\id JON - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2011) 
\h Jonas 
\toc1 Jonas 
\toc2 Jonas 
\toc3 Jon 
\mt1 Jonas 
\c 1  
\s1 Wazà Mebpezumazuma si Jonas te \sc Nengazen\sc* 
\p  
\v 1 Ne zuen timpu he zutun, migkeǥiyan te \sc Nengazen\sc* si Jonas he anak ni Amitai. Ke sikandin te,  
\v 2 “Segugunè ka hendiyà te zekelà he inged he Nineve, ne keǥiyi nu is menge etew zutun, he engkezi zan is mezaat he menge ulaula zan su sumalà is neehè ku, utew subra is kezaat te menge ulaula zan.”  
\v 3 Piru wazà mebpezumazuma si Jonas su mibpeleǥuyan din is \sc Nengazen\sc* pehendiyà te Tarshish. Midhendiyà sikandin te Jopa, ne zutun duen barku he edhendiyà te Tarshish. Mibayad sikandin te piliti, ne hein nekevayad en, mid-untud dutun te varku he ebpehendiyà te Tarshish su wey zin mepeleǥuyi is \sc Nengazen\sc*. 
\p  
\v 4 Ne hein dutun en te zaǥat, impepengeramag te \sc Nengazen\sc* te utew mevandes, ne tenged te kevandes din henduen be te egkezeetan en haazà is barku.  
\v 5 Ne tenged te utew nengahandek is menge terebahanti, ne is kada sevaha kandan mid-ampù diyà te kandin he menge ed-ezapen. Ne impenimbag dan en is menge karga zutun te varku su wey mebmahagkap. 
\p Ne si Jonas mulà, nehurep diyà te zizalem he vahin te varku.  
\v 6 Ne midhendiyà te kandin is kepitan dutun te varku. Ke sikandin te, “Maan is iyan nu zà is kedlipezeng nu? Enew ka, wey medhangyù diyà te kenikew he ed-ezapen. Su kela ke mehizuwi kiw zin ne kenè kiw zed egkeǥerà.” 
\p  
\v 7 Ne mibpelelelaǥà is menge terebahanti zutun te varku, ne iyan neuyunan dan he ibarè dan pinaaǥi te ripa ke hentei is edsilutan he iyan hinungdan he impepengeramag te utew mevandes. Ne zutun te kedripa zan iyan neripahan si Jonas.  
\v 8 Ne zutun migkeǥiyan dan si Jonas te, “Maan is nehitavù heini is bagyu? Maan is kayi ka? Hendei ka ebpuun? Hengkey is ngazan te nasyun nu? Hengkey ka he kelasi te etew?”  
\v 9 Ne ke si Jonas te, “Hebriyuhanen a ne iyan ed-ezapen ku is \sc Nengazen\sc*, is Megbevayà diyà te langit he iyan midlimbag te zaǥat wey tanà.”  
\v 10 Ne midtudtulan sikandan ni Jonas mehitenged te kenè din kebpezumdumahi te suǥù te \sc Nengazen\sc* kandin. Ne tenged dutun utew zan nengahandek, ne ke sikandan te, “Kenà meupiya haazà is mid-ulaula nu.” 
\p  
\v 11 Ne zutun mid-iseg en is kevandes te keramag, ne migkeǥiyan dan si Jonas te, “Hengkey is ed-ul-ulahan dey kenikew su wey meengked heini is utew zekelà he vaǥel su wey key kenà mekeizi?”  
\v 12 Ne ke si Jonas te, “Itimbag a keniyu ziyà te zaǥat, ne egkeengked heini is mevandes he keramag, su tenged te salè ku ne neuwit-uwit kew.”  
\v 13 Iyan, midhimu zan pa is taman te egkehimu zan. Midsigudu zan mebpemegsey su wey mekehendiyà te veyvey haazà is barku. Iyan, wazè dan nehimu su nasì en man medlavew is kevandes te keramag.  
\v 14 Umbe, midhangyù dan diyà te \sc Nengazen\sc* he ke sikandan te, “He \sc Nengazen\sc*, kenè nu himuwa he mebpatey key tenged te kebpatey kayi te etew pinaaǥi te kedtimbaǥa zey kandin diyà te zaǥat. Kenè key kenikew siluti tenged te kegkehimetayi zey kandin, su heini is nehitavù, \sc Nengazen\sc*, kenikew he ulaula su midhimu nu is egkesuatan nu.”  
\v 15 Ne zutun mibitbit dan si Jonas ne intimbag dan diyà te zaǥat, ne segugunà mibmelinew is daǥat.  
\v 16 Ne tenged kayi he hitavù, dekelà is kedtahud te menge etew te \sc Nengazen\sc*. Umbe mibpemuhat dan sikandin wey zuen menge penaad dan diyà te kandin. 
\p  
\v 17 Ne zuen utew zekelà he isdà he inteǥana te \sc Nengazen\sc* su wey zin meeveleng si Jonas, ne ziyè si Jonas te ǥetek dutun te isdà seled te tetelu he andew wey tetelu he kezukileman.\fig Intimbag si Jonas diyà te zaǥat|src="co01414b.TIF" size="span" loc="Jonas 1:15-17" copy="David C. Cook" ref="Jonas 1:15-17" \fig* 
\c 2  
\s1 Is Ampù ni Jonas 
\p  
\v 1 Ne zutun te ziyè si Jonas te ǥetek te isdà, mid-ampù sikandin diyà te \sc Nengazen\sc* he Megbevayè din.  
\v 2 Ke sikandin te, 
\q1 “\sc Nengazen\sc*, edsempiten ku sikew tenged te kemereǥenan he neeǥiyan ku. 
\q1 Ne midineg a kenikew. 
\q1 Ne midtevangan a kenikew hein edserupatey ad. 
\q1  
\v 3 Ne ǥuntaan intimbag a kenikew kayi te mezalem, ne zini ad te zizalem te zaǥat. 
\q1 Ne nelened a wey netembunan a te zekelà he menge vaǥel he midhimu nu. 
\q1  
\v 4 Minsan pa te impekeziyù a puun kenikew, netuenan ku he ebpekehendiyà a ǥihapun te segradu he valey nu. 
\q1  
\v 5 Inteledted ad te wahig ne henduen te egkelened ad. 
\q1 Is ulu ku, nevukusan te sagbet diyà te zagat. 
\q1  
\v 6 Kunaan ku ke nepirisu ad diyà te kinezizeleman te wahig te wazà pidtemanan. 
\q1 Piru inggaun a kenikew puun te kinezizeleman, He \sc Nengazen\sc* he Megbevayè ku. 
\q1  
\v 7 Ne hein edserupatey ad, netenuzan ku sikew. 
\q1 Ne zutun mid-ampù a, ne is ampù ku nezineg nu, 
\q1 su nekeuma ziyà te kenikew zutun te segradu he valey nu, ne midtavak nu haazà. 
\q1  
\v 8 Sikan is menge etew he iyan edsimbahan dan is duma he menge ed-ezapen, ne mid-engkezan dan is gaǥew nu kandan. 
\q1  
\v 9 Iyan, siak mulà, emun edlibriyen a kenikew ne ebpemuhaten ku sikew te kanta te kebpeselamat. 
\q1 Ne heini is impenaad ku, edtumanen ku. 
\q1 Sikew is \sc Nengazen\sc*, iyan ka ebpekelibri!” 
\m  
\v 10 Ne midsuǥù te \sc Nengazen\sc* sikan is isdà he iutè din si Jonas diyà te veyvey, ne midtuman dutun te isdà haazà is insuǥù kandin. 
\c 3  
\s1 Midhendiyà si Jonas te Nineve 
\p  
\v 1 Ne migkeǥiyan en maan te \sc Nengazen\sc* si Jonas te,  
\v 2 “Hendiyè kad human te zekelà he inged he Nineve, ne isangyew nu sikan is migkaǥi ku ziyà te kenikew.”  
\v 3 Ne human mebpezumazuma si Jonas, ne midhendiyà sikandin te Nineve. Ne is Nineve utew zekelà he inged; tetelu he andew is kedhipenawa zutun ne human ta egkepangkus. 
\p  
\v 4 Ne mibpuun medseled si Jonas dutun te inged, ne zutun te kebpuun din senga andew is kedhipanew zin. Midweliyan din is menge etew ziyà te Nineve he ke sikandin te, “40 dà he andew is keluǥayad ne edlimasen kew en te Megbevayà sumalà is migkaǥi zin kayi te kediey!” 
\p  
\v 5 Ne tenged dutun midtuu te Megbevayà is menge tig-Nineve. Mibpuasa sikandan, ne is langun kandan, dekelà se zeisey is pid-etawan din, ne mibivisti te saku wey mibpuasa he tuus te ed-engkezan dan en is mezaat he menge ulaula zan.  
\v 6 Ne hein netudtulan is hadì dan dutun te inged, ne mid-awè sikandin diyà te pinuuwè din te kedhadì. In-awè din is samput din te kedhadì, ne mibivisti sikandin te saku wey ziyà sikandin mebpinuu te avu.  
\v 7 Ne midhimu zutun te hadì is suǥù he edhenduen te, “Iyan suǥù te hadì wey te menge upisyal zin is: Kinahanglan he kenè dèpa megkaan wey med-inum is minsan hentei he nesakup dutun te ginhedian, wey kenè daan dèpa ibpekaan wey ibpeinum is langun he menge vaka, kerehidu, etawa kambing.  
\v 8 Is langun kinahanglan he mebivisti te saku, wey kinahanglan daan he ebelhenan te saku is menge uyaǥen. Kinahanglan he med-ampù diyà te Megbevayà is uman sevaha te ked-ampù he utew hustu. Ne kinahanglan daan he engkezi te uman sevaha is mezaat he menge ulaula wey kebpendaagdaag.  
\v 9 Su kela ke maawè ded is pauk te Megbevayà kenitew. Kela ke meilisi zed is pauk din te hizu ne kenè kiw zed egkengeǥerà.” 
\p  
\v 10 Ne hein naahà te Megbevayà is mid-ulaula zan he iyan is ked-engkezi zan te mezaat he menge ulaula, nehizuwan din sikandan ne wazè din sikandan leusi te edlimas. 
\c 4  
\s1 Nepauk si Jonas Tenged te Kegkehizuwi te \sc Nengazen\sc* te menge Tig-Nineve 
\p  
\v 1 Piru wazà mesuat si Jonas, kekenà, utew sikandin neepes.  
\v 2 Ne mid-ampù sikandin diyà te \sc Nengazen\sc* he ke sikandin te, “\sc Nengazen\sc*, heini is kebpeseyluwa nu te menge tig-Nineve, ne zaan ku en he netueni zutun te aney he kedsuǥua nu kedì, umbe migaanggaan a mebpelaǥuy pehendiyà te Tarshish. Su netuenan ku he veliǥeǥawen ka wey hihizuwen he Megbevayà. Ne mepelevayen wey nepenù te hizu wey andam he kenà edlaus edsilut te menge etew he ed-iniyug te mezaat.  
\v 3 Ne ǥuntaan, deyzey ke edhimetayan ad kenikew, su meupiya pa ke ebpatey a kenà te uuyag a.”  
\v 4 Ne midtavak is \sc Nengazen\sc*. Ke sikandin te, “Kenè ka engayan he egkepauk tenged kayi te mid-ulaula ku.” 
\p  
\v 5 Ne zutun midhipanew si Jonas pehendiyà te zapit te edsilaan dutun te inged he Nineve. Ne hein nekeuma zutun, midlelawig sikandin, ne zutun sikandin mebpimpinuu is edhelung. Su ebpeseseǥazen din ke hengkey is egkeulaula zutun te inged.  
\v 6 Ne mibpengelinteuwan te \sc Nengazen\sc* he Megbevayà, he medtuvù dutun te uvey ni Jonas is tevayag he segugunà ebpenguyabpat su wey melembungi si Jonas. Ne haazà neketavang ki Jonas ne utew sikandin nelipey.  
\v 7 Iyan, te egkeriwaswas dutun te sunud he andew, duen tetaru he impeketket te \sc Nengazen\sc* dutun te tevayag su wey meǥangu haazà. 
\p  
\v 8 Ne hein midsilè en is andew ne impepengeramag te \sc Nengazen\sc* te meinit he keramag he ebpuun te edsilaan. Ne midluyahan si Jonas tenged te keinit te andew. Ne egkesuat en sikandin he ebpatey, ne ke sikandin te, “Meupiya pa ke ebpatey ad kenà te uuyag a.”  
\v 9 Iyan, migkaǥi is Megbevayà diyà te ki Jonas te, “Dait be he igkepauk nu is kegkeǥangu keniyan te tevayag?” Ne midtavak si Jonas te, “Uya, dait iyan he egkepauk a. Umbe meupiya pa ke ebpatey ad nasì.”  
\v 10 Ne migkaǥi is \sc Nengazen\sc* te, “Heeyan is tevayag he midtuvù wey nenguyabpat seled te sengekezukileman dà, ne neǥangu te kegkesunud he andew ne wazà kenikew he vaal zutun, kenè ka iyan mibpetuvù duen, iyan, minsan pa zutun egkenuǥunan nu ǥihapun.  
\v 11 Ne iyan e pa kenà mehizu te Nineve, keniyan te inged he zuen duen subra he 120,000 he menge etew he wazè dan hanew zuen te kesuǥuan ku, ne zuen pa mahabet he menge uyaǥen?”