\id MRK - Nyindrou NT with Gen, Ruth, Jon -Papua New Guinea 2001 (DBL 2014) \h Mak \toc1 Tarou ta Mak \toc2 Mak \toc3 Mak \mt2 Tarou ta \mt1 MAK \imt1 Sahou Tanan \ip Sahou ta buk Mak laba tinan i buku doh, “Idah sahou mwasin ma mwena asahan ta nyala Jises Krais, Nadu Kindrei.” Ma bolo tarou ta buk dah taha anyolom Jises, iy ndramak ari boto-on, ma nyaran udu loken labai ta amekes iri gok randrah, randrah. Taha anyolom boto-on tan, ma anuhun nyaran na len mene iy leheya iri lau mwan ma badih, ma tikahei malawi balik ndra-in udu la-u iri iu, ma sikine kandriyen ndra-in tiri mwan ma badih marakon iu. Jises aloh iy amwenen i buku doh, “Nadu Ndramak Awas,” ma iy asehek i buku doh ale, iy eme ta edeu kohan amwenen ta akunoh mwan ma badih solo-an labai ame hamon. (10:45). \ip Mak asehek kundruh solo-an ta gok ta Jises, arile iy basehek kundruh solo-an ta iri sahou Jises mene amekes ta leheya iri lau mwan ma badih bwe. Ma mwena handru, Mak asehek kundruh ta Jon ta alomwa, iy mene alomwa Jises ma Satan eme none iy. Udu hamon ja taha anyolom Jises tikisiy tinan labai, ta iri lau bwese maha-an solo-an, ma iy eme leheya iri. Ma bwena handru, iri lau tan bala tanan bala mwasin ta kati iri sahou Jises amekes bwe, arile iri amekes amunum le ili, eme ma iri akohok tanan tan. \ip Taha anyolom ale ta iri lau ame amekes ndra-in i ta Jises, ma iri adeu maha-an solo-an labai i tan. Ma sendrehendreh ta sahou iy atorou, Mak asehek kundruh ta Jises imek ma iy amak ja. \iot Iri Sahou Tinan \io1 Sahou eme boho Jon ta alomwa (\ior 1:1-8\ior*) \io1 Jon inyu Jises ano ma Satan none iy (\ior 1:9-13\ior*) \io1 Jises amekes gok tan ma bwena udu kon Galili (\ior 1:14–9:50\ior*) \io1 Jises ere Galili edek ili Jerusalem (\ior 10:1-52\ior*) \io1 Jises ili Jerusalem buku kabin ano iy imek (\ior 11:1–15:47\ior*) \io1 Jises bamak bwe, iy ndramak ja. (\ior 16:1-8\ior*) \io1 Jises asahan mada oro lau tan amwenen (\ior 16:9-20\ior*) \c 1 \ms1 Jises eme ta asehek tiri mwan ma badih ta nyala tondrok ta Kindrei \mr (Kalan 1:1–3:6) \s1 Sahou mwasin ta nyala Jises hawe Jon atehe san ta Jises \r (Metiu 3:1-12; Luk 3:1-9; Luk 3:15-17; Jon 1:19-28) \p \v 1 Idah sahou mwasin ma mwena asahan ta nyala Jises Krais, Nadu Kindrei. \v 2 I buku none propet Aisaya ndratorowenei, \q1 “Jo kameh suni ndramak ari ewek bwena tam. \q1 Iy kameh ta atehe san tam.” \rq Malakai 3:1\rq* \q1 \v 3 “Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.’” \rq Aisaya 40:3\rq* \m \v 4 Ya eme Jon ta alomwa asahan bolo kon lomale an ta atiye sahou mwasin ma inyu iri lau, ma tiye tiri katubuni ndrine iri, ma Kindrei kameh sikine kandriyen ndra-in tiri mara-ei iu. \v 5 Eme iri lau mari badu loboho Judiya ma badu kon tinan Jerusalem ame anuhun iy. Eme ma iri asehek budon ma lomondra ndra-in ta karei tiri i ta Kindrei, ma iy alomwa iri ta sikine kandriyen ndra-in tiri iu udu gwa Jodan. \p \v 6 Jon isin awin iri amekes na lami kamel, ma iy aseu balaban, iri amekes na ku-i bulumakau udu ndrukulun i buku malou ta aseu awin tan. Ya iy badeh, kaniyan sabaye ma hawe bwirik badu lokei. \v 7 Eme iy tiye i buku doh, “Ndramak ari in hamon tek eme kameh boto-on tan sakalawi boto-on tek ja. Jo badeh, mwasin handru bwe, ta aluh i andri ta talou malou ta molowa ku-i katin bwe. \v 8 Jo badeh, alomwa ado na gwa, arile iy kameh inyu ado na boto-on ta Malawin Ndrabun.” \s1 Jon inyu Jises \r (Metiu 3:13-17; Luk 3:21-22) \p \v 9 Eme nawin bwe na len doh, Jises ere Nasaret udu bolo Galili eme, ma Jon inyu iy in gwa Jodan. \v 10 Ano, Jises edek udu gwa eme loken le badeh, nawin bwe iy atou kandrah asak, ma Malawin Mwasin atah i buku ban eme andri eme bwele-en. \v 11 Ya, eme aloh ari udu kandrah tiye i buku doh, “Ou badeh, naduk handru, ma ou adek handru. Ou le mesekei jo sekesek labai.” \s1 Satan none Jises \r (Metiu 4:1-11; Luk 4:1-13) \p \v 12 Ano suwi labai Malawin Ndrabun tiyani Jises iu ili kon lomale an. \v 13 Eme Jises udu gwek winiya len ma hanoh (40) hawe iri katin haka, eme Satan none iy kataku, arile iri angelo ta Kindrei badu loken ame bwese-ei Jises ma aseben iy. \s1 Jises atiye sahou mwasin udu bolo Galili \r (Metiu 4:12-17; Luk 4:14-15) \p \v 14 Ano hamon ta iri ndratehei Jon ta alomwa ndrala bolo kou, Jises eme asahan Galili ta atiye sahou mwasin ta Kindrei. \v 15 Eme iy tiye i buku doh, “Len ndrasahan ai, ma tondrok ta Kindrei ndrame bakep! Ya ado katubuni ndrine ado ta karei ma lomondra ndra-in tado, ya ado katehei budon tado handru ki ta sahou mwasin.” \s1 Jises aloh oro lau tan \r (Metiu 4:18-22; Luk 5:1-11) \p \v 16 Ya eme Jises edek kabede gwa li Galili ili, ma iy atou Saimon hawe nadu tinen Enduru. Uru akeh kubwin turu ili bolo gwa li ta akohok ni, tasah uru lau ta bwisir ta ni. \v 17 Eme Jises tiye i turu i buku doh, “Ah kame ka-en hamon tek ma jo kaleheya ah, san ta akohok lau.” \v 18 Eme ya nawin bwe uru ruwani kubwin turu, ma uru au a-en hamon tan. \p \v 19 Ano Jises edek ili bwena sese ja, iy atou Jemis uru Jon an hawe tama uru Sebedi. Oro an ndron toro lowosa kubwin toro. \v 20 Eme iy atou uru le badeh, ma iy aloh i turu, eme uru ruwani tama uru Sebedi hawe lau ta kubwin nane an gwek ai. Eme ma uru an hamon ta Jises. \s1 Jises leheya ma amekes iri lau amwenen ja \r (Metiu 8:14-17; Luk 4:31-41) \p \v 21 Ano oro ame kon tinan Kapena-um na bolo len ta amunyau, eme ma Jises ili bolo asiu ta atukum tiri Juwis, ma leheya iri lau. \v 22 Eme iri lau mari mani iri atur ta leheya tan, tasah iy leheya iri, bala buku none iri lau ta leheya kandriyen tiri Juwis, bwe. Arile, iy leheya iri, i buku none ari ndramak leheya tan boto-on labai. \p \v 23 Eme nawin bwe, udu bolo asiu ta atukum tiri Juwis nane dah, ndramak ari malawin ndra-in udu bwele-en. \v 24 Eme iy aloh, “Jises badu Nasaret, ou anya amekes sasah keme taso? Ou ame dah ta adai aso kamak ai? Jo tanan ou are handru kede-eh, ou badeh, ndramak ndrabun ta Kindrei.” \p \v 25 Arile Jises tiye sahou boto-on i ta malawin ndra-in anya, “Ou andru-uk ma ou ame len ta ndramak badeh!” \p \v 26 Eme ma malawin ndra-in nane dah mesekei ndramak dah totoreh ma anyar bohon i loken, ano iy ruwani iy ma iy eme len. \v 27 Eme iri lau mari mani iri atur, ma iri ndremenya iri ari ari, “Saba lakou handru dah? Idah tanan ha-un ja nadeh? Sahou ta ndramak dah boto-on labai, iy tiye le badeh, malawin ndra-in anuhun bohon ma iri au.” \p \v 28 Eme ma sahou ta nyalan aseker ili bolo kon mari badu loboho Galili. \p \v 29 Ano nawin bwe oro ame len ta asiu ta atukum tiri Juwis ma oro adek ales ala asiu ta Saimon uru Enduru, ma Jemis uru Jon a hawe oro. \v 30 Eme salahu Saimon ibo sik, badan nyarahan in bada sau. Eme Jises asahan le badeh, oro tiye i tan. \v 31 Eme Jises ili hawen tawi minen ma suri iy eme loken, eme ma badan nyarahan nane iu, ma iy amekes noro nyamon. \p \v 32 Eme na beyeh an anya ki andri badeh, iri atiye iri lau mari sik ma hawe lau malawin ndra-in udu bwele-e iri ame hawen. \v 33 Eme iri lau mari badu kon tinan mara-ei atukum ala loboho le madasan ta asiu. \v 34 Eme Jises mesekei iri lau, saba sik udu tiri badeh, amwenen ja, ma tikahei iri malawin ndra-in solo-an au. Eme iy tiye iri malawin ndra-in kandru-uk le, tasah iri tanan iy. \s1 Jises asolom ano iy atiye sahou mwasin ili Galili ja \r (Luk 4:42-44) \p \v 35 Ano na mandraben ma wahun an bame loken bwe le, Jises suri iy ma edek eme len ta asiu ma edek iu ili kon ari doh, lau bare aliy bwe. Eme ma iy udu aliy asolom. \v 36 Arile Saimon hawe oro lau nane an hawen ala takaleh iy. \v 37 Eme oro ndruni iy ma asehek i tan, “Iri lau mari asilah ou.” \p \v 38 Eme Jises tiye i toro, “To ka-au ka kon rayah ja, ya jo kameh kasehek sahou ki aliy, tasah jo dah eme ta aliy amwenen ai.” \p \v 39 Eme ma iy edek ili loboho Galili mara-ei asehek sahou in bolo asiu ta atukum tiri Juwis ma atikah iri malawin ndra-in au. \s1 Jises hawe ndramak badan lepra \r (Metiu 8:1-4; Luk 5:12-16) \p \v 40 Eme ndramak ari sik lepra udu tan eme atehei bwili ndru-un i andri, ma iy ndremenya Jises i buku doh, “I buku none ou aseken, ou winiyan mesekei jo kamwenen ja udu mada Kindrei.” \v 41 Eme Jises tikisi iy labai, eme iy atehei minen i badan ma tiye i tan i buku doh, “Jo aseken. Ya ou amwenen.” \v 42 Eme ma nawin bwe, lepra udu badan amai iu laleyah ma iy ndramwenen ja. \v 43-44 Eme iy suni iy iu ma tiye sahou boto-on i tan i buku doh, “Ou sala sasehek ta ari lau ja ai, ndri-iy. Arile, ou ales ala hawe iri pris, leheya badam ki tiri kanyolom, ano ou adeu salom ta asun i le buku Moses mene ndrabatanau, ya eme iri kanyolom ma katanan ou badeh, ndramwenen ja.” \p \v 45 Arile bwai, ndramak nane dah ili asehek i tiri lau mari. Eme handru labai iy asehek san solo-an labai, eme Jises winiyan bala kon tinan bwe. Arile iy udu ndra kon nane lau aliy bwe doh, eme ma iri lau badu heh, badu heh ame le hawen. \c 2 \s1 Jises mesekei ndramak ari badan imek amwenen ja \r (Metiu 9:1-8; Luk 5:17-26) \p \v 1 Na len ra-on hamon ja, Jises eme hamon eme Kapena-um, eme ma sahou ta nyalan ndraseker, tasah iy ndrame bolo kon. \v 2 Eme iri atukum ala le, eme ma bolo asiu aso ma reu bwe, eme asiu winiya lau bwe, ma loboho madasan aso ale. Eme Jises asehek sahou mwasin i tiri. \v 3 Ya eme oro lau ma hahuw bwese-ei ndramak ari badan imek anya keme hawe Jises. \v 4 Arile iri lau solo-an labai, eme oro winiyan batiyani iy bala hawe Jises bwe. Eme oro bosokei bwele-e asiu amwenen le bwele-e Jises ales udu aliy, eme oro atehei ndramak nane dah in bada nyahan tan ili andri amwenen le ta batala Jises. \p \v 5 Eme Jises anyolom budon toro boto-on labai in tan, ya eme iy tiye sahou i ta ndramak nane badan imek anya, “Naduk, kandriyen tam ndra-in mari badeh, ndrasikine mara-ei ndra-au.” \p \v 6 Ya eme oro lau ra-on ta leheya kandriyen tiri Juwis manyah are doh ale, ya eme oro ari ari lomondra, \v 7 “I buku sah handru iy asehek sahou ndra-in i buku doh i ta Kindrei? Ari ndramak winiyan basikine kandriyen ndra-in bwe. Kindrei le ari, kabwe!” \p \v 8 Suwi labai Jises ndratanan budon toro, eme iy tiye i toro, “Tasah handru iri budon solo-an doh udu ndrine ado? \v 9 Katiye ki manamwun ki buku sah handru ki ta ndramak badan imek dah, ‘Kandriyen ndra-in tam ndrasikine ndra-au,’ deh, bwe katiye, ‘Ou suri ou, ou andrei nyahan tam ma ou adek’? \v 10 Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai, udu bwele-e munyak dah ta tiye i ta ndramak ta mani kandriyen tan ndra-in iu.” \v 11 Eme Jises tiye i ta ndramak badan imek dah, “Jo tiye tam, ou suri ou, ou andrei nyahan tam ma ou au a kon!” \p \v 12 Eme iri mari anyolom ndramak nane dah suri iy eme loken, andrei nyahan tan ma iy edek iu. Eme iri mari mani iri atur labai, ma iri atudun nyara Kindrei i buku doh, “Ahi ndra bwena bwena batou ari lakou bala buku dah bwe!” \s1 Jises aloh Libai ma aimon nyamon hawe iri lau ndra-in \r (Metiu 9:9-13; Luk 5:27-32) \p \v 13 Ano Jises iu i hamon ja ili kapa gwa li Galili. Eme iri lau mari atukum ame hawen ma iy leheya iri. \v 14 Ano iy edek ili, ma iy atou ndramak ari ta akohok luk ta takis, nadu Alpeyus nyaran Libai. Iy manyah ereu bolo asiu tan ta gok ta akohok luk ta takis. Eme Jises tiye i tan, “Ou ame an hamon tek.” Eme Libai suri iy ma iy in hamon tan. \p \v 15 Ano Jises manyah udu bolo asiu ta Libai. Ya iri lau solo-an ta akohok luk ta takis, ma hawe iri Juwis ale ba-en hamon ta kandriyen ta batanau ta Moses bwe, ma hawe oro lau tan ame aimon nyamon hawen. Ya iri lau solo-an ale an hamon tan. \v 16 Eme oro lau ta leheya kandriyen tiri Juwis ma hawe oro Parasi\f + \fr 2:16 \ft Iri Parasi badeh, lau ta atondrok kandriyen tiri Juwis.\f* atou Jises aimon nyamon udu hawe iri lau ta lomondra ndra-in ma hawe iri lau ta akohok luk ta takis. Eme oro tiye i toro lau ta Jises, “Tasah handru iy aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?” \p \v 17 Eme Jises anuhun oro, ma iy tiye toro i buku doh, “Iri lau ale babo sik bwe, iri winiyan baso-ok ndramak ta anyumor iri bwe. Arile iri lau tiri sik le badeh, aseken seben. Jo eme dah ta aseben lau mwasin le bwe. Jo eme dah badeh, ta aseben iri lau ta karei ma ta lomondra ndra-in udu tiri kasahan mwasin.” \s1 Jises asehek nyala kandriyen ta abeles taha ta nyamon \r (Metiu 9:14-17; Luk 5:33-39) \p \v 18 Udu bolo len doh, oro lau ta Jon ma hawe iri Parasi, abeles iri ta nyamon. Eme lau ra-on ame ndremenya Jises anya, “I buku sah handru oro lau ta Jon ta alomwa ma hawe iri lau tiri Parasi abeles iri ta nyamon, arile oro lau tam ja, bwe?” \p \v 19 Eme Jises asumon boho oro i buku doh, “I buku none ndramak tasou bolohau udu aliy, ado winiyan babilisi oro lau ta molak bwe! Arile, na len hamon eme, idah kameh iri kuhi iy eme len, ma na len doh, oro kameh winiyan baimon nyamon bwe. \v 20 Arile, len hamon eme kameh, ndramak doh kameh, iri lau ta amekes kaliu i tan kuhi iy eme len. Ma na bolo len doh ale kameh oro winiyan baimon nyamon bwe. \s1 Sahou ta lakou ha-un ma lakou malen \p \v 21 “Ado kanuhun. Ari ndramak winiyan bakuhi ranah kolau ha-un, ya suwidiy ja i manamunu awin malen bwe. Buku iri bwidiy i buku doh, ya iri sikine awin, kolau ha-un nane kameh bosokou, ma awin malen kameh atarah ja, eme ma munun kameh i tinan labai ja ai. \v 22 Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen kameh tuburok, ma kohan kameh tarani ku-i me nane, ma waen kameh iu laleyah. Tasah waen ha-un badeh, ndrahunen ku-i me ha-un.” \s1 Sahou ta len ta amunyau \r (Metiu 12:1-8; Luk 6:1-5) \p \v 23 Ano, udu bolo len ari ta amunyau, Jises ma hawe oro lau tan adek bolo bilin ari ta wit. Eme oro lau tan abwe-eh buwa wit nane dah. \v 24 Eme ya oro Parasi ame tiye i ta Jises, “Hei, ou anuhun! Tasah handru oro abwe-eh buwa wit na len ta amunyau? I buku sah oro ba-en hamon ta kandriyen tahi bwe?” \p \v 25 Eme Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen bado ta kundruh ta lakou kabin Debit mene mesekei bwe nadeh? Jo asehek ta lakou kala Debit hawe oro lau tan aso-ok lakou tasah oro ameson. \v 26 Ya eme iy ili bolo asiu ta Kindrei ya kuhi jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Lakou idoh asahan na len pris, Abiyata in ndra tinan tiri pris. Ehe, Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.” \p \v 27 Eme ma Jises asehek sendrehendreh i buku doh, “Mesekei len ta amunyau badeh, ta aseben ndramak labai, arile bamesekei ndramak ta aseben len ta amunyau bo-oh. \v 28 Eme ma jo Nadu Ndramak Awas, ya jo tama len ta amunyau.” \c 3 \s1 Jises amekes lahou udu bolo len ta amunyau \r (Metiu 12:9-14; Luk 6:6-11) \p \v 1 Eme Jises iu i hamon ja ili asiu ta atukum tiri Juwis, ya eme ndramak ari in aliy, minen imek. \v 2 Oro lau rayah ado aliy, eme ya oro anya katakaleh madasan ta kadeu Jises ki ta mada sahou. Eme iri atehei mada iri udu tan, i buku iy kamesekei ndramak dah kamwenen na len ta amunyau dah, deh bwe. \v 3 Eme Jises tiye i ta ndramak nane minen imek dah, “Ou ame mwena dah.” \v 4 Ya eme iy ndremenya iri, “Saba kandriyen mwasin kameh taha kamekes na len ta amunyau? Kamekes kandriyen mwasin ta aseben koha lakou deh, bwe kamekes kandriyen ndra-in ta adai lau?” \p Eme iri basehek randra sahou bwe. \v 5 Eme Jises anyolom ili eme i tiri, eme iy ibolosen, arile bwai, ndrinen ale tikisi iri, tasah iri badeh, ndrandra-i ma ndrine iri ndraso. Ano, iy tiye i ta ndramak nane dah anya, “Minem kales!” Eme iy talasei minen ma minen amwenen ja. \v 6 Eme oro Parasi ame len ta asiu ta atukum, ma oro au suwi labai atukum hawe iri lau rayah ta Herot, eme ma oro asehek ma atilik nyala oro ta takaleh san ta kadai Jises kimek. \ms1 Jises leheya boto-on tan, arile iri lau badu kati kon tan amwenen batehei budon tiri bala tan bwe \mr (Kalan 3:7–6:6) \s1 Jises asehek sahou mwasin ma amekes lau solo-an amwenen udu Galili \r (Luk 6:17-19) \p \v 7 Ano Jises ma hawe oro lau tan ame gwa li Galili, ma hawe iri lau solo-an labai an hamon tan. Iri lau badeh, badu Galili, badu Judiya, \v 8 ya badu Jerusalem, badu loboho Idumiya, badu loboho kapa gwa Jodan bilisiu ma hawe badu mirihik ta kon tinan Tair hawe Saidon. Iri lau solo-an doh nane ame hawe Jises, tasah iri anuhun lakou solo-an iy amekes. \v 9 Iri lau solo-an labai, eme Jises tiye i toro lau tan lowosani ndron ra-ei ta iy ki aliy, koro-an lau katisi iy. \v 10 Iy ndramesekei iri lau solo-an ndramwenen, ya eme iri lau sik udu tiri ndrokowa iri ame hawen, tasah oro anya kateu le badan. \v 11 Ya eme loboho heh, loboho heh, Jises ili badeh, iri lau malawin ndra-in udu bwele-e iri atou iy le badeh, iri atarah a andri ma aloh, “Ou badeh, Nadu Kindrei!” \p \v 12 Eme Jises batanau iri ta iri sanyowonya iy are lau handru, ndri-iy. \s1 Jises aloh oro lau tan ma ronoh la-uh \r (Metiu 10:1-4; Luk 6:12-16) \p \v 13 Eme Jises iu ili bwele-e mandrei i loke ma iy aloh oro lau ala so-ok tan udu toro. Eme ma oro ame hawen. \v 14 Eme iy andrei oro lau ma ronoh la-uh dah, eme ma Jises tondrohani nyara oro i aposel, lau badu hawen ma iy kameh tiye oro au a len atiye sahou. \v 15 Ma iy edeu boto-on i toro ta atikah malawin ndra-in ki-iu. \p \v 16-19 Ya idah nyara oro lau tan ma ronoh la-uh: \li1 Saimon (Jises tondrohani nyaran Pita), \li1 Nadu Sebedi uru, Jemis uru Jon (eme Jises tondrohani nyara uru Bowanekes, moson “Nadu Kuruh”), ya hawe \li1 Enduru, \li1 Pilip, \li1 Batolomiu, \li1 Metiu, \li1 Tomas, ma \li1 Jemis nadu Alpeyus, \li1 Tadeyus, \li1 Saimon Selot,\f + \fr 3:16-19 \ft Selot badeh, moson Ndramak ta aliu iri Juwis kame len ta baha tondrok ta Rom ma hawe.\f* \li1 Judas Iskariyot, iy ale ndramak doh hamon kameh iy edeu sa-oh ta Jises. \s1 Iri anya Jises malawin ndra-in udu la-un ma iy asehek sahou sokek \r (Metiu 12:24-32; Luk 11:14-23; Luk 12:10) \p \v 20 Eme Jises iu i kon. Udu ja, lau solo-an labai atukum, eme Jises hawe oro lau tan ari len ta aimon nyamon bwe. \v 21 Eme lowan oro anuhun, ma oro anya kala kakohok iy, tasah iri lau anya, “Iy badeh, ndra lolo-ou.” \p \v 22 Iri lau ra-on ta leheya kandriyen tiri Juwis are Jerusalem ame asehek anya, “Jises badeh, Belsabul ndra bwele-en!” Iri ra-on ja anya, “Idoh tinan tiri malawin ndra-in edeu boto-on i tan ta atikah iri au.” \p \v 23 Ya eme Jises aloh iri lau ame hawen ma iy asehek sahou sokek ra-on, “Ki buku sah handru tama iri balik Satan katikah Satan? \v 24 Ki buku sah handru, buku rakon kon buruwen kapou uru ki la-uh ya uru kadai uru, idah kameh ndrokowa uru udu aliy. \p \v 25 “Ya, ki buku iri lau badu boho kamen ra-em kaseker, idah kameh iri lau doh winiyan bales boto-on bwe. \v 26 Ya, ki buku oro lau ta Satan kapou oro ki lumuk, idah kameh iy boto-on bwe, ma kameh nyaran mirihik ano. \p \v 27 “Ya, buku none ndramak anya ki bolo asiu ta ndramak boto-on, ma kabahana iri lakou tan, iy kameh amekes sah handru? Ma bwena handru iy kameh sawei iy ndramak boto-on nane na malou boto-on. Ano iy winiyan akohok iri lakou ereu asiu ta ndramak nane. \p \v 28 “Jo tiye tado handru! Kindrei kameh winiyan mani kandriyen ndra-in ta lau, ma sahou ndra-in lau asehek. \v 29 Arile, are lau aluhe i bada nyara Malawin Ndrabun, Kindrei kameh winiyan bamani kandriyen ndra-in tan doh bwe, tasah maha-an tan winiyan bano bwe.” \v 30 Jises tiye sahou doh, tasah oro ra-on tiye anya, “Iy badeh, malawin ndra-in udu bwele-en.” \s1 Are lau iy lowa Jises \r (Metiu 12:46-50; Luk 8:19-21) \p \v 31 Eme tine Jises hawe nadu tinen oro asos. Oro ales are manan ya oro suni sahou ili ta ndremenya iy. \v 32 Ya lau solo-an labai manyah ma awudi Jises, eme oro tiye i tan, “Jises ei, tinem hawe nadu tinem oro are manan kodo-oh, oro anya ou ala.” \p \v 33 Eme Jises tiye, “Ado anya tine handru, are lau bah? Ya nadu tine oro handru, lau heh bah?” \v 34 Iy anyolom ili eme i toro lau nane manyah dah, eme ma iy tiye, “Jo asehek tado, tine ma nadu tine oro handru, asah ado mari manyah kede-eh! \v 35 Are lau in hamon ta so-ok ta Kindrei, iri badeh, nadu tine mwan ma badih handru, ma tine handru.” \c 4 \s1 Sahou sokek ta ndramak sabara badu wit ili bolo bilin \r (Metiu 13:1-9; Luk 8:4-8) \p \v 1 Ano ja, Jises leheya iri lau an kapa gwa li Galili. Iri lau solo-an labai atukum ta anuhun iy, eme iy sandroh in ndron ra-ei ma manyah udu bolo ndron ere bwele-e gwa, ya iri lau mari nane dah, an kapa gwa amik ai. \v 2 Eme iy asehek sahou solo-an i tiri na sahou sokek, eme udu bolo leheya tan, iy tiye i tiri i buku doh, \p \v 3 “Aha kanuhun! Ndramak ari ili sabara badu wit ili bolo bilin, \v 4 ya eme iy akeh ili, badu wit ra-on taku in san, ya iri sirih ame aniy. \v 5 Ra-on ja taku in bwele-e bek, ndren solo-an mwe-en bwe, ma badu wit ateh suwi. \v 6 Arile, an anya eme loken nyarahan boto-on labai, ma sulumwi wit nane, tasah kandron bala bolo munyak alih bwe, eme ma iy ame-er mara-ei ma imek. \v 7 Ya badu wit ra-on ja taku in bolo bada malou bobodon. Bada malou bobodon nane ateh eme loken, ma tubuluhi wit nane ma iy bato-ou buwan bwai. \v 8 Arile buwa wit ra-on taku i bolo ndren mwasin, ma iy ateh i tinan ma iy ato-ou buwan solo-an labai. Eme buwan ra-on ato-ou tonoh (30), ya ra-on ato-ou ndro hanoh (60) ma ra-on ja ato-ou rinek (100).” \p \v 9 Ano, Jises isan sendrehendreh ta sahou i buku doh, “Ou are lau ndranyem udu aliy, ou anuhun kamwenen.” \s1 Kati sahou sokek \r (Metiu 13:10-17; Luk 8:9-10) \p \v 10 Eme ma lau solo-an aseker, ano Jises le ari, ma hawe lau ra-on badu bolo oro nane ma hawe oro lau tan anuhun, ma oro ndremenya Jises ta saba moson handru ta sahou sokek nane ndra-au. \v 11 Eme iy tiye i toro, “Kindrei aseken ado lau tek katanan iri sahou mene aton ta nyala tondrok ta Kindrei. Arile iri rayah bare hawe to dah bwe, jo asehek i san ta sahou sokek, \q1 \v 12 ‘Iri kameh anuhun sahou san solo-an, arile iri kameh winiya bala tanan kati sahou handru bwe. Iri kameh anyolom san solo-an, arile iri kameh winiyan baseleyani ari lakou bwe. Koro-an iri katubuni ndrine iri ja ma Kindrei kameh sikine lomondra ndra-in tiri iu.’” \rq Aisaya 6:9-10\rq* \s1 Jises asehek sahou sokek \r (Metiu 13:18-23; Luk 8:11-15) \p \v 13 Eme Jises ndremenya oro, “Budon tado kede-eh aleu ta sahou sokek dah deh bwe? Ki buku sah kameh budon tado kaleu ta sahou sokek mara-ei? \v 14 Ndramak ta sabara buwa kei doh, i buku ndramak ta atiye sahou ta Kindrei. \v 15 San rayah, sahou ta Kindrei taku in san. Ya iri lau doh anuhun. Arile, Satan eme ja, sokosowei sahou mwasin nane Kindrei tahiy ereu budon tiri. \v 16 Lau rayah i buku none buwa wit taku in bwele-e bek. Ya eme suwi labai iri anuhun sahou ta Kindrei ma sekesek le, \v 17 arile bala ndrine iri handru bwe ma bare gwek luluwen bwe. Ya i buku none ndrine sen asahan deh bwe-em ndra-i asahan, tasah ta sahou ta Kindrei, ya idah kameh, suwi suwi iri taku. \v 18 Lau rayah ja, i buku none buwa wit taku in ndrokowa bada malou bobodon. Idoh i buku none iri anuhun sahou ta Kindrei, \v 19 arile iri abudon boto-on labai ta lakou solo-an badu kon munyak. Ya iri abudon boto-on labai ta atukum iri luk, ma iri lakou ra-on ja. Ya idoh sokei sahou ta Kindrei, eme ma bwidi iri bato-ou sali iri bwe. \v 20 Ya lau rayah ja, i buku none buwa wit ateh in munyak mwasin. Iri anuhun sahou ta Kindrei, eme iri tawiy ma iri ato-ou sali iri. Rayah asahan tonoh (30), rayah ndro hanoh (60), ma rayah asahan rinek (100).” \s1 Sahou sokek ta sun \r (Luk 8:16-18) \p \v 21 Eme Jises asehek le ili, “Ndramak ari iy telemei sun, iy winiyan batehei bado bahandra bwekei bwe, ma iy ale winiyan batehei bala bahandra sau bwe le, arile iy kameh atehei udu ndrahunen loken. \v 22 Lakou mari aton kede-eh kameh eme lewan, ya saba lakou tubuluhiy kameh andrei lakou ta tubuluhen iu. \v 23 Ou anuhun, i buku ndranyem udu aliy, ou anuhun kamwenen!” \p \v 24 Eme Jises tiye i tiri, “Ndranyem kirih ki ta sahou ou anuhun! Saba maha-an ou amekes i tiri, kameh i le buku maha-an ou akohok. Eme kameh, ou akohok maha-an solo-an labai ja i hawen. \v 25 Are ndramak tanan tan mwasin udu aliy, iy kameh akohok tanan mwasin labai ja i la-un. Ya ndramak tanan tan sese le, tanan tan sese le doh kameh kuhiy mari iu.” \s1 Sahou sokek ta buwa kei ateh \p \v 26 Eme Jises asehek ili le, “Ya tondrok ta Kindrei i buku none ndramak sabara buwa kei ili bolo bilin. \v 27 Iy amadin na ben ma amak na len, eme buwa kei ateh, arile iy bala tanan bwe, i buku sah handru ateh. \v 28 Munyak le anyohan buwa kei ateh ma edeu salin. Ma mwena handru iy i tinan ano, nyandren asahan ano ja, buwan asahan. \v 29 Len ta buwa kei uni badeh, ndramak andrei samen ili isan, tasah len ta akohok badeh, ndrano.” \s1 Sahou sokek ta mastet \r (Metiu 13:31-32; Luk 13:18-19) \p \v 30 Eme Jises ndremenya, “Taha kasehek tondrok ta Kindrei kameh ki buku sah handru? Saba sahou sokek taha kasehek kaleu? \v 31 Tondrok ta Kindrei i buku none buwa kei ari iri aloh mastet. Badun badeh, nadu bwisik labai udu bolo munyak idah. Ndramak andrei, iy ili tahiy i bolo munyak. \v 32 Ano, ateh eme loke ma i tinan sakalawi ja iri buwa kei badu bolo bilin. Iy asahan buku ra-ei kei ma edeu andran. Eme iri sirih winiyan ame amekes ndrahu iri ta aton.” \s1 Jises asehek na sahou sokek le \r (Metiu 13:34-35) \p \v 33 Ya eme Jises asehek sahou i tiri lau na sahou sokek solo-an i buku le doh, iy tiye san solo-an handru winiya iri akohok amwenen. \v 34 Iy asehek i tiri na sahou sokek le, arile iy le ma hawe oro lau tan le ja, iy asehek moso sahou marakon i toro. \s1 Siyer ma bayau anuhun Jises \r (Metiu 8:23-27; Luk 8:22-25) \p \v 35 Na len mirihik ta kon akoroh, Jises tiye i toro lau tan i buku doh, “To ka-au kala kapa gwa bilisiu.” \v 36 Eme iri lau marakon an gwek, oro suni Jises i hawe oro, ya ndron ra-on ja a hawe oro ale. \v 37 Eme laba siyer atohou ya bayau i tinan, eme ndron bokobwak, bayau eme ndron, ndrai idih, ya mirihik ndron anya katuh. \v 38 Arile, Jises amadin in bada sau hamon ta ndron, eme oro ala mete-ei iy, ma oro tiye i tan, “Ndramak ta leheya, ou batikisi to bwe nadeh? I buku to kamak?” \p \v 39 Eme iy amak eme loke, ma iy asehek sahou i ta siyer ma bayau anya, “Ou amondrei! Bahun ka-iy ai!” Eme siyer ma bayau amondrei ma gwa ndras ameres udu le udu. \v 40 Eme Jises tiye i toro, “Ado anoh tasah? Buku sah ado batehei budon tado ba-en tek bwe?” \p \v 41 Eme ma mani oro atur labai, ma oro ndremenya oro ari ari anya, “Iy are lau handru? Ya siyer ma bayau anuhun iy!” \c 5 \s1 Jises tikahei malawin ndra-in au \r (Metiu 8:28-34; Luk 8:26-39) \p \v 1 Oro ame asos kapa gwa li loboho kon tiri lau Gerasa. \v 2 Jises udu ndron eme andri le badeh, ndramak ari badu mada lek, malawin ndra-in udu bwele-en eme asahan hawen. \v 3 Ya ndramak nane dah ndrahu matinou tan badu mada lek ta lau amak, ya ari lau winiyan basawei iy bwe, sen winiyan bwe. \v 4 San solo-an aseu iy na sen ma sei i sakan, arile iy mindrindri sen amendreh, ma iy sekese-ei andra-i labai, ya ari lau iy boto-on, iy winiyan batawi iy bwe ale. \v 5 Ben len ben len, iy in mada lek ndrokowa mandrei anyar ma alim iy na bek. \p \v 6 Ya eme iy atou Jises i ndra len on, eme iy sakaliye ili taku udu katin ma atudun nyaran. \v 7-8 Eme Jises tiye i tan, “Ou malawin ndra-in, ou ame len ta ndramak badeh.” Eme iy anyar bohon i tinan anya, “Jises Nadu Kindrei, ou anya amekes sasah keme tek? Jo tandrakan ta nyara Kindrei, ou samekes sisi-in same tek.” \p \v 9 Eme Jises ndremenyani iy, “Nyaram are lau?” \p Eme iy anya, “Nyarak badeh, Solo-an, tasah aso nyaran bwe!” \v 10 Eme ya iy asehek sahou ta tikisiy i ta Jises i buku doh, “Ou satikahei aso sa-au ta kon dah.” \p \v 11 Eme ya bou rakou buruwen aimon nyamon an ka-u mandrei. \v 12 Eme malawin ndra-in tiye sahou tikisiy i ta Jises anya, “Ou tikahei aso ka bwele-e bou.” \v 13 Eme Jises tiye i toro, “Abo, ado ka-au.” Eme malawin ndra-in nane dah ame len ma a bwele-e bou. Ya kane oro bou doh, i buku none luwa (2,000), eme oro sakaliye are bwele-e mandrei ame andri ala bolo gwa li, ma oro amak. \p \v 14 Eme ma lau ta atondrok iri bou doh atobwak au a kon tinan ma hawe a lokei asehek i tiri lau. Eme ma iri lau ame anyolom. \v 15 Iri ame hawe Jises ma iri anyolom ndramak nane malawin ndra-in mene udu la-un nane dah manyah udu andri ai. Iy ndratani kolau ma budon tan ndramwenen ja ai. Eme ma iri anoh. \v 16 Ya oro lau nane anyolom dah, ala asehek nyala iri ta ndramak mene, malawin ndra-in udu la-un badeh, ndramwenen ja, ma hawe bou. \p \v 17 Eme iri tiye Jises ta iy ki-iu ki rasi ja ta loboho doh. \p \v 18 Suniya Jises anya ki-iu kili bolo ndron, ya ndramak nane malawin ndra-in udu bwele-en eme tiye sahou tikisiy i ta Jises, ta iy anya ki hawen. \p \v 19 Arile Jises bwalen, eme iy tiye i tan, “Ou a kon hawe lowam oro, ya ou asehek nyala oro ta lahou tinan Laban ndramesekei ndrawek tam, ma iy tikisi ou, ma iy mesekei ou ndramwenen ja.” \p \v 20 Ya eme ndramak nane dah, iu ili bolo kon ma ronoh udu loboho Dekapolis asehek ta nyala lahou tinan mene, Jises ndramesekei i tan, ya eme iri lau marakon lomondra solo-an. \s1 Jises mete-ei nadu Jairus badih ma mesekei badih ari sik ndra udu tan iu \r (Metiu 9:18-26; Luk 8:40-56) \p \v 21 Eme Jises i ndron ja iu i kapa gwa bilisiu, eme ya lau solo-an labai, atukum ame le kapa gwa hawen. \v 22 Eme ndramak ari ta atondrok asiu ta atukum tiri Juwis nyaran Jairus, iy atou Jises ma iy eme taku in katin. \v 23 Eme Jairus tiye sahou tikisiy i tan i buku doh, “Naduk badih badeh, mirihik ta anya kimek ai, ou ame atehei minem ki tan ya iy kamak ja.” \p \v 24 Eme Jises i hawen, ma hawe iri lau solo-an an hamon tan ala ale, ma awudi iy udu le alih. \p \v 25 Eme ya badih ari udu aliy, sik ndra udu tan winiya jaha ma ronoh la-uh. \v 26 Iy ndrakahei luk sabe kolek ndra tiri lau ta anyumor ma amekes iy kamwenen, arile bwe, sik tan bamwenen se bwai. Ya iy akohok sisi-in kahis le, ma sik ja asahan boto-on le gwek. \v 27 Iy ndranuhun nyala Jises bwena, eme iy sokohani iy i ndrokowa iri lau ili in hamon tan, eme iy tawi kiri awin ta Jises, \v 28 tasah iy anya, “I buku none jo katawi le kiri awin tan kameh jo amwenen ja.” \p \v 29 Eme se nawin bwe, sik ndra tan iu ma ano mara-ei, eme iy atona bolo odan badeh, ndramwenen mara-ei. \v 30 Jises ndratanan boto-on tan ndrame len, eme iy tubuni madan i tiri lau marakon, eme ma iy tiye, “Are lau tawi awin tek?” \p \v 31 Eme oro lau tan anya, “Ou atou lau ahas badam badeh, i buku sah handru, ma ou tiye anya ja, ‘Are lau tawi jo?’” \p \v 32 Eme madan ili eme, iy anya kasilah are lau nane amekes lakou doh. \v 33 Eme badih nane dah tanan lakou nane asahan tan, eme iy inoh ma iy totoreh, ma iy morohani iy i andri kati Jises eme ma iy asehek sasah mene asahan tan. \v 34 Eme Jises tiye i tan anya, “Nadu badih den, ou atehei budon tam handru in tek, ma mesekei ou asahan amwenen. Ou au ma ndrinem kamunum, tasah sik tam ndra-au ma ndrano mara-ei.” \p \v 35 Eme iy asehek sahou kahis le, lau ra-on ado asiu ta Jairus ame tiye ta Jairus, “Nadum badih ndramak. I buku sah ou asehek sahou kahis i ta ndramak ta leheya badeh?” \p \v 36 Eme Jises banuhun sahou toro bwe, eme iy tiye i ta Jairus, “Ou sanoh, budon tam handru ki-in tek.” \v 37 Eme Jises bwalen ari lau sa-en hamon tan, arile Pita le, Jemis le hawe Jon nadu tine Jemis, oro le a hawen ala. \v 38 Oro ame asos asiu ta Jairus, eme Jises atou iri lau ta kabek taya andra-i labai. \v 39 Eme Jises i bolon tiye i tiri, “I buku sah ado aden ma taya ndranyen? Nah kede-eh bamak bo-oh, iy amadin le oh.” \p \v 40 Eme iri ehe-en iy. Arile iy tikahei iri ame len ta asiu, eme Jises hawe tama nah hawe tinen ma hawe oro lau tan le ala bolo asiu, nane iy nadu badih imek in aliy. \v 41 Eme Jises tawi minen ma tiye i tan i buku doh, “Talita kumi,” moson, “Nadu badih, jo tiye i tam, ou amak ame loke.” \p \v 42 Eme se nawin bwe, nadu badih dah suri iy ma iy edek (jaha tan badeh, ronoh la-uh). Eme suwi labai mani oro atur. \v 43 Eme Jises tiye sahou batanau i toro lau, ta oro sala sasehek ta ari ndramak ja ndri-iy, eme iy tiye i toro, “Ado kadeu nyamon ki nan.” \c 6 \s1 Iri lau badu kon ta Jises amwenen bwale iri iy \r (Metiu 13:53-58; Luk 4:16-30) \p \v 1 Eme Jises iu i len ta kon nane iy udu aliy, eme iy iu ili kon tan amwenen, ma hawe oro lau tan ale ala hawen. \v 2 Eme na bolo len ta amunyau, iy leheya iri lau an asiu ta atukum tiri Juwis. Eme lau solo-an anuhun iy asehek sahou, ma mani iri atur, ma iri ndremenya, “Iy ndramak kede-eh, iy akohok tanan doh badu heh handru? Aden! I buku sah iy amekes lahou tinan na minen! \v 3 Taha tana taha, iy ndramak kede-eh ta atah asiu, ma iy nadu Mariya, nadu tine Jemis, Joses, Judas hawe Saimon, ya nadu tinen oro badih, are hawe to kada-ah, neh?” Oro asehek i buku doh, ma oro atehei kona oro i tan. \p \v 4 Eme Jises tiye i tiri anya, “Iri propet ta atiye boho Kindrei, nyara iri tinan ereu kon mari. Arile ereu kati kon tan amwenen, ma ereu boho kamen tan amwenen, ma ndrokowa oro ndraye oro rabuk, iy asahan buku lau laleyah.” \p \v 5 Eme Jises winiyan bamekes ari lahou tinan bareu kon dah bwai, arile iy le edeu minen i bwele-e iri le lau sik udu tiri, eme ma sik tiri iu. \v 6 Eme Jises manin atur, tasah iri batehei budon tiri handru ba-en tan bwe. \ms1 Jises leheya boto-on tan, arile oro lau tan bala tanan iy bala mwasin bwe \mr (Kalan 6:6–8:21) \s1 Jises suni oro lau tan ala ta amekes lahou \r (Metiu 10:5-15; Luk 9:1-6) \p Eme ma Jises iu ili kon ari ari ta leheya iri lau. \v 7 Eme iy luhi oro lau tan ma ronoh la-uh ame hawen, eme iy tiye oro la-uh la-uh a se, ma eme iy suni oro au ala bolo kon mara-ei ta atiye sahou mwasin ili tiri mwan ma badih. Ma iy ale edeu boto-on i toro ta atikah iri malawin ndra-in iu. \v 8-9 Iy tiye sahou batanau i toro, ta oro winiyan akohok kandro le ta adek hawe oro, arile oro sakohok ari lakou sala hawe oro, lakou i buku jabi ramen, lakou i buku kohei ma luk, ndri-iy labai, ma ale sa-en ndrakali oro. Arile iy tiye i toro kasin le ku-i kati oro ya oro sasin awin la-uh. Oro kasin ari le ka-iy, ma hawe kandro ta lime oro. \v 10 Iy ale tiye i toro, “I buku none ado ala asahan rakon kon, ma iri lau badu kon doh atehei ado ala bolo ra-em asiu, ya ado ka-en le aliy kado gwek winiya le len ado anya ka-au kala kon rakon ja. \v 11 Ya, i buku none ado asahan rakon kon, ya iri lau badu kon doh basekesek ta akohok ado ala asiu tiri bwe, ma iri basekesek ta anuhun sahou tado bwe, ya buku ado anya ka-au, ado katuruhi kasu on ma ndren ta kati ado ki-iu, ya ado ka-au. Ya eme ta kalem doh iri kalomondra ta kandriyen ndra-in tiri.” \p \v 12 Jises asehek sahou ano, ya oro lau tan au ala atiye sahou tan i tiri lau mwan ma badih. Oro asehek i tiri i buku doh: “Aha katubuni kona aha kili tiri kandriyen ndra-in marakon taha, ma katehei budon taha kili ta Kindrei le ari.” \v 13 Ya, malawin ndra-in solo-an labai udu bwele-e iri mwan ma badih, eme ma oro lau ta Jises ame, abo gok ta atikah iri malawin ndra-in solo-an iu. Ma oro atah ndrelekei ta kei olip i bada iri lau abo sik ma iri amwenen ja. \s1 Jon ta alomwa imek i buku sah \r (Metiu 14:1-12; Luk 3:19-20; 9:7-9) \p \v 14 Eme kabin Herot anuhun sahou nyala Jises ndraseker winiya le bolo kon. Eme iri lau ra-on anya, “Jon ta alomwa mene ndramak ja ereu bolo lek tan ndrame loken, eme ma boto-on tan bwena ndrame hamon ja, ya boto-on tan udu ta Jises, eme iy amekes lahou tinan.” \p \v 15 Iri ra-on anya ja, “Iy Alaija,” ya iri ra-on anya ja, “Iy propet, i buku none le lau ta tiye boho Kindrei bwena ndra-au o-on.” \p \v 16 Herot anuhun, ya iy anya ja, “Kede-eh Jon ta alomwa! Jo mene ndrasani batun, arile iy ndramak ja!” \v 17 Ya Herot bwena ndra-au o-on tiye iri tawi Jon ta alomwa, ma sawei iy ma atehei iy i bolo asiu lulik. Herot amekes doh, tasah iy mene sudi udu nadu tinen Pilip nyaran Herodiyas. \v 18 Eme ma Jon tiye Herot anya, “Ou ndrandra-i tasah, ou sudi udu nadu tinem!” \p \v 19 Eme Herodiyas badeh, tan losen in ta Jon ma iy anya kidi iy, arile iy udu bahandra tondrok ta Herot, \v 20 ma Herot ale, inoh Jon, tasah Jon badeh, ndramak mwasin labai ta mada Kindrei, eme ma Herot badai iy bwe. Batun aso ta anuhun Jon, arile iy aso-ok ta anuhun iy labai ja. \p \v 21 Ya, madasan ta Herot kidi Jon asahan i buku doh: Eme len ta Herot mene tinen tuwi iy anya kasahan, eme ya iy iwer nyamon i niri lau tan badu bolo asiu hawe iri lau tinan ta bahun ma hawe lau batun badu Galili. \v 22 Eme budon ndra-in ta Herodiyas asahan i buku doh. Eme nadu Herodiyas badih eme bolon idi mana, eme mesekei ndrine Herot hawe iri lau nane sekesek, ya eme kabin tiye i ta nadu badih bihin dah, “Ou aso-ok sasah handru? Jo winiyan atehei saba lakou i tam i buku ou aso-ok.” \v 23 Eme iy tiye ja, “Jo tandrakan ou, jo tiye sahou handru en, jo winiyan atehei saba lakou i tam i buku none ou ndremenya ta aliy i buku none ranah lakou jo atondrok jo winiyan atehei i tam.” \p \v 24 Ya eme badih bihin dah iu i manan, tiye i ta tinen, “Saba lakou jo katiye?” \p Eme tinen anya ja, “Jo aso-ok batu Jon ta alomwa.” \p \v 25 Eme badih bihin dah iu i bolon suwi suwi ili hawe kabin ma tiye, “Jo aso-ok na le dah ou adai Jon ta alomwa ma ou atehei batun ki bolo raben bwekei, ya ou bwese-ei keme tek.” \p \v 26 Eme sahou doh mesekei kabin tikisiy handru en, iy abudon ta iy nane ndratandrakan ereu mada oro kabin aimon nyamon hawen nane, ya iy bwalen akohok bwilima ta tobolowe sahou tan iy ndrasihidi ta nadu badih nane doh. \v 27 Eme suwi labai iy suni ndramak ta bahun ari ili bolo asiu lulik mwetehei batu Jon eme. \v 28 Eme iy andrei batun i bolo bwekei ma atehei i mine badih bihin dah, eme ma badih bihin dah atehei i mine tinen. \v 29 Eme oro lau ta Jon anuhun, oro ame andrei bada kei, oro su-iy, ma ala ahi iy i lek. \s1 Jises edeu nyamon i niri lau ma lamawa (5,000) \r (Metiu 14:13-21; Luk 9:10-17; Jon 6:1-13) \p \v 30 Eme oro aposel ame hamon ame hawe Jises, ma oro asehek nyalan ta lakou mari oro amekes. \v 31 Iri lau solo-an solo-an ame au ame au, eme Jises hawe oro lau tan badeh, ari len ta aimon nyamon bwe. Ya eme Jises tiye i toro, “To ka-au ka kon rasi ja kamunyau op.” \v 32 Ya eme oro le ala ndron ra-ei, ma oro au ala kon rasi sese len ja, lau aliy bwe. \p \v 33 Arile, iri lau ra-on ndratou oro au, ma iri ndratanan, idoh oro le ai, eme iri lau badu kon tinan loboho doh adek a san loke ala mwena ta Jises oro lau tan, a kon nane oro anya ka aliy. \v 34 Eme oro anya ka amik le badeh, Jises atou iri lau solo-an labai, ma iy tikisi iri, tasah iri badeh, a buku none sipsip, ari ndramak ta atondrok iri bwe, ma eme iy leheya iri ta lakou solo-an. \v 35 Ya mirihik kon anya keben ai, eme oro lau tan ame tiye i buku doh, “Mirihik kon eben ai, ma loboho dah mundrindriyou. \v 36 Ou tiye iri lau kede-eh ka-au kala kon mirihik ma ndrahu oro kasih noro nyamon ta aimon.” \p \v 37 Arile, Jises tiye toro anya, “Ado kadeu niri nyamon.” \p Eme oro anya ja, “Jises, ou aseken aso kala kasilah sihine ndramak ta bun ma ndru la-uh ki se, ma kasih jabi ramen ma kanyohan oro?” \p \v 38 Ya eme Jises tiye i toro ja, “Ado kala kondrek. Jabi ramen tado sabe udu aliy?” \p Eme oro ala atou, ano oro tiye i tan anya, “Limeh jabi ramen hawe la-uh ni.” \p \v 39 Eme Jises tiye oro lau tan kapwai iri lau dah, ma katiye iri kamanyah ka-en andri bada bwidiu. \v 40 Eme oro apwai iri lau nane dah manyah an se, ra-on rinek (100) ado se ai, ra-on ja lomonoh (50) an se ai, i le buku doh. \v 41 Eme Jises andrei jabi ramen ma limeh hawe ni ma la-uh dah, iy eme anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah, ma iy edeu ili mine oro lau tan. Eme oro ala adeu ili winiya iri lau mari, ma Jises ale boso-ei ni ma la-uh ma oro adeu i le winiya iri ale. \v 42 Iri mari aimon nyamon doh ma ndrine iri idih. \v 43 Ano oro lau tan bwese tikibwah tiri erah i bwak ma ronoh la-uh. \v 44 Ya kane lau mwan mara-ei aimon jabi ramen nane dah ma lamawa (5,000). \s1 Jises edek bwele-e gwa i hawe oro lau tan \r (Metiu 14:22-23; Jon 6:16-21) \p \v 45 Suwi suwi Jises tiye oro lau tan kasandroh kala bolo ra-ei ndron, ma oro kasowe kala bwena kala kapa gwa Betsaida bilisiu. Ya iy le kameh udu hamon ta atiye iri lau ka-au. \v 46 Iy tiye iri lau au, ano iy iu ili bwele-e mandrei ta iy kasolom. \v 47 Eme kon a beyeh, ya ndron toro lau tan udu le alih ta gwa li, Jises lebai le in ndra amik kahis. \v 48 Eme iy atou oro lau tan ndrawoyah ta abahau, tasah jor atohou boto-on i bada ndron toro. Mirihik boho len, Jises edek bwele-e gwa ili hawe oro. Iy anya kedek ki bwena toro, \v 49 arile, oro atou iy edek bwele-e gwa eme oro anya, “Nyam! Nyam!” Eme ma oro anyar, \v 50 tasah oro mari anyolom iy, ma oro anoh andra-i labai. Arile, Jises aloh i toro suwi i buku doh, “Ndrine ado kamunum! Jo, jo! Ado sanoh!” \p \v 51 Eme iy i ndron hawe oro ma jor amondrei, eme oro lau tan badeh, boho oro asak, \v 52 tasah budon toro baleu ta jabi ramen mene moson i buku sah, bwe, ma budon toro ale ndraso. \s1 Iri atiye lau abo sik ame hawe Jises \r (Metiu 14:34-36) \p \v 53 Eme oro ala bilisiu, ma oro asos loboho kon Genesaret, eme oro sawei ndron toro i hanai udu ai. \v 54 Oro are ndron ame loken le badeh, iri lau seleyani Jises. \v 55 Ya eme iri lau badu loboho doh sakaliye ame ma atiye iri lau abo sik an bada nyahan ame hawen, eme iri anuhun Jises udu heh, iri ala le ai. \v 56 Eme Jises ili heh ili heh, ili kon bwisik, ili kon tinan, ili kon lokei, eme iri tiyani iri lau sik udu tiri ala ndrahu baen, ya ndremenya Jises boto-on labai ta iy kalelei iri katehei le mine iri kili kiri awin tan. Eme iri lau mari nane ateu awin tan, iri asahan amwenen ja. \c 7 \s1 Sahou nyala kandriyen \r (Metiu 15:1-9) \p \v 1 Eme iri lau ra-on ta leheya kandriyen tiri Juwis, iri badeh, ado Jerusalem ame hawe iri Parasi, atukum ame hawe Jises. \v 2 Ya iri ndratou oro lau ra-on ta Jises aimon nyamon, ya oro basikine mine oro bala buku none kandriyen tiri Parasi bwe. \p \v 3 Tasah iri Parasi ma hawe iri Juwis mari badeh, winiyan baimon nyamon bwe, i buku none iri basikine mine iri bwena bwe, tasah iri an hamon ta kandriyen ta tubu iri. \v 4 Ya i buku none iri are baen ame, ya nyamon badu baen iri winiyan baimon bwe, i buku none nyamon basikine bwe. Iri badeh, an hamon ta kandriyen solo-an labai, i buku none san ta sikine bwiniu ma kun hawe kun kaba ma hawe sau. \p \v 5 Ya eme iri Parasi ma hawe iri lau ta leheya kandriyen tiri Juwis ndremenya Jises i buk doh, “I buku sah oro lau tam aimon nyamon ya oro basikine mine oro bwe, ya oro ba-en hamon ta kandriyen ta tubu ahi iri bwe?” \p \v 6 Eme Jises tiye i tiri, “Amwenen handru i buku none propet Aisaya ndratiye nyala aha! Aha asehek na boho aha le, i buku none iy ndratorowenei, \q1 ‘Iri lau mwan ma badih dah bwese nyarak eme loken na boho iri le, arile ndrine iri ereu len labai. \v 7 Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’” \rq Aisaya 29:13\rq* \p \v 8 Eme Jises anya, “Aha ndraruwani kandriyen ta Kindrei, eme aha an hamon ta kandriyen tiri ndramak.” \p \v 9 Eme ja iy tiye i tiri, “Batu aha ndrala labai, ya eme aha baseken batanau ta Kindrei bwai, eme ma aha tawi kandriyen taha le. \v 10 Moses mene ndratiye, \q1 ‘Ou a-en bahandra tamam uru tinem, ma ou anuhun sahou turu,’ \rq Eksodus 20:12; Dutoronomi 5:16\rq* \m ma, \q1 ‘Are lau aluhe taman uru tinen, iy kimek ta aliy.’ \rq Lebitikus 20:9\rq* \p \v 11 “Arile ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak luk tan ta aseben taman uru tinen, arile iy tiye turu i buku doh, “Luk jo anya kaseben ah na aliy badeh, Korban (moson ta aliy, ndraleheyani ta adeu i ta Kindrei).”’ \v 12 Ya, ta san doh ado baseken iy baseben taman uru tinen bwe. \v 13 Ta kandriyen doh le ado atehei sahou ta Kindrei i andri mara-ei, ma hawe lahou ra-on ja badu hawen, ya ado bwese-ei iri kandriyen solo-an ado akohok ta tubu aha iri ja eme loken mara-ei.” \s1 Lakou ala amekes ndramak andra-i \r (Metiu 15:10-20) \p \v 14 Eme Jises aloh iri lau mwan ma badih a hawen ja, ya eme iy tiye tiri i buku doh, “Aha mari kanuhun jo, ma aha kabudon kamwenen. \v 15 Saba lakou badu manan i bolo boho ari ndramak, badeh winiyan bamesekei iy bandra-i bwe. Arile lakou udu bolo bohon eme len idoh kameh, mesekei ndramak andra-i adeh.” [ \v 16 “I buku none are ndramak ndranyen udu aliy, badeh iy kanuhun!”] \p \v 17 Ano iy ruwani iri lau ma iy ili bolo asiu, eme ma oro lau tan ndremenya iy ta sahou sokek nane. \v 18 Eme ma Jises tiye i toro, “Buku sah? Ado ale budon tado baleu bwe le? Sebwe ado tana ado bwe, sasah udu manan i bolo ndramak, badeh winiyan bamesekei ndramak bandra-i bwe, \v 19 tasah idoh winiyan bala budon bwe, arile ili ndrabai ano ndramak iu akeh ili sareu.” (Eme sehek ta aliy, Jises anya, nyamon mari mwasin ta aimon le ai.) \p \v 20 Eme Jises asehek ili le, “Saba lakou ala udu bolo boho ndramak eme len, lakou don adeh, mesekei ndramak andra-i. \v 21 Lakou ala udu bolo budon ta ndramak eme len, ma lolowa ndramak amekes lomondra ndra-in. Lakou buku none, kandriyen mari ta karei, kandriyen ta bahana, kandriyen ta adai ndramak imek, ma kandriyen ta amekes tasou andra-i. \v 22 Ya i buku none kandriyen ta madalakis ta lakou ta ndramak, ya kandriyen ta ramwes, kandriyen ta wendreya l au, kandriyen ta aten lau, kandriyen ta atudun nyaram, ma hawe kandriyen ta nyaladan. \v 23 Iri kandriyen mari doh badu bolo ndramak eme len ma mesekei ndramak andra-i adeh.” \s1 Badih badu leheleh atehei budon tan handru in ta Jises \r (Metiu 15:21-28) \p \v 24 Ano Jises suri iy ma iy iu ili loboho kon tinan Tair ma Saidon. Eme ya iy i bolo asiu ra-em. Eme Jises anya, iri sala tanan iy udu doh, arile iy winiyan batone iy bwai. \v 25 Eme suwi labai badih ari anuhun nyalan, eme ya iy eme taku i andri kati Jises, tasah nadun badih badeh, malawin ndra-in udu la-un. \v 26 Badih dah kandriyen tan badu Grik, arile iy badu Siroponisiya, eme iy lelen Jises katikahei malawin ndra-in udu la-u nadun badih keme len. \v 27 Eme Jises tiye i tan i buku doh, “Kanyohan iri nah bwena op, tasah bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.” \p \v 28 Arile, iy tiye i ta Jises i buku doh, “Laban, ou asehek sahou handru. Arile iri nadu mwi an bahandra sau badeh, aimon kahu nyamon tiri nah.” \p \v 29 Eme iy tiye i tan, “Ya ta sehek ta aliy, ou au ai. Malawin ndra-in nane udu la-u nadum badih badeh, ndra-au.” \p \v 30 Eme badih dah iu i kon, ma iy atou nadun ales in bada sau, ya malawin ndra-in badeh, ndra-au. \s1 Jises bwidi ndramak ari ndranyen siu ma bohon bwe amwenen ja \p \v 31 Ano Jises udu loboho Tair edek iu ili Saidon, ma iy edek ja ili loboho gwa li Galili, ano ili loboho kon ma ronoh udu bolo Dekapolis. \v 32 Eme iri lau ra-on tiyani ndramak ari ndranyen siu ma iy bohon bwe, eme oro ndremenya Jises katehei minen ki bwele-en. \v 33 Eme Jises andrei iy udu bolo iri lau nane eme len, ya Jises sakaruk i kandro minen ma iy atehei i munu ndranye ndramak nane ma i bada kalimen ale. \v 34 Eme Jises anyolom i kandrah ma ndrinen eden labai, eme iy tiye i ta ndramak nane dah, “Epata,” moson ta aliy i buku doh, “Ou asak!” \p \v 35 Se nawin bwe, ndranye iy ndramak dah asak ma kalimen nyokolokon ma iy asehek sahou amwenen mara-ei ja. \v 36 Ano Jises tiye sahou batanau i toro anya, “Ado sasehek sala ta ari ndramak.” Jises tiye i toro san solo-an solo-an, arile bwai, oro asehek le ili ai. \v 37 Eme iri anuhun, ma mani iri atur. Eme iri tiye i buku doh, “Lakou mari iy amekes doh, ndra amwenen le ai. Iy mesekei ndramak ndranyen siu ma hawe bohon bwe, amwenen ja!” \c 8 \s1 Jises anyohan iri lau ma hawa (4,000) \r (Metiu 15:32-39) \p \v 1 Udu bolo len doh iri lau solo-an labai atukum ame le hawen. Iri ado, ya iri nyamon ta aimon bwai. Eme Jises luhi oro lau tan ala hawen, ma iy asehek i toro i buku doh, \v 2 “Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe. \v 3 Ya i buku none jo katiye iri ma son tiri ka-au ka kon tiri, kora-on mada iri kabuluw ya iri kataku kado san, tasah iri rayah mene ame, san tiri lawe-en labai.” \p \v 4 Eme oro lau tan anya, “Kon dah lau aliy bwe. Are lau kameh winiyan salahani niri nyamon udu bolo kon lomale an le dah?” \p \v 5 Eme Jises ndremenyani oro, “Nado jabi ramen sabe udu aliy?” \p Eme oro anya, “Ndro taloh le.” \p \v 6 Eme iy tiye i tiri lau mwan ma badih kamanyah kado andri bada munyak. Eme iy andrei jabi ramen ma ndro taloh dah, eme iy edeu wurah i ta Kindrei. Ano iy boso-ei ma atehei ili mine oro lau tan, ma oro adeu ili niri lau. \v 7 Oro ale ni toro ra-on udu aliy, eme Jises asehek sahou ta nyosowan i ta aliy. Ano iy tiye oro lau tan adeu i le winiya iri. \v 8 Eme iri aimon ma ndrine iri idih. Ano oro lau ta Jises tukumwi tikibwah tiri erah asahan i bwak ma ndro taloh. \p \v 9 Ya kane iri lau nane doh i buku hawa (4,000). Ano iy tiye iri lau mwan ma badih au ala hamon ala kon tiri. \p \v 10 Eme Jises i bolo ndron ra-ei hawe oro lau tan ma oro au ala loboho kon Dalmanuta. \s1 Oro Parasi anya katou kalem badu kandrah \r (Metiu 16:1-4) \p \v 11 Ano iri Parasi ame ya andres hawe Jises. Iri anya kanone iy ma iri ndremenya iy kamekes kalem badu kandrah ta leheya buku none iy amekes gok ta Kindrei handru. \v 12 Eme ya budon tan ihis in bolo ndrinen o-on, eme iy anya, “Ki buku sah handru iri lau mwan ma badih ta len dah anya katou kalem? Jo tiye tado handru en! Idah kameh kalem handru winiyan basahan tiri lau na len dah bwai.” \p \v 13 Eme Jises ruwani iri Parasi areu, ma iy i ndron ma iu i len ili kapa gwa li bilisiu. \s1 Sahou ta nyala yis ta Herot hawe iri Parasi \r (Metiu 16:5-12) \p \v 14 Ya oro lau ta Jises ndramaniy ta akohok jabi ramen, oro andrei rabah le i ndron. \v 15 Eme Jises anya, “Mada ado kaleu ta yis tiri Parasi ma ta Herot.” \p \v 16 Eme oro tiye nyala oro ari ari, “Sebwe iy amekes sahou doh tasah to bakohok jabi ramen bwe nadeh?” \p \v 17 Eme Jises tanan ta sahou nane oro asehek, eme iy tiye i toro, “Buku sah handru ado asehek, anya ado jabi ramen bwe? Sebwe mada ado baleu bwe le nadeh? Bar tado boto-on? \v 18 Ado mada ado udu aliy ya ado batou bwe? Ma ndranye ado udu aliy ya ado banuhun bwe? \v 19 Ado ndramaniy ja, ta jo mene boso-ei jabi ramen ma limeh i niri lau ma lamawa (5,000) mene deh bwe? Ya bwak sabe mene erah ado andrei?” \p Eme oro anya, “Ma ronoh la-uh.” \p \v 20 “Ya ado ndramaniy ja ta jabi ramen ma ndro taloh i niri lau ma hawa (4,000), ma bwak sabe mene erah ado andrei?” \p Eme oro anya, “Bwak ma ndro taloh.” \p \v 21 Eme Jises tiye i toro, “Budon tado kede-eh baleu bwe le?” \ms1 Jises leheya iri lau tan \mr (Kalan 8:22–10:52) \s1 Jises bwidi ndramak ari madan kaseu amwenen ja udu Betsaida \p \v 22 Ano Jises hawe oro lau tan au ala asahan Betsaida. Eme ma iri lau ra-on sirini ndramak ari madan kaseu, ya oro tiyani iy eme hawe Jises. Ma oro tiye i ta Jises i buku doh: “Aso aso-ok ou atehei minem kili bwele-e iy ndramak dan op.” \v 23 Eme Jises tawi mine ndramak madan kaseu nane dah ma sirini iy eme len ta kon. Eme Jises sakaruk i madan ma atehei minen i bwele-e madan, ma iy anya, “Ou atou ari lakou deh bwe?” \p \v 24 Eme ya iy anyolom i loke ma iy anya, “Ehe, jo atou iri lau, iri a buku none kei adek ma seselek laleyah.” \p \v 25 Ano ja Jises atehei minen i bwele-e mada ndramak dah ja, ma ndramak dah madan atau i loke eme ma iy anyolom lakou amwenen mara-ei. \v 26 Eme Jises anya, “Ou au ala asiu tam ya ou sala bolo kon.” \s1 Pita tiye, Jises are handru \r (Metiu 16:13-20; Luk 9:18-21) \p \v 27 Eme ma Jises hawe oro lau tan adek san anya kala loboho kon tinan Sesariya Pilipai, eme ya Jises ndremenya oro lau tan, “Iri lau anya jo are lau handru?” \p \v 28 Eme oro tiye i tan, “Iri ra-on anya ja ou Jon ta alomwa, ya iri ra-on anya ja, ou Alaija, ya iri ra-on anya ja, ou ari propet.” \p \v 29 Eme Jises ndremenya oro, “Ya ado amwenen anya jo are lau handru?” \p Eme Pita asumon bohon i buku doh, “Ou kede-eh Krais handru oh.” \p \v 30 Eme Jises batanau oro satiye ta ari lau ja ai, ndri-iy. \s1 Jises asehek nyala imek ma amak tan \r (Metiu 16:21-28; Luk 9:22-27) \p \v 31 Ma iy leheya oro ta, Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh iri adai iy imek, ya len taloh ano iy kameh amak ja. \v 32 Iy asehek aleu amwenen i toro lau tan. Eme Pita anuhun sahou doh, ya iy seheyani Jises i kabwak, ma iy ibolosen i tan anya, “Ou sato-en sala buku badeh!” \v 33 Arile Jises tubuni iy ma iy anyolom oro lau tan, eme ma iy to-en Pita anya, “Satan, ou a len a konak! Ou ba-en hamon ta budon ta Kindrei bwe. Ou a-en hamon le ta budon tiri lau.” \s1 San tare lau anya ki-in hamon ta Jises ma kakohok kohan handru \p \v 34 Eme Jises luhi iri lau solo-an solo-an ma hawe oro lau tan, eme ma tiye i toro, “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese kei tondreh tan, ya iy ki-in hamon tek. \v 35 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ma atiye sahou mwasin tek, ya kohan ano, iy kameh winiyan andrei kohan ja. \v 36 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru? \v 37 Ya lau kadeu saba sowan handru kameh ta akohok kohan keme hamon? \v 38 Ou are lau bwilim ama jo ma ta sahou tek udu bolo lau rebesem dah ta maliye Kindrei ma lomondra ndra-in, Nadu Ndramak Awas kameh bwilin ama ou ale, i buku none len hamon kameh, iy eme ma hawe lomada taman hawe iri angelo, lau ndrabun badu loken.” \c 9 \s1 Jises ndra randrah ja ma lomadan asahan \r (Metiu 17:1-13; Luk 9:28-36) \p \v 1 Eme Jises asehek i toro i buku doh, “Jo asehek sahou handru ewek tado. Lau ra-on ales ereu bolo to dah kameh winiyan bamak bwe, ya iri kameh anyolom tondrok ta Kindrei ma hawe boto-on tan kameh asahan.” \p \v 2 Len onoh ano, Jises kuhi Pita, Jemis ma hawe Jon a hawen, ma Jises kuhi oro ala bwele-e mandrei ari loken labai, ya oro le ado aliy. Oro ado, oro anyolom ili bada Jises ndratubuniy ndra randrah ja. \v 3 Ma awin tan ndra nyikilikin asahan i belen ma sakalawi belen ta lakou mari badu munyak dah, i buku kasikine. \v 4 Eme oro lau tan ma taloh nane dah atou Alaija uru Moses asahan, ma asehek sahou hawen. \v 5 Eme Pita atou lakou doh ya iy asehek ta Jises i buku doh, “Ndramak ta leheya, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.” \v 6 Pita asehek sahou doh, tasah iy hawe uru nane anoh, eme iy bala tanan sahou nane iy asehek bwe. \p \v 7 Eme ma asi kandrah asahan ma tubuluhi oro, ya sahou ari asahan bolo asi kandrah nane asehek i buku doh, “Idah naduk handru. Jo aseken iy labai, ya ado kanuhun sahou tan.” \p \v 8 Eme suwi labai oro anyolom ili, ma oro batou ari lau hawe oro bwe, arile Jises le ari. \s1 Oro ndremenya Jises ta Alaija \p \v 9 Eme oro are bwele-e mandrei ame andri, Jises batanau oro i buku doh, “Saba lakou ado ndratou ma ndranuhun, ado sasehek sala ta ari ndramak, ili winiya le Nadu Ndramak Awas amak ereu bolo lek tan eme loken.” \p \v 10 Eme oro basehek bwe, toro le, eme udu ndrokowa oro le, oro ndremenya oro ta saba moson, “Ta amak ta imek tan,” ma i buku sah handru. \v 11 Eme oro ndremenya Jises i buku doh, “Buku sah iri lau ta leheya kandriyen tiri Juwis anya Alaija kameh eme bwena op?” \p \v 12 Eme iy tiye i toro anya, “Sahou badeh, handru. Alaija eme bwena handru ta lowosa iri lakou mari. Ya i buku sah handru ja sahou mene torowenei anya idah kameh Nadu Ndramak Awas kameh akohok sisi-in solo-an ma iri kameh bwale iri iy? \v 13 Arile jo asehek tado i buku doh, Alaija ndrame, arile iri an hamon ta budon tiri amwenen, ya iri amekes iri kandriyen mari i badan, i buku none ndratorowenei sihiden.” \s1 Jises tikahei malawin ndra-in udu bwele-e nah ari iu \r (Metiu 17:14-21; Luk 9:37-43) \p \v 14 Eme oro ame hawe oro lau ra-on ja ta Jises, eme oro anyolom lau solo-an solo-an awudi oro ma iri lau ta leheya kandriyen tiri Juwis ame andres hawe oro lau ta Jises. \v 15 Eme nawin bwe, iri lau atou Jises ma mani iri atur ma iri sakaliye ala hawen ma sekesek ma anyumos badan. \v 16 Eme ya Jises ndremenya oro lau tan, “Ado andres hawe iri ta sasah handru?” \p \v 17 Eme ndramak ari udu bolo iri anya, “Ndramak ta leheya, jo atiye naduk eme hawem ai, tasah malawin ndra-in udu la-un, ya iy winiyan basehek sahou bwe. \v 18 I buku none asahan, malawin ndra-in kameh moraha iy i andri bada ndren, ma bubusi bohon eme len ma iy andrebek lihin ale, ma iy sorokok en. Eme jo tiye oro lau tam katikahei malawin ndra-in doh ki-iu, arile oro winiyan batikahei ba-au bwe.” \p \v 19 Eme Jises tiye i toro, “Ado lau mwan ma badih batehei budon tado handru bame tek bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.” \v 20 Eme oro tiyani iy i hawen. Eme malawin ndra-in anyolom Jises, ma iy morohani nah dah i andri bada ndren ma iy tundrundru ma bubusi bohon atau. \v 21 Eme Jises ndremenya tama i nah nane dah, “Malawin ndra-in udu la-un len sabe handru?” Eme iy anya, “Iy ma nadu bwisik le badeh, asahan ai. \v 22 San solo-an iy moraha iy i jih ma i gwa anya kamekes iy kimek. Ya i buku none saba lakou ou winiyan mesekei, ya ou tikisi aso, ma ou sebenei aso!” \p \v 23 Eme Jises tiye i tan i buku doh, “I buku sah handru ou anya, i buku jo winiyan? Lakou mari winiyan asahan i tare lau i buku none budon tan handru in tek.” \p \v 24 Eme tama nah nane dah aloh, “Laban, jo badeh, budon tek sese le in tam, arile ou aseben jo ja ya budon tek handru ki tam.” \p \v 25 Eme ya Jises anyolom iri lau solo-an solo-an sakaliye a le se ame, eme iy tiye sahou boto-on i ta malawin ndra-in anya, “Ou malawin ndra-in, ou bohom bwe, ou ndranyem siu, jo tiye tam, ou ame len tan ma ou same hamon ja ai!” \p \v 26 Ano malawin ndra-in nane anyar ma iy morohani i nah dah i andri ma iy amei, eme ma malawin ndra-in nane udu bwele-en eme len, ya i nah mwan dah sorokok i buku none iy ndramak, eme iri lau solo-an anya ja, “Iy ndramak.” \v 27 Arile Jises tawi minen, ma suri iy eme loken. \p \v 28 Eme Jises iu i asiu, ma oro lau tan ndremenya iy anya, “Buku sah handru ya aso winiyan batikahei malawin ndra-in nane iu bwe?” \p \v 29 Eme iy tiye i toro, “Lakou i buku dah winiyan batikahei bame len na saba san ja bwe, arile na salom i ta Kindrei le winiyan ai.” \s1 Jises asehek nyala imek ma amak tan ja \r (Metiu 17:22-23; Luk 9:43-45) \p \v 30 Eme ma, Jises hawe oro lau tan ruwani kon doh ame len, ma oro adek ales au ala bolo Galili. Ya Jises bwalen lau sala tanan ta iy udu heh handru. \v 31 Tasah iy anya kaleheya oro lau tan, “Iri kameh atehei Nadu Ndramak Awas ili mine iri lau. Ya iri lau kameh adai iy imek. Ano len ma taloh ja kameh iy amak ja.” \v 32 Arile budon toro baleu ta sahou tan nane bwe, eme oro anoh ta ndremenya iy. \s1 Are udu bwele-en labai \r (Metiu 18:1-5; Luk 9:46-48) \p \v 33 Eme oro ame asahan Kapena-um, oro ame ala ado bolo asiu ra-em. Eme Jises ndremenya oro lau tan, “Ado andres ta sasah nane an san?” \v 34 Arile, oro batiye randra sahou bwe, tasah oro adek san doh, oro le andres oro, ta are handru udu bwele-en toro mari. \v 35 Eme Jises manyah udu andri, ano iy luhi oro lau tan ma ronoh la-uh ame hawen, ano iy tiye i toro, “Are lau anya ki bwena badeh, iy ki-in ndrobek, ma iy ki ndrahu so-ok ta lau mari.” \v 36 Eme Jises andrei nadu nah ari nadu bwisik eme ales ereu ndrokowa oro. Eme iy awudi iy na minen ya eme iy tiye i toro, \v 37 “Ya buku none ari ndramak abudon jo, ya iy aseben ari nadu nah bwisik buku nah dah, badeh iy aseben jo. Ma are lau oro aseben jo, badeh, oro baseben jo le bwe, arile oro ale aseben Kindrei iy nane suni jo eme dah.” \s1 Are lau iy losen tato bwe iy badeh, kawas tato \r (Luk 9:49-50) \p \v 38 Eme Jon tiye i ta Jises, “Ndramak ta leheya, aso atou ndramak ari atikah malawin ndra-in eme len na boto-on ta nyaram, ya eme aso anya kabarah iy, tasah iy badu hawe to bwe.” \p \v 39 Eme Jises tiye i toro, “Ado sabarah iy, tasah are lau amekes lahou tinan na boto-on ta nyarak, suwi labai iy winiyan batiye ndra-in ta nyarak bwe. \v 40 Ya are lau tan bahun tato bwe, iy badeh, kawas tato ma iy badu hawe to. \v 41 Jo tiye tado handru! Are lau atehei bwiniu gwa i wa-im, tasah ou badu hawe Krais, sihine i lau doh winiyan ba-au laleyah bwe. \s1 Kandriyen ndra-in badeh, amekes ndramak taku \r (Metiu 18:6-9; Luk 17:1-2) \p \v 42 “Buku none ari ndramak bwidi ari nadu nah ale atehei budon tan eme tek taku ta kandriyen ndra-in, sebwe mwasin ta ndramak doh kasawei ari bek maha-an ki balen ya kakahei iy katuh kili bolo ndras ki-in gwek kimek. \v 43-44 Ya i buku none minem aliu ou ta amekes kandriyen ndra-in, mwasin ou saniy ki-iu! Sebwe mwasin ta minem raka le ka-iy ta akohok koham mwasin ta ereu le buku doh. Kora-on minem ma la-uh udu aliy, ya ou kameh ala bolo jih ta winiyan bamak bwe! \v 45-46 Ya, i buku none katim aliu ou ta amekes kandriyen ndra-in ou saniy ki-iu! Sebwe mwasin ta katim raka le ka-iy ta akohok koham mwasin ta ereu le buku doh. Kora-on katim ma la-uh udu aliy, ya iri kakahei ou ala bolo jih ale ta winiyan bamak bwe! \v 47 Ya, buku none madam aluwi ou ta amekes kandriyen ndra-in, sebwe mwasin ta ou holowaniy ma kakahei ki-iu! Mwasin ta madam ari le ka-iy, ya ou ala bahandra tondrok ta Kindrei, kora-on madam ma la-uh kudu aliy, ya iri kakahei ou ala bolo jih ta anya ereu le buku doh. \v 48 Ya bolo jih doh, \q1 ‘Iri nadu un aimon iri lau ndramak, ya iri winiyan bamak bwe. Ma jih asun iri lau ndramak ale winiyan bamak bwe.’ \rq Aisaya 66:24\rq* \m Iri lau ndramak ado bolo jih doh kameh akohok sisi-in solo-an ndra-in ta udu le buku doh. \p \v 49 “Lau marakon kameh asah i buku none ndras hawe jih. Jih badeh, i buku none sisi-in ta leheya kandriyen ta ndramak mwasin, ya ndras i bolo nyamon badeh, ta amekes nyamon i simidin. Eme ma aha marakon kandrei sahou ta Kindrei ma katehei ki buku ndras kudu bolo oda aha, ma iy kameh winiyan atisih iri kandriyen ndra-in. \v 50 Ndras mwasin, arile i buku none iy mani nyiminyen, ya idah kameh ou baramesekei nyiminyen barame hamon barala buku sah bah? Ou badeh, i buku ndras ki-in bolo odam ya ndrinem kamunum ki ta ndramak ari ari.” \c 10 \s1 Jises asehek kandriyen ta ndramak tikahei udun iu \r (Metiu 19:1-12; Luk 16:18) \p \v 1 Eme ma Jises hawe oro lau tan ruwani kon Kapena-um, ma oro au ala loboho kon Judiya ereu kapa gwa Jodan bilisiu. Eme ma iri lau solo-an solo-an atukum ame hawen ja, ya eme i buku none kandriyen tan ala iy ndramekes ndramekes ndra-au, eme ma iy leheya iri. \p \v 2 Eme iri Parasi ame hawe Jises anya kanone iy. Eme iri ndremenya iy, “Sebwe sahou batanau tataha anya, ndramak winiyan atikah udun iu deh bwe?” \p \v 3 Eme Jises tiye i tiri anya, “Moses mene batanau sasah handru i taha?” \p \v 4 Eme iri anya, “Moses tiye tahi anya ndramak winiyan atorou la-ukei ta amendren tasou, ya iy atehei i mine badih tan ano iy winiyan aruwe badih tan iu.” \p \v 5 Eme Jises tiye i tiri i buku doh, “Batu ado boto-on labai, eme Moses torowenei batanau i taha. \v 6 Arile, bwena handru kala Kindrei mene \q1 ‘mesekei lakou mari, iy mesekei lau mwan ma badih.’ \rq Jenesis 1:27\rq* \q1 \v 7 ‘Ta katin le doh, iy mwan karuwani taman uru tinen ya iy keme len hawe udun, \v 8 ya uru kasahan ari buruwen.’ \rq Jenesis 2:24\rq* \m Kindrei asehek anya, bada uru la-uh bwai, bada uru ndrasahan ari le buruwen. \v 9 Idoh le, saba lakou Kindrei ndrasawei mari ndrase, ari ndramak sasaniy ja ai.” \p \v 10 Eme oro a hamon a asiu, oro lau tan ndremenya iy ta sahou mene. \v 11 Eme Jises tiye i toro, “Ndramak tikahei udun iu ya i buku none iy sudi badih ari ja, iy le mesekei karei i tan. \v 12 Ma ale i buku none iy badih tikahei udun mwan ya i buku none iy ili i tasou i ta mwan ari ja, badeh, iy mesekei karei i tan ale.” \s1 Jises aseken iri nah kala hawen \r (Metiu 19:13-15; Luk 18:15-17) \p \v 13 Ano iri lau atiye iri nah ala hawe Jises ta iy kedeu minen ki bada iri. Eme oro lau tan abolosen i tiri. \v 14 Eme Jises seleyaniy, ma iy ibolosen i toro lau tan, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh. \v 15 Jo tiye sahou handru ewek tado. I buku ado basahan buku none iri nah bwisik bwe, ado kameh winiyan bala bolo tondrok ta Kindrei bwe.” \v 16 Eme iy nyuruwini iri nah nane ame hawen. Iy atehei minen i bwele-e oro ari ari, ma asehek sahou ta nyosowan boto-on i tiri nah dah. \s1 Sahou nyala ndramak tan lakou solo-an \r (Metiu 19:16-30; Luk 18:18-30) \p \v 17 Eme Jises anya kedek san anya ki-iu le badeh, ndramak ari sakaniy in hamon tan eme, aluh udu andri mada Jises, ma iy ndremenya iy, “Ndramak ta leheya, ou mwasin handru. Jo kamekes saba kandriyen handru ya jo kakohok kohan mwasin ta ereu le buku doh len mari?” \p \v 18 Eme Jises tiye i tan i buku doh, “Tasah handru ou aloh jo mwasin handru? Ari ndramak badeh, bala mwasin i buku none Kindrei bwe, Kindrei le ari, kabwe. \v 19 Ou tanam batanau ta Kindrei, \q1 ‘Ou sadai ndramak samak, ou samekes karei ta badih tasou, ou sabahana, ou sawasai, madam salikis. Arile, ou a-en bahandra tamam uru tinem, ma ou anuhun sahou turu.’” \rq Eksodus 20:12-16; Dutoronomi 5:16-20\rq* \p \v 20 Eme ndramak dah anya, “Ndramak ta leheya, jo ma loweu eme taku dah, jo in hamon ta sahou batanau mari le ai.” \m \v 21 Eme Jises anyolom iy ndramak dah, ma iy tikisi iy, ma iy anya, “Lakou ari le kahis. Ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.” \v 22 Ndramak dah anuhun, ma sa-ar asahan bwilin, ma iy tikisiy labai, tasah tan lakou solo-an labai, ma iy bwalen ta edeu iu, ya eme ma iy edek iu. \s1 Bohosak ta ndramak tan lakou solo-an \p \v 23 Iy ndramak nane ndra-au ai. Eme Jises anyolom ili eme, ma iy tiye i toro lau tan i buku doh, “Idah kameh boto-on labai ta ndramak tan lakou solo-an, i buku none iy anya kili bolo tondrok ta Kindrei!” \v 24 Eme oro lau tan badeh, boho oro asak, tasah ta sahou iy asehek. Eme Jises asehek ili le, “Ado naduk, idah kameh boto-on labai ta ndramak anya kili bolo tondrok ta Kindrei! \v 25 Masakan boto-on boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja ta kamel i buku iy i bolo manamunu nunu.” \p \v 26 Jises asehek, ma mani oro atur labai. Eme ma oro ndremenya iy, “Buku none i buku baden eh, are lau handru kameh winiyan akohok kohan mwasin ta ereu le buku doh?” \p \v 27 Eme Jises anyolom amwenen i toro, ma iy anya, “Lau winiyan bwe, arile Kindrei badeh, bala buku aliy bwe. Kindrei le ari winiyan amekes iri lakou marakon.” \s1 Kunoh ta ndramak ruwani lakou ya iy in hamon ta Jises \p \v 28 Jises asehek, ma Pita anya, “Ou atou, aso ndraruwani lakou taso mari, ya aso ndra-en hamon tam.” \p \v 29 Pita asehek i buku doh, ma Jises asehek i toro anya, “Jo tiye tado handru. Are lau ruwani asiu tan, ma nadu tinen mwan, ma buru-un, ma taman uru tinen, ma nadun, ma bilin tan tasah ta jo, ma ta sahou mwasin, \v 30 iy kameh akohok lakou solo-an handru na len dah. Iy kameh akohok ndramas buku san rinek (100) ja i bwele-e lakou tan bwena. Ndramas doh buku asiu solo-an ja, ma nadu tinen mwan solo-an ja ma buru-un solo-an solo-an ja, ma tinen hawe nadun ma bilin solo-an, ma ale hawe iri lau amekes ndra-in i tan ale. Arile len hamon, Kindrei kameh winiyan edeu kohan handru i tan ta winiyan bano bwe ta udu le buku doh. \v 31 Arile lau solo-an na len dah areu bwena, iri kameh ame hamon. Ya iri lau solo-an na len dah areu hamon iri kameh kala bwena.” \s1 Jises asehek nyala imek ma amak tan san rasan ja \r (Metiu 20:17-19; Luk 18:31-34) \p \v 32 Ano Jises hawe iri lau ado san adek ala Jerusalem, ma Jises edek iu i bwena tiri, eme ma oro lau tan mani oro atur, ma iri lau an hamon tan badeh, anoh. Eme Jises ma hawe oro lau tan ma ronoh la-uh a ka-un ya eme iy tiye nyala oro ta sasah kameh asahan badan. \v 33 Eme iy tiye nyala oro i buku doh, “Ado kanuhun, na dah to ala loke ala Jerusalem, ma iri kameh atehei Nadu Ndramak Awas ili mine iri tinan tiri pris ma hawe iri lau ta leheya kandriyen tiri Juwis. Ya iri kameh atehei iy ili ta mada sahou, ma iri kameh atilik sahou i se ta kadai iy kimek, ma iri kameh adeu iy i mine iri lau badu leheleh. \v 34 Ma iri kameh bobose iy ma omor iy ma a-um iy na malou sakabuk i bek ma hawe adai iy imek, arile hamon ta len taloh kameh iy amak ja.” \s1 Jemis uru Jon anya kasahan tinan \r (Metiu 20:20-28) \p \v 35 Eme nadu Sebedi, Jemis uru Jon ame hawe Jises, eme uru tiye i tan, “Ndramak ta leheya, aru anya kandremenya ou, saba lakou aru ndremenya, ou mesekei keme taru.” \p \v 36 Eme Jises anya, “Saba lakou ah aseken jo kamesekei kewek ta-ah?” \p \v 37 Eme uru tiye i tan, “I buku none ou aseken, aru anya kamanyah ka-en hawem, ari kamanyah kudu bilisiu minem salin, ya ari kamanyah kudu bilisiu minem kamweu kudu bolo lomadan tam.” \p \v 38 Arile Jises tiye i turu, “Ah bala tanan ta saba lakou ah ndremenya kede-eh bo-oh! Sebwe ah winiyan a-un na bwiniu jo kameh a-un na aliy dah nadeh? Ya, sebwe ah winiyan anyu na inyu jo kameh inyu na aliy?” \v 39 Eme uru tiye i tan, “Aru winiyan.” Eme Jises tiye i turu ja, “Handru, bwiniu kameh jo a-un na aliy, ah kameh a-un na aliy ale, ma inyu, jo inyu na aliy, ah kameh anyu na aliy ale. \v 40 Arile, are kameh manyah ereu minek salin ma are kameh manyah ereu minek kamweu, idoh jo winiyan batiye bwai. Tasah kon doh tiri lau ale tama Kindrei ndralowosani iri kabwe.” \v 41 Ya eme oro lau tan ma ronoh anuhun sahou turu, oro anya kabolosen ki ta Jemis uru Jon. \v 42 Ano Jises luhi oro lau tan mari ame hawen ma iy tiye i toro i buku doh, “Ado tana ado, iri lau lomondra ta atondrok iri lau badu leheleh badeh, tiri boto-on ta atondrok iri lau tiri, ma iri badeh, batanau boto-on labai ta iri lau tiri kanuhun sahou tiri handru. \v 43 Arile, kandriyen doh sa-en ndrokowa ado, ndri-iy. Ndramak anya ki tinan kereu ndrokowa ado, iy kasahan lau ta gok kereu ndrokowa ado. \v 44 Ma are anya kereu bwena tado iy kasahan ndramak ta gok laleyah kereu ndrokowa ado. \v 45 Tasah Nadu Ndramak Awas ale eme ta iri lau kamekes gok tan, bwe. Iy eme ta aseben iri, ma ta edeu kohan ta akunoh lau mari.” \s1 Jises mesekei mada Batimeyus amwenen ja \r (Metiu 20:29-34; Luk 18:35-43) \p \v 46 Ano oro ame Jeriko, ya Jises hawe oro lau tan anya ka-au ta Jeriko ma hawe iri lau solo-an solo-an. Eme nadu Timeyus nyaran Batimeyus, iy madan bwe, manyah udu ka-u san anyolou iri lau ta lakou. \v 47 Eme iy anuhun, idoh Jises badu Nasaret le ai, eme iy aloh, “Jises, ou nadu tubu kabin Debit, ou tikisi jo!” \p \v 48 Eme iri lau solo-an abolosen i tan ma tiye iy kandru-uk, arile bwai, iy aloh ma arah boto-on le gwek ai, “Nadu tubu kabin Debit ou tikisi jo!” \v 49 Eme Jises udu rasi ma tiye sahou i tan i buku doh, “Ado kaluhi iy keme.” Eme ma oro luhi Batimeyus ma oro tiye sahou i tan i buku doh, “Ndrinem kamunum! Ou suri ou ma ou ame. Jises aloh ou!” \p \v 50 Eme Batimeyus suri iy ales i loken suwi suwi. Iy asini kolau ta bwele-en iu, ma ruwaniy udu api, ma iy edek amwenen ili hawe Jises. \p \v 51 Iy edek ili isos le badeh, Jises tiye i tan i buku doh, “Ou aso-ok jo kamekes sasah ki tam?” \p Eme ndramak madan kaseu dah anya, “Ndramak ta leheya, jo anya kanyolom kon ja.” \p \v 52 Eme Jises tiye i tan, “Ou au ai, budon tam handru ndramesekei ou ndramwenen ja.” Eme ma nawin bwe madan amwenen ma iy anyolom ja ma iy in hamon ta Jises. \c 11 \ms1 Jises akohok sisi-in ma iy imek, ano iy amak ja \mr (Kalan 11–16) \s1 Jises ili Jerusalem i buku kabin \r (Metiu 21:1-11; Luk 19:28-40; Jon 12:12-19) \p \v 1 Eme oro ame mirihik ta Jerusalem ya ame kon Betapes ma Betani udu loboho kesehe mandrei Olip. Eme Jises suni uru lau tan la-uh, \v 2 ma iy tiye i turu i buku doh, “Ah kala kon to anyolom i aliy don. Suwi labai ah kameh atou nadu donki ari loweu, ari ndramak bamanyah bare bwele-en bwe le. Ya ah katolowei malou ma kasiriniy keme. \v 3 I buku none are lau kandremenya ah anya, ‘Ah abo sah kede-eh?’ Ah katiye ki buku doh, ‘Laban gok udu tan, ano iy baratiyaniy barame hamon ja!’” \p \v 4 Eme uru au ma atou nadu donki badeh, iri sakabwitiniy udu ta kou udu alih ta san ili bolo kon, eme uru tolowei malou iu. \v 5 Eme iri lau rayah ales are loboho doh ndremenya uru, “Hei, ah anya katalou donki badeh, ta sasah?” \p \v 6 Eme uru tiye sahou nane Jises asehek i turu, eme oro tiye uru kandrei ma katiyaniy kili. \v 7 Eme uru sirini donki ili hawe Jises, ma oro lau tan lowosani kolau toro lawe-en badu bwele-e awin toro i kona donki nane, ya Jises ili manyah udu bwele-en. \v 8 Eme iri lau solo-an labai talou kolau tiri lawe-en badu bwele-e awin tiri ya iri talaha ili madasan. Ya iri ra-on badeh, ala asan la-u kei badu bilin ma anyehe i andri. \v 9 Eme iri lau ra-on adek ala bwena ta Jises ma hawe iri ra-on adek an hamon badeh aloh i buku doh, \q1 “Hosana! \q1 Kasekesek iy! \q1 Kasore nyaran! \q1 Iy eme ta nyara Laban! \rq Wari 118:25-26\rq* \q1 \v 10 Kasore tondrok ta tama Debit kameh, eme! \q1 Hosana! \q1 Kasekesek ki loken mara-ei!” \p \v 11 Eme ma oro ala asos kon tinan Jerusalem. Ma Jises hawe oro lau tan ala bolo asiu tinan ta Kindrei. Ano oro anyolom ili eme i ta lakou mari. Arile, an anya kamai ki-iu ki andri ai. Eme ma oro ruwani Jerusalem ma adek au ala kon bwisik Betani, ma oro amadin doh. \s1 Jises tiye kei pik winiyan bato-ou salin bwe \r (Metiu 21:18-19) \p \v 12 Ya eme na len ari ja, oro are Betani ame len, ma Jises imeson andra-i labai. \v 13 Eme iy ere ndra len, iy atou kei pik ra-ei, suhuyen labai. Eme iy edek ili bada kei dah, anya katou buwa pik dah udu aliy deh bwe. Arile iy ili badeh, iy batou se ari bwe, laba le la-un, tasah bamwenen ta len ta buwa pik bwe. \v 14 Eme Jises tiye i ta kei nane i buku doh, “Iri lau winiyan baimon salim ja bwai.” Eme oro lau tan anuhun sahou iy asehek. \s1 Jises atikah iri amekes baen ado asiu tinan ta Kindrei \r (Metiu 21:12-17; Luk 19:45-48; Jon 2:13-22) \p \v 15 Eme oro ame Jerusalem ma Jises iu ili bolo asiu tinan ta Kindrei ya iy atikah iri lau amekes ba-en udu asiu doh. Eme Jises bukudi iri sau tiri lau ta tokoha luk, ma hawe bwabwai tiri lau asih iri sirih aloh ban. \v 16 Ya iy baseken are lau sabwese lakou sala bolo asiu doh, ndri-iy. \v 17 Eme Jises leheya iri mwan ma badih, ma iy tiye i tiri, “Sebwe buk ndrabun ndratiye nadeh? Tiye i buku doh, \q1 ‘Asiu tek dah, ta lau mari badu munyak tinan mari ta salom,’ \rq Aisaya 56:7\rq* \m arile aha ndramesekei asiu tek, ndrasahan \q1 ‘asumwe iri lau ta bahana.’” \rq Jeremaya 7:11\rq* \p \v 18 Jises asehek i buku doh, ma iri lau tinan tiri pris hawe iri lau ta leheya kandriyen tiri Juwis anuhun iy. Eme iri anoh iy, tasah iri lau mari boho iri asak ta leheya tan. Eme iri lomondra ta anya kadai iy. \p \v 19 Len mara-ei Jises hawe oro lau tan amekes i buku doh: Kon a beyeh, oro adek are kon tinan au ala amadin a bolo kon bwisik. \s1 Kei pik ndrasara ma sahou tanan ta aliy \r (Metiu 21:20-22) \p \v 20 Eme mandraben ta len ari ja badeh, oro adek anya kala hamon kala Jerusalem. Eme oro anyolom kei pik mene Jises asehek sahou i tan badeh, ndrasara mara-ei, udu ta la-un ili isos bada kandron. \v 21 Ya Pita, balen bamaniy bwe, eme iy anya, “Ou anyolom, ndramak ta leheya, kei pik mene ou tiye sahou boto-on i ta aliy, badeh, ndrasara mara-ei!” \p \v 22 Pita asehek i buku doh badeh, ma Jises tiye ili toro lau tan anya, “Ado kanuhun! Ado katehei budon tado handru badeh, kili ta Kindrei. \v 23 Jo asehek sahou handru ewek tado, ou are lau asehek sahou i ta mandrei doh anya, ‘Ou suri ou ya ou sandroh ala bolo ndras,’ ma budon ta nohonoh sa-en ndrinem, arile budon tam handru ki-in ta lakou ou asehek, idah kameh asahan tam buku le ou nane ndratiye. \v 24 Ya ta sehek ta aliy i buku doh, sasah ou ndremenya i san ta salom, ya budon tam ki-in ta aliy handru i buku ou ndrandrei, idah kameh ou andrei handru. \v 25 Ya i buku none ou are ales ta salom badeh, ou badeh, balem kamani saba lomondra ndra-in ta bada are lau, ya idah kameh ou ale tamam Kindrei udu kandrah kameh sikine lomondra ndra-in tam iu.” [ \v 26 “Arile, buku ou bamani lomondra ndra-in ta bada iri rayah bwe, tamam Kindrei udu kandrah ale kameh winiyan basikine lomondra ndra-in tam bwe ale.”] \s1 Oro ndremenya Jises are lau handru edeu boto-on i tan \r (Metiu 21:23-27; Luk 20:1-8) \p \v 27 Eme oro ame asahan Jerusalem ja. Ya eme iy edek ili bolo asiu tinan ta Kindrei le badeh, iri tinan tiri pris hawe iri lau ta leheya kandriyen tiri Juwis hawe iri lau-en badeh, ame hawen. \v 28 Eme iri ndremenya Jises, “Ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?” \p \v 29 Ya eme Jises tiye i tiri, “Jo ale anya kandremenya aha ta lakou ari. Ano buku none aha tiye amwenen eme tek, sebwe jo kameh tiye ewek taha are lau handru atehei boto-on eme tek ta amekes gok dah. \v 30 Kala Jon mene alomwa iri lau, iy akohok boto-on badu heh? Lokou doh badu kandrah deh, badu kon munyak le? Aha tiye keme tek.” \p \v 31 Eme iri andres udu ndrokowa oro le i buku doh, “Buku none to katiye anya, ‘Idoh lakou badu kandrah,’ idah kameh iy ndremenya to ja anya, ‘Buku sah handru ya aha batehei budon taha bala ta aliy bwe?’ \v 32 Arile, buku none to katiye anya, ‘Idoh kandriyen tiri lau le,’ winiyan bwe nadeh?” Iri lomondra i buku doh. Iri anoh iri lau tasah iri lau anya, Jon badeh, propet ta Kindrei handru. \v 33 Eme iri asumon boho Jises i buku doh, “Ahi tana ahi bwe.” \p Eme Jises tiye tiri i buku doh, “Jo ale jo winiyan batiye bawek taha ta are lau handru atehei nyaran tinan eme tek ya jo amekes iri gok dah bwe.” \c 12 \s1 Sahou sokek ta nyala salibah ndra-in atondrok bilin waen \r (Metiu 21:33-46; Luk 20:9-19) \p \v 1 Eme ya Jises asehek sahou sokek i tiri i buku doh, “Ndramak ari badeh, bwidi bilin ari ta waen, ma iy bwidi kou awudiy. Ma udu bolo bilin tan nane doh, iy ihi lek ari ta atik ma apis buwa waen, ano iy tahi asiu ra-em ta atondrok bilin doh. Eme iy ruwani bilin ili mine iri lau salibah ta atondrok. Ma iy iu i kon rakon ja. \p \v 2 Eme ya len ta abwe-eh buwa waen asahan, iy eme suni lohowan tan ari ili hawe oro salibah atondrok bilin waen nane dah, anya kakohok rayah buwa waen ki minen. \v 3 Eme oro salibah ta bilin tawi iy ma adai iy, eme ma oro tikahei iy iu na luka minen ma luka katin. \v 4 Ano ja, iy suni lohowan tan ari ili hawe oro ja. Eme oro adai iy i batun, ma abolei iy andra-i labai. \v 5 Ano ja, iy suni lohowan tan ari ili ja. Eme oro adai iy imek, ma hawe iri rayah ja ale oro ubwiy, ma rayah badeh, oro adai imek. \v 6 Ano, ari le badu bolo oro erah ya idoh nadun amwenen, ya iy badeh, aseken iy labai. Eme tama bilin nane abudon buku doh, ‘Sebwe oro kameh anuhun boho naduk.’ \v 7 Arile oro salibah ta bilin suburuk i toro ari ari i buku doh, ‘Ei, nadun eme, to kadai iy, ma to kakuhi iri lakou tan mari.’ \v 8 Eme oro tawi iy, ma adai iy imek, ma oro akahei iy iu i len ta bilin. \p \v 9 “Ya idah kameh tama bilin kamekes saba lakou handru? Iy kameh idi oro lau doh amak, ma iy kameh atehei bilin ili mine iri lau rayah ja katondrok ma kabo gok ta aliy. \v 10 Handru labai, sebwe ado banyolom sahou doh ereu bolo buk ndrabun ta Kindrei bwe nadeh, sahou i buku doh, \q1 ‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek. \v 11 Idah san ta Laban amekes, ma mwasin labai ta mada taha.’” \rq Wari 118:22-23\rq* \p \v 12 Eme iri tinan tiri pris hawe iri lau ta leheya kandriyen tiri Juwis hawe iri lau-en nane anya ja Jises asehek sahou sokek doh i bada iri. Eme ma iri anya kateu iy. Arile iri winiyan bwe, tasah iri anoh iri lau solo-an nane dah. Eme iri ruwani iy ma iri au. \s1 Ndremenya ta akeh takis \r (Metiu 22:15-22; Luk 20:20-26) \p \v 13 Ano oro suni iri Parasi rayah hawe lau rayah ta Herot a hawe Jises ma ndremenya ta none iy na sahou. \v 14 Eme iri ame hawen ma anya, “Ndramak ta leheya, ahi tanan, ou lau ta asehek sahou handru, ma ou banoh are ndramak bwe. Ya ou asehek sahou ari le ili tiri lau mari, buku ndramak nyaran tinan, deh, ndramak iy nyaran bwe, ya ou badeh, leheya san handru ta Kindrei. Ou abudon i buku sah? Mwasin ta taha kadeu takis ki ta Sisa, deh, ndri-iy?” \v 15 Arile Jises badeh, ndratanan iri asehek sahou na boho iri le, eme ma iy tiye i tiri, “Buku sah handru aha anya kanone jo? Aha kaleheya keme tek ari luk bororoh ya jo kanyolom.” \p \v 16 Eme iri andrei ari ili minen, ya eme iy ndremenyani iri i buku doh, “Malawi ndramak ma nyaran kede-eh are lau handru?” \p Eme iri anya, “Ta Sisa.” \p \v 17 Eme Jises tiye i tiri, “Mwasin, saba lakou ta Sisa, aha kadeu ki ta Sisa. Ya saba lakou ta Kindrei, aha kadeu ki ta Kindrei.” Ya eme boho iri asak. \s1 Ndremenya ta nyala tasou ma amak ja ta imek \r (Metiu 22:23-33; Luk 20:27-40) \p \v 18 Eme iri Sadusi ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe. \v 19 Eme oro ndremenyani Jises i buku doh, “Ndramak ta leheya, Moses bwena mene torowenei nyala taha anya, \q1 ‘Buku none ari ndramak imek, ya udun erah ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’ \rq Dutoronomi 25:5\rq* \m \v 20 Len ari bwena, oro lau ma ndro taloh, oro badeh, nadu tine oro. Eme kadok toro i tasou ta badih ari, eme ya iy imek ma iy nadun bwe. \v 21 Ano iy bwaneh sudi udun ja, ano bwaneh imek ma uru nah bwe le. Ano ja silih sudi iy ja eme i le buku aliy, iy imek ma uru nadu uru bwe le. \v 22 Ya eme oro ma ndro taloh amak, nah bwe le i buku aliy. Ano, udu hamon badeh, ma iy badih ale imek. \v 23 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro ma ndro taloh nane doh.” \p \v 24 Eme Jises tiye i tiri anya, “Aha ndrandra-i labai, tasah aha bala tanan tarou ereu bolo buk ndrabun ta Kindrei bwe. Ma aha tana aha boto-on ta Kindrei bwe ale. Eme ya ado asehek sahou laleyah. \v 25 Na len iri lau ndramak kameh amak ame awas ja, ya iri kameh winiyan bala tasou ja bwe. Iri kameh asahan buku iri angelo areu kandrah. \v 26 Handru labai. Iri lau ndramak bwena, hamon kameh iri amak ja. Sebwe aha banyolom ta tarou ta Moses bwe nadeh? Idoh asehek ta nyala len mene Moses atou jih anya udu ta kei. Eme ma Kindrei tiye i ta Moses i buku doh, \q1 ‘Jo Kindrei ta Abraham, ta Aisik, ma ta Jekop.’ \rq Eksodus 3:6\rq* \m \v 27 Aha ndrandra-i kede-eh! Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le. Eme ma aha andra-i kede-eh, tasah aha abudon anya, iri lau ale ndramak bwena mene, iri kameh winiyan bamak ja bwe.” \s1 Nyala batanau udu bwele-e batanau mari \r (Metiu 22:34-40; Luk 10:25-28) \p \v 28 Eme ma ndramak ari ta leheya kandriyen tiri Juwis eme bolo iri ma iy anuhun iri andres iri. Eme iy anuhun Jises asehek sahou i tiri ndra mwasin le ai. Eme ma iy ndremenya Jises i buku doh, “Saba sahou batanau badeh, tinan handru ma udu bwele-e iri sahou batanau mari?” \p \v 29 Eme Jises anya, “Lakou laba tinan handru asah idoh, \q1 ‘Aha kanuhun, aha lau badu Isra-el, Laban badeh, iy le ari, iy Kindrei tataha. \v 30 Ya ou aseken Laban tam Kindrei na ndrinem mari, ma na koham handru mari, ma na budon tam mari, ma na boto-on tam mari.’ \rq Dutoronomi 6:4-5\rq* \m \v 31 Ya la-uh ta aliy ja asah idoh, \q1 ‘Ou aseken iri lau ari ari badu hawen, i le buku ou aso-ok ou le.’ \rq Lebitikus 19:18\rq* \m Ya ari batanau ja badeh, winiyan basakalawi uru batanau ma la-uh dah bwai. Uru le badeh, maha-an ma udu bwele-en labai.” \p \v 32 Eme ma iy ndramak nane dah tiye i ta Jises, “Handru labai, ndramak ta leheya, ou nane tiye handru. Ari Kindrei udu kede-eh ja bwai, iy le ari. \v 33 Ma ou aseken iy na ndrinem mari, ma na budon tam mari, ma na boto-on tam mari. Ma ou aseken iri lau ari ari badu hawem, i le buku ou aseken ou le, idoh mwasin handru, sakalawi kandriyen ta asun lakou i buku salom i ta Kindrei, ma lakou adai i buku salom i ta Kindrei.” \p \v 34 Eme Jises anuhun ma iy asehek mwasin handru, eme iy tiye i tan, “Ou badeh, are mirihik labai ta tondrok ta Kindrei.” Ano, hamon ta aliy iri anoh ma iri bandremenya ari ndremenya bala tan ja bwai. \s1 Krais nadu Debit ma iy ale Laban tan \r (Metiu 22:41-46; Luk 20:41-44) \p \v 35 Jises udu ndra bolo asiu tinan ta Kindrei kahis, eme ma iy leheya iri mwan ma badih ta kandriyen ta Kindrei. Iy tiye tiri anya, “Ya aha kanuhun. Debit badeh, ndramak ndra bwena, arile, bolo len mari lundriyen oro badeh, asahan kahis. I buku sah handru iri lau ta leheya kandriyen tiri Juwis anya ja, Krais badeh, nadu Debit? \v 36 Taha ndratanan, bwena mene Malawin Ndrabun atehei budon i ta Debit le tiye i buku doh, \q1 ‘Laban Kindrei tiye i ta Laban tek i buku doh: \q1 “Ou ame manyah ado loboho minek salin \q1 winiya jo le baratehei iri lau ta amekes budon ndra-in i tam barado bahandra katim.”’ \rq Wari 110:1\rq* \m \v 37 Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?” \s1 Sahou batanau ta nyala iri lau ta leheya kandriyen \r (Metiu 23:1-36; Luk 11:37-54; Luk 20:45-47) \p Eme iri lau solo-an handru anuhun ma iri sekesek. \v 38 Jises leheya iri mwan ma badih kahis ma iy tiye tiri udu bolo leheya tan anya, “Mada aha kaleu tiri lau ta leheya kandriyen tiri Juwis. Iri aseken adek ala ame na kolau moroyan lawe tiri, eme iri anya lau mari kasumon iri na len ta baen. \v 39 Ya iri anya kamanyah kareu le bwabwai mwasin badu tukum tiri Juwis, ma ndrahu kon ta atudun ta nyamon tinan. \v 40 Iri bene-ei asiu ta badih nyau, ya iri wendreya ta aliu salom lawe-en lawe-en. Idah kameh iri lau buku doh kameh akohok maha-an laba tinan labai.” \s1 Nyala badih nyau akeh luk handru i ta Kindrei \r (Luk 21:1-4) \p \v 41 Eme Jises manyah udu mirihik ta ndrahune luk udu asiu tinan ta Kindrei, eme ma iy anyolom lau ala ame akeh luk i bolo lakou ta ndrahu luk nane dah. Iri lau tiri lakou solo-an badeh, akeh luk solo-an handru en. \v 42 Eme ya badih nyau ari tan se lakou bwe badeh, eme akahei luk bororoh saraman ma la-uh le. \v 43 Eme Jises luhi oro lau tan ame ma iy asehek i toro, “Jo katiye tado handru en! I badih nyau tan lakou bwe kede-eh, akeh luk solo-an labai ja tiri lau rayah kede-eh ja. \v 44 Tasah iri lau mari kede-eh akahei rayah le badu bolo luk tiri solo-an, arile iy badih nyau tan lakou bwe badeh, ndrakahei luk mari ta sukunyan ndrala.” \c 13 \s1 Nyala asiu tinan ta Kindrei ato-oh \r (Metiu 24:1-2; Luk 21:5-6) \p \v 1 Eme Jises udu asiu tinan ta Kindrei eme len le badeh, lau tan ari tiye i tan i buku doh, “Ou anyolom ndramak ta leheya, asiu amekes na bek tinan kede-eh, mwasin handru labai ma asiu mari kede-eh konen handru.” \p \v 2 Eme Jises tiye tan i buku doh, “Ou anyolom asiu tinan tinan kede-eh deh? Ari ndruwi asiu bek kameh winiyan bales bareu loken bwe. Iri marakon kameh ato-oh iu i andri.” \s1 Sahou tanan ta wendreya ma sisi-in kameh asahan \r (Metiu 24:3-28; Luk 21:7-24) \p \v 3 Ya eme Jises manyah udu bwele-e mandrei Olip bilisiu ta asiu tinan ta Kindrei. Iy le ari udu ndra ndrahun, eme Pita ma Jemis hawe Jon uru Enduru ala ndremenya iy anya, \v 4 “Ou tiye keme taso, na saba len handru kameh iri lakou doh kasahan? Ya saba kalem kameh kasahan bwena ta leheya lakou mari doh buku ndrame bakep?” \p \v 5 Eme Jises tiye i toro i buku doh, “Ado kanyolom kamwenen, ya ari ndramak sawendreyani ado, ndri-iy. \v 6 Iri lau solo-an kameh ame anya iri asehek sahou tek ma anya, ‘Jo dah Krais’ Ya iri kameh wendreyani lau solo-an. \v 7 Ya i buku none ado anuhun kurutuwe bahun ereu mirihik, ma yoyou ta bahun ereu len, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh kahis le. \v 8 Tasah, kon munyak tinan ari kameh amekes bahun i ta kon tinan ari, ya kabin badu kon rakon kameh amekes bahun i ta kabin badu kon rakon ja. Ma idah kameh kon ari ari kameh ndroi asahan aliy, ma son kameh asahan bolo kon. Iri lakou mari doh anya kasahan buku none sisi-in ta badih anya kato-ou nah. \p \v 9 “Arile, bale aha ki-in taha, tasah iri kameh ateu ado ma adeu aha a mine iri kansol ma atehei aha a ta sahou. Ya iri kameh ubwi aha an bolo asiu ta atukum tiri Juwis, ma aha kameh ales are mada iri lau ta atondrok ma hawe iri kabin. Iri amekes doh ta ado katiye sahou tek mwasin ki tiri ya iri marakon kanuhun ma katanan. \v 10 Eme ma sahou mwasin badeh, katiye mwena op, ki tiri kon marakon. \v 11 Ya, i buku none iri atehei aha ka ta sahou, aha sabwerei ta saba sahou kameh aha kasehek. Arile, i buku none len ta aliy asahan, aha kameh asehek sahou Kindrei edeu ewek taha, tasah sahou aha asehek kameh sahou taha bwe, sahou ta Malawin Ndrabun labai. \v 12 Ya na len doh kameh ndramak atehei nadu tinen amwenen ili ta mada sahou, ya iy kameh edeu sa-oh tan. Ya tama iri ra-on ale kameh amekes buku aliy ili ta nadu iri. Ma iri nah ra-on kameh asahan lau ta bahun ili ta tama ma tine iri, ma iri kameh atehei iri ala mada iri lau tinan ta kadai iri kamak. \v 13 Ya iri lau mari kameh baseken aha bwe, tasah aha badeh, an hamon tek. Arile, are lau tawi iy ili isos munyak ano, Kindrei kameh winiyan akohok iy i hamon ja. \p \v 14 “Idah kameh aha anyolom \q1 ‘lakou munya-un ndra-in’ \rq Daniyel 9:27; 11:31; 12:11\rq* \m ales udu kon ndrabun ta iy sare aliy. (Are lau anyolom sahou dah iy kabudon kamwenen.) Are lau iri are kon Judiya katobwak kala bolo mandrei. \v 15 Ya are lau ereu bwele-e asiu loken sala hamon sala bolo asiu sakohok ari lakou tan ja, ndri-iy. \v 16 Ya are lau ereu bolo bilin sala hamon sala sakohok kolau tan ja, ndri-iy. \v 17 Len doh kameh len ndra-in labai tiri badih nah ereu tiri, ma badih nah ma nyandren! \v 18 Ado kasolom ki ta Kindrei ta ado satobwak na len ta jor ma ur. \v 19 Tasah, len ndra-in doh eme kameh, kon mari kameh andra-i mara-ei, sakalawi ja iri len ndra-in mene kabatana Kindrei bwidi munyak eme taku dah. Ya ari ja hamon winiyan basakalawiy bwai. \v 20 Arile, Laban ndrasani kane len doh. Ya, i buku none iy basaniy bwe, ari ndramak winiyan basakalawiy bwe. Arile, toro lau le nane Kindrei ndranyowonyani oro, iy kameh sani len doh kameh a mo-on. \p \v 21 “Ya buku none ari ndramak katiye taha, ‘Krais asah idah!’ deh, ‘Laban asah in kenoh!’ Aha sanuhun, ndri-iy labai. \v 22 Tasah, idah kameh krais ta wendreya ma hawe propet ta wendreya kameh asahan. Ya iri kameh amekes iri lahou tinan ma kalem ta wendreya iri lau, ma ale anya kanone iri lau ala budon ta Kindrei udu tiri badeh, kataku. \p \v 23 “Bale aha kudu aliy! Lakou mari doh kameh barasahan hamon, eme ya jo ndratiye taha ereu bwena.” \s1 Kalem ta Nadu Ndramak Awas eme hamon ja \r (Metiu 24:29-31; Luk 21:25-28) \p \v 24 “Arile, hamon ta len ndra-in ano, ya udu bolo len doh kameh, \q1 ‘An kameh ilik, ma bun kameh winiyan banya bwe. \q1 \v 25 Ya ndrau udu kandrah kameh taku ereu kandrah eme andri, ma boto-on mari badu kandrah kameh nyukunyok.’ \rq Aisaya 13:10; 34:4\rq* \m \v 26 Ano iri lau kameh anyolom Nadu Ndramak Awas asahan ereu bwele-e asi kandrah, ma boto-on tan ma lomadan tinan labai. \v 27 Eme ya iy kameh suni iri angelo tan au ala kati jor ma hahuw ereu bolo munyak dah, ta atukum iri lau tan, ala budon tan udu tiri, ereu kon ranah ili taku ranah ame hawen. \s1 Tanan ta kei pik \r (Metiu 24:32-35; Luk 21:29-33) \p \v 28 “Ya aha kanyolom kei pik, ya iy kameh tiye tado. Buku none andran irek ta gwa ma nyabun asahan, aha tana aha, idah kameh kon ndra an le ai. \v 29 Ya, buku none aha anyolom iri lakou nane jo ndrasehek, aha atana aha len ndrame bakep ai. \v 30 Jo tiye tado handru! Iri lau rebesem areu kede-eh kahis na len dah kameh bamak bwe le, iri lakou mari doh kameh asahan. \v 31 Kandrah hawe kon munyak dah kameh ano iu, arile sahou tek le kameh winiyan bano bwe. \s1 Mada aha kaleu! \r (Metiu 24:36-44) \p \v 32 “Ari ndramak bala tanan len, deh, mada an ta Laban eme hamon bwe. Iri angelo badu kandrah ma nadun ale tanan bwe, taman le ari badeh, tanan ai. \v 33 Bale aha kudu aliy! Aha kanyolom kamwenen, tasah aha tanan bwe, saba len handru, kameh iy eme hamon ja. \v 34 Ya idah kameh, i buku none ndramak ari anya kedek kili kon ari leheleh, ya iy atehei iri lohowan tan atondrok ai, iy ari ari in ta lahou tan labai, iy ari ari in ta lahou tan labai. Ma iy tiye ta ndramak ta madasan badeh, madan kaleu. \v 35 Ya aha kanyolom kamwenen, tasah aha tanan saba len tama asiu kameh eme bwe. Iy kameh asahan na beyeh, deh bwe, iy kameh asahan na ben alih deh, bwe na boho len deh, bwe na ma ndraben an eme loken. \v 36 Koro-an iy keme i le mani tur, ya iy kameh kasilahei aha amadin kahis le. \v 37 Lakou jo asehek nyala ado badeh, jo asehek nyala aha mari ya mada aha kaleu!” \c 14 \s1 Pris tinan ma hawe lau ta leheya kandriyen tiri Juwis takaleh san ta aseu ma kadai Jises \r (Metiu 26:1-5; Luk 22:1-2; Jon 11:45-53) \p \v 1 Ya idah kameh, len la-uh ano, ya hamon ta aliy badeh, len ndrabun aloh Pasoba ma hawe nyamon tinan ta jabi ramen yis bolon bwe, kameh asahan. Eme iri lau tinan tiri pris ma hawe iri lau ta leheya kandriyen tiri Juwis badeh, takaleh madasan ta bahana ta ateu Jises ma anya kadai iy. \v 2 Tasah, iri anya, “To samekes sado bolo len ta nyamon tinan, ndri-iy, bwe kameh iri lau solo-an kabokoro-ei ma bahun kasahan.” \s1 Badih ari asolou suluw i bwele-e Jises \r (Metiu 26:6-13; Jon 12:1-8) \p \v 3 Ya eme Jises udu Betani udu asiu ta Saimon ale lepra mene udu tan. Ya iy manyah udu bada sau aimon nyamon. Eme ya badih ari eme hawen ma bwisi ndrau suluw tan amekes na kandro kei aloh nat. Ya sowan badeh, laba tinan labai. Eme iy tubwani bale bwisi ndrau suluw iu, ano iy asolou i batu Jises. \p \v 4 Eme ya oro lau rayah abolosen ma tiye i toro ari ari i buku doh, “Aden! Tasah handru iy asolou suluw doh iu laleyah? \v 5 Ndrelekei doh nane katehei kili mada ba-en ya winiyan asahan i luk denariyus ere bwele-e tonek (300),\f + \fr 14:5 \ft Kane luk doh ja sakalawi luk i buku sihine ndramak ta lahou iy amekes udu bolo jaha ari buruwen.\f* ya kanyohan ki tiri lau lakou bwe.” \p \v 6 Arile Jises anya, “Ado karuwani iy. Ado abudon andra-i i ta iy badih kede-eh tasah? Badih kede-eh ndramesekei lakou tinan ma mwasin labai ndrame tek. \v 7 Ya idah kameh, iri lau tiri lakou bwe kameh len mari iri are hawe ado, ma i buku none ado aseken, ado winiyan aseben iri, arile jo kameh winiyan bado hawe ado len mari bwe. \v 8 Lakou iy badih dah anya kamekes badeh, asah iy ndramesekei dah. Iy asolou suluw badeh, i badak udu bwena dah, ta lowosa jo ta ki lek. \v 9 Ya jo tiye handru i tado. Saba kon iri atiye sahou mwasin ili udu bolo kon munyak dah, saba lakou iy ndrabwidiy dah kameh iri asehek ta aliy ta abudon nyaran.” \s1 Judas iu edeu sa-oh ta Jises \r (Metiu 26:14-16; Luk 22:3-6) \p \v 10 Ano ya, iy ari badu hawe oro lau tan ma ronoh la-uh nyaran Judas Iskariyot, iu i hawe iri lau tinan tiri pris anya kedeu sa-oh ta Jises ki mine iri. \v 11 Eme iri tinan tiri pris anuhun badeh, iri sekesek ma tandrakan Judas ta kanyohan iy na luk. Eme Judas takaleh san ta edeu Jises ki mine iri. \s1 Jises aimon nyamon ta Pasoba hawe oro lau tan \r (Metiu 26:17-25; Luk 22:7-14; Luk 22:21-23; Jon 13:21-30) \p \v 12 Eme na len ma mwena ta nyamon tinan ta jabi ramen yis bolon bwe eme asahan, na len ta adai iri nadu sipsip i ta salom ta Pasoba, eme oro lau ta Jises ndremenya iy, “Ou aseken aso kala heh kamekes ma kalowosa ta to kaimon nyamon ta Pasoba kado aliy?” \p \v 13 Eme ya iy suni uru lau tan ma la-uh ma tiye turu i buku doh, “Ah kala bolo kon tinan Jerusalem ya idah kameh ndramak ari bwese gwa in bolo sabok kameh ndruni ah. \v 14 Eme ah ka-en hamon tan kala asiu ala iy anya ki bolon en, eme ah katiye ki ta ndramak ta asiu ki buku doh: ‘Ndramak ta leheya anya, asiu tan ndraheh? Ya idah kameh oro lau tan ma iy kameh aimon nyamon ta Pasoba a-en aliy.’ \v 15 Ya idah kameh iy leheya ah ta bolo asiu ari udu loken badeh, ndralowosaniy le. Eme ah kala aliy kamekes nyamon tato kudu le ai.” \p \v 16 Eme uru lau ta Jises dah adek au a kon tinan, eme uru takalahei i le buku none ndrasihidiy turu, ma oro lowosani nyamon ta Pasoba ma asiu buku le aliy. \p \v 17 Ano kon abeyeh Jises eme hawe oro lau tan ma ronoh la-uh ai. \v 18 Eme oro an ndra andri aimon nyamon badeh, Jises asehek i toro i buku doh, “Jo tiye sahou handru ewek tado, iy ari ereu bolo ado kede-eh kameh atehei jo i mine iri lau ndra-in, iy ala aimon nyamon hawek en.” \p \v 19 Eme oro tikisiy labai, ma oro ari ari ndremenya iy anya, “Jo nadeh, jo nadeh?” \p \v 20 Eme Jises tiye i toro, “Ari badu bolo ado ma ronoh la-uh dan. Iy are alomwa jabi ramen i bolo bwekei hawek en. \v 21 Tasah, Nadu Ndramak Awas kameh imek buku le none tarou mene ndratorowenei ta nyalan. Arile, sisi-in laba tinan kameh i bwele-e iy ndramak nane ale atehei Nadu Ndramak Awas ili mine iri lau ndra-in, sebwe mwasin tinen mene satuwi iy, ndri-iy!” \s1 Jises asehek ta nyala odan ma ndrayen \r (Metiu 26:26-30; Luk 22:14-20; 1 Korin 11:23-25) \p \v 22 Kala oro aimon nyamon doh, Jises kuhi jabi ramen, ma iy asalom i la-un, ano iy boso-ei i noro. Ano iy tiye i toro i buku doh, “Ado kandrei, idah odak amwenen.” \p \v 23 Ano iy kuhi bwiniu waen, ma iy edeu wurah i ta aliy, ano iy edeu i wa-i oro lau tan, eme ma oro mari a-un. \v 24 Eme Jises tiye i toro ja, “Idah ndrayek ta sahou randra le, ma idah kameh amou ta lau mari. \v 25 Jo tiye tado handru. Jo winiyan ba-un ndraye buwa waen dah hawe ado ja bwe, winiya le len jo kameh a-un ja i san ha-un udu bolo tondrok ta Kindrei.” \p \v 26 Eme oro ayah wari ari ta atudun, ano ma oro au ala mandrei Olip. \s1 Jises nyowonya besebes ta Pita \r (Metiu 26:31-35; Luk 22:31-34; Jon 13:36-38) \p \v 27 Oro adek ala le kahis, eme ma Jises tiye i toro anya, “Ado mari kameh ruwani jo, tasah iri ndratorowenei bwena udu bolo buk ndrabun asehek i buku doh, \q1 ‘Jo kameh idi ndramak ta tondrok, ya iri sipsip tan kameh aseker laleyah.’ \rq Sekaraya 13:7\rq* \m \v 28 Arile, hamon ta aliy kameh jo amak ja, ya jo kameh ili bwena tado ili Galili.” \p \v 29 Ya eme Pita tiye i tan i buku doh, “I buku none oro mari anoh ma aseker, jo winiyan batobwak bwe.” \p \v 30 Eme Jises asehek i tan anya, “Handru jo asehek tam. Na ben dah kameh, kakaro baden san lusan bwe le badeh, ou kameh besebes anya ou tanam jo bwe san tulusin.” \p \v 31 Arile, iy tiye sahou boto-on boto-on i buku doh, “Jo winiyan basehek sahou badeh bwe, buku none jo imek hawem jo winiyan babesebes anya jo tanan ou, bwe.” Eme ya oro mari badeh, asehek sahou randra le. \s1 Jises asolom in bolo bilin Getsemeni \r (Metiu 26:36-46; Luk 22:39-46) \p \v 32 Eme ma oro adek au ala kon ari aloh Getsemeni. Eme iy tiye i toro lau tan, “Ado kamanyah kado dah, ya jo kameh asolom ki ta Kindrei.” \p \v 33 Ano iy kuhi Pita, Jemis ma hawe Jon oro a hawen, eme Jises atona bolo odan badeh, amaha ma sisi-in hawe iy tikisiy. \v 34 Eme iy tiye i toro anya, “Jo tikisiy labai, ma jo anya kimek. Ado kado dah ma mada ado katele.” \p \v 35 Eme ya Jises edek ili bwena sese, ma iy taku i andri bada ndren. Eme ma iy asolom i buku doh, i buku none winiyan eh, len doh ki-iu ki len tan. \v 36 Eme ma iy anya, “Tama, tama, lakou mari badeh, ou ndra winiyan le ai. Ou andrei bwiniu dah ki-iu ki len tek, arile idoh budon tek le, ou amekes saba lakou ou tanam mwasin.” \p \v 37 Ano iy eme hamon iy atou oro lau tan ma taloh nane dah ndramadin. Eme iy mete-ei oro ma tiye i ta Pita anya, “Saimon, ou kede-eh ndramadin? Buku sah handru ya ou winiyan bareu loken luluwen bwe? \v 38 Ado kanyolom ma ado kasolom ki ta Kindrei ta ado sataku sala bolo kandriyen ndra-in. Ndrine ado aso-ok handru ta amekes gok, arile oda ado badeh, boto-on handru bwe.” \p \v 39 Ano ja iy iu i hamon asolom ma tiye sahou nane le i ta Kindrei. \v 40 Ano iy eme hamon badeh, iy atou oro ndramadin ja, tasah mada oro badeh, maha-an ta amadin labai. Eme ya oro randra sahou ta tiye i tan bwai. \v 41 Ano iy eme hamon i san tulusin ja badeh, ma iy anya, “Ado kede-eh amadin ma amunyau kahis le? Ka-iy ai! Mada an ndrasahan. Ado katou! Idah kameh Nadu Ndramak Awas kameh ili mine iri lau ta lomondra ndra-in ai. \v 42 Ado kareu loken, to ka-au. Ado katou, iy ndramak ta atiye jo ili mine iri lau ndra-in asah ndrasahan kede-eh.” \s1 Iri ateu Jises \r (Metiu 26:47-56; Luk 22:47-53; Jon 18:3-12) \p \v 43 Ya eme Jises asehek sahou kahis le, Judas, iy badu hawe oro lau ma ronoh la-uh nane, edek eme hawen, hawe iri lau solo-an ma samen hawe kei udu mine iri. Iri tinan tiri pris ma hawe iri lau ta leheya kandriyen tiri Juwis ma hawe iri lau-en suni oro ame. \v 44 Judas nane ndratiye toro i buku doh, “Are lau jo atehei bohok i bohon, badeh iy le ai, ado katawi iy, ma kasirini iy ki-iu ma mwasin.” \p \v 45 Eme Judas isos le badeh, iy edek ales amwenen ili hawen ma anya, “Ndramak ta leheya!” Ma iy atehei bohon i boho Jises. \v 46 Eme ma iri atehei mine iri i ta Jises ma tawi iy. \v 47 Arile, oro lau tan ari badeh, ales are mirihik nane doh aluwi samen tan, ma iy sani ka-u ndranye bonyo-ou ta tinan tiri pris ari taku iu. \v 48 Eme Jises tiye i tiri lau marakon doh anya, “Buku sah ya ado ame ma samen hawe kei ta ateu jo, jo ari lau ta amekes ramwes deh? \v 49 Len mari jo udu hawe aha leheya in asiu tinan ta Kindrei, ya aha bateu jo bwe. Arile bwai. Kasahan ai, ya kamekes sahou ta buk ndrabun kasahan i handru.” \p \v 50 Ano oro lau tan mari ruwani iy ma oro atobwak au. \p \v 51 Eme ndramak loweu ari in hamon ta Jises ya lakou badan bwe, arile ra-ei le kolau in badan. Eme iri anya kaseu iy, \v 52 arile iy ruwani kolau tan ma iy ndrakane le sakaliye iu. \s1 Jises udu ta sahou udu mada kansol \r (Metiu 26:57-68; Luk 22:54-55; Luk 22:63-71; Jon 18:13-14; Jon 18:19-24) \p \v 53 Eme iri sirini Jises i hawe tinan tiri pris ari. Eme iri tinan tiri pris rayah hawe iri lau-en ma hawe iri lau ta leheya kandriyen tiri Juwis mari nane atukum dah. \v 54 Ya Pita badeh, edek in ndra hamon o-on, eme iy ili bolo kowah ta asiu ta tinan tiri pris dah. Eme iy manyah udu andri hawe iri lau ta atondrok madasan alakan iy i ta jih. \v 55 Ano iri tinan tiri pris ma hawe iri lau mari badu hawe iri kansol nane anya kanone katakaleh ari sahou wasai kihis bada Jises ta anya kadai iy kimek, arile iri takaleh labwe. \v 56 Tasah, iri solo-an labai asehek sahou ta wendreya i tan, arile iri batakalahei ari lakou ndra-in Jises mesekei bwe, ma sahou tiri ba-en badan bwe ale. \p \v 57 Eme iri rayah ales are loken badeh, asehek sahou ta wendreya i badan, i buku doh, \v 58 “Ahi mene ndranuhun iy anya ja, ‘Jo kameh tohowei asiu tinan ta Kindrei dah ala amekes na lim kameh iu, ano na len ma taloh ja kameh jo tutuni ari ja, idoh bamekes na lim bwe.’” \v 59 Arile bwai, sahou tiri ba-en se badan bwe ale. \p \v 60 Eme tinan tiri pris nane suri iy ereu loken bolo iri eme ma iy ndremenya Jises, “Ou randra sahou ta tiye i ta sahou nane doh oro to-en ewek tam deh bwe?” \p \v 61 Arile bwai, iy andru-uk le ai, ma iy batiye se sahou bwe. Ano ja tinan tiri pris ndremenya iy ja anya, “Ou kede-eh Krais handru deh bwe? Ya ou Nadu Kindrei ahi katudun ai?” \p \v 62 Eme Jises anya, “Ehe, jo adeh badeh. Ya idah kameh aha anyolom Nadu Ndramak Awas kameh manyah udu loboho lim salin ta Kindrei iy boto-on labai, iy kameh udu bwele-e asi jor badu kandrah eme.” \p \v 63 Eme ma tinan tiri pris ibolosen ta sahou doh ya iy tarani awin tan le ma iy anya ja, “I buku sah ja to anya kasilah sahou ta i badan ja? \v 64 Aha mari ndranuhun sahou bobose nane. Ya aha abudon i buku sah?” Eme iri mari anya, “Kadeu iy ki ta sahou ma kadai iy kimek.” \p \v 65 Eme iri rayah omor iy, ma iri tubuluhi madan ma a-um iy ma tiye sahou i tan anya, “Ou none tiye i buku ou propet, are lau a-um ou doh!” Eme iri lau ta tondrok madasan andrei iy ma ubwi iy. \s1 Pita besebes anya iy tanan Jises bwe \r (Metiu 26:69-75; Luk 22:56-62; Jon 18:15-18, 25-27) \p \v 66 Ya Pita badeh, manyah udu bolon loboho andri kahis le. Eme badih ari lohowan ta ndramak tinan tiri pris edek eme. \v 67 Eme iy atou Pita alakan iy eme iy anyolom iy boto-on boto-on. Ano i badih dah anya, “Ou kede-eh ale mene are hawe Jises badu Nasaret adeh.” \p \v 68 Arile Pita anya ja, “Bwe oh, jo tanan sasah ou asehek kede-eh bo-oh.” Eme ma Pita edek eme madasan le badeh. [Eme ma kakaro eden.] \p \v 69 Ya badih ta lohowan nane dah atou Pita ma iy asehek ja i toro lau ales dah, “Iy ndramak kede-eh iy ari badu hawe oro adeh.” \p \v 70 Arile iy anya ja, “Jo tanan bwe oh.” Ano luwen bwe iri lau ales tiye i ta Pita ja, “Handru, ou kede-eh ari badu hawe oro, tasah ou kede-eh badu Galili.” \p \v 71 Ano Pita tandrakan boto-on labai, “Jo asehek sahou handru, jo tanan ndramak ala ado asehek iy badeh, bo-oh. Buku none jo wasai, Kindrei kamesekei maha-an keme la-uk.” \p \v 72 Iy asehek sahou ano le badeh, kakaro eden san lusan ja. Eme Pita bwetenei sahou mene Jises tiye i tan anya, “Kakaro baden san lusan bwe le, ou kameh besebes anya ou tanam jo bwe san tulusin.” Eme ma iy atehei bohon i ta ndrelen. \c 15 \s1 Jises ales udu mada Pailat \r (Metiu 27:1-2; Metiu 27:11-14; Luk 23:1-5; Jon 18:28-38) \p \v 1 Ano na mandraben handru badeh, iri tinan tiri pris hawe iri batun tinan ma iri lau ta leheya kandriyen tiri Juwis ma hawe iri kansol rayah ame atukum atilik nyala iri. Ano ma iri sawei Jises ma tiyani iy ili, ma atehei iy ili mine Pailat. \v 2 Eme Pailat ndremenya iy, “Ou kabin tiri Juwis, neh?” Eme Jises anya, “Ou ndrasehek badeh kabwai.” \p \v 3 Eme iri tinan tiri pris badeh, asehek sahou solo-an boto-on i bada Jises. \v 4 Eme Pailat ndremenya iy ja i buku doh, “Ou ari sahou ta tiye deh bwe? Ou anuhun sahou solo-an labai iri asehek i badam.” \p \v 5 Arile Jises batiye randra sahou bwe, idoh mesekei Pailat abudon solo-an labai. \s1 Pailat atehei Jises iu ili ta kei tondreh \r (Metiu 27:15-26; Luk 23:13-25; Jon 18:39–19:16) \p \v 6 Eme ya na len ta nyamon tinan, i buku none kandriyen tan, eme iy ruwani ndramak ari badu bolo kou eme len, i buku are ndramak iri aseken ta aliy. \v 7 Eme na len doh badeh, ndramak ari nyaran Barabas in bolo kou hawe iri lau rayah ta amekes bahun i bada gabman ta atondrok. Iri mene adai ndramak imek udu bolo len ta bahun. \p \v 8 Eme iri lau solo-an ame hawe Pailat ma anya kandremenya iy ta iy katehei ndramak ki mine iri, i buku none iy ndramekes bwena ndra-au ndra-au. \v 9 Eme iy tiye i tiri, “Aha aseken jo karuwani kabin tiri Juwis kewek mine aha?” \v 10 Pailat asehek i buku doh, tasah iy ndratanan, ndrine iri tinan tiri pris badeh, ndra-in ta Jises, ma iri tiyani iy eme mada sahou. \p \v 11 Arile iri tinan tiri pris badeh, sosokok iri lau solo-an dah anya ja, Pailat karuwani Barabas ki mine iri ai. \v 12 Eme Pailat ndremenya iri ja, “Ya jo kamekes sasah ki ta ndramak ala aha aloh iy kabin tiri Juwis?” \p \v 13 Eme iri arah ja anya, “Katahi iy ki bada kei tondreh!” \v 14 Eme Pailat tiye i tiri, “Buku sah handru, saba lakou ndra-in handru iy mesekei?” Arile bwai, iri sarakau i loken le gwek anya, “Katahi iy ki bada kei tondreh!” \p \v 15 Ya eme Pailat anya kamekes iri lau solo-an nane dah kasekesek, eme ma iy ruwani Barabas i mine iri ai. Arile iy atehei Jises ili mine iri lau ta bahun, ta iri ka-um iy na malou sakabuk i bek. Ano iy atehei Jises ili mine iri lulik ta atideh iy kili bada kei tondreh. \s1 Lau ta bahun bobose Jises \r (Metiu 27:27-31; Jon 19:2-3) \p \v 16 Eme oro lau rayah ta bahun aluwi iy eme len i bolo asumwe Pailat (idoh asiu tinan ta atukum tiri Rom). Eme ma oro luhi iri lau solo-an solo-an ta bahun dah ame. \v 17 Eme iri atehei kolau ari saraman lawe-en ili la-un. Ano iri tabuwi bada malou bobodon i se buku none barak ma atehei ili batun. \v 18 Eme ma iri wendreya ta asore ma abelek iy ma sarakau anya ja, “Ou kabin tiri Juwis, ou areu le buku doh len mari!” \v 19 Eme iri ubwi iy na bala banap i batun ma omor iy, ma iri atehei bwili ndru-u iri i andri ma wendreya ta atudun iy. \v 20 Iri bobose iy ano, iri tolowei kolau saraman nane udu la-un iu, eme ma iri tani kolau tan amwenen ili hamon i badan. Eme iri sirini iy iu i len ta kadai iy ki bada kei tondreh. \s1 Iri tatahi Jises i bada kei tondreh \r (Metiu 27:32-44; Luk 23:26-43; Jon 19:17-27) \p \v 21 Eme iri adek ala badeh, iri ndruni ndramak ari nyaran Saimon badu Sairini. Iy badeh, edek udu kon munyak tinan eme, ya iy badeh, tama Aleksandra ma hawe Rupus. Eme iri andrekei iy bwese-ei kei tondreh ta Jises. \v 22 Eme iri andrei Jises ili kon ari aloh Golgata, moson ta aliy iri aloh, “Kon ta bwisi bar ta ndramak.” \v 23 Eme iri atehei waen hawe gwa ari nyakadan aloh mer tubuniy i hawen anya iy ka-un, arile iy banyuwiy bwe. \v 24 Eme ma iri atahi iy i bada kei tondreh, ano iri andrei kolau tan i andri ma iri amekes laki na aliy, ta are winiyan andrei lakou ta Jises. \p \v 25 Iri atahi Jises doh na mada an ndro ari na mandraben. \v 26 Eme iri atahi sahou tanan ta bobose i bada kei tondreh i buku doh, “Idah Kabin tiri Juwis.” \v 27-28 Ya udu hawen ale iri atahi uru lau la-uh ta bahana ado kabeden. Ari ereu minen salin, ya ari ereu minen kamweu. \v 29 Eme ya iri lau adek mirihik badeh, nyokoda batu iri ili eme ma bobose Jises i buku doh, “Ehe! Ou adeh mene anya ou kameh tohowei asiu tinan ta Kindrei eme andri, ano kameh ou tutuniy ja na bolo len taloh le. \v 30 Ya abo, ou sebenei ou amwenen, ma ou ame andri ta kei tondreh badeh!” \p \v 31 Ya eme ale iri tinan tiri pris bobose iy i tiri ari ari ma hawe iri lau ta leheya kandriyen tiri Juwis bobose iy i buku doh, “Iy sebenei iri rayah, arile iy winiyan basebenei iy amwenen bwe! \v 32 Taha kanyolom, Krais kabin ta Isra-el iy keme andri ta kei tondreh, ya eme ahi kanyolom ma budon tahi handru ki tan!” Ya uru lau ma la-uh sukik areu hawen ale badeh, asehek sahou ndra-in i tan ale. \s1 Nyala imek ta Jises \r (Metiu 27:45-56; Luk 23:44-49; Jon 19:28-30) \p \v 33 Ano ya an eme udu le alih badeh, lulik tubuluhi kon marakon udu gwek winiya mada an i taloh na beyeh. \v 34 Eme na mada an taloh na beyeh badeh, Jises arah boto-on labai anya, \q1 “Eloi, Eloi, lama sabaktani?” \m moson ta aliy i buku doh, \q1 “Kindrei tek, Kindrei tek, buku sah handru ya ou ruwani jo?” \rq Wari 22:1\rq* \p \v 35 Eme iri lau ra-on areu mirihik anuhun sahou tan ma anya, “Aha kanuhun, iy aloh Alaija.” \p \v 36 Eme iy ari sakaliye ili badeh, lomwani konyei idih na waen titi-in. Eme iy atehei ili no-o banap ma atehei ili bohon ta iy ka-un, eme ma iy anya, “To kareu op, to kanyolom, idah kameh Alaija barame baratalou iy barame andri ta kei tondreh deh bwe.” \p \v 37 Eme Jises anyar bohon i loken, eme ma kohan ano ma iy imek. \p \v 38 Kala doh amwenen kolau tinan badu bolo asiu tinan ta Kindrei atarah i ma lusi ereu loken eme andri. \v 39 Eme ndramak ari tinan ta bahun badeh, ales ere mwena ta kei tondreh badeh, anyolom Jises nane anyar ma imek i buku sah. Eme ma iy anya, “Handru labai, ndramak kede-eh Nadu Kindrei handru!” \p \v 40 Ma ale iri badih rayah ale areu len anyolom. Ya udu bolo iri \m badih nane doh badeh, Mariya badu Makdala ma hawe Salome ma hawe Mariya tine i loweu Jemis ma Joses. \v 41 Oro badeh, an hamon ta Jises udu ndra Galili o-on ma aseben iy, ma ale hawe iri badih solo-an ame hawen ame Jerusalem. \s1 Jises i lek \r (Metiu 27:57-61; Luk 23:50-55; Jon 19:38-42) \p \v 42 Eme kon a beyeh ai, len ta lowosa len ta amunyau ai. \v 43 Eme ya Josep badu Arimateya eme, ya iy badeh, tinan ari badu hawe iri kansol, ma iy badeh, abe-en ma anya katou tondrok ta Kindrei. Iy banoh bwe, eme iy ili hawe Pailat ta ndremenya bada kei. \v 44 Eme Pailat nunu-uh tasah iy anya, Jises ndramak handru nadeh. Eme iy luhi tinan ari ta bahun eme ya iy ndremenya iy, ta Jises ndramak luluwen ndra-au deh bwe. \v 45 Eme iy anuhun ndramak tinan ta bahun anya Jises badeh, ndramak handru. Ano Pailat tiye ta Josep badeh, kili kabwese-ei bada kei ai. \v 46 Eme ya Josep sihinei kolau ra-ei belen eme iy andrei Jises eme andri. Ano iy su-i iy na kolau nane dah, eme iy bwese-ei Jises ili bolo lek ndramak ari doh ihiy in bolo munu bek. Ano iy tundruwi bek tinan ari ili turuki madan. \v 47 Eme ya Mariya badu Makdala hawe Mariya tine Joses badeh anyolom ndrahune Jises nane nyahani iy in aliy ale. \c 16 \s1 Jises amak eme loken ja \r (Metiu 28:1-8; Luk 24:1-12; Jon 20:1-10) \p \v 1 Eme ya len ta amunyau ndrano ai, eme Mariya badu Makdala hawe Salome hawe Mariya tine Jemis badeh, sihinei suluw. Eme oro anya kala kanyas ki bada Jises. \v 2 Eme ma ndra wahun ta len ma bwena ta wik ari ja, ma ndraben handru oro au a mada lek, an barame loken ai. \v 3 Eme oro asehek nyala oro ari ari i buku doh, “Are lau kameh kaseben to katundruwi bek tinan udu mada lek ki-iu ki len?” \v 4 Oro asehek i buku doh, tasah bek badeh, laba tinan labai. Ano oro suri batu oro eme loken le badeh, oro anyolom bek ta mada lek badeh, ndratundruwiy ndra len. \p \v 5 Eme oro a bolon badeh, oro atou ndramak loweu ari asini awin belen nyikilikin labai manyah badeh, udu loboho lim salin. Eme ya oro toroyani oro. \p \v 6 Eme iy tiye i toro, “Ado satoroyani ado. Ado anya kasilah Jises badu Nasaret iri mene tatahi iy i bada kei tondreh. Iy badeh, ndramak ndrame awas ja! Ya ado kanyolom ndrahunen mene iri nyahani iy in aliy. \v 7 Arile ado kala katandra-un toro lau tan ma hawe Pita, ya iy ndra-au ndrala bwena ndrala Galili. Ya idah kameh ado winiyan anyolom iy ereu loboho doh, i buku iy mene ndrasehek tado bwena ndra-au.” \p \v 8 Eme ma oro ado bolo lek ame manan, ma sakaliye au a kon. Ma mani oro atur ma oro totoreh, eme ma oro basehek nyala ari lau bwe, tasah, oro anoh. \s1 [Iri lau ta tanan solo-an abudon anya Mak 16:9-20 bado bolo tarou ta Mak torowenei bwena mene bwe.] \s1 Jises asahan hawe Mariya badu Makdala \r (Metiu 28:9-10; Jon 20:11-18) \p [ \v 9 Eme ma ndra wahun ta len ma bwena ta wik ari ja badeh, Jises asahan ma mwena hawe Mariya badu Makdala ala iy mene tikahei oro malawin ndra-in ma ndro taloh ado bwele-en au en. \v 10 Eme Mariya ili tiye i toro mene an hawe Jises tikisi iy ma aden iy en. \v 11 Eme oro anuhun Mariya asehek nyala oro anya ja, “Jises ndramak, jo ndranyolom iy.” Arile oro badeh, batehei budon toro handru ba-en ta aliy bwe. \s1 Jises asahan hawe uru lau tan ma la-uh \r (Luk 24:13-35) \p \v 12 Ano hamon ta aliy ja, Jises asahan hawe uru lau tan la-uh ja i san randrah labai, idoh na len uru adek ala kon munyak tinan. \v 13 Eme uru au a hamon ma asehek nyala iri mari, arile bwai, iri batehei budon tiri handru ba-en ta sahou turu bwe. \s1 Jises asahan hawe oro lau tan, ma iy batanau oro \r (Metiu 28:16-20; Luk 24:36-49; Jon 20:19-23) \p \v 14 Ano hamon ja badeh, Jises asahan hawe oro lau tan ma ronoh ari le, ya oro badeh, manyah an andri aimon nyamon. Ya eme iy tiye sahou boto-on i toro, tasah, ta budon toro handru ba-en tan bwe, ma ndrine oro ndrabadok. Ma oro badeh, mene budon toro handru ba-en toro lau mene anyolom iy hamon ta iy amak eme loken ja bwe. \p \v 15 Eme ma iy tiye i toro i buku doh, “Ado kala bolo kon munyak mara-ei badeh, katiye sahou mwasin doh ki tiri lau mari. \v 16 Ya iy are budon tan handru in ta sahou mwasin ma kanyuwi iy, idah kameh Kindrei sebenei kohan. Arile, iy are lau batehei budon tan handru ba-en ta sahou mwasin bwe, idah kameh iy ales ere ta sahou udu mada Kindrei ma iy kameh akohok ndra-in labai, tasah ta lomondra ndra-in tan. \v 17 Idah kameh kalem asahan ta are lau budon tan handru in ta aliy. Na boto-on ta nyarak le, iri kameh atikah malawin ndra-in iu, ma idah kameh iri asehek boho kon rakon ja nane iri tana iri bwena bwe. \v 18 Ya, i buku none iri ateu mwak deh, bwe iri a-un gwa nyakadan, idah kameh iri winiyan bakohok sisi-in ma bamak bwe. Ma idah kameh iri adeu mine iri i bwele-e iri lau abo sik, ya idah kameh sik udu tiri iu.” \s1 Kindrei andrei Jises iu i loken \r (Luk 24:50-53; Aposel 1:9-11) \p \v 19 Ya eme Laban Jises asehek sahou i toro ano, ma Kindrei andrei iy iu i loken bolo kandrah, ma iy ili manyah udu loboho mine Kindrei salin. \v 20 Eme ma oro au a len, ma atiye sahou ili bolo kon mari, ma Laban aseben oro ma amekes kalem asahan ta edeu boto-on i ta sahou toro.]