\id MAT - Nyindrou NT with Gen, Ruth, Jon -Papua New Guinea 2001 (DBL 2014) \h Metiu \toc1 Tarou ta Metiu \toc2 Metiu \toc3 Met \mt2 Tarou ta \mt1 METIU \imt1 Sahou Tanan \ip Sahou Metiu atorou idoh buk ari udu bwena toro buk ma hahuw oro asehek kundruh ta nyala iri lakou mene asahan ta Jises kala iy udu kon munyak. Buk dah ma bwena iy asehek kundruh ta iri lakou asahan ta Mariya mene ato-ou Jises, ma iy asehek kundruh ili isos ta len iri adi Jises imek, ma iy amak udu lek tan eme loken ja, ma iy ruwani oro lau tan ma iy iu ili kandrah. \ip Lakou ari laba tinan Metiu leheya, i buku doh: Jises ndratehei ndrala le winiya iri tandrakan ta Kindrei bwena mene, eme ma iri torowenei ndrala bolo iri buk malen ta sahou randra le bwena. Kindrei mene tandrakan ta tiye ari ndramak keme ta akohok iri Isra-el kame hamon, ma buk dah iy anya kaleheya buku Jises, iy ndramak le doh. Udu loboho bolo buk ta Metiu iy leheya iri lakou buku Jises mene amekes, iri ndratehei ndra le winiya iri sahou iri propet ta Kindrei bwena mene ndrasehek. Ou anyolom udu ta 1:22-23, 2:4-6, 2:14-15, 2:23, 4:13-16, 8:16-17, 12:15-21, 13:34-35, 21:2-5, 21:16, 26:24, 26:31, 26:54, ma 27:6-10. \ip Lakou ari ja laba tinan buk ta Metiu asehek ta aliy badeh, tondrok ta kandrah o tondrok ta Kindrei. Na gok ta Jises Kindrei anya kasahan kabin handru ta lau mwan ma badih, ma iy aso-ok iri lau mwan ma badih marakon kameh winiyan a-en hamon handru ta so-ok tan. \ip Udu bolo ndrokowa sahou ta buk ta Metiu, iri sahou ma limeh lawe-en sese Jises mene asehek: \io1 (1) Ari ma bwena badeh, udu ta kalan limeh ili ano ndro taloh, ma idoh iri sahou mene Jises asehek udu bwele-e mandrei ari. Ta sahou doh Jises leheya taha ta kandriyen handru tiri mwan ma badih ta Kindrei. \io1 (2) La-uh ta aliy, sahou udu ta kalan ronoh. Ta sahou doh Jises mene edeu ili toro lau tan ta iri lakou iri kamekes ta len iri anya kala katiye nyara Jises kili tiri lau mwan ma badih rayah ja. \io1 (3) Taloh ta aliy, sahou udu ta kalan ronoh taloh. Idoh Jises asehek iri sahou sokek ta leheya iri mwan ma badih ta kandriyen ta tondrok ta Kindrei. \io1 (4) Hahuw ta aliy, sahou udu ta kalan ronoh ndru la-uh. Idoh Jises asehek sahou ili tiri ta kandriyen tiri lau mwan ma badih are buku iri lau tan handru. \io1 (5) Ya limeh ta aliy, sahou udu ta kalan lunoh hahuw, ma lunoh limeh. Jises asehek doh ta iri lakou kameh asahan ta bolo len munyak anya kano. \ip Buk dah amwenen basehek ta iy are lau handru iy atorou buk dah bwe. Arile buk dah akohok nyaran i buku, sahou Metiu atorou. Nyolom ta aliy i buku iri atehei budon boto-on ere ta Metiu le doh, iy ta akohok luk ta takis; ou anyolom udu kalan ndro ari sendrehendreh ndro ari ili ano ronoh taloh (9:9-13). \iot Iri Sahou Tinan \io1 Nyara tubu Jises oro ma len ta adeu iy (\ior 1:1–2:23\ior*) \io1 Sahou badu boho Jon ta alomwa (\ior 3:1-12\ior*) \io1 Jon inyu Jises ano ma balik none iy (\ior 3:13–4:11\ior*) \io1 Jises amekes gok ma bwena udu kon Galili (\ior 4:12–18:35\ior*) \io1 Jises ere Galili edek ili Jerusalem (\ior 19:1–20:34\ior*) \io1 Jises ili Jerusalem buku kabin (\ior 21:1–27:66\ior*) \io1 Jises imek ano iy ndramak ja (\ior 28:1-20\ior*) \c 1 \ms1 Jises eme asahan kon munyak \mr (Kalan 1:1–4:16) \s1 Nyara tubu Jises Krais iri \r (Luk 3:23-38) \p \v 1 Idah nyara tubu Jises Krais, nadu Debit, iy ale nadu Abraham. \v 2 Udu bada Abraham eme isos bada kabin Debit, kane tubun oro mari ndratorowenei: \li1 Abraham atehei Aisik, \li1 Aisik atehei Jekop, \li1 Jekop atehei Juda hawe nadu tinen oro mari. \li1 \v 3 Ano Juda atehei Peres uru Sera, tine uru badeh Tamar, \li1 Peres atehei Hesron, \li1 Hesron atehei Ram, \li1 \v 4 Ram atehei Aminadap, \li1 Aminadap atehei Nason, \li1 Nason atehei Salmon, \li1 \v 5 Salmon atehei Bowas, Bowas badeh tinen Rahap, \li1 Bowas atehei Obet, Obet badeh tinen Rut, \li1 Obet atehei Jesi, \li1 \v 6 Jesi atehei kabin Debit. \p Udu kabatana kabin Debit eme isos bada len iri tawi iri lau badu Isra-el au ala bolo kou ala Babilon, nyara tubu iri ale ndratorowenei: \li1 Debit atehei Solomon, ya tinen bwena badeh udu Uraya. \li1 \v 7 Solomon atehei Rehobowam, \li1 Rehobowam atehei Abijah, \li1 Abijah atehei Asa, \li1 \v 8 Asa atehei Jehosapat, \li1 Jehosapat atehei Jehoram, \li1 Jehoram atehei Usiya, \li1 \v 9 Usiya atehei Jotam, \li1 Jotam atehei Ahas, \li1 Ahas atehei Hesekaya, \li1 \v 10 Hesekaya atehei Manase, \li1 Manase atehei Amon, \li1 Amon atehei Josaya, \li1 \v 11 Josaya atehei Johowakin ma nadu tinen oro. Ma udu bada len doh badeh, iri tawi iri Isra-el a bolo kou ala Babilon. \p \v 12 Udu bada len tiri Isra-el ndrame len ta bolo kou udu Babilon, eme isos bada len ta Jises Krais asahan, nyara tubun oro mari badeh ndratorowenei: \li1 Johowakin atehei Seyaltiyel, \li1 Seyaltiyel atehei Serubabel, \li1 \v 13 Serubabel atehei Abiyut, \li1 Abiyut atehei Eliyakim, \li1 Eliyakim atehei Asor, \li1 \v 14 Asor atehei Sadok, \li1 Sadok atehei Akim, \li1 Akim atehei Eliyut, \li1 \v 15 Eliyut atehei Eliyesa, \li1 Eliyesa atehei Matan, \li1 Matan atehei Jekop, \li1 \v 16 Jekop atehei Josep, \li1 Josep udu Mariya, ya Mariya tuwi Jises, aloh iy Krais; Kindrei suni iy eme ta akohok iri lau tan ame hamon. \p \v 17 Ya idoh sare tubu Jises Krais udu ndra bada Abraham eme isos bada kabin Debit sare oro asahan ronoh hahuw (14). Ya ronoh hahuw (14) ja udu bada kabin Debit ili isos bada iri Isra-el ado bolo kou ado Babilon, ya ronoh hahuw (14) ja udu bada iri Isra-el ado bolo kou ado Babilon eme isos bada Jises Krais asahan. \s1 Asahan ta Jises Krais \r (Luk 2:1-7) \p \v 18 Idah sare Jises Krais eme asahan. Tinen Mariya san tan ta tasou ili ta Josep, arile bwena turu, uru bala tasou bwe le, Mariya badeh ndratanan iy kameh tuwi nah ari na boto-on ta Malawin Ndrabun. \v 19 Josep badeh iy ndramak ari ta amekes kandriyen mwasin, arile iy bwalen ta asehek Mariya eme lewan ta lau mari sanuhun; eme ma iy amekes budon ta iy kisan tasou turu ki-iu kamunum le. \v 20 Arile iy abudon kahis le badeh, angelo ari ta Kindrei asahan ta Josep udu bolo ameh ya asehek i buku doh, “Josep nadu Debit, ou sanoh ta akohok Mariya ewek udum. Tasah, na boto-on ta Malawin Ndrabun Mariya susune nah. \v 21 Iy kameh tuwi nah mwan, ya ou kameh tondrohani nyaran Jises, tasah iy kameh sebenei iri lau ta karei ma lomondra ndra-in.”\f + \fr 1:21 \ft Ta boho iri Hiburu, ta nyara Jises badeh, mirihik anya buku sahou ari doh, Laban badeh, ndramak ta akohok iri mwan ma badih ame hamon. Nyara Jises amwenen badeh, boho iri Grik. Boho iri Hiburu badeh, iri aloh buku, Josuwa.\f* \v 22 Lakou mari doh asahan ta amekes amwenen sahou ta Kindrei iy ndrasehek ndrala tiri propet asahan ili handru: \q1 \v 23 Badih ari bamadin hawe mwan bwe kameh susune nah ya iy kameh atehei nah mwan, ya idah kameh iri lau aloh iy Imanyuwel (moson i buku doh, “Kindrei udu hawe taha”). \rq Aisaya 7:14\rq* \p \v 24 Ya Josep amak eme loken, iy andrei Mariya i udun, i buku none sahou angelo ta Kindrei ndrasehek tan ta amekes. \v 25 Arile, iy bamadin hawe udun bwe winiya len ta Mariya atehei nadun mwan. Eme ya Josep tondrohani nyaran Jises. \c 2 \s1 Tekedek toro lau ta tanan badu loboho an eme loke \p \v 1 Hamon ta Jises ndrasahan udu Betlehem udu bolo kon tinan Judiya, udu bada len ta kabin Herot,\f + \fr 2:1 \ft Kabin Herot badeh, iy atondrok loboho Judiya ma hawe iri munyak rayah ja udu mirihik ta Judiya. Bolo iri len doh Herot asahan kabin, arile iy udu bahandra tondrok ta kabin badu Rom, iri aloh iy Sisa.\f* oro lau ta tanan badu loboho an eme loke\f + \fr 2:1 \ft Iri aloh oro lau ta tanan doh badeh, Magi. Iri Magi badeh, tanan labai ta iri ndrau ma hawe iri buk ndrabun; iri badeh, adek hawe iri kabin ma adeu tanan ili tiri. Budon tinan tiri Magi badeh, i buku doh: Buku ari ndrau anya bwele-e Isra-el, idoh kameh leheya buku kabin ari badeh, ndrasahan ai.\f* ame Jerusalem, \v 2 ma oro ndremenya, “Iy nah nane ndrasahan ma iy kameh asahan kabin tiri Juwis, iy ndraheh? Aso anyolom ndrau tan anya udu loboho mada an eme loken, eme ma aso ame dah ta atudun iy.” \p \v 3 Kabin Herot anuhun, eme ma manin atur labai, ma mani iri lau mari badu Jerusalem atur ale. \v 4 Eme iy aloh iri lau ado batu tinan tiri pris ma iri lau tanan ta leheya batanau malen mari ame le se ma iy lelen oro, “Mesaya\f + \fr 2:4 \ft Boho iri Grik iri aloh Krais. Boho iri Hiburu iri aloh Mesaya. Moso boho kon ma la-uh i le randra: Ndramak Kindrei atehei iy eme ta asahan kabin ma ta aseben iri lau tan marakon ame hamon.\f* kameh asahan heh?” \v 5 Eme oro lau nane dah tiye anya, “Udu Betlehem bolo kon tinan Judiya. Tasah propet, lau ta atiye sahou ta Kindrei ndratorowenei: \q1 \v 6 Arile ou Betlehem ado bolo munyak Judiya, ou basahan hamon toro kon ale nyara oro tinan udu bolo munyak Judiya bwe handru. Idah kameh ndramak ari badu hawe aha amwenen kameh asahan, ma iy kameh asahan ndramak ta atondrok iri lau tek Isra-el.” \rq Maika 5:2\rq* \p \v 7 Ano Herot aloh oro lau ta tanan nane amunum le ame, ma iy ndremenya oro ta len amwenen ta ndrau asahan. \v 8 Ano iy suni oro ala Betlehem, ma iy tiye i toro i buku doh, “Ado kala kasilah kamwenen ta iy nah badeh. I buku none ado ala silahei iy, sahou keme tek ja. Ya jo ale, anya kewek katudun iy.” \p \v 9 Oro anuhun sahou ta kabin Herot, ano ma oro au, ya ndrau mene anya udu loboho an eme loke, ili ja anya udu bwena toro ili udu bwele-e kon amwenen iy nah dah asahan udu aliy. \v 10 Na len oro atou ndrau anya, oro sekesek handru. \v 11 Oro ame asos asiu, oro atou nah dah udu hawe tinen Mariya, eme ya oro atehei bwili ndru-u oro i andri, ma atudun nadun. Ano oro aseh kohei kohoya luk toro, ma adeu gol hawe suluw ta amekes kasu-er ili manahun mwasin, ma hawe kei ta suluw aloh mer.\f + \fr 2:11 \ft Kei ta amekes suluw doh badeh, iri aloh mer. Idoh badeh, i buku marasin ta anyas ili bada ndramak anya kimek. (Ou winiyan anyolom udu ta tarou ta Mak kalan 15:23. Ma ale, buku ndramak ndramak ai, iri kameh anyas ndrelekei ta mer doh, ili bada iri lau nane ndramak. (Ou winiyan anyolom udu bolo tarou ta Jon kalan 19:39.\f* \v 12 Na ben oro amadin ma oro ameh Kindrei batanau oro sala hamon ja sala hawe kabin Herot, oro kala hamon kala kon toro kala san rasan ja. \s1 Oro atobwak au ala Ijip \p \v 13 Udu bada len oro anya ka-au le badeh, angelo ta Kindrei ari eme tiye ta Josep udu bolo ameh na ben. Iy tiye i buku doh, “Ou amak! Ou andrei iy nah hawe tinen, ma ado katobwak ka-au kala Ijip. Ado kado gwek winiya jo le baratiye ou, tasah Herot kameh asilah iy nah dah ta idi iy kimek.” \p \v 14 Josep amak eme loken iy andrei iy nah dah hawe tinen ma oro atobwak na le ben au ala Ijip. \v 15 Iy udu gwek winiya le kabin Herot imek, ma idah mesekei sahou asahan handru ma amwenen le i buku Laban ndrasihidiy i ta propet: \q1 “Jo aloh naduk eme len ta Ijip.” \rq Hoseya 11:1\rq* \p \v 16 Herot i tanan oro lau ta tanan badeh, ndrawendreyani iy. Eme ma iy ibolosen handru ma iy atehei sahou boto-on i tiri lau ta bahun tan ta kadai iri nah mwan mari badu Betlehem. Iri nah doh ala jaha tiri udu kalama jaha la-uh eme andri. Iy atehei sahou ta adai nah mwan mari kamak, amwenen ta len iy i tanan ma iy seleyani oro lau ta tanan. \v 17 Eme ma, sahou mene propet Jeremaya asehek badeh, asahan handru ma amwenen le: \q1 \v 18 “Bohon aloh udu kon Rama, \q1 ndrelen tinan ma hawe tikisiy tinan. \q1 Resel eden ndranye nadun oro, \q1 eme ma iy bwalen lau samekes ndrinen samwenen ja ai, \q1 tasah nadun oro ndrano ndra-au.” \rq Jeremaya 31:15\rq* \s1 Oro ame hamon ame Nasaret ja \p \v 19 Hamon ta Herot imek, angelo ari ta Kindrei asahan ta Josep udu bolo ameh udu Ijip, \v 20 ma iy tiye i buku doh: “Ou amak, ou andrei iy nah kede-eh hawe tinen, ado ka-u kala hamon kamanyah kado munyak Isra-el. Oro lau mene anya kanone kadai iy nah dah kimek, oro ndramak.” \v 21 Eme ya Josep amak iy andrei iy nah dah ma hawe tinen oro au ala hamon ala munyak Isra-el. \p \v 22 Arile Josep anuhun Akela-us ja badeh, atondrok Judiya, ma iy akohok ndrahune taman Herot. Eme ma bwidi iy inoh ta ili loboho doh. Arile, udu bolo ameh ta Josep, Kindrei batanau iy ta oro ka-au kala loboho Galili. \v 23 Eme ma iy ili manyah udu kon ari aloh Nasaret. Ya sahou dah asahan ma amwenen le i buku le iri propet ndrasihidiy: “Idah kameh iri aloh iy lau badu Nasaret.” \c 3 \s1 Jon ta alomwa lowosa san \r (Mak 1:2-8; Luk 3:1-18; Jon 1:19-28) \p \v 1 Udu bolo oro len doh Jon ta alomwa eme bwena atiye sahou ma asehek sahou udu bolo kon lomale an ta Judiya. \v 2 Ma iy asehek i buku doh, “Aha katobolowe ndrine aha, tasah tondrok ta Kindrei ndrame \m mirihik.”\f + \fr 3:2 \ft Sahou ta nyala tondrok ta Kindrei, doh badeh, sahou ta Kindrei amwenen, iy kabin handru tiri lau mwan ma badih mari ma tiri lakou mara-ei.\f* \v 3 Idah iy le propet Aisaya asehek ta nyala aliy, \q1 “Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.’” \rq Aisaya 40:3\rq* \p \v 4 Jon isin awin iri amekes na lami kamel, ma iy edeu ku-i bulumakau udu bada ndrukulun i buku malou ta aseu awin tan. Iy badeh, kaniyan sabaye ma hawe bwirik badu lokei.\f + \fr 3:4 \ft Kandriyen ta Jon doh badeh, leheya iy ibo gok buku propet Alaija bwena mene. Ou anyolom kili ta 2 Kabin kalan 1:8; Malakai kalan 4:5; Metiu kalan 11:14; ma hawe kalan 17:10-13 .\f* \v 5 Iri lau badu Jerusalem, badu Judiya ma iri lau badu kon mari badu loboho Jodan ame hawen. \v 6 Eme ma iri asehek budon ma lomondra ndra-in ta karei tiri i ta Kindrei, ma iy alomwa iri ta sikine kandriyen ndra-in tiri iu udu gwa Jodan. \p \v 7 Arile iy atou ja iri Parasi ma hawe oro Sadusi\f + \fr 3:7 \ft Iri Parasi badeh, iri lau ta atondrok kandriyen tiri Juwis. Iri Sadusi badeh, badu hawe iri pris, ma gok tiri badeh, tinan labai ta atondrok iri lau, arile iri batehei budon tiri handru ba-en ta sahou ta Kindrei bwe.\f* ame le hawen, ta iy kalomwa iri, eme ma iy tiye i toro Parasi ma Sadusi i buku doh: “Ado nadu mwak ndra-in. Are lau tiye ado ta atobwak au a len ta losen ta Kindrei kameh eme? \v 8 Ado kadeu nah ma ado kabatanau oro ta oro katubuni ndrine oro ta kandriyen ndra-in toro ki san ta tikisiy. \v 9 Ya ado sabudon ado ma satiye ado sala buku doh: ‘Aso badeh tama aso Abraham, eme ya aso anya, aso mwasin le ai.’ Arile bwe. Jo katiye tado kamwenen: Kindrei winiyan mesekei bek dah asahan i nadu Abraham. \v 10 Samen kamondrou ta Kindrei badeh, ndrala ndrado mwe-e kei, ya iri kei ala bato-ou sali iri bala mwasin bwe, idah kameh amundroh iri ala andri, ano ma akeh iri au ala bolo jih. \v 11 Jo alomwa ado na gwa ta leheya ado badeh, ndratubuni ndrine ado ma ado tikisi kandriyen ndra-in tado. Arile ndramak ari in hamon tek eme kameh, boto-on tan badeh, sakalawi boto-on tek ja. Jo badeh, mwasin handru bwe, ta bwese ku-i katin bwe. Iy kameh inyu ado na boto-on ta Malawin Ndrabun ma aleben ado buku jih. \v 12 Iy andrei lakou tan udu minen ta asorok bada kalom eme len lewa salin ma iy kameh atukum sali kalom tan ili asiu ta asumwe nyamon, ma idah kameh iy asun iri bada kalom ili bolo jih ta winiyan bamak bwe.” \s1 Jon inyu Jises \r (Mak 1:9-11; Luk 3:21-22) \p \v 13 Jises udu Galili eme amwenen ili gwa Jodan ta Jon kinyu iy. \v 14 Arile Jon bwalen, eme iy tiye i buku doh, “Ou nane anyu jo ah, anya jo kinyu ou ja?” \p \v 15 Eme ya Jises tiye i buku doh, “Ou anyu jo ma idah kameh talu mesekei iri lakou Kindrei anya talu kamekes.” Eme ma Jon aseken. \p \v 16 Jon ta alomwa anyuwi Jises le badeh, ma Jises eme loken ta gwa Jodan ma nawin bwe kandrah asak, ma iy atou Malawin Mwasin ta Kindrei atah i buku ban eme andri amwenen le bwele-en ma manyah udu bwele-en. \v 17 Eme ya aloh ari udu kandrah tiye i buku doh, “Badeh naduk handru, jo aseken iy labai, iy le mesekei jo sekesek handru tan.” \c 4 \s1 None asahan ta Jises \r (Mak 1:12-13; Luk 4:1-13) \p \v 1 Ano Malawin Ndrabun andrei Jises iu ili kon lomale an ta balik kanone iy. \v 2 Hamon ta Jises abeles iy ta nyamon udu bolo hanoh (40) len hanoh (40) ben eme ma iy imeson. \v 3 Ya balik eme asahan hawen, ma iy tiye i buku doh, “I buku none ou anya ou Nadu Kindrei, ou asehek sahou kili toro bek dah kasahan jabi ramen.” \p \v 4 Eme ya Jises tiye i buku doh, \q1 “Ndratorowenei, ‘Lau winiyan balelei le jabi ramen ta samak bwe, arile na sahou mari eme len asahan boho Kindrei.’” \rq Dutoronomi 8:3\rq* \p \v 5 Ano balik andrei iy, uru au ala Jerusalem kon ndrabun, eme ma balik atehei iy ales udu bwele-e no-o asiu tinan ta Kindrei loken on. \v 6 Ano balik tiye i tan i buku doh, “Ou anya ou Nadu Kindrei handru eh, ou akahei ou ado dah ala andri. Tasah i buku ndratorowenei, \q1 ‘Kindrei kameh edeu sahou batanau ili tiri angelo tan ame ta aseben ou. Ma idah kameh, iri bwese-ei ou, ma bek winiyan batahi katim bwe.’” \rq Wari 91:11-12\rq* \p \v 7 Jises tiye i buku doh i tan, “Ndratorowenei ale, \q1 ‘Ou satehei Laban Kindrei tam sala ta bolo none.’” \rq Dutoronomi 6:16\rq* \p \v 8 Ano ja balik andrei iy uru au ala bwele-e mandrei ari lawe-en, eme ma balik leheya iy ta boto-on ma lomadan tiri kon tinan mari badu munyak, iri kabin atondrok. \v 9 Eme ma balik tiye i ta Jises i buku doh, “Jo winiyan atehei lakou mari dah ewek tam, i buku ou atehei bwili ndru-um i andri keme tek, ma atudun nyarak.” \p \v 10 Jises tiye i tan i buku doh, “Ou a len, Satan, tasah ndratorowenei ale, \q1 ‘Ou atudun le nyara Laban Kindrei tam, ma ou a-en hamon tan le ari kabwe.’” \rq Dutoronomi 6:13\rq* \p \v 11 Ano ya balik ruwani iy udu, ma iy iu, eme iri angelo ta Kindrei ame bwese-ei Jises ma aseben iy. \s1 Jises leheya ma asehek sahou tan ma bwena \r (Mak 1:14-15; Luk 4:14-15) \p \v 12 Na len Jises anuhun iri ndratehei Jon ta alomwa ndrala bolo kou, iy iu ili Galili ja. \v 13 Ano iy ruwani Nasaret ma iy iu ili manyah udu Kapena-um. Ya kon doh udu mirihik ta gwa li ari udu bolo munyak ta Sebulun ma udu bolo munyak ta Naptali. \v 14 Iri lakou doh asahan ta amekes sahou dah abadok ma i handru i le buku propet Aisaya ndrasihidiy: \q1 \v 15 “Munyak ta Sebulun ma munyak ta Naptali, \q1 san amwenen ili ndras amwenen le ta Jodan. \q1 Ya Galili badeh, munyak tiri lau badu leheleh,\f + \fr 4:15 \ft Iri lau badu leheleh doh badeh, ndraye iri Juwis bwe. Iri tana iri Laban bwe. Boho iri jam aloh haiden o genta-el \f* \q1 \v 16 ya iri lau badeh ado bolo lulik \q1 arile iri ndratou lomadan tinan ndrasahan; \q1 udu bwele-e oro lau ale ado bolo munyak udu koroha imek \q1 eme ya lomadan ndrasahan tiri.” \rq Aisaya 9:1-2\rq* \ms1 Jises atiye sahou mwasin ta bolo tondrok ta Kindrei, ma iy amekes iri mwan ma badih sik udu tiri badeh, amwenen \mr (Kalan 4:17–9:34) \p \v 17 Udu bada len doh Jises asehek sahou ma bwena handru, eme ma iy tiye i buku doh: “Ado katobolowe ndrine ado, ma ado katikisiy handru ta kandriyen ndra-in tado, tasah tondrok ta Kindrei ndrame mirihik.” \s1 Aloh ta oro lau tan ma bwena \r (Mak 1:16-20; Luk 5:1-11) \p \v 18 Jises edek kabede gwa li Galili ma iy atou Saimon, iri aloh iy ale Pita, uru nadu tinen Enduru. Uru akeh kubwin ili bolo gwa li ta akohok ni, tasah uru lau ta bwisir ta ni. \v 19 Eme Jises tiye i \m turu i buku doh, “Ah kame ka-en hamon tek. Ya idah kameh jo leheya ah san ta akohok lau.” \v 20 Eme ya nawin bwe uru ruwani kubwin turu, ma uru au a-en hamon tan. \p \v 21 Iy edek ili bwena ja, ma iy atou Jemis nadu Sebedi hawe nadu tinen Jon. Uru ado bolo ndron hawe tama uru Sebedi, lowosa kubwin toro. Jises eme aloh uru, \v 22 eme ya, nawin bwe uru ruwani ndron ma hawe tama uru udu gwek, ma uru au a-en hamon ta Jises. \s1 Jises amekes iri lau sik udu tiri amwenen \r (Luk 6:17-19) \p \v 23 Jises edek ili loboho Galili mara-ei, leheya ma asehek sahou mwasin ta tondrok ta Kindrei udu bolo asiu ta atukum tiri Juwis, ma iy bwidi iri sik ndra-in mari udu bada iri lau iu. \v 24 Nyaran ma sihide lahou iy amekes aseker i bolo Siriya mara-ei,\f + \fr 4:24 \ft Na len Rom atondrok kon, munyak tiri Isra-el hawe iri kon solo-an ja iri aloh, Siriya.\f* eme ya iri lau atiye iri lau sik udu tiri, ma iri lau sik tiri bwidi iri sisi-in labai, ya hawe iri lau balik lolowa iri ma bwidi iri lolo-ou, ma hawe iri lau kati iri ma mine iri winiyan ta bales bwe. Iri tiyani iri lau mari doh ame hawen, eme ma iy bwidi iri lau mari doh amwenen ja. \v 25 Eme ma iri lau solo-an badu Galili, ma iri lau badu Dekapolis,\f + \fr 4:25 \ft Dekapolis, moson badeh, kon tinan ma ronoh.\f* ma iri lau badu Jerusalem, ma iri lau badu Judiya, ma hawe iri lau badu kon udu loboho Jodan bilisiu ya iri lau mari doh adek a-en hamon tan. \c 5 \s1 Sekesek tinan handru \r (Luk 6:20-23) \p \v 1 Na len iy atou iri lau mari doh iy ili loken bwele-e mandrei, ma iy manyah udu aliy. Eme ya oro lau badu hamon tan ame hawen. \v 2 Eme ma iy leheya oro, ma iy asehek sahou i toro i buku doh,\f + \fr 5:2 \ft Tarou ta Metiu kalan 5-7 taha ndranyolom sahou solo-an labai Jises asehek ta leheya iri mwan ma badih ta nyala iri kandriyen ta tondrok ta Kindrei. Ma hamon, ta tarou ta Metiu kalan 8-9 badeh, taha anyolom iri kundruh ta Jises, iy amekes iri mwan ma badih, sik udu tiri amwenen ja. Udu bolo tarou ta Metiu badeh, Jises asehek sahou ma limeh doh lawe-en labai. Sahou lawe-en doh badeh, udu bolo kalan 5-7, idoh ma mwena handru toro sahou lawe-en ma limeh nane. Jises asehek oro sahou doh badeh, udu bwele-e mandrei ari. \f* \q1 \v 3 “Sekesek handru i toro lau ala ado ndra-in ta budon ma hawe manyah toro, \q2 idah kameh Kindrei atondrok oro \q3 ma oro kameh akohok iri lakou mwasin tan. \q1 \v 4 “Sekesek handru i toro lau ala ado ndra-in ta tikisiy ma ndrelen, \q2 idah kameh Kindrei bahabah oro \q3 ma oro ado ta sekesek handru. \q1 \v 5 “Sekesek handru i toro lau ala batudun oro ma nyara oro le bwe. \q2 Oro kameh akohok iri lakou mwasin badu munyak \q3 i buku le Kindrei ndratandrakan. \q1 \v 6 “Sekesek handru i toro lau ala abadok ta asilah budon mwasin \q2 ma hawe manyah mwasin ta Kindrei i buku oro ameson ta nyamon \q2 ma i buku bale oro amar ta gwa ta a-un, \q2 ya idah kameh oro adih handru. \q1 \v 7 “Sekesek handru i toro lau ala abadok ta amekes kandriyen ta tikisi lau, \q2 ya idah kameh tikisiy ta Kindrei tinan ili bwele-e oro. \q1 \v 8 “Sekesek handru i toro lau ala budon ma kandriyen toro udu mwasin, \q2 ya idah kameh oro atou Kindrei. \q1 \v 9 “Sekesek handru i toro lau ala abadok ta amekes kandriyen mwasin ta mondrei, \q2 ya idah kameh iri aloh oro nadu Kindrei. \q1 \v 10 “Sekesek handru i toro lau ala iri lau adai oro \q2 ma iri tawi oro ma andrei oro ala bolo kou, tasah oro badeh amekes kandriyen mwasin, \q2 ya idah kameh Kindrei kameh atondrok oro \q3 ma oro kameh akohok iri lakou mwasin tan. \p \v 11 “Sekesek handru ewek tado tasah, iri lau asehek sahou ta bobose ado ma iri adai ado ma iri asehek sahou ndra-in handru ta wasai ewek tado, tasah ado a-en hamon tek. \v 12 Ya, ado kasekesek, tasah ndramas mwasin udu kandrah kodo-oh abe-en ado. Idoh i le buku san iri lau ndradai iri propet mene ndrame bwena tado.” \s1 Ndras hawe lomadan \r (Mak 9:50; Luk 14:34-35) \p \v 13 Jises asehek ili le i buku doh, “Ado kaseben iri lau i buku ndras aseben nyamon ta munyak dah. Arile, i buku nyiminye ndras aliy bwe, ki buku sah handru kameh nyiminye ndras doh kasahan ja? Ndras doh bala mwasin ta i bolo ari nyamon bwai. Mwasin handru ta kakahei \m ndras doh ki-iu ma lau katisih na kati iri. \p \v 14 “Ado kasahan buku lomadan ta lomada iri lau ado bwele-e munyak. Ya, i buku kon tinan ari udu bwele-e mandrei, iy winiyan baton bwe. Iri lau ado len winiyan atou lomadan. \v 15 Eme ya iri lau telemei sun, iri batehei bado bahandra bwekei bwe. Iri atehei udu ndrahunen loken, tasah lomadan kameh lomatani lau mari ado bolo asiu. \v 16 I le buku san dah lomada ado kanya kili bwena ta lau. Ya idah kameh iri lau atou lahou tado ma kandriyen mwasin tado, eme ya iri lau kameh sekesek ma atudun tama ado Kindrei udu kandrah.” \s1 Leheya ta batanau malen \p \v 17 Jises asehek ili le i buku doh, “Ya ado sabudon sala buku doh, anya jo eme dah ta akeh batanau malen,\f + \fr 5:17 \ft Batanau malen - Jises asehek ta nyala batanau malen ta Moses iy atorou udu bolo buk ndrabun.\f* ma iri propet au, bwe; jo eme dah ta atikah oro au bwe, jo eme dah ta amekes batanau malen abadok ma amekes sahou tiri propet ta Kindrei kabadok ma i handru. \p \v 18 “Jo tiye tado handru i buku doh: Idah kameh munyak ma kandrah kameh amai iu. Arile sese kono-o tarou ta batanau malen winiyan bamai ba-au bwe, winiya le lakou mari Kindrei anya kamekes, kasahan i handru. \p \v 19 “Ya are lau winiyan banuhun randra sahou nadu bwisik ta batanau malen bwe, ma iy leheya lau ta iri ka-en hamon ta kandriyen tan doh, iy winiyan basahan bala tinan bado ta tondrok ta Kindrei, bwe. Arile, are lau none ma leheya lau ta iri kanuhun ma kamekes batanau malen, iy kameh, aloh nyaran i tinan handru udu bolo tondrok ta Kindrei. \p \v 20 “Ya jo katiye tado, ado winiyan ala bolo tondrok ta Kindrei, arile i buku none budon tado handru, ma kandriyen mwasin tado winiyan basakalawi budon ma kandriyen mwasin tiri Parasi ma hawe iri lau ta leheya kandriyen ta Moses bwe, ado winiyan bala bolo tondrok ta Kindrei bwe.” \s1 Adai lau amak \r (Luk 12:57-59) \p \v 21 Jises asehek ili le i buku doh, “Ado ndranuhun sahou ndrabatanau ndrala tiri lau rebesem bwena, \q1 ‘Ou sadai ndramak samak.’ \rq Eksodus 20:13\rq* \m I buku none are lau idi ari ndramak imek, iy lau doh kameh ales ili ta mada sahou tinan handru. \v 22 Arile jo katiye handru, i buku none are lau andra-i i hawe nadu tinen, iy kameh ales ili ta mada sahou tinan, ya are lau tiye ili ta nadu tinen i buku doh: ‘Ou badeh, mwasin ta laleyah le,’ ya idah kameh ou ala ales a ta mada sahou tinan ta kansol tiri Isra-el. Ya are lau tiye ili ta nadu tinen i buku doh, ‘Ou lolo-ou,’ ya idah kameh mirihik ou ales ala bolo jih. \p \v 23 “Eme ma, i buku none ou anya ala atiye salom tam kili ndrahune salom, ou abudon bwena op, buku nadu tinem badeh iy tan sahou udu tam, \v 24 ya, ou ruwani salom tam kudu andri bwena ta mada koto-ok op. Ou ala hawe nadu tinem, ou asehek sahou mwasin kili ta nadu tinem, ta leheya ndrine sen tam hawe nadu tinem ndrano ai. Ano ya ou ame barala baradeu salom tam barala bwele-e mada koto-ok ta salom. \v 25 Buku ari ndramak tan losen udu tam ya iy atehei ou ala ta mada sahou, ou asehek sahou mwasin kili tan suwi na len ah ma la-uh adek san kahis le, bwe kameh iy atehei ou ala mine ndramak ta anuhun sahou, eme ya ndramak ta anuhun sahou atehei ou ala mine iri lulik, ya iri lulik atehei ou ala bolo asiu lulik. \v 26 Jo katiye tam handru, ou winiyan bame len bwe, winiya le ou sihinei labai na luk in hamon ta maha-an tam.” \s1 Madam salikis \p \v 27 Jises asehek ili le i buku doh, “Ya ado ndranuhun sahou mene iri ndrasehek, \q1 ‘Ou samekes karei hawe badih tasou.’ \rq Eksodus 20:14\rq* \m \v 28 Arile, jo katiye kewek tam, ki buku none ari ndramak kanyolom boto-on kili bada ari badih ta amekes budon ndra-in ta karei kili tan, iy ndramak doh ndramesekei karei hawe iy badih doh ndrado ndrinen kabwe. \v 29 Ya i buku none madam salin suni ou ala bolo kandriyen ndra-in ta karei, ou holowani madam salin keme len, ya ou akahei ki-iu. Mwasin ta ou holowani madam salin ki-iu, ndra-in ta sakahei ou ma buruwen sala bolo jih ta udu le buku doh. \v 30 Ya, i buku none minem salin suni ou ta amekes kandriyen ndra-in ta karei, mwasin ta ou saniy ki-iu ya ou akahei ki-iu. Mwasin ta ou sani minem salin ki-iu, ndra-in ta sakahei ou ma buruwen sala bolo jih ta udu le buku doh.” \s1 Asan tasou \r (Metiu 19:9; Mak 10:11-12; Luk 16:18) \p \v 31 Jises asehek ili le i buku doh, “Sahou ndrasehek kabwe, \q1 ‘Ya, i buku none ari lau kisan tasou tan ma katikah udun ki-iu, iy katehei ramen la-ukei ma sahou boto-on in aliy ta asan tasou, ya iy katehei ki minen ta asan tasou.’ \rq Dutoronomi 24:1\rq* \m \v 32 Arile jo katiye ki buku doh, i buku none are lau kisan tasou tan ma katikah udun ki-iu, ya iy badih tan badeh, bamadin hawe ari ndramak ja bwe, iy badeh, amekes udun i buku badih ta madasan. Iy mwan ale andrei badih ari bwena, udun ndratikahei iy, iy ale amekes kandriyen ta karei.” \s1 Sahou tandrakan \p \v 33 Jises asehek ili le i buku doh, “Ya idah ado ndranuhun sahou ale ndrasehek ndrala ta lau rebesem bwena ndra-au, ‘Buku ou tandrakan i ta nyara Laban ta amekes sahou tam i handru, ou a-en hamon le ta sahou nane ou amekes ili ta Laban le ari.’ \v 34 Arile jo katiye tam, ou satandrakan ta amekes iri sahou tam i handru, ndri-iy; ya ou satandrakan kandrah, tasah kandrah badeh kon ndrahu koyeu ta Kindrei manyah udu aliy. \v 35 Ya ou satandrakan sala ta munyak ale, tasah munyak badeh ta ndrahu kati Kindrei udu aliy. Ya ou satandrakan sala ta Jerusalem, tasah Jerusalem badeh kon ta kabin tinan. \v 36 Ya ou satandrakan sala ta batum, ndri-iy, tasah ou winiyan bamesekei ramen lami batum asahan belen deh asahan bokodon bwe. \v 37 Ya buku ou asehek sahou, ‘Ehe,’ ‘Ehe’ le kai-iy ai. I buku ou asehek sahou, ‘Bwe,’ ‘Bwe’ le kai-iy ai. Ya, i buku none iri sahou boto-on labai asahan ja, badeh, asahan ta balik.” \s1 Ou sadeu saluwe kandriyen ndra-in \r (Luk 6:29-30) \p \v 38 Jises asehek ili le i buku doh, “Ya ado ndranuhun sahou dah ndrasehek i buku doh, \q1 ‘I buku none are lau sudi madam eme len, ya ou ala sudi madan keme len ale. Ya i buku none are lau tubwani lihim, ya ou ala tubwani lihin ale.’ \rq Eksodus 21:24; Lebitikus 24:20; Dutoronomi 19:21\rq* \m \v 39 Arile jo katiye tam, ou sadeu saluwe kandriyen ndra-in ta ndramak are edeu kandriyen ndra-in ewek tam, ndri-iy. Ya i buku none are lau ubwi lim ili kapam salin, mwasin, ou tubuni kapam kamweu kili ja, ya iy kubwi lim ki aliy ale. \v 40 Ya are lau anya katehei ou ala ta mada sahou ta iy anya kakohok awin tam kili tan, mwasin, ou atehei awin tam lawe-en kili ale. \v 41 Ya, ki buku none ari lau ta bahun kandrek ou, ma iy anya ou bwese lakou tan a hawen ta ah kadek san winiya kilomita ari, mwasin, ou ala, ah kadek san winiya kilomita la-uh ja. \v 42 Ya ki buku none ari lau kandremenya ou ta ari lakou tam kili tan, mwasin, ou atehei kili tan. Ya are lau aseken ta akohok lakou tam bwena, ano iy anya katehei kewek hamon ja, mwasin, ou atehei lakou kili tan, ya ou satehei konam sala tan.” \s1 Ou aseken iri lau nane amekes ndra-in ewek tam ale \r (Luk 6:27-28; 6:32-36) \p \v 43 Jises asehek ili le i buku doh, “Ado ndranuhun sahou dah ndrasehek i buku doh, \q1 ‘Ou aseken iri lau badu mirihik tam le amwenen. Ya ou bwalem iri lau amekes ndra-in ewek tam.’ \rq Lebitikus 19:18\rq* \m \v 44 Arile jo katiye tam, ou aseken iri lau amekes budon ndra-in ewek tam. Ma ou amekes salom ki ta Kindrei ta iy kaseben iri lau amekes ndra-in ewek tam ta adai ou. \v 45 Ya idah kameh ou asahan nadu Kindrei handru badu loken. Iy edeu an tan anya i bwele-e lau ndra-in ma i bwele-e lau mwasin ale. Ma iy edeu ur tan i bwele-e lau ta kandriyen ma lomondra mwasin, ma i bwele-e lau ta kandriyen ma lomondra ndra-in ale. \v 46 Ya, i buku ou aseken iri lau le nane aso-ok ou, ya bundruwe lakou tam doh, eme hamon kameh i buku sah bah? Ya iri lau ta kolowa luk ta takis amekes i le buku aliy. \v 47 Eme ya, i buku none ou asehek sahou mwasin i le ta nadu tinem le amwenen, ya ou asahan mwasin ja tiri lau rayah ja na sasah bah? Ya iri lau badu leheleh amekes ale i le buku aliy. \v 48 Ou ado le mwasin handru i le buku tamam udu kandrah udu le mwasin handru.” \c 6 \s1 San ta aseben iri lau ndra-in \p \v 1 Jises asehek ili le i buku doh, “Ado kabudon kamwenen ta ado saleheya kandriyen mwasin tado sala mada lau ta lau kamasiye ado, ndri-iy. Ya, i buku none ado leheya kandriyen mwasin tado i mada lau ta iri kamasiye ado, ado winiyan bakohok sihine ado udu mine tama ado udu kandrah bwe. \p \v 2 “Ya, i buku ado kadeu lakou ili tiri lau ndra-in, ado soloh ndrah ta lau katanan ado, ndri-iy, sala buku iri lau ta wasai amekes udu bolo asiu ta atukum, ma udu bolo iri kon tinan ale, ta iri lau kamasiye ma katudun oro. Jo katiye handru, oro ndrakohok sihine oro ndrano kabwe. \v 3 Arile ado anya kadeu lakou kili tiri lau ndra-in, ado kamekes kudu ndra kabwak, ta iri mwan ma badih sado mirihik, sanyolom aha amekes. \v 4 Eme ma, saba lakou ado adeu i tiri lau ndra-in, ado katone kamai labai. Ya tama ado udu kandrah ndratou ado adeu lakou i san kabwak, ma idah kameh iy edeu sihine ado.” \s1 San ta salom \r (Luk 11:2-4) \p \v 5 Jises asehek ili le i buku doh, “Na len ado anya kasolom, ado sasolom sala buku iri lau ta wasai, tasah iri lau ta wasai anya kasolom kameh, iri aseken ta ales ado loken ado bolo asiu ta salom, ma iri aseken ta amekes salom ado bolo bosoh tiri kon tinan ta lau katou iri. Ya jo katiye tado handru, oro ndrandrei sihine oro mara-ei ndrano kabwe. \v 6 Arile, ado anya kasolom, ado kala bolo asiu tado, ya ado kasulu-i kou kili, ma ado kasolom kili ta tama ado, iri lau winiyan batou iy bwe. Ano ya, tama ado udu kandrah ndratou ado amekes lakou i san kabwak, ma idah kameh iy edeu sihine ado. \v 7 Ya ado anya kasolom, ado samekes sahou solo-an, sala buku none iri lau badu leheleh asolom. Iri anya Kindrei kameh anuhun salom tiri tasah iri badeh asehek sahou solo-an. \v 8 Ado sala buku none oro, tasah tama ado ndratanan saba lakou ado aseken ano ado ndremenya iy ta aliy. \v 9 Ya idah san ta salom ado ka-en hamon ta aliy: \q1 Tama aso, ou ado kandrah. \q1 Nyaram badeh, ki ndrabun. \q1 \v 10 Ma ou ame atondrok kon mari. \q1 Ahi kamesekei lahou na so-ok tam udu munyak, \q2 i le buku ndramesekei udu kandrah. \q1 \v 11 Ou anyohan aso na nyamon, winiyan ta len dah. \q1 \v 12 Ou mani kandriyen ndra-in taso, \q2 i le buku aso mani iri kandriyen ndra-in iri amekes eme taso. \q1 \v 13 Ma ou satehei aso sala bolo iri none. \q1 Arile, ou sebenei aso ta sala bolo kandriyen ndra-in ta balik.\f + \fr 6:13 \ft Iri lau ta tanan rayah abudon sahou ari ja udu bolo tarou dah i buku doh, Tasah, iri tondrok, ma boto-on mara-ei, ma nyaran tinan badeh, tam le, udu le buku doh. Handru.\f* \m \v 14 Aha kasolom ki buku doh. Tasah, buku aha mani kandriyen ndra-in tiri mwan ma badih rayah, tama aha udu kandrah kameh winiyan mani kandriyen ndra-in taha ale. \v 15 Arile, buku aha bamani kandriyen ndra-in nane iri mwan ma badih rayah amekes ewek taha, bwe, tama aha ale kameh winiyan bamani iri kandriyen ndra-in nane aha amekes, bwe.” \s1 Abeles ta nyamon \p \v 16 Jises asehek ili le i buku doh, “Ki buku none ado anya kabeles ado ta nyamon, ado samekes teheya mada ado sandra-i sala buku iri lau ta wasai amekes. Ya iri lau ta wasai leheya mada iri ma teheya iri ta lau katou iri, kabeles iri ta nyamon. Jo katiye tado handru, oro ndrandrei sihine oro mara-ei ndrano kabwe. \v 17 Arile, ki buku none ado anya kabeles ado ta nyamon, ado kadeu ndrelekei kili batu ado, ma ado kasikine mada ado. \v 18 Ya idah kameh iri lau winiyan baseleyani ado adeu ndrabun ili ta nyamon bwe, arile ili ta tama ado ala ado winiyan batou badan bwe, ya tama ado, iy ndratou saba lakou ado ndramesekei amunum le, ma iy kameh edeu sihine ado.” \s1 Lakou mwasin handru udu kandrah kon ta Kindrei \r (Luk 12:33-34) \p \v 19 Jises asehek ili le i buku doh, “Ado satukum tado iri lakou badu munyak, ndri-iy, tasah idah kameh iri amu-uk ma ndranyem kameh iniy ano iu, ma iri lau ta bahana kameh apwai asiu ma bene-ei iu. \v 20 Arile ado katukum tado lakou mwasin handru badu kandrah, ya amu-uk hawe ndranyem winiyan baniy bano bwe, ma iri lau ta bahana winiyan bapwai asiu ma winiyan babene-ei bwe. \v 21 Tasah, i buku none ou tam lakou solo-an udu bolo munyak dah, kameh mesekei ou abudon solo-an ta aliy.” \s1 Sun ta lomada lau \r (Luk 11:34-36) \p \v 22 Jises asehek ili le i buku doh, “Mada ado badeh, i buku lomada sun ta atelem bolo oda ado. Ya, i buku none mada ado udu mwasin, ya idah kameh bolo ado mara-ei idih na lomadan. \v 23 Arile, i buku none mada ado ndra-in, ya idah kameh bolo ado mara-ei idih na lulik. Ya, i buku none lomadan udu bolo ado i lulik, ya idah kameh lulik i tinan labai.” \s1 Kindrei hawe luk \r (Luk 16:13) \p \v 24 Jises asehek ili le i buku doh, “Ari ndramak winiyan bateu lahou ta lau tinan la-uh bala le rasan bwe. Ya idah kameh iy i bwalen iy ari, ya iy aseken iy ari; deh bwe, kameh, iy anuhun sahou ta iy ari labai ja, ta iy ari. Ado winiyan balelei Kindrei ta atondrok ado, ma hawe aseken luk ta atondrok ado bala le rasan bwe.” \s1 Ado sabwerei \r (Luk 12:22-31) \p \v 25 Jises asehek ili le i buku doh, “Idah jo katiye tado, ado sabwerei ta manyah tado, saba lakou kameh ado aimon, ma saba lakou kameh ado a-un, ma ta bada ado ale, saba lakou kameh ado kataliye. Sebwe koha ado sakalawi nyamon, ma bada ado sakalawi kalawi ado, neh? \v 26 Ado katou iri sirih ateleh loken. Iri batah nyamon bwe, ma iri babwe-eh buwa nyamon bwe. Ma hawe iri batukum nyamon bala asumwe nyamon bwe, arile tama ado badu kandrah anyohan iri. Sebwe ado winiyan basakalawi iri sirih doh bwe nadeh? \v 27 Buku ado abwerei ta iri lakou doh, idah kameh winiyan edeu ari len ja ili hawe len ta manyah tado, ta ado luluwen deh? Bwe! \p \v 28 “Tasah handru ado abudon andra-i ta kolau ma awin? Ado kanone kanyolom iri kanyeu ateh ado ndrahune iri se. Ya iri babo gok bwe, ma iri bamekes kalawi iri bwe. \v 29 Arile, jo katiye tado, bwena mene kabin Solomon asini iri awin tan mwasin mara-ei handru ano, arile nyasou tiri kanyeu ja sakalawi nyasou ta kabin Solomon. \v 30 Idah Kindrei edeu nyasou ma awin ili tiri bwidiu badu lokei, iri bwidiu ado na len dah, ano na len bi-i akeh iri au ala bolo jih ta asun iu. I buku sah, sebwe Kindrei winiyan badeu kolau ma awin bawek tado bwe nadeh? Budon tado handru tinan bwe? \v 31 Ya ado sabudon sandra-i ma satiye sala buku doh, ‘Aso kaimon saba lakou bah? Aso ka-un sasah bah? Ya aso kadeu saba lakou bah?’ \v 32 Iri lau badu leheleh aseken ma asilah iri lakou mari doh. Ado sala buku iri, tasah tama ado udu kandrah tanan saba lakou ado aseken. \v 33 Arile, ado kanyolom bwena kili ta tondrok ta Kindrei ma ta kandriyen mwasin tan, ano ya iri lakou mari doh Kindrei kameh edeu ewek tado. \v 34 Ya ado sabudon ta len bi-i, tasah len bi-i badeh, tan lomondra ma lahou tan labai. Kora-on aha kandruni maha-an ta bi-i ja, iy kameh sakalawi lakou nane ou abudon boto-on labai ta aliy na len dah.” \c 7 \s1 Ado satehei ndramak ari ja sala ta mada sahou \r (Luk 6:37-38; Luk 6:41-42) \p \v 1 Jises asehek ili le i buku doh, “Ou satiye kandriyen ta ndramak ari ja, bwe kameh ou ale ala ta mada sahou tinan. \v 2 I le buku san tam ou tiye kandriyen ta ndramak ari ja, ya idah kameh ou ales ala ta mada sahou ale. Tasah, Kindrei kameh seleya kandriyen tam i buku le kandriyen ou ale amekes ili tiri mwan ma badih rayah ja. \p \v 3 “I buku sah handru, ou nyowonya mutahu kei udu mada nadu tinem ari ja, arile ou batona sobola kei ranah ma buruwen udu madam bwe nadeh? \v 4 I buku sah handru, ou tiye ili ta nadu tinem ari ja i buku doh: ‘Jo kandrei mutahu kei ranah ma buruwen udu madam keme len,’ arile len mari ou batona sobola kei ranah ma buruwen udu bolo madam bwe? \v 5 Ou lau ta wasai, ma bwena ou andrei sobola kei udu bolo madam keme len op, ano ou kameh anyolom amwenen handru ta akohok mutahu kei udu mada nadu tinem ari ja eme len. \p \v 6 “Ou sadeu nyamon ndrabun sala na mwi. Ya ou sakeh sa-un tam sala bwena ta bou. Buku ou akeh eh, idah kameh iri bou adek ala bwele-en ma tihisiy na kati iri, ano iri bou doh kameh tubuni iri ame hamon ja ani ou, ma sekese-ei ou ale bwisik.” \s1 Ndremenya, asilah ma alim kou \r (Luk 11:9-13) \p \v 7 Jises asehek ili le i buku doh, “Ado kandremenya, ya ado kameh akohok. Ado kasilah, ya ado kameh takalahei. Ado kalim kou, ya kou kameh asak tado. \v 8 Tasah, iy are lau ndremenya, iy kameh akohok. Iy are lau asilah, iy kameh takalahei. Ya, iy are lau alim kou, ya kou kameh asak tan. \v 9 Ya, ou, i buku none nadum kandremenya ou ta jabi ramen, ya ou taman kameh adeu nan bek deh? \v 10 Bwe, iy ndremenya ta ari ni, ya ou kameh adeu nan mwak deh? \v 11 Ya, i buku none ou tanam ou ndra-in, arile ou tanam ta adeu lakou mwasin ili ta nadum oro; ou winiyan atanam handru, tama ado udu kandrah kameh sekesek labai ta edeu lakou mwasin ale ili toro are lau ndremenya iy! \v 12 Ya, udu bolo lakou mari, ou amekes kili tiri lau, saba lakou ou aseken iri lau kamekes kewek tam ale. Idah amwenen le ta sahou batanau ta Moses, ma hawe sahou leheya tiri propet.” \s1 San ari bwisik hawe san ari tinan \r (Luk 13:24) \p \v 13 Jises asehek ili le i buku doh, “Ado kala san ta loboho kou bwisik, tasah san ta kou ili bolo jih badeh, san tinan labai. Ya lau solo-an labai adek ala san aliy. \v 14 Arile san ili ta kou bwisik ales ili kon ta manyah mwasin ma winiyan ta bano bwe. Ya idah kameh lau sola handru bwe adek ala san aliy.” \s1 Iri propet ta wasai \r (Luk 6:43; Luk 13:25-27) \p \v 15 Jises asehek ili le i buku doh, “Ado katondrok ado kamwenen handru tiri propet ta wasai. Iri ame hawe ado kameh bilibik ala buku none iri sipsip, ta bada oro le. Arile udu bolo ndrine oro badeh, oro ala buku none iri mwi ndra-in ta atoh. \v 16 Ado winiyan seleyaniy amwenen handru ta saba lakou asahan ta kandriyen oro amekes, tasah, malou bobodon ndra-in winiyan bato-ou buwa waen bwe. Ya iri lau abwe-eh buwa pik eme ta bwidiu ndra-in? Bwe! \v 17 I le buku aliy, iri kei mwasin ato-ou buwa kei mwasin, arile kei ndra-in ato-ou buwa kei ndra-in. \v 18 Ya kei mwasin winiyan bato-ou buwa kei ndra-in bwe, ya kei ndra-in winiyan bato-ou buwa kei mwasin bwe. \v 19 Ya iri kei mari ala bato-ou buwa kei mwasin bwe idah kameh amundroh i andri ma akeh ili bolo jih ta asun iu. \v 20 Ya ado kameh ala tanan mwasin labai tiri propet ta wasai, tasah ado seleya amwenen handru ta saba lakou asahan ta kandriyen oro amekes. \p \v 21 “Ado sabudon sala buku doh, ‘Iri lau mari aloh Jises i Laban iri winiyan ala bolo tondrok ta Kindrei udu kandrah.’ Arile, oro le lau ala amekes lahou ta tama udu kandrah. \v 22 Ya len doh kameh asahan, lau solo-an kameh asehek eme tek i buku doh, ‘Laban, Laban, ta nyaram aso asehek sahou ta Kindrei buku propet, ya ta nyaram aso atikah balik udu bwele-e lau au a len, ya ta nyaram aso amekes lahou tinan solo-an.’ \v 23 Arile jo kameh tiye tiri handru, ‘Jo tanan ado bwe, ado ka-au ka len tek. Ado lau ta amekes kandriyen ndra-in.’” \s1 Uru lau ma la-uh atah asiu \r (Luk 6:47-49) \p \v 24 Jises asehek ili le i buku doh, “Sendrehendreh ta aliy i buku doh: Are lau anuhun sahou tek dah ma iy in hamon ta aliy, iy i buku none ndramak tan budon mwasin, iy atah asiu tan udu bwele-e bek. \v 25 Ya ur undruk eme andri, ma wadah in gwa ma siyer \m atohou boto-on ili isos bada asiu. Arile batohowei asiu bwe, tasah asiu doh ndru ta aliy ili ihis bada bek. \v 26 Arile, are lau iy anuhun sahou tek dah, arile iy ba-en hamon ta aliy bwe, iy i buku none ndramak tan budon mwasin bwe, iy atah asiu tan udu bwele-e on laleyah. \v 27 Ya ur undruk eme andri, ma wadah in gwa ma siyer atohou boto-on ili isos bada asiu ma tohowei asiu taku i andri, ma atohou andra-i labai.” \s1 Boto-on ta Jises \p \v 28 Jises ano ta sehek sahou doh, ya iri lau mari mani iri atur ta leheya tan. \v 29 Tasah iy leheya iri i buku none ndramak tan boto-on, iy bala buku none iri lau ta leheya kandriyen malen bwe. \c 8 \s1 Ndramak ari sik lepra udu tan \r (Mak 1:40-44; Luk 5:12-14) \p \v 1 Jises edek udu mandrei eme andri, ya lau solo-an labai a-en hamon tan. \v 2 Ya ndramak ari sik lepra udu tan eme hawen, ma iy atehei bwili ndru-un i andri, ma iy tiye i buku doh, “Laban, i buku none ou aseken ou winiyan mesekei jo kamwenen ja udu mada Kindrei.”\f + \fr 8:2 \ft Kandriyen tiri Juwis iri anya, buku ndramak ari sik lepra udu badan badeh, iy ndrako-ak udu mada Kindrei. Ya buku iy anya sik lepra tan ndrano, iy kili hawe iri pris. Buku iri atou badan ndrasahan amwenen ja iri kameh tiye iy ndrasahan ha-un ja ta mada Kindrei. Ou anyolom kili ta Lebitikus kalan 13 hawe 14. \f* \v 3 Jises eme atehei minen i badan ma tawi iy, ma iy tiye, “Jo aseken. Ya ou amwenen ja.” Nawin bwe sik lepra iu ma iy amwenen ja. \v 4 Ano Jises tiye i tan, “Ou sasehek sala ta ari lau, ndri-iy, arile ou ales ala hawe iri pris, leheya badam ki tiri kanyolom. Ano ou adeu lakou kili ta salom i le buku Moses mene ndrabatanau, ya eme iri kanyolom ma katanan ou badeh, ndramwenen ja.” \s1 Budon handru ta ndramak batun tinan ta bahun \r (Luk 7:1-10) \p \v 5 Jises edek eme isos Kapena-um, ndramak batun tinan ta tondrok lau ta bahun eme hawen, ta ndremenya iy ta seben. \v 6 Ya iy ndramak batun tinan tiye i buku doh, “Laban, ndramak ta ndrahu so-ok tek ibo sik ndra-in labai udu kon, ma iy winiyan ta banyokolokon bwe. Iy akohok sisi-in tinan labai.” \p \v 7 Jises tiye i tan i buku doh, “Jo kameh ewek mesekei iy amwenen.” \v 8 Ya ndramak batun tinan tiye i buku doh, “Laban, jo ndramak ndra-in, jo winiyan baseken ou ta ame bolo asiu tek bwe, arile jo aseken ou asehek le sahou, ya ndramak ta ndrahu so-ok tek doh kamwenen ja. \v 9 Tasah, jo amwenen udu bahandra boto-on ta batun tinan ta tondrok lau mari ta bahun, ma jo badeh, lau tek rinek (100) ta bahun ale ado bahandrak. I buku none jo katiye ki ta ari lau anya, ‘Ou ala,’ idah kameh iy ilih. Ya, i buku none jo katiye anya, ‘Ou ame,’ idah kameh iy eme. I buku none jo katiye ki ta ndramak ta ndrahu so-ok tek anya, ‘Ou bwidi lahou doh,’ ya idah kameh iy bwidiy.” \p \v 10 Jises anuhun sahou doh ma manin atur, ma iy tiye ili tiri lau a-en hamon tan i buku doh, “Jo katiye tado handru, jo bandruni ari lau badu Isra-el tan budon tinan bala buku iy lau dah bwe. \v 11 Jo katiye tado, lau solo-an badu leheleh kameh ame, badu loboho an eme loken, ma badu loboho an i andri. Ya iri kameh akohok ndrahune iri ta manyah ta nyamon tinan hawe Abraham, ma hawe Aisik, ma hawe Jekop udu bahandra tondrok ta Kindrei. \v 12 Arile, oro lau ala Kindrei mene tiye oro ala ado bolo tondrok tan kameh akeh oro au ala manan, ala bolo lulik, ya oro kameh aden, ma andrebek lihi oro.” \p \v 13 Ano Jises tiye ili ta ndramak batun tinan tiri lau ta bahun, “Ou ala kon, saba lakou ou aseken, ndramesekei in hamon ta budon tam tinan handru.” Eme ya ndramak ta ndrahu so-ok tan ndramwenen ja na le liliy. \s1 Jises mesekei lau solo-an amwenen \r (Mak 1:29-34; Luk 4:38-41) \p \v 14 Na len Jises edek eme ili asiu ta Pita, iy atou salahu Pita ibo sik. Badan nyarahan ma iy amadin in bada sau. \v 15 Jises eme tawi le minen ma badan nyarahan nane iu, ma badih doh suri iy le eme loke, ma iy amekes na Jises nyamon. \v 16 Mirihik kon anya ka beyeh, ya iri lau atiye lau solo-an nane balik udu bwele-e iri ame hawe Jises, eme ma iy asehek le sahou ili tiri malawin ndra-in, ma tikahei iri au, ma iy mesekei iri lau mari amwenen ja. \v 17 Idoh ta amekes sahou ta propet Aisaya ndrasihidiy, asahan handru: \q1 “Iy amwenen bwese-ei sik tataha \q1 ma iy andrei sik ndra-in tataha iu i len.” \rq Aisaya 53:4\rq* \s1 Katin ta lau a-en hamon ta Jises \r (Luk 9:57-60) \p \v 18 Jises atou iri lau solo-an labai awudi iy, eme ma iy tiye i toro lau tan au ala kapa gwa bilisiu. \v 19 Ano ndramak ari ta leheya kandriyen malen eme hawe Jises, ma iy tiye tan i buku doh, “Ndramak ta leheya, loboho heh ou ala aliy, jo kameh in le hamon tam.” \p \v 20 Jises tiye i tan i buku doh, “Iri mwi badu lokei, munu iri udu aliy, ya iri sirih ale awi iri ta matinou udu aliy. Arile, jo Nadu Ndramak Awas,\f + \fr 8:20 \ft Jises aloh iy le Nadu Ndramak Awas. Nyara Jises dah leheya buku iy ndramak awas handru, ma Kindrei suni iy eme kon munyak ta aseben taha lau badu munyak ame hamon ja.\f* badeh, ari ndrahu matinou tek, bwe.” \p \v 21 Ano ndramak ari badu hamon tan eme tiye i ta Jises, “Laban, jo kili kihi tama op. Ano jo barawek bara-en hamon tam.” \v 22 Arile Jises tiye i tan i buku doh, “Ndri-iy ai! Ou ame a-en hamon tek, ya iri lau amak badeh, kado gwek. Idah kameh, iri lau badu hawe iri barala bara-eh iri.” \s1 Jises mesekei siyer amondrei \r (Mak 4:36-41; Luk 8:22-25) \p \v 23 Ano Jises sandroh ili bolo ndron ra-ei, ma hawe oro lau tan ma ronoh la-uh a-en hamon tan. \v 24 I le mani tur, siyer laba tinan atohou eme bwele-e gwa li Galili, eme ma bayau atohou eme bolo ndron. Arile Jises amadin. \v 25 Ya oro lau tan ala mete-ei iy, ma oro tiye i buku doh, “Laban, ou aseben to! Bwe kameh to katuh ai!” \p \v 26 Jises tiye i buku doh, “Ado budon tado nadu bwisik labai, i buku sah ado anoh tinan labai?” Ano iy suri iy eme loken, ma tiye sahou boto-on i ta siyer ma hawe bayau, eme ma siyer ma bayau amondrei i le rasan. \p \v 27 Eme ma oro lau tan mani oro atur, ma oro ndremenya oro, “Are ndramak i buku iy dah? Ya siyer ma bayau anuhun iy!” \s1 Jises mesekei uru lau ma la-uh malawin ndra-in udu bwele-e uru iu \r (Mak 5:1-17; Luk 8:26-37) \p \v 28 Jises oro ame asos kapa gwa li loboho kon tiri lau Gadara. Eme ya uru lau ma la-uh doh malawin ndra-in udu bwele-e uru, ma uru ado mada lek adek ame hawe Jises. Ya malawin ndra-in mesekei uru ala lolo-ou ndra-in labai, ma iri lau winiyan badek bala san doh bwe. \p \v 29 Eme ya uru ndremenya Jises ma uru arah i buku doh, “Ou Nadu Kindrei, ou anya amekes sasah keme taru? Ou ame dah ta adeu sisi-in eme taru, bwena ta len amwenen ta aliy?” \p \v 30 Eme ya, udu len sese, bou rakou aimon nyamon. \v 31 Eme ya malawin ndra-in tiye sahou tikisiy i ta Jises anya, “I buku ou tikahei aso ame len, ya ou suni aso kala bwele-e bou.” \v 32 Eme iy tiye i toro, “Ado kala!” Eme iri malawin ndra-in ame len. Ano iri sandroh a bwele-e bou, ma bou rakou nane dah sakaliye are bwele-e mandrei ame andri ala bolo gwa li, ma oro amak. \p \v 33 Eme ma oro lau ta atondrok \m bou nane dah atobwak au ala kon tinan, ma ala asehek tiri lau ta lakou mari asahan tiri bou, ma hawe lakou asahan turu lau nane dah malawin ndra-in udu bwele-e uru. \v 34 Ano ma lau mari badu kon nane dah au ala ta atou Jises. Oro atou Jises, eme ma oro ndremenya iy, ta iy karuwani kon tiri ma iy ki-iu. \c 9 \s1 Jises mesekei ndramak ari badan imek amwenen ja \r (Mak 2:1-12; Luk 5:17-26) \p \v 1 Jises sandroh i bolo ndron ra-ei, ma iy iu i hamon i kapa gwa bilisiu ili kon tan amwenen.\f + \fr 9:1 \ft Udu bolo len doh, kon ta Jises badeh, Kapena-um.\f* \v 2 Eme ma, iri lau ra-on bwese-ei ndramak ari badan imek ta eme atou iy. Ndramak nane amadin bada nyahan tan. Jises atou buku none budon toro boto-on labai in tan, ma iy tiye i ta ndramak nane badan imek anya, “Ou abadok, naduk! Kandriyen ndra-in tam ndrasikinei ndra-au.” \p \v 3 Eme ma oro lau ra-on ta leheya kandriyen malen nunu-uh i buku doh, “Ndramak kede-eh asehek sahou ndra-in i bada Kindrei.” \p \v 4 Arile, Jises tanan budon toro ma iy anya, “Tasah handru ado abudon ndra-in i buku badeh in bolo ndrine ado? \v 5 Buku sah, san manamun ndraheh, jo kasehek anya, ‘Kandriyen ndra-in tam ndrasikine ndra-au,’ deh bwe, katiye, ‘Ou suri ou, ma ou adek’? \v 6 Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai, udu bwele-e munyak dah ta tiye i ta ndramak ta mani kandriyen ndra-in tan iu.” Eme ma iy tiye i ta ndramak nane badan imek, iy anya, “Ou suri ou, ma ou andrei nyahan tam ma ou au a kon!” \v 7 Ndramak nane suri iy eme loken, ma iy iu i kon. \v 8 Eme ma, iri lau mari nane atou, ma iri anoh, ma iri atudun nyara Kindrei, tasah Kindrei badeh, edeu iri boto-on i buku doh ili tiri lau mwan ma badih. \s1 Jises aloh Metiu \r (Mak 2:13-17; Luk 5:27-32) \p \v 9 Eme ma Jises edek ili, ya iy atou ndramak ari nyaran Metiu manyah ereu bolo asiu tan ta gok ta akohok luk ta takis, eme ma iy tiye i tan, “Ou ame an hamon tek.” Eme Metiu suri iy ma iy in hamon tan. \p \v 10 Ano, Jises manyah udu bolo asiu ta Metiu. Ya iri lau solo-an ta akohok luk ta takis, ma hawe iri Juwis ale ba-en hamon ta kandriyen ta batanau ta Moses bwe, ame aimon nyamon hawen, ma oro lau tan. \v 11 Eme oro Parasi atou, ma oro orou sahou i ta Jises, ma oro tiye toro lau tan buku doh, “Tasah handru ndramak ta leheya tado aimon nyamon hawe \m oro lau ta akohok luk ta takis, ma hawe oro lau ale ba-en hamon ta batanau ta Moses bwe?”\f + \fr 9:11 \ft Iri Parasi badeh, a-en hamon ta kandriyen malen solo-an labai, eme iri anya iri are lau ba-en hamon tiri kandriyen malen solo-an doh, iri asahan lau ndra-in ma iri ado ndra-in ta mada Kindrei. Ma iri Parasi anya, buku ndramak ari ja ili hawe ndramak ndra-in doh, iy ale asahan ndramak ndra-in. Iri Parasi anya ja, iri lau ta akohok luk o takis, iri badeh ndra-in ale, tasah san solo-an iri ado hawe iri lau leheleh badu Rom. \f* \p \v 12 Jises anuhun sahou toro, ma iy tiye, “Iri lau ale babo sik bwe, iri winiyan baso-ok ndramak ta anyumor bwe. Arile, iri lau tiri sik le badeh, aseken seben. \v 13 Ado kala kabudon kati sahou sokek dah kamwenen, \q1 ‘Jo baso-ok salom laleyah aha amekes eme tek bwe, \q1 arile jo aso-ok handru aha kamekes kandriyen ta tikisiy ki ta ndramak ari ja.’” \rq Hoseya 6:6\rq* \m Eme Jises anya ja, “Jo eme dah ta aseben lau mwasin le, bwe. Jo eme dah badeh, ta aseben iri lau ta karei ma lomondra ndra-in udu tiri kasahan mwasin.” \s1 Jises leheya tanan ta amekes beleben ta nyamon \r (Mak 2:18-22; Luk 5:33-39) \p \v 14 Jises hawe oro lau tan aimon nyamon kahis le badeh, oro lau ra-on ta Jon ta alomwa ame ndremenya iy i buku doh, “I buku sah handru ahi lau ta Jon hawe oro Parasi abeles ahi ta nyamon, ya oro lau tam bwe?” \p \v 15 Eme Jises asumon i buku doh, “I buku none ndramak tasou bolohau udu aliy, ado winiyan babilisi oro lau ta molak bwe! Arile, na len hamon eme kameh, iri lau ta kaliu tan kuhi iy eme len, ma oro kameh, winiyan baimon nyamon bwe, oro kameh beleben, ma abeles oro ta nyamon. \p \v 16 “Ado kanuhun. Ari ndramak winiyan bakuhi ranah kolau ha-un, ya suwidiy ja i manamunu awin malen bwe. Buku iri bwidiy i buku doh, ya iri sikine awin, kolau ha-un nane kameh bosokou, ma awin malen kameh atarah ja, eme ma, munun kameh i tinan labai ja. \v 17 Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen doh kameh tuburok, ma kohan kameh tarani ku-i me nane, ma waen kamou, ma iu laleyah. Ma ku-i me ale kameh andra-i. Arile, iri lau asolou waen ha-un i bolo ku-i me ale ma bweseken kahis le, ma uru ma la-uh kameh ado mwasin.”\f + \fr 9:17 \ft Iri Juwis badeh, adi me, ta akohok ku-in ma asowek. Ku-in doh kameh, iri suwidiy i buku sabok laba tinan ta asolou ndraye waen ili bolon. Iri atehei waen ha-un ili bolo ku-i iri me nane doh badeh, iri atehei udu gwek luluwen sese o winiya len sabe op, ta nyiminye waen kasahan kamwenen. Ta bolo oro len doh, waen kameh winiyan apus eme loken ma tabasi bwisi iri waen nane ndrabosar mwena udu aliy.\f* \s1 Jises mete-ei nadu nah ari ma mesekei badih ari tawi awin tan amwenen ja \r (Mak 5:22-43; Luk 8:41-56) \p \v 18 Jises asehek sahou ili toro lau ta Jon kahis le, ndramak ari tinan ta atondrok eme atehei bwili ndru-un ere mirihik ta kati Jises, ya iy tiye i buku doh, “Naduk badih ndramak na nane, arile jo aso-ok ou ame atehei le minem le ki tan, ya iy kamak ja.” \v 19 Iy tiye ano le badeh, Jises suri iy, ma iy in hamon tan, ma oro lau tan ale an hamon tan. \p \v 20-21 Oro adek ala badeh, iy badih ari ja ereu san, sik ndra udu tan winiya jaha ronoh la-uh. Iy badih doh sokohani iy i ndrokowa iri lau ili in hamon ta Jises, ma iy abudon i buku doh, “Buku none jo katawi le kiri awin tan, sebwe jo winiyan amwenen.” Eme ma, iy atehei minen le i ta kiri awin ta Jises. \p \v 22 Arile Jises tubuni iy, iy atou badih doh, ma iy anya, “Ou sabudon sandra-i, ndri-iy, naduk. Ou atehei budon tam handru in tek, ma mesekei ou asahan amwenen.” Eme na le liliy, sik tan ano, ma iy asahan amwenen. \p \v 23 Hamon ta aliy, Jises eme asahan asiu ta ndramak tinan nane. Eme iy atou iri lau ta kabek aden areu aliy. Iri lau doh oloh bala-eu, ma iri taya andra-i labai. \v 24 Eme Jises tiye i toro i buku doh, “Ado ka-au ka len. Iy nadu badih kede-eh bamak bwe, iy asah amadin le kede-eh.” Iri anuhun sahou tan, ma iri ehe-en iy andra-i labai. \v 25 Arile Jises abadok, ma tikahei iri ala manan. Eme ma iy ili bolo asiu, ma iy tawi mine nadu badih nane, ma iy amak ja. \v 26 Eme ma, sahou nyala lakou nane Jises mesekei aseker i bolo kon loboho nane doh. \s1 Jises mesekei uru lau ma la-uh mada uru bwe, ma ndramak ari bohon bwe amwenen ja \p \v 27 Jises ruwani kon nane, ma iy edek ili, ma uru lau la-uh mada \m uru bwe adek an hamon tan, ma uru aloh i tan anya, “O nadu tubu kabin Debit,\f + \fr 9:27 \ft Iri Juwis badeh, tanan buku, ndramak Kindrei badeh, ndranyowaniy ta akohok iri mwan ma badih tan, iy kameh asahan amwenen boho kamen ta kabin Debit. Uru lau ma la-uh, mada uru kaseu atehei budon turu i buku, iy Jises le doh badeh, iri Isra-el ale atondrok iy kede-en, ma uru aloh Jises i buku doh, Nadu tubu kabin Debit.\f* ou tikisi aru!” \p \v 28 Jises ili bolo asiu ra-em, ma uru lau ma la-uh nane ame hawen. Ma iy ndremenyani uru, “Ah atehei budon boto-on handru ta jo winiyan mesekei ah amwenen deh bwe?” \p Ma uru anya, “Ehe, Laban, aru atehei budon taru handru.” \p \v 29 Eme Jises atehei minen i mada uru, ma iy anya, “Ah atehei budon boto-on in tek, ma lakou mwasin nane ah aseken kasahan ta ah.” \v 30 Se nawin bwe mada uru asak. Arile, Jises atehei sahou boto-on anya, “Ah sasehek nyala ari lau ja, ta lakou asahan ta ah dah, ndri-iy.” \v 31 Arile, uru ala asehek nyala lakou nane Jises mesekei asahan turu ili nyala iri lau mari badu loboho kon tinan nane doh. \p \v 32 Kala le uru lau mala-uh nane ruwani Jises, oro lau ra-on kuhi ndramak ari bohon bwe, ma malawin ndra-in ereu la-un. \v 33 Eme ma Jises tikahei malawin ndra-in nane iu, ma ndramak nane bohon bwe asehek sahou ja. Eme ya iri lau mari mani iri atur labai, ma anya, “Aden! Bwena mene ari lakou buku doh basahan bolo kon tinan Isra-el bwe, handru en!” \p \v 34 Arile, iri Parasi anya, “Iy atikah malawin ndra-in iu tasah, tinan tiri malawin ndra-in badeh, edeu boto-on ili tan ta amekes lakou doh.” \ms1 Jises edeu gok ili toro lau tan \mr (Kalan 9:35–10:42) \s1 Jises tikisi handru iri lau mwan ma badih \p \v 35 Hamon ta aliy, Jises edek ili bolo iri kon tinan ma bwisik mari, ma iy leheya iri in bolo asiu ta atukum tiri. Iy atiye sahou mwasin ta Kindrei aso-ok iri lau mwan ma badih, ma iy aso-ok iri kame baha tondrok mwasin tan. Ma Jises ale mesekei iri lau mari tiri sik in bada iri amwenen ja. \v 36 Eme Jises atou iri lau solo-an \m labai atukum, ma iy tikisi iri. Tasah, budon tiri inyon laleyah ta san ta takaleh Kindrei, ma iri ado ndra-in labai, buku none sipsip lau ta atondrok iri bwe. \v 37 Eme ma Jises tiye toro lau tan anya, “Ado katou, nyamon solo-an labai ndruni in bolo bilin, arile lau solo-an bwe, ta gok ta akohok nyamon nane doh bwe. \v 38 Eme ya ado kasolom ki ta Laban ta kati bilin, ta iy kasuni lau kala katukumwi iri nyamon tan.” \c 10 \s1 Nyara oro lau ronoh la-uh ta Jises \r (Mak 3:13-19; Luk 6:12-16) \p \v 1 Jises luhi oro lau tan ma ronoh la-uh ame hawen, ma iy edeu boto-on ili toro ta atikah malawin ndra-in in la-u lau mwan ma badih iu, ma amekes iri lau tiri sik in bada iri amwenen ja. \p \v 2 Nyara oro aposel ma ronoh la-uh i buku doh: Ari in bwena badeh, Saimon, nyaran ari ja Pita, ma nadu tinen Enduru. Ano, Jemis hawe Jon, uru nadu Sebedi. \v 3 Ano Pilip uru Batolomiu, ma Tomas, hawe Metiu, iy lau ta akohok luk ta takis, ma hawe Jemis nadu Alpeyus, ma Tadeyus. \v 4 Ma hawe Saimon, iy lau badu bolo iri Selot,\f + \fr 10:4 \ft Selot badeh, moson Ndramak ta aliu iri Juwis kame len ta baha tondrok ta Rom.\f* ma Judas Iskariyot, ndramak doh hamon kameh iy edeu sa-oh ta Jises. \s1 Jises edeu gok ili toro lau tan ma ronoh la-uh \r (Mak 6:7-13; Luk 9:1-5) \p \v 5 Jises suni oro lau tan ma ronoh la-uh ala, ma iy atehei sahou i toro i buku doh,\f + \fr 10:5 \ft Sahou ari ja dah badeh, badu hawe oro sahou lawe-en ma limeh nane, Jises asehek udu bolo tarou ta Metiu. Sahou dah badeh, udu ta kalan 10:5-42, ma iy asehek ta nyala iri lakou kameh asahan toro lau ta Jises, udu bolo len toro anya kasehek sahou ta Kindrei kili tiri mwan ma badih.\f* “Ado sala bolo kon ale iri lau badu Isra-el bwe, ndri-iy. Ma ado sala bolo kon tinan tiri Samariya. \v 6 Ado kala hawe iri lau mwan ma badih ale badu boho kamen tiri Isra-el amwenen, iri amai buku none sipsip iri lau ta atondrok iri bwe. \v 7 Ado kala kasehek nyala iri buku doh, ‘Mirihik kameh Kindrei eme atondrok iri lau badu kon munyak.’ \v 8 Ado kala kamekes kamwenen iri lau abo sik, ma ado kamak iri lau ale ndramak, ma kamekes kamwenen iri lau sik lepra udu bada iri, ma ado katikah iri malawin ndra-in udu la-u iri lau ki-iu. Lakou ado ndrakohok dah, ado akohok laleyah, ma sihinen bwe. Ya ado ale kadeu laleyah kili tiri lau mwan ma badih. Ado sakohok luk ta gok ado amekes, ndri-iy. \p \v 9 “Ado sakohok gol, silba ma hawe kaba su-iy sareu mine ado, ndri-iy. \v 10 Ya buku ado adek, ado sabwese kohei ta nyamon, ndri-iy. Ma ado sakohok awin la-uh deh ku-i kati ado, deh ari kei ja ta edek hawe ado, ndri-iy. Ado kala laleyah le. Tasah, ndramak ibo gok, iri lau mwan ma badih kameh anyohan iy na nyamon, ma adeu lakou i tan. \p \v 11 “Buku none ado ala bolo ari kon tinan deh, ari kon bwisik, ado kanyolom kamwenen are lau handru badu bolo kon doh sekesek ta akohok ado, ya ado ka-en hawen winiya le ado ruwani kon nane doh. \v 12 Buku none ado ala bolo ra-em asiu, ado kasehek toro lau ta asiu ki buku doh, ‘Kindrei katondrokei ado, ma ado kado mwasin.’ \v 13 Ya buku none oro lau badu asiu nane sekesek ta akohok ado, mwasin, sahou tado mwasin kudu la-u oro. Arile, buku none oro basekesek ta akohok ado bwe, mwasin, ado kakuhi sahou tado mwasin nane keme hamon ja. \v 14 Buku none ari ndramak basekesek ta akohok ado ala asiu tan bwe, ma basekesek ta anuhun sahou tado bwe, mwasin. Ya buku none ado ruwani asiu deh kon nane, ado katuruhi kasu on ma ndren ta kati ado ki-iu, ma ado ka-au.\f + \fr 10:14 \ft Iri lau ta Jises badeh, kamekes kandriyen doh ta leheya iri mwan ma badih badu kon tinan, buku iri kameh akohok maha-an ta kandriyen iri mene amekes. Ou winiyan anyolom udu bolo tarou ta Mak kalan 6:11, ma udu bolo tarou ta Aposel kalan 13:51.\f* \v 15 Jo asehek sahou handru ewek tado, na len Kindrei edeu lau ala ta mada sahou eme kameh, kon tinan dah kameh, bwese maha-an laba tinan tinan labai sakalawi ja maha-an mene asahan tiri lau ndra-in badu kon tinan Sodom ma Gomora.” \s1 Jises asehek anya maha-an solo-an kameh asahan \r (Mak 13:9-13; Luk 21:12-17) \p \v 16 Jises asehek sahou ili ja buku doh, “Ado kanuhun! Jo kasuni ado buku none le sipsip ili bolo iri mwi badu lokei. Arile, ado kamekes budon ki mwasin buku none le mwak amekes, arile ado samekes kandriyen ndra-in ta amekes ndra-in ili bada ndramak ari ja. Aha kasahan ki buku le sirih aloh ban ale ba-um ari lakou bwe. \p \v 17 “Arile, mada ado kaleu! Ado kanyolom iri lau kamwenen. Iri kameh atehei ado ala mada iri kansol ta anuhun sahou, ya iri kameh a-um aha na bala oseu an bolo asiu tiri ta atukum, tasah ado an hamon ta sahou tek. \v 18 Handru labai! Iri kameh seheyani ado ala mada iri lau ta atondrok, ma hawe iri kabin, ma iri kameh atehei ado ala ta mada sahou. Idoh le, ado winiyan leheya sahou tek ili tiri, ma hawe iri lau mwan ma badih badu leheleh ale. \v 19 Buku none iri atehei ado ala ta mada sahou, ado sabwerei, ta saba san ado kasehek sahou, ma ta saba sahou kameh ado kasehek. Ado sabudon sandra-i, ndri-iy. Na len doh amwenen kameh Kindrei leheya ado ta saba sahou kameh asahan boho ado ta ado asehek. \v 20 Tasah, idoh ado amwenen basehek sahou bwe. Malawi Ndrabun ta tama ado amwenen kameh asehek sahou na boho ado. \p \v 21 “Na len doh kameh, ndramak atehei nadu tinen amwenen ili ta mada sahou, ya iy kameh edeu sa-oh tan. Ya tama iri ra-on ale kameh amekes i buku aliy ili ta nadu iri. Ma iri nah ra-on kameh asahan lau ta bahun ili ta tama ma tine iri, ma iri kameh atehei iri ala mada iri lau tinan ta kadai iri kamak. \v 22 Ya iri lau mari kameh baseken ado bwe, tasah ado badeh, an hamon ta sahou tek. Arile, are lau ales boto-on, ma baruwani budon tan ba-au tek bwe, winiya le len ta maha-an doh ano, Kindrei kameh andrei iy eme hamon. \v 23 Ya buku none are lau mwan deh badih badu saba kon tinan amekes ndra-in ewek tado, mwasin, ado katobwak kala kon tinan ari ja. Jo asehek sahou handru ewek tado, ado winiyan babwidi gok dah bano bwe udu bolo iri kon tinan badu Isra-el, ya jo Nadu Ndramak Awas ta Kindrei kameh eme hamon ja. \p \v 24 “Ado kanuhun. Ari ndramak ta akohok tanan basakalawi ndramak ta leheya iy bwe. Ari bonyo-ou basakalawi ndramak ta atondrok iy bwe. \v 25 Arile, buku none ari ndramak ta akohok tanan asahan buku none ndramak ta leheya iy, mwasin. Ya buku none ari bonyo-ou asahan buku none ndramak ta atondrok iy, mwasin. Iri lau tinan badu Isra-el tondrohani jo tama boho kamen, nyarak Belsabul.\f + \fr 10:25 \ft Belsabul doh badeh, nyara Satan (Balik) ari ai. Ou winiyan anyolom udu bolo tarou ta Metiu kalan 12:22-28.\f* Ya idoh ado katana ado, iri kameh tondrohani nyara ado i le ndra-in labai, tasah, ado lau mwan ma badih an hamon tek.” \s1 Ado sanoh ta asehek sahou nyala Kindrei, ndri-iy \r (Luk 12:2-7) \p \v 26 Jises asehek sahou ili ja buku doh, “Ado sanoh tiri lau ale anya kamekes ndra-in ewek tado. Lakou mari ale aton kede-eh kameh asahan eme lewan, lau mari kameh anuhun ma atou na mada iri. \v 27 Ya sahou jo asehek tado dan, hamon ado kasehek nyala iri lau mari. Sahou jo ohei nyala ado le dah, arile hamon, ado kales kare bwele-e ndrahu tukum tiri lau, ya ado kasehek nyala saba lakou jo asehek nyala ado dah, ki tinan ta lau mari kanuhun. \v 28 Ado sanoh tiri lau ale winiyan idi bada ado na dah, arile iri winiyan badai malawi ado bwe. Arile ado kanoh labai ta Kindrei, tasah iy winiyan idi malawim ma badam udu bolo jih ale anya udu le buku doh. \p \v 29 “Ado tana ado, iri lau asih sirih nadu bwisik ma la-uh na luk bororoh le, neh? Arile, tama ado badeh, atondrok uru sirih doh udu mwasin labai. Ari winiyan bamak bwe buku none tama ado baso-ok ta iy imek bwe. \v 30 Kindrei ale ndrandromwei lami batu ado mari, ya iy tanan ado mwasin labai. \v 31 Ya, ado sanoh tiri lakou ndra-in iri lau anya kamekes kewek tado. Kindrei winiyan tondrokei ado. Ado kanuhun! Ereu budon ta Kindrei, iri sirih badeh, lakou laleyah, arile iy atondrok iri. Eme ya iy winiyan tondrokei ado areu mwasin labai ja. \p \v 32 “Eme ma, are lau ale asehek ili tiri lau mwan ma badih buku none iy badu hawek, jo ale kameh asehek ta tama udu kon loken buku iy ndramak doh badu hawek handru. \v 33 Arile, are lau asehek ta ndramak ari ja buku iy badu hawek bwe, jo ale kameh asehek ta tama udu kon loken, buku iy lau doh badu hawek bwe ale.” \s1 Lau mwan ma badih kaso-ok Jises kudu bwele-en ja ta lakou marakon \r (Luk 12:51-53; 14:26-27) \p \v 34 Jises asehek sahou ili ja buku doh, “Ado satehei budon buku jo eme ta amekes mondrei. Bwe! Jo eme ta amekes buku doh bwe. Jo eme ta apou lau. \v 35 Handru, jo eme, \q1 ‘ta amekes kandriyen ta andres asahan. Idah kameh, lau mwan kameh andres i la-u taman, ya nadu badih kameh andres i la-u tinen. \q1 Ya salahun uru kayon kameh andres uru, i le buku aliy. \v 36 Lowa ndramak amwenen kameh amekes bahun i tan.’ \rq Maika 7:6\rq* \p \v 37 “Buku lau mwan o badih aso-ok taman uru tinen, idoh mwasin, arile, ki buku none iy baso-ok jo handru bwe ja, iy winiyan basahan lau tek bwe. Ya buku ndramak aso-ok nadun mwan deh badih, mwasin ale. Arile, ki buku none iri baso-ok jo handru bwe ja, iri winiyan basahan lau tek bwe le. \v 38 Ya, are lau mwan deh badih balokou iy ta imek ereu hamon tek bwe, buku none ndramak ta imek iy kabwese kei tondreh tan amwenen, iy badeh, winiyan basahan lau tek bwe. \v 39 Iy are lau iy atehei budon boto-on ta amekes manyah tan kudu mwasin, iy winiyan batakalahei kohan mwasin bwe. Arile, are lau anya ki-in hamon tek, ya iy babudon ta kohan nadah bwe, iy winiyan akohok manyah mwasin hamon.” \s1 Ndramak aseben iri lau ta Jises iy winiyan akohok ndramas mwasin \r (Mak 9:41) \p \v 40 Jises asehek sahou ili ja buku doh, “Are lau akohok ado ma aseben ado, idoh i buku none le iri akohok jo ma aseben jo. Ma are lau akohok jo, idoh i buku none le iy akohok Kindrei, iy suni jo eme dah. \v 41 Buku none are lau akohok ari propet ta Kindrei, ma nyowo-ei iy udu asiu tan, hamon kameh Kindrei akunoh iy, buku le sihine iri lau ta atiye bohon. Ya buku none are lau akohok iri lau mwasin ili asiu tan ma anyo-ou iri, hamon kameh Kindrei akunoh iri buku le sihine iri lau mwasin. \v 42 Ya are lau atehei le ari bwiniu gwa i wa-i are lau laleyah badu hamon tek, mwasin, jo asehek handru ewek tado: Sihine i lau doh winiyan ba-au laleyah bwe.” \ms1 Jises, iy are lau handru? \mr (Kalan 11:1–16:20) \c 11 \s1 Jon ta alomwa suni oro lau tan ala atou Jises \r (Luk 7:18-35) \p \v 1 Jises tiye sahou ili toro lau tan ma ronoh la-uh ano, iy ruwani kon nane, ya iy edek ili bolo iri kon tinan loboho Galili. Ya iy leheya ma asehek sahou nyala Kindrei ili tiri. \p \v 2 Kala doh Jon ta alomwa ereu bolo kou. Iy anuhun yoyou ta gok mari Krais amekes, ya iy suni oro lau tan ra-on ala atou Jises. Iy tiye toro \v 3 ta ndremenya Jises i buku doh, “Sebwe ou ndramak aloh Krais, Kindrei mene tandrakan ta iy kameh suni iy eme. Buku none bwe, sebwe ahi kabe-en ndramak ari ja nadeh?” \p \v 4 Eme Jises asumon boho oro i buku doh, “Ado kala hamon katiye ta Jon ta saba lakou ado ndratou ma ndranuhun dah: \v 5 Iri lau mada iri bwe, iri atou kon ja, iri kati iri ndra-in iri adek ja, iri lau lepra udu bada iri, iri asahan amwenen, ma iri ndranye iri bwe, iri anuhun kon ja, ya iri lau ndramak, iri ndrasahan ndrame awas ja, ma hawe sahou ta nyala \m sahou mwasin badeh, ndratiyaniy ndrala bolo iri lau, lakou bwe.\f + \fr 11:5 \ft Bwena mene propet Aisaya asehek ta nyala iri lakou randrah, randrah solo-an kameh asahan udu bolo len ta Kindrei mene aseben iri Isra-el. Ou winiyan anyolom udu ta bolo tarou ta Aisaya kalan 35:1-7 ma ale udu ta kalan 61:1-4.\f* \v 6 Eme ya, sekesek ki toro lau heh le nane bataku ta budon toro bwe, tasah ta jo le.” \p \v 7 Eme oro lau ta Jon au ala hamon. Eme ma Jises asehek sahou ili tiri lau nyala Jon, “Buku sah, aha mene ala kon lomale an, anya katou sasah? Ari bwidiu awa-is nyukunyok ereu bolo jor neh? Sebwe bwe nadeh! \v 8 Aha ala anya katou sah handru? Ndramak ari atehei awin mwasin ereu badan? Bwe oh! Iri lau asin awin mwasin badeh, badu bolo asiu tiri kabin. \v 9 Saba lakou handru aha anya kala katou? Sebwe aha anya kala katou propet? Ehe, aha atou iy, ma jo katiye tado kamwenen, iy badeh sakalawi iri lau mari mene ta atiye boho Kindrei ndra-au ndrala bwena. \v 10 Eme sahou torowenei udu bolo buk ndrabun tiye i buku doh, \q1 ‘Jo kameh suni ndramak ari ewek bwena tam. \q1 Iy kameh atehe san tam.’ \rq Malakai 3:1\rq* \m \v 11 Jo tiye tado amwenen, Jon ta alomwa badeh sakalawi iri lau mari tine iri tuwi iri ereu kon munyak eme kala dah. Arile, are lau nyaran bwe, udu baha tondrok ta Kindrei eme kameh sakalawi nyara Jon ja. \v 12 Kala mene Jon ta alomwa leheya sahou ta Kindrei eme winiya na len dah, iri lau solo-an ta bahun abo gok boto-on labai ta tiyani tondrok ta Kindrei keme bolo munyak, ya iri anya kasuni ari lau ta ereu bwena tiri.\f + \fr 11:12 \ft Boho iri Grik badeh, baleu bamwenen bala tiri lau badu loboho doh, bwe. Lau rayah badeh, anya Jises badeh, asehek tiri lau rayah, iri abudon i buku, iri badeh, kamekes bahun, ma katikahei iri Rom ka-au, ma ta kandriyen doh kameh, iri winiyan tahani san ta Kindrei, winiyan amekes tondrok asahan kon munyak.\f* \v 13 Bwena handru kala Jon basahan bwe le, iri sahou mari ta Moses hawe iri propet badeh, leheya saba lakou Kindrei anya kamekes. \v 14 Ya buku none ado anya kanuhun, ado katunuhun kamwenen. Buk ndrabun ta Kindrei anya, propet Alaija kameh eme. Ya iy asehek nyala Jon amwenen. Iy badeh, ndramak nane nyaran Alaija, iri mene asehek anya, iy kameh eme. \v 15 Ou are lau ndranyem udu aliy, ou anuhun. \p \v 16 “Arile, jo kasehek iri lau na len dah ki buku sah handru? Iri badeh, i buku none le iri nah nadu bwisik manyah areu mada ba-en. Ra-on arah i ta ra-on i buku doh, \q1 \v 17 ‘Aso oloh bala eu ta molak ewek tado, \q1 arile ado bada mana bwe; \q1 ya aso ayah wari ta kabek, \q1 arile ado bataya bwe.’” \p \v 18 Jises leheya kati sahou sokek i buku doh, “Kala Jon mene eme, iy abeles iy ta nyamon ta iy kedeu budon tan boto-on kili ta Kindrei, ma iy ba-un gwa waen bwe, ma iri lau anya, ‘Aha sanuhun ndramak kede-eh, ndri-iy. Malawin ndra-in ereu la-un!’ \v 19 Ya, jo Nadu Ndramak Awas, jo eme aimon nyamon, ma a-un gwa waen hawe iri lau. Eme ma iri lau asehek jo i buku doh, ‘Aden, aha katou iy ndramak ta aimon nyamon tinan, ma iy ndramak ta a-un gwa waen solo-an labai. Iy ndramak ndra-in labai. Tasah handru iy amekes kawas hawe iri lau ta akohok takis, ma iri lau ba-en hamon ta batanau ta Moses bwe?’ Ehe, iri amekes sahou i buku doh. Arile, are lau mwan ma badih ale idih ta budon ta Kindrei, iy kameh amekes kandriyen mwasin, ya iri lau kameh atana iri buku none ndramak doh edek san mwasin handru.” \s1 Jises ibolosen tiri lau ale batubuni ndrine iri bwe \r (Luk 10:13-15) \p \v 20 In bolo iri kon tinan ra-on mene, Jises amekes lahou tinan udu mada iri, arile iri batubuni ndrine iri bwe, eme Jises ibolosen ili tiri lau badu kon tinan nane doh. \v 21 Iy tiye i buku doh, “Ado lau badu kon Korasin hawe ado lau badu kon Betsaida, ado katou! Sisi-in tinan labai kameh ewek bwele-e ado. Tasah, ki buku none lau ra-on mene kala kon tinan Tair hawe Saidon ma kamekes lahou tinan buku none jo ndramekes ereu ndrokowa ado, sebwe ndra bwena iri lau badu kon ma lubuk doh ndrasin awin bokodon, ma ndratahi iri na koloweh, ta leheya buku none iri tikisiy handru ta kandriyen ndra-in tiri mene, iri ndrabwidiy. \v 22 Arile, jo tiye tado na dah, na len Kindrei le tanan ta adeu lau ala ta mada sahou, ado kameh bwese maha-an udu bwele-en labai ja ta kon Tair hawe Saidon. \p \v 23 “Ya aha lau badu Kapena-um, sebwe iri lau ra-on ja kameh bwese nyara ado ili loken ili kandrah nadeh? Bwe handru en! Kindrei kameh akahei ado ala bolo jih, kon tiri lau ndra-in amak ado aliy. Tasah, buku none iri lau kala kon Sodom ma kamekes iri lahou tinan buku none jo amekes ereu ndrokowa ado dah, sebwe Sodom ereu kede-eh kahis le nadeh! \v 24 Eme ma jo tiye tado amwenen. Hamon na len Kindrei le tanan ta adeu lau ala ta mada sahou, maha-an asahan tado kameh sakalawi ja maha-an mene asahan tiri lau badu Sodom. \m Tasah, ado atou iri lakou mari jo amekes, arile ado batehei budon boto-on ba-en hamon tek bwe.” \s1 Jises anya, “Ado kame hawek ma kamunyau” \r (Luk 10:21-22) \p \v 25 Kala doh Jises tiye buku doh, “Tama, ou Laban badu munyak ma kandrah. Jo masiye ou! Tasah, ou tone lakou dah, ta mada iri lau ta tanan, ma hawe iri lau anya iri tanan labai, ya ou leheyani i tiri nah, tana iri lakou bwe. \v 26 Ehe, idoh asahan na seken tam le.” \p \v 27 Eme ma, Jises asehek ili ja buku doh, “Tama ndratehei lakou mari ndrame minek. Ya ari ndramak ja winiyan bala tanan jo bala mwasin bwe. Tama le ari tanan jo udu mwasin labai. Ya ari ndramak ja winiyan bala tanan tama bala mwasin bwe; jo nadun le ari tanan iy, hawe oro lau le jo ndranyowonyani oro ndrala mada taman, oro le tana oro tama. \p \v 28 “Aha lau mwan ma badih abo gok boto-on labai ta asahan mwasin ereu mada Kindrei, ma akohok maha-an labai, aha mari kame hawek, ma jo kabwidi aha kamunyau. \v 29 Aha kakohok tanan tek, ma ka-en hamon ta sahou tek, buku none le bulumakau udu le ya taman aseu kei ranah i tondreh in balen ta amekes iy aliu iri lakou. Ehe, aha kakohok tanan udu tek, tasah jo amekes lakou i san ta manamun i tiri lau mwan ma badih, ma jo babolosen ma basobolon ari ndramak bwe. Ya iri lakou tek kameh bamekes maha-an bala ta ari ndramak bwe, ya manyah taha kameh udu mwasin. \v 30 Ehe, lakou mari jo ndratiye taha, aha ka-en hamon ta aliy; idoh boto-on handru bwe, ya lakou mari jo edeu ewek taha ta bwese badeh, maha-an handru bwe.” \c 12 \s1 Jises anya, “Jo atondrok len ta amunyau” \r (Mak 2:23-28; Luk 6:1-5) \p \v 1 Ano, udu bolo len ari ta amunyau, Jises hawe oro lau tan adek bolo bilin ari ta wit. Oro lau tan amak son, ya oro abwe-eh buwa iri wit, ma oro aimon. \v 2 Iri lau Parasi atou lakou nane doh, ma iri abolosen i ta Jises buku doh, “Hei, ou anuhun! Oro lau tam abwe-eh buwa wit na len ta amunyau. Kandriyen doh ndrabun handru ta amekes na len ta amunyau.”\f + \fr 12:2 \ft Batanau tiri Juwis badeh, ta iri samekes gok udu bolo len ta amunyau. Gok ari, batanau tiri baso-ok iri ta amekes bwe badeh, ta atukum nyamon marakon uni. Ou winiyan anyolom udu bolo tarou ta Eksodus kalan 34:21. Iri Parasi badeh, asehek i buku doh, iri lau ta Jises badeh, ba-en hamon ta batanau doh, bwe. \f* \p \v 3 Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen ta kundruh ta lakou mene kabin Debit mesekei bwena bwe nadeh? Jo asehek ta lakou kala Debit hawe oro lau tan mene amak son. \v 4 Ya, iy ili bolo asiu ta Kindrei, ya kuhi jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Ehe, Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon. \v 5 Ya, sebwe aha banyolom sahou ereu bolo batanau malen bwe nadeh? Anya iri pris badeh kabo gok bolo asiu tinan ta Kindrei na len ta amunyau, idoh iri ba-en hamon ta sahou na len ta amunyau bwe, arile idoh kandriyen ndra-in bwe. \v 6 Arile, jo tiye tado, ndramak ari in dah, iy sakalawi ja asiu tinan ta Kindrei, ma kandriyen ta len ta amunyau ale. \v 7 Sahou ta Kindrei ereu bolo buk ndrabun anya, \q1 ‘Jo baso-ok salom laleyah aha amekes eme tek bwe, \q1 arile jo aso-ok handru aha kamekes kandriyen ta tikisiy ki ta ndramak ari ja.’ \rq Hoseya 6:6\rq* \m Buku none aha tana aha kati sahou ta Kindrei doh, sebwe aha winiyan babolosen, ma bamekes sahou ndra-in bala bada ari ndramak iy kandriyen ndra-in badan bwe. Arile bwe, aha tanan kati sahou dah handru bwe. \v 8 Jo asehek tado, oro lau tek badeh, babwidi ari kandriyen ndra-in bwe, tasah jo Nadu Ndramak Awas, ya jo tama len ta amunyau.” \s1 Na bolo len ta amunyau Jises mesekei ndramak ari minen ndra-in amwenen \r (Mak 3:1-6; Luk 6:6-11) \p \v 9 Ano Jises ruwani kon nane, ma iy ili bolo asiu ari tiri ta atukum. \v 10 Ya in bolo asiu ta atukum nane iy ndruni ndramak ari minen raka ndramak. Iri lau ra-on anya kadeu Jises kili ta mada sahou, eme ya oro ndremenyani iy i buku doh, “Taha winiyan amekes iri lau abo sik amwenen na len ta amunyau, deh bwe?” \p \v 11 Jises ndremenya oro anya, “Ya ki buku none ari tado tan ari sipsip, ya sipsip nane kataku ki bolo lek na len ta amunyau. Ado tana ado, sebwe ndramak nane winiyan tawi sipsip, ma aluwi iy eme loken nadeh? Handru, iy ibo gok na len ta amunyau, tasah buku none iy bamekes bwe, sipsip doh kameh imek, neh? \v 12 Ya ado kanuhun! Iri lau mwan ma badih badeh, sakalawi sipsip ja. Eme ya, mwasin ta aha kamekes kandriyen mwasin, ma kaseben iri lau abo sik na len ta amunyau.” \p \v 13 Iy tiye toro ano, iy tubuni iy ma iy tiye i ta ndramak nane minen ndra-in, iy anya, “Minem kales!” Nawin bwe ndramak nane minen ales, ma minen amwenen buku le minen raka mwasin nane. \v 14 Jises bwidi buku doh, ma iri Parasi ruwani asiu ta atukum, ma iri asehek ma atilik nyala iri ta takaleh san ta kadai Jises kimek. \s1 Jises, ndramak ta amekes gok ta Kindrei handru \p \v 15 Kala doh Jises i tanan budon tiri Parasi ta oro anya kamekes saba lakou i tan, eme iy ruwani kon tinan nane doh, ma iy edek iu ili. Iri lau mwan ma badih solo-an an hamon tan, eme ma iy mesekei iri mari amwenen ta sik tiri. \v 16 Eme Jises batanau iri ta iri sasehek nyaran sala ta ndramak ari ja, ma sasehek nyala gok iy ndramesekei ta aseben iri. \v 17 Iy mesekei lakou doh in hamon ta sahou randra Kindrei mene tiye ta propet nyaran Aisaya. Iy mene torowenei i buku doh, \q1 \v 18 “Iy ndramak dah, ta amekes gok tek handru. Jo aso-ok iy handru, ndrinek badeh, sekesek tan handru. \q1 Jo kameh atehei Malawik Mwasin i la-un, ya iy kameh asehek nyala gok tek mwasin ta jo kameh akohok iri lau mari badu kon munyak dah ame hamon. \q1 \v 19 Iy winiyan babolosen ma barah laleyah bwe. Iri lau mwan ma badih winiyan banuhun iy asehek sahou laleyah ereu madasan, ma ereu mada baen bwe. \q1 \v 20 Bale banap badeh, boto-on bwe, ma anya kibok, iy winiyan batubwaniy bwe, ma iy winiyan basemete-ei sun ale banya bamwenen bwe. \q1 Iy kameh ibo gok udu le winiya le iy mesekei iri lau mari atana iri gok jo amekes ta akohok iri ame hamon. \q1 \v 21 Ya iri lau mwan ma badih badu boho kamen tiri Isra-el bwe, kameh atehei budon i tan, ma iri kameh abe-en iy akohok iri ame hamon.” \rq Aisaya 42:14\rq* \s1 Iri Parasi anya Jises ibo gok hawe Belsabul \r (Mak 3:20-30; Luk 11:14-23; 12:10) \p \v 22 Kala doh oro lau ra-on kuhi ndramak ari malawin ndra-in udu la-un. Oro kuhi iy eme hawe Jises. Ndramak doh nane iy madan bwe, ma bohon bwe ale. Eme Jises mesekei iy amwenen, ma iy anyolom na madan ma asehek sahou na bohon ja. \v 23 Iri lau mari boho iri asak, ma iri anya, “Sebwe ndramak kede-eh nadu tubu kabin \m Debit ale taha abe-en iy ta eme kede-eh nadeh?”\f + \fr 12:23 \ft Ou winiyan anyolom sahou udu bolo tarou ta Metiu kalan 9:27. \f* \p \v 24 Arile, oro Parasi anuhun iri lau nane asehek sahou i buku doh, ma oro anya, “Bwe, iy ndramak nane Krais bwe, iy ndramak nane atikah malawin ndra-in ereu la-u ndramak nane iu badeh, na boto-on ta Belsabul, tinan tiri balik.”\f + \fr 12:24 \ft Belsabul doh badeh, nyara Satan ari ja. \f* \p \v 25 Arile Jises ndrandrei budon toro, ndra-in i tan, eme iy asehek i toro i buku doh, “Buku none iri lau badu kon munyak tinan kapou iri ranah i len, ma ranah i len, ma iri amekes bahun, iri lau badu kon doh kameh andra-i. Ya buku none iri lau badu kon rakon, deh badu boho kamen ra-em aseker, ma amekes bahun, iri lau doh winiyan bales boto-on bwe. \v 26 Ya ki buku oro lau ta Satan katikah Satan, ma oro lau tan kapou oro ki lumuk, ya ki buku sah handru iy tan boto-on ta atondrok iri lakou? \v 27 Ya, ki buku none Belsabul aseben jo handru, ma jo katikah iri malawin ndra-in, ya are lau handru aseben iri lau taha ta atikah malawin ndra-in? Sebwe balik aseben oro nadeh? Iri gok oro lau tado amekes, leheya buku none sahou tado badeh, bamwenen bwe. \v 28 Arile ado kanuhun, i buku none Malawin Ndrabun ta Kindrei aseben jo ta atikah iri malawin ndra-in, ado ndratana ado kabwe, Kindrei ndrame ta atondrok aha lau mwan ma badih badu Isra-el. \p \v 29 “Ya buku none ari ndramak anya ki bolo asiu ta ari ndramak boto-on, ma kabahana iri lakou tan, iy kameh amekes sah handru? Ma bwena handru iy kameh sawei iy ndramak boto-on nane na malou boto-on. Ano, iy winiyan akohok iri lakou ereu asiu ta ndramak nane. \p \v 30 “Ya eme are lau iy kawas tek bwe, iy ndramak ta amekes bahun eme tek. Ya are lau baseben jo ta atukum iri lau kame ka-en hamon ta Kindrei bwe, iy kameh atikah iri lau ka-en ndra len ta Kindrei. \v 31 Eme ma ado kanuhun, ya jo kasehek tado, Kindrei kameh mani kandriyen ndra-in, ma sahou ndra-in mari lau mwan ma badih amekes. Arile are lau aluhe i bada nyara Malawin Ndrabun, Kindrei winiyan bamani kandriyen ndra-in tan doh bwe. \v 32 Ma are lau asehek sahou ndra-in i bada Nadu Ndramak Awas, Kindrei le kameh winiyan mani kandriyen ndra-in tan. Arile, are lau amekes sahou ndra-in i bada Malawin Ndrabun, Kindrei winiyan bamani kandriyen ndra-in tan doh na len dah, deh na len eme hamon, bwe-en.” \s1 Jises anya kei ndra-in kameh ato-ou buwa kei ndra-in \r (Luk 6:43-45) \p \v 33 Jises asehek sahou ra-on ja i buku doh, “Buku none kei mwasin, buwa kei doh kameh mwasin ale. Arile, buku none kei doh ndra-in, buwa kei doh ndra-in ale. Lau kanyolom buwa kei mwena, hamon iri barala tana iri buku kei doh mwasin deh bwe. \v 34 Idoh buku le aha Parasi. Aha lau buku le mwak ndra-in, ya aha winiyan bamekes sahou mwasin na boho aha bwe. Tasah, boho ndramak badeh, asehek iri budon solo-an ale idih ereu bolo ndrinen amwenen. \v 35 Buku none ndramak mwasin ma budon mwasin solo-an idih ereu ndrinen, idon adeh, iy ale amekes kandriyen mwasin ale. Iri lau ndra-in, tiri budon ndra-in solo-an ereu ndrine iri, ma iri ale amekes kandriyen ndra ndra-in le. \v 36 Arile jo tiye tado, na len hamon Kindrei le tanan ta edeu lau ala ta mada sahou ma anuhun sahou ta lau mari, iy kameh bwetenei iri sahou ndra-in iri mene ndrasehek, iy kameh anuhun sahou mari iri asehek laleyah. \v 37 Ehe, sahou doh handru! Tasah, Kindrei kameh aleben aha ta sahou mene aha ndrasihidiy. Ma, na idoh Kindrei kameh aloh aha lau mwasin deh lau ndra-in, kandriyen tan ndra-in udu badan.” \s1 Iri lau ra-on ndremenya Jises ta amekes lahou tinan \r (Mak 8:11-12; Luk 11:29-32) \p \v 38 Jises asehek sahou ano, eme oro lau ra-on ta leheya kandriyen tiri Juwis hawe oro Parasi ra-on asehek sahou i ta Jises i buku doh, “Ndramak ta leheya, aso aso-ok ou amekes ari kalem ta leheya eme taso, buku ou amekes gok ta Kindrei handru.” \p \v 39 Arile Jises asumon i buku doh, “Iri lau mwan ma badih ta len dah badeh, iri ndra-in handru, ma iri batehei ndrine iri handru bala ta Kindrei bwe. Iri ndremenya ta anya katou kalem, arile winiyan bwai. Kalem ari le kameh iri atou, kalem ta propet Jona. \v 40 Ehe, Jona badeh, in bolo ndrine ni tinan in gwek na taloh len ma taloh ben. Idoh ya jo Nadu Ndramak Awas ale kameh, jo kameh ereu bolo lek na taloh len ma taloh ben.\f + \fr 12:40 \ft Ou winiyan anyolom udu bolo tarou ta Jona kalan 1:17. Buk ta propet Jona asehek kundruh ale, ta iy ili atiye sahou ta Kindrei ili tiri mwan ma badih badu kon tinan Ninibe, eme ma iri anuhun sahou tan, ma iri tubuni ndrine iri ili ta Kindrei. Ou winiyan anyolom ja udu bolo tarou ta Jona kalan 3:5. \f* \v 41 Na len Kindrei le tanan ta edeu iri lau ala ta mada sahou, iri lau mwan ma badih badu Ninibe ale kameh ales ala ta mada sahou, ma iri kameh asehek sahou boto-on labai i taha lau ta len hamon dah. Tasah, iri lau badu Ninibe anuhun sahou Jona asehek, ma iri tubuni ndrine iri. Na idah, ndramak ari ereu ndrokowa ado dah, sakalawi ja Jona, arile ado banuhun sahou tan, ma batubuni ndrine ado bwe! \v 42 Na len hamon ta Kindrei kameh atehei iri lau mari badu kon munyak dah ala ta mada sahou, badih tinan kabin badu kon tinan Seba, kon tan in le loboho kum, kameh ales ereu mada sahou, iy kameh asehek ma nyowonya iri kandriyen ndra-in taha lau ta len hamon dah amekes. Tasah, iy badih kabin doh ereu len labai ta Isra-el, arile iy eme ta anuhun le kabin Solomon leheya iri tanan mwasin tan. Na dah, ndramak ari ereu ndrokowa ado, iy sakalawi ja Solomon, arile ado banuhun sahou bwe, ma ado batubuniy ndrine ado bwe.” \s1 Jises anya malawin ndra-in ndrame hamon ja \r (Luk 11:24-26) \p \v 43 Jises asehek sahou ja anya, “Buku none ari ndramak tikahei malawi balik ereu la-u ari ndramak iu, malawi balik doh iu laleyah i bolo kon lomale an ta iy katakaleh ari kon ja, iy kili aliy. Arile, iy winiyan batou ari kon mwasin ta iy ili aliy bwe. \v 44 Iy kameh asehek, ‘Jo ndrawoyah ai, sebwe jo kili hamon kili asiu tek bwena mene jo ereu aliy.’ Eme iy ili hamon anyolom asiu nane ereu laleyah, ndrasahan ha-un, ma ndranyosowani kabwe. \v 45 Ehe, iy atou buku doh, eme iy ili hamon ja andrei oro malawi ndra-in ndro taloh ja sakalawi iy ta amekes kandriyen ndra-in. Ya oro kameh ala bolo asiu nane. Ya eme ndramak dah, bala buku bwena mene, ja bwai, iy ndrandra-i labai ai. Jo asehek tado, kandriyen buku doh kameh asahan taha lau mwan ma badih ndra-in ereu kon munyak na len dah.” \s1 Jises anya are lau tinen ma nadu tinen handru \r (Mak 3:31-35; Luk 8:19-21) \p \v 46 Jises asehek sahou hawe iri lau mari nane kahis le, tinen hawe oro nadu tinen ame ales areu manan. Oro anya kasehek sahou hawen. \v 47 Ndramak ari asehek tan anya, “Jises ei, tinem ma hawe nadu tinem oro ales ado manan, oro anya kasehek sahou hawem.”\f + \fr 12:47 \ft Iri lau ta tanan rayah anya, sahou udu bolo tarou ta Metiu kalan 12:47, doh badeh, Metiu amwenen batorou bwe, arile ndramak ari ja badeh, atorou hamon labai, ta amekes sahou asahan i le randra i buku le tarou ta Mak kalan 3:32 ma tarou ta Luk kalan 8:20. \f* \p \v 48 Jises asehek ta ndramak nane, “Ado anya tine handru, are lau bah? Ya nadu tine oro handru, lau heh bah?” \v 49 Eme Jises nyowonya ili toro lau tan ma iy anya, “Jo asehek tado, tine ma nadu tine oro handru asah idah! \v 50 Tasah, are lau ale in hamon ta so-ok ta tama in kon tan udu kandrah, iri badeh, nadu tine mwan ma badih handru, ma tine handru.” \c 13 \s1 Sahou sokek ta ndramak atah wit ereu bolo bilin tan \r (Mak 4:1-9; Luk 8:4-8) \p \v 1 Na le len nane Jises ruwani asiu nane, ma iy ili manyah udu kapa gwa li Galili. \v 2 Iri lau solo-an atukum ta anuhun iy. Eme iy ili manyah in bolo ndron ra-ei in gwa, ya iri lau mari nane dah, ales an kapa gwa an amik ai. \v 3 Jises asehek sahou sokek solo-an i tiri.\f + \fr 13:3 \ft Idoh badeh, i buku sahou taloh ai, badu bolo oro sahou lawe-en ma limeh nane Jises asehek udu bolo tarou ta Metiu. Sahou dah badeh, udu ta kalan 13:3-52, ma hawe iri sahou sokek solo-an ta kandriyen ta tondrok ta Kindrei.\f* Iy asehek i buku doh, “Ado kanuhun! Ndramak ari ili sabara badu wit ili bolo bilin. \v 4 Iy akeh ili, badu wit ra-on taku in san, ya iri sirih ame aniy. \v 5 Ra-on taku in bwele-e bek, ndren solo-an mwe-en bwe, ma badu wit ateh suwi. \v 6 Arile, an eme loken ma iy anya boto-on, iy sulumwi wit nane, tasah kandron bala bolo munyak handru bwe, eme ma iy ame-er mara-ei ma imek ai. \v 7 Ya badu wit ra-on taku i bolo iri malou bobodon, ma malou bobodon nane ateh eme loken, ma tubuluhi wit nane ma iy bato-ou buwan bwai. \v 8 Arile, badu wit ra-on taku i bolo ndren mwasin, ma iy ato-ou buwan. Ra-on ato-ou rinek (100), ra-on ato-ou ndro hanoh (60), ra-on ato-ou tonoh (30). \v 9 Ou are lau ndranyem udu aliy, ou anuhun.” \s1 Katin handru ta Jises akeh sahou sokek \r (Mak 4:10-12; Luk 8:9-10) \p \v 10 Hamon ta aliy, oro lau ta Jises ame ndremenya i buku doh, “Tasah handru ou amekes sahou sokek ili tiri lau?” \p \v 11 Ma Jises asumon i buku doh, “Kindrei aseken ado lau tek katanan iri sahou mene aton ta nyala tondrok ta Kindrei. Arile iy baleheya bala tiri lau ra-on ja bwe. \v 12 Buku none ari ndramak tanan tan tinan udu aliy, iy kameh akohok tanan rasan ja i la-un. Arile, ndramak tanan tan sese le, idah kameh kuhiy mari iu. \v 13 Na kati budon le don adeh, jo amekes sahou sokek i tiri, tasah: \q1 ‘Mada iri asak, arile iri batou saba lakou iri atou bwe. \q1 Iri anuhun sahou, arile iri tanan moson ta aliy bwe.’ \rq Aisaya 6:9\rq* \m \v 14 Ya iri lau don adeh, sahou randra ta propet nyaran Aisaya asahan handru. Iy mene torowenei i buku doh, \q1 ‘Ado kameh anuhun sahou san solo-an, arile ado kameh winiya bala tanan kati sahou handru bwe. Ado kameh anyolom san solo-an, arile ado kameh winiyan baseleyani ari lakou bwe. \q1 \v 15 Tasah, ndrine iri ndraso, ma ndranye iri ndrawoyah ta anuhun sahou. Ya iri ndraturuki mada iri. Kora-on mada iri katou, ma ndranye iri kanuhun, ma budon tiri ki tanan, ya iri katubuni ndrine iri keme tek, ma jo kabwidi iri kamwenen ja.’ \rq Aisaya 6:9-10\rq* \m \v 16 Arile ado kasekesek le ka-en. Tasah, mada ado anyolom iri lakou, ma ndranye ado aleu ale ta anuhun sahou tek. \v 17 Jo asehek sahou handru ewek tado. Bwena mene propet solo-an, ma iri lau solo-an an hamon ta Kindrei aso-ok handru ta atou iri lakou aha atou na dah. Arile, iri batou bwe. Iri aso-ok handru ta anuhun iri sahou aha anuhun jo asehek. Arile iri banuhun bwe.” \s1 Jises asehek eme lewan moson ta sahou sokek \r (Mak 4:13-20; Luk 8:11-15) \p \v 18 Jises asehek sahou ja i buku doh, “Ado kanuhun moson ta sahou sokek ta ndramak akeh buwa wit ili bolo bilin tan. \v 19 Iri lau rayah anuhun sahou mwasin nyala tondrok ta Kindrei, arile iri tanan katin handru bwe. Iri buku none le buwa wit taku ereu san, ya balik eme kuhi iu suwi handru sahou mwasin Kindrei tahiy ereu budon tiri. \v 20 Ya iri buwa wit taku in bwele-e bek, i buku le iri lau anuhun sahou, ya nawin bwe iri kuhiy ma iri sekesek ta aliy. \v 21 Arile buwa wit doh kandron aliy bwe, ya i bareu luwen bwe. Ya i buku none ndrine sen asahan deh bwe-em ndra-i asahan, tasah ta sahou ta Kindrei, ya idah kameh, suwi suwi iri taku. \v 22 Ya iri buwa wit taku ereu ndrokowa iri malou bobodon, idoh leheya iri lau ale anuhun sahou ta Kindrei, arile iri abudon boto-on ta lakou badu kon munyak. Ya iri abudon boto-on labai ta atukum iri luk, ma iri lakou ra-on ja. Ya idoh sokei sahou ta Kindrei eme ma bwidi iri bato-ou sali iri bwe. \v 23 Arile, iri buwa wit ale taku in munyak mwasin badeh, i buku le iri lau anuhun sahou ta Kindrei, ya iri tanan katin handru. Eme ya iri ato-ou sali iri, ra-on ato-ou rinek (100), ra-on ndro hanoh (60), ra-on tonoh (30).” \s1 Sahou sokek ta bwidiu ndra-in ateh udu bolo bilin \p \v 24 Jises asehek sahou sokek ari ja i toro. Iy asehek i buku doh, “Tondrok ta Kindrei i buku none le ndramak ari atah buwa wit mwasin le udu bilin tan. \v 25 Arile iri lau amadin, ndramak ta bahun i ta ndramak nane eme, ya iy tahi iri buwa bwidiu ndra-in ereu ndrokowa wit, ano iy ndra-au. \v 26 Hamon wit nane asahan hawe bwidiu ndra-in kone uru i le se. Eme ya wit anya kato-ou buwan, iri lau ta gok atou bwidiu ndra-in ereu ndrokowa wit. \v 27 Eme ma, iri lau ta gok ala hawe tama bilin, ma asehek tan, ‘Ndramak tinan, aso anya ou mene tahi le badu wit in bolo bilin tam. Buku sah handru ya bwidiu ndra-in doh ateh ale?’ \p \v 28 “Ya tama bilin nane asehek i toro, ‘Ari ndramak ta bahun ndrabwidi kandriyen doh.’ \p Eme ya iri lau ta gok ndremenyani iy, ‘Ou aso-ok aso kala kasudi bwidiu ndra-in nane?’ \p \v 29 “Arile iy anya, ‘Ndri-iy, kora-on ado asoh bwidiu ndra-in nane ado kasudi wit ale. \v 30 Mwasin, ado karuwani uru ma la-uh winiya le len ta akohok nyamon. Na len ta akohok nyamon jo katiye toro lau ta amekes gok doh: Ado katukumwi bwidiu ndra-in bwena, ya kasawei ki se ta asun i jih. Arile ado katukumwi iri wit keme bolo asiu ta nyamon tek.’” \s1 Sahou sokek ta buwa kei ari aloh mastet \r (Mak 4:30-32; Luk 13:18-19) \p \v 31 Jises asehek sahou sokek ari ja i toro. Iy asehek i buku doh, “Tondrok ta Kindrei badeh, i buku buwa kei ari iri aloh mastet. Ndramak ari kuhi buwa mastet ya iy ili tahiy in bolo bilin tan. \v 32 Buwa mastet badeh, nadu bwisik handru. Arile buku none iy ateh eme tinan, iy kameh sakalawi ja iri buwa kei badu bolo bilin nane. Iy asahan buku ra-ei kei tinan, ya iri sirih atah ame amekes awi iri udu bada andran.” \s1 Sahou sokek ta yis \r (Luk 15:20-21) \p \v 33 Jises asehek sahou sokek ari ja. Iy anya, “Ado kanuhun! Tondrok ta Kindrei kameh asahan buku none yis. Ari badih kuhi yis nane ma iy tubuni i hawe rahak ndrom tinan palawa. Iy tubuni ili ili winiya palawa mara-ei apus eme loken.” \s1 Kati iri lakou ya Jises asehek iri sahou sokek le \r (Mak 4:33-34) \p \v 34 Iri sahou nane Jises amekes i tiri lau, iy amekes i sahou sokek le. Iy basehek ari sahou bame lewan bala tiri bwe. Iy asehek sahou sokek le. \v 35 Na kandriyen doh, Jises mesekei eme handru sahou randra propet ndratiye in bolo buk ndrabun. Iy tiye i buku doh, \q1 “Jo kameh asehek sahou sokek ewek taha, ma jo kameh asehek kundruh ta iri lakou solo-an bwena mene aton, kala munyak asahan, eme isos na len dah.” \rq Wari 78:2\rq* \s1 Kati sahou sokek ta bwidiu ndra-in \p \v 36 Jises ruwani iri lau mari nane, ma iy i bolo asiu ra-em. Kala iy ili bolon, oro lau tan ame, ma asehek anya, “Aso aso-ok ou asehek keme taso moson ta sahou sokek ta bwidiu ndra-in ateh in bolo bilin.” \p \v 37 Eme Jises anya, “Abo, ndramak nane ta atah wit in bolo bilin badeh, jo dah, jo Nadu Ndramak Awas. \v 38 Ya bilin badeh, kon munyak dah. Buwa wit badeh, iri lau mwasin badu hawe Kindrei. Ya bwidiu ndra-in doh badeh, iri lau ndra-in badu hawe balik amwenen. \v 39 Iy lau ta bahun i ta Kindrei eme tahi buwa bwidiu na ben, idoh, balik. Ya len ta akohok nyamon kameh, leheya buku none munyak dah anya kano ai. Iri lau ta gok badeh, iri angelo ta Kindrei. \p \v 40 “Iri lau atukum iri bwidiu ndra-in nane ma asun i jih, i buku none le iri angelo kameh amekes kandriyen buku le aliy, buku none Kindrei anya kasun kon munyak dah. \v 41 Jo Nadu Ndramak Awas, jo kameh atehei oro angelo tek ame akeh iu iri lakou mari ereu mada Kindrei ale amekes budon ta lau andra-i, ma hawe iri lau ta amekes kandriyen ndra-in. \v 42 Ma oro kameh akahei iri ala bolo jih ale winiyan bamak bwe-en. In bolo jih doh kameh oro aden andra-i labai, ma oro asenyer lihi oro kameh ili ta isi tinan labai kameh oro akohok. \v 43 Arile, na len doh kameh, oro lau nane a-en hamon ta kandriyen ta tama oro Kindrei kameh ala bolo tondrok tan, ma lomada oro kameh anya buku an anya. Are lau iri anuhun sahou dah, iri kabudon kamwenen.” \s1 Sahou sokek ta ko-on tone ereu bolo ndren \p \v 44 Jises asehek sahou ja anya, “Tondrok ta Kindrei kameh asahan buku none le ko-on iri lau ra-on tone ereu bolo bilin. Ndramak ari eme a-eh ndren ma iy atou, ma iy tone ja. Iy sekesek labai, ya ili mada ba-en, ma iy atehei iri lakou tan mari i ba-en, ma iri lau sihinei iu. Ya iy ili sihinei bilin nane ko-on ereu bolon, tasah idah ko-on nane ndrala tan ma iy winiyan akohok.” \s1 Sahou sokek ta sa-un sihinen tinan labai \p \v 45 Jises asehek sahou ja, “Sahou sokek ari ja i buku doh: Tondrok ta Kindrei i buku none ndramak ari ta amekes ba-en, anya katakaleh sa-un mwasin. \v 46 Ya buku iy atou ari sa-un mwasin handru, eme ya iy ili atehei iri lakou tan mari i ta ba-en, ma iy ili sihinei sa-un mwasin nane. Tasah, iy aso-ok sa-un nane handru sakalawiy iri lakou tan mari.” \s1 Sahou sokek ta kubwin \p \v 47 Jises asehek kundruh ili ja: “Sahou sokek ari ja i buku doh. Tondrok ta Kindrei i buku none le ari kubwin iri lau akahei ili bolo gwa li. Ya kubwin nane akohok iri ni buku liliy. \v 48 Ano kubwin irek, iri lau aluwi eme babi. Ya oro manyah ma atukum iri ni mwasin i bolo bwak. Arile iri ni ndra-in oro akeh iu. \v 49 Hamon, buku Kindrei anya kon munyak dah ano, idah kameh asahan tiri mwan ma badih ale. Oro angelo kameh ame akohok iri lau ndra-in ereu ndrokowa iri lau mwasin ale areu hamon ta Kindrei. \v 50 Ya oro kameh akahei iri lau ndra-in nane ala bolo jih ale winiyan bamak bwe-en. In bolo jih doh kameh oro aden ma asenyer lihi oro ta isi tinan labai oro atona.” \p \v 51 Ya Jises ndremenya oro i buku doh, “Sebwe ado tana ado kati sahou dah deh bwe?” \p Ya oro asumon i buku doh, “Ehe, aso tanan.” \p \v 52 Eme ya Jises asehek i toro i buku doh, “Abo, jo asehek tado, are lau iy tanan ta batanau malen ta Moses, ma iy ndra-en baha tondrok ta Kindrei, iy kameh asahan buku none tama asiu ra-em tinan. Ma iy winiyan ili bolo asiu ya akohok iri lakou mwasin sowan tinan, ma tiyani iri lakou ha-un, ma hawe iri lakou malen eme lewan.” \s1 Iri lau mwan ma badih badu Nasaret atehei kona iri i ta Jises \r (Mak 6:1-6; Luk 4:16-30) \p \v 53 Jises asehek iri sahou sokek nane ano, iy iu i len ta kon nane, \v 54 ya iy ili kati kon tan amwenen. Ya iy ili bolo asiu ta atukum tiri ma iy leheya sahou ta Kindrei i tiri. Iri anuhun sahou tan, ma mani iri atur, ma iri ndremenya, “Iy ndramak dah akohok tanan ereu heh? Ya are lau edeu boto-on i tan, ma iy amekes iri lahou tinan solo-an? \v 55 Taha tana taha, iy ndramak dah nadu ndramak ari ta atah asiu. Ya tinen Mariya, ma Jemis hawe Josep ma Saimon hawe Judas oro, nadu tinen. \v 56 Ya oro nadu tinen badih mari areu hawe taha kede-eh. Eme ya buku sah handru, ya iy amekes iri lakou doh?” \v 57 Oro asehek i buku doh, ma oro atehei kona oro i tan. \p Arile, Jises asehek i toro, “Iri propet ta atiye boho Kindrei nyara iri tinan ereu kon mari. Arile ereu kati kon tan amwenen, ma ereu boho kamen tan amwenen iy asahan buku lau laleyah.” \p \v 58 Eme iy bamekes iri lahou tinan solo-an bareu kon dah bwe, tasah iri batehei budon tiri ba-en tan handru bwe. \c 14 \s1 Herot anya Jises badeh, Jon ta alomwa \r (Mak 6:14-29; Luk 3:19-20; 9:7-9) \p \v 1 Kala doh iri lau mwan ma badih badu kon Nasaret atehei kona iri i ta Jises, Herot Antipas ndramak ta in bwena ta kon tinan Galili, iy anuhun kundruh ta iri lakou Jises amekes. \v 2 Eme ya iy asehek ta iri lau ta gok tan, “Ndramak doh iy Jon ta alomwa le ai. Iy ndramak ja ereu bolo lek ndrame loken. Eme ya iy ndrakohok boto-on ta amekes iri lahou tinan doh.” \p \v 3 Ehe, Herot abudon buku doh. Tasah, bwena ndra-au o-on iy tiye iri tawi Jon ta alomwa, ma sawei iy ma atehei iy i bolo asiu lulik. Herot amekes doh, tasah iy sudi udu nadu tinen Pilip nyaran Herodiyas. \v 4 Eme ma Jon asehek ta Herot i buku doh, “Ou ndrandra-i tasah, ou sudi udu nadu tinem!” \v 5 Herodiyas aso-ok ta Herot kidi Jon. Arile, Herot bwalen ma iy inoh. Tasah, lau solo-an badu Isra-el atehei budon boto-on anya Jon badeh, propet. \p \v 6 Na len ari, iri kabin ra-on ame aimon nyamon hawe Herot. Na len oro ame atukum doh ta abudon len tine Herot tuwi iy. Ya na len doh, nadu Herodiyas badih eme idi mana ta amekes ndrine oro kabin nane kasekesek. Herot sekesek labai ta mana tan nane. \v 7 Eme ya iy edeu wurah i tan ma iy amekes sahou randra hawen i buku doh, “Jo tandrakan handru, saba lakou ou ndremenya jo ta aliy, jo winiyan atehei ewek tam.” \v 8 Eme ya iy ili ndremenya tinen ta iy kamekes ki buku sah handru. Tinen atehei budon i tan. Eme ya iy ili asehek ta Herot ma oro kabin nane, “Jo aso-ok ou adai Jon ta alomwa ma ou atehei batun ki bolo bwekei, ya ou atehei keme tek.” \p \v 9 Herot anuhun sahou doh ya ndrinen andra-i labai. Arile iy abudon ta iy nane ndratandrakan ereu mada oro kabin aimon nyamon hawen nane, ya iy bwalen akohok bwilima ta tobolowe sahou tan nane iy ndrasihidiy. Eme ya iy tiye toro lau tan ta bahun ta kala kabwidi buku le sahou ta badih nane ndrasehek. \v 10 Eme lau ta bahun tan ala ma iy sani bale Jon ereu bolo asiu lulik. \v 11 Eme ya iri kuhi batun ereu bolo bwekei raben eme, ma iri atehei i mine nadu badih nane, ma iy bwese-ei ili hawe tinen. \v 12 Ya oro lau ta Jon, badu hamon tan, ame bwese-ei bada kei le, ya oro ala ahi iy i lek ano oro ala tiye ta Jises. \s1 Jises nyohonei iri lau ma lamawa (5,000) \r (Mak 6:31-44; Luk 9:10-17; Jon 6:1-13) \p \v 13 Jises anuhun buku iri ndradai Jon ndramak, eme ma iy ruwani kon nane ma iy suni ndron ra-ei ili kon ari doh lau aliy bwe. Iy ma oro lau tan badu hamon tan le ala. Arile iri lau solo-an anuhun saba kon Jises ndrala aliy, ma iri ruwani kon tinan tiri ma iri adek ala takaleh iy. \v 14 Eme Jises anya ki amik, iy atou iri lau solo-an labai, ma iy tikisi iri, ma iy amekes iri lau bada iri ndra-in amwenen. \v 15 Kon abeyeh ya oro lau ta Jises ame tiye tan i buku doh, “Kon dah lau aliy bwe, ya mirihik an iu i andri ai. Ou tiye iri lau kede-eh ka-au kala bolo kon lau an aliy ma iri kasih niri nyamon.” \p \v 16 Arile Jises tiye toro lau tan i buku doh, “Tasah handru ya iri ka-au? Ado kadeu niri nyamon.” \p \v 17 Eme oro tiye tan, “Naso nyamon solo-an bwe, arile kada-ah limeh jabi ramen hawe ni ma la-uh le.” \p \v 18 Eme iy tiye toro, “Ado kandrei jabi ramen hawe ni nane keme minek.” \p \v 19 Eme ya Jises tiye tiri lau mwan ma badih ta kamanyah ka-en andri bada bwidiu. Eme iy kuhi jabi ramen ma limeh ma hawe ni ma la-uh nane, ya iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah ma iy edeu ili mine oro lau tan, ma oro lau tan adeu i niri lau mwan ma badih. \v 20 Iri mari aimon ma ndrine iri idih. Ya iri tukumwi tikibwah nane i se asahan bwak ma ronoh la-uh. \v 21 Kane iri lau mwan mara-ei aimon nyamon badeh ma lamawa (5,000), idoh bondrek iri badih ma nah bwe. \s1 Jises edek bwele-e gwa \r (Mak 6:45-52; Jon 6:16-21) \p \v 22 Eme Jises tiye toro lau tan kasandroh kala bolo ndron, ma oro ka bwena kala kapa gwa bilisiu. Ya iy le udu hamon ta atiye iri lau ka-au. \v 23 Iy tiye iri lau mari au ano iy le ari iu ili bwele-e mandrei, ta iy kasolom. Mada an amai iu i andri, iy le ari udu bwele-e mandrei nane. \v 24 Ndron ndra-au ndrala len labai, ma jor ale udu bwena eme ma bayau nyokoda ndron andra-i labai. \v 25 Mirihik boho len, Jises edek bwele-e gwa ili hawe oro lau tan nane. \v 26 Arile, oro atou iy edek bwele-e gwa, ma oro anoh andra-i labai, ma oro totoreh. Oro anya, “Nyam! Nyam!” Oro anoh ma oro arah andra-i labai. \v 27 Arile, suwi labai Jises aloh i toro i buku doh, “Ndrine ado kamunum! Jo, jo! Ado sanoh!” \p \v 28 Eme Pita asumon bohon i buku doh, “Laban, buku none ou handru eh, mwasin ou tiye, ya jo kedek bwele-e gwa kewek hawem.” \v 29 Eme Jises tiye i tan, “Ou ame.” Eme ya Pita ruwani ndron, ma iy edek bwele-e gwa ili hawe Jises. \v 30 Arile iy atou jor boto-on labai ya iy inoh, ma iy atuh sese ili bolo gwa, eme iy aloh i buku doh, “Laban, ou sebenei jo!” \p \v 31 Suwi labai Jises atehei minen ma tawi Pita. Eme iy tiye tan i buku doh, “Ou budon tam boto-on handru bwe. Tasah handru budon la-uh asahan tam?” \v 32 Eme uru ma la-uh sandroh ala bolo ndron, ma jor amondrei. \v 33 Eme ma oro lau areu bolo ndron nane asolom i ta Jises ma oro anya, “Handru labai, ou Nadu Kindrei handru.” \s1 Jises bwidi iri lau solo-an badu Genesaret amwenen \r (Mak 6:53-56) \p \v 34 Jises hawe oro lau tan ala bilisiu, ma oro asos loboho kon Genesaret. \v 35 Iri lau badu kon doh atou Jises, ma iri seleyani iy, ma iri atehei sahou ili kon mari badu mirihik, ma iri tiyani iri lau mari abo sik ame hawen. \v 36 Eme iri ndremenya Jises boto-on labai ta iy kalelei iri lau nane sik udu tiri katehei le mine iri kili kiri awin tan. Eme iri lau mari nane ateu awin tan, iri asahan amwenen ja. \c 15 \s1 Batanau ta Kindrei sakalawi sahou ta tubu taha iri \r (Mak 7:1-13) \p \v 1 Na len ari oro Parasi hawe oro lau ta leheya kandriyen tiri Juwis, ruwani Jerusalem ma oro ame atou Jises, ma oro ndremenyani iy i buku doh, \v 2 “Buku sah handru oro lau tam ba-en hamon ta sahou batanau mene iri tubu taha ndrasihidiy ndrame tataha bwena bwe? Buku none oro anya kaimon nyamon oro basikine mine oro bwe.” \p \v 3 Jises asumon oro i buku doh, “Buku sah handru ado an hamon ta budon ma kandriyen tado amwenen, ya ado ba-en hamon ta batanau ta Kindrei bwe? \v 4 Kindrei anya, \q1 ‘Ou a-en bahandra tamam uru tinem, ma ou anuhun sahou turu,’ \rq Eksodus 20:12; Dutoronomi 5:16\rq* \m ma, \q1 ‘Are lau aluhe taman uru tinen, iy kimek ta aliy.’ \rq Eksodus 21:17; Lebitikus 20:9\rq* \m \v 5 Arile, ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak tan luk ta aseben taman uru tinen, arile iy tiye turu, “Luk jo anya kaseben ah na aliy jo ndraleheyani ta edeu i ta Kindrei.”’ \v 6 Ya, ta san doh ado aseken ndramak doh sabudon taman ma samekes mwasin sala tan, ndri-iy. Ta kandriyen doh ado atehei i andri labai sahou ta Kindrei, ya ado bwese-ei eme loken iri kandriyen ado akohok ta tubu aha iri. \v 7 Ado lau ta wasai, amwenen handru i buku none propet Aisaya leheyani kandriyen tado handru kala iy tiye i buku doh, \q1 \v 8 ‘Iri lau mwan ma badih dah bwese nyarak eme loken na boho iri le, arile ndrine iri ereu len labai. \v 9 Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’” \rq Aisaya 29:13\rq* \s1 Jises asehek nyala lakou amekes oda lau i ndraka-an \r (Mak 7:14-23) \p \v 10 Eme Jises aloh iri lau mwan ma badih a hawen ma iy tiye tiri i buku doh, “Ado kanuhun ma kabudon kamwenen. \v 11 Saba lakou i bolo boho ari ndramak, idoh babwidi iy bandra-i bwe. Arile, lakou bohon asehek, idoh mesekei ndramak andra-i.” \p \v 12 Hamon ta aliy oro lau ta Jises ame tiye tan i buku doh, “Sebwe ou ndratanam oro Parasi ndranuhun sahou tam ma ndrine oro ndrandra-i labai tam.” \p \v 13 Eme Jises asumon i buku doh, “Tama udu kandrah tan bilin udu aliy. Ya iri lakou mari ale iy batah bwe-en, idoh kameh iy asoh ma kandron iu. \v 14 Ado sabudon oro lau doh, oro badeh buku lau mada iri bwe, arile oro anya kaleheya san ki ta ndramak ari ja. Arile, buku none ari ndramak madan bwe anya kaleheya san ki ta ndramak ari ja madan bwe, uru ma la-uh kameh taku a bolo lek.” \p \v 15 Eme Pita tiye ta Jises buku doh, “Winiyan ou asehek keme lewan moson ta sahou sokek ou asehek i tiri lau mwan ma badih nane, ya aso kanuhun.” \p \v 16 Eme Jises tiye toro, “Buku sah? Ado ale budon tado baleu bwe le? \v 17 Sebwe ado tana ado bwe; saba lakou i bolo boho ndramak, badeh iu ili bolo ndrine ndramak ano ndramak iu akeh ili sareu. \v 18 Arile, saba lakou bohon asehek badeh, asahan ta budon ta ndramak, ya lakou doh mesekei ndramak andra-i. \v 19 Iri lakou mari ale asahan ta budon ta ndramak badeh, lolowa ndramak amekes lomondra ndra-in. Lakou buku none, budon ndra-in, kandriyen ta adai ndramak imek, ya iri kandriyen mari ta karei, ma kandriyen ta amekes tasou andra-i, kandriyen ta bahana, kandriyen ta amekes sahou wasai ereu mada iri lau ta anuhun sahou, ma kandriyen ta amekes sahou ndra-in i bada ndramak ari ja. \v 20 Iri kandriyen mari doh mesekei ndramak andra-i adeh. Arile buku none ndramak aimon nyamon bwena ya iy basikine minen bwe, kandriyen doh bamesekei iy bandra-i bwe.” \s1 Badih badu Kenan atehei budon tan in ta Jises \r (Mak 7:24-30) \p \v 21 Eme Jises ruwani kon doh ma iy iu ili loboho kon tinan Tair ma Saidon. \v 22 Badih ari badu kon Kenan iy ereu mirihik ta kon tinan Tair hawe Saidon, iy eme ma iy aloh i buku doh, “Laban, ou nadu Debit, ou tikisi jo. Malawin ndra-in ndrabwidi naduk badih ndrandra-i labai.” \v 23 Arile Jises basumon iy bwe. Eme oro lau tan ame tiye tan i buku doh, “Iy badih doh arah, arah in hamon ta to eme. Ou suni iy ki-iu.” \p \v 24 Eme Jises asumon oro i buku doh, “Kindrei suni jo eme ta aseben le iri sipsip badu Isra-el ale ndranyon.” \p \v 25 Arile iy badih nane eme mirihik ta Jises ma iy atehei bwili ndru-un i andri, ma iy anya, “Laban, jo aso-ok ou sebenei jo handru.” \p \v 26 Eme Jises asumon iy i buku doh, “Bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.”\f + \fr 15:26 \ft Jises bwalen ta atehei badih doh i andri. Arile, iy aso-ok sahou mwasin ki tiri Isra-el bwena, ya udu hamon iri lau badu leheleh baranuhun. Eme ma, Jises asehek sahou sokek doh. Iri nadu nah leheya buku iri Isra-el, ya iri mwi badeh, leheya iri lau badu leheleh. Arile, Jises ndratou badih doh atehei budon handru in tan, ma Jises sebenei iy. \f* \p \v 27 Arile badih nane anya, “Laban, ou asehek sahou handru. Arile iri nadu mwi aimon kahu nyamon taku in bahandra sau ta nyamon ta tama iri ale.” \p \v 28 Jises anuhun sahou doh ma iy asumon i buku doh, “Badih, budon tam boto-on labai. Saba lakou ou aso-ok kameh asahan tam, iy winiyan asahan.” Kala le don nadun badih asahan amwenen ja. \s1 Jises mesekei iri lau solo-an bada iri ndra-in amwenen \p \v 29 Eme Jises ruwani kon doh ma iy edek iu ili kapa gwa li Galili. Iy ili bwele-e ka-u mandrei ma iy manyah. \v 30 Iri lau solo-an ame hawen. Iri atiye iri lau kati iri ndra-in ma iri lau mada iri ndra-in ma ndruwi iri hewon, ma boho iri bwe, ma iri lau solo-an bada iri ndra-in. Iri atehei iri an mirihik ta kati Jises. Ma iy mesekei iri asahan amwenen. \v 31 Eme iri lau mwan ma badih atou iri lau boho iri bwe asehek sahou, ma iri ndruwi iri hewon asahan amwenen, ma iri lau kati iri ndra-in adek ja, ma iri lau mada iri bwe atou kon, ma iri abudon solo-an. Eme iri atudun nyara Kindrei badu Isra-el i loken. \s1 Jises edeu nyamon niri lau ma hawa (4,000) \r (Mak 8:1-10) \p \v 32 Jises luhi oro lau tan ma iy tiye toro i buku doh, “Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe. Jo bwalek iri amak son ya jo kasuni iri ka-au. Kora-on mada iri kabuluw ya iri kataku kareu san.” \p \v 33 Eme oro lau tan tiye anya, “Kon dah lau aliy bwe. Idah kameh to kakohok jabi ramen solo-an badu heh, ya to kanyohonei iri lau solo-an an kon lomale an dah?” \p \v 34 Eme Jises ndremenyani oro, “Nado jabi ramen sabe udu aliy?” \p Eme oro anya, “Ndro taloh le, ma hawe iri nadu ni rayah bwisik.” \p \v 35 Eme ya Jises tiye tiri lau mwan ma badih kamanyah kado andri bada munyak. \v 36 Eme iy andrei jabi ramen ma ndro taloh nane, ma nadu ni, ma iy edeu wurah i ta Kindrei. Ano iy boso-ei, ma atehei ili mine oro lau tan, ma oro lau tan adeu ili niri lau. \v 37 Lau mari aimon ma ndrine iri idih. Ano iri tukumwi tikibwah asahan bwak ma ndro taloh. \v 38 Iri lau aimon nyamon doh, kane iri badeh, ma hawa (4,000), idoh bondrek iri badih ma nah bwe. \v 39 Eme Jises tiye iri mwan ma badih au. Ano iy sandroh i bolo ndron, ya oro ala loboho Magadan. \c 16 \s1 Iri tiye Jises ta amekes lahou tinan \r (Mak 8:11-13; Luk 12:54-56) \p \v 1 Iri Parasi hawe Sadusi ame hawe Jises anya kanone iy. Oro tiye tan ta amekes ari lahou tinan ta leheya buku none iy amekes gok ta Kindrei handru. \p \v 2 Arile iy asumon oro i buku doh, “Na beyeh ado anya, ‘Mada kon ndra saram. Sebwe idah kameh jor bwe ma kon mondrei nadeh.’ \v 3 Na mandraben ado anya, ‘Asi kandrah ndra bokodon ma mada kon ndra saram. Sebwe na idah kameh jor atohou ma ur undruk nadeh.’ Ehe, ado atou kalem ere bolo kandrah, ma tiye amwenen. Arile ado batou ma baleheya bamwenen iri kalem ta len dah bwe.\f + \fr 16:3 \ft Iri lau ta tanan rayah abudon kalan 16:2-3 Metiu amwenen batorowenei bwena bwe. Iri anya ndramak ari ja torowenei hamon. \f* \v 4 Iri lau mwan ma badih ta len dah badeh, lau ndra-in handru, ma iri batehei ndrine iri handru bala ta Kindrei bwe. Iri ndremenya ta anya katou kalem, arile winiyan bwai. Kalem ari le kameh iri atou, kalem ta Jona.” Eme ma Jises ruwani iri ma iy iu. \s1 Sahou sokek ta yis tiri Parasi hawe iri Sadusi \r (Mak 8:14-21) \p \v 5 Jises hawe oro lau tan ala kapa gwa li bilisiu, arile oro lau tan maniy, ma oro bakohok jabi ramen bwe. \v 6 Eme Jises tiye toro i buku doh, “Ado kanyolom kamwenen. Mada ado kaleu ta yis tiri Parasi hawe Sadusi.” \p \v 7 Eme oro lau tan asehek sahou ndrokowa oro amwenen, “Sebwe iy amekes sahou doh tasah to bakohok jabi ramen bwe nadeh?” \p \v 8 Arile, Jises tanan ta sahou nane oro asehek, eme iy tiye i buku doh, “Ado lau budon tado tinan handru bwe. Buku sah handru ado asehek, anya ado jabi ramen bwe? \v 9 Sebwe mada ado baleu bwe le nadeh? Ado ndramaniy ja, ta limeh jabi ramen mene iri lau ma lamawa (5,000) aimon? Ma bwak sabe mene erah ado anyuhiy? \v 10 Ado ndramaniy ja ta jabi ramen ma ndro taloh iri lau ma hawa (4,000) mene aimon, ma bwak sabe ado anyuhiy? \v 11 Buku sah handru budon tado kede-eh baleu bwe le? Jo babudon ta jabi ramen bwe. Mada ado kaleu ta yis tiri Parasi hawe Sadusi.” \v 12 Oro anuhun sahou doh, ma oro atana oro buku iy basehek ta mada oro kaleu ta yis ta amekes jabi ramen, bwe. Arile, iy anya mada oro kaleu ta sahou toro Parasi hawe Sadusi oro leheya iri lau na aliy. \s1 Pita leheya Jises eme lewan \r (Mak 8:27-30; Luk 9:18-21) \p \v 13 Jises iu ili loboho kon tinan Sesariya Pilipai. Kala doh iy ndremenya oro lau tan i buku doh, “Iri lau anya Nadu Ndramak Awas, iy are lau handru?” \p \v 14 Eme oro anya, “Lau ra-on anya ou Jon ta alomwa. Ya ra-on anya ou Alaija, ya ra-on anya ou Jeremaya, deh ou ari propet.” \p \v 15 Eme Jises ndremenya oro, “Ya ado amwenen anya jo are lau?” \p \v 16 Saimon Pita asumon iy i buku doh, “Ou Krais, Kindrei suni ou ame dah. Ou Nadu Kindrei kohan handru udu aliy.” \p \v 17 Eme Jises asumon sahou tan i buku doh, “Saimon, ou nadu Jon, ou winiyan sekesek. Tasah, ari ndramak badu kon munyak baleheya ou ta sahou dah bwe. Idoh tama le udu kandrah, iy leheyani sahou dah ewek tam. \v 18 Ya jo tiye tam i buku doh: Ou Pita,\f + \fr 16:18 \ft Boho iri Grik Pita badeh, moson bek.\f* ya jo kameh amekes iri mwan ma badih tek asahan i buku asiu salom tek, ya ou kameh aseben iri i buku ndru bek aseben asiu ales boto-on udu bwele-e munyak dah, ya Satan hawe boto-on ta imek kameh winiyan batohowei asiu salom tek doh bala andri bwe. \v 19 Ya jo kameh amekes nyaram ki buku nyarak. Iri lakou ou asehek iri mwan ma badih kamekes udu munyak dah, mwasin, Kindrei udu kandrah mukuni ale. Ya saba lakou ou turukiy udu kon munyak, idoh kameh Kindrei ale turukiy udu kandrah.” \v 20 Eme Jises batanau oro lau tan boto-on labai i buku doh, “Ado sasehek nyala lakou dah sala ta ari ndramak, anya jo badeh, Krais, ndri-iy.” \ms1 Mirihik ta len Jises anya kimek, iy eme leheya oro lau tan ta ka-en hamon ta iri kandriyen tan \mr (Kalan 16:21–20:34) \s1 Jises anya iy kameh imek ano iy amak ja \r (Mak 8:31–9:1; Luk 9:22-27) \p \v 21 Kala doh Jises leheya oro lau tan anya iy ki-iu kili Jerusalem. Ya iy kameh akohok sisi-in solo-an labai ereu mine iri lau tinan areu bwena, ma hawe iri lau tinan tiri pris, hawe iri lau tanan ta sahou batanau. Ya iri kameh adai iy imek, ya len taloh ano iy kameh amak ja. \v 22 Pita anuhun sahou doh, ya iy seheyani Jises i kabwak, ma iy ibolosen i tan i buku doh, “Laban, sebwe lakou doh kameh winiyan basahan tam bwe nadeh.” \p \v 23 Arile Jises tubuni iy ma iy asehek ta Pita i buku doh, “Satan, ou a len a konak! Ou anya aturuk san tek. Ou ba-en hamon ta budon ta Kindrei bwe. Ou a-en hamon le ta budon tiri lau.” \v 24 Eme Jises tiye toro lau tan i buku doh, “Buku none ari ndramak anya ki-in hamon tek, mwasin, iy kamani iri so-ok tan mari, ya iy kabwese-ei kei tondreh tan, ya iy ki-in hamon tek. \v 25 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja. \v 26 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru? Ya lau kadeu saba sowan handru kameh ta akohok kohan keme hamon? \v 27 Nadu Ndramak Awas kameh eme ma lomadan ta taman. Ya iy kameh eme hawe oro angelo tan. Na len doh kameh iy edeu ndramas i tiri lau mwan ma badih i le winiya le kandriyen iri amekes. \v 28 Jo asehek sahou handru ewek tado. Lau ra-on ales areu bolo to dah kameh bamak bwe, ya iri kameh atou Nadu Ndramak Awas eme hamon ma atondrok kon munyak i buku kabin.” \c 17 \s1 Bada Jises asahan i randrah ja \r (Mak 9:2-13; Luk 9:28-36) \p \v 1 Len onoh ano, Jises kuhi Pita uru Jemis hawe nadu tinen Jon. Iy kuhi oro ala bwele-e mandrei ari loken labai, ya oro le ado aliy. \v 2 Oro ado, oro anyolom ili bada Jises ndratubuniy ndra randrah ja. Ya bwilin anya buku none an. Ya awin tan asahan belen, handru en! \v 3 Eme Moses uru Alaija asahan, ma oro lau ta Jises nane atou uru asehek sahou hawen. \p \v 4 Pita atou lakou doh ya iy asehek ta Jises i buku doh, “Laban, mwasin handru ta aso are ndra kada-ah. Buku none ou aso-ok jo katahi mandron ki taloh kudu dah; ra-em tam, ra-em ta Moses, ma ra-em ta Alaija.” \p \v 5 Pita asehek sahou kahis le, asi kandrah ari anya labai ili tubuluhi oro. Ya sahou randra asahan bolo asi kandrah nane asehek i buku doh, “Idah naduk handru. Jo aso-ok iy labai, ma jo sekesek tan handru. Ado kanuhun sahou tan.” \p \v 6 Oro lau ta Jises nane anuhun sahou doh, ya oro atehei bwili ndru-u oro i andri, ma bwili oro i bada munyak, ma oro anoh labai. \v 7 Arile, Jises eme mirihik toro, ma iy tawi oro ma iy anya, “Ado kareu loken, ado sanoh, ndri-iy.” \v 8 Eme oro suri mada oro eme loken, oro batou ari ndramak ja bwe, oro atou Jises le ari. \p \v 9 Eme oro are bwele-e mandrei ame andri, Jises batanau oro boto-on buku doh, “Saba lakou ado ndratou, ado sasehek ta ari ndramak ili winiya le Nadu Ndramak Awas amak ereu bolo lek eme loken ja.” \p \v 10 Eme oro lau tan ndremenyani iy i buku doh, “Buku sah iri lau ta leheya kandriyen tiri Juwis anya Alaija kameh eme bwena op?” \p \v 11 Iy asumon oro i buku doh, “Sahou badeh handru. Alaija kameh eme, iy kameh lowosa iri lakou mari. \v 12 Arile jo asehek tado i buku doh, Alaija ndrame, arile iri lau tana iri iy bwe. Iri an hamon ta budon tiri amwenen, ya iri amekes iri kandriyen mari i badan. Ya iri kandriyen doh kameh iri amekes i bada Nadu Ndramak Awas ale.” \v 13 Jises asehek i buku doh, ya oro lau tan atana oro buku iy asehek ta Jon ta alomwa. \s1 Jises bwidi nah ari malawin ndra-in udu la-un iu \r (Mak 9:14-29; Luk 9:37-42) \p \v 14 Jises hawe oro lau tan ma taloh ame ndruni iri lau solo-an. Eme ndramak ari asahan ta Jises, ma iy atehei bwili ndru-un i andri, \v 15 ma iy anya, “Laban, ou tikisi naduk mwan. Iy asahan lolo-ou, ya badan udu ndra-in labai. Len ra-on iy kataku i bolo jih, len ra-on kameh iy taku i bolo gwa. \v 16 Jo tiyani iy ili hawe oro lau tam, arile oro winiyan babwidi iy bamwenen bwe.” \p \v 17 Eme Jises asehek sahou i buku doh, “Ado lau mwan ma badih batehei budon handru bwe, budon ma kandriyen tado bamwenen bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.” \v 18 Eme Jises ibolosen i ta malawi balik nane, ma balik ruwani nah nane, ma nawin bwe, lolo-ou tan ano. \p \v 19 Hamon ta aliy oro lau tan ame hawen, ma oro ndremenya iy i buku doh, “Buku sah handru ya aso winiyan batikahei malawin ndra-in nane iu bwe?” \p \v 20-21 Eme iy tiye toro i buku doh, “Budon tado boto-on handru bwe, mesekei ado winiyan bwe. Jo asehek tado handru, buku budon tado kasahan ki buku badu buwa kei mastet, idoh ado winiyan tiye ta mandrei idoh, ‘Ou suri ou, ya ou ala kodo-oh;’ iy winiyan ili. Ya idah kameh ari lakou ja batawi ado ta amekes lahou bwe.”\f + \fr 17:20-21 \ft Iri lau ta tanan rayah anya sahou ari ja udu bolo tarou dah i buku doh, (21) Arile, iri lakou buku doh ado winiyan bamesekei bwe; buku ado asalom ta aliy ma ado abeles ado ta nyamon, ado winiyan mesekei iri lakou doh.\f* \s1 San rasan ja Jises asehek ta iy kameh imek ano iy kameh amak ja \r (Mak 9:30-32; Luk 9:43-45) \p \v 22 Jises hawe oro lau tan atukum areu loboho kon Galili. Eme Jises asehek i toro i buku doh, “Iri kameh atehei Nadu Ndramak Awas ili mine iri lau. \v 23 Ya iri lau kameh adai iy imek, ya hamon ta len taloh kameh iy amak ja.” Oro lau tan anuhun sahou doh, oro tikisiy labai. \s1 Jises akeh takis i ta asiu tinan ta Kindrei \p \v 24 Hamon ta aliy Jises hawe oro lau tan ala asahan kon tinan Kapen-um. Ya iri lau ta akohok takis ta asiu tinan ta Kindrei asahan ta Pita, ya oro ndremenya iy i buku doh, “Sebwe ndramak ta leheya ado edeu luk ale i ta asiu tinan ta Kindrei nadeh?” \p \v 25 Eme Pita asumon anya, “Ehe.” \p Eme Pita iu ili bolo asiu, Pita basehek sahou bwe le, Jises eme ndremenyani iy, “Saimon ou abudon buku sah? Iri kabin badu kon munyak akohok luk ta takis ere mine are lau eme? Oro akohok ere mine oro lau toro amwenen, deh, oro akohok ereu mine ndramak ari ja?” \p \v 26 Eme Pita anya, “Oro akohok luk ta takis ta ndramak ari ja.” \p Eme Jises tiye tan, “Idoh ya oro lau toro amwenen kameh bakeh luk ta takis bwe. \v 27 Arile, kora-on to kabwidiy, ma oro kabolosen keme ta to. Ou ala kapa gwa ou akeh jai. Ari ni ou aluwiy ma bwena, idoh ou sihi bohon, ya ou kameh atou luk ari ereu bohon. Ou andrei luk doh ou ala atehei ki mine oro. Idoh ta takis ta talu ma la-uh.” \c 18 \s1 Are lau nyaran tinan ereu baha tondrok ta Kindrei \r (Mak 9:33-37; Luk 9:46-48) \p \v 1 Kala doh oro lau ta Jises ame hawen ma ndremenya iy, “Are lau nyaran tinan ereu baha tondrok ta Kindrei?” \v 2 Eme Jises luhi nadu nah ari nadu bwisik eme ales ereu ndrokowa oro. \v 3 Ano iy tiye i buku doh,\f + \fr 18:3 \ft Idoh badeh, i buku sahou hahuw ai, badu bolo oro sahou lawe-en ma limeh nane Jises asehek udu bolo tarou ta Metiu. Sahou dah badeh, udu ta kalan 18:3-35, ma asehek ta nyala kandriyen toro lau ta an hamon tan kamekes ndrokowa oro amwenen.\f* “Jo tiye sahou handru ewek tado, buku none ado batubuni ndrine ado bwe, ma basahan buku none nah nadu bwisik dah bwe, ado winiyan bala bolo tondrok ta Kindrei bwe. \v 4 Ndramak atehei budon tan asahan buku le nah, ndramak doh kameh nyaran asahan tinan ereu bolo tondrok ta Kindrei. \v 5 Ya buku none ari ndramak abudon jo ya iy aseben ari nadu nah bwisik buku nah dah, badeh iy aseben jo.” \s1 Kandriyen ndra-in ale bwidi budon tataha i ta Kindrei andra-i \r (Mak 9:42-48; Luk 17:1-2) \p \v 6 Jises asehek ja anya, “Buku none ari ndramak bwidi ari nadu nah ale atehei budon tan eme tek taku ta kandriyen ndra-in, sebwe mwasin ta ndramak doh kasawei ari bek maha-an ki balen ma kakahei iy katuh kili bolo ndras lawe-en ya iy kimek. \p \v 7 “Sisi-in tinan labai kameh i bwele-e iri lau badu kon munyak, iri nane amekes ndramak ari ja taku ta kandriyen ndra-in. Handru, iri kandriyen ndra-in doh kameh asahan. Arile jo tikisiy handru ta ndramak mesekei asahan. \v 8 Buku none minem deh katim aliu ou ta amekes kandriyen ndra-in, mwasin ou saniy ya ou akahei ki-iu! Sebwe mwasin ta ou minem raka le ma ou katim raka le ta akohok koham mwasin ta ereu le buku doh. Kora-on minem ma la-uh ma katim ma la-uh udu aliy, ya iri kakahei ou ala bolo jih ale winiyan bamak bwe-en! \v 9 Ya, buku none madam aluwi ou ta amekes kandriyen ndra-in, sebwe mwasin ta ou sudiy ma ou akahei ki-iu! Mwasin ta ou madam ari le ya ou akohok koham mwasin ta ereu le buku doh, kora-on madam ma la-uh kudu aliy, ya iri kakahei ou ala bolo jih ta anya ereu le buku doh. \p \v 10-11 “Ado kabudon kamwenen. Kora-on ado anya ari ereu ndrokowa oro nah kede-eh lakou laleyah. Bwe handru. Jo asehek tado amwenen, ereu kandrah oro angelo toro badeh, len mari oro areu mada tama ereu kandrah.”\f + \fr 18:10-11 \ft Iri lau ta tanan rayah anya sahou ari ja udu bolo tarou dah i buku doh, (11) Tasah, Nadu Ndramak Awas eme kon munyak ta aseben iri lau mwan ma badih mene ndramai. \f* \s1 Sahou sokek ta sipsip amai \r (Luk 15:3-7) \p \v 12 Jises asehek sahou ja anya, “Ado abudon buku sah? Buku none ari ndramak tan rinek (100) sipsip udu aliy, ya buku none ari sipsip tan amai, sebwe iy winiyan bala batakaleh bwe nadeh? Neh? Bwe labai. Iy kameh ruwani oro sipsip tan ma ndro ronoh ndro ari (99) nane areu bwele-e mandrei are gwek, ma iy kameh iu ili takaleh ari nane amai. \v 13 Jo asehek sahou handru ewek tado, buku none iy takalahiy, iy kameh sekesek labai. Iy sekesek toro ndro ronoh ndro ari (99) sipsip nane bamai bwe, arile, buku none iy takalahei sipsip ari nane amai, sekesek tan kameh i tinan labai. \v 14 Buku le tama ado udu kandrah, iy bwalen ari nadu nah kede-eh samai.” \s1 Kandriyen ta amekes nadu tinem nane bwidi kandriyen ndra-in, asahan amwenen ja \p \v 15 Jises asehek sahou ja i buku doh, “Buku none nadu tinem bwidi kandriyen ndra-in ewek tam, mwasin ta ou ala atou iy, ya ah kasehek sahou ki se ta kandriyen nane. Buku none iy anuhun sahou tam, mwasin, ou ndrandrei nadu tinem ndrame hamon. \v 16 Arile, buku none iy banuhun sahou tam bwe, mwasin, ou andrei ari deh la-uh ndramak ja kewek hawem, ya, \q1 ‘Buku lau la-uh o taloh asehek anya, oro anyolom ari ndramak amekes kandriyen ndra-in, mwasin ta aha kasehek sahou hawen.’ \rq Dutoronomi 19:15\rq* \m \v 17 Arile, buku none iy banuhun sahou toro bwe, mwasin, ou tiye ki tiri lau mwan ma badih badu bolo iri lau ta Kindrei. Buku batun boto-on ma iy bwalen anuhun sahou toro ale, mwasin, ou atou iy buku none ari ndramak tanan Kindrei bwe, deh iy ndramak ta kolowa luk ta takis ta lau. \p \v 18 “Jo asehek sahou handru ewek tado, iri lakou ado asehek iri mwan ma badih kamekes udu munyak dah, mwasin, Kindrei udu kandrah sekesek ale. Ya saba lakou ado turukiy udu kon munyak, idoh kameh Kindrei ale turukiy udu kandrah. \v 19 Ya jo asehek ja ewek tado. Buku none ah la-uh lau badu kon munyak atehei budon ta ah i se ta ari lakou, ya ah asolom ta amekes, o, ta akohok lakou doh, mwasin tama udu kandrah winiyan atehei ewek ta-ah. \v 20 Ya, buku none lau la-uh deh lau taloh ame atukum ta nyarak, mwasin, jo amwenen kameh ereu ndrokowa oro.” \s1 Sahou sokek ta lau la-uh ta gok \p \v 21 Kala doh Pita eme hawe Jises ma ndremenyani iy i buku doh, “Laban, san sabe buku nadu tine kamekes ndra-in keme tek, ya jo kamani kandriyen ndra-in tan doh? Sebwe san ndro taloh le nadeh?” \p \v 22 Ya Jises asumon iy i buku doh, “Jo basehek anya ou mani kandriyen ndra-in tan san ndro taloh le bwe. Jo anya ou mani kandriyen ndra-in tan san ndro taloh, ano san ndro taloh ja, ano san ndro taloh ja, ili ili winiya asahan san nyaran bwe. \v 23 Ado kanuhun, tondrok ta Kindrei i buku none ari kabin anya kakohok iri luk oro lau tan ta gok mene andrei buku dinau udu minen, ma oro batehei saluwen bwe le. \v 24 Iy anya kamekes lakou doh le, iri tiyani ndramak ari eme hawen, iy kameh kisih luk ki hamon ki ta kabin nane na luk solo-an labai (K10,000,000). \v 25 Arile iy ndramak nane tan luk ta edeu saluwe luk nane bwe. Eme ma, kabin nane anya iy kameh atehei iy ndramak nane hawe udun ma nadun ala mada ba-en, ya ari ndramak kasihinei oro kala lau ta gok buku bonyo-ou tan. Ya oro kandrei iri lakou mari ta ndramak nane ki mada ba-en ale ya ta kandriyen doh oro winiyan andrei luk tan mari eme hamon. \v 26 Eme ndramak ta gok nane anuhun sahou doh, iy atehei bwili ndru-un in mirihik ta kati kabin nane, ma iy tiye ta kabin nane i buku doh, ‘Ou tikisi jo, ma ou abe-en jo, idah kameh jo winiyan atehei ewek hamon iri luk mari mene jo akohok tam.’ \v 27 Eme ndramak tinan ta lau ta gok nane tikisi iy, ma iy ruwani iy, ma tiye tan ta iy sadeu luk sala hamon sala tan, ndri-iy ai. \p \v 28 “Arile, ndramak ta gok nane iu ili manan, ya iy atou ndramak ari ta gok badu hawen, iy mene andrei luk tan winiya rinek (K10) le. Eme ma iy tawi ndramak badu hawen nane ta gok, iy tawi balen ma iy asehek sahou boto-on i tan i buku doh, ‘Ou adeu iri luk mari mene ou akohok tek, keme hamon.’ \v 29 Lau ta gok badu hawen nane anuhun sahou doh, ma iy atehei bwili ndru-un i andri, ya iy tiye ta ndramak nane i buku doh, ‘Ou tikisi jo, ya ou abe-en jo. Idah kameh jo winiyan atehei ewek hamon iri luk mari mene jo akohok tam.’ \v 30 Arile, ndramak nane bwalen. Eme iy atehei lau badu hawen nane i bolo kou winiya le ndramak nane atehei i hamon iri luk mari iy andrei ta ndramak nane. \p \v 31 “Oro lau ta gok ra-on ja badu hawe uru lau nane atou kandriyen doh, ya ndrine oro andra-i labai. Eme oro ala tiye ta tinan toro. \v 32 Eme ya tinan nane luhi ndramak ta gok nane, ma tiye tan i buku doh, ‘Ou lau ta gok ndra-in. Nane ou aden eme tek, ya jo anya ou sasih same hamon iri luk mari mene ou akohok tek. \v 33 Jo tikisi ou handru. Arile, buku sah handru ya ou batikisi iy lau ta gok badu hawem nane bwe?’ \v 34 Ndramak tinan nane ndrinen irih ya iy atehei iy lau ta gok nane i bolo kou ma iy tiye iri lau ta ndrokei katehei maha-an ki tan winiya le iy kasihinei iri luk tan mari nane kili hamon. \p \v 35 “Idoh buku le tama udu kandrah, iy kameh amekes iri kandriyen doh ewek taha mari, buku aha bamani iri kandriyen ndra-in nadu tine aha ari ja amekes ewek taha bwe.” \c 19 \s1 Jises asehek ta kandriyen ta apou tasou \r (Mak 10:1-12; Luk 16:18) \p \v 1 Jises asehek sahou tan nane ano, iy ruwani kon Galili ma iy iu ili loboho kon Judiya ereu kapa gwa Jodan bilisiu. \v 2 Eme iri lau solo-an an hamon tan, ya iy mesekei bada iri nane udu ndra-in amwenen ja. \v 3 Eme oro Parasi rayah ame atou Jises ma oro anya kanone iy. Oro ndremenyani iy i buku doh, “Sebwe sahou batanau tataha anya, lau winiyan tikahei udun na saba katin udu budon tan amwenen nadeh?” \p \v 4 Jises asumon boho oro i buku doh, “Sebwe ado batou tarou ta Kindrei ereu bolo buk ndrabun tan bwe nadeh? Bwena handru kala Kindrei mene \q1 ‘mesekei lakou mari, iy mesekei lau mwan ma badih.’ \rq Jenesis 1:27\rq* \m \v 5 Eme Kindrei anya, \q1 ‘Ta katin le doh, iy mwan karuwani taman uru tinen ya iy keme len hawe udun, ya uru kasahan ari buruwen.’ \rq Jenesis 2:24\rq* \m \v 6 Kindrei asehek anya, bada uru la-uh bwe, bada uru ndrasahan ari le buruwen. Idoh le, saba lakou Kindrei ndrasawei mari ndrase, ari ndramak sasaniy ja ai.” \p \v 7 Ya oro Parasi tiye tan i buku doh, “Ya buku sah handru Moses atehei sahou batanau eme tataha ya iy asehek anya ndramak winiyan atorou la-ukei ta amendren tasou ya iy atehei i mine badih ano iy winiyan aruwe badih iu?” \p \v 8 Eme Jises asumon i buku doh, “Batu ado boto-on labai, eme Moses aruwe ado ta atikah badih iu. Arile bwena handru kandriyen doh bwe. \v 9 Jo asehek ewek tado i buku doh. Buku none udu ari ndramak bamekes madasarah bwe, ya udun ruwani iy, ma iy i tasou i ta badih ari ja, iy le mesekei karei i tan.” \p \v 10 Oro lau ta Jises anuhun sahou doh, ya oro asehek i buku doh, “Buku none ndramak anya ki-in hamon ta kandriyen buku doh ya iy in hawe udun, sebwe mwasin mwan satasou, ndri-iy.” \p \v 11 Jises asehek i toro i buku doh, “Iri lau mari winiyan bakohok sahou dah bwe. Kindrei atehei boto-on i ta lau ra-on le. \v 12 Ado kanuhun. Iri lau rayah areu kede-eh iri ale batasou bwe. Lau ra-on bada iri andra-i kala tine iri tuwi iri. Lau ra-on asan iri, ma iri winiyan bamekes nah bwe, ya ra-on abudon ta amekes gok ta Kindrei, ya iri abeles iri ya iri batasou bwe. Arile, are lau winiyan akohok sahou dah, iy kakohok.” \s1 Jises anya oro karuwe oro nah kame hawen \r (Mak 10:13-16; Luk 18:15-17) \p \v 13 Kala doh iri lau atiye iri nah bwisik ame hawe Jises. Iri aso-ok anya Jises katehei minen ki la-u iri nah nane, ya iy kasolom. Arile oro lau ta Jises abolosen i tiri lau nane. \v 14 Arile Jises tiye toro lau tan i buku doh, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.” \v 15 Eme iy atehei minen i la-u iri nah nane, ano iy ruwani kon nane ma iy iu. \s1 Ndramak ari loweu tan lakou solo-an asehek sahou hawe Jises \r (Mak 10:17-31; Luk 18:18-30) \p \v 16 Eme ndramak ari eme atou Jises ma iy anya, “Ndramak ta leheya, jo kamekes saba kandriyen mwasin handru ya jo kakohok kohan mwasin ta ereu le buku doh len mari?” \p \v 17 Jises tiye i tan i buku doh, “Tasah handru ya ou ndremenya jo ta kandriyen mwasin? Ndramak ari le Kindrei, iy mwasin labai. Arile, buku none ou anya akohok kohan mwasin ta ereu le buku doh, ou a-en hamon ta sahou batanau ta Kindrei.” \p \v 18 Eme ndramak nane ndremenya Jises ja i buku doh, “Ou asehek ta saba sahou batanau handru?” \p Jises anya, “Iri sahou batanau ale anya, \q1 ‘Ou sadai ndramak samak, ou samekes karei ta badih tasou. Ou sabahana, ou sawasai, ma sadeu iri lau laleyah sala ta mada sahou, ndri-iy. \v 19 Ou a-en bahandra tamam uru tinem, ma ou anuhun sahou turu.’ \rq Eksodus 20:12-16\rq* \m Ya, \q1 ‘Ou aseken iri lau ari ari badu hawem, i le buku ou aso-ok ou le.’” \rq Lebitikus 19:18\rq* \p \v 20 Eme ndramak loweu nane asehek ta Jises i buku doh, “Jo badeh, in hamon ta sahou batanau mari, ya saba lakou ja jo kamekes?” \p \v 21 Eme Jises asehek tan i buku doh, “Buku none ou anya asahan ndramak mwasin handru, mwasin, ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.” \p \v 22 Ndramak loweu nane anuhun sahou doh, ya budon tan andra-i, ma iy iu ai, tasah tan lakou solo-an labai. \p \v 23 Eme Jises tiye toro lau tan i buku doh, “Jo tiye handru ewek tado, idah kameh, boto-on labai ta ndramak tan lakou solo-an, i buku none iy anya kili bolo tondrok ta Kindrei! \v 24 Jo asehek tado ja, masakan boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja ta kamel i buku iy i bolo manamunu nunu.” \p \v 25 Oro lau tan anuhun sahou doh mani oro atur labai, ma oro anya, “Buku none i buku baden eh, are lau handru kameh winiyan akohok kohan mwasin ta ereu le buku doh?” \p \v 26 Eme Jises anyolom amwenen i toro, ma iy anya, “Lau winiyan bwe. Arile Kindrei winiyan mesekei lakou mari.” \p \v 27 Ya Pita asumon bohon anya, “Ou atou, aso ndraruwani lakou mari, ya aso ndra-en hamon tam. Ya idah kameh aso kakohok sasah handru?” \p \v 28 Jises asehek i toro i buku doh, “Jo asehek handru ewek tado, na len lakou mari asahan ha-un, ya Nadu Ndramak Awas kameh akohok nyaran i tinan, ma iy kameh manyah udu koyeu ta kabin, koyeu doh tan amwenen. Na len doh ado lau ale an hamon tek, ado ale kameh manyah ado koyeu ma ronoh la-uh mwasin, ma ado kameh anuhun sahou toro boho kamen ma ronoh la-uh badu Isra-el. \v 29 Ya are mwan ma badih ale abudon nyarak, ma iy ruwani asiu tan ma nadu tinen mwan ma buru-un, ma taman uru tinen, nadun ma bilin tan, iy kameh akohok ndramas buku san rinek (100) ja i la-un, ma akohok kohan mwasin ta ereu le buku doh. \v 30 Arile lau solo-an na dah areu bwena, iri kameh ame hamon. Ya iri lau solo-an na dah areu hamon iri kameh ame bwena.” \c 20 \s1 Jises asehek sahou sokek ta oro lau abo gok ta bolo bilin waen \p \v 1 Jises asehek sahou ja anya, “Jo asehek dah tiri lau ale anya ka-en bwena, tasah tondrok ta Kindrei i buku le ndramak ari tan munyak solo-an. Na mandraben handru iy iu ili takaleh iri lau ta ame abo gok ta bolo bilin waen tan. \v 2 Oro lau ta gok nane ndraso-ok ta akohok luk ronoh (K1) ta len ari, eme ndramak nane suni oro ala abo gok bolo bilin waen tan. \p \v 3 “Mada an eme ndro ari ndramak nane ili ma iy atou oro lau ra-on areu laleyah areu mada ba-en. \v 4 Eme iy tiye toro i buku doh, ‘Ado ale kala kabo gok bolo bilin waen. Ya jo kameh isih ado winiya le gok ado bwidiy.’ \v 5 Eme oro ala. \p “Ya, na mada an udu alih ma mada an taloh beyeh, ndramak nane ili amekes buku aliy ale. \v 6 Eme na mada an limeh na beyeh, iy ili ja iy atou oro lau ra-on ales laleyah, eme iy ndremenyani oro, ‘Buku sah handru ya len ari ma buruwen dah ado ales laleyah ya ado bamekes ari gok bwe?’ \p \v 7 “Oro asumon bohon buku doh, ‘Ari ndramak badeu gok bame taso bo-oh.’ \p “Ndramak nane anya, ‘Mwasin, ado ale kala kabo gok bolo bilin waen tek.’ \p \v 8 “Kon abeyeh handru tama bilin waen nane tiye ta ndramak ta in bwena ta gok tan buku doh, ‘Ou luhi oro lau ta gok kame ya ou adeu sihine oro. Ou adeu sihine oro lau ame hamon ta gok bwena, kano ou adeu sowa oro lau mari kili kisos are lau eme bwena handru ta gok.’ \p \v 9 “Eme oro lau nane abo gok na mada an limeh ame akohok sihine oro; oro ari, ari akohok luk ronoh (K1). \v 10 Eme oro lau nane oro abo gok ma bwena handru oro ame, oro abudon buku oro kameh akohok luk solo-an ja. Arile bwe. Oro akohok luk ronoh (K1), ndramak ari, ari. \v 11 Oro atou luk oro akohok ma oro abolosen i ta tama bilin waen nane buku doh, \v 12 ‘Oro lau ame hamon oro babo gok luwen bwe, arile ou adeu sihine oro i buku le aso akohok. Arile aso abo gok boto-on handru na mandraben eme isos dah, ya an sulumwi aso andra-i labai.’ \p \v 13 “Tama bilin nane anuhun sahou doh ya iy tiye ta ndramak ari toro lau ta gok nane anya, ‘Kawas tek, jo bamekes ari ndra-in bawek tam bwe, sebwe na mandraben handru, talu asehek ta ou kameh akohok luk ronoh (K1), neh? \v 14 Ou akohok sihinem ma ou a-au ai. Na so-ok tek amwenen ya jo edeu sihine i ndramak nane in hamon eme i buku le ado nane ame bwena. \v 15 Idoh lakou tek amwenen. Sebwe jo winiyan ba-en hamon ta budon tek amwenen ta ondrek luk tek bwe nadeh, neh? Buku none jo anya kamekes kandriyen mwasin ki toro lau doh, buku sah handru ya ou abudon andra-i.’” \p \v 16 Eme Jises anya, “Idoh i buku le iri lau ale an hamon handru, oro kameh ame bwena. Ya oro lau ale an bwena, oro kameh ame hamon ja.” \s1 Jises asehek san tulusin ai, ta nyala imek ma amak tan \r (Mak 10:32-34; Luk 18:31-33) \p \v 17 Jises edek iu ili Jerusalem. Iy kuhi oro lau tan ma ronoh la-uh ala a ka-un, ya oro adek kahis le, Jises tiye toro i buku doh, \v 18 “Ado kanuhun, na dah to ala loke ala Jerusalem, ma iri kameh atehei Nadu Ndramak Awas ili mine iri tinan tiri pris ma hawe iri lau ta leheya kandriyen tiri Juwis. Ya iri kameh atehei iy ili ta mada sahou, ma iri kameh atilik sahou i se ta kadai iy kimek. \v 19 Ya oro kameh atehei iy ili mine iri lau ra-on badu leheleh, ta oro lau doh kabobose iy, ma ka-um iy na malou sakabuk i bek, ma katehei iy ki bada kei tondreh. Ya hamon ta len taloh iy kameh amak ja.” \s1 Jemis uru Jon anya kasahan ndramak tinan \r (Mak 10:35-45) \p \v 20 Hamon ta aliy tine uru nah ma la-uh nadu Sebedi hawe nadun uru ame atou Jises. Eme iy atehei bwili ndru-un i andri ma iy anya kandremenya Jises ta lakou ari. \p \v 21 Eme Jises ndremenyani iy anya, “Ou aso-ok saba lakou?” \p Iy badih nane asehek ta Jises i buku doh, “Jo aso-ok ou asehek anya naduk uru ma la-uh dah kameh manyah areu mirihik hawem areu kon tam ta atondrok, ari ereu minem salin, ari ereu minem kamweu.” \p \v 22 Jises anuhun sahou doh ma iy asumon i buku doh, “Ado tana ado saba lakou ado ndremenya kede-eh bo-oh! Sebwe ah winiyan a-un na bwiniu jo kameh a-un na aliy dah nadeh?” \p Uru asumon, “Aru winiyan.” \p \v 23 Jises tiye turu buku doh, “Handru, bwiniu kameh jo a-un na aliy, ah kameh a-un na aliy ale. Arile, are kameh manyah ereu minek salin ma are kameh manyah ereu minek kamweu, idoh jo winiyan batiye bwai. Tasah, kon doh tiri lau ale tama Kindrei ndralowosani iri kabwe.” \p \v 24 Ya eme oro lau tan ma ronoh \m anuhun sahou turu, oro abolosen labai ili turu. \v 25 Arile Jises luhi oro mari ame hawen, ma iy asehek i toro i buku doh, “Ado tana ado, iri kabin tiri lau badu leheleh badeh, iri boto-on labai ta atondrok iri lau tiri, ma iri batanau boto-on labai ta iri lau tiri kanuhun sahou tiri handru. \v 26 Arile kandriyen doh sa-en ndrokowa ado, ndri-iy. Ndramak anya ki tinan kereu ndrokowa ado, iy kasahan lau ta gok kereu ndrokowa ado. \v 27 Ya are lau anya kereu bwena tado, iy kasahan ndramak ta gok laleyah kereu ndrokowa ado. \v 28 Idoh le Nadu Ndramak Awas eme ta iri lau kabo gok i tan bwe. Iy eme ta aseben iri, ma ta edeu kohan ta akunoh lau mari.” \s1 Jises mesekei uru lau la-uh mada uru bwe amwenen \r (Mak 10:46-52; Luk 18:35-43) \p \v 29 Jises hawe oro lau tan \m ruwani kon tinan Jeriko, ma oro au. Iri lau solo-an labai an hamon toro. \v 30 Uru lau la-uh manyah areu kabede san. Uru mada uru bwe, uru anuhun le buku Jises edek eme. Eme ma, uru arah boto-on buku doh, “Laban, ou nadu tubu kabin Debit, ou tikisi aru!” \p \v 31 Iri lau solo-an abolosen i turu ma iri tiye turu ta uru kandru-uk. Arile, bwai, uru aloh ma arah boto-on le gwek anya, “Laban, ou nadu tubu kabin Debit, ou tikisi aru!” \p \v 32 Eme Jises udu rasi ma aloh i turu, “Ah aso-ok jo kamekes sasah kewek ta ah?” \p \v 33 Uru asumon sahou tan i hamon i buku doh, “Laban, aru aso-ok ou sihi mada aru kasak.” \p \v 34 Eme Jises tikisi uru, ma iy atehei minen i mada uru, ma nawin bwe mada uru amwenen, ma uru anyolom kon ja. Ma uru an hamon ta Jises. \ms1 Jises ili asahan Jerusalem, ma iy leheya iri mwan ma badih \mr (Kalan 21–25) \c 21 \s1 Jises iu ili bolo Jerusalem buku none ari kabin \r (Mak 11:1-11; Luk 19:28-40; Jon 12:12-19) \p \v 1 Jises hawe oro lau tan ame mirihik ta Jerusalem, oro asahan kon Betapes ereu mandrei Olip. Eme Jises suni uru lau tan ma la-uh, \v 2 ma iy tiye turu buku doh, “Ah kala kon to anyolom i aliy don. Suwi labai ah kameh atou donki ari iri sawei udu aliy, ma nadun ale udu hawen. Ah katolowei malou ma kasirini uru kame hawek. \v 3 Ya, buku none ari ndramak kandremenya ah, ah katiye ki buku doh, ‘Laban gok udu turu, ano iy baratiyani uru barame hamon ja.’” \p \v 4 Lakou dah asahan ta amekes sahou mene propet ndrasehek bwena asahan handru, \q1 \v 5 “Kasehek sahou dah ki tiri lau mwan ma badih badu Sayon, \q1 ‘Ado kanyolom, kabin tado eme ai. \q1 Iy eme buku ari ndramak nyaran bwe, \q1 ya iy manyah udu bwele-e donki ari. \q1 Ehe, iy manyah udu bwele-e donki ari \q1 ndramak bamanyah ba-en bwele-en bwena bwe.’” \rq Sekaraya 9:9\rq* \p \v 6 Eme uru lau tan ma la-uh nane ala bwidiy buku le nane iy ndratiye turu. \v 7 Uru ame sirini donki uru nadun nane, ya uru atehei kolau turu lawe-en badu bwele-e awin turu i la-u uru donki ma la-uh nane, ya Jises manyah udu bwele-en. \v 8 Ya iri lau solo-an ame talaha awin tiri lawe-en badu bwele-e iri i san. Ya iri ra-on ala amundroh andra kei, ya iri anyehe ili san. \v 9 Iri lau ra-on adek ala bwena ta Jises ma hawe iri ra-on adek an hamon tan, ya iri mari arah i buku doh, \q1 “Hosana!\f + \fr 21:9 \ft Sahou Hosana badeh, moson i buku, Ou sebenei aso ai. \f* \q1 Kasekesek ki ta nadu Debit! \q1 Kasore nyaran! \q1 Iy eme ta nyara Laban!” \rq Wari 118:26\rq* \q1 “Hosana! \q1 Kasekesek ki loken mara-ei!” \p \v 10 Jises iu ili bolo kon Jerusalem, ya iri lau mari badu bolo kon tinan nane mani iri lau mari atur tan, ma iri ndremenya iri i buku doh, “Idoh are lau handru?” \p \v 11 Eme iri lau mwan ma badih nane adek hawen anya, “Idah propet nyaran Jises, iy badu kon Nasaret, badu loboho Galili.” \s1 Jises atikah iri lau amekes ba-en udu bolo asiu tinan ta Kindrei \r (Mak 11:15-19; Luk 19:45-48; Jon 2:13-22) \p \v 12 Jises ili loboho bolo asiu tinan ta Kindrei ya iy atikah iri lau amekes ba-en udu asiu doh. Iy bukudi iri sau tiri lau ta tokoha luk, ma hawe bwabwai tiri lau asih iri sirih aloh ban.\f + \fr 21:12 \ft Iri mwan ma badih anya kasih lakou udu bolo kowah ta asiu tinan ta Kindrei badeh, iri kakohok luk ta asiu tinan amwenen. Luk doh randrah labai. Iri winiyan bakeh luk tiri Rom, o, luk tiri Grik bwe. Eme ma, iri tutuni nadu ba-en ta tubuni iri luk badu leheleh ili luk ta asiu tinan amwenen. Ya iri asih iri sirih, bulumakau ma sipsip ta lau amekes salom na aliy. \f* \v 13 Ya iy tiye tiri i buku doh, “Buk ndrabun tiye i buku doh, \q1 ‘Asiu tek dah, asiu ta amekes salom labai,’ \rq Aisaya 56:7\rq* \m arile ado ndramesekei asiu tek, ndrasahan \q1 ‘asumwe iri lau ta bahana.’” \rq Jeremaya 7:11\rq* \p \v 14 Jises udu bolo asiu tinan ta Kindrei, ya iri lau mada iri bwe, ma hawe kati iri ndra-in ame hawen, ma iy mesekei iri amwenen. \v 15 Arile iri pris tinan hawe iri lau tanan ta sahou batanau atou iri lahou tinan iy amekes, ma oro anuhun iri nah arah udu bolo kou ta asiu tinan buku doh, “Hosana! Sekesek i ta nadu Debit!” Idoh mesekei ndrine oro andra-i. \p \v 16 Ma oro ndremenya Jises i buku doh, “Sebwe ou ndranuhun sahou oro amekes doh?” \p Eme Jises asumon boho oro i buku doh, “Ehe, jo ndranuhun. Arile, sebwe ado banyolom sahou doh bwe, \q1 ‘Iri nadu nah atudun nyaran ili loken.’” \rq Wari 8:2\rq* \p \v 17 Eme iy ruwani oro ma iy iu i len ta kon nane ma iy ili udu Betani na ben doh. \s1 Jises tiye ma kei pik asara \r (Mak 11:12-14; 11:20-24) \p \v 18 Na mandraben handru Jises edek iu i hamon i kon tinan nane ja, ya iy imeson andra-i labai. \v 19 Iy atou kei pik ra-ei ales udu kabede san, ya iy ili mirihik ta aliy. Arile iy batou ari buwan ba-en aliy bwe. La-un le udu aliy. Eme iy tiye ta kei nane buku doh, “Ou winiyan bato-ou salim ja bwai.” Na le liliy kei pik doh asara ai. \p \v 20 Oro lau tan atou lakou doh, ya mani oro atur. Eme oro anya, “Buku sah ya kei doh asara suwi labai?” \p \v 21 Eme Jises asumon boho oro i buku doh, “Jo asehek sahou handru ewek tado, buku none ado atehei budon handru in ta Kindrei ya ado babwerei bwe, ado winiyan mesekei kandriyen jo amekes i ta kei pik nane. Ya idoh le bwe, buku none ado tiye i ta mandrei dah, ‘Ou suri ou ya ou sandroh ala bolo ndras,’ lakou doh kameh asahan buku le ado nane ndratiye. \v 22 Ya buku none ado atehei budon boto-on ma asolom, iri lakou ado asolom ta akohok, ado winiyan kuhiy.” \s1 Iri lau ndremenya Jises are lau atehei nyaran tinan i tan \r (Mak 11:27-33; Luk 20:1-8) \p \v 23 Jises iu ili hamon ili asiu tinan ta Kindrei nane ja, ya iy leheya iri lau mwan ma badih ta bolo sahou mwasin. Eme ya iri lau tinan tiri pris ma hawe iri lau-en ame hawen, ya oro ndremenyani iy i buku doh, “Ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?” \p \v 24 Jises asumon boho oro i buku doh, “Jo ale jo anya kandremenya ado ta lakou ari. Ya, buku none ado tiye amwenen eme tek, sebwe jo kameh tiye ewek tado are lau handru atehei boto-on eme tek ta amekes gok dah. \v 25 Kala Jon mene alomwa iri lau, iy akohok boto-on badu heh? Lakou doh badu kandrah deh, badu kon munyak le?” \p Eme oro andres udu ndrokowa oro le i buku doh, “Buku none to katiye anya, ‘Idoh lakou badu kandrah,’ idah kameh iy ndremenyani to ja anya, ‘Buku sah handru ya ado batehei budon tado bala ta aliy bwe?’ \v 26 Arile buku none to katiye anya, ‘Idoh kandriyen tiri lau le,’ idah kameh to anoh iri lau ale, tasah iri anya, Jon badeh, propet ta Kindrei handru.” \p \v 27 Eme oro asumon boho Jises i buku doh, “Aso tana aso bwe.” \p Eme Jises tiye toro i buku doh, “Jo ale jo winiyan batiye bawek tado are lau handru atehei nyaran tinan eme tek ya jo amekes iri gok dah.” \s1 Sahou sokek turu nah la-uh nadu ndramak ari \p \v 28 Jises asehek sahou i toro pris ma hawe oro lau tinan ja i buku doh, “Ehe, ya ado abudon buku sah? Ndramak ari nadun la-uh. Iy ili hawe nadun kadok iy tiye tan buku doh, ‘Naduk, ou ala abo gok bolo bilin waen.’ \v 29 Nadun tiye tan buku doh, ‘Jo bwalek.’ Arile hamon iy tubuni budon tan ja ya iu ili ibo gok. \v 30 Ya ndramak nane ili hawe nadun bwaneh ja, ya iy asehek i buku le aliy ili tan ja. Ya nadun tiye tan buku doh, ‘Abo tama.’ Arile iy bala bwe. \v 31 Ya uru nah ma la-uh doh are lau handru in hamon ta budon ta tama uru?” \p Eme oro lau nane anya, “Nadun kadok.” \p Eme Jises tiye toro i buku doh, “Jo asehek tado handru, iri lau ta akohok luk ta takis taha ma hawe iri badih ta madasarah kameh ala bwena ala bolo tondrok ta Kindrei. \v 32 Tasah, Jon asahan tado bwena ma iy leheya kandriyen mwasin ewek tado, arile ado batehei budon boto-on bala ta aliy bwe. Arile iri lau ta akohok luk taha ta takis, ma hawe iri badih ta madasarah atehei budon boto-on i tan, ma ado atou kandriyen doh, arile ado batubuni budon tado bwe. Ma ado batehei budon boto-on bala ta aliy bwe.” \s1 Sahou sokek ta lau ndra-in atondrok bilin ta waen \r (Mak 12:1-12; Luk 20:9-19) \p \v 33 Jises asehek i tiri lau tinan ja i buku doh, “Ado kanuhun sahou sokek ari ja i buku doh: Ndramak ari bwidi bilin ta waen ari, ma iy bwidi kou awudiy. Ma in bolo bilin nane iy ihi lek ari ta atik ma apis buwa waen, ano iy tahi asiu ra-em ta atondrok. Ano iy atehei bilin ili mine iri salibah ta atondrok. Ma iy iu ili kon rakon ja. \v 34 Ya mirihik ta buwa waen nane uni, iy suni iri lohowan tan ala hawe iri lau nane iy atehei bilin i tiri ta atondrok, ta iri kakohok ra-on buwa waen ki hamon ki tan. \p \v 35 “Arile oro salibah ta bilin tawi oro lohowan tan, ubwi ari, adai iy ari, ma orowei ari na bek. \v 36 Hamon ta aliy tama bilin suni oro lohowan tan ra-on ja ta gok ala, kane oro solo-an ja sakalawi oro nane ala bwena. Ya oro lau ta gok ta bilin nane tawi oro ya mesekei kandriyen ili toro i buku le bwena nane. \v 37 Eme hamon ta aliy tama bilin suni nadun amwenen ili hawe oro. Tama bilin nane abudon buku doh, ‘Sebwe oro kameh anuhun boho naduk.’ \p \v 38 “Arile oro salibah ta bilin atou nadun edek eme, ya oro asehek sahou ndrokowa oro buku doh, ‘Ei, nadun eme, to kadai iy, ma to kakuhi iri lakou tan mari.’ \v 39 Eme oro tawi iy, ma kuhi iy iu ili kona bilin, ma oro adai iy imek. \p \v 40 “Ya ado abudon buku sah? Buku tama bilin keme, eme iy kameh amekes saba lakou handru kili toro salibah nane abo gok an bolo bilin nane?” \p \v 41 Eme oro asehek tan buku doh, “Iy kameh idi oro lau doh amak, ma iy kameh atehei bilin ili mine iri lau rayah ja kabo gok ta aliy, ya buku none buwa waen uni, iy kameh akohok ra-on ale.” \p \v 42 Eme Jises ndremenya oro i buku doh, “Sebwe ado banyolom sahou doh ereu bolo buk ndrabun ta Kindrei bwe nadeh, sahou i buku doh, \q1 ‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek. Idah san ta Laban amekes, ma mwasin labai ta mada taha.’ \rq Wari 118:22-23\rq* \p \v 43 “Ya jo asehek tado, Kindrei kameh kuhi tondrok tan ereu mine aha lau badu Isra-el eme hamon, ya iy kameh atehei ili mine iri lau ra-on ja ale winiyan a-en hamon ta so-ok tan amwenen. \v 44 Are lau oro taku a bada bek doh kameh, ndruwi oro kameh ibok i le bwisik, arile, are lau oro i buku none bek doh, taku i la-u oro, idah kameh ati-i oro abwesek.”\f + \fr 21:44 \ft Iri lau ta tanan rayah anya, sahou udu bolo tarou ta Metiu kalan 21:44, doh badeh, Metiu batorou bwena bwe. Ou anyolom udu ta Tarou Ta Luk kalan 20:18. \f* \p \v 45 Oro tinan tiri pris hawe oro Parasi anuhun sahou sokek Jises amekes, oro tana oro buku Jises amekes sahou doh i la-u oro. \v 46 Idoh mesekei budon toro ta ateu Jises handru, arile oro anoh \m iri lau mwan ma badih, tasah iri lau mwan ma badih anya Jises badeh, propet. \c 22 \s1 Sahou sokek ta nyamon tinan ta tasou \r (Luk 14:16-24) \p \v 1 Jises amekes sahou sokek ili tiri lau ja i buku doh: \v 2 “Tondrok ta Kindrei i buku none ari kabin, nadun mwan anya ki tasou, ya kabin nane mesekei tine nyamon. \v 3 Ma mwena handru iy atehei sahou ili tiri lau kame ta nyamon ta tasou ta nadun. Ya, na len ta nyamon amwenen iy suni oro lohowan tan ala kaloh iri kame ta nyamon. Arile iri bwale iri. \p \v 4 “Ya iy suni oro lohowan tan ra-on ja, ma iy tiye toro i buku doh, ‘Ado kala katiye tiri lau nane jo ndraluhi iri, ma ado katiye toro buku doh, jo ndralowosani nyamon kabwe. Iri bulumakau mwan ma hawe iri bou apar jo ndradai kabwe, ma jo ndralowosani lakou mari kabwe. Aha kame le kaimon nyamon ta tasou.’ \p \v 5 “Oro lohowan tan au ala tiye tiri lau nane, arile iri bwale iri anuhun, ma iri au ala amekes budon tiri amwenen. Ari iu ili bolo bilin tan, ari iu ili amekes gok ta akohok luk tan amwenen. \v 6 Iri rayah tawi oro lohowan ta kabin nane luhani oro, ma adai oro amak. \v 7 Eme ya kabin nane ibolosen, ma iy suni oro lau tan ta bahun ala adai iri lau nane, ma sulumwi kon tiri andrakak iu. \p \v 8 “Eme kabin nane anya, ‘Nyamon ta tasou ndralowosaniy kabwe, oro lau nane jo aloh oro ma bwena, ado kamani oro. \v 9 Ado kadek kala madasan mari, ya are lau ado ndruniy, ado kaluhi iri kame ta nyamon ta tasou.’ \v 10 Iy tiye i buku doh, ya oro lohowan tan nane au ala kon mari, ma oro luhi iri lau mwasin ma ndra-in ale ame. Asiu ta tasou nane aso na lau. \p \v 11 “Iri lau mari nane manyah ado andri, ya kabin nane eme bolon atou iri. Madan ili, iy atou ndramak ari, iy batehei awin ta ame bolo nyamon ta tasou nane bwe. \v 12 Eme kabin nane ndremenyani iy, ‘Kawas tek, buku sah handru ou basini ari awin mwasin ta ame bolo nyamon ta tasou dah bwe?’ Iy ndramak nane basumon bwe. \p \v 13 “Kabin nane tiye toro lau ta ndrokei tan anya, ‘Ado kasawei katin ma minen ya ado kakahei iy ki-iu kili manan bolo lulik. Bolo lulik doh kameh iri lau aden andra-i labai ma lihi iri kameh asenyer andra-i labai.’ \p \v 14 “Ado kanuhun. Kindrei aloh taha mari. Arile iy ndralebelei ndramak ari, ari ta ili bolon.” \s1 Taha kadeu takis ki ta Sisa, deh, ndri-iy? \r (Mak 12:13-17; Luk 20:20-26) \p \v 15 Eme iri Parasi au ala manan atilik sahou tiri i se, ta takaleh madasan ta bolowa Jises ya sahou tan kinyon ma iri katehei iy ki mada sahou. \v 16 Iri suni oro ra-on tiri hawe oro lau ra-on ta Herot, ala atou Jises, ma oro tiye tan i buku doh, “Ndramak ta leheya, aso tanan, ou lau ta asehek sahou handru. Ya, na sahou handru ou ale leheya iri lau mwan ma badih ta kandriyen ta Kindrei. Ou banoh ta ari ndramak bwe. Ya, ou asehek sahou ari le ili tiri lau mari, buku ndramak nyaran tinan, deh, ndramak iy nyaran bwe. \v 17 Eme ya, ou asehek kamwenen keme taso. Ou abudon buku sah? Mwasin ta taha kadeu takis ki ta Sisa, deh, ndri-iy?” \p \v 18 Arile Jises ndratanan budon toro ndra-in. Eme ya, iy asehek i buku doh, “Ado lau ta wasai, buku sah handru ado anya kanone jo? \v 19 Ado kaleheya keme tek ari luk nane ado asih takis tado na aliy.” Eme oro andrei luk bororoh ari ili minen. \v 20 Eme Jises ndremenyani oro i buku doh, “Malawi ndramak ma nyaran kede-eh are lau handru?” \p \v 21 Oro anya “Ta Sisa.” \p Iy tiye toro, “Mwasin, saba lakou ta Sisa, ado kadeu ki ta Sisa. Ya saba lakou ta Kindrei, ado kadeu ki ta Kindrei.” \p \v 22 Oro anuhun sahou doh ma boho oro asak. Eme ma, oro ruwani iy ma oro au ai. \s1 Oro sadusi ame ndremenya Jises ta lau ndramak ano amak ja \r (Mak 12:18-27; Luk 20:27-40) \p \v 23 Na len le nane, oro Sadusi ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe. Eme oro ndremenyani Jises i buku doh, \v 24 “Ndramak ta leheya, Moses bwena mene anya, \q1 ‘Buku none ari ndramak imek, ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’ \rq Dutoronomi 25:5\rq* \p \v 25 “Ya, len ari bwena, oro lau ma ndro taloh nadu tine oro areu ndrokowa ahi dah. Eme kadok toro i tasou ta badih ari, ya iy nadun bwe ma iy imek. Ma iy ruwani udun i mine nadu tinen oro. \v 26 Bwaneh andrei iy, nadun bwe ale ma iy imek. Silih andrei iy buku aliy le, badih nane andromwei oro mari ano ili isos ta kalai. \v 27 Oro amak, ya hamon ta aliy badih nane imek ale. \v 28 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro mari.” \p \v 29 Eme Jises asumon boho oro i buku doh, “Ado ndrandra-i labai, tasah ado tana ado tarou ereu bolo buk ndrabun ta Kindrei bwe. Ma ado tana ado boto-on ta Kindrei bwe ale. Eme ya ado asehek sahou laleyah. \v 30 Na len iri lau ndramak kameh amak ame awas ja, ya iri kameh winiyan bala batasou ja bwe. Iri kameh asahan buku iri angelo areu kandrah. \v 31 Handru labai. Iri lau ndramak bwena, hamon kameh iri amak ja. Sebwe ado batou bolo tarou ta Kindrei iy mene asehek ewek tado bwe nadeh? Iy asehek i buku doh, \q1 \v 32 ‘Jo Kindrei ta Abraham, ta Aisik, ma ta Jekop.’\f + \fr 22:32 \ft Na len Kindrei asehek sahou doh i ta Moses, Abraham, Aisik hawe Jekop oro ma taloh ndramak ndra-au ma bwena handru.\f* \rq Eksodus 3:6\rq* \m Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le.” \p \v 33 Iri lau mari anuhun sahou doh, mani iri atur ta sahou tan. \s1 Batanau ta Kindrei udu bwele-en labai \r (Mak 12:28-31; Luk 10:25-28) \p \v 34 Kala doh oro Parasi anuhun buku Jises ndrasokei san toro Sadusi. Eme oro Parasi tukumwi oro a se ma oro ame atou Jises. \v 35 Ereu ndrokowa oro, ndramak ari iy tanan labai ta sahou batanau. Iy anya kanone Jises na sahou ya iy ndremenyani iy i buku doh, \v 36 “Ndramak ta leheya, saba sahou batanau badeh, tinan handru ma sakalawi iri sahou batanau mari?” \p \v 37 Eme Jises asumon i buku doh, \q1 “‘Ou aseken Laban tam Kindrei na ndrinem mari, ma na koham handru mari, ma hawe na budon tam mari.’ \rq Dutoronomi 6:5\rq* \m \v 38 Sahou batanau dah tinan handru ma iy batanau udu bwele-en labai. \v 39 Ya sahou batanau ari ja i buku le aliy, \q1 ‘Ou aseken iri lau ari ari badu hawem, i le buku ou aso-ok ou le.’ \rq Lebitikus 19:18\rq* \m \v 40 Sahou batanau ma la-uh doh kati iri sahou batanau malen mari hawe sahou tiri propet ale.” \s1 Jises ndremenya oro Parasi ta Krais o Mesaya \r (Mak 12:35-37; Luk 20:41-44) \p \v 41 Oro Parasi atukum kahis le, Jises ndremenyani oro buku doh, \v 42 “Ado abudon i buku sah handru ta ndramak taha aloh Krais o Mesaya? Iy nadu are handru?” \p Eme oro tiye i tan i buku doh, “Iy nadu Debit.” \p \v 43 Jises ndremenya oro ja i buku doh, “Ya i buku sah handru ya Malawi Ndrabun atehei budon i ta Debit ya Debit aloh ndramak nane ‘Laban’? Debit asehek i buku doh, \q1 \v 44 ‘Laban Kindrei tiye i ta Laban tek i buku doh: \q1 “Ou ame manyah ado loboho minek salin, \q1 winiya jo le baratehei iri lau ta amekes budon ndra-in i tam barado bahandra katim.”’ \rq Wari 110:1\rq* \p \v 45 “Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?” \v 46 Ari toro winiyan basumon boho Jises bwe. Kala le doh, iri anoh ta ndremenya Jises ta randra sahou ja. \c 23 \s1 Oro Parasi hawe oro lau ta leheya batanau malen amekes kandriyen ndra-in \r (Mak 12:38-39; Luk 11:43, 46; 20:45-46) \p \v 1 Hamon ta aliy Jises asehek sahou ili tiri lau mwan ma badih hawe oro lau tan. \v 2 Iy asehek i buku doh, “Iri lau ta leheya batanau malen hawe iri Parasi leheya aha ta sahou batanau, buku le Moses bwena mene amekes. \v 3 Iri sahou mari oro asehek ewek taha badeh, aha kanuhun ma ka-en hamon ta aliy. Arile kandriyen oro amekes, ado sa-en hamon ta aliy, tasah oro asehek iri sahou, arile oro ba-en hamon ta sahou toro bwe. \v 4 I buku le oro atisih lau na kandriyen malen solo-an labai ta iri ka-en hamon ta aliy, arile oro winiyan batehei mine oro ta aseben bwe. \p \v 5 “Iri lakou mari oro amekes doh, ta amekes iri lau katou. Oro asin nyeh ndra tinan ta asolom ereu mine oro ma bwili oro, ma oro aseu malou lawe-en ereu kiri awin toro.\f + \fr 23:5 \ft Udu bada nyeh tinan ta asolom badeh, iri aseu bwisi lakou, ya in bolo bwisi lakou doh iri atehei iri tarou rayah badu bolo sahou ta buk ndrabun. Ano iri asin nyeh doh ereu mine oro kamweu ma hawe bwili oro. Ou anyolom ili ta Eksodus kalan 13:9, 16 ma Dutoronomi 6:8; 11:18. Ya iri Juwis ale a-en hamon ta sahou udu bolo tarou ta Namba kalan 15:37-41. Eme ma iri aseu malou ereu kiri awin tiri. Jises anya, iri lau ta leheya batanau malen hawe iri Parasi bwidi iri lakou doh asahan i tinan ta iri lau katou, ma kabudon iri badeh abadok handru ta a-en hamon ta sahou ta Kindrei. \f* \v 6 Iri anya kamanyah kareu le ndrahu kon ta atudun ta nyamon tinan, ma bwabwai mwasin badu ndrahu tukum tiri Juwis. \v 7 Ya oro anya lau mari kasumon oro na len ta baen. Ma oro anya lau kaloh oro ‘ndramak ta leheya.’ \p \v 8 “Arile lau saloh ado ‘ndramak ta leheya,’ ndri-iy. Tasah ndramak ari le, iy ndramak tinan ta leheya ado, ya ado mari badeh, nadu tine ado. \v 9 Ya ereu kon munyak dah ado saloh ari ndramak tama ado, ndri-iy. Ndramak ari le tama aha, ya iy udu kandrah. \v 10 Ya iri saloh ado ‘ndramak ereu bwena,’ ndri-iy, tasah ndramak ari le ereu bwena, iy Mesaya o Krais. \v 11 Ndramak nyaran tinan ereu ndrokowa aha iy kasahan lohowan taha. \v 12 Ndramak atudun nyaran amwenen ili loken, nyaran kameh eme andri, ya are lau amekes nyaran amwenen eme andri, nyaran kameh ili loken.” \s1 Jises tiye oro lau tanan hawe oro Parasi ta kandriyen ndra-in oro amekes \r (Mak 12:40; Luk 11:39-52; 20:47) \p \v 13-14 Jises asehek sahou ja i buku doh, “Ado lau tanan ta batanau malen ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Tasah, ado ndrasulu-i kou ta ala bolo kon mwasin udu kandrah ereu mada iri lau. Ado ale winiyan bala bolon bwe. Ya, buku none iri lau anya kala bolon, ado aturuk san tiri.\f + \fr 23:13-14 \ft Iri lau rayah ta tanan anya, sahou rayah ja udu hawe sahou ta bolo Metiu kalan 23:13 i buku doh: (14) Ado lau tanan ta batanau malen ma ado Parasi, mada ado kaleu. Ado kalime ado la-uh! Ado bahana lakou tiri nyau ale ano ado asolom lawe-en labai. Ta kandriyen doh ado kameh akohok maha-an tinan labai. Ou anyolom kili ta tarou ta Mak kalan 12:40. \f* \p \v 15 “Ado lau tanan ta batanau malen ma ado Parasi, ado kabudon kamwenen! Sisi-in laba tinan doh kameh ewek bwele-e ado! Ado kalime ado la-uh! Ado adek bolo kon ma bwele-e ndras mari ta amekes ndramak ari le ta in hamon taha. Ya buku none iy in hamon taha, ado mesekei iy ndramak ta i bolo jih, i buku none ado le. Ado mesekei kandriyen tan asahan ndra-in, sakalawi tado ja. \p \v 16 “Ado lau mada ado bwe! Sisi-in laba tinan doh kameh ewek bwele-e ado! Ado anya kaleheya san ki tiri lau, ado kabudon kamwenen. Ado asehek i buku doh, ‘Buku none ndramak asehek sahou handru i ta asiu tinan ta Kindrei, ma iy tandrakan handru i ta kon loken, idoh lakou laleyah. Arile, buku none ndramak asehek i ta gol ereu bolo asiu ta Kindrei, ma iy tandrakan ili kon loken, idoh kameh iy kabwidi lakou buku iy nane ndrasehek.’ \v 17 Ado lolo-ou ma mada ado bwe. Saba lakou iy mwasin ereu mada Kindrei? Gol mwasin deh, asiu tinan ta Kindrei? Ado tana ado bwe nadeh? Buku none gol ereu asiu tinan ta Kindrei, gol doh bamesekei asiu tinan ta Kindrei bala mwasin bwe; asiu ta Kindrei le mwasin, ma iy mesekei gol doh asahan mwasin ma ndrabun. \v 18 Ya ado ale anya, ‘Buku none ari ndramak tandrakan in bwele-e mada koto-ok, idoh ari lakou handru bwe. Arile, buku none iy tandrakan in bwele-e iri lakou ta asun ere bwele-e mada koto-ok, iy kamesekei buku iy nane ndratandrakan.’ \v 19 Ado mada ado bwe. Saba lakou mwasin ereu mada Kindrei, iri lakou ta asun nane deh, o mada koto-ok? Iri lakou ta asun nane ereu bwele-e mada koto-ok, idoh lakou laleyah. Arile, mada koto-ok le mesekei iri lakou ta asun nane asahan ndrabun ta Kindrei. \v 20 Ya, buku none ou tandrakan ereu bwele-e mada koto-ok, idoh ou asehek sahou ndrabun handru. Ou ndratandrakan udu bwele-e mada koto-ok ma hawe iri lakou mari ta salom nane ereu bwele-e mada koto-ok nane. \v 21 Ya buku none ou tandrakan ili bwele-e asiu tinan ta Kindrei, ou ndratandrakan ndrala bwele-e asiu tinan ta Kindrei ma ndrala bwele-e Kindrei ale, tasah ou ado bolo asiu tan. \v 22 Ya are lau tandrakan ili kandrah, iy ndratandrakan ndrala ndrahu manyah ta Kindrei ma Kindrei ale, tasah idoh ndrahunen ta manyah. \p \v 23 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Iri bake mari badu bolo bilin ado apou ari, ari i ronoh, ronoh, ya ado adeu ari ari badu bolo ronoh doh, i ta Kindrei. Idoh mwasin, arile ado ndramani iri sahou tinan badu bolo batanau ta Kindrei, buku none kandriyen ta anuhun sahou amwenen, ma tikisiy lau, ma adeu budon boto-on i ta Laban. Sebwe mwasin ta ado ka-en hamon ta sahou batanau tinan ma ado samani iri sahou batanau bwisik nane ale. \v 24 Ado mada ado bwe. Ado anya kaleheya san ki tiri lau, arile ado amwenen batou san bwe. Ado atou lakou nadu bwisik buku buruku udu bolo suw tado, ya ado abo gok ta akohok eme len, arile ado batou lakou tinan buku kamel udu bolo suw tado, ya ado a-un le ma sakalami lakou mari. \p \v 25 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado sikine kona bwesam ma kona bwekei amwenen, arile nyamon ale ado apwe irek in bolo bwekei tado, ado akohok i san ta bahana ma san ta ndrakok. \v 26 Ado Parasi, ado mada ado bwe! Ado kasikine bolo bwesam ma bolo bwekei op, ano konan barasahan mwasin ale. \p \v 27 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado buku none ari lek ta lau ndramak areu bolon, konan badeh, iri nyosowaniy na iri kanyeu ma iri lakou konen mwasin labai, arile bolon kodo-oh ndrarahak le ndruwi ndramak ma manahun ndra-in labai. \v 28 Ado a buku aliy adeh. Iri lau atou bada ado, iri anya ado mwasin. Arile bolo oda ado kodo-oh irek ta sahou wasai ma kandriyen ta ba-en hamon ta sahou batanau bwe.” \p \v 29 Jises asehek sahou ili ja i buku doh, “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado a-eh lek mwasin tiri propet, ma ado anyasou lek tiri lau mwasin. \v 30 Ma ado anya, ‘Buku none to ka-en hawe iri tubu taha bwena, sebwe to winiyan baseben ta adai iri propet ta Kindrei amak bwe.’ \v 31 Na sahou ado amekes doh, ado leheya buku none ado nadu iri lau mene adai iri propet ta Kindrei bwena. \v 32 Mwasin, ado kadek, ado kabwidiy kano iri kandriyen ndra-in mene iri tubu aha mene ndramesekei! \p \v 33 “Ado mwak ndra-in. Kindrei kameh atehei ado ala ta mada sahou, ma ado kameh ala bolo jih. Ya ado kasahan kamwenen ki buku sah handru? \v 34 Ado kanuhun kamwenen! Jo kameh suni iri propet ma iri lau budon tiri mwasin ma iri lau tanan mwasin ta leheya ado, ame atou ado. Arile ado kameh adai iri ra-on amak ma atahi iri ra-on ala bada kei tondreh, hawe iri ra-on kameh ado ubwi iri na malou an bolo asiu ta atukum taha. Ya ado kameh sobolon iri ereu bolo kon tinan taha ma oro kameh sakaliye au ala kon rakon ja. \v 35 Kandriyen ta adai iri lau mwasin don adeh, mesekei maha-an eme kon munyak. Maha-an doh kameh ereu bwele-e ado amwenen. Iri adai iri lau mwasin udu ndra kabatana ndraye Ebol eme isos ndraye Sekaraya nadu Berekaya, iy ndramak ale ado adai ereu ndrokowa asiu tinan ta Kindrei ma mada koto-ok. Ado amwenen kameh akohok iri maha-an ta kandriyen ndra-in doh. \v 36 Jo asehek sahou handru ewek tado, sohowa iri kandriyen ndra-in doh kameh ewek bwele-e aha lau mwan ma badih ale kede-en.” \s1 Jises tikisiy Jerusalem \r (Luk 13:34-35; 19:41-44) \p \v 37 Jises asehek sahou ja anya, “Jerusalem, Jerusalem, jo tikisi ado labai, ado adai iri propet, ma ado ateu iri lau Kindrei suni iri ame atou ado, ma ado orowei iri na bek ma adai iri amak. San solo-an jo anya katukumwi nadum oro, buku none iri kakaro tukumwi nadu iri areu bahandra bani iri. Arile ado bwale ado! \v 38 Nadah asiu ta salom tado kameh andra-i ma udu laleyah. \v 39 Jo asehek tado amwenen, ado winiyan batou jo ja bwe, winiya le len hamon kameh ado anya, \q1 ‘Kasekesek ki ta ndramak doh iy eme ta nyara Laban.’” \rq Wari 118:26\rq* \c 24 \s1 Jises asehek anya asiu tinan ta Kindrei kameh andra-i \r (Mak 13:1-2; Luk 21:5-6) \p \v 1 Jises ruwani asiu tinan ta Kindrei ma iy iu i len, ya oro lau tan ame leheya i tan asiu tinan ta Kindrei nane, konen handru. \v 2 Eme iy asehek sahou ja i toro i buku doh,\f + \fr 24:2 \ft Idoh badeh, i buku sahou limeh ai, badu bolo oro sahou lawe-en ma limeh nane Jises asehek udu bolo tarou ta Metiu. Sahou dah badeh, udu ta kalan 24:2-25:46, ma asehek ta nyala iri lakou kameh asahan na len munyak anya kano.\f* “Ado ndratou iri lakou mari ta asiu kede-eh? Jo tiye tado amwenen, ari ndruwi asiu bek kameh winiyan bales bareu loken bwe. Iri marakon kameh ato-oh iu i andri.” \s1 Len ndra-in ma bahun kameh asahan \r (Mak 13:3-13; Luk 21:7-19) \p \v 3 Jises eme manyah udu bwele-e mandrei Olip, oro lau tan aton le ame ndremenya iy anya, “Ou tiye keme taso, na saba len handru kameh lakou doh kasahan? Ya saba kalem kameh leheya aso buku none len tam ta eme hamon, ma kon munyak ano.” \p \v 4 Jises asumon oro i buku doh, “Ado kanyolom kamwenen, ya ari ndramak sawendreyani ado, ndri-iy. \v 5 Iri lau solo-an kameh ame anya iri asehek sahou tek ma anya, ‘Jo dah Krais.’ Ya iri kameh wendreyani lau solo-an. \v 6 Ado kameh anuhun kurutuwe bahun ereu mirihik, ma yoyou ta bahun ereu len. Arile, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh, kahis le. \v 7 Tasah, kon munyak tinan ari kameh amekes bahun i ta kon tinan ari, ya kabin badu kon rakon kameh amekes bahun i ta kabin badu kon rakon ja. Son kameh asahan bolo kon, ma kon ari ari kameh ndroi asahan. \v 8 Iri lakou mari doh anya kasahan buku none sisi-in ta badih anya kato-ou nah. \p \v 9 “Ano, iri kameh ateu ado, ma a-um ado, ma adai ado amak. Iri lau badu kon munyak tinan mari kameh baseken ado bwe, tasah ado an hamon tek. \v 10 Na len doh kameh iri lau solo-an aruwe budon tiri udu tek iu, ma au ala hamon. Iri ari, ari kameh nyowonya ndramak ari ja ili tiri lau ndra-in, ma iri kameh bwale iri ndramak ari ja. \v 11 Iri propet solo-an ta wasai kameh asahan, ma iri kameh wendreyani iri lau solo-an. \v 12 Kandriyen ndra-in solo-an kameh asahan, ma iri lau solo-an kameh ruwani kandriyen ta aseken ndramak ari ja. \v 13 Arile, are lau tawiy ili isos munyak ano, Kindrei kameh winiyan akohok iy i hamon ja. \v 14 Sahou mwasin dah nyala tondrok ta Kindrei kameh tiyaniy ili isos kon mari, ta iri lau marakon kanuhun, ano kon munyak dah barano. \s1 Lakou munya-un ndra-in kameh asahan \r (Mak 13:14-23; Luk 21:20-24) \p \v 15 “Hamon kameh aha anyolom \q1 ‘lakou munya-un ndra-in’ \rq Daniyel 9:27; 11:31; 12:11\rq* \m propet Daniyel mene tiye, lakou doh munya-un ndra-in ales udu kon ndrabun ta iy sare aliy. (Are lau anyolom sahou dah iy kabudon kamwenen.) \v 16 Are lau iri are kon Judiya katobwak kala bolo mandrei. \v 17 Are lau ereu bwele-e asiu loken sala hamon sala bolo asiu sakohok lakou tan, ndri-iy. \v 18 Ya are lau ereu bolo bilin sala hamon sala sakohok kolau tan, ndri-iy. \v 19 Len doh kameh len ndra-in labai tiri badih ale nah ere tiri, ma badih nah ma nyandren. \v 20 Aha kasolom ki ta Kindrei ta aha satobwak na len ta jor ma ur, ma na len ta amunyau, ndri-iy. \v 21 Tasah, na len ndra-in doh eme kameh kon mari kameh andra-i handru en, sakalawi iri len ndra-in mene kabatana Kindrei bwidi munyak eme taku dah. Ya ari ja hamon winiyan basakalawiy bwai. \v 22 Arile, Kindrei ndrasani kane len doh. Ya i buku none iy basaniy bwe, ari ndramak winiyan basakalawiy bwe. Arile, toro lau le nane Kindrei ndranyowonyani oro, iy kameh sani len doh kameh a mo-on. \v 23 Ya buku none ari ndramak katiye taha, ‘Krais asah idah!’ deh, ‘Laban asah in kenoh!’ Aha sanuhun, ndri-iy labai. \v 24 Tasah, idah kameh, krais ta wendreya ma hawe propet ta wendreya kameh asahan. Ya iri kameh amekes iri lahou tinan ma kalem ta wendreya iri lau, ma iri ale anya kanone iri lau ala budon ta Kindrei udu tiri kataku. \v 25 Aha ndranuhun! Jo ndratiye taha bwena. \p \v 26 “Ya, buku none lau asehek anya, ‘Laban ndrame, iy ereu bolo kon lomale an.’ Aha sala, ndri-iy. Ya buku none iri anya, ‘Iy asah aton kenah,’ aha satehei budon taha sala ta aliy, ndri-iy. \v 27 Len ta Nadu Ndramak Awas eme hamon kameh mada lau mari atou iy. Iy kameh eme buku le kalik anya ereu rai, lau areu ndra jaha kameh atou ale. \v 28 Kon ale oda ari lakou, o ndramak ereu aliy, idoh kamen adeh, iri sirih ta aimon lakou bolo-an le kameh atukum areu aliy.” \s1 Nadu Ndramak Awas kameh eme hamon \r (Mak 13:24-27; Luk 21:25-28) \p \v 29 “Hamon ta len ndra-in asahan, \q1 ‘An kameh ilik, ma bun kameh winiyan banya bwe. \q1 Ya ndrau udu kandrah kameh taku ereu kandrah eme andri, ma boto-on mari badu kandrah kameh nyukunyok.’ \rq Aisaya 13:10; 34:4\rq* \p \v 30 “Hamon ta aliy, idah kameh kalem ta Nadu Ndramak Awas asahan bolo kandrah, ya lau mari badu munyak kameh aden, ma iri kameh atou Nadu Ndramak Awas asahan ereu bwele-e asi kandrah, ma boto-on tan ma lomadan tinan labai. \v 31 Ya kurutuwe ndrah kameh anyar tinan labai, ma iy kameh suni oro angelo tan au ala kati jor ma hahuw ereu bolo munyak dah, ta atukum iri lau tan, ala budon tan udu tiri, ereu kon ranah ili taku ranah ame hawen. \s1 Ado kakohok tanan ta kei pik \r (Mak 13:28-31; Luk 21:29-33) \p \v 32 “Ado kanyolom kei pik, ya iy kameh tiye tado. Buku none andran irek ta gwa ma nyabun asahan, ado tana ado, idah kameh mirihik kon i le an ai. \v 33 Ya, buku none aha anyolom iri lakou nane jo ndrasehek, aha tana aha len ndrame bakep, ya Nadu Ndramak Awas ndrareu le mada kou ta eme hamon ai. \v 34 Jo tiye tado handru en! Iri lau rebesem areu kede-eh kahis na len dah kameh bamak bwe le, iri lakou mari doh kameh asahan. \v 35 Kandrah hawe kon munyak dah kameh ano iu, arile sahou tek le kameh winiyan bano bwe. \s1 Ari ndramak bala tanan len ma mada an ta Laban eme hamon, bwe \r (Mak 13:32-37; Luk 17:26-30, 34-36) \p \v 36 “Ari ndramak bala tanan len, deh, mada an ta Laban eme hamon bwe. Iri angelo badu kandrah ale ma nadun ale tanan bwe, taman le ari tanan. \v 37 Len ta Nadu Ndramak Awas eme kameh asahan, buku le iri lakou mene asahan na len ta Nowa. \v 38 Na len bwena ta wadah asahan, iri lau amekes nyamon tinan, iri a-un gwa, iri mwan ma badih atasou ili eme, ili le isos ta len Nowa oro ala bolo ndron tan tinan. \v 39 Arile, iri lau tana iri bwe, winiya le wadah eme aluwi iri mari au. Len ta Nadu Ndramak Awas kameh asahan buku le len mene ndrasahan bwena. \v 40 Na len doh, uru lau la-uh kameh abo gok se ereu bolo bilin, ya ari kameh iu, ya ari kameh udu api. \v 41 Uru badih la-uh kameh alim badu wit areu se, ari kameh andrei iy iu, ya ari kameh udu api. \p \v 42 “Aha kanyolom kamwenen, tasah aha tanan saba len Laban taha eme hamon, bwe. \v 43 Arile, budon tado kaleu ta tanan doh: Buku tama asiu i tanan, saba ben handru iri lau ta bahana kameh ame apou asiu tan, iy kameh winiyan bamadin bwe, iy kameh atehei ndrokei, tasah iy winiyan bamukuni iri lau ame apou asiu tan bwe. \v 44 Ya buku none aha ale, aha kalokou aha na len mari. Tasah, Nadu Ndramak Awas kameh asahan na len aha batehei budon ta iy eme bwe. \s1 Sahou sokek ta iri lau mwasin ta gok ma iri lau ndra-in ta gok \r (Luk 12:42-46) \p \v 45 “Are lau iy mwasin ta gok, ma iy budon mwasin? Iy don adeh, tinan tan ndratehei tondrok tiri lau tan ra-on ja ndra-en bahandran ta adeu niri nyamon na len ari ari, iy le tanan. \v 46 Sekesek handru in bwele-e ndramak doh, buku none tinan tan eme takalahi iy amekes gok tan mwasin. \v 47 Jo tiye tado handru, tinan tan kameh atehei iy ta atondrok iri lakou tan mari. \v 48 Arile, buku none iy lau ta gok ndra-in katiye anya, ‘Ndramak ta asiu doh kameh winiyan bame suwi bwe,’ \v 49 ya iy kameh a-um iri lau ta gok hawen, ma iy kameh ili aimon nyamon ma a-un gwa lolo-ou hawe iri lau ta a-un gwa lolo-ou. \v 50 Ya, na len ari, tinan ta ndramak nane ta gok kameh eme hamon na len iy ndramak nane tanan bwe. \v 51 Tinan tan kameh sani iy i lunah, ma mesekei iy akohok maha-an buku le iri lau kalime iri la-uh. Iy kameh anyar, ma asenyer lihin. \c 25 \s1 Sahou sokek ta badih bihin ma ronoh \p \v 1 “Tondrok ta Kindrei udu kandrah i buku le oro badih bihin ma ronoh. Ndramak ari anya ki tasou. Eme ma, iri badih bihin doh bwese-ei sun toro ta ala ndruni iy in san ma tiyani iy eme ta molak. \v 2 Oro limeh badeh bale oro bwe, ya oro limeh oro tanan labai. \v 3 Oro limeh bale oro bwe nane bwese-ei lam toro, oro bakohok ra-on ndrelekei ja bwe. \v 4 Oro limeh nane bale oro udu aliy, oro kuhi lam toro, ma oro kuhi ndrau ndrelekei ari ale. \v 5 Ndramak nane ta tasou bame suwi bwe, ya oro badih nane mada oro amadin, ya oro amadin. \p \v 6 “Na ndrukulu ben alih, iri anuhun ndramak ari aloh i buku doh, ‘Iy ndrame, ndramak ta tasou ndrame! Aha kame katou iy.’ \p \v 7 “Eme oro badih ma ronoh nane amak, mine oro i ta sun toro, anya katelem ja. \v 8 Eme ya, oro limeh nane bale oro bwe, tiye toro limeh nane bale oro udu aliy, ‘Ado kanyohan aso sese ndrelekei tado, sun taso anya kamak ai.’ \p \v 9 “Arile oro limeh nane bale oro udu aliy anya, ‘Sebwe winiya to bwe nadeh! Ado ka hamon kala kasih ra-on ja kewek tado.’ \p \v 10 “Eme oro badih ma limeh nane adek au ala hamon ala asih toro ndrelekei, oro adek ala anya kasih le badeh, ndramak ta tasou nane asahan, ya oro limeh nane ndralowosani oro ma oro abe-en iy, oro au ala bolo asiu hawen, ma oro aimon nyamon ta tasou nane, ma iri sulu-i kou ihis. \p \v 11 “Luwen bwe oro badih limeh nane ame hamon aloh anya, ‘Laban, Laban, ou sulu-i kou, aso anya kawek asiu.’ \p \v 12 “Arile iy asumon boho oro anya, ‘Jo tiye handru, jo tanan ado bwe oh!’ \p \v 13 “Eme ya, ado kanyolom kamwenen, tasah ado tana ado bwe, saba len, ma saba mada an handru, kameh iy eme hamon ja. \s1 Sahou sokek ta oro lau lohowan ma taloh \r (Luk 19:11-27) \p \v 14 “Tondrok ta Kindrei kameh i buku le ndramak ari anya kedek kili kon ari leheleh, ya iy luhi oro lohowan tan ya iy indrom luk tan ili toro ta oro katondrok. \v 15 Iy abudon kandriyen ta gok ma nyamu lohowan tan ari, ari. Eme ya, i ta iy ari, iy atehei lamalou (K5,000), i ta ari ja iy atehei lulou (K2,000), i ta ari ja iy atehei ralou (K1,000), ano iy akohok tekedek tan iu ili kon len. \v 16 Iy nane kuhi lamalou (K5,000), nawin bwe iy ili amekes ba-en na luk tan, eme ya iy kuhi lamalou (K5,000) ja ili hawen. \v 17 Ya iy nane kuhiy lulou (K2,000) mesekei buku aliy ale, ma iy kuhi lulou (K2,000) ja ili hawen tan nane. \v 18 Arile, iy ari nane kuhiy ralou (K1,000) le, ili ihi lek ili bolo ndren, ma iy tone luk ta tinan tan nane. \p \v 19 “Jaha solo-an iu ano tinan toro lohowan nane eme hamon, ma iy ndremenya oro ta luk tan mene iy atehei ili mine oro. \v 20 Ndramak nane kuhi lamalou (K5,000) eme madan ma iy anya, ‘Tinan tek, ou mene atehei lamalou (K5,000) eme tek. Jo ili ja mesekei lamalou (K5,000) ja ndrala hawen.’ \p \v 21 “Tinan tan anya, ‘Lohowan tek, ou ndramak mwasin, ou ndranyowo-ei lakou nadu bwisik, idah kameh jo mesekei ou atondrok lakou tinan; ou ala bolo kon tek ta sekesek.’ \p \v 22 “Ya iy ndramak nane kuhi lulou (K2,000) eme madan ma iy anya, ‘Tinan tek, ou atehei lulou (K2,000) eme minek, jo ndramesekei lulou (K2,000) ja ndrala hawen.’ \p \v 23 “Tinan tan tiye tan, ‘Ou ndramak mwasin; Ou ndranyowo-ei lakou nadu bwisik, idah kameh jo mesekei ou atondrok lakou tinan, ou ala bolo kon tek ta sekesek.’ \p \v 24 “Iy ndramak nane kuhi ralou (K1,000) le eme bwena ma iy anya, ‘Tinan tek, jo tanan ou badeh, ndramak ta losen. Ou akohok lakou laleyah ma akohok lakou badu bwisi limem bwe. \v 25 Eme ya, jo inoh, ma jo ili tone luk tek nane ili bolo ndren. Idoh luk ralou (K1,000) tam kewek hamon.’ \p \v 26 “Arile tinan tan anya, ‘Ou ndramak ndra-in ma ou lau ta awoyah! Ou tanam jo kameh akohok lakou jo batah bwe, ma jo kameh atukum nyamon bolo kon mari ale jo bakeh badu nyamon bala aliy bwe. \v 27 Tasah handru ou mene batehei luk tek bala mine iri lau ta amekes luk asahan solo-an bwe? Ya, buku none jo asahan, jo kameh akohok luk tek ma saba lakou ja badu hawen. \v 28 Ado kakuhi luk ralou (K1,000) ereu minen keme len, ma katehei kili mine iy lau tan nane akohok lamalou (K5,000) i bwele-e lamalou (K5,000) mene udu minen ta atondrok. \v 29 Tasah, i ta ndramak ari, ari tan lakou udu aliy, idah kameh iy akohok solo-an ja ili la-un. Arile, ndramak tan lakou bwe, ya sese le iy tawiy, idah kameh kuhi mari ano iu. \v 30 Ya, ta lohowan ndra-in nane, ado kakahei iy kili bolo kon lulik. Kon doh iri kameh aden ma asenyer lihi iri.’” \s1 Nadu Ndramak Awas kameh anuhun sahou ta lau mari \p \v 31 Jises asehek sahou ili ja anya, “Na len Nadu Ndramak Awas eme ma lomadan, iri angelo tan ale ereu hawen, iy kameh manyah ereu koyeu tan lomadan handru. \v 32 Ya, iri lau mari badu munyak kameh ame atukum areu madan, ya iy kameh apou iri, ari i len, ari i len, buku none iri lau ta atondrok lebelei iri sipsip hawe me. \v 33 Ma iy kameh atehei iri sipsip ala minen salin, ma iri me kameh ala minen kamweu. \p \v 34 “Ya kabin kameh tiye toro lau areu minen salin anya, ‘Ado kame, tama ndranyosowani ado. Ado kame kakohok ndrahune ado, tama ndralowosaniy kala munyak dah ma ha-un kahis le. \v 35 Tasah, bwena jo imek son, ou adeu nek nyamon, balek amar ou atehei wa-ik gwa, jo lau badu leheleh ou luhi jo ili asiu. \v 36 Jo kolau bwe, ou atehei kolau ra-ei eme jo taniy, jo ibo sik ou ame tondrokei jo, jo in bolo kou, ou ame anyolom jo.’ \p \v 37 “Ya iri lau mwasin kameh asumon iy anya, ‘Laban, na saba len ahi atou ou amak son, ya aso nyohonei ou; ya, na saba len balem amar ya aso atehei wa-im gwa? \v 38 Na saba len aso atou ou lau badu leheleh, ya aso luhi ou ame asiu; ya, ou kolau ta taliye bwe, ya aso atehei kolau ra-ei ewek ya ou taniy? \v 39 Ya na saba len ou abo sik, ya, ou areu bolo kou, ya aso awek anyolom ou?’ \p \v 40 “Ya kabin kameh asumon i buku doh, ‘Handru, jo tiye tado, buku none ou ndrabwidiy ndrala ta ari nadu tinek laleyah kede-eh, ou ndrabwidiy ndrame tek.’ \p \v 41 “Ya iy kameh tiye toro lau areu minen kamweu i buku doh, ‘Ado ka-au ka len! Lakou ndra-in udu la-u ado. Ado kala bolo jih, tama ndralowosaniy ta balik hawe oro angelo tan. \v 42 Tasah, jo imek son ado banyohan jo nyamon bwe, balek asamar ado badeu wa-ik gwa bwe. \v 43 Jo lau badu leheleh ado baluhi jo bawek asiu bwe, jo kolau ta taliye bwe, ado badeu kolau bame tek ta taliye bwe, jo ibo sik ma jo in bolo kou ado bame banyolom jo bwe.’ \p \v 44 “Oro kameh asumon i buku doh, ‘Laban na kahis aso atou ou amak son, deh, balem amar, deh, ou lau badu leheleh, deh, ou kolau ta taliye bwe, deh, ou abo sik, deh, ou a-en bolo kou, ya aso banyohan ma bawek batou ou bwe?’ \p \v 45 “Iy kameh asumon i buku doh, ‘Handru jo tiye tado, buku none ou bamekes bala ta ari ndramak laleyah kede-eh bwe, ou bamekes bame tek bwe le.’ \p \v 46 “Ya oro kameh au ala bolo kon ndra-in, arile iri lau mwasin kameh au ala bolo kon mwasin.” \c 26 \ms1 Jises akohok sisi-in ma iy imek ano iy amak ja \mr (Kalan 26–28) \s1 Iri lau tinan areu bwena amekes budon ta adai Jises kimek \r (Mak 14:1-2; Luk 22:1-2; Jon 11:45-53) \p \v 1 Jises bwidi iri sahou doh ano, iy tiye toro lau tan anya, \v 2 “Ado tana ado, len la-uh hamon kameh taha abudon len tinan ta Pasoba,\f + \fr 26:2 \ft Len tinan ta Pasoba badeh, iri Isra-el abudon len bwena mene, angelo ta Kindrei idi nadu iri Ijip kadok amak. Ya len doh ale iy sebenei nadu iri Isra-el kadok ado mwasin; ano iy kuhi iri Isra-el ado Ijip ame len. Ou winiyan anyolom moso iri sahou ta Pasoba udu kona Buk Ndrabun dah.\f* ma Nadu Ndramak Awas kameh, iri atehei iy ili mine iri lau ndra-in, ma oro kameh tatahi iy ili bada kei tondreh.” \p \v 3 Na len doh iri tinan tiri pris hawe iri lau tinan areu bwena tiri Isra-el atukum areu asiu ta tinan tiri pris, nyaran Kayapas. \v 4 Oro atilik sahou toro i se ta takaleh san ta wendreya Jises, ma kateu iy, ma kadai iy kimek. \v 5 Arile, oro tiye anya, “To samekes na len tinan ta nyamon, ndri-iy, koro-an iri lau kabokoro-ei ma bahun tinan kasahan.” \s1 Badih ari solowei ndrelekei manahun mwasin i la-u Jises \r (Mak 14:3-9; Jon 12:1-8) \p \v 6 Jises udu Betani udu asiu ta Saimon, iy bwena lepra udu tan. \v 7 Jises udu andri aimon nyamon kahis le, badih ari eme ma bwisi ndrau ari ma ndrelekei manahun mwasin udu bolon, lakou doh sowan tinan labai, ma iy solowei ili batu Jises. \p \v 8 Oro lau tan atou, ma oro abolosen ma oro anya, “Aden! Tasah handru iy asolou ndrelekei mwasin doh iu laleyah? \v 9 Ndrelekei doh nane katehei kili mada ba-en ya luk solo-an asahan ta aliy, ya katehei ki tiri lau tiri lakou bwe.” \p \v 10 Arile, Jises tanan budon toro, ma iy anya, “Ado abudon ndra-in i ta badih kede-eh tasah? Badih kede-eh ndramesekei lakou tinan ma mwasin labai ndrame tek. \v 11 Iri lau tiri lakou bwe kameh len mari ado hawe ado, arile jo kameh winiyan bado hawe ado len mari bwe. \v 12 Iy solowei ndrelekei doh eme badak ta alokou jo ta ili bolo lek. \v 13 Handru, jo tiye tado. Saba kon iri atiye sahou mwasin ili udu bolo kon munyak dah, saba lakou iy ndrabwidiy dah kameh iri asehek ta aliy ta abudon nyaran.” \s1 Judas edeu sa-oh ta adeu Jises ili mine iri lau tinan areu bwena \r (Mak 14:10-11; Luk 22:3-6) \p \v 14 Ano ya iy ari ereu ndrokowa oro ronoh la-uh nyaran Judas Iskariyot, iy ili atou oro tinan tiri pris. \v 15 Ma iy tiye toro, “Saba lakou handru kameh ado atehei eme tek, buku none jo atehei iy ewek mine ado?” Eme oro sihinei iy na bek nyikilikin silba ma tonoh (30).\f + \fr 26:15 \ft Bek nyikilikin silba ma tonoh (30) doh, luk tinan sese. Idoh i buku sihinen ta ndramak ta lahou ibo gok bun limeh o onoh ma buruwen. Ou anyolom kili ta kalan 27:9-10. \f* \v 16 Kala doh iy takaleh madasan ta katehei iy kili mine oro. \s1 Jises aimon nyamon hawe oro lau tan \r (Mak 14:12-21; Luk 22:7-14, 21-23; Jon 13:21-30) \p \v 17 Na len ma bwena ta nyamon tinan ta jabi ramen oro bamekes yis bala bolon bwe, oro lau ta Jises ame ndremenya iy anya, “Saba kon ou aso-ok aso kalowosaniy ta to kaimon nyamon ta Pasoba kudu aliy?” \p \v 18 Eme iy anya, “Ado kala bolo kon tinan kala katou ndramak ari ma katiye ki tan, ‘Ndramak ta leheya anya, len tek ndrame mirihik; jo kameh aimon nyamon udu asiu tam hawe oro lau tek.’” \v 19 Eme oro lau ta Jises mesekei buku le Jises nane ndrasehek, ma oro lowosani nyamon ta Pasoba ma asiu buku le aliy. \p \v 20 Kon abeyeh Jises hawe oro lau tan ma ronoh la-uh manyah ado andri ta aimon nyamon. \v 21 Oro aimon nyamon kahis le, iy tiye, “Jo asehek sahou handru ewek tado, iy ari ereu bolo ado kede-eh kameh atehei jo ili mine iri lau ndra-in.” \p \v 22 Eme oro tikisiy handru en, ma oro ari ari ndremenya iy anya, “Laban ou tiye, jo deh, bwe?” \p \v 23 Eme iy asumon boho oro anya, “Are lau na dah edeu minen i bolo bwekei hawek, iy kameh adeh, atehei jo ili mine iri lau ndra-in. \v 24 Nadu Ndramak Awas kameh imek i buku le tarou mene ndratorowenei ta nyalan. Arile sisi-in laba tinan kameh i bwele-e ndramak iy ale atehei Nadu Ndramak Awas ili mine iri lau ndra-in, sebwe mwasin tinen mene satuwi iy, ndri-iy!” \p \v 25 Judas, iy lau kameh edeu iy ili mine iri lau ndra-in, ndremenya anya, “Ndramak ta leheya, jo deh bwe?” \p Jises tiye tan, “Ou ndratiye badeh, kabwai.” \s1 Jises edeu jabi ramen hawe gwa waen ili toro lau ta an hamon tan \r (Mak 14:22-26; Luk 22:15-20; 1 Korin 11:23-25) \p \v 26 Kala oro aimon nyamon doh, Jises kuhi jabi ramen, ma iy asolom i la-un, iy boso-ei i noro lau tan, ma iy anya, “Ado kakohok ma ado kaimon, idah odak amwenen.” \p \v 27 Ano iy kuhi bwiniu waen, ma iy edeu wurah i ta aliy, ano iy edeu wa-i oro lau tan, iy anya, “Ado mari ka-un. \v 28 Tasah, idah ndrayek ta sahou randra le, ndrayek amou ta sikine lau mari ta kandriyen ndra-in tiri. \v 29 Jo asehek tado, jo kameh winiyan ba-un ndraye buwa waen dah hawe ado ja bwe, winiya le len jo kameh a-un ja i san ha-un hawe ado udu bolo tondrok ta tama amwenen.” \p \v 30 Eme oro ayah wari ari ta atudun, ano ma oro au ala mandrei Olip. \s1 Jises tiye Pita kameh atehei konan i tan \r (Mak 14:27-31; Luk 22:31-34; Jon 13:36-38) \p \v 31 Ano Jises tiye toro i buku doh, “Ado mari kameh ruwani jo, ma sakaliye au na ben dah, tasah iri ndratorowei bwena udu bolo buk ndrabun i buku doh, \q1 ‘Jo kameh idi ndramak ta tondrok, ya iri sipsip tan kameh aseker laleyah.’ \rq Sekaraya 13:7\rq* \m \v 32 Arile, hamon ta aliy kameh jo amak ja, ya jo kameh ili bwena tado ili Galili.” \p \v 33 Pita asumon iy i buku doh, “Buku none oro mari atou lakou asahan tam, ya oro anoh ma aseker, jo kameh winiyan baruwani ou bwe.” \p \v 34 Jises tiye tan anya, “Handru jo asehek tam. Na ben dah kameh, kakaro baden bwe le, ou kameh besebes anya ou tanam jo bwe san tulusin.” \p \v 35 Pita tiye tan anya, “Jo winiyan basehek sahou badeh bwe, buku none jo imek hawem jo winiyan babesebes anya jo tanan ou, bwe.” Eme ya oro lau tan mari asehek sahou buku aliy ale. \s1 Jises asalom udu bilin Getsemeni \r (Mak 14:32-42; Luk 22:39-46) \p \v 36 Ano Jises ma hawe oro lau tan au ala kon ari aloh Getsemeni. Eme iy tiye i toro lau tan, “Ado kamanyah kado dah, ya jo kameh ili sese kodo-oh asolom.” \v 37 Iy kuhi Pita hawe nadu Sebedi uru ma la-uh, iy tikisiy ma budon tan andra-i labai. \v 38 Iy tiye toro anya, “Jo tikisiy labai, ma jo anya kimek. Ado kado dah ma mada ado katele hawek.” \p \v 39 Eme Jises edek ili bwena sese, ma iy taku i le batalan. Eme ma iy asolom i buku doh, “Tama, buku none winiyan eh, ou kuhi maha-an ta tikisiy udu bwele-ek dah ki-iu, arile idoh budon tek le, ou amekes saba lakou ou tanam mwasin.” \p \v 40 Ano, iy eme hamon iy atou oro lau tan ndramadin, ma iy tiye ta Pita, “Buku sah handru ya ado winiyan bareu loken luluwen hawek bwe? \v 41 Ado kanyolom ma ado kasolom ki ta Kindrei ta ado sataku sala bolo kandriyen ndra-in. Ndrine ado aso-ok handru ta amekes gok, arile oda ado badeh, boto-on handru bwe.” \p \v 42 San rasan ja Jises iu ili len ma iy asolom, “Tama, buku none maha-an dah winiyan ba-au bwe winiya le jo kanyuwiy, mwasin, tama jo in hamon ta budon tam.” \p \v 43 Ano ja iy eme hamon atou oro ndramadin ja, tasah mada oro amadin labai. \v 44 Jises ruwani oro areu gwek, iy iu ili hamon asolom san rasan ja, iy tiye sahou buku le iy nane ndrasehek ndrala ta taman. \p \v 45 Ano iy eme hamon atou oro lau tan ma iy anya, “Ado kede-eh amadin ma amunyau kahis le? Ado katou! Mada an ndrano ai. Idah kameh, Nadu Ndramak Awas kameh ili mine iri lau ndra-in ai. \v 46 Ado kareu loken, to ka-au. Ado katou, iy ndramak ta atiye jo ili mine iri lau ndra-in asah ndrasahan idah.” \s1 Judas atehei Jises ili mine iri lau ndra-in \r (Mak 14:43-50; Luk 22:47-53; Jon 18:3-12) \p \v 47 Iy asehek sahou kahis le, Judas, iy badu hawe oro lau ma ronoh la-uh nane, iy edek eme hawen, hawe iri lau solo-an handru en, ma samen ma kei udu mine iri. Iri tinan tiri pris ma ndramak ereu bwena tiri lau suni oro ame. \v 48 Judas nane ndratiye toro i buku doh, “Are lau jo atehei bohok i bohon, badeh iy le ai, ado katawi iy ai.” \v 49 Judas ales amwenen ili hawe Jises ma iy anya, “Ei, ou ndramak ta leheya!” Ma iy atehei bohon i boho Jises. \p \v 50 Eme Jises asumon bohon anya, “Kawas tek, sasah ou anya amekes, ou amekes ai.”\f + \fr 26:50 \ft Boho Grik dah badeh, baleu bwe. Iri lau ta tanan rayah tobolowe sahou ta Jises dah i buku doh, Kawas tek, tasah handru ou ame dah? \f* \p Iri lau ame atehei mine iri i ta Jises ma tawi iy. \v 51 Ndramak ari badu hawe Jises aluwi samen tan, ma sani ka-u ndranye bonyo-ou ta tinan tiri pris iu. \p \v 52 Jises tiye tan, “Ou atehei samen tam ki hamon ki ndrahunen! Are lau akohok samen, iy kameh imek na samen. \v 53 Sebwe ou tanam bwe nadeh? Jo winiyan ndremenya tama, ya iy winiyan suni iri angelo solo-an labai, kane iri sakalawi iri lau ta bahun badu kon munyak tinan ma ronoh la-uh, tukumwi i le se. \v 54 Arile, buku none jo kamesekei buku doh, sahou ta Kindrei ereu bolo buk ndrabun tan kameh basahan handru bwe. Buk ndrabun ta Kindrei anya, iri lakou doh kasahan tek.” \p \v 55 Kala doh Jises asehek tiri lau nane ta ateu iy anya, “Buku sah ya ado ame ma samen hawe kei ta ateu jo, jo ari lau ta amekes ramwes deh? Len mari jo manyah udu bolo asiu tinan ta Kindrei ma jo asehek sahou ma leheya aha, ya aha bateu jo bwe. \v 56 Arile iri lakou mari dah asahan ta amekes sahou iri propet mene ndratorowenei asahan i handru.” Eme oro lau ta Jises mari ruwani iy ma oro atobwak au. \s1 Jises ili mada sahou \r (Mak 14:53-65; Luk 22:54-55, 63-71; Jon 18:13-14; 18:19-24) \p \v 57 Iri lau nane tawi Jises kuhi iy ili asiu ta Kayapas iy tinan tiri pris. Iri lau ta leheya kandriyen tiri Juwis ma hawe iri lau-en atukum ado aliy. \v 58 Arile, Pita in hamon tiri ili, iy ili isos bada kowah ta mada asiu ta Kayapas. Iy iu ili bolo kowah ma iy manyah hawe iri lau ta ndrokei, iy anya kanyolom saba lakou handru kameh asahan ta Jises. \p \v 59 Oro tinan tiri pris ma hawe iri lau mari ta kansol nane anya kanone katakaleh ari sahou wasai kihis bada Jises ma iri kadai iy kimek. \v 60 Iri lau solo-an ame asehek sahou wasai, arile iri batakalahei ari lakou ndra-in Jises mesekei bwe. Hamon ta aliy uru lau la-uh asahan. \v 61 Ma uru anya, “Ndramak kede-eh anya, ‘Jo winiyan tohowei asiu tinan ta Kindrei, ya len taloh hamon jo winiyan tahiy i loken ja.’” \p \v 62 Tinan tiri pris suri iy ereu loken ma iy tiye ta Jises anya, “Ou randra sahou ta tiye i ta sahou nane doh oro to-en ewek tam deh bwe?” \v 63 Arile bwai, iy andru-uk le ai. \p Ano, tinan tiri pris asehek sahou i tan ja anya, “Jo ndremenya ou na nyara Kindrei kohan udu aliy, ya ou tandrakan handru ki loken ma ou tiye taso. Ou kede-eh Krais handru deh bwe? Ya ou Nadu Kindrei?” \p \v 64 Jises asumon bohon anya, “Ou ndrasehek badeh kabwai. Arile jo tiye tado, hamon kameh ado anyolom Nadu Ndramak Awas kameh manyah udu loboho lim salin ta Kindrei iy boto-on labai, ya iy kameh udu bwele-e asi jor badu kandrah eme.” \p \v 65 Eme ma tinan tiri pris ibolosen ta sahou doh ya iy tarani awin tan le ma iy anya, “Iy ndrabobose nyara Kindrei kabwai. Ya buku sah ja to anya kasilah sahou ta i badan ja? Ado mari ndranuhun sahou bobose nane. \v 66 Ya ado abudon i buku sah?” \p Eme iri asumon anya, “Iy ndrabwidi kandriyen ndra-in, ya iy kimek ta aliy.” \p \v 67 Ano iri amuri bwilin ma a-um iy, ya oro ra-on atahan lim i kapan, \v 68 ma anya, “Ou ndramak Kindrei ndraleheyaniy, ou asehek sahou buku none iri propet. Ou tiye taso, are lau a-um ou doh?” \s1 Pita anya iy tanan Jises bwe \r (Mak 14:66-72; Luk 22:56-62; Jon 18:15-18, 25-27) \p \v 69 Pita manyah udu manan boho asiu, ya badih ari lohowan ta tinan tiri pris eme atou iy, ma iy anya, “Ou ale, ou are hawe Jises badu Galili.” \p \v 70 Arile Pita besebes udu mada iri lau mari anya, “Jo tanak saba sahou ou asehek kede-eh bo-oh.” \p \v 71 Ya Pita suri iy ma iy iu ili manyah udu madasan ta eme asiu. Badih ta lohowan ari ja atou iy, ma iy tiye toro lau areu mirihik tan anya, “Iy ndramak kede-eh badu hawe Jises badu Nasaret.” \p \v 72 Pita anuhun ma iy anya ja, “Jo tanan ndramak badeh bwe, handru!” Ma iy tandrakan ale. \p \v 73 Luwen bwe iri lau areu san ame, ma tiye ta Pita, “Handru labai, ou kede-eh ari ai badu hawe oro, tasah sehek sahou tam kede-eh buku le aliy, handru en!” \p \v 74 Ano Pita tandrakan boto-on labai, “Jo asehek sahou handru, jo tanan ndramak badeh, bo-oh. Buku none jo wasai, Kindrei kamesekei maha-an keme la-uk.” Iy asehek sahou ano le badeh, kakaro eden. \p \v 75 Ano, Pita bwetenei sahou ta Jises ndratiye ndrala tan anya, “Kakaro baden bwe le, ou kameh besebes anya ou tanam jo bwe san tulusin.” Eme iy iu ili len, ma iy eden andra-i labai. \c 27 \s1 Oro tiyani Jises ili hawe Pailat \r (Mak 15:1; Luk 23:1-2; Jon 18:28-32) \p \v 1 Na mandraben handru en, iri tinan tiri pris ma hawe iri lau tinan amekes budon i bada Jises ta kadai iy kimek. \v 2 Iri sawei iy, ma tiyani iy ili, ma atehei iy ili mine tinan tiri Rom nyaran Pailat.\f + \fr 27:2 \ft Pailat iy badu kon munyak tinan Rom amwenen. Iri tinan ta Rom atehei iy asahan gabman ta atondrok iri Juwis. Iri Juwis amwenen winiyan badai Jises bamak bwe, tasah, na len doh, iri lau ta atondrok badu Rom le winiyan tiye ndramak ari kimek. Eme ma, iri Juwis tiyani Jises ili hawe Pailat. Ou anyolom kili ta tarou ta Jon kalan 18:31. \f* \s1 Imek ta Judas \r (Aposel 1:18-19) \p \v 3 Judas, ndramak ta edeu Jises ili mine iri lau ndra-in, iy i tanan ta iri atehei maha-an i la-u Jises, iy tubuni budon tan, ma iy kuhi luk silba bororoh ma tonoh (30) iu ili hamon ili mine tinan tiri pris ma tinan tiri lau. \v 4 Iy anya, “Jo ndrabwidi kandriyen ndra-in. Ndramak jo atehei ewek mine ado badeh, babwidi ari kandriyen ndra-in bwe, ya ado kameh adai iy imek.” \p Oro asumon bohon i buku doh, “Ari lakou taso bwe, badeh lokowam labai.” \p \v 5 Iy akahei luk nane ili andri in bolo asiu tinan ta Kindrei, ma iy sakaliye iu. Eme iy ili simidi iy. \p \v 6 Tinan tiri pris kuhi luk nane ma iy anya, “Luk dah ta sa-oh. To satehei sala hawe luk badu bolo asiu tinan ta Kindrei, ndri-iy.” \v 7 Oro mari atehei sahou i se, ya luk nane oro sihinei munyak ranah tiri lau ta amekes kun na ndren, ya munyak doh iri a-eh iri lau badu leheleh amak ala aliy. \v 8 Idoh le ya iri aloh munyak doh, “Munyak ta ndra,” eme isos dah.\f + \fr 27:8 \ft Iri aloh munyak doh, Munyak ta ndra, eme isos len ta Metiu atorou buk dah. \f* \v 9 Idoh mesekei sahou ta propet nyaran Jeremaya asahan handru anya, \q1 “Oro kuhi luk silba bororoh ma tonoh (30), kanen badeh, iri lau badu Isra-el sekesek ta akohok buku none sihinen, \v 10 Ya na luk nane oro sihinei munyak tiri lau ta amekes kun, buku none le Laban tiye tek.” \rq Jeremaya 19:1-13; Sekaraya 11:12-13\rq* \s1 Pailat ndremenya Jises \r (Mak 15:2-5; Luk 23:3-5; Jon 18:33-38) \p \v 11 Jises ales udu bwena ta tinan tiri Rom, ma iy ndremenya iy anya, “Ou kabin tiri Juwis, neh?” \p Jises anya, “Ou ndrasehek badeh, kabwai.” \p \v 12 Arile, iy basumon ari sahou bwe-en, kala tinan tiri pris hawe tinan tiri lau to-en sahou ili tan. \v 13 Eme Pailat tiye tan buku doh, “Oh anuhun iri sahou doh iri lau to-en ewek la-um kede-eh deh bwe?” \v 14 Arile Jises basehek ari sahou bwe, idoh mesekei tinan tiri Rom abudon solo-an labai. \s1 Pailat anya Jises kimek ki-in kei tondreh \r (Mak 15:6-15; Luk 23:13-25; Jon 18:39–19:16) \p \v 15 Jaha mari na len ta nyamon tinan, ndramak in bwena ta kon tinan ruwani ndramak ari badu bolo kou eme len. Iri lau le aloh nyaran, ya Pailat kameh aruwe iy ili mine iri. \v 16 Na len doh ndramak ari nyaran Barabas udu bolo kou ale tasah iy ta amekes kandriyen ta ramwes. \v 17 Iri lau tukumwi iri, ma Pailat ndremenya iri anya, “Aha aso-ok are lau jo karuwaniy kewek mine aha? Barabas deh Jises, iri asehek anya iy Krais, Kindrei suni iy eme.” \v 18 Pailat asehek buku doh, tasah iy tanan, ndrine iri ndra-in ta Jises, ma iri tiyani iy eme mada sahou. \p \v 19 Ma kala Pailat manyah udu bada koyeu tan ta anuhun sahou kahis le, udun atehei sahou eme anya, “Ou samekes ari lakou sala bada iy lau badeh, ndri-iy, tasah na ben jo ameh jo atou ndramak badeh, ya ameh doh mesekei budon tek andra-i labai.” \p \v 20 Eme iri tinan tiri pris ma oro lau tinan tiri lau sosokok iri lau solo-an dah anya, “Aha kaloh, ‘Ahi aso-ok Barabas keme mine ahi, ya ou adai Jises kimek.’” \p \v 21 Pailat ndremenya iri ja, “Are lau handru aha aso-ok jo karuwaniy kewek mine aha?” \p Iri arah, “Barabas!” \p \v 22 Eme Pailat ndremenya iri, “Ya jo kamekes sasah ki ta Jises iri aloh Krais?” \p Iri mari anya, “Katahi iy ki bada kei tondreh!” \p \v 23 Iy anya, “Buku sah handru, saba lakou ndra-in handru iy mesekei?” \p Arile bwai, iri sarakau i loken le gwek anya, “Katahi iy ki bada kei tondreh!” \p \v 24 Pailat ndratanan ai, buku iri kameh winiyan banuhun sahou tan bwai, ya mirihik bahun anya kasahan. Eme iy kuhi gwa, ma iy sikine minen ereu mada iri lau mari, ma iy anya, “Ado sato-en sahou same la-uk buku none ndramak dah imek. Lokowa ado ai!” \p \v 25 Eme iri lau mari anya, “Ndrayen badeh, keme la-u ahi, ma nadu ahi!” \p \v 26 Pailat eme ruwani Barabas ili mine iri, arile iy atehei Jises ili mine iri lau ta bahun, ta iri ka-um iy na malou sakabuk i bek. Ano iy atehei Jises ili mine iri lulik ta katahi iy kili ta kei tondreh. \s1 Iri lau ta bahun bobose Jises \r (Mak 15:16-20; Jon 19:2-3) \p \v 27 Iri lau ta bahun ta Pailat kuhi Jises ili bolo asiu tinan ta atukum tiri Rom, ma iri mari tukumwi iri ame ales are madan. \v 28 Eme iri tarani kolau tan iu, ma atehei kolau ari saraman lawe-en ili la-un. \v 29 Ya oro tabuwi bada malou bobodon i se buku none barak ma atehei ili batun. Ano oro atehei bala banap ari ili minen salin; ano oro atehei bwili ndru-u oro in bwena tan ma oro bobose iy anya, “Ou kabin tiri Juwis ou, areu le buku doh len mari!” \v 30 Eme oro amuri iy, ano oro kuhi bala banap nane ereu mine oro ubwiy i batun. \v 31 Oro bobose iy ano, oro tolowei kolau saraman nane udu la-un iu, eme ma oro tani kolau tan amwenen ili hamon i badan. Ano oro sirini iy iu ili ta kadai iy ki bada kei tondreh. \s1 Oro atahi Jises i bada kei tondreh \r (Mak 15:21-32; Luk 23:26-43; Jon 19:17-27) \p \v 32 Oro adek au ala len, oro ndruni ndramak ari badu Sairini nyaran Saimon. Oro lau ta bahun andrekei iy bwese-ei kei tondreh ta Jises. \v 33 Oro ame asos kon iri aloh Golgata, moson ta aliy iri aloh, “Kon ta bwisi bar ta ndramak.” \v 34 Oro atehei waen, oro tubuni i hawe gwa ari nyakadan labai anya iy ka-un, arile Jises atona, eme iy ba-un bwai. \v 35 Oro atahi iy i bada kei tondreh, ano oro atehei kolau tan i andri ma oro amekes laki na aliy, ta andrei kolau tan i le winiya iri. \v 36 Ano oro manyah ado andri, ma oro atondrok iy. \v 37 Udu bwele-e batun loken, oro torowenei sahou tanan ta bobose anya, “Idah Jises, Kabin tiri Juwis.” \v 38 Ano oro atahi uru lau la-uh ta bahana areu mirihik ta Jises. Iy ari ereu minen salin, ya iy ari ereu minen kamweu. \v 39 Eme ya iri lau adek mirihik tan, nyokoda batu iri ili eme ma bobose Jises i buku doh, \v 40 “Ou adeh, ou mene anya ou kameh tohowei asiu tinan ta Kindrei eme andri, ano kameh ou tutuniy ja na len taloh le. Ya abo, ou sebenei ou le ai, buku none ou Nadu Kindrei, ou ame andri ta kei tondreh badeh!” \p \v 41 Oro tinan tiri pris ma iri lau ta leheya kandriyen tiri Juwis ma tinan tiri lau bobose Jises buku aliy ale. \v 42 Iri anya, “Iy sebenei iri lau rayah, arile iy winiyan basebenei iy amwenen bwe! Iy badeh, kabin tiri Isra-el; iy keme andri ta kei tondreh, ya eme aso kameh atehei budon taso in hamon tan. \v 43 Iy atehei budon tan in ta Kindrei, ma iy anya, iy badeh, Nadu Kindrei. Mwasin, aso anya katou iy kasebenei iy amwenen na dah \v 44 Uru lau mala-uh nane sukik areu hawen ale asehek sahou ndra-in i tan ale. \s1 Jises imek \r (Mak 15:33-41; Luk 23:44-49; Jon 19:28-30) \p \v 45 Na mada an udu le alih, lulik tubuluhi kon marakon udu gwek winiya mada an i taloh na beyeh. \v 46 Mada an ili taloh na beyeh, Jises arah boto-on labai anya, \q1 “Eli, Eli, lama sabaktani?” \m moson ta aliy i buku doh, \q1 “Kindrei tek, Kindrei tek, buku sah handru ya ou ruwani jo?” \rq Wari 22:1\rq* \p \v 47 Eme iri lau ra-on areu mirihik anuhun sahou tan ma anya, “Iy kede-eh aloh Alaija!” \p \v 48 Eme ma, suwi handru oro ari toro sakaliye ili kuhi konyei ari, tolomwani i bolo waen titi-in, ma atehei ili no-o banap ma atehei ili bohon ta iy ka-un. \v 49 Arile oro ra-on anya, “Kareu op, to kanyolom, idah kameh Alaija eme aseben iy deh bwe.” \p \v 50 Eme Jises arah tinan labai ja, ano iy ruwani kohan ma iy imek. \p \v 51 Kala doh amwenen kolau tinan badu bolo asiu tinan ta Kindrei atarah i ma lusi ereu loken eme andri. Munyak totoreh ma iri bek asak, i ma lusi. \v 52 Ma lek tiri lau mwasin ndramak bwena asak, ma iri lau mwasin ta Kindrei amak ame loken. \v 53 Iri ruwani lek tiri. Hamon ta Jises amak eme loken, iri ala bolo kon tinan Jerusalem, ma iri lau solo-an atou iri. \v 54 Iri lau ta bahun ma tinan tiri nane atondrok Jises nane atou kon totoreh ma iri lakou mari nane asahan, oro anoh labai ma oro anya, “Handru labai, iy kede-eh Nadu Kindrei handru!” \p \v 55 Iri badih solo-an ale ales areu len anyolom le, iri mene areu hamon tan adek loboho Galili ame ta aseben iy. \v 56 Ereu ndrokowa iri badeh, Mariya badu Makdala ma hawe Mariya ari ja tine Jemis uru Josep ma hawe udu Sebedi ale. \s1 Oro atehei Jises ili munu bek ari \r (Mak 15:42-47; Luk 23:50-55; Jon 19:38-42) \p \v 57 Kon abeyeh, ndramak ari nadu batun, tan luk solo-an badu Arimateya asahan, nyaran Josep. Iy badeh, ndramak ari ale badu hamon ta Jises. \v 58 Iy ili atou Pailat ta ndremenya bada kei, ma Pailat atehei sahou ta oro katehei bada kei kili mine Josep. \v 59 Eme Josep kuhi bada kei eme andri, ma su-i iy na kolau ari ha-un, \v 60 ma atehei iy ili bolo lek tan ma ha-un le iy ihiy in bolo munu bek. Ano iy tundruwi bek ari laba tinan ili turuki madan ano iy iu ai. \v 61 Mariya badu Makdala hawe Mariya ari ja uru ale manyah anyolom ili boho lek nane. \s1 Oro lau ta bahun atondrok mada lek \p \v 62 Len ta alokou iri lakou ta len ta amunyau ano, ya len ari hamon,\f + \fr 27:62 \ft Idoh len ta amunyau amwenen.\f* iri tinan tiri pris ma hawe iri Parasi ala atou Pailat. \v 63 Oro tiye tan buku doh, “Tinan, aso bwetenei sahou ari ndramak ta wasai kede-eh mene asehek kala iy mene ereu loken kahis le, iy anya, ‘Hamon ta len taloh, jo kameh amak eme loken ja.’ \v 64 Idoh le ya ou tiye, ya oro katondrokei mada lek nane kamwenen winiya len taloh, koro-an oro lau tan same sabwese-ei bada kei sa-au, ano oro kameh asehek tiri lau anya iy ndramak ndrame loken. Sahou wasai doh kameh ndra-in ja sakalawi wasai nane ndrasahan bwena.” \p \v 65 Pailat tiye toro anya, “Ado kakuhi iri lulik kala katondrokei lek nane, ya oro katondrokei kamwenen handru en.” \v 66 Eme oro ala turuki mada lek nane, ma oro lulik ales areu aliy ta atondrok. \c 28 \s1 Jises amak eme loken \r (Mak 16:1-10; Luk 24:1-10; Jon 20:1-18) \p \v 1 Len ta amunyau ano, ma ndra wahun ta len ma bwena ta wik ari ja, Mariya Makdala ma Mariya ari ja uru adek ala ta anyolom mada lek ta Jises. \p \v 2 I le mani tur, munyak nyukunyok ili eme, ya angelo ari badu kandrah eme andri ma susuwini bek badu mada lek iu i len. Ano iy ili manyah udu aliy. \v 3 Konen i buku none kalik, ya kolau tan badeh, belen i buku none asi kandrah belen mara-ei. \v 4 Oro lulik ta atondrok iy nane anoh labai, ya oro totoreh ma oro asahan buku none iri lau ndramak. \p \v 5 Arile angelo nane asehek sahou ili turu badih nane anya, “Ah sanoh, jo tanan ah takaleh Jises, mene iri tatahi iy i bada kei tondreh. \v 6 Iy bareu dah bwe, iy ndramak ndrame awas ja! Idoh buku none le iy mene ndrasehek. Ah kame katou ndrahunen mene iy amadin udu aliy. \v 7 Ano ah kala suwi katandra-un toro lau tan ta iy ndramak ndrame loken, ya iy ndra-au ndrala bwena ndrala Galili. Ya idah kameh, ado winiyan anyolom iy ereu doh, buku jo ndrasehek.” \p \v 8 Eme ma, uru ruwani lek nane suwi suwi, uru anoh arile uru sekesek, uru sakaliye ala tiye toro lau tan. \v 9 I le mani tur, Jises asahan hawe uru ma iy anya, “Ndraben ta-ah.” Uru ame mirihik tan ma tawi katin ma asolom ili tan. \v 10 Jises tiye turu, “Ah sanoh, ndri-iy, ah kala katiye ta nadu tinek oro kala Galili, ya oro katou jo kameh in doh.” \s1 Sahou toro lau ta ndrokei \p \v 11 Kala uru badih nane adek kahis le, oro lau ta ndrokei ra-on ta atondrok mada lek nane au ala bolo kon tinan, ma tiye iri tinan tiri pris nyala lakou mari nane asahan. \v 12 Tinan tiri pris atukum hawe iri lau tinan, ma tukumwi sahou toro i ari, ano oro atehei luk tinan labai ili toro lau ta ndrokei nane. \v 13 Ma iri tiye toro anya, “Ado kasehek ki buku doh, ‘Na ben, oro lau tan ame ya ndrabene-ei bada kei ndra-au, kala aso amadin kahis le.’ \v 14 Buku none tinan badu kon anuhun sahou dah, aso kameh winiyan asehek sahou i tan, ya ado kameh winiyan bame mada sahou bwe.” \v 15 Eme oro lau ta atondrok mada lek nane kuhi luk ma oro ala amekes buku le oro nane ndranuhun. Sahou dah aseker ereu ndrokowa iri Juwis eme isos na len dah. \s1 Jises asahan hawe oro lau tan \r (Mak 16:14-18; Luk 24:36-49; Jon 20:19-23) \p \v 16 Oro lau ta Jises ma ronoh ari nane au ala mandrei ari udu Galili buku Jises ndratiye toro ta ala aliy. \v 17 Ereu doh oro atou iy, ma oro atudun nyaran, arile oro ra-on badeh, budon toro i la-uh. \v 18 Eme Jises eme mirihik toro ma tiye toro anya, “Boto-on ma lakou mari badu kandrah ma munyak badeh udu minek. \v 19 Ado kala kon mari, ya kamesekei iri lau mari kasahan lau tek, ado kalomwa iri na nyara tama, ma nadun ma hawe Malawi Ndrabun. \v 20 Ma ado kaleheya iri ta lakou mari jo ndratiye tado. Ya jo kameh in hawe ado na len mari, winiya le munyak dah ano.”