\id 2TH 2MTSNK-OMU SEBEZI NO KUTOLOKA EBIBELE NO SILUYANA
\ide UTF-8
\h MATESELONIKA NO WIILI
\toc1 Eliñolo no wiili lya Paulusi ku Mateselonika
\toc2 2 Mateselonika
\toc3 2 Mate
\mt2 ELIN̄OLO NO WIILI KU
\mt1 MATESELONIKA
\imt Okulimukisa ku Mateselonika no wiili
\im Elin̄olo no wiili ku Mateselonika kama lina kun̄oliwa kwa Mutumiwa Paulusi (1.1). Kama nakun̄ola eli lin̄olo mukwibiba munyima no Mateselonika no weli, mu myaka makumi atanu ni kamweya munyima no kuleiwa kwa Kilesite. Paulusi yosili mu Kolinte abana kun̄ola eli lin̄olo ku Keleke mu Teselonika, Ekeleke eyo ana kuwana mu musipili waye no wiili no ulapeli (Tikezo 17.1-10). Kama yamba mu buka no Tikezo nji Ekeleke kama inakwikalanga ni kalulo no Majuda ni Magelike no kupula.
\ip Ekeleke no Mateselonika kama ifanena okutwalela etingana ni tinako no mamaneneno ni kwiya kwa Kilesite aka no wiili, kakuli Paulusi kama anakwin̄ola aka no kupula mu man̄olo aye onje ku Mateselonika. Beebi ekalulo no Mateselonika no wiili kama yamba eino tinako no mamaneneno. Paulusi mane osiba emamela okulwisa eyi nambulwa tuso. Omunu yonje kama afanena okusebeleza eilya yoo (3.6-10).
\iot Emitwi no titaba
\io1 1. Paulusi kama atateka elin̄olo muukulimukisa yonyene nawo aikalanga noo mu 1.1-2
\io2 2. Cwale kame aku tumela kwa Nyambe mulibaka no Keleke mu Mateselonika ni kwalapelela (1.3-12).
\io3 3. Mukauhanyo no wiili, Paulusi kama aamba eyi no tinako no mamaneneno.
\io4 4. Cwale kama aamba okulwisa eyi nambulwa tuso mane ni tuso no kubeleka (3.1-15)
\io 5. Paulusi kama amana mu kukeeta Ekeleke kame (3.16-18).
\c 1
\p
\v 1 Okutunda kwa Paulusi, Silubanasi ni Timoteya.
\p Ku Ndoo ya Nyambe na mu Muteselonika mwa Nyambe Sitetu mane ni Mbumu Jesu Kilesite. 
\v 2 Sishemo siikale naanyi ni kozo ya Nyambe Sitetu ni Mbumu Jesu Kilesite.
\s Ekatulo ba kwiiya kwa Kilesite
\p
\v 3 Kame tufanena okuba etumbo kwa Nyambe mu nako yonje mulibaka lyenu, aasingwa, kanyi omu kufanenena kakuli etumelo yenu kame ikula mukupula mane ni lilato lyenu moonje sebeli lyekeza. 
\v 4 Abo cwale aaci twenyene kaama tukuyema kwaanyi mu Tikeleke ta Nyambe mulibaka mu kongota kwenu mane ni mu tumelo yenu mu mayando ni matata ao mubitamo.
\p
\v 5 Ou ni upaki no katulo no kuluka ya Nyambe, nji mutendiwe aafanena ku mubuso wa Nyambe, owo muyandela. 
\v 6 Kakuli Nyambe ni wakuluka, mbateneke outata kwao amiyandisa, 
\v 7 mi mbabi epumulo kwaanyi muyandisiwa mane ni kwaaci ngeso, abo Mbumu Jesu aba sa shootolwe kuwilu ni mutindimi no mulilo mane ni mang'eloi aye no kongola, 
\v 8 mbabi ekoto kwao kaalimukile Nyambe ni kwao kaakuteke eliywi lya Mbumu wetu Jesu Kilesite. 
\v 9 Mbaayandisiwa mu koto no kwaabwa mane ni kutundisiwa beebi ni Mbumu ni kanya no kuneneba kwaye, 
\v 10 cwale aba saiye ba liywaa elyo nji akanyisiwe mwaanu aye no kukena onje ni kumakalisiwa mwao onje ao ana kupumena, kakuli amaywi etu kwaanyi naku asikupumenawa.
\p
\v 11 Ku mamaneneno aa, enako yonje kame tumilapelela nji Nyambe wetu amitende aafanena ku kwisana kwaye mane mu maata aye aiyatetete emilelo yenu yonje no kuwaba ni misebezi yenu no tumelo mu maata aye. 
\v 12 Abo cwale nji elitina lya Mbumu wetu Jesu likanyisiwe mwaanyi, mane naanyi ngeeso okutunda kwa yonyene, mulibaka no sishemo sa Nyambe wetu ni Mbumu Jesu Kilesite.
\c 2
\s Omulume no kwa Kong'elela omulao wonje
\p
\v 1 Cwale okukumanena neyi no kwiiya kwa Mbumu wetu Jesu Kilesite ni kukuwana kwetu naye aasingiwa, kame tumikumbela nji, 
\v 2 mulese oku lelubela oku nyanganyisiwa mu minahano simba ku cilisiwa, simba ku Mebo, simba ku maywi, simba ku mang'olo ao aamba nji mwendi kame atunda kwaaci, nji eliywaa lya Mbumu lyaiya kale. 
\v 3 Mulese okongiwa ku munu mu ndila yonje, kakuli eliywaa elyo kalitamba kwiya konji oku kufutukela aba sakwiye oweli mi ku monahale omulume no kwa kong'elela omulawo wonje, yonyene otatelele okasinyeha. 
\v 4 Woyo olwisa ni kuku nuneka yonyene kwao akwisana nji Nyambe ni kwasikulapela onje, nji cwale ashimbe esibaka saye mundoo ya Nyambe mane ni kukuyema yonyene nji Nyambe.
\p
\v 5 Kandi anyi kamupuluka nji abo meni sili nanyi inaku myambela eyi yonje? 
\v 6 mi mulimukile eso siliyeisa nji cwale woyo no kwiiba ashotoliwe mu nako yaye. 
\v 7 Kakuli amaata no tikunutu no mulume no kwakong'elela omulawo tatateka kale okubeleka, kono kaitamba kutendahala konji woyo oikanisa okutendahala aba satundisiwe mu ndila 
\v 8 mi cwale woyo no kwa kong'elela omulawo aba sashotolwe, mi abo cwale Mbumu Jesu mba mwibaa ni koyela na mukanwa kaye mane ni kumu sinya mu kumonahala ni kwiiya kwaye. 
\v 9 Okwiiya kwa woyo no kwa kong'elela omulawo mutikezo ta Satani mbakwikala ni maata ni isupo no mapwa ni timakazo, 
\v 10 mane ni koonga no kwiiba konje kwao afanena oku sinyeha kakuli naakana oku singa eniti mane nji ayoyisiwe. 
\v 11 Cwalehe Nyambe sebeli otuma amaata no ubofu okwaatende asiku pumena eyi no mapwa, 
\v 12 nji cwale onje aatuliwe awo no kwaapumena eniti kono kame ana ku wabelelwa eyi no kwaluka.
\s Namuketelwe oku Yoyisiwa
\p
\v 13 Kono kame tufanena okuutumela kwa Nyambe mu nako yonje, abetu aa asingiwa kwa Nyambe, kakuli Nyambe na kumiketa okutunda ku matatekelo nji mu yoyisiwe mu kukenisiwa ni mebo ni ku pumena mu uniti. 
\v 14 Mulibaka elyo Nyambe na ku miisana mu liywi, nji cwale mu tambule ekanya ya Mbumu Jesu Kilesite. 
\v 15 Cwalehe abaange, mukoongote ni kwikalelela mu sizo tuna ku miyeta, simba mu liywi, simba mu tunwa, simba mu mang'olo. 
\v 16 Cwale Ombumu wetu Jesu Kilesite yonyene ni Nyambe Sitetu woyo ona ku tusinga ni kutuba kozo na kwaabwa ni minahano no kuwaba mu sishemo, 
\v 17 ababalele emicima yenu ni miongota mu misebezi yonje no kuwaba ni mu maywi.
\c 3
\s Mutulapelele
\p
\v 1 Abaange amamaneneno, mu tu lapelele, nji eliywi lya Mbumu lifanene okwekeza okwambiwa muwangu ni ku kutekiwa kanyi omu lina kwikalela naanyi. 
\v 2 Mi mulapele nji tu fanene oku tundisiwa ku ufokoli ni kwaanu no kwiiba, kakuli kasa omunu yonje oli ni tumelo. 
\v 3 Kono Ombumu no tumelo, mba miongota ni ku mi babalela kwa woyo no kwiiba. 
\v 4 Mi kame tu yupisisa mwa Mbumu kwiinu yenu, eyo mu tenda ni ku tenda einu eyo tu mi laelela. 
\v 5 Mbumu afanene oku mi twaletela emicima yenu ku lilato lya Nyambe ni ku kongotiwa kwa Kilesite.
\s Okulemusiwa mulibaka no kububa
\p
\v 6 Abaange, cwale kame tu mi laelela, mu litina lya Mbumu Jesu Kilesite nji mu tunde ku mwabenu yonje woyo no kububa mu kwapumena mi kasa mu ku kong'a esizo eso mu na tambula kwaaci. 
\v 7 Kakuli anyi mwenyene kame mulimukile oku tenda oku kong'a eyo tuna tende, katusi kwitenda abo me tuli naanyi. 
\v 8 ka tusi kulya esinkwa sa munu yonje katusi teneka, kono oukuwana ni mu misebezi kame tu sebeza ousiku ni munji, nji tu lese oku imezwa omunjili mwaanyi. 
\v 9 Kasa nji ni mulibaka nji katu kwite etukelo eyo, kono oku miba omutendelo wetu omwanda no ku sebeza. 
\v 10 Kakuli simba aba tu na kwikala naanyi, na tu kumiba etaelo eyi. Nji omunjili ka sebeze, mu lese oku mulumelela nji alye. 
\v 11 Kakuli kame tu yupa nji anjili mwaanyi kame ayoya mu kwaongola, ka tende omusebezi simba mumweya. 
\v 12 Cwale aanu no ngeso kame tu laelela ni kwaalemusa mwa Mbumu Jesu Kilesite oku tenda emisebezi yoo mu koondoka ni ku wana omoyo woo. 
\v 13 Abaange, mulese oku katala mu ku tenda wino. 
\v 14 Nji omunu munjili kame akana oku kuteka eyo twamba mu ling'olo eli, mulimuke woyo munu, mi mulese oku tenda esinjli kwa yonyene, nji afanene okweena. 
\v 15 Mu lese oku mwaliketa kanyi esiila kwaanyi, kono mu mueleze kanyi omuasikupumena munjili.
\s Amaywi no Mamaneneno
\p
\v 16 Cwale mulesele Ombumu no kozo amibe ekozo mu nako yonje ni mu tindila tonje. Ombumu aikale naanyi enako yonje. 
\v 17 Meene Paulusi, kame ni ng'ola etitumeliso eti ni maoko ange. Esi esisupo mu ling'olo lyange lyonje, mo kame omu ina ng'olele. 
\v 18 Esishemo sa Mbumu wetu Jesu Kilesite siikale naanyi moonje.