\id REV  - Nyindrou NT with Gen, Ruth, Jon -Papua New Guinea 2001 (DBL 2014) 
\h Rebelesen 
\toc1 Rebelesen Ameh Kindrei leheya i ta Jon 
\toc2 Rebelesen 
\toc3 Reb 
\mt1 REBELESEN  
\mt2 Ameh Kindrei leheya i ta Jon  
\imt1 Sahou Tanan  
\ip Jon torowenei buk ta Rebelesen dah badeh, na len iri lau abo gok ta amekes ndra-in ili tiri lau ta Kindrei, tasah iri lau ta Kindrei atehei budon tiri buku Jises le ari badeh, tinan tiri. Iri lau solo-an badu kon munyak tinan Rom batehei budon tiri anya, Jises tinan tiri, bwe; Sisa le badeh, tinan tiri. Eme ma iri atehei maha-an ma sisi-in solo-an i bwele-e iri lau ta Kindrei. Buk dah anya kamekes budon tiri lau ta Kindrei kabadok, iri sabwerei ta iri maha-an tinan i bwele-e iri.  
\ip Udu bolo buk dah sahou sokek solo-an labai ta iri lakou kameh asahan na len hamon. Sebwe iri lau ta Kindrei na bolo len doh mene ndrakohok ndramwenen bolo iri sahou sokek doh, arile iri lau nane tana iri Kindrei bwe, idoh iri bwai. Kati iri sahou sokek marakon i buku doh: Jises Krais badeh, iy Laban tinan labai. Na minen badeh, Kindrei kameh tihisi iri lau ta bahun mari, ma iy kameh tihisi balik ale. Ma len doh Jises ndrabwidi gok tan mara-ei ndrano, Kindrei kameh edeu ndramas ili tiri mwan ma badih ales boto-on kahis ma baruwani budon tiri bwe. Iri kameh are hawe Kindrei, ma iri kameh ari maha-an ja bwai, tasah Kindrei kameh bwidi lakou marakon asahan ha-un ja.  
\iot Iri Sahou Tinan  
\io1 Jon asehek sahou ta Kindrei mari eme lewan (\ior 1:1-8\ior*)  
\io1 Jon anyolom Krais (\ior 1:9-20\ior*)  
\io1 Sahou ili tiri lau ta Kindrei badu kon ma ndro taloh (\ior 2:1–3:22\ior*)  
\io1 Iri lau ta Kindrei atudun Kindrei udu kandrah (\ior 4:1-11\ior*)  
\io1 Jon anyolom buk ari iri ndralukumwiy (\ior 5:1–6:17\ior*)  
\io1 Lau mwan ma badih solo-an labai atudun Kindrei (\ior 7:1-17\ior*)  
\io1 Ndrah bala-eu ma ndro taloh (\ior 8:1–11:19\ior*)  
\io1 Jon anyolom badih ari ma hawe mwak laba tinan (\ior 12:1–13:18\ior*)  
\io1 Iri mwan ma badih ta Nadu Sipsip ayah wari (\ior 14:1–15:8\ior*)  
\io1 Bwekei ma ndro taloh losen ta Kindrei udu aliy (\ior 16:1-21\ior*)  
\io1 Tine madasarah akohok sihinen ndra-in labai (\ior 17:1–20:10\ior*)  
\io1 Sahou laba tinan asahan (\ior 20:11-15\ior*)  
\io1 Kandrah ha-un ma hawe munyak ha-un asahan (\ior 21:1-8\ior*)  
\io1 Jon anyolom Jerusalem ha-un (\ior 21:9–22:5\ior*)  
\io1 Ndra mirihik ai ta Jises eme hamon ja (\ior 22:6-21\ior*)  
\c 1  
\ms1 Jises Krais badeh, suni sahou ili tiri mwan ma badih ta Kindrei badu kon ma ndro taloh  
\mr (Kalan 1–3)  
\p
\v 1 Sahou ale jo atorou dah badeh, mene bame lewan bwe, arile Jises Krais le amwenen bwidiy asahan eme lewan. Kindrei le amwenen edeu i ta nadun Jises Krais, ta iy kaleheya taha lohowan tan, ta se luwen bwe, iri lakou mara-ei doh kameh asahan. Eme, Jises amekes sahou dah i san ta ameh, iy eme suni angelo hawe sahou tan eme tek, Jon, jo lohowan tan, ma iy asehek kati ameh mara-ei doh.   
\p
\v 2 Eme ma jo torowenei iri sahou mara-ei ta Kindrei ma ta Jises Krais, ma iri lakou mara-ei nane jo anuhun ma anyolom.   
\p
\v 3 Are lau anyolom sahou ta propet ta Kindrei dah, ta lakou anya kasahan hamon iri winiyan sekesek. Ma are lau ta Kindrei anuhun ma in hamon ta aliy, iri kameh winiyan sekesek handru. Tasah, len ndrasahan ndrame mirihik labai ta Kindrei kameh amekes iri lakou doh, iy mene ndratiye ta aliy.   
\s1 Jon atorou sahou ili tiri lau ta Kindrei badu kon ma ndro taloh  
\p
\v 4-5 Jo Jon, jo atorou sahou dah ewek taha mwan ma badih ta Kindrei badu kon ma ndro taloh udu bada kon tinan Esiya. Jo anya kedeu bada-an mwasin kewek taha ta nyara Kindrei. Na len dah iy udu hawe taha kada-ah, bwena, bwena iy udu aliy ale, ma hamon kameh iy eme hawe taha. Ma jo anya kedeu bada-an mwasin kewek taha ale ta nyara malawin mwasin ma ndro taloh,\f + \fr 1:4-5 \ft Iri lau rayah ta tanan tubuni sahou dah i buku doh: Ma jo anya kedeu bada-an mwasin kewek taha ale ta nyara Malawin Mwasin, kandriyen tan ma ndro taloh, na len mara-ei iy manyah udu mirihik ta koyeu ta Kindrei.\f* na len mara-ei oro manyah ado mirihik ta koyeu ta Kindrei. Ma jo anya kedeu bada-an kewek taha ale in ta nyara Jises Krais, iy ta atiye iri sahou marakon ta Kindrei.  
\q1 Iy le ari badeh, amak udu bolo lek tan eme awas ja ma mwena handru ta lau mara-ei.  
\q1 Ma iy asahan tinan ja tiri kabin marakon ado kon munyak.  
\q1 Tikisiy ma manyah mwasin ta Kindrei uru nadun Jises hawe Malawin Ndrabun badeh, kudu hawe aha.  
\q1 Jises Krais badeh, aso-ok taha mwan ma badih tinan labai,  
\q2 ma ta ndrayen amou udu bada kei tondreh eme andri,  
\q1 ma ndrasikinei kandriyen ndra-in tataha mara-ei ndra-au.   
\q1
\v 6 Ma iy bwidi taha asahan lau tan ma pris ta bolo tondrok tan,  
\q1 ma taha ale asahan lohowan ta Kindrei, iy tama Jises.  
\q1 Aha mwan ma badih mara-ei badeh, katudun nyaran ki tinan kili loken mara-ei,  
\q2 ma iy kameh katondrok lakou mara-ei na boto-on tan ta udu le buku don ai. Handru!   
\q1
\v 7 Aha kanuhun! Jo atou iy anya keme badeh, udu bolo asi kandrah,  
\q2 ma iri mwan ma badih mara-ei kameh anyolom iy na mada iri amwenen,  
\q1 ma hawe iri mwan ma badih mara-ei badu Isra-el bwena mene orowei kabede Jises Krais na nyah  
\q2 ma tatahi iy i bada kei tondreh.  
\q1 Iri lau doh kameh anyolom iy ale.  
\q1 Iri lau mwan ma badih mara-ei badu kon munyak kameh abudon solo-an labai ta aliy,  
\q2 ma iri kameh a-um ade iri amwenen, ma aden i ndra-in labai.  
\q1 Ma, iri lakou mara-ei doh kameh asahan. Handru.   
\p
\v 8 Laban Kindrei, boto-on mara-ei udu tan, iy asehek i buku doh: “Jo ma mwena handru, ma jo in ndrobek mara-ei.” Na len dah iy udu hawe taha kada-ah, bwena handru labai iy udu aliy ale, ma hamon kameh iy eme hawe taha.   
\s1 Jon anyolom Krais  
\p
\v 9 Jo Jon, jo nadu tine aha lau ta Jises. Jo badu hawe aha ta bwese maha-an ma akohok sisi-in, jo udu bilisiu ta Kindrei hawe aha. Ma taha mara-ei ales are le se atadau taha ta bwese maha-an. Jo mene atiye sahou ta Kindrei, ma jo asehek ta jo amwenen badeh, atehei budon tek mara-ei in ta sahou handru ta nyala Jises. Eme ma iri lau tinan badu Rom badeh, tikahei jo, ma atehei jo ili bolo kou udu busu ari, iri aloh Patmos.  
\v 10 Na len ta Laban amwenen badeh, Malawin Ndrabun asahan eme bwele-ek ma tubuluhi jo, ma udu konak badeh, jo anuhun boho ndramak ari aloh boto-on labai i buku lau oloh ndrah.  
\v 11 Ma iy asehek i buku doh, “Lakou mara-ei, ou anyolom, ou torowenei kili bolo buk, ano ou atehei kili tiri mwan ma badih ado kon ma ndro taloh udu bolo Esiya. Ou atehei ari, ari kili tiri kon mara-ei doh: Epesus, Semena, Pegamum, Tayataira, Sadis, Piladelpiya ma Leyodisiya.”   
\p
\v 12 Eme, jo tubuni jo ta anya kanyolom ndramak nane asehek sahou eme tek doh. Jo tubuni madak, ma jo anyolom ndru-u sun ma ndro taloh ales, ndru-u sun doh iri amekes na bek nyikilikin.  
\v 13 Ma jo atou ndramak ari, ya konen badeh,  
\q1 “I buku le Nadu Ndramak Awas.” \rq Daniyel 7:13\rq*  
\m Iy ales udu ndrokowa ndru-u sun ma ndro taloh nane doh, ma iy asini awin belen mara-ei ili isos ndra bada katin andri, ma iy bawei balaban ari amekes na bek nyikilikin labai udu batalan.  
\v 14 Lami batun belen mara-ei, i buku asi kandrah, ma madan anya i buku jih.  
\v 15 Katin badeh, nyikilikin labai buku bek bras iri asun na jih taladan, ano nyasei i nyimirin mara-ei, ma nyaro bohon i buku nyaro goi laba tinan atohou.  
\v 16 Iy tawi ndrau ma ndro taloh badeh, udu minen salin, ma hawe raho samen iri aloh bainat, madan mala-uh badeh, lahen bwe, lahen bwe, udu bohon eme len. Ma madan anya labai i buku le an udu alih amwenen.   
\p
\v 17 Jo anyolom le iy badeh, ma jo taku ili bada katin, jo ndramak ndra buku bada kei. Iy atehei minen salin eme bwele-ek ma iy asehek sahou eme tek i buku doh, “Ou sanoh! Jo ma bwena labai, ma jo ndrobek handru!  
\v 18 Jo badeh, ta ere le buku don ai! Jo mene imek, arile nadah jo ndrame awas ja ta ere le buku doh, winiya bamak ja bwai. Eme ma jo le ari badeh, boto-on tek winiyan mete-ei iri mwan ma badih ndramak bwena kameh ame awas ja.   
\p
\v 19 Abo, ou atorou iri sahou ta lakou ou ndranyolom, ma ta iri lakou nane udu kada-ah, ma ta iri lakou kameh asahan hamon tiri lakou doh.  
\v 20 Ou ndranyolom ndrau ma ndro taloh udu minek salin ma hawe ndru-u sun ma ndro taloh ai. Idoh i buku sahou sokek le, arile moson ta aliy i buku doh: Ndrau ma ndro taloh doh i buku iri angelo atondrok lau ta Kindrei badu kon ma ndro taloh. Ya, ndru-u sun ma ndro taloh doh, i buku iri mwan ma badih ta Kindrei badu kon ma ndro taloh doh amwenen.”   
\c 2  
\s1 Sahou ili tiri lau mwan ma badih badu kon Epesus  
\p
\v 1 Iy ndramak nane dah asehek eme tek i buku doh, “Ou atorou rayah sahou kili ta angelo\f + \fr 2:1 \ft I boho Grik badeh, sahou angelo doh badeh, moson ndramak ta atiye sahou. Iy ndramak nane tiye Jon katorou rayah sahou kili ta angelo ere bwena tiri lau ta Kindrei. Sahou ili ta angelo doh i buku sahou sokek o kalem ta leheya iri kandriyen tiri lau ta Kindrei nane amekes.\f* ere bwena tiri lau ta Kindrei are kon Epesus. Sahou i buku doh:  
\pi1 ‘Jo badeh, tawi oro ndrau ma ndro taloh udu minek salin, ma jo edek bolo ndrokowa ndru-u oro sun ma ndro taloh iri amekes na bek nyikilikin. Jo le amwenen badeh suni sahou dah ewek tam:  
\v 2 Jo badeh, ndratanan mara-ei ndrano ta iri kandriyen mara-ei nane aha lau ta Kindrei badu Epesus amekes, ma ta sa-ar ta gok taha mara-ei ano. Jo tanan, aha badeh, ales boto-on labai tiri maha-an asahan taha, ma aha bwale aha iri lau ndra-in. Iri badeh, tiye aha i buku doh, “Ahi aposel ale.” Arile, iri aposel bwe. Ma aha ndraseleyani sahou tiri, ma aha ndrasilahei kati kandriyen mara-ei iri amekes. Eme ma, aha ndratanan ai, iri lau ta wendreya le.  
\v 3 Aha badeh, ndra-en hamon tek, ma aha ndratawi nyarak ndrahis mara-ei. Eme ma iri lau badeh, amekes ndra-in ewek taha. Arile, aha badeh, ales boto-on labai, ma bwese iri maha-an mari doh, ma jo tanan aha bawoyah ta aliy bwe.   
\pi1
\v 4 ‘Arile, jo tek sahou udu taha i buku doh: Ma bwena handru mene aha atehei budon taha badeh, eme le tek, ma aha aso-ok jo labai, arile nadah ja badeh, aha baso-ok jo bala buku bwena mene aha amekes ja bwe.  
\v 5 Ya, ma bwena mene aha amekes kandriyen mwasin labai, arile nadah ja aha ndraruwaniy. Ya, aha kabudon kili hamon ja ta kandriyen, mene aha atehei budon taha mara-ei eme le tek, ma aha aso-ok jo labai. Aha katubuni ndrine aha ja, ma ka-en hamon tek buku bwena mene ja. Buku bwe-eh, jo kameh asahan hawe aha ma andrei ndru-u sun taha iu.  
\v 6 Handru labai, aha amekes kandriyen ari mwasin labai. Aha badeh, bwale aha kandriyen tiri lau ta Nikolas.\f + \fr 2:6 \ft Iri lau ta Nikolas badeh, ndraruwani budon handru ta Kindrei ma iri a-en hamon ta kandriyen tiri lau badu munyak. Iri abudon anya kandriyen ta karei ma hawe iri kandriyen rayah ta bada taha badeh, mwasin le. Eme ma, iri leheya, iri lau ta Kindrei winiyan amekes kandriyen laleyah, ma idah kameh maha-an asahan ta aliy bwe. Ou anyolom ili ta kalan 2:15-16 ale.\f* Jo ale bwalek kandriyen iri amekes.   
\pi1
\v 7 ‘Ya, buku ndranye aha udu aliy, aha kanuhun saba lakou handru Malawin Mwasin asehek ili tiri lau ta Kindrei! Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri bwe, jo kameh tiye buku doh, iri kameh winiyan akohok nyamon badu ta kei nane edeu kohan mwasin ili tiri mwan ma badih. Kei doh badeh, udu bolo bilin ta Kindrei udu bolo kandrah.’”   
\s1 Sahou ili tiri lau mwan ma badih ta Kindrei badu kon Semena  
\p
\v 8 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Semena. Sahou i buku doh:  
\pi1 ‘Jo ndra bwena, bwena labai, ma jo ndrobek handru. Jo mene imek, arile jo amak eme awas ja, ma jo udu kada-ah. Jo amwenen asehek sahou ewek taha dah:  
\v 9 Jo tanan iri maha-an ma isi badeh, ndrasahan taha, ma jo ndratanan, aha ari lakou bwe, aha badeh, ndra buku iri lau laleyah. Arile, lakou taha mari badeh, solo-an labai udu hawek. Ma jo ale tanan sahou nane iri lau rayah sondrokonya aha badeh, badu boho iri Juwis amwenen. Iri lau nane doh anya, “Ahi badeh, lau ta Kindrei handru, tasah ahi badu Juwis.” Arile bwe, iri badeh, lau ta Satan.  
\v 10 Hamon kameh, aha akohok sisi-in ma bwese maha-an, arile aha sanoh ta aliy. Aha kanuhun! Balik kameh atehei iri mwan ma badih rayah badu bolo aha ala bolo kou, ta none budon taha. Ma aha kameh akohok sisi-in ma bwese maha-an ili winiya le len ma ronoh. Arile, aha saruwani budon taha handru udu tek. Aha katawiy kihis budon taha handru kili, winiya le len iri adai ou amak. Ma idah kameh jo edeu taha kohan handru ta udu le buku doh, i nyara ndramas taha.  
\v 11 Ya, buku ndranyem udu aliy, abo, ou anuhun saba lakou handru, Malawin Mwasin asehek ili tiri lau ta Kindrei! Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri kameh winiyan bakohok sisi-in ta imek ari hamon ja bwe.’”   
\s1 Sahou ili tiri lau mwan ma badih ta Kindrei badu kon Pegamum  
\p
\v 12 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Pegamum. Sahou i buku doh:  
\pi1 ‘Jo tawi samen raho lawe-en, madan ma la-uh, ma madan, madan labai, ma jo suni sahou dah ewek taha.  
\v 13 Jo tanan, iri lakou ndra-in asahan kon nane aha are aliy badeh. Satan badeh, ndratondrokei iri mwan ma badih rayah badu loboho badeh, ma iy udu koyeu tan ma ndrasahan kabin handru! Bwena mene, iy ndramak Antipas badeh, iy ndramak ari ta atiye sahou tek, iy udu hawe aha, ma iy in hamon handru tiri sahou tek. Eme ma, iri lau badu loboho badeh, adai iy imek udu kon tiri lau ta Satan are aliy. Na len dah, aha baruwani budon taha udu tek bwe le. Aha badeh, a-en hamon tek kahis, ma aha batone budon doh bwe le.   
\pi1
\v 14 ‘Ya, aha mwasin handru, arile jo tek sahou rayah udu taha: Iri lau rayah are bolo aha kede-eh badeh, a-en hamon ta leheya ta Balam, iy mene leheya Balak, san ta ariu iri lau badu Isra-el ta taku ala bolo kandriyen ndra-in. Eme ma, Balak andrekei iri mwan ma badih rayah badu Isra-el ta aimon nyamon nane iri asalom ili ta nyara kindrei ta wasai, iri amekes na sukumada kei, ma iri amekes kandriyen ndra-in ta karei.  
\v 15 I buku le aliy ai, lau rayah are bolo aha kede-eh badeh, a-en hamon ta sahou tiri lau ta Nikolas.  
\v 16 Eme nadah badeh, aha katehei kona aha kili tiri sahou hawe kandriyen ndra-in tiri lau ta Balam hawe Nikolas. Buku aha bamekes bwe-eh, mirihik ai, jo kameh ewek amekes bahun hawe aha lau nane a-en hamon ta sahou tiri lau ta Nikolas, na samen madan, madan labai kameh udu bohok eme len.   
\pi1
\v 17 ‘Buku ndranye aha udu aliy, jo aso-ok aha kanuhun saba lakou handru Malawin Mwasin asehek ili tiri lau ta Kindrei. Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, jo kameh edeu niri mana,\f + \fr 2:17 \ft Mana badeh, nyamon mene Kindrei edeu i niri lau badu Isra-el na len iri adek ala bolo kon lomale an.\f* amai labai udu kon tek. Ma jo ale kameh edeu bek belen mara-ei i tiri ari, ari. Ma udu bwele-e bek doh, jo kameh torowenei nyaran ha-un udu aliy. Ma ari ndramak ja winiyan bala tanan ta kati nyaran doh bwe. Are lau, iy nane akohok bek doh, iy le kameh winiyan i tanan moson ta aliy ai.’”   
\s1 Sahou ili tiri lau ta Kindrei ado kon Tayataira  
\p
\v 18 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Tayataira. Sahou i buku doh:  
\pi1 ‘Jo Nadu Kindrei, madak badeh, anya i buku jih nyarahan labai. Ma bada katik badeh, buku bras nyikilikin ma nyikadin labai. Eme ma, jo amwenen asehek sahou dah ewek taha lau batun ta nyala aliy:  
\v 19 Jo ndratanan ta kandriyen marakon aha amekes. Jo tanan ale, ta aha badeh, aso-ok labai iri lau rayah ja. Ma aha ale atehei budon taha mara-ei eme le tek. Ma aha amekes gok ale ta aseben iri mwan ma badih rayah ja. Na len marakon, maha-an anya kasahan, arile aha ales boto-on ma atadau aha tiri lakou doh. Nadah, kandriyen solo-an aha amekes badeh, mwasin labai ja tiri kandriyen mene aha amekes ma bwena, kabatana aha asahan lau ta Kindrei.   
\pi1
\v 20 ‘Ya, lakou mara-ei aha amekes badeh, mwasin. Arile, jo basekesek ta lakou ari aha amekes bwe. Aha badeh, andrei Jesebel\f + \fr 2:20 \ft Jesebel badeh, nyara kabin badih ari atondrok iri Isra-el bwena mene. Kandriyen tan ndra-in labai. Ou anyolom ili ta 1 Kabin kalan 18:4; 19:1-2; 21:1-28; ma 2 Kabin kalan 9:22 ma kalan 9:30-37. Anyolom ta aliy i buku badih ari badu hawe iri lau ta Nikolas badeh, ariu budon tiri lau rayah badu Tayataira ta iri ka-en hamon ta kandriyen ndra-in tan. Eme, ta katin doh, iri aloh nyaran i Jesebel ja.\f* ewek udu hawe aha, iy badih doh, leheya kandriyen rayah ndra-in i taha mwan ma badih ta amekes gok tek. Ya, iy badeh, ndrawendreyani iri, ma iy anya iy le badeh, propet. Arile, iy ibo gok ta leheya iri mwan ma badih tek ta a-en hamon ta kandriyen ta karei ma aimon nyamon nane iri adeu i ta salom ta kindrei ta wasai iri amekes na sukumada kei.  
\v 21 Jo ndratehei len ndrala tan, tasah jo aso-ok iy katubuni ndrinen ta iri kandriyen ta karei iy amekes. Arile, iy baso-ok bwe.  
\v 22 Ya, aha kanuhun! Jo kameh edeu sisi-in hawe sik ndra-in laba tinan i ta badih doh. Ma hawe iri mwan ma badih nane a-en hamon tan amekes kandriyen ndra-in i le buku iy, buku iri batubuni ndrine iri bwe, ma batehei kona iri bala tiri lakou doh bwe-eh, idah kameh jo edeu sisi-in ma maha-an laba tinan labai ili tiri.  
\v 23 Ma jo ale kameh idi nadu i badih nane mara-ei amak au. Eme ma iri mwan ma badih ta Kindrei kameh winiyan atanan buku, jo badeh, anyolom ma aleben amwenen labai iri lakou udu budon ma ndrine iri mwan ma badih mari. Ma jo kameh edeu ndramas ndra-in labai ewek taha ari ari, i bundruwe le iri kandriyen nane aha amekes.   
\pi1
\v 24 ‘Arile, nadah badeh, jo anya kasehek kewek taha ado Tayataira, aha badeh, ba-en hamon ta sahou ta Jesebel bwe, ma aha ale bakohok ari tanan ta kandriyen nane iri aloh, “Udu bolo kandriyen handru ta Satan.” Na aha le badeh, jo anya kasehek ki buku doh: Jo kameh winiya badeu ari sahou batanau ta aha ka-en hamon ta aliy ja bwai. Lakou ari le doh badeh, kabwai.  
\v 25 Iri lakou marakon ale aha atehei budon taha, ma a-en hamon ta aliy badeh, aha katawiy kihis mara-ei, kili winiya le len ta jo kameh eme hamon eme kon munyak ja.   
\pi1
\v 26 ‘Ya, buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, ma iri ale ta amekes lahou na so-ok tek winiya le gok tek ano; jo kameh edeu boto-on ili tiri, ma iri kameh asahan tinan are bwele-en labai ja tiri mwan ma badih badu kon munyak tinan mara-ei.  
\v 27 I buku le buk ndrabun ndrasehek,  
\q1 “Iy kameh tawi balekei hayen ari udu minen ta atondrok iri mwan ma badih boto-on handru,  
\q2 ma tabasi marakon ili le bwisik, bwisik i buku ndramak tabasi kun iri amekes na ndren.” \rq Wari 2:9\rq*  
\m Jo amwenen kameh edeu gok doh i tiri. Idoh, i buku le gok mene tama edeu eme tek, ta atondrok iri mwan ma badih marakon.  
\v 28 Ma jo kameh edeu ndrau ta boho len i tiri.  
\v 29 Ya, buku ndranyem udu aliy, jo aso-ok ou anuhun iri saba lakou handru, Malawin Mwasin asehek ili tiri lau ta Kindrei.’”   
\c 3  
\s1 Sahou ili tiri lau ta Kindrei badu Sadis  
\p
\v 1 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Sadis. Sahou kili buku doh:  
\pi1 ‘Jo le ari badeh, atondrok oro Malawin Mwasin ta Kindrei ma ndro taloh, ma hawe iri mwan ma badih ta Kindrei, buku ndrau, badu kon ma ndro taloh. Jo badeh, ndratanan iri kandriyen marakon aha amekes. Iri lau rayah badeh, asehek nyala aha anya, “Iri mwan ma badih ta Kindrei badu Sadis, a-en hamon ta kandriyen mwasin, ma iri a-en hamon handru ta Jises Krais.” Arile, bwe. Aha badeh, ndra buku ndramak imek. Aha ale bamekes gok badeh, bame tek bwe.  
\v 2 Aha kasuri aha ja, ma aha kabudon kamwenen op! Saba kandriyen tek ale aha a-en hamon ta aliy badeh, jo aso-ok aha katawiy kihis, kandriyen doh anya kimek ai! Tasah, iri lakou mara-ei aha amekes kede-eh badeh, rayah bamwenen ta mada Kindrei tek ja bwai.  
\v 3 Aha kabudon kili hamon ja ta len ma mwena mene aha anuhun sahou tek mwasin, ma aha atehei budon handru taha in aliy. Eme nadah, aha katubuni ndrine aha ma ka-en hamon ta sahou handru ma bwena mene ja. Buku bwe-eh, jo kameh ewek hawe aha i buku ndramak ta bahana, ma aha kameh winiyan bala tanan ta len, jo kameh ewek bwe, ma jo kameh edeu ndramas ndra-in labai ewek taha ale.   
\pi1
\v 4 ‘Arile, iri lau mwan ma badih ta Kindrei taha rayah badu kon Sadis badeh, bamekes kandriyen ndra-in bwe. Iri lau doh kameh adek hawek, ma asini awin belen mara-ei, tasah kandriyen tiri mwasin mara-ei.  
\v 5 Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, jo kameh edeu awin belen ili tiri, ma jo kameh winiyan basokosowei nyara iri udu bolo buk tiri ta akohok kohan handru ta Kindrei ba-au bwe, arile jo kameh asehek nyala tama hawe oro angelo tan i buku doh: “Iri lau mwan ma badih dah badeh, iri lau tek handru ma iri a-en hamon ta sahou tek.”  
\v 6 Are mwan o badih ndranyen udu aliy, jo aso-ok iy kanuhun saba lakou handru, Malawin Mwasin asehek ili tiri lau ta Kindrei.’”   
\s1 Sahou ili tiri lau mwan ma badih ta Kindrei ado kon Piladelpiya  
\p
\v 7 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Piladelpiya. Sahou kili buku doh:  
\pi1 ‘Idah sahou tek amwenen. Jo badeh, ndrabun labai, ma jo kati iri kandriyen handru mari. Jo badeh, boto-on labai udu bolo tondrok ta kabin Debit. Buku jo sihi kou, ari ndramak winiyan basulu-iy ja bwe. Ya, buku jo sulu-i kou, ari ndramak, winiyan basihiy ja bwe.  
\v 8 Jo ndratanan ta kandriyen marakon aha amekes. Nyamu aha kede-eh boto-on sese udu aliy, ma aha a-en hamon tiri sahou tek, ma aha ale babisini nyarak bwe. Eme ma aha ndranyolom ai! Jo badeh, amekes san ta aha winiyan atiye iri sahou tek. Ma ari mwan o badih ja kameh winiyan baturuki aha ta amekes lakou dah, bwe-en.  
\v 9 Aha ndratanan iri lau ta balik kede-eh. Iri badeh, ado bolo asiu ta atukum tiri Juwis. Iri anya, Kindrei ndratehei kalem ndrala tiri, ta iri asahan lau tan, tasah iri badu Isra-el. Arile, iri bwai. Satan ndraruwi budon tiri, ma iri ndrala hawen. Aha kanuhun! Hamon kameh jo tiye iri ta awek hawe aha, ta atehei bwili ndru-u iri i andri udu mirihik ta kati aha, ma iri kameh atanan ta jo aso-ok aha labai.  
\v 10 Aha badeh, a-en hamon ta sahou tek, ma aha ales boto-on labai tiri maha-an marakon. Eme ma, jo kameh atondrok aha ta iri lakou anya kasahan ta none iri mwan ma badih badu kon munyak mara-ei, idoh kameh winiya bandruni aha bwe.  
\v 11 Ndrame mirihik ai, ta jo kameh eme hamon eme kon munyak dah ja. Eme ma iri budon tek mara-ei aha ndratawiy, badeh, aha katawiy kihis. Kora-on iri lau rayah kawendreyani aha ma aha kamani iri ndramas nane, jo anya kedeu kili tiri mwan ma badih nane a-en hamon tek handru.   
\pi1
\v 12 ‘Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh kameh jo tutuni iri i buku ndru eh ta ateu asiu tinan ta Kindrei tek, ma iri kameh winiya bala manan ja bwe. Jo kameh torowenei nyara Kindrei tek udu bada iri, ma jo kameh torowenei nyara kon tinan ta Kindrei tek, Jerusalem ha-un doh udu mine Kindrei tek udu kandrah eme andri. Ma nyarak ari ha-un ja, jo kameh torowenei ili bada iri ale.  
\v 13 Ya, buku are lau ndranyen udu aliy, jo aso-ok iy kanuhun saba lakou handru, Malawin Mwasin asehek ili tiri lau ta Kindrei.’”   
\s1 Sahou ili tiri lau mwan ma badih ta Kindrei ado kon Leyodisiya  
\p
\v 14 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Leyodisiya. Sahou kili buku doh:  
\pi1 ‘Iri sahou dah, tek amwenen. Jo badeh, kati iri sahou handru, ma jo badeh, ta atiye le sahou handru. Jo badeh, kati iri lakou mara-ei Kindrei ndrabwidiy. Eme ma jo suni sahou dah ewek taha.  
\v 15 Jo tanan lakou mara-ei aha amekes. Jo ale tanan aha nyarahan o nyala-an. Jo badeh, aso-ok aha kado buku nyala-an o nyarahan le ka-i ai.  
\v 16 Arile, bwe. Aha badeh, nyarahan sese le. Eme ma jo anya kamwitini aha ado bohok kame len.  
\v 17 Tasah, aha badeh, asehek i buku doh, “Luk tahi badeh, solo-an labai, ma lakou rayah ja badeh, tahi mara-ei udu aliy. Ahi bandriliu ta ari lakou ja bwai.” Arile, bwe. Aha badeh, bateu lakou ta Kindrei handru nane ta aseben aha ja bwai. Eme ma manyah taha udu ndra-in mara-ei, winiya le iri lau baratikisi aha. Aha badeh, ndra buku iri lau, tiri ari lakou bwe, ma aha ndra buku iri lau, mada iri ndrakaseu, ma aha ndra buku iri lau, iri ari awin ta tubuloh bada iri bwe. Ma aha le amwenen kede-eh winiya bala tanan, aha are buku sah handru ta budon ta Kindrei!  
\v 18 Eme ma, jo anya kedeu sahou dah kewek taha. Aha mara-ei badeh, kame le hawek kasih bek nyikilikin tek. Jih badeh, ndrasulumwi lakou marakon udu bwele-en ndra-au, ma bwidiy ndra nyikilikin mara-ei. Ma aha kameh asahan nadu batun. Ya, aha kame kasih taha kolau belen ta tubuloh bada aha, ma iri mwan ma badih winiyan banyolom bada aha ndrakane ja bwe. Ma mwasin ale, ta aha kame hawek kasih rayah ndrelekei tek, ta adeu i mada aha, ta aha kanyolom kon ja. Ma aha winiyan atanan, buku aha badeh, bateu lakou handru ta Kindrei bwe. Ma aha kameh winiyan anyolom aha are buku sah handru.  
\v 19 Jo ibolosen i tiri lau, ma asehek nyala kandriyen iri amekes, tasah jo badeh, aso-ok iri labai. Eme ma, aha katubuni ndrine aha, ma katehei budon taha kirih ta a-en hamon ta Kindrei.   
\pi1
\v 20 ‘Aha ndranyolom jo! Jo ales udu kona kou, ma jo alim kou. Buku are lau, iy anuhun bohok, ma iy sihi kou, jo kameh ili bolo asiu hawen, ma aimon nyamon hawen, ma iy aimon nyamon hawek.  
\v 21 Ya, buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh, jo kameh tiye iri kame hawek ma katondrok iri lakou marakon hawek, i buku tama aso-ok jo kamanyah kudu hawen ta atondrok lakou marakon.  
\v 22 I buku ndranye aha udu aliy, jo aso-ok aha kanuhun saba lakou handru, Malawin Mwasin asehek ili tiri lau ta Kindrei.’”   
\ms1 Nadu Sipsip ta Kindrei sihi buk udu kandrah, ma iri lakou ndra-in asahan tiri mwan ma badih badu kon munyak  
\mr (Kalan 4–11)  
\c 4  
\s1 Iri atudun Kindrei udu kandrah  
\p
\v 1 Ameh ranah nane dah ano badeh, ari ja asahan i buku doh: Jo anyolom kou ari asak udu kandrah. Iy ndramak doh mene jo anuhun bohon bwena, nyaro bohon asehek sahou eme tek, i buku iri lau oloh ndrah, iy asehek i buku doh, “Ou ame loken dah, jo kameh leheya ou tiri lakou mara-ei kameh asahan hamon.”  
\v 2 Ma se nawin bwe, Malawin Ndrabun eme bwele-ek, ma jo anyolom koyeu ari ta kabin udu kandrah, ma ndramak ari manyah udu aliy.  
\v 3 Ma mada iy ndramak doh anya, lomadan solo-an labai lomotani kon mara-ei i buku bek ari iri aloh jaspa, ma bek ari ja saraman iri aloh koniliyen, nyikadin labai, buku an anya ili bwele-en. Ma beteke nyabwiu awudi koyeu tan, ma jo anyolom idoh anya buku bek ari nyorowan iri aloh emeral.  
\v 4 Ma jo ale anyolom koyeu ma lunoh hahuw (24) awudi koyeu ta kabin nane doh, ma oro batun ma lunoh hahuw (24) badeh, manyah ado bada koyeu doh. Iri asini awin lawe-en belen mara-ei, ma barak tiri badeh, bek nyikilikin i buku barak tiri kabin adeu udu batu iri.  
\v 5 Ya, udu bada koyeu ta kabin doh, jo anyolom kalik takamek ili eme, ma jo anuhun nyaro lakou tinan labai asahan, ma kuruh atohou i le rasan. Ma udu bwena ta koyeu ta kabin doh, jo anyolom sun ma ndro taloh anya udu aliy. Oro sun ma ndro taloh doh leheya i buku Malawin Mwasin ta Kindrei.  
\v 6 Udu mirihik ta koyeu ta kabin badeh, lakou ari udu aliy i buku ndras laba tinan, i buku torowe lewen labai. Koyeu tan udu alih ta lakou mara-ei. Ma jo atou lakou ma mulin ma hahuw koha oro udu aliy. Oro ales ma awudi koyeu ta kabin doh. Ma mada oro badeh, solo-an labai tubuluhi mada oro ma kona oro mara-ei.   
\p
\v 7 Lakou ma mulin ma mwena kone madan badeh, i buku layon. Iy ari ja, kone madan i buku bulumakau mwan. Iy ari ja, madan udu aliy, konen i buku batu ndramak awas. Ma iy ari ja badeh, konen i buku manyuwe, lu-u balen alawe ma iy atah loken.  
\v 8 Oro lakou ma mulin ma hahuw doh, iy ari, ari badeh, banin ma onoh, ma mada oro solo-an labai tubuluhi bada oro mara-ei, udu bwele-en ma udu bahandra bani oro ale. Na len ma ben mara-ei badeh, oro bamunyau se ta ayah wari bwai. Oro badeh, ayah wari ma asehek sahou i buku doh:  
\qc “Laban Kindrei, iy tawi iri boto-on mara-ei.  
\qc Iy ndrabun, iy ndrabun, iy ndrabun labai.  
\qc Ndra bwena bwena iy udu aliy,  
\qc Nadah badeh, iy udu aliy ale.  
\qc Ma iy kameh eme hamon ja.”  
\p Oro badeh, bamunyau ta aloh sahou doh bwe.   
\p
\v 9 Oro lakou ma mulin ma hahuw nane doh, ayah wari ta sekesek i ta Kindrei manyah udu bada koyeu ta kabin, iy winiyan bamak bwe, ta udu le buku don ai. Ma na bolo len mara-ei oro lakou ma mulin ma hahuw nane doh atudun nyaran, ma adeu wurah i tan. Len ari buku ari oro lakou ma mulin badeh, amekes le ai.  
\v 10 Ya, oro lakou ma mulin amekes, ma oro batun ma lunoh hahuw (24) badeh, atehei bwili ndru-u oro i andri udu mada Kindrei, iy manyah udu bada koyeu ta kabin. Ma oro atudun Kindrei, iy ta udu le buku doh. Ma oro ale akahei barak toro nane bek nyikilikin ili taku udu mirihik ta koyeu ta kabin, ma oro anya:   
\q1
\v 11 “Laban, ou Kindrei tahi.  
\q1 Ou mwasin labai ma ou are loken, loken labai,  
\q2 ta iri mwan ma badih kasekesek ou, ma katudun nyaram,  
\q2 ma kado bahandra boto-on tam le ari.  
\q1 Tasah, ou amekes lakou marakon.  
\q1 Na budon tam le amwenen, ou bwidi iri,  
\q2 eme nadah, iri lakou marakon doh udu kede-eh.”   
\c 5  
\s1 Jon atou buk ari doh bohon ndrakumum  
\p
\v 1 Udu bolo ameh tek doh badeh, jo anyolom iy ndramak nane manyah udu bada koyeu ta kabin badeh, tawi buk ari udu minen salin, iri ndralukumwiy. Iri torowenei sahou udu bolon ma konan ale, ma Kindrei atehei tobwe ma ndro taloh udu aliy ma ari ndramak winiyan basihiy bwe.  
\v 2 Ano ja, jo anyolom angelo ari boto-on labai eme, ma iy aloh i buku doh, “Are lau mwasin handru, kameh winiyan sudi tobwe doh iu, ma sihi buk asak? Ari ndramak udu kede-eh, deh bwe?”  
\v 3 Angelo asehek i buku doh ano le badeh, ma iri lau mara-ei atalan ta asilah ari ndramak. Iri asilah bolo kandrah ma bwele-e munyak, ma udu bahandra munyak, kon tiri lau ndramak ndrasu-u, arile iri basilahei ari ndramak ja bwai, ya ari ndramak winiyan banyolom bolon bwe le.  
\v 4 Jo anyolom badeh, iri bandruni ari ndramak mwasin labai ta iy winiyan sihi buk doh ma anyolom bolon ja bwai. Eme ma bwidi jo eden.  
\v 5 Jo eden le ai. Ano batun ari badu bolo oro lunoh hahuw (24) nane eme asehek sahou eme tek i buku doh, “Ou saden! Ou atou! Ndramak ari kede-eh i buku layon, iy badu boho kamen tiri Juda, ma iy ale badu boho kamen ta tubun Debit. Iy i buku sisine kei asahan ta kandro kei iri mwetehei mwena. Iy idi balik uru kandriyen ndra-in. Eme ma iy winiyan sudi tobwe ma sihi buk doh asak.”   
\s1 Jon anyolom Nadu Sipsip ta Kindrei  
\p
\v 6 Ano badeh, jo anyolom ndramak ari, iy ales i buku Nadu Sipsip ta Kindrei. Nyolom tan i buku iri lau ndradai iy ndramak, arile iy amak eme awas ja. Iy ales udu le alih ta ka-u koyeu ta kabin, ma oro lakou ma mulin ma hahuw hawe iri batun. Kasoh tan ma ndro taloh hawe madan ma ndro taloh. Madan doh badeh, leheya i buku Malawin Mwasin ta Kindrei ma ndro taloh. Kindrei ndrasuni iri ndrala bolo kon munyak mara-ei ta amekes lahou tan.  
\v 7 Nadu Sipsip doh eme, ili andrei buk udu mine Kindrei salin, iy nane manyah udu bada koyeu ta kabin.  
\v 8 Iy ili andrei buk, ano oro lakou ma mulin ma hahuw, hawe oro batun ma lunoh hahuw (24) atehei bwili ndru-u oro i andri udu mirihik ta Nadu Sipsip ta Kindrei. Oro batun ari, ari badeh, tawi ndran iri aloh hap, udu mine oro hawe bwekei raben bek nyikilikin. Ma eh manahu buburen irek udu bolo bwekei doh, ma tuhi bwekei mara-ei. Idoh leheya buku salom ta lau mwan ma badih ta Kindrei marakon.  
\v 9 Iri ame ayah wari ari ha-un i buku doh:  
\q1 “Ou mwasin handru ta andrei buk doh,  
\q2 ma sudi tobwe marakon nane iu.  
\q1 Tasah, iri mene adai ou amak,  
\q2 ma na ndrayem amwenen, ou ndrakonohei iri mwan ma badih ndrame hamon, ta Kindrei.  
\q1 Ya, ou badeh, ndrakonohei iri mwan ma badih ndrame hamon ja.  
\q2 Iri lau doh badu boho kamen mari,  
\q2 ma boho kon rakon rakon badu kon munyak mari,  
\q2 ma iri lau bada iri randrah, randrah,  
\q2 ma badu kon munyak tinan mara-ei.  
\q2 Eme ma, nadah badeh, iri mara-ei ta Kindrei le ari kabwe.   
\q1
\v 10 Ou badeh, ndrabwidi iri ndrasahan pris ta amekes lahou ta Kindrei tataha,  
\q2 ma iy asahan kabin tiri.  
\q2 Ma iri kameh atondrok iri lau mwan ma badih mara-ei badu kon munyak.”   
\s1 Iri atudun nyara Nadu Sipsip ta Kindrei  
\p
\v 11 Ano badeh, jo anyolom, ma anuhun boho iri angelo solo-an labai, kane iri buku ralou (10,000), tulou (30,000), ndru tulou (70,000) kane iri ili le ai, i buku nyaran bwe (100,000,000). Iri mara-ei doh, hawe oro lakou ma mulin ma hahuw, ma hawe oro batun mara-ei badeh, ales ma awudi koyeu ta kabin.  
\v 12 Iri badeh, ayah wari boto-on labai, ma boho iri iu ili loken mara-ei i buku doh:  
\q1 “Iy ndramak kede-eh badeh, Nadu Sipsip ta Kindrei, iri lau mene adai iy imek.  
\q1 Iy winiyan ta akohok nyaran i tinan, iri lakou mwasin ma tanan mwasin, ma hawe boto-on mara-ei.  
\q1 Iy winiyan handru, lau mara-ei katudun nyaran.  
\q1 Kadeu sekesek ma wurah kili le tan.”   
\p
\v 13 Ano badeh, jo anyolom iri lakou mara-ei ma mulin udu kandrah, udu bwele-e munyak, udu bahandra munyak, udu ndrahune iri lau ndramak ndrasu-u, ma udu bwele-e ndras. Iri lakou mara-ei doh badeh, jo anuhun iri ayah wari i buku doh:  
\q1 “Kindrei manyah udu bada koyeu ta kabin, ma hawe Nadu Sipsip tan.  
\q1 Uru winiyan akohok wurah, ma nyara uru i tinan mara-ei.  
\q1 Ma sekesek hawe boto-on mari ta ere le buku doh winiyan bano bwe!”   
\p
\v 14 Udu bada len, iri amekes i buku doh, eme ma oro lakou ma mulin ma hahuw anya, “Idoh handru.” Ma iri batun mara-ei atehei bwili ndru-u iri i andri ma atudun Kindrei hawe Nadu Sipsip tan.   
\c 6  
\s1 Nadu Sipsip ta Kindrei sudi tobwe ma onoh nane tobo-ei buk  
\p
\v 1 Ano badeh, jo anyolom Nadu Sipsip ta Kindrei tawi buk udu minen, tobwe ndratobo-ei mara-ei. Jo anyolom iy asoh tobwe ari udu bwele-en iu, ma jo anuhun boho lakou ari ma mulin udu bolo oro ma hahuw nane asehek sahou, ma nyaro bohon badeh, i buku kuruh atohou. Iy asehek i buku doh, “Ou ame!”  
\v 2 Jo anyolom ja, ma jo atou hos belen ari eme! Ma ndramak ari manyah udu bwele-en, tawi beteleu udu minen. Iri atehei barak ari ta kabin udu batun, tasah iy winiyan ili bolo bahun, arile iri winiyan badai iy bamak bwe. Iy ili anya kamekes bahun hawe iri lau mwan ma badih ado kon munyak. Iy ili badeh, anya kidi iri marakon kano ka-au.   
\p
\v 3 Ano ja, jo anyolom Nadu Sipsip ta Kindrei asoh tobwe ari iu ja, eme ma jo anuhun boho lakou ari ma mulin badu bolo oro ma hahuw nane anya. “Ou ame!”  
\v 4 Ma jo anyolom hos ari ja, badan saraman asahan! Iri atehei boto-on i ta ndramak manyah udu bwele-en. Iy winiyan tolowei manyah mwasin tiri mwan ma badih badu kon munyak. Ma iy ale winiyan amekes bahun laba tinan asahan. Ma iy winiyan idi iri mwan ma badih amak ano au. Eme ma iri atehei laba samen gwak ari iri aloh bainat, i tan ta amekes gok doh.   
\p
\v 5 Idoh ano, jo anyolom Nadu Sipsip ta Kindrei asoh tobwe ari ja nane tobo-ei buk doh iu, idoh ili asahan taloh ai. Eme ma, jo anuhun boho lakou ari ma mulin udu bolo oro ma hahuw nane anya, “Ou ame!” Ma jo anyolom hos ari ja badan bokodon eme asahan! Ma ndramak ari manyah udu bwele-en badeh, tawi sikel ari udu minen.  
\v 6 Ma jo anuhun lakou buku boho ari ndramak udu ndrokowa oro lakou ma mulin ma hahuw nane. Iy tiye i buku doh, “Ou ala leheya iri gok tam, ma iri lau kameh niri nyamon bwe. Eme ma ndramas nane iri lau akohok ta len ari, idoh kameh winiyan ta sihinei nadu kun wit ari o nadu kun bali ma taloh le kabwe. Arile, aha salobwai kei olip ma waen mara-ei sa-au, eme ma ndrelekei ta olip hawe waen kameh udu luluwen kahis.”   
\p
\v 7 Ano, Nadu Sipsip ta Kindrei asoh tobwe ari ja nane tobo-ei buk iu, idoh ili asahan hahuw ai. Eme ma jo anuhun boho lakou ari ma mulin badu hawe oro ma hahuw nane, asehek i buku doh, “Ou ame!”  
\v 8 Jo anyolom ja, ma jo atou hos ari badan nyokowan. Ya ndramak ari manyah udu bwele-en, nyaran Imek. Ano hos ari udu mirihik tan eme ja, ma ndramak ari manyah udu bwele-en badeh, nyaran Jih, o, Ndrahune Iri Lau Ndrasu-u. Iri atehei boto-on i turu ta tukumwi iri mwan ma badih badu kon munyak ranah ma buruwen ala le se ta adai iri. Uru adai iri mwan ma badih ma lunoh limeh (25) badu bolo rinek (100) rakum rakum badu bolo kon munyak. Iri amekes doh badeh, na samen gwak raho, iri aloh bainat, ma son hawe iri sik solo-an ta adai lau amak, ma iri lakou bondriliu badu kon munyak ta adai lau solo-an ano au.   
\p
\v 9 Ano ja badeh, jo anyolom Nadu Sipsip ta Kindrei asoh tobwe ari ja iu, idoh i buku limeh ai, nane tobo-ei buk. Eme ma jo atou malawi iri lau mwasin rayah ndramak bwena ndra-au badeh, are bahandra mada koto-ok ta Kindrei. Malawi iri mwan ma badih doh, iri mwena mene ateu sahou ta Kindrei boto-on labai, ma atiye sahou ta budon handru doh, eme ma iri lau adai iri amak.  
\v 10 Malawi iri lau mara-ei nane doh, aloh boto-on labai ma ndremenya tiri i buku doh,  
\q1 “Laban, kabin ta lakou mara-ei.  
\q1 Ou ndrabun handru,  
\q2 ma iri kandriyen mara-ei ou amekes kede-eh, ndra handru le ai!  
\q1 Len sabe handru kameh ou anuhun sahou tiri mwan ma badih badu kon munyak,  
\q2 ma ou adeu bundruwe ndraye ahi ili tiri?”   
\p
\v 11 Ano, Laban tiye, ma iri rayah atehei awin lawe-en belen ili tiri malawi iri lau nane ari, ari ma iri tiye tiri i buku doh, “Aha kamunyau, ma katondrok sese op. Iri kameh adai iri lau taha rayah ala mene amekes gok hawe aha, ma hawe iri nadu tine aha rayah ta Kindrei, i buku le iri mene adai aha amak. Kindrei badeh, ndrandromwei kane lau sabe handru kameh amak, ano badeh, iy baramekes lakou ta bundruwe ndraye aha ai.”   
\p
\v 12 Idoh ano le badeh, jo anyolom Nadu Sipsip ta Kindrei asoh tobwe ari ja nane tobo-ei buk iu. Idoh ili asahan i buku onoh ai. Iy amekes i buku doh, ma jo atou ma atona ndroi tinan labai asahan kon munyak. Ma mada an ilik, ma asahan i bokodon mara-ei, i buku kolau bokodon, ma mada bun ale asaram, ma asahan i saraman i buku ndra.  
\v 13 Ma iri ndrau mara-ei badu kandrah badeh, taku eme andri kon munyak, i buku buwa kei pik mamakahis, jor laba tinan asahan eme rohoyani ili le bahan.  
\v 14 Kandrah ale badeh, amai laleyah, i buku ndrou boholahak iri lukumwiy. Ndroi asahan laba tinan, ma iri mandrei hawe busu mara-ei sosokok au ala rasi ja.   
\p
\v 15 Ano ja, jo anyolom iri kabin badu kon munyak mara-ei, hawe iri lau nyara iri tinan, iri kabin ta bwena tiri lau ta bahun, iri nadu batun, iri lau boto-on, iri lau ta amekes gok ta lau rayah buku bonyo-ou, ma iri lau are laleyah. Iri lau mara-ei doh badeh, tone iri ala bolo ndraban, ma mada munu bek udu bolo mandrei.\f + \fr 6:15 \ft Iri anoh labai, tasah iri ba-en hamon ta sahou mwasin ta Laban bwe.\f*  
\v 16 Iri aloh ili tiri mandrei ma bek mara-ei i buku doh, “Aha katohou kame andri bwele-e ahi, ma katubuluhi ahi kamai ta mada Kindrei, iy manyah udu bada koyeu ta kabin, ma ta losen ta Nadu Sipsip!  
\v 17 Tasah, len laba tinan ma losen turu anya kamekes keme tataha ta bundruwe lakou taha amekes badeh, ndrasahan nane dah. Eme ma ari mwan o badih winiyan bales ta losen doh ja bwe!”   
\c 7  
\s1 Iri 144,000 mwan ma badih badeh akohok kalem ta Kindrei  
\p
\v 1 Iri lakou marakon doh ano iu, eme badeh, jo anyolom oro angelo ma hahuw ales are kabede kon munyak ma hahuw: Rai, Tolau, Kum, ma Jaha, ma oro tawi siyer ma hahuw udu bwele-e munyak doh ihis mara-ei, ma jor kameh winiyan boloh munyak hawe ndras, o ra-ei kei bwe.  
\v 2 Ano jo atou angelo ari ja edek udu loboho Rai eme loken. Ma iy tawi kalem ta Kindrei ma mulin, ma iy aloh boto-on labai ili toro angelo ma hahuw nane, Kindrei ndratehei boto-on ndra toro ta oro kabokoro-ei munyak ma ndras mara-ei.  
\v 3 Angelo nane aloh ili toro i buku doh, “Ado kareu op, ado sabotatahan ta bokoro-ei kon munyak ma ndras ma hawe kei mara-ei iu. Ahi badeh, anya kadeu kalem ta Kindrei tataha kili bwili iri lau ta amekes gok tan op. Ano badeh, ado barabokoro-ei lakou mara-ei bara-au ai.”  
\v 4 Angelo ari nane asehek sahou ano, eme ma iri atalan ma adeu kalem ili tiri mwan ma badih. Ano jo anuhun iri aloh kane iri mwan ma badih, iri sabe handru akohok kalem ta Kindrei. Iri atehei kalem ili tiri 144,000 mwan ma badih, badu bolo iri lau mara-ei badu Isra-el.   
\li1
\v 5 Eme ma, iri mwan ma badih ma ralou luwa (12,000) badu boho kamen ta Juda, iri akohok kalem,  
\li1 ya ralou luwa (12,000) ja badu boho kamen ta Ruben,  
\li1 ma ralou luwa (12,000) ja badu boho kamen ta Gat,   
\li1
\v 6 ma mwan ma badih ma ralou luwa (12,000) ja badu boho kamen ta Asa,  
\li1 iri ralou luwa (12,000) ja badu boho kamen ta Naptali,  
\li1 iri ralou luwa (12,000) badu boho kamen ta Manase,   
\li1
\v 7 ma iri mwan ma badih ma ralou luwa (12,000) ja badu boho kamen ta Simiyon.  
\li1 Ya iri ralou luwa (12,000) badu boho kamen ta Libai,  
\li1 iri ralou luwa (12,000) badu boho kamen ta Isakar,   
\li1
\v 8 ya iri ralou luwa (12,000) badu boho kamen ta Sebulun,  
\li1 iri ralou luwa (12,000) badu boho kamen ta Josep,  
\li1 ma iri ralou luwa (12,000) badu boho kamen ta Benjamin.  
\p Iri lau mwan ma badih mara-ei doh badeh, akohok kalem ta Kindrei.   
\s1 Iri mwan ma badih solo-an labai atudun Kindrei  
\p
\v 9 Iri lakou mara-ei asahan madak nane doh amai iu, ano jo anyolom iri mwan ma badih, solo-an labai atukum are le se, ma ari mwan o badih winiyan bandromwei kane iri bwe. Iri lau doh badu kon munyak tinan mara-ei, ma iri badu boho kamen mari, ma bada iri badeh, randrah, randrah, ma iri badu boho kon rakon rakon badu munyak mara-ei. Iri lau mari doh badeh, ales are bwena ta koyeu ta kabin, ma mirihik ta Nadu Sipsip ta Kindrei. Iri nyosowani iri na awin lawe-en belen mara-ei, ma iri tawi la-u badou udu mine iri.  
\v 10 Iri mara-ei atehei boho iri i le se ma aloh i buku doh:  
\q1 “Ahi mara-ei atudun nyara Kindrei tataha,  
\q2 iy manyah udu bada koyeu ta kabin, hawe Nadu Sipsip tan.  
\q1 Uru mala-uh badeh, andrei taha ndrame hamon,  
\q2 ma taha ado mwasin labai mara-ei!”   
\p
\v 11 Iri angelo mara-ei ales awudi koyeu ta kabin, ma iri batun hawe oro lakou ma mulin ma hahuw. Iri mara-ei atehei bwili ndru-u iri i andri udu mirihik ta koyeu ta kabin ma atudun Kindrei i loken mara-ei.  
\v 12 Ma iri mara-ei tiye i buku doh:  
\q1 “Handru labai!  
\q1 Taha mara-ei sekesek labai ta Kindrei tataha,  
\q2 nyaran laba tinan labai!  
\q1 Budon marakon mwasin udu tan le ari,  
\q2 ma taha kadeu wurah kili tan,  
\q2 ma katudun nyaran kili loken mara-ei.  
\q1 Iy nyamun labai!  
\q1 Iri boto-on mara-ei udu tan!  
\q1 Iri lakou marakon nane doh badeh, tan le ari ta udu le buku doh!  
\q1 Handru labai!”   
\s1 Maha-an ma sisi-in tiri boho kamen mara-ei doh ndrano ai  
\p
\v 13 Ano, ndramak batun ari eme ndremenya jo i buku doh, “Ou tanam iri lau marakon asini awin belen kede-eh, ma iri badu loboho heh handru?”   
\p
\v 14 Jo eme tiye i tan i buku doh, “Ndramak tinan tek, ou amwenen badeh, tanam iri, jo bwe.”  
\p Ma iy asehek eme tek i buku doh, “Iri lau mwan ma badih mara-ei kede-eh mene ado bolo maha-an hawe sisi-in ame len, ma iri amak udu mine iri lau ndra-in ta bahun. Iri badeh, atehei iri budon tiri mara-ei in ta Jises le ari, ma iri akohok boto-on ta ndraye Nadu Sipsip ta amekes bahun hawe kandriyen ndra-in. Idoh i buku iri sikine awin tiri na ndrayen, ma asahan belen mara-ei.  
\v 15 Eme ma,  
\q1 iri mara-ei adeh, ales are mwena ta koyeu ta Kindrei kede-eh,  
\q2 ma atudun iy na ben ma len marakon udu bolo asiu tan tinan.  
\q1 Kindrei manyah udu bada koyeu tan,  
\q2 ma iy atondrok iri marakon ta udu le buku doh.   
\q1
\v 16 Eme ma iri marakon kameh winiyan bameson ma bale iri winiyan bamar ta gwa ja bwai.  
\q1 Ma an kameh winiyan basulumwi bada iri ja bwai.  
\q2 Iri kameh ado mwasin labai mara-ei!   
\q1
\v 17 Tasah Nadu Sipsip ta Kindrei badeh, ales udu le alih ta ka-u koyeu ta kabin,  
\q2 ma iy kameh atondrok iri marakon.  
\q1 Iy kameh sirini iri ala mana munu kaloh, gwa asahan aliy eme len,  
\q2 ma iri kameh a-un gwa kohan handru udu loboho doh.  
\q1 Ma Kindrei kameh owei wa-i mada iri mara-ei iu,  
\q2 ma iri kameh winiyan baden ja bwai.”   
\c 8  
\s1 Nadu Sipsip sudi tobwe ma ndro taloh ndra-au  
\p
\v 1 Nadu Sipsip sudi tobwe ma ndro taloh nane tobo-ei buk mara-ei iu le badeh, kandrah mundrindriyou kakan luluwen sese buku awa ranah.  
\v 2 Ano le badeh, jo anyolom oro angelo ma ndro taloh ales are mada Kindrei, ma iy atehei ndrah ma ndro taloh ili mine oro.   
\p
\v 3 Angelo ari ja, tawi bwekei raben nyikilikin labai udu minen, iy eme ales udu mirihik ta mada koto-ok. Iri atehei eh manahu buburen solo-an labai ili bolo bwekei tan ta adeu ili hawe salom tiri lau ta Kindrei mara-ei, ma atehei i ta salom ili bwele-e mada koto-ok nyikilikin nane ales udu mwena ta koyeu ta Kindrei.  
\v 4 Kasu-er ta eh manahu buburen nane ma hawe salom tiri mwan ma badih ta Kindrei mara-ei ruwani mine angelo nane, ma ales amwenen iu ili loken mada Kindrei.  
\v 5 Ano angelo andrei bwekei nane kasu-er ta eh manahu buburen udu aliy, ma iy andrei jih badu mada koto-ok, anyuhi ili bolo bwekei, ano iy akahei ili andri bwele-e kon munyak. Iy akahei ano le badeh, kuruh atohou, ma nyaro boho iri lakou marakon asahan, ma kalik takamek ili eme, ma ndroi asahan kon munyak.   
\s1 Oro angelo ma hahuw oloh ndrah toro ma bwena  
\p
\v 6 Ano oro angelo ma ndro taloh nane tawi ndrah ma ndro taloh udu mine oro ta anya koloh ai.   
\p
\v 7 Angelo ari ma mwena nane doh aluhi ndrah tan, eme ma gwa, bek hawe jih tubuniy hawe ndra, ma iy akahei iu ili andri bwele-e kon munyak. Jih nane doh badeh, anya ili sulumwi kon munyak ranah ma buruwen ano iu. Idoh, buku none apou kon munyak mara-ei i taloh, badeh, ranah badu bolo taloh doh andrakak ano iu. Ma hawe iri kei mara-ei nane badu loboho doh badeh, andrakak ano iu, hawe iri bwidiu nyorowan mwasin nane ateh udu loboho doh.   
\p
\v 8 Iy angelo ma mwena nane doh ano, iy ari ja udu hamon tan eme len oloh ndrah tan ja. Eme ma lakou ari i buku mandrei laba tinan anya buku jih ma atohou ales iu ili bolo ndras. Eme ma, buku ndras mara-ei apou i taloh, ndras ranah ma buruwen asahan i ndra.  
\v 9 Eme ma iri lakou mara-ei nane koha iri udu aliy, udu bolo ndras doh, mara-ei amak, ma hawe iri ndron mara-ei nane atas bolo ndras doh, andrakak ma mara-ei atuh ano labai.   
\p
\v 10-11 Iy angelo doh ano le badeh, iy ari in hamon tan eme len ja oloh ndrah tan. Idoh ili asahan taloh ai. Eme ma ndrau laba tinan lomadan anya tinan labai buku sun udu kandrah badeh, taku eme andri bwele-e gwa lakon ma gwa kaloh ranah ma buruwen. Nyara ndrau laba tinan nane doh badeh, iri aloh “Lakou Nyakadan.” Ya, i buku gwa doh ma tonoh (30) are bwele-e munyak mari, ronoh badeh, akohok andra-i. Gwa lakon ma gwa kaloh ranah ma buruwen doh badeh, asahan nyakadan, ma iri lau solo-an a-un gwa doh, ma nyekedei iri, ma iri mara-ei amak, tasah gwa mara-ei doh ndra nyakadan le ai.   
\p
\v 12 Iy nane doh ano le badeh, iy ari eme len oloh ndrah tan ja. Idoh ili asahan hahuw ai. Eme ma bwidi mada an, ma mada bun ma hawe mada ndrau andra-i; eme ma bwidi lomada oro banya bamwenen bwe; eme ma awa hahuw ta bolo len ma awa hahuw ta bolo ben badeh, asahan lulik le ai.   
\p
\v 13 Idoh ano le badeh, jo anyolom laba manyuwe ari atah bolo kandrah, ma jo anuhun iy eden i buku doh, “Tikisiy, tikisiy, tikisiy tinan labai tiri lau mara-ei are kon munyak. Oro angelo ma taloh anya koloh ndrah toro ja. Ma idah kameh sisi-in laba tinan ma ndra-in labai kameh asahan tiri mwan ma badih mara-ei are kon munyak.”   
\c 9  
\s1 Angelo ari ja eme oloh ndrah tan  
\p
\v 1 Ano angelo ari eme ja oloh ndrah tan. Idoh ili asahan limeh ai. Ma jo anyolom lakou i buku ndrau laba tinan ndrataku ndrame andri bwele-e kon munyak. Ma iri atehei lakou ari ta aseh kou ili ta ndrau doh ta aseh kou ta munu lek nane doh lawe-en, lawe-en labai iu ili ndraban, winiyan basilahei katin andri bwe.  
\v 2 Eme ma iy sihi kou ta lek nane doh, ma kasu-er asahan mana munu lek nane dah eme len i buku kasu-er ta jih laba tinan. Ma kasu-er udu mana munu lek nane doh eme loken, ili tubuluhi mada an, ma jor abakak eme bwidi kon munyak mara-ei asahan lulik.  
\v 3 Eme ma iri lakou i buku sabaye atah are bolo kasu-er nane doh ame andri ame kon munyak. Ma nyamu iri i buku le nyamu sabiyep badu kon munyak.  
\v 4 Ma iri badu kandrah tiye tiri i buku doh, “Aha sabwidi iri bwidiu sa ndra-i o, ma kei hawe iri lakou rayah ale ateh udu bwele-e munyak, idoh badeh, ndri-iy labai. Gok taha handru badeh, ta sokoso-ou iri mwan ma badih nane, kalem ta Kindrei bado bwili iri bwe.  
\v 5 Aha badeh, kadeu le sisi-in kili tiri, winiya bun ma limeh, arile aha sadi iri samak.” Ma hawe iri lakou nane doh atoh iri lau, ma lihi iri sisi-in tinan labai i buku sabiyep atoh lau, ma amekes sisi-in laba tinan labai ili tiri.  
\v 6 Udu bolo bun ma limeh nane doh badeh, iri kameh asilah imek, arile iri winiyan basilahei iy bwe, iri aso-ok ta amak, arile imek badeh, atobwak le tiri.   
\p
\v 7 Iri sabaye badeh, kone iri i buku hos, iri lokowani iri ado le ta anya kamekes bahun; udu bwele-e batu iri, iri atehei lakou buku barak bek nyikilikin, ma mada iri badeh, i buku mada iri lau.  
\v 8 Ma lami batu iri badeh, i buku lami batu iri badih, ma lihi iri badeh, i buku lihi iri layon.  
\v 9 Iri tubuluhi batala iri na awin iri amekes na kapa o hayen, ma kurutuwe bani iri badeh, i buku nyaro iri hos ariu karis ili ta bahun.  
\v 10 Kiwi iri badeh, udu aliy, i buku kiwi sabiyep ta atoh lau, ma boto-on tiri badeh, udu kiwi iri ta amekes sisi-in ili bada iri lau ta udu le buku doh, winiya bun ma limeh ano.  
\v 11 Kabin tiri udu aliy ta atondrok iri badeh, angelo ari udu mwena ta mana munu lek nane doh. Ili boho iri Hiburu badeh, iri aloh nyaran Abadon. Ya boho iri Grik badeh, iri aloh iy Apoliyon. Moson ta aliy i buku, “Ndramak ta bokoro-ei iri lakou mara-ei ano iu.”   
\p
\v 12 Maha-an mara-ei laba tinan ma mwena doh badeh, ndrano ai. Arile, aha kanuhun kamwenen! Maha-an ma la-uh laba tinan badeh, kahis le, idah kameh asahan hamon.   
\s1 Angelo ari eme len ja oloh ndrah tan  
\p
\v 13 Maha-an doh ano badeh, eme angelo ari ja eme len oloh ndrah tan. Idoh asahan ili onoh ai. Eme ma jo anuhun boho ndramak ari udu bolo ndrokowa kasoh ma hahuw nane ales udu ka-u mada koto-ok nyikilikin labai udu mada Kindrei.  
\v 14 Boho ndramak nane asehek sahou ili ta angelo nane tawi ndrah tan i buku doh, “Ou tolowei oro angelo ma hahuw badeh, are bolo asiu lulik udu bolo gwa tinan Yupretis, kame manan ma ka-au laleyah.”  
\v 15 Oro angelo doh badeh, ndralowosani oro ndra bwena ado le ai, ta atondrok le jaha, bun, len, ma awa amwenen ta amekes gok nane doh. Iy eme tolowei oro angelo ma hahuw nane ame len, oro kameh tukumwi lau mwan ma badih mara-ei badu kon munyak ki tulukum, ano adai iri rakum ma buruwen ano au.  
\v 16 Iri ame tiye tek ta kane iri lau nane manyah ado bwele-e iri hos ta amekes bahun, i buku 200 miliyon (200,000,000), solo-an labai, ou winiyan bandromwei bwe.  
\v 17 Ma udu bolo ameh tek doh badeh, jo anyolom iri hos ma iri lau manyah ado bwele-e iri. Iri tubuluhi batala iri na awin iri amekes na kapa hawe hayen, ma tariye awin tiri doh badeh, saraman mara-ei, nyarawin mara-ei, ma nyokowan mara-ei i buku solpa. Batu iri hos marakon doh badeh, i buku batu iri layon, ma jo anyolom jih ma kasu-er hawe solpa andrakak ma atas udu boho iri eme len.  
\v 18 Eme ma bwidi lau badu kon munyak ranah ma buruwen amak na lakou nane doh udu boho iri hos eme len. Idoh, buku iri lau ma tuluwi (3,000) are aliy, jih ma kasu-er hawe solpa andrakak badeh, bwidi iri lau ma rawa (1,000) amak ano au.  
\v 19 Boto-on tiri hos mara-ei nane doh badeh, udu boho iri ma kiwi iri. Kiwi iri badeh, i buku mwak, batun udu aliy ta atoh iri lau ma amekes sisi-in i bada iri.   
\p
\v 20 Iri lau mwan ma badih rayah ma buruwen bamak ta lakou ndra-in nane bwe, iri ale badeh, batubuni ndrine iri bwe, ma batehei kona iri bala tiri lakou, iri nane amekes na mine iri amwenen bwe le. Ya, iri ale baruwani kandriyen ta atudun malawin ndra-in bwe, ma hawe iri kindrei ta wasai, iri amekes na bek nyikilikin, ma silba hawe bras, ma bek hawe kei. Iri lakou marakon doh badeh, winiyan banuhun sahou bwe, iri banyolom kon bwe, ma iri winiyan badek bwe.  
\v 21 Iri lau mwan ma badih doh badeh, mene adi iri mwan ma badih rayah, ma iri amekes nyam balahak, ma iri a-en hamon tiri kandriyen ta karei, ma bahana lakou tiri lau laleyah, arile iri batubuni ndrine iri, ma batehei kona iri bala tiri kandriyen mara-ei nane doh bwe.   
\c 10  
\s1 Angelo atehei buk ili mine Jon ma iy iniy  
\p
\v 1 Lakou ndra-in nane doh ano iu, ano jo anyolom angelo ari, boto-on labai udu bolo kandrah eme andri. Iri nyosowani iy na asi kandrah hawe beteke nyabwiu awudi batun udu le alih; madan badeh, i buku le an, ya katin ja badeh, i buku ndru laba tinan amekes na jih.  
\v 2 Iy tawi buk ari nadu bwisik asak le udu minen. Ya, iy nyahani katin salin udu bwele-e ndras, ya katin kamweu badeh, udu bwele-e kon munyak.  
\v 3 Iy nyahani katin mala-uh ano badeh, iy ataba bohon i tinan mara-ei, ma nyaro bohon badeh, i buku layon anyur. Iy aloh ano le badeh, nyaro kuruh ma ndro taloh atohou ili le rasan.  
\v 4 Nyaro kuruh ma ndro taloh nane atohou ili le rasan ano le badeh, jo eme anya katorou sahou toro nane amekes. Arile, jo anuhun boho ndramak ari udu bolo kandrah asehek sahou eme tek ja i buku doh, “Ou satorou sahou toro kuruh ma ndro taloh nane atohou ili le rasan doh. Ou tawiy kihis kudu budon tam le ka-iy.”   
\p
\v 5 Udu hamon toro lakou nane ano badeh, jo anyolom iy angelo nane nyahani katin raka udu bwele-e ndras ma raka udu bwelee munyak badeh, suri minen salin nyowonya amwenen iu ili kandrah.  
\v 6 Ma iy asehek sahou tandrakan handru iu ili loken labai ta nyara Kindrei, iy winiyan bamak bwe, iy kameh ta udu le buku doh, iy bwidi kandrah, ma iri lakou mara-ei udu aliy, munyak ma lakou mara-ei udu bwele-en, ndras ma lakou mara-ei udu aliy. Iy angelo nane asehek i buku doh, “Len anya kano ai. Kindrei kameh winiyan babe-en ja bwai!”  
\v 7 Arile, iy angelo ndro taloh doh ili oloh ndrah tan, ma nyaro ndrah tan asahan, ma, na le liliy, iri lakou mara-ei nane Kindrei anya kamekes i san ta gok ta nadun, mara-ei kameh ano. Iri tanan mene ta gok ta Jises kameh amekes bame lewan bwe, tasah bwena mene Kindrei badeh, tone udu tiri lau mwan ma badih. Arile, udu hamon ja badeh, iy nyowaniy, ma iy atehei ili mine iri lohowan tan, iri badeh, propet tan ta asehek ili tiri lau mara-ei.   
\p
\v 8 Ano ja boho ndramak nane jo anuhun udu bolo kandrah, iy badeh, asehek sahou eme tek ja i buku doh, “Ou ala andrei buk ndrasihiy le udu mine iy angelo nane ales udu bwele-e ndras ma munyak.”  
\v 9 Jo eme edek amwenen ili hawe iy angelo nane, ma jo ndremenya iy katehei nadu buk nane doh keme minek. Iy eme tiye tek i buku doh, “Idoh, ou andrei, ma ou aniy; idah kameh, i titi-in udu bolo ndrinem, arile simidin udu bohom kameh, nyaman labai i buku gwa ta bwirik.”  
\v 10 Jo eme andrei nadu buk nane udu minen, jo atehei ili bohok, ma jo aimon, ma simidin badeh, nyaman labai i buku gwa ta bwirik udu bohok. Arile, udu hamon ta jo sakalamiy, titi-in ta aliy ja badeh, udu bolo ndrinek.   
\p
\v 11 Ano iri ado kandrah tiye sahou eme tek i buku doh, “Ou ala asehek sahou ta Kindrei dah ja, ta iri lakou mara-ei kameh asahan tiri lau, bada iri randrah, randrah, ma tiri lau badu kon munyak tinan mara-ei, ma tiri lau asehek boho kon rakon rakon badu kon mari, ma tiri kabin ale.”   
\c 11  
\s1 Uru propet ma la-uh atiye sahou  
\p
\v 1 Udu hamon ta lakou nane doh ano, ndramak ari atehei lakou i buku kandro ari eme tek. Kone kandro doh i buku kei ta tumundroh iri lakou na aliy. Ma iy tiye eme tek i buku doh, “Ou suri ou, ma ou ala tomondrohei lawe-en ta asiu ndrabun ta Kindrei, ma mada koto-ok tan. Ma ou andromwei kane iri lau mwan ma badih, ma iri sabe handru asolom ala aliy.  
\v 2 Arile, ou satomondrohei lawe-en ta kowah udu manan nane awudi asiu ndrabun ta Kindrei. Idoh badeh, ndri-iy ai, ou ruwaniy kere gwek. Tasah, bolo kowah badeh, tiri lau badu Isra-el bwe, ma iri kameh amekes bahun ta akohok kon tinan ndrabun mara-ei, ma iri kameh atondrok ili winiya bun ma hanoh la-uh (42) ano.  
\v 3 Ma jo kameh edeu boto-on i ta lau tek la-uh ta atiye sahou propet tek i tiri lau. Uru kameh asini awin ta tikisiy; ma uru kameh atiye sahou tek udu bolo iri len ma rawa lunek ndro hanoh (1,260)\f + \fr 11:3 \ft Len ma rawa lunek ndro hanoh (1,260) doh badeh i buku le bun ma hanoh la-uh (42) amwenen, i buku kalan 11:2 asehek ta aliy.\f* mara-ei doh.”   
\p
\v 4 Uru lau tek ma la-uh doh kameh, i buku kei olip ma lu-ei, ma ndru-u sun ma la-uh ales udu bwena ta mada Laban atondrok kon munyak mara-ei.  
\v 5 Buku iy are lau anya kanone ta idi uru badeh, jih kameh udu boho uru eme len, ma sulumwi are lau nane anya kamekes bahun kili turu. Ya, idoh handru, buku are lau anya kamekes ndra-in kili turu badeh, ta kandriyen doh le kameh iri amak le kabwe.  
\v 6 Uru lau ma la-uh nane doh badeh, Kindrei atehei boto-on tan i turu, ta turuki kandrah, ta ur winiyan bandruk na bolo len mara-ei nane, uru atiye sahou ta Kindrei bwe. Kindrei atehei boto-on i turu ale, ta tobolowe gwa asahan ndra, ma bokoro-ei iri lau marakon badu kon munyak ta iri lakou solo-an ndra-in. Len mara-ei, buku uru anya kamekes lakou doh, uru winiyan amekes le ai.  
\v 7 Buku uru bwidi gok ta atiye sahou ta Kindrei mara-ei ano badeh, nyabwe lakou ari kameh udu mada munu lek nane lawe-en labai, ari katin bwe, badeh kameh ruwani lek doh edek eme len. Buku iy eme len badeh, iy kameh amekes bahun hawe uru lau nane, ma iy kameh idi uru ma la-uh amak.  
\v 8 Bada kei turu lau ma la-uh doh kameh i tondreh in san tinan ta kon tinan, taha asehek sahou sokek ma taha aloh nyara kon doh, Sodom ma Ijip, kon doh mene iri adi Laban turu udu aliy.  
\v 9 Iri lau bada iri randrah, randrah, ma iri boho kamen mara-ei, ma iri boho kon mari, ma iri lau badu kon munyak tinan mara-ei kameh anyolom bada kei ma la-uh doh kameh winiya len taloh ranah, ma iri lau doh kameh bwale iri anya iri lau badu kon tinan nane doh sahi uru sala lek, bada kei turu kudu mada iri lau kanyolom.  
\v 10 Eme ma, iri lau badu kon munyak mara-ei kameh sekesek labai, tasah ta imek turu lau ma la-uh nane doh. Iri kameh amekes nyamon laba tinan, ma iri adi mana, ma iri adeu ndramas ili ta kawas tiri le amwenen, tasah uru propet ma la-uh doh badeh, amekes maha-an ma sisi-in ndra-in labai ili tiri lau mara-ei badu kon munyak.   
\p
\v 11 Udu hamon ta len taloh ranah nane doh ano badeh, Kindrei aluhi kohan ili turu, ma uru suri uru ales; ma iri lau anyolom uru, ma mani iri mara-ei atur, ma iri anoh andra-i labai.  
\v 12 Ano badeh, uru anuhun boho ndramak ari, udu kandrah, aloh boto-on labai ili turu i buku doh, “Ah kame loken dah.” Eme ma iri lau nane amekes bahun hawe uru, anyolom uru au ala bolo asi jor, ma amwenen au ala bolo kandrah.  
\v 13 Se nawin bwe ja, na le liliy, ndroi laba tinan mara-ei labai asahan, ma kon tinan ranah ma buruwen atohou iu. Idoh i buku apou kon tinan doh i ronoh, ya ranah ma buruwen atohou iu, ma iri lau ma ndru tuluwi (7,000) amak. Eme ma iri lau mwan ma badih nane arah ado badeh, anyolom ma bwidi iri anoh mara-ei, ma iri nyowonya iri kandriyen ndra-in tiri, ma tubuni ndrine iri, eme ma iri atudun nyara Kindrei, iy udu kandrah.   
\p
\v 14 Len ta sisi-in mala-uh nane ndrameres ndra-au ai; arile mada aha kere loken! Mirihik ai, len ta sisi-in kameh asahan ja.   
\s1 Angelo ndro taloh doh eme len oloh ndrah tan  
\p
\v 15 Ya, angelo ndro taloh doh badeh, badu hawe oro ma onoh nane eme len oloh ndrah tan, eme ma boho iri lau rayah asehek sahou boto-on labai udu kandrah i buku doh,  
\q1 “Laban tataha Kindrei hawe Mesaya tan, uru mala-uh ndrasahan kabin ta kon munyak mara-ei,  
\q1 ma iy kameh atondrok udu le buku doh!”   
\m
\v 16 Eme ma oro batun ma lunoh hahuw (24) nane manyah are bada koyeu tiri kabin mirihik ta mada Kindrei, badeh, atehei bwili iri i andri bada munyak, ma oro atudun nyara Kindrei.  
\v 17 Eme ma oro anya,  
\q1 “Aso adeu wurah ewek tam, Laban,  
\q1 Ou Kindrei, iri boto-on mara-ei udu minem.  
\q1 Na nane dah ou are aliy, ma ndra bwena mene ou are aliy ale.  
\q1 Ou ndrandrei iri boto-on tam mara-ei,  
\q2 ma ou asahan kabin ta atondrok kon mara-ei ai.  
\q1 Eme ma ahi adeu wurah ewek tam.   
\q1
\v 18 Eme ma iri lau mwan ma badih nane tana iri Kindrei bwe badeh, abo losen labai,  
\q2 arile len ta losen tam badeh, ndrasahan.  
\q1 Len doh kameh ou ariu iri mwan ma badih mene ndramak ame ta mada sahou.  
\q1 Len doh badeh, ta adeu ndramas mwasin ili tiri lau ta amekes lahou tam badeh, ndrasahan;  
\q2 iri a buku iri propet tam, ma iri mwan ma badih ou aloh iri badeh, lau tam,  
\q2 ma iri mwan ma badih nyara iri tinan ma iri mwan ma badih nyara iri bwe,  
\q2 iri badeh, atudun nyaram, ma iri anuhun sahou tam ma a-en hamon ta aliy.  
\q1 Ma len ale ndrasahan ta ou kameh bokoro-ei iri mwan ma badih mene amekes bahun  
\q2 ma adi iri lau mwan ma badih mwasin mene are kon munyak.”   
\p
\v 19 Sahou ano le badeh, asiu ta Kindrei ndrabun udu kandrah badeh, asak, ma bwisi sahou randra le ta Kindrei badeh, udu le lewan bolo asiu ndrabun tan. Ma kuruh atohou, kalik takamek ili eme, ma nyaron asahan tinan labai, ma kon munyak totoreh, ma mada ur asahan i buku bek, ma indruk iroh eme andri bwele-e kon munyak.   
\ms1 Satan hawe iri lau tan andra-i mara-ei  
\mr (Kalan 12–20)  
\c 12  
\s1 Kundruh ta badih ari hawe mwak laba tinan banin ere aliy  
\p
\v 1 Ano badeh, jo anyolom lakou randrah labai asahan bolo kandrah, ma bohok asak ta aliy. Jo anyolom badih ari udu aliy, ma iy asini an i nyara awin tan, ma bun udu bahandra katin, ma ndrau ma ronoh la-uh badu kandrah i nyara barak udu batun.  
\v 2 Nadun ere tan, ma sisi-in ta iy anya kedeu nah badeh, asahan tan. Ma sisi-in doh badeh, ndra-in labai, eme ma iy anyar iy ta anya kedeu nadun.  
\v 3 Ano badeh, jo anyolom kalem ari ja asahan bolo kandrah ale. Lakou doh, i buku mwak laba tinan banin ere aliy. Badan saraman mara-ei, ma batun ma ndro taloh, ma kasoh ma ronoh udu batun, ma hawe barak ma ndro taloh ta kabin udu batun ari ari.  
\v 4 Kiwin badeh, asiri ndrau ranah ma buruwen badu kandrah, ma akahei mari iu ili andri kon munyak. Ya, ndrau ma lubuk le badeh, erah udu kandrah ai. Mwak laba tinan nane banin ere aliy badeh, ales ere batala iy badih nane, atondrok ta anya kaimon nadu i badih nane doh, buku iy atehei iy eme le len.   
\p
\v 5 Eme ma iy badih nane dah atehei nadun mwan eme len, ma hamon kameh, iy ta atondrok iri lau mwan ma badih mara-ei badu kon munyak, ma tondrok tan kameh boto-on labai. Ya, iy akahei nadun eme len le badeh, iri angelo ame bwese-ei iy nah nane ma mwasin amwenen iu ili bada koyeu hawe Kindrei.  
\v 6 Eme ma iy badih nane dah atobwak iu ili lokei, loboho kon lomale an lau bado aliy bwe. Loboho doh badeh, Kindrei ndralowosaniy le, ta iy badih doh kameh ili udu aliy. Ma iri kameh atondrok iy, ma adeu nan nyamon ili ili winiya le len ma rawa lunek ndro hanoh (1,260) ano.   
\p
\v 7 Ano, bahun laba tinan atohou udu kandrah, ya Maikel hawe oro angelo tan amekes bahun hawe mwak laba tinan banin ere aliy, ma mwak hawe iri angelo tan amekes bahun ili hamon ili toro ale.  
\v 8 Arile, mwak laba tinan nane banin ere aliy hawe oro angelo tan badeh, bala winiyan bwai, eme ma iy hawe oro angelo tan badeh, winiyan bado kandrah ja bwai.  
\v 9 Eme ma oro angelo ta Kindrei akahei iy mwak laba tinan banin ere aliy hawe oro angelo tan, ame andri kon munyak. Iy mwak laba tinan banin ere aliy doh badeh, ndra bwena labai, ma nyaran badeh, “Balik” o “Satan”\f + \fr 12:9 \ft Sahou Satan badeh moson, Iy ndramak ta orou sahou i bada iri lau mwan ma badih.\f* Ma iy ndramak ta wendreya iri lau mwan ma badih mara-ei badu kon munyak. Oro akahei iy hawe oro angelo tan ame andri kon munyak.   
\p
\v 10 Ano badeh, jo anuhun boho ndramak ari badu kandrah asehek sahou boto-on labai anya,  
\q1 “Nadah, Kindrei tataha badeh, ndrandrei taha ndrame hamon.  
\q1 Iri mwan ma badih mara-ei badeh, ndranyolom boto-on tan,  
\q2 ma iy ndrasahan kabin.  
\q1 Ma Krais badeh, akohok nyaran ta atondrok iri mwan ma badih mara-ei.  
\q1 Tasah, balik badeh, iy ndramak ta ili hawe Kindrei na len ma na ben mara-ei ta orou sahou i bada iri lau ta Kindrei, ta lakou iri amekes.  
\q2 Iri angelo ndrakahei iy udu kandrah ndrame andri kon munyak.   
\q1
\v 11 Iri mwan ma badih ta Kindrei tataha badeh, ndrame len laleyah ta mada iri sahou ndra-in nane balik tiyaniy ili mine Kindrei ta iri kandriyen mara-ei iri amekes.  
\q1 Tasah Jises badeh, imek udu bada kei tondreh,  
\q2 ma ndrayen amou tubuluhi kandriyen ndra-in tiri mwan ma badih nane atehei budon tiri mara-ei in tan.  
\q1 Eme ma, ta idoh le badeh, iri mara-ei ndrasakalawi balik.  
\q1 Ma iri ale atiye sahou tan mwasin,  
\q2 ma ta kandriyen nane doh, iri ndrasakalawi kandriyen ndra-in tan.  
\q1 Iri batehei budon tiri ba-en ta manyah tiri badu munyak bwe.  
\q2 Iri badeh, alelei ili le mine iri lau nane a-en hamon ta balik adai iri amak.   
\q1
\v 12 Ya, iri angelo badeh, ndratikahei balik udu kandrah ndra-au.  
\q1 Eme ma aha marakon ala are kandrah, aha kasekesek labai kare aliy ai!  
\q1 Arile kon munyak ma hawe iri lau mwan ma badih marakon are aliy, bale aha ki-in taha!  
\q1 Balik badeh, ndrawek andri kon munyak hawe aha ma iy ibo losen tinan labai!  
\q1 Iy tanan, len tan badeh, ndrame mirihik labai,  
\q2 ma Kindrei kameh tobohei iy ta iri lakou mara-ei iy amekes.”   
\p
\v 13 Mwak laba tinan banin ere aliy, ndratanan buku iri badeh, ndrakahei iy udu kandrah ndrame andri kon munyak, eme ma iy eme in hamon ta iy badih mene tuwi nadun mwan.  
\v 14 Arile, iri angelo atehei bani manyuwe ma la-uh i ta iy badih nane doh, ta iy winiyan atah iu ili lokei bolo kon lomale an, lau bare aliy bwe. Loboho doh badeh, Kindrei ndralokowaniy le. Eme ma iy winiyan udu len labai ta mwak laba tinan banin ere aliy. Ma iri angelo ale kameh winiyan atondrok iy ta nyamon udu loboho doh, winiya jaha taloh ranah.  
\v 15 Eme ma mwak laba tinan banin ere aliy badeh amuri gwa udu bohon eme len. Gwa udu bohon eme len doh badeh, asahan i buku wadah arorou in hamon ta iy badih nane doh. Mwak laba tinan banin ere aliy anya, gwa arorou in hamon tan doh kameh winiyan teheyani iy badih doh amai iu mara-ei.  
\v 16 Arile bwe. Munyak badeh, sebenei iy badih doh. Munyak sihi bohon asak, ma iy anyuwi gwa mara-ei nane amou udu boho mwak laba tinan banin ere aliy eme len, mara-ei ano iu ili ndrinen.  
\v 17 Eme ma mwak laba tinan banin ere aliy badeh, ndrinen ibolosen i ta iy badih nane doh, ma iy eme anya kamekes bahun hawe nadun iri rayah ja. Idoh, iri lau mwan ma badih nane iri anuhun ma a-en hamon ta sahou ta Kindrei, ma iri atiye sahou mwasin ta Jises ma a-en hamon tan. Eme ma mwak laba tinan banin ere aliy nane dah, ili ales in babi.   
\c 13  
\s1 Nyabwe ndras apek eme loken  
\p
\v 1 Ano ja, jo anyolom nyabwe ndras ari apek udu bolo ndas eme loken. Kasoh tan ma ronoh, ma batun ma ndro taloh. Kasoh ma ronoh udu batun doh badeh, barak tiri kabin ma ronoh badeh, udu toro kasoh doh. Ya, batun ma ndro taloh doh badeh, nyara lakou rayah ere aliy. Ya, kati nyara iri lakou doh badeh, nyowonya iri sondrokonya mari ili bada Kindrei.  
\v 2 Jo anyolom nyabwe ndras nane doh, konen i buku ari lepat. Katin badeh, i buku kati lakou ari iri aloh be, ya bohon ja badeh, laba tinan i buku boho layon. Ya, mwak laba tinan banin ere aliy badeh, edeu boto-on ili tan. Iy atehei iy asahan kabin i buku le iy ta manyah in bada koyeu tan amwenen.  
\v 3 Ma jo anyolom batu nyabwe ndras ari i buku baka ndrana udu aliy bwena, iy mene ndra-in ta adai iy imek, arile ndramon ja. Boho iri mwan ma badih mara-ei badu kon munyak asak ta aliy, ma bwidi iri a-en hamon ta nyabwe ndras nane udu bolo ndras apek eme loken.  
\v 4 Iri mwan ma badih mara-ei badeh, atudun mwak laba tinan nane banin ere aliy, tasah iy ndranyumusi boto-on tan ndrala ta nyabwe ndras nane. Iri ale atudun iy, ma iri tiye i buku doh, “Are lau handru i buku nyabwe ndras doh? Are handru winiyan amekes bahun hawen?”   
\p
\v 5 Eme Kindrei alelei ili le minen ta arah bohon laleyah ta atudun iy le, ma ta bobose Kindrei. Ma Kindrei atehei boto-on tan ere gwek ta amekes iri kandriyen doh winiya bun ma hanoh la-uh (42).  
\v 6 Eme ma, iy arah bohon ta bobose Kindrei, iy sondrokonya Kindrei ma kon tan, ma hawe iri lau ta Kindrei ado kandrah.  
\v 7 Eme ma Kindrei alelei ili le tan ta amekes bahun hawe iri mwan ma badih nane a-en hamon ta sahou ta Kindrei, ma adi iri amak ma ta atondrok kon tiri. Ma iy akohok boto-on ta asahan kabin ta boho kamen mara-ei are kon munyak, ma iri lau bada iri randrah, randrah, ma iri boho kon rakon rakon badu kon munyak, ma iri lau badu kon munyak tinan mara-ei.  
\v 8 Iri lau mara-ei badu kon munyak ale, nyara iri bado bolo buk ta Kindrei bwe, udu ndra bada len Kindrei mene amekes kon munyak, iri mara-ei doh kameh winiyan bakohok kohan handru bwe, arile iri kameh atudun nyara nyabwe ndras nane. Buk doh badeh, buk ta ndramak konen i buku Nadu Sipsip ta Kindrei, bwena mene iri lau adai iy imek.   
\p
\v 9-10 Iri lau mwan ma badih mara-ei nane anuhun sahou dah, iri kabudon kamwenen, ma iri ka-en hamon ta aliy.  
\q1 Iri lau nane Kindrei ndraluhi nyara iri ta ala bolo asiu lulik,  
\q2 iri doh kameh ta ala le ai.  
\q1 Ya, iri lau heh nane Kindrei ndraluhi nyara iri ta amak na samen,  
\q2 iri doh kameh ta amak le ai.  
\m Udu ndra bada len, kandriyen dah asahan, iri lau badu hawe Kindrei badeh, kales boto-on ma katawi budon tiri mara-ei handru kihis.   
\s1 Nyabwe munyak abusuk bolo ndren ma atas eme loken  
\p
\v 11 Udu hamon ta nyabwe ndras amai ta madak, jo anyolom nyabwe munyak ari ja abusuk bolo ndren ma atas eme loken. Jo anyolom kasoh ma la-uh udu batun, ya kone nadu kasoh ma la-uh udu batun doh badeh, i buku ta nadu sipsip. Arile, nyaro sahou tan badeh, tinan labai i buku le ta mwak laba tinan nane banin ere aliy.  
\v 12 Iy ndrandrei boto-on mara-ei ta nyabwe ndras nane eme bwena, iy andrei doh ta amekes iri gok tan udu madan. Iy amekes gok boto-on labai ta ariu iri mwan ma badih are kon munyak, katudun nyabwe ndras eme bwena nane. Iy mene baka ndrana ndra-in ta adai iy imek, arile ndramon ja.  
\v 13 Iy nyabwe munyak nane dah amekes iri kalem ma lahou tinan; kalem ari badeh, iy amekes i buku doh: Buku iri mwan ma badih anyolom iy badeh, iy kameh bwidi jih udu kandrah eme andri kon munyak.  
\v 14 Nyabwe ndras badeh, udu aliy, ya Kindrei badeh, alelei nyabwe munyak nane doh kamekes kalem udu mada nyabwe ndras. Ma ta kandriyen nane iy ndrawendreyani iri mwan ma badih badu kon munyak. Eme ma iy tiye iri lau i buku doh: “Aha badeh, kasihidi ari sukumada kei, konen ki buku nyabwe ndras kede-eh, ta aha katudun nyaran. Iy nyabwe ndras doh ale mene samen ari sese le kidi iy kimek, arile badi iy bamak bwe, iy udu kede-eh kahis.”  
\v 15 Eme ma Kindrei alelei iy, ma iy atehei kohan i ta sukumada kei doh, ma iy asehek sahou. Buku iri lau rayah batudun, ma batehei bwili ndru-u iri bala andri ta sukumada kei nane doh bwe, iy kameh tiye iri lau rayah ja ta adi iri mara-ei amak ano au.   
\p
\v 16 Eme ma nyabwe munyak nane dah tiye iri lau tan rayah ta kadeu ari kalem kili mine iri salin o kudu bwili iri lau mara-ei badu kon munyak: iri lau laleyah, iri lau nyara iri tinan, iri lau nadu batun, ma iri lau tiri lakou bwe, iri lau bonyo-ou, ma hawe iri lau ndrame len ta kandriyen ta bonyo-ou ma are laleyah.  
\v 17 Eme ma, buku are mwan o badih, kalem ta nyara nyabwe munyak doh bwe, iy kameh winiyan basih lakou tiri lau rayah ja bwe, ma iri amwenen winiyan basih lakou tiri bwe le. Ya kalem doh badeh, nyara nyabwe munyak, o kane nyaran.   
\p
\v 18 Taha kabudon kamwenen ta lakou doh. Lau mwan ma badih, tanan tiri udu aliy, iri kondrek kane nyara nyabwe munyak kamwenen labai. Idoh badeh, kane lakou ta ndramak ari labai, ma kane lakou ta iy ndramak doh badeh, asahan buku ndro hanek ndro hanoh onoh (666).\f + \fr 13:18 \ft Len mene iri atorou boho iri Grik ma boho iri Hiburu, sahou tiri ta ondrek iri lakou buku ari, la-uh, taloh badeh, aliy bwe. Iri atorou le leta “a” i nyara kane lakou asahan “ari” le; leta “b” iri atorou i nyara kane lakou asahan ma “la-uh;” ma iri amekes ili le i buku doh. Eme ma, i buku ou anyolom leta ari, ari badu bolo nyara ari lakou o nyara ndramak ari badeh, ou winiyan ondrek kane iri leta ta bolo nyara lakou doh. Ya, i buku ou tukumwi kane iri leta doh i se badeh, kane lakou doh asahan. Ya, i san ta ondrek lakou doh, kane nyabwe munyak badeh asahan 666.\f*   
\c 14  
\s1 Iri lau mwan ma badih ta Nadu Sipsip ta Kindrei ayah wari ha-un  
\p
\v 1 Ano badeh, jo anyolom ili kandrah ja, ma jo anyolom Nadu Sipsip ta Kindrei, iy ales udu bwele-e mandrei ta Sayon, hawe iri mwan ma badih kane iri 144,000 ales are hawen. Ma nyara i Nadu Sipsip doh, ma nyara taman badeh, torowenei udu bwili iri.  
\v 2 Ma jo anuhun nyaro sahou ari doh mwasin labai udu kandrah eme i buku nyaro goi laba tinan, ma buku kuruh atohou. Jo anuhun nyaro lakou doh, i buku iri lau adi ndran solo-an doh, iri aloh hap.  
\v 3 Iri 144,000 mwan ma badih doh badeh, ales ma ayah wari ari ha-un, iri badeh, are mirihik ta koyeu ta Kindrei manyah udu aliy, hawe oro lakou ma mulin ma hahuw, ma mirihik ale toro batun ma lunoh hahuw (24). Kindrei ndrandrei iri lau mara-ei doh ndrame hamon. Iri mene badu bolo iri lau badu kon munyak mara-ei. Eme ma oro le 144,000 mwan ma badih doh badeh, kameh winiyan ta atanan moso kati wari nane oro ayah doh. Ari mwan o badih udu kede-eh ja kameh winiyan ta akohok tanan ta kati moso wari doh ja bwe.  
\v 4 Sahou sokek ari badeh, asahan i buku doh: Iri badeh, a buku iri lau mwan, iri bamadin sese hawe iri badih, ma bamekes karei hawe iri, bwe. Iri ma buruwen kahis. Ma iri kon mara-ei nane, Nadu Sipsip anya kili aliy, san nane doh le badeh, iri lau a-en hamon tan. Kindrei mene ndrakonohei iri are bolo iri lau mara-ei badu kon munyak, iri ma bwena handru, Kindrei mene konohei iri. Ma iri badeh, asahan lau tan hawe lau ta ndramak ari, konen i buku Nadu Sipsip.  
\v 5 Iri mara-ei badeh, bamekes ari sahou wendreya o ari kandriyen ndra-in ta karei bwe.   
\s1 Oro angelo ma taloh ame asehek sahou  
\p
\v 6 Udu hamon ta lakou doh ano badeh, jo anyolom angelo ari atah ili bolo kandrah. Gok tan badeh, ta atiye sahou mwasin kameh ta udu le buku doh, ili tiri mwan ma badih mara-ei are kon munyak. Iy asehek ili tiri mwan ma badih badu kon munyak tinan mara-ei, tiri boho kamen mari, tiri boho kon rakon rakon badu kon munyak mari, ma ili tiri mwan ma badih bada iri randrah ja.  
\v 7 Iy badeh, aloh boto-on labai i buku doh, “Len badeh, ndrasahan ta Kindrei aleben iri mwan ma badih mara-ei are ta mada sahou. Eme ma aha kanoh iy, ma aha katudun nyaran. Aha mara-ei badeh, katehei bwili ndru-u aha kili andri ki ta Kindrei, iy le badeh, bwidi kandrah ma munyak, hawe ndras ma mana munu iri gwa mara-ei.”   
\p
\v 8 Ano angelo ari ja in hamon ta iy ma mwena nane eme. Iy angelo nane dah, anya, “Kon tinan Babilon mene tutuni nyaran i loken labai, badeh, ndratohou ndra-au ai! Iri mwan ma badih mara-ei mene ado bolo kon Babilon badeh, iri mene ariu budon tiri mwan ma badih rayah ado bolo kon munyak mara-ei. Eme ma iri atehei bwili ndru-u iri i andri ili ta kindrei ta wendreya tiri amekes na kei, ma adeu kona iri ili ta Kindrei handru. Iri mwan ma badih mara-ei nane are Babilon badeh, i buku badih iy tawi bwesam udu minen irek na waen, ma iy aruwi budon tiri lau mara-ei, eme ma iri anyuwiy, ma iri abo lolo-ou, ma iri amekes kandriyen ndra-in ta karei hawen.”   
\p
\v 9 Ano, angelo ari ja in hamon turu eme ale. Iy aloh boto-on labai i buku doh, “Are mwan o badih handru atehei bwili ndru-u iri ili andri i ta nyabwe munyak hawe malawin, ma iri akohok kalem udu mine iri, o bwili iri?  
\v 10 Iri kameh a-un waen udu bwesam ari. Waen doh kameh leheya iri lakou ndra-in labai, Kindrei kameh amekes ili tiri mwan ma badih, ta kandriyen ndra-in nane iri a-en hamon ta aliy. Tasah, iy ibolosen tinan labai ili tiri. Eme ma iri kameh akohok sisi-in ndra-in labai ta nyaraha jih anya ta bek solpa. Ma iri angelo ta Kindrei hawe Nadu Sipsip tan, kameh anyolom iri mwan ma badih akohok sisi-in tinan labai doh.  
\v 11 Ma kasu-er asahan ta jih nane edeu sisi-in ili tiri, kameh ili loken ta udu le buku don ai. Iri lau mwan ma badih doh nane atehei bwili ndru-u iri ili andri i ta nyabwe munyak hawe malawin, ma akohok kalem ta nyaran, jih kameh edeu sisi-in ili tiri. Ben, len iri winiyan bamunyau bwe, jih doh badeh, winiyan bamak bwe, kameh anya ta udu le buku don ai, ma iri mwan ma badih doh kameh winiyan bado mwasin ja bwai.”   
\p
\v 12 Udu bada len ta lakou nane doh asahan, ya iri lau ta Kindrei nane, a-en hamon ta batanau tan, ma tawi ihis budon tiri in ta Jises, iri badeh, katadau ndruwi iri ta bwese iri maha-an mara-ei doh.   
\p
\v 13 Ma jo anuhun boho ndramak ari udu kandrah asehek sahou i buku doh, “Ou atorou sahou ki buku doh: Iri mwan ma badih atehei budon tiri mara-ei in ta Laban, ma iri ndramak ta aliy, nadah, ma na len eme kahis, iri badeh, kasekesek!” Malawin Ndrabun ale asehek, “Ya, iri kameh ruwani lahou boto-on tiri, iri mene amekes, ma iri amunyau ta aliy. Iri bame dah laleyah bwe. Kandriyen mwasin mene iri amekes, idoh kameh ili hawe iri ale ili kandrah.”   
\s1 Len ta akohok nyamon uni badu bolo bilin  
\p
\v 14 Oro asehek sahou ano le badeh, jo anyolom asi kandrah rasi belen mara-ei, ma ndramak ari manyah udu aliy, konen badeh,  
\q1 “I buku le Nadu Ndramak Awas.” \rq Daniyel 7:13\rq*  
\m Barak ari bek nyikilikin badeh, udu batun, ma iy tawi samen gwak raho, madan labai udu minen.  
\v 15 Ano, angelo ari ja badeh, atah udu bolo asiu tinan ta Kindrei eme len. Iy aloh boto-on labai ili ta ndramak nane manyah udu bwele-e asi kandrah i buku doh, “Ou sani iri nyamon marakon na samen tam! Iri nyamon marakon badu munyak badeh, ndruniy mara-ei! Eme ma, len dah badeh, len mwasin ta akohok iri nyamon marakon doh.”  
\v 16 Ano le badeh, iy ndramak nane manyah udu bolo asi kandrah, andrei samen tan, iy akahei eme andri kon munyak, ma sani iri nyamon mara-ei nane uni badu kon munyak.   
\p
\v 17 Jo anyolom angelo ari ja atah udu bolo asiu tinan ta Kindrei udu kandrah eme len. Iy tawi samen gwak raho madan labai ale udu minen.  
\v 18 Ya, jo anyolom angelo ari ja, iy boto-on labai ta atondrok jih. Iy badeh, atah udu loboho mada koto-ok eme len. Iy asehek sahou, bohon ili loken mara-ei, ili ta angelo ari nane tawi samen gwak madan, madan labai udu minen i buku doh, “Ou andrei samen tam madan labai badeh, ma ou sani kandro iri waen mara-ei badu munyak, ma ou tukumwiy marakon kili le se, tasah nyamon marakon badeh, ndruniy mara-ei!”  
\v 19 Eme ma, iy angelo nane dah akahei samen gwak tan eme andri kon munyak, ma sani kandro iri waen mara-ei, ano iy tukumwiy marakon ili le se. Ano iy akahei nyamon marakon ili le bolo kun bek laba tinan ta atisih waen mara-ei kabwesek. Idoh badeh, leheya buku lakou ndra-in mara-ei doh badeh, Kindrei kameh amekes ili tiri lau marakon badu kon munyak, tasah ndrinen badeh, ibolosen labai tiri.  
\v 20 Iri waen badeh, ili bolo kun bek laba tinan udu manan kesehe kon tinan ta atisih iri. Eme ma ndraye waen amou kabede kun bek eme len, atas ili winiya kilomita ma tonek (300), ma eme loken lawe-en badeh, winiya le hayen iri atehei udu boho iri hos.   
\c 15  
\s1 Oro angelo ma ndro taloh tawi lakou ma ndro taloh doh badeh, ndra-in labai  
\p
\v 1 Udu ja badeh, jo anyolom lakou ari laba tinan labai asahan bolo kandrah, ma jo abudon solo-an labai ta aliy. Jo badeh, anyolom oro angelo ma ndro taloh, tawi lakou ma ndro taloh ndra-in labai doh udu mine oro ta amekes maha-an laba tinan ili tiri mwan ma badih. Hamon ta lakou doh ano, ari winiyan basahan ja bwai. Idoh ndrano mara-ei ai. Tasah, ta oro lakou ma ndro taloh ndra-in nane doh badeh, losen ta Kindrei kameh ano mara-ei, ma iy kameh winiyan bamekes bundruwe aliy ja bwai.   
\p
\v 2 Jo ale anyolom lakou ari buku ndras laba tinan, iri amekes na torowe, ma iri tubuniy hawe jih. Iri lau mene abadok sakalawi nyabwe munyak mene hawe malawin, ma sakalawi boto-on ta kane nyara ndramak nane ale, iri badeh, ales amwenen are kesehe ndras i buku torowe. Kindrei atehei iri ndran, iri aloh hap badeh, ndrala toro, ma oro tawiy udu mine oro.  
\v 3 Iri badeh, ayah wari ta Moses, lohowan ta Kindrei torowenei, ma wari wariye Nadu Sipsip ta Kindrei, i buku doh,  
\q1 “Laban, ou Kindrei, ou tawi iri boto-on mara-ei.  
\q2 Iri gok mara-ei ou amekes, iri laba tinan labai,  
\q2 ma ahi ale anyolom, ma ahi abudon solo-an labai!  
\q1 Ou badeh, kabin ta boho kamen tiri mwan ma badih mara-ei,  
\q2 ma kandriyen tam badeh, amwenen mara-ei, ma handru labai!   
\q1
\v 4 Laban, ou le ari, ou ndrabun labai.  
\q1 Eme ma are lau handru, kameh winiyan banoh ou bwe?  
\q1 Are lau handru kameh winiyan batudun nyaram bwe?  
\q1 Iri lau mara-ei badu kon munyak kameh ame atehei bwili ndru-u iri i andri ewek tam.  
\q2 Tasah, kandriyen tam mwasin badeh, ndrasahan ndrame lewan.”   
\p
\v 5 Udu hamon ta wari ano badeh, jo anyolom asiu tinan ta Kindrei udu kandrah badeh, asak. Asiu doh buku asiu balei ndrabun mene Kindrei atah ta leheya kandriyen ma sahou handru tan.  
\v 6 Ma jo anyolom oro angelo ma ndro taloh nane, tawi lakou ndra-in ma ndro taloh udu mine oro ta adeu maha-an ili tiri lau marakon, oro badeh, atah ado bolo asiu ndrabun ta Kindrei ame manan. Oro mara-ei badeh, asini awin moroyan, ma se ndraka-an aliy bwe. Ma oro ale bawei balaban udu batala oro, kone balaban doh badeh i buku bek nyikilikin.  
\v 7 Ya, lakou ari ma mulin badu bolo oro ma hahuw badeh, eme atehei bwekei bek nyikilikin ma ndro toloben ili mine oro angelo ma ndro taloh. Ma hawe lakou udu bolo iri bwekei nane, leheya losen ta Kindrei ili tiri lau marakon badu kon munyak, iri lakou doh badeh, irek udu bolo oro bwekei bek nyikilikin ma ndro taloh nane doh. Ndrinesen doh badeh, ta Kindrei, iy winiyan bamak bwe, iy ta ere le buku don ai.  
\v 8 Kasu boto-on ma lomada Kindrei badeh, tubuluhi bolo asiu tinan ta Kindrei nane doh. Ma ari ndramak winiyan bala bolo asiu ndrabun doh bwe. Iri lau marakon badeh, atondrok le oro angelo ma ndro taloh nane doh, kabwidi gok toro lakou ndra-in ma ndro taloh nane doh, mara-ei kano labai.   
\c 16  
\s1 Oro angelo ma ndro taloh asolou losen ta Kindrei udu bolo bwekei  
\p
\v 1 Ano badeh, jo anuhun boho ndramak ari asehek sahou boto-on labai udu bolo asiu  
\m tinan ta Kindrei ili toro angelo ma ndro taloh i buku doh, “Ado kala kasolowei bwekei ma ndro taloh losen ta Kindrei udu bolon kodo-oh ki-iu kili andri bwele-e kon munyak!”   
\p
\v 2 Iy asehek sahou ano le badeh, jo anyolom angelo ari atah ili solowei bwekei tan amou ili bwele-e kon munyak. Eme ma se nawin bwe, soso-ou ma hawe sisi-in ndra-in mara-ei badeh, asahan bada iri mwan ma badih, iri nane kalem ta nyabwe munyak udu bada iri ma iri atudun malawin iri bwidiy na sukumada kei.   
\p
\v 3 Ano, angelo ari ja ili solowei bwekei tan amou ili bwele-e ndras. Eme ma gwa ndras asahan i buku ndraye ndramak imek, eme ma iri lakou mara-ei, bwisik ma tinan, are bolo ndras, mara-ei amak.   
\p
\v 4 Uru angelo la-uh ndrano ai, iy ari eme len ja solowei bwekei tan amou ili bwele-e gwa lakon ma kaloh mara-ei. Bwekei doh asahan ili taloh ai. Eme ma gwa mara-ei asahan ndra.  
\v 5 Eme ma jo anuhun boho angelo atondrok gwa mara-ei nane asehek i buku doh,  
\q1 “Ou ndrabun labai.  
\q1 Ta sahou tam, ou anuhun sahou tiri lau ndra-in amwenen labai.  
\q1 Tasah, nadah ou are aliy, ma ndra bwena mene ou are aliy ale.   
\q1
\v 6 Iri mwan ma badih mene ale adai ma bwidi ndraye iri lau ma hawe iri propet tam amou.  
\q1 Eme ma ou atehei ndraye iri lau badeh, ili wa-i iri.  
\q1 Eme ma iri akohok bundruwe ndra-in tiri amwenen.”   
\m
\v 7 Ano ja badeh, jo anuhun ndramak ari udu loboho mada koto-ok, asumon boho angelo nane i buku doh,  
\q1 “Ya, ou Laban handru, ou Kindrei,  
\q1 boto-on marakon udu tam.  
\q1 Ou badeh, aleben iri mwan ma badih are ta mada sahou,  
\q1 iri sahou tam badeh, ndra handru le, ma amwenen mara-ei.”   
\p
\v 8 Ano badeh, angelo ari ja eme len ili solowei bwekei tan amou amwenen ili bwele-e an, ma jih taladan eme loken, ma sulumwi bada iri mwan ma badih. Ya bwekei doh ili asahan hahuw ai.  
\v 9 Jih ta an nane doh badeh, nyarahan labai ma sulumwi bada iri mara-ei atabuk, eme ma bwidi iri abolosen, ma iri aten nyara Kindrei. Tasah, Kindrei badeh, amekes iri lakou mara-ei nane doh. Eme ma iri bwale iri ta tobolowe ndrine iri, ma ta a-en hamon ta sahou handru, ta atudun nyara Kindrei.   
\p
\v 10 Ya, iy angelo ari ja eme ili solowei bwekei tan amwenen ili bwele-e koyeu ta nyabwe munyak. Ya bwekei doh ili asahan limeh ai. Eme ma lulik asahan tubuluhi tondrok ta nyabwe munyak. Eme ma bwidi iri lau atohei kalime iri, ta sisi-in tiri nane doh.  
\v 11 Iri abudon ta sisi-in hawe soso-ou tiri, eme ma bwidi iri aten nyara Kindrei badu kandrah. Arile, iri badeh, batubuni ndrine iri ma batehei kona iri bala tiri kandriyen ndra-in nane iri amekes bwe.   
\p
\v 12 Iy angelo ari ja badeh, ili solowei bwekei tan amou amwenen ili bwele-e gwa tinan Yupretis. Ya bwekei doh ili asahan onoh ai. Eme ma gwa Yupretis asamar mara-ei, ta adik san tiri kabin badu loboho rai mara-ei kameh ame.  
\v 13 Ano ja, jo anyolom oro malawin ndra-in ma taloh, kotowa oro i buku basen. Oro ado boho mwak laba tinan banin ere aliy sandroh ame len, ma udu boho nyabwe munyak, ma udu boho propet ta wendreya ale.  
\v 14 Oro basen ma taloh doh badeh, malawi oro ndra-in labai, ta amekes iri kalem solo-an hawe lahou tinan. Oro ma taloh badeh, ala hawe iri kabin marakon tiri mwan ma badih badu kon munyak. Iri anya katukum iri kala le se kamekes bahun kameh udu bada len laba tinan ta Kindrei, boto-on mara-ei udu tan.   
\q1
\v 15 “Aha ari ari kanuhun! Jo Jises, jo kameh ewek i buku ndramak ta bahana!  
\q1 Eme buku are mwan o badih, iy atehei ndrokei amwenen na bolo len mara-ei,  
\q2 ma lowosani kolau tan kudu mirihik tan, iy kameh winiyan badek ndrakane mada iri lau, ma iri lau winiyan banyolom badan bwe.  
\q2 Iy lau doh badeh, kasekesek.”   
\p
\v 16 Eme ma, malawi oro balik ma taloh nane badeh, ame tukumwi iri kabin mara-ei ala le loboho doh, i boho Hiburu badeh, iri aloh Amagedon.   
\p
\v 17 Ano, iy angelo in ndrobek toro mara-ei badeh, ili solowei bwekei tan amou ili bolo kandrah. Ya bwekei doh ili asahan ndro taloh ai. Eme ma ndramak ari ales mirihik ta mada koto-ok udu bolo asiu tinan ta Kindrei, iy asehek sahou i buku doh, “Lakou marakon badeh, ndrano ai.”  
\v 18 Bolo len doh badeh, kalik takamek ili eme, ma kuruh atohou, kurutuwen laba tinan labai, ndroi asahan, iy nyokoda kon ma kon munyak mara-ei totoreh andra-i mara-ei. Ndroi ari le doh badeh, i randrah labai, bala buku iri ndroi rayah ale Kindrei amekes kala iy bwidi iri lau manyah bwele-e munyak eme taku dah, bwe. Iy ndroi le doh badeh, iy ndra-in, ndra-in labai udu bolo iri ndroi mara-ei!  
\v 19 Kon tinan nane iri aloh Babilon, badeh asak asahan i tolokon, ya kon tinan badu kon munyak tinan mara-ei, badeh, irou i andri ma ano iu. Ya, Kindrei badeh, bamani kandriyen ndra-in mara-ei tiri mwan ma badih badu kon tinan Babilon amekes bwe. Eme ma bwidi ndrinen ibolosen labai, ma iy a-um iri na lakou doh. Ya, iy bokoro-ei iri badeh, eme ma iri asahan i buku iri lau a-un waen solo-an labai, ma iri abo sik i ndra-in mara-ei.  
\v 20 Ya, ndroi laba tinan nane asahan badeh, ndratolomwani iri busu mara-ei udu bolo ndras laba tinan, badeh ndratuh ndra-au ndrala baha ndras. Ma iri mandrei mari ale arou ame le andri, ma atohou iu laleyah, ari madan bwe.  
\v 21 Ma ur laba tinan undruk eme andri i buku bek. Maha-an ta mada ur ari ari doh badeh, i buku kilo ma lomonoh (50). Ur doh badeh, i buku bek, undruk udu bolo kandrah eme andri ili bwele-e iri mwan ma badih badu loboho kon munyak mara-ei, ma bokoro-ei iri andra-i labai. Eme ma, iri aten nyara Kindrei ta ur i buku bek nane bokoro-ei iri.   
\c 17  
\s1 Badih tinan ta karei akohok bundruwe kandriyen tan  
\p
\v 1 Ya, oro lakou nane doh ano badeh, angelo ari badu hawe oro ma ndro taloh nane tawi bwekei, eme asehek tek i buku doh, “Ou ame. Iy badih tinan ta karei manyah udu bwele-e gwa laba tinan kodo-oh, iy kameh akohok bundruwe iri kandriyen ndra-in tan marakon nadah. Jo anya kaleheya ou ta idoh le, ma saba maha-an handru kameh, iy akohok.  
\v 2 Iri kabin badu kon munyak mara-ei badeh, amekes kandriyen solo-an ta karei hawe i badih doh. Iri mwan ma badih mara-ei badu kon munyak ale amekes kandriyen doh hawen, ma iri asahan lolo-ou, i buku iri lau a-un gwa boto-on.”\f + \fr 17:2 \ft Kandriyen ta karei doh, i buku sahou sokek ta leheya kandriyen tiri lau na len iri ruwani Kindrei handru tiri ma iri ala an hamon ta kandriyen ta atudun iri lakou amekes na sukumada kei i nyara kindrei ta wasai tiri.\f*   
\p
\v 3 Malawin Ndrabun ta Kindrei eme la-uk, ma angelo doh bwese-ei jo ma mwasin amwenen iu ili kon lomale an. Jo udu loboho doh badeh, jo anyolom badih ari, iy manyah udu bwele-e nyabwe munyak ari badan saraman mara-ei. Nyabwe munyak doh badeh, nyara iri lakou solo-an labai irek udu badan, ma nyara iri lakou doh badeh, i buku, iri sahou bobose, iri sahou sondrokonya, ma iri sahou ta aluhe Kindrei. Nyabwe munyak ale doh badeh, batun ma ndro taloh, ma hawe kasoh ma ronoh udu batun.  
\v 4 Ya, jo atou iy badih doh badeh, nyosowani iy na awin saraman ma lu-ei, ma iri nyasou nyikilikin solo-an labai tubuluhi iy, ma iri bek nyikilikin, hawe iri buwandralou sowa iri tinan labai. Ya, iy tawi raben bwesam nyikilikin labai udu minen. Ya, waen badeh, irek udu bolo bwesam nyikilikin doh, leheya iri kandriyen ndra-in solo-an abola labai ta budon ta Kindrei, ma hawe iri kandriyen mara-ei ta karei, i badih doh amekes.  
\v 5 Iri ndratorowenei nyaran udu bwilin, nyaran doh i buku sahou sokek, moson ta aliy mene aton. Ya, moson ta nyaran amwenen badeh, i buku doh,   
\qc “Kon tinan Babilon,  
\qc mene tutuni nyaran i tinan labai i loken,  
\qc iy tine iri badih mara-ei ta karei,  
\qc ma tiri kandriyen ndra-in mara-ei badu kon munyak.” ”  
\m
\v 6 Iy badih doh mene idi iri mwan ma badih ta Kindrei, ma iri lau atehei budon tiri handru in ta Jises, ma iri atiye sahou tan. Ma jo anyolom i badih doh a-un ndraye iri, ma bwidi batun ibo lolo-ou, i buku ari badih iy a-un gwa boto-on solo-an labai, ma bwidi iy ibo lolo-ou. Jo anyolom lakou doh, manik atur, ma jo abudon solo-an labai.   
\p
\v 7 Ano angelo asehek sahou eme tek i buku doh, “Manim atur tasah handru? Jo anya kasehek tam ta nyala iy badih kede-eh ma nyala nyabwe munyak. Iy badih nane doh manyah in bwele-e nyabwe munyak, ma nyabwe munyak nane, batun ma ndro taloh ma kasoh ma ronoh udu batun. Uru lakou ma la-uh doh kameh leheya malawi iri lakou rayah, ya moso iri lakou doh badeh, aton mara-ei, arile nadah kameh jo leheyaniy mara-ei ewek tam.  
\v 8 Nyabwe munyak nane ou ndranyolom eh, bwena mene iy ere aliy, arile nadah badeh, iy bare aliy ja bwai. Arile, iy kameh udu mana munu lek lawe-en labai, ari katin bwe, eme len, ma iy kameh ili akohok andra-i labai ma amai mara-ei. Iri lau mwan ma badih badu kon munyak nane nyara iri bado bolo buk ta Kindrei bwe, udu ndra bada len mene Kindrei bamekes kon munyak bwe le en, iri winiyan bakohok kohan handru bwe, arile iri doh kameh anyolom nyabwe munyak, ma mani iri kameh atur. Tasah, bwena mene iy ere aliy, ma na len dah ja iy bare aliy bwe, arile iy kameh barasahan na len hamon.   
\p
\v 9 “Buku are mwan o badih, iy budon mwasin, iri winiyan atanan iri lakou doh. Batun ma ndro taloh doh badeh, i buku mandrei ma ndro taloh, ta iy badih doh manyah udu bwele-e oro.  
\v 10 Batun ma ndro taloh doh ale badeh, i buku oro kabin ma ndro taloh. Arile, oro limeh badeh, ndrataku, ya, uru la-uh ja badeh, ari udu kabin kahis ai, ya ari ja badeh, basahan kabin bwe le. Ya, hamon kameh iy asahan kabin, arile iy kameh winiyan bado luluwen bwe.  
\v 11 Ya, nyabwe munyak doh mene udu aliy, arile nadah ja badeh, iy bado kede-eh ja bwai, iy kameh asahan, buku kabin ma ndru la-uh. Iy badu le hawe oro kabin ma ndro taloh nane bwena, arile iy kameh amai iu mara-ei.   
\p
\v 12 “Ya, ou ndranyolom kasoh ma ronoh udu batu nyabwe munyak nane ai. Idoh i buku oro kabin ma ronoh. Oro doh badeh, basahan buku kabin bwe le. Arile, oro kameh akohok boto-on ta atondrok kon hawe nyabwe munyak. Ma oro kameh asahan kabin bado sese luluwen bwe, i buku awa ari le.  
\v 13 Oro kabin ale doh badeh, budon toro randra le. Nyara oro badeh, ndra tinan ma oro boto-on labai, ya oro kameh adeu ili ta nyabwe munyak.  
\v 14 Oro kameh amekes bahun hawe Nadu Sipsip ta Kindrei. Arile, Nadu Sipsip ta Kindrei kameh kimidi iri mara-ei ano. Iy badeh, Laban tiri Laban ma kabin tiri kabin mara-ei. Ma iri mwan ma badih are hawen, iri lau doh badeh, iri mene anuhun sahou mwasin, ma iri lau iy mene edeu kalem i tiri, ma iri a-en hamon ta sahou tan, iri mwan ma badih marakon doh, hawe Nadu Sipsip ta Kindrei kameh adai iri lau marakon nane amekes bahun hawen ano mara-ei.”   
\p
\v 15 Udu ja badeh, angelo asehek eme tek i buku doh, “Ou ndratou iri gwa nane iy badih tinan ta karei manyah udu bwele-e iri. Idoh badeh, leheya iri mwan ma badih bada iri randrah ja, ma iri lau solo-an solo-an atukum are aliy, ma iri lau badu kon munyak tinan mara-ei, ma iri boho kon rakon rakon badu kon munyak mari.  
\v 16 Ya, ou ndratou kasoh ma ronoh doh, oro marakon doh hawe nyabwe munyak kameh amekes bahun i ta badih laba tinan ta karei. Ya, oro kameh bokoro-ei iy ma andrei iri lakou solo-an tan, ma tarani awin udu badan mari iu. Ma oro kameh ani odan, ma sulumwi iy mara-ei i jih andrakak iu.  
\v 17 Iri lakou doh kameh asahan, tasah Kindrei le amwenen badeh, edeu iri budon doh ili tiri kabin, ta amekes iri lakou marakon doh kasahan, in hamon ta iri lakou iy ndrasehek ta aliy. Ya, budon tiri mari kameh randra le, ma boto-on nane iri akohok ta asahan kabin, iri kameh atehei marakon doh ili ta nyabwe munyak. Iri kameh amekes ili le  
\m buku don ai, ili, ili winiya le len ta lakou mari nane Kindrei ndrasehek ta aliy asahan.  
\v 18 Ma iy badih nane ou ndratou, badeh, i buku kon laba tinan iy udu bwele-en tiri kabin mara-ei badu kon munyak.”   
\c 18  
\s1 Kon tinan Babilon, andra-i mara-ei  
\p
\v 1 Udu hamon ta lakou mara-ei nane doh ano, jo anyolom angelo ari ja atah udu kandrah eme andri. Iy badeh, boto-on labai, ma lomada nyosowan badeh, lomotani kon munyak mara-ei anya.  
\v 2 Ma iy asehek sahou boto-on labai i buku doh,  
\q1 “Kon tinan Babilon mene udu bwele-en labai,  
\q2 arile nadah iy ndratohou ndra andri mara-ei!  
\q1 Nadah badeh, iy ndrala ndrahune iri malawin ndra-in ta balik are aliy.  
\q1 Iri malawin ndra-in ma hawe iri sirih ta aimon lakou bolo-an,  
\q2 ma hawe iri sirih ndra-in mara-ei, are loboho doh ale.   
\q1
\v 3 Tasah, lau mwan ma badih badu kon munyak tinan mara-ei mene atudun iri kindrei,  
\q2 iri amekes na sukumada kei badeh, ndramekes kandriyen ta karei solo-an labai hawen.  
\q1 Idoh i buku iri ale badeh, ndranyuwi waen tan boto-on labai ta lolo-ou.  
\q1 Ma iri kabin badu kon munyak mara-ei amekes karei hawen ale.  
\q1 Ma hawe iri lau nadu batun ta amekes ba-en ma ta sisih badu kon munyak mara-ei badeh, akohok luk tinan labai ta iri kandriyen tan solo-an ndra-in, ma bwilin winiyan bama ta aliy bwe.”   
\p
\v 4 Ano ja, jo anuhun boho ndramak ari asehek sahou udu bolo kandrah i buku doh,  
\q1 “Aha lau tek, aha kame len ta iy badih badeh!  
\q1 Idah kameh aha winiyan bala bolo maha-a kandriyen ndra-in tan bwe;  
\q2 eme ma aha ale winiyan bakohok bundruwe iri ndra-in tan bwe!   
\q1
\v 5 Suhuye iri kandriyen ndra-in tan mara-ei badeh, ili isos kandrah,  
\q2 eme ma Kindrei bwetenei iri kandriyen ndra-in mara-ei ta kon doh.   
\q1
\v 6 Aha badeh, kabwetenei iri kandriyen mara-ei iy badih ta karei amekes ili tiri rayah nane op, ano aha baramekes barala tan ai.  
\q1 Iy badeh, amekes kandriyen rayah ja ili le bwele-e bwena, ma bwidiy ili solo-an labai.  
\q1 Eme ma aha kamekes kili tan ma sola, ki-in hamon le tiri kandriyen mara-ei, iy nane amekes.  
\q1 Iy badeh, ale tubuni gwa lolo-ou i bolo bwesam.  
\q1 Ya, aha ale katubuni gwa lolo-ou kili ndra-in labai ja ma solo-an kili tan.   
\q1
\v 7 Iy ale badeh, atudun nyaran amwenen, ma amekes kandriyen solo-an ndra-in ta karei, ma hawe iri kandriyen ndra-in rayah ja.  
\q1 Eme ma aha kadeu sisi-in ma solo-an kili badan, kili, kili winiya le iri kandriyen ndra-in iy nane amekes.  
\q1 Iy badeh, asehek iy i buku doh, ‘Jo badeh, ere mwilis, jo manyah udu bada koyeu ta mwilis. Jo bala buku badih udun imek ma iy ere laleyah bwe. Iri maha-an kameh winiyan basahan tek bwe, ma jo kameh winiyan baden ja bwai.’   
\q1
\v 8 Ta budon doh le, bolo len ari le kameh, iri lakou marakon ndra-in doh kameh asahan tan.  
\q1 Sik solo-an kameh asahan, ma lau solo-an kameh aden, son kameh asahan i tinan mara-ei.  
\q1 Ma jih kameh sulumwi Babilon andrakak mara-ei iu.  
\q1 Laban Kindrei boto-on labai, ma iy kameh edeu bundruwe iri kandriyen ndra-in tan.   
\p
\v 9 “Iri kabin mara-ei badu kon munyak badeh, mene atudun kindrei ta wasai iri amekes na sukumada kei, ma amekes kandriyen solo-an ndra-in ta karei hawen. Eme ma iri kabin mara-ei doh kameh anyolom kasu-er ta jih nane asun iy, iri kameh alim ade iri, aden, ma tikisiy le ai.  
\v 10 Iri kameh anoh labai, tasah sisi-in ndra-in nane bokoro-ei Babilon doh kameh asahan tiri. Eme ma iri badeh, ales are ndra len labai, ma aden ma asehek i buku doh,  
\q1 “‘Lakou ta tikisiy, Babilon, iri lau katikisiy ou labai,  
\q2 tasah sisi-in tinan labai kameh ewek bwele-em!  
\q1 Ou kon laba tinan labai, ma ou kon boto-on labai!  
\q2 Udu bolo awa ari le, bundruwe kandriyen ndra-in tam badeh, ndrasos hawem!’   
\p
\v 11 “Iri nadu batun solo-an ta amekes ba-en ma ta sisih badu kon munyak mara-ei kameh, abudon ta kon le doh, ma iri kameh aden ndranyen ma tikisi iy. Tasah, lau kameh winiyan basih lokowa iri ja bwai.  
\v 12 Iri sanuw buku bek nyikilikin, silba, bek man nyikilikin hawe iri bek rayah sowa iri badeh, tinan labai, ma iri kolau belen mwasin labai, iri kolau saraman tariyen solo-an hawe iri kolau sosowan. Ma iri kei tiri solo-an manahun buburen mwasin labai, ma iri lakou rayah ja iri amekes na kasoh tiri elepen, ma lakou rayah ja, sowan laba tinan labai iri mwan ma badih amekes na kei. Iri bras ma hayen, iri bek tariyen mwasin labai; idoh iri lau kameh winiyan basih ja bwai.  
\v 13 Ma sanuw rayah ja i buku sinamon, lei ta aimon, eh ma ndrelekei ta amekes suluw manahu buburen mwasin ma ta anyas i bada lau. Waen hawe ndrelekei, ndrom plaua ma wit, bulumakau ma sipsip, iri hos ma hawe karis tiri, iri lau bonyo-ou hawe lau awas rayah ja. Iri lakou tiri mara-ei doh badeh, iri lau kameh winiyan basih ja bwai.  
\v 14 Ya, iri nadu batun nane amekes lakou ta sisih, kameh asehek i tan i buku doh, ‘Iri lakou mara-ei nane sowa iri tinan labai, ou ndrasakalamiy hawe nyasou tam mwasin, iri lakou marakon doh badeh, ndramani madan. Iri mwan ma badih kameh winiyan banyolom iri lakou doh bado badam ja bwai.’   
\p
\v 15 “Ya, iri lau nadu batun ta amekes ba-en ma ta sisih nane amekes iri lakou doh, ma akohok luk solo-an badu kon tinan doh, iri badeh, anoh labai, tasah sisi-in hawe ndra-in ta kon laba tinan doh kameh akohok iri. Eme ma iri badeh, bales bare mirihik tan bwai. Iri kameh aden ma tikisi iy.  
\v 16 Iri kameh aden i buku doh,  
\q1 “‘Ahi tikisiy, ahi tikisiy tinan labai, ta kon tinan doh!  
\q1 Tasah sisi-in tinan labai ndrame ndrala la-un.  
\q1 Iy mene anyasou na awin belen hawe kolau saraman tariyen solo-an labai udu aliy,  
\q2 ma iy nyosowani badan mara-ei na bek nyikilikin, bek rayah hawe man sowa iri tinan labai.   
\q1
\v 17 Ma sese luwen bwe, buku bolo awa ari le badeh, iri luk ma nyasou mari ndrandrakak ndrano ndra-au.’  
\p “Ma hawe iri lau tinan ta atondrok iri ndron mara-ei udu bolo ndras, ma iri lau ta sandroh ala ndron are kon rakon ala rakon, ma hawe iri lau nadu batun badu bolo ndras, iri mara-ei doh kameh ales are len labai ta kon tinan Babilon.  
\v 18 Ya, iri anyolom kasu-er ta jih nane asun iy, iri kameh anyar i buku doh, ‘Ari kon tinan udu kede-eh ja, i buku kon tinan Babilon doh, o bwai?’  
\v 19 Iri kameh atah koloweh ili batu iri, iri aden, ma iri tikisiy tinan labai. Eme ma iri asehek i buku doh,  
\q1 “‘Ahi tikisiy, ahi tikisiy tinan labai, ta kon tinan doh!  
\q2 Tasah sisi-in tinan labai ndrame ndrala la-un.  
\q1 Tama iri ndron mara-ei ale atas bolo ndras asahan iri nadu batun ta luk, badeh, na le kon tinan nane doh.  
\q1 Ahi tikisiy tinan labai!  
\q2 Tasah, udu bolo awa ari le badeh, iy ndratohou mara-ei ndrano ndra-au!   
\q1
\v 20 Aha lau marakon badu kandrah, hawe iri mwan ma badih ta Kindrei, ma iri aposel hawe iri propet, aha marakon badeh, kasekesek ta lakou nane asahan ta kon tinan doh.  
\q2 Tasah, Kindrei badeh, ndralebelei bundruwe iri lakou tan ndrala.  
\q2 Ma ta kandriyen tan doh, iy edeu bundruwe kandriyen ndra-in mene kon tinan nane doh amekes ewek taha.’”   
\p
\v 21 Sahou mara-ei ano le badeh, jo anyolom angelo ari boto-on labai, iy andrei bek ari laba tinan, i buku bek laba tinan ta atisih wit. Iy tutuni bek nane doh i loken, ma iy akahei iu ili andri atuh i bolo ndras. Ma iy anya,  
\q1 “Ta kandriyen doh le badeh, iri kameh andrei kon tinan Babilon, ma akahei boto-on labai ili andri,  
\q2 eme ma iri lau kameh winiyan banyolom iy ja bwai.   
\q1
\v 22 Eme ma nyaro iri ndran iri aloh hap, ma nyaro iri ndran bala-eu, ma hawe iri ndran rayah ja hawe ndrah,  
\q2 iri lau kameh winiyan banuhun oro bado hawem ja bwai.  
\q1 Iri lau ale tana iri ta amekes lakou na kei, o hayen, o bek nyikilikin, o lakou mwasin ja,  
\q2 iri lau ta tanan doh winiyan bare hawem ja bwai.  
\q1 Ma nyaro bek laba tinan ta atisih wit,  
\q2 iri lau kameh winiyan banuhun iy bado hawem ja bwai.   
\q1
\v 23 Lomada sun kameh winiyan banya lomadam ja bwai.  
\q1 Sohowa loweu ma bihin anya katasou,  
\q2 iri kameh winiyan banuhun bado bolo kon tinan Babilon ja bwai.  
\q1 Bwena mene iri nadu batun tam ta amekes ba-en ma ta sisih badeh, lahou tiri udu aliy, ma nyara iri badeh, tinan labai ere bolo kon munyak.  
\q1 Ma ou badeh, wendreyani iri mwan ma badih na kandriyen tam ta balahak ma ta lakou solo-an ndra-in, ou a-en hamon ta aliy,  
\q2 ma idoh mene ariu ndrine iri ta a-en hamon tiri kandriyen ndra-in ou amekes.   
\q1
\v 24 Ma Kindrei anyolom kon tinan Babilon doh badeh, maha-an ndra-in labai ta adai iri propet, hawe iri mwan ma badih tan badeh, udu aliy.  
\q1 Ma iri mwan ma badih mara-ei badu kon munyak, ala iri lau ndra-in mene, ndradai iri ndramak badeh,  
\q2 bundruwe iri lakou marakon doh ale udu kon tinan Babilon le.”   
\c 19  
\s1 Iri mwan ma badih sekesek ta Babilon atohou ma andrakak  
\p
\v 1 Udu hamon ta lakou nane doh ano, jo anuhun nyaro lakou doh, i buku iri lau solo-an labai asehek sahou boto-on udu bolo kandrah. Boho iri i tinan labai ma iri aloh i buku doh,  
\q1 “Haleluyah!\f + \fr 19:1 \ft Sahou Haleluyah doh badeh, boho iri Hiburu. Moson ta aliy badeh, Taha katudun nyara Kindrei le ari!\f*  
\q1 Tasah, Laban Kindrei tataha iy le ari mene andrei taha ame hamon.  
\q1 Nyaran badeh, laba tinan ma iy boto-on labai.   
\q1
\v 2 Ta mada sahou, Kindrei badeh, aleben ma anuhun iri mwan ma badih ta kandriyen tiri handru ma amwenen mara-ei.  
\q1 Iy badih tinan ta karei doh mene, bokoro-ei iri mwan ma badih badu kon munyak, ta kandriyen ta mani Kindrei handru, ma ala atudun iri kindrei ta wasai.  
\q1 Eme ma Kindrei edeu bundruwe iri kandriyen ili hamon i tan.  
\q1 Iy badih doh mene idi iri lohowan ta Kindrei, eme ma Kindrei edeu bundruwe iri lakou doh ili hamon i tan ja.”   
\p
\v 3 Ano ja, boho iri i tinan labai ma iri aloh i buku doh,  
\q1 “Haleluyah!  
\q1 Tasah, kasu-er ta jih nane sulumwi kon tinan Babilon,  
\q2 idoh ili loken i kandrah,  
\q2 ma ta udu le buku don ai!”   
\p
\v 4 Ya, oro batun ma lunoh hahuw (24) hawe oro lakou ma mulin ma hahuw badeh, atehei bwili ndru-u oro i andri ma oro atudun Kindrei, iy manyah udu  
\m bada koyeu ta kabin. Iri marakon asehek i le rasan i buku doh,  
\q1 “Handru labai! Haleluyah!  
\q1 Taha badeh, katudun Kindrei le ari!”   
\s1 Molak ta Nadu Sipsip ta Kindrei ma nyamon tinan asahan  
\p
\v 5 Ano, nyaro boho ndramak ari udu loboho bada koyeu ta Kindrei asehek i buku doh,  
\q1 “Aha lohowan ta Kindrei, aha katudun iy,  
\q2 aha hawe iri mwan ma badih nyara iri tinan,  
\q2 ma aha lau nyara aha bwe,  
\q2 ma aha anoh iy.  
\q1 Aha mari badeh, katudun nyara Kindrei le ari!”   
\p
\v 6 Ano ja, jo anuhun nyaro boho iri lau solo-an labai asehek sahou, i buku nyaro goi laba tinan ma kuruh atohou. Jo anuhun iri asehek sahou i buku doh,  
\q1 “Haleluyah!  
\q1 Iy Laban Kindrei tataha,  
\q2 boto-on marakon udu tan!  
\q1 Nadah iy udu kabin ta atondrok taha handru!   
\q1
\v 7 Nadah badeh, ndrine taha kudu mwasin  
\q2 ma taha kasekesek, ma katudun nyaran!  
\q1 Tasah, len ta tasou ta Nadu Sipsip badeh, ndrasahan.  
\q2 Ya, badih tan badeh, ndranyosowani iy.   
\q1
\v 8 Kindrei atehei awin belen ra-ei i tan,  
\q2 awin doh mwasin handru en, nyikadin labai,  
\q2 ma ha-un mara-ei, iy asiniy ili badan.”  
\m Awin belen mwasin doh, i buku kandriyen mwasin, iri lau ta Kindrei amekes.   
\p
\v 9 Ano angelo eme asehek tek i buku doh, “Ou torowenei ki buku doh: Are lau, iri aloh iri ta ala ta nyamon tinan ta tasou ta Nadu Sipsip, nyosowa Kindrei udu la-u iri ma iri mara-ei badeh, kasekesek!” Angelo eme asehek ja, “Iri sahou dah badeh, sahou handru ta Kindrei.”  
\v 10 Eme ma jo atehei bwili ndru-uk i andri udu mirihik ta kati angelo, ta anya katudun iy, arile angelo anya, “Ndri-iy, ou samekes! Jo badeh, ta amekes gok ta Kindrei hawem, ma jo ale badu hawe nadu tinem oro, oro ala atehei budon toro ki-in ta sahou handru ta Jises asehek. Ou atehei bwili ndru-um ki andri ma ou atudun Kindrei le ari kabwai. Ya taha tanan sahou mara-ei iy asehek, idoh le badeh, suri ndrine iri lau mara-ei ta asehek iri sahou propet.”   
\s1 Jon anyolom ndramak ari manyah udu bwele-e hos belen  
\p
\v 11 Ano ja badeh, jo anyolom kandrah asak, ma hos belen udu aliy. Ya, nyara ndramak manyah udu bwele-e hos doh badeh, i buku, “Ndramak atondrok gok tan mara-ei udu mwasin” ma “Ndramak amekes kandriyen mara-ei badeh, ndra handru ma mwasin le ai.” Na len iy aleben ma anuhun sahou tiri mwan ma badih, ma iy ale alokou ta amekes bahun, iy badeh, in hamon le tiri kandriyen mwasin iy amekes.  
\v 12 Madan badeh, anya i buku jih, ma barak tiri kabin solo-an labai badeh, udu batun. Bwilin badeh, iri torowenei nyara lakou ari udu aliy. Iri mwan ma badih badeh, bala tana iri ta moso nyara lakou doh bwe. Iy le ari amwenen badeh, tanan ai.  
\v 13 Iy asini awin ari doh, iri lomwaniy na le ndra. Ma iri aloh nyaran badeh, “Sahou ta Kindrei.”  
\v 14 Iri lau ta bahun mara-ei badu kandrah badeh, manyah ado bwele-e hos belen, ma sakaliye a-en hamon tan. Iri mara-ei badeh, asini awin ndra belen le, se ndraka-an aliy bwe.  
\v 15 Samen gwak raho doh lawe-en, ma madan labai, iri aloh bainat, badeh, udu boho ndramak nane atas eme len. Samen gwak le doh kameh amondroh bale iri mwan ma badih badu kon munyak tinan mara-ei.  
\q1 “Iy kameh tawi balekei hayen ari udu minen ta atondrok iri mwan ma badih boto-on handru.” \rq Wari 2:9\rq*  
\m Ma iy kameh atisih waen na katin udu bolo kun laba tinan. Idoh leheya losen ndra-in labai ta Kindrei, iy boto-on labai.  
\v 16 Udu bada awin tan lawe-en, ma bada ndrubulon badeh, iri torowenei nyara lakou ari udu aliy i buku doh,   
\qc “Kabin tiri Kabin ma Laban tiri Laban.”  
\p
\v 17 Ano ja badeh, jo anyolom angelo ari ales udu bwele-e an. Iy aloh boto-on labai ili tiri sirih mara-ei atah ado bolo asi kandrah, i buku doh, “Aha katukumwi aha mara-ei ka le se, ta nyamon laba tinan ta Kindrei!  
\v 18 Aha kameh aimon oda iri kabin mene ndramak, oda iri lau batun ta bahun, oda iri lau boto-on labai ta bahun, oda iri hos, ma oda iri lau nane manyah ado bwele-e iri hos. Aha kameh aimon oda iri lau mara-ei; oda iri lau bonyo-ou, ma oda iri lau ado laleyah, ma oda iri lau nadu batun ma hawe iri lau nyara iri bwe.”   
\p
\v 19 Ano ja, jo anyolom nyabwe munyak hawe iri kabin badu kon munyak, ma iri lau tiri mara-ei ta bahun atukum ala le se ta amekes bahun hawe i ndramak nane sakaliye hos hawe iri lau tan ta bahun.  
\v 20 Arile, iy ndramak doh tawi nyabwe munyak doh, ma atehei iy udu bolo asiu lulik hawe propet ta wendreya. Iy propet ta wendreya doh mene, amekes iri kalem solo-an ma lahou tinan labai udu mada nyabwe munyak, ma hawe malawin. Ma, na iri kalem solo-an ma lahou tinan doh, iy wendreyani iri lau mene ndrandrei kalem ta nyabwe munyak, hawe atudun malawin. Nyabwe munyak ma hawe propet ta wendreya doh badeh, iri akahei uru ma mulin au ala andri bolo lek ta jih anya na bek solpa, asun uru.  
\v 21 Iy ndramak nane manyah udu bwele-e hos tan badeh, mwetehei iri lau ta bahun turu mara-ei ano na samen madan labai, iri aloh bainat nane udu bohon eme len. Ma iri sirih mara-ei ame ani oda iri lau nane doh ano mara-ei, ma ndrine iri irek.   
\c 20  
\s1 Jaha ma rawa (1,000), balik amadin in bolo asiu lulik  
\p
\v 1 Udu le badeh, jo anyolom angelo ari atah udu kandrah eme andri kon munyak, iy tawi lakou ta aseh kou ta mada munu lek lawe-en labai, ari katin bwe, hawe sen maha-an labai udu minen ale.  
\v 2 Iy ili badeh, tawi mwak laba tinan banin ere aliy, mwak doh badeh, ndra bwena labai, iy balik o Satan, iy ta edeu lau solo-an labai ala ta mada sahou. Angelo eme badeh, bawei iy na sen nane maha-an labai udu minen. Sen maha-an labai doh kameh udu gwek winiya le jaha ma rawa (1,000) ano.  
\v 3 Angelo eme akahei iy iu ili andri bolo lek nane lawe-en labai, ari katin bwe, ano iy sulu-i kou tan ihis mara-ei, eme ma iy kameh winiyan bawendreya iri mwan ma badih badu kon munyak ja bwai. Iy kameh udu gwek winiya le jaha ma rawa (1,000) ano. Hamon ta jaha ma rawa ano badeh, idah kameh tolowei iy eme udu len sese, ta edek bolo kon munyak ili eme op.   
\p
\v 4 Ano ja, jo anyolom koyeu rayah buku tiri kabin, ma iri lau manyah ado aliy. Kindrei ndratehei gok ili tiri ta tunuhun sahou tiri lau. Jo ale anyolom malawi iri lau ndramak bwena. Iri lau mene ndrasani bale iri ma ndradai iri ndramak, tasah iri atiye sahou handru ta Jises mene asehek, ma hawe sahou ta Kindrei. Iri badeh, batehei bwili ndru-u iri bala andri bwe, ma batudun nyabwe munyak hawe malawin bwe. Iri ale bakohok kalem bado bwili iri ma mine iri bwe. Eme ma koha iri mwasin asahan eme hamon ja, ma iri asahan i buku iri kabin ta atondrok kon hawe Krais, udu gwek winiya le jaha ma rawa (1,000) ano.  
\v 5 (Iri lau rayah ndramak bwena badeh, bakohok koha iri na len doh bwe. Iri kameh atondrok ili winiya jaha ma rawa ano.) Len dah badeh, kameh asahan buku len ta lau amak ame awas ta imek ma bwena.  
\v 6 Sekesek handru ki tiri lau nane amak ame awas ma bwena! Kandriyen tiri ndra mwasin le. Tasah, iri lau doh ta Kindrei. Imek hamon doh kameh, ari nyamun ta atisih iri lau doh ja bwai. Iri kameh asahan buku iri pris ta Kindrei hawe Krais. Ma iri kameh asahan kabin hawe Krais ta bolo jaha ma rawa (1,000) doh.   
\s1 Satan badeh, ndrandra-i mara-ei  
\p
\v 7 Udu hamon ta jaha ma rawa (1,000) doh ano, iri kameh sihi kou ta mana munu lek nane lawe-en labai, ari katin bwe doh kameh asak. Ma Satan kameh ano ta udu bolo asiu lulik eme len.  
\v 8 Iy kameh eme len ta wendreya iri lau marakon atalan laleyah ado bolo kon munyak mara-ei. Iri lau badu kon Gok ma Magok. Satan kameh tukumwi iri marakon doh ala le se ta amekes bahun. Kane iri mara-ei ili le se badeh, i buku on mamarin badu bada babi, winiyan bandromwei bwe.  
\v 9 Iri kameh, adek ala bolo kon munyak mara-ei, ma iri atehei kenyer ta ndrahune iri lau ta Kindrei hawe kon tinan iy aso-ok labai. Arile, jih udu kandrah anya eme andri badeh, sulumwi iri amak ano au.  
\v 10 Balik badeh, ndrawendreyani iri mwan ma badih doh, eme ma Kindrei akahei iy ma buruwen ales amwenen ili bolo lek laba tinan, ta jih nyarahan labai anya udu ta bek solpa. Nyabwe munyak uru propet ta wendreya badeh, are aliy bwena; eme oro ma taloh kameh akohok sisi-in, ben, len, ben, len ta udu le buku don ai.   
\s1 Sahou tinan asahan  
\p
\v 11 Ano ja, jo anyolom koyeu laba tinan belen ta kabin, ma ndramak ari manyah udu bada koyeu doh. Ma kon munyak hawe kandrah badeh, sakaliye iu ta madan, uru bado ndrahune uru bwena nane ja bwe.  
\v 12 Ma jo ale anyolom iri lau ndramak bwena on! Iri lau nadu batun, iri lau laleyah tiri lakou bwe, iri lau marakon doh badeh, ales are bwena ta koyeu ta kabin. Iy ndramak manyah udu bada koyeu badeh, tiye iri angelo kasihi iri buk mara-ei. Iri sihi buk ari ale, buk doh badeh, nyara iri mwan ma badih kameh winiyan akohok kohan handru ado hawe Kindrei. Kindrei badeh, anyolom bolo iri buk ma aleben kandriyen marakon tiri lau ndramak, mene amekes.  
\v 13 Ano, jo anyolom iri lau mene amak bwena badeh, ado bolo ndras hawe iri lau badu kon ta lau mene ndramak ndrasu-u are aliy, iri ari ari ala ales are madan. Ma iri akohok maha-an badeh, in hamon le ta kandriyen, iri amekes.  
\v 14 Ano, iy ndramak nane manyah udu bada koyeu ta kabin badeh, eme akahei imek hawe kon ta ndrahune lau amak are aliy badeh, ala bolo lek ta jih. Lek ta jih doh badeh, ta imek hamon ja ai.  
\v 15 Buku are lau nyaran bado bolo buk ta lau winiyan akohok kohan handru doh bwe, Kindrei kameh tiye iri angelo tan, akahei iy ales amwenen iu ili bolo lek laba tinan ta jih.   
\ms1 Kindrei badeh, bwidi iri lakou marakon asahan ha-un mara-ei ja  
\mr (Kalan 21–22)  
\c 21  
\s1 Kindrei bwidi kandrah ma kon munyak ha-un asahan ja  
\p
\v 1 Udu hamon ta lakou doh ano badeh, jo anyolom kandrah ma kon munyak ha-un asahan. Kandrah hawe kon munyak malen badeh, amai ndra-au laleyah. Ma gwa ndras ale bado ja bwe.  
\v 2 Ma jo ale anyolom kon tinan Jerusalem ha-un ndrabun labai asahan. Jo anyolom kon tinan doh udu hawe Kindrei, udu bolo kandrah eme andri, i buku badih ndralokowani iy, ma ndranyosowani iy ta anya kili bahandra mwan tan.  
\v 3 Jo ale anuhun boho ndramak ari udu bada koyeu ta Kindrei asehek sahou boto-on labai i buku doh, “Nadah, ndrahu manyah ta Kindrei udu hawe lau mwan ma badih! Iy kameh manyah udu hawe iri, ma iri kameh asahan lau tan. Kindrei le amwenen kameh udu hawe iri, ma iy kameh asahan Kindrei tiri.  
\v 4 Iy kameh owei wa-i mada iri mara-ei iu. Iri mwan ma badih kameh winiyan bamak ja bwai, iri kameh winiyan batikisiy ma baden, o babwese iri maha-an ma sisi-in ja bwai. Iri lakou malen bwena badeh, ndrano mara-ei.”   
\p
\v 5 Ano ja, iy ndramak nane manyah udu bada koyeu ta kabin tiye i buku doh, “Nadah kameh jo bwidi iri lakou mara-ei asahan ha-un ja.” Iy tiye ale i buku doh, “Ou torowenei sahou doh kili bolo buk. Tasah, sahou doh handru mara-ei, ma iri mwan ma badih winiyan atehei budon tiri handru in hamon ta aliy.”  
\v 6 Ma iy tiye eme tek, “Iri lakou marakon nane jo anya kamekes badeh, ndrano ai! Jo ma mwena handru, ma jo in ndrobek mara-ei, jo ale badeh, kati iri lakou marakon, ma jo in ndrobek handru ta amekes iri gok mara-ei ano. Buku are lau, balen amar ta gwa, jo kameh edeu gwa i wa-in badu kaloh ta adeu kohan handru winiyan bano bwe, ya iy kameh winiyan bakeh ari luk ta asih gwa doh bwe.  
\v 7 Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh kameh akohok lakou mara-ei doh badu minek amwenen. Jo kameh asahan Kindrei tiri, ma iri asahan naduk.  
\v 8 Arile, iri lau nane anoh, ma atobwak ala hamon, ma iri lau batehei budon tiri bala ta Kindrei bwe, ma iri lau amekes kandriyen ndra-in solo-an labai, ma iri lau adai lau rayah amak, iri lau ta amekes kandriyen ta karei, iri lau balahak udu tiri ta bekebek lau amak, iri lau ta atehei bwili ndruu iri i andri i ta sukumada kei, iri lau ta amekes sahou wendreya, ya kon tiri lau mara-ei doh badeh, bolo lek ta jih nyarahan, anya udu ta bek solpa. Imek ari hamon ja dah badeh, ma kabwai.”   
\s1 Jon anyolom Jerusalem ha-un asahan  
\p
\v 9 Ano, angelo ari badu hawe oro ma ndro taloh mene, tawi bwekei ma ndro taloh irek na losen ta Kindrei udu aliy, eme hawek asehek i buku doh, “Ou ame ma jo kaleheya ou ta udu Nadu Sipsip, iy badih doh kameh i tasou i tan.”  
\v 10 Malawin Ndrabun eme bwele-ek, ma angelo bwese-ei jo ma mwasin iu ili bwele-e mandrei ari doh loken labai. Ma iy leheyani jo ta Jerusalem ha-un, kon laba tinan ma ndrabun labai, ta Kindrei udu bolo kandrah eme andri.  
\v 11 Nyikadi lomada Kindrei badeh, anya ili bwele-e kon tinan nane doh. Lomadan badeh, i randrah labai, i buku bek mwasin, sowan tinan labai. Lomadan i buku bek ari iri aloh jaspa, lewen mara-ei i buku torowe, ou winiyan anyolom udu bilisiu tabasi bilisiu.  
\v 12 Kon tinan doh badeh, kowah awudiy mara-ei, ma ili loken labai. Ma kou tan ma ronoh la-uh, ya oro angelo ma ronoh la-uh badeh, atondrok oro kou doh. Udu bwele-e oro kou ma ronoh la-uh doh badeh, iri torowenei nyara boho kamen ma ronoh la-uh tiri lau badu Isra-el udu aliy.  
\v 13 Kowah doh badeh, iri atehei kou taloh, taloh udu kabowen ma hahuw. Iri atehei taloh ili loboho rai, taloh udu loboho kum, taloh udu loboho tolau, ma taloh ja udu loboho jaha.  
\v 14 Kabowe kon tinan nane doh, bilisiu ma bilisiu iri atudun i bwele-e bek laba tinan. Ya udu bada oro bek nane doh iri torowenei nyara oro aposel ma ronoh la-uh ta Nadu Sipsip ta Kindrei udu aliy.   
\p
\v 15 Iy angelo nane asehek sahou eme tek badeh, tawi bala kei ari nyikilikin labai, udu minen ta tumundroh tinan ta kon tinan doh, ma kou hawe kowah awudi kon tinan nane doh.  
\v 16 Kon tinan nane doh, kabowen ma hahuw badeh, i le randra. Lawe-en ma tinan tan mara-ei badeh, ili le randra ale. Angelo tomondrohei na bala kei tan ta tumundroh lakou, ma lawe ta kon tinan amwenen i buku luwa lunek (2,200) kilomita mara-ei. Kabowen ma hahuw hawe bwele-en ta loboho loken badeh, ili le randra.  
\v 17 Angelo ale tomondrohei kowah mara-ei asahan buku ndro hanoh limeh (65) mita lawe-en ta iu ili loken.\f + \fr 21:17 \ft Iri lau rayah ta tanan abudon anya, lawe-en ta iu ili loken, badeh buku 65 mita. Iri rayah ja abudon anya, hutu-u kowah i bolon badeh, buku 65 mita.\f* Tumundroh doh badeh, in hamon tiri lau ale tumundroh lakou. Angelo tumundroh kowah badeh, in hamon ta san ari le nane doh.   
\p
\v 18 Kowah ta kon tinan nane doh, iri amekes na bek jaspa, ya kon tinan mara-ei, iri amekes na bek nyikilikin, lewen mara-ei i buku torowe.  
\v 19 Mwe-e ndru ta kon tinan doh badeh, ma ronoh la-uh, ma Kindrei nyosowani mwe-e ndru ari ari doh na iri bek, randrah, randrah sowa iri laba tinan labai. Mwe-e ndru ma bwena badeh, iy nyosowaniy na bek jaspa, ano bek sapaya iy nyosowani mwe-e ndru la-uh na aliy, bek aget iy nyosowani mwe-e ndru taloh na aliy, ano bek emeral iy nyosowani mwe-e ndru hahuw na aliy.  
\v 20 Bek sadonikis badeh, sowan laba tinan labai, iy nyosowani mwe-e ndru limeh na aliy. Tariyen badeh, saraman hawe belen. Ano bek ari ja, koniliyen tariyen saraman, iy nyosowani mwe-e ndru onoh na aliy, iy atehei bek krisolait tariyen nyokowan udu bada mwe-e ndru ndro taloh, bek beril tariyen nyorowan, iy nyosowani mwe-e ndru ndru la-uh na aliy. Ano iy atehei bek topas, tariyen nyokowan udu bada mwe-e ndru ndro ari. Iy atehei bek krisopres udu bada mwe-e ndru ronoh. Bek hayasin badeh, iy atehei udu bada mwe-e ndru ronoh ari. Ano badeh, iy nyosowani mwe-e ndru ronoh la-uh na bek ametis, tariyen saraman.  
\v 21 Ya, madasan ma ronoh la-uh badeh, Kindrei amekes na bek man ma ronoh la-uh. Kou ari, ari, iy amekes na laba bek man ari, ari. San mara-ei badu bolo kon tinan doh badeh, iy amekes na bek nyikilikin, lewen mara-ei i buku torowe.   
\p
\v 22 Jo badeh, banyolom asiu tinan ta Kindrei bado bolo kon tinan doh bwe, tasah Kindrei badeh, iy boto-on labai, hawe Nadu Sipsip tan, uru ma la-uh badeh, i buku asiu tinan tan.  
\v 23 Udu bolo kon tinan nane doh, an ma bun badeh, banya bwe, tasah lomada Kindrei le ari anya ili bwele-en. Ya, Nadu Sipsip badeh, anya i nyara sun ta aliy.  
\v 24 Iri lau marakon badu kon munyak tinan kameh adek ta lomada sun doh, ma iri kabin mara-ei badu kon munyak kameh, atiye iri nyasou tiri mari mwasin eme le ta lomada sun doh.  
\v 25 Kou mari ta kon tinan doh kameh asak ta udu le buku doh, winiyan bahis bwe, tasah ben kameh winiyan basahan ja bwe.  
\v 26 Iri nyasou hawe luk tiri lau badu kon munyak tinan mara-ei kameh, iri tiyaniy ili le bolo kon tinan nane doh.  
\v 27 Arile, iri lakou ndraka-an, hawe iri lau ta amekes kandriyen ndra-in, iri lau ta karei, ma iri lau ta amekes sahou wasai, iri mara-ei doh kameh winiyan bala bolo kon tinan doh bwe. Iri lau le nyara iri udu bolo buk ta Nadu Sipsip, iri le lau doh kameh akohok kohan handru ma winiyan ala bolo kon tinan don ai.   
\c 22  
\s1 Jon badeh, anyolom gwa hawe kei ta adeu kohan handru  
\p
\v 1 Angelo nane leheya jo ale ta gwa ari doh, kohan handru udu aliy, ta adeu ili wa-i iri lau. Lewen mara-ei, i buku torowe. Bare gwa doh badeh, udu loboho bada koyeu ta Kindrei uru Nadu Sipsip tan, arorou eme len.  
\v 2 Ma gwa doh badeh, arorou amwenen lawe-e le bolo san ta kon tinan nane doh. Udu kapa gwa bilisiu ma bilisiu badeh, iri kei ta adeu kohan handru ili tiri lau, ateh udu aliy. Iri kei doh, ato-ou sali iri badeh, san ma ronoh la-uh udu bolo jaha ari, ma san rasan ta bolo bun ari, ari. La-u iri badeh, ta amekes iri mwan ma badih badu kon munyak tinan mara-ei amwenen.  
\v 3 Ya, iri lakou marakon Kindrei anya kakeh ki-iu, kameh winiyan bado bolo kon tinan doh ja bwai. Kindrei kameh akahei marakon iu. Kindrei  
\m hawe Nadu Sipsip tan kameh ado bolo kon tinan doh, ma atondrok iri mwan ma badih nane are aliy. Ma iri lohowan ta Kindrei kameh, amekes lahou tan ma atudun iy are aliy.  
\v 4 Ma iri winiyan anyolom madan, ma iy kameh torowenei nyaran udu bwili iri.  
\v 5 Ben kameh winiyan basahan ja bwai, ma iri kameh winiyan batelem sun ta lomada iri o lomada an anya na len ja bwai, tasah Laban Kindrei le ari kameh asahan sun ta lomada iri, ma iri kameh asahan kabin ta atondrok lakou marakon hawe Kindrei ta ere le buku don ai.   
\s1 Jises kameh eme hamon ja  
\p
\v 6 Ano angelo asehek eme tek ja i buku doh, “Iri sahou marakon ou ndranuhun ma ndratou ta iri lakou doh badeh, ndra handru le ai, ma iri kameh asahan. Ma iri mwan ma badih kameh winiyan atehei budon tiri handru in ta aliy. Ma Laban Kindrei badeh, ta atadau malawin mwasin tiri propet, ta atiye sahou tan. Ya, iy don adeh, ndrasuni angelo tan ari eme leheya iri lohowan tan ta saba lakou kameh mirihik asahan.”   
\p
\v 7 Jises anya, “Aha kanuhun! Se nawin bwe kameh, jo asahan hawe aha. Buku are mwan o badih, iy in hamon handru ta sahou propet ta Kindrei udu bolo buk dah, badeh, nyosowan ta Kindrei udu la-un ma iy winiyan sekesek handru!”   
\p
\v 8 Jo Jon, jo amwenen anuhun ma anyolom iri lakou marakon doh. Jo anuhun iri lakou doh ano le badeh, jo eme atehei bwili ndru-uk i andri ili ta angelo nane leheya iri lakou eme tek, ma jo anya katudun iy.  
\v 9 Arile, iy anya, “Ndri-iy, ou samekes! Jo Kindrei bwe! Jo ale amekes gok i buku le ou, ma hawe nadu tinem oro, iri propet, ma hawe iri lau anuhun sahou badu bolo buk dah ma a-en hamon ta aliy. Aha marakon katudun Kindrei le ari!”  
\v 10 Ma iy asehek eme tek ja i buku doh, “Ou satone iri sahou ta Kindrei badu bolo buk dah, tasah len ndrame mirihik ai, ta iri lakou marakon doh, kameh asahan.  
\v 11 Eme ma, buku are mwan o badih ale ta amekes kandriyen ndra-in, iri badeh, kamekes kili le ai, ma buku are ale ta amekes kandriyen abola labai, mwasin ta iy saruwaniy, iy kamekes kili le. Ya, buku iri mwan ma badih ta amekes kandriyen mwasin labai, iri kamekes kili le ai. Ya, iri mwan ma badih, Kindrei ndratehei kalem ndrala tiri ta ado ndrabun, iri badeh, saruwaniy, iri kabadok.”   
\p
\v 12 Eme Jises anya, “Aha marakon kanuhun! Jo kameh asahan nawin bwe. Jo kameh andrei iri ndramas ewek, ta adeu ewek taha mwan ma badih. Jo kameh edeu saluwe ndramas ili tiri mwan ma badih ari, ari ta bundruwe kandriyen iri mene amekes.  
\v 13 Jo le ari badeh, asahan mwena handru, ta iri lakou marakon, jo kameh udu le kahis, buku iri lakou marakon ano. Ya, jo ma bwena handru, ma jo in ndrobek mara-ei. Jo ale badeh, kati iri lakou marakon ta asahan, ma jo in hamon ndrobek badeh, ta amekes gok mara-ei ano.   
\p
\v 14 “Iri mwan ma badih ale sikine awin tiri asahan belen mara-ei, badeh, nyosowan ta Kindrei udu la-u iri, ma iri winiyan sekesek handru, ma iri kameh winiyan aimon buwa kei, badu ta kei kohan handru udu aliy, ma iri ale winiyan adek ala madasan ta ili bolo kon tinan.  
\v 15 Arile, iri lau ta amekes kandriyen ndra-in labai i buku iri mwi amekes, iri ta amekes balahak, iri ta amekes karei, iri ta adai lau amak, iri ta atehei bwili ndru-u iri i andri ili ta kindrei ta wendreya, ma iri mwan ma badih ale aso-ok kandriyen ta wasai, ma a-en hamon ta aliy; iri lau marakon doh kameh are ndra manan ta kon tinan nane, iri winiyan bala bolo kon tinan ta Kindrei doh bwe.   
\p
\v 16 “Jo Jises, jo mene tiye angelo tek amwenen ewek bolo aha ta asehek nyala iri lakou marakon doh i taha lau ta Kindrei. Jo badeh, i buku nyabun asahan boho kamen ta Debit. Ya, lomadak badeh, anya i buku lomada ndrau ta boho len.”   
\p
\v 17 Malawin Ndrabun hawe udu Nadu Sipsip anya, “Ou ame.” Eme ma iri lau marakon anuhun boho uru, iri ale kasehek sahou anya, “Ou ame.” Buku ou are mwan o badih, balem amar ta gwa kohan handru udu aliy, ou ame akohok wa-im gwa ta edeu kohan handru, na so-ok tam, i buku ndramas Kindrei edeu laleyah.   
\s1 Jon amekes sahou boto-on ili tiri mwan ma badih nane anuhun sahou badu bolo buk dah  
\p
\v 18 Jo Jon, jo batanau aha mwan ma badih marakon, anuhun sahou propet ta Kindrei udu bolo buk dah. I buku ou are mwan o badih, amekes sahou na le budon tam amwenen ili bolo iri sahou dah, ya iri lakou ndra-in handru nane, Kindrei asehek ta aliy udu bolo buk dah, Kindrei kameh edeu ili bwele-e iri mwan o badih nane amekes sahou ta balen le amwenen.  
\v 19 Ma, i buku are ale bahana sahou propet badu bolo buk dah iu, Kindrei ale, kameh andrei iri lakou mwasin nane, iy ndraleheyaniy ndrala tan, badu ta buwa kei kohan handru udu aliy, badu kon tinan ndrabun labai, ma iri asehek badu bolo buk dah, marakon doh kameh iu.  
\v 20 Iy lau doh asehek sahou ta nyala iri lakou marakon nane anya, “Ehe, jo kameh ewek, nawin bwe!”  
\p Handru! Laban Jises, ou ame!   
\p
\v 21 Tikisiy ta Laban Jises kudu hawe aha lau marakon ta Kindrei, kudu le buku don ai. Handru.