\id 2TI Lewo \h 2 Timote \toc1 M̃aki Nalua Nap̃a Pol Siria Pa Pan TIMOTE \toc2 2 Timote \mt2 M̃aki Nalua Nap̃a Pol \mt2 Siria Pa Pan \mt1 TIMOTE \imt1 Visayuena Na Tusi Nene \is1 Suniena plas na tusi nini \ip M̃aki na lua nene nap̃a Pol siri pan Timote, ana pulen visena wo lala na iilaen Timote nap̃a kiena erau viu nap̃a sum̃a miila naga. Sitomena keviu nap̃a sike e m̃aki nini, Pol pisa pan Timote sape sum̃alu m̃arera vena visawal lologena wo kiena Yesu Kristo. A pisa pania sape naga monar uarar vianiena lelaga na lologena wo, a na Tusi Marua. Naga pisa pan Timote sape monar kila luwe ga yum̃aena na vianen yaru lala, a vena kila yum̃aena na wereen yaru lala, pe suri korenaga visae yaru la avisakare naga pona avisakare yum̃aena na sum̃are nap̃a naga sum̃a kila ke ne. \ip Pol pisa pan Timote vena ve va sikol re naga e visena wowe lala a visena na veveyuena nap̃a tap̃atete kila suri wo tai, ana vena kila kareen ga yaru lala. \ip E m̃aki m̃enaga nini Pol pisa pan Timote sape taveve p̃alaga wo la sa nap̃a naga kila ke ne e kiena maliena. Nanene p̃elaga kiena Pol sa nap̃a mlelaga m̃arera, a kiena sitomiena piyavi, a sinen si yaru lala, a kiena p̃elaga nap̃a pa p̃arpoyo e pogos m̃arera lala nap̃a yaru la akila miloge piowa e tasnena, ana naga pe paruru re poli, sum̃a pisawal luwen ga lologena wo kiena Yesu Kristo. \is1 Komp̃asnen tusi la na nini \ili Visena p̃esa 1:1-2 \ili Pol mieluar Ntewa vanon Timote ana pian Timote 1:3—2:13 \ili Pol mila visena na iilaen maliena kiena Timote 2:14—4:5 \ili Pol pisayu naga amio kiena yum̃aena 4:6-18 \ili Visena maro kiena Pol 4:19-22 \c 1 \s1 Visena p̃esia \p \v 1 Naruu Timote, in Pol nap̃a nesiri m̃ak nini pim̃asu pan ko, nap̃a nasinenanena kiena ne Ntewa ga naga pisirlua inu nepim nepe nalogena kiena Kristo Yesu. Kristo Yesu naga pe purp̃es nen malena nap̃a Ntewa pisaar pan la nap̃a amlelaga pania. \p \v 2 \x - \xo 1:2 \xt Yum̃aena 16:1\x*Timote, kiau leniena nesape yoko Ntewa Arimata a kieta Sup̃e Yesu Kristo, lalua aligan pupia lemamiena, sineyeena, a sum̃arena su lue ga pun ko. \s1 Visena na potena pa Ntewa \p \v 3 Sa nap̃a kau apua lala ataveve nanua rui pimi, in na nom̃areran lue ga kilaen yum̃aena kiena ne Ntewa, a in na nesum̃a nop̃ikeyon nap̃a nelotun naga amio losineu wetelu. Ana legiena a lemalo, e pogos na leniena lala, nesitom̃al ko m̃aga, nesum̃a nepisa lue ga potena pap̃isi pania vanon ko. \v 4 Nesum̃a nesitom̃al ke wamaram̃a lala nalogeen viowa, ana kila narui sineun manene pap̃isi nap̃a neim̃asu nem̃alivin ko sina. Visae nevisu sina ga maram̃a, yoko neloge wo na neloge wo! \v 5 \x - \xo 1:5 \xt Yum̃aena 16:1\x*Nesum̃a nesitom̃al m̃ena ga kiom̃a naviawaena lelaga, nap̃a nanua se kom̃a apua nap̃a sira marua Lois, siraunia se kom̃a m̃am̃a nap̃a Yunis, a sa nap̃a nepisu kilale rui, nagane sike e ko. \p \v 6 Naga ke narui nesum̃a nesitom̃al m̃ena ga nalaena nap̃a Ntewa mla pan ko, pogos nap̃a nopu p̃arum̃a nemlotuwo ko. Sineun nesape nevisa van ko sanini, ve otam̃an re kapi na nalaena nene vito tano, ana monar osum̃a okila lue ga vivaga ruru silaga. \v 7 Monar ositom̃al Ninuna nap̃a Ntewa mla pan ita, naga pe ninuna re nap̃a na maraunen yaru poli, ana naga pe Ninuna na m̃areraena, pe Ninuna na sitomena, a pe Ninuna nap̃a kila yaru kawe ruru kiena malena. \p \v 8 Visae lelaga kemua nap̃a Ninuna ke nanene narui sike e kiom̃a malena, monar ve omawan re visawalen lologena wo kiena Sup̃e va yar lala, pona monar ve omawan re nap̃a ovisawal va yaru lala ovisave lelaga sane ko na ope kiau erau wo tai. A amliganin nesike e yum̃a naloge viowaena vanon kiena yum̃aena, ana pe pon re omawan inu vanon sur nene poli. Kiom̃a suria nap̃a yoko okila, monar okekaran ove p̃egas omio inu e naloge viowaena vanon Lologena Wo, vano tol nap̃a m̃areraena kiena ne Ntewa kila ko otorokin oyum̃aenia. \v 9 Ntewa ke narui, nap̃a naga tamalia ga ita luwoka rui, a pio ita ga luwoka teyaloro e mrapa na kiena malena wa, ana silaga kilia iila ita. Nanene pe vanon re ga nap̃a italua tekila kiena yum̃aena wo poli, pona italua tekila ya, ana naga kila ga molue kome kiena sitomena amio kiena lemamiena wo pan ita. Kiena lemamiena nena, naga kila ruruia, mligan ruruia sike amio Kristo Yesu nanua sumo rui, sumon nap̃a siar kieta pogos ita yeririna lala na yomarava. \p \v 10 Ana lemamiena nene sum̃a sanene pano-o tol nagane towe ga, nap̃a m̃alivi mare ga e yomarava nap̃a kate e marata kome kieta natamaliaena Kristo Yesu. Naga pitomi e yomarava, kila make nam̃areraena na marena pimi pe sur korena ga tai, a kiena nalologena wo kila nap̃a nagane tesike e yomarava nini wa, tekilia telual malena wo. Ana naga kila m̃ena nap̃a siraunia, yoko tekilia teva loyum̃a e malena nap̃a tap̃atete p̃isi pogos tai. \p \v 11 \x - \xo 1:11 \xt 1Tim 2:7\x*Lologena wo nena, naga ke narui nap̃a Ntewa pisirlua inunia nepe kana navisawalena nena, nepe kana nalologonena nena, nepe kana navianena m̃ena ga. \v 12 Kiau yum̃aena nena nane kila nepane ke pogos m̃arera lala loyum̃a e yum̃a naloge viowaena nini vanonia, ana pogaga nap̃a, pe pe sur re tai pan inu poli. Pe nemawa re poli, komin nekilia nesape yar nap̃a nemlelaga ea, naga pe lelaga, kiau nalelagaena ea m̃arera ruru po pap̃isi sane ya nap̃a nemligan e limana, yoko uarar ruru m̃arera sum̃a ga vano-o tol Legiena maro. \p \v 13 Sanini Timote, nesape nevisa van ko sanini, monar otaveve ruru mrapa na visena mesmesu lala nap̃a nemla pan ko, monar osum̃alu m̃arera e Yesu Kristo silaga, a monar oligan ruru kiena sinesiena sum̃a ule e kiom̃a malena. \v 14 Ninuna Wa sum̃a kokonia ruru losineta, ana ve oligan re navisa ruruena la nap̃a naga mligan ruru sike e kiom̃a malena rui, ana oloun ruruia. \s1 Pol pisayu Onesiporas \p \v 15 Nekilia nesape omloge lologena viowa tai rui, nap̃a asape li na lelagaena lala nae pupia lepas nap̃a Esia, apilon m̃asila pan inu rui, a la nene amio m̃ena kieta erau lua nap̃a Paekelus amio Emosenisi. \p \v 16 Ana kieta wolai wo nap̃a Onesiporas, naga kila po pap̃isi. Pe sur korena ga nap̃a apiar inu e sen lala loyum̃a e yum̃a naloge viowaena nini, ana naga pe mawan re nap̃a imi katen inu poli, ana nemlen pa Sup̃e vena visa ruru naga ve keviu amio kiena namratava lala. \v 17 Naga pimi m̃aliv Rom nini, pe yam piavi re nenaga naga p̃iyon nap̃a sape lual inu, pano-o pimi tol inu e yo nene. \v 18 Naga sum̃a kila manene ke sina ga suri wo la pap̃isi pan inu e Rom nini, sa ke ga nap̃a miila ruru inu sumo rui pogos nap̃a nesike gar Episas nanua ne, sa nap̃a kam na akilia ruru rui. Naga po pan inu sanene, nemlelaga nesape yoko Ntewa sinen ye ruru nena naga e legiena maro. \c 2 \s1 Yaru na mara kiena Yesu monar war naloge viowaena \p \v 1 Naruu Timote, nesape nevisa van ko sanini, popon ola lemamiena kiena Kristo Yesu ve keviu e kiom̃a malena, ana yoko okilia om̃arera ruru wo vena osum̃alu osulue. \v 2 Yam moki rui nap̃a omiagogon kiau visena lala nap̃a nepisawal ke e maran yeririna lala, ana monar olual yar lap̃asia nap̃a auarar ruru yum̃aena, ola visena la nene van la, ana siraunia, la m̃ena ga akilia avian liluen la vano tol yeririna tap̃ena lala. \v 3 Ita yar na kilaen mara lala kiena ne Kristo Yesu, yoko ita veve taaga monar kieta pogos na lualen pog m̃arera la sike ne. Ana visae nagane kiom̃a pogos narui, monar ola ga ve sa nap̃a kiom̃a lepas na yum̃aena tai. \p \v 4 Ositom ruruli yar na mara lala. Kiela yum̃aena monar akila kare m̃areraen na sinekar kiena ne kiela yerkawa vito tano, ana pe asikol la re amio yum̃aen kar la poli, sa nap̃a yar tap̃ena la asum̃a amiyum̃aen ke ne. \p \v 5 A monar ositomyuli m̃ena yaru viu la nap̃a akila kiriena. La am̃areran ke nap̃a atauluia, vena atol kiela nalaena tai, ana visae akilaro navisaluaena na kiriena, yoko akila plan la, tap̃atete atol sur tai p̃isa. \p \v 6 A ositom̃al m̃ena yaru na yum̃aenen lokove lala. Yar na m̃areran yum̃aenen lokove mapila ve moki, nane yar ne nane popon war kinanena ea. \p \v 7 Sur la ne nesum̃a nepisa ke ne, visae ositom ruru la, yoko Sup̃e iila ko vena otol kiena manmaruaena wo lala a kiena kiliaena lala ea. \s1 Popon yar na lelagaena la asum̃a asitom̃al lue ga Yesu \p \v 8 Naga nap̃a yoko ositom manene laa naga, nane Yesu Kristo. Naga paeme e yomarava molue kome lus kiena yermarua P̃arin Sup̃e Tepet, a siraunia, am̃em̃ar naga, ana naga mal sina sa nap̃a Lologena Wo pisa. Nane Lologena Wo ne nane nemlologon ke ne, \v 9 a nane Lologena Wo nap̃a netol pupia kana naloge viowaena e yo nene, nap̃a kila narui nagane apiar tasneu la wetelu e pototo, sa nap̃a in na yar viowa na kilaroen navisaluaena. Ana sur tai nap̃a yar la tap̃atete aviaria, nane visena wa kiena ne Ntewa, komin momolue ke ga wa tap̃atete avisalup̃aria. \p \v 10 In na nesum̃a sineu miye manene yeririna la nap̃a Ntewa mligan plan la vena nekila la atol malena kome Kristo Yesu. A sitomen ne na nene narui kila sane pog m̃arera ya nap̃a nokom ea, ana in na nesum̃a nakawean inun ga vena nekila make suria, vena la m̃ena ga akilia atol naurarena nae ma e peni nap̃a tap̃atete p̃isi pogos tai. \p \v 11 Yauena tai pisayu sur nene, kana visena ne lala lelaga pap̃isi, nap̃a pisa sanini, sape \q1 “Visae teva e marena temio naga, yoko temal temio naga. \q1 \v 12 \x - \xo 2:12 \xt Mat 10:33; Luk 12:9\x*Visae tesum̃al m̃arera e pogos m̃arera, yoko teve sup̃en yo temio naga. Visae tevilon m̃asita vania, yoko naga ligan ita, \q1 \v 13 ana visae tekila pal nap̃a teloru, yoko naga tarar ita m̃arera sum̃a ga, komin naga kuslua ita tepe kiena, ana naga tap̃atete visokan, tap̃atete si kovenlua ita.” \s1 Yaru wo na yum̃aena kiena ne Ntewa monar uarar m̃areran visena lelaga \p \v 14 Nalelagaena la ne asike ne, monar osum̃a ovian la m̃aga vena ve sinela p̃esan re sur la nene. A monar ovis m̃arera van la ovisave e kia kiena ne Ntewa, ve aveveyun la re. Apepeyun ke kinas nen visen la sane asum̃a akila ke ne, pe akila re sur wo tai poli, a pe amiila re nena la tap̃ena nap̃a asum̃a amiagogon ke poli. \p \v 15 Sur wo ya la nap̃a okilia okila sane yaru wo tai na yum̃aena kiena ne Ntewa, monar okila make ga vena wo vap̃isi e kiena navisuena. Visae okila wo ve sanene narui, yoko tap̃atete omawan mras nap̃a kiom̃a yum̃aena waria, a okilia oim ove yar na vianen visena lelaga lala kiena ne Ntewa va yaru lala mesmesu a wo. \p \v 16 Ovisuar ruru e visena korena la nap̃a yar la asum̃a apisayu kare ke ne. Visena la ne sanene pe nasuen re e sitomena kiena lelagaena la poli, komin nap̃a akilia aure la ava manene laa e p̃elaga nap̃a Ntewa pe sinenan re poli. Popon ve ova re lavisin yar la nap̃a akila ke sanene, \v 17 komin visena kien la nene sa nap̃a magka wa tai, nap̃a kar ke tas nen yaru tap̃atete imi wo pogos tai. \p Nepisu sane monar nevisa sane lalua nene Aemeneas amio P̃aelitas, lalua sa towe m̃a nene rui, \v 18 komin nap̃a apur matan mrapa na visen lelaga, asum̃a amlologon ke kiela lelagaena tai nap̃a pe pe lelaga re nenaga. La asum̃a apisasa ke asape e luas nen yomerava, nasum̃alen si e marena na peraga, komin e kiela sitomena, asitom asape Ntewa kila ke rui, nane e pogos nap̃a naga miyum̃ae e kieta malena. Ana pogos nap̃a amlologon ke kiela visokanena nene, asum̃a akila kare ke lelagaena kiena yeririna la moki, kila narui kiela sitomena pimi peve lua sina. \v 19 Ana ko m̃ena ga monar ve sinem̃a kurkur re, komin yum̃a nap̃a Ntewa sum̃a miyum̃aenia, miasin namaplarena la nene sum̃al m̃arera ruru sum̃a ga. Visena lala e siriena wa kiena ne Ntewa sike ne nap̃a torokin e lepas nene, a tai pisa sanini, sape \q1 “Ntewa kilia ruru po pap̃isi a la nap̃a ape kiena yeririna lelaga.” \m A nalua nena, pisa sanini, sape \q1 “Yaru nap̃a mla kia kiena Sup̃e teke e kiena malena, \q1 naga monar ligan p̃elaga lala na mrapa nakilaen mlamulena viowa.” \p \v 20 Ositomyuli pupia yum̃a m̃ana yar na sur moki lala. Loyum̃a e yum̃a la nene, tekilia tevisu pias nen sur na kinanena lala, nap̃a lap̃asa, amiyum̃aen e kol pona selpa, a lap̃asa, amiyum̃aen ga e porotano pona e laki. La nap̃a apisu sane po, asum̃a apio kinanena pa ea, e kiela pupia p̃ap̃agena kerkeviu lala, ana lap̃asa, asum̃a akinan kai ga ea. \v 21 A ita yeririna lala ita maran taaga sa ke ga nene. Yar nap̃a kila kiena malena merarava ruru po, a pe wa, a pe kila re yum̃aena viowa la poli, yoko kiena yerkawa were naga kila kiena yum̃aena wo la ve moki e maran yar lala. \p \v 22 Visae sinom̃an osape ko ove sanene, monar ovisa lup̃ar kiom̃a naninuena m̃arera lala a nasinenanena viowa lala nap̃a sitomena kiena m̃ee lala kilia ulenia. Monar op̃ionli nap̃a kiom̃a sitomena ulen nawoena, a viawaena, a sinesiena, a sum̃arena, ana sanene yoko wo vap̃isi van ko omio tap̃ena la nap̃a kiamiu sitomen taaga, nap̃a asum̃a amlen ke pa Sup̃e vanon kiena naiilaena. \p \v 23 Yam mokliu, yar la akilia aveveyu vap̃isi van la komin sur wowe lala pona kiela sitomena kar lala, sa nap̃a pe akilia re suri tai poli. Pogos tai veveyuen la nene va m̃aga tol nap̃a asulania, akilia alip̃erela sina, ana ko na pe pon re ova loyum̃a e visen la ne sanene poli. \v 24 Yar nayum̃aena kiena kieta Sup̃e, naga monar ve sinena kar re yar tap̃ena lala, ana naga monar visuar ruru la, monar kilia ruru mrapa na vian malumunlaena. Naga monar ve sinen mimi re vilaga, ana kiena sitomena ve piavi ruru wo van la. \p \v 25 Pona pogos tai lap̃as ve aloge re naga yo, yepel mavinia, ana visae kilali nap̃a were ruru kiela sitomena, ana naga monar malum ga van la. E mrapa ne nanene pona Ntewa yoko kilia la narin pogos tai van la vena vilonen kiela sitomena, vena atol kiena visena lelaga. \v 26 La ne sanene, Yermare sum̃a p̃uarar ruru la ke rui, sum̃a m̃areran la ke vena akila ya nap̃a naga sinenania. Ana visae akilia atol maran si kiela kiliaena wo, yoko akilia aure vetan kiena pova a kiena visokanena lala. \c 3 \s1 P̃elaga na p̃arm̃arera lala na legiena maro \p \v 1 Timote, monar ve sineta p̃esan re sane e legiena maro la nini, yoko monar pog m̃arera la ve moki aimi am̃aliv. \v 2 Monar ve sa nene narui, komin nap̃a e pogos nene yoko p̃elaga kiena yar lala va viowa manene laa. E pogos nene, yoko ave sanini: \li1 yoko ave yaru na sitom̃al laen ga, \li1 yoko asitom manene ga kilavaru, \li1 yoko avilave a awarwarla vap̃isi, \li1 yoko ave yar na veveyuena, \li1 yoko tap̃atete alogear visena kiena kiela yermarua lala, \li1 yoko tap̃atete nena avisa potena e sur tai, \li1 yoko asitom korenan ga sur wa lala, \li1 \v 3 yoko tap̃atete awo van yaru tap̃ena, \li1 yoko ave p̃arm̃arera vap̃isi, \li1 yoko aviueli a avisa kare sur wo lala, \li1 yoko sinela kar yaru lala, asu la, \li1 yoko yepel mavin sur wo lala, \li1 \v 4 yoko avisa kotalia kiela erau lala, \li1 yoko ve asitom re suri tai, \li1 yoko asitom asape la ga na apo, \li1 yoko ve sinela si re Ntewa, ana sinela si ga malena wo ya nap̃a la sinelania, \li1 \v 5 a visae akilali nap̃a auarar towe laa narin yum̃aena na sum̃are lala, ana na nene e ga e kulusa, komin nap̃a kiela malena pisawal ruru rui sape m̃areraena lelaga na lelagaena e Ntewa pe to re nena e la poli. \p Nane p̃elaga na malena kiena yaru na legiena maro lala, a monar ve osu re lavisin la. \v 6 Sineu miye m̃ena sira la nene pap̃isi wa nap̃a navianena navisokanen lala asum̃a ateteliv ke m̃ala um̃a lala. Sira la nene lap̃asa asum̃a ap̃ar ke urmiena namlamulen viowa rui, a lap̃asa sitomen tap̃ena la sike e la, kila sane visae yar la aimi vinau sanene, ana sira la nene ameu pap̃isi, pe puriula re si nap̃a avisalup̃ar la poli. \v 7 Ya nap̃a yar la nene apisa, ana amlelaga ga narui, akila m̃a sanene pano-o ana pe atol ruru re kiliaena napo poli e visen lelaga kiena ne Ntewa. \p \v 8 Yar la ne apivim ke sanene, nepisu la sane ape nasinekar kiena ne visena lelaga napo, sane e pogos kiena ne yermarua Mosis nanua sumo, lalua nap̃a Sanes amio Sampres, apim apian kare sitomena kien yar la moki. Yum̃aena ne nanene yar la nene asum̃a akila ke na wa, nap̃a kiela sitomena la pilolon kare pa piowa, pe apuarar re si kieta viawaena poli, ana apurmatan apa e tap̃ena. \v 9 Ya nap̃a la akila naga piowa manene laa, ana pogos na waren kana nakoaena nena yoko imi m̃aliv pogos tai na wa, sa nap̃a m̃alivin lalua na nepisa ga na wa. Pogos tai, amilan ga kiela visokanena kate ga yometava, ana yar la apisu kilalea. \s1 P̃elaga wo lala kiena ne Pol \p \v 10 Timote, tesu lele taaga nakonua rui, ana nekilia nesape ko na opisuveve inu po pap̃isi. Okilia inu sanene, nap̃a \li1 okilia ruru ya nap̃a nepian ke pan yar la ea, \li1 okilia ruru kiau p̃elaga, \li1 okilia ruru ya nap̃a sineun nesape neyum̃aen e kiau malena, \li1 opisu kiau viawaena e Kristo keviu sanape, \li1 okilia ke osape kiau sitomena piavi, \li1 opisu ke sinesiena nap̃a teke e inu pa yar tap̃ena keviu, \li1 okilia ke osape pog m̃arera ya nap̃a pimi pan inu, ana nesum̃alu ga, \li1 \v 11 \x - \xo 3:11 a \xt Yum̃aena 13:14-52, \xo b \xt Yum̃aena 14:1-7, \xo c \xt Yum̃aena 14:8-20\x*okilia ruru napiowaena la nap̃a kiau nasinekar la akila pan inu, sane e pupia kumali telu nene, Antiok, Aekoniam amio Listra, \li1 a okilia ke yepe lalaea nap̃a nop̃aria e limala e pogos la nene. \p Naloge viowaena la nene am̃arera pap̃isi, ana nakawean inu ga pano-o nom̃al nap̃a Sup̃e pimi p̃erelua inu e napiowaena make la nene. \p \v 12 Ee, ita punu ga nap̃a sinetan Kristo Yesu se ita, pona telual malena wo temio, monar tekilia tesape yoko towar naloge viowaena e yar tap̃ena lala. \v 13 Nanene na pogaga, ana naloge viowaena tap̃ena sike ga wa naga piowa ga, nap̃a yaru viowa lala amio yar navisokanena yoko awaria. Nagane asum̃a akila manene ke piowa rui, a yoko akila m̃a viowa sanene vano vano-o viowa manene la, vano vano viowa nap̃a viowa. \p \v 14 Ana ko Timote, okila ga omio kiliaena wo la nap̃a otol rui, ana oyum̃ae va sanene omio lelagaena wo la nap̃a opiawa ruru m̃arera e rui. Ve sinem̃a p̃esan re sane imimi ai nap̃a mepian ko, \v 15 siar e pogos nap̃a ove tokak ke ga wa gar mom̃a, pimi tol nagane, ana kila sa nap̃a okilia ruru Tusi Wa, nap̃a kilologia mrapa na tamaliaena kiena yar nap̃a mlelaga e Kristo Yesu. \p \v 16 Siriena Wa la nene, Ninuna ne Ntewa sike e la, ana akilia aiila ita ve keviu vano-o vap̃isi. Avian ruru ita, awep̃ege sineta, akawe ruru kieta p̃elaga, a akila kieta malena wo nenaga, \v 17 vano vano-o ita yeririna lala kiena ne Ntewa teim towo a tetorokin nakilaena kiena yum̃aena wo lala. \c 4 \s1 Pol miilaar Timote \p \v 1 Timote, sane italua tesike e marana Ntewa, a e kia kiena Kristo Yesu, nepiun tan ko nesape owarar ruru sur lap̃asa nap̃a sineun nesape nevisa van ko. Italua tekilia tesape kieta Sup̃e yoko lip̃ere la nap̃a amarmare rui amio la nap̃a amali, a italua tesum̃a tesitom ke urmi pap̃isi e kiena nawasup̃eena sina, amio kiena nasup̃enena nap̃a yoko naga visirlua, ana monar ologe ruru visena la nene. \p \v 2 Ya nap̃a yoko okila na ve sanini, monar olologon Visena Wa silaga. Visae pog wo pona pog viowa, ana monar osum̃alu m̃arera vena visawalena, monar op̃ion tauluen yeririna lala, monar oure ruru la nap̃a akom ke e mrapa tap̃ena, a monar oiilaar yaru la nap̃a amlelaga. \p A pogos nap̃a okila yum̃aena la nene, silaga kiom̃a sitomena monar ve piavi ruruia, a ve sinem̃a maren re vian laena. \v 3 Pogos la ne pimi ke ne yoko yeririna la yepela mavin vianen wo lala, ana yoko kiligala lala vikiraran sitomen kar lala, a yoko asum̃a aure navianena la ve moki nap̃a asitom ke asape yoko akilia avisa sur wo lala vena kilaen alogewonia. \v 4 Yoko aligan logeen visen lelaga, a yoko akila pal mrapa ava ataveve suniena lala nap̃a yar ga la akila. \p \v 5 Ana ko na ve ove sa re nene, ana okila ga kiom̃a sitomena va ruru sum̃a ga, okawean ko e pogos m̃arera lala, okila kiom̃a yum̃aena na lologonen Lologena Wo, a oyum̃ae taveve ya nap̃a Ntewa pio kon sape oyum̃aenia. \s1 Pol pisu sape lavisi awem̃ar naga narui \p \v 6 E lepas nap̃a pun inu, nemloge sane nagane nepim ke lavisin luas narui, nepimi ke e lele tai nap̃a yoko monar nokup̃ap̃ain kiau malena vanon Lologena Wo narui. Ee, nepisu sane kiau pogos na liganen yo pimi ke lavis narui. \v 7 Ana pogaga, komin nap̃a nekilia sane nekila mara, nop̃aryon m̃arera po; nekiriri, nekila make nenaga; a nopuarar lelagaena, pe nemligan li re pogos tai poli. \p \v 8 Yar napo lala kiena ne Sup̃e yoko atol karo wa na p̃arila, a nesitom sane naga mligan ruru kiau sike ma e peni rui, vena yoko e ga e legiena maro ana la van inu. \p E pogos nene, yoko naga lip̃ere yaru make ga, a yoko naga la nalaena van ita make ga nap̃a kieta sitomena m̃areran nap̃a tekrakravan kiena nawasup̃eena. \s1 Visena maro \p \v 9 Timote, sineun manene nesape owarlion nap̃a oyal kawa oim e nini. \v 10 \x - \xo 4:10 a \xt Kolosi 4:14; Pilimon 1:24, \xo b \xt 2Kor 8:23; Kal 2:3; Taetas 1:4\x*Sineun ko pap̃isi, komin wolai nap̃a Timas, sur na yomarava la ap̃ere kiena sitomena pano-o pure pa garu Tesalonaika. Kresens m̃ena ga pa garu Kalesia rui, a Taetas pe su re si amio inu poli, naga pito ke Telmesia. \v 11 \x - \xo 4:11 a \xt Kolosi 4:14; Pilimon 1:24, \xo b \xt Yum̃aena 12:12,25, 13:13, 15:37-39; Kolosi 4:10; Pilimon 1:24\x*Erau ga tai sike amio inu nagane, nane Luk. Ana visae okilia olual Mak, yoko oure naga imi amio ko, komin nap̃a nepisu naga sum̃a miila inu keviu pap̃isi e yum̃aena kiena Sup̃e nap̃a sineun nesape nekila. \v 12 \x - \xo 4:12 \xt Yum̃aena 20:4; Epis 6:21,22; Kolosi 4:7,8\x*Taekikas, nepitetalia naga pa garu Episas rui. \p \v 13 \x - \xo 4:13 \xt Yum̃aena 20:6\x*Yoko nevisa kiau sur lap̃asa, sanini pogos nap̃a ovam e nini, yoko owarar la avami. M̃au kulkota na miava, nemligan m̃eke puna Karp̃as pogos nap̃a nesike gar Troas, a kiau tus lala amio m̃as nen tus lala, sineun nesape owarar sur la nene imi. \p \v 14 \x - \xo 4:14 a \xt 1Tim 1:20, \xo b \xt Rom 2:6\x*Okilia ke yar na yum̃aenen piaki nap̃a Aliksanta, naga kila visena viowa la mok liu pan inu. Yoko Sup̃e ga visuvevea vena kila ya ne vania, \v 15 ana monar nekila m̃ena okilia nap̃a naga kawe manene ke kieta Lologena Wo, ana monar ovisuar ruru ko ea. \p \v 16 Yer kawa nae Rom lala apis pan inu kumali yam tai rui. E pogos nene, kiau erau tap̃ena lala apureure make ga, pe la yar re tai nap̃a pimi e lepasneu poli. Ana nanene na pogaga, popon sane Ntewa ve sinen karla re vanonia. \v 17 E poglis nene, Sup̃e ga naga taaga amio inu, ana nemloge sane naga mla pupia nam̃areraena pan inu, ana nom̃areran visawalen sur make ga na Lologena Wo e maran yeririna lala, kila narui p̃egas nen la nap̃a pe amlelaga re e Ntewa poli amloge. E pogos nene, lelaga, nesike pae e logon laion rui, ana naga p̃erelua in sina petania. \p \v 18 Nemninue narui am̃a nelual naviowaena ya ne yoko nevan ea, ana nemligan inu e limana Sup̃e, nesape yoko naga tamalia inu vena nesike nemio e kiena yo wo ma e peni, a silaga yoko nelasup̃e si naurarena la vania, vano vano-o ve uro re, sanene. \p \v 19 \x - \xo 4:19 a \xt Yum̃aena 18:2, \xo b \xt 2Tim 1:16,17\x*Sur si lap̃asa navisaena, awis ovisa pokolulagi pona pokolemalo va sira nene Prisila amio wona Akwila, a va m̃ena namratava puna ne Onesiporas. \v 20 \x - \xo 4:20 a \xt Yum̃aena 19:22; Rom 16:23, \xo b \xt Yum̃aena 20:4, 21:29\x*Erastas pe pam re si e nini poli, sike ga Koren, a pogos nap̃a mepam, metol yo M̃aelitas, ana Tropimas mai, nemligan naga sike e yo nene. \p \v 21 Timote, sineun manene pap̃isi nesape monar okilayonli ovam e nini vilaga, komin pogos na miava pimi ke lavis narui. \p La ne e nini asape nevisawal van ko, la asape asitom ko pap̃isi, nane Yupulus, Putensa, Linas, Klotia, amio erau tap̃ena lala. \p \v 22 Nop̃isi e nene narui, nesape Sup̃e sike amio ninum̃a, kiena lemamiena sike amio amiu make ga. \p Inu, Pol.