\id 2TH  
\h 2 Tesalonicenses 
\toc1 Xi³ ma³jao²-ni³ xon⁴xi³ pa²stro⁴Pablo qui³squi³-le⁴cho⁴ta⁴tesalonicenses 
\toc2 2 Tesalonicenses 
\toc3 2 Ts. 
\mt1 Xi³ ma³jao²-ni³ xon⁴xi³ pa²stro⁴Pablo qui³squi³-le⁴cho⁴ta⁴ tesalonicenses 
\c 1  
\s1 Pablo si¹ti²ˀnta³ 
\p  
\v 1 Pablo cao⁴ Silvano cao⁴ Timoteo ti³chji³-lai²⁴jin⁴ xi³ na⁴xi⁴na³nta¹-le⁴ Cristo xi³ cho⁴ta⁴ tesalonicenses ˀmi²-no³, xi³ ti³yo³cao⁴³ Ni³na¹ Nˀai³-na¹ cao⁴ Nai³-na¹ Jesucristo. 
\p  
\v 2 Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ Nˀai³-na¹ cao⁴ Nai³-na¹ Jesucristo. 
\s1 Cho⁴ta⁴je¹ sˀe³-le⁴ cjoa⁴ñˀain³ cˀia⁴ nca³ cjoa⁴ˀai¹ Cristo 
\p  
\v 3 Ma³chjen¹ nca³ cˀoai⁴-lai⁴jin⁴ cjoa⁴nta³ nca³ntsjai² Ni³na¹ xi³ tˀa³tsaon⁴³, ntsˀe³², nca³ je³cji³ma³cjain¹-sa³no³, cˀoa⁴ nca³ jnco¹jnco¹ nca³tsˀio³ cjai¹nca³ nta³ tsjoa³chao³ xi²nquio⁴³. 
\p  
\v 4 Ti⁴jin⁴-ni³jin⁴ cjai¹nca³ ma³tsjoa³-na³jin⁴ xi³ tˀa³tsaon⁴³ ya⁴jin³-le⁴ na⁴xi⁴na³nta¹-le⁴ Ni³na¹, nca³ tjin¹-no³ cjoa⁴tse³jta³, cˀoa⁴ ma³cjain¹-no³ nta³ tsa² vi³yo³tjen⁴nqui³ co²ntran⁴-no³, nta³ tsa² cjoa⁴nˀain³ chja³ˀao²³. 
\p  
\v 5 Cˀoa⁴sˀin² cji³ma³tsen³ nca³ Ni³na¹ vˀe¹nta³jin³ xi³ ña³qui³ cˀoa⁴tjin¹, jme¹-ni³ nca³ coa⁴quin²-ni³no³ cjoa⁴te¹xo³ma³-le⁴ Ni³na¹, nca³ tˀa³tsˀe⁴ ti³chja³ˀao²³ cjoa⁴ñˀain³. 
\p  
\v 6 Tjin¹-le⁴ cjoa⁴qui²xi⁴ Ni³na¹ nca³ cˀoe⁴²chji¹-le⁴ cao⁴ cjoa⁴ñˀain³ je² xi³ tjio¹tsjoa¹-no³ cjoa⁴ñˀain³. 
\p  
\v 7 Cˀoa⁴-ti⁴ cˀoe⁴²chji¹-no³ nca³ jon² xi³ cjoa⁴ñˀain³ ti³chja³ˀao²³, nca³ si⁴²cˀe¹yo³cja¹ya³-no³ cao⁴ jin⁴-jin⁴ cˀia⁴ nca³ coan⁴tsen³ Nai³-na¹ Jesús, nca³ cjoi⁴nčhoa¹-ni³ ncˀa³jmi³ cao⁴ a²ncje⁴ xi³ va³co¹ nca³nˀion¹-le⁴. 
\p  
\v 8 Coan⁴tsen³jin³ ni⁴jen⁴lˀi¹. Tsjoa¹-le⁴ cjoa⁴ñˀain³ je² xi³ tsi² tsa³ve³ Ni³na¹, cˀoa⁴ xi³ tsi² si¹tjo³son²-le⁴ je² en¹nta³ xi³ tˀa³tsˀe⁴ Nai³-na¹ Jesucristo. 
\p  
\v 9 Je² xi³ tjoe¹-le⁴ cjoa⁴ñˀain³ nca³ ña³qui³ ntia³ coai⁴cha³jin³, nca³ tsi² tsa² ti⁴scoe⁴-ni³ Nai³-na¹, ni⁴cjoa⁴je³ya³-le⁴jin² xi³ tsˀe⁴ nca³nˀion¹-le⁴, 
\p  
\v 10 cˀia⁴ nca³ cjoa⁴ˀai¹ cˀia⁴ ni⁴čhjin³ je²-vi⁴ nca³ tjo¹sje³je³ya³ to⁴tˀa³tsˀe⁴ cho⁴ta⁴-le⁴, cˀoa⁴ nca³ to⁴xcon¹ scoe⁴ nca³tsˀi³ xi³ coan³cjain¹-le⁴. (Nca⁴ je² en¹-na⁴jin⁴ xi³ cˀoa⁴sˀin² coan³cjain¹-no³ nca³ jon².) 
\p  
\v 11 Coi³ cjoa⁴ nca³ cˀoa⁴sˀin² ti³vˀe²tsˀoai³⁴-jin⁴ nca³ntsjai² xi³ tˀa³tsaon⁴³, jme¹-ni³ nca³ cˀoa⁴sˀin² Ni³na¹ tsjoa¹-si¹ni³no³ cjoa⁴nta³ nca³ coa⁴quin²-no³ je² xa¹ xi³ qui³nchja⁴-no³. Cjai¹nca³ to⁴tse³-sa³ cjoa⁴nta³ ca²ta³tsjoa¹-le⁴ nca³yi³je³ cjoa⁴fa³ˀai³tsjen³-no³ xi³ nta³ tjin¹. Ca²ta³tsjoa¹-sa³le⁴ nca³nˀion¹ nca³yi³je³ xa¹-no³ nca³ ma³cjain¹-no³, 
\p  
\v 12 jme¹-ni³ nca³ coi⁴tjo³je³ya³jin³-si¹ni³no³ je² jan³ˀain¹-le⁴ Nai³-na¹ Jesucristo, cˀoa⁴ jon² coi²tjo⁴je³ya³-si¹nio³ cao⁴ Cristo, jo³-sˀin² tsjoa¹-no³ cjoa⁴nta³ Ni³na¹-na¹ cao⁴ Nai³-na¹ Jesucristo. 
\c 2  
\s1 Coan⁴tsen³ je² cho⁴ta⁴tsˀen⁴ 
\p  
\v 1 To⁴nca³ vˀe²tsˀoa³-lai²⁴jin⁴, ntsˀe³². coi³ cjoa⁴ jo³sˀin² nca³ cjoa⁴ˀai¹ Nai³-na¹ Jesucristo, cˀoa⁴ coan⁴xco¹tˀa³-le⁴², 
\p  
\v 2 a³li² jnco³ tjo²-jin² mˀo¹fa³ya³-no³ cjoa⁴fa³ˀai³tsjen³-no³, a³li² ni²va³-jin²lao⁴³ ni⁴ma⁴-no³, ni⁴cao⁴-jin² en¹, ni⁴cao⁴-jin² xon⁴, xi³ cˀoa⁴tso² nca³ tsain⁴-jin⁴ je²-vi⁴ xi³ tso² nca³ je³ ni⁴čhjin³-le⁴ Nai³-na¹. 
\p  
\v 3 A³li² vˀa³na⁴cha⁴-jin²no³ to⁴ˀya³-ni³ ni⁴to⁴jme³ cjoa⁴-ni³. Nca⁴ li²coi³ cjoa⁴ˀai¹ ni⁴čhjin³-le⁴ Nai³-na¹, tsa² tsi² ti¹tjon² cjoa⁴ˀai¹ xi³ co²ntran⁴ coai⁴-le⁴ Jesús, cˀoa⁴ tsa² tsi² coan⁴tsen³ je² cho⁴ta⁴tsˀen⁴, je² cho⁴ta⁴ xi³ cha⁴jin³. 
\p  
\v 4 Cˀoe¹jna³toan¹ coi⁴so¹tjen⁴ co²ntran⁴-le⁴ nca³yi³je³ xi³ Ni³na¹ ˀmi² a³xo⁴ xi³ ˀya³xcoan¹, sa³ˀnta³ cˀoe¹jna³ ya⁴ yo⁴nco⁴ jo³-ni³ tsa² Ni³na¹, nca³ Ni³na¹ tso²-le² yao³-le⁴. 
\p  
\v 5 A³ tsi² tjin¹jin³-no³ nca³ cˀoa⁴na¹qui³xin³-no³ cˀia⁴ nca³ ya⁴-sa³ tsa³ca²te⁴jna³cao⁴-no³. 
\p  
\v 6 Je³ˀyao³ jme³ xi³ vˀe¹chjoa²-le⁴ ntˀai⁴-vi⁴, jme¹-ni³ nca³ coan⁴tsen³-si¹ni³ ni⁴čhjin³ xi³ tji¹choa⁴-le⁴. 
\p  
\v 7 Je³ti¹si¹xa¹ˀma³ cjoa⁴tsˀen⁴, to⁴nca³ tjin¹ xi³ vˀe¹chjoa² ntˀai⁴, jo³ sa³ˀnta³ tjo¹xin²jin³ je² xi³ ntˀai⁴ vˀe¹chjoa². 
\p  
\v 8 Cˀia⁴² coan⁴tsen³ je² cho⁴ta⁴tsˀen⁴, xi³ je² Nai³-na¹ si⁴²cˀen³-ni³ cao⁴ jta⁴-le⁴ tsˀoa³. Cˀia⁴ nca³ Jesucristo coan⁴tsen³ nca³ cjoa⁴ˀai¹, si⁴²qui³xo¹ya³. 
\p  
\v 9 Je² cho⁴ta⁴tsˀen⁴ cjoa⁴ˀai¹ jo³sˀin² si¹xa¹ Satanás. Cjoa⁴ˀai¹ cao⁴ nca³yi³je³ nca³nˀion¹ cao⁴ choa⁴ cao⁴ cjoa⁴xcon¹ nti³so³. 
\p  
\v 10 Ña³qui³ chˀao³sˀin² cˀoa⁴na⁴cha⁴-le⁴ je² xi³ cha⁴jin³, nca⁴ tsi² coan³tsjoa³que³ xi³ cjoa⁴qui²xi⁴, jme¹-ni³ nca³ coi⁴tjo³ntjai²-si¹ni³. 
\p  
\v 11 Coi³ cjoa⁴ nca³ Ni³na¹ si¹ca³sen¹-ni³le⁴ jnco³ cjoa⁴chˀa²-na⁴cha⁴ xi³ si¹xa¹jin³-le⁴ nca³ je², jme¹-ni³ nca³ cˀoa⁴sˀin² coan⁴cjain¹-si¹ni³le⁴ cjoa⁴nti³so³, 
\p  
\v 12 jme¹-ni³ nca³ sˀe⁴-ni³le⁴ cjoa⁴ñˀain³ nca³tsˀi³ xi³ tsi² tsa² coan³cjain¹-le⁴ xi³ cjoa⁴qui²xi⁴, xi³ to⁴sa³ qui³sa³sen³-le⁴ cjoa⁴tsˀen⁴. 
\s1 Ni³na¹ tsa³cja³ˀa¹jin³ je² ntsˀe⁴ nca³ coi⁴tjo³ntjai² 
\p  
\v 13 To⁴nca³ jin⁴-jin⁴ ma³chjen¹-na³jin⁴ nca³ cˀoai⁴-lai⁴jin⁴ cjoa⁴nta³ Ni³na¹ nca³ntsjai² xi³ tˀa³tsaon⁴³, ntsˀe³² xi³ tjao²que³-no³ Nai³-na¹. Tsa³cja³ˀa¹jin³-no³ Ni³na¹ sa³ˀnta³ nca³ to²tsˀin³-le⁴ cjoa⁴ nca³ coi²tjo⁴ntjao²³ to⁴tˀa³tsˀe⁴ je² Espíritu Santo xi³ qui³si³tsje³ya³-no³ cˀoa⁴ to⁴tˀa³tsˀe⁴ nca³ ma³cjain¹-no³ xi³ cjoa⁴qui²xi⁴. 
\p  
\v 14 Tˀa³tsˀe⁴ coi³-vi⁴ Ni³na¹ qui³nchja⁴-no³ cao⁴ je² en¹nta³ xi³ tˀa³tsˀe⁴ Cristo xi³ no²cjoai⁴-jin⁴. Cˀoa⁴sˀin² sˀe⁴-no³ cjoa⁴je³ya³-le⁴ Nai³-na¹ Jesucristo. 
\p  
\v 15 Cˀoa⁴sˀin² ntsˀe³², nˀion¹ ti⁴yo³ tˀe²jin³-ta³con²³ je² cjoa⁴fa³ˀai³tsjen³ xi³ qui³cho²tˀa³yao³, nta³ tsa² cao⁴ en¹, nta³ tsa² cao⁴ xon⁴-na⁴jin⁴. 
\p  
\v 16 Ti⁴je²-ni³ Nai³-na¹ Jesucristo cao⁴ Ni³na¹ Nˀai³-na¹, je² xi³ cjai¹nca³ coan³tsjoa³que³-na¹, qui³tsjoa³-na¹ cjoa⁴je³ta³con² xi³ cˀoe¹jna³jin³ntsjai²-na¹, cˀoa⁴ xi³ nta³ ti³cho³ya²-le⁴² xi³ to⁴tˀa³tsˀe⁴ cjoa⁴nta³-le⁴. 
\p  
\v 17 Ca²ta³si¹je³con³ ni⁴ma⁴-no³, cˀoa⁴sˀin² nˀion¹ ca²ta³si¹ca³tio¹-no³ nca³yi³je³ en¹-no³ cao⁴ xa¹-no³ xi³ nta³ tjio¹. 
\c 3  
\s1 Cˀoe¹tsˀoa³² nca³ je² en¹-le⁴ Ni³na¹ ca²ta³vˀa³tji³son² 
\p  
\v 1 Je² xi³ fe³tˀa³-ni³, ntsˀe³², nca³ tˀe²tsˀoa³ntjai²-na³jin⁴ nca³ je² en¹-le⁴ Nai³-na¹ xi¹ti¹ ca²ta³vˀa³tji³son², ca²ta³mi³ncˀa³-sa³ jo³ qui³sˀin³ ya⁴jin³-no³ nca³ jon². 
\p  
\v 2 Cˀoa⁴-ti⁴ tˀe²tsˀoa³ntjai²-na³jin⁴ nca³ coi²tjo⁴ntjai²-lai⁴jin⁴ cho⁴ta⁴ xi³ chˀao³ sˀin¹ cao⁴ cho⁴ta⁴tsˀen⁴, nca⁴ tsi² tsa² ma³cjain¹-le⁴ nca³tsˀi³. 
\p  
\v 3 Je² Ni³na¹ cjai¹nca³ nˀion¹tˀa³con³, nca³ nˀion¹ si⁴²ca³tio¹-no³, si⁴²coi²nta⁴-no³ nca³ tsi² si⁴²cao⁴-no³ je² xi³ tsˀen⁴. 
\p  
\v 4 Nta³ ˀya³ta³con²-lai²⁴jin⁴ nca³ ti³yo³cao⁴³ Nai³-na¹, nca³ cˀoa⁴nˀiaon²³ nca³ cˀoa⁴sˀiaon⁴³ je² xi³ vˀe²ne²-lai²⁴jin⁴. 
\p  
\v 5 Je² Nai³-na¹ ca²ta³tso²ya³-le⁴ ni⁴ma⁴-no³ cjoa⁴tjao²cha³-le⁴ Ni³na¹ cao⁴ cjoa⁴tse³jta³-le⁴ Cristo. 
\s1 Li²coi³ nta³ tjin¹ tsa² tsi² nˀion¹ si⁴xa¹ 
\p  
\v 6 To⁴nca³ cˀoa⁴sˀin² vˀe²ne²-lai²⁴jin⁴, ntsˀe³², xi³ tˀa³tsˀe⁴ jan³ˀain¹-le⁴ Nai³-na¹ Jesucristo, nca³ coi⁴ncha³xin²-lao⁴³ nca³tsˀi³ ntsˀe³² xi³ chˀao³sˀin² tjio¹ma³cao⁴ yao³-le⁴, xi³ tsi² tsa² cˀoa⁴sˀin² fi²cao⁴ jo³ tso² cjoa⁴fa³ˀai³tsjen³ xi³ jin⁴ tsa³cˀai²-lai⁴jin⁴. 
\p  
\v 7 Ti⁴jon² ˀya³-nio³ jo³sˀin² ma³chjen¹ nca³ chjen¹nqui³-na³jin⁴, nca³ tsi² tsa² chˀao³sˀin² tsa³nquin¹coai⁴-jin⁴ yao³-na⁴jin⁴ ya⁴jin³-le⁴ nca³ jon². 
\p  
\v 8 A³li² to⁴cjoa⁴tjao²-jin² tsa³qui³chi³⁴-jin⁴ nio⁴-le⁴ xi³cˀa³, to⁴sa³ nˀion¹ qui³ni²xai¹⁴-jin⁴ qui³ni²qui³jtai³⁴-jin⁴ yao³-na⁴jin⁴ nca³ ni⁴čhjin³ nca³ ni⁴tjen⁴, jme¹-ni³ nca³ ni⁴jnco³-jin² coan⁴chˀa¹ne²-si¹nio³. 
\p  
\v 9 A³li² tsa² tsin²-na³jin⁴ ˀnte³, to⁴nca³ cˀoa⁴sˀin² cˀoe¹jna³choa⁴ jnco³-lai²⁴jin⁴, jme¹-ni³ nca³ chjen¹nqui³-si¹ni³na³jin⁴. 
\p  
\v 10 Cˀia⁴ nca³ to⁴jo³ tsa³qui³yo³cao⁴-sa³lai²⁴jin⁴, cˀoa⁴sˀin² tsa³cˀe²ne²-lai²⁴jin⁴ je²-vi⁴: Tsa² jnco³ xi³ cai³-le⁴ si¹xa¹, cˀoa⁴²-ti⁴ tsi² coa⁴cjen⁴. 
\p  
\v 11 Qui³no²ˀya²-ni¹⁴jin⁴ nca³ tjio¹ma³jin³ cˀa³-no³ xi³ chˀao³sˀin² tjio¹ma³, ni⁴ˀi⁴tse¹-jin² si¹xa¹, cˀoa⁴ cjoa⁴sin³cjoa⁴ vˀe²ma³-ni³. 
\p  
\v 12 Je² xi³ cˀoa⁴cjoan³ vˀe²ne²-lai⁴jin⁴ vˀe²tsˀoa³-lai⁴jin⁴ nca³ ti³yo³coa⁴² Nai³-na¹ Jesucristo nca³ to⁴jvi³ ca²ta³si¹xa¹, cˀoa⁴ ca²ta³cjen² nio⁴ xi³ ti⁴tsˀe⁴-ni³. 
\p  
\v 13 To⁴nca³ jon², ntsˀe³², a³li² vi³jta³-jin²no³ nca³ nta³ nˀiaon²³. 
\p  
\v 14 Tsa² jnco³ xi³ tsi² si⁴²qui³tjo³son² en¹-na⁴jin⁴ xi³ tji¹tˀa³ xon⁴-vi⁴, cho¹tsen³-lao⁴³ je² cho⁴ta⁴-vi⁴, a³li² ya⁴-jin² ni²jnco³cao⁴³ yao³-no³, jme¹-ni³ nca³ coan⁴soa³-ni³le⁴. 
\p  
\v 15 To⁴nca³ a³li² tsa² jo³ co²ntran⁴-no³ ˀya³ta³con²³, to⁴nca³ cˀoa⁴sˀin² tˀin²ya³-lao⁴³ jo³-ni³ tsa² ntsˀao³. 
\s1 Cjoa⁴nta³ ca²ta³sˀe³-le⁴ nca³tsˀi³ 
\p  
\v 16 Ti⁴je²-ni³ Nai³-na¹ xi³ tsjoa¹ xi³ nchˀan¹ tjin¹ cˀoa⁴sˀin² ca²ta³si¹qui³njen³nchˀan¹jin³-no³ to⁴jme³-sa³ni³ve⁴ nca³ntsjai². Je² Nai³-na¹ ca²ta³vˀe²jna³cao⁴-no³ nca³tsˀio³. 
\p  
\v 17 An³ xi³ Pablo ˀmi²-na³ cao⁴ ntsa⁴ ti²cji³-ni³no³. Cˀoa⁴sˀin² yˀa³ choa⁴ nca³yi³je³ xon⁴ xi³ tsˀan⁴. Cˀoi⁴²sˀin² cjia³. 
\p  
\v 18 Je² cjoa⁴nta³-le⁴ Nai³-na¹ Jesucristo ca²ta³sˀe³-no³ nca³tsˀio³. Cˀoa⁴ ca²ta³ma³.