\id JOS - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Josue 
\toc1 Josue 
\toc2 Josue 
\toc3 Jos 
\mt1 Josue 
\c 1  
\s1 Is Kebpengandam para te Ked-eǥawa te Canaan 
\p  
\v 1 Hein minatey en si Moises is suluǥuen te \sc Nengazen\sc*, ne migkaǥi is \sc Nengazen\sc* diyà te timbang ni Moises he si Josue he anak ni Nun te,  
\v 2 “Minatey en is suluǥuen ku he si Moises. Umbe sikew wey is langun he menge Israilihanen, pengendami niw is kedlayun niw te Wahig he Jordan pehendiyà te tanà he ibeǥey ku keniyu.  
\v 3 Sumalà is impenaad ku ziyà te ki Moises, ne ibeǥey ku keniyu is langun he tanà he egkeumahan niw.  
\v 4 Iyan heini egkehimu he tanè niw: ebpuun diyà te sibsivayan is dapit te zivavà pehendiyà te menge vuvungan diyà te Lebanon he zapit te zizaya, wey puun te zekelà he Wahig he Eufrates is dapit te edsilaan, ne taman te Zaǥat he Mediteraneo is diyà dapit te edsenlepan, wey taman te tanà te menge Hitihanen. 
\p  
\v 5 “Wazà ebpekezaag kenikew mintras uuyag ke pa. Su ebpekiduma a kenikew iring te kebpekiduma ku ki Moises. Kenè ku sikew ed-ewaan wey ebpesegdanen.  
\v 6 Mebpekelig-en ka wey mebpekevurut ka, su iyan ka ebpengulu kayi te menge etew te ked-angken duen te tanà he impenaad ku ziyà te menge kepuun dan.  
\v 7 Basta mebpekelig-en ka wey mebpekevurut ka utew. Purungi nu sunuza is langun he kesuǥuan he imbeǥey kenikew ni Moises te suluǥuen ku. Kenè nu heini engkezi, su para medlampus ka te langun he ebeelan nu.  
\v 8 Kenè nu lipati te ebasa is Libru te Kesuǥuan. Ne purungi nu ngunngunua maandew wey mezukilem su para metueni nu ke ebmenmenuwen te edtuman is langun he ingkesurat kayi. Su pinaaǥi kayi ebmeuswaǥen ka wey ebmelempusen.  
\v 9 Tentenuzi nu heini is insuǥù ku kenikew: ‘Mebpekelig-en ka wey mebpekevurut ka. Kenè ka mahandek wey luyahi, su siak, is \sc Nengazen\sc* he Megbevayè nu, eduma a kenikew minsan hendei ka ebpevayà.’ ” 
\p  
\v 10 Umbe, mibmenduan ni Josue sikan is ebpemendumala te Israel te,  
\v 11 “Liǥuya niw is kampu ne keǥiyi niw is menge etew he teǥenaha zan is menge egkekaan dan, su tetelu he andew puun guntaan ne edlayun kiw en te Wahig he Jordan te ked-angken duen te tanà he imbeǥey kenitew te \sc Nengazen\sc* he Megbevayè tew.” 
\p  
\v 12 Ne migkeǥiyan ni Josue is tribu ni Reuben, ni Gad, wey is ketengà he tribu ni Manase te,  
\v 13 “Tentenuzi niw is migkaǥi keniyu ni Moises te suluǥuen te \sc Nengazen\sc*. Migkaǥi sikandin te ebeǥayan kew te \sc Nengazen\sc* he Megbevayè niw te tanà he zutun kew ebpekehimeley. Ne iyan heini he tanà imbeǥey zin keniyu:  
\v 14 Is menge esawa niw, wey is menge anak niw ne mebpetaǥak dà kayi te tanà he zapit te edsilaan he vahin te tanà kayi te Jordan duma te menge uyaǥen niw. Piru is menge sundaru niw kinahanglan he edhuna sikandan edlayun te ked-uǥup te menge suled niw,  
\v 15 taman te egkaangken dan en is tanà he egkehimelayan dan he imbeǥey te \sc Nengazen\sc* iring te naangken niw en. Ne emun egkeulaula en heini, ne egkehimu en he ebpekehulenè kew te ked-angken te tanà kayi te Jordan he zapit te edsilaan he imbeǥey keniyu ni Moises te suluǥuen te Megbevayà.” 
\p  
\v 16 Ne midtavak dan si Josue te, “Ebeelan dey is langun he migkaǥi nu, ne edhendiyè key te minsan hendei he ebpeveyaan nu kenami.  
\v 17 Edsunud key kenikew iring te kedsunud dey ki Moises, su ebpekiduma kenikew is \sc Nengazen\sc* he Megbevayè nu iring te kebpekiduma zin ki Moises.  
\v 18 Edhimetayan is minsan hentei he edsupak kenikew wey kenà edtuman te mandù nu. Mebpekelig-en ke zà wey mebpekevurut!” 
\c 2  
\s1 Midsuǥù si Josue te menge Ibpepeniid te Jerico 
\p  
\v 1 Ne zutun meeles he midsuǥù ni Josue is dezuwa he etew puun te kampu te menge Israilihanen diyà te Shitim su para mekepeniid diyà te Canaan, lavew en te inged he Jerico. Ne hein nekeuma ziyà te Jerico haazà is dezuwa he meniniid, ne ziyè dan medateng te valey ni Rahab; heini he vahi ebelegyà te zengeg din. 
\p  
\v 2 Ne netudtulan is hadì diyà te Jerico, he zutun he kezukileman duen nekeuma he menge Israilihanen te kebpeniid kandan.  
\v 3 Umbe, impekeǥiyan duen te hadì si Rahab te, “Ipeǥawas nu is menge etew he midateng diyà te valey nu su iyan inhengkayi zan is kebpeniid kayi te inged tew.” 
\p  
\v 4-6 Migkaǥi si Rahab te, “Tutuu he zuen menge etew he nekehengkayi piru wazè ku metueni ke hendei zan ebpuun. Migenat dan hein merusirem en, he timpu en te kedlekeb duen te pultahan te inged. Ne wazè ku metueni ke hendei zan mebpevayà, iyan, emun egaangaan kew kela ke egkesaut niw pa sikandan.” (Piru iyan tutuu is in-eles ni Rahab haazà is dezuwa he meniniid diyà te atep te valey zin, ne midtembunan din sikandan te menge mibpenamped he menge pinemula he flax he ingkagkag din dutun.)  
\v 7 Ne midtelukunan diyà te ǥawas duen te menge midsuǥù te hadì sikan is dezuwa he meniniid. Kegawas dan duen te pultahan ne midlekevan dan heini. Ne nekeuma zan diyà te repasan diyà te Wahig he Jordan. 
\p  
\v 8 Ne hein wazè pa medhizeǥà haazà is dezuwa he meniniid, nemenahik si Rahab diyà te atep  
\v 9 ne migkeǥiyan din sikandan te, “Netuenan ku he imbeǥey keniyu te \sc Nengazen\sc* heini he tanà ne utew kew ingkahandek te menge etew kayi.  
\v 10 Nezineg dey ke mibmenumenu te ebpemaza te \sc Nengazen\sc* is Daǥat he Meriǥà dutun te kegawas niw puun te Ehipto. Nezineg dey zaan ke mibmenumenu niw is kebpurung kedezaat duen te zezuwa he hadì te menge Amorihanen he midhadì diyà dapit te edsilaan te Jordan he iyan si Sihon wey si Og.  
\v 11 Nengahandek key hein nezineg dey haazà ne naawà is kevurut te kada sevaha kenami tenged keniyu. Su is \sc Nengazen\sc* he Megbevayè niw iyan Megbevayà diyà te langit wey zini te tanà.  
\v 12 Umbe, penangdù kew pinaaǥi te ngazan te \sc Nengazen\sc*, he edtevangan niw is pemilya ku iring te kedtevangi ku keniyu. Beǥayi a keniyu te gerentiya  
\v 13 he kena a keniyu edhimetayan wey is amey ku, iney ku, menge suled ku, wey is langun he pemilya zan.” 
\p  
\v 14 Ne migkaǥi haazà is dezuwa he meniniid diyà te ki Rahab te, “Iyan igerentiya zey is untung dey! Basta kenè nu idtug-an is kebpeniid dey kayi, kenè dey sikew ebmenuwen emun ibeǥey en te \sc Nengazen\sc* kenami heini he tanà.” 
\p  
\v 15 Is baley ni Rahab nekezegkit duen te elavat he verengbeng duen te inged, umbe midtevangan din sikan is dezuwa he meniniid wey zan mekepenaug he ebayà diyà te sulawà pinaaǥi te kegamit te pisì.  
\v 16 Migkaǥi si Rahab diyà te kandan te, “Hendiyè kew te menge vuvungan su para kenè kew maahà te ebpen-ahà keniyu. Eles kew ziyà taman te tetelu he andew para ebpekelikù en sikandan kayi. Ne kegkeipus dutun, ne egkehimu en ke edlaus kew ed-ulì.” 
\p  
\v 17 Ne migkaǥi haazà is dezuwa he meniniid diyà te ki Rahab te, “Edtumanen dey is impepenangdù nu kenami.  
\v 18 Piru kinahanglan he ebeelan nu zaan heini: Emun edsurung key en kayi te tanè niw, ihiket nu heini is meriǥà he pisì diyà te sulawà he mibpeveyaan nu kenami wey key mekepenaug. Ne tiǥuma nu kayi te valey nu is amey nu, iney nu, menge suled nu, wey is langun he pemilya zan.  
\v 19 Ne emun duen sevaha keniyu he egawas su edhendiyà te zalan, ne wazè dey en televaken emun egkepatey sikandin. Piru zuen dey televaken emun duen egkepatey ziyà te seled te valey nu.  
\v 20 Piru emun idtug-an nu heini is kebpeniid dey, ne wazè dey en televaken duen te impepenangduan nu kenami.”  
\v 21 Ne midtavak si Rahab te, “Uya, egketuman is migkaǥi niw.” Ne zutun impeǥenat din sikandan, ne inhiket din sikan is meriǥà he pisì diyà te sulawà. 
\p  
\v 22 Ne hein nekeǥenat en haazà is dezuwa he meniniid, ne midhendiyè dan te menge vuvungan. Ne zutun sikandan med-eles seled te tetelu he andew, ne zutun mibpen-ahà sikandan duen te menge sinuǥù te hadì diyà te menge zalan. Ne wazà sikandan meturedu, umbe nemen-ulì dà tekew haazà is menge sinuǥù te hadì.  
\v 23 Ne midtupang haazà is dezuwa he meniniid wey midlayun duen te wahig ne midlikù dan diyà te ki Josue. Ne midtudtul zan ki Josue is langun he neulaula kandan.  
\v 24 Migkaǥi sikandan te, “Tutuu iyan he imbeǥey kenitew te \sc Nengazen\sc* is tivuuk he tanà. Is langun he etew zutun ne nengahandek kenitew.” 
\c 3  
\s1 Midlayun is menge Israilihanen te Jordan 
\p  
\v 1 Utew midsayu med-enew si Josue wey is menge Israilihanen. Mid-awè dan diyà te Shitim ne midhendiyè dan te Wahig he Jordan. Migkampu zan dèpa zutun, te wazè pa sikandan medlayun.  
\v 2 Kedlavey te tetelu he andew, midliǥuy ziyà te kampu zan is menge edumala,  
\v 3 ne mibmenduan dan is menge etew te, “Emun egkeehè niw en he ebintingen en te menge memumuhat he menge kevuwazan ni Levi sikan is Kavan te Kebpekid-uyun te \sc Nengazen\sc* he Megbevayè niw, ne tundug kew en kandan,  
\v 4 su wey niw metueni ke hendei kew ebayà, su wazè kew pa keenu mekevayà kayi. Piru kenè kew utew uvey zuen te Kavan te Kebpekid-uyun. Pekeziyui niw heini te keziyù he menge 1,000 he mitrus.” 
\p  
\v 5 Ne migkeǥiyan ni Josue is menge etew te, “Mebpekelumpiyu kew, su keeselem ebaal is \sc Nengazen\sc* te egkengein-inuwan diyan te keniyu.”  
\v 6 Ne migkeǥiyan daan ni Josue is menge memumuhat te, “Uwita niw en is Kavan te Kebpekid-uyun ne huna kew zutun te menge etew.” Ne midtuman dan haazà is migkaǥi ni Josue. 
\p  
\v 7 Ne zutun migkaǥi is \sc Nengazen\sc* diyà te ki Josue te, “Guntaan he andew ebpuunan ku is kebeǥey kenikew te zengeg diyà te etuvangan te menge etew te Israel, ne egketuenan dan he ebpekiduma a kenikew iring te kebpekiduma ku ki Moises.  
\v 8 Keǥiyi nu is menge memumuhat he ed-uwit duen te Kavan te Kebpekid-uyun ku he emun ebpekeuma zan en duen te Wahig he Jordan, ne mebpundu sikandan dutun te wahig.” 
\p  
\v 9 Ne zutun mid-umew ni Josue is menge etew te, “Hendini kew su edtudtulan ku sikiyu te migkaǥi te \sc Nengazen\sc* he Megbevayè niw.  
\v 10 Guntaan egketuenan niw he mibpekiduma keniyu is uuyag he Megbevayà, su emun edsurung kew en ne iyan sikandin edsegseg te menge Canaanhen, menge Hitihanen, menge Hivihanen, menge Pirisihanen, menge Girgasihanen, menge Amorihanen, wey menge Jebusihanen.  
\v 11 Sigureduwa niw he egkehuna sikan is Kavan te Kebpekid-uyun te Nengazen he iyan ebayàbayà te tivuuk he kelibutan dutun te kedlayun niw te Wahig he Jordan.  
\v 12 Guntaan pilì kew te 12 he menge etew, sevaha ziyà te kada tribu te Israel.  
\v 13 Ne emun ebpekeǥiek en te wahig is menge memumuhat he ebinting duen te Kavan te Kebpekid-uyun te \sc Nengazen\sc* he iyan teǥiǥaked te tivuuk he kelibutan, ne ed-engked he edtudà is Wahig he Jordan. Is wahig he edtudà ne ebpundu ziyà te sevaha he lugar.” 
\p  
\v 14-15 Timpu haazà te tiraǥun ne midalem haazà is wahig. Ne mid-awà is menge etew zuen te kampu zan su edlayun dan en duen te wahig. Ne iyan midhuna sikan is menge memumuhat he ebinting duen te Kavan te Kebpekid-uyun. Ne kebpekeǥiek duen te menge memumuhat duen te wahig,  
\v 16 ne mid-engked he edtudà haazà is wahig. Mibpundu is wahig diyà te sevaha he lugar he egngezanan te Adam, inged heini he uvey te Zaretan. Wazè en wahig he edtudà pehendiyà te Zaǥat te Araba, umbe nekelayun haazà is menge etew ziyà te lugar he uvey te Jerico.  
\v 17 Midhitindeg diyà te teliwazà dutun te nemezahan he wahig sikan is menge memumuhat he mibinting duen te Kavan te Kebpekid-uyun te \sc Nengazen\sc* taman te nekelayun is langun he menge zuma zan. 
\c 4  
\s1 Mibaal is menge Israilihanen te Munyumintu 
\p  
\v 1 Hein nekelayun en is langun he menge etew te Israel te Wahig he Jordan, ne migkaǥi is \sc Nengazen\sc* diyà te ki Josue te,  
\v 2 “Pilì ka te 12 he etew, sevaha ziyà te kada tribu,  
\v 3 ne ipekuwa nu sikandan te tigselimbaha he vatu ziyà te teliwazà te Wahig he Jordan, duen mismu te midhitindeǥan te menge memumuhat. Ne uwita zan haazà diyà te lugar he zutun kew egkampu kengkuwan ke mezukilem.” 
\p  
\v 4 Umbe, mid-umew ni Josue sikan is 12 he menge etew he mibpilì din puun te kada tribu te Israel, ne migkeǥiyan din sikandan te,  
\v 5 “Hendiyè kew te teliwazà te wahig etuvangan duen te nesevukan te Kavan te Kebpekid-uyun te \sc Nengazen\sc* he Megbevayè niw. Is kada sevaha keniyu ne megkuwa te sevaha he vatu he ed-uwiten din, sevaha te kada tribu te Israel.  
\v 6 Ne vurvuruna niw heini ne veeli niw he munyumintu he tedeman te mibeelan te \sc Nengazen\sc*, su para heini te huziyan he timpu, emun ed-insà is menge anak niw ke hengkey is kehuluǥan kayi he menge vatu,  
\v 7 keǥiyi niw sikandan he mid-engked he edtudà is Wahig he Jordan hein inlayun sikan is Kavan te Kebpekid-uyun te \sc Nengazen\sc*. Heini he menge vatu kenà egkaawà he tedeman te menge etew te Israel taman te taman.” 
\p  
\v 8 Ne midtuman duen te 12 he menge Israilihanen is insuǥù kandan ni Josue. Sumalà is migkaǥi te \sc Nengazen\sc* diyà te ki Josue, ne migkuwa zan te 12 he vatu ziyà te teliwazà duen te wahig, sevaha he vatu is para te kada tribu te Israel. Mid-uwit dan haazà is menge vatu ziyà te lugar he migkempuwan dan, ne mibpunduk dan heini zutun.  
\v 9 Ne midsavuk daan si Josue te 12 he vatu ziyà te teliwazà duen te wahig, duen mismu te midhitindeǥan te menge memumuhat he ebinting duen te Kavan te Kebpekid-uyun. Ne taman en guntaan kemulu pa zutun haazà is menge vatu.  
\v 10 Wazà med-engked he edhitindeg diyà te teliwazà duen te wahig is menge memumuhat taman te netuman te menge etew is langun he insuǥù te \sc Nengazen\sc* ki Josue, he iyan ded sikan is insuǥù ni Moises ki Josue. Migaanggaan medlayun is menge etew. 
\p  
\v 11 Ne hein nekelayun en sikandan is langun, inlaus daan ilayun duen te menge memumuhat sikan is Kavan te Kebpekid-uyun te \sc Nengazen\sc* kandan. Ne midhunaan en maan duen te menge memuhat is menge etew.  
\v 12 Midhuna zaan medlayun is neǥumeenan he menge maama he edpuun te tribu ni Reuben, ni Gad, wey te ketengà he tribu ni Manase, sumalà is insuǥù ni Moises kandan.  
\v 13 Heini is 40,000 he neǥumeenan he menge maama mibayà diyà te etuvangan te \sc Nengazen\sc* ne midhendiyè dan te menge suǥud te Jerico su ebpekidtebek dan. 
\p  
\v 14 Dutun he andew mibeǥayan te \sc Nengazen\sc* si Josue te zengeg diyà te etuvangan te menge Israilihanen. Ne midtahud si Josue te menge etew seled te tivuuk he untung din iring te kedtahud dan ki Moises. 
\p  
\v 15 Ne zutun te kebpekelayun en te menge Israilihanen te Wahig he Jordan, migkaǥi is \sc Nengazen\sc* diyà te ki Josue te,  
\v 16-17 “Heeyan is menge memumuhat he ebinting keniyan te Kavan te Kebpekid-uyun ku keniyu mendui nu te kegawas puun keniyan te edtudaan te Wahig he Jordan.” Ne midtuman haazà ni Josue.  
\v 18 Ne hein nekeǥawas en sikan is menge memumuhat he ebinting duen te Kavan te Kebpekid-uyun te \sc Nengazen\sc*, ne mid-uman en medalem haazà is wahig iring hein aney zan mekeuma kayi. 
\p  
\v 19 Is kedlayun te menge Israilihanen te Wahig he Jordan nehitavù hein ikesepulù he andew te egkehuna he vulan. Ne migkampu sikandan diyà te Gilgal he zapit te edsilaan emun diyè ki te Jerico.  
\v 20 Ne zutun punduka ni Josue sikan is 12 he menge vatu he impekuwa zin puun te Wahig he Jordan.  
\v 21 Migkeǥiyan ni Josue is menge Israilihanen te, “Keuzemà, emun ed-insaan kew te menge anak niw ke hengkey is kehuluǥan kayi te menge vatu,  
\v 22 tudtuli niw sikandan he memaza he tanà is midhipenawan te menge Israilihanen hein midlayun dan te Wahig he Jordan.  
\v 23 Tudtuli niw sikandan he mibpemezahan te \sc Nengazen\sc* he Megbevayè tew is Wahig he Jordan taman te nekelayun key iring ded te mibeelan din dengan diyà te Zaǥat he Meriǥà taman te nekelayun key.  
\v 24 Mibeelan heini te \sc Nengazen\sc* su para kilelaa te langun he etew kayi te kelibutan he mekeǥeǥehem sikandin, wey kew layun medtahud kandin te \sc Nengazen\sc* he Megbevayè niw.” 
\c 5  
\s1 Is Kedsirkunsidar 
\p  
\v 1 Netudtulan is langun he menge hadì he menge Amorihanen he ziyà te zapit te edsenlepan te Jordan wey is langun he menge hadì he menge Canaanhen he ziyà te veyvey te Mediteraneo ke mibmenumenu te \sc Nengazen\sc* is kebpemezahi zin te Wahig he Jordan hein midlayun is menge Israilihanen. Umbe nengahandek sikandan ne naawà is kevurut dan te kebpekidtebek te menge Israilihanen. 
\p  
\v 2 Dutun he timpu migkaǥi is \sc Nengazen\sc* diyà te ki Josue te, “Vaal ka te menge ubpit he lintikan he vatu, ne veeli nu en maan is kedsirkunsidar te menge Israilihanen he wazà mesirkunsidar.”  
\v 3 Umbe, mibaal si Josue te menge ubpit ne midsirkunsidar zin is menge Israilihanen diyà te vuntud he migngezanan te Midsirkunsidaran. 
\p  
\v 4-6 Iyan heini hinungdan ke maan is mibpensirkunsidar ni Josue is menge maama: Hein mibpuun is menge Israilihanen diyà te Ehipto, nesirkunsidar en is langun he menge maama kandan. Piru sikan is impen-anak seled te 40 he tuig te kebpekeriǥuriǥu zan diyà te sibsivayan ne wazè pa mengesirkunsidar. Ne zutun he timpu, is menge maama he hustu en he id-asdang te tebek su netengkaan en is keǥurang dan nemematey su wazè dan mebpezumazuma te \sc Nengazen\sc*. Migkeǥiyan sikandan te \sc Nengazen\sc* he kenè dan en egkaahà is meupiya wey selebpeten he tanà he impenaad din diyà te menge kepuun tew he ibeǥey kenitew.  
\v 7 Ne iyan heini sikandan midsirkunsidar ni Josue, su wazà heini sikandan mesirkunsidar zutun te timpu te kedtulung dan kedhipanew.  
\v 8 Ne hein nengesirkunsidar en sikandan, mid-ubpàubpà dà sikandan diyà te kampu zan taman te nengeulian dan. 
\p  
\v 9 Ne migkaǥi is \sc Nengazen\sc* diyà te ki Josue te, “Guntaan he andew in-awè ku ziyà te keniyu is keelezan tenged te kegkeuripena keniyu ziyà te Ehipto.” Umbe iyan inngazan dutun he lugar is Gilgal taman en guntaan. 
\p  
\v 10 Ne zutun te kegkampu te menge Israilihanen diyà te Gilgal, he ziyà te suǥud te Jerico, midsilibra zan is Pista te Kedlavey te Belinsuǥuen. Mibeelan dan heini hein mezukilem te ike-14 he andew te nehuna he vulan.  
\v 11 Ne hein nepawà, nemengaan sikandan te sinandag he trigu wey supas he wazè din tapey he iyan kes menge abut dutun te tanà.  
\v 12 Ne puun dutun neengked en is kegkengeulug te ‘manna’, umbe puun dutun iyan en keuyaǥan dan is menge abut he ebpuun te tanà he Canaan. 
\p  
\v 13 Ne hein diyà si Josue te uvey te Jerico, duen etew he neehè din he edhithitindeg diyà te etuvangan din he egkulang te ispada. Ne mid-insaan sikandin ni Josue te, “Sundaru zey ve sikew etawa kuntada zey sikew?”  
\v 14 Ne midtavak haazà is etew te, “Kenà a keniyu sundaru he zumezapig keniyu ne kenà a zaan keniyu kuntada. Midhengkayi a he peremandar te menge sundaru te \sc Nengazen\sc*.” Ne impaahà ni Josue is kedtahud din su midlangkeb sikandin, ne zutun mid-insà sikandin te, “Datù, hengkey is idsuǥù nu kediey te suluǥuen nu?”  
\v 15 Ne midtavak haazà is peremandar te menge sundaru te \sc Nengazen\sc* te, “Pul-uta nu is sandalyas nu su segradu he lugar heini is nehitindeǥan nu.” Ne midtuman ni Josue haazà is insuǥù kandin. 
\c 6  
\s1 Is Kegkezeeti te Jerico 
\p  
\v 1 Mibpurungan lekevi is Jerico te menge meǥinged duen su wey kenà mekeseled is menge Israilihanen. Wazà ebpekeseled wey ebpekeǥawas dutun te inged.  
\v 2 Migkaǥi is \sc Nengazen\sc* diyà te ki Josue te, “Ibpesakup ku keniyu is Jerico ragkes is hadì kayi wey menge sundaru.  
\v 3 Ne sikew wey is langun he menge sundaru nu ne liǥuya niw heeyan is inged te kesevaha kada andew, seled te heenem he andew.  
\v 4 Ipehuna nu is ebivinting duen te Kavan te Kebpekid-uyun ku keniyu he pitu he menge memumuhat he ed-uwit te tigselimbaha he vudyung. Ne emun ikepitu en he andew, ne kepipitu niw liǥuya haazà is inged, duma te menge memumuhat he ebpezaǥing te vudyung.  
\v 5 Ne emun egkezineg niw en is mezaǥing wey egkeuǥet ebpengkusa he zaǥing te vudyung dan, ne kulahì kew is langun te utew mezaǥing. Ne zutun he timpu egkeregdas is berengbeng keniyan he inged. Ne zutun wazè en ebpekaalang keniyu te kedseled niw.” 
\p  
\v 6 Umbe, mid-umew ni Josue is menge memumuhat ne migkeǥiyan din te, “Uwita niw is Kavan te Kebpekid-uyun. Ne medhuna is pitu keniyu he ed-uwit te tigselimbaha he vudyung.”  
\v 7 Ne migkeǥiyan din is duma he menge etew te, “Genat kew en. Liǥuya niw heeyan is inged. Is duma he menge sundaru medhuna zuen te ebpemen-uwit te vudyung he pitu he menge memumuhat.” 
\p  
\v 8 Ne midtuman dan is mandù ni Josue. Midhuna is pitu he memumuhat duen te ebinting te Kavan te Kebpekid-uyun te \sc Nengazen\sc* ne impezaǥing dan is menge vudyung dan.  
\v 9 Ne midhuna zuen te menge memumuhat he ebpezaǥing te menge vudyung dan is duma he menge sundaru, ne is duma pa edtinundug duen te Kavan te Kebpekid-uyun. Ne kena egkeengked is kedaǥing te menge vudyung.  
\v 10 Piru mibmenduan ni Josue is menge etew he kenè dan megkulahi etawa megurub taman te kenè pa sikandin ebmandar te kegkulahì.  
\v 11 Ne midtuman dan is insuǥù ni Josue, inliǥuy zan dutun te inged te kesevaha sikan is Kavan te Kebpekid-uyun te \sc Nengazen\sc*. Ne kegkepasad midlikù dan diyà te kampu zan ne te kegkezukilem midlipezeng dan. 
\p  
\v 12 Ne kegkemeselem, utew midsayu med-enew si Josue. Ne mid-uwit en maan duen te menge memumuhat sikan is Kavan te Kebpekid-uyun te \sc Nengazen\sc*,  
\v 13 ne midhuna ǥihapun sikan is pitu he menge memumuhat he ebpezaǥing te menge vudyung. Ne iyan ded mibeelan duen te menge sundaru is: edhuna is duma ne is duma pa, edtinundug duen te Kavan te Kebpekid-uyun te \sc Nengazen\sc*, ne idtulung dan en ibpezaǥing is menge vudyung.  
\v 14 Ne iyan heini ikezuwa he andew te kedliǥuy zan te kesevaha zutun te inged, ne kegkepasad dutun midlikù dan en maan diyà te kampu zan. Ne iyan heeyan mid-ulaula zan seled te heenem he andew. 
\p  
\v 15 Ne hein ikepitu en he andew, ne egkeriwaswas pa ne mid-enew en sikandan ne midliǥuy sikandan dutun te inged iring te mibeelan dan te midlavey he heenem he andew. Piru kayi he andew kepipitu zan medliǥuy zutun te inged.  
\v 16 Ne hein ikepitu en te kedliǥuy zan, impezaǥing te menge memumuhat is menge vudyung dan ne mibmendaran ni Josue is menge etew te, “Kulahì kew su imbeǥey en keniyu te \sc Nengazen\sc* heini is inged!  
\v 17 Heini is tivuuk he inged wey is langun he netaǥù kayi ibpemuhat diyà te \sc Nengazen\sc* pinaaǥi te kedezeeti zuen. Si Rahab dà he ebelegyà te zengeg din wey is tivuuk he pemilya zin is edlibriyen su in-eles din sikan is menge meniniid tew.  
\v 18 Kenè kew megkuwa te minsan hengkey he vutang he para edezeetan. Su emun ebeelan niw heini egkezeetan kew, ne iyan kew egkehimu he hinungdan emun duen kezeetan he egkehitavù te Israel.  
\v 19 Piru is langun he menge azen he pelata, bulawan, brunsi, etawa putew, ne para heini te \sc Nengazen\sc*, ne kinahanglan he idtaǥù diyà te teleǥuey te ketiǥeyunan te \sc Nengazen\sc*.” 
\p  
\v 20 Impezaǥing te menge memumuhat is menge vudyung dan, ne nemengulahì is menge Israilihanen hein nezineg dan heini. Ne neregdas is berengbeng dutun te inged ne utew zà melemu is kedseled dan ne mid-aǥew zan haazà is inged.\fig Menge berengbeng te Jerico|src="BK00362C.TIF" size="span" loc="Josue 6:1-20" copy="Bass and Knowles " ref="Josue 6:1-20" \fig* 
\v 21 Impurung dan ipemuhat diyà te \sc Nengazen\sc* haazà is inged pinaaǥi te kegeraa zan te menge maama wey menge vahi, meǥurang wey vatà, ragkes en is menge vaka, menge kerehidu, wey menge asnu. 
\p  
\v 22 Ne migkeǥiyan ni Josue sikan is dezuwa he neniid diyà te Jerico te midlavey he timpu te, “Hendiyè kew te valey zuen te vahi he ebelegyà te zengeg din, ne iǥawas niw sikandin wey is langun he sakup te pemilya zin sumalà is insaad niw kandin.” 
\p  
\v 23 Umbe, migenat haazà is dezuwa ne miduma zan diyà te ǥawas si Rahab, duma te amey zin, iney zin, menge suled din, wey is langun he sakup te pemilya zin. Impeǥawas dan sikandan is langun ne impehulenè dan diyà te sevaha he lugar he gawas te kampu zan.  
\v 24 Ne mibinsulan dan haazà is tivuuk he inged wey is langun he netaǥù kayi gawas te menge azen he pelata, bulawan, brunsi, wey putew. Mibpenguwa zan haazà su wey zan iketaǥù diyà te teleǥuey te ketiǥeyunan te \sc Nengazen\sc*.  
\v 25 Piru midlibri mulà ni Josue si Rahab wey is pemilya zin su ǥeina te in-eles din sikan is menge maama he midsuǥù ni Josue te kebpeniid te Jerico. Taman en guntaan ne kemulu meǥinged diyà te Israel is menge kevuwazan din. 
\p  
\v 26 Dutun he timpu mibpetizeenan ni Josue is menge Isaelihanen: “Edrewakan te \sc Nengazen\sc* is minsan hentei he edtinguhà te ked-uman kebangun kayi te inged he Jerico. Is minsan hentei he ed-uman ebaal te pundasyun kayi ne ebpatey is kinekekayan he anak din. Is ebpeterebahu te menge pultahan kayi ebpatey is tinengkezan he anak din.” 
\p  
\v 27 Mibpekiduma ki Josue is \sc Nengazen\sc*, ne nevantug sikandin seled te tivuuk he nasyun. 
\c 7  
\s1 Is Salà ni Acan 
\p  
\v 1 Piru midrapas iyan te menge Israilihanen is suǥù te \sc Nengazen\sc* he kenè dan ibpekuwa te minsan hengkey he impurung en ipemuhat diyà te \sc Nengazen\sc*. Su migkuwa si Acan te menge vutang he kenà engayan he egkuwaan, umbe utew nepauk is \sc Nengazen\sc* kandan. Heini si Acan anak ni Carmi. Si Carmi anak ni Zabdi. Si Zabdi anak ni Zera. Heini sikandan sakup te tribu ni Juda. 
\p  
\v 2 Puun te Jerico midsuǥù si Josue te menge etew he ibpepeniid te Ai, sevaha heini he inged he zapit te edsilaan he vahin te Betel, he uvey te Bet Aven. Umbe migenat haazà he menge etew su ebpeniid dan.  
\v 3 Ne hein nekelikù dan en, migkaǥi sikandan diyà te ki Josue te, “Kenè en kinahanglan he pudu kiw edsurung diyà te Ai, su zeisey zà is meǥinged duen. Suǥù ke zà te 2,000 etawa 3,000 he menge etew he edsurung dutun te inged.”  
\v 4 Umbe menge 3,000 zà is midsurung diyà te Ai,  
\v 5 piru midal-as sikandan te menge tig-Ai puun te pultahan dutun te inged taman te Shebarim, ne menge 36 kandan is nepatey hein edtupang dan. Umbe naawà is kevurut te menge Israilihanen wey nengahandek dan. 
\p  
\v 6 Ne tenged te kegkeseeng, si Josue wey is ebpemendumala te Israel, mibindas dan is menge visti zan ne mibukbukan dan te eliyavuk is menge ulu zan, ne taman te mezukilem, midlangkeb dan diyà te etuvangan duen te Kavan te Kebpekid-uyun te \sc Nengazen\sc*.  
\v 7 Migkaǥi si Josue te, “He Nengazen he MEGBEVAYÀ, maan is impelayun key pa kenikew te Wahig he Jordan ke ibpezaag key zè bes kenikew te menge Amorihanen? Deyzey pa ke wazè key en med-awà diyà layun te Jordan.  
\v 8 He Nengazen, hengkey en be is egkekaǥi ku te mibpeleǥuyan man te menge Israilihanen is menge kuntada zan?  
\v 9 Emun egkezineg heini te menge Canaanhen wey zuma pa he meǥinged kayi ne edliǥuyan key zan, ne ebpenhimetayan key zan. Ne emun iyan haazà, hengkey is ebeelan nu para kenà mezeeti is dengeg nu?” 
\p  
\v 10 Ne migkaǥi is \sc Nengazen\sc* diyà te ki Josue te, “Hitindeg ka! Maan is edlangkeb ka?  
\v 11 Nekesalà is Israel; midrapas dan is kebpekid-uyun ku. Migkuwa zan te menge vutang he impurung en ipemuhat kayi te kedì. Midtakew zan heini, midtarùtarù dan bahin kayi, ne intampu zan heini te menge azen dan.  
\v 12 Iyan heini hinungdan ke maan is kenè dan ebpekesukul te menge kuntada zan. Mibpeleǥuyan dan is menge kuntada zan, su edezeetan man daan sikandan he pemuhat kayi te kedì. Kenà ad ebpekiduma keniyu taman te kenè niw edezeetan heeyan is menge azen he para zà kediey. 
\p  
\v 13 “Hitindeg ka ne keǥiyi nu is menge etew he lumpiyuwi zan is keugelingen dan para te ked-etuvang dan kedì keeselem, tenged te siak, is \sc Nengazen\sc* he Megbevayà te Israel, egkaǥi te: ‘He Israel, duen niw in-eles he menge azen he para zà kediey. Kenè kew ebpekesukul te menge kuntada niw mintras wazè pa maawà diyà te keniyu heini he menge azen.’  
\v 14 Umbe, keeselem te meselem med-uvey kayi te kediey is kada tribu niw. Is tribu he idtezù ku he nekesalà ne med-uvey kayi te kediey is kada sengeepuan. Is kezuzumahi he idtezù ku he nekesalà med-uvey is kada pemilya kayi te kediey. Is pemilya he idtezù ku he nekesalà med-uvey is kada sevaha kayi te kediey.  
\v 15 Is etew he idtezù ku he mid-eles duen te menge vutang he impurung ipemuhat kayi te kedì edtutungen duma te pemilya zin wey te langun he menge azen din. Su midrapas din is kebpekid-uyun ku, ne mibaal sikandin te mekeeled-eled he vaal kayi te Israel.” 
\p  
\v 16 Ne hein meselem en, ne impesayu en ni Josue te ebpeuvey ziyà te \sc Nengazen\sc* is kada tribu te Israel. Ne is intezù he nekesalà iyan is tribu ni Juda.  
\v 17 Ne impeuvey zin is kevuwazan ni Juda, ne iyan nepilì kandan is menge pemilya ni Zera. Ne impeuvey zin is menge kevuwazan ni Zera, ne is nepilì kandan iyan is pemilya ni Zabdi.  
\v 18 Ne impeuvey zin is pemilya ni Zabdi ne is intezù iyan si Acan. (Si Acan anak ni Carmi. Si Carmi anak ni Zabdi. Ne si Zabdi anak ni Zera te sakup te tribu ni Juda.) 
\p  
\v 19 Ne migkaǥi si Josue ziyà te ki Acan te, “Mama, beǥayi nu te zengeg is \sc Nengazen\sc* he Megbevayà te Israel; keǥiya nu is tutuu ziyà te etuvangan din. Keǥiya nu kayi te kediey ke hengkey is mibeelan nu? Kenè nu heini ieles kediey.” 
\p  
\v 20 Ne midtavak si Acan te, “Tutuu he nekesalà a ziyà te \sc Nengazen\sc* he Megbevayà te Israel. Iyan heini mibeelan ku:  
\v 21 Duen te menge azen he netavan tew, duen ku neehè he mekempet he visti he ebpuun diyà te Babilonia, pelata he menge dezuwa he kilu wey tengà, wey senge verita he vulawan he menge tengà te kilu. Utew ku neimahi heini he menge azen, umbe migkuwa ku. Ne inleveng ku heini ziyà te tanà he seled te tulda ku, ne ziyà te kinezizeleman sikan is pelata.” 
\p  
\v 22 Umbe, duen menge etew he midsuǥù ni Josue he megaanggaan medhendiyà te tulda ni Acan. Ne neehè dan iyan dutun is menge azen he inleveng, sumalà is nekaǥi ni Acan.  
\v 23 Ne mid-uwit dan heini ziyà te ki Josue wey te langun he menge Israilihanen, ne insavuk dan diyà te etuvangan te \sc Nengazen\sc*.  
\v 24 Ne zutun mid-uwit ni Josue wey te langun he menge Israilihanen si Acan diyà te Suǥud te Acor, ragkes sikan is pelata, bisti, wey senge verita he vulawan, wey is menge anak din, menge vaka zin, menge asnu zin, menge kerehidu zin, tulda zin, wey is langun he azen din.  
\v 25 Migkaǥi si Josue ziyà te ki Acan te, “Maan is mid-uwit ka te samuk kayi te kenami? Umbe edsilutan ka ǥuntaan te \sc Nengazen\sc*.” 
\p Ne zutun mibpenuleng te vatu te menge Israilihanen si Acan taman te kebpatey zin. Ne mibpenuleng dan daan te vatu is pemilya zin ne mibinsulan dan is menge azen din.  
\v 26 Ne kegkepasad dutun, midtembuan dan te vatu si Acan. Ne taman en guntaan dutun pa haazà is menge vatu. Ne haazà he lugar migngezanan te Suǥud te Acor taman guntaan. 
\p Ne tenged kayi naawà is pauk te \sc Nengazen\sc*. 
\c 8  
\s1 Is Ked-eǥawa wey Kedezeeti te Ai 
\p  
\v 1 Ne migkaǥi is \sc Nengazen\sc* diyà te ki Josue te, “Kenè ka mahandek etawa luyahi. Tiguma nu is langun he menge sundaru nu ne umani niw surunga is Ai, su ebpeveyveyaan ku en kenikew is hadì te Ai, is menge etew zin, is inged din, wey is tanè din.  
\v 2 Beeli niw ziyà te Ai wey ziyà te hadì dutun is iring te mibeelan niw ziyà te Jerico wey zuen te hadì te Jerico; piru ǥuntaan egkehimu en human ke egkuwaan niw is menge azen dan wey is menge uyaǥen dan he para en keniyu. Pengandam kew ne eyani niw sikandan, ne ziyè kew vayà te egkeiniyuǥan te inged.” 
\p  
\v 3 Umbe, nengandam si Josue wey is langun he menge sundaru zin para te kedsurung dan diyà te Ai. Mibpilì si Josue te 30,000 he menge sundaru he metau he ebpekidtebek ne impelapus din sikandan.  
\v 4 Ne ke sikandin diyà te kandan te, “Eles kew ziyà te egkeiniyuǥan te inged, piru kenè kew utew mebpekeziyù dutun te inged. Pengandam kew te kedsurung niw te minsan hengkey he uras.  
\v 5 Ne siak wey is menge zuma ku ne ziyè key mulà ebayà te etuvangan te inged is edsurung. Ne emun egawas en is menge tig-Ai te kebpekidtebek kenami, ne ebpemelaǥuy key iring duen te nehuna he kedsurung tew.  
\v 6 Ne zutun, ebpekekaǥi sikandan te nengahandek key iring duen te nehuna he nehitavù, ne zutun edel-asen key zan ne ebpezal-as key taman te ebpekepekeziyù sikandan puun te inged.  
\v 7 Ne zutun seǥuǥunè kew ǥawas puun te mid-elesan niw ne eǥawa niw is inged. Ibeǥey heini keniyu te \sc Nengazen\sc* he Megbevayè niw.  
\v 8 Ne emun egkaaǥew niw en heini binsuli niw su iyan heeyan suǥù te \sc Nengazen\sc*. Sigureduwa niw he metuman niw heini.”  
\v 9 Ne impeǥenat sikandan ni Josue, ne mid-eles dan diyà te zapit te edsenlepan emun dutun ki te Ai, diyà te pid-elangan te Ai wey Betel. Ne zutun he kezukileman wazè pa si Josue med-awà diyà te kampu zan duma te menge etew. 
\p  
\v 10 Ne hein nepawà, midsayu med-enew si Josue ne midtiǥum din is menge etew zin. Ne iyan sikandin wey is menge pengulu te Israel nengegalen te menge etew te kedhendiyà te Ai.  
\v 11 Ne nekeuma zan diyà te sevaha he lugar he egkesineruwan te pultahan dutun te inged he Ai, ne mibangun sikandan te menge tulda ziyà te egkezivavà kayi. Ne zuen suǥud-suǥud diyà te pid-elangan kayi wey Ai.  
\v 12 Duen en impehuna ni Josue he 5,000 he menge sundaru te kedsurung dutun te inged. Diyè dan mebpelastar te zapit te edsenlepan dutun te inged, diyà te tengàtengà te Ai wey Betel.  
\v 13 Umbe, iyan heini kebpekepelastar te menge sundaru: is duma he menge sundaru, ne ziyà te zivavà dutun te inged, ne is duma pa, diyà dapit te edsenlepan kayi. 
\p Ne zutun he kezukileman midhendutun ensì Josue te suǥud.  
\v 14 Ne hein naahà sikandan duen te hadì diyà te Ai, ne migaanggaan sikandin megawas dutun te inged duma te menge etew zin te utew pa meselem, ne midhendiyè dan te lugar he egkesineruwan te Suǥud te Jordan su ebpekidtebek dan te menge Israilihanen. Wazè dan metueni he zuen bes edsurung kandan he ebpuun diyà te egkeiniyuǥan dutun te inged.  
\v 15 Ne si Josue wey is menge etew zin ne uvag kun nezaag sikandan, ne mibpelaǥuy zan pehendiyà te sibsivayan.  
\v 16 Ne midal-as kandan is langun he menge maama ziyà te Ai taman te neziyuan dan en haazà is inged.  
\v 17 Is langun he menge maama ziyà te Ai wey ziyà te Betel midal-as dan is menge Israilihanen, umbe wazà nesamà he ebpekidtebek para kenà maaǥew haazà is inged. 
\p  
\v 18 Ne migkeǥiyan si Josue te \sc Nengazen\sc* te, “Bentanga nu is bangkew nu ziyà te Ai su ibeǥey ku kenikew is Ai.” Umbe mibantang ni Josue is bangkew zin diyà te Ai.  
\v 19 Ne segugunà nenggawas sikan is menge etew zin puun te mid-elesan dan. Midseled dan dutun te inged ne migègaanan dan heini binsuli.  
\v 20 Ne kedlilingey te menge tig-Ai, neehè dan is evel he ebpuun dutun te inged. Wazè dan en egkepeleǥuyan su mid-etuvang en man sikandan duen te menge Israilihanen he edel-asen dan pehendiyà te sibsivayan.  
\v 21 Su hein naahà ni Josue wey te menge etew zin he nekeseled en duen te inged is menge zuma zan ne mibinsulan dan en heini, midlikù sikandan is ed-etaki te menge tig-Ai.  
\v 22 Ne mid-etaki zaan is menge Israilihanen he midseled dutun te inged, umbe nelingutan is menge tig-Ai. Mibpenhimetayan eni Josue sikandan is langun; wazà nekepelaǥuy kandan ne wazà neuyag kandan,  
\v 23 gawas duen te hadì dan. Mibihag dan heini ne mid-uwit dan diyà te ki Josue.  
\v 24 Hein naamin dan en te edhimatey is langun he menge tig-Ai he midal-as kandan diyà te menge pemuleey wey ziyà te sibsivayan, midlikuan dan sikan is inged ne mibpenhimetayan dan is langun he nesamà dutun.  
\v 25 Dutun he andew mibpatey is langun he meǥinged diyà te Ai–12,000 langun he menge maama wey menge vahi.  
\v 26 Wazà engkezi ni Josue is kebantang duen te vangkew zin diyà te Ai taman te naamin mebpatey is langun he meǥinged dutun.  
\v 27 Mibpenguwa te menge Israilihanen is menge uyaǥen wey menge azen dutun te inged, sumalà is migkaǥi te \sc Nengazen\sc* diyà te ki Josue.  
\v 28 Ne kegkepasad dutun, mibpevinsulan ni Josue is tivuuk he Ai ne wazè en heini meuman mevangun. Ne taman en guntaan wazè en meǥinǥed kayi.  
\v 29 Impevitey zin sikan is hadì diyà te kayu ne mibey-anan heini zutun taman te mahapun. Ne kedsanlep te andew impekuwa ni Josue haazà is minatey he hadì ne impetimbag din diyà te ǥawas te pultahan dutun te inged. Ne midtembuan dan heini te menge vatu, ne taman en guntaan kemulu egkaahà haazà is menge vatu. 
\s1 Mibasa is Kesuǥuan diyà te Buntud he Ebal 
\p  
\v 30 Ne zutun mibpevaal si Josue te pemuhatà diyà te Buntud he Ebal he para te \sc Nengazen\sc* he Megbevayà te Israel.  
\v 31 Mibpeveelan din heini sumalà te suǥù te suluǥuen te \sc Nengazen\sc* he si Moises diyà te menge Israilihanen. Heini he suǥù ingkesurat diyà te Libru te Kesuǥuan ni Moises, he edhenduen: “Beeli niw is pemuhatà he vatu he wazà mesepsapi wey wazà meǥemiti te putew.” Ne ziyà te zivavew zutun he pemuhatà, nemuhat dan diyà te \sc Nengazen\sc* te menge pemuhat he edtutungen wey menge pemuhat he para te meupiya he kedepità.  
\v 32 Ne ziyà te etuvangan te menge Israilihanen, migkupya ni Josue ziyà te menge vatu sikan is kesuǥuan he insurat ni Moises.  
\v 33 Is langun he menge Israilihanen, duma te menge pengulu zan, menge upisyal, wey is menge zatù ragkes is kenà menge Israilihanen he zuma zan he meǥinged midhitindeg he ebpesinsineruwà. Ne ziyà medhitindeg te teliwazè dan is menge memumuhat (he menge kevuwazan ni Aaron) he mibinting duen te Kavan te Kebpekid-uyun kandan te \sc Nengazen\sc*. Is ketengà kayi te menge etew, ne ed-iniyuǥan dan is Buntud he Gerizim ne is sevaha he ketengà, ne ed-iniyuǥan dan is Buntud he Ebal. Si Moises he suluǥuen te \sc Nengazen\sc* is midsuǥù kandan te kebaal kayi emun egkeume en is timpu te kedewata zan te kebpenubtuvazi kandan. 
\p  
\v 34 Ne zutun mibasa ni Josue sikan is libru te kesuǥuan, ragkes en sikan is menge penuvadtuvad wey menge rawak he ingkesurat kayi.  
\v 35 Midtigseselimbaha vesaha ni Josue is menge suǥù ni Moises diyà te etuvangan te tivuuk he keet-etawan te Israel ragkes en is menge vahi, menge vatà, wey kenà menge Israilihanen he zuma zan he meǥinged. 
\c 9  
\s1 Midterteruan te menge Tig-Gibeon is menge Israilihanen 
\p  
\v 1 Nezineg te langun he menge hadì diyà dapit te edsenlepan te Jordan is tudtul mehitenged te kebpekezaag te menge Israilihanen. (Iyan heini sikandan menge hadì te menge Hitihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.) Meǥinged sikandan diyà te menge vuvungan, menge mibuntud-buntud diyà te edsenlepan, wey menge veyvey te Zaǥat he Mediteraneo taman en te Lebanon.  
\v 2 Midsevaha sikandan te kebpekidtebek ki Josue wey te Israel. 
\p  
\v 3 Piru hein nezineg te menge tig-Gibeon is mibeelan ni Josue ziyà te Jerico wey ziyà te Ai,  
\v 4 neuyun dan he edterteruan dan si Josue. Impehendiyè dan te ki Josue is menge etew he zuen dan menge asnu he migkergahan te zaan he menge saku wey nengevindas wey menge tinepikan he lundis he teleǥuey te vinu.  
\v 5 Midsesendalyas daan sikandan te menge tinepikan wey mibivisti te utew en daan he menge visti. Memaza wey egkengepugpug en is menge supas he lutù dan.  
\v 6 Midhendiyè dan te ki Josue ziyà te kampu te Israel ziyà te Gilgal ne migkeǥiyan dan sikandin wey is menge Israilihanen te, “Midhendini key is ebpuun diyà te meziyù he lugar para zà te kedhangyù keniyu he ed-uyun kiw, ne penangdù kew ziyà te kenami he kenè key keniyu edhilevetan.”  
\v 7 Ne midtavak is menge Israilihanen te, “Kela ke uvayè dey zà sikiyu he menge meǥinged. Umbe kenà egkehimu ke ebpekid-uyun key keniyu.”  
\v 8 Ne mibpehizuhizu sikandan ki Josue. Ke sikandan te, “Andam key he ebpenilbi keniyu.” Ne mid-insà si Josue kandan te, “Hentei kew wey hendei kew ebpuun?”  
\v 9 Ne midtavak dan te, “Diyè key ebpuun te utew meziyù he lugar. Midhendini key su nekezineg key mehitenged te \sc Nengazen\sc* he Megbevayè niw. Netudtulan key te langun he mibeelan din diyà te Ehipto,  
\v 10 wey is langun he mibeelan din duen te zezuwa he Amorihanen he hadì he ziyà dapit te edsilaan he iyan si Hadì Sihon he hadì te Heshbon, wey si Hadì Og he hadì te Bashan he ed-ubpà diyà te Ashtarot.  
\v 11 Umbe, midsuǥù key te menge pengulu zey wey zuma zey he menge meǥinged he endama zey is keenen he egkelutù dey ne medhengkayi key te kebpekidhinguma keniyu su wey zey sikiyu mekeǥiyi he andam key he ebpenilbi keniyu, basta ebpekid-uyun kew kenami he kenè key keniyu edhilevetan.  
\v 12 Ahaa niw man heini is uwiten dey he supas. Meinit pa heini te kegenat dey, piru ǥuntaan mibmezesen en ne nengepugpug en.  
\v 13 Heini is lundis he teleǥuey zey beǥu pa heini hein midteǥuan dey te vinu, iyan, guntaan egkevindas en. Is menge visti zey wey menge sandalyas dey ne nengezaan en tenged te kegkeuǥet te kedhipanew zey.” 
\p  
\v 14 Midsusi te menge Israilihanen haazà is menge lutù dan piru wazà sikandan mebpekisambag te \sc Nengazen\sc* ke hengkey is ereg he ebeelan dan.  
\v 15 Ne mibpekid-uyun si Josue kandan he kenè din sikandan edhilevetan wey ebpenhimetayan. Ne nenangdù is menge pengulu te Israel mehitenged kayi. 
\p  
\v 16 Ne hein nekelavey en is tetelu he andew puun te kegkeuyun dan, netudtulan is menge Israilihanen he uvey zè bes is ed-ubpaan duen te menge etew.  
\v 17 Umbe, migenat is menge Israilihanen, ne iketelu he andew te kedhipanew zan nekeuma zan diyà te menge inged he ed-ubpan duen te menge etew. Heini he menge inged iyan is Gibeon, Kefira, Beerot, wey Kiriat Jearim.  
\v 18 Piru wazà sikandan surunga te menge Israilihanen su ǥeinà te nekepenangdù en diyà te kandan is menge pengulu te Israel te penangdù he mibpeseksiyan te \sc Nengazen\sc* he Megbevayà te Israel. Midriklamu is menge Israilihanen diyà te menge pengulu zan,  
\v 19 piru midtavak haazà is langun he menge pengulu zan te, “Nekepenangdù kiw en diyà te kandan te mibpeseksiyan te \sc Nengazen\sc* he Megbevayà te Israel, umbe kenè tew sikandan egkehilevetan.  
\v 20 Iyan dà heini ed-ul-ulahan tew: Kenè tew sikandan ebpenhimetayan su kela ke siluti kiw te Megbevayà su nekepenangdù kiw en diyà te kandan.  
\v 21 Kenè niw en sikandan penhimetayi. Piru edhimuwen tew sikandan he perepengayu wey peresekezu para kenitew te langun.” Ne iyan heeyan nehitavù te menge tig-Gibeon su iyan man heeyan migkaǥi zuen te menge pengulu mehitenged kandan. 
\p  
\v 22 Impetawag ni Josue is menge tig-Gibeon ne migkeǥiyan din te, “Maan is midterteruan key keniyu? Maan is migkaǥi kew he ziyè kew ebpuun te meziyù he lugar, he kayi kew zè bes he meǥinged te uvey zey?  
\v 23 Ne tenged kayi te vaal niw edrewakan kew te Megbevayà: Puun guntaan penilbi kew en pinaaǥi te kebpengayu wey kebpenekezu para te valey te Megbevayè ku.”  
\v 24 Ne midtavak dan si Josue te, “Mibeelan dey heini tenged te nahandek key he kela ke penhimetayi key keniyu. Su netuenan dey he midsuǥù te \sc Nengazen\sc* he Megbevayè nu si Moises he suluǥuen din he ibeǥey ziyà te keniyu heini he menge tanà ne egeraan is langun he meǥinged kayi.  
\v 25 Ne ǥuntaan kayi key en te zizalem te ǥehem nu, ne iyan ke en metau ke hengkey is ereg he ebeelan nu kenami.”  
\v 26 Wazà ituǥut ni Josue he penhimetayi sikandan te menge Israilihanen.  
\v 27 Piru midhimu zin sikandan he menge perepengayu wey menge peresekezu para te menge Israilihanen wey para te pemuhatà para te \sc Nengazen\sc*. Taman en guntaan is kebeeli zan kayi he vuluhaten diyà te lugar he mibpilì te \sc Nengazen\sc* he zutun sikandin ed-ezapa. 
\c 10  
\s1 Nezaag te menge Israilihanen is menge Meǥinged diyà te Divavà 
\p  
\v 1 Netudtulan si Hadì Adoni Zedek he hadì te Jerusalem he mid-aǥew ni Josue is Ai ne mibpurung din heini zèdeeti wey midhimetayan din is hadì kayi iring te mibeelan din diyà te Jerico wey te hadì kayi. Nezineg din daan he nekid-emiǥu is menge tig-Gibeon te menge Israilihanen ne mid-amur zan en med-ubpà kandan.  
\v 2 Ne utew nahandek sikandin wey is menge etew zin su netuenan dan he mekeǥeǥehem he inged is Gibeon. Minsan pa te wazà hadì kayi, dekelè pa ǥihapun he inged. Ne zekelè pa heini te Ai ne memetau he ebpekidtebek is menge sundaru kayi.  
\v 3 Umbe, mibpeuwit te lalag si Adoni Zedek diyà te ki Hadì Hoham he hadì te Hebron, ki Hadì Piram he hadì te Jarmut, ki Hadì Jafia he hadì te Lakish, wey ki Hadì Debir he hadì te Eglon he ke sikandin te:  
\v 4 “Uǥupi a keniyu te kedsurung te menge tig-Gibeon su nekid-emiǥu sikandan ki Josue wey te menge Israilihanen.”  
\v 5 Umbe, midsevaha heini is lelima he hadì te menge Amorihanen: is hadì te Jerusalem, Hebron, Jarmut, Lakish, wey Eglon. Midtiǥum dan is menge sundaru zan ne midsurung dan is Gibeon. 
\p  
\v 6 Ne mibpeuwit is menge tig-Gibeon te lalag diyà te ki Josue diyà te kampu zan diyà te Gilgal he edhenduen te, “Kenè key kenikew vey-ani is menge suluǥuen nu. Segugunè kew hendini ne libriya key. Tevangi key su midsevaha te kebpekigkuntra kenami is langun he menge hadì he Amorihanen he meǥinged diyà te menge vuvungan.”  
\v 7 Umbe, migenat si Josue duma te langun he menge sundaru zin, ragkes is utew memetau he ebpekidtebek.  
\v 8 Ne migkaǥi is \sc Nengazen\sc* diyà te ki Josue te, “Kenè ka mahandek kandan. Imbeǥey ku en sikandan kenikew. Wazà minsan sevaha kandan he ebpekezaag kenikew.” 
\p  
\v 9 Tivuuk he kezukileman is kedhipanew eni Josue puun te Gilgal, ne midsurung dan is menge kuntada he wazà mekevantey.  
\v 10 Midteranta te \sc Nengazen\sc* is menge kuntada hein neehè dan is menge Israilihanen. Ne ziyà te Gibeon mahabet kandan is mibpenhimetayan te menge Israilihanen. Midal-as te menge Israilihanen is duma kandan, ne mibpenhimetayan dan diyà te zalan he ebpeketekezeg diyà te Bet Horon taman te Azeka wey Makeda.  
\v 11 Hein edtupang sikandan puun te Bet Horon pehendiyà te Azeka edel-asen sikandan te menge Israilihanen. Ne mibpeuzanan sikandan te \sc Nengazen\sc* te zezekelà he menge giyew ne nemematey zan. Mahabet pa is nemematey pinaaǥi te ǥiyew kenà te nemematey pinaaǥi te menge ispada te menge Israilihanen. 
\p  
\v 12 Dutun te andew he mibpengelinteuwan te \sc Nengazen\sc* he mezaag te menge Israilihanen is menge Amorihanen, mid-ampù si Josue ziyà te \sc Nengazen\sc* diyà te etuvangan te menge Israilihanen, ke sikandin te: 
\p “\sc Nengazen\sc*, ipepundu nu is andew ziyà te zivavew te Gibeon, wey ipepundu nu is bulan diyà te Suǥud he Ayalon.”  
\v 13 Umbe, midpundu is andew wey is bulan taman te nezaag te menge Israilihanen is menge kuntada zan. 
\p Heini he hitavù ingkesurat diyà te Libru ni Jashar. Mibpundu is andew ziyà te tengàtengà te langit, ne wazà heini medsanlep te senge andew.  
\v 14 Wazè pa nehitavù he iring kayi te midineg te \sc Nengazen\sc* is iring keniyan he ampù te etew. Tutuu iyan he nekidtebek is \sc Nengazen\sc* para te Israel. 
\p  
\v 15 Ne midlikù si Josue wey is langun he menge Israilihanen diyà te kampu zan diyà te Gilgal. 
\s1 Midhimetayan sikan is Lelima he Hadì te menge Amorihanen 
\p  
\v 16 Nemelaǥuy sikan is lelima he hadì ne mid-eles dan diyà te surung he Makeda.  
\v 17 Iyan, duen nekaahà he mid-eles sikandan dutun, ne midtudtul zin haazà ki Josue.  
\v 18 Umbe, migkaǥi si Josue te, “Elangi niw te zezekelà he vatu is bèbà duen te surung ne peventayi niw heini.  
\v 19 Piru kenè kew pundu kayi. Del-asa niw is menge kuntada niw; diyè kew puun te egkeiniyuǥan is edsurung kandan, ne kenè niw mehimuwa he mekeseled sikandan diyà te menge inged dan su imbeǥey en sikandan te \sc Nengazen\sc* he Megbevayè niw.” 
\p  
\v 20 Hapit egkaamin egkepatey eni Josue is menge kuntada zan. Iyan, duen nepipira kandan he nekepelaǥuy ne nemekelikù mekeseled diyà te vinerengbeng he menge inged dan.  
\v 21 Ne zutun midlikù is langun he sundaru ni Josue ziyà te kampu zan diyà te Makeda he zutun edtaǥad si Josue. Puun dutun, wazè en nekaaku he egkaǥi te mezaat he lalag he ebpekesuǥat te menge Israilihanen. 
\p  
\v 22 Mibmandar si Josue te, “Puwasi niw sikan is surung ne uwita niw zini te kedì sikan is lelima he hadì.”  
\v 23 Umbe, migkuwa zan ne mid-uwit dan diyà te ki Josue sikan is lelima he hadì: hadì diyà te Jerusalem, Hebron, Jarmut, Lakish, wey Eglon.  
\v 24 Ne hein neuwit en diyà te ki Josue haazà is lelima he hadì, midtiǥum din is langun he menge Israilihanen, ne migkeǥiyan din is menge peremandar te menge sundaru zin, ke sikandin te, “Hendini kew, ne ǥieki niw is menge lieg kayi te menge hadì.” Umbe mid-uvey sikandan ne migiekan dan is menge lieg duen te menge hadì.  
\v 25 Migkaǥi si Josue ziyà te kandan te, “Kenè kew mahandek wey luyahi. Mebpekelig-en kew wey mebpekevurut. Su iyan heini ebeelan te \sc Nengazen\sc* diyà te langun he menge kuntada niw.”  
\v 26 Ne zutun mibpenhimetayan ni Josue sikan is lelima he hadì ne imbitey haazà diyà te lelima he kayu taman te mahapun.  
\v 27 Ne hein edsanlep en is andew, impekuwa ni Josue is menge lawa zan, ne impetimbag din duen te surung he mid-elesan dan. Mid-elangan dan te zezekelà he menge vatu is bèbà duen te surung, ne taman en guntaan dutun pa heini he menge vatu. 
\s1 Midsakup ni Josue is Duma pa he menge Lugar te menge Amorihanen 
\p  
\v 28 Dutun he andew, midsakup ni Josue is Makeda. Midhimetayan din is hadì wey is langun he meǥinged dutun. Mibpurung din heini zèdeeti ne wazà nesamà he uuyag. Mibeelan ni Josue ziyà te hadì te Makeda is iring te mibeelan din duen te hadì te Jerico. 
\p  
\v 29 Puun diyà te Makeda midlaus si Josue wey is menge Israilihanen diyà te Libna ne midlusuzan dan heini.  
\v 30 Imbeǥey zaan te \sc Nengazen\sc* kandan heini he inged wey is hadì dutun. Migerè dan is langun he meǥinged kayi, ne wazà nesamà he uuyag. Mibeelan daan ni Josue ziyà te hadì te Libna is iring te mibeelan din duen te hadì te Jerico. 
\p  
\v 31 Puun te Libna, midhendiyà si Josue wey is menge Israilihanen te Lakish. Midliǥuyan dan heini ne midlusuzan dan.  
\v 32 Imbeǥey te \sc Nengazen\sc* diyà te menge Israilihanen is Lakish diyà te ikezuwa he andew te tebek. Is mibeelan dan iring ded te mibeelan dan diyà te Libna su miǥerè dan is langun he meǥinged dutun.  
\v 33 Hein kemulu zan pa edlusuzi is Lakish, si Hadì Horam he hadì te Gezer wey is menge sundaru zin midtavang te Lakish, piru nezaag gihapun sikandan eni Josue ne wazà nesamà kandan he uuyag. 
\p  
\v 34 Puun te Lakish, midhendiyà si Josue wey is menge Israilihanen te Eglon. Midliǥuyan dan daan heini ne midlusuzan dan.  
\v 35 Dutun he andew, nesakup dan is Eglon ne migerè dan is langun he meǥinged kayi. Mibpurung dan heini zèdeeti iring te mibeelan dan diyà te Lakish. 
\p  
\v 36 Ne midtekezeg si Josue wey is menge Israilihanen diyà te Hebron ne midlusuzan dan heini.  
\v 37 Midsakup dan haazà is inged, ne midhimetayan dan is hadì wey is langun he meǥinged kayi, ragkes is menge etew ziyà te nekepeliǥuy he menge inged. Ne wazà nesamà he uuyag. Mibpurung dan dèdeeti is inged iring te mibeelan dan diyà te Eglon. 
\p  
\v 38 Ne zutun midlikù si Josue wey is menge Israilihanen ne midsurung dan is Debir.  
\v 39 Mid-aǥew zan haazà is inged ne midhimetayan dan is hadì wey is langun he meǥinged kayi, ragkes is menge etew ziyà te nekepeliǥuy he menge inged. Mibpurung dan heini zèdeeti ne wazà nesamà he uuyag. Is mibeelan dan diyà te Hebron wey Libna wey te menge hadì kayi mibeelan dan daan diyà te Debir wey te hadì kayi. 
\p  
\v 40 Umbe, naaǥew ni Josue is tivuuk he tanà–is menge vuvungan, is Negev, is menge mibuntud-buntud diyà te edsenlepan, wey is lugtenaan te menge vuvungan. Nezaag din is menge hadì kayi, wazà nesamà he uuyag. Mibpenhimetayan dan is langun sumalà te insuǥù te \sc Nengazen\sc* he Megbevayà te Israel.  
\v 41 Migerà ni Josue is menge etew ziyà te menge lugar he ebpuun te Kadesh Barnea taman te Gaza, wey is tivuuk he tanà te Goshen taman te Gibeon.  
\v 42 Naaǥew ni Josue is langun kayi he menge tanà wey nezaag din is menge hadì kayi te sengesurung dà, su is \sc Nengazen\sc* he Megbevayà te Israel, mid-uǥup te kebpekidtebek dan.  
\v 43 Ne kegkepasad kayi, midlikù si Josue wey is langun he menge Israilihanen diyà te kampu zan diyà te Gilgal. 
\c 11  
\s1 Nezaag te menge Israilihanen is menge Meǥinged diyà te Dizaya 
\p  
\v 1 Hein nezineg ni Hadì Jabin he hadì te Hazor is menge kezeeǥan te menge Israilihanen, ne mibpeuwit sikandin te lalag kayi he menge hadì: diyà te ki Hadì Jobab he hadì te Madon, diyà te menge hadì te Shimron wey Acshaf,  
\v 2 diyà te menge hadì diyà te menge vuvungan he zapit te zizaya, diyà te menge hadì te Suǥud te Jordan diyà te zivavà te Ranew te Galilea, diyà te menge hadì te menge mibuntud-buntud diyà te edsenlepan, diyà te menge hadì diyà te veyvey te Dor he zapit te edsenlepan,  
\v 3 diyà te menge hadì te menge Canaanhen diyà te edsilaan wey edsenlepan te Wahig he Jordan, diyà te menge hadì te menge Amunihanen, diyà te menge hadì te menge Hitihanen, diyà te menge hadì te menge Pirisihanen, diyà te menge hadì te menge Jebusihanen he meǥinged diyà te menge vuvungan, wey ziyà te menge hadì te menge Hivihanen he menge meǥinged diyà te lugtenaan te Buntud he Hermon he ziyà te tanà he Mizpa.  
\v 4 Mibpeteltelevukà heini he menge hadì duma te menge sundaru zan. Iring sikandan kahabet te pantad diyà te veyvey, utew zaan mezakel is menge kudè dan wey menge kerwahi zan.  
\v 5 Midsevaha heini he menge hadì ne migkampu zan diyà te veyvey te Wahig he Merom su edtebeken dan is Israel. 
\p  
\v 6 Migkaǥi is \sc Nengazen\sc* diyà te ki Josue te, “Kenè kew mahandek kandan, su keeselem te iring kayi he uras, ne egeraan ku sikandan is langun para te Israel. Penlepui niw is menge kudè dan wey peminsuli niw is menge kerwahi zan.”  
\v 7 Umbe, midtik-awan sikandan surunga ni Josue duma te menge sundaru zin dutun te Wahig he Merom.  
\v 8 Mibpengelinteuwan te \sc Nengazen\sc* he mezaag te menge Israilihanen haazà is menge kuntada zan. Midal-as dan is menge kuntada zan taman diyà te Zekelà he Sidon wey ziyà te Misrefot Maim, wey taman diyà te Suǥud te Mizpa ziyà te edsilaan, taman te naamin dan mepatey is menge kuntada zan.  
\v 9 Mibeelan ni Josue ziyà te kandan is insuǥù te \sc Nengazen\sc*: Mibpenlepuan din is menge kudè dan ne mibpeminsulan din is menge kerwahi zan. 
\p  
\v 10 Kegkepasad kayi midlikù ensi Josue ne mid-aǥew zan is Hazor ne midhimetayan dan is hadì kayi. (Is Hazor iyan utew mekeǥeǥehem he ginhedian dutun he timpu.)  
\v 11 Mibpenhimetayan dan daan is langun he meǥinged diyà te Hazor, ne wazà nesamà he uuyag. Ne mibinsulan dan haazà is inged. 
\p  
\v 12 Naaǥew eni Josue heini is langun he menge inged. Migerè dan is langun he menge meǥinged kayi, ragkes is menge hadì dan, su iyan heini insuǥù te suluǥuen te \sc Nengazen\sc* he si Moises.  
\v 13 Iyan, wazà mulà binsuli te menge Israilihanen is menge inged he menge vuvungan, gawas te Hazor he mibinsulan ni Josue.  
\v 14 Mibpenguwa te menge Israilihanen is langun he menge azen wey menge uyaǥen kayi he menge inged. Piru mibpenhimetayan dan mulà is langun he meǥinged kayi, ne wazà nesamà he uuyag.  
\v 15 Iyan heeyan insuǥù te \sc Nengazen\sc* ki Moises, ne insuǥù daan heini ni Moises diyà te ki Josue. Ne midtuman ni Josue is langun he insuǥù te \sc Nengazen\sc* ki Moises. 
\s1 Nekuwa ni Josue is Tivuuk he Tanà 
\p  
\v 16 Nekuwa ni Josue haazà is tivuuk he tanà: is menge vuvungan, is tivuuk he tanà te Negev, is tivuuk he tanà te Goshen, is menge mibuntud-buntud diyà te edsenlepan, is Araba, wey is menge metikang wey mevavà he menge vuntud diyà te Israel.  
\v 17 Is lugar he nesakup din, ne ziyà ebpuun te Buntud he Halak petekezeg diyà te Seir taman te Baal Gad he ziyà te Suǥud te Lebanon diyà te lugtenaan te Buntud he Hermon. Midakep din wey mibpenhimetayan din is menge hadì kayi he menge lugar.  
\v 18 Meluǥayad he timpu is kebpekidtebek dan ne human nepasad.  
\v 19 Wazà duma he mibpekid-emiǥu te menge Israilihanen kayi he lugar gawas te menge Hivihanen he meǥinged diyà te Gibeon. Is duma nezaag dan te tebek.  
\v 20 Su mibpekubalan te \sc Nengazen\sc* is gehinawa zan su wey zan sukuli te tebek is menge Israilihanen. Ne pinaaǥi kayi egkepurung sikandan egkezeeti ne ebpenhimetayan he kenè ne egkelizuwan, su iyan insuǥù te \sc Nengazen\sc* ki Moises. 
\p  
\v 21 Dutun daan he timpu, midsurung ni Josue is menge kevuwazan ni Anak he meǥinged diyà te menge vuvungan te Hebron, Debir, Anab, wey is diyà te langun he menge vuntud he nesakup guntaan te Juda wey Israel. Midèdeetan ni Josue sikandan is langun ragkes is menge inged dan.  
\v 22 Wazà kevuwazan ni Anak he nesamà diyà te lugar te menge Israilihanen gawas te ziyà te Gaza, Gat, wey ziyà te Ashdod. 
\p  
\v 23 Umbe, migkuwa ni Josue heini is tivuuk he tanà su iyan heini insuǥù te \sc Nengazen\sc* diyà te ki Moises. Impemeǥey zin heini he tanà diyà te menge Israilihanen su wey zan mepengevilin. Ne mibehinan dutun is kada tribu. 
\p Ne zutun mibmelinew en haazà is tanà. 
\c 12  
\s1 Is menge Hadì diyè Dapit te Edsilaan te Jordan he Nezaag te menge Israilihanen 
\p  
\v 1-2 Nesakup en te menge Israilihanen is menge tanà diyà te edsilaan te Jordan, puun te zal-ug te Arnon taman te Buntud he Hermon, ragkes kayi is tanà diyà te edsilaan he vahin te Araba. Iyan heini menge hadì dutun he menge lugar he nezaag te menge Israilihanen: 
\p Si Sihon he Amorihanen he meǥinged diyà te Heshbon. Sakup te ginhedian din is ketengà te Gilead. Puun heini te Aroer he kilid te zal-ug te Arnon, ragkes en is inged diyà te teliwazà kayi he zal-ug taman te zal-ug te Jabok, he dulunà te menge Amunihanen.  
\v 3 Nesakup daan te ginhedian din is dapit te edsilaan he Araba, puun te Ranew te Galilea taman te Bet Jeshimot, he zapit te edsilaan te Zaǥat te Araba, ne taman pa ziyà te zivavà he lugtenaan te Buntud he Pisga. 
\p  
\v 4 Is ikezuwa ne iyan si Og, is hadì diyà te Bashan. Sevaha sikandin te nesamà he menge kevuwazan te menge Ripanhen. Meǥinged sikandin diyà te Ashtarot wey ziyà te Edrei.  
\v 5 Is nesakup te ginhedian din iyan is Buntud te Hermon, Saleca, is tivuuk he Bashan taman te zulunà te Geshur wey Maaca, wey is ketengà te Gilead taman te zulunà te Heshbon he nesakup te lugar ni hadì Sihon.  
\v 6 Nezaag sikandan ni Moises he suluǥuen te \sc Nengazen\sc* wey te menge Israilihanen. Imbeǥey ni Moises is tanè dan diyà te tribu ni Reuben, tribu ni Gad, wey ketengà he tribu ni Manase wey zan mepengevilin. 
\s1 Is Nezaag he menge Hadì he diyà te Edsenlepan te Jordan 
\p  
\v 7-8 Naaǥew zaan ni Josue wey te menge Israilihanen is menge tanà diyà dapit te edsenlepan te Jordan, puun te Baal Gad he Suǥud te Lebanon taman te Buntud he Halak petekezeg diyà te Seir. Imbeǥey ni Josue heini he menge tanà diyà te menge Israilihanen. Mibahin din heini ziyà te kada tribu te Israel wey zan mepengevilin. Ragkes kayi he tanà is menge vuvungan, is menge mibuntud-buntud diyà te edsenlepan, is Suǥud te Jordan, wey is lugtenaan te menge vuvungan, is menge disirtu ziyà te zivavà, wey is Negev. Iyan nehuna he menge meǥinged kayi is menge Hitihanen, Amorihanen, Canaanhen, Pirisihanen, Hivihanen, Jebusihanen. Iyan heini menge hadì kayi he menge lugar he midaag ni Josue wey te menge Israilihanen: 
\li1  
\v 9 hadì te Jerico 
\li1 hadì te Ai (uvey te Betel) 
\li1  
\v 10 hadì te Jerusalem 
\li1 hadì te Hebron 
\li1  
\v 11 hadì te Jarmut 
\li1 hadì te Lakish 
\li1  
\v 12 hadì te Eglon 
\li1 hadì te Gezer 
\li1  
\v 13 hadì te Debir 
\li1 hadì te Geder 
\li1  
\v 14 hadì te Horma 
\li1 hadì te Arad 
\li1  
\v 15 hadì te Libna 
\li1 hadì te Adulam 
\li1  
\v 16 hadì te Makeda 
\li1 hadì te Betel 
\li1  
\v 17 hadì te Tapua 
\li1 hadì te Hefer 
\li1  
\v 18 hadì te Afek 
\li1 hadì te Lasharon 
\li1  
\v 19 hadì te Madon 
\li1 hadì te Hazor 
\li1  
\v 20 hadì te Shimron Meron 
\li1 hadì te Acshaf 
\li1  
\v 21 hadì te Taanac 
\li1 hadì te Megido 
\li1  
\v 22 hadì te Kedesh 
\li1 hadì te Jokneam (diyà te Carmel) 
\li1  
\v 23 hadì te Dor (diyà te Nafat Dor) 
\li1 hadì te Goim (diyà te Gilgal) 
\li1  
\v 24 hadì te Tirza 
\m 31 langun he menge hadì. 
\c 13  
\s1 Is Tanà he Kinahanglan pa he Ed-eǥawen 
\p  
\v 1 Hein utew en meǥurang si Josue, migkaǥi is \sc Nengazen\sc* diyà te kandin te, “Meǥurang ke en utew, ne mahabet pa he menge tanà is kinahanglan he ed-eǥawen.  
\v 2 Iyan heini menge tanà he wazè pa maaǥew: Is langun he menge tanà te menge Filistihanen wey menge Gisurhanen  
\v 3 he sakup te menge Canaanhen. Heini puun te wahig he Shihor ziyà te zapit te edsilaan he vahin te Ehipto taman te zulunà te Ekron diyà te zizaya, ragkes en is lelima he menge inged te menge Filistihanen he: Gaza, Ashdod, Ashkelon, Gat, wey Ekron. Elin is tanà te menge Aybihanen  
\v 4 diyà te zivavà; is langun he tanà te Canaanhen puun te Meara, he ǥaked dengan te menge Sidunhanen, taman te Afek he zulunà te tanà te menge Amorihanen.  
\v 5 Elin daan is tanà te menge Gibalnen, wey is tivuuk he Lebanon diyà te edsilaan, puun te Baal Gad diyà te lugtenaan te Buntud he Hermon taman te Lebo Hamat.  
\v 6 Ragkes daan is menge vuvungan puun te Lebanon taman te Misrefot Maim he ǥaked te menge Sidunhanen. 
\p “Emun edsurung kew en, iyan a ebpenguney edsegseg te menge meǥinged keniyan he menge lugar. Sigureduwa nu he mevahin heini he menge tanà diyà te menge Israilihanen su wey zan mepengevilin, sumalà te insuǥù ku kenikew.  
\v 7 Behina nu heini he menge tanà diyà te siyam he menge tribu wey te ketengà he tribu ni Manase.” 
\p  
\v 8 Is tribu ni Reuben, ni Gad, wey is ketengà he tribu ni Manase daan en mibeǥayan ni Moises he suluǥuen te \sc Nengazen\sc* te kandan he vahin diyà te zapit te edsilaan te Jordan.  
\v 9 Is tanè dan, ne ziyà ebpuun te Aroer ziyà te kilid te zal-ug he Arnon (ragkes is inged diyà te kilid kayi he zal-ug) pehendiyà te tivuuk he suǥud puun te Medeba taman te Dibon.  
\v 10 Neragkes daan is langun he menge inged he zizalem te kebmandù ni Sihon te midhadì diyà te Heshbon, taman te zulunà te menge Amorihanen.  
\v 11 Ragkes daan is Gilead wey is menge tanà he mid-ubpaan te menge Gisurhanen wey menge Maakatnen, is tivuuk he Buntud he Hermon, wey is tivuuk he Bashan taman te Saleca.  
\v 12 Ragkes daan is tivuuk he ginhedian ni Og, he midhadì diyà te Ashtarot wey ziyà te Edrei. Si Og, ne sevaha te nesamà te menge kevuwazan te menge Ripanhen he midaag ni Moises ne midsegseg din sikandan puun te tanè dan.  
\v 13 Piru wazà mesegseg te menge Israilihanen is menge Gisurhanen wey is menge Maakatnen. Heini he menge etew nengungubpaan gihapun duma te menge Israilihanen taman en guntaan. 
\p  
\v 14 Wazà beǥayi ni Moises is tribu ni Levi te tanà he egkepengevilin dan. Kekenà, iyan egkezawat dan is bahin te menge pemuhat pinaaǥi te hapuy he ibpemuhat diyà te \sc Nengazen\sc* he Megbevayà te Israel, sumalà is migkaǥi zin diyà te ki Moises. 
\p  
\v 15 Iyan heini kevahin te tanà te Israel he imbahin ni Moises diyà te tribu ni Reuben, he mibahin diyà te kada pemilya zan: 
\p  
\v 16 Ebpuun te Aroer he kilid te zal-ug he Arnon (ragkes is inged diyà te kilid kayi he zal-ug) taman te tivuuk he suǥud he nekepeliǥuy te Medeba.  
\v 17 Ragkes daan is Heshbon wey is langun he menge inged kayi ziyà te menge suǥud he iyan is: Dibon, Bamot Baal, Bet Baal Meon,  
\v 18 Jahaz, Kedemot, Mefaat,  
\v 19 Kiriataim, Sibma, Zeret Shahar (he ziyà te vuvungan te menge suǥud),  
\v 20 Bet Peor, is menge kelendiǥan diyà te Buvungan he Pisga, Bet Jeshimot,  
\v 21 is langun he menge inged diyà te menge suǥud wey is langun he menge inged he nesakup ni Sihon te hadì te menge Amorihanen he midhadì diyà te Heshbon. Nezaag sikandin ni Moises ragkes is menge pengulu te Midian he iyan ensi Evi, Rekem, Zur, Hur, wey Reba. Heini sikandan menge pengulu ziyà te menge tanè dan, dizalem sikandan te keǥehem ni Hadì Sihon.  
\v 22 Ragkes daan te midhimetayan te menge Israilihanen si Balaam he menenagnà he anak ni Beor.  
\v 23 Is Wahig he Jordan iyan dulunà te tribu ni Reuben. Iyan heini menge inged he imbeǥey ziyà te tribu ni Reuben, he mibahin diyà te kada pemilya zan. 
\p  
\v 24 Iyan heini kevahin te tanà he imbahin ni Moises te tribu ni Gad he mibahin diyà te kada pemilya zan he iyan is: 
\p  
\v 25 Jazer wey is langun he menge inged diyà te Gilead, wey is ketengà te tanà te menge Amunihanen taman te Aroer ziyà te edsilaan he vahin te Raba.  
\v 26 Ragkes daan is menge tanà puun te Heshbon taman te Ramat Mizpa wey Betonim, wey puun te Mahanaim taman te dulunà te Lo Debar.  
\v 27 Is tanà diyà te Suǥud te Jordan, he naangken dan iyan is Bet Haram, Bet Nimra, Sucot, Zafon, wey is nesamà he nesakup te ginhedian ni Hadì Sihon he hadì te Heshbon. Is dulunà diyà te edsenlepan iyan is Wahig he Jordan taman te Ranew te Galilea.  
\v 28 Iyan heini menge inged he imbeǥey ziyà te tribu ni Gad, he mibahin diyà te kada pemilya zan. 
\p  
\v 29 Iyan heini kevahin te tanà he imbeǥey ni Moises diyà te ketengà he tribu ni Manase he mibahin diyà te kada pemilya zan: 
\p  
\v 30 Puun te Mahanaim, pehendiyà te tivuuk he Bashan, kes tivuuk he ginhedian ni Hadì Og he hadì te Bashan, wey is 60 he menge inged diyà te Jair he sakup te Bashan.  
\v 31 Ragkes kayi is ketengà te Gilead, wey is Ashtarot wey Edrei, he menge dezekelà he inged diyà te Bashan he ginhedian ni Og. Iyan heini tanà he imbeǥey ziyà te ketengà te menge kevuwazan ni Makir te anak ni Manase, he mibahin diyà te kada pemilya zan. 
\p  
\v 32 Iyan heini paaǥi te kebehina ni Moises te menge tanà diyà dapit te edsilaan te Jerico wey Jordan, hein diyà sikandin te menge suǥud te Moab.  
\v 33 Iyan, wazà mulà beǥayi ni Moises te tanà he egkepengevilin dan is tribu ni Levi su iyan kandan he kevilin is \sc Nengazen\sc*, he Megbevayà ni Israel, sumalà is migkaǥi zin kandan. 
\c 14  
\s1 Is Kebehina te Tanà Diyà te Edsenlepan he Egketengkilizan te Jordan 
\p  
\v 1 Iyan heini paaǥi te kebehina eni Eleazar he memumuhat, ni Josue he anak ni Nun, wey te menge pengulu te menge pemilya te kada tribu te Israel te zuma pa he menge tanà diyà te Canaan he nepengevilin te menge Israilihanen:  
\v 2 Midtuman dan is suǥù te \sc Nengazen\sc* ki Moises, umbe sikan is siyam wey tengà he tribu mibahin diyà te kandan is tanà pinaaǥi te kedripa.  
\v 3-4 Mibeǥayan eni Moises te kandan he vahin sikan is dezuwa wey tengà he menge tribu ziyà te zapit te edsilaan te Jordan. Wazè din beǥayi te vahin is menge kevuwazan ni Levi, piru mibeǥayan din sikandan te menge inged he egkeubpaan dan wey menge penebtavà para te menge uyaǥen dan. Is kevuwazan ni Jose mibahin te zezuwa he tribu–is tribu ni Manase wey is tribu ni Efraim.  
\v 5 Nevahin haazà is tanà diyà te menge Israilihanen sumalà te insuǥù te \sc Nengazen\sc* ki Moises. 
\s1 Imbeǥey ki Caleb is Hebron 
\p  
\v 6 Midhendiyà te ki Josue ziyà te Gilgal is nepipira he etew te tribu ni Juda. Is sevaha kandan iyan si Caleb he anak ni Jefune he Kinishanen. Migkaǥi sikandin te, “Egketenuzan nu pe be sikan is migkaǥi te \sc Nengazen\sc* diyà te ki Moises he suluǥuen te Megbevayà mehitenged kenita te zezuwa hein diyè kiw pa te Kadesh Barnea?  
\v 7 Ne 40 dutun he tuig is keǥurang ku hein midsuǥù a ni Moises te kebpeniid kayi he tanà, ne hein nekelikù a, midtudtul ku kandin is langun he netuenan ku.  
\v 8 Piru mibpelihandek te menge zuma ku is menge etew. Piru siak, metinumanen a te kedsunud te \sc Nengazen\sc* he Megbevayè ku.  
\v 9 Umbe, zutun he andew midsaad si Moises kayi te kedì he ke sikandin te, ‘Tenged te metinumanen ka te kedsunud te \sc Nengazen\sc* he Megbevayè ku, sikew wey is menge kevuwazan nu, egkaangken niw haazà is tanà he neumahan nu zutun te kebpeniid nu.’ 
\p  
\v 10 “Ne 45 he tuig is midlavey puun te kegkeǥiya zutun te \sc Nengazen\sc* diyà te ki Moises. Kemulu pa zutun edhipanew is menge Israilihanen diyà te sibsivayan. Ne ǥuntaan 85 en he tuig is keǥurang ku ne uuyag e pa ǥihapun pinaaǥi te tavang te \sc Nengazen\sc*,  
\v 11 ne is desen ku iring gihapun te zesen ku hein midsuǥù a ni Moises. Ebpekehimu e pa ǥihapun te minsan hengkey, minsan is kebpekidtebek su is egkehimu ku ǥuntaan ne iring ded te egkehimu ku zengan.  
\v 12 Umbe, iveǥey nu kediey is menge vuvungan he insaad kediey te \sc Nengazen\sc*. Iyan ka mismu nekezineg dengan he iyan menge meǥinged kayi is menge kevuwazan ni Anak ne melig-en is menge inged dan he miberengbeng. Piru pinaaǥi te tavang te \sc Nengazen\sc* edsegseǥen ku sikandan keniyan he tanà su iyan heeyan insaad din kediey.” 
\p  
\v 13 Mibpenubtuvazan ni Josue si Caleb is anak ni Jefune, ne imbeǥey kandin is Hebron he para egkepengevilin din.  
\v 14 Umbe, taman en guntaan, is Hebron gaked te menge kevuwazan ni Caleb te anak ni Jefune te Kinishanen, su ǥeinà te mibpezumdumahan ni Caleb is \sc Nengazen\sc* he Megbevayà te Israel.  
\v 15 Dengan Kiriat Arba is ngazan te Hebron, su tedeman ki Arba te utew nevantug he kevuwazan ni Anak. 
\p Dutun he timpu neengked is tebek diyà te tanà te menge Israilihanen. 
\c 15  
\s1 Is Tanà he Imbeǥey ziyà te Tribu ni Juda 
\p  
\v 1 Is tanà he naangken te tribu ni Juda he mibahin diyà te kada pemilya zan. Nekeuma heini ziyà te dulunà te Edom he zapit egkezivavà, he sungkù te sibsivayan he Zin.  
\v 2 Is divavà he dulunà kayi he tanà, puun te egkezivavà he vahin te Daǥat he Minatey,  
\v 3 pehendiyà te egkezivavà te Beyeey te Akrabim taman te sibsivayan he Zin, pehendiyà heini te egkezivavà te Kadesh Barnea, ebpekevayà heini te Hezron petekezeg diyà te Adar, ne mibulegkù pehendiyà te Karka,  
\v 4 ne nekevayà diyà te Azmon, he nekeikul te zal-ug he dulunà te Ehipto taman te Zaǥat he Mediteraneo. Iyan heini dulunà te Juda ziyà te zivavà. 
\p  
\v 5 Is dulunà diyà te edsilaan ne iyan is Daǥat he Minatey taman te idsimbuwang te Wahig he Jordan. 
\p Is dulunà diyà te zizaya ebpuun daan diyà te idsimbuwang te Wahig he Jordan  
\v 6 petekezeg diyà te Bet Holga, pehendiyà te egkezizayà te Bet Araba, petekezeg taman te Batu ni Bohan te anak ni Reuben.  
\v 7 Ne puun dutun, mibpehendiyà heini te Suǥud te Acor taman te Debir, ne mibulegkù diyà te zizaya pehendiyà te Gilgal he zehipag te Beyeey te Adumim he zivavà he vahin te zal-ug. Pelaus diyà te menge serebseb diyà te En Shemesh, taman te En Rogel.  
\v 8 Puun dutun mibpehendiyà heini te Suǥud-suǥud te Ben Hinom he ebpekevayà diyà te menge kelendiǥan diyà te zivavà taman te inged te menge Jebusihanen. (Heini he inged iyan is Jerusalem.) Ne mibpetekezeg heini pehendiyà te puntur te vuntud he zapit te edsenlepan he Suǥud-suǥud te Ben Hinom, diyà te purù te egkezizaya te Suǥud he Refaim.  
\v 9 Ne puun dutun midlaus heini ziyà te Serebseb te Neftoa, ne ebpuun dutun ebpehendiyà te menge inged he uvey te Buntud he Efron. Ne mibulegkù heini petupang diyà te Baala he iyan is Kiriat Jearim,  
\v 10 ne mid-uman mebulegkù diyà dapit te edsenlepan te Baala pehendiyà te Buntud he Seir. Ne midlaus heini ziyà te egkezizayà he kelendiǥan te Buntud he Jearim he iyan is Kesalon, pehendiyà te Bet Shemesh wey midlaus diyà te Timnah.  
\v 11 Midlaus heini ziyà te egkezizaya he kelendiǥan te Ekron ne mibulegkù pehendiyà te Shikeron, he ebpekevayà te Buntud he Baala taman te Jabneel. Ne midsangkù heini ziyà te Zaǥat he Mediteraneo,  
\v 12 he iyan daan dulunà kayi he zapit te edsenlepan. 
\p Iyan heini nekeliǥuy he zulunà te tanà he mibahin diyà te menge pemilya te tribu ni Juda. 
\p  
\v 13 Midtuman ni Josue is insuǥù kandin te \sc Nengazen\sc*, umbe imbeǥey zin is senge vahin duen te tanà te tribu ni Juda ziyà te ki Caleb he anak ni Jefune. Heini he tanà iyan is Kiriat Arba, he iyan is Hebron. (Su ngazan heini ni Arba te amey ni Anak.)  
\v 14 Midsegseg ni Caleb puun dutun he tanà is tetelu he kevuwazan ni Anak he iyan is menge pemilya ni Sheshai, ki Ahinam, wey ki Talmai.  
\v 15 Ne zutun midsurung dan is Debir (he migngezanan dengan te Kiriat Sefer).  
\v 16 Migkaǥi si Caleb te, “Ibpeesawa ku is anak ku he si Acsa te etew he ebpekaaǥew te Kiriat Sefer.” 
\p  
\v 17 Si Otniel he anak ni Kenaz te hazi ni Caleb iyan nekaaǥew zutun he inged. Umbe impeesawa ni Caleb kandin is anak din he si Acsa.  
\v 18 Ne hein neked-esawe en haazà is dezuwa midhengyuan ni Acsa is esawa zin he mebuyù diyà te amey zin te tanà para meumani is tanà dan. Ne zutun midhendiyà si Acsa te ki Caleb, ne hein nekerenè en sikandin puun te asnu zin, mid-insaan sikandin ni Caleb ke hengkey is tuud din.  
\v 19 Midtavak si Acsa te, “Umani a kenikew beǥayi te pebur, iyan pezem suat ku he ebeǥayan a kenikew te tanà he zuen duen serebseb su is tanà he imbeǥey nu kedì diyà te Negev wazà duen serebseb.” Umbe imbeǥey ni Caleb kandin is menge lugar he zuen duen menge serebseb diyà te vuvungan wey alug. 
\s1 Is menge Inged te Tribu ni Juda 
\p  
\v 20 Iyan heini menge inged he nepengevilin te tribu ni Juda he mibahin diyà te kada pemilya zan:  
\v 21 Is menge inged he kinepuruan he egkezivavà he ziyà te Negev he uvey te dulunà te Edom he iyan is: Kabzeel, Eder, Jagur,  
\v 22 Kina, Dimona, Adada,  
\v 23 Kedesh, Hazor, Itnan,  
\v 24 Zif, Telem, Bealot,  
\v 25 Hazor Hadata, Keriot Hezron (he iyan is Hazor),  
\v 26 Amam, Shema, Molada,  
\v 27 Hazar Gada, Heshmon, Bet Pelet,  
\v 28 Hazar Shual, Beersheba, Biziotia,  
\v 29 Baala, Iim, Ezem  
\v 30 Eltolad, Kesil, Horma,  
\v 31 Ziklag, Madmana, Sansana,  
\v 32 Lebaot, Shilhim, Ain, wey Rimon: 29 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 33 Is menge inged diyà te menge mibuntud-buntud diyà te edsenlepan iyan is: Eshtaol, Zora, Ashna,  
\v 34 Zanoa, En Ganim, Tapua, Enam,  
\v 35 Jarmut, Adulam, Soco, Azeka,  
\v 36 Shaaraim, Aditaim, wey Gedera (etawa Gederotaim): ne 14 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 37 Ragkes daan is Zenan, Hadasha, Migdal Gad,  
\v 38 Dilean, Mizpa, Jokteel,  
\v 39 Lakish, Bozkat, Eglon,  
\v 40 Cabon, Lamas, Kitlish,  
\v 41 Gederot, Bet Dagon, Naama, wey Makeda: ne16 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 42 Is Libna, Eter, Ashan,  
\v 43 Ifta, Ashna, Nezib,  
\v 44 Keila, Aczib, wey Maresha: ne 9 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 45 Ragkes daan is Ekron wey malù dezekelà he inged wey is dezeisey he inged diyà te peliǥuy kayi,  
\v 46 wey is langun he malù dezekelà wey dezeisey he inged he uvey te Ashdod puun te Ekron pehendiyà te Daǥat he Mediteraneo. 
\p  
\v 47 Neragkes daan kayi is Ashdod wey Gaza, wey is malù dezekelà wey is dezeisey he menge inged kayi taman te wahig he dulunà te Ehipto wey te veyvey te Zaǥat he Mediteraneo. 
\p  
\v 48 Is malù dezekelà he menge inged diyà te menge vuntud iyan is: Shamir, Jatir, Soco,  
\v 49 Dana, Kiriat Sana (he iyan is Debir),  
\v 50 Anab, Eshtemo, Anim,  
\v 51 Goshen, Holon, wey Gilo: ne 11 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 52 Is Arab, Duma, Eshan  
\v 53 Janim, Bet Tapua, Afeka,  
\v 54 Humta, Kiriat Arba (he iyan is Hebron), wey Zior: ne 9 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 55 Is Maon, Carmel, Zif, Juta,  
\v 56 Jezreel, Jokdeam, Zanoa,  
\v 57 Kain, Gibea wey Timnah: ne 10 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.  
\v 58 Is Halhul, Bet Zur, Gedor,  
\v 59 Maarat, Bet Anot, wey Eltekon: ne 6 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 60 Is Kiriat Baal (he iyan is Kiriat Jearim) wey is Raba: ne 2 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 61 Is malù dezekelà he menge inged diyà te sibsivayan iyan is: Bet Araba, Midin, Secaca,  
\v 62 Nibshan, is Inged te Timus wey is En Gedi: ne 6 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 63 Piru wazà mesegseg te tribu ni Juda is menge Jebusihanen he meǥinged diyà te Jerusalem. Umbe taman en guntaan kemulu pa sikandan ebpemen-ubpà dutun duma te tribu ni Juda. 
\c 16  
\s1 Is Tanà he Imbeǥey ziyà te Tribu ni Efraim wey ni Manase 
\p  
\v 1 Is tanà he imbeǥey ziyà te menge kevuwazan ni Jose ne puun te Wahig he Jordan uvey te Jerico, diyà te edsilaan he vahin te menge serebseb diyà te Jerico pehendiyà te sibsivayan pelaus diyà te menge vuvungan taman te Betel.  
\v 2 Puun te Betel (he iyan is Luz), ne ebpekevayà diyà te Atarot he mid-ubpaan te menge Arkanhen.  
\v 3 Ne petupang heini ziyà te edsenlepan pehendiyà te lugar te menge Jafletnen, pelaus en diyà te zulunà te Bet Horon, pelaus te Gezer taman te Daǥat he Mediteraneo.  
\v 4 Iyan heini kevahin te tanà he naangken te tribu ni Manase wey ni Efraim te menge kevuwazan ni Jose. 
\p  
\v 5 Iyan heini vahin te tribu ni Efraim he impemeǥey ziyà te kada pemilya zan: is dulunà kayi, ne ziyà te edsilaan puun te Atarot Adar pehendiyà te ebpekehinugnew te Bet Horon  
\v 6 pelaus diyà te Daǥat he Mediteraneo. Is dulunè dan diyà te zizaya ne puun te Micmetat. Ne mibulegkù heini pehendiyà te edsilaan he ebpekevayà te Taanat Shilo pehendiyà te edsilaan he vahin te Janoa.  
\v 7 Puun te Janoa impetupang heini ziyà te Atarot wey Naara, he ebpekevayà te Jerico pehendiyà te Wahig he Jordan.  
\v 8 Puun te Tapua, is dulunà impehendiyà te edsenlepan, nekeikul te zal-ug he Kana pelaus diyà te Daǥat he Mediteraneo. Iyan heini tanà he imbeǥey ziyà te tribu ni Efraim he mibahin diyà te kada pemilya zan.  
\v 9 Ragkes kayi is malù dezekelà wey dezeisek he menge inged he nesakup te tanà te menge kevuwazan ni Manase.  
\v 10 Wazè dan segseǥa is menge Canaanhen he ebpemen-ubpà diyà te Gezer; umbe zuen menge Canaanhen he nengungubpaan duma te menge Efraimnen taman en guntaan, piru mid-uripen dan sikandan. 
\c 17  
\s1 Is Tanà te Ketengà he Tribu ni Manase 
\p  
\v 1 Duen daan tanà he imbeǥey para te kevuwazan ni Manase te kakey he anak ni Jose. Is Gilead wey is Bashan he ziyà dapit te edsilaan te Wahig he Jordan imbeǥey ziyà te pemilya ni Makir su ǥeina te beǥani sikandin. (Si Makir he amey ni Gilead, iyan kinekekayan he anak ni Manase.)  
\v 2 Is tanà he ziyà dapit te edsenlepan te Wahig he Jordan, imbeǥey ziyà te zuma he menge kevuwazan ni Manase he iyan is menge pemilya ni Abiezer, Helek, Asriel, Shekem, Hefer, wey Shemida. Mibahinbahin heini ziyà te kada pemilya zan. 
\p  
\v 3 Ne zutun duen etew he iyan ngazan din si Zelofehad he anak ni Hefer te apù ni Gilead. Si Gilead anak ni Makir, ne si Makir anak ni Manase. Heini si Zelofehad wazè din menge anak he maama. Kekenà, pudu zà bahi he iyan ensi Mala, Noa, Hogla, Milca wey Tirza.  
\v 4 Midhendiyà dan te ki Eleazar he memumuhat, ki Josue he anak ni Nun, wey ziyà te menge pengulu, ne ke sikandan te, “Midsuǥù te \sc Nengazen\sc* si Moises he ebpeveǥayan key te tanà iring te menge maama he menge kezuzumahi zey.” Umbe mibeǥayan sikandan te kandan he vahin su iyan heini migkaǥi te \sc Nengazen\sc*.  
\v 5 Iyan heini hinungdan ke maan is nekaangken is tribu ni Manase te sepulù he vahin duen te tanà, gawas te Gilead wey Bashan he ziyà te edsilaan te Jordan,  
\v 6 su in-iring te menge kevuwazan din he menge maama is menge kevuwazan din he menge vahi su elin sikandan mibeǥayi te tanà. Is Gilead imbeǥey ziyà te zuma pa he menge kevuwazan ni Manase. 
\p  
\v 7 Is dulunà te tanà ni Manase, ne puun te Asher taman te Micmetat, diyà dapit te edsilaan he vahin te Shekem ne impehendiyà heini te zivavà, pehendiyà te tanà te menge meǥinged diyà te En Tapua.  
\v 8 (Is tanà he ebpekeelingkus te Tapua gaked te tribu ni Manase, piru is Tapua mismu he ziyà te dulunà te tanà ni Manase gaked te menge kevuwazan ni Efraim).  
\v 9 Ne is dulunà mibpehendiyà te zal-ug he Kana. Duen dezekelà he inged diyà te zivavà he vahin duen te zal-ug he ǥaked te tribu ni Efraim, minsan pa te neseled heini te tanà te tribu ni Manase. Is dulunà te tribu ni Manase midlaus diyà te egkezizaya he vahin duen te zal-ug taman te Daǥat he Mediteraneo.  
\v 10 Is tanà he ziyà te zivavà duen te zal-ug, ne gaked te tribu ni Efraim, ne is tanà he ziyà te zizaya zuen te zal-ug ne ǥaked te tribu ni Manase. Is dulunà te tribu ni Manase ziyà te edsenlepan iyan is Daǥat he Mediteraneo. Ne ziyà te zizaya he zapit te edsenlepan te tribu ni Manase dutun is tribu ni Asher, ne ziyà te zizaya he zapit te edsilaan dutun is tribu ni Isachar. 
\p  
\v 11 Diyà te tanà ni Isacar wey ni Asher, duen dutun menge lugar he ǥaked ni Manase he iyan is: Bet Shean, Ibleam, Dor (etawa Nafot), Endor, Taanac, Megido, wey is malù dezekelà he menge inged diyà te peliǥuy kayi.  
\v 12 Piru heini he menge inged wazà meubpai te menge kevuwazan ni Manase, su kenè dan egkesegseg is menge Canaanhen dutun.  
\v 13 Piru hein mibmelig-en en is menge Israilihanen, mid-uripen dan haazà is menge Canaanhen, piru wazè dan gihapun evuǥa sikandan. 
\p  
\v 14 Migkaǥi is menge kevuwazan ni Jose ziyà te ki Josue te, “Maan is senge vahin dà duen te tanà is imbeǥey nu kenami? Utew key mahabet su midtuvazan key te \sc Nengazen\sc*.” 
\p  
\v 15 Midtavak si Josue te, “Emun utew kew en mahabet ne kenà ereg keniyu is menge vuvungan te Efraim, hendiyè kew te menge ketelunan te menge Pirisihanen wey menge Ripanhen. Ne hiǥawan kew ziyà te para keniyu.” 
\p  
\v 16 Mid-uman megkaǥi is menge kevuwazan ni Jose te, “Kenà ereg kenami is menge vuvungan, ne kenè dey egkezaag is menge Canaanhen diyà te menge suǥud su zuen dan menge kerwahi he putew. Ne iring ded daan te menge Canaanhen diyà te Bet Shean wey ziyà te menge inged he peliǥuy kayi, wey ziyà te Suǥud he Jezreel.”  
\v 17 Mid-uman medtavak si Josue te, “Geina te utew kew mahabet wey utew kew mekeǥeǥehem ne kenà senge vahin dà is bahin niw.  
\v 18 Egkaangken niw zaan is menge ketelunan diyà te vuvungan. Hiǥewani niw haazà is menge ketelunan ne egkaangken niw is kinetivuukan kayi. Ebpekehimu kew te kedsegseg te menge Canaanhen minsan mekeǥeǥehem dan wey zuen dan menge kerwahi he putew.” 
\c 18  
\s1 Is Kebehina te Nesamà he Tanà 
\p  
\v 1 Ne hein naaǥew en te tivuuk he keet-etawan te Israel haazà is tanà, midtiǥum sikandan is langun diyà te Shilo, ne mibaal sikandan te Tulda he Edtelevukaayan dan.  
\v 2 Duen pa pitu he tribu te menge Israilihanen he wazè pa meveǥayi te kandan he vahin duen te tanà.  
\v 3 Umbe, migkaǥi si Josue ziyà te menge Israilihanen te, “Keenu niw pe bes ed-engkena is tanà he imbeǥey keniyu te \sc Nengazen\sc* he Megbevayà te menge kepuun niw?  
\v 4 Pilì kew te tigtetelu he etew ziyà te kada tribu niw. Ibpesusi ku kandan is tivuuk he tanà su para mesevuki zan te tuus is egkesuatan dan te ed-angken. Ne edlikù sikandan kayi te kediey he ed-uwit te vineelan dan he mapa he egkeehè ta zutun ke ebmenmenuwen heini te kebahin.  
\v 5 Kinahanglan he ebehinen haazà is tanà te pitu he vahin. Kenà idragkes is tanà te tribu ni Juda ziyà te zivavà wey is tanà te menge tribu ni Jose ziyà te zizaya.  
\v 6 Isurat niw is menge zulunà duen te pitu he vahin he tanà, ne uwita niw kayi te kediey, su edripahan ku heini ziyà te etuvangan te \sc Nengazen\sc* he Megbevayè tew.  
\v 7 Piru kenè mulà ebehinan te tanà is menge Levihanen su iyan kandan he vahin is kebpenilbi te \sc Nengazen\sc* pinaaǥi te kegkememumuhat dan. Is menge tribu ni Gad, ni Reuben, wey ketengà he tribu ni Manase nekezawat en te kandan he vahin diyà te tanà he zapit te edsilaan te Jordan, he imbeǥey kandan ni Moises te suluǥuen te \sc Nengazen\sc*.” 
\p  
\v 8 Ne hein egenat en sikan is nepilì he menge etew, migkaǥi si Josue ziyà te kandan te, “Susiya niw is tanà ne vaal kew te mapa zin. Ne likù kew zini te kediey kayi te Shilo, su edripahan ku heini ziyà te etuvangan te \sc Nengazen\sc* ke hentei ki tribu is egkevehinan te kada vahin dutun te tanà.”  
\v 9 Umbe, migenat haazà is menge etew te kedsusi zuen te tanà. Ne mibaal zan te mapa kayi he ebpaahà he pitu he vahin haazà is tanà. Ne inlista zan is dezekelà wey malù dezekelà he menge inged he nesakup te kada senge vahin. Ne kegkepasad dutun midlikù dan diyà te ki Josue ziyà te Shilo.  
\v 10 Ne pinaaǥi te kedripa mibeǥayan ni Josue te kandan he vahin is menge tribu te Israel he wazè pa kandan he tanà. 
\s1 Is Tanà he Imbeǥey ziyà te Tribu ni Benjamin 
\p  
\v 11 Is nehuna he neveǥayan pinaaǥi te kedripaha zuen te tanà iyan is tribu ni Benjamin. Is kandan he vahin nekepetug-elang te vahin te tribu ni Juda wey te menge tribu ni Jose.  
\v 12 Is dulunà kayi ziyà te zizaya ne puun te Wahig he Jordan, ne mibpehendiyè te zizaya he vahin te Jerico, pehendiyà en te menge vuvungan diyà te edsenlepan taman te sibsivayan te Bet Aven.  
\v 13 Ne puun dutun ebpehendiyà heini te zivavà he kelendiǥan te Luz (he iyan is Betel), ne mibpetupang heini ziyà te Atarot Adar, diyà te vuntud he ziyà te zivavà he vahin te alug he Bet Horon.  
\v 14 Puun dutun, ebpehendiyà heini te zapit te edsenlepan te vuntud he ebpekesinaru te Bet Horon diyà te zivavà. Midsangkù heini ziyà te Kiriat Baal (he iyan is Kiriat Jearim), he sevaha he zekelà he inged te tribu ni Juda. Iyan heini zulunà diyà te edsenlepan. 
\p  
\v 15 Is dulunà diyà te zivavà ne puun te zulunà te Kiriat Jearim. Puun dutun ebpehendiyà heini te edsenlepan diyà te menge teheb diyà te Neftoa.  
\v 16 Mibpetupang heini ziyà te lugtenaan te vuntud he zehipag te Suǥud-suǥud he Ben Hinom he ziyà te zizaya he vahin te Suǥud he Refaim. Midlaus heini ziyà te Suǥud-suǥud he Ben Hinom, nekeikul te zivavà he kelendiǥan te inged te menge Jebusihanen, pelaus diyà te En Rogel.  
\v 17 Ne mibulegku heini pezizaya pehendiyà te En Shemesh, laus diyà te Gelilot he atbang te Beyeey te Adumim, ne mibpetupang diyà te Batu ni Bohan te anak ni Reuben.  
\v 18 Puun dutun nekevayà heini te zizaya he kelendiǥan he atbang te Araba, ne midtupang dutun mismu he suǥud.  
\v 19 Ne midtupang en maan diyà te zizaya he kelendiǥan te Bet Holga, ne midunggù diyà te zizaya he suyuk te Daǥat he Minatey, he iyan divavà he purù te Wahig he Jordan. Iyan heini zulunà diyà te zivavà. 
\p  
\v 20 Is Wahig he Jordan iyan dulunà diyà te edsilaan. Iyan heeyan menge zulunà te tanà he naangken te menge pemilya te tribu ni Benjamin. 
\s1 Is menge Inged he Naangken te Tribu ni Benjamin 
\p  
\v 21 Iyan heini zezekelà he menge inged he imbeǥey ziyà te tribu ni Benjamin he mibahin diyà te kada pemilya zan: 
\p Jerico, Bet Hogla, Emek Keziz,  
\v 22 Bet Araba, Zemaraim, Betel,  
\v 23 Avim, Para, Ofra,  
\v 24 Kefar Amoni, Ofni, wey Geba: 12 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.  
\v 25 Ne elin ebpekeuman kayi is Gibeon, Rama, Beerot,  
\v 26 Mizpa, Kefira, Moza,  
\v 27 Rekem, Irpeel, Tarala,  
\v 28 Zela, Ha Elef, Jebus (he iyan Jerusalem), Gibea, wey Kiriat Jearim: ne 14 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p Iyan heini nepengevilin te tribu ni Benjamin he mibahin diyà te kada pemilya zan. 
\c 19  
\s1 Is Tanà he Imbeǥey ziyà te Tribu ni Simeon 
\p  
\v 1 Is ikezuwa he neveǥayan te tanà pinaaǥi te kedripa iyan is menge pemilya te tribu ni Simeon. Is kandan he nepengevilin, diyà te teliwazà te tanà he imbeǥey ziyà te tribu ni Juda.  
\v 2 Neselakup kayi is Beersheba, Sheba, Molada,  
\v 3 Hazar Shual, Bala, Ezem,  
\v 4 Eltolad, Betul, Horma,  
\v 5 Ziklag, Bet Marcabot, Hazar Susa,  
\v 6 Bet Lebaot, wey Sharuhen: ne 13 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 
\p  
\v 7 Iyan nekeuman kayi is Ain, Rimon, Eter, wey Ashan: ne 4 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged,  
\v 8 taman te Baalat Beer (he iyan is Rama) diyà te Negev. 
\p Iyan heini nepengevilin te tribu ni Simeon he mibahin diyà te kada pemilya zan.  
\v 9 Is duma kayi ne kevahin te tanà he imbeǥey ziyà te tribu ni Juda su subra heini para kandan. Iyan heini hinungdan ke maan is diyà te seled te tanà te tribu ni Juda is bahin te tribu ni Simeon. 
\s1 Is Tanà he Imbeǥey ziyà te Tribu ni Zebulun 
\p  
\v 10 Is iketulu he mibehinan te tanà pinaaǥi te kedripa iyan is menge pemilya te tribu ni Zebulun. 
\p Is dulunà te tanè dan ebpuun diyà te Sarid.  
\v 11 Ne puun te Sarid mibpehendiyà heini te edsenlepan pehendiyà en te Marala, te Dabeshet, ne midlaus diyà te zal-ug diyà te edsilaan te Jokneam.  
\v 12 Puun te zivaluy he vahin te Sarid, is dulunà kayi mibpehendiyà te edsilaan pehendiyà te zulunà te Kislot Tabor, pelaus diyà te Daberat wey te Jafia.  
\v 13 Puun dutun, mibpehendiyà heini te edsilaan te Gat Hefer, diyà te Et Kazin, wey te Rimon, ne mibulegkù heini ziyà te Nea. 
\p  
\v 14 Is dulunà te Zebulun diyà te zizaya nekevayà te Hanaton, ne midsangkù diyà te Suǥud te Ifta El.  
\v 15 Ne 12 he dezekelà he inged is nesakup te Zebulun, ne ebpekeuman kayi is dezeisey he menge inged diyà te peliǥuy kayi he menge inged. Nekeuman pa kayi is menge inged he Katat, Nahalal, Shimron, Idala, wey Betlehem.  
\v 16 Iyan heini menge inged wey zezeisey he menge inged he nezawat te tribu ni Zebulun, he mibahin diyà te kada pemilya zan. 
\s1 Is Tanà he Imbeǥey ziyà te Tribu ni Isachar 
\p  
\v 17 Is ikeepat he mibehinan te tanà pinaaǥi te kedripa iyan is menge pemilya te tribu ni Isachar.  
\v 18 Iyan heini menge inged he nesakup dan: Jezreel, Kesulot, Shunem,  
\v 19 Hafaraim, Shion, Anaharat,  
\v 20 Rabit, Kishion, Ebez,  
\v 21 Remet, En Ganim, En Hada, wey Bet Pazez.  
\v 22 Is dulunà nekeuma ziyà te Tabor, diyà te Shahazuma, wey te Bet Shemesh, ne ziyà metaman te Wahig he Jordan: ne 16 he menge inged is nesakup te Isacar, ne ebpekeuman kayi is dezeisey he menge inged diyà te peliǥuy kayi he menge inged.  
\v 23 Iyan heini nepengevilin te tribu ni Isachar he mibahin diyà te kada pemilya zan. 
\s1 Is Tanà he Imbeǥey ziyà te Tribu ni Asher 
\p  
\v 24 Is ikelima he mibehinan te tanà pinaaǥi te kedripa iyan is menge pemilya te tribu ni Asher.  
\v 25 Iyan heini menge inged he nesakup dan: 
\p Helkat, Hali, Beten, Acshaf,  
\v 26 Alamelec, Amad, wey Mishal. Is dulunà kayi ziyà te edsenlepan mibpuun te Carmel wey te Shihor Libnat.  
\v 27 Ne mibulegku heini ziyà te edsilaan pehendiyà te Bet Dagon ne nekeuma ziyà te Zebulun wey te Suǥud-suǥud te Ifta El. Ne mibpehendiyà heini te zizaya pehendiyà te Bet Emek wey Neil. Ne midlaus heini ziyà te zizaya pehendiyà te Cabul,  
\v 28 Ebron, Rehob, Hamon, Kana, taman te Zekelà he Sidon.  
\v 29 Ne mibulegku heini pehendiyà te Rama, ne midlaus heini ziyà te vinerengbeng he inged he Tyre, ne mibpehendiyà te Hosa, ne ziyà metaman te Daǥat he Mediteraneo. Is duma pa he menge inged he nesakup dan iyan is: Mahabal, Aczib,  
\v 30 Umma, Afek, wey Rehob: ne 22 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged.  
\v 31 Iyan heini menge inged he nepengevilin te tribu ni Asher he mibahin diyà te kada pemilya zan. 
\s1 Is Tanà he Imbeǥey ziyà te Tribu ni Naftali 
\p  
\v 32 Is ikeenem he mibehinan te tanà pinaaǥi te kedripa iyan is menge pemilya te tribu ni Naftali.  
\v 33 Is dulunè dan mibpuun te Helef wey te kayu he ulayan diyà te Zaananim, mibpehendiyà te Adami Nekeb wey Jabneel midlaus diyà te Lakum, ne ziyà metaman te Wahig he Jordan.  
\v 34 Puun dutun mibulegkù heini ziyà te edsenlepan, pehendiyà te Aznot Tabor, ne zutun mibpehendiyà te Hukok taman te dulunà te Zebulun diyà te zivavà, diyà te dulunà te Asher ziyà te edsenlepan, wey te Wahig he Jordan diyà te edsilaan.  
\v 35 Is duma he vinerengbeng he menge inged he nesakup kayi iyan is: Zidim, Zer, Hammat, Rakat, Kineret,  
\v 36 Adama, Rama, Hazor,  
\v 37 Kedesh, Edrei, En Hazor,  
\v 38 Iron, Migdal El, Horem, Bet Anat, wey Bet Shemesh: ne 19 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged.  
\v 39 Iyan heini menge inged he nepengevilin te tribu ni Naftali, he mibahin diyà te kada pemilya zan. 
\s1 Is Tanà he Imbeǥey ziyà te Tribu ni Dan 
\p  
\v 40 Is ikepitu he mibehinan te tanà pinaaǥi te kedripa iyan is menge pemilya te tribu ni Dan.  
\v 41 Iyan heini menge inged he nesakup dan: Zora, Eshtaol, Ir Shemesh,  
\v 42 Shaalabin, Ayalon, Itla,  
\v 43 Elon, Timna, Ekron,  
\v 44 Elteke, Gibeton, Baalat,  
\v 45 Jehud, Bene Berak, Gat Rimon,  
\v 46 Me Jarkon, wey Rakon, wey is tanà atbang te Jopa.  
\v 47 Edlised is menge kevuwazan ni Dan te ked-aǥew zuen te tivuuk he tanà he imbahin kandan, umbe iyan dan dà dèpa midsurung is Leshem ne migerè dan is meǥinged kayi. Naaǥew zan heini ne zutun dan med-ubpà. Ne mid-ilisan dan is ngazan kayi he Leshem te Dan, he iyan ngazan te kepuun dan he si Dan. 
\p  
\v 48 Iyan heini menge inged he nepengevilin te tribu ni Dan, he mibahin diyà te kada pemilya zan. 
\s1 Is Tanà he Imbeǥey ziyà te ki Josue 
\p  
\v 49 Hein nepasad is kebehina zuen te tanà te menge Israilihanen, mibeǥayan dan si Josue he anak ni Nun, te kandin he vahin.  
\v 50 Midtuman dan is insuǥù te \sc Nengazen\sc*, umbe imbeǥey zan kandin is inged he mibuyù din he iyan is Timnat Sera, diyà te vuvungan te Efraim. Mibangun din umana heini he inged ne mid-ubpà sikandin dutun.  
\v 51 Is mibahin duen te tanà iyan si Eleazar he memumuhat, si Josue he anak ni Nun, wey is menge pengulu te kada tribu ni Israel. Mibeelan dan heini pinaaǥi te kedripa ziyà te etuvangan te \sc Nengazen\sc* diyà te Shilo, duen te ǥemawan te Tulda he Edtelevukaayan, ne nepasad dan en is kebahinbahin duen te tanà. 
\c 20  
\s1 Is Eputà he menge Inged 
\r (Menge Numero 35:9-15; Deuteronomio 19:1-13) 
\p  
\v 1 Ne migkaǥi is \sc Nengazen\sc* diyà te ki Josue te,  
\v 2 “Kegiyi nu is menge Israilihanen he mebpilì dan te menge inged he eputà sumalà is migkaǥi ku keniyu zengan pinaaǥi ki Moises.  
\v 3 Is etew he ebpekepatey he wazè din tivevaa, ne ebpekaaput dutun ne kenà sikandin egkekeizan te menge etew he egkesuat he ebales kandin.  
\v 4 Ebpekaaput sikandin diyà te minsan hendei zutun he menge inged, ne ed-etuvangen din diyà te pultahan te inged is ebpemendumala ne egkeǥiyen din kandan is nehitavù. Ne ibpeseled dan sikandin ne ebeǥayan dan te lugar he egkeubpaan din.  
\v 5 Ne emun ebpekeuma zutun te inged is edal-as kandin he egkesuat he ebales kandin, kinahanglan he kenà sikandin iveǥey te menge meǥinged dutun su wazè din tivevaa is kegkepetaya zin te zuma zin, wey kenà daan heini tenged te kegkepauk din.  
\v 6 Ne kenà sikandin med-awà dutun te inged taman te egkehusey haazà he rirù diyà te etuvangan te kezekelan wey taman te ebpatey is lavew he memumuhat he iyan ebpenilbi zutun he timpu. Ne emun egkehitavù en heini ne egkehimu en ke ed-ulì sikandin diyà te kandan.” 
\p  
\v 7 Umbe, mibpilì dan is Kedesh diyà te Galilea he ziyà te vuvungan te Naftali wey is Shekem diyà te vuvungan te Efraim, wey is Kiriat Arba (he iyan is Hebron), he ziyà te vuvungan te Juda.  
\v 8 Diyà te edsilaan te Wahig he Jordan he uvey te Jerico, mibpilì dan is Bezer ziyà te sibsivayan he ziyà te menge suǥud he nesakup te tanà te tribu ni Reuben, is Ramot diyà te Gilead he nesakup te tanà te tribu ni Gad, wey is Golan diyà te Bashan he nesakup te tanà te tribu ni Manase.  
\v 9 Iyan heini menge inged he eputà he mibpilì para te menge Israilihanen wey kenà menge Israilihanen he zuma zan he meǥinged. Is minsan hentei he ebpekepatey he wazè din tivevaa ebpekaaput dutun para kenà sikandin mepatey te menge egkesuat he ebales kandin te wazè pa mehusey haazà is rirù diyà te etuvangan te kezekelan. 
\c 21  
\s1 Is menge Inged he para te Tribu ni Levi 
\p  
\v 1 Ne zutun, is menge pengulu te menge kevuwazan ni Levi midhendiyà te ki Eleazar he memumuhat, ki Josue he anak ni Nun, wey ziyà te menge pengulu te kada tribu te Israel  
\v 2 diyà te Shilo he tanà te Canaan. Migkaǥi sikandan diyà te kandan te, “Midsuǥù is \sc Nengazen\sc* pinaaǥi ki Moises he ebeǥayan key te menge inged he egkeubpaan dey wey menge penebtavà he para te uyaǥen dey.”  
\v 3 Umbe, sumalà dutun te insuǥù te \sc Nengazen\sc* mibeǥayan is menge kevuwazan ni Levi te menge inged wey menge tanà he menge pepenebtavè dan he midtarin diyà te menge vahin te tanà te menge Israilihanen. 
\p  
\v 4 Is nehuna he mibeǥayan te menge inged iyan is menge kevuwazan ni Kohat. Kevahin te kevuwazan ni Kohat is menge kevuwazan ni Aaron, ne mibeǥayan sikandan te 13 he menge inged he nesakup diyà te tanà te tribu eni Juda, Simeon, wey Benjamin.  
\v 5 Is duma he menge kevuwazan ni Kohat mibeǥayan te 10 he menge inged he nesakup diyà te tanà te menge tribu eni Efraim, Dan, wey ketengà he tribu ni Manase. 
\p  
\v 6 Is menge kevuwazan ni Gershon mibeǥayan te 13 he menge inged he nesakup te menge tanà te tribu eni Isachar, Asher, Naftali, wey te ketenga he tribu ni Manase diyà te Bashan. 
\p  
\v 7 Is menge kevuwazan ni Merari mibeǥayan te 12 he menge inged he nesakup te menge tanà te menge tribu eni Reuben, Gad, wey Zebulun. 
\p  
\v 8 Pinaaǥi te kedripa, mibeǥayan te menge Israilihanen is menge kevuwazan ni Levi te menge inged wey menge penebtavà, su iyan heeyan insuǥù te \sc Nengazen\sc* ki Moises. 
\p  
\v 9-10 Iyan heini menge inged he nesakup te tanà te tribu ni Juda wey ni Simeon he imbeǥey ziyà te menge kevuwazan ni Aaron. Heini sikandan menge kevuwazan ni Kohat te anak ni Levi. Iyan sikandan nehuna he neripahan he ebeǥayan te menge inged.  
\v 11 Imbeǥey kandan is Kiriat Arba (he iyan is Hebron) ziyà te menge vuvungan te Juda, ragkes en is menge penebtavà diyà te peliǥuy kayi. (Si Arba iyan amey ni Anak.)  
\v 12 Piru is menge vevesukà wey zezeisey he menge inged diyà te peliǥuy kayi he inged imbeǥey en mulà diyà te ki Caleb te anak ni Jefune he iyan kandin he vahin.  
\v 13 Umbe, imbeǥey ziyà te menge kevuwazan ni Aaron he memumuhat is Hebron (he sevaha zuen te menge inged he eputà he ebpekaaput dutun is etew he nekepatey he wazè din tivevaa). Elin imbeǥey kandan is Libna,  
\v 14 Jatir, Eshtemoa,  
\v 15 Holon, Debir,  
\v 16 Ain, Juta, wey Bet Shemesh, ragkes is menge penebtavà kayi. Ne 9 he menge inged is nesakup te tanà te tribu ni Simeon wey ni Juda.  
\v 17 Imbeǥey pa kandan is heepat he menge inged he nesakup te tanà te tribu ni Benjamin. Heini iyan is Gibeon, Geba,  
\v 18 Anatot, wey Almon, ragkes is menge penebtavà kayi. 
\p  
\v 19 Ne 13 he menge inged langun ragkes is menge penebtavà kayi is nezawat te menge memumuhat he menge kevuwazan ni Aaron. 
\p  
\v 20-22 Is duma he menge kevuwazan ni Kohat he ebpuun diyà te tribu ni Levi nekezawat te heepat he menge inged he nesakup te tanà te tribu ni Efraim. Heini iyan is Shekem (he ziyà te vuvungan te Efraim he sevaha zuen te menge inged he eputà he ebpekaaput dutun is etew he nekepatey he wazè din tivevaa), is Gezer, Kibzaim, wey Bet Horon, ragkes is menge penebtavà kayi. 
\p  
\v 23-24 Mibeǥayan daan sikandan te heepat he menge inged he nesakup te tanà te tribu ni Dan. Iyan is: Elteke, Gibeton, Ayalon, wey Gat Rimon, ragkes is menge penebtavà kayi. 
\p  
\v 25 Ne puun daan te tanà te ketengà he tribu ni Manase he ziyà te edsenlepan nekuwa zan daan is dezuwa he inged he iyan is: Taanak wey Gat Rimon, ragkes is menge penebtavà kayi.  
\v 26 Ne 10 langun he menge inged ragkes is menge penebtavà kayi, is imbeǥey ziyà te nesamà he menge kevuwazan ni Kohat. 
\p  
\v 27 Is menge kevuwazan ni Gershon he ebpuun daan diyà te tribu ni Levi, nekezawat te zezuwa he inged he nesakup te tanà te ketengà he tribu ni Manase he ziyà dapit te edsilaan he iyan is: Golan diyà te Bashan (he sevaha zuen te menge inged he eputà he ebpekaaput dutun is etew he nekepatey he wazè din tivevaa), wey is Beeshtera, ragkes is menge penebtavà kayi.  
\v 28-29 Mibeǥayan daan sikandan te heepat he menge inged he nesakup te tanà te tribu ni Isachar he iyan is: Kishion, Daberat, Jarmut, En Ganim, ragkes is menge penebtavà kayi.  
\v 30-31 Ne zuen te tanà he nesakup te tribu ni Asher, imbeǥey ziyà te kandan is heepat he inged he iyan is: Mishal, Abdon, Helkat, wey Rehob, ragkes is menge penebtavà kayi.  
\v 32-33 Ne mibeǥayan pa sikandan te tetelu he inged he nesakup te tanà te tribu ni Naftali he iyan is: Kedesh diyà te Galilea (he sevaha zaan duen te menge inged he eputà, he zutun egkehimu he ed-aput is sevaha he etew he nekepatey he wazè din tivevaa), is Hamot Dor wey is Kartan, ragkes is menge penebtavà kayi. Ne 13 he menge inged ragkes is menge penebtavà kayi is imbeǥey ziyà te kevuwazan ni Gershon. 
\p  
\v 34-35 Is nesamà he menge kevuwazan ni Levi he menge kevuwazan ni Merari mibeǥayan te heepat he menge inged he nesakup te tanà te tribu ni Zebulun. He iyan is Jokneam, Karta, Dimna, wey Nahalal, ragkes is menge penebtavà kayi.  
\v 36-37 Mibeǥayan daan sikandan te heepat he menge inged he nesakup te tanà te tribu ni Reuben. He iyan is Bezer, Jahaz, Kedemot, wey Mefaat ragkes is menge penebtavà kayi.  
\v 38-39 Ne ziyè daan te tanà he nesakup te tanà te tribu ni Gad mibeǥayan sikandan te heepat he inged, he iyan is: Ramot he ziyà te Gilead (he sevaha zuen te menge inged he eputà he ebpekaaput dutun is etew he nekepatey he wazè din tivevaa), is Mahanaim, Heshbon, wey Jazer, ragkes is menge penebtavà kayi. 
\p  
\v 40 Ne 12 he menge inged ragkes is menge penebtavà kayi is nekuwa te menge kevuwazan ni Merari he nesakup te tanà te tribu ni Levi. 
\p  
\v 41-42 Ne 48 he menge inged ragkes is menge pepenebtavà kayi is imbeǥey ziyà te menge kevuwazan ni Levi he nesakup te tanà te menge Israilihanen. 
\p  
\v 43 Iyan heini paaǥi te kebeǥaya te \sc Nengazen\sc* diyà te Israel duen te tanà he impenaad din diyà te menge kepuun dan. Ne hein nekuwa zan en heini ne zutun en sikandan med-ubpà.  
\v 44 Ne impemelinew te \sc Nengazen\sc* is ked-ubpè dan su wazè dan en mekepekidtebek te menge kuntada zan diyà te peliǥuy, su iyan heini insaad te \sc Nengazen\sc* diyà te menge kepuun dan. Wazà sikandan mezaag te menge kuntada zan su impezaag kandan te \sc Nengazen\sc* is langun he menge kuntada zan.  
\v 45 Midtuman te \sc Nengazen\sc* is langun he insaad din diyà te menge etew te Israel. 
\c 22  
\s1 Nemenlikù diyà te Kandan he Tanà is menge Tribu te Israel he ziyà te Edsilaan 
\p  
\v 1 Ne zutun midtiǥum ni Josue is menge tribu ni Reuben, ni Gad, wey is ketengà he tribu ni Manase.  
\v 2 Ne migkeǥiyan sikandan ni Josue te, “Mibeelan niw is langun he insuǥù keniyu ni Moises he suluǥuen te \sc Nengazen\sc* ne midtuman niw zaan is langun he insuǥù ku.  
\v 3 Ne taman en guntaan wazè niw vey-ani is menge zuma niw he menge Israilihanen. Ne mibpurungan niw tumana is langun he insuǥù keniyu te \sc Nengazen\sc* he Megbevayè niw.  
\v 4 Ne ǥuntaan naangken en te zuma niw he menge Israilihanen is kelinew he insaad kandan te \sc Nengazen\sc*. Umbe, ulì kew en diyà te keniyu he tanà he ziyè layun te Wahig he Jordan, duen te tanà he imbeǥey keniyu ni Moises he suluǥuen te \sc Nengazen\sc*.  
\v 5 Piru kenè niw lipati is kedtuman te menge suǥù wey menge penurù he imbeǥey keniyu ni Moises te suluǥuen te \sc Nengazen\sc*: Mahala niw is \sc Nengazen\sc* he Megbevayè niw, pengungubpaan kew he ed-ikul te menge paaǥi zin, tumana niw is menge suǥù din, pezumazuma kew kandin, wey silbiyi niw sikandin te ebpuun te tivuuk he ǥehinawa niw wey kedsavut niw.”  
\v 6 Ne zutun mibpenubtuvazan sikandan ni Josue ne impeulì din.  
\v 7 (Is ketengà he tribu ni Manase ne mibeǥayan ni Moises te tanà diyà te Bashan, ne is ketengà pa ne mibeǥayan ni Josue te tanà diyà te zapit te edsenlepan te Jordan duma te zuma pa he menge tribu). 
\p Hein ed-ulì en sikandan mibpenubtuvazan sikandan ni Josue  
\v 8 he ke sikandin te, “Ed-ulì kew he ed-uwit te mahabet he menge ketiǥeyunan–menge uyaǥen, pelata, bulawan, brunsi, putew wey menge visti. Behini niw is menge kezuzumahi niw he ziyà te keniyu te minsan hengkey he naaǥew niw ziyà te menge kuntada niw.”  
\v 9 Ne zutun nemen-ulì is tribu ni Reuben, ni Gad, wey is ketengà he tribu ni Manase. Mid-ewaan dan is menge zuma zan he menge Israilihanen diyà te Shilo, he tanà te Canaan ne nemen-ulì sikandan diyà te Gilead, sikan is tanà he nehimu he vahin dan he insuǥù te \sc Nengazen\sc* ki Moises he iveǥey ziyà te kandan. 
\p  
\v 10 Kebpekeuma zan diyà te Gelilot, he uvey te Wahig he Jordan he nesakup pa te Canaan, mibaal sikandan dutun te zekelà he pemuhatà.  
\v 11-12 Ne hein netudtulan is duma he menge Israilihanen he mibaal te pemuhatà is tribu ni Reuben, ni Gad, wey is ketengà he tribu ni Manase ziyà te Gelilot, uvey te Wahig he Jordan he dulunà te Canaan, midtiǥum dan diyà te Shilo su ebpengandam dan te kebpekidtebek kandan.  
\v 13 Midsuǥù te menge Israilihanen si Finehas he anak ni Eleazar he memumuhat he medhendiyà te Gilead, diyà te tribu ni Reuben, ni Gad, wey te ketengà he tribu ni Manase.  
\v 14 Duen din duma he sepulù he menge pengulu he ebpuun diyà te kada tribu te Israel. Heini sikandan, menge pengulu zaan te menge pemilya te menge tribu zan.  
\v 15 Kebpekeuma zan diyà te Gilead, migkeǥiyan dan is tribu ni Reuben, ni Gad, wey is ketengà he tribu ni Manase te,  
\v 16 “Sikami is tivuuk he etew te \sc Nengazen\sc* egkesuat key he metueni zey ke maan is midlimbungan niw is Megbevayà te Israel? Nekesupak kew te \sc Nengazen\sc* pinaaǥi te kebaal niw te keugelingen niw he pemuhatà. Maan is mid-iniyuǥan niw sikandin?  
\v 17 Kenè pe be ereg is salà he neveelan tew ziyà te Peor? He tenged dutun mibpeeǥiyan kiw te \sc Nengazen\sc* te vangkit, he minsan ganì guntaan kemulu tew pa ed-entusa is rimeǥas din.  
\v 18 Ne ǥuntaan nekehimu kew pa te ked-iniyug te \sc Nengazen\sc*? Emun edsupak kew pa kandin guntaan he andew, ne keeselem egkepeukan din en is tivuuk he keet-etawan te Israel.  
\v 19 Umbe, emun egkinahanglan kew te pemuhatà su is tanà niw, kenè dait he zutun kew ed-azap, layun kew ziyà te kenami, diyà te tanà te \sc Nengazen\sc* he zutun sikan is Tulda he ed-ezapan kandin, ne ziyè kew en ubpà te kenami. Piru kenè kew vaal te selakew en he pemuhatà gawas duen te pemuhatà he para te \sc Nengazen\sc* he Megbevayè tew, su kedsupak heeyan kandin ne supak daan kenami.  
\v 20 Nelipatan niw en be is mibeelan ni Acan te anak ni Zera? Hein midsupak din is suǥù mehitenged te menge azen he para zà te \sc Nengazen\sc*, midsilutan sikandin duma te tivuuk he keet-etawan te Israel. Kenà iyan dà sikandin minatey tenged te salè din.” 
\p  
\v 21 Ne midtavak te tribu ni Reuben, ni Gad, wey te ketengà he tribu ni Manase sikan is menge pengulu te menge pemilya te Israel te:  
\v 22 “Is \sc Nengazen\sc* iyan sikan is Mekeǥeǥehem he Megbevayà! Netuenan din ke maan is mibeelan dey heini, ne ereg daan heini he egketuenan niw. Emun iyan imbeeli zey kayi is kebpekidsukulà etawa kedsupak te \sc Nengazen\sc*, ne kenè kew en tuǥut he meuyag-uyag key pa ǥuntaan he andew.  
\v 23 Emun midsupak dey is \sc Nengazen\sc* pinaaǥi te kebaal zey te keugelingen dey he pemuhatà he para te menge pemuhat he edtutungen, pemuhat he para gasa, etawa menge pemuhat he para te meupiya he kedepità, berakat he iyan en medsilut kenami is \sc Nengazen\sc*. 
\p  
\v 24 “Umbe mibeelan dey heini su nahandek key he kela ke ziyà te huziyan he timpu megkaǥi is menge kevuwazan niw ziyà te menge kevuwazan dey te, ‘Hengkey is lavet niw te \sc Nengazen\sc* he Megbevayà te Israel?  
\v 25 Midhimu te \sc Nengazen\sc* he dulunà tew is Wahig he Jordan te kedsivaya zin keniyu puun diyà te kenami. Sikiyu is menge tribu ni Reuben wey ni Gad wazè niw lavet te \sc Nengazen\sc*.’ Ne kela ke zewaya te menge kevuwazan niw is menge kevuwazan dey te ked-azap te \sc Nengazen\sc*.  
\v 26 Is tutuu, mibeelan dey heini he pemuhatà, kenà para te menge pemuhat he edtutungen wey te zuma pa he menge pemuhat,  
\v 27 kekenà, para mehimu heini he tuus he ebpetanudtanud kenami, wey keniyu, wey te peleebuten he menge kevuwazan tew he ed-azap key zaan te \sc Nengazen\sc* pinaaǥi te kebpemuhat te menge pemuhat he edtutungen, pemuhat he para te meupiya he kedepità, wey zuma pa he menge pemuhat diyà te Tulda he zutun sikandin ed-ezapa. Ne tenged kayi he pemuhatà kenà ebpekekaǥi is menge kevuwazan niw ziyà te menge kevuwazan dey he wazè dan lavet te \sc Nengazen\sc*.  
\v 28 Su emun egkehitavù he egkeǥiyan is menge kevuwazan dey te iring dutun, ebpekekaǥi sikandan te, ‘Ahaa niw man! Mibaal is menge apù dey te pemuhatà he iring duen te pemuhatà he para te \sc Nengazen\sc*, he kenà para te pemuhat he edtutungen wey te zuma pa he menge pemuhat, kekenà, para ebpetanudtanud kenami wey keniyu he sevaha zà he Megbevayà is ed-ezapen tew.’ 
\p  
\v 29 “Kenà egkehimu he edsupaken dey wey ed-iniyuǥan dey is \sc Nengazen\sc* pinaaǥi te kebaal te keugelingen dey he pemuhatà he para ebpemuhatan te menge pemuhat he edtutungen, menge pemuhat he para gasa, wey zuma pa he menge pemuhat. Iyan dà is pemuhatà para te \sc Nengazen\sc* he Megbevayè tew ziyà te Tulda he zutun sikandin ed-ezapa ereg he ebpemuhatan.” 
\p  
\v 30 Nelipey si Finehas he memumuhat, wey sikan is menge pengulu te menge pemilya te keet-etawan te Israel hein nezineg dan haazà is migkaǥi te menge tribu ni Reuben, ni Gad, wey te ketengà he tribu ni Manase.  
\v 31 Umbe, migkaǥi si Finehas he anak te memumuhat he si Eleazar te, “Netuenan tew ǥuntaan he mibpekiduma kenitew is \sc Nengazen\sc* su wazè kew medsupak kandin. Midlibri niw is Israel te silut te \sc Nengazen\sc*.” 
\p  
\v 32 Ne zutun mid-ulì diyà te Canaan si Finehas wey sikan is menge pengulu, ne migkaǥi zan diyà te menge Israilihanen is rimeǥas te kebpekidlalag dan te tribu ni Reuben wey ni Gad diyà te Gilead.  
\v 33 Ingkelipey te menge Israilihanen haazà is nezineg dan ne midalig dan is Megbevayà. Ne wazè dan en meventeeni is bahin te kedsurung dan diyà te tanà he ed-ubpaan te menge tribu ni Reuben wey ki Gad.  
\v 34 Migngezanan haazà is pemuhatà te menge tribu ni Reuben wey ki Gad te “Tuus,” su ke sikandan te, “Tuus heini para kenitew te langun he is \sc Nengazen\sc* Megbevayè tew.” 
\c 23  
\s1 Is Kebpeneltelaan ni Josue ziyà te menge Israilihanen 
\p  
\v 1 Seled te meluǥayad he timpu is kebeǥey te \sc Nengazen\sc* te kelinew ziyà te Israel su wazè en sikandan mekepekidtebek te menge kuntada zan diyà te peliǥuy zan. Ne si Josue utew en meǥurang,  
\v 2 umbe impetawag din is langun he menge etew te Israel: is menge ebpemendumala, is menge pengulu, is menge zatù, wey is menge upisyal, ne ke sikandin diyà te kandan te, “Utew ad meǥurang.  
\v 3 Neehè niw en is langun he mibeelan te \sc Nengazen\sc* he Megbevayè niw kayi te menge nasyun para keniyu. Is \sc Nengazen\sc* he Megbevayè niw iyan mibpekidtebek para keniyu.  
\v 4 Mibahinbahin ku en keniyu he para egkepengevilin te menge tribu niw is langun he tanà kayi te menge nasyun he naaǥew ku. Heini he tanà puun te Wahig he Jordan diyà dapit te edsilaan pehendiyà te Zaǥat he Mediteraneo diyà te edsenlepan. Elin daan is menge tanà te menge etew ziyà te menge nasyun he wazè tew pa maaǥew.  
\v 5 Egkehimu he egkeangken niw zed is menge tanè dan, sumalà te impesarig keniyu te \sc Nengazen\sc* he Megbevayè niw. Su edsegseǥen sikandan te \sc Nengazen\sc*. 
\p  
\v 6 “Mebpekelig-en kew, ne peniguduwi niw he metuman niw is langun he ingkesurat diyà te Libru te Kesuǥuan ni Moises. Kenè niw repasa is minsan hengkey he vahin kayi.  
\v 7 Kenè kew pekidsevaha te menge etew ziyà te menge nasyun he kemulu zuma niw, kenè niw sempita is ngazan te menge ed-ezapen dan wey kenè kew penangdù pinaaǥi te kegemita te ngazan kayi. Kenè kew zaan med-azap wey mebpenilbi kandan.  
\v 8 Pezumazuma kew te \sc Nengazen\sc* he Megbevayè niw, iring te nehuna he mibeelan niw. 
\p  
\v 9 “Midsegseg te \sc Nengazen\sc* is menge etew ziyà te zezekelà wey mekeǥeǥehem he menge nasyun hein midsurung niw sikandan, ne taman en guntaan ne wazè pa minsan sevaha he nekezaag keniyu.  
\v 10 Is minsan hentei keniyu ebpekesegseg te 1,000 he menge etew, su is \sc Nengazen\sc* iyan ebpekidtebek para keniyu, sumalà te insaad din.  
\v 11 Umbe, sigureduwa niw he mahal niw is \sc Nengazen\sc* he Megbevayè niw. 
\p  
\v 12 “Iyan, emun ed-iniyuǥan niw sikandin, wey ebpekidsevaha kew te menge etew kayi te menge nasyun he kemulu pa menge zuma niw, wey ebpekid-esawa kew kandan,  
\v 13 siguradu kenè en edsegseǥen te \sc Nengazen\sc* he Megbevayè niw heini he menge etew. Egkehimu sikandan he pekaid keniyu. Egkesekitan kew tenged kandan he henduen be te edletiguwen is menge peka niw etawa edtiyuken te zuǥi is menge mata niw. Ne kenà heini egkeengked taman te kebpemematey niw kayi te meupiya he tanà he imbeǥey keniyu te \sc Nengazen\sc* he Megbevayè niw. 
\p  
\v 14 “Hapit ad ebpatey. Netuenan niw pinaaǥi te tivuuk he gehinawa niw wey isip niw he midtuman te \sc Nengazen\sc* he Megbevayè niw is langun he menge meupiya he insaad din keniyu. Wazà minsan sevaha he wazà metuman.  
\v 15-16 Ne iring te midtuman te \sc Nengazen\sc* he Megbevayè niw is langun he menge meupiya he insaad din keniyu, edtumanen din daan is kezeetan he impetizaan din keniyu emun edsupaken niw is kebpekid-uyun keniyu te \sc Nengazen\sc* he Megbevayè niw he ibpetuman din keniyu. Wey emun ed-azap kew wey ebpenilbi kew te tarù he menge megbevayà, ibpeǥezaman din keniyu is pauk din, ne seled dà te mevavà he timpu egkeǥerè kew is langun kayi te meupiya he tanà he imbeǥey zin keniyu.” 
\c 24  
\s1 Mibpesarig is menge Israilihanen he Ebelvelewanan Dan is Kedtuman Dan te Paaǥi te Kebpekid-uyun te Megbevayè 
\p  
\v 1 Ne zutun midtiǥum ni Josue is langun he tribu te Israel ziyà te Shekem. Ne mid-umew zin is ebpemendumala, menge pengulu, menge zatù, wey menge upisyal te Israel, ne mid-uvey zan diyà te etuvangan te Megbevayà. 
\p  
\v 2 Migkaǥi si Josue ziyà te langun he menge etew te, “Iyan heini migkaǥi te \sc Nengazen\sc* he Megbevayà te Israel: Dengan, menge meǥinged diyà layun te Wahig he Eufrates is menge kepuun niw ne ebpemen-azap dan te zuma he menge ed-ezapen. Is sevaha kandan iyan si Tera is amey ni Abraham wey ki Nahor  
\v 3 Iyan, migkuwa ku si Abraham puun dutun he lugar ne migiyahan ku sikandin pehendiyà te tanà te Canaan, ne impemahabet ku is menge kevuwazan din. Mibeǥayan ku sikandin te anak he si Isaac,  
\v 4 ne si Isaac ne iyan amey ni Esau wey ni Jacob. Imbeǥey ku ki Esau is buvungan te Seir he kandin he vahin, piru is kepuun niw he si Jacob wey is menge anak din ne midhendiyà te Ehipto.  
\v 5 Kedlavey te menge timpu, midsuǥù ku ziyà te Ehipto si Moises wey si Aaron te kedlibri keniyu ziyà, mibpeeǥiyan ku te vangkit is Ehipto ne kegkepasad dutun, impeǥawas ku sikiyu.  
\v 6-7 Piru hein nekeume en diyà te Zaǥat he Meriǥà is menge kepuun niw, midal-as sikandan te menge Ehiptohanen he ebpemen-untud te menge kerwahi zan wey menge kudè dan. Mibpetavang dan kedì, umbe insavuk ku ziyà te mid-elangan dan wey te menge Ehiptohanen is merusirem. Ne midlened ku is menge Ehiptohanen dutun te zaǥat. Neehè niw en is mibeelan ku ziyà te menge Ehiptohanen. Ne mid-ubpè kew ziyà te sibsivayan seled te meluǥayad he timpu. 
\p  
\v 8 “Ne mid-uwit ku sikiyu ziyà te tanà te menge Amorihanen diyà dapit te edsilaan te Wahig he Jordan. Nekidtebek dan keniyu piru imbeǥey ku sikandan keniyu. Midèdeetan ku sikandan ne nekuwa niw is tanè dan.  
\v 9 Ne nekidtebek te Israel is hadì te Moab he si Balak he anak ni Zipor. Midsuǥù din si Balaam he anak ni Beor te kedrawak keniyu.  
\v 10 Piru wazè ku tuǥuti si Balaam te kebaal kayi ziyà te keniyu. Edrewakan kew zin pezem piru mibpepenubtuvazan ku sikiyu ki Balaam, ne midlibri ku sikiyu te kegkeiza pezem keniyu ni Balak. 
\p  
\v 11 “Ne midlayun kew te Wahig he Jordan ne nekeuma kew ziyà te Jerico. Nekidtebek keniyu is menge tig-Jerico, wey is menge Amorihanen, menge Pirisihanen, menge Canaanhen, menge Hitihanen, menge Girgasihanen, menge Hivihanen, wey menge Jebusihanen. Piru nezaag niw sikandan pinaaǥi kedì.  
\v 12 Impezal-as ku te menge petiyukan sikan is dezuwa he hadì he menge Amorihanen su para zaan sikandan he mesegseg te kenè kew pa ebpekeuma. Nekezaag kew kenà tenged te menge ispada niw wey menge panè niw.  
\v 13 Mibeǥayan ku sikiyu te tanà he wazè niw heǥui. Impeubpè ku sikiyu ziyà te menge inged he kenè kew iyan mibangun duen. Egkaan kew ǥuntaan te menge paras wey menge ulibu he kenè kew iyan nemula zuen. 
\p  
\v 14 “Umbe ǥuntaan, ezapa niw is \sc Nengazen\sc* ne penilbi kew kandin te tinutuuwà. Engkezi niw en is menge ed-ezapen he ebpen-ezapen dengan te menge kepuun niw ziyà layun te Wahig he Eufrates wey ziyà te Ehipto, ne penilbi kew te \sc Nengazen\sc*.  
\v 15 Iyan, emun kenè niw igkelipey is kebpenilbi te \sc Nengazen\sc*, pilì kew ǥuntaan he andew ke hentei is edsilbiyan niw. Iyan be is menge ed-ezapen he midsilbiyan te menge kepuun niw ziyà layun te Wahig he Eufrates, etawa iyan is menge ed-ezapen te menge Amorihanen he mid-ubpaan niw ǥuntaan is tanè dan. Piru siak mulà wey is pemilya ku, \sc Nengazen\sc* is kenami he edsilbiyan.” 
\p  
\v 16 Ne midtavak is menge etew te, “Wazà kayi te isip dey he ed-iniyuǥan dey is \sc Nengazen\sc* wey ebpenilbi key te zuma he ed-ezapan.  
\v 17 Is \sc Nengazen\sc* he Megbevayè tew iyan mibpeǥawas kenitew wey te menge kepuun tew te kegkeuripen diyà te Ehipto. Ne neehè tew zaan is egkengein-inuwan he mibeelan din. Ne wazè din ituǥut he mekeizi kiw zuen te hipanew tew ziyà te teliwazà te menge nasyun he imbayè tew.  
\v 18 Dutun te kedhengkayi tew te tanà, midsegseg te \sc Nengazen\sc* is menge Amorihanen wey zuma pa he menge etew he ebpemen-ubpà kayi. Umbe ebpenilbi key zaan te \sc Nengazen\sc*, su iyan sikandin Megbevayè dey.” 
\p  
\v 19 Ne migkaǥi si Josue ziyà te menge etew te, “Kenè kew ebpekehimu he ebpenilbi te \sc Nengazen\sc* su waǥas sikandin he Megbevayà wey tengelikuzen, su kenè din egkesuatan ke zuen selakew en he ed-ezapen niw. Kenè din ibpelavey is kebpekidsukulè niw wey menge salè niw.  
\v 20 Emun ed-engkezan niw is \sc Nengazen\sc* ne ebpenilbi kew te zuma he menge ed-ezapen, egkepeukan kew zin ne edsilutan kew zin. Edèdeetan kew zin minsan pa te mibpurungan kew zin dutun te nehuna he timpu.” 
\p  
\v 21 Piru midtavak is menge etew ziyà te ki Josue te, “Ebpenilbi key iyan te \sc Nengazen\sc*.”  
\v 22 Migkaǥi si Josue te, “Iyan kew en ebpeketistiǥus te keugelingen niw he penaad, nenaad kew he ebpenilbi kew te \sc Nengazen\sc*.” Midtavak sikandan te, “Uya, iyan key en menge tistiǥus.” 
\p  
\v 23 Migkaǥi si Josue te, “Emun iyan heeyan, engkezi niw en is menge ed-ezapen niw, ne penilbi kew te \sc Nengazen\sc* he Megbevayà te Israel.”  
\v 24 Midtavak is menge etew te, “Edsilbiyan dey is \sc Nengazen\sc* he Megbevayè dey, ne edtumanen dey is menge suǥù din,” 
\p  
\v 25 Dutun he andew midheǥet ni Josue is kebpepenengdua zin te menge etew ziyà te Shekem, ne imbeǥey zin diyà te kandan is menge kesuǥuan wey menge sulunuzen.  
\v 26 Insurat din heini ziyà te Libru te Kesuǥuan te Megbevayà. Ne migkuwa sikandin te zekelà he vatu ne impelastar zin diyà te lempek te kayu he ulayan he uvey te segradu he lugar te \sc Nengazen\sc*.  
\v 27 Ne migkeǥiyan ni Josue is langun he menge etew zutun te, “Heini is batu iyan tistiǥus te kebpekidlalag te \sc Nengazen\sc* kenitew. Egkehimu heini he tistiǥus kuntra keniyu emun ed-iniyuǥan niw is Megbevayà.”  
\v 28 Ne impeulì ni Josue is menge etew ziyà te ed-ulian te kada sevaha kandan. 
\s1 Minatey si Josue wey si Eleazar 
\p  
\v 29 Ne hein neipus haazà minatey is suluǥuen te \sc Nengazen\sc* he si Josue he anak ni Nun, te keǥurang he 110 he tuig.  
\v 30 Inleveng sikandin diyà te tanè din diyà te Timnat Sera, ziyà te vuvungan te Efraim, he zizaya te Buntud he Gaash.  
\v 31 Nenilbi te \sc Nengazen\sc* is menge Israilihanen dutun te kaazen pa ni Josue. Ne minsan te minatey en si Josue mibpedayun dan gihapun he ebpenilbi te \sc Nengazen\sc* dutun te uuyag pa is ebpemendumala te menge Israilihanen he nengetau te langun he mibeelan te \sc Nengazen\sc* para te Israel. 
\p  
\v 32 Is menge tulan ni Jose he mid-uwit te menge Israilihanen puun te Ehipto inleveng diyà te Shekem, diyà te tanà he nepemasa ni Jacob te 100 he vuuk he pelata ziyà te anak ni Hamor he amey ni Shekem. Heini he tanà kevahin te tanà he nepengevilin te menge kevuwazan ni Jose. 
\p  
\v 33 Minatey zaan si Eleazar is anak ni Aaron ne inleveng diyà te Gibea, kes inged diyà te vuvungan te Efraim he imbeǥey ziyà te anak din he si Finehas.