\id 2PE Second Peter, Luqa in Solomon Islands, 1st Proofread Corrected, Tr:RP, Adch:AGZ, Cch:Carl/March2000, Rvwd:Aug99/May2001, 7th rvsd:JuneAugNov2001/AugSep2002, Dec2002
\ide UTF-8
\h 2 Pita
\toc3 2 Pita
\toc2 2 Pita
\toc1 2 Pita
\mt I Pita Vinarua
\c 1
\s Na popodalaina na leta
\p
\v 1 Ara Saimone Pita na nabulu beto na tinoni tagarunuqu tai Jisu Karisito.
\p Na leta api sa qa valaoa tadira na tinoni qai isongia na rarange poreveveina jola veveina tugu qe isongia agei. Sa tei vatuvisigita tu na oda Tamasa beto i Jisu Karisito isa sa alogita sa gita.
\p
\v 2 Na vairoqu vaialona beto na bule mi vovonu tamugou tonai muna gigila vatalea na Tamasa beto i Jisu Karisito na oda Bangara.
\s Na kuku beto na vivile tana Tamasa
\p
\v 3 Pana ona neqi tinamasa na Tamasa sa tei vanigita tu sa doru sakasava pana toa gagala ko tana boka toa beto tana pangagania na Tamasa sau. Ko taqe tei isongoria tu gita sira na sakasava pira ura taqe tei gigilai tu gita sisa. Ko isa sa sa kukugita ko taqe somana pana ona neqi lavatana beto na uana tuvisina. 
\v 4 Ura pana ginugua vei aipira sa sa tei vanigita tu isa sira nona taringuguti jojongadi beto na poreveveidi jola. Ko pana soana vei pira sa muna somana isongia agou sa na toa tinamasai tonai muna uku loa pale agou sa na toa lulasana sa koko lame vei pana nyorogua tana kasia gusu.
\p
\v 5 Ko sa vei isa sa agou mu ngangali ko mu vaokoto vatalenia na toa jongana sa na miu rarange, beto mu vatavitinia na gigalaina na nyorogua tana Tamasa sa na jongana. 
\v 6 Na gigalaina na nyorogua tana Tamasa sa mu vatavitinia na kopu mulenigou pana ikerena, na kopu mulenigou pana ikerena sa mu vatavitinia na turu vangaju pana tapata. Na turu vangaju sa mu vatavitinia na pangagana na Tamasa. 
\v 7 Na pangagana na Tamasa sa mu vatavitinia na vaitamatasi, beto ko na vaitamatasi sa mu vatavitinia na vairoqu. 
\v 8 Ura vei mai kole tamugou beto vei muna isongo vamotaria agou sira na toa aipira, sa kode munake qasa beto munake egoronia na miu gigalaina na oda Bangara i Jisu Karisito sagou. 
\v 9 Ura na tinoni sa qasaniria na sakasava vei pira sa sa leqa ko sa papaka nona dodogoro, beto ko sa tei muma pale tu isa sa ira nona sela koledi sa qai toi tavulasa tu.
\p
\v 10 Ko inara sa vei, ka visa tavitiqu, ko mu podeke vivitigia ko mu gigila vatalea sa na ginuana sa kukugou beto sa vilegou na Tamasa. Ko vei muna roitiniria agou sira na roiti aipira poni sa kode munake boka tatupe pana miu rarangena na Karisito sagou. 
\v 11 Ko na vuana na miu popodeke lavata sa kode muna tekua agou sa na vinamalumu sosotona ko muna tomea sa na binangara kole jolana ta noda Bangara beto na inaalo i Jisu Karisito.
\p
\v 12 Ko sa vei sa nake savana qu tei gigilaimiu tu beto qu tei turu vamauru tu sa pana vaivagigalai sosotona qu isongia sagou, ba ara sa manake beto varoroqunigou sa na sakasava aipira. 
\v 13 Qa rove veinia na qua roiti ara sapi ko tonai qa korapa toaqua sa manake beto varoroqunigou sira na sakasava aipira ko muke mumaniria. 
\v 14 Ura qa tei gigilai tu sa na rane mana taloa sa nake sovaina beto mina kamu, vei tugu sa tei vakabere vanisiu tugu na oda Bangara i Jisu Karisito. 
\v 15 Ara mana popodeke vivitigia pana qua kukuti ko pana liguna mana taloa ara ba munake roqu mumaniria agou sira na sakasava aipira.
\s Na malakapi tana Karisito sa tadogoroni mata
\p
\v 16 Ura nake vivinei jojongadi gogoborodi sa qe tutiria agei na tinoni tagarunumei totonai qe ule vanigou sa na veveina na neqi beto na mule lame ta noda Bangara i Jisu Karisito. Goto qe batini matamei sosoto sa nona neqi isa. 
\v 17 Ura agei qe korapa tugu sa totonai sa tekua isa sa na vinalavata beto na malakapi pana tana Tamasa na Tamada. Totonai sa na ovovele tana Tamasa lavatana jola sa pira sau, <<Na Tuqu Mekaina isa qa qera vivitiginia ara sapi,>> sau. 
\v 18 Ko na ovovele qe nongoria agei api sa sa lagere vei pa noka tonai qe kole suvere tavitia sisa pa batu kubo madina. 
\v 19 Ko sa vei isa sa agei qe vasosoto vivitigia sa na nongoro qai pojai ira na tinoni kokorotai pa moa. Ko sa vei sa kode muna tatoka vatale sagou vei munake doro kipunia agou sa na paranga tadira na tinoni kokorotai. Na paranga tadira na tinoni kokorotai isa sa sa vei na juke sa vakaberia na eqa rorodomona pa bulomiu tinganai mina kabere vei tonai sa sae na vovola rane beto sa sagere na seru rane pana vuvugei. 
\v 20 Ba api sa na roroqu sa poreveveina ko mu gigila vatalea sapi. Kepore kai kokorotai pana Kukuti Tabuna sa sa tavavukele pana ona ruruvata gu mekana na tinoni. 
\v 21 Ura kepore sa kai kokorotai sa votu lame pana ona nyorogua gu mekana na tinoni, goto na Gagala Tabuna tu sa gaitiria sira na tinoni beto sa qai poja votuniria sira na nongoro qai lagere vei tana Tamasa.
\c 2
\s Ira na tinoni vaivagigalai sesekedi
\r (Jiudasi 4-13)
\p
\v 1 Ego ira na tinoni kokorotai sesekedi ba qai votu lame tugu sa pa vaikorapaidi ira na tinoni Izireli pa moa, kai muqisi vei tugu ira na tinoni vaivagigalai sesekedi ba kode mai votu lame tugu sa pa vaikorapaimiu agou. Ira sa kode mai mavo vaivagigalai golomoniria sira na vaivagigalai sesekedi beto na vainganguludi beto ko kode mai kilu pale sa na Bangara lavata isa sa tei pajukuria tu pana dia toa sela. Ko tonai mai vei inara sira sa mai teku tariniria mekadi sa na vinakilasa. 
\v 2 Ko sokudi ira qai gigala muleniria na tinoni tana Karisito qarigu sa kode mai tutia sa na uana lulasana tadira, ko pana soana vei inara sa na nongoro jongana isa na soana sosotona sa kode mina tapoja vivikere. 
\v 3 Beto ko pana ginuana qai nyonyorogua isisongodia gu sa kode mai roiti votuniria sira na soku vaivagigalai nyonyoravadi ko mai tekuria sa na miu poata. Ba na vaituti tadira sa sa tei tavanaqiti vakole tu pa moa tu beto ko na vinakilasa tana Tamasa mai gosoria ira sa sa tei korapa tu veraniria.
\p
\v 4 Ura agou ba qu tei gigilaimiu tu sa na Tamasa sake kole gu dodorona sa tadira na mateana tonai qai roitinia na sela, goto sa gona goreniria pa heli.\f + \fr 2.4 \fr*\ft Na paranga Qiriki sa tapeluku heli api sa na Tatarusi, ko pa Vinaego Koregana sa lani gu sa kole sa na paranga isa. Pana tadira na tinoni Qiriki sa pa Tatarusi sa na ia pa kauruna pa hedisi (ketakoi na ia tadira na tinoni matedi), ko pa Tatarusi qai tavakilasa sira na tinoni ko ketakoi qai tapiu vakole pa leo rorodomona ko mai verania na vinakilasa.\ft*\f* 
\v 5 Beto sake kole gu dodoriaona gu isa sa na kasia gusu pa moa, goto sa vadururu paleria isa sira na tinoni ikikeredi tonai. I Noa gu sa kole taraenia na tuvisi beto ko ira ka vitu tinoni gu mule sa qai tavasare. 
\v 6 Beto ira na gugusu pa Sodomo pa Qomora sa sa vaganiniria na iku isa ko qai peluku kavu betodia tu. Ko isa sa na vinapapada vinabalau tadira mai toania na toa ikerena. 
\v 7 Ko na Tamasa sa aloa si Loti isa kai tinoni tuvisina. I Loti sake tavaraguania sa na toa lulasana tadira na tinoni ikikeredi pa vailivutaina. 
\v 8 Na tinoni tuvisina isa sa sa suvere tavitiria ira na tinoni ikikeredi. Ko doru rane na ona toa tuvisina sa kole gosororia sa na vitigi takulanga tonai sa batiria beto sa nongoroniria na dia roiti ikikeredi. 
\v 9 Ko na Bangara sa gigilaiona sisa mina roiti vei ko mina teku votuniria pana tapata sira na tinoni tuvisidi, beto sa gigilaiona sisa mina roiti vei ko mina vatananiria na vinakilasa sira na tinoni ikikeredi tinganai mina kamua na rane vaituti. 
\v 10 Ko ira qai vaivagigalainiria na nongoro sesekedi sa na tinoni qai toaniria na toa lulasana beto ko qai vakepore veveinaia sa na neqi tana Tamasa.
\p Ira na tinoni aipira sa qai juju batudi beto qai tututidia roroqu mekadi ko qaike matagutu poja vivikeria sira na sakasava madidi jola. 
\v 11 Ba ira tu na mateana qai neqi jola beto qai viva jolaniria sira na tinoni vaivagigalai sesekedi pira ba qaike tuma vamoroanaria pana moena na Bangara sira na sakasava madidi pira. 
\v 12 Goto ira na tinoni vavaivagigalai sesekedi aipira sa qai vei na manugu mamade nenedi sa kepore na roqudi. Ko na ginuana sa qai podo ko mai gosoria tugu na mate sira. Qai poja vivikereria sira na sakasava qaike gigila vataleria ko ira sa kode mai tapipiara vei tugu ira na manugu aipira, 
\v 13 beto kode mai gosoro taleni vitigi ira sira na vitigi qai roiti laoniria pana tadira na tinoni. Qai doro veinia na sakasava vaivaqerana sa na kole roroitiniria pana rane kabere lavata sira na roiti ikikeredi sa vaqerai na dia toa tini. Ira sa qai vei na opopu ko na dia uana sa paji totonai qai somana tavitigou agou pana miu vavolo. Sa lingiria tu ira sa na kole tututiria na dia soana ikikeredi. 
\v 14 Qai nyorogua laoria sira doru rereko qai batiria beto qaike nogoto roitinia na sela. Qai valoposoria sira na tinoni sake neqi na dia rarange. Qai isongia na bulo sa morutu vatalenia nyonyoroguaniria na sakasava. Na tinoni talevedi sira. 
\v 15 Ira sa qai loa palea na soana tuvisina ko qai rerege vapiru. Qai tutia sa na soana tai Balamu na tuna i Beo. I Balamu sa sa nyorogua isisongona pana soana ikikerena, 
\v 16 ba sa tatoke talenia isa sa nona roiti ikikerena sa kole roroqua ko mina roitinia sau. Ko na dongiki tu sa tabu paranga ba sa paranga votu toa vei na tinoni ko sa vanogotia sa na duduvili tai Balamu na tinoni kokorotai.
\p
\v 17 Ira na tinoni vaivagigalai sesekedi pira sa qai vei na vuvugu pie pidilina beto na pauku sa ivu vajola palea na gava. Ko sa tavanaqiti vaniria ira na tinoni pira sa na rodomo kukunina. 
\v 18 Qai paranga vapopoto bati kare beto qai roitiniria sira na nyonyorogua ikikeredi qai vaqerai na toa tini ko qai bako vakatapa muleria pana sela sira qai koni uku loai na toa ikerena. 
\v 19 Qai taringunguti vakole vaniria na toa taruvatana sira na goto tinoni ba ira mekadi sa qai korapa pinausu pana dia uana vavaipiarai. Ura gita na tinoni ko na ona pinausu gu na sakasava sake vangongogita. 
\v 20 Ko ira na tinoni qai tei uku loa pale mai tu sa na toa pajina pa kasia gusu tonai qai gigilai na oda Bangara beto i Jisu Karisito isa sa alogita beto sa qai tapiunia mule na sela ko sa vapinausuria mule na sela, poni sa na toa qai toania pana totoso liligu sa sa ikere jolania na dia toa pana totoso momoe. 
\v 21 Na Tamasa kode mina vakilasa vataleria sa pira, ko vei baike gigilai ira na soana tuvisi sa bi jongana jolania qai tei gigilai tu beto sa qai balinga loa pale sa na garunu liosona qai tavavanaunia. 
\v 22 Na toa tadira sa ulenia gu sa na sosotona na paranga gigigalai sosoto api, pira sau, <<Na sie sa gabala mule gania na luana mekana, beto na borogo sa koni ogono valioso sa lao titolo ovovaona pa nyenyelakana,>> sau.
\c 3
\s Na mule lamena na Bangara
\p
\v 1 Ka visa baere jonga, na qua leta vinarua lao tamugou sapi. Pana karu doru qua leta sa qa podeke vangangalia ara sa na miu roroqu jongana ko muke mumaniria sira na sakasava aipira qau. 
\v 2 Ara qa nyoguania ko vakoititiria agou sira na paranga perangaina tu qai pojaria ira na tinoni kokorotai beto ira na garunu qai ule vanigou ira na tinoni tagarunudi totonai qai vavakato vanigou na veveina noda Bangara isa sa alogita. 
\v 3 Sa poreveveina jola sa agou mu vakoititiria sa aipira. Pana rane vinabebetodi sa kode mai lame sira na tinoni vavalededi qai tututia na dia nyorogua ikikeredi ko mai vavaledenigou sagou. 
\v 4 Kode pira mai paranga vavalede veinigou, <<Beko sa tei taringunguti vakolea tu sa kode mina mule lame sau, oko? Ba sake gore votu tu sa na taringunguti isa! Ira na tamada sa qai toi mate riudia tu ba kepotu kai sa bi bei. Doru sakasava sa qai kopa kole veidia tugu qai kole vei pa popodalaina tonai sa tavapodaka na kasia gusu!>> marigu. 
\v 5 Ba qai daidia roqu vakoinonoa ira sa na ginugua alepi. Pa totoso pa moa sa paranga gu na Tamasa sa qai podaka votu sira na oka, beto na kasia abana sa podaka votu pa kolo ko sa kole livutia na kolo. 
\v 6 Beto ko na kolo tugu sa piaria sa na kasia gusu isa. 
\v 7 Ko pana kai muqisi paranga tugu isa sa qai korapa takopu sira na oka beto na kasia abana kopira, ko qai korapa tavanaqiti vania na iku. Ko na oka beto na kasia abana sa kode mina ganiria na iku pana rane vaituti tonai mai tavakilasa sira na tinoni ikikeredi.
\p
\v 8 Ba muke roqu mumania agou sa kai sava api, ka visa baere jonga. Pana tana Bangara sa na kakasana na totoso sa sa kepore veveina. Pana tana Bangara kai rane sa sa vei kai tina aoro beto kai tina aoro sa sa vei kai rane gu. 
\v 9 Na Bangara sake korapa vavabonginia sa na vagore votuna na ona taringunguti vei qai rorove veinia sa vei qarigu ira kaki tinoni. Goto isa sa korapa mavo veranigou gu sagou ura sake nyoroguania isa sa kai tinoni bi mate. Ba ira doru tinoni sa sa nyoroguaniria isa ko mai gabala loa pale na dia sela. 
\v 10 Ba mina lame vasiboro vei kai tinoni ikikona sa na rane mule lame tana Bangara. Pana rane isa na oka mina mumuri tonai mina tanongoro sa na ovangana na qalalana na iku. Beto ko na sakasava pana oka mai tavurungu ko mai tapiara pale pana iku, beto na kasia abana beto doru sakasava qai taroiti pa korapana sa mai mumuri manyao betodia.
\p
\v 11 Ego qu tei nongoria tu agou sa kode doru sakasava sa mai tapiara vei inara, ko sa vei sa qu gigilaimiu ai muna toa goto vei sa agou. Mu toania na uana liosona beto na pangagana na Tamasa 
\v 12 totonai qu korapa verania sa na rane tana Tamasa ko mu vasisiqaraia na lamena na rane isa. Pana rane isa sa mina taqalala ko mina vurungia na iku sa na oka ko doru kai sava sa mai nyoro maragutu betodia. 
\v 13 Ba gita sa taqe korapa verania isa sa taringunguti vakole vanigita na Tamasa. Sa taringunguti vakole vanigita isa sa na oka koregana beto na kasia abana koregana, ketakoi sa kole na tuvisi tana Tamasa.
\p
\v 14 Ko inara sa vei sa, ka visa baere jonga, totonai qu korapa veraniria agou sa aipira sa mu podeke vivitigia ko mike tabata kai opopu pana miu toa beto muke roitinia kai sela muna boka tajutunia pa moena na Tamasa beto mu suvere bule tavitia isa. 
\v 15 Na Bangara sa korapa vera vamomoso, ko na totoso sa korapa vera vamomoso isa sa mu doro veinia na totoso sa korapa vanigou agou ko mu taalo sau. Ko i Paula na turada pana tana Karisito ba sa tei kuti lao vanigou tu pana gigalai sa vania na Tamasa sa na veveina na mule lame tana Bangara. 
\v 16 Ko api sa sa tei pojai tu isa pana doru ona leta tonai sa pojai na veveina na lame tana Bangara. Koledia sira kaki sakasava pana ona leta qaike munyala na vakaberedi ko ira na tinoni rururadi beto ira sake matua na roqudi sa qai ruvata vapiruria sira na sakasava pira. Beto ko kaki kukuti pana Kukuti Tabuna ba qai veiniria tugu. Ko na dia roiti vei tugu isa sa qai korapa teku tariniria na vinakilasa pana rane vaituti. 
\v 17 Ko inara sa vei sa, ka visa baere jonga, qu tei gigilaimiu tu agou sa vei pira. Ko mu kopu mulenigou mekamiu beto ira na tinoni ikikeredi maike toni vapirugou kita mai vavukelegou. 
\v 18 Mu toa sae pana vairoqu vaialona beto na gigalaina na oda Bangara beto na oda inaalo i Jisu Karisito. Isa sa ta vatarasaea beto ta valavatia kopira, beto ko mi kamua na kamua. Agua.