\id TIT Titus, Luqa in Solomon Islands, 1st Proofread corrected, rvwd Feb99/May2000, Cch/Gross, Tr/Adch:AGZ, 5th rvsd:JuneAugNov2001/AugSep2002, Dec2002, revised for naturalness- Dec 2011, Dr Zobule \ide UTF-8 \h Taetusi \toc3 Tae \toc2 Taetusi \toc1 Taetusi \mt Ti Taetusi \c 1 \s Na Popodalaina Na Leta \p \v 1 Ara Paula na nabulu tana Tamasa, na tinoni tagarunuqu tai Jisu Karisito ko mana vaneqia na rarange tadira sa vileria na Tamasa beto mana tokaniria ko mai isongia na gigalaina na sosoto sa vuania na pangagana na Tamasa. \p \v 2 Na rarange beto na gigalai aipira sa qai vangangaligita ko taqe korapa gelenia gita sa na toa jola pa moa tu sa taringunguti vanigita na Tamasa sake seseke. \v 3 Ko pa ona totoso tavilena poni sa ule vakaberenia pana tarae na Tamasa sa na ona nongoro api, ko na roiti taraenia na nongoro api sa na Tamasa na oda inaalo sa garununisiu ara ko mana roitinia sau. \p \v 4 Na leta api sa lao tao Taetusi, ao qu vei na tuqu sosoto pana rarange taqe mekarai isongia. \p Na vairoqu vaialona beto na bule tana Tamasa na Tamada beto tana Karisito i Jisu na oda inaalo mai somana tamu. \s Na Roiti tai Taetusi pa Nusa Kiriti \p \v 5 Na ginuana qa vasuverenigo ara pa nusa Kiriti sao sa vei ko mu vatuvisi vataleria sa na roiti qai oqoro okoto beto mu vile vatoqoria pa okokoto gugusu ketakoi sira na tinoni mamata, isa vei qa tei vavanaunigo tu. \p \v 6 Isa sa pada ko mina tinoni mamata sa na tinoni sa kepore na ona pake, kame gu na maqotana, ira na tuna qai tinoni rarange beto qaike tagigalania na toa gogoborodi babi na uana duduvilidi. \v 7 Ura sa poreveveina sa na tinoni kopu sa mina tinoni kepore na ona pake, ura isa sa mamatania sa na roiti tana Tamasa. Ko na tinoni isa sa nake tinoni tututiona roroqu mekana, nake tinoni oqoqanai kokora, minake tinoni didigere aruna, minake tinoni vavaipera goboro, beto nake tinoni sa nyaqo isisongona pana soana selana sisa. \p \v 8 Goto isa sa na tinoni vakamu goto tinoni tu, sa tavaraguania na jongana, sa boka gaiti vatalea na roquna, sa tuvisi, sa toania na toa liosona, beto sa aru mulenia mekana pana uana ikeredi. \v 9 Beto na tinoni sa aru tamana vamauria na vaivagigalaina na nongoro tarangena sisa ko sa boka paranga vaivaneqinia na vaivagigalai togasana beto sa boka udukia na dia sela ira qai paranga kakanai na vaivagigalai togasana. \s Ira Na Tinoni Vaivagigalai Sesekedi \p \v 10 Ura kubo sira qai duduvili, sa kokoba na dia paranga beto qai tinoni vaitoni vapiru. Ira kaki puku tinoni Jiu ira qai tapobe sa qai vajolai sosoto sa na roiti aipira. \v 11 Ira sa na tuvisina sa mai tangujupuku ura ira na sakasa qai vaivagigalainia ko qai isisongodia pana soana selana sa sake garo ko bai vaivagigalainiria ba qai vaivagigalainiria tugu ko qai vapeluku vapiruria sira na tatamana doruna. \v 12 Kai dia tinoni kokorotai mekadi tugu ira sa tei poja vataleaona tu sa pira sau, \q1 <> sau. \p \v 13 Na vavakato api sa sa sosoto ko sa vei sa mu uduku votuniria na dia sela, ko mai togasa pana dia rarange \v 14 beto maike jujuno goboroniria na vivinei jojongadi gogoborodi tadira na Jiu beto na garunu tadira na tinoni qai gabala vapelenia na sosoto. \v 15 Doru sakasava sa qai lioso tadira qai lioso, goto tadira qai paji beto qaike vasosoto sa kepore tugu sa kai sa bi lioso, goto sa paji sa na vonanadi beto na monanadi. \v 16 Qai ule votunia sa na Tamasa qai gigilaidia qarigu, ba na roiti qai tabata votunia pana dia uana qai ulenia sa qai kilu palenia tu ira sa na Tamasa. Qai lulasa pa moena na Tamasa, qai duduvili, beto kepore kai roiti jongana bai boka roitinia. \c 2 \s Na Paranga Vavanau \p \v 1 Goto ao sa mu vaivavanauniria sira na sakasava sa garo pana vaivagigalai togasana. \v 2 Mu vavanauria sira na marene iviva kokoleidi ko maike tinoni gua goboro, mai tinoni tapangagadi, mai gaiti vatalea na roqudi, mai togasa pana dia rarange, pana dia vairoqu beto pana dia turu vangaju. \p \v 3 Mu vavanauria tugu vei sira na rereko iviva kokoleidi ko mai toania na uana pangagana, maike vaipopoja vikere, maike pinausunia na kole bubuku gojo, goto mai vaivagigalainia tu ira sa na uana jongadi. \v 4 Ko mai vei sa mai vatavagigalaria sira na iviva rereko koregadi ko mai roroquria na marenedi, mai roroquria na tudia, \v 5 mai gaiti vatalea na roqudi, mai lioso na dia toa, mai rereko vatana vatale pa dia tatamana, mai vajongana lao tadira na goto tinoni, beto mai kole vaiketai tadira na marenedi. Ko mai toa vei ira sa ira na goto tinoni maike poja vivikeria sa na paranga tana Tamasa. \p \v 6 Ira na marene sae korega tugu vei sa mu paranga vaneqiria ko mai gaiti vatalea na roqudi. \p \v 7 Pana doru ginugua sa mu vabatiniria na mua toa mekamu ko mi kai dodoro tutina pana roiti jongadi. Na mua vaivagigalai mi kolea na uana jongana, na pangaga \v 8 beto na paranga vavagegoai sa lenoniria na vaipitu, ko ira qai kanago sa mai kea ura kepore sa kai sa ikerena mai boka vakesanigita. \p \v 9 Mu vavanau vataleria sira na pinausu ko pana doru sakasava sa mai kole vaiketai tadira na dia bangara, mai vaqeraria, maike paranga kakarovoria \v 10 maike aru golomoria na isisongo, goto mai vabatiniria na dia toa tarangena vatale, ko doru dia roiti mai sari vabata jongai sa na vaivagigalai tana Tamasa na oda inaalo. \p \v 11 Ura na vairoqu vaialona tana Tamasa sa pogoso lamenia na inaalo sa sa tei bola votu tu tadira doru tinoni. \v 12 Ko na vairoqu vaialona isa sa totoli vatavagigalagita ko ta kilu paleniria sa na uana vavakepore Tamasa beto ira na nyorogua ikikeredi tana kasia gusu, ko ta toania gita pa oda susuvere pa kasia gusu api sa na roroqu tavagigalana, na uana tuvisina, beto na toa madina, \v 13 tonai taqe korapa kukulinia gita sa na rane tamanana taqe gegelenia totonai mina bola votu na neqi ta noda Tamasa lavata i Jisu Karisito na oda inaalo. \v 14 Isa sa sa vania na ona toa mekana ko sa ruvatagita pana doru toa ikeredi beto sa valiosogita ko na ona tinoni poreveveina jola isa sa gita ko taqe ngangaliniria sira na roiti jongadi. \p \v 15 Aipira sira na sakasa mu vavanauniria, mu paranga vaivaneqiniria beto mu vaiudukuniria pana doru neqi qu isongia. Muke vamalumigo mekamu ko mai doro vagorego ira na tinoni. \c 3 \s Na Toa Susuvere Tana Tinoni Tana Tamasa \p \v 1 Muke koroto varoroquniria sira na tinoni ko mai vainongoro vaiketai lao tadira na babangara beto na tinoni vaitoni, mai vataberia, mai turu qaqiriniria sira doru roiti jongadi, \v 2 maike poja vivikere tinoni, maike tinoni vainonomi, goto mai tinoni vajongana lao tana goto tinoni, beto mai roiti vajonga lao tadira doru tinoni. \p \v 3 Ura gita sa perangana ba kepore tugu na roquda, taqeke vatabe, taqe tatoni vapiru, beto taqe pinausuniria soku nyonyorogua ikikeredi beto soku qeqera tana toa tini gu, taqe toania na toa ikikerena beto na uana kokono, qaike tavaraguanigita beto gita ba taqeke vaitavaragua lao lame tugu mekada. \v 4 Ba tonai sa bola votu sa na jongana beto na vairoqu jongana tana Tamasa na oda inaalo \v 5 poni sa sa alogita na Tamasa sa gita. Ba nake roiti tuvisidi taqe roitiniria gita sa taqe taalonia sa gita, goto na vairoqu vaitokai gu tana Tamasa. Ko isa sa alogita tonai taqe tavaliosonia na podo mule beto taqe tavakoregania na Gagala Tabuna. \v 6 Ko na Gagala Tabuna api sa sa tei vuva tari vapugelenigita tu na Tamasa tonai taqe vasosotoa gita si Jisu Karisito na oda inaalo. \v 7 Ko tonai sa vatuvisigita na vairoqu vaialona tana, poni sa taqe somana isongia gita sa na toa jola isa taqe korapa gegele kukulinia. \v 8 Na paranga tarangena sapi. \p Ego doru sakasava aipira sa qa nyoroguania ko ao mu paranga vaneneqiniria, ko ira qai rangea na Tamasa sa mai jujuno toliniria ira sira na roiti jongadi. Aipira sira na sakasava jongadi beto qai vaitokai tadira na tinoni. \s Na Tinoni Qai Vaivagigalainia Na Vaivagigalai Sesekena \p \v 9 Goto ao sa mu turu peleniria sira na toa vevei na vavaipera paranga duduvilidi, na tututidi ira na oda tite, na toa vaipiarai, beto na vavaiguania na Vavanau, ura na toa aipira sa qaike vaitokai beto kepore veveidi. \v 10 Na tinoni sa vavaipiarai sa mu paranga vabalaua na totoso momoe beto na totoso vinarua. Pa liguna isa sa muke galania. \v 11 Qu gigilaimua ao sa na tinoni sa vei isa sa na lulasa ikerena, beto sa toania na toa selana ko sa leve mulenia mekana. \s Na Paranga Vinaokotona \p \v 12 Tonai mana garunu laonia tamu si Atemasi babi Tukikosi, poni muna podeke vivitigia ko muna lame kamusiu pa Nikopolisi sao. Ura qa tei rove vatalea tu sa kode ketakoi tu sa mana suvere totonai mina kamua na totoso lomoso. \v 13 Mu podeke vivitigia ko mu vatana tokaniria ira Zenasi na loea beto i Apolosi, ko maike qasania kai sa pana dia rererege. \v 14 Ira na oda tinoni sa maike toa udapelu goboro, goto mai balau jujunoniria tu na roiti jongadi ko mai tokaniria sira qai tapata. \p \v 15 Ira doru qai suvere tavitisiu ara aipira sa qai valaoa na dia roroqu lavata tamu. Mu vakarovia na mei roroqu lavata tadira na tinoni rarange qai roroqugei ketakoi. \p Na vairoqu varialona mi vavaburogou agou doru.