\id EZK - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Ezekiel 
\toc1 Ezekiel 
\toc2 Ezekiel 
\toc3 Eze 
\mt1 Ezekiel 
\c 1  
\s1 Is Nehuna he Nelewasan ni Ezekiel 
\p  
\v 1-3 Iyan a si Ezekiel, sevaha a he memumuhat ne anak a ni Buzi, wey sevaha a te menge mibihag pehendiyà te Babilonia. Duen andew he zutun diyà a te veyvey te Wahig he Kebar zuma te zuma he menge vinihag, ne neehè ku he nepuwasan is langit ne midumala a te ǥehem te \sc Nengazen\sc*. Ne zutun duen impelewasan din kediey. Nehitavù heini hein ikelima he andew te ikeepat he vulan te ike-30 he tuig. Iyan heini timpu te ikelima he tuig te kegkevihaǥa ki Hadì Jehoyakin. 
\p  
\v 4 Dutun te kedtengteng ku, neehè ku is bagyu he ebpuun diyà te zizaya. Mekepal heini he kivel he egkezumahan te kenà egkeengked he kegkilat he edsiǥa he henduen be te ed-ilak-ilak he mital.  
\v 5 Ne ziyà te teliwazà kayi zuen heepat he uuyag he menge linimbag he henduen be te menge etew.  
\v 6-8 Piru is kada sevaha kandan duen din heepat he vuked wey heepat he pakpak. Metulid is menge vuvun dan, piru is menge paa zan he henduen be te menge paa te vaka ne ed-ilak-ilak heini he iring te impesinew he brunsi. Duen belad dan he velad te etew ziyà te zizalem te kada pakpak dan,  
\v 9 ne nekedtetemu is menge pakpak dan. Ne ebperedredseey sikandan he edlayang minsan hendei zan ebpevayà ne kenè dan en ebpenlililingey. 
\p  
\v 10 Ne iyan heini kegkeveeli te zagwey zan: diyà te sineruwan, dagwey te etew; diyà te egkekewanan, dagwey te erimaung; diyà te egkeǥivang, dagwey te tudu he vaka; diyà te iniyuǥan, dagwey te kulaǥu.  
\v 11 Is dezuwa he pakpak dan nevekar ne neketemu ziyà te pakpak te avey zan, ne is dezuwa pa he pakpak dan neketambun te lawa zan.  
\v 12 Ebpekedreredsà sikandan he edlayang minsan hendei zan ebpevayà ne kenè dan en ebpenlililingey. Ne ke hendei zan ed-uwita te Mulin-ulin ne zutun sikandan ebpevayà.  
\v 13 Is ked-ahaa ta kandan henduen be te egkeregreg he vaǥa, wey zuen ebpekepelelaǥuy he ebpekesuǥat te menge lawa zan he henduen be te sulù he utew epekesirang, ne egkilat puun dutun te sulù.  
\v 14 Heini is uuyag he menge linimbag edlikùlikù he henduen be te kilat. 
\p  
\v 15 Dutun te kedtengtengi ku kayi te heepat he uuyag he menge linimbag, duen neehè ku ziyà te zizalem dan he heepat he ligid, tigselimbaha kandan he ligid. Ne heini he menge ligid ne ziyà mekeuntud te tanà.  
\v 16 Iyan heini ked-ahaa ta wey kegkeveeli zuen te menge ligid: Ed-ilak-ilak heini iring te mahalen he vatu he krisulitu, ne neked-iiring is kegkeveeli kayi he henduen be te zezuwa he ligid he nekebelevaǥà  
\v 17 umbe ebpekehendiyà heini wey haazà is uuyag he menge linimbag te minsan hendei renged he kenè en kinahanglan he eberiyung.  
\v 18 Is pesiziveluyà te kada ligid ne melumpipì ne mekahandekhandek su neeneb te menge mata. 
\p  
\v 19 Ke hendei ebpevayà haazà is uuyag he menge linimbag ne zutun daan ebpevayà haazà is menge ligid, ne emun egkevitbit puun te tanà haazà is menge linimbag, egkevitvit daan sikan is menge ligid.  
\v 20 Is mulin-ulin duen te uuyag he menge linimbag, dutun metaǥù te menge ligid. Umbe ke hendei ebpevayà haazà is mulin-ulin ne zutun daan ebpevayà haazà is uuyag he menge linimbag wey kes menge ligid.  
\v 21 Ke hendei ebpevayà haazà is uuyag he menge linimbag, ne eduma zaan sikan is menge ligid, ne emun ebpundu sikandan, ne ebpundu zaan sikan is menge ligid. Ne emun egkevitbit sikandan puun te tanà, egkevitbit daan sikan is menge ligid, su is mulin-ulin dan, dutun man te menge ligid. 
\p  
\v 22 Ne ziyà te zivavew te menge ulu zutun te uuyag he menge linimbag duen henduen be te langit he kristal he ed-ilak-ilak, ne egkein-inuwan heini he edtengtengan.  
\v 23 Ne ziyà te zizalem kayi nevekar is dezuwa he pakpak te kada sevaha zuen te uuyag he menge linimbag, ne neketemu heini ziyà te pakpak te avey zin. Ne is dezuwa pa he pakpak dan neketambun te lawa zan.  
\v 24 Ne emun edlayang haazà is uuyag he menge linimbag, egkezineg ku is keǥurub te menge pakpak dan, he henduen be te selenuhug, wey zeǥurus te meseleg he wahig, wey iring te laǥeng te Mekeǥeǥehem he Megbevayà, wey henduen be te keǥurub te mahabet he menge sundaru. Ne emun ebpundu sikandan kenè dan ebekaren is menge pakpak dan. 
\p  
\v 25 Ne zutun te wazà mevekar is menge pakpak dan, duen laǥeng he ebpuun diyà te zivavew zuen te neketambun kandan.  
\v 26 Ne zuen dutun henduen be te pinuuwà te hadì he iyan mibeelan is menge vatu he sepiru, ne zuen mibpinuu kayi he henduen be te etew.  
\v 27 Puun te hawak din pehendiyà te zivavew, ne henduen sikandin te ed-ilak-ilak he mital he nevaǥa. Ne puun te hawak din pehendiyà te zizalem, ne henduen sikandin te edriyubriyub he hapuy, ne neliǥuy sikandin te kerayag he utew ebpekesirang.  
\v 28 Is kerayag diyà te peliǥuy zin iring te velugtu emun edtikdew is uzan. 
\p Iring dutun is mekeǥeǥehem he kebpekiduma te \sc Nengazen\sc*. Ne te kegkahaa ku zutun midlangkeb a ne zuen nezineg ku he nekidlalag kedì.\fig Midlangkeb si Ezekiel ziyà te tanà hein nezineg din is ebpekidlalag kandin puun dutun te nelewasan din|src="co01340b.TIF" size="span" loc="Ezekiel 1:1-28" copy="David C. Cook" ref="Ezekiel 1:1-28" \fig* 
\c 2  
\s1 Midtawag si Ezekiel para Mehimu he Ebpeneuven 
\p  
\v 1 Migkaǥi is laǥeng kayi te kedì te, “Sikew is etew, hitindeg ka su zuen ku egkeǥiyen kenikew.”  
\v 2 Dutun te kebpekidlalag din kedì, mibpurungan a ulini te Mulin-ulin ne impehitindeg e zin. Mibpemineg ku is laǥeng he ebpekidlalag kedì.  
\v 3 Ke sikandin te, “Sikew is etew, edsuǥuen ku sikew ziyà te menge etew te Israel, he iyan kes nasyun he mesinupaken kediey. Is menge kepuun dan midsupak kedì dengan, ne taman en guntaan is kedsupaka zan kediey.  
\v 4 Utew sikandan midtaman he mesinupaken. Iyan a, is Nengazen he MEGBEVAYÀ midsuǥù kenikew ziyà te kandan te kegkaǥi kandan te menge lalag ku he para kandan.  
\v 5 Mebpemineg dan etawa kenà su menge mesinupaken man sikandan, ne ereg he egketuenan dan he zuen ebpeneuven he zuma zan.  
\v 6 Ne sikew is etew, ne kenè ka mahandek. Kenè ka mahandek minsan mesakit is ebpengeǥiyen dan iring te zuǥi etawa kineǥatan te venayew. Kenè ka mahandek emun edhulgaan ke zan, su netuenan nu en he mesinupaken sikandan he menge etew.  
\v 7 Keǥiya nu is menge lalag ku ziyà te kandan, mebpemineg heini is menge mesinupaken etawa kenà. 
\p  
\v 8 “Piru sikew is etew, pemineǥa nu is egkeǥiyen ku ziyan te kenikew. Ne kenà a kenikew supaka iring kandan. Ginganga ka ne keena nu is ibeǥey ku kenikew.”  
\v 9 Ne neehè ku is belad he eduwal kedì te linulun he velesahan.  
\v 10 Mibekar zin heini ziyà te etuvangan ku, ne zuen surat kayi ziyà te pesiziveluyà, he menge lalag para te kedlalew wey kebpenhulùhulù. 
\c 3  
\p  
\v 1 Ne migkaǥi haazà is laǥeng kayi te kediey te, “Sikew is etew, keena nu heini is linulun he velesahan, ne ǥenat ka, ne keǥiyi nu is menge etew te Israel.”  
\v 2 Umbe, miginganga a, ne impekaan din kedì haazà is linulun he velesahan.  
\v 3 Migkeǥiyan e zin te, “Sigi, keena nu heeyan taman te egkahantey ka.” Ne hein migkaan ku haazà, ne iring heini keemis te teneb. 
\p  
\v 4 Ne migkeǥiyan e zin te, “Sikew is etew, genat kad pehendiyà te menge etew te Israel ne keǥiya nu is menge lalag ku ziyà te kandan.  
\v 5 Wazè ku sikew suǥua ziyà te menge etew he selakew is kineǥiyan dan wey mereǥen he edsevuten, kekenà, diyà te menge etew te Israel.  
\v 6 Su emun diyè ku sikew edsuǥua te menge etew he selakew is kandan he kineǥiyan he kenè nu egkesavut, ne kenà duwazuwa he ebpemineǥen ke zan.  
\v 7 Piru is menge etew te Israel, kenè dan ebpemineg kenikew, su kenè dan egkesuat he ebpemineg kedì. Pudu sikandan midtaman he mesinupaken wey kenà ebpezumazuma.  
\v 8 Piru edhimuwen ku he mezesen is kenikew he ǥehinawa iring kandan,  
\v 9 iring kezesen te lintikan he vatu. Umbe kenè nu sikandan ikahandek su netuenan nu man he menge mesinupaken sikandan.” 
\p  
\v 10 Mid-uman pa sikandin megkaǥi kayi te kedì te, “Sikew is etew, purung ka pemineg wey hemeni nu ziyà te ǥehinawa nu is langun he egkeǥiyen ku ziyan te kenikew.  
\v 11 Guntaan, hendiyè ka te menge emurè nu te inged he zuma nu te menge mibihag, ne keǥiya nu is lalag he ebpuun kayi te kedì, kes Nengazen he MEGBEVAYÀ. Beeli nu heini mebpemineg man sikandan etawa kenà.” 
\p  
\v 12 Ne imbayew a te Mulin-ulin, ne nezineg ku is edraǥeb he laǥeng he ebpuun diyà te egkeiniyuǥan ku he edhenduen te, “Ereg he edeliǥen is gehem te \sc Nengazen\sc* he ziyà te langit!”  
\v 13 Ne nezineg ku zaan is daǥing te ebpekebevag-id he menge pakpak duen te uuyag he menge linimbag, wey nezineg ku zaan is edselenuhug he keǥurub duen te menge ligid diyà te avey zan.  
\v 14 Imbayew a te Mulin-ulin ne mid-uwit e zin pehendiyà te meziyù. Neǥezam ku kayi te ǥehinawa ku is kegkesekiti wey kegkeepes, piru mibeyveyaan a te \sc Nengazen\sc*. 
\p  
\v 15 Nekeuma a ziyà te Tel Abib, he ziyà te kilid te Wahig he Kebar he zutun ed-ubpà is menge vihag. Ne ziyà a te kandan seled te pitu he andew ne utew mibmezaat is gehinawa ku tenged te nengeehè ku. 
\s1 Midhimu te Megbevayà si Ezekiel he iyan Ebantey te Israel 
\r (Ezekiel 33:1-9) 
\p  
\v 16 Kedlavey te pitu he andew, migkaǥi is \sc Nengazen\sc* kayi te kedì te,  
\v 17 “Sikew is etew, midhimu ku sikew he perevantey te menge etew te Israel. Umbe emun duen egkezineg nu he petizaan he ebpuun kayi te kedì ne segugunè nu keǥiya ziyà te kandan.  
\v 18 Emun egkaǥi a ziyà te sevaha he etew he lalung he ebpatey sikandin, piru wazè nu sikandin petizeeni he engkezi zin is mezaat he vaal zin su wey kenè mebpatey, ne ebpatey haazà is lalung he etew tenged te salè din, ne edsukutan ku sikew tenged te kemetayen din.  
\v 19 Iyan, emun mibpetizeenan nu sikandin piru wazà gihapun med-engked te mezaat he vaal zin, ebpatey sikandin tenged te salè din, piru wazè nu televaken kayi te kediey.  
\v 20 Emun ed-engked he edtinazeng is metazeng he etew su ebaal te salà, ne emun ebey-anan ku en sikandin, ebpatey sikandin. Emun wazè nu sikandin petizeeni, ebpatey sikandin tenged te salè din, ne kenè ku en edtentenuzan is meupiya he menge vaal zin. Piru edsukutan ku sikew tenged te kemetayen din.  
\v 21 Iyan, emun mibpetizeenan nu sikandin he kenà mebaal te salà, ne mibpezumazuma kenikew, ne kenà sikandin ebpatey ne wazè nu televaken kayi te kedì.” 
\p  
\v 22 Kayi te kediey is gehem te \sc Nengazen\sc* ne migkeǥiyan e zin te, “Genat ka, hendiyè ka te suǥud su zutun duen egkeǥiyen ku kenikew.”  
\v 23 Umbe, midhendiyà a te suǥud, ne neehè ku is kebpenganlag te \sc Nengazen\sc* iring te neehè ku ziyà te veyvey te Wahig he Kebar, ne midluhud a.  
\v 24 Ne midumala a te Mulin-ulin ne impehitindeg e zin ne migkaǥi te, “Ulì ka ne lelekeb ka ziyà te valey nu!  
\v 25 Ne zutun ebekusen ka te pisì su para kenè ka mekepekiduma te menge zuma nu he meǥinged.  
\v 26 Ed-emawen ku sikew su wey nu kenà mepetizeeni heini is mesinupaken he menge etew.  
\v 27 Piru zutun te timpu he ebpekidlalag a kenikew, ne ebpekekaǥi ke en. Ne keǥiya nu kandan is menge lalag he migkaǥi te Nengazen he MEGBEVAYÀ. Ne ebpemineg is duma kandan ne is duma, kenà, su mesinupaken sikandan he menge etew.” 
\c 4  
\s1 Impaahà ni Ezekiel Ke Nemenumenu is Kedsurunga te Jerusalem 
\p  
\v 1 Migkeǥiyan a te \sc Nengazen\sc* te, “Guntaan, sikew is etew, kuwa ka te brik, ne isavuk nu ziyà te etuvangan nu, ne druwinga nu zuen is inged he Jerusalem.  
\v 2 Ne himuwa nu heini he henduen be te edliǥuyan te menge kuntada. Ne sevuki nu heini te para te kedsurung: menge turi-turi, pemenehikà dutun te verengbeng, idtambù he menge tanà su para mepemenehiki is berengbeng, menge kayu he ibpenbengkag dutun te verengbeng. Ne pelinguti nu heini te menge kampu.  
\v 3 Ne kuwa ka te meluag he putew ne iyan heini iverengbeng nu ziyà te mid-elangan niw zuen te inged. Ne ed-etuvang ka zutun te inged is uvag edsurung kayi. Egkehimu heini he petizaan te menge etew te Israel he edsurungen sikandan te menge kuntada zan. 
\p  
\v 4 “Kegkepasad nu kayi, hizeǥè ka he edtengkilid dapit te givang nu. Simbulu heini he edtiangen nu is salà te menge etew te Israel. Tianga nu is salè dan seled te kahabet te menge andew te kedhizeǥè nu.  
\v 5 Is senga andew ebpesavut te senge-tuig. Umbe seled te 390 he andew is kedtianga nu te menge salè dan.  
\v 6 Ne kegkepasad dutun, tengkilid ka zapit te kewanan nu ne tianga nu zaan is salà te menge etew te Juda seled te 40 he andew; is senga andew ebpesavut gihapun te senge-tuig.  
\v 7 Ne umani nu sineruwi is Jerusalem ne tegnaa nu is mezaat he egkehitavù te Israel he wazà tambun te bekelawan nu.  
\v 8 Ebekusen ku sikew para kenè ka mekevelvelikid taman te egkepasad nu te ebpaahà is kedsurunga zuen te inged. 
\p  
\v 9 “Guntaan kuwa ka te trigu, barli, lisu he menge utanen, belatung, tikap, wey ispilta, ne ipedsesahug nu heini is langun diyà te sevaha he teleǥuey ne veeli nu he supas. Ne iyan heini keena nu seled te 390 he andew he edhizeǥè ka he edtengkilid dapit te ǥivang nu.  
\v 10 240 zà he gramu he supas is keena nu kada andew te egketendek he menge uras.  
\v 11 Ne tengè dà te litru he wahig is inuma nu kada andew te egketendek he menge uras.  
\v 12 Lutua nu is supas kada andew zutun te edtengteng is menge etew. Lutua nu heini iring te kedhilutù te supas he barli. Iyan nu itavun is egkeǥangu he tai te etew, ne keena nu is supas.  
\v 13 Su iring daan kayi is egkehitavù diyà te menge etew te Israel, egkaan sikandan diyà te menge lugar te ebpekevihag kandan te menge keenen he mid-isip he meremerik.” 
\p  
\v 14 Ne migkaǥi a te, “He Nengazen he MEGBEVAYÀ, netuenan nu he wazè ku remeriki is keugelingen ku puun te vatè e pa taman en guntaan. Wazà a keenu mekekaan te uyaǥen he minatey etawa midhimetayan te sengelelanggam. Wazè e zaan keenu mekekaan te langgam he mid-isip he meremerik.”  
\v 15 Midtavak is \sc Nengazen\sc* te, “Emun iyan heeyan tai zà te vaka is itavun nu he ilis te tai te etew.” 
\p  
\v 16-17 Migkaǥi pa is \sc Nengazen\sc* te, “Sikew is etew, egkeǥiyen ku kenikew he edhimuwen ku he zeisey zà is egkekaan diyà te Jerusalem. Edtekesen dà te menge meǥinged diyà te Jerusalem is keenen dan wey wahig he egkeinum dan tenged te egkaamuy-amuy zà heini. Egkaan sikandan wey ed-inum duma is kegkeliveg tenged te egkeamuy-amuy is egkekaan dan wey ed-inumen dan. Ebpetengtengtengè dan he egkengeheratan, ne egkenaneynaney sikandan ebpematey tenged te salè dan.” 
\c 5  
\s1 Is Ebpekeuma he Kezeetan te Jerusalem 
\p  
\v 1 Migkeǥiyan a te \sc Nengazen\sc* te, “Sikew is etew, kuwa ka te meǥarang he ispada ne ǥemita nu heini he kiskis te ulu nu wey sumpè nu. Ne timbanga nu is bulvul nu wey sumpè nu ne vehina nu te tetelu he vahin.  
\v 2 Isavuk nu is egkehuna he vahin diyà te brik he midruwingan te Jerusalem, ne vinsuli nu heini ziyà te teliwazà te inged, emun egkepasad nu en te ebpaahà is kedliǥuyi zuen te inged. Isavuk nu is senge vahin diyà te peliǥuy te inged, ne penempeza nu heini zuen te ispada nu. Is bahin he egkesamà ne isimburè nu, su ibpeyapat ku is menge etew ku pinaaǥi te ispada.  
\v 3 Ne samè ka te zeisey he vulvul ne tengesa nu te visti nu.  
\v 4 Terini nu heini te egkepipira he vuuk ne vinsuli nu. Ne ebpuun kayi edelandap is hapuy ne egkevinsulan is tivuuk he Israel. 
\p  
\v 5 “Iyan a, is Nengazen he MEGBEVAYÀ, migkaǥi te iyan heeyan egkeulaula ziyà te Jerusalem, kes inged he midhimu ku he utew impurtanti he lugar kayi te kelibutan.  
\v 6 Piru midrapas din is menge suǥù ku, ne midsubra pa is kandin he kelelalung te kelelalung te zuma he menge nasyun diyà te peliǥuy zin. Inselikwey zin is menge suǥù ku wey menge sulunuzen.  
\v 7 Umbe siak, is Nengazen he MEGBEVAYÀ, migkaǥi te: Sikiyu is menge tig-Jerusalem, edhuna pa is keniyu he kelelalung te kelelalung te menge etew ziyà te menge nasyun he nekeliǥuy keniyu. Wazè niw zaan tumana is menge suǥù ku wey menge sulunuzen.  
\v 8 Umbe siak, is Nengazen he MEGBEVAYÀ, iyan a ebpekigkuntada keniyu. Edsilutan ku sikiyu te silut he egkaahà te menge etew ziyà te menge nasyun.  
\v 9 Tenged te utew mezaat he menge vaal niw, ebeelan ku keniyu is wazè ku pa keenu meveeli ne kenè ku en ed-umanan te ebaal.  
\v 10 Egkeenen te menge ǥinikanan is menge anak dan, ne egkeenen te menge anak is menge ǥinikanan dan. Edsilutan ku iyan sikiyu, ne is egkesamà keniyu ibpeyapat ku kayi te tivuuk he kelibutan.  
\v 11 Iyan a, kes uuyag he Nengazen he MEGBEVAYÀ, ebpenangdù a he edezeetan ku sikiyu duma is kenà kegkehizu su midremerikan niw is baley ku pinaaǥi te ked-azap niw te zuma he menge ed-ezapen wey kebaal niw te utew mezaat he menge vaal.  
\v 12 Ebehinen ku sikiyu te tetelu he vahin. Is egkehuna he vahin ebpematey keniyan te inged pinaaǥi te vitil wey menge zaru. Is ikezuwa he vahin ebpematey pinaaǥi te ispada ziyà te ǥawas keniyan te inged. Ne is iketelu he vahin ibpeyapat ku kayi te tivuuk he kelibutan ne ibpelaus ku is kedlisliseza ku kandan. 
\p  
\v 13 “Pinaaǥi keniyan igkevuswang ku is pauk ku kandan, ne igkepeǥezaman ku is rerangit ku para mevehew is utew ku kegkepauk.  
\v 14 Ebengkaǥen ku is inged niw ne ebpeel-elezan ku sikiyu ziyà te menge nasyun he nekeelingkus keniyu wey te menge sumeseǥàzà kayi te inged niw.  
\v 15 Ed-un-undahan kew, edsudien kew, wey igkelimezangi kew te menge etew ziyà te menge nasyun he nekeelingkus keniyu. Egkehimu kew he petizaan para kandan dutun te timpu te kedsiluti ku keniyu tenged te utew ku kegkepauk. Iyan a, is \sc Nengazen\sc*, is migkaǥi kayi.  
\v 16 Ebpeeǥiyan ku sikiyu te vitil he iring te panà he edezaat keniyu. Ed-iseg-iseg is kepait dutun he vitil taman te wazè niw en egkekaan.  
\v 17 Gawas te vitil edsuǥuen ku zaan diyà te keniyu is dumezaas he menge langgam ne ebpenhimetayan dan is menge anak niw. Ebpematey kew zaan pinaaǥi te menge zaru wey tebek. Iyan a, is \sc Nengazen\sc*, is migkaǥi kayi.” 
\c 6  
\s1 Is Lalag he Ebpekesuǥat te menge Buvungan diyà te Israel 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, sinaru ka ziyà te menge vuvungan te Israel ne rewaki nu heini:  
\v 3 He menge vuvungan te Israel, menge zal-ug wey menge suǥud, pemineǥa niw is egkeǥiyen te Nengazen he MEGBEVAYÀ: Ebpeeǥiyan ku sikiyu te tebek, ne ebpemengkaǥen ku is menge simbahan niw ziyà te metikang he menge lugar.  
\v 4 Egkengevengkag is menge pemuhatè niw ragkes en is menge pemuhatà he edtutungan te menge veyewà, ne ebpenhimetayan ku is menge meǥinged diyà te keniyu diyà te etuvangan te menge ed-ezapen niw.  
\v 5 Ibpelastar ku sikiyu is ebpematey he menge Israilihanen diyà te etuvangan te menge ed-ezapen niw ne ibpeyapat ku is menge tulan niw ziyà te ebpekeliǥuy te menge pemuhatè niw.  
\v 6 Is kada inged niw ne edezeetan. Egkengerupet is menge simbahan niw ziyà te metikang he menge lugar, menge ed-ezapen, menge pemuhatà, ragkes is menge pemuhatà he edtutungan te menge veyewà, wey is duma pa he iring kayi te menge vineelan niw.  
\v 7 Ebpematey is menge meǥinged kayi, ne egketuenan niw he iyan a \sc Nengazen\sc*. 
\p  
\v 8 “Piru kenè ku sikiyu ed-eminen te edhimatey. Is duma keniyu ebpekepelaǥuy te tebek ne ebpekepeyapat dan diyà te zuma he menge nasyun  
\v 9 su egkengevihag sikandan. Dutun egketenuzan e zan, ne egkeseǥipè dan he mibeǥayan e zan bes te seeng tenged te kedluivi zan kedì su iyan dan impelavi is duma he menge ed-ezapen. Edumutan dan is keugelingen dan tenged te mezaat wey utew mahawag he menge vaal zan.  
\v 10 Ne egketuenan dan he iyan a \sc Nengazen\sc*, ne tinutuuwà is kegkaǥi ku he ibpaaǥi ku ziyà te kandan heini he menge kezeetan.” 
\p  
\v 11 Ne migkaǥi is Nengazen he MEGBEVAYÀ kayi te kedì te, “Sumbaǥa nu is palad nu, padewpadew ka, ne pemensag ka te, ‘Hanu ve!’ te kebpaahaa nu te kegkeseeng wey kegkepauk nu te menge etew te Israel, tenged te langun he mezaat wey utew mahawag he menge ulaula zan. Iyan heini hinungdan te kebpematey zan pinaaǥi te tebek, bitil, wey zaru.  
\v 12 Is diyà te meziyù ebpatey te zaru. Is diyà te uvey ebpatey te tebek. Ne is egkesamà ebpatey te vitil. Pinaaǥi kayi igkevuswang ku is rerangit ku.  
\v 13 Ne egketuenan dan he iyan a \sc Nengazen\sc* emun is ebpematey he zuma zan he meǥinged ebpekepeyapat en duma te menge ed-ezapen dan diyà te peliǥuy te menge pemuhatè dan, diyà te menge vuvungan, diyà te puntur te menge vuntud, diyà te sihung te zezekelà he menge kayu, wey ziyà te sihung te merapung he menge kayu he ulayan, he zutun dan ebpemuhata te veyewà is langun he menge ed-ezapen dan.  
\v 14 Edsilutan ku sikandan minsan hendei zan ed-ubpà, ne egkehimu he mekevulungbulung is tanè dan puun te sibsivayan diyà te zivavà pehendiyà te Dibla ziyà te zizaya, ne zutun egketuenan dan he iyan a \sc Nengazen\sc*.” 
\c 7  
\s1 Hapit en is Ketepusan te Israel 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, iyan a is Nengazen he MEGBEVAYÀ migkaǥi ziyà te nasyun he Israel te, ‘Iyan en heini ketepusan te tivuuk he tanà te Israel.  
\v 3 Ketepusan niw en, su ibpeǥezaman ku en keniyu is pauk ku. Edhukuman ku sikiyu te sungkad te menge vaal niw. Ebelesan ku sikiyu te langun he utew memezaat he menge ulaula niw.  
\v 4 Kenè ku sikiyu egkehizuwan. Edsilutan ku sikiyu tenged te menge vaal niw wey te utew mahawag he menge ulaula niw, su wey niw metueni he iyan a \sc Nengazen\sc*.’ 
\p  
\v 5 “Iyan a, is Nengazen he MEGBEVAYÀ, migkaǥi te: Ebpekeuma is ebpekedtutundug he kezeetan.  
\v 6 Ne iyan en heini ketepusan! Egketapus kew en,  
\v 7 sikiyu is menge meǥinged diyà te tanà te Israel. Iyan en heini andew te kezeetan niw. Hapit en is timpu he egkengeteranta kew. Nepasad en is melipayen he menge andew niw ziyà te menge vuntud.  
\v 8 Kenè en egkeuǥet ne ibpeǥezaman ku en keniyu is utew ku kegkepauk. Edhukuman ku sikiyu sumalà te vineelan niw. Ebelesan ku sikiyu tenged te utew mezaat he menge vaal niw.  
\v 9 Kenè ku sikiyu egkehizuwan. Edsilutan ku sikiyu sumalà te vineelan niw wey te utew mezaat he menge ulaula niw. Ne zutun egketuenan niw he iyan a, is \sc Nengazen\sc* midsilut keniyu. 
\p  
\v 10 “Guntaan hapit en is andew te kegkezeeti niw! Utew en subra is kezaat niw wey kebpelavew te menge etew.  
\v 11 Is utew zan kegkemesipala edlikù diyà te kandan he silut tenged te kelelalung dan. Wazà egkesamà kandan, ne egkahanew is langun he ketiǥeyunan dan.  
\v 12 Uya, hapit en is timpu te kedsilut. Kenè en ereg he egkelipey is ebpememasa tenged te nekahangyù dan, wey kenè en ereg he egkeseeng is ebpemelegyà tenged te neǥansi sikandan, su is pauk ku egkeǥezaman te langun.  
\v 13 Emun duen pa menge nigusyanti he egkesamà, kenè en sikandan ebpekelikù te nigusyu zan, su is nekaǥi ku he egkehitavù diyà te langun he menge etew te Israel egkehitavù iyan. Is minsan hentei he ebaal te mezaat kenà egkelibri is untung din.  
\v 14 Minsan ibpezaǥing dan pa is trumpita su wey mekepengandam is langun te kebpekidtebek, ne wazà eduma ziyà te edtebekan, su is langun ebpekesaǥad te pauk ku. 
\p  
\v 15 “Is menge etew ziyà te ǥawas te inged, ebpatey te tebek. Ne is kenà ed-awà diyà te inged ebpatey te zaru wey vitil.  
\v 16 Ne emun duen ebpekelingkawas te kemetayen he ebpekepelaǥuy ziyà te menge vuvungan, ebpekezag-es iring te merepatik, tenged te menge salè dan.  
\v 17 Edluyahan is menge velad dan wey menge vuel zan.  
\v 18 Ebivisti sikandan te saku wey egkiskisan dan is menge ulu zan te kebpaahà te kegkeseeng dan. Ne utew sikandan egkahandek wey egkeeled.  
\v 19 Ibpenimbag dan is menge pelata zan wey menge vulawan dan diyà te menge zalan he henduen be te meremerik he menge vutang. Kenà heini ebpekelibri kandan dutun te andew he ibpeehè ku is kegkepauk ku. Kenà heini ebpekahantey kandan su iyan heini hinungdan te kebaal zan te salà.  
\v 20 Impegalbu zan is mekempet he menge elahas dan, ne migamit dan heini wey zan mekavaal te ledawan te utew mezaat he menge ed-ezapen dan. Umbe edhimuwen ku is menge ketiǥeyunan dan he iring te meremerik he menge vutang para kandan.  
\v 21 Ibpaaǥew ku heini te lalung he menge etew he ziyà te zuma he lugar, ne edremerikan dan heini.  
\v 22 Ebpesegdanen ku en sikandan dutun te kedremeriki zan wey kebpenevana zan te menge azen dutun te lugar he utew ku mibmahal. 
\p  
\v 23 “Ibpevihag ku is menge etew ku su grabi is hinimetayà wey kesamuk diyà te nasyun dan.  
\v 24 Ibpaaǥew ku is menge valey zan te utew lalung he menge etew he ebpuun diyà te zuma he menge nasyun. Edtepusen ku is kebpegalbu te lavew he menge etew ziyà te kandan, ne ebpesegdanen ku en he remeriki is menge simbahan dan.  
\v 25 Egkeseǥazan dan is utew kegkahandek ne ebpen-ehè dan te kelinew piru kenè dan heini egketuredu.  
\v 26 Egkeumahan sikandan te ebpekedtutundug he kezeetan wey mezaat he menge tudtul. Ebpepenudtul zan pezem te menge ebpeneuven piru kenà sikandan egketudtulan. Kenè en ibpenurù te menge memumuhat is mehitenged te kesuǥuan, ne wazè en daan penurù he ebpuun diyà te menge pengulu.  
\v 27 Edlalew is hadì wey egkaawà is perateng din, ne egkerkeren is menge etew tenged te kegkahandek. Edsilutan ku sikandan sumalà te vineelan dan, ne ebeelan ku ziyà te kandan is mibeelan dan diyà te zuma. Ne egketuenan dan dutun he iyan a \sc Nengazen\sc*.” 
\c 8  
\s1 Is Ked-ezapa te zuma he menge Ed-ezapen diyà te Jerusalem 
\p  
\v 1 Hein ikelima he andew te ikeenem he vulan, dutun te ikeenem he tuig te kegkevihag dey, midumala a te Nengazen he MEGBEVAYÀ. Dutun ebpimpinuu a ziyà te valey ku he ebpekidlalag kedì is menge edumala te Juda.  
\v 2 Duen neehè ku he henduen be te etew. Puun te hawak din pehendiyà te zizalem ne henduen sikandin te hapuy, ne puun te hawak din pehendiyà te zivavew ne iring sikandin te ed-ilak-ilak he mital.  
\v 3 Ingkawè din is henduen be te velad din ne migewezan e zin diyà te vulvul. Mibitbit a te Mulin-ulin diyà te hewhewanan ne mid-uwit e zin diyà te Jerusalem, diyà te zizaya he pultahan dutun te seled te lama duen te valey te \sc Nengazen\sc* he zutun is ledawan te sevaha he ed-ezapen he utew ingkepauk te Megbevayà.  
\v 4 Ne neehè ku zutun is mekeǥeǥehem he kebpenganlag te Megbevayà te Israel, he iring te neehè ku ziyà te suǥud. 
\p  
\v 5 Ne migkaǥi is Megbevayà kayi te kedì te, “Sikew is etew, tengteng ka ziyà te zapit te zizaya.” Umbe midtengteng a, ne neehè ku ziyà te avey te idselang pehendiyà te pemuhatà is ledawan te ed-ezapen he utew ingkepauk te Megbevayà.  
\v 6 Ne migkaǥi is Megbevayà kayi te kediey te, “Sikew is etew, neehè nu ve is mibeelan te menge etew te Israel? Neehè nu ve is utew mezaat he mibeelan dan para te kedsegseg kedì puun te valey ku? Piru zuen nu pa egkaahà he menge vaal he edhuna pa he utew mezaat keniyan.” 
\p  
\v 7 Ne mid-uwit e zin diyà te idselang te lama zuen te valey te \sc Nengazen\sc*, ne kedtengteng ku, neehè ku is budsi te verengbeng.  
\v 8 Migkeǥiyan e zin te, “Sikew is etew, pekeluaǥa nu heeyan is budsi te verengbeng.” Ne mibeelan ku haazà, ne neehè ku is sevaha he idselang.  
\v 9 Ne migkaǥi en maan sikandin te, “Seled ka ne ahaa nu is utew mezaat he vaal he mibeelan dan.”  
\v 10 Umbe, midseled a ne neehè ku he sikan is berengbeng ne nezengkuuran te nekedseselekawà he menge ledawan te menge langgam he edula wey zuma pa he menge langgam he mid-isip he meremerik. Neehè ku zaan is langun he ed-ezapen te menge etew te Israel.  
\v 11 Ne ziyà te egkesineruwan kayi edhithitindeg is 70 he menge edumala te Israel, ne is sevaha kandan iyan si Jaazania he anak ni Shafan. Is kada sevaha kandan egawed te teleǥuey te veyewà, ne edlipuwak is mekepal he evel te veyewà. 
\p  
\v 12 Ne migkaǥi is Megbevayà kayi te kedì te, “Sikew is etew, neehè nu en be ke hengkey is ebeelan he meeles te menge edumala te Israel? Diyà is kada sevaha kandan te ruǥu te ed-ezapen din, su ke sikandan te, ‘Kenè kiw egkaahà te \sc Nengazen\sc*; inselikwey zin en is Israel.’ ” 
\p  
\v 13 Migkaǥi en maan is Megbevayà te, “Ebpekeehè ke pa te edhuna pa keniyan he utew mezaat.”  
\v 14 Ne midume e zin diyà te zizaya he ǥemawan te valey te \sc Nengazen\sc*, ne zutun neehè ku is menge vahi he ebpemimpinuu ne edsineǥawan dan is ed-ezapen dan he si Tamuz.  
\v 15 Migkaǥi is Megbevayà kayi te kedì te, “Sikew is etew, neehè nu ve heeyan? Ebpekeehè ke pa te lavew pa utew he mezaat keniyan he menge vaal.” 
\p  
\v 16 Ne mid-uwit e zin diyà te seled he lama duen te valey te \sc Nengazen\sc*. Ne ziyà te ǥemawan te valey te \sc Nengazen\sc* he ziyà te pid-elangan te varkun wey pemuhatà, duen 25 he menge etew. Ed-iniyug sikandan duen te valey te \sc Nengazen\sc* he edsinaru ziyà te edsilaan su ed-ezapen dan is edsilà he andew. 
\p  
\v 17 Ne migkaǥi is Megbevayà kayi te kedì te, “Sikew is etew, neehè nu ve heeyan? Kunaan bes te menge etew te Juda ke kenà mezaat is kebaal keniyan te utew mezaat he menge vaal? Ne mibeǥayan dan pa te kesamuk is nasyun. Pinaaǥi kayi midhimu zan he utew a mepauk. Ahaa nu is kebpesipelahi zan kediey!  
\v 18 Umbe, ibpeǥezaman ku kandan is pauk ku. Kenè ku sikandan egkehizuwan. Minsan ikulahì dan pa te mezaǥing is kebuyù dan te tavang kayi te kediey, ne kenè ku sikandan ebpemineǥen.” 
\c 9  
\s1 Mibpenhimetayan is Ed-azap te zuma he menge Ed-ezapen 
\p  
\v 1 Ne nezineg ku is Megbevayà he nemensag te, “Egpas kew zini te Jerusalem, sikiyu is menge etew he edsilut te menge meǥinged kayi te inged, ne uwita niw is menge ǥumaan niw.”  
\v 2 Ne zutun duen heenem he etew he midseled diyà te zizaya he ǥemawan te valey te \sc Nengazen\sc* ne is kada sevaha kandan duen din uwiten he ǥumaan. Duen etew he zuma zan he mibivisti te linu he midseluniket te teleǥuey te idsurat. Midhitindeg dan diyà te kilid te pemuhatà he brunsi.  
\v 3 Puun pa zengan sikan is gapun etawa regreg he tuus te mekeǥeǥehem he kebpekiduma te Megbevayà te menge Israilihanen ne egkaahà diyà te zivavew zuen te ledawan te menge kirubin he ziyà te seled duen te simbahan, piru kayi he timpu mid-awà heini zutun ne midhalin diyà te ǥemawan te valey te \sc Nengazen\sc*. Ne mid-umew te \sc Nengazen\sc* sikan is etew he mibivisti te linu he seseluniket te teleǥuey te idsurat,  
\v 4 ne migkeǥiyan din te, “Liǥuya is Jerusalem ne merkahi nu is buked duen te ingkeseeng dan is utew mezaat he menge vaal he mibeelan diyà te seled te inged.” 
\p  
\v 5 Ne nezineg ku is Megbevayà he migkeǥiyan din sikan is heenem he menge etew te, “Tunduǥa niw sikandin pehendiyà te inged ne penhimetayi niw is menge etew he wazà marka ziyà te vuked dan. Kenè niw sikandan kehizuwi.  
\v 6 Penhimetayi niw is menge meǥurang, menge vetan-en he menge maama wey menge vahi, menge iney, menge vatà, piru kenè niw kevuta is duen dan menge marka. Diyè kew puun te valey ku.” Umbe midhuna zan penhimetayi is menge pengulu he ziyà te egkesineruwan duen te valey te \sc Nengazen\sc*. 
\p  
\v 7 Ne migkaǥi is Megbevayà diyà te kandan te, “Genat kew en. Remeriki niw heeyan is baley ku pinaaǥi te kedsavuk niw te menge minatey ziyà te lama.” Ne migenat dan ne mibpenhimetayan dan is menge etew zuen te tivuuk he inged.  
\v 8 Ne zutun te kebpenhimatey zan, netaǥak a is sebsevaha. Midlangkeb a is nengumew te Megbevayà, “He Nengazen he MEGBEVAYÀ, ed-eminen nu ve ebpenhimetayi is nengesamà kayi te Israel tenged te kegkepeuki nu te menge tig-Jerusalem?”  
\v 9 Midtavak sikandin kediey te, “Utew en subra is salà te menge etew te Israel wey Juda. Subre en is kebpehimhimetayà ne wazè en hustu he kukuman diyà te inged. Egkaǥi pa sikandan te kenà edtengteng is \sc Nengazen\sc* kenitew, su inselikwey zin en is Israel!  
\v 10 Umbe kenè ku sikandan egkehizuwan; ebeelan ku ziyà te kandan is mibeelan dan diyà te zuma.” 
\p  
\v 11 Ne sikan is etew he mibivisti te linu wey midseseluniket te teleǥuey te idsurat, midlikù ne migkeǥiyan din is \sc Nengazen\sc* te, “Netuman ku en is insuǥù nu kediey.” 
\c 10  
\s1 Mid-awà is Mekeǥeǥehem he Kebpekiduma te Megbevayè te Baley Din 
\p  
\v 1 Dutun te edtengteng a, duen neehè ku he henduen be te pinuuwà te kedhadì he vatu he sepiru ziyà te zivavew te tambun he kristal he ziyà te zivavew te ulu zuen te menge kirubin.  
\v 2 Migkeǥiyan te \sc Nengazen\sc* sikan is etew he mibivisti te linu te, “Hendiyè ka te teliwazà keniyan te egketileng he menge ligid dizalem te menge kirubin, ne akup ka te menge vaǥa ne isimburè nu keniyan te inged.” Ne neehè ku he midseled sikandin. 
\p  
\v 3 Midhitindeg sikan is menge kirubin diyà te egkezivavà he kilid duen te valey te \sc Nengazen\sc* hein midhendiyà sikan is etew, ne zuen gapun he mid-eneb duen te lama te valey te \sc Nengazen\sc*.  
\v 4 Ne mid-awà is mekeǥeǥehem he kebpekiduma te \sc Nengazen\sc* puun duen te menge kirubin ne midhalin diyà te ǥemawan te valey te \sc Nengazen\sc*. Neeneb te ǥapun haazà is baley te \sc Nengazen\sc*, ne mibmerayag sikan is lama te kerayag te mekeǥeǥehem he kebpekiduma te \sc Nengazen\sc*.  
\v 5 Is rekubkub te menge pakpak duen te menge kirubin egkezineg minsan diyà te ǥawas duen te lama, iring heini te laǥeng te Mekeǥeǥehem he Megbevayà emun egkaǥi. 
\p  
\v 6 Hein midsuǥù te \sc Nengazen\sc* sikan is etew he mibivisti te linu he megkuwa te vaǥa ziyà te teliwazà te menge egketileng he menge ligid he ziyà te zizalem te menge kirubin, midhendiyà sikandin ne midhitindeg diyà te avey te sevaha he ligid.  
\v 7 Ne is sevaha zuen te menge kirubin migkuwa te vaǥa zuen te hapuy ne induwal zin duen te etew he mibivisti te linu. Ne midawat duen te etew ne migawas.  
\v 8 Diyà te zizalem te menge pakpak dutun te kirubin duen egkeehè ta he henduen be te velad te etew. 
\p  
\v 9 Duen daan neehè ku he heepat he ligid, is sevaha ziyà te avey te kada kirubin. Ed-ilak-ilak heini iring te vatu he krisulitu,  
\v 10 ne neked-iring is kegkeveeli kayi. Is kada ligid ne zuen pa sevaha he ligid din he nekebelevaǥà,  
\v 11 umbe ebpekehendiyà heini wey haazà is menge kirubin te minsan hendei renged he kenè en kinahanglan he ebelikùkù etawa eberiyung.  
\v 12 Is tivuuk he lawa zutun te menge kirubin, ragkes en is peka zan, belad dan, pakpak dan neeneb te menge mata, ne iring din ded daan sikan is menge ligid.  
\v 13 Ne nezineg ku he migngezanan heini te, “egketileng he menge ligid.”  
\v 14 Is kada kirubin, duen din heepat he vuked. Is dagwey te egkehuna dagwey te kirubin, ne is dagwey te ikezuwa dagwey te etew, ne is dagwey te iketelu dagwey te erimaung, ne is ikeepat dagwey te kulaǥu. 
\p  
\v 15 Ne wazà meketanà diyà te tanà haazà is menge kirubin. Iyan heini sikandan kes uuyag he menge linimbag he neehè ku ziyà te Wahig he Kebar.  
\v 16 Ke hendei ebayà haazà is menge kirubin, ne zutun daan ebayà haazà is menge ligid, emun edlayang sikandan ebpekelapik daan haazà is menge ligid.  
\v 17 Emun ebpundu sikandan, ebpundu zaan haazà is menge ligid, ne emun ebpezivavew zan, ebpezivavew zaan haazà is menge ligid, su is mulin-ulin dan ne zutun te menge ligid.  
\v 18 Ne sikan is mekeǥeǥehem he kebpekiduma te \sc Nengazen\sc* mid-awà duen te ǥemawan te valey te \sc Nengazen\sc* ne midhalin diyà te zivavew zuen te menge kirubin.  
\v 19 Ne zutun te edtengteng a, midlayang haazà is menge kirubin, duma zuen te menge ligid. Ne midteren dan diyà te ǥemawan he zapit te edsilaan duen te valey te \sc Nengazen\sc*, ne sikan is mekeǥeǥehem he kebpekiduma te Megbevayà te Israel ne ziyà te zivavew zan. 
\p  
\v 20 Iyan heini sikan is uuyag he menge linimbag he neehè ku ziyà te dizalem te Megbevayà te Israel hein diyà a te Wahig he Kebar. Ne netuenan ku he menge kirubin sikandan.  
\v 21 Is kada sevaha kandan, duen din heepat he vuked wey heepat he pakpak, ne ziyà te zizalem te menge pakpak dan duen henduen be te velad te etew.  
\v 22 Is paras dan iring te zagwey zuen te uuyag he menge linimbag he neehè ku ziyà te Wahig he Kebar. Is kada sevaha kandan edhipanew he kenè en ebpenlililingey. 
\c 11  
\s1 Edsilutan te Megbevayà is menge Pengulu te Jerusalem 
\p  
\v 1 Mibitbit a te Mulin-ulin ne mid-uwit e zin diyà te ǥemawan te valey te \sc Nengazen\sc* he ebpekesinaru ziyà te edsilaan. Ne zutun te ǥemawan duen 25 he menge maama, he is dezuwa kandan iyan si Jaazania he anak ni Azur wey si Pelatia he anak ni Benaya, pengulu sikandan te menge etew.  
\v 2 Migkaǥi is \sc Nengazen\sc* kayi te kedì te, “Sikew is etew, iyan heini sikandan mibpelanu te mezaat wey mibeǥey kayi te inged te kenà meupiya he sambag.  
\v 3 Ke sikandan te, ‘Meupiya heini he timpu te kebpehitindeg te menge valey. Wazà egkevut kenitew. Is inged tew iring te kuzen ne iring kiw te usa ziyà te seled din he kenà egkevinsulan.’  
\v 4 Umbe, sikew is etew, rewaki nu sikandan.” 
\p  
\v 5 Ne midumala a te Mulin-ulin te \sc Nengazen\sc* ne migkeǥiyan e zin he keǥiya ku heini: “Iyan heini migkaǥi te \sc Nengazen\sc* diyà te keniyu te menge etew te Israel, ‘Netuenan ku ke hengkey is egkeǥiyen niw wey ed-isipen niw.  
\v 6 Mahabet is mibpenhimetayan niw kayi he inged ne nekepeyapat dà diyà te menge zalan is nemematey.  
\v 7 Umbe siak, is \sc Nengazen\sc* he MEGBEVAYÀ, egkeǥiyan ku sikiyu te: Tutuu he heini is inged iring te kuzen, piru sikan is nemematey he impeyapat niw kayi te inged ne iyan usa. Ne edsegseǥen ku sikiyu puun kayi te inged.  
\v 8 Egkahandek kew te tebek, piru ibpesurung ku sikiyu te menge kuntada niw. Iyan a, is Nengazen he MEGBEVAYÀ, is migkaǥi kayi.  
\v 9 Edsegseǥen ku sikiyu puun kayi he inged ne ibpevihag ku sikiyu te menge lumelengyawà ne ebpesilutan ku sikiyu kandan.  
\v 10 Ne ebpematey kew te tebek pehendiyè en te dulunà te Israel. Ne zutun egketuenan niw he iyan a \sc Nengazen\sc*.  
\v 11 Heini he inged kenè en egkehimu he iring te kuzen para keniyu, ne kenè kew egkehimu he iring te usa ziyà te seled din. Su edsilutan ku sikiyu taman te zulunà te Israel.  
\v 12 Ne zutun egketuenan niw he iyan a \sc Nengazen\sc*. Ebeelan ku heini su wazè kew medtuman te menge suǥù ku wey menge sulunuzen, iyan niw hinuun midtuman is menge sulunuzen te menge etew ziyà te zuma he menge nasyun.’ ” 
\p  
\v 13 Ne zutun te edtudtulen ku is menge lalag te Megbevayà, minatey si Pelatia he anak ni Benaya. Ne zutun midlangkeb a ne inhabet ku ivensag is lalag he edhenduen te, “He Nengazen he MEGBEVAYÀ, ed-eminen nu ve te ebpenhimatey is nesamà he menge Israilihanen?”  
\v 14 Migkaǥi is \sc Nengazen\sc* kayi te kedì te,  
\v 15 “Sikew is etew, is menge etew he nesamà diyà te Jerusalem, iyan heini lalag dan mehitenged keniyu te menge zuma zan he nengevihag, ‘Meziyù dan en te \sc Nengazen\sc*; ne heini he tanà, imbeǥey en kenitew te \sc Nengazen\sc* he egkaangken tew.’ 
\p  
\v 16 “Umbe keǥiyi nu is menge zuma nu he vinihag he siak, is Nengazen he MEGBEVAYÀ, migkaǥi a te, ‘Minsan impevihag ku sikiyu wey impeyapat ku ziyà te zuma he menge nasyun, ebpekiduma a ǥihapun keniyu keniyan he menge lugar.  
\v 17 Umbe siak, is Nengazen he MEGBEVAYÀ migkaǥi a he ed-umanan ku sikiyu edtiǥuma puun te menge nasyun he zutun kew mekepeyapat, ne id-uman ku ibeǥey keniyu is tanà he Israel.  
\v 18 Ne zutun te ked-ulì niw ziyà te keniyu he lugar, id-awè niw is langun he utew mezaat he menge ed-ezapen.  
\v 19 Ebeǥuwen ku is gehinawa niw wey isip niw. Id-awè ku is kebmesinupaken te gehinawa niw ne ebeǥayan ku sikiyu te ǥehinawa he mepezumdumahan kediey.  
\v 20 Edtumanen niw en is menge suǥù ku wey menge sulunuzen. Egkehimu kew he menge etew ku, ne egkehimu a he Megbevayè niw.  
\v 21 Piru sikan is edsimba te utew mezaat he menge ed-ezapen dan, edsilutan ku sumalà te bineelan dan. Iyan a, is Nengazen he MEGBEVAYÀ, is migkaǥi kayi.’ ” 
\p  
\v 22 Ne midlayang sikan is menge kirubin duma zuen te menge ligid diyà te avey zan, ne sikan is mekeǥeǥehem he kebpekiduma te Megbevayà te Israel midhendiyà te zivavew zan.  
\v 23 Ne nevitbit haazà is mekeǥeǥehem he kebpekiduma te \sc Nengazen\sc* puun dutun te inged, ne mibpundu ziyà te vuvungan he zapit te edsilaan te inged.  
\v 24 Ne pinaaǥi te kebpelewasa kedì te Mulin-ulin te Megbevayà nelewasan ku he mibitbit e zin ne mid-uwit e zin diyà te menge vinihag diyà te Babilonia. Ne netapus is nengelewasan ku mehitenged te Jerusalem.  
\v 25 Ne midtudtulan ku is menge vinihag te langun he impaahà te \sc Nengazen\sc* kedì. 
\c 12  
\p  
\v 1 Hein diyè e pa te Jerusalem, migkaǥi is \sc Nengazen\sc* kayi te kedì te,  
\v 2 “Sikew is etew, nengungubpaan ka zuma te mesinupaken he menge etew. Duen dan menge mata piru kenè dan ebpekaahà, duen dan menge telinga piru kenè dan ebpekezineg, su menge mesinupaken sikandan he menge etew.  
\v 3 Umbe, sikew is etew, peehè ka he iring te vinihag ka. Penines ka te menge azen nu ne hendiyè ka te selakew en he lugar. Ne veeli nu heini zutun te andew te edtengtengan ke zan. Su kela ke pinaaǥi kayi egkeisip-isip dan he menge mesinupaken dan.  
\v 4 Dutun te maandew pa, tinesa nu is ed-uwiten nu para meehè dan. Ne kebmezukilem, dutun te edtengtengan ke zan, hipanew ka he iring te vinihag ka.  
\v 5 Busluwa nu is elavat te valey nu zutun te edtengtengan ke zan, ne zutun ka vayà he ed-uwit te uwiten nu.  
\v 6 Ne zutun te edtengteng sikandan, bevaa nu is uwiten nu ne ǥenat ka zutun te egkesakep en. Tembuni nu is buked nu su wey nu kenà maahà is tanà. Heini is ebeelan nu ebpezayag te sevaha he petizaan diyà te menge etew te Israel.” 
\p  
\v 7 Ne midtuman ku haazà is insuǥù din. Maandew pa ne nenines ad te uwiten ku, ne hein mezukilem en, mibuslu ku is elavat ku pinaaǥi te menge velad ku. Ne zutun te edtengteng sikandan, mibava ku is uwiten ku ne migenat a zutun te merusirem en. 
\p  
\v 8 Ne hein meselem en migkaǥi is \sc Nengazen\sc* kayi te kedì te,  
\v 9 “Sikew is etew, emun ed-insà is mesinupaken he menge etew te Israel mehitenged te mibeelan nu,  
\v 10 keǥiyi nu sikandan he siak, is Nengazen he MEGBEVAYÀ duen menge lalag ku para te pengulu te Jerusalem wey te langun he menge etew te Israel.  
\v 11 Keǥiyi nu sikandan he sikan is mibeelan nu sevaha he petizaan diyà te kandan he egkevihag sikandan.  
\v 12 Minsan is pengulu zan, diyà ebpekevayà te vudsi te elavat he ebava te uwiten din is egenat dutun te merusirem he kezukileman. Edtembunan din is buked din su wey zin kenà maahà is tanà.  
\v 13 Edhingutelen ku sikandin ne ed-uwiten ku ziyà te Babilonia he tanà te menge Kaldiyanhen. Piru kenè din heini egkaahà, ne ebpatey sikandin dutun.  
\v 14 Ibpeyapat ku ziyà te minsan hendei is langun he menge etew zin, ragkes is menge suluǥuen din wey menge vantey zin, ne minsan hendei zan ebpevayà ebpehimetayan ku sikandan.  
\v 15 Ne emun igkepeyapat ku en sikandan diyà te menge nasyun, ne egketuenan dan human he iyan a \sc Nengazen\sc*.  
\v 16 Piru edtuǥutan ku is egkepipira kandan he mekelingkawas te tebek, bitil, wey zaru su wey zan metudtul ziyà te menge nasyun he egkepeveyaan dan is utew mezaat he menge vaal zan. Ne zutun egketuenan dan he iyan a \sc Nengazen\sc*.” 
\p  
\v 17 Migkaǥi pa is \sc Nengazen\sc* kayi te kedì te,  
\v 18 “Sikew is etew, pekekerker ka tenged te kegkahandek dutun te egkaan ka wey ed-inum ka.  
\v 19 Ne keǥiyi nu is menge meǥinged diyà te Jerusalem wey te tivuuk he Israel he siak, is Nengazen he MEGBEVAYÀ, migkaǥi a he egkengeseeng sikandan wey ebpengerkeren tenged te kegkahandek dutun te egkaan sikandan wey ed-inum, su ed-eǥawen is menge azen diyà te nasyun dan tenged te kegkemesipala zan.  
\v 20 Edèdeetan is menge inged dan ne egkehimu heini he mekevulungbulung. Ne egketuenan dan dutun he iyan a kes \sc Nengazen\sc*.” 
\p  
\v 21 Migkaǥi en maan is \sc Nengazen\sc* kayi te kedì te,  
\v 22 “Sikew is etew, maan is duen erubasa ziyà te Israel he edhenduen te, ‘Mahabet en is midlavey he menge timpu, piru wazè man metuman is menge tagnà.’?  
\v 23 Keǥiyi nu sikandan he, iyan a, is Nengazen he MEGBEVAYÀ edtapus kayi he erubasa, ne kenè dan en heini egkeumanan egkehisguti ziyà te Israel. Keǥiya nu ziyà te kandan he hapit en egketuman is menge tagnà.  
\v 24 Su egkaawè en diyà te Israel is tarù he egkengelewasan wey menge tagnà he kenà tutuu.  
\v 25 Su emun iyan a, is \sc Nengazen\sc* egkaǥi, ne segugunà heini egketuman. Egketuman en is migkaǥi ku he ebpekesuǥat diyà te keniyu te menge mesinupaken he menge etew. Egkehitavù heini ziyà te keniyu he timpu. Iyan a, is \sc Nengazen\sc* he MEGBEVAYÀ, migkaǥi kayi.” 
\p  
\v 26 Ne migkaǥi is \sc Nengazen\sc* kayi te kedì te,  
\v 27 “Sikew is etew, egkaǥi is menge etew te Israel te, ‘Is menge mibpelewasan din wey menge tagnè din ne egkeuǥet pa egkehitavù.’  
\v 28 Umbe, keǥiya nu heini ziyà te kandan: ‘Iyan a, is Nengazen he MEGBEVAYÀ, migkaǥi a te hapit en egketuman is migkaǥi ku. Uya, egkeulaula en heini.’ ” 
\c 13  
\s1 Edsilutan is menge Kenè Tutuu he Ebpeneuven 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, rewaki nu is menge tarù he ebpeneuven kayi te Israel he ebpenagnà te binèbeelan dan dà. Keǥiyi nu sikandan he mebpemineg dan kayi te menge lalag ku:  
\v 3 Iyan a, is Nengazen he MEGBEVAYÀ, migkaǥi he mekehizuhizu is tulebung he menge ebpeneuven he ebaalvaal zà te menge tagnè dan he wazè dan nelewasan.  
\v 4 He Israel, is menge ebpeneuven diyà te keniyu iring te menge leew he asu he ziyà te nevengkag he menge inged.  
\v 5 Wazè dan petizeeni is menge etew. Iring heini te wazè dan purungi is neǥevà he verengbeng te Israel su para melig-en heini ke egkeuma is tebek dutun te andew te kedsilut te \sc Nengazen\sc*.  
\v 6 Kenà tutuu is nelewasan dan ne tarù is menge tagnè dan. Kesikandan te ebpuun diyà te \sc Nengazen\sc* is menge lalag dan, piru iyan tutuu is wazè ku sikandan suǥua. Ne ebperateng pa sikandan te kegketuman te mibpengaǥi zan.  
\v 7 Kenà tutuu is nelewasan dan ne tarù is menge tagnè dan. Kesikandan te iyan haazà migkaǥi ku piru wazè ku haazà mekaǥi. 
\p  
\v 8 “Umbe siak, is Nengazen he MEGBEVAYÀ migkaǥi a he edsupaken ku is tarù he menge tagnè dan wey kenà tutuu he menge nelewasan dan.  
\v 9 Edsilutan ku sikandan is menge ebpeneuven he kenà tutuu is nengelewasan dan wey tarù is menge tagnè dan. Kenà sikandan egkilelaan he zuma te menge etew ku, ne is menge ngazan dan kenà idsurat diyà te listahan te menge etew ziyà te Israel, ne kenà sikandan ebpekeseled diyà te tanà te Israel. Ne human niw egketuenan he iyan a Nengazen he MEGBEVAYÀ. 
\p  
\v 10 “Heini he menge ebpeneuven, midtazin dan is menge etew ku pinaaǥi te kegkaǥi he meupiya is kebpekesavuk te langun, piru iyan tutuu is kenà heini meupiya. Iring heini te mibangun is menge etew te kenà melig-en he verengbeng, ne mibpekeplaan dà heini te menge ebpeneuven te minasa he utew zà deisey he simintu is insahug duen.  
\v 11 Keǥiyi nu heeyan is mibpekapla he egkevengkag heeyan is berengbeng dan. Ed-enuzen heini te mereǥes he uzan, egkeuluǥan heini te menge giyew he iring te menge vatu ne egkeremaǥen heini te mevendes.  
\v 12 Ne emun egketempag en heini, ed-insà is menge etew ziyà te kandan te, ‘Hengkey is nehimu te impekaple niw?’ 
\p  
\v 13 “Umbe siak, is Nengazen he MEGBEVAYÀ, egkaǥi a te: Tenged te utew ku kegkepauk, edtempaǥen ku is menge verengbeng pinaaǥi te mevendes he keramag, wey ked-uzan te zezekelà he menge ǥiyew, wey mereǥes he uzan.  
\v 14 Uya, edtempaǥen ku is berengbeng he mibpekeplaan te minasa he utew zà deisey he simintu is insahug duen. Edtempaǥen ku heini taman te egkaahà is pundasyun kayi. Ne emun egketempag en, egkeutunan kew ne egkeǥerè kew. Ne zutun egketuenan te langun he iyan a \sc Nengazen\sc*.  
\v 15 Ebeelan ku keniyan te verengbeng wey ziyà te mibpekapla duen is rimeǥas te utew ku kegkepauk. Ne ibpehibelu ku he wazè en is berengbeng wey is mibpekaplà duen  
\v 16 he iyan is menge ebpeneuven diyà te Israel he midtagnà he meupiya is kebpekesavuk te menge etew ziyà te Jerusalem, minsan pa te iyan tutuu is kenà heini meupiya. Iyan a, is Nengazen he MEGBEVAYÀ, is migkaǥi kayi. 
\p  
\v 17 “Guntaan, sikew is etew, penagnè ka te ebpekesuǥat te menge vahi he nenagnà te binèbeelan dà.  
\v 18 Keǥiyi nu sikandan te iyan a is Nengazen he MEGBEVAYÀ migkaǥi te: Mekehizuhizu kew is menge vahi he mid-akal te menge etew ku, batà etawa meǥurang, pinaaǥi te menge hinepetan niw, he ibevekelew niw wey ibpikit niw ziyà te menge lembung niw. Egkesuat kew he meveyveyai niw is menge etew ku su wey niw sikandan mepenepii.  
\v 19 Mibpendezeisey a keniyu ziyà te etuvangan te menge etew ku tenged dà te nepipira he kemkem te barli wey nepipira he supas. Mibpenhimetayan niw is kenà ereg he edhimetayan, ne mibpesagdan niw he meuyag-uyag is ereg pezem he ebpatey. 
\p  
\v 20 “Umbe siak, is Nengazen he MEGBEVAYÀ, migkaǥi a he utew a supak te menge hinepetan niw he migamit niw te ked-akal te menge etew he iring te penuǥes he nekeutel kandan. Id-awè ku heini puun te menge vekelawan niw, ne ibpaawè ku is menge etew he neiring te tagbis he neutel niw.  
\v 21 Id-awè ku zaan is menge lembung niw, ne edlibriyen ku is menge etew ku puun te ǥehem niw, ne kenè niw en sikandan egkeuman egkebiktima. Ne zutun egketuenan niw he iyan a \sc Nengazen\sc*. 
\p  
\v 22 “Naawà is kezasig te menge metazeng tenged te menge tarù niw, ne minsan siak wazà a mebeǥey kandan te seeng. Ne midasig niw is menge lalung he kenè dan ewai is kelelalung dan pinaaǥi te kedsaad niw kandan he egkelibri sikandan te kemetayen.  
\v 23 Umbe, kenè kew en ebpekelawas te tarù is ibpesavut din wey kenè kew en ebpekehimu he ebpenagnà. Edlibriyen ku is menge etew ku puun te ǥehem niw. Ne zutun egketuenan niw he iyan a \sc Nengazen\sc*.” 
\c 14  
\s1 Petizaan te menge Pengulu te Israel he Ed-azap te zuma he menge Ed-ezapen 
\p  
\v 1 Duen timpu he midhengkayi te kediey is menge pengulu te Israel, ne mibpinuu zan diyà te etuvangan ku su ebpeseysey zan te menge lalag he ebpuun te \sc Nengazen\sc*.  
\v 2 Migkaǥi is \sc Nengazen\sc* kayi te kedì te,  
\v 3 “Sikew is etew, heini he menge etew, utew zan mibmahal is menge ed-ezapen dan he kenà tutuu he megbevayà he iyan edsinumag kandan wey zan mekesalà, umbe kena a ebpeinsà kandan.  
\v 4 Guntaan, keǥiyi nu sikandan he siak, is Nengazen he MEGBEVAYÀ, migkaǥi a he is minsan hentei he Israilihanen he utew zin mibmahal is menge ed-ezapen din he iyan midsinumag kandin wey mekesalà, emun ebpenginginsà sikandin diyà te ebpeneuven ku mehitenged te menge lalag ku, ne siak is \sc Nengazen\sc*, iyan a mismu edtavak kandin pinaaǥi te silut sumalà te kahabet te menge ed-ezapen din.  
\v 5 Ebeelan ku heini su wey medlikù kayi te kediey is langun he menge Israilihanen he nekepekeziyù kayi te kediey tenged te menge ed-ezapen dan. 
\p  
\v 6 “Umbe ǥuntaan, keǥiyi nu is menge Israilihanen he siak, is Nengazen he MEGBEVAYÀ, migkaǥi a te: Helina niw is isip niw ne iselikwey niw is menge ed-ezapen niw wey engkezi niw is langun he utew mezaat he menge vaal.  
\v 7 Is minsan hentei he Israilihanen etawa kenà Israilihanen he meǥinged te Israel, he ed-awà kayi te kedì su iyan din utew ebmahala is menge ed-ezapen din he iyan midsinumag kandin wey mekeselà, emun ebpenginginsà sikandin diyà te ebpeneuven ku mehitenged te menge lalag ku, ne siak, is \sc Nengazen\sc*, iyan a mismu edtavak kandin pinaaǥi te silut.  
\v 8 Kenè ku ibeǥey is tuyù din ne edhimuwen ku sikandin he petizaan te menge etew, ne egkehimu sikandin he hilisgutan. Edsegseǥen ku sikandin puun te menge etew ku. Ne zutun egketuenan niw he iyan a \sc Nengazen\sc*. 
\p  
\v 9 “Emun egkelimbungan is sevaha he ebpeneuven dutun te kedtagnè din, ne tenged heeyan te iyan a is \sc Nengazen\sc* midlimbung kandin. Edsilutan ku sikandin ne edsegseǥen ku puun te menge etew ku he Israilihanen.  
\v 10 Pudu ku edsiluti is ebpeneuven wey is ebpenginginsà diyà te kandin mehitenged te menge lalag.  
\v 11 Ebeelan ku heini su wey kenà med-awà kayi te kedì is menge Israilihanen, ne kenè dan en edremerikan is keugelingen dan pinaaǥi te kebaal te salà. Egkehimu sikandan he menge etew ku, ne egkehimu a he Megbevayè dan. Iyan a, is Nengazen he MEGBEVAYÀ, is migkaǥi kayi.” 
\p  
\v 12 Migkaǥi is \sc Nengazen\sc* kayi te kedì te,  
\v 13 “Sikew is etew, emun ebpekesalà kayi te kediey is menge etew ziyà te sevaha he nasyun pinaaǥi te kedluivi zan kediey, edsilutan ku sikandan, ne id-awè ku is ebpuunan te keenen dan. Ebpeeǥiyan ku sikandan te vitil su wey zan mebpematey duma te menge uyaǥen dan.  
\v 14 Minsan pa ke ziyà te kandan si Noe, si Daniel, wey si Job, ne iyan dà heini is tetelu egkelibri tenged te ketazeng dan. Iyan a, is Nengazen he MEGBEVAYÀ, is migkaǥi kayi. 
\p  
\v 15 “Ne emun edsuǥuen ku is dumezaas he menge langgam keniyan he nasyun su wey zan penhimetayi is menge meǥinged duen, ne egkehimu he mekevulungbulung heeyan he lugar ne wazè en ebayà duen tenged te kegkahandek dan te zumezaas he menge langgam.  
\v 16 Minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà sikandan egkelibri. Ne haazà is nasyun egkehimu he mekevulungbulung. 
\p  
\v 17 “Ne emun daan tebek is ibpaaǥi ku keniyan he nasyun su wey meǥerà is menge meǥinged kayi duma te menge uyaǥen dan,  
\v 18 ne minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà sikandan egkelibri. 
\p  
\v 19 “Ne emun daru is ibpaaǥi ku keniyan he nasyun su wey meǥerà is menge meǥinged kayi duma te menge uyaǥen dan,  
\v 20 ne minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà egkelibri zan is kandan he keugelingen tenged te ketazeng dan. 
\p  
\v 21 “Benar iyan, siak, is Nengazen he MEGBEVAYÀ migkaǥi he mekehizuhizu is menge tig-Jerusalem emun ebpeeǥiyan ku sikandan te heepat he meveǥat he menge silut he iyan is: tebek, bitil, dumezaas he menge langgam, wey menge zaru he edhimatey te menge meǥinged kayi wey te menge uyaǥen dan.  
\v 22 Piru zuen kandan egkesamà he uuyag, ne edumahan sikandan kayi te Babilonia ne idtampu keniyu su menge vihag daan sikandan. Egkeehè niw ke sengemenu kezaat is betasan dan wey menge ulaula zan ne egkaawà is kegkeseeng niw tenged te kedsilut ku ziyà te Jerusalem.  
\v 23 Uya, egkaawà is kegkeseeng niw emun egkeehè niw is betasan dan wey menge ulaula zan, ne egkesavut niw he zuen hinungdan te kedsilut ku ziyà te Jerusalem. Iyan a, is Nengazen he MEGBEVAYÀ, is migkaǥi kayi.” 
\c 15  
\s1 Is Jerusalem Neiring te menge Subpang te Paras he Wazà Pulus 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, hengkey he paaǥi is igkehimu te subpang te paras he lavew te minsan hengkey he subpang te kayu?  
\v 3 Egkehimu ve he ebeelan is subpang kayi he minsan hengkey he ǥelemiten? Egkehimu ve heini he ebeelan he selenggatà?  
\v 4 Kenà heini egkehimu! Egkehimu zà heini he idtavun, piru minsan pa ke igketavun heini meǥaan dà heini ed-ugmas.  
\v 5 Ne emun wazà kayi pulus dutun te wazè pa heini metutung ne lavew en he wazè din pulus emun egketutung en! 
\p  
\v 6 “Guntaan, siak, is Nengazen he MEGBEVAYÀ, egkaǥi a he is menge meǥinged diyà te Jerusalem, neiring te paras he midtuvù duma te menge kayu ziyà te ketelunan. Ne geina te pudu zan wazà pulus ne pudu ku ebinsuli.  
\v 7 Uya, edsilutan ku sikandan, minsan egkepeleǥuyan dan is hapuy, egkeepur ǥihapun sikandan te ikezuwa he hapuy. Ne zutun egketuenan dan he iyan a \sc Nengazen\sc*.  
\v 8 Edhimuwen ku he mekevulungbulung he lugar is nasyun dan su midluivan e zan. Iyan a, is Nengazen he MEGBEVAYÀ, is migkaǥi kayi.” 
\c 16  
\s1 Is Jerusalem Neiring te Bahi he Mengungumpadi 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, petueni nu te Jerusalem is utew mezaat he menge vaal zin.  
\v 3 Keǥiyi nu sikandin he siak, is Nengazen he MEGBEVAYÀ, migkaǥi a ziyà te kandin te, ‘Sevaha ka he Canaanhen! Amorihanen is amey nu, ne Hitihanen is iney nu.  
\v 4 Ne hein in-anak ka wazà mid-elima kenikew. Wazà midtamped te pused nu, wazà midiǥù kenikew, etawa midhaplas kenikew te timus, wazà midek-en kenikew.  
\v 5 Wazà mibpesarig he ebaal kayi he menge vaal ziyà te kenikew; wazà nehizu kenikew. Intimbag ke zà hinuun diyà te vevesukà, ne ingkesilag ka puun pa te ked-enaka kenikew. 
\p  
\v 6 “ ‘Ne zutun te kedsaǥad ku, neehè ku sikew is midtunà te keugelingen nu he lengesa, ne migkeǥiyan ku sikew te egkeuyag ka.  
\v 7 Impezekelè ku sikew iring te pinemula ziyà te vevesukà. Midekelè ka he nehimu he mekempet he raǥa. Nepurma is menge susu nu wey mibmelayat is bulvul nu, piru lelevas ka ǥihapun. 
\p  
\v 8 “ ‘Ne hein mid-uman a medsaǥad, neehè ku he egkehimu ke en he ed-esewaan. Ne midtembunan ku sikew is lelevas te samput ku ne nenangdù a he ebmahalen ku sikew. Midhimu ku is kebpekid-uyun kenikew, ne naangken ku sikew. Iyan a, is Nengazen he MEGBEVAYÀ, migkaǥi kayi. 
\p  
\v 9 “ ‘Ne midlùluan ku is menge lengesa ziyà te lawa nu, wey midlenahan ku sikew.  
\v 10 Ne mibistiyan ku sikew te mahalen he visti he linu wey sida he binurdahan, ne impesesendalyas ku sikew te panit.  
\v 11 Mideyzeyanan ku sikew te menge elahas: menge rintì wey menge velieg.  
\v 12 Mideyzeyanan ku zaan te sising is izung nu, ne mid-eritisan ku sikew wey migkurunahan.  
\v 13 Impemekempet ku sikew pinaaǥi te pelata wey vulawan. Is bisti nu linu wey sida he binurdahan, ne meupiya he kelasi te herina is ebeelan he keenen nu, teneb, wey lana he ulibu. Utew ka mezagwey, ne henduen ka te rayna.  
\v 14 Nevantug ka ziyà te menge nasyun tenged te utew nu kekempet he imbeǥey ku kenikew. Iyan a, is Nengazen he MEGBEVAYÀ, is migkaǥi kayi. 
\p  
\v 15 “ ‘Piru midsarig ka te kempet nu, ne migamit nu he puhunan is bentuǥan nu zutun ke kebpelelevag nu. Imbeǥey nu is keugelingen nu ziyà te minsan hentei he maama he edsaǥad, ne mibpurungan ke zan pemulpulusi.  
\v 16 Migamit nu is duma he menge visti nu te kebpekekempeta te menge simbahan diyà te metikang he menge lugar, he zutun ka mebpelelevag. Kenà pezem heeyan ereg he egkehitavù.  
\v 17 Migamit nu zaan is menge pelata wey menge vulawan he menge elahas he imbeǥey ku kenikew te kebaal te menge ed-ezapen he maama ne mid-azap nu heini. Iring heini te nengumpadi ka!  
\v 18 Mibistiyan nu heini he menge ed-ezapen te menge visti nu he binurdahan, ne impemuhat nu ziyà te kandan is lana ku wey veyewà.  
\v 19 Mibpemuhat nu zaan sikandan te keenen he imbeǥey ku kenikew he ebpuun te meupiya he kelasi te herina, teneb, wey lana te ulibu. Impemuhat nu heini he pemuhat he mehemut. Uya, iyan heeyan nehitavù. Iyan a, is Nengazen he MEGBEVAYÀ, is migkaǥi kayi. 
\p  
\v 20 “ ‘Migkuwa nu zaan is menge anak nu he menge maama wey menge vahi he menge anak ta, ne impemuhat nu su wey mekaan te zuma he menge ed-ezapen. Kenè pe be ereg is kebpelelevag nu?  
\v 21 Mibpenhimetayan nu pa is menge anak ku ne impemuhat nu ziyà te menge ed-ezapen.  
\v 22 Dutun te kebaal nu te utew mezaat he menge vaal wey kebpelelevag nu wazè nu en tentenuzi ke mibmenumenu ku sikew te ed-elima hein betan-en ke pa, hein lelevas ka wey midtunè ka te keugelingen nu he lengesa. 
\p  
\v 23 “ ‘Iyan a, is Nengazen he MEGBEVAYÀ, migkaǥi te mekehizuhizu ka utew! Gawas te langun he mezaat he vaal nu,  
\v 24 mibpehitindeg ke pa te menge simbahan para te menge ed-ezapen nu ziyà te menge pelasa  
\v 25 wey ziyà te kada suyuk te menge zalan. Ne zutun midremerikan nu is kekempet nu, ne imbeǥey nu is keugelingen nu ziyà te minsan hentei he maama he edsaǥad. Kada andew ed-iseg is kebpelelevag nu.  
\v 26 Mibpelelevag ke pa ziyà te menge Ehiptohanen he siringan nu he utew zaan lebag. Utew ku ingkepauk is kenè nu ked-engked te kebpelelevag.  
\v 27 Umbe, midsilutan ku sikew wey impemeliǥet ku is tanè nu. Mibpeveyveyaan ku sikew te menge kuntada nu he menge Filistihanen, ne minsan sikandan, henduen be te neinuinu kenikew te mahawag he vetasan nu. 
\p  
\v 28 “ ‘Mibpelelevag ke zaan diyà te menge tig-Asiria su wazè ke pa meperahi. Ne hein nepasad haazà wazè ke pa iyan meperahi.  
\v 29 Mid-umanan nu pa is kebpelelevag nu su nekidrerepungen ka ziyà te Babilonia he lugar te menge nigusyanti, piru wazè ka ǥihapun meperahi. 
\p  
\v 30 “ ‘Siak, is Nengazen he MEGBEVAYÀ, migkaǥi a te utew ka meluya umbe nehimu nu heini he menge vaal. Iring ka te vahi he wazè din keelezan he ebelegyà te zengeg din.  
\v 31 Mibpehitindeg ka te menge simbahan diyà te menge suyuk te menge zalan wey menge pelasa he para te menge ed-ezapen nu. Tuwas pa he mezaat is baal nu te vaal te vahi he ebelegyà te zengeg dan su wazè ka mulà mebpevayad te nekidhilavet kenikew.  
\v 32 Mengungumpadi ka he vahi! Egkesuat ke pa he ebpekidhilavet te sengememaama kenà te esawa nu.  
\v 33 Is menge vahi he ebelegyà te zengeg dan ebpevayad mulà. Piru sikew, iyan ka hinuun mibeǥey te menge gasa ziyà te menge maama he kumpadi nu su wey sikandan mehinggat te ked-uvey ziyan te kenikew te kebpekidhilavet.  
\v 34 Nekeviza ka te zuma he menge vahi he ebelegyà te zengeg dan. Wazà edhinggat kenikew te kebpekidhilavet; iyan ka mismu ebpenginggat. Kenè ka edawat te vayad, su iyan ka hinuun ebayad. 
\p  
\v 35 “ ‘Umbe sikew is lebag, pemineǥa nu is menge lalag ku.  
\v 36 Siak, is Nengazen he MEGBEVAYÀ, migkaǥi a te: Impeehè nu is kegkelevasi nu ne mibpeveyveyaan nu is lawa nu te menge kumpadi nu su ǥeina te lebag ka. Mid-azap nu is utew mezaat he menge ed-ezapen nu, ne mibpenhimetayan nu is menge anak nu su impemuhat nu ziyà te kandan.  
\v 37 Tenged kayi te mibeelan nu, edtiǥumen ku is langun he menge kumpadi nu he igkelilingey nu, is mibmahal nu wey ragkes en is egkeepesan nu. Edtiǥumen ku sikandan su wey ke zan kuntedaha, ne edlevasan ku sikew ziyà te etuvangan dan su wey ke zan maahà is lelevas.  
\v 38 Edsilutan ku sikew tenged te kebpenapew nu wey kebpenhimatey nu. Ne tenged te utew ku kegkepauk edhimetayan ku sikew.  
\v 39 Ibeǥey ku sikew ziyà te menge kumpadi nu, ne edrundusen dan is menge simbahan he para te menge ed-ezapen nu. Edlevasan ke zan ne egkuwaan dan is mekempet he menge elahas nu, ne ed-ewaan ke zan he lelevas.  
\v 40 Ibpesurung ke zan te grupu te menge etew he iyan ebpenuleng kenikew te vatu wey edtadtad kenikew te ispada.  
\v 41 Ebinsulan dan is menge valey nu ne edsilutan ke zan diyà te etuvangan te mezakel he menge vahi. Ebpeengkezan ku kenikew is kebpelelevag nu wey is kebayad nu ziyà te menge kumpadi nu.  
\v 42 Ne egkevehew en is utew ku kegkepeuki kenikew, ne kenà ad egkepauk kenikew. 
\p  
\v 43 “ ‘Midlipatan nu ke mibmenumenu ku sikew te ed-atur hein betan-en ke pa, ne midhimu nu hinuun he mepauk a tenged te menge mibeelan nu, umbe iyan a, is Nengazen he MEGBEVAYÀ egkaǥi he edsilutan ku sikew te sungkad te menge vaal nu. Kenè be mibaal ka te utew mezaat he menge vaal he in-uman nu te mahawag ha menge vaal nu? 
\p  
\v 44 “ ‘Duen menge etew he egkaǥi kayi he erubasa ziyà te kenikew: “Ke hengkey is iney iyan daan kes anak.”  
\v 45 Iring ka iyan te iney nu he edsudì te esawa zin wey menge anak din. Wey iring ke zaan te menge suled nu he vahi he edsudì te menge esawa zan wey menge anak dan. Hitihanen is iney nu ne Amorihanen is amey nu.  
\v 46 Is kakey nu he vahi iyan is Samaria he ziyà ed-ubpà te zizaya duma te menge anak din he vahi. Is hazi nu he vahi iyan is Sodom, he ziyà ed-ubpà te zivavà duma te menge anak din he vahi.  
\v 47 Mid-iringan nu is menge vetasan dan wey is utew mezaat he menge vaal zan. Ne seled te mevavè dà he timpu midlavew is kenikew he kezaat te kandan he kezaat.  
\v 48 Siak, is uuyag he Nengazen he MEGBEVAYÀ, migkaǥi a te tutuu he is suled nu he Sodom wey is menge anak din he vahi, wazà mekevaal te iring te mibeelan nu wey te menge anak nu he vahi.  
\v 49 Is salà te suled nu he Sodom iyan is kebpelavew. Dekelà is keenen din wey is menge anak din he vahi wey meupiya is ked-ubpè din, piru wazè din tevangi is menge pubri.  
\v 50 Mepelevawen sikandan wey mibaal zan te utew mezaat he menge vaal kayi te etuvangan ku, umbe midezeetan ku sikandan hein neehè ku is mibeelan dan. 
\p  
\v 51 “ ‘Is Samaria wazà mekevaal te minsan ketengè dà te kenikew he neveelan he menge salà. Edhuna he mahabet is kenikew he mezaat he menge vaal, kenè te kandan, umbe zuen pa kandan he iketazeng kenè ka, tenged te langun he utew mezaat he menge mibeelan nu.  
\v 52 Ereg ka he egkeeled tenged te impeehè nu pinaaǥi te menge salè nu he edhuna ka he mezaat kenà te menge suled nu he vahi. Dewata nu is keelezan su iyan ke en mibpaahà he metazeng pa sikandan kenikew.  
\v 53 Piru egkeuma is timpu he ibpeuman ku ibpeuswag is Sodom wey is Samaria, ragkes is menge anak dan he menge vahi. Ne ibpeuman ku zaan sikew ibpeuswag,  
\v 54 ne ereg he igkeeled nu is langun he menge vaal nu su tenged te ked-uswag kayi te menge suled nu ebpekelepew he henduen be te edhuna pa heini is menge suled nu he meupiya kenè sikew  
\v 55 he iyan is Sodom wey Samaria. Heini sikandan ed-uman ed-uswag wey is menge anak dan he vahi ne iyan daan heini egkehitavù kenikew wey te menge anak nu he vahi.  
\v 56 Midsudì nu zengan is Sodom dutun te timpu te kegkemepelevawen nu  
\v 57 wey hein wazè pa mezayag is kezaat nu. Piru ǥuntaan iring ke en kandin su midsudì ka zaan te menge meǥinged diyà te Edom wey ziyà te nekeelingkus kayi he menge lugar, wey te menge meǥinged diyà te Filistia wey ziyà te menge lugar he nekeelingkus kenikew.  
\v 58 Egkaantus nu is silut tenged te mahawag wey utew mezaat he menge vaal nu. Iyan a, is \sc Nengazen\sc*, is migkaǥi kayi.’ ” 
\p  
\v 59 Migkaǥi pa is Nengazen he MEGBEVAYÀ te, “Edsilutan ku sikew te ereg kenikew, su mibpekahagkap nu is pesarig ku pinaaǥi te kedsupaka nu te paaǥi ku te kebpekid-uyun.  
\v 60 Piru edtumanen ku is kebpekid-uyun ku kenikew hein betan-en ke pa, ne edhimu a te kebpekid-uyun ku kenikew he ebpedayun te wazà pidtemanan.  
\v 61 Ne egketenuzan nu ke hengkey is betasan nu zengan ne egkeeled ka, lavew en ke edhimuwen ku he menge anak nu is menge suled nu he vahi, he iyan is Samaria wey Sodom, minsan kenà heini ragkes te paaǥi ku te kebpekid-uyun kenikew.  
\v 62 Edlig-enan ku is kebpekid-uyun ku kenikew, ne egketuenan nu he iyan a \sc Nengazen\sc*.  
\v 63 Egketenuzan nu is menge salè nu ne egkeeled ka, ne kenè ke en ebpekekaǥi tenged te utew nu kegkeeled emun ebpeseyluwen ku en sikew tenged te langun he mibeelan nu. Iyan a, is Nengazen he MEGBEVAYÀ, is migkaǥi kayi.” 
\c 17  
\s1 Is Sempità Mehitenged te menge Kulaǥu wey Paras 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, keǥiya nu heini is sempità diyà te menge etew te Israel,  
\v 3 ne keǥiyi nu sikandan he iyan a, is Nengazen he MEGBEVAYÀ migkaǥi kayi: duen dekelà he kulaǥu he midlayang pehendiyà te Lebanon. Meluag is menge pakpak din wey merapung is bulvul zin he nekedseselekawà is barek. Ne midlatun heini ziyà te purù te kayu he sidru,  
\v 4 ne midtamped kayi is lumbey te kinepuruan he subpang. Mid-uwit din heini ziyà te lugar te menge nigusyanti ne impemula zin dutun. 
\p  
\v 5 “Ne hein nepasad migkuwa haazà is kulaǥu te lisu he ebpuun diyà te tanà he Israel ne impemula zin heini ziyà te egkeveluyan he tanà he kilid te wahig ne zutun utew meǥaan is kedtuvù din.  
\v 6 Midtuvù heini he mevavà he pinemula he ebpenguyabpat. Is menge subpang kayi nenguyabpat pehendutun te kulaǥu, ne mezalem is nesenevan te menge zalid din. Ne mibpurung mebpenubpang ne mibpeneringsing. 
\p  
\v 7 “Piru zuen nekeuma he selakew en he zekelà he kulaǥu. Meluag daan is menge pakpak din wey merapung is bulvul zin. Is menge zalid wey menge subpang duen te pinemula nenguyabpat pehendutun te kulaǥu su para mewehiǥi heini duen te kulaǥu te lavew pa te wahig duen te tanà he mibpemulaan kandin.  
\v 8 Midhimu heini zutun te pinemula minsan diyè en sikandin ikepemula te meupiya he tanà, he zuen duen dekelà he wahig he ebpekeveǥey kandin te meupiya he tuvù, wey ebpekepeveǥas, wey ebpekeveǥey kandin te kekempet. 
\p  
\v 9 “Ne ǥuntaan, siak, is Nengazen he MEGBEVAYÀ, ed-insà a te: Ebpekepedayun be heini te kedtuvù? Kenà! Ebezuten heini ne egkuwaan is menge veǥas din, ne ebey-anan en ke meǥangu. Melemu zà heini he ebezuten, kenè en egkinahanglan te mezesen he etew etawa mezakel he menge etew is kebazut kayi.  
\v 10 Minsan id-uman pa heini ibpemula ziyà te selakew en he lugar kenà gihapun heini edtuvù. Egkepurung heini egkeǥangu emun egkeremaǥen te meinit he keramag he ebpuun te edsilaan.” 
\s1 Is Kehuluǥan Duen te Sempità 
\p  
\v 11 Ne migkaǥi is \sc Nengazen\sc* kayi te kedì te,  
\v 12 “Insai nu heini is mesinupaken he menge etew te Israel ke netuenan dan be is kehuluǥan duen te sempità. Keǥiyi nu sikandan te iyan heini kehuluǥan din: Midhendiyà is hadì te Babilonia te Jerusalem ne mibihag din is hadì kayi wey menge upisyal, ne miduma zin diyà te Babilonia.  
\v 13 Mibpilì sikandin te sevaha zuen te menge kevuwazan te hadì te Juda ne nekid-uyun sikandin kandin, ne impepenangdù din heini he mebpenilbi kandin. Mibihag din daan is lavew he menge etew ziyà te Juda  
\v 14 su para kenè en mekeuman mekeenew heini he ginhedian ne kenè en mekesukul kandin. Ebpekehimu zà he ebpedayun heini he ginhedian emun ebpedayun heini edtuman te neuyunan dan te Babilonia.  
\v 15 Piru midsukul is hadì te Juda te hadì te Babilonia pinaaǥi te kedsuǥù te menge etew pehendiyà te Ehipto te kedhangyù te menge kudà wey mahabet he menge sundaru. Edlampus be sikandin? Egkelikayan din be wey egkepeleǥuyan is silut kandin tenged te kedrapas din te neuyunan dan te hadì te Babilonia?  
\v 16 Kenà! Su siak, is uuyag he Nengazen he MEGBEVAYÀ, nenangdù a he heini is hadì te Juda, siguradu he ebpatey ziyà te Babilonia, su midrapas din is uyun he mibpenengduan din diyà te hadì te Babilonia he iyan ingkehimuwa kandin he hadì.  
\v 17 Kenà ebpekeuǥup kandin te kebpekidtebek is hadì te Ehipto wey is mahabet wey mekeǥeǥehem he menge sundaru zin emun edsurung en is menge tig-Babilonia te kebpenhimatey te mahabet.  
\v 18 Ne ǥeina te wazè din beliya is impenangdù din wey wazè din tumana is neuyunan, kenè sikandin ebpekelingkawas. 
\p  
\v 19 “Umbe siak, is uuyag he Nengazen he MEGBEVAYÀ, ebpenangdù a he edsilutan ku sikandin su midrapas din is kebpekid-uyun ku ne migamit din is ngazan ku te kebpenangdù din he edtumanen din heini.  
\v 20 Edhingutelen ku sikandin ne ed-uwiten ku ziyà te Babilonia, ne zutun edsilutan ku sikandin tenged te kedluib din kedì.  
\v 21 Ebpematey is ebpemelaǥuy he menge sundaru zin, ne is egkesamà ebpekepeyapat diyà te minsan hendei he lugar. Ne human niw egketuenan he iyan a, is \sc Nengazen\sc* migkaǥi kayi.” 
\s1 Is Meupiya he Egkeperateng he Insaad te \sc Nengazen\sc* 
\p  
\v 22-23 Mibpedayun megkaǥi is Nengazen he MEGBEVAYÀ te, “Egkuwa a te lumbey ziyà te kinepuruan te subpang te kayu he sidru ne ibpemula ku heini ziyà te puntur te metikang he vuntud diyà te Israel. Ebpenubpang heini ne ebpemeǥas, ne egkehimu he utew mekempet he sidru. Edsesalag dutun is langun he kelasi te menge tagbis ne ebpekehelung sikandan diyà te menge subpang kayi.  
\v 24 Ne egketuenan te langun he menge kayu kayi te tanà he iyan a is \sc Nengazen\sc* edtamped te metawis he menge kayu wey ebpeketawis te mevavà he menge kayu. Iyan a zaan egangu te merapung he menge kayu wey ed-uman ebpetuvù te neǥangu he menge kayu. Iyan a, is \sc Nengazen\sc*, midsaad kayi ne edtumanen ku heini.” 
\c 18  
\s1 Ebpatey is Ebaal te Salà 
\p  
\v 1 Migkaǥi is \sc Nengazen\sc* kayi te kedì te,  
\v 2 “Hengkey is ibpesavut te kegkaǥi kayi he erubasa mehitenged te Israel: ‘Migkaan is amey te mepezes he paras, ne iyan nengingilu is menge anak din?’ 
\p  
\v 3 “Siak, is Nengazen he MEGBEVAYÀ he uuyag, edsaad a he kenè niw en egkeuman egkeerubasa heeyan kayi te Israel.  
\v 4 Pemineǥa niw heini! Is langun he untung ne kedì–is untung te menge ǥinikanan wey is untung te menge vatà. Iyan dà ebpatey tenged te rimeǥas te salà sikan is etew he nekesalà.  
\v 5 Penenglitan duen etew he metazeng he mibaal te hustu he menge vaal.  
\v 6 Wazà sikandin med-azap te menge ed-ezapen kayi te Israel wey wazà megkaan te menge pemuhat he para kayi he menge ed-ezapen diyà te menge simbahan diyà te menge vuntud. Wazà sikandin mebpekidhilavet te esawa te zuma etawa bahi he midlengesahan.  
\v 7 Wazà sikandin mebpendaagdaag, wey in-ulì din is insandà te mid-utang diyà te kandin. Wazà sikandin mebpenakew, kekenà, impekaan din is egkengevitil wey mibeǥayan din te visti is menge wazà bisti.  
\v 8 Wazè din ipetuvù is impeutang din. Wazà sikandin mebaal te mezaat, wey wazè din midepiǥan diyà te kedhukum din.  
\v 9 Ebpurungan din edsunuza is menge sulunuzen wey menge suǥù ku. Metazeng heeyan he etew ne ebpedayun is kegkeuyag-uyag din. Iyan a, is Nengazen he MEGBEVAYÀ, is migkaǥi kayi. 
\p  
\v 10 “Piru penenglitan duen din anak he maama he mesipala wey kriminal etawa mibeelan din is minsan hengkey kayi he menge vaal  
\v 11 he wazà beeli te amey zin: Egkaan sikandin te menge pemuhat he para te menge ed-ezapen diyà te menge simbahan diyà te menge vuvungan, wey ebpekidhilavet te esawa te zuma.  
\v 12 Edèdaaǥen din is menge pubri wey is menge egkaayuayu. Tekawen sikandin, wey kenè din id-ulì is insandà te menge nekeutang diyà te kandin. Ed-azap sikandin te zuma he menge ed-ezapen, wey ebaal te utew mezaat he menge vaal.  
\v 13 Ebpeutang sikandin te ibpetuvù. Egkeuyag-uyag be sikandin? Kenà! Ebpatey heini he etew tenged kayi te langun he utew mezaat he menge vaal he mibeelan din. Iyan dà sikandin egkevasul tenged te kemetayen din. 
\p  
\v 14 “Ne penenglitan heini is lalung he etew zuen din anak he maama, ne minsan neehè din is langun he menge salà he mibeelan te amey zin, piru wazè din mulà heini iringi.  
\v 15 Wazà sikandin med-azap te menge ed-ezapen kayi te Israel wey wazà megkaan te menge pemuhat he para kayi he menge ed-ezapen diyà te menge simbahan diyà te menge vuntud. Wazà sikandin mebpekidhilavet te esawa te zuma.  
\v 16 Kenà sikandin ebpendaagdaag, wey kenà sikandin ebpesandà te menge mid-utang diyà te kandin. Kenà sikandin ebpenakew, kekenà, ebpekaan sikandin te egkengevitil wey ebeǥayan din te visti is menge wazà bisti.  
\v 17 Kenà sikandin ebaal te mezaat, wey kenà sikandin ebuyù te tuvù te ed-utang diyà te kandin. Edtumanen din is menge suǥù ku wey menge sulunuzen. Heini he etew kenà ebpatey tenged te salà te amey zin, kekenà, ebpedayun is kegkeuyag-uyag din.  
\v 18 Piru is amey zin, ebpatey mulà tenged te salè din su nenlimbung sikandin, nenakew wey mibaal te mezaat diyà te menge zuma zin he meǥinged. 
\p  
\v 19 “Piru ed-insè kew te, ‘Maan is kenà ereg he edsilutan is anak tenged te salà te amey zin?’ Emun is anak ebaal te metazeng wey hustu, wey ebpurungan din edsunuza is menge sulunuzen, ebpedayun is kegkeuyag-uyag din.  
\v 20 Iyan dà ebpatey tenged te rimeǥas te salà is nekesalà. Is anak kenà ereg he edsilutan tenged te salà te amey zin, iring din daan is amey su kenà ereg he edsilutan tenged te salà te anak din. Is keupiyaanan tenged te ketazeng egkeraǥun te metazeng, is silut tenged te kelelalung egkeraǥun te lalung. 
\p  
\v 21 “Iyan, emun ed-engkezan te lalung he etew is langun he salà he neveelan din, ne edtuman te sulunuzen wey ebaal te hustu wey metazeng, kenà sikandin ebpatey, kekenà, egkeuyag-uyag sikandin.  
\v 22 Kenà en sikandin edsukutan tenged te langun he menge salà he nehimu zin te nehuna he timpu, tenged te mibeelan din he metazeng ebpedayun is kegkeuyag-uyag din.  
\v 23 Siak, is Nengazen he MEGBEVAYÀ, kenà a egkelipey emun ebpatey is lalung he etew. Egkelipey a emun ed-engked sikandin te mezaat he ulaula wey ebpedayun he egkeuyag-uyag. 
\p  
\v 24 “Piru emun ed-engked he edtinazeng is etew he metazeng ne ebpengungubpaan duma is kebaal te salà wey kebaal te utew mezaat he menge vaal he ebeelan te lalung he menge etew, ebpedayun be is kegkeuyag-uyag din? Kenà! Su edlipatan is langun he metazeng he menge vaal zin. Ne tenged te kedluib din kedì wey te menge salà he neveelan din, ebpatey sikandin. 
\p  
\v 25 “Ne sikiyu mulà, iyan niw egkeǥiyen is, ‘Kenà metazeng is menge paaǥi te \sc Nengazen\sc*.’ Pemineg kew is menge etew te Israel: Iyan be kenà metazeng is kediey he menge paaǥi etawa iyan is keniyu?  
\v 26 Emun is etew he metazeng ed-engked he edtinazeng su ebaal te salà, ebpatey sikandin tenged keniyan.  
\v 27 Piru is lalung he etew he ed-engked he edlalunglalung su ebaal te metazeng wey hustu, egkelibri zin is untung din.  
\v 28 Kenà sikandin ebpatey su mid-iniyuǥan din man is langun he salè din.  
\v 29 Ne egkaǥi kew pa is menge etew te Israel te, ‘Kenà metazeng is paaǥi te Nengazen.’ He menge etew te Israel, iyan be kenà metazeng is paaǥi ku etawa iyan is keniyu? 
\p  
\v 30 “Umbe egkeǥiyan ku sikiyu is menge etew te Israel, te siak, is Nengazen he MEGBEVAYÀ iyan a edhukum te kada sevaha keniyu sumalà te menge vaal niw. Guntaan sendit kew ne iniyuǥi niw is menge salè niw su wey kew kenà mezeeti.  
\v 31 Engkezi niw en is kebaal niw te salà ne beǥuwa niw en is kebpengungubpaan niw su kenè kew ereg he ebpatey is menge etew te Israel.  
\v 32 Su kenà a egkelipey emun duen ebpatey. Umbe engkezi niw en is mezaat he ulaula su wey mebpedayun is kegkeuyag-uyag niw. Iyan a, is Nengazen he MEGBEVAYÀ, is migkaǥi kayi.” 
\c 19  
\s1 Is Penhulùhulù Mehitenged te menge Pengulu te Israel 
\p  
\v 1 Migkaǥi is \sc Nengazen\sc* kayi te kediey te, “Kentaha nu heini is kanta para te kebpenhulùhulù mehitenged te menge pengulu te Israel: 
\p  
\v 2 “Is iney nu neiring te sevaha he erimaung he mid-elimahan din is menge anak din he zuma zin is duma he menge erimaung.  
\v 3 Mid-elimahan din is sevaha te menge anak din ne nehimu heini he mezesen he erimaung. Metau heini he ebpendawi, ne nengaan heini te etew.  
\v 4 Ne hein netuenan heini te menge meǥinged diyà te zuma he menge nasyun midhingutel zan heini ne mid-uwit dan diyà te Ehipto he kinedinahan. 
\p  
\v 5-6 “Ne hein netuenan duen te iney zin he erimaung he wazà metuman is pelanu zin duen te anak din, mid-elimahan din is sevaha pa te menge anak din ne nehimu heini he mezesen he erimaung. Nekiduma heini te zuma he menge erimaung ne mibmetau he ebpendawi, ne nengaan heini te etew.  
\v 7 Midlempag din is menge melig-en he menge lugar te menge kuntada ne mibpemengkag din is menge inged dan. Nahandek is menge meǥinged te hiniǥeran din. 
\p  
\v 8 “Midsevaha is menge meǥinged diyà te menge nasyun te kegpekidtebek kandin, ne midliǥuyan dan sikandin. Midteenan dan te veteng ne neutel zan.  
\v 9 Migkew-itan dan ne intaǥù dan diyà te veleyanan, ne mid-uwit dan diyà te hadì te Babilonia. Midureng dan heini su wey kenè en mezineg diyà te menge vuvungan te Israel is kedhiniǥer zin. 
\p  
\v 10 “Is iney nu neiring daan te paras he impemula ziyà te kilid te wahig. Mahabet is menge subpang kayi wey menge veǥas din su ebpekesupsup man te wahig.  
\v 11 Melig-en is menge subpang kayi ne egkehimu he ebeelan he tuked te hadì. Utew mibmetikang haazà is paras, ne midlavew te zuma he merapung he menge pinemula. Egkaahà heini tenged te ketikang din wey kerapung te menge subpang din.  
\v 12 Piru mibazut heini te egkeepes duen, ne intimbag din diyà te tanà. Ne nengepis is menge veǥas din tenged te meinit he keramag he ebpuun diyà te edsilaan. Neǥangu is melig-en he menge subpang din ne segugunà heini mibinsuli.  
\v 13 Ne zutun impasek heini iuman diyà te sibsivayan, diyà te lugar he memaza he wazà duen wahig.  
\v 14 Netutung is sevaha he subpang kayi ne midelandap diyà te zuma he menge subpang ne netutung is menge veǥas din. Umbe wazè en nesamà he melig-en he subpang din he egkehimu he ebeelan he tuked te hadì. 
\p “Heini he kebpenhulùhulù ereg he egkentahan kayi he timpu.” 
\c 20  
\s1 Is Mesinupaken he menge Israilihanen 
\p  
\v 1 Hein ikesepulù he andew te ikelima he vulan, te ikepitu he tuig te kegkevihag dey, duen nepipira he menge pengulu te Israel he midhengkayi te kedì ne mibpinuu ziyà te etuvangan ku su ebpetudtul zan te menge lalag he ebpuun diyà te \sc Nengazen\sc*.  
\v 2 Migkaǥi is \sc Nengazen\sc* kayi te kedì te,  
\v 3 “Sikew is etew, keǥiyi nu heeyan is menge pengulu te Israel, he siak, is Nengazen he MEGBEVAYÀ, migkaǥi a te, ‘Midhengkayi kew ve te kebpetudtul kediey te menge lalag ku? Siak, is Nengazen he MEGBEVAYÀ he uuyag, ebpenangdù a he kenè ku edtudtulen is menge lalag ku ziyà te keniyu.’ 
\p  
\v 4 “Sikew is etew, hukumi nu sikandan. Ipetentenuzi nu kandan is utew mezaat he menge vaal he mibeelan te menge kepuun dan.  
\v 5 Keǥiyi nu sikandan he siak, is Nengazen he MEGBEVAYÀ, migkaǥi a te, ‘Hein mibpilì ku is Israel he menge kevuwazan ni Jacob, ne mibpekilala a kandan diyà te Ehipto, nenangdù a ziyà te kandan. Ke siak te, “Iyan a \sc Nengazen\sc* he Megbevayè niw.”  
\v 6 Ne zutun daan he timpu nenangdù a he ibpeǥawas ku sikandan puun te Ehipto ne ed-uwiten ku sikandan diyà te tanà he mibpilì ku para kandan–meupiya wey selebpeten he tanà, kineupiyahan te langun he tanà.  
\v 7 Ne migkeǥiyan ku sikandan te, “Iselikwey niw en is utew mezaat he menge ed-ezapen niw. Kenè niw remeriki is keugelingen niw pinaaǥi te ked-azap te menge ed-ezapen diyà te Ehipto, su iyan a, is \sc Nengazen\sc* Megbevayè niw.” 
\p  
\v 8 “ ‘Piru midsupak e zan, ne wazè dan mebpemineg. Wazè dan iselikwey is utew mezaat he menge ed-ezapen diyà te Ehipto. Umbe migkaǥi a te ibpeǥezaman ku kandan is pauk ku zutun te ziyà sikandan te Ehipto.  
\v 9 Piru wazè ku heini himuwa, su midlevanan ku is dengeg ku su wey a kenà mependezeisey te menge etew ziyà te menge nasyun he nekeelingkus te Israel su netuenan dan he impahayag ku ziyà te menge Israilihanen he ibpeǥawas ku sikandan puun te Ehipto.  
\v 10 Umbe, impeǥawas ku sikandan puun te Ehipto ne mid-uwit ku ziyà te sibsivayan.  
\v 11 Ne zutun imbeǥey ku kandan is menge suǥù ku wey menge sulunuzen he ereg he edtumanen dan para mebpedayun is kegkeuyag-uyag dan.  
\v 12 Impetuman ku zaan kandan is Andew te Kedhimeley he tuus te paaǥi te kedepitè dey. Ebpetanudtanud heini kandan he iyan a, is \sc Nengazen\sc* mibpilì kandan wey zan mehimu he menge etew ku. 
\p  
\v 13 “ ‘Piru midsupak gihapun kediey is menge etew te Israel te ziyè dan te sibsivayan. Wazè dan tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana zan kayi. Wazè dan daan isipa he segradu is Andew te Kedhimeley he impetuman ku kandan. Umbe migkaǥi a te ibpeǥezaman ku kandan is pauk ku su para mepurung sikandan mezeeti ziyà te sibsivayan.  
\v 14 Piru wazè ku heini leusa te ebaal su egkepeel-elezan a ziyà te menge nasyun he zutun netuenan he impeǥawas ku is menge Israilihanen puun te Ehipto.  
\v 15 Piru nenangdù a ziyà te kandan dutun te sibsivayan he kenè ku sikandan ed-uwiten diyà te tanà he imbeǥey ku kandan, kes tanà he meupiya wey selebpeten, kes kineupiyahan te langun he tanà.  
\v 16 Impenangdù ku heini ziyà te kandan su geina te wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Impelavi zan is ked-azap te zuma he menge ed-ezapen dan. 
\p  
\v 17 “ ‘Piru minsan pa te iyan heini mibeelan dan, nehizuwan ku ǥihapun sikandan, ne wazè ku sikandan purungi zèdeeti ziyà te sibsivayan.  
\v 18 Dutun te sibsivayan migkeǥiyan ku is menge anak dan te, “Kenè niw iringi is menge sulunuzen wey menge mibeelan te menge ginikanan niw, ne kenè niw remeriki is keugelingen niw pinaaǥi te ked-azap te zuma he menge ed-ezapen.  
\v 19 Iyan a is \sc Nengazen\sc* Megbevayè niw. Purungi niw tumana is menge suǥù ku wey menge sulunuzen.  
\v 20 Isipa niw he segradu is Andew te Kedhimeley su tuus heini te paaǥi te kedepitè tew, ne ebpetanudtanud heini keniyu he iyan a is \sc Nengazen\sc* Megbevayè niw.” 
\p  
\v 21 “ ‘Piru minsan is menge anak dan midsupak daan kedì. Wazè dan purungi tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana kayi. Ne wazè dan daan isipa he segradu is Andew te Kedhimeley he impetuman ku kandan. Umbe migkaǥi a he ibpeǥezaman ku kandan dutun te sibsivayan is utew ku kegkepauk.  
\v 22 Piru wazè ku heini leusa te ebaal su egkepeel-elezan a ziyà te menge nasyun he zutun netuenan he impeǥawas ku is menge Israilihanen puun te Ehipto.  
\v 23 Piru zutun te sibsivayan nenangdù a ziyà te kandan he ibpeyapat ku sikandan diyà te nekedseselekawà he menge nasyun,  
\v 24 su wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Iyan dan hinuun impelavi is ked-azap te menge ed-ezapen te menge kepuun dan.  
\v 25 Umbe, mibey-anan ku en sikandan he ebpedayun edtuman te menge suǥù wey menge sulunuzen he kenà meupiya wey kenà ebpekeveǥey kandan te meluǥayad he untung.  
\v 26 Mibey-anan ku en daan sikandan duen te kedremeriki zan te keugelingen dan pinaaǥi te kebpemuhata zan te zuma he menge ed-ezapen ragkes en is kebpemuhat dan he iyan dan ibpemuhat is kinekekayan he anak dan he maama. Intuǥut ku heini kandan su wey zan mahandek ne egketuenan dan he iyan a \sc Nengazen\sc*.’ 
\p  
\v 27 “Umbe, sikew is etew, keǥiyi nu is menge Israilihanen, he siak, is Nengazen he MEGBEVAYÀ, migkaǥi a te: ‘Is menge kepuun niw mibpedayun is kebpendezeisaya zan wey kedluivi zan kedì.  
\v 28 Su hein mid-uwit ku sikandan diyà te tanà he insaad ku he ibeǥey ziyà te kandan, mibpemuhat dan te menge pemuhat, menge veyewà, wey menge inumen diyà te metikang he menge lugar wey ziyà te merapung he menge kayu he egkeehè dan. Umbe utew ku sikandan nepeuki.  
\v 29 Mid-insaan ku sikandan te, “Hengkey ves heeyan is metikang he lugar he layun kew ebpehendutun?” ’ (Taman en guntaan is igngazan dan keniyan he lugar ‘simbahan diyà te metikang he lugar’.) 
\p  
\v 30 “Ne ǥuntaan, keǥiyi nu is menge etew te Israel te siak, is Nengazen he MEGBEVAYÀ, migkaǥi a te, ‘Edremerikan niw ve zaan is keugelingen niw iring te mibeelan te menge kepuun niw, wey ed-azap kew ve zaan te utew mezaat he menge ed-ezapen?  
\v 31 Minsan ganì guntaan midremerikan niw en is keugelingen niw pinaaǥi te kebpemuhat diyà te zuma he menge ed-ezapen ragkes en is kebpemuhata niw te menge anak niw he maama pinaaǥi te kedtevuna niw zuen diyà te hapuy. Umbe pemineg kew is menge etew te Israel, siak, is Nengazen he MEGBEVAYÀ he uuyag, he kenà ebpenudtul te menge lalag diyan te keniyu minsan edhangyù kew pa. 
\p  
\v 32 “ ‘Kenà egkehitavù is egkeisip niw he egkeiring kew te zuma he menge nasyun he is menge etew zuen ed-azap te menge ed-ezapen he ledawan he vatu wey kayu.  
\v 33 Siak, is Nengazen he MEGBEVAYÀ he uuyag, ebpenangdù a he edhedian ku sikiyu pinaaǥi te zekelà he ǥehem ku wey pauk ku.  
\v 34 Uya, tenged te zekelà he gehem ku wey pauk ku, id-awè ku sikiyu ziyà te nekedseselekawà he menge nasyun he zutun kew mekepeyapat,  
\v 35 ne ed-uwiten ku sikiyu ziyà te sibsivayan he ǥaked te menge etew ziyà te menge nasyun. Ne zutun ed-etuvangen ku sikiyu wey edhukuman.  
\v 36 Uya, edhukuman ku sikiyu iring te midhukuman ku is menge kepuun niw ziyà te sibsivayan te Ehipto. Iyan a, is Nengazen he MEGBEVAYÀ, is migkaǥi kayi.  
\v 37 Idsivey ku is menge lalung keniyu, ne edlig-enan ku is paaǥi ku te kebpekidepità keniyu.  
\v 38 Idtapid ku puun keniyu is menge midsupak kedì. Minsan ibpeǥawas ku sikandan puun te nasyun he mibihag kandan, piru kenè dan gihapun ebpekeseled diyà te tanà he Israel. Ne zutun egketuenan niw he iyan a \sc Nengazen\sc*.’ ” 
\p  
\v 39 Migkeǥiyan daan te Nengazen he MEGBEVAYÀ is menge etew te Israel te, “Sigi, pedayun kew en he ebpenilbi te zuma he menge ed-ezapen niw emun kenè kew egkesuat he ebpezumazuma kediey. Piru egkeuma is timpu he kenà ad keniyu egkepeelimungawan pinaaǥi te kebpemuhat niw ziyà te menge ed-ezapen niw.  
\v 40 Su ebpekepenilbi kediey is langun he menge etew te Israel ziyà te segradu he vuvungan ku, he iyan kes metikang he vuvungan diyà te Israel. Dutun edewaten ku sikiyu wey ibpepemuhat ku te nekedseselekawà he menge pemuhat wey te ispisyal he menge gasa.  
\v 41 Emun egkekuwa ku en sikiyu puun diyà te nekedseselekawà menge nasyun he zutun kew mekepeyapat, edewaten ku sikiyu he iring te pemuhat he veyewà he mehemut. Pinaaǥi kayi te ebeelan ku ziyà te keniyu igkepeehè ku ziyà te keniyu is kegkewaǥas ku egkaahà heini te menge zuma he nasyun.  
\v 42 Ne emun egkeuwit ku en sikiyu ziyà te tanà te Israel he insaad ku ziyà te menge kepuun niw, egketuenan niw he iyan a \sc Nengazen\sc*.  
\v 43 Ne zutun egketenuzan niw is menge vaal niw he nekeremerik keniyu, ne egkesilag kew te keugelingen niw tenged te langun he mezaat he mibeelan niw.  
\v 44 He menge etew te Israel, egketuenan niw he iyan a \sc Nengazen\sc*, emun ebpurungan ku sikiyu para te zengeg ku minsan mezaat wey meremerik is menge vaal niw. Iyan a, is Nengazen he MEGBEVAYÀ, is migkaǥi kayi.” 
\s1 Is Lalag te Megbevayà he Ebpekesuǥat diyà te Zivavà 
\p  
\v 45 Migkaǥi is \sc Nengazen\sc* kayi te kedì te,  
\v 46 “Sikew is etew, sinaru ka ziyà te zivavà, kaǥi ka te ebpekesuǥat keniyan te ketelunan.  
\v 47 Keǥiyi nu heeyan he lugar he siak, is Nengazen he MEGBEVAYÀ, edretem a te hapuy he ebpekevinsul te menge kayu keniyan, neǥangu etawa wazà. Kenà egkeevukan heini is edriyubriyub he hapuy. Egkevinsulan kayi is langun puun te zivavà pehendiyà te zizaya.  
\v 48 Egkaahà te langun he iyan a, is \sc Nengazen\sc*, midretem kayi, ne kenà heini egkeevukan.” 
\p  
\v 49 Ne migkaǥi a te, “He Nengazen he MEGBEVAYÀ, egkaǥi is menge etew te sempitè dà is ebpengeǥiyen ku.” 
\c 21  
\s1 Egemiten te \sc Nengazen\sc* is Babilonia he Ispada Zin dutun te Kedsilut Din diyà te Israel 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, sinaru ka ziyà te Jerusalem ne kaǥi ka te ebpekesuǥat te Israel wey te menge simbahan kayi.  
\v 3 Keǥiyi nu sikandan he siak, is Nengazen he MEGBEVAYÀ, migkaǥi a te, ‘Ebpekigkuntada a keniyu! Edhulevuten ku is ispada ku ne ebpenhimetayan ku sikiyu is langun, meupiya man etawa lalung he etew.  
\v 4 Uya, ebpenhimetayan ku sikiyu is langun te ispada ku puun te zivavà taman te zizaya.  
\v 5 Ne egketuenan te langun he iyan a \sc Nengazen\sc*. Midhulavut ku en is ispada ku, ne kenè ku heini igumà taman te kenè pa egkepasad is buluhaten din.’ 
\p  
\v 6 “Umbe, sikew is etew, ipezineg nu kandan is dag-es nu tenged te kegkeseeng nu wey kesakit te ǥehinawa nu.  
\v 7 Emun ed-insà sikandan ke maan is midag-es ka, keǥiyi nu sikandan he tenged te tudtul he ebpekepekerker, ebpekepeluya, ebpekepahandek, wey ebpekelipung kandan. Egkehitavù heini te kenà egkeuǥet. Iyan a, is Nengazen he MEGBEVAYÀ, is migkaǥi kayi.” 
\p  
\v 8 Migkaǥi pa is \sc Nengazen\sc* kayi te kedì te,  
\v 9-10 “Keǥiya nu is ibpetuenan ku te menge etew. Keǥiyi nu sikandan te siak, is Nengazen, migkaǥi a te, ‘Mibpurungan ku kemengaa is ispada ku he idhimatey ku keniyu. Utew ku heini impesinew su wey megkindab heini iring te kilat. Ne ǥuntaan edlipey kew pe be? Ed-un-undahan niw pe be is kebmansu ku keniyu?  
\v 11 Mibpurungan ku kemengaa is ispada ku wey impesinew ku, ne andam en heini he egemiten te kebpenhimatey.’ 
\p  
\v 12 “Sikew is etew, sineǥew ka ne tempelinga nu is kumeng nu tenged te kegkeseeng su heeyan he ispada ebpekepatey te menge etew ku he Israilihanen wey te menge pengulu zan.  
\v 13 Sevaha heini he penggezam te menge etew ku. Kenè dan isipa he kenè ku edleusen is kebmensuwa ku kandan he và dan dà edwelwelia. Iyan a, is Nengazen he MEGBEVAYÀ, is migkaǥi kayi.  
\v 14 Umbe, sikew is etew, keǥiya nu is menge lalag ku. Sumbaǥa nu is palad nu he tuus te kegkepauk nu, ne kuwa ka te ispada ne itibas nu heini te kezezuwa etawa ketetelu he simbulu he mahabet kandan is ebpematey te tebek.  
\v 15 Ebpengerkeren sikandan tenged te kegkahandek ne mahabet is ebpematey kandan. Insavuk ku en is ispada ziyà te menge pultahan te menge inged dan te kedhimatey kandan. Egkindab heini iring te kilat ne andam en he idhimatey.  
\v 16 He ispada, pemenibas ka ziyà te egkeǥivang wey egkekewanan. Pemenibas ka minsan hendei.  
\v 17 Edsumbaǥen ku zaan is palad ku he tuus te kegkepauk ku, ne egkaawà is pauk ku. Iyan a, is \sc Nengazen\sc*, is migkaǥi kayi.” 
\p  
\v 18 Migkaǥi is \sc Nengazen\sc* kayi te kedì te,  
\v 19 “Sikew is etew, baal ka te mapa ne merkahi nu te zezuwa he kersada he egkehimu he ebeyaan te hadì te Babilonia he ed-uwit te ispada. Heini is dezuwa he kersada ne ebpuun diyà te Babilonia. Sevuki nu te tuus is diyà te lembaǥan dutun te zezuwa he zalan para metueni ke hendei ebpevayà heeyan is dezuwa he zalan.  
\v 20 Is sevaha he zalan ebpehendiyà te Raba, he kepital te Amon, ne is sevaha pa, ne ibpehendiyà te Jerusalem he neliǥuy te verengbeng, he kepital te Juda.  
\v 21 Su is hadì te Babilonia edhitindeg diyà te lembaǥan keniyan te zezuwa he kersada ne ibarè din ke hendei zutun te zezuwa is ed-ikulen din pinaaǥi te kedhubus te vesut te panà, wey kedsusi te atey te uyaǥen he impemuhat, wey ked-insà diyà te menge ed-ezapen.  
\v 22 Is egkehubus din he vesut te panà iyan is mibmerkahan te Jerusalem. Ne edhabet sikandin ebpemensag he edsurungen dan en is Jerusalem ne egeraan dan is meǥinged kayi. Ebpesevukan din is pultahan te Jerusalem te zezekelà he menge kayu he ibengkag. Ebaal sikandin te turi-turi wey edtambù te tanà diyà te kilid duen te verengbeng duen te inged su para mepemenehiki heini.  
\v 23 Kenà ebpeketuu is menge tig-Jerusalem he egkehitavù heini ziyà te kandan su zuen neuyunan dan te menge tig-Babilonia. Piru is hadì te Babilonia ebpetanudtanud kandan te menge salè dan, ne ebihaǥen din sikandan. 
\p  
\v 24 “Umbe siak, is Nengazen he MEGBEVAYÀ, migkaǥi a te: Nezayag en is menge salè niw, impeehè niw ke sengemenu is kebmesinupaken niw wey kegkemekesesalè niw. Ne ǥeina te mibeelan niw heini ibpevihag ku sikiyu. 
\p  
\v 25 “Sikew, is lalung wey mekesesalà he pengulu te Israel. Neume en is timpu te kedsiluti kenikew!  
\v 26 Siak, is Nengazen he MEGBEVAYÀ migkaǥi a te: Puwasa nu is tengkulu nu wey kuruna nu, su egkahalin en is egkeulaula. Is deisey is pid-etawan din iyan en egkehimu he gemhanan, ne is gemhanan iyan en egkehimu he zeisey is pid-etawan din.  
\v 27 Edezeetan ku is Jerusalem! Ne kenè en heini egkeuman egketukud taman te kebpekelepew te pinilì ku he iyan edhukum kayi he inged; su insarig ku heini kandin. 
\p  
\v 28 “Ne sikew is etew, keǥiyi nu is menge Amunihanen he edsudì te Israel he siak, is Nengazen he MEGBEVAYÀ, migkeǥiyan ku sikandan te: Andam en is ispada he ibpenhimatey. Utew heini impesinew su wey mebpengindab iring te kilat.  
\v 29 Kenà tutuu is menge nelewasan wey menge tagnà he nezawat niw mehitenged te ispada. Iyan tutuu is, andam en is ispada te kedtamped te menge lieg te lalung he menge etew. Neume en is timpu te kedsiluti kandan.  
\v 30 Igumè ku ve heini is ispada? Kenà! Edsilutan ku sikiyu keniyan mismu te nasyun niw, he mid-enakan keniyu.  
\v 31 Ebpeǥezaman ku keniyu is utew ku kegkepauk, ne ibeǥey ku sikiyu ziyà te mesipala he menge etew, he nelayam he ebpenhimatey.  
\v 32 Egkehimu kew he tavun, ne edtudà is lengesa niw keniyan te tanè niw. Ne kenè kew en egketenuzan. Iyan a, is \sc Nengazen\sc*, is migkaǥi kayi.” 
\c 22  
\s1 Is menge Salà diyà te Jerusalem 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, andam ke en be he edhukum te Jerusalem? Andam ke en be te kedhukum kayi te inged te menge kriminal? Petueni nu kandin is utew mezaat he menge vaal zin.  
\v 3 Keǥiyi nu heini is inged he siak, is Nengazen he MEGBEVAYÀ, migkaǥi a te: He inged te menge kriminal, ebpekeuma ziyà te kenikew is limas. Midremerikan nu is keugelingen nu pinaaǥi te kebaal te menge ed-ezapen.  
\v 4 Nekesalè ka pinaaǥi te kebpenhimatey nu wey kedremeriki nu te keugelingen nu pinaaǥi te kebaal nu te menge ed-ezapen. Neume en is ketepusan nu. Umbe ed-engitan ka wey ed-un-undahan te menge nasyun.  
\v 5 Sikew is inged, nevantug ka te kelelalung wey kesamuk, edsudien ka te menge nasyun he ziyà te uvey wey meziyù.  
\v 6 Ahaa nu is menge pengulu te Israel he ed-ubpà diyà te kenikew, migamit dan is gehem dan wey zan mekepenhimatey.  
\v 7 Keniyan te lugar nu wazè en tehuza is menge ǥinikanan. Is kenà menge Israilihanen he ed-ubpà diyà te kenikew ebpenepian, ne edèdaaǥen is menge ilu wey menge valu.  
\v 8 Mibey-anan nu is segradu he menge azen ku ne wazè nu isipa he segradu is Andew te Kedhimeley he ibpetuman ku.  
\v 9 Duen menge etew ziyan te kenikew he mid-uluǥan dan te kewusa is duma su wey ikepehimetayi. Diyà te menge simbahan diyà te menge vuvungan duen daan duma he migkaan te menge pemuhat he impemuhat diyà te zuma he menge ed-ezapen wey zutun utew mahawag is menge vaal zan.  
\v 10 Duen daan menge etew ziyan he nekidhilavet te esawa te amey zan etawa bahi he edlengesahan.  
\v 11 Duen daan mibpekidhilavet te esawa te zuma, etawa te ambey zin, etawa etevey zin.  
\v 12 Is duma mibpesuhul te kedhimatey te etew, is duma mibpeutang te utew zekelà is tuvù din, wey is duma midsepian tenged te kedlimbungi zin te zuma he etew. Nelipatan e zan en. Iyan a, is Nengazen he MEGBEVAYÀ, is migkaǥi kayi. 
\p  
\v 13 “Menge tig-Jerusalem, edsumbaǥen ku is palad ku he tuus te utew ku kegkepauk tenged te kebpenapì niw wey kebpenhimatey.  
\v 14 Duen niw vuwa kevurut wey kelig-en dutun te timpu te kedsiluti ku keniyu? Wazà, su iyan a, is \sc Nengazen\sc* migkaǥi te, edsilutan ku sikiyu, ne ebeelan ku iyan heini.  
\v 15 Ibpeyapat ku sikiyu ziyà te nekedseselekawà he menge nasyun, ne ibpeengked ku sikiyu te kebaal te nekeremerik keniyu.  
\v 16 Egkepeel-elezan kew ziyà te zuma he menge nasyun, ne zutun egketuenan niw he iyan a \sc Nengazen\sc*.” 
\p  
\v 17 Migkeǥiyan ad maan te \sc Nengazen\sc* te,  
\v 18 “Sikew is etew, is menge etew te Israel nehimu he wazè dan pulus para kediey. Iring sikandan te tangis te brunsi, lata, putew, etawa timeǥà he netaǥak diyà te tunawà he midlunsayan te pelata.  
\v 19 Umbe siak, is Nengazen he MEGBEVAYÀ, migkaǥi a te, ‘Geina te wazè niw pulus su iring kew te tangis, ne edtiǥumen ku sikiyu ziyà te Jerusalem.  
\v 20-21 Iring a te etew he ed-amur-amur te pelata, te brunsi, putew, timeǥà wey lata ziyà te edriyubriyub he edtunawan duen. Uya, ed-em-emuren ku sikiyu ziyà te Jerusalem tenged te kegkepeuki ku keniyu, ne zutun edsilutan ku sikiyu he iring te mital he edtunawen.  
\v 22 Iring te lata he edtunawen diyà te tunawà, edtunawen ku zaan sikiyu ziyà te Jerusalem, ne egketuenan niw he iyan a is \sc Nengazen\sc*, mibpeǥezam keniyu te pauk ku.’ ” 
\p  
\v 23 Migkaǥi en maan is \sc Nengazen\sc* kayi te kedì te,  
\v 24 “Sikew is etew, keǥiyi nu is menge Israilihanen he ǥeina te kenè dan egkesuat he edlumpiyuwan ku ne kenè ku en sikandan egkehizuwan dutun te andew te kebpeǥezama ku kandan te pauk ku.  
\v 25 Is menge pengulu zan mibpelanu te mezaat. Iring sikandan te edhiniǥer he erimaung he ebpenhimatey te menge etew. Ebpenguwa zan te menge ketiǥeyunan wey mahalen he menge azen. Mahabet is egkevalu tenged te kebpenhimatey zan.  
\v 26 Is menge memumuhat dan wazà medtuman te kesuǥuan ku, ne midremerikan dan is segradu he menge azen ku. Imped-iring dan dà is segradu wey kenè segradu, is lumpiyu wey meremerik, ne wazè dan tumana is menge ibpetuman ku emun Andew te Kedhimeley. Umbe nekekaǥi a te pinaaǥi keniyan wazè e zan tehuza.  
\v 27 Is menge upisyal zan iring te zumezaas he menge asu he ebpitaspitas te egkezawi zan. Edhimatey zan para zà mekeselapì sikandan.  
\v 28 Is menge ebpeneuven diyà te kandan edtembunan dan is menge salè dan pinaaǥi te uvag kebpekelawas dan wey menge tagnè dan he vinèbeelan dan dà. Egkeǥiyen dan he iyan kun haazà migkaǥi te Nengazen he MEGBEVAYÀ minsan pa te iyan tutuu is wazà haazà keǥiya te \sc Nengazen\sc*.  
\v 29 Umbe, nenlimbung wey nenakew is menge etew. Edèdaaǥen dan is menge pubri wey menge egkaayuayu, wey is kenà menge Israilihanen he zuma zan he meǥinged. Wazè dan heini veǥayi te hustu he kukuman. 
\p  
\v 30 “Nengahà a te etew he ebpekelavan te inged su egkehimu he zatù diyà te pid-elangan ku wey menge etew su wey ku kenà mevengkag heini is inged. Piru wazà a meketuredu.  
\v 31 Umbe, ebpeǥezaman ku kandan is utew ku kegkepauk. Edezeetan ku sikandan tenged te mibeelan dan. Iyan a, is Nengazen he MEGBEVAYÀ, is migkaǥi kayi.” 
\c 23  
\s1 Is Telesuled he Bahi he menge Lalung 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, dengan duen telesuled he vahi,  
\v 3 hein betan-en dan pa, mibelegyè dan te zengeg dan diyà te Ehipto. Wazè dan en beliya is menge maama he ebpemuluspulus te lawa zan.  
\v 4 Is ngazan te kakey si Ohola, ne is hazi iyan si Oholiba. Mid-esawa ku sikandan is dezuwa ne mid-anak key. Si Ohola iyan is Samaria, ne si Oholiba iyan is Jerusalem. 
\p  
\v 5 “Minsan esawa ku en si Ohola, mibpedayun gihapun sikandin mebelegyà te zengeg din, ne edteltelukunan din en is menge kumpadi zin he menge tig-Asiria he siringan din.  
\v 6 Mezagwey sikandan wey vetan-en he menge maama. Menge kepitan sikandan wey menge peremandar he nekeyuyunipurmi te meitem is kaavuavu zin ne metau sikandan he pereuntud te kudà.  
\v 7 Mibpehilavet si Ohola te langun he menge upisyal ziyà te Asiria, ne midremerikan din is keugelingen din pinaaǥi te ked-azap te menge ed-ezapen te menge tig-Asiria.  
\v 8 Wazà sikandin med-engked he ebelegyà te zengeg din, puun pa te timpu he ziyè pa sikandin te Ehipto. Su hein betan-en pa sikandin mibpehilavet en sikandin te menge maama he nemuluspulus te lawa zin he sikan pa mekeremaǥi. 
\p  
\v 9 “Umbe, imbeǥey ku sikandin te menge kumpadi zin he menge tig-Asiria he midtelukunan din.  
\v 10 Midlevasan dan sikandin, migkuwa zan is menge anak din, ne midhimetayan dan sikandin pinaaǥi te ispada. Tenged te nehitavù he kedsiluti kandin nehimu sikandin he ed-ituken te menge vahi. 
\p  
\v 11 “Minsan pa te naahà ni Oholiba is nehitavù te suled din, mibpedayun gihapun sikandin mebelegyà te zengeg din, ne midlavew pa is kandin he kezaat te kezaat duen te suled din.  
\v 12 Edteltelukun daan sikandin te menge tig-Asiria he menge mezagwey wey menge vetan-en he menge maama. Heini sikandan menge kepitan wey menge peremandar he nekeyuyunipurmi wey memetau he pereuntud te kudà.  
\v 13 Neehè ku he iring ded sikandin duen te suled din, midekiyan din daan is keugelingen din. 
\p  
\v 14-15 “Ne mid-iseg pa is kebpelelevag ni Oholiba. Neeriǥan sikandin te menge kekerwahi he menge upisyal te menge tig-Babilonia hein neehè din diyà te elavat is menge litratu zan. Heini he menge upisyal nekeyuyunipurmi te meriǥà. Duen dan menge vakes wey menge tengkulu.  
\v 16 Umbe, impehendiyè din te Babilonia is menge menunudtulà te ked-imbita kayi he menge upisyal te kedhendiyà te kandin.  
\v 17 Umbe, midhendiyà te kandin haazà is menge upisyal ne nekidhilavet dan kandin. Pinaaǥi keniyan midekiyan dan sikandin. Piru hein neuǥet nepezaan ded sikandin kandan. 
\p  
\v 18 “Nepeukan ku si Oholiba ne mid-iniyuǥan ku en iring te mibeelan ku ziyà te suled din su utew keladu he mibpedayun sikandin mebpelelevag.  
\v 19 Piru minsan pa te iyan haazà, nasì en med-iseg is kebpelelevag din, mibpedayun sikandin te kebelegyà te zengeg din iring te mibeelan din diyà te Ehipto hein betan-en pa sikandin.  
\v 20 Mibpenelukunan din is menge kumpadi zin he iring kezekelà is sudiyà dan te sudiyà te asnu wey iring te egawas diyà te kudà is egawas duen.  
\v 21 Umbe, sikew Oholiba midlikuan nu is mezaat he menge vaal nu, he mibeelan nu zengan diyà te Ehipto hein betan-en ke pa. He zutun mibpemulpulusan te menge maama is lawa nu. 
\p  
\v 22 “Umbe siak, is Nengazen he MEGBEVAYÀ, egkeǥiyan ku sikew Oholiba te ibpesurung ku sikew te menge kumpadi nu he mid-iniyuǥan nu en hein nepezaan ke en kandan.  
\v 23 Heini sikandan iyan is menge tig-Babilonia wey menge tig-Caldea he ebpuun diyà te Pekod, Shoa, Koa, wey menge tig-Asiria. Heini he menge tig-Asiria menge mezagwey wey menge vetan-en he menge maama. Is duma kandan menge kepitan, menge peremandar, menge upisyal te ebpemen-untud te kerwahi wey zuma pa he lavew he menge upisyal. Ne nemen-untud sikandan te kudà.  
\v 24 Edsurung heini kenikew he ebpuun diyà te zizaya duma te mahabet he menge sundaru, menge kudà, wey menge kerwahi. Duen dan menge kelasag wey menge hilmit, ne edliǥuyan ke zan. Ibeǥey ku sikew kandan, ne edsilutan ke zan sumalà te egkesuatan dan he idsilut.  
\v 25 Tenged te utew ku kegkepeuki kenikew, ebpesilutan ku sikew kandan. Ne tenged te pauk dan edtinglasen dan is izung nu wey telinga nu. Ebihaǥen dan is menge anak nu, ne is egkesamà diyà te kenikew ebpenhimetayan dan te ispada etawa ebinsulan dan.  
\v 26 Edlevasan ke zan ne egkuwaan dan is menge elahas nu.  
\v 27 Ne egkeengked en is mezaat he vaal nu he iyan is kebelegyè nu te zengeg nu, he ziyè nu zà puuni te Ehipto. Kenè nu en heeyan egketenuzan, ne egkelipatan nu en is Ehipto.  
\v 28 Su iyan a, is Nengazen he MEGBEVAYÀ migkaǥi he ibeǥey ku sikew ziyà te menge etew he midumutan nu, he iyan sikan is midsuwayan nu hein nepezaan ke en kandan.  
\v 29 Tenged te pauk dan edsilutan ke zan, ne egkuwaan dan is langun he hineǥuan nu. Ed-ewaan ke zan is lelevas, ne egkezayag is mekeeled-eled he kebpekesavuk nu tenged te mahawag he vaal nu he iyan is kebelegyè nu te zengeg nu.  
\v 30 Egkehitavù heini kenikew su mibpehilavet ka te menge etew ziyà te selakew en he nasyun wey midremerikan nu is keugelingen nu pinaaǥi te ked-azap te zuma he menge ed-ezapen.  
\v 31 Mid-iringan nu is mibeelan te suled nu he vahi, umbe edsilutan ku zaan sikew iring te kedsiluti ku kandin. 
\p  
\v 32 “Uya, iyan is Nengazen he MEGBEVAYÀ, migkaǥi te, ‘Edsilutan ku sikew iring te kedsiluti ku te suled nu he vahi. Is silut ku, ne iring te inumen he ziyà te tasa he zekelà wey mezalem. Emun egkeinum nu en is nekepenù kayi te tasa he iyan is pauk ku, ed-un-undahan ka wey ed-engitan.  
\v 33 Egkelangut ka wey egkeseeng, su heini he tasa nepenù te handek wey kezeetan. Iyan heini tasa te ked-antus he neinuman te suled nu he iyan is Samaria.  
\v 34 Ed-eminen nu zaan ed-inuma is taǥù kayi, ne zutun edrupeten nu heini is tasa, ne edtempelingen nu is kumeng nu tenged te kegkeseeng nu. Iyan a, is Nengazen he MEGBEVAYÀ, is migkaǥi kayi.  
\v 35 Ne ǥeina te midlipatan a kenikew wey mid-iniyuǥan, ne siak is Nengazen he MEGBEVAYÀ, egkaǥi a he egkerasey ka tenged te mahawag he vaal he iyan is kebelegyè nu te zengeg nu.’ ” 
\p  
\v 36 Mid-uman megkaǥi is \sc Nengazen\sc* kayi te kedì te, “Sikew is etew, hukumi nu si Ohola wey si Oholiba. Keǥiya nu kandan is utew mezaat he menge vaal zan.  
\v 37 Nekepenapew zan wey nekepatey pinaaǥi te ked-azap te zuma he menge ed-ezapen, is menge anak dan he inhalad dan kayi te kediey zutun te kegkeetew kayi, impekaan dan te menge ed-ezapen pinaaǥi te kebpemuhata zan duen.  
\v 38-39 Ne mibpendezeisey zan daan is baley ku wey is Andew te Kedhimeley he ibpetuman ku kandan. Su zutun te andew te kebpemuhata zan te menge anak dan diyà te zuma he menge ed-ezapen dan, midseled dan diyà te valey ku, ne timpu haazà te Andew te Kedhimeley.  
\v 40 Mibpaangey pa ganì sikandan te menge maama he ebpemuun diyà te meziyù he menge lugar. Ne kebpekeuma kayi te menge maama, nemeziǥù dan wey mibpeguwapa, wey mid-eelahas sikandan.  
\v 41 Ne heini, si Ohola wey si Oholiba, mibpinuu zan diyà te mekempet he katri, ne ziyà te egkesineruwan kayi zuen lemisahan he midsevukan dan te veyewà wey lana he ibpemuhat dan kun kediey.  
\v 42 Egkezineg puun te ruǥu zan is keǥurub te egkengelangut wey kedlipeylipey te menge etew, he ebpemuun diyà te sibsivayan. Midrintian wey migkurunahan sikandan kayi te menge etew.  
\v 43 Ne migkaǥi a ziyà te ǥehinawa ku te, ‘Ebey-anan en sikandan dutun te kebpenigudu zan kebpekidhilavet keniyan te menge vahi he neǥurang en te kebelegyà te zengeg dan.’  
\v 44 Ne ebeelan dan iyan heini. Nekidhilavet sikandan ki Ohola wey ki Oholiba, he iyan kes dezuwa he meremerik he vahi he ebelegyà te zengeg dan.  
\v 45 Piru edsilutan sikandan te menge etew he metazeng te silut he ereg kandan te menge menenapew wey teremunù. 
\p  
\v 46 “Iyan a, is Nengazen he MEGBEVAYÀ, edsuǥù a te menge etew te kedsurung kandan. Ne igkeherati zan heini he menge etew, ed-eǥawen kayi is menge azen dan,  
\v 47 ebpenuleng heini kandan te vatu wey edhimatey kandan pinaaǥi te ispada. Ebpenhimetayan daan is menge anak dan wey ebinsulan is menge valey zan.  
\v 48 Pinaaǥi kayi edhimesazen ku is mahawag he vaal kayi he nasyun. Ne egkehimu zaan heini he petizaan te langun he menge vahi he kenè bes ereg he ed-iringan is mibeelan dan.  
\v 49 Sikiyu is dezuwa he telesuled, igkerasey niw utew is silut tenged te keremerik te vaal niw, wey ked-azap niw te zuma he menge ed-ezapen. Ne zutun egketuenan niw he iyan a Nengazen he MEGBEVAYÀ.” 
\c 24  
\s1 Is Tengisen he Kitang 
\p  
\v 1 Hein ikesepulù he andew te ikesepulù he vulan, dutun te ikesiyam he tuig te kegkevihaǥa kenami, migkaǥi is \sc Nengazen\sc* kayi te kedì te,  
\v 2 “Sikew is etew, isurat nu is pitsa kayi he andew, su kayi he andew ebpuun en edsurung diyà te Jerusalem is hadì te Babilonia.  
\v 3 Ne tudtula nu heini he sempità diyà te menge etew te Israel he menge mesinupaken, ne ipetueni nu kandan he iyan a, is Nengazen he MEGBEVAYÀ, migkaǥi kayi: 
\p “Diken ka te kitang ne teǥui nu te wahig.  
\v 4 Ilunud nu zutun is meupiya he vahin te usa, menge pemenayen wey menge vuvun. Iragkes nu zaan is menge tulan.  
\v 5 Iyan nu zà gemita is usa he ebpuun diyà te kineupiyahan he kerehidu. Tevuni nu is kitang ne leuyaha nu haazà is usa wey is menge tulan.  
\v 6 Su iyan a is Nengazen he MEGBEVAYÀ migkaǥi te: Mekehizuhizu is inged he Jerusalem he teremunù is menge meǥinged duen. Iring heini te tengisen he kitang he wazà melumpiyuwi. Ne tigseselimbahaa nu te egkuwa is taǥù kayi ne kenè nu erama.  
\v 7 Su is kebpenhimatey zin nekeleduwan te langun. Is lengesa te mibpenhimetayan din mibey-anan din dà diyà te menge vatu he egkaahà te langun. Wazè din ganì heini vunbuni te tanà.  
\v 8 Neehè ku heini he lengesa ne mibey-anan ku heini zutun te menge vatu he maahà te langun, ne henduen be te ebpengulahì heini is edhangyù he iyan a mebales.” 
\p  
\v 9 “Umbe iyan a, is Nengazen he MEGBEVAYÀ migkaǥi te: ‘Mekehizuhizu is inged he Jerusalem he teremunù is menge meǥinged duen! Iyan a mismu edtambù te mezakel he idtavun te kebinsuli zuen.  
\v 10 Sigi, umani niw pa is idtavun, ne retemi niw te hapuy. Peneketi niw wey leuyaha is usa taman egketutungan is menge tulan.  
\v 11 Ne iziken nu is kitang he wazè din en taǥù diyà te vaǥa taman te egkevaǥa zaan heini. Paaǥi heini te kedlumpiyuwi zuen te kitang ne egketutung is tangis din.  
\v 12 Piru minsan ebmenmenuwen nu pa haazà is tangis, ne kenà heini egkaawà pinaaǥi te hapuy. 
\p  
\v 13 “ ‘He Jerusalem, is mahawag he vaal nu iyan nekeremerik kenikew. Neninguhà a te kedlumpiyu kenikew, piru wazè ka mebpelumpiyu. Umbe kenà egkaawà is keremerik nu taman te kanà egkaawà is kegkepeuki ku kenikew.  
\v 14 Iyan a is \sc Nengazen\sc* migkaǥi he neume en is timpu he iyan ad edwaleng te kedsilut, ne wazà ebpekeeǥen kediey. Kenè ku sikiyu egkehizuwan, ne kenè en egkahalin is isip ku. Edhukuman kew tenged te vetasan niw wey menge vaal niw. Iyan a, is Nengazen he MEGBEVAYÀ, is migkaǥi kayi.’ ” 
\s1 Is Kebpatey te Esawa ni Ezekiel 
\p  
\v 15 Migkaǥi is \sc Nengazen\sc* kayi te kedì te,  
\v 16 “Sikew is etew, sengekebperè dà ne edtik-awan ku egkuwaa is bahi he utew nu mibmahal. Piru kenè nu sikandin sineǥawi ne kenè ka seengseeng para kandin.  
\v 17 Diyè nu zà te ǥehinawa nu izag-es is kesakit kayi. Kenè ka lalew. Kenè nu puwasa is tengkulu nu wey kenè nu pul-uta is sandalyas nu, wey kenè nu tembuni is buked nu te kebpaahà he neseeng ka. Kenè ka zaan kaan te menge keenen he para te edlalew he mibpetayan.” 
\p  
\v 18 Ne hein meselem en migkaǥi ku haazà diyà te menge etew, ne kegkezukilem dutun minatey is esawa ku. Ne hein meselem en maan midtuman ku is insuǥù kedì.  
\v 19 Ne mid-insà is menge etew kayi te kedì te, “Hengkey is ibpesavut nu keniyan te mibeelan nu?”  
\v 20-21 Midtavak ku sikandan te, “Migkaǥi is Nengazen he MEGBEVAYÀ kayi te kedì he keǥiya ku heini ziyà te menge etew te Israel: Andam ad he ebpendezeisey zuen te valey ku he dengepè niw, ebentuǥen niw, mahal niw, wey kelipey niw. Ebpematey te tebek is menge anak niw he nesamà diyà te Jerusalem.  
\v 22 Ne ebeelan niw is mibeelan ni Ezekiel. Kenè niw tembuni is buked niw, ne kenè kew egkaan te keenen he para te edlalew he mibpetayan.  
\v 23 Kenè niw zaan ebpuwasen is tengkulu niw wey kenè niw ebpul-uten is sandalyas niw. Kenè kew edsineǥew wey edseengseeng. Edluyahan kew tenged te menge salè niw, ne pesizag-es kew zà.  
\v 24 Is nehitavù ki Ezekiel egkehimu he petug-iringan niw. Is mibeelan din iyan daan ebeelan niw. Ne emun egkehitavù en heeyan ne egketuenan niw he iyan a Nengazen he MEGBEVAYÀ.” 
\p  
\v 25 Mibpedayun megkaǥi is \sc Nengazen\sc* te, “Sikew is etew, emun timpu en te kedrundusa ku zuen te valey ku, he eputè dan, he ebentuǥen dan, utew zan mahal, wey kelipey zan, ne emun ebpenhimetayan ku he is menge anak dan,  
\v 26 duen sevaha he etew he ebpekepelaǥuy puun te Jerusalem ne edtudtulen din heini kenikew.  
\v 27 Dutun he timpu ebpekekaǥi ke en maan ne ebpekesineǥew kew is dezuwa. Egkehimu ka he petizaan diyà te menge etew, ne egketuenan dan he iyan a \sc Nengazen\sc*.” 
\c 25  
\s1 Is Lalag he Ebpekesuǥat te Amon 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, sinaru ka ziyà te Ammon ne keǥiya nu is menge lalag he ebpekesuǥat kayi he lugar.  
\v 3 Keǥiyi nu is menge meǥinged keniyan he mebpemineg dan kedì, su iyan a, is Nengazen he MEGBEVAYÀ migkaǥi te, ‘Tenged te ingkelipey niw is kegkerundus duen te simbahan he valey ku wey is kegkezeeti te Israel, wey kegkevihag te menge etew ziyà te Juda,  
\v 4 ibpesakup ku sikiyu te menge etew ziyà te edsilaan, ne ed-engkenen kew zan. Egkampu sikandan diyà te keniyu, ne egkeenen dan is menge prutas niw wey ed-inumen dan is gatas niw.  
\v 5 Edhimuwen ku he penebtavà te menge kemilyu is inged he Raba, ne is tivuuk he Ammon edhimuwen ku he himelayà te menge kerehidu. Ne zutun egketuenan niw he iyan a \sc Nengazen\sc*.’ 
\p  
\v 6 “Iyan a, is Nengazen he MEGBEVAYÀ migkaǥi te, ‘Geina te mibpelakpak kew wey midlinglingketew kew tenged te kegkelipey niw zutun te kedsudia niw te Israel,  
\v 7 edsilutan ku iyan sikiyu. Ibeǥey ku sikiyu ziyà te zuma he menge nasyun he ed-aǥew te menge azen niw. Ebpurungan ku sikiyu edèdeeti taman te wazè en egkesamà keniyu he egkehimu he nasyun. Ne egketuenan niw he iyan a \sc Nengazen\sc*.’ ” 
\s1 Is Lalag he Ebpekesuǥat te Moab 
\p  
\v 8 Migkaǥi is Nengazen he MEGBEVAYÀ te, “Is Moab he migngezanan daan te Seir, egkaǥi is menge meǥinged duen te iring dà daan is Juda te zuma he menge nasyun.  
\v 9 Umbe, iyan a metau he surunga is menge inged diyà te dulunà te Moab, ragkes en is lavew he menge inged dan iring te Bet Jeshimot, Baal Meon, wey Kiriataim–kes menge inged he ebentuǥen dan.  
\v 10 Ibpesakup ku sikandan te menge etew ziyà te edsilaan, ne ed-angken heini kandan iring te ked-engkena zan te menge tig-Ammon. Ne is kenà kegkilelaa te menge tig-Ammon he sevaha te menge nasyun, ne iyan daan egkehitavù diyà te Moab.  
\v 11 Edsilutan ku is Moab, ne egketuenan dan dutun he iyan a \sc Nengazen\sc*.” 
\s1 Is Lalag he Ebpekesuǥat te Edom 
\p  
\v 12 Migkaǥi is Nengazen he MEGBEVAYÀ te, “Nenimales is menge tig-Edom te menge tig-Juda, ne tenged kayi nekesalà is menge tig-Edom.  
\v 13 Umbe iyan a, is Nengazen he Megbevayà, migkaǥi te edsilut a ziyà te Edom ne ebpenhimetayan ku is menge etew kayi wey menge uyaǥen. Edhimuwen ku is Edom he mekevulungbulung he lugar puun te Teman taman te Dedan, ne ebpematey te tebek is menge meǥinged kayi.  
\v 14 Ebelesan ku is Edom pinaaǥi te menge etew ku he Israilihanen. Edsilutan dan is menge tig-Edom te sungkad te utew ku kegkepauk, ne egketuenan te menge tig-Edom is paaǥi te kebales ku. Iyan a, is Nengazen he MEGBEVAYÀ, is migkaǥi kayi.” 
\s1 Is Lalag he Ebpekesuǥat te Filistia 
\p  
\v 15 Migkaǥi is Nengazen he MEGBEVAYÀ te, “Mibpelanu is menge tig-Filistia te kebpekigkuntada te menge tig-Juda su egkesuat dan he ebales wey neuǥet en is kedumuti zan kayi he menge etew.  
\v 16 Umbe iyan a, is Nengazen he MEGBEVAYÀ, migkaǥi he edsilutan ku is menge Filistihanen. Ebpenhimetayan ku is menge tig-Keret wey is duma pa he menge ebpemen-ubpà diyà te veyvey te zaǥat.  
\v 17 Tenged te pauk ku ebelesan ku sikandan wey edsilutan. Ne emun egkevelesan ku en sikandan, egketuenan dan he iyan a \sc Nengazen\sc*.” 
\c 26  
\s1 Is Lalag he Ebpekesuǥat te Tyre 
\p  
\v 1 Dutun te nehuna he andew te vulan, dutun te ike-11 he tuig te kegkevihaǥa kenami, migkaǥi is \sc Nengazen\sc* kayi te kedì te,  
\v 2 “Sikew is etew, midlipey is menge tig-Tyre tenged te kegkezeeti te Jerusalem. Ke sikandan te, ‘Nezeetan en is beyeey te menge nigusyanti. Kenitew en heini he timpu. Iyan kiw en maan ed-uswag.’  
\v 3 Umbe iyan a, is Nengazen he MEGBEVAYÀ, migkaǥi he egkuntrahan ku is menge tig-Tyre. Ibpesurung ku heini te mahabet he menge nasyun, he edasmag iring te menge vaǥel.  
\v 4 Ebengkaǥen dan is menge verengbeng te Tyre wey menge turi kayi. Egkeluten dan is tanà kayi taman te vatu zà is egkesamà.  
\v 5 Ne egkehimu zà heini he kegkaǥà te puket te menge mengingisdà. Iyan a, is Nengazen he MEGBEVAYÀ, is migkaǥi kayi. Ibeǥey ku is Tyre ziyà te zuma he menge nasyun he ed-aǥew te menge azen kayi,  
\v 6 ne is menge meǥinged diyà te menge inged kayi ebpenhimetayan pinaaǥi te ispada. Ne egketuenan dan he iyan a \sc Nengazen\sc*.” 
\p  
\v 7 Mibpedayun megkaǥi is Nengazen he MEGBEVAYÀ te, “Sikiyu is menge tig-Tyre, ibpesurung ku sikiyu ki Hadì Nebucadnezar he hadì te Babilonia, he hadì te menge hadì. Edsurung sikandin is ebpuun diyà te zizaya duma te mahabet he menge sundaru, menge kerwahi, menge kudà, wey menge pereuntud te kudà.  
\v 8 Ibpepenhimetayan din is menge meǥinged diyà te menge inged niw pinaaǥi te ispada. Edsurung is menge sundaru zin he ed-uwit te menge turi-turi, wey menge kelasag, ne edtembuan dan te menge tanà is peliǥuy te menge verengbeng niw su para mepemenehiki heini.  
\v 9 Ibpevengkag din is menge verengbeng niw pinaaǥi te zezekelà he menge trusu ne ibperundus din is menge turi niw pinaaǥi te menge masu.  
\v 10 Egketembunan kew te eliyavuk tenged te menge kudè din he utew mahabet. Egketegker is menge verengbeng niw tenged te dabekdabek te menge kudè din wey menge kerwahi he edseled diyà te pultahan te nevengkag he inged niw.  
\v 11 Edtekutakan te menge kudè din is langun he menge zalan niw. Ibpeǥerè kew zin is menge meǥinged pinaaǥi te ispada, ne egkevengkag is melig-en he menge tukud niw.  
\v 12 Ed-eǥawen dan is menge ketiǥeyunan niw wey menge velegyè niw. Edrundusen dan is menge verengbeng niw wey mekempet he menge valey niw, ne idtimbag dan diyà te zaǥat is menge vatu, menge kayu, wey is langun he egkesamà te nengevengkag.  
\v 13 Pinaaǥi kayi ibpeengked ku sikiyu te kegkanta wey kedtukar te menge alpa niw.  
\v 14 Edhimuwen ku is lugar niw he sevaha he meluag he vatu he zutun igkagkag te menge mengingisdà is menge puket dan. Kenè en egkeuman egkevangun is inged niw. Iyan a, is Nengazen he MEGBEVAYÀ, is migkaǥi kayi.” 
\p  
\v 15 Migkeǥiyan pa te Nengazen he MEGBEVAYÀ is menge tig-Tyre, “Is menge ed-ubpà diyà te beyvey te zaǥat egkerkeren te kegkahandek dan emun egkezineg dan is kegkezeeti niw wey kebpematey, wey is dag-es te menge teǥepalì diyà te keniyu.  
\v 16 Is menge pengulu ziyà te menge lugar he veyvey te zaǥat edrenà puun te pinuuwà te lavew ne edluwasen dan is bisti te hadì wey is mekempet he pendizalem he visti zan. Ne ebpinuu sikandan diyà te tanà is egkerkeren tenged te nehitavù keniyu.  
\v 17 Ne edsineǥew sikandan he egkaǥi te: ‘Utew subra is kegkezeeti nu, sikew is nevantug he inged he ed-ubpaan te menge etew he iyan ibpeguyag dan is daǥat. Mekeǥeǥehem ka utew ziyà te menge zaǥat, ne egkehandek is menge etew he ed-ubpà diyà te veyvey te zaǥat.  
\v 18 Ne ǥuntaan egkerkeren te kegkahandek is menge ebpemen-ubpà diyà te veyvey te zaǥat tenged te kegkezeeti kayi te inged.’ ” 
\p  
\v 19 Migkaǥi pa is Nengazen he MEGBEVAYÀ te, “He Tyre, egkehimu ka he mekevulungbulung he inged, egkehimu ka he inged he wazà duen ed-ubpà. Edsepalen ku sikew te mezalem he wahig.  
\v 20 Edlenepen ku sikew ziyà te kinezizaleman. Kenè ke en ebpekelikù diyà te lugar he para te menge uuyag.  
\v 21 Edtepusen ku en sikew, ne mekahandekhandek is ketepusan nu. Egkahanew ke en, minsan ebpen-ahaan ka ne kenè ke en egkaahà. Iyan a, is \sc Nengazen\sc*, is migkaǥi kayi.” 
\c 27  
\s1 Is Kanta para te Kebpenhulùhulù Mehitenged te Tyre 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, kanta ka te kentahan para te kebpenhulùhulù mehitenged te Tyre,  
\v 3 kes inged he dungguanan te menge varku wey sintru te nigusyu te menge meǥinged diyà te veyvey te zaǥat. Keǥiyi nu he iyan a, is Nengazen he MEGBEVAYÀ migkaǥi te, ‘He Tyre, mibpehivantug ka he utew ka mekempet.  
\v 4 Impemeluag nu is lugar nu ziyà te zaǥat. Mibpurung ka pekekempeta te menge mibangun kenikew.  
\v 5 Neiring ka te zekelà he varku he kayu he abitu he ebpuun diyà te Senir. Ne menge kayu he sidru he ebpuun diyà te Lebanon is palu nu.  
\v 6 Ne menge kayu he ulayan he ebpuun diyà te Bashan is menge vegsey nu. Ne menge kayu he sipris he ebpuun diyà te balet he Kitim is saag nu, ne mibpekeplaan heini te dayandayan he ungal te ilipanti.  
\v 7 Is layag nu binurdahan he linu he ebpuun te Ehipto. Ne henduen te bendirà is ked-ahaa kayi. Is terapal nu maavuavu is keitem din wey merudtem he ebpuun diyà te isla te Elisha.  
\v 8 Tig-Sidon wey tig-Arvad is menge perevegsey nu, ne iyan mismu is menge meǥinged diyà te kenikew menge terebahanti nu.  
\v 9 Ne menge metau he menge pandey he ebpuun diyà te Gebal is ebpurung te egkengezeetan diyà te kenikew. Ed-uvey kenikew is langun he menge terebahanti te zuma he menge untuzà ne ebpetiǥayun dan diyà te kenikew.  
\v 10 Ne menge tig-Persia, tig-Lydia, wey tig-Put is menge sundaru nu. Insanggat dan is menge kelasag dan wey menge hilmit dan diyà te elavat nu, ne nekeveǥey heini kenikew te zengeg.  
\v 11 Menge tig-Arvad wey menge tig-Helec is menge sundaru nu he ebantey ziyà te peliǥuy te menge verengbeng nu, ne menge tig-Gamad is ebantey te menge turi nu. Insanggat dan diyà te elavat nu is menge kelasag dan ne nekeveǥey heini kenikew te zekelà he zengeg. 
\p  
\v 12 “ ‘Mibpetiǥayun diyà te kenikew is Tarshish su mahabet is ketiǥeyunan nu. Midliwaan dan is menge velegyè nu te pelata, putew, lata, wey timeǥà.  
\v 13 Mibpetiǥayun daan diyà te kenikew is Grecia, Tubal, wey Meshec. Midliwaan dan is menge velegyè nu te menge uripen wey menge brunsi he mibeelan he menge gelemiten.  
\v 14 Ne is inliwà te menge tig-Bet Togarma te menge velegyè nu ne menge kudà he para te idterebahu wey para te tebek, wey menge mulà. 
\p  
\v 15 “ ‘Mibpetiǥayun daan diyà te kenikew is menge tig-Dedan, ne mahabet is menge sukì nu ziyà te menge lugar he ziyà te veyvey te zaǥat. Is imbayad dan kenikew menge ungal te ilipanti wey menge mezesen wey meitem he menge kayu. 
\p  
\v 16 “ ‘Mibpetiǥayun daan diyà te kenikew is Aram su mahabet is menge pruduktu nu. Is inliwè dan te menge velegyè nu menge ismiralda, menge manggad he merudtem, menge binurdahan, menge mahalen he linu, paǥang, wey menge rubi. 
\p  
\v 17 “ ‘Mibpetiǥayun daan diyà te kenikew is Juda wey Israel. Midliwaan dan is menge velegyè nu te trigu he ebpuun diyà te Minnit, higus, teneb, wey haplas. 
\p  
\v 18 “ ‘Mibpetiǥayun daan diyà te kenikew is tig-Damascus su mahabet is ketiǥeyunan nu wey menge pruduktu. Is inliwè dan te velegyè nu binu he ebpuun diyà te Helbon wey welin he ebpuun diyà te Zahar.  
\v 19 Is menge tig-Dan wey tig-Javan he ebpuun diyà te Uzal mibpetiǥayun daan diyà te kenikew. Is inliwè dan te menge velegyè nu, iyan is menge putew wey menge penaket. 
\p  
\v 20 “ ‘Is inliwà te menge tig-Dedan te menge velegyè nu iyan is menge manggad he ebeelan he valhen. 
\p  
\v 21 “ ‘Mibpetiǥayun daan diyà te kenikew is menge tig-Arabia wey is langun he pengulu ziyà te Kedar. Is inliwè dan te menge velegyè nu menge kerehidu wey menge kambing. 
\p  
\v 22 “ ‘Mibpetiǥayun daan diyà te kenikew is menge nigusyanti ziyà te Sheba wey Raama. Is imbayad dan te menge velegyè nu iyan is langun he kelasi te meupiya he menge penaket, mahalen he menge vatu, wey menge vulawan. 
\p  
\v 23 “ ‘Mibpetiǥayun daan diyà te kenikew is menge tig-Haran, tig-Cane, tig-Eden, wey is menge nigusyanti ziyà te Sheba, Ashur, wey Kilmad.  
\v 24 Is inliwè dan te menge velegyè nu iyan is mahalen he menge visti, menge manggad he maavuavu is keitem din, menge manggad he binurdahan, wey menge carpet wey nekedseselekawà is barek din he mibperibitiyan te nepurungan is kedtehia zuen. 
\p  
\v 25 “ ‘Sikew is inged he Tyre, is menge barku ziyà te Tarshish iyan egkarga te menge velegyè nu. Neiring ka te varku he nepenù te karga zutun te kedlayag din diyà te zaǥat.  
\v 26 Piru te ed-uwiten ka te menge perevegsey nu ziyà te lawed, ebengkaǥen ka te mevendes he keramag he ebpuun diyà te edsilaan.  
\v 27 Ne egkengelened is langun he mid-untud wey in-untud diyà te kenikew: menge ketiǥeyunan nu, menge velegyè nu, menge terebahanti nu, menge meriniru nu, menge pandey nu, menge nigusyanti wey is langun he menge sundaru nu. Egkengelened heini is langun dutun te andew he egkevengkag ka. 
\p  
\v 28 “ ‘Egkerkeren tenged te kegkahandek is menge meǥinged diyà te veyvey te zaǥat emun egkezineg dan is kebpetavang te menge terebahanti.  
\v 29 Ed-ewaan te menge perevegsey is menge untuzè dan ne ebpemenhitindeg dan diyà te veyvey duma te menge meriniru wey menge terebahanti,  
\v 30 ne edsineǥawan ke zan. Ebukbukan dan te eliyavuk is ulu zan ne edtelulid sikandan diyà te avu su ibpeehè dan is kedlalew zan.  
\v 31 Egkiskisan dan is ulu zan wey ebivisti sikandan te saku zutun te edsineǥew sikandan is egkeseeng.  
\v 32 Ne zutun te kedlalew zan ibpenhulùhulù dan heini: “He Tyre, wazè en ebpekerepeng te kegkezeeti kenikew pinaaǥi te kegkelened nu ziyà te lawed!  
\v 33 Midlayag ka is ed-uwit te menge velegyè nu, ne mahabet he menge etew is nelipey tenged te kezekelà te ketiǥeyunan nu. Midsepian is menge hadì kayi te kelibutan tenged te menge velegyè nu.  
\v 34 Piru ǥuntaan nevengkag ke en ne nekezuma te kegkelened nu ziyà te zizalem te zaǥat is menge velegyè nu wey is langun he menge terebahanti.  
\v 35 Ne utew ingkahandek te langun he menge meǥinged diyà te veyvey te zaǥat is nehitavù kenikew. Is menge hadì dan mibpengerker te kegkahandek, ne egketuusan heini ziyà te dagwey zan.  
\v 36 Henduen be te kenà ebpeketuu is menge nigusyanti ziyà te menge nasyun te nehitavù kenikew. Mekahandekhandek is ketepusan nu, ne egkahanew ka taman te taman.” ’ ” 
\c 28  
\s1 Is Lalag he Ebpekesuǥat diyà te Hadì te Tyre 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, keǥiyi nu is pengulu te Tyre he iyan a, is Nengazen he MEGBEVAYÀ migkaǥi te: Tenged te kebpelavew nu migkaǥi ka he sevaha ka he megbevayà he mibpinuu ziyà te pinuuwà te hadì he ziyà te teliwazà te zaǥat. Piru iyan benar is, minsan mid-isip nu he metau ka iring te megbevayà, ne kenè ka Megbevayà, kekenà, etew ke zà.  
\v 3 Egkeisip nu he edhuna ke pa he metau ki Daniel, ne wazà id-eles he kenè nu egketuenan.  
\v 4 Pinaaǥi te ketau nu wey keuluwanen midsepian ka wey neketiǥum ka te mahabet he menge vulawan wey pelata ziyà te teleǥuey nu te ketiǥeyunan nu.  
\v 5 Ne pinaaǥi zaan te ebilidad nu te kednigusyu, neumanan pa is ketiǥeyunan nu, ne tenged te ketiǥeyunan nu nehimu ka he mepelevawen.  
\v 6 Umbe, iyan a, is Nengazen he MEGBEVAYÀ migkaǥi te: Geina te mid-isip nu he metau ka iring te Megbevayà,  
\v 7 ibpesurung ku sikew te menge ebpuun diyà te zuma he lugar, he utew mesipala kenà te ebpemuun diyà te langun he menge nasyun. Edèdeetan dan is kekempet he naangken nu tenged te ketau nu, ne egkaawà is dengeg nu.  
\v 8 Mesakit he kemetayen is ibpatey nu, ne edlenezen ke zan diyà te kinezeleman te zaǥat.  
\v 9 Ne ed-ahaan ta ke ebpekekaǥi ke pa ǥihapun diyà te etuvangan te menge edhimatey kenikew te Megbevayè ka. Etew zà is ked-isipa zan kenikew ne kenà Megbevayà.  
\v 10 Iyan edhimatey kenikew is ebpuun diyà te sengelulugar en. Iring is kemetayen nu te kemetayen te etew he wazà medtuu kediey. Egkeula-ula iyan heini, su iyan a, is Nengazen he MEGBEVAYÀ, is migkaǥi kayi.” 
\p  
\v 11 Mid-uman megkaǥi is \sc Nengazen\sc* kayi te kedì te,  
\v 12 “Sikew is etew, kanta ka te kentahan te kedlelawi te hadì te Tyre. Keǥiyi nu sikandin he iyan a, is Nengazen he MEGBEVAYÀ migkaǥi te: Dengan petug-iringan ka te wazè din kurang. Metau ka wey utew mekempet.  
\v 13 Diyè ke zengan te Eden, he pemuleey te Megbevayà. Mideyzeyanan ka te nekedseselekawà he kelasi te mahalen he menge vatu: rubi, tupasyu, ismiralda, krisulitu, uniks, haspi, sapiru, turkisu, wey biril. Mideyzeyanan ka zaan te vulawan he in-andam en dutun te andew te kedlimbaǥa kenikew.  
\v 14 Pinilì ku sikew he kirubin he mid-urdinahan ku he perevantey te segradu he vuntud ku. Midhipanew ka ziyà te pid-elangan te ed-ilak-ilak he menge vatu.  
\v 15 Wazà igkesawey kenikew puun te andew te kedlimbaǥa kenikew taman te mibaal ka te mezaat.  
\v 16 Is mahabet he petiǥayun nu nehimu he hinungdan te kegkemesipala nu, ne mibaal ka te salà. Umbe midsegseg ku sikew puun te segradu he vuntud ku; impaawè ku sikew is kirubin he perevantey puun te ed-ilak-ilak he menge vatu.  
\v 17 Nehimu ka he mepelevawen tenged te kekempet nu, ne migamit nu is ketau te tinulebung para mevantug ka. Umbe intimbag ku sikew ziyà te tanà, ne nehimu ka he edtengtengan te zuma he menge hadì.  
\v 18 Tenged te mahabet he menge salè nu wey kebpenlimbung nu ziyà te petiǥayun nu, mibpendezeisey nu is menge lugar he zutun ka ed-azap. Umbe ziyà te etuvangan te langun he edtengteng kenikew imperiyubriyub ku is hapuy ziyà te lugar nu ne nevinsulan ka. Nehimu ke zà he avu ziyà te tanà.  
\v 19 Is langun he menge etew ziyà te menge nasyun he nekekilala kenikew ingkahandek dan is nepengkusan nu. Mekahandekhandek is ketepusan nu, ne egkahanew ke en taman te taman.” 
\s1 Is Lalag he Ebpekesuǥat te Sidon 
\p  
\v 20 Migkaǥi is \sc Nengazen\sc* kayi te kedì te,  
\v 21 “Sikew is etew, sinaru ka ziyà te Sidon ne keǥiya nu is menge lalag he ebpekesuǥat kayi.  
\v 22 Keǥiyi nu is Sidon he iyan a is Nengazen he MEGBEVAYÀ migkaǥi te: Migkuntada ku sikew is Sidon. Edeliǥen a te menge etew emun edsilutan ku en sikew, ne egketuenan dan he iyan a \sc Nengazen\sc*, wey egkeehè dan is kegkewaǥas ku.  
\v 23 Ebpeeǥiyan ku sikew te limas he tenged dutun edalem is lengesa ziyà te menge zalan nu, utew mahabet is ebpematey he menge meǥinged diyà te kenikew. Ne zutun egketuenan dan he iyan a \sc Nengazen\sc*. 
\p  
\v 24 “Dutun he timpu wazè en menge etew ziyà te menge nasyun he siringan te Israel he edsudì te menge Israilihanen he ebpekepesakit kandan he iring te medidis menge zuǥi. Ne egketuenan dan dutun he iyan a Nengazen he MEGBEVAYÀ.” 
\p  
\v 25 Migkaǥi zaan is Nengazen he MEGBEVAYÀ te, “Ed-umanan ku te edtiǥum is menge etew te Israel puun te menge nasyun he zutun sikandan mekepeyapat. Pinaaǥi kandan igkepetuusan ku ziyà te menge nasyun is kegkewaǥas ku. Dutun he timpu ebpekeubpè en is menge Israilihanen diyà te keugelingen dan he tanà, he iyan kes tanà he imbeǥey ku ziyà te suluǥuen ku he si Jacob.  
\v 26 Ebpekeubpè dan dutun he melinawen. Ebangun sikandan te menge valey wey ebpemula te menge paras. Wazè en edsamuk kandan emun edsilutan ku en is menge etew ziyà te langun he menge avey zan he nasyun he mid-undaunda kandan. Ne egketuenan dan he iyan a \sc Nengazen\sc* he Megbevayè dan.” 
\c 29  
\s1 Is Lalag he Ebpekesuǥat te Ehipto 
\p  
\v 1 Dutun te ike-12 he andew te ikesepulù he vulan, duen te ikesepulù he tuig te kegkevihag dey, migkaǥi is \sc Nengazen\sc* kayi te kedì te,  
\v 2 “Sikew is etew, sinaru ka ziyà te Ehipto ne weliyi nu is Faraon he hadì te Ehipto te ebpekesuǥat kandin wey te langun he menge etew zin.  
\v 3 Keǥiyi nu sikandin he iyan a is Nengazen he MEGBEVAYÀ migkaǥi te: Kuntada ku sikew, Faraon he hadì te Ehipto. Neiring ka te zekelà he vuaya he ed-ubpà diyà te menge wahig diyan te Ehipto. Migkaǥi ka te kenikew is Wahig he Nilo, ne mibeelan nu heini para mismu kenikew.  
\v 4 Piru egkew-itan ku te menge vunuwit is bakè nu, ne igaun ku sikew puun te menge wahig nu duma te menge isdà he ebpemekepikit diyà te menge hun-ap nu.  
\v 5 Ne idtimbag ku sikew wey is menge isdà diyà te disirtu, ne ebpekesesavuk ka ziyà te tanà he wazà egkuwa wey edleveng kenikew. Ne ibpekaan ku sikew te zumezaas he menge langgam wey menge tagbis.  
\v 6 Ne egketuenan te langun he meǥinged te Ehipto he iyan a \sc Nengazen\sc*. Su iring ke zà te meǥevù he tuked he midseriǥan te menge Israilihanen.  
\v 7 Dutun te kegewezi zan kenikew nevagbag ka, ne nepelian sikandan diyà te menge vekelawan. Ne hein midtelumbeǥat dan diyà te kenikew ne nevadtì ka ne nepiley zan ne nelepù is tulan te seǥang dan.  
\v 8 Umbe siak, is Nengazen he MEGBEVAYÀ, migkaǥi a he ibpesurung ku sikew te menge etew he edhimatey te menge etew nu wey menge uyaǥen dan.  
\v 9 Egkehimu he mekevulungbulung is Ehipto. Ne egketuenan niw he iyan a \sc Nengazen\sc*. 
\p “Geina te migkaǥi ka he kenikew is Wahig he Nilo wey iyan ka mibaal kayi,  
\v 10 kuntada ku sikew wey is menge wahig nu. Edèdeetan ku is Ehipto ne egkehimu en heini he mekevulungbulung puun te Migdol pehendiyà te Aswan, taman te dulunà te Etiopia.  
\v 11 Wazè en etew wey langgam he ebayà kayi, ne wazè en ed-ubpà kayi seled te 40 he tuig.  
\v 12 Edhimuwen ku is Ehipto he utew mekevulungbulung kenà te zuma he menge nasyun. Seled te 40 he tuig, is menge inged kayi egkehimu he edhuna he mekevulungbulung te zuma he nevengkag he menge inged. Ne ibpeyapat ku is menge Ehiptohanen diyà te nekedseselekawà he menge nasyun.” 
\p  
\v 13 Piru migkaǥi zaan is Nengazen he MEGBEVAYÀ te, “Kedlavey te 40 he tuig, edtiǥumen ku is menge Ehiptohanen puun te menge nasyun he zutun sikandan mekepeyapat.  
\v 14 Idlikù ku sikandan diyà te Patros he divavà he vahin te Ehipto, he iyan kes tanà he mibpuunan dan. Ne zutun egkehimu zà sikandan he mevavà is kebpekesavuk din he ginhedian–  
\v 15 pinekemevavà heini te langun he menge ginhedian, ne kenè dan en ebpekeuman ebpekelavew te zuma he menge nasyun. Edhimuwen ku sikandan he meǥuyà utew he ginhedian, ne kenè en egkeuman egkezizalem te ǥehem din is duma he menge nasyun.  
\v 16 Ne kenè en ed-uman edsarig te Ehipto is menge etew te Israel. Is egkehitavù te Ehipto ebpekepetanudtanud te menge Israilihanen te menge salè dan, he iyan is kebuyù te tavang diyà te Ehipto. Ne egketuenan te menge Israilihanen he iyan a \sc Nengazen\sc* he MEGBEVAYÀ.” 
\p  
\v 17 Hein nehuna he andew te nehuna he vulan, dutun te ike-27 he tuig te kegkevihaǥa kenami, migkaǥi is \sc Nengazen\sc* kayi te kedì te,  
\v 18 “Sikew is etew, is menge sundaru ni Hadì Nebucadnezar he hadì te Babilonia mibpurung mebpekidtebek te menge sundaru te Tyre taman te nengeupew en sikandan wey mibpenlupangan en is menge pemenayen dan. Piru wazà nekuwa ni Nebucadnezar wey te menge sundaru zin diyà te menge tig-Tyre.  
\v 19 Umbe siak, is Nengazen he MEGBEVAYÀ, migkaǥi a he iyan ibeǥey ku is Ehipto ziyà te hadì te Babilonia he si Nebucadnezar. Egkaaǥew zin is langun he ketiǥeyunan diyà te Ehipto he iyan bayad diyà te menge sundaru zin.  
\v 20 Ibeǥey ku kandin is Ehipto he suhul te kedhaǥù din. Su para kediey is kedhimuwa zin kayi wey te menge sundaru zin. Iyan a, is Nengazen he MEGBEVAYÀ, is migkaǥi kayi. 
\p  
\v 21 “He Ezekiel, diyà te timpu te kegkeul-ulaha kayi, ed-umanan ku ed-enawa is Israel, ne egketuenan te menge Israilihanen he tutuu ves iyan is mibpengaǥi nu. Ne zutun egketuenan dan he iyan a \sc Nengazen\sc*.” 
\c 30  
\s1 Is Kedsilut diyà te Ehipto 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, tudtula nu heini is menge lalag ku he para te menge tig-Ehipto. Keǥiyi nu sikandan he siak, is Nengazen he MEGBEVAYÀ, migkaǥi a te: Sineǥew kew tenged te ebpekeuma ziyà te keniyu he kezeetan.  
\v 3 Su hapit en egkeuma haazà he andew, is andew te kedhukum te \sc Nengazen\sc*. Egkikivel ne ebmerusirem haazà he andew para te menge nasyun.  
\v 4 Edsurungen is Ehipto, ne ebpekebmereǥen is menge tig-Etiopia. Mahabet is ebpematey ziyà te Ehipto, ne ebpenguwaan is menge ketiǥeyunan kayi he nasyun, ne ebengkaǥen heini.  
\v 5 Kayi he tebek, ebpematey is menge tig-Etiopia, tig-Put, tig-Lydia, tig-Arabia, tig-Libya, wey is diyà te zuma he menge nasyun he nekidsevaha te Ehipto.  
\v 6 Iyan a, is Nengazen he MEGBEVAYÀ migkaǥi he egkezeetan iyan is diyà te menge nasyun he nekidsevaha te Ehipto, ne egkaawà is gehem he impehivantug te menge Ehiptohanen. Egkeǥerà is meǥinged kayi puun te Migdol pehendiyà te Aswan.  
\v 7 Ne egkehimu he edlavew is kegkemekevulungbulung te Ehipto te zuma he mekevulungbulung he menge nasyun diyà te peliǥuy zin, is menge inged kayi, egkehimu he iring te nevengkag he menge inged diyà te peliǥuy zin su egkengevengkag daan.  
\v 8 Emun ebinsulan ku en is Ehipto wey ebpematey en is langun he nekidsevaha kayi, egketuenan te menge meǥinged kayi he iyan a \sc Nengazen\sc*. 
\p  
\v 9 “Dutun he timpu, edsuǥù a te menge menunudtulà he ed-untud te menge untuzà he tenged kandan utew egkahandek is menge tig-Etiopia he ebpeeyehey zà. Egkeheratan sikandan dutun te timpu te kedèdeeti te Ehipto su siguradu egkeuma heeyan he timpu.” 
\p  
\v 10 Migkaǥi zaan is Nengazen he MEGBEVAYÀ te, “Egemiten ku si Hadì Nebucadnezar he hadì te Babilonia te kebpenhimatey te mahabet he menge etew ziyà te Ehipto.  
\v 11 Ibpezezeetan ku is Ehipto ki Nebucadnezar wey te menge sundaru zin he edlavew he mesipala kenà te zuma he mesipala he menge sundaru ziyà te menge nasyun, ne ebpekepeyapat is ebpematey ziyà te minsan hendei.  
\v 12 Ebpekemezahan ku is Wahig he Nilo, ne ibeǥey ku is Ehipto ziyà te lalung he menge etew. Edèdeetan ku is tivuuk he nasyun he Ehipto wey is langun he neseled kayi pinaaǥi te ebpemuun diyà te senge nenasyun. Iyan a, is \sc Nengazen\sc*, is migkaǥi kayi.” 
\p  
\v 13 Migkaǥi pa is Nengazen he MEGBEVAYÀ te, “Edèdeetan ku zaan is menge ledawan te menge ed-ezapen diyà te Memfis. Wazè en ebpengulu te Ehipto ne ebpelihendeken ku is langun he meǥinged kayi.  
\v 14 Edhimuwen ku he mekevulungbulung is Patros, ebinsulan ku is Zoan, ne edsilut a ziyà te Tebes.  
\v 15 Ibpeǥezaman ku is kegkepauk ku ziyà te Pelusium, wey ziyà te melig-en he inged te Ehipto, ne ebpenhimetayan ku is mahabet he menge etew ziyà te Tebes.  
\v 16 Ebinsulan ku is Ehipto! Ebpekezag-es tenged te kegkesekiti is menge tig-Pelusium. Egkezeetan is Tebes, ne layun egkahandek is menge tig-Memfis.  
\v 17 Ebpematey te tebek is menge vetan-en he maama ziyà te Heliopolis wey ziyà te Bubastis, ne is egkesamà he uuyag kayi he menge inged ne ebihaǥen.  
\v 18 Emun edèdeetan ku en is gehem te Ehipto egkehimu heeyan he merusirem he andew para te menge tig-Tapanhes. Egkeawè en is impehivantug he ǥehem te Ehipto. Egkeselikuvungan is Ehipto te kivel, ne ebihaǥen is menge meǥinged diyà te menge inged kayi.  
\v 19 Iring keniyan is kedsilut ku ziyà te Ehipto, ne egketuenan dan he iyan a \sc Nengazen\sc*.”  
\v 20 Ne hein ikepitu he andew te nehuna he vulan, dutun te ike-11 he tuig te kegkevihaǥa kenami, migkaǥi is \sc Nengazen\sc* kayi te kedì te,  
\v 21 “Sikew is etew, midlepuan ku is bekelawan te Faraon he hadì te Ehipto. Ne wazà ebpekevawì kayi wey meulii su wey med-uman mebmezesen te kegawed te ispada.  
\v 22 Umbe, keǥiyi nu sikandin he siak, is Nengazen he MEGBEVAYÀ, migkaǥi a he kuntada ku sikandin. Edlepuan ku is dezuwa he vekelawan din, sikan is wazè pa melepui wey sikan is daan en he nelepuan, su wey zin melekai is ispada zin.  
\v 23 Ibpeyapat ku is menge Ehiptohanen diyà te nekedseselekawà he menge nasyun.  
\v 24 Edteǥuan ku te zesen is menge vekelawan te hadì te Babilonia ne ebpeǥewezan ku kandin is ispada ku. Piru edlepuen ku mulà is menge vekelawan te hadì te Ehipto, ne ebpekezag-es sikandin is pelien he edserupatey en diyà te etuvangan te hadì te Babilonia.  
\v 25 Edteǥuan ku te zesen is menge vekelawan te hadì te Babilonia. Piru is menge vekelawan te hadì te Ehipto egkeinutil mulà. Emun ibpeǥewezan ku en is ispada ku te hadì te Babilonia, wey egemiten din en heini te kedezaat te Ehipto, ne egketuenan te menge Ehiptohanen he iyan a \sc Nengazen\sc*.  
\v 26 Ibpeyapat ku is menge Ehiptohanen diyà te nekedseselekawà he menge nasyun, ne egketuenan dan he iyan a \sc Nengazen\sc*.” 
\c 31  
\s1 Impetug-iring is Ehipto te Kayu he Sidru 
\p  
\v 1 Dutun te nehuna he andew te iketelu he vulan, duen te ike-11 he tuig te kegkevihaǥa kenami, migkaǥi is \sc Nengazen\sc* kayi te kedì te,  
\v 2 “Sikew is etew, keǥiya nu heini ziyà te Faraon he hadì te Ehipto, wey te menge etew zin: 
\p “Hentei is egkepetug-iringan ku te kegkemekeǥeǥehem nu?  
\v 3 Ibpetug-iring ku sikew te Asiria, kes nasyun he iring te kayu he sidru ziyà te Lebanon. Sikew Faraon, iring kew zaan te kayu he sidru. Heini he kayu zuen din mekempet wey merapung he edrerepa he menge subpang, ne nelapew kayi is duma he merapung he menge kayu.  
\v 4 Nekeuǥup te kebmehinuvù kayi is wahig he ebpuun diyà te mezalem he serebseb. (Midtudà daan heini ziyà te zuma he menge kayu ziyà te ketelunan.)  
\v 5 Mibmetawis heini he kayu lavew te zuma he menge kayu ziyà te ketelunan. Midezekelà wey mibmerapung is menge subpang kayi tenged duen te zekelà he wahig.  
\v 6 Is langun he menge tagbis midsesalag diyà te menge subpang din, wey is langun he leew he menge langgam mid-anak diyà te puun din. Is menge etew ziyà te langun he gemhanan he menge nasyun midhelung kayi.  
\v 7 Mekempet heini he kayu ne memelayat is menge subpang din, su is menge zalid din midtiusek diyà te zizalem tenged te zekelà he wahig.  
\v 8 Minsan is menge kayu he sidru ziyà te pemuleey te Megbevayà ne kenà ebpekerepeng te kekempet kayi he kayu. Minsan is menge kayu he abitu wey platanu kenà ebpekerepeng te kekempet te subpang kayi he kayu.  
\v 9 Mibpekekempet ku heini he kayu is merapung is menge subpang din. Umbe nesina kandin is langun he menge kayu ziyà te pemuleey te Megbevayà.” 
\p  
\v 10 Umbe ǥuntaan, migkaǥi is Nengazen he MEGBEVAYÀ te, “Tenged te impemetikang kayi he kayu is keugelingen din wey kerapung te menge subpang din, wey tenged te kebpegalbu zin,  
\v 11 ibeǥey ku heini ziyà te nasyun he lavew he mekeǥeǥehem te zuma he menge nasyun he siguradu he edsilut kandin te sungkad te kelelalung din. Uya, idselikwey ku sikandin;  
\v 12 ebpilayen sikandin te kinemepesipelahan te langun he menge nasyun wey ebey-anan en. Ne ebpekepeyapat is egkengevadtì he menge subpang din diyà te menge vuvungan, menge suǥud, wey menge beyeey te wahig. Ed-awà diyà te kandin is menge etew ziyà te menge nasyun he midhelung diyà te kandin.  
\v 13 Edlatun is langun he menge tagbis diyà te lawa kayi he nepiley, ne ebpemen-untud is leew he menge langgam diyà te menge subpang kayi.  
\v 14 Umbe puun guntaan, wazè en kayu he edlavew is ketawis din wey kerapung din te zuma he menge kayu, minsan wehiǥen pa is netuvuan din. Su egkepatey is langun he kayu iring te etew he ebpatey ne ebpehendiyà heini te dizalem te tanà.” 
\p  
\v 15 Mibpedayun megkaǥi is Nengazen he MEGBEVAYÀ te, “Dutun te andew te ked-uwita kayi te kayu ziyà te lugar te menge minatey, edtembunan ku is mezalem he menge serebseb, ne tuus heini te kegkeseeng. Ne kenè en edtudà is wahig diyà te menge wahig, ne kenè en dekelà is wahig. Tenged kayi ebmerusirem is Lebanon ne egkeǥangu is langun he menge kayu ziyà te menge vevesukà.  
\v 16 Egkerkeren tenged te kegkahandek is menge etew ziyà te menge nasyun emun egkezineg dan en is guǥumangkul te kegkezeeti zutun te kayu, emun ed-uwiten en diyà te lugar te menge minatey duma te nemematey he menge etew. Ne is langun he menge kayu ziyà te Eden wey is langun he meupiya wey mekempet he menge kayu ziyà te Lebanon he nekepurung mekesupsup te wahig, edlipey zan diyà te zizalem te tanà.  
\v 17 Is menge etew ziyà te menge nasyun he midhelung diyà te kandin wey nekidsevaha kandin ne ebpekezuma zaan kandin diyà te lugar te menge minatey duma te nematey te tebek. 
\p  
\v 18 “Sikew is hadì te Ehipto, wazà kayu ziyà te Eden he ebpekerepeng te kekempet nu wey kegkemekeǥeǥehem nu. Piru id-ulug ka zaan diyà te zizalem te tanà duma te menge kayu ziyà te Eden. Dutun egkezuma nu is menge etew he nemematey te tebek he wazà medtuu te Megbevayà. 
\p “Iyan heini egkehitavù te hadì te Ehipto wey te menge etew zin. Iyan a, is Nengazen he MEGBEVAYÀ, is migkaǥi kayi.” 
\c 32  
\s1 Is Hadì te Ehipto Impetug-iring te Buaya 
\p  
\v 1 Dutun te nehuna he andew te ike-12 he vulan, dutun te ike-12 he tuig te kegkevihaǥa kenami, migkaǥi is \sc Nengazen\sc* kayi te kedì te,  
\v 2 “Sikew is etew, penhulùhulù ka mehitenged te Faraon he hadì te Ehipto. Ne keǥiya nu heini ziyà te kandin: Mid-isip nu he iring ka te erimaung he ibpedleleyunè din dà te edhipanew is menge nasyun. Piru iyan benar is iring ke zà te vuaya he ed-en-enunung diyà te wahig nu. Edsimbeǥen nu te paa nu is wahig ne egkeleveg heini.  
\v 3 Guntaan, iyan heini egkeǥiyen te Nengazen he MEGBEVAYÀ diyà te kenikew: Edhingutelen ku sikew te puket ne ibpeǥaun ku sikew te mahabet he menge etew.  
\v 4 Idtimbag ku sikew ziyà te tanà ne ibpekaan ku sikew te menge tagbis wey te leew he menge langgam.  
\v 5 Ibpeyapat ku is menge sapù nu ziyà te menge vuvungan wey menge suǥud.  
\v 6 Ibpetudè ku is lengesa nu ziyà te tanà wey ziyà te menge vuntud wey veyeey te menge wahig.  
\v 7 Emun igkaawè ku en sikew, ed-elangan ku te ǥapun is langit, ne kenè en ebpekeveǥey te kerayag is menge vituen, wey is andew wey vulan.  
\v 8 Ibpemerusirem ku is langun he edsiǥa ziyà te langit. Umbe ebmerusirem is tivuuk he nasyun. Iyan a, is Nengazen he MEGBEVAYÀ, is migkaǥi kayi. 
\p  
\v 9 “Egkeǥiyaǥiya is menge etew ziyà te menge nasyun he wazè nu mekilala emun timpu en te kedèdeeti ku kenikew.  
\v 10 Ibpelihandek ku ziyà te mahabet he menge nasyun is egkehitavù kenikew, ne elin en egkerkeren te kegkahandek is menge hadì dan. Egkerkeren te kegkeherati is kada sevaha kandan emun idsiwer ku en is ispada ku ziyà te etuvangan dan dutun te timpu te kegkezeeti nu.  
\v 11 Siak, is Nengazen he MEGBEVAYÀ, egkaǥi a he kenè ebpekeuram kenikew is ispada te hadì te Babilonia.  
\v 12 Ibpeǥerè ku is ginsekupan nu pinaaǥi te ispada te mekeǥeǥehem he menge etew he kinemepesipelahan kenà te langun he menge etew ziyà te menge nasyun. Edèdeetan dan is langun he menge etew ziyà te Ehipto ragkes is menge vutang he impahambug dan.  
\v 13 Egeraan ku is langun he menge uyaǥen diyà te Ehipto he ebpemenabtab diyà te uvey te zekelà he wahig. Umbe wazè en etew wey uyaǥen he edleveg duen te wahig.  
\v 14 Ne ibpemetingew ku is wahig diyà te Ehipto, ne edtudà heini he henduen be te lana. Iyan a, is Nengazen he MEGBEVAYÀ, is migkaǥi kayi.  
\v 15 Dutun te timpu te kedhimuwa ku te Ehipto he mekevulungbulung, wey kedèdeeti ku te langun he netaǥù kayi ragkes is menge meǥinged, egketuenan dan he iyan a \sc Nengazen\sc*. 
\p  
\v 16 “Iyan haazà penhulùhulù te menge meǥinged diyà te menge nasyun para te Ehipto wey te langun he menge meǥinged kayi. Iyan a, is Nengazen he MEGBEVAYÀ, is migkaǥi kayi.” 
\p  
\v 17 Ne te ike-15 he andew te iyan ded he vulan wey tuig, migkaǥi is \sc Nengazen\sc* kayi te kedì te,  
\v 18 “Sikew is etew, ikeseeng nu is menge meǥinged diyà te Ehipto wey is menge meǥinged diyà te zuma he mekeǥeǥehem he menge nasyun. Su idtimbag ku sikandan diyà te zizalem te tanà duma zuen te nemematey en.  
\v 19 Keǥiyi nu sikandan te, ‘Edlavew kew ve te zuma? Idtimbag kew zaan diyà te zizalem duma te menge wazà medtuu te Megbevayà  
\v 20 he nemematey te tebek.’ Egkezeetan is menge Ehiptohanen su naandam en is ispada te menge kuntada he idhimatey kandan. Eguyuzen is Ehipto wey is menge etew kayi pehendiyà te kezeetan.  
\v 21 Diyà te lugar te menge minatey, igalewǥalew te mekeǥeǥehem he menge pengulu is tig-Ehipto wey is menge etew ziyà te menge nasyun he nekidsevaha kandan. Egkaǥi zan te, ‘Mibpenaug dan daan dini! Ne zuma zan en guntaan is menge wazà medtuu te Megbevayà he nemematey te tebek.’ 
\p  
\v 22-23 “Dutun daan is hadì te Asiria he neliǥuy te leveng te menge sundaru zin he nemematey te tebek. Diyà is menge leveng dan te kinezizeleman diyà te zizalem. Heini he menge etew, igkikinehendekà dengan sikandan te menge etew he nemematey en te tebek. 
\p  
\v 24 “Dutun daan is hadì te Elam. Neliǥuy is leveng din te menge leveng te menge etew zin. Pudu sikandan minatey te tebek. Nenaug sikandan diyà te lugar te menge minatey duma zuen te zuma he wazà medtuu te Megbevayà. Hein uuyag dan pa igkikinehendekà sikandan te menge etew. Piru ǥuntaan nepeel-elezan sikandan duma zuen te nemematey.  
\v 25 Duen dutun lugar he para zuen te hadì te Elam duma te menge minatey te tebek. Neliǥuy is leveng din te menge leveng te menge etew zin. Mibpematey te tebek sikandan is langun he wazà medtuu te Megbevayà. Uya, igkikinehendekà sikandan te menge etew hein uuyag dan pa, piru ǥuntaan nepeel-elezan sikandan wey neketetayhad duma te nemematey te tebek. 
\p  
\v 26 “Dutun daan is hadì te Meshec wey hadì te Tubal. Neliǥuy is menge leveng dan te menge leveng te menge etew zan. Pudu sikandan wazà medtuu te Megbevayà, ne mibpematey sikandan te tebek. Igkikinehendekà sikandan hein uuyag dan pa.  
\v 27 Piru nemematey sikandan he wazà meveǥayi te dungganen he kedleveng iring te ventuǥan he menge etew he wazà medtuu te Megbevayà, te kedlevenga kandan diyà te ulunan dan is menge ispada zan ne ziyà te kumeng dan is kelasag dan. Heini he menge etew nemematey te tebek, su igkikinehendekè sikandan hein uuyag dan pa. 
\p  
\v 28 “Ne sikew is hadì te Ehipto, egkezeetan ka zaan wey ebpeketetayhad duma te menge wazà medtuu te Megbevayà he nemematey te tebek. 
\p  
\v 29 “Dutun daan te lugar te menge minatey is hadì te Edom wey is langun he menge upisyal zin. Gemhanan dengan sikandan, piru ǥuntaan neketetayhad dan duma te menge wazà medtuu te Megbevayà he nemematey te tebek. 
\p  
\v 30 “Dutun daan is langun he menge upisyal te menge lugar he zapit te dizaya wey is menge tig-Sidon. Su hein uuyag pa sikandan mibpelinandek dan daan is menge etew ziyà te kandan. Gemhanan daan sikandan dengan, piru guntaan nibpeel-elzan sikandan wey nemekererey-as diyà te lugar te menge minatey zuma te wazà medtuu te Megbevayà he nemematey te tebek.  
\v 31 Emun egkaahà te hadì te Ehipto ziyà te iveyaan heini is nemematey, egkelipey sikandin wey is menge sundaru zin su kenè bes iyan dà sikandan minatey te tebek.  
\v 32 Minsan ketau ku he ikahandek sikandan te menge etew hein uuyag dan pa, ebpatey zan wey ebpemeketetayhad duma te wazà medtuu kedì he nemematey te tebek. Iyan a, is Nengazen he MEGBEVAYÀ, is migkaǥi kayi.” 
\c 33  
\s1 Midhimu te Megbevayà si Ezekiel he Perevantey te Israel 
\r (Ezekiel 3:16-21) 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, keǥiyi nu is duma nu he menge meǥinged he emun ibpesurung ku te menge kuntada is sevaha he lugar, is menge meǥinged keniyan he lugar kinahanglan he mebpilì te sevaha kandan he egkehimu he perevantey te inged dan.  
\v 3 Emun egkaahà dutun te vantey he ebpelingguma is menge kuntada, ipezaǥing din is trumpita he para te kebpetizaan te menge etew.  
\v 4 Is minsan hentei he ebpekezineg duen te trumpita piru kenè din edseǥipaan, ne ebpatey sikandin dutun te kedsurunga kandan, ne ziyà mismu igkevasul te kandin is kemetayen din.  
\v 5 Su ǥeina te hein nezineg din is trumpita ne wazà sikandin medseǥipà, umbe iyan dà sikandin egkevasul te kemetayen din. Su emun pezem midseǥipà sikandin ne egkelibri zin is keugelingen din.  
\v 6 Iyan, emun naahà duen te vantey is ebpelingguma he menge kuntada piru wazè din ipezaǥing is trumpita te kebpetizaan te menge etew, ne emun duen ebpatey kandan dutun te kedsurunga kandan, edsukuten ku zutun te vantey is kemetayen dan minsan iyan ibpatey zan is tenged te salè dan.” 
\p  
\v 7 Mibpedayun megkaǥi is \sc Nengazen\sc* te, “Sikew is etew, mibpilì ku sikew he ed-elima te menge etew te Israel, umbe pemineǥa nu is egkeǥiyen ku, ne segugunè nu petizeeni is menge etew.  
\v 8-9 Emun egkeǥiyan ku is lalung he etew he siguradu he ebpatey sikandin tenged te salè din ne wazè nu sikandin keǥiyi he engkezi zin is mezaat he menge vaal zin, iyan ka edsukutan ku te kemetayen din. Iyan, emun migkeǥiyan nu haazà is lalung he etew he engkezi zin is mezaat he menge vaal zin, ne wazè din seǥipaa is migkaǥi nu, ebpatey sikandin tenged te salè din, piru wazè nu televaken dutun te kemetayen din. 
\p  
\v 10 “Sikew is etew, edriklamu is menge etew te Israel he kenè dan egkaantus is silut tenged te menge salè dan. Ebpengguyaan en sikandan ne henduen be te ebpatey zan en tenged kayi.  
\v 11 Ne ǥuntaan keǥiyi nu sikandan he siak, is Nengazen he MEGBEVAYÀ he uuyag, migkaǥi a he kenà a egkelipey emun duen ebpatey he lalung he etew. Iyan suat ku he engkezi zan is mezaat he menge vaal zan su wey zan meuyag-uyag. Umbe sikiyu is menge etew te Israel, engkezi niw en is mezaat he menge vaal niw. Maan is egkesuat kew he ebpatey? 
\p  
\v 12 “Ne ǥuntaan, sikew is etew, keǥiyi nu is duma nu he menge meǥinged he emun ebaal te salà is metazeng he etew, is meupiya he menge vaal zin dutun te nehuna he timpu ne kenà ebpekelibri kandin. Ne emun iyan ed-engked te mezaat he menge vaal zin is lalung he etew ne kenè en sikandin edsilutan tenged duen te nehuna he kelelalung din.  
\v 13 Emun egkaǥi a ziyà te metazeng he etew te siguradu he egkeuyag-uyag sikandin, piru kegketapus dutun ebaal sikandin te salà su edsarig he ebpekelibri kandin is nehuna he meupiya he menge vaal zin, heeyan he etew ebpatey tenged te salè din. Kenè ku en edtentenuzan is meupiya he menge vaal zin.  
\v 14 Ne emun egkeǥiyan ku is lalung he etew he siguradu he ebpatey sikandin, piru mibpezumdumahan din is sambag kandin ne mid-engkezan din is mezaat he menge vaal zin ne mibaal te hustu wey metazeng–  
\v 15 penenglitan, in-ulì din is insandà diyà te kandin etawa tinakew zin, wey midtuman din is menge sulunuzen he ebpekeveǥey te untung te wazà mebaal te mezaat, ne heeyan he etew siguradu he egkeuyag, ne kenà sikandin ebpatey.  
\v 16 Is minsan hengkey he salà he nehimu zin ne kenè en edtentenuzan is kedèdeeti kandin tenged dutun. Ne tenged te mibaal sikandin te hustu wey metazeng, siguradu he egkeuyag-uyag sikandin. 
\p  
\v 17 “Piru is menge zuma nu he meǥinged, Ezekiel, edriklamu he kenè kun hustu is paaǥi ku. Piru iyan kenà hustu is kandan he paaǥi.  
\v 18 Emun ed-engked he edtinazeng is metazeng he etew su ebaal en sikandin te mezaat. Ebpatey sikandin.  
\v 19 Ne emun is lalung ed-engked he ebaal te mezaat he menge vaal, ne ebaal en sikandin te hustu wey metazeng, egkeuyag-uyag sikandin.  
\v 20 Menge etew te Israel, migkaǥi kew he kenà hustu is paaǥi ku. Edhukuman ku is kada sevaha keniyu sumalà te menge vaal niw.” 
\s1 Is Kebpahayag Mehitenged te Kegkezeeti te Jerusalem 
\p  
\v 21 Hein ikelima he andew te ikesepulù he vulan, dutun te ike-12 he tuig te kegkevihaǥa kenami, duen sevaha he etew he nekepelaǥuy puun te Jerusalem he midhendiyà te kedì, ne ke sikandin te, “Nezeetan en is inged he Jerusalem!”  
\v 22 Dutun te nehuna he kezukileman, te wazè pa mekeuma haazà is etew, midumala a te \sc Nengazen\sc* ne nekeuman ad mekekaǥi. Umbe hein meselem he nekeuma haazà is etew, ne ebpekekaǥi ad. 
\p  
\v 23 Migkaǥi is \sc Nengazen\sc* kayi te kedì te,  
\v 24 “Sikew is etew, is menge etew he ed-ubpà diyà te nevengkag he menge inged diyà te Israel egkaǥi te, ‘Sebsevaha zà si Abraham, ne imbeǥey ziyà te kandin is tivuuk ha tanà. Ne mahabet kiw mulà, umbe siguradu he egkaangken tew ǥihapun heeyan he tanà.’  
\v 25 Ne guntaan keǥiyi nu sikandan, he iyan a, is Nengazen he MEGBEVAYÀ migkaǥi te, ‘Egkeisip niw ve he egkaangken niw ǥihapun haazà is tanà minsan egkaan kew te usa he zuen din pa lengesa, wey ed-azap kew te zuma he menge ed-ezapen niw, wey ebpenhimatey kew te etew?  
\v 26 Edsarig kew te ispada niw, ebaal kew te utew mezaat he menge vaal, wey mengungumpadi kew. Ne egkeisip niw ǥihapun is ked-angken duen te tanà?  
\v 27 Iyan a, is uuyag he Nengazen he MEGBEVAYÀ, nenangdù he siguradu he ebpemematey te tebek sikan is nengesamà he uuyag duen te nerundus he inged. Is menge nengesamà he uuyag diyà te menge vevesukà edewiyen te zumezaas he menge langgam, ne is duma kandan he ziyà te menge elesà wey menge surung ebpematey te zaru.  
\v 28 Edhimuwen ku he mekevulungbulung he tanà is Israel, ne id-awè ku is kebpehivantug te menge etew kayi mehitenged te egkehimu zan. Minsan is menge vuvungan kayi egkehimu he mekevulungbulung, ne wazè en ebayà dutun.  
\v 29 Emun ebengkaǥen ku en wey edhimuwen he mekevulungbulung heeyan is tanà tenged te langun he utew mezaat he menge vaal te menge etew kayi, egketuenan dan he iyan a \sc Nengazen\sc*.’ ” 
\p  
\v 30 Migkaǥi is \sc Nengazen\sc* kayi te kedì te, “Sikew is etew, is duma nu he menge meǥinged edhisgut mehitenged kenikew emun egketiǥum sikandan diyà te uvey te verengbeng te inged etawa ǥemawan te menge valey zan. Ebpelelelaǥà sikandan is egkaǥi te, ‘Hendini kew su ebpemineg kiw ki Ezekiel ke hengkey is ibpakaǥi kandin te \sc Nengazen\sc*!’  
\v 31 Umbe, ed-uvey is menge etew ku ziyà te kenikew iring duen te layun dan ebeeli, ebpinuu zan diyà te etuvangan nu he henduen be te tutuu he ebpemineg dan kenikew, piru iyan benar is wazè dan tumana is mibpengaǥi nu. Netuleng dan dà te kegkaǥi he mahal e zan, piru iyan diyà te ǥehinawa zan is dekelà he kadar te selapì.  
\v 32 Diyè te kandan, iring ke zà te perekanta he zuen din meupiya he laǥeng he egkanta te kentahan para te kebmahal wey sevaha ka he metau he edtukar te instrumintu. Mibpemineg dan dà is menge lalag nu piru wazè dan heini tumana.  
\v 33 Ne emun egkehitavù en heini is silut kandan he siguradu he egkehitavù, egketuenan dan he zuen bes iyan ebpeneuven he zuma zan.” 
\c 34  
\s1 Is menge Perevantey te Israel 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, kaǥi ka te ebpekesuǥat te menge perevantey te Israel. Keǥiyi nu sikandan he iyan a, is Nengazen he MEGBEVAYÀ migkaǥi te: Mekehizuhizu kew is menge perevantey te Israel. Keugelingen niw zà is ed-eturen niw! Kenè be is menge perevantey kinahanglan he ed-eturen din is menge kerehidu?  
\v 3 Ed-inumen niw is gatas dan, ebeelan niw he visti is bulvul zan, ne edlapaan niw is utew melambù kandan, piru wazè niw sikandan etura.  
\v 4 Wazè niw elimahi para mebmezesen is menge meluya kandan. Wazè niw tembari is menge nezeruwan, wazè niw vukusi is palì dan. Wazè niw pen-ahaa is menge netazintazin wey netazin. Kekenà, mibpurung niw sikandan ruuǥa.  
\v 5 Ne ǥeina te wazà ebantey kandan, nekepeyapat sikandan ne mibpendawi te zumezaas he menge langgam.  
\v 6 Netazintazin is menge kerehidu ku ziyà te menge vuntud wey menge vuvungan. Nekepeyapat sikandan kayi te tivuuk he kelibutan, ne wazè en iyan nen-ahà kandan. 
\p  
\v 7 “Umbe, sikiyu is menge perevantey, pemineǥa niw is egkeǥiyen ku.  
\v 8 Iyan a, Nengazen he MEGBEVAYÀ he uuyag, ebpenangdù a he edsilutan ku sikiyu su wazè niw elimahi is menge kerehidu ku, umbe midsurung wey mibpendawi sikandan te zumezaas he menge langgam. Wazè niw sikandan pen-ahaa, kekenà, iyan niw zà ed-eturen is keugelingen niw.  
\v 9 Umbe, sikiyu is menge perevantey, pemineǥa niw is egkeǥiyen ku.  
\v 10 Iyan a, is Nengazen he MEGBEVAYÀ, migkaǥi he kuntada ku sikiyu, wey edsukutan ku sikiyu tenged te nehitavù te menge kerehidu ku. Kenè ku en sikiyu ibpaatur te menge kerehidu, su iyan niw zà ed-eturen is keniyu he keugelingen. Edlibriyen ku is menge kerehidu ku ziyà te keniyu, ne kenè niw en sikandan egkekaan. 
\p  
\v 11 “Iyan a, is Nengazen he MEGBEVAYÀ, migkaǥi he iyan a mismu ebpen-ahà te menge kerehidu ku wey ed-atur kandan.  
\v 12 Iring te ebpen-ahaan te pereelima is menge kerehidu zin he ebpekedsusuwey, ebpen-ahaan ku zaan is menge kerehidu ku. Edlibriyen ku sikandan puun te langun he menge lugar he zutun sikandan mekedsusuwey hein timpu te kesamuk.  
\v 13 Egkuwaan ku sikandan puun te nekedseselekawà he menge nasyun, ne ed-uwiten ku ziyà te keugelingen dan he tanà. Ibpepenabtab ku sikandan diyà te menge vuvungan te Israel, diyà te kilid te menge wahig, wey ziyà te langun he lugar he ed-ubpaan te menge etew.  
\v 14 Uya, ibpepenabtab ku sikandan te meilem he penebtavà diyà te menge vuvungan te Israel. Dutun edleku sikandan is ebpenabtab.  
\v 15 Iyan a mismu, is Nengazen he MEGBEVAYÀ ed-atur te menge kerehidu ku, ne ibpehimeley ku sikandan.  
\v 16 Ebpen-ahaan ku sikan is nengetazin wey nengetazintazin. Ebukusan ku is menge pelien wey edlig-enan ku is memeluya. Piru edèdeetan ku is memelambù wey memeupiya is kedlelawa. Ebeelan ku ziyà te kandan ke hengkey is hustu he kukuman. 
\p  
\v 17 “Sikiyu is menge etew te Israel he menge kerehidu ku, iyan a, is Nengazen he MEGBEVAYÀ, migkaǥi ziyà te keniyu he edhukuman ku sikiyu. Ibpedtepizè ku is meupiya wey mezaat, is menge kerehidu wey menge kambing.  
\v 18 Is duma keniyu kenè pa kuntintu te kebpenabtab diyà te meupiya he penebtavà; edtekutakan niw pa is duma he menge penebtavà. Is duma kenè pa kuntintu te ked-inum diyà te metingew he wahig; edleveǥen dan pa is duma he wahig.  
\v 19 Ebpengamuy-amuy ve ebpenabtab is menge kerehidu ku ziyà te midtekutakatan he penebtavà? Ed-inum be sikandan te midleveg niw he wahig? 
\p  
\v 20 “Umbe siak, is Nengazen he MEGBEVAYÀ, migkaǥi a ziyà te keniyu he iyan a mismu ebpedsivey te melambù wey meǥasà he menge kerehidu.  
\v 21 Su sikiyu is menge melambù, eduǥehungen niw zà wey edsungayen is meluya he menge kerehidu taman te ebpekepekeziyù sikandan.  
\v 22 Edlibriyen ku is menge kerehidu ku ne kenè en sikandan egkeumanan egkeebusari. Ibpedsivey ku is menge meupiya wey menge mezaat.  
\v 23 Ebeǥayan ku sikandan te sevaha he tig-elima he kevuwazan te suluǥuen ku he si David. Iyan sikandin ed-atur wey egkehimu he ed-elima.  
\v 24 Ne siak, is \sc Nengazen\sc*, egkehimu a he Megbevayè dan, ne sikan is kevuwazan te suluǥuen ku he si David egkehimu he pengulu zan. Iyan a, is \sc Nengazen\sc*, is migkaǥi kayi. 
\p  
\v 25 “Ebaal a te kebpekid-uyun kandan he ebpekeveǥey te meupiya te ked-ubpè dan. Egsegseǥen ku is dumezaas he menge langgam puun te tanè dan su wey mekeubpà sikandan diyà te sibsivayan ne ebpekelipezeng dan diyà te ketelunan he wazà ebpekekaid kandan.  
\v 26 Edtuvazan ku sikandan wey is menge lugar peliǥuy te segradu he vuntud ku. Edtuvazan ku sikandan pinaaǥi te kebpeuzani ku kandan dutun te hustu he timpu.  
\v 27 Ebpemeǥas is menge kayu zan wey is duma pa he menge pinemula zan. Ne ebpengungubpaan sikandan he wazà ebpekekaid kandan. Egketuenan dan he iyan a \sc Nengazen\sc* emun edlibriyen ku en sikandan puun te ǥehem te mid-uripen kandan.  
\v 28 Kenè en sikandan edsurungen wey ed-eǥawan te menge azen te menge etew ziyà te zuma he menge nasyun he iring te zumezaas he menge langgam. Ebpengungubpaan sikandan he wazà ebpekekaid kandan wey wazè dan igkahandek.  
\v 29 Ebeǥayan ku sikandan te tanà he egkevantug te kegkeselebpeten din su wey zan kenè en bitila wey sudia te menge etew ziyà te zuma he menge nasyun.  
\v 30 Ne egketuenan dan he iyan a, is \sc Nengazen\sc* he Megbevayè dan mibpekiduma kandan, ne sikandan is menge etew te Israel, menge etew ku. Iyan a, is Nengazen he MEGBEVAYÀ, is migkaǥi kayi. 
\p  
\v 31 “Iyan kew menge kerehidu ku ziyà te pepenebtavè ku. Iyan kew menge etew ku, ne iyan a Megbevayè niw. Iyan a, is Nengazen he MEGBEVAYÀ, is migkaǥi kayi.” 
\c 35  
\s1 Is Lalag he Ebpekesuǥat te Edom 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, sinaru ka ziyà te Buntud he Seir, ne kaǥi ka te ebpekesuǥat te menge meǥinged keniyan.  
\v 3 Keǥiyi nu sikandan, he iyan a, is Nengazen he MEGBEVAYÀ migkaǥi te kuntada ku sikiyu is menge meǥinged diyà te Buntud he Seir. Edsilutan ku sikiyu ne egkehimu he mekevulungbulung is lugar niw.  
\v 4 Ebengkaǥen ku is menge inged niw ne egkehimu heini he mekevulungbulung. Ne zutun egketuenan niw he iyan a \sc Nengazen\sc*.  
\v 5 Neuǥet en is kedumuti niw te menge tig-Israel, ne midsurung niw sikandan dutun te timpu te kelised dan, su timpu haazà te kedsiluti kandan tenged te menge salè dan.  
\v 6 Umbe siak, is Nengazen he MEGBEVAYÀ he uuyag, ebpenangdù a he ibpepenhimetayan ku sikiyu minsan hendei kew ebpevayà. Uya, edel-asen kew te ebpenhimatey, su wazè niw isipa he mezaat is kedhimatey.  
\v 7 Edhimuwen ku he mekevulungbulung is Buntud he Seir, ne ebpenhimetayan ku is langun he sumeseǥazà dutun.  
\v 8-9 Is ebpematey keniyu te tebek ebpekepeyapat diyà te menge vuntud, diyà te menge vuvungan, diyà te menge suǥud, wey ziyà te kilid te menge wahig. Edhimuwen ku is lugar niw he mekevulungbulung taman te taman. Wazè en ed-ubpà diyà te menge inged niw. Ne zutun egketuenan niw he iyan a \sc Nengazen\sc*. 
\p  
\v 10 “Migkaǥi kew he egkaangken niw is Juda wey Israel, ne ed-engkenen niw heini minsan siak, is \sc Nengazen\sc*, ebpekiduma kandan.  
\v 11 Umbe siak, is Nengazen he MEGBEVAYÀ he uuyag, nenangdù a he ebelesan ku sikiyu tenged te pauk niw, kesina niw, wey rerangit niw he impeehè niw te menge etew ku. Ne egketuenan dan he iyan a \sc Nengazen\sc* dutun te kedsiluti ku en keniyu.  
\v 12 Ne pinaaǥi zaan keniyan ekgetuenan niw he iyan a \sc Nengazen\sc*, ne nezineg ku is langun he kedsudia niw te menge vuvungan te Israel. Su ke sikiyu te, ‘Nezeetan heini ne neveǥayan kiw te meupiya he timpu te ked-aǥew kayi.’  
\v 13 Mibpahambug kew zaan wey minsan hengkey zà is ebpengeǥiyen niw he ebpekesuǥat kediey, ne nezineg ku heini. 
\p  
\v 14 “Umbe siak, is Nengazen he MEGBEVAYÀ, migkaǥi a he emun edhimuwen ku en he mekevulungbulung is lugar niw egkelipey is menge etew kayi te tivuuk he kelibutan,  
\v 15 su geina te ingkelipey niw hein nehimu he mekevulungbulung is tanà he mibpepengevilin te menge Israilihanen. Umbe iyan daan heeyan egkehitavù keniyu; egkehimu he mekevulungbulung is Buntud he Seir wey is tivuuk he Edom. Ne zutun egketuenan niw he iyan a \sc Nengazen\sc*.” 
\c 36  
\s1 Is Lalag para te menge Buvungan te Israel 
\p  
\v 1 Migkaǥi is \sc Nengazen\sc* te, “Sikew is etew, keǥiyi nu is menge vuvungan te Israel te, ‘He menge vuvungan te Israel, pemineǥa nu is menge lalag te \sc Nengazen\sc*.  
\v 2 Iyan heini migkaǥi te Nengazen he MEGBEVAYÀ: migkaǥi is menge kuntada niw he egkaangken dan en is menge vuvungan niw.’ 
\p  
\v 3 “Umbe, sikew is etew, keǥiyi nu is menge vuntud te Israel he siak, is Nengazen he MEGBEVAYÀ, migkaǥi a te, ‘Midsurung kew te menge nasyun he diyà te minsan hendei renged, ne ǥuntaan gaked kew zan en. Midsudì kew zan wey mibpeel-elezan.  
\v 4-5 Umbe, sikiyu is menge vuvungan, menge zal-ug, menge suǥud, menge lugar he nengevengkag, pemineǥa niw is egkeǥiyen ku. Siak, is Nengazen he MEGBEVAYÀ, migkaǥi a he utew ku egkepeuki heeyan he menge nasyun lavew en is Edom, su mid-aǥew zan is tanè ku zuma te utew kegkelipey wey kedsudì, su egkesuat dan he maangken dan is menge penebtavà kayi.’ 
\p  
\v 6-7 “Umbe, sikew is etew, keǥiyi nu is tanà he Israel. Keǥiyi nu is menge vuvungan, menge zal-ug, menge suǥud, he iyan a, is Nengazen he MEGBEVAYÀ migkaǥi te, ‘Naantus niw is kebpeel-elezi keniyu te nekepeliǥuy he menge nasyun. Umbe tenged te utew ku kegkepauk, ne siak, is Nengazen he MEGBEVAYÀ ebpenangdù he egkepeel-elezan daan heeyan he menge nasyun.  
\v 8 Piru sikiyu is menge vuvungan te Israel, edtuvù diyà te keniyu is menge kayu, ne ebpemeǥas heini para te menge etew ku he Israilihanen, su hapit dan en ed-ulì.  
\v 9 Pemineg kew! Ed-etimanen ku sikiyu. Ed-ereduwen ku is tanè niw ne ebpemulaan ku.  
\v 10 Ibpemezakel ku is menge meǥinged kayi he iyan is tivuuk he menge etew te Israel. Ed-umanan ku ebenguna is nezeetan he menge inged niw, ne ed-ubpaan heini te menge etew ku.  
\v 11 Ibpemahabet ku is menge etew wey menge uyaǥen diyà te keniyu. Ebpeumanan ku sikiyu ebpeubpai te menge etew iring te zengan, ne ibpeuswag ku sikiyu te lavew pa te zengan. Ne egketuenan niw he iyan a \sc Nengazen\sc*.  
\v 12 Idlikù ku ziyà te keniyu is menge etew ku he Israilihanen. Ed-engkenen kew zan ne kenè niw en id-uman ibpen-awà is menge anak dan.’ ” 
\p  
\v 13 Mibpedayun megkaǥi is Nengazen he MEGBEVAYÀ te, “Migkaǥi is menge etew ziyà te keniyu te ebpenhimetayan niw is menge meǥinged diyà te keniyu, ne ibpen-awè niw is menge vatà diyà te nasyun niw.  
\v 14 Piru puun guntaan kenè niw en ebpenhimetayan is menge meǥinged diyà te keniyu. Ne kenè niw en daan ibpen-awà is menge vatà diyà te nasyun niw. Iyan a, is Nengazen he MEGBEVAYÀ, is migkaǥi kayi.  
\v 15 Kenè ku en idtuǥut he sudia kew wey peel-elezi te zuma he menge nasyun. Wey kenè ku en idtuǥut he mezeeti is nasyun niw. Iyan a, is Nengazen he MEGBEVAYÀ, is migkaǥi kayi.” 
\p  
\v 16 Migkeǥiyan e pa te \sc Nengazen\sc* te,  
\v 17 “Sikew is etew, hein ed-ubpè pa is menge Israilihanen diyà te tanè dan, midremerikan dan heini pinaaǥi te mezaat he menge vaal zan. Is baal zan iring keremerik te vahi he midlengesahan.  
\v 18 Umbe, mibpeǥezaman ku kandan is pauk ku tenged te kebpenhimatey zan keniyan te tanà he Israel, wey tenged te ked-azap dan te zuma he menge ed-ezapen he nekeremerik kayi he tanà.  
\v 19 Impeyapat ku sikandan diyà te zuma he menge nasyun. Mibeelan ku ziyà te kandan is ereg he ibales te menge vetasan dan wey menge ulaula zan.  
\v 20 Minsan hendei he nasyun is egkepeveyaan dan, egkependezeisey zan is waǥas he ngazan ku. Su egkaǥi is menge etew te, ‘Menge etew sikandan te \sc Nengazen\sc*, piru midsegseg din sikandan puun te tanè dan.’  
\v 21 Ingkeseeng ku is kebpendezeisaya te menge etew te Israel te waǥas he ngazan ku ziyà te minsan hendei he nasyun he egkeveyaan dan.  
\v 22 Umbe, keǥiyi nu is menge etew te Israel he siak, is Nengazen he MEGBEVAYÀ migkaǥi te: He menge etew te Israel, ibpelikù ku sikiyu ziyà te tanè niw kenà tenged te engayan kew he edawat kayi. Ebeelan ku heini tenged te waǥas he ngazan ku he ebpendezeisayen niw ziyà te minsan hendei he nasyun he egkeveyaan niw.  
\v 23 Iyan a, is Nengazen he MEGBEVAYÀ, migkaǥi te ibpeehè ku ke sengemenu is kegkewaǥas te zengeg te ngazan ku ziyà te menge nasyun he zutun niw pendezeisaya heini. Ne egketuenan te menge etew keniyan he menge nasyun he iyan a \sc Nengazen\sc* emun igkepeehè ku en kandan is kegkewaǥas ku pinaaǥi te ebeelan ku ziyà te keniyu.  
\v 24 Su egkuwaan ku sikiyu puun diyà te nekedseselekawà he menge nasyun ne ed-uwiten ku sikiyu ziyà te keugelingen niw he tanà.  
\v 25 Ed-itisan ku sikiyu te lumpiyu he wahig para maawà diyà te keniyu is langun he meremerik, ne kenè kew en ed-uman ed-azap te zuma he menge ed-ezapen.  
\v 26 Ebeǥayan ku sikiyu te veǥu he ǥehinawa wey beǥu he mulin-ulin. Is mesinupaken he ǥehinawa niw edhimuwen ku he metinumanen he ǥehinawa.  
\v 27 Ebeǥayan ku zaan sikiyu te kediey he Mulin-ulin su wey niw mepurung mesunud is menge suǥù ku wey menge sulunuzen.  
\v 28 Ed-ubpè kew ziyà te tanà he ibeǥey ku te menge kepuun niw. Egkehimu kew he menge etew ku, ne egkehimu a he Megbevayè niw.  
\v 29 Edlumpiyuwan ku sikiyu te langun he keremerik niw. Ebeǥayan ku sikiyu te zekelà he trigu ne kenè kew en ebitilen.  
\v 30 Ibpeveǥas ku te mahabet is menge kayu niw wey ibpezekelè ku is menge abut niw, su wey kew kenè en mepeel-elezi ziyà te zuma he menge nasyun tenged te kebitila niw.  
\v 31 Ne egketenuzan niw is mezaat he menge ulaula wey menge vaal niw, ne igkelimezangi niw is keugelingen niw tenged te menge salè niw wey utew mezaat he menge vaal niw.  
\v 32 Piru egkesuatan ku he metueni niw te menge etew te Israel he ebeelan ku heini kenà tenged keniyu. Umbe ereg he igkeeled niw is menge ulaula niw. Iyan a, is Nengazen he MEGBEVAYÀ, is migkaǥi kayi.” 
\p  
\v 33 Mibpedayun megkaǥi is Nengazen he MEGBEVAYÀ te, “Emun egkelumpiyuwan ku en sikiyu te langun he menge salè niw, ibpeuman ku sikiyu ibpeubpà diyà te menge inged niw, ne ebengunen ku is nezeetan he menge lugar.  
\v 34 Ne sikan is tanà he mekevulungbulung dengan, ne ed-ereduwen en, ne is langun he ebpekaahà kayi,  
\v 35 egkaǥi te, ‘Is tanà he wazè din pulus dengan, neiring en te pemuleey he Eden. Is menge inged he nengevengkag wey nengehimu he mekevulungbulung dengan ne zuen din en menge verengbeng wey ed-ubpaan en!’  
\v 36 Ne is menge etew ziyà te egkesamà he menge nasyun diyà te peliǥuy niw egketuenan dan he iyan a, is \sc Nengazen\sc* mibangun te nengevengkag wey nemula ziyà te menge tanà he nengehimu he mekevulungbulung. Iyan a, is \sc Nengazen\sc*, is migkaǥi kayi, ne ebeelan ku heini.” 
\p  
\v 37-38 Mibpedayun megkaǥi is Nengazen he MEGBEVAYÀ te, “Ed-umanan ku ebpemineǥa is kebpehizuhizu te menge etew te Israel, ne iyan ebeelan ku ziyà te kandan is: Edhimuwen ku sikandan he iring kahabet te menge kerehidu he ibpemuhat diyà te Jerusalem emun timpu te pista. Umbe is nengevengkag he menge inged egkeuman egkepenù te mahabet he menge etew. Ne egketuenan dan he iyan a \sc Nengazen\sc*.” 
\c 37  
\s1 Is Suǥud he zuen duen Mahabet he menge Tulan 
\p  
\v 1 Ne midumala a te \sc Nengazen\sc* ne mid-uwit a te Mulin-ulin din diyà te teliwazà te suǥud he zuen duen mahabet he menge tulan te etew.  
\v 2 Inriǥuriǥu a te \sc Nengazen\sc* dutun, ne neehè ku is utew mahabet he menge tulan he nekepeyapat dutun te suǥud ne nepurung en heini meǥangu.  
\v 3 Mid-insà is \sc Nengazen\sc* kayi te kedì te, “Sikew is etew, egkeuyag pe be heini is menge tulan?” Midtavak a te, “He Nengazen he MEGBEVAYÀ, iyan ke zà netau keniyan.” 
\p  
\v 4 Mid-uman sikandin megkaǥi kayi te kedì te, “Keǥiyi nu heeyan is memaza he menge tulan he mebpemineg dan te egkeǥiyen ku.  
\v 5 Su siak, is Nengazen he MEGBEVAYÀ, egkeǥiyan ku sikandan te, ‘Ebeǥayan ku sikiyu te ǥehinawa ne egkeuyag kew.  
\v 6 Ebeǥayan ku sikiyu te menge uǥat wey menge sapù, ne edtengesen ku sikiyu te lundis. Ebeǥayan ku sikiyu te ǥehinawa ne egkeuyag kew. Ne egketuenan niw he iyan a \sc Nengazen\sc*.’ ”  
\v 7 Umbe, midtuman ku haazà is inmandù kedì. Ne hein migkaǥi ad, nekezineg a te leletekà, ne nekedsusuur sikan is menge tulan.  
\v 8 Ne zutun te kedtengteng ku zuen en kayi menge uǥat wey menge sapù, ne netenges en heini te lundis, piru wazè pa sikandan megeǥehinawa. 
\p  
\v 9 Migkaǥi is \sc Nengazen\sc* kayi te kedì te, “Sikew is etew, keǥiyi nu is keramag he siak, is Nengazen he MEGBEVAYÀ, migkaǥi a te, ‘He keramag, pengeramag kew puun diyà te heepat he ebpuunan, ne hiyupi niw heeyan is menge minatey su wey meuyag sikandan.’ ”  
\v 10 Ne midtuman ku haazà is inmandù din kedì, ne nengeuyag haazà is menge minatey. Ne nemenhitindeg sikandan he iring kahabet te sengebetalyun he menge sundaru. 
\p  
\v 11 Migkaǥi en maan is \sc Nengazen\sc* kayi te kedì te, “Sikew is etew, heeyan is menge tulan iyan ibpaalung din is tivuuk he menge etew te Israel. Migkaǥi sikandan te, ‘Neǥangu en is menge tulan dey, ne kenè key en ebpekeperateng, henduen be te minatey key en.’  
\v 12 Umbe keǥiyi nu sikandan he siak, is Nengazen he MEGBEVAYÀ, migkaǥi a te, ‘He menge etew ku, ed-ebriyan ku is menge leveng niw ne ebenhawen ku sikiyu, ne idlikù ku ziyà te tanà he Israel.  
\v 13 Ne egketuenan niw te menge etew ku, he iyan a \sc Nengazen\sc* emun ed-ebriyan ku en is menge leveng niw wey ebenhawen ku sikiyu.  
\v 14 Ibeǥey ku keniyu is Mulin-ulin ku ne egkeuyag kew, ne ibpeubpè ku sikiyu ziyà te keugelingen niw he tanà. Ne egketuenan niw he iyan a is \sc Nengazen\sc* midtuman te migkaǥi ku. Iyan a, is \sc Nengazen\sc*, is migkaǥi kayi.’ ” 
\s1 Is Kedsevahaa te Juda wey Israel 
\p  
\v 15 Migkaǥi is \sc Nengazen\sc* kayi te kedì te,  
\v 16 “Sikew is etew, kuwa ka te tinevì ne surati nu heini te, ‘Is ginhedian te Juda.’ Ne uman ke pa kuwa te sevaha pa he tinevì ne surati nu heini te, ‘Ginhedian te Israel.’  
\v 17 Ne ipedsumpul nu haazà is dezuwa he tinevì wey mehimu he sevaha zà diyà te velad nu.  
\v 18 Emun ed-insaan ka te zuma nu he menge meǥinged ke hengkey is ibpesavut dutun.  
\v 19 Ne keǥiyi nu sikandan te, ‘Iyan heini migkaǥi te Nengazen he MEGBEVAYÀ: Ibpedsumpul ku is tinevì he ebpaalung te Israel wey is tinevì he ebpaalung te Juda, ne egkehimu heini he sevaha zà diyà te velad ku.’ 
\p  
\v 20 “Ne ǥewezi nu haazà is tinevì he midsuratan nu su wey maahà te menge etew,  
\v 21 ne keǥiyi nu sikandan te, ‘Iyan heini migkaǥi te Nengazen he MEGBEVAYÀ: Egkuwaan ku is menge Israilihanen puun te langun he menge nasyun he zutun sikandan mekepeyapat, ne ed-umanan ku sikandan ed-uwita ziyà te keugelingen dan he tanà.  
\v 22 Ne edhimuwen ku zà sikandan he sevaha he nasyun diyà te tanà he Israel. Sevaha zà he hadì is edhadì kandan, ne kenè dan en egkeuman egkevahin diyà te zezuwa he nasyun etawa dezuwa he ginhedian.  
\v 23 Kenè dan en ed-umanan edremeriki is keugelingen dan pinaaǥi te ked-azap te mezaat he menge ed-ezapen dan, wey kebaal te minsan hengkey he salà, su edlibriyen ku sikandan te langun he menge salè dan, ne edlumpiyuwan ku sikandan. Egkehimu sikandan he menge etew ku ne egkehimu a he Megbevayè dan.  
\v 24 Edhedian sikandan te kevuwazan te suluǥuen ku he si David, ne sevaha zà is ed-elima kandan. Ebpurungan dan edsunuza is menge suǥù ku wey menge sulunuzen.  
\v 25 Ed-ubpè dan diyà te tanà he imbeǥey ku te suluǥuen ku he si Jacob, he iyan kes tanà he mid-ubpaan te menge kepuun dan. Dutun dan wey is menge kevuwazan dan ebpekeubpà taman te taman, ne edhedian sikandan te kevuwazan te suluǥuen ku he si David te wazà pidtemanan.  
\v 26 Ne ebpekid-uyun a kandan he ebpekeubpà sikandan he meupiya is kebpekesavuk, ne heini he uyun ebpedayun te taman te taman. Ibpeubpè ku sikandan diyà te tanè dan, ne ibpemahabet ku sikandan, ne ebengunen ku ziyà te kandan is baley ku te wazà pidtemanan.  
\v 27 Ed-ubpà a he zuma zan. Egkehimu a he Megbevayè dan, ne egkehimu sikandan he menge etew ku.  
\v 28 Ne emun kenè en egkaawà haazà is baley ku te wazà pidtemanan, egketuenan te menge etew ziyà te menge nasyun he iyan a, is \sc Nengazen\sc*, mibpilì te menge Israilihanen su wey mehimu he kediey.’ ” 
\c 38  
\s1 Is Lalag he Ebpekesuǥat ki Gog 
\p  
\v 1 Migkaǥi is \sc Nengazen\sc* kayi te kedì te,  
\v 2 “Sikew is etew, kaǥi ka te ebpekesuǥat diyà te ki Gog he tig-Magog he pengulu te Meshec wey Tubal.  
\v 3 Keǥiyi nu sikandin he siak, is Nengazen he MEGBEVAYÀ, migkaǥi a te: He Gog, he pengulu te Meshec wey Tubal, egkuntedahan ku sikew.  
\v 4 Egkew-itan ku te vunuwit is bakè nu, ne eguyuzen ku sikew zuma te langun he menge sundaru nu. Ed-endamen ku para te tebek is menge kudè nu, wey egkeǥumeenan he pereuntud te kudà, wey is mahabet he menge sundaru he zuen dan dezekelà wey dezeisey he menge kelasag wey is langun he egkeǥumeenan te ispada.  
\v 5 Eduma ziyà te kandan is menge sundaru ziyà te Persia, Cush, wey Put, he zuen dan menge kelasag wey menge hilmit,  
\v 6 ragkes is diyà te Gomer wey Bet Togarma he ziyà te zizaya wey is langun he menge sundaru zan. Ebpemuun diyà te mahabet he menge nasyun is eduma kenikew. 
\p  
\v 7 “Layun nu endama is keugelingen nu wey is langun he menge sundaru nu ne penguluwi nu sikandan.  
\v 8 Dutun te ebpekeuma he menge andew ebmenduan ku sikiyu te kedsurung te Israel, he nekeenew en puun te kegkezeeti zuen he midtiǥum is menge meǥinged duen diyà te menge vuvungan te Israel he nehimu he mekevulungbulung seled te neuǥet he timpu. Nekelikù en is menge meǥinged kayi puun te menge nasyun ne melinawen en is ked-ubpè dan.  
\v 9 Sikew wey is menge sundaru nu, wey is menge zuma nu he ebpuun diyà te menge nasyun, edsurung kew ziyà te Israel he henduen be te vagyu, ne edliǥuyan niw heini he iring kew te ǥapun he edtambun kayi.” 
\p  
\v 10 Mibpedayun megkaǥi is Nengazen he MEGBEVAYÀ te, “Dutun he timpu ebpelanu ka te mezaat.  
\v 11 Egkaǥi ka te: Edsurung a ziyà te Israel he is menge inged duen wazà berengbenga, wazè dan pultahan, wey wazè dan trangka, he is menge meǥinged duen ed-ubpà he melinawen wey wazà igkahandek he kezeetan.  
\v 12 Ed-eǥawen ku is menge azen kayi te menge inged he nehimu zengan he mekevulungbulung, piru ǥuntaan neeneb en te menge etew he nemenlikù puun te zuma he menge nasyun. Mahabet is menge uyaǥen dan wey menge azen, ne migkilala zan is nasyun dan he iyan utew impurtanti he nasyun kayi te kelibutan. 
\p  
\v 13 “Egkaǥi ziyà te kenikew is menge etew ziyà te Sheba wey Dedan, wey is menge nigusyanti ziyà te menge inged diyà te Tarshish te, ‘Midtiǥum nu en be is menge sundaru nu su para ed-eǥawen en is menge pelata, menge vulawan, menge uyaǥen wey menge azen te menge Israilihanen?’ ” 
\p  
\v 14 “Umbe, sikew is etew, keǥiyi nu si Gog he siak, is Nengazen he MEGBEVAYÀ, migkaǥi a te, ‘Emun ebpengungubpaan en he melinawen is menge etew ku he Israilihanen, ne egketuenan nu heini.  
\v 15 Ne puun diyà te meziyù he lugar nu ziyà te zizaya, edsurungen nu sikandan, duma te mahabet wey mekeǥeǥehem he menge sundaru nu he ebpemen-untud te kudà.  
\v 16 Edsurungen nu is menge etew ku he Israilihanen he henduen kew te ǥapun he ebpeketambun te tanà. Uya, ibpesurung ku kenikew Gog, is nasyun ku te huziyan he timpu. Ne pinaaǥi te ebpeveelan ku kenikew, igkepeehè ku ziyà te menge nasyun is kegkewaǥas ku. Ne egketuenan dan he iyan a \sc Nengazen\sc*.’ ” 
\p  
\v 17 Mibpedayun megkaǥi is Nengazen he MEGBEVAYÀ te, “Te nehuna he timpu impahayag ku pinaaǥi te ebpemeneuven diyà te Israel he menge suluǥuen ku, he ziyà te huziyan he menge andew duen edsurung diyà te Israel. Ne iyan ka ibpesavut ku he edsurung.  
\v 18 Piru zutun te timpu te kedsurung nu, Gog, is Israel, egkeregreg is pauk ku.  
\v 19 Tenged te utew ku kegkepauk, ibpenangdù ku he zutun he timpu edlinug te mezesen diyà te tanà he Israel.  
\v 20 Ne zutun is langun he menge etew wey is langun he menge langgam: is ebpemenhipanew, is ebpemenlayang, is ebpemenanap, wey is diyà ebpen-ubpà te wahig ebpengerkeren te kegkahandek diyà te etuvangan ku. Egkengetempag is menge vuvungan wey menge kelendiǥan, wey egkengevengkag is menge verengbeng.  
\v 21 Ibpehimetayan ku sikew, Gog, diyà te menge vuntud ku, ne ebpehimhimetayà is menge sundaru nu. Iyan a, is Nengazen he MEGBEVAYÀ, is migkaǥi kayi.  
\v 22 Edsilutan ku sikew wey is menge sundaru nu, wey is menge zuma nu he ebpemuun diyà te zuma he menge nasyun. Edsilutan ku sikiyu pinaaǥi te zaru wey ebpeun-unayè kew ebpehimhimetayà. Ibpetanè ku is mereǥes he uzan, wey ibpeuzan ku te ǥiyew he henduen be te menge vatu, wey egkeregreg he esupri.  
\v 23 Pinaaǥi kayi is kebpaahaa ku ziyà te langun he menge nasyun te kegkemekeǥeǥehem ku wey kegkewaǥas. Ne egketuenan dan he iyan a \sc Nengazen\sc*.” 
\c 39  
\s1 Is Kegkezeeti ni Gog wey te menge Sundaru Zin 
\p  
\v 1 Migkaǥi is \sc Nengazen\sc* kayi te kedì te, “Sikew is etew, kaǥi ka te ebpekesuǥat diyà te ki Gog. Keǥiyi nu sikandin he siak, is Nengazen he MEGBEVAYÀ, migkaǥi a te, ‘Kuntada ku sikew, Gog, is pengulu te Meshec wey Tubal.  
\v 2 Eguyuzen ku sikew puun te meziyù diyà te zizaya pehendiyà te menge vuvungan te Israel.  
\v 3 Ne ed-eǥawan ku sikew te ǥumaan,  
\v 4 ne egkezeetan ka ziyà te menge vuvungan te Israel ragkes is langun he menge sundaru nu wey is ebpemuun te menge nasyun he nekidsevaha kenikew. Ibpekaan ku sikiyu is ebpematey te nekedseselekawà he kelasi te zumezaas he menge tagbis, wey te mesipala he menge langgam.  
\v 5 Egkezeetan kew ziyà te menge vevesukà su iyan a, is Nengazen he MEGBEVAYÀ migkaǥi kayi.  
\v 6 Ebinsulan ku is Magog wey is duma zin he menge nasyun he uvey te zaǥat he is menge meǥinged duen nengungubpaan he melinawen. Ne egketuenan dan he iyan a \sc Nengazen\sc*.  
\v 7 Ibpetuenan ku te menge etew ku he Israilihanen he waǥas is ngazan ku, ne kenè ku en idtuǥut he pendezeisaya pa heini. Ne egketuenan diyà te menge nasyun he iyan a \sc Nengazen\sc*, is waǥas he Megbevayà te Israel.  
\v 8 Egkeuma heeyan he timpu ne egkehitavù is migkaǥi ku. Iyan a, is Nengazen he MEGBEVAYÀ, is migkaǥi kayi. 
\p  
\v 9 “ ‘Dutun he timpu, edtiǥumen te menge etew te Israel he ebpemen-ubpà diyà te zekelà he menge inged is menge himan niw te kebpekidtebek, is dezekelà wey zezeisey he menge kelasag, is menge panà, is menge lagkut he para te tebek, wey is menge vangkew, ne egemiten dan heini he tavun seled te pitu he tuig.  
\v 10 Kenè en kinahanglan he ebpengayu pa sikandan diyà te vevesukà wey ketelunan, su egkeǥamit dan en man he tavun is menge ǥumaan te kebpekidtebek. Umbe ed-eǥawan dan daan is menge nengaǥew kandan. Iyan a, is Nengazen he MEGBEVAYÀ, is migkaǥi kayi. 
\p  
\v 11 “ ‘Dutun he timpu idleveng ku ziyà te Israel si Gog wey is mahabet he menge etew zin; idleveng ku ziyà te Suǥud te Ebiyahi, diyà te edsilaan he uvey te Daǥat he Minatey. Ne kenè en haazà igkevayà su ebpekaalang haazà is dekelà he penlevengà te ebiyahi. Ne egngezanan en heini te Hamon Gog, he ke và dà egkegiya kes, “Suǥud-suǥud te Mahabet he menge Etew ni Gog.” 
\p  
\v 12 “ ‘Pitu he vulan is kedlevenga kandan te menge Israilihanen te kedlumpiyu zutun te tanà.  
\v 13 Is langun he menge meǥinged ed-uǥup te kedleveng. Ne heini he timpu kenà egkelipatan te menge Israilihanen, su pinaaǥi keniyan egkeveǥayan a te zengeg. Iyan a, is Nengazen he MEGBEVAYÀ, is migkaǥi kayi.  
\v 14 Emun egketapus en is pitu he vulan, duen menge etew he edsuǥuen te kedriǥuriǥu zutun te nasyun su wey zan mesusi ke zuen pe be minatey he wazà ikeleveng. Ne ibpeleveng dan heini su wey melumpiyuwi haazà is tanà.  
\v 15 Emun duen egkaahà te menge etew he tulan te etew, edsevukan dan heini te tuus su wey metueni zuen te menge etew he midsuǥù, ne igkeleveng dan heini ziyà te “Suǥud-suǥud te Mahabet he menge Etew ni Gog.”  
\v 16 (Duen daan dutun inged he egkengezanan keuzemà te “Mahabet he menge Etew.”) Pinaaǥi keniyan egkelumpiyuwan dan haazà is tanà.’ ” 
\p  
\v 17-18 Mibpedayun megkaǥi is Nengazen he MEGBEVAYÀ kayi te kediey te, “Sikew is etew, keǥiyi nu is langun he kelasi te menge tagbis wey zumezaas he menge langgam diyà te peliǥuy he medtiǥum dan diyà te menge vuvungan te Israel, su wey zan mekekaan te zekelà he ǥastu te pemuhat he in-andam ku kandan. Dutun egkaan sikandan te sapù wey ed-inum te lengesa te menge sundaru wey menge pengulu, he henduen dà te menge kerehidu, menge vaka, wey menge kambing he impelambù he ebpuun diyà te Bashan.  
\v 19-20 Kayi he ǥastu te ed-endamen ku para kandan, egkepezaharan sikandan te keenen wey inumen taman te egkengehantey wey egkengelangut sikandan. Ebpetakè dan egkaan te menge kudà, menge pereuntud te kudà, wey menge sundaru. Iyan a, is Nengazen he MEGBEVAYÀ, is migkaǥi kayi. 
\p  
\v 21 “Emun edsilutan ku en is menge etew ziyà te menge nasyun, ne egkeehè dan ke sengemenu is kegkemekeǥeǥehem ku.  
\v 22 Puun dutun he timpu, egketuenan te menge etew te Israel he iyan a is \sc Nengazen\sc* Megbevayè dan,  
\v 23 egketuenan daan diyà te zuma he menge nasyun he mibihag is menge etew te Israel tenged te menge salè dan, su wazè dan mebpezumazuma kedì. Mibpesegdan ku sikandan he surunga wey penhimetayi te menge kuntada zan.  
\v 24 Mibeelan ku zà diyà te kandan is ereg he vales te mibeelan dan he meremerik wey mezaat.” 
\p  
\v 25 Mibpedayun pa megkaǥi is Nengazen he MEGBEVAYÀ te, “Piru ekgehizuwan ku en is menge Israilihanen, he menge kevuwazan ni Jacob, ne ibpeuman ku sikandan ibpeuswag, su wey meveǥayi te zengeg is waǥas he ngazan ku.  
\v 26 Egkelipatan dan en is keelezan dan wey kedluivi zan kedì, emun ebpengungubpaan en sikandan he melinawen wey wazà egkehendekan.  
\v 27 Ibpeehè ku ziyà te menge nasyun is kegkewaǥas ku pinaaǥi te kedhewia ku kandan puun diyà te menge nasyun te menge kuntada zan.  
\v 28 Ne egketuenan dan he iyan a \sc Nengazen\sc* he Megbevayè dan. Su minsan impevihag ku sikandan pehendiyà te menge nasyun, piru ed-umanan ku sikandan edtiǥuma ziyà te keugelingen dan he tanà ne wazà minsan sevaha he egkesamà.  
\v 29 Kenè ku en sikandan ebpesegdanen su edsuǥuen ku ziyà te kandan is Mulin-ulin ku. Iyan a, is Nengazen he MEGBEVAYÀ, is migkaǥi kayi.” 
\c 40  
\s1 Is Beǥu he Baley te \sc Nengazen\sc* 
\p  
\v 1-2 Dutun te ikesepulù he andew te nehuna he vulan, dutun te ike-25 he tuig te kegkevihaǥa kenami–he iyan ike-14 he tuig te kegkezeeti te Jerusalem–midumala a te \sc Nengazen\sc*, ne zuen mibpelewasan din kediey. Dutun te kebpekelawas ku, mid-uwit e zin diyà te utew metikang he vuvungan te Israel. Ne kebpantew ku ziyà te egkezivavà, duen neehè ku he menge bilding he henduen be te inged.  
\v 3 Ne mid-uwit a te \sc Nengazen\sc* dutun, ne zuen neehè ku he etew he is ked-ahaa ta zuen, iring te ed-ilak-ilak he brunsi. Midhitindeg sikandin diyà te ǥemawan is egawed te zezuwa he sukud: is sevaha linu he hiket, ne is sevaha pa kayu.  
\v 4 Migkaǥi haazà is etew kayi te kedì te, “Sikew is etew, pemineg ka, ne purungi nu tengtengi is langun he ibpeehè ku kenikew su iyan heini hinungdan te ked-uwita kenikew kayi. Ne tudtula nu ziyà te menge etew te Israel is langun he egkengeehè nu.” 
\s1 Is Beyeey zapit te Edsilaan 
\p  
\v 5 Neehè ku is baley te \sc Nengazen\sc* he neliǥuy te verengbeng. Ne migkuwa zuen te etew is kayu he sukud din, he sepulù he ǥiek is kelayatan din, sumalà te upisyal he sukud, ne midsukud din kes berengbeng. Sepulù he ǥiek is ketikang kayi wey is kekepal zin.  
\v 6 Ne midhendiyà sikan is etew te veyeey zuen te valey te \sc Nengazen\sc* he ebpekesinaru ziyà te edsilaan. Mibpemenahik sikandin diyà te heǥezan ne midsukud din is idselang kayi te veyeey, ne sepulù he ǥiek is kelayatan din.  
\v 7 Is diyà te kada kilid kayi te veyeey ne zuen dutun tetelu he ruǥu he zutun ebantey is menge vantey. Heini he menge ruǥu, sepulù he ǥiek he kwedradu, ne is kekepal te imberengbeng diyà te mid-elangan dan, walu he ǥiek. Is sunud kayi te menge ruǥu, ne zuen en maan dutun idselang pehendiyà te varkun he ebpekesinaru zuen te valey te \sc Nengazen\sc*. Heini he idselang, sepulù he ǥiek is keleyatan din. 
\p  
\v 8 Ne midsukud daan dutun te etew haazà is barkun,  
\v 9 ne 14 he ǥiek is keleyatan kayi. Ne is nekedtimbang he verengbeng dutun te veyeey ne tetelu he ǥiek is kekepal zan. 
\p  
\v 10 Haazà is tetelu he menge ruǥu he zutun ebantey is menge vantey, neked-iiring is kezekelè dan, ne is menge verengbeng diyà te mid-elangan te kada sevaha he ruǥu, neked-iiring daan is kekepal.  
\v 11 Midsukud daan duen te etew is keluag duen te veyeey pehendiyà te lama zuen te valey te \sc Nengazen\sc*, ne 22 he ǥiek is keluag din. Is keluag te ǥemawan kayi 17 zà he ǥiek.  
\v 12 Diyà te egkesineruwan te kada ruǥu he zutun ebantey is menge vantey, zuen berengbeng he 20 he vaney is ketikang din ne 20 he vaney is kekepal zin. Heini he menge ruǥu, tig sepulù he ǥiek kuwedradu. 
\p  
\v 13 Ne midsukud duen te etew is tivuuk he keluag te veyeey pehendiyà te lama zuen te valey te \sc Nengazen\sc*, ne 42 heini he ǥiek. Is kedsukuza kayi, ne impepuun diyà te egkeiniyuǥan he verengbeng te ruǥu he zutun ebantey is menge vantey ne pehendiyà daan te egkeiniyuǥan te verengbeng te zivaluy zin he ruǥu.  
\v 14 Midsukud din is berengbeng puun te ǥemawan pehendiyà te varkun he ebpekesinaru te lama, ne 100 he ǥiek is keluǥayad kayi.  
\v 15 Is keluǥayad duen te veyeey puun te ǥemawan kayi pehendiyà te purù te varkun ne 85 he ǥiek.  
\v 16 Duen dezeisey he menge sulawà duen te verengbeng duen te menge ruǥu he zutun ebantey is menge vantey wey zuen te verengbeng he nekepetug-elang duen te menge ruǥu. Ne in-ukir zutun te menge verengbeng is menge palma. 
\s1 Is Gawas he Lama zuen te Baley te \sc Nengazen\sc* 
\p  
\v 17 Ne mid-uwit a zuen te etew ziyà te ǥawas he lama. Dutun duen ku naahà he 30 he menge ruǥu he nekezalandalan diyà te veyeey he simintadu he nekepeliǥuy zuen te lama.  
\v 18 Heini is egkezizalem he simintadu he veyeey, nekeuma ziyà te kilid duen te menge veyeey he ibpenhindiyà te seled te lama. Is keluag dutun te simintadu he veyeey ne repeng te keluǥayad duen te menge beyeey.  
\v 19 Ne midsukud duen te etew is keziyù puun te veyeey he ibpendendiyà te seled duen te lama ziyà te gawas taman te veyeey he ibpehendiyà te lama he ziyà te seled, ne 170 he ǥiek is keziyù kayi. 
\s1 Is Beyeey ziyà te Dizaya 
\p  
\v 20 Ne midsukud duen te etew is keluǥayad wey keluag duen te veyeey he ebpekesinaru ziyà te zizaya. Heini he veyeey ibpehendiyà te ǥawas he lama.  
\v 21 Ne is kada kilid duen te veyeey ne zuen duen tetelu he menge ruǥu he zutun ebantey is menge vantey. Is kezekelà kayi he menge ruǥu wey sikan is menge verengbeng he nekepetug-elang kayi, ragkes is barkun kayi, iring te sukud duen te veyeey he ziyà te edsilaan. Is keluǥayad duen te veyeey ziyà te zizaya 85 he ǥiek ne is keluag din 42 wey tengà he ǥiek.  
\v 22 Is menge sulawà kayi, is barkun, wey is in-ukir he menge palma ne iring daan te veyeey he ziyà te edsilaan. Pitu he ang-ang is heǥezan pehendutun te veyeey, ne zuen barkun diyà te purù kayi.  
\v 23 Is diyà te seled he lama he ebpekesinaru ziyà te zapit te zizaya iring te veyeey he zapit te edsilaan. Midsukud daan duen te etew is kebpekediyuey zuen te zezuwa he veyeey, ne 170 heini he ǥiek. 
\s1 Is Beyeey ziyà te Divavà 
\p  
\v 24 Ne miduma a zuen te etew ziyà te zivavà, ne zutun duen ku naahà he veyeey. Midsukud din is barkun wey is menge verengbeng diyà te seled kayi, ne iring ded is sukud kayi te sukud duen te zuma.  
\v 25 Duen daan menge sulawà diyà te peliǥuy zuen te veyeey wey is barkun iring duen te zuma. Is keluǥayad dutun te veyeey, 85 he ǥiek ne is keluag din 42 wey tengà he ǥiek.  
\v 26 Pitu he ang-ang is heǥezan kayi he ibpehendutun te veyeey wey duen barkun diyà te purù kayi. Is menge verengbeng diyà te kilid dutun te veyeey zuen duen dayandayan he in-ukir he menge palma.  
\v 27 Duen daan beyeey ziyà te seled he lama, he ebpekesinaru ziyà te zivavà. Midsukud duen te etew is keziyù puun kayi he veyeey pehendiyà te veyeey he ziyà te ǥawas he zapit te zivavà, ne 170 he ǥiek. 
\s1 Is menge Beyeey he Ibpehendiyà te Seled he Lama 
\p  
\v 28 Ne miduma a zuen te etew ziyà te seled he lama ne zuen key mebayà te veyeey ziyà te zivavà. Ne midsukud din is beyeey zutun, ne iring ded is kezekelà duen te zuma.  
\v 29 Duen daan kayi menge ruǥu, he zutun ebantey is menge vantey. Is kezekelà kayi he menge ruǥu wey is menge verengbeng diyà te pid-elangan kayi, wey ragkes is barkun kayi, iring daan kezekelà te zuma. Duen daan menge sulawà diyà te peliǥuy zutun te veyeey wey ziyà te varkun. Is keluǥayad dutun te veyeey 85, he ǥiek ne is keluag din 42 wey tengà he ǥiek.  
\v 30 (Is menge barkun kayi he menge veyeey he ebpekeliǥuy zuen te seled he lama ne walu he ǥiek is keluǥayad din ne 42 wey tengà he ǥiek is keluag din.)  
\v 31 Is barkun te veyeey ziyà te zivavà, ebpekesinaru ziyà te ǥawas he lama, ne in-ukir ziyà te nekedtimbang he verengbeng kayi is menge palma. Walu he ang-ang is heǥezan he ibpehengkayi te veyeey. 
\p  
\v 32 Ne mid-umanan a zumaha zuen te etew ziyà te seled he lama. Diyè key mebayà te veyeey he zapit te edsilaan. Midsukud din is beyeey ne iring ded is kezekelè din te kezekelà duen te zuma.  
\v 33 Duen daan kayi menge ruǥu, he zutun ebantey is menge vantey. Is kezekelà kayi he menge ruǥu wey is menge verengbeng diyà te pid-elangan kayi, wey ragkes is barkun kayi, iring daan kezekelà te zuma. Duen daan menge sulawà diyà te peliǥuy zutun te veyeey wey ziyà te varkun. Is keluǥayad dutun te veyeey 85 he ǥiek ne is keluag din 42 wey tengà he ǥiek.  
\v 34 Is barkun kayi, ziyà ebpekesinaru te ǥawas he lama, ne zuen kayi zayandayan he menge palma he in-ukir zuen te nekedtimbang he verengbeng ne zuen walu he ang-ang te heǥezan kayi he ibpehengkayi te veyeey. 
\p  
\v 35 Ne miduma a zuen te etew ziyà te veyeey he zapit te edsilaan. Midsukud din heini he veyeey ne iring ded heini kezekelà duen te zuma.  
\v 36 Duen daan kayi menge ruǥu he zutun ebantey is menge vantey. Is kezekalà kayi he menge ruǥu wey is menge verengbeng diyà te pid-elangan dan, wey ragkes is menge barkun kayi, ne iring ded is kezekelè din duen te zuma. Duen daan menge sulawà diyà te peliǥuy zutun te veyeey. Is keluǥayad dutun te veyeey ne 85 he ǥiek ne is keluag din 42 wey tengà he ǥiek.  
\v 37 Is barkun kayi, ziyà ebpekesinaru te ǥawas he lama, ne zuen kayi zayandayan he menge palma he in-ukir zuen te nekedtimbang he verengbeng. Walu he ang-ang is heǥezan he ibpehengkayi te veyeey. 
\s1 Is menge Ruǥu he zutun Ed-endama is menge Pemuhat 
\p  
\v 38 Ne zuen ku naahà he ruǥu he zuen din gemawan, he avey te varkun te veyeey he zapit te zizaya. Dutun edlùlùi is menge pemuhat he edtutungen.  
\v 39 Is kada kilid dutun te varkun duen dutun dezuwa he lemisahan he zutun edlepaa is menge uyaǥen he pemuhat he edtutungen, pemuhat he idlumpiyu, wey pemuhat he vayad te salà.  
\v 40 Duen pa zezuwa he lemisahan diyà te kada kilid duen te heǥezan he ibpehendiyà te veyeey he zapit te edsilaan.  
\v 41 Umbe, walu pudu he lemisahan is lepeey te menge pemuhat; heepat is diyà te varkun ne heepat daan is diyà te kilid duen te veyeey.  
\v 42 Duen daan dutun heepat he lemisahan he iyan mibeelan is binesbasan he vatu, he zutun idsavuk is menge gelemiten para te kedlapà te menge pemuhat he edtutungen wey zuma pa he menge pemuhat. Heini he menge lemisahan 30 he vaney kuwedradu ne 20 he vaney is ketikang din.  
\v 43 Ne ziyà te peliǥuy he verengbeng duen te varkun ne zuen selenggatà he tetelu he vaney is kelayat din. Ne neehè ku ziyà te menge lemisahan is menge usa he ibpemuhat. 
\s1 Is menge Ruǥu te menge Memumuhat 
\p  
\v 44 Duen dezuwa he ruǥu zuen te lama ziyà te seled. Is sevaha ziyà te kilid duen te veyeey he zapit te zizaya he ebpekesinaru ziyà te zivavà, ne is sevaha ziyà te kilid duen te veyeey he zapit te zivavà ne ebpekesinaru heini ziyà te zizaya.  
\v 45 Migkaǥi sikan is etew kayi te kedì te, “Is ruǥu he nekesinaru ziyà te zivavà ne para te menge memumuhat he edumala ziyà te valey te \sc Nengazen\sc*.  
\v 46 Ne is ruǥu he ebpekesinaru ziyà te zizaya ne para te menge memumuhat he edumala te pemuhatà. Heini sikandan menge kevuwazan ni Zadok, ne iyan dà sikandan kevuwazan ni Levi he midtuǥutan te ked-uvey ziyà te etuvangan te \sc Nengazen\sc* te ebpenilbi kandin.  
\v 47 Ne zutun midsukud duen te etew sikan is lama ziyà te seled, ne 170 he ǥiek he kuwedradu. Is pemuhatà ne ziyà te egkesineruwan duen te valey te \sc Nengazen\sc*.” 
\s1 Is Baley te \sc Nengazen\sc* 
\p  
\v 48 Ne miduma a zuen te etew ziyà te varkun duen te valey te \sc Nengazen\sc*. Ne midsukud din is nekedtimbang he verengbeng ne walu he ǥiek is keluag din ne lelima he ǥiek is kekepal zin. Is keluǥayad te veyeey ziyà te varkun, ne 24 he ǥiek.  
\v 49 Ne is barkun 34 he ǥiek is keluǥayad din ne 20 he ǥiek is keluag din. Ne sepulù he ang-ang is heǥezan he ibpehedutun te varkun, ne zuen tukud diyà te kada kilid kayi. 
\c 41  
\p  
\v 1 Ne miduma a zuen te etew ziyà te Segradu he Lugar zuen te valey te \sc Nengazen\sc*. Ne midsukud din is nekedtimbang he verengbeng te veyeey zutun te Segradu he Lugar, ne is kada verengbeng sepulù he ǥiek is keluǥayad din.  
\v 2 Ne walu he ǥiek is kekepal zin. Is keluag dutun te veyeey 17 he ǥiek. Midsukud din daan sikan is Segradu he Lugar, ne 68 he ǥiek is keluǥayad din ne 34 he ǥiek is keluag din. 
\p  
\v 3 Ne midseled sikan is etew ziyà te Utew Segradu he Lugar. Midsukud din is nekedtimbang he verengbeng te veyeey zuen te Utew Segradu he Lugar, ne is kada verengbeng 12 he ǥiek is keluag din ne tetelu he ǥiek is kekepal zin. Ne is keluǥayad te veyeey zutun ne sepulù he ǥiek.  
\v 4 Midsukud din sikan is Utew Segradu he Lugar, ne 34 he ǥiek kuwedradu. Ne migkaǥi haazà is etew kayi te kedì te, “Iyan heini Utew Segradu he Lugar.” 
\p  
\v 5 Ne midsukud duen te etew is berengbeng duen te valey te \sc Nengazen\sc*, ne sepulù he ǥiek is kekepal kayi. Kayi te verengbeng duen nekelinya he menge ruǥu he pitu he ǥiek is keluǥayad din.  
\v 6 Heini he menge ruǥu tetelu he endana, ne is kada endana 30 he ruǥu. Is berengbeng duen te valey te \sc Nengazen\sc*, nekeiseg-iseg is kenipis din diyà te kada endana su wey mekeuntud is menge ruǥu zutun te verengbeng he kenè en kinahanglan is menge sintas.  
\v 7 Heini he menge ruǥu is nekeliǥuy zuen te valey te \sc Nengazen\sc*, nekeiseg-iseg is keluag dan puun te egkehuna he endana pehendiyà te iketelu he endana. Duen kayi heǥezan he ebpuun te egkehuna he endana pehendiyà te ikezuwa he endana taman te iketelu he endana. 
\p  
\v 8 Neehè ku he haazà is baley te \sc Nengazen\sc* nevangun diyà te metikang he lugar he sepulù he ǥiek is ketikang din, ne iyan heini nehimu he pundasyun duen te menge ruǥu ziyà te kilid.  
\v 9 Is diyà te ǥawas he verengbeng duen te menge ruǥu ne walu he ǥiek is kekepal zin. Duen bekanti he lugar ziyà te teliwazà kayi te menge ruǥu  
\v 10 wey ziyà te sevaha pa he vilding he pudu zaan ruǥu. Is keluag kayi te vekanti he lugar 34 he ǥiek, ne nekeliǥuy heini zuen te valey te \sc Nengazen\sc*.  
\v 11 Duen dezuwa he ǥemawan he para te kedseled dutun te valey te \sc Nengazen\sc*. Heini he menge ǥemawan, ebpekesinaru zuen te vekanti he lugar; is sevaha, ne ziyà dapit te edsilaan ne is sevaha, ziyà dapit te zivavà. Diyà te avey zuen te bekanti he lugar zuen beyeey he is keluǥayad din, walu he ǥiek peliǥuy. 
\p  
\v 12 Duen neehè ku he sevaha he vilding he ebpekesinaru zuen te seled he lama zuen te valey te \sc Nengazen\sc*. Is keluag kayi, 118 he ǥiek ne is keluǥayad din 150 he ǥiek. Ne is kekepal te verengbeng kayi, walu he ǥiek.  
\v 13 Ne midsukud duen te etew sikan is baley te \sc Nengazen\sc*, ne 170 he ǥiek is keluǥayad kayi. Is keziyù puun te egkeiniyuǥan duen te valey te \sc Nengazen\sc* pehendiyà te zivaluy he verengbeng duen te bilding he zapit te edsenlepan, 170 he ǥiek.  
\v 14 Is keluǥayad te seled he lama he zapit te edsilaan, he egkesineruwan duen te valey te \sc Nengazen\sc*, ne 170 zaan he ǥiek. 
\p  
\v 15 Ne midsukud daan duen te etew is keluǥayad duen te bilding he zapit te zivavà, he ebpekesinaru zuen te seled he lama he egkeiniyuǥan te valey te \sc Nengazen\sc*, ragkes is menge verengbeng kayi ziyà te kada kilid, ne 170 zaan he ǥiek. Is Segradu he Lugar, is Utew Segradu he Lugar, wey is barkun te valey te \sc Nengazen\sc*,  
\v 16 ne mibpekeplaan te tabla, ragkes is peliǥuy zuen te zezeisey he menge sulawà. Is tetelu he ruǥu ziyà te pesiziveluyà he kilid te veyeey, mibpekeplaan daan te tabla puun te saag pehendiyà te sulawà. Heini he menge sulawà egkehimu he edlekevan.  
\v 17 Is elavat he ziyà te zivavew zuen te ǥemawan he para te kedseled duen te Utew Segradu he Lugar, mibpekeplaan daan te tabla. Is tivuuk he elavat diyà te seled te valey te \sc Nengazen\sc*,  
\v 18 ne mideyzeyanan te menge palma wey te menge kirubin he zezuwa is dagwey.  
\v 19 Is sevaha he zagwey zutun te kirubin, ne zagwey te etew, ne edsinaru heini te palma. Ne is sevaha pa he zagwey zutun te kirubin, ne zagwey te erimaung ne edsinaru heini ziyà te palma he ziyà te zivaluy. Heini he menge zayandayan, in-ukir zuen te tivuuk he elavat duen te valey te \sc Nengazen\sc* 
\v 20 puun te saag taman te zivavew, ragkes en is dapit te ǥawas he elavat duen te Segradu he Lugar. 
\p  
\v 21 Kuwadradu is menge marku zuen te ǥemawan duen te Segradu he Lugar. He ziyà ebpekesinaru te Utew Segradu he Lugar he zuen duen henduen be te  
\v 22 pemuhatà he kayu he tetelu he ǥiek kuwedradu wey lelima he ǥiek is ketikang din. Is menge suyuk kayi, pundasyun, wey menge kilid pudu kayu. Ne migkaǥi sikan is etew kayi te kedì te, “Iyan heini lemisahan diyà te etuvangan te \sc Nengazen\sc*.”  
\v 23 Sikan is Segradu he Lugar wey is Utew Segradu he Lugar, ne tig-dezuwa is lekeb.  
\v 24 Is kada lekeb, dezuwa he vahin ne egkehimu he edlumlumpien.  
\v 25 Is menge lekeb te Segradu he Lugar mideyzeyanan te menge kirubin wey menge palma he in-ukir iring te ziyà te menge elavat. Ne is barkun kayi ne mid-etepan te kayu.  
\v 26 Is diyà te kada kilid te varkun duen kayi dezeisey he menge sulawà he mideyzeyanan te menge palma is avey kayi. Is menge ruǥu ziyà te nekeliǥuy zuen te valey te \sc Nengazen\sc* mid-etepan daan. 
\c 42  
\s1 Is Segradu he menge Ruǥu 
\p  
\v 1 Ne miduma a zuen te etew ziyà te ǥawas he lama zuen te valey te \sc Nengazen\sc*. Ne ziyè key mebayà te veyeey he zapit te edsilaan. Ne zutun impeehè din kedì is menge ruǥu he zapit te edsilaan duen te seled he lama wey te bilding diyà te zapit te edsenlepan.  
\v 2 Heini he menge ruǥu is ebpekesinaru ziyà te zizaya, 170 he ǥiek is keluǥayad ne 85 he ǥiek is keluag.  
\v 3 Heini he menge ruǥu, 34 he ǥiek is kebpekediyù dan duen te valey te \sc Nengazen\sc*, ne ebpekesinaru heini zuen te simintadu he veyeey ziyà te gawas he lama. Heini he menge ruǥu, tetelu he endana  
\v 4 Ne ziyà te egkesineruwan kayi ne zuen beyeey he 17 he ǥiek is keluag din ne 170 he ǥiek is keluǥayad din. Is menge ǥemawan dutun te menge ruǥu, ne ebpekesinaru ziyà te zizaya.  
\v 5 Is menge ruǥu ziyà te iketelu he endana, ne meliǥet duen te ziyà te ikezuwa he endana, ne is menge ruǥu ziyà te ikezuwa he endana ne meliǥet duen te ziyà te egkehuna he endana, su egkinahanglan te veyeey is diyà te zivavew he endana.  
\v 6 Heini is tetelu he endana, ne wazè din menge tukud, kenà iring te menge bilding duen te menge lama. Ne geina te neked-uuntuzè dà heini, ne neriyus is kengezekelà te ruǥu.  
\v 7 Heini he vilding, nekesivey zuen te ǥawas he lama pinaaǥi te verengbeng he 85 he ǥiek is keluǥayad din.  
\v 8 Su emun wazà heini is berengbeng, is ketengà te bilding he 85 he ǥiek, egkaahà ke ziyè ki te ǥawas he lama. Is tivuuk he keluǥayad duen te bilding he 170 he ǥiek, egkaahà ke ziyè ki te valey te \sc Nengazen\sc*. 
\p  
\v 9 Duen beyeey he para idseled diyà te zizalem he endana zutun he vilding he ebpuun te ǥawas he lama he zapit te edsilaan. 
\p  
\v 10 Duen daan menge ruǥu ziyà te egkezivavà he verengbeng duen te seled he lama. Heini he menge ruǥu is avey zuen te seled he lama uvey zaan duen te bilding he zapit te edsenlepan.  
\v 11 Duen daan beyeey ziyà te egkesineruwan kayi he menge ruǥu, iring te menge ruǥu he ziyà te zapit te zizaya. Is keluǥayad wey keluag kayi he menge ruǥu, ne neked-iring, ragkes en is menge veyeey kayi wey is sukud kayi. Is menge ǥemawan duen te menge ruǥu he zapit te zizaya  
\v 12 ne iring daan te menge ǥemawan duen te menge ruǥu he zapit te zivavà. Duen gemawan diyà te egkezungguan duen te veyeey he para te kedseled dutun te bilding. Duen berengbeng kayi te veyeey he para te edseled he ebpuun te dapit te edsilaan. 
\p  
\v 13 Migkaǥi sikan is etew kayi te kedì te, “Heini he menge ruǥu is dapit te zivavà wey zizaya he ebpekesinaru te lama kayi te valey te \sc Nengazen\sc*, ne segradu heini he menge ruǥu. Su is menge memumuhat he ebpemuhat diyà te \sc Nengazen\sc* ne kayi zan egkeena is utew segradu he menge pemuhat. Egemiten dan daan heini he menge ruǥu he para selevukà te menge pemuhat he para gasa, menge pemuhat he para idlumpiyu, wey menge pemuhat he vayad te salà. Su segradu heini he menge ruǥu.  
\v 14 Emun egawas en is menge memumuhat puun kayi te segradu he menge ruǥu, kinahanglan he kenè dan dèpa mediritsu megawas pehendiyà te ǥawas te lama. Kinahanglan he edluwasen dan dèpa is menge visti he imbivisti zan dutun te kebpemuhat dan, su segradu heini he menge visti. Kinahanglan he ed-ilis dèpa sikandan te selakew en he visti te kenè pa sikandan edhendiyà te vahin duen te simbahan he para te menge etew.” 
\p  
\v 15-16 Hein nepasad duen te etew te edsukud sikan is baley te \sc Nengazen\sc*, ne midume e zin diyà te ǥawas. Diyè key mebayà te veyeey he zapit te edsilaan, ne midsukud din is tivuuk he keluag duen te valey te \sc Nengazen\sc*. Midsukud din duen te kayu he sukud din is bahin dutun he ziyà mezapit te edsilaan, ne 850 he ǥiek is keleyatan kayi.  
\v 17-19 Ne midsukud din daan is bahin he ziyà te zizaya, divavà, wey edsenlepan, ne neked-iring is keleyatan kayi he pudu 850 he ǥiek.  
\v 20 Umbe, kuwedradu haazà is baley te \sc Nengazen\sc*, ne neliǥuy heini te verengbeng he mibpedsivey zuen te Segradu he Lugar wey urdinaryu he lugar. 
\c 43  
\s1 Is Mekeǥeǥehem he Kebpekiduma te \sc Nengazen\sc* Midlikù diyà te Baley te \sc Nengazen\sc* 
\p  
\v 1 Ne hein nepasad haazà miduma ad maan duen te etew ziyà te veyeey he zapit te edsilaan.  
\v 2 Ne zutun neehè ku is mekeǥeǥehem he kebpekiduma te Megbevayà te Israel he ebpekeuma is ebpuun diyà te edsilaan. Is keǥurub te kebpekeuma zin iring te deǥurus te meseleg he wahig, ne mid-anlag is tanà tenged te mekeǥeǥehem he kebpekiduma zin.  
\v 3 Ne heini is nelewasan ku, ne iring te nelewasan ku hein midezeetan te Megbevayà is inged he Jerusalem, wey iring daan heini zuen te nelewasan ku ziyà te veyvey te Wahig he Kebar. Ne kegkaahaa ku zutun midlangkeb a ziyà te tanà. 
\p  
\v 4 Ne midseled haazà is mekeǥeǥehem he kebpekiduma te \sc Nengazen\sc* diyà te valey te \sc Nengazen\sc*, ne ziyà haazà mebayà te veyeey he zapit te edsilaan.  
\v 5 Impeenew a te Mulin-ulin ne mid-uwit e zin diyà te seled he lama. Ne zutun neehè ku he nepenù haazà is baley te \sc Nengazen\sc* te mekeǥeǥehem he kebpekiduma zin.  
\v 6 Ne zutun te edhithitindeg sikan is etew ziyà te avey ku, ne zuen nezineg ku he laǥeng he ebpuun dutun te valey te \sc Nengazen\sc* 
\v 7 he migkaǥi kayi te kedì te, “Sikew is etew, iyan heini pinuuwè ku te kedhadì wey untuzà te menge paa ku. Kayi a ed-ubpà duma te menge Israilihanen te wazà pidtemanan. Ne kenè en ed-umanan ebpendezeisaya te menge Israilihanen wey te menge hadì dan is waǥas he ngazan ku pinaaǥi te ked-azap dan te zuma he menge ed-ezapen etawa ked-azap te menge munyumintu te menge hadì dan he nemematey en.  
\v 8 Dengan mibaal sikandan te pemuhatà he para te zuma he menge ed-ezapen diyà te avey te pemuhatà he para kediey he verengbeng dà is nekepetug-elang. Midremerikan dan is waǥas he ngazan ku pinaaǥi keniyan te utew mezaat he menge vaal zan. Umbe tenged te pauk ku midezeetan ku sikandan.  
\v 9 Ne ǥuntaan kinahanglan he ed-engked en sikandan he ed-azap te zuma he menge ed-ezapen wey te menge munyumintu te menge hadì dan he nemematey en, ne ed-ubpà a zuma kandan te wazà pidtemanan.” 
\p  
\v 10 Midlaus megkaǥi haazà is laǥeng te, “Sikew is etew, keǥiya nu ziyà te menge etew te Israel sikan is baley te \sc Nengazen\sc* he impeehè ku kenikew. Tudtula nu kandan is kegkeveeli kayi su wey zan meeled tenged te menge salè dan.  
\v 11 Emun egkeeled dan en tenged te langun he menge vaal zan ne petueni nu kandan is kebpurmaha kayi, ragkes is menge veyeey kayi wey menge ǥemawan, wey is kinetivuukan he purma zin. Isurat nu is menge paaǥi te kedterebehuwa kayi zutun te edtengteng sikandan su wey zan mepurung mesunud heini.  
\v 12 Iyan heini edhuna he menge kesuǥuan dutun te valey te \sc Nengazen\sc*: Kinahanglan he segradu is langun he lugar ziyà te zivavew te vuvungan he ebpekeliǥuy te nehitindeǥan te valey te \sc Nengazen\sc*. 
\s1 Is Pemuhatà 
\p  
\v 13 “Iyan heini sukud te pemuhatà sumalà te upisyal he sukud. Diyà te peliǥuy te pundasyun te pemuhatà duen mid-iring te kanal he 20 he vaney is kezalem din ne 20 zaan he vaney is keluag din, ne zuen senipa ziyà te peliǥuy he menge heenem he vaney is keluag din.  
\v 14-17 Ne tetelu he vahin haazà is pemuhatà. Is kinezizeleman he vahin 27 he ǥiek kuwedradu, is keluag din, ne tetelu he ǥiek is ketikang din. Is teliwazà he vahin 24 he ǥiek kuwedradu is keluag din, ne menge sepulù wey pitu he ǥiek is ketikang din. Duen mid-iring te kanal ziyà te peliǥuy kayi he sepulù he ǥiek is keluag din ne zuen din senipa ziyà te peliǥuy he sepulù he vaney is keluag din. Is divavew he vahin menge 20 he ǥiek kuwedradu, ne menge pitu he ǥiek is ketikang din, ne kayi edtutunga is menge pemuhat. Duen diyà te heepat he suyuk kayi he henduen be te sungey. Ne zuen kayi heǥezan diyà te vahin kayi he zapit te edsilaan.” 
\p  
\v 18 Migkaǥi pa haazà is laǥeng kayi te kedì te, “Sikew is etew, iyan heini migkaǥi te Nengazen he MEGBEVAYÀ: Emun egkepasad en haazà is pemuhatà, ne ibpehinungud haazà pinaaǥi te kebpemuhat te menge pemuhat he edtutungen wey kebpirik te lengesa te menge uyaǥen he ibpemuhat. Iyan heini menge sulunuzen he para zutun he andew.  
\v 19 Is menge memumuhat he ebpenilbi kedì, he ebpuun te tribu ni Levi he menge kevuwazan ni Zadok, ebeǥayan te turiti he vaka he ibpemuhat dan he pemuhat he para idlumpiyu.  
\v 20 Kuwa ka te lengesa he ebpuun kayi ne ipalis nu zuen te heepat he sungeysungey ziyà te menge suyuk duen te pemuhatà wey ziyà te menge suyuk te ikezuwa he huntù duen te pemuhatà wey ziyà te senipa zin. Pinaaǥi kayi egkelumpiyuwan haazà is pemuhatà.  
\v 21 Ne kuwaa nu sikan is turiti he vaka he pemuhat he para idlumpiyu, ne tutunga nu heini ziyà te tutungà he ziyà te ǥawas te valey te \sc Nengazen\sc*.  
\v 22 Dutun te ikezuwa he andew ne pemuhat ka te meemahan he kambing he wazè din sazir he pemuhat he idlumpiyu zuen te pemuhatà, iring te mibeelan nu zuen te turiti he vaka.  
\v 23 Kegkepasad kayi, ne kuwa ka te sevaha he turiti he vaka wey sevaha he kerehidu he pudu wazè dan sazir,  
\v 24 ne ipemuhat nu heini ziyà te etuvangan te \sc Nengazen\sc*. Ebpirikan heini te menge memumuhat te timus ne ibpemuhat dan heini he pemuhat he edtutungen. 
\p  
\v 25 “Kada andew seled te sengesimana, pemuhat ka te sevaha he meemahan he kambing, sevaha he turiti he vaka, wey sevaha he kerehidu he pudu wazè dan sazir he pemuhat he para idlumpiyu.  
\v 26 Pinaaǥi kayi egkelumpiyuwan haazà is pemuhatà ne egkehimu en he egemiten.  
\v 27 Ne kegkepasad kayi, zutun te ikewalu he andew, ebpemuhat en dutun te pemuhatà is menge memumuhat te menge pemuhat niw he edtutungen wey menge pemuhat he para te meupiya he kedepità. Ne edewaten ku sikiyu. Iyan a, is Nengazen he MEGBEVAYÀ, is migkaǥi kayi.” 
\c 44  
\s1 Is menge Sulunuzen diyà te Baley te \sc Nengazen\sc* 
\p  
\v 1 Miduma a umana zuen te etew ziyà te ǥawas he veyeey zuen te valey te \sc Nengazen\sc*, he ebpekesinaru ziyà te edsilaan, piru siradu heini.  
\v 2 Migkaǥi is \sc Nengazen\sc* kayi te kedì te, “Heini he veyeey kinahanglan he layun siradu. Kenà heini ebpuwasan su para wazà ebpekevayà kayi, su siak is \sc Nengazen\sc* he Megbevayà te Israel, kayi a mebayà.  
\v 3 Iyan dà is pengulu te Israel egkehimu he ebpinuu kayi he veyeey para te kegkaan te impemuhat kayi te kedì, piru kinahanglan he ziyà sikandin ebayà te varkun te veyeey emun edseled, ne zutun ded daan sikandin mebayà emun egawas en.” 
\p  
\v 4 Ne miduma a zuen te etew ziyà te egkesinaruwan duen te valey te \sc Nengazen\sc*. Ne ziyè key mebayà te veyeey he zapit te zizaya. Ne zutun neehè ku is mekeǥeǥehem he kebpekiduma te \sc Nengazen\sc* he nekeeneb dutun te valey zin, ne segugunà a midlangkeb.  
\v 5 Migkaǥi pa is \sc Nengazen\sc* kayi te kedì te, “Sikew is etew, timan-i nu wey purungi nu pemineǥa is egkeǥiyen ku ziyà te kenikew mehitenged te langun he sulunuzen bahin te valey ku. Kinahanglan he egketuenan nu ke hentei is ereg he edseled duen te valey ku wey is kenà ereg he edseled kayi.  
\v 6 Keǥiyi nu is mesinupaken he menge etew te Israel, he iyan a is Nengazen he MEGBEVAYÀ migkaǥi te, ‘He menge etew te Israel, engkezi niw en is langun he utew mezaat he menge vaal niw.  
\v 7 Impeseled niw ziyà te valey ku is kenà menge Israilihanen he wazà medtuu te Megbevayà. Pinaaǥi kayi midremerikan niw is baley ku zutun te kebpemuhat niw te keenen, tavà te uyaǥen, wey lengesa. Gawas te utew mezaat he menge vaal niw midrapas niw pa is paaǥi ku te kebpekidepità keniyu.  
\v 8 Iyan kew man pezem ereg he edumala te segradu he menge azen ku ziyà te valey ku, ne selakew is impezumala niw.  
\v 9 Umbe siak is Nengazen he MEGBEVAYÀ, iyan egkeǥiyen ku is: is menge etew he kenà Israilihanen, kenè ku idtugut he mekeseled sikandan diyà te valey ku, minsan is kenà menge Israilihanen he mid-ubpà duma keniyu.’ 
\p  
\v 10 “Mehitenged te menge kevuwazan ni Levi he mid-awà kayi te kedì su mibpekiduma te zuma he menge Israilihanen te ked-azap te menge ed-ezapen dan, ebpekaantus sikandan tenged te menge salè dan.  
\v 11 Egkehimu he ebpenilbi sikandan diyà te valey ku pinaaǥi te kebantey te ǥemawan wey kedlapà te menge pemuhat he edtutungen wey zuma pa he menge ibpemuhat te menge etew. Wey egkehimu ke ebpenilbi sikandan te menge etew ziyà te valey ku.  
\v 12 Ne geina te nenilbi sikandan te menge etew te kebpenilbi he para te zuma he menge ed-ezapen dan, ne tenged kayi nekevaal te salà is menge etew te Israel, ibpenangdù ku he ebpekaantus dan tenged te salè dan. Iyan a, is Nengazen he MEGBEVAYÀ, is migkaǥi kayi.  
\v 13 Puun guntaan ne kenè ku en sikandan edtuǥutan te kebpenilbi kediey pinaaǥi te kegkememumuhat dan. Kenà daan sikandan ebpekesamsam te segradu he menge azen ku etawa segradu he menge pemuhat para kedì. Kinahanglan he ebpekaantus dan te kegkeeled tenged te menge vaal zan.  
\v 14 Edhimuwen ku zà sikandan he menge umuuǥup te langun he menge vuluhaten diyà te valey ku. 
\p  
\v 15 “Piru is menge memumuhat he ebpuun diyà te tribu ni Levi he menge kevuwazan ni Zadok he metinumanen he nenilbi kedì diyà te valey ku hein mid-awà kayi te kedì is menge Israilihanen, nenilbi zan mulà kedì. Iyan sikandan egkehimu he ebpemuhat kedì te tavà wey lengesa te uyaǥen. Iyan a, is Nengazen he MEGBEVAYÀ, is migkaǥi kayi.  
\v 16 Iyan dà sikandan ebpekeseled diyà te valey ku wey ebpekeuvey ziyà te pemuhatà he para kediey te kebpenilbi kedì. Iyan dà sikandan ebpekevaal te ebpeveelan ku ziyà te valey ku.  
\v 17 Emun edseled sikandan diyà te veyeey pehendiyà te seled he lama zuen te valey ku, kinahanglan he ebivisti sikandan te linu. Kenà sikandan mebivisti te welin emun ebaal sikandan te vuluhaten diyà te seled he lama etawa ziyà te seled te valey ku.  
\v 18 Kinahanglan he edtetengkulu sikandan te linu wey edsun-ud te pendizalem he visti he linu ǥihapun. Kenà sikandan medsun-ud te minsan hengkey he ebpekeperimuseng kandan.  
\v 19 Emun egawas sikandan diyà te ǥawas he lama he zutun is menge etew, kinahanglan he edluwasen dan dèpa is menge visti he migamit dan dutun te kebpenilbi zan ne idsavuk dan diyà te segradu he menge ruǥu, ne mebivisti zà sikandan te urdinaryu. Pinaaǥi kayi kenà ebpekezezaat te menge etew is kegkesegradu zuen te menge visti zan. 
\p  
\v 20 “Kinahanglan he kenà sikandan mebpevangul wey mebpemelayat te vulvul, kekenà, layun dan dà heini peeluti.  
\v 21 Kinahanglan daan he kenà sikandan med-inum te vinu emun edseled en sikandan duen te seled he lama.  
\v 22 Kenà daan egkehimu ke ebpengesawa sikandan te valu etawa vahi he midsuwayan te esawa zin. Is egkehimu he ed-esewaan dan, iyan dà is bahi he wazè pa mekeremaǥi he ebpuun diyà te kevuwazan te menge Israilihanen etawa nevalu he menge esawa te menge memumuhat.  
\v 23 Kinahanglan he ebpenuruen dan is menge etew ku ke hengkey is segradu wey ke hengkey is kenà segradu, ke hengkey is lumpiyu wey meremerik.  
\v 24 Emun duen egkesemberewaanan, iyan is menge memumuhat edhitindeg he menge menhuhukum ne iveǥey zan is kukuman he ibpesikad diyà te kesuǥuan ku. Kinahanglan he edtumanen dan is menge suǥù ku wey menge sulunuzen bahin te menge pista he ibpetuman ku; kinahanglan he ed-isipen dan he segradu he andew is Andew te Kedhimeley.  
\v 25 Is memumuhat kinahanglan he kenè din remeriki is keugelingen din pinaaǥi te ked-uvey te minatey gawas ke is minatey amey zin etawa iney zin, etawa suled din he maama, etawa etevey zin he wazè din pa esawa.  
\v 26 Emun ebpekesamsam dan te minatey, kinahanglan he mebpekelumpiyu sikandan wey medtaǥad dan te pitu he andew,  
\v 27 ne emun edseled en sikandan diyà te seled he lama zuen te valey ku te kebpenilbi zutun, ne kinahanglan he ebpemuhat dèpa sikandan te pemuhat he idlumpiyu para te keugelingen dan. Iyan is Nengazen he MEGBEVAYÀ, migkaǥi kayi.” 
\p  
\v 28 Mibpedayun megkaǥi is \sc Nengazen\sc* te, “Wazà tanà he egkepengevilin te menge memumuhat te Israel, su iyan a mismu ebeǥey te menge kinahanglan dan.  
\v 29 Is keenen dan ne ziyà ebpuun te menge pemuhat he para gasa, menge pemuhat he para idlumpiyu, wey menge pemuhat he vayad te salà. Ne is menge azen he mibpeveyveyaan en kedì ne egkehimu zaan he kandan.  
\v 30 Is kineupiyahan te egkehuna he menge sebpet niw wey is ispisyal he menge gasa kayi te kedì, diyà daan ebpekepevayà te menge memumuhat. Beǥayi niw zaan te kineupiyahan he herina niw is menge memumuhat, su wey metuvazi is pemilya niw.  
\v 31 Kinahanglan he kenà egkaan is menge memumuhat te minsan hengkey he tagbis etawa uyaǥen he minatey etawa midhimetayan te zuma he langgam.” 
\c 45  
\s1 Is Kebehina te Tanà 
\p  
\v 1 Migkaǥi pa is \sc Nengazen\sc* te, “Emun ebehinen niw en is tanà diyà te kada tribu te Israel, sivayi a keniyu te kedì he vahin he ispisyal he gasa he is keleyatan din 12 he kilumitru ne sepulù he kilumitru is keluaǥan din. Heini he tanà ed-isipen he segradu.  
\v 2 Sivey kew kayi he tanà te 875 he ǥiek kuwedradu, he ebpehitindeǥan te valey ku, is peliǥuy kayi te valey ku edhimuwen he bekanti is 87 he ǥiek is keluag din.  
\v 3-4 Is ketengà te tanà he para kediey, ne 12 he kilumitru is keleyatan din ne lelima he kilumitru is keluaǥan din, idsivey heini he para te menge memumuhat he ebpenilbi kediey ziyà te valey ku. Ebengunan heini te menge valey zan wey te valey ku he iyan kes Utew Segradu he Lugar.  
\v 5 Is ketengà kayi he tanà ne 12 he kilumitru is keleyatan din ne lelima he kilumitru is keluaǥan din gaked te menge Levihanen he umuuǥup te menge memumuhat diyà te valey ku. Ed-engkenen dan heini su para zuen dan menge inged he egkeubpaan. 
\p  
\v 6 “Ne ziyà te avey te tanà he para kediey, sivey kew te tanà he 12 he kilumitru is keleyatan din ne zezuwa wey tengà he kilumitru is keluaǥan din. Ebeelan heini he inged he zutun egkehimu he ebpekeubpà is minsan hentei he Israilihanen.  
\v 7 Edsivayan daan te zezuwa he vahin te tanà is pengulu te Israel. Is senge vahin, diyà ibpepuun te zapit te edsenlepan he zulunà duen te tanà he para kediey wey te tanà he ebeelan he inged pehendiyà te Zaǥat he Mediteraneo, ne is senge vahin pa ibpepuun diyà te zapit te edsilaan he zulunà pehendiyà te Wahig he Jordan. Is dulunà kayi zapit te edsilaan wey edsenlepan ne repeng te zulunà te tanà he mibahin te menge tribu te Israel.  
\v 8 Heini he tanà, iyan egkehimu he vahin te pengulu te Israel. 
\s1 Is menge Kesuǥuan para te menge Pengulu te Israel 
\p “Kenè en maan luplupiǥa te menge pengulu ku is menge etew ku. Tuǥuti zan is menge etew te Israel te ked-angken te tanà he imbahin kandan te kada tribu zan.  
\v 9 Su iyan a is Nengazen he MEGBEVAYÀ, migkaǥi: Sikiyu is menge pengulu te Israel, subre en is mibeelan niw! Engkezi niw en is kebpenggulpi niw wey kebpendaagdaag, ne veeli niw is metazeng wey hustu. Kenè niw en eǥawi te tanà is menge etew ku.  
\v 10 Gemita niw is hustu he timbangan, tekesà, etawa sukuzà.  
\v 11 Is ‘homer’ iyan ereg he ebesiyan te kedtakes te kezakel. Is senge ‘homer’ sepulù he ‘ipa’ etawa sepulù he ‘bat’.  
\v 12 Is ‘shekel’ iyan ereg he ebesiyan te kedsukud te keveǥat. Is senge ‘shekel’ 20 he ‘giras’ wey 60 he ‘shekel’ ne senge ‘mina’. 
\s1 Is Mehitenged te Pemuhat wey Ispisyal he menge Andew 
\p  
\v 13-14 “Iyan heini menge pemuhat he ereg he ibeǥey niw ziyà te menge pengulu te Israel: Ike-60 he vahin te sebpet niw he trigu wey barli, ike-100 he vahin te lana niw he ulibu (Is ebesiyan te kedtekesa kayi iyan is ‘bat’ is sepulù he ‘bat’ senge ‘homer’ etawa senge ‘cor’,)  
\v 15 wey sevaha he kerehidu ziyà te kada 200 he ebpuun diyà te menge uyaǥen niw. Menge pemuhat heini he gasa, menge pemuhat he edtutungen, wey menge pemuhat he para te meupiya he kedepità su wey kew mevelukasi tenged te menge salè niw. Iyan a, is Nengazen he MEGBEVAYÀ, is migkaǥi kayi.  
\v 16 Is langun he menge Israilihanen med-uwit keniyan he menge pemuhat su wey meǥamit te pengulu te Israel.  
\v 17 Ketengdanan te pengulu is kebeǥey te menge pemuhat he edtutungen, pemuhat he para gasa, pemuhat he inumen, pemuhat he para idlumpiyu, wey pemuhat he para te meupiya he kedepità dutun te timpu te menge pista iring te Pista te Kebpuun te Hayag, menge Andew te Kedhimeley, wey zuma pa he menge pista he edsilibrahan te menge Israilihanen. Ibpemuhat heini he menge pemuhat su wey mevelukasi is menge Israilihanen tenged te menge salè dan.” 
\s1 Is menge Pista 
\r (Exodus 12:1-20; Leviticus 23:33-43) 
\p  
\v 18 Migkaǥi pa is Nengazen he MEGBEVAYÀ te, “Te egkehuna he andew te egkehuna he vulan pemuhat kew te turiti he vaka he wazè din sazir su wey melumpiyuwi is baley ku.  
\v 19 Ne egkuwa is memumuhat te lengesa kayi he pemuhat he para idlumpiyu ne ebpelisan din is marku te ǥemawan te valey ku, is heepat he suyuk duen te pemuhatà, wey marku te pultahan duen te seled he lama.  
\v 20 Iyan ded heini veeli niw zutun te ikepitu he andew te iyan ded gihapun he vulan he para te minsan hentei he nekesalà he wazè din tivevaa etawa nekesalà he wazè din metueni. Pinaaǥi kayi egkelumpiyuwan is baley ku. 
\p  
\v 21 “Dutun te ike-14 he andew te egkehuna he vulan, silibraha niw is Pista te Kedlavey te Belinsuǥuen. Silibraha niw heini seled te pitu he andew, ne kaan kew zà te supas he wazè din tapey.  
\v 22 Dutun te egkehuna he andew te kedsilibra niw, mebpemuhat is pengulu te turiti he vaka te pemuhat he para idlumpiyu kandan wey te langun he menge Israilihanen.  
\v 23 Kada andew seled te pitu he andew zutun te kedsilibra niw, ne mebpemuhat kayi te kedì is pengulu te pitu he turiti he vaka wey pitu he meemahan he kerehidu he wazè din sazir he pemuhat he edtutungen. Mebpemuhat daan sikandin te sevaha he meemahan he kambing he pemuhat he para idlumpiyu.  
\v 24 Is kada turiti he vaka wey kada meemahan he kerehidu he ibpemuhat, duen idlapik kayi he pemuhat he gasa, he menge liwazà te saku he herina is kezekelè din wey sengegelun he lana te ulibu.  
\v 25 Mebpemuhat daan is pengulu zutun te Pista te Kebaal te menge Lawig, he ebpuunan te ike-15 he andew te ikepitu he vulan. Ne seled daan te pitu he andew, ebpemuhat is pengulu te iring ded te menge pemuhat he ibpemuhat din emun Pista te Kedlavey te Belinsuǥuen: menge pemuhat he para idlumpiyu, menge pemuhat he edtutungen, menge pemuhat he para gasa, wey lana.” 
\c 46  
\p  
\v 1 Migkaǥi pa is Nengazen he MEGBEVAYÀ te, “Is beyeey pehendiyà te seled he lama he ebpekesinaru ziyà te edsilaan, kinahanglan he siradu seled te heenem he andew he iyan timpu te kedterebahu, piru ed-ebriyan heini emun Andew te Kedhimeley wey emun Pista te Kebpuun te Hayag.  
\v 2 Is pengulu ziyà ebayà te veyeey he ebpekesinaru ziyà te edsilaan, ne edhitindeg sikandin diyà te avey zuen te pultahan dutun te ebpemuhat is menge memumuhat te pemuhat he edtutungen wey te pemuhat din he para te meupiya he kedepità. Dutun te pultahan ed-azap is pengulu ne kegkepasad kayi egawas sikandin, piru haazà is pultahan kenà edlekevan te taman te mezukilem.  
\v 3 Kada Andew te Kedhimeley wey kada Pista te Kebpuun te Hayag, is menge etew te Israel, ne med-azap daan kedì dutun te egkesineruwan te ǥemawan.  
\v 4 Kada Andew te Kedhimeley, mebpemuhat is Pengulu kayi te kedì te sevaha he meǥurang en he kerehidu he meemahan wey heenem he nati he kerehidu he wazè din sazir he ibpemuhat he edtutungen.  
\v 5 Is pemuhat he para gasa he idlapik duen te meǥurang en he kerehidu, ne liwazà te saku he herina, piru sumalè en is egkeusatan duen te pengulu he kezekelà te herina he idlapik din duen te kada nati he kerehidu. Is kada liwazà te saku he herina he idlapik din duen te menge pemuhat he kerehidu, mebpemuhat daan sikandin te sengegelun he lana te ulibu. 
\p  
\v 6 “Kada Pista te Kebpuun te Hayag mebpemuhat is pengulu: sevaha he turiti he vaka, sevaha he meǥurang en he kerehidu, wey heenem he nati he kerehidu he meemahan he pudu wazè dan sazir.  
\v 7 Is pemuhat he para gasa he idlapik duen te pengulu ziyà te turiti he vaka wey ziyà te meemahan he kerehidu he meǥurang en ne tig liwazà te saku he herina, piru sumalè en is egkesuatan din he kezekelà te herina he idlapik din diyà te kada nati he kerehidu. Te kada tengà te saku he herina he idlapik din te menge pemuhat he uyaǥen, mebpemuhat daan sikandan te sengegelun he lana ha ulibu.  
\v 8 Emun edseled is pengulu su ebpemuhat, kinahanglan he ziyà sikandin ebayà te varkun te veyeey, ne zutun daan sikandin megawas. 
\p  
\v 9 “Emun ed-ezapen a ziyà he valey ku te menge etew te Israel zutun te timpu te menge pista, is edseled he ziyà ebayà te veyeey he zapit te zizaya kinahanglan he ziyà mebayà te veyeey he zapit te zivavà emun egawas en, ne is edseled diyà te zivavà kinahanglan he ziyà egawas te zizaya. Wazà medseled wey megawas he zutun ded ebayà te imbayè din te kedseled din, kinahanglan he ziyà sikandin mebayà te zivaluy emun diyà sikandin mebayà te zivaluy zutun te kedseled din.  
\v 10 Edredsà kandan is pengulu te kedseled wey kegawas. 
\p  
\v 11 “Dutun te timpu te nekedseselekawà he menge pista, is pemuhat he para gasa he idlapik te turiti he vaka wey te meǥurang he kerehidu, tig liwazà te saku he herina piru sumalè en is egkesuatan duen te ebpemuhat ke sengemenu kezekelà is idlapik din he herina ziyà te kada nati he kerehidu. Is kada liwazà te saku he herina he idlapik din te pemuhat he uyaǥen, lepiki zin te sengegelun he lana te ulibu.  
\v 12 Emun ebpemuhat is pengulu te pemuhat he edtutungen etawa pemuhat he para te meupiya he kedepità he keugelingen he suat is kebpemuhata zuen, ebpuwasan para kandin is beyeey he ebpekesinaru ziyà te edsilaan, ne ebpemuhat sikandin te menge pemuhat he iring te kebpemuhat din emun Andew te Kedhimeley. Ne emun ebpekeǥawas en sikandin edlekevan en haazà is pultahan. 
\p  
\v 13 “Kada meselem, kinahanglan he zuen ibpemuhat kayi te kedì he kerehidu he menge senge-tuig is keǥurang din he wazè din sazir he pemuhat he edtutungen.  
\v 14 Idlapik kayi te kerehidu is pemuhat he para gasa he heepat he kilu he herina, wey senge litru he lana te ulibu he para idsahug te herina. Heini he sulunuzen is mehitenged te pemuhat he para gasa kinahanglan he edtumanen taman te taman.  
\v 15 Umbe kada meselem, kinahanglan he zuen ibpemuhat kayi te kedì he kerehidu, herina, wey lana te ulibu he andew-andew he pemuhat he edtutungen.” 
\p  
\v 16 Mibpedayun pa megkaǥi is Nengazen he MEGBEVAYÀ te, “Emun ebeǥey ziyà te sevaha te menge anak din is pengulu, te tanà he ebpuun diyà te nepengevilin din, heeyan he tanà iyan dà ebpekaangken duen is menge kevuwazan din taman te taman.  
\v 17 Piru emun diyè din ibeǥey heini te sevaha te menge suluǥuen din, egkaangken heini zutun te suluǥuen taman dà te midtail he Tuig te Kebeǥey te Bayàbayà wey Ked-ulì. Dutun he tuig id-ulì din haazà is tanà diyà te pengulu. Iyan dà is menge anak te pengulu egkehimu he ebpekaangken te tanè din taman te taman.  
\v 18 Is pengulu, kinahanglan he kenè din penguwaa is tanà te menge etew. Emun ebeǥey sikandin te tanà diyà te menge anak din, kinahanglan he kandin dà he tanà is iveǥey zin, su wey kenà mewezai te tanà is menge etew ku.” 
\p  
\v 19 Hein nepasad haazà miduma a zuen te etew ziyà te segradu he ruǥu te menge memumuhat he ebpekesinaru ziyà te zivavà. Diyè key mebayà te pultahan he kilid te veyeey. Dutun impeehè din kedì is sevaha he lugar he zapit te edsenlepan dutun he menge ruǥu.  
\v 20 Migkeǥiyan e zin te, “Kayi he lugar edlutù is menge memumuhat te pemuhat he vayad te salà, pemuhat he para idlumpiyu, wey pemuhat he para gasa. Kayi zan heini edlutua su wey zan melikayi is ked-uwita zuen te menge pemuhat diyà te ǥawas he lama. Pinaaǥi kayi kenà ebpekezezaat te menge etew is kegkesegradu zuen te menge pemuhat.” 
\p  
\v 21-22 Ne midume e zin diyà te ǥawas he lama, ne impeehè din kedì is heepat he suyuk kayi. Diyà te kada suyuk duen ku naahà he zeisey he lama he 68 he ǥiek is keleyatan din ne 50 he ǥiek is keluaǥan din. Neked-iiring is kezekelà kayi he menge lama.  
\v 23 Is kada sevaha kayi, neliǥuy te mevavà he verengbeng he menge vatu ne ziyà te kilid dutun te verengbeng he zuen duen tetevunà.  
\v 24 Ne migkaǥi haazà is etew kayi te kedì te, “Iyan heini avu he kayi edlutua te menge ebpemenilbi ziyà te valey te \sc Nengazen\sc* is menge pemuhat te menge etew.” 
\c 47  
\s1 Is Wahig he Edtudà puun te Baley te \sc Nengazen\sc* 
\p  
\v 1 Ne miduma a zuen te etew pelikù diyà te ǥemawan te valey te \sc Nengazen\sc*, ne zutun duen neehè ku he wahig he edtudà pehendiyà te edsilaan he ebpuun diyà te zizalem te ǥemawan te valey te \sc Nengazen\sc*. (Is baley te \sc Nengazen\sc*, nekesinaru ziyà te edsilaan.) Mibelikùkù haazà is wahig diyà te zapit te egkekewanan he kilid te pemuhatà, dapit te zivavà kayi.  
\v 2 Ne miduma a zuen te etew ziyà te ǥawas duen te valey te \sc Nengazen\sc*. Diyè key mebayà te veyeey he zapit te zizaya. Ne inliǥuy e zin diyà te ǥawas pehendiyà te veyeey he zapit te edsilaan. Dutun neehè ku is wahig he edtudà he ebpuun diyà te zapit te zizaya zuen te veyeey.  
\v 3 Midhipanew key zuen te etew pehendiyà te edsilaan he veyvey te wahig, ne edsigudu en sikandin edsukud. Ne hein 1,700 en he ǥiek is keziyù te nehipenawan dey, ne imperapas e zin te wahig he taman pa te lenglenguan te menge paa ku.  
\v 4 Midlaus en maan medsukud sikan is etew te 1,700 he ǥiek ne impeuman e zin iperapas diyà te renged te netemanan din ne taman te vuel ku haazà. Ne midsukud pa sikandin te 1,700 he ǥiek ne impeuman e zin iperapas diyà te wahig he renged te netemanan din ne taman te hawak ku.  
\v 5 Ne midlaus pa mesukud te selakew en he 1,700 he ǥiek, ne kenè ku en egketegkad is wahig he renged din su utew en mezalem. Kinahanglan en heini he ed-emperasen. 
\p  
\v 6 Migkeǥiyan a zuen te etew te, “Sikew is etew, purungi nu timan-i is neehè nu.” Ne midume e zin te kedlikù he ziyè key mebayà te kilid duen te wahig.  
\v 7 Ne zutun te kebayè dey zutun ne zuen ku naahà he mezakel he menge kayu ziyà te pesikilizà te pangpang.  
\v 8 Ne migkaǥi sikandin kayi te kedì te, “Heini he wahig edtudà pehendiyà te tanà diyà te edsilaan petupang diyà te Araba pehendiyà te Daǥat he Minatey. Ne ebmeupiyè en is taam te Daǥat he Minatey, ne kenè en mepait.  
\v 9 Minsan hendei is egketudaan kayi zuen duen mahabet he menge isdà wey zuma pa he uuyag he menge linimbag diyà te wahig, su ibpemeupiya kayi is taam te timusen he wahig.  
\v 10 Mahabet is ebpengisda diyà te Daǥat he Minatey he ebpemuun diyà te En Gedi pehendiyè en te En Eglaim. Is beyvey egkeeneb te puket he igkagkag. Egkeiring te Zaǥat he Mediteraneo is Daǥat he Minatey su ebmahabet kayi is nekedseselekawà he menge isdà.  
\v 11 Piru is menge wahig diyà te peliǥuy kayi ne kenà egkaawà is timus duen su para zuen egkekuwaan te timus te menge etew.  
\v 12 Edtuvù diyà te pesikilizà duen te wahig he edtudà is nekedseselekawà he menge kayu he ebpemeǥas. Kenà egkeǥangu is menge zahun dan wey kenà egkaamin is menge veǥas dan. Ebpemeǥas heini kada vulan su edtudaan man duen te wahig he ebpuun diyà te valey te \sc Nengazen\sc*. Egkekaan is menge veǥas dan ne igkevawi is menge zahun dan.” 
\s1 Is menge Zulunà te Tanà 
\p  
\v 13 Migkaǥi is Nengazen he MEGBEVAYÀ te, “Iyan heini menge zulunà te tanà he ebehinen niw ziyà te 12 he menge tribu te Israel he egkepengevilin dan. Beǥayi niw te zezuwa he vahin is tribu ni Jose.  
\v 14 Kinahanglan he ped-iiringa niw te ebahin is tanà, su nenangdù a ziyà te menge kepuun niw he ibeǥey ku heini kandan ne egkehimu heini he kevilin niw.  
\v 15 Iyan heini menge zulunà: 
\p “Is dulunà diyà te zizaya, ebpuun diyà te Zaǥat he Mediteraneo pehendiyà te Hetlon, pehendiyà te Lebo Hamat, pehendiyà te Zedad,  
\v 16 pehendiyà te Berota, pehendiyà te Sibraim he ziyà te dulunà te Damascus wey Hamat, taman te Hazer Haticon he ziyà te zulunà te Hauran.  
\v 17 Umbe, is dulunà diyà te zizaya ebpuun diyà te Zaǥat he Mediteraneo taman te Hazar Enan, he ziyà te zulunà te Damascus wey Hamat he ziyà te zizaya. Iyan heini dulunà diyà te zizaya. 
\p  
\v 18 “Is dulunà diyà te zapit te edsilaan ebpuun diyà te zulunà te Hauran wey Damascus pehendiyà te Wahig he Jordan he iyan mibpedsivey te tanà he Gilead wey tanà he Israel pehendiyà te Daǥat he Minatey taman te Tamar. Iyan heini zulunà diyà te edsilaan. 
\p  
\v 19 “Is dulunà diyà te zivavà ebpuun diyà te Tamar pehendiyà te serebseb te Meriba Kadesh edlaus diyà te zal-ug te Ehipto taman te Zaǥat he Mediteraneo. Iyan heini zulunà diyà te zivavà. 
\p  
\v 20 “Is dulunà diyà te edsenlepan iyan mismu is Daǥat he Mediteraneo taman diyà te lugar he atbang te Lebo Hamat. Iyan heini zulunà diyà te edsenlepan. 
\p  
\v 21 “Behina niw heini is tanà diyà te kada tribu niw.  
\v 22 Kevilin niw heini wey te kenà menge Israilihanen he mid-ubpà duma keniyu he neetew ziyà te Israel is menge anak dan. Isipa niw sikandan he menge Israilihanen iring keniyu, ne vehini niw zaan sikandan te kevilin he tanà te tribu te Israel.  
\v 23 Ke hentei ki tribu is mid-emuran dan, ne zutun daan sikandan ebeǥayi te tanà he kandan he vahin. Iyan a, is Nengazen he MEGBEVAYÀ, is migkaǥi kayi.” 
\c 48  
\s1 Is Kebevehina zuen te Tanà diyà te menge Tribu 
\p  
\v 1 Iyan heini lista te menge tribu te Israel wey is menge tanà he egkaangken dan: 
\p Is tanà te tribu ni Dan ne ziyà te zizaya. Is dulunà kayi ebpuun diyà te Hetlon pehendiyà te Lebo Hamat taman te Hazar Enan he ziyà te zulunà te Damascus wey Hamat diyà te zizaya. Is keluag te tanà te tribu ni Dan, ebpuun diyà te edsilaan taman te zapit te edsenlepan te Israel. 
\p  
\v 2 Is tanà te tribu ni Asher ne ziyà te zivavà he vahin te tanà te tribu ni Dan, ne is keluag kayi, ebpuun diyà te edsilaan taman te zapit te edsenlepan te Israel. 
\p  
\v 3 Is tanà te tribu ni Naftali ne ziyà te zizaya he vahin te tanà te tribu ni Asher, ne is keluag kayi, ebpuun daan diyà te edsilaan taman te zapit te edsenlepan te Israel. 
\p  
\v 4 Is tanà te tribu ni Manase ne ziyà te zivavà he vahin te tanà te tribu ni Naftali, ne is keluag kayi, ebpuun daan diyà te edsilaan taman te zapit te edsenlepan te Israel. 
\p  
\v 5-7 Is edsunud pa he menge tanà iyan is gaked te tribu ni Efraim, ni Reuben, wey ni Juda, he is menge keluag kayi ebpuun daan te edsilaan taman te zapit te edsenlepan te Israel. 
\p  
\v 8 Is tanà he ziyà te zizaya te Juda, iveǥey niw ziyà te \sc Nengazen\sc* he ispisyal he gasa. 12 he kilumitru is keleyatan kayi, ne is keluag kayi, ebpuun daan diyà te edsilaan taman te zapit te edsenlepan te Israel iring te ǥaked te zuma he menge tribu te Israel. Is baley te \sc Nengazen\sc* ne edtukuzen diyà te teliwazà kayi he tanà.  
\v 9 Mehitenged duen te tanà he ibeǥey niw ziyà te \sc Nengazen\sc* he ebengunan te valey zin, ne 12 he kilumitru is keleyatan din ne lelima he kilumitru is keluaǥan din.  
\v 10 Is ketengà kayi he tanà ne para te menge memumuhat. Is keleyatan kayi puun te edsilaan pehendiyà te edsenlepan ne 12 he kilumitru, ne is keluaǥan kayi he puun te zizaya pehendiyà te zivavà, ne lelima he kilumitru. Ne ziyà te teliwazà kayi ne zutun is baley te \sc Nengazen\sc*.  
\v 11 Heini he tanà, ne para te pinilì he menge memumuhat, he iyan is menge kevuwazan ni Zadok. Metinumanen sikandan he nenilbi kedì wey wazà med-awà kayi te kedì. Kenà iring te mibeelan te zuma he menge kevuwazan ni Levi he miduma te menge Israilihanen te ked-awà kayi te kedì.  
\v 12-13 Heini he tanà, ne ispisyal he gasa para te menge memumuhat, ne iyan heini utew segradu he tanà. Ne ziyà te avey kayi iyan is tanà he para te zuma he menge kevuwazan ni Levi. Heini is tanà, ne 12 he kilumitru is keleyatan din ne lelima he kilumitru is keluaǥan din.  
\v 14 Kinahanglan he kenè dan ivelegyà etawa iliwà is minsan deisey zà he vahin kayi, su iyan heini utew meupiya he tanà wey segradu heini para te \sc Nengazen\sc*. 
\p  
\v 15 Is egkesamà he tanà he zuen din keleyatan he 12 he kilumitru wey keluaǥan he dezuwa wey tengà he kilumitru, ne para heini mulà te kezekelan. Egkehimu heini he ed-ubpaan te menge etew wey ebpepenebtavan te menge uyaǥen dan. Ne ziyà te teliwazà kayi, ne zutun is inged  
\v 16 he zuen din keluag he zezuwa he kilumitru kuwedradu.  
\v 17 Neliǥuy heini te mehiǥawan he lugar he tig-125 he mitrus kuwedradu.  
\v 18 Diyà te ǥawas te inged duen bevesukà he zuen din keleyatan he lelima he kilumitru pehendiyà te edsilaan wey lelima zaan he kilumitru pehendiyà te edsenlepan. Diyà heini te zulunà te segradu he tanà. Is menge abut kayi he tanà ne para te keenen te edterebahu ziyà te inged.  
\v 19 Is minsan hentei he edterebahu ziyà te inged he ebpuun diyà te nekedseselekawà he tribu te Israel egkehimu he ebasuk kayi he tanà.  
\v 20 Umbe, is tivuuk he tanà he ibeǥey niw ziyà te \sc Nengazen\sc* he ispisyal he gasa, ragkes en is segradu he tanà wey sikan is inged, 12 he kilumitru kuwedradu. 
\p  
\v 21-22 Is egkesamà he menge tanà, diyà te edsilaan wey edsenlepan duen te segradu he tanà wey zuen te inged, ne gaked te pengulu. Is keluag kayi he tanà 12 he kilumitru ne nekeuma heini ziyà te zulunà te Israel ziyà te edsilaan wey edsenlepan. Umbe is diyà te teliwazà te tanà he para te pengulu iyan is segradu he tanè ku, is baley ku, is tanà te menge kevuwazan ni Levi, wey is inged. Is tanà he para te pengulu ziyà te mid-elangan te tanà he para te tribu ni Juda wey te tanà he para te tribu ni Benjamin. 
\p  
\v 23 Iyan heini menge tanà he egkaangken te wazè pa mevehini he menge tribu: 
\p Is tanà te tribu ni Benjamin ne ziyà te egkezivavà te tanà te pengulu, ne is keluag kayi puun te edsilaan taman te edsenlepan te Israel. 
\p  
\v 24 Is tanà te tribu ni Simeon, ne ziyà te egkezivavà te tanà te tribu ni Benjamin, is keluag kayi, ebpuun daan te edsilaan taman te edsenlepan te Israel. 
\p  
\v 25-27 Is edsunud he menge tanà, ne iyan is gaked te tribu ni Isachar, ni Zebulun, wey ni Gad, he is keluag dan, ebpuun daan te edsilaan taman te edsenlepan te Israel.  
\v 28 Is divavà he zulunà te tanà te tribu ni Gad, ebpekeikul te Tamar pehendiyà te menge serebseb te Meriba Kadesh edlaus diyà te zal-ug te Ehipto taman te Zaǥat he Mediteraneo. 
\p  
\v 29 Iyan heini menge tanà he egkezawat te menge tribu te Israel he egkepengevilin dan. Iyan a, is Nengazen he MEGBEVAYÀ, is migkaǥi kayi. 
\s1 Is menge Pultahan te Inged he Jerusalem 
\p  
\v 30-34 Is heepat he verengbeng he nekeliǥuy te inged he Jerusalem, duen din tigtetelu he pultahan. Is menge pultahan diyà te zizaya he verengbeng, ne egngezanan te Reuben, Juda, wey Levi. Is menge pultahan diyà te zapit te edsilaan he verengbeng, egngezanan te Jose, Benjamin, wey Dan. Is menge pultahan diyà te zivavà he verengbeng, egngezanan te Simeon, Isachar, wey Zebulun. Ne is menge pultahan diyà te zapit te edsenlepan, egngezanan te Gad, Asher, wey Naftali. Is kada verengbeng, 2,250 he mitrus is keluǥayad din.  
\v 35 Umbe is tivuuk he keleyatan duen te verengbeng, ne 9,000 he mitrus, ne puun dutun he timpu haazà is inged egngezanan he “Keniyan is \sc Nengazen\sc*!”