\id AMO - mbb OT -Philippines 2014 (DBL -2014) 
\ide 65001 - Unicode (UTF-8) 
\rem Copyright: Kermit Titrud (2012) 
\h Amos 
\toc1 Amos 
\toc2 Amos 
\toc3 Amo 
\mt1 Amos 
\c 1  
\p  
\v 1 Iyan heini menge lalag ni Amos he tig-Tekoa he perevantey te menge kerehidu. Heini he menge lalag, ne mehitenged te Israel. Impezayag heini te Megbevayà diyà te kandin hein dezuwa pa he tuig human egkehitavù is linug, hein timpu he si Uzia iyan hadì diyà te Juda ne si Jeroboam he anak ni Joash iyan hadì diyà te Israel.  
\v 2 Migkaǥi si Amos te, “Edhiniǥer is \sc Nengazen\sc* he ebpuun te Zion; edraǥeb is laǥeng din puun te Jerusalem. Ne tenged kayi nengeǥangu is menge pepenebtavà te menge vantey te menge kerehidu ragkes en is menge pinemula ziyà te puntur te Buntud he Carmel.” 
\s1 Is Silut diyà te Nasyun he Siria 
\p  
\v 3 Iyan heini migkaǥi te \sc Nengazen\sc* mehitenged te Siria: “Tenged te kedtulung kebaal te salà te menge tig-Damascus, edsilutan ku sikandan. Su midsurung dan is menge tig-Gilead he henduen be te midlepiǥis dan te putew.  
\v 4 Umbe, ebinsulan ku is turuǥan ni hadì Hazael wey is melig-en he menge vahin te Damascus he mibpeveelan te anak din he si Ben Hadad.  
\v 5 Ebengkaǥen ku is pultahan te Damascus wey edezeetan ku is menge pengulu ziyà te Suǥud te Aven wey Bet Eden. Ebihaǥen te menge tig-Kir is menge etew ziyà te Aram. Iyan a, is \sc Nengazen\sc*, is migkaǥi kayi.” 
\s1 Is Silut diyà te Nasyun he Filistia 
\p  
\v 6 Iyan heini migkaǥi te \sc Nengazen\sc* mehitenged te Filistia: “Tenged te kedtulung kebaal te salà te menge tig-Gaza, edsilutan ku sikandan. Su zuen menge inged he mibihag dan is tivuuk he menge meǥinged dutun ne imbelegyà dan he menge uripen diyà te Edom.  
\v 7 Umbe, ebinsulan ku is menge verengbeng diyà te Gaza wey is melig-en he menge vahin kayi he inged.  
\v 8 Edezeetan ku is menge pengulu ziyà te Ashdod wey Ashkelon, ne edsilutan ku is menge tig-Ekron. Is menge Filistihanen he ebpekepelaǥuy te silut, ebpematey zaan. Iyan a, is \sc Nengazen\sc* he Megbevayà migkaǥi kayi.” 
\s1 Is Silut diyà te Nasyun he Tyre 
\p  
\v 9 Iyan heini migkaǥi te \sc Nengazen\sc* mehitenged te Tyre: “Tenged te kedtulung kebaal te salà te menge tig-Tyre, edsilutan ku sikandan. Su is langun he meǥinged diyà te menge inged, imbelegyè dan he menge uripen diyà te Edom. Ne wazè dan tumana is neuyunan dan kayi te menge etew he emiǥu zan.  
\v 10 Umbe, ebinsulan ku is menge verengbeng te Tyre wey is melig-en he menge vahin kayi he inged.” 
\s1 Is Silut diyà te Nasyun he Edom 
\p  
\v 11 Iyan heini migkaǥi te \sc Nengazen\sc* mehitenged te Edom: “Tenged te kedtulung kebaal te salà te menge tig-Edom, edsilutan ku sikandan. Su mibpendal-as dan is menge kezuzumahi zan he menge Israilihanen ne wazè dan en mehizuwi te ebpenhimatey. Is menge Israilihanen, kenè egkaawà is pauk kandan te menge tig Edom.  
\v 12 Umbe, ebinsulan ku is Teman wey is melig-en he menge vahin te Bozra.” 
\s1 Is Silut diyà te Nasyun he Ammon 
\p  
\v 13 Iyan heini migkaǥi te \sc Nengazen\sc* mehitenged te Ammon: “Tenged te kedtulung kebaal te salà te menge tig-Ammon, edsilutan ku sikandan. Su midsirian dan is memeǥingey he menge vahi ziyà te Gilead, su wey zan maangken heini he tanà.  
\v 14 Umbe, ebinsulan ku is menge verengbeng diyà te Raba wey is melig-en he menge vahin kayi he inged; dutun ebpengulahì te kulehian te kebpekidtebek is menge kuntada zan he edsurung kandan, he edselenuhug heini iring te vagyu.  
\v 15 Ne ebihaǥen is hadì diyà te Ammon ragkes is menge upisyal zin. Iyan a, is \sc Nengazen\sc*, is migkaǥi kayi.” 
\c 2  
\s1 Is Silut diyà te Nasyun he Moab 
\p  
\v 1 Iyan heini migkaǥi te \sc Nengazen\sc* mehitenged te Moab: “Tenged te kedtulung kebaal te salà te menge tig-Moab, edsilutan ku sikandan. Su mibinsulan dan is menge tulan te hadì te Edom taman te neigmuk heini.  
\v 2 Umbe, ebinsulan ku is Moab ragkes is melig-en he menge vahin te Keriot. Ebpematey is menge tig-Moab dutun te ebpengulahì wey ebpezaǥing te vudyung is menge kuntada zan he edsurung kandan.  
\v 3 Elin ebpatey is hadì dan wey is langun he menge upisyal zin. Iyan a, is \sc Nengazen\sc*, is migkaǥi kayi.” 
\s1 Is Silut diyà te Nasyun he Juda 
\p  
\v 4 Iyan heini migkaǥi te \sc Nengazen\sc* mehitenged te Juda: “Tenged te kedtulung kebaal te salà te menge tig-Juda, edsilutan ku sikandan. Su inselikwey zan is menge kesuǥuan ku wey wazè dan tumana is menge sulunuzen. Neketazin kandan is kebpenilbi zan te zuma he menge ed-ezapen he midsilbiyan daan te menge kepuun dan.  
\v 5 Umbe, ebinsulan ku is Juda ragkes is melig-en he menge vahin te Jerusalem.” 
\s1 Is Silut diyà te Nasyun he Israel 
\p  
\v 6 Iyan heini migkaǥi te \sc Nengazen\sc* mehitenged te Israel: “Tenged te kedtulung kebaal te salà te menge tig-Israel, edsilutan ku sikandan. Su imbelegyè dan he menge uripen is menge etew he wazà mekesalà, tenged dà te utang dan. Mibeelan dan heini ziyà te menge pubri minsan nekeutang dà diyà te kandan te senge paris he sandalyas.  
\v 7 Edèdaaǥen dan is menge pubri wey wazè dan beǥayi te hustu he kukuman. Neulaula ziyà te kandan, he is amey wey is anak din he maama ebpekidhilavet te sevaha zà he vahi. Tenged kayi mibpendezeisey zan is waǥas he ngazan ku.  
\v 8 Edlipezeng dan diyà te lugar he zutun dan edsimba he bivisti te visti he insandà diyà te kandan te menge pubri. Ne ed-iinum dan diyà te valey ku te vinu he imbayad kandan te menge pubri te utang dan.  
\v 9 Piru siak, is mibeelan ku para kandan te menge tig-Israel, iyan heini: mibpendezeetan ku is menge Amorihanen, minsan pa te memelangkew heini he menge etew he henduen be te kayu he sidru wey melig-en iring te kayu he ulayan. Mibpendezeetan ku sikandan taman te wazà nesamà kandan.  
\v 10 Impeǥawas ku zaan is menge kepuun te menge tig-Israel ziyà te Ehipto, ne seled te 40 he tuig is kegiyahi ku kandan diyà te sibsivayan su wey zan maangken is tanà te menge Amorihanen.  
\v 11 Mibpilì ku pa ganì is duma he menge kevuwazan dan wey mehimu he menge ebpeneuven wey menge Nazareo. Kenè be tutuu heini menge tig-Israel?  
\v 12 Piru hengkey is mibeelan niw? Impeinum niw te vinu is menge Nazareo ne mibmenduen niw is menge ebpeneuven he kenè dan keǥiya is menge lalag ku.  
\v 13 Umbe, pemineǥa niw heini: Edhimuwen ku he meveǥati kew iring te kerumata he nepenù te sebpet.  
\v 14 Umbe, minsan is mezesen he ebpelelaǥuy keniyu, ne kenà ebpekepelaǥuy, is mezesen ebmeluya, ne is menge sundaru, kenè dan egkelibri is keugelingen dan.  
\v 15 Minsan is menge perepanà diyà te tebek, ne ebpekeendud. Is menge sundaru he meǥaan he ebpelelaǥuy ne kenà ebpekepelaǥuy, ne is menge pereuntud te kudà ne kenè dan egkelibri is keugelingen dan.  
\v 16 Dutun te andew te kedsiluti ku keniyu, minsan is kinemevurutan he menge sundaru, ebpekepelaǥuy he egkelevasan. Iyan a, is \sc Nengazen\sc*, is migkaǥi kayi.” 
\c 3  
\p  
\v 1 “Sikiyu is menge tig-Israel, he is menge kepuun niw impeǥawas te \sc Nengazen\sc* diyà te Ehipto, pemineǥa niw is menge lalag din he ebpekesuǥat keniyu:  
\v 2 Diyà te langun he menge nasyun kayi te tivuuk he kelibutan iyan kew zà mibpilì ku he mehimu he menge etew ku. Umbe edsilutan ku sikiyu tenged te langun he menge salè niw.” 
\s1 Ketau te \sc Nengazen\sc* is Buluhaten te menge Ebpeneuven 
\p  
\v 3 Ebpezumehè be is dezuwa he etew te kedhipanew emun wazè dan mehuna meuyun?  
\v 4 Edhiniǥer ve is erimaung diyà te ketelunan emun wazè din edewiyen? Edhiniǥer ve sikandin diyà te elesè din emun wazè din nezawi?  
\v 5 Egketuǥesan be is tagbis emun wazà epani is penuǥes? Egkevekas be is penuǥes emun wazè din egkevekasan?  
\v 6 Kenè be egkerkeren te kegkahandek is menge etew emun edaǥing is menge vudyung te kebpesayud he zuen menge kuntada he edsurung? Emun egkeumahan te kezeetan is inged kenè be ketau te \sc Nengazen\sc* is kebpekeuma zutun? 
\p  
\v 7 Benar iyan, wazà minsan hengkey he ebeelan te Nengazen he MEGBEVAYÀ emun wazè din ikehuna ikepezayag diyà te menge suluǥuen din he menge ebpeneuven. 
\p  
\v 8 Hentei man is kenà egkahandek emun edhiniǥer is erimaung? Hentei man is kenà ebpekekaǥi te menge lalag te Nengazen he MEGBEVAYÀ emun iyan en is Nengazen he MEGBEVAYÀ ebpekaǥi kandin? 
\s1 Is Kedhukumi te Megbevayà te Samaria 
\p  
\v 9 Keǥiyi niw is menge pengulu he ed-ubpà diyà te melig-en he menge vahin te Ashdod wey is diyà te Ehipto he medtiǥum sikandan diyà te menge vuntud he nekeliǥuy te Samaria ne ahàa zan is kegubut kayi he inged wey is kedlisliseza te menge meǥinged kayi.  
\v 10-11 Su iyan heini kes migkaǥi te Nengazen he MEGBEVAYÀ he ebpekesuǥat te Samaria: “Kenè dan metau he edtinazeng, ne is melig-en he menge vahin te inged dan, nepenù te menge azen he tinakew wey tinavan. Umbe edsurungen sikandan te menge kuntada zan ne ebpemengkaǥen is menge pengalang dan. Egkuwaan te menge kuntada is menge azen diyà te melig-en he menge vahin te inged dan.” 
\p  
\v 12 Heini pa is migkaǥi te \sc Nengazen\sc*: “Is egkekuwa te vantey te kerehidu zuen te uyaǥen he edeesan te erimaung egkehimu he iyan dà is dezuwa he vuvun etawa sevaha te telinga. Ne iring keniyan is egkehitavù keniyu te menge Israilihanen he menge meǥinged diyà te Samaria; is egkesamà keniyu, iyan dà is menge vahin te mekempet he menge hizeǥaan niw.” 
\p  
\v 13 Migkaǥi is Nengazen he MEGBEVAYÀ, kes Megbevayà he Mekeǥeǥehem, ke sikandin te, “Pemineǥa niw heini is egkeǥiyen ku ne tudtula niw ziyà te menge kevuwazan ni Jacob:  
\v 14 Dutun te andew te kedsiluti ku te menge tig-Israel tenged te menge salè dan, edweǥayen ku is menge pemuhatà diyà te Betel. Epungelen ku is menge sungeysungey te menge suyuk te pemuhatà ne egkengeulug heini ziyà te tanà.  
\v 15 Edrundusen ku is menge valey zan he para te timpu te meǥenew wey menge valey he para te timpu te meinit. Edrundusen ku zaan is mahalen he menge valey zan. Umbe mahabet is menge valey zan he egkengerundus. Iyan a, is \sc Nengazen\sc*, is migkaǥi kayi.” 
\c 4  
\p  
\v 1 Sikiyu is dungganen he menge vahi ziyà te Samaria, iring kew te menge vaka ziyà te Bashan he mibpurungan elimahi. Edèdaaǥen niw wey mibpesipelahan is menge pubri, ne edsuǥuen niw pa is menge esawa niw he uwiti kew zan te inumen. Umbe pemineǥa niw heini is  
\v 2 migkaǥi te \sc Nengazen\sc* he Megbevayà: “Tenged te kegkewaǥas ku ebpenangdù a he egkeuma is andew he ebihaǥen kew te menge kuntada niw ne egkeiring kew te pait he ebunuwiten.  
\v 3 Ibpeǥawas kew zan diyà te inged niw he ziyà ibpevayà te menge vudsi te verengbeng he nevengkag, ne edumahan kew zan diyà te lugar he Harmon. Iyan a, is \sc Nengazen\sc*, is migkaǥi kayi. 
\p  
\v 4 “Sikiyu is menge Israilihanen, hendiyè kew te ed-ezapen niw ziyà te Betel wey Gilgal ne sigudu kew en baal te salà. Uwit kew te pemuhat niw kada meselem wey uwit kew te ikepulù niw kada tetelu he andew.  
\v 5 Tutung kew te supas he midtepayan he pemuhat niw te kebpeselamat kayi te kedì. Sigi, ipahambug niw heeyan ragkes is menge pemuhat niw he keugelingen he suat is kebpemuhata zuen, su iyan man heeyan egkesuatan niw. Iyan a, is Nengazen he MEGBEVAYÀ, migkaǥi kayi. 
\p  
\v 6 “Iyan a mibpaaǥi te vitil ziyà te langun he menge inged niw, piru wazè kew ǥihapun medlikù kayi te kedì. Iyan a, is \sc Nengazen\sc*, is migkaǥi kayi. 
\p  
\v 7 “Iyan a mid-eǥen te uzan te tetelu he vulan human is tiraǥun. Mibpeuzanan ku is duma he menge inged piru is duma wazè ku peuzani. Mibpeuzanan ku is duma he menge pemuleey piru is duma mibmemaza.  
\v 8 Tenged te keluya egkesemsempirey kew en is ebpen-ahà te wahig puun te sevaha he inged pehendiyà te sevaha pa he inged, piru kenà ereg is egkekuwa niw piru wazè kew ǥihapun medlikù kayi te kedì. Iyan a, is \sc Nengazen\sc*, is migkaǥi kayi. 
\p  
\v 9 “Kemahabet ku en dezeeti is menge pemuleey niw pinaaǥi te meinit he keramag wey menge erat. Mid-etaki te terapan is menge kayu niw he higus wey ulibu. Piru wazè kew ǥihapun medlikù kayi te kedì. Iyan a, is \sc Nengazen\sc*, is migkaǥi kayi. 
\p  
\v 10 “Impaaǥi ku ziyà te keniyu is limas iring te impaaǥi ku zengan diyà te Ehipto. Mibpenhimetayan ku is menge vetan-en he menge maama niw pinaaǥi te tebek wey impaaǥew ku is menge kudè niw. Wey impaantus ku sikiyu te kemahù te nemematey ziyà te kampu niw. Piru wazè kew ǥihapun medlikù kayi te kedì. Iyan a, is \sc Nengazen\sc*, is migkaǥi kayi. 
\p  
\v 11 “Midezeetan ku is duma keniyu iring te mibeelan ku ziyà te Sodom wey Gomora. Ne is duma keniyu he nekelingkawas neiring te kayu he midsekelew puun te hapuy. Piru wazè kew ǥihapun medlikù kayi te kedì. Iyan a, is \sc Nengazen\sc*, is migkaǥi kayi. 
\p  
\v 12 “Umbe ed-umanan ku pa ebeeli heini he menge silut diyà te keniyu te menge tig-Israel. Ne ǥeina te ebeelan ku heini, pengandam kew te ked-etuvang kediey te Megbevayè niw.” 
\p  
\v 13 Is Megbevayà, iyan mibaal te menge vuvungan wey midlimbag te keramag, ne iyan daan sikandin edliwan te meselem te mezukilem. Impahayag din diyà te etew is menge pelanu zin, ne iyan sikandin ebayàbayà te tivuuk he kelibutan. Is ngazan din iyan is \sc Nengazen\sc* he Megbevayà he Mekeǥeǥehem. 
\c 5  
\s1 Is Penenawag te Ked-iniyug te Kelelalung 
\p  
\v 1 Menge etew te Israel, pemineǥa niw heini is mekeseseeng he kebpenhulùhulù mehitenged keniyu: 
\q1  
\v 2 Is Israel he iring te vahi he wazè pa mekeremaǥi, nezeetan ne kenè en heini ebpekeuman ebpekeenew. 
\q1 Mibey-anan sikandin diyà te tanè din 
\q1 ne wazè en ebpeenew kandin. 
\p  
\v 3 Umbe, migkaǥi is Nengazen he MEGBEVAYÀ te, “Dutun te 1,000 he menge sundaru he edsuǥuen puun te sevaha he inged te Israel, 100 dà is egkesamà. Ne is edsuǥuen he 100 he menge sundaru, 10 dà is egkesamà.  
\v 4 Umbe, dangep kew kayi te kedì, is menge etew te Israel, su wey kew meuyag-uyag.  
\v 5 Kenè kew en hendiyà te Betel, te Gilgal, etawa te Beersheba te ked-azap. Su siguradu he ebihaǥen is menge etew ziyà te Gilgal, ne egkahanew is Betel.  
\v 6 Sikiyu is menge kevuwazan ni Jose, dangep kew kayi te kediey su wey kew meuyag-uyag. Su emun kenà, ne edsurungen ku sikiyu he iring a te hapuy. Umbe egkezeetan is Betel ne wazè en ebpekeeǥen kayi.  
\v 7 Ne mekehizuhizu kew! Is meupiya wey hustu he kukuman, midhimu niw he mezaat ne wazè niw veliya is metazeng.” 
\p  
\v 8 Is Megbevayà iyan midlimbag te menge grupu te menge vituen he migngezanan te Penikapan wey Belatic. Iyan sikandin mibpedliwà te merusirem wey merayag, wey maandew wey mezukilem. Iyan sikandin midtiǥum te wahig te zaǥat diyà te menge gapun ne ibpeuzan din heini ziyà te tanà. Is ngazan din iyan is \sc Nengazen\sc*.  
\v 9 Kandin he ketau is kegketik-ew kegkezeeti te pengalang te inged, ne edweǥayen din is miberengbeng he inged. 
\p  
\v 10 Sikiyu is menge tig-Israel, egkepeukan niw is edhukum te hustu wey egkaǥi te tutuu ziyà te hukmanan.  
\v 11 Midaagdaag niw is menge pubri ne midteǥel niw he mebeǥey ziyà te keniyu te neraǥun dan. Umbe kenè niw en egkeubpaan is dezekelà he menge valey he mibangun niw, wey kenè kew en ebpekeinum te vinu he ebpuun diyà te impemula niw he menge paras.  
\v 12 Su netuenan ku ke sengemenu kahabet wey ke sengemenu kezekelà is menge salè niw. Edèdaaǥen niw is menge etew he wazà mekesalà ne mibpenepian niw pa. Wazè niw veǥayi te hustu he kukuman diyà te hukmanan is menge pubri.  
\v 13 Umbe, tenged te kezaat te ulaula te menge etew kayi he timpu, is menge etew he nekesavut te egkesuatan te Megbevayà ebpereremek en.  
\v 14 Guntaan, beeli niw is meupiya ne kenà is mezaat su wey kew meuyag-uyag ne ebpekiduma keniyu is \sc Nengazen\sc* he Megbevayà he Mekeǥeǥehem sumalà is egkeǥiyen niw he zuma niw sikandin.  
\v 15 Senggilahi niw is mezaat ne veeli niw is meupiya, ne hukum kew te hustu ziyà te hukmanan. Su kela ke mehizuwi kew zed te \sc Nengazen\sc* he Megbevayà he Mekeǥeǥehem is nengesamà keniyu te menge kevuwazan ni Jose. 
\p  
\v 16 Su iyan heini migkaǥi te \sc Nengazen\sc* he Megbevayà he Mekeǥeǥehem: “Egkeuma is timpu he zuen ebpemenineǥew wey ebpemen-erang diyà te menge zalan niw wey menge pelasa. Is menge perevasuk ibpetawag su wey zan mesineǥawi is menge minatey zuma te menge etew he edsuhulan wey mekesineǥew.  
\v 17 Duen daan ebpemenineǥew ziyà te menge pemuleey niw te paras. Egkehitavù heini ziyà te keniyu su edsilutan ku sikiyu. Iyan a, is \sc Nengazen\sc*, is migkaǥi kayi.” 
\s1 Is Andew te Kedhukum te Megbevayà 
\p  
\v 18 Kehizu niw te edtaǥad te kegkeuma te andew te \sc Nengazen\sc*. Kenè niw isipa he andew heeyan te kegkelibri niw, kekenà, andew heeyan te kedsiluti keniyu.  
\v 19 Egkeiring kew te etew he egkeisip din he nelibri en sikandin su nepeleǥuyan din en is erimaung, piru bir ves is egkesinuǥung din. Etawa egkeisip din he wazè en ebpekekaid kandin su ziyè en sikandin te seled te valey zin, piru ked-ulembè din diyà te elavat ne migkaǥat is belad din te uled.  
\v 20 Benar he is andew te \sc Nengazen\sc* ebpekeuwit te silut ne kenà kelibriyanan; iring heini te merusirem he wazè en duen bulug deisey he kerayag. 
\s1 Is Egkesuatan te Megbevayà he Beeli te menge Etew Zin 
\p  
\v 21 “Egkeepesan ku is menge pista niw; wazè ku ikelipey is menge ketiǥuman niw.  
\v 22 Umbe, minsan uwiti e pa keniyu te nekedseselekawà he menge pemuhat, minsan iyan pa is kineupiyahan he pemuhat, kenè ku heeyan edewaten.  
\v 23 Engkezi niw en is meǥurub he menge kanta niw. Kenà a egkesuat he ebpemineg te sunata te menge alpa niw.  
\v 24 Piru ipeehè niw is hustu he kukuman ne veeli niw is metazeng; kenè niw heini engkezi iring te wahig he kenà ed-engked he edtudà. 
\p  
\v 25 “Sikiyu is menge etew te Israel, hein seled te 40 he tuig diyà te sibsivayan is menge kepuun niw, nemuhat be sikandan kayi te kedì? Wazà!  
\v 26 Ne ǥuntaan edtulungan niw ed-uwita si Sakut, kes ed-ezapen he mid-isip niw he hadì niw, wey si Kaywan, kes ed-ezapen niw he vituen. Mibeelan niw heini he menge ledawan su ed-ezapen niw.  
\v 27 Umbe, ibpevihag ku sikiyu ziyà te hunaan pa te Damascus.” Iyan heini migkaǥi te \sc Nengazen\sc* he migngezanan te Megbevayà he Mekeǥeǥehem. 
\c 6  
\s1 Is Kezeetan te menge Pengulu te Israel 
\p  
\v 1 Kehizu niw te menge pengulu ziyà te Zion wey Samaria, he ebpeeyehey zà he wazà igkeipeng. Mid-isip niw is keugelingen niw he dungganen he menge etew ziyà te lavew he nasyun, ne iyan kew edengepan te menge meǥinged diyà te keniyu.  
\v 2 Egkeǥiyan niw is menge sakup niw te, “Ahaa niw is inged he Calne, wey is dekelà he inged he Hamat, wey is inged he Gat he sakup te Filistia. Hengkey, edhuna ve sikandan he mekeǥeǥehem te ginhedian te Juda wey Israel? Kenà. Edhuna ve he meluag is tanè dan te kenitew? Kenà daan.” 
\p  
\v 3 Kehizu niw su kunaan niw ke kenà egkeuma is andew te kedsiluti keniyu. Tenged te mezaat he vaal niw midhimu niw he meǥaan meuma heeyan is andew he utew ed-iseg is kebpendezaat. 
\p  
\v 4 Kehizu niw te edhidhizeǥè dà diyà te mahalen he menge katri niw, he ebpetakè en egkaan te usa te nati he kerehidu wey impelambù he nati he vaka. 
\p  
\v 5 Kehizu niw te ebaal te menge kanta zutun te edtukar kew te alpa wey susuaten he ebaal te sunata pinaaǥi te menge instrumintu iring ki David. 
\p  
\v 6 Kehizu niw te utew vuleǥuk te vinu wey egamit te mahalen he menge pehemut, piru wazà meseeng te edtelinguma he kezeetan te nasyun niw.  
\v 7 Ne sikiyu is menge pengulu, iyan kew egkehuna he ebihaǥen, ne egketapus en is menge pista niw wey kebpeeyehey. 
\s1 Igkeepes te Megbevayà is Kebpelavew ziyà te Israel 
\p  
\v 8 Nenangdù is Nengazen he MEGBEVAYÀ, kes Megbevayà he Mekeǥeǥehem. Ke sikandin te, “Igkeepes ku is kebpelavew te menge kevuwazan ni Jacob, wey midrewakan ku is melig-en he menge vahin te inged dan. Umbe ibeǥey ku ziyà te menge kuntada is inged dan wey is langun he taǥù kayi.” 
\p  
\v 9 Emun duen sepulù he etew he egkesamà diyà te senge velayan ebpematey ǥihapun sikandan is langun.  
\v 10 Is ebpatey, egkuwaan te kezuzumahi zin su edtutungen din. Ne ed-insaan din is ed-eles diyà te seled te valey te, “Duen nu pe be zuma keniyan?” Ne emun edtavak te wazà, ne egkaǥi haazà is mid-insà te, “Kenè ke en kaǥikaǥi su kela ke mesempiti nu is ngazan te \sc Nengazen\sc* ne egkesilutan ki.” 
\p  
\v 11 Benar iyan, emun iyan en ebmandù is \sc Nengazen\sc*, edrunteken din is langun he menge valey, deisey se zekelà. 
\p  
\v 12 Ebpekepelelaǥuy ve is menge kudà diyà te vetuwen he kelendiǥan? Igkeeradu ve ziyà te zaǥat is baka? Simpri kenà. Piru is kukuman midhimu niw he ebpekezezaat te etew, ne is metazeng midhimu niw he mezaat.  
\v 13 Ingkelipey niw is kebpekezaag niw ziyà te inged he Lo Debar wey Karnaim, ne ke sikiyu te, “Nezaag tew sikandan pinaaǥi te keugelingen tew he zesen.”  
\v 14 Benar iyan, migkaǥi is \sc Nengazen\sc* he Megbevayà he Mekeǥeǥehem te, “Sikiyu is menge etew te Israel, ibpesurung ku te menge etew ziyà te sevaha he nasyun. Edlislisezen kew zan ne edsekupen dan is lugar niw puun te Lebo Hamat taman te zal-ug diyà te Araba.” 
\c 7  
\s1 Is Nelewasan ni Amos Mehitenged te Terapan, Hapuy, wey Tuntun 
\p  
\v 1 Iyan heini impaahà te Nengazen he MEGBEVAYÀ kedì: Neehè ku he edtiǥum is \sc Nengazen\sc* te utew mahabet he terapan dutun te ingkeveǥey en diyà te hadì is kandin he vahin puun te nehuna he neraǥun dutun te ebpuun en is ikezuwa he kedraǥun.  
\v 2 Ne zutun migkaan te terapan is langun he pinemula, ne wazè en nesamà. Ne zutun migkaǥi a te, “Nengazen he MEGBEVAYÀ, edhangyù a ziyà te kenikew he peseyluwa nu is menge kevuwazan ni Jacob. Egkemenumenu is kegkeuyag-uyag dan emun egkehitavù heeyan he silut? Meluya zan ne kenè dan ebpekegaga.”  
\v 3 Umbe, nahalin is isip te \sc Nengazen\sc* ne ke sikandin te, “Is neehè nu ne kenè en egkehitavù.” 
\p  
\v 4 Heini pa is impaahà kedì te Nengazen he MEGBEVAYÀ: Neehè ku he ebpengandam is Nengazen he MEGBEVAYÀ te kedsilut te menge etew zin pinaaǥi te hapuy. Ne impememaza te hapuy is ebpuunan te wahig diyà te zizalem te tanà, ne midtutung kayi is langun he netaǥù te tanà he Israel.  
\v 5 Ne zutun migkaǥi a te, “Nengazen he MEGBEVAYÀ, edhangyù a ziyà te kenikew he kenè nu heeyan beeli. Egkemenumenu is kegkeuyag-uyag te menge kevuwazan ni Jacob emun egkehitavù heeyan? Meluya zan ne kenè dan ebpekegaga.”  
\v 6 Umbe, nahalin is isip te \sc Nengazen\sc* ne ke sikandin te, “Is neehè nu kenè en egkehitavù.” 
\p  
\v 7 Heini pa is impaahà te Nengazen he MEGBEVAYÀ kediey: Neehè ku is Nengazen he edhithitindeg diyà te uvey te verengbeng ne zuen din egewezan he tuntun he migamit te kedsukuza zuen te verengbeng ke metandang be is kegkeveeli kayi etawa kenà.  
\v 8 Mid-insà is Nengazen kayi te kedì te, “Amos, hengkey is neehè nu?” Midtavak a te, “Tuntun is neehè ku.” Ne migkaǥi sikandin te, “Sumalà te kedtuntun ku ne kenà metandang is menge ulaula te menge etew ku he menge tig-Israel. Umbe ǥuntaan he timpu ne kenè ku en sikandan egkehizuwan.  
\v 9 Edrundusen ku is menge simbahan diyà te metikang he menge lugar he zutun ed-azap is menge tig-Israel he menge kevuwazan ni Isaac. Ne ibpesurung ku te menge kuntada is Israel, he ginhedian ni Hadì Jeroboam.” 
\s1 Si Amos wey si Amazia 
\p  
\v 10 Dutun he timpu, si Amazia he memumuhat diyà te Betel mibpeuwit te lalag diyà te ki Hadì Jeroboam he hadì te Israel. Ke sikandin te, “Mibpelanu si Amos te mezaat diyà te kenikew kayi mismu te Israel. Kenè en egkaantus te menge etew is menge mibpengaǥi zin.  
\v 11 Su iyan heini migkaǥi zin: ‘Ebpatey si Jeroboam pinaaǥi te tebek, ne siguradu he ebihaǥen is menge tig-Israel pehendiyà te zuma he nasyun.’ ” 
\p  
\v 12 Ne migkaǥi si Amazia ziyà te ki Amos te, “Sikew is ebpeneuven, ne awè ka kayi ne likù ka ziyà te Juda. Ne ziyè nu veeli is terebahu nu he igkeuyag nu he iyan is kebpeneuva kenikew.  
\v 13 Kenè nu en tudtula kayi te Betel is menge lalag te Megbevayà, su kayi is simbahan he ed-ezapan te hadì, he iyan simbahan kayi te ginhedian din.”  
\v 14 Midtavak ni Amos si Amazia te, “Kenà a zengan ebpeneuven wey kenà a sumusunud te ebpeneuven, kekenà, perevantey a te menge kerehidu wey tig-elima te menge kayu he sikemur.  
\v 15 Piru migkeǥiyan a te \sc Nengazen\sc* he ewai ku is terebahu ku he kebantey te kerehidu ne tudtula ku is menge lalag din diyà te keniyu te menge tig-Israel he menge etew zin.  
\v 16-17 Ne ǥuntaan, sikew is migkaǥi he kenè ku tudtula is menge lalag te Megbevayà diyà te menge tig-Israel he menge kevuwazan ni Isaac, pemineǥa nu heini is migkaǥi te \sc Nengazen\sc* he ebpekesuǥat kenikew: ‘Is esawa nu ebelegyà te zengeg din diyà te inged ne ebpatey te tebek is menge anak nu. Is menge tanè nu ebehinen te menge kuntada he ed-aǥew kayi, ne ebpatey ka ziyà te zuma he nasyun. Ne siguradu he ebihaǥen is menge tig-Israel ne edumahan diyà te zuma he nasyun.’ ” 
\c 8  
\s1 Is Nelewasan ni Amos Bahin te Revan he zuen din Taǥù he Nelutuan he menge Prutas 
\p  
\v 1 Iyan heini impaahà te Nengazen he MEGBEVAYÀ kediey: Neehè ku is revan he zuen din taǥù he nelutuan he menge prutas.  
\v 2 Mid-insà is \sc Nengazen\sc* kayi te kedì te, “Amos, hengkey is neehè nu?” Ne midtavak a te, “Sevaha he revan he zuen din taǥù he nelutuan he menge prutas.” Ne migkaǥi is \sc Nengazen\sc* kayi te kedì te, “Neume en is ketepusan te menge etew ku he menge tig-Israel. Kenè ku en sikandan egkehizuwan.  
\v 3 Dutun he andew te kedsiluti kandan, is melipayen he kegkanta ziyà te valey ku egkehimu he sineǥawan su mahabet is ebpekepeyapat diyà te minsan hendei he ebpemematey. Ne zutun wazè en egkezineg he keǥurub. Iyan a, is \sc Nengazen\sc* he Megbevayà, is migkaǥi kayi.” 
\s1 Is Salà te menge Sepian he menge Tig-Israel 
\p  
\v 4 Pemineǥa niw heini, sikiyu is edlislisezen dan is menge pubri wey edtinguhà te kedezaat kandan.  
\v 5 Ima niw ke metapus en is Pista te Kebpuun te Hayag etawa Andew te Kedhimeley su wey kew mekepemelegyè en te trigu ne wey kew mekepenlimbung pinaaǥi te kedsukud, kedtakes, wey kedtimbang niw.  
\v 6 Egaangaan kew ebelegyà te trigu he nesehuǥan te ukap, su wey kew mekepemasa te pubri he etew he mid-uripen su kenà ebpekevayad te utang din, minsan senge paris dà he sandalyas is utang din.  
\v 7 Umbe, nenangdù is \sc Nengazen\sc*, kes Megbevayà he impahambug niw te menge kevuwazan ni Jacob, ke sikandin te, “Kenè ku edlipatan is langun he kelelalung he mibeelan niw.  
\v 8 Tenged kayi ibpelinug ku ziyà te tanè niw ne ebpemekesineǥew kew. Egkepurung egkeyunggat is tanè niw, he iring te kedlapey wey kegkemezahi te Wahig he Nilo ziyà te Ehipto.  
\v 9 Dutun he andew te kedsiluti ku keniyu, ibpesanlep ku is andew ziyà te udtuwan, umbe ebmerusirem minsan maandew pa. Iyan a, is \sc Nengazen\sc* he Megbevayà, migkaǥi kayi.  
\v 10 Edhimuwen ku he sineǥawan is kedlipey niw emun timpu te pista, ne edhimuwen ku he hulùhulù is menge kegkanta niw. Ebpevistiyan ku sikiyu te saku wey edsuǥuen ku he mebpevangul su wey niw ikepaahà is kedlalew niw, iring te menge ǥinikanan he edsineǥew tenged te kebpatey te vudtung he anak dan. Piru edhuna pa he mesakit is ketepusan kayi he menge silut.” 
\p  
\v 11 Migkaǥi pa is Nengazen he MEGBEVAYÀ te, “Egkeuma is timpu he ibpaaǥi ku is bitil ziyà te tanè niw. Piru kenà heini vitil te keenen etawa kegkemezahi te wahig, kekenà, bitil heini wey kegkemezahi te kebpemineg te menge lalag ku.  
\v 12 Ebpekeziregdireg kew tenged te kegkeveley niw te kebpen-ahà te etew he ebpekepenudtul ziyà te keniyu te menge lalag ku, piru kenè niw egketuredu heini minsan hendei kew ebpevayà.  
\v 13 Dutun te andew te kedsiluti ku keniyu, minsan is kezegwayan he vetan-en he menge vahi niw wey vetan-en he menge maama niw, egkengevidtawan tenged te kegkemezahi.  
\v 14 Sikiyu is ebpenangdù pinaaǥi te ngazan te menge ed-ezapen diyà te Samaria, Dan, wey Beersheba, edezeetan kew ne kenè kew en ebpekeenew pa.” 
\c 9  
\s1 Wazà Ebpekepelaǥuy te Silut te Megbevayà 
\p  
\v 1 Migkaǥi si Amos te, “Neehè ku is Nengazen he midhitindeg diyà te pemuhatà he ke sikandin te, ‘Pukpuka nu is in-ulu keniyan te menge tukud te valey ku su wey merundus is atep din ne wey merundusi is menge etew. Ne is kenà ebpatey kandan ne edhimetayan ku pinaaǥi te tebek. Wazà minsan sevaha kandan he ebpekelikey etawa ebpekepelaǥuy.  
\v 2 Minsan med-eles pa sikandan diyà te zizalem te tanà, he ziyà te lugar te menge minatey, egkuwaan ku sikandan dutun. Minsan mebpemenahik pa sikandan diyà te langit, eguyuzen ku sikandan pehendiyà te zizalem.  
\v 3 Minsan med-eles pa sikandan diyà te puntur te Buntud he Carmel, ebpen-ahaan ku sikandan dutun ne edekepen ku. Minsan med-eles pa sikandan diyà te zizalem te zaǥat, ne ibpehendutun ku is uled te kegkaǥat kandan.  
\v 4 Minsan bihaǥa pa sikandan te menge kuntada zan, ebpenhimetayan ku ǥihapun sikandan. Su utew a disididu te kedezaat kandan ne kenà kedtavang kandan.’ ” 
\p  
\v 5 Emun egkeviten te Nengazen he MEGBEVAYÀ he Mekeǥeǥehem is tanà, egkehuyung heini ne is langun he menge meǥinged kayi ne ebpemekesineǥew. Is kegkehuyung kayi iring te kedlapey wey kegkemezahi te Wahig he Nilo ziyà te Ehipto. 
\q1  
\v 6 Iyan is Megbevayà mibaal te keugelingen din he ubpeey ziyà te langit. 
\q1 Su iyan sikandin mibaal te hewhewanan diyà te zivavew te tanà. 
\q1 Iyan sikandin midtiǥum te wahig te zaǥat diyà te menge ǥapun ne impeuzan din heini ziyà te tanà. 
\q1 Is ngazan din iyan is \sc Nengazen\sc*. 
\p  
\v 7 Migkaǥi is \sc Nengazen\sc* te, “Is ked-ahaa ku keniyu te menge tig-Israel ne iring dà te menge tig-Etiopia. Tutuu iyan he impeǥawas ku sikiyu ziyà te Ehipto, piru impeǥawas ku zaan is menge Filistihanen diyà te Caftor ne is menge Aramihanen impeǥawas ku ziyà te Kir.  
\v 8 Siak, is Nengazen he MEGBEVAYÀ, edtengteng a keniyu te mezaat he ginhedian. Ne edezeetan ku sikiyu taman te egkahanew kew kayi te kelibutan. Piru zuen egkesamà keniyu te menge kevuwazan ni Jacob. Iyan a, is \sc Nengazen\sc*, is migkaǥi kayi.  
\v 9 Benar iyan, emun iyan a ebmandù, ne ed-eyaǥen ku sikiyu is menge etew te Israel duma te menge etew ziyà te langun he menge nasyun, iring te ked-ayag te trigu. Iring te kenà edlahus diyà te eyagan is nekesahug he menge vatu, ne kenà daan ebpekeliyu te silut is menge lalung keniyu, kekenà,  
\v 10 ebpatey te tebek sikandan is langun. Iyan heini sikandan kes egkaǥi he wazè kun mezaat he egkehitavù kandan.” 
\s1 Ed-umanan Ebenguna is Israel 
\p  
\v 11 “Egkeuma is andew he ed-umanan ku ebenguna is ginhedian ni David he iring te lawig he nerundus. Su ebpurungan ku heini is nezeetan, ne ibpeuman ku ibpehitindeg iring duen te nehuna.  
\v 12 Edhimuwen ku heini su wey mesakup te menge Israilihanen is nesamà he tanà te Edom wey is duma pa he menge nasyun he nesakup dan dengan he mid-isip ku he kediey. Iyan a, is \sc Nengazen\sc*, is migkaǥi kayi, ne ebeelan ku heini.” 
\p  
\v 13 Migkaǥi pa is \sc Nengazen\sc* bahin te menge tig-Israel, “Egkeuma is timpu he utew sikandan ed-uzara, ne kenè pa egkepasad is kedreǥuna te menge abut dan ne egkeume en is timpu te ked-eradu. Ne is kegkeres dan te paras ne kenè pa egkepasad ne egkeume en is timpu te ked-uman kebpemula te paras. Emun ed-ahaan ta is utew mahabet he menge paras diyà te menge vuntud ne henduen be heini te edtudà he veǥu he vinu.  
\v 14 Ibpeulì ku is menge etew ku he menge tig-Israel ziyà te tanè dan puun te kegkevihaǥa kandan. Ed-umanan dan ebenguna is nevengkag he menge inged dan ne zutun sikandan ed-ubpà. Ebpemula zan te menge paras ne ed-inum dan te vinu kayi. Ebpemula zan diyà te menge pemuleey zan ne egkaan dan te menge veǥas kayi.  
\v 15 Ibpeuman ku sikandan ibpeubpà diyà te tanè dan, ne kenè dan en ibpeuman ibpaawà dutun te tanà he imbeǥey ku kandan.” Iyan heini migkaǥi te \sc Nengazen\sc* he Megbevayè niw.