\id JAS BCJAS.SCW Central Bontoc James 10-Nov-92 \h Santiago \toc1 Nan Solat Santiago \toc2 Santiago \toc3 San \mt1 Nan Solat Santiago \imt1 Nan Makwani Maipoon isnan Solat Santiago \ip Nan solat ay nalpo ken Santiago ay pangolon nan mamati id Jerusalem id sangad-om et tokhon isnan am-in ay mamati ken Apo Dios ay naiwalas isnan lofong. Inpaammona ken chaicha nan osto ay ikkan nan takho mo kanancha en mamati cha. Angsan nan al-alig Santiago ay mangipaawat isnan tet-ewa ay laychena ay ibfakha tay laychena ay ostoosto nan okhalin nan mamati. \ip Ifab-aagna nan semek Apo Dios maipoon isnan kinafaknang, nan kinaposi, nan mangaw-awis isnan takho ta enfasol, nan faken khawis ay kankanancha, nan tet-ewa ay silib ya nan tapina kayet. \ip Nan napateg isna et masapol ay maila nan kinatet-ewan nan pammatin nan takho isnan okhalicha ta faken kecheng nan topekcha is mangmangwani. \iot Nan Linaona \io1 Nan lapon nan solat 1:1 \io1 Nan tet-ewa ay pammati ya silib 1:2-8 \io1 Nan kinaposi ya kinafaknang 1:9-11 \io1 Nan mangawis ta fomasol nan takho 1:12-18 \io1 Masapol ay ad-i yangkhay chengngen nan takho nan kalin Apo Dios mod-i ket iyangnencha 1:19-27 \io1 Nan enngaakhan nan pip-iliyen nan ib-a 2:1-13 \io1 Maila nan kinatet-ewan nan pammatin nan takho isnan angnena 2:14-26 \io1 Mey-an nan mamati nan angnencha ay enkali 3:1-18 \io1 Masapol ay ad-i wanwanchen nan mamati nan ang-angnen nan ad-i mamati 4:1 - 5:6 \io1 Nan tap-in nan filin 5:7-20 \ie \c 1 \s1 Nan Lapon nan Solat \p \v 1 Sak-en si Santiago, ay faan Apo Dios ya si Apo Jesu Cristo. \p Pakomostaek chakayo am-in ay takhon Apo Dios\f + \fr 1:1 \ft Nan osto ay naisolat isnan Griego isna et, “Pakomostaek nan sinpoo ya chwa ay naiwalas ay tribo.”\f* ay naiwalas isnan teketeken ay ili. \s1 Nan Likhat, Anos, Silib ya Pammatin nan Takhon Apo Dios \p \v 2 Iib-ak, mo omchan nan ngag issa ay likhat, ifilangyo ay siya nan khotok si chachama ay malaylaychanyo. \v 3 Ammoyo ay nan mateptepngan/mapadpachasan nan pammatiyo et pafal-ena nan anosyo ay en-ikatpe. \v 4 Ngem ilaenyo ta pafal-en ya pabfikasen nan sana ay anosyo nan khawis ay okhali engkhana ay maid makmakwaniyan paymo enkolanganyo. \p \v 5 Mo wad-ay ken chakayo nan enkolang isnan laing ay mangilasinan isnan khawis isnan ngaag,\f + \fr 1:5 \ft Nan osto ay naisolat isnan Griego isna et, \fq “Mo wad-ay ken chakayo nan enkolang is laing”\f* komchaw ken Apo Dios is silib ya at maagtan siya. Tay si Apo Dios, al-allayad ay en-ichowa isnan am-in ay komchaw ken siya ya ad-ina yangyangan chaicha. \v 6 Ngem mo sino nan komchaw, masapol ay abfolotena ya ad-i enchwadchwa ay maalana'y maala nan kedchawena. Tay nan enchwadchwa, et maiyalig isnan talipyakew is kafayfay ay patolitoliyen nan chakhem. \v 7-8 Adi kad mo sino nan enchwadchwa isnan am-in ay ang-angnena, ad-ina kanan en wad-ay fongaena ken Apo Dios, tay ad-i kanonongnong. \s1 Nan Tet-ewa ay Kinafaknang \p \v 9 Lebfengna'y ilal-ayad koma nan maid mabmabfalina ay ib-a nan nangipatongchowan Apo Dios ken siya isnan kasasaadna isnan namatiyana. \v 10 Siya akhes koma isnan nafaknang mo maibfafan-ig isnan mamatiyana. Tay khechangna'y mamaid nan fafaknang, kag isnan sabsafong nan ponchag. \v 11 Tay mo fomala nan akhew ya chad-ama'y atong, malango nan mola, mekchag nan safong et mapakawas nan khawis ay foyana. Siya akhes isnan nafaknang, at maamas isnan en-anaanapana isnan ifaknangna. \s1 Nan Likhat ya Sailo \p \v 12 Naoney nan takho ay makaanos isnan likhat, tay mo ad-i enpaafak, at chawatena nan koronan si fiyag ay eng-engkhana ay inkalin Apo Dios isnan menlaylayad ken siya. \p \v 13 Mo wad-ay masailowan ken chakayo, ad-ina koma kanan en si Apo Dios nan nangawis ken siya. Tay ad-i mabfalin ay maawis si Apo Dios isnan ngaag ya maid akhes sailowana. \v 14 Tay olay sino et masailowan mo malalayan ya maawis isnan ngaag ay figfikhawena. \v 15 Sa et mo nenliton nan fikhaw, at iyanakna nan fasol. Et mo naengngan nan fasol, etey nan wad-ayena. \p \v 16 Tay siya chi chakayo ay kalal-ayad ay ib-ak, ad-i kayo masas-ailowan. \v 17 Tay am-in ay khawis ya maid kolangna ay mailayad ken chatako et malpo id tongcho ken Dios Ama. Siya nan nangaeb isnan am-in ay ensilaw id chaya, ngem olay mo enfaliw ya tomeken nan ilacha, ad-i enfaliw siya. \v 18 Isnan nemnemna kannay, nenfalinena chatako ay takhona maichalan isnan tet-ewa ay kalina, tatno chatako nan alig fin-i isnan am-in ay khinaebna. \s1 Nan Manngelan ya Mangabfolotan isnan Kalin Apo Dios \p \v 19 Iib-ak ay laylaychek, sesemkenyo na: Masapol ay ensasakhana tako ay enchenge, ilonloney tako ay enkali, sa tako't ad-i nalaka ay somonget. \v 20 Tay ad-i pawad-ayen nan songet si takho nan kinalenteg Apo Dios. \v 21 Kaanenyo et mampay nan ngag issa ay kinalokhit ya nan inmawas ay kinangaag. Ibfafan-igyo nan semekyo ay manawat isnan kalina ay inmolana ken chakayo ya makaisalak ken chakayo.\f + \fr 1:21 \ft Nan osto ay naisolat isnan Griego isna et, \fq “makaisalak isnan leng-agyo.”\f* \p \v 22 Iyangnenyo nan kanan Apo Dios ya ad-iyo aped yangkhay chengchengngen. Tay mo siya chi at loklokowenyo nan awakyo. \v 23 Nan aped manmannge isnan kalina ya ad-ina iyangnen, et kag isnan cha ensarming. \v 24 Ilaena nan kamesna sa et komaan ngem ke na't lichongan kannay mo ngag nan ilana. \v 25 Ngem mabindisyonan isnan ang-angnena nan takho ay mang-osiosig ya mamangset ay cha mangiyangnen isnan ad-i enkolang ya omipawaya ay lenteg Apo Dios. Siya nan mangafolot ya mangiyangnen isnan chinngena ya faken nan aped mannge yangkhay sa na't lichongan. \p \v 26 Mo wad-ay mangwani ay siya et en menchayachayaw, sa et ad-i makaipatke isnan chilana, et ongar yangkhay nan enchad-ayawana ya awakna kannay nan loklokowena.\f + \fr 1:26 \ft Nan osto ay naisolat isnan Griego isna et, \fq “sailowana nan posona.”\f* \v 27 Nan nadchalos ay angnen ay enchayaw ay maid kasina kakwaniyan isnan sakhang Dios Ama et siya na: nan mamachang isnan nangoso ya nailekkasan isnan likhatcha, ya nan kaikasiwan isnan kinalokhit nan lofong. \c 2 \s1 Nan Ipaila tako isnan Ib-a ay Mamati \p \v 1 Iib-ak, mo eegnanyo nan pammati isnan matangtangad ay Apo tako ay si Jesu Cristo, masapol ay maid pawadwad-enyo isnan takho. \v 2 Mo wad-ay somkhep isnan maam-amonganyo ay faknang ay ensisingsing is fallitok ya enfafacho is khawigkhawis, sa et somkhep akhes nan posi ay nakhayyokhayyot nan fachona, \v 3 sa yo et khakhawisen nan khawis nan fachona ay mangwanin, “Itokchom isnan nay kakhawisan ay tokchowan,” sa yo't akhes kanan isnan posi, “Itakchegmo ischi,” paymo “Itokchom, isnan sag-en nan khagkhatinak,” \v 4 teketeken nan ikkanyo ay mangifilang isnan ib-ayo ay mamati, ad-i ngen? Mo siya chi nan angnenyo enfalin kayo ay okom ay nappangil ay ngaag nan pangkhepna. \p \v 5 Laylaychek ay iib-ak, chengngenyo kay nan kanak ya! Egay ngen pinilin Apo Dios nan poposi isnan lofong ta enfalin cha ay nafaknang isnan pammati, ya tawichencha nan en-ap-apowana ay inkalina isnan menlal-ayad ken siya? \v 6 Ngem chakayo, ilaylayosanyo nan posi. Adi ngen chaicha kannay ay fafaknang nan mangipap-alikhat ken chakayo ya nan mangog-oyod ay en mangisaklang ken chakayo? \v 7 Adi ngen chaicha kayet nan mangipangapangaag isnan napateg ay ngachan nan Apo ay naitapiyanyo? \p \v 8 Wad-ay nan chadlos nabfalor ay lenteg\f + \fr 2:8 \ft Nan osto ay naisolat isnan Griego isna et, \fq “nan lenteg si ali.” \ft Nan laychena ay kanan et nan chadlos napateg ay lenteg ay infilin nan Ali ay si Apo Dios.\f* ay naisolat ay kalin Apo Dios: “Masapol ay laylaychem nan ib-am ay takho kag isnan menlaycham isnan awakmo.”\f + \fr 2:8 \ft Nan osto ay naisolat isna et, “Masapol ay laylaychem nan sag-enmo kag isnan menlaycham isnan awakmo.” Ilaenyo nan Levitico 19:18.\f* Mo siya chi nan tet-ewa ay abfolotenyo, osto nan angnenyo. \v 9 Ngem mo wad-ay pawadwad-enyo, fomasol kayo, ya maokom kayo isnan lenteg ay mangwanin fomafasol kayo. \v 10 Mo wad-ay eg-ay nangafolot isnan am-iam-in ay lenteg Apo Dios tay kinomsaw isnan esang, maifilang ay finmasol siya isnan am-in. \v 11 Tay si Apo Dios ay nangifilin en, “Ad-im chwadchawaen nan pantewmo,”\f + \fr 2:11 \ft Ilaenyo nan Exodo 20:14; Deuteronomio 5:18.\f* siya kayet nan nangwanin, “Ad-i ka enpatey.”\f + \fr 2:11 \ft Ilaenyo nan Exodo 20:13; Deuteronomio 5:17.\f* Adi kad, olay mo ad-im chwadchwaen nan pantewmo ngem mo nenpatey ka, khechangna'y egaymo inafolot nan lenteg. \p \v 12 Meymey-anyo nan am-in ay kankananyo ya ang-angnenyo tay at maokom tako isnan lenteg Cristo ay mangipawaya ken chatako. \v 13 Tay nan ad-i maneg-ang isnan ib-ana, at ad-i akhes maseg-angan mo maokom. Ngem nan maseg-ang, maid iyegyatna mo maokom siya. \s1 Nan Ilan si Pammati, Maila isnan Okhali \p \v 14 Iib-ak, mo wad-ay mangwanin mamati siya ngem ad-ina tet-ewaan isnan angnena, ngag kay nan enkhawisana? Ay ke mabfalin ay isalakan nan pammatina siya? \v 15 Mo sa ya wad-ay nan ib-ayo ay mamati ay nagkhakhayyot nan fachona ya enkolang nan kanena isnan inakhew, \v 16 ngag kay nan enkhawisana mo wad-ay ken chakayo nan mangwani ken siya, “En ka et. Asop ya enkhagkhawis ka ya chomechenat ya memegsan ka,” mo maid ichowana is kasapolana? \v 17 Siya akhes isnan pammati mo maid fongana, maiyalig ay natey. \p \v 18 Ngem away nget wad-ay nan mangwanin, “Nan esang, wad-ay yangkhay pammatina, ngem nan esang, wad-ay akhes khawis ay cha na angnen.” Ayed, ipailam nan kinatet-ewan nan pammatim ay maid khawis si angnena, ya sak-en, ipatet-ewak nan pammatik isnan khawis ay chak angnen. \v 19 Patiyem ngen ay wad-ay nan es-esang ay Dios? Khawis achi, ngem ay ke omanay? Tay olay nan anito, patiyencha akhes, ya entat-ayenten cha isnan egyatcha ken siya. \p \v 20 Chakayo ay ad-i ensemsemek, ay ke yo ad-i ammo ay nan pammati ay ad-i iyangnen isnan khawis, et maid silfina? \v 21 Si ama tako'y Abraham, faken ngen nan nangiyangnenana isnan naifilin ken siya nan nangibfilangan Apo Dios ay nalenteg siya, tay inchoona nan anakna ay si Isaac is kaaltar?\f + \fr 2:21 \ft Ilaenyo nan Genesis 22:1-12.\f* \v 22 Ilaen tako isna ay nenfinnachang nan pammatina ya nan inangnena, ya nenfalin ay maid enkolangan nan pammatina isnan nangiyangnenana. \v 23 Et siya nan tinmet-ewaan nan naisolat ay kalin Apo Dios ay mangwanin, “Namati si Abraham ken Apo Dios, et nay infilangna siya ay nalenteg.”\f + \fr 2:23 \ft Ilaenyo nan Genesis 15:6.\f* Ya nay nakwanin aloyos Apo Dios. \v 24 Adi kad nay et ammo tako ay ifilang Apo Dios ay nalenteg nan takho khapo isnan angnena, ya faken kecheng isnan pammatina. \p \v 25 Ad-i ngen siya akhes ken Rahab ay asi ay fafai? Infilang Apo Dios ay nalenteg siya khapo isnan inangnena ay nenmangili isnan takhon Apo Dios ay nafaa ay nen-as-as, ya nan nangipaligwatana ken chaicha isnan teken ay chalan ay layawencha.\f + \fr 2:25 \ft Ilaenyo nan Josue 2:1-21.\f* \v 26 Adi kad nan pammati ay ad-i iyangnen et alig natey, kag isnan awak ay kinmaan nan leng-agna. \c 3 \s1 Nan Maiyegyatan nan Chila \p \v 1 Iib-ak, khapesna't si akit ken chakayo nan en-isolo, tay ammoyo ay enchamcham-et nan angnen Apo Dios ay mangokom ken chakami ay en-isos-olo isnan kalina. \v 2 Am-in tako ay takho, et enkammakammali tako, am-amed isnan kali. Ngem mo sa ya wad-ay nan ad-i paat enkammali nan topekna, siya nan takho ay maid kolangna tay ammona ay manengngel isnan olay ngag ay angnen nan awakna. \p \v 3 Kag isnan kafaryo, mo wad-ay ippey tako ay fosar isnan topekna ta patpatiyena chatako, mabfalin ay ittolong tako nan awakna. \v 4 Kag akhes isnan bapor, tay olay mo chakchake ya itot-olod nan ab-afikas ay chakhem, nan mangittolong isnan laychen nan enmanmaniho ay omayan, et nan fan-ifan-ig ay kag chila is kachokogna. \v 5 Siya akhes isnan chila, olay mo fan-ig, chad-ama nan chayewna ay enkali. \p Sesemkenyo nan isang, ay olay mo fan-ifan-ig, mabfalin ay pabfichangena nan anwaanwa ay pagpag. \v 6 Siya chi nan kaiyalikhan nan chila. Siya nan lofong si ngaag isnan awak tako ay menfolok isnan olay ngag sisa isnan katatakho tako. Kag apey ay mangipafichang isnan ngaag isnan am-in ay kasasaad ay omchan isnan fiyag, ya si Satanas kannay id inferno nan mangipafichang.\f + \fr 3:6 \ft Nan osto ay naisolat isnan Griego isna et, \fq “et inpafichang nan Gehenna.” \ft Tay id inferno ay makwanin Gehenna isnan Griego nan ayen Satanas, ento mo isolat Santiago nan ngachan Satanas ket ay inferno nan insolatna.\f* \p \v 7 Am-in ay enkik-iwi, manad-alan ya entat-ayaw, enkodkochong ya enkikyat is kafayfay, mabfalin ay maipaamo cha ya inpaamon si takho. \v 8 Ngem maid takho ay makaipaamo isnan chila. Tay ngaag ya ad-i katengngel, ya napno is pomatey ay khiwachay. \v 9 Siya nan osalen tako ay menchayaw isnan Apo tako ay Dios Ama, nay met achi siya akhes nan osalen tako ay mangipangaag isnan ib-a tako ay takho olay mo nakhaeb cha ay is-ison Apo Dios. \v 10 Adi kad fomala nan enchayaw ya nan enpangaag isnan es-esang ay topek. Iib-ak, ad-i omno chi's maang-angnen. \p \v 11 Maiyalig nan chila isnan eb-eb. Ay ke fomala nan en-aklit ya entamnay ay chanom isnan es-esang ay eb-eb? \v 12 Kag akhes isnan kaew ay lobfan, ay ke fomkhas is kayyab? Wad-ay ngen kalob-as ay fomkhas is lobfan?\f + \fr 3:12 \ft Nan osto ay naisolat isnan Griego isna et, “Ay ke fomkhas nan higos isnan olibo, paymo nan wakan si ofas is higos?”\f* Siya akhes ay ad-i mabfalin ay fomala nan khawis ay chanom isnan en-aklit ay eb-eb. \s1 Nan Malpowan nan Tet-ewa ay Silib \p \v 13 Wad-ay ngen ken chakayo nan nasilib ya makaawat? Ipailana koma nan silibna isnan mangibfafan-ikhana isnan awakna ay kad-in mangiyangnen isnan khawis. \v 14 Ngem mo nan khiwachay ay apal ya nan yangkhay kaidchayawanyo nan semsemkenyo, ad-iyo patongchowen nan awakyo, tay nan ang-angnenyo et iyeng-engagyo nan kinatet-ewa. \v 15 Nan sana ay silib, ad-i malpo id tongcho, mod-i ket kalotaan ay silib, ya malpo isnan fikhaw si takho ya nan anito. \v 16 Tay mo apal ya nan kaidchayawanyo yangkhay nan wad-ay isnan semekyo, at maid manongnong ya fomala nan am-in ay ilan si ngaag. \p \v 17 Ngem naay nan okhali ay pawad-ayen nan silib ay malpo id tongcho. Nan omona et nadchalos. Sa et naimeng naanos, naoya, kad-in maseg-ang ya khawis nan ang-angnena, ad-i enpip-ili paymo kakas-okas-on. \v 18 Nan kinalenteg, et siya nan fongan si talna ay inmolan nan cheycha'y mangipaornos isnan ib-acha. \c 4 \s1 Nan Khotok nan Ad-i Enkasiawatan \p \v 1 Ngag nan khotok nan enkhogkholaan ya maonon-onganyo? Ad-i ngen nan angsan ay fikhawyo nan maon-onon-ong isnan katatakhoyo? \v 2 Wad-ay nan chadlos yo laychen ngem ad-i kayo makaala, et nay maliligwat kayo ay enpatey. Akhomanyo ngem ad-iyo maala, et nay siya nan maonon-ongan ya enkhogkholaanyo. Ad-i kayo makaala isnan laychenyo tay ad-iyo kedchawen ken Apo Dios. \v 3 Ngem olay mo kedchawenyo, ad-ina ichowa, tay ngaag nan pangkhepyo ay siya nan kang-epan yangkhay nan fikhawyo. \v 4 Chakayo ay ad-i kaaafolot! Ad-iyo ngen ammo ay mo nan kalotaan nan pawadwad-enyo et aposenyo kannay si Apo Dios? Adi kad nan mamati ay menlayad ay makikadwa isnan menwadwad-ay isnan lofong, et enfalin ay foson Apo Dios. \v 5 Ad-iyo koma kanan en maid silfin nan inpaisolat Apo Dios ay nangwanin, “Nan Ispirito Santo ay inpateen Apo Dios ken chatako, et chadlos en-imon mo wad-ay pawadwad-en tako mo siya.” \v 6 Ngem al-allayad siya ay fomachang, ay kag isnan inpaisolatna ay nangwanin, “Fachangan Apo Dios nan mangifafan-ig isnan semekna, ngem kholaena nan nachayew.”\f + \fr 4:6 \ft Ilaenyo nan Proverbio 3:34.\f* \p \v 7 Tay siya chi iyornosyo nan nemnemyo ken Apo Dios. Ad-iyenyo nan Chimonyo ya at lomayaw ken chakayo. \v 8 Somag-en kayo ken Apo Dios ya at somag-en siya ken chakayo. Chakayo ay fomafasol, chalosanyo nan nalokhit ay okhaliyo.\f + \fr 4:8 \ft Nan osto ay naisolat isnan Griego isna et, “Chakayo ay fomafasol, enfolo kayo.”\f* Ya chakayo ay enchwadchwa, eesangenyo nan semekyo ken Apo Dios.\f + \fr 4:8 \ft Nan osto ay naisolat isnan Griego isna et, “Chakayo ay chwa nan leng-agna, chalosanyo nan posoyo.”\f* \p \v 9 Ingoyosyo, isangayo ya iyakhayo nan fasolyo. Ento mo en-ang-ango kayo, en-akha kayo koma, ya sokatanyo nan lagsakyo is fafawi. \v 10 Ibfafan-igyo nan semekyo ken Apo Dios ya at ipatongchona chakayo. \s1 Nan Tokhon Maipoon isnan Chilaw \p \v 11 Iib-ak, ad-i kayo en-asipangapangaag. Tay nan mangipangaag ya mangokom isnan ib-ana, pangaakhena ya chilawena kannay nan lenteg Apo Dios. Et mo chilawenyo nan lentegna, ad-iyo abfoloten, mod-i ket ippeyyo nan awakyo ay okom ay entongcho mo nan lenteg. \v 12 Ngem es-esang nan Okom ya siya nan malpowan nan lenteg. Kecheng siya is makaisalak ken chatako paymo makachosa ken chatako.\f + \fr 4:12 \ft Nan osto ay naisolat isnan Griego isna et, \fq “nan makaisalak paymo mamakawas.”\f* Tay siya chi ay ke wad-ay kalebfengam ay mangokom isnan ib-am? \s1 Nan Tokhon isnan Amchayewan \p \v 13 Chengngenyo sak-en, chakayo ay mangwanin, “Idwani paymo is wakas enfaat kami isnan chey ay ili ta entee kami is esa'y tawen ay enkomerso ya angsan nan khalansiyaenmi.” \v 14 Ay ke yo ammo nan at omat is wakas? Ngag nan kasasaad nan fiyag? Iyalig tako nan fiyag isnan lifoo ay ilaen tako isnan sinak-itan ket ay awni ya maamas. \v 15 Nan magtek kanan tako koma et siya na: “Mo laychen Apo Dios, matatakho tako kayet ya siya na paymo siya chi nan angnen tako.” \v 16 Ngem nan ang-angnenyo et ipatotongchoyo nan semekyo ya ichayewyo nan is yangkhay. Am-in ay kag tosa ay ilan si chayew et ngaag. \p \v 17 Adi kad nan takho ay mangammo isnan khawis ay ikkan, ya ad-ina angnen, et enfasol siya. \c 5 \s1 Nan Tokhon isnan Nafaknang \p \v 1 Chakayo ay fafaknang, chengngenyo nan kanak! Iyakhayo ya ipapangekheyo ay mangingegngeg isnan kakaegyat ay likhat ay at omchan ken chakayo. \v 2 Cha machonot nan ifaknangyo ya cha pakawasen nan kimkimi nan fachoyo. \v 3 Malatiyan nan fallitok ya pilakyo, ya nan laticha nan kail-an nan finmasolanyo, ya at kanencha nan awakyo ay kag isnan ikkan nan apey. Aped kayo nen-igtoigto is ifaknangyo isnan naycha'y omochi ay akhew. \v 4 Ngem ilaenyo nan naamoamong ay cha yo tinokong ay lagfon nan nenchonchono isnan payewyo, et nay chechengngen nan Makabfalin ay Dios nan achawag nan cheycha'y eg-ayyo linagfowan ay cha nensama ya nen-ani. \p \v 5 Nenfib-iyag kayo yangkhay isnan laglagsak ya finofoslon ay fiyag, ngem nan kinatet-ewana et kag kayo isnan faka ay aped yangkhay en men-angloanglod ta lomames, ngem ke pet ay nganngani nan maparkiyana. \v 6 Inokomyo ya pinateyyo nan nalenteg, ngem egaycha inkedse. \s1 Nan Manapolan isnan Anos \p \v 7 Chakayo ay iib-ak, masapol ay anosanyo nan ngag sisa engkhana isnan kasin omaliyan Apo Jesus. Semkenyo nan ensamsama. Naanos ay maman-ed isnan lapon si ochan ta enmola. Sa na't an-anosan kayet ay man-ed isnan tapina kayet ay omodchanana ta mo ke wad-ay nan napateg ay pawad-ayen nan lotana. \v 8 Siya akhes ken chakayo, en-anos kayo koma ya pabfikasenyo nan semekyo tay nganngani nan omaliyan Apo Jesus. \p \v 9 Iib-ak, ad-i kayo en-asimollomollotomot, ta ad-i kayo maokom ay machosa. Tay chey wad-ay et nan Okom ay tomatakcheg is kapantew. \p \v 10 Semkenyo nan mamadto id sangad-om ay nenkali ay mangitakcheg isnan ngachan Apo Dios. Chaicha nan wanwanchenyo tay olay mo naipap-alikhat cha, inan-anosancha kayet. \v 11 Chaicha nan kanan tako en naoney, tay inkatpecha nan am-in ay likhatcha. Chinngeyo nan maipoon isnan inangnen Job ay nangikatpe isnan likhatna, ya ammoyo nan pangkhep Apo Dios ken siya, et nay maawatanyo ay ad-i tomke si Apo Dios ay mangisakit ya maneg-ang ken chakayo. \s1 Nan Tokhon Maipoon isnan Sapata \p \v 12 Wad-ay nan chadlos napateg ay ifaagko ken chakayo ay iib-ak. Mo wad-ay ifaagyo, ad-i kayo ensapsapata. Ad-iyo isapata nan chaya paymo nan lota paymo nan ngag issa. Kananyo yangkhay en, “Wen,” mo tan-oyanyo, ya “Ad-i,” mo ad-i, tatno ad-i kayo machosa ken Apo Dios. \s1 Nan Saknib nan Mamati \p \v 13 Mo wad-ay ken chakayo nan enliglikhat, enlowalo. Mo wad-ay malaylaychan ken chakayo, enkanta koma ay enchayaw. \p \v 14 Mo wad-ay ken chakayo nan masasakit, ipaayagna nan aam-a ay mangichad-alan isnan mamati ta ilowalowancha siya ay menlana ay mangitakcheg isnan ngachan Apo Jesus. \v 15 Nan lowalocha ay malpo isnan pammaticha nan mangipagkhawis isnan nasakit. Fangonen Apo Jesus siya, ya mo wad-ay nenfasolana, at mapakawan. \v 16 Tay siya chi, en-asibfakha kayo isnan finmasolanyo ya en-asilowalo kayo, ta pakhawisena chakayo. Tay nan lowalon nan nalenteg ay takho et wad-ay nan kamabfalina. \p \v 17 Semkenyo si Elias. Siya akhes et takho ay kag ken chatako ay takho, ngem tay chadlos na inpapati ay nangilowalo ay ad-i koma en-ochan, naekhew tet-ewa is tolo ay tawen ya kakhedwa isnan ilina. \v 18 Sa et kasin nenlowalo ya ket ay nenpeleplas nan ochan ay nalpo id chaya. Et inpabkhas nan lota nan kamolamola. \p \v 19 Iib-ak, mo wad-ay ken chakayo nan omadchawi isnan kinatet-ewa, ya wad-ay ken chakayo nan manokhon ya mangisakhong ken siya, \v 20 lebfengna'y ammowena na: Mo sino nan mangawis isnan fomafasol ta chokokhana nan fasolna, isalakana nan leng-agna ta ad-i madchongaw, ya wad-ayena nan makaanan nan kafasofasolna.\f + \fr 5:20 \ft Nan osto ay naisolat isnan Griego isna et, \fq “isalakana nan leng-agna isnan etey ya salakana nan angsaangsan ay fasolna.” \f*