\id 2TH 2 Thessalonians, Luqa in Solomon Islands, 1st Proofread corrected, Tr:RP, ACh:AGZ, CCh/Gross, rvwd:Aug99/May2001, 8th rvsd:May2001/JanAug2002/Dec2002
\ide UTF-8
\h 2 Tesalonika
\toc3 2 Tesalonika
\toc2 2 Tesalonika
\toc1 2 Tesalonika
\mt Pa Tesalonika Vinarua
\c 1
\s Na popodalaina na leta
\p
\v 1 Ara Paula beto ira Silovanosi i Timote.
\p Na leta api sa lao tamugou na ekelesia pa Tesalonika, agou sa isongogou na Tamasa na Tamada beto na Bangara i Jisu Karisito.
\p
\v 2 Na vairoqu vaialona beto na bule tana Tamasa na Tamada beto tana Bangara i Jisu Karisito mi somana tamugou.
\s Na Vaituti pa Mule Lame Tana Bangara
\p
\v 3 Ka visa tavitimei, qe doro vagaroa ko qe paranga jongana laonia tana Tamasa doru totoso agei sa na veveimiu agou. Ko sa tuvisina gu sa qe vei inana agei ura sa ijoko vatale sa na rarange tamugou beto sa vovonu sa na vairoqu tamugou. 
\v 4 Ko agei mekamei qe vavaqatania tadira na ekelesia tana Tamasa sa na veveimiu agou, ura qu gosororia sira na tapata beto na vitigi ba qu turu vangaju beto qu neqi pana miu rarange sagou.
\p
\v 5 Ko api sa ule votunia sa na vaituti tana Tamasa na tuvisina beto ko na Tamasa mina dogoro vapadagou pa nona binangara isa qu korapa gosoro taleni vitigi sagou. 
\v 6 Na Tamasa sa na tuvisina, ko kode mina bei vaniria tugu na vitigi sira qai vatakulangagou agou. 
\v 7 Goto agou qu gosororia na vitigi beto agei sa kode na Bangara i Jisu mina vamanotogita totonai mina votu lagere vei pa noka tavitiria ira na ona mateana neqidi jola. 
\v 8 Kode mina lagere tavitia na iku vuvurunguna ko mina vakilasaria sira qai kilunia na Tamasa beto ira qaike vatabea na nongoro jongana ta noda Bangara i Jisu. 
\v 9 Ko ira sa mai gosoria sa na vinakilasa tana pipiara kole jolana beto ko mai tapikata vasou pale pana tana Bangara beto pana ona neqi poreveveina lavatana 
\v 10 totonai mina mule lame sisa. Ko totonai mina mule lame si Jisu sa ira nona tinoni taviledi beto ira qai rangea isa sa mai vatarasaea beto mai valavatia sisa. Ko agou ba kode muna somana tavitiria tugu sira nona tinoni ura qu vasosotoa agou sa na nongoro qe vavakato vanigou agei.
\p
\v 11 Ko sa vei inara sa agei doru totoso qe vavara tokanigou sagou, ko na Tamasa mi doro vapadanigou isa vei sa kukunigou beto ko mi vagore voturia sira dorudi na miu nyorogua jongadi beto na vuana na miu rarange, 
\v 12 ko mu valavatia na isongona na oda Bangara i Jisu, beto isa ba mina valavatagou tu sagou ura sa roroqugou na oda Tamasa beto na oda Bangara i Jisu Karisito sagou.
\c 2
\s Na Mule Lame ti Jisu Karisito
\p
\v 1 Qe tepagou agei sagou, ka visa tavitimei, ko na veveina na mule lamena na oda Bangara i Jisu Karisito beto tonai tana vaikamu gosoria gita sisa 
\v 2 sa muke oqani tajou vaneneqerenia babu takulanganiria agou sa kaki nongoro goborodi na lame veidi tana Gagala Tabuna, na vavakato babi na leta sa koko lame vei tamigei qarigu ko qai ulenia sa tei lame tu sa na rane tana Bangara qarigunigou.
\p
\v 3 Muke vaniria na lolomo sira na tinoni ko mai vasianagou, ura minake tei lame tu sa na rane isa tinganai mina kamua mai tu sa na totoso vuvukele riudia tadira na tinoni beto ko na kana tana Tamasa, na isongona na Tinoni Ikikerena Jola, isa mina tapipiara vakilasa sa mina votu lame mai tu. 
\v 4 Ko na Tinoni Ikikerena Jola isa sa mina paranga vakekeporeria sira doru sakasava qai tapopoja tamasa babi na sakasava qai tavatarasae, beto sa mina lao tome toqo pa zelepade madina tana Tamasa ko mina gigalia mekana sa isa sa na Tamasa minagu.
\p
\v 5 Ai vei quke roqu vakoititia tu agou sa perangana qa korapa suvere tavitigou sa qa tei pojanigou tu sa na veveidi aipira? 
\v 6 Ko kopira qu tei gigilaimiu tu agou sa isa sa aru vatogolia na Tinoni Ikikerena Jola ko tinganai mina kamua tu sa na ona totoso totonai mina votu vakabere sisa. 
\v 7 Na neqi ikikerena sa tei korapa tu roiti pa soana golomona, ba mina tateku varijo mai tu sa na tinoni sa aru vatogolia isa beto sa mina votu vakabere sa na tinonina. 
\v 8 Ko pa liguna tu mina tateku varijo na tinoni isa sa mina votu vakabere sa na Tinoni Ikikerena Jola api, ko i Jisu mina ivu vamatea beto mina vakilasania na ona kabere tonai mina bola votu lame sisa. 
\v 9 Na Tinoni Ikikerena Jola isa sa mina lame tavitia na neqi ti Setani ko mina roitiniria na roiti neqidi, na vinagigila sesekedi beto na roiti vaivagabara sesekedi. 
\v 10 Ko mina varoitiria doru soana seseke ikeredi tadira na tinoni mai gosoria na vinakilasa. Kode mai tavakilasa sira na tinoni ira ura isa tugu na sosoto bi aloria sa qai dainiadia. 
\v 11 Ko sa vei sa na Tamasa sa garunu tariniria na neqi vaitoni vapiru sira ko qai vasosotoa sa na seseke 
\v 12 ko ira doru qaike vasosotoa na sosoto beto qai tavaraguaniria sira na roiti ikikeredi sa kode mai gania na vinakilasa.
\s Agou qu Tavile ko Muna Taalo
\p
\v 13 Ka visa tavitimei, agei qe doro vaporeveveinai ko qe paranga jonganania tana Tamasa sa na veveimiu agou, ura na Bangara sa roroqugou sagou ko pa popodalaina tu sa vilegou na vua moena na Tamasa sagou ko muna isongia sa na inaalo, ko na Gagala Tabuna sa vamadigou sagou qu vasosotoa na vaivagigalai sosotona. 
\v 14 Isa sa na toa sa kukunigou na Tamasa pana nongoro jongana qe taraenia agei tamugou ko agou muna somana isongia sa na toa jongana ta noda Bangara i Jisu Karisito. 
\v 15 Ko inara sa vei sa, ka visa tavitimei, mu turu vamauru beto mu aru tamanaria sira na uana tututidi qe vagigalainigou pana mei vavakato beto pana mei leta. 
\v 16 Na Tamasa sa roroqugita beto pana ona vairoqu vaialona sa vanigita na manoto kole jolana beto na vangaju ko ta boka vera gegelenia gita sira na sakasa jongadi. Na Bangara i Jisu Karisito mekana beto na Tamasa na Tamada sa 
\v 17 mi vaneqiria na bulomiu ko mu turu vaneqiniria doru roiti jongadi beto na paranga jongadi.
\c 3
\s Mu Vavara Tokanigei Agei
\p
\v 1 Ego na vinaokotona, ka visa tavitimei, sa agou mu vavara tokanigei agei ko na paranga tana Bangara mi rerege sisiqarai beto mi tadoro valavata, kai muqisi podeke vei tugu qu veinia agou tonai qu tekua sa na paranga tana. 
\v 2 Mu vavara tokanigei tugu vei sagei ko me tavasare tadira na tinoni ikikeredi, ura nake ira doru qai vasosotoa sa na nongoro jongana. 
\v 3 Ba na tarangena sa na Bangara, isa mina vaturu neqigou beto mina vasaregou pana tana kutana nikerena. 
\v 4 Na mei vinasosoto tana Bangara na veveimiu agou sa isa qe paranga vaneneqinigou sa qu tei korapa tu roitinia ko kode muna kole roitinia tugu. 
\v 5 Na Bangara mi totolinia na bulomiu ko mu gigila vatalea na vairoqu tana Tamasa beto mu isongia na turu vangaju tana Karisito.
\s Ira Doru Tinoni sa Mai Roiti
\p
\v 6 Ka visa tavitimei, agei qe paranga vaneneqinigou pa isongona na oda Bangara i Jisu Karisito ko muke nago sa tadira doru tavitimiu qai toania na toa udapelu beto qai dainiadia toania sa na uana tututidi qai teku vakarovia tamigei. 
\v 7 Agou mekamiu qu gigila vataleamiu sa sa poreveveina sa mu doro tutigei agei, ura agei ba qeke toania na toa udapelu tonai qe suvere tavitigou sagou 
\v 8 beto na gagani ba qeke teku gobororia tadira na tinoni, goto qe roiti na rane na bongi ko qe pavu beto qe gosoroni tapata tu ko meke vejujunogou agou na goto tinoni qeu. 
\v 9 Nake vei ko sa keporenigei na mei neqi ko be tepa sa, goto qe toa vei api sagei ko mu doro tutigei agei sagou qeu. 
\v 10 Ura tonai qe suvere tavitigou sa qe paranga vaneneqi veinigou pira: <<Na tinoni sa daiona roiti sa minake gagani,>> qeunigou.
\p
\v 11 Ura qe nongoronia sa kaki agou sa qai toania na toa ududapeluna beto qai daidia roiti goto qai kole roiti susula gu pana ona roitina na goto tinoni. 
\v 12 Ira na tinoni vevei ira sa qe garunu vaneneqiria beto qe paranga vaneqiria pa korapa isongona na Bangara i Jisu Karisito ko mai mavo roiti votunia sa na gagani mai gania.
\p
\v 13 Goto, ka visa tavitimei, agou sa muke munyalania na roiti jongana. 
\v 14 Na tinoni sa daiona nongoria sa na paranga qe kuti laonia pa leta api, poni sa mu dogoro viloto vatalea sa na tinoni isa ko muke nagoa ko mi keania sa nona roiti. 
\v 15 Ba muke doro veinia na miu kana, goto mu vavanau veinia tu kai tavitimiu.
\s Na Paranga Vinaokotona
\p
\v 16 Na Bangara bule mekana mi vanigou na bule pa dorudi totoso, bi pana totoso jongadi babi na ikeredi. Na Bangara mi vavaburogou agou doru. 
\v 17 Na qua roroqu lavata lao tamugou api sa pa limaqu mekaqu qa kutinia. Na kukuti vinagigila vevei api sa qa vakolea pa bebetodi dorudi na qua leta. Ko pira qa kuti veinia sa na vinagigila api.
\p
\v 18 Na vairoqu vaialona ta noda Bangara i Jisu Karisito mi somana tamugou doru.