\id ROM  
\h Romanos 
\toc1 Xon⁴xi³ pa²stro⁴Pablo qui³squi³-le⁴cho⁴ta⁴romanos 
\toc2 Romanos 
\toc3 Ro. 
\mt1 Xon⁴xi³ pa²stro⁴Pablo qui³squi³-le⁴cho⁴ta⁴romanos 
\c 1  
\s1 Pablo si¹ti²ˀnta³ 
\p  
\v 1 An³ nia¹³ Pablo, xi³ cho⁴ˀnta³-le⁴ Jesucristo. Qui³no²cjoa⁴-na³ nca³ pa²stro⁴ coan³, cˀoa⁴ qui³nˀo²sje³xin²-na³ xi³ tˀa³tsˀe⁴ je² en¹nta³-le⁴ Ni³na¹  
\v 2 xi³ to⁴nqui³-ni³ Ni³na¹ qui³tsjoa³ tsˀoa³ nca³ tsjoa¹. Ya⁴ tji¹tˀa³ xon⁴ Escrituras xi³ tsje³, je² xi³ qui³squi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.  
\v 3 Je² en¹nta³-vi⁴ xi³ nchja⁴-ni³ Jesucristo Nai³-na¹ xi³ ˀnti¹-le⁴ Ni³na¹, xi³ ji³nčhoa³-ni³ ntje⁴-le⁴ David jo³ cjoan³ yao³-le⁴.  
\v 4 Je² xi³ cao⁴ nca³nˀion¹ tsa³ˀya³son²tsen³-le⁴ nca³ ˀnti¹-le⁴ Ni³na¹ ni¹, jo³ cjoan³ Espíritutsje³-le⁴, nca³ ja³ˀa²ya³-ni³le⁴ nca³ cˀen³.  
\v 5 Xi³ to⁴tˀa³tsˀe⁴ Cristo qui³scoe²³ cjoa⁴nta³ cao⁴ xa¹-le⁴ pa²stro⁴, jme¹-ni³ nca³ nca³tsˀi³ cho⁴ta⁴ xi³ li² judío-jin² coi⁴tjo³son²-si¹ni³le⁴ nca³ coan⁴cjain¹-le⁴ tˀa³tsˀe⁴ jan³ˀain¹-le⁴ Cristo.  
\v 6 Cˀoa⁴²-ti⁴ coi³ nio¹³ nca³ jon² xi³ cˀoa⁴-sˀin² qui³no²cjoa⁴-no³ tˀa³tsˀe⁴ Jesucristo.  
\v 7 Ti²cji³-no³ nca³tsˀio³ xi³ ti³yo³ ya⁴ Roma, xi³ tsjoa³que³-no³ Ni³na¹, xi³ qui³no²cjoa⁴-no³ nca³ cho⁴ta⁴-le⁴ Cristo coaon⁴³. Ni³na¹ Nˀai³-na¹ cao⁴ Nai³-na¹ Jesucristo ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³. 
\s1 Pablo me³-le⁴ nca³ coai⁴ ya⁴ Roma 
\p  
\v 8 Ti¹tjon², xi³ to⁴tˀa³tsˀe⁴ Jesucristo tsjoa³-le⁴ cjoa⁴nta³ Ni³na¹-na⁴ xi³ tˀa³tsaon⁴³ nca³tsˀio³ nca³ nca³qui³jnta² son³ˀnte³ no²cjoa⁴ya³-ni³ nca³ ma³cjain¹-no³.  
\v 9 Testigo-na⁴ ma³-ni³ Ni³na¹, xi³ an³ si³xa¹³-le⁴ cao⁴ ni⁴ma⁴-na⁴, nca³ nchja²ya³ je² en¹nta³ xi³ tˀa³tsˀe⁴ ˀnti¹-le⁴, nca³ fa³ˀai³tsjen³-na³ nca³ntsjai² xi³ tˀa³tsaon⁴³ cˀia⁴ nca³ vˀe³tsˀoa²³.  
\v 10 Ti²si³je¹³-nia¹³ tsa² coi⁴cho³-na³ ni⁴čhjin³ tsa² Ni³na¹ cˀoa⁴-sˀin² me³-le⁴ nca³ cˀoa⁴coan⁴-na³ nca³ cjoi¹con³-no³ nca³ jon² to⁴jo³-sˀin²ni³.  
\v 11 Cjai¹nca³ me³-na³ nca³ scoe³-no³, jme¹-ni³ nca³ tsjoa³-si¹ni³no³ jnco³ cjoa⁴tjao² xi³ tsˀe⁴ Espíritu Santo, cˀoa⁴ jme¹-ni³ nca³ sˀe⁴-si¹ni³no³ nca³nˀion¹.  
\v 12 Coi³ xi³ tso²-le⁴ nca³ to⁴jnco³ si⁴je³ta³coan³² xi²nquia⁴² cao⁴ jo³-sˀin² ma³cjain¹-na¹ cao⁴ jon² cao⁴ an³.  
\v 13 To⁴nca³ me³-na³, ntsˀe³, nca³ jchao⁴³ nca³ ncjin² cˀa³ tsa³ca²te⁴jna³nta³ nca³ cjoi¹con³-no³ (to⁴nca³ sa³ˀnta³ ntˀai⁴-vi⁴ ti¹sˀe³chjoa²-na³), jme¹-ni³ nca³ cˀoa⁴-ti⁴ tjin¹ xi³ si³qui³njen³jin³-si¹ni³no³, jo³-sˀin² nca³ qui³si³qui³njen³jin³-le⁴ xi³cˀa³ cho⁴ta⁴ xi³ li² judío-jin².  
\v 14 An³ qui³tjen⁴-na³ xi³ tˀa³tsˀe⁴ cho⁴ta⁴ griego cˀoa⁴ xi³ tˀa³tsˀe⁴ cho⁴ta⁴cja⁴ˀai¹, xi³ tˀa³tsˀe⁴ cho⁴ta⁴chji⁴ne⁴, cˀoa⁴ xi³ tˀa³tsˀe⁴ xi³ tsi² tsa² chji⁴ne⁴.  
\v 15 Cˀoa⁴-sˀin² ti²jna⁴nta³ nca³ an³, nca³ cˀoa⁴-ti⁴ coi³nchja²ya³jin³-no³ je² en¹nta³ xi³ tˀa³tsˀe⁴ Cristo, jon² xi³ ti³yo³ ya⁴ Roma. 
\s1 Je² en¹nta³ xi³ tˀa³tsˀe⁴ Cristo coi³ xi³ nca³nˀion¹-le⁴ Ni³na¹ 
\p  
\v 16 Nca⁴ li²coi³ ma³soa³-na³ xi³ tˀa³tsˀe⁴ je² en¹nta³ xi³ tˀa³tsˀe⁴ Cristo, nca⁴ coi³ xi³ nca³nˀion¹-le⁴ Ni³na¹, xi³ vˀa³sje³ntjai² nca³tsˀi³ xi³ ma³cjain¹-le⁴, ti¹tjon² cho⁴ta⁴ judío cˀoa⁴-ti⁴ cho⁴ta⁴ griego.  
\v 17 Je² en¹nta³ xi³ va³co¹son²tsen³ cjoa⁴qui²xi⁴-le⁴ Ni³na¹ xi³ tˀa³tsˀe⁴ xi³ ma³cjain¹-le⁴ cho⁴ta⁴ nca³ ma³cjain¹-sa³le⁴, jo³-sˀin² tji¹tˀa³: Je² xi³ cho⁴ta⁴cjoa⁴qui²xi⁴ cˀoe¹jna³con³ xi³ to⁴tˀa³tsˀe⁴ nca³ ma³cjain¹-le⁴. 
\s1 Cho⁴ta⁴son³ˀnte³ ña³qui³ tjin¹-le⁴ je¹ 
\p  
\v 18 Ti¹jna³son²tsen³ je² cjoa⁴jti³-le⁴ Ni³na¹ xi³ nčhoa¹-ni³ ncˀa³jmi³ co²ntran⁴-le⁴ nca³yi³je³ xi³ tsi² ve³xcon¹ Ni³na¹ cao⁴ xi³ tsi² cjoa⁴qui²xi⁴ xi³ sˀin¹, cho⁴ta⁴ xi³ vˀe¹chjoa²-le⁴ xi³ cjoa⁴qui²xi⁴ to⁴tˀa³tsˀe⁴ xi³ tsi² cjoa⁴qui²xi⁴.  
\v 19 Je² cjoa⁴ xi³ ˀya³-le⁴ xi³ tˀa³tsˀe⁴ Ni³na¹ tjio¹son²tsen³-le⁴ cho⁴ta⁴-ve⁴, nca⁴ Ni³na¹ tsa³cˀe¹jna³son²tsen³-le⁴.  
\v 20 Je² cjoa⁴ xi³ tsi²coi³ ma³tsen³ xi³ tsˀe⁴ Ni³na¹, xi³ coi³ nca³nˀion¹-le⁴ xi³ ti¹jna³ntsjai², cˀoa⁴ xi³ coi³ jo³ cjoan³ Ni³na¹, coan³tsen³ sa³ˀnta³ nca³ qui³sˀe³nta³ son³ˀnte³. Je² cjoa⁴-vi⁴ tsa³ˀya³-le⁴ to⁴tˀa³tsˀe⁴ tso³jmi² xi³ qui³sˀe³nta³. Coi³ nca³ ña³qui³ tjin¹-le⁴ je¹ cho⁴ta⁴.  
\v 21 Nca⁴ nta³ tsa² tsa³ve³ Ni³na¹, li²coi³ tsa³cˀa³sje³je³ya³ jo³-ni³ tsa² Ni³na¹, ni⁴qui³tsjoa³-jin²le⁴ cjoa⁴nta³, to⁴nca³ qui³si³sca¹ya³-le⁴ cjoa⁴fa³ˀai³tsjen³-le⁴, cˀoa⁴ je² ni⁴ma⁴-le⁴ xi³ chi⁴con¹ qui³sˀe³njion²jin³-le⁴.  
\v 22 Chji⁴ne⁴ qui³tso²-le⁴ yao³-le⁴, sca¹ya³ coan³-le⁴.  
\v 23 Cˀoa⁴ qui³tsjion³ cjoa⁴je³ya³-le⁴ Ni³na¹ xi³ tsi² fi³tson³ya² cˀoa⁴ nca³jao³-le⁴ qui³si³cjoan³ sen¹-le⁴ cho⁴ta⁴son³ˀnte³ xi³ fi³tson³ya², cˀoa⁴ qui³si³cjoan³ sen¹-le⁴ ni⁴se³, cˀoa⁴ sen¹-le⁴ cho⁴ xi³ ño³ ma³-ni³ ntso⁴co⁴, cˀoa⁴ sen¹-le⁴ ye⁴.  
\v 24 Coi³ cjoa⁴ nca³ Ni³na¹ qui³sca³ni¹tˀa³-le⁴ cjoa⁴tsˀen⁴, nca³ cjoa⁴chi⁴nca⁴ tjin¹-le⁴ ni⁴ma⁴-le⁴. Cˀoa⁴-sˀin² qui³si³qui³tson¹ yao³-le⁴ ya⁴jin³-le⁴ xi¹ncjin¹.  
\v 25 Je² cho⁴ta⁴ xo⁴cjoan³-vi⁴ qui³si³cˀa³ntjai²ya³ cjoa⁴qui²xi⁴-le⁴ Ni³na¹ nca³ tsa³cˀa³sje³ nti³so³. Nqui²sa⁴ tsa³ve³xcon¹, cˀoa⁴ nqui²sa⁴ qui³si³xa¹-le⁴ cho⁴ta⁴son³ˀnte³ cao⁴-ni³ tsa² Ni³na¹ xi³ tsa³cˀe¹nta³, jña³-le⁴ xi³ coan³chi³con³tˀain³ nca³ntsjai² ni⁴čhjin³. Cˀoa⁴ ca²ta³ma³.  
\v 26 Xi³ coi³-vi⁴ Ni³na¹ qui³sca³ni¹tˀa³-le⁴ cjoa⁴chi⁴nca⁴-le⁴ xi³ tjin¹-le⁴ cjoa⁴soa³. Nta³ tsa² ya¹nchjin¹-le⁴ qui³si³cˀa³ntjai²ya³ jo³-sˀin² ma³chjen¹-le⁴ yao³-le⁴ xi³ tˀa³tsˀe⁴ je² xi³ tsi² tsa² coi³ cˀoa⁴-sˀin² ma³chjen¹-le⁴.  
\v 27 Ti⁴cˀoa⁴-sˀin² qui³sˀin³-ni³ cho⁴ta⁴xˀin⁴ nca³ qui³si³cˀe¹jna³ jo³-sˀin² nca³ ma³chjen¹ xi³ ya¹nchjin¹. Ña³qui³ nˀion¹ qui³si³sin³-le⁴ yao³-le⁴ cao⁴ xˀin⁴xi¹ncjin¹, qui³si³cao⁴ je¹ xi¹ncjin¹ jo³-ni³ tsa² ya¹nchjin¹. Je² soa³ qui³scoe¹ chji¹-le⁴ xi³ tsa³quin²-le⁴ cjoa⁴sca¹ya³-le⁴.  
\v 28 Cˀoa⁴ jo³-sˀin² nca³ je² tsi²coi³ qui³sa³sen³-le⁴ nca³ Ni³na¹ cjoa⁴ˀai¹tsjen³-le⁴, Ni³na¹ qui³sca³ni¹tˀa³-le⁴ cjoa⁴fa³ˀai³tsjen³ xi³ nˀion¹ chˀao³ tjin¹, jme¹-ni³ nca³ cˀoa⁴sˀin⁴²-si¹ni³ xi³ tsi² tsa² coi³ nta³ tjin¹.  
\v 29 Tjin¹yi³je³-le⁴ to⁴jo³ tjin¹ jco⁴ya³ cjoa⁴tsˀen⁴, cjoa⁴cha³jnqui³, cjoa⁴taon³, cjoa⁴chˀao³ntai³, cjoa⁴ xi³ chˀao³ tjin¹, cjai¹nca³ tse³ qui³sˀe³-le⁴ cjoa⁴xin²ta³con², cˀoa⁴ xi³ si¹cˀen³ cˀen³, cjoa⁴vi³xcan¹ tjin¹-le⁴, cao⁴ cjoa⁴chˀa²na⁴cha⁴, cˀoa⁴ chˀao³ si¹cja³ˀai³tsjen³-le⁴ nca³tsˀi³ xi³cˀa³.  
\v 30 Si¹cˀa³xqui⁴ xi³cˀa³, vi³ncha¹nti³so³-le⁴, jti³que³ Ni³na¹, cho⁴ta⁴tsˀen⁴ˀa³, ncˀa³con³, vˀa³sje³je³ya³ yao³-le⁴, vˀa³sje³-ni³ jco⁴ cjoa⁴ xi³ chˀao³ tjin¹, tsˀa³ntjai²cjoa⁴ tˀa³tsˀe⁴ xi³jcha¹-le⁴,  
\v 31 chi⁴con¹, li²coi³ si¹tjo³son²-le⁴ en¹-le⁴, xi¹jin³ ni⁴ma⁴-le⁴, nˀion¹con³, tsin²-le⁴ cjoa⁴ma⁴ta³con²-jin².  
\v 32 Nta³ tsa² ve³ jme³ cjoa⁴qui²xi⁴ xi³ tsjoa¹ Ni³na¹, nca³ je² xi³ cˀoa⁴sˀin¹ va³quin²-le⁴ cjoa⁴vi³ya³, a³li² to⁴coi³-jin² nca³ cˀoa⁴sˀin¹, to⁴nca³ cˀoa⁴-ti⁴ to⁴jnco³ ma³tsjoa³ya³-le⁴ cao⁴ je² xi³ cˀoa⁴sˀin¹. 
\c 2  
\s1 Cao⁴ cjoa⁴qui²xi⁴ Ni³na¹ tsjoa¹-le⁴ cjoa⁴ñˀain³ cho⁴ta⁴je¹ 
\p  
\v 1 Coi³ nca³ tsin²-li² cjoa⁴qui²xi⁴-jin² jo³-sˀin² nca³ chˀa⁴sje³ntjai² je¹ yao³-li⁴, ji³ cho⁴tai⁴ xi³ ˀya³sin³ cho⁴ta⁴. Cˀia⁴ nca³ ˀya³sin³ cho⁴ta⁴ xi³ cja⁴ˀai¹, ti⁴ji³ ˀya³sin³-ni³ yao³-li⁴, nca⁴ cˀoa⁴²-ti⁴ ti⁴nˀian²-ni³, ji³ xi³ ti³ˀya³sin³.  
\v 2 To⁴nca³ ˀya³-nia¹ nca³ cao⁴ cjoa⁴qui²xi⁴ Ni³na¹ tsjoa¹-le⁴ cjoa⁴ñˀain³ je² xi³ cˀoa⁴sˀin¹ je² cjoa⁴-vi⁴.  
\v 3 Ji³ xi³ ˀya³sin³ cho⁴ta⁴ xi³ cˀoa⁴sˀin¹ je² cjoa⁴-vi⁴, cˀoa⁴-ti⁴ ji³ cˀoa⁴ti³nˀian²-ni³. A³ ni²cja³ˀai³tsjen³-ni¹ nca³ coi²tjo⁴ntjai²-lai⁴ cjoa⁴ñˀain³-le⁴ Ni³na¹.  
\v 4 A³xo⁴ nˀo²sje³nqui³-ni¹ xi³ nˀion¹ tse³ cjoa⁴nta³-le⁴ Ni³na¹, cao⁴ cjoa⁴cho⁴ya³cao⁴cjoa⁴-le⁴, cao⁴ cjoa⁴tse³ta³con²-le⁴, nca³ tsi² ˀyai³ nca³ je² cjoa⁴nta³-le⁴ fi²cao⁴-li² nca³ si⁴cˀa³ntjai²ya³-ni³ cjoa⁴fa³ˀai³tsjen³-li⁴.  
\v 5 To⁴nca³ jo³-sˀin² xi¹jin³ ni⁴ma⁴-li⁴ nca³ tsi² ni²cˀa³ntjai²yai³ cjoa⁴fa³ˀai³tsjen³-li⁴, ti³ni²chˀa¹ne²-lai⁴ yao³-li⁴ cjoa⁴jti³-le⁴ Ni³na¹ xi³ tˀa³tsˀe⁴ cˀia⁴ ni⁴čhjin³-le⁴ cjoa⁴jti³-le⁴, cˀia⁴ nca³ coa⁴co²tsen³ je² cjoa⁴ñˀain³ xi³ cjoa⁴qui²xi⁴ xi³ tsjoa¹ Ni³na¹.  
\v 6 Ni³na¹ cˀoe⁴²chji¹-le⁴ nca³ jnco¹jnco¹ jo³-sˀin² xa¹-le⁴ xi³ qui³sˀin³.  
\v 7 Je² cho⁴ta⁴ xi³ va¹sjai³ cjoa⁴je³ya³ cao⁴ cjoa⁴xcon¹ta³con² cao⁴ xi³ ni⁴cˀia³-jin² cjoi⁴tson¹, nca³ tse³jta³ nta³ ncha³ sˀin¹, Ni³na¹ tsjoa¹-le⁴ cjoa⁴vi³jna³chon³ nca³ntsjai².  
\v 8 To⁴nca³ je² xi³ me³-le⁴ si¹qui³njen³ tˀa³tsˀe⁴ yao³-le⁴, xi³ tsi² si¹tjo³son²-le⁴ xi³ cjoa⁴qui²xi⁴, to⁴nca³ si¹tjo³son²-le⁴ xi³ cjoa⁴tsˀen⁴, Ni³na¹ nˀion¹ tsjoa¹-le⁴ cjoa⁴jti³ cao⁴ cjoa⁴jti³ xi³ nˀion¹,  
\v 9 cjoa⁴ñˀain³ cao⁴ cjoa⁴va³ xi³ tˀa³tsˀe⁴ nca³tsˀi³ cho⁴ta⁴ xi³ chˀao³ sˀin¹, ti¹tjon² cho⁴ta⁴ judío, cˀoa⁴-ti⁴ cho⁴ta⁴ griego,  
\v 10 to⁴nca³ cjoa⁴je³ya³ cao⁴ cjoa⁴xcon¹ta³con² cao⁴ cjoa⁴nchˀan¹ta³con² tˀa³tsˀe⁴ nca³tsˀi³ xi³ nta³ sˀin¹, ti¹tjon² cho⁴ta⁴ judío, cˀoa⁴-ti⁴ cho⁴ta⁴ griego.  
\v 11 Ni³na¹ to⁴nco¹son²-sˀin² fi²cao⁴ nca³tsˀi³.  
\v 12 Je² nca³tsˀi³ xi³ tsin²-le⁴ cjoa⁴te¹xo³ma³, cˀoa⁴ xi³ tsa³jnqui³ je¹, cˀoa⁴²-ti⁴ tsin²-le⁴ cjoa⁴te¹xo³ma³ nca³ cha⁴jin³. Cˀoa⁴ je² nca³tsˀi³ xi³ tjio¹nqui³ cjoa⁴te¹xo³ma³, cˀoa⁴ xi³ tsa³jnqui³ je¹, cˀoa⁴²-ti⁴ cao⁴ cjoa⁴te¹xo³ma³ sˀe⁴nta³jin³-ni³le⁴.  
\v 13 A³li² je²-jin² xi³ to⁴nčhˀoe¹-le⁴ cjoa⁴te¹xo³ma³ xi³ tjin¹-le⁴ cjoa⁴qui²xi⁴ nqui³xcon⁴ Ni³na¹, to⁴nca³ je² xi³ si¹tjo³son²-le⁴ cjoa⁴te¹xo³ma³, je² xi³ cjoe⁴tˀa³ je¹-le⁴.  
\v 14 Je² cho⁴ta⁴ xi³ li² judío-jin² xi³ tsin²-le⁴ cjoa⁴te¹xo³ma³-jin², xi³ to⁴xa¹ je²-ni³ nca³ cˀoa⁴sˀin¹ jo³ tso² cjoa⁴te¹xo³ma³, nta³ tsa² tsin²-le⁴ cjoa⁴te¹xo³ma³-ve⁴, je² cho⁴ta⁴-ve⁴ to⁴xa¹ je²-ni³ nca³ tjin¹-le⁴ cjoa⁴te¹xo³ma³ ti⁴tˀa³tsˀe⁴-ni³.  
\v 15 Va³co¹cho⁴ya³ nca³ je³tjin¹-le⁴ ni⁴ma⁴-le⁴ je² xi³ vˀe¹ne²-le⁴ cjoa⁴te¹xo³ma³. Cˀoa⁴-ti⁴ je² cjoa⁴fa³ˀai³tsjen³-le⁴ to⁴jnco³ si¹qui²xi⁴ya³. Cˀoa⁴ je² cjoa⁴fa³ˀai³tsjen³-le⁴ fao¹ˀa³ nca³ va¹nqui³ cˀoa⁴ vˀa³sje³nqui³ je¹ yao³-le⁴.  
\v 16 Cˀoa⁴coan⁴ coi³ ni⁴čhjin³ cˀia⁴ nca³ Ni³na¹ cˀoe⁴²nta³jin³ cjoa⁴ˀma³-le⁴ cho⁴ta⁴ xi³ to⁴tˀa³tsˀe⁴ Jesucristo. Cˀoa⁴tso² en¹nta³ xi³ tˀa³tsˀe⁴ Cristo xi³ nchja²ya³. 
\s1 Cho⁴ta⁴ judío cjai¹nca³ nta³ ve³con³ cjoa⁴te¹xo³ma³ 
\p  
\v 17 Coe⁴-ni³vi⁴, ji³ xi³ jan³ˀain¹ judío tjin¹-li², cjai¹nca³ nˀion¹ nta³ ˀya³ta³coin²³ cjoa⁴te¹xo³ma³, cˀoa⁴ nˀo²sje³je³yai³ yao³-li⁴ nca³ Ni³na¹ ˀyai³.  
\v 18 Nta³ ˀyai³ jo³-sˀin² me³-le⁴ Ni³na¹. Nta³ chˀa²sjai³ xi³ nqui²sa⁴ nta³ tjin¹, nca³ je² cjoa⁴te¹xo³ma³ xi³ tso²ya³-li².  
\v 19 Nˀion¹tˀa³-ta³coin²³ yao³-li⁴ nca³ ji³ xi³ va³co²-lai⁴ ntia⁴² xi³ xca⁴ cjoan³. Ji³ xi³ ni²ˀi³sen³-lai⁴ xi³ njion²jin³ tjio¹.  
\v 20 Ji³ xi³ va³co²ya³-lai⁴ xi³ tsi² tsa² jme³ xi³ ma³-le⁴, nca³ maestro-le⁴ xti³ mai³, nca³ ya⁴jin³ cjoa⁴te¹xo³ma³ tjin¹-li² jo³ tjin¹ cjoa⁴chji⁴ne⁴ cao⁴ xi³ cjoa⁴qui²xi⁴.  
\v 21 Ji³-ˀni³ xi³ va³co²ya³-lai⁴ xi³ cja⁴ˀai¹, a³ tsi² ˀmi²ya³-lai⁴ yao³-li⁴. Ji³ xi³ no²cjoa⁴yai³ nca³ tsi² tsa² coan⁴ nca⁴ si⁴che¹, a³ ni²che¹-ni¹³.  
\v 22 Ji³ xi³ si³ nca³ tsi² tsa² coan⁴ si⁴cha³jnqui³tˀa³², a³ ni²cha³jnqui³tˀa³-ni¹³. Ji³ xi³ chˀao³chai³ xco¹son², a³ ni²che¹tˀa³-ni¹³ yo⁴nco⁴-le⁴.  
\v 23 Ji³ xi³ chˀa²sje³je³yai³ yao³-li⁴ nca³ tjin¹-li² cjoa⁴te¹xo³ma³, a³ tsi² tsa² taon³ ˀyai³ Ni³na¹ nca³ cjoa⁴te¹xo³ma³ vi³tja³to³ntjai²-lai⁴.  
\v 24 Je² jan³ˀain¹-le⁴ Ni³na¹ no²cjoa⁴ˀaon³-le⁴ xi³ to⁴tˀa³tsaon⁴³ ya⁴jin³-le⁴ cho⁴ta⁴ xi³ li² judío-jin², jo³-sˀin² tji¹tˀa³.  
\v 25 Je² cjoa⁴circuncisión ña³qui³ chji¹-le⁴ tsa² si⁴tjo³son²-lai⁴ cjoa⁴te¹xo³ma³, to⁴nca³ tsa² ji³ coi⁴tja¹to³ntjai²-lai⁴ cjoa⁴te¹xo³ma³, je² cjoa⁴circuncisión cˀoa⁴coan⁴-li² jo³-ni³ xi³ tsin²-le⁴ cjoa⁴circuncisión.  
\v 26 Cˀoa⁴ tsa² je² xi³ tsin²-le⁴ cjoa⁴circuncisión xi³ si¹tjo³son²-le⁴ cjoa⁴ xi³ vˀe¹ne² cjoa⁴te¹xo³ma³, nta³ tsa² tsin²-le⁴ cjoa⁴circuncisión, cˀoa⁴-ti⁴sˀin² ma³xqui⁴cao⁴ jo³-ni³ tsa² xi³ cjoa⁴circuncisión.  
\v 27 Je² xi³ tsin²-le⁴ cjoa⁴circuncisión, to⁴nca³ nˀion¹ nta³ si¹tjo³son²-le⁴ cjoa⁴te¹xo³ma³, si⁴²cja³ˀa¹-li² cjoa⁴ñˀain³ nca³ ji³ xi³ vi³tja³to³ntjai²-lai⁴ cjoa⁴te¹xo³ma³, nta³ tsa² tjin¹-li² cjoa⁴te¹xo³ma³ xi³ tji¹tˀa³ xon⁴, cˀoa⁴ nta³ tsa² tjin¹-li² cjoa⁴circuncisión.  
\v 28 Nca⁴ li² judío-jin² je² xi³ to⁴xquia⁴ cˀoa⁴cji³ nca³ judío ni¹, ni⁴coi³-jin² xi³ cjoa⁴circuncisión xi³ to⁴xquia⁴ cˀoa⁴cji³ je² xi³ tsˀe⁴ yao³-le⁴ cho⁴ta⁴.  
\v 29 To⁴nca³ je² xi³ ña³qui³ judío xi³ ña³qui³ cˀoa⁴cjoan³ ni⁴ma⁴-le⁴. Cˀoa⁴ je² xi³ ña³qui³ cjoa⁴circuncisión je² xi³ ña³qui³ tsˀe⁴ ni⁴ma⁴-na¹, tsˀe⁴ espíritu, li²coi³ to⁴tsˀe⁴ xi³ tji¹tˀa³, je² xi³ li²coi³ vi³tjo³nta³-ni³ cho⁴ta⁴, to⁴nca³ Ni³na¹ xi³ vˀa³sje³nta³. 
\c 3  
\p  
\v 1 Jme¹-ni³ˀni³ xi³ tjin¹-sa³le⁴ cho⁴ta⁴ judío. A³xo⁴ jme¹ xi³ chji¹-le⁴ cjoa⁴circuncisión.  
\v 2 Cjai¹nca³ ncjin² cˀa³ chji¹-le⁴. Xi³ ti¹tjon², nca⁴ je² en¹-le⁴ Ni³na¹ tsa³cˀai²-le⁴ cho⁴ta⁴ judío nca³ coan⁴tjao²-le⁴.  
\v 3 Cˀoa⁴ jme¹-ni³, tsa² tjin¹ cˀa³ xi³ tsi²coi³ coan³cjain¹-le⁴. Je² xi³ tsi²coi³ ma³cjain¹-le⁴, a³ cˀoe⁴²chjoa²-le⁴ cjoa⁴qui²xi⁴-le⁴ Ni³na¹.  
\v 4 Ni⁴ˀi⁴tse¹-jin². To⁴sa³ ca²ta³ma³ qui²xi⁴ Ni³na¹, to⁴nca³ ca²ta³vi³tjo³ nti³so³ nca³tsˀi³ cho⁴ta⁴, jo³-sˀin² nca³ tji¹tˀa³: Jme¹-ni³ nca³ coi⁴tjo³qui²xi⁴-ni³ jo³ tso² en¹ xi³ vˀai²³, cˀoa⁴ si⁴qui³njain³ cˀia⁴ nca³ sˀe⁴nta³jin³-li².  
\v 5 Cˀia⁴ tsa² je² cjoa⁴tsˀen⁴-na¹ vˀe¹jna³tsen³ cjoa⁴qui²xi⁴-le⁴ Ni³na¹, jo¹ coi⁴xoan¹-ˀni³. A³ tjin¹-le⁴ cjoa⁴tsˀen⁴ Ni³na¹ nca³ tsjoa¹-na¹ cjoa⁴ñˀain³. (Nchja²³-nia¹³ jo³-ni³ tsa² cho⁴ta⁴.)  
\v 6 Ni⁴ˀi⁴tse¹-jin² cˀoa⁴tjin¹. Cˀia⁴ tsa² cˀoa⁴tjin¹ cjoa⁴, jo¹-sˀin² cˀoe⁴²nta³jin³-le⁴ˀni³ son³ˀnte³-vi⁴ Ni³na¹.  
\v 7 Tsa² an³ li²coi³ qui³si³jncoa³ en¹-na⁴, to⁴nca³ coi³ cjoa⁴-vi⁴ nca³ nqui²sa⁴ nˀion¹ nta³ va³co²son²tsen³ cjoa⁴qui²xi⁴-le⁴ Ni³na¹ tˀa³tsˀe⁴ cjoa⁴je³ya³-le⁴, a¹-ni³ nca³ to⁴jo³ cˀoa⁴-sˀin² an³ sˀe³-si¹ni³na³ cjoa⁴ñˀain³ jo³-ni³ tsa² cho⁴ta⁴je¹.  
\v 8 Tjin¹ cˀa³ xi³ no²cjoa⁴ˀaon³-na³jin⁴, xi³ cˀoa⁴tso² nca³ jin⁴ xo⁴ vi³xoin¹⁴-jin⁴: A³ cˀoa⁴sˀian⁴² cjoa⁴tsˀen⁴, jme¹-ni³ nca³ coan⁴-si¹ni³ xi³ nta³ tjin¹. Je² cjoa⁴ñˀain³-le⁴ xi³ cˀoa⁴cjoan³ tjin¹-le⁴ cjoa⁴qui²xi⁴. 
\s1 Nca³tsˀi³ cho⁴ta⁴ tjio¹nqui³-le⁴ je¹ 
\p  
\v 9 Jme¹-ni³ˀni³. A³ nqui²sa⁴ tjin¹-sa³na¹ ña¹-vi⁴ cao⁴ je². Ni⁴ˀi⁴tse¹-jin². Je³tsa³ca³nquia²³ cho⁴ta⁴ judío cao⁴ cho⁴ta⁴ xi³ li² judío-jin², nca³ nca³tsˀi³ tjio¹nqui³-le⁴ je¹.  
\v 10 Jo³-sˀin² tji¹tˀa³: Tsin² xi³ cho⁴ta⁴cjoa⁴qui²xi⁴-jin², ni⁴jnco³-jin².  
\v 11 Tsin² xi³ nčhˀoe¹, tsin² xi³ va¹sjai³ Ni³na¹.  
\v 12 Nca³tsˀi³ tsa³qui³ncha³xin²-ni¹. Nca³tsˀi³ li²jme³ ti⁴chji¹-ni³le⁴. Ni⁴ˀya³-jin² xi³ sˀin¹ cjoa⁴nta³, ni⁴jnco³-jin².  
\v 13 Na⁴xa⁴jta⁴-le⁴ cˀoa⁴-sˀin² jo³-ni³ nco³ya³-le⁴ tsjo¹ xi³ ti⁴xˀa⁴. Cao⁴ ni⁴jen⁴ vˀa³na⁴cha⁴-ni³ jo³-ni³ tsa² xan¹-le⁴ ye⁴ xi³ tji¹nqui³ čhjoa⁴tsˀoa³.  
\v 14 Je² tsˀoa³ ña³qui³ tji¹qui³tse³ xi³ chˀao³ tso², cˀoa⁴ xi³ cjai¹nca³ jnčha³.  
\v 15 Cjai¹nca³ chji³nca³ ntso⁴co⁴ nca³ njin¹ vˀe¹jten³.  
\v 16 Si¹cje³jco³yi³je³, cjoa⁴va³ si¹ca³tio¹ ya⁴ya³ ntia⁴²-le⁴.  
\v 17 Je² ntia⁴² xi³ nchˀan¹ tjin¹ li²coi³ ve³.  
\v 18 Li²coi³ tsa³cjon¹que³ Ni³na¹ ya⁴jin³ cjoa⁴fa³ˀai³tsjen³-le⁴.  
\v 19 To⁴nca³ ˀya³-nia¹ nca³ nca³yi³je³ xi³ tso² cjoa⁴te¹xo³ma³ nchja⁴-le⁴ je² xi³ cjoa⁴te¹xo³ma³ tjio¹nqui³-le⁴, jme¹-ni³ nca³ nca³tsˀi³ tsˀoa³ sˀe⁴chjoa²-ni³, cˀoa⁴ nca³tsˀi³ cho⁴ta⁴son³ˀnte³ na³nqui³ cˀoe⁴²yo³-si¹ni³le⁴ cjoa⁴te¹xo³ma³-le⁴ Ni³na¹.  
\v 20 Nca⁴ ni⁴jnco³-jin² cho⁴ta⁴ xi³ cjoe⁴tˀa³-le⁴ je¹ ya⁴ nqui³xcon⁴ Ni³na¹ nca³ cˀoa⁴sˀin¹ jo³ tso² cjoa⁴te¹xo³ma³, nca⁴ to⁴tˀa³tsˀe⁴ cjoa⁴te¹xo³ma³ ˀya³-le⁴ je¹. 
\s1 Sˀe³-na¹ cjoa⁴qui²xi⁴-le⁴ Ni³na¹ xi³ to⁴tˀa³tsˀe⁴ nca³ ma³cjain¹-na¹ tˀa³tsˀe⁴ Cristo 
\p  
\v 21 To⁴nca³ ntˀai⁴-vi⁴ntai⁴ tˀa³xin² xi³ cjoa⁴te¹xo³ma³ ˀmi², je² cjoa⁴qui²xi⁴-le⁴ Ni³na¹ je³coan³tsen³. Testigo coan³-le⁴ je² cjoa⁴te¹xo³ma³ cao⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.  
\v 22 Je³coan³tsen³ je² cjoa⁴qui²xi⁴-le⁴ Ni³na¹ tˀa³tsˀe⁴ nca³tsˀi³ xi³ ma³cjain¹-le⁴, xi³ to⁴tˀa³tsˀe⁴ nca³ ma³cjain¹-le⁴ tˀa³tsˀe⁴ Cristo. Nca⁴ to⁴nco¹son² fi²cao⁴ nca³tsˀi³.  
\v 23 Nca³tsˀi³ tsa³jnqui³ je¹, li²coi³ nta³ vi³tjo³ nqui³xcon⁴ Ni³na¹.  
\v 24 Fe³tˀa³-le⁴ je¹ xi³ to⁴cjoa⁴tjao², xi³ to⁴tˀa³tsˀe⁴ cjoa⁴nta³-le⁴ Ni³na¹, nca⁴ Cristo tsa³cˀe¹chji¹ntjai² xi³ tˀa³tsˀe⁴.  
\v 25 Ni³na¹ qui³si³cˀe¹jna³son²tsen³ Cristo nca³ coan³-le⁴ je¹ntjai²-na¹ cao⁴ njin¹-le⁴. Ña¹ chjoe¹ coi³ cjoa⁴nta³-vi⁴ nca³ ma³cjain¹-na¹. Cˀoa⁴-sˀin² sˀe³son²tsen³ cjoa⁴qui²xi⁴-le⁴ Ni³na¹, nta³ tsa² cao⁴ cjoa⁴tse³jta³-le⁴ qui³si³cˀa³to³-ni³ je¹ xi³ je³ja³ˀa³to³.  
\v 26 Cˀoa⁴coan³, jme¹-ni³ nca³ cˀoa⁴-sˀin² sˀe⁴son²tsen³-si¹ni³ cjoa⁴qui²xi⁴-le⁴ Ni³na¹ ni⁴čhjin³ je²-vi⁴, cˀoa⁴ jme¹-ni³ nca³ jcha⁴-si¹ni³ nca³ Ni³na¹ tjin¹-le⁴ cjoa⁴qui²xi⁴ cˀoa⁴ nca³ si¹cje³tˀa³ je¹-le⁴ cho⁴ta⁴ xi³ ma³cjain¹-le⁴ tˀa³tsˀe⁴ Jesús.  
\v 27 Jo¹-sˀin² coan⁴-nia¹ nca³ chˀa⁴sje³je³ya³² yao³-na¹. A³li²coi³ coan⁴. Tji¹chjoa²-na¹. Jña¹-le⁴ cjoa⁴te¹xo³ma³ xi³ tji¹chjoa²-ni³na¹. A³ je² xi³ tsˀe⁴ jo³ nˀian². Ma³jain², to⁴nca³ je² xi³ tsˀe⁴ nca³ ma³cjain¹-na¹.  
\v 28 Cˀoa⁴-sˀin² nta³ cho¹son²-ni³le⁴² nca³ cho⁴ta⁴ fe³tˀa³-na¹ je¹ to⁴tˀa³tsˀe⁴ nca³ ma³cjain¹-na¹, tˀa³xin² je² xa¹ xi³ tsˀe⁴ cjoa⁴te¹xo³ma³.  
\v 29 Ni³na¹, a³ to⁴Ni³na¹ xi³ tsˀe⁴ cho⁴ta⁴ judío. A³ tsi² cˀoa⁴-ti⁴ Ni³na¹ xi³ tsˀe⁴ cho⁴ta⁴ xi³ li² judío-jin². Cjoa⁴qui²xi⁴-jin², cˀoa⁴²-ti⁴ Ni³na¹ xi³ tsˀe⁴ cho⁴ta⁴ xi³ li² judío-jin².  
\v 30 Nca⁴ to⁴jnco³ Ni³na¹ xi³ si⁴²cje³tˀa³ je¹-le⁴ cho⁴ta⁴ xi³ tsˀe⁴ cjoa⁴circuncisión xi³ to⁴tˀa³tsˀe⁴ nca³ ma³cjain¹-le⁴, cˀoa⁴ xi³ si⁴²cje³tˀa³ je¹-le⁴ cho⁴ta⁴ xi³ tsin²-le⁴ cjoa⁴circuncisión, xi³ to⁴tˀa³tsˀe⁴ nca³ ma³cjain¹-le⁴.  
\v 31 A³ ni²cha³-nia¹ cjoa⁴te¹xo³ma³ xi³ to⁴tˀa³tsˀe⁴ nca³ ma³cjain¹-na¹. Ni⁴ˀi⁴tse¹-jin². To⁴sa³ si⁴cˀe¹jna³nta³² cjoa⁴te¹xo³ma³. 
\s1 Jo³-sˀin² nca³ coan³cjain¹-le⁴ Abraham tˀa³tsˀe⁴ Ni³na¹ 
\c 4  
\p  
\v 1 Jme¹ xi³ coi⁴xoan¹-ˀni³, jme¹ xi³ qui³sa³co³-le⁴ Abraham je² nˀai³-na¹ jo³ cjoan³ yao³-na¹.  
\v 2 Tsa² je¹-le⁴ Abraham je³tˀa³-le⁴ xi³ to⁴tˀa³tsˀe⁴ xi³ qui³sˀin³, tjin¹-le⁴ jo³-sˀin² nca³ vˀa³sje³je³ya³-ni³ yao³-le⁴, to⁴nca³ li²coi³ nqui³xcon⁴ Ni³na¹.  
\v 3 Jo¹ tso² xon⁴ Escritura. Abraham coan³cjain¹-le⁴ tˀa³tsˀe⁴ Ni³na¹. Cˀoa⁴-sˀin² Ni³na¹ cho⁴ta⁴cjoa⁴qui²xi⁴ qui³tso²-le⁴.  
\v 4 Tˀa³tsˀe⁴ je² xi³ si¹xa¹, je² chji¹-le⁴ li²coi³ ma³xqui⁴cao⁴ jo³-ni³ tsa² xi³ to⁴cjoa⁴tjao², to⁴nca³ jo³-ni³ tsa² xi³ qui³tjen⁴ xi³ tˀa³tsˀe⁴.  
\v 5 To⁴nca³ tˀa³tsˀe⁴ je² xi³ tsi² si¹xa¹, to⁴nca³ ma³cjain¹-le⁴ tˀa³tsˀe⁴ Ni³na¹ xi³ si¹cje³tˀa³ je¹-le⁴ cho⁴ta⁴ xi³ tsi² ve³xcon¹ nca³ je², to⁴coi³ tsa² nca³ ma³cjain¹-le⁴, cho⁴ta⁴cjoa⁴qui²xi⁴ tso²-le⁴.  
\v 6 Jo³-sˀin² cˀoa⁴-ti⁴ je² David qui³tso²: Jo¹ to⁴nta³-le⁴ je² cho⁴ta⁴ xi³ Ni³na¹ cho⁴ta⁴cjoa⁴qui²xi⁴ tso²-le⁴, tˀa³xin² xa¹-le⁴.  
\v 7 Qui³tso²: Jo¹ to⁴nta³-le⁴ je²-ve⁴ xi³ cjoa⁴tsˀa³ntjai²cjoa⁴-le⁴ qui³cha³tˀa³, cˀoa⁴ xi³ je¹-le⁴ qui³sˀe³ˀma³.  
\v 8 Jo¹ to⁴nta³-le⁴ je² cho⁴ta⁴ xi³ Nai³-na¹ li²coi³ si¹cˀa³xqui⁴cao⁴ je¹-le⁴.  
\v 9 Je² cjoa⁴nta³ je²-vi⁴ a³ to⁴jnco³ tsˀe⁴ xi³ tjin¹-le⁴ cjoa⁴circuncisión, a³xo⁴ cˀoa⁴²-ti⁴ tsˀe⁴ xi³ tsin²-le⁴ cjoa⁴circuncisión-jin². Nca⁴ vi³xon¹-nia¹ nca³ Abraham cho⁴ta⁴cjoa⁴qui²xi⁴ qui³tso²-le⁴ nca³ coan³cjain¹-le⁴.  
\v 10 Jo¹-sˀin²ni³ nca³ cho⁴ta⁴cjoa⁴qui²xi⁴ qui³tso²-le⁴. A³ cˀia⁴² nca³ je³qui³sˀe³-le⁴ cjoa⁴circuncisión a³xo⁴ cˀia⁴ nca³ cje³ tjin¹-jin²le⁴. A³li² cˀia⁴ nca³ je³qui³sˀe³-le⁴ cjoa⁴circuncisión, to⁴nca³ cˀia⁴ nca³ cje³ tjin¹-jin²le⁴.  
\v 11 Cˀoa⁴ cjoa⁴circuncisión coan³-le⁴ jo³-ni³ tsa² choa⁴, cˀoa⁴ sello xi³ coi³ cjoa⁴qui²xi⁴ xi³ qui³sˀe³-le⁴ nca³ coan³cjain¹-le⁴ cˀia⁴ nca³ cje³ tjin¹-jin²le⁴ cjoa⁴circuncisión. Coi³ cˀoa⁴-sˀin² nca³ nˀai³-le⁴ nca³tsˀi³ cho⁴ta⁴ coan⁴-si¹ni³ xi³ ma³cjain¹-le⁴ nca³ tsin²-le⁴ cjoa⁴circuncisión, jme¹-ni³ nca³ cho⁴ta⁴cjoa⁴qui²xi⁴ coi⁴tso⁴-si¹ni³le⁴ nta³ tsa² je².  
\v 12 Cˀoa⁴-ti⁴sˀin² nˀai³-le⁴ coan³ xi³ tjin¹-le⁴ cjoa⁴circuncisión. A³li² tsa² to⁴jnco³ je²-jin² xi³ tjin¹-le⁴ cjoa⁴circuncisión, to⁴nca³ cˀoa⁴²-ti⁴ je² xi³ fi²tjen⁴nqui³-le⁴ ntia⁴²-le⁴ Abraham, jo³-sˀin² coan³cjain¹-le⁴ nca³ cje³ tjin¹-jin²le⁴ cjoa⁴circuncisión. 
\s1 Ni³na¹ qui³si³sˀe³nqui³-le⁴ Abraham cjoa⁴tjao² xi³ to⁴tˀa³tsˀe⁴ nca³ coan³cjain¹-le⁴ 
\p  
\v 13 Nca⁴ Ni³na¹ qui³si³sˀe³nqui³-le⁴ Abraham cao⁴ ntje⁴-le⁴ nca³ sˀe⁴-le⁴ cjoa⁴tjao² son³ˀnte³-vi⁴, a³li² to⁴tˀa³tsˀe⁴-jin² cjoa⁴te¹xo³ma³, to⁴nca³ to⁴tˀa³tsˀe⁴ je² cjoa⁴qui²xi⁴ xi³ qui³sˀe³-le⁴ nca³ coan³cjain¹-le⁴.  
\v 14 Tsa² je² cho⁴ta⁴ xi³ tsˀe⁴ cjoa⁴te¹xo³ma³ sˀe⁴-le⁴ cjoa⁴tjao², li²jme³-jin² chji¹-le⁴ xi³ ma³cjain¹-na¹ˀni³, cˀoa⁴ qui³cha³ xi³ Ni³na¹ qui³tsjoa³ tsˀoa³.  
\v 15 Je² cjoa⁴te¹xo³ma³ si¹cˀe¹jna³ne² cjoa⁴ñˀain³, to⁴nca³ ya⁴ jña³ nca³ tsin² cjoa⁴te¹xo³ma³-jin², cˀoa⁴²-ti⁴ tsin² xi³ fa³ˀa³to³ntjai²-le⁴.  
\v 16 Coi³ nca³ cˀoa⁴ma³ xi³ to⁴tˀa³tsˀe⁴ nca³ ma³cjain¹-na¹, jme¹-ni³ nca³ cˀoa⁴ma³-si¹ni³ to⁴cao⁴ cjoa⁴nta³-le⁴ Ni³na¹, cˀoa⁴ jme¹-ni³ nca³ je² xi³ Ni³na¹ qui³tsjoa³-ni³ tsˀoa³ ña³qui³ tjin¹qui²xi⁴-ni¹ tˀa³tsˀe⁴ nca³tsˀi³ ntje⁴-le⁴, a³li² to⁴je²-jin² xi³ tsˀe⁴ cjoa⁴te¹xo³ma³, to⁴nca³ cˀoa⁴²-ti⁴ je² xi³ ma³cjain¹-le⁴ jo³-sˀin² coan³cjain¹-le⁴ Abraham xi³ nˀai³-na¹ nca³tsˀia³².  
\v 17 (Jo³-sˀin² tji¹tˀa³: Nˀai³-le⁴ xi³ ncjin² na⁴xi⁴na³nta¹ qui³si³cˀe¹jna³-le²³.) Cˀoa⁴coan³ nqui³xcon⁴ Ni³na¹. Abraham coan³cjain¹-le⁴ tˀa³tsˀe⁴ Ni³na¹, je² xi³ tsjoa¹-le⁴ cjoa⁴vi³jna³chon³ xi³ cˀen³, cˀoa⁴ nchja⁴-le⁴ cjoa⁴ xi³ tsin² jo³-ni³ tsa² xi³ tjin¹.  
\v 18 Cˀia⁴ nca³ li²jme³ ti⁴tjin¹-ni³le⁴ cjoa⁴cho³ya²cao⁴cjoa⁴, to⁴jo³ cao⁴ cjoa⁴cho³ya²cao⁴cjoa⁴ coan³cjain¹-ni³le⁴ Abraham, nca³ coan⁴ nˀai³-le⁴ ncjin² na⁴xi⁴na³nta¹, jo³-sˀin² nca³ tsa³cˀin²-le⁴: Cˀoa⁴²-sˀin² coan⁴ ntje⁴-li⁴.  
\v 19 Li²coi³ coan³ˀi³nta³jin³ jo³-sˀin² coan³cjain¹-le⁴, cˀia⁴ nca³ qui³si³cja³ˀai³tsjen³ jo³-ni³ tsa² je³cˀen³ yao³-le⁴ (nca³ je³me³ jnco³ ciento no¹-le⁴), cˀoa⁴ cˀia⁴ nca³ qui³si³cja³ˀai³tsjen³ nca³ ˀnti⁴ Sara.  
\v 20 To⁴nca³ nta³ coan³cjain¹-le⁴. Li²coi³ jao² tsa³cˀe¹-con³ xi³ tˀa³tsˀe⁴ xi³ Ni³na¹ qui³tsjoa³-le⁴ tsˀoa³. To⁴sa³ nqui²sa⁴ nˀion¹ nta³ coan³cjain¹-le⁴, tsˀa³sje³je³ya³ Ni³na¹,  
\v 21 cˀoa⁴ nˀion¹ nta³ tsa³cˀe¹-le⁴con³ nca³ nca³yi³je³ xi³ Ni³na¹ qui³tsjoa³-le⁴ tsˀoa³, cˀoa⁴-ti⁴ Ni³na¹ tjin¹-le⁴ nca³nˀion¹ nca³ cˀoa⁴sˀin⁴².  
\v 22 Coi³ nca³ Ni³na¹ cho⁴ta⁴cjoa⁴qui²xi⁴ qui³tso²-le⁴.  
\v 23 A³li² tsa² to⁴je²-jin² tˀa³tsˀe⁴ nca³ qui³chji³-ni³ nca³ cho⁴ta⁴cjoa⁴qui²xi⁴ qui³tso²le⁴,  
\v 24 to⁴nca³ cˀoa⁴-ti⁴ tˀa³tsan⁴² xi³ cho⁴ta⁴cjoa⁴qui²xi⁴ coi⁴tso⁴-na¹, ña¹ xi³ ma³cjain¹-na¹ tˀa³tsˀe⁴ Ni³na¹ xi³ qui³si³cja³ˀa¹ya³-ni³le⁴ Jesús, Nai³-na¹, ya⁴jin³-le⁴ cˀen³.  
\v 25 Je² xi³ qui³ni²cˀen³ tˀa³tsˀe⁴ cjoa⁴tsˀen⁴-na¹, cˀoa⁴ xi³ ja³ˀa²ya³-le⁴ jme¹-ni³ nca³ cjoe⁴tˀa³-si¹ni³ je¹-na¹. 
\c 5  
\s1 Fe³tˀa³ je¹-na¹ xi³ to⁴tˀa³tsˀe⁴ nca³ ma³cjain¹-na¹ 
\p  
\v 1 Coi³ nca³ je³tˀa³ je¹-na¹ xi³ to⁴tˀa³tsˀe⁴ nca³ ma³cjain¹-na¹, tjin¹-na¹ cjoa⁴ xi³ nchˀan¹ tjin¹ tˀa³tsˀe⁴ Ni³na¹, xi³ to⁴tˀa³tsˀe⁴ Nai³-na¹ Jesucristo.  
\v 2 Xi³ to⁴tˀa³tsˀe⁴ Cristo cˀoa⁴-ti⁴ qui³sa³co³-na¹ ˀnte³ nca³ ji³tja³sˀen³² je² cjoa⁴nta³-vi⁴, nca⁴ ma³cjain¹-na¹ tˀa³tsˀe⁴. Nˀion¹ nta³ ti³yo³jin³-le⁴² coi³ cjoa⁴nta³-vi⁴, cˀoa⁴ chˀa²sje³je³ya³² yao³-na¹ tˀa³tsˀe⁴ cjoa⁴cho³ya²cao⁴cjoa⁴ xi³ tjin¹-na¹ nca³ cˀoa⁴cao⁴tˀa³-na¹ cjoa⁴je³ya³-le⁴ Ni³na¹.  
\v 3 A³li² tsa² to⁴coi³ je²-vi⁴, to⁴nca³ cˀoa⁴-ti⁴ chˀa²sje³je³ya³² yao³-na¹ tˀa³tsˀe⁴ cjoa⁴ñˀain³ xi³ tjin¹-na¹, nca³ ˀya³² nca³ je² cjoa⁴ñˀain³-ve⁴ si¹jcha¹jin³-na¹ cjoa⁴tse³jta³.  
\v 4 Je² cjoa⁴tse³jta³-ve⁴ si¹jcha¹jin³-na¹ nca³ nta³ coi²tjoa⁴². Cˀoa⁴ nca³ nta³ coi²tjoa⁴², coi³ xi³ si¹jcha¹jin³-na¹ cjoa⁴cho³ya²cao⁴cjoa⁴.  
\v 5 Cˀoa⁴ je² cjoa⁴cho³ya²cao⁴cjoa⁴ a³li²coi³ si¹soa³, nca⁴ je² cjoa⁴tjao²cha³-le⁴ Ni³na¹ qui³si³tse³ya³ ni⁴ma⁴-na¹ xi³ to⁴tˀa³tsˀe⁴ je² Espíritu Santo xi³ tsa³cˀai²-na¹.  
\v 6 Cˀia⁴ nca³ to⁴jo³ i³nta³jin³-sa³na¹, coi³ ni⁴čhjin³ xi³ qui³sˀe³choa⁴ nca³ Cristo cˀen³ xi³ tˀa³tsˀe⁴ xi³ tsi² ve³xcon¹ Ni³na¹.  
\v 7 Xi³ cjoa⁴qui²xi⁴ li²coi³-la⁴ coi⁴ya²ntjai² jnco³ cho⁴ta⁴ xi³ tˀa³tsˀe⁴ cho⁴ta⁴cjoa⁴qui²xi⁴, to⁴nca³ tsa² coi³ ni⁴čhjin³ nca³ jnco³ xi³ coan⁴nˀion¹con³ nca³ coi⁴ya²ntjai² xi³ tˀa³tsˀe⁴ jnco³ cho⁴ta⁴nta³.  
\v 8 To⁴nca³ Ni³na¹ va³co¹qui²xi⁴ cjoa⁴tjao²cha³-le⁴ xi³ tˀa³tsan⁴² nca³ Cristo cˀen³ xi³ tˀa³tsan⁴², cˀia⁴ nca³ to⁴jo³ cho⁴ta⁴je¹ nia¹.  
\v 9 To⁴coi³ cjoa⁴ nca³ ntˀai⁴-vi⁴ je³je³tˀa³ je¹-na¹ xi³ to⁴tˀa³tsˀe⁴ njin¹-le⁴, nqui²sa⁴-jin² nˀion¹ cjoa⁴qui²xi⁴ nca³ coi²tjo⁴ntjai²-nia¹ je² cjoa⁴jti³-le⁴ Ni³na¹ xi³ to⁴tˀa³tsˀe⁴ Cristo.  
\v 10 Tsa² cˀia⁴ nca³ co²ntran⁴-na¹ coan³ Ni³na¹, ti⁴je²-ni³ qui³si³cjao¹nta³-na¹ ti⁴tˀa³tsˀe⁴-ni³ xi³ to⁴tˀa³tsˀe⁴ cjoa⁴vi³ya³-le⁴ ˀnti¹-le⁴, to⁴sa³ ntˀai⁴, nca³ je³qui³cho³va²nta³-nia¹, coi²tjo⁴ntjai²-nia¹ xi³ to⁴tˀa³tsˀe⁴ cjoa⁴vi³jna³chon³-le⁴.  
\v 11 A³li² tsa² to⁴je² je²-vi⁴, to⁴nca³ cˀoa⁴²-ti⁴ nˀo²sje³je³ya³²sa³ Ni³na¹ to⁴tˀa³tsˀe⁴ Nai³-na¹ Jesucristo. To⁴tˀa³tsˀe⁴ je³qui³chjoe¹ ntˀai⁴-vi⁴ je² cjoa⁴cho³va²nta³-vi⁴. 
\s1 Je² Adam cˀoa⁴ je² Cristo 
\p  
\v 12 Coi³ je² xi³ je¹ ˀmi² ja³ˀa³sˀen³jin³ son³ˀnte³ xi³ to⁴tˀa³tsˀe⁴ jnco³ cho⁴ta⁴. Cˀoa⁴-sˀin² tjin¹ cjoa⁴vi³ya³ xi³ to⁴tˀa³tsˀe⁴ je¹-ve⁴. Cˀoa⁴ je² cjoa⁴vi³ya³-ve⁴ cˀoa⁴-sˀin² qui³tsao³tˀa³-le⁴ nca³tsˀi³ cho⁴ta⁴, nca⁴ tsa³jnqui³ je¹ nca³tsˀi³.  
\v 13 Ti¹tjon² nca³ ja³ˀai³ cjoa⁴te¹xo³ma³, tjin¹ je¹ i⁴ son³ˀnte³-vi⁴, to⁴nca³ li²coi³ ma³xqui⁴tˀa³ je¹, tsa² tsin² cjoa⁴te¹xo³ma³.  
\v 14 To⁴nca³ cjoa⁴vi³ya³ tsa³ca³te¹xo³ma³ ni⁴čhjin³-le⁴ Adam sa³ˀnta³ ni⁴čhjin³-le⁴ Moisés. Tsa³ca³te¹xo³ma³-le⁴ nta³ tsa² je² xi³ tsi² je¹ tsa³jnqui³ jo³ qui³sˀin³ Adam nca³ ja³ˀa³to³ntjai²-le⁴ cjoa⁴te¹xo³ma³. Je² Adam nco³ya³-le⁴ je² xi³ cjoa⁴ˀai¹.  
\v 15 To⁴nca³ je² cjoa⁴tjao²-le⁴ Ni³na¹, a³li² cˀoa⁴-sˀin² coan³ jo³-ni³ tsa² je² cjoa⁴tsˀa³ntjai²cjoa⁴. Nca⁴ tsa² ncjin² xi³ cˀen³ xi³ to⁴tˀa³tsˀe⁴ je¹-le⁴ jnco³ cho⁴ta⁴-ve⁴, nqui²sa⁴ nˀion¹ coan³ncjin²ya³ cjoa⁴nta³-le⁴ Ni³na¹ xi³ tˀa³tsˀe⁴ xi³ ncjin² ma³-ni³, cˀoa⁴ je² cjoa⁴tjao² coan³ncjin²ya³ xi³ to⁴tˀa³tsˀe⁴ cjoa⁴nta³-le⁴ jnco³ cho⁴ta⁴ xi³ Jesucristo.  
\v 16 Je² cjoa⁴tjao²-le⁴ Ni³na¹ li²coi³ cˀoa⁴coan³ jo³ coan³ je² je¹-ve⁴. Cˀia⁴ nca³ Ni³na¹ tsa³cˀe¹nta³jin³ je² cjoa⁴tsˀa³ntjai²cjoa⁴-ve⁴ xi³ jnco³ ma³-ni³, qui³sˀe³ cjoa⁴ñˀain³, to⁴-nca³ je² cjoa⁴tjao² ja³ˀai³ xi³ to⁴tˀa³tsˀe⁴ ncjin² cjoa⁴tsˀa³ntjai²cjoa⁴, nca³ cˀoa⁴-sˀin² cjoe⁴tˀa³ je¹-na¹.  
\v 17 Cˀia⁴ tsa² to⁴tˀa³tsˀe⁴ jnco³ cjoa⁴tsˀa³ntjai²cjoa⁴ xi³ tsˀe⁴ jnco³ cho⁴ta⁴-ve⁴, cjoa⁴vi³ya³ tsa³ca³te¹xo³ma³, nqui²sa⁴ to⁴nˀion¹ coa⁴te²xo³ma³ je² cho⁴ta⁴ xi³ cjoe¹ xi³ nˀion¹ tse³ cjoa⁴nta³ cˀoa⁴ je² cjoa⁴tjao² nca³ je³tˀa³ je¹-le⁴. Coa⁴te²xo³ma³ nca³ cˀoe¹jna³con³ntsjai² xi³ to⁴tˀa³tsˀe⁴ jnco³ xi³ Jesucristo.  
\v 18 Cˀoa⁴-sˀin² jo³-sˀin² nca³ to⁴tˀa³tsˀe⁴ je² cjoa⁴tsˀa³ntjai²cjoa⁴ xi³ tsˀe⁴ jnco³ cho⁴ta⁴-ve⁴ cjoa⁴ñˀain³ qui³sˀe³-le⁴ nca³tsˀi³ cho⁴ta⁴, cˀoa⁴-ti⁴sˀin² to⁴tˀa³tsˀe⁴ je² cjoa⁴qui²xi⁴-le⁴ jnco³ cho⁴ta⁴ cjoa⁴nta³ qui³sˀe³-le⁴ nca³tsˀi³ cho⁴ta⁴, nca³ cjoe⁴tˀa³ je¹-le⁴, cˀoa⁴ cˀoa⁴-sˀin² sˀe³-le⁴ cjoa⁴vi³jna³chon³.  
\v 19 Jo³-sˀin² nca³ cjai¹nca³ ncjin² xi³ cho⁴ta⁴je¹ coan³ xi³ to⁴tˀa³tsˀe⁴ nca³ jnco³ cho⁴ta⁴ xi³ tsi² qui³si³tjo³son², cˀoa⁴-ti⁴sˀin² cjai¹nca³ ncjin² xi³ cho⁴ta⁴cjoa⁴qui²xi⁴ coan⁴ xi³ to⁴tˀa³tsˀe⁴ nca³ jnco³ cho⁴ta⁴ xi³ qui³si³tjo³son².  
\v 20 To⁴nca³ je² cjoa⁴te¹xo³ma³ ja³ˀa³sˀen³tˀa³, jme¹-ni³ nca³ je² cjoa⁴tsˀa³ntjai²cjoa⁴-ve⁴ nqui²sa⁴ tse³ coan⁴-si¹ni³. To⁴-nca³ jña³ nca³ je² je¹-ve⁴ coan³tse³, cˀoa⁴²-ti⁴ nqui²sa⁴ tse³ coan³-sa³ cjoa⁴nta³.  
\v 21 Jo³-sˀin² nca³ je² je¹-ve⁴ tsa³ca³te¹xo³ma³ xi³ tˀa³tsˀe⁴ cjoa⁴vi³ya³, cˀoa⁴-ti⁴sˀin²ni³ je² cjoa⁴nta³-ve⁴ coa⁴te²xo³ma³ xi³ to⁴tˀa³tsˀe⁴ cjoa⁴qui²xi⁴ nca³ sˀe⁴ cjoa⁴vi³jna³chon³ nca³ntsjai² xi³ to⁴tˀa³tsˀe⁴ Jesucristo Nai³-na¹. 
\c 6  
\s1 Jo³-ni³ tsa² ti³yo³cˀen³², li²coi³ ti⁴ña¹ ˀya³-nia¹ je¹ 
\p  
\v 1 Jme¹ xi³ coi⁴xoan¹-ˀni³. A³ coi⁴jnchi¹-sa³² je¹, jme¹-ni³ nca³ nqui²sa⁴ coan⁴tse³-ni³ cjoa⁴nta³.  
\v 2 Ni⁴ˀi⁴tse¹-jin². Ña¹ xi³ jo³-ni³ tsa² ti³yo³cˀen³², nca³ li²coi³ ti⁴ña¹ ˀya³-nia¹ je¹. Jo¹-sˀin² ti⁴coi⁴yo³-sa³nia³² cao⁴ je¹.  
\v 3 A³xo⁴ tsi² tsa² ˀyao³ nca³ nca³tsˀia³² jo³ tjin¹ ma³-nia³² xi³ qui³sa³te³nta¹tˀa³-le⁴² Cristo Jesús, cˀoa⁴-ti⁴ qui³sa³te³nta¹tˀa³² cjoa⁴vi³ya³-le⁴.  
\v 4 To⁴jnco³ qui³sˀe³ñai³-nia¹ cao⁴ je² nca³ cˀoa⁴-sˀin² qui³sa³te³nta¹tˀa³² cjoa⁴vi³ya³-le⁴, jme¹-ni³ nca³ cˀoa⁴-ti⁴sˀin²ni³ ña¹-vi⁴ coi⁴tso⁴ma²coa⁴² cjoa⁴vi³jna³chon³, jo³-sˀin² nca³ Cristo ja³ˀa²ya³jin³-ni³le⁴ cˀen³ xi³ to⁴tˀa³tsˀe⁴ cjoa⁴je³ya³-le⁴ Nˀai³-na¹.  
\v 5 Cˀia⁴ tsa² cˀoa⁴-sˀin² to⁴jnco³ coan³² cao⁴ je², jo³-ni³ tsa² cˀen³² jo³-sˀin² cˀen³ nca³ je², cˀoa⁴-ti⁴sˀin² to⁴jnco³ coan⁴² cao⁴ je² nca³ cjoa⁴ˀa¹ya³-na¹ jo³ coan³ nca³ ja³ˀa²ya³-le⁴ nca³ je².  
\v 6 ˀya³-nia¹ je²-vi⁴ nca³ nca³yi³je³ jo³ cjoan³² nca³sˀa⁴ to⁴jnco³ qui³sˀe³tˀa³ cro² cao⁴ Jesús, jme¹-ni³ nca³ je² yao³-na¹ xi³ tjin¹-le⁴ je¹ sˀe⁴chjoa²-si¹ni³le⁴, cˀoa⁴ jme¹-ni³ nca³ tsi² ti⁴cjoa⁴nˀion¹ coan⁴chjen¹-si¹ni³na¹ je¹-ve⁴.  
\v 7 Nca⁴ je² xi³ cˀen³, je³tˀa³ je¹-le⁴.  
\v 8 Cˀia⁴ tsa² cˀen³coa⁴² Cristo, ma³cjain¹-na¹ nca³ cˀoa⁴-ti⁴ coi⁴yo³chon³coa⁴² nca³ je².  
\v 9 ˀya³-nia¹ nca³ Cristo li²coi³ ti⁴coi⁴ya²-sa³ni³ nca³ ja³ˀa²ya³jin³-ni³le⁴ cˀen³. Cjoa⁴vi³ya³ li²coi³ ti⁴va³te¹xo³ma³-sa³ni³le⁴ nca³ je².  
\v 10 Cˀia⁴ nca³ cˀen³ Cristo, to⁴jnco³ cˀa³ ntia³cˀen³ tˀa³tsˀe⁴ je¹, to⁴nca³ nca³ ti¹jna³con³, ti¹jna³con³-ni¹ tˀa³tsˀe⁴ Ni³na¹.  
\v 11 Cˀoa⁴²-ti⁴sˀin² nca³ jon², cho¹son²-ni³lao⁴³ tˀa³tsˀe⁴ yao³-no³ nca³ cjoa⁴qui²xi⁴ nca³ jo³-ni³ tsa² ti³yo³cˀen³-nio¹³ tsˀe⁴ je¹, to⁴nca³ ti³yo³chon³-nio¹³ tˀa³tsˀe⁴ Ni³na¹ nca³ ti³yo³cao⁴³ Cristo Jesús Nai³-na¹.  
\v 12 Coi³ cjoa⁴ nca³ li² vˀai²ˀnte³-jin²lao⁴³ je¹-ve⁴ nca³ coa⁴te²xo³ma³ ya⁴jin³ yao³-no³ xi³ vi³ya³, nca³ cˀoa⁴-sˀin² si⁴tjo³son²-ni³lao⁴³ xi³ cjoa⁴chi⁴nca⁴-le⁴.  
\v 13 Ni⁴ˀi⁴tse¹-jin² vˀai²ˀnte³-lao⁴³ je¹ jo³ tjin¹ jco⁴ya³-le⁴ yao³-no³, nca³ cjoa⁴tsˀen⁴ si¹chjen¹. To⁴sa³ Ni³na¹ tˀai²ˀnte³-lao⁴³ yao³-no³, jo³-ni³ tsa² xi³ cˀen³ qui³ni²cja³ˀa¹ya³-ni³le⁴, tjio¹con³-ni³ ntˀai⁴-vi⁴. Cˀoa⁴-ti⁴ tˀai²ˀnte³-lao⁴³ Ni³na¹ nca³yi³je³ jco⁴ya³-le⁴ yao³-no³, nca³ coan⁴chjen¹-le⁴ xi³ tˀa³tsˀe⁴ xi³ cjoa⁴qui²xi⁴.  
\v 14 Nca⁴ je² je¹-ve⁴ li²coi³ coa⁴te¹xo³ma³-no³, nca³ tsi² tsa² na³nqui³ ti³yo³-lao⁴³ cjoa⁴te¹xo³ma³, to⁴nca³ na³nqui³ ti³yo³-lao⁴³ cjoa⁴nta³-le⁴ Ni³na¹. 
\s1 Cho⁴ˀnta³ xi³ tsˀe⁴ xi³ cjoa⁴qui²xi⁴ ca²ta³ma³² 
\p  
\v 15 Jme¹-ni³ˀni³. A³ coi⁴jnchi¹-nia¹ je¹ nca³ tsi² tsa² na³nqui³ ti³yo³-le⁴² cjoa⁴te¹xo³ma³, to⁴nca³ na³nqui³ ti³yo³-le⁴² cjoa⁴nta³. Ma³jain² ni⁴ˀi⁴tse¹-jin².  
\v 16 A³ tsi² ˀyao³ ˀya³-ni³ve⁴ xi³ cˀoai⁴-lao⁴³ yao³-no³ nca³ cho⁴ˀnta³-le⁴ coaon⁴³ nca³ si⁴tjo³son²-lao⁴³, jon² nio¹³ xi³ ña³qui³ cho⁴ˀnta³-le⁴ mao³ je² xi³ ni²tjo³son²-lao⁴³. Tsa² je² je¹-ve⁴ xi³ cho⁴ˀnta³-le⁴ coaon⁴³, coi⁴ya²-nio¹³ˀni³, to⁴nca³ tsa² si⁴tjo³son²-lao⁴³ Ni³na¹, cˀoai⁴-no³ xi³ cjoa⁴qui²xi⁴.  
\v 17 To⁴nca³ cjoa⁴nta³ cˀoai⁴-le⁴² Ni³na¹ nca⁴ jon² xi³ cho⁴ˀnta³-le⁴ je¹ coaon³, to⁴nca³ je³qui³ni²tjo³son²-lao⁴³ cao⁴ ni⁴ma⁴-no³ jo³ cji³ choa⁴-le⁴ cjoa⁴fa³ˀai³tsjen³ xi³ tsa³cˀin²ya³-no³, jña³-le⁴ xi³ qui³cha³ni²tˀa³-lao⁴³ yao³-no³.  
\v 18 To⁴nca³ je³ji²tjo⁴ntai¹-lao⁴³ je² je¹. Je³coaon³ cho⁴ˀnta³-le⁴ xi³ cjoa⁴qui²xi⁴.  
\v 19 Cˀoa⁴ ti²si³chjen¹³ en¹ jo³ tso² cho⁴ta⁴, nca⁴ to⁴choa³ nca³nˀion¹ tjin¹-no³. Jo³-sˀin² nca³ tsa³cˀai²ˀnte³-lao⁴³ nca³yi³je³ jco⁴ya³-le⁴ yao³-no³ nca³ jo³ xi³ cho⁴ˀnta³-sˀin² coan³chjen¹-lao⁴³ xi³ chˀao³ tjin¹ cao⁴ xi³ cjoa⁴tsˀa³ntjai²cjoa⁴ xi³ to⁴sin³ to⁴nta³, cˀoa⁴-ti⁴sˀin² ntˀai⁴-vi⁴ tˀai²ˀnte³-lao⁴³ nca³yi³je³ jco⁴ya³-le⁴ yao³-no³ nca³ jo³ xi³ cho⁴ˀnta³-sˀin² coan⁴chjen¹-lao⁴³ xi³ cjoa⁴qui²xi⁴, nca³ cˀoa⁴-sˀin² coan⁴tsje³-nio³ nca³ jon².  
\v 20 Cˀia⁴ nca³ cho⁴ˀnta³-le⁴ je¹ coaon³, tsa³qui³ma³ntai¹-lao⁴³ xi³ cjoa⁴qui²xi⁴.  
\v 21 Jme¹-ni³ xi³ qui³si³jcha¹jin³-no³ je² cjoa⁴ je²-ve⁴, xi³ ntˀai⁴-vi⁴ntai⁴ ma³soa³-ni³no³. Je² xi³ cjoe⁴tˀa³-le⁴ je² cjoa⁴-ve⁴, cjoa⁴vi³ya³ ni¹.  
\v 22 To⁴nca³ ntˀai⁴-vi⁴ntai⁴ nca³ je³ji²tjo⁴ntai¹-lao⁴³ je¹, cˀoa⁴ cho⁴ˀnta³-le⁴ Ni³na¹ coaon³, cˀoa⁴-sˀin² cji³ma³jcha¹jin³-no³ xi³ coan⁴tsje³jin³-ni³no³. Cˀoa⁴ xi³ cjoe⁴tˀa³-ni³ je²-vi⁴ cjoa⁴vi³jna³chon³ nca³ntsjai² ni¹.  
\v 23 Nca⁴ je² chji¹-le⁴ je¹ cjoa⁴vi³ya³ ni¹, to⁴nca³ je² cjoa⁴tjao²-le⁴ Ni³na¹ cjoa⁴vi³jna³chon³ nca³ntsjai² ni¹, xi³ to⁴tˀa³tsˀe⁴ Cristo Jesús Nai³-na¹. 
\c 7  
\s1 Cjoa⁴nco¹son² tˀa³tsˀe⁴ cjoa⁴vi³xan³ 
\p  
\v 1 A³ tsi² tsa² ˀyao³, ntsˀe³, (nca³ fa³coa⁴ je² xi³ ve³ cjoa⁴te¹xo³ma³) nca³ je² cjoa⁴te¹xo³ma³ va³te¹xo³ma³-le⁴ cho⁴ta⁴ cˀia⁴ nca³ ti¹jna³con³-sa³.  
\v 2 Je² chjon⁴² xi³ je³chi³xan³ na³nqui³ ti¹jna³-le⁴ xˀin⁴-le⁴ jo³ tso² cjoa⁴te¹xo³ma³, cˀia⁴ nca³ tjen⁴ ti¹jna³con³-sa³ xˀin⁴-le⁴, to⁴nca³ tsa² cˀen³ xˀin⁴-le⁴ ti¹jna³ntai¹-le⁴ cjoa⁴te¹xo³ma³ xi³ tˀa³tsˀe⁴ xˀin⁴-le⁴.  
\v 3 Cˀoa⁴-sˀin² cˀia⁴ nca³ ti¹jna³con³ xˀin⁴-le⁴, tsa² tjin¹-le⁴ xˀin⁴ xi³ cja⁴ˀai¹ chjon⁴²cha³jnqui³tˀa³ ˀmi², to⁴nca³ tsa² cˀen³ xˀin⁴-le⁴, ti¹jna³ntai¹-le⁴ cjoa⁴te¹xo³ma³. Cˀia⁴ tsa² xˀin⁴ xi³ cja⁴ˀai¹ sˀe⁴-le⁴, a³li² chjon⁴²cha³jnqui³tˀa³-jin² ˀmi²-le⁴.  
\v 4 Cˀoa⁴-ti⁴sˀin² nca³ jon²-vi⁴, ntsˀe³, jo³-ni³ tsa² xi³ ti³yo³cˀaon³ tˀa³tsˀe⁴ cjoa⁴te¹xo³ma³-ve⁴ xi³ to⁴tˀa³tsˀe⁴ yao³-le⁴ Cristo, jme¹-ni³ nca³ tsˀe⁴ xi³ cja⁴ˀai¹ coan⁴-si¹nio³. Tsˀe⁴ coaon⁴³ je² xi³ ja³ˀa²ya³jin³-ni³le⁴ xi³ cˀen³, jme¹-ni³ nca³ coan⁴jcha¹jin³-si¹ni³na¹ cjoa⁴nta³ xi³ tˀa³tsˀe⁴ Ni³na¹.  
\v 5 Cˀia⁴ nca³ tsa³qui³yoa³² jo³ coan³ cjoan³ yao³-na¹, je² cjoa⁴chi⁴nca⁴-le⁴ je¹-ve⁴ xi³ coan³ to⁴tˀa³tsˀe⁴ cjoa⁴te¹xo³ma³, qui³si³xa¹jin³ nca³yi³je³ jco⁴ya³-le⁴ yao³-na¹, qui³si³jcha¹jin³-na¹ cjoa⁴ xi³ tˀa³tsˀe⁴ cjoa⁴vi³ya³.  
\v 6 To⁴nca³ ntˀai⁴-vi⁴ je³ji²tjo⁴ntai¹-le⁴² cjoa⁴te¹xo³ma³, nca³ jo³-ni³ tsa² je³ti³yo³cˀen³-le⁴² jña³-le⁴ xi³ tsa³qui³yo³nˀion¹-le⁴². Cˀoa⁴-sˀin² coan⁴chjen¹-na¹ jo³-ni³ tsa² cho⁴ˀnta¹ jo³-sˀin² tso² cjoa⁴cho⁴tse⁴ xi³ tsˀe⁴ Espíritu Santo, a³li²coi³ jo³-sˀin² tso² je² cjoa⁴jchi¹nca³ xi³ tji¹tˀa³ xon⁴. 
\s1 Je² xi³ je¹ ˀmi² ti¹jna³jin³-na¹ 
\p  
\v 7 Jme¹-ni³ xi³ coi⁴xoan¹-ˀni³. Je² cjoa⁴te¹xo³ma³-ve⁴, a³ je¹ ni¹. Ma³jain², ni⁴to⁴ˀi⁴tse¹-jin² cˀoa⁴tjin¹. To⁴nca³ an³ li²coi³ tsa³ˀve³ xi³ je¹ ˀmi², tsa² tsi² xi³ to⁴tˀa³tsˀe⁴ cjoa⁴te¹xo³ma³. Cˀoa⁴-ti⁴ li²coi³ tsa³ˀve³ xi³ cjoa⁴xin²ta³con², cˀia⁴ tsa² cjoa⁴te¹xo³ma³ li²coi³ cˀoa⁴qui³tso²: A³li² ma³xin²ta³con²-jin²³.  
\v 8 To⁴nca³ je² je¹-ve⁴ qui³sˀe³-le⁴ ˀnte³ xi³ to⁴tˀa³tsˀe⁴ cjoa⁴te¹xo³ma³. Cˀoa⁴-sˀin² qui³si³ncjin²-coan³ nca³yi³je³ jco⁴ya³ cjoa⁴chi⁴nca⁴. Cˀia⁴ tsa² tsin² cjoa⁴te¹xo³ma³ je² je¹ jo³-ni³ tsa² ti¹jna³cˀen³-ni¹.  
\v 9 Cˀoa⁴-sˀin² tsa³ca²te⁴jna³coan³ xi³jnco³ ni⁴čhjin³ tˀa³xin² cjoa²te¹xo³ma³, to⁴nca³ cˀia⁴ nca³ ja³ˀai³ cjoa⁴te¹xo³ma³-ve⁴, je² je¹-ve⁴ tsa³cˀe²jna³con³-ni¹, cˀoa⁴ an³ jo³-ni³ tsa² cˀen³-nia¹³.  
\v 10 Cˀoa⁴ coan³sjai³-na³ nca³ je² cjoa⁴te¹xo³ma³-ve⁴ xi³ tˀa³-tsˀe⁴ cjoa⁴vi³jna³chon³ cˀoa⁴coan³-na³ jo³-ni³ tsa² cjoa⁴-vi³ya³.  
\v 11 Nca⁴ je² je¹-ve⁴ qui³sˀe³-le⁴ ˀnte³ xi³ to⁴tˀa³tsˀe⁴ cjoa⁴-te¹xo³ma³. Je² je¹-ve⁴ tsa³cˀa²na⁴cha⁴-na³, cˀoa⁴ qui³si³cˀen³-na³ xi³ to⁴tˀa³tsˀe⁴ cjoa⁴te¹xo³ma³.  
\v 12 Cˀoa⁴-sˀin² nca³yi³je³ cjoa⁴te¹xo³ma³ ña³qui³ tsje³-ni¹, cˀoa⁴ tjin¹-le⁴ cjoa⁴qui²xi⁴, cˀoa⁴ nta³-ni¹.  
\v 13 Je² xi³ nta³-ve⁴ˀni³ a³ qui³si³cˀen³-na³. Ma³jain², to⁴nca³ je² je¹-ve⁴ qui³si³xa¹jin³-na³ cjoa⁴vi³ya³ xi³ to⁴tˀa³tsˀe⁴ xi³ nta³ tjin¹, jme¹-ni³ nca³ coan⁴tsen³-si¹ni³ nca³ je² xi³ je¹. Xi³ to⁴tˀa³tsˀe⁴ cjoa⁴te¹xo³ma³ je² je¹-ve⁴ nqui²sa⁴ nˀion¹ tjin¹-le⁴ je¹.  
\v 14 ˀya³-nia¹ nca³ je² cjoa⁴te¹xo³ma³ tsˀe⁴ Espíritu Santo, to⁴nca³ an³ to⁴xa¹ yao³ nia¹³. Qui³sa³te²na³tˀa³-le⁴ je¹-ve⁴ na³nqui³ ti²jna⁴-le⁴.  
\v 15 A³li²coi³ ma³cho⁴ya³-na³ jme³ xi³ sˀian³ an³-vi⁴, ni⁴-cˀoa⁴²-jin² sˀian³ je² xi³ me³-na³, to⁴nca³ je² xi³ chˀao³que⁴, je²-ve⁴ xi³ cˀoa⁴²sˀian³.  
\v 16 Cˀoa⁴ tsa² cˀoa⁴²sˀian³ je² xi³ tsi² tsa² coi³ me³-na³, an³ si³qui²xi⁴ya³nta³ nca³ nta³ tjin¹ je² cjoa⁴te¹xo³ma³.  
\v 17 Cˀoa⁴-sˀin² li²coi³ an³ xi³ ti⁴cˀoa⁴sˀin³-nia³, to⁴nca³ je² je¹-ve⁴ xi³ ti¹jna³jin³-na³ xi³ cˀoa⁴sˀin¹.  
\v 18 Cˀoa⁴ ˀve³-nia³ an³ nca³ tsi²jme³ xi³ nta³ tjin¹ xi³ ti¹jna³jin³-na³ (xi³ ti²xian³ xi³ ti¹jna³jin³ xi³ to⁴xa¹ yao³-na⁴ ni¹). Tjin¹-na³ cjoa⁴me³ta³con² nca³ cˀoa⁴²sˀian³ je² xi³ nta³ tjin¹, to⁴nca³ li²coi³ coi³cho²tjen⁴nqui³-le⁴ nca³ cˀoa⁴²sˀian³.  
\v 19 Nca⁴ tsi² tsa² cˀoa⁴sˀian³ je² xi³ nta³ tjin¹ xi³ me³-na³, to⁴nca³ je² xi³ chˀao³ tjin¹-ve⁴ xi³ tsi²coi³ me³-na³, je²-vi⁴ xi³ cˀoa⁴sˀian³.  
\v 20 Cˀoa⁴ tsa² cˀoa⁴sˀian³ xi³ tsi²coi³ me³-na³, li²coi³ an³ xi³ ti⁴cˀoa⁴sˀin³-nia³, to⁴nca³ je² je¹-ve⁴ xi³ ti¹jna³jin³-na³, xi³ cˀoa⁴sˀin¹.  
\v 21 Cˀoa⁴-sˀin² ma³sjai³-na³ je² cjoa⁴te¹xo³ma³-vi⁴, cˀia⁴ nca³ me³-na³ an³ nca³ cˀoa⁴sˀian³ xi³ nta³ tjin¹, je² xi³ chˀao³ tjin¹ ti¹jna³jin³-na³.  
\v 22 Tjin¹-na³ cjoa⁴tsjoa³ xi³ tˀa³tsˀe⁴ cjoa⁴te¹xo³ma³-le⁴ Ni³na¹, jo³-sˀin² tjin¹ ni⁴ma⁴-na⁴.  
\v 23 To⁴nca³ ˀve³ nqui²jnco³ cjoa⁴te¹xo³ma³ i⁴jin³ nca³yi³je³ jco⁴ya³-le⁴ yao³-na⁴ xi³ cjan¹cao⁴ je² cjoa⁴te¹xo³ma³ xi³ tsˀe⁴ cjoa⁴fa³ˀai³tsjen³-na⁴. Je²-vi⁴ xi³ si¹cˀe¹jna³tˀa³nˀion¹-na³ je² cjoa⁴te¹xo³ma³ xi³ tsˀe⁴ je¹ xi³ ti¹jna³jin³ nca³yi³je³ jco⁴ya³-le⁴ yao³-na⁴.  
\v 24 Ma⁴-xo¹nia³ an³-vi⁴. ˀya¹ xi³ si⁴²cˀe¹jna³ntai¹-ni³na³ yao³-na⁴ xi³ tsˀe⁴ cjoa⁴vi³ya³-vi⁴.  
\v 25 Tsjoa³-le⁴ cjoa⁴nta³ Ni³na¹ xi³ to⁴tˀa³tsˀe⁴ Jesucristo Nai³-na¹. Cˀoa⁴-sˀin² ti⁴ˀan³-nia³ cao⁴ cjoa⁴fa³ˀai³tsjen³-na⁴ ma³chjen¹-le⁴ cjoa⁴te¹xo³ma³-le⁴ Ni³na¹, to⁴nca³ cao⁴ yao³-na⁴ an³ ma³chjen¹-le⁴ cjoa⁴te¹xo³ma³-le⁴ je¹. 
\c 8  
\s1 Je² Espíritu Santo tsjoa¹-na¹ cjoa⁴vi³jna³chon³ nca³ ti³yo³coa⁴² Cristo 
\p  
\v 1 Ntˀai⁴-vi⁴ntai⁴ ni⁴jme³-jin² cjoa⁴ñˀain³ xi³ tjin¹ne²-le⁴ je² xi³ tjio¹cao⁴ Cristo Jesús, je² xi³ tsi² tsa² coi³ cˀoa⁴-sˀin² vˀe²tso⁴ma³ jo³-sˀin² nca³ me³-le⁴ yao³-na¹, to⁴-nca³ jo³-sˀin² nca³ me³-le⁴ Espíritu Santo.  
\v 2 Je² cjoa⁴te¹xo³ma³ xi³ tsˀe⁴ Espíritu Santo, je² xi³ tsjoa¹ cjoa⁴vi³jna³chon³, nca³ ti³yo³coa⁴² Cristo Jesús. Qui³si³cˀe¹jna³ntai¹-ni³na³ cjoa⁴te¹xo³ma³ xi³ tsˀe⁴ je¹, cˀoa⁴ xi³ tsˀe⁴ cjoa⁴vi³ya³.  
\v 3 Je² xi³ tsi² tsa² coi³ coan³ je² cjoa⁴te¹xo³ma³, nca⁴ tsin²-le⁴ nca³nˀion¹-jin² xi³ to⁴tˀa³tsˀe⁴ yao³-na¹, Ni³na¹ cˀoa⁴qui³sˀin³ je²-vi⁴ cˀia⁴ nca³ qui³si³ca³sen¹ ˀnti¹-le⁴ xi³ cˀoa⁴cji³ yao³-le⁴ jo³ cjoan³ yao³-na¹ xi³ tjin¹-le⁴ je¹, cˀoa⁴ qui³si³ca³sen¹ Cristo xi³ to⁴cjoa⁴-le⁴ je¹-ve⁴. Cˀoa⁴-sˀin² tsa³cˀe¹ne²-le⁴ cjoa⁴ñˀain³ je² je¹ xi³ ti¹jna³jin³ yao³-na¹,  
\v 4 jme¹-ni³ nca³ je² cjoa⁴qui²xi⁴ xi³ vˀe¹ne²-na¹ cjoa⁴te¹xo³ma³ coi⁴tjo³son²jin³-si¹ni³na¹ ña¹-vi⁴, xi³ tsi² tsa² coi³ cˀoa⁴-sˀin² coi⁴tso⁴ma²coa⁴² jo³-sˀin² me³-le⁴ yao³-na¹, to⁴nca³ jo³-sˀin² me³-le⁴ Espíritu Santo.  
\v 5 Nca⁴ je² xi³ cˀoa⁴-sˀin² fi²cao⁴ yao³-le⁴ jo³-sˀin² me³-le⁴ yao³-na¹, si¹sin³-le⁴ cjoa⁴-le⁴ yao³-na¹, to⁴nca³ je² xi³ cˀoa⁴-sˀin² fi²cao⁴ yao³-le⁴ jo³-sˀin² me³-le⁴ Espíritu Santo, si¹sin³-le⁴ cjoa⁴ xi³ tsˀe⁴ Espíritu Santo.  
\v 6 Je² xi³ si¹sin³-le⁴ cjoa⁴-le⁴ yao³-na¹, tjin¹-le⁴ cjoa⁴vi³ya³, to⁴nca³ je² xi³ si¹sin³-le⁴ cjoa⁴ xi³ tsˀe⁴ Espíritu Santo, tjin¹-le⁴ cjoa⁴vi³jna³chon³ cao⁴ cjoa⁴nchˀan¹ta³con².  
\v 7 Nca⁴ je² xi³ si¹sin³-le⁴ cjoa⁴-le⁴ yao³-na¹ co²ntran⁴ fi²-le⁴ Ni³na¹, nca³ tsi² na³nqui³ va³tio²-le⁴ cjoa⁴te¹xo³ma³-le⁴ Ni³na¹, ni⁴ˀi⁴tse¹-jin² coan⁴-le⁴.  
\v 8 Cˀoa⁴-sˀin² je² xi³ cˀoa⁴-sˀin² yao³-le⁴ tjio¹-ni³, li²coi³ ma³-le⁴ si¹tsjoa³ya³-le⁴ Ni³na¹.  
\v 9 To⁴nca³ jon² li²coi³ yao³-no³ ti³yo³-nio³, to⁴nca³ Espíritu Santo ti³yo³-nio³, tsa² cjoa⁴qui²xi⁴ nca³ je² Espíritu Santo xi³ tsˀe⁴ Ni³na¹ ti¹jna³jin³ ni⁴ma⁴-no³. To⁴nca³ tsa² jnco³ xi³ tsin²-le⁴ je² Espíritu xi³ tsˀe⁴ Cristo, a³li² tsˀe⁴ Cristojin²ˀni³.  
\v 10 To⁴nca³ tsa² Cristo ti¹jna³jin³ ni⁴ma⁴-no³, je² yao³-no³ cjoa⁴qui²xi⁴ ni¹ nca³ jo³-ni³ tsa² tjio¹cˀen³ xi³ to⁴tˀa³tsˀe⁴ je¹, to⁴nca³ je² espíritu-no³ tjio¹con³-ni¹ xi³ to⁴tˀa³tsˀe⁴ cjoa⁴qui²xi⁴.  
\v 11 Cˀoa⁴ tsa² je² Espíritu Santo xi³ tsˀe⁴ Ni³na¹ xi³ qui³si³cja³ˀa¹ya³jin³-ni³le⁴ cˀen³ Cristo, tsa² coi³ Espíritu ti¹jna³jin³ ni⁴ma⁴-no³, je² xi³ qui³si³cja³ˀa¹ya³jin³-ni³le⁴ cˀen³ Cristo Jesús, cˀoa⁴-ti⁴ tsjoa¹-le⁴ cjoa⁴vi³jna³chon³ yao³-no³ xi³ vi³ya³, xi³ to⁴tˀa³tsˀe⁴ je² Espíritu Santo-le⁴ xi³ ti¹jna³jin³ ni⁴ma⁴-no³.  
\v 12 Cˀoa⁴-sˀin² ntsˀe³, ni⁴jme³-jin² xi³ qui³tjen⁴-na¹ tˀa³-tsˀe⁴ yao³-na¹, nca³ coi⁴yo³chon³-nia³² jo³-sˀin² me³-le⁴ yao³-na¹.  
\v 13 Tsa² coi⁴yo³ jo³-sˀin² me³-le⁴ yao³-na¹, coi⁴ya²-nio¹³ˀni³, to⁴nca³ tsa² cao⁴ je² Espíritu Santo si⁴cˀaon³ je² cjoa⁴ xi³ sˀin¹ yao³-na¹, coi⁴yo³chon³-nio¹³ˀni³.  
\v 14 Nca³tsˀi³ xi³ je² Espíritu Santo xi³ tsˀe⁴ Ni³na¹ va¹ntia⁴²-le⁴, je²-vi⁴ xi³ ˀnti¹-le⁴ Ni³na¹-ˀni³.  
\v 15 Nca⁴ jon² a³li²coi³ qui³chjoao¹³ cjoa⁴fa³ˀai³tsjen³ xi³ tsˀe⁴ xi³ tjio¹nˀion¹, nca³ nqui²jnco³cˀa² sˀe⁴-no³ cjoa⁴jcon³, to⁴nca³ qui³chjoe¹-nio¹³ je² Espíritu Santo xi³ ve³con³-na¹ jo³-ni³ tsa² xti³-le⁴. Xi³ to⁴tˀa³tsˀe⁴ je² Espíritu Santo no²-cjoa⁴² Abba, xi³ tso²-ni³ Nˀai³.  
\v 16 Ti⁴je²-ni³ Espíritu Santo to⁴jnco³ tsjoa¹ cjoa⁴qui²xi⁴ cao⁴ ni⁴ma⁴-na¹ nca³ coia³² ˀnti¹-le⁴ Ni³na¹.  
\v 17 Cˀia⁴ tsa² ˀnti¹-le⁴ ma³², cˀoa⁴²-ti⁴ sˀe⁴-na¹ cjoa⁴tjao² tsˀe⁴ Ni³na¹. To⁴jnco³ sˀe⁴-na¹ cjoa⁴tjao² cao⁴ Cristo, tsa² ña³tjen⁴ chja⁴ˀa² cjoa⁴ñˀain³ cao⁴ Cristo, jme¹-ni³ nca³ ña³tjen⁴ coi²tjo⁴je³ya³-si¹nia³² cao⁴ je².  
\v 18 Cjai¹nca³ co³son²-le⁴ nca³ an³ nca³ cjoa⁴qui²xi⁴ nca³ je² cjoa⁴ñˀain³ xi³ ti³chja³ˀa² coi³ ni⁴čhjin³-vi⁴ li²coi³ coan⁴nco¹son²cao⁴ je² cjoa⁴je³ya³ xi³ sˀa⁴ nčhoa¹, xi³ coan⁴son²tsen³ tˀa³tsan⁴².  
\v 19 Nca⁴ cˀoa⁴-sˀin² nca³yi³je³ xi³ qui³sˀe³nta³ son³ˀnte³-vi⁴ nˀion¹ tjio¹co³ya³cao⁴cjoa⁴ nca³ coan⁴son²tsen³ nca³tsˀi³ xi³ ˀnti¹-le⁴ Ni³na¹.  
\v 20 Nca⁴ nca³yi³je³ xi³ qui³sˀe³nta³ son³ˀnte³-vi⁴, na³nqui³ qui³ni²cˀe¹yo³-le⁴ cjoa⁴ xi³ tsi²jme³ nca³nˀion¹ tjin¹-le⁴, a³li² tsa² to⁴je² xi³ cˀoa⁴-sˀin² me³-le⁴, to⁴nca³ cˀoa⁴-sˀin² coan³me³-le⁴ je² xi³ na³nqui³ qui³si³cˀe¹yo³-le⁴ cao⁴ cjoa⁴cho³ya²cao⁴cjoa⁴.  
\v 21 Cˀoa⁴-sˀin² ti⁴je²-ni³ je² nca³yi³je³ xi³ qui³sˀe³nta³ son³ˀnte³-vi⁴, coi⁴tjo³ntai¹-le⁴ je² cjoa⁴ xi³ cˀoa⁴-sˀin² vˀe¹nˀion¹-le⁴ xi³ to⁴fi³tson³. Cˀoai⁴-le⁴ nca³ cˀoe¹yo³ntai¹ cao⁴ cjoa⁴je³ya³ xi³ tsˀe⁴ ˀnti¹-le⁴ Ni³na¹.  
\v 22 ˀya³-nia¹ nca³ nca³tsˀi³ xi³ qui³sˀe³nta³ son³ˀnte³-vi⁴ sa³ˀnta³ ntˀai⁴-vi⁴, to⁴jnco³ tse³ne², cˀoa⁴ to⁴jnco³ jo³ ma⁴ sˀin¹ jo³-ni³ tsa² jnco³ chjon⁴² xi³ ˀnti¹ ti¹vˀe¹.  
\v 23 A³li² tsa² to⁴je²-jin² nca³ je², to⁴nca³ cˀoa⁴²-ti⁴ ña¹ nca³ ña¹-vi⁴ xi³ tjin¹-na¹ je² Espíritu Santo jo³-ni³ tsa² xi³ ti¹tjon² cjoa⁴tjao², ña¹-vi⁴ tse³ne² jin³ yao³-na¹, nca³ ti³ma³cho³ya²-le⁴² nca³ coan⁴jnco³ nca³ coa⁴sen²-na¹ jo³-ni³ tsa² xti³-le⁴, nca³ tso²ˀva³ntai¹ yao³-na¹.  
\v 24 Nca⁴ ji²tjo⁴ntjai²-nia¹ cao⁴ cjoa⁴cho³ya²cao⁴cjoa⁴-vi⁴. To⁴nca³ je² xi³ ti³cho³ya²-le⁴², tsa² ma³tsen³, li²coi³ ti³cho³ya²-le⁴². ˀya¹ xi³ sco¹ya³-sa³le⁴ xi³ je³co³tsen³.  
\v 25 To⁴nca³ tsa² ti³cho³ya²-le⁴² je² xi³ tsi² tsa² coi³ ˀya³², cao⁴ cjoa⁴tse³jta³ cho¹ya³-ni³le⁴².  
\v 26 Cˀoa⁴-ti⁴sˀin²ni³ je² Espíritu Santo va³sen¹cao⁴-na¹ nca³ i³nta³² cjoan³², nca⁴ li²coi³ ˀya³² jme³ xi³ si⁴je¹ jo³-sˀin² va³quin²-le⁴, to⁴nca³ ti⁴je²-ni³ Espíritu Santo vˀe¹tsˀoa³ntjai²-na¹ cao⁴ nca³ cjai¹nca³ to⁴tse³ne², nca³ tsi² ma³-na¹ jo³ vi³xoan¹.  
\v 27 To⁴nca³ je² xi³ va¹sjai³jin³ ni⁴ma⁴-na¹, ve³ je² cjoa⁴fa³ˀai³tsjen³-le⁴ Espíritu Santo, nca³ vˀe¹tsˀoa³ntjai² cho⁴ta⁴-le⁴ Cristo jo³-sˀin² nca³ me³-le⁴ Ni³na¹. 
\s1 Xi³ to⁴tˀa³tsˀe⁴ Cristo nqui²sa⁴ cˀoa⁴sˀian⁴-sa³² cao⁴-ni³ tsa² je² xi³ si¹qui³njen³ 
\p  
\v 28 ˀya³-nia¹ nca³ nca³yi³je³ cjoa⁴ ña³tjen⁴ si¹xa¹ cjoa⁴nta³ tˀa³tsˀe⁴ je² xi³ tsjoa³que³ Ni³na¹, xi³ Ni³na¹ qui³nchja⁴-le⁴ jo³-sˀin² nca³ xa¹ tsa³cˀe¹nta³-ni³,  
\v 29 je² xi³ Ni³na¹ to⁴nqui³-ni³ tsa³ve³, cˀoa⁴²-ti⁴ to⁴nqui³-ni³ xa¹ tsa³cˀe¹nta³-ni³ nca³ cˀoa⁴coan⁴ cjoan³ jo³ cjoan³ ˀnti¹-le⁴, jme¹-ni³ nca³ ˀnti¹tjon² coan⁴-si¹ni³le⁴ jin³-le⁴ ncjin² ntsˀe⁴.  
\v 30 Cˀoa⁴ je² xi³ Ni³na¹ to⁴nqui³-ni³ xa¹ tsa³cˀe¹nta³-ni³, cˀoa⁴²-ti⁴ Ni³na¹ qui³nchja⁴-le⁴ je²-vi⁴. Cˀoa⁴ je² xi³ qui³nchja⁴-le⁴, cˀoa⁴-ti⁴ je²-vi⁴ xi³ qui³si³cje³tˀa³ je¹-le⁴. Cˀoa⁴ je² xi³ qui³si³cje³tˀa³ je¹-le⁴, cˀoa⁴²-ti⁴ je²-vi⁴ tsa³cˀa³sje³je³ya³.  
\v 31 Jme¹ xi³ coi⁴xoan¹-ˀni³ je²-vi⁴. Cˀia⁴ tsa² Ni³na¹ ti¹jna³ tˀa³tsan⁴², ˀya¹ xi³ co²ntran⁴-na¹ coan⁴-ˀni³.  
\v 32 Je² xi³ li²coi³ tsa³cˀe¹chjoa²-le⁴ nca³ qui³sˀe³-le⁴ cjoa⁴ñˀain³, nta³ tsa² ti⁴tsˀe⁴-ni³ ˀnti¹-le⁴, to⁴nca³ qui³tsjoa³tˀa³ xi³ tˀa³tsan⁴² nca³tsˀia³², a³ tsi² cˀoa⁴-ti⁴ tsjoa¹cjoa⁴tjao²-na¹ nca³yi³je³ cjoa⁴ cao⁴ Cristo.  
\v 33 ˀya¹ xi³ coa⁴²nqui³ je² cho⁴ta⁴ xi³ Ni³na¹ tsa³cja³ˀa¹jin³. Ni³na¹ xi³ si¹cje³tˀa³ je¹.  
\v 34 ˀya¹ xi³ vˀe¹ne²-na¹ cjoa⁴ñˀain³. Cristo Jesús xi³ cˀen³, to⁴nca³ cˀoa⁴²-ti⁴ je² xi³ ja³ˀa²ya³-le⁴, xi³ ya⁴ ti¹jna³ nca³qui²xi⁴-le⁴ Ni³na¹, je² xi³ cˀoa⁴-ti⁴ vˀe¹tsˀoa³ xi³ tˀa³tsan⁴².  
\v 35 ˀya¹ xi³ cjoa⁴ˀa²xin²-na¹ cjoa⁴tjao²cha³-le⁴ Cristo. A³ cjoa⁴ñˀain³ ni¹. A³ xi³ ai¹ cji³ne³-na¹. A³ je² xi³ co²ntran⁴ ma³nca³tjen⁴nqui³-na¹. A³ cji³nčha¹ ni¹. A³ je² xi³ qui³xi³jnta²joan³². A³ je² xi³ xcon¹-na¹. A³ je² xi³ qui⁴cha⁴ va¹-na¹.  
\v 36 Jo³-sˀin² tji¹tˀa³: Xi³ tˀa³tsi⁴ ti³vi³ya³-ni¹⁴jin⁴ nca³ntsjai², to⁴jo³-ni³ va³rre² xi³ ti¹ni²cˀen³ ti¹ˀya³ta³con²-na³jin⁴.  
\v 37 To⁴nca³ nca³yi³je³ je² cjoa⁴ je²-vi⁴ nqui²sa⁴ nˀion¹ cˀoa⁴sˀian⁴-sa³² cao⁴-ni³ tsa² je² xi³ si¹qui³njen³, xi³ to⁴tˀa³tsˀe⁴ je² xi³ coan³tsjoa³que³-na¹.  
\v 38 To⁴coi³ je²-vi⁴ ña³qui³ tji¹jnco³-le⁴coan³, nca³ ni⁴cjoa⁴vi³ya³-jin², ni⁴cjoa⁴vi³jna³chon³-jin², ni⁴ˀa²ncje⁴-jin², ni⁴ xi³ nca³jco⁴-le⁴jin², ni⁴je²-jin² xi³ tjin¹-le⁴ nca³nˀion¹, ni⁴ xi³ ntˀai⁴-vi⁴jin², ni⁴je² xi³ sˀa⁴ nčhoa¹-jin²,  
\v 39 ni⁴ xi³ ncˀa³-jin², ni⁴ xi³ na³nqui³-jin², ni⁴to⁴jnco³-jin²sa³ xi³ xa¹ qui³sˀe³nta³-ni³ xi³ coan⁴ cjoa⁴ˀa²xin²-na¹ je² cjoa⁴tjao²cha³-le⁴ Ni³na¹ nca³ ti³yo³coa⁴² Cristo Jesús Nai³-na¹. 
\c 9  
\s1 Cho⁴ta⁴ Israel xi³ tsa³cˀin²-le⁴ nca³ ˀnti¹-le⁴ Ni³na¹ coan³ 
\p  
\v 1 Xi³ cjoa⁴qui²xi⁴ xi³ xian³ nca⁴ ti²jna⁴coa⁴ Cristo, li²coi³ vˀe³nti³soa³. Je² cjoa⁴fa³ˀai³tsjen³-na⁴ to⁴jnco³ tsjoa¹ cjoa⁴qui²xi⁴ xi³ tˀa³tsˀan⁴ cao⁴ je² Espíritu Santo.  
\v 2 Cjai¹nca³ tse³ cjoa⁴va³ xi³ tjin¹-na³, cˀoa⁴ nca³ntsjai² nˀion¹ cji³ne³ ni⁴ma⁴-na⁴.  
\v 3 Ti⁴ˀan³-nia³ me³-na³ ntia³coa²sen⁴tˀa³xin²-le⁴ Cristo, tsa² coan⁴-na³, xi³ tˀa³tsˀe⁴ ntsˀe³, xi³ xi²nquia⁴ xi³ to⁴nco¹son² yao³-na⁴jin⁴,  
\v 4 xi³ coi³ cho⁴ta⁴ israelita ni¹, je² xi³ tsa³cˀin²-le⁴ nca³ ˀnti¹-le⁴ Ni³na¹ coan³, cˀoa⁴ tsˀe⁴ cjoa⁴je³ya³, cao⁴ cjoa⁴ xi³ qui³sˀe³nˀion¹, cao⁴ je² cjoa⁴te¹xo³ma³ xi³ qui³tsˀai²-le⁴, cao⁴ cjoa⁴ xi³ ve³xcon¹, cao⁴ xi³ qui³ni²sˀe³nqui³-le⁴.  
\v 5 Je² xi³ nˀai³jcha¹cjin³ tsˀe⁴ ni¹, cˀoa⁴²-ti⁴ je² Cristo jo³ cjoan³ yao³-le⁴ ji³nčhoa³-ni³ ntje⁴-le⁴. Je² xi³ Ni³na¹ xi³ va³te¹xo³ma³-le⁴ nca³yi³je³ cjoa⁴, ca²ta³chi³con³tˀain³ nca³ntsjai² ni⁴čhjin³. Cˀoa⁴ ca²ta³ma³.  
\v 6 To⁴nca³ en¹-le⁴ Ni³na¹ ni⁴jme³-jin² xi³ qui³cha³-le⁴. Nca⁴ tsi² tsa² to⁴nca³tsˀi³-jin² xi³ nčhoa¹-ni³ ntje⁴-le⁴ Israel xi³ cho⁴ta⁴ israelita ni¹.  
\v 7 Ni⁴coi³-jin² nca³ ntje⁴-le⁴ Abraham nca³ ˀnti¹-le⁴ coan³ nca³tsˀi³, to⁴nca³ je² xi³ tsˀe⁴ Isaac, je² xi³ ntje⁴-li⁴ cˀoin¹.  
\v 8 Coi³ xi³ tso²-ni³: A³li² je²-jin² xi³ ˀnti¹-le⁴ jo³ cjoan³ yao³-le⁴ xi³ ˀnti¹-le⁴ Ni³na¹, to⁴nca³ je² xi³ ˀnti¹-le⁴ jo³-sˀin² nca³ qui³si³sˀe³nqui³-le⁴, je² ni¹ xi³ coan³xqui⁴cao⁴ nca³ ntje⁴-le⁴.  
\v 9 Je² en¹ xi³ Ni³na¹ qui³si³sˀe³nqui³-le⁴ Abraham, coi³ je²-vi⁴: I⁴-cjoan²sˀin² ni⁴čhjin³ no¹ xi³jnco³ cjoe²ˀe⁴, cˀoa⁴ sˀe⁴-le⁴ Sara jnco³ ˀnti¹.  
\v 10 A³li² tsa² to⁴coi³ je²-vi⁴, to⁴nca³ cˀoa⁴²-ti⁴ Rebeca, cˀia⁴ nca³ qui³sa³co³-le⁴ ˀnti¹ xi³ tsˀe⁴ jnco³ xˀin⁴ Isaac, nˀai³-na⁴jin⁴,  
\v 11 (cˀia⁴ nca³ cje³-sa³ tsin³-jin², cˀoa⁴ cˀia⁴ nca³ ni⁴sa³jme³-jin² xi³ sˀin¹, ni⁴ xi³ nta³ tjin¹, ni⁴ xi³ chˀao³ tjin¹, jme¹-ni³ nca³ sˀe⁴jna³ntsjai²-ni³ jo³-sˀin² xa¹ tsa³cˀe¹nta³-ni³ Ni³na¹ nca³ tsa³cja³ˀa¹jin³, a³li² to⁴tˀa³tsˀe⁴ xa¹-le⁴jin², to⁴-nca³ to⁴tˀa³tsˀe⁴ jo³-sˀin² me³-le⁴ je² xi³ nchja⁴),  
\v 12 cˀoa⁴tsa³cˀin²-le⁴ Rebeca nca³ je² xi³ ma³jchi¹nca³ cho⁴ˀnta³ coan⁴-le⁴ xi³ ma³ˀnti¹.  
\v 13 Jo³-sˀin² nca³ tji¹tˀa³: Je² Jacobo xi³ coan³tsjoa³que⁴, to⁴nca³ Esaú chˀao³que⁴ coan³.  
\v 14 Jme¹ xi³ coi⁴xoan¹-ˀni³. Ni³na¹, a³ tjin¹ xi³ tsi² cjoa⁴qui²xi⁴ xi³ sˀin¹. Ma³jain². Ni⁴ˀi⁴tse¹-jin² cˀoa⁴tjin¹.  
\v 15 To⁴nca³ Ni³na¹ qui³tso²-le⁴ Moisés: Coan⁴ma⁴que⁴ to⁴ˀya³-ni³ve⁴ xi³ me³-na³ nca³ coan⁴ma⁴que⁴, cˀoa⁴ aon³ coan⁴-na³ to⁴ˀya³-ni³ve⁴ xi³ tˀa³tsˀe⁴ aon³ coan⁴-na³.  
\v 16 Cˀoa⁴-sˀin² nca³ tsi² tsa² coi³ nca³ cˀoa⁴-sˀin² me³-le⁴ cho⁴ta⁴, ni⁴coi³-jin² nca³ nˀion¹ si¹xa¹, to⁴nca³ coi³ nca³ Ni³na¹ xi³ tjin¹-le⁴ cjoa⁴ma⁴ta³con².  
\v 17 Nca⁴ je² xon⁴ Escritura cˀoa⁴tso²-le⁴ Faraón: Coi³ je²-vi⁴ nca³ qui³sco³mi³tjen⁴-le²³, jme¹-ni³ nca³ coa³co³-si¹nia³ nca³nˀion¹-na⁴ xi³ to⁴tˀa³tsi⁴, cˀoa⁴ jme¹-ni³ nca³ jan³ˀain¹-na⁴ coi⁴no²cjoa⁴ya³-si¹ni³ nca³qui³jnta² son³ˀnte³.  
\v 18 Cˀoa⁴-sˀin² Ni³na¹ tjin¹-le⁴ cjoa⁴ma⁴ta³con² tˀa³tsˀe⁴ cho⁴ta⁴ to⁴ˀya³-ni³ve⁴ xi³ me³-le⁴. Cˀoa⁴-ti⁴ Ni³na¹ si¹ta²ja³ ni⁴ma⁴-le⁴ cho⁴ta⁴ to⁴ˀya³-ni³ve⁴ xi³ me³-le⁴.  
\v 19 Cˀoa⁴cˀoin¹-nai¹ˀni³. A¹-ni³ nca³ Ni³na¹ va¹ne²-si¹ni³ je¹ cho⁴ta⁴, nca⁴ ˀya¹ xi³ coan⁴ cˀoe⁴²jna³ta²ja³-le⁴ xi³ me³-le⁴ Ni³na¹.  
\v 20 To⁴nca³ ji³ cho⁴ta⁴, ˀya¹ ni¹³ ji³ nca³ coa⁴te²cjao³ˀa²cao⁴-si¹ni³ Ni³na¹. A³ coi⁴nchja⁴cao⁴ ti⁴²ˀnte³ je² xi³ ca²si¹nta³: A¹-ni³ nca³ cˀoa⁴ca²ni²ca¹-si¹ni³nai¹³.  
\v 21 A³ tsin²-le⁴ ˀnte³-jin² je² xi³ si¹nta³ ti⁴² nca³ si⁴²nta³-ni³ xi³ ti⁴coi³-ni³ nta¹si³ jnco³ xi³ nˀion¹ nta³ cji³ cˀoa⁴ nqui²jnco³ xi³ to⁴ti⁴²yo⁴ma⁴.  
\v 22 To⁴nca³ Ni³na¹, nta³ tsa² me³-le⁴ nca³ coa⁴co² cjoa⁴jti³-le⁴, cˀoa⁴ nta³ tsa² me³-le⁴ nca³ jcha⁴-le⁴ nca³nˀion¹-le⁴, cˀoa⁴-sˀin² qui³cho¹cjoa⁴-le⁴ cao⁴ cjoa⁴tse³jta³-le⁴ je² ti⁴² xi³ xa¹ coan³nta³-ni³ tˀa³tsˀe⁴ cjoa⁴jti³-le⁴. Je² ti⁴² xa¹ coan³nta³-ni³ nca³ coi⁴xo⁴ya³.  
\v 23 Coi³ xi³ cˀoa⁴qui³sˀin³ jme¹-ni³ nca³ jcha⁴-si¹ni³le⁴ jo³ nca³ nˀion¹ tse³ tjin¹ cjoa⁴je³ya³-le⁴ xi³ tˀa³tsˀe⁴ ti⁴² xi³ xa¹ coan³nta³-ni³ tˀa³tsˀe⁴ cjoa⁴ma⁴ta³con²-le⁴. Je² ti⁴² xi³ Ni³na¹ to⁴nqui³-ni³ tsa³cˀe¹jna³nta³ tˀa³tsˀe⁴ cjoa⁴je³ya³.  
\v 24 Xi³ coi³ ña¹-vi⁴ nca³ cˀoa⁴-ti⁴ Ni³na¹ qui³nchja⁴-na¹, a³li² tsa² to⁴je²-jin² xi³ tsˀe⁴ cho⁴ta⁴ judío, to⁴nca³ cˀoa⁴²-ti⁴ cho⁴ta⁴ xi³ tsˀe⁴ xi³ li² judío-jin².  
\v 25 Jo³-sˀin² nca³ Ni³na¹ cˀoa⁴-ti⁴ tso² ya⁴ tsˀe⁴ Oseas: Coi³nchja²³-le⁴ na⁴xi⁴na³nta¹-na⁴, je² xi³ tsi² tsa² coi³ tsˀan⁴ na⁴xi⁴na³nta¹. Cˀoa⁴-ti⁴ coi³nchja²³-le⁴ xi³ tjao²que⁴, je² xi³ tsi² tsa² coi³ coan³tjao²que⁴.  
\v 26 Cˀoa⁴ coan⁴ ya⁴ ˀnte³ jña³ nca³ cˀoa⁴tsa³cˀin²-le⁴ve⁴, jon²-vi⁴ a³li² na⁴xi⁴na³nta¹-na⁴jin², ya⁴ coi⁴no²cjoa⁴-le⁴ ˀnti¹-le⁴ Ni³na¹ xi³ ti¹jna³con³.  
\v 27 Cˀoa⁴-ti⁴ Isaías nchja⁴ya³ xi³ tˀa³tsˀe⁴ Israel: Nta³ tsa² cˀoa⁴tjin¹ ma³-ni³ ˀnti¹-le⁴ Israel jo³ cji³ ma³-ni³ tso³mi¹-le⁴ nta¹chi³con³, to⁴je² xi³ cˀoa⁴nqui³ coi³tjo³ntjai²-ni¹.  
\v 28 Nca⁴ je² Nai³-na¹ si⁴²jnco³ cjoa⁴qui²xi⁴-le⁴ xi³ tjin¹ne²-le⁴ son³ˀnte³ nca³ ña³qui³ cˀoa⁴tjin¹, cˀoa⁴ nti⁴ton⁴ cˀoa⁴coan⁴.  
\v 29 Jo³-sˀin² nca³ to⁴nqui³-ni³ cˀoa⁴qui³tso² Isaías: Tsa² je² Nai³-na¹ xi³ Nai³-le⁴ so³nta²do⁴ tsa² tsi² qui³si³ca³tio²con³-na¹ ntje⁴, cˀoa⁴-ti⁴sˀin² cˀoa⁴coan³² jo³ coan³ Sodoma, cˀoa⁴-ti⁴sˀin² cˀoa⁴coan³ cjoan³² jo³ cjoan³ Gomorra. 
\s1 Je² cjoa⁴qui²xi⁴ xi³ to⁴tˀa³tsˀe⁴ nca³ ma³cjain¹-na¹ 
\p  
\v 30 Jme¹ xi³ coi⁴xoan¹-ˀni³: Je² cho⁴ta⁴ xi³ li² judío-jin², xi³ tsi² qui³tjen⁴nqui³-le⁴ cjoa⁴qui²xi⁴-le⁴ Ni³na¹, ji³cho²tjen⁴nqui³ xi³ cjoa⁴qui²xi⁴, xi³ coi³ cjoa⁴qui²xi⁴ tjoe¹-na¹ xi³ to⁴tˀa³tsˀe⁴ nca³ ma³cjain¹-na¹,  
\v 31 to⁴nca³ cho⁴ta⁴ Israel xi³ qui³tjen⁴nqui³-le⁴ je² cjoa⁴te¹xo³ma³ xi³ vˀe¹ne² xi³ cjoa⁴qui²xi⁴ li²coi³ ji³cho²tjen⁴nqui³-le⁴ nca³ qui³si³jnco³ cjoa⁴te¹xo³ma³ xi³ vˀe¹ne² xi³ cjoa⁴qui²xi⁴.  
\v 32 A¹-ni³. To⁴coi³ nca³ li²coi³ qui³tjen⁴nqui³-le⁴ xi³ cjoa⁴qui²xi⁴ xi³ to⁴tˀa³tsˀe⁴ nca³ coan³cjain¹-le⁴, to⁴nca³ cˀoa⁴-sˀin² qui³tjen⁴nqui³-le⁴ xi³ cjoa⁴qui²xi⁴ xi³ to⁴tˀa³tsˀe⁴ nca³ qui³si³xa¹-le⁴ cjoa⁴te¹xo³ma³. Ya⁴ qui³sa³te³nqui³-ni³ ya⁴ la⁴jao⁴ xi³ qui³jna³chjoa².  
\v 33 Jo³-sˀin² tji¹tˀa³: Coe⁴-ni³ i⁴ cˀoe³jna²³ ya⁴ Sión la⁴jao⁴ xi³ qui³jna³chjoa², cˀoa⁴ la⁴jao⁴ xi³ sa³te¹nquia³². Je² xi³ coan⁴cjain¹-le⁴ tˀa³tsˀe⁴ li²coi³ coan⁴soa³-le⁴. 
\c 10  
\p  
\v 1 Ntsˀe³, ña³qui³ cjoa⁴qui²xi⁴ ni¹ coi³ xi³ me³-le⁴ ni⁴ma⁴-na⁴, cˀoa⁴ coi³ xi³ vˀe³tsˀoa²³-le⁴ Ni³na¹ tˀa³tsˀe⁴ Israel, nca³ coi⁴tjo³ntjai².  
\v 2 Nca⁴ an³ tsjoa³ cjoa⁴qui²xi⁴ tˀa³tsˀe⁴ Israel nca³ nˀion¹ xcon¹ ve³ Ni³na¹, to⁴nca³ li²coi³ jo³-sˀin² ma³chjen¹ cjoa⁴i³sen³ta³con².  
\v 3 Li²coi³ ve³ cjoa⁴qui²xi⁴ xi³ Ni³na¹ tsjoa¹. To⁴coi³ xi³ me³-le⁴ nca³ vˀa³sje³ cjoa⁴qui²xi⁴ xi³ ti⁴tsˀe⁴-ni³. Li²coi³ na³nqui³ tsa³ca³tio²-le⁴ cjoa⁴qui²xi⁴-le⁴ Ni³na¹.  
\v 4 Cristo qui³si³cje³tˀa³ cjoa⁴te¹xo³ma³-ve⁴, jme¹-ni³ nca³ sˀe⁴-si¹ni³le⁴ cjoa⁴qui²xi⁴ nca³tsˀi³ xi³ ma³cjain¹-le⁴.  
\v 5 Je² Moisés cˀoa⁴-sˀin² qui³squi³ tˀa³tsˀe⁴ je² cjoa⁴qui²xi⁴ xi³ tsˀe⁴ cjoa⁴te¹xo³ma³: Je² cho⁴ta⁴ xi³ cˀoa⁴sˀin⁴² je² cjoa⁴ je²-vi⁴, xi³ to⁴tˀa³tsˀe⁴ je² cjoa⁴-vi⁴ cˀoe¹jna³con³-ni¹.  
\v 6 To⁴nca³ je² cjoa⁴qui²xi⁴ xi³ to⁴tˀa³tsˀe⁴ nca³ ma³cjain¹-na¹ cˀoi⁴tso²: A³li² cˀoa⁴-jin² tso² ni⁴ma⁴-li⁴: ˀya¹ xi³ coai⁴ ncˀa³jmi³, (xi³ tso²-ni³, nca³ coai⁴ cˀa¹jen³ Cristo).  
\v 7 A³xo⁴: ˀya¹ xi³ coai⁴sˀen³ tsjo¹ cjoa⁴vi³ya³, (xi³ tso²-ni³, nca³ coai⁴ cˀa¹jin³nqui²ntia³-ni³ cˀen³ Cristo).  
\v 8 To⁴nca³ jo¹ tso². Je² en¹-ve⁴ čhian³ ti¹jna³-li², ti¹jna³ˀa³ ntso⁴ˀvai³, cˀoa⁴ ya⁴ ti¹jna³jin³ ni⁴ma⁴-li⁴. Je²-vi⁴ je² en¹ xi³ tˀa³tsˀe⁴ nca³ ma³cjain¹-na¹, jña³-le⁴ xi³ no²cjoa⁴ya³jin³-ni³jin⁴.  
\v 9 Xi³ coi³-vi⁴, tsa² si⁴qui²xi⁴ya³nta³-lai⁴ cao⁴ ntso⁴ˀvai³ nca³ Nai³-li⁴ Jesús, cˀoa⁴ tsa² coan⁴cjain¹-le⁴ ni⁴ma⁴-li⁴ nca³ Ni³na¹ qui³si³cja³ˀa¹ya³jin³-ni³le⁴ cˀen³ Cristo, cˀia⁴ coi²tjo⁴ntjai²-ni¹ˀni³.  
\v 10 Nca⁴ cao⁴ ni⁴ma⁴-na¹ ma³cjain¹-na¹ xi³ tˀa³tsˀe⁴ nca³ cjoe⁴tˀa³ je¹-na¹, to⁴nca³ cao⁴ ntso⁴ˀva³² ni²qui²xi⁴ya³nta³-nia¹ xi³ tˀa³tsˀe⁴ nca³ coi²tjo⁴ntje².  
\v 11 Je² xon⁴ Escritura tso²: Je² nca³tsˀi³ xi³ ma³cjain¹-le⁴ tˀa³tsˀe⁴ Cristo, li²coi³ coan⁴soa³-le⁴.  
\v 12 Nca⁴ Ni³na¹ to⁴nco¹son² fi²cao⁴ cho⁴ta⁴ judío cao⁴ cho⁴ta⁴ griego, nca³ ti⁴je²-ni³ Cristo xi³ Nai³-le⁴ nca³tsˀi³, nˀion¹ tjin¹-le⁴ cjoa⁴nchi⁴na¹ tˀa³tsˀe⁴ nca³tsˀi³ xi³ nchja⁴-le⁴.  
\v 13 Nca⁴ nca³tsˀi³ to⁴ˀya³-ni³ve⁴ xi³ coi⁴nchja⁴-le⁴ jan³ˀain¹-le⁴ Nai³-na¹, coi⁴tjo³ntjai²-ni¹ˀni³.  
\v 14 Jo¹-sˀin² coi⁴nchja⁴-le⁴ Cristo tso²cˀoa⁴, nca³ je² xi³ tsi² coan³cjain¹-le⁴ tˀa³tsˀe⁴. Cˀoa⁴ jo¹-sˀin² coan⁴cjain¹-le⁴ tˀa³tsˀe⁴, nca³ je² xi³ tsi²coi³ nčhˀoe¹ tˀa³tsˀe⁴. Cˀoa⁴ jo¹sˀin² coan⁴-ni³ cjoi⁴nčhˀoe¹, tsa² tsin² xi³ coi⁴nchja⁴ya³jin³-le⁴.  
\v 15 Cˀoa⁴ jo¹-sˀin² coi⁴nchja⁴ya³jin³-le⁴ tsa² tsi² ˀya³ xi³ si⁴²ca³sen¹-le⁴, jo³-sˀin² tji¹tˀa³: Li² to⁴cˀoa⁴ na³sca¹ cjoan³ ntso⁴co⁴ je² xi³ tsˀe⁴ xi³ nchja⁴ya³jin³ je² en¹nta³-le⁴ tˀa³tsˀe⁴ xi³ nchˀan¹ tjin¹, xi³ tsˀe⁴ xi³ nchja⁴ya³jin³ je² en¹nta³-le⁴ tˀa³tsˀe⁴ xi³ nta³ tjin¹.  
\v 16 To⁴nca³ li²coi³ nca³tsˀi³ xi³ qui³si³tjo³son² en¹nta³-vi⁴, nca³ je² Isaías tso²: Señor, ˀya¹ xi³ coan³cjain¹-le⁴ en¹ xi³ qui³no²cjoa⁴yai³⁴-jin⁴.  
\v 17 Cˀoa⁴-sˀin² ma³cjain¹-na¹ xi³ to⁴tˀa³tsˀe⁴ nca³ no²ˀya². Cˀoa⁴ cˀoa⁴-sˀin² no²ˀya² xi³ to⁴tˀa³tsˀe⁴ en¹-le⁴ Ni³na¹.  
\v 18 To⁴nca³ cˀoa⁴xian³: A³ tsi² qui³nčhˀoe¹. Ña³qui³ cˀoa⁴tjin¹, nca³qui³jnta² son³ˀnte³ tsˀa³tji³vi¹son² jta⁴-le⁴, cˀoa⁴ ji³cho² en¹-le⁴ sa³ˀnta³ jña³ tjen⁴ fe³tˀa³-ni³ son³ˀnte³.  
\v 19 To⁴nca³ cˀoa⁴xian³: A³ tsi² tsa³ve³ je²-vi⁴ cho⁴ta⁴ Israel. Ti¹tjon² Moisés tso²: An³ si³chi⁴ni⁴-no³ co²ntran⁴-le⁴ cho⁴ta⁴ xi³ tsi² na⁴xi⁴na³nta¹, cˀoa⁴ co²ntran⁴-le⁴ cho⁴ta⁴ xi³ tsi²coi³ si¹cja³ˀai³tsjen³ si³jti³-no³.  
\v 20 To⁴sa³ Isaías ma³nˀion¹con³ nca³ tso²: Coan³sjai³-le⁴ nca³ an³ je² xi³ tsi² tsa³ca¹sjai³-na³, cˀoa⁴ tsa³ca³co³-le⁴ yao³-na⁴ je² xi³ tsi² tsa² coi³ qui³tsi²na³nqui³ tˀa³tsˀan⁴.  
\v 21 To⁴nca³ xi³ tˀa³tsˀe⁴ cho⁴ta⁴ Israel tso²: Nca³yi³je³ ni⁴čhjin³ tsa³cjen³-le⁴ ntsa⁴ jnco³ na⁴xi⁴na³nta¹ xi³ xi¹jin³, xi³ to⁴cja⁴ˀai¹-nca¹ tso². 
\c 11  
\s1 Je² xi³ tsˀe⁴ cho⁴ta⁴ Israel xi³ Ni³na¹ tsa³cja³ˀa¹jin³ cao⁴ cjoa⁴nta³-le⁴ 
\p  
\v 1 Cˀoa⁴xian³-ˀni³: A³ tsa³cˀa³sje³tˀa³xin²-ni¹ Ni³na¹ na⁴xi⁴na³nta¹-le⁴. Ma³jain², ni⁴ˀi⁴tse¹-jin² cˀoa⁴tjin¹. Cˀoa⁴-ti⁴ an³-vi⁴ cho⁴ta⁴ israelita nia¹³, ntje⁴-le⁴ Abraham nia¹³, xi³ ti⁴coi³-nia³ xi¹ncjin¹ Benjamín.  
\v 2 Ni³na¹ li²coi³ tsa³cˀa³sje³xin² na⁴xi⁴na³nta¹-le⁴ xi³ to⁴nqui³-ni³ tsa³ve³. A³ tsi² ˀyao³ jo³ tso² xon⁴ Escritura tˀa³tsˀe⁴ Elías, jo³-sˀin² nca³ tsa³cˀe¹tsˀoa³-le⁴ Ni³na¹ co²ntran⁴-le⁴ Israel,  
\v 3 Señor, qui³si³cˀen³ cho⁴ta⁴-li⁴ xi³ qui³nchja⁴ya³ tˀa³tsi⁴, cˀoa⁴ qui³si³xcoa⁴ya³ son²xta²-li⁴, cˀoa⁴ to⁴ˀan³ tsa³ca²te⁴jna³, cˀoa⁴ me³-xo¹le⁴ nca³ si⁴²cˀen³-na³.  
\v 4 To⁴nca³ jo¹-sˀin² qui³si³cˀo¹fa³ya³-le⁴ en¹ Ni³na¹: Ña³to³ jmi³ cho⁴ta⁴ qui³si³ca³tioa²³ xi³ tˀa³tsˀan⁴ xi³ tsi² tsa² ya⁴ tsa³qui³ncha³xco¹nchˀin³tˀa³-le⁴ Baal.  
\v 5 Cˀoa⁴-ti⁴sˀin²ni³, nta³ tsa² coi³ ni⁴čhjin³ je²-vi⁴ to⁴jo³ tjin¹-sa³ cho⁴ta⁴ xi³ njen³nqui³ xi³ Ni³na¹ tsa³cja³ˀa¹jin³-ni³ cao⁴ cjoa⁴nta³-le⁴.  
\v 6 Cˀia⁴ tsa² to⁴tˀa³tsˀe⁴ cjoa⁴nta³, li²coi³ to⁴tˀa³tsˀe⁴ xa¹na¹ˀni³. Tsa² cja⁴ˀai¹ tjin¹ cjoa⁴, je² cjoa⁴nta³-ve⁴ a³li² ti⁴cjoa⁴nta³-ni³ˀni³. Cˀoa⁴ tsa² to⁴tˀa³tsˀe⁴ xa¹-na¹, a³li² ti⁴cjoa⁴nta³-ni³ˀni³. Tsa² cja⁴ˀai¹ tjin¹ cjoa⁴, je² xa¹-na¹ li²coi³ ti⁴xa¹-ni³ˀni³.  
\v 7 Jme¹-ni³ˀni³. Israel li²coi³ ji³cho²tjen⁴nqui³-le⁴ jme³ xi³ tsa³ca¹sjai³, to⁴nca³ je² xi³ Ni³na¹ tsa³cja³ˀa¹jin³ ji³cho²tjen⁴nqui³-le⁴. Cˀoa⁴ je² xi³cˀa³ ña³qui³ nˀion¹ xi¹jin³ coan³.  
\v 8 Jo³-sˀin² tji¹tˀa³: Ni³na¹ qui³tsjoa³-le⁴ nca³ cjai¹nca³ njion² tjio¹ ni⁴ma⁴-le⁴, cˀoa⁴ xcon⁴ xi³ tsi² ma³tsen³-ni³le⁴, cˀoa⁴ xo⁴ño³ xi³ tsi²coi³ nčhˀoe¹-ni³, sa³ˀnta³ je² ni⁴čhjin³-vi⁴.  
\v 9 Cˀoa⁴ David tso²: Ca²ta³vˀa³ntjai²ya³ sˀoi¹-le⁴. Jnco³ nˀo¹chji⁴ye⁴ ca²ta³ma³, cˀoa⁴ na⁴ˀya³ xi³ ya⁴ tsao³ya³, cˀoa⁴ la⁴jao⁴ xi³ sa³te¹nqui³, cˀoa⁴ cao⁴ cjoa⁴ñˀain³-le⁴ ca²ta³vˀe¹chji¹-ni³.  
\v 10 Ca²ta³sˀe³chjoa²nqui³ xcon⁴, jme¹-ni³ nca³ tsi² scoe⁴-si¹ni³. Nca³ntsjai² ca²ta³mi³nti³ya³cao⁴ ya¹tsˀin⁴. 
\s1 Cˀoa⁴-ti⁴ ja³ˀai³-le⁴ cjoa⁴vi³tjo³ntjai² cho⁴ta⁴ xi³ li² judío-jin² 
\p  
\v 11 Cˀoa⁴xian³-ˀni³: A³ qui³sa³te²nqui²-ni³ jo³ sa³ˀnta³ nca³ qui³tsao³nti²jao³. Ma³jain², ni⁴ˀi⁴tse¹-jin², to⁴nca³ to⁴tˀa³tsˀe⁴ nca³ qui³tsao³jin³ je¹ cho⁴ta⁴ Israel, cˀoa⁴-sˀin² ja³ˀai³-le⁴ cjoa⁴vi³tjo³ntjai² cho⁴ta⁴ xi³ li² judío-jin², jme¹-ni³ nca³ coan⁴chi⁴ni⁴que³-si¹ni³ cho⁴ta⁴ Israel.  
\v 12 Tsa² to⁴tˀa³tsˀe⁴ nca³ qui³tsao³jin³ je¹ cho⁴ta⁴ Israel, coi³ nca³ sˀe⁴-le⁴ cjoa⁴nchi⁴na¹ son³ˀnte³-vi⁴, cˀoa⁴ tsa² to⁴tˀa³tsˀe⁴ nca³ qui³cha³-le⁴ cho⁴ta⁴ Israel, coi³ nca³ sˀe⁴-le⁴ cjoa⁴nchi⁴na¹ cho⁴ta⁴ xi³ li² judío-jin², jo¹ tjin¹-sa³ cjoa⁴nta³ xi³ sˀe⁴-le⁴ cˀia⁴ nca³ coan⁴jnco³-ni³ cho⁴ta⁴ judío.  
\v 13 Jon² xi³ fa³cao⁴-no³ xi³ cho⁴ta⁴ xi³ li² judío-jin². Coi³ nca³ an³ nia¹³ xi³ pa²stro⁴-le⁴ cho⁴ta⁴ xi³ li² judío-jin², vˀa³sje³je³ya²³ je² xa¹ xi³ tsa³cˀai²-na³,  
\v 14 tsa² to⁴jo³-sˀin²ni³ cjoa⁴ coan⁴-na³ si³chi⁴nia³ je² xi³ xi²nquia⁴, tsa² cˀoa⁴-ti⁴ coan⁴-na³ cˀoa⁴sje³ntje² jnco³joa² xi³ je².  
\v 15 Tsa² je² xi³ qui³tsjion³con³-le⁴ Ni³na¹, tsa² coi³ cjoa⁴ je²-vi⁴ nca³ tsa³cjao²nta³-ni³ cho⁴ta⁴son³ˀnte³ cao⁴ Ni³na¹, jme¹ xi³ coan⁴ cˀia⁴ nca³ tjo¹ve¹tjao² nca³ je², tsa² tsi² jo³-ni³ xi³ tjo¹ve¹tjao² cjoa⁴vi³jna³chon³ nca³jao³-le⁴ cjoa⁴vi³ya³.  
\v 16 Tsa² je² xi³ ti¹tjon² ntje⁴ xi³ vˀai²tˀa³, tsje³ ni¹, cˀoa⁴²-ti⁴ tsje³ nca³yi³je³. Cˀoa⁴ tsa² je² ja⁴ma⁴-ve⁴ tsje³ ni¹, cˀoa⁴²-ti⁴ cjoan³ ya¹ntsja³-ˀni³.  
\v 17 Cˀia⁴ tsa² jnco³ jao² ya¹ntsja³ xi³ qui³ti³tˀa³, cˀoa⁴ ji³ ni¹ xi³ ya¹ˀoliva xi³ jin³jña¹ cji³ma³jchai¹³, ya⁴² ti³sen³jna³yai³ ˀnte³-le⁴ nca³ je², cˀoa⁴ ya⁴² tji¹cjao³coai⁴ ja⁴ma⁴ nca³ chjoai¹³ nca³nˀion¹-le⁴ ya¹ˀoliva.  
\v 18 A³li² chˀa²sje³je³ya³-jin²lai⁴ yao³-li⁴ ya¹ntsja³ xi³ qui³ti³tˀa³-ve⁴. Cˀoa⁴ tsa² chˀa²sje³je³ya³-lai⁴ yao³-li⁴, ca²ta³fa³ˀai³tsjen³-li² nca³ tsi² tsa² coi³ ji³ xi³ vˀai²-lai⁴ nca³nˀion¹ ja⁴ma⁴-ve⁴, to⁴nca³ je² ja⁴ma⁴-ve⁴ xi³ tsjoa¹-li² nca³nˀion¹.  
\v 19 Ji³ cˀoa⁴-la² si³: Je² ya¹ntsja³ qui³ti³tˀa³, jme¹-ni³ nca³ an³ coa²se⁴jna³ya³-nia³ ˀnte³-le⁴.  
\v 20 Nta³ tjin¹. To⁴tˀa³tsˀe⁴ nca³ tsi² tsa² coan³cjain¹-le⁴ nca³ qui³ti³tˀa³-ni³ nca³ je². To⁴nca³ ji³ to⁴tˀa³tsˀe⁴ nca³ ma³cjain¹-li², vi³sen²jna³nˀion¹-ni³. A³li² ncˀa³ta³con²-jin² mai³, to⁴sa³ ti⁴jcon¹-lai⁴.  
\v 21 Nca⁴ tsa² Ni³na¹ li² coi³ tsa³cˀe¹chjoa²-le⁴ nca³ qui³sˀe³-le⁴ cjoa⁴ñˀain³ je² xi³ to⁴xa¹ ya¹ntsja³-ni³, cˀoa⁴²-ti⁴ ji³ ni⁴ˀi⁴tse¹-jin² cˀoe⁴²chjoa²-li² nca³ sˀe⁴-li⁴ cjoa⁴ñˀain³.  
\v 22 Cho¹tsen³-lai⁴ˀni³, je² cjoa⁴nta³-le⁴ cˀoa⁴ je² cjoa⁴ta²ja³ta³con²-le⁴ Ni³na¹, je² cjoa⁴ta²ja³ta³con²-le⁴ xi³ tˀa³tsˀe⁴ je² xi³ qui³tsao³-ve⁴, to⁴nca³ je² cjoa⁴nta³-le⁴ Ni³na¹ xi³ tˀa³tsi⁴, tsa² cˀoa⁴-sˀin² coi⁴jna³cao⁴-sai³ je² cjoa⁴nta³-ve⁴. Cˀoa⁴ tsa² mai³, cˀoa⁴-ti⁴ ji³ coi⁴cha¹tˀa³-li²ˀni³.  
\v 23 Cˀoa⁴ nta³ tsa² je² xi³cˀa³, tsa² tsi² cˀoa⁴-sˀin² cˀoe¹yo³cao⁴ nca³ tsi² ma³cjain¹-le⁴, sa⁴sen¹jna³ya³ ˀnte³-le⁴, nca⁴ Ni³na¹ tjin¹-le⁴ nca³nˀion¹ nca³ si⁴²ca³sen¹jna³ya³ nqui²jnco³cˀa² ˀnte³-le⁴.  
\v 24 Tsa² ji³ xi³ qui³ti³tˀai³ je² ya¹ˀoliva xi³ to⁴xa¹ cjoan³-ni³ jin³jña¹, cˀoa⁴ cˀoa⁴-sˀin² sa³sen¹jna³yai³ ˀnte³-le⁴ xi³ nqui²sa⁴ nta³ ya¹ˀoliva xi³ tsi² tsa² coi³ to⁴xa¹ cjoan³-ni³ jin³jña¹, jo¹ tjin¹-sa³ je²-ve⁴ xi³ ña³qui³ xa¹ cjoan³-ni³ ya¹ntsja³ ya¹-ve⁴ cˀoa⁴-ti⁴ sa⁴sen¹jna³ya³ nqui²jnco³cˀa² ˀnte³-le⁴ ya⁴ ya¹ˀoliva xi³ tsˀe⁴. 
\s1 Cho⁴ta⁴ Israel sa⁴co²-le⁴ cjoa⁴ma⁴ta³con² 
\p  
\v 25 Nca⁴ tsi²coi³ me³-na³, ntsˀe³, nca³ tsi² jchao⁴³ je² cjoa⁴ˀma³-ve⁴, jme¹-ni³ nca³ tsi² nˀion¹ ncˀa³ta³con²³ coan⁴-si¹nio³ xi³ ti⁴tˀa³tsaon⁴³-nio³. Je² cjoa⁴ta²ja³ta³con² xi³ coan³cˀa³-le⁴ cho⁴ta⁴ Israel, jo³ sa³ˀnta³ nca³ cjoe⁴ coan⁴jnco³ nca³tsˀi³ cho⁴ta⁴ xi³ li² judío-jin² xi³ cjoa⁴ˀa³sˀen³.  
\v 26 Cˀia⁴ nca³ cˀoa⁴-sˀin² cjoe⁴ coan⁴-ve⁴, nca³tsˀi³ cho⁴ta⁴ Israel coi⁴tjo³ntjai², jo³-sˀin² tji¹tˀa³: Ya⁴ Sión cjoi⁴nčhoa³-ni³ xi³ cˀoa⁴sje³ntjai², je² xi³ cjoa⁴ˀa²xin²-le⁴ Jacobo cjoa⁴ xi³ tsi² ve³xcon¹ Ni³na¹.  
\v 27 Je²-vi⁴ cjoa⁴ xi³ cˀoe³nta³coa⁴ cˀia⁴ nca³ cjoa³ˀa³xian²³ je¹-le⁴.  
\v 28 Cˀoa⁴-sˀin² xi³ tˀa³tsˀe⁴ je² en¹nta³ xi³ tˀa³tsˀe⁴ Cristo, co²ntran⁴ ma³-le⁴. Coi³ cjoa⁴ cˀoa⁴coan³ xi³ tˀa³tsaon⁴³. To⁴-nca³ jo³-sˀin² nca³ Ni³na¹ tsa³cja³ˀa¹jin³, Ni³na¹ cjai¹nca³ tjao²que³ nca³ je² xi³ tˀa³tsˀe⁴ nˀai³jcha¹cjin³-le⁴.  
\v 29 Nca⁴ li²coi³ coan⁴ cˀoa⁴ntjai²ya³ cjoa⁴tjao²-le⁴ Ni³na¹ cao⁴ jo³-sˀin² nca³ qui³nchja⁴-le⁴ Ni³na¹.  
\v 30 Jo³-sˀin² nca³ cˀoa⁴-ti⁴ jon²-vi⁴ cˀia⁴ li²coi³ qui³ni²tjo³son²-lao⁴³ Ni³na¹, to⁴nca³ ntˀai⁴-vi⁴ qui³sa³co³-no³ cjoa⁴ma⁴ta³con² to⁴tˀa³tsˀe⁴ nca³ tsi² qui³si³tjo³son²-le⁴ nca³ je².  
\v 31 Cˀoa⁴-ti⁴sˀin² je²-vi⁴ ntˀai⁴-vi⁴ li²coi³ qui³si³tjo³son²-le⁴, jme¹-ni³ nca³ cˀoa⁴-ti⁴ je² sa⁴co²-le⁴ cjoa⁴ma⁴ta³con² to⁴tˀa³tsˀe⁴ cjoa⁴ma⁴ta³con² xi³ qui³sa³co³-no³ nca³ jon².  
\v 32 Nca⁴ Ni³na¹ tsa³cˀe¹yo³nqui³-le⁴ nca³tsˀi³ nca³ tsi² tsa² qui³si³tjo³son²-le⁴, jme¹-ni³ nca³ coan⁴ma⁴que³-si¹ni³ nca³tsˀi³.  
\v 33 Li² to⁴cˀoa⁴cji³ tse³ tjin¹ cjoa⁴chji⁴ne⁴-le⁴ cao⁴ cjoa⁴ˀi³sen³ta³con²-le⁴ Ni³na¹. Ni⁴ˀya³-jin² xi³ ma³-le⁴ ma³cho⁴ya³-le⁴ jo³ tjin¹ cjoa⁴te¹xo³ma³-le⁴ Ni³na¹. Ni⁴ˀya³-jin² xi³ ma³-le⁴ ve³ ntia⁴²-le⁴.  
\v 34 ˀya¹ xi³ coan³cho⁴ya³-le⁴ cjoa⁴fa³ˀai³tsjen³-le⁴ Nai³-na¹. A³xo⁴ ˀya¹ xi³ qui³tso²ya³-le⁴.  
\v 35 A³xo⁴ ˀya¹ xi³ ti¹tjon² qui³tsjoa³-le⁴ nca³ je², jme¹-ni³ nca³ coan³chji¹-si¹ni³le⁴.  
\v 36 Nca³yi³je³ cjoa⁴ ji³nčhoa³-ni³ nca³ je². Nca³yi³je³ cjoa⁴ tˀa³tsˀe⁴ qui³sˀe³nta. Cˀoa⁴ nca³yi³je³ cjoa⁴ tjio¹ tˀa³tsˀe⁴. Ca²ta³sˀe³-le⁴ cjoa⁴je³ya³ nca³ je² to⁴jo³ tjin¹-ni³ ni⁴čhjin³. Cˀoa⁴ ca²ta³ma³. 
\c 12  
\s1 Cjoa⁴ xi³ ma³chjen¹-le⁴ cho⁴ta⁴-le⁴ Cristo 
\p  
\v 1 Cˀoa⁴-sˀin² ntsˀe³, cˀoe³tsˀoa²³-no³ xi³ to⁴tˀa³tsˀe⁴ cjoa⁴ma⁴ta³con²-le⁴ Ni³na¹, nca³ coi⁴ncha³va³saon³ yao³-no³ nca³ cˀoai⁴tˀa³-lao⁴³ Ni³na¹ je² yao³-no³ jo³-ni³ jnco³ cjoa⁴tjao² xi³ ti¹jna³con³, xi³ tsje³, xi³ sa³sen¹-le⁴ Ni³na¹. Cˀoa⁴²-sˀin² ma³chjen¹-lao⁴³ Ni³na¹ cao⁴ ni⁴ma⁴-no³.  
\v 2 A³li² cˀoa⁴-jin²sˀin² ma³nquin¹cao⁴³ yao³-no³ jo³ tjin¹ cjoa⁴ son³ˀnte³-vi⁴. Ca²ta³vˀa³ntjai²yao³ yao³-no³ nca³ coan⁴cho⁴tse⁴ya³nta³ nqui²jnco³cˀa²-ni³ cjoa⁴fa³ˀai³tsjen³-no³, jme¹-ni³ nca³ jcha⁴-si¹nio³ jme³-ni³ xi³ Ni³na¹ me³-le⁴, jña³-le⁴ xi³ nta³, xi³ sa³sen¹-le⁴, xi³ ña³qui³ tji¹jnco³.  
\v 3 Cˀoa⁴xin³-no³ nca³ jnco¹jnco¹ xi³ ti³yo³-vi⁴, xi³ to⁴tˀa³tsˀe⁴ cjoa⁴nta³ xi³ tsa³cˀai²-na³, nca³ tsi² ˀya³ xi³ nqui²sa⁴ nˀion¹ ncˀa³ si⁴²cja³ˀai³tsjen³-le⁴ yao³-le⁴ cao⁴-ni³ tsa² xi³ jo³-sˀin² nca³ va³quin²-le⁴, to⁴nca³ cˀoa⁴-sˀin² ca²ta³si¹cja³ˀai³tsjen³jin³ nca³ ni⁴ncˀa³-jin² cˀoa⁴ ni⁴na³nqui³-jin² si⁴²cja³ˀai³tsjen³ xi³ tˀa³tsˀe⁴ yao³-le⁴, to⁴nca³ jo³-sˀin² choa⁴ xi³ Ni³na¹ qui³tsjoa³-le⁴ nca³ jnco¹jnco¹ nca³ coan³cjain¹-le⁴.  
\v 4 Jo³-sˀin² cjoan³ yao³-na¹ nca³ ncjin² jco⁴ya³ tjin¹-le⁴, to⁴nca³ nca³yi³je³ jco⁴ya³-le⁴ yao³-na¹ a³li² to⁴jnco³-jin² xa¹ tjin¹-le⁴ xi³ to⁴nco¹son².  
\v 5 Cˀoa⁴-sˀin² xi³ to⁴tˀa³tsˀe⁴ Cristo to⁴jnco³ yao³ nia¹, nta³ tsa² ncjin² ma³-nia¹, to⁴nca³ nca³tsˀia³² nca³ jnco¹jncoa¹ xi¹ncjin¹ ma³-ni³ yao³-na¹.  
\v 6 Cˀoa⁴-sˀin² cja⁴ˀai¹-nca¹ cjoan³ cjoa⁴tjao²-le⁴ Espíritu Santo xi³ tjin¹-le⁴ nca³ jnco¹jnco¹. Jo³-sˀin² qui³tsˀai²-le⁴ cjoa⁴nta³-le⁴, cˀoa⁴-sˀin² ca²ta³si¹chjen¹. Tsa² cjoa⁴tjao²-ve⁴ nca³ nchja⁴ya³jin³-ni³, ca²ta³si¹chjen¹ jo³-sˀin² choa⁴-le⁴ nca³ ma³cjain¹-le⁴,  
\v 7 a³xo⁴ tsa² je² cjoa⁴tjao²-ve⁴ nca³ si¹xa¹, ca²ta³si¹chjen¹ jo³-sˀin² vˀai²-le⁴ nca³ si¹xa¹, a³xo⁴ je² xi³ va³co¹ya³, cˀoa⁴-sˀin² ca²ta³si¹chjen¹ jo³-sˀin² vˀai²-le⁴ nca³ va³co¹ya³.  
\v 8 Je² xi³ vˀe¹tˀain³, ca²ta³si¹chjen¹ jo³-sˀin² vˀai²-le⁴ nca³ vˀe¹tˀain³. Je² xi³ si¹cˀa³vi¹ cjoa⁴tjao², cˀoa⁴ca²ta³sˀin¹ cao⁴ cjoa⁴nta³. Je² xi³ ma³ nca³jco⁴-le⁴, nta³ ca²ta³si¹coi²nta⁴. Je² xi³ ma³ma⁴que³, cˀoa⁴ca²ta³sˀin¹ cao⁴ cjoa⁴tsjoa³.  
\v 9 Je² cjoa⁴tjao²cha³ xi³ ña³qui³ cjoa⁴qui²xi⁴ ca²ta³ma³. Chˀao³cha³ ca²ta³mao³ xi³ chˀao³ tjin¹, nˀion¹ ta³nquin¹tˀa³-lao⁴³ xi³ nta³ tjin¹.  
\v 10 Ca²ta³ma³tsjoa³chao³ xi²nquio⁴³ jo³-ni³ nca³ ntsˀao³. Nqui²sa⁴ ti¹tjon² jcha⁴xcon¹³ xi³cˀa³ jo³-ni³ tsa² ti⁴jon²-nio³.  
\v 11 A³li² tsˀe²-jion²³ xi³ nˀiaon²³, ti⁴xi¹ti¹yao³, tsjoa³cjoa⁴ ca²ta³mao³ cao⁴ Espíritu Santo, cˀoa⁴ jo³-ni³ cho⁴nta³-sˀin² ti⁴xa¹-lao⁴³ Nai³-na¹.  
\v 12 Cjoa⁴tsjoa³ ca²ta³sˀe³-no³ xi³ tˀa³tsˀe⁴ xi³ cho³ya²-lao⁴³, cjoa⁴tse³jta³ ca²ta³sˀe³-no³ xi³ tˀa³tsˀe⁴ cjoa⁴ñˀain³ xi³ ti³chja³ˀao²³, tˀe²tsˀoa³ntsjao²³.  
\v 13 Tˀai²-lao⁴³ jme³ xi³ ma³chjen¹-le⁴ cho⁴ta⁴-le⁴ Cristo, tˀai²ˀnte³-lao⁴³ cho⁴ta⁴ xi³ xin² fa³ˀai³-ni³.  
\v 14 Ti⁴chi³con³tˀaon³ je² xi³ chˀao³ fi²cao⁴-no³, ti⁴chi³con³tˀain³-nio¹³ a³li² no²cjoa⁴ˀaon³-jin²lao⁴³.  
\v 15 Ti⁴tsjoa³cao⁴³ ˀya³ xi³ ma³tsjoa³-le⁴, chji¹ˀnta¹cao⁴³ ˀya³ xi³ cji³ˀnta¹.  
\v 16 To⁴jnco³ cjoa⁴fa³ˀai³tsjen³ ca²ta³sˀe³jin³-no³ nca³ jon², a³li² ncˀa³con³-jin² mao³, to⁴nca³ mi²yo⁴ tˀiaon⁴³ cho⁴ta⁴yo⁴ma⁴, a³li² nˀo²sje³ncˀa³-jion²³ yao³-no³.  
\v 17 A³li² chˀao³-jin² ni²cao⁴³ je² xi³ chˀao³ si¹cao⁴-no³, ti⁴coi²ntao⁴³ xi³ nta³ tjin¹ nqui³xcon⁴ nca³tsˀi³ cho⁴ta⁴.  
\v 18 To⁴jo³ cji³ nca³yi³je³ xi³ coan⁴-no³, cˀoa⁴tˀiaon⁴³ jme¹-ni³ nca³ nchˀan¹ coi⁴yo³-si¹nio³ cao⁴ nca³tsˀi³ cho⁴ta⁴.  
\v 19 Jon² xi³ tsjoa³que⁴-no³, a³li² ni²jnta²-jin²nio³ nca³ ti⁴jon²-nio³, to⁴nca³ tˀai²ˀnte³-lao⁴³ Ni³na¹ cao⁴ cjoa⁴jti³-le⁴, nca³ cˀoa⁴-sˀin² tji¹tˀa³: An³ xi³ si³jnta²³-nia³, an³ cˀoe³chji¹-nia³, tso² Nai³-na¹.  
\v 20 Tsa² co²ntran⁴-li⁴ xi³ vao³-le⁴, ti⁴cjain²³. Cˀia⁴ tsa² fa³ti²-le⁴, tˀai²-lai⁴ xi³ scˀoi¹. Tsa² cˀoa⁴nˀiain²³, vi³ncha³nto³soin²³ jco⁴ co²ntran⁴-li⁴ xo¹lˀi¹-ve⁴.  
\v 21 A³li² je²-jin² si⁴²qui³njen³-li² xi³ chˀao³ tjin¹-ve⁴, to⁴-nca³ ti⁴qui³njen³-lai⁴ xi³ chˀao³ tjin¹ xi³ to⁴tˀa³tsˀe⁴ xi³ nta³ tjin¹. 
\c 13  
\p  
\v 1 Nca³tsˀi³ cho⁴ta⁴ ca²ta³si¹tjo³son²-le⁴ cho⁴ta⁴ xi³ xa¹ tjin¹-le⁴, xi³ va³te¹xo³ma³, nca³ tsin² cjoa⁴te¹xo³ma³-jin² xi³ tsi² tsjoa¹ˀnte³ Ni³na¹, cˀoa⁴ je² xi³ tjio¹, Ni³na¹ qui³si³qui³ncha¹.  
\v 2 Cˀoa⁴-sˀin² je² cho⁴ta⁴ xi³ vˀe²yo³ta²ja³cao⁴ cho⁴ta⁴ xi³ xa¹ tjin¹-le⁴, vˀe²yo³ta²ja³cao⁴ cjoa⁴te¹xo³ma³-le⁴ Ni³na¹, cˀoa⁴ je² xi³ vˀe²yo³ta²ja³-ve⁴ˀni³, ti⁴je² tjo¹ve¹-le⁴ cjoa⁴ñˀain³ yao³-le⁴.  
\v 3 Je² xi³ xa¹ tjin¹-le⁴, a³li² coi³-jin² xa¹ tjin¹-le⁴ nca³ si¹qui³ncha¹xcon¹ cho⁴ta⁴ xi³ nta³ sˀin¹, to⁴nca³ je² xi³ chˀao³ sˀin¹. A³ me³-li²ˀni³ nca³ li²coi³ coi⁴jcon¹-lai⁴ cho⁴ta⁴xa¹-ve⁴. Cˀoa⁴tˀiain⁴ xi³ nta³ tjin¹, cˀoa⁴ cˀoa⁴sje³nta³-li²ˀni³.  
\v 4 Nca⁴ je² cho⁴ta⁴xa¹ si¹xa¹-le⁴ Ni³na¹ nca³ nta³ coi⁴jna³-ni³ nca³ ji³. Cˀia⁴ tsa² ji³ xi³ chˀao³ sˀiain⁴, ti⁴jcon¹-lai⁴, nca³ tsi² tsa² to⁴cjoa⁴tjao²-jin² yˀa³ je² qui⁴cha⁴, nca³ je² xi³ si¹xa¹-le⁴ Ni³na¹, xi³ si¹jnta²-le⁴, xi³ tsjoa¹-le⁴ cjoa⁴ñˀain³ xi³ chˀao³ sˀin¹.  
\v 5 Coi³ nca³ ma³chjen¹-ni¹ nca³ na³nqui³ ti⁴yo³-lao⁴³, a³li² tsa² to⁴coi³-jin² nca³ li²coi³ ti⁴cjoa⁴ñˀain³ sˀe⁴-ni³no³, to⁴nca³ cˀoa⁴-ti⁴ tˀa³tsˀe⁴ cjoa⁴fa³ˀai³tsjen³-no³.  
\v 6 Nca⁴ coi³ cjoa⁴-vi⁴ nca³ cˀoe¹chji¹ntjao²³, nca³ je² cho⁴ta⁴xa¹ to⁴xa¹ tjio¹-ni³le⁴ Ni³na¹ nca³ nta³ si¹coi²nta⁴ xi³ ti⁴coi³-ni³ cjoa⁴ je²-vi⁴.  
\v 7 Tˀe²chji¹-lao⁴³ nca³tsˀi³ xi³ qui³tjen⁴-no³ tsˀe⁴, tsa² taon⁴sa¹ tˀe²chji¹-lao⁴³ taon⁴sa¹-no³, tsa² taon⁴va³sen³ ni¹, tˀe²chji¹-lao⁴³ taon⁴va³sen³-no³, tsa² je² xi³ va³quin²-le⁴ cjoa⁴xcon¹ta³con², tˀai²-lao⁴³ cjoa⁴xcon¹ta³con², tsa² je² xi³ va³quin²-le⁴ cjoa⁴nˀo²sje³nta³, tˀai²-lao⁴³ cjoa⁴nˀo²sje³nta³.  
\v 8 Ni⁴to⁴jme³-jin² xi³ qui³tjen⁴-no³ cao⁴ ˀya³-ni³ve⁴, to⁴je²-jin² cjoa⁴tjao²cha³ nca³ ma³tsjoa³chao³ xi²nquio⁴³. Je² xi³ tsjoa³que³ xi¹ncjin¹, je² xi³ si¹qui³tjo³son² cjoa⁴te¹xo³ma³.  
\v 9 Je² cjoa⁴te¹xo³ma³ xi³ tso²: A³li² cha³jnqui³tˀa³-jin² mai³, a³li² ni²cˀen³-jin², a³li² ni²che¹-jin², a³li² en¹nti³so³-jin² no²cjoai⁴, a³li² ma³xin²ta³con²cha³-jin². Cˀia⁴ tsa² tjin¹-sa³ nqui²jnco³ xi³ cja⁴ˀai¹ cjoa⁴te¹xo³ma³, i⁴² ti¹nchja⁴yi³je³ cjoa⁴te¹xo³ma³ je²-vi⁴: Tsjoa³cha³ ca²ta³mai³ xi²nqui⁴ jo³-ni³ tsa² ti⁴ji³-ni³.  
\v 10 Je² cjoa⁴tjao²cha³ a³li² chˀao³-jin² si¹cao⁴ xi¹ncjin¹. Cˀoa⁴²-sˀin², je² xi³ si¹jnco³ cjoa⁴te¹xo³ma³, je² xi³ cjoa⁴tjao²cha³.  
\v 11 Cˀoa⁴-ti⁴ ˀya³² jme³ ni⁴čhjin³-ni³ ntˀai⁴-vi⁴, nca³ je² coi³ hora nca³ coi⁴so¹tjen⁴-le⁴² ni³jña¹-na¹. Nca⁴ ntˀai⁴-vi⁴ntai⁴ nqui²sa⁴ ti¹jna³čhian³-na¹ nca³ coi²tjo⁴ntje² cao⁴-ni³ tsa² cˀia⁴ nca³ ti¹tjon² coan³cjain¹-na¹.  
\v 12 Ni⁴tjen⁴ je³fa³ˀa³to³-ni¹, cˀoa⁴ je³nčhoa¹čhian³ ni⁴čhjin³. Chja⁴ˀa²xian² tso²cˀoa⁴ xa¹ xi³ tjin¹ jña³ njion²chon³, cˀoa⁴ chˀa⁴cja¹ na³jño³qui⁴cha⁴ xi³ tsˀe⁴ jña³ i³sen³.  
\v 13 Nta³ coan³nquin¹coa⁴² yao³-na¹ jo³-sˀin² xi³ cjoa⁴qui²xi⁴ jo³-sˀin² vˀe²ma³² nca³ ni⁴čhjin³. A³li²coi³ cjoa⁴chi⁴nca⁴ cao⁴ cjoa⁴chˀi⁴ coi⁴tso⁴ma³jian³². A³li²coi³ ya¹nchjin¹ cjoa¹jta³² cao⁴ xi³ to⁴xquia⁴ nˀian² cao⁴ yao³-na¹. A³li²coi³ coi⁴xcan³coa⁴² xi²nquia⁴². A³li²coi³ coan⁴xin²ta³con² jcha⁴² xi²nquia⁴².  
\v 14 To⁴nca³ cˀoa⁴-sˀin² ca²ta³mao³ jo³ cjoan³ Nai³-na¹ Jesucristo. A³li² to⁴nqui³-jin²ni³ vˀe²nta³-lao⁴³ yao³-no³ nca³ si⁴tjo³son²-lao⁴³ jo³ tso² xi³ me³-le⁴ yao³-no³. 
\c 14  
\s1 Xi³ tˀa³tsˀe⁴ cho⁴ta⁴ xi³ ma³cjain¹-le⁴ to⁴nca³ xi³ cje³ tsm²-sa³le⁴ nca³nˀion¹ 
\p  
\v 1 Chjoe¹tjao²yao³ cho⁴ta⁴ xi³ ma³cjain¹-le⁴, to⁴nca³ xi³ cje³ tsin²-sa³le⁴ nca³nˀion¹. Li²coi³ coi⁴xcan³cao⁴³ cjoa⁴fa³ˀai³tsjen³-le⁴.  
\v 2 Jnco³ cho⁴ta⁴ ma³cjain¹-le⁴ nca³ ma³ cji³ne³yi³je³ tso³-jmi², cˀoa⁴ xi³ nqui²jnco³ xi³ tsin²-le⁴ nca³nˀion¹-jin² to⁴ˀnti¹xca⁴ cjen².  
\v 3 Je² xi³ cjen², a³li² vˀa³sje³nqui³-jin² je² xi³ tsi²coi³ cjen². Cˀoa⁴ je² xi³ tsi²coi³ cjen², a³li² ve³sin³-jin² je² xi³ cjen², nca⁴ Ni³na¹ xi³ qui³scoe¹tjao².  
\v 4 ˀya¹-ni³ ji³ nca³ ˀya³sin³-ni³ cho⁴ˀnta³ xi³ tsˀe⁴ xi³ cja⁴-ˀai¹. Tˀa³tsˀe⁴ xi³ ña³qui³ tsˀe⁴ nai³-le⁴ nta³ ti¹jna³ a³xo⁴ sca⁴nqui³-je⁴. To⁴nca³ ña³qui³ nta³ si⁴cˀe¹jna³, nca⁴ je² Nai³-na¹ ma³-le⁴ si⁴²cˀe¹jna³nta³ nca³ je².  
\v 5 Jnco³ xi³ cja⁴ˀai¹-nca¹sˀin² ve³con³ ni⁴čhjin³, to⁴nca³ xi³ cja⁴ˀai¹ to⁴nco¹son² ve³con³ nca³ntsjai² ni⁴čhjin³. Nca³ jnco¹jnco¹ ña³qui³ ca²ta³sˀe³jnco³ta³con².  
\v 6 Je² xi³ cjoa⁴-le⁴ ni⁴čhjin³ vˀa³, cˀoa⁴sˀin¹ tˀa³tsˀe⁴ Nai³-na¹, cˀoa⁴ je² xi³ tsi² cjoa⁴-le⁴ ni⁴čhjin³ vˀa³ cˀoa⁴-ti⁴sˀin¹ tˀa³tsˀe⁴ Nai³-na¹. Je² xi³ cjen², cjen² tˀa³tsˀe⁴ Nai³-na¹, nca⁴ tsjoa¹-le⁴ cjoa⁴nta³ Ni³na¹. Cˀoa⁴ je² xi³ tsi²coi³ cjen², cˀoa⁴-ti⁴ tˀa³tsˀe⁴ Nai³-na¹ li²coi³ cjen², cˀoa⁴ tsjoa¹-le⁴ cjoa⁴nta³ Ni³na¹.  
\v 7 Nca⁴ ni⁴jnco³-jin² xi³ ña¹-vi⁴, xi³ ti¹jna³con³ xi³ ti⁴tˀa³tsˀe⁴-ni³ yao³-le⁴, cˀoa⁴ ni⁴jnco³-jin² xi³ vi³ya³ xi³ ti⁴tˀa³tsˀe⁴-ni³ yao³-le⁴.  
\v 8 Tsa² ti³yo³chon³-nia¹, to⁴tˀa³tsˀe⁴ Nai³-na¹ nca³ ti³yo³choan³². Tsa² vi³ya³², to⁴tˀa³tsˀe⁴ Nai³-na¹ nca³ vi³ya³². Cˀoa⁴-sˀin² tsa² vi³yo³chon³-nia¹ a³xo⁴ vi³ya³-nia¹, tsˀe⁴ nia¹ Nai³-na¹.  
\v 9 Cristo coi³ cjoa⁴-vi⁴ cˀen³-ni³, cˀoa⁴ ja³ˀa²ya³-ni³le⁴, cˀoa⁴ tsa³cˀe²jna³con³ nqui²jnco³cˀa²-ni³, jme¹-ni³ nca³ Nai³-le⁴ coan⁴-si¹ni³ xi³ cˀen³ cˀoa⁴ xi³ tjio¹con³.  
\v 10 To⁴nca³ ji³, a¹-ni³ nca³ ntsˀai³ ˀya³sin³-si¹ni³. A³xo⁴ cˀoa⁴-ti⁴ ji³, a¹-ni³ nca³ ntsˀai³ nˀo²sje³nqui³-si¹ni³. Nca⁴ nca³tsˀia³² coi⁴yoa³² nqui³xcon⁴ cjoa⁴te¹xo³ma³-le⁴ Cristo.  
\v 11 Nca⁴ cˀoa⁴-sˀin² tji¹tˀa³: Tso² je² Nai³-na¹ve⁴: Jo³-sˀin² cjoa⁴qui²xi⁴ nca³ ti²jna⁴coan³, coi⁴ncha¹-na³ xco¹nchˀin³-le⁴ nca³tsˀi³ cho⁴ta⁴, cˀoa⁴ si⁴²qui²xi⁴ya³nta³ Ni³na¹ nca³tsˀi³ cho⁴ta⁴.  
\v 12 Cˀoa⁴-sˀin² nca³tsˀia³²-vi⁴ cˀoai⁴-le⁴² coi²nta⁴ Ni³na¹ xi³ ti⁴tˀa³tsˀe⁴ yao³-na¹ni³ nca³ jnco¹jncoa¹.  
\v 13 Cˀoa⁴-sˀin² a³li²coi³ ti⁴jcha⁴sin³-sa³nia³² xi²nquia⁴², to⁴sa³ ti⁴cja³ˀai³tsjaon³ nca³ tsi² cˀoe¹jnao³ xi³ sa⁴te¹nqui³ ntsˀao³, a³xo⁴ tsi² si⁴ca³jnquio³ je¹ ntsˀao³.  
\v 14 An³ ˀve³-nia¹³, cˀoa⁴ nta³ ˀve³coan³ nca³ ti²jna⁴coa⁴ Nai³-na¹ Jesús, nca³ ni⁴jme³-jin² xi³ tjin¹ xi³ chˀao³ tjin¹ nca³ ti⁴je²-ni³, to⁴nca³ je² xi³ si¹cja³ˀai³tsjen³ nca³ chˀao³ tjin¹ to⁴jme³ cjoa⁴-ni³ve⁴, tˀa³tsˀe⁴ chˀao³ tjin¹-ni³.  
\v 15 To⁴nca³ tsa² coi³ cjoa⁴-le⁴ xi³ ma³ vi³chi³-ni³ je² ntsˀai³ aon³ ma³-le⁴, ji³ a³li²coi³ ti⁴to²mjen³cao⁴-ni³ cjoa⁴tjao²cha³. A³li² ni²qui³tson¹-jin² ntsˀai³ cao⁴ xi³ vi³chi³-ni³ve⁴, jña³-le⁴ xi³ Cristo cˀen³ tˀa³tsˀe⁴.  
\v 16 A³li² no²cjoa⁴ˀaon³-jin²le⁴ xi³ nta³ tjin¹ tˀa³tsaon⁴³.  
\v 17 Je² cjoa⁴te¹xo³ma³-le⁴ Ni³na¹ a³li² to⁴xquia⁴ tso³jmi² xi³ chi³ne³, ni⁴xi³ ˀyo²-jin², to⁴nca³ xi³ cjoa⁴qui²xi⁴, xi³ nchˀan¹ tjin¹, cao⁴ xi³ cjoa⁴tsjoa³ tjin¹-ni¹ xi³ tˀa³tsˀe⁴ Espíritu Santo.  
\v 18 Je² xi³ cˀoa⁴-sˀin² si¹xa¹-le⁴ Cristo jo³-ni³ cho⁴ˀnta³, sa³sen¹con³-le⁴ Ni³na¹, cˀoa⁴ nta³ vi³tjo³ nqui³xcon⁴ cho⁴ta⁴.  
\v 19 Cˀoa⁴-sˀin² cjoin³tjen⁴nqui³-le⁴² cjoa⁴ xi³ si¹qui³njen³nchˀan¹jin³-na¹, cˀoa⁴-ti⁴ je² xi³ si¹quin³ncˀa³ xi¹ncjin¹.  
\v 20 A³li² tˀa³tsˀe⁴ tso³jmi² xi³ ma³vi³chi³-ni³jin² si⁴qui³xo¹ya³-ni³ je² xa¹ xi³ sˀin¹ Ni³na¹. Nca³yi³je³ cjoa⁴ ña³qui³ tsje³-ni¹, to⁴nca³ chˀao³ tjin¹ tˀa³tsˀe⁴ cho⁴ta⁴ xi³ si⁴²ca³te¹-nqui³ xi³cˀa³ xi³ to⁴tˀa³tsˀe⁴ nca³ cjen².  
\v 21 Nta³ tjin¹ nca³ tsi² tsa² yao³ chi³nai³, ni⁴ˀyo²-jin² xan¹, cˀoa⁴ ni⁴jme³-jin² xi³ nˀiain²³ xi³ sa⁴te¹nqui³ ntsˀai³, xi³ si⁴²ca³jnqui³ je¹, a³xo⁴ xi³ si⁴²ˀi³nta³jin³ nca³ je².  
\v 22 Je² xi³ jo³-sˀin² ma³cjain¹-li² ca²ta³ma³cjain¹-li² xi³ ti⁴tˀa³tsi⁴-ni³ nqui³xcon⁴ Ni³na¹. Jo¹ to⁴nta³-le⁴ xi³ tsi² vˀe¹ne²-le⁴ je¹ yao³-le⁴ cao⁴ xi³ co³son²-ni³le⁴ nca³ nta³ tjin¹.  
\v 23 To⁴nca³ je² xi³ jao² tjin¹-sa³con², tsa² coa⁴cjen⁴, cjoa⁴ñˀain³ tjin¹ne²-le⁴, nca³ tsa³cjen² nta³ tsa² tsi² cˀoa⁴-sˀin² coan³cjain¹-le⁴. Cˀoa⁴ je² nca³yi³je³ xi³ sˀian⁴², cˀoa⁴ tsa² tsi² cˀoa⁴-sˀin² coan⁴cjain¹-na¹, je² xi³ je¹-ni³. 
\c 15  
\p  
\v 1 Cˀoa⁴-sˀin² ña¹-vi⁴ xi³ tjin¹-na¹ nca³nˀion¹, tjin¹ne²-na¹ nca³ coi⁴ncha³coa⁴² cjoa⁴ˀi³nta³jin³-le⁴ xi³ tsin²-le⁴ nca³nˀion¹-jin², cˀoa⁴ li²coi³ si⁴tsjoa³ya³-le⁴² yao³-na¹ xi³ ti⁴ña¹-nia³².  
\v 2 Nca³ jnco¹jncoa¹-vi⁴ si⁴tsjoa³ya³-le⁴² xi²nquia⁴² xi³ tˀa³-tsˀe⁴ nca³ nqui²sa⁴ nta³ coan⁴-le⁴ cˀoa⁴ nca³ coin⁴ncˀa³-sa³.  
\v 3 Nca⁴ Cristo li²coi³ ti⁴je² qui³si³tsjoa³ya³-ni³le⁴ yao³-le⁴, to⁴nca³ jo³-sˀin² tji¹tˀa³: Je² en¹ xi³ chˀao³ tso², xi³ tsˀe⁴ je² xi³ chˀao³ qui³tso²-li², qui³sca³son²-na³ an³.  
\v 4 Je² cjoa⁴ qui³chji³tˀa³ nca³sˀa⁴, qui³chji³tˀa³ xi³ tˀa³tsˀe⁴ nca³ coa⁴co²ya³-na¹, jme¹-ni³ nca³ sˀe⁴-si¹ni³na¹ cjoa⁴cho³ya²cao⁴cjoa⁴ xi³ to⁴tˀa³tsˀe⁴ cjoa⁴tse³jta³ cao⁴ cjoa⁴ni²je³ta³con² xi³ tjin¹-le⁴ xon⁴ Escrituras.  
\v 5 To⁴nca³ je² Ni³na¹ xi³ tsjoa¹ cjoa⁴tse³jta³ cao⁴ cjoa⁴ni²je³ta³con², cˀoa⁴ ca²ta³tsjoa¹-no³ nca³ to⁴jnco³ cjoa⁴fa³ˀai³tsjen³ ca²ta³sˀe³jin³-no³, jo³-sˀin² qui³tso² Cristo Jesús,  
\v 6 jme¹-ni³ nca³ to⁴jnco³ coan⁴-si¹nio³, nca³ to⁴jnco³ cjoa¹jtao³ nca³ chˀa⁴sje³je³yao³ Ni³na¹-le⁴ cˀoa⁴ Nˀai³-le⁴ je² Nai³-na¹ Jesucristo. 
\s1 Je² en¹nta³ xi³ tˀa³tsˀe⁴ Cristo cˀoa⁴-ti⁴ sˀe⁴-le⁴ cho⁴ta⁴ xi³ li² judío-jin² 
\p  
\v 7 Coi³ cjoa⁴ nca³ cˀoa⁴-sˀin² chjoe¹tjao² xi²nquio⁴³, jo³-sˀin² nca³ Cristo qui³scoe¹tjao²-na¹ xi³ tˀa³tsˀe⁴ cjoa⁴je³ya³-le⁴ Ni³na¹.  
\v 8 Cˀoa⁴xin³-nia³ nca³ Cristo Jesús coan³ cho⁴ˀnta³-le⁴ cho⁴ta⁴ xi³ tsˀe⁴ cjoa⁴circuncisión xi³ tˀa³tsˀe⁴ cjoa⁴qui²xi⁴-le⁴ Ni³na¹, jme¹-ni³ nca³ cˀoe⁴²jnco³-si¹ni³ je² cjoa⁴ xi³ Ni³na¹ qui³si³sˀe³nqui³-le⁴ nˀai³jcha¹cjin³-na¹,  
\v 9 cˀoa⁴ jme¹-ni³ nca³ je² cho⁴ta⁴ xi³ li² judío-jin² cˀoa⁴sje³je³va³-si¹ni³ Ni³na¹ tˀa³tsˀe⁴ cjoa⁴ma⁴ta³con²-le⁴, jo³-sˀin² tji¹tˀa³: Coi³ nca³ an³ si³qui²xi⁴ya³nta³ tˀa³tsi⁴ ja⁴jin³-le⁴ cho⁴ta⁴ xi³ li² judío-jin², cˀoa⁴ se³ya²³-nia³ tˀa³tsˀe⁴ jan³ˀain¹-li⁴.  
\v 10 Cˀoa⁴ nqui²jnco³cˀa² tso²: Ca²ta³ma³tsjoa³ya³-no³ xi³ cho⁴ta⁴ xi³ li² judío-jin², cao⁴ na⁴xi⁴na³nta¹-le⁴ Ni³na¹.  
\v 11 Cˀoa⁴ nqui²jnco³cˀa² tso²: Chˀa⁴sje³ntao³ Nai³-na¹ nca³tsˀio³ xi³ cho⁴ta⁴ xi³ li² judío-jin², cˀoa⁴ nca³tsˀi³ na⁴xi⁴na³nta¹ chˀa⁴sje³je³yao³ Ni³na¹.  
\v 12 Cˀoa⁴ nqui²jnco³cˀa² tso² Isaías: Jtsˀen¹-le⁴ Isaí cjoi⁴nčhoa³-ni¹, cˀoa⁴ je² xi³ coi⁴so¹tjen⁴ nca³ coa⁴te²xo³ma³-le⁴ cho⁴ta⁴ xi³ li² judío-jin². Je² cho⁴ta⁴ xi³ li² judío-jin² sco¹ya³cao⁴cjoa⁴-le⁴ nca³ je².  
\v 13 Cˀoa⁴ je² Ni³na¹ xi³ tsjoa¹ cjoa⁴cho³ya²cao⁴cjoa⁴, ca²ta³si¹tse³-no³ cao⁴ nca³yi³je³ cjoa⁴tsjoa³, cˀoa⁴ cao⁴ cjoa⁴nchˀan¹ta³con² nca³ ma³cjain¹-no³, jme¹-ni³ nca³ coan⁴ncjin²ya³-si¹ni³no³ cjoa⁴cho³ya²cao⁴cjoa⁴ xi³ to⁴tˀa³tsˀe⁴ nca³nˀion¹-le⁴ je² Espíritu Santo.  
\v 14 To⁴nca³ ña³qui³ tjin¹jnco³coan³ xi³ tˀa³tsaon⁴³, ntsˀe³, nca³ ti⁴jon²-nio³ nˀion¹ ma³tse³-nio³ cjoa⁴nta³, tjin¹yi³je³-no³ cjoa⁴fa³ˀai³tsjen³, cˀoa⁴-ti⁴ coan⁴-no³ cˀoin¹ya³-lao⁴³ xi²-nquio⁴³.  
\v 15 To⁴nca³ coan³nˀion¹coan³ nca³ jnco³jao² cˀa² qui³squi³-no³, ntsˀe³, jo³-sˀin² nca³ qui³si³cja³ˀai³tsjen³-no³, nca⁴ cˀoa⁴-sˀin² Ni³na¹ qui³tsjoa³-na³ je² cjoa⁴nta³.  
\v 16 Nca³ an³ coan³ cho⁴ˀnta³-le⁴ Jesucristo tˀa³tsˀe⁴ cho⁴ta⁴ xi³ li² judío-jin², nca³ si³xa¹coa⁴ en¹nta³-le⁴ Ni³na¹, jme¹-ni³ nca³ je² cjoa⁴tjao² xi³ tsjoa³tˀa³, xi³ coi³ cho⁴ta⁴ xi³ li² judío-jin², sa⁴sen¹con³-ni³le⁴ Ni³na¹, nca³ coan³tsje³ cao⁴ je² Espíritu Santo.  
\v 17 Jo³-sˀin² ti²jna⁴coa⁴ Cristo Jesús, tjin¹-na³ jme³ xi³ cˀoa³sje²je³ya³-nia³ yao³-na⁴ ja⁴tˀa³tsˀe⁴ xa¹-na⁴ xi³ tˀa³tsˀe⁴ Ni³na¹.  
\v 18 Li²coi³ coan⁴nˀion¹coan³ nca³ coi³nchja²³ to⁴jme³ cjoa⁴-ni³, to⁴je² cjoa⁴ xi³ Cristo qui³si³nta³ xi³ to⁴tˀa³tsˀan⁴ cao⁴ en¹ cˀoa⁴ cao⁴ xa¹, jme¹-ni³ nca³ cho⁴ta⁴ xi³ li² judío-jin² si⁴²cji³tjo³son²-si¹ni³le⁴.  
\v 19 Qui³si³xa¹³ cao⁴ nca³nˀion¹-le⁴ cjoa⁴xcon¹ cao⁴ choa⁴, cˀoa⁴ cao⁴ nca³nˀion¹-le⁴ je² Espíritu Santo xi³ tsˀe⁴ Ni³na¹. Cˀoa⁴-sˀin² tsa³ca²sen⁴tsˀia³cao⁴-nia³ ya⁴ Jerusalén, cˀoa⁴ xi³ cao⁴ ya⁴ ntai³-le⁴ sa³ˀnta³ ya⁴ Ilírico, je³coan³jnco³-na³ nca³ qui³si³cˀa³tji³vi¹soan²³ nca³qui³jnta² je² en¹nta³ xi³ tˀa³tsˀe⁴ Cristo.  
\v 20 Cˀoa⁴-sˀin² nca³ tsˀa³sje³ nca³nˀion¹-na⁴ nca³ qui³nchja²ya³ je² en¹nta³-ve⁴, a³li² ya⁴-jin² jña³ nca³ je³qui³no²cjoa⁴ jan³ˀain¹-le⁴ Cristo, jme¹-ni³ nca³ tsi² si⁴²quin³son²-si¹nia³ čhjao¹ja⁴ma⁴ xi³ tsˀe⁴ xi³ cja⁴ˀai¹.  
\v 21 To⁴nca³ jo³-sˀin² tji¹tˀa³: Je² xi³ tsi²coi³ qui³no²cjoa⁴ya³jin³-le⁴ tˀa³tsˀe⁴ Cristo, scoe⁴-ni¹. Cˀoa⁴ je² xi³ tsi² tsa² qui³nčhˀoe¹, coan⁴cho⁴ya³-le⁴. 
\s1 Pablo me³-le⁴ nca³ coai⁴ ya⁴ Roma 
\p  
\v 22 Coi³ cjoa⁴-vi⁴ nca³ ncjin² cˀa³ qui³sˀe³chjoa²-na³ nca³ cjoa²ˀai⁴con³-no³ nca³ jon² tsa²cai³.  
\v 23 To⁴nca³ ntˀai⁴-vi⁴ntai⁴ tsin²-sa³na³ ˀnte³ nca³ si³xa¹³ i⁴ ˀnte³ je²-vi⁴, cˀoa⁴ coan³ ncjin² no¹-jan¹ nca³ coan³me³-na³ nca³ qui³con³-no³.  
\v 24 Coi³ cjoa⁴ cˀia³-la³⁴ nca³ cjoia¹³ España, cjoi¹con³-no³ nca³ jon², nca³ tjin¹-na³ cjoa⁴cho³ya²cao⁴cjoa⁴ nca³ cjoa²ˀa⁴ co³tsen³to³-no³, cˀoa⁴ coi⁴ncha³cao⁴-nao¹³ nca³ jon² nca³ cjoia¹³ ya⁴-jan¹, cˀia⁴ nca³ ti¹tjon² ca²ma³tsjoa³ya³ jnco³tjo²-na³ cao⁴ jon².  
\v 25 To⁴nca³ ntˀai⁴-vi⁴ ti²fi³-nia¹³ ya⁴ Jerusalén nca³ coa²sen⁴coa⁴ cho⁴ta⁴-le⁴ Cristo.  
\v 26 Nca⁴ ya⁴ Macedonia cao⁴ ya⁴ Acaya coan³tsjoa³-le⁴ nca³ qui³tsjoa³ taon⁴ xi³ tˀa³tsˀe⁴ cho⁴ta⁴yo⁴ma⁴ xi³ tsˀe⁴ cho⁴ta⁴-le⁴ Cristo xi³ tjio¹ ya⁴ Jerusalén.  
\v 27 Nta³ coan³tsjoa³-le⁴ nca³ cˀoa⁴qui³sˀin³, cˀoa⁴ qui³tjen⁴-le⁴ xi³ tsˀe⁴. Tsa² cho⁴ta⁴ xi³ li² judío-jin² cˀoa⁴-ti⁴ tsˀa³cao⁴tˀa³-le⁴ cjoa⁴nta³ xi³ tsˀe⁴ Espíritu Santo, cˀoa⁴²-ti⁴ tjin¹ne²-le⁴ nca³ je² nca³ coi⁴ncha³cao⁴ tso³jmi²-le⁴ son³ˀnte³-vi⁴.  
\v 28 Cˀoa⁴-sˀin² cˀia⁴ nca³ cjoe⁴ si³jncoa³ cjoa⁴ je²-vi⁴, cˀoa⁴ cˀia⁴ nca³ cjoe⁴ si³cˀa³sˀen³-le⁴ je² cjoa⁴tjao²-vi⁴ je²-vi⁴, cˀia⁴ cjoa²ˀa⁴to³-no³ nca³ cjoia¹³ ya⁴ España.  
\v 29 Cˀoa⁴ ˀve³-nia¹³ cˀia⁴ nca³ cjoi³cho³con³-no³, cjoi³cho²cao⁴-nia¹³ xi³ nˀion¹ tse³ cjoa⁴nta³ xi³ tsˀe⁴ en¹nta³ tˀa³tsˀe⁴ Cristo.  
\v 30 To⁴nca³ vˀe³tsˀoa²³-no³ ntsˀe³, xi³ to⁴tˀa³tsˀe⁴ Nai³-na¹ Jesucristo, cˀoa⁴ xi³ to⁴tˀa³tsˀe⁴ cjoa⁴tjao²cha³-le⁴ Espíritu Santo, nca³ to⁴jnco³ cao⁴ an³ nˀion¹ vˀao²³ nca³nˀion¹-no³ nca³ vˀe²tsˀoa³-lao⁴³ Ni³na¹ xi³ tˀa³tsˀan⁴,  
\v 31 jme¹-ni³ nca³ coi²tjo⁴ntjai²-si¹nia³ tˀa³tsˀe⁴ cho⁴ta⁴ xi³ tsi²coi³ ma³cjain¹-le⁴ xi³ tjio¹ ya⁴ Judea, cˀoa⁴ jme¹-ni³ nca³ je² cjoa⁴tjao²-le⁴ xa¹-na⁴vi⁴ tˀa³tsˀe⁴ cho⁴ta⁴-le⁴ Cristo xi³ tjio¹ ya⁴ Jerusalén sa⁴sen¹-si¹ni³le⁴,  
\v 32 cˀoa⁴ jme¹-ni³ nca³ cao⁴ cjoa⁴tsjoa³ cjoi³cho³con³-si¹ni³no³ nca³ jon² jo³-sˀin² me³-le⁴ Ni³na¹, cˀoa⁴ jme¹-ni³ nca³ cˀoa⁴-sˀin² to⁴jnco³ cˀoai⁴nca³nˀion¹-si¹ni³nao¹³ nca³ jon².  
\v 33 Je² Ni³na¹ xi³ si¹qui³njen³nchˀan¹jin³-na¹ ca²ta³vˀe²jna³cao⁴-no³ nca³tsˀio³. Cˀoa⁴ ca²ta³ma³. 
\c 16  
\s1 Pablo si¹ti²ˀnta³ cho⁴ta⁴ 
\p  
\v 1 To⁴nca³ vˀe³tˀain²³-no³ xi³ tˀa³tsˀe⁴ Febe je² ti²chja³², je² xi³ si¹xa¹-le⁴ cho⁴ta⁴-le⁴ Cristo xi³ tjio¹ ya⁴ Cencrea.  
\v 2 Ti⁴sin³-ni³lao⁴³ jo³-ni³ tsa² xi²nquio⁴³ tˀa³tsˀe⁴ Nai³-na¹, jo³-sˀin² nca³ va³quin²-no³ xi³ cho⁴ta⁴-le⁴ Cristo. Cˀoa⁴-ti⁴ ti⁴ncha³cao⁴³ to⁴jme³ cjoa⁴-ni³ xi³ coan⁴chjen¹-le⁴. Je² ni¹ a³li² to⁴cˀoa⁴²cji³ ncjin² cho⁴ta⁴ tsa³ca³sen¹cao⁴, cˀoa⁴-ti⁴ an³vi⁴je⁴.  
\v 3 Ti⁴ti²ˀntao³ je² Priscila cˀoa⁴ cao⁴ Aquila je² xˀin⁴-le⁴, xi³ to⁴ña³tjen⁴ si¹xa¹cao⁴-na³ tˀa³tsˀe⁴ Cristo Jesús,  
\v 4 (xi³ me³qui³ti³sin³ tˀa³tsˀan⁴. A³li² to⁴ˀan³-jin² tsjoa³-le⁴ cjoa⁴nta³, to⁴nca³ cˀoa⁴-ti⁴ nca³tsˀi³ cho⁴ta⁴ xi³ li² judío-jin² xi³ cho⁴ta⁴-le⁴ Cristo.)  
\v 5 Cˀoa⁴-ti⁴sˀin² ti⁴ti²ˀntao³ je² cho⁴ta⁴-le⁴ Cristo xi³ ma³ña³ ya⁴ ntˀia³-le⁴. Ti⁴ti²ˀntao³ je² Epeneto, xi³ tsjoa³que⁴, je² xi³ ti¹tjon² coan³cjain¹-le⁴ tˀa³tsˀe⁴ Cristo ya⁴ Acaia.  
\v 6 Ti⁴ti²ˀntao³ je² María xi³ nˀion¹ nta³ qui³si³xa¹ tˀa³tsaon⁴³.  
\v 7 Ti⁴ti²ˀntao³ je² Andrónico cˀoa⁴ cao⁴ Junias, xi³ xi²nquia⁴ xi³ ña³tjen⁴ tsa³qui³yo³ˀyai³-jin⁴ nto⁴ya¹, je² xi³ nta³ ˀya³-le⁴ ya⁴jin³-le⁴ pa²stro⁴-ve⁴, jña³-le⁴ xi³ nqui²sa⁴ ti¹tjon² tsa³ca³tio²tˀa³-le⁴ Cristo cao⁴-ni³ tsa² an³.  
\v 8 Ti⁴ti²ˀntao³ je² Amplias, xi³ tsjoa³que⁴ an³ xi³ tˀa³tsˀe⁴ je² Nai³-na¹.  
\v 9 Ti⁴ti²ˀntao³ je² Urbano xi³ ña³tjen⁴ si¹xa¹cao⁴-na¹ tˀa³-tsˀe⁴ Cristo Jesús, cao⁴ Estaquis, xi³ tsjoa³que⁴ an³.  
\v 10 Ti⁴ti²ˀntao³ je² Apeles, xi³ nta³ ji³tjo³ tˀa³tsˀe⁴ Cristo. Ti⁴ti²ˀntao³ je² xi¹ncjin¹ Aristóbulo.  
\v 11 Ti⁴ti²ˀntao³ je² Herodión, xi³ xi²nquia⁴. Ti⁴ti²ˀntao³ je² xi¹ncjin¹ Narciso, xi³ tjio¹cao⁴ Nai³-na¹.  
\v 12 Ti⁴ti²ˀntao³ je² Trifena, cao⁴ je² Trifosa, jña³-le⁴ xi³ nˀion¹ si¹xa¹ tˀa³tsˀe⁴ Nai³-na¹. Ti⁴ti²ˀntao³ je² Pérsida xi³ tsjoa³que⁴, je² xi³ cjai¹nca³ nˀion¹ qui³si³xa¹ tˀa³tsˀe⁴ Nai³-na¹.  
\v 13 Ti⁴ti²ˀntao³ Rufo, xi³ Nai³-na¹ tsa³cja³ˀa¹jin³, cˀoa⁴ cao⁴ na⁴-le⁴ xi³ cˀoa⁴-ti⁴ na⁴-na⁴.  
\v 14 Ti⁴ti²ˀntao³ je² Asíncrito, cao⁴ Flegonte, cao⁴ Hermas, cao⁴ Patrobas, cao⁴ Hermes, cˀoa⁴ cao⁴ je² ntsˀe³² xi³ tjio¹cao⁴ nca³ je².  
\v 15 Ti⁴ti²ˀntao³ je² Filólogo, cao⁴ Julia, cao⁴ Nereo, cao⁴ nti³chja³, cao⁴ Olimpas, cao⁴ nca³tsˀi³ cho⁴ta⁴-le⁴ Cristo xi³ tjio¹cao⁴ nca³ je².  
\v 16 Ti⁴ti²ˀntao³ xi²nquio⁴³ nca³ tsje³ tˀe²tˀa³tsˀoa³-lao⁴³ xi²-nquio⁴³. Nca³tsˀi³ cho⁴ta⁴-le⁴ Cristo si¹ti²ˀnta³-no³.  
\v 17 Cˀoa⁴ vˀe³tsˀoa²³-no³ ntsˀe³, nca³ cho¹son²-ni³lao⁴³ je² xi³ si¹jao²ya³ xi¹ncjin¹, xi³ si¹ca³jnqui³ je¹ xi¹ncjin¹, co²ntran⁴-le⁴ je² cjoa⁴fa³ˀai³tsjen³ xi³ qui³cho²tˀa³yao³ nca³ jon². Chja⁴ˀa²xin²-lao⁴³ yao³-no³ nca³ je².  
\v 18 Je² cho⁴ta⁴ xi³ cˀoa⁴cjoan³ a³li²coi³ Nai³-na¹ Jesucristo si¹xa¹tˀa³-le⁴ jo³-ni³ cho⁴ˀnta³, to⁴nca³ to⁴yao³-le⁴ si¹xa¹ntjai². Cjai¹ ntsjen¹ en¹ xi³ nchja⁴, cˀoa⁴ cjai¹nca³ ma³-le⁴ nchja⁴. Cˀoa⁴-sˀin² vˀa³na⁴cha⁴-le⁴ ni⁴ma⁴-le⁴ xi³ tsi²coi³ ve³.  
\v 19 Nca⁴ jo³-sˀin² nca³ ni²tjo³son²³ jon²-vi⁴, cjai¹nca³ nˀion¹ nta³ ˀya³-le⁴ nca³tsˀi³. Coi³ nca³ cˀoa⁴²-sˀin² ma³, tsjoa³-na³ xi³ tˀa³tsaon⁴³, to⁴nca³ me³-na³ nca³ chji⁴ne⁴ coaon⁴³ tˀa³tsˀe⁴ xi³ nta³ tjin¹, to⁴nca³ nca³ ña³qui³ tsje³ coaon⁴³ tˀa³tsˀe⁴ xi³ chˀao³ tjin¹.  
\v 20 Cˀoa⁴ je² Ni³na¹ xi³ si¹qui³njen³nchˀan¹jin³-na¹ si⁴²xcoa⁴nti⁴ton⁴ Satanás ya⁴ nqui³ntso⁴co⁴ nca³ jon²-vi⁴. Je² cjoa⁴nta³-le⁴ Nai³-na¹ Jesucristo ca²ta³sˀe³-no³.  
\v 21 Si¹ti²ˀnta³-no³ Timoteo xi³ ña³tjen⁴ ni²xai¹⁴-jin⁴, cao⁴ Lucio, cao⁴ Jasón, cao⁴ Sosípater, xi³ xi²nquia⁴.  
\v 22 An³ xi³ Tercio ˀmi²-na³, xi³ qui³squia³ je² xon⁴-vi⁴, si³ti²ˀnta³-no³ tˀa³tsˀe⁴ Nai³-na¹.  
\v 23 Si¹ti²ˀnta³-no³ Gayo xi³ si¹sin³-na³ i⁴ ntˀia³-le⁴vi⁴, xi³ cˀoa⁴-ti⁴ si¹sin³-le⁴ nca³tsˀi³ xi³ cho⁴ta⁴-le⁴ Cristo. Si¹ti²ˀnta³-no³ Erasto xi³ si¹coi²nta⁴ taon⁴ xi³ tsˀe⁴ na⁴xi⁴na³nta¹-vi⁴, cˀoa⁴ cao⁴ je² ntsˀe³ Cuarto.  
\v 24 Je² cjoa⁴nta³-le⁴ Nai³-na¹ Jesucristo ca²ta³sˀe³-no³ nca³tsˀio³.  
\v 25 Ca²ta³vi³tjo³je³ya³ Ni³na¹ xi³ tjin¹-le⁴ nca³nˀion¹ nca³ si⁴²nˀion¹jin³-no³ jo³ tso² en¹nta³ xi³ yˀa³, jo³-sˀin² nca³ nchja²ya³jin³-nia³ tˀa³tsˀe⁴ Jesucristo, jo³-sˀin² nca³ coan³tsen³ je² cjoa⁴ˀma³-ve⁴ xi³ tsa³cˀe²jna³tjao²ˀma³ sa³ˀnta³ ni⁴čhjin³ coa²tse³.  
\v 26 To⁴nca³ je³ti¹jna³son²tsen³ ntˀai⁴-vi⁴. To⁴tˀa³tsˀe⁴ xon⁴ Escrituras xi³ qui³squi³ je² cho⁴ta⁴ xi³ qui³nchja⁴ya³ tˀa³-tsˀe⁴ Ni³na¹, jo³ tso² cjoa⁴te¹xo³ma³-le⁴ Ni³na¹ xi³ ti¹jna³ntsjai², je³tsa³cˀin²ya³-le⁴ nca³tsˀi³ na⁴xi⁴na³nta¹ nca³ qui³jnta² son³ˀnte³, jme¹-ni³ nca³ si⁴²tjo³son²-si¹ni³le⁴ nca³ coan⁴cjain¹-le⁴.  
\v 27 Je² xi³ to⁴jnco³ Ni³na¹ xi³ tjin¹-le⁴ cjoa⁴ˀi³sen³ta³con² ca²ta³vi³tjo³je³ya³ xi³ to⁴tˀa³tsˀe⁴ Cristo nca³ntsjai² ni⁴čhjin³. Cˀoa⁴ ca²ta³ma³.