\id 1TI 1 Timothy, Luqa in Solomon Islands, 1st Proofread corrected, Ach:AGZ Tr:RP, rvwd:Aug99/May2001, Cch:Carl/Feb2000, 7th rvsd:JuneSep2001/JanAugSep2002/Dec2002
\ide UTF-8
\h 1 Timote
\toc3 1 Timote
\toc2 1 Timote
\toc1 1 Timote
\mt Tai Timote Momoe
\c 1
\s Na Popodalaina na Leta
\p
\v 1 Ara Paula na tinoni tagarunuqu tana Karisito i Jisu ko qa tagarunu pana neqi tana Tamasa noda inaalo beto tana Karisito i Jisu isa taqe korapa gelenia.
\p
\v 2 Na leta api sa lao tao Timote ao qu vei na tuqu sosoto pana toa rarange.
\p Na vairoqu vaialona, na vairoqu vaitokai beto na bule tana Tamasa na Tamada beto tana Karisito i Jisu na oda Bangara mai somana tamu.
\s Na Paranga Vinabalauna na Vaivagigalai Sesekedi
\p
\v 3 Isa tugu vei qa tei paranga vaneqinigo tu totonai qa rererege lao vei pa Masidonia sa mu suvere pa Episasi qaunigo, ko mu paranga vaneneqiria sira kaki ketakoi ko mai nogoto vaivagigalainia na vaivagigalai sesekedi 
\v 4 beto maike jujuno goboroniria sira na vivinei goborodi gu beto na tututidi ira na dia tite. Ira na sakasava pira sa qai vapodo vavaigua goborodi gu goto qaike ule votunia na vareregena na vaialo tana Tamasa isa sa lame vei pana rarange. 
\v 5 Na vinaokotona na vavanau api sa na vairoqu, isa sa koko vei pana bulo liosona beto pana monana jongana beto pana rarange sosotona. 
\v 6 Ira kaki pira sa qai tei gabala vapiru tu ko qai gabala vapele laoria sira na vavaigua paranga sa kepore na veveidi. 
\v 7 Qai nyoroguania ko bai tinoni vavaivagigalainia na Vavanau sira, ba qaike vakoinoni podekeria ira na sakasa qai pojaria beto ira na sakasava qai paranga vaneneqiniria.
\p
\v 8 Taqe gigilaioda gita sa na Vavanau sa sa jongana vei mina tavaroiti pana vavanau tuvisina. 
\v 9 Ko taqe gigilaioda tugu vei gita sa na Vavanau sa sake tavatoqo vania na tinoni tuvisina, goto ira tu na tinoni qai daidia tuti vavanau beto na tinoni duduvilidi, ira qai kilunia na Tamasa beto ira na tinoni seladi, ira qaike toania na toa madina beto qai kanai na Tamasa, ira qai vamatea na tinadi na tamadi beto ira na tinoni vavarivai, 
\v 10 ira na tinoni lulasadi beto na marene qai vaivori vei na manugu, ira qai ikiko golomo pinausu, ira qai seseke beto qai maulu seseke, beto ira qai roitiniria na roiti qaike jongana pana vaivagigalai tuvisina. 
\v 11 Ko na vaivagigalai isa sa tabata pana nongoro jongana isa sa udukunisiu ara na Tamasa ko mana ulenia, isa sa na nongoro jongana tana Tamasa lavatana sa pada ko mina tavatarasae.
\s I Paula sa Paranga Jongana Lao ti Jisu na Inaalo
\p
\v 12 Ara qa paranga jongana lao tana Karisito Jisu na oda Bangara. Isa sa vaneqisiu ko qa boka nabulunia beto ko sa doro rangesiu ko sa udukunisiu sa na roiti ninabuluna isa. 
\v 13 Pana totoso qai jola lao pori ara sa na tinoni vavaiaja vagorequ, na tinoni nganganguluqu, beto na tinoni vavaipoja vivikerequ sara. Ba na Bangara sa roroqu tokanisiu sara ura totonai sa qa oqoro vasosotoa sisa ko qake gigilai na manugu qa roitinia. 
\v 14 Beto noda Bangara sake beto vadogoronisiu nona roroqu lavatana jola ko qa boka rangea sisa beto qa boka roroquria sira na goto tinoni tonai qa kole kame pana tana Karisito i Jisu. 
\v 15 Na paranga tarangena sapi ko sa pada ko mina tateku vakatapa: na Karisito i Jisu sa lame pa kasia gusu ko mi aloria sira na tinoni seladi sau. Ko ara tugu sa kame na tinoni ikikerequ jola. 
\v 16 Ba na ginuana sa roroqu tokanisiu ara sa na Bangara sa pira gu sa vei. Pana taqu sa vatadogoro momoenia na Karisito i Jisu sa na veveina isa sa boka vera vamomosonia sa na tinoni ikikeredi vevei ara. Ko ara sa kai dodogoro tutina tadira mai rangea sisa ko mai tekua sa na toa jola. 
\v 17 Na Bangara lavata na kole jolana, sake boka mate, sa pae, beto kai memekai Tamasa sosotona, isa sa mi kole na panganga beto na vinalavata kamua na kamua. Agua.
\s I Paula sa pojania i Timote ko mi neqi pana ona rarange
\p
\v 18 Na vavanau api sa qa varangenigo ao Timote na tuqu marene, ko muke mumaniria sira na kokorotai veveimu ao qai pojaria ira na tinoni kokorotai tonai qu tavamadi, ko ira tugu sa mai vabokago ko muna vaiperania na vaipera jongana, 
\v 19 beto mu kopunia na mua rarange beto na monana jongana. Ira kaki sa qai kilu pale sa na roroqu tuvisina ko na dia rarange sa vei na vaka sa jule vivikerenia pa mati. 
\v 20 Karu ira na tinoni vevei pira sa ira Humenaiosi beto i Alekezada. Ko ira karu pira sa qa tei loa laoniria tu ti Setani ara ko mai tavagigala ko maike poja vivikeria sa na Tamasa.
\c 2
\s Na Vavanauna na Vavara
\p
\v 1 Ego ko sa vei sa, momoe, ara qa paranga vaneqinia ko mu vavara tetepa, vavara vaniria, tetepa tokaniria, beto mu paranga jongana vaniria lao tana Tamasa sira doru tinoni, 
\v 2 ira doru babangara beto ira qai aruria na totoqona poreveveidi, ko gita ta isongia na toa bubulena beto na momosona pana doru oda uana pangagana na Tamasa beto na uana tuvisina. 
\v 3 Na toa vavara vevei api sa sa jongana beto sa vaivaqera pana dodogoro tana Tamasa na oda inaalo, 
\v 4 isa sa nyoroguaniria doru tinoni mai taalo ko mai lame tekua na gigalaina na sosotona. 
\v 5 Ura kame gu sa na Tamasa, beto kame gu sa isa sa vaikarovainiria ira na tinoni beto na Tamasa, ko na tinoni vaikarovai isa sa na Karisito i Jisu. 
\v 6 Isa sa vania na ona toa mekana ko na ruvatadi doru tinoni, ko na ule votuna sa gore votu pa ona totosona. 
\v 7 Ko isa sa qa tavilenia na tinoni tarae beto na tinoni tagarunuqu sara (qa korapa pojai na sosotona sara, qake seseke) beto na tinoni vaivagigalai tadira na tinoni karovodi ko qa vaivagigalainia na rarange sosotona.
\s Na Uana Tadira na Rereko pana Totoso Vinatarasae
\p
\v 8 Ego ko na nyorogua taqu sa ira na iviva marene doru eqa sa mai alakaniria na limadi ko mai vavara pana bulo liosona sake kolea na kokora beto na vavaiququmi. 
\v 9 Ko qa nyoroguania tugu vei sa ira na iviva rereko ba mai vasaeniria na poko pangaga padadi na uana pangaga beto na tavagigala, maike vinyulu vagogotoria na vurungudi babi na sariniria na qolo babi na papaku babata jonga babi na poko sa sae gigiri na vaidi. 
\v 10 Goto na roiti jongadi tu sa mai sariniria na dia toa isa vei sa dogoro padadi ira na iviva rereko qai vatarasaea na Tamasa. 
\v 11 Na rereko sa mi nogoto ko mi tekuona gigalai pana doru uana vakole vakaurai. 
\v 12 Ara qake vamalumia na rereko ko mina vaivagigalai babi babangarania sa na marene, goto na rereko sa mi nogoto tu. 
\v 13 Ura i Adama mai tu sa sa taroiti vapodaka beto sa taroiti vapodaka si Ivi. 
\v 14 Beto nake i Adama sa sa tatoni vapiru momoe, goto na rereko tu sa sa tatoni vapiru ko sa vukele pana sela. 
\v 15 Ba na rereko sa mina taalo pana vapododi na koburu vei mai turu pana rarange, mai toania na toa vairoqu beto na toa liosona beto ko vei mai toaniria ira pana pangaga sa na toa aipira.
\c 3
\s Ira na Iviva Mamata pa Ekelesia
\p
\v 1 Na paranga tarangena sa api. Na tinoni sa kukulinia na roiti tana tinoni kopu, poni sa na roiti jongana jola sa sa nyoroguania isa. 
\v 2 Ko sa vei sa na tinoni kopu sa mina tinoni kepore ona pake, mina tinoni kame gu na maqotana, minake tinoni gua goboro, mina boka gaiti vatalea na roquna, mina pangaga na ona uana, mina tinoni vakamu goto tinoni, mina bokaona na vaivagigalai, 
\v 3 minake tinoni didigere aruna, minake tinoni vavaipera goboro, goto mina tinoni vajongana lao tana goto tinoni, minake tinoni vainonomi, beto minake tinoni bulo poata. 
\v 4 Na tinoni kopu sa boka toli vatalenia na ona tatamana mekana ko ira na tuna sa qai suvere vakaurai pana doru uana pangagana. 
\v 5 Na tinoni sake balau tolinia sa nona tatamana mekana, sa ai mina vei mina boka doro kopunia isa sa na ekelesia tana Tamasa? 
\v 6 Minake tinoni koni gabalana sisa, ura kita mi vapugelenia na roqu mulenia mekana ko mi vukele pana vaituti sa gosoria na bangaradi na tomate ikeredi. 
\v 7 Beto ko sa poreveveina sa mina kai tinoni tapangagana tadira na tinoni pa peguruna sisa, ko minake tatupe pana vaipoja ikikeredi tadira na tinoni beto minake vukele pana sipata tana bangaradi na tomate ikeredi.
\s Ira na Tinoni Vaitokai pa Ekelesia
\p
\v 8 Ira na tinoni vaitokai tugu vei sa mai tinoni tapangagadi, minake ngoja vaikale na dia paranga, maike tapiunia na bubuku vasoku vaini, maike nyaqo isisongodia pana soana selana. 
\v 9 Mai aru vamaurunia na vonana liosona sa na gigalai golomona na rarange. 
\v 10 Ko ira ba mai taviloto vatale mai tugu, ko vei mina kepore na dia pake poni sa qai tavamalumu ko mai tinoni roiti vaitokai.
\p
\v 11 Ira na rereko vaitokai tugu vei sa mai tinoni tapangagadi, maike popoja vikere tinoni, maike tinoni gua goborodi, beto mai tarange pana doru dia uana.
\p
\v 12 Na marene vaitokai sa mina kame gu na maqotana, mina boka totoli vataleniria na ona koburu beto na ona tatamana. 
\v 13 Ura ira na tinoni qai vaitokai vatale sa qai teku isongia kai tuturuna jongana beto qai varene vatale pana dia rangena na Karisito i Jisu.
\s Na Vaivagigalai Sosotona
\p
\v 14 Qa rovea sa nake sovaina beto mana lao kamugo sao. Ba qa kuti laoniria ara pana tamu sira na sakasa aipira 
\v 15 ko vei mina mamavo sa na lao taqu poni ba ao muna tei gigilaimua tu sa na uana sa pada tana toania gita na tinoni pana tatamana tana Tamasa. Na tatamana isa sa na ekelesia tana Tamasa toana, ko na ekelesia isa sa na babara eveva beto na kokovana mauruna sa vamauria na vaivagigalai sosotona. 
\v 16 Ko kepore kai tinoni mina boka vasekea sa na poreveveina jola na gigalai golomona na pangagana na Tamasa:
\q1 Isa sa bola votu pana tini masa,
\q2 sa taule votu na tuvisina pana gagala,
\q3 sa tabata tadira na mateana.
\q1 Sa tatarae tadira na tinoni karovodi,
\q2 sa tavasosoto pa kasia gusu,
\q3 sa tateku vasae pa neqi.
\c 4
\s Ira Na Tinoni Vaivagigalai Sesekedi
\p
\v 1 Ego na Gagala Tabuna sa poja lodakia sa pana totoso bebetodi aipira kaki tinoni sa kode mai balinga loa palenia sa na rarange ko mai tutiria sira na gagala sesekedi beto na vaivagigalai tadira na tomate. 
\v 2 Na vaivagigalai vei aipira sa qai lame vei tadira na tinoni sesekedi qai vavadogoro mule veiniria na tuvisidi sira qarigu. Ira tinoni ira sa na monanadi sa sa tei taparugu vamatenia tu na patu dagalana. 
\v 3 Ira na tinoni aipira sa qai vaisogarania na vaialava beto qai vatataburia sa na gagani. Ba na gagani inara sa na Tamasa tu sa vapodakaria ko ira qai rangea isa beto qai gigilai na sosoto sa mai tekuria pana paranga jongana. 
\v 4 Ura doru vinapodaka tana na Tamasa sa na jongadi ko maike takilu pale goto mai tateku pana paranga jongana, 
\v 5 ura na paranga tana Tamasa beto na vavara qai vamadiria.
\s Na nabulu jongana tana Karisito i Jisu
\p
\v 6 Kode muna kai nabulu jongamu tana Karisito i Jisu sao vei muna vanonoganiria ao ira na tinoni lotu sira na vaivagigalai aipira beto vei muna meme vatalenigo na vaivagigalaina na oda rarange beto na vaivagigalai jongadi qu korapa tuti vikivokotoria. 
\v 7 Ira na vivinei ikikeredi beto na gogoborodi beto na kepore veveidi sa mu uku paleniria. Goto mu ngurungausu vaneqinigo tu na pangagana na Tamasa. 
\v 8 Ura na ngurungausu vaneqina na tini sa sa koleona iapeki poreveina, ba na pangagana tu na Tamasa sa sa poreveveina doru totoso, ura sa kolea na taringungutina na toa kopira beto na toa sa korapa lame. 
\v 9 Na paranga tarangena sapi ko sa pada ko mina tateku vakatapa. 
\v 10 Api sa na ginuana taqe pavu talenia beto taqe vaipera vivivania gita: ura taqe korapa totoravusu kukulinia gita sa na Tamasa toana, isa na inaalo tadira doru tinoni ko na inaalo isa sa tabata votu tadira qai rangea isa.
\p
\v 11 Mu paranga vaneneqiniria beto mu vaivagigalainiria ao sira na sakasa aipira. 
\v 12 Muke vamalumuria na tinoni ko mai vakepore veveinigo sa ao na tinoni koregamu, goto ao sa mi kai dodoro tutina tu tadira na tinoni rarange pana mua paranga, na mua uana, na mua vairoqu, na mua rarange beto na mua uana liosona. 
\v 13 Mu aru tokaria sira na roiti aipira tinganai mana lame kamu ara: na tiro votuna na Kukuti Tabuna, na paranga vaivaneqi beto na vaivagigalai. 
\v 14 Muke doro pale sa na vaivana sa kole tamu, isa qu tekua tonai qai kokorotainigo beto qai vaoponigo na limadi ira na tinoni mamata. 
\v 15 Mu rove vakoriria beto mu junoniria na sakasa aipira, ko na ijoko sae tamu mai bati vakaberia ira doru tinoni. 
\v 16 Mu doro kopunigo mekamu beto na mua vaivagigalai. Muke aru loloaria sira na roiti aipira. Ura vei muna roiti vei isa sao, sa kode muna alo mulenigo mekamu beto ira na tinoni qai nongorigo.
\c 5
\s Na Uana tana Tinoni Mamata lao tadira Goto Tinoni
\p
\v 1 Muke toke sasururia sira na baragoso goto mu paranga vaneqi veiniria na tamamu mekamu sira. Ira na marene koregadi mu veiniria na tasimu marene. 
\v 2 Ira na qoqoele mu veiniria na tinamu. Ira na rereko koregadi mu veiniria na lulumu pana doru uana liosona.
\p
\v 3 Mu pangaganiria sira na qoqoele naboko qai naboko vaivasevi sosoto. 
\v 4 Goto na naboko qoqoele sa pore tuna babi na ona mabusu, sa ira pira sa mai balau roiti votunia mai pana dia tatamana mekadi sa na soana vatarasaena na Tamasa ko mai beia na pavudi ira ketakoi qai pidoko votu lame vei. Ura na toa vei isa sa vaivaqera pa dodogoro tana Tamasa. 
\v 5 Na naboko sa vaivasevi sosoto beto sa taloa vamekai sa sa totoravusia sa na Tamasa beto na rane na bongi sake korotonia na vavara beto na tetepa lao tana Tamasa. 
\v 6 Goto na naboko sa vapugeleni qeqera kasia gusu na ona toa sa sa korapa toaona ba na tei matena tu. 
\v 7 Ko mu paranga vaneneqiniria sira na sakasa aipira, ko ira na tinoni mi keporeniria na pake. 
\v 8 Goto na tinoni sake dogoro kopuniria sira na turana mekana vevei ira pa ona tatamana sosoto mekana, poni sa isa sa kilu palenia isa sa na ona rarange beto ko sa ikere jolania na tinoni keporeona rarange sisa. 
\v 9 Na naboko vevei gu api sa mu kuti vagorea ko mina tatoka: isa gu sa jola vonomongavulu na aorona, sa kame gu na marenena, 
\v 10 na roiti jongadi sa roitiniria perangana na tagigilana vatale vevei na pausu koburu, na vakamu goto tinoni, na loqana na nenedi ira na tinoni tana Tamasa,\f + \fr 5.10 \fr*\ft Na loqadi na nenedi ira na tinoni kamudi sa na tuti tadira pa totoso isa, totonai qai vakamuria sira na tinoni qai kamu pa ruma.\ft*\f* na tokaniria ira na tinoni qai gosoro tapata beto na tutidi ira doru jongadi.
\p
\v 11 Goto ira na naboko kokoregadi sa muke kuti vatomeria ura totonai sa neqi jolania na Karisito sa na dia nyonyorogua poni sa qai nyorogua vaialava bei. 
\v 12 Ko qai teku tariniria sa na vaituti ura qai tetea na dia rarange qai maulu momoenia 
\v 13 Beto ko isa tugu vei qai gigalainia sa na udapelu kole rererege vaikarovai ruruma gu. Ba nake udapelu gu mekana sa qai toania, goto qai vavavotu goboro paranga tugu, qai rara karovoria na dia ginugua na goto tinoni, beto qai pojaria na sakasava sake garo bai pojaria. 
\v 14 Ko sa vei sa ara qa nyoroguania sa ira na naboko koregadi sa mai vaialavadia gu, mai isongo koburu, beto mai kopunia na dia tatamana, ko mi keporeniria na lolomo mai vakesanigita na paranga ikikeredi ira qai kanagita. 
\v 15 Ura ira kaki naboko koregadi sa qai tei gabala vapele tutiadia tu si Setani. 
\v 16 Na rereko rarange sa koledia na tavitina nanabokodi sa mi kopu vataleniria gu ko mike vajujunoa na ekelesia, ko na ekelesia mi boka tokaniria sira na nanaboko vaivasevi sosoto.
\p
\v 17 Ira na tinoni mamata qai totoli vatale pana dia vaitoni sa na padadi mai tatabarania karu boko vinalavata, ko sa poreveveina jola sa muna veiniria sira qai pavu talenia na tarae beto na vaivagigalai. 
\v 18 Ura sa paranga sa na Kukuti Tabuna, pira sau, <<Muke piko ngujupukua sa na okeseni totonai sa korapa tete vovoragaria na kiko,>> \f + \fr 5.18 \fr*\ft Vavanau 25.4 (1 Koriniti 9.9). Na ginuana vei api sa vei ko mina boka ganigana kiko tugu vei ura sa roiti ko sa padana tugu mina tekua na tabarana.\ft*\f*sau, beto ko <<Na tinoni roiti sa na padana tugu mina tekua na tabarana,>>\f + \fr 5.18 \fr*\ft Luke 10.7; Matiu 10.10\ft*\f* sau. 
\v 19 Na tinajutu sa tajutunia na tinoni mamata sa muke nongoria, goto vei karu babi kue tu bai dogoroni matadi bai pogoso lamenia sa na tinajutu poni sa mu nongoria ko mu pitua. 
\v 20 Ira na tinoni mamata qai toania na toa selana sa mu uduku votuniria pa moedi doru tinoni, ko ira doru tinoni ba mai matagutu. 
\v 21 Pa moena na Tamasa na Karisito i Jisu beto ira na mateana taviledi qa poja vaneneqinigo ara sao ko mu kopu vatataleniria sira na sakasa aipira. Tonai qu oqoro doro vilotia na sakasa poni muke vatoqo moea na mua vivile beto muke totoka kale. 
\v 22 Muke oqani bebenyo vaoponiria na limamu ko mu vamadiria pana roitina sira na tinoni beto muke somanania na dia sela na goto tinoni. Mu kopu valioso mulenigo mekamu.
\p
\v 23 Kopira muke buku gagale pie gu, goto mu tekua tugu vei iapeki vaini ko mi vajonganai na iapamu beto na vioro sa kakamugo.
\p
\v 24 Na sela tadira kaki tinoni sa sa kabere vatatale gu ko sa momoeniria lao pa vaipitu, goto ira kaki na dia sela sa sa tuti liliguria. 
\v 25 Sa vaitoto vei tugu na roiti jongadi tadira na tinoni ba qai kabere vatatale, ko ira qaike kabere vatale ba kode maike boka pae.
\c 6
\s Na Uana Tadira Na Pinausu
\p
\v 1 Ira na pinausu sa mai roqu veiniria sa pada tugu ko mai pangaganiria sira na dia bangara, ko kepore kai tinoni mina poja vivikeria na isongona na Tamasa beto na vaivagigalaina na Karisito. 
\v 2 Ira qai isongia na bangara sa tinoni rarange sa maike vakeporea sa na dia bangara ura kopira qai mekarai vaitamatasi pana rarange. Goto mai nabulu vatale jolania tu perangaina ura ira na bangara qai tokaniria pira ba na tinoni rarange tugu ko qai roroquria tugu vei. Mu vaivagigalainiria beto mu paranga vaneqiniria sira na sakasa aipira.
\s Na Vaivagigalai Sesekedi beto na Isisongo Sosoto
\p
\v 3 Na tinoni sa vaivagigalainia kai goto vaivagigalai tu ko sake vasotoa na paranga tuvisidi ta noda Bangara i Jisu Karisito beto sake vasotoa na vaivagigalaina na pangagana na Tamasa, 
\v 4 poni na tinoni isa sa pugelia na roqu mulenia mekana beto kepore kai sava bi vagogovea. Goto sa mo na roquna sa na tinoni vei isa ko sa kole gu vavaikalo paranga beto vavaigua paranga. Ko na vavaipera paranga vei pira sa sa vavotua na nyonyoroguania na isisongo tana goto tinoni, na vavaipiarai, na vavaipoja vivikere, beto na dodoro rorovenia na goto tinoni pana soana ikerena. 
\v 5 Qai kole gu vaitoke vivikere sira sa gani vikere na vonanadi beto qai daidiania na sosoto. Ira qai roroqua sa na pangagana na Tamasa sa kai soana mai isisongonia qarigu.
\p
\v 6 Ba na pangagana na Tamasa sa kolea na uana doro vagaronia na sakasa sa na isisongo lavata. 
\v 7 Ura gita sa kepore kai sa taqe pogoso tomenia pa kasia gusu, ko kepore tugu sa kai sa tana boka pogoso votunia pana kasia gusu. 
\v 8 Ko vei tana isongia gita sa na tetekuna beto na poko, poni sa tana dogoro vagaroa gu gita sa aipira. 
\v 9 Goto ira qai nyonyorogua isisongodia sa qai vukele pana totoke beto pana sipata, beto qai vukeleniria soku roroqu gogoborodi beto na vavainganguludi qai vadururia ira na tinoni ko qai gosoroni tapata beto na tapipiara. 
\v 10 Ura kai kutana doru roiti ikikeredi sa na bulo poata. Ira kaki sa qai kukuli vivitiginia sa na poata ko qai tatoni vapiru pana rarange beto na bulodi sa soberia soku takulanga.
\s Na uana tuvisina tana nabulu tana Karisito
\p
\v 11 Goto ao, na tinoni tana Tamasa, sa mu ukuniria tu sira na sakasava ikeredi aipira. Mu nyaqo tutia tu sa na tuvisi, na pangagana na Tamasa, na rarange, na vairoqu, na vangaju beto na vajongana lao tadira na goto tinoni. 
\v 12 Mu vaipera vivivania na vaipera jongana pana rarange. Mu aru tamania na toa jola, isa sa sorunigo ao na Tamasa ko muna tekua sau tonai qu ule votunia na mua rarange pa moedi soku tinoni qai nongorigo. 
\v 13 Pa moena na Tamasa isa sa vatoaria doru sakasava beto na Karisito i Jisu isa sa ule votunia na ulule jongana pa moena i Ponitiasi Paelati, qa paranga vaneneqinigo ara sao 
\v 14 ko mu kopunia sa na garunu api pana uana kepore pajina beto kepore pakena tinganai mina bola votu lame sa na oda Bangara i Jisu Karisito. 
\v 15 Ko na ona bola votu isa sa mina gore votu pana totoso tavilena sa vakolea na Tamasa isa sa pada ko mina tavatarasae, na Bangara ululuna mekana, na Bangara tadira na bangara beto na Tamasa tadira na tamasa. 
\v 16 Isa mekana sake boka mate beto sa suvere pana kabere vaivakeana jola, isa kepore kai tinoni bi tei batia mai tu babi mina boka batia sisa. Tana sa na vinalavata beto na neqi kole jolana. Agua.
\s Vavanau tadira Qai Isisongo
\p
\v 17 Ira qai isisongo pa kasia gusu api sa mu paranga vaneneqiniria ko maike valavata muleniria mekadi beto maike totoravusia na isisongo sa boka mumuri, goto na Tamasa tu isa sa vanigita doru isisongo ko na vaqera vataleda gita sa mai totoravusia. 
\v 18 Mu poja vaneneqiniria ko mai roitinia na jongana, mai isisongoniria na roiti jongadi, mai vaitokai vatale beto ko mai ngangalinia na vaiia. 
\v 19 Tonai mai vei inara sa qai korapa boko vaikamudia isisongo sa veu kai kokovana jongana tana toa vuka risa, ko mai aru tamania sa na toa sosotona.
\s Na paranga vinabebetona
\p
\v 20 Timote, mu kopu vasarenia sa isa sa qu tarangenia ko mu kopunia. Mu gabala loa paleria sira na paranga tututurudi sake koleria na pangagana na Tamasa beto na vavaigua goborodi qai gigala goboroniria na gigalai. 
\v 21 Ira kaki sa qai tei isongia tu sa na gigalai isa qarigu, ko qai tei gabala loa pale tu sa na dia rarange.
\p Na vairoqu vaialona mi vavaburogou agou.