\id ACT - Nyindrou NT with Gen, Ruth, Jon -Papua New Guinea 2001 (DBL 2014) \h Aposel \toc1 Lahou toro Aposel \toc2 Aposel \toc3 Apo \mt2 Lahou toro \mt1 APOSEL \imt1 Sahou Tanan \ip Iri aloh buk dah, Lahou toro Aposel, sukumada sahou badu bolo buk ta Luk atorou. Luk le ari atorou buk dah ale. Udu bolo buk dah, taha anyolom Malawin Ndrabun leheya san ili tiri aposel, ma iri atiye sahou ta nyala Jises, “ili Jerusalem, ili Judiya, ili Samariya, ma ili bolo kon munyak mara-ei.” (Ou anyolom udu ta kalan 1:8.) \ip Buk ta Lahou toro Aposel dah asehek kundruh ta nyala lahou ta Jises asahan bolo iri Juwis ma udu hamon ja ili a tinan ma aseker laleyah ili bolo iri kon rayah ja badu munyak. Luk anya kaleya taha, i buku gok ta Krais ma koha iri mwan ma badih an hamon tan, bwidi iri tandrakan mene Kindrei amekes ili tiri lau mwan ma badih badu Isra-el asahan handru. \ip Lakou ari laba tinan udu bolo Lahou toro Aposel asehek ta aliy badeh, gok ta Malawin Ndrabun, idoh Malawin Mwasin ta Kindrei. Malawin Ndrabun ma bwena ili tiri lau ta Jises badeh, udu bolo len ta Pentikos. Hamon ja Malawin Ndrabun atehei budon mwasin ma atehei boto-on ili toro. \ip Bolo buk dah, taha anyolom ale, ta iri sahou solo-an lawe-en mene iri aposel tiye tiri lau mwan ma badih rayah ja ta sahou mwasin ta nyala Jises. Ma taha anyolom lau mwan ma badih solo-an labai an hamon ta iri sahou mwasin ma gok tiri abadok. \ip Udu bolo Lahou toro Aposel badeh, iri kundruh toro aposel solo-an udu aliy, arile sahou solo-an handru ta iri lakou, Pita uru Pol mene amekes. Pita, iy ari tiri lau mene adek hawe Jises. Arile, ma bwena badeh, Pol badek hawe Jises bwe. Iy mene ibo gok ta atikah lau mwan ma badih ta Jises. Arile, Jises badeh, aloh Pol, ma bwidi iy asahan ndramak ari mwasin handru ta amekes gok tan. \ip Udu bolo buk dah, Luk anya kasehek kundruh ta iri lakou mene asahan ta Pol, iy tiye ta iri lakou “ahi” mene amekes. Lau ta tanan solo-an labai abudon Luk amwenen badeh, edek hawe Pol san sabe, eme ma iy tiye “ahi” badu loboho doh. \iot Iri Sahou Tinan \io1 Iri asehek sahou mwasin udu Jerusalem (\ior 1:1–8:3\ior*) \io1 Sahou mwasin ili bolo Judiya ma Samariya (\ior 8:4–12:25\ior*) \io1 Tekedek ta Pol ma bwena ta atiye sahou mwasin (\ior 13:1–14:28\ior*) \io1 Tukum tinan ta lau ta Kindrei asahan Jerusalem (\ior 15:1-35\ior*) \io1 Tekedek ta Pol rasan ja ta atiye sahou mwasin (\ior 15:36–18:22\ior*) \io1 Tekedek ta Pol ari ja ta atiye sahou mwasin (\ior 18:23–21:16\ior*) \io1 Iri tawi Pol udu Jerusalem (\ior 21:17–23:22\ior*) \io1 Iri andrei Pol iu ili Sesariya (\ior 23:23–26:32\ior*) \io1 Iri andrei Pol iu ili Rom (\ior 27:1–28:31\ior*) \c 1 \ms1 Oro aposel atiye sahou ta Jises ili Jerusalem \mr (Kalan 1:1–8:3) \s1 Jises iu i loken \p \v 1 Tiyopilus ei, udu bolo tarou tek mwena mene badeh, jo atorou ta nyala lahou mari Jises amekes ma leheya iri mwan ma badih ma mwena handru,\f + \fr 1:1 \ft Luk badeh, atorou buk aloh Lahou toro Aposel dah. Ma bwena mene iy atorou buk tan ari ja aloh Tarou ta Luk.\f* \v 2 eme, eme taku na len andrei Jises iu i kandrah. Idoh, udu hamon ta iy edeu batanau na boto-on ta Malawin Ndrabun i toro aposel tan, iy mene ndralebelei. \v 3 Udu hamon ta imek tan ja badeh, iy leheya iy amwenen i toro lau doh, ma leheya lahou solo-an i mada oro ta iy badeh, ndramak ndrame awas ja. Iy badeh, asahan hawe oro udu bolo len ma hanoh (40). Iy asehek sahou i toro ta nyala tondrok ta Kindrei. \v 4 Ya udu bolo tukum toro ari ja, iy udu hawe oro aimon nyamon, ma iy batanau oro i buku doh: “Ado badeh, sa-au op, ado kado Jerusalem kado kabe-en ndramas tado Malawin Ndrabun. Tama mene tandrakan i tado mene, ado anuhun jo asehek nyala aliy. \v 5 Tasah, Jon mene inyu ado na gwa, arile len rayah iu, ano kameh, ado anyu na Malawin Ndrabun.” \p \v 6 Eme na len oro atukum badeh, oro ndremenya iy anya, “Laban ei, na len dah kameh, ou atudun tondrok ta Isra-el ja ai?”\f + \fr 1:6 \ft Ma bwena handru, iri kabin badu Isra-el amwenen atondrok iri lau badu Isra-el. Arile, na bolo len ta Jises badeh, iri lau badu Isra-el ado bahandra tondrok ta kon munyak tinan Rom. Eme, na len dah, iri lau rayah badu Isra-el abudon anya, Jises kameh tikahei tondrok ta Rom, ma tutuni tondrok tiri Isra-el amwenen ja.\f* \p \v 7 Eme iy tiye i toro i buku doh, “Len ma sasah asahan kameh, udu mine tama le ari. Idoh badeh, ta ado katanan ta aliy bwe. \v 8 Arile, ado kameh akohok boto-on na len Malawin Ndrabun kameh ewek la-u ado; ma ado kameh atiye sahou tek ili Jerusalem, ili Judiya, ili Samariya, ano kili kon munyak mari.” \p \v 9 Eme iy asehek sahou doh i toro ano le badeh, Kindrei kuhi iy udu mada oro iu i loken, ma asi jor turuki iy amai ta mada oro. \p \v 10 Eme mada oro badeh, udu le tan, ma iy iu i kandrah. Ya eme suwi suwi badeh, uru lau la-uh asini awin belen mara-ei ales udu ka-u oro. \v 11 Eme uru anya, “Ado lau badu Galili. Ado ales ado kede-eh, anyolom i kandrah, ta sasah handru? Iy ndramak Jises le doh, kameh, ado anyolom, andrei iy ndra-au ndra kandrah; idah kameh, ado anyolom iy eme andri ja kameh i le buku none ado anyolom iy i loken doh.” \s1 Matiyas akohok ndrahune Judas \p \v 12 Ano oro adek ado bwili ndrondro-ou Olip ala hamon ala Jerusalem. Ya ndrokowa bwili ndrondro-ou doh kilomita ari udu len ta kon tinan Jerusalem. \v 13 Eme oro asos badeh, oro ala loken a bolo asiu mene oro areu aliy. Oro lau areu aliy badeh, Pita, Jon, Jemis hawe Enduru, Pilip, Tomas, Batolomiu, Metiu, Jemis nadu Alpeyus, Saimon Selot ma hawe Judas nadu Jemis. \v 14 Oro mari atukum ame se ya oro atehei budon toro i randra le i ta salom. \m Ma hawe oro badih rayah hawe Mariya tine Jises hawe nadu tine Jises ale udu hawe oro. \p \v 15 Eme na len doh badeh, Pita ales ere loken bolo iri lau ta Kindrei, kane iri ma rinek lunoh (120), \v 16 ma iy tiye anya, “Ado nadu tine mwan ma badih, sahou ta Kindrei mwena mene Malawin Ndrabun mene ndratiye udu boho Debit tiye nyala Judas mene udu bwena tiri eme ateu Jises badeh, ndrasahan handru. \v 17 Judas badeh, mene badu hawe to ta amekes lahou dah. \v 18 Eme Judas badeh, sihinei munyak na luk, tasah ta kandriyen ndra-in tan; eme iy taku i andri ma imek ya ndrinen asikak ma ndrinen talou eme len. \v 19 Eme iri lau badu Jerusalem anuhun badeh, ma tondrohani kon iy imek udu aliy doh i boho kon tiri aloh Akeldama, moson ‘munyak ta ndrahu ndra.’ \p \v 20 “Tasah, ndratorowenei udu bolo buk Wari badeh, tiye i buku doh: \q1 ‘Asiu tan badeh, kudu laleyah, \q1 ya ari ndramak sado aliy.’ \rq Wari 69:25\rq* \p Ma torowenei ale i buku doh: \q1 ‘Ya ndramak ari ki saluwen ta in bwena.’ \rq Wari 109:8\rq* \p \v 21 “Ya eme, are lau mene udu hawe to na len mari to adek hawe Laban Jises badeh, ki saluwen? \v 22 Udu ndra kabatana Jon ta alomwa eme, eme taku kabatana andrei Jises udu hawe to iu i loken. Iy doh badeh, keme hawe to ta asehek nyala Jises mene amak eme awas ja.” \p \v 23 Eme oro badeh, aseken lau la-uh: Iy ari badeh, Matiyas. Iy ari ja nyaran taloh: Josep, Barsabas,\f + \fr 1:23 \ft Barsabas, moson Nadu len ta amunyau Jastus.\f* \v 24-25 Ano oro amekes salom anya, “Laban, ou badeh anyolom ndrine lau mari. Ou leheyani keme lewan keme taso ta are turu kasahan aposel ta amekes lahou tam ki saluwe Judas mene iy ndramak ndra-au.” \v 26 Ano oro asoh nyek. Eme nyek ihis ta Matiyas. Ya eme iy ili hawe oro aposel ma ronoh ari nane dah. \c 2 \s1 Malawin Ndrabun eme andri na Pentikos \p \v 1 Eme len ta Pentikos\f + \fr 2:1 \ft Len ta Pentikos asahan len lomonoh (50) hamon ta len tinan iri aloh Pasoba. Ou anyolom buk ta Lebitikus kalan 23:15-22.\f* asahan badeh, oro mari atukum ame kon rasi le. \v 2 Eme nawin bwe badeh, nyaro lakou asahan i buku none nyaro siyer tinan atohou udu kandrah eme andri idih bolo asiu nane oro areu aliy dah. \v 3 Eme oro anyolom jih anya eme andri, ma weleyaniy i la-u oro ari ari. \v 4 Eme Malawin Ndrabun anyuhi ndrine oro, ma mesekei oro badeh, asehek boho kon randra doh, randra doh. \p \v 5 Ya udu Jerusalem badeh, iri Juwis ta atudun Kindrei badu kon mari manyah ado aliy. \v 6 Eme iri anuhun kurutuwe lakou doh badeh, iri arou ame. Tasah, iri ari ari badeh, boho iri asak ta anuhun oro badeh, asehek sahou na boho kon tiri mari. \v 7 Eme mani iri atur labai, ya iri lomondra ma anya, “Oro lau asehek sahou kede-eh badu Galili o? \v 8 Arile, i buku sah ja to anuhun oro asehek sahou na boho kon ta to mari? \v 9 To badeh, badu kon munyak tinan Partiya, Midiya, ma Elam. To ale badu kon munyak tinan Mesopotemiya, Judiya, Kapadosiya, Pontus hawe Esiya. \v 10 Ma to badeh, badu kon munyak tinan Prijiya, Pampiliya, Ijip, hawe kon rayah badu Libiya udu mirihik ta kon Sairini. Ma udu ndrokowa to badeh, iri lau badu Rom adek ame dah ale. \v 11 Ma to badeh, Juwis hawe oro lau badu leheleh ala a-en hamon ta leheya tiri Juwis; ma hawe to lau rayah badu busu Krit hawe badu kon munyak tinan Arabiya; badeh, to mari anuhun sahou nyarahan ta lahou tinan ta Kindrei oro asehek i boho kon ta to amwenen.” \v 12 Eme ya mani iri atur ma budon tiri bameles bwe, ma eme iri ndremenya anya, “Lakou dah, asahan i buku sah handru?” \p \v 13 Arile iri rayah badeh, bobose oro anya, “Oro kede-eh, a-un waen solo-an labai.” \s1 Pita asehek sahou i tiri lau \p \v 14 Ano Pita suri iy ere loken hawe oro ma ronoh ari dah, aloh i tinan ma asehek sahou i tiri anya: “Ado nadu tine badu Juwis ma hawe ado lau mari areu Jerusalem dah, ndranye ado kasak, ya jo kasehek kaleu kewek tado. \v 15 Oro lau dah badeh, ba-un gwa boto-on bwe. I buku bale ado badeh, bwe. Kon mandraben kahis le oh, mada an barala ndro ari adeh!\f + \fr 2:15 \ft Pita asehek i buku doh, tasah kandriyen tiri Juwis iri winiyan ba-un gwa boto-on na mandraben bwe.\f* \v 16 Arile, idoh lakou mene propet Jowel asehek nyala aliy: \q1 \v 17 “Kindrei anya, ‘Suniya len anya kano kameh, \q1 jo kameh solowei Malawik i la-u lau mari badu kon munyak. \q1 Ya iri nadu ado mwan ma badih kameh asehek sahou i buku iri propet, \q1 ma iri lau loweu tado kameh amekes lele, \q1 ma hawe oro lau tado ndrala bada ndramak kameh ameh solo-an. \q1 \v 18 Ma hawe oro lohowan tek mwan ma badih na len eme kameh, \q1 jo kameh solowei Malawik i la-u oro, \q1 ya oro kameh winiyan asehek sahou i buku iri propet. \q1 \v 19 Jo kameh leheya kalem udu bada kandrah loken, \q1 ma udu bada munyak andri ale. \q1 Idah kameh, ndra ma hawe jih ma hawe kasu-er hutuwen kameh asahan. \q1 \v 20 Ya an kameh amak ma kon ilik, \q1 ma bun kameh asaram i buku ndra. \q1 Ya lakou doh kameh asahan bwena op. \q1 Ano len tinan ta lomadan ta Laban asahan. \q1 \v 21 Ya lau amekes salom na nyara Laban \q1 ma ndremenya iy ta seben kameh, iy winiyan sebenei iri.’ \rq Jowel 2:28-32\rq* \p \v 22 “Ado lau badu Isra-el kanuhun sahou doh. Jises Krais badu Nasaret mene, Kindrei suni iy ewek hawe ado. Ya iy mene amekes lahou tinan ma amekes kalem tinan na boto-on ta Kindrei edeu i tan udu ndrokowa ado. Ya ado tanan iy. \v 23 Bwena mene Kindrei ndratanan iri lakou kameh asahan hamon, ma iy bwidi iri lakou asahan na le tanan ma seken tan. Eme ma, ado badeh, atehei iy i mine iri lau ndra-in, ma iri atahi iy imek i bada kei tondreh. \v 24 Arile, Kindrei mete-ei iy amak eme awas ja ta imek; ma sebenei iy ta sisi-in ta imek. Tasah, imek badeh, winiyan batawi iy bwe. \v 25 Tasah, Debit mene asehek nyalan i buku doh: \q1 ‘Jo badeh, anyolom Kindrei udu madak na len mari. \q1 Tasah, iy badeh, udu loboho lim salin hawek ya jo winiyan banoh bwe. \q1 \v 26 Eme bwidi ndrinek sekesek ma jo asehek ta aliy, \q1 Ma jo ale atondrok ta lakou mwasin handru kameh asahan hamon. \q1 \v 27 Tasah, ou winiyan baruwani jo bamak bado bolo munyak dah bwe. Ma ou winiyan baruwani bada lau tam mwasin labai sabola sado bolo lek. \q1 \v 28 Ou badeh, ndraleheyani jo ta san mwasin ta akohok kohak handru ta udu le buku doh. \q1 Ou kameh ado hawek ma atehei sekesek tinan labai eme tek.’ \rq Wari 16:8-11\rq* \p \v 29 “Ado nadu tine, jo katiye tado kamwenen. Tubu taha Debit mene imek ma ahi iy. Ya lek tan asah udu hawe to kahis le eme taku dah. \v 30 Iy badeh, propet ya iy tanan tandrakan ta Kindrei mene tandrakan iy. Kindrei badeh, tandrakan ta lundriyen oro ari kameh asahan kabin, i buku le \m iy amwenen. \v 31 Debit ndratanan ta lakou doh, Kindrei anya kamekes hamon, ma iy ndratanan Krais\f + \fr 2:31 \ft Krais badeh, ndramak Kindrei ndraleheyani ta akohok taha ame hamon.\f* nane, iy kamak udu bolo lek tan keme awas ja. Eme ma iy tiye i buku doh, Kindrei kameh winiyan baruwani iy bado ndrahune iri lau amak ado aliy bwe, ma badan kameh winiyan babola bwe. \v 32 Kindrei badeh, mete-ei Jises amak eme awas ta imek. Eme ya aso dah badeh, asehek nyala lakou handru mene asahan. \v 33 Iy ales ili udu loboho lim salin ta Kindrei ma akohok Malawin Ndrabun udu mine taman mene tandrakan. Ma iy solowei Malawin Ndrabun eme, i buku none ado atou hawe anuhun dah. Lakou doh badeh, Jises edeu eme taso. \v 34 Ya Debit badeh, bala kandrah buku Jises bwe, arile iy anya, \q1 ‘Laban Kindrei tiye i ta Laban tek i buku doh: \q1 “Ou ame manyah ado loboho minek salin, \q1 \v 35 winiya jo le baratehei iri lau ta amekes budon ndra-in i tam barado bahandra katim.”’ \rq Wari 110:1\rq* \p \v 36 “Eme ya ado lau mari badu Isra-el ki tana ado kudu mwasin ta lakou doh: Kindrei badeh, ndrabwidi Jises, ado mene atahi iy i bada kei tondreh, iy ndrasahan Laban ma Krais.” \p \v 37 Eme iri lau anuhun sahou doh badeh, ndrine iri tikisiy handru ma tiye i ta Pita hawe oro aposel rayah ja anya, “Ado nadu tine aso, aso ka buku sah bah?” \p \v 38 Eme Pita asumon boho oro i buku doh, “Ado mari badeh, katubuni ndrine ado ma kanyu na nyara Jises Krais, ya idah karei ma lomondra ndra-in tado kameh sikine iu. Ma idah kameh, ado akohok Malawin Ndrabun i nyara ndramas ewek tado. \v 39 Ya tandrakan ta lakou doh badeh, i tado ma hawe i ta nadu ado oro, ma i toro lau badu len. Idoh i toro lau heh Kindrei aloh oro ame hawen.” \p \v 40 Pita asehek sahou batanau i toro ma indrek oro anya, “Ado badeh, katondrok ado kamwenen, kora-on ado kala bolo maha kameh eme la-u iri lau ndra-in ado munyak dah.” \v 41 Eme iri lau solo-an badeh, atehei budon tiri handru i ta sahou tan ma anyuwi oro. Ya kane iri lau mari nane doh, i buku none tuluwi (3,000) i bwele-e iri lau rayah na len doh. \s1 Manyah udu ndrokowa iri lau ta Kindrei \p \v 42 Eme iri badeh, aso-ok labai ta a-en hamon ta leheya toro aposel ma atukum ta atudun \m hawe abo-os jabi ramen\f + \fr 2:42 \ft Iri lau rayah ta tanan abudon kandriyen ha-un tiri lau ta Kindrei doh asahan, ya na len iri lau ta Kindrei atukum ta aimon nyamon, iri amekes kandriyen ta abudon bada Jises ma ndrayen.\f* ma asolom. \v 43 Iri mwan ma badih badeh, anyolom kalem hawe lahou tinan solo-an labai Kindrei amekes udu mine iri aposel, eme boho iri asak ta lahou iri aposel amekes, ma iri anoh. \v 44 Eme ya bolo iri mari badeh, ndrine iri i se, ya iri anyohan lakou i tiri ari ari. \v 45 Eme iri adeu lakou tiri hawe adeu nyamon tiri i ta sisih ma hawe anyohan iri lau lakou bwe. \v 46 Ma len mari badeh, iri atukum ala bolo asiu tinan ta Kindrei. Ma iri badeh, ado kon tiri abo-os jabi ramen ma aimon amunum le ma sekesek, \v 47 ma atudun Kindrei. Ma, iri badeh, mwasin labai udu mada iri lau ta kon doh. Eme ya udu bolo len mari badeh, kane iri lau asola ala hawe iri rayah mene, tasah Kindrei ibo gok ta akohok iri ame hamon. \c 3 \s1 Pita mesekei ndramak ta anyolou lakou amwenen ja \p \v 1 Ya, na mada an taloh na beyeh ari badeh, Pita hawe Jon, uru au ala loken ala asiu tinan ta Kindrei asolom. \v 2 Eme ndramak ari badan imek kabatana tinen atehei iy eme len. Eme iri bwese-ei iy ili madasan tinan ta i asiu tinan ta Kindrei aloh, “Madasan Mwasin.” Eme iy udu aliy na len mari badeh, anyolou lakou tiri lau adek ala ame ala bolo asiu tinan ta Kindrei. \v 3 Eme iy anyolom Pita uru Jon ame le badeh, iy anyolou uru ta luk. \v 4 Eme uru anyolom amwenen i tan. Ano Pita anya, “Madam keme taru!” \v 5 Ya eme iy anya, uru kameh anyohan iy lakou, ya eme madan i turu. \p \v 6 Ano Pita anya, “Aru badeh, luk ta anyohan ou bwe. Arile, sasah taru udu aliy kada-ah, aru kameh atehei ewek tam. Na boto-on ta nyara Jises Krais badu Nasaret badeh, ou suri ou, ma ou adek.” \v 7 Ya eme Pita tawi minen salin ma suri iy ere loken. Eme katin hawe kusu-u bekan tan abadok ma iy edek. \v 8 Ano iy ili hawe oro ili bolo asiu tinan ta Kindrei, ma edek ma sandroh ta atudun Kindrei. \v 9 Ya eme iri lau mari anyolom iy edek ma atudun Kindrei; \v 10 ma iri seleyani iy, tasah iy badeh, ndramak ta anyolou lakou. Iy mene manyah udu Madasan Mwasin ta i bolo asiu ta Kindrei. Eme ya, mani iri mari atur ma mada iri atau, ta sasah nane ndrasahan tan. \s1 Pita asehek sahou i tiri lau nane anyolom iy ndramak dah \p \v 11 Eme ndramak nane ta anyolou lakou tawi Pita uru Jon kahis le badeh, iri lau mani iri \m atur ya iri sakaliye ala ame ala hawe uru ala beleheleh ta Solomon. \v 12 Eme Pita anyolom badeh, iy tiye i toro anya, “Aha lau badu Isra-el, mani aha atur ta sasah? Aha anyolom aru boto-on tasah handru? Budon taha kede-eh anya, boto-on mari badeh udu taru, tasah aru mwasin mara-ei ta mada Kindrei, ma aru bwidi iy ndramak kede-eh edek ja. Arile bwe. \v 13 Kindrei ta Abraham uru Aisik hawe Jekop, ma ta tama taha badeh, bwidi lomadan i ta lohowan tan Jises asahan. Aha mene atehei iy ili mine iri lau adai iy. Pailat anya karuwani iy, arile aha badeh, bwale aha, ma aha baseken iy udu mada Pailat bwe. \v 14 Aha tubuni kona aha i ta iy ndramak mwasin labai doh, iy bamekes ari kandriyen ndra-in bwe. Iy irek na iri kandriyen mwasin le. Aha bwale aha ta Pailat tolowei Jises. Aha tiye Pailat tolowei iy ndramak ta adi ndramak. \v 15 Aha badeh, adai ndramak ta edeu kohan handru ta udu le buku doh. Arile, Kindrei le mete-ei iy ta imek eme loken. Eme aru badeh, anyolom na mada aru amwenen ma aru asehek nyala aha. \v 16 Eme i san ta budon handru in ta nyara Jises badeh, ndramak badan imek, ndra boto-on ja. Ehe, na budon handru in ta Jises le, ndramak badeh, ndramwenen ja. Eme na dah aha anyolom. \v 17 Eme ya aha nadu tine, jo badeh, tanan, ta aha tanan bala mwasin ta lakou aha amekes i ta Jises bwe; ma hawe oro lau ta atondrok ale. \v 18 Arile, sahou mene Kindrei atehei i kani iri propet mari asehek badeh, i buku doh: Krais kameh bwese isi. Ma na kandriyen aha amekes i tan, Kindrei bwidi sahou tiri propet tan i handru. \v 19 Ya eme aha badeh, katubuni ndrine aha ma aha ka-en hamon ta Kindrei. Ma idah kameh, lomondra ndra-in taha kameh Kindrei sikine iu. Ya len ta akohok manyah mwasin ta Laban kameh eme. \v 20 Ma iy kameh suni Jises eme hamon ja. Iy badeh, Krais, ndramak Kindrei mene ndralebelei ta akohok aha ame hamon ja. \v 21 Jises kameh udu kandrah udu gwek, winiya le len Kindrei anya kamekes lakou mari kasahan ha-un ja, i buku none iy mene ndrasehek i tiri propet tan ndrabun mwena mene. \v 22 Moses mene tiye anya, \q1 ‘Laban Kindrei kameh tutuni ndramak ari badu bolo aha kameh asahan propet taha. Iy kameh suni iy i le buku iy mene suni jo. Ya eme aha badeh, kanuhun sahou tan mari iy asehek i taha. \v 23 Ya are lau banuhun bohon bwe, badeh kameh tikahei iy eme len ta bolo lau tan.’ \rq Dutoronomi 18:15, 18-19\rq* \p \v 24 “Handru labai, iri propet \m kabatana Samuwel eme, eme taku dah badeh, mari asehek nyala le len doh. \v 25 Ya eme aha dah, badeh, lundriye iri propet ta sahou randra le mene Kindrei amekes hawe tubu aha Abraham i buku doh: \q1 ‘Na lundriyem oro le kameh, jo kameh edeu nyosowan i la-u iri lau mari badu munyak.’ \rq Jenesis 22:18; 26:4\rq* \m \v 26 Na len Kindrei tutuni lohowan tan, iy suni iy ewek taha bwena ta adeu nyosowan ewek la-u aha, ta amekes aha badeh, katubuni kona aha ki tiri kandriyen ndra-in.” \c 4 \p \v 1 Pita uru Jon asehek sahou i tiri lau kahis le badeh, iri pris hawe tinan ta ndrokei ta asiu tinan ta Kindrei\f + \fr 4:1 \ft Tinan ta ndrokei ta asiu tinan ta Kindrei badeh, iy pris ari badu boho kamen ta Libai. Iy atondrok iri lau ta boho kamen tan doh amekes gok i buku lau ta ndrokei ndrahunen bolo kowah ta asiu tinan ta Kindrei.\f* hawe iri Sadusi badeh, ame hawe uru. \v 2 Ya ndrine iri badeh, ibolosen i toro aposel. Tasah, oro badeh, leheya iri lau ta nyala Jises Krais ndramak ndrame awas ja ta imek tan, eme ma iri lau mari ale kameh winiyan amak ame awas ja ta imek tiri. \v 3 Eme iri anya katehei uru a ta mada sahou, arile ndra mirihik ta an i andri. Eme ma iri tawi Pita uru Jon ma atehei uru a bolo kou, andrei ben ari. \v 4 Arile, iri lau solo-an anuhun sahou turu ma iri atehei budon tiri handru i ta aliy. Ya, eme sebenei iri ma kane iri badeh, i sola asahan lamawa (5,000). \p \v 5 Eme na len ari ja badeh, iri lau ta atondrok, hawe iri lau-en, hawe iri lau ta leheya kandriyen malen tiri Juwis atukum ame Jerusalem.\f + \fr 4:5 \ft Tukum tiri lau tinan tiri Isra-el doh aloh kansol. I boho Aramek aloh iri Senhedrin.\f* \v 6 Iri lau rayah ta lundriye iri pris badeh, are aliy. Ya Anas tinan tiri pris hawe Kayapas oro lau tan. Jon hawe Aleksandra badeh, ado aliy ale. \v 7 Eme iri kuhi Pita uru Jon ala ales are mada iri ma iri ndremenya uru, “Na boto-on ma hawe nyara are handru, ah amekes iri lahou dah?” \p \v 8 Eme Pita idih na Malawin Ndrabun badeh, ma iy tiye i tiri, “Ado lau ta atondrok, hawe ado lau-en tiri lau! \v 9 I buku none ado kandremenya aso na dah, ta lahou mwasin aso amekes i ta ndramak badan imek ma kalelen iy kamwenen i buku sah, \v 10 idah kameh, ado ma hawe iri lau badu Isra-el katanan ta ndramak ales udu mada ado ndramwenen dah badeh, na boto-on ta nyara Jises Krais badu Nasaret. Iy mene \m ado\f + \fr 4:10 \ft Iri kansol le mene tiye Pailat atehei Jises i bada kei tondreh. Ou anyolom in bolo tarou ta Luk kalan 22:66–23:5. Hamon ta len Jises imek, iri kansol baseken iri lau satehei budon tiri sa-en ta Jises labai.\f* atahi iy i bada kei tondreh ma iy imek. Ano Kindrei mete-ei iy amak eme awas ta imek tan. \v 11 Iy badeh, Jises i buku \q1 ‘bek, ado lau ta atah asiu bwale ado, na dah, iy ndrasahan kati ndru ta ka-u asiu bek.’ \rq Wari 118:22\rq* \m \v 12 Taha badeh, winiyan batakalahei ari seben bare ta ari lau ja bwe; tasah ari lau udu baha kandrah ja kada-ah atehei iy ki nyara seben tataha bwe.” \p \v 13 Eme oro anyolom Pita uru Jon badeh, banoh se bwe, uru abadok handru. Ma oro atanan uru badeh, mene bakohok tanan tinan bwe, uru badeh lau badu kon laleyah. Eme ya mani oro atur, ma oro atanan, ta uru lau doh mene badu hawe Jises. \v 14 Eme oro badeh, basehek randra sahou bala bada uru bwe. Tasah, iy ndramak mene uru mesekei iy amwenen badeh, ales ere hawe Pita uru Jon are mada oro mari. \v 15 Eme oro badeh, tiye iri lau ta ndrokei katiyani Pita uru Jon ka len ta mada iri kansol, ya eme oro atilik nyala oro, \v 16 “To kamekes sasah handru ki turu lau kede-eh bah? Iri lau mari manyah ado Jerusalem badeh, ndratanan kalem mwasin uru amekes. Ya eme to winiyan babisiniy bwai. \v 17 Arile, san le doh badeh, to kabwidi lahou dah saseker badeh, to katiye uru badeh, ka-i ta asehek nyara iy ndramak doh.” \p \v 18 Ano oro luhi uru ame bolon ja badeh, tiye i turu sasehek sahou ma saleheya boto-on ta nyara Jises ja, ndri-iy ai. \v 19 Arile, Pita uru Jon anya, “Ado kanone kaseleya ki tado le se. Mwasin ta mada Kindrei ta aso kanuhun boho ado deh, bwe-em kanuhun boho Kindrei? \v 20 Ya aso kameh winiyan bandru-uk ta asehek lakou aso ndranyolom na mada aso, ma anuhun na ndranye aso amwenen bwai.” \p \v 21 Eme oro kansol nohowa oro abadok le gwek, ma tiye uru au. Oro badeh, winiyan badeu maha-an bala turu bwe, tasah iri lau mari atudun le Kindrei ta lahou tinan mene uru amekes. \v 22 Jaha ta ndramak nane amwenen badeh, sakalawi hanoh (40). \s1 Boto-on ta salom tiri lau ta Kindrei \p \v 23 Eme oro tiye uru ame len badeh, ala hawe oro lau turu amwenen, ma asehek nyala oro ta lakou mari, oro tinan tiri pris hawe oro lau-en tiye i turu. \v 24 Eme oro anuhun badeh, oro asore boho oro i le se i loken, asolom i ta Kindrei. Eme oro anya, “Laban Kindrei, ou le mesekei kandrah ma munyak hawe ndras ma hawe lakou mari udu bahandran ma udu bwele-en. \v 25 Ou mene asehek sahou na Malawin Ndrabun edek boho lohowam, tubu ahi Debit anya: \q1 ‘I buku sah iri lau badu leheleh abolosen le gwek? \q1 Ya i buku sah iri lau atilik budon labwe? \q1 \v 26 Iri kabin badu munyak lowosa iri, \q1 ma hawe iri lau ta atondrok atukum a se amekes bahun i ta Laban \q1 hawe ndramak ta seben tan iy suni iy eme.’ \rq Wari 2:1-2\rq* \m \v 27 Idoh mene handru, Herot hawe Pontiyus Pailat atukum a hawe iri lau badu leheleh ma hawe iri lau badu Isra-el, badu bolo kon tinan dah amekes budon ta adai Jises. Iy badeh, lohowan tam ndrabun ou mene suni iy eme ta amekes gok tam. \v 28 Oro amekes doh badeh, in hamon le ta budon ma seken tam, ou ndrasehek. \v 29 Abo, Laban, na dah badeh, ou anuhun iri anya kanohowa aso, arile ou bwidi aso lohowam kabadok ta asehek sahou tam. \v 30 Talasei minem kamekes lau kamwenen ma kamekes kalem mwasin na boto-on ta nyara lohowam ndrabun, Jises.” \p \v 31 Oro asolom ano, kon nane oro atukum are aliy dah, totoreh. Ma eme oro mari badeh, adah na boto-on ta Malawin Ndrabun ma oro abadok ta asehek sahou ta Kindrei. \s1 Iri lau ta Kindrei anyohan iri ari ari na lakou \p \v 32 Eme iri lau ta Kindrei, budon tiri hawe ndrine iri i le ari. Iri mari badeh, bamekes ndrakok bala ta sanuw tiri bwe. Arile, iri mari badeh, anyohan lakou tiri, i tiri ari ari. \v 33 Eme oro aposel asehek sahou ta nyala amak eme awas ja ta Laban Jises na boto-on ta Kindrei. Ya eme Kindrei apwai nyosowan badeh, i la-u iri mari. \v 34 Eme iri ari ari badeh, bandriliu ta lakou bwe. Ya len rayah, oro lau heh, munyak toro udu aliy hawe asiu toro udu aliy badeh, adeu i ta sisih. \v 35 Ya luk ta lakou nane oro asih doh badeh, oro atiye ili hawe oro aposel. Ano oro apou i toro lau heh nane, lakou bwe. \p \v 36 Eme Josep badeh, badu boho kamen ta Libai, adeu iy udu Saipres, ya oro aposel badeh, aloh iy Banabas (moson “ndramak ta edeu tanan mwasin.”) \v 37 Iy eme atehei munyak tan i ta sisih. Eme iy andrei luk badeh, atehei i mine oro aposel. \c 5 \s1 Ananayas uru Sapira \p \v 1 Ya eme ndramak ari nyaran Ananayas uru udun Sapira ale atehei munyak turu i ta sisih. \v 2 Ya uru tanan, uru badeh, tone luk rayah, ya rayah le uru atehei i mine oro aposel. \p \v 3 Ano Pita tiye i ta Ananayas anya, “I buku sah handru tama balik Satan ewek ndrinem ma mesekei ou wasai Malawin Ndrabun. Ya eme ou tone luk ranah mene ta munyak ou atehei i ta sisih. \v 4 Ou tanam ou basihinei bala ta luk bwe le badeh, idoh tam. Ano ou andrei luk ta aliy i tam le ai. Saba lakou mesekei ou, ya ou amekes kandriyen doh? Ou badeh, bawasai lau bwe, arile ou badeh, wasai Kindrei.” \p \v 5 Eme Ananayas anuhun le badeh, iy taku i andri ma imek. Eme iri lau anuhun badeh, iri anoh andra-i labai. \v 6 Ano iri loweu ame su-i iy ma bwese iy eme len ma iri ala ahi iy. \p \v 7 Hamon ta awa taloh ano badeh, udun eme ja, ya iy bala tanan sasah nane ndrasahan bwe. \v 8 Eme Pita ndremenya iy anya, “Idoh le kabwai, ta sihine munyak mene ah udum andrei ta munyak ta ah ai?” \p Eme iy anya, “Ehe, aliy le badeh.” \p \v 9 Eme Pita tiye anya, “I buku sah ah udum anya kanone boto-on ta Malawin Ndrabun ta Laban? Ou ndranuhun! Iri lau ta bwese \m udum ma a-eh iy asah barame ado madasan kada-ah. Ya iri kameh bwese ou a manan ale.” \p \v 10 Eme na le liliy badeh, iy taku i andri udu kati Pita ma imek. Ano iri lau loweu ame anyolom iy ndramak, eme iri bwese-ei iy ili ma ahi iy udu ka-u udun. \v 11 Eme iri lau ta Kindrei ma hawe iri lau mari anuhun badeh, iri anoh andra-i labai. \s1 Oro aposel amekes iri lau solo-an amwenen ja \p \v 12 Eme oro aposel badeh, amekes lahou tinan hawe kalem tinan udu bolo iri lau. Ma hawe iri lau mari ala atehei budon tiri in ta Kindrei badeh, atukum ame bahandra beleheleh ta Solomon udu loboho asiu tinan ta Kindrei. \v 13 Ya eme iri lau rayah badeh, bala bolo oro lau ta Jises bwe. Iri lau badeh, masiye oro, arile iri anoh ta atukum hawe oro. \v 14 Arile, bwai, iri lau solo-an labai badeh, atehei budon tiri handru ili le ta Laban, ma andromwei iri hawe iri lau tan nane. \v 15 Eme ta katin le doh badeh, iri lau bwese iri lau abo sik ala bolo kon tinan. Ma adeu iri an bada sau hawe ndrou ta abe-en i buku none Pita kedek keme badeh, korohan le ki tiri.\f + \fr 5:15 \ft Iri lau doh abudon i buku koroha Pita le ili bwele-e iri lau abo sik, badeh, winiyan bwidi iri amwenen ja.\f* \v 16 Eme iri lau solo-an badu kon tinan mirihik ta Jerusalem atiye iri lau tiri abo sik ma hawe malawin ndra-in udu la-u iri ame le hawe oro. Eme iri mari badeh, amwenen ja. \s1 Iri adai oro aposel \p \v 17 Ano, tinan tiri pris hawe oro lau badu hawen, oro badu hawe oro Sadusi, mada oro alikis oro aposel, tasah iri mwan ma badih mara-ei badeh, sekesek labai ta gok toro aposel. \v 18 Eme ma iri ala tawi oro aposel ma atehei oro ala bolo kou ta ndrahu lau mari. \v 19 Arile, na ben badeh, angelo ta Laban eme sihi iri madasan ta i bolon asak ma kuhi oro ame len, \v 20 ya iy tiye oro anya, “Ado kala bolo asiu tinan ta Kindrei katiye nyala lau mari ta sahou mari ta nyala manyah ha-un ta Kindrei.” \p \v 21 Eme na mandraben handru badeh, oro ala bolo asiu tinan ta Kindrei i buku le angelo mene ndrasihidiy toro, ma oro leheya iri lau. \p Eme tinan tiri pris hawe oro lau badu hawen asahan, eme oro luhi oro kansol ma hawe oro lau-en mari badu Isra-el ame, ya iri atilik nyala iri. Ano oro suni sahou ili bolo kou tiye oro aposel kame kales kado mada oro kansol. \v 22 Arile, oro lau ta atondrok asiu ta Kindrei ala asos bolo kou, iri batou oro aposel bado bolo kou doh bwe. Eme oro a hamon badeh, asehek nyala oro, \v 23 “Aso ala asos, \m ma anyolom iri kou badeh, ndrahas, se lakou babwidiy bwe, ma hawe oro lau ta ndrokei are aliy atondrok. Arile, aso sihi kou anya kabolon badeh, oro bado aliy bwe.” \v 24 Eme oro anuhun sahou doh badeh, ya budon ta tinan ta ndrokei ta asiu ta Kindrei, hawe iri tinan tiri pris lomondra anya sasah kameh asahan bah? \p \v 25 Ano ndramak ari eme badeh, anya, “Ei! Oro lau mene, ado atehei oro ala bolo kou badeh, ales areu asiu tinan ta Kindrei kodo-oh leheya iri lau mwan ma badih.” \v 26 Eme oro batun hawe oro tinan ta ndrokei ala badeh, andrei oro aposel dah. Oro badeh, baseheya oro boto-on bwe, tasah oro anoh, kora-on iri lau korowei oro na bek. \p \v 27 Eme oro tiyani oro aposel ame atehei oro ales are mada iri kansol, eme ma iri pris ndremenya oro i buku doh, \v 28 “Aso tiye sahou boto-on boto-on ndrawek tado, ta ado saleheya boto-on ta nyara ndramak badeh, ja ai, ndri-iy labai. Arile, ado badeh, ndramesekei bolo kon Jerusalem na leheya tado, ma ado anya kamekes aso kabwese maha-an ta ndraye ndramak badeh.” \p \v 29 Eme ma Pita hawe oro aposel rayah tiye i hamon anya, “Aso badeh, winiyan banuhun ari ndramak bwe, aso anuhun le Kindrei, kabwai! \v 30 Kindrei ta tama aso mene mete-ei Jises udu ta imek eme loken. Iy mene ado adai iy imek udu bada kei tondreh. \v 31 Kindrei eme tutuni iy ere loken udu loboho limen salin, ma iy asahan kabin ma ndramak ta seben. Ma iy badeh, leheya madasan ta ado winiyan tubuni ndrine ado, ma iy winiyan sikine karei ma lomondra ndra-in tiri Isra-el. \v 32 Ya, eme aso dah badeh, anyolom lakou mari doh, na mada aso amwenen. Ma hawe Malawin Ndrabun ta Kindrei ale bwidiy aleu iri lakou doh. Kindrei badeh, winiyan edeu Malawin i tare lau, buku none iy anuhun bohon.” \p \v 33 Ya eme oro kansol anuhun sahou doh badeh, ma bwidi ndrine oro irih mara-ei, ma oro anya kadai oro aposel kamak. \v 34 Arile, ndramak ari nyaran Gamaliyel,\f + \fr 5:34 \ft Pol basahan lau ta Kindrei bwe le badeh, Gamaliyel doh ndramak ta leheya ta Pol. Ou anyolom udu bolo Lahou toro Aposel kalan 22:3.\f* iy tinan tiri, iy badu Parasi, iri beleben iy tinan labai. Iy badeh, ndramak ari ta leheya bolo kandriyen malen, iy ales ere loken bolo iri kansol, ma iy asehek sahou boto-on, ta iri badeh, karuwani mine iri ma oro ka manan sese op. \v 35 Ano iy tiye sahou i toro kansol anya, “Ado lau badu Isra-el, ado anya kamekes sasah ki toro lau doh badeh, ado kabudon kamwenen bwena op. \v 36 Len sabe mene \m ndra-au Tudas asahan, iy amekes iy i buku ndramak ari handru, ya lau ma hanek (400) badeh, a-en hamon tan. Eme iri adai iy imek badeh, iri lau tan aseker, eme ma ari lakou basahan se bwe. \v 37 Ano, udu hamon tan ja badeh, ndramak ari badu Galili nyaran Judas asahan kabatana len ta ndromondrom kane lau; iy ale aluwi lau solo-an an hamon tan ale. Eme iri adai iy imek ale, ma iri lau tan aseker. \v 38 Ya, jo katiye tado kamwenen: Oro lau dah badeh, ado karuwani mine ado ki-iu toro! Ya oro ka-au! Ki buku none budon dah i buku none tiri lau laleyah, badeh kameh winiyan bala bala bwe. \v 39 Arile, buku none budon doh ta Kindrei handru eh, idah kameh ado winiyan batobohei oro bwe; ya ado kameh amekes bahun i bada Kindrei le.” \p \v 40 Eme ma sahou tan badeh, tubuni budon toro. Eme iri luhi oro aposel ame bolon, ma ubwi oro na malou sakabuk i bek. Ano iri tiye sahou i toro, hamon oro sasehek sahou na nyara Jises ja ai, ndri-iy, ma eme iri tiye oro au. \p \v 41 Eme oro aposel ame len ta mada iri kansol ma sekesek tinan labai ta Kindrei badeh, ndranyulumwi oro badeh, mwasin labai ta bwese maha-an ta nyara Jises. \v 42 Eme len ari buku ari udu bolo asiu lohalak ta Kindrei ma i asiu ra-em i ra-em, oro badeh, baruwani ta leheya ma ta tiye sahou mwasin ta nyala Jises bwe. Oro asehek boto-on labai ta Jises badeh, Mesaya. \c 6 \s1 Oro lau ma ndro taloh ta seben \p \v 1 Na len doh badeh, kane iri lau nane a-en hamon ta Jises ma atehei budon tiri handru i ta Kindrei i sola le ai. Eme ma iri Juwis nane asehek boho iri Grik badu bolo iri lau ta Kindrei badeh, tebelese hawe iri Juwis rayah nane asehek boho Aramek.\f + \fr 6:1 \ft Aramek badeh, boho kon tiri lau badu bolo kon munyak tinan Judiya hawe Galili. Boho kon doh, anya ki buku boho kon tiri Hiburu.\f* Iri Grik anya iri badih nyau tiri badeh, bakohok nyamon sola bwe. \v 2 Eme oro aposel ma ronoh la-uh ame luhi iri lau ta Kindrei ame, ma tiye i toro i buku doh, “Aha kanuhun, gok ta apou nyamon ma luk ili tiri mwan ma badih badeh, sokei gok taso, ma idoh badeh, bamwenen bwe. Gok taso handru badeh, ta atiye sahou ta Kindrei le kabwe. \v 3 Ado nadu tine, ado badeh, kalebelei oro lau ma ndro taloh badu bolo ado. Oro lau doh badeh, kadah na Malawin Ndrabun hawe tanan ta aleben budon. Ya to kameh atehei lahou doh kameh i kani oro. \v 4 Ya aso badeh, budon taso ki le ta salom ma katiye sahou ta Kindrei.” \p \v 5 Eme iri mari badeh, sekesek ta budon doh. Eme iri lebelei Stiben, ndramak idih na Malawin Ndrabun hawe ndramak ta budon handru; ale hawe Pilip, Prokorus, Nikanor, Timon, Parmenas, hawe Nikolas badu Antiyok. Iy mene badu Juwis bwe, arile udu ja, iy in hamon ta kandriyen tiri Juwis. \v 6 Eme iri tiyani oro lau doh ala hawe oro aposel. Eme oro adeu nyosowan i la-u oro ma asolom oro. \p \v 7 Eme ya sahou ta nyala Kindrei badeh, aseker. Eme kane iri lau badu Jerusalem atehei budon tiri handru i ta Kindrei i sola suwi suwi. Ma iri pris solo-an badeh, anuhun sahou ma atehei budon handru. \s1 Iri ateu Stiben \p \v 8 Stiben badeh, Kindrei nyosowani iy tinan labai, ma atehei boto-on i tan ta amekes kalem tinan hawe amekes lahou tinan, udu bolo iri lau. \v 9 Arile, iri lau rayah suri iri badeh, andresei iy. Oro lau doh badeh, badu asiu ta atukum tiri Juwis, ya oro lau nane doh badu boho kamen iri aloh, “Kamen tiri salibah.”\f + \fr 6:9 \ft I boho Grik badeh, salibah doh moson i buku doh: Bwena mene oro ado bahandra iri lau ta atondrok oro buku bonyo-ou. Udu hamon ja badeh, iri ruwani oro ame len ta kandriyen ta bonyo-ou. Eme ma, na dah oro lau doh ado laleyah.\f* Ya, iri lau doh badeh, iri Juwis badu kon tinan Aleksandriya ya kon tinan Sairini. Oro rayah ja badeh, oro Juwis badu kon munyak tinan Silisiya hawe badu bada kon munyak tinan Esiya atukum hawe oro ta tebelese hawe Stiben. \v 10 Arile, Malawin Ndrabun badeh, edeu budon mwasin i ta Stiben asehek sahou, ya oro winiyan basehek sahou bala tan bwe. \p \v 11 Ano, oro tamarei lau rayah tiye boho oro anya, “Aso badeh, anuhun Stiben asehek sahou ndra-in i bada Moses hawe Kindrei.” \p \v 12 Eme oro mesekei ndrine iri lau hawe ndrine iri lau-en ma hawe iri Juwis ta leheya kandriyen malen towodau. Eme iri tawi Stiben ma tiyani iy ili hawe iri kansol. \v 13 Eme iri amekes budon laleyah ma iri wasai anya, “Iy lau doh badeh, asehek sahou ndra-in i bada kandriyen malen hawe kon ndrabun. \v 14 Aso badeh, anuhun iy tiye anya, ‘Idah kameh, Jises badu Nasaret kameh tokosei kon dah ma hawe tobolowe kandriyen tataha mene Moses edeu eme ta taha.’” \p \v 15 Eme oro manyah ado bolo oro kansol anyolom Stiben boto-on ma anyolom bwili Stiben anya i buku ari angelo. \c 7 \p \v 1 Ano pris tinan ndremenya Stiben anya, “Ou amekes iri lakou doh, handru?” \p \v 2 Ya, eme Stiben asumon anya, “Wurah lomada ado nadu tine, ma hawe ado tama, ado kanuhun jo! \m Kindrei badu bolo lomadan mene asahan hawe tubu taha Abraham na len iy mene manyah udu Mesopotemiya mwena, ano iy barala baramanyah barado Haran. \v 3 Eme Kindrei tiye i ta Abraham anya, \q1 ‘Ou ruwani kon tinan tam hawe ou ruwani iri lau tam, ya ou adek au ala kon kameh jo leheya i tam.’ \rq Jenesis 12:1\rq* \p \v 4 “Eme ma iy ruwani kon munyak Kaldiya, iy eme badeh, manyah udu Haran. Iy udu gwek winiya taman imek, ano Kindrei suni iy ili manyah udu kon ado areu aliy dah. \v 5 Ma iy badeh, badeu se ranah munyak bala tan bwe. Arile, Kindrei badeh, tandrakan iy hawe lundriyen oro kameh, iy kameh edeu munyak i tan ma hawe lundriyen oro asahan hamon. Na len Kindrei tandrakan doh badeh, Abraham ari nadun bwe le. \v 6 Ya eme Kindrei asehek sahou i ta Abraham i buku doh: \q1 ‘Lundriyem oro kameh manyah are kon munyak toro amwenen bwe, ma idah kameh, oro asahan bonyo-ou, winiya jaha ma hanek (400). Ma iri lau ta atondrok oro kameh amekes ndra-in i toro. \v 7 Ano, jo kameh edeu maha i la-u iri kon munyak nane adeu oro a bonyo-ou, ma jo kameh kuhi oro ame hamon ame kon dah atudun jo ja.’ \rq Jenesis 15:13-14\rq* \m \v 8 Ano, Kindrei amekes sahou randra le ta nyala asan ku-i lau i ta Abraham. Eme Abraham asahan tama Aisik, ma tinen atehei iy eme len ano. Len tan asahan ndru la-uh badeh, taman Abraham sani ku-in. Ano Aisik badeh, atehei Jekop, ya Jekop asahan tama tubu taha oro ma ronoh la-uh. \p \v 9 “Eme nadu tine Josep oro ma ronoh ari badeh, mada oro alikis iy, ma oro atehei iy i ta sisih i buku bonyo-ou ili Ijip. Arile, Kindrei udu hawen, \v 10 ma sebenei iy ta bolo maha-an mari. Eme iy atehei budon mwasin i ta Josep ma mesekei iy asahan mwasin, mesekei Parou, kabin badu Ijip sekesek. Eme ma iy mesekei Josep asahan tinan ta atondrok kon Ijip ma iri lakou badu bolo asiu ta kabin ale. \p \v 11 “Ano, kon mari badu bolo Ijip hawe Kenan badeh, nyamon bwe. Ma edeu maha-an tinan labai, ma tubu taha oro, ari madasan ta takaleh nyamon bwe. \v 12 Ya, eme Jekop anuhun Ijip badeh, nyamon udu aliy, eme iy suni tubu taha oro ala selesen bwena op. \v 13 Ano oro ala san lusan ja badeh, Josep baranyowonya, iy are lau handru barala ta nadu tinen oro ai. Ma Parou barala tanan nadu tine \m Josep oro ai. \v 14 Ano hamon ta idoh badeh, Josep suni sahou i ta taman Jekop hawe lundriyen oro mari ma ndro tonoh limeh (75) kame. \v 15 Ano Jekop hawe lundriyen oro mari au ala Ijip. Ya eme iy hawe tubu taha iri amak ado loboho doh. \v 16 Ya a-eh iri mari badeh, a hamon ja ala Sekem ala lek mene Abraham sihine i ta nadu Hamor oro na luk rayah. \p \v 17 “Eme ya suniya len Kindrei anya kamekes tandrakan tan i ta Abraham kasahan handru badeh, kane iri lau tataha ado Ijip i sola le gwek. \v 18 Ya eme kabin ari asahan ja atondrok Ijip. Iy badeh, tanan Josep se bwe. \v 19 Iy eme wendreyani iri lau tataha, ma amekes kandriyen ndra-in handru i ta tubu taha iri. Iy indrek iri badeh, kakeh nadu iri ma borolak le kamak ka-au. \p \v 20 “Na len doh badeh, tine Moses atehei iy eme len. Iy badeh, konen mwasin labai ma Kindrei aseken iy handru. Udu bolo bun ma taloh badeh, atondrok iy udu le asiu ta taman. \v 21 Ano na len iri atehei iy eme manan badeh, nadu Parou badih bwese-ei iy eme loken ma nyowo-ei iy i nadun. \v 22 Eme Moses badeh, akohok tanan tinan labai badu Ijip ma iy badeh, asehek sahou nyarahan labai, ma iy amekes lahou tan badeh, irih labai. \p \v 23 “Ano jaha ta Moses asahan hanoh (40) badeh, iy ili selesen iri lau tan badu Isra-el. \v 24 Eme iy anyolom ndramak ari badu Ijip badeh, idi ndramak ari badu Isra-el andra-i labai. Eme Moses suri iy ili badeh, aseben lau tan badu Isra-el ma iy idi ndramak nane imek. \v 25 Eme Moses lomondra anya kameh, iri lau tan baraseleyani iy, Kindrei suni iy eme ta aseben iri, arile bwe. \v 26 Ano na len rasan ja badeh, Moses eme, iy anyolom uru lau la-uh badu Isra-el ada uru. Eme iy ili anya katalou uru ma tiye sahou i turu i buku doh, ‘Ah anya kada ah ta sasah? Ah badeh, nadu tine ah.’ \p \v 27 “Arile, iy ari nane ta amekes bahun bwena atuwi Moses i hamon ma iy tiye sahou nyarahan i tan anya, ‘Are lau atehei ou atondrok ahi hawe suni ou asehek sahou nyarahan eme tahi? \v 28 Ou anya adai jo ja, i buku none ou na mene adai iy lau badu Ijip mene imek, neh?’ \v 29 Eme Moses anuhun sahou doh badeh, ma iy atobwak iu ili Midiyen, i buku lau badu leheleh manyah udu kon doh. Ya eme nadun mwan la-uh asahan. \p \v 30 “Iy udu gwek jaha ma hanoh (40) ano badeh, angelo ari asahan hawen udu bolo jih anya laleyah udu ta kei udu kon lomale an, udu mirihik ta mandrei Sainai. \v 31 Eme Moses anyolom jih doh badeh, manin atur, eme iy edek ili mirihik anya katou \m kamwenen. Eme iy anuhun boho Laban aloh anya, \q1 \v 32 ‘Jo dah badeh, Kindrei ta tamam oro. Jo Kindrei ta Abraham, ta Aisik, ma ta Jekop.’ \rq Eksodus 3:6\rq* \m Eme Moses totoreh, ma inoh ma madan bala loken bwe. \p \v 33 “Ano Laban tiye i tan anya, \q1 ‘Ou tolowei ku-i katim ki-iu, kon ou ales areu aliy badeh, turuwen. \v 34 Jo badeh, ndranyolom sisi-in ndra-in labai tiri lau tek are Ijip. Jo badeh, ndranuhun ndrelen tiri, ya eme jo ndrame andri dah ta aseben iri kame len kado mwasin. Abo, ou suri ou ya jo kasuni ou ala hamon ala Ijip ja.’ \rq Eksodus 3:5, 7, 8, 10\rq* \p \v 35 “Iy Moses dah le mene adeh iri badeh, asehek na boho iri anya ‘Are lau atehei ou atondrok ahi ma asehek sahou nyarahan eme tahi?’ Iy le badeh, Kindrei suni iy ili atondrok iri, ma ta akohok iri ame len na seben ta angelo mene asahan hawen udu bolo jih. \v 36 Iy badeh, kuhi iri ame len ta Ijip ma iy amekes kalem tinan tinan udu Ijip, udu gwa ndras aloh Retsi, ma iy sariye iri ado kon lomale an, jaha ma hanoh (40). \v 37 Iy Moses le doh mene adeh tiye i tiri lau badu Isra-el anya, \q1 ‘Kindrei kameh suni propet ari ewek taha i le buku jo badu bolo ado amwenen.’ \rq Dutoronomi 18:15\rq* \m \v 38 Iy le badeh, mene udu ndrokowa iri lau badu Isra-el ado kon lomale an udu hawe tama taha iri. Ma iy udu hawe angelo mene asehek sahou i tan udu mandrei Sainai, ma iy akohok sahou awas ta asehek nyala taha. \p \v 39 “Arile, tubu taha iri badeh, baseken iy bwe, ma iri tikahei iy ma udu ndrine iri badeh, iri lomondra ili hamon ja ili Ijip. \v 40 Ya eme iri ame tiye Aron anya, \q1 ‘Ou amekes rayah kindrei ya iri ka-en bwena ta to ja. Iy lau Moses ta sariye to ame dah badeh, to bala tanan sasah ndrasahan tan udu mandrei Sainai kodo-oh bwe!’ \rq Eksodus 32:1\rq* \m \v 41 Na len doh badeh, iri mesekei sukumada lakou ari asahan i buku nadu bulumakau. Eme iri atiye lakou i nyara salom eme ta asun i tan, ma iri amekes tine nyamon ta atudun lakou iri amekes na mine iri doh. \v 42 Arile, Kindrei atehei konan i tiri ma mesekei iri ala atudun iri lakou badu bada kandrah. Idoh amwenen le ta sahou mene torowenei udu bolo tarou tiri propet i buku doh: \q1 ‘Aha Isra-el, na len aha mene ado kon lomale an udu bolo jaha ma hanoh (40), aha atiye lakou i nyara salom eme tek deh bwe? \q1 \v 43 Bwe handru! Asiu balei mene aha bwese, tek bwe, ta kindrei ta wasai Molek le, ma sukumada kei i buku ndrau ta kindrei taha ta wasai aloh Repan; oro sukumada kei doh ado asah, ta aha atudun iri. Ya eme idah kameh, jo kameh tikahei aha au a len ala kon munyak tinan Babilon.’ \rq Amos 5:25-27\rq* \p \v 44 “Iri tubu taha iri badeh, mene kuhi asiu balei ta Kindrei ma sahou handru tan udu bolon mirihik tiri, udu kon lomale an. Amekes doh mene in hamon ta boho Kindrei tiye i ta Moses, amekes in hamon ta malawin Moses ndranyolom. \v 45 Ano udu hamon badeh, tubu taha iri bwese-ei udu mine tama iri, ma an hamon ta Josuwa, ma akohok iri kon munyak tinan mene Kindrei takahei iri au. Eme asiu balei doh udu gwek, eme taku len ta Debit asahan. \v 46 Eme iy aluwi budon ta Kindrei badeh, aseken iy ma ndremenyani Kindrei i buku none iy kaseken, badeh, iy katahi ra-em asiu ki asumwe Kindrei ta Jekop. \v 47 Arile bwe, idoh badeh Solomon labai tahi asiu i asumwe Kindrei. \p \v 48 “Arile bwe, Kindrei udu bwele-e kindrei mari badeh, bamanyah bado asiu ala lau amekes na mine iri bwe. I buku none propet ari asehek i buku doh, \q1 \v 49 ‘Kandrah badeh, ndrahu manyah tek labai, \q2 ma munyak badeh, ndrahu katik. \q1 Ma Laban anya, saba asiu handru ado anya kamekes keme asumwek? \q2 Ya ndrahu amunyau tek kameh kudu heh bah? \q1 \v 50 Sebwe, jo bamekes lakou mari bwe, nadeh?’ \rq Aisaya 66:1-2\rq* \p \v 51 “Aha badeh, ta tebelese handru en! Ma ndrine aha badeh, ndradah na kindrei ta wasai i buku iri lau tana iri Kindrei handru bwe, ma ndranye aha ndralun ma aha winiyan banuhun sahou handru ta Kindrei, bwe! Aha badeh, i le buku none tama aha oro mene. Aha banuhun sahou ta Malawin Ndrabun bwe! \v 52 Are propet asahan bwena mene, ya tama aha oro mene badai iy bwe? Oro mene adai iri propet mene asehek ta nyala ndramak mwasin handru kameh barasahan. Ya eme na dah, iy ndrame, arile aha badeh, atehei sa-oh ma adai iy imek. \v 53 Aha mene andrei batanau malen udu mine iri angelo, arile aha ba-en hamon ta aliy bwe.” \s1 Iri orowei Stiben na bek \p \v 54 Eme na len iri anuhun sahou doh badeh, iri abolosen handru ma lihi iri asenyer i tan. \v 55 Arile Stiben badeh, idih handru na Malawin Ndrabun, ya eme iy suri madan ili bolo kandrah, ma iy anyolom lomadan ta Kindrei, ma anyolom Jises ales udu loboho lim salin ta Kindrei. \v 56 Eme iy anya, “Ado kanyolom! Jo anyolom bolo kandrah asak ma jo anyolom Nadu Ndramak Awas ales udu lim salin ta Kindrei.” \p \v 57 Eme iri arah ma sokei ndranye iri na lime iri, ma iri sakaliye ala hawen ma tawi iy, \v 58 ma aluwi iy eme len ta kon tinan, ma orou iy na bek.\f + \fr 7:58 \ft Ta kandriyen malen tiri Isra-el, buku ndramak ari amekes kandriyen ndra-in handru, iri lau kameh tawi iy ma aluwi iy eme len ta kon tinan, ma iri orou iy na bek ili, ili winiyan le iy imek. Ou anyolom in bolo tarou ta Lebitikus kalan 24:13-16 ma Namba 15:35.\f* Ya iri lau nane amekes sahou wendreya, ta adeu Stiben i ta sahou, badeh, talou awin tiri iu, ya iri akahei ili udu kati iy ndramak loweu ari, nyaran Sol. \p \v 59 Iri badeh, abo gok le ta orou Stiben na bek ai, ta adi iy kimek. Iy eme asolom bohon i tinan ili ta Laban i buku doh, “Laban Jises, ou andrei malawik ai.” \v 60 Ano badeh, iy atehei bwili ndru-un udu andri, ma iy aloh i tinan i ta Kindrei i buku doh, “Laban, balem kamani kandriyen ndra-in toro nane amekes eme tek doh.” Iy asehek sahou doh ano le badeh, ma iy imek. \c 8 \p \v 1 Na len doh Sol badeh, udu aliy anyolom ale ma iy tiye iri ta kadai Stiben kimek. \s1 Iri lau budon tiri handru in ta Kindrei bwese isi ma iri aseker \p Eme na le bolo len doh badeh, iri lau mwan ma badih nane manyah ado bolo kon tinan Jerusalem amekes ndra-in labai, ili tiri lau nane atehei budon tiri handru in ta Jises, eme ma iri akohok sisi-in laba tinan labai. Eme ma iri atobwak au ala loboho kon munyak tinan Judiya hawe Samariya. Arile, oro aposel le badeh, batobwak bwai. \v 2 Eme iri lau ta Kindrei rayah ame aden ndranye Stiben. Ano iri ala ahi iy. \v 3 Iy ndramak Sol doh badeh, edek ta idi iri lau nane atehei budon tiri handru i ta Kindrei. Iy edek ili asiu ra-em ili ra-em takaleh ma aliu iri mwan hawe iri badih ame, ma adeu iri ala bolo kou. \ms1 Oro aposel atiye sahou ta Jises ili Judiya ma hawe Samariya \mr (Kalan 8:4–12:25) \s1 Pilip udu kon Samariya \p \v 4 Iri lau mwan ma badih nane atehei budon tiri handru in ta Jises badeh, atobwak ala ado bolo kon mara-ei, ma iri atiye sahou mwasin ta nyala Jises ili loboho heh iri adek ma ala ado aliy. \v 5 Pilip badeh, ili andri bolo kon tinan ari badu loboho Samariya, atiye sahou ili tiri lau ta nyala Jises, ta iy ndramak doh Krais, iy mene Kindrei ndraleheyani iy eme ta aseben taha mari. \v 6 Eme na len iri lau anuhun sahou ta Pilip asehek ma anyolom kalem iy amekes badeh, ma iri atehei ndranye iri irih labai ta anuhun sahou iy asehek. \v 7 Ma hawe iri malawin ndra-in badeh, anyar ma ame len ta ndramak, ma hawe lau kati iri imek, ma bada iri imek badeh, mara-ei amwenen ja. \v 8 Ya iri lahou tinan ta Kindrei eme bolo kon tinan doh badeh, ma bwidi iri lau mara-ei sekesek laba tinan labai. \s1 Saimon ndramak ta amekes balahak \p \v 9 Ya ndramak ari nyaran Saimon udu kon tinan doh ale badeh, amekes balahak san solo-an solo-an ndra-au, ya amekes iri lau mari badu loboho Samariya, boho iri asak ta aliy. Iy badeh, atudun iy anya, iy le kabwai. \v 10 Ya eme iri lau mari ma tinan ma bwisik badeh, atehei budon tiri i tan anya, “Iy ndramak dah badeh, iy Kindrei, ma boto-on tan ili labai.” \v 11 Iri lau badeh, an hamon tan, tasah iy badeh, bwidi boho iri asak san solo-an labai, ma amekes kalem luluwen labai. \v 12 Arile, na len Pilip tiye tiri ta sahou mwasin ta nyala tondrok ta Kindrei ma hawe nyara Jises Krais, iri mwan hawe iri badih badeh, atehei budon tiri in ta sahou ta Pilip, ma alomwa iri. \v 13 Ma Saimon ale atehei budon tan handru in tiri sahou doh, ya eme alomwa iy ale. Eme ma iy in hamon ta Pilip ili kon rakon, rakon, ma anyolom iri kalem tinan Pilip amekes ma bohon asak. \p \v 14 Eme na len oro aposel ado Jerusalem anuhun iri lau badu Samariya badeh, ndrandrei sahou ta Kindrei, eme oro suni Pita uru Jon ala anyolom oro. \v 15 Eme uru ala asahan hawe oro lau mwan ma badih nane, uru asolom oro ta oro kakohok Malawin Ndrabun, \v 16 tasah Malawin Ndrabun badeh, bala la-u oro ari bwe le; oro badeh, alomwa oro na nyara Laban Jises le. \v 17 Ano Pita uru Jon atehei mine uru i la-u oro, ma oro adah na Malawin Ndrabun. \p \v 18 Eme na len doh Saimon anyolom oro akohok Malawin Ndrabun i san ta oro aposel adeu lim i la-u oro badeh, iy anya kedeu luk ki ta Pita uru Jon ta asih boto-on turu nane doh. \v 19 Eme ma iy tiye turu i buku doh, “Ah katehei boto-on badeh, keme tek ale, ya i buku none jo kedeu minek ki la-u are ki la-u are, iri kakohok Malawin Ndrabun ale.” \p \v 20 Eme Pita anya, “Ou ndrandra-i kede-eh, ou abudon anya, ou winiyan sihinei ndramas ta Kindrei dah na luk tam badeh? Arile, bwe! Ou ma luk tam badeh, kameh amak. \v 21 Ou badeh, balem bahas ta lahou dah bwe, tasah ndrinem badeh, bamwenen ta mada Kindrei bwe. \v 22 Ou tubuni ndrinem ta kandriyen ndra-in badeh, ya ou amekes salom ki ta Laban. Sebwe iy winiyan mani budon ndra-in marakon udu ndrinem badeh ano iu. \v 23 Tasah, jo anyolom ou badeh, ndradah na iri madalakis hawe kandriyen ndra-in ndrasebete-ei ou.” \p \v 24 Ano Saimon anya, “Ndri-iy! Ah kamekes salom kili ta Laban ta aseben jo, ya eme sasah nane ah ndrasehek badeh, kameh sasahan tek.” \p \v 25 Ya uru asehek sasah uru tanan ma ndranyolom udu bada Jises amekes ma asehek sahou ta nyala Laban ano badeh, Pita uru Jon au a hamon ja ala Jerusalem. Ya udu bolo tekedek turu au a hamon badeh, uru atiye sahou mwasin ili kon solo-an badu loboho Samariya. \s1 Pilip hawe ndramak ari badu kon Itiyopiya \p \v 26 Eme angelo ari ta Laban eme tiye Pilip anya, “Ou ala san ili loboho kum, kon lomale an ala udu Jerusalem i andri ili kon tinan Gasa.” \v 27 Eme iy edek ili badeh, ndruni ndramak ari badu Itiyopiya. Iy badeh, ndramak ari tinan ta atondrok lakou mwasin mwasin ta kabin badih badu Itiyopiya nyaran Kandasi. Iy badeh, mene ili Jerusalem ta atudun Kindrei. \v 28 Ano, iy udu san ta ki-iu ki kon ja ai. Ya iy badeh, udu bwele-e sau, ya iri hos aliu iy. Eme iy manyah udu bwele-en badeh, anyolom sahou propet Aisaya mene atorou. \v 29 Eme Malawin Ndrabun tiye Pilip anya, “Ou ala mirihik ta sau ale iri hos aliu kodo-on.” \p \v 30 Ano, Pilip sakaliye ili mirihik ta bada sau nane anuhun ndramak dah aloh sahou badu bolo tarou ta propet Aisaya. Eme Pilip ndremenya iy anya, “Batum aleu ta sahou ou aloh badeh, deh bwe?” \p \v 31 Eme iy anya, “Batuk kaleu ta aliy ki buku sah? Ki buku none ari ndramak keme kaleheya keme tek.” Ya eme iy tiye Pilip anya, “Ou ame loke manyah ado hawek, ma aseben jo.” \p \v 32 Eme ma, Pilip ili loke hawe \m ndramak doh, anyolom tarou ta buk ndrabun ranah nane, atorou i buku doh, \q1 “Iy badeh, i buku none ari sipsip andrei iy eme len ta adai iy; \q1 Iy badeh, i buku none ari sipsip nadu bwisik se balohou bwe na len anya kasan lamin; \q1 Iy badeh, randra sahou bwe. \q1 \v 33 Iri atehei iy i andri labai, ma iri atehei iy i ta mada sahou, arile iri balelei iy, ta mada sahou tan bwe, \q1 Are lau handru barasihidi saren barala ta lundriyen oro? \q1 Tasah iri ndradai iy ndramak.” \rq Aisaya 53:7-8\rq* \p \v 34 Eme ma ndramak tinan badu Itiyopiya ndremenya Pilip anya, “Abo, ou tiye tek, are propet handru asehek nyalan dah? Iy asehek iy le deh? Bwe-em iy asehek nyala ndramak ari ja?” \v 35 Ano Pilip asehek nyalan ta sahou nane iy aloh, ma asehek sahou mwasin ta nyala Jises i tan. \p \v 36-37 Eme uru sakaliye ado san ala badeh, asahan ta gwa rayah, \m eme ndramak tinan badu Itiyopiya dah anya, “Ou anyolom se, gwa asah idah. I buku sah handru, balomwani jo bwai?”\f + \fr 8:36-37 \ft Iri lau rayah ta tanan abudon anya sahou ari ja asahan bolo tarou dah. Sahou doh asehek i buku doh, (37) Ma Pilip tiye, “Buku ou atehei budon tam handru in ta Jises, badeh, kameh jo winiyan anyuwi ou ai.” Eme iy anya, “Jo atehei budon tek handru, buku Jises badeh, Nadu Kindrei handru.”\f* \v 38 Eme iy tiye oro hos tan aliu sau dah udu rasi. Ano Pilip hawe iy ndramak dah, uru ame andri a gwa, ma Pilip alomwa iy. \v 39 Eme uru ado gwa ame loken le badeh, Malawin Ndrabun ta Laban kuhi Pilip iu, ya ndramak tinan badu Itiyopiya batou iy ja bwe. Arile, iy ma sekesek tan edek iu ai. \v 40 Ya Pilip badeh, ili ja asahan Asdot; eme iy ili bolo kon tinan mari atiye sahou mwasin ili ili asahan Sesariya. \c 9 \s1 Sol tubuni ndrinen i ta Kindrei \p \v 1 Na bolo len doh, Sol badeh, alohou ta idi iri lau ta Laban marakon kamak ka-au. Eme ma iy amwenen ili hawe batun tiri pris, \v 2 anya kalelen iy ta iy katorou rayah la-ukei ta tiye nyala Sol badeh, are lau handru. Ya Sol aseken ta atiye iri la-ukei doh i mine iri tinan ta ndrahu tukum tiri Juwis udu kon Damaskus katanan ta aliy. Ya eme i buku none iy kili kanyolom iri lau mwan hawe badih ta a-en hamon ta San ta Laban ado aliy badeh, iy kakuhi iri kala Jerusalem kala bolo kou. \v 3 Eme iy edek eme mirihik ta kon Damaskus le badeh, se nawin bwe, sun lomadan labai anya udu kandrah eme andri awudi iy. \v 4 Eme ma iy atarah i andri bada munyak ma ndranyen anuhun sahou aloh i tan anya, “Sol, Sol, buku sah handru ou anya adai jo?” \p \v 5 Eme Sol anya, “Laban, ou are lau badeh?” \p Eme iy anya, “Jo Jises, na len mari, ou ale anya adai le jo kede-en. \v 6 Abo, ou suri ou, ya ou ala bolo kon tinan Damaskus. Ma idah kameh ndramak ari eme, tiye tam ta sasah kameh ou amekes.” \p \v 7 Ya oro lau nane adek hawe Sol doh badeh, boho oro ihis; oro anuhun nyaro boho ndramak, arile oro banyolom ari ndramak bwe. \v 8 Sol eme suri iy udu bada munyak eme loken, madan anya kasak badeh, iy banyolom se lakou bwe. Eme iri sirini iy ili Damaskus. \v 9 Len taloh badeh, iy winiyan batou kon bwe, iy ba-un gwa ma baimon nyamon bwe. \p \v 10 Ya udu Damaskus doh badeh, ndramak ari ta Jises udu aliy, nyaran Ananayas. Ya Laban badeh, asahan ta lele, tiye i tan anya, “Ananayas, ei!” \p Eme Ananayas anya, “Abo, Laban, jo udu kada-ah.” \p \v 11 Eme Laban tiye i tan anya, “Ou ales ala asiu ta Judas udu loboho nadu san iri aloh San Ales Le. Ya ou ndremenya oro ta ndramak ari badu Tasus, nyaran Sol. Iy badeh, asolom. \v 12 Udu bolo salom ta Sol badeh, iy anyolom ndramak ari nyaran Ananayas udu bolo lele eme, atehei limen i bwele-en ta amekes madan kasak.” \p \v 13 Eme Ananayas anya, “Laban, jo badeh, ndranuhun yoyou ta ndramak badeh, ma ndranuhun sisi-in iy amekes i tiri lau ta Kindrei ado Jerusalem. \v 14 Iy akohok boto-on badu mine iri tinan tiri pris ta aseu iri lau ala aloh nyaram udu bolo salom tiri.” \p \v 15 Arile, Laban tiye i ta Ananayas anya, “Bwe, ou ala! Iy ndramak doh badeh, jo ndralebelei iy ta atiye sahou tek i tiri lau badu leheleh, i tiri kabin tiri ma hawe i tiri lau badu Isra-el. \v 16 Jo amwenen kameh leheya iy ta iri maha-an ma sisi-in, iy kameh bwese ta nyarak.” \p \v 17 Ano Ananayas ili, ma iy ales ili bolo asiu badeh, atehei minen i bwele-e Sol ma iy anya, “Sol ou nadu tine, Laban Jises amwenen suni jo eme hawem; iy le mene adeh asahan hawem udu san ta ou ame dah. Iy suni jo eme dah badeh, ta amekes madam kanyolom kon ja, ma iy aso-ok ou adah na Malawin Ndrabun.” \v 18 Eme se nawin bwe, lakou i buku none bwisi ni udu madan taku eme len, ma iy anyolom kon ja. Eme iy ales udu loken ma alomwa iy. \v 19 Ano iy aimon nyamon ma nyamun eme hamon ja. \s1 Sol udu Damaskus ma Jerusalem \p Eme Sol badeh, udu hawe oro lau ta Jises udu Damaskus len solo-an sese. \v 20 Ya eme iy ales ili kon ndrahu tukum tiri Juwis, iy asehek ta nyala Jises badeh, Nadu Kindrei handru. \v 21 Eme iri are anuhun iy asehek sahou badeh, mani iri atur anya, “Kede-eh iy ndramak mene udu Jerusalem idi iri lau mene aloh i ta nyaran doh i buku iy asehek kede-eh! Ma iy kede-eh eme ta ateu iri lau kala hawe iri tinan tiri pris ma iri kala bolo kou ai.” \v 22 Arile, sahou Sol akeh badeh, i nyarahan nyarahan le gwek ma iy asehek sahou aleu handru i tiri Juwis ado Damaskus, ta Jises badeh, Krais handru, Kindrei suni iy eme. Sahou tan bolowani budon tiri Juwis doh, ma bwidi boho iri ihis. \p \v 23-24 Eme udu, udu len solo-an iu badeh, iri Juwis atilik nyala iri ta adi iy kimek. Ya ben len ben len badeh, iri atehei mada iri udu madasan ta kon tinan ta anya kadai iy. Arile, iy badeh, ndrandrei bale iri. \v 25 Ma iri lau tan badeh, andrei iy na ben ma atehei iy i bolo ndrom sahin rahak iu ta malou i san ta mada munu kowah i andri. \s1 Sol ili Jerusalem \p \v 26 Na len Sol eme Jerusalem badeh, iy anya kili hawe oro lau ta Jises, arile oro mari anoh iy. Ma oro atehei budon anya iy badeh, ndramak badu hawe oro bwe. \v 27 Ndramak ari nyaran Banabas eme badeh, andrei iy, ma uru ala hawe oro aposel. Eme iy asehek nyala oro ta sasah asahan ta Sol na len iy edek ili Damaskus, ya iy anyolom Laban, ma Laban asehek sahou i tan. Ma asehek i toro ta iy udu Damaskus badeh, iy banoh ta asehek sahou, ta nyala nyara Jises nyarahan labai bwe. \v 28 Ma eme Sol udu hawe oro edek ili eme bolo Jerusalem atiye sahou nyarahan nyarahan ta nyara Laban. \v 29 Iy asehek sahou ma hawe andres oro lau badu Juwis nane asehek boho Grik, arile oro anya kadai iy kimek. \v 30 Eme iri lau ta Jises ado doh anuhun badeh, iri kuhi Sol ili Sesariya ma suni iy iu ili kon Tasus. \p \v 31 Ano iri lau ta budon handru badu loboho Judiya, Galili hawe Samariya sekesek handru ta iri babwese isi ja bwe. Iri badeh, abadok ma ales boto-on na boto-on ta Malawin Ndrabun. Ma eme, kane iri i sola ma iri anoh Kindrei, eme ma iri atudun iy. \s1 Aneyas uru Dokas \p \v 32 Udu bolo tekedek ta Pita ili eme bolo kon munyak doh badeh, ma iy ili selesen oro lau ta Kindrei an kon Lida. \v 33 Iy ili badeh, ndruni ndramak ari nyaran Aneyas, badan mari imek. Iy in le bada sau andrei jaha ma ndru la-uh. \v 34 Eme Pita tiye i ta Aneyas anya, “Jises Krais ndramesekei ou ndramwenen. Ou suri ou, ma ou lukumwi kin tam.” Eme, se nawin bwe, iy suri iy eme loken. \v 35 Eme iri lau manyah ado Lida hawe Saron anyolom badeh, ma iri atehei budon tiri handru i ta Laban. \p \v 36 Ya udu kon Jopa badeh, badih ari nyaran Tabita (i boho Grik badeh, aloh iy Dokas). Iy badeh, badih ari ta in hamon ta Kindrei. Eme na len mari, iy amekes kandriyen mwasin i tiri lau, ma iy aseben iri lau, tiri lakou bwe. \v 37 Na len doh badeh, iy ibo sik ma iy imek. Ya eme iri anyuwi iy, ma nyahani iy udu bolo asiu loken. \v 38 Lida doh badeh, udu mirihik ta Jopa. Ya eme oro lau ta Jises anuhun Pita badeh, udu Lida. Eme oro suni uru lau la-uh badeh, ala andrek iy anya, “Ou ame suwi.” \p \v 39 Eme Pita i hawe uru, ya oro ame asos le badeh, oro kuhi iy iu ili bolo asiu loken. Ya iri badih nyau mari awudi iy, ya iri aden, ma leheya i tan iri awin lawe-en hawe awin rayah ja Dokas amekes, na len i bamak bwe le. \p \v 40 Eme Pita tiye iri mari ame len ta bolo asiu. Ano iy atehei bwili ndru-un i andri ya iy asolom. Eme iy tubuni batalan i ta bada kei nane dah ma iy anya, “Tabita, ou ales are loken.” Eme madan asak anyolom Pita, ma iy suri iy. \v 41 Eme ya Pita tawi minen ma suri iy ales na katin ere loken. Ano, iy aloh i toro lau ta budon handru hawe iri badih nyau ame, ma iy atehei iy i hawe iri, ya kohan ndrame hamon ja. \v 42 Eme iri lau mari badu loboho Jopa badeh, atanan ta aliy, ma atehei budon tiri handru i ta Laban. \v 43 Ya eme Pita badeh, udu hawe ndramak ari lahou tan ta asereh ku-i iri katin haka, nyaran Saimon, iy udu gwek sese. \c 10 \s1 Koniliyus aloh Pita \p \v 1 Udu kon Sesariya doh badeh, ndramak ari nyaran Koniliyus udu aliy. Iy badeh, batun tinan ta atondrok lau ta bahun ma rinek (100) badu Rom. Iy ma hawe iri lau ta bahun tan badu rakum iri aloh lau ta bahun badu Itali. \v 2 Koniliyus ma hawe lowan oro badu Juwis bwe, arile iy ma hawe oro mara-ei ado asiu tan badeh, atudun Kindrei le ai. Iy badeh, edeu lakou i tiri lau lakou bwe, ma amekes salom i ta Kindrei na bolo len mari. \v 3 Eme na beyeh ari, mada an taloh badeh, iy amekes lele. Eme iy anyolom angelo ta Kindrei ari eme asahan hawen anya, “Koniliyus, ei!” \p \v 4 Eme Koniliyus anyolom ales i tan ma iy inoh, ma iy anya, “Laban tek, ou aso-ok sasah?” \p Eme angelo dah anya, “Kindrei ndrasumon salom tam ma iy ndranyolom sasah ou anyohan i tiri lau lakou bwe, ya balen bamani ou bwe. \v 5 Abo, ou suni rayah lau kala Jopa kakuhi ndramak ari udu aliy nyaran Saimon keme, iri ale aloh iy Pita. \v 6 Iy badeh, udu asiu ta liyen Saimon, ndramak ta asereh ku-i katin haka, ya asiu tan udu kabede ndras.” \p \v 7 Ano iy angelo nane asehek sahou i tan iu badeh, Koniliyus eme luhi uru lohowan tan ame ma hawe ndramak ari ta bahun. Iy ndramak ta bahun doh badeh, atehei budon tan handru in ta Kindrei. Ma iy badeh, ta lohowa Koniliyus na len mari. \v 8 Koniliyus eme sihidi sahou mari ta angelo nane asehek i tan, ano i toro, ano iy tiye oro ala Jopa. \s1 Pita amekes lele \p \v 9 Kon aleu, len ari ja, mada an udu le alih badeh, oro ma taloh ndradek ndrala mirihik ta san ili bolo kon tinan Jopa. Na len doh badeh, an nyarahan labai, Pita eme ili loken asiu ta Saimon ta akohok jor, ma iy anya kamekes salom kili ta Kindrei. \v 10 Eme Pita imeson handru en, ya eme iy aseken labai ta aimon nyamon. \m Ya nyamon oro lowosa kahis le badeh, lele asahan tan. \v 11 Eme iy anyolom kandrah asak ya lakou i buku none ra-ei kolau tinan suwin ma hahuw udu kandrah eme munyak. \v 12 Udu bolon badeh, iri katin haka randrah randrah, ma hawe iri sasah ta seselek badu bwele-e munyak, hawe iri sirih badu reu, ado bolo lakou nane doh. \v 13 Ano sahou ari aloh i tan anya, “Ou are loken, adai iri lakou doh, ma ou aimon.” \p \v 14 Eme Pita anya, “Laban, bwe, bwe handru en! Jo badeh, baimon se ari nyamon ko-ak i buku doh bwena bwe le!” \p \v 15 Eme Kindrei aloh san rasan ja anya, “Ou badeh, saloh anya iri lakou, Kindrei sikinei ko-ak ndra-au, ya ou saloh ko-ak udu aliy ja ai, ndri-iy.” \p \v 16 Kindrei aloh i san tulusin ano, suwi labai kolau dah iu i kandrah ja. \p \v 17 Pita lomondra moso iri lakou nane iy anyolom kahis le badeh, oro lau nane Koniliyus suni oro ame ndratakalahei asiu nane Pita udu aliy. Ya, eme oro are rasi are madasan are gwek. \v 18 Eme oro aloh ma ndremenya anya, “Saimon, iri aloh Pita udu aliy deh bwe?” \p \v 19 Pita lomondra ta lele kahis le badeh, Malawin Ndrabun tiye i tan anya, “Saimon ei, lau taloh takaleh ou. \v 20 Ou suri ou, ya ou au ala andri. Ou sanoh ta ala andri hawe oro. Oro badeh, jo suni oro.” \p \v 21 Eme Pita ili andri tiye i toro anya, “Ado asilah jo, jo asah idah. Ado ame dah luwa sah?” \p \v 22 Eme oro lau anya, “Aso dah ado hawe Koniliyus ndramak batun tiri lau ta bahun badu Rom ame dah. Iy badeh, ndramak mwasin handru ma iy badeh, inoh Kindrei labai, ma iy badeh, iri lau mari badu Isra-el aso-ok iy tinan labai. Angelo ndrabun badeh, tiye tan ta ou ala asiu tan, ya eme iy kanuhun sahou badu bohom.” \v 23 Ano Pita kuhi oro ala asiu hawen amadin. \s1 Pita udu asiu ta Koniliyus \p Eme kon aleu badeh, Pita i hawe oro ma hawe nadu tinen oro rayah badu Jopa ala hawe oro ma oro adek au ala. \v 24 Ano i bada len ari ja badeh, iy isos Sesariya. Ya Koniliyus badeh, abe-en oro kameh asahan na len doh. Eme iy luhi oro kawas tan, hawe lowan oro badu mirihik tan ala hawen. \v 25 Eme Pita ili bolo asiu le badeh, Koniliyus asumon iy, ano iy i andri na bwili ndru-un ta sekesek iy. \v 26 Arile, Pita tiye iy ere loken ma tiye anya, “Jo dah badeh, ndramak laleyah labai.” \p \v 27 Pita asehek sahou hawen ano iy i bolon badeh, anyolom iri lau solo-an labai. \v 28 Eme iy tiye i tiri i buku doh, “Ado badeh, tanan idoh badeh, ba-en hamon ta batanau malen bwe, ta ahi lau badu Juwis winiyan ba-en bolo aha \m bwe, ma ahi saselesen aha lau badu leheleh. Arile, Kindrei mene ndraleheyani ndrame tek, ta jo badeh, saloh ari ndramak ndra-in ta mada Kindrei. \v 29 Ya eme ado ala andrei jo eme dah, jo bandremenya ado ta aliy, bwe. Ya abo, sasah handru ado aseken?” \p \v 30 Eme Koniliyus anya, “Len hahuw mene ndra-au, na mada an taloh na beyeh badeh, jo udu asiu tek asolom. Nawin bwe badeh, ndramak ari asini awin belen nyikadin, ales udu bwena tek, \v 31 ma tiye eme tek i buku doh, ‘Kindrei badeh, ndranuhun salom tam ma hawe kandriyen mwasin tam, ta ou adeu lakou laleyah i tiri lau lakou bwe. \v 32 Ou suni ari ndramak kili Jopa kalelen ta ndramak ari nyaran Saimon Pita. Iy badeh, udu asiu ta liyen Saimon, ndramak ta asereh ku-i katin haka, udu kabede-e ndras.’ \v 33 Eme jo suni oro awek suwi ta atou ou, ma mwasin handru ta ou ame. Ya abo, aso mari kada-ah are mada Kindrei ta anuhun sasah Laban tiye ewek tam ta asehek eme taso.” \p \v 34 Ano Pita asehek anya, “Kabwai, na dah jo ndranyolom handru ta Kindrei badeh, baseken ndramak rayah le bwe. \v 35 Arile, iy badeh, aseken lau mari badu kon munyak tinan labai, buku ndramak ari ari anoh iy, ma amekes kandriyen mwasin le. \v 36 Ya idah badeh, ado tanan sahou mene Kindrei tiye i tiri lau badu Isra-el, ta iri katiye sahou mwasin ta amekes mondrei i san ta Jises Krais, iy le ari, Laban ta lau mari. \v 37 Ado badeh, ndratanan sasah mene asahan bolo Judiya in hamon ta Jon ta alomwa atiye sahou ta iri lau kanyuwi iri. Lakou doh asahan udu Galili bwena. \v 38 Ma ado ndratanan i san mene Kindrei atehei nyosowan ta Malawin Ndrabun hawe boto-on ili ta Jises badu Nasaret. Ma hawe iy edek ili eme ta amekes lahou mwasin hawe amekes iri lau mene are le bahandra boto-on ta balik. Tasah, Kindrei badeh, udu hawen. \p \v 39 “Aso dah badeh, anyolom na mada aso amwenen, ta lakou mari iy amekes udu kon munyak tinan tiri Juwis ma hawe Jerusalem. Iri badeh, adai iy ma atahi iy imek i bada kei tondreh. \v 40 Arile, Kindrei suri iy ta imek tan udu hamon ta len taloh ma leheyani iy i mada iri lau solo-an anyolom iy. \v 41 Iri lau mari badeh, banyolom iy bwe, arile Kindrei lebelei le aso lau le mene anyolom iy, ma aimon nyamon ma a-un gwa hawen, udu hamon ta iy amak eme loken ta imek. \v 42 Iy badeh, batanau boto-on labai ta aso katiye sahou kili tiri lau mari ma katiye, iy le badeh, Kindrei atehei lahou i tan ta aleben sahou tiri lau ndramak bwena, ma hawe iri \m lau ma mulin kahis. \v 43 Iri propet badeh, tiye nyalan ale, buku none are lau atehei budon handru in tan badeh, karei ma lomondra ndra-in tan kameh, iy maniy i san ta nyaran.” \p \v 44 Pita asehek sahou doh kahis le badeh, Malawin Ndrabun eme bwele-e iri lau mari nane anuhun sahou dah. \v 45 Eme ma iri Juwis ta asan ku-i iri, atehei budon tiri in ta Jises, ado hawe Pita badeh, boho iri asak ta Malawin Ndrabun amou laleyah i tiri lau badu leheleh ale. \v 46 Tasah, oro anuhun iri badeh, asehek boho kon rakon labai ja, ma atudun Kindrei. Ano Pita anya, \v 47 “Are lau handru winiyan tawi oro lau doh, ta salomwa oro na gwa? Oro badeh, ndrakohok Malawin Ndrabun i le buku aso mene.” \v 48 Ya, eme iy tiye ta kalomwa oro na boto-on ta nyara Jises Krais. Ano oro tiye Pita udu hawe oro len sabe op. \c 11 \s1 Pita asehek lahou tan \p \v 1 Oro aposel hawe nadu tine oro badu loboho Judiya anuhun iri lau badu leheleh ale ndrandrei sahou ta Kindrei. \v 2 Ya, na len Pita ili Jerusalem badeh, oro lau mene atehei budon toro handru i ta Jises ado aliy. Oro ale atehei budon toro boto-on ta asan ku-i oro asehek iy anya, \v 3 “Ou badeh, ala bolo asiu tiri lau nane basan ku-i iri bwe, aimon nyamon hawe iri.” \p \v 4 Pita eme badeh, asehek amwenen i toro ta nyala sasah mene asahan tan i toro: \v 5 “Jo badeh, udu kon tinan Jopa asolom, eme lele asahan tek le badeh, jo anyolom lakou i buku none ra-ei kolau tinan suwin ma hahuw udu kandrah eme andri. Ya suwin badeh, ma hahuw eme andri batalak le dah. \v 6 Jo anyolom ili badan badeh, jo atou iri katin haka, randrah randrah, ma hawe iri lakou ta seselek badu bada munyak, iri ndriliu ma hawe iri sirih badu rewa kandrah. \v 7 Ano, jo anuhun aloh ari anya, ‘Pita, ou suri ou, ya ou adai rayah, ma ou aimon.’ \p \v 8 “Eme jo anya, ‘Laban, bwe, bwe handru en! Jo badeh, baimon sese iri lakou ko-ak doh, bwe le.’ \p \v 9 “Eme Kindrei aloh san rasan ja anya, ‘Ou badeh, saloh anya iri lakou Kindrei sikinei ko-ak ndra-au, ou saloh ko-ak udu aliy ja ai, ndri-iy.’ \v 10 Kindrei badeh, aloh i san tulusin ano suwi labai kolau dah iu i kandrah ja. \p \v 11 “Ano, amwenen le na bolo len doh badeh, oro lau taloh, iri suni oro are Sesariya ame ales are rasi, boho asiu nane jo udu aliy dah. \v 12 Eme Malawin Ndrabun tiye tek badeh, ta jo sandrondro ta i hawe oro. Eme nadu tine oro ma onoh dah ame hawek ale, aso ala asiu ta ndramak doh. \v 13 Eme iy tiye taso ta nyala iy anyolom angelo asahan asiu tan ma tiye, ‘Ou suni oro kala Jopa kandrei ndramak ari nyaran Saimon Pita. \v 14 Iy kameh tiye sahou tam ma hawe oro lowam mari. Ma na sahou doh Kindrei kameh sebenei ado.’ \p \v 15 “Ya jo asehek sahou i toro le badeh, Malawin Ndrabun eme la-u oro i buku none asahan eme la-u to ma mwena mene. \v 16 Ano jo lomondrani sasah Laban mene tiye i buku doh, ‘Jon badeh alomwa ado na gwa, arile ado kameh anyu ado na Malawin Ndrabun.’ \v 17 Jo winiyan batebelese hawe Kindrei bwe, tasah iy edeu ndramas i tiri i le buku iy edeu eme tataha mene, kabatana to atehei budon tato handru in ta Laban Jises Krais.” \p \v 18 Eme oro anuhun badeh, oro basehek iy ja bwe, ma boho oro andru-uk ma oro atudun Kindrei i buku doh, “Handru labai, Kindrei badeh, anya kaseben iri lau badu leheleh ale ta iri winiyan tubuni kona iri ili tiri kandriyen ndra-in, ma kakohok manyah mwasin ta Kindrei ta winiyan bano bwe.” \s1 Iri lau ta budon handru ta Kindrei badu Antiyok \p \v 19 Ya oro lau ta budon handru i ta Kindrei mene aseker ta iri mene adai Stiben badeh, iri rayah aseker ala kon munyak tinan Ponisiya, ma busu Saipres ma kon tinan Antiyok atiye sahou i tiri Juwis le. \v 20 Arile, oro lau rayah badeh, badu Sairini hawe badu Saipres ala Antiyok atiye sahou i tiri lau badu Grik ale ta nyala sahou mwasin nyala Laban Jises Krais. \v 21 Eme boto-on ta Laban badeh, udu la-u oro, eme lau solo-an badeh, atehei budon tiri handru ma tubuni ndrine iri ja i ta Laban. \p \v 22 Eme iri lau ta Kindrei badu Jerusalem anuhun nyala lahou doh badeh, ma iri suni Banabas ili Antiyok. \v 23 Ya eme na len iy isos badeh, iy sekesek tasah iy anyolom Kindrei atehei nyosowan i tiri, ma iy tiye iri mari kado handru le ta Laban na ndrine iri mari. \v 24 Iy badeh, ndramak mwasin idih na Malawin Ndrabun hawe budon handru. Ma iy aluwi iri lau solo-an a ta Laban. \p \v 25 Ano, Banabas ili takaleh Sol ili Tasus. \v 26 Eme iy ndruni iy badeh, iy kuhi iy eme Antiyok. Ya eme udu bolo jaha ari ma buruwen badeh, Banabas uru Sol atukum hawe iri lau ta budon handru ta Kindrei ma leheya iri lau solo-an. Oro lau ta Laban, iri lau aloh oro “Kristen” ma mwena badeh, udu Antiyok. \p \v 27 Udu bolo len doh badeh, iri propet rayah ale, ado Jerusalem ame andri, ame Antiyok. \v 28 Eme iy ari badu hawe oro badeh, nyaran Agabus, ales ere loken asehek sahou na boto-on ta Malawin Ndrabun anya, “Idah kameh, kon mari badu loboho tondrok ta Rom kameh nyamon bwe.” Idoh badeh, asahan na len Klodiyas atondrok kon). \v 29 Eme oro lau ta a-en hamon ta Jises tiye anya, idah kameh, oro ari ari kameh abudon ta oro winiyan adeu lakou ili ta aseben nadu tine oro rayah nane ado Judiya. Oro lau lakou toro solo-an badeh, adeu lakou solo-an ta aseben. \v 30 Oro amekes budon doh ano badeh, oro atehei luk i mine Banabas uru Sol, ma uru tiyani ili tiri lau ta Kindrei nane ado Jerusalem. \c 12 \s1 Iri lau ta Kindrei bwese isi tinan le gwek \p \v 1 Na len doh badeh, kabin Herot ateu lau rayah badu hawe iri lau ta budon handru in ta Kindrei anya kidi oro kamak. \v 2 Iy badeh, tiye ndramak tan ari ta bahun ili mwetehei Jemis, nadu tine Jon, imek na samen gwak iri aloh bainat. \v 3 Eme iy anyolom, buku iri Juwis badeh, sekesek ta aliy, iy ili abwiyeh ta aseu Pita ale. Idoh badeh, udu bolo len ta nyamon tinan ta jabi ramen yis bala bolon bwe. \v 4 Iy tawi iy ano badeh, iy atehei Pita i bolo kou, i mine oro lau ma hahuw, badu bolo oro lau ma habuk ta bahun badeh, tondrokei iy. Oro ndrokei ta Pita badeh hahuw, hahuw ta bolo awa onoh onoh, ben ma len. Budon ta Herot badeh, anya iy keme lewan mada lau mari ta sahou, kudu hamon ta len ta Pasoba. \p \v 5 Ya eme iri atehei Pita udu bolo kou udu gwek, arile iri lau atehei budon tiri handru i ta Kindrei badeh, amekes salom boto-on tan, ili ta Kindrei. \p \v 6 Na ben ano kon kaleu doh badeh, Herot kameh edeu iy i ta sahou. Ya Pita badeh, amadin ndrokowa uru lau ta bahun ma la-uh. Sawei iy badeh, na sen ma la-uh. Ya, oro lau ta bahun rayah ja badeh, ado ta ndrokei ado madasan tinan, loboho manan. \v 7 Eme nawin bwe badeh, angelo ta Laban ari asahan, ma lomadan lomatani bolo kou dah. Iy tukuhi kabede Pita ma mete-ei iy amak anya, “Ou suri ou suwi!” Eme badeh, sen asoh laleyah bada bobwan tan. \p \v 8 Ano angelo tiye i tan anya, “Ou asini awin tam hawe ku-i katim kili.” Eme Pita mesekei i le buku aliy. Ano iy anya, “Ou atehei kolau tam ta bwele-em kili, ya ou an hamon tek.” \v 9 Ya eme Pita in hamon ta angelo dah eme manan ta bolo kou. Arile, iy badeh, bala tanan sasah angelo amekes doh bwe. Iy anya badeh, iy amekes lele. \v 10 Uru adek ame sakalawi ndramak ari ta ndrokei i hamon, ano uru ame sakalawi iy ari ja, ma uru ame asahan madasan amekes na hayen, madan i kon tinan. Eme madasan dah asak laleyah turu, ma uru ame manan. \m Uru adek san kakan lawe-en sese, ma se nawin bwe angelo doh amai iu laleyah. \p \v 11 Ano Pita baraseleyani ai, ta sasah nane asahan ma eme iy anya, “Jo ndratanan ndramwenen handru ai. Laban badeh, suni angelo tan eme sebenei jo ta bolo mine Herot boto-on, ma hawe ta mine iri Juwis mari anya kamekes keme badak.” \p \v 12 Eme iy anyolom tanan doh badeh, ma iy iu ili asiu ta Mariya tine Jon Mak. Iri lau solo-an badeh, atukum ala aliy asolom. \v 13 Eme Pita udu manan atukoh kou, ya eme lohowan badih ari nyaran Roda ili madasan anya katou are lau handru. \v 14 Eme iy anuhun nyaro bale Pita badeh, iy abasa, ma iy basulu-i kou bwe, ma iy sakaliye i hamon ja tiye anya, “Pita asah udu madasan kodo-oh!” \p \v 15 Eme iri anya, “Ou kede-eh budon tam ndra-au oh!” Bwai, iy asehek le ili anya, “Ado kanuhun jo. Ndrakan en! Iy asah udu manan kodo-oh.” \p Eme iri anya, “Sebwe, malawin eme ales nadeh.” \p \v 16 Arile, bwai, Pita atukoh kou \m udu le gwek, ya eme iri anya kasulu-i kou, oro atou iy. Eme mani iri atur handru. \v 17 Eme Pita atehei minen i loken amunum le ma iy tiye i toro kandru-uk, ma iy asehek i toro ta nyala Laban kuhi iy udu bolo kou eme len. Ano iy anya, “Ado badeh, kasehek nyala Jemis ma hawe oro nadu tine to oro rayah ja ta aliy. Ano ma iy ruwani oro, ya iy iu ili kon rakon ja.” \p \v 18 Eme ya na mandraben badeh, oro lau ta bahun lomondra solo-an ta aliy. Eme oro anya, “Sasah handru ndrasahan ta Pita doh?” \v 19 Ya eme Herot takaleh ili badeh, iy batakahei bwe, eme iy ndremenya oro lau ta ndrokei ma tiye ta kadai oro kamak. Udu hamon ta idoh badeh, Herot udu Judiya iu ili udu Sesariya winiya ben sabe. \s1 Herot imek \p \v 20 Herot badeh, mene andra-i hawe iri lau badu kon Tair hawe Saidon; eme uru atukum ase asahan solo-an badeh, ta ala atou iy. Arile, ma mwena badeh, iri ala anyolom kawas tiri ari op, iy doh badeh, ndramak tinan ari ta asiu ta kabin, nyaran Blastus. Iri badeh, atamar iy, ta iy kati-i losen ta kabin Herot kimek ki-iu laleyah, tasah iri amwenen asih niri nyamon badeh, badu kon ta kabin Herot. \p \v 21 Eme na len ta Herot ndratiye, iy asini awin tan ta kabin, ma iy manyah udu bada koyeu asehek sahou i tiri lau. \v 22 Eme ya iri lau sarakau anya, “Idoh badeh, boho kindrei ari ai, asehek sahou doh, boho ndramak bwe!” \v 23 Eme nawin bwe, angelo ta Laban mesekei iy ibo sik ma atarah i andri, ma iri nadu un ani iy, ma iy imek, tasah iy batudun Kindrei bwe. \p \v 24 Arile, na bolo len doh badeh, sahou ta Laban asahan i tinan ma aseker ili bolo kon mara-ei, ma lau solo-an a-en hamon tan. \v 25 Ano, na bolo len doh ale gok ta amekes lahou ta Kindrei udu bolo Jerusalem badeh, Banabas uru Sol ndrabwidiy mari ndrano, eme ma, uru kuhi Jon Mak i hawe uru ili hamon ili Antiyok. \ms1 Pol atiye sahou ta Jises ili bolo kon munyak solo-an labai \mr (Kalan 13:1–21:1) \c 13 \s1 Iri suni Banabas uru Sol au \p \v 1 Udu bolo iri lau atehei budon tiri handru in ta Kindrei badu Antiyok badeh, iri propet rayah, ma hawe iri lau ta leheya rayah ale ado aliy. Nyara oro badeh, Banabas, Simiyon iri aloh iy Nijer,\f + \fr 13:1 \ft Nijer doh badeh, boho iri Grik. Moso sahou Nijer badeh, bada lau bokodon.\f* Lusiyus badu Sairini, hawe Mana-en iy mene asahan kawas ta kabin Herot na len iy atondrok kon, ma hawe Sol. \v 2 Ya eme oro atudun Laban hawe abeles oro ta nyamon ili badeh, ma Malawin Ndrabun anya, “Ado katehei Banabas uru Sol badeh, kare len ta amekes lahou tek mene jo aloh uru kamekes.” \v 3 Ya oro abeles oro ta nyamon ma salom ano, oro adeu lim i la-u uru, ano suni uru ma la-uh au. \s1 Udu kon Saipres \p \v 4 Eme Malawin Ndrabun suni uru lau ma la-uh doh au ala andri ala kon Selusiya, akohok ndron, ma alakak au ala busu Saipres. \v 5 Uru ala asos kon Salamis badeh, oro asehek sahou ta nyala Kindrei udu ndrahu tukum tiri Juwis. Ya Jon udu hawe uru, buku ta aseben uru. \p \v 6-8 Oro badeh, adek awudi busu udu ranah ili taku ranah, ma oro asos kon iri aloh Papos. Eme udu loboho doh badeh, oro ndruni ndramak ari badu Juwis, iy tan balik udu aliy, ma iy wasai iri lau anya, iy propet, nyaran Bajises.\f + \fr 13:6-8 \ft Bajises moson Nadu Josuwa.\f* I boho Grik badeh, iri aloh iy Elimas, moson, iy ndramak ta balahak. Iy badeh, kawas ta Sejiyus Polus ndramak ta atondrok busu doh. Ma Sejiyus badeh, tanan tan ili labai. Eme iy tiye Banabas uru Sol ame, tasah iy anya kanuhun sahou ta Kindrei. Arile, Elimas badeh, tebelese hawe Sol uru Banabas, tasah iy anya kamekes Sejiyus satehei budon tan handru sala ta Jises. \v 9 Arile, nyara Sol ari ja badeh, Pol,\f + \fr 13:9 \ft Nyaran Sol badeh, boho iri Hiburu, ma nyaran Pol badeh, boho iri Grik. Iri lau ta tanan abudon anya Sol aloh iy amwenen i nyaran Pol na len dah, tasah Pol baramekes gok ta atiye sahou ta Kindrei ili tiri Grik ai.\f* iy idih na boto-on ta Malawin Ndrabun, anyolom boto-on i ta Elimas, ma iy tiye i tan anya, \v 10 “Ou badeh, nadu balik amwenen, ma ou badeh, baseken kandriyen mwasin mari bwe! Ou adah labai na kandriyen ta wasai ta balik. Ya, ma saba len kameh ou aruwe ta tobolowe sahou handru ta Laban kasahan wasai? \v 11 Na le dah kameh, boto-on ta Laban kameh edeu maha-an ewek la-um, ya idah kameh, ou winiyan banyolom kon bwe, winiya le len ta aliy barasahan.” Eme na le liliy badeh, Elimas atona lakou bokodon eme tubuluhi madan ilik, ma iy sokorokar lau ta sariye iy na lim. \v 12 Eme ndramak ta atondrok busu anyolom badeh, ma bohon asak ta leheya turu ta nyala Jises, ma iy atehei budon tan handru i ta Laban. \s1 Udu kon Antiyok udu bolo Pisidiya \p \v 13 Eme Pol hawe uru lau badu hawen ruwani Papos, ya oro alakak au ala kon Pega. Pega doh udu bolo kon munyak tinan Pampiliya. Udu doh badeh, Jon ruwani uru ma iy iu i hamon ili Jerusalem. \v 14 Ano Banabas uru Sol ado Pega ala Antiyok, kon udu loboho Pisidiya. Eme na len ta amunyau, uru ala ndrahu atukum tiri Juwis, ma uru manyah ado aliy. \v 15 Udu hamon ta iri anuhun sahou aloh badu bolo batanau malen, hawe boho iri propet ano badeh, iri lau ta atondrok ndrahu atukum, suni sahou i turu anya, “Nadu tine ahi, i buku none ah sahou ta batanau ahi badeh, ah kasehek ai.” \p \v 16 Eme Pol ales udu loken edeu minen i loken amunum le ma anya, “Ado lau badu Isra-el, hawe ado lau badu leheleh, ado ta atudun Kindrei, ado kanuhun bohok! \v 17 Kindrei tiri lau badu Isra-el badeh, tiye tama taha iri ma mesekei iri asahan tinan labai, udu bolo len mene iri manyah ado Ijip, ano na le boto-on ta Kindrei, iy andrei iri ado bolo kon Ijip ame len. \v 18 Ma na bolo jaha hanoh (40) badeh, iy bwese maha-an ta kandriyen tiri ado kon lomale an.\f + \fr 13:18 \ft Lau rayah ta tanan anya sahou udu ta kalan 13:18 asehek i buku doh, Ma na bolo jaha hanoh (40) badeh, iy tondrokei iri ado kon lomale an.\f* \v 19 Kindrei badeh, tikahei oro kon tinan ma ndro taloh ado munyak Kenan au, ma iy atehei munyak toro i tiri lau tan amwenen. \v 20 Iri lakou doh asahan udu bolo jaha ma hanek lomonoh (450). \p “Ano udu hamon ta idoh badeh, Kindrei atehei tiri, iri batun ta atondrok iri eme eme taku, ta Samuwel asahan propet tiri. \v 21 Ano iri aseken tiri ari kabin, ya eme iy atehei Sol asahan kabin tiri. Iy badeh, nadu Kis, asahan ta lundriye Benjamin. Iy atondrok kon badeh, jaha ma hanoh (40). \v 22 Eme Kindrei bwidi Sol ano ta kabin, iy atehei Debit i kabin tiri. Eme iy tiye i buku doh ta nyalan, ‘Jo badeh, ndrasilahei nadu Jesi ari, nyaran Debit, ndramak adek handru in tan labai, iy kameh winiyan in hamon ta sasah jo aseken iy ta amekes.’ \v 23 Edek ta lundriyen kameh, Kindrei atehei ndramak ari ta seben iri Isra-el, nyaran Jises. I buku mene iy ndratandrakan ta aliy. \v 24 Jises basahan bwe le badeh, Jon tiye sahou i tiri lau badu Isra-el katubuni ndrine iri ta kandriyen ta karei ma lomondra ndra-in, ma kalomwa iri. \v 25 Ya eme suniya lahou ta Jon anya kano badeh, iy anya, ‘Ya, ado anya jo are lau handru? Jo badeh, iy bwe! Arile, are lau iy in hamon tek eme kameh, jo ndramak mwasin bwe, ta talou ku-i katin iu bwe!’ \p \v 26 “Ya ado nadu tine, lundriye Abraham hawe ado lau badu leheleh ala an hamon ta Kindrei. Sahou ta nyala seben badeh, ndrame tataha. \v 27 Iri lau badu Jerusalem, ma hawe lau ta atondrok iri badeh, maliye seben tiri Jises, Kindrei nane suni iy eme ta aseben taha, bwe. Iri babudon sahou tiri propet, iri anuhun na bolo len ta amunyau mari bamwenen bwe. Eme ma iri tiye iy kimek. Ya, ta sahou doh, iri amekes sahou mene tiri propet asehek asahan handru. \v 28 Iri badeh, winiyan basilahei ari kati lakou ta amekes imek i badan bwe, eme ma, iri ndremenya Pailat kidi iy kimek. \v 29 Ano, udu hamon ta iri amekes sasah i tan, i buku none iri propet mene asehek, eme iri kuhi iy udu bada kei tondreh eme andri ma atehei iy i lek amekes na bek. \v 30 Arile, Kindrei suri iy udu lek amak eme loken ja. \v 31 Ma udu bolo len solo-an badeh, oro lau mene ta adek hawen ado Galili ili Jerusalem anyolom iy. Oro badeh, anyolom iy na mada oro amwenen, ma iri asehek sahou tan ili tiri lau badu Isra-el ai. \p \v 32 “Eme aso asehek nyala sahou mwasin dah ewek taha: Sasah mene Kindrei tandrakan i ta tubu taha iri badeh, \v 33 iy ndramesekei ndrasahan handru, ndrame tato nadu oro, i san ta iy suri Jises amak eme loken ja ta imek tan. I buku none ndratorowenei mene udu bolo wari la-uh ta Buk Wari tiye i buku doh: \q1 ‘Ou badeh naduk handru. \q1 Na dah jo ndrasahan tamam kabwe.’ \rq Wari 2:7\rq* \p \v 34 “Eme Kindrei suri iy eme loken ta imek ja, ma iy winiyan bamak ma babola ja bwe. Sahou doh handru, eme ma Kindrei tiye i buku doh: \q1 ‘Jo kameh edeu ewek taha iri nyosowan turuwen mene jo tandrakan Debit ta aliy. Idoh kameh asahan handru buku jo ndratiye.’ \rq Aisaya 55:3\rq* \p \v 35 “Ma, buk ndrabun ndrasehek udu bolo sahou rayah ja anya: \q1 ‘Ou kameh winiyan baruwani ndramak ndrabun tam bala bolo sisi-in bolo-an ta imek bwai.’ \rq Wari 16:10\rq* \p \v 36 “Ya Debit mene amekes lahou ta Kindrei; ano iy imek ma ahi iy udu ka-u tubun oro, ma badan ndrabola ndra-au. \v 37 Arile, iy ndramak ala Kindrei suri iy eme loken ta imek tan badeh, babola bwe. \v 38-39 Eme ma, aha nadu tine, jo badeh, anya aha ki tana aha, i san ta Jises, Kindrei winiyan mani kandriyen ta karei ma lomondra ndra-in. Sahou dah badeh, aso asehek ndrawek taha. Na iy le badeh, are lau atehei budon handru in tan winiyan bala bolo maha-an ta kandriyen ta karei ma lomondra ndra-in mari bwe. Ya, na iy le, Kindrei winiyan aloh ari ndramak mwasin labai ta madan. Iri batanau malen mari ta Moses badeh, winiyan basebenei ou bwe, ma iri winiyan babwidi ou bala mwasin ta madan bwe le. \v 40 Aha badeh, katondrok aha kudu mwasin, ta sasah iri propet mene ndrasehek, sasahan bada aha. Iri asehek i buku doh: \q1 \v 41 ‘Aha kanyolom, aha lau ta tebelese! Lahou laba tinan tek doh, jo kameh amekes udu bolo ndrokowa aha, arile sebwe aha baso-ok ta anuhun sahou doh bwe, ma aha winiyan batehei budon taha ba-en ta aliy bwe. Aha badeh, anya kasondrokonya, eme ma lakou tado le kameh mani ado atur, ma ado akohok maha-an laba tinan ta aliy.’” \rq Habakuk 1:5\rq* \p \v 42 Ya eme Pol uru Banabas anya kame len ta ndrahu tukum tiri Juwis badeh, iri lau ndremenya uru badeh, kame hamon ja na len ta amunyau ari ja, kasehek nyala iri ma sola. \v 43 Eme ma, iri lau au, arile iri Juwis hawe iri lau badu leheleh mene ndra-en hamon ta kandriyen tiri Juwis badeh, a-en hamon ta Pol uru Banabas. Uru aposel ame batanau iri i buku doh, “Aha badeh, kabadok ta bolo manyah mwasin ma tikisiy nane Kindrei ndratehei ndrame tataha.” \p \v 44 Ano, na len ta amunyau ari ja badeh, mirihik iri lau mari badu bolo kon tinan mari ame anuhun sahou ta Laban. \v 45 Eme iri Juwis anyolom iri lau solo-an labai ame badeh, ma mada iri alikis ma bwidi iri asehek sahou ndra-in labai i bada sahou ta Pol nane asehek. \p \v 46 Arile, Pol uru Banabas asehek sahou nyarahan labai i tiri anya, “Aru badeh, kasehek sahou ta Kindrei ki taha Juwis bwena op. Arile, aha badeh, baseken bwe, ma sahou taha badeh, leheya i buku, aha kameh winiyan bakohok manyah mwasin ta Kindrei ta udu le buku doh bwai. Eme ma aru kameh ruwani aha kon dah areu, ya, aru kameh ala aseben iri lau badu kon leheleh ai. \v 47 Tasah, idoh badeh, sahou ta Kindrei batanau aru ta aliy, i buku doh: \q1 ‘Jo badeh, atehei ou i buku sun anya lomada iri lau badu leheleh, ma ou ki nyara bohok kaseben iri lau badu bolo munyak mari.’” \rq Aisaya 49:6\rq* \p \v 48 Eme na len doh iri lau badu leheleh anuhun sahou doh badeh, iri sekesek ma atudun sahou ta Laban. Eme oro lau le Kindrei ndralebelei oro ta akohok koha oro ta udu le buku doh badeh, atehei budon toro handru i ta Kindrei. \p \v 49 Eme ya sahou ta Laban badeh, aseker udu loboho kon doh. \v 50 Arile, iri Juwis ala badeh, sosokei oro lau ta bwena ta kon tinan nane doh, ma hawe sosokei oro badih rayah tinan ta budon. Eme ma budon toro andra-i ta anya kadai Pol uru Banabas ma mesekei uru au ta loboho doh. \v 51 Eme uru atoroh kasu ndren ta bada kati uru iu ta leheya budon turu i tiri, ma uru ruwani Antiyok ma au ala Ikoniyum. \v 52 Ma iri lau atehei budon tiri handru in ta Laban ado Antiyok badeh, adah na sekesek ma na Malawin Ndrabun. \c 14 \s1 Udu kon Ikoniyum \p \v 1 Udu kon Ikoniyum badeh, Pol uru Banabas ala ndrahu tukum tiri Juwis i buku none uru ndramekes ndra-au ndra-au. Eme uru asehek sahou nyarahan labai, eme iri lau solo-an badu Juwis, hawe iri lau badu leheleh atehei budon tiri handru ihis. \v 2 Arile, oro Juwis rayah batehei budon toro handru bwe badeh, sosokok budon tiri lau badu leheleh andra-i i bada iri lau ta Laban. \v 3 Eme Pol uru Banabas are gwek luluwen sese, asehek sahou boto-on ta Laban. Eme Laban leheya sahou ta tikisiy tan, uru asehek i handru i san ta iy edeu boto-on i turu ta amekes kalem ma lahou tinan. \v 4 Ma eme iri lau badu bolo kon tinan doh, apou iri i lumuk; iri rayah badeh, a-en hamon ta budon tiri Juwis, ya iri rayah badeh, a-en hamon ta budon tiri aposel. \v 5 Ano, iri Juwis hawe iri lau badu leheleh ala atilik sahou hawe iri lau ta bwena tiri anya, kadai uru ma anya korou uru na bek. \v 6 Arile, uru takalahei tanan tiri doh, ma eme uru atobwak au ala kon tinan Listra hawe Debi, udu kon tinan Likoniya, ma hawe uru ala loboho kon munyak doh ale. \v 7 Eme uru atiye sahou mwasin ta nyala Kindrei ili tiri mwan ma badih udu loboho idoh. \s1 Udu kon Listra hawe Debi \p \v 8 Eme udu Listra badeh, ndramak ari tinen atehei iy eme len badeh, katin imek. Iy badeh, badek bwe ma iy manyah udu le andri. \v 9 Eme iy atehei ndranyen i ta Pol asehek sahou. Eme Pol anyolom amwenen i tan badeh, iy anyolom budon tan handru udu aliy ta iy winiyan asahan amwenen ja. \v 10 Ya eme Pol aloh, “Ou ales na katim are loken!” Eme ma ndramak dah sandroh eme loke ma iy edek ja. \p \v 11 Eme iri lau anyolom sasah nane Pol amekes badeh, ma iri aloh i boho kon Likoniya anya, “Iri kindrei badeh, ndrasahan ndrame awas hawe taha!” \v 12 Eme iri aloh Banabas badeh, Sus ya Pol badeh, iri aloh iy Hermes\f + \fr 14:12 \ft Iri Grik masiye nyam tiri solo-an i buku kindrei tiri. Sus doh badeh iri tiye anya iy doh badeh, kabin ta kon doh. Hermes doh badeh, nyara nyam tiri ari ja, iy ta atiye ma asehek sahou tiri nyam mari.\f* tasah iy ndramak tinan ta asehek sahou. \v 13 Ya pris ari ta kindrei Sus, asiu tan ta atudun badeh, udu manan mirihik ta madasan ta kon tinan. Iy kuhi iri bulumakau hawe kanyeu ili madasan ta asiu ta atudun. Tasah, iy ma hawe iri lau anya kamekes salom kili ta Banabas uru Pol. \p \v 14 Eme Banabas uru Pol anuhun le badeh, uru tarani awin ta la-u uru iu ma uru sakaliye ala bolo iri lau dah aloh anya, \v 15 “Ado lau, ado anya kamekes lakou badeh, ta sasah? Aru dah badeh, ndramak laleyah i buku le ado badeh. Aru dah badeh, atiye nyala ado ta sahou mwasin ta ado badeh, katubuni ndrine ado ta lakou ndra-in laleyah i buku badeh, ki ta Kindrei kohan handru udu aliy. Iy le adeh mesekei munyak ma kandrah, ndras ma hawe lakou mari udu bolon. \v 16 Bwena ndra-au mene iy alelei iri lau mara-ei badu kon munyak adek na seken tiri. \v 17 Arile, iy badeh, leheya mwasin tan eme lewan ta sasah iy amekes: Iy badeh leheya laban tan i san ta iy edeu ur undruk udu kandrah eme andri ma iy badeh, isan len ta nyamon uni ma akohok; ma iy edeu nado nyamon solo-an solo-an ma iy mesekei ndrine ado idih na sekesek.” \v 18 Buku, sahou doh uru asehek ai, arile boto-on labai, ta uru satobohei iri. Iri anya kasun salom i turu le ai. \p \v 19 Ano iri Juwis rayah badu Antiyok, ma badu Ikoniyum ame andresei iri anuhun boho oro. Eme iri orowei Pol na bek, ma anya deh, iy ndramak, ma aluwi iy eme manan ta kon tinan. \v 20 Arile, udu hamon ta iri lau atehei budon tiri handru in ta Kindrei awudi iy, ano badeh, iy suri iy eme loken edek iu ili hamon ja ili kon tinan. Ano len ari ja badeh, Pol uru Banabas au ala kon Debi. \s1 Uru ala hamon ja ala Antiyok kon udu bolo Siriya \p \v 21 Uru asehek sahou udu bolo kon tinan doh badeh, ma aluwi iri lau solo-an labai atehei budon tiri handru i ta Kindrei. Ano uru ala hamon ala Listra, ano ala Ikoniyum ma ala Antiyok. \v 22 Oro ala badeh, batanau iri lau ta budon handru badeh, kabadok ta tanan handru ta bolo budon handru tiri. Eme uru anya, “Taha kameh bwese maha-an solo-an solo-an, ano taha barala baha tondrok ta Kindrei.” \v 23 Ano Pol uru Banabas atehei lau mwasin kasahan batun ta atondrok iri lau ta Kindrei badu kon rakon rakon. Eme iri abeles iri ta aimon nyamon, ma amekes salom i toro ma atehei oro a mine Laban ta lahou iri atehei i kani oro ta amekes. \v 24 Ya udu hamon ta uru ala loboho Pisidiya, badeh, uru ame bolo kon munyak tinan Pampiliya. \v 25 Ya eme uru atiye sahou mwasin i tiri lau ado kon tinan Pega, ano uru ala andri ala kon tinan Ataliya. \p \v 26 Ano udu kon Ataliya badeh, uru alakak ala hamon ala Antiyok. Kon tinan doh mene iri lau ta Kindrei suni uru ala a len, ta amekes lahou mene i kani uru i san ta tikisiy ta Kindrei. Uru ndramesekei lahou turu ndrano, ma uru ame hamon ame Antiyok ja. \v 27 Eme uru ala asos Antiyok badeh, uru nyuruwini iri lau ta Kindrei atukum, ma tiye i tiri ta lahou mari Kindrei ndramesekei na mine uru, ma i buku sah Kindrei ndrasihi san ndra tiri lau badu leheleh ta budon handru. \v 28 Eme uru ado hawe iri lau ta hamon ta Kindrei luluwen handru ado gwek. \c 15 \s1 Atukum ado Jerusalem \p \v 1 Oro lau rayah ado Judiya badeh, ame andri kon Antiyok, ma eme oro leheya iri lau ta budon handru anya, “Ado badeh, winiyan bado mwasin bwe, i buku none ado basan ku-i ado bwe. Idoh badeh, in hamon ta batanau ta Moses tiye.” \v 2 Sahou doh le badeh, mesekei Pol uru Banabas andres boto-on boto-on ma hawe asehek sahou nyarahan labai i toro. Ya eme iri lebelei Pol uru Banabas ma hawe lau rayah ta budon handru ala hawe uru, ya oro ala Jerusalem, ala atou oro lau ta a-en hamon ta Jises, hawe iri batun tiri lau ta budon handru, ta lelen iri ta tanan doh. \v 3 Ya eme iri lau ta Kindrei badeh, suni uru au. Ya udu bolo tekedek turu badeh, uru ala bolo kon Ponisiya ma bolo kon Samariya asehek nyala iri ta iri lau badu leheleh badeh, ndratubuni ndrine iri ta kandriyen ndra-in. Eme sahou mwasin doh badeh mesekei iri lau ta budon handru sekesek laba tinan labai. \v 4 Eme, na len uru ame Jerusalem badeh, iri lau ta Kindrei ma hawe iri aposel ma hawe iri batun tiri lau ta Kindrei sekesek handru turu ame hawe iri. Eme uru asehek i tiri ta nyala iri lakou mari Kindrei ndramesekei na mine uru. \p \v 5 Ano oro lau rayah ta budon handru, badu hawe oro lau Parasi ales are loken tiye anya, “Iri lau badu leheleh badeh, ka-en hamon ta batanau ta Moses, ya kasan ku-i iri.” \p \v 6 Eme iri aposel hawe iri batun tiri lau ta Kindrei atukum ase badeh, anyolom bolo budon nane doh. \v 7 Eme hamon ta oro andres luluwen badeh, Pita eme ales ere loken tiye anya, “Ado nadu tine, ado badeh, mene ndratanan ta jo dah mene ndra mwena ndra-au, Kindrei lebelei jo udu bolo ado eme len ta atiye sahou mwasin i tiri lau badu leheleh ta iri kanuhun ma katehei budon handru ki ta Kindrei. \v 8 Eme ya Kindrei badeh, tanan ndrine iri ma leheyani iy aseken iri i san ta iy atehei Malawin Ndrabun i tiri, i buku none iy amekes eme tato mene. \v 9 Iy badeh, bamesekei iri bala randrah ja tato bwe; iy badeh, sikine ndrine iri amwenen i san ta budon handru tiri le. \v 10 Eme ya, i buku sah ado anya kanone Kindrei ma anya kadeu maha-an ki la-u iri lau ta budon handru? Idoh badeh, iri tubu taha hawe to winiyan babwese-ei bwe ale. \v 11 Bwe, handru en! Taha badeh, atehei budon handru bala san doh bwe. Idoh badeh, i san ta tikisiy ta Laban Jises le, ta koha taha kameh udu le buku doh, i le buku none oro.” \p \v 12 Eme iri lau mari badeh, andru-uk ado le anuhun Banabas uru Pol asehek sahou ta nyala kalem ma lahou tinan mene Kindrei amekes udu ndrokowa iri lau badu leheleh na mine uru. \v 13 Sahou turu ano le badeh, Jemis asehek sahou anya, “Ado nadu tine kanuhun jo. \v 14 Saimon mene ndrasehek ndraleu ndrame ta taha, ta ma mwena Kindrei leheya tikisiy tan i tiri lau badu leheleh. Ma iy le kuhi oro lau badu bolo iri eme len, ma asahan lau tan amwenen. \v 15 Eme ya sahou tiri propet amwenen le ta aliy, torowenei i buku doh: \q1 \v 16 ‘Laban anya, “Len hamon eme, jo kameh eme hamon ja ta atudun kandriyen ha-un udu bolo lundriye Debit oro. \q1 Oro badeh, ndrandra-i i buku ra-em asiu ndra malen ma irou udu andri. \q1 Arile, jo kameh tutuni asiu doh ja, ma asahan ha-un mara-ei ja. \q1 \v 17 Idoh kameh asahan ta iri lau rayah ja kameh katakaleh jo, \q1 ma iri lau badu leheleh mari mene, jo aloh oro ame asahan lau tek.” \q1 Laban mene asehek i buku doh. \q1 \v 18 Ya eme Laban amekes lakou mari dah, \q1 mene lau ndratanan ndra bwena ndra-au ndra-au.’” \rq Amos 9:11-12\rq* \p \v 19 Eme Jemis asehek sahou ili le i buku doh, “Jo budon tek badeh, i buku doh: To badeh, samekes sabadok labai sala tiri lau badu leheleh, iri ala ndratubuni ndrine iri ndra ta Kindrei. \v 20 Arile, to atorou ki toro ma katandra-un toro saimon nyamon iri ndratehei ndra mine kindrei ta wendreya, iri amekes na sukumada kei; oro samekes kandriyen ndra-in ta karei; oro saimon oda iri lakou buku me ma bulumakau ndra udu ta aliy, ma sa-un ndraye iri ale. \v 21 Tasah, ndra bwena labai eme taku len dah, iri atiye sahou ta Moses mene torowenei udu bolo buk tan, ma udu bolo kon mari iri kandriyen malen ta batanau doh, ndrabwena labai udu aliy, ma udu bolo len mari ta tukum badeh, iri asehek ma aloh udu bolo asiu ta atukum tiri Juwis mara-ei. Eme ma iri tanan, buku iri lakou mara-ei doh, ndrabun handru.” \s1 La-ukei i tiri lau ta budon handru badu leheleh \p \v 22 Ano iri aposel hawe iri batun tiri lau ta budon handru hawe iri lau ta Kindrei mari amekes budon ta kaleben oro rayah badu bolo iri, ya kasuni oro kala Antiyok hawe Pol uru Banabas. Eme iri lebelei Judas aloh Barsabas ma hawe Sailas. Uru ma la-uh doh badeh, batun badu bolo iri lau ta Kindrei. \v 23 Eme iri atehei la-ukei dah i mine uru ili: \pi1 “Ya eme aso aposel hawe aso batun ta lau ta budon handru tiye sahou sekesek taso ewek taha nadu tine aso badu leheleh ta budon handru badu Antiyok, Siriya ma hawe Silisiya. \pi1 \v 24 “Aso ndranuhun lau rayah badu hawe aso ndrawek bolo aha. Aso badeu ari budon bala toro bwe, arile oro ndrawek ndrabwidi budon taha ndrandra-i na sahou oro asehek. \v 25 Ya eme aso badeh, ndra le se ja, ma aso ndralebelei oro nadu tine aso rayah, ma ndrasuni oro ndrawek hawe nadu tine aso, Banabas uru Pol. \v 26 Uru lau doh badeh, ndratehei koha uru ndra ta imek ta nyara Laban tataha Jises Krais. \v 27 Ya eme aso suni Judas uru Sailas awek, kasehek na boho uru amwenen, nyala aha ta sasah udu bolo la-ukei, aso atorou. \v 28 Ya, budon ta Malawin Ndrabun hawe budon taso i le se, ta aso satu aha sala bolo iri batanau mari tiri Juwis. Mwasin ta aha a-en hamon ta iri batanau le doh: \v 29 Aha saimon nyamon ala ndrala ta salom tiri kindrei nane iri asehek na sukumada kei, ma aha saimon oda iri lakou buku me ma bulumakau ndra udu ta aliy, ma hawe sa-un ndraye iri, ma hawe aha samekes kandriyen ndra-in ta karei. Buku none aha kateleya aha tiri lakou doh, idah kameh aha ado mwasin. Kabwai.” \p \v 30 Eme oro lau nane suni oro au ala andri ala Antiyok, ya eme oro \m nyuruwini iri lau ta Kindrei mari ame le se, ma adeu la-ukei i mine iri. \v 31 Eme iri anyolom bolo la-ukei, ma iri sekesek ta sahou mwasin ta amekes iri kabadok. \v 32 Ya eme Judas uru Sailas badeh, propet ale, eme uru asehek sahou nyarahan labai, ta amekes iri nadu tine uru kabadok ale. \v 33-34 Ano udu hamon ja, nadu tinen iri badeh, suni oro au ma nyosowan ta bahun bwe, au ala hamon ala hawe oro lau mene suni oro ame.\f + \fr 15:33-34 \ft Sahou dah badeh, iri batehei bwena bwe, iri adeu hamon labai: Arile, Sailas abudon ta udu doh udu gwek.\f* \v 35 Arile, Pol uru Banabas ado Antiyok ado gwek, ya uru ma hawe iri lau solo-an leheya iri, ma atiye sahou ta Laban. \s1 Pol uru Banabas aseker \p \v 36 Ano udu sese, Pol tiye i ta Banabas i buku doh, “Talu ka-au kala hamon kaselesen nadu tine talu iri mene udu bolo kon tinan mari mene ta atiye sahou ta Laban ili aliy, ta kala kanyolom iri ado mwasin deh bwe.” \v 37 Eme ya Banabas aseken Jon aloh iy Mak kili hawe uru. \v 38 Arile, Pol anya, idoh budon mwasin ta iy kili hawe uru bwe, tasah iy badeh, ndraruwani uru ma gok oro anya kamekes na len oro ala atiye sahou ili Pampiliya. \v 39 Eme uru andres ili, ma uru aseker. Eme Banabas kuhi Mak i hawen ma uru alakak au ala Saipres. \v 40 Ya Pol kuhi Sailas i hawen ma nadu tine uru i san ta Laban atehei nyosowan i bwele-e uru ma ndremenya Kindrei ta iy katehei tikisiy tan ki bwele-e uru, eme ma uru au. \v 41 Ya, uru ala bolo kon munyak tinan Siriya ma hawe Silisiya asehek sahou, ta amekes iri lau ta Kindrei kabadok. \c 16 \s1 Timoti i se hawe Pol uru Sailas \p \v 1 Eme Pol edek ili isos Debi ano iy ili Listra. Eme udu kon doh badeh, ndramak ari ta budon handru manyah udu aliy nyaran Timoti. Tinen badu Juwis ma budon tan handru ndra ta Jises, arile taman badu Grik. \v 2 Iri lau ta Kindrei badu Listra ma Ikoniyum mara-ei badeh, masiye Timoti. \v 3 Eme Pol anya kakohok iy ki hawen, ya uru kadek. Eme Pol sani ku-in, tasah iy abudon loboho doh badeh, ndrahu iri Juwis, ya iri tanan tama Timoti badeh, badu Grik. \v 4 Ya eme oro adek ala bolo kon tinan rakon ala rakon badeh, tiye tanan i tiri lau ta budon handru ta batanau oro aposel hawe oro batun tiri lau ta Kindrei ndrasehek ta aliy, udu Jerusalem nyala iri lau, ma iri ka-en hamon ta aliy. \v 5 Ma iri lau ta Kindrei abadok ta budon handru tiri ma len mari badeh, kane iri edek i sola. \s1 Pol anyolom Masadoniya udu bolo lele \p \v 6 Eme Pol hawe oro lau badu hawen, adek ala loboho kon munyak tinan Prijiya hawe Galesiya. Oro badeh, batiye sahou bala bolo kon tinan badu Esiya bwe. Tasah, Malawin Ndrabun badeh, tiye oro sala. \v 7 Eme, na len oro ame asahan bada kobek ta kon Misiya badeh, oro anya kanone kala kon Bitiniya katiye sahou, arile Malawin Ndrabun ta Jises baseken bwe ale. \v 8 Ya eme oro sakalawi kon Misiya ma adek ala andri ala kon tinan Trowas. \p \v 9 Eme na ben badeh, lele asahan ta Pol ma iy anyolom ndramak ari badu kon Masadoniya ales indrek iy anya, “Ou ame Masadoniya, ma aseben aso.” \v 10 Eme ya Pol anyolom lele doh ano le badeh, aso\f + \fr 16:10 \ft Luk atorou buk dah aloh Lahou toro Aposel. Udu bolo sahou dah iy atorou aso. Anyolom ta aliy i buku Luk amwenen i se hawe Pol oro udu bolo len oro an kon Pilipai. Ou anyolom ale in ta Lahou toro Aposel kalan 16:40.\f* alokou aso i le rasan, ta aso kala Masadoniya. Tasah, aso tanan Kindrei badeh, aloh aso kala katiye sahou mwasin ki tiri. \s1 Lidiya tubuni ndrinen udu kon Pilipai \p \v 11 Eme aso an ndron are Trowas, alakak ame len ma ales ame busu Samotres. Ano len ari ja, aso asahan Niyapolis. \v 12 Ya eme udu doh badeh, aso adek ala lokei ala Pilipai. Kon doh badeh, kon ari tinan labai udu bolo kon munyak tinan Masadoniya, ya iri Rom atondrok kon doh. Eme aso ado doh len sabe sese. \p \v 13 Eme na len ta amunyau badeh, aso ame manan ta madasan tinan ta kon tinan ame kapa gwa anya katakaleh ndrahune kon ta asolom. Ya eme aso manyah ado andri ma asehek sahou i tiri badih atukum ame loboho doh. \v 14 Eme udu bolo iri badih nane anuhun sahou doh badeh, badih ari nyaran Lidiya udu aliy. Iy badeh, lahou tan ta asih kolau saraman iri amekes awin moroyan na aliy. Iy badu kon tinan Tayataira, ma iy atehei budon tan mara-ei i ta atudun Kindrei. Eme Laban mesekei ndrinen badeh, aseken labai ta anuhun sahou ta Pol asehek. \v 15 Eme iy hawe lowan oro mara-ei badeh, alomwa oro, ya eme iy kuhi aso ala asiu tan. Ma eme iy tiye i taso ma indrek aso anya, “I buku none ado lomondra jo badih ta budon handru i ta Laban eh, ado kame kado asiu tek.” \s1 Pol uru Sailas ado bolo kou \p \v 16 Na len ari aso anya kala ndrahune kon ta salom badeh, badih lohowan ari malawin ndra-in udu la-un eme bada aso. Iy winiyan tiye sasah kameh asahan udu bwena eme. Iy badeh, ndrakohok luk solo-an solo-an ndra-au ndra tiri lau ta atondrok iy i san ta sehek sasah asahan udu bwena. \v 17 Iy doh badeh, edek in hamon ta Pol hawe aso marakon, ma iy aloh anya, “Oro lau dah ala tiye sahou ta koha ado kameh udu le buku doh, badeh, oro lohowan ta Kindrei ere bwele-e kindrei mari badu loken.” \p \v 18 Eme iy amekes lahou tan doh badeh, len solo-an labai. Ya eme Pol eme ndrinen isi ta aliy, eme iy tubuni iy ma tiye sahou i ta malawin ndra-in anya, “I san ta boto-on ta nyara Jises, jo tiye ou ame len ta la-u badih badeh!” Eme na le liliy, malawin ndra-in udu bwele-en eme len. \p \v 19 Eme oro lau tan nane atanan ta san ta akohok toro luk badeh, ndrano, oro ame tawi Pol uru Sailas, ya seheyani uru ame lohalak ndrahu kon ta anuhun sahou, ame mada iri lau ta atondrok kon. \v 20 Eme oro kuhi uru ame mada iri lau ta anuhun sahou ma tiye anya, “Uru lau dah badeh, badu Juwis, ya uru amekes nono-ou udu bolo kon tinan tataha. \v 21 Uru badeh, leheya kandriyen bamwenen ta kandriyen tataha bwe; taha badeh, lau badu Rom, ya kandriyen doh taha banone ma winiyan bamekes bwe.” \p \v 22 Eme iri lau arou ala la-u Pol uru Sailas ala adai uru, ya eme iri lau ta anuhun ame tiye iri tarani awin ta la-u uru ma a-um uru na malou sakabuk i bek. \v 23 Iri ubwi uru andra-i labai, ano iri akahei uru ala bolo kou. Eme iri tiye ndramak ta ndrokei ta bolo kou katehei ndrabek kihis ma katondrok uru kamwenen. \v 24 Iy anuhun sahou iri tandra-un i tan ano badeh, iy atehei uru ala bolo asiu udu bolon handru, ma sawei kati uru ma totowaniy i bolo sabar. \p \v 25 Eme i ndrukulu ben alih badeh, uru asolom ma ayah wari ta atudun Kindrei. Ya eme iri lau rayah are bolo kou i buku uru badeh, anuhun uru ayah wari. \v 26 Eme nawin bwe, kon totoreh ma sali asiu nane dah nyukunyok. Eme madasan mari ta bolo kou dah asak, ma kati iri lau mari udu bolo sabar dah asoh. \v 27 Ya eme ndramak ta ndrokei atondrok iri, amak anyolom kou mari asak badeh, iy anya iri are bolo kou ndratobwak. Eme iy andrei samen ta anya kidi iy le badeh, \v 28 Pol aloh anya, “Ou sadai ou! Aso ba-au bwe, aso mari ado kada-ah!” \p \v 29 Eme ndramak ta ndrokei dah tanyarei ta sun ma sakaliye ili taku ma totoreh udu mada Pol uru Sailas. \v 30 Ano iy kuhi uru ame manan, ma eme iy lelen uru anya, “Ah ma la-uh, jo kamekes sasah handru ya jo kakohok kohak handru ta udu le buku doh?” \p \v 31 Eme uru anya, “Ou atehei budon tam handru ki ta Laban, idah kameh koham udu le buku doh ma hawe lowam oro.” \v 32 Ano, uru asehek sahou ta nyala Laban i tan ma i tiri lau nane are bolo asiu tan doh. \v 33 Eme na le liliy na ben doh, ndramak ta ndrokei doh kuhi uru ma sikine ndrana turu; ano na le liliy, iy ma hawe lowan oro alomwa oro a gwa. \v 34 Ano iy andrei uru ala asiu tan mesekei nyamon i nuru. Ma oro lowan mari badeh, sekesek tinan handru, tasah oro badeh, ndratehei budon toro handru ndra-en ta Kindrei. \p \v 35 Eme kon aleu, iri lau ta anuhun sahou tiye sahou i toro lau ta mwena tiri lulik ala tiye ta ndramak ta atondrok, katiye iri lau doh ka-au ai. \v 36 Eme iy tiye sahou i ta Pol uru Sailas anya, “Iri lau ta anuhun sahou anya ah ka-au ai. Abo, ah ka-au ma mwasin.” \p \v 37 Arile, Pol eme tiye i tiri lau \m ta mwena tiri lulik anya, “Aru badeh, lau badu baha tondrok ma kandriyen ta Rom. Ya, i buku sah oro lau ta anuhun sahou doh bwale oro ma banuhun sahou taru bwe. Aru bamekes se ari lakou bandra-i bwe, arile iri ame adai aru udu mada lau mari. Ano oro akahei aru laleyah ame bolo kou dah. Ya, na dah oro anya katone aru ka-au ai? Winiyan bwe, handru en! Oro le kame katiye aru ka-au.” \p \v 38 Eme iri lau ta mwena tiri lulik ala hamon tiye i tiri lau ta anuhun sahou, ta Pol uru Sailas badeh, ndra sali kon Rom eme ma iri abwerei iri. \v 39 Eme iri ame tiye sahou ta tikisiy i turu ma eme iri tiyani uru ame len ta bolo kou ma tiye uru ka-au ta kon tinan. \v 40 Eme uru ala asiu ta Lidiya, batanau iri lau nane atehei budon tiri handru in ta Jises, ma iri kabadok, ano ma uru au ai. \c 17 \s1 Uru ado Tesalonaika \p \v 1 Uru adek ame bolo kon Ampipolis hawe kon Apoloniya ma ame asos kon tinan Tesalonaika. Ya udu kon doh badeh, ndrahu tukum tiri Juwis udu aliy. \v 2 Eme i buku none kandriyen ta Pol, iy ndramekes ndra-au, ndra-au badeh, iy ili ndrahune tukum. Eme na len taloh ta len ta amunyau ja badeh, iy andres hawe iri ta sahou badu bolo tarou ta Kindrei. \v 3 Ma, na tarou ta Kindrei le doh iy asehek aleu i tiri, ta Krais, iy mene bwese sisi-in, ma iy amak ta imek eme loken. Eme Pol anya, “Iy Jises nane jo asehek iy i tado dah, iy Krais.” \v 4 Eme iri Juwis rayah badeh, atehei budon tiri handru in ta sahou ta Pol uru Sailas; ma hawe iri lau solo-an badu Grik ta atudun Kindrei ma hawe iri badih ta mwena solo-an ale. \p \v 5 Arile, mada iri Juwis alikis, ya eme iri tukumwi iri lau rayah, budon tiri ndra-in udu bolo ba-en tiye iri ta amekes losen udu bolo kon tinan. Eme iri abotatahan ala asiu ta Jesen takaleh Pol uru Sailas anya kateu uru kame mada iri lau mari. \v 6-7 Arile, iri batakalahei uru bwe, eme iri seheyani Jesen hawe oro lau rayah ta Kindrei ame ales are mada iri lau mwena ma aloh anya, “Oro lau ala amekes losen udu bolo kon munyak mari, Jesen luhi oro ala asiu tan asah idah. Oro mari badeh, aluwi budon tiri lau eme len tiri batanau ta kabin badu Rom Sisa, ma tiye i tiri ta nyala kabin ari ja aloh Jises.” \v 8 Eme iri anuhun sahou doh ano badeh, iri lau tinan ma hawe iri lau nane are bolo kon tinan doh badeh, toroyani iri ma anyon labai. \v 9 Eme iri lau tinan ta atondrok iri badeh, mesekei Jesen hawe oro lau nane seheyani oro dah, akunoh iri, ano ma tiye oro au. \s1 Udu kon Beriya \p \v 10 Ano kon ilik le badeh, oro lau ta Kindrei suni Pol uru Sailas au ala kon Beriya. Uru ala asahan badeh, uru ala ndrahu atukum tiri Juwis. \v 11 Ya eme iri lau badu doh badeh, budon tiri aleu labai ja tiri lau badu Tesalonaika. Tasah, iri badeh, atehei ndranye iri ta anuhun sahou tinan labai, ma na len mari mada iri udu ta tarou anya kanyolom Pol asehek sahou handru deh wasai. \v 12 Eme iri Juwis solo-an atehei budon tiri handru i ta Kindrei ma hawe iri badih rayah ta mwena badu Grik ma hawe iri mwan solo-an badu Grik ale atehei budon tiri handru. \p \v 13 Eme na len iri Juwis badu Tesalonaika anuhun Pol atiye sahou ta nyala Kindrei udu Beriya badeh, eme iri ala doh ale amekes ndrine iri lau atukum doh towodau. \v 14 Eme na le liliy nadu tine Pol oro ame badeh, suni iy ili mada ndras. Arile, Sailas uru Timoti are Beriya are gwek. \v 15 Eme oro lau ala hawe Pol badeh, tiyani iy ili isos Atens, ano oro ame hamon ma tuwi sahou ta tiye i ta Sailas uru Timoti, ta uru kame hawen, suwi suwi. \s1 Udu kon Atens \p \v 16 Na len Pol udu Atens abe-en Sailas uru Timoti, ndrinen isi handru ta kon tinan doh idih na iri sukumada kei, iri amekes solo-an labai. \v 17 Ya eme Pol ili bolo asiu ta atukum andres hawe oro Juwis ma hawe iri lau badu Grik ala atudun Kindrei. Ma hawe udu mada lau mari na len mari udu ndrahu tukum ta lau. \v 18 Eme oro lau rayah aloh oro Epikuriya ma hawe oro lau aloh oro Stowik\f + \fr 17:18 \ft Iri lau badu Epikuriya doh badeh, a-en hamon ta tanan ma leheya ta ndramak tiri ari nyaran Epikurus. Iy leheya iri lau anya, iri katehei sekesek badeh, kudu bwena ta bolo manyah tiri na len marakon. Ya iri Stowik ja badeh, lau ta ndramak ari nyaran Seno. Iy leheya iri ta tanan ta atondrok bada iri, ma leheya sahou badu bolo budon iri kudu mwasin.\f* ame andres hawe Pol. Oro rayah asehek anya, “Iy ndramak doh ta amou gwa laleyah, anya kasehek nyala sasah kede-eh?” Ya oro rayah anya, “Iy kede-eh asehek nyala iri kindrei rayah badu leheleh nadeh?” Oro asehek i buku doh, tasah Pol nane asehek sahou mwasin ta nyala Jises ndramak ta amak ta imek eme loken. \v 19 Ya eme oro lau rayah tiye Pol ili atou oro lau ta atondrok kandriyen tiri ado kon ta ndrahu tukum aloh Areyapakus. Ma oro tiye i ta Pol i buku doh, “Aso anya kanuhun ma katanan ta tanan ha-un ou asehek badeh. \v 20 Ou badeh, atiye tanan rayah i randrah labai ta ndranye ahi ma ahi anya kanuhun moson ta aliy i buku sah handru.” \v 21 (Eme iri lau \m mari badu kon Atens ma hawe lau badu leheleh manyah ado doh, na len mari badeh, bamekes se ari lahou bwe. Iri badeh, asehek nyala tanan doh ma anuhun tanan ha-un doh.) \p \v 22 Ano Pol ales udu loken ta ndrahu tukum tiri aloh Areyapakus doh, ma tiye anya, “Ado lau badu Atens! Jo anyolom ta bolo lahou tado mari, ado lau ta atudun iri kindrei solo-an. \v 23 Tasah, jo edek bolo kon tinan tado anyolom ndrahune aha ta atudun badeh, jo anyolom tarou ari udu bada koto-ok ta atudun, tiye i buku doh: \q1 ‘Ta Kindrei, Ahi Maliye Iy.’ \m Ya Kindrei ado maliye iy badeh, jo kameh asehek nyala ado na len dah. \p \v 24 “Iy Kindrei nane ta amekes munyak ma kandrah ma lakou mari udu bolon. Iy badeh, Laban ta atondrok munyak ma kandrah. Ya iy bamanyah bado bolo asiu ta atudun amekes na lim bwe. \v 25 Ma iy bandriliu ta se lakou badu mine lau katiye ki tan bwe. Tasah, iy le badeh, iy kati ndramak ta edeu koha taha, ma hawe sasah, sasah ja i ta lau mari. \v 26 Iy bwidi lau mari asahan badeh, in hamon ta ndramak ari le, ma iy weleyani iri lau mari manyah ado kon rakon rakon udu bolo kon munyak. Ma iy le amwenen sani len ta kon iri manyah ado aliy, ma iy atehei iri kobek ta aliy. \v 27 Kindrei amekes san doh badeh, ta lau kala katakaleh iy, i buku none bale iri kabwetenei. Tasah, iy badeh, udu le bakep hawe taha ari ari. \v 28 Ma, na iy le badeh, taha ado mulin ma adek ala doh, ala doh ma to asahan awas dah. I le buku none lau ta asehek kundruh tado ndrasehek ndra-au anya, ‘Taha badeh, nadun labai.’ \p \v 29 “Ya eme i buku doh, taha badeh, nadu Kindrei ya eme taha satehei budon anya Kindrei kede-eh i buku none ari sukumada kei ndramak asehek na lim, deh, i buku bek nyikilikin gol deh, i buku none bek laleyah bwe. \v 30 Len bwena mene, Kindrei anyolom lau badeh, bala tanan iy bwe, ya iy batiye iri ta lakou iri amekes laleyah bwe. Arile, na len dah ja, iy batanau lau mari badu heh, badu heh badeh, katubuni ndrine iri. \v 31 Tasah, iy ndrasani len ta iy kameh aleben lau badu kon munyak mari, na ndramak ari mwasin labai iy ndratehei lahou dah ndra minen. Iy badeh ndraleheyani lakou doh ndrasahan handru ndrame len mada lau mari i san ta iy suni iy amak ta imek tan eme loken.” \p \v 32 Eme na len iri anuhun Pol asehek nyala amak eme loken ta imek badeh, iri lau rayah ja badeh, bobose iy. Arile, iri rayah anya, “Ahi anya kanuhun sahou ou nane asehek badeh, ja.” \v 33 Eme ma iy ruwani iri ma iy iu. \v 34 Eme iri lau sabe le badeh, atehei budon tiri \m handru ma iri an hamon ta Pol. Ya udu bolo iri nane doh badeh, Diyonisiyus ale. Iy badeh, tinan ari badu bolo iri lau rayah aloh Areyapakus ma hawe badih ari nyaran Damaris hawe iri lau rayah ja ale. \c 18 \s1 Pol ili Korin \p \v 1 Ano Pol ruwani kon Atens ma iy iu ili Korin. \v 2 Iy udu Korin udu gwek badeh, iy ndruni ndramak ari badu Juwis nyaran Akwila, ya tinen atehei iy eme len udu kon munyak tinan Pontus. Iy hawe udun Prisila uru barado Itali barame ai. Tasah, Sisa Klodiyas tiye sahou boto-on i tiri Juwis ado kon tinan Rom badeh, ka-au. \v 3 Eme Pol edek ili selesen uru ma iy udu hawe uru amekes lahou ta asereh asiu balei, tasah lahou turu doh badeh i se buku lahou tan amwenen. \v 4 Na len ta amunyau mari badeh, iy ili ndrahu tukum tiri Juwis badeh, anya kaliu budon tiri Juwis hawe iri lau badu Grik. \p \v 5 Eme na len Timoti uru Sailas ado Masadoniya ame badeh, Pol eme ruwani lahou tan ta asereh asiu balei, ma atehei budon tan ihis labai ta atiye sahou i tiri Juwis ta Jises badeh, iy Krais handru, ndramak Kindrei atehei iy ta akohok iri lau tan ame hamon. \v 6 Eme iri Juwis abolosen i tan ma bobose iy badeh, iy turuhi awin tan i mada iri ma asehek i tiri i buku doh, “I buku imek asahan tado, ado sato-en ai. Lahou tek ndrano. Kabwai, udu kabatana dah kameh, jo kameh iu ili bolo iri lau badu leheleh ai.” \p \v 7 Ano Pol udu ndrahu tukum tiri Juwis eme len badeh, iy iu ili asiu ari udu mirihik le, ili hawe Titiyus Jastus. Iy badu Juwis bwe, arile iy badeh, ta atudun Kindrei. \v 8 Eme ndramak ta mwena ta atondrok ndrahu tukum tiri Juwis nyaran Krisipus ma lau mari badu asiu tan badeh, atehei budon toro handru i ta Laban; ma hawe iri lau solo-an badu Korin anuhun sahou Pol asehek badeh, ma iri atehei budon tiri handru i ta Laban ma Pol alomwa iri. \p \v 9 Eme na ben ari badeh, Laban asehek sahou i ta Pol i san ta ameh i buku doh: “Ou sanoh, ndri-iy, ma ou sandru-uk ta asehek sahou ale. Ou asehek sahou kili. \v 10 Tasah, jo kameh udu hawem, ya ari ndramak winiyan batawi ou ma winiyan bamekes isi bawek badam bwe. Tasah, iri lau tek solo-an labai are bolo kon tinan dah.” \v 11 Ya eme Pol udu hawe iri andrei jaha ari ranah, leheya iri na sahou ta Kindrei. \p \v 12 Na len iri lau atondrok Rom atehei Galiyo asahan kabin ta kon tinan Akaya,\f + \fr 18:12 \ft Kon tinan Korin badeh, udu loboho munyak tinan Akaya.\f* eme iri Juwis atukum ase tawi Pol ma aruwi iy ili ales ere mada sahou. \v 13 Eme iri anya, “Iy ndramak dah badeh, ndraluwi budon tiri lau ta atudun Kindrei i san ta kandriyen randrah labai ja, ya idoh bamwenen ta kandriyen malen bwe.” \p \v 14 Eme Pol anya kasehek sahou le badeh, Galiyo asehek sahou i tiri Juwis anya, “I buku none kandriyen ndra-in rayah iy mesekei badeh, mwasin ta jo kanuhun ado Juwis ai. \v 15 Arile, idah badeh, andres ta ndremenya ado hawe nyara ado ma andres ta bolo kandriyen malen tado. Ya eme ado kasehek ta aliy kudu ndrokowa ado le. Jo winiyan banuhun hawe baleben ta aliy bwai.” \v 16 Eme iy tiye oro au ta are mada sahou. \v 17 Eme iri Korin tawi tinan ta atondrok ndrahu tukum tiri Juwis nyaran Sostenes ma adai iy udu mirihik ta mada sahou.\f + \fr 18:17 \ft Oro lau adai Sostenes badeh, taha tana taha oro are handru bwe. Iri lau ta tanan rayah anya oro badu Grik ma oro abolosen, tasah oro bwale oro iri Juwis. Iri lau ta tanan rayah ja abudon, oro Juwis amwenen adai Sostenes, tasah iy batiye sahou toro bamwenen bwe na mada sahou.\f* Arile, Galiyo batehei budon bala ta aliy bwe. \s1 Pol i hamon ili Antiyok \p \v 18 Eme Pol udu Korin udu gwek luwen sese. Ano iy ruwani nadu tinen oro ado gwek, ya iy ili kon Senkriya anya kalakak kala Siriya, ma Prisila uru Akwila\f + \fr 18:18 \ft Prisila badeh, badih, ya Akwila badeh udun mwan. Sebwe Luk atehei Prisila ili bwena ta sahou, tasah iy badeh, badih tinan handru.\f* a hawen ale. Iy ba-au bwe le badeh, iy udu Senkriya asiki batun iu tasah tandrakan tan mene ndrano.\f + \fr 18:18 \ft Tanan ta kandriyen doh, ou anyolom udu bolo tarou ta Namba kalan 6:21.\f* \v 19 Oro ala asos Epesus, eme iy ruwani Prisila uru Akwila ado gwek. Iy le ari badeh, ili ndrahu tukum tiri Juwis andres ta sahou hawe iri. \v 20 Eme iri lelen iy ta iy kudu hawe iri luluwen sese kudu gwek, arile iy bwalen. \v 21 Arile, iy anya ki-iu badeh, iy tandrakan i toro anya, “I buku none Kindrei aseken, badeh kameh, jo eme hamon ja.” Ano iy alakak udu Epesus iu ai. \p \v 22 Na len iy isos Sesariya badeh, iy i loke ili Jerusalem sekesek iri lau ta Kindrei. Ano iy iu ili andri ili Antiyok. \v 23 Ano, hamon ta iy udu Antiyok sese, Pol udu doh edek ili rakon ili rakon udu bolo kon munyak tinan Galesiya ma Prijiya batanau iri lau ta budon handru kabadok. \s1 Apolos udu Epesus \p \v 24 Udu bolo len doh, ndramak ari badu Juwis nyaran Apolos, ya atehei iy eme len udu Aleksandriya \m eme kon Epesus. Iy badeh, tanan tan ndrala labai, ma iy tanan bolo sahou ta Kindrei mwasin labai. \v 25 Iy badeh, tanan labai ta san ta Laban ma abe-ei iy asehek sahou ta nyala Jises ndra mwasin le. Arile, iy badeh, tanan le lahou ta Jon ta alomwa. \v 26 Eme iy asehek sahou nyarahan nyarahan udu ndrahu tukum tiri Juwis. Eme Prisila uru anuhun iy badeh, uru kuhi iy eme asiu turu ma leheya iy amwenen na bolo sahou ta Kindrei le gwek. \p \v 27 Na len Apolos anya kili Akaya badeh, nadu tinen oro ta Kindrei rayah amekes ndrinen abadok ta ili, ma oro atorou la-ukei ili toro lau ta hamon ta Jises kabe-en iy. Eme Apolos asahan badeh, ma iy ndramak mwasin ta aseben oro are mene asahan lau ta budon handru i san ta tikisiy ta Kindrei. \v 28 Eme iy bwidi andres i hawe iri Juwis udu mada lau mari na buk ndrabun, ma iy leheya i mada iri ta nyala Jises badeh, iy Krais handru, ndramak Kindrei ndratehei iy ta akohok iri lau tan ame hamon. \c 19 \s1 Pol udu Epesus \p \v 1 Apolos udu Korin udu gwek ya Pol badeh, andrei san udu bolo kon loken doh eme asahan Epesus. Udu loboho doh badeh, iy ndruni iri lau rayah iri atehei budon tiri handru in ta Kindrei, \v 2 ma eme iy ndremenya oro anya, “Na len ado atehei budon handru tado i ta Kindrei, Malawin Ndrabun ewek la-u ado deh bwe?” \p Eme oro tiye i hamon anya, “Bwe, aso badeh, banuhun se ari lakou i buku Malawin Ndrabun badeh, bwe.” \p \v 3 Ya eme Pol lelen oro ja anya, “Ya alomwa ado badeh, na alomwa tare?” \p Eme oro anya, “Alomwa aso badeh, na alomwa ta Jon.” \p \v 4 Eme Pol anya, “Alomwa ta Jon amekes badeh, ta i buku none ou tubuni ndrinem ta kandriyen ndra-in tam. Eme iy tiye i tiri lau badeh, katehei budon tiri handru ki-in ta ndramak ari in kona Jon eme. Iy badeh, Jises.” \v 5 Oro anuhun sahou doh ano badeh, ma alomwa oro na nyara Laban Jises. \v 6 Eme na len Pol edeu limen i la-u oro badeh, ma Malawin Ndrabun eme la-u oro, ma oro asehek boho kon rakon ja, randrah labai ma asehek sahou i buku iri propet. \v 7 Oro lau doh badeh, ma ronoh la-uh. \p \v 8 Udu bolo bun taloh badeh, Pol ili ndrahu tukum tiri Juwis asehek sahou nyarahan labai, ma andres boto-on ta aliu budon tiri ta nyala bolo tondrok ta Kindrei. \v 9 Arile, iri rayah badeh, ndrine iri boto-on labai, ma batehei budon tiri bala ta Kindrei bwe, ma iri asehek sahou ndra-in i bada bolo San ta Laban udu ndranye iri lau \m mari. Ya eme Pol ruwani iri ado gwek ai. Eme iy kuhi oro lau ta budon handru nane dah ala bolo asiu ta leheya ta Tiranus, ma iy udu hawe oro na len mari, ta leheya oro. \v 10 Pol amekes gok doh winiya jaha la-uh buruwen. Eme ma iri mwan ma badih solo-an labai badu loboho kon tinan Esiya doh anuhun sahou mwasin ta Laban, iri badu Juwis, ma iri badu iri kon leheleh ale. \p \v 11 Eme Kindrei leheya kalem randrah labai edek bada Pol. \v 12 Eme ma nyandroh ta Pol, buku iri andrei ili hawe iri lau ta sik, eme sik tiri ano ma iri malawin ndra-in atobwak tiri. \p \v 13 Eme iri Juwis rayah adek ala anya katikah iri malawin ndra-in ado la-u iri lau ka-au na boto-on ta nyara Laban Jises. Eme iri badeh, tiye i buku doh, “I san ta nyara Jises i buku none Pol asehek, jo tiye ou ame len.” \v 14 Oro lau nane amekes lakou doh badeh, oro ma ndro taloh, oro badeh, nadu tinan tiri pris ari badu Juwis nyaran Skeba. \v 15 Arile, na len ari, iri amekes lahou toro badeh, ma malawin ndra-in tiye i toro anya, “Jises hawe Pol badeh, jo tanan uru ai, ya ado, are lau bah?” \v 16 Eme ndramak nane malawin ndra-in udu la-un dah sandroh i la-u oro ribidi oro ma tarani awin toro ma ubwi oro andra-i labai. Eme oro atobwak ado asiu ame len, ma ndraye oro, hawe awin toro atarah iu. \p \v 17 Eme na len iri Juwis ma hawe iri lau badu Grik manyah ado Epesus anuhun badeh, iri anoh. Ma eme nyara Laban Jises badeh, bare andri bwai, nyaran i loke le gwek ai. \v 18 Eme iri lau ta budon handru mene ame tiye sahou ta tikisiy udu mada lau mari ta sasah ndra-in iri ndramekes. \v 19 Eme oro lau rayah boto-on ta balik mene udu toro ta amekes balahak, atukum iri buk ma lakou toro i se udu mada lau mari ma atehei jih i ta aliy. Oro andromwei sowan nane asahan buku (K150,000) iri winiyan bandromwei bwe. \v 20 Eme i san le doh badeh, sahou ta Laban aseker ma i tinan, ma amekes iri lau tan abadok le gwek. \p \v 21 Ano udu hamon ta lahou mari doh asahan badeh, Pol amekes budon tan ta anya kili Jerusalem. Iy kameh edek ili bolo kon Masadoniya ma Akaya. Eme iy anya, “Jo ili oro kon doh ano, udu hamon ta aliy badeh, jo kili kaselesen Rom ale.” \v 22 Eme ma, iy suni uru lau ta aseben iy, Timoti uru Erastus ala Masadoniya. Iy le badeh, udu kon munyak tinan Esiya udu gwek luluwen sese. \s1 Bahun udu kon Epesus \p \v 23 Na len doh badeh, tine losen asahan i bada San ta Laban. \v 24 Eme udu loboho doh ale, \m ndramak ari ta amekes iri lakou na hayen hawe silba nyaran Demitiriyus. Iy amekes silba nyolom tan badeh, i buku asiu ta atudun kindrei badih ari nyaran Atemis. Iy ma hawe lau solo-an akohok luk solo-an labai tiri lau ta lahou doh. \v 25 Eme iy luhi iri lau ta lahou tan ma hawe iri lau amekes lahou i le buku iy, ame, ma iy tiye i tiri i buku doh, “Ado lau mari ado ndratou ai, to mari badeh, akohok luk solo-an eme tato, ta lakou to amekes dah. \v 26 Iy lau Pol kede-eh, iy ndraluwi iri mwan ma badih solo-an. Iy ndrabolowani budon tiri, i buku ado ndranyolom ma ndranuhun. Ma iy bamekes kandriyen doh bado kon tinan Epesus dah le, bwe. Mirihik andrei loboho kon tinan Esiya ale. Iy asehek buku iri kindrei, lau amekes na lim, idoh kindrei handru bwe. \v 27 Ya idoh kameh atehei bohosak eme ta lahou tato ta aliu luk nyaran kameh andra-i. Ya idoh le bwe, idah kameh, ma atehei bohosak i ta asiu ta atudun kindrei Atemis ari moson bwe. Ma idah kameh, lomada kindrei badih tiri lau mari badu Esiya ma hawe munyak mari ta atudun kameh atokos.” \p \v 28 Eme iri anuhun sahou doh badeh, ma bwidi ndrine iri ibolosen ma iri sarakau anya, “Atemis kindrei badu Epesus badeh, iy le ai!” \v 29 Eme se nawin bwe, lau mari badu bolo kon tinan mari sarakau. Eme iri tawi uru lau ta Pol ma la-uh. Gayus uru Aristakus, uru badu Masadoniya, ya iri seheyani uru ala lohalak ndrahu tukum ta lau mari. \v 30 Pol badeh, anya kili mada iri lau mari, arile iri lau ta Kindrei badeh, balelei iy bwe. \v 31 Ma hawe iri batun rayah badu kon doh, hawe iri kawas tan suni sahou i tan, ta iy badeh, sala ndrahu tukum ta mada lau mari. \p \v 32 Iri lau mari badeh, anyon. Iri rayah badeh, sarakau i randrah labai, ya iri rayah i randrah labai. Ya iri lau solo-an bala tanan ta katin ta iri ala doh bwe. \p \v 33 Eme iri Juwis andrekei Aleksandra ili udu mwena tiri ma iri rayah sarakau, ta iy ki-in hamon ta boho iri. Eme ma iy tiye iri mari kandru-uk, ya iy kamekes sahou ta aseben iri lau. \v 34 Arile, udu ja iri atanan iy badeh, badu Juwis, eme iri sarakau i le buku bwena nane anya, “Atemis kindrei badu Epesus badeh, iy le ai.” Iri sarakau ili winiya awa la-uh. \p \v 35 Eme ndramak ta atorou lakou badu kon tinan tiye iri andru-uk, ano iy anya, “Aha lau badu Epesus, iri lau badu kon munyak mari tana iri ta kon tinan Epesus badeh, ta atondrok asiu ta atudun kindrei badih Atemis hawe sukumada hayen mene taku udu kandrah eme andri. \v 36 Iri lakou doh handru ya ari lau winiyan babisiniy bwe. Ya ado \m kandru-uk ma ado samekes lakou ta bobo-ap. \v 37 Ya ado ndraluwi uru lau kede-eh ame dah, uru babene-ei ari lakou badu bolo asiu ta tudun ta Atemis bwe, ma uru badeh, batiye sahou ndra-in bala ta kindrei tato bwe oh. \v 38 Ya i buku none Demitiriyus hawe oro lau ta lahou tan, toro budon ndra-in udu tare lau badeh, len ta amekes sahou udu aliy, ma iri lau ta atondrok are aliy. Oro winiyan tiye ndramak ta ari lakou ndra-in iy ndramesekei. \v 39 I buku none, ado ari budon ta asehek, badeh, kedek ki-in hamon ta batanau ma kandriyen tataha mari. \v 40 Ado kanuhun kamwenen! Tasah, idah kameh, to ndrare bohosak, ta to kameh are ta mada sahou ta gabman tinan tasah ta losen, to amekes dah. To ari madasan bwai, ta sasah to amekes dah, ma to ari kati sahou mwasin bwe le.” \v 41 Sahou tan ano badeh, iy tiye iri aseker au ai. \c 20 \s1 Ala Masadoniya hawe kon tiri Grik \p \v 1 Udu hamon ta sarakau tiri ano badeh, Pol suni sahou i toro lau atehei budon toro handru in ta Kindrei ame. Ya eme iy batanau oro. Ano ma iy edek iu ili Masadoniya. \v 2 Iy edek loboho doh badeh, iy asehek sahou ta batanau iri lau ili ili, ma iy isos kon munyak tinan tiri Grik. \v 3 Eme iy udu kon tiri Grik doh udu gwek winiya bun taloh. Eme iy alokou iy ta anya kalakak kili Siriya, arile iy anuhun yoyou, ta iri Juwis badeh, atilik nyala iri ta kadi iy. Ma eme iy bala bwai, iy ili hamon ili Masadoniya. \v 4 Ya oro lau a hawen badeh, nadu Pirus nyaran Sopater badu kon Beriya, Aristakus hawe Sekundus badu kon Tesalonaika, ya Gayus badu kon Debi, ma hawe Timoti, Titikus ma hawe Tropimus badu kon munyak Esiya. \v 5 Oro lau doh badeh, ala bwena ala Trowas abe-en aso. \v 6 Arile, aso\f + \fr 20:6 \ft Iri lau ta tanan abudon, Pol isos Pilipai le badeh, iy kuhi kawas tan nyaran Luk i hawen ja. Eme ma sahou asahan bolo tarou dah aloh aso. Ou anyolom in bolo Lahou toro Aposel kalan 16:10.\f* badeh, alakak ado Pilipai ala badeh, udu hamon ta nyamon tinan ta jabi ramen yis bolon bwe. Aso alakak na len limeh, ano aso asos Trowas hawe oro. Eme aso ado gwek len ndro taloh. \s1 Pol mete-ei ndramak imek amak ja \p \v 7 Ano na len ma mwena ta wik ari ja badeh, aso atukum ame le se ta abo-os jabi ramen.\f + \fr 20:7 \ft Iri lau ta tanan abudon, iri amekes kandriyen ta abo-os jabi ramen ta iri kabudon bada Jises ma ndrayen.\f* Tasah, Pol badeh, anya ki-iu na len bi-i, ya iy asehek sahou ili tiri lau ili, ili asahan ndrukulu ben. \v 8 Sun solo-an badeh, udu bolo asiu loken nane aso atukum areu aliy doh. Ya lawe ta asiu loken doh i buku asiu tolo-em, ra-em udu bwele-e ra-em. \v 9 Eme ya ndramak loweu ari nyaran Yutikus manyah udu mada kadam. Iy anuhun Pol asehek sahou ili, ili, ya madan ndrundrun ili, ili, ma iy amadin tuk ili, ano ma iy taku udu loken eme andri. Eme iri anya kasuri iy badeh, iy ndramak. \v 10 Pol eme andri badeh, akabah i la-u ndramak loweu dah ma tawi iy. Eme iy anya, “Bale ado sasin iy. Kohan udu aliy!” \v 11 Ano iy ili bolo asiu loken abo-os jabi ramen ma aimon ai. Iy asehek sahou ili winiya boho len, ano iy iu. \v 12 Eme iri lau andrei iy ndramak loweu dah iu i kon ma mulin le, ma iri batikisiy ja bwe. \s1 Pol ruwani iri batun tinan badu Epesus \p \v 13 Aso badeh, a ndron alakak ales amwenen ala kon Asos. Aso ala badeh, ta asowe Pol. Iy amekes san doh, tasah iy badeh, edek na kati ilih aliy. \v 14 Eme iy eme isos bada aso udu Asos badeh, aso suni iy ma aso au ala Mitileni. \v 15 Ano i bada len ari ja badeh, aso alakak ala asos Kiyos. Ano na len ari ja badeh, aso alakak ala bilisiu ala Samos, ma na len ari ja badeh, aso asos Miletus. \v 16 Eme Pol atehei budon ta aso kasakalawi Epesus ta teleya aso badeh, sare loboho munyak tinan badu Esiya sado luluwen. Tasah, iy ibotatahan ta ili isos Jerusalem na len tinan ta Pentikos.\f + \fr 20:16 \ft Ou anyolom in ta sahou tanan udu ta Aposel kalan 2:1.\f* \p \v 17 Eme Pol udu Miletus badeh, suni sahou i tiri batun tiri lau ta budon handru in ta Kindrei badu Epesus kame katou iy. \v 18 Eme iri asahan badeh, iy tiye i toro i buku doh, “Ado badeh, ndratanan bolo manyah tek ma mwena handru kabatana jo eme udu hawe ado eme eme taku len dah, udu loboho kon tinan badu Esiya. \v 19 San solo-an iri Juwis atilik sahou ta anya kanone jo ta bolo lahou jo amekes, eme ma, kandriyen tiri doh bwidi ndrinek maha-an labai, ma jo eden ta aliy san solo-an. Arile, i buku iri atehei nyarak i andri, jo babudon ta aliy bwe, jo amekes le lahou ta Laban. \v 20 Ado badeh, tanan jo babisiniy ta atiye sahou ta aseben ado se bwe. Arile, jo badeh, asehek udu mada ado mari ma hawe jo ili asiu ra-em i ra-em. \v 21 Jo badeh, asehek i ndranye iri Juwis hawe iri lau badu Grik katubuni ndrine iri ta kandriyen ta karei ma lomondra ndra-in tiri, ya katehei budon tiri handru ki ta Laban tataha Jises. \p \v 22 “Ya na dah jo in hamon ta boho Malawin Ndrabun, jo kameh ili Jerusalem. Ya jo bala tanan ta sasah katok badak udu doh bwe. \v 23 Jo le badeh, tanan ta Malawin Ndrabun ndrabatanau jo ta i buku jo ili bolo kon tinan mari, idah kameh, maha-an hawe a bolo kou udu aliy abe-en jo. \v 24 Arile, jo badeh, balek basin ta kohak bwe. Jo le badeh aseken ta jo kisos bilisiu ta bolo sakaliye tek, ma kamesekei kano lahou Laban Jises ndratehei kanik. Lahou doh ta atiye sahou mwasin ta nyala tikisiy ta Kindrei, ma ta leheya eme lewan. \p \v 25 “Ya, jo mene edek ewek bolo ado atiye sahou ta nyala tondrok ta Kindrei. Arile, na dah jo tanan idah kameh, ado winiyan banyolom jo ja bwe. \v 26 Ya eme na dah jo katiye tado kamwenen, ki buku none ado ari kamak, jo winiyan babwese maha-an ta aliy bwe. \v 27 Tasah, jo badeh, babisiniy ta tiye seken mari ta Kindrei ewek tado bwe. \v 28 Ado badeh, katondrok ado kamwenen, ma hawe katondrok lau ta Kindrei mene Malawin Ndrabun atehei iri ado baha tondrok tado. Ado badeh, a buku lau ta atondrok sipsip, ado katondrok iri lau ta budon handru ta Kindrei, ala iy mene konohei iri na ndraye nadun amwenen. \v 29 Ya aha katondrok iri kamwenen, tasah hamon kameh jo ruwani aha, idah kameh lau solo-an ndra-in ame bolo aha ta tobolowe budon hawe manyah taha. Ya kandriyen tiri kameh i buku iri mwi badu lokei ame atikah iri nadu sipsip. \v 30 Ma na len eme kameh, lau rayah badu bolo ado badeh, kameh tebeya wasai ta aliu iri mwan ma badih ame len ta budon handru, ma ta iri ka-en hamon toro. \v 31 Ya eme mada ado badeh, kaleu! Ado badeh, ndratanan, na jaha taloh mene jo ndrabatanau ado na ben na len ta aliy. Jo batanau ado ma wa-i madak amou ta tikisiy. \p \v 32 “Ya eme ta sendrehendreh ta aliy, na dah jo edeu ado ala baha tondrok ta Kindrei, ma jo aseken ado abudon sahou ta nyala tikisiy tan. Ya sahou doh kameh winiyan mesekei ado abadok, ma winiyan amekes kandriyen tado ki mwasin winiya ado akohok manyah mwasin, Kindrei ndralebelei ndra ta lau tan. \v 33 Jo badeh, bawasai ta akohok ra-ei kolau tado ma hawe bakohok ari silba hawe bek nyikilikin bwe. \v 34 Aha amwenen ndratanan jo badeh, ibo gok ma asilah luk ta atondrok jo hawe oro lau are hawek. \v 35 Ma udu bolo lahou tek mari, jo ndraleheya aha ta san ta kandriyen ta amekes gok boto-on, aha kaseben iri lau nyamu iri bwe. Ma taha kabudon sahou mene Jises asehek i buku doh, ‘Are ndramak, iy edeu lakou ili tare lau, iy badeh, sekesek tinan handru. Ma sekesek ta iy ndramak nane akohok lakou winiyan basakalawi sekesek ta iy ndramak nane aseben iy bwe.’” \p \v 36 Sahou ta Pol ano le badeh, iy atehei bwili ndru-un i andri hawe iri mari, ta adeu salom ma wurah i ta Kindrei. \v 37 Iri marakon tawi iy, ma iri aden, iri tikisi iy tinan labai, ma iri bwale iri iy iu. \v 38 Iri badeh, tikisiy tinan labai ta iri sahou nane iy asehek tiri anya, iri kameh winiyan banyolom madan ja bwe. Eme ma iri tiyani iy ili isos bolo ndron. \c 21 \s1 Pol iu ili Jerusalem \p \v 1 Aso adeu wurah ili tiri lau badu Epesus, ma anya, “Aha ndrado ai.” Aso alakak amwenen ala busu ari, iri aloh Kos. Ano, na len ari ja badeh, aso are Kos alakak ala busu Rodes. Aso alakak are busu Rodes au ala asahan kon tinan Patara. \v 2 Aso ruwani ndron nane aso au aliy ereu ai, aso anuhun ndron ra-ei kameh anya ki-iu kili Ponisiya. Eme ma aso sandroh ala bolo ndron nane doh ja, ere Patara ma alakak au ai. \v 3 Ahi alakak au ala bolo ndras laleyah, eme ma ahi anyolom busu Saipres udu loboho mine ahi kamweu. Eme ahi alakak ala, ala winiya le ahi asahan kon munyak tinan Siriya. Ma ndron doh ili Tair ta akeh sanuw ale. \p \v 4 Aso ala kon doh, ma ndruni oro lau ta Jises rayah, ma aso are hawe oro are gwek, winiya len ma ndro taloh. Udu bolo len doh badeh, boto-on ta Malawin Ndrabun tiye sahou randra ili tiri. Eme ma iri tiye sahou nane doh ili ta Pol i buku doh, “Ou sala kon tinan Jerusalem labai, bwe kameh iri kadai ou amak.” \v 5 Arile, len ma ndro taloh taso are hawe oro badeh, ndrano ai, eme ma aso ka-au kala hamon kala ndron ja. Eme ma oro lau marakon ta Jises nane, ma udu oro hawe nadu oro, tiyani aso ala babi. Eme ma ahi mari atehei bwili ndru-u ahi i bada on, ma asolom ili ta Kindrei. \v 6 Aso ateu lim hawe oro, ano aso sandroh ala bolo ndron. Eme ma oro adek au ala hamon ala ndrahune oro ja. \p \v 7 Eme ma ndron nane aso an bolon alakak are Tair ales ili kon tinan Tolomes. Eme aso ndruni oro lau ta Jises rayah ja are loboho doh, ma ateu lim hawe oro. Ma aso are hawe oro len ari le. \v 8 Na len ari ja badeh, ahi alakak are Tolomes ala kon tinan Sesariya. Udu loboho doh, badeh aso ala asahan asiu ta lau ta Jises ari nyaran Pilip, ma aso amadin hawen. Iy ta atiye sahou ta Jises na len mari, ma iy badu hawe oro lau ma ndro taloh mene iri lau ta Kindrei hawe oro aposel badu Jerusalem atehei oro ta aseben iri lau ta Kindrei. \v 9 Ma Pilip badeh, nadun oro ma hahuw ndra badih le. Oro ndra tinan ndra bihin, arile oro batasou bwe le, ma Malawin Mwasin ta Kindrei badeh, udu hawe oro badih nane doh, eme ma len rayah oro winiyan atiye sahou nane Kindrei edeu ili toro i buku propet. \p \v 10 Len sabe aso are hawe Pilip, eme ma propet ari nyaran Agabus \m udu Judiya eme andri hawe aso. \v 11 Iy eme asahan hawe aso, ano iy andrei molowa awin ta Pol. Ma iy bawei iy le, katin hawe minen ma la-uh na aliy, ma iy tiye eme taso i buku doh, “Malawin Ndrabun nane tiye eme tek i buku doh, tama molowa awin dah kameh iu ili bolo asiu lulik ili Jerusalem. Iri Juwis badu Jerusalem kameh bawei katin ma minen i buku doh. Ma iri kameh atehei iy ili mine iri lau badu leheleh, ta iri winiyan amekes kandriyen ndra-in i tan.” \p \v 12 Aso anuhun sahou doh badeh, eme aso ma hawe oro lau nane are doh, asehek sahou boto-on ili ta Pol i buku doh, “Pol, ou are dah areu, ou winiya bala andri bala Jerusalem bwe.” \v 13 Arile, Pol tiye i taso ja i buku doh, “Buku sah? Ado satikisi jo, ma ado satehei tikisiy badeh, same tek. Ado kanuhun, jo banoh ta ili bolo asiu lulik ili bolo kon tinan Jerusalem bwe, ma jo banoh bwe ale, buku iri anya kadi jo, tasah jo asehek nyara Jises, iy tinan labai. Eme ma ado winiyan batawi jo ta udu ja bwai.” \v 14 Aso badeh, winiyan batubuni budon tan bwe, ma aso basehek sahou bala tan ja bwai. Eme ma aso anya, “Ya, Laban, ou bwidi iri lakou kameh asahan na so-ok tam le amwenen.” \ms1 Pol udu bolo asiu lulik udu Judiya, ma iri anuhun sahou tan \mr (Kalan 21:15–26:32) \p \v 15 Len sabe ndrano ndra-au, ano aso lokowani lokowa aso, ta au ala Jerusalem. Aso ame adek au ala kon tinan Jerusalem, \v 16 ma oro lau rayah ta Jises badu Sesariya adek hawe aso ale. Oro tiyani aso ala asos asiu ta ndramak ari badu busu Saipres nyaran Nason. Iy ndreh doh mene in hamon ta Jises ndra bwena labai. Eme ma aso ado asiu tan. \p \v 17 Ya, aso asahan kon tinan Jerusalem badeh, iri lau ta Jises sekesek labai ta anyolom aso. \v 18 Na len ari ja badeh, Pol hawe aso mari ala anyolom Jemis; ma oro lau ta Jises rayah tinan are aliy ale. \v 19 Aso ateu lim hawe oro, ma aso mari ja sekesek a le se. Ano Pol asehek nyala iri lakou marakon nane Kindrei amekes ere bolo iri mwan ma badih badu leheleh udu bolo iri len bwena mene iy amekes lahou tan. \p \v 20 Iri anuhun nyala lahou ta Pol mari, ano iri atudun nyara Kindrei. Ma iri tiye ta Pol i buku doh, “Nadu tine aso, ou anuhun, ou ndratanam kane lau mwan ma badih nyaran bwe badeh, iri badu Juwis ma iri ndratehei budon tiri ndrala ta Jises. Ma iri mwan ma \m badih doh badeh, budon tiri irih labai ta a-en hamon ta batanau ta Moses. \v 21 Iri lau rayah asehek ou ili tiri i buku doh, ‘Pol badeh, leheya iri lau badu Juwis nane are kon munyak tiri lau badu leheleh, ta iri katehei kona iri kili ta batanau ta Moses, ma tiye iri, sasan ku-i iri nah mwan, ma sa-en hamon ta kandriyen tiri Juwis.’ \v 22 Iri kameh kanuhun, ta ou ndrasahan dah. Ya idah kameh, to kamekes kili buku sah handru? \v 23 Ya, aso aso-ok ou an hamon taso ta saba lakou aso asehek. Udu bolo aso dah, oro lau ma hahuw badu Juwis badeh, ndramekes tandrakan boto-on labai i ta Kindrei, ta abeles lakou rayah ta manyah toro amwenen. \v 24 Ya, ou ala hawe oro ala bolo asiu tinan ta Kindrei, ma ado kamekes kandriyen ta Kindrei ta amekes ado kasahan ha-un ta mada Kindrei. Ma ou asih lakou toro ta asun i ta salom, ta oro winiyan asik batu oro.\f + \fr 21:24 \ft Ou anyolom in ta Aposel kalan 18:18 ma hawe Namba kalan 6:1-21.\f* I buku ou amekes i buku doh, iri kameh anyolom ou amekes amwenen handru i buku le kandriyen tiri Juwis. Ma iri kameh winiyan batehei budon tiri ba-en ta sahou, iri anuhun lau rayah mene amekes ewek tam. \v 25 Ahi ndratorowenei la-ukei ramen, ma ndratiyaniy ndrala tiri lau ta Kindrei badu leheleh, ma ahi tiye tiri i buku doh, ‘Aha saimon nyamon ala ndrala ta salom tiri kindrei nane iri asehek na sukumada kei. Ma aha saimon oda iri katin haka ndra udu ta aliy, ma hawe sa-un ndraye iri. Ma aha samekes kandriyen ndra-in ta karei.’” \p \v 26 Na len ari ja, Pol andrei oro lau ma hahuw nane doh, ma oro au ala asiu tinan ta Kindrei. Ma oro ala amekes kandriyen tiri Juwis ta iri kasahan ha-un ta mada Kindrei. Ano, oro adek ala bolo asiu tinan ta Kindrei, ma Pol eme tiye iri tinan ta bwena ta asiu ta Kindrei, ta len sabe handru kameh ta kandriyen toro lau ma hahuw kameh amekes ano iu, ma na saba len ja kameh oro kame katiye lakou ta adeu i nyara salom ili ta Kindrei. \s1 Iri tawi Pol \p \v 27 Eme ma len ma ndro taloh doh, mirihik tiri ta anya kano ai, iri Juwis rayah nane badu loboho kon Esiya anyolom Pol udu bolo asiu tinan ta Kindrei, oro tukumwi lau solo-an badu Juwis, ma iri ala tawi Pol. \v 28 Iri arah ma aloh i buku doh, “Aha lau badu Isra-el, aha kame kaseben aso. Iy lau dah le adeh, leheya lau badu kon mara-ei, iy bobose iri lau tataha, ta kandriyen malen ta Moses, ma asiu tinan ta Kindrei ale. Ya, iy bamekes kandriyen dah le bwe. Iy akohok iri lau badu Grik ale ame bolo asiu tinan ta Kindrei, ma iri bwidi ndrahune Kindrei nane leheya iy amwenen udu aliy, ma bwidi ajah ta madan.” \v 29 Iri tiye iy i buku doh, tasah iri mene anyolom ndramak ari nyaran Tropimus, iy badu kon tinan Epesus, edek bolo kon tinan hawe Pol, ma iri abudon anya, Pol kede-eh ndrandrei iy ndrame bolo asiu tinan ta Kindrei dah. \p \v 30 Iri lau marakon anuhun sahou doh, ma iri Jerusalem mara-ei badeh, mani iri atur labai, eme iri mari sakaliye ame atukum ala le doh. Iri tawi Pol ma aruwi iy udu bolo asiu tinan ta Kindrei iu ili manan. Ma iri sulu-i kou marakon badu asiu tinan ta Kindrei ili. \v 31 Iri anya kadi Pol kimek ki-iu, arile tinan ta atondrok lau ta bahun badu Rom, badeh, ndranuhun lau solo-an labai ado Jerusalem ndratukum, ma anya kamekes bahun laba tinan. \v 32 Eme ma iy andrei iri tinan hawe iri lau ta bahun, iri sakaliye ala loboho nane iri lau mara-ei atukum are aliy. Iri Juwis anyolom tinan ta mwena tiri lau ta bahun hawe iri lau ta bahun le badeh, iri ruwani Pol ma iri ba-um iy ja bwai. \p \v 33 Ndramak tinan ta atondrok iri lau ta bahun eme tawi Pol, ma tiye oro lau tan i buku doh, “Ado kasawei iy ndramak dah na la-uh sen.” Eme ma iy ndremenya iri lau nane i buku doh, “Ya, iy ndramak dah, iy are lau handru? Ma iy amekes saba kandriyen ndra-in handru?” \v 34 Lau solo-an arah boto-on labai, ma iri asehek sahou laleyah. Eme ma ndramak tinan tiri lau ta bahun nane dah winiyan bala tanan ta kati sahou doh bwe. Ma iy aloh oro lau tan kala katiyani Pol kili bolo asiu boto-on tiri ta bahun. \v 35-36 Iri lau ta bahun ame tiyani iy ili isos kati kandren ta adek ala loken le badeh, oro anyolom ma anuhun lau sakaliye ame hawe oro, ma arah i buku doh, “Aha kadi iy ndramak badeh, kimek ki-iu!” Eme ma oro lau ta bahun bwese-ei iy i kase oro iu ili loken, ma iri badai iy bwe. \p \v 37 Oro lau ta bahun anya katiye Pol kili bolo asiu tiri boto-on, Pol eme asehek sahou i boho kon Grik ili ta ndramak tinan ta atondrok iri lau ta bahun i buku doh, “Buku sah, jo winiyan asehek sahou ewek tam deh bwe?” Mani iy ndramak tinan nane dah atur sese, ma iy asumon boho Pol i buku doh, “Buku sah, ou tanam boho kon tiri Grik? \v 38 Jo anya ou kede-eh badu Ijip, iy mene ale tukumwi iri lau ta bahun tan ala tebelese hawe iri lau tahi. Ma iy mene atobwak hawe iri lau, kane iri ma hawa (4,000) iri mene adi iri lau anya ka-en hamon ta gabman badu Rom, ma tiyani iri ala are kon lomale an.” \p \v 39 Pol eme asehek sahou i tan ja i buku doh, “Jo iy ndramak badeh, bwe. Jo ndramak ari labai badu Juwis, kon tek handru badeh, Tasus, udu bolo kon tinan Silisiya. Ma nyarak badeh, ere bolo buk badu kon tinan doh, arile na idah jo anya kandremenya ou. Jo anya kasehek sahou kili tiri lau mara-ei are kede-eh.” \p \v 40 Iy tiye i buku doh, ma tinan tiri lau ta bahun anya, “Mwasin, ou winiyan asehek sahou.” Eme ma Pol atehei minen i loken ta iri kandru-uk. Eme ma iri andru-uk i le rasan, ma iy asehek sahou ili tiri i boho kon Aramek. \c 22 \pc \v 1 Eme ma Pol tiye tiri i buku doh, “Aha mari, aha nadu tine, ma aha tama, jo anya kasehek taha kamwenen i buku doh, jo badeh tanan ari lakou jo amekes andra-i bwe. Aha kanuhun kamwenen.” \v 2 Eme ma iri anuhun iy asehek sahou i tiri i boho kon Aramek, ma iri mara-ei andru-uk, ma bamekes se sahou bwe, tasah iri anuhun iy amwenen labai. \p \v 3 Ma iy asehek ili le anya, “Jo badu Juwis, tine tuwi jo badeh, udu kon rakon iri aloh Silisiya udu bolo kon tinan Tasus. Arile, jo ma bwisik, jo ili akohok tanan ta leheya ma jo asahan ili awas badeh, udu kon tinan Jerusalem dah. Bolo len doh, ndramak tinan taha ari nyaran Gamaliyel badeh, leheya jo. Ma jo badeh, akohok tanan handru ta iri kandriyen malen mari ta tubu taha Moses. Jo abadok ma asahan boto-on ta in hamon le ta Kindrei, ta iri sahou tan, i buku le aha lau marakon nane are kada-ah amekes. \v 4 Bwena mene jo bokoro-ei iri lau a-en hamon ta San ta Jises, andra-i labai. Ma jo anya kidi iri kamak ka-au. Jo badeh, bawei iri mwan ma badih na sen, ano akahei iri ala are bolo asiu lulik. \v 5 Iri tinan tiri pris tataha hawe iri kansol mari badu Juwis are kede-eh, iri winiyan asehek sahou mari doh ewek taha, ta jo basehek sahou wendreya, ta iri lakou nane doh bwe. Iri lau mene torowenei la-ukei ramen ili tiri Juwis are Damaskus, iri atehei eme minek, ta jo kili kateu iri lau doh, kabawei iri na sen, ma kandrei iri kame Jerusalem ta iri lau tinan tataha kadeu maha-an ki tiri.” \s1 Pol asehek iy asahan lau ta Jises \r (Aposel 9:3-19; 26:12-18) \p \v 6 Pol asehek i tiri i buku doh, “An udu halas badeh, jo edek ndrame mirihik labai ta kon tinan Damaskus. Se nawin bwe, sun ari lomadan tinan labai anya udu kandrah eme andri awudi jo mara-ei. \v 7 Ma jo atarah i andri bada munyak, ma ndranyek anuhun ndramak ari aloh jo i buku doh, ‘Sol, Sol, tasah handru ou anya adai jo kimek?’ \p \v 8 “Eme ma jo asumon bohon i buku doh, ‘Laban, ou are lau badeh?’ Eme iy anya, ‘Jo Jises badu Nasaret, ou nane abo gok ta adai jo kede-eh!’ \v 9 Ya oro lau rayah nane adek hawek badeh, anyolom lomada sun doh, arile oro banuhun boho ndramak nane asehek sahou eme tek bwe. \p \v 10 “Eme ma jo ndremenya iy ja, ‘Laban, ou aso-ok jo kamekes saba lakou tam handru?’ \p “Ma Laban tiye sahou eme tek i buku doh, ‘Ya, ou suri ou ma ou ala bolo kon tinan Damaskus, ya ndramak ari kameh tiye tam ta lakou marakon Kindrei aso-ok ou amekes.’ \v 11 Madak ma la-uh badeh, ilik mara-ei, tasah lomada sun nane doh, lomadan tinan labai, eme ma oro lau nane adek hawek tawi minek, ma sirini jo iu ili bolo kon tinan Damaskus. \p \v 12 “Ndramak ari nyaran Ananayas, iy udu bolo kon nane doh. Iy lau ta Jises ari ai, len mari badeh, iy in hamon le tiri kandriyen ta batanau, eme ma iri Juwis nane are Damaskus badeh, aso-ok iy tinan labai. \v 13 Ya iy eme ales ere mirihik tek, ma iy asehek sahou eme tek i buku doh, ‘Sol, ou nadu tine ahi, na dah kameh ou winiyan anyolom kon ja.’ Sahou ano le bohon badeh, madak asak, ma jo anyolom iy amwenen. \p \v 14 “Iy asehek sahou eme tek i buku doh, ‘Kindrei ale mene, tubu taha iri atudun iy badeh, lebelei ou, ma aseken ou akohok tanan tiri lakou marakon iy aso-ok, ma iy aseken ou anyolom iy. Iy badeh, mwasin labai ta madan, ma ou winiyan anuhun iy asehek sahou na bohon amwenen. \v 15 Ma ou kameh a buku bohon ta tiye tiri lau mari ta saba lakou nane ou ndranyolom, ma ou ndranuhun. \v 16 Ma, na idah kameh ou sabe-en ja ai! Ou suri ou are loken, alomwa ou, ma ou aloh nyaran kasikine kandriyen tam ndra-in marakon ki-iu.’ \s1 Kindrei aloh Pol ili ta atiye sahou tan ili tiri lau badu leheleh \p \v 17 “Jo eme hamon eme Jerusalem ja, ma iu ili bolo asiu tinan ta Kindrei, jo asolom udu le badeh, jo amekes lele. \v 18 Eme ma jo anyolom Laban asehek sahou eme tek i buku doh, ‘Ou anuhun, na le dah, ou suri ou a-au ta Jerusalem. Ou suri ou suwi, tasah iri lau kameh winiyan banuhun ou bwe, buku ou asehek nyarak ili tiri.’ \p \v 19 “Jo anya, ‘Laban, iri marakon ndratanan jo mwasin labai ta jo mene edek ili bolo asiu ta ndrahu tukum tiri Juwis, ra-em ili ra-em, ta apeu iri, ma adai iri lau ale atehei budon tiri in tam. \v 20 Udu bolo len mene iri adi lau tam ari nyaran Stiben, badeh, jo udu aliy ale, anyolom iri adai iy. Jo badeh, ere aliy ta atondrok awin tiri lau nane adai iy imek na bek. Ya, ta madak badeh, iri amekes kandriyen mwasin i tan.’ \p \v 21 “Laban tiye jo anya, ‘Ou adek ai, tasah jo aso-ok ou kameh ala bolo iri kon leheleh, ta aseben iri lau leheleh, iri tanan kandriyen tiri Juwis bwe.’” \s1 Pol amwenen badeh, badu Rom \p \v 22 Iri Juwis anuhun sahou ta Pol, arile iri anuhun iy asehek ja ta aseben iri lau badu leheleh, eme ma bwidi ndrine iri ibolosen, ma iri arah boto-on labai anya, “Iy sare kon munyak hawe taha! Kadi iy kimek ki-iu! Iy ndra-in labai, ma iy sado kon munyak dah!” \p \v 23 Iri arah, ma asehek sahou laleyah. Iri asini awin tiri udu bwele-e iri iu, iri akeh ili eme laleyah, ma iri akeh kasu-er ta ndren ili loken, atalan laleyah. Idoh leheya buku iri basekesek ta sahou Pol asehek nane bwe. \p \v 24 Tinan ta atondrok iri lau ta bahun nane tiye oro lau tan i buku doh, “Ado kandrei Pol keme bolo kowah hawe to. Ma ado ka-um iy na malou sakabuk i bek, winiya le iy baratiye ta saba lakou handru iy amekes, ma to kameh winiyan atanan kati kandriyen nane doh, tasah handru iri Juwis abadok ta adi iy anya kimek ki-iu?” \v 25 Eme ma iri lau ta bahun ame bawei Pol, ano iri anya ka-um iy ai. Arile, Pol badeh, ales ere mirihik ta ndramak tinan ta bahun ari, iy ta atondrok iri rayah ai. Eme Pol tiye i ta ndramak nane i buku doh, “Ou anuhun se, buku nyara ndramak udu bolo buk badu kon Rom, ya kandriyen ta batanau asehek i buku doh, iy kili ta mada sahou mwena op, ta seleya iy ndramak nane doh, bwidi kandriyen handru o bwe. Ya, i buku sah handru, na idah ja ado kameh anya ka-um jo laleyah?” \p \v 26 Ndramak tinan nane dah anuhun sahou ta Pol, ma iy ales amwenen ili hawe tinan ta atondrok iri lau ta bahun mara-ei. Iy asehek i ta tinan tiri i buku doh, “Ou abudon ma ou anuhun kamwenen op, ano ou baramekes saba lakou ndra-in barala tan, tasah nyaran badeh, ere bolo buk badu kon tato dah.” \p \v 27 Eme ma tinan ta atondrok iri lau ta bahun mara-ei doh, ili atou Pol, ma iy ndremenya Pol i buku doh, “Ou tiye tek, nyaram in bolo buk badu kon tahi dah handru?” \p Eme Pol anya, “Ehe, jo asehek handru.” \p \v 28 Eme ma ndramak tinan nane dah anya, “Jo badeh, mene akeh luk solo-an labai ta adeu nyarak ili bolo buk badu Rom.” \p Ma Pol anya, “Badeh, handru, arile tama uru tine badeh, nyara uru udu bolo buk badu Rom bwena labai, eme ma nyarak udu aliy ale.” \p \v 29 Eme ma oro lau ta bahun nane bawei Pol ma anya ka-um iy badeh, anuhun sahou doh ja, oro anoh ma oro tolowei iy. Tinan ta atondrok iri lau ta bahun mara-ei nane doh inoh ale, tasah iy badeh, tiye iri lau ta bahun ta bawei Pol na malou ma sen. Ya, iy tanan idoh ndrabun, ndrabun labai ta apeu ari ndramak laleyah, buku nyaran udu bolo buk badu Rom. \p \v 30 Na len ari ja badeh, tinan ta atondrok iri lau ta bahun mara-ei nane dah tolowei Pol, ma iy udu bolo kowah laleyah. Ma tinan tiri lau ta bahun mara-ei dah anya kasilah kati sahou doh ale, iri Juwis nane amekes ta adeu Pol i ta mada sahou. Eme ma iy atehei sahou ili tiri tinan tiri pris, ma hawe iri kansol mara-ei tiri Juwis, ta kame ta tukum doh. Ma iy andrei Pol ili atehei iy ales ere mada iri mara-ei. \c 23 \p \v 1 Pol anyolom amwenen mada iri kansol mara-ei, ma iy anya, “Aha nadu tine, Kindrei badeh, ndranyolom iri kandriyen tek mari na bolo len mara-ei, ndrabwena eme asahan dah. Jo batona ari kandriyen ndra-in jo amekes bwe.” \v 2 Pol asehek sahou doh ili ma tinan tiri pris nyaran Ananayas eme tiye oro lau rayah ales are mirihik ta Pol i buku doh, “Ado katabasi lim ki boho iy ndramak badeh.” \p \v 3 Pol tiye ili ta Ananayas i buku doh, “Kindrei kameh a-um ou. Buku ou badeh, atehei awin tiri tinan, arile bahandran ta aliy badeh, ou ndramak ndra-in, ma budon tam ndrandra-i. Ou anya ou ndramak ari handru ta a-en hamon ta kandriyen malen ta Moses, ma aseben ta amekes sahou tek, ya i buku sah, nadah ja ou ndrasakalawi kandriyen malen, ma ou tiye iri lau are kada-ah ta a-um jo laleyah?”\f + \fr 23:3 \ft Lebitikus kalan 19:15 asehek i buku doh: Iri lau ta anuhun sahou badeh, kamekes kandriyen mwasin le udu mada sahou tiri. Sebwe Pol abudon sahou dah, eme iy tiye tinan tiri pris doh ndrasakalawi kandriyen malen.\f* \p \v 4 Ya, oro lau nane ales are mirihik ta Pol asehek i tan i buku doh, “Hei, Kindrei atehei i ndramak kodo-oh tinan tiri Juwis. Ya, ou sondrokonya iy na sahou badeh, tasah handru?” \p \v 5 Eme ma Pol anya, “Ado nadu tine, jo bala tanan buku iy ndramak kodo-oh tinan tiri pris badu Juwis bwe. Buku jo ki tanan badeh, jo winiyan basehek sahou doh bala tan bwe, tasah sahou randra udu bolo buk ndrabun, asehek i buku doh, \q1 ‘Aha sasondrokonya iri lau nane atondrok aha.’” \rq Eksodus 22:28\rq* \p \v 6 Pol ndranyolom buku lau lubuk are bolo tukum nane doh, rabuk Sadusi ya rabuk Parasi. Pol eme aloh i buku doh, “Aha nadu tine! Jo Parasi ari ai, jo nadu iri Parasi amwenen. Ya, nadah ja jo ales udu hawe aha ta aha atehei jo ili ta mada sahou, tasah jo in hamon ta budon tiri Parasi amwenen, ma ahi atehei budon tahi boto-on labai, buku len hamon eme, Kindrei kameh mete-ei iri lau ndramak are bolo lek tiri, amak ame awas ja.” \p \v 7 Pol atehei sahou doh ili badeh, ma bwidi losen asahan bolo ndrokowa iri Sadusi ma iri Parasi, ma apwai iri a lubuk. \v 8 Iri Sadusi anya iri lau ndramak badeh, winiyan bamak bame awas ja bwe, ma iri anya iri malawin mwasin ma angelo bwe, arile iri Parasi badeh, atehei budon tiri mara-ei in toro lakou mari doh, handru. \v 9 Eme ma bwidi iri arah i tinan labai, eme lau rayah ta leheya kandriyen ta batanau malen ta Moses, iri badu hawe iri Parasi ales are loke, asehek sahou nyarahan labai i buku doh, “Ahi winiyan basilahei ari kandriyen ndra-in ta iy ndramak kede-eh amekes bwe. Buku sah? Buku ari malawin mwasin, o, ari angelo ndradeu sahou ndrala tan!” \p \v 10 Losen toro ma lubuk badeh, i tinan le gwek ai. Eme ma, tinan ta atondrok iri lau ta bahun anya, se luwen bwe, iri kameh tarani Pol. Eme ma iy tiye oro lau ta bahun tan rayah anya, “Ado kala bolo tukum kodo-oh, karuwi Pol udu mine iri lau keme len, ma kandrei iy keme, bolo asiu tato boto-on.” \p \v 11 Udu, i ben ari ja badeh, Laban eme ales ere mirihik ta Pol, ma iy asehek sahou i tan anya, “Ou abadok ma ou sanoh, ou badeh, ndraleheyani nyarak ndrala bolo kon tinan Jerusalem, ma ou kameh winiyan amekes i buku le aliy kameh, udu kon tinan Rom ale.” \s1 Iri Juwis amekes sa-oh ta adai Pol \p \v 12 Na mandraben ari ja badeh, iri lau rayah badu Juwis atukum ja, ta amekes sahou tandrakan ta adai Pol. Iri badeh, abeles iri winiyan bakohok nyamon, ma gwa bwe, winiya le iri kandrei batu Pol ki-iu labai. \v 13 Kane iri Juwis nane atilik sahou ta adi Pol badeh, udu bwele-e hanoh (40) ja. \v 14 Ano iri au ala atou iri tinan tiri pris hawe iri lau tinan ta atondrok iri, ma asehek sahou ili tiri i buku doh, “Ahi marakon ndratandrakan, ta ahi winiyan baimon nyamon ma ba-un gwa bwai, winiya le ahi kandrei batu Pol ki-iu labai. \v 15 Buku na dah ado hawe iri kansol katehei sahou kili ta tinan ta atondrok iri lau ta bahun badu Rom badeh, katiye tan ki buku doh, ‘Ahi aso-ok aha lau tam katiyani Pol keme andri ja, ma ahi anya kandremenya iy ta lakou rayah ja. Ahi anya katanan kamwenen ta saba lakou handru iy amekes.’ Ya, na len iri tiyani iy, iy edek san kahis le, ahi kameh awe-ek iy, ma adi iy imek.” \p \v 16 Arile, nadu kali Pol ari badeh, anuhun ta iri anya kadi Pol kimek. Eme ma iy ili suwi, suwi ili asiu boto-on tiri lau ta bahun, ma iy edek ili bolon anyolom Pol ma tiye sahou nane doh i tan. \v 17 Eme ma Pol aloh tinan ta lau ta bahun ari eme hawen, ma iy asehek i tan i buku doh, “Ou andrei iy loweu kede-eh kili hawe tinan ta atondrok aha. Iy anya kasehek sahou ari kili tan ta iy kanuhun.” \v 18 Eme lau ta bahun doh andrei iy, ma sirini iy ili hawe tinan ta atondrok iri mara-ei, ma iy asehek i ta ndramak tinan doh anya, “Iy ndramak udu bolo asiu lulik kodo-oh nyaran Pol aloh jo ili ta jo kandrei iy loweu dah keme katou ou, tasah iy tan sahou ta asehek ewek tam.” \p \v 19 Ndramak tinan ta atondrok iri lau ta bahun eme tawi minen, ma sirini iy, uru ala ales are loboho bolo asiu sese doh, ari lau bwe. Iy eme ndremenya iy loweu nane dah, “Ya, ou anya asehek tek ta nyala saba lakou handru?” \p \v 20 Iy loweu dah anya, “Iri tinan tiri lau badu Juwis badeh, ndrasehek nyala iri ndra le ari, iri anya, buku bi-i badeh, ou tiyani Pol kili andri kanyolom iri, iri anya katukum, kasehek nyala iri ja, ma iri anya kawendreya, buku iri kanuhun rayah sahou ta Pol ja. \v 21 Arile, ou sanuhun iri labai, tasah kane iri lau badeh, udu bwele-e kane lau ma hanoh (40), iri kameh are san atondrok ta adai Pol. Ma iri ndratandrakan ndrala ta Kindrei, i buku doh, iri kameh adi Pol imek labai, ano iri barakohok nyamon ma gwa ja ai. Eme ma iri atondrok ou, buku ou aso-ok ta atiye Pol ili hawe iri.” \p \v 22 Eme tinan ta atondrok iri lau ta bahun tiye i ta iy loweu i buku doh, “Ou anuhun, ou sasehek labai sala ta ari ndramak ja, ta ou nane ndrasehek nyalak ta sahou dah.” Ma iy tiye iy iu ili hamon ili ndrahunen ja. \s1 Iri tiyani Pol iu ili hawe Peliks \p \v 23 Eme, tinan ta atondrok iri lau ta bahun luhi uru tinan la-uh ja badu bahandran ame, ma iy asehek i turu anya, “Ya, ah kandrei lau ta bahun ma lunek (200) kawek hawe ah ta ala Sesariya na ben kameh, hawe oro ndro tonoh (70) lau ta bahun, oro winiyan sakaliye ta hos, ma hawe lunek (200) lau ta bahun ja ta orou nyah. Ah katiye iri kado le katondrok mada an kili buku ndro-ari na ben dah. \v 24 Aha kandrei ari hos ale ta bwese Pol, ma ah katiyani iy kamwenen kili kisos hawe kabin Peliks.” \v 25 Ano, ndramak tinan ta atondrok iri lau ta bahun mara-ei dah, torowenei la-ukei ramen, sahou udu bolon asehek i buku doh: \pi1 \v 26 “Peliks, jo Klodiyas Lisiyas, jo atorou la-ukei ramen dah ewek tam. Ou ndramak tinan labai, ou atondrok kon mara-ei udu loboho badeh. Bada-an tam mwasin ai. \v 27 Jo tiye oro lau tek tiyani iy ndramak dah ewek hawem, tasah iri Juwis are kada-ah mene tawi iy, ma seheyani iy ili eme, mirihik iri kadi iy kimek. Eme ahi anuhun buku nyaran badeh, udu bolo buk tinan tataha badu Rom. Eme, jo ma hawe iri lau tek ta bahun ala andrei iy ere mine iri Juwis eme len. \v 28 Eme jo badeh anya ki tanan ta saba katin handru iri amekes kandriyen buku doh i tan. Eme ma jo tiyani iy ili hawe iri kansol badu Juwis. \v 29 Ma jo badeh, ndranuhun sahou, iri amekes ili ta Pol. Iri atehei iy ili ta mada sahou doh badeh, ta sahou rayah ta kandriyen ta batanau tiri Juwis. Ma iy ale, bamekes ari kandriyen ta iri kadai iy, ma katehei iy kili bolo kou, bwe. \v 30 Jo anuhun sahou i buku doh, eme ma jo tiye iri lau tek ta bahun tiyani iy kewek hawem suwi, tasah jo ndranuhun sahou ta lau rayah, atukum a le se ta adi iy ndramak dah. Eme jo tiye iri lau nane amekes i buku doh, ta awek hawem, ma ou kameh winiyan lebelei sahou tiri. Ya, sahou tek idoh le, kabwai.” \p \v 31 Ya, iri lau ta bahun andrei la-ukei doh, ma a-en hamon ta sahou ta tinan tiri. Iri tondrokei Pol, ma tiyani iy na le ben doh ili isos kon tinan Antipatris. \v 32 Na len ari ja badeh, iri lau ta bahun nane adek na kati iri ame hamon ame asiu tiri ta bahun ere Jerusalem ja. Arile, iri rayah nane ta hos badeh, tiyani Pol iu isos kon tinan Sesariya. \v 33 Oro ala asahan kon tinan Sesariya, eme oro lau ta bahun nane tiyani Pol amwenen iu ili hawe kabin ta kon doh. Ma oro atehei la-ukei nane ili minen. \v 34 Kabin eme anyolom la-ukei doh, ma iy ndremenya Pol, “Ya, ou badu saba kon handru udu loboho Rom?” \p Pol asehek i tan i buku doh, “Jo badeh, badu kon Silisiya.” \p \v 35 Kabin eme tiye Pol, “Mwasin jo winiyan anuhun sahou tam, buku iri lau nane anya kadeu ou ala ta mada sahou, asahan.” Ano iy aloh oro lau tan ta bahun ame, “Ya, ado katiyani Pol kili asiu tinan ta kabin Herot mene tutuniy, ma ado katondrokei iy.” \c 24 \s1 Tinan tiri Juwis atehei Pol i ta sahou \p \v 1 Udu len ma limeh ano iu, eme tinan tiri pris ari badu Juwis, nyaran Ananayas, iy eme ili asahan kon tinan Sesariya. Iy ma hawe iri tinan rayah, ma ndramak ari iy tanan labai ta kandriyen ta batanau ta sahou, nyaran Tertulus. Eme iri ala asahan bada kabin ta kon doh, ma iri asehek sahou marakon ta amekes Pol kili ta sahou. \v 2 Kabin tinan eme aloh Tertulus ta ili bwena ta asehek sahou. Iy ili ales ere bwena, ma iy asehek iri sahou ta amekes Pol kili ta sahou, i buku doh, “Peliks, ou tinan tahi, ma mwena, jo anya kedeu wurah kewek tam, tasah tanan tam mwasin labai. Eme ma, ahi badu loboho kon doh akohok manyah mwasin, ma ari bahun bwe, tasah ou amekes iri batanau mwasin ta amekes lakou rayah amwenen, ma amekes kon tahi edek amwenen. \v 3 Na bolo len mara-ei badeh, sekesek tahi tinan labai ere tam, ta idoh ma ahi anya kadeu wurah kewek tam. \v 4 Jo bwalek aliu sahou lawe-en labai, tasah ou tam gok solo-an ta amekes. Arile, na dah jo anya kandremenya ou ta tikisi aso, ma ou anuhun sahou taso ja, na dah aso anya kasehek kewek tam. \p \v 5 “Ya, iy Pol badeh, iy ndramak ari ndra-in labai, ta amekes ramwes solo-an. Ahi tanan, buku iy ta amekes losen ere bolo iri Juwis ere bolo kon mara-ei, ma iy ndramak tinan ari ale, tiri lau nane a-en hamon ta Jises badu kon tinan Nasaret. \v 6-8 Ou anuhun, iy ale none ta akohok iri kandriyen ndra-in solo-an eme bolo asiu tinan ta Kindrei. Arile, na bolo len doh badeh, ahi tawi iy.\f + \fr 24:6-8 \ft Iri lau ta tanan rayah anya, sahou ranah badeh, udu bolo tarou dah ale. Sahou asehek i buku doh, Ma ahi anya katehei iy kili ta mada sahou, in hamon ta kandriyen malen tahi Juwis amwenen. (7) Arile, tinan ta atondrok iri lau ta bahun mara-ei nyaran Lisiyas, iy andrei iri lau tan ame ubwi ahi ma andrei iy udu mine ahi iu. (8) Eme ma Lisiyas atehei sahou ili tiri lau anya kadeu Pol kili ta mada sahou badeh, kame hawem kasehek sahou tiri ma ou aleben.\f* Buku ou ndremenya iy ndramak kede-eh, ou amwenen kameh winiyan silahei iri lakou marakon nane ahi anya kadeu iy kili ta mada sahou ta aliy.” \v 9 Eme ma iri Juwis nane are bolo tukum doh aloh i le rasan anya, “Iri sahou marakon doh ndra handru le ai.” \s1 Pol tiye sahou ili ta Peliks \p \v 10 Eme ma kabin ta kon dah anyoleh, ta iy anya kanuhun boho Pol. Pol eme suri iy, ma iy asehek sahou i buku doh, “Jo tanan ou asahan kabin are loboho tiri Juwis dah, na jaha solo-an labai, eme ma jo sekesek tinan labai ta ou aseben ta anuhun sahou tek nadah. \v 11 Len ma ronoh la-uh mene le kada-ah badeh, jo ili bolo asiu tinan ta Kindrei udu Jerusalem ta amekes salom. Buku ou lelen iri, idah kameh ou winiyan atanan, buku sahou mari doh, handru. \v 12 Iri Juwis badeh, anyolom jo, batebelese hawe ari ndramak bwe. Ma jo batukumwi rayah lau ame ta amekes bahun bwe. Iri lau nane ta adeu jo i ta mada sahou dah badeh, banyolom jo andra-i, ma tebelese hawe iri bado bolo asiu tinan ta Kindrei, o ndrahu tukum udu loboho bolo Jerusalem, bo-oh. \v 13 Ma sahou marakon nane iri asehek ta adeu jo ili ta mada sahou doh badeh, wasai. Ma iri lau kede-eh winiyan baleheya ari lakou nane jo amekes andra-i bwai. \v 14 Arile, jo anya kasehek lakou ari, iri nane atehei jo i ta mada sahou ta aliy, badeh, kaleu kewek taha: Jo badeh, atudun Kindrei ta tubu ahi ari le, ma jo atehei budon tek mara-ei in hamon ta San ta Jises, iri Juwis kede-eh aloh san randrah ja. Ma jo atehei budon tek mara-ei i tiri lakou ndratorowenei ere bolo kandriyen malen ta Moses, ma ere bolo buk tiri propet. \v 15 Jo in hamon ta Kindrei, iri lau nane atehei jo ili ta mada sahou badeh, a-en hamon tan ale, ma ahi atondrok, len hamon Kindrei kameh mete-ei iri lau mwasin, ma hawe iri lau ndra-in mene ndramak, kameh amak ame awas ja. \v 16 Eme ma, na len mari, jo aseken budon tek badeh, kaleu, ma jo ki-in hamon ta kandriyen mwasin ta ere mada Kindrei, ma hawe iri lau badu munyak. \p \v 17 “Winiya jaha sabe kolek, jo ruwani kon tinan Jerusalem, jo iu ili bolo iri kon leheleh, ano jo eme hamon ja atiye luk i toro lau tek amwenen, toro lakou bwe, ma hawe iri lakou rayah ta asun i nyara salom ili ta Kindrei. \v 18 Ya, iri atou jo ere bolo asiu tinan ta Kindrei, ma iri atou jo sikine badak ndrano, in hamon ta kandriyen tiri Juwis ta asahan ha-un ja ta mada Kindrei, ma ari ndramak, o, rayah lau batukum bame hawek, ma aso andra-i bwe. Ma ari ndramak barah laleyah bwe. \v 19 Arile, iri Juwis rayah badu loboho Esiya are ndra Jerusalem kodo-on. Buku oro lau doh toro sahou ta asehek eme badak, mwasin, oro amwenen kame kare madam dah, ma katehei jo kili ta sahou. \v 20 Ya, ou ndremenya iri lau are kede-eh se, oro kasehek ta saba kandriyen ndra-in udu tek handru, kala jo ales ere mada tinan ta kansol tiri mene. \v 21 Sebwe iri badeh, abolosen ta nadu lakou ari le, mene jo amekes. Jo ales ere bolo iri kansol tinan tiri marakon doh, ma jo asehek, ‘Jo atehei budon tek mara-ei in ta Kindrei, iy kameh mete-ei iri lau marakon are bolo lek tiri amak ame awas ja.’ Eme ta katin doh le, iri atehei jo ili ta mada sahou.” Ma Pol ano ta asehek sahou tan marakon. \p \v 22 Eme ma Peliks tanan mwasin labai ta iri kandriyen tiri lau ta Kindrei aloh San ta Jises. Ma iy tiye tiri i buku doh, “Ya, buku iy ndramak tinan ta atondrok iri lau ta bahun nyaran Lisiyas udu Jerusalem keme kasahan dah, badeh kameh, jo baranuhun sahou taha ja ai.” Iy asehek sahou i buku doh ma sahou tiri kabwai. \v 23 Eme ma kabin tinan doh tiye ta tinan ta atondrok iri lau ta bahun nane androkei ta Pol i buku doh, “Ou hawe oro lau tam katehei ndrokei \m ta Pol kamwenen, arile ado sabawei iy mara-ei. Ado karuwani iy kedek, ma oro lau badu hawen kame kanyolom iy ma katiye nan nyamon.” \s1 Peliks atehei Pol ili bolo asiu lulik winiya jaha la-uh \p \v 24 Len sabe ano iu, eme Peliks hawe udun Ndrusila, ame ta atou Pol. Ndrusila doh, iy badih butuhu Juwis. Peliks eme aloh Pol kili katou iy. Pol eme ili tiye turu ta iri kandriyen ta atehei budon handru in ta Jises Krais. \v 25 Arile, Pol asehek iri sahou nane ili le, ma iy asehek ta lau ka-en hamon tiri kandriyen mwasin, ma iri katondrok manyah tiri kamwenen, ma iri samekes kandriyen ndra-in. Ma iy asehek ta nyala len hamon, Kindrei kameh seleya manyah ta lau marakon. Peliks anuhun iri sahou doh, ma bwidi iy inoh mara-ei labai. Ma iy tiye Pol i buku doh, “Ou au ai. Buku len rasan ja, jo baraloh ou barame, ma ou barame baratou jo ja.” \v 26 Peliks anya, Pol badeh, kedeu tan rayah luk, ma iy karuwani iy ere bolo asiu lulik keme len laleyah. Budon tan boto-on udu ta lakou doh, ma iy aloh Pol ili hawen san solo-an labai. \p \v 27 Arile, Peliks anya kasahan kawas hawe iri Juwis, ma iy baruwani Pol udu bolo asiu lulik bame len bwe. Eme ma jaha ma la-uh ano iu, ma ndramak ari ja nyaran Porsiyus Pestus akohok kon ta Peliks, ma iy akohok gok tan. \c 25 \s1 Pol asahan ta mada Pestus \p \v 1 Pestus eme asahan Sesariya ta akohok kon ta Peliks. Ano, udu hamon ta len taloh iu, iy iu ili loke ili Jerusalem. \v 2 Udu Jerusalem doh badeh, iri tinan tiri pris ma hawe tinan tiri Juwis ala anyolom Pestus ta amekes sahou ta adeu Pol i ta mada sahou. \v 3 Iri Juwis badeh, aso-ok Pestus katiyaniy Pol keme Jerusalem suwi suwi, tasah iri ndratehei sahou ndrado aliy. Iri kameh atondrok ado kabede-e san ta adai Pol kimek. \v 4 Arile, Pestus eme asehek i tiri i buku doh, “Pol badeh, udu ndra bolo asiu lulik udu Sesariya kahis, arile jo amwenen kameh iu ili hamon ja. \v 5 Mwasin, iri tinan taha rayah kame hawek kala Sesariya, ma katehei iy ndramak doh kili ta mada sahou, buku iy ndrabwidi saba lakou ndrandra-i handru.” \p \v 6 Pestus udu hawe iri ere gwek buku len ma ndru la-uh, o len ma ronoh, ano iy iu ili hamon ili Sesariya. Na len ari ja badeh, iy manyah udu bolo asiu ta anuhun sahou ta lau, ma iy atehei sahou ili tiri lau ta bahun katiyani Pol kili kales kudu madan. \v 7 Pol eme bolon le badeh, iri Juwis nane are Jerusalem ndrame ndrare bolo asiu doh, awudi iy ma asehek sahou boto-on ta kandriyen solo-an ndra-in ta adeu Pol ili ta mada sahou. Arile, sahou tiri bare bada ari lakou handru bwe. \v 8 Eme, Pol asehek sahou ta aseben iy i tiri i buku doh, “Jo badeh, bamekes ari ndra-in bala ta batanau malen tiri Juwis, o asiu tinan ta Kindrei, o i bada Sisa, bo-oh!” \p \v 9 Pestus anya kamekes ndrine iri Juwis kasekesek, iy eme asehek ili ta Pol i buku doh, “Buku sah, ou aso-ok ta ala hamon ala Jerusalem ja, ma jo kamekes sahou dah ja kere loboho tiri amwenen, deh?” \p \v 10 Pol anya, “Bwai, jo ndrales ndrare ta sahou mada Sisa kada-ah kabwai, iy kabin ta atondrok kon tataha Rom. Aha winiyan atehei jo i ta sahou udu bolo asiu ta sahou le dah. Ya, ou ndratanam, jo badeh, bamekes ari ndra-in bala bada iri Juwis kede-eh, bwe-en. \v 11 Buku jo ba-en hamon ta batanau bwe ma jo ndrabwidi ari kandriyen ndra-in, badeh, iri winiyan atehei jo ili ta sahou ma adai jo imek ta aliy, idoh jo ari sahou ta aliy bwe. Arile, buku sahou nane iri asehek ta adeu jo i ta mada sahou kede-eh, buku sahou wendreya, ya ari ndramak tinan ta kon tataha dah winiyan badai jo bamak laleyah bwe. Jo aso-ok ou andrei jo kamwenen kili hawe Sisa, tinan tataha badu Rom, ma iy amwenen kanuhun sahou dah.” \p \v 12 Pestus ili asehek ma anuhun sahou hawe iri lau ta gabman tan, ta akohok rayah tanan mwasin tiri. Ano, Pestus eme hamon asehek ili ta Pol i buku doh, “Ou badeh, aso-ok ta ala Rom, ta Sisa kanuhun sahou tam dah. Ya, ou are bahandra tondrok ta Rom, jo kameh tiyani ou ala hawe Sisa.” \s1 Pestus asehek Pol ili ta kabin Agripa \p \v 13 Len sabe iu, ano kabin Agripa hawe udun Banis, uru ame Sesariya anya kaselesen Pestus. \v 14 Uru are loboho doh len sabe iu, ano Pestus asehek ta nyala Pol i ta kabin. Iy anya, “Ndramak ari ere bolo asiu lulik kede-eh, nyaran Pol. Peliks badeh, banuhun sahou tan bano bwe, iy ere ndra bolo asiu lulik kede-eh kahis. \v 15 Jo mene ili Jerusalem badeh, tinan tiri pris hawe tinan ta bwena ta kandriyen tiri Juwis atukum ta atilik nyala iri ta adeu iy ndramak doh, anya kili ta mada sahou. Eme iri tiye tek i buku doh, ‘Ou anuhun sahou ta iy ndramak kede-eh suwi, ma iri lau ta bahun kadai iy ki-iu.’ \v 16 Eme ma jo anya, ‘Kandriyen ta gapman badu Rom edeu ndramak ili ta sahou i buku doh: Buku rayah lau anya kadeu ari ndramak ki ta sahou, iy ndramak doh badeh, katiye len tan ta asehek sahou hawe oro bwena, op. Gabman winiyan bati-i sahou tan iu laleyah bwe, buku i ndramak nane basehek saba lakou iy amekes bado mada sahou bwe.’ \v 17 Iri asahan hawek le badeh, jo batondrok ja bwai, na len ari ja badeh, jo ndramanyah ndrado bolo asiu ta anuhun sahou, ma jo atehei sahou ili tiri, katiyani Pol keme ta sahou. \v 18 Arile, iri Juwis ame loken ta adeu iy i ta sahou badeh, jo abudon iri kameh asehek ta nyala iri kandriyen ndra-in iy ndramekes, arile bwai. \v 19 Iri atehei iy i ta mada sahou badeh, ta budon ma kandriyen tiri in ta bada kei nane nyaran Jises, Pol asehek ta iy amak ndrame awas ja. \v 20 Jo badeh, winiyan basilahei ari san ta anuhun sahou doh, bwai; eme, jo lelen buku iy kaso-ok ta ili hamon kili Jerusalem, kales ta sahou tan ja. \v 21 Arile, Pol bwalen, ma iy ndremenya jo katiyani iy kili kon tinan Rom kandremenya Sisa kanuhun sahou doh ja. Jo eme tiye i tan, ta iy kili hamon kili bolo asiu lulik ja, iri lau ta bahun katondrokei iy, winiya le len ta anya katiye iy kili Rom katou Sisa.” \p \v 22 Kabin Agripa tiye Pestus, “Jo le amwenen kameh anuhun boho iy ndramak badeh.” \p Eme Pestus anya, “Mwasin, ou kameh anuhun bohon na bi-i.” \p \v 23 Udu, na len ari ja badeh, Agripa uru Banis nyosowani uru na awin turu moroyan, ano uru adek ala bolo asiu tinan tiri ta atukum. Uru ala bolon hawe iri lau tinan ta bahun, ma iri kabin badu kon doh. Eme ma Pestus atehei sahou, ma iri lau ta bahun tiyani Pol eme. \v 24 Pestus anya, “Kabin Agripa, ma hawe aha lau marakon ame ta tukum dah, aha kanyolom iy ndramak dah se, len marakon iri lau badu Juwis arah eme tek ta adai iy ki-iu. Iri amekes udu kon tinan Jerusalem, ma udu dah ale. \v 25 Arile, jo silahei amwenen badeh, iy bamekes ari kandriyen ndra-in ta adai iy imek bwe. Eme ma iy amwenen ndremenya jo katiyani iy kili Rom, ma Sisa kanuhun sahou tan doh ja. Eme ma jo anya katiyani iy kili. \v 26 Arile, jo ari lakou ta atorou ta nyalan ili ta tinan tataha Sisa bwe. Eme, kabin Agripa, jo andrei iy eme ales ere madam, ma aha marakon are kede-eh ale. Taha marakon kanuhun sahou tan op. Ano jo baratou saba sahou tan handru barala ta ramen la-ukei barala ta Sisa. \v 27 Buku jo kandrei ari ndramak badu bolo asiu lulik kili, ano jo batorowenei ramen la-ukei ta tiye tanan ta saba lakou iri atehei iy ili ta mada sahou bwe, jo amwenen anyolom buku kandriyen doh bamwenen bwe.” \c 26 \s1 Pol tiye sahou ili ta Agripa \p \v 1 Eme ma kabin Agripa tiye Pol, “Ya, nadah, ou asehek sahou tam kamwenen ai.” \p Pol eme edeu kalem na minen ta iri marakon kanuhun iy. \v 2 “Kabin Agripa, na len dah jo sekesek tinan labai ta asehek sahou tek dah ewek tam. Iri lau ta atondrok kandriyen tiri Juwis, iri mene amekes sahou solo-an labai eme badak, eme jo anya kasehek sahou tiri doh kewek tam. \v 3 Arile, ou ndratanam kandriyen tahi Juwis marakon, ma ou ale tanam iri rayah a-en hamon ta budon ari labai, ya iri rayah ja tebelese na sahou, ma iri a-en hamon ta budon ari ja. Sebwe, ou kameh winiyan anuhun sahou tek dah. \p \v 4 “Ya, i buku doh, iri tinan ta atondrok kandriyen tiri Juwis marakon badeh, ndratanan manyah tek, mene jo ma loweu manyah udu kati kon amwenen, ma jo eme akohok tanan udu Jerusalem. \v 5 Iri ndratanan jo ndra bwena labai. Ya, buku oro aso-ok, oro winiyan asehek nyala iri lahou jo ndramekes udu bolo tukum tiri. Bwena mene jo Parasi ari ai; kandriyen tiri badeh boto-on labai, ma jo amekes lahou in hamon ta kandriyen tiri. \v 6 Eme ma, jo ales ere mada sahou dah, tasah jo atondrok ma atehei budon tek mara-ei in ta sahou tandrakan ta Kindrei, iy atehei ndra bwena i ta tubu ahi iri. \v 7 Iri boho kamen tahi ma ronoh la-uh atondrok ta akohok tandrakan badeh, asahan. Iri atudun Kindrei na len ma ben mari, ma iri atehei budon tiri mara-ei handru ta iy winiyan mete-ei iri lau ndramak ame loken ame awas ja. O, kabin tek, jo ale atehei budon tek mara-ei in ta atondrok lakou doh. Ta kati sahou le doh, bwidi iri Juwis orowei sahou eme tek. \v 8 Buku sah handru, aha rayah abudon buku, taha satehei budon tataha sala ta Kindrei, ta iy kameh mete-ei iri lau ndramak, kameh amak ame awas ja? \p \v 9 “Aha kanyolom! Bwena mene jo amwenen badeh, ales boto-on labai ta amekes iri gok solo-an, solo-an ta sa-en hamon ta sahou ta Jises badu Nasaret doh. \v 10 Jo amekes iri gok doh udu Jerusalem. Jo akohok sahou ta ateu lau badeh, badu mine tinan tiri pris badu Juwis, ma jo bawei iri lau nane a-en hamon ta Jises badeh, solo-an labai ala bolo asiu lulik. Buku iri Juwis atehei iri rayah ala ta mada sahou ta adai iri ta amak badeh, jo amwenen ale udu aliy edeu minek ta adai iri amak. \v 11 Ma len solo-an badeh, jo iu ili bolo asiu ta atukum tiri Juwis, ma jo abwiyeh iri lau ta Jises doh. Ma jo atehei sahou ili ta lau rayah ta a-um iri, ma nohowa iri ta iri kabobose Kindrei. Eme ma ndrinek ibolosen labai, ma jo in hamon tiri ili, ili bolo iri kon udu len labai ta Jerusalem. \s1 Pol asehek iy asahan lau ta Kindrei \r (Aposel 9:3-19; 22:6-16) \p \v 12 “Ma jo mene amekes gok i buku doh, ma iri tinan tiri pris badu Juwis badeh, atehei la-ukei ramen eme minek ta atiye kili kon tinan Damaskus ta ateu iri lau ta \m Kindrei kala bolo asiu lulik. \v 13 Ndramak tinan, an ndrame loken ndrare le alih. Jo badeh, edek san, se nawin bwe jo anyolom lomada sun ari udu kandrah eme andri. Sun doh lomadan boto-on ma tinan labai ja ta an. Sun doh anya eme bwele-ek, ma hawe oro lau rayah nane adek hawek. \v 14 Aso mari atarah ala bada munyak, ma jo anuhun boho ndramak ari aloh jo i boho iri Hiburu i buku doh, ‘Sol, Sol, tasah handru, ou anya adai jo kimek? Ou badeh, bwese maha-an ma sisi-in ta kandriyen, buku ou le amwenen morohani katim i ta lakou madan labai.’ \p \v 15 “Eme ma jo asumon bohon i buku doh, ‘Laban, ou are badeh?’ Eme Laban asehek i buku doh, ‘Jo Jises, ou nane abo gok ta adai jo kede-eh. \v 16 Arile, ou suri ou, ma ou ales. Nadah, jo ewek hawem, atehei ou ta amekes gok tek. Ma ou kameh atiye sahou ta iri lakou nane ou ndranyolom, ma ta iri lakou jo kameh leheya ou ta aliy. \v 17 Jo kameh sebenei ou, buku ou ala ado bolo iri lau tam amwenen, ma iri lau leheleh. Jo kameh suni ou ala bolo iri, \v 18 ta aseh mada iri ilik kanyolom kon ja, ma iri katubuni kona iri kili ta boto-on ta balik, kili hamon ta Kindrei. Kindrei kameh mani kandriyen ndra-in tiri mara-ei, ma iri kameh winiyan akohok kon hawe iri lau nane asahan ndrabun, i san ta iri atehei budon tiri in tek.’” \s1 Pol asehek nyala gok iy amekes \p \v 19 Pol asehek ili le i buku doh, “O kabin Agripa, jo bala bwalek ta lakou badu kandrah mene jo anyolom ma anuhun bwe. \v 20 Jo atiye sahou ma bwena handru ili tiri lau badu Damaskus. Ano ja, jo atiye ili bolo kon Jerusalem ma Judiya mara-ei, ma ili bolo kon leheleh ale. Jo atiye sahou, ta iri karuwani kandriyen ndra-in tiri ki-iu, ma iri katubuni ndrine iri kili ta Kindrei. Ma iri kamekes kandriyen mwasin ta leheya iri ndratubuni ndrine iri handru. \v 21 Ta idoh le badeh, iri Juwis ame tawi jo udu ndra bolo asiu tinan ta Kindrei, ma anya kadai jo kimek. \v 22 Arile, Kindrei tondrokei jo udu mwasin labai, eme isos dah. Eme ma, jo ales ja dah, ma tiye sahou ili tiri lau marakon bwisik, ma tinan, ta saba lakou jo ndranyolom. Jo batiye randra sahou ja bwe. Jo tiye sahou randra le doh, iri propet hawe Moses mene asehek ta aliy kameh asahan. \v 23 Iri asehek i buku doh, ‘Mesaya, iy ndramak nane Kindrei tiye iy eme ta akohok iri lau tan, iy kameh akohok sisi-in ma iy imek, eme ma iy le ari doh kameh ili bwena labai ta amak ere bolo lek tan eme awas ja. Ma iy kameh atiye sahou ta nyala sun ta Kindrei ili tiri Isra-el, ma ili tiri leheleh ale.’” \s1 Pol tiye Agripa katehei budon tan kili ta Kindrei \p \v 24 Pol asehek sahou tan kahis le, arile Pestus eme sokolowa iri sahou tan, ma arah anya, “Pol, balem ndra-au, tanan tam tinan labai, ma bwidi ou asahan lolo-ou!” \p \v 25 Eme Pol anya, “Pestus, ou kabin tinan labai! Jo babo lolo-ou bwe. Iri sahou marakon badeh, ndra handru le ai, ta laleyah bwe. \v 26 Agripa, ou kabin, jo winiyan banoh ta asehek iri lakou marakon ewek tam bwe. Jo tanan lakou marakon doh winiyan bataras madam, ma ndranyem bwe. Ou ndratanam iri marakon, tasah iri lakou marakon doh mene basahan bare kabwak bwe. \v 27 Agripa, ou kabin, ou atehei iri budon tam mara-ei in ta sahou tiri propet deh bwe? Jo ndratanan, ou atehei budon tam mara-ei in aliy.” \p \v 28 Agripa eme ndremenya Pol i buku doh, “Buku sah handru? Ya, na bolo len sese le dah, ou abudon anya, ou kameh winiyan andrekei jo asahan ‘Kristen’ nadeh?” \p \v 29 Pol anya, “Buku len sese le, o, len ari ma buruwen badeh, ndra mwasin le. Jo asolom ili ta Kindrei i buku, ou ma hawe iri lau marakon are kede-eh, anuhun sahou tek dan, aha marakon kameh winiyan asahan buku le jo. Arile, jo bwalek ta iri kameh bawei aha na sen, ma atehei aha ala ado bolo asiu lulik.” \p \v 30 Eme ma kabin Agripa suri iy ales, Pestus hawe Banis, ma hawe iri rayah nane manyah are hawe oro ma taloh. Iri marakon suri iri ales are loke, \v 31 ma iri adek ala bolo bosoh ari ja, atilik nyala iri, i buku doh, “Iy ndramak doh badeh, babwidi ari kandriyen ndra-in ta adai iy, o, iy kudu bolo asiu lulik kudu gwek, bwe.” \v 32 Agripa eme tiye ta Pestus i buku doh, “Ou winiyan tolowei iy ndramak kodo-oh iu laleyah. Arile, iy amwenen aso-ok Sisa kanuhun sahou tan.” \ms1 Pol iu ili Rom \mr (Kalan 27–28) \c 27 \s1 Iri atehei Pol i bolo ndron ra-ei ta ili Rom \p \v 1 Iri atilik nyala iri ano, eme ma nyala iri ndra le randra, ta aso\f + \fr 27:1 \ft Na len Pol edek ili asahan Jerusalem badeh, anyolom ta aliy i buku Luk ili hawen ale. Ou anyolom i ta sahou udu Aposel kalan 16:10 ma hawe 21:17. Na len Pol oro ado Judiya au ala Rom, sebwe Luk ili hawe oro ale.\f* kakohok ndron ta ala kon tinan Rom udu bolo munyak tinan Itali. Iri ame atehei Pol ili hawe iri lau rayah ja nane badu bolo asiu lulik, i mine tinan ari nyaran Juliyus. Iy ta atondrok iri lau ta bahun, kane iri ma rinek (100). Iy badu hawe iri lau ta bahun ta Sisa amwenen. \v 2 Ahi sandroh ala ndron ra-ei badu kon tinan Adramitiyum. Ndron doh anya kalakak lawe-e le bada kon tinan mara-ei loboho Esiya. Eme ma ahi alakak au a len. Ndramak ari nyaran Aristakus, badu Tesalonaika udu bolo kon munyak tinan Masadoniya badeh, udu bolo ahi ale. \v 3 Na len ari ja badeh, ahi asahan Saidon. Juliyus badeh, amekes kandriyen mwasin labai handru ili ta Pol, eme iy tiye Pol kili loken kanyolom iri kawas tan, ma iri winiyan adeu nan nyamon. \v 4 Ahi ado Saidon, alakak au a len bolo ndras, kona busu badu Saipres, tasah jor atohou udu no-o ndron tahi. \v 5 Ahi ame apou bayau ala bilisiu mirihik ta kon munyak tinan Silisiya, ma Pampiliya, ano ahi asahan Maira udu loboho kon tinan Lisiya. \v 6 Ahi are doh badeh, tinan ta atondrok lau ta bahun ili atou ndron ra-ei badu Aleksandriya anya kili Itali. Eme ma iy atehei ahi ala bolo ndron doh ja. \p \v 7 Len sabe kolek ahi alakak amunum le ai, tasah jor ma bayau laba tinan labai soroya ahi. Iri lau badu bolo ndron doh boto-on labai, ma ahi ala asahan mirihik ta kon tinan Nidus. Arile, jor sokei ahi ma ahi winiyan balakak bala doh ja bwe. Eme ma ahi tubuni ahi ja ala are busu Krit. Mirihik ta no-o sabon Salmone, ma ahi au ala bilisiu mara-ei ta busu. \v 8 Iri lau badu ndron badeh, boto-on, ma ahi atas Krit le ai. Ma ahi ame asahan kon ari, iri aloh Salan Korohan, bado len ta kon tinan Laseya bwe. \p \v 9 Len solo-an iu ma ahi manyah laleyah are loboho doh, ma len ndrabun tiri Juwis ta abeles iri ta nyamon badeh, ndrano ndra-au.\f + \fr 27:9 \ft Na len ndrabun doh, iri Juwis abudon ta len Kindrei mani kandriyen ndra-in tiri lau mwan ma badih. Ou anyolom in ta Lebitikus kalan 25:9. Na len doh iri tine jor asahan ma bwidi ndras tinan iri aloh Medetereniyen andra-i labai.\f* Ma bayau atohou a tinan le gwek, eme ma Pol tiye sahou batanau ili tiri i buku doh, \v 10 “Aha lau marakon, aha kanuhun, jo ndratanan buku taha au nadah, taha kameh ndruni len ndra-in labai, ma lakou solo-an kameh iu. Iri sanuw hawe ndron kameh iu. Taha marakon kameh amak ale.” \v 11 Arile, tinan ta atondrok lau ta bahun banuhun sahou ta Pol bwai. Iy in hamon le ta budon ta ndramak ta atondrok ndron, ma tama ndron doh amwenen. \v 12 Sala kon nane doh ari korohan mwasin ta ndron aton ta jor tinan ere aliy bwe. Eme ma iri lau solo-an are bolo ndron nane doh, atehei sahou tiri i le randra ta ahi ka-au le ai. Buku ahi winiyan, asahan Piniks, ma kado aliy katondrok \m jor tinan nane doh kamondrei. Kon Piniks doh badeh, salan ari le udu bilisiu ili kum, ma loboho an i andri ta busu Krit. \s1 Jor ma bayau atohou i tinan le gwek \p \v 13 Nadu yayah sese le atohou eme loboho kum, iy batohou boto-on handru bwe. Eme ma iri anya, ahi winiyan alakak ala bolo salan ari nane iri asehek ta aliy. Eme ma iri aruwi hanai eme loken, ma ahi alakak lawe-e le bada kon badu Krit au ai. \v 14 Arile, se nawin bwe, jor tolau laba tinan atohou udu busu eme tahi. \v 15 Jor eme atok ta ndron badeh, ma ndron mara-ei totoreh, ma winiyan batas bamwenen ja bwe. Oro lau badu ndron anya katobolowe, tobolowe labwe, eme ma oro tubuni ndron in le bwele-e bayau, ma jor atuw ahi le ai. \v 16 Ahi alakak au ala koroha nadu busu ari, iri aloh Kauda. Oro lau badu bolo ndron badeh, anyolom bwalu bameles bwe, oro ame aluwiy ma boto-on eme bwele-e ndron tinan. \v 17 Oro aruwiy eme bwele-e ndron tinan, ma oro tabuwi ndron mara-ei ihis na le ndriliki. Oro anoh, kora-on oro katas kala kahis ta kababi udu loboho kiri Libiya. Eme oro lukumwi balei mari eme andri, boto-on ta jor ma bayau le badeh, teheya ndron ma oro. \v 18 Na len ari ja badeh, jor ma bayau i tinan le gwek. Eme ma iri lau badu ndron badeh, akeh sanuw rayah iu i ndras. \v 19 Atoha, ano atoha ja badeh, iri lau badu bolo ndron akahei ndriliki ma liwiliu ta balei, mara-ei i bolo ndras. \v 20 Len sabe buruwen badeh, ahi banyolom an ma ndrau bwai. Jor atohou boto-on ma bwidi bayau a tinan mara-ei, ma bwidi ahi kameh ta amak le ai. \p \v 21 Len sabe buruwen badeh, ahi baimon se nyamon bwai. Eme Pol suri iy ales udu bwena tiri lau badu ndron, ma asehek anya, “Buku taha nane ado ndra Krit, aha kanuhun bohok badeh, jor ma bayau dah winiyan basahan tataha bwe, ma ado winiyan bakeh iri sanuw bala ndras bwe. \v 22 Arile, nadah aha sabwerei, ndrine aha mara-ei kasekesek, tasah taha mara-ei winiyan bamak bwe; ndron le kameh atahan ma atuh iu. \v 23 Jo badeh, lau ta Kindrei ma jo badeh, lohowan tan; len marakon jo atehei bwili ndru-uk i andri i tan. Na ben nane iy suni angelo tan ari eme ales ere mirihik tek, \v 24 ma iy tiye tek i buku doh, ‘Pol, ou sanoh! Ou kameh ala ales are mada Sisa. Ou anuhun, Kindrei ndranuhun sahou tam, ma iri lau marakon are bolo ndron hawem kede-eh kameh winiyan bamak bwe.’ \v 25 Ya, aha marakon sanoh! Jo atehei budon tek mara-ei in ta Kindrei, iy kameh winiyan bwidi lakou marakon i buku le iy asehek tek na ben. \m \v 26 Arile, taha kameh alakak ala amar ado bwele-e busu rayah.” \p \v 27 Winiya ben ronoh hahuw jor teheya ahi ma ndron au ala andri bolo ndras tinan laleyah, iri aloh Medetereniyen. I buku ben alih badeh, oro lau badu ndron atona, buku ahi ndrame mirihik ta kon. \v 28 Eme ma oro akahei malou i gwa ta tumundroh gwa, buku gwa lawe-en, o, bwe. Oro aruwiy eme loken tomondrohei lawe ta gwa i buku nyahan lunoh\f + \fr 27:28 \ft Nyahan lunoh badeh, i buku mita tonoh ndro taloh (37).\f* (20). Ahi atas ala sese, ano oro tumundroh gwa ja. Oro tomondrohei lawe ta gwa ja doh asahan nyahan ronoh limeh\f + \fr 27:28 \ft Nyahan ronoh limeh badeh, i buku mita lunoh ndro taloh (27).\f* (15). \v 29 Ma bwidi oro anoh labai, kora-on ndron tahi katas kili bwele-e bek, eme ma oro akahei hanai ma hahuw badu hamon i gwa ta ateu ndron kere rasi. Iri ame asolom ta kon kaleu suwi. \v 30 Oro lau ta ndron badeh, none ta atobwak, oro tolowei bwalu bwisik ili gwa, ta wendreya ta ala apeu rayah hanai ja ta no-o ndron. \v 31 Arile, Pol asehek ili tiri tinan ta tondrok lau ta bahun ma iri lau ta bahun i buku doh, “Buku oro lau doh bado ndron bwe, aha kameh winiyan bado bwe.” \v 32 Oro lau ta bahun ame sani iri ndriliki ta ateu nadu bwalu nane doh, ma ateheh iu ili bolo ndras laleyah. \p \v 33 Kon ndraleu, an anya kasahan keme loken ai, Pol eme asehek sahou ili ta lau marakon nane are bolo ndron badeh, kaimon nyamon. Iy tiye i buku doh, “Idah, buku wik la-uh amwenen ai, aha tikisiy tinan labai, ma aha baimon se nyamon bwe. \v 34 Jo anya kasehek taha marakon i buku doh, aha kaimon nyamon nadah, tasah nyamon kameh amekes ndrine aha abadok, ma udu mwasin. Aha kanuhun, taha marakon kameh are mwasin, ma ari tataha winiyan bamai bwe.” \v 35 Pol asehek sahou i tiri ano, iy andrei jabi ramen rayah udu minen, iy edeu salom i ta Kindrei udu mada iri, ano iy boso-ei ma iy aimon. \v 36 Sahou doh ili bwidi ndrine iri lau mari sekesek, ma iri aimon nyamon. \v 37 Kane ahi lau marakon are bolo ndron nane doh i se badeh, ma lunek ndro tonoh onoh (276). \v 38 Iri aimon nyamon ano, iri ame akeh lakou rayah buku ndrom wit iu i gwa ta amekes ndron kapek keme loken. \p \v 39 Kon aleu amwenen badeh, ahi anyolom bada babi, arile iri lau badu ndron ja badeh, tana iri kon doh ja bwe. Iri ame anyolom salan ari iu ili bolon ma bada babi mwasin ere aliy. Ma oro ame abudon ta akohok ndron kili salan nane doh. \v 40 Oro ame sani ndriliki ta hanai ma hahuw nane doh atuh iu ili andri bolo ndras. Na le liliy, oro tolowei ndriliki oro nane \m bawei bos tinan ta kulik na aliy iu. Ano oro sihi balei badu no-o ndron i loken ta jor katuw ndron katas ki-iu kili salan. \v 41 Arile, ndron atas ili bwele-e kababi ma amar ili bwele-e mek; no-o ndron ili ihis ta kababi udu gwek. Goi atohou eme tabasi mwe-e ndron, ma ndron atahan i le munya-un ndra-in. \p \v 42 Iri lau ta bahun amekes budon ta adai iri lau ta bolo kou kamak, iri abudon anya kora-on iri kaya kala amik ma iri katobwak ka-au. \v 43 Arile, tinan ta atondrok iri lau ta bahun badeh, anya kaseben Pol, ma iy tiye tiri lau tan samekes kandriyen doh. Iy eme tiye tiri lau nane, tana iri ta aya, kasandroh kala gwa, ma kaya kala amik. \v 44 Ya iri rayah ja a-en hamon tiri, aya a-en bwele-e iri sabar ta ndron tahi nane atahan, ma lakou rayah ja badu ndron atahan ili bwisik. Ahi amekes i buku doh, ma ari tahi bamak bwe. \c 28 \s1 Pol udu busu Malta \p \v 1 Ahi marakon aya asos babi ndra mwasin le ai. Ahi atanan buku busu doh iri aloh Malta. \v 2 Iri lau badu busu doh amekes kandriyen mwasin labai eme tahi. Ur undruk laba tinan eme andri ma bwidi bolo kon anyala labai. Eme ma iri tabani jih, ano iri luhi ahi marakon ala anyan jih, ta amekes bolo oda ahi ki nyarahan. \v 3 Pol ale atubwa ma atukum ndro-o jih rayah, ta edeu i jih. Jih nyarahani mwak ari udu bolo iri ndro-o jih nane doh, ma iy seselek eme len, ma ini mine Pol. \v 4 Iri lau badu busu doh anyolom mwak sukik udu mine Pol, ma mani iri atur laleyah, ma iri asehek i tiri ari, ari anya, “Sebwe iy ndramak kede-eh ta idi lau nadeh, eme ma mwak ini iy doh! Iy bamak bado ndra bolo ndras bwe, arile kindrei nane ta edeu maha-an i ta lau ta amekes kandriyen ndra-in badeh, bwalen iy ndramak kodo-oh ta udu kon munyak dah nadeh.” \v 5 Arile, Pol toboroyani mwak nane sukik udu minen taku i jih ma minen bisi bwe, ma se ndra batekeu bwe. \v 6 Iri lau marakon ado atondrok ta minen kase, ano iy kataku ma kimek. Arile, iri atondrok luluwen labai ma iri banyolom ari lakou basahan tan bwe, iri ame tubuni budon tiri ma asehek budon tiri anya, “Iy kede-eh ari kindrei!” \p \v 7 Munyak nane ahi are aliy badeh, ere mirihik ta munyak ta ndreh kabin ta busu doh, nyaran Publiyus. Iy ndreh kabin doh andrei ahi ala asiu tan, ma iy tondrokei ahi udu mwasin labai winiya len taloh. \v 8 Tama Publiyus badeh, ibo sik in andri, badan nyarahan, ma walou ere tan. Pol eme ili bolo asiu hawen, iy asolom iy, iy atehei minen i bwele-en ma nyumuri iy amwenen ja. \v 9 Pol amekes i buku doh, ma iri lau badu busu nane doh ame le hawen, ma iy nyumuri iri amwenen ale. \v 10 Iri lau badu busu doh adeu tahi lakou buku ndramas badeh, solo-an labai, ma ahi anya ka-au badeh, iri adeu nahi lakou buku nyamon ta atondrok ahi are ndron. \s1 Pol ere Malta iu ili Rom \p \v 11 Bun ma taloh badeh, ahi are busu Malta. Ano ahi a bolo ndron ra-ei mene aton ta jor tolau ere busu doh. Ndron doh badeh, badu kon tinan Aleksandriya. Udu no-o ndron badeh, iri torowenei malawi nadu kindrei Sus\f + \fr 28:11 \ft Nyara nadu Sus ma la-uh doh badeh, Kastor uru Poluks. Uru badeh buku nyam tiri. Iri abudon uru nyam doh badeh ta aseben iri lau na len iri alakak a bwele-e ndras.\f* ma la-uh udu aliy. \v 12 Ahi alakak ala asahan kon tinan Sirakus. Ma len taloh ahi are kon tinan doh. \v 13 Ahi alakak are loboho doh ala asahan kon tinan rakon, iri aloh Regiyum. Na len ari ja badeh, jor atohou udu loboho kum eme, ma na bolo len la-uh le badeh, ahi asahan kon tinan Puteyoli. \v 14 Loboho bolo kon tinan doh, ahi ndruni lau ta Kindrei rayah, iri ame ndremenya ahi kare hawe iri winiya wik ari op. Ano iri ado, ahi adek amwenen au ala kon tinan Rom. \v 15 Iri lau ta Kindrei badu Rom anuhun, buku ahi adek ala, eme iri adek ame mada baen ta Apiyus, ma kon iri aloh Asiu Ma Taloh Ta Amunyau, atondrok ahi are aliy. Pol anyolom iri le badeh, ma iy edeu wurah tinan labai i ta Kindrei, ma bwidi ndrinen sekesek labai. \s1 Pol asahan Rom \p \v 16 Ahi asahan bolo kon tinan Rom badeh, iri lau ta atondrok kon Rom leheyani asiu raem i ta Pol le amwenen udu aliy, ma hawe ndramak ari ta bahun udu hawen ta atondrok iy. \v 17 Pol udu Rom buku len taloh ai, eme ma iy atehei sahou ili tiri tinan tiri Juwis kame ta tukum ari. Iri marakon ndrame ndratukum ndrano, iy eme tiye tiri i buku doh, “Aha nadu tine, jo in hamon ta kandriyen ta tubu taha iri mene. Jo ale bamekes ari lakou ta bolowa iri lau tataha bwe. Arile, iri tawi jo ili bolo asiu lulik udu Jerusalem, ano iri atehei jo ili mine iri Rom. \v 18 Iri lau tinan badu Rom ndremenya jo, ma anuhun sahou tek, ma iri anya katalou jo ki-iu laleyah, tasah iri basilahei ari ndra-in jo amekes ta adai jo kimek bwe. \v 19 Arile, iri Juwis banuhun sahou doh bwe. Eme ma jo ari madasan ja bwe. Jo badeh, anya Sisa kanuhun sahou tek. Arile, bala buku jo anya katehei iri lau tek amwenen ta ari lakou a ta mada sahou bwe. \v 20 Ta katin doh le, eme jo aloh aha marakon ame. Jo anya kanyolom aha, ma kasehek sahou hawe aha. Tasah, jo atehei budon tek mara-ei, ma jo atondrok sahou tandrakan nane taha lau marakon badu Isra-el atondrok kede-eh. Ta idoh le, iri bawei jo na sen dah.” \p \v 21 Iri Juwis tiye Pol i buku doh, “Ahi bakohok ramen la-ukei badu Judiya eme tahi ta tiye nyalam eme dah bwe. Ma ari ndramak badu Juwis bame basehek tahi, ma amekes sahou rayah ndra-in ewek tam, bwe. \v 22 Arile, nadah, ahi anya kanuhun budon tam le amwenen, tasah ahi tanan, bolo kon mara-ei iri lau amekes sahou ta bobose ili ta lakou nane ha-un asahan bolo taha Juwis kede-eh.” \p \v 23 Eme iri asan len tiri ta ame hawe Pol, ma iri lau solo-an ame hawe Pol ala asiu nane iy udu aliy. Na mandraben ili ano beyeh an amai, iy asehek i tiri ta nyala tondrok ta Kindrei le ai. Iy asehek tiri ta kandriyen malen ta Moses, ma sahou iri torowenei udu bolo buk tiri propet bwena. Na iri sahou doh, iy anya kamekes budon tiri mari kili ta Jises. \v 24 Eme ma iri lau rayah a-en hamon ta sahou ta Pol. Arile, iri rayah badeh, batehei budon tiri ba-en hamon ta sahou tan bwe. \v 25 Eme ma iri asehek sahou solo-an ta andres ere ndrokowa iri le amwenen, ma iri kadek ka-au. Arile, ma mwena badeh, Pol sihidi sahou randra i tiri i buku doh, “Malawin Ndrabun badeh, asehek sahou handru ili ta tubu taha iri eme boho propet Aisaya. Iy asehek i buku doh: \q1 \v 26 ‘Ou ala asehek kili tiri lau badu Juwis buku doh: “Aha kameh anuhun sahou san solo-an, arile aha kameh winiya bala tanan kati sahou handru bwe. Aha kameh anyolom san solo-an, arile aha kameh winiyan baseleyani ari lakou bwe.” \q1 \v 27 Tasah, budon tiri lau doh badeh, ndrandra-i, ma ndranye iri ndrawoyah ta anuhun iri sahou, ma iri ndratubuluhi mada iri. Kora-on iri kanyolom iri lakou, ma kanuhun iri sahou, ma iri katanan kati sahou handru, ma iri katubuni ndrine iri, ma kame hawek, ma jo kameh bwidi iri asahan mwasin ja.’” \rq Aisaya 6:9-10\rq* \p \v 28-29 Ma Pol isan sahou tan ta ano i buku doh, “Buku aha ndratanan, sahou dah ta lahou mwasin Kindrei amekes ta akohok taha ame hamon ja, badeh, Kindrei ndratehei ndra-au ndrala tiri lau badu kon leheleh. Iri kameh winiya anuhun amwenen!”\f + \fr 28:28-29 \ft Iri tarou rayah ta buk ndrabun asehek i buku doh: (29) Eme ma Pol sani sahou tan ano, ma iri Juwis adek au, ma iri asehek sahou solo-an ma andres iri amwenen.\f* \p \v 30 Jaha ma la-uh badeh,\f + \fr 28:30 \ft Luk basehek taha ta saba lakou asahan ta Pol hamon ta jaha la-uh ano. Iri lau rayah ta tanan abudon, Rom atehei iy iu laleyah. Iri lau rayah ja abudon, iri lau tinan ta Rom adi iy imek.\f* Pol ere le asiu iy sihinei ta iy udu aliy. Iy sekesek labai ta iri lau ame manyah hawen. \v 31 Iy banoh bwe ta asehek nyala tondrok ta Kindrei i tiri, ma iy leheya iri ta sohowa Laban Jises Krais.