\id EPH  
\h Efesios 
\toc1 Xon⁴xi³ pa²stro⁴Pablo qui³squi³-le⁴cho⁴ta⁴efesios 
\toc2 Efesios 
\toc3 Ef. 
\mt1 Xon⁴xi³ pa²stro⁴Pablo qui³squi³-le⁴cho⁴ta⁴efesios 
\c 1  
\p  
\v 1 An³ nia¹³ Pablo, pa²stro⁴-le⁴ Jesucristo, nca⁴ cˀoa⁴-sˀin² coan³me³-le⁴ Ni³na¹. Ti²cji³-no³ jon² xi³ cho⁴ta⁴-le⁴ Cristo, xi³ ti³yo³ ya⁴ Efeso. Nta³ ma³nquin¹tˀa³-lao⁴³ Cristo Jesús.  
\v 2 Ni³na¹ nˀai³-na¹ cao⁴ Nai³-na¹ Jesucristo ca²ta³tsjoa¹-no³ cjoa⁴nta³, cˀoa⁴ ca²ta³si¹qui³njen³nchˀan¹jin³ ni⁴ma⁴-no³. 
\s1 Ni³na¹ si¹chi³con³tˀain³-na¹ nca³ ti³yo³coa⁴² Cristo 
\p  
\v 3 Ca²ta³vi³tjo³je³ya³ Ni³na¹-le⁴ cao⁴ Nˀai³-le⁴ Nai³-na¹ Jesucristo, xi³ qui³si³chi³con³tˀain³-na¹ cao⁴ nca³yi³je³ cjoa⁴nta³ xi³ tsˀe⁴ ncˀa³jmi³ xi³ tˀa³tsˀe⁴ ni⁴ma⁴-na¹, nca³ ti³yo³coa⁴² Cristo.  
\v 4 Ni³na¹ cˀoa⁴-sˀin² tsa³cja³ˀa¹jin³-na¹ nca⁴ ti³yo³coa⁴² Cristo sa³ˀnta³ nca³ cje³ sˀe³nta³-jin² son³ˀnte³, jme¹-ni³ nca³ tsje³ coan⁴-si¹nia³² nca³ ni⁴jme³-jin² je¹ sˀe⁴-si¹ni³na¹ nqui³xcon⁴ nca³ je².  
\v 5 Cˀoa⁴-sˀin² coan³tsjoa³que³-na¹ nca³ to⁴nqui³-ni³ qui³sco³son²-ni³le⁴ nca³ ˀnti¹-le⁴ coi⁴tso⁴-na¹ xi³ to⁴tˀa³tsˀe⁴ Jesucristo, jo³-sˀin² coan³me³-le⁴ nca³ je²,  
\v 6 jme¹-ni³ nca³ nta³ coi⁴tjo³-si¹ni³ cjoa⁴je³ya³-le⁴ xi³ to⁴tˀa³tsˀe⁴ cjoa⁴nta³-le⁴. Je² cjoa⁴nta³-le⁴ qui³tsjoa³cjoa⁴tjao²-na¹ nca³ ti³yo³coa⁴² je² ˀnti¹-le⁴ xi³ tsjoa³que³.  
\v 7 Je² Cristo tsa³cˀe¹chji¹ntjai²-na¹ cao⁴ njin¹-le⁴. Qui³si³cha³tˀa³ je¹-na¹ nca³ cˀoa⁴-sˀin² to⁴nˀion¹ tse³ cjoa⁴nta³ xi³ tjin¹-le⁴.  
\v 8 Je² cjoa⁴nta³-le⁴ nˀion¹ tse³ qui³si³ncjin²ya³son²-na¹ cao⁴ nca³yi³je³ cjoa⁴chji⁴ne⁴ cao⁴ cjoa⁴fa³ˀai³tsjen³-le⁴.  
\v 9 Cˀoa⁴-sˀin² qui³si³cˀa³tsen³-na¹ je² xi³ je² me³-le⁴, xi³ tji¹ˀma³, jo³-sˀin² nca³ cjoa⁴tsjoa³-le⁴ni³, jo³ qui³tso² je² cjoa⁴fa³ˀai³tsjen³-le⁴ nca³ xa¹ cˀoe⁴²nta³-ni³ xi³ to⁴tˀa³tsˀe⁴,  
\v 10 nca³ cˀoe⁴²xco¹ nqui²ntia³ to⁴tˀa³tsˀe⁴ Cristo nca³yi³je³ tso³jmi² xi³ tjio¹ ncˀa³jmi³ cao⁴ xi³ tjio¹ i⁴ son³ˀnte³, cˀia⁴ nca³ cjoi⁴cho³ choa⁴-le⁴.  
\v 11 To⁴coi³ nca³ Cristo ti³yo³coa⁴², tsa³cja³ˀa¹jin³-na¹, cˀoa⁴ tsa³ca³sen¹-na¹ jo³-sˀin² nca³ to⁴nqui³-ni³ qui³sco³son²-ni³le⁴ je² xi³ vˀe¹nta³ nca³yi³je³ jo³-sˀin² si¹cja³ˀai³tsjen³, nca³ cˀoa⁴-sˀin² me³-le⁴.  
\v 12 Ni³na¹ tsa³cja³ˀa¹jin³-na³jin⁴ nca³ jin⁴-jin⁴ xi³ ti¹tjon² qui³cho³ya²cao⁴cjoai⁴-jin⁴ tˀa³tsˀe⁴ Cristo, jme¹-ni³ nca³ coan⁴ chˀa⁴sje³nta³-si¹ni³jin⁴ je² cjoa⁴je³ya³-le⁴.  
\v 13 Cˀoa⁴-ti⁴ jon² xi³ Cristo ti³yo³cao⁴³, je³qui³no²ˀya²-lao⁴³ je² en¹ xi³ cjoa⁴qui²xi⁴, je² en¹ xi³ va³co¹-no³ jo³-sˀin² vi²tjo⁴ntjao²³. Jon² xi³ je³coan³cjain¹-no³, je² Espíritu Santo xi³ qui³ni²sˀe³nqui³-no³ tsa³ca³sen¹choa⁴-no³ nca³ ti³yo³cao⁴³ Cristo.  
\v 14 Cˀoa⁴-sˀin² Ni³na¹ tsa³cˀe¹jna³nqui³-na¹ je² Espíritu Santo xi³ tˀa³tsˀe⁴ cjoa⁴tjao²-na¹, sa³ˀnta³ ña³qui³ sˀe⁴-na¹ xi³ tsan⁴², jme¹-ni³ nca³ chˀa⁴sje³nta³-si¹nia³² je² cjoa⁴je³ya³-le⁴. 
\s1 Pablo vˀe¹tsˀoa³ nca³ nta³ scoe⁴ Ni³na¹ 
\p  
\v 15 Coi³ cjoa⁴ nca³ an³ qui³nčhˀoe³ nca³ ma³cjain¹-no³ tˀa³tsˀe⁴ je² Nai³-na¹ Jesús, cˀoa⁴ nca³ tjao²chao³ nca³tsˀi³ cho⁴ta⁴-le⁴ Cristo,  
\v 16 li²coi³ si³cha³jian³ nca³ tsjoa³ cjoa⁴nta³ xi³ tˀa³tsaon⁴³. Cˀoa⁴-ti⁴sˀin² si³cja³ˀai³tsjen³-no³ nca³ vˀe³tsˀoa²³.  
\v 17 Cˀoa⁴-sˀin² vˀe³tsˀoa²³ nca³ Ni³na¹-le⁴ Nai³-na¹ Jesucristo, je² Nˀai³-na¹ xi³ tsˀe⁴ cjoa⁴je³ya³, ca²ta³tsjoa¹jin³ ni³ma⁴-no³ cjoa⁴chji⁴ne⁴, ca²ta³si¹ˀi³sen³-no³ sa³ˀnta³ nta³ jchao⁴³ Ni³na¹.  
\v 18 Cˀoa⁴-sˀin² si⁴²ˀi³sen³-le⁴ cjoa⁴fa³ˀai³tsjen³-le⁴ ni⁴ma⁴-no³, jme¹-ni³ nca³ jcha⁴-nio³ jña³-le⁴ xi³ cho³ya²-ni³lao⁴³ nca³ qui³no²cjoa⁴-no³. Jcha⁴-nio¹³ jo³-sˀin² nca³ nˀion¹ tse³ cjoa⁴je³ya³ xi³ tjin¹-le⁴ je² cjoa⁴tjao² xi³ sˀe³-le⁴ Ni³na¹, xi³ je² cho⁴ta⁴-le⁴ Cristo.  
\v 19 Jcha⁴-nio¹³ jo³-sˀin² nca³ li² to⁴jo³ xi³ cji³ ncˀa³ ti¹jna³ nca³nˀion¹-le⁴ xi³ tˀa³tsan⁴² xi³ je³coan³cjain¹-na¹. Jcha⁴-nio¹³ jo³-sˀin² nˀion¹ si¹xa¹cao⁴ nca³nˀion¹-le⁴ xi³ tse³ tjin¹-le⁴.  
\v 20 Cao⁴ je² nca³nˀion¹-le⁴ qui³si³xa¹jin³-le⁴ Cristo nca³ qui³si³cja³ˀa¹ya³jin³-ni³le⁴ cˀen³, cˀoa⁴ nca³ qui³si³cˀˀe¹jna³tˀa³ nca³qui²xi⁴-le⁴ ya⁴ ncˀa³jmi³.  
\v 21 Nqui²sa⁴ to⁴ncˀa³ qui³si³cˀe¹jna³-le⁴ cao⁴-ni³ tsa² xi³ xa¹ti¹tjon² tjin¹-le⁴, cao⁴ nca³tsˀi³ cho⁴ta⁴xa¹, cao⁴ nca³tsˀi³ xi³ tjin¹-le⁴ nca³nˀion¹, cao⁴ nca³tsˀi³ xi³ tjin¹-le⁴ cjoa⁴te¹xo³ma³, cao⁴ nca³tsˀi³ jan³ˀain¹ xi³ i⁴ son³ˀnte³ tjin¹, a³li² tsa² to⁴je²-jin² ni⁴čhjin³-vi⁴, jo³-sa³ tjin¹ ni⁴čhjin³ xi³ sˀa⁴ nčhoa¹-sa³.  
\v 22 Ni³na¹ cˀoa⁴-sˀin² qui³si³cˀe¹yo³nqui³ ntso⁴co⁴ Cristo nca³yi³je³ to⁴jme³-ni³ve⁴. Ni³na¹ qui³si³cˀe¹jna³ Cristo nca³jco⁴-le⁴ nca³yi³je³ cjoa⁴ xi³ tˀa³tsˀe⁴ na⁴xi⁴na³nta¹-le⁴ Cristo.  
\v 23 Je² na⁴xi⁴na³nta¹-le⁴ Cristo jo³-ni³ tsa² yao³-le⁴ ma³, xi³ si¹jnco³ je² xi³ si¹jnco³ nca³yi³je³. 
\c 2  
\s1 Vi²tjo⁴ntje² to⁴tˀa³tsˀe⁴ cjoa⁴nta³ 
\p  
\v 1 Je² qui³si³cˀe¹yo³con³-no³ nca³ jon² xi³ jo³-ni³ tsa² xi³ ti³yo³cˀaon³ xi³ to⁴tˀa³tsˀe⁴ cjoa⁴tsˀen⁴ cao⁴ je¹-no³.  
\v 2 Nca³sˀa⁴ xi³ cja⁴ˀai¹ ni⁴čhjin³ cˀoa⁴-sˀin² tsa³qui³ma³-jion³ je² cjoa⁴-ve⁴ jo³ cji³ma³chon³ son³ˀnte³, jo³-sˀin² nca³ me³-le⁴ je² xi³ nca³jco⁴-le⁴ xi³ ya⁴ tjin¹-le⁴ nca³nˀion¹ jin³sen¹. Je² ni¹ xi³ nca³jco⁴-le⁴ nai⁴² xi³ nta³jin³ xi³ ntˀai⁴-vi⁴ si¹xa¹jin³ cho⁴ta⁴ xi³ xi¹jin³.  
\v 3 Cˀoa⁴-ti⁴sˀin² tsa³qui³yo³coai⁴-jin⁴ yao³-na⁴jin⁴ nca³tsˀi³⁴-jin⁴ nca³sˀa⁴, jo³ tso² cjoa⁴tsjoa³-le⁴ yao³-na⁴jin⁴. Cˀoa⁴qui³nˀiain²⁴-jin⁴ to⁴jo³-sˀin² coan³me³-le⁴ yao³-na⁴jin⁴ cao⁴ cjoa⁴faˀai³tsjen³-na⁴jin⁴. To⁴xa¹ cjoan³ ni¹⁴jin⁴ cho⁴ta⁴ xi³ sˀe⁴-le⁴ cjoa⁴ñˀain³, jo³-ni³ tsa² xi³cˀa³.  
\v 4 To⁴nca³ Ni³na¹, nca⁴ cˀoa⁴-sˀin² to⁴tse³ cjoa⁴ma⁴ta³con² tjin¹-le⁴, cjai¹nca³ nˀion¹ coan³tsjoa³que³-na¹.  
\v 5 Nta³ tsa² ña¹ xi³ jo³-ni³ tsa² xi³ ti³yo³cˀen³² xi³ to⁴tˀa³tsˀe⁴ cjoa⁴tsˀen⁴-na¹, to⁴jnco³ cao⁴ Cristo qui³si³cˀe¹yo³con³-na¹. To⁴tˀa³tsˀe⁴ cjoa⁴nta³-le⁴ ji²tjo⁴ntjai²-nio³.  
\v 6 To⁴jnco³ qui³si³cja³ˀa¹ya³-na¹, cˀoa⁴-ti⁴sˀin² qui³si³ca³tio²tˀa³-na¹ ya⁴ ncˀa³jmi³ cao⁴ Cristo Jesús,  
\v 7 jme¹-ni³ nca³ je² ni⁴čhjin³ xi³ nčhoa¹-sa³ coa⁴co²-si¹ni³ je² cjoa⁴nta³-le⁴ xi³ li² to⁴jo³ xi³ cji³tse³, nca³ cˀoa⁴-sˀin² qui³sˀe³-le⁴ cjoa⁴ma⁴ta³con² tˀa³tsan⁴² nca³ ti³yo³coa⁴² Cristo Jesús.  
\v 8 To⁴tˀa³tsˀe⁴ cjoa⁴nta³ ji²tjo⁴ntjai²-nio³ nca³ ma³cjain¹-no³. A³li² je²-jin² xi³ tsaon⁴³ je²-vi⁴, nca⁴ cjoa⁴tjao² ni¹ xi³ Ni³na¹ tsjoa¹.  
\v 9 A³li² tˀa³tsˀe⁴ xa¹-jin², jme¹-ni³ nca³ ni⁴to⁴ˀya³-jin² xi³ cˀoa⁴sje³je³ya³-si¹ni³ yao³-le⁴.  
\v 10 Nca⁴ ña¹ nia¹ xa¹-le⁴ Ni³na¹. Ni³na¹ cˀoa⁴-sˀin² qui³si³nta³-na¹ nca³ ti³yo³coa⁴² Cristo Jesús, jme¹-ni³ nca³ nta³ si⁴xa¹-nia³² jña³-le⁴ xi³ Ni³na¹ to⁴nqui³-ni³ tsa³cˀe¹nta³ nca³ cˀoa⁴-sˀin² coi⁴ma³coa⁴² cjoa⁴-vi⁴. 
\s1 To⁴tˀa³tsˀe⁴ cro² qui³ni²cjao²nta³-nia³² 
\p  
\v 11 Xi³ coi³, jon² xi³ cho⁴ta⁴ xi³ li² judío-jin² jo³ cjoan³ yao³-no³, cho⁴ta⁴ xi³ tsi² tsˀe⁴ cjoa⁴circuncisión tsa³cˀin²-no³. Cˀoa⁴qui³tso²-no³ je² cho⁴ta⁴ xi³ tsˀe⁴ cjoa⁴circuncisión xi³ je² ntsja³ cho⁴ta⁴ si¹nta³-ni³ yao³-le⁴.  
\v 12 Ti⁴cja³ˀai³tsjen³jion³ jo³-sˀin² nca³sˀa⁴ li²jme³ xi³ qui³sˀe³-no³ tˀa³tsˀe⁴ Cristo. Tˀa³xin² tsa³qui³yo³-lao⁴³ na⁴xi⁴na³nta¹-le⁴ Israel. Cho⁴ta⁴cja⁴ˀai¹ nio¹³ nca³ tsi² coan³-no³ ˀnte³ tˀa³tsˀe⁴ je² cjoa⁴ xi³ qui³sˀe³nˀion¹ xi³ Ni³na¹ qui³si³sˀe³nqui³. Li²jme³ xi³ qui³cho²ya³-lao⁴³ nca³ tsa³qui³yo³tˀa³xin²-lao⁴³ Ni³na¹ i⁴ son³ˀnte³-vi⁴.  
\v 13 Nca⁴ ti³yo³cao⁴³ Cristo jon² xi³ nca³sˀa⁴ cjai¹nca³ cjin³ ti³yo³, ntˀai⁴-vi⁴ je³coan³čhian³tˀao³ xi³ to⁴tˀa³tsˀe⁴ njin¹-le⁴ Cristo.  
\v 14 Ti⁴je²-ni³ xi³ qui³si³qui³njen³nchˀan¹ cjoa⁴ tˀa³tsan⁴². To⁴jnco³ qui³sˀin³-na¹ nca³ joa³². Qui³si³qui³xo²ya³ čhjao¹ xi³ jao²ya³ ma³-ni³na¹, xi³ coi³ cjoa⁴co²ntran⁴.  
\v 15 Cao⁴ yao³-le⁴ tsa³cja³ˀa¹xin² je² cjoa⁴co²ntran⁴, cˀoa⁴ je² cjoa⁴te¹xo³ma³ xi³ vˀe¹ne². Qui³si³nta³ya³cho⁴tse⁴ nca³ to⁴jnco³ coan³ nca³ jao² nca³ tjio¹cao⁴ Cristo. Cˀoa⁴-sˀin² qui³si³qui³njen³nchˀan¹jin³-le⁴.  
\v 16 To⁴tˀa³tsˀe⁴ cro² Cristo qui³si³cjao²nta³-ni³ Ni³na¹ cao⁴ xi³ jao²ya³ cho⁴ta⁴, nca³ to⁴jnco³ yao³ coan³ nca³ jao². Ti⁴ya⁴ tˀa³cro² qui³si³cha³jin³-ni³ cjoa⁴co²ntran⁴.  
\v 17 Ja³ˀai³ Jesús, qui³nchja⁴ya³ cjoa⁴ xi³ nchˀan¹ tjin¹. Qui³nchja⁴ya³jin³-no³ nca³ jon² xi³ cjin³ ti³yo³, cˀoa⁴ cao⁴ je² xi³ čhian³ tjio¹.  
\v 18 To⁴tˀa³tsˀe⁴-ni¹ ña¹ nca³ joa³² tjin¹-na¹ ˀnte³ nca³ cjoi³cho³chon³-le⁴² Nˀai³-na¹ xi³ to⁴tˀa³tsˀe⁴ to⁴jnco³ Espíritu Santo.  
\v 19 A³li²coi³ ti⁴cho⁴ta⁴cja⁴ˀai¹-nio³, ni⁴to⁴ti³ma³-jion²³. To⁴jnco³ na⁴xi⁴na³nta¹ vˀa³cao⁴-no³ cao⁴ cho⁴ta⁴-le⁴ Cristo, cˀoa⁴ xi²nqui⁴ mao³ cho⁴ta⁴-le⁴ Ni³na¹.  
\v 20 Cˀoa⁴-sˀin² jon² qui³sˀe³yo³son²ncˀao³ je² čhjao¹ja⁴ma⁴ xi³ je² pa²stro⁴ cao⁴ xi³ qui³nchja⁴ya³ tˀa³tsˀe⁴ Ni³na¹. Je² lao⁴ xi³ ti¹tjon² ti¹jna³ ya⁴ xi⁴nqui⁴-le⁴, ti⁴je²-ni³ Jesucristo.  
\v 21 Jo³-sˀin² cjio³ˀncho²-le⁴ xi¹ncjin¹ xi⁴ˀnte⁴, cˀoa⁴ tjio¹cjao²nˀion¹, cˀoa⁴-sˀin² ti¹mi³ jnco³ yo⁴nco⁴ xi³ tsje³. Cˀoa⁴ti⁴sˀin²ni³ ti³yo³cjao³cao⁴³ Nai³-na¹.  
\v 22 Cˀoa⁴-ti⁴ jon², nca³ ti³yo³cao⁴³ Nai³-na¹, cˀoa⁴-ti⁴sˀin² sˀe⁴cjao³nˀion¹ cao⁴ xi²nquio⁴³, jme¹-ni³ nca³ ntˀia³-le⁴ Ni³na¹ coan⁴-si¹nio³ to⁴tˀa³tsˀe⁴ je² Espíritu Santo. 
\c 3  
\s1 Je² xa¹ xi³ qui³sˀe³ne²-le⁴ Pablo xi³ tˀa³tsˀe⁴ cho⁴ta⁴ xi³ li² judío-jin² 
\p  
\v 1 Coi³ cjoa⁴ nca³ an³ Pablo, xi³ cjoa⁴ñˀain³ ti²jna⁴ tˀa³tsˀe⁴ Cristo xi³ to⁴tˀa³tsaon⁴³ jon² xi³ cho⁴ta⁴ xi³ li² judío-jion²³.  
\v 2 Cˀoa⁴-sˀin² qui³no²ˀyao²³ nca³ xa¹ qui³sˀe³ne²-na³ nca³ an³ xi³ tˀa³tsˀe⁴ je² cjoa⁴nta³-le⁴ Ni³na¹ xi³ qui³tsˀai²-na³ xi³ tˀa³tsaon⁴³,  
\v 3 jo³-sˀin² nca³ Ni³na¹ tsa³ca³co¹son²tsen³-na³ je² cjoa⁴ xi³ tji¹ˀma³, jo³-sˀin² nca³ je³qui³squia³-vi⁴ nca³ to⁴choa³ en¹ qui³si³chjen¹³.  
\v 4 Cˀia⁴ nca³ cˀoe¹xquiao⁴³ je²-vi⁴, cˀoa⁴²-sˀin² jchao⁴³ jo³-sˀin² ma³cho⁴ya³-na³ tˀa³tsˀe⁴ je² cjoa⁴ˀma³ xi³ tˀa³tsˀe⁴ Cristo.  
\v 5 Je² xi³ cja⁴ˀai¹ ni⁴čhjin³ Ni³na¹ li²coi³ tsa³ca³co¹-le⁴ ni⁴jnco³-jin² cho⁴ta⁴son³ˀnte je² cjoa⁴ˀma³, jo³-sˀin² ntˀai⁴-vi⁴ xi³ to⁴tˀa³tsˀe⁴ je² Espíritu Santo tsa³ca³co¹son²tsen³-le⁴ je² pa²stro⁴-le⁴ xi³ tsje³ cao⁴ je² xi³ qui³nchja⁴ya³ tˀa³tsˀe⁴.  
\v 6 Coi³ xi³ cjoa⁴ˀma³-vi⁴: Je² cho⁴ta⁴ xi³ li² judío-jin² cˀoa⁴-sˀin² to⁴jnco³ sˀe³-le⁴ je² cjoa⁴tjao² je²-vi⁴, cˀoa⁴ to⁴jnco³ yao³-le⁴ xi¹ncjin¹. To⁴jnco³ qui³ni²sˀe³nqui³-le⁴ nca³ tjio¹cao⁴ Cristo xi³ to⁴tˀa³tsˀe⁴ je² en¹nta³ tˀa³tsˀe⁴ Cristo.  
\v 7 Qui³tsˀai²-na³ nca³ si³xa¹³-le⁴ xi³ coi³ en¹nta³ tˀa³tsˀe⁴ Cristo, jo³-sˀin² Ni³na¹ qui³tsjoa³cjoa⁴tjao²-na³ cjoa⁴nta³-le⁴ nca³ si¹xa¹ je² nca³nˀion¹-le⁴.  
\v 8 Je² xi³ nqui²sa⁴-sa³ na³nqui³ tjio¹ xi³ cho⁴ta⁴-le⁴ Cristo, an³ xi³ nqui²sa⁴-sa³ nˀion¹ na³nqui³ ti²jna⁴-le⁴. An³ tsa³cˀai²-na³ cjoa⁴nta³-vi⁴ nca³ cˀoa⁴-sˀin² coi³nchja²ya³jin³-le⁴ cho⁴ta⁴ xi³ li² judío-jin² je² en¹nta³ tˀa³tsˀe⁴ je² cjoa⁴nta³ xi³ tjin¹-le⁴ Cristo xi³ li²coi³ coan⁴ jcha⁴yi³je³.  
\v 9 An³ si³ˀi³sen³-le⁴ nca³tsˀi³ jo³-sˀin² nca³ Ni³na¹ xa¹ tsa³cˀe¹nta³-ni³ xi³ cˀoa⁴-sˀin² tsa³cˀe¹jna³ˀma³ jo³ sa³ˀnta³ to²tsˀin³-le⁴ cjoa⁴. Ni³na¹ tsa³cˀe¹nta³ nca³yi³je³ xi³ tjin¹ son³ˀnte³.  
\v 10 Cˀoa⁴ coan³ jme¹-ni³ nca³ je² na⁴xi⁴na³nta¹-le⁴ Cristo coa⁴co²ya³-si¹ni³le⁴ ntˀai⁴-vi⁴ je² xi³ tjin¹-le⁴ xa¹ti¹tjon² cao⁴ xi³ tjin¹-le⁴ nca³nˀion¹ ya⁴ ncˀa³jmi³. Cao⁴co²ya³-le⁴ je² cjoa⁴ˀi³sen³ta³con²-le⁴ Ni³na¹ xi³ cjai¹ ncjin² jco⁴ya³ tjin¹.  
\v 11 Cˀoa⁴-sˀin² tjin¹nta³ cjoa⁴fa³ˀai³tsjen³-le⁴ Ni³na¹ nca³ntsjai², nca³ cˀoa⁴-sˀin² tsa³cˀe¹nta³ xi³ to⁴tˀa³tsˀe⁴ Cristo Jesús Nai³-na¹.  
\v 12 Cˀia⁴ nca³ ti³yo³coa⁴² Cristo cjai¹nca³ nta³ nˀion¹-ta³coan³², cˀoa⁴ coan⁴ coi⁴tja¹sˀen³² nca³ li²jme³ xi³ xcon¹ coan⁴-na¹, nca⁴ ma³cjain¹-na¹ tˀa³tsˀe⁴ nca³ je².  
\v 13 Coi³ cjoa⁴ nca³ si³je¹³-no³, a³li² ni²ˀi³nta³-jion² ni⁴ma⁴-no³ xi³ to⁴tˀa³tsˀe⁴ jña³-le⁴ cjoa⁴ñˀain³ xi³ an³ ti²fa²ˀa⁴toa³ xi³ tˀa³tsaon⁴³. Je² cjoa⁴ñˀain³-na⁴ xi³ cˀoa⁴sje³je³ya³-no³. 
\s1 Pablo vˀe¹tsˀoa³ nca³ nˀion¹ coa⁴tio⁴cao⁴ cjoa⁴tjao²cha³ 
\p  
\v 14 Coi³ cjoa⁴ va²sen⁴xco¹nchˀin³tˀa³-le⁴ nca³ vˀe³tsˀoa²³-le⁴ Nˀai³-le⁴ je² Nai³-na¹ Jesucristo.  
\v 15 Xi³ to⁴tˀa³tsˀe⁴ Nˀai³-na¹ nca³tsˀi³ xi¹ncjin¹ ma³ ya⁴ ncˀa³jmi³ cao⁴ i⁴ son³ˀnte³.  
\v 16 Cˀoa⁴-sˀin² to⁴tˀa³tsˀe⁴ je² Espíritu Santo-le⁴ ca²ta³tsjoa¹jin³ ni⁴ma⁴-no³ xi³ tse³ nca³nˀion¹, jo³-sˀin² nca³ nˀion¹ tse³ cjoa⁴je³ya³-le⁴.  
\v 17 Nta³ ca²ta³vˀe²jna³jin³ ni⁴ma⁴-no³ Cristo nca³ ma³cjain¹-no³. Vˀe³tsˀoa²³ nca³ nˀion¹ coi⁴yo³cao⁴³ nca³ nˀion¹tˀa³ coaon⁴³ cjoa⁴tjao²cha³,  
\v 18 jme¹-ni³ nca³ cˀoa⁴-sˀin² sˀe⁴-si¹ni³no³ nca³nˀion¹ nca³ ña³qui³ nta³ coan⁴cho⁴ya³-si¹ni³no³ cao⁴ nca³tsˀi³ cho⁴ta⁴-le⁴ Cristo jo³ cji³ cjoa⁴tjao²cha³-le⁴ Cristo, jo³ cji³ te³ya³, jo³ cji³ nto³, jo³ cji³ na⁴nca⁴, jo³ cji³ ncˀa³.  
\v 19 Cˀoa⁴-sˀin² jcha⁴-nio¹³ je² cjoa⁴tjao²cha³-le⁴ Cristo, xi³ ña³qui³ fa³ˀa³ti¹tjon²-le⁴ nca³yi³je³ cjoa⁴fa³ˀai³tsjen³, jme¹-ni³ nca³ jtse¹jin³-si¹ni³no³ nca³yi³je³ xi³ tsˀe⁴ Ni³na¹.  
\v 20 Ni³na¹ nqui²sa⁴ to⁴tse³ ma³-le⁴ sˀin¹ nca³yi³je³ cjoa⁴ jo³ cji³ xi³ ni²je¹, jo³-sˀin² fa³ˀai³tsjen³-na¹, to⁴tˀa³tsˀe⁴ je² nca³nˀion¹ xi³ si¹xa¹jin³-na¹.  
\v 21 Je² ca²ta³vi³tjo³je³ya³ ya⁴jin³-le⁴ na⁴xi⁴na³nta¹-le⁴ Cristo xi³ to⁴tˀa³tsˀe⁴ Cristo Jesús, to⁴jo³ tjin¹ ni⁴čhjin³ nca³ntsjai² nca³ntsjai². Cˀoa⁴ ca²ta³ma³. 
\c 4  
\s1 Je² Espíritu Santo vˀe¹cjao²-na¹ 
\p  
\v 1 An³ xi³ ti²jna⁴ cjoa⁴ñˀain³ xi³ ti²jna⁴coa⁴ je² Nai³-na¹, vˀe³tsˀoa²³-no³ nca³ coi⁴mao³ jo³-sˀin² ma³chjen¹ je² xa¹ xi³ qui³no²cjoa⁴-no³,  
\v 2 cao⁴ cjoa⁴yo⁴ma⁴ cjia³ta³con²³, cao⁴ cjoa⁴ntˀe¹, cao⁴ cjoa⁴tse³ta³con², Ti⁴cjain¹-lao⁴³ xi³nquio⁴³ nca³ tjao²chao³.  
\v 3 Ti⁴xi¹ti¹ya³-lao⁴³ yao³-no³ nca³ to⁴jnco³ ti⁴yo³cjao³ nca³ nchˀan¹ ti³yo³, nca³ je² Espíritu Santo tsa³cˀe¹cjao³-no³.  
\v 4 Jnco³ yao³ tjin¹. Jnco³ Espíritu Santo tjin¹, jo³-sˀin² nca³ cˀoa⁴-ti⁴ qui³no²cjoa⁴-no³ xi³ tˀa³tsˀe⁴ jnco³ cjoa⁴cho³ya²cao⁴cjoa⁴ xi³ qui³sˀe³-no³ nca³ qui³no²cjoa⁴-no³.  
\v 5 Jnco³ Nai³-na¹ tjin¹, jnco³ jo³-sˀin² nca³ ma³cjain¹-na¹, jnco³ cjoa⁴sa³te²nta¹,  
\v 6 jnco³ Ni³na¹, cˀoa⁴ Nˀai³-le⁴ nca³tsˀi³, je² xi³ ti¹jna³ti¹tjon²-le⁴ nca³tsˀi³, xi³ ti¹jna³cao⁴ nca³tsˀi³, xi³ ti¹jna³jin³ ni⁴ma⁴-le⁴ nca³tsˀi³.  
\v 7 To⁴nca³ nca³ jnco¹jncoa¹ tsa³cˀai²-na¹ cjoa⁴nta³ jo³-sˀin² choa⁴-le⁴ Cristo xi³ tsjoa¹cjoa⁴tjao²-na¹.  
\v 8 Je² Ni³na¹ cˀoi⁴qui³tso²: Ncjin² ma³-ni³ xi³ tjio¹tˀa³nˀion¹ xi³ qui³cao⁴ cˀia⁴ nca³ qui³mi³ncˀa³, cˀoa⁴ qui³tsjoa³-le⁴ cjoa⁴tjao² cho⁴ta⁴son³ˀnte³.  
\v 9 Xi³ qui³mi³ncˀa³, jo¹ tso²-ni³le⁴ tsa² tsi² ji³tjo³jen³ ya⁴ ˀnte³ xi³ nqui²sa⁴ na³nqui³ xi³ tsˀe⁴ son³ˀnte³.  
\v 10 Je² xi³ ji³tjo³jen³, ti⁴je²-ni³ xi³ ja³ˀa³to³-sa³le⁴ ncˀa³jmi³ nca³ qui³mi³ncˀa³, jme¹-ni³ nca³ cˀoa⁴-sˀin² si⁴²jnco³si¹ni³-le⁴ nca³yi³je³ cjoa⁴.  
\v 11 Ti⁴je²-ni³ xi³ qui³tsjoa³-le⁴ cˀa³ nca³ pa²stro⁴ ma³, cˀoa⁴ xi³cˀa³ nca³ vˀe¹ma³ nchja⁴ya³, cˀoa⁴ xi³cˀa³ nca³ vˀe¹ma³son² nca³ tso²ya³ tˀa³tsˀe⁴ Ni³na¹, cˀoa⁴ xi³cˀa³ nca³ pastor ma³, cˀoa⁴ nca³ maestro ma³.  
\v 12 Cˀoa⁴-sˀin² coan³ jme¹-ni³ nca³ cho⁴ta⁴-le⁴ Cristo nta³ coa⁴tio⁴-si¹ni³ tˀa³tsˀe⁴ xa¹-le⁴ nca³ si⁴²xa¹-le⁴ Ni³na¹. Cˀoa⁴-sˀin² je² yao³-le⁴ Cristo coin⁴ncˀa³.  
\v 13 Sa³ˀnta³ nca³ cjoi³choa³² nca³ to⁴jnco³ coan⁴-nia¹ nca³tsˀia³² jo³-sˀin² coan⁴cjain¹-na¹, jo³-sˀin² jcha⁴xcoan³² je² ˀnti¹-le⁴ Ni³na¹, nca³ cjoe⁴ coan⁴nca³-na¹ jo³-ni³ tsa² jnco³ cho⁴ta⁴jchi¹nca³, jo³ sa³ˀnta³ cjoi³choa³² choa⁴ nca³ cˀoa⁴ coan⁴ cjoan³² jo³ cjoan³ Cristo.  
\v 14 A³li² ti⁴cˀoa⁴ sˀian⁴²-nia³ jo³-ni³ tsa² ˀnti¹xti³ xi³ si¹cˀo¹fa³ya³ cjoa⁴fa³ˀai³tsjen³-le⁴, xi³ jo³-ni³ tsa² ntjao⁴ xi³ tjen⁴ nca³ i⁴ nca³ jan¹, xi³ to⁴fi²tjen⁴nqui³-le⁴ xi³ to⁴cja⁴ˀai¹ cjoa⁴fa³ˀai³tsjen³, xi³ to⁴cjoa⁴ma²ña⁴-le⁴ cho⁴ta⁴son³ˀnte³, xi³ vˀa³na⁴cha⁴ cao⁴ je² xi³ tsi² tsa² coi³ nta³ tjin¹, xi³ fi²cao⁴ tˀa³xin² jña³-le⁴ xi³ cjoa⁴qui²xi⁴.  
\v 15 To⁴sa³ cjoin³tjen⁴nqui³-le⁴² xi³ cjoa⁴qui²xi⁴ cao⁴ cjoa⁴tjao²cha³. Cˀoa⁴-sˀin² ca²ta³ma³jcha¹jin³-na¹ nca³yi³je³ cjoa⁴ xi³ tˀa³tsˀe⁴ nca³ je² xi³ jcoa³² ma³, xi³ je² Cristo.  
\v 16 Xi³ to⁴tˀa³tsˀe⁴ Cristo nca³yi³je³ yao³-le⁴ cˀoa⁴-sˀin² ma³yˀai³ ma³ncˀa³ cao⁴ cjoa⁴tjao²cha³, nca³ je³nta³ tjio¹cjao³ nca³qui³jnta² jña³ nca³ xco¹-le⁴. Cˀoa⁴-sˀin² tjin¹-le⁴ nca³nˀion¹ jo³-sˀin² nca³ nta³ si¹xa¹ jnco¹jnco¹ cˀa³ xi³ tsˀe⁴ yao³-le⁴. 
\s1 Cristo si¹cho⁴tse⁴ya³-na¹ 
\p  
\v 17 Je²-vi⁴ xi³ cˀoa⁴xian³, cˀoa⁴ vˀe³ne²³ tˀa³tsˀe⁴ Nai³-na¹, nca³ tsi² tsa² ti⁴coi⁴ma³-nio³ jo³-ni³ xi³cˀa³ cho⁴ta⁴ xi³ li² judío-jin², xi³ tjio¹ma³cao⁴ cjoa⁴fa³ˀai³tsjen³-le⁴ xi³ tsi²jme³ chji¹-le⁴.  
\v 18 To⁴njion² tjio¹ cjoa⁴fa³ˀai³tsjen³-le⁴. Cjai¹nca³ to⁴tˀa³xin² tjio¹-le⁴ cjoa⁴vi³jna³chon³-le⁴ Ni³na¹ nca⁴ cˀoa⁴-sˀin² to⁴cjoa⁴njion² tjin¹-le⁴, cˀoa⁴ nca⁴ cjai¹nca³ xi¹jin³ ni⁴ma⁴-le⁴.  
\v 19 Coan³scan³-ni³ nca³ je³qui³si³cha³jin³ cjoa⁴fa³ˀai³tsjen³nta³-le⁴, to⁴cˀoa⁴-sˀin² qui³sca³ni¹taon³ yao³-le⁴ nca³ to⁴cho⁴ta⁴cjoa⁴soa³ coan³. To⁴tˀa³tsˀe⁴ cjoa⁴xin²ta³con²-le⁴ cˀoa⁴qui³sˀin³ jo³ tjin¹ jco⁴ya³ cjoa⁴jnti¹.  
\v 20 To⁴nca³ li²coi³ cˀoa⁴-sˀin² qui³cho²tˀa³yao³ tˀa³tsˀe⁴ Cristo.  
\v 21 A³ tsi² tsa³ cjoa⁴qui²xi⁴ nca³ qui³no²ˀyao²³ tˀa³tsˀe⁴ Cristo, nca³ tsa³qui³yo³cao⁴³ nca³ qui³cho²tˀa³yao³ jo³-sˀin² nca³ cjoa⁴qui²xi⁴ xi³ tjin¹ tˀa³tsˀe⁴ Cristo.  
\v 22 Chja⁴ˀa²xin²-lao⁴³ yao³-no³ je² ni⁴ma⁴-no³ xi³ jchi¹nca³ xi³ cjai¹nca³ to⁴coan³nca³-le⁴ cjoa⁴ xi³ chˀao³ tjin¹ jo³ tso² cjoa⁴tsjoa³-le⁴ yao³-no³ xi³ to⁴vˀa³na⁴cha⁴, jo³-sˀin² tsa³nquin¹cao⁴³ yao³-no³ nca³sˀa⁴.  
\v 23 Cˀoa⁴-sˀin² ca²ta³ma³cho⁴tse⁴ya³ jo³ tjin¹ cjoa⁴fa³ˀai³tsjen³-no³.  
\v 24 Chjoao¹³ je² ni⁴ma⁴-no³ xi³ cho⁴tse⁴, xi³ nco³ya³-le⁴ Ni³na¹ qui³sˀe³nta³-ni³ cao⁴ xi³ tjin¹-le⁴ cjoa⁴qui²xi⁴ cˀoa⁴ cao⁴ xi³ ña³qui³ tsje³.  
\v 25 Coi³ nca³ qui³chja³ˀa²xion²³ cjoa⁴nti³so³, cho⁴va²cao⁴³ xi²nquio⁴³ xi³ cjoa⁴qui²xi, nca³ to⁴jnco³ tji¹cjao³ yao³-na¹ nca³tsˀia³².  
\v 26 Nta³ tsa² ma³jti³-no³, a³li² je¹-jin² vi³jncho³. A³li² jti³-jin² ma³-no³ jo³ sa³ˀnta³ nca³ ca²ntjai² tsˀoi¹.  
\v 27 Ni⁴ vˀai²ˀnte³-jin²lao⁴³ nai⁴².  
\v 28 Je² xi³ qui³si³che¹, a³li² ti⁴si¹che¹-jin²ni³. To⁴sa³ ca²ta³si¹xa¹, cˀoa⁴-sˀin² ca²ta³si¹xa¹-ni³ ntsja³ xi³ nta³ tjin¹, jme¹-ni³ nca³ sˀe⁴-si¹ni³le⁴ xi³ tsjoa¹-le⁴ xi³ tsi²jme³ tjin¹-le⁴.  
\v 29 Ni⁴to⁴jnco³-jin² en¹ xi³ chˀao³ tso² nˀo¹sje³-nio³ ntso⁴ˀvao³, to⁴je² en¹ xi³ nta³ tjin¹ xi³ coi⁴ncha³cao⁴, xi³ ma³chjen¹-le⁴, jme¹-ni³ nca³ cˀoa⁴-sˀin² tsjoa¹-si¹ni³le⁴ cjoa⁴nta³ je² xi³ nčhˀoe¹.  
\v 30 A³li² cˀoa⁴-jin²sˀin² ni²va³-jin²lao⁴³ je² Espíritu Santo xi³ tsˀe⁴ Ni³na¹, xi³ tsa³ca³sen¹choa⁴-no³ tˀa³tsˀe⁴ cˀia⁴ ni⁴čhjin³ nca³ coan⁴chji¹ntjao²³.  
\v 31 Nca³yi³je³ cjoa⁴jnčha³, cjoa⁴jti³, cjoa⁴jti³cha³, xi³ nˀion¹ nchja⁴ti³, cao⁴ xi³ nchja⁴ˀaon³, ca²ta³tjo³xin²-no³, cao⁴ nca³yi³je³ cjoa⁴tsˀen⁴.  
\v 32 To⁴sa³ nta³ ti⁴cao⁴³ xi²nquio⁴³. Ca²ta³sˀe³-no³ cjoa⁴ma⁴ta³con². Ti⁴cha³tˀa³-lao⁴³ xi²nquio⁴³, jo³-sˀin² nca³ Ni³na¹ qui³si³cha³tˀa³-no³ nca³ ti³yo³cao⁴³ Cristo. 
\c 5  
\s1 Coi⁴ma³² jo³-ni³ tsa² ˀnti¹-le⁴ Ni³na¹ xi³ i³sen³-le⁴ 
\p  
\v 1 Chjen²nqui³-lao⁴³ Ni³na¹, jo³-ni³ tsa² ˀnti¹ xi³ cjai¹nca³ tjao²cha³.  
\v 2 Cao⁴ cjoa⁴tjao²cha³ ti⁴ma³cao⁴³ xi²nquio⁴³, jo³-sˀin² Cristo coan³tsjoa³que³-na¹, qui³tsjoa³ntjai²-na¹ yao³-le⁴, jo³-ni³ jnco³ cjoa⁴tjao², cˀoa⁴ jo³-ni³ xi³ qui³tsˀai²ntjai²-na¹ xi³ na³sca¹ njen⁴ nqui³xcon⁴ Ni³na¹.  
\v 3 A³li² ni²cˀa³xqui⁴jin³-jion²³ xi²nquio⁴³ ni⁴ˀi⁴tse¹-jin² cjoa⁴cha³jnqui³, ni⁴ nca³yi³je³ xi³ nˀion¹ chˀao³ tjin¹, ni⁴ cjoa⁴xin²ta³con²-jin². Je² cjoa⁴-vi⁴ li²coi³ ntia⁴² squen¹-le⁴ cho⁴ta⁴-le⁴ Cristo.  
\v 4 Ni⁴ je²-jin² en¹tsˀen⁴ no²cjoao⁴³, ni⁴ en¹chi⁴con¹-jin², ni⁴ en¹ntsjen¹ˀa³-jin², xi³ tsi² tsa² va³quin²-no³, to⁴sa³ tˀao²³ cjoa⁴nta³.  
\v 5 Je³ˀyao³ je²-vi⁴, nca³ ni⁴jnco³-jin² cho⁴ta⁴cha³jnqui³, ni⁴jnco³-jin² xi³ cjoa⁴jnti¹ tjio¹ma³sˀin¹, ni⁴jnco³-jin² xi³ xin²con³, xi³ ma³nco¹son² xi³ xco¹son² ve³xcon¹, ni⁴jnco³-jin² tjin¹-le⁴ ˀnte³ ya⁴ cjoa⁴te¹xo³ma³-le⁴ Cristo cao⁴ Ni³na¹.  
\v 6 Ni⁴to⁴ˀya³-jin² xi³ ca²ta³vˀa³na⁴cha⁴-no³ cao⁴ xi³ to⁴xquia⁴ en¹. Xi³ to⁴coi³ cjoa⁴-vi⁴ nčhoa¹ne²-le⁴ cjoa⁴jti³-le⁴ Ni³na¹ je² cho⁴ta⁴ xi³ xi¹jin³.  
\v 7 A³li² ya⁴-jin² ña³tjen⁴ mai¹cao⁴³ nca³ je².  
\v 8 Nca³sˀa⁴ njion² nio¹³, to⁴nca³ ntˀai⁴-vi⁴ntai⁴ je³ˀi³saon³ nca³ ti³yo³cao⁴³ je² Nai³-na¹. Ti⁴mao³ jo³-ni³ tsa² ˀnti¹-le⁴ xi³ i³sen³-le⁴.  
\v 9 (Je² Espíritu Santo tsjoa¹ntje⁴jin³ ni⁴ma⁴-na¹ je² xi³ cjoa⁴nta³, xi³ tjin¹-le⁴ cjoa⁴qui²xi⁴, cˀoa⁴ je² xi³ ña³qui³ cˀoa⁴tjin¹.)  
\v 10 Cho¹tˀao³ je² xi³ sa³sen¹con³ Nai³-na¹.  
\v 11 A³li² cˀoa⁴-jin²sˀin² nˀiaon²³ je² xa¹ xi³ tsi² coan⁴ntje⁴-no³, xi³ to⁴tsˀe⁴ cjoa⁴njion², to⁴sa³ ta⁴co²son²tsaon⁴³.  
\v 12 Cjai¹nca³ to⁴chˀao³ tjin¹, nta³ tsa² to⁴coi⁴no²cjoao⁴³ xi³ tˀa³tsˀe⁴ je² xi³ to⁴cjoa⁴ˀma³ sˀin¹.  
\v 13 Nca³yi³je³ je² cjoa⁴ xi³ va³tio²son²tsen³, cˀoa⁴-sˀin² sa³tio²son²tsen³ cao⁴ lˀi¹. Je² nca³yi³je³ xi³ cˀoa⁴-sˀin² va³tio²son²tsen³, i³sen³ jo³-ni³ tsa² lˀi¹.  
\v 14 Xi³ coi³ cˀoi⁴tso²: Ti⁴cja³ˀa¹-lai⁴ yao³-li⁴, ji³ xi³ ti³so³jna³fai³. Ti²so⁴tjen⁴jin³-lai⁴ cˀen³, cˀoa⁴-sˀin² si⁴²ˀi³sen³-li² Cristo.  
\v 15 Cho¹tsaon³, tso²cˀoa⁴, nca³ qui²xi⁴ ti⁴mao³, a³li² jo³-ni³ cho⁴ta⁴ xi³ tsin²-le⁴ cjoa⁴fa³ˀai³tsjen³-jin², to⁴nca³ jo³-ni³ cho⁴ta⁴ xi³ tjin¹-le⁴ cjoa⁴fa³ˀai³tsjen³.  
\v 16 A³li² ni⁴čhjin³-jin² ni²cha³-lao⁴³ yao³-no³, nca³ je² ni⁴čhjin³ cjai¹nca³ to⁴chˀao³ chon³.  
\v 17 Xi³ coi³, a³li² chi⁴con¹-jin² mao³, to⁴nca³ ca²ta³ma³cho⁴ya³-no³ jo³-sˀin² nca³ me³-le⁴ Nai³-na¹.  
\v 18 A³li² yao³-no³jin² ni²chˀi⁴-nio³ vino, nca³ cˀoa⁴-sˀin² si¹qui³xo²ya³-ni³ cjoa⁴, to⁴nca³ ca²ta³tse³jin³ ni⁴ma⁴-no³ je² Espíritu Santo.  
\v 19 Chja⁴cao⁴³ xi²nquio⁴³ je² en¹-le⁴ Ni³na¹ xi³ coi⁴jntao¹³, ti⁴jnta¹-lao⁴³ je² xi³ vˀa³sje³je³ya³ Ni³na¹, ti⁴jntao¹³ ja⁴jin³ ni⁴ma⁴-no³. Ti⁴jnta¹-lao⁴³, cˀoa⁴ chˀa⁴sje³je³yao³ je² Nai³-na¹ ja⁴jin³ ni⁴ma⁴-no³.  
\v 20 Nca³ntsjai² nca³yi³je³ tˀai²-lao⁴³ cjoa⁴nta³ Ni³na¹ Nˀai³-na¹ xi³ to⁴tˀa³tsˀe⁴ jan³ˀain¹-le⁴ Nai³-na¹ Jesucristo. 
\s1 Na³nqui³ coi⁴yo³-le⁴² xi²nquia⁴² 
\p  
\v 21 Na³nqui³ ti⁴yo³-lao⁴³ xi²nquio⁴³ nca³ jcon³ chao³ Ni³na¹.  
\v 22 Je² ya¹nchjin¹ na³nqui³ ca²ta³va³tio²-le⁴ xˀin⁴-le⁴, jo³-sˀin² nca³ na³nqui³ tjio¹-le⁴ Nai³-na¹.  
\v 23 Je² xˀin⁴-ve⁴ nca³jco⁴-le⁴ chjon⁴²-le⁴, jo³-sˀin² nca³ Cristo nca³jco⁴-le⁴ na⁴xi⁴na³nta¹-le⁴. Je² xi³ vˀa³sje³ntjai² na⁴xi⁴na³nta¹-le⁴ xi³ ti⁴je²-ni³ yao³-le⁴.  
\v 24 Jo³-sˀin² nca³ je² na⁴xi⁴na³nta¹-le⁴ Cristo na³nqui³ tjio¹-le⁴ Cristo, cˀoa⁴-ti⁴sˀin²ni³ nca³ je² ya¹nchjin¹ na³nqui³ tjio¹-le⁴ xˀin⁴-le⁴ nca³yi³je³.  
\v 25 Jon² xi³ xˀion⁴³, tsjoa³cha³ ca²ta³mao³ ya¹nchjin¹-no³, jo³-sˀin² nca³ Cristo coan³tsjoa³que³ na⁴xi⁴na³nta¹-le⁴, cˀoa⁴ qui³tsjoa³ntjai² yao³-le⁴ xi³ tˀa³tsˀe⁴,  
\v 26 jme¹-ni³ nca³ cˀoa⁴-sˀin² Cristo tsa³cˀe¹jna³tjao²-si¹ni³ cˀoa⁴ qui³si³tsje³-si¹ni³ na⁴xi⁴na³nta¹-le⁴, jo³-ni³ tsa² cao⁴ na³nta¹ xi³ to⁴tˀa³tsˀe⁴ en¹-le⁴,  
\v 27 jme¹-ni³ nca³ ti⁴je²-ni³ si⁴²ca³sen¹ va³sen³-si¹ni³le⁴ yao³-le⁴ jnco³ na⁴xi⁴na³nta¹ xi³ tsˀe⁴ xi³ cjai¹nca³ to⁴je³ya³, xi³ tsi² tsa² coi³ je² tjin¹-le⁴, xi³ tsi² tsa² yo¹ cjoan³, ni⁴to⁴cˀoa⁴cjoan³ cˀoa⁴ma³-jin², jme¹-ni³ nca³ to⁴ña³qui³ tsje³ coan⁴-si¹ni³ nca³ tsi²jme³ je¹ sˀe⁴-le⁴.  
\v 28 Cˀoa⁴-ti⁴sˀin² xi³ xˀin⁴ tsjoa³que³ ca²ta³ma³ ya¹nchjin¹-le⁴, jo³-ni³ tsa² ti⁴tsˀe⁴-ni³ yao³. Je² xi³ tsjoa³que³ chjon⁴²-le⁴, ti⁴je²-ni³ yao³-le⁴ xi³ tsjoa³que³.  
\v 29 Ni⁴jnco³-jin² xi³ ti⁴je² taon³ ve³-ni³ yao³-le⁴. To⁴cˀoa⁴sˀin² si¹jcha¹, cˀoa⁴ tjao²-le⁴, jo³-ni³ tsa² Cristo si¹jcha¹, cˀoa⁴ tjao²-le⁴ na⁴xi⁴na³nta¹-le⁴.  
\v 30 Nca³ ña¹ tjio¹cjao³-nia¹ yao³-le⁴ cao⁴ ni³nta³-le⁴.  
\v 31 Coi³ cjoa⁴-vi⁴ nca³ je² xi³ xˀin⁴ si¹ca³tio¹-ni³ nˀai³-le⁴ cao⁴ na⁴-le⁴, nca³ nta³ ti¹jna³cao⁴ chjon⁴²-le⁴. To⁴jnco³ yao³ ma³ nca³ jao².  
\v 32 Je²-vi⁴ jnco³ cjoa⁴ˀma³ xi³ cjai¹nca³ tse³ya³, to⁴nca³ an³ cˀoa⁴²xian³ xi³ tˀa³tsˀe⁴ Cristo, cˀoa⁴ tˀa³tsˀe⁴ na⁴xi⁴na³nta¹-le⁴.  
\v 33 Jnco¹jnco¹ nca³tsˀio³-vi⁴ ña³qui³ cˀoa⁴-sˀin² tsjoa³cha³ ca²ta³mao³ ya¹nchjin¹-no³, jo³-sˀin² tsjoa³chao³ yao³-no³. Je² xi³ chjon⁴² xcon¹ ca²ta³ve³ xˀin⁴-le⁴. 
\c 6  
\p  
\v 1 Jon² xi³ ˀnti¹xtio³, ti⁴tjo³-son²-lao⁴³ xi³jcha¹-no³ nca³ ti³yo³cao⁴³ Nai³-na¹. Je²-vi⁴ xi³ nta³ tjin¹.  
\v 2 Jcha⁴xcoin¹³ nˀai³-li⁴ cao⁴ na⁴-li⁴, nca³ je² xi³ ti¹tjon² cjoa⁴te¹xo³ma³ xi³ tjin¹-le⁴ xi³ si¹sˀe³nqui³,  
\v 3 jme¹-ni³ nca³ nta³ coi⁴jna³-si¹ni³, cˀoa⁴ tse³ coan⁴-si¹ni³li² i⁴ son³ˀnte³.  
\v 4 Jon² xi³ nˀai³ mao³, a³li² ni²jti³-jin²lao⁴³ xti³-no³. To⁴cˀoa⁴-sˀin² ti⁴jchao¹³ nca³ sin³ nca³ nta³ coa⁴co²-lao⁴³ coa⁴co²ya³nta³-lao⁴³ cjoa⁴ xi³ tso²ya³ Ni³na¹.  
\v 5 Jon² xi³ cho⁴ˀnta³ mao³, ti⁴tjo³son²-lao⁴³ nai³-no³ xi³ cho⁴ta⁴son³ˀnte³ cao⁴ cjoa⁴jcon³-no³ cao⁴ cjoa⁴fa³tse¹-no³, nca³ ña³qui³ nta³ tjin¹ ni⁴ma⁴-no³, jo³-ni³ tsa² Cristo ni²xa¹-lao⁴³.  
\v 6 A³li² cˀoa⁴-jin²sˀin² ni²xao¹³ nqui³xcon⁴ cho⁴ta⁴, jo³-sˀin² xi³ to⁴xquia⁴ si¹tsjoa³-le⁴ cho⁴ta⁴, to⁴nca³ jo³-ni³ tsa² cho⁴ˀnta³-le⁴ Cristo, to⁴cao⁴ cjoa⁴tsjoa³ cˀoa⁴tˀiaon⁴³ jo³-sˀin² me³-le⁴ Ni³na¹.  
\v 7 To⁴cao⁴ cjoa⁴nta³ ti⁴xao¹³, jo³-ni³ tsa² tˀa³tsˀe⁴ Nai³-na¹ Cristo, a³li²coi³ tˀa³tsˀe⁴ cho⁴ta⁴-jin².  
\v 8 Nta³ ˀyao³ nca³ jnco¹jnco¹ nca³ je² Nai³-na¹ tsjoa¹-nca¹nca³no³ je²-vi⁴ jme³-ve⁴ xi³ nta³ sˀiaon⁴³, tsa² cho⁴ˀnta³ cˀoa⁴ tsa² je² xi³ ntai¹ tjin¹.  
\v 9 Jon² xi³ nai³-le⁴ mao³, cˀoa⁴-ti⁴sˀin²ni³ ti⁴cao⁴³ nca³ je². Ti⁴njion¹³ xi³ ñˀain³ nˀian²-lao⁴³, nca³ je³ˀyao³ nca³ je² Nai³-le⁴ xi³ tsˀe⁴ cˀoa⁴ xi³ tsaon⁴³ ti¹jna³ ncˀa³jmi³, to⁴nco¹son² fi²cao⁴ nca³tsˀi³. 
\s1 Je² cjoa⁴ xi³ tsˀe⁴ Ni³na¹ xi³ nco³ya³-le⁴ qui⁴cha⁴ xi³ tsˀe⁴ so³nta²do⁴ 
\p  
\v 10 Xi³ fe³tˀa³, ˀnti¹ntsˀe³, ca²ta³sˀe³-no³ nca³nˀion¹ nca³ ti³yo³cao⁴³ Nai³-na¹ cao⁴ nca³yi³je³ nca³nˀion¹ xi³ tse³ tjin¹-le⁴.  
\v 11 Jo³-ni³ tsa² so³nta²do⁴ ti⁴nca³jon³ yao³-no³ nca³yi³je³ qui⁴cha⁴ xi³ tsˀe⁴ Ni³na¹, jme¹-ni³ nca³ coan⁴-si¹ni³ nca³ coi⁴yo³ta²ja³-lao⁴³ cjoa⁴ma²ña⁴-le⁴ je² nai⁴².  
\v 12 Li²coi³ cho⁴ta⁴son³ˀnte³ xi³ njin¹ xi³ yao³ tjin¹-le⁴ xi³ coi³xcan¹coa⁴². To⁴je² xi³ co²ntran⁴-na¹ xi³ xa¹ti¹tjon² tjin¹-le⁴, xi³ cjoa⁴te¹xo³ma³ tjin¹-le⁴, xi³ nai⁴²ti¹tjon² xi³ nca³qui³jnta² va³te¹xo³ma³ jña³ njion², xi³ je² nca³tsˀi³ ntjao⁴ xi³ chˀao³ sˀin¹ xi³ tsˀe⁴ ja⁴ncˀa¹.  
\v 13 Coi³ nca³ cˀoa⁴-sˀin² chjoe¹-nio³ nca³yi³je³ qui⁴cha⁴ xi³ tsˀe⁴ Ni³na¹, jme¹-ni³ nca³ coi⁴yo³ta²ja³-si¹ni³lao⁴³ je² ni⁴čhjin³ xi³ ñˀain³ tjin¹. Cˀoa⁴-sˀin² to⁴jo³ coi⁴yo³ta²jao³, nca³ je³cˀoa⁴-sˀin² qui³ni²jnco³ nca³yi³je³.  
\v 14 Cˀoa⁴-sˀin² nˀion¹ ti⁴yo³ntao³. Nta³ tˀe²cjao¹³ čhjoa⁴xin¹cja¹ntia³-no³ xi³ nco³ya³-le⁴ xi³ ña³qui³ cˀoa⁴tjin¹. Tja³cjao¹³ ˀme⁴-no³ na³jño³qui⁴cha⁴ xi³ nco³ya³-le⁴ cjoa⁴ xi³ tjin¹-le⁴ cjoa⁴qui²xi⁴.  
\v 15 Tja³yao³ ntso⁴co³ je² jte¹ xi³ nco³ya³-le⁴ nca³ ti³yo³ntao³ xi³ tˀa³tsˀe⁴ je² en¹nta³ xi³ tsjoa¹ xi³ nchˀan¹ tjin¹.  
\v 16 Je² xi³ nqui²sa⁴ ma³chjen¹, nca³ chjoao¹³ je² qui⁴cha⁴ xi³ va¹jčho³chjoa² yao³-no³ xi³ nco³ya³-le⁴ je² xi³ ma³cjain¹-na¹, jme¹-ni³ nca³ cˀoa⁴-sˀin² si⁴cji³tsˀao¹-si¹nio³ je² flecha xi³ ti¹ti² xi³ tsˀe⁴ nai⁴².  
\v 17 Tˀe²yao³ jco³ je² xo³mpe³qui⁴cha⁴ xi³ nco³ya³-le⁴ cjoa⁴vi³tjo³ntjai²-na¹, cao⁴ je² qui⁴cha⁴nto³ xi³ tsˀe⁴ je² Espíritu Santo, xi³ nco³ya³-le⁴ je² en¹-le⁴ Ni³na¹.  
\v 18 Tˀe²tsˀoa³-lao⁴³ Ni³na¹ nca³ntsjai², ti⁴je¹-lao⁴³ cjoa⁴nta³ nca³yi³je³ xi³ to⁴tˀa³tsˀe⁴ je² Espíritu Santo. Cˀoa⁴-sˀin² ti⁴yo³chon³ˀntao³ to⁴jme³ hora-ni³, nca³ vˀe²tsˀoa³ntjao²³ tˀa³tsˀe⁴ nca³tsˀi³ cho⁴ta⁴-le⁴ Cristo.  
\v 19 Cˀoa⁴-ti⁴sˀin² tˀe²tsˀoao³ tˀa³tsˀan⁴, jme¹-ni³ nca³ cˀoai⁴-si¹ni³na³ en¹ nca³ sco³ˀe²³ ntso⁴ˀva³, cˀoa⁴ jme¹-ni³ nca³ li²coi³ tsa³cjon³-si¹nia³ nca³ coi³nchja²ya³ je² cjoa⁴ˀma³ xi³ tsˀe⁴ en¹nta³ tˀa³tsˀe⁴ Cristo.  
\v 20 An³ nia¹³ xi³ cˀoi⁴²-sˀin² ti²jna⁴ nca³jao³-le⁴ Ni³na¹. Ti²jna⁴nˀion¹tˀa³ nˀo¹qui⁴cha⁴ xi³ tˀa³tsˀe⁴ je² en¹nta³ tˀa³tsˀe⁴ Cristo. Cˀoa⁴-sˀin² tˀe²tsˀoao³ tˀa³tsˀan⁴, jme¹-ni³ nca³ li²coi³ tsa³cjon³-si¹nia³ nca³ nˀion¹ coi³nchja²ya³ xi³ tˀa³tsˀe⁴, jo³-sˀin² nca³ tjin¹ne²-na³ nca³ coi³nchja²³. 
\s1 Cjoa⁴ni²ti²ˀnta³ xi³ fe³tˀa² 
\p  
\v 21 Je² Tíquico, je² ntsˀe³² xi³ cjai¹nca³ tsjoa³cha³², xi³ cjai¹nca³ nta³ si¹xa¹ tˀa³tsˀe⁴ Nai³-na¹, je² cˀoa⁴coi⁴tso⁴yi³je³-no³, jme¹-ni³ nca³ jcha⁴-si¹nio³ jo³-sˀin² ti²jna⁴ cˀoa⁴ jo³-sˀin² ma³ xa¹-na⁴.  
\v 22 Coi³ cjoa⁴ nca³ qui³sca³ni³con³-no³ Tíquico, jme¹-ni³ nca³ jcha⁴-si¹nio³ xi³ tˀa³tsain⁴jin⁴, cˀoa⁴ jme¹-ni³ nca³ si⁴²je³con³-si¹ni³ ni⁴ma⁴-no³.  
\v 23 Je² Ni³na¹ Nˀai³-na¹, cˀoa⁴ je² Nai³-na¹ Jesucristo ca²ta³si¹qui³njen³nchˀan¹jin³ ni⁴ma⁴-le⁴ ntsˀe³², ca²ta³tsjoa¹-le⁴ cjoa⁴tjao²cha³ nca³ ma³cjain¹-le⁴.  
\v 24 Cjoa⁴nta³ ca²ta³sˀe³-le⁴ nca³tsˀi³ xi³ tsjoa³que³ Nai³-na¹ Jesucristo cao⁴ cjoa⁴tjao²cha³ xi³ ni⁴cˀia³-jin² cjoe⁴. Cˀoa⁴ ca²ta³ma³.