\id JAS - Keyagana NT with OT portions [kyg] -Papua New Guinea 2001 (web 2014) 
\h Yemisi 
\toc1 YEMISI 
\toc2 Yemisi 
\toc3 Yem 
\mt1 YEMISI  
\ip Yemisiꞌa Yesu geꞌamo neꞌafiya vekamo tuolofuꞌa vayapati vekamo oꞌmaiꞌnifa hamoꞌamoꞌmo maiꞌniye. Mani avoꞌmo kaeꞌniya vekamo Yesu aganaꞌamoꞌmo maiꞌneno Yulusalemu taonifiꞌmo maiꞌnaya siosi vayaꞌaiteꞌmo yagaino neꞌapateya vayatama vekamo maiꞌniye. (Galesiya 1:19; 2:9). Agaemo tuolofuꞌa Yu nofi vayaꞌaifeꞌmo mani avoꞌmo kaeꞌniye. Agaemo apamalageka nehiya kavafeꞌmo avoꞌmo kaege Goti geꞌamo fiku oꞌafiꞌa afiteꞌa akame hisaya kavafeꞌmo avoꞌmo kaege aigofe apakesa afiꞌa fatago nehaya kavafeꞌmo avoꞌmo kaege apavayaleꞌmo yagaisaya kavafeꞌmo avoꞌmo kaege ma mopafi kavafeꞌmo avoꞌmo kaege kagemi yaꞌapimo haneꞌniya vayaꞌaifeꞌmo avoꞌmo kaege nunumu hisaya kavafeꞌmo avoꞌmo kaege huno mani avoꞌmo kaeꞌniye.  
\c 1  
\p
\v 1 Nagaemo Yemisiꞌnamo Gotiꞌe Ala kava neꞌmo Yesu Kalaisiꞌeꞌmo aliꞌyaꞌanileꞌmo maiꞌnove. Nagaemo tuolofuꞌa Yu nofi vayaꞌmo kotapimo ataletapa atagu faetapa uteta huꞌnaya vayaꞌmogitapaeꞌmo ge lapamamaeꞌna mani avoꞌmo nekaove.   
\s1 Oꞌataletapa Gotifekeꞌmo ge hutapa afi gegeno lapamino, huno hapa paiꞌniya gemae  
\p
\v 2 Konagaꞌnimogitapae, lapakaetegamo asole hanageke kavapiꞌmo asagautapa aiꞌnisaꞌmoꞌmo lapamalageka nehisigetapaeꞌmo alopa lamogaga aisuna agufa kavaꞌmo afole aiꞌniye, hutapa lapakesamo afiyo.  
\v 3 Ago afiꞌnayana hanageke kavaꞌmoꞌa lapakesa afita fatago nehaya kavatapileꞌmo lapamalageka nehisigetapaeꞌmo oꞌataletapa lokiya vaitapa maisayafeꞌmo ani kavaꞌmoꞌa lapaipafiꞌmo aliꞌyaꞌmo aligiye.  
\v 4 Lapaipafiꞌmo aliꞌyaꞌmo alisiya kavaꞌmo ka akanitapa oꞌategenoꞌao alagi oꞌataletapa lokiya vaitapa maisaya himamutapimo alagepa huno ko sino afu lesigetapa haita me otaletapa haitapa hapaigae.  
\v 5 Lapakaepatiꞌmo mago vekamoꞌa ageteno afiꞌniya kavaꞌamo magoꞌe huno oꞌaliꞌnisiyana Gotifeꞌmo ge huno afi genagenoꞌao Gotiꞌa ge ohaugiyanageno muki vayaꞌaina magoꞌe huno alino neꞌapamiya vekamoꞌa alino amino.  
\v 6 Amigiyaꞌmonanafa lole agesamo oꞌafiꞌneno alagepa huno agesa afino fatago huꞌnenoꞌaeꞌmo ge huno afi gegaiye. Lole agesamo neꞌafiya vekamo solovala aniteꞌmo yasimo neꞌaligenoꞌaeꞌmo aino holakau holakau hulino uneno nehiya agufa anikana huno maiꞌniye.  
\v 7-8 Agaemo magoke kavafeꞌmo agesamo oꞌafiꞌnifa lole agesamo neꞌafiya vekamo maiꞌniyaꞌmofeꞌmo Ala kava netegatiꞌmo mago yaꞌmo afaꞌa oꞌaligiye. Fiku yanageno alitegauve, huno agesamo afigiye.   
\p
\v 9 Apaki ohaneꞌniya konagatimogi apakiꞌapileꞌmo Gotiꞌa alino asaga huno apateꞌniya kavafeꞌmo apamogaga aiyo.  
\v 10 Kagemi yaꞌapiꞌe vayaꞌmogi apakiꞌapileꞌmo alino afepi apateꞌniya kavafeꞌmo apamogaga aiyo. Yosa ausemo heno hifaliteno hali hu nelamiya kava huꞌa faligae.  
\v 11 Yegemoꞌmo haineno neꞌagesigenoꞌaeꞌmo lusi kava huno amuko huꞌnigeno kahaumo leno falu netegenoꞌaeꞌmo auseꞌamo hali hu nelamigenoꞌaeꞌmo konali yaꞌamo alagi hano nehiye. Ani kava huꞌa kagemi yaꞌapiꞌe vayaꞌmo aliꞌyaꞌapimo neꞌalisaya folagapatiꞌmo ataleꞌa faligae.   
\p
\v 12 Hanageke kavaꞌmoꞌmo apamalageka nehisigeꞌapaeꞌmo oꞌataleꞌa atafauꞌa alagi huꞌa maiꞌnisaya vayaꞌmogi Goti aulagaleꞌmo alagepa huꞌa neꞌmaiyanageꞌa afaꞌa apamogaga aigae. Na kava hisigeꞌapaene. Apamalageka nehisigeꞌapaeꞌmo oꞌataleꞌa atafauꞌa alagi huꞌa maiꞌnisagenoꞌaeꞌmo Ala kava neꞌmoꞌa, nagaefeꞌmo hapauꞌniyaꞌmofeꞌmo alagepa huꞌa maige maige huꞌa maisaya yaꞌmo aliꞌna apamiguve, huno huꞌniya yaꞌmo aligae.  
\v 13 Apamalageka nehisiya vayaꞌmogimo, Gotiꞌa hosu kava hisunafeꞌmo layate neꞌaliye, huꞌa apakesamo oꞌafisaya kavaꞌmo haneꞌniye. Mago vekamoꞌmo Gotiꞌa hosu kavaꞌmo hisiyafeꞌmo ayate afaꞌa oꞌaligiye. Gotiꞌa vayaꞌmogi hosu kavaꞌmo hisayafeꞌmo apayate noꞌaliye.  
\v 14 Apakaiꞌapi apakufamoꞌmo hauꞌniya kavaꞌmoꞌa apayate alino heno apavayu hulino hosu kavategamo neꞌviye.  
\v 15 Aꞌnemogi apaipaguꞌeꞌmo maiteꞌa mafaꞌnemo aliꞌa neꞌapataya kava huno apakufamoꞌmo hauꞌniya kavaꞌmoꞌa aipaguꞌeꞌmo maiteno hosu kavaꞌmo alino neꞌate. Hosu kavaꞌmo alino ateꞌnigeno ko sino alopa heno maiꞌnenoꞌaeꞌmo nefaliya kavaꞌmo alino afole aino neꞌate.  
\v 16 Nahauꞌniya konagaꞌnimogitapae, humi lapatesayafeꞌmo hisaya gemo alagi oꞌafiyo.  
\v 17 Gotiꞌa muki alagepa yaꞌe haino hapaiꞌniya yaꞌeꞌmo fiku alino neꞌapamigenoꞌaeꞌmo kokuꞌnapatiꞌmo emineꞌniye. Muki kokuꞌnate haneꞌneno aeno ha neleya yaꞌmoꞌa alu kava alu kavaꞌmo huno aeno ha neleyaꞌmonanafa ani aeno ha neleya yaꞌmo Afoꞌamoꞌmo aeno noꞌatagaeya vekamoꞌa alu kava alu kavaꞌmo osuno magoke agufa kavaꞌmo huno fiku alino neꞌapamiye.  
\v 18 Agaemo hauꞌnigeno muki alo huno apateꞌniya vayaꞌmo aeta apakaseta maisunafeꞌmo lama geꞌaletiꞌmo alino lateꞌnigeta mafaꞌneꞌamo maiꞌnone.   
\s1 Goti geꞌamo fiku oꞌafita afitetapa akame hiyo, huno huꞌniya gemae  
\p
\v 19 Nahauꞌniya konagaꞌnimogitapae, geꞌaletiꞌmo alino lapateꞌniyaꞌmofeꞌmo mukiꞌamogitapamo geꞌamo afisayafeꞌmo lapayamukiki hutapa afiyo. Gemo hugefekeꞌmo vase vase hutapa ge hiyo. Lapaipamo legefeꞌmo nehisigetapaeꞌmo vase vase hutapa lapaipamo leno.  
\v 20 Na kava nehiyaꞌmofeꞌmae. Vayaꞌai apaipamo neleya kavaꞌmoꞌa Goti fatago kavaꞌamo alagi alino afole aino noꞌate.  
\v 21 Inagi muki hosu oꞌaniꞌya kavaꞌmo lapaipafiꞌmo havai teꞌniya kavaꞌmo alita ataletetapa Goti aiyafiꞌmo ape huta maiꞌnetapa lapaipafiꞌmo ago faiꞌniya geꞌamo aliyo. Ani gemokeꞌmo lapakufamo alino katino lapategaiye.  
\v 22 Goti geꞌamo fiku neꞌafisayana lapakaitapieꞌmo humi lapategayanagi fiku oꞌafitapa alagepa huta afitetapa akame hiyo.  
\v 23 Fiku afiteno alagepa huno akame nosiya vekamoꞌmo vayaꞌmogi laveꞌyofatiꞌmo apaugosamo neꞌagaya kava huno neꞌmaiye.  
\v 24 Laveꞌyofatiꞌmo augosamo ageteno ataleno neꞌunoꞌaeꞌmo, haiya agufa naugosaꞌe vekamo maiꞌnofi, huno agesamo noꞌafifa malage huno ago age nekaniye.  
\v 25 Age nekaniyaꞌmonanafa mago vekamoꞌa Goti keꞌaepa geꞌamoꞌmo haino hapaiꞌniya kanale geꞌaletiꞌmo hatu maeno neꞌapateya geꞌaleꞌmo aulu haeno ageꞌniya geeꞌmo age okanino agesa afifi nehuno akame nehisiyana kanale hugiye. Muki kavaꞌamo nehisigenoꞌaeꞌmo Gotiꞌa alagepa huno ha maegaiye.  
\v 26 Mago vekamoꞌa, mono vekamo maiꞌnove, huno agesamo afiꞌnenoꞌaeꞌmo avayaleꞌmo alagepa huno oꞌyagaino hosu gemo nehisiyana mono nehiya kavaꞌamo ina agufa kavaꞌmo haneꞌniyanageno alagi ha oꞌmaegaiye. Agaiꞌaeꞌmo humi neꞌate.  
\v 27 Gotiꞌa muki yaꞌmo afoꞌamo aulagaleꞌmo alagepa mono nehaya kavaꞌmo haneꞌniyana kogu aꞌnemogiꞌe megusa mafaꞌnemogiꞌeꞌmo kanamo neꞌaliya afinaꞌmo uꞌa hapa maege ma mopafi vayaꞌmogimo aliꞌa hosu huꞌa oꞌapatesayafeꞌmo apakaiꞌapileꞌmo alagepa huꞌa yagaiꞌa apatege huꞌa neꞌmaiya kavaꞌmo haneꞌniye.   
\c 2  
\s1 Muki vayaꞌaitegamo magoke agufa kavaꞌageꞌmo hiyo, huno huꞌniya gemae  
\p
\v 1 Konagaꞌnimogitapae, lapakaemo Ala kava netimo Yesu Kalaisiꞌa ha le konali agi vekaeꞌmo lapakesa afita fatago nehutapaeꞌmo ala apaki vayaꞌaitegaꞌe aise apaki vayaꞌaitegaꞌeꞌmo magoke agufa kavaꞌageꞌmo hiyo.  
\v 2 Lapakaemo mono nehisageꞌanaeꞌmo lole vekalaꞌmo mago kagemi yaꞌaꞌe vekamoꞌa ayateꞌmo aenimo vaino aliteno kanale kukenamo vailiꞌniya vekaꞌe kagemi yaꞌamo oꞌmaleꞌniya vekamoꞌa hosu kukenamo vailiꞌniya vekaꞌeꞌmo eꞌana hai eꞌana magokepi maisaꞌagetapaeꞌmo na agufa kavaꞌmo anakaetegamo hugae.  
\v 3-4 Kagemi yaꞌaꞌe vekaeꞌmo hao ke nehetapaeꞌmo, alagepa siateꞌmo haikeka fai maiyo, hutapa ha paitetapaeꞌmo kagemi yaꞌamo ohaneꞌniya vekaeꞌmo, afaꞌa maiyo, hutapa ha paisafi, haikeka mopafiꞌmo laiyafi itopale maiyo, hutapa ha nepaisafi hosu lapakesamo afiꞌnetapa alita fako hutapa neꞌanatae.  
\v 5 Neꞌnahaiya konagaꞌnimogitapamo afiyo, Gotiꞌa kagemi yaꞌapimo ohaneꞌniya vayaꞌmo apakesa afiꞌa fatago nehaya kavaꞌmoꞌa kagemi yaꞌapikana huno hanesigeꞌa neꞌyagaiya koꞌmo alisayafeꞌmo lekana paino apateꞌniye. Gotiꞌa agaefeꞌmo hapau apayamopafiꞌmo hapauꞌnisiya vayaꞌaifeꞌmo, mafaꞌnemogi afoꞌapimo yaꞌmo neꞌaliya kava hutapa ani neꞌyagauva koꞌmo aligae, huno hapa paiꞌniyaꞌmofeꞌmae.  
\v 6 Maigayaꞌmonanafa kagemi yaꞌapimo ohaneꞌniya vayaꞌaina alita afepi apateꞌnae. Kagemi yaꞌapiꞌe vayaꞌmogi kana yaꞌmo aliꞌa lapamige agoti huꞌa lapatege nosafiye. Haꞌao, agoti huꞌa nelapatae.  
\v 7 Apakaemo lapakaefeꞌmo alagepa agi neꞌaya agiꞌalefeꞌmo huꞌa faipa huꞌa neꞌatae.  
\v 8 Lapakaemo yagaino neꞌapateya kini vekatapimo keꞌaepa geꞌamo Goti mukufiꞌmo haneꞌniya keꞌaepa geꞌamo akame nehisayana alagepa kavaꞌmo nehae. Ani gemoꞌa hunoꞌaeꞌmo, \it lapakaitapieꞌmo lapau lapayamopafiꞌmo lapauꞌniya kava hutapa lapaopaleꞌmo neꞌmaiya vayaꞌaifeꞌmo lapau lapayamopafiꞌmo lapaino,\it* huno huꞌniye.  
\v 9 Mani gemo akame nehisayana alagepa kavaꞌmo nehayaꞌmonanafa alu vaya alu vayaꞌaitegamo magoke agufa kavaꞌmo nosisayana hosu kavaꞌmo nehae. Ani agufa hosu kavaꞌmo nehisagenoꞌaeꞌmo keꞌaepa gemoꞌa hunoꞌaeꞌmo, keꞌaepa geꞌamo aetapa atale neꞌvaiya vayaꞌmo maiꞌnae, huno nehiye.  
\v 10 Na kava nehayaꞌmofeꞌmae. Muki keꞌaepa geꞌamo akame nehuꞌapaeꞌmo magoke keꞌaepa gemo amagiꞌa neꞌatalesayana muki keꞌaepa geꞌamo ago amagiꞌa neꞌatalayanageꞌa vaiꞌmo aligae.  
\v 11 Na kava higeꞌapaene. \it Kumai kavaꞌmo osiyo,\it* huno huꞌniya vekamoꞌa magoꞌe gemo hunoꞌaeꞌmo, \it vayaꞌmo ohapaeyo,\it* huno huꞌniye. Kumai kavaꞌmo osutapa vayaꞌmo hapaeꞌnisayana Goti keꞌaepa geꞌamo ago amagitapa ataleꞌnae.  
\v 12 Gotiꞌa ago hatu maeno lapateꞌniya keꞌaepa geꞌaletiꞌmo alino fako huno lapategaiyaꞌmofeꞌmo alagepa gemo huge alagepa kavaꞌmo huge hutapa maiyo.  
\v 13 Gotiꞌa agoti huno apatesiya afinaꞌmo mago vayaꞌaifeꞌmo hapau huꞌa noꞌapatesaya vayaꞌaifeꞌmo hau huno oꞌapategaiyaꞌmonanafa hapau huꞌa neꞌapataya vayaꞌaifeꞌmo Gotiꞌa hau huno apatesiya kavatetiꞌmo agoti huꞌa aeꞌa agasegae.   
\s1 Aigofe apakesa afiꞌa fatago nehaya kavafeꞌmo huꞌniya gemae  
\p
\v 14 Konagaꞌnimogitapae, Mago vekamoꞌa, nagesa afiꞌna fatago nehuve, huno nehiyaꞌmonanafa alagepa kavaꞌmo nosisiyana agesa afino fatago huꞌniya kavaꞌamo ina agufa kavane. Ani agufa agesa afino fatago huꞌniya kavaꞌamoꞌa afaꞌa ha maegaifiye. Haꞌao afaꞌa ha oꞌmaegaiye.  
\v 15 Mago konagatapimoꞌmofi lapasatapimoꞌmofi huno kukenaꞌaꞌe neꞌyaꞌaꞌeꞌmo ohaneꞌnisigetapaeꞌmo,  
\v 16 kukenakaꞌe neꞌyakaꞌeꞌmo aligananagi uvo, hutapa ha paitetapaeꞌmo alagepa huno maisiya yaꞌmo oꞌamiꞌnetapa geꞌageꞌmo nehisayana ina agufa gemo haneꞌniyanageno afaꞌa ha oꞌmaegaiye.  
\v 17 Ani kava huno mago vekamoꞌa agesa afino fatago nehiyaꞌmonanafa alagepa kavaꞌmo nosisiyana agesa afino fatago huꞌniya kavaꞌamo agaiꞌageꞌmo haneꞌneno faligekana huno nehane.  
\v 18 Haneꞌniyaꞌmonanafa mago vekamoꞌa, kagaemo kagesa afika fatago nehananageꞌna nagaemo alagepa kavaꞌmo nehuve. Alagepa kavaꞌmo nosisanana kagesa afika fatago nehana kavakamo alika nave liyo. Nagaemo alagepa kavaꞌniletiꞌmo nagesa afiꞌna fatago nehuva kavaꞌnimo aliꞌna kave liguve, huno hugiye.  
\v 19 Kagaemo Gotifeꞌmo magoke vekamo maiꞌniye, huka kagesa afika fatago nehanana kanalene. Nehanaꞌmonanafa hosu apaune vayaꞌmogiꞌeꞌmo Gotiꞌa maiꞌniye, huꞌa apakesa afiꞌa fatago nehuꞌapaeꞌmo atete nehae.  
\v 20 Negi vekae, kagesa afika fatago nehanaꞌmonanafa alagepa kavaꞌmo nosanaꞌmofeꞌmo kagesa afika fatago nehana kavakamo faligekana huno haneꞌniye, huꞌna aliꞌna kave lisufiye.   
\p
\v 21 Laginago vekamo Emalehamuꞌa mafaꞌneꞌamo Aisikiꞌa Gotiꞌmo ofalinimo amisiyafeꞌmo yafa hiꞌyalamuteꞌmo alino havaeno ateꞌniya alagepa kavaꞌaletiꞌmo vayaꞌai apaulagaleꞌmo fatago vekamo maiꞌnifiye.  
\v 22 Lapakaemo ago afiꞌnayana agesa afino fatago huꞌniya kavaꞌamoꞌe alagepa kava huꞌniya kavaꞌamoꞌeꞌmo magokepi lokaeꞌana aliꞌyaꞌmo aliꞌnaꞌageno alagepa kavaꞌaletiꞌmo agesa afino fatago huꞌniya kavaꞌamoꞌa ko sino afu leꞌniye.  
\v 23 Emalehamuꞌa huꞌniya kavafeꞌmo Goti mukufiꞌmo avo kae maleꞌniya gemo ago ha le yategamo alagi afole aiꞌniye. Ani gemoꞌa hunoꞌaeꞌmo, \it Emalehamuꞌa Gotifekeꞌmo agesa afino fatago huꞌnigenoꞌaeꞌmo, naulagaleꞌmo fatago vekamo maiꞌnane, huno ha paiꞌniye.\it* Vayaꞌmogi, Emalehamuꞌa Goti ao vekamo maiꞌniye, huꞌa huꞌnae.  
\v 24 Lapakaemo ago ageꞌnayana alagepa kavaꞌmo nehaya vayaꞌaifeꞌmo fatago vayaꞌmo maiꞌnae, hutapa apakeꞌnayaꞌmonanafa apakesa afiꞌa fatago hu kavaꞌagekeꞌmo nehaya vayaꞌmo fatago vayaꞌmo maiꞌnae, huꞌa nosae.   
\p
\v 25 Kumai kavaꞌmo nehiya a kanomo Lehepiꞌa kame vayaꞌai apamasa hisaꞌafeꞌmo eꞌnaꞌa vekalaꞌmo noꞌafiꞌmo uꞌana havaesaꞌafeꞌmo havaesaꞌa yaꞌmo alino alagepa huno anateꞌnigeꞌana havaetaꞌagenoꞌaeꞌmo visaꞌa kaꞌmo alino ho huno anateteno anave liꞌniye. Ani kavaꞌmo huno Gotiꞌa ani a kanomoꞌa huꞌniya alagepa kavaꞌaletifeꞌmo, naulagaleꞌmo fatago a kanomo maiꞌnane, huno ha paiꞌniye.  
\v 26 Mago vekamo agufafiꞌmo aunemeꞌamo ohaneꞌnisiyana ago faliꞌniye. Ani kava huno mago vekamoꞌa agesaꞌageꞌmo afino fatago huteno alagepa kavaꞌmo nosisiyana agesa afino fatago huꞌniya kavaꞌamo faligekana huno nehane.   
\c 3  
\s1 Apavayaleꞌmo alagepa huꞌa yagaisaya kavafeꞌmo huꞌniya gemae  
\p
\v 1 Konagaꞌnimogitapae, fiku yanagetapa mukiꞌamogitapamo, lagaemo yagaita apatesuna tisa vayaꞌmo maigesune, hutapa hugae. Na kava hinagetapaene. Gotiꞌa tisa vayaꞌmogitamo lusi kava huno agoti huno lategaiyaꞌmofeꞌmae.  
\v 2 Mukiꞌamogitamo muki kavaꞌalefeꞌmo haita me netalone. Mago vekamoꞌa avayaletiꞌmo alagepa geꞌagekeꞌmo nehisiyana hosu kavaꞌamo alagi ohaneꞌniye. Ani agufa gemo nehisiya vekamoꞌa haino hapaiꞌniya vekamo maiꞌneno muki agufaꞌaleꞌmo alagepa huno afaꞌa yagaigiye.  
\v 3 Lagaemo hosimoꞌa getimo afiteno lakame hisiyafeꞌmo aeniletiꞌmo avayafiꞌmo nofi aeta ateꞌneta kaꞌmo alita ho huta neꞌateta avalelita neꞌune.  
\v 4 Lapakaemo sipiꞌefeꞌmo lapakesamo afiyo. Sipimo alopa yakefamo haneꞌniyaꞌmonanafa sipileꞌmo neꞌaliya vekamoꞌa lusi yasimo neꞌalino alino agoꞌya failino neꞌviya sipimoꞌmo aise agoꞌya kayoꞌmo haneꞌnigeno alagepa huno yagaiꞌneno alino ho huno neꞌategeno neꞌviye.  
\v 5 Ani kava huno apavayamo apakufafi aise yaꞌatomo haneꞌniyaꞌmonanafa magoꞌe huꞌna lusi gemo huguve, huno huteno himuꞌnamu gemo nehiye. Ani kava huno aise atamoꞌa lusi kahaufiꞌmo lelinuneno huno leno hano huno neꞌataleya kavafeꞌmo lapakesamo afiyo.  
\v 6 Apavayamo atagana huno haneꞌneno alu hosu ge alu hosu gemo nehiye. Lavayamo lagufafiꞌmo aise yaꞌatomo haneꞌniyaꞌmonanafa muki lagufaꞌamo alagi alino hosu huno nelate. Lavayamoꞌa ata kotegatiꞌmo atamo aelineno muki vayaꞌamogita lahaopaleꞌmo kae neꞌmale.  
\v 7 Vayaꞌmogimo muki aunemeꞌe yaꞌmo namagi nagaloꞌyavegi noyamemogi huꞌa afaꞌa aliꞌa yuna heꞌa apateteꞌa yagaiꞌa neꞌapatayanageꞌa afaꞌa yagaiꞌa apategae.  
\v 8 Aliꞌa yuna nehayaꞌmonanafa ani kava huꞌa apavayaleꞌmo afaꞌa yagaiꞌa oꞌategae. Lavayamoꞌa alagi gemo noꞌafiya yaꞌmo haneꞌneno vayaꞌmo neteꞌa nefaliya analisa yakana huno lavayafiꞌmo havai teno haneꞌniye.  
\v 9 Lavayafatiꞌmo Afotimo Goti agiꞌaleꞌmo alita asaga huta ateꞌneta Gotiꞌa agaiꞌagana huno alo huno apateꞌniya vayaꞌaifeꞌmo huta faipa huta neꞌapatone.  
\v 10 Konagaꞌnimogitapae, magoke lavayafatiꞌmo alagepa gemo huge hosu gemo huge nehuna gemoꞌmo kanale gemo nosune.  
\v 11 Ne aniꞌe oꞌne aniꞌeꞌmo meti aniꞌmo aeno latino haineno nelamiya aniꞌmo magoke kapatiꞌmo haineno nolamiye.  
\v 12 Konagaꞌnimogitapae, fiki yosamoꞌa alifi alagamo afaꞌa aegaifiye. Nofimoꞌa fiki alagamo afaꞌa aegaifiye. Haꞌao. Ani kava huno solovala anipatiꞌmo haga aniꞌmo afaꞌa alino ohamalegaiye.   
\s1 Alagepa huꞌa ageteꞌa afiꞌnaya kavaꞌmo Gotitegatiꞌmo neꞌe, huno huꞌniya gemae  
\p
\v 13 Lapakaepatiꞌmo ina laꞌmo afiteno ageꞌniya neꞌmoꞌa alagepa huno neꞌafiye. Agaemo alagepa kavaꞌaletiꞌmo agiꞌaleꞌmo alino afepi neꞌateno yagu yaga kavaꞌmo nehuno alagepa huno afiteno ageꞌniya kavaꞌmo nehuno alino apave lino.  
\v 14 Huno hugiyaꞌmonanafa hosu lapaipa kafa hapaege hosu lapaipa kalitapa apatege ala lapaki alisayafeꞌmo lapauge hutapa neꞌmaisayana alagepa vayaꞌmo maiꞌnone, huta nehutapa lama geꞌamo aetapa ati okaeyo.  
\v 15 Ani agufa ageteꞌa afiꞌnaya kavaꞌapimo kokuꞌnapatiꞌmo emi noꞌmeꞌnifa ma mopafi vayaꞌai kavaꞌapimo apakufamoꞌmo hauꞌniya kavaꞌmo Satanitegatiꞌmo afole neꞌaiye.  
\v 16 Mono vayaꞌmogi apaipa kafa hapaege ala apaki alisaya kavafeꞌmo hapauge huꞌa maiꞌnisayana siosi vayaꞌmogimo alagepa huꞌa oꞌmaiꞌa muki alu hosu kava alu hosu kavaꞌmo hugae.  
\v 17 Hugayaꞌmonanafa siosi vayaꞌmogi alagepa huꞌa ageteꞌa afiꞌnaya kavaꞌmo kokuꞌnapatiꞌmo aliꞌnisayana hogoteꞌa yaveyave apaipamo aliteꞌa alagepa huꞌa magokepi lokaeꞌa maiꞌneꞌa yagu yaga kavaꞌmo huꞌa maiꞌneꞌa vayaꞌai geꞌapimo afiꞌneꞌa hapau huꞌa neꞌapateꞌa alu alagepa kava alu alagepa kavaꞌmo nehae. Apakaemo muki vayaꞌaitegamo magoke agufa kavaꞌmo nehuꞌa aeꞌa ati okaeꞌa ha le yategamo neꞌmaiye.  
\v 18 Aliꞌa nanu aeꞌa neꞌapataya vayaꞌmogimo magoke apaipa aliꞌa neꞌmaiya afinaꞌmo vase vase huꞌa avina yaꞌmo nehakalagenoꞌaeꞌmo fatago kavaꞌmoꞌa alaga aegekana huno afole neꞌaiye.   
\c 4  
\s1 Ma mopafi kavafeꞌmo nehapaiya vayaꞌmo Goti kameꞌamo maiꞌnae, huno huꞌniya gemae  
\p
\v 1 Kame huge kaveta huge nehaya kavaꞌmo aepaꞌaeꞌmo lapa paigesuve. Lapakufamoꞌmo hauꞌniya kavatapimoꞌa lapakufafiꞌmo kame nehigenoꞌaeꞌmo kaveta nehaya kavaꞌe kame hutapa neꞌapataya kavaꞌeꞌmo alino afole aino neꞌate.  
\v 2 Lapakaemo alu ya alu yaꞌmo alisayafeꞌmo lusi kava huno lapauꞌniyaꞌmonanafa noꞌaliyaꞌmofeꞌmo vayaꞌmo nehapae. Alu vayaꞌai yafeꞌmo lapaꞌye nehiyaꞌmonanafa alisaya kaꞌmo alagi ohaneꞌniyaꞌmofeꞌmo ani vayaꞌaina kaveta hapaege kame hutapa apatege nehae.  
\v 3 Gotifeꞌmo nunumu hutapa afi nekayaꞌmonanafa noꞌaliye. Lapakufamoꞌmo hauꞌniya kavaꞌmo hisayafeꞌmo hosu ge hutapa afi nekayaꞌmofeꞌmo noꞌaliye.  
\v 4 Ve aꞌnemogitapamo kumai kavaꞌmo nehaya vayaꞌmogitapae, ma mopafi kavafeꞌmo lapauꞌniya vayaꞌmogitapamo Gotiꞌmo ataletuta alu veleꞌmo maiꞌnetapaeꞌmo kumai kavaꞌmo hugekana hutapa maiꞌnae. Ma mopafi kavafeꞌmo nehapaiya vayaꞌmo Goti kameꞌamo maiꞌnae, hutapa oꞌafiꞌnafiye. Ma mopafi kavaꞌmo ao vayaꞌamogimo Gotifeꞌmo kame huꞌa neꞌatae.  
\v 5 Goti mukufiꞌmo haneꞌniya gemoꞌa hunoꞌaeꞌmo, lapakaepiꞌmo neꞌmaiya lapaunelapameꞌmoꞌa hosu kavafeꞌmo nehaigenoꞌaeꞌmo haꞌye nehiye, huno huꞌniya gemo afa gemo haneꞌniye, hutapa lapakesamo neꞌafifiye.  
\v 6 Haꞌye nehiyaꞌmonanafa Gotiꞌa fiku laha maeno magoꞌe huno nelamiye. Ani kavatefeꞌmo hunoꞌaeꞌmo,  
\q1 Gotiꞌa ala vayaꞌmo maiꞌnone, huꞌa apakesamo neꞌafiya vayaꞌaifeꞌmo kame huno neꞌapateyaꞌmonanafa ina agufa vayaꞌmo maiꞌnone, huꞌa apakesamo neꞌafiya vayaꞌaina fiku hapa maeno neꞌapamiye,  
\m huno huꞌniye.   
\p
\v 7 Neꞌapamiyaꞌmofeꞌmo Goti aiyafiꞌmo maiyo. Satanifeꞌmo kame hutapa ategenoꞌao lapakaetegatiꞌmo ataleno aune heno.  
\v 8 Goti haopaleꞌmo vigenoꞌao lapakae lapaopaleꞌmo eno. Hosu kavaꞌmo nehaya vayaꞌmogitapae, huꞌna, lapayaꞌmo sese hiyo. Lole lapakesamo neꞌafiya vayanagi lapaipafatiꞌmo oꞌaniꞌyamo aeta kalo paetapa ataleyo.  
\v 9 Lapaipamoꞌmo lusi kava huno kana nehinagetapa yulagefa aitapa aviꞌya hiyo. Kigi nehaya kavatapimo ataletapa yulagefa aiyo. Lapamogaga neꞌaiya kavatapimo ataletapa lapaipamoꞌmo kana hino.  
\v 10 Ala kava neꞌmo aulagaleꞌmo lapakufamo alita afepi ategenoꞌao alino asaga huno lapateno.   
\s1 Konagatapimo alita fako hutapa oꞌapateyo, huno huꞌniya gemae  
\p
\v 11 Konagatapimogifeꞌmo hutapa faipa hutapa oꞌapateyo. Mago vekamoꞌa konagaꞌamofeꞌmo huno faipa huno ateteno alino fako huno neꞌatesiyana Goti keꞌaepa geꞌaeꞌmo huno faipa huno ateteno alino fako huno neꞌate. Lapakaemo keꞌaepa geꞌamo alita fako hutapa neꞌatesayana keꞌaepa geꞌamo akame osutapa keꞌaepa geꞌamo alita fako hutapa neꞌatae.  
\v 12 Keꞌaepa geꞌamo alino apamiꞌniya Gotiꞌa magoke vekamo maiꞌniye. Agaemo apakufamo afaꞌa alino katino apatege alino apagoꞌya lagauno apatalege nehiye. Lapakaemo alita fako hutapa apategefeꞌmo nehisayana lapakaemo ina lagitapamo maiꞌnae.   
\s1 Afaꞌa hugune, hutapa himuꞌnamu agufa gemo osiyo, huno huꞌniya gemae  
\p
\v 13 Mago vayaꞌamogitapamo, hemenimofi egamofi huta uta taonifiꞌmo mago kafuga maita aliꞌyaꞌmo aliteta monimo aligune, hutapa nehae.  
\v 14 Nehayaꞌmonanafa egamo na kavaꞌmo afole aigifi hutapa oꞌafiꞌnae. Lapakaemo na agufa yakana hutapa maiꞌnae. Lapakaemo netepiꞌmo yosaleꞌmo aise hiyaꞌmo kiꞌnigeno yegemo haineno nelegenoꞌaeꞌmo alino hano hulino neꞌviya hiyakana hutapa maiꞌnae.  
\v 15 Lapakaemo, afaꞌa hugune, hutapa hosu gemo nehayaꞌmonanafa Gotiꞌa hauꞌniyanageta mani kavaꞌmofi ina kavaꞌmofi huta afaꞌa hugune, hutapa hugae.  
\v 16 Hisaya gemo haneꞌniyaꞌmonanafa hemenimo lapakaemo, afaꞌa hugune, huta hutetapa lapakitapileꞌmo alita asaga hutetapa himuꞌnamu gemo nehae. Ani agufa himuꞌnamu gemo nehaya gemo hosu gemo nehae.  
\v 17 Alagepa kavaꞌmo hisaya kavaꞌmo haneꞌnigeꞌa neꞌagayaꞌmonanafa nosisayana hosu kavaꞌmo nehae.   
\c 5  
\s1 Asole kagemi yaꞌapimo haneꞌniya vayaꞌaifeꞌmo huꞌniya gemae  
\p
\v 1 Asole kagemi yatapimo haneꞌniya vayaꞌmogitapae, lapakufaleꞌmo afole aisiya hanageke yafeꞌmo lapakesamo neꞌafitapa ai ai aetapa aviꞌya hiyo.  
\v 2 Kagemi yatapimo kasalige kukenatapimo kafamoꞌmo hatagauge monitapileꞌmo oꞌaniꞌya faige huno haneꞌniye.  
\v 3 Monitapileꞌmo oꞌaniꞌya faiꞌniya yaꞌmoꞌa agoti huno lapateteno atagana huno leno lapasaga ligiye. Lapakaemo henaga afinafeꞌmo magoꞌe kagemi yatapimo alita anupa hutapa malege malege hutapa neꞌmaiye.  
\v 4 Aliꞌyatapimo neꞌaliya vayaꞌmogi hoyatapifiꞌmo aliꞌyaꞌmo neꞌaliya vayaꞌaifeꞌmo humi neꞌapatetapa hosu miyaꞌmo neꞌapamiye. Oꞌapamiꞌnaya monimoꞌmo hosu kavatapieꞌmo keya aeno ge hugekana huno haneꞌniye. Aliꞌyatapimo neꞌaliya vayaꞌmogi keya aeꞌa ge nehagenoꞌaeꞌmo Ala kava neꞌmoꞌa muki kokuꞌnapi neꞌmaiya vayaꞌaiteꞌmo yagaino neꞌapateya vekamoꞌa ani keya aeꞌa ge nehaya gemo neꞌafiye.  
\v 5 Lapakaemo muki ma mopafi kagemi yatapimo agetapa alita malege lapakufamoꞌmo hauꞌniya kavaꞌmo huge hutapa maiꞌnae. Muki afinaꞌmo afumo heꞌa lusi yagita nehaya kavakana hutapa maiꞌnetapa apaipaguꞌe vayakana hutapa maiꞌnae.  
\v 6 Lapakaemo fatago vayaꞌaina agoti hutapa apatetetapaeꞌmo kamiti apamagiꞌnae. Afaꞌamo maiꞌneꞌapaeꞌmo lapakaetegamo mago kavaꞌmo osuꞌnayaꞌmonanafa fiku apamagiꞌnae.   
\s1 Goti mafaꞌneꞌaifeꞌmo, oꞌataleta atafauta alagi huꞌnetapa agava maiyo, huno huꞌniya gemae  
\p
\v 7 Konagaꞌnimogitapae, kagemi yaꞌapiꞌe vayaꞌmogimo ani kavaꞌmo nehayaꞌmofeꞌmo oꞌataleta atafauta alagi huꞌnetapa agava maime maime neꞌvigenoꞌao Ala kava neꞌmo emineno. Hoyamo aliꞌa neꞌvaiya vayaꞌmogimo avina yaꞌmo nehakalaya afinaꞌe neꞌyaꞌmo hagesigeꞌa alisaya afinaꞌefeꞌmo oꞌataleꞌa atafauꞌa alagi huꞌa maiꞌneꞌapaeꞌmo agava neꞌmaiye.  
\v 8 Ani kava hutapa atafauta alagi huꞌnetapaeꞌmo oꞌataleta agava maiyo. Ala kava neꞌmo aise afinaꞌmo emiꞌnegaiyanagi lapaipamo alita lokiya vaitapa lapateyo.  
\v 9 Konagaꞌnimogitapae, huꞌna, konagatapieꞌmo ge ohapaiyo fiku yanageno Gotiꞌa hosu gemo nehae, huno hugiyanagi. Afiyo, huꞌna, alino fako huno apatesiya vekamo kipateꞌmo he tino neꞌmaiye.  
\v 10 Konagaꞌnimogitapae, ema akeyaꞌvilaga vayaꞌmogi Gotitegati gemo alini eꞌa aeꞌa hakalo huꞌa hapa nepaiya vayaꞌai kavafeꞌmo lapakesamo neꞌafitapa apaiyakamo aliyo. Apakaemo Ala kava neꞌmo agiꞌalefeꞌmo geꞌamo hapa nepaiꞌapaeꞌmo kanamo aliꞌneꞌapaeꞌmo oꞌataleꞌa atafauꞌa alagi huꞌa maiꞌnae.  
\v 11 Lagaemo, oꞌataleꞌa atafauꞌa alagi huꞌa maiꞌnaya vayaꞌaifeꞌmo Gotiꞌa, naulagaleꞌmo alagepa huꞌa maiꞌnaya vayane, huno nehiye, huta nehune. Lapakaemo ago afiꞌnayana akeyaꞌvilaga vekamo Yopuꞌa kanamo aliꞌnenoꞌaeꞌmo oꞌataleno atafauno alagi huno maime maime neꞌegenoꞌaeꞌmo Ala kava neꞌmoꞌa ha maeꞌniya kavafeꞌmo ava gemo ago afiꞌnae. He, Ala kava neꞌmoꞌa lusi kava huno hau huno neꞌapateno hau ayamopafiꞌmo nehaiya vekamo maiꞌniye, hutapa ago afiꞌnae.   
\p
\v 12 Konagaꞌnimogitapae, hogote kavaꞌmo ina kavaꞌmo huno haneꞌniyanagi getapimo alita lokiya vaitapa atesayafeꞌmo hutapaeꞌmo kokuꞌnategaeꞌmofi ma mopalefeꞌmofi alu yatetiꞌefeꞌmofi hutapa alagi lama gemo nehuve, hutapa osiyo. Fiku yanageno Gotiꞌa agoti huno lapategaiyaꞌmofeꞌmo he, nehutapaeꞌmo heꞌageꞌmo hiyo. Haꞌao, nehutapaeꞌmo haꞌaoꞌageꞌmo hiyo.   
\s1 Siosi vayaꞌmogi hisaya kavafeꞌmo huꞌniya gemae  
\p
\v 13 Lapakaepatiꞌmo mago vekamoꞌa kanamo neꞌalisiyana nunumu hino. Lapakaepatiꞌmo mago vekamoꞌa amogaga neꞌaisiyana samu mono yokemo hino.  
\v 14 Lapakaepatiꞌmo mago vekamo kaita nehaisiyana siosi vayaꞌaiteꞌmo yagaiꞌa neꞌapataya vayatama vayaꞌaifeꞌmo ge hino. Ge hisageꞌa eꞌa Ala kava neꞌmo agiꞌaletiꞌmo uvelimo agenopaleꞌmo faleꞌa ateteꞌa nunumu huꞌa ategae.  
\v 15 Apakaemo Gotifeꞌmo apakesa afiꞌa fatago nehuꞌa nunumu huꞌa atesageno Ala kava neꞌmoꞌa alagepa huno alino he tino ategaiye. Kaita hauꞌniya vekamoꞌa hosu kavaꞌmo huꞌnisiyana Ala kava neꞌmoꞌa alino atalegaiye.  
\v 16 Lapakaemo konagatapimogifeꞌmo hosu kavatapieꞌmo aeta hakalo hutapa hapa paigeꞌa apakaemo ani kava huꞌa hosu kavaꞌapieꞌmo aeꞌa hakalo huꞌa lapa paisagetapa nunumu hutapa apategeꞌa ani kava huꞌa nunumu huꞌa lapatenagetapa higenoꞌao Gotiꞌa alino alagepa huno lapateno. Fatago vayaꞌmogimo aukaya huꞌa nunumu huꞌa ge huꞌa afi nekagenoꞌaeꞌmo Gotiꞌa himamu lokiyaꞌaletiꞌmo aliꞌyaꞌmo aliteno alino afole aino neꞌate.  
\v 17 Ilaiyaꞌa velafaꞌmo maiꞌneno lagaekana huno maiꞌniyaꞌmonanafa lokiya vaino nunumu hunoꞌaeꞌmo, ko oꞌaiyo, huno nunumu huꞌnigeno loleꞌe magoꞌe kafugaꞌe sigisiꞌa kaileꞌeꞌmo ko oꞌaiꞌniye.  
\v 18 Halate nunumu huꞌnigeno kokuꞌnapatiꞌmo ko aiꞌnigenoꞌaeꞌmo mopafatiꞌmo neꞌyaꞌmo hageꞌniye.   
\p
\v 19 Konagaꞌnimogitapae, lapakaepatiꞌmo mago vekamoꞌa alagepa kaꞌmo ataleno uneno nehisigenoꞌaeꞌmo mago vekamoꞌa avalelino esiyana,  
\v 20 Hosu kavaꞌmo nehiya vekamoꞌa hosu kavaꞌmo osuno alagi atalesiyafeꞌmo alino aino atagi neno avalelino eꞌniya vekamoꞌmo, fali kavategatiꞌmo agufamo alino katino atesigeno Gotiꞌa asole hosu kavaꞌamo aeno ati kaeno ategaiye, huno agesamo afigiye.