\id 1JN 10Lewo \h 1 Yoane \toc1 M̃aki Nasumo Nap̃a YOANE Siriyuia \toc2 1 Yoane \mt2 M̃aki Nasumo Nap̃a \mt1 YOANE \mt2 Siriyuia \imt1 Visayuena Na Tusi Nene \is1 Suniena na plas na tusi nini \ip M̃aki p̃esa kiena Yoane, naga kiena sitomena keviu lua. \ip Nasumo, Yoane sinenan sape visirlua sitomena kiena li nalelagaena lala nap̃a aulo m̃aki nini, vena silaga monar asikol la ruruia nap̃a kiela sitomena ve taaga ga, a vena asikola ruruia amio Ntewa, amio narina nap̃a Yesu Kristo. \ip A nalua, naga vena visaen vanila vena ve ataveve re navianiena la nap̃a kiela vianena pe mesmesu re poli, komin navianena la nene akilia akila kare sum̃are e kiela visena na visokanen lala, ana yoko kilia kila nap̃a li nalelagaena la tap̃atete si asikol ruru la e sitomiena ve taaga. \ip Navianena la nene asum̃a apian ke yaru lala, asape p̃elaga viowa la apimi am̃alivi komin yaru la asike e yomarava, a amiyum̃ae ke ga e suri na yomarava la ne. Amio nanene, asitom sape Yesu, naga narina Ntewa, ana pe pe yaru ruru re sane ita poli. La asum̃a apisa ke asape visae Ntewa tamalia yaru, yaru nena tap̃atete sitomali si malena na yomarava nini, a pe pe suri re poli visae yaru na sanene kila milamulena viowa po pe kila re milamulena viowa poli a pe pe suri re m̃ena poli visae naga sinena si yaru tap̃ena pona ve sinena si re, ana suri la nene maran taaga ga, pe suri na yomarava ga. \ip Yoane siri m̃aki nini, sape kila meraravan nap̃a naga yepen mavin sitomiena la nene pano-o pap̃isi, a pisawal meraravan nap̃a Yesu Kristo, naga pe yaru nena sane ita. A naga pisaar m̃arera sape yaru la nap̃a amlelaga e Yesu, a sinela si Ntewa, monar sinela sisi la m̃enaga. \is1 Komp̃asnen Tusi La Na Nini \ili Visena p̃esa 1:1-4 \ili Legiena a yemalo 1:5—2:29 \ili Narina Ntewa lala a narina Yermare lala 3:1-24 \ili Ninuna nap̃a pe purp̃esnen visena lelaga a ninuna nap̃a pe purp̃esnen visena na visokanena 4:1-6 \ili P̃elaga kiena yaru nap̃a sinena si yaru 4:7-21 \ili P̃elaga na lelagaena nap̃a kilia taulu make suri la silaga 5:1-21 \c 1 \s1 Yar na visawalen malena kiena ne Ntewa van ita, naga pimi e yomarava p̃isi rui \p \v 1 \x - \xo 1:1 \xt Yoan 1:1\x*Sur tai, nanua sumo e pogos nap̃a yomarava siaria, ana nagane in na nemloge, nepisu e kilamarau, in na nepisu ruru pano-o, netol nena e lum̃au. Sur nene, kiena kia sanini, sape Navisawalen Malena, po Purp̃es nen Malena, po Malena Nap̃a Ve Uro Re Pogos Tai, nane in na sineun nesape nesiri van amiu. \v 2 \x - \xo 1:2 \xt Yoan 1:14\x*Sur nene, nanua sumo pe tekilia re poli, naga sum̃a ga amio Ntewa arimata pano-o, nagane na pimi p̃arpoyo merarava e marata e yomarava nini narui, ana imimi moki mepisuia, a mepisawal pan yeririna lala. \v 3 Imimi memloge ruru nena e kiligamimi lala, a mepisu nena e kilamaramimi, ana mesape mevisawal van amiu vena kam m̃ena ga alelaga ea. Visae kam alelaga ea, yokorena kam m̃ena aim ave taaga amio imimi, sa nap̃a imimi mepe taaga ga memio arimata Ntewa a narina Yesu Kristo rui. \v 4 Sur nene kila pupia kekarena sike amio imimi silaga, a visae auarar ruru visena la nap̃a nesape nevisa van amiu e m̃aki nini, yoko pupia kekarena nene sike m̃ena amio amiu, p̃isi na kila ita punu ga teloge wo vap̃isi. \s1 Ntewa naga pe purp̃es nen yomerarava \p \v 5 Visena nap̃a narina ne Ntewa mla pan imimi, pisape monar mevisawal van yeririna tap̃ena lala, sa nene, naga pisa sape, Ntewa pe purp̃es nen yomerarava, pe narin yemalolo re nena tai teke puna. \v 6 Ve sanene, visae tepisawal ke tesape tepe taaga temio Ntewa, ana tekila ke ga p̃elaga na yemalolo la na wa, nanene tepisokan ke ga ne, pe tekila re sur na lelaga nene poli. \v 7 Ana visae tesum̃a teyal m̃a e yomerarava nap̃a Ntewa sike e silaga, kila yoko telapran ita ruru wo silaga, ana tevisu tana na narina, Yesu, kilia kevan ita temekiki e kieta mlamulena viowa lala. \s1 Nayalena e yomerarava kiena ne Ntewa: Monar teligan plan p̃elaga na mlamulena viowa lala \p \v 8 Yeririna nap̃a pisawo ke, pisape naga pe naviowaena su re e kiena malena poli, kiena visena nene pe pe lelaga re poli, naga pisa kotalia ke sina ga naga. \v 9 Ana visae tevisa plan ga kieta naviowaena lala, yoko Ntewa viewo ita, p̃isi na war plan kieta naviowaena lala vetan ita, kila ita temekiki. Naga ga kila ruru mrapa na kilaen sanene rui, ana ita towasine ga naga sane yoko kila van ita sanena nap̃a pisaaria. \v 10 Ana visae tesum̃a tevirovia, tevisa m̃a tesape pe tekila re naviowaena poli na, nanene ita tekila sane Ntewa naga pisokan ga, a ita tekila sane kiena visena nowo na lelagaena, pe tepuarar ruru re nena e kieta malena la poli. \c 2 \p \v 1 Naruu lala, sineun nesape nesiri visena nini van amiu vena iila amiu avisulup̃ar sane pe pon re si atap̃a mlamulena viowa poli. Ana visae pogos tai, amiu yar tai kila viowa, monar tesitom̃al silaga Yesu sulue ga sike na, sane pe yar wa tai na waren kieta visena lala. Naga mesmes, a mekiki, naga kilia va sum̃al mesmes e mara Ntewa, kilia viun tania vena naga sinen ye ita, viewo itania. \v 2 Ana mrapa na kilaen sa nap̃a yoko Ntewa kilia viewo itania sanini, nane Yesu ga ne, komin naga pe kup̃ap̃aena na warplanen kieta mlamulena viowa lala, ita yeririna punu ga na yomerava. \s1 Nayalena e yomerarava kiena ne Ntewa: Monar telogear kiena navisaluaena lala \p \v 3 Visae yar tai viun ve sanini, visave: ?In na pe nekilia re poli, nekilia ruru Ntewa, pona pe nekilia ruru re naga poli? ?In na nepe kiena, pona pe nepe kiena re poli? Ve sanene na, teviun si tania, tevisave, ?Sanape, ko na omlelaga ke e kiena visena lala, pona pe omlelaga re poli? \v 4 Nanene vanon nap̃a visae yar tai visa sape naga kilia ruru sape Ntewa, naga pe kiena, a naga pe kila re sur la nap̃a navisaluaena kiena ne Ntewa pisa ke ne, yar nene naga pe pisa re lelaga ne poli, pisokan ga. \v 5 Ana yar nap̃a mlogear ruru visena kiena ne Ntewa, naga kila meraravan sane naga kekaran kemua lelaga, pimi keviu lue ga. Ana e mrapa na sanene narui tekilia ruru kemua tesape ita tepe kiena ne Ntewa na lelaga. \v 6 Yar nap̃a naga pisa ke sape pe kie Yesu, yoko monar tevisulup̃ar nap̃a naga mla kemua Yesu pe lelaga e kiena malena. \p \v 7 \x - \xo 2:7 \xt Yoan 13:34\x*Erau lala, e lepas tai na, navisaluaena nap̃a nesiri ke pan amiu, naga pe pe visena viu re tai nap̃a na nanagane poli, naga pe visena tai na susumo, pe visena kiena ne Ntewa ga nap̃a amloge pa na susumo rui. \v 8 Ana e lepas tap̃ena tai na, pe lelaga m̃ena nap̃a navisaluaena nene, naga sa ga pe urviu si tai pan ita, komin ita tepisu ke sane nagane p̃ere ke yemalolo p̃aro pano, kila ke yomerarava na lelagaena pimi narui. Naga sane e malena kiena ne Yesu narui, a nanagane pimi ke m̃ena sanene e kieta malena la narui, p̃isi na kila ita tepisu kilale ke visena viu nene pe lelaga kemua. \p \v 9 Visae yar tai visa sape mial ke pa e yomerarava rui, ana tepisu naga sinen kar ke wenla, kila ke piowa pania, yar nene sike e yemalolo wa. \v 10 Ana yar nap̃a kekaran wenla, kila ke po pania, yar nene mial ke pa e yomerarava narui, tap̃atete sitom̃al sape p̃isi na yalwowe sina e yemalolo, lolor si pogos tai. \v 11 Ana naga nap̃a sinen kar ke wenla, naga ve ve sa re nene. Naga sike e yemalolo wa, yemalolo kila sane kilamarana p̃ala, mial wowe lue ga e pupumalko, pe pisulup̃ar re kiena mrapa poli, pisulup̃ar re lele ne kom ke e poli. \s1 Nayalena e yomerarava kiena ne Ntewa: Ve tekekaran re yomarava nini \p \v 12 Amiu naruu lala, amiu kiau nin sisi lala e kieta na lelagaena, in na nesiri ke visena la nene pan amiu komin kam ke narui nap̃a Ntewa arimata piewo kiamiu mlamulena viowa komin kia kiena Yesu Kristo, ana amiu akilia naga. \v 13 Kiamiu yermarua lala, in na nesiri ke visena la nene pan amiu komin kam ke narui akilia ruru laa naga rui, nap̃a naga mali sike nanua sumo, sumon na siiena yomarava nini. \v 14 Kiamiu yar m̃ee lala, in na nesiri ke visena la nene pan amiu komin kam ke nap̃a am̃arera ruru po narui, amligan ruru pa visena kiena ne Ntewa teke e kiamiu malena la rui, ataulu pa Yar Viowa nene rui. \v 15 Sineun nesape nevisa ve sanene van amiu, ve akekaran manene re yomarava nini, pona kiena sur lala. Yar na kekaran manene yomarava nini, naga tap̃atete kekaran ruru arimata. \v 16 Nanene komin nap̃a sur na yomarava lala, pona kiena p̃elaga lala, ape tap̃ena, pe sa re sur kiena ne arimata Ntewa amio kiena p̃elaga lala. Sur na yomarava la nene la sanini, lala ape purp̃es nen nasinenanen sur moki, ape purp̃es nen nawereen kilamarata, ape purp̃es nen warwarena e kieta malena. \v 17 Yomarava nini, amio kiena sur la nap̃a yeririna la sinelan manene silaga, naga pimi ke vena kovioena ga, ana yar nap̃a kila ke mesmes e nasinenanena kiena ne Ntewa, naga yoko sulue ga sike narui. \s1 Nayalen e yomerarava kiena ne Ntewa: Monar tevisuar ruru ita vanon sinekar \p \v 18 Naruu lalo-o, nagane tesike e pog maro narui, sa nap̃a amloge pa rui, na yar nap̃a apio asape Nasinekar kiena ne Kristo, yoko kilia vim katenia. Pe tepisu re naga poli wa, ana tepisu pa narin yeririna moki na kila kareen Kristo rui, ana kila tepisulup̃aria sane yoko ve ve piavi re na Legiena Maro m̃alivi. \v 19 Sinekar la nap̃a nepisayu ke ne, kam na akilia ke ne. Nanua, la asu amio ita asu ga likan ita, ana siraunia, asum̃alu narui, amligan ita ap̃ure matan ita sina apano. Nanagane na, tepisulup̃ar la ruru nenaga, sane pe apimi re veraga ga amio ita poli, vanon visae peraga, yoko la asu ruru ga amio ita. \v 20 Ana kam nap̃a asu ruru ke ga wa, yar wa Kristo pisa ruru amiu pa rui, ana apisulup̃ar kiena visena, yoko tap̃atete aurmatan si naga. \v 21 Ve asitom re asape in na sineun nesape nevisi van amiu vanon sitomena tai nap̃a asape amiu na amninue ga suria, vanon pe sa re nene poli. In na nepisu sane akilia aloge ruru kilale visena na lelaga a visena na visokanen p̃isi rui, amiu akilia pa rui visena navisokanena tap̃atete molue e visena nalelaga, ana nesape nevis van amiu ve naiilaar amiuena. \v 22 ?Ana visokanen ya ne la nene apisa ke ne? Visena ne nane, apisa sanene, asape Yesu naga pe pe Navisaarena re poli nap̃a Ntewa mligan pimi tamalia yomarava nini. Visena nene naga pe visena kiena yar la nap̃a sinela kar ke Yesu, ana yar nap̃a pisa sanene, naga kawe ke Ntewa arimata, a kawe ke m̃ena narina. \v 23 Yar nap̃a pilopu m̃asina pa narina ne Ntewa, Ntewa tap̃atete se e naga, a yar nap̃a pisawal ruruia pisape naga mla narina ne Ntewa e kiena malena, yoko Ntewa m̃ena ga sike amio naga silaga. \p \v 24 Lologena wo nap̃a amloge p̃esania nanua sumo, naga pe visen wo a pe lelaga, ana popon aligan ruruia e kiamiu malena lala. Visae ve sanene, yoko kiamiu malena naga sum̃a wo e Ntewa amio Narina silaga, \v 25 nagane akilia atol malena nap̃a naga pisaaria sape la maran si van ita, nap̃a ve uro re pogos tai. \p \v 26 Naga ga nene nesape nevisa van amiu e lepas kiena ne la nap̃a apisa kotalia amiu ke ne, asape aure amiu ava ave tap̃ena sina. \v 27 Kristo na miawawo amiu pa rui, ana Ninuna Wa nap̃a amiu atolia e pogos nap̃a, naga sike amio amiu wa. Naga kilia vian amiu e sur punu ga nap̃a pe lelaga a mesmes, ana tap̃atete si akale yar tai nap̃a naga kilia vian amiu sina ga e sur lap̃asia. Yoko akilali ga sa nap̃a Ninuna Wa pian amiun e p̃isi rui, nap̃a pisape popon amiu aligan ruru kiamiu malena to ruru lue ga e Kristo. \v 28 Naga nene, naruu lala, visae kieta malena naga su ruru lue ga e Kristo, tap̃atete teloge viowa pogos nap̃a naga wasup̃e sina ga pun ita. Ana visae peraga, pupia memawaena, p̃isi na tesape tokuswan marata pogos nap̃a tevisu naga vim. \v 29 Tekilia tesape Kristo, kiena p̃elaga punu ga po a mesmesu, ana yar nap̃a naga m̃ena sanene, tekilia tesape yar nene naga m̃ena pe narina ne Ntewa sane Kristo. \c 3 \s1 Ita tepe narina ne Ntewa lala \p \v 1 \x - \xo 3:1 \xt Yoan 1:12\x*Asitomveveli sitomena kiena ne arimata Ntewa e ita yeririna viowa lala. Naga kekaran ita keviu pap̃isi, pano-o kila pan ita sa ga nap̃a tepisu ita sane narin ga lala. Ana pe ita re ga tepisu ita sa nene poli, naga m̃ena pisu ita sanene, komin nap̃a pure ita tepa loyum̃a e namratava puna rui, sane narina wawa lala. Yar tap̃ena lala e yomarava pe akilia ruru re arimata poli, sa nap̃a ita tekilia naga, ana sur nene kila la pe apisu kilale ita re m̃ena poli, sane ita tepe narina lala. \v 2 Erau lala, ita tekilia tevisa tesape tepe narina ne Ntewa, ana pe tekilia re poli wa, sane p̃isi na sirau, yoko naga kila ita teim teve ya sina ga. Ana sur tai tekilia ruruia, nap̃a visae Sup̃e Yesu warpoyo sina ga, yoko tevisu ruru nena naga e kilamarata napo, tevisu ruru naga, naga ke narui, ana pogos nap̃a tevisu sanene, yoko teimi teve sa ga naga. \v 3 Ana yar nap̃a sinenan sape yoko naga m̃ena imi ve sa Yesu Kristo, naga monar uarar ruru kiena malena mekiki ruruia a ve wa, sa ga Yesu. \s1 Ita narina ne Ntewa lala: Monar teligan p̃elaga viowa lala \p \v 4 Yar nap̃a tap̃a mlamulena viowa, kilaro ke navisaluaena kiena ne Ntewa, komin purp̃es nen p̃elaga viowa, naga pe p̃elaga na monen logearen navisaluaena. \v 5 \x - \xo 3:5 \xt Yoan 1:29\x*Ana pogos nap̃a Yesu pimi e yomerava nini, naga pimi nap̃a pe mlamulena viowa tai to re nene e naga, naga pimin vena war plan kieta mlamulena viowa lala. \v 6 Ana visae sanene, yar nap̃a kiena malena teke ruru e naga, yoko mlamulena viowa ve su re si e naga, naga tap̃atete si kila naviowaena. Ana yar nap̃a mlamulena viowa teke e kiena malena silaga, naga pe pisu ruru re naga poli wa, naga pe kilia re nena naga. \v 7 Kiau narin sisi lala, piowa nap̃a avisa kotalia amiu. Yar nap̃a kiena malena po, naga pe yar mesmesu sane Kristo. \v 8 Yar nap̃a kiena malena piowa, naga pe yeririna kiena Yermare, nap̃a naga pe purp̃es nen mlamulena viowa e yomarava, siaria e nasiiena pimi tol nanagane. P̃elaga viowa kiena ne Yermare kila narina ne Ntewa pitomi m̃alivi e yomarava nini, vena we plan kiena yum̃aena viowa lala a kila kiena puriukawaena naga p̃isi. \v 9 Yar nap̃a sike loyum̃a e namratava kiena ne Ntewa, naga tap̃atete si tap̃a mlamulena viowa, vanon malena kiena ne Ntewa te ea. Naga pe narina ne Ntewa, ana monar kus p̃elaga wo kiena ne arimana nene, p̃isi na tap̃atete si kila viowa. \v 10 E mrapa ne la nene ita monar tevisu kilia ruru ga sane ane pe narina ne Ntewa, a ane pe narina ne Yermare. Yar nap̃a pe kila re mesmes poli, pona yaru nap̃a pe kekaran re namratava puna poli, yar na sanene naga pe pe nin sisi kiena ne re nena Ntewa poli. \s1 Ita narina ne Ntewa lala: Monar telogear navisaluaena nasitomen yeririna tap̃ena lala \p \v 11 \x - \xo 3:11 \xt Yoan 13:34\x*Lologena nap̃a amiu amloge siar e purp̃esia pimi, na sanini, nap̃a pisa sape: ita monar tekekaran ita silaga. \v 12 Asitom̃ali yar sa Yermare nanua ne, Ken, nap̃a pe kekaran re wenla nap̃a Epol poli, naga m̃emom̃aria. Piowa nap̃a tekila sanene, ana popon tesitomvevelia mias ya ne naga kila sanene? Nanene vanon kiena yum̃aena lala, Ntewa pisu piowa ga, ana kiena ne wenla, naga mesmes ruru po, ana Ntewa kekarania, p̃isi na kila Ken pieluen wenla panonia, sinen karia, m̃emaria. \p \v 13 Erau lala, p̃elaga viowa na sa nene, yeririna la akila ke pimi tol nanagane, ana ve teilan re nap̃a visae tevisu la avieluen ita m̃ena ga, avisa kare ita vanon yum̃aena wo lala kiena ne Ntewa nap̃a visae teyum̃aenia. \v 14 \x - \xo 3:14 \xt Yoan 5:24\x*Ana ita nap̃a pe sineta kar re yar la poli, tekekaran ruru na mratava pun ita, nanene pe mrapa na kila meraravanen sane temligan marena, tepim e malena rui. Ana yar nap̃a sitomena pe to re e naga poli, naga sike e marena na wa. \v 15 Yar nap̃a sinen kar na mratava puna tai, naga sane pe yar na wemom̃aren yar la narui, ana sa nap̃a ita tekilia ruru p̃a rui, yar na wemom̃aren yaru, malena nap̃a ve uro re pe to re e kiena malena poli. \p \v 16 Pona ita yar tai piun ke pisape, ana sur nap̃ane sitomena, naga pe sur na sanape? Pogaga, tekilia tesape sitomena nap̃a pe lelaga, naga sanini: Yesu Kristo tam̃an kiena malena wetelu panon ita, ana visae sitomena nene teke e ita, p̃isi na ita m̃ena tetam̃an kieta malena vanon kieta wolai lala. \v 17 Yar tai naga limana pulen sur nowo lala a, wenla tai, limana plas kemua lelaga, pe kiena sur re poli. P̃isi na naga pisulup̃ar wenla nene, ana naga kila sinen m̃arera laa sane pania, pe miila re poli, yar na sanene sitomena kiena ne Ntewa pe to re nena e poli. \p \v 18 Naruu lala, kieta sitomena ve e re ga e kieta visena lala. Sitomena nap̃a pe lelaga, naga pe sur re tai na visaen ga poli, pe sur na yum̃aenena a na kilaena. \v 19 Ana visae kieta sitomena p̃arlologia ruru marana sanene, nane pe mrapa nap̃a ita tekilia tesape visena lelaga kiena ne Ntewa p̃ar ke mras e kieta malena. Ana ve sanene na, teloge ga wo vena vaen lavisin Ntewa, ve temaraun re si naga. \v 20 Pogos lap̃asia tekilia temaraun naga, vanon nap̃a yoko kieta sitomena kilia lip̃ere ita sina, kila ita tesitom̃al sina tese kieta naviowaena lala, ana Ntewa naga kilia ruru punu pa rui, ana kieta na viewoena na naga keviu manene laa sane, p̃ar plan petan ita. \v 21 Erau lala, visae losineta naga merarava ruru wo, p̃isi na naga tap̃atete lip̃ere ita sina, kila pe temaraun re nena na va sum̃alen se marana ne Ntewa na viunen sur tania. \v 22 Visae telelaga m̃a e naga, tekila m̃a sur la nap̃a naga sinenania, p̃isi na tekilia tetol suria la nap̃a tepiun ke tania. \v 23 \x - \xo 3:23 \xt Yoan 13:34, 15:12,17\x*Navisaluaena kiena ne Ntewa pan ita sanini, pisape: Monar telelaga e kia kiena ne narina, Yesu Kristo, a monar tekekaran ita silaga, sa nap̃a naga pisa pan ita. \v 24 Yar nap̃a mlogear e navisaluaena kiena ne Ntewa, naga sike amio Ntewa. Ntewa teke e kiena malena. ?A yoko ita tekilia tesape naga teke e ita sanape? Sur nene, Ninuna nap̃a naga mla pan ita naga kilia kila ita teloge kilale sane pe lelaga. \c 4 \s1 Ita narina ne Ntewa: Monar tevisuar ruru vanon sinekar kiena ne Kristo lala amio p̃elaga na yomarava \p \v 1 Erau lala: visae amiu yar tai visa ke sape Ninuna Wa teke e naga, kila ke naga pisawal ke kiena visena, popon sa amiu avisu ruruia aninulup̃ar ninuna na teke e naga, pe lelaga ninuna kiena ne Ntewa, po pe kiena re Ntewa poli. Ita monar tevisu ruruia komin navisawalena navisokanena lala moki asu make yo la ne e yomarava nini rui. \v 2 ?Ana tekilia teninu lup̃ar ninuna la nene ve sanape? Ita tekilia tevisu lup̃ar Ninuna Wa kiena ne Ntewa komin naga pisawal pisape Yesu Kristo pimi pe yeririna, paeme e yomerava, \v 3 ana visae ninuna tai ve visa re sanene, ninuna nene pe pe kiena ne re Ntewa poli. Ninuna na sanene na molue kome nasinekar kena Kristo, nap̃a amiu amloge pa rui sane pimi ke rui, pona sike pa e yomarava nini rui. \v 4 Ana naruu lala, ve amaraun re navisawalena la nene, komin amiu asike e lepas kiena ne Ntewa, akilia ataulu la ga. Lelaga pap̃isi, naga nap̃a teke e amiu naga m̃arera laa taulu naga nap̃a sike e yomarava. \v 5 Yar na visokanen la ape yeririna na yomarava ga nini, ana visena la nap̃a apisa ke ne molue ga e sitomena na yomarava nini, ana yeririna tap̃ena la na yomarava nini amiyagogan la. \v 6 Ana ita yeririna na lelagaena, ita na pe na yomarava re nini poli, ita tepe kiena ne Ntewa. Yar nap̃a kilia ruru Ntewa, naga kekaran yagogon itaena, a naga nap̃a pe kiena ne Ntewa re poli, mon yagogon itaena. E mrapa ne la nene ita tekilia teninu lup̃ar Ninuna na visena nap̃a lelaga, a ninuna na visokanena. \s1 P̃elaga na sinesiena \p \v 7 Erau lala, popon nap̃a tekekaran ita silaga, komin sinesiena naga pe p̃elaga kiena ne Ntewa. Yar nap̃a sinen si yeririna, naga pe narina ne Ntewa, p̃arlologia ga p̃elaga kiena ne Ntewa, kilia ruru Ntewa e kiena malena. \v 8 Yar nap̃a pe sinen si re yeririna la poli, naga kilia re Ntewa poli, komin Ntewa na pe purp̃es nen nasinesiena. \v 9 ?Ana tepisu pupia nasinesiena kiena ne Ntewa nene pogwai? Tepisu kiena sinesiena nene e pogos nap̃a mligan narina taaga nene pimi e yomarava, vena kila ita tekilia temal. \v 10 Nanene nasinesiena nap̃a pe lelaga kemua: pe naga re nap̃a sineta si Ntewa poli, ana nap̃a naga sinena si ita, pano-o tam̃an narina pitomi pe kup̃ap̃aena pe na kilaruruen marana ne kieta naviowaena lala. \p \v 11 Erau lala, komin nap̃a Ntewa sinen si ita keviu sanene, kila po pan ita sanene, popon ita m̃ena ga sineta sisi ita ve sanene, tekila wo van ita. \v 12 \x - \xo 4:12 \xt Yoan 1:18\x*Yar tap̃atete kirawal Ntewa, ana visae ita sineta si manene ita, yoko tevisu sane Ntewa teke e kieta malena, ana p̃elaga na kiena sinesiena yoko imi ve keviu manene laa sane e kieta malena. \p \v 13 Ita tekilia Ntewa teke e kieta malena, a ita tesike ruru ga e losinena, komin naga mla Ninuna mesmes pan ita, pe na kilaen ita telogekilale tesape sur nap̃a pe lelaga. \v 14 Tekilia m̃ena ga pe lelaga ga nap̃a Arimata Ntewa mligan narina nene pitomi vena natamaliaena na yomarava, ve sa nap̃a ita tepisu pa e kilamarata rui a nap̃a tepisawal ke e yo punu ga. \v 15 Yar nap̃a pisawal ke sape Yesu pe narina ne Ntewa kemua lelaga, Ntewa teke e losinena, a naga m̃ena teke e losinena ne Ntewa. \v 16 Tekilia ruru po nap̃a Ntewa sinen si ita, komin nap̃a tekilia teloge kilia e kieta malena lala, ana tekilia telelaga e kiena visena nap̃a pisawal pan ita. Ntewa naga pe purp̃es nen nasinesiena, ana yar nap̃a p̃elaga na sinesiena pimi keviu e kiena malena, naga teke e losinena Ntewa, a Ntewa teke e losinena. \v 17 Ntewa sinenan sape kila p̃elaga na sinesiena vim ve keviu la sane e kieta malena lala, vena kilaen kieta p̃elaga lala na yomarava nini ve sa ga p̃elaga kiena ne Kristo nanua ne. Ana visae kieta p̃elaga lala vim wo ve sa nene, yoko wo van ita vap̃isi ne, vanon tap̃atete si temarau po tememawa e legiena na lip̃ereena na pimi ke ne. \v 18 Visae yar tai naga marau, nanene vanon nap̃a naga pisu kiena nakoaena tai pimi ke rui, a naga mloge kilale re sinesiena kiena ne Ntewa kila ruru kiena malena poli. Ana p̃elaga na sinesiena napo naga kilia m̃enelua nena pupia marauena nene. \p \v 19 Visae sineta si ke yeririna tap̃ena lala, nanene vanon Ntewa naga sinen si ita p̃esia. \v 20 Yar nap̃a pisa sape naga sinen si Ntewa, ana sinen kar ke namratava tai puna, naga pisokan ke ga. Visae namratava puna nap̃a sum̃a pisu lue ga ana naga pe sinen si re poli, naga tap̃atete sinen si Ntewa nap̃a naga pe pisu re e kilamarana poli. \v 21 Navisaluaena kiena ne Kristo e kieta malena naga sanini, sape: yar nap̃a sinenan sape ve yar nasinesiruruen Ntewa, naga monar sinen si ruru m̃ena namratava puna lala. \c 5 \p \v 1 Yar nap̃a mlelaga sape Yesu na pe Navisaarena, yar nene naga pe narina ne Ntewa lelaga. Ana visae narina ne Ntewa nene visa sape naga sinen si Arimana Ntewa, naga monar sinen si m̃ena narina ne Ntewa tap̃ena lala. \v 2 ?Ana yoko naga kilia sape sinen si ruru la ve sanape? Visae sinen si Ntewa, ana mlogear kiena navisaluaena lala, yoko naga visu nap̃a sinen si kemua narin Ntewa la pe lelaga ga. \v 3 \x - \xo 5:3 \xt Yoan 14:15\x*P̃elaga na sinen si Ntewa naga sanini: touarar ruru kiena visena. Kiena navisaluaena lala pe urmi manene re pan ita nap̃a teyum̃aen poli, \v 4 komin ita sisi la nap̃a tepaeme pu Ntewa, visae tesum̃al m̃arera e kieta naviawaena, ita tepe yeririna na tauluen pa yomerava nini rui. \v 5 Neviun si vetan amiu: ?Yar nap̃a taulu ke yomarava nini naga ai? Naga ga nap̃a visae sum̃al m̃arera sape Yesu naga pe narina ne Ntewa kemua lelaga. \p \v 6-8 ?Ana tekilia ve sanape nap̃a Yesu naga pe narina ne Ntewa? Yar la telu nap̃a apisawal visena nene pan ita: tai na Ninuna Wa, tai na wii, a tap̃ena na kuruta, a la telu nene apisawalia sane visena taaga ga. Wii naga pisa sape e p̃elaga kiena ne Yesu Kristo, nap̃a paeme e yomarava sanape, naga tol nakeena sanape, ita tekilia tevisulup̃ar sane naga pe narina ne Ntewa. Ana pe naga re ga nene poli, ana kuruta m̃ena pisa sape e p̃elaga kiena ne Yesu m̃a ke na wa, nap̃a naga mare sanape, ita tekilia tevisulup̃ar sane pe lelaga. Ana metavan si nanene, Ninuna Wa, nap̃a kiena visena pe lelaga lue ga, pisawal meraravan m̃ena e maran yeririna la nakonua rui. \v 9 Ana visena la nap̃a Ninuna Wa kila, la aurumi pap̃isi, visae ve sanene monar telelaga ga ea, komin nanene pe pe visena kie yeririna re ga la poli, naga pe visena kiena ne Ntewa navisawalen sape naga pisu Narina sanape. \v 10 Yar nap̃a naga mlelaga ruru e narina ne Ntewa ve lelaga, visena la nene tawa ruru ga sike e kiena sitomena, pe sitom p̃ele re si poli, ana yar nap̃a pe mlelaga re e narina ne Ntewa poli, pe mlelaga re e sur nap̃a Ntewa pisa meraravan ke e narina poli, naga pisu sane Ntewa pisokan ga. \v 11 \x - \xo 5:11 \xt Yoan 3:36\x*Ana visena la nap̃a monar tesum̃al m̃arera e silaga, sa nene, asape: Ntewa mla malena nap̃a ve uro re pogos tai pan ita, ana purp̃es nen malena nene na pe Narina ga. \v 12 Yar nap̃a narina ne Ntewa teke e kiena malena, naga tol pa malena rui, ana nap̃a narina ne Ntewa pe to re e kiena malena poli, naga pe tol re malena poli wa. \s1 Visen maro: Malena nap̃a pe luas to re e poli \p \v 13 Nesiri ke m̃aki nini pan amiu nap̃a amlelaga pa e kia kiena ne narina ne Ntewa rui, vena iila amiuena ve kiamiu sitomena ve veve lua re, vena akilia ruru sane atol pa malena nap̃a ve uro re. \v 14 Pogos nap̃a kieta sitomena ve pepe re, ita tekilia tesum̃alu m̃arera e naga, p̃isi na sur ya ne teviun tania mesmesun e kiena nasinenanena, yoko naga loge ita. \v 15 Ana visae tekilia ruru sane naga mloge ita pa rui, tekilia ruru m̃ena sane sur ya nap̃a tepiun tania, sa nap̃a tetol pa rui. \p \v 16 Visae tevisu kieta wolai tai naga kila ke naviowaena, nap̃a naviowaena nene pe keviu re poli, pe torokin re yar mare vanon poli, pona wereplan si yeririna lala vetan Yesu Kristo, ita tekilia telenwoia, p̃isi na Ntewa kilia tam̃an ga naga to loyum̃a e malena. Ana pe nepisa re nesape poga ga amiu alenwo yar nap̃a kila pupia naviowaena, vanon naviowaena p̃asia naga na marena ga, ana visae yar tai naga kila sanene, yoko ita tap̃atete si tevisa sur tai. \v 17 Sur natap̃aviowaena make ga naga mlamulena viowa nene, ana naviowaena p̃asia ape na marena, ana p̃asia pe na marena re poli. \p \v 18 Ana tekilia pa rui sane yar nap̃a pimi pe narina ne Ntewa, naga ve kila re si viowaena na marena pona viowaena na pe na marena re poli. Yar na sa nene monar visuar ruru naga, vilon mesmes ruru kiena malena, p̃isi na yar viowa nene tap̃atete si kila sur tai vania, tap̃atete kila kare si naga. \v 19 Yomarava wetelu nini sike vatanon puriukawaena kiena ne Yar Viowa nene, ana ita yeririna lala nap̃a temlelaga, tekilia ita tepe kiena ne Ntewa ga. \v 20 Ita tekilia sane narina ne Ntewa pitomi, mla pan ita navisu kilaleena vena tekilia Ntewa nap̃a pe lelaga, ana ita tesike ga e naga ga narui, amio narina nene, Yesu Kristo. Kieta Ntewa nene naga pe lelaga, ana malena nap̃a mla pan ita naga pe luas re poli. \p \v 21 Naruu lala: amiu avisuar ruru amiu, amiu alotun Ntewa nene naga taaga ga silau, ve atam̃an re nono tap̃ena lala aimi akus lelena e kiamiu sitomen lala.