\id SNG - Keyagana NT with OT portions [kyg] -Papua New Guinea 2001 (web 2014) 
\h Salomoni Yokemae 
\toc1 SALOMONI YOKEMAE 
\toc2 Salomoni Yokemae 
\toc3 Sal 
\mt1 SALOMONI YOKEMAE  
\ip Salomoniꞌa avoꞌmo kae maleꞌniya yokemoꞌmo mago kini vekamoꞌa aꞌaeꞌmo hau ayamopafiꞌmo hauꞌniya yokemo haneꞌniye. Huꞌniya kava huno a kanomo hau ayamopafiꞌmo hauꞌniya vekaeꞌmo hauꞌnigeno agaefeꞌmo ava gemo huno hapa paiꞌniye.  
\ip Kini vekamoꞌa aꞌaeꞌmo hauꞌniya kava huno Yesuꞌa agaiꞌa siosi vayaꞌaifeꞌmo hau ayamopafiꞌmo hauꞌniye. Ani a kanomoꞌa anauꞌamofeꞌmo hauꞌniya kava huꞌa siosi vayaꞌmogi Yesu Kalaisifeꞌmo hapau apayamopafiꞌmo hapauꞌnigeꞌa akame nehae.  
\c 1  
\p
\v 1 Mani yokemo Salomoniꞌa avoꞌmo kae maleꞌniya yokemoꞌmo muki yokeꞌamo ago aeno agaseꞌniye.  
\v 2 Nagaefeꞌmo kahau kayamopafiꞌmo kahauꞌniya kavaꞌmoꞌa alagepa nofi alagafati aniꞌmoꞌa nehiya agufa hagaꞌamo ago aeno agaseꞌniyaꞌmofeꞌmo yafayaꞌmo huka natesanafeꞌmo neꞌnahaiye.  
\v 3 Asole alagepa atumo neꞌaiya uveliletiꞌmo kagufaleꞌmo fale maleꞌnanageno kagufalegatiꞌmo alagepa atumo neꞌaiye. Kagikamoꞌmo alagepa atuꞌmo neꞌaiya aniꞌmo aino lakiꞌniya anikana huno haneꞌneno alagepa atumo neꞌaiyaꞌmofeꞌmo veꞌeꞌmo magokepi lokaeꞌa ohavaeꞌnaya aꞌmafaꞌne anagaꞌmogimo kagaefeꞌmo hapau apayamopafiꞌmo nehapaiye.  
\v 4 Kagaemo nayate heka navayu hulika neꞌegetao lagaemo nagu nagu huta eta kakame huta ugune. Kini vekamoꞌa navalelino uno noꞌafiꞌmo maisuvafeꞌmo nateꞌniye.  
\p Kao vayaꞌmogitamo kagaefekeꞌmo lamogaga aiteta amuse hugune. Apakaemo alagepa nofi alagafati anifeꞌmo apakesamo afiꞌa apamogaga neꞌaiyaꞌmonanafa lagaefeꞌmo kahau kayamopafiꞌmo kahauꞌniya kavafekeꞌmo lagesa afifi huta lamogaga aigune. Fatago vayaꞌmogi kagaefekeꞌmo hapau apayamopafiꞌmo nehapaiye.   
\p
\v 5 Yulusalemu aꞌmafaꞌne anagaꞌmogitapae, huno, nagufaꞌamo anupa nagufamo haneꞌniyaꞌmonanafa kanale nagufaꞌe a kanomo maiꞌnove. Nagaemo Keta vayaꞌai seli noꞌapigana huꞌna maiꞌnovaꞌmonanafa Salomoniꞌa alagepa lavolavomo asai maleꞌniya lavolavogana huꞌna maiꞌnove.  
\v 6 Anupa nagufamo haneꞌniyaꞌmofeꞌmo afa a kanoe, hutapa oꞌnageyo. Yegemoꞌmo naleno alino ani agufa nagufamo kalino nateꞌniye. Itaꞌnimoꞌa ve mafaꞌne anagaꞌamogi apaipamo leꞌa nateteꞌapaeꞌmo, uka nofi hoyatileꞌmo yagaiyo, huꞌa naha paiꞌnae. Vaehae, nagaiꞌni hoyanileꞌmo alagepa huꞌna oꞌyagaiꞌnove.   
\p
\v 7 Lusi kava huno nahau nayamopafiꞌmo neꞌnahaiya vekaꞌnimogae, huꞌna, sipisipi anagakamo haiyategamo apavalelika uka neꞌyaꞌmo alika neꞌapamine. Yegemo haineno namotule neꞌaeya afinaꞌmo haiyategamo apavalelika uka neꞌapatanageꞌa maiꞌa falu nehae. Naha paigeꞌnao hosu kavanageꞌna kaꞌmo ataleꞌna kavagi vayaꞌai sipisipiꞌeꞌmo magokepi lokaeꞌna maino.   
\p
\v 8 Alagepa kanale a kanomogae, huno, muki aꞌne anagaꞌmo ago aeka apakaseꞌnane. Ani kotegamo oꞌageꞌnisanaꞌmoꞌmo sipisipi anagaꞌai apaiyakamo alinika aise meme anagakamo apavalelika uka sipisipileꞌmo neꞌyagaiya vayaꞌai seli no haopaleꞌmo uka neꞌyaꞌmo alika apamiyo.  
\v 9 Nahau nayamopafiꞌmo neꞌnahaiya aꞌnimogae, huno, Kagaemo Kini vekamo Felo hosi anagaꞌamogi kame hisayafeꞌmo talalamo halauliꞌa neꞌvaya hosigana huka maiꞌnane.  
\v 10 Muki kayokateꞌmo haneꞌniya konali yakamoꞌa kaugosafiꞌmo aeno ha nele. Kagaemo kanale sesumo lugokafiꞌmo huka aliꞌnanageno alagepa huno aeno ha nele.   
\p
\v 11 Lagaemo konali yakamo goli yafatetiꞌmo alo huge siluva yafatetiꞌmo alo huge huteta kamigune.   
\p
\v 12 Kini vekaꞌnimo hiꞌyalamuꞌaleꞌmo siateꞌmo fai maiꞌnigenoꞌaeꞌmo fale maleꞌnova aniꞌmoꞌa alagepa atuꞌamoꞌmo aino atagu nefae.  
\v 13 Nahau nayamopafiꞌmo neꞌnahaiya vekaꞌnimoꞌa meya hayafatiꞌmo alagepa atumo neꞌaiya anikana huno maiꞌneno muki haniꞌilagamo nuꞌnilaꞌmogani folagapiꞌmo havaegaiye.  
\v 14 Nahau nayamopafiꞌmo neꞌnahaiya vekaꞌnimoꞌa Enigeti kotegatiꞌmo nofi hoyafatiꞌmo yosa ausemoꞌmo alagepa atumo neꞌaiya yosa ausegana huno maiꞌniye.   
\p
\v 15 Nahau nayamopafiꞌmo neꞌnahaiya aꞌnimogae, huno, vae, alagepa kanale a kanomo maiꞌnane. He, alagepa kanale a kanomo maiꞌnane. Kaulagamoꞌa kaugoꞌyavemo aulagagana huno haneꞌniye.   
\p
\v 16 Nahau nayamopafiꞌmo neꞌnahaiya vekaꞌnimogae, huꞌna, Vae, alagepa kanale vekamo maiꞌnane. He alagepa kanale vekamo maiꞌnane. Hipatiꞌamo alino hegafa hu maleꞌniye.  
\v 17 Nokotiꞌaleꞌmo kanale yosamo haneꞌniye. Yofo yosamo sita yosamo haneꞌnigeno hanae yosamo paini yosamo haneꞌniye.   
\c 2  
\p
\v 1 Nagaemo Salonigayaga yahaofatiꞌmo kahaumoꞌa haesa ausemo neheya ausegana huꞌna maige ave aiyamo folagapiꞌmo haneꞌniya yaveyave kahaumo ausegana huꞌna maige huꞌna maiꞌnove.  
\v 2 Aufe kahaumo haneꞌniya folagapiꞌmo kanale yaveyave kahaumo ausemo haneꞌniya kava huno nahau nayamopafiꞌmo neꞌnahaiya aꞌnimoꞌmo aꞌmafaꞌne anagaꞌai folagapiꞌmo maiꞌniye.   
\p
\v 3 Alagepa alagamo neꞌaeya yosamo yahaofilaga yosamo haneꞌniya folagapiꞌmo haneꞌniya kava huno nahau nayamopafiꞌmo neꞌnahaiya vekaꞌnimo ve mafaꞌne anagaꞌai folagapiꞌmo maiꞌniye. Nagaemo lusi yegemo nelegeꞌnaeꞌmo ani yosamo ulunapiꞌmo itopaleꞌmo maiꞌneꞌnaeꞌmo lusi kava huꞌna namogaga aiꞌnove. Ani yosa alagamo lagiꞌna neꞌnogeno navayafilagatiꞌmo lusi kava huno hagaꞌage neꞌnahaiye.   
\p
\v 4 Agaemo alopa neꞌyaꞌmo neꞌnaya noꞌafiꞌmo navalelino haino nagaefeꞌmo hau ayamopafiꞌmo hauꞌniya kavatefeꞌmo kalahauꞌmeꞌmo nagenopaleꞌmo asai maleꞌniye.  
\v 5 Nagaefeꞌmo hau ayamopafiꞌmo hauꞌnigeꞌnaeꞌmo lokiyaꞌnimo alagi ohaneꞌniyaꞌmofeꞌmo nofi alagafati aniꞌmo alika namiteka alika lokiya vaika nato. Alagepa apoli alagamo alika namigeꞌna neꞌna falu hino.  
\v 6 Hoga ayatetiꞌmo nageyutega maleteno lamaga ayatetiꞌmo nagufaleꞌmo natafauno maiꞌniye.  
\v 7 Yulusalemu aꞌmafaꞌne anagane, huꞌna, lokiya gefatiꞌmo huꞌnaeꞌmo, afela afumogimo koli huteꞌa apaune nehaya afu anagaꞌmogi nehaya kavafeꞌmo lapakesamo afitetapa nahau nayamopafiꞌmo neꞌnahaiya aꞌnimo aupatiꞌmo haunetapa oꞌateyo. Agaiꞌamo hauꞌninageno aupatiꞌmo he tigiye.   
\p
\v 8 Nahau nayamopafiꞌmo neꞌnahaiya vekaꞌnimo agemo afiꞌnove. Agaemo aeno hailo hailo hulino nagu nagu huno avelegamo neꞌe.  
\v 9 Nahau nayamopafiꞌmo neꞌnahaiya vekaꞌnimoꞌa kanale afela afugana huno nagu nagu hulino neꞌe. Ago eno kumateꞌmo he tino maiꞌnenoꞌaeꞌmo aise yasi katetiꞌmo nopilagamo aulu heno ageꞌniye.  
\v 10 Nahau nayamopafiꞌmo neꞌnahaiya vekaꞌnimoꞌa naha paiꞌniye. Agaemo naha painoꞌaeꞌmo, Nahau nayamopafiꞌmo neꞌnahaiya aꞌnimo alagepa kanale aꞌnimogae, huno, he tika kumatega emikeka nagaeꞌeꞌmo magokepi lokaeka eno.  
\v 11 Kagaemo yasi kofeꞌmo koli osuvo. Koꞌmo neꞌaiya afinaꞌmo ago hano huꞌniye.  
\v 12 Hemenimo muki haopalegamo kahau ausemo ago heꞌnigeꞌapaeꞌmo nama anagaꞌmogimo yoke nehae. Kaugoꞌyave anagaꞌmogimo yoke huꞌnageꞌapaeꞌmo muki haopalegatiꞌmo vayatimogimo neꞌafiye.  
\v 13 Fiki yosamoꞌa aepa faino alagamo aeꞌnigenoꞌaeꞌmo nofiꞌmoꞌa ausemo heꞌnigeno alagepa atumo neꞌaiye. Nahau nayamopafiꞌmo neꞌnahaiya aꞌnimo alagepa kanale aꞌnimogae, huno, he tika egetaꞌao uguꞌae.  
\v 14 Kaugoꞌyave namaꞌnimo yafakapiꞌmo maiꞌnane. Aulafi kateꞌmo haika fala kika maiꞌnane. Kanale kaugosamo alika nave ligeꞌna ageno. Kagemo alagepa kagemo haneꞌnigi kage aigeꞌna afino.   
\p
\v 15 Aise afela kala anagaꞌmo apatafauka apanu kiyo. Fiku yanageꞌa hoyatifiꞌmo haiꞌeꞌa nofiꞌmo aliꞌa hosu huꞌa ategae. Nofitimoꞌa saufa alagamo aeꞌniyaꞌmofeꞌmae.   
\p
\v 16 Nahau nayamopafiꞌmo neꞌnahaiya vekamo nagaiꞌni vekaꞌnimo maiꞌnigeꞌna agaiꞌa aꞌamo maiꞌnove. Agaemo sipisipi anagaꞌamo apavalelino uꞌnigeꞌapaeꞌmo kanale yaveyave kahaumoꞌmo ause heꞌniya folagapatiꞌmo kahaumo neꞌnae.  
\v 17 Nahau nayamopafiꞌmo neꞌnahaiya vekaꞌnimogae, huꞌna, oꞌnataleka malage huka aika atagineka eka alino fako huno laꞌateꞌniya avelegamo haikeka kanale afela afugana huka nagu nagu huka egetaꞌao nagaeꞌeꞌmo maime maime neꞌvisuꞌagenoꞌaeꞌmo kotisigenoꞌaeꞌmo hani huꞌniya kavaꞌmo hano hino.   
\c 3  
\p
\v 1 Haniꞌilagamo hipaꞌnileꞌmo havaeꞌneꞌnaeꞌmo nahau nayamopafiꞌmo neꞌnahaiya vekaꞌnieꞌmo kahauya huꞌnovaꞌmonanafa oꞌageꞌnove.  
\v 2 Nagaemo he tiꞌna taonifiꞌmo uꞌneꞌna huꞌna muki kaꞌaleꞌmo kahauya huꞌna agegauve, huꞌna nagesamo afiꞌnove. Nagaemo kahauya huꞌnovaꞌmonanafa oꞌageꞌnove.  
\v 3 Uꞌneꞌna nehugeꞌapaeꞌmo taonifiꞌmo uꞌeꞌa huꞌa neꞌyagaiya vayaꞌmogimo neꞌnagageꞌnaeꞌmo, Nahau nayamopafiꞌmo neꞌnahaiya vekaꞌnimo ageꞌnafiye, huꞌna apafi geꞌnove.   
\p
\v 4 Nagaemo apataleꞌna uvategamo malage huꞌna neꞌnahaiya vekaꞌnimo ageꞌnove. Nagaemo agaetegamo uꞌnaeꞌmo agaemo natalesiyafeꞌmo oꞌnahauꞌnigeꞌnaeꞌmo anu kiꞌna maiꞌnove. Oꞌataleꞌna avaleliꞌnuꞌna alino nateꞌniya itaꞌnimoꞌmo nehavaeya yapilagamo utaꞌa haiꞌnoꞌae.  
\v 5 Yulusalemu aꞌmafaꞌne anagane, huꞌna, lokiya gefatiꞌmo huꞌnaeꞌmo, afela afumogimo koli huꞌa apaune nehaya afu anagaꞌmogi nehaya agufa kavafeꞌmo lapakesamo afitetapa nahau nayamopafiꞌmo neꞌnahaiya vekamo aupatiꞌmo haunetapa oꞌateyo. Agaiꞌamo hauꞌninageno aupatiꞌmo he tigiye.  
\v 6 Ageyo. Ina laꞌmo yahaofilagamo aniꞌmo ohaneꞌniya kotegatiꞌmo haine neꞌe. Maketiletiꞌmo miya nefaiya laꞌnefamo atafiꞌmo nekaya afinaꞌmo alagepa atumo neꞌaigeno halinaꞌamoꞌmo posigana huno haneꞌneno halinamo ailinuno nehaiya kava huno haine neꞌe.  
\v 7 Ageyo, huꞌna, Mago vayaꞌmogi Salomoni siamo aliniꞌa neꞌae. Sigisitiꞌa Isaleli ati vayaꞌmo koli nosaya lokiya ati vayaꞌmogimo faiꞌa ku aiꞌa ateliꞌa neꞌae.  
\v 8 Muki vayaꞌamogimo kame nehaya kavaꞌmo ageꞌa alagepa huꞌnaya vayaꞌmogi naipeꞌapimo aliniꞌa neꞌae. Haniꞌilagamo afole neꞌaiya kavafeꞌmo koli nehayaꞌmofeꞌmo naipeꞌapimo apaluteꞌmo maleꞌnae.  
\v 9 Kini vekamo Salomoniꞌa Lemanoni kotegati aliꞌnaya alagepa yosaletiꞌmo alini uꞌeꞌa nehaya siaꞌamo mago aise nokana huno kiꞌniye.  
\v 10 Agaemo siluva yafatetiꞌmo posiꞌamo alo huge goli yafatetiꞌmo afeꞌalumelagaꞌamo alo huge huno alo huteno haesa lavolavoletiꞌmo aino ati kae maleꞌniye. Yulusalemu aꞌmafaꞌne anagaꞌaifeꞌmo hau ayamopafiꞌmo hauꞌniya kavatetiꞌmo yuꞌilagaꞌamo alagepa huno alo huꞌniye.  
\v 11 Saiyoni aꞌmafaꞌne anagane, huꞌna, lapakaemo etapa kini vekamo Salomoniꞌmo ageyo. Agaemo agenopaleꞌmo kini kakolitamo haneꞌniye. Kini vekamo Salomoniꞌa aꞌmo aliꞌniya afinaꞌmo lusi kava huno amogaga aiꞌnigenoꞌaeꞌmo itaꞌamoꞌmo ani kakolitamo alino agenopaleꞌmo maleno ateteno kini vekamo lekana paino ateꞌniye.   
\c 4  
\p
\v 1 Nahau nayamopafiꞌmo neꞌnahaiya aꞌnimogae, huno, vae, alagepa kanale a kanomo maiꞌnane. He, alagepa kanale a kanomo maiꞌnane. Kaulagamoꞌa kaugoꞌyavemo aulagagana huno haneꞌnigeno kanale kayokaꞌmoꞌa aino ati kaeꞌniye. Kayokaꞌmoꞌa meme anagaꞌmogi Gileyati avelegatiꞌmo magokepi lokaeliꞌa nelamiya meme anagaꞌai apayokakana huno haneꞌniye.  
\v 2 Muki kaveꞌamoꞌmo yaveyave sipisipi anagaꞌmogi apayokaꞌmo magoke aiyaya huꞌa lagauꞌa apateteꞌa hemenimo aniꞌmo faleꞌa apateꞌnagenoꞌaeꞌmo apayokaꞌmoꞌa yaveyaveꞌage nehiya kava huno kaveꞌmoꞌa yaveyaveꞌageꞌmo nehiye. Mani muki sipisipi anagaꞌmogimo lagoꞌya apanaꞌaumo maleꞌnae. Mago anamo sipisipimo oꞌmaiꞌnae.  
\v 3 Kavayamo kanale haesa nofikana huno haneꞌnigeka alagepa kagemo neꞌaine. Kayokaꞌmoꞌa aino ati kaeꞌniya kagesa aepaleꞌmo mago yosamo agiꞌamo pamagalanati alagamo aino apalo atiꞌniya yosa alagagana huno haneꞌniye.  
\v 4 Lugokamoꞌa kini vekamo Neviniꞌa kame nehiya yaꞌamo maleꞌniya noꞌmo yatala vegovego nokana huno haneꞌniye. Ani nopiꞌmo lokiya kame nehaya vayaꞌai haleguꞌapimo tauseniꞌa haleguꞌmo asai maleꞌnae.  
\v 5 Lole nukalaꞌmoꞌa kanale lagoꞌya afela afulaꞌmoganimo yaveyave kahaumo ausemo haneꞌniya folagapatiꞌmo kahaumo neꞌnaꞌa afulakana huno haneꞌniye.   
\p
\v 6 Nagaemo alagepa atu neꞌaiya yosamo haneꞌniya avefiꞌmo haiꞌna maime maime neꞌvisugenoꞌaeꞌmo kotisigenoꞌaeꞌmo hani huꞌniya kavaꞌmo hano hugiye.  
\v 7 Nahau nayamopafiꞌmo neꞌnahaiya aꞌnimogae, huno, alagepa kanale a kanomo maiꞌnane. Oꞌaniꞌya faifa yaꞌmo kagaeteꞌmo ohaneꞌniye.  
\v 8 Aꞌnimogae, huno, kagaemo nagaeꞌeꞌmo Lemanoni aveletiꞌmo ataleka ugetaꞌao. Amana avelegatiꞌmo agege Sena avelegatiꞌmo agege Hemoni avelegatiꞌmo agege huka ago. Ani loleꞌe magoꞌe avefiꞌmo Laiyoni anagaꞌe Laiyonigana huꞌa maiꞌnaya afela pusi anagaꞌeꞌmo maiꞌnae.  
\v 9 Nasaꞌnimogamo aꞌnimae, huno, kagaemo aiseꞌatoꞌamo nagaemo aulu nahaeka neꞌnaganagenoꞌaeꞌmo naipafiꞌmo lusi kava huno nahaꞌye huꞌniye. Nagaemo lugokamo ageteꞌnaeꞌmo kagaeteꞌmo asagauꞌna neꞌauve.  
\v 10 Nasaꞌnimogamo aꞌnimae, huno, Nagaefeꞌmo kahau kayamopafiꞌmo kahauꞌniya kavaꞌmoꞌa alagepa kanale kavaꞌmo haneꞌniye. Ani kahauꞌniya kavakamo hagaꞌamoꞌmo nofi alagafati aniꞌmo nehiya hagaꞌamo alagi ago aeno agaseꞌniye. Ani nefalana aniꞌmoꞌa alagepa atuꞌamoꞌmo muki alagepa atumo neꞌaiya yaꞌmo atuꞌamo ago aeno agaseꞌniye.  
\v 11 O aꞌnimogae, huno, Kavayafatiꞌmo kevegeve anumo asagauno neꞌaiye. Kavenafuꞌnamo afeꞌalumelaga kevegevemo anuꞌe nuꞌanuꞌeꞌmo haneꞌniye. Kukenakalegatiꞌmo alagepa atumo Lemanoni avefatiꞌmo neꞌaiya agufa alagepa atumo neꞌaiye.   
\p
\v 12 Nasaꞌnimoꞌmo maige aꞌnimo maige huno maiꞌniya aꞌnimoꞌa hoyaleꞌmo kegiꞌyamoꞌa faino ku aiꞌniya hoyagana huno maige keli kotupi aniꞌmo muki vayaꞌmogimo oꞌnesayafeꞌmo ka akani maleꞌniya keli kotupi anikana huno maige aniꞌmo kanage kanage huno haine neꞌeya aniteꞌmo loki ae maleꞌniya anikana huno maige huno maiꞌniye.  
\v 13-14 Kagae hoyafati yosamoꞌmo alagepa alagamo neꞌae. Haga atumo neꞌaiya yaꞌmo nehage. Magoꞌaletiꞌmo alagepa atumo neꞌaiya yaꞌmo alo huge haga neꞌyaꞌmo alo huge laꞌnefamo atafi kageno halinamo neꞌaigenoꞌaeꞌmo alagepa atumo neꞌaiya laꞌnefamo alo huge huꞌa alo nehae.   
\p
\v 15 Kagaemo kanage kanage huno haine neꞌeya aniꞌmoꞌa muki hoyafilagamo nelamiya anikana huka maige Lemanoni avefatiꞌmo emine neꞌeya anikana huka maige huka maiꞌnane.  
\v 16 Hoga haopalegatiꞌmo yasimo alinika eno. Lamaga haopalegatiꞌmo yasimo alinikeka hoyaꞌnifiꞌmo aligenoꞌao alagepa atumo neꞌaiya yaꞌmoꞌa muki haopalegamo ailino uneno hino. Nahau nayamopafiꞌmo neꞌnahaiya vekaꞌnimoꞌa hoyaꞌafatiꞌmo eno alagepa yosa alagamo lagino neno.   
\c 5  
\p
\v 1 Nasaꞌnimogamo aꞌnimogae, huno, Nagaemo hoyaꞌnilegamo ago eꞌna alagepa atumo neꞌaiya yaꞌmo agiꞌamo meyaꞌe mago alagepa atumo neꞌaiya yaꞌeꞌmo aliꞌna anupa huꞌnove. Nagaemo kevegevemo aliꞌna anoꞌaꞌe anuꞌaꞌeꞌmo neꞌnove. Nagaemo nuꞌanuꞌe nofi alagafati aniꞌeꞌmo aliꞌna neꞌnove. Nao vayaꞌnimogitapae, huno, alitapa neyo. Nahau nayamopafiꞌmo neꞌnahaiya vayaꞌnimogitapae, huno, He, aniꞌmo alita netapa lapamu hiyo.   
\p
\v 2 Haniꞌilagamo nau kaleꞌnovaꞌmonanafa nagupi mafaꞌnemoꞌa auꞌmo okaleno afaꞌa maiꞌniye. Nahau nayamopafiꞌmo neꞌnahaiya vekaꞌnimo agemo afiꞌnove. Kitaꞌnileꞌmo hakalu hakalu huteno, Nasaꞌnimogamo nahau nayamopafi aꞌnimogae, huno, Kitamo yakika nato. Haniꞌilagamo aniꞌmoꞌa emineno nagenopafiꞌmo aniꞌmo faleno nateꞌnigeno nayokapiꞌmo lao yaꞌmo emineno havai teꞌniye, huno naha paiꞌniye.  
\v 3 Nagaemo kukenaꞌnimo ago asagiꞌna ataleꞌnovanageꞌna halate haiya kava huꞌna aliꞌna vaiguve. Nagaemo naiyaꞌnimo ago sese hu maleꞌnovanageꞌna halate he tiꞌna uꞌneꞌna hisugeno naiyaꞌnileꞌmo oꞌaniꞌya faigiye, huꞌna ha paiꞌnove.  
\v 4 Nahau nayamopafiꞌmo neꞌnahaiya vekaꞌnimoꞌa kitamo alita neꞌyakuna yateꞌmo ayaꞌmo aliꞌnigeꞌna ageteꞌnaeꞌmo naipamoꞌmo he tiꞌniye.  
\v 5 Nagaemo kitamo yakiꞌna atesuvafeꞌmo he tiꞌna kitamo alita neꞌyakuna yaꞌaleꞌmo nayaꞌmo neꞌalugenoꞌaeꞌmo meya aniꞌmo alagepa atu neꞌaiya aniꞌmo nayate haneꞌniya aniꞌmoꞌa kita alita neꞌyakuna yaꞌaleꞌmo aeno kamaeꞌniye.  
\v 6 Nagaemo nahau nayamopafiꞌmo neꞌnahaiya vekaꞌnimo kita yakiꞌna ateꞌnovaꞌmonanafa ago utegeꞌna nagaemo oꞌageꞌnove. Nagaemo huꞌniya geꞌaeꞌmo nagesamo neꞌafugenoꞌaeꞌmo naipamoꞌmo alagi hosuꞌniye. Nagaemo agaefeꞌmo kahauya huꞌnovaꞌmonanafa oꞌageꞌnove. Nagaemo keya aeꞌna ge huꞌnovaꞌmonanafa agaemo geꞌnileꞌmo aeno atagaina huno ge osuꞌniye.  
\v 7 Umenitata nehuꞌa taonifiꞌmo neꞌyagaiya vayaꞌmogi nageteꞌapaeꞌmo namagiꞌa nagufamo aiꞌa atalagauꞌnae. Yafa lafi kegiꞌyaleꞌmo neꞌyagaiya vayaꞌmogi naugosafiꞌmo aiꞌna ati kaeꞌna neꞌaluva lavolavoꞌnimo aliꞌnae.  
\v 8 Yulusalemu aꞌmafaꞌne anagaꞌmogitapae, huno, Lapakaemo nahau nayamopafiꞌmo neꞌnahaiya vekaꞌnimo agetapaeꞌmo agaefeꞌmo nahau nayamopafiꞌmo nahauꞌniyaꞌmofeꞌmo lokiyaꞌnimo ohaneꞌniye, hutapa ha paiyo, huno hapa paiꞌniye.   
\p
\v 9 Alagepa kanale a kanomo maiꞌneka muki aꞌne anagaꞌmo ago aeka apakaseꞌnana a kanomogae, huꞌa, kahau kayamopafiꞌmo kahauꞌniya vekamo haiya kava huno maiꞌneno muki hapau apayamopafiꞌmo nehapaiya vayaꞌmo aeno apakaseꞌniye. Haiya kava huno maiꞌneno muki hapau apayamopafiꞌmo nehapaiya vayaꞌmo aeno apakaseno maiꞌniyaꞌmofeꞌmo lokiya gefatiꞌmo hiyo, huka laha paine, huꞌa ha paiꞌnae.   
\p
\v 10 Nahau nayamopafiꞌmo neꞌnahaiya vekaꞌnimo yaveyave augosamo hanege haesa augosamo hanege huno haneꞌniye. Agaemo asole tauseniꞌa vayaꞌmo ago aeno apakaseꞌniye.  
\v 11 Agenopamoꞌmo hogote goli yafakana huno leꞌnigeno ayokakuꞌmo kanale alopa ayokakuꞌmo mago anupa namamo ayokagana huno haneꞌniye.  
\v 12 Aulagamoꞌmo kaugoꞌyave nama anagaꞌmogi nuꞌmo anuletiꞌmo aniꞌmo faleꞌa uꞌa ani agiꞌnaleꞌmo he tiꞌa maiꞌnaya namagana huno haneꞌniye.  
\v 13 Agalametalegatiꞌmo alagepa atumo neꞌaiya yosamo aise yosamo hiꞌyalamuteꞌmo haneꞌniya yosagana huno hanege kahaumo ausemo aulafilega haneꞌniya kahaumo ausegana huno hanege huno haneꞌniye. Avayamo kanale kahaumo ausegana huno haneꞌnigeno avayafatiꞌmo alagepa atumo neꞌaiya aniꞌmo meya aniꞌmo lape tape huno asagauno neꞌaiye.  
\v 14 Ayatalaꞌmoꞌa goli linimo apayateꞌmo neꞌvaiya linigana huno haneꞌniye. Alopa moniletiꞌmo miya nefaiya yafaꞌmo aeno ha neleya yafaꞌmo apayateꞌmo neꞌvaiya linifiꞌmo neꞌmalaya linigana huno haneꞌniye. Agufamoꞌa elefeni afumo avekana huno haneꞌnigeno agufalegatiꞌmo yaveyaveꞌage huteno aeno ha leꞌniye.  
\v 15 Aiyaꞌalaꞌmo kanale yaveyave yafatetiꞌmo alo nehaya posilaꞌmo golilateꞌmo aeꞌa he tiꞌa ateꞌnageno haneꞌniya posigana huno haneꞌniye. Agaemo Lemanoni avegana huno maige alagepa sita yosagana huno maige huno maiꞌniye.  
\v 16 Avayafatiꞌmo haga huꞌniye. He, muki agufaꞌamo alagepa agufamo haneꞌniye. Yulusalemu aꞌmafaꞌne anagaꞌmogitapae, huꞌna, Agaemo nahau nayamopafiꞌmo neꞌnahaiya vekaꞌnimo maige nao vekaꞌnimo maige huno maiꞌniye, huꞌna lapa paiꞌnove, huno hapa paiꞌniye.   
\c 6  
\p
\v 1 Alagepa kanale a kanomo maiꞌneka muki aꞌne anagaꞌmo ago aeka apakaseꞌnana a kanomogae, huꞌa, Kahau kayamopafiꞌmo kahauꞌniya vekamo haiyategamo uno maiꞌniye. Lagaemo kagaeꞌeꞌmo magokepi lokaeta kahauya huta agesunafeꞌmo haiya kateꞌmo uꞌniye, huꞌa afi geꞌnae.  
\v 2 Nahau nayamopafiꞌmo neꞌnahaiya vekaꞌnimo hoyaꞌafiꞌmo uno maiꞌniye. Agaemo sipisipi anagaꞌamo hoyaꞌafatiꞌmo nesayafeꞌmo apavalelino uꞌniye. Agaemo kanale yaveyave kahau ausemo alino anupa huno malesiyafeꞌmo hoyaꞌafiꞌmo uno maiꞌniye.  
\v 3 Nahau nayamopafiꞌmo nahauꞌniya vekamo nagaiꞌni vekaꞌnimo maiꞌnigeꞌna agaiꞌa aꞌamo maiꞌnove. Agaemo sipisipi anagaꞌamo apavalelino uꞌnigeꞌa kanale yaveyave kahaumoꞌmo ausemo heꞌniya folagapatiꞌmo kahaumo neꞌnae, huno hapa paiꞌniye.   
\p
\v 4 Nahau nayamopafiꞌmo neꞌnahaiya aꞌnimogae, huno, vae, kanale taonimo Tilisi taonigana huka maiꞌnane. Kanale taonimo Yulusalemu taonigana huka maiꞌnane. Asole ati vayaꞌmogimo asole kalahauꞌmeꞌmo aliniꞌa neꞌvageꞌa apaketeꞌapaeꞌmo hapau neꞌaiya asole ati vayakana huka maiꞌnane.  
\v 5 Aulu nahaeka oꞌnago. Kaulagamoꞌmo ago aeno nagaseꞌnigeꞌna kagaefeꞌmo neꞌnahaiye. Kayokaꞌmoꞌa meme anagaꞌmogi Gileyati avelegatiꞌmo magokepi nelamiya meme anagaꞌai apayokakana huno haneꞌniye.  
\v 6 Muki kaveꞌakamoꞌmo yaveyave sipisipi anagaꞌmo hemenimo aniꞌmo faleꞌa apateꞌnagenoꞌaeꞌmo apayokaꞌmoꞌa yaveyaveꞌageꞌmo nehiya kava huno kaveꞌmoꞌa yaveyaveꞌageꞌmo nehiye. Mani muki sipisipi anagaꞌmogimo lagoꞌya apanaꞌaumo maleꞌnae. Mago anamo sipisipimo oꞌmaiꞌnae.  
\v 7 Kayokaꞌmoꞌa kagesa aepaleꞌmo aino ati kaeꞌniya kagesa aepamoꞌmo mago yosamo agiꞌamo pamagalanati yosa alagamo aino apalo atiꞌniya yosa alagagana huno haneꞌniye.   
\p
\v 8 Kini vekamo aꞌne anagaꞌmo asole aꞌne anagaꞌmo maiꞌnae. Sigisitiꞌa kuvini aꞌne anagaꞌmo maige henaga aꞌne anagaꞌamo eitiꞌamo maige lekana opaisuna agufa alu aꞌmafaꞌne anagaꞌmo aliꞌniya aꞌne anagaꞌamo maige huꞌa maiꞌnae.  
\v 9 Maiꞌnayaꞌmonanafa kaugoꞌyave namaꞌnimoꞌa aeno apakaseno haino hapaiꞌniye. Asole aꞌne anagaꞌmo maiꞌnayaꞌmonanafa aꞌnimo magokeꞌageꞌmo maiꞌniye. Itaꞌamoꞌmo magoke aꞌmafaꞌneꞌamo maiꞌniye. Alino ateꞌniya itaꞌamoꞌmo, hogote aꞌmafaꞌneꞌnimo maiꞌniye, huno agesamo afiꞌniye. Muki aꞌmafaꞌne anagaꞌmogi ageteꞌapaeꞌmo hao ke heꞌnae. Kuvini aꞌne anagaꞌmogiꞌe kini vekamo alu aꞌne anagaꞌamogiꞌeꞌmo agiꞌaleꞌmo aliꞌa asaga huꞌa ateꞌnae.   
\p
\v 10 Aulu neꞌnahaeya a kanomo ina laꞌae. Kaimoꞌa alagepa huno aeno ha lege yegemoꞌa alagepa huno aeno ha lege huno aeno ha neleya kava huno aulu neꞌnahae. Asole ati vayaꞌmogimo asole kalahauꞌmeꞌmo aliniꞌa neꞌvageꞌa apaketeꞌapaeꞌmo hapau neꞌaiya ati vayakana huno maiꞌniye, huno hapa paiꞌniye.   
\p
\v 11 Nagaemo kagoꞌmufilagatiꞌmo neꞌaeya yosa alagamo agesuvafeꞌmo lamiꞌna alagepa yosamoꞌmo alagamo neꞌaeya yosa hoyafiꞌmo maiꞌnove. Nofiꞌmo alagepa huno haneꞌnifi pamagalanati yosamoꞌa ause heꞌnifi huꞌna agesuvafeꞌmo lamiꞌnove.  
\v 12 Nagesamo oꞌafiꞌnogenoꞌaeꞌmo malage huno nagupi mafaꞌnemoꞌa alino he tino nateꞌnigeꞌna aliꞌna namalagiteꞌnaeꞌmo visuvafeꞌmo nehuve. Hapauꞌnisiya vayaꞌnilefeꞌmo hosimoꞌmo halaulino neꞌviya talalagana huno alino ha maleno nateꞌniye, huno huꞌniye.  
\v 13 Yulusalemu a kanomogae, huꞌa, Aika atagi neka eno. Kagaemo atagi neka egetao lagaemo kageno, huꞌa ha paiꞌnae.  
\p Yulusalemu a kanomo agesayana na agufa a kanomo agegae. Agaemo lole nofi ati vayakana huno maiꞌniya a kanomo agegae, huno hapa paiꞌniye.   
\c 7  
\p
\v 1 Kini vekamo aꞌmafaꞌneꞌamogae, huno, kagaemo kaiyaleꞌmo suꞌmo vaika aliꞌnana kaiyaꞌmoꞌmo magoꞌe huno kanale kaiyamo haneꞌniye. Kaumiꞌyamo aeno hapaiꞌniya yaꞌe kaleꞌyamo aeno hapaiꞌniya yaꞌeꞌmo alopa moniletiꞌmo miya nefaiya yafaꞌmo ani kava huno alagepa huno ageꞌniya vekamoꞌa alo huꞌniya yafakana huno haneꞌniye.  
\v 2 Kagae kaipamo folagapiꞌmo mago kapugana huno haneꞌniye. Ani kapufiꞌmo nofi alagafati aniꞌmo havai teꞌniye. Kaipamo alagepa kanale kaipamoꞌmo ani kava huno vitimo aliniꞌeꞌa magokepi aliꞌa anupa huꞌa maleꞌnaya vitimo yaveyave ausemo folagapiꞌmo haneꞌniya vitigana huno haneꞌniye.  
\v 3 Kagaemo lole nukalaꞌmoꞌa ani kava huno lole kanale afela afulaꞌmo lagoꞌya afela afulakana huno haneꞌniye.  
\v 4 Lugokamoꞌmo mago yatala vegovego noꞌmo yaveyave nokana huno haneꞌniye. Kaulagalaꞌmoꞌa lole ani kotutalaꞌmo Hesimoni taonimo yafa lafi kegiꞌya kate kipateꞌmo haneꞌniya ani kotutalakana huno haneꞌniye. Kagaemo kagoꞌyamo kanale kagoꞌyamo Lemanoni yahaofiꞌmo yatala nokana huno haneꞌniye. Kava neꞌyagaiya vayaꞌmogimo ani nopiꞌmo maiꞌneꞌa Namakasi taonifi maiꞌnaya vayaꞌaifeꞌmo aulu hapaeꞌa apakeꞌa yagaiꞌa neꞌmaiye.  
\v 5 Kagenopamoꞌmo Kameli avegana huno haneꞌniye. Kayokaꞌmo okokana agufa kayokaꞌmo haneꞌniye, huno ha paiꞌniye.  
\p Agaemo kini vekamo atafauꞌnigeno haiteꞌa emiꞌeteꞌa nehaya yateꞌmo maiꞌniye.  
\v 6 Nahau nayamopafiꞌmo neꞌnahaiya a kanomogae, huno, alagi kanale a kanomo maiꞌnane. Muki yaꞌakamoꞌmo namogaga aisuva agufa kavaꞌmo nehiye.  
\v 7 He tika maikaeꞌmo alagi alagepa huno api aino haneꞌniya kokanasi yosagana huka he tika maiꞌnane. Nukamoꞌmo ani agufa yosa alagagana huno haneꞌniye.  
\v 8 Nagaemo, Ani yosafiꞌmo haiꞌna yosa akopaleꞌmo atafauguve, huꞌna huꞌnove. Haiꞌna maisugeno nukamoꞌmo nofi alagamoꞌa magokepi akalo akalo huno nehaneya kava huno hanegaiye. Kavayafatiꞌmo apoli yosa alagamoꞌa kanale atumo neꞌaiya agufa atumo aigiye.  
\v 9 Kavayamo nofi alagafati aniꞌmo hogote anikana huno hanegaiye, huno ha paiꞌniye.  
\p Ani nofi alagafati aniꞌmo nahau nayamopafiꞌmo neꞌnahaiya vekaꞌnilefeꞌmo haneꞌniye. Ani aniꞌmoꞌa hagaꞌageꞌmo huꞌniye. Apaukalegekana huꞌa neꞌmaiya vayaꞌmogimo neꞌneꞌapaeꞌmo ge nehae.  
\v 10 Nagaemo nahau nayamopafiꞌmo neꞌnahaiya vekaꞌnimo aꞌamo maiꞌnogeno nagaefeꞌmo haꞌye nehiye, huno huꞌniye.   
\p
\v 11 Nahau nayamopafiꞌmo neꞌnahaiya vekaꞌnimogae, huno, nagaeꞌeꞌmo magokepi lokaeka egetaꞌao malaga uguꞌae. Utaꞌa alu aise taonifiꞌe alu aise taonifiꞌeꞌmo havaegauꞌae.  
\v 12 Havaetetaꞌaeꞌmo kotilamisiyapiꞌmo he titaꞌa nofi hoyalegamo utaꞌaeꞌmo nofiꞌmoꞌa ago ausisimo aeꞌnisifi auseꞌamo ago aino ata leꞌnisifi pamagalanati yosamoꞌa ago ause heꞌnisifigetaꞌa utaꞌa agegauꞌae. Maiꞌnetaꞌaeꞌmo nahau nayamopafiꞌmo neꞌnahaiya kavaꞌnimo aliꞌna kave liguve.  
\v 13 Alagepa kahaumo ausemoꞌa alagepa atumo neꞌaiye. Nagaemo alagepa yosa alagamo aliꞌna muki yafa lafi kegiꞌya kate kipaꞌaleꞌmo maleꞌnove. Magoꞌamo akeyaꞌvilaga alige magoꞌamo hemenimo alige huꞌna aliꞌna anupa huꞌna maleꞌnove. Nahau nayamopafiꞌmo neꞌnahaiya vekaꞌnimogae, huno, kagaetefeꞌmo aliꞌna anupa huꞌna maleꞌnove, huno ha paiꞌniye.   
\c 8  
\p
\v 1 Nasaꞌnimoꞌa itaꞌnimo nuꞌaleꞌmo neꞌniya nasaꞌnimogagana huka maisanafeꞌmo nahauꞌniye. Nasaꞌnimogamo maiꞌnanesinana kumatega kageteꞌnaeꞌmo kahaeꞌna neꞌnesugenoꞌaeꞌmo mago vekamoꞌa ani kavafeꞌmo hosu agesamo afaꞌa oꞌafiyesine.  
\v 2 Inagi nagaemo kagaemo kavaleliꞌna itaꞌnimo notegamo visugekaeꞌmo kagaemo alagepa huka afaꞌa alika naya malegane. Nagaemo nofi alagafati anipiꞌmo alagepa haga nehiya yaꞌmo aliꞌna ateteꞌna alo huꞌna kamiguve, huno ha paiꞌniye.   
\p
\v 3 Hoga ayatetiꞌmo nageyutega maleꞌneno lamaga ayatetiꞌmo nagufaleꞌmo natafauꞌniye.  
\v 4 Yulusalemu aꞌmafaꞌne anagane, huno, lokiya gefatiꞌmo huꞌnaeꞌmo, afela afu anagaꞌmogi koli hutaleꞌa apaune nehaya afuꞌaifeꞌmo lapakesamo afitetapa nahau nayamopafiꞌmo neꞌnahaiya a kanomo aupatiꞌmo haunetapa oꞌateyo. Agaiꞌamo hauꞌninageno aupatiꞌmo he tigiye, huno hapa paiꞌniye.   
\p
\v 5 Ina laꞌamoꞌmo yahaofilagatiꞌmo eno hau ayamopafiꞌmo hauꞌniya vekaꞌamo agufaleꞌmo atafautegeꞌana kako kiliꞌana haiꞌana neꞌaꞌae, huꞌa huꞌnae.  
\p Kagaemo apoli yosamo aepafiꞌmo havaeꞌnanageꞌna kahauneꞌna kateꞌnove. Itakamoꞌmo ani yosa aepafiꞌmo alino kateꞌniye. Alino kateꞌniya a kanomoꞌmo ani yosa aepafiꞌmo alino kateꞌniye, huno ha paiꞌniye.  
\v 6 Mago vekamoꞌa alagena kavaꞌamo hu neꞌmaleya kava huka nagaemo alika kaipafiꞌmo alagena kavaꞌmo hugekana huka hu malo. Ani kava huka nagaemo alika kayamoteꞌmo alagena kavaꞌmo hugekana huka hu malo. Ani kavatefeꞌmo nahau nayamopafiꞌmo nahauꞌniya kavaꞌmo lokiyaꞌamoꞌmo fali kavaꞌmo lokiyaꞌagana huno haneꞌniye. Nagaefeꞌmo hau ayamopafiꞌmo ohauꞌnifi, huꞌna nagesamo neꞌafuva kavaꞌmoꞌa nefaliya kavakana huno haneꞌniye. Nahau nayamopafiꞌmo neꞌnahaiya kavaꞌmo atagana huno nele. He, lusi kava huno nele.  
\v 7 Hau ayamopafiꞌmo nehaiya kavaꞌmoꞌa atagana huno neleyanageno aniꞌmoꞌa afaꞌa aeno yu osegaiye. Aniꞌmo hesiyaꞌmoꞌmo alagi aeno ati okaegaiye. Mago vekamoꞌmo a kanoeꞌmo, Nagaefeꞌmo kahau kayamopafiꞌmo kahausiyafeꞌmo muki moniꞌaniletiꞌmo miya faiguve, huno ha paisigenoꞌaeꞌmo, afaꞌa ina agufa yane, huno huteno hosu aipamo kaligiye, huno huꞌniye.   
\p
\v 8 Lasatimoꞌmo aise aꞌmafaꞌnemo maiꞌnigeno nuꞌamo oꞌmeꞌniye. Mago vekamoꞌmo aligefeꞌmo hisigetaeꞌmo agaetegamo na agufa kavaꞌmo hugune, huno apafi geꞌniye.   
\p
\v 9 Agaemo alagepa huno taonilefeꞌmo yafa lafi kegiꞌyagana huno maiꞌnisigetaeꞌmo lagaemo ani yafa lafi kegiꞌyaleꞌmo siluva yafatetiꞌmo yatala noꞌmo kime kime haigune. Agaemo kitagana huno maiꞌnisigetaeꞌmo lagaemo agaeteꞌmo lokiya sita yosaletiꞌmo noꞌamo kigune, huꞌa ha paiꞌnae.   
\p
\v 10 Nagaemo mago yafa lafi kegiꞌyagana huꞌna maiꞌnogeno nuꞌnimoꞌa lole yatala vegovego notalakana huno haneꞌniye. Ani afinaꞌmo fiku naha maeꞌnigeꞌnaeꞌmo aulagaleꞌmo alagepa huꞌna maiꞌnove, huno hapa paiꞌniye.   
\p
\v 11 Kini vekamo Salomoniꞌa nofi hoyaꞌamo Malihamoni kotega haneꞌniye. Agaemo hoyaꞌaleꞌmo yagaiꞌa atesayafeꞌmo apavaleno apateꞌniye. Apakaemo nofi alagamo alisayafeꞌmo muki vayaꞌamogimo vani tauseni vani tauseni huꞌa siluva yafatetiꞌmo miya faiꞌa amisaya kavaꞌmo haneꞌniye.   
\p
\v 12 Hoyaꞌnimo nagaiꞌni hoyamo naulagaleꞌmo haneꞌniye. O Salomonigae, huno, vani tauseni siluva yafaꞌmo alitesanageꞌa hoyaleꞌmo neꞌyagaiya vayaꞌmogi tu hataleti tu hataleti huꞌa aligae.   
\p
\v 13 Hoyafiꞌmo neꞌmaina aꞌnimogae, huno, kagaeꞌeꞌmo magokepi lokaeꞌa maiꞌnaya vayaꞌmogimo kagemo neꞌafiye. Kagemo aigeꞌna afino, huno ha paiꞌniye.   
\p
\v 14 Nahau nayamopafiꞌmo neꞌnahaiya vekaꞌnimogae, huno, malage huka emikeno. Mago alagepa afela afumoꞌa alagepa atumo neꞌaiya yaꞌmo havai teno haneꞌniya avelegamo nagu nagu huno haine neꞌeya kava huka emikeno, huno ha paiꞌniye.