\id HEB  
\h Hebreos 
\toc1 Xujun xi camahindu xi cjuahatsja xuta xi visiajmi Hebreo 
\toc2 Hebreos 
\toc3 He. 
\mt1 Xujun xi camahindu xi cjuahatsja xuta xi visiajmi Hebreo 
\c 1  
\p  
\v 1 Nixtin titjun ne, jemu cjín ndiya hacuaha jemu cjín chuva rë xi casua Nina camachaya rë xutachanga naja ngu cjua hya xi catsingatju me cjua cojo profeta rë me.  
\v 2 Peru quihndë nixtin vihi ne, casua me camachaya naja hya xi catsingatju me cjua cojo Quihndi rë me. Hane me vëhë xi cachja Nina xi cuma Nai rë yëjë ni xcusun xi tjin ngasunhndë, hacuaha casuaxa Nina Quihndi rë me jan xi me vëhë casahmi me ngasunhndë.  
\v 3 Hacuaha sacuatjin jemu jyë hnga Nina cojo hasen ndajyihi rë me ne, cuatjin jyë hnga Quihndi rë me cojo hasen rë. Hacuaha sacuajyihi suvá Nina ne, cuajyihi camahani Quihndi rë me. Hacuaha Quihndi rë Nina jan ne, yahangui me yëjë ni xcusun xi tjin ngasunhndë cojo cjua rë me xi jemu hñu ngahñu rë. Hane xi cafë catsityjahi me xuta tsëhë jyë́ rë ne, sehe quiji me ngahnga, cavejña me taha ladu quixi tsëhë Nina. 
\s1 Hitsë sa matitjun Quihndi rë Nina xi cumá rë yëjë ni ángel 
\p  
\v 4 Hacuaha tu tjin xi hitsë sa jemu ndajyihi xa xi casacu rë Quihndi rë Nina xi cumá rë xa xi casacu rë ángel ne, hacuanitjin ni cavechutaha me xi hitsë sa jemu camatitjun me tsëhë ángel xi cuacun jan, hya xi quiji cavejña me cojo Nina.  
\v 5 Hisca xi ngu ángel ne, cachjaain Nina cojo cjua vihi, sacuatjin cachja me cojo Quihndi rë me: 
\q1 Ngaye xi quihndi naha ngaye; 
\q1 hacuaha quihndë casuáxa ri. 
\m Cuatjin cachja me. Hacuaha cachjaain me tsëhë ngu ángel cuitjin: 
\q1 Ngahan cumá ngahan nahmi rë cha, 
\q1 hane cha vëhë ne, cumá cha quihndi naha. 
\m Cachjaain me cuatjin cojo ángel.  
\v 6 Hane ngu ndiya nga, hya xi tsingatju me Quihndi ngu rë me ngasunhndë ne, cuitjin chja me tsëhë Quihndi rë me: 
\q1 Yëjë ni ángel naha ne, catjaharcun rë me. 
\m Cuatjin cachja me.  
\v 7 Hane xi tsëhë ángel rë me ne, cuitjin chja me: 
\q1 Ngahan sahme xi ángel naha ne, tangun xcusun rë cojo tjo, 
\q1 hane ángel xi fahacuenda xa naha ne, sahme xi tangun xcusun rë cojo ndihi. 
\m Cuatjin cachja me.  
\v 8 Peru xi tsëhë Quihndi rë me ne, cuitjin chja me: 
\q1 Ngayun Nina, tsajin nu tsajin nixtin cuijnetaha gubiernu nuju, 
\q1 hacuaha gubiernu xi nihñu ne, hatuxa cjuaquixi. 
\q1  
\v 9 Canihmutacun cjuaquixi hane choho cahyun cjuatsehen; 
\q1 hane vëhë xi ngahan Nina nuju ne, cavaxejen nuju, 
\q1 hacuaha hitsë sa jyë cjuasua casuá nuju ngayun 
\q1 xi cuma rë xingun. 
\m Cuatjin cachja me.  
\v 10 Hacuaha chja nga me cuitjin: 
\q1 Ngayun, Nai naha, ntsacu cavetsihin ne, ngayun canindujun nangui; 
\q1 hacuanitjin ni ngahnga, hacuaha ngayun canindujun. 
\q1  
\v 11 Yëjë xcusun vëhë ne, cuechu nixtin xi cjuë, 
\q1 peru ngayun ne, tsajin nu tsajin nixtin xi cjuë ngayun. 
\q1 Hacuaha yëjë xcusun vëhë ne, cuma changá sacuatjin rë ngu tsjian xi chajá rë; 
\q1  
\v 12 hacuaha cuechu nixtin xi nijeyun xcusun xi cuacun vë sacuaha ngu tsjian tsjanga, 
\q1 hacuaha nindeyun sacuaha vindeya ngu tsjian xi chajá rë. 
\q1 Peru ngayun ne, hatuxa vindeyaain ngayun; 
\q1 hacuaha nixtin nuju ne, hatuxa cuijnitaain. 
\m Cuatjin cachja me.  
\v 13 Hacuaha hisca ngu ángel ne, cachjaain Nina cojo rë cjua vihi, sacuatjin cachja me cojo Quihndi rë me: 
\q1 Tinechin nguehe ladu quixi naha, 
\q1 hisca hya xi yëjë ni xi sahmi ri condra ne, cuiyujú ngahan ngahma gubiernu riji. 
\m  
\v 14 Sacuaha ángel ne hacui hasen xi tsujyihiya tixa tsëhë Nina. Nina tsingatju me ángel xi cuacun vë xi fehe visecoo naja ngayaan xi cuetjuntjen tsëhë jyë́ naja. 
\c 2  
\s1 Mijí rë xi chasen cjuandajyihi xi chja hacutjin cuetjuntjen 
\p  
\v 1 Vëhë xi meje rë xi hitsë sa ndaja cuetahanrcun cjuandajyihi xi cavisiñuju, cojo sa xi hacuiin tu hitsë tu hitsë ne, cuetjunxen tsëhë ndiya ndajyihi xi tivanguen.  
\v 2 Ta sacuaha ley rë Nina xi cachja ángel hatsëë nixtin ne, tjin jain rë ngahñu. Hane yëjë xuta xi casahmi cjuatsehen hacuaha cahndiin me tsëhë ley jan ne, camá me castigu sacuatjin xi mameje rë jyë́ rë me.  
\v 3 Hacuaha ngayaan ne, cumaji cuatjuhnga ngayaan tsëhë castigu xi satë naja, sa xi chasen cjuandajyihi xi jercu tu ndajyihi camahani xi chja hacutjin cuetjuntjen. Cjuandajyihi vëhë ne, titjun Nai naja cachja me, hane xuta xi cahndë me cjua rë Nai naja ne, hacuanitjin ni cachja me cojo naja xi camá ngascan.  
\v 4 Hacuaha Nina ne, cojo jemu cjín cjuarcun xi ña quijircun naja hisca carcun cachutsejen ne, casua me camachaya naja xi cjuandajyihi vëhë ne, cjuaquixi jain. Hacuaha hya xi casua naja Nina Hasen rë me sacuatjin cavejñangucacun me ne, cuatjin xi casua me camachaya naja xi cjuandajyihi vëhë ne, cjuaquixi jain. 
\s1 Hacutjin vaxëtje naja cjuaveya rë Jesús 
\p  
\v 5 Nina ne, cachjaain me xi ngahma gubiernu rë ángel cuejña ngasunhndë, hya xi cuinduva me sahmi me gubiernu ngasunhndë xi tinújan tsëhë vi.  
\v 6 Tjin ngu cahndë́ tsëhë xujun rë Nina xi cachja ngu xuta cojo Nina cuitjin: 
\q1 ¿Mé vengui chjí niji ngayin xuta, xi cuatjin ninguitsjun niji? 
\q1 ¿Mé vengui chji niji xi cuatjin chjuhuncuendun niji? 
\q1  
\v 7 Ngayun ne, ngujo nixtin ne, hitsë sa caninguijnu niji xi cuma rë ángel, 
\q1 peru canihñu yehe canihñu hnga niji cojo cjuatacun niji hacuaha canihñu xi chjihinjendin; 
\q1  
\v 8 yëjë ni xcusun xi tjin ngasunhndë ne, caviyujun ngahma 
\q1 gubiernu niji ngayin xuta. 
\m Cuatjin cachja ngu xuta cojo Nina. Hya xi cuatjin caviyuju Nina yëjë xcusun xi cuacun vë ngahma gubiernu rë xuta ne, yëjë ni caviyuju me, hisca ngu xcusun catsicanguiin me. Peru hisca quihndë ne, cjëë chan xi yëjë xcusun xi cuacun vë ne, cuiyuju ngahma gubiernu rë xuta.  
\v 9 Peru xi hyan ne, Jesús, xi ngu jo nixtin ne, hitsë sa catsinguijne Nina me xi cumá rë ángel, peru quihndë ne, casahmi jyë casahmi hnga Nina me cojo hasen rë me hacuaha casahmi me xi Jesús ne, cjuahájenda me. Cuatjin casahmi Nina cojo rë me tsëhë xi jemu jyë cjuañihi cavatju me hya xi cahme me. Cuatjin camá cojo sa xi cojo cjuandaja rë Nina ne, Jesús cueya me ngatsë rë yëjë ni xuta. 
\p  
\v 10 Nina ne, casahmi me yëjë ni xcusun xi tjin, tsëhë xi cuatjin chuya rë me. Hacuaha meje rë me xi jemu cjín quihndi rë me xi cuma yehe cuma hnga cojo cjuatacun rë. Vëhë xi ndatjin xi sahmi Nina xi ngajñi rë cjuañihi xi cavatju Jesús, me xi vaxëtje naja ne, cuechutaha me yëjë ni hacutjin xi meje rë Nina xi cuechutaha me.  
\v 11 Me xi tiviyujuxin rë xuta xi cumá tsëhë Nina me cojo yëjë ni xuta xi tiviyujuxin ne, ngu ni nahmi rë me. Hane vëhë xi me xi Quihndi rë Nina ne, ma savaain rë me xi chja me xi xicjin me xuta xi cuacun jan,  
\v 12 sacuatjin chja me xcun xujun rë Nina xi chja me cuitjin: 
\q1 Suá cumachaya rë yëjë xingueen yo ngayun, 
\q1 hacuaha cuaxëndaja nuju së́ tsujun ngajñi rë me hiscan xi matangun me. 
\m Cuatjin cachja Quihndi rë Nina.  
\v 13 Hacuaha chja nga me cuitjin: 
\q1 Hacuaha ngayun xi cumangu cácun cojo nuju. 
\m Cuatjin cachja nga me. Chja nga me cuitjin: 
\q1 Nguehe cuajyihi ngahan cojo yëjë quihndi nuju xi catuhun ná. 
\m Cuatjin cachja me. 
\p  
\v 14 Tsëhë xi ngayaan quihndi rë Nina ne, tjin jni tjin yojo naja ne, vëhë xi Jesús ne, hacuaha casacu rë me jni casacu rë me yojo rë me, cojo sa xi ngatsë rë cjuaveya rë me ne, cjuahataha me ngahñu rë xitsehen xi matitjun xi vitexa rë cjuaveya.  
\v 15 Hacuaha ngatsë rë cjuaveya rë me ne, ma sahmi ndaya naja me ngayejen ni xuta xi rcun cjuaveya. Hane tsëhë xi cuatjin rcun cjuaveya ne, vëhë xi sacuaha xi cjuaveya ne, cavitexa naja xcun cjuahñu naja.  
\v 16 Ha cjuaquixi ta hacuiin canduva me xi cuisecoo me ángel ta xi canduva me ne, tsëhë xi cuisecoo naja me ngayaan xuta tjë rë Abraham.  
\v 17 Hane ngatsë rë vëhë xi casahmi ngujyë xi camá me sacuaha ngayaan cojo ngayëjë ni chuva rë sacuatjin cun ngayaan xicjin me, cojo sa xi hacuaha cuma me ngu nahmi xi matitjun xi tjin rë me cjuayumatacun, hacuaha jemu ndaja sahmichihin me xa rë Nina, hacuaha cojo sa xi cuechjitje me jyë́ naja.  
\v 18 Hane tsëhë xi cuatjin suvá Jesús cavatju me cjuañihi hya xi cafahachuva xitsehen me ne, vëhë xi quihndë ne, hacuaha cuma cuisecoo naja me ngayaan hya xi tifahachuva naja xitsehen. 
\c 3  
\s1 Hitsë sa jyë hnga Jesús cojo hasen rë me xi cumá rë Moisés 
\p  
\v 1 Ngayujun ni xuta ladu rë Nina xi cavaxijin nuju me xi cuma tsëhë me ngayun ne, cuisiajme hitsë tsëhë Jesús, me xi catsingatju Nina xi sua cumachaya naja tsëhë cjuachacun xi nújan xi macjain naja, me xi hacuaha má nahmi xi matitjun tsëhë cjuachacun xi nújan xi macjain naja.  
\v 2 Jesús ne, jemu ndaja casahmichihin me yëjë hacutjin xi meje rë Nina xi casuaxa rë me, sacuatjin casahmi xutachanga naja Moisés hatsëë xi hacuaha jemu ndaja casahmichihin me xa xi cavisecoo me xuta rë Nina.  
\v 3 Jesús ne, vechú chuva rë xi hitsë sa cuma jyë cuma hnga me cojo hasen rë me xi cuma rë Moisés. Má sacuatjin rë ngu cha xi sahmi ngu ndihya, xi vechú chuva rë xi hitsë sa chjaharcun rë cha xi cuma rë ndihya xi casahmi cha jan ta,  
\v 4 tsëhë xi yëjë ni ndihya ne, tjin ngu xuta xi casahmi me, vëhë xi camá, peru me xi casahmi yëjë ni xcusun xi tjin ngasunhndë ne, hacui Nina.  
\v 5 Moisés ne, ngu xuta xi sahmi xa rë Nina ni má me, hane jemu ndaja chihin casahmi me xa xi casatëxa rë me ngajñi rë yëjë ni xuta rë Nina. Hane xa xi casahmi me jan ne, xi catsingasca rë me cjuatacun rë xuta tsëhë cjua xi cuichja Nina cuma ngascan.  
\v 6 Peru Cristu ne, Quihndi rë Nina camahani má me, hane jemu ndaja chihin casahmi me cuidadu yëjë ni xuta rë Nina. Xuta xi cuacun vë ne, hacui ngayaan, sa xi hacuiin nismetacun cjuatacun xi rcun camahani hacuaha sa xi hacuiin nismetacun cjuasua xi tjin rë xahasen naja xi vetahan tacun Nina. 
\s1 Cjuahajenda tangun xuta rë Nina cojo rë me 
\p  
\v 7 Vëhë xi meje rë xi cuetuhunrcun cjua xi chja Hasen rë Nina xi chja cuitjin: 
\q1 Sa xi cuisiñuju cjua xi chjá quihndë ne, 
\q1  
\v 8 hacuiin nihñu taja tacún sacuatjin casahmi xuta hya xi cachjataha me Moisés 
\q1 hacuaha cafahachuva ná me ngajan hiscan jemu xín tsëhë nandya. 
\q1  
\v 9 Hane ngajan cafahachuva ná xutachanga nuju, 
\q1 handasa ha cavëë me yëjë cjuandaja xi casahme cahntsua yachan nu xi catsujyihiya me jan. 
\q1  
\v 10 Vëhë xi camacjan ná cojo yëjë xuta xi caviyuju nixtin hya, 
\q1 cuitjin cachjá tsëhë me: “Cjuatacun rë me ne, hatuxa hacjahi ndiya fi, 
\q1 hvíin me ndiya naha.” Cuatjin cachjá. 
\q1  
\v 11 Vëhë xi camacjan ná cojo rë me hane cachjá quixi xi 
\q1 tsajin nu tsajin nixtin xi cuisehen cjuahajenda tangun me cojo ná. 
\m Cuatjin cachja Hasen rë Nina. 
\p  
\v 12 Nechun cuidadu, ngayujun ni, cojo sa xi tsajin hisca ngu ngayun xi cumatsehen cjuatacun nuju hacuaha cumacjaain nuju tsëhë me, sa tu cjuatacun tsehen jan ne, cuaxëxin nuju tsëhë Nina xi quicun me.  
\v 13 Cahndë́ rë vëhë ne, nchunchujun ni ne, tuhun cjuetacun xingun xingu xingu ngayun jinguyëjë rë xi tjin sa hora quihndë, cojo sa xi tsajin ngu ngayun xi cuma taja cjuatacun nuju ngatsë rë cjuandacha xi sahmi cjuatsehen.  
\v 14 Ta cojo ngayaan satë naja cjuandaja xi tjin rë Cristu, sa xi scaa jain naja cumangutacun hisca xi cuijnetaha nixtin naja, sacuatjin camangutacun ntsacu cavetsihin. 
\p  
\v 15 Tetuhunrcun nga sacuatjin chja xujun rë Nina xi chja cuitjin: 
\q1 Sa xi cuisiñuju cjua xi chjá quihndë ne, 
\q1 hacuiin nihñu taja tacún sacuatjin casahmi xuta hya xi cachjataha me Moisés. 
\m Cuatjin chja xujun rë Nina.  
\v 16 ¿Yo me xi cuatjin cachjataha rë Moisés hya xi cavatju cavisiñuju me cjua rë Nina ni? Yëjë ni xutachanga naja xi cavaxëxin Moisés tsëhë nangui Egipto.  
\v 17 Hane ¿yo me xi camacjan rë Nina cojo rë cahntsua yachan nu ni? Ha hacui ni me changá xi cuacun vë xi casahmi cjuatsehen hane cahme me ngajan hiscan jemu xín tsëhë nandya.  
\v 18 Hane ¿yo me xi cachja quixi Nina cojo xi tsajin nu tsajin nixtin xi cuisehen cjuahajenda tangun cojo me ni? Ha hacui ni me changá xi cuacun vë xi cahndiin tsëhë Nina.  
\v 19 Hane cuatjin camá xi camaji cavisehen cafahajenda me ngajan, tsëhë xi camacjaain rë me. 
\c 4  
\p  
\v 1 Vëhë xi jinguyëjë rë xi tacun quicun cjua xi cachja Nina xi cuisen chjahanjendan tangun cojo rë me ne, meje rë xi cumacjíntacun sá tu tjin ngu ngayun xi cuechuntuun xcusun ndajyihi vëhë.  
\v 2 Ngayaan ne, hacuaha cojo ngayaan camachaya naja cjuandajyihi vëhë sacuatjin camachaya rë xutachanga naja xi cuacun jan; peru me xi cuacun jan ne, tsajin mé camachjirëhë rë me cjua xi cavisiñuju me jan ta, tsëhë xi hya xi cavisiñuju me cjua jan ne, camacjaain rë me.  
\v 3 Peru ngayaan xi camacjain naja ne, cuma cuiseen chjahanjendan tangun cojo rë Nina. Sacuatjin xi ha cachja me tsëhë cjuandajyihi vëhë, xi cachja me cuitjin: 
\q1 Vëhë xi camacjan ná cojo rë me hane cachjá xi 
\q1 tsajin nu tsajin nixtin xi cuisehen cjuahajenda tangun me cojo ná. 
\m Cuatjin cachja me. Nina ne, catsinguijnetaha me xa xi sahmi me hisca hya xi casahmi me ngasunhndë;  
\v 4 hacuaha tjin ngu cahndë́ tsëhë xcun xujun rë me ne, cachja me tsëhë nixtin xi má yatu jan cuitjin: 
\q1 Ngahan ne, nixtin xi má yatu ne, cafahájenda tsëhë yëjë ni xa xi casahme. 
\m Cuatjin cachja me.  
\v 5 Hacuaha ha xujun vëhë ni ne, cachja nga me cuitjin: 
\q1 Tsajin nu tsajin nixtin xi cuisehen cjuahajenda tangun me cojo ná. 
\m Cuatjin cachja me.  
\v 6 Hane tsëhë xi chaja sa cuisehen yahnga xuta xi cjuahajenda tangun me cojo Nina ne, hacuaha tsëhë xi xutachanga naja xi cojo tjun camachaya rë cjuandajyihi jan ne, cavisiin me cafahajenda tangun me, ngatsë rë xi cahndiin me tsëhë cjua xi tjun camachaya rë me jan ne,  
\v 7 vëhë xi Nina ne, cavejña nga me ngu nixtin, xi hacui quihndë. Jemu tsëë cavatju nixtin xi cavitexa Moisés, hya xi catsihindu xutachanga naja David cjua rë Nina xi ha canújan titjun xi chja cuitjin: 
\q1 Sa xi cuisiñuju cjua xi chjá quihndë ne, 
\q1 hacuiin nihñu taja tacún. 
\m Cuatjin cachja Nina.  
\v 8 Sa xi xutachanga naja Josué quijicojo me xuta xi cjuahajenda tangun cojo Nina ne, Nina ne, hacuaha cachjaain me xi camangascan xi tjin sa ngu nixtin xi cuiseen chjahanjendan tangun cojo rë me.  
\v 9 Ngajan xi tjin sa ngu nixtin xi cuisehen xuta rë Nina cjuahajenda tangun me cojo Nina.  
\v 10 Ta xuta xi visehen fahajenda tangun cojo Nina ne, hacuaha fahajenda me tsëhë xa xi casahmi me sacuatjin cafahajenda Nina tsëhë xa xi casahmi me.  
\v 11 Ngajan xi meje rë xi nihña ngahñu xi cuma cuiseen chjahanjendan cojo rë Nina, cojo sa xi hisca ngu ngayaan ne, hacuiin nihña sacuatjin casahmi xuta xi cahndiin me tsëhë Nina. 
\p  
\v 12 Cjua xi chja Nina ne, quicun jain, hacuaha jemu tjin rë ngahñu, hatuxa vetjucaa. Sacuaha xi hitsë sa yuju xi cumá rë quicha xi jo yuju rë, xi vatjucja rë hisca hasen naja, hacuaha handasa hiscan hinchacoo ninda naja ne, cuatju, cuechu hisca ngajñi rë xineninda naja. Cjua xi chja Nina jan ne, vëë hacutjin ningatahantacun, hacuaha vëë hacutjin má rë xahasen naja. 
\p  
\v 13 Hisca ngu xcusun xi Nina catsindaja me ne, cumaji chahma xi cumá rë me; yëjë ni xcusun vëhë ne, tjin tsejen xi cuma rë Nina, me xi tahancuendan rë yëjë ni xcusun xi canihña. 
\s1 Jesús ne, hacui me xi má nahmi xi matitjun 
\p  
\v 14 Jesús, Quihndi rë Nina ne, hacui me xi nahmi xi matitjun xi tjin naja. Jemu ndaja camahani me, hacuaha cavatjutaha me ngahnga, sehe cavechu me xcun Nina. Vëhë xi meje rë xi hacuiin nismetacun cjuachacun xi nújan xi macjain naja. Cuatjin meje rë ta,  
\v 15 tsëhë xi nahmi xi matitjun xi tjin naja ne, ma mayuma rë me ngayaan xi jemu chuva tacun ta, tsëhë xi me vëhë ne, hacuaha cavatju me camá yëjë ni cjuacjintacun sacuatjin vatjun ngayaan má. Peru handasa cuatjin cavatju me camá ne, hisca ngu cjuatsehen ne, casahmii me.  
\v 16 Vëhë xi meje rë xi rcun camahani xi nihña tiña tsëhë Nina, me xi sahmi naja gubiernu cojo cjuandaja. Nihña tiña cojo sa xi chjahanntsan cjuayumatacun rë me, hane hacuaha sacú naja cjuandaja rë me xi cuisecoo naja hora xi mameje rë. 
\c 5  
\p  
\v 1 Yëjë ni nahmi xi matitjun xi tuxijin rë ngajñi rë xuta ne, satë xa rë me xi visecoo me xuta, cojo sa xi sahmi tiña xuta tsëhë Nina. Hacuaha nahmi xi cuacun vë ne, satëxa rë me xi sua me yëjë ni xcusun cjuatjo cojo Nina ngatsë rë cjuatsehen xi sahmi xuta.  
\v 2 Nahmi xi cuacun vë ne, ma tsijyëcacun me cojo xuta xi hvíin camahani hacuaha cachaja tsëhë ndiya rë Nina ta, tsëhë xi nahmi vë ne, hacuaha chuva cacun me.  
\v 3 Vëhë xi tjin rë me xi sua me cjuatjo cojo Nina ngatsë rë cjuatsehen xi casahmi suvá me, cojo ngatsë rë cjuatsehen xi casahmi jingu sa xuta. 
\p  
\v 4 Tsajin ngu xuta xi cojo cjuatacun rë suvá ni me ne, cjuaha me ngu xa ndajyihi vëhë ta me xi cjuaha ne, me xi suvá Nina cuichja me xi satë rë, sacuatjin cavatju xutachanga naja Aarón camá.  
\v 5 Hacuanitjin ni rë Cristu ta, hacuiin casahmi jyë casahmi hnga suvá me yojo rë me xi cuma me ngu nahmi xi matitjun ta me xi cachja xi cuma me nahmi ne, hacui Nina, xi cachja me cuitjin: 
\q1 Ngaye xi quihndi naha ngaye; 
\q1 hacuaha quihndë casuá xa ri. 
\m Cuatjin cachja Nina.  
\v 6 Hacuaha chja me jingu sa cahndë́ tsëhë xujun rë me cuitjin: 
\q1 Ngaye xi nahmi ngaye yëjë nu yëjë nixtin 
\q1 sacuaha camá Melquisedec hatsëë nixtin. 
\m Cuatjin cachja Nina.  
\v 7 Hane jinguyëjë rë xi Cristu tacun sa me cjuahñu cojo yojo rë me ne, hora xi cafehya rë me Nina, Nina xi tjin rë chuva rë xi cuaxëtje rë me tsëhë cjuaveya ne, jercu cajindaya me hacuaha jercu cajihnda me. Hane cafahacuenda Nina cjua rë me ta, tsëhë xi jemu cafaharcun me Nina.  
\v 8 Cristu ne, handasa Quihndi rë Nina me xi cjuaquixi, peru cjuañihi xi cavatju me camá nguehe ngasunhndë ne, vëhë hitsë sa cavicuya rë me mé vijne xi nuhyan tsëhë Nina.  
\v 9 Hane xi cuatjin casahmi Nina xi cavechutaha Jesús yëjë ni hacutjin xi meje rë Nina xi cuechutaha me ne, vëhë xi Jesús ne, ma vaxëtje me yëjë ni xuta xi vihndë tsëhë me, hacuaha tsajin nu tsajin nixtin xi cuatju xuta xi cuacun vë castigu. 
\p  
\v 10 Hane hacuaha Nina casuaxa me Jesús xi má me nahmi xi matitjun sacuaha camá Melquisedec hatsëë nixtin. 
\s1 Mijí rë xi nismetacun ndiya rë Nina 
\p  
\v 11 Sacuaha tsëhë cjuatacun vëhë ne, jemu tjin cjua xi cuinújin cojo nuju, peru jemu chja cuátjin xi tihincuendin nuju ta, tsëhë xi hacuiin ndaja meje cuisiñuju.  
\v 12 Ngayun xi ha jemu tsëë nduvun chutayun cjua rë Nina ne, ha tivicuyun rë xuta cjua rë Nina. Peru cahndë́ rë xi ha tivicuyun ne, tu ngayun meje rë ngu xi cuicuya nga nuju cjua xi tjun tjun chutaya rë tsëhë cjua rë Nina. Sacuaha xi mameje rë xi cuyun siuhun nga lechi, cahndë́ rë xi xinu niñu.  
\v 13 Sacuaha quihndi langa ne, vëhë xi suvá lechi hvi, hacuaha hvíin camahani mé xi ndaja o mé xi ndajin.  
\v 14 Peru sacuaha niñu xi chinë ne, xuta changá xi jinë me, xuta xi ha vëë me mé xi ndaja mé xi ndajin ta, tsëhë xi cjuatacun rë me ne, ha jemu nduva sahmixa. 
\c 6  
\p  
\v 1 Quihndë ne, meje rë xi cuejñaxen hitsë cjuachacun xi cachutayan hya xi tjun tjun camangutacun cojo Cristu, hane chutayan jingu sa cjua xi hitsë sa chja, cojo sa xi cuejñachihin ndaja cjuatacun naja. Mijí rë xi cuyan chutayan nga cjua xi ha cama naja titjun, sacuaha cjua xi chja xi meje rë xi cuejñaxen rë yëjë xcusun xi machjiriin xi nihña; sacuaha cjua xi chja xi meje rë xi cumangutacun cojo Nina;  
\v 2 sacuaha cjua xi chja xi meje rë xi cuma tyjahi vihi cuma tyjahi vëhë xi cuma rë Nina; sacuaha cjua xi chja xi meje rë xi cuisanentsan ngu xuta; sacuaha cjua xi chja xi cuya nima cjuahñu; sacuaha cjua xi chja xi cuechu nixtin xi Nina ne, tsichuva naja me ngayejen ni cojo cjuatacun naja.  
\v 3 Vëhë xi quihndë ne, cuejñaxen hitsë cjua xi cuacun vë, hane chutayan jingu sa cjua xi hitsë sa chja cuijnercuun, sa xi sua Nina cahndë́. 
\p  
\v 4 Xuta xi ha cavisehen cjuahasen rë Nina ngajñi rë cjuatacun rë me ne, hacuaha casacu rë me hitsë cjuandaja xi Nina sua me, hacuaha cavisehen Hasen rë Nina cahntsua xahasen rë me,  
\v 5 hacuaha cavejña rë me hitsë cjuandajyihi rë Nina, hacuaha camachaya rë me hitsë cjuarcun xi hitsë sa rcu cjín cuma nixtin xi sehe nduva.  
\v 6 Sa xi xuta xi cuacun vë tsismicacun me ndiya rë Nina ne, cumaji cuisecoon rë me xi tsindeya me cjuatacun rë me ngu ndiya nga ta, xcusun xi tisahmi me ne, titsixcuehyu me Quihndi rë Nina, sacuaha xi tivuya tivetaha suvá me me xcun cru.  
\v 7 Xuta xi cuacun vë ne, tangun me cojo nangui xi hvi rë tsi xi vaha xcun: sa xi nangui vëhë ma ngu xcusun xitjë xi cumachjirëhë rë xuta xi nai rë ne, tsinchacun Nina nangui vëhë;  
\v 8 peru sa xi suvá nahyá cuetju xcun nangui vëhë ne, venguiin camahani chjí rë. Hacuaha choho cuichja Nina cojo, hane hiscan xi cuijnetaha ne, cueti. 
\s1 Cuanguen nduju cuetahantacun Nina 
\p  
\v 9 Peru handasa cuatjin nújin cojo nuju, ngayujun ni xi jemu hmutacuin nuju ne, peru ha hyin cojo cjuatacun niji xi ngayun ne, ndaja tivatjun tijima, cuma cuinújan ne, ha tivanguncujun ndiya xi cuaxëtje nuju.  
\v 10 Nina ne, quixi me cojo cjua rë me. Vëhë xi tsichayaain me yëjë xcusun xi canihñu, hacuaha tsichayaain me cjuahmutacun xi camatsejen xi tjin nuju cojo rë me, hya xi cavisecun rë xuta ladu rë me, sacuatjin xi tinihñu hisca quihndë.  
\v 11 Xi meje niji ngayin ne, jima ngu ngayun ne, hacuanitjin ni tinechun ngunajatacún jinguyëjë rë xi nechun cjuahñu, cojo sa xi sacú nuju yëjë cjuandaja rë Nina xi vetuhun tacun.  
\v 12 Hacuaha meje niji xi hacuiin cuma tsëhë́ ngayun ta xi meje niji ne, nihñu sacuatjin sahmi xuta xi ngatsë rë xi jemu ndaja ticaa rë me xi mangucacun me cojo Nina ne, vëhë xi tifahatsja me cjuandaja xi ha cachja Nina xi sacú rë me. 
\p  
\v 13-14 Hya xi cachja quixi Nina cojo Abraham xi sua rë me ngu cjuandaja ne, tsëhë xi ha quihndë tsajin sa yo xi matitjun xi cuma rë Nina ne, vëhë xi cachja me cuitjin: “Ngahan suva hvë xi cjuaquixi xi tsinchácun ri, hacuaha jemu cjín sahme ri cojo xuta riji.” Cuatjin cachja me.  
\v 15 Hane xi cuatjin cacaa rë Abraham cavejñaya me cojo cjuajeya cjua xi cachja Nina ne, cavechu nixtin xi casacu jain rë me cjuandaja xi ha cachja Nina xi sua rë me.  
\v 16 Hya xi ngu xuta sua me ngu cjua rë me xi cjuaquixindaja ne, hisca veyanangui me ngu xi hitsë sa matitjun xi cumá rë me, xi hacui Nina; hane hya xi jo xuta tisua cjua rë me ne, sa xi cuetjujñi ngu me xi cuacun vë xi cuichja me: “Vëë Nina jain xi quixi” ne, ngajan ma chihin cjuavisiajmi rë me.  
\v 17 Vëhë xi hya xi cachja Nina xi sua rë me Abraham ngu cjuandaja ne, cuitjin cachja me: “Ngahan suva hvë.” Cuatjin cachja me cojo sa xi ngayaan xi chjahanntsan cjuandaja vëhë ne, cumachayandaja naja ta Nina ne, hya xi cuichja me ngu cjua ne, tsindeyaain me cjuatacun rë me.  
\v 18 Cuatjin cachja Nina cojo sa xi jercu ndaja sacú naja cjuetacun ngatsë rë jo xcusun xi hatuxa cumaji cuindeya. Ngu xcusun jan ne, hacui suvá Nina, hane xi ma jo jan ne, hacui cjua xi cachja me cojo Abraham. Hacuaha Nina ne, hatuxa maji vindacha me. Hane ngayaan xi vetahan tacun Nina ne, sacú naja cjuetacun vëhë, cojo sa xi cumangutacun cojo cjua xi Nina cachja me xi cuechu nixtin xi cuiseen chjahanjendan tangun cojo rë me.  
\v 19 Hane xi cuatjin vetahan tacun Nina ne, tsajin camahani mé cuma rë hasen naja, hacuaha cuma cuechun hisca hiscan tacun Nina,  
\v 20 hiscan xi quiji Jesús cavuxaha me ndiya tsajan. Hane Nina casua xa me Jesús xi camá Jesús nahmi xi matitjun xi tsajin nu tsajin nixtin xi cjuë xa rë me, sacuaha camá Melquisedec hatsëë nixtin. 
\c 7  
\s1 Jesús ne, má me nahmi sacuaha camá Melquisedec 
\p  
\v 1 Melquisedec vë ne, matitjun me tsëhë nandya Salem, hacuaha má me nahmi xi sahmi me xa tsëhë Nina xi hatuxa jyë hnga cojo Hasen rë. Hane hya xi cavuya Abraham xi quiji cavaxëtje me quihndi rë hntsë me tsëhë condra rë ne, cavetju Melquisedec tsëhë nandya Salem quijitjengui me Abraham hiscan nduva, hane xi casacu xicjin me ndiya ne, catsinchacun Melquisedec Abraham.  
\v 2 Hya xi camá ne, të cahndë́ cavatëcja Abraham yëjë ni xcusun xi camá sa cafaha me tsëhë xuta xi cuacun condra jan ne, casua rë me Melquisedec ngu cahndë́ tsëhë të cahndë́ jan, tsëhë xi Abraham ne, faharcun me Nina. Ñihi xi Melquisedec ne, meje cuichja “ngu me xi matitjun xi vitexa cojo yëjë ni cjuaquixi”; hacuaha ñihi xi chja Me xi Matitjun tsëhë Salem ne, meje cuichja “ngu me xi matitjun xi vitexa cojo yëjë ni cjuajeya.”  
\v 3 Xcun xujun rë Nina ne, tsajin camahani hiscan xi chja tsëhë naa tsëhë nahmi rë Melquisedec. Hisca tsëhë xutachanga rë me ne, tsajin hiscan xi chja. Hacuaha chjaain hacutjin catsin me ne, chjaain hacutjin cahme me. Cuatjin xi Melquisedec ne, meje tangun me cojo Quihndi rë Nina, tsëhë xi hacuaha ngu nahmi má me xi tsajin nu tsajin nixtin fë xa rë me. 
\p  
\v 4 Chutsujun hacutjin jercu vengui chjí rë Melquisedec, xi hisca xutachanga naja Abraham ne, casua me me ngu cahndë́ tsëhë yëjë xcusun xi cavatëcja me të cahndë́ jan.  
\v 5 Ley xi casua Nina rë Moisés xi camá ngascan ne, chja ta nahmi xi nduva tjë rë Leví ne, tjin rë me chuva rë xi cjuehya me cojo naja ngayaan xuta tjë rë xuta Israel xi cuichancjan të cahndë́ yëjë ni xcusun xi tjin naja, cjuaha nahmi vëhë ngu cahndë́ tsëhë të cahndë́ jan. Cuatjin chja ley rë Moisés xi cuechjen diezmu naja, handasa xicjin nahmi jan má ngayaan, hacuaha tjë rë Abraham ngayejen ni.  
\v 6 Melquisedec ne, handasa hacuiin tjë rë Leví má me, peru cafahatsja me ngu cahndë́ tsëhë xi camá të cahndë́ jan, xi casua Abraham. Hacuaha catsinchacun Melquisedec Abraham, me xi ha cachja Nina xi sacú rë cjuandaja.  
\v 7 Ngayejen ni ne, ha hyan ta me xi tsinchacun ne, me vëhë xi matitjun me tsëhë me xi manchacun.  
\v 8 Nguehe xcun cjuahñu naja vi ne, nahmi xi fahatsja me diezmu tsëhë yëjë xcusun xi ticja të cahndë́ ne, hacuaha xuta ngayaan ni me xi hacuaha hme me; peru xcun xujun rë Nina ne, chja tsëhë Melquisedec sacuaha xi tacun cuaha me.  
\v 9 Nahmi xi nduva tjë rë Leví xi hacuaha cojo me tifahatsja me diezmu ne, cuma cuinújan ne, sacuaha xi cojo me cavechji me diezmu rë me hya xi casua Abraham cojo Melquisedec jan diezmu rë me.  
\v 10 Cuatjin sacuaha xi cavechji nahmi xi cuacun jan ta, tsëhë xi Abraham ne, ha cojo tjë xi cuacun vë yaha me hya xi casua me diezmu rë me cojo Melquisedec. 
\p  
\v 11 Xuta Israel ne, cafahatsja me cjua xi chja hacutjin meje rë Nina xi sahmi yëjë xuta xi tjë rë Leví xi sahmi me xa sacuaha nahmi. Quihndë ne, sa xi nahmi xi cuacun vë camá casahmi me xi cavechutaha xuta yëjë ni hacutjin xi meje rë Nina xi sahmi me ne, ha quihndë hacuiin sahmi ngujyë xi cuetjujñi sa ngu nahmi xi hacjahi xcusun rë, ngu nahmi xi hacuiin tangun xcusun rë cojo Aarón ta ngu nahmi xi tangun xcusun rë cojo Melquisedec.  
\v 12 Hane hya xi vindeya xcusun rë xa xi sahmi nahmi ne, hacuaha hatuxa vindeya ley xi vitexa rë me.  
\v 13 Hane Nai naja, me xi cuatjin chja xujun rë Nina tsëhë ne, hacjahi tjë me, hane sacuaha tjë vëhë ne, hisca ngu nahmi cjëë cuetjujñi me.  
\v 14 Hacuaha ha hyan ta Nai naja ne, tsëhë tjë rë Judá canduva me, hane Moisés ne, cachjaain camahani me xi tjë vëhë ne, ngajan cuetjujñi ngu nahmi. 
\p  
\v 15 Yëjë cjua xi tinújan vi ne, tsejen xi jemu cjuaquixi, hya xi vetjujñi sa ngu nahmi sacuaha Melquisedec.  
\v 16 Hane nahmi xingu jan ne, hacui Nai naja, me xi cavechutaha xi camá nahmi, hacuiin ngatsë rë ngu ley xi chja yo tjë rë xi cuma nahmi ta ngatsë rë ngahñu rë ngu cjuahñu xi tjin rë me xi tsajin nu tsajin nixtin vetsun. Ngatsë rë vëhë xi cavechutaha me xi camá me nahmi. 
\p  
\v 17 Hacuaha Nina ne, cuitjin chja me tsëhë Nai naja: 
\q1 Ngaye xi nahmi ngaye yëjë nu yëjë nixtin 
\q1 sacuaha camá Melquisedec hatsëë nixtin. 
\m Cuatjin cachja Nina.  
\v 18 Sacuaha cjua rë ley xi cavitexa titjun ne, cavetsunya, tsëhë xi hatuxa tsajin rë ngahñu hacuaha machjiriin ta,  
\v 19 tsëhë xi camaji casahmi xi cavechutaha xuta yëjë ni hacutjin xi meje rë Nina xi cuechutaha me. Hane cahndë́ rë ley vëhë ne, vetahan tacun ngu cjua xi hitsë sa ndajyihi, hane ngatsë rë xi cuatjin vetahan tacun ne, vëhë xi nihña tiña tsëhë Nina. 
\p  
\v 20 Hya xi casua xa Nina Jesús xi cuma me nahmi xi matitjun ne, cachja me cjua vihi: “Ngahan suva hvë.” Cuatjin cachja me. Peru hya xi cafaha xa nahmi xi yahnga jan ne, cachjaain Nina: “Ngahan suva hvë.”  
\v 21 Peru sacuaha tsëhë Nai naja ne, xujun rë Nina ne, cuitjin chja: 
\q1 Nai naja ne, cachja me cjua vihi: “Ngahan suva hvë.” Cuatjin cachja me, 
\q1 hacuaha tsajin hora tsindeya me cjuatacun rë me xi cachja me cjua vihi: 
\q1 “Ngaye xi nahmi ngaye yëjë nu yëjë nixtin 
\q1 sacuaha camá Melquisedec.” 
\m Cuatjin cachja me.  
\v 22 Hane xi cuatjin casua xa Nina Jesús xi camá me nahmi xi matitjun tsajan ne, vëhë xi sacu naja cjuaquixindaja xi Nina ne, sahmichihin jain me compromisu xi sehe tisahmi me. Hane compromisu vëhë ne, hitsë sa ndajyihi xi cuma rë xi casahmi me titjun.  
\v 23 Sacuatjin rë nahmi xi yahnga jan ne, sacuiin rë me cahndë́ xi cjuenduju me sahmi me xa yëjë nu yëjë nixtin ta, tsëhë xi hatuxa hme me. Vëhë xi hisca ntsacu cavetsihin hisca quihndë ne jemu cjín camá me cojo yëjë sa tjë rë me xi yahnga xi hacuaha camá nahmi.  
\v 24 Peru Jesús ne, tsëhë xi tsajin nu tsajin nixtin xi cueya me ne, vëhë xi hacuaha tsajin nu tsajin nixtin xi jingu sa cjuahatsja xa rë me xi má me nahmi.  
\v 25 Vëhë xi ma vaxëtje me xuta xi sahmi tiña tsëhë Nina ngatsë rë xi camangucacun xuta jan cojo Jesús. Hane hya xi vaxëtje me xuta xi cuacun vë ne, ha quihndë tsajin nu tsajin nixtin xi cumameje nga cuetjutje me ta, tsëhë xi Jesús ne, tacun me yëjë nixtin xi cjuehya rë me Nina ngatsë rë xuta xi cuacun vë. 
\p  
\v 26 Jemu ndatjin xi tjin naja ngu nahmi xi matitjun xi cuatjin xcusun rë me. Jesús, nahmi xi matitjun jan ne, jemu tyjahi me, tsajin rë me cjuatsehen, tsajin mé jyihi mé má me, cavetjuxin me tsëhë xuta tsehen, quiji me hisca ngajan sa tsëhë ngahnga.  
\v 27 Me vëhë ne, hacuiin tangun me cojo nahmi xi matitjun xi yahnga jan ta, me vëhë ne, tsajin mé má xi cojo me nchunchujun ni sua rë me Nina ngu chu xi cahme ngatsë rë jyë́ rë suvá me, hane xi cuma ngascan ne, sua nga me ngu chu xi cahme ngatsë rë jyë́ rë xuta. Jesús ne, ngu ndiya ni casua me ngu cjuatjo cojo Nina ngatsë rë jyë́ rë xuta, hya xi casua me yojo rë me xi cahme me.  
\v 28 Sacuaha ley rë Moisés ne, sua xa rë xuta xi cuma me nahmi xi matitjun tsëhë yëjë ni nahmi. Hane xuta ne, hatuxa caain rë cjuatacun rë me xi suvá cjuandaja sahmi me. Peru sacuaha cjua xi cachja Nina hya xi cachja me xi “Ngahan suva hvë” ne, cjua vëhë casua xa rë Quihndi rë Nina xi cuma me ngu nahmi xi matitjun. Hane cjua xi cachja Nina jan ne, camá ngascan canduva xi cuma rë ley. Hacuaha Quihndi rë Nina ne, tsajin nu tsajin nixtin xi caain rë cjuatacun rë me xi suvá cjuandaja sahmi me. 
\c 8  
\s1 Jesús ne, sahmi tangun me xuta cojo Nina ngatsë rë ngu compromisu xatsë 
\p  
\v 1 Quihndë ne, cjua xi hitsë sa matitjun tsëhë yëjë ni cjua xi tinújan vi ne, hacui cjua vihi: tjin naja ngu nahmi xi matitjun xi cuatjin xcusun rë me. Quiji me ngahnga, cavejña me taha ladu quixi tsëhë Nina xi jemu jyë hnga cojo hasen rë.  
\v 2 Ngajan sahmi me xa xi má me nahmi ngajan ndava Nina. Peru ndava Nina jan ne, hacuiin ngu ndihya xi catsindaja ngu xuta ta cahndë́ vëhë ne, suvá Nai naja catsindaja me. 
\p  
\v 3 Yëjë ni nahmi xi matitjun ne, hatuxa xa rë me xi sua me cjuatjo cojo Nina sua me ngu chu xi tsiquehen xuta. Vëhë xi cojo Jesús camameje rë xi tjin mé xi sua me cjuatjo cojo Nina.  
\v 4 Sa xi nguehe ngasunhndë tacun cuaha me quihndë ne, hacuiin cojo me má me nahmi ta nguehe ne ha tjin nahmi xi sua cjuatjo cojo Nina sacuatjin vitexa ley rë Moisés.  
\v 5 Sacuaha xa xi sahmi nahmi nguehe ngasunhndë vi ne, hacuiin tangun cojo xa xi má ngajan ngahnga ta, sacuaha ejemplu o tjahnguen ni rë xa xi má jan ne, vëhë xi má nguehe. Hya xi ha cuetsihin sahmi Moisés ndava Nina jan ne, cuitjin cachja Nina cojo rë me: “Nechin cuidadu ne ndandaja nihñi yëjë ni xcusun vë sacuaha xcusun xi ha catsingácun ri ngajan hiscan naxi jan.” Cuatjin cachja Nina.  
\v 6 Quihndë ne, Jesús casacu rë me ngu xa xi hitsë sa ndaja, tsëhë xi hacuaha me vëhë sahmi tangun me xuta cojo Nina ngatsë rë ngu compromisu vëhë hane hitsë sa ndaja cjua cachja me. 
\p  
\v 7 Sa xi ndatjin tjin chihin compromisu xi casahmi Nina titjun ne, sehe camamiji rë ngu nga compromisu xi ma jo xi hitsë sa ndaja.  
\v 8 Peru Nina ne, cavëë me xi xutachanga naja ne, quitjen me jyë́, vëhë xi cachja me cuitjin: 
\q1 Ngahan Nai nuju ne, cuichjá cojo nuju ta cuechu nixtin 
\q1 xi sahme nga ngu compromisu xatsë cojo nuju ngayun xuta tjë rë Israel cojo xuta tjë rë Judá. 
\q1  
\v 9 Peru ha quihndë hacuiin sacuaha compromisu xi casahme titjun cojo xutachanga nuju, 
\q1 hya xi cojo cjuahmutacun naha ne, cavaxëxen me tsëhë nangui Egipto; 
\q1 hane tsëhë xi hacuiin quiji nduju me sacuatjin compromisu xi casahme cojo rë me ne, 
\q1 vëhë xi ngahan ne, casahmecuendaan me, cuatjin chjá ngahan, Nai nuju. 
\q1  
\v 10 Sacuaha compromisu xatsë xi sahme cojo nuju ngayun xuta tjë rë Israel 
\q1 hya xi cuma ngascan tsëhë nixtin vëhë ne, hacui vihi: 
\q1 Cueyá ley naha cahntsua cjuatacun nuju, 
\q1 sacuaha xi cuma hindu cjua rë ley vëhë cahntsua cjuatacun nuju. 
\q1 Hacuaha ngahan cuma ngahan Nina nuju 
\q1 hane ngayun cuma ngayun xuta naha. 
\q1  
\v 11 Tsajin yo xi cuicuya xicjin, 
\q1 tsajin yo xi cuichja cojo xicjin cuitjin: “Meje rë xi cumachaya ri yo xi Nai naja.” 
\q1 Tsajin yo xi cuichja cuatjin ta tsëhë xi yëjë ni sa quihndi sa changá ne, 
\q1 ha camachaya rë yo ngahan. 
\q1  
\v 12 Nixtin hya ne, jemu tjin ná cjuaninchataha cojo cjuatsehen xi cún me 
\q1 hacuaha ha quihndë tsajin nixtin tsinguítsjen jyë́ rë me. 
\m Cuatjin cachja Nina.  
\v 13 Hya xi chja Nina tsëhë ngu compromisu xi tjun jan ne, casahmi changá me. Hane xcusun xi ha jima changá jan ne, ha meje cjuëya. 
\c 9  
\s1 Ndava Nina nguehe nangui 
\p  
\v 1 Quihndë ne, ngajñi rë cjua tsëhë compromisu xi casahmi Nina titjun ne, cachja me hacutjin xi chjahanrcun rë me, cojo xi cuma ndava me nguehe ngasunhndë.  
\v 2 Vëhë xi camá ngu ndihya tsjian xi camá ndava Nina. Ngu cahntsua xi tjun tjun tacun, xi hmí rë Cahndë́ Rcun ne, ngajan tacun candeleru, tacun maxë, siu pan xi viyuju xcun Nina.  
\v 3 Ngu cahntsua xi tacun cahnchun taha cahntsua tsjian xi tyjangui má jo cahndë́ jan ne, ngajan tacun cahndë́ xi hmí Cahndë́ Xi Jercu Tu Rcun Camahani.  
\v 4 Ngajan tacun ngasunscun xi suvá oro camá hiscan xi tí tyjungunsa. Hacuaha ngajan tacun caxa tsëhë compromisu xi suvá oro casaxtë rë yëjë ni ladu rë. Hane cahntsua caxa jan ne, ngajan jiya tilu xi suvá oro cama, hane cahntsua tilu jan hinchandaja scuan cjuarcun xi hmí rë maná. Hacuaha bastón tsëhë Aarón xi cavetjusehen jan ne, cahntsua caxa jan jiyandaja. Hacuaha ngajan hinchandaja ndyojo të xi camahindu cjua rë ley.  
\v 5 Xcun caxa jan ne, hinchacun jo quicha, xi sacuaha ángel rë Nina, xi fehma rë tyjunga rë xcun caxa jan. Hane xcun tyjavaxcun caxa jan ne, ngajan tsejen hasen rë ngahñu cjua rë Nina hiscan tsicjë me jyë rë xuta. Peru quihndë ne, tsëhë cjua xi ha cachjá cojo nuju vë ne, ha quihndë cuichjaan chichihin sa cojo nuju. 
\p  
\v 6 Quihndë xi ha caviyuju chihin yëjë ni xcusun vëhë cuatjin ne, yëjë ni nahmi ne, visehen me nchunchujun ni cahntsua xi tjun tjun tacun tsëhë ndihya tsjian jan, xi sahmi me xa rë me sacuaha nahmi.  
\v 7 Peru cahntsua xi má jo tacun tsëhë ndihya jan ne, suvá ni nahmi xi matitjun visehen me ngu ndiya xi ngu nu, hane hatuxa vaha me jni rë chu xi sua me cjuatjo cojo Nina ngatsë rë cjuatsehen xi casahmi suvá me, cojo ngatsë rë cjuatsehen xi casahmi xuta xi hisca hvíin me xi tjin rë me jyë́.  
\v 8 Cojo cjuatacun vëhë ne, Hasen rë Nina ne, sua machaya naja xi ndiya xi cjuecani naja xcun Nina ne, cjëë tuxaha, jinguyëjë rë xi ndava Nina jan ne, tisahmi xa cuaha.  
\v 9 Yëjë cjuatacun xi cuatjin má vë ne, machjirëhë naja ngayaan sacuaha ngu ejemplu ni, quihndë nixtin vihi. Ta sacuaha cjuatjo xi sua me cojo Nina ngajan ndihya vëhë cojo chu xi tsiquehen xuta ne, maji tsityjahi rë cjuatacun rë xuta xi cuatjin faharcun me Nina.  
\v 10 Yëjë cjuatacun vëhë ne, vitexa suvá tsëhë xi chinë xi hyun ni cojo tsëhë xi ma tyjahi vihi ma tyjahi vëhë xi cumá rë Nina. Cjuatacun vëhë ne, vitexa suvá ni tsëhë taha xcun, hacuiin tsëhë cahntsua xahasen naja. Peru cjuatacun vëhë ne, cuitexa hisca nixtin xi Nina tsindeya me cjuatacun vëhë. 
\s1 Ndava Nina ngajan ngahnga 
\p  
\v 11 Peru Cristu ne, ha cavetjucun me xi má me nahmi xi matitjun xi sua naja me yëjë ni cjuandaja xi titsingatju Nina. Sacuaha cahndë́ hiscan xi tisahmi me xa xi má me nahmi ne, hitsë sa vengui chjí rë hacuaha hitsë sa tjin rë cjuaquixi. Hacuaha hacuiin xuta casahmi me, cuma cuinújan ne, hacuiin nguehe ngasunhndë vihi tacun.  
\v 12 Hacuaha hacuiin ngatsë rë jni rë chu tentsun cojo jni rë chu ndyaja chihndë xi cavisehen me xcun Nina ta ngatsë rë jni rë suvá me. Hane ngu ndiya cavisehen ni me, hya xi ha cavaxëtje naja me xi quihndë tsajin nu tsajin nixtin chajá ngayaan.  
\v 13 Hane jni rë chu tentsun cojo jni rë chu ndyaja cojo ndesu rë chu ndyaja chihndë ne, hora xi xinchutaha rë xuta xi camachocun yojo rë ne, caa rë tsityjahi rë yojo rë xuta jan cojo sa xi cuma tyjahi me xcun Nina.  
\v 14 Ha hitsë sa jni rë Cristu, me xi tsajin nu tsajin nixtin cjuë Hasen rë, hacuaha casua suvá me yojo rë me cojo Nina, ngu cjuatjo xi hatuxa jercu tu tyjahi camahani. Jni rë me jan ne, tsityjahi rë cjuatacun naja tsëhë yëjë xcusun xi machjiriin xi nihña, cojo sa xi cuma nihña xa rë Nina, me xi quicun. 
\s1 Ngatsë rë jni ne, ma tyjahi yëjë ni xcusun 
\p  
\v 15 Vëhë xi Cristu ne, me vëhë xi sahmi tangun me xuta cojo Nina ngatsë rë ngu compromisu xatsë. Cahme me xi cuaxëtje me xuta tsëhë cjuatsehen xi casahmi xuta jinguyëjë rë xi sahmi xa cuaha compromisu xi tjun casahmi Nina. Hane ngatsë rë xi cuatjin cahme Cristu ne, vëhë xi xuta xi cavaxijin Nina ne cuma cjuahatsja me cjuandaja xi ha cachja Nina xi sua rë me, cjuandaja xi tsajin nu tsajin nixtin chjahataha rë.  
\v 16 Hiscan xi tjin rë xuta ngu testamentu ne, cuma sahmi xa, peru hisca hya xi ha tjin cjuaquixi xi ha cahme me xi casahmi xujun jan.  
\v 17 Ta ngu testamentu ne, vetsihin sahmi xa ngatsë rë ngu cjuaveya ta, tsëhë xi jinguyëjë rë xi tacun quicun me xi casahmi ne, hatuxa tsajin rë ngahñu.  
\v 18 Vëhë xi hisca compromisu xi tjun casahmi Nina cojo xutachanga naja ne, hacuaha cojo jni rë chu camachihin.  
\v 19 Xi cavatju casua Moisés camachaya rë yëjë ni xuta yëjë ni cjua tsëhë ley xi casua Nina ne, sehe cafaha me hitsë tsanga hani cojo ngu tsja rë ya xi hmí rë hisopo, sehe catsicahnchi me cojo jni rë chu hndindyaja cojo jni rë chu tentsun, cavisecjan rë me nandá ne, sehe cavinchutaha rë me libru tsëhë ley hacuaha cavinchutaha rë me yëjë ni xuta.  
\v 20 Ngajan xi cachja Moisés cojo xuta cuitjin: “Vihi jni xi sahmichihin rë compromisu xi cavitexa Nina hacutjin xi meje rë me xi nihña.” Cuatjin cachja me.  
\v 21 Hacuanitjin ni cojo yëjë ni xcusun xi sahmi xa cahntsua ndihya jan.  
\v 22 Sacuatjin vitexa ley ne, ha ña meje yëjë ni xcusun ne, ma tyjahi ngatsë rë jni. Hane sa xi cuangaain jni ne, hacuaha sacuiin cjuaninchataha. 
\s1 Casua Cristu yojo rë me xi cjuahaxin me cjuatsehen 
\p  
\v 23 Vëhë xi camameje rë xi cuatjin camatyjahi rë yëjë xcusun xi sacuaha tjahnguen rë xcusun xi tjin ngajan hiscan tacun Nina. Peru xcusun xi tjin ngajan hiscan tacun Nina ne, camameje rë xi camatyjahi ngatsë rë cjuaveya xi hitsë sa ndacun xi cuma rë cjuaveya xi cuacun vë.  
\v 24 Cristu ne, hacuiin cavisehen me ndava Nina xi xuta catsindaja me, ndihya xi tu cavetjutaha ni tsëhë hiscan xi cjuaquixi xi tacun Nina ta hisca ngahnga hiscan xi tacun Nina ne, ngajan xi cavisehen me. Cuatjin cavisehen me cojo sa xi quihndë ne, cuejña me xcun Nina, cuichjatje me ngatsë naja.  
\v 25 Peru hacuiin cavisehen me xi sua me yojo rë me cojo Nina jemu cjín ndiya, sacuatjin sahmi nahmi xi matitjun xi chuva nu chuva nu visehen me ndava Nina cojo jni xi hacuiin jni rë me.  
\v 26 Sa xi cuatjin cjín ndiya cavisehen Cristu ne, hacuaha cuatjin cjín ndiya camameje rë xi cueya me hisca hya xi cavetsihin ngasunhndë ne hisca quihndë. Peru quihndë xi ha tivijnetaha nixtin changá vëhë ne, Cristu ne, ngu ndiya canduva ni me xi sua me yojo rë me xi cueya me cojo sa xi cjuahaxin me cjuatsehen.  
\v 27 Ngayejen ni ne, hatuxa ngu ndiya ni cueyan. Ngaxtun vëhë ne, sehe tsichuva naja Nina cojo cjuatacun naja.  
\v 28 Hacuanitjin ni Cristu ta hacuaha ngu ndiya ni casua me yojo rë me xi cjuahaxin me jyë́ rë jemu cjín xuta. Ngaxtun vëhë ne, cuinduva nga me xi ma jo ndiya, peru ha quihndë hacuiin tsëhë jyë́ rë xuta ta tsëhë xi cuaxëtje me xuta xi siuya rë me. 
\c 10  
\p  
\v 1 Peru ley rë Moisés ne, sacuaha tjahnguen ni rë yëjë cjuandaja xi sehe sua naja Nina. Hacuiin ndandaja sua ley vëhë machaya naja hacutjin jain cun cjuandaja vëhë. Vëhë xi ley ne, tsajin nixtin xi cuma tsityjahi rë cjuatacun rë xuta xi tu nu tu nu fi me ndava Nina cojo chu xi tsiquehen me jan xi sua me cjuatjo cojo Nina.  
\v 2 Sa xi cjuaveya rë chu vëhë cacaa rë catsityjahi jain rë cjuatacun rë xuta xi cafaharcun rë me ne, hacuaha ha quihndë tsiquiin sa me chu ta, tsëhë xi xi má rë me ne, ha quihndë tsajin jyë́ rë me.  
\v 3 Peru xi cuatjin tsiquehen xuta chu ne, tu nu tu nu tsinguitsjen rë me tsëhë jyë́ rë me ta,  
\v 4 tsëhë xi jni rë chu ndyaja cojo jni rë chu tentsun ne, hatuxa maji fahaxin rë jyë́ rë xuta. 
\p  
\v 5 Vëhë xi hya xi cavéjña Cristu ngasunhndë ne, cachja me cojo Nina cuitjin: 
\q1 Ngayun ne, hacuiin suvá cjuaveya rë chu xi meje nuju, hacuiin suvá cjuatjo xi meje nuju, 
\q1 vëhë xi canihñu yojo naha. 
\q1  
\v 6 Hacuiin suvá cjuatjo xi tí xi chuya nuju tsëhë, hacuaha hacuiin suvá ni jingu sa cjuatjo xi sua nuju xuta ngatsë rë jyë́ rë me xi chuya nuju tsëhë. 
\q1  
\v 7 Sehe ngajan xi cachja nga Cristu: “Cuajyihi ngahan nguehe, xi sahme yëjë ni hacutjin xi meje nuju, ngayun Nina naha, 
\q1 sacuatjin camahindu tsahan xcun xujun nuju.” 
\m Cuatjin cachja Cristu cojo Nina.  
\v 8 Xi tjun tjun ne, cachja Cristu xi Nina ne, mijí rë me hacuaha chuyiin rë me tsëhë cjuaveya rë chu cojo jingu sa cjuatjo, cojo cjuatjo xi tí, cojo cjuatjo xi sua xuta ngatsë rë jyë́ rë me, handasa cuatjin vitexa ley xi cuatjin sahmi xuta.  
\v 9 Ngaxtun vëhë ne, cachja nga me xi tacun me xi sahmi me yëjë ni hacutjin xi meje rë Nina. Cuma cuinújan ne, tsicjë me xcusun changá xi hme chu, cojo sa xi cuejña me ngu xcusun xatsë xi sahmi xuta yëjë hacutjin xi meje rë Nina.  
\v 10 Nina ne, catsityjahi me cjuatacun naja ngatsë rë xi Jesucristu ne, casahmi me yëjë ni hacutjin xi meje rë Nina, ngatsë rë cjuatjo xi casua Jesucristu xi casua me yojo rë me ngu ndiya ni. 
\p  
\v 11 Yëjë ni nahmi ne, nchunchujun ni hinchacun me fahacuenda me xa rë me xi má me nahmi, hacuaha cuatjin cjín ndiya vuya sua me cjuatjo xi tu vëhë tu vëhë ni, xi hatuxa tsajin nixtin xi ma fahaxin rë jyë́ rë xuta.  
\v 12 Peru Cristu ne, xi cavatju casua me ngu ni cjuatjo cojo Nina ngatsë rë jyë́ rë xuta ne, sehe quiji me ngahnga cavejña me taha ladu quixi tsëhë Nina. Hane cjuatjo xi casua me jan ne, tsajin nu tsajin nixtin xi meje rë xi cuya cjue nga xcun Nina.  
\v 13 Hane quiji me ngajan, cojo sa xi nixtin xi cjui sa ne, ngajan cuejñaya me hisca hya xi yëjë ni xi sahmi rë me condra ne, cuiyuju ngahma gubiernu rë me.  
\v 14 Vëhë xi ngatsë rë ngu ni cjuatjo vëhë ne, catsityjahi Cristu cjuatacun rë xuta xi ha Nina tiviyujuxin rë me xi cuma tsëhë me me, hane tsajin nu tsajin nixtin xi cuya cuetsun nga cjuatacun rë xuta xi cuacun vë.  
\v 15 Hasen rë Nina ne, ha cuanitjin ni sua machaya naja cuitjin: 
\q1  
\v 16 Sacuaha compromisu xi sahme cojo xuta xi cuacun vë hya xi cuma ngascan tsëhë nixtin vëhë ne, hacui vihi: 
\q1 Cueyá ley naha cahntsua cjuatacun rë me, 
\q1 sacuaha xi cumahindu cjua rë ley vëhë cahntsua cjuatacun rë me. 
\q1  
\v 17 Hacuaha jyë́ rë me cojo cjuatsehen xi sahmi me ne, 
\q1 ha quihndë tsajin nixtin xi tsinguítsjen. 
\m Cuatjin cachja Hasen rë Nina.  
\v 18 Hya xi ha camanchataha jyë́ ne, ha quihndë mamijí rë xi cjue sa cjue sa cjuatjo xcun Nina ngatsë rë jyë́ vëhë. 
\s1 Meje rë xi nihña tiña tsëhë Nina 
\p  
\v 19 Vëhë xi ngayejen ni ne, rcuun camahani xi cuiseen xcun Nina quihndë ngatsë rë jni rë Jesús.  
\v 20 Jesús ne, cavuxaha me ngu ndiya xatsë xi cuma naja, ngu ndiya xi cjuecojo naja xcun cjuahñu, ngu ndiya xi cjuecojo naja xcun Nina ngatsë rë cjuaveya rë Jesús.  
\v 21 Jesús ne, me vëhë má me nahmi xi jercu tu vengui camahani chjí rë, hacuaha sahmi naja me cuidadu ngayejen ni xi má ngayaan ladu rë Nina.  
\v 22 Ngatsë rë yëjë cjuatacun vëhë ne, meje rë xi nihña tiña tsëhë Nina cojo nguñajatacun, meje rë xi tjin ngu tacun xi macjain naja Jesús ta, tsëhë xi cjuatacun naja ne, cachjahaxin rë cjuatsehen xi cún tsëhë xi sacuaha xi caxinchutaha rë jni, hane yojo naja ne, sacuaha xi cafengui cojo nandá tyjahi.  
\v 23 Meje rë xi hacuiin nismetacun cjuandaja xi nújan xi vetahan tacun ta, tsëhë xi me xi cachja cojo naja yëjë cjuandaja xi sahmi me ngascan ne, hatuxa sahmichihin me yëjë cjuandaja vëhë.  
\v 24 Meje rë xi cuinchan chuva rë hacutjin cuisecoon xingueen xingu xingu ngayaan cojo sa xi tjin naja cjuahmutacun hacuaha nihña cjuandaja.  
\v 25 Mijí rë xi cuejñaxen xi ma tangun ngayaan sacuaha xcusun rë jingu sa xingueen. Xi meje rë ne, cuma tangun ngayaan cojo sa xi tahan cjuetacun xingueen xingu xingu ngayaan, hitsë guan ta nixtin xi cuinduva Jesús ne, chutsejen ta ha tijima tiña. 
\s1 Handajasa cjuatjo casacu naja cjuahñu xatsë, peru suaain cahndë xi tujyë nihña cjuatsehen 
\p  
\v 26 Cuatjin meje rë xi nihña ta sa xi ngu xingueen xi ha ndaja cafahatsja me cjua xi ha cjuaquixi cjuenduju me cojo ngu ndiya rë cjuatsehen ne, ha quihndë tsajin sa mé cjuatjo xi cuma cjue ngatsë rë jyë́ rë me.  
\v 27 Cahndë́ rë vëhë ne, hatuxa sacú rë me castigu, cjue cuetí me xcun ndihi xi ha jima tiña nixtin xi tsicjë rë yëjë xi choho vëë rë Nina.  
\v 28 Hya xi ngu xuta tsitjungui me ley rë Moisés ne, cojo jo cojo jyan ni xuta xi tsinguixi me xi cuaaintjin sahmi xuta vëhë ne, chja ley ta hatuxa cueya me, hacuaha hisca ngu tsajin yo cumayuma rë tsëhë me.  
\v 29 Ngayun ne, ha ndaja hyun ta hitsë sa jercu jyihi camahani castigu meje rë xi cuma xuta xi sune tsufë me Quihndi rë Nina, hacuaha tsingatahacacun me xi tsajin mé vengui chjí rë jni rë Quihndi rë Nina jan, hacuaha choho chja me tsëhë Hasen rë Nina xi jercu casua rë xuta jan cjuandaja. Jni xi tsitjungui xuta jan ne, jni vëhë xi casahmichihin rë compromisu xi cachja Nina, hacuaha ngatsë rë jni vëhë ne, camatyjahi cjuatacun rë xuta jan.  
\v 30 Ngayaan ne, ha hyan Nai naja, hane me vëhë xi cachja me cuitjin: “Ngahan satë ná xi sahmengojo cojo xuta tsehen; hatuxa ngahan sahmengojo.” Hacuaha chja nga me ngu ndiya cuitjin: “Ngahan Nai nuju ne, cjuahá chuva xuta naha.” Cuatjin cachja Nai naja.  
\v 31 ¡Jemu jyë chircun sa xi ngayaan cjuinenguenyan ngajñi rë castigu xi sahmi Nina, me xi quicun! 
\p  
\v 32 Peru ninguitsjun nixtin titjun, hya xi ha cafë cachjuhunntsun cjuahasen rë Nina sehe cacaa nuju cojo ngu cjuacjintacun jyë xi casua nuju cjuañihi xi cavatjun camá.  
\v 33 Jiya hora ne, xcun cojo xcun ni choho cachja xuta tsujun hacuaha casua nuju me cjuañihi, hacuaha jiya hora nga ne, cavisecuun rë xuta xi cuatjin cavatju me camá.  
\v 34 Chjá cuatjin ta hacuaha hvë xi hacuaha camayuma nuju me xi hincha ndavaya. Hacuaha hisca cojo cjuasua caningatuhun xi cachjahataha cjuachan rë yëjë ni xcusun xi ngayun tsujun, tsëhë xi ha hyun ta ngajan ngahnga ne, ha tjin nuju ngu xcusun xi hitsë sa ndaja, xi tsajin nu tsajin nixtin cjuë.  
\v 35 Xicanismutacuun cjuatacun xi rcun camahani, ta xi cuatjin cuanguncujun cjuatacun vëhë ne, Nina ne, hatuxa jemu jyë cjuatjo xi sua nuju me.  
\v 36 Ngayun ne, meje rë xi scaa nuju cojo cjuacjintacun xi vatjun má, cojo sa xi hya xi cuatjin cafë canihñu hacutjin xi meje rë Nina ne, sacú nuju cjuandaja xi ha cachja Nina xi sua nuju me.  
\v 37 Xujun rë Nina ne, cuitjin chja: 
\q1 Ha tu chúva sa nixtin ne, 
\q1 me xi cuinduva ne, hatuxa cuinduva me, ha quihndë cuindeyaain rë me. 
\q1  
\v 38 Xuta naha xi tsajin jyë́ rë me ne, sacú rë me cjuahñu xatsë ngatsë rë xi mangucacun me cojo ná; 
\q1 peru sa xi cuya me cjue ngaxtun me ne, chuyiin ná tsëhë me. 
\m Cuatjin chja xujun rë Nina.  
\v 39 Peru ngayaan ne, hacuiin tangun ngayaan cojo xuta xi vuya fi ngaxtun me sehe tsicjë Nina me ta ngayaan ne, tangun ngayaan cojo xuta xi mangucacun me cojo Nina sehe cuaxëtje Nina me. 
\c 11  
\s1 Ninguitsjen xutachanga naja xi jemu camangucacun me cojo Nina 
\p  
\v 1 Quihndë ne, hya xi ha camangutacun cojo ngu cjua ne, sacuaha xi ha tjin naja cjuaquixi xi hatuxa sacú naja ngu xcusun xi vetahan tacun, sacuaha xi ha hyan xi xcusun xi matsijin ne, hacuaha cjuaquixi.  
\v 2 Tsëhë xi xutachanga naja ne, camangucacun me cojo Nina, vëhë xi Nina cachja tsëhë me xi tsajin xi cún rë me xcun Nina. 
\p  
\v 3 Tsëhë xi mangutacun cojo Nina ne, vijnercun xi Nina cojo cjua ni rë me ne, catsindaja me ngasunhndë, hacuiin cafaha me ngu xcusun xi matsejen xi catsindaja me ngasunhndë vi xi tsejen naja. 
\p  
\v 4 Tsëhë xi camangucacun xutachanga naja Abel cojo Nina ne, hitsë sa ndaja cjuatjo xi casua rë me Nina xi cuma rë cjuatjo xi casua xutachanga naja Caín. Vëhë xi Nina ne, cachja me xi Abel ne, tyjahi me cojo cjuatacun rë me. Hacuaha suvá Nina catsingacun me xi cjuatjo xi casua Abel ne, jemu ndaja. Hane tsëhë xi cuatjin camangucacun Abel cojo Nina ne, vëhë xi handasa cahme me, peru hisca quihndë ne, cumachjirëhë sa naja cjuatacun rë me. 
\p  
\v 5 Tsëhë xi camangucacun xutachanga naja Enoc cojo Nina ne, cachjahataha rë me tsëhë ngasunhndë vi, cojo sa xi cueyaain me. Hane ha quihndë casacuiin me ta, tsëhë xi Nina cafahataha rë me. Peru chaja sa xi cjuahataha Nina me ne, ha camatsejen xi Nina ne, jemu cachuya rë me tsëhë Enoc.  
\v 6 Peru sa xi manguaaintacuun cojo Nina ne, cumaji nihña xi chuya rë me tsajan. Xuta xi sahmi tiña me tsëhë Nina ne, meje rë xi macjain rë me xi tjin jain Nina, hacuaha Nina vëhë xi jemu jyë cjuatjo xi sua rë me xuta xi cuacun vangui rë me. 
\p  
\v 7 Tsëhë xi camangucacun xutachanga naja Noé cojo Nina ne, hya xi casua Nina camachaya rë me tsëhë xcusun xi cjëë cuma ne, casahmi me ngu barcu cojo sa xi cuetjutje me cojo xuta rë me. Cuatjin casahmi me ta, tsëhë xi faharcun me Nina. Hane xi cuatjin camangucacun me cojo Nina hacuaha casahmi me cuatjin ne, ngajan camatsejen xi yëjë sa xuta tsëhë ngasunhndë ne, chajá me. Hane Noé ne, cuatjin camatyjahi me cojo cjuatacun rë me sacuatjin matyjahi ngayaan cojo cjuatacun naja xi mangutacun cojo Nina. 
\p  
\v 8 Tsëhë xi camangucacun xutachanga naja Abraham cojo Nina ne, hya xi cachja Nina xi cuetjuxin me tsëhë nangui hiscan xi tacun me xi cjue me ngu cahndë́ hiscan xi sua Nina xi cuma tsëhë me ne Abraham ne, cahndë me tsëhë Nina hane cavetju me quiji me, handasa hvíin me jani cuechú me.  
\v 9 Tsëhë xi camangucacun Abraham cojo Nina ne, caviyujutaha me ngu nangui xín xi cachja Nina xi sua rë me. Hane ndihya tsjian ni caviyuju me cojo quihndi rë me, Isaac cojo Jacob, quihndi xi hacuaha cojo cjuahatsja cjuandaja xi ha cachja Nina xi sua me jan.  
\v 10 Cuatjin caviyuju Abraham ta, tsëhë xi jemu meje rë me xi cuechú me ngu nandya xi ndaja hñu cun ndihya rë cojo xihndënaña rë, ngu nandya xi Nina cavejña me cjuatacun rë me hacutjin cuma, hacuaha me vëhë casahmi me.  
\v 11 Tsëhë xi camangucacun Abraham cojo Nina ne, Nina casua rë me ngahñu xi cuma sacú rë chjuun rë me quihndi, handasa Sara chjuun rë me ne, hatuxa maji sacu rë me quihndi hacuaha Abraham ne, jemu changá me xi sehe sacú rë chjuun rë me quihndi. Cuatjin camá ta, tsëhë xi camangucacun Abraham xi Nina ne, hatuxa sahmichihin me cjua xi cachja me.  
\v 12 Vëhë xi ngatsë rë ngu ni Abraham ne, handasa hatuxa ha quihndë tsajin rë me ngahñu xi sacú rë chjuun rë me quihndi ne, peru tjë rë me ne, tangun cjín camá cojo niñú xi yaja ngahnga, tangun cojo tsumi rë tjehen ndachacun xi maji maxqui. 
\p  
\v 13 Yëjë ni xutachanga naja xi cuacun vë ne, mangucacun cuaha me cojo Nina hya xi cahme me. Casacuiin rë me cjuandaja xi cachja Nina xi sua rë me, peru sacuaha xi ha cavëë me cjuandaja vëhë hane jemu ndama rë me. Cachja quixi me xi sacuaha xuta ngu nangui me xi caviyujutaha me nguehe ngasunhndë.  
\v 14 Hane xuta xi chja cuatjin ne, jemu quixi sua me machaya naja xi tivangui sa me ngu nangui xi cuma tsëhë suvá me.  
\v 15 Sa xi catsinguitsjen sa me nangui hiscan cavetju me ne, tjin sa rë me chuva rë xi camá cavuya me jan.  
\v 16 Peru me xi cuacun vë ne, xi meje rë me ne, ngu nangui xi cuma tsëhë suvá me ngajan ngahnga hiscan tacun Nina. Vëhë xi Nina ne, ma savaain rë me xi hmí rë me Nina rë xutachanga naja xi cuacun vë, tsëhë xi ha tjin ndaja rë Nina ngu nandya xi cumá rë me. 
\p  
\v 17 Tsëhë xi camangucacun xutachanga naja Abraham cojo Nina ne, hya xi catsichuva Nina me cojo cjuatacun rë me ne, casua Abraham cojo Nina quihndi rë me Isaac. Hane Abraham, me xi cachja Nina xi sua rë cjuandaja ne, cavejñangucacun me xi sua me quihndi ngu rë me,  
\v 18 handasa cuitjin cachja Nina cojo rë me: “Suvá tjë rë quihndi riji Isaac ne, vëhë ni xuta xi cumá tjë riji xi cjuaquixi.” Cuatjin cachja Nina.  
\v 19 Abraham ne, camacjain rë me xi Nina ne, tjin jain rë me chuva rë xi hisca nima ne, tsicuya me cjuahñu. Cuatjin camá xi sacuaha xi ngajñi rë nima jain cavuya cafahatsja Abraham quihndi rë me. 
\p  
\v 20 Tsëhë xi camangucacun xutachanga naja Isaac cojo Nina ne, catsinchacun me quihndi rë me Jacob cojo Esaú. Cachja me yëjë mé xi nduva ngascan xi cuma rë quihndi rë me. 
\p  
\v 21 Tsëhë xi camangucacun xutachanga naja Jacob cojo Nina ne, hya xi ha meje cueya me ne, catsinchacun me jima ngu quihndindai rë me xi quihndi rë xutachanga naja José, hacuaha cafaharcun me Nina taha yahangui me bastón rë me. 
\p  
\v 22 Tsëhë xi camangucacun José cojo Nina ne, hya xi ha meje cueya me ne, caveyanangui me xi cuechú nixtin xi yëjë ni xutachanga naja ne, cuetjuxin me tsëhë nangui Egipto, hacuaha cavitexa me hacutjin cuma cojo rë ninda rë me hya xi ha cahme me. 
\p  
\v 23 Tsëhë xi camangucacun xutacha rë xutachanga naja Moisés cojo Nina ne, hya xi catsin Moisés ne, jyan sá caveyahma me, tsëhë xi cavëë me xi quihndinda jan ne, jemu ndajyihi camahani, hane cavincharcuaain rë me yojo rë me tsëhë cjua xi cavitexa me xi matitjun xi cueya yëjë ni quihndinda xi xihin tsëhë xutachanga naja. 
\p  
\v 24 Tsëhë xi camangucacun Moisés cojo Nina ne, hya xi camachangá me ne, catsitjungui me cahndë́ rë me xi má me quihndi rë na quihndi rë me xi matitjun tsëhë nangui Egipto.  
\v 25 Hitsë sa cachuya rë me xi cjue me choho cuatju me cuma cojo xuta rë Nina, xi cuma rë xi sua me cjuasua xahasen rë me nguhñu ngu hora ni ngajñi rë cjuatsehen.  
\v 26 Catsingatahacacun me xi hitsë sa vengui chjí rë xi scaa rë me xi choho cuichja xuta tsëhë me ngatsë rë xi sahmi tangun me cojo xutachanga naja xi ha Nina cavaxijin me, xi cuma rë xi sacú rë me cjuanchina rë Egipto. Cuatjin catsingatahacacun me ta, tsëhë xi hatuxa quitahacacun me cjuatjo xi sua Nina me ngascan.  
\v 27 Tsëhë xi mangucacun me cojo Nina ne, cavetjuxin me tsëhë nangui Egipto, hacuaha hisca cavincharcuaain rë me yojo rë me tsëhë xi cjan rë me xi matitjun jan. Cacaa rë me cojo yëjë ni cjuacjintacun vëhë sacuaha xi tivutsejen me Nina xi matsijin.  
\v 28 Tsëhë xi mangucacun me cojo Nina ne, casahmi me suhi tsëhë Pascua, hane cavitexa me yëjë ni xutachanga naja xi cuinchataha me jni rë chu ngajan ya ngahñu rë tingotjo ndava me xingu xingu me, cojo sa xi hora xi cjuehe hasen xi tsiquehen rë quihndi tjun rë yëjë ni xuta ne, tsiquiin rë hisca xi ngu quihndi tjun rë xutachanga naja. 
\p  
\v 29 Tsëhë xi mangucacun xutachanga naja cojo Nina ne, cavatjucja me Ndachacun Hani sacuaha vatju me nangui quixí. Hya xi camá ne, xi canduva xuta Egipto tivatju me ne, hora vëhë cavuya camatangun nga nandá hane ngajan cafë xuta xi cuacun vë. 
\p  
\v 30 Tsëhë xi mangucacun xutachanga naja cojo Nina ne, cavitijñundee me hnchua xondyojo tsëhë nandya Jericó, hane xi cavatju yatu nixtin ne, cavixujne hnchua vëhë.  
\v 31 Hacuaha tsëhë xi mangucacun ngu na Jericó xi hmí rë Rahab cojo Nina ne, hacuiin hya xi cahme yëjë sa xuta Jericó xi cahndiin tsëhë Nina, hya cahme na xi viteña yojo rë vë ta, tsëhë xi cojo cjuandaja cafahatsja na ngu jo xutachanga naja xi quiji cavutsejensun me nandya Jericó jan. 
\p  
\v 32 ¿Mé sa xi meje nuju xi cuichjá cojo nuju? ta hisca chutaain sa hora xi cuichjá cojo nuju tsëhë xutachanga naja Gedeón, cojo Barac, cojo Sansón, cojo Jefté, cojo David, cojo Samuel, cojo yëjë sa profeta.  
\v 33 Xuta xi cuacun vë ne, tsëhë xi camangucacun me cojo Nina ne, cacaa rë me hya xi casahmi me si cojo xuta tsëhë jingu sa nandya, casahmi me xi ndiya rë cjuaquixi, cavetjucaa ngu jo cjua xi cachja Nina cojo rë me. Camaji cavuxaha chu xa hntsua chu hora xi meje sinë chu me.  
\v 34 Catiin me hya xi cavincha xuta me ngajñi ndihi xi meje cuaca me me. Cavatjuhnga me tsëhë xuta xi meje tsiquehen rë me cojo quicha. Handasa jemu ndaya tjin cacun me ne, casacu rë me ngahñu. Jemu casacu rë me ngahñu hya xi casahmi me si cojo xuta tsëhë jingu sa nandya, cacaa rë me catsinguijne me xuta xi choho vëë rë me.  
\v 35 Ngu jo yachjin ne, cavuya cafahatsja me xuta rë me xi cavuya cjuahñu hya xi cahme. 
\p Peru ngu jo nga xutachanga naja ne, jercu cavaja xuta me. Peru catsingatiin me xi sehenndaya me ta, tsëhë xi mijí tsismicacun me Nina hacuaha meje rë me xi sacú rë me ngu cjuahñu xatsë xi hitsë sa ndajyihi. Vëhë xi cacaa rë me hya xi cavaja xuta me hisca xi cahme me.  
\v 36 Hane ngu jo nga me ne, catsixcuehyu xuta me, hacuaha cavaja xuta me cojo cuarta rë chu, hisca quiji me ndavaya hacuaha camahñu me cojo cadena.  
\v 37 Catsiquehen xuta me cojo ndyojo, cavatëcja vasen xuta me cojo quicha nehñu, catsiquehen xuta me cojo quicha, catsujyihiya nguehe catsujyihiya ngajan me tixtë rë me chuxin rë chu tsánga cojo chuxin rë chu tentsun. Jemu camachaja rë me, jemu jyë cjuañihi cavatju me camá, choho casahmi xuta cojo rë me.  
\v 38 Xutachanga naja xi cuacun vë ne, hisca vechiin chuva rë xi sacú rë ngasunhndë me. Catsujyihiya me ngajan ngu xín camahani hiscan naxindya, hiscan nguijo, hisca ngu ngojo naxi caviyuju me. 
\p  
\v 39 Peru xuta xi cuacun vë ne, handasa ha cavetjundaja me ngatsë rë xi mangucacun me cojo Nina ne, peru hisca xi ngu me casacuiin rë me cjuandaja xi ha cachja Nina xi sua rë me,  
\v 40 tsëhë xi Nina ne, hya xi catsingatahacacun me ngatsë naja ne, ha cavejñangucacun me xi sahmi me ngu xcusun xi hitsë sa ndaja, xi hisca nixtin quihndë ne, sahmi Nina xi cuechutaha xutachanga naja xi cuacun vë yëjë ni hacutjin xi meje rë Nina xi cuechutaha me, sacuatjin tisahmi Nina cojo naja ngayaan quihndë. 
\c 12  
\s1 Meje rë xi cuejñahñu cjuatacun naja cojo Jesús 
\p  
\v 1 Vëhë xi ngayaan ta ha jemu cjín xutachanga naja xi machaya naja xi camangucacun me cojo Nina ne, meje rë xi cuejñaxen yëjë ni xcusun xi sahmindya naja, hacuaha cuejñaxen cjuatsehen xi mijí cjuexin tsajan, hacuaha nihña ngahñu xi scaa naja cuanguen nduju cojo ndiya xi Nina cavejña me xi cuma naja.  
\v 2 Hacuaha meje rë xi cuejñahñu cjuatacun naja cojo Jesús, me xi cavejña ntsacu cjuachacun xi macjain naja hacuaha catsichihin me. Ngatsë rë cjuasua xi cavejña Nina xi cuma rë Jesús ne, cacaa rë me cojo cjuañihi xi casetaha me xcun cru, hisca casahmicuendaain me xi jemu cjuasava xi cuatjin cahme me. Hya xi camá ne, sehe quiji me ngahnga, hane ngajan tacun me taha ladu quixi tsëhë Nina. 
\s1 Meje rë xi ningatehen xi cueyaquixi naja Nina ndiya 
\p  
\v 3 Vëhë xi ninguitsjun Jesús, me xi cacaa rë cojo yëjë xcusun xi casahmi xuta tsehen hya xi catsitjungui me Jesús. Ninguitsjun me, cojo sa xi hacuiin cjuenda rë cjuatacun nuju, hacuiin cuma ndaya tacún.  
\v 4 Ta ngayun ne, hisca cjuaveya cjëë cuechuntuhun xi nihñu ngahñu xi ningatuun rë cjuatsehen.  
\v 5 Sacuaha xi ngayun ne, canichayun cjua xi chja Nina cojo nuju sacuaha chja ngu nahmi cojo quihndi rë me xi chja cuitjin: 
\q1 Hacuiin tu xcuehyu ni cumacjain ri hya xi Nai naja tiveyaquixi me ngaye ndiya, tsan, 
\q1 hacuaha hacuiin cuma ndaya tacuin hya xi tichjataha me ngaye. 
\q1  
\v 6 Ta Nai naja ne, quihndi xi hmucacun me ne, veyaquixi me ndiya, 
\q1 hacuaha sahmi me castigu yëjë ni xuta xi fahatsja me sacuaha quihndi rë me. 
\m Cuatjin chja cjua jan.  
\v 7 Ngayun ne, caticaa nuju cojo yëjë ni cjuacjintacun, ta xi cuatjin vatjun má ne, Nina tiveyaquixi nuju me ndiya. Nina ne, vutsejen me ngayun sacuaha quihndi rë me ta, cjuaquixi xi tsajin ngu quihndi xi nahmi rë ne, veyaquixiin rë ndiya.  
\v 8 Peru sa xi Nina cueyaquixiin nuju me ndiya sacuatjin veyaquixi me ndiya tsajan ngayejen ni ne, ngajan matsejen xi hacuiin quihndindaja rë me ngayun.  
\v 9 Ngayaan ne, hacuaha tjin xutacha naja nguehe ngasunhndë xi cavinchaquixi naja me ndiya, hacuaha cachjahanrcun me. Peru hitsë sa meje rë xi cuinuhyan tsëhë Nina Nahmi naja xi tacun me ngahnga. Xi cuatjin ne, cuechuntahan ngu cjuahñu xatsë.  
\v 10 Me xi cuacun vë ne, cavinchaquixi naja me ndiya ngu jo nixtin ni hacutjin xi má rë me xi ndatjin. Peru xi vinchaquixi naja Nina ndiya ne, ngayaan ndaja tsajan, cojo sa xi cuma tyjahi cjuatacun naja sacuatjin tyjahi cjuatacun rë suvá me.  
\v 11 Hya xi tjin yo vinchaquixi naja ndiya ne, hacuiin ndama naja ta choho má naja, hora xi tichja me cojo naja. Peru sa xi cuinuhyan ne, xi cuma ngascan ne, sacú naja cjuandaja cjuajeya xi cuma tyjahi cjuatacun naja. 
\s1 Mijí rë xi nitjunguen Nina 
\p  
\v 12 Vëhë xi ngayun xi ndaya tjin tacún xi tivangun cojo ndiya rë Jesús ne, tuhun ngahñu xahasen nuju.  
\v 13 Ngu quixi tángun ni cojo ndiya rë Jesús, cojo sa xi yo xi ndaya tjin cacun ne, hacuiin chajá tsëhë ndiya rë Jesús ta sacú rë ndiya xi cjuaquixi. 
\p  
\v 14 Nihñu ngahñu xi cuinechun ngu cjuandaja ngu cjuajeya cojo yëjë ni xuta, hacuaha nihñu ngahñu xi cuma tyjahi cjuatacun nuju, ta hisca xi ngu xuta ne, cuechiin me xcun Nai naja sa xi hacuiin tyjahi cjuatacun rë me.  
\v 15 Nechun cuidadu cojo sa xi tsajin ngu xuta xi cuechintaain me cjuandaja rë Nina, ta ngaxtun vëhë ne, choho cuma rë me hane tu hitsë tu hitsë ne, tsinguetsun me cjuatacun rë jemu cjín xuta.  
\v 16 Nechun cuidadu cojo sa xi tsajin ngu xuta xi sahmi me cjuatsehen cojo ngu xi hacuiin chjuun rë me. Hacuaha nechun cuidadu cojo sa xi tsajin ngu xuta xi hisca sahmicuendaain me Nina, sacuatjin rë xutachanga naja Esaú, xi casua me yëjë cjuanchina xi satë rë me xi má me quihndi tjún, ngatsë rë ngu comida xi cajinë me.  
\v 17 Ngayun ne, ha hyun ta xi camá ngascan hya xi meje cjuahatsja me ximinchacun rë nahmi rë me ne, cavitjungui me, tsëhë xi ha quihndë tsajin chuva rë xi tsindeya me cjuatacun rë me, handasa hisca cajihnda me xi meje rë me xi cuatjin cuma. 
\p  
\v 18 Ha jemu hatsëë xi xutachanga naja ne, quiji casahmi tiña me tsëhë ngu naxi xi tacun nguehe ngasunhndë hiscan xi catí ngu ndihi jyë, hiscan xi jemu jñu camahani, hiscan xi jercu hñu camahani cavanga tjo,  
\v 19 hiscan xi canuhya rë xi fane ngu tyjo, hiscan xi canuhya rë cjua xi cachja Nina. Hane xuta xi cahndë me cjua vëhë ne, jercu cafehya rë me xutachanga naja Moisés xi ha quihndë cuichjaain sa Nina cojo xuta xi cuacun vë.  
\v 20 Cuatjin cachja me ta, tsëhë xi cacaain rë me cojo cjua xi cachja Nina hya xi cachja me cuitjin: “Yo xi cjue cuisane ntsacu hiscan naxi vë ne, meje rë xi cueya cojo ndyojo, handasa ngu chu.” Cuatjin cachja Nina.  
\v 21 Xcusun vëhë ne, ngu chircun jyë, vëhë xi hisca Moisés ne, cuitjin cachja me: “Jemu tsácjun, ña fatsë ngahan.” Cuatjin cachja me. 
\p  
\v 22 Peru ngayun ne, casatiin sa nuju cjuacjintacun vëhë ta ngayun ne, canihñutangun cjuatacun nuju cojo Nina xi quicun, me xi tacun ngajan ngahnga, sacuaha nandya xi hmí rë Jerusalén, ndetjún xi hmí Sión. Canihñutangun cjuatacun nuju cojo yëjë jercu tu cjín camahani ángel xi tjin tangun xi sahmi jyë sahmi hnga rë Nina.  
\v 23 Ngayun ne, canihñutangun cjuatacun nuju cojo yëjë xuta xi cahme xi quihndi rë Nina xi tjin tangun ngajan ngahnga hiscan xi siutahaxujun ñihi rë. Yëjë nima vëhë ne, vëhë xi sacuaha quihndi tjun rë Nina. Canihñutangun cjuatacun nuju cojo Nina, Nina xi tsichuva rë yëjë ni xuta cojo cjuatacun rë me. Ngayun ne, canihñutangun cjuatacun nuju cojo hasen rë xuta xi tsajin jyë́ rë, xi casahmi Nina xi cavechutaha me yëjë ni hacutjin xi meje rë Nina xi cuechutaha me.  
\v 24 Ngayun ne, canihñutangun cjuatacun nuju cojo Jesús, me xi sahmitangun rë xuta cojo Nina ngatsë rë ngu compromisu xatsë. Hacuaha canihñutangun cjuatacun nuju cojo jni rë Jesús jan ne, hitsë sa ndaja sua machaya naja tsëhë cjuandaja rë Nina xi cuma rë jni rë xutachanga naja Abel. 
\p  
\v 25 Nechun cuidadu, hacuiin nitjungun Nina, me xi tichja cojo naja. Ta sa xi xutachanga naja cavatjinhngaain me tsëhë castigu hya xi catsitjungui me Moisés, me xi cachja cjua rë Nina cojo xuta nguehe ngasunhndë ne, hitsë guan ngayaan, sa xi nicuyan taha ngaxtuun tsëhë Jesús, me xi tichja cojo naja hisca ngajan ngahnga.  
\v 26 Sacuaha nixtin rë xutachanga naja jan ne, ña nangui cafiniya cojo cjua xi cachja Nina, peru quihndë ne, chja me cuitjin: “Ngu ndiya sa tsiniya nangui, peru hacuiin suvá nangui ni tsiniya ta cojo ngahnga tsiniya.” Cuatjin chja Nina.  
\v 27 Hya xi chja me cjua xi “ngu ndiya sa” ne, sua machaya naja xi chjahaxin rë yëjë ni xcusun xi finiya, cuma cuinújan ne, yëjë ni xcusun xi Nina casahmi me, cojo sa xi cuiyuju xcusun xi maji finiya.  
\v 28 Vëhë xi quihndë ne, tahan nacuechji rë Nina ngatsë rë xi tiviseen ngahma gubiernu rë me; gubiernu vëhë ne, vëhë xi maji finiya. Hane xi cuatjin nihña ne, chjahanrcun Nina sacuatjin xi chuya rë me, cojo yëjë ni cjuandaja cjuajeya tsëhë xi ngayaan ne, rcun me.  
\v 29 Cuatjin meje rë xi nihña ta Nina naja ne, tsicjë me yëjë ni xi cjuatsehen sacuatjin rë ngu ndihi jyë xi tsicjë cuaca rë yëjë ni xcusun xi ma tí. 
\c 13  
\s1 Meje rë xi nihña hacutjin xi chuya rë Nina 
\p  
\v 1 Tángun nduju cojo xcusun naja xi nihñahmutacun xingueen sacuaha xi ngu jni ngu yojo naja.  
\v 2 Hacuiin nichayun xi cojo cjuandaja chjuhunntsun xuta ngu nangui xi cjuehe nangui nuju ta tjin ngu jo xutachanga naja ne, cuatjin cafahatsja me xuta ngu nangui xi cafehe nangui rë me ne, hisca hvíin me ne, ángel xi cafahatsja me jan. 
\p  
\v 3 Ninguitsjun xuta xi hincha me ndavaya. Nihñucuendun sacuaha xi cojo ngayun nechunyun cojo rë me ndavaya. Hacuaha ninguitsjun xuta xi choho sahmi jingu sa xuta cojo ta, tsëhë xi ngayun ne, tjin ngu nixtin ne, hacuaha cuma cuatjun cuatjin.  
\v 4 Ngayujun ni ne, meje rë xi chjuhunrcun xi hmí rë cjuavixan. Hisca ngu ngayun ne, mijí rë xi ninguetsun ngu cjuavixan xi ha tjin ndaja ta cuechu nixtin xi Nina ne, sahmi me castigu xuta xi sahmi me cjuatsehen cojo ngu xi hacuiin chjuun hacuiin xihin rë me, há tjin chjuun tjin xihin rë me ne, o há tsajin chjuun tsajin xihin rë me. 
\p  
\v 5 Hacuiin jercu meje nicujun tujún xi tivangun cojo nixtin nuju. Catamangutacun ni cojo xi ha tjin nuju. Cuatjin nihñu ta, tsëhë xi Nina ne, cuitjin cachja me: “Hatuxa tsajin nixtin xi tsismecácun nuju.” Cuatjin cachja me.  
\v 6 Vëhë xi jemu ndama naja xi cuitjin nújan: 
\q1 Nai naja ne, me vëhë xi visecoo ná me; vëhë xi tsacjuun. 
\q1 ¡Ndastu mé sahmi xuta cojo ná ngahan! 
\m Cuatjin nújan. 
\p  
\v 7 Ninguitsjun me xi matitjun ngajñi nuju, me xi cuacun cachja cojo nuju cjua rë Nina. Ningatuhuntacún tsëhë cjuandaja xi cavetjucaa tsëhë xcusun xi casahmi me, hacuaha catamangutacún cojo Nina sacuatjin camangucacun me xi cuacun vë. 
\p  
\v 8 Yëjë ni cjuatacun xi tjin rë Jesucristu hisca ntsacu cavetsihin ne, cjuatacun vëhë tjin rë me hisca quihndë, hacuaha cjuatacun vëhë tjin rë me yëjë nixtin xi cjui sa.  
\v 9 Xicatsanguun ndiya rë jingu sa cjuachacun xi hacuiin tangun cojo cjuachacun xi cjuaquixi. Hitsë sa ndaja xi ngayaan ne, cumangutacun cojo Nina ngatsë rë cjuandaja rë me, xi cuma rë ngatsë rë cjuachacun xi vicuya yahnga xuta hacutjin xi meje rë xi xinë xi siuhun ta, tsëhë xi cjuachacun xi vicuya xuta xi cuacun vë ne, tsajin mé machjirëhë rë xuta xi tjengui me cjuachacun vëhë. 
\p  
\v 10 Cjuaveya rë Jesucristu ne, tangun hitsë cojo cjuatjo xi tu nu tu nu ni cjue xcun Nina ngatsë rë jyë́ rë yëjë ni xuta. Tangun hitsë ta, tsëhë xi sacuaha nahmi xi sahmi me xcusun rë xutachanga naja ne, hatuxa cumaji sinë me yojo rë chu xi hme xi sua me sacuaha ngu cjuatjo vëhë.  
\v 11 Ngayujun ni ne, ha ndaja hyun ta nahmi xi matitjun ne, vaha me jni rë chu xi cahme, ficojo me ngajan Cahndë́ Rcun, xi sua rë me Nina sacuaha ngu cjuatjo ngatsë rë jyë́ rë xuta, peru yojo rë chu ne, cahndë́ rë xi sinë me ne, cjue ngajan ngu xín tsëhë nandya, hane ngajan cjuë cueti.  
\v 12 Cuanitjin rë Jesús ta ngajan ngu xín tsëhë nandya cahme me. Cahme me cojo sa xi tsityjahi me cjuatacun rë xuta ngatsë rë jni rë suvá me.  
\v 13 Ngajan xi ngayaan ne, cuetjunxen tsëhë nandya, cuma cuinújan ne, cuetjunxen tsëhë xcusun rë xutachanga naja, cuanguentjenguen Jesús, hacuaha meje rë xi scaa naja xi choho chja xuta tsajan sacuatjin choho cachja me tsëhë Jesús.  
\v 14 Cuma cuetjunxen tsëhë nandya vë ta, tsëhë xi nguehe ngasunhndë vi ne, tsajin naja ngu nandya xi cuejña yëjë nu yëjë nixtin ta ngayaan ne, tivinchasen sa nandya xi tsindaja Nina xi cuma ngascan, cuma cuinújan ne, ngajan ngahnga.  
\v 15 Vëhë xi ngayaan ne, xi tivanguen ndiya rë Jesús ne, meje rë xi yëjë ni hora naxenndajan Nina, sacuaha xi titahan ngu cjuatjo xi cuma rë me, cuma cuinújan ne, meje rë xi ndaja cuinújan tsëhë me, meje rë xi cuinújanquixen xi tsëhë me ngayaan.  
\v 16 Hacuiin nichayun xi nihñu cjuandaja hacuaha cuisecun xingun xingu xingu ngayun ta xi cuatjin nihñu ne, sacuaha xi tituhun rë Nina ngu cjuatjo xi jemu chuya camahani rë me tsëhë. 
\p  
\v 17 Tinuhyun tsëhë me xi matitjun ngajñi nuju, hacuaha nihñu yëjë hacutjin xi meje rë me xi cuacun vë ta me vëhë xi sahmi cuidadu nuju me hacuaha vëë me xi cuechu nixtin xi sua me cuenta cojo Nina. Nihñu ngahñu xi me xi cuacun vë ne, cuma sua rë xahasen rë me, hacuiin choho cuma rë me xi tisahmi me xa cuatjin ta sa xi choho cuma rë me ne, tsajin mé machjirëhë xi cuma nuju. 
\p  
\v 18 Nihñu oración ngatsë niji ta, tsëhë xi ngayin ne, hyin cojo cjuatacun niji xi cjuatacun niji ne, tyjahi, hacuaha hatuxa meje nihñi cjuandaja ngajñi rë tu mé ni cjuacjintacun.  
\v 19 Hacuaha ngahan ne, jercu cjuéhya sa nuju xi cuatjin nihñu oración ngatsë niji, cojo sa xi sua Nina cahndë́ xi hitsë sa xati cuinduvatjëngë nuju. 
\s1 Nguehe cuijnetaha cjua 
\p  
\v 20 Quihndë ne, ngayaan ne, ha hyan ta Nina ne, sua naja me cjuandaja cjuajeya, hacuaha catsicuya me Nai naja cjuahñu, me xi cavejña ngajñi rë nima. Nai naja ne, hacuaha jemu ndaja sahmi naja me cuidadu sacuaha sahmi cuidadu ngu xuta chu tsánga rë me. Cuatjin ma sahmi Nai naja ngatsë rë jni rë me xi cavetju hya xi cahme me, jni xi casahmichihin rë compromisu xi yëjë nu yëjë nixtin sahmi xa.  
\v 21 Nina catisua nuju me yëjë cjuandaja rë me, cojo sa xi ngayun ne, cuma nihñu yëjë hacutjin xi meje rë me. Hacuaha catisahmi me cojo naja hacutjin xi chuya rë me, ngatsë rë xi ngayaan ne, tjin tangun cjuatacun naja cojo Jesucristu. Hane ngayaan ne, meje rë xi nihña jyë nihña hnga Jesucristu yëjë nu yëjë nixtin. Cuatjin jain. 
\p  
\v 22 Ngayujun ni ne, nihñu favor ne, tisiñuju cojo cjuasua cjua xi catsihindu nuju vë ta hacuaha hacuiin cjín cjua vë xi catsihindu nuju.  
\v 23 Nguehe tisuá tijimachaya nuju ta cha Timoteo xingueen ne, ha camandaya cha tsëhë cjuañihi. Sa xi cjuehe xati cha ne, cuinduvintjenguin nuju ndyá, hane ndyá sacú xingueen.  
\v 24 Tuhun ngu nina naha cojo yëjë me xi matitjun ngajñi nuju cojo yëjë sa me xi má ladu rë Nina. Xuta Italia xi xuta rë Nina ne, hacuaha tsingatju me ngu nina nuju. 
\p  
\v 25 Nina catisua nuju me cjuandaja rë me. Cuatjin jain.