\id 2TH Lewo 
\h 2 Tesalonaika 
\toc1 M̃aki Nalua Nap̃a Pol Siri  Pa Pan Li Nalelagaena Wa Lala Nae Garu  TESALONAIKA 
\toc2 2 Tesalonaika 
\mt2 M̃aki Nalua Nap̃a Pol Siri  
\mt2 Pa Pan Li Nalelagaena Wa Lala Nae Garu  
\mt1 TESALONAIKA  
\imt1 Visayuena Na Tusi Nene  
\is1 Komp̃asnen suniena plas na tusi nini  
\ip Yaru lala na sum̃are nae Tesalonaika amloge piowa komin amloge ke visena la mokliu, nap̃a asape Yesu p̃asup̃e rui, a amininuwe kare narui am̃a visena nape nap̃a lelaga. Ana Pol siri kiena m̃aki na lua nini pano pa li nalelagaena la garu Tesalonaika vena visawalen visena na lelaga vani la. Naga pisape yoko Yesu wasup̃e sina, ana sumonia p̃elaga viowa lala monar imi viowa manene la vatanon nasup̃enena kiena yaru tai nap̃a yoko imi m̃alivi, nap̃a kiena kia “Yaru na kilaroen navisaluaena,” a yoko naga visakare Kristo amio li nelagaena lala.  
\ip Pol pisawal meraravania sape yaru la nap̃a aulo m̃aki nini monar asum̃alu m̃arera e kiela lelagaena lala, pe suri korena ga visae avane suri viowa la ve moki, pona aloge viowa manenea vap̃isi. A naga sape monar ayum̃ae ga m̃arera vena atol suri la nap̃a limala plasania e kiela maliena lala, sanap̃a naga amio yaru la nap̃a amiyum̃ae ke amio naga, la asum̃a akila kene, a monar akila luwe ga yum̃aena wo lala.  
\is1 Komp̃asnen tusi la na nini  
\ili Visena p̃esa 1:1-2  
\ili Pol pisawal sape kekaran la pap̃isi 1:3-12  
\ili Pol pian la sape Yesu yoko wasup̃e si ve sanape 2:1-17  
\ili Pol pian la e p̃elaga kiena li nalelagaena lala 3:1-15  
\ili Visena maro 3:16-18  
\c 1  
\s1 Visena na sumo  
\p
\v 1 \x - \xo 1:1 \xt Yum̃aena 17:1\x*P̃egas na li nalelagaena lala kiena ne Ntewa Arimata a kieta Sup̃e Yesu Kristo, nap̃a asike e kumali nene Tesalonaika, imimi telu Pol, Saelas a Timote, mekekara pap̃isi navitawe amiuena sina e m̃aki nini.  
\v 2 Lemamiena a sum̃arena kiena ne Ntewa Arimata amio kieta Sup̃e Yesu Kristo sike amio amiu.   
\s1 Pol siar kiena m̃aki e leniena na visaen potena  
\p
\v 3 Sur tai nap̃a popon meyum̃aen silaga, monar mevisa potena van Ntewa vanon amiu kiamimi erau wo lala. A nanagane, mekekaran mesape meyum̃aen sanini, komin memloge ke kiamiu lologena lala, sane kiamiu naviawaena pam manene laa meta sane silaga, a amiu punu ga akekekaran amiu tap̃ena lala pimi keviu manene la.  
\v 4 Naga nene po pap̃isi, ana pogos nap̃a mepa metelivi ke puna p̃egas nen li nalelagaena tap̃ena lala kiena ne Ntewa, memieluar amiu ke pap̃isi pan la. Mepisa meraravan ke pan la sane amiu ap̃ar ke p̃elaga m̃arera kiena li nasinekar lala, ana amiu apa ap̃arpoyo ke e yo m̃arera tai nap̃a kila kare amiu pap̃isi, ana pe akukulul re poli, kiamiu naviawaena pe mlor re nenaga.   
\p
\v 5 Pogos nap̃a asum̃al ke m̃arera sanene, mepisu sane pogos nap̃a Ntewa kilologia amiu, naga kila mesmes ruru ga, komin nap̃a pisulup̃ar sane amiu ape yeririna la nap̃a tap̃atete aloru. Nanagane, naga pisulup̃ar rui nap̃a ap̃ar ke naloge viowaena lala komin kiena nasup̃enena, a siraunia yoko naga visu amiu atorokin vaen loyum̃a ea.   
\p
\v 6 Naga, silaga miyum̃ae mesmes ga, a yoko kilamaran viowa van la nap̃a akila piowa pan amiu.  
\v 7 Lala akila amiu akus naloge viowaena pap̃isi, ana naga yoko kila p̃isi, naga yoko iila amiu gar ne, a iila imimi m̃ena e nini nap̃a mepane ke sur lap̃asia. Pogos nap̃a tevisu pupia kapi tego ma e sinapane, tekilia tesape kila ke mrapa nap̃a Ntewa ligan lua Sup̃e Yesu ma e peni vitom tano e yomarava, amio kiena navisi m̃arera lala, nap̃a yoko wereplan ita vetan naloge viowaena lala na yomarava.  
\v 8 Naga m̃alivi, yoko lip̃ere la nap̃a yepela mavin Ntewa, nap̃a yepela mavin logearen lologena wo kiena ne kieta Sup̃e Yesu.   
\p
\v 9 Naloge viowaena kiena ne la nap̃a yoko akusia, yoko akokovio lue ga narui, yoko akilawo la tap̃atete nena asike amio Sup̃e pogos tai e yo nowo nap̃a kiena m̃areraena miyum̃aenia mon m̃aga.  
\v 10 E pogos nap̃a naga m̃alivi, yoko kiena yar wa lala ayeluar vap̃isi, la nap̃a amlelaga ea avisu naga sane po na po pap̃isi, ana amiu amio la akilia ataveve naga. Akilia akila sanene komin amlelaga e kiamimi lologena, ana li tap̃ena la nene, tap̃atete nena atavevea.   
\p
\v 11 Mesum̃a mesitomveve m̃a sur la nene pano-o, kila imimi mom̃arera ruruia na lenwo amiuena silaga. Mepiun ke tan kieta Ntewa nap̃a iila amiu vena atorokin malena wa nap̃a naga pio amiyunia. Memlen ke sane kiamiu naliganarena wo la nap̃a sike e kiamiu sitomena vena taveveena, amio yum̃aena wo la nap̃a kiamiu naviawaena kilia kila, yoko Ntewa yum̃ae e kiena m̃areraena vena kila awar mrasa.  
\v 12 Memlen ke sanene vena ayeluar kia kiena ne kieta Sup̃e Yesu imi ve keviu likan amiu, a vena akapur manenea amio kiena p̃elaga wo lala. Visae akilia akila sanene vano-o maran taaga amio lemamiena wo kiena ne Ntewa kieta Sup̃e, nane Yesu Kristo, yoko wo na wo.   
\c 2  
\s1 Yar viowa nene, Nasinekareena Navisaluaena, yoko imi m̃alivi  
\p
\v 1 \x - \xo 2:1 \xt 1Tes 4:15-17\x*Nesape nevisayu sina ga nawasup̃een sina kiena ne kieta Sup̃e Yesu Kristo, amio sanape nap̃a yoko were ita lele taaga tesike temio naga. Erau lala, e lele nene nesape nevisa sanini,  
\v 2 sane ve sinemiu pepe re, ve amarau re. Nekilia sane visena tai tetelivi ke sape yar lap̃asia apisasawalia pona amlologon ke asape nanagane legiena na nawasup̃een si kiena ne Sup̃e naga pimi kate rui, ana la p̃asia apisasa ke asape imimi ke nalologena la narui mepisawal sur nene e kiamimi lum̃aki tai rui. Ana amiu ve alelaga re e visena nene,  
\v 3 ve atam̃an re nap̃a avisa kotalia amiu sanene. Sur na apisa ke ne, pe sa re nena nene, komin pupia nakawelanen van Ntewa monar va meta sumo. Siraunia yoko yar viowa na kovioena, nap̃a apio Nasinekareena Navisaluaena, naga m̃ena monar imi kate e yometava.  
\v 4 Yar nene naga piowa pap̃isi, naga pilolon kare make ga sur wo lala, a naga mligan ke naga mon metavan sur make ga nap̃a kia kiena ne Ntewa sike ea, amio sur wa tap̃ena la nap̃a yeririna la apatanon ruruia. Yoko naga kila m̃a sanene vano-o, naga ga visirlua si naga sike e lele wa loyum̃a e Yum̃a Wa m̃ana ne Ntewa, visawal naga sape naga ga pe Ntewa rui. Ana pogos nap̃a kila sanene, nanene naga e pogos ke nap̃a lavis ke towarpoyo e legiena maro narui.   
\p
\v 5 Visae amiu asitom̃al ke ga wa, pogos nap̃a nesike nemio amiu, nepisasawal ke suri nene pan amiu yam mokli rui.  
\v 6 Ana taveve ya nap̃a nepisa meraravan ke ne, akilia avisu kilale sane yar nene, kan pog mesmes nap̃a vim kate sike ga wa, ana apisawo ke ga wa komin kan pog nena na pere wa.   
\p
\v 7 Ana pe sur korena ga nap̃a Nasinekareena Navisaluaena pe kate re poli wa, ana kiena m̃areraena sum̃a miyuyum̃aen wan ke kiena p̃elaga viowa lala e yomarava nini rui. Tap̃atete imi kate e yometava amio kiena pupia m̃areraena na wa, komin Ninuna Wa suwo ke naga, ana pogos nap̃a Ninuna Wa ure si vavini,  
\v 8 yoko naga sum̃alu amio kiena m̃areraena make ga. Naga yoko kila mara vano lavis taulu make sur narui, ana yoko Sup̃e Yesu vim kate, yoko lagi na kiena visena lelua yar viowa nene veraga ga, pupia yomerarava nap̃a pimi amio, m̃enelua yar nene va kovio e pupumalko.  
\v 9 \x - \xo 2:9 \xt Mat 24:24\x*Pogos nap̃a Nasinekareena Navisaluaena nene vim kate, yoko naga yum̃ae amio m̃areraena kiena Yermare, p̃isi na naga kila pupia kile lala amio sur na ilanen lala, ana ape navisokanen ga lala.  
\v 10 Naga yoko kila ve sanene komin sinenan werekareen sitomena kien yeririna la nap̃a ave na kovioena. A yoko kila m̃ena p̃elaga viowa lala nap̃a kilia were kare kiela sitomen la va ve tap̃ena, komin ape yeririna la nap̃a pe sinelan re akekaran visen lelaga lala kiena ne Ntewa poli, pe asitom̃al re nena sane yoko naga kilia tamalia kiela malena poli.  
\v 11 Ana pogos nap̃a Ntewa pisu kiela sitomen la m̃arera sanene, yoko naga ligan la ga, tam̃an nap̃a sane pupia visen navisokanena la kilia taulu la ga sane, yoko alelaga ruru e visokanena la nene.   
\p
\v 12 Ana siraunia, yoko naga lip̃erela mesmesu nena, sape ape yeririna la nap̃a yepela mavin lelagaen e kiena visen lelaga, ana sur nap̃a la akekarania, naga p̃elaga na kilaen viowa la nap̃a akilakila ke pa rui.   
\s1 Asum̃al m̃arera ruru silau  
\p
\v 13 Sur wo tai nap̃a popon meyum̃aen silaga, monar mevisa potena van Sup̃e Ntewa vanon amiu kiamimi puruvi a vinemimi lala nap̃a naga kekaran amiu pap̃isi. Siar nanua susumo rui, naga kilologia amiu vena kam na ape mras p̃esia nap̃a amlelaga e kiena visen nalelaga, a Ninuna myum̃ae e kiamiu malena lala ana apim amerarava e marana, p̃isi na naga kilia tamalia amiu.   
\p
\v 14 Naga pio amiu kome lologena wo nap̃a mokus pimi, komin naga sinenan pisape amiu m̃ena ayakol e pupia naurarena vena yeluaren kia kiena ne kieta Sup̃e Yesu Kristo.  
\v 15 Ve sanene erau lala, pe pon re amiu yar tai kila pal poli. Monar asum̃al m̃arera ruru silaga, a monar auarar ruru nakilapianen la nap̃a mekila pan amiu rui e kiamimi visena lala pona e m̃aki la nene.   
\p
\v 16 Armata Ntewa kekaran ita pap̃isi, pe lemam pan ita a miilaar si kieta sitomena e kiena navisaarena wo tai, sane ita na tesu wo lue ga temio vano-o tap̃atete p̃isi pogos tai. Ana nemlen pania, sane narina, kieta Sup̃e Yesu Kristo,  
\v 17 iilaar kiamiu sitomena lala, kila amiu am̃arera ruruia e visen wo punu ga lala a e kiamiu yum̃aena wo punu ga lala.   
\c 3  
\s1 Pol piun vena alenwoia  
\p
\v 1 Erau lala, sumon nep̃isin kiau visena nesape neviun tan amiu punu ga ve sinemiu p̃esan imimi re e kiamiu leniena lala, vena mekilia meyum̃ae m̃arera laa sane vena visena kiena ne Sup̃e kilia momolue vilaga e yo la punu ga. Visae ve sanene, yoko yar tap̃ena m̃ena la akilia aloge kiena visena nalelaga, akilia avisirlua kiena kia, sa ga nap̃a amiu amiyum̃aenia pogos nap̃a pimi m̃alivin amiu sumo ne.  
\v 2 Ana pogos nap̃a visae alen, popon asitom̃al m̃ena sane pe amiu punu re amlelaga poli, a yeririna viowa p̃as asike nap̃a ap̃ar ke sitomen tap̃ena lala, ana amiu akilia alen vena Ntewa suwo ruru imimi vena tap̃atete atol imimi.   
\p
\v 3 Ita tekilia sane tekilia towasine Sup̃e silaga, ana pe sur korena nap̃a P̃arin Yar Viowa tap̃ali kila ya ne van ita, a nemlelaga sane yoko Sup̃e kila ita tom̃arera ruruia, yoko visuar ruru ita vap̃isi.  
\v 4 Kiau sitomena nekiliaar sane naga yoko kekaran naiila amiuen sanene, komin sur la nap̃a mepisawal pan amiu, nemlelaga sane amiu akila ke pa rui, a nemlelaga sane amiu yoko awaryon nakilaena e legiena la ne pimi ke ne.  
\v 5 Amiu akila sanene po pap̃isi, ana kiau leniena sane kieta Sup̃e Kristo sumon amiu vano tol nap̃a kiamiu sitomena la viayavi lelaga sane kiena, a losinemiu la va ulemamaga e sinesiena kiena ne Ntewa.   
\s1 Visena e lepas na yowena a na su korenena ga  
\p
\v 6 Erau lala, e kia kiena ne Yesu Kristo nesape nevisawal van amiu, sane visae puruvi tai pe miyum̃ae ruru re poli po pe taveve ruru re navianena la nap̃a mepian amiun poli, popon asu perinan li laa ga naga sane. Yowena la ne sanene, ve ava re lavisin la,  
\v 7 komin pogos nap̃a mesike likan amiu, pe mesu koren re ga sanene po. Mekila meraravan mrapa wo pan amiu, ana amiu akilia ruruia sane popon asiraunia.  
\v 8 Pog nap̃a visae memla kinanena tai, ana monar moul ga, komin memiyum̃ae legiena a kolemalo natauluen narin kilavaru vanon sur ya nap̃a sinemiminia. Imimi na memninu sanene sane ve mekila re yum̃aen keviu van amiu na visuar imimiena.  
\v 9 Visae amiu avisuar re imimi ve tokaki pona mesmesu yo, ana mop̃aryon mesape imimi ga mevisuar imimi, vena kilapian amiuen e p̃elaga wo nap̃a akilia atavevea.  
\v 10 Pogos nap̃a mesike memio amiu, amloge ke nap̃a mepisa ke sur nene, sane pe kiamimi navisaluaena tai, ana memla m̃ena pan amiu, mesape yar na yepen mavin yum̃aena, naga tap̃atete kinana.  
\v 11 Nepis ke sanene komin narin visena tai pimi tol kiligau sane kiamiu yeririna p̃asia pe amiyum̃ae re la poli, asusu korena ga asum̃a sane, ana asum̃a apisimumu e sur la nap̃a yar tap̃ena ga la amiyum̃aenia. \fig Pol ga miyum̃aen kiena kilavaru|alt="Paul Tentmaking" src="54_2Thes3.7-10_PaulTentmaking.tif" size="col" loc="Top right" copy="Gordon Thompson" ref="3:7" \fig*   
\p
\v 12 Kiamimi visena e yar la ne sanene pa sanini, sape ve asu kare re sanene, akilia ava ruru amiu la sane, ana akila towe li la yum̃aena na tauluen kamiu kinanena sa nap̃a amla ke legiena punu ga.  
\v 13 Ana visena pan amiu punu ga puruvi lala a vineu la, sane ve ita yar re tai nap̃a loge yepen malumun yum̃aena wo la nap̃a sike ne vena teyum̃aenia.   
\p
\v 14 Mepisawal sur la moki e m̃aki nene, ana visae yar tai ve kekaran re, popon avisu ruru yar nene. Yoko ve akilali re nap̃a ayum̃ae veraga amio naga sumo wa, vena kila naga mawa towe la sane, vena visu kilale kiena viowaena.  
\v 15 Ana ve akila re suri tai vania sane naga ve kiamiu sinekar tai, ana awep̃ege si naga sane imi ve kiamiu puruvi wo ga tai.   
\s1 Visena maro  
\p
\v 16 Kiau visena maro, nemlen nesape yoko Sup̃e na sum̃arena ligan kiena sum̃arena sike e amiu e kiamiu mrapa la punu ga, nemlen nesape naga sike amio amiu punu ga silaga.   
\p
\v 17 Narin yo na tano yoko ovisu sane in ga nesiri visena la nene e lum̃au. Sineun nesape nekila ve sanene e kiau m̃aki lala vena akilia avisu kilia lum̃au sane in ke narui nemligan m̃aki nene pim̃asu. Naga kiau nasiriena ga nane teke ne, nesape:   
\p
\v 18 Lemamena kiena kieta Sup̃e Yesu Kristo sike amio amiu punu ga.  
\p Inu, Pol.