\id ROM  - Nyindrou NT with Gen, Ruth, Jon -Papua New Guinea 2001 (DBL 2014) 
\h Rom 
\toc1 La-ukei ta Pol atorou ili tiri lau badu kon Rom 
\toc2 Rom 
\toc3 Rom 
\mt2 La-ukei ta Pol atorou ili tiri lau badu kon  
\mt1 ROM  
\imt1 Sahou Tanan  
\ip Pol atorou la-ukei dah, tasah iy aso-ok labai ta anya kili kanyolom iri lau ta Kindrei are bolo kon tinan Rom. Iy aso-ok ta udu hawe oro sese, ma hamon ta aliy, iy ili atiye iri sahou mwasin ili kon tinan Spen. Ta bolo la-ukei dah, Pol tiye eme lewan handru ta iri sahou mwasin ta Krais, ma ta kandriyen ta tekedek tiri lau mwan ma badih an hamon ta Jises.  
\ip Ma bwena handru badeh, Pol aloh bada-an i tiri lau ta Kindrei badu Rom ma iy tiye i tiri i buku doh, iy badeh, asolom len mari ta ndremenya Kindrei ta aseben iri. Udu hamon ta aliy iy barasehek kati iri sahou ta la-ukei: “Na san ta budon handru le, taha winiyan asahan lau mwan ma badih mwasin ta mada Kindrei” (1:17). Pol tiye i buku doh: Iri lau mwan ma badih marakon, buku iri badu hawe iri Juwis, o, badu hawe iri lau rayah ja, iri lau mwan ma badih ta amekes kandriyen ndra-in. Eme ma Kindrei tikisi iri ma iy andrei iri ame hamon. Ndramak atehei budon tan mara-ei in ta Jises Krais, Kindrei kameh andrei iy eme hamon, ma iy kameh asahan kawas ta Kindrei ma nadu tine Jises Krais.  
\ip Buku Kindrei akohok ari ndramak eme hamon ja, ya kohan kameh asahan randrah ja, Kindrei kameh ere hawen, ma Malawin Mwasin ta Kindrei kameh idih bolo odan. Eme ma, kandriyen ndra-in ma imek, uru kameh nyamu uru ja bwe, ta atisih ma atondrok iy. Udu ta kalan 5-8 Pol asehek ta moso batanau ta Kindrei, ma ta boto-on ta Malawin Ndrabun ere bolo oda iri lau mwan ma badih atehei budon tiri in ta Jises.  
\ip Udu ta kalan 9:11 Pol asehek lakou maha-an ari laba tinan tan. Pol amwenen iy badu hawe iri Juwis, iri lau doh bwena mene Kindrei mene andrei iri i buku iri lau mwan ma badih tan amwenen. Arile, iri Juwis solo-an labai, mene atehei kona iri i ta Jises. Lau mwan ma badih solo-an rayah ja ame asahan lau ta Jises, arile iri Juwis ja bwe. Pol asehek i buku, idoh ndra-in tiri Juwis amwenen. Iri banyolom ta lakou laba tinan nane Kindrei anya kamekes tiri bwe. Arile, Pol abudon, hamon kameh iri lau mwan ma badih badu hawe iri Juwis kameh ame bolon hawe iri lau ta Jises.  
\ip Ano ta la-ukei dah, Pol asehek ta nyala kandriyen, iri lau ta Kindrei kameh ka-en hamon ta aliy. Iy asehek sahou solo-an ta kandriyen ta aso-ok labai iri lau rayah ja. Iy asehek ale ta kandriyen ta amekes gok ta Kindrei ma ta kandriyen ta are bahandra kabin o gabman, ma ta kandriyen ta aseben iri rayah ja.  
\iot Iri Sahou Tinan  
\io1 Pol amekes gok ta atiye sahou mwasin (\ior 1:1-17\ior*)  
\io1 Lau mari amekes kandriyen ndra-in ma atehei kona iri i ta Kindrei (\ior 1:18–3:20\ior*)  
\io1 Kindrei aloh taha lau mwasin labai ta madan (\ior 3:21–4:25\ior*)  
\io1 Kindrei atehei tataha lau tan kohan ha-un (\ior 5:1–8:39\ior*)  
\io1 Pol tikisiy labai handru tiri lau badu Isra-el (\ior 9:1–11:36\ior*)  
\io1 Taha katehei taha mara-ei kili ta Kindrei i buku salom (\ior 12:1–15:13\ior*)  
\io1 Pol sekesek labai ta gok iy amekes (\ior 15:14–16:27\ior*)  
\c 1  
\ms1 Na san ta budon handru le kameh, taha winiyan asahan lau mwan ma badih mwasin labai ta mada Kindrei  
\mr (Kalan 1–4)  
\p
\v 1 Jo Pol, jo badeh, lohowan ta Krais Jises. Jo ale aposel, Kindrei tiye jo, ma aloh jo eme ta atiye sahou tan mwasin.  
\v 2 Sahou mwasin doh bwena mene iy tandrakan, ma atehei i kani iri propet, ma torowenei udu bolo tarou tan.  
\v 3 Sahou mwasin doh badeh, ta nyala nadun, ya iy badeh, saren tiye iy asahan ta lundriye tubun Debit.  
\v 4 Na len Kindrei mete-ei iy amak eme loken ja, Malawin Mwasin ta Kindrei leheya taha buku, Kindrei atehei nyosowan i la-un, ma hawe boto-on i tan ta atondrok lakou tan mari. Iy badeh, Laban Jises Krais.  
\v 5 Na iy le badeh, Kindrei atehei lahou dah eme kani aso, ma iy atehei seben eme taso ale, eme ma aso asahan aposel i nyara Krais ta atiye sahou, hawe kaliu iri lau badu kon leheleh mari kanuhun sahou, ma katehei budon tiri handru ki ta Kindrei.  
\v 6 Sahou doh badeh, ewek taha lau manyah ado Rom ale. Aha ndranuhun iri lau atiye sahou ta Kindrei ewek taha, ma Kindrei ndraluwi aha ndrame lau ta Jises Krais.   
\p
\v 7 Eme ya, jo Pol amwenen atorou la-ukei dah badeh, ewek taha lau mwan ma badih mari badu Rom, ala mene Kindrei aseken aha labai, ma ndraluwi aha mari ndrasahan lau tan amwenen.  
\p Ya eme ma, jo aso-ok tama taha Kindrei ma hawe Laban Jises Krais, katehei tikisiy ma mondrei tan kudu taha.   
\s1 Pol anya kili kanyolom iri mwan ma badih badu Rom  
\p
\v 8 Ma mwena handru jo edeu wurah i ta Kindrei tek i san ta Jises Krais ewek taha mari, tasah lau mari badu kon munyak asehek anya, aha badeh, ndratehei budon taha handru ndra-en ta Jises Krais.  
\v 9 Aha ndranyolom ai, sahou mene jo asehek i taha badeh, handru, ya Kindrei badeh, tanan. Kindrei le doh badeh, jo atehei ndrinek mari i tan, ma atudun iy, ma jo edek ta atiye sahou mwasin ta nyala nadun. Ma Kindrei tanan, jo badeh, balek bamani aha bwe na len mari  
\v 10 udu bolo salom tek. Jo badeh, ndremenya Kindrei udu bolo salom ta iy kasihi san, ya jo kewek kanyolom aha.   
\p
\v 11 Jo badeh, aseken labai ta anyolom aha, ma kasehek sahou ta nyosowa Malawin Ndrabun kewek taha, ma kamekes ndrine aha kabadok.  
\v 12 Ya eme jo asehek ta aliy ewek taha, ma eme tek ta aseben taha mari i le rasan. Ya aha kameh anyolom budon tek handru, idah kameh, amekes aha abadok, ma jo ale kameh anyolom budon handru taha ma amekes jo kabadok i le buku aliy.  
\v 13 Ya eme aha nadu tine, bale aha samani lakou doh: San solo-an solo-an jo lomondra ta anya kewek kanyolom aha, arile lakou badeh, mesekei ta jo sawek, eme eme taku dah. Jo badeh, anya kamekes lahou kudu bolo aha, ma kaseben aha kabadok ta budon handru taha ki ta Jises Krais, ma ka-en hamon ta san tan. I buku none jo mene amekes i tiri lau badu leheleh.   
\p
\v 14 Jo anya kedeu saluwe lahou tiri lau mari, ki tiri lau badu Grik ma Grik bwe, ma hawe ki tiri lau ta tanan, ma ki tiri lau tana iri lakou bwe.  
\v 15 Ya eme ta katin le doh, jo aseken labai ta atiye sahou mwasin ta nyala Krais ki taha lau mari manyah ado Rom badeh.   
\s1 Sahou mwasin ta Krais iy boto-on labai  
\p
\v 16 Jo banoh ma bwilik bama ta sahou mwasin ta Krais bwe, tasah idoh badeh, boto-on ta Kindrei ta akohok are lau iri atehei budon tiri handru i ta sahou mwasin doh ame hamon. Sahou doh ma mwena i tiri Juwis, ano badeh, i tiri lau badu leheleh ale.  
\v 17 Sahou doh handru, tasah sahou mwasin leheyani kandriyen mwasin ta Kindrei eme lewan, ta iy aloh iri lau mwasin mara-ei ta madan i san ta budon handru le, udu ndra bada katin eme taku na len dah. I buku none tarou ta Kindrei tiye i buku doh,  
\q1 “Are lau le atehei budon tan handru in ta Kindrei, Kindrei kameh aloh iy mwasin mara-ei ta madan, ma iy ndramak doh le winiyan akohok kohan ha-un ta udu le buku doh.” \rq Habakuk 2:4\rq*   
\s1 Losen ta Kindrei i la-u lau mari  
\p
\v 18 Tasah, taha tanan Kindrei udu kandrah, iy leheyani losen tan eme lewan eme andri ili la-u iri lau ta tebelese, ma ta kandriyen ndra-in iri amekes. Ya eme na kandriyen tiri le doh, iri anya katisih sahou handru, ma sokei iri lau winiyan bala tanan Kindrei bwe.  
\v 19 Handru, losen ta Kindrei eme andri ili la-u iri, tasah iri kandriyen ma tanan mwasin ta Kindrei badeh, iri winiyan atanan ta aliy, tasah Kindrei ndraleheyaniy ndraleu ndrala mada iri.  
\v 20 Ya eme kabatana Kindrei mesekei munyak eme taku dah, iri lau anyolom iri lakou iy ndramesekei. Na iri lakou le doh, iri lau winiyan atanan kandriyen rayah ta Kindrei. Handru, iri kandriyen doh amai ta mada iri, arile iri winiyan atanan ta iy badeh, udu kede-eh handru, ma boto-on tan ta udu le buku doh. Eme ma, ta katin doh, iy mesekei iri lau winiyan bawasai anya iri tanan iy bwe.   
\p
\v 21 Iri tanan Kindrei badeh, udu kede-eh, arile iri batudun ma bamasiye iy bwe, ma badeu wurah bala tan ta lakou mwasin iy amekes i tiri, bwe. Ya eme budon tiri badeh inyon; bolo iri mara-ei idih na lulik, ma iri bala tanan ndra-in ma mwasin udu heh bwe.  
\v 22 Eme iri anya iri lau ta budon, arile bwe, iri a lolo-ou le gwek.  
\v 23 Kindrei badeh, lomadan tinan labai ma iy badeh, winiyan bamak bwe, iy ta udu le buku doh. Arile, iri batudun iy ja bwai, iri ja atudun sukumada kei asehek i buku ndramak, ma hawe atudun iri sirih, iri katin haka hawe iri mwak. Iri lakou mara-ei doh kameh amak au.   
\p
\v 24 Ya eme ta katin doh le, Kindrei ruwani minen iu tiri, ma iri amekes kandriyen ndra-in in hamon ta boto-on ta seken tiri. Eme ma iri amekes karei hawe iri ari, ari, ma bokoro-ei bada iri amwenen.  
\v 25 Eme iri sokolowa sahou handru ta Kindrei na wasai, iri batudun Kindrei handru ta amekes lakou mari bwai. Iri atudun le lakou Kindrei mene amekes. Arile, iy Kindrei le doh badeh, lau katudun iy. Handru!   
\p
\v 26 Ya eme ta katin doh badeh, Kindrei ruwani minen iu tiri. Ma eme iri amekes karei hawe iri ari ari. Ma iri badih badeh, amadin iri le amwenen.  
\v 27 Ya eme i le buku aliy, iri lau mwan ruwani ta akohok udu iri, ya eme iri mwan amekes kandriyen ndra-in ta karei. Iri lau mwan badeh, amekes karei hawe iri ari ari amwenen. Eme Kindrei edeu maha-an i ta budon ma bolo oda iri, tasah iri amekes karei ndra-in labai i buku doh.   
\p
\v 28 Ma laba tinan labai, iri batawi budon ta Kindrei mene leheya iri ta amekes bwe. Eme Kindrei ruwani iri ado ndrahun ta budon ndra-in tiri, ma kandriyen ndra-in iri samekes badeh, iri amekes ja.  
\v 29 Eme iri badeh, ndradah ta kandriyen ndra-in mari. Iri adah na kandriyen ta aseken lakou tiri rayah. Iri amekes budon ta amekes isi i tiri lau. Iri amekes madalakis i tiri lau, iri andra-i i la-u iri lau, ma adai iri lau amak. Iri sokolowa ta katehei budon tiri ki ta lakou handru bwe. Iri bahana sahou ndra-in asehek i tiri lau. Iri asehek sahou ta wasai tiri lau udu ndranye lau mari.  
\v 30 Iri bwale iri Kindrei ma iri bobose iri lau, ya iri anya iri le ai, ma hawe iri atudun nyara iri, ya iri amekes tanan ha-un ta amekes kandriyen ndra-in, ma iri tebelese boho tama iri hawe tine iri.  
\v 31 Iri badeh, ari budon mwasin bwe, ma iri ba-en hamon ta tandrakan nane iri tandrakan ta aliy bwe, ya iri baleheya kandriyen ta aseken ndramak ari ari bala lowan iri bwe, ma iri batehei kandriyen ta tikisiy bala tiri lau bwe.  
\v 32 Batanau ta Kindrei anya, buku iri lau ala bolo iri kandriyen ndra-in doh, iri kameh amak. Ya, iri tanan ta batanau mwasin doh, arile iri amekes kandriyen doh ili le anya mwasin, ki tiri lau ta ka bolon ale.   
\c 2  
\s1 Mada sahou ta Kindrei amwenen labai  
\p
\v 1 Ou are lau anya ou mwasin, ya ndramak kodo-oh ndra-in; balem ki tam! Ou badeh, ari madasan ta atobwak bwe. Tasah, buku none ou anya ndramak kodo-oh ndra-in, arile kandriyen doh ou amekes, badeh ou le amekes Kindrei edeu maha-an ewek la-um.  
\v 2 Taha ndratanan, mada sahou ta Kindrei badeh, amwenen labai. Iy aleben lau in hamon ta sahou tan handru.  
\v 3 Ya ou badeh, ndramak laleyah le; buku ou anya aleben iri lau rayah ja, arile ou amekes kandriyen ndra-in i le buku aliy; ou anya kameh, ou baratobwak ta bolo maha-an ta Kindrei barala buku sah?  
\v 4 Ya eme ou abudon anya, “Bolo tikisiy tan tinan labai, ya iy udu le abe-en lau katubuni ndrine iri, ma iy badeu ndramas ndra-in bala tiri suwi bwe. Idah kameh, jo winiyan bala bolo maha-an ta Kindrei bwe.” Sebwe ou abudon kandriyen mwasin tan doh, i buku lakou laleyah nadeh? Ya eme ou baseleyani se bwai, ta tikisiy tan badeh, ta anya katubuni ndrinem ma katiye ou ame hamon ja.   
\p
\v 5 Arile, ou badeh, batum boto-on labai, ma ou batubuni ndrinem bwe. Ou atukum losen ta Kindrei ewek tam i tinan le gwek abe-en len ta losen ta Kindrei kameh asahan eme lewan. Na len doh iy kameh anuhun taha lau mari, ma mada sahou tan badeh, amwenen labai.  
\v 6 Kindrei kameh,  
\q1 “edeu sowa iri lau mwan ma badih ari, ari in hamon ta kandriyen iri amekes.” \rq Wari 62:12; Tanan 24:12\rq*   
\m
\v 7 Iri lau rayah amekes gok boto-on ta a-en hamon le ta kandriyen mwasin, tasah iri anya kado bolo lomadan hawe masiye ta Kindrei, ma iri ale anya kakohok kohan handru winiyan bamak bwe. I tiri le kameh Kindrei winiyan edeu kohan handru ta udu le buku doh.  
\v 8 Arile, iri lau rayah ja aseken le budon tiri le, ma iri baseken sahou handru bwe, ya iri an hamon ta kandriyen ndra-in, iri kameh bwese maha-an hawe losen ta Kindrei.  
\v 9 Are lau iri le amekes kandriyen ndra-in i buku doh, idah kameh, Kindrei le edeu iri mara-ei ala bolo maha-an hawe sisi-in. Idah kameh, ili tiri Juwis bwena, ano kameh ili tiri lau badu leheleh ale;  
\v 10 Arile, Kindrei kameh edeu lomadan, masiye hawe mondrei kameh i tiri lau mari le amekes kandriyen mwasin: Ma mwena kameh i tiri Juwis, ano kameh i tiri lau badu leheleh ale.  
\v 11 Tasah, Kindrei aleben iri lau mari i san ta kandriyen randra le.   
\p
\v 12 Iri are lau bakohok batanau malen Kindrei edeu i mine Moses bwe, i buku none iri amekes karei ma lomondra ndra-in, iri kameh bwese maha-an ta aliy. Ya, iri Juwis bwena mene, ndrakohok batanau malen Kindrei ndradeu ndra mine Moses, ya, i buku none iri amekes karei ma lomondra ndra-in, idah kameh, batanau malen le aleben iri amwenen.  
\v 13 Tasah, are lau ndranyen anuhun le batanau malen kameh iy winiyan basahan mwasin ta mada Kindrei bwe. Arile, are lau le in hamon ta batanau malen, Kindrei kameh aloh iy mwasin labai ta madan.  
\v 14 Handru labai, batanau malen ta Moses bala tiri lau mara-ei bwe. Arile, len ra-on badeh, budon tiri amwenen mesekei, ma iri an hamon le ta kandriyen ta batanau malen tiye iri ka-en hamon ta aliy. Idoh i buku batanau malen amwenen atondrok iri.  
\v 15 Ya idoh leheya i buku Kindrei ndratorowenei kandriyen ta batanau malen ndrala ndrine iri. Eme ma, buku iri anya kamekes kandriyen mwasin, o, iri amekes kandriyen ndra-in, bar tiri badeh, leheya tanan ta amekes budon tiri abadok ta aseben iri.  
\v 16 Kindrei kameh abudon ta iri lakou nane doh na len iy suni Jises Krais eme ta manyah anuhun budon ma kandriyen tataha amai, in hamon ta sahou mwasin jo atiye i tiri lau mari.   
\s1 Iri Juwis ma hawe batanau malen  
\p
\v 17 Ou badeh, anya ou ndra ari ai, ta atudun Kindrei, tasah ou badeh, Juwis, ma ou tanam batanau malen mari.  
\v 18 Ou badeh, tanam sasah Kindrei aseken ou amekes, ma ou badeh, ndratanan udu bolo batanau malen ta aleben lakou mwasin.  
\v 19 Ou anya ou ndratanan handru ta ou winiyan sariye iri lau mada iri bwe, ma ou winiyan asahan buku sun tiri lau ado bolo lulik,  
\v 20 ma asahan ndramak ta leheya iri lau bale iri bwe, ma hawe ndramak ta leheya iri nah ma lau loweu ma bihin.  
\v 21 Ya eme, ou badeh, leheya iri oh? Ya, i buku sah handru ou winiyan baleheya ou le bwe? Ou tiye anya, “Ado sabahana,” ya ou babahana bwai?  
\v 22 Ou tiye anya, “Ado sateu badih udu mwan,” ya ou bateu se badih udu mwan bwai? Ou asehek sahou nyarahan i tiri lau satudun sukumada kei, ya ou bakohok lakou ta atudun sukumada kei badu asiu ta atudun bwai?  
\v 23 Ou badeh, anya ou le ai tanam labai ta batanau malen, arile ou ja, ba-en hamon ta batanau malen bwe. Eme ma ou amekes iri lau badu leheleh banoh ta batanau malen ta Kindrei bwe.  
\v 24 I buku none ndratorowenei anya,  
\q1 “Na ou le badeh, iri lau badu leheleh bobose nyara Kindrei.” \rq Aisaya 52:5; Isikiyel 36:22\rq*   
\p
\v 25 I buku none ou an hamon ta batanau malen, idah kameh, kandriyen ta asan ku-im, kameh bundruwen udu aliy ai. Arile, i buku none ou ba-en hamon ta kandriyen malen bwe, idah kameh ou asahan buku ndramak basan ku-in bwe, ma ou are len ta Kindrei labai.  
\v 26 Ya, i buku none iri are lau badu leheleh basan ku-i iri ba-en hamon ta batanau malen bwe, arile iri le badeh, an hamon ta batanau malen, sebwe iri i le buku none iri lau asan ku-i iri, ma iri asahan kawas ta Kindrei nadeh?  
\v 27 Eme ya, aha Juwis eh, aha ndrakohok batanau malen ta Kindrei, ma aha badeh, asan ku-i aha, arile aha ba-en hamon ta batanau malen bwe. Eme ma, iri lau badu leheleh basan ku-i iri bwe, i buku none iri a-en hamon ta batanau malen, iri kameh tiye sahou nyarahan labai i taha!   
\p
\v 28 Abo, i buku ou badu boho kamen tiri Juwis le badeh, ou basahan Juwis handru bwe. Ya, asan ku-im badeh, lakou ta badam le bwe.  
\v 29 Ndramak asahan Juwis handru badeh, na ndrinen labai, ma kandriyen handru ta asan ku-i taha badeh, lakou badu ndrinen labai. Idoh asahan na boto-on ta Malawin Ndrabun le, ya na tarou ta batanau malen bwe. Nyara ndramak doh iri lau bamasiye bwe, Kindrei le badeh, masiye.   
\c 3  
\s1 Kindrei badeh, in hamon ta sahou tan  
\p
\v 1 Buku sahou nane jo atorou ndrawek taha i handru, ya, sebwe iri lau badu Juwis ndrakohok iri lakou mwasin labai tiri lau badu leheleh ja nadeh? Ya saba lakou mwasin kameh asahan tiri Juwis i buku none kasan ku-i iri?  
\v 2 Seben solo-an solo-an udu aliy oh! Ya, ari ma bwena badeh, i buku doh: Kindrei mene atehei sahou tan amwenen i tiri Juwis ta atondrok ma aseben iri mwan ma badih winiyan atanan ta iri sahou tan marakon.   
\p
\v 3 Handru labai! Iri rayah batehei budon tiri ba-en hamon ta sahou dah bwe. Arile aha abudon i buku sah bah? Sebwe budon ndra-in nane iri a-en hamon ta aliy kameh amekes Kindrei tubuni budon ma karuwani sahou tan ai?  
\v 4 Winiyan bwe! Buku lau marakon kamekes kandriyen ta wasai, Kindrei le ari badeh, bwe! Iy badeh, asehek le sahou handru len marakon, i buku none ndratorowenei,  
\q1 “Kindrei, na saba len ou asehek, idah kameh, ou aleben sahou, ndra handru le;  
\q1 ya buku none ari ndramak anya katuw ou a ta mada sahou, idah kameh, ou winiyan bakunoh bwe, iy le kameh kakunoh mara-ei.” \rq Wari 51:4\rq*   
\p
\v 5 Taha kasehek ki buku sah bah? (Jo asehek sahou dah i buku taha ndramak asehek). Ki buku kandriyen ndra-in taha ale amekes, idoh badeh, leheyani iri mwan ma badih ta kandriyen mwasin ta Kindrei, ya idah kameh, taha kasehek saba sahou bah? Taha katiye anya ja, Kindrei edeu maha-an eme la-u taha le badeh, ari katin bwe?  
\v 6 Bwe handru en! Buku Kindrei, iy bamwenen bwe, ya barala buku sah ja handru, iy kameh kaleben kandriyen tataha mwan ma badih mari? Iy winiyan bwe, neh?  
\v 7 Ya, buku sahou wasai tek ili aseben iri mwan ma badih nane atanan sahou handru ta Kindrei, ma buku wasai doh bwidi nyaran i tinan labai ja, ya buku sah ja iy aloh jo ndramak ta amekes kandriyen ndra-in, ma iy edeu maha-an eme bwele-ek ta aliy?  
\v 8 Buku sahou doh handru, sebwe taha kasehek ki buku doh ja ai, “Abo, taha kamekes kandriyen ndra-in, tasah kandriyen mwasin kameh winiyan asahan ta lakou doh.” Sebwe kandriyen i buku doh mwasin, nadeh? Bwe handru! Arile, iri lau mwan ma badih rayah anya, “Handru, sahou ta Pol buku baden eh.” Are oro mwan ma badih orou sahou ndra-in buku doh, Kindrei kameh edeu maha-an i la-u oro.   
\s1 Lau mari ndra ndra-in le  
\p
\v 9 Sendrehendreh ta aliy taha kasehek ki buku sah bah? Sebwe taha lau badu Juwis badeh, are mwasin labai ja tiri lau mwan ma badih rayah ja nadeh? Bwe handru en! Tasah, taha mene ndrasehek, iri Juwis hawe iri lau badu leheleh mari badeh, ado bahandra tondrok ta kandriyen ndra-in mari.  
\v 10 Sahou dah handru, i buku none ndratorowenei,  
\q1 “Lau mari badeh, ndra ndra-in le ai, ari mwasin ja bwai;   
\q1
\v 11 Ari ndramak badeh, tanan mwasin udu tan ja bwai,  
\q1 ma hawe ari ndramak batakaleh tekedek ta Kindrei bwai.   
\q1
\v 12 Iri mara-ei ndramani san mwasin, ma iri mara-ei ndrasahan lau ndra-in labai.  
\q1 Ari ndramak bamekes se kandriyen mwasin bwai.” \rq Wari 14:1-3; 53:1-3; Leheya 7:20\rq*   
\q1
\v 13 “Boho iri badeh, i buku lek ta lau amak bohon apwa le,  
\q1 tasah iri sihi boho iri ta amekes sahou wasai.” \rq Wari 5:9\rq*  
\q1 “Iri amekes sahou solo-an labai ta bokoro-ei ndramak ari ja, i buku mada lihi mwak ndra-in ta atoh ndramak imek.” \rq Wari 140:3\rq*   
\q1
\v 14 “Boho iri badeh, ndrarahak le aten, ma ndra losen le.” \rq Wari 10:7\rq*   
\q1
\v 15 “Kati iri edek suwi anya ta kidi ndramak kimek le;   
\q1
\v 16 Bolo len mara-ei iri abo gok ta bokoro-ei lakou solo-an, ma adeu maha-an ili tiri mwan ma badih.   
\q1
\v 17 Iri tana iri kandriyen ta manyah ado le hawe iri lau rayah ja bwe.” \rq Aisaya 59:7-8\rq*   
\q1
\v 18 “Ma iri banoh se Kindrei bwe.” \rq Wari 36:1\rq*   
\p
\v 19 Ya nadah, taha ndratanan, iri sahou mari, batanau ta Kindrei amekes, idoh badeh, i tiri ado bahandra tondrok ta batanau doh. Eme ma, ari mwan o badih ja winiyan basehek anya, “Jo mwasin mara-ei,” bwe. Taha mwan ma badih badu kon marakon amekes lakou ndra-in i ta mada Kindrei, eme ma batanau tan kameh atehei taha mara-ei a ta mada sahou.  
\v 20 Tasah, Kindrei atehei batanau tan eme tataha, ta leheya taha ta kandriyen ndra-in tataha i buku sah. Batanau tan le doh, winiyan bamani kandriyen ndra-in tataha bwe. Eme ma, ari ndramak winiyan basahan mwasin ta mada Kindrei na lahou iy amekes in hamon ta batanau malen, bwe.   
\s1 Ndramak atehei budon tan handru in ta Krais, Kindrei kameh aloh iy mwasin ta madan  
\p
\v 21 Arile, nadah, Kindrei ndraleheyaniy ndrame tataha ta san rasan ja, ta taha ka-en hamon ta aliy, ma iy kameh aloh taha lau mwasin. Iy basahan ta san ta a-en hamon ta batanau Kindrei edeu i ta Moses, bwe. Arile, buk nane Moses atorou ma buk iri propet atorou ale, iri asehek sahou i san doh, ta Kindrei ki-in hamon ta amekes taha kasahan mwasin.  
\v 22 San i buku doh: Buku are mwan o badih iy atehei budon tan handru in ta Jises Krais, Kindrei kameh aloh iy ndramak mwasin. Kindrei bamekes san rasan tiri Juwis, ya san rasan tiri lau badu leheleh ja, bwe. Iy bwidi san rasan le kabwe.  
\v 23 Tasah, taha mari badeh, ta amekes kandriyen ndra-in, ma taha asahan i le randra. Taha ataras mara-ei ta kalem mene Kindrei atehei ma taha winiyan bala bolo lomadan tan bwe.  
\v 24 Arile, Kindrei tikisi taha, ma i san ta Krais Jises akohok taha ame hamon, iy edeu ndramas tan laleyah eme tataha. Ya, na ndramas tan le doh, iy aloh taha mwasin mara-ei ta madan.  
\v 25 Kindrei atehei Jises eme mada lau mari, iy imek i nyara salom ta sikine kandriyen ndra-in ta are atehei budon tan handru i ta ndrayen. Kindrei amekes doh, ta leheya iy badeh, in hamon le ta kandriyen mwasin. Tasah, ndra bwena ndra-au eme taku nadah, iri lau amekes kandriyen ndra-in, arile Kindrei amekes kandriyen amunum mara-ei ili tiri mwan ma badih marakon, ma iy badeu maha-an laba tinan suwi bala ta kandriyen ndra-in nane iri amekes bwe.  
\v 26 Arile, na len dah ja, Kindrei suni Jises eme imek i nyara salom ta akunoh kandriyen ndra-in taha mene amekes. Handru, iy amekes i buku doh ta taha winiyan atanan, iy le ari badeh, mwasin mara-ei. Ma iri mwan ma badih marakon atehei budon tiri in ta Jises imek ta akunoh iri ame hamon, Kindrei winiyan aloh iri mwasin ta madan.   
\p
\v 27 Ya, i buku Kindrei amekes lakou doh ta aseben taha, ya saba madasan handru kameh taha katudun nyara taha le amwenen? Kameh bwe nadeh! San doh ndraso mara-ei. Arile, ta saba katin handru san doh ndraso mara-ei? Sebwe taha ba-en hamon ta batanau Kindrei edeu i mine Moses mene bwe, eme ya, idoh le badeh, sokei san ta atudun nyara taha le nadeh? Bwe! Kandriyen ta adeu budon handru i ta Jises, idoh le adeh, sokei san mara-ei ta atudun nyara taha.  
\v 28 Eme ma, taha atanan, buku mwan o badih atehei budon handru in ta Jises imek ta sikine kandriyen ndra-in tan mara-ei iu, Kindrei winiyan aloh iy mwasin mara-ei. Arile, are mwan o badih in hamon le ta batanau Kindrei mene edeu i mine Moses, Kindrei kameh winiyan basehek anya, iy mwasin mara-ei, bwe. Winiyan bwe!  
\v 29 Ya buku sah bah? Sebwe Kindrei badeh, Kindrei tiri Juwis le ai? Ya iri lau badu leheleh bwai? Bwe, iy Kindrei tiri lau badu leheleh ale.  
\v 30 Tasah, Kindrei ari le doh kabwe. Iy le kameh anyolom kandriyen tiri lau asan ku-i iri, ma iy anyolom kandriyen tiri lau basan ku-i iri bwe; buku iri ma lubuk atehei le budon tiri handru in ta Jises imek ta sikine kandriyen ndra-in tiri, iy winiyan aloh iri ma lubuk mwasin mara-ei.  
\v 31 Ya, buku iri mwan ma badih atehei budon tiri handru in ta Jises ma Kindrei aloh iri mwasin mara-ei, sebwe budon tiri handru doh badeh, akohok ta ano ma tubuloh batanau mene Kindrei edeu ili mine Moses nadeh? Bwai! Kandriyen ta budon handru doh, leheya taha i buku batanau badeh, boto-on le gwek.   
\c 4  
\s1 Kindrei aloh Abraham ndramak mwasin na budon tan handru  
\p
\v 1 Abo, taha kasehek tubu taha Abraham ki buku sah bah? Saba tanan iy ndra aliy, ya ma iy takalahei?  
\v 2 I buku none iy kasahan mwasin ta mada Kindrei na lahou iy le amekes, badeh nane iy katudun iy le na aliy. Arile, iy winiyan batudun iy bare mada Kindrei bwe.  
\v 3 Tarou ta Kindrei tiye i buku sah?  
\q1 “Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.” \rq Jenesis 15:6, 21\rq*   
\p
\v 4 Arile, i buku none ari ndramak amekes lahou badeh, iy bakohok luk bala buku none ndramas tan, bwe. Iy akohok bundruwe lahou tan labai.  
\v 5 Arile, i buku none ndramak bamekes ari lahou ta an hamon ta batanau malen ta Moses bwe, arile iy atehei le budon tan handru i ta Kindrei, ndramas tan badeh i buku doh: Kindrei aloh iy ndramak mwasin handru. Handru! Iri lau nane ta amekes karei ma lomondra ndra-in badeh, Kindrei winiyan aloh iri lau mwasin mara-ei ta madan.  
\v 6 Idoh i buku Debit mene ndrasehek nyala iy ndramak nane akohok nyosowan ta ndramas mwasin ta Kindrei doh i san ta budon handru, ma bala san ta lahou bwe:   
\q1
\v 7 “Ou are lau ta karei ma lomondra ndra-in, ou badeh, sekesek,  
\q1 tasah Kindrei ndrasikine kandriyen ndra-in doh ndra-au.  
\q1 Handru, iy badeh, ndrasokosowei kandriyen ndra-in tam ndra-au.   
\q1
\v 8 Sekesek ki tare ndramak Laban ndramaniy ma ndrasokosowei kandriyen ndra-in tan ndra-au.” \rq Wari 32:1-2\rq*   
\p
\v 9 Ya, sekesek ma ndramas doh i tiri lau le asan ku-i iri deh? Bwe, i tiri lau basan ku-i iri bwe ale? Turu ma la-uh. Taha ndrasehek ndrasehek ndra-au: Kindrei anyolom budon handru ta Abraham, ma eme iy aloh iy ndramak mwasin ta madan.  
\v 10 Kindrei aloh iy mwasin ta madan udu mwena ta kandriyen ta asan ku-i taha deh, bwe em, kandriyen ta asan ku-i taha asahan mwena? Bwe, Kindrei aloh iy ndramak mwasin ta madan mwena, ano kandriyen doh udu hamon.  
\v 11 Ano badeh, barasan ku-in i nyara kalem ta leheya buku Kindrei ndraloh iy ndramak mwasin ta madan. Tasah, iy atehei budon tan handru bwena, ya kandriyen ta asan ku-i taha badeh, udu hamon labai. Ya eme Abraham asahan tama iri lau mari iri an hamon ta san ta budon handru. Handru, iri basan ku-i iri ba-au bwe, arile Kindrei aloh iri lau mwasin mara-ei ta madan.  
\v 12 Iy ale badeh, tama iri lau rayah asan ku-i iri. Iri basani ku-i iri laleyah bwe, iri ale anyolom san tubu iri Abraham edek aliy. Ya iri ka le buku iy katehei budon tiri handru ki ta Kindrei i buku none mene na len basani iy bwe.   
\s1 Tandrakan ta Kindrei i tiri lau mari atehei budon tiri handru  
\p
\v 13 Kindrei tandrakan Abraham ta kon munyak mari kameh i tan, ma i ta lundriyen oro. Arile Kindrei tandrakan Abraham oro badeh, bala san ta oro a-en hamon ta batanau malen, bwe. Iy tandrakan oro kameh akohok munyak mari, tasah Abraham atehei budon tan mara-ei in tan, eme ma Kindrei aloh iy ndramak mwasin mara-ei ta madan.  
\v 14 Ya, buku oro are lau a-en hamon ta batanau malen badeh, oro le asahan lundriyen, kandriyen ta atehei budon handru kameh lakou laleyah nyamun bwe, ma tandrakan kameh ari moson bwe.  
\v 15 Tasah, taha tanan, lahou ta batanau malen badeh, ta leheya losen, ma ta adeu maha-an i la-u iri mwan ma badih amekes kandriyen ndra-in. Batanau malen winiya baseben taha bakohok tandrakan ta Kindrei bwe. Ya, buku batanau malen aliy bwe eh, iri kandriyen ndra-in ale winiyan basahan ta mada sahou bwe le.   
\p
\v 16 Eme ya, Kindrei kameh edeu lakou mene iy tandrakan i ta Abraham kameh i tare lundriyen oro le atehei budon toro handru in tan. Ya eme Kindrei kameh tikisi oro ma edeu lakou tan mari i toro laleyah le. Bala toro le are baha batanau malen, ma hawe bala toro are atehei budon toro handru i buku Abraham le, bwe. I toro ma lubuk. Tasah, iy badeh, tama taha mari.  
\v 17 I buku ndratorowenei mene,  
\q1 “Jo badeh, mesekei ou kameh a tama iri kon munyak mari.” \rq Jenesis 17:5\rq*  
\m Iy badeh, i tama taha mari udu mada Kindrei anyolom, tasah iy atehei budon tan handru in ta Kindrei. Iy badeh, Kindrei ta amak lau amak ame loken ja, ma iy ale Kindrei ta tiye sahou le badeh, lakou asahan.   
\p
\v 18 Abraham jaha tan solo-an labai ma nadun bwe, arile iy atondrok Kindrei le gwek, ma iy atehei budon handru, ta Kindrei kameh atehei iy i tama iri lau solo-an. I san doh le badeh, iy asahan tama lau solo-an badu kon munyak. I le buku iy mene ndrasehek tan i buku doh,  
\q1 “Lundriyem oro kameh nyaran bwe.” \rq Jenesis 15:5\rq*   
\m
\v 19 Handru labai, Abraham badeh, ndra bada ndramak, ma jaha tan ndrasahan rinek (100), ma iy abudon udun Sara badan ndrakoreh, ma badan winiyan ta ato-ou nah bwe. Arile, iy baliliy ta budon tan handru i ta Kindrei bwe.  
\v 20 Ma budon tan badeh, bala lundra bwe ta tandrakan ta Kindrei bwe. Arile, budon tan handru badeh, irih le gwek ma iy atudun Kindrei.  
\v 21 Ma mesekei iy i tanan handru ta Kindrei badeh, boto-on ta amekes tandrakan tan doh kameh asahan ili handru.  
\v 22 Eme ta katin doh, iy abudon ta budon handru ta Abraham, “eme ma Kindrei aloh iy ndramak mwasin ta madan.”  
\v 23 Sahou nane, “Kindrei aloh iy ndramak mwasin ta madan” badeh, ta Abraham le, bwe.  
\v 24 Sahou doh badeh, winiyan eme tataha lau ale. Tasah, taha atehei budon tataha mara-ei ta Kindrei le mete-ei Laban tataha Jises eme loken ta imek. Eme ta katin doh, iy winiyan aloh taha lau mwasin mara-ei ta madan.  
\v 25 Iy mene atehei Jises i mine iri lau adai iy imek ta sikine karei ma lomondra ndra-in tataha. Ano Kindrei mete-ei iy eme loken ja ta leheya taha buku iy amekes ndrokowa taha asahan mwasin i hawen ma ta iy winiyan aloh taha lau mwasin mara-ei ta madan.   
\ms1 Taha mene amak hawe Krais, ma taha ale asahan ame awas hawen  
\mr (Kalan 5–8)  
\c 5  
\s1 Kindrei aloh taha mwan ma badih mwasin labai are madan  
\p
\v 1 Taha ndratehei budon tataha ndra tan ma Kindrei ndraloh taha lau mwasin mara-ei ta madan. Eme ma Laban tataha Jises Krais bwidi ndrokowa Kindrei ma ndrokowa taha badeh, udu mwasin, ma iy bwidi ndrine taha kamunum kudu le hawe Kindrei.  
\v 2 Jises badeh, ndrasihi san ta taha lau mwan ma badih atehei budon in ta Kindrei, eme ma taha kameh winiyan ala bolo tikisiy tan, na idah taha areu aliy. Ma taha atondrok Kindrei ta akohok taha, idah kameh taha manyah ado lomadan tan mwasin ado kandrah. Ma idoh bwidi taha sekesek ta aliy.  
\v 3 Taha basekesek ta idoh le bwe. Taha winiya sekesek ta iri maha-an asahan tataha ale, tasah taha tanan, iri maha-an doh badeh aseben ta amekes ndrine taha abadok.  
\v 4 Buku ndrine taha abadok udu le buku doh, idah kameh kandriyen tataha mwasin winiyan sebenei taha, buku iri none anya kasahan. Ya, buku kandriyen tataha mwasin sebenei taha ala bolo iri none don eh, badeh, taha atondrok le Kindrei eme ta aseben taha.  
\v 5 Handru, taha atondrok Kindrei ta aseben taha. Taha winiyan babe-en laleyah bwe, winiyan bwe-en! Tasah, Kindrei ndratehei Malawin Ndrabun ndrame. Eme ma Malawin Ndrabun ndranyuhi kandriyen ta Kindrei ta aseken labai iri lau ndrame ndrine taha.   
\p
\v 6 Na len amwenen ta taha nyamu taha ta aseben taha le bwe, Kindrei eme sani len ta Krais kameh winiyan imek ta akohok taha lau ta amekes kandriyen ndra-in ame hamon.  
\v 7 Handru labai, iy ari tataha winiyan bamak ta aseben ndramak ari, taha aloh iy ndramak mwasin ta mada taha, bwe. Arile, i buku taha anyolom ndramak ari kandriyen tan mwasin labai mara-ei, sebwe taha ari winiyan atehei iy imek ta aseben iy lau doh.  
\v 8 Arile, taha mene are ndra bolo iri kandriyen ndra-in kahis le badeh, Krais eme akohok kon tataha, ma iy imek ta aliy. Ta san doh, Kindrei leheyani iri tikisiy ma so-ok tan eme tataha badeh, tinan labai ja.   
\p
\v 9 Handru labai! Ndraye Krais amou udu bada kei tondreh, ma ndrayen doh eme sikine taha mari ndra belen mara-ei, ya Kindrei aloh taha, lau mwan ma badih tan mwasin ta madan. Eme ma, idah taha atanan handru, i buku Krais kameh aseben taha tinan labai ja, ta teleya ndramas ndra-in nane doh, Kindrei kameh edeu ili tiri lau mwan ma badih ta amekes kandriyen ndra-in.  
\v 10 Bwena mene taha amekes bahun hawe Kindrei kahis le badeh, na le len doh Nadu Kindrei imek. Ta gok ta imek nane doh iy ndrabwidi kandriyen ta bahun mari udu ndrokowa Kindrei hawe taha, ma iy bwidi ndrine taha udu mwasin hawe Kindrei. Na dah, Nadu Kindrei, kohan handru ta udu le buku doh, winiyan bamak ja bwe. Eme ma, taha winiyan atanan handru, na koha nadun le doh, Kindrei kameh andrei taha ame hamon, ma iy kameh aseben taha tinan labai ja.  
\v 11 Ya lakou ari ja i buku doh: Kabin tataha Jises Krais, iy le ari bwidi ndrine taha asahan mwasin hawe Kindrei. Eme ma, ta gok tan nane doh, taha sekesek ta Kindrei handru.   
\s1 Sahou ta Adam hawe Krais  
\p
\v 12 Taha tanan, ndramak ari le bwidi kandriyen ndra-in, ya, ta kandriyen ndra-in doh le, kandriyen ndra-in mari asahan kon munyak. Ano ja, kandriyen ndra-in tiyani imek eme. Eme ma imek eme andrei lau marakon, tasah lau marakon amekes iri kandriyen ndra-in.  
\v 13 Kandriyen ndra-in udu kon munyak bwena labai, ano kandriyen malen ta Moses barasahan. Arile, kandriyen malen ta batanau basehek bwe le badeh, Kindrei babudon tiri kandriyen ndra-in ari, ari tiri lau amekes, bwe.  
\v 14 Arile, udu ndra bada len ta Adam eme asahan bada len ta Moses, imek badeh, ibo gok ta ilom lau marakon. Lau rayah bamekes kandriyen ndra-in bala le buku ta Adam amekes bwe, arile imek ilom iri lau i buku le doh ale. Adam badeh, i buku malawi le iy ndramak nane kameh asahan hamon.   
\p
\v 15 Arile, kandriyen ndra-in ta Adam nane iy amekes, ma tikisiy ta Kindrei bala le randra bwe. Winiyan bwe-en! Kandriyen ndra-in ta ndramak ari le badeh, eme bwidiy, ma iri lau mwan ma badih solo-an amak. Arile, boto-on ta tikisiy ta Kindrei badeh, udu bwele-en labai ja ta boto-on ta imek, ma asahan solo-an labai ja ta iri mwan ma badih. Ta tikisiy ta ndramak ari le nyaran Jises Krais, Kindrei badeh, bwidi taha asahan lau mwan ma badih mwasin labai ta madan, ma idoh ndramas ari mwasin labai iy edeu eme tataha.  
\v 16 Ndramas ta Kindrei ma kandriyen ndra-in ale ta iy ndramak ari le nane, babwidi lakou bala le randra asahan tataha bwe. Winiyan bwe-en! Kandriyen ndra-in ari le ta iy ndramak nane bwidiy, ma Kindrei atehei lau mwan ma badih ala ta mada sahou, ma iy asehek i buku doh, “Iri marakon kandra-i ka-au mara-ei.” Arile, ndramas ta Kindrei i buku doh: Buku iri lau mwan ma badih amekes kandriyen ndra-in solo-an labai, Kindrei eme tikisi iri, iy eme aloh iri lau mwan ma badih mwasin labai ta madan.  
\v 17 Ndramak ari mene ta tebelese sahou, eme ma ta kandriyen ndra-in ta iy ndramak ari nane, eme imek asahan i buku kabin ma tihisi lau mara-ei. Arile, tikisiy ta Kindrei hawe ndramas tan, idoh le badeh, udu bwele-en labai ja ta boto-on ta imek, ma tinan labai ja ta lakou mara-ei. Eme ma, taha atanan, handru, ta lau mara-ei akohok tikisiy nane doh ta Kindrei, ma Kindrei aloh iri lau mwasin ta are madan, koha iri mara-ei kameh udu le buku doh, ma iri kameh asahan kabin, ta gok ta iy ndramak ari le nane nyaran Jises Krais.   
\p
\v 18 Eme ma, taha kabudon kamwenen tiri sahou doh. Ndramak ari le bwena mene bwidi lakou ari ba-en hamon ta kandriyen ta batanau bwe, iy sakalawiy labai, eme ma, ta kandriyen ndra-in tan nane, Kindrei eme atehei taha lau mwan ma badih mara-ei ala ta mada sahou. I buku le, ndramak ari mene amekes lakou ari in hamon ta kandriyen mwasin labai, eme Kindrei anyolom ta idoh, ma iy eme aloh taha mara-ei lau mwasin labai ta madan, ma kohan handru udu tataha.  
\v 19 Ndramak ari le, iy tebelese boho Kindrei, eme ta kandriyen ta tebelese tan nane doh, eme bwidi lau mara-ei asahan lau mwan ma badih mara-ei ta amekes kandriyen ndra-in. I buku le, ndramak ari le, iy in hamon tiri sahou batanau, ta kandriyen tan le doh, lau mwan ma badih solo-an kameh winiya asahan lau mwan ma badih mwasin labai ta mada Kindrei.   
\p
\v 20 Udu hamon, iri lau akohok kandriyen ta batanau, eme bwidi iri sakalawi iri kandriyen ta batanau ili labai ja. Iri lau mara-ei amekes kandriyen ndra-in solo-an labai, arile Kindrei badeh tikisi iri tinan labai ja.  
\v 21 Kandriyen ndra-in le badeh, bwidi imek asahan, eme ma, ta kandriyen ndra-in le doh, iy asahan i buku kabin. Arile, na idah ja, tikisiy ta Kindrei ndrasahan ndra buku kabin. Tasah, ta gok ta tinan tataha, Jises Krais le, Kindrei badeh, tikisi taha, ano iy aloh taha lau mwan ma badih mwasin labai ta madan, eme ma taha akohok kohan handru kameh ta udu le buku doh.   
\c 6  
\s1 Taha amak hawe Krais  
\p
\v 1 Taha katiye ki buku sah bah? Taha kamekes karei ma lomondra ndra-in, ta Kindrei leheya tikisiy tan ili tinan le gwek ai?  
\v 2 Bwe handru en! Taha badeh, buku lau ndramak, ma taha ndraruwani kandriyen ta karei ma lomondra ndra-in. Eme ma, i buku sah handru, ya taha amekes kandriyen doh ili le gwek ai?  
\v 3 Sebwe aha tana aha bwe nadeh? Alomwa taha badeh, amekes taha mara-ei asahan ari buruwen hawe Krais Jises, ma hawe alomwa taha a bolo imek tan.  
\v 4 Handru, na alomwa taha badeh, taha a bolo imek ta Krais, eme ya, Kindrei ihi taha ala hawen i san ta alomwa taha a bolo imek tan. Eme ya, i buku none Krais mene amak eme loken ta imek tan i san ta boto-on ta taman, ma eme taha ale winiyan manyah ado bolo manyah ha-un.   
\p
\v 5 Ya, i buku none taha mene ndrahas ndra ari buruwen ndrala bolo imek hawen, idah kameh, taha ahas ari buruwen hawen ale, ma taha winiyan amak ame loken i buku iy.  
\v 6 Sahou doh handru, tasah taha ndratanan ta kandriyen ndra-in ta ndrine taha malen badeh, ndratahiy i bada kei tondreh hawe Krais. Eme ya, bada taha ndra-in ta karei ma lomondra ndra-in ano, ma taha winiyan bala bonyo-ou ta karei ma lomondra ndra-in ja bwe.  
\v 7 Tasah, are lau imek hawe Krais badeh, iy ndrano ta karei ma lomondra ndra-in, ma iri kandriyen ndra-in winiyan batondrok iy ja bwe.   
\p
\v 8 Ya, i buku none taha ndramak hawe Krais badeh, taha atehei budon tataha handru, ta taha kameh manyah ado hawen ale.  
\v 9 Tasah, taha ndratanan, na len Krais amak eme loken ta imek badeh, iy winiyan bamak ja bwe; ya imek winiyan batondrok iy ja bwe.  
\v 10 Iy akohok imek san rasan le doh kabwe. Ya, ta kandriyen doh, iy bokoro-ei boto-on ta karei ma lomondra ndra-in. Arile iy amak eme loken ja badeh, iy manyah udu mwasin ta atudun nyara Kindrei.   
\p
\v 11 Ya eme i le buku aliy, taha ka-en hamon ta kandriyen ta Krais doh. Ya, taha kasehek nyala taha le ki buku doh: Taha mene ndramak hawe Krais, ya karei ma lomondra ndra-in winiyan batondrok taha ja bwe. Taha ndrahas hawe Krais, eme ma taha ndrakohok koha Kindrei ta udu le buku doh.  
\v 12 Eme ya, taha samokon karei ma lomondra ndra-in satondrok bada taha. Bada taha doh kameh imek le. Kora-on kandriyen ndra-in ariu budon tataha ma aha a-en hamon le ta seken ta bada taha.  
\v 13 Aha badeh, sadeu sese bada aha sala buku none ndron ta ndrole karei ma lomondra ndra-in. Arile aha kadeu bada aha ki mine Kindrei, i buku none oro lau mene amak, ano Kindrei mesekei oro amak ame loken ja, ma aha kadeu bada aha mari ki buku ndron ta ndrole kandriyen mwasin.  
\v 14 Ya eme, karei ma lomondra ndra-in satondrok aha labai, tasah aha badeh, bado bahandra batanau malen ja bwe; aha badeh, ado bahandra tikisiy ta Kindrei labai.   
\s1 Bonyo-ou ta kandriyen mwasin  
\p
\v 15 Ya taha kasehek ki buku sah bah? Taha badeh, bare bahandra batanau malen ta Moses ja bwe. Taha badeh, are bahandra tikisiy ta Kindrei labai, ma iy aloh taha lau mwasin labai ta madan. Ya, mwasin tataha ka-en hamon ta so-ok tataha le ma amekes kandriyen ndra-in? Bwe handru en!  
\v 16 Aha ndratanan, buku none aha katehei aha ka bonyo-ou ta ari ndramak, ma aha kanuhun sahou tan, badeh, aha ndrasahan bonyo-ou tan kabwe. I buku aha a bonyo-ou ta karei ma lomondra ndra-in kameh, ndra-in ta aliy imek. Ya, buku none aha anuhun sahou ta Kindrei kameh, mwasin ta aliy kameh, iy aloh aha lau mwasin mara-ei ta madan.  
\v 17 Arile, wurah ki ta Kindrei! Tasah, na len ndra-au aha asahan bonyo-ou ta karei ma lomondra ndra-in; arile ano ja, aha anuhun sahou handru na ndrinem mari udu bolo leheya aha akohok dah.  
\v 18 Aha badeh, ndrame len ta karei ma lomondra ndra-in, ya eme aha ndrasahan bonyo-ou ta amekes le kandriyen mwasin ta udu mada Kindrei.   
\p
\v 19 Jo asehek sahou dah, i buku taha asehek kede-eh, tasah, i buku none jo kasehek ki san ta Malawin Ndrabun kameh batu aha winiyan bandrei bwe. Na len mene, aha alelei aha a bonyo-ou labai ta karei ma kandriyen ndra-in ta bada aha. Ya i le buku aliy, na dah aha alelei aha mara-ei ka bonyo-ou ta kandriyen mwasin winiyan tiyani manyah taha udu mwasin ma ndrabun buku Kindrei.  
\v 20 Na len aha a bonyo-ou ta karei ma lomondra ndra-in badeh, tawi aha, ya aha basahan bonyo-ou ta amekes kandriyen mwasin bwe.  
\v 21 Arile, na len mene doh, aha akohok saba lakou mwasin ewek taha ta kandriyen ndra-in aha mene amekes? Iri kandriyen ndra-in nane atehei le bwilima ewek taha, neh? Bundruwe lakou mari doh, imek le!  
\v 22 Arile na dah, Kindrei le ndrakunoh aha ndrame len ta karei ma lomondra ndra-in, ya na dah, aha ndrasahan bonyo-ou ta Kindrei. Ya bundruwe lakou aha akohok doh kameh winiyan tiyani ou asahan mwasin handru ala akohok koham handru udu le buku doh.  
\v 23 Tasah, sihine karei ma lomondra ndra-in badeh, imek le. Arile, Kindrei edeu ndramas laleyah i ta lau badeh, kohan ta udu le buku doh i san ta Laban Jises Krais le.   
\c 7  
\s1 Taha ka-en hamon ta san ha-un ta Malawin Ndrabun aseben taha  
\p
\v 1 Aha nadu tine, jo asehek sahou dah i tiri lau ala tanan iri batanau malen. Sebwe aha ndratanan nadeh? Batanau malen badeh, winiyan atondrok ndramak ma mulin na le len iy udu bwele-e munyak dah. I buku iy ndramak, batanau malen winiyan batondrok iy ja bwai.  
\v 2 Jo kasehek ki buku doh: Badih tasou asahan ari buruwen hawe udun na len iy bamak bwe. Arile, i buku none udun mwan imek badeh, kandriyen ta asahan ari buruwen badeh, batanau malen tiye ndrano.  
\v 3 Ya, i buku none iy badih udun bamak bwe, ya iy ki ta mwan ari ja badeh, iy amekes karei, tasah udun ma mwena bamak bwe; arile ki buku none udun kimek badeh, sahou ta aliy bwai, iy winiyan i tasou ta ndramak ari ja. Idoh badeh, iy bamekes karei bwe, iy udu laleyah.   
\p
\v 4 Eme ya, aha nadu tine, aha badeh, i buku aliy. Aha ndrahas hawe bada Krais, eme ma aha ndramak hawen. Ma batanau malen ta Moses winiyan basehek taha ja bwai. Idoh i buku aha ndramak, ma batanau malen winiyan batondrok aha ja bwe, ma aha are laleyah. Nadah, aha atasou a ta mwan ari ja, iy imek ma iy amak eme loken ta imek tan, ta taha winiyan amekes iri kandriyen mwasin Kindrei aso-ok.  
\v 5 Tasah, bwena mene, kandriyen ta karei ma lomondra ndra-in badu bolo taha badeh, ndratondrokei taha. Ma batanau malen mesekei kandriyen ta karei ma lomondra ndra-in doh towodau udu bolo oda taha eme loke; eme ya ta katin doh taha mene adek san ta tiyani taha ala bolo imek.  
\v 6 Arile, na dah, taha ndramak, ma taha ruwani iri lakou mene tawi taha, ma taha ndrame len. Taha winiyan bare bahandra tondrok ta kandriyen bwena ndratorowenei udu bolo batanau malen ja bwai. Arile taha ka-en hamon ta san ha-un ta Malawin Ndrabun aseben taha.   
\s1 Kandriyen ta Karei ma lomondra ndra-in bokoro-ei taha  
\p
\v 7 Ya, i buku batanau malen mesekei kandriyen ndra-in towodau udu bolo oda taha eme loke badeh, taha kasehek ki buku sah bah? Batanau malen badeh, kandriyen ndra-in nadeh? Bwe! Arile, na batanau malen le badeh, mesekei jo i tanan karei ma lomondra ndra-in i buku sah. Batanau malen mene tiye anya,  
\q1 “Madam salikis lakou doh, lakou doh!” \rq Eksodus 20:17; Dutoronomi 5:21\rq*  
\m Ya, buku batanau malen batiye lakou doh bwe, jo badeh, winiyan bala tanan kandriyen ta madalakis i buku sah bwe  
\v 8 Arile, kandriyen ta karei ma lomondra ndra-in silahei san ta bokoro-ei jo. Ya iri kandriyen doh i madasan ta batanau malen ma mesekei budon tek towodau ta amekes madak alikis lakou ari, ya lakou ari doh. Tasah, buku none batanau malen mene basehek tek bwe, idah nane karei ma lomondra ndra-in winiyan batowodau boto-on bwe.  
\v 9 Kabatana batanau malen bame bwe le badeh, jo anya jo mwasin ta mada Kindrei, ya jo bato-ou ta karei ma lomondra ndra-in bwe; arile na len batanau malen asahan badeh, karei ma lomondra ndra-in towodau udu ndrinek eme loken ma amekes jo imek.  
\v 10 Bwena mene jo abudon anya batanau malen eme ta aseben kohak udu le udu, arile bwe, eme ta idi jo imek.  
\v 11 Tasah, kandriyen ta karei ma lomondra ndra-in badeh, silahei san tan eme mesekei jo amekes kandriyen ndra-in; eme ya i san le ta batanau malen badeh, karei ma lomondra ndra-in wasai jo ma idi jo imek.  
\v 12 Eme ya, taha kasehek batanau malen ki buku sah bah? Kandriyen ta batanau malen le badeh, ndrabun ma mwasin, ma hawe batanau malen ari ari badeh, ndrabun hawe lewen ma mwasin.   
\p
\v 13 Handru, batanau malen badeh, mwasin labai. Arile, buku sah ja? Lakou mwasin doh bwidi jo imek deh? Bwe, bala buku badeh, bwe! Arile, idoh badeh, asahan na seken ta kandriyen ndra-in badu bolo oda taha mesekei taha tebelese sahou badu bolo batanau malen ma bwidi taha amak. Kindrei le alelei kandriyen ndra-in amekes gok doh, tasah iy aseken kandriyen ndra-in doh keme lewan, ma iri lau katanan buku kandriyen ta karei ma lomondra ndra-in badeh, ndra-in labai.   
\s1 Kandriyen ndra-in atondrok taha  
\p
\v 14 Taha tanan, batanau malen badeh, Kindrei le edeu. Arile jo badeh, ndrala bonyo-ou ta karei ma lomondra ndra-in, tasah jo ba-en hamon ta seken ta Kindrei bwe.  
\v 15 Eme ya, jo bala tanan sasah jo amekes bwe. Tasah, kandriyen mwasin ta jo nane kamekes on, jo bamekes bwai. Arile, jo ja aseken kamekes kandriyen ndra-in nane jo samekes on, badeh, jo amekes ai.  
\v 16 Eme ya, i buku none jo amekes sasah nane jo bwalek ta amekes badeh, kandriyen tek doh leheya buku budon tek anya ki-in hamon ta sahou batanau malen asehek ta aliy ai.  
\v 17 Ya eme jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.  
\v 18 Eme jo tanan ta bolo odak badeh, kandriyen mwasin bado aliy bwe. Handru, bolo budon tek, jo aseken ta amekes kandriyen mwasin, arile winiyan bwe, kandriyen ndra-in udu le bolo odak kada-ah.  
\v 19 Eme kandriyen mwasin jo nane anya kamekes badeh, jo bamekes bwai; ya, kandriyen ndra-in anya nane jo samekes badeh, jo amekes ai.  
\v 20 Eme ya, i buku none jo amekes sasah nane jo bwalek amekes, jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.   
\p
\v 21 Ya eme sendrehendreh ta aliy i buku doh: Jo anya kamekes kandriyen mwasin badeh, kandriyen ndra-in nane udu bolo odak kodo-on aliu jo amekes le kandriyen ndra-in ja.  
\v 22 Ya udu bolo budon tek jo abudon anya batanau malen ta Kindrei badeh, mwasin, ya eme taha kasekesek ma ka-en hamon le ta aliy;  
\v 23 arile jo ja anyolom kandriyen randrah ja amekes lahou udu bolo odak mari, ya kandriyen doh akek eme hawe bar tek ta lomondra mwasin. Eme ma kandriyen doh sawei jo udu baha boto-on ta karei ma lomondra ndra-in sokoro-ei bolo odak mari.  
\v 24 Eme ya, bolo odak ndrandra-i ai! Ya, are lau handru winiyan sebenei jo udu bolo imek ta karei ma lomondra ndra-in kada-ah?  
\v 25 Arile, wurah handru i ta Kindrei, i san ta Laban tataha Jises Krais le!  
\p Ya eme ta sendrehendreh jo kasehek i buku doh: Taha mene asehek sahou i lundra; budon tataha asehek anya batanau malen ta Kindrei mwasin, ya eme taha a buku bonyo-ou ka-en hamon ta aliy, arile taha ame ja asehek anya, oda taha atehei taha a buku bonyo-ou ta a bolo kandriyen ndra-in ta bada taha ma mesekei taha andra-i labai.   
\c 8  
\s1 Manyah mwasin i san ta Malawin Ndrabun  
\p
\v 1 Ya eme sendrehendreh ta lakou mari i buku doh: Are lau asahan ari buruwen hawe Krais Jises badeh, batanau malen ta Kindrei winiyan batiyani iy bala ta mada sahou ma badeu maha-an bala tan ja bwe.  
\v 2 Idoh handru, tasah na lahou ta Krais Jises, Malawin Ndrabun le badeh, mesekei taha ahis hawen, ma taha winiyan a-en hamon ta kandriyen ta kohan handru ma manyah mwasin. Ya, iy tolowei taha udu bolo kandriyen ta karei ma lomondra ndra-in, eme ma iri kandriyen doh winyan batondrok taha ma batiyani taha bala san ta imek ja bwe.  
\v 3 Tasah, batanau malen badeh, boto-on tan winiyan basakalawi boto-on ta karei ma lomondra ndra-in bwe. Iy badeh, nyowonya le karei ma lomondra ndra-in udu bolo oda taha, ma iy winiyan basikine ba-au bwe. Arile, Kindrei le suni nadun amwenen asahan awas i buku taha ndramak ta karei ma lomondra ndra-in, i nyara salom, ma iy imek ta aseben taha mari. Handru, Kindrei le badeh, atehei Krais i buku none ndramak ta amekes karei ma lomondra ndra-in i saluwe taha.  
\v 4 Iy amekes doh, ta talou taha ame len, ya kandriyen mwasin ala batanau malen asehek badeh, kasahan handru, i tataha lau an hamon ta Malawin Ndrabun, ya sa-en hamon ta kandriyen ndra-in badu bolo oda taha aseken.   
\p
\v 5 Are lau oro an hamon ta karei ma lomondra ndra-in badu bolo oda oro badeh, ndratehei budon toro ndrahas ndra ta aliy kabwe; arile, are lau oro an hamon ta budon ta Malawin Ndrabun badeh, atehei budon toro handru in hamon tan.  
\v 6 Ya eme buku none are lau atehei karei ma lomondra ndra-in udu budon tan labai kameh iy imek; arile, are lau atehei Malawin Ndrabun atondrok bolo budon tan mari kameh iy manyah mwasin udu le buku doh, winiya se losen bwe.  
\v 7 Ya, are lau atehei karei ma lomondra ndra-in udu bolo budon tan badeh, kameh mesekei le bahun hawe Kindrei. Tasah, are lau amekes kandriyen i buku doh, iri lau doh badeh, batehei oro bala bahandra tondrok ta batanau malen ta Kindrei bwe, ya iri winiyan ba-en hamon ta batanau tan bwe.  
\v 8 Are lau oro atehei oro ala bolo karei ma lomondra ndra-in badu bolo oda oro winiyan bamesekei mada Kindrei basekesek toro bwe.   
\p
\v 9 Arile, i buku none aha katehei Malawin Ndrabun katondrok aha handru, ya aha karuwani budon ta karei ma lomondra ndra-in lolowa aha; idah kameh, aha a-en hamon ta budon ta Malawin Ndrabun leheya aha. Tasah, are lau bandrei Malawin Ndrabun ta Krais bwe, iy badeh badu hawe Krais bwe.  
\v 10 Karei ma lomondra ndra-in taha bwidi bolo oda aha, ma aha amak. Arile, i buku none aha kandrei Krais kamanyah kudu bolo aha, Malawin Ndrabun kameh manyah mwasin udu ndrine aha, tasah Kindrei le winiyan aloh aha mwasin mara-ei ta madan.  
\v 11 Ya, ki buku none Malawin Ndrabun ta Kindrei mene mete-ei Jises ta imek tan amak eme loken, kamanyah kudu bolo aha, iy winiyan mete-ei aha amak ame loken i le buku Krais mene, iy mete-ei iy eme loken. Ma iy kameh aluhi kohan handru kameh i bada aha i san ta Malawin Ndrabun udu bolo aha.   
\s1 Are lau oro an hamon ta budon ta Malawin Ndrabun, oro badeh, nadu Kindrei  
\p
\v 12 Eme ya, aha nadu tine, ta katin doh le, taha kalelei budon ta Malawin Ndrabun katondrok kandriyen ma tekedek tataha mara-ei. Ya, kandriyen ta karei ma lomondra ndra-in saluwi oda taha ma budon tataha, ndri-iy!  
\v 13 Tasah, i buku none aha katehei manyah taha mari badu bolo oda aha mari ki mine karei ma lomondra ndra-in, idah kameh, aha amak; arile i buku none aha katehei Malawin Ndrabun kasebenei aha katikahei karei ma lomondra ndra-in badu bolo oda aha ki-iu, idah kameh, aha winiyan bamak bwe, aha kameh ado le buku doh.  
\v 14 Tasah, are lau oro alelei budon ta Malawin Ndrabun atondrok oro, oro baden eh, nadu Kindrei.  
\v 15 Eme ya, aha bakohok Malawin Ndrabun ta nohowa aha bwe, arile, na Malawin Ndrabun le idih udu bolo oda aha mesekei aha asahan nadu Kindrei handru. Ma na iy le, taha aloh Kindrei anya, “Tama, tama.”  
\v 16 Ma ale Malawin Ndrabun tiye udu bolo koha taha anya, “Aha badeh, nadu Kindrei.”  
\v 17 Ya, i buku none taha ndrasahan nadun, idah kameh, taha akohok nyosowan mwasin tan udu hawe iri lau tan. Ma idah kameh, taha ma hawe Krais kameh atondrok lakou mene Kindrei atehei udu mine Krais, arile taha ma mwena kabwese maha-an ma isi, iri lau kamekes keme tataha op, ano kameh Kindrei edeu manyah mwasin eme tataha i le buku manyah mwasin ta Krais.   
\s1 Nyosowan ma lomadan udu bwena eme  
\p
\v 18 Balek lomondra ta maha-an hawe sisi-in taha bwese na len dah badeh; lakou nadu bwisik labai ta manyah mwasin ma lomadan kameh eme, iy leheya eme tataha.  
\v 19 Tasah, iri lakou mari badu munyak ma kandrah badeh, ado le abe-en, ma hawe koha iri apwe ta anyolom len eme kameh, Kindrei edeu bwabwai ta masiye i ta nadun iri.  
\v 20 Handru, Kindrei mesekei lakou mari mene ta kimek ma kabola na seken ta lakou mari nane bwe. Arile, idoh na seken le ta Kindrei. Iy atehei lakou mari nane iy mesekei kado le kabe-en iri lakou mwasin kameh asahan.  
\v 21 Iri lakou mari doh atondrok le len Kindrei ndrasaniy ta amekes kandriyen ta imek ma abola kano. Na len doh amwenen iri lakou mari Kindrei mesekei kameh ado mwasin hawe iri nadu Kindrei, ma iri mara-ei kameh asahan i randrah labai. Iri kameh winiyan bamak ma babola bwe, ma Kindrei kameh edeu nyosowan solo-an solo-an i tiri.   
\p
\v 22 Taha ndratanan ta lakou mari Kindrei mesekei atona isi, i buku none isi ta badih anya kedeu nadun keme len. Ma iri lakou doh atondrok len ta Kindrei kameh nyowonya nadun iri ame lewan, winiya taku len dah.  
\v 23 Oro lakou ala Kindrei mesekei le bwe; taha mari mene asahan ma mwena handru akohok Malawin Ndrabun badeh, mesekei ndrine taha eden handru udu bolo taha ma taha ado le, ma koha taha apwe ta taha kasahan nadun handru ta nyo-ou. Na len doh kameh taha akohok bada taha ha-un ame hamon.  
\v 24 Kindrei mene ndrakohok taha ndrame hamon, tasah taha mene ndratehei budon tataha handru ndra-en tan. Ya nadah ale, taha atondrok ma atehei budon tataha handru ta lakou Kindrei kameh amekes eme tataha. Arile, iri lakou mwasin taha atondrok ta aliy badeh, ki buku none taha akohok handru, idah kameh taha batondrok ta aliy ja bwai. Tasah, buku none are lau ndratakalahei lakou nane doh, idah nane iy winiyan babe-en ja bwe, neh?  
\v 25 Arile, taha tanan, i buku none taha anyolom bohon ili bwena ta lakou taha bandrei bwe le badeh, taha ado le abe-en ta aliy.   
\p
\v 26 Ya eme i le buku aliy, na len taha nyamu taha bwe badeh, Malawin Ndrabun eme aseben taha. Tasah, taha tana taha san ta amekes salom ki buku sah bwe, taha aden le udu ndrine taha na sahou rayah taha winiyan basehek na boho taha bwe; arile i buku none taha aso ta asehek sahou badeh kameh, Malawin Ndrabun le i nyara boho taha ndremenya Kindrei ta aseben.  
\v 27 Kindrei anyolom ndrine taha, ma iy tanan budon ta Malawin Ndrabun ma sasah kameh iy ndremenya iy ta aliy ta aseben taha lau tan. Ma Malawin Ndrabun kameh ndremenya iy boto-on boto-on amwenen le ta budon ta Kindrei.   
\s1 Kindrei udu bwele-en labai  
\p
\v 28 Taha tanan, Kindrei amekes lakou mari mwasin ma ndra-in kameh, asahan mwasin i tare lau aseken iy; oro are lau mene iy aloh oro ame bolo lahou tan.  
\v 29 Ta katin doh, oro are lau le Kindrei ndratanan bwena mene, iy ale ndralebelei oro ndrare len ta iri kameh kakohok kone nadun ma hawe kandriyen tan le amwenen. Ya idah kameh, nadun asahan i tuluton tataha, ma taha asahan somwendreu tan.  
\v 30 Ma Kindrei ale aloh oro are lau ala iy mene ndralebelei oro, ndrado len kameh asahan nadun; oro le don badeh, iy aloh oro mwasin labai ta madan; ma oro le ala iy aloh oro mwasin labai ta madan kameh, iy atudun oro na len eme.   
\s1 Ari lakou winiyan bapwai taha ta bolo seken ma tikisiy ta Krais bwe  
\p
\v 31 Ya abo, taha katiye sasah ki tiri lakou mari Kindrei amekes doh? Ki buku none iy badu hawe taha ma aseben taha, idah kameh, are lau katikahei taha ai? Winiyan bwe!  
\v 32 Kindrei batawi nadun amwenen ba-en gwek bwe, arile iy atehei nadun eme bwese isi ma imek ta akunoh taha mari. Handru, taha ndranyolom iy badeh, ndratehei nadun oh! Ya, idah kameh, aha abudon anya iy winiyan batehei lakou mwasin mari bame tataha bwe? Bwe, idah kameh, iy atehei laleyah i ta nadun ma i tataha ale.  
\v 33 Ya, are lau handru kameh winiyan tiye sahou nyarahan barala la-u oro lau nane Kindrei ndralebelei doh? Ari lau winiyan bwe! Kindrei le baraloh taha mwasin mara-ei ta madan.  
\v 34 Are lau winiyan tiye anya taha ndrandra-i? Lau bwe! Krais Jises le badeh, mene imek, ya eme ja, iy amak eme loken ili manyah udu kabede taman loboho lim salin! Ya eme iy le aseben taha na sahou.  
\v 35 Abo, saba lakou handru winiyan apwai taha are bolo tikisiy ta Krais? Maha-an winiyan deh, sisi-in deh, iri amekes ndra-in eme tataha deh, bilidi awas deh, taha kalawi taha bwe deh, bohosak deh, iri kadai taha kamak deh? Bwe, iri lakou mara-ei doh winiyan bapwai taha ta bolo seken ma tikisiy ta Krais bwe!  
\v 36 Ki le buku sahou udu bolo tarou mene ndratiye anya,  
\q1 “Aso lau tam, eme ma, na ou le badeh, aso are bohosak ta imek na len mari;  
\q1 Iri boso-ou aso andra-i labai,  
\q1 i buku none iri bosowa sipsip ta anya kasan balen.” \rq Wari 44:22\rq*   
\p
\v 37 Arile bwe, iri maha-an mari doh, winiyan amekes bahun tinan eme bada taha, arile tikisiy tan eme tataha badeh, tinan labai ja, eme ma iri maha-an mari doh winiyan batisi taha bwe!  
\v 38 Tasah, jo badeh, ndratanan labai, ta saba lakou asahan bada taha winiyan bapwai taha ta bolo tikisiy ta Kindrei; jo imek deh jo udu; iri angelo badu kandrah deh, iri malawin ndra-in badu reu; na sasah asahan na dah deh, asahan udu bwena eme; na boto-on badu loke ma badu andri;  
\v 39 ma na saba lakou ja Kindrei mesekei, iri lakou mara-ei doh winiyan bapwai taha ta bolo tikisiy ta Kindrei bwe. Tikisiy tan doh eme tataha i san ta Krais Jises, iy Laban tataha.   
\ms1 Pol asehek ta kandriyen Kindrei amekes ili tiri Isra-el  
\mr (Kalan 9–11)  
\c 9  
\s1 Sahou ta Kindrei hawe iri lau tan  
\p
\v 1 Jo badu hawe Krais. Eme ma, sasah jo asehek dah badeh, wasai bwe, handru. Malawin Ndrabun atondrok bolo budon tek mari ma tiye tek, ta jo badeh, bawasai bwe.  
\v 2 Jo balek asin ma ndrinek tikisiy labai tiri lau ndraye ahi rabuk.   
\p
\v 3 Ki buku none mwasin eh, jo aseken losen ta Kindrei keme la-uk, ya jo kakohok kon tiri lau ndraye ahi rabuk, keme len ta Krais, ya eme oro le kakohok kohan ta udu le buku doh.  
\v 4 Iri badeh, lau tan amwenen, lau badu Isra-el. Iri mene batehei budon tiri ba-en tan bwe, arile iy mene mesekei iri asahan nadun ta nyo-ou, ma edeu lomadan ma boto-on tan mwasin i tiri. Iy mene amekes sahou randra le ma hawe edeu batanau malen, ma hawe leheya san ta asalom ma atudun handru udu bolo asiu tinan tan. Iy amekes iri lakou mwasin doh i tiri hawe edeu tandrakan i tiri.  
\v 5 Udu ndra bada tubu iri, sare iri edek eme eme taku bada Krais asahan awas. Iy badeh, Kindrei  
\m ma iy udu bwele-e lakou mari. Masiye ma tudun ki tan kudu le buku doh. Handru.\f + \fr 9:5 \ft Iri lau ta tanan rayah tobolowe sahou ta Rom kalan 9:5 i buku doh, Udu ndra bada tubu iri badeh, sare iri edek eme eme taku bada Krais asahan awas, ma iy kabin badu boho kamen tiri le. Ya eme, masiye ma tudun badeh, ki ta Kindrei kudu le buku doh. Handru.\f*   
\s1 Pol asehek nyala kandriyen Kindrei amekes i tiri Isra-el  
\p
\v 6 Lundriye Isra-el solo-an batehei budon tiri ba-en ta Krais bwe. Ya, ta katin doh, sebwe jo katiye anya, Kindrei ba-en hamon ta tandrakan mene iy amekes i ta Abraham bwe, nadeh? Bwe! Tasah, lundriye Isra-el badeh, solo-an labai, arile iri mara-ei basahan lau handru ta Kindrei bwe, rayah le.  
\v 7 Sahou dah handru. Jo ale batiye anya iri lundriye Isra-el doh asahan lundriye Abraham handru, bwe. Bwe labai! Tasah, bwena mene Kindrei tiye i ta Abraham i buku doh,  
\q1 “Lundriyem oro hamon kameh asahan solo-an labai, in hamon ta san ta nadum Aisik amwenen.” \rq Jenesis 21:12\rq*   
\m
\v 8 Kati sahou doh badeh, i buku doh: Lau solo-an abudon anya Abraham badeh, tubu iri, arile nah adeu eme len i buku taha ndranyolom doh kameh asahan nadu Kindrei ai, bwe. Nah ala asahan i san ta kandriyen ta atehei budon handru in ta tandrakan ta Kindrei, iri nah le don adeh asahan lundriye Abraham handru.  
\v 9 Tasah, tandrakan mene tiye i buku doh:  
\q1 “Na len jo ndrasaniy kameh jo eme hamon, ma Sara kameh atehei nah mwan eme len.” \rq Jenesis 18:10, 14\rq*   
\p
\v 10 Abo, anya sahou ta Kindrei doh le kabwai? Bwe. Nadu Rebeka uru mene ma la-uh badeh, au ndrine ndramak ari le; iy badeh, tubu taha Aisik.  
\v 11-12 Arile, in hamon ta kandriyen tan, Kindrei le lebelei ndramak na le so-ok tan amwenen; iy babudon ta lahou ndramak amekes bwe. Eme ma, kabatana Rebeka batehei uru nah mumwir doh bwe le, ma uru bamekes se kandriyen ndra-in hawe kandriyen mwasin bwe le badeh, Kindrei ndratehei budon tan ndra-en andri kabwe, ta are turu kameh kakohok nyaran ma kasahan lau tan handru. Eme Kindrei tiye Rebeka anya,  
\q1 “Iy kadok kameh asahan lohowan ta iy bwaneh.” \rq Jenesis 25:23\rq*   
\m
\v 13 I le buku none ndratorowenei udu buk ndrabun ta Kindrei anya,  
\q1 “Jo badeh, aseken Jekob tinan labai, ano ja Iso.” \rq Malakai 1:2-3\rq*   
\p
\v 14 Ya eme taha kasehek ki buku sah bah? Kandriyen ma lomondra ta Kindrei bamwenen bwe? Bwe handru en!  
\v 15 Tasah, iy tiye i ta Moses i buku doh,  
\q1 “Na seken tek le, jo anya jo aseken ndramak ari, jo aseken iy,  
\q1 Ma jo anya, jo tikisi ndramak ari, jo tikisi iy.” \rq Eksodus 33:19\rq*   
\p
\v 16 Ya eme Kindrei lebelei lau badeh, ba-en hamon ta seken ta ndramak, ma hawe ba-en hamon ta lahou bwe; arile idoh badeh, na tikisiy ta Kindrei le.  
\v 17 Tasah, sahou mene ndratorowenei tiye i ta Parou asah i buku doh:  
\q1 “Jo mene atehei ou asahan kabin ta anyehe budon ta jo badeh, kaleheya boto-on tek kewek tam. Ya eme ma iri lau kameh winiyan atudun nyarak ma atiye sahou tek i tiri lau badu kon munyak mara-ei.” \rq Eksodus 9:16\rq*   
\p
\v 18 Ya eme sendrehendreh ta aliy i buku doh: I buku none Kindrei anya kamekes mwasin ki tare lau, badeh, lokowan ai. Ya, i buku none iy anya kamekes are lau sanuhun iy, badeh, lokowan le ai.   
\s1 Taha badeh, a buku kun ndren Kindrei amekes  
\p
\v 19 Eme ya aha ari kameh tiye sahou eme tek anya, “I buku sah handru? I buku Kindrei aseken, iy winiyan tiye iri lau rayah kasahan nadun. O, bwe eh, iy atehei le konan i tiri rayah ja, ma iri kameh amai.” Buku sahou dah handru, ya, na saba katin handru kameh Kindrei winiyan edeu maha-an eme tataha lau ta amekes kandriyen ndra-in? Tasah, ari lau winiyan basokei tanan ma lahou ta Kindrei bwe.  
\v 20 Arile, ou saba ndramak handru, ya ou anya asehek sahou i buku badeh, ki ta Kindrei? Buku none ari ndramak kabonei ndren, ya iy kamekes kun ano, kun keme ja katiye i ta ndramak nane ta amekes iy anya,  
\q1 “Ou bamekes jo bamwenen bwe oh”? \rq Aisaya 29:16; 45:9\rq*   
\m
\v 21 Bwe, ndramak ta apon ndren badeh, winiyan apon ndren na seken tan. I buku none iy anya kapon ari kasahan kabuluw o, ki rabos ta amekes gok laleyah ta len mari, badeh na seken tan. O, buku none iy anya kapon ari ja ki tariye ka-ukon ta leheya, badeh na seken tan le.   
\p
\v 22 Ya eme i le buku aliy. Sebwe Kindrei winiyan leheya losen ma boto-on tan i la-u iri na seken tan nadeh? Eme ya, iy badeh, amunum udu le abe-en oro are lau ale losen tan udu toro. Oro don eh, iy ndralowosaniy ta iy kameh idi oro amak, o, akahei oro au buku kun ndra-in.  
\v 23 Kindrei amekes kandriyen buku doh, tasah iy anya kaleheya lakou tan solo-an labai udu bolo lomadan eme la-u taha are le mene iy tikisi taha. Taha lau mene iy lowosani taha ado buku kun tariye ka-ukon ta akohok lakou udu bolo lomadan.  
\v 24 Ma taha dah ale, taha lau mene iy aloh taha a buku kun ta akohok tikisiy tan. Taha rayah badu bolo iri Juwis ma rayah badu bolo iri lau badu leheleh.  
\v 25 I buku none iy torowenei udu bolo tarou ta propet Hoseya:  
\q1 “Jo kameh aloh iri lau tek bwe, asahan lau tek handru;  
\q1 ma jo kameh aloh iri lau jo baseken iri bwe, kameh jo aloh iri lau tek, jo aseken iri labai.” \rq Hoseya 2:23\rq*   
\m
\v 26 ma,  
\q1 “Idah kameh, asahan amwenen le ndra kon heh, sahou mene asehek i toro anya,  
\q1 ‘Aha badeh, lau tek bwe,’  
\q1 udu kon doh kameh aloh iri badeh, ‘nadu Kindrei, iy kohan ta udu le buku doh.’” \rq Hoseya 1:10\rq*   
\p
\v 27 Ya, Aisaya mene aloh bohon i tinan ta nyala iri Isra-el anya,  
\q1 “I buku none kane lundriye iri Isra-el kameh asahan solo-an i buku le on badu babi, arile oro sabe le kameh Kindrei akohok ame hamon.   
\q1
\v 28 Tasah, idah kameh, sahou ta Laban ano ma iy kameh edeu maha-an suwi suwi i tiri lau badu munyak.” \rq Aisaya 10:22-23\rq*   
\p
\v 29 Idoh asahan i le buku none Aisaya mene ndratiye ndra-au anya,  
\q1 “I buku none Laban ma boto-on tan bamukuni lundriye taha basahan tataha bwe,  
\q1 idah nane taha ndrandra-i i le buku iri Sodom, ma hawe iri Gomora.” \rq Aisaya 1:9\rq*   
\s1 Iri Isra-el ba-en hamon ta kandriyen ta budon handru bwe, eme ma Kindrei winiyan baloh iri mwasin ta madan bwe  
\p
\v 30 Ya eme taha kasehek ki buku doh: Iri lau badu leheleh bamekes lahou boto-on ta asilah madasan ta Kindrei kaloh iri mwasin mara-ei ta madan bwe, arile iri badeh, ndratakalahei madasan ta Kindrei kaloh iri mwasin mara-ei ta madan. Ya, san doh badeh, i san ta budon handru le.  
\v 31 Arile, iri lau tan amwenen, iri Isra-el badeh, none boto-on handru ta anya ka-en hamon le ta batanau malen mari ta Moses. Iri aseken Kindrei kaloh iri mwasin mara-ei ta madan, arile iy winiyan bwe.  
\v 32 I buku sah handru iy winiyan baloh iri mwasin mara-ei ta madan bwe? Tasah, iri banone na budon handru bwe, iri abudon ma an hamon le ta lahou boto-on iri amekes. Iri bwale iri Krais, ma iri batehei budon tiri ba-en handru tan bwe. Ya eme Krais le asahan i buku “bek ta lau ato-ak bwele-en,” ya iri Isra-el badeh, ato-ak ta bwele-e bek le doh.  
\v 33 I le buku tarou ta Kindrei asehek nyala aliy anya,  
\q1 “Ndranye aha kanuhun, jo nyahani bek udu Sayon ta tono-ei kati iri lau kato-ak  
\q1 Ma bek doh kameh tono-ei kati iri lau, ma iy kameh amekes lau taku areu san.  
\q1 Are lau atehei budon tan handru in tan kameh iy winiyan bani bwilima bwe.” \rq Aisaya 8:14; 28:16\rq*   
\c 10  
\s1 Iri Isra-el tana iri kandriyen ta Kindrei bwe  
\p
\v 1 Aha nadu tine, jo badeh, bolo ndrinek aseken handru, ta Kindrei kakohok iri lau tek Isra-el kame hamon ma iri samak. Eme ma jo asolom i ta Kindrei ta aseben iri na len mari.  
\v 2 Tasah, jo tanan iri mwasin labai, ma jo winiyan asehek i buku doh: Budon tiri badeh, ta amekes lahou ta Kindrei. Arile, budon tiri doh badeh, bamwenen ta tanan ta Kindrei bwe.  
\v 3 Ya eme iri bala tanan ta saba san handru Kindrei aloh iri lau mwasin mara-ei ta madan bwe. Ma eme iri amekes na budon ma boto-on tiri laleyah, ya eme iri batehei iri bala baha Kindrei baloh iri mwasin ta madan bwe.  
\v 4 Tasah, Krais ndraweneyani batanau malen ta Moses kabwe, ya eme are lau oro atehei budon handru le badeh, Kindrei aloh iy mwasin mara-ei ta madan.   
\p
\v 5 Moses asehek kandriyen toro lau nane anya ka-en hamon ta batanau malen; buku none oro anya Kindrei kaloh oro mwasin mara-ei ta madan, Moses tiye oro badeh, kamekes ki buku doh:  
\q1 “Are lau le, iy in hamon ta lakou mari batanau malen asehek, iy kameh akohok kohan ha-un ta udu le buku doh.” \rq Lebitikus 18:5\rq*   
\m
\v 6 Arile, ndramak in hamon ta kandriyen ta budon handru, eme Kindrei aloh iy mwasin mara-ei ta madan, iy ndramak doh in hamon ta sahou doh, “Ndrinem badeh, satiye anya,  
\q1 ‘Are lau winiyan ili bolo kandrah?’” \rq Dutoronomi 30:12\rq*  
\m ma kandrei Krais keme andri katiye sahou mwasin keme tataha.  
\v 7 “O,  
\q1 ‘Are lau winiyan ili bolo lek ndrahu lau amak?’” \rq Dutoronomi 30:13\rq*  
\m kamete-ei Krais keme loken katiye sahou mwasin keme tataha.  
\v 8 Arile kati sahou nane i buku doh:  
\q1 “Sahou mwasin asah udu mirihik hawe aha; ma udu boho aha hawe ndrine aha badeh.” \rq Dutoronomi 30:14\rq*  
\m Sahou doh badeh, sahou mwasin le nane dah aso atiye anya iri lau katehei budon tiri handru ki-in ta Krais.   
\p
\v 9 Ya, i buku none ou asehek na bohom eme lewan anya, “Handru, Jises badeh, iy Laban,” ma ou atehei budon tam handru na ndrinem katiye ta Kindrei badeh, mete-ei Jises ta imek handru, idah kameh, iy akohok ou ame hamon.  
\v 10 Tasah, ou badeh, atehei budon tam handru na ndrinem, ya eme Kindrei aloh ou mwasin mara-ei ta madan. Ma ou asehek sahou na bohom eme lewan, ma eme iy akohok ou ame hamon.  
\v 11 I le buku none buk ndrabun mene ndrasehek anya,  
\q1 “Are lau atehei budon tan handru in tan kameh iy winiyan bani bwilima bwe.” \rq Aisaya 28:16\rq*   
\m
\v 12 Tasah, iri Juwis ma hawe iri lau badu leheleh badeh, ari ndrokowa iri aliy bwe. Laban turu ma lubuk badeh, Laban le ari, iy Laban tiri mari. Ma iy edeu nyosowan solo-an mwasin i tiri mari ala aloh nyaran i san ta asolom ma ndremenya iy ta seben.  
\v 13 I buku buk ndrabun ale ndrasehek anya,  
\q1 “Lau amekes salom na nyara Laban ma ndremenya iy ta seben kameh, iy winiyan sebenei iri.” \rq Jowel 2:32\rq*   
\p
\v 14 Ya, buku none iri batehei budon tiri handru ba-en tan bwe, na saba san handru kameh iri aloh nyaran i san ta salom ma ndremenya iy ta seben? Ya, i buku none iri banuhun sahou ta nyalan bwena bwe, na saba san handru kameh iri atehei budon tiri handru in tan? Ya, i buku none iri lau batiye sahou mwasin bala tiri bwe, na saba san kameh iri anuhun?  
\v 15 Ya, i buku none ndramak basuni oro lau rayah bala len bwe, na saba san kameh oro lau nane atiye sahou doh? I buku ndratorowenei udu bolo buk ndrabun,  
\q1 “Lau sekesek handru ta anyolom ma anuhun ndramak atiye sahou mwasin.” \rq Aisaya 52:7\rq*   
\s1 Iri lau solo-an badu Isra-el baseken sahou mwasin bwe  
\p
\v 16 Arile, iri lau solo-an badu Isra-el baseken sahou mwasin bwe, oro rayah le. Aisaya amwenen asehek i buku doh,  
\q1 “Laban, are lau handru atehei budon tan in ta sahou tam aso ndrasehek.” \rq Aisaya 53:1\rq*   
\m
\v 17 Eme ma, taha tanan, taha anuhun sahou ta Kindrei, ya sahou tan badeh, tiyani budon tataha handru asahan. Ma sahou asehek doh badeh, sahou ta nyala Krais.   
\p
\v 18 Ya eme jo lelen i buku doh, iri ndranuhun sahou mene deh bwe? Ehe, iri ndranuhun oh! Buk ndrabun tiye,  
\q1 “Sahou badu boho oro ndraseker bolo munyak mari,  
\q1 ma sahou badu boho oro, lau badu len loboho heh, loboho heh ndranuhun kabwe.” \rq Wari 19:4\rq*   
\p
\v 19 Eme ya jo lelen ja, iri Isra-el kede-eh, ndratana iri deh bwe? Ehe, iri ndratanan oh! Ma mwena mene Moses tiye i buku doh,  
\q1 “Jo kameh akohok iri lau laleyah, nyara iri bwe, ma kandriyen tek doh kameh mesekei mada aha alikis iri;  
\q1 Jo kameh akohok iri lau tana iri lakou bwe, ma idoh kameh amekes ndrine aha irih.” \rq Dutoronomi 32:21\rq*   
\p
\v 20 Ano Aisaya mene tiye sahou nyarahan i buku doh,  
\q1 “Iri lau ala basilah jo bwe, iri ame ndratakalahei jo;  
\q1 Ya, iri lau ala balomondra ta akohok tanan ta nyalak bwe, jo kameh leheya jo aleu i mada oro.” \rq Aisaya 65:1\rq*   
\p
\v 21 Arile, Aisaya abudon iri Isra-el ma iy asehek iri badeh, i buku doh,  
\q1 “Udu bolo len mari mari jo indrek iri, ta iri katehei budon tiri handru ki-in tek ma kanuhun sahou tek, arile batu iri boto-on; iri atehei le kona iri eme tek ma banuhun sahou tek bwai.” \rq Aisaya 65:2\rq*   
\c 11  
\s1 Kindrei tikisi iri Isra-el  
\p
\v 1 Ya eme jo lelen anya, sebwe Kindrei baseken iri lau tan bwe nadeh? Bwe, handru en! Jo dah badeh, ndraye Isra-el amwenen, lundriye Abraham badu boho kamen ta Benjamin.  
\v 2 Kindrei badeh, winiyan bakahei iri Isra-el bwe, tasah ndra mwena mwena ndra-au iy tanan ta iri badeh, lau tan amwenen. Aha bala tana aha bwe? Tarou mene torowenei udu bolo buk ndrabun asehek nyala Alaija mene ibolosen ma iy asalom i ta Kindrei ma iy asehek kandriyen tiri Isra-el i buku doh,   
\q1
\v 3 “Laban, iri mene ndradai iri propet tam, ma ndratokosei mada koto-ok tam ta salom ndra-au; eme ma jo le ari erah, ya iri anya kadai jo ale.” \rq 1 Kabin 19:10, 14\rq*   
\m
\v 4 Ya eme Kindrei tiye sasah i tan?  
\q1 “Bwe, jo ndrasolo-ei iri lau ma ndru tuluwi (7,000) iri mene batehei bwili ndru-u iri bala andri ta Ba-al bwe, ndrame tek.” \rq 1 Kabin 19:18\rq*   
\m
\v 5 Ya eme na len dah i le buku aliy, na tikisiy ta Kindrei le, iy solo-ei oro rayah le tawi oro areu.  
\v 6 Iy atehei tikisiy badeh, i kati budon tan, ya buku iy anya kasolo-ei ndramak badeh, iy ba-en hamon ta lahou ndramak amekes doh bwe. Tasah, ki buku none Kindrei kasolo-ei ndramak ki-in hamon le ta lahou iy amekes, idah kameh tikisiy tan ari moson bwe.   
\p
\v 7 Ya, asah i buku doh: Iri Isra-el anya katakaleh san ta Kindrei kaloh iri mwasin mara-ei ta madan, arile iri batakalahei bwe. Arile, iri lau rayah le Kindrei solo-ei iri badeh, iri ndruniy. Ya iri mara-ei badu hawe oro nane doh, Kindrei mesekei ndrine iri abadok ta iri winiyan banuhun sahou tan bwe.  
\v 8 I buku none ndratorowenei mene ndra-au anya,  
\q1 “Kindrei badeh, wahei budon tiri Isra-el,  
\q1 ma mesekei mada iri agwah ta anyolom lakou,  
\q1 hawe ndranye iri ulun ta anuhun kon,  
\q1 eme, eme, taku na len dah.” \rq Dutoronomi 29:4; Aisaya 29:10\rq*   
\p
\v 9 Ma Debit ale tiye anya,  
\q1 “Ya abo, jo aseken nyamon tiri ki buku lakou ta wahei iri; ki buku nyamon udu ta samek hawe udu ta lolohon kawahei iri kala kasukik,  
\q1 ma ki buku bek iri kato-ak ma kataku bwele-en,  
\q1 ya iri lakou doh kasahan tiri ta amekes oda iri kakohok sisi-in ta kandriyen ndra-in tiri.   
\q1
\v 10 Ya abo, jo aseken lakou kawahei mada iri kagwah, ma iri sanyolom kon eh,  
\q1 ma hawe ndruwi kona iri kihun kudu le buku don eh.” \rq Wari 69:22-23\rq*   
\s1 Kindrei akohok iri lau badu leheleh ame hamon  
\p
\v 11 Ya eme jo ndremenya ja anya, na len iri Isra-el ato-ak ma taku mene, iri ndrandra-i mara-ei, deh bwe? Bwe! Arile iri atehei kona iri i ta Kindrei, ma iri amekes karei ma lomondra ndra-in. Eme, ta katin doh, Kindrei eme aseben iri lau badu leheleh. Budon tan badeh, iy aseken iri Isra-el kanyolom kandriyen tan ta tikisiy i tiri lau badu leheleh, ma eme iri Isra-el ame, ya mada iri alikis ta aliy.  
\v 12 Na len iri lau badu Isra-el atehei kona iri i ta Kindrei, Kindrei le aseben iri lau badu kon munyak. Handru, na len iri Isra-el atelei ma bakohok nyosowan ta Kindrei bwe, iy mesekei iri lau badu leheleh akohok nyosowan solo-an labai ja. Ya, ta seleya ta aliy badeh, i buku doh: I buku none iri Isra-el katubuni kandriyen tiri ma kame hamon hawe Kindrei ja, idah kameh, nyosowan solo-an labai mwasin ja winiyan eme la-u lau mari badu leheleh ma badu Isra-el ale.   
\p
\v 13 Ya sasah, sasah kasahan, aha ndratanan ta jo badeh, aposel ta atiye sahou ta ewek taha lau badu leheleh. Kindrei suni jo dah ta amekes lahou tan, ma jo sekesek ma aseken iri lau kanyolom gok jo amekes dah.  
\v 14 Tasah, jo abudon i san doh, kameh winiyan mesekei iri lau badu hawek, iri Isra-el kameh, mada iri alikis ta aliy. Ma idah kameh, winiyan sebenei iri rayah ado mwasin.  
\v 15 Ya kabatana len doh mene Kindrei baseken iri bwe badeh, mesekei iri lau badu kon munyak asahan kawas ta Kindrei. Eme ma, i buku none len ta aliy kasahan, ya Kindrei kaseken iri Isra-el kame hamon ja, idah kameh, ki buku sah bah? Idah kameh, iri sekesek tinan labai, i buku none iri amak ta imek ame loken.   
\p
\v 16 Ya, sahou sokek i buku doh: I buku none ou amekes jabi ramen, ano ou andrei ari ma mwena, ou adeu i ta Kindrei i nyara ndramas badeh, jabi ramen mari ndra tan kabwe. Ma, i buku none kandro kei katehei ki ndramas ki ta Kindrei badeh, ma andran mari kili hawen ale. Idoh leheya buku, bwena mene, Abraham hawe tubu iri Isra-el rayah ndratehei iri ndra ta Kindrei. Eme ya, udu hamon ja, iri lundriye Isra-el kameh ame hawen ale.   
\p
\v 17 Iri lau badu Isra-el badeh, i buku kei olip ateh udu bolo bilin. Kindrei eme tubwani andran rayah ma akahei iu. Ya, aha lau badu leheleh badeh, i buku andra kei olip ateh laleyah udu bolo lokei. Eme aha andra olip saniy badu bolo lokei doh badeh, Kindrei andrei aha ala ya tabahani aha ahas ala bada ndro-o andra olip rayah nane udu bolo bilin. Ma eme gwa edek bolo kandron eme ma nyohonei bakatabadah dah akuk ma andra iri basara bwe, uru asahan ari buruwen.  
\v 18 Eme ya aha andra olip ta bakatabadah, mada aha sandra-i sala toro andra olip udu bilin ibok mene, ndri-iy. Tasah, aha badeh, andran laleyah; aha akohok nyosowan ma boto-on badeh, edek udu ta kandron le. Kandron badeh, balelei aha bwe.  
\v 19 Ya, i buku none ou asehek anya, “Iy ndrasani oro andran kede-eh ndrame andri, tasah iy anya katabahani jo kili bada ndro-on oh.”  
\v 20 Handru, arile ou anuhun! Oro mene abok a andri tasah oro batehei budon handru toro bwe. Arile ou ales boto-on ta lakou ari le, ta budon handru tam. Ma ou sabudon anya ou ndra ari ai, ndri-iy; ou abudon ou, ma ou anoh.  
\v 21 Ou abudon! Kindrei mene sani iri Isra-el rayah ame andri, i buku ndramak sani andra kei olip amwenen. Ya eme ou ale kameh, buku ou ruwani budon tam handru, iy winiyan sani ou ame andri ale.  
\v 22 Ya eme ou none seleya se, Kindrei amekes kandriyen mwasin labai i tiri lau, arile iy ale edeu maha-an i la-u iri ma tiye sahou nyarahan ale. Iy edeu maha-an i la-u iri mene taku, arile iy amekes kandriyen mwasin ewek tam, i buku ou adek amwenen ala le bolo kandriyen mwasin tan. Bwe kameh iy kasani ou ame andri ale.  
\v 23 Ya, i buku none iri Isra-el nane katehei budon tiri handru kihis, iri kameh winiyan alih hamon ja ala bada ndro-o iri. Tasah, Kindrei le kameh winiyan tabadah iri ala hamon ala bada ndro-o iri.  
\v 24 Ya, ou tanam, ou a buku andra kei olip mene ateh laleyah bolo lokei. Ya, Kindrei eme amekes lahou boto-on labai, iy eme sani ou badu lokei, eme ya iy tabadahani ou ndra bada ndro-o olip udu bolo bilin ndrahas kabwe. Ma idoh kameh, mwasin labai ja ta Kindrei kameh winiyan atehei iri lau badu Isra-el kameh ala hawen ala ndrahune iri amwenen.   
\s1 Iri Isra-el mari kameh ado mwasin  
\p
\v 25 Aha nadu tine, jo aseken budon taha kaleu ta sali sahou handru bwena mene aton mara-ei. Ma aha sasore nyara aha anya, Kindrei aseken le aha, ya iri Isra-el bwe, ndri-iy. Sali sahou handru bwena mene aton asah idoh: Iri lau rayah badu Isra-el badeh, bwale iri atehei budon tiri handru in ta Jises Krais. Ya iri kameh tunuhun sahou mwasin tan ili winiya le kane iri lau mari badu leheleh ala Kindrei aloh iri badeh, anuhun sahou mwasin ta nyala Jises Krais ma ame bolo tondrok tan.  
\v 26 Ma i san doh kameh, buku kane iri lau badu leheleh winiyan eh, Kindrei kameh akohok iri Isra-el mari ame hamon, ma iri kameh ado mwasin i buku none ndratorowenei mene ndra-au,  
\q1 “Ndramak ta seben kameh asahan udu Sayon eme.\f + \fr 11:26 \ft Sayon badeh, nyaran ari ja ta kon tinan Jerusalem.\f*  
\q1 Iy kameh tikahei kandriyen ta tunuhun sahou tan au a len ta lundriye Jekob oro.   
\q1
\v 27 Ma idah, sahou randra le tek jo amekes hawe iri,  
\q1 Ma jo kameh sikine kandriyen ndra-in tiri mara-ei iu.” \rq Aisaya 59:20-21; 27:9; Jeremaya 31:33-34\rq*   
\p
\v 28 Arile, iy anyolom iri Isra-el badeh, ndratubuni kona iri ndra ta sahou mwasin, ya eme mesekei iri are len labai ta Kindrei; ma eme sihi madasan ta Kindrei amekes mwasin i taha lau badu leheleh. Arile, in hamon ta tandrakan tan bwena mene iy amekes hawe tubu iri Isra-el badeh, iy aseken iri kahis le.  
\v 29 Tasah, Kindrei winiyan bapwai tandrakan tan mene iy amekes i tiri lau tan iy aloh iri ma atehei nyosowan i la-u iri, bwe.  
\v 30 I le buku none aha lau badu leheleh  
\m mene tebelese boho Kindrei; na dah Kindrei tikisi aha. Tasah, na tebelese tiri Isra-el le mesekei aha asahan i buku badeh.  
\v 31 Ya i le buku aliy, i san ta Kindrei tikisi aha le badeh, tubuni iri lau badu Isra-el mene tebelese boho Kindrei, na dah kameh akohok tikisiy tan ale.  
\v 32 Ma eme ta sendrehendreh ta sahou, jo asehek i buku doh: Kindrei mene alelei lau mari tebelese badeh, ta katin doh: Ta iy kaleheya tikisiy tan keme lewen la-u lau mari.   
\s1 Masiye ki ta Kindrei  
\q1
\v 33 Handru labai, Kindrei amekes mwasin solo-an labai eme tataha mari.  
\q1 Lomondra tan ta aleben ndra amwenen le,  
\q2 Ma tanan tan badeh, ili labai.  
\q1 Taha winiyan batakalahei kati budon tan ta aleben bwe,  
\q2 Ma taha winiyan bala tanan tekedek tan bwe.   
\q1
\v 34 “Are lau handru, iy ndratanan iri budon marakon ta Laban?  
\q2 Ma, are lau winiyan batanau iy ta sasah?” \rq Aisaya 40:13\rq*   
\q1
\v 35 “Are lau ndradeu lakou ndra ta Kindrei,  
\q2 ya eme iy kedeu bundruwen ki hamon?” \rq Jop 41:11\rq*   
\q1
\v 36 Taha mara-ei winiyan bwe!  
\q1 Tasah, lakou mari asahan badeh, iy le amekes;  
\q1 Iy asehek na le bohon badeh, lakou asahan i le buku aliy;  
\q2 Ma iy amekes iri lakou mara-ei badeh, tan le ari.  
\q1 Ya ta katin le doh badeh, taha lau mari katudun iy kudu le buku doh.  
\q2 Handru!   
\ms1 Pol asehek ta kandriyen iri mwan ma badih atehei budon tiri handru in ta Krais badeh, iri kamekes  
\mr (Kalan 12:1–15:13)  
\c 12  
\s1 Manyah mwasin hawe Kindrei  
\p
\v 1 Ya eme aha nadu tine i san ta tikisiy tinan ta Kindrei, jo indrek aha katehei bada aha mari ki ndrabun, ki buku salom handru ki ta Kindrei kasekesek ta aliy. Idoh badeh, atudun handru ai.  
\v 2 Ma aha sa-en hamon ja ta tekedek ndra-in tiri lau badu munyak dah amekes, ndri-iy. Arile aha kasokosowei budon ndra-in ki-iu na budon mwasin ta Kindrei. I buku none aha a-en hamon ta aliy, idah kameh, aha takalahei seken ta sasah Kindrei anya aha kamekes. Ma iy kameh sekesek, tasah, sasah iy tiye aha ta amekes badeh, ndra amwenen le.   
\p
\v 3 Tasah, Kindrei amekes mwasin eme tek, ma iy atehei kalem eme tek ta jo kamekes lahou tan, ya eme jo asehek nyala aha mari i buku doh: Aha satehei budon taha anya aha ndra ari ai, ndri-iy. Arile, aha kamekes budon taha kudu mwasin ta lomondra ki-in hamon ta boto-on ta budon handru ma ta ndramas Kindrei atehei ndrawek taha.  
\v 4 Taha ndratanan, bada taha ari ari badeh, ari buruwen, arile andran badeh, solo-an. Ya andran ari ari badeh, iy ari amekes lahou randrah labai ta ari ari.  
\v 5 Ya eme taha badeh, i le buku aliy. Taha badeh, solo-an, arile taha asahan ari buruwen ahas hawe le Krais. Ma taha ari ari badeh, kaseben iri rayah ja.   
\p
\v 6 Na tikisiy ta Kindrei, taha ari ari ndrakohok ndramas mwasin i le winiya taha, ta amekes lahou tan. I buku none ari ndramak tan lahou mwasin ta akohok sahou propet badu boho Kindrei badeh, iy kamekes ki-in hamon ta boto-on ta budon handru tan le.  
\v 7 Ya, i buku none iy tan ta anyo-ou iri lau ta Kindrei badeh, iy kanyo-ou oro kudu mwasin; ya, i buku none iy tan tanan ta leheya bolo budon ta sahou ta Kindrei badeh, iy kaleheya iri lau kudu mwasin.  
\v 8 Ya, i buku none iy tan ta amekes budon tiri lau kabadok badeh, iy kamekes iri kabadok kudu mwasin. Ya, i buku none iy tan ta anyohan iri na lakou badeh,  
\m iy kanyohan na ndrinen handru ma solo-an. Ya, i buku none iy tan ta atondrok badeh, iy katondrok kudu mwasin labai. Ya, i buku none ndramas tan ta tikisiy ma aseben iri lau maha-an udu tiri badeh, iy kaseben iri ma sekesek.   
\s1 Kandriyen ta tikisiy  
\p
\v 9 Ou badeh, leheya kandriyen ta tikisiy ki handru. Ou ruwani kandriyen ndra-in ta balik; ya ou tawi kandriyen mwasin kihis.  
\v 10 Ou aseken nadu tinem ari ari badu hawem handru. Ou sabudon ou le, arile ou anuhun sahou ta nadu tinem ari ari.  
\v 11 Ou saliliy ma ou sawoyah ta amekes lahou ta Laban. Arile ou alelei Malawin Ndrabun aseben ou amekes lahou le kili.  
\v 12 Na len ou anyolom bohon i bwena ta lakou Jises kameh edeu tam badeh, ou sekesek. Buku none maha ma isi katok tam, ou sanunu-uh ma ou ado le. Ma, na len mari, ou amekes salom ma ou ado le ta salom; ou sabudon anya Kindrei kameh winiyan bamesekei bwe, ndri-iy.  
\v 13 Ou anyohan lakou ki toro lau ta Kindrei, i buku none oro andriliu ta lakou. Ma ou asumon iri lau badu heh, badu heh kawek asiu.   
\p
\v 14 Are lau oro amekes maha-an ma isi i tam badeh, ou asolom ki ta Kindrei kanysowani oro le, ma iy sabokoro-ei oro.  
\v 15 Are lau oro sekesek badeh, ou ala hawe oro, ado mari kasekesek; ya are lau oro taya ma tikisiy badeh, ou ala hawe oro taya ma tikisiy hawe oro.  
\v 16 Ou manyah ado le, nono-ou ndri-iy hawe iri ari ari. Ou satudun ou, ndri-iy, arile ou amekes ou badeh, ala nah nadu bwisik ala hawe iri lau nyara iri bwe. Ya ou samekes ou anya ou tanan labai, ndri-iy.   
\p
\v 17 I buku none ari ndramak kamekes ndra-in kewek tam, ou satehei ndra-in sala bada ndra-in, ndri-iy. Ma ou badeh, madam kaleu ki doh, ki doh, ma ou amekes lahou badeh, kamekes ndrine lau mari kasekesek.  
\v 18 Ou samekes losen sala ta ari ndramak, ndri-iy; arile i buku winiyan eh, ou manyah amunum le ado hawe iri.  
\v 19 Aha kawas tek, aha samekes losen sala tiri, ndri-iy, arile aha katehei ki kani Kindrei kamekes, tasah sahou mene ndratorowenei tiye i buku doh:  
\q1 “Jo kameh atehei maha-an ili tiri, ma jo konohei saba kandriyen nane iri amekes.” \rq Dutoronomi 32:35\rq*   
\m
\v 20 Idoh handru, ya mwasin labai ta ou amekes i buku doh,  
\q1 “I buku none ndramak ta amekes bahun i tam kimeson badeh, ou anyohan iy na nyamon;  
\q1 Ma i buku none iy anyar ta gwa badeh, ou adeu gwa ki wa-in.  
\q1 I buku none ou amekes kandriyen mwasin doh i tan,  
\q1 ou kameh winiyan amekes bwilin ama ma tubuni kandriyen tan ndra-in doh iu.” \rq Tanan 25:21-22\rq*   
\m
\v 21 Ou samukuni kandriyen ndra-in sasakalawi ou, ndri-iy; arile ou tihisi kandriyen ndra-in na kandriyen mwasin.   
\c 13  
\s1 Ou anuhun sahou tiri lau ta atondrok kon  
\p
\v 1 Ou anuhun sahou tiri lau ta atondrok kon.\f + \fr 13:1 \ft O, gabman.\f* Tasah, Kindrei badeh, edeu boto-on i tiri ta atondrok. Iri lau ta atondrok doh badeh, Kindrei le edeu.  
\v 2 Ya eme, are lau oro tebelese o amekes bahun i tiri lau ta atondrok, oro tebelese boto-on ale Kindrei amwenen ndratehei. Ya oro kameh bwese maha-an ma isi i la-u oro ta aliy.  
\v 3 Tasah, iri lau ta atondrok badeh, lahou tiri ta nohowa lau amekes kandriyen mwasin bwe; arile toro lau heh amekes kandriyen ndra-in labai. I buku none ou anya, ou sanoh tiri lau ta atondrok badeh, ou amekes kandriyen mwasin, ya idah kameh, iy masiye ou.  
\v 4 Iri lau ta atondrok doh, Kindrei le edeu iri ta anyolom tekedek tam kudu mwasin. Arile, i buku none ou amekes kandriyen ndra-in bamwenen ta madan bwe, ou anoh iy. Tasah, iri badeh, i nyara Kindrei kameh ateu samen ma winiyan adeu maha-an hawe isi ewek tam.  
\v 5 Ya eme ta katin doh, aha kanuhun boho iri lau ta atondrok aha. Idoh badeh, anya ta aha kabelek maha-an hawe isi le bwe. Idoh in hamon ta budon mwasin tiye ou amekes kandriyen mwasin.   
\p
\v 6 Ta katin don adeh, aha ala akeh luk ta takis i tiri lau ta atondrok kon adeh. Tasah, iri badeh, lohowan ta Kindrei; iri amekes lahou ta atondrok na len mari.  
\v 7 Aha katehei lakou saluwe lakou iri lau mari mene aha ndrandrei, kili hamon ja: Ya, i buku none aha bakeh luk ta takis ta sasah aha akohok eme bolo kon bwe badeh, aha kakeh kili; ya, i buku none aha mene banoh bwe, aha kanoh iri lau ta atondrok kon; ma i buku none aha bamasiye iri mene bwe badeh, aha kamasiye iri.   
\s1 Kandriyen ta aseken in hamon tiri batanau ta Kindrei  
\p
\v 8 I buku none aha mene ndrandrei ari lakou ta ari ndramak ta aseben aha, ya aha batehei saluwen bala hamon bwe le, badeh, aha katehei kili hamon. Arile, kandriyen ta aseken ndramak ari ja badeh, aha winiyan babwidiy bano bwe. Tasah, kandriyen ta aseken ndramak ari ja badeh, lakou maha-an labai ta aha winiyan batehei mara-ei bala hamon bwe. Ya, iy are lau aseken ndramak badu heh, badu heh badeh, iy in hamon handru ta batanau malen mari.  
\v 9 Tasah, taha tanan, batanau malen mene ndratorowenei tiye i buku doh,  
\q1 “Ou sateu badih udu mwan, ya ou sadai ndramak samak, ya ou sabahana, ya madam salikis lakou ta ndramak ari ja.” \rq Eksodus 20:13-15, 17; Dutoronomi 5:17-19, 21\rq*  
\m Ma saba batanau malen ja badu hawe oro doh badeh, sukik le bada batanau ari le doh:  
\q1 “Ou aseken iri lau ari ari badu hawem, i le buku ou aso-ok ou le.” \rq Lebitikus 19:18\rq*   
\m
\v 10 Ya eme are lau aseken lau badu mirihik tan badeh, iy winiyan bamekes budon ndra-in bala tiri bwe. Eme ya sendrehendreh ta aliy i buku doh: Kandriyen ta aseken ndramak ari ari badeh, mesekei ou an hamon ta batanau malen mari.   
\s1 Taha katondrok tekedek tataha kudu mwasin  
\p
\v 11 Ma eme aha kamekes kandriyen doh, tasah aha ndratanan ta taha na dah manyah ado bolo len ta aliy ai. Mada an ndrasahan ta aha samadin, tasah ndramak ta aseben taha, ale taha mene atehei budon tataha handru in tan badeh, len tan ndrame bakep, bala buku none kabatana na len mene taha tubuni ndrine taha, bwe.  
\v 12 Mirihik kon kaleu ai, ma len kataku ai. Ya eme taha karuwaniy ta amekes kandriyen ndra-in badu lulik, ya taha kasini awin ta bahun ma len.  
\v 13 Ma eme taha katondrok tekedek tataha kudu mwasin i buku none lau manyah ado bolo an na len; sala buku none taha ka-un gwa boto-on ma bwidi batu taha asahan lolo-ou, ya taha asehek sahou laleyah, ma amekes karei ma madasarah, ma samekes bahun hawe samekes madalakis sala ta ndramak ari ari, ndri-iy.  
\v 14 Arile, aha katehei kandriyen ta Laban Jises Krais ki buku none awin taha, ma aha karuwani budon ta karei ma lomondra ndra-in badu bolo oda aha.   
\c 14  
\s1 Ou sasehek nadu tinem ari ja  
\p
\v 1 Aha kaseken are lau budon tan handru babadok bwe, kewek hawe aha. Ma aha sandres budon tan.  
\v 2 Ndramak ari badeh, budon tan abadok, ma eme winiyan mesekei iy aimon nyamon mari. Arile, ndramak ari ja badeh, budon tan babadok bwe ma eme, mesekei iy aimon le nyamon badu bilin.  
\v 3 Ya eme iy ndramak ta kaniya nyamon mari, madan sandra-i sala ta ndramak nane aimon nyamon badu bilin le, ndri-iy; ma iy aimon nyamon badu bilin le ale satiye sahou nyarahan sala ta ndramak ta kaniya nyamon mari, ndri-iy. Tasah, Kindrei badeh, baseken iy ari le bwe, iy aseken uru ma la-uh.  
\v 4 Ou are ndramak handru ya ou anya asehek ki ta lohowan ta ndramak ari ja? I buku none iy lohowan doh abadok ta ales, o bwe, iy taku ta lahou tan, idoh lahou ta Laban tan le barasehek hawe baraleben iy. Arile, iy kameh abadok ta ales, tasah Laban kameh aseben iy.   
\p
\v 5 Ya jo kasehek sahou ari ja doh: Lau rayah abudon hawe aleben anya, “Len rayah badeh, ndrabun ta len rayah;” ya iri rayah abudon anya, “Bwe, len mari i le randra le, ari bala randrah bwe, ya ari bala randrah bwe.” Arile, bwe, uru ma lubuk badeh, budon turu sala la-uh ta nyala kandriyen ta atehei ndrabun ta len rayah.  
\v 6 Are lau oro abudon ma aleben anya, “Len rayah badeh, ndrabun ta len rayah” badeh, oro amekes ta atudun Laban; ya are oro ta kaniya nyamon mari badeh, oro amekes ta atudun Laban ale, tasah iy edeu wurah i ta Kindrei ta nyamon nane doh. Ma hawe are lau oro beleben ta baimon nyamon rayah bwe badeh, amekes ta atudun Laban hawe adeu wurah i ta Kindrei i le buku oro ale.  
\v 7 Tasah, taha ari ari manyah are kada-ah na budon tataha le bwe, ma taha bamak laleyah na seken tataha bwe le.  
\v 8 Ya eme, i buku none iy anya taha amak, taha amak na seken ta Laban le; ya i buku none iy anya taha ado, taha ado na seken tan le. Ya eme, buku none taha ado deh, taha amak, taha mari badeh, badu hawe Laban le.   
\p
\v 9 Ya eme ta katin le doh, Krais mene imek, ano iy amak ja, ta iy kasahan Laban ma katondrok lau ndramak ndrasu-u hawe lau bamak bwe.  
\v 10 Eme ya aha anya katiye sahou nyarahan ki ta nadu tine aha rayah ja, anya ki sah? Ma mada aha anya kandra-i ta nadu tine aha rayah ja ki sah? Tasah, taha ndramak ndrasu-u, deh, taha bamak bwe, taha mari kameh ales are mada Kindrei ta sahou.  
\v 11 I buku none sahou mene ndratorowenei:  
\q1 “Laban tiye anya, ‘Jo ma mulin kahis le;  
\q1 Idah kameh, lau mari aluh a andri ma atehei bwili ndru-u iri i andri are madak,  
\q1 Ma iri mari kameh tiye eme lewen anya, ehe, jo Kindrei handru.’” \rq Aisaya 45:23\rq*   
\p
\v 12 Ya eme ta sendrehendreh ta aliy i buku doh: Idah kameh, taha ari ari kameh asehek sasah taha  
\m amekes ndra-in o mwasin i ta Kindrei.   
\s1 Taha samekes ari lakou ta amekes nadu tine taha ari ja ato-ak ta aliy  
\p
\v 13 Eme ya, ou sasehek ndramak ari ari anya iy badeh, ba-en hamon ta batanau malen bwe, ndri-iy. Arile ou amekes budon tam ki buku doh: Jo badeh, samekes ari lakou ta amekes nadu tine ari ja ato-ak ta aliy, ma jo samekes ari sahou ta sokoso-ou budon tan, ndri-iy.  
\v 14 Eme ya, jo katiye kamwenen; jo dah badu hawe Laban Jises. Ya jo ndratanan handru en, ta nyamon mari kede-eh ndra mwasin le, ya ari ndra-in aliy bwe. Arile, i buku none ari ndramak anya iy beleben badeh, mwasin, lakou ta budon tan ai, ma mesekei iy baimon nyamon bwe.  
\v 15 Arile, i buku none ou aimon nyamon nane nadu tinem ari ja beleben, ya mesekei budon tan andra-i badeh, ou bamekes mwasin bala tan bwai, ma kandriyen tam leheya ta ou baseken iy handru bwe. Eme ma, nyamon ou aimon badeh, samesekei budon ta nadu tinem sandra-i. Tasah, ndramak doh, Krais mene imek ta aseben iy!  
\v 16 Ya, buku ou abudon anya, “Lakou doh mwasin, jo winiyan ta amekes ai,” arile ou abudon amwenen op! Kora-on lakou ou amekes doh kasahan ndra-in udu bolo budon ta ndramak ari ja.  
\v 17 Tasah, tondrok ta Kindrei badeh, bala buku none kandriyen ta aimon nyamon ma a-un gwa mari, ma hawe bala buku none kandriyen ta beleben, bwe. Arile, lakou laba tinan ta tondrok ta Kindrei badeh, ndra kandriyen mwasin le, ma kandriyen ta mondrei le, ma hawe kandriyen ta sekesek le i san ta Malawin Ndrabun.  
\v 18 Ma eme, buku are lau amekes lahou mwasin ta Krais i buku doh kameh Kindrei sekesek tan handru. Ma hawe iri lau kameh asehek anya, “Iy ndramak kede-eh badeh, manyah mwasin handru en.”   
\p
\v 19 Ya eme ta sendrehendreh ta lakou ndrasehek ndra-au i buku doh: Taha kabadok ta amekes budon ta asan mondrei kudu ndrokowa iri lau ari ari, ma taha kamekes sasah le winiyan sebenei iri abadok ta budon mwasin.  
\v 20 Aha sasemete-ei lahou ta Kindrei na andres ta nyamon, ndri-iy. Handru, nyamon mari badeh, ndra mwasin le ta aimon. Arile, ndra-in badeh, i buku ou aimon nyamon ari, ma kandriyen tam doh amekes ndramak ari ja ato-ak ma taku.  
\v 21 Mwasin handru ta aha sa-un waen hawe aimon oda lakou ma hawe sasah, sasah ja, kora-on kabini nadu tinem ari ja kataku.   
\p
\v 22 Ya eme, sasah ou atehei budon tam abadok i ta aliy anya mwasin badeh, lakou ta ndrokowa ah Kindrei le. Eme ya, buku ndramak amekes ari lakou, ma ndrinen ma budon tan basehek anya lakou doh, ndra-in, bwe, iy kasekesek.\f + \fr 14:22 \ft Boho iri Grik badeh, baleu bamwenen bala tiri lau badu loboho doh, bwe.\f*  
\v 23 Arile, are ndramak androndro ta aimon nyamon badeh, iy bala tanan Kindrei sekesek ta aliy deh, bwe. Ya, buku iy ili le aimon nyamon doh, budon tan badeh, tiye iy ndramesekei kandriyen ndra-in. Tasah, budon tan handru badeh, bahas ta nyamon nane iy aimon bwe. Ya eme i buku doh: Sasah, sasah ou amekes ya batehei budon tam handru ba-en ta aliy bwe, badeh, ou ndrandra-i kabwe.   
\c 15  
\s1 Taha ka-en hamon ta budon ma kandriyen ta Krais  
\p
\v 1 Taha are lau le budon tataha ndrabadok handru, kala kaseben oro are lau babadok bwe le ma kabwese maha-an toro. Ya taha sabudon le taha, ndri-iy.  
\v 2 Eme ya jo aseken taha ari ari kamekes kandriyen mwasin ta seben ki ta nadu tine taha oro ari ari badu mirihik tataha, ta sasah le winiyan sebenei iy abadok ta budon mwasin.  
\v 3 Tasah, Krais mene amekes lahou, ta aseben iy le bwe. Iy amekes i buku none tarou mene ndratorowenei asehek,  
\q1 “Are lau oro amekes losen i la-um, jo tanan idoh badeh, ndrame la-uk ale.” \rq Wari 69:9\rq*   
\m
\v 4 Tasah, sahou mene ndratorowenei ndra-au ndra-au udu bolo tarou ta Kindrei badeh, ta leheya taha kado le, ma ta amekes taha kabadok ta abe-en lakou mwasin udu bwena tataha eme.   
\p
\v 5 Eme ya, jo aseken Kindrei, ndramak ta edeu boto-on ma ta amekes aha abadok, kaseben ndrine aha kudu mwasin ma kare le se, ta bolo tekedek taha a-en hamon ta Krais Jises,  
\v 6 ma eme ndrine aha ma boho aha mari badeh, ki le ari katudun Kindrei tama Laban tataha Jises Krais.   
\s1 Sahou mwasin i tiri lau badu leheleh  
\p
\v 7 Eme ya aha kaseken nadu tine aha oro ari ari, i buku none Krais mene aseken aha; ma idah kameh winiyan mesekei iri lau atudun Kindrei.  
\v 8 Ya eme jo kasehek taha ta Krais mene eme asahan lohowan tiri Juwis. Iy amekes lahou doh ta leheya Kindrei badeh, tiye sahou handru ta tandrakan tan mene iy amekes i ta tubu iri mene ndra-au.  
\v 9 Ya eme, iri lau badu leheleh winiyan atudun Kindrei in hamon ta tikisiy tan i buku none sahou mene ndratorowenei:  
\q1 “Ya eme ta katin doh le, jo kameh udu ndrokowa iri lau badu leheleh atudun nyaram.  
\q1 Ma jo kameh iyah wari ta atudun nyaram.” \rq 2 Samuwel 22:50; Wari 18:49\rq*   
\p
\v 10 Ano ja asehek i buku doh:  
\q1 “Ya aha lau badu leheleh badeh, ka le se hawe iri lau ta Kindrei, ya aha kasekesek.” \rq Dutoronomi 32:43\rq*   
\p
\v 11 Ma buk ndrabun tiye ale i buku doh,  
\q1 “Aha lau mari badu leheleh katudun Laban,  
\q1 Ma hawe aha lau mari kayah wari ta atudun iy.” \rq Wari 117:1\rq*   
\p
\v 12 Ma propet Aisaya ale asehek anya,  
\q1 “Idah kameh, lundriye Jesi ari kameh barasahan,  
\q1 Iy kameh asahan ta atondrok iri lau badu munyak tinan mara-ei,  
\q1 Ma iri lau badu leheleh kameh atehei budon tiri in tan ma atondrok iy ta sasah mwasin kameh iy edeu i tiri.” \rq Aisaya 11:10\rq*   
\p
\v 13 Ya jo aseken Kindrei, ndramak ta edeu lakou mwasin, kamesekei bolo oda aha kidih na sekesek, ma hawe oda aha kudu mwasin ki-in hamon ta budon taha handru in tan. Ya eme ma budon taha kameh abadok ta anyolom bohon i bwena ta lakou mwasin na boto-on ta Malawin Ndrabun.   
\ms1 Pol asehek nyala gok tan amwenen, ma iy edeu bada-an tan mwasin ili tiri lau badu Rom  
\mr (Kalan 15:14–16:27)  
\s1 Pol sekesek ta lahou iy amekes ta atiye sahou i tiri lau badu leheleh  
\p
\v 14 Aha nadu tine, budon tek ndrabadok ta aha amwenen badeh, ndradah handru na kandriyen mwasin. Ma aha ndradah na tanan aha mene ndrakuhiy, ma eme winiyan sebenei aha ta leheya ma hawe batanau aha ari ari.  
\v 15 Jo nane atorou sahou rayah boto-on labai ewek taha ta tiye nyala aha ta budon taha samaniy. Tasah, na tikisiy ta Kindrei le badeh,  
\v 16 iy atehei lahou dah eme kanik ta atiye sahou ta nyala Krais Jises ki tiri lau badu leheleh. Jo badeh, i buku none ari pris amekes lahou ta atiye sahou mwasin ta Kindrei. Ya eme iri lau badu leheleh badeh, i nyara salom jo edeu i mada Kindrei ma eme iy sekesek ta aliy. Ma hawe Kindrei badeh, mesekei iri asahan lau tan handru i san ta iy suni Malawin Ndrabun ili manyah udu bolo oro.   
\p
\v 17 Ya eme in bwele-e sahou nane ndrasehek ndra-au, jo winiyan sekesek ta aliy. Tasah jo badeh, ndrahis ndrase hawe Krais Jises, ya aru amekes lahou ta Kindrei.  
\v 18 Ma eme jo winiyan basehek ta nyala sasah ja bwai; arile jo le kameh asehek ta nyala sasah Krais atehei eme kanik ta amekes iri lau badu leheleh kanuhun boho Kindrei i san ta sahou mwasin ma tanan handru, jo asehek.  
\v 19 Handru, Malawin Ndrabun aseben jo ta asehek sahou, ma iy edeu boto-on eme tek ta amekes kalem ma lahou tinan. Iri lau anyolom ma iri atehei budon tiri handru in ta Krais. Ya eme jo mene edek udu ndra Jerusalem o-on eme eme taku Ilirikum ta atiye sahou mwasin handru ta nyala Krais.  
\v 20 Jo bwalek ta atiye sahou mwasin ta nyala Krais ili kon ala lau ndra aliy bwena, kora-on jo ja katah asiu ki bwele-e ndru ta ndramak ari ja. Arile, udu bolo odak mari, jo aseken handru ta atiye sahou mwasin ta nyala Krais kili kon ha-un lau batiyaniy bala aliy bwe le.  
\v 21 I buku none sahou mene ndratorowenei tiye i buku doh:  
\q1 “Are lau oro banuhun kundruh nyalan bwena bwe,  
\q1 Idah kameh oro anyolom iy,  
\q1 Ma are lau oro mene banuhun sahou ta nyalan bwe le,  
\q1 Na len dah kameh oro atanan ta aliy.” \rq Aisaya 52:15\rq*   
\p
\v 22 Ya eme ta katin le doh, lahou tek solo-an jo mene amekes, sokei jo bawek hawe aha bwe.   
\s1 Budon ta Pol anya kili Rom  
\p
\v 23 Arile, na dah lahou tek ta amekes udu loboho kon dah badeh, ndrano. Jaha solo-an labai ndra-au jo aseken handru ta ewek atou aha, arile jo mene winiyan bwe.  
\v 24 Arile, jo amekes budon ta ewek atou aha udu bolo tekedek tek ili Spen. Jo kameh ewek udu hawe aha, taha sekesek luluwen sese, ano ma jo aseken aha kaseben jo ta rayah lakou ta ili Spen.  
\v 25 Arile, na dah jo winiyan bawek bwai; jo kameh ili Jerusalem atiye lakou ta aseben iri lau ta Kindrei badu doh.  
\v 26 Tasah, iri lau ta budon handru i ta Kindrei badu kon Masadoniya hawe badu kon Akaya badeh, sekesek handru ta atukum lakou ta aseben oro lau ta Kindrei ado Jerusalem, oro badeh, andriliu ta lakou.  
\v 27 Eme iri sekesek handru ta atukum lakou i saluwe sasah mene oro amekes i tiri. Budon i buku doh: Oro lau ta budon handru badu Juwis mene aseben iri lau ta budon handru badu leheleh ta sahou ta Kindrei ta nyala Krais. Ya eme iri lau ta budon handru badu leheleh kadeu saluwen ki hamon ki toro lau ta budon handru badu Juwis na lakou ta aseben bolo manyah toro.  
\v 28 Ya eme udu hamon ta jo edeu lakou ta aseben ili toro ano kameh, udu bolo tekedek tek ili kon Spen jo barawek baranyolom aha ai.  
\v 29 Jo tanan na len jo ewek hawe aha kameh jo badek laleyah bwe. Jo kameh ewek atiye sahou ma amekes aha adah ma sekesek na nyosowan handru ta Krais.   
\p
\v 30 Ya eme aha nadu tine, jo indrek aha i san ta Laban Jises Krais, ma hawe i san ta tikisiy ta Malawin Ndrabun, ta aha kahas hawek, ma kales boto-on ma aha kateu salom keme tek ki ta Kindrei.  
\v 31 Aha kaseben jo ta salom ya jo sataku sala mine iri lau ta tebelese ado Judiya. Ya eme ma lahou tek jo amekes udu Jerusalem kamekes bolo iri lau ta Kindrei doh kasekesek ta lakou jo edeu i tiri.  
\v 32 Ya jo kameh ewek atou aha ma sekesek, ma, i buku Kindrei aseken ta aliy, idah kameh, jo ewek hawe aha ya taha mari sekesek ma amunyau.  
\v 33 Ya kabwai. Mondrei ta Kindrei kudu ndrokowa aha. Handru!   
\c 16  
\s1 Sahou sekesek ta Pol  
\p
\v 1 Jo anya kasehek tanan ki taha ta nadu tine taha ari badih nyaran Pibi, i buku none iy kasahan bada aha. Iy badeh, lohowan ari mwasin ta Krais Jises udu bolo iri lau ta Kindrei badu kon tinan Senkriya.  
\v 2 I buku none iy kasahan hawe aha, jo aseken aha kasumon iy hawe kakuhi iy kewek hawe aha, ki san ta Laban i buku lau ta Kindrei ala amekes kede-eh. Ya sasah iy aseken ta aliy, aha kaseben iy. Tasah iy mene ndraseben iri lau solo-an solo-an ndra-au ma hawe jo ale.   
\qm1
\v 3 Jo anya katiye sahou ta sekesek tek doh ki ta Prisila uru udun Akwila. Uru badeh, ta badu hawek ta amekes lahou ta Krais Jises.  
\v 4 Uru banoh bwe, uru aseben jo na len iri lau anya kadai jo. Jo le ari le badeu wurah bala turu le bwe, ahi mari. Iri lau ta Kindrei badu leheleh eneh ma jo eh.   
\qm1
\v 5 Ma sekesek tek ale kili toro lau ta Kindrei atukum are asiu turu badeh.   
\qm1 Ma hawe sekesek tek ki ta borobwar tek handru Epenetus. Iy asahan lohowan ta Kindrei, ma mwena handru tiri lau mari badu kon loboho Esiya.  
\qm1
\v 6 Sekesek tek ja ki ta Mariya. Iy mene amekes lahou boto-on boto-on ma amekes lakou solo-an labai ta aseben aha.   
\qm1
\v 7 Ya sekesek tek doh ki ta Andronikus hawe Juniyas. Uru badeh, ndraye ahi rabuk ta amekes lahou hawek ya uru hawe jo mene aso ado bolo kou. Ya uru ma la-uh badeh, lahou turu ili labai udu bolo ndrokowa oro aposel ta Jises. Ma uru atehei budon turu handru i ta Krais bwena tek.   
\qm1
\v 8 Ya sekesek tek doh ki ta kawas tek Ampiliyatus. Jo aseken iy labai i san ta Laban.   
\qm1
\v 9 Ma sekesek tek ale ki ta Urbanus. Iy mene eme hawek ya aru amekes lahou ta Krais. Ma hawe sekesek tek ki ta kawas tek handru ale Stakis.   
\qm1
\v 10 Sekesek tek doh ki ta Apelis. Nyaran badeh, mwasin, tasah iri lau ndranyolom iy ateu lahou ta Krais udu mwasin.   
\qm1 Ma hawe sekesek tek ki toro lowa Aristobolus ala budon toro handru i ta Krais are asiu tan badeh.  
\qm1
\v 11 Ya sekesek tek ja ki ta Herodiyon. Iy badeh, badu Juwis ale, ta amekes lahou hawek.   
\qm1 Ma hawe sekesek tek ale ki toro lau ta Laban ado hawe Narsisus badeh.  
\qm1
\v 12 Sekesek tek ki turu badih doh, Traipena hawe Traiposa. Uru badih doh amekes lahou mwasin handru ma amekes lahou boto-on boto-on ta Laban.   
\qm1 Ma hawe sahou sekesek tek ki ta borobwar tek Persis. Iy badeh, badih ari ja amekes lahou solo-an solo-an ta Laban.  
\qm1
\v 13 Sekesek tek ki ta Rupus. Iy badeh, mwasin handru ta mada Laban ta amekes lahou tan, ma hawe sekesek tek ale ki ta tinen. Tinen badeh, atondrok jo i buku none nadun handru badu ndrinen amwenen.   
\qm1
\v 14 Sekesek tek ki toro lau doh: Ki ta Asikritus, ki ta Pilegon, ki ta Hermes, ki ta Patrobas hawe Hermas. Ma hawe sekesek tek ale ki toro lau ta Kindrei atukum are hawe oro badeh.   
\qm1
\v 15 Ya sekesek ki toro lau doh: Ki ta Pilologus hawe udun Juliya, ki ta Nereyus hawe nadu tinen badeh, ki ta Olimpas ma hawe ki tiri lau mari ta Kindrei atukum are hawe oro ale.   
\qm1
\v 16 Na len aha atukum, aha kadeu lim ma kasekesek aha ari ari.   
\qm1 Ya oro lau ta budon toro handru tiye sahou sekesek ewek taha are badeh.  
\p
\v 17 Ya eme aha nadu tine, jo tiye sahou batanau doh ewek taha i buku doh: Aha badeh, mada aha kaleu tiri lau ta orou bolo lau andra-i ma ano lau aseker. Iri lau doh ta leheya tanan ta wasai bamwenen ta leheya mene aha ndrakohok bwe. Iri kameh aluwi aha rayah kameh ame len ta leheya handru mene. Aha kateleya oro;  
\v 18 tasah oro lau i buku doh, baleheya tanan handru ta lahou ta Laban bwe. Oro leheya tanan randrah labai ta abulum le ndrine oro. Oro asehek sahou nyaman nyaman ta asan bale aha, ma hawe amekes sahou mwasin mwasin ta atamar aha; ma oro bolowani budon tiri lau tana iri lakou mwasin o ndra-in bwe, ka-en hamon toro.  
\v 19 Iri lau mari ndranuhun nyara aha. Aha badeh, lau ta anuhun sahou. Ya eme mesekei jo idih handru na sekesek ta kandriyen taha. Arile aha kanuhun, jo aseken aha kabudon kamwenen ta kandriyen mwasin aha ka-en hamon ta aliy. Ya kandriyen ndra-in badeh, aha sala aliy. Aha ma mwasin kado.   
\p
\v 20 Kindrei badeh, ndramak ta isan mondrei ndrokowa aha ma amekes manyah taha kudu mwasin. Ma, na nawin bwe kameh iy atisih tama balik Satan abwesek udu bolo kati aha.  
\p Ya eme jo aseken tikisiy ta Laban tataha Jises kudu hawe aha.   
\p
\v 21 Ma eme Timoti, ndramak ta amekes lahou hawek ale tiye sahou sekesek tan ewek taha; ma hawe Lusiyus, hawe Jesen, hawe Sosipater ale. Oro lau ma taloh doh badeh, oro Juwis i le buku jo.   
\p
\v 22 Ya sahou udu bolo la-ukei dah badeh, Pol asehek, ya jo Tertiyus atorou bolon. Ya jo asehek sekesek tek ewek taha ale.   
\p
\v 23-24 Ma Gayus ale tiye sekesek tan ewek taha. Iy aloh ma atukum aso lau mara-ei ta Kindrei ala asiu tan, ma hawe iy atondrok aso.  
\p Ya Erastus ndramak ta atondrok luk ta kon tinan ma hawe nadu tine taha Kuwartus tiye sekesek turu ewek taha ale.\f + \fr 16:23-24 \ft Iri lau ta tanan rayah abudon anya sahou ari ja udu bolo sahou nane, asehek i buku doh: (24) Ya tikisiy ta Laban tataha Jises Krais kudu hawe aha mara-ei. Handru.\f*   
\s1 Salom ta atudun  
\p
\v 25 Sendrehendreh ta aliy i buku doh: Taha badeh, katudun Kindrei. Iy le kameh winiyan aseben aha ales boto-on ta bolo budon handru taha, in hamon ta sahou mwasin mene jo atiye ewek taha. Sahou mwasin doh ta nyala Jises Krais, ma hawe in hamon ta sahou bwena mene aton mara-ei kabatana le munyak asahan eme eme taku dah.  
\v 26 Arile, na dah, sahou handru mene doh ndrasak. Aso atiye sahou doh amwenen le ta sahou udu bolo tarou tiri propet ta Kindrei mene asehek, ma amwenen le ta batanau ta Kindrei ta bano bwe, kameh ta udu le buku doh. Ya eme iri lau badu kon munyak mari katehei budon tiri handru ki-in tan ma hawe kanuhun le iy.  
\v 27 Masiye ma hawe tudun tataha badeh, ki tan udu bolo len dah ma hawe udu bolo len udu bwena eme, kudu le buku doh. Tasah tanan tan badeh, ili labai, eme taha katudun iy i san ta Jises Krais. Handru!