\id 2TI  
\h 2 Timoteo 
\toc1 Xi³ ma³jao²-ni³ xon⁴xi³ pa²stro⁴Pablo qui³squi³-le⁴Timoteo 
\toc2 2 Timoteo 
\toc3 2 Ti. 
\mt1 Xi³ ma³jao²-ni³ xon⁴xi³ pa²stro⁴Pablo qui³squi³-le⁴Timoteo 
\c 1  
\s1 Pablo si¹ti²ˀnta³ 
\p  
\v 1 An³ nia¹³ Pablo, pa²stro⁴-le⁴ Jesucristo nca³ cˀoa⁴-sˀin² coan³me³-le⁴ Ni³na¹. An³ nia¹³ pa²stro⁴ xi³ tˀa³tsˀe⁴ je² cjoa⁴vi³jna³chon³ xi³ Ni³na¹ qui³si³sˀe³nqui³, cˀoa⁴ xi³ Cristo Jesús tsjoa¹.  
\v 2 Ti²cji³-le²³ Timoteo ˀnti¹-na⁴ xi³ tsjoa³que⁴. Ni³na¹ Nˀai³-na¹ cao⁴ Jesucristo Nai³-na¹ ca²ta³tsjoa¹-li² cjoa⁴nta³, ca²ta³ma³ma⁴que³-li², ca²ta³si¹qui³njen³nchˀan¹jin³ ni⁴ma⁴-li⁴. 
\s1 Cˀoe¹ en¹-na¹ xi³ tˀa³tsˀe⁴ Nai³-na¹ 
\p  
\v 3 Tsjoa³-le⁴ cjoa⁴nta³ Ni³na¹, je² xi³ cˀoa⁴-sˀin² si¹chjen¹-na³ nca³ tsje³ tjin¹ cjoa⁴fa³ˀai³tsjen³-na⁴ jo³-sˀin² ji²tjo⁴jian³ cho⁴ta⁴jchi¹nca³-na⁴. Li²coi³ cha³jin³-na³ ni⁴čhjin³ nca³ ni⁴tjen⁴ nca³ si³cja³ˀai³tsjen³-le²³ nca³ vˀe³tsˀoa²³.  
\v 4 Me³-na³ nca³ scoe³-le²³, nca³ fa³ˀai³tsjen³-na³ nta¹xcoin³, jme¹-ni³ nca³ tse³ cjoa⁴tsjoa³ sˀe⁴-si¹ni³na³.  
\v 5 Tjin¹jin³-na³ jo³-sˀin² nca³ ña³qui³ cjoa⁴qui²xi⁴ ma³cjain¹-li², nca³ cˀoa⁴-sˀin² ti¹tjon² coan³cjain¹-le⁴ na⁴jcha¹-li⁴ Loida cao⁴ na⁴-li⁴ Eunice. Cˀoa⁴²-ti⁴ nˀion¹ nta³ ˀve³ nca³ ma³cjain¹-li².  
\v 6 Xi³ coi³-vi⁴ si³cja³ˀai³tsjen³-le²³ nca³ cˀoe¹tse³-sai³ je² cjoa⁴tjao²-le⁴ Ni³na¹ xi³ je³ti¹jna³jin³-li² nca³ an³ tsa³ca³son²-le²³ ntsa⁴.  
\v 7 Ni³na¹ li²coi³ qui³tsjoa³-na¹ cjoa⁴jcon³. To⁴cˀoa⁴-sˀin² qui³tsjoa³-na¹ nca³nˀion¹, cao⁴ cjoa⁴tjao²cha³, cao⁴ cjoa⁴fa³ˀai³tsjen³ xi³ nta³ fi²cao⁴ yao³-na¹.  
\v 8 Coi³ cjoa⁴ a³li² ma³soa³-jin²li² nca³ cˀoai⁴ en¹ xi³ tˀa³tsˀe⁴ Nai³-na¹, ni⁴tˀa³tsˀan⁴-jian²³ nca³ cjoa⁴ñˀain³ ti²jna⁴ xi³ tˀa³tsˀe⁴ Nai³-na¹. To⁴sa³ cˀoa⁴-ti⁴ ji³ chja⁴ˀai²³ cjoa⁴ñˀain³ xi³ tˀa³tsˀe⁴ je² en¹nta³ tˀa³tsˀe⁴ Cristo, jo³ tjin¹ nca³nˀion¹-le⁴ Ni³na¹.  
\v 9 Je² xi³ tsa³cˀa³sje³ntjai²-na¹, xi³ qui³nchja⁴-na¹ xi³ tˀa³tsˀe⁴ xa¹tsje³-vi⁴. A³li² tsa² cˀoa⁴-sˀin² va³quin²-le⁴ xa¹-na¹, to⁴je² xi³ cˀoa⁴-sˀin² coan³me³-le⁴ cao⁴ cjoa⁴nta³-le⁴ xi³ qui³tsˀai²-na¹ cao⁴ Cristo Jesús jo³ sa³ˀnta³ ti¹tjon² nca³ to²tsˀin³-le⁴ cjoa⁴.  
\v 10 Ntˀai⁴-vi⁴ je³coan³tsen³ nca³ ja³ˀai³ cˀa³tsen³ xi³ tsa³cˀa³sje³ntjai²-na¹, Jesucristo, xi³ tsa³cja³ˀa¹xin² cjoa⁴vi³ya³. To⁴tˀa³tsˀe⁴ je² en¹nta³ xi³ tˀa³tsˀe⁴ Cristo qui³si³cˀa³tsen³ cjoa⁴vi³jna³chon³ xi³ ni⁴cˀia³-jin² cjoe⁴tˀa³.  
\v 11 Xi³ tˀa³tsˀe⁴ je² en¹nta³-vi⁴ cˀoa⁴-sˀin² qui³sˀe³ne²-na³ nca³ nchja²ya³, nca³ pa²stro⁴ ma³, nca³ maestro ma³-le⁴ cho⁴ta⁴ xi³ li² judío-jin².  
\v 12 Coi³ cjoa⁴ cˀoi⁴-sˀin² ti²fa³ˀa³-nia³ cjoa⁴ñˀain³-vi⁴, to⁴nca³ li²coi³ ma³soa³-na³ nca³ ˀve³-nia¹³ Cristo xi³ je³coan³cjain¹-na³ tˀa³tsˀe⁴. Ña³qui³ tjin¹jin³-na³ nca³ to⁴je²-sa³ xi³ tjin¹-le⁴ nca³nˀion¹ nca³ cˀoe⁴²tjao² xi³ an³ qui³sca³ni²-le⁴ sa³ˀnta³ cˀia⁴ ni⁴čhjin³-ve⁴.  
\v 13 Nta³ tˀe²jin³-ta³coin²³ jo³ tso² je² en¹ xi³ nta³, xi³ an³ qui³no²ˀya²-nai¹³. Tˀe²jin³-ta³coin²³ jo³-sˀin² nca³ ma³cjain¹-na¹, cˀoa⁴ jo³-sˀin² nca³ tjao²cha³² nca³ ti³yo³coa⁴² Cristo Jesús.  
\v 14 Xi³ to⁴tˀa³tsˀe⁴ je² Espíritu Santo xi³ ti¹jna³jin³ ni⁴ma⁴-na¹, nta³ tˀe²jna³tjoai²³ je² xi³ qui³cha³ni²-li².  
\v 15 Je³ˀyai³ je²-vi⁴ nca³ qui³tsjion³-na³ nca³tsˀi³ xi³ tjio¹ ya⁴ Asia. Ya⁴ tjio¹jin³-le⁴ Figelo cao⁴ Hermógenes.  
\v 16 Je² Nai³-na¹ ca²ta³ma³ma⁴que³ cho⁴ta⁴ xi³ tsˀe⁴ ntˀia³-le⁴ Onesíforo. Cjai¹nca³ ncjin² cˀa³ qui³si³cˀe¹jna³con³-na³. Li²coi³ coan³soa³-le⁴ nca³ cjoa⁴ñˀain³ ti²jna⁴.  
\v 17 To⁴sa³ cˀia⁴ nca³ ji³cho² Onesíforo ya⁴ Roma, cjai¹nca³ xi¹ti¹ya³ tsa³ca¹sjai³-na³. Coan³sjai³-le⁴.  
\v 18 Je² Nai³-na¹ ca²ta³ma³ma⁴que³ nca³ je² cˀia⁴ ni⁴čhjin³-ve⁴. A³li² to⁴cˀoa⁴cji³ nta³ tsa³ca³sen¹cao⁴ ya⁴ Efeso, ji³ ni¹³ xi³ nqui²sa⁴ nta³ ˀyai³. 
\c 2  
\s1 Jo³-ni³ tsa² so³nta²do⁴ xi³ nta³ fi²tˀa³-le⁴ Jesucristo ca²ta³ma³² 
\p  
\v 1 Ji³ ˀnti¹-na⁴, chˀa⁴sjai³ nca³nˀion¹, nca⁴ Cristo Jesús tsjoa¹-li² cjoa⁴nta³.  
\v 2 Je² xi³ qui³no²ˀya²-nai¹³ nqui³xcon⁴ testigo xi³ ncjin² ma³-ni³, je²-vi⁴ tˀe²ne²-lai⁴ cho⁴ta⁴ xi³ tjio¹jnco³con³, xi³ cˀoa⁴-ti⁴ coan⁴-le⁴ coa⁴co²ya³-le⁴ xi³cˀa³.  
\v 3 Cˀoa⁴-ti⁴ ji³ chja⁴ˀai²³ cjoa⁴ñˀain³, jo³-ni³ tsa² so³nta²do⁴ xi³ nta³ fi²tˀa³-le⁴ Jesucristo.  
\v 4 Ni⁴jnco³-jin² xi³ so³nta²do⁴ tso²ˀva³, tjo³ˀnte³-le⁴ nca³ ca³ni¹jin³ yao³-le⁴ cjoa⁴ xi³ tjin¹ son³ˀnte³, jme¹-ni³ nca³ nta³ cˀoe⁴²-ni³con³ je² xi³ cjoa⁴so³nta²do⁴ qui³tsjoa³-le⁴.  
\v 5 Cˀoa⁴-ti⁴sˀin² je² xi³ si¹sca¹ li²coi³ si⁴²qui³njen³ chji¹-le⁴ tsa² tsi² nta³ si⁴²sca¹, jo³-sˀin² xi³ cjoa⁴qui²xi⁴.  
\v 6 Je² cho⁴ta⁴ xi³ nˀion¹ nta³ si¹xa¹ cjai¹nca³ ma³chjen¹ nca³ ti¹tjon²-cjoa²la² si¹xa¹, jme¹-ni³ nca³ cˀoa⁴-sˀin²ni³ cˀoe⁴²xco¹ ntje⁴-le⁴.  
\v 7 Cho¹son²-ni³lai⁴ jo³ xin³-le²³. Je² Nai³-na¹ si⁴²cho⁴ya³-li² nca³yi³je³.  
\v 8 Ti⁴cja³ˀai³tsjain³ tˀa³tsˀe⁴ Jesucristo xi³ ji³nčhoa³-ni³ ntje⁴-le⁴ David. Ja³ˀa²ya³jin³-ni³le⁴ cˀen³ jo³ tso² je² en¹nta³ xi³ nchja²ya³.  
\v 9 Xi³ tˀa³tsˀe⁴ je² en¹nta³-vi⁴ ti²fa³ˀa³ cjoa⁴ñˀain³ sa³ˀnta³ nto⁴ya¹ jo³-ni³ tsa² cho⁴ta⁴tsˀen⁴. To⁴nca³ je² en¹-le⁴ Ni³na¹ li²coi³ sˀe³chjoa²-le⁴.  
\v 10 Coi³ cjoa⁴ nca³yi³je³ jcho¹cjoa⁴-na³ xi³ tˀa³tsˀe⁴ je² cho⁴ta⁴ xi³ qui³tjo³jin³, jme¹-ni³ nca³ cˀoa⁴-ti⁴ je² coi⁴tjo³ntjai²-si¹ni³ xi³ to⁴tˀa³tsˀe⁴ Cristo Jesús cao⁴ cjoa⁴je³ya³ xi³ nca³ntsjai².  
\v 11 Ña³qui³ en¹qui²xi⁴: Tsa² cˀoa⁴-sˀin² cˀen³² ña¹ cao⁴ je², cˀoa⁴-ti⁴sˀin² coi⁴yo³choan³² ña¹ cao⁴ je².  
\v 12 Tsa² ti¹jcho¹cjoa⁴-na¹ cao⁴ je², cˀoa⁴-ti⁴sˀin² coa⁴te²xo³ma³² cao⁴ je². Tsa² cˀoe¹ˀma³-le⁴², cˀoa⁴-ti⁴ je² cˀoe⁴²ˀma³-na¹.  
\v 13 Tsa² tsi² ma³cjain¹-na¹ nca³ ña¹, to⁴jo³ si¹jnco³ nca³ je². Li²coi³ coan⁴ si⁴²cˀa³ntjai²ya³ yao³-le⁴. 
\s1 Nta³ si⁴chjen¹ je² en¹ xi³ cjoa⁴qui²xi⁴ 
\p  
\v 14 Ti⁴cja³ˀai³tsjen³-lai⁴ je²-vi⁴, tˀe²ne²-lai⁴ nqui³xcon⁴ Nai³-na¹ nca³ tsi² fao¹ya³-ni³ en¹-ve⁴ xi³ ni⁴to⁴jme³-jin² chji¹-le⁴. To⁴sa³ si¹sca¹ya³-le⁴ xi³ tjio¹nčhˀoe¹.  
\v 15 Cjai¹nca³ nta³ ti⁴xi¹ti¹yai³, jme¹-ni³ nca³ coi⁴sen⁴jna³va³sen³-si¹ni³ nca³ nta³ coi²tjoi⁴ tˀa³tsˀe⁴ Ni³na¹, jo³-ni³ jnco³ xi³ si¹xa¹ xi³ tsi² tsa² jme³ xi³ coan⁴soa³-le⁴ nca³ nta³ si¹chjen¹ je² en¹ xi³ cjoa⁴qui²xi⁴.  
\v 16 Ti⁴sen⁴xin²-lai⁴ xi³ to⁴xquia⁴ na⁴jmi¹ xi³ tsi²jme³ chji¹-le⁴ tˀa³tsˀe⁴ Ni³na¹. To⁴nqui²sa⁴-sa³ cjin³ sca⁴ni² cho⁴ta⁴ nca³ tsi² scoe⁴xcon¹ Ni³na¹.  
\v 17 Je² en¹-le⁴ to⁴coai⁴ ca³jna³ jo³-ni³ tsa² jnco³ jtse¹. Himeneo cao⁴ Fileto tjio¹jin³-le⁴ xi³ cˀoa⁴cjoan³.  
\v 18 Xin² ntia⁴² qui³-le⁴ cjoa⁴qui²xi⁴. Qui³tso² nca³ je² xi³ cjoa⁴ˀa¹ya³-le⁴, je³coan³. Cˀoa⁴-sˀin² si¹sca¹ya³cˀa³-le⁴ xi³ ma³cjain¹-le⁴.  
\v 19 To⁴nca³ je² nca³nˀion¹-le⁴ Ni³na¹ jo³ čhjao¹ja⁴ma⁴ xi³ nˀion¹ ti¹jna³. Tjin¹-le⁴ je² choa⁴-vi⁴: Je² Nai³-na¹ ve³ jña³-le⁴ xi³ tsˀe⁴. Je² nca³tsˀi³ xi³ nchja⁴ jan³ˀain¹-le⁴ Cristo ca²ta³vi³tjo³xin²-le⁴ cjoa⁴tsˀen⁴.  
\v 20 Ya⁴ jnco³ ni³ˀya³ xi³ je³, a³li² tsa² tso³jmi² xi³ taon⁴si³ne² taon⁴čhoa³-jin² tjin¹, to⁴nca³ cˀoa⁴²-ti⁴ tjin¹ xi³ ya¹ xi³ ni³ˀnte³ coan³nta³-ni³. Cˀoa⁴-ti⁴sˀin² tjin¹ cˀa³ xi³ ˀya³xcoan¹ cˀoa⁴ xi³ tsi² ˀya³xcoan¹.  
\v 21 Tsa² jnco³ xi³ coi³ cjoa⁴ si¹tsje³-ni³ yao³-le⁴, cˀoa⁴cjoan³ jo³-ni³ tsa² cho⁴tsin¹ xi³ ˀya³xcoan¹, xi³ je³coan³tsje³, xi³ coan⁴ coan⁴chjen¹-le⁴ Nai³-na¹, nca³ ti¹jna³nta³ to⁴jme³ xa¹ xi³ nta³ tjin¹.  
\v 22 Ti⁴sen⁴xin²-lai⁴ cjoa⁴sca¹ya³-le⁴ xti³. Cˀoa⁴-sˀin² tˀin³coai⁴ yao³-li⁴ cao⁴ xi³ cjoa⁴qui²xi, cao⁴ xi³ ma³cjain¹-na¹, cao⁴ xi³ cjoa⁴tjao²cha³, cao⁴ xi³ cjoa⁴nchˀan¹ta³con², cao⁴ je² cho⁴ta⁴ xi³ nchja⁴-le⁴ Nai³-na¹ cao⁴ ni⁴ma⁴ xi³ tsje³.  
\v 23 To⁴nca³ je² xi³ si¹cjan³ˀa³-ni³ en¹-le⁴ xi¹ncjin¹ xi³ tsi²jme³ chji¹-le⁴, xi³ tsin²-le⁴ cjoa⁴chji⁴ne⁴-jin², ti²tjo⁴xin²-lai⁴. Je³ˀyai³ nca³ to⁴cjoa⁴si³ vˀe¹tsˀia⁴.  
\v 24 Je² cho⁴ˀnta³-le⁴ Nai³-na¹ a³li²coi³ ma³chjen¹ nca³ cho⁴ta⁴cjoa⁴si³ coan⁴, to⁴nca³ ma³chjen¹ nca³ ntˀe¹ coan⁴ xi³ tˀa³tsˀe⁴ nca³tsˀi³, nca³ ma³-le⁴ va³co¹ya³, nca³ si¹cjain¹ xi³ chˀao³ si¹cao⁴.  
\v 25 Cao⁴ cjoa⁴nta³ ca²ta³tso²ya³nta³-le⁴ je² xi³ va³tio²ta²ja³-le⁴, tsa² tsjoa¹-sa³le⁴ Ni³na¹ nca³ si⁴²cˀa³ntjai²ya³ cjoa⁴fa³ˀai³tsjen³-le⁴, jme¹-ni³ nca³ scoe⁴-ni³ xi³ cjoa⁴qui²xi⁴.  
\v 26 Cˀoa⁴-sˀin² coi⁴tjo³xin²-ni³ chen⁴-le⁴ nai⁴² je² xi³ tjio¹nˀion¹-le⁴ jo³-sˀin² me³-le⁴ nca³ je². 
\c 3  
\s1 Jo³ cjoan³ cho⁴ta⁴ xi³ sˀe⁴ je² ni⁴čhjin³ xi³ cjoe⁴tˀa³ 
\p  
\v 1 Je²-vi⁴ cˀoa⁴-ti⁴ ca²ta³ˀyai³ nca³ je² ni⁴čhjin³ xi³ cjoe⁴tˀa³ cjoa⁴ˀai¹-na¹ cjoa⁴ñˀain³ xi³ tse³.  
\v 2 Sˀe⁴ cho⁴ta⁴ xi³ to⁴yao³-le⁴ tsjoa³que³ coan⁴, xi³ chˀao³ntai³, xi³ nchja⁴tˀa³ yao³-le⁴, xi³ ncˀa³con³, xi³ chˀao³ tso²-le⁴ xi¹ncjin¹, xi³ tsˀa³ntjai²cjoa⁴que³ xi³jcha¹-le⁴, xi³ ni⁴ˀi⁴tse¹-jin² tsjoa¹ cjoa⁴nta³, xi³ tsi² tsje³ tjin¹,  
\v 3 xi³ tsin²-le⁴ cjoa⁴tjao²cha³-jin², xi³ si¹qui³tson¹ en¹-le⁴, xi³ va¹nqui³ cao⁴ cjoa⁴nti³so³, xi³ to⁴cja⁴ˀai¹-nca¹ sˀin¹, xi³ toan¹, xi³ taon³ ve³ xi³ nta³,  
\v 4 xi³ jao² ncjain¹, xi³ to⁴xquia⁴ sˀin¹, xi³ to⁴si¹xcon¹ ma³-le⁴, xi³ nqui²sa⁴ ma³tsjoa³que³ cjoa⁴sca¹ cao⁴-ni³ tsa² Ni³na¹,  
\v 5 xi³ ma³tsen³ jo³ xi³ ve³xcon¹ Ni³na¹, to⁴nca³ tjio¹tˀa³xin²-le⁴ nca³nˀion¹-le⁴ Ni³na¹. Je² xo⁴cjoan³-vi⁴ xi³ ti⁴sen⁴xin²-lai⁴.  
\v 6 Tjin¹ cˀa³ xi³ tsˀe⁴ je²-vi⁴ xi³ ma³ fa³ˀa³sˀen³che¹, si¹ntˀe¹tˀa³-le⁴ ˀnti¹ ya¹nchjin¹ xi³ cjai¹nca³ tse³ je¹ yˀa³, xi³ cja⁴ˀai¹-sa³ cjoa⁴chi⁴nca⁴ fi²cao⁴ nca³ je²,  
\v 7 xi³ tjio¹co³tˀa³ya³ntsjai², cˀoa⁴ ni⁴cˀia³-jin² ma³-le⁴ cjoa⁴fa³ˀai³tsjen³ xi³ cjoa⁴qui²xi⁴.  
\v 8 Jo³-sˀin² qui³sˀin³ Janes cao⁴ Jambres nca³ ña³qui³ tsa³ca³tio²ta²ja³-le⁴ Moisés, cˀoa⁴²-ti⁴ sˀin¹ je²-vi⁴ nca³ va³tio²ta²ja³-le⁴ xi³ cjoa⁴qui²xi⁴, cho⁴ta⁴ xi³ chˀao³ tjio¹ cjoa⁴fa³ˀai³tsjen³-le⁴, xi³ tsi² nta³ ji³tjo³ tˀa³tsˀe⁴ en¹ xi³ ma³cjain¹-na¹.  
\v 9 To⁴nca³ li²jme³ xi³ ti⁴coi⁴njen³-ni³le⁴, nca³ je² cjoa⁴sca¹-le⁴ jcha⁴-le⁴ nca³tsˀi³, jo³-sˀin² tsa³ˀya³-le⁴ cjoa⁴sca¹-le⁴ xi³ nqui²jao²-ve⁴. 
\s1 Pablo vˀe¹ne²-le⁴ Timoteo 
\p  
\v 10 To⁴nca³ ji³ coan³cho⁴ya³-li² je² cjoa⁴fa³ˀai³tsjen³-na⁴, jo³-sˀin² tsa³ca³co³ya²³-le²³, jo³ qui³sˀian³, jme³ xi³ tsa³cˀa³mjen³ ca²sje³, jo³-sˀin² coan³cjain¹-na³, jo³-sˀin² qui³si³-cjen¹³, jo³-sˀin² coan³tsjoa³que⁴, jo³-sˀin² qui³cho¹cjoa⁴-na³,  
\v 11 jo³-sˀin² tsa³qui³yo³tjen⁴nqui³ co²ntran⁴-na³, jo³-sˀin² qui³si³cja³ˀa¹-na³ cjoa⁴ñˀain³, je²-vi⁴ xi³ ja³ˀai³ne²-na³ ya⁴ Antioquía, ya⁴ Iconio, ya⁴ Listra. Coi³ cjoa⁴ñˀain³ xi³ tsa³cja³ˀa³. Nai³-na¹ tsa³cˀa³sje³ntjai²-na³ nca³yi³je³.  
\v 12 Cˀoa⁴ je² nca³tsˀi³ xi³ me³-le⁴ nca³ tsje³ coa⁴tio²con³tˀa³-le⁴ Cristo Jesús, cˀoa⁴-ti⁴sˀin² cjoa⁴ˀa² cjoa⁴ñˀain³.  
\v 13 To⁴nca³ je² cho⁴ta⁴tsˀen⁴, cˀoa⁴ je² xi³ vˀa³na⁴cha⁴ to⁴ña³qui³ to⁴sin³ to⁴nta³ nqui²sa⁴-sa³ tsˀen⁴ coan⁴, cˀoa⁴na⁴cha⁴-sa³le⁴, cˀoa⁴-ti⁴ chˀa⁴na⁴cha⁴-sa³le⁴.  
\v 14 To⁴nca³ ji³ nta³ tˀin³coai⁴ xi³ qui³cho²tˀa³yai³, xi³ nta³ coan³cjain¹-li², nca³ je³ˀyai³ ˀya³ xi³ tsa³ca³co¹ya³-li².  
\v 15 Sa³ˀnta³ nca³ ˀnti¹ ti³soi³, tsa³ˀyai³ je² xon⁴ Escritura xi³ tsˀe⁴ Ni³na¹, je² xi³ nta³ si⁴²chji⁴ne⁴-li² jo³-sˀin² coi²tjo⁴ntjai²³ xi³ to⁴tˀa³tsˀe⁴ nca³ ma³cjain¹-li² tˀa³tsˀe⁴ Cristo Jesús.  
\v 16 Nca³yi³je³ xon⁴ Escritura Ni³na¹ ji³nčhoa³-ni³, cˀoa⁴ cjai¹nca³ nta³ ma³chjen¹ nca³ va³co¹ya³-na¹, nca³ nchja⁴ti³cao⁴-na¹, nca³ si⁴²cho⁴ya³nta³-na¹, nca³ si⁴²qui³ncha¹ya³ntia⁴²-na¹ xi³ cjoa⁴qui²xi⁴,  
\v 17 jme¹-ni³ nca³ je² cho⁴ta⁴-le⁴ Ni³na¹ ña³qui³ tji¹jnco³-si¹ni³, nca³ ña³qui³ tjin¹yi³je³-le⁴ xi³ ma³chjen¹-le⁴ tˀa³tsˀe⁴ nca³yi³je³ xa¹ xi³ nta³. 
\c 4  
\p  
\v 1 Vˀe³ne²³-le²³ nqui³xcon⁴ Ni³na¹ cao⁴ Nai³-na¹ Jesucristo xi³ sˀa⁴ cˀoe⁴²nta³jin³-le⁴ xi³ tjio¹con³ cao⁴ xi³ cˀen³, nca⁴ Jesucristo coan⁴tsen³, cjoa⁴ˀai¹ ca³te¹xo³ma³.  
\v 2 Ti⁴no²cjoa⁴yai³ en¹-vi⁴, ti⁴xi¹ti¹yai³ nca³ntsjai² ni⁴čhjin³, ti⁴cho⁴ya³-lai⁴ ti⁴no²cjoa⁴ti³coai⁴ tˀe²ne²-lai⁴ cao⁴ nca³yi³je³ cjoa⁴tse³ta³con² cao⁴ cjoa⁴fa³ˀai³tsjen³ xi³ cˀoin¹ya³-lai⁴.  
\v 3 Cjoi⁴cho³ ni⁴čhjin³ nca³ tsi²coi³ si⁴²cjain¹-le⁴ xi³ nta³ cjoa⁴fa³ˀai³tsjen³, to⁴sa³ cˀoe⁴²xco¹tˀa³-le⁴ yao³-le⁴ maestro jo³-sˀin² me³-le⁴ cjoa⁴chi⁴nca⁴-le⁴, cˀoa⁴ jo³-sˀin² nca³ na³sca¹ tso²-le⁴ xo⁴ño³.  
\v 4 Li²coi³ coi⁴ncha²ño³-le⁴ xi³ cjoa⁴qui²xi⁴, to⁴ya⁴² coai⁴ nčhˀoe² xi³ to⁴ˀen¹.  
\v 5 To⁴nca³ ji³ nta³ ti⁴jna³chon³ˀntai³, ti⁴cjain¹-lai⁴ cjoa⁴ñˀain³, ti⁴xai¹³, ti⁴no²cjoa⁴yai³ tˀa³tsˀe⁴ Ni³na¹, ti⁴jncoi³ xa¹-li⁴.  
\v 6 Je³ti²jna⁴čhian³ cjoa⁴vi³ya³-na⁴, jo³-sˀin² vˀai²tˀa³ cjoa⁴tjao². Cjai¹nca³ choa³-sa³ ma³ ni⁴čhjin³ nca³ cjoia¹³.  
\v 7 Nta³ qui³si³toan¹jian³ cjoa⁴jchan¹. Qui³si³jncoa³ xa¹-na⁴. Nta³ qui³si³tjo³son²-nia³ en¹ xi³ ma³cjain¹-na¹.  
\v 8 Je² xi³ fe³tˀa³, ti¹jna³tjao²-na³ je² cjoa⁴qui²xi⁴ xi³ jo³-ni³ jnco³ corona, xi³ cˀia⁴ ni⁴čhjin³-ve⁴ tsjoa¹-na³ je² Nai³-na¹ xi³ vˀe¹nta³jin³ cao⁴ cjoa⁴qui²xi⁴. A³li² tsa² to⁴ˀan³-jian² xi³ tsjoa¹-na³, cˀoa⁴²-ti⁴ tsjoa¹-le⁴ nca³tsˀi³ xi³ me³-le⁴ nca³ coan⁴tsen³ nca³ je². 
\s1 Pablo vˀe¹ne²-le⁴ cho⁴ta⁴ 
\p  
\v 9 Ti⁴xi¹ti¹yai³ nca³ nti⁴ton⁴ nčhoa¹chon³-nai¹³.  
\v 10 Je² Demas qui³tsjion³-na³ nca³ coan³tsjoa³que³ cjoa⁴ xi³ tjin¹ ntˀai⁴-vi⁴. Qui³ ya⁴ Tesalónica. Crescente qui³ ya⁴ Galacia. Tito qui³ ya⁴ Dalmacia.  
\v 11 To⁴je² Lucas xi³ ti¹jna³cao⁴-na³. Chjoai¹³ Marcos, nčhoa¹coai⁴. Cjai¹nca³ coan⁴chjen¹-na³ xi³ tˀa³tsˀe⁴ xa¹-vi⁴.  
\v 12 Je² Tíquico qui³sca³nia³ ya⁴ Efeso.  
\v 13 Cˀia⁴ nca³ cjoi⁴nčhoai³ nčhoa¹coai⁴ je² tso⁴nca⁴ xi³ tsa³cˀe³jna²³ ya⁴ Troas ya⁴ ntˀia³-le⁴ Carpo, cao⁴ xon⁴, ti¹tjon² je² xon⁴čhjoa⁴.  
\v 14 Alejandro je² chji⁴ne⁴qui⁴cha⁴ a³li² to⁴cˀoa⁴cji³ taon³ tsa³ve³-na³. Je² Nai³-na¹ cˀoe⁴²chji¹-le⁴ jo³ tso² je¹-le⁴.  
\v 15 Cˀoa⁴-ti⁴ ti⁴coi²ntai⁴ yao³-li⁴ xi³ cao⁴ je². Cjai¹nca³ to⁴ta²ja³ tsa³cˀe²jna³-le⁴ en¹-na¹.  
\v 16 Cˀia⁴ nca³ ti¹tjon² qui³nchja²ntje²³ yao³-na⁴ ni⁴to⁴ˀya³-jin² xi³ tsa³qui³ncha²cao⁴-na³, to⁴sa³ qui³tsjion³-na³ nca³tsˀi³. A³li² coi²nta⁴-jin² sˀin¹-le⁴.  
\v 17 To⁴nca³ je² Nai³-na¹ tsa³cˀe²jna³cao⁴-na³. Qui³tsjoa³-na³ nca³nˀion¹, jme¹-ni³ nca³ to⁴tˀa³tsˀan⁴ coan⁴jnco³-si¹ni³ cjoa⁴qui²xi⁴ xi³ qui³nchja²ya³, cˀoa⁴ jme¹-ni³ nca³ nca³tsˀi³ cho⁴ta⁴ xi³ li² judío-jin² cjoi⁴nčhˀoe¹-si¹ni³. Ji²tjo⁴ntjai²-nia³ tsˀoa³ xa³.  
\v 18 Je² Nai³-na¹ cˀoa⁴sje³ntjai²-na³ nca³yi³je³ cjoa⁴tsˀen⁴, cˀoa⁴ cˀoe⁴²tjao²-na³ xi³ tˀa³tsˀe⁴ cjoa⁴te¹xo³ma³-le⁴ ncˀa². Ca²ta³sˀe³-le⁴ cjoa⁴je³ya³ nca³ntsjai² nca³ntsjai². Cˀoa⁴ ca²ta³ma³. 
\s1 Cjoa⁴ni²ti²ˀnta³ xi³ fe³tˀa³ 
\p  
\v 19 Ti⁴ti²ˀntai³ Prisca cao⁴ Aquila cao⁴ nca³tsˀi³ cho⁴ta⁴ xi³ tsˀe⁴ ntˀia³-le⁴ Onesíforo.  
\v 20 Erasto tsa³cˀe²jna³ ya⁴ Corinto. Je² Trófimo qui³si³-cˀe¹jna³ ya⁴ Mileto nca³ ti¹mˀen³.  
\v 21 Ti⁴xi¹ti¹yai³ nčhoa¹nti⁴ton⁴-ni³ nca³ cje³ chan⁴nchˀan¹-jin². Eubulo, cao⁴ Pudente, cao⁴ Lino, cao⁴ Claudia, cao⁴ ntsˀe³² nca³tsˀi³ si¹ti²ˀnta³-li².  
\v 22 Je² Nai³-na¹ Jesucristo ca²ta³vˀe²jna³cao⁴ ni⁴ma⁴-li⁴. Cjoa⁴nta³ ca²ta³sˀe³-no³. Cˀoa⁴ ca²ta³ma³.