\id REV - Label 
\h Tatatai 
\toc3 Tatatai 
\toc2 Tatatai 
\toc1 A Tatatai ane Jon 
\mt1 A Tatatai  
\mt2 ane Jon  
\is1 A warwara talapor nigo  
\ip E Jon i tumus a buk ne. I ning a halinla ning a bonot pa pisir naur a kakak a asaer ane Iesu. I tumus a buk ne, ning i kes na dodot tumo na lolo Patimos. I tumusi diono na bonot pa dilima na rau lamur tana tinan ane Iesu usaot na langit. Ana rau ning, a tarai a lotu la pastek a galis a mamahat, pa tarai la alaulau la pa di um kol a galis onla otleng. E Jon i tumus a buk ne anasa i mang sur lar tur rakrakai pa lar nuk pas e Iesu.  
\ip I atai dala mang e God i tasman a ututnala rop ning ir hanot, pa ir tolsot pas e Satan. Pa ana ararop a rakrakan hanua, a mamahat ning dala pasteki te lapiu ir rarop. Pa e God ir alaun pas a tarai ning la tortorot, pa ir warkurai a tarai ning bel la tortorot. Pa ka sang tar a wakak a hanua sur la ning anunai.  
\ip A galis a utna te na buk ne i arlar ana warwara larlar.  
\iot A tinan ana buk Tatatai:  
\io1 A kamkama buk ne (1:1-8)  
\io1 A tumtumus tetek a tarai a lotu ting na mais a hanua (1:9-3:22)  
\io1 A Leklek i sapang a buk ning di ka hin tari (4:1-8:1)  
\io1 A mais a angelo la wus mais a tawuru (8:2-11:19)  
\io1 A dregon pa naur a rokoio na inagoi (12:1-13:18)  
\io1 Na tatatai (14:1-15:8)  
\io1 Mais a besen a balakut ane God (16:1-21)  
\io1 E Babilon i punga pa e God i tolsot pas e Satan (17:1-20:10)  
\io1 A pukakiar a warkurai (20:11-15)  
\io1 A tona langit pa tona rakrakan hanua (21:1-22:6)  
\io1 A ararop a warwara (22:7-21)  
\ie  
\c 1  
\p
\v 1 A buk ne, a warwara puasa ane Iesu Karisito, ning e God i saran tari tana, suir asangan tar anuna na tena titol oros ana sa ning milau ir hanot. E Iesu i sune sen anuna angelo tetek anuna tena titol oros e Jon, suir warwara puasa ana ututnala ne tana.  
\v 2 E Jon i warwara talapor ana ututnala rop ning ka oroi tari. Ine a utna ning, a warwara ane God pa a warwara talapor ane Iesu Karisito.  
\v 3 Esining ir was a warwarala na propet ne ir angis, pa la otleng ning lar longori pa lar muri, la otleng lar angis, anasa a taem ning a ututnala ne ir hanot ka milau.   
\s1 A tumtumus ane Jon tetek a tarai a lotu ting na mais a hanua  
\p
\v 4 Iau e Jon, a tumtumus tetek mulo a tarai a lotu ting na mais a hanua tumo na papar Esia.  
\p A marmaris pa a bal molmol tetek mulo ta esaning i laun nigo, i laun onone pa ir hanot lamur, pa tana mais a ingun otleng kanisa lanigo na nuna keskes a king,  
\v 5 pa ta e Iesu Karisito, i a momol a tena warwara talapor o e God, a ningnigo tanla ning lar laun ulak kusun a minat, pa a ningnigo anuna kingla te na rakrakan hanua.  
\p I maris dala, pa i alangolango pas dala kusun anundala na toltol laulau ana sulukna,  
\v 6 pa i akes dala sur dalar warkurai taum onoi pa sur dala na tena artabar tetek e Tamana, esining anuna God. Dala na tena artabar sur dalar titol tetek e God. A matatar pa a rakrakai rop i kes o e Iesu Karisito, bel ir rop pa bel ir rop. Amen.   
\q1
\v 7 Oroi, i han purum ana diah bakut,  
\q2 pa a matana tarai rop lar oroi i,  
\q2 pa la otleng ning la so tari,  
\q1 pa a mangis a tarai rop te na rakrakan hanua lar domos anasa onoi.  
\q1 Ir hanot lar otning. Amen.   
\p
\v 8 A Leklek e God i atongi mang, “Iau a Alpa pa Omega\f + \fr 1:8 \ft A Alpa a ningnigo na leta ana warwara Grik, pa Omega a ararop a leta.\f*, esaning i laun nigo, i laun onone pa ir hanot lamur, esaning i rakrakai kol.”   
\s1 E Jon i oroi takai i arlar ana Nat a Barsan  
\p
\v 9 Iau e Jon, a tasimulo pa a halimulo ning dala tur taum o e Iesu ana kankan, pa ana nuna matanitu pa a tuntunur rakrakai ning dala kilang a kankan. A kes na dodot tumo na lolo Patimos, anasa a warawai ana warwara ane God, pa a warwara talapor ane Iesu.  
\v 10 Ana pukakiar anuna Leklek\f + \fr 1:10 \ft A pukakiar anuna Leklek a kamkam a warwara mang a ningnigo na pukakiar ana wik ning di akinalang a kamkamtur ulak ane Iesu.\f* a bukus ana Talngan Tabu, pa tumo lamur tak, a longor a tnan elngen takai, i arlar ana tawuru.  
\v 11 I atongi larne, “A utna ning u oroi i, ur tumus akesi ana buk ning di hini pa ur saran seni utumo tetek a tarai a lotu ona mais a hanua ne: Epeses, Smerna, Pergamum, Tiatira, Sardis, Piladelpia pa Laodisia.”   
\p
\v 12 A talingir suar oroi esining i warwara tetek iau. Ning a talingir, a oroi a mais a turtur a lam na gol.  
\v 13 Pa na arpotor tana mais a turtur a lam a oroi takai i “arlar ana Nat a Barsan,” i mermer ana barbarah a kaen i barah misaot tuk tumo na naur a hana, pa i dot a malwasna ana inau na gol.  
\v 14 A pukulna pa hih a pukulna dia kokok kol, arlar ana hih a sipsip, pa i arlar otleng ana busa na top, pa naur a kalso matana i arlar ana irnga na iah.  
\v 15 Naur a hana dia arlar ana bras ning di ka tun totoh tari ana iah, pa a elngena i arlar ana unga na malum ning i naro.  
\v 16 I tong mais a nangnang ana sot a kuna, pa a liwan na harum naur a risna rop dia harat kol, kaning na pahana i gom pasi. Pa patarna i arlar ana kamis ning i sasai kol.   
\p
\v 17 Ning a oroi i, a punga purum tar napir naur a hana arlar ana minat. Lamur i suah tar a sot a kuna saot hok, pa i atongi mang, “Gong u matmataut, iau a ningnigona pa araropna.  
\v 18 Iau a lalauna. Ia ka mat pas, oroi i, ia ka laun tikin pa a tong akes a kila ana minat pa ana hanua Hedes, a hanua anunla ning la mat.   
\p
\v 19 “Ur tumusi ma a ututnala ning u ka oroi tari: a ututnala ning ka hanot pa a ututnala ning ir hanot lamur.  
\v 20 Ine a kamkama ututnala na pidik ana mais a nangnang ning u ka oroi tari te na sot a kuk, pa mais a turtur a lam na gol: A mais a nangnang i tur aslang a angelola anuna tarai a lotu ting na mais a hanua, pa mais a turtur a lam i tur aslang a tarai a lotu ting na mais a hanua.   
\c 2  
\s1 A warwara tetek a tarai a lotu tumo e Epeses  
\p
\v 1 “Ur tumtumus tetek a angelo anuna tarai a lotu tumo e Epeses mang:  
\p Na warwara ne anun esaning i tong mais a nangnang ana sot a kuna, pa i han potor ting na mais a turtur a lam na gol.   
\p
\v 2 A tasman anumulo na titol pa anumolo na rakrakai a titol, pa anumulo a tuntunur rakrakai ning mulo kilang a kankan. A tasmani mang bel mulo noren tar na laulau a tarai. Pa mulo ka lar tar la ning la atong la na aposel, ika belsur la na aposel momol, pa mulo ka oroi lalan la mang na tena asasongo.  
\v 3 Mulo ka kilang a kankan anasa mulo anuki, ika bel mulo palaona ngorngoro, mulo gomo rakrakai ot.   
\p
\v 4 Ika a tiu mulo ana utna ne: Bel mulo mang sur iau ma, arlar ning nating mulo mang sur iau.  
\v 5 Mulor nuk pas anumulo a wakak a keskes lanigo ning mulo ka punga tar kusuni! Mulor lingir a nuknukimulo, pa mulor tol ulak a anumulo na titol ning lanigo mulo toli. Ning bel mulor lingir a nuknukimulo, ar hanot tetek mulo, par kibas sen anumulo na turtur a lam kusun a ngasna.  
\v 6 Ika takai a utna ine ning mulo toli i wakak: Mulo nget a titolla anun na tarai ning la mur a asaer ane Nikolas, ning iau otleng a ngeti.   
\p
\v 7 Esining a talngana kaning, i wakak sur ir longor a warwara ning a Talngan Tabu i atongi tetek a lotula. Esining i tolsot pas a harum, ar malmaling pasi suir hangan miting na rakai a lalaun, ning kaning na Paradais ane God.   
\s1 A warwara tetek a tarai a lotu tumo e Smerna  
\p
\v 8 “Ur tumtumus tetek a angelo anun na tarai a lotu tumo e Smerna mang:  
\p Na warwara ne anun esaning a ningnigona pa a araropna, ning i mat pas, pa i laun ulak.   
\p
\v 9 A tasman a kankan ning i monong mulo, pa anumulo a kapan a keskes, ika mulo kes na leklek ot! A tasman a warwara laulaula ning dingla na tarai la atongi o mulo. La ning, la atongi mang la na te Juda, ika belsur la na te Juda, la tarai ane Satan.  
\v 10 Gong mulo matatan a kankan ning milau ir hanot tetek mulo. Oroi i, e Satan ir akas tar dingla na tarai o mulo uting na rumai a dodot suir lar mulo, pa mulor kilang a kankan ana ning a bonot a pukakiar. Mulor tur rakrakai ot ana anumulo a tortorot tuk ana pukakiar ning mulor mat ono, par saran tar a lalaun tetek mulo, larning di saran a arlou tetek tik ning i tolsot pas a arsoksok.   
\p
\v 11 Esining a talngana kaning, i wakak sur ir longor a warwara ning a Talngan Tabu i atongi tetek a lotula. Esining i tolsot pas a harum, a munaur a minat bel ir alaulau i.   
\s1 A warwara tetek a tarai a lotu tumo e Pergamum  
\p
\v 12 “Ur tumtumus tetek a angelo anuna tarai a lotu tumo e Pergamum mang:  
\p Na warwara ne anun e esaning anuna liwan na harum naur a risna rop dia harat kol.   
\p
\v 13 A tasman a hanua ning mulo kes ia, a hanua ning e Satan i kes na king ia. Ika mulo tur rakrakai ana risak. Anumulo a tortorot bel i han masik kusun iau, ning di um kol e Antipas. Esaning anuka momol a tena warwara talapor, ning di um koli ting na numulo a hanua, ning e Satan i kes ia.   
\p
\v 14 Ika a tiu mulo ana ututnala ne: Dingla na tarai kaning na arpotor tamulo, la ka mur a asaer ane Balam, esaning i asaer e Balak suir asobor a tarai Israel pa la tol a toltol laulau, ning la ien a utna na hangan ning di ka artabar tar ono tetek a asasongo na godla, pa la tol na toltol a pamuk.  
\v 15 Larka otleng ning, dingla na tarai o mulo la ka mur a asaer ane Nikolas.  
\v 16 Mulor lingir a nuknukimulo! Ning bel, ar hanot kapit tetek mulo, par harum taum onla ana liwan a harum ning kane na pahak a gom pasi.   
\p
\v 17 Esining a talngana kaning, i wakak sur ir longor a warwara ning a Talngan Tabu i atongi tetek a lotula. Esining i tolsot pas a harum, ar tabari on ta mana ning i kes kumna. Pa ar saran tar otleng a kokok a hat di ka tumus tar a tona rising ono, ning bel tik i tasmani. I sot ka, ning ar saran tar a hat ne tana ir tasmani.   
\s1 A warwara tetek a tarai a lotu tumo e Tiatira  
\p
\v 18 “Ur tumtumus tetek a angelo anuna tarai a lotu tumo e Tiatira mang:  
\p Na warwara ne anuna Nat e God esaning naur a kalso matana i arlar ana irnga na iah, pa naur a hana dia arlar ana bras ning di ka tun totoh tari ana iah.   
\p
\v 19 A tasman a titolla ning mulo toli, anumulo na marmaris, anumulo na tortorot, anumulo na titol na harnangai pa numulo na tuntunur rakrakai ning mulo kilang a kankan. Pa tasmani mang anumulo na titol anone, la itna kol tana anumulo na titol ning mulo toli nating.   
\p
\v 20 Ika a tiu mulo ana utna ne: Bel mulo lu sen e Jesabel, a hane ning i atongi mang i a propet. I asaer rongon anuk na tena titol oros, sur lar tol a toltol na pamuk pa sur lar ien a utna ning di ka artabar tar ono tetek a asasongo na godla.  
\v 21 Ia ka saran tar a taem tana suir lingir a nuknukna kusun anuna pamuk a toltolla, ika bel i mang.  
\v 22 Oroi, ar saran a tnan tinsaman tana pa ir sira borbor ka ana logo ngasna. Pa la otleng ning la tol a pamuk a toltol taum ono, pa bel la lingir a nuknukinla kusun na toltol ane Jesabel, ar saran a rakrakai a kankan tetek la.  
\v 23 Par um kol na natnat e Jesabel, sur a tarai a lotu rop lar tasmani mang a tasman a balan a tarai pa a nuknukinla, par kelesi tetek mulo taktakai arlar ot ana numulo na titol.   
\p
\v 24 Ika mulo tingia e Tiatira ning bel mulo mur a asaer ane Jesabel, pa bel mulo mur a ututnala ne di atongi mang a rakrakai a utna na pidik ane Satan, a atongi tamulo mang, bel ar suah ulak tar ta mamahat saot o mulo.  
\v 25 A utna rop ning mulo tol akesi mulor tur rakrakai ono tuk ning ar hanot.   
\p
\v 26-27 Esining i tolsot pas a harum, pa i tolsot pas a nuknukik tuk ana araropna, ar saran tar a warkurai tana larot a warkurai ning e Tata i saran tari tak, suir warkurai a tarai miting na matanitu rop.  
\q1 ‘Ir warkurai rakrakai la ana bulse na aen,  
\q2 pa ir miren la arlar ning di pagal gingini a kuro ning di toli ona piopap.’ \rq Buk Song 2:9\rq*   
\m
\v 28 Pa ar tabari otleng ana matlai.   
\p
\v 29 Esining a talngana kaning, i wakak sur ir longor a warwara ning a Talngan Tabu i atongi tetek a lotula.   
\c 3  
\s1 A warwara tetek a tarai a lotu tumo e Sardis  
\p
\v 1 “Ur tumtumus tetek a angelo anuna tarai a lotu tumo e Sardis larne:  
\p Na warwara ne anun esaning i tong mais a Inguna e God pa mais a nangnang.  
\p A tasman anumulo na titol. A tarai la atongi mang mulo laun, ika mulo ka mat.  
\v 2 Mulor mata, pa mulor arakrakai anumulo na wakak a toltol ning i mang sur ir mat, anasa a oroi i mang, anumulo na titol belot i kidol namatana e God anuki.  
\v 3 I maining mulor nuk pas a asaer ning mulo ka kibas pasi pa mulo ka longor tari, mulor longor ono pa mulor lingir a nuknukimulo. Ika ning bel mulor mata, ar hanot tetek mulo arlar ana tena kinkinau pa bel mulor tasmani nangse ar hanot tetek mulo.   
\p
\v 4 Ika dingla o mulo tingia e Sardis, bel la adur anunla na kaen. Lar han taum hok, lar mermer ana kokok a kaen, anasa anunla na lalaun i tostos.  
\v 5 Esining i tolsot a harum, ir mermer larne ana kokok a kaen. Pa bel ar kepsen a risana miting na buk a lalaun, par atong puasa i namatana e Tata pa anuna angelola.   
\p
\v 6 Esining a talngana kaning, i wakak sur ir longor a warwara ning a Talngan Tabu i atongi tetek a lotula.   
\s1 A warwara tetek a tarai a lotu tumo e Piladelpia  
\p
\v 7 “Ur tumtumus tetek a angelo anuna tarai a lotu tumo e Piladelpia larne:  
\p Na warwara ne anun esaning i tostos, pa i momol. I tong a ki ane Dewit, pa ning ir sapang a taman, bel tik ir tagar lar pasi, pa ning ir tagar, bel tik ir sapang lar pasi.   
\p
\v 8 A tasman anumulo na titol. Oroi, ia ka sapang tar a taman salanigo tamulo, ning bel tik ir tagar lar pasi. A tasmani mang a rakrakaimulo bel i itna, ika mulo mur ot anuka warwara, pa bel mulo puai sen a risak.  
\v 9 La ning a tarai ane Satan ning la atongi mang la na te Juda, ika bel, la na tena asasongo. Ar warkurai la sur lar han tetek mulo pa lar kes ana bokona hanla salanigo tamulo, pa lar atong puasa i mang iau a maris mulo.  
\v 10 Ning a tnan larlar ir hanot te na rakrakan hanua rop, suir lar la ning la kes te lapiu, ar tai alar mulo ana pukakiar ning, anasa mulo mur anuka warkurai sur mulor tur rakrakai ning mulo kilang a kankan.   
\p
\v 11 Milau kama ar hanot. Mulor tong arakrakai tar asaning mulo ka kibas pasi, sur gong tik i kibas anumulo a arlou, ning e God ir saran tari tamulo, larning di saran tar a arlou tan tik ning i tolsot pas a arsoksok.  
\v 12 Esining i tolsot pas a harum, ar aturi sur i a pos a rumai a artabar anuna God anuki pa bel ir purum ulak kusuni. Pa ar tumus a risan a God anuki ono, pa risan a hanua anuna God anuki, a tona Jerusalem, ning ir han purum misaot na langit kusun a God anuki. Pa ar tumus tar otleng a tona risak ono.   
\p
\v 13 Esining a talngana kaning, i wakak sur ir longor a warwara ning a Talngan Tabu i atongi tetek a lotula.   
\s1 A warwara tetek a tarai a lotu tumo e Laodisia  
\p
\v 14 “Ur tumtumus tetek a angelo anuna tarai a lotu tumo e Laodisia larne:  
\p Na warwara ne anun esaning di atongi Amen, a tena warwara talapor ane God ning i momol kol, pa kama akakes ane God.   
\p
\v 15 A tasman anumulo na titol. Bel mulo kotkoto pa bel mulo laplapang otleng. A mang sur mulor kotkoto o mulor laplapang.  
\v 16 Ar muraen sen mulo kusun a pahak, anasa mulo laplapang siklik ka, bel mulo laplapang momol, pa bel mulo kotkoto.  
\v 17 Mulo atongi mang, ‘Mila gongon, mila suah taum a galis a gongon pa bel mila kapan sur ta utna.’ Ika bel mulo oroi lalani mang anumulo a keskes bel i wakak, mulo pot na marmaris, mulo kapan, mulo kut pa mulo mengere.  
\v 18 A nangan mulo ana nuknukla ne: Mulor lou a gol tak, ning di ka tun totoh tari ana iah, sur mulor gongon ono. Pa mulor lou otleng a kokok a kaen pa mulor pipisi, sur mulor pipis alar mulo sur gong mulo meme, anasa mulo mengere ka. Pa mulor lou a marasin tak pa mulor suahi ana naur a kalso matamulo, sur mulor tai wakak.   
\p
\v 19 La ning a maris la, a sira saran a rakrakai a warwara tetek la pa a sira atostos la. I maining mulor rakrakai sur mulor mur a tostos a toltol pa mulor lingir a nuknukimulo.  
\v 20 Oroi, a tur ting na taman pa a pinpidir. Ning tik ir longor a elngek pa ir sapang a taman, ar kas teteki, pa ar hangan taum onoi, pa i, ir hangan taum hok.   
\p
\v 21 Esining i tolsot pas a harum, ar malmaling sur miar kes taum ana nuk a keskes a king, larning a tolsot pas a harum, pa a kes taum o e Tata ana nuna keskes a king.   
\p
\v 22 Esining a talngana kaning, i wakak sur ir longor a warwara ning a Talngan Tabu i atongi tetek a lotula.”   
\c 4  
\s1 A lotu saot na langit  
\p
\v 1 Lamur a tai, a oroi pas a taman i sapang saot na langit. Pa elngena esaning a longor nigon tari, ning i warwara tetek iau arlar ana tawuru, i atongi mang, “Han kas ute, ar asangan tar u ana sa ning ir hanot lamur.”  
\v 2 Ono otning a bukus ana Talngan Tabu. Pa salanigo tak, a oroi a keskes na king saot na langit, pa takai i kes tar ono.  
\v 3 Pa esaning i kes tar ana keskes na king, i talapor arlar ana naur a hat ning a matandiau i abit, ning di atong diau mang jaspa pa karnelian. Pa pakasir i tur talilis pas a keskes a king, i tatatai arlar ana wakak a hat ning di atongi a emeral.  
\v 4 Pa naur a bonot pa diat a keskes na king la tur talilis a keskes na king ning, pa naur a bonot pa diat a ningnigo kaning la kes tar tingia. La mermer ana kokok a kaenla, pa ting na pukulunla la suah na kukuh a king ning di toli ana gol.  
\v 5 A pil, a pupugur pa unga, ditol hanot miting na keskes na king. Pa salanigo na keskes a king, mais a lam kaning la irnga. La ning a mais a ingun e God.  
\v 6 Ting otleng napir a keskes a king, ning a utna i tatatai arlar ana puka tasi ning di toli ana galas, pa i talapor kol.  
\p Ting na arpotor, diat a lalaun a utna la tur talilis a keskes a king, a kalso matanla i bonot arop a palaonla, salanigo pa tumo lamur.  
\v 7 A ningnigo na lalaun a akakes i arlar ana laion, a munaurna i arlar ana bulumakau, a munatolna a patarna i arlar ana barsan, pa mundiatna i arlar ana manigulai ning i rowoi.  
\v 8 Diat a lalaun a akakes ne, taktakai onla, diono na dehelna, pa a kalso matanla i bonot arop a palaonla, pa ting nahai na dehelinla otleng. Ana morom pa kamis, bel la manah ana atong a warwara mang,  
\q1 “I totoh, i totoh, i totoh,  
\q1 A Leklek e God, esaning i rakrakai kol,  
\q1 esaning i laun nigo, i laun onone pa ir hanot lamur.”   
\m
\v 9 Esaning i kes ana keskes a king, ning i laun tikin bel ir rop pa bel ir rop, diat a lalaun na akakes ne la aitna pasi, la hanrawai pa la atong wakak teteki. A tuka kamis rop ning la toli larne,  
\v 10 naur a bonot pa diat a ningnigo otleng la punga hanrawai namatana esaning i kes ana keskes a king, pa i laun tikin bel ir rop pa bel ir rop, pa la lotu teteki. La suah tar anunla na kukuh a king salanigo na keskes a king pa la atongi mang,   
\q1
\v 11 “Anumila a Leklek pa anumila a God,  
\q2 i tostos kol sur dir aitna pas u pa dir hanrawai u,  
\q2 pa i tostos kol ning ur tong akes a rakrakai,  
\q1 anasa u, u akes a ututnala rop.  
\q2 U akes la ana nuknukim ot,  
\q2 pa la laun ka hom.”   
\c 5  
\s1 A buk ning di ka hin tari pa a Nat a Sipsip  
\p
\v 1 Lamur a oroi a buk ting na sot a kuna esaning i kes ana keskes a king. A buk ning di ka hin tari, di ka tumtumus rop tar ana naur a risna, pa di ka bulit alar tari ana mais a bulit.  
\v 2 Pa a oroi a rakrakai a angelo i deke ana tnan elngena mang, “Esi ning i tostos suir pilik sen mais a bulit ne mite na buk, pa ir paki?”  
\v 3 Bel tik saot na langit, pa te lapiu, pa tingui na piu i tolsot pasi suir pak a buk ning, o ir oroi i.  
\v 4 A tangis kol iau, anasa bel tik i tostos suir pak a buk ning, o ir oroi a tumtumus tingui na tinine.  
\v 5 Ning a ningnigo i atongi tak mang, “Gong u tangis! Oroi, a laion anuna mangis a tarai Juda, a wakir e Dewit, ka tolsot pas a hiruala anunai. I tolsot pasi suir pilik sen mais a bulit pa ir pak a buk ning.”   
\p
\v 6 Lamur a oroi a Nat a Sipsip, i tai arlar larning di ka um kol tari, i tur napir a keskes a king, pa diat a lalaun na akakes taum ana ningnigola la tur talilis pasi. A Nat a Sipsip ning, mais a komna, pa mais a kalso matana. La ning, mais a inguna e God, ning i sune sen la ute na rakrakan hanua rop.  
\v 7 A Nat a Sipsip i han pa i kibas pas a buk miting na sot a kuna esaning i kes ana keskes a king.  
\v 8 Ning ka kibas a buk ning, diat a lalaun a akakes pa naur a bonot pa diat a ningnigo, la punga hanrawai tar salanigo tana Nat a Sipsip. La rop la tong taktakai a gita pa taktakai a besen ning di toli ana gol. A besenla ning, la bukus ana ning a ngas a bulit, ning di tuni pa sasawana i toboh wakak. La ning, a nunungla anuna tarai ane God.  
\v 9 Pa la saken a tona saksak larne,  
\q1 “U ot u tostos sur ur kibas pas a buk pa ur pilik sen na bulit kusuni,  
\q2 anasa di um kol u,  
\q1 pa u lou lingir pas a tarai tetek e God ana sulukim,  
\q2 a tarai tagun a mangis a tarai rop, a tarai tagun na urmatana ngas a warwara rop, a tarai mite na hananuala rop pa a tarai tagun a matanitula rop.   
\q1
\v 10 U ka akes tar la sur lar warkurai taum hom,  
\q2 pa la na tena artabar tetek anundala a God,  
\q1 pa lar warkurai te na rakrakan hanua.”   
\p
\v 11 Lamur a tai pa a longor a elngen a galis a angelo ning la tur talilis pas a keskes a king pa diat a lalaun a utna pa ningnigola. A angelola la galis kol, bel tik ir was lar pas la.  
\v 12 La saksak ana tnan elngenla larne,  
\q1 “I tostos kol sur a Nat a Sipsip ning di um kol tari  
\q1 ir tong akes a warkurai, a galis a gongon, a tastasmai pa rakrakai.  
\q1 Pa i tostos kol ning dir hanrawai i, dir aitna pasi pa dir atong aleklek pasi!”   
\p
\v 13 Pa a longor na elngen na akakes rop saot na langit pa te na rakrakan hanua pa tingui na piu pa tingui na puka tasi, a ututnala rop ning di akes la, la saksak larne,  
\q1 “Tetek esaning i kes ana keskes a king, pa tetek a Nat a Sipsip,  
\q1 dalar atong aitna pas diau, dalar hanrawai diau pa dalar aitna pas diau.  
\q1 Pa diar tong akes a rakrakai,  
\q2 bel ir rop pa bel ir rop.”   
\m
\v 14 Pa diat a lalaun na utna la atongi mang, “Amen,” pa na ningnigo la punga hanrawai pa la lotu.   
\c 6  
\s1 A Nat a Sipsip i pilik sen na bulit  
\p
\v 1 A oroi ning a Nat a Sipsip i pilik sen a ningnigo na bulit miting na mais a bulit kaning na buk. A longor ning a halin diat a lalaun na akakes i arkabah ana elngena i arlar ana pungpugur mang, “Han ute!”  
\v 2 Pa ning a tai, a oroi pas a kokok a hos salanigo tak. Pa esaning i kes saot ono, i tong pas a kaba raurau na harum, pa di saran tar a kukuh na king tana. I han ana rakrakai suir tolsot pas a harum.   
\p
\v 3 Ning a Nat a Sipsip i pilik sen a munaur a bulit, a longor munaur a lalaun na akakes i atongi mang, “Han ute!”  
\v 4 Ning a hos maleng i hanot i kubar kol. Pa esaning i kes saot ono di saran tar a rakrakai tana suir kibas sen a molmol mite na rakrakan hanua, pa a tarai lar um kol artalai la. Pa di saran tar a tnan liwan na harum tana.   
\p
\v 5 Ning a Nat a Sipsip i pilik sen a munatol a bulit, a longor a munatol a lalaun na utna i atongi mang, “Han ute!” Ning a tai, a oroi pas a mutmut a hos salanigo tak. Pa esaning i kes saot ono, ting na kuna i tong pas a sikel.  
\v 6 Pa longor takai a utna i arlar ana elngen takai na arpotor indiat a lalaun na akakes i atongi mang, “A matana utna ir abit kol. Dir lou takai a kilogrem a wit ana takai a denaria,\f + \fr 6:6 \ft Ning a denaria i arlar ana arlou anuna tik ana ning a pukakiar a titol.\f* pa dir lou natol a kilogrem a bali\f + \fr 6:6 \ft Naur a ngas a ulai ning di tol a palawa ana wandiau, a wit pa bali. A wit i wakak tana bali.\f* otleng ana takai a denaria. Ika gong di alaulau naur a utna ne: a wel a oliw pa wain.”   
\p
\v 7 Ning a Nat a Sipsip i pilik sen a mundiat a bulit, a longor a elngen a mundiat a lalaun na akakes i atongi mang, “Han ute!”  
\v 8 Ning a tai, a oroi pas a kubus a hos salanigo tak. Pa esaning i kes saot ono a risana A Minat. E Hedes, a hanua anunla ning la mat, i mur milau i. Di saran tar a warkurai tan diau sur diar asalar a tarai mite na rakrakan hanua ona diat a kunum a tarai pa diar um kol ning a kunum a tarai onla. Diar um kol la ana liwan na harum, pa munurak, pa na laulau a tinsaman, pa na rokoio a inagoi otleng mite na rakrakan hanua.   
\p
\v 9 Ning a Nat a Sipsip i pilik sen a mundilima bulit, a oroi a ingunla ning di ka um kol tar la, anasa la mur sot pas a warwara ane God pa la warwara talapor ono. A oroi la ting lain a logo na tun artabar.  
\v 10 La arkabah ana tnan elngenla mange, “Leklek, u a King, u totoh pa u momol. Nangse ma ur warkurai la ning la kes te na rakrakan hanua pa ur keles a sulukimila tetek la?”  
\v 11 Lamur di saran tar taktakai a kokok a kaen tanla rop. Pa di atai la mang, lar kes siklik ulak pas, tuk ning dir um kol la otleng ning la titol taum onla ana Wakak a Warwara, pa na tastasinla ana tortorot. Dir um kol la arlar onla ning di ka um kol nigon tar la, tuk a wawasinla ir sot.   
\p
\v 12 A oroi ning a Nat a Sipsip i pilik sen a mundiono na bulit. A tnan mamais i gulgule rakrakai kol, a kamis i mutmut arlar ana mutmut a kaen a tobo ning di toli ana hih a meme, pa a kalang i kubar arlar ana suluk.  
\v 13 Pa na nangnang saot na solsol la punga purum te na rakrakan hanua, arlar ana pirau a wana figla ning la punga purum ana rakrakai a wuwu i wus pungan la.  
\v 14 Pa a bakut otleng i rorom ka arlar ana mat ning di hini. Pa na mangir rop pa na lolo rop la karai pas kusun a ngasinla.   
\p
\v 15 A kingla mite na rakrakan hanua pa na ningnigo, na ningnigo anuna tena harumla, la ning la leklek ana gongonla, na tena rakrakai, na tena titol oros pa la ning belsur na tena titol oros, la rop la parau ting na kulamla, pa na arpotor a tatatnan hatat ting na mangirla.  
\v 16 Pa la woiwoi tetek na tatatnan hatat pa na mangir mang, “Mulor punga alar mila, pa mulor bunur mila kusun a patarna esaning i kes ana keskes a king, pa kusun a balakut ana Nat a Sipsip!  
\v 17 Anasa anundiau a tnan pukakiar a balakut ka hanot, pa esi ma ir tolsot pas diau?”   
\c 7  
\s1 Di suah tar a akinalang ana 144 a rip miting na tarai Israel  
\p
\v 1 Lamur tana, a oroi diat a angelo la tur ting na diat a matmatana wuwu te na rakrakan hanua. La tong alar pas diat a matmatana wuwu sur gong la wus a hananuala, pa na puka tasi, pa na rakai.  
\v 2 A oroi pas ning angelo kaleng i hanot miting namatana tobar pa i tong pas a akinalang ane God, esaning i laun. I arkabah ana tnan elngena tetek diat a angelo ning di ka saran tar a rakrakai tanla sur lar alaulau na hanua pa puka tasi.  
\v 3 I atongi larne, “Gong mulo alaulau na hanua, pa puka tasi pa na rakai, tuk ning milar suah tar a akinalang ting na patar a tena titol orosla ane God anundalai.”  
\v 4 Pa longor a wawasinla ning di ka aslang tar la, kane la: 144 a rip miting na mangis a tarai Israel rop.   
\q1
\v 5 Di ka aslang tar 12 a rip miting a mangis a tarai Juda,  
\q1 12 a rip miting a mangis a tarai Ruben,  
\q1 12 a rip miting a mangis a tarai Gat,   
\q1
\v 6 12 a rip miting a mangis a tarai Aser,  
\q1 12 a rip miting a mangis a tarai Naptali,  
\q1 12 a rip miting a mangis a tarai Manase,   
\q1
\v 7 12 a rip miting a mangis a tarai Simion,  
\q1 12 a rip miting a mangis a tarai Liwai,  
\q1 12 a rip miting a mangis a tarai Isakar,   
\q1
\v 8 12 a rip miting a mangis a tarai Sebulon,  
\q1 12 a rip miting a mangis a tarai Josep,  
\q1 12 a rip miting a mangis a tarai Benjamin.   
\s1 A kunum a tarai la lotu tetek e God  
\p
\v 9 Lamur tana, a tai, pa a oroi pas a tnan kunum a tarai ning bel tik ir was lar pas la. A tarai miting na matanitula rop, pa miting na mangis a taraila rop, pa miting na hananuala rop pa miting na urmatana ngas a warwarala rop, la tur salanigo na keskes a king pa Nat a Sipsip. La mermer ana kokok a kaenla, pa la tong a paka baibaila.  
\v 10 La woiwoi ona tnan elngenla larne,  
\q1 “E God anundalai,  
\q2 esaning i kes ting na keskes a king  
\q1 pa Nat a Sipsip,  
\q1 dia alaun pas dala.”   
\p
\v 11 Na angelo rop la tur talilis pas a keskes a king pa na ningnigo pa diat a lalaun na akakes. La punga hanrawai ana matanla ting na piu salanigo na keskes a king, pa la lotu tetek e God,  
\v 12 la atongi mang,  
\q1 “Amen!  
\q1 Dalar atong aitna pas e God anundalai, dalar aitna pasi, dalar atong wakak teteki pa dalar hanrawai i.  
\q1 I tong akes a tastasmai, pa warkurai pa rakrakai,  
\q2 bel ir rop, pa bel ir rop.  
\q1 Amen!”   
\p
\v 13 Pa takai a hal a ningnigola i deken iau mang, “Esi la ne la mermer ana kokok a kaenla? Pa la han mitahaia?”  
\v 14 Pa kelesi mang, “Leklek, u ot u tasmani.” Pa i atongi tak mang, “La ne, la ning la ka laun ot miting na tnan kankan ning i monong la. La ka gos kokok pas anunla na kaen ana suluk a Nat a Sipsip.  
\v 15 Manglarning,  
\q1 la tur salanigo na keskes a king ane God,  
\q1 la titol teteki ting na nuna rumai a artabar  
\q2 ana kamisla pa moromla.  
\q1 Pa esaning i kes ana keskes a king ir pol alar la sur lar kes taum onoi.   
\q1
\v 16 Bel lar murak,  
\q2 pa bel lar mos ulak ma.  
\q1 Pa a kamis bel ir alaulau la,  
\q2 pa bel ta utna otleng ir rang sakan la.   
\q1
\v 17 Anasa a Nat na sipsip ning i kes na arpotor a keskes a king, ir hanot anunla a tena tai alar.  
\q2 Ir nigon la sur na matmatana malum a lalaun.  
\q1 Pa e God ir sah sen na luru matanla rop.”   
\c 8  
\s1 A ararop a bulit  
\p
\v 1 Ning a Nat a Sipsip i pilik sen a ararop a bulit ting na mais a bulit, saot na langit, a keskes wowowon i arlar ana natol a bonot a minit.  
\v 2 Pa oroi a mais a angelo ning la sira tur salanigo ta e God, pa di saran tar a mais a tawuru tanla.  
\v 3 Ning a angelo kaleng i hanot i tur tar napir a logo na tun artabar. I tong pas a besen na gol, ning di sira tuntun a bulit ning a sasawana i toboh wakak onoi. Di saran tar a tnan bulit ning tana sur ir tuni sur a artabar. I suah taumi ana nunungla ana tarai rop ane God ting na logo na tun artabar ning di toli ana gol, salanigo na keskes a king.  
\v 4 A sasawan ana bulit ning i toboh wakak i han usaot taum ana nunungla anuna taraila ane God. A sasawana i kamtur miting na kuna angelo usaot namatana e God.  
\v 5 Lamur a angelo i kibas pas a besen pa i abukus ulaki taum ana iah miting na logo na tun artabar, pa i minggen purum tari saot na rakrakan hanua. A bakut i pugur, pa unga, a pil i pil pa mamais i hanot.   
\s1 Na angelo la wus na tawuru  
\p
\v 6 Pa mais a angelo ning la tong mais a tawuru la sang sur lar wus la.  
\v 7 A ningnigo na angelo i wus anuna tawuru, pa kiar a ais i hanot taum ana iah ning di ka tol taman tari ana suluk, pa di minggen purum seni te na rakrakan hanua. Di salar a rakrakan hanua rop ona natol a pukna pa takai a pukna miting na natol a pukna i irnga rop. Di salar a rakaila rop ona natol a pukna pa takai a pukna miting na natol a pukna i irnga rop, pa ulaila rop otleng ning la gomo, la irnga rop.   
\p
\v 8 A munaur a angelo i wus anuna tawuru, pa ning a utna i arlar ana tnan mangir ning i irnga, di minggen seni uting latasi. Di salar a puka tasi ona natol a pukna, pa takai a pukna miting na natol a pukna i keles sur a suluk.  
\v 9 Di salar a ututnala la laun salatasi ona natol a pukna, pa takai a pukna miting na natol a pukna la mat, pa di salar a sipla ona natol a pukna, pa takai a pukna miting na natol a pukna la hirua.   
\p
\v 10 A munatol a angelo i wus anuna tawuru, pa a tnan nangnang ning i irnga arlar ana sulu i punga misaot na bakut. Di salar a malumla pa a matmatana malum ona natol a pukna, pa takai a pukna miting na natol a pukna, a nangnang ning i punga tar saot ono.  
\v 11 A risana nangnang ning di atongi mang Mapak Kol. Pa a malum miting na malumla pa matmatana malum ning a nangnang i punga tar saot onla i mapak kol. Pa galis a tarai ning la gang a malum ning, la mat, anasa a malum ning i mapak kol.   
\p
\v 12 A mundiat a angelo i wus anuna tawuru. Di salar a kamis, a kalang pa na nangnang ona natol a pukna, pa takai a pukna miting na natol a pukna miting na kamis, di dapisi pa i keles sur a mormorom, pa takai a pukna miting na kalang di dapisi pa i keles sur a mormorom, pa takai a pukna miting na nangnangla di dapisi pa la keles sur a mormorom. Takai a pukna miting na natol a pukna miting na pukakiar ana morom pa takai a pukna miting na pukakiar ana kamis otleng, bel ta talapor ono.   
\p
\v 13 Ning a tai, a longor a manigulai ning i rowoi saot na solsolna i arkabah ana tnan elngena larne, “Ir laulau! Ir laulau! Ir laulau tetek la ning la kes te na rakrakan hanua, anasa ana elngen natol a tawuru ning milau natol a angelo ditol ir wusi.”   
\c 9  
\p
\v 1 A mundilima angelo i wus anuna tawuru, pa oroi a nangnang ning ka punga purum tar misaot na bakut ute na rakrakan hanua. Di saran tar a ki tana, a ki ana tnan tung ning bel ta araropna.  
\v 2 Ning i sapang a tnan tung, a sasawan i tur ot mitingia arlar ana sasawan ana tnan iah ning i irnga kol. Pa kamis pa bakut i mormorom ana sasawan miting na tung ning.  
\v 3 Na mum la han purum miting na sasawan ning, pa la kes te na rakrakan hanua, pa di saran tar a rakrakai tanla, arlar ana rakrakai ana radamla.  
\v 4 Di atai la mang gong la alaulau a ulai te na rakrakan hanua, o a rakaila otleng. Lar alaulau a taraila ka ning bel ta akinalang ane God ting na patarinla.  
\v 5 Ika belsur di saran tar a rakrakai tanla sur lar um kol la, sur lar akadik la ka dilima na kalang. Pa anunla a kankan i arlar ana kankan ning a radam i sira pisi a tarai.  
\v 6 Ana pukakiarla ning, a galis a tarai lar tai sur a minat, ika bel lar mat. Lar mang sur lar mat, ika a minat ir alah la ka.   
\p
\v 7 Na mum ning, la tai arlar ana hosla ning di ka sang tar la sur a harum. Ting na pukulunla a ututnala i arlar ana kukuh a king ning i tatatai lar a gol, pa a patarinla i arlar ana patara momolna.  
\v 8 A hih a pukulunla i barah arlar ana hih a gurarala, pa na ngesenla i arlar ana ngesen a laion.  
\v 9 Di suah alar na malwasinla ana ututnala ning i tai arlar ana aen. A unga na dehelinla i arlar ana unga na galis a hos pa a galis a karis la dun kapit sur a harum.  
\v 10 Na mukmukinla i pispisi arlar ana radam. Pa a rakrakai i kes ting na mukmukinla sur lar alaulau a tarai ana dilima na kalang.  
\v 11 A angelo miting na tnan tung ning bel ta araropna, esaning anunla a king. Di atong a risana ana warwara Hibru Abadon, pa ana warwara Grik Apolion.\f + \fr 9:11 \ft Abadon pa Apolion a kamkamna mang a “Tena alaulau a tarai.’\f*  
\v 12 Ka rop a ningnigo na kankan. Naur a kankan kaning ot ir hanot.   
\p
\v 13 A mundiono na angelo i wus anuna tawuru, pa a longor a elngen takai i hanot miting na diat a utna ning i tatatai lar diat a kom ning i tur saot na logo na tun artabar. A logo ning di toli ana gol, pa i tur salanigo ta e God.  
\v 14 A elngen takai i atai a mundiono na angelo ning i tong anuna tawuru larne, “Ur pak sen diat a angelo ning di dot akes tar la ting na tnan malum Iupretis.”  
\v 15 Pa i pak sen diat a angelo ning, sur lar salar a tarai rop ona natol a pukna, pa takai a pukna miting na natol a pukna, lar um kol la. Diat a angelo ning e God ka sang tar la sur a puka kamis ning, pa pukakiar ning, pa kalang ning pa rau ning.   
\p
\v 16 A wawas ana tarai a harum ning la kes ana hos la arlar ana naur a mar a milian rop. A longori larne.  
\v 17 Ana nuk a tatatai a oroi na hos pa la ning la kes saot on la. Na utna ning la suah alar na malwasinla ono i kubar arlar ana iah, i bulu pa i sinang arlar ana salfa. Pa pukul a hosla ning i arlar ana pukul a laionla. A sasawan, a iah pa salfa ditol purum miting na pahanla.  
\v 18 Di salar a tarai rop ona natol a pukna, pa takai a pukna miting na natol a pukna, a sasawan, a iah pa salfa ning i purum miting na pahanla, i um kol la.  
\v 19 A rakrakai ana hosla i kes ting na pahanla pa na mukmukinla. Anasa na mukmukinla i arlar ana soila, pa a pukul a soila la akadik a tarai.   
\p
\v 20 Pa a tarai ning a laulau a akadikla ne bel i um kol la, bel la lingir a nuknukinla kusun a manarla ning la toli ona kunla. Bel la manah ana lotu tetek a motla pa na manarla ana gol, pa silwa, pa bras, pa hat, pa na rakaila. Na manarla ning, bel la tai, bel la longor pa bel la sira han.  
\v 21 Pa bel la lingir a nuknukinla otleng kusun a um kol a tarai, a wah, na pamuk a toltol o na kinkinau.   
\c 10  
\s1 A angelo pa natar a buk ning di sira hini  
\p
\v 1 Lamur a oroi pas ning a rakrakai a angelo maleng i han purum amon misaot na langit. I mermer ana bakut, pa a pakasir i kes lao tar saot na pukulna. A patarna i arlar ana kamis, pa naur a hana i tatatai arlar ana naur a pos i sot.  
\v 2 I tong pas a natar a buk ning di sira hini, kaning i sapang tar ting na kuna. I atur tar a sot a hana saot na puka tasi, pa kair a hana ting na piu.  
\v 3 Pa i kukukuk ana tnan elngena arlar ana elngen a laion. Ning i agaia, a elngen mais a pungpugur la warwara.  
\v 4 Ning mais a pungpugur la ka warwara rop, a mang suar tumtumus, ika a longor a elngen takai misaot na langit i atongi mang, “Gong u tumus akes a warwarala ning mais a pungpugur la ka atong tari, ur pidik alari ka.”   
\p
\v 5 Pa a angelo ning a oroi tari ning i tur tar saot na puka tasi pa ting na piu, i tuslan kas a sot a kuna usaot na langit.  
\v 6 Pa i lele tar o esaning i laun tikin, bel ir rop pa bel ir rop, ning i akes a bakut pa ututnala rop ning la kaningia, pa rakrakan hanua pa ututnala rop ning la kaningia, pa puka tasi pa na ututnala rop ning la kaningia, pa i atongi mang, “Bel ma e God ir molot ulak.  
\v 7 Ana pukakiarla ning a ararop a angelo miting na mais a angelo ir mang suir wus anuna tawuru, dir tolsot pas a utna na pidik anun e God, arlar ono ning ka atong tari tana nuna tena titol orosla, a propetla.”   
\p
\v 8 Pa elngen takai, ning ia ka longor tari misaot na langit, i atong ulaki tak larne, “Ur han pa ur kibas pas a buk, ning kaning i sapang tar ting na kuna angelo ning i tur tar saot na puka tasi pa ting na piu.”   
\p
\v 9 Pa han tetek a angelo pa a nunungi suir saran tar a natar a buk ning tak. Pa i atongi tak mang, “Kibasi, pa ur ieni. Ir amapak a balam, ika a paham ir namnamnin arlar ana polo na tatos.”  
\v 10 Pa a kibas pas a natar a buk ning kusun a kuna angelo, pa a ieni. Pa a pahak i namnamnin arlar ana polo na tatos. Ika, ning a konomi, i amapak a balak.  
\v 11 Pa di atongi tak mang, “Ur warwara na propet ulak ana galis a tarai ting na hananuala, a galis a tarai miting na matanitula, a galis a tarai miting na urmatana ngas a warwara pa galis a king.”   
\c 11  
\s1 Naur a momol a tena warwara talapor  
\p
\v 1 Di saran tar a por tak, i arlar ana rakai di sira mak onoi pa di atai iau mang, “Ur han pa ur mak a rumai a artabar ane God, pa a logo na tun artabar, pa ur was la ning la lotlotu tingia.  
\v 2 Ika ur madek sen a pukna tumo lapiu na rumai a artabar, gong u mak tari. Anasa di ka saran tari tetek a tarai ning belsur a tarai ane God, pa lar pas dur a totoh a hanua ane God arlar ana diat a bonot pa naur a kalang.  
\v 3 Par saran tar a rakrakai tana nuk naur a tena warwara talapor hok, diar mermer ana kaen a tobo pa diar warwara na propet pas ana 1,260 a pukakiar.”   
\p
\v 4 Naur a tena warwara talapor ne, dia naur a rakai a oliw pa naur a turtur a lam, ning dia tur namatana Leklek anuna rakrakan hanua.  
\v 5 Ning tik i mang suir alaulau diau, a iah ir hanot miting na pahan diau pa ir ien sen anundiau na hiruala. Ning tik i mang suir alaulau diau, ir mat larot ning.  
\v 6 Naur a barsan ne dia tong akes a rakrakai sur diar sairas a bakut, sur gong a kiar i punga ana taem ning dia warwara na propet. Dia tong akes otleng a rakrakai sur diar keles a malum sur a suluk, pa diar dapis a rakrakan hanua ana urmatana ngas a akadik rop ana puka kamisla ning dia mang.   
\p
\v 7 Ning dia ka arop sen a nundiau a warwara talapor, a rokoio a inagoi ir han kas kusun a tnan tung ning bel al araropna. Ir harum taum on diau, pa ir tolsot pas diau pa ir um kol sen diau.  
\v 8 Pa a minatindiau ir borbor ka ting na ngas ana tnan hanua di atong arlari o e Sodom pa e Ijip, a hanua ning di sai ahat otleng anundiau a Leklek ia.  
\v 9 Pa a tarai miting na hananuala rop, pa miting na mangis a tarai rop, pa miting la ning la warwara ana urmatana ngas a warwara rop pa miting na matanitula rop lar oroi a minatindiau tuk natol a pukakiar pa takai a tuka kamis pa bel lar longor sur dir por diau.  
\v 10 Pa na tarai miting na rakrakan hanua lar gas ka on diau, lar asangan anunla na gasgas ona artabar tetek la artalai, anasa naur a propet ne dia akadik a tarai te na rakrakan hanua.   
\p
\v 11 Ika lamur tana natol a pukakiar pa takai a tuka kamis, e God i wus kas tar a wuwu na lalaun on diau. Pa dia laun pa dia tur, pa a tnan matmataut i los la ning la oroi diau.  
\v 12 Pa dia longor a tnan elngen takai misaot na langit i atai diau mang, “Mu han kas ute.” Pa dia han kas ana bakut usaot na langit, pa nundiau a hiruala la oroi sen diau.   
\p
\v 13 Ana puka kamis ot ning, a tnan mamais i hanot. Pa takai a pukna miting na tnan hanua ning i tarege, pa siuk a pukna bel. Pa mais a rip a tarai la mat, pa la ning la laun kes la matmataut kol, pa la atong leklek pas e God ning i kes saot na langit.   
\p
\v 14 Pa munaur a akadik ka rop. Pa munatol a akadik milau ir hanot.   
\s1 A ararop a tawuru  
\p
\v 15 A ararop a angelo ting na mais a angelo, i wus anuna tawuru, pa galis a tnan elngena tarai saot na langit la atongi mang,  
\q1 “A matanitu ana rakrakan hanua ka keles sur a matanitu anuna Leklek anundalai, pa anuna Karisito anunai.  
\q2 Ir kes na king tikin, bel ir rop pa bel ir rop.”   
\m
\v 16 Naur a bonot pa diat a ningnigo, ning la kes ana anunla na keskes a king salanigo ta e God, la punga hanrawai ona patarinla ting na piu, pa la lotu tetek e God.  
\v 17 La atongi mang,  
\q1 “Mila atong wakak tetek u a Leklek e God ning u rakrakai kol,  
\q1 u laun nigo pa u laun anone,  
\q1 anasa u ka kubas pas a tnan rakrakaim  
\q2 pa u ka turpasi sur ur kes ana keskes a king pa u warkurai.   
\q1
\v 18 Na matanitu masik la balakut,  
\q2 pa anuma balakut otleng ka hanot.  
\q1 A taem ka hanot sur ur warkurai la ning la mat,  
\q1 pa ur saran a arlou tetek anum na tena titol oros, a propetla  
\q2 pa anum na tarai, pa la ning la hanrawai a risam,  
\q2 la ning bel al risanla pa la ning la leklek,  
\q1 pa ur kamar sen la ning la alaulau a rakrakan hanua.”   
\p
\v 19 Lamur a rumai a artabar ane God saot na langit i sapang, pa ting na rumai a artabar anunai, di oroi anuna bok a kunubus. Pa a pil i pil, a unga, a bakut i pugur, a mamais, pa a tnan kiar a ais i hanot.   
\c 12  
\s1 A hane pa dregon  
\p
\v 1 A tnan akinalang i hanot saot na langit. Ning a hane i mermer ana kamis, pa a kalang kaning i kes ting nahai naur a hana, pa saot na pukulna, a kukuh na king, ning di toli ana ning a bonot pa naur a nangnang.  
\v 2 A hane ne i tianan, pa i woiwoi ana tnan kankan, anasa ka milau ir agon.   
\p
\v 3 Ning a akinalang maleng i hanot saot na langit. Oroi, a tnan dregon, a palaona i kubar, mais a pukulna, ning a bonot a komna, pa mais a kukuh a king kaning na mais a pukulna.  
\v 4 A mukmukna i surupu purum sen a galis a nangnang misaot na bakut pa i minggen purum sen la ute lapiu. Larning di salar a nangnangla miting na natol a pukna, pa takai a pukna la rop la punga purum. Pa a dregon i tur tar salanigo tana hane ning i pele na agon, sur ono otning ir konom e natnalik ning ir agon seni.  
\v 5 Pa i agon pas a kaklik barsan, esaning ir warkurai rakrakai na tarai miting na matanitu rop ana bulse na aen. Pa di kibas kapit pas a kaklik usaot tetek e God, pa uting na nuna keskes a king.  
\v 6 Pa a hane ning i liu uting na hanua bel, sur uting na pukna ning e God ka sang tari, sur dir tai alari arlar ana 1,260 a pukakiar.   
\p
\v 7 La tur na harum saot na langit. E Maikel pa nuna angelola la harum taum ana dregon, pa a dregon pa nuna angelola otleng la keles la.  
\v 8 La tolsot pas a dregon, pa bel ta pukna ulak ma anuna dregon pa nuna angelola saot na langit.  
\v 9 Di minggen purum sen a tnan dregon, a soi tagun nating, ning di atongi a tena artitiu, pa e Satan, esaning i ben rongon a rakrakan hanua rop. Di minggen purumi taum ana nuna angelola ute lapiu.   
\p
\v 10 Pa a longor a tnan elngen takai saot na langit i atongi mang,  
\q1 “Onone e God anundala ka alaun pas a tarai, i asangan a rakrakaina, pa anuna matanitu ka hanot,  
\q2 pa a warkurai anuna Karisito anunai ka hanot.  
\q1 Anasa a tena artitiu ning i sira tiu na tastasindala,  
\q2 esaning i sira tiu la namatana e God ana kamisla pa moromla,  
\q2 di ka minggen purum seni.   
\q1
\v 11 Na tastasindala la ka tolsot pasi  
\q2 ana suluk a Nat a Sipsip  
\q2 pa ana nunla na warwara talapor.  
\q1 Bel la mangan alar anunla a lalaun kusun a minat.   
\q1
\v 12 Manglarning, a langit pa mulo ning mulo kes onoi,  
\q2 mulor gas.  
\q1 Ika ir laulau tetek a rakrakan hanua pa a puka tasi otleng,  
\q2 anasa a tena artitiu ka han purum tar tetek mu!  
\q1 Anun a balakut i irnga kol,  
\q2 anasa i tasmani mang bel ma i bongnani.”   
\p
\v 13 Ning a dregon i tasmani mang di ka minggen purum seni ute na rakrakan hanua, i lu a hane ning i agon pas a kaklik barsan.  
\v 14 Di saran tar naur a dehel a tnan manigulai tana hane ning, suir rowoi taum ono sur a pukna ning e God i sang tari saot na hanua bel, sur dir tai alari kusun a soi, arlar ana natol a rau pa tukna.  
\v 15 A soi i lewe sen a malum miting na pahana, arlar ana malum, suir los sen a hane ning.  
\v 16 Ika a piu i nangan a hane ning, i panganga pa i konom a malum ning a dregon i lewe seni.  
\v 17 Pa dregon i balakut kol tetek hane ning, pa i han suir harum taum dingla na natnatna a hane otleng ning. La ning la sira longor ana warkurai ane God, pa la sira mur a warwara talapor o e Iesu.  
\v 18 Pa a dregon i tur tar kama tumo na tasi.   
\c 13  
\s1 A rokoio a inagoi i burak ot miting na puka tasi  
\p
\v 1 Lamur a oroi pas a rokoio a inagoi i burak ot miting na puka tasi. Ning a bonot a komna, pa mais a pukulna, pa ning a bonot a kukuh na king i kes saot na komna. Pa ana taktakai pukulna, di ka tumus tar na risana ning i atong saksakan e God onoi.  
\v 2 Pa rokoio a inagoi ning a oroi i arlar ana lepat,\f + \fr 13:2 \ft A lepat, ning a ngas a rokoio a inagoi i arlar ana taiga. Pa hih a palaona i toktok.\f* ika naur a hana i arlar ana naur a hana bea,\f + \fr 13:2 \ft A bea, ning a tnan rokoio a inagoi.\f* pa a pahana i arlar ana pahana laion. A dregon ning, i saran tar a rakrakaina, pa nun a keskes a king, pa anuna tnan warkurai tetek a rokoio a inagoi.  
\v 3 Takai a pukul a rokoio a inagoi i tai arlar onoi ning di ka um kol tari, ika a masik a minat ning, ka mah ulak. Pa rakrakan hanua rop la kulkulan, pa la mur a rokoio a inagoi ning.  
\v 4 Pa tarai la lotu tetek a dregon, anasa ka saran tar a warkurai tetek a rokoio a inagoi. Pa la lotu otleng tetek a rokoio a inagoi, pa la deke mang, “Esining i arlar ana rokoio a inagoi ne? Esi ning i tolsot sur ir umi?”   
\p
\v 5 Di malmaling tar a rokoio a inagoi suir atong a warwarala na iaunan pa warwarala ning ir anan e God ono, pa ir titol pas ana nuna warkurai diat a bonot pa naur a kalang.  
\v 6 I sapang a pahana sur ir anan e God, pa ir atong laulau a risana, pa pukna ning i kes ia pa la ning la kes saot na langit.  
\v 7 Di saran tar a rakrakai tana suir harum taum ana tarai ane God, pa ir tolsot pas la. Di saran tar a warkurai tana sur ir warkurai na mangis a tarai rop, a tarai miting na hananuala rop, la ning la warwara ana urmatana ngas a warwarala rop, pa a tarai miting na matanitula rop.  
\v 8 Pa la rop te na rakrakan hanua, ning a risanla bel i kes ting na buk a lalaun, lar lotu tetek a rokoio a inagoi. A buk a lalaun ne, anuna Nat a Sipsip, ning di um kol seni, di ka tumus tari ning e God belot i akes a rakrakan hanua.  
\v 9 Esining a talngana kaning, i wakak sur ir longor onoi.   
\q1
\v 10 Ning e God i malmaling sur tik ir dodot,  
\q2 ir dodot ot.  
\q1 Ning i malmaling sur dir um kol tik ana liwan a harum,  
\q2 dir um koli ot onoi.  
\m Manglarning, a tarai ane God lar tur rakrakai pa lar tortorot.   
\s1 A rokoio a inagoi i pusa ot miting na piu.  
\p
\v 11 Lamur a oroi ning a rokoio a inagoi maleng i pusa ot miting na piu. Naur a komna i arlar ana kom ana nat a sipsip, ika i warwara lar a dregon.  
\v 12 I titol ana warkurai rop miting na ningnigo na rokoio a inagoi, suir nangani, sur a rakrakan hanua, pa la ning la kes teia, lar lotu tetek a ningnigo na rokoio a inagoi, ning a masik a minat kaning onoi ka mah ulak.  
\v 13 A rokoio a inagoi ning i pusa ot miting na piu i tol a tatatnan akinalangla. Ning a akinalang ning i toli, i tol otnan a iah misaot na langit ute na rakrakan hanua namatana tarai.  
\v 14 I ben rongon a tarai ning la kes te na rakrakan hanua, anasa ana akinalangla ning i toli ana rakrakai ning di saran tari tana suir nangan a ningnigo na rokoio a inagoi onoi. I atai la sur lar atur a manar a ningnigo na rokoio a inagoi sur lar aitna pasi onoi. A ningnigo na rokoio a inagoi ning nating di so tari ana liwan a harum, ika i laun ot.  
\v 15 Di saran tar a rakrakai tana suir tabar a manar a ningnigo na rokoio a inagoi ana wuwu na lalaun, suir warwara pa ir warkurai sur dir um kol la ning bel la longor sur lar lotu teteki.   
\p
\v 16 Pa munaur a rokoio a inagoi i angongos pas a tarai rop, sur dir suah a akinalang ting na sot a kunla pa ting na patarinla. I angongos pas la ning bel al risanla pa la ning la leklek, la ning la leklek ana gongonla pa na kapan a tarai, na tena titol oros, pa la ning bel na tena titol oros.  
\v 17 Bel tik ir lolou pa bel tik otleng ir siusiurai, ning bel ta akinalang kaning onoi. A akinalang ning a risana a rokoio a inagoi pa wawas ana risana.  
\v 18 Esining i tastasmai ir talapor wakak ana utna ne. Ir was taman a wawas ana rokoio a inagoi, anasa a wawas ana barsan. Anuna wawas ine diono na mar diono na bonot pa diono (666).   
\c 14  
\s1 A Nat a Sipsip pa 144 a rip a taraila  
\p
\v 1 Lamur a tai, pa oroi pas a Nat a Sipsip i tur saot na Mangir Saion taum ana 144 a rip a taraila, la ning di ka tumus tar a risan a Nat a Sipsip pa a risana e Tamana otleng ting na patarinla.  
\v 2 Pa a longor a tnan unga misaot na langit i arlar ana unga na malum ning i naro, pa i arlar ana rakrakai a pungpugur. A unga ning a longori, i arlar ana taraila ning la sian anunla na gita.  
\v 3 La saken a tona saksak salanigo na keskes a king, pa diat a lalaun na akakes pa a ningnigola. Bel tik ir tolsot pas suir asaer ana saksak ne. 144 a rip ning di ka lou alangolango pas la mite na rakrakan hanua, la ka lar tolsot pasi.  
\v 4 La ne bel la dur, anasa bel la borbor taum ana gurarala. La mur a Nat a Sipsip ting na pukpukna ning i sira han ia. Arpotor tana taraila te na rakrakan hanua di lou langolango pas la. Di saran la tetek e God pa tetek a Nat a Sipsip, arlar ana ningnigo na wana ning di sira sarani ta e God.  
\v 5 Bel di longor tar ta asasongo miting na pahanla, pa bel di arup sot pas la on ta rongo.   
\s1 Natola angelo ditol warwara talapor ana warkurai  
\p
\v 6 Lamur a oroi ning a angelo maleng i rowoi saot na solsolna, pa i kibas a Wakak a Warwara ning ir kes tikin, suir warawai onoi tetek a taraila ning la kes te na rakrakan hanua, a taraila miting na matanitula rop, miting na mangis a taraila rop, la ning la warwara ana urmatana ngas a warwara pa a tarai miting na hananuala rop.  
\v 7 Pa i warwara ana tnan elngena mang, “Mulor matmataut sur e God, pa mulor atong aitna pasi, anasa anuna pukakiar a warkurai ka hanot. Mulor lotu tetek e God, esaning i akes a bakut, a rakrakan hanua, a puka tasi pa matana malumla.”   
\p
\v 8 A munaur a angelo i mur pa i atongi mang, “A tnan hanua Babilon ka punga! Ka punga! Esaning i agang a tarai miting na matanitu rop ana rakrakai a wain ana pamuk a toltol anunai.”   
\p
\v 9 A munatol a angelo i mur diau pa i warwara ana tnan elngena mang, “Ning tik ir lotu tetek a rokoio a inagoi pa a manarna, pa ir kibas anuna akinalang ting na patarna o a kuna,  
\v 10 i otleng ir gang ting na wain a balakut ane God. A wain ne di ka sang tari, a rakrakaina i itna kol, pa di peki ting na kap a balakut ane God. Dir akadiki ana iah pa salfa salanigo tana Nat a Sipsip pa na totoh a angelo ane God.  
\v 11 Pa a sasawan ana nunla na kankan ir sasawan kas, bel ir rop pa bel ir rop. La ning la lotu tetek a rokoio a inagoi pa manarna, pa la ning a akinalang ana risana kaning on la, bel lar manah ana kamisla pa moromla.”  
\v 12 Larne, ir wakak sur a tarai ane God, lar tur rakrakai, la ning la sira longor ana warkurai ane God pa anunla a tortorot i tur rakrakai o e Iesu.   
\p
\v 13 Lamur a longor a elngen takai misaot na langit i atongi mang, “Ur tumus a utna ne: La ning la ka mat ana tortorot ana Leklek turpasi anone pa lamur, la angis.” A Talngan Tabu i atongi mang, “Momolna, lar manah kusun anunla a titolla, anasa anunla a wakak a titolla ir han taum on la.”   
\s1 Dir sol a rakrakan hanua anasa ka makos  
\p
\v 14 Ning a tai, a oroi pas a kokok a bakut, pa takai i “arlar ana Nat a Barsan” i kes saot onoi. I suah pas a kukuh na king ning di toli ana gol ting na pukulna, pa ting na kuna i tong pas a liwan ning i hangan kol.  
\v 15 Ning a angelo maleng i han purum misaot na rumai a artabar, pa i arkabah ana tnan elngena tetek esaning i kes saot na bakut larne, “Kibas pas anuma liwan pa ur sol. A pukakiar na sol ka hanot, anasa a ututnala te na rakrakan hanua ka makos rop.”  
\v 16 Pa esaning i kes saot na bakut, i pirat ana nun a liwan te na rakrakan hanua, pa i sol a rakrakan hanua.   
\p
\v 17 Ning a angelo maleng i purum misaot na rumai a artabar saot na langit. I otleng i tong a liwan ning i hangan kol.  
\v 18 Pa ning a angelo maleng, esaning i warkurai sur a iah, i purum miting na logo na tun artabar, pa i arkabah ana tnan elngena tetek esaning i tong pas a liwan ning i hangan kol mang, “Ur kot na kurena wain miting na rakrakan hanua, pa ur suah taman la, anasa la ka makos rop.”  
\v 19 Pa angelo i pirat ana nun a liwan, pa i suah taum a wana wain miting na rakrakan hanua. Pa i minggen tari ting na tinine tnan tung a hat, ning di sira pas miren a wana wain tingia suir polo. A tnan tung ning i tur aslang a balakut ane God.  
\v 20 Pa di miren a wana wain ting na tung a hat ning, ning tumo lapiu ana taman ana tnan hanua. Pa a suluk i saler ot miting na tung a hat ning. I barah arlar ana natol a mar a kilomita, pa i lomom kas usaot tuk ana puka aen ning i kes na pahana hos.   
\c 15  
\s1 Mais a angelo pa mais a akadik  
\p
\v 1 Pa oroi ning a tnan akinalang ulak saot na langit, pa a kulkulan kol onoi. A mais a angelo la tong pas a mais a akadik. Na akadik ne, na araropna, anasa a balakut ane God i arlar bot.   
\p
\v 2 Pa oroi ning a utna i tai arlar ana puka tasi di toli ana galas ning di suah tamani ana iah. La ning la tolsot pas a rokoio a inagoi pa manarna pa wawas ana risana, la tur ting na ris a puka tasi ning, pa la tong na gita ning e God ka saran tari tanla.  
\v 3 La saken a saksak ane Moses, a tena titol oros ane God, pa saksak ana Nat a Sipsip mang,  
\q1 “Leklek e God u rakrakai kol,  
\q2 anum na titol la itna pa di kulkulan kol on la.  
\q1 U a King ana mangis a tarai rop,  
\q2 anum na toltol la tostos pa la momol.   
\q1
\v 4 Leklek, esining bel ir matmataut sur u?  
\q2 Pa esining bel ir atong aleklek pas a risam?  
\q1 Anasa u ka u totoh.  
\q1 Na tarai miting na matanitu rop lar hanot  
\q2 pa lar lotu tetek u,  
\q1 anasa anum na tostos a titol i talapor rop tetek la.”   
\p
\v 5 Lamur tana, a tai pa oroi pas a rumai a artabar saot na langit i sapang. A rumai ning a rumai sel ning i apuasa i mang e God i kes taum ana nun a tarai.  
\v 6 Pa mais a angelo ning la tong pas a mais a akadik la purum misaot na rumai a artabar ning. La mermer ana wakak a kaenla ning la totoh pa la talapor kol, pa la dot na malwasinla ana inau a gol.  
\v 7 Pa ning a halin diat a lalaun na akakes i saran tar mais a besen di toli ana gol tetek mais a angelo ning. Pa mais a besen na gol ne la bukus ana balakut ane God, esaning i laun tikin.  
\v 8 Pa rumai a artabar i bukus ana sasawan miting na matatar ane God pa miting na rakrakaina. Pa bel tik ir tolsot pasi suir kas uting na rumai, tuk ning dir tolsot pas mais a akadik ana mais a angelo ning.   
\c 16  
\s1 Mais a angelo la pek mais a besen a balakut ane God  
\p
\v 1 Lamur a longor a tnan elngen takai misaot na rumai a artabar i atongi tetek mais a angelo ning larne, “Mulor han pa mulor pek mais a besen a balakut ane God utumo na rakrakan hanua.”   
\p
\v 2 A ningnigo na angelo i han pa i pek anuna besen a balakut saot na kabalapiu. Pa laulau a masikla, ning la sursuren kol, la hanot ting na palaona tarai ning a akinalang anuna rokoio a inagoi kaning onla pa la lotu tetek a manarna.   
\p
\v 3 A munaur angelo i pek anuna besen a balakut saot na tasi, pa tasi i keles sur a suluk arlar ana suluk a barsan ning i mat. Pa a ututnala rop ning la laun ting latasi la mat.   
\p
\v 4 A munatol a angelo i pek anuna besen a balakut saot na malumla, pa ting na matmatana malumla, pa la keles sur a suluk.  
\v 5 Pa a longor a angelo ning i tai alar a puka tasi pa a malumla, i atongi mang,  
\q1 “E God, u laun nigo pa u laun anone, a Tena Totoh u,  
\q2 u tostos anasa u warkurai na arkeles larne.   
\q1
\v 6 Ur agang la ana suluk sur ir arlar ana warkurai a arkeles tetek la anasa ana nunla na laulau a titol,  
\q2 anasa la ka um kol tar anuma tarai pa anuma propetla, pa a sulukinla ka tapek.”   
\m
\v 7 Pa a longor a elngen takai misaot ana logo na tun artabar i atongi mang,  
\q1 “A momolna, a Leklek e God u rakrakai kol,  
\q2 anum na warkurai i momol pa i tostos.”   
\p
\v 8 Pa mundiat a angelo i pek anuna besen a balakut saot na kamis, pa e God i saran tar a rakrakai ana kamis suir tun a tarai ana iah.  
\v 9 Pa tnan laplapang a iah ning, i tun a tarai, pa la atong sakan a risana e God, esaning na akadik ne kaning nahai a warkurai anunai, ika bel la lingir a nuknukinla, pa bel la atong leklek pasi.   
\p
\v 10 A mundilima na angelo maleng i pek anuna besen a balakut saot na keskes a king anuna rokoio a inagoi, pa a pukpukna ning i sira warkurai suri i mormorom rop. Pa a tarai la harat a laigereminla ana tnan kankan ning,  
\v 11 pa la atong saksakan e God ning i kes saot na langit, anasa ana tnan kankan pa na laulau a masik kaning na palaonla, ika bel la lingir a nuknukinla kusun anunla na toltol laulaula.   
\p
\v 12 A mundiono na angelo i pek anuna besen a balakut saot na tnan malum Iupretis, pa i masa rop suir sang a ngas anuna kingla mitumo na matmatana tobar.  
\v 13 Lamur a oroi pas natol a mot ditol tatatai arlar lar natol a rokrok. Ditol purum miting na pahana dregon, a pahana rokoio a inagoi pa pahana asasongo na propet.  
\v 14 Ditol natol a mot, pa ditol tol a akinalangla, pa ditol han sarara sur na king miting na rakrakan hanua rop, sur ditol ir ben taum la sur a harum ana tnan pukakiar ane God, esaning i rakrakai kol.   
\p
\v 15 “Oroi i, ar hanot lar a tena kinkinau. Esining i kes na tai alar pa i sang anun na kaenla, i angis, sur bel ir mengere pa bel ir meme.”   
\p
\v 16 Pa natol a mot ditol ben taum tar a kingla uting na pukna ning di atongi ana warwara Hibru mang Amagedon.   
\p
\v 17 Pa ararop a angelo miting na mais a angelo, i pek anuna besen a balakut saot na maup, pa a tnan elngen takai i purum miting na keskes a king saot na rumai a artabar, pa i atongi mang, “Ka rop!”  
\v 18 Lamur a pil i pil, a unga, a bakut i pugur pa a tnan mamais kol i hanot. Turpasi miting na akakes ana tarai, belot ta mamais larne i hanot tar te na rakrakan hanua. A tnan mamais ning i laulau kol.  
\v 19 A tnan hanua Babilon i tapagal sur natol, pa na tatatnan hanua anuna tarai miting na matanitula, la tarege rop. E God i nuk pas a tnan hanua Babilon pa i agang la ana wain i bukus ana ngalngaliah a balakut anunai.  
\v 20 Na lolo rop la ka rorom pa na mangir otleng bel ma di oroi la.  
\v 21 A tnan kiar a ais, taktakai tutuna i arlar ana dilima na bonot a kilogrem i punga saot ana tarai. Pa a tarai la atong saksakan e God ana akadik a kiar a ais ne, anasa a akadik ne i laulau kol.   
\c 17  
\s1 A pamuk a hane ning i tur aslang a tnan hanua Babilon  
\p
\v 1 Takai miting na mais a angelo ning la tong mais a besen i han tetek iau pa i atai iau mang, “Han ute, ar asangan tar u ana warkurai na arkeles tetek a pamuk a hane ning a risana i han sarara ana nuna a toltol laulau. Kaning i kes saot na malumla.  
\v 2 Na king mite na rakrakan hanua la tol a laulau taum onoi. Pa tarai miting na rakrakan hanua la sipak ona wain ana pamuk a toltol anunai.”   
\p
\v 3 A bukus ana Talngan Tabu pa angelo ning i kibas pas iau usaot na hanua bel. Tingia a oroi pas takai a hane i kes tar saot na kubar a rokoio a inagoi. A inagoi ning, mais a pukulna pa ning a bonot a komna pa a palaona i bukus ana risingla ning di atong saksakan e God onoi.  
\v 4 A hane ning, i mermer ana kaen i pepol pa i kubar otleng, pa di amermeri ana gol pa a wakak a hatatla ning a matanla i abit, pa na wakak a kabaruruan. Ting na kuna i tong a kap ning di toli ana gol. I bukus ana laulau a ututnala pa na dur a toltol miting na nuna pamuk a toltol.  
\v 5 Di tumus tar a risana ting na patarna, a utna na pidik larne,   
\qc \sc A tnan hanua babilon, A kabatnan a pamuk a hanela pa na laulau a toltol kol anuna rakrakan hanua.\sc*  
\m
\v 6 A oroi a hane ning i sipak, anasa i gang a suluk a tarai ane God, a sulukinla ning la warwara talapor o e Iesu.  
\p Ning a oroi i, a kulkulan kol.  
\v 7 Pa angelo i atai iau mang, “Asa kamkamna ning u kulkulan? Ar pak a kamkama hane, pa a rokoio a inagoi ning i kes tar saot onoi, ning mais a pukulna pa ning a bonot a komna.  
\v 8 A rokoio a inagoi ning u oroi tari, i laun pas nating, pa bel i laun anone, pa lamur ir hanot ulak miting na tnan tung ning bel ta araropna, pa ir han suir hirua. Pa a tarai te na rakrakan hanua ning bel di tumus a risanla ana buk a lalaun, turpasi ning e God i akes a rakrakan hanua, lar kulkulan ning lar oroi a rokoio a inagoi ne. Anasa i laun pas nating, pa bel i laun anone, pa lamur ir hanot ulak.   
\p
\v 9 “Esining i tastasmai ir talapor wakak ana utna ne. Mais a pukulna a kamkamna mang mais a mangir ning a hane ning i kes tar saot on la.  
\v 10 Ning a kamkamna otleng mang mais a king. Dilima ka mat, takai kama kane i kes, pa ning a halinla otleng belot i hanot. Ning ir hanot ir kes siklik pas ka.  
\v 11 Pa a rokoio a inagoi ning ka laun pas nating, pa bel i laun anone, esaning a siwal a king. I miting na mais a king ning, pa ir han suir hirua.   
\p
\v 12 “Ning a bonot a komna ning u oroi i, la ning, ning a bonot a king, ning belot la kibas ta warkurai sur lar hanot a king. Ika ana diono na bonot a minit ka lar warkurai taum ana rokoio a inagoi arlar ana king.  
\v 13 A nuknukinla i takai ka, pa lar saran tar a rakrakainla pa anunla a warkurai tetek a rokoio a inagoi.  
\v 14 Lar harum taum ana Nat a Sipsip, ika a Nat a Sipsip ir tolsot pas la, anasa i a Leklek anuna leklekla, pa a King anuna kingla. Pa la ning ka aslang pas la pa ka kabah pas la pa la tortorot momol teteki, lar tolsot taum onoi.”   
\p
\v 15 Pa angelo i atai iau mang, “Na malum ning u oroi, ning a pamuk a hane i kes tingia, la tur aslang na tarai miting na hananuala, a galis a tarai, a tarai miting na matanitula pa miting na urmatana ngas a warwara.  
\v 16 Pa rokoio a inagoi pa ning a bonot a kom ning u oroi la, lar nget a pamuk a hane. Lar alaulau i pa lar kepsen anuna mermer pa ir mengere kama. Lar ien a sisna, pa lar tun seni ting na iah.  
\v 17 Anasa e God ot ka anuknuk tari ana nuknukinla sur lar tolsot pas a nuknukna larne: Lar saran tar a rakrakainla ning la warkurai onoi tetek a rokoio a inagoi, tuk ning dir tolsot pas a warwarala ane God.  
\v 18 A hane ning u oroi, a tnan hanua kol, ning i warkurai a kingla te na rakrakan hanua.”   
\c 18  
\s1 E Babilon ka punga  
\p
\v 1 Lamur tana utna ne, a oroi ning a angelo maleng i han purum misaot na langit. I tong akes a rakrakai a warkurai pa anuna matatar i atalapor a rakrakan hanua.  
\v 2 Pa i woiwoi ana tnan elngena mang,  
\q1 “A tnan hanua Babilon ka punga! Ka punga!  
\q1 I hanot a pukna ana motla,  
\q2 pa a rumai a mumun anuna laulau a ingunla,  
\q2 pa a rumai a mumun anuna manila ning la dur  
\q2 pa a rumai a mumun anuna inagoila ning la dur pa la bilbilor.   
\q1
\v 3 Ka punga, anasa na tarai miting na matanitu rop la ka gang pas a rakrakai a wain ana nuna pamuk a toltolla.  
\q1 Na king mite na rakrakan hanua la tol a pamuk a toltol taum onoi.  
\q1 Pa na tena siusiurai mite na rakrakan hanua la leklek ana galis a gongon  
\q2 miting na nuna keskes na leklek.”   
\p
\v 4 A longor maleng a elngen takai misaot na langit i atongi larne,  
\q1 “Anuk a tarai, mulor purum kusuni,  
\q2 sakana mulor kes taum onoi ana nuna toltol laulaula,  
\q2 sur gong mulo otleng mulo kilang a akadikla ning i kibasi.   
\q1
\v 5 Anasa anuna toltol laulau i galis kol pa i tuk pas ot a langit,  
\q2 pa e God ka nuk akes anuna laulau a titolla.   
\q1
\v 6 A toltol ning i toli tetek mulo, dir toli ulak teteki,  
\q2 a utna ning i tol tari tetek mulo, dir kelesi arlar ana naur a dihna teteki.  
\q1 A kap ning i agang tar mulo onoi,  
\q2 dir abukus tari ana naur a dihna sur dir agangi onoi.   
\q1
\v 7 Dir saran a tnan kankan pa a tnan bal maris tana,  
\q2 ir galis arlar ana tnan matatar pa a keskes na leklek ning i tong akesi.  
\q1 I nuki ono i ot mang,  
\q2 ‘Iau a kwin, pa a kes ana nuk a keskes a kwin.  
\q2 Bel iau a lao,  
\q2 bel ar bal maris lar pas.’   
\q1
\v 8 I maining a akadikla ne, a minat, a bal maris pa a munurak  
\q2 lar hanot teteki ana ning a pukakiar sot ka.  
\q1 Pa dir tun seni ting na iah  
\q2 anasa a Leklek e God i rakrakai kol,  
\q2 esaning i saran tar a warkurai na arkeles teteki.   
\p
\v 9 “Na king mite na rakrakan hanua, ning la tol a laulauna taum ana pamuk a hane ning, pa la ka kibas taum a nuna na gongon miting na nuna keskes na leklek, ning lar oroi a sasawan na iah ning di tun a hane ning ono, lar bal maris pa lar tangis.  
\v 10 Lar tur bakbak tar kama kusuni, anasa la matatan a kankan ning dir akadiki onoi. Pa lar atongi mang,  
\q1 ‘A tnan hanua Babilon ka laulau. Ka laulau!  
\q2 E Babilon, a rakrakai a hanua!  
\q1 Ana diono na bonot a minit sot ka, anuma warkurai na arkeles ka hanot tetek u.’   
\p
\v 11 “Na tena siusiurai mite na rakrakan hanua lar tangis pa lar bal maris onoi, anasa bel ma tik ir lou anunla ututnala na siusiuran.  
\v 12 A ututnala na siusiurai larne: a gol, a silwa, na wakak a hatat ning a matana i abit, pa na kabaruruan, pa na wakak a kaen, na kaen ning i arlar ana sar a taus, na kaen ning i silika pa na kubar a kaen, pa na rakai ning i toboh wakak, pa a urmatana ngas a utna ning di toli ana kom a elepan, pa ana wakak a rakaila ning a matana i abit, pa a bras, a aen pa a wakak a hatat ning di atongi ana mabel.  
\v 13 Pa dingla na ututnala ning i toboh wakak, pa naur a utna ning i toboh wakak di atong diau ana sinamon pa mira, pa a paura di tuni pa sasawana i toboh wakak ning di atongi ana insens, pa a wain, a wel na oliw, a palawa pa a witla, pa a bulumakaula pa na sipsip, na hos pa na karis ono, pa a tarai ning lar titol na tena titol oros.   
\p
\v 14 “Na tena siusiurai lar atongi mang, ‘Na ututnala ning u mang kol suri ka rorom. Anum a gongonla pa num na matatar, la otleng la ka rorom kusun u, pa bel ulak ma ur oroi tar la.’  
\v 15 Na tena siusiurai ning la sira siuran a ututnala ne, ning e Babilon i angis la ana galis a gongon, lar tur bakbak tar kama kusuni, anasa lar matatan a kankan ning di akadiki onoi. Lar bal maris, lar tangis,  
\v 16 pa lar woiwoi mang,  
\q1 ‘A tnan hanua Babilon ka laulau! Ka laulau!  
\q2 I mermer ana wakak a kaenla, ning i pepol pa i kubar,  
\q2 pa di amermeri ana gol, pa na wakak a hatat ning a matana i abit pa na wakak a kabaruruan.   
\q1
\v 17 Ana diono na bonot a minit ka, di alaulau rop sen anuma galis a gongon!’  
\p “Pa na kiapten rop pa la ning la han taltal ana sip, na tena titol miting na sipla, pa la ning la kibas a mani miting na titol ana sipla, lar tur bakbak kusuni.  
\v 18 Ning lar oroi a sasawan na iah ning di tun e Babilon ono, lar woiwoi mang, ‘Esi na hanua i arlar taum ana wakak a hanua ne i itna kol?’  
\v 19 Lar sapran a kubus saot na pukulunla pa lar bal maris, lar tangis pa lar woiwoi mang,  
\q1 ‘A tnan hanua Babilon ka laulau! Ka laulau!  
\q2 La ning la kibas a mani miting na sipla,  
\q2 la leklek ana nuna na galis a gongon!  
\q1 Diono na bonot a minit ka, pa ka laulau rop!   
\q1
\v 20 Mulo saot na langit, mulor gas ono!  
\q2 Pa tarai ane God pa na aposel pa na propet, mulor gas!  
\q1 E God i saran a warkurai a arkeles teteki ana ututnala ning i toli o mulo.’”   
\p
\v 21 Pa ning a rakrakai a angelo i kibas pas a tnan hat, i itna arlar ana hat ning di sira gini a witla ono, pa i minggen parung seni salatasi pa i atongi mang,  
\q1 “Dir minggen tosngen sen a tnan hanua Babilon arlar ana hat ne,  
\q2 pa bel ulak ma dir oroi i.   
\q1
\v 22 A elngen na tena tol saksak pa na tena wus kaur pa na tena wus tawuru pa na tinangis ana gitala,  
\q2 bel ulak ma dir longor tari ting napirim.  
\q1 Bel ulak ma ta tena titol ana kuna ir kes taum hom.  
\q1 Pa bel ulak ma dir longor tar a tinangis ana hat ning di sira gini a witla ono.   
\q1
\v 23 Bel ulak ma ta talapor ana lam  
\q2 ir sasai ting napirim.  
\q1 Bel ulak ma dir longor tar  
\q2 a elngen ta tona tinaulai, a barman pa a basbas ting napirim.  
\q1 Lanigo anum na tena siusiurai la na tatatnan leklek te na rakrakan hanua.  
\q1 U ben rongon pas na tarai miting na matanitu rop ana numa kapil.   
\q1
\v 24 A suluk a propetla pa na tarai ane God,  
\q2 pa la rop otleng ning di um kol la te na rakrakan hanua,  
\q1 di pastetek a sulukinla tumo e Babilon.”   
\c 19  
\s1 Di atong aitna pas e God saot na langit  
\p
\v 1 Ning i rop a ututnala ne, a longor a tnan agaia lar a elngen a tnan kunum a taraila saot na langit, la kukukuk mang,  
\q1 “Haleluia!  
\q1 E God anundalai ka alaun pas dala, pa a matatar pa a rakrakai anunai ka,   
\q1
\v 2 anasa anuna warkuraila i momol pa i tostos.  
\q1 Ka warkurai a pamuk a hane ning a risana i han sarara ana nuna toltol laulau,  
\q1 esaning i alaulau a rakrakan hanua ana nuna na pamuk a toltol.  
\q1 E God ka saran tar a warkurai a arkeles teteki,  
\q2 anasa ana suluk anuna tena titol orosla,  
\q2 ning i um kol sen la.”   
\p
\v 3 Pa la kukukuk ulak mang,  
\q1 “Haleluia!  
\q1 Pa sasawan a hane ning i han kas usaot bel ir rop pa bel ir rop.”   
\p
\v 4 Naur a bonot pa pisir diat a ningnigo pa diat a lalaun na akakes la punga hanrawai, pa la lotu tetek e God, esaning i kes ana nuna keskes a king pa la atongi mang,  
\q1 “Amen, Haleluia!”   
\p
\v 5 Pa elngen takai i hanot miting na keskes a king, i atongi mang,  
\q1 “Mulor atong aitna pas anundala a God,  
\q1 mulo anuna tena titol orosla,  
\q2 mulo ning bel al risamulo pa mulo ning mulo leklek,  
\q1 mulo ning mulo hanrawai teteki!”   
\p
\v 6 Pa longor a agaia lar a elngen a tnan kunum a tarai, pa unga na malum ning i naro pa a rakrakai a pungpugur, i kukukuk mang,  
\q1 “Haleluia!  
\q1 Anasa anundala a Leklek e God,  
\q2 ning i rakrakai kol,  
\q2 i kes na king.   
\q1
\v 7 Dalar gas,  
\q2 pa dalar saran a matatar teteki!  
\q1 Anasa a pukakiar a tinaulai anuna Nat a Sipsip ka hanot,  
\q2 pa nuna hane ka sang.   
\q1
\v 8 Di ka saran tar na wakak a kaen, ning i talapor pa i toh tetek a hane,  
\q2 suir mermer ono.”  
\m Na wakak a kaen ning, i tur aslang na tostos a toltol ana tarai ane God.   
\p
\v 9 Pa angelo i atai iau mang, “Ur tumusi larne: La ning di atai pas la sur a ngasa na tinaulai ana Nat a Sipsip, la angis!” Pa i atongi otleng mang, “Na warwara ne na momol a warwara ot ane God.”   
\p
\v 10 Lamur a punga hanrawai napir naur a hana suar lotu teteki. Ika i atai iau mang, “Gong! Iau otleng a tena titol oros ka lar u pa na tastasim ning la tong akes a warwara talapor o e Iesu. Ur lotu tetek e God! Anasa a warwara talapor o e Iesu i akamtur a tarai sur lar warwara na propet.”   
\s1 Esaning i kas ana kokok a hos  
\p
\v 11 A oroi a langit ka sapang pa oroi a kokok a hos i tur salanigo tak. Pa esaning i kes saot ono di atongi mang “I sira tolsot anuna titol” pa “I momol.” Anuna warkurai pa anuna harum i tostos.  
\v 12 Naur a kalso matana i arlar ana irnga na iah, pa a galis a kukuh a king kanisaot na pukulna. Pa di ka tumus tar a rising ting na palaona, ning bel tik i tasmani, i sot ka i tasmani.  
\v 13 I mermer ana kaen ning di amurungi ting na suluk. Pa a risana, “A Warwara ane God.”  
\v 14 A kunum a tarai a harum misaot na langit la kas na kokok a hos pa la muri. La mermer ana wakak a totoh na kokok a kaen.  
\v 15 Pa liwan na harum ning i harat kol kaning na pahana i gom pasi, suir kot na tarai miting na matanitula ono, pa ir warkurai rakrakai la ana bulse na aen. I pas gingini a wana wain ting na tung a hat ning i tur aslang a ngalngaliah a balakut ane God, esaning i rakrakai kol.  
\v 16 Ting na nuna kaen pa ting na kinwar a hana, di ka tumus tar a risana larne,   
\qc \sc A King anuna kingla pa Leklek anuna leklekla\sc*.  
\p
\v 17 Pa oroi ning a angelo i tur tar ting na kamis, pa i arkabah ana tnan elngena tetek a manila rop ning la rowoi saot na solsolna mang, “Mulo rowoi ute, mulor han taum ana tnan ngasa ane God,  
\v 18 sur mulor ien a sis a palaona kingla, na ningnigo anuna tarai a harum, a tarai a harum, na hos pa la otleng ning la kas on la, pa sis a palaona tarai rop, na tena titol oros, pa la ning bel na tena titol oros, la ning bel al risanla pa la ning la leklek.”   
\p
\v 19 Lamur a oroi a rokoio a inagoi pa kingla mite na rakrakan hanua, pa anunla na kunum a tarai a harum ning la han taum sur lar harum taum o esaning i kas ana hos pa nuna kunum a tarai a harum.  
\v 20 Ika di tong akes pas a rokoio a inagoi pa asasongo na propet, esaning ka tol a akinalangla ana risana rokoio a inagoi. Ning i tol a akinalangla ning, i asongo pas la ning a akinalang ana rokoio a inagoi kaning on la, pa la lotu tetek a manar a rokoio a inagoi. Di minggen lalaun tar a asasongo na propet pa rokoio a inagoi ting na tnan tung a iah ning i irnga ana salfa.  
\v 21 Di um kol sen a nundiau a kunum a tarai a harum ana liwan a harum kaning na pahana esaning i kas ana hos. Pa manila rop la ien a sis a palaonla pa lar masur onoi.   
\c 20  
\s1 Takai a rip a rau  
\p
\v 1 A oroi pas ning angelo i han purum misaot na langit, i tong pas a ki ana tnan tung ning bel ta araropna, pa i tong pas otleng a tnan sen.  
\v 2 I tong akes pas a dregon, a soi tagun nating, ning di atongi mang a tena artitiu, e Satan. I sen akes tari tuk ot ning takai a rip a rau ir rop.  
\v 3 I minggen purum tari ting na tnan tung ning, i tagar alari, sur gong ulak ma i asongo tar a tarai miting na matanitula rop, tuk ning takai a rip a rau ning ir rop. Lamur tana, dir pak seni suir langolango pas ka siklik taem, bel ir bongnani.   
\p
\v 4 Pa oroi na keskes a king, pa la ning la kes saot on la, ning di ka saran tar a rakrakai tanla sur lar warkurai. Pa a oroi a ingun a tarai ning di ka kot kutus sen a pukulunla, anasa ana nunla na warwara talapor o e Iesu pa ana warwara ane God. Bel la lotu tetek a rokoio a inagoi pa a manarna, pa bel di kibas a akinalang anuna rokoio a inagoi ting na patarinla o ting na kunla. La laun ulak pa la warkurai taum o e Karisito ning a rip a rau.  
\v 5 Ine a ningnigo na kamkamtur ulak kusun a minat. Ika la rop ning la ka mat pa bel la laun ulak ana puka kamis ning, lar borbor tuk ning a rip a rau ning ir rop, pa lar kamtur bot kusun a minat.  
\v 6 La ning di alaun la ana ningnigo na kamkamtur ulak kusun a minat, la angis pa la na totoh a tarai ane God. A munaur a minat bel ta rakrakai sur ir alaulau la. La na tena artabar tetek e God pa e Karisito. Lar warkurai taum o e Karisito ning a rip a rau.   
\s1 Di tolsot pas e Satan  
\p
\v 7 Ning a rip a rau ning ka rop, dir pak sen e Satan miting na nuna keskes a dodot.  
\v 8 Pa ir han suir asongo pas a tarai miting na matanitula ting diat a matana wuwu, na tarai ning di atong la e Gok pa e Magok. Ir ben taum la sur a harum. A wawasinla ir arlar ana woio miting na hang.  
\v 9 Pa lar han miting na hananuala rop te na rakrakan hanua, pa lar tur talilis pas a tarai ane God, pa tnan hanua ning e God i maris koli. Ika a iah ir han purum misaot na langit pa ir tun arop sen a tarai a harum ning.  
\v 10 Pa dir minggen purum sen e Satan, esaning i asongo pas la. Ir kes ting na tnan tung a iah pa salfa, ning di ka minggen purum tar kaba a rokoio a inagoi pa asasongo na propet ia. Tingia dir akadik ditol ana kamisla pa na morom, bel ir rop pa bel ir rop.   
\s1 A ararop a warkurai  
\p
\v 11 Lamur a oroi pas a tnan keskes na king i kokok, pa esaning i kes onoi. A rakrakan hanua pa bakut dia rorom miting namatana, bel ta pukna ulak ma anundiau.  
\v 12 Pa oroi a minatla rop, la ning la leklek pa la ning bel al risanla, ning la tur tar salanigo na keskes a king, pa di sapang a bukla. Di sapang ulak ning a buk, a buk a lalaun. Pa di warkurai a minatla arlar ana anunla a titolla ning di ka tumus akes tari ting na bukla.  
\v 13 A puka tasi i saran ulak a minatla ning la mat salatasi. A minat pa Hedes, a hanua anunla ning la mat, diau otleng dia saran ulak a minatla ning kaning on diau. Di warkurai la taktakai arlar ot ana anunla na titol.  
\v 14 Lamur di minggen purum sen a minat pa Hedes ting na tnan tung a iah. A tung a iah ning, a munaur a minat.  
\v 15 Pa la ning bel di tumus akes na risanla ting na buk a lalaun, di minggen purum sen la uting na tnan tung a iah.   
\c 21  
\s1 A tona langit pa tona rakrakan hanua  
\p
\v 1 Lamur a oroi a tona langit pa tona rakrakan hanua, anasa a ningnigo na langit pa a ningnigo na rakrakan hanua dia ka rorom, pa bel ma ta puka tasi.  
\v 2 Pa oroi a tona Jerusalem, a hanua ane God, i han purum misaot na langit kusun e God. Di ka sang tari larning di ka amermer wakak tar a hane sur anuna barsan sur diar taulai.  
\v 3 Pa a longor a tnan elngen takai misaot ana keskes a king i atongi mang, “Oroi, a hanua ane God ka kes taum ona tarai. I ot ir kes taum on la, pa lar hanot anuna tarai. E God ir kes taum on la, pa ir hanot anunla God.  
\v 4 Pa ir sah sen a luru matanla rop. Bel ta minat ulak ma, bel ta bal maris, bel ta tinangis pa bel ta kankan ma, anasa a ututnala tagun nating la ka rorom.”   
\p
\v 5 Pa esaning i kes ana keskes a king i atongi mang, “Oroi, onone a atona ututnala rop!” Pa i atongi otleng mang, “Ur tumus akes a warwarala ne, anasa a warwarala ne la momol pa i tolsot pasi sur dir tortorot ono.”  
\v 6 Pa i atai iau mang, “Ka rop! Iau a Alpa pa Omega, a kamkamna pa araropna. Esaning i mos ar agangi ana malum miting na matmatana malum, a malum a lalaun, ning bel di sira lou i.  
\v 7 Esining ir tolsot pas a harum, ir kibas pas a ututnala rop ne, pa iau ar God anunai, pa ir hanot a natuklik.   
\p
\v 8 “Na tena matmataut, pa la ning bel la tortorot, pa la ning anunla na toltol i dur, pa na tena um kol a tarai, pa la ning la tol na pamuk a toltol, na tena wah, la ning la lotu tetek a asasongo na godla, taum ana tena asasongo rop, anunla pukna kaning na tnan tung ning i irnga ana iah pa salfa. Ine a munaur a minat.”   
\s1 A tona Jerusalem  
\p
\v 9 Ning a hal a mais a angelo, ning la tong mais a besen ning i bukus ana mais a ararop a akadik, i hanot pa i atai iau mang, “Han ute, ar asangan tar u ana tona tinaulai, a hane anuna Nat a Sipsip.  
\v 10 A bukus ana Talngan Tabu, pa angelo ning i kibas pas iau usaot na tnan mangir ning i tur kas usaot. Pa i asangan tar iau o e Jerusalem, a hanua ane God, i han purum misaot na langit kusun e God.  
\v 11 I sasai ana matatar ane God, a talaporna i pilpil arlar lar a wakak a hat ning a matana i abit, di atongi ana jaspa, pa i talapor arlar ana galas.  
\v 12 Pa tnan woroh ning i tur talilisi, i tur kas usaot, pa ning a bonot pa pisir naur a taman, pa ning a bonot pa pisir naur a angelo la tur ting na tamanla. Ting na tamanla ning, di ka tumus tar na risan ning a bonot pa pisir naur a mangis a tarai Israel.  
\v 13 Natol a taman ditol tai sur a pukna ning a kamis i pusa ia, natol ting namatana labur, natol ting namatana tobar, pa natol ditol tai sur a pukna ning a kamis i sup ia.  
\v 14 A kama woroh na hanua ning, di toli ana ning a bonot pa pisir naur a hat. Pa ting na hatatla ning, di ka tumus tar a risan ning a bonot pa pisir naur a aposel anuna Nat a Sipsip.   
\p
\v 15 Pa takai a angelo ning mia warwara, i tong pas a bulse ning di toli ana gol, suir mak a hanua Jerusalem ono, pa ir mak otleng na taman pa na woroh.  
\v 16 A hanua ning diat a ris ono, la arlar rop tar ka. A barahna pa a palarna dia arlar ka. Ning i mak a hanua ana nuna bulse, i arlar ana ning a bonot pa naur a rip a stadia\f + \fr 21:16 \ft I arlar ana naur a rip pa naur a mar a kilomita.\f* a barahna, pa palarna pa a turturna, ditol arlar rop ka.  
\v 17 A angelo i mak a butbut ana woroh, i arlar ana ning a mar pa diat a bonot pa diat a kubit\f + \fr 21:17 \ft I arlar ana diono na bonot pa dilima na kilomita.\f*. I mak ana mak ning a tarai la sira titol ono.   
\p
\v 18 A woroh di toli ana jaspa, pa hanua di toli ana gol rop ka, pa i totoh kol arlar ana galas.  
\v 19 A kama woroh na hanua ning, di amermer tari ana urmatana ngas a hatat rop ning la wakak kol pa a matanla i abit. A ningnigona di toli ana jaspa, a munaurna a sapaia, a bulu na hat, a munatolna a aget, a makada na hat, a mundiatna a emeral, a makada na hat,  
\v 20 a dilima onoi a sadonik, a hat ning i kokok pa i kubar, a mundiono onoi a konilian, a kubar a hat, a maisna a krisolait, a sinang a hat, a siwalna a beril, a makada na hat, a siuk onoi a topas, a sinang a hat, ning a bonot onoi a krisopres, a makada na hat, ning a bonot pa pisir takai onoi a jasin, a bulu na hat, pa ning a bonot pa pisir naur onoi a ametis, a kubar a hat.  
\v 21 Takai a bonot pa naur a taman, di toli ana kiau a kabolkabolla. Ning a taman ning a kiau a kabolkabol. A ngas ting na hanua di toli ana gol rop ka, i tai solsol arlar ana galas.   
\p
\v 22 Bel a oroi ta rumai artabar ting na hanua ning, anasa a Leklek e God, ning i rakrakai kol, pa Nat a Sipsip, diau a rumai artabar tingia.  
\v 23 A hanua ning bel i kapan sur a kamis pa a kalang diar atalapori, anasa a matatar ane God ot i atalapori, pa Nat a Sipsip i ot, a lam onoi.  
\v 24 A tarai miting na matanitula rop lar han ana talaporna, pa kingla mite na rakrakan hanua lar los kas anunla na matatar usaot teteki.  
\v 25 Bel ma ta pukakiar ulak ning na taman lar tagar, anasa bel ma ir morom ulak tingia.  
\v 26 Na tarai miting na matanitula lar los kas anunla na ututnala na leklek, pa anunla na matatar usaot teteki.  
\v 27 Bel ta dur a utna ir kas tingui na hanua ning, pa bel tik ning i sira tol a ututnala na meme pa bel tik otleng ning i sira asasongo. La ka, ning di ka tumus tar a risanla ting na buk a lalaun ana Nat a Sipsip lar kas.   
\c 22  
\s1 A malum a lalaun pa rakai a lalaun  
\p
\v 1 Lamur a angelo i asangan iau a malum a lalaun, ning i talapor arlar ana galas. I saler ot miting na keskes a king ane God, anundiau taum ana Nat a Sipsip.  
\v 2 I saler potor a tnan ngas ting na hanua ning. A rakai a lalaun i tur ting na naur a ris a malum ning. I sira wai ning a bonot pa naur a maskana wana. Ana kalangla rop, i sira wai, ning a bonot pa naur a kalang ana taktakai rau. Pa pakanala la sira alangolango na tarai miting na matanitula kusun a tinsamanla.  
\v 3 A laulau a ututnala ning a balakut ane God i kes ono, bel ulak ma dir oroi tari. A keskes a king ane God pa anuna Nat a Sipsip ir kes ting na hanua ning, pa na tena titol oros otleng ane God lar lotu teteki.  
\v 4 Lar oroi a patarna, pa dir tumus tar a risana ting na patarinla.  
\v 5 Bel ulak ma ta morom. Bel lar kapan sur a talapor ana lam pa talapor ana kamis, anasa a Leklek e God ot ir saran a talapor tanla. Pa lar warkurai arlar ana king, bel ir rop pa bel ir rop.   
\p
\v 6 A angelo i atai iau mang, “Na warwarala ne i momol pa di tolsot pasi sur dir tortorot ono. A Leklek, e God, ning i nigon a ingun a propetla sur lar apuasa anuna warwarala, i sune sen anuna angelo sur ir asangan tar anuna tena titol orosla ana ututnala ning milau ir hanot.”   
\s1 A tinan ot ulak ane Iesu i milau  
\p
\v 7 E Iesu i atongi mang, “Oroi, milau ma ar hanot! Esining i mur a warwara na propet mite na buk ne, i angis.”   
\p
\v 8 Iau e Jon, ia ka longor tar a ututnala ne pa ia ka oroi tari. Ning ia ka longor tari pa ia ka oroi tari, a punga ting napir naur a hana angelo sur ar lotu teteki, a angelo ning i asangan tar a ututnala ne tak.  
\v 9 Ika i atai iau mang, “Gong! Iau otleng a tena titol oros ka arlar hom pa na tastasim, na propet, pa la rop otleng ning la mur a warwarala mite na buk ne. Ur lotu tetek e God!”   
\p
\v 10 Pa i atai iau mang, “Gong u pidik alar a warwara na propet mite na buk ne, anasa a taem ning a ututnala ne ir hanot ono ka milau.  
\v 11 Esining a tena tol a laulau dir madek seni ot suir tol a laulau, pa esining i dur, dir madek seni ot suir tol a dur a toltol, pa esining anuna toltol i tostos, dir madek seni ot suir tol a tostos a toltol, pa esi otleng ning i totoh, dir madek seni ot suir tol a totoh a toltol.”   
\p
\v 12 E Iesu i atongi mang, “Oroi, milau ma ar hanot! Ar hanot taum ana arlou, par tokom a tarai rop arlar ot ana nunla na titol taktakai.  
\v 13 Iau a Alpa pa Omega, iau a ningnigo pa murmur, a kamkamna pa araropna.   
\p
\v 14 “La ning la gos anunla na kaen, la angis, pa i tostos sur lar hangan miting na rakai a lalaun pa lar kas ting na taman a woroh na hanua ning.  
\v 15 Ika a papla, na tena wah, la ning la tol na pamuk a toltol, na tena um kol a tarai, la ning la lotu tetek a asasongo na godla, pa la ning la mang sur a asasongo pa la toli, la kanumo lapiu na woroh.   
\p
\v 16 “Iau e Iesu, a sune sen anuka angelo suir saran a warwara talapor ne tetek mulo, a tarai a lotu ting na hananuala. Iau a wakir o e Dewit pa e tubuna, pa matlai ning i talapor kol.”   
\p
\v 17 A Talngan Tabu pa tona tinaulai, a hane, dia atongi mang, “Han ute!” Pa esining i longori, i otleng ir mang, “Han ute!” Esining i mos, i wakak sur ir han ute, pa esining i mang suri, ir gang a malum a lalaun ning bel di sira lou i.   
\s1 A araropna  
\p
\v 18 A atumarang la rop ning la longor a warwara na propet mite na buk ne: Ning tik ir tugus tar ta warwara masik ona warwara na propet ne, e God ir tugus tar otleng na akadik teteki, ning di ka warwara talapor tar ono, te na buk ne.  
\v 19 Ning tik ir kepsen ta warwara mite na buk na propet ne, e God otleng ir kepsen anuna tiniba kusuni, anuna tiniba miting na rakai a lalaun, pa totoh a hanua ane God, ning di ka warwara talapor tar onoi te na buk ne.   
\p
\v 20 Esaning i warwara talapor ana ututnala ne i atongi mang, “Momol, milau ma ar hanot.”  
\p Amen. Han ute a Leklek e Iesu.   
\p
\v 21 A marmaris anuna Leklek e Iesu ir kes tetek a tarai rop ane God. Amen.