\id HAB - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Habakuk 
\toc1 Habakuk 
\toc2 Habakuk 
\toc3 Hab 
\mt1 Habakuk 
\c 1  
\p  
\v 1 Iyan heini menge lalag te ebpeneuven he si Habakuk he impahayag te \sc Nengazen\sc* diyà te kandin. 
\s1 Is Nehuna he Riklamu ni Habakuk 
\p  
\v 2 Migkaǥi si Habakuk te, “He \sc Nengazen\sc*, taman te keenu is kebuyù ku te tavang diyà te kenikew he zutun ebpemineg ke en human kedì? Keenu key kenikew edlibriya ziyà te menge etew he mibpesipala kenami?  
\v 3 Maan is impeehè nu pa kediey heini is kezeetan wey kegubut? Minsan hendei ne egkeehè ku is inhimetayà, kebpepespesipelahà, kedtebek, wey kebikilan.  
\v 4 Umbe, nehimu he wazè en pulus te kesuǥuan; wazè en ul-ulaha is hustu he kukuman su is menge etew he nekesalà, ne iyan ebpekezaag diyà te hukmanan ne kenà iyan is wazà mekesalà. Umbe nevulegkù en is hustu he kukuman.” 
\s1 Is Tavak te Megbevayà ki Habakuk 
\p  
\v 5 Midtavak is Megbevayà, “Purungi niw ahaa is egkehitavù diyà te menge nasyun ne egkeinuinu kew te egkeehè niw. Su zuen ebeelan ku ziyà te timpu niw he kenè niw egketuuwan minsan duen pa kayi edtudtul ziyà te keniyu.  
\v 6 Su edhimuwen ku he gemhanan is menge tig-Babilonia. Heini he menge etew, utew memesipala ne kenè ne egkesanggen he edsurung diyà te zuma he menge nasyun su wey zan maaǥew is menge lugar he kenà kandan.  
\v 7 Igkikinehendekà sikandan te menge etew. Ebeelan dan ke hengkey is egkesuatan dan ne wazà ebpekeeǥen kandan.  
\v 8 Is menge kudè dan, meǥaan pa te langgam he liyupardu wey mesipala pa te dumezaas he asu he ebpen-ahà te egkekaan din emun mezukilem. Ebpelelaǥuy heini puun te meziyù he menge lugar, he henduen be te edlayang he kulaǥu he andam he edagmang te edewiyen din.  
\v 9 Ebpekeuma is grupu te menge sundaru zan he andam he ebpesipala. Iring heini te mevandes he keramag he ebpuun diyà te edsilaan. Is menge vihag dan iring kahabet te pantad.  
\v 10 Bà dan dà edsudia is menge hadì wey menge pengulu. Ne và dan dà ed-engiti is kada vinerengbeng he inged, su ebpekeliyu zan kayi pinaaǥi te kedtambù te tanà diyà te kilid te verengbeng, ne zutun egkaaǥew zan haazà is inged.  
\v 11 Ne kegkepasad dutun ne egenat sikandan he henduen dà te keramag he midsaǥad. Heini sikandan, nekesalà, su wazà duma he migkilala zan he Megbevayà, kekenà, iyan dà is kebpekegaga zan.” 
\s1 Is Ikezuwa he Riklamu ni Habakuk 
\p  
\v 12 Migkaǥi si Habakuk te, “He \sc Nengazen\sc*, Megbevayè ka puun te nehuna. Iyan ka waǥas he Megbevayè ku ne wazè nu kemetayen. He \sc Nengazen\sc* he iring te endilungà he vatu, mibpilì nu is menge tig-Babilonia te kedsilut kenami.  
\v 13 Geina te metazeng ka, ne kenè nu egkaantus is kedtengteng te kelelalung wey kegubut. Piru maan is mibey-anan nu zà is meluiven he menge tig-Babilonia? Maan is intuǥut nu he mezèdeeti zan is menge etew he emun idhindeg kandan ne edhuna sikandan he lalung?  
\v 14 Midhimu nu is menge kuntada zan he iring te menge isdà he wazè dan pengulu he edlavan kandan.  
\v 15 Midlipeylipey is menge tig-Babilonia zutun te kebihaǥa zan te menge kuntada zan he henduen dà te menge isdà he midhingutel zan pinaaǥi te vunuwit etawa puket.  
\v 16 Ne tenged te mahabet is nevihag dan, midalig dan is keugelingen dan tenged te kebpekegaga zan; iring sikandan te mengingisdà he mibeǥayan din te zengeg is bunuwit din etawa puket din pinaaǥi te kedtutung te veyewà he pemuhat para kayi he menge azen. Su pinaaǥi te vunuwit din etawa puket din ne midsepian sikandin ne egkekaan din is metaam he menge keenen he egkesuatan din te egkaan.  
\v 17 Tenged kayi \sc Nengazen\sc*, ebpedayun en be sikandan te wazà hizu he kebpemihag dan wey kebpendezaat diyà te menge nasyun?” 
\c 2  
\p  
\v 1 Migkaǥi si Habakuk te, “Ebpemenahik a ziyà te turi he ventayè ku, ne edteǥazan ku ke hengkey is egkeǥiyen te \sc Nengazen\sc* kayi te kedì wey ke hengkey is idtavak din te riklamu ku.” 
\s1 Is Tavak te Megbevayà ki Habakuk 
\p  
\v 2 Iyan heini tavak te \sc Nengazen\sc* ki Habakuk: “Isurat nu he keladu ziyà te suratà he vatu is ibpahayag ku ziyà te kenikew su para melemu heini he ebesahan.  
\v 3 Isurat nu zà heini zep-a su wazè pa meuma is midtelaan he timpu te kegkeul-ulaha kayi. Ne kenà ebperis is kegkeul-ulaha kayi te kena egkeuǥet. Emun henduen be te malù egkeuǥet ne teǥazi nu, su siguradu he egkehitavù heini he kenà egkeuǥet.  
\v 4 Iyan heini isurat nu: 
\p “Ahaa nu is menge mepelavawen! Lalung sikandan he menge etew. Piru is metazeng he menge etew ebpengungubpaan tenged te kedtuu zan.  
\v 5 Benar iyan, kenà egkeseriǥan is ketiǥeyunan. Ne sikan is mepelavawen he menge etew he zekelà is kadar zan te ketiǥeyunan, ne kenà mevented wey kenè dan egkekuntintu. Iring sikandan te kemetayen he kenà egkeperahan. Ne iyan heeyan imbihaǥa zan te menge etew ziyà te mahabet he menge nasyun.  
\v 6 Piru edsudien sikandan keniyan te menge etew ziyà te menge nasyun pinaaǥi te mesakit he menge lalag he edhenduen te, 
\p “ ‘Kehizu niw te ebpenguwa te menge azen he kenà keniyu, wey edtiǥum te ketiǥeyunan pinaaǥi te kebpenapì. Taman pa te keenu is ked-ul-ulaha niw keniyan?  
\v 7 Piru edtik-awan kew ebelesi te menge etew ziyà te menge nasyun he mibihag niw, ne tenged kandan egkerkeren kew te kegkahandek, ne iyan en maan sikandan ed-aǥew te menge azen niw.  
\v 8 Tenged te mahabet he menge nasyun is mid-eǥawan niw te menge azen, ne iyan kew en maan ed-eǥawan te menge etew he nesamà keniyan he menge nasyun. Egkehitavù heini keniyu tenged te kebpenhimatey niw te menge etew wey kebpendezeeti niw te menge tanè dan wey menge inged dan. 
\p  
\v 9 “ ‘Mekehizuhizu kew is mibpehitindeg te menge valey pinaaǥi te selapì he nekuwa niw te mezaat he paaǥi. Midlig-enan niw is menge valey niw su wey kew kenà memenu emun ebpekeuma is kezeetan.  
\v 10 Tenged te kebpenhimatey niw te mahabet he menge etew, edhimetayan kew zaan ne egkezeetan is dengeg niw.  
\v 11 Henduen be te edriklamu minsan is menge vatu ziyà te elavat wey is menge pepesanan te menge valey niw. Henduen be te ebpengulahì dan is edsumbung keniyu. 
\p  
\v 12 “ ‘Kehizu niw te mibangun te inged pinaaǥi te pesipala. Andam kew he edhimatey te etew vasta mevangun heini.  
\v 13 Piru heeyan is impevangun niw te menge etew he mibihag niw ne ebinsulan dà heeyan, umbe egkehimu he wazà pulus te midheǥuan dan. Midtelaan en heini te \sc Nengazen\sc* he Mekeǥeǥehem.  
\v 14 Su is menge etew kayi te kelibutan, egkepenù te keuluwanen vahin te gehem te \sc Nengazen\sc*, iring te zaǥat he nepenù te wahig. 
\p  
\v 15 “ ‘Mekehizuhizu kew su tenged te pauk niw mibpeel-elezan niw is menge etew ziyà te avey niw he menge nasyun. Henduen be te midlangut niw sikandan te vinu su wey maahà is kegkelevasi zan.  
\v 16 Ne ǥuntaan iyan kew en maan egkepeel-elezan he iyan pezem egkesuatan niw he veǥayi kew te zengeg, su edsilutan kew iyan te \sc Nengazen\sc*. Iring te ibpeinum kew zin te vinu su wey kew melangut ne wey maahà is kegkelevasi niw su wey kew meeled-eled.  
\v 17 Mibpemiley niw is menge kayu ziyà te Lebanon, ne midhimetayan niw is menge langgam duen. Umbe edezeetan kew zaan ne egkerkeren kew te kegkahandek. Egkehitavù heini keniyu tenged te kebpenhimatey niw te menge etew wey kebpendezaat niw te menge tanè dan wey menge inged dan. 
\p  
\v 18 “ ‘Hengkey is pulus te zuma he menge ed-ezapen? Kayu zè man heeyan etawa mital he mibeelan te etew, ne kenè man heeyan ebpekekaǥi mehitenged te tutuu. Ne maan is midtuuwan heeyan te menge etew he mibaal zuen? Kenà ganì heeyan ebpekekaǥi.  
\v 19 Kehizu niw te egkaǥi ziyà te ledawan he kayu etawa vatu te, “Kepukew ke en ne tevangi key.” Kenè ganì heeyan ebpekepenurù keniyu. Minsan mibpekeplaan heeyan te vulawan wey pelata, piru kenà heeyan uuyag.  
\v 20 Piru is \sc Nengazen\sc* mulà, ne ziyà sikandin te segradu he ubpeey zin he ziyà te langit. Umbe is langun he kayi te kelibutan ebpereremek diyà te etuvangan din.’ ” 
\c 3  
\s1 Is Ampù ni Habakuk 
\p  
\v 1 Iyan heini ampù te ebpeneuven he si Habakuk: 
\p  
\v 2 “He \sc Nengazen\sc*, nezineg ku is menge mibeelan nu, ne tenged kayi utew zekelà is kedtehuza ku kenikew. Ne ǥuntaan umani nu heini veeli kayi te kenami he timpu. Ne zutun te timpu te kebpaahaa nu te pauk nu ne kehizuwi key kenikew. 
\p  
\v 3 “Iyan ka kes Waǥas he Megbevayà he ebpekeuma he ebpuun te Teman wey te Buntud he Paran, ne is gehem nu egkaahà diyà te langit, ne tenged kayi edeliǥen ka te menge etew kayi te kelibutan.  
\v 4 Is kebpenganlag te kebpekeuma, nu ne iring te kebpenganlag te andew; edsiǥa is menge velad nu he zutun mekeeles is gehem nu.  
\v 5 Ed-uwit ka te kezeetan dutun te kebpekeuma nu.  
\v 6 Emun edhitindeg ka egkehuyung is kelibutan, ne emun edtengteng ka ne egkerkeren te kegkahandek is menge etew wey egkengetiplak is neuǥet en he menge vuntud. Is menge paaǥi nu ebpedayun te wazà pidtemanan.  
\v 7 Neehè ku he egkengeregdas is menge tulda te meǥinged diyà te Cushan wey Midian. 
\p  
\v 8-9 “\sc Nengazen\sc*, iring ka te sundaru he ed-untud te kerwahi he ibpekezaag te tebek. Andam ke en he ebpanà. Piru hentei man is egkeepesan nu? Iyan be is menge wahig wey menge zaǥat? Kenà iyan is menge wahig wey is menge zagat, kekenà, iyan is menge etew he ebpemekigkuntada kenikew. Midtevì nu is tanà ne midtudà dutun is wahig.  
\v 10 Is menge vuntud henduen be te menge etew he egkerkeren emun egkeehè ke zan. Mid-uzan te mereǥes, mideǥurus is wahig diyà te zaǥat ne midekelà is menge vaǥel.  
\v 11 Mibpundu is andew wey is bulan tenged te hagyung te menge vesut te panè nu wey kesinew te ed-ilak-ilak he vangkew nu. 
\p  
\v 12 “Tenged te utew nu kegkepauk midhipenawan nu is kelibutan ne midtekutakan nu is menge nasyun,  
\v 13 su edlibriyen nu is pinilì nu he menge etew. Midhimetayan nu is pengulu te mezaat he ginhedian ne mibpurungan nu zezeeti is menge etew zin.  
\v 14 Midtiyuk nu is ulu te peremandar te menge sundaru zin ne iyan nu in-uney itiyuk is besut te panà dutun te peremandar. Mibeelan nu heini hein midsurung key zan he iring dan te vagyu su wey key zan ikepeyapat. Su kelipey zan is kedezaat kenami te mekehizuhizu, he nemen-eles tenged te kegkahandek.  
\v 15 Iring ka te sundaru he imperapas din diyà te zaǥat is kudè din te kedsewsew kayi.” 
\s1 Is Ipiktu ziyà te ki Habakuk te Impahayag te Megbevayà diyà te Kandin 
\p  
\v 16 Migkaǥi si Habakuk te, “Hein nezineg ku is impahayag te \sc Nengazen\sc* kayi te kedì, migkerker is tivuuk he lawa ku ragkes en is bivig ku tenged te kegkahandek ku. Midluyahan a ne migkerker is menge paa ku. Ne tenged kayi te impahayag te \sc Nengazen\sc*, ne kenà a edarà is edtaǥad te timpu te kedsiluti zin te menge midsurung kenami.  
\v 17 Minsan kenè pa mebpemeǥas is kayu he higira, is paras, etawa kayu he ulibu, wey minsan wazà sebpet diyà te tanà, wey minsan mebpemematey pa is menge uyaǥen diyà te tudil,  
\v 18 egkelipey a gihapun su ǥeina te iyan midlibri kedì is \sc Nengazen\sc* he Megbevayà.  
\v 19 Iyan sikandin mibeǥey kedì te zesen. Midlig-enan din is menge paa ku, in-iring din te paa te selazeng su wey ku metekezeg is metikang he menge lugar.”