\id 1PE First Peter, Luqa in Solomon Islands, 1st Proofread corrected, Tr:EK, AdC:AGZ/Sep98, CCh: Carl/Feb2000, Rvwd:Aug/99/May2001, 8th rvsd:JuneNov2001/AugSep2002, Dec2002
\ide UTF-8
\h 1 Pita
\toc3 1 Pita
\toc2 1 Pita
\toc1 1 Pita
\mt I Pita Momoe
\c 1
\s Na popodalaina na leta
\p
\v 1 Ara Pita kai tinoni tagarunuqu ti Jisu Karisito sa qa korapa kuti lao tamugou na tinoni tavilemiu tana Tamasa qu korapa okoto suvere vei na tinoni gotomiu pana okokoto gugusu pa Ponitasi, pa Qelesia, pa Kapadosia, pa Esia beto pa Bitinia. 
\v 2 Agou sa pa ona nyorogua tu na Tamasa na Tamada sa vilegou beto sa tei vamadigou tu na Gagala Tabuna, ko muna tutia agou si Jisu Karisito ura qu tei tavalioso tu pana orunguna isa sagou.
\p Na vairoqu vaialona beto na bule mi vovonu tamugou.
\s Taqe vera gegele ura i Jisu sa tei turu mule tu
\p
\v 3 Sa pada vivitigi ko mina tavatarasae sa na Tamasa na Tamana na oda Bangara i Jisu Karisito. Ura isa sa roroqu toka vivitiginigita ko sa vanigita na toa koregana. Ko sa vei sa taqe korapa vera gele vatalenia gita sa na toa vinarua ura i Jisu Karisito sa tei toa mule tu pana mate. 
\v 4 Taqe tei tekua tu gita sa na toa koregana ko sa vei sa taqe korapa verania sa na toa sa taringunguti vakole vanigita pa noka na Tamasa. Ko na toa sa taringunguti vakolea na Tamasa api sa sake boka nyabo na paji beto sake boka manyao. 
\v 5 Ko agou sa qu rangea isa vei sa qu korapa takopu vasare pana neqi tana Tamasa ko tinganai muna tekua tu agou sa na inaalo sa tei vanaqiti vakolenia tu na Tamasa ko mina vagore votua pana vinabebetona na totoso sau. 
\v 6 Ko sa vei sa mu qeraniria sa ira na sakasa mai gore votu vuka risa, ba pana iapeki totoso pira sa qu korapa takulanga sagou tonai qu korapa gosororia soku tapata. 
\v 7 Ba na ginuana qai lame sira na tapata aipira sa vei ko mina tadogoro pikata sa na sosotona na rarange tamugou. Na qolo sa kai sakasava sa boka tapiara pale gu ba sa tapodeke tu pa niku sisa. Ba na rarange tamugou sa sa poreveveina jolania na qolo ko sa vei sa mina tapodeke tugu pana tapata. Tonai tu mina tapodeke sa mina tadoro pikata sa na rarange sosotona sisa, beto sa mina ovulugou beto na valavatagou na Tamasa sagou tonai mina mule lame i Jisu Karisito. 
\v 8 Quke batia agou si Jisu ba qu korapa tugu roroqua, beto kopira ba quke korapa tugu batia agou sisa ba qu korapa tugu vasosotoa. Beto ko qu isongia sa na qeqera lavatana jola sake boka tavakole pana vavakato. 
\v 9 Ura qu korapa tekua tugu agou sa na vuana na miu rarange ko na vua isa sa na veveina na Tamasa sa aloria na miu toa.
\p
\v 10 Ko na veveina na inaalo api sa qai kole nyaqo vivitigia beto qai doro vivilotia ira na tinoni kokorotai pa moa, beto qai ule votunia sa na vaivana isa mina vanigou agou saunia na Tamasa. 
\v 11 Ko qai podeke doro pikatia ira sa ai totoso veveina beto ai mina vevei sa na lame tana. Isa sa na totoso sa udukia na Gagalana na Karisito sa kole tadira tonai sa kokorotainia sa na vitigi mina gosororia na Karisito beto na sakasava vaivagabaradi mai tuti lame pa liguna mina gosororia isa sira na vitigi beto ko mina tavaturu mule sisa. 
\v 12 Na Tamasa sa vakaberia pana tadira na tinoni kokorotai sa na sakasava qai kokorotainiria sa nake dia mekadi gu goto na vei ko na tokanigou agou tugu vei. Ko na sakasava pira sa qai tei ule vanigou tu ira qai vavakatonia na nongoro jongana tamugou. Na Gagala Tabuna isa na tagarunu lagerena pa noka sa sa vaniria na neqi sira ko qai vavakato vanigou sa na nongoro jongana. Ko ira na mateana ba qai nyorogua gigilaria tugu sira doru sakasava qai gore votu aipira ba qaike boka batia.
\s Mu toania na toa liosona
\p
\v 13 Ko sa vei isa sa, mu vatana vatalea na roqumiu vei na tinoni sa saqiti vasaea nona poko ko sa vanaqiti ko mi roiti sau. Muke ilalo lao lame goboro pana miu toa, mu vakolea doruna na miu rarange pana vairoqu vaialona isa muna tekua tonai mina mule lame i Jisu Karisito. 
\v 14 Mu toania na toa vatabe ko muke vamalumuria na miu nyorogua ikikeredi pa moadi kita mai toni vapiru veinigou tonai qu oqoro gigilai na tuvisi. 
\v 15 Goto pana doruna na miu uana sa mu toania tu na toa liosona, kai muqisi podeke vei na Tamasa isa sa kukugou ba na liosona tugu. 
\v 16 Ura pira sau sa na Kukuti Tabuna, <<Mu toania na toa liosona sagou ura ara sa na liosoqu,>> sau sa na Tamasa.\x - \xo 1.16 \xo*\xt Iama 11.44, 45; 19.2; 20.7.\xt*\x*
\p
\v 17 Isa na Tamasa sake totoka kale tonai sa pituria ira na roiti tadira na tinoni sa qu gigalania na Tamamiu agou. Ko sa vei isa sa mu pangagania sa na Tamasa pa doruna na miu uana tonai qu korapa suvere vei na tinoni gotomiu pa kasia gusu api. 
\v 18 Ura qu tei gigilaimiu tu agou sa na soana vei beto qu taruvata. Nake sakasava vevei na qolo beto na siliva sa qu tapajukunia agou pana miu toa gogoborodi qai vakarovo vanigou ira na miu tite. Na qolo beto na siliva sa qai boka tavakepore veveidi gu. 
\v 19 Ba agou sa qu tapajuku pana orunguna tu na Karisito tonai sa mate, ko isa sa sa na vavakukuvu sa vei na lami liosona kepore na pajina. 
\v 20 Tonai tu sa oqoro tavapodaka na kasia gusu sa tei vilea tu na Tamasa sisa ko mina alogita, beto pana totoso bebetodi pira sa sa bola votu sisa pana laemiu agou. 
\v 21 Ko tonai qu rangea agou sa na Karisito sa qu vasosotoa agou sa na Tamasa isa sa vaturu mulea pana mate si Jisu beto sa vania na vinalavata. Ko na rarange tamugou beto na miu vera vatalena na taringunguti tana Tamasa sa qai pasusu gu pana tana.
\s Mu toania na toa vairoqu
\p
\v 22 Ego tonai qu vatabea agou sa na nongoro sosotona sa qu tei tavalioso tu pana miu toa ikeredi beto ko qu roroquria pana vairoqu sosotona sira na turamiu. Ko kopira mu ngangalinia agou pa bulomiu sa na toa mekarai vairoqu. 
\v 23 Ura qu tei podo mule tu sagou. Ba nake pana tana tinoni sa boka mate sa qu podo mule lame vei sagou goto tonai qu vasosotoa na paranga toana beto na kole jolana tu tana Tamasa isa sake boka mate. 
\v 24 Vei sa pojai na Kukuti Tabuna sa pira sau,
\q1 <<Doru tinoni sa qai vei gu na buburu
\q2 beto doruna na dia babata jonga sa sa vei gu na avoro pirudi.
\q1 Na buburu qai malei mate
\q2 beto na avorodi qai udodia,
\q1
\v 25 ba na paranga tana Bangara sa kole jola kamua na kamua,>> sau.\x - \xo 1.24-25 \xo*\xt Aisea 40.6-8.\xt*\x*
\p Ko na paranga api sa isa tugu na nongoro jongana sa tei tavavakato tu tamugou.
\c 2
\s Na patu toana beto na bubutu madina
\p
\v 1 Mu loa paleria sira doru roiti ikikeredi, doru seseke, na kokonoa beto na poja vivikeria na goto tinoni. 
\v 2 Kai muqisi podeke vei tugu na melalu sa nyorogua susu vivitigi poni sa agou ba mu kidepe vivitigi veinia tugu isa sa na paranga tana Tamasa. Ko muna nongoria beto muna tutia agou sa kode muna pidoko sae ko muna taalo sagou. 
\v 3 Ura qu tei valilingia tu agou sa na vairoqu tana Bangara.\x - \xo 2.3 \xo*\xt Kera Vinatarasae 34.8.\xt*\x*
\p
\v 4 Mu lame tata tana Bangara. Isa sa na patu toana qai kilu pale ira na tinoni, ba isa tugu sa na poreveveina pana vivile tana Tamasa.\x - \xo 2.4 \xo*\xt Kera Vinatarasae 118.22; Aisea 28.16.\xt*\x* 
\v 5 Agou mekamiu sa qu vei na patu toana ko mu somana tavaroiti pana vaturuna na ruma tabuna sa roitinia na Gagala Tabuna. Ketakoi muna roiti vei ira na iama madidi sagou ko muna pogoso lameniria na vavakukuvu liosodi isa sa vaqerai na Tamasa pa ginuana na roiti sa roitinia i Jisu Karisito. 
\v 6 Ura na kolena pana Kukuti Tabuna sa na paranga api:
\q1 <<Doro! Qa vakolea kai patu pa Zaione
\q2 na patu viviso tavilena beto poreveveina.
\q1 Ko na tinoni sa vakolea nona totoravusu tana
\q2 sa minake tavakea,>> sau.\x - \xo 2.6 \xo*\xt Aisea 28.16.\xt*\x*
\p
\v 7 Ko agou qu vasosotoa na Karisito sa qu valavatia sisa, goto ira qaike vasosotoa ba sa korapa tugu poreveveina sisa, vei sa pojai na Kukuti Tabuna, pira sau,
\q1 <<Na patu qai kilu pale
\q2 ira na tinoni vavaturu ruma,
\q2 isa tugu sa na kuta patu viviso,>>\x - \xo 2.7 \xo*\xt Kera Vinatarasae 118.22.\xt*\x* sau.
\p
\v 8 Beto isa vei sa pojai mule na Kukuti Tabuna sa pira sau,
\q1 <<Kai patu vaivavukelena
\q2 beto kai patu lavata vaivatatupena,>>\x - \xo 2.8 \xo*\xt Aisea 8.14-15.\xt*\x* sau.
\p Qai tatupe sira ura qaike vasosotoa ira sa na paranga tana Tamasa. Ko qai gosoria tugu ira sisa vei qai talevenia ko mai gosoria.
\p
\v 9 Ba agou sa na tinoni tavilemiu, na iama tuti bangara, na puku tinoni liosomiu, beto nona mekana na Tamasa sagou. Agou sa qu taudukunia ko muna vavakato votunia sa na roiti vaivagabaradi tana Tamasa, isa na Tamasa sa kuku votunigou pana rodomo ko sa vavotu lamegou pana ona kabere. 
\v 10 Pana totoso qai jola lao pori nake tinoni tana Tamasa sagou, ba kopira sa na ona tinoni isa sagou. Pana totoso qai jola lao pori quke valilingia agou sa na vairoqu vaitokai tana Tamasa, ba kopira sa qu valilingia sa na vairoqu vaitokai isa.
\s Mu toa vei na nabulu tana Tamasa
\p
\v 11 Ka visa baere jonga, qa tepa vivitigigou ara sagou qu suvere vei na tinoni gotomiu beto na tinoni kamumiu ko mu loa paleria sira na nyorogua ikikeredi qai vei na kana pana toa tini. 
\v 12 Pana miu suvere vaisomanai tadira tinoni karovodi sa mu vajonganaia sa na miu uana. Ko tonai mai jutunigou na tinoni ikikeremiu poni sa mu vabatiniria na miu roiti jongadi ko tonai mina lagere tutiniria na tinoni sa na Tamasa poni sa mai vatarasaea ira sa na Tamasa.
\p
\v 13 Pana valavatana na Bangara sa mu vataberia sira doru tinoni qai taudukunia sa na neqi ko qai suvere pa qavuna. Mu vatabea na kuta bangara lavata pa qavuna beto mu vataberia tugu sira na tinoni vaitoni sa vileria isa. 
\v 14 Ira tugu sira na tinoni sa vileria isa ko mai vakilasaria sira na tinoni ikikeredi beto mai valavataria sira na tinoni qai roitinia na jongana. 
\v 15 Ura na nyorogua tana Tamasa sa ira na tinoni ikikeredi sa mai noso poja vivikeregou pana dia soana ikikeredi sagou tonai mai batiria ira sa na miu roiti jongadi muna roitiniria agou. 
\v 16 Mu suvere vei ira na tinoni taruvatamiu. Ba muke varoitia na miu toa taruvatana ko bu roitiniria sira na sakasava ikikeredi, goto mu toa vei tu na nabulu tana Tamasa. 
\v 17 Mu pangaganiria sira doru tinoni, mu roroquria sira agou qu mekarai rangea na Karisito, mu valavatia na Tamasa beto mu pangagania sa na kuta bangara lavata pa qavuna.
\p
\v 18 Agou na pinausu sa mu tuti viketairia beto mu pangaganiria sira na miu bangara. Ko nake ira gu mekadi na bangara qai jonga beto qai vajongana lao tana goto tinoni sa muna veiniria, goto ira na bangara qaike vajongagou ba mu veiniria tugu. 
\v 19 Ura na Tamasa sa qerania sa na tinoni tonai bi gosoria na tapata ba sa gigilai na tinoni isa sa na monanana na Tamasa, ko sa varajai gu isa sa na vitigi sake pada ko bi gosororia isa. 
\v 20 Tonai qu roiti vasela ko qu tapiqolo taleniria agou sira na sela qu roitiniria ba qu vangajuria gu sa na vitigi ira. Ba kepore kai sakasava jongana bu tekunia agou sa na tapata qu gosoria tonai. Goto tonai quke kilasaniria agou sira na vitigi qu gosororia tonai qu roitiniria na roiti jongadi, sa isa sa vaqerai na Tamasa sisa. 
\v 21 Ko na toa vei inara sa sa kukunigou na Tamasa agou. Ura na Karisito sa tei gosororia tugu sira na vitigi ko sa tokanigou sagou beto ko sa vakole vanigou isa sa kai vinapapada jongana ko agou ba muna rerege tutia sa na pou nenena isa. 
\v 22 Kepore kai sela bi roitinia beto kepore kai seseke bi tanongoro pa nona paranga sisa.\x - \xo 2.22 \xo*\xt Aisea 53.9.\xt*\x* 
\v 23 Tonai qai poja tarinia doru paranga ikeredi, poni sake bei laoniria na paranga ikeredi. Tonai qai vania na tapata, poni sake vaiperaona ko bi vanosoria, goto sa vakole laoa na ona toa tana Tamasa tu isa sa vaituti pana tuvisi. 
\v 24 Na Karisito sa pogosia pana tinina tonai sa mate pa korosi sa na vinakilasana na sela tadagita. Ko sa vei sa gita taqe taruvata pana neqi tana sela ko taqe toania na toa tuvisina. Pana palekana isa sa qu tasalana sagou. 
\v 25 Perangana qu vei na sipi mumana sagou ba kopira qu tei tatoni mule lao tu tana Karisito isa na sepati beto isa sa kopunia na miu toa.
\c 3
\s Na vavanau tadira na iviva rereko na iviva marene
\p
\v 1 Beto ko agou na iviva rereko ba mu tuti viketeria sira na marenemiu. Ko vei ira kaki sa bai oqoro vasosotoa na paranga tana Tamasa poni sa kode mai boka tavagabala ko mai vasosotoa tonai mai batia na uana jongana tamugou na maqotadi. Ko munake kilu pojaniria kai paranga agou sa beto mai tavagabala sira na marenemiu 
\v 2 goto tonai gu mai batia na miu uana liosona sa kolea na pangaga. 
\v 3 Muke sari vababata jonganaria gu na sakasava vevei na vivinyulu vurungu, na papaku teteri qolo beto na poko sasari sa na peguru tinimiu. 
\v 4 Goto na miu uana tu sa koko lame vei pana bulomiu sa mu sarinia na sakasava qaike nyabo vivikere vevei na uana nake tuara beto na uana bubule. Na sari vevei tu pira sa sa doro poreveveina pana tana Tamasa. 
\v 5 Ura pa moa sa api tugu sa na soana qai tutia ira na rereko madidi qai totoravusia na taringunguti tana Tamasa. Qai sari vabata jongai sa na dia toa tonai qai suvere viketai pana tadira na marenedi. 
\v 6 I Sera sa kai rereko sa vei isa. I Sera sa vainongoro lao ti Ebarahami beto sa kukunia na ona bangara si Ebarahami. Ko agou ba kopira muna vei tugu i Sera vei muna roiti vatale beto vei muneke matagutunia kai sa.
\p
\v 7 Ko agou na iviva marene ba mu gigila vataleria tugu sira na maqotamiu tonai qu suvere tavitiria ura qaike neqi vei agou na marene sira. Mu pangaganiria sira na maqotamiu ura ira beto agou sa kode muna mekarai isongia tugu sa na toa jola isa na vaivana tana Tamasa. Ko muna roiti vei agou aipira sa na miu vavara ba maike takoloso.
\s Gosoro taleni vitigi na roiti tuvisina
\p
\v 8 Na qua vavanau bebetona sapi. Mu mekarai suvere kame pana uana jongana pana toa, mu mekarai kame pana roroquna na goto tinoni, mu mekarai vairoqu vei na tamatasi tana Karisito, mu mekarai isongia na bulo vairoqu, beto mu vaikete mulenigou pana tadira na tinoni. 
\v 9 Muke vamule bei vaniria na ikerena sira qai roiti lamenia na ikerena pana tamugou, beto muke gonaniria na parange ikeredi sira qai gonanigou na paranga ikeredi. Goto mu tepa vaniria tu na mana ura na mana tu sa sa kukunigou na Tamasa ko muna teku isongia agou. 
\v 10 Inara tu mu toa vei sagou, ura pira sa tei paranga vei tu sa na Kukuti Tabuna,
\q1 <<Na tinoni sa nyorogua tekua na toa qeqera
\q2 beto sa nyorogua kamuria na rane jongadi
\q1 sa mi noso poja vivikereria sira na tinoni
\q2 beto mike vavakatoniria sa na vavakato sesekedi.
\q1
\v 11 Mi noso roitinia na roiti ikikerena ko mi roitinia na roiti jongana.
\q2 Mi nyoroguania tu beto mi nyaqo vivitigia tu isa sa na toa bule.
\q1
\v 12 Ura na Bangara sa doro kopuniria sira na tinoni tuvisi
\q2 beto sa vainongoroniria sa na dia vavara,
\q1 goto ira na tinoni qai roitinia nikerena sa sake tavaraguaniria,>> sau.\x - \xo 3.12 \xo*\xt Kera Vinatarasae 34.12-16.\xt*\x*
\p
\v 13 I sei sa mina boka ngangangulugou agou tonai muna ngangalinia na roiti jongana? Bi mija tu kame! 
\v 14 Ba vei bu gosoro taleni tapata tu agou sa na tuvisi qu roitinia, sa tamalea sagou. Muke matagutuniria sira qai boka vanigou na tapata, beto muke mamata na takulanga. 
\v 15 Goto mu valavatia pa bulomiu sa na Karisito na Bangara. Beto mu vatana doru totoso ko mu oe muleria sira na tinoni mai nanasanigou na veveina na miu vinasosoto sa kole pa bulomiu. 
\v 16 Ba tonai mu oeria poni sa mu roitinia pana pangaga beto pana uana viketai beto pana monana jongana, ko tonai mai aja vagogoregou beto mai poja vivikeria sa na miu uana jongana vei qu tutia na Karisito sagou, sa kode mai tavakea mekadi sira. 
\v 17 Ura vei mina ona nyorogua tugu na Tamasa sa muna gosoro tapata sagou, poni sa sa jongana jola sa muna gosoro taleni tapata sa na roiti jongana. Isa tu sa sa jongana jolania vei bu gosoro taleni tapata sira na roiti ikeredi.
\p
\v 18 Ura na Karisito sa matenia kai totoso gu sa na sela tana goto tinoni. Isa na tinoni tuvisi sa matepaeniria sira na tinoni sela, ko sa toni vatata laogita tana Tamasa. Na Karisito sa tavamate pana tini ba sa tavatoa pana gagala, 
\v 19 ko tonai sa sa gore tarae vevelania isa sa na vinakilasa tadira na gagala qai tapiu vakole. 
\v 20 Ira sira na tinoni sa kole vera vamomosoniria na gabaladi na Tamasa pana totoso pa moa tonai sa kole roitinia na aka i Noa. Ira ka vesu tinoni momoqasadi gu sa qai tome pana aka ko ira gu sa sa aloria na Tamasa pana kolo. 
\v 21 Ko isa sa gosoria i Noa beto na ona tatamana sa na vinagigila sa udukia sa na paputaiso isa kopira sa alogou agou ura i Jisu Karisito sa tei turu mule tu. Ba na ginuana na paputaiso sa nake vei ko na valioso paleria na paji pana tini ba na ginuana sa gita taqe vasosotoa pana monana jongana sa na Tamasa. 
\v 22 Ko i Jisu Karisito sa tei sae tu pa noka ko kopira sa korapa toqo pa kale matuana na Tamasa, beto ko sa bangaraniria sira dorudi na mateana beto ira na okokoto kuta bangara beto na gagala neqidi pa vavagalo eqa.
\c 4
\s Mu toania na toa gabalana
\p
\v 1 Na Karisito sa tei gosoria tu na vitigi pa korosi, ko agou ba mu vanaqitinia ko mu gigila vatalea sa api: na tinoni sa gosoria na vitigi pa tini sa sa tei dainiaona tu sa na sela. 
\v 2 Ko na tinoni vevei isa sake tutia sa na ona nyorogua ikikerena mekana, goto pana doruna na ona toa pa peso sa toania gu sa isa vei sa nyoroguania na Tamasa. 
\v 3 Qu tei gona paleni totoso kakasana jola tu agou pana totoso qai jola pori sa na roiti qai nyonyorogua roitinia ira na tinoni karovodi. Pana miu toa perangana tonai qu oqoro vasosoto sa qu kole toaniria sa na aru vabosi, na nyonyorogua ikikerena tana tini, na toa bubuku, na vavaigitanainia na toa bubuku beto na roiti vaivakeadi beto na vavatarasae beku vaivakeadi jola. 
\v 4 Ko sa vei sa qai gabaranigou sira na tinoni rodomo ura kopira quke vaigitanai tavitiria sira pana toa lulasana sosoto qai toania. Ko sa vei sa qai vakesanigou doru paranga ikikeredi. 
\v 5 Ba ira na tinoni pira sa kode mina tabati poa na dia toa ikikerena tonai mai turu pa moena na Tamasa. Ko na Tamasa sa sa korapa vanaqiti ko mina tutiniria sira na tinoni toadi beto na matedi. 
\v 6 Ko pana ginugua vei isa sa sa tei tatarae tu pana tadira qai tei mate tu sa na nongoro jongana. Ko pana toa tini qai tapitu vei tugu ira doru tinoni sira, beto ko pana toa gagala sa mai toa vei sa nyoroguania na Tamasa.
\s Mu varoiti vataleria na vaivana tana Tamasa
\p
\v 7 Ego sa tei rijo tata lame tu sa na vinabetona na kasia gusu ko mu gaiti vatalea na roqumiu beto mu suvere kopu ko mu boka vavara vatale. 
\v 8 Ba isa sa poreveveina jola sa mu vaneqia na toa vairoqu, ura na tinoni sa vairoqu sa sa boka doro vajola pale sa na sela tana goto tinoni.\x - \xo 4.8 \xo*\xt Gigalai 10.12.\xt*\x* 
\v 9 Mu vakamu vataleria na goto tinoni beto muke ququminiria. 
\v 10 Gita doru sa taqe okoto teku vaivana tana Tamasa ko tavaroiti vataleria sira na vaivana pira ko ta tokaniria na goto tinoni. 
\v 11 Isa na tinoni sa tarae sa mi taraenia sa na paranga sosotona tana Tamasa. Isa na tinoni sa vaitokai sa mi vaitokai tugu sisa pana neqi sa vania na Tamasa. Ko vei pira mai vevei sira na uana tamugou poni sa mina tavatarasae sa na Tamasa pana miu kole kame tai Jisu Karisito. Na Tamasa sa pada ko mina tavatarasae, ura isa tugu sa isongia sa na neqi kamua na kamua. Agua.
\s Ta vitigi vei na Karisito
\p
\v 12 Ka visa baere jonga, muke siboro beto na ruraniria sira na vitigi mamanginidi qu gosororia. Muke dogoro veiniria qai kamu goborogou sira na tapata qai lame podekia na miu rarange. 
\v 13 Ba mu qerania tu agou sa na ginuana qu somana gosororia sira na vitigi sa gosororia na Karisito. Mu qera ko mu boka tavapugelenia agou sa na qeqera lavata tonai mina tabata sa na neqi lavatana tana. 
\v 14 Qu tamana sagou tonai qu tapoja kokomiti pana ginuana qu vasosotoa agou sa na isongona na Karisito. Ura tonai qai veinigou inara, poni sa na Gagala neqina jola tana Tamasa sa kole somana pana tamugou. 
\v 15 Tonai bi gosoro tapata sa kame agou, sa sa vavagua jola sa mike gosoria isa sa na tapata pana ginugua vei isa sa na tinoni sa vaivamate, sa ikiko, sa vavapodo roiti ikerena, babi na tinoni sa rarara karovo pana ona ginugua na goto tinoni. 
\v 16 Ba vei bu gosoro tapata sagou pana ginuana qu tutia na Karisito, poni sa muke keania agou sa vei isa. Goto tonai sa mu paranga jongana lao tu sa tana Tamasa pana ginugua vei qu somana pogosia agou sa na isongona na Karisito. 
\v 17 Ura sa kamua gu sa na totoso tonai mai tatuti sira na tinoni pana tatamana tana Tamasa. Ko sa podalai pana tadagita sa na vaituti, ko kode mai tapata vivitigi sira qaike vasosotoa na nongoro jongana sa koko lame vei tana Tamasa. 
\v 18 Ura sa tei pojai tu pana Kukuti Tabuna sa pira sau,
\q1 <<Vei na tinoni tuvisina tu ba sa gosoro tapata mai tu beto sa taalo,
\q2 poni ai mina koi vei tapatia sa na tinoni ikikerena beto na tinoni selana?>> sau.\x - \xo 4.18 \xo*\xt Gigalai 11.31.\xt*\x*
\p
\v 19 Ko sa vei sa ira na tinoni qai gosoro tapata pana ginuana qai tutia na nyorogua tana Tamasa sa mai totoravusia ira sa isa sa vapodakaria ko mai vania isa sa dorudi na dia toa. Ko mai vatadogoronia ira na tinoni vevei inara pana dia roiti sa na dia totoravusu tana, ura isa sake boka tetea na ona taringunguti.
\c 5
\s Na puku tinoni tana Tamasa
\p
\v 1 Ko sa vei sa ira na tinoni mamata pa vaikorapaimiu agou sa qa korapa tepa vivitigiria ara. Ara ba kai tino mamata tugu beto ko qa vavakatoniria tugu ara sira na vitigi sa gosororia na Karisito pa korosi beto qa somana isongia tugu ara sa na neqi lavatana isa sa tata mina tabata votu tonai mina mule lame isa. 
\v 2 Kai muqisi podeke vei na sepati sa kopuniria na ona sipi, poni sa agou ba mu kopu vataleniria tugu sira na tinoni tana Tamasa qu korapa toniria. Mu kopuniria nake vei ko qu tajutu tarinia gu agou sa, ba mu kopuniria pana bulo malumuna tu isa vei sa nyoroguania na Tamasa. Mu roitinia na roiti api nake vei ko qu nyonyogua teteku tabara gu, goto mu roitinia ura qu nyorogua vaitokai sosoto. 
\v 3 Muke toni veiniria na pinausu sira qai kole pana miu kopu, goto mu vabatiniria tu sa na uana jongana mai tutia. 
\v 4 Ko tonai mina bola votu sa na kuta sepati na Karisito, sa muna tekua agou sa na pinia sake mumuri na kilangana.
\p
\v 5 Ko agou na tinoni sae korega ba mu suvere vaiketai lao tadira na tinoni mamatuadi, beto pana miu uana viketai mu vainabulu lao lame. Ura pira sau sa na Kukuti Tabuna,
\q1 <<I Tamasa sa kanaria sira na tinoni qai valavata muleniria mekadi,
\q2 ba sa vajongana lao sa tadira na tinoni qai vaiketai muleniria mekadi,>>\x - \xo 5.5 \xo*\xt Gigalai 3.34.\xt*\x* sau.
\p
\v 6 Ko sa vei sa agou mu vaiketai mulenigou pa kauru lima evevana na Tamasa, ko isa mina ovulugou sagou pana totoso mina vilea isa. 
\v 7 Mu vania isa ko mi jujunoniria sira dorudi na miu takulanga ura isa sa kopu vatalenigou sagou.
\p
\v 8 Muke ilalo lao lame pana miu roroqu, mu suvere gegele! Ura na miu kana isa na bangaradi na tomate sa sa korapa lekogia doru eqa. Sa korapa lekogo vei na laione sa ngangara ko sa korapa nyaqo tinoni ko mi gani pipiararia sau. 
\v 9 Mu kole vamauru pana miu rarange beto mu raja kokolosia sisa. Ura qu gigilaimiu agou sira na tinoni tana Tamasa pa kasia gusu sa qai korapa tugu gosororia sira na vitigi pana ginuana qai vasosotoa na Karisito vevei tugu qu korapa gosororia agou. 
\v 10 Ba pa liguna muna suvere vitigi pana iapeki totoso papakana, sa na Tamasa mekana isa sa pugelia na vairoqu sa mina tuvaka vatuvisigou, mina sori vamaurugou, mina vaneqigou beto mina vaturu vamaurugou sagou. Isa sa na Tamasa sa kukugou ko muna somana isongia agou sa nona neqi kole jolana, ura qu gigilai agou sa na Karisito. 
\v 11 Isa sa na Tamasa sa isongia na binangara kamua na kamua! Agua.
\s Na Paranga Vinaokotona
\p
\v 12 I Silovanosi sa kai tinoni tana Karisito sa nago taqu ko qa doro rangea ara ko pana vaitokai tana sa qa kutia ara sa kai leta papakana api. Ko qa paranga vaneneqigou beto qa vavakato vaneqinia ara sa isa na vairoqu vaialona sosotona tana Tamasa api. Ko agou sa mu turu vaneqi pana vairoqu vaialona api.
\p
\v 13 Na ekelesia somana tavilena tugu tana Tamasa pa Babiloni\f + \fr 5.13 \fr*\ft Na isongo \ft*\fk Babiloni\fk* api sa udukia pa Romu. Na totoso tapata tadira na tinoni tana Karisito sa tonai sa takuti na leta api ko sake tapoja lodaka sa na isongo Romu.\f* beto na tuqu marene i Maka sa qai garunu laonia na dia roroqu tamugou. 
\v 14 Mu vaigosoro qeqera pana vairoqu tana Karisito.
\p Na bule mi somana pana tamugou na tinoni tana Karisito.