\id 1PE - Label 
\h 1 Pita 
\toc3 1 Pita 
\toc2 1 Pita 
\toc1 A Ningnigo na Pas ane Pita 
\mt1 A Ningnigo na Pas  
\mt2 ane  
\mt1 Pita  
\is1 A warwara talapor nigo  
\ip A pas ne e Pita i tumusi. E Pita a hala ning a bonot pa pisir naur a kakak a asaer ane Iesu. I tumus a pas ne tetek a tarai a lotu ning la kes na wasira ting na hananuala. I kes tumo e Rom pa i tumus a pas ne. I atong e Rom e Babilon, a warwara larlar ana toltol mite na rakrakan hanua ning i bukus tumo e Rom.  
\ip A tena tortorotla la barat a galis a mamahat miting na matanitu anasa la tortorot o e Iesu. Ana pas ne, e Pita i mang sur ir arakrakai anunla a tortorot. I atai la ana nunla a tona lalaun o e Karisito, pa ana toltol ane Iesu, anasa e Iesu otleng i barat a mamahatla. I atai la otleng ana wakak a toltolla ning lar muri.  
\iot A tinan ana Ningnigo na Buk ane Pita:  
\io1 A kamkama buk ne (1:1-2)  
\io1 Dalar harnanai ana tortorot sur a lalaun tikin (1:3-12)  
\io1 A totoh a lalaun (1:13-2:12)  
\io1 A wakak a toltol ning dalar muri (2:13-3:7)  
\io1 A tarai ane Karisito lar kilang a kankan (3:8-4:19)  
\io1 Dalar anatarna pas dala (5:1-11)  
\io1 A ararop a warwara ane Pita (5:12-14)  
\ie  
\c 1  
\p
\v 1 Iau e Pita, a aposel ane Iesu Karisito, a tumtumus tetek mulo ning e God ka aslang pas mulo sur mulo anunai, pa mulo kes sarara arlar ana wasirala tumo na paparla Pontas, Galesia, Kapadosia, Esia pa e Bitinia.  
\v 2 E God a Tamandala ka aslang pas mulo ning ka tasman nigon tar mulo, pa a Talngan Tabu i atotoh mulo, sur mulor longor tetek e Iesu Karisito, pa dir lamir mulo ana sulukna.  
\p A marmaris pa bal molmol ir kes tetek mulo, pa ir itna bolos.   
\s1 Dala harnanai ana tortorot sur a lalaun tikin  
\p
\v 3 Dalar atong aleklek pas e God, a Taman anundala Leklek e Iesu Karisito. Ana nun a tnan marmaris, i agon tona pas dala. I maining dala harnanai ana tortorot sur a lalaun tikin, anasa e Iesu Karisito i kamtur ulak kusun a minat,  
\v 4 pa dalar kibas a utna ning e God ka sang tari saot na langit, a utna ning bel ir marase, bel ir laulau pa bel ir rorom. E God ka sang tari sur mulo.   
\p
\v 5 Pa i tai alar mulo ana rakrakaina, anasa mulo tortorot onoi. Ir tai alar mulo tuk ana ararop a pukakiar ning ir alaun mulo. Pa ana nuna titol ning, ir apuasa asaning ka sang tari sur mulo.  
\v 6 A utna ne ir agasgas kol mulo. I momol ot, a urmatana mamahat ning mulo kilangi onone ir saran a bal maris ta mulo, ika bel ir bongnan la.  
\v 7 A mamahatla ne la hanot sur dir toho anumulo a tortorot, sur dir oroi i mang i momol o bel. Di toho anumulo a tortorot arlar onoi ning di tun atotoh a gol ting na iah. Ika anumulo a tortorot i itna kol tana gol ning ir rop ka. Pa ning anumulo a tortorot i tur rakrakai lamur tana larlarla, e Iesu Karisito ir rakan aleklek pas mulo, pa ir aitna pas mulo, pa ir saran a hanrawai tetek mulo ana pukakiar ning ir hanot puasa.  
\v 8 Tur pasi nating tuk onone belot mulo oroi i, ika mulo mang kol suri. Onone bel mulo oroi i, ika mulo tortorot onoi. Pa mulo bukus ana tnan gasgas ning bel dir pak sot pasi ana ta warwara, pa i bukus ana matatar.  
\v 9 Anasa e God ka alaun pas a ingumulo, ine a wana numulo a tortorot.   
\p
\v 10 A propetla tagun nating la warwara na propet ana titol ane God ning ir alaun mulo, arlar ana artabar ning ir tabar mulo onoi. La tatatai suri, pa la rakrakai sur lar tasmani.  
\v 11 A Inguna e Karisito i kes onla, pa i atai nigon la ana mamahatla ning e Karisito ir kilangi, pa ana nun a matatar lamur. La tiktikin mang nangse momol, pa esi na barsan ning a utna ne ir hanot onoi.  
\v 12 E God i apuasai tetek a propetla mang a ututnala ne, bel ir hanot tetek la. La warwara ka ana ututnala ning e God ir toli tetek mulo. Pa onone, mulo ka longor tari kusun a tarai ning la warawai ana Wakak a Warwara tetek mulo ana rakrakai a Talngan Tabu esaning di sunei misaot na langit. Pa a ututnala ne, na angelo otleng la mang kol sur lar oroi i.   
\s1 A totoh a lalaun  
\p
\v 13 I maining mulor sang a nuknukimulo sur anumulo a titol, mulor warkurai tostos anumulo a lalaun, pa mulor harnanai ana tortorot momol sur a utna ning dir tabar mulo onoi ning e Iesu Karisito ir hanot puasa.  
\v 14 Mulo na natnat e God, ning mulo sira longor tana, gong mulo mur a laulau a nuknukla ning mulo sira toli nating, ning bel mulo mananos.  
\v 15 Mulor totoh ana numulo na toltol rop, arlar o esaning i kabah pas mulo i totoh.  
\v 16 Anasa di ka tumus tari ting na Buk Tabu mang, “Mulor totoh, anasa iau, a totoh.” \rq Liwai 11:45\rq*   
\p
\v 17 Mulo sira atong Tamamulo o e God. Pa i wakak ning mulor laun taum ana matmataut namatana, ana numulo a keskes a wasira te lapiu, anasa ir warkurai a taraila rop, ana ututnala rop ning la ka tol tari, pa bel ir purpurngis.  
\v 18 Mulo ka tasmani mang e God ka lou langolango pas mulo kusun na toltol orosla ka, ning mulo kibasi tana tamamulola. Bel i lou langolango pas mulo ana utna ning ir rorom ka, arlar ana silwa o a gol.  
\v 19 I lou langolango pas mulo ana wakak a sulukna e Karisito, esaning i arlar ana nat a sipsip ning i totoh pa bel ta tinsaman kaning onoi.\f + \fr 1:19 \ft A tarai Israel la sira artabar tetek e God ana nat a sipsip ning i totoh pa bel ta tinsaman kaning onoi, sur e God ir kepsen anunla na toltol laulau. Oroi a Wok Pris 22:17-25.\f*  
\v 20 E God ka aslang pasi nating ot ning belot i akes a rakrakan hanua, pa ana ararop a pukakiarla ne, ka hanot sur mulo.  
\v 21 O e Karisito, mulo tortorot o e God, ning i akamtur ulak pasi kusun a minat, pa i saran tar a matatar teteki. Larning mulo tortorot o e God pa mulo harnanai ana tortorot sur a utna ning ir toli lamur.   
\p
\v 22 Pa onone, ning mulo ka longor ana momol a warwara, mulo ka totoh, sur mulor mang momol sur na tastasimulo ana tortorot. Larning mulor mang artalai sur mulo ana marmaris momol ting na balamulo.  
\v 23 Anasa di ka agon ulak pas mulo. Pa anumulo a tona lalaun, bel i kamna pas on tik mite lapiu, anasa tik mite lapiu ir rarop ka. Di agon tona mulo ana utna ning bel ir rarop, i a warwara ane God, ning i laun pa ir kes tikin.   
\q1
\v 24 I arlar larning di ka tumus tari ting na Buk Tabu mang, “A taraila rop la arlar ka ana wulai,  
\q2 pa anunla na mermer i arlar ka ana purpur ning i sar.  
\q1 A wulai ir marang, pa a purpur ir punga,   
\q1
\v 25 ika a warwara ana Leklek ir kes tikin.” \rq Ais 40:6-8\rq*  
\m Pa a warwara ne, i a Wakak a Warwara, ning di ka warawai tar onoi tetek mulo.   
\c 2  
\s1 E Iesu a lalaun a hat  
\p
\v 1 I maining mulor kepsen a toltol laulaula rop, a warwara asasongo pa lalaun a asasongo, ram sur a utna ana tik masik pa urmatana warwara laulau.  
\v 2 Mulor mang kol sur a utna na ingun ning i totoh, arlar ana kakak mermeremla la mang kol sur a polo na sus. Mulor mang sur a utna na ingun, sur mulor gomo onoi tuk ana pukakiar ning mulor kibas a lalaun tikin.  
\v 3 Anasa mulo ka toho tar a lalaun ana Leklek, pa mulo tasmani mang a Leklek i wakak kol.   
\p
\v 4 Mulor han tetek a Leklek, esaning a lalaun a hat. A taraila la kepseni, ika e God i aslang pasi, pa i wakak kol namatana.  
\v 5 Pa mulo otleng, mulo arlar ana lalaun a hatatla, ning e God i titol o mulo sur mulor hanot a rumai ana Talngan Tabu. Mulor hanot na totoh a tena artabar tetek e God, sur mulor saran na artabar ning i hanot miting na Talngan Tabu, ning i wakak namatana e God, anasa o e Iesu Karisito.  
\v 6 Larning di ka tumus tari ting na Buk Tabu larne,  
\q1 “Oroi i, ia ka suah tar a hat saot e Saion.  
\q1 A hat ning a aslang pasi sur ir a wakak a hat kes, ning di tol a rumai saot ono.  
\q1 Pa esining ir tortorot onoi, anuna tortorot bel ir ame i.” \rq Ais 28:16\rq*   
\m
\v 7 Tetek mulo ning mulo tortorot, a hat ning i wakak, ika tetek la ning bel la tortorot,  
\q1 “A hat ning na tena tol rumai la kepseni,  
\q2 i ot ning a hat kes, ning di tol a rumai saot ono.” \rq Buk Song 118:22\rq*   
\q1
\v 8 “A hat ning, a tarai lar buh a hanla onoi,  
\q2 pa lar punga onoi.” \rq Ais 8:14\rq*  
\m La buh a hanla onoi, anasa bel la longor ana warwara ane God. Ning la toli larning, anuna warwara ning ka atong tari nating i sot onla.   
\p
\v 9 Ika mulo na tarai a aslang, na tena tuntun artabar tetek a King, mulo na totoh a mangis a tarai, pa mulo na tarai ane God. E God ka kabah pas mulo miting na mormorom sur anuna talapor ning i wakak kol, sur mulor warwara talapor ana anun na wakak a titol.  
\v 10 Nating bel mulo na tarai ane God, ika onone mulo anuna tarai. Nating bel mulo kibas a marmaris ane God, ika onone mulo ka kibasi.   
\p
\v 11 Na halalik, mulo kes na wasira te na rakrakan hanua, bel anumulo a hanua ne. I maining a nunung mulo, sur gong mulo mur na laulau a nuknuk, ning la harum taum ana ingumulo.  
\v 12 Ika mulor tol a wakak a toltol na arpotor tanla ning bel la tortorot, sur la ning la tiu mulo mang mulo tol a laulaula, lar oroi anumulo na wakak a titol, pa lar atong leklek pas e God ana pukakiar ning ir hanot ono.   
\s1 Mulor anatarna pas mulo tetek a ningnigola  
\p
\v 13 Mulor anatarna pas mulo tanla rop ning la tong akes a warkurai te lapiu. Mulor toli anasa a Leklek i mang suri. Mulor anatarna pas mulo tetek a king, esaning a tnan ningnigo ting na matanitu.  
\v 14 Pa mulor anatarna pas mulo otleng tetek na tena warkurai ning a king i sira sune sen la, sur lar warkurai a tarai ning la tol a laulau, pa lar aitna pas a tarai ning la tol a wakakna.  
\v 15 Anasa e God i mang sur mulor tol na wakak a titol, sur mulor sairas na warwara oros ka ana tarai ning bel la tastasman.  
\v 16 Mulo ka langolango, ika gong mulo nuki mang mulo ka langolango sur mulor tol a laulau pa mulor nuki mang i wakak ka. Mulor laun arlar larning mulo na tena titol oros ane God.  
\v 17 Mulor hanrawai a tarai rop. Mulor mang sur na tastasimulo ana tortorot, mulor matmataut sur e God, pa mulor hanrawai a king.   
\s1 Dalar mur a toltol ane Iesu  
\p
\v 18 Mulo na tena titol oros, mulor sira anatarna pas mulo tetek anumulo na ningnigo taum ana hanrawai. Bel mulor anatarna pas mulo ka tetek la ning la wakak pa la sira maris mulo, mulor anatarna pas mulo otleng tetek la ning i rakrakai na magiranla tetek mulo.  
\v 19 Ning bel mulo tol ta laulau a utna, ika mulo kilang a mamahat kusun a tarai, e God ir gas o mulo ning mulo mur a nuknukna pa mulor tur rakrakai.  
\v 20 Ning di um mulo ana numulo na toltol laulau ot, pa mulo tur rakrakai, e God bel ir aitna pas mulo. Ika ning mulo tol a tostos a toltol, pa di akadik mulo onoi, e God ir gas o mulo ning mulo tur rakrakai.   
\p
\v 21 E God ka kabah pas mulo sur mulor tur rakrakai ning mulo kilang na mamahat. Anasa e Karisito i kilang a kankan sur mulo, pa ka tol tar a manar tamulo, sur mulor mur a kiuna.   
\q1
\v 22 “Bel i tol tar ta toltol laulau,  
\q2 pa bel i atong tar ta asasongo na warwara.” \rq Ais 53:9\rq*   
\m
\v 23 Ning di atong laulau i, bel i kelesi. Ning di akadiki, bel i balakut pa bel i atong tar ta warwara mang ir alaulau la. I noren tari ot na kuna e God, esaning anuna warkurai i tostos.  
\v 24 E Karisito ot i kibas pas anundala na toltol laulau ana palaona ning i mat saot na rakai kutus, sur dalar mat kusun a toltol laulau, pa dalar laun sur a tostos a toltol. Pa ana hirua ting na palaona, i alangolango pas mulo.  
\v 25 Anasa nating mulo han rongo arlar ana sipsipla, ika onone mulo ka han ulak tetek anumulo Tena tai alar anuna sipsipla, pa Tena tai alar ana ingumulo.   
\c 3  
\s1 A keskes a tinaulai  
\p
\v 1 Mang otleng larning mulo na tinaulai a gurara, mulor anatarna pas mulo tetek anumulo na barsan, sur ning dingla onla bel la tortorot ana warwara ane God, anumulo na wakak a toltol ka ir warwara tetek la. Anumulo na toltol ir ben pas la tetek e God,  
\v 2 ning la oroi lalan anumulo na totoh a toltol pa hanrawai.  
\v 3 Gong mulo nuknuk kol sur a mermer ting na palaomulo larne, a iris pukulumulo, pa wakak na kabaruruan di toli ana gol, pa na wakak a kaen.  
\v 4 Anumulo a mermer momol ning bel ir rop, ir hanot ting na balamulo, larne a wowon a toltol pa keskes na molmol. A utna ne, i itna kol namatana e God.  
\v 5 A toltol ne, na totoh na gurara tagun nating, ning la tortorot o e God, la sira amermer la ono. La sira anatarna pas la tetek anunla na barsan,  
\v 6 arlar o e Sara ning i longor ta e Abaram, pa i atongi anuna leklek. Pa mulo na natnat e Sara, ning mulo tol asaning i tostos, pa bel mulo matmataut.   
\p
\v 7 Mang otleng larning mulo na tinaulai a barsan, ana numulo a keskes a taulai, mulor mur a wakak a nuknuk tetek anumulo na gurarala pa mulor hanrawai tetek la, anasa mulo tasmani mang, a rakrakainla bel i arlar ana rakrakaimulo, pa la otleng lar kibas a lalaun ning e God ir sarani tamulo. Mulor toli larning, sur gong ta utna i sairas anumulo na nunung.   
\s1 A kankan ning dir kilangi ana tostos a toltol  
\p
\v 8 Anuk na ararop a warwara tetek mulo rop larne, i wakak sur ir takai ka a nuknukimulo, pa ning ta halimulo ir kilang a mamahat, mulo otleng mulor kilangi taum onoi. Mulor mang artalai sur mulo larning mulo tas, mulor lasan ana marmaris, pa mulor anatarna pas mulo.  
\v 9 Gong mulo keles a laulauna uting na laulau, pa gong mulo keles a laulau a warwara uting na laulau a warwara. Ika mulor atong angis la ning la tol a laulauna tetek mulo, anasa e God i kabah pas mulo sur mulor toli larne, sur ir angis mulo.  
\v 10 Larning a Buk Tabu i atongi larne,  
\q1 “Ning tik i mang sur a wakak a lalaun,  
\q2 pa i mang sur ir oroi na wakak a pukakiar na gasgas,  
\q1 ir tai alar a pahana kusun na laulau a warwara,  
\q2 pa gong i asasongo.   
\q1
\v 11 Ir talingir kusun a laulauna pa ir tol a wakak a toltol.  
\q2 Ir tai sur a molmol pa ir rakrakai sur ir muri.   
\q1
\v 12 Anasa a matana Leklek i sira tong ana tena tostosla,  
\q2 pa i sira longor anunla na nunung.  
\q1 Ika i sira saran tar a intaurna tetek la ning la tol a laulauna.” \rq Buk Song 34:12-16\rq*   
\p
\v 13 Ning mulo rakrakai sur mulor tol a wakakna, esining ir alaulau mulo? Bel tik ir alaulau mulo.  
\v 14 Ika ning dir akadik mulo anasa ana numulo na tostos a toltol, mulo angis.  
\q1 “Gong mulo matatan asaning lar amatmataut mulo onoi,  
\q2 pa gong mulo koloron.” \rq Ais 8:12-13\rq*   
\m
\v 15 Ika, ting na numulo a lalaun, mulor tong akes e Karisito sur a Leklek anumulo. Na pukakiar rop mulor kes na sang sur mulor keles tik ning ir kabah mulo mang asa a kamna ning mulo harnanai ana tortorot. Pa ning mulo kelesi, mulor kelesi ana wakak a toltol pa hanrawai.  
\v 16 Pa mulor sira mur a toltol ning mulo tasmani mang i tostos, sur la ning la atong laulau na wakak a toltol mulo toli ning mulo mur e Karisito, lar meme ana nunla a warwara ning la atong laulau mulo onoi.  
\v 17 Ning mulor kilang a kankan, anasa mulo tol a laulauna, i wakak ka. Ika i wakak kol ning mulor kilang a kankan ana wakak a titol ning mulo toli, ning e God i mang suri.   
\p
\v 18 Anasa e Karisito i mat muntakai pas ka, sur anundala na toltol laulau. A Tena Tostos i mat sur la ning bel la tostos, sur ir ben pas mulo tetek e God. La um kol a palaona, ika di alaun pasi ana inguna.  
\v 19 Pa i han pa i warawai tetek na ingun ning la kes na dodot.  
\v 20 Na ingun ning, na ingun a tarai tagun nating ot ana raula ane Noa. E God i harnanai pas la sur lar lingir a nuknukinla, ning e Noa i tol a sip. Ika bel la longor teteki. Pa e God i alaun pasi kama a siwal la kusun a lomom.   
\p
\v 21 A lomom i tur aslang a baptais ning i alaun mulo onone. Bel di baptais mulo sur dir gos sen a dur ting na palaomulo. A baptais i warwara talapor mang mulo tasmani mang mulo tostos namatana e God. Pa ir alaun mulo anasa ana kamkamtur ulak ane Iesu Karisito kusun a minat.  
\v 22 Esaning i han kas usaot na langit, pa onone i kes ting na sot a kuna e God. Pa na angelo, pa ingunla ning la tong akes a rakrakai sur lar warkurai, pa ingunla ning la tong akes a rakrakai, la kes nahaina.   
\c 4  
\s1 Mulor manah kusun a toltol laulaula  
\p
\v 1 E Karisito i kilang a kankan ana palaona. I maining mulo otleng mulor sang sur mulor kilang a kankan arlar onoi. Anasa esining i kilang a kankan ana palaona ka manah kusun a toltol laulaula.  
\v 2 Pa onone, bel i saran tar anuna lalaun sur a laulau a nuknukla mite lapiu. I saran tari ka sur ir mur a nuknuk e God.  
\v 3 Ka bongnan mulo ning mulo ka tol tar na toltol laulau, ning na tarai ning bel la tortorot la mang sur lar toli. La tol na toltol a pamuk, la mur na laulau a nuknukinla, la sipak pa la kukuk taltal taum ana longlong a toltol, pa la tol orosi ka na toltol ning bel i wakak. Pa la lotu tetek a asasongo a godla, ning e God i sairas dala kusuni.  
\v 4 Pa onone, na halalimulo la kulkulan kol ning bel mulo mur na laulau a toltol ne taum onla, pa la atong laulau mulo.  
\v 5 Ika lamur lar tur namatana e God, pa lar warwara talapor ana asaning la ka tol tari. Anasa e God ka sang sur ir warkurai a tarai rop, la ning la laun pa la ning la ka mat.  
\v 6 Ine a kamkamna ning di ka warawai ana Wakak a Warwara tetek a tarai ning la ka mat. Ning la mat la kibas a warkurai ana palaonla, arlar ana tarai rop, ika di warawai tetek la sur a ingunla ir laun arlar o e God i laun.   
\s1 Dalar titol ana artabarla ning e God ka saran tari tan dala  
\p
\v 7 A ararop ana ututnala rop ka milau. I maining mulor nuknuk wakak pa mulor warkurai tostos anumulo a lalaun, sur mulor tol sot sur mulor nunung.  
\v 8 Ine a utna ning i leklek kol tan a ututnala rop, mulor mang artalai sur mulo ana momol, anasa a marmaris i poroi a galis a toltol laulau.  
\v 9 Mulor gas artalai pas mulo ting na numulo na rumai, pa gong mulo toli ana ururai.   
\p
\v 10 E God ka saran tar na artabar tetek mulo taktakai miting na urmatana artabarla. Pa ir wakak sur mulor titol wakak onoi, sur mulor nangan artalai mulo.  
\v 11 Ning tik i kibas a artabar sur ir tena warawai, i wakak sur ir warawai arlar ot ana warwara ane God. Ning tik i kibas a artabar sur ir tena harnangai, i wakak sur ir harnangai taum ana rakrakai ning e God i saran tari tana, sur a tarai lar atong aleklek pas e God ana ututnala rop, anasa o e Iesu Karisito. Anunai ka a matatar pa a rakrakai, bel ir rop pa bel ir rop. Amen.   
\s1 A tarai ane Karisito lar kilang a kankan  
\p
\v 12 Na halalik, gong mulo kulkulan ning di toho mulo ana rakrakai a kankan arlar larning a iah i tun mulo, pa gong mulo nuki mang a tona utna ning i hanot tetek mulo.  
\v 13 Ika mulor gas anasa mulo kilang a kankan arlar o e Karisito i kilangi, sur mulor bukus ana gasgas ning e Karisito ir hanot taum ana nun a matatar.  
\v 14 Ning di atong laulau mulo anasa mulo ane Karisito, mulo angis. Anasa a Inguna e God, a Ingun a matatar, i kes o mulo.  
\v 15 Gong tik o mulo i kilang a kankan anasa i a tena um kol a tarai, o a tena kinkinau, o a tena laulau, o a tena tol oros tetek a tarai.  
\v 16 Ika, ning di akadik u ka anasa u a te Karisito, gong u meme. Ur atong aleklek pas e God, anasa u kibas a risana e Karisito.  
\v 17 A taem ning e God ir warkurai ka hanot. Dir warkurai nigon dala a tarai ane God. Ning dir warkurai nigon dala, ir mangmangasa a warkurai tetek la ning bel la mur a Wakak a Warwara ane God?  
\v 18 A Buk Tabu i atongi larne,  
\q1 “Ir ngangaten sur dir alaun pas na tostos a tarai.  
\q2 Pa ir mangmangasa tetek na laulau a tarai pa la ning bel la tortorot o e God?” \rq Sindaun 11:31\rq*   
\p
\v 19 I maining la ning la kilang a kankan, anasa ana nuknukna e God, lar saran tar la ting na kuna a Tena Akakes anunla, ning bel ir noren oros la, pa gong la manah kusun a wakak a toltol.   
\c 5  
\s1 A liur a sipsip ane God  
\p
\v 1 Onone ar warwara tetek mulo na ningnigo ana lotu, ning iau otleng a ningnigo arlar o mulo. Ning e Karisito i kilang a kankan ia ka oroi tari, pa lamur ning ir hanot, iau otleng taum o mulo, dalar kimkibas ana nun a matatar.   
\p
\v 2 Mulor tai alar a liur a sipsip ane God, ning di saran tari tetek mulo sur mulor tai alari. Gong mulo titol anasa a tarai ka la angongos tar mulo, mulor titol anasa mulo ot mulo mang sur mulor agasgas e God. Gong mulo titol ka sur a mani. Mulor titol ana tnan gasgas.  
\v 3 Gong mulo warkurai rakrakai la ning di ka saran tar la sur mulor tai alar la. Anumulo a lalaun ir arlar ana wakak a manar tetek a liur a sipsip.  
\v 4 Ning a Ningnigo na tena tai alar anuna sipsipla ir hanot, mulor kibas a kukuh na matatar ning a matatarna bel ir rop.   
\p
\v 5 Mang otleng larning, mulo na barman, mulor sira anatarna pas mulo tetek la ning la nigo ta mulo. Mulo rop mulor anatarna pas mulo artalai, esaning anumulo a wakak a mermer. Anasa a Buk Tabu i atongi mang,  
\q1 “E God i nget esining i aitna pasi ot,  
\q1 pa i maris esining i anatarna pasi.”   
\p
\v 6 I maining mulor anatarna pas mulo nahaina rakrakai a kuna e God, sur ning a taem ir sot arlar ana nuknukna, ir aleklek pas mulo.  
\v 7 Mulor saran rop tar anumulo na mamahat tetek e God, anasa i sira tai alar mulo.   
\p
\v 8 Mulor tumarang pa mulor warkurai tostos anumulo a lalaun, anasa anumulo a hirua, e Satan, i han taltal arlar ana laion, ning i kukukuk, pa i tai sur al tarai sur ir ien la.  
\v 9 Mulor tur rakrakai ana tortorot pa mulor sairasi, anasa mulo tasmani mang na tastasimulo te na rakrakan hanua rop la kilang na kankan arlar o mulo.   
\p
\v 10 Ika e God i a God na marmaris, pa o e Karisito i kabah pas mulo sur mulor kes taum onoi ana nun a matatar ning bel ir rop. A kankan ning mulo kilangi, bel ir bongnani, pa lamur i ot ir awakak ulak pas mulo, ir arakrakai mulo pa ir nangan mulo sur mulor tur rakrakai.  
\v 11 A rakrakaina ir kes tikin. Amen.   
\s1 Na ararop a warwara  
\p
\v 12 E Sailas i nangan iau ning a tumus a natar a pas ne tetek mulo. E Sailas a tasik ana tortorot, ning a tortorot kol onoi. Ana pas ne, a mang sur ar arakrakai mulo pa ar atai talapor mulo ana marmaris momol ane God. Mulor tur rakrakai onoi.   
\p
\v 13 A tarai a lotu ning la kes te e Babilon\f + \fr 5:13 \ft E Babilon i tur aslang e Rom, pa i warwara larlar ana toltol mite na rakrakan hanua ning i bukus tumo e Rom. \f*, la saran anunla na marmaris tetek mulo. La a tarai na aslang ane God taum o mulo. E Mak, a natuklik ana tortorot, i otleng i saran anuna marmaris tetek mulo.  
\v 14 Ning mulo arpastek, mulor maris artalai mulo taum ana argoro a marmaris.  
\p A bal molmol tetek mulo rop ning kaning mulo o e Karisito.