\id HEB - Keyagana NT with OT portions [kyg] -Papua New Guinea 2001 (web 2014) 
\h Himulu 
\toc1 HIMULU 
\toc2 Himulu 
\toc3 Him 
\mt1 HIMULU  
\ip Mani avoꞌmo kaeꞌniya vekamo agiꞌamo ohaneꞌniye. Poloꞌa mani avoꞌmo kaeꞌnifi, huꞌna nagesamo afiꞌnove. 13:23,24 gefiꞌe 2 Pita 3:15 gefiꞌeꞌmo agetapa lekana paitapa afiyo. Mani avoꞌmo Yu vayaꞌaifeꞌmo kaeꞌniye. Yu vayaꞌai apakiꞌapimo Himulu vayane. Ani Yu vayaꞌmogimo Kalaisifeꞌmo apakesa afiꞌa fatago huꞌnayaꞌmofeꞌmo kame huꞌa apateꞌnae. Oꞌataleꞌa atafauꞌa alagi hisayafeꞌmo mani avoꞌmo kaeꞌniye. Mani avoꞌmo kaeꞌniya vekamoꞌa, Kalisitini vayaꞌai mono kavaꞌmoꞌa Yu vayaꞌai mono kavaꞌmo ago aeno agaseꞌniye. Lapakesa afita fatago hutetapa akame hiyo, huno mani avoꞌmo kaeꞌniye.  
\c 1  
\s1 Gotiꞌa Mafaꞌneꞌaletiꞌmo laha paiꞌniya geeꞌmo ava gemo huꞌniya gemae  
\p
\v 1 Akeyaꞌvilaga Gotiꞌa agaiꞌalegati gemo alini eꞌa aeꞌa hakalo huꞌa hapa nepaiya vayaꞌai apavayaletiꞌmo laginago vayaꞌaifeꞌmo hapa paiꞌniye. Alu afinaꞌae alu afinaꞌaeꞌmo aise gemo hapa paite hapa paite huge alu kavatetiꞌe alu kavatetiꞌeꞌmo hapa paige huno hapa paiꞌniye.  
\v 2 Hemenimo henaga afinaꞌmo Mafaꞌneꞌaletiꞌmo laha paiꞌniye. Mafaꞌneꞌapimogimo afoꞌapimogi muki yaꞌapimo neꞌaliya kava huno Mafaꞌneꞌamoꞌmo muki yaꞌamo alisiyafeꞌmo ago lekana paino ateꞌniye. Gotiꞌa agaetetikeꞌmo muki yaꞌmo alo huꞌniye.  
\v 3 Agaemo Gotiꞌa ha le konali yaꞌamo aeno ha legekana huno neꞌmaiye. Agaemo Goti lama ge auneꞌamo maiꞌniye. Ayamufaꞌage geꞌaletiꞌmo muki yaꞌmo afaꞌa hanesiyafeꞌmo yagaino neꞌatenoꞌaeꞌmo agaiꞌamo hosu kavatimo aeno kalo paeno ataletenoꞌaeꞌmo haino kokuꞌnapi Gotiꞌa anaga hogote vekamo yagaino neꞌapateya vekamo lamaga haopaleꞌmo fai maiꞌniye.   
\s1 Goti Mafaꞌneꞌamoꞌmo enisole vayaꞌaina ago aeno apakaseꞌniya gemae  
\p
\v 4 Ani kava huno enisole vayaꞌmo ago aeno apakaseno ala agiꞌamo Gotiꞌa alino amiꞌniya agiꞌamoꞌmo apakiꞌapimo ago aeno agaseꞌniya kava huno aeno apakaseno maiꞌniye.  
\v 5 Gotiꞌa agaefeꞌmo,  
\q1 Mafaꞌneꞌnimo maiꞌnane. Hemenimo ago aliꞌna kateꞌnove,  
\m huno huteno magoꞌe gemo hunoꞌaeꞌmo,  
\q1 Afoꞌamoꞌnamo maiꞌnovanageꞌna agaetegamo ani kavaꞌmo hisugeno Mafaꞌneꞌnimo maiꞌniyanageno nagaetegamo ani kavaꞌmo hugiye,  
\m huno ha paiꞌniyaꞌmonanafa mago enisole vayaꞌaifeꞌmo ani agufa gemo huno hapa opaiꞌniye.  
\v 6 Hapa opaiꞌniyaꞌmonanafa yege Mafaꞌneꞌamo ma mopafiꞌmo alino atesigeno eminesiyafeꞌmo mani gemo hunoꞌaeꞌmo,  
\q1 Muki enisole vayaꞌmogitapamo agiꞌaleꞌmo alita asaga nehutapa agaefekeꞌmo mono hiyo,  
\m huno hapa paiꞌniye.  
\v 7 Enisole vayaꞌaifeꞌmo apava gemo hunoꞌaeꞌmo, Enisole vayaꞌmo yasigana huno alo huno apateꞌniye. Aliꞌyaꞌamo neꞌaliya enisole vayaꞌmo ata vaikana huno alo huno apateꞌniye, huno huꞌniye.  
\v 8 Huno huꞌniyaꞌmonanafa Mafaꞌneꞌaeꞌmo,  
\q1 O Gotiyo, muki afinaꞌmo alagi ofalika afaꞌa maige maige huka maiꞌneka yagaika apategane. Alagepa huka alika fako huka apateteka yagaika neꞌapatane.  
\v 9 Kagaemo alagepa kavafekeꞌmo kahauꞌnigekaeꞌmo gemo amagiꞌa neꞌatalaya kavafeꞌmo alagi okahauꞌnigeno Gotikamoꞌmo uvelimo faleno kateꞌnigekaeꞌmo lusi kava huka kamogaga aiteka kafalukamogimo ago aeka apakaseka maiꞌnane,  
\m huno huꞌniye.  
\v 10 Magoꞌe gemo hunoꞌaeꞌmo,  
\q1 Ala kava neyo, aepa faiꞌniya afinaꞌmo ma mopamo alo huꞌnane. Kayatetiꞌmo kokuꞌnaꞌmo alo huꞌnane.  
\v 11 Ma mopaꞌe kokuꞌnaꞌeꞌmo alagi hano hugiyaꞌmonanafa kagaemo afaꞌa maigane. Ma mopaꞌe kokuꞌnaꞌeꞌmo kukenagana huno atafa hegaiye.  
\v 12 Vayaꞌmogimo kukenamo asagiꞌa lo aeꞌa maleꞌneꞌa saufa kukenamo aliꞌa neꞌvaiya kava huka ma mopaꞌe kokuꞌnaꞌeꞌmo alika ataleteka saufa kokuꞌnaꞌe mopaꞌeꞌmo malegane. Maleganaꞌmonanafa kagaemo mago alu kava huka oꞌmaige ofalige huteka maige maige huka alagi maigane,  
\m huno hu maleꞌniye.  
\v 13 Gotiꞌa agaefeꞌmo,  
\q1 lamaga nahaopaleꞌmo faika maime maime neꞌugeꞌnao kame vayakamo aliꞌna kaiya afeꞌalumelaga apategauve,  
\m huno ha paiꞌniyaꞌmonanafa mago enisole vayaꞌaifeꞌmo ani agufa gemo hapa opaiꞌniye.  
\v 14 Enisole vayaꞌmo apauneꞌapameꞌe vayaꞌmo maiꞌneꞌa Goti aliꞌyaꞌamo neꞌaliya vayaꞌmo maiꞌnae. Gotiꞌa fiku hapa maeno apakufamo alino katino apatesiya vayaꞌmo hapa maesayafeꞌmo alino apategeꞌa neꞌvae.   
\c 2  
\s1 Gotiꞌa lusi kava huno laha maeꞌniya kavafeꞌmo ava gemo huꞌniya gemae  
\p
\v 1 Ani kava huno neꞌmaiyaꞌmofeꞌmo aniꞌmoꞌa alinino neꞌviya kava huno fiku yanageno lavalelino visigeta agaetegatiꞌmo ago afiꞌnona gemo ataleta ugunanagi magoꞌe huta afita alagepa huta afigetao.  
\v 2 Gotiꞌa enisole vayaꞌai apavayafatiꞌmo laginago vayaꞌaifeꞌmo hapa paiꞌniye. Ani gemo asagauno oꞌaino lokiya vaino haneꞌnigeꞌapaeꞌmo muki vayaꞌmogi akame osuꞌa ago amagiꞌa ataleꞌnaya vayaꞌai anonaꞌapilefeꞌmo alino alagepa huno fako huno apateteno kayoꞌmo apamiꞌniye.  
\v 3 Apamiꞌniyaꞌmofeꞌmo Ala kava neꞌmo Gotiꞌa lusi kava huno vayaꞌai apakufamo alino katino neꞌapateya kavafeꞌmo ava gemo ago hapa paiꞌnigeꞌa afiꞌnaya vayaꞌmogimo, lama gemo haneꞌniye, huꞌa laha paiꞌnaya gemo oꞌafita afaꞌa maisunana haiya kava huta aeta kasalo paegaune.  
\v 4 Gotiꞌa alagena kavaꞌaletinagi noꞌagaya himamu kavaꞌaletinagi ageꞌapa hapau neꞌaiya kavaꞌaletiꞌmogi huno ha maeno faigoko gemo huno ani gemo alino lokiya vaino ateꞌniye. Gotiꞌa agesamo afiteno hauꞌnigenoꞌaeꞌmo Aunemeꞌamoꞌmo himamuꞌamo apamete apamete huno alino apamiꞌniye.   
\s1 Yesuꞌa laha maesiyafeꞌmo ma mopafi vekamo hamaleꞌniya kavafeꞌmo ava gemo huꞌniya gemae  
\p
\v 5 Nagaemo henagaꞌamo afole aisiya saufa kavafeꞌmo ava gemo huꞌna avoꞌmo nekaova kavateꞌmo Gotiꞌa enisole vayaꞌmogimo yagaisayafeꞌmo lekana paino oꞌapateꞌniye.  
\v 6 Lekana paino oꞌapateꞌniyaꞌmonanafa mago vekamoꞌmo Goti mukufiꞌmo avo kae maleꞌniya gemoꞌmo hunoꞌaeꞌmo,  
\q1 Gotiyo, ma mopafi vayaꞌmo ina agufa vayanagi na kava higeka apakaefeꞌmo kagesamo neꞌafine. Vemo Mafaꞌnemo na agufa vekamo maiꞌnigeka ha maeka yagaika neꞌatane.  
\v 7 Kagaemo aise afinaꞌmo enisole vayaꞌai apaiyafiꞌmo maisiyafeꞌmo alika ateꞌnane. Ha le konali yaꞌaꞌe ala agiꞌaꞌeꞌmo alika amiteka alo huꞌnana yateꞌmo yagaisiyafeꞌmo alika ateꞌnane.  
\v 8 Muki yaꞌe vayaꞌeꞌmo alika aiyafiꞌmo ateꞌnane,  
\m huno huꞌniye. Gotiꞌa muki yateꞌmo yagaisiyafeꞌmo alino ateꞌniyaꞌmofeꞌmo oꞌyagaiꞌniya yaꞌmo magokeꞌatomo ohaneꞌniyaꞌmonanafa muki yaꞌamo alino aiyafiꞌmo ateꞌniye. Ateꞌniyaꞌmonanafa ma mopafi vayaꞌmogimo hemenimo muki yateꞌmo neꞌyagaigeta oꞌapakeꞌnonaꞌmonanafa  
\v 9 Gotiꞌa Yesuꞌmo ha le konali yaꞌaꞌe ala agiꞌaꞌeꞌmo alino amiꞌniya vekamo ago ageꞌnone. Gotiꞌa, fiku hapa maeꞌna apamiguve, huno huteno Yesuꞌmo muki vayaꞌaitefeꞌmo falisiyafeꞌmo aise afinaꞌmo alino enisole vayaꞌai apaiyafiꞌmo ateꞌniye.   
\p
\v 10 Gotiꞌa muki yateꞌe vayaꞌaiteꞌeꞌmo aepa vekamo maiꞌnigeno agaetefeꞌmo hanege maige nehaya aepa vekamoꞌmo asole mafaꞌneꞌamogimo ha le konali yaꞌamo alisayafeꞌmo Gotiꞌa agaiꞌa agiꞌaletiꞌmo fatago kavaꞌamo hunoꞌaeꞌmo, Yesuꞌa afaꞌa agafu kigiye, huno huꞌniye. Gotiꞌa apakufamo alino katino apatesiya vekamo maisiyafeꞌmo agafu kiꞌniya kavatetiꞌmo alino alagepa huno ateꞌniye.  
\v 11 Yesuꞌa apavaleno apaote apateꞌniya vekamoꞌe apavaleno alino apaote apateꞌniya vayaꞌaꞌeꞌmo magoke agufa yaꞌmo aliꞌnayaꞌmofeꞌmo naganaꞌnimogitapae, huno hapa paisiyafeꞌmo avagage nosiye.  
\v 12 Agaemo hunoꞌaeꞌmo,  
\q1 Nagaemo naganaꞌnimogifeꞌmo ala kagikaeꞌmo kava gemo huꞌna aeꞌna hakalo huꞌna hapa paiguve. Aliꞌa anupa huꞌa maiꞌnisaya siosi vayaꞌai folagaꞌapifatiꞌmo yokemo nehuꞌna kagikaleꞌmo aliꞌna asaga huꞌna kategauve,  
\m huno huteno  
\v 13 magoꞌe gemo hunoꞌaeꞌmo,  
\q1 Naha maegaiye, huꞌna agaefekeꞌmo nagesamo afiguve,  
\m huno huteno halate magoꞌe gemo hunoꞌaeꞌmo,  
\q1 Gotiꞌa mafaꞌneꞌamo apavalelineno namiꞌnigeꞌna manileꞌmo apakaeꞌeꞌmo magokepi lokaeta maiꞌnone,  
\m huno huꞌniye.  
\v 14 Mafaꞌnemogi apakufaꞌe kolaꞌeꞌmo neꞌaliya kava huno falisiyafeꞌmo agufaꞌe kolaꞌaꞌeꞌmo aliꞌniye.  
\v 15 Aliꞌnenoꞌaeꞌmo nefaliya kavaꞌmo aepa vekamo Nevoꞌmo aeno agaseno himamuꞌamo alino atalesiyafeꞌmo faliꞌniye. Falisaya kavafeꞌmo koli nehuꞌa kanamo neꞌaliya vayaꞌaina hatu maeno apatesiyafeꞌmo faliꞌniye.  
\v 16 Agaemo ani kavatetiꞌmo enisole vayaꞌmo hapa noꞌmaeyaꞌmonanafa Emalehamu aginago vayaꞌageꞌmo hapa neꞌmae.  
\v 17 Hogote mono vekamo Gotitefeꞌmo mono aliꞌyaꞌmo neꞌalino mono huno neꞌapateya vekamoꞌa hau huno neꞌapateno aliꞌyaꞌamo oꞌataleno alagepa aliꞌyaꞌmo alisiyafeꞌmo aganaꞌamogigana huno alino hamaleno ateꞌniye. Hosu kavaꞌapimo alino atalesigeno Gotiꞌa aipamo leno oꞌapatesiyafeꞌmo muki kavatefeꞌmo magoke aiyaya vekamo alino hamaleꞌniye.  
\v 18 Amalageka huꞌnigeno agafu kiꞌniyaꞌmofeꞌmo apamalageka nehiya vayaꞌmo afaꞌa hapa maegaiye.   
\c 3  
\s1 Yesu ala agiꞌamoꞌmo Mosese ala agiꞌamo ago aeno agaseꞌniya kavafeꞌmo huꞌniya gemae  
\p
\v 1 Gotiꞌa lapakaefeꞌmo kokuꞌnapiꞌmo haitapa magokepi lokaetapa maisayafeꞌmo keya aeno ge huꞌniya lapaote konagaꞌnimogitapae, huꞌna, Yesufekeꞌmo lapakesa afifi hutapa maiyo. Lagaemo lagesa afita fatago hutaeꞌmo, Goti apa vekaꞌamo maiꞌneno hogote mono vekamo mono huno nelateya vekamo maiꞌniye, huta aeta hakalo nehune.  
\v 2 Moseseꞌa Goti nopiꞌmo aliꞌyaꞌmo neꞌalino Goti afamo anaga vayaꞌaiteꞌmo aliꞌyaꞌamo oꞌataleno alagepa huno aliꞌniya kava huno Yesuꞌa lekana paino ateꞌniya Gotitefeꞌmo aliꞌyaꞌamo oꞌataleno alagepa huno aliꞌniye.  
\v 3 Afamo anaga vayaꞌai aepa vekamoꞌa no kigekana huno maiꞌniya vekamoꞌmo ala agimo haneꞌnigeno afamo anaga vayaꞌmo aeno apakaseno maiꞌniyaꞌmofeꞌmo ani kava huno Yesuꞌa Moseseꞌmo ago aeno aga seꞌniyaꞌmofeꞌmo magoꞌe ala agi alisiya vekamo maiꞌniye.  
\v 4 Muki noꞌamo agaiꞌamo afaꞌa afole noꞌaifa vayaꞌmogigeꞌmo nekiye. Inagi Gotiꞌa muki yaꞌmo aepa vekamo maiꞌniye.  
\v 5 Moseseꞌa Goti nopiꞌmo Goti afamo anaga vayaꞌalefeꞌmo aliꞌyaꞌamo oꞌataleno alagepa huno aliꞌyaꞌmo alino afole aisiya vekaeꞌmo ava ge huno hapa paiꞌniye.  
\v 6 Hapa paiꞌniyaꞌmonanafa Kalaisiꞌa afamo anaga vayaꞌai aepa vekamo Mafaꞌneꞌamoꞌmo Goti afamo anaga vayaꞌaleꞌmo yagaino neꞌapate. Lagaemo alagepa huta maige maige huta maigune, huta lole lagesamo oꞌafita lavayagunagu huteta koli osuta lamogaga neꞌaitaeꞌmo oꞌataleta atafauta alagi huta maime maime neꞌuta hano hisiya afinaꞌmo ani kava huta maiꞌnisunaꞌmoꞌmo Goti afamo anaga vayaꞌamo maiꞌnone.   
\s1 Goti vayaꞌamo maiꞌa falu huꞌa maisaya kavafeꞌmo huꞌniya gemae  
\p
\v 7-8 Ani kavatefeꞌmo Goti Aunemeꞌamo aote Aunemeꞌamo geꞌamo alagepa hutapa afiyo. Agaemo hunoꞌaeꞌmo,  
\q1 Hemenimo lapakaemo Goti geꞌamo neꞌafisayana lapaipamo alita lokiya vaitapa oꞌateyo. Lapakinago vayaꞌmogimo kaꞌme kotegamo nata neꞌa neꞌuꞌapaeꞌmo namalageka huꞌnae. Geꞌnimo ago amagiꞌa ataleꞌnaya kava hutapa geꞌnimo amagitapa oꞌataleyo.  
\v 9 Nagaemo lusi alagepa kavaꞌmo huꞌna fotiꞌa kafugamo hapa maeꞌnogeꞌa alagepa kavaꞌnimo ago nageꞌnayaꞌmonanafa hosu kavakeꞌmo nehuꞌapaeꞌmo, na agufa kavaꞌmo hisifi, huꞌa namalageka huꞌnae.  
\v 10 Huꞌnayaꞌmofeꞌmo ani afinaꞌmo muki maiꞌnaya vayaꞌaifeꞌmo naipamo leꞌna apateꞌnaeꞌmo, muki afinaꞌaeꞌmo hosu apaipa apakesageꞌmo neꞌafiꞌapaeꞌmo neꞌnatalae. Geꞌnimo alagi alagepa huꞌa noꞌafiye.  
\v 11 Naipamo leꞌnigeꞌnaeꞌmo nagoꞌyamo neꞌataleꞌna lokiya gefatiꞌmo huꞌnaeꞌmo, nagaeꞌeꞌmo haiꞌeꞌa maiꞌa falu hisaya koteꞌmo alagi faleꞌa hai eꞌa oꞌmaigae, huꞌna huꞌnove,  
\m huno huꞌniye.  
\v 12 Konagaꞌnimogitapae, ehetapiye, fiku yanagetapa mago vayaꞌamogitapamo hosu lapaipamo kalitapa lapakesa afita fatago osutapa afaꞌa neꞌmaiya yaꞌmo aepa vekamo Gotiꞌa lapakameꞌya neꞌamita ataletapa ugayanagi.  
\v 13 Hosu kavaꞌmoꞌa humi nelapateno alino lokiya lapaipamo kalino lapategaiyanagi muki afinaꞌae afinaꞌaeꞌmo konagatapieꞌmo, atafauta alagi hiyo, hutapa alita lokiya vaita apateyo. Akeyaꞌvilaga Gotiꞌa, hemenimo afiyo, huno huꞌniya gemo hemeni kanatapimo hano osuno afaꞌa haneꞌniyaꞌmofeꞌmo hemenigeꞌmo konagatapimo alita he titapa apateyo.  
\v 14 Hogoteta lokiya vaita lagesamo afitaeꞌmo, lama gemo huꞌniyanageno alagi afole aigiye, huta huteta oꞌataleta atafauta alagi huta maime maime neꞌutaeꞌmo hano hisiya afinaꞌeꞌmo ani kavakeꞌmo huta maiꞌnisunaꞌmoꞌmo Kalaisiꞌa alita laipafiꞌmo ateꞌnonageno neꞌmaiye.  
\v 15 Goti mukufiꞌmo avo kae maleꞌniya gemoꞌmo hunoꞌaeꞌmo,  
\q1 Hemenimo Goti geꞌamo neꞌafisayana lapaipamo alita lokiya vailiꞌnetapa oꞌafiyo. Geꞌnimo amagiꞌa ataleꞌnaya kava hutapa geꞌnimo amagitapa oꞌataleyo,  
\m huno huꞌniye.   
\p
\v 16 Haiya vayaꞌmogimo Goti geꞌamo afiꞌnayaꞌmonanafa amagiꞌa ataleꞌnae. Moseseꞌa Isipi kotegatiꞌmo muki apavalelino uꞌniya vayaꞌmogigeꞌmae.  
\v 17 Gotiꞌa haiya vayaꞌaifeꞌmo fotiꞌa kafugamo aipamo leno apatege apatege huno maiꞌniye. Hosu kavaꞌmo huteꞌa kaꞌme kotegamo faliꞌnaya vayaꞌaifeꞌmae.  
\v 18 Gotiꞌa haiya vayaꞌaifeꞌmo lokiya gefatiꞌmo hunoꞌaeꞌmo, Nagaeꞌeꞌmo maiꞌa falu huꞌa maisaya koteꞌmo faleꞌa hai eꞌa oꞌmaigae, huno huꞌniye. Geꞌamo ago amagiꞌa ataleꞌnaya vayaꞌaifeꞌmo huꞌniye.  
\v 19 Inagi ago afiꞌnonana apakesa afiꞌa fatago osuꞌnayaꞌmofeꞌmo afaꞌa faleꞌa ohaiꞌnae.   
\c 4  
\p
\v 1 Inagi Gotiꞌa ani kavaꞌmo huguve, huno hu maleꞌniya gemo hano osuno afaꞌa haneꞌnigeno hemeniꞌeꞌmo hunoꞌaeꞌmo, nagaeꞌeꞌmo maita falu huta maigae, huno laha nepaiye. Fiku yanagetapa lapakaepatiꞌmo mago vayaꞌmo haitapa metalegayanagi koli higetao.  
\v 2 Gotiꞌa alagepa faigoko geꞌamo hapa paiꞌnigeꞌa afiꞌnaya kava huno laha paiꞌnigeta ago afiꞌnone. Afiꞌnayaꞌmonanafa apakesa afiꞌa fatago osuꞌnayaꞌmofeꞌmo afiꞌnaya gemoꞌmo hapa oꞌmaeꞌniye.  
\v 3 Lagesa afita fatago huꞌnona vayaꞌmogitamo haita Gotiꞌeꞌmo magokepi lokaeta maita falu hugune. Gotiꞌa ma mopamo ago alo huno hano hu maleꞌniyaꞌmofeꞌmo maiꞌa falu hisaya kavaꞌmo haneꞌniye. Haneꞌniyaꞌmonanafa Gotiꞌa hunoꞌaeꞌmo,  
\q1 Naipamo leꞌnigeꞌna nagoꞌyamo neꞌataleꞌna lokiya gefatiꞌmo huꞌnaeꞌmo, nagaeꞌeꞌmo maiꞌa falu huꞌa maisaya koteꞌmo alagi faleꞌa hai eꞌa oꞌmaigae,  
\m huno huꞌniye.  
\v 4 Goti mukufiꞌmo mago gemoꞌmo seveni afinafeꞌmo, \it Gotiꞌa muki yaꞌamo alo huno hano huteno seveni afinaꞌmo maino falu huꞌniye,\it* huno huteno  
\v 5 magoꞌe gemo hunoꞌaeꞌmo, \it nagaeꞌeꞌmo maiꞌa falu huꞌa maisaya koteꞌmo alagi faleꞌa hai eꞌa oꞌmaigae,\it* huno huꞌniye.  
\v 6 Hogoteꞌa alagepa gemo afiꞌnaya vayaꞌmogi apakesa afiꞌa fatago osuꞌnayaꞌmofeꞌmo faleꞌa haiꞌa maiꞌa falu osuꞌnae. Osuꞌnayanageꞌa alu vayaꞌmogi faleꞌa haiꞌa maiꞌa falu hisaya kavaꞌmo haneꞌniye.  
\v 7 Faleꞌa haiꞌa maiꞌa falu osuꞌnageno asole kafugamo ago utegeno Gotiꞌa halate magoꞌe afinaꞌmo hu maleꞌnenoꞌaeꞌmo,  
\q1 Hemenimo faleta haitapa maita falu hugae, huno hu maleꞌniye. Gotiꞌa mani gemo Nevini avayaletiꞌmo, hemenimo Goti geꞌamo neꞌafitapaeꞌmo lapaipamo alita lokiya vaitapa oꞌateyo,  
\m huno huꞌniye.  
\v 8 Ema akeyaꞌvilaga mago vekamo agiꞌamo Yosuvaꞌa Isaleli vayaꞌmo apavalelino uꞌnigeꞌapaeꞌmo haiꞌa maiꞌa falu huꞌnaesinana Gotiꞌa henagaꞌamo alu afinaꞌmo maiꞌa falu hisaya afinafeꞌmo halate ani agufa gemo osiyesine.  
\v 9 Gotiꞌa muki yaꞌamo alo huno hano hutenoꞌaeꞌmo maino falu huꞌniya kava huno Kalaisiꞌa aliꞌyaꞌamo ago alino hano huꞌniyanageno Gotiꞌeꞌmo magokepi lokaeno maino falu nehiye.  
\v 10 Aliꞌyaꞌamo ago alino hano huꞌniyaꞌmofeꞌmo Goti vayaꞌamo maiꞌa falu hisaya sapati afinaꞌmo hano osuno afaꞌa haneꞌniye.  
\v 11 Goti geꞌamo amagiꞌa ataleteꞌa asagauꞌa aiꞌnaya kava huta asagauta aigayanagi haita maita falu hisunafeꞌmo layamukiki higetao.   
\p
\v 12 Goti geꞌamo aunemeꞌe gemo haneꞌneno himamuꞌaletiꞌmo aliꞌyaꞌmo neꞌaliye. Ani gemoꞌa aluga alugaꞌamo ave neꞌneya naipemo ago aeno agaseno aveꞌmo lusi kava huno neꞌne. Agaemo geꞌaletiꞌmo apauneꞌapamepinagi apaipa apakesafinagi apayamufafinagi apatupiꞌmogi huno neꞌaeno alino fako nehiye.  
\v 13 Lagaemo, ma kava huꞌnove, ina kava huꞌnove, huta ha paisuna vekamo aulagaleꞌmo muki nehuna kavatimo alagi fala okino afole neꞌaiye. Muki vayaꞌmo aulagaleꞌmo alagi fala okisageno apakegaiye.   
\s1 Yesuꞌa hogote vekamo mono huno nelateya ala vekatimo maiꞌniya gemae  
\p
\v 14 Yesuꞌa Goti Mafaꞌneꞌamo hogote ala vekatimo mono huno nelateya vekamo maiꞌnenoꞌaeꞌmo haino kokuꞌnaꞌmo aeno agaseno Gotitegamo haino maiꞌniyaꞌmofeꞌmo lagesa afita fatago nehuta aeta hakalo huta hapa nepauna geleꞌmo atafauta alagi huta maigetao.  
\v 15 Hogote ala vekatimo mono huno nelateya vekatimoꞌa himamutimo ohaneꞌniya vayaꞌmogitaeꞌmo hau huno nelate. Muki alu hosu kava alu hosu kavaꞌmo hisunafeꞌmo lamalageka nehaya kava huꞌa amalageka huꞌnayaꞌmofeꞌmo hau huno nelate. Amalageka huꞌnayaꞌmonanafa hosu kavaꞌmo alagi osuꞌniye.  
\v 16 Inagi atete osuta Gotiꞌa yagaino neꞌapateya siaꞌaleꞌmo fai maiꞌnenoꞌaeꞌmo fiku laha maeno nelamiya kavategamo vigetao, kana yaꞌmo alisuna afinaꞌmo hau huno nelateno fiku laha maeno lamigiyaꞌmofeꞌmae.   
\c 5  
\p
\v 1 Gotiꞌa hogote vayaꞌmo mono huꞌa neꞌapataya vayaꞌmo apakae konaga vayapatiꞌmo lekana paino apateꞌniye. Apakaemo konagaꞌapimogitefeꞌmo Gotiꞌmo amigune, huꞌa huꞌnaya yaꞌmo amige konagaꞌapimogi hosu kavaꞌapilefeꞌmo afumo heꞌa Gotiꞌmo ofalinimo amige huꞌa mono aliꞌyaꞌmo alisayafeꞌmo lekana paino apateꞌniye.  
\v 2 Himamuꞌapimo ohaneꞌniyaꞌmofeꞌmo afiteꞌa oꞌageꞌnaya vayaꞌaitegaꞌe alagepa kaꞌmo ataleꞌa uꞌnaya vayaꞌaitegaꞌeꞌmo vase vase kavaꞌmo afaꞌa hugae.  
\v 3 Himamuꞌapimo ohaneꞌniyaꞌmofeꞌmo alu vayaꞌai hosu kavaꞌapilefekeꞌmo afumo heꞌa ofalinimo oꞌamiꞌnayaꞌmonanafa apakaiꞌapi hosu kavaꞌapileꞌefeꞌmo neꞌamiye.  
\v 4 Mago vayaꞌmogi apakaiꞌapimo, ani aliꞌyaꞌmo afaꞌa aligune, huꞌa osuꞌnafa Gotikeꞌmo Elonifeꞌmo keya aeno ge huꞌniya kava huno keya aeno ge huꞌniya vayaꞌamogigeꞌmo ani aliꞌyaꞌmo neꞌaliye.   
\p
\v 5 Ani kava huno Kalaisiꞌa hogote vekamo mono huno nelateya vekamoꞌmo lusi aliꞌyaꞌmo alisiyafeꞌmo agaiꞌa agufamo avalelino ohaiꞌniye. Haꞌao, Gotiꞌa agaefeꞌmo,  
\q1 Mafaꞌneꞌnimo maiꞌnane. Hemenimo ago aliꞌna kateꞌnove,  
\m huno huteno  
\v 6 magoꞌe gemo aote mukufiꞌmo hunoꞌaeꞌmo,  
\q1 Melikisetekiꞌa mono huno neꞌapateya vekamo maiꞌniya kava huka mono huka neꞌapatana vekamo maiꞌneka oꞌataleka muki afinaꞌmo aliꞌyaꞌmo alige alige huka maigane,  
\m huno ago hu maleꞌniye.  
\v 7 Kalaisiꞌa ma mopafiꞌmo maiꞌnenoꞌaeꞌmo falisiya kavategatiꞌmo agufamo alino katino atesiya Gotifekeꞌmo alopa gefatiꞌmo keya aeno ge huge aviꞌya huge huno aukaya huno nunumu huꞌniye. Gotifeꞌmo koli nehuno mono huꞌniyaꞌmofeꞌmo Gotiꞌa geꞌamo afiꞌniye.  
\v 8 Agaemo Goti Mafaꞌneꞌamo maiꞌniyaꞌmonanafa geꞌamo afiteno akame hisiyafeꞌmo lusi kava huno agafu kiꞌniya kayotetiꞌmo amagino alino aya maleꞌnigeno alagepa huno afiꞌniye.  
\v 9 Gotiꞌa aliꞌyaꞌamo alisiyafeꞌmo avaleno aote ateꞌnigenoꞌaeꞌmo agaemo geꞌamo akame nehaya vayaꞌai apakufamo alino katino neꞌapateya kavaꞌmo aepa vekamo hamaleꞌniye.  
\v 10 Hamaleꞌnigeno Gotiꞌa, \it Melikisetekiꞌa hogote vekamo mono huno neꞌapateya vekamo maiꞌniya kava huka maiꞌnane,\it* huno ge huꞌniye.   
\s1 Nute mafaꞌnegana hutapa oꞌmaiyo, huno huꞌniya gemae  
\p
\v 11 Ani kavafeꞌmo magoꞌe gemo lapa paigunaꞌmonanafa lapau maiꞌmai hutapa neꞌmaiyaꞌmofeꞌmo haiya kava huta alita lapaya malegaune.  
\v 12 Yatala afinaꞌmo Goti geꞌamo ago afiꞌnayaꞌmofeꞌmo aliꞌa apaya neꞌmalaya vayaꞌmo maisaya yaꞌmo haneꞌniyaꞌmonanafa Gotiꞌa geꞌamo aepa faiꞌniya gemo magoꞌe huꞌa aliꞌa lapaya malesaya kavaꞌmo haneꞌniye. Lapakaemo lokiya neꞌyaꞌmo afaꞌa oꞌnetapa nuꞌagekeꞌmo nesaya agufa kavaꞌmo haneꞌniye.  
\v 13 Nuꞌageꞌmo neꞌnaya vayaꞌmogimo nute mafaꞌnegana huꞌa neꞌmaiꞌapaeꞌmo fatago kavafeꞌmo ava gemo alagepa huꞌa noꞌafiye.  
\v 14 Alopa vayaꞌmogimo lokiya neꞌyaꞌmo neꞌnae. Muki afinaꞌae afinaꞌaeꞌmo afime afime neꞌayaꞌmofeꞌmo alagepa geꞌe hosu geꞌeꞌmo alagepa huꞌa afaꞌa aliꞌa fako huꞌa neꞌafiye.   
\c 6  
\s1 Aepa faita afiꞌnona gemo ataleta haita hapaigetao, huno huꞌniya gemae  
\p
\v 1-2 Lagaemo agava maiꞌnona vekamo Kalaisi nefeꞌmo ava gemo aepa faita afiꞌnona gemo afiꞌnone. Aepa faita afiꞌnona gemo haneꞌniyana fali kavaꞌmo aliꞌyaꞌalefeꞌmo lapaipamo alita afe leyo, huꞌa hageta afige Gotifeꞌmo lapakesa afita fatago hiyo, huꞌa hageta afige sese nehaya kavafeꞌmo aliꞌa laya maleꞌnageta afige aliꞌa apaya neꞌmalaya gemo afige faliꞌnaya vayaꞌmo he tisaya kavafeꞌmo ava gemo afige agoti huno apatesiya kavafeꞌmo ava gemo afige huta ago afiꞌnone. Ani aepa faita afiꞌnona gemoꞌmo noꞌmo faiꞌa neꞌataya yakana huno haneꞌniye. Fiku yanageta halate alita faita ategaunanagi ataleta haita hapaigetao.  
\v 3 Gotiꞌa he, kanalene, huno hisigetaeꞌmo ataleta uta hano hugune.  
\v 4 Gotiꞌa mago vayaꞌmo kokuꞌnapatiꞌmo ha le yaꞌamo fiku alino neꞌapamiya yaꞌamo ago alino apamiꞌnigeꞌa aliꞌa neꞌa afigeꞌnae. Goti Aunemeꞌamoꞌmo alino neꞌapamiya himamuꞌamo alige  
\v 5 Goti alagepa geꞌamo afiꞌa neꞌa afige saufa afinaꞌmo himamu kavaꞌamo ageꞌa neꞌa afige huꞌnae.  
\v 6 Ageteꞌapaeꞌmo alagi ataleꞌa asagauꞌa aiꞌnayaꞌmofeꞌmo halate apaipamo alagi aliꞌa afe lesaya kaꞌmo ohaneꞌniye. Apakaemo Goti Mafaꞌneꞌamo malipu yosaleꞌmo nili aiꞌnaya kava huꞌa apaipafiꞌmo halate ani agufa kavaꞌmo nehuꞌapaeꞌmo vayaꞌai apaulagaleꞌmo agiꞌaleꞌmo aliꞌa afepi neꞌatayaꞌmofeꞌmae.  
\v 7 Koꞌmo mopafiꞌmo aino nelamigenoꞌaeꞌmo neꞌyaꞌmo nehageya mopamoꞌmo hoyamo neꞌvaiya vayaꞌmo hapa neꞌmaegeno Gotiꞌa, alagepa mopamo haneꞌniye, huno alagepa huno yagaino neꞌate.  
\v 8 Neꞌateyaꞌmonanafa mago mopafatiꞌmo aufe nofiꞌe aufe inoꞌeꞌmo aesigenoꞌaeꞌmo ina agufa mopamo haneꞌniyanageno Gotiꞌa aise afinaꞌmo hunoꞌaeꞌmo, hosu mopamo haneꞌniye, huno atafiꞌmo alino kaeno asagalino atalegaiye.   
\p
\v 9 Lahauꞌniya vayaꞌmogitapae, mani gemo nehunaꞌmonanafa hosu mopagana hutapa oꞌmaiꞌnae, huta lagesamo neꞌafune. Gotiꞌa apakufamo alino katino neꞌapateya vayaꞌai apaipafiꞌmo alino neꞌmaleya yaꞌmo hogote yaꞌmo lapaipafiꞌmo ago alino maleꞌniya vayaꞌmo maiꞌnae, huta lokiya vaita lagesamo neꞌafune.  
\v 10 Lapakaemo aliꞌyaꞌmo alige Gotifeꞌmo lapau lapayamopafiꞌmo lapauꞌnigetapaeꞌmo aliꞌyaꞌamo alige nehutapa apaote vayaꞌamo hapa maeꞌnayanagetapaeꞌmo hapa neꞌmae. Gotiꞌa hosu kava huno alino fako huno noꞌapateyaꞌmofeꞌmo alagepa kavatapieꞌmo alagi age okanigiye.  
\v 11 Lahauꞌniyanagetapa mukiꞌamogitapa ani kava nehutapa lapavayagunagu hutapa agava maime maime neꞌvisagenoꞌaeꞌmo hano hisiya afinaꞌmo he tisayafeꞌmo lapayamukiki hugae.  
\v 12 Alagaꞌmo olapaeꞌninagetapa Gotiꞌa polomasi gemo hunoꞌaeꞌmo, aliꞌna lapamiguve, huno hu maleꞌniya yaꞌmo ago aliꞌnaya vayaꞌai apaiyakamo aliyo. Apakaemo oꞌataleꞌa apakesa afiꞌa fatago nehuꞌa atafauꞌa alagi huꞌa maime maime neꞌeꞌapaeꞌmo aliꞌnae.   
\s1 Gotiꞌa lapa maegauve, huno polomasi gemo hu maleꞌniya gemae  
\p
\v 13 Akeyaꞌvilaga Gotiꞌa Emalehamufeꞌmo, fiku kaha maeꞌna kamiguve, huno polomasi gemo huno ha paiꞌniye. Mago vekamoꞌa Gotiꞌmo aeno agaseꞌniya vekamo alagi oꞌmaiꞌniyaꞌmofeꞌmo Gotiꞌa agaiꞌa agiꞌaletiꞌmo agoꞌyamo neꞌataleno hu maleꞌniye.  
\v 14 Gotiꞌa, \it alagi lama gemo kaha nepauve huꞌna, kaha maeꞌna kamiguve. Nagaemo muki kaginago vayaꞌmo kaha maeꞌna kamiguve,\it* huno ha paiꞌniye.  
\v 15 Huno ha paiꞌnigeno Emalehamuꞌa oꞌataleno agesa afino fatago nehuno agava maime maime neꞌegenoꞌaeꞌmo Gotiꞌa hu maleꞌniya gemo afole aiꞌnigeno aliꞌniye.  
\v 16 Mago vayaꞌmo ago aeno apakaseꞌniya vekamo agiꞌaletiꞌmo lokiya gefatiꞌmo huꞌnageꞌa afiteꞌapaeꞌmo, vae, alagi lama gemo nehae, huꞌa ge noꞌnae.  
\v 17 Ani kavakana huno Gotiꞌa, lapa maegauve, huno hapa paiꞌniya vayaꞌmogi, Gotiꞌa halate ataleno alu gemo osugiye, huꞌa alagepa huꞌa afisayafeꞌmo agaiꞌa agiꞌaletiꞌmo agoꞌyamo neꞌataleno huꞌniya geꞌalefeꞌmo agesamo afiꞌnenoꞌaeꞌmo, ani kavaꞌmo afaꞌa afole aigiye, huno hu maleꞌniya geleꞌmo alino lokiya vaino ateꞌniye.  
\v 18 Gotiꞌa ani lole kavaꞌmo ago hu maleꞌniyaꞌmofeꞌmo halate ataleno alu kavaꞌmo osisiya agufa kavaꞌmo huno aigofe gemo huteno ataleno alu kavaꞌmo hisiya kaꞌmo alagi ohaneꞌniye. Agaemo ani kava huꞌniya kavatetiꞌmo laune hetaleta uta fala kita neꞌmauna vayaꞌmogita laulagaleꞌmo alino afole aino ateꞌniya yateꞌmo atafauta lavayagunagu huta agava maiꞌneta ani kavaꞌmo alagi hisunafeꞌmo alino he tino nelate.  
\v 19 Lavayagunagu huta agava neꞌmauna yaꞌmo lokiya yaꞌmo afaꞌa hanesiya yaꞌmo haneꞌniye. Sipimo aeꞌa atafauꞌa neꞌataya yakana huno haneꞌneno lagupi mafaꞌnemo atafauno neꞌate.  
\v 20 Yesuꞌa lavayagunagu huta agava neꞌmauna vekamo laha maesiyafeꞌmo Gotiꞌa neꞌmaiya yateꞌmo aeno asai maleꞌniya lavolavofiꞌmo ago hogoteno faleno haino aote nopiꞌmo neꞌmaiye. Agaemo Melikisetekigana huno maiꞌneno hogote vekamo mono huno neꞌapateya vekamo hamaleꞌniyanageno muki afinaꞌmo maige maige huno maigiye.   
\c 7  
\s1 Mono huno neꞌapateya vekamo Melikisetekifeꞌmo ava gemo huꞌniya gemae  
\p
\v 1 Ani vekamo Melikisetekiꞌa ema akeyaꞌvilaga Selemi taonifiꞌmo maiꞌnaya vayaꞌaiteꞌmo yagaino neꞌapateya kini vekamo maiꞌniye. Agaemo hogote vekamo anaga Goti vekaꞌamo mono huno neꞌapateya vekamo maiꞌniye. Emalehamuꞌa mago kini vayaꞌeꞌmo kame huteꞌa huno aeno apakasetenoꞌaeꞌmo aino atagineno eno Melikisetekiꞌeꞌmo fotu huꞌnaꞌae. Melikisetekiꞌmo, Gotiꞌa kaha maeno, huno ha paiꞌniye.  
\v 2 Emalehamuꞌa kame huno huno aeno apakaseteno kagemi yaꞌapimo aliꞌniya kagemiyapatiꞌmo alino fako huno teniꞌa hetamamo male maleꞌneno ani hetamafatiꞌmo magoke hetamamo alino taisimo Melikisetekiꞌa amiꞌniye. Inagi Melikisetekiꞌae agimo hogote aepaꞌamo haneꞌniyana fatago kavaꞌageꞌmo nehiya kini vekae. Selemi taonifiꞌmo maiꞌnaya vayaꞌaiteꞌmo yagaino neꞌapateya kini vekamo maiꞌniyaꞌmofeꞌmo agiꞌafiꞌmo lole aepaꞌamo haneꞌniyana alagepa huꞌa magokepi lokaeꞌa maiꞌnaya taonifiꞌmo yagaino neꞌapateya kini vekamo maiꞌniye.  
\v 3 Ita afoꞌalaꞌmoganimo oꞌmaige lotoꞌamogimo oꞌmaige huꞌa oꞌmaiꞌnae. Alino ateꞌniya afinafeꞌmo ava gemo ohanege faliꞌniya afinafeꞌmo ava gemo ohanege huꞌnigeno Goti Mafaꞌneꞌagana huno maiꞌneno mono huno neꞌapateya vekamo ofalino afaꞌa maige maige huno maiꞌniye.   
\p
\v 4 Ala agi vekamo maiꞌniye, hutapa lapakesamo afitetapa lapakesa afifi hutapa maiyo. Emalehamuꞌa hogote laginago vekamo maiꞌniyaꞌmonanafa kame huno aeno apakaseteno aliꞌniya kagemi yaꞌapifatiꞌmo alino fako huno taisimo amiꞌniye.  
\v 5 Livai nofi vayapatiꞌmo mono huꞌa neꞌapataya vayaꞌmogimo Yu vayaꞌai taisimo aliꞌnae. Keꞌaepa gemoꞌmo hunoꞌaeꞌmo, Livai nofi vayaꞌmo taisi ofalini yatapimo alita apamiyo, huno huꞌnigeꞌa Livai nofi vayaꞌmogi konagaꞌapimogi taisimo aliꞌnae. Konagaꞌapimogimo Emalehamu aginagomo maiꞌnayaꞌmonanafa apakaetegatiꞌmo taisimo aliꞌnae.  
\v 6 Aliꞌnayaꞌmonanafa Melikisetekiꞌa Livai nofi vekamo oꞌmaiꞌniyaꞌmonanafa Emalehamu taisimo neꞌalinoꞌaeꞌmo, Gotiꞌa kaha maeno, huno ha paiꞌniye. Melikisetekiꞌa Gotiꞌmo, kaha maegauve, huno ha paiꞌniya vekaeꞌmo ani gemo huꞌniye.  
\v 7 Muki vayaꞌamogitamo ago afiꞌnonana Gotiꞌa kaha maeno, huno huꞌniya vekamoꞌa hapa paiꞌnigeꞌa afiꞌnaya vayaꞌmo ago aeno apakaseꞌniye.  
\v 8 Mono huꞌa neꞌapataya vayapatiꞌmo magoke vekamo falite falite huꞌa faliꞌnayaꞌmonanafa Goti mukufiꞌmo avo kae maleꞌniya gemoꞌmo, afaꞌa maiꞌniye, huno ava gemo huꞌniya vekamo agiꞌamo Melikisetekiꞌa taisimo aliꞌniye.  
\v 9-10 Melikisetekiꞌe Emalehamuꞌeꞌmo fotu huꞌnaꞌa afinaꞌmo Livaiꞌa alino oꞌateꞌnigeno Emalehamu agufafiꞌmo Livaiꞌa maiꞌniyaꞌmofeꞌmo Emalehamuꞌa taisimo amiꞌnigenoꞌaeꞌmo Livaiꞌa taisimo aliꞌniya vekaꞌeꞌmo magokepi amiꞌniye, huta afaꞌa ge hugune.   
\p
\v 11 Livai nofi vayaꞌmogi mono huꞌa neꞌapataya vayaꞌaitefeꞌmo Isaleli vayaꞌmogi Goti keꞌaepa geꞌamo aliꞌnae. Livai nofi vayaꞌmo mono huꞌa neꞌapataya vayaꞌmogi vayaꞌaina hapa maeꞌnageꞌa haiꞌa hapaiꞌnaesinana alu nofi vekamo mono huno apatesiya vekamo afole oꞌaiyesinaꞌmonanafa agaemo Livai aginagomo Eloni nofi vekamo oꞌmaiꞌnifa Melikisetekigana huno maiꞌniye.  
\v 12 Gotiꞌa mono huꞌa neꞌapataya vayaꞌmo ago apataleꞌniya apaimuꞌyaleꞌmo saufa vekamo afole aiꞌniyaꞌmofeꞌmo keꞌaepa gemo aimuꞌyaleꞌmo saufa keꞌaepa gemo afole aiꞌniye.  
\v 13 Ani ge huta ava gemo huꞌnona vekamo alu nofi vekamo maiꞌniye. Ani nofi vayapatiꞌmo magoke vekamoꞌa ofalini hiꞌyalamuteꞌmo aliꞌyaꞌmo oꞌaliꞌniye.  
\v 14 Lapakaemo ago afiꞌnayana Ala kava netimo Yuta nofi vayapatiꞌmo afole aiꞌnigeno Moseseꞌa ani nofi vayaꞌaifeꞌmo, mono huꞌa neꞌapataya vayaꞌmo maigae, huno osuꞌniye.   
\s1 Mono huno neꞌapateya vekamo Melikisetekigana huno maiꞌniya gemae  
\p
\v 15 Alu vekamo mono huno neꞌapateya vekamo Melikisetekigana huno maiꞌniya vekamo ago afole aiꞌniyaꞌmofeꞌmo magoꞌe huta afita alagepa huta afiꞌnonana saufa gemo afole aiꞌniye.  
\v 16 Agaemo amega apakufalefeꞌmo keꞌaepa geꞌaletiꞌmo afole oꞌaiꞌnifa ofalino afaꞌa maige maige huno neꞌmaino maino hano osuno neꞌmaiya himamuꞌaletiꞌmo mono huno neꞌapateya vekamo afole aiꞌniye.  
\v 17 Gotiꞌa ani kavafeꞌmo hunoꞌaeꞌmo,  
\q1 Melikisetekigana huka mono huka neꞌapatana vekamo maige maige huka maiꞌneka maika hano osuka maigane,  
\m huno hu maleꞌniye.  
\v 18 Inagi atafa keꞌaepa gemoꞌa vayaꞌmo hapa maesiya lokiyaꞌamo ohaneꞌnigeno hapa oꞌmaeꞌniyaꞌmofeꞌmo Gotiꞌa ani gemo ago ataleꞌniye.  
\v 19 Keꞌaepa gemoꞌa haiꞌa hapaisaya kaꞌmo valino oꞌapateꞌniyaꞌmonanafa hemenimo ago aeno agaseꞌniya kavaꞌmo maleꞌnigeta lavayagunagu huta agava neꞌmauna kavatetikeꞌmo Goti haopaleꞌmo neꞌune.   
\p
\v 20 Gotiꞌa aliꞌyaꞌaleꞌmo afaꞌa avaleno oꞌateꞌnifa agoꞌyamo neꞌataleno lokiya gemo hu maleꞌniya geꞌaletiꞌmo avaleno ateꞌniye.  
\v 21 Gotiꞌa mono huꞌa neꞌapataya vayaꞌmo aliꞌyaꞌapileꞌmo apavaleno apatetenoꞌaeꞌmo agaiꞌa agiꞌaletiꞌmo agoꞌyamo neꞌataleno lokiya gemo osuꞌniyaꞌmonanafa agaefekeꞌmo agaiꞌa agiꞌaletiꞌmo lokiya gemo hunoꞌaeꞌmo,  
\q1 Ala kava vekamoꞌna nagaiꞌni nagiꞌniletiꞌmo nagoꞌyamo neꞌataleꞌna lokiya gemo huꞌnaeꞌmo, Mono huka neꞌapatana vekamo Melikisetekigana huka maige maige huka maiꞌneka maika hano osuka muki afinaꞌmo maigane, huꞌna hu maleꞌnovanageꞌna mago alu nagesamo alagi oꞌafiguve,  
\m huno hu maleꞌniye.  
\v 22 Huno hu maleꞌniyaꞌmofeꞌmo Yesuꞌa saufa kotalake gemo aeno agaseꞌniya kotalake geletiꞌmo anonale apakae apaimuꞌyaleꞌmo maisiya vekamo afole aiꞌniye.  
\v 23 Mono huꞌa neꞌapataya vayapatiꞌmo falime falime neꞌeꞌapaeꞌmo aliꞌyaꞌapimo alagi ataleme ataleme eꞌnayaꞌmofeꞌmo asole vayaꞌmo maiꞌnae.  
\v 24 Faliꞌnayaꞌmonanafa agaemo ofalino afaꞌa maige maige huno maigiyaꞌmofeꞌmo mago alu vekamoꞌmo eno agae aimuꞌyaleꞌmo aliꞌyaꞌmo oꞌaligiye.  
\v 25 Agaemo muki afinaꞌmo nunumu huno apatesiyafeꞌmo alagi maige maige huno neꞌmaiyaꞌmofeꞌmo agaiꞌaletiꞌmo Gotitegamo neꞌaya vayaꞌai apakufamo alagi alino katino apateteno apakaetefeꞌmo aliꞌyaꞌamo afaꞌa alino hano huno ategaiye.  
\v 26 Inagi Yesuꞌa ani hogote vekamo mono huno nelateya vekamo maiꞌniyaꞌmofeꞌmo afaꞌa laha maegaiye. Agaemo Gotitegamo alagepa kavaꞌmo huge vayaꞌaitegamo falu fala kavaꞌmo huge huꞌnigenoꞌaeꞌmo hosu kavaꞌmoꞌa alagi alino hosu huno oꞌateꞌnigeno ma mopafi vayakana huno oꞌmaiꞌnifa aote vekamo maiꞌniye. Gotiꞌa kokuꞌnapiꞌmo alino asaga huno ateꞌnigeno kokuꞌnapi neꞌmaiya vayaꞌmo ago aeno apakaseno maiꞌniye.  
\v 27 Mono huꞌa neꞌapataya vayaꞌmogi muki afinaꞌae afinaꞌaeꞌmo apakaiꞌapi hosu kavaꞌapileꞌe muki vayaꞌai hosu kavaꞌapileꞌefeꞌmo afumo heꞌa Gotiꞌmo ofalinimo amiꞌnayaꞌmonanafa agaemo muki afinatefeꞌmo magoke afinaꞌmo vayaꞌai hosu kavaꞌapilefeꞌmo agaiꞌa agufaꞌamo Gotiꞌmo ago amiꞌniye.  
\v 28 Vayaꞌmogi Mosese keꞌaepa gelefeꞌmo mono huꞌa neꞌapataya aliꞌyaꞌmo alisayafeꞌmo haiꞌa metaleꞌnaya vayaꞌmo lekana paiꞌa apateꞌnayaꞌmonanafa Gotiꞌa keꞌaepa gemo akamelegaꞌamo agoꞌyamo neꞌataleno Mafaꞌneꞌamo lekana paino ateꞌniye. Aliꞌyaꞌamo alisiyafeꞌmo alino alagepa huno ateꞌniyanageno muki afinaꞌmo alagepa huno afaꞌa maige maige huno maisiya Mafaꞌneꞌamo lekana paino ateꞌniye.   
\c 8  
\p
\v 1 Inagi mani avoꞌmo nekaona gemo aepaꞌamo haneꞌniyana agaemo ani agufa hogote vekamo mono huno nelateya vekamo maiꞌniye. Agaemo ala kini vekamoꞌmo yagaino neꞌapateya siaꞌaleꞌmo lamaga haopaleꞌmo kokuꞌnapiꞌmo fai maiꞌniye.  
\v 2 Agaemo mago aune seli nopiꞌmo aliꞌyaꞌmo noꞌalifa aote mono nopiꞌmo lama ge aote seli mono nopiꞌmo aliꞌyaꞌmo neꞌaliye. Ma mopafi vayaꞌmogi ani seli mono noꞌmo okiꞌnafa Ala kava neꞌmokeꞌmo kiꞌniye.  
\v 3 Gotiꞌmo fiku neꞌamiya yaꞌmo amige afumo heꞌa ofalinimo amige huꞌa amisayafeꞌmo muki hogote vayaꞌmogi mono huꞌa apatesaya vayaꞌmo lekana paino apateꞌniye. Ani kava huno mani vekamoꞌa ofalinimo amisiya yaꞌmo haneꞌniye.  
\v 4 Mono huꞌa neꞌapataya vayaꞌmogimo keꞌaepa gelefeꞌmo fiku amiꞌnae. Apakaemo hemenimo aliꞌyaꞌmo neꞌaliyaꞌmofeꞌmo agaemo hemenimo ma mopafiꞌmo maiꞌniyesinana mono huno nelateya vekamo oꞌmaiꞌniyesine.  
\v 5 Moseseꞌa ani seli mono noꞌmo kisiyafeꞌmo nehigenoꞌaeꞌmo Gotiꞌa, aveleꞌmo maiꞌnanageꞌnaeꞌmo ago aliꞌna kave liꞌnovanagi ani kava huka ageka alagepa huka aune yaꞌmo alo huvo, huno ha paiꞌniye. Apakaemo kokuꞌnapi haneꞌniya mono nokana huno haneꞌniya agufa aune nopiꞌmo aliꞌyaꞌmo neꞌaliye.  
\v 6 Neꞌaliyaꞌmonanafa hemenimo agaemo aeno agaseꞌniya aliꞌyaꞌmo aliteno kotalake gemo folagapi vekamo maiꞌniye. Ani kotalake gemoꞌa atafa kotalake gemo ago aeno agaseꞌniye. Gotiꞌa, lapa maegauve, huno hu maleꞌniya polomasi geꞌaletiꞌmo saufa kotalake gemo alino he tino ateꞌniye. Saufa kotalake gemo lapa maegauve, huno hu maleꞌniya polomasi geꞌamoꞌmo atafa kotalake gemo lapa maegauve, huno hu maleꞌniya polomasi gemo ago aeno agaseꞌniye.  
\v 7 Hogote kotalake gemoꞌa alagepa huno hapa maeꞌniyesinana henaga kotalake gemo aliꞌyaꞌamo ohaneꞌniyesinaꞌmonanafa  
\v 8 kotalake geꞌamo ago amagiꞌa ataleꞌnayaꞌmofeꞌmo Ala kava neꞌmo Gotiꞌa,  
\q1 Afiyo, mago afinaꞌmo afole aisigeꞌnaeꞌmo saufa kotalake gemo Isaleli vayaꞌaitegaꞌe Yuta vayaꞌaitegaꞌeꞌmo hu malegauve.  
\v 9 Apakinago vayaꞌmo Isipi kotegatiꞌmo apayate aliꞌna apavaleliꞌna eꞌnova afinaꞌmo hu maleꞌnova agufa kotalake gemo osuguve. Apakaetefeꞌmo hu maleꞌnova kotalake gemo akame osuꞌa amagiꞌa ataleꞌnageꞌnaeꞌmo yagaiꞌna oꞌapateꞌna afaꞌa apataleꞌnove.  
\v 10 Inagi ani afinaꞌmo hano hutesigeꞌnaeꞌmo Isaleli vayaꞌaitegamo kotalake gemo hu maleteꞌnaeꞌmo keꞌaepa geꞌnimo aliꞌna apakesafiꞌmo maleteꞌna apaipafiꞌmo avoꞌmo kae malegauve. Gotiꞌapimoꞌnamo maisugeꞌa nagaiꞌni vayaꞌnimo maigae.  
\v 11 Ani afinaꞌmo muki ala apaki vayaꞌe aise apaki vayaꞌmogiꞌeꞌmo nagaemo nageꞌa aeto hugayaꞌmofeꞌmo muki vayaꞌamogimo apao vayaꞌe konagaꞌapimogiꞌeꞌmo, Ala kava neꞌmo agetapa aeto hiyo, huꞌa aliꞌa apaya oꞌmalegae.  
\v 12 Hosu kavaꞌapieꞌmo nahau huꞌna apateteꞌna hosu kavaꞌapiꞌe keꞌaepa geꞌnimo amagiꞌa neꞌatalaya kavaꞌapileꞌefeꞌmo nagesamo oꞌafiꞌna nage kaniꞌna atalegauve,  
\m huno huꞌniye.  
\v 13 Gotiꞌa mani kotalake geeꞌmo, \it saufa kotalake geꞌnimae,\it* huno huꞌniyaꞌmofeꞌmo hogote kotalake gemo atafa heꞌnigeno aliꞌyaꞌamo ago hano huꞌniyanageno aise afinaꞌmo maino alagi hano hugiye.   
\c 9  
\s1 Ma mopafi seli mono nopiꞌmo mono huꞌnaya kavafeꞌmo ava gemo huꞌniya gemae  
\p
\v 1 Hogote kotalake gemo Gotiꞌa alino apamiꞌnigeꞌa mono nehaya kavatefeꞌmo keꞌaepa gemo hanege ma mopafi mono noꞌmo hanege huno haneꞌniye.  
\v 2 Mago seli mono nopiꞌmo lavolavomo aeꞌa akani maleꞌnageno lole noꞌmo haneꞌniye. Afelaga noꞌmo agiꞌamo aote mono none. Ani nopiꞌmo lamu hanege hiꞌyalamuꞌmo hanege huno haneꞌniye. Hiꞌyalamuteꞌmo peleti mayamo Gotiꞌmo neꞌamiya peleti mayamo haneꞌniye.  
\v 3 Lavolavomo aeꞌa akani maleꞌnaya noꞌmo agiꞌamo alagi aote mono noꞌmo haneꞌniye.  
\v 4 Ani nopiꞌmo hiꞌyalamuꞌmo goli yafatetiꞌmo alo huꞌnaya hiꞌyalamuꞌmo haneꞌniye. Ani hiꞌyalamuteꞌmo alagepa atumo neꞌaiya yaꞌmo kaeꞌnae. Mago kesimo agiꞌamo kotalake kesimo yosaletiꞌmo alo hu maleꞌneꞌa goli yafatetiꞌmo yosaleꞌmo aiꞌa ati kae maleꞌnaya kesimo ani nopiꞌmo haneꞌniye. Ani kesifiꞌmo goli yafa yuvapamo hanege Eloni hayopa kayoꞌafatiꞌmo ausisi aeꞌniya hayopa kayoꞌmo hanege lole yafatalateꞌmo kotalake gemo avo kae maleꞌniya yafatalaꞌmo hanege huno haneꞌniye. Yuvapafiꞌmo mago neꞌyaꞌmo kokuꞌnapatiꞌmo emineꞌniya neꞌyaꞌmo agiꞌamo manamo haneꞌniye.  
\v 5 Lole enisole vekalaꞌmo ha le vekalaꞌmo anauneꞌalaꞌmo kesileꞌmo he tiꞌana maiꞌnaꞌae. Gotiꞌa aipamoꞌmo falu huno apatesiyafeꞌmo afumo kolatetiꞌmo aiꞌa fuli fuli nehiya yateꞌmo hanakumo aliꞌana ataleꞌana yagaiꞌana maiꞌnaꞌae. Hemenimo ani kavafeꞌmo magoꞌe huta alagi ava gemo afaꞌa osugune.   
\p
\v 6 Inagi muki ani yakoꞌmo alo huꞌa maleꞌnageꞌapaeꞌmo mono huꞌa neꞌapataya vayaꞌmogi muki afinaꞌmo afelaga nopikeꞌmo haiꞌa aliꞌyaꞌapimo alige alige huꞌa maiꞌnae.  
\v 7 Maiꞌnayaꞌmonanafa hogote vekamo mono huno neꞌapateya vekamokeꞌmo ani anaga nopiꞌmo muki kafugaꞌae kafugaꞌaeꞌmo magoke afinaꞌmo haitale haitale huno maiꞌniye. Afaꞌa ohaiꞌnifa afumo heno kolaꞌamo yuvapafiꞌmo lakino alinino haino agaiꞌa hosu kavateꞌe muki vayaꞌai hosu kavaꞌapileꞌefeꞌmo Gotiꞌmo amiꞌniye.  
\v 8 Goti Aunemeꞌamoꞌmo ani kavaꞌmo aepaꞌaeꞌmo, hogote seli mono noꞌmo afaꞌa haneꞌniya afinaꞌmo anaga nopiꞌmo alagi aote mono nopiꞌmo vayaꞌmo haisaya kaꞌmo afole yategamo afole oꞌaiꞌniye, huno huꞌniye.  
\v 9 Ani agufa aune kavaꞌmo hemeni afina kavafeꞌmo huꞌniye. Alino apave linoꞌaeꞌmo, fiku neꞌamiya kavaꞌmoꞌe afumo heꞌa neꞌamiya yaꞌmoꞌeꞌmo mono nehaya vayaꞌai apakupi mafaꞌnemo alagi afaꞌa alino alagepa huno oꞌapategaiye.  
\v 10 Ani agufa kavaꞌmo amega apakufale kavaꞌmo haneꞌniyana neꞌyanagi aninagi sese nehaya kavaꞌmogi huno haneꞌniye. Ani kavaꞌmo haneme haneme neꞌesigenoꞌaeꞌmo saufa afinaꞌmo Gotiꞌa alino alagepa huno apatesiya afinaꞌmo afole aisigenoꞌaeꞌmo hano hugiye.   
\p
\v 11 Ani kavaꞌmo haneꞌniyaꞌmonanafa Kalaisiꞌa alagepa kavaꞌmo afole aisiya kavatefeꞌmo hogote vekamo mono huno neꞌapateya vekamoꞌmo ago aeno agaseꞌniya alagepa seli mono nopiꞌmo afole aiꞌniye. Vayaꞌmogimo ani seli mono noꞌmo okige Gotiꞌa ma mopamo alo huꞌniya afinaꞌmo okige huꞌniye.  
\v 12 Agaemo mememo kolaꞌaletiꞌe aikeli pulumakamo kolaꞌaletiꞌeꞌmo aote mono nopiꞌmo faleno ohaiꞌnifa agaiꞌa kolaꞌaletiꞌmo muki afinatefeꞌmo magoke afinaꞌmo alagi faleno haitenoꞌaeꞌmo maige maige huta maisunafeꞌmo alagi hatu maeno lateteno haiꞌniye.  
\v 13 Mono huꞌa neꞌapataya vayaꞌmogimo pulumakamo kolaꞌmo alige mememo kolaꞌmo alige aikeli pulumakamo heꞌa atafiꞌmo kaeꞌnaya laꞌnefamo alige huꞌa aliꞌneꞌa vayaꞌai apakufaleꞌmo aiꞌa fuli fuli huꞌa faleꞌa neꞌapateꞌapaeꞌmo mono hisayafeꞌmo apakufamo aeꞌa kalo paeꞌa apateꞌnae.  
\v 14 Afumo kolaꞌmoꞌa vayaꞌai amega apakufaleꞌmo aeno kalo paeno neꞌapateyaꞌmonanafa afaꞌa neꞌmaiya yaꞌmo alino neꞌapamiya Goti aliꞌyaꞌamo alisayafeꞌmo Kalaisi kolaꞌamoꞌa magoꞌe huno lapakupi mafaꞌnemo fali kavaꞌmo aliꞌyaꞌalefeꞌmo aeno kalo paeno lapategaiye. Agaemo hosu kavaꞌamo alagi ohaneꞌniya vekamo maige maige huno neꞌmaiya Aunemeꞌaletiꞌmo agaiꞌa agufaꞌamo Gotiꞌmo amiꞌniye.  
\v 15 Ani kava huꞌniyaꞌmofeꞌmo saufa kotalake gemo folagapi vekamo maiꞌniye. Agaemo Gotiꞌa keya aeno ge huꞌniya vayaꞌaifeꞌmo polomasi gemo hunoꞌaeꞌmo, aliꞌna lapamiguve, huno huꞌniya alagepa yaꞌmo hanege hanege huno hanesiya yaꞌmo mafaꞌneꞌapimogi muki afoꞌapimogi yaꞌmo neꞌaliya kava huꞌa alisayafeꞌmo atafa kotalake gemo amagiꞌa ataleꞌnaya vayaꞌai hosu kavaꞌapilefeꞌmo falino miya faino hatu maeno apateꞌniye.   
\p
\v 16 Mago vayaꞌmogi manu gemo huꞌapaeꞌmo, kagemi yaꞌnimo aliyo, huꞌa hapa paiteꞌa nefalisageꞌapaeꞌmo afaꞌa aligayaꞌmonanafa ofaliꞌa afaꞌa maiꞌnisageꞌapaeꞌmo oꞌaligae.  
\v 17 Afaꞌa neꞌmaiya afinaꞌmo manu gemo hu maleꞌnaya gemo afaꞌa nehaneyaꞌmonanafa falisagenoꞌaekeꞌmo ani manu gemo hu maleꞌnaya gemo afole aigiye.  
\v 18 Ani kava huno Gotiꞌa atafa kotalake gemo afaꞌa osuꞌnifa kotalake gemo afole aisiyafekeꞌmo pulumakamo kolatetiꞌmo hu maleꞌniye.  
\v 19 Ani kavatefeꞌmo Moseseꞌa muki keꞌaepa geꞌamo muki vayaꞌaifeꞌmo hapa paiteno aikeli pulumakaꞌe memeꞌeꞌmo heteno kolaꞌamo alino anipiꞌmo laki maleꞌneno sipisipimo haesa ayokaꞌmo alino yosa akopamo agiꞌamo hisopu akopaleꞌmo maleno ki maleꞌneno kolapiꞌmo aeteno keꞌaepa gemo haneꞌniya mukuleꞌe muki vayaꞌai apakufaleꞌeꞌmo aino fuli fuli huno faleno apateꞌniye.  
\v 20 Agaemo, \it mani kolaꞌmoꞌa Gotiꞌmo akame hiyo, huno hu maleꞌniya kotalake gemo alino afole aino ateꞌniye,\it* huno hapa paiꞌniye.  
\v 21 Ani kava huno mono nehaya yateꞌe seli mono noteꞌeꞌmo aino fuli fuli huno faleno ateꞌniye.  
\v 22 Vayaꞌmogi keꞌaepa gemo akame hisayafeꞌmo alagi aise hogoꞌamo muki hosu kavaꞌapimo afumo kolaꞌaletiꞌmo aeꞌa kalo paeꞌa atalesaya agufa kavaꞌmo nehae. Kolaꞌmoꞌa aino olakiꞌnisimoꞌmo Gotiꞌa vayaꞌai hosu kavaꞌapimo alino oꞌatalegaiye.   
\s1 Kalaisiꞌa faliteno hosu kavaꞌapimo alino ataleꞌniya gemae  
\p
\v 23 Ani kavaꞌmo haneꞌniyaꞌmofeꞌmo apakaemo afumo kolatetiꞌmo ma mopafi mono kavaꞌmo nehuꞌa kokuꞌnate aune yatefeꞌmo aeꞌa kalo paeꞌa ataleꞌnayaꞌmonanafa kokuꞌnapi yaꞌmoꞌa aeno kalo paeno atalesiyafeꞌmo afumo amiꞌnaya ofalinimo ago aeno agaseꞌniya ofaliniletiꞌmo aeno kalo paeno ataleꞌniye.  
\v 24 Ani kavatefeꞌmo Kalaisiꞌa aote seli mono noꞌmo vayaꞌmogi ki maleꞌnaya mono nopiꞌmo lama ge aune mono nopiꞌmo faleno ohaiꞌnifa laha maesiyafeꞌmo kokuꞌnapiꞌmo Goti haopaleꞌmo faleno haiꞌniye.  
\v 25 Yu vayaꞌaiteꞌmo hogote vekamo mono huno neꞌapateya vekamoꞌa muki kafugaꞌae kafugaꞌaeꞌmo agaiꞌa kolaꞌamo alinino ohaiꞌnifa afu kolaꞌmo alininuno alagi aote mono nopiꞌmo haitale haitale huno maiꞌniye.  
\v 26 Huno maiꞌniyaꞌmonanafa Kalaisiꞌa ani kavaꞌmo osuꞌnifa muki afinaꞌae afinaꞌaeꞌmo ofalinimo amisiyafeꞌmo kolaꞌamo aliteno faleno ohaiꞌniye. Muki afinaꞌae afinaꞌaeꞌmo agaiꞌamo ofalini amiyesinana ma mopamo alo huꞌniya afinatetiꞌmo falite falite hume hume neꞌesine. Hiyesinaꞌmonanafa hemeni afinaꞌe hano hisiya afinaꞌefeꞌmo kolaꞌaletiꞌmo hosu kavaꞌapimo alagi alino atalesiyafeꞌmo magoke afinaꞌmo vayaꞌai apaulagaleꞌmo afole aiꞌniye.  
\v 27 Gotiꞌa, muki vayaꞌmogi apakaiꞌapi hosu kavaꞌapilefeꞌmo magoke afinaꞌmo falitesageꞌna agoti huꞌna apategauve, huno hu maleꞌniye.  
\v 28 Ani gelefeꞌmo Kalaisiꞌa asole vayaꞌai hosu kavaꞌapimo alino atalesiyafeꞌmo magoke afinaꞌmo agaiꞌa agufaꞌamo Gotiꞌmo amiꞌniye. Agaemo henagaꞌamo vayaꞌai hosu kavaꞌapimo alino atalesiyafeꞌmo ma mopafiꞌmo afole oꞌaigifa agaefeꞌmo agava neꞌmaiya vayaꞌai apakufamo alagi alino katino apatesiyafeꞌmo afole aigiye.   
\c 10  
\p
\v 1 Gotiꞌa Yu vayaꞌmo apamiꞌniya keꞌaepa gemoꞌmo alagepa aune kavaꞌmo ohaneꞌnifa alagepa kavaꞌmo Gotiꞌa afole aigiye, huno hu maleꞌniya kavaꞌmo alino lave lisiyafeꞌmo yegemo auneꞌagana huno haneꞌniye. Kafugaꞌae kafugaꞌaeꞌmo afumo heꞌa amiꞌnayaꞌmonanafa ani agufa ofalinimoꞌa alagepa huꞌa maige maige huꞌa maisayafeꞌmo Gotitegamo neꞌvaya vayaꞌmo alagi alino alagepa huno oꞌapategaiye.  
\v 2 Alagi alino alagepa huno apateyesinana magoꞌe huꞌa Gotiꞌmo ofalinimo alagi oꞌamiꞌnaesine. Mono huꞌnaya vayaꞌmo aeno kalo paeno apateyesinana apakupi mafaꞌnemoꞌa hosu kavatapimo haneꞌniye, huno osuꞌniyesine.  
\v 3 Huno osuꞌniyesinaꞌmonanafa ani agufa ofalini kavatefeꞌmo muki kafugaꞌae kafugaꞌaeꞌmo hosu kavaꞌapieꞌmo apake okaniꞌa apakesa afifi huꞌa maiꞌnae.  
\v 4 Pulumakamo kolaꞌmoꞌe mememo kolaꞌmoꞌeꞌmo hosu kavaꞌapimo afaꞌa alino oꞌatalegaiye.   
\p
\v 5 Afaꞌa alino oꞌatalegaiyaꞌmofeꞌmo Kalaisiꞌa ma mopafiꞌmo emiꞌnenoꞌaeꞌmo,  
\q1 Afumo heꞌa nekamiya kavaꞌe ofalinimo nekamiya kavaꞌefeꞌmo alagi okahauꞌniyaꞌmofeꞌmo nagufamo alika alo huka nateꞌnane.  
\v 6 Kagaemo afumo heꞌa hiꞌyalamuteꞌmo maleꞌneꞌa nekaya kavaꞌe hosu kavaꞌapilefeꞌmo afumo heꞌa nekamiya kavateꞌefeꞌmo amuse huka oꞌapateꞌnane.  
\v 7 O Gotiyo, mukukafiꞌmo nava gemo huka avoꞌmo kae maleꞌnane. Ani gelefeꞌmo kahauꞌniya kavaꞌmo hisuvafeꞌmo ago emiꞌneꞌnove, huꞌna huꞌnove,  
\m huno huꞌniye.  
\v 8 Hogoteno hunoꞌaeꞌmo, \it Afumo heꞌa nekamiya kavanagi ofalinimo nekamiya kavanagi afumo heꞌa hiꞌyalamuteꞌmo maleꞌneꞌa nekaya kavanagi hosu kavaꞌapilefeꞌmo nekamiya kavanagi huno okahauꞌniyaꞌmofeꞌmo amuse huka oꞌapateꞌnane,\it* huno ha paiꞌniye. Ani kavaꞌmo nehuꞌapaeꞌmo keꞌaepa gemo akame nehayaꞌmonanafa amuse osuꞌniye.  
\v 9 Inagi henagaꞌamo hunoꞌaeꞌmo, \it O Gotiyo, kahauꞌniya kavaꞌmo hisuvafeꞌmo emiꞌneꞌnove,\it* huno ha paiꞌniye. Inagi Gotiꞌa henagaꞌamo afole aiꞌniya kavaꞌmo alino afole aino atesiyafeꞌmo hogote kavaꞌmo ago alino ataleꞌniye.  
\v 10 Yesu Kalaisiꞌa Gotiꞌmo hauꞌniya kavaꞌmo huꞌniyaꞌmofeꞌmo muki afinatefeꞌmo magoke afinaꞌmo agaiꞌa agufaꞌamo amiꞌniya ofaliniletiꞌmo hosu kavatimo alagi aeno kalo paeꞌnigeta laote alagepa vayaꞌamo maiꞌnone.   
\p
\v 11 Muki Yu vayaꞌmogimo mono huꞌa neꞌapataya vayaꞌmo he tiꞌa maiꞌneꞌapaeꞌmo muki afinaꞌae afinaꞌaeꞌmo aliꞌyaꞌmo neꞌaliꞌapaeꞌmo ani agufa ofalinimo amige amige huꞌa maiꞌnayaꞌmonanafa ani agufa ofalinimoꞌmo hosu kavaꞌapimo afaꞌa alino oꞌatalegaiye.  
\v 12 Nehayaꞌmonanafa ani vekamoꞌa muki afinatefeꞌmo magoke ofalinimo amiteno Goti lamaga haopaleꞌmo fai maiꞌniye.  
\v 13 Ani afinatetiꞌmo Gotiꞌa kame vayaꞌamo alino aiyafiꞌmo apatesiyafeꞌmo agava neꞌmaiye.  
\v 14 Agaemo magoke ofalinimo amiteno apavaleno apaoteꞌmo apateꞌneno alagi alino alagepa huno apateꞌniyanageꞌa alagepa huꞌa maige maige huꞌa maigae.  
\v 15 Agaemo ani kavatetiꞌmo laha paiteno Aote Aunemeꞌamoꞌeꞌmo aeno hakalo huno laha painoꞌaeꞌmo,  
\v 16 Ala kava neꞌmoꞌa,  
\q1 Ani agufa kotalake gemo afole aisiya afinaꞌmo apakaetegamo hu malegauve. Keꞌaepa geꞌnimo aliꞌna apaipafiꞌmo maleteꞌna apakesafiꞌmo avo kae malegauve, huno hu maleꞌniye,   
\m
\v 17 huno huteno magoꞌe gemo hunoꞌaeꞌmo,  
\q1 hosu kavaꞌapiꞌe keꞌaepa geꞌnimo amagiꞌa ataleꞌnaya kavaꞌapileꞌefeꞌmo magoꞌe huꞌna nagesamo oꞌafiꞌna afaꞌa nagekaniꞌna apategauve,  
\m huno huꞌniye.  
\v 18 Gotiꞌa hosu kavaꞌapimo ago alino ataleꞌniyaꞌmofeꞌmo hosu kavaꞌapilefeꞌmo halate amisaya ofalinimo alagi ohaneꞌniye.   
\s1 Koli osuta Goti haopaleꞌmo vigetao, huno huꞌniya gemae  
\p
\v 19 Konagaꞌnimogitapae, ani gemo huꞌniyaꞌmofeꞌmo koli osuta Yesu kolaꞌaletiꞌmo alagi aote mono nopiꞌmo faleta haigetao.  
\v 20 Agaemo lavolavo kitamo ago yakino lateꞌniyanageta agufaletiꞌmo saufa kaꞌmo maige maige huta maisuna kaꞌmo ago valino lateꞌniyaꞌmofeꞌmae.  
\v 21 Siosi vayaꞌaiteꞌmo yagaino neꞌapateya vekamo maiꞌneno Ala kava netimo mono huno nelateya vekamo maiꞌniyaꞌmofeꞌmo  
\v 22 lama ge laipamo nekalita lole lagesamo oꞌafita lokiya vaita lagesa afita fatago nehutaeꞌmo Goti haopaleꞌmo haigetao. Laipafiꞌmo aino fuli fuli huno lateꞌnigenoꞌaeꞌmo yuꞌilaga vekatimoꞌmo hosu kavatapimo haneꞌniye, huno nosiye. Lagufaleꞌmo alagepa anitetiꞌmo lagufaleꞌmo faleno lateꞌniyanagi haigetao.  
\v 23 Ani kava huguve, huno laha paiꞌniya vekamoꞌa geꞌamo aeno oꞌatagaegaiyaꞌmofeꞌmo agava neꞌmaita lavayagunagu nehuna kavatefeꞌmo lole lagesamo oꞌafita atafauta alagi higetao.  
\v 24 Lagaemo alita he tita apatesunageꞌapaeꞌmo hapau apayamopafiꞌmo hapauge alagepa kavaꞌmo huge hisayafeꞌmo konagatieꞌmo lagesa afifi huta maigetao.  
\v 25 Mago vayaꞌmo aliꞌa anupa huꞌa neꞌmaiya kavaꞌmo ataleꞌnayaꞌmofeꞌmo oꞌataleta alagepa kava hiyo, huta hapa paisunageꞌa laha paisageta alita anupa huta maigetao. Alopa afinaꞌmo neꞌegetapa neꞌagayaꞌmofeꞌmo ani kavaꞌmo magoꞌe hutapa hiyo.   
\p
\v 26 Lagaemo lama gemo ago ageta alagepa huta ageꞌnonaꞌmofeꞌmo amagita atalesunafeꞌmo, kanalene, huta hisunana hosu kavatimo aeno kalo paeno atalesiya ofalinimo alagi ohaneꞌniye.  
\v 27 Ohaneꞌniyaꞌmofeꞌmo Gotiꞌa agoti huno latesiya kavafekeꞌmo koli huta agava maisuna kavaꞌmo haneꞌniye. Aipamo leno neꞌapatesigenoꞌaeꞌmo kame vayaꞌamo atamoꞌmo leno apasaga ligiye.  
\v 28 Muki vayaꞌmogimo Mosese keꞌaepa gemo ago amagiꞌa ataleteꞌapaeꞌmo afa gemo haneꞌniye, huꞌa huꞌnaya vayaꞌmo ago faliꞌnae. Agoti gemo neꞌafiyategamo lole vekalaꞌmoganimofi loleꞌe magoꞌe vayaꞌmogimofi huꞌa apakaefeꞌmo, hosu kavaꞌmo huꞌnae, huꞌa huꞌnageꞌapaeꞌmo hapau huꞌa oꞌapateꞌa kamiti apamagiꞌnae.  
\v 29 Inagi mago vekamoꞌa Goti Mafaꞌneꞌaeꞌmo, ina agufa vekae, huno agiꞌaleꞌmo alino afepi atege kotalake kolaꞌamo alino aote maleꞌniya kolaꞌaeꞌmo ina agufa kolane, huno agesamo afige fiku hapa maeno neꞌapamiya Aunemeꞌaeꞌmo huno faipa huno atege huꞌnisiyana anonaꞌalefeꞌmo magoꞌe huno lusi kayoꞌmo alisiya vekamo maiꞌniye, huꞌa apakesamo afigae.  
\v 30 Ala kava neꞌmoꞌa, \it hosu kavaꞌapimo anonaꞌapilefeꞌmo aeꞌna atagaina huꞌna kayoꞌmo neꞌapamuva vekamo maiꞌnove, huno huꞌniya vekamo ago ageꞌnone.\it* Magoꞌe gemo hunoꞌaeꞌmo, \it Ala kava neꞌmoꞌa vayaꞌamo alino fako huno apategaiye,\it* huno hu maleꞌniye.  
\v 31 Gotiꞌa afaꞌa neꞌmaiya vekamo maiꞌniyaꞌmofeꞌmo ayapiꞌmo apatafauno maiꞌnisiya vayaꞌmogimo lusi kava huꞌa koli hisaya kavaꞌmo haneꞌniye.   
\p
\v 32 Hogotetapa maiꞌnaya kavafeꞌmo lapakesamo afita ho hiyo. Gotiꞌa ha le yaꞌamoꞌmo lapaipafiꞌmo aeno ha leꞌnigetapa ageꞌnae. Agetetapaeꞌmo lusi hanageke yaꞌmo aliꞌnetapaeꞌmo oꞌataleta lokiya vaitapa lapayamufa valeꞌnae.  
\v 33 Lapakaemo vayaꞌmogi vayaꞌai apaulagaleꞌmo huꞌa faipa huꞌa nelapateꞌa lapakaetegamo hosu kavaꞌmo huꞌnaya agufa hanageke yaꞌmo alige mani agufa kana yaꞌmo aliꞌnaya vayaꞌeꞌmo afalu afalugana hutapa neꞌmaiya agufa hanageke yaꞌmo alige hutapa maiꞌnae.  
\v 34 Nagaemo kalavusifiꞌmo maiꞌnogetapaeꞌmo lapau hutapa nateꞌnae. Kagemi yatapimo kumayaꞌmo aliꞌnagetapaeꞌmo kanalene, hutapa huꞌnae. Hogote kagemi yatimo kokuꞌnapiꞌmo okasalisiya kagemi yatimo haneꞌniye, hutapa lapaipafiꞌmo lapakesamo afiꞌnayaꞌmofeꞌmae.  
\v 35 Ani kava hutapa maiꞌnayaꞌmofeꞌmo oꞌataletapa atafauta alagi hutapa maiyo, alopa miyatapimo aligayanagi.  
\v 36 Lapakaemo Gotiꞌa hauꞌniya kavaꞌmo hutetapa lapamiguve, huno huꞌniya yaꞌmo alisayafekeꞌmo atafauta alagi hutapa maiyo.  
\v 37 Ani kavatefeꞌmo Goti mukufi gemoꞌmo hunoꞌaeꞌmo,  
\q1 Aise afinaꞌmo utesigeno eminesiya vekamo alagi eminegaiye. Gemo afino oꞌmaigifa malage huno eminegaiye.  
\v 38 Inagi fatago vayaꞌmo apakesa afiꞌa fatago nehaya kavatetiꞌmo alagepa huꞌa maigayaꞌmonanafa mago vekamo halate ataleno aino atagi neno uꞌnisiyana alagi aiseꞌamo amuse huꞌna oꞌategauve,  
\m huno hu maleꞌniye.  
\v 39 Huno hu maleꞌniyaꞌmonanafa lagaemo ataleꞌa aiꞌa atagi neꞌa uꞌa lageso nehaya nofi vayapatiꞌmo oꞌmaiꞌnonaꞌmonanafa lagaemo apakesa afiꞌa fatago nehageno apakufamo alino katino neꞌapateya nofi vayapatiꞌmo maiꞌnone.   
\c 11  
\s1 Apakesa afiꞌa fatago huꞌnaya vayaꞌaifeꞌmo apava gemo huꞌniya gemae  
\p
\v 1 Lagesa afita fatago nehuna kavaꞌmo afole aisiya kavatefeꞌmo lavayagunagu huta agava neꞌmauna kavaꞌmo oꞌageꞌnona kavaꞌmo alino lave neligeta alagi ago ageꞌnone.  
\v 2 Ema akeyaꞌvilaga vayaꞌmogi apakesa afiꞌa fatago huꞌnaya kavatetiꞌmo Gotiꞌa, naulagaleꞌmo fatago vayaꞌmo maiꞌnae, huno hapa paiꞌnigeꞌa alagepa apakiꞌapimo aliꞌnae.  
\v 3 Lagaemo lagesa afita fatago nehuna kavatetiꞌmo hutaeꞌmo, Gotiꞌa geꞌaletiꞌmo ma mopagi kokuꞌnanagi muki neꞌagona yaꞌmogi huno noꞌagona yatetiꞌmo alo hu maleꞌniye, huta afita aeto nehune.   
\p
\v 4 Evoꞌa agesa afino fatago huꞌniya kavatetiꞌmo alagepa ofalinimo Keni ofalinimo ago aeno agaseꞌniya ofalinimo Gotiꞌmo amiꞌniye. Gotiꞌa amiꞌniya ofalinieꞌmo agesamo afinoꞌaeꞌmo, naulagaleꞌmo fatago vekamo maiꞌnane, huno ha paiꞌniye. Evoꞌa ago faliꞌniyaꞌmonanafa hemenimo agesa afino fatago huꞌniya kavatetiꞌmo ge nehiye.   
\p
\v 5 Inokiꞌa agesa afino fatago huꞌniya kavatetiꞌmo ofalino afaꞌa maiꞌniye. \it Gotiꞌa kokuꞌnapiꞌmo ago avalelino haiꞌniyaꞌmofeꞌmo kahauya huꞌnayana ageꞌa ava oteꞌnae.\it* Gotiꞌa kokuꞌnapiꞌmo avalelino ohaiꞌniya afinaꞌmo hogoteno Inokifeꞌmo amuse huno ateꞌniyaꞌmofeꞌmae, huno huꞌniye.  
\v 6 Amuse huno ateꞌniyaꞌmonanafa apakesa afiꞌa fatago nosaya vayaꞌaifeꞌmo Gotiꞌa amuse huno apatesiyafeꞌmo magoke alagepa kavaꞌmo alagi afaꞌa osugae. Na kava hinageꞌapaene. Gotitegamo neꞌvaya vayaꞌmogimo huꞌapaeꞌmo, Gotiꞌa maiꞌniyanagetae, huꞌa agaefeꞌmo apayamukiki huꞌa kahauya huꞌa ageꞌa ava tesayafeꞌmo nehaya vayaꞌmo alagepa yaꞌmo alino neꞌapamiye, huꞌa apakesa afiꞌa fatago nehae.  
\v 7 Gotiꞌa muki vayaꞌmogimo oꞌageꞌnaya kavafeꞌmo Noafeꞌmo, ehekae, huno, hosu vayaꞌmo alagi aliꞌna hano huꞌna apatalegauve, huno ha paiꞌnigeno Noaꞌa lusi kava huno amoꞌya neꞌainoꞌaeꞌmo agesa afino fatago huꞌniyaꞌmofeꞌmo afamo anagaꞌamogi apakufamo alino katino apatesiyafeꞌmo mago alopa sipimo alo huꞌniye. Ani kavaꞌmo huꞌniya kavatetiꞌmo ma mopafi vayaꞌaifeꞌmo, lapakaemo hosu kavaꞌmo nehayanagetapa faligae, huno alino apave liꞌniye. Agaemo Gotitegatiꞌmo fatago kavaꞌmo apakesa afiꞌa fatago nehageno alino neꞌapamiya agufa fatago kavaꞌmo aliꞌniye.   
\p
\v 8 Gotiꞌa Emalehamuꞌmo amiꞌniya kotegamo visiyafeꞌmo keya aeno ge huꞌnigeno Emalehamuꞌa agesa afino fatago huꞌniya kavatetiꞌmo ani gemo afiteno koꞌamo ago ataleno oꞌageꞌniya kotegamo uꞌniye.  
\v 9 Agesa afino fatago huꞌniya kavatetiꞌmo Gotiꞌa polomasi gemo ha painoꞌaeꞌmo, mago mopamo hakiꞌna kamiguve, huno ha paiꞌniya kotegamo alu nofi vayaꞌai mopaleꞌmo nata nenuno seli nopiꞌmo maiꞌniye. Gotiꞌa Emalehamufeꞌmo, fiku kaha maeꞌna kamiguve, huno ha paiꞌniya polomasi gemo hana paiꞌniya vekalaꞌmo Aisikiꞌe Yekopuꞌeꞌmo seli noꞌapifiꞌe noꞌapifiꞌeꞌmo magokepi lokaeꞌa maiꞌnae.  
\v 10 Agaemo Gotiꞌa agesamo afino alo huno faino ateꞌniya taonifiꞌmo maisiyafeꞌmo agava maiꞌniye.  
\v 11 Selaꞌa agesa afino fatago huꞌniya kavatetiꞌmo himamuꞌamo aliteno aipaguꞌeꞌmo maiteno mafaꞌnemo alino atesiya afinaꞌamo ago hano huꞌniyaꞌmonanafa mafaꞌnemo alino ateꞌniye. Agaemo mafaꞌnemo kamiguve, huno polomasi gemo huno ha paiꞌniya Gotifeꞌmo, geꞌageꞌmo hugeno oꞌatalegaifa alagikeꞌmo geꞌamo akame hugiya vekae, huno agesamo afiꞌniye.  
\v 12 Huꞌniyaꞌmofeꞌmo magoke vekamo ago alagi hogoꞌamo faligefeꞌmo huꞌniya vekafatiꞌmo asole aginago vayaꞌmo kokuꞌnate asole kanefiꞌmo haneꞌniyanageta lekana opaige ani kahaepamo lekana opaige hisuna agufa aginago vayaꞌamo afole aiꞌnae.   
\p
\v 13 Ani muki vayaꞌamogimo apakesa afiꞌa fatago hume hume neꞌeꞌapaeꞌmo faliꞌnae. Gotiꞌa polomasi gemo hunoꞌaeꞌmo, fiku lapa maeꞌna lapamiguve, huno hu maleꞌniya yaꞌmo oꞌaliꞌnayaꞌmonanafa muga afagiꞌaleꞌmo haneꞌnigeꞌa ageteꞌapaeꞌmo, aligune, huꞌa magoke apakesamo afiteꞌa ani geleꞌmo anukiꞌa alagi huꞌa maigekana huꞌa atafauꞌa alagi huꞌa maiꞌnae. Ani kavaꞌmo huꞌa maiꞌneꞌapaeꞌmo, nata vayaꞌmo alu kotega vayaꞌmo maiꞌnone, huꞌa huꞌnae.  
\v 14 Ani gemo nehaya vayaꞌmogimo, Afotimo kotegamo haita alagi maisunafeꞌmo lavayagunagu huta agava neꞌmaune, huꞌa ha leꞌa hapa nepaiye.  
\v 15 Apakaemo ataleꞌa eꞌnaya kotegaeꞌmo apakesamo afiꞌnaesinana halate aiꞌa atagi neꞌa uꞌnaesinaꞌmonanafa  
\v 16 alagepa koꞌmo aeno agaseꞌniya kokuꞌna kotefeꞌmo hapauꞌniye. Gotiꞌa maisaya taonimo alo huno apateꞌniyaꞌmofeꞌmo Gotitimoꞌmo maiꞌniye, huꞌa agi neꞌaya gelefeꞌmo avagage nosiye.  
\v 17 Gotiꞌa Emalehamuꞌmo amalageka huꞌnigenoꞌaeꞌmo agesa afino fatago huꞌniya kavatetiꞌmo mafaꞌneꞌamo Aisikiꞌmo amagino ofalinimo amiꞌniye. Polomasi gemo afiꞌniya vekamoꞌa magoke mafaꞌneꞌamo amagino ofalinimo amiꞌniye.  
\v 18 Gotiꞌa ani mafaꞌnekeꞌmo, \it Aisiki vayapatiꞌmo kaginago vayaꞌmo maigae,\it* huno hu maleꞌniye.  
\v 19 Agaemo, Gotiꞌa himamuꞌaletiꞌmo falisiya kavategatiꞌmo afaꞌa alino he tino ategaiye, huno agesamo afitenoꞌaeꞌmo aune kavaꞌmo huno faliꞌniyatetiꞌmo halate avaleꞌniye.   
\p
\v 20 Aisikiꞌa agesa afino fatago huꞌniya kavatetiꞌmo afole aisiya kavatefeꞌmo Yekopuꞌe Isoꞌefeꞌmo, Gotiꞌa lahana maeno, huno hana paiꞌniye.  
\v 21 Yekopuꞌa agesa afino fatago huꞌniya kavatetiꞌmo faligefe nehunoꞌaeꞌmo Yosefe mafaꞌnelafeꞌmo, Gotiꞌa lahana maeno, huno hana paiteno hayopa kayoꞌamo alino hayopa faino maiꞌneno Gotifeꞌmo mono huꞌniye.  
\v 22 Yosefeꞌa agesa afino fatago huꞌniya kavatetiꞌmo faligefeꞌmo nehunoꞌaeꞌmo Isaleli vayaꞌaifeꞌmo, Isipi kotetiꞌmo ataletapa ugefe hisaya afinaꞌmo kanolufatiꞌmo nayamufaꞌnimo hatita alinitutapa kita nateyo, huno hapa paiꞌniye.   
\p
\v 23 Moseseꞌa itaꞌafoꞌalaꞌmoganimo aliꞌana ateteꞌanaeꞌmo, alagepa mafaꞌnemo maiꞌniye, huꞌana ageꞌnaꞌaꞌmofeꞌmo anakesa afiꞌana fatago huꞌnaꞌa kavaꞌaniletiꞌmo loleꞌe magoꞌe kaimo maisiyafeꞌmo aliꞌana fala kiꞌana ateꞌnaꞌae. Anakaemo kini vekamoꞌa hu maleꞌniya keꞌaepa geꞌamo amagiꞌana atalesaꞌafeꞌmo koli osuꞌnaꞌae.  
\v 24 Kini vekamo agiꞌamo Felo aꞌmafaꞌnemoꞌa Moseseꞌmo yagaino ateꞌnigeno Moseseꞌa ko sino alopa hetenoꞌaeꞌmo agesa afino fatago huꞌniya kavatetiꞌmo, Felo aꞌmafaꞌnemo mafaꞌneꞌamo oꞌmaiꞌnove, huno huꞌniye.  
\v 25 Agaemo Goti vayaꞌamogiꞌeꞌmo magokepi kana yaꞌmo alisiyafeꞌmo hauꞌnigenoꞌaeꞌmo hosu kavaꞌmo huno aise afinaꞌmo amogaga aino maisiya kavafeꞌmo ohauꞌniye.  
\v 26 Agaemo Gotiꞌa amisiya miyafekeꞌmo agesamo afiꞌniyaꞌmofeꞌmo, Kalaisi agiꞌalefeꞌmo huꞌa faipa huꞌa natesaya kavaꞌmo hogote kanale kavaꞌmo haneꞌnigeno Isipi kote kagemi yaꞌe konali yaꞌeꞌmo henaga yaꞌmo ina agufa yaꞌmo haneꞌniye, huno agesamo afiꞌniye.  
\v 27 Kini vekamoꞌa aipamo leno ateꞌniyaꞌmonanafa Moseseꞌa agesa afino fatago huꞌniya kavatetiꞌmo koli osuno Isipi kotegatiꞌmo ataleno uꞌniye. Agaemo noꞌagaya vekamo agetenoꞌaeꞌmo geꞌaleꞌmo oꞌataleno atafauno alagi huno maiꞌniye.  
\v 28 Agesa afino fatago huꞌniya kavatetiꞌmo Isipi vayaꞌai yege mafaꞌneꞌapimo kamiti apamagiꞌniya enisole vekamoꞌa Isaleli nofi vayaꞌai yege mafaꞌneꞌapimo oꞌapamagisiyafeꞌmo Pasova kavaꞌmo hutapa sipisipimo apamagitapa kolaꞌaletiꞌmo kipa yosatapileꞌmo faleyo, huno hapa paiꞌniye.  
\v 29 Isaleli vayaꞌmogi apakesa afiꞌa fatago huꞌnaya kavatetiꞌmo haesa solovala aniꞌmo aino akaka vaeꞌnigeno folagapiꞌmo hau huꞌniya mopaleꞌmo uꞌnae. Isipi kotega vayaꞌmogimo vegala aeli uꞌapaeꞌmo amalageka huꞌa aniꞌmo nelakagenoꞌaeꞌmo aniꞌmoꞌa ago aeno apati kaeꞌniye.   
\p
\v 30 Isaleli vayaꞌmogimo apakesa afiꞌa fatago huꞌnaya kavatetiꞌmo Yeliko taonifiꞌmo uꞌa seveniꞌa afinaꞌmo aiꞌa vego huꞌa neꞌagenoꞌaeꞌmo yafa kegiꞌyamo aino nakupaeno asagauno aiꞌniye.  
\v 31 Lehepiꞌa kumai a kanomoꞌmo agesa afino fatago huꞌniya kavatetiꞌmo apamasa hisaꞌafeꞌmo eꞌnaꞌa vekalaꞌmo alino falu fala huno anateꞌnigeꞌapaeꞌmo Isaleli vayaꞌmogi apakesa afiꞌa fatago osuꞌnaya vayaꞌmo hapaeteꞌa Lehepiꞌmo afaꞌa atageno maiꞌniye.   
\p
\v 32 Magoꞌe huꞌna apava gemo hisufiye. Nagaemo Gitiyoniꞌagi Malakiꞌagi Samisoniꞌagi Yefetaꞌagi Neviniꞌagi Gotitegati gemo alini eꞌa aeꞌa hakalo huꞌa hapa nepaiya vayaꞌaifenagi huꞌna apava gemo huꞌna avoꞌmo kaesuva afinaꞌnimo ohane.  
\v 33 Apakaemo apakesa afiꞌa fatago huꞌnaya kavatetiꞌmo alu nofi vaya alu nofi vayaꞌai ati vayaꞌapiꞌeꞌmo kame huꞌa aeꞌa apakaseꞌnae. Apakaemo vayaꞌai kavaꞌapimo aliꞌa fako huꞌa apateꞌnageꞌapaeꞌmo alagepa kavaꞌmo huꞌnae. Gotiꞌa polomasi gemo hunoꞌaeꞌmo, fiku lapa maeꞌna lapamiguve, huno hu maleꞌniya yaꞌmo ago aliꞌnae. Afela laiyonimogimo hapaesaya kavaꞌmo huꞌnayaꞌmonanafa apakesa afiꞌa fatago huꞌnaya kavatetiꞌmo apavayaleꞌmo alino akaniꞌniye.  
\v 34 Lusi atamoꞌa leno apasagalisiya agufa atamo aeꞌa yu heꞌa ataleꞌnae. Vayaꞌmogi naipeletiꞌmo apaiꞌa kiꞌa apatesayafeꞌmo apaiꞌnayana apaiꞌa kasalo paeꞌnae. Apayamufa noꞌvalaya vayaꞌmogi apayamufa vayaꞌmo hamaleꞌnae. Koli osuꞌa lokiya vaiꞌa kame huꞌa alu nofi ati vayaꞌmo hapa faiꞌa hapaetalageꞌa uꞌnae.  
\v 35 Gotiꞌa apakesa afiꞌa fatago huꞌnaya kavatetiꞌmo mafaꞌneꞌapimo faliꞌnayatetiꞌmo halate alino he tino apateꞌnigeꞌa itaꞌapimogimo halate apavaleꞌnae.  
\p Huꞌnayaꞌmonanafa magoꞌamo apakafu kiꞌnigeꞌa faliꞌnae. Kame vayaꞌapimogimo, lapakaemo atalesayana afaꞌa hatu maeta lapategaune, huꞌa hapa paiꞌnageꞌapaeꞌmo kanolufatiꞌmo he tiꞌapaeꞌmo maige maige huꞌa maisaya kavafeꞌmo apakesamo afiteꞌapaeꞌmo, oꞌatalegaune, huꞌa huꞌnae.  
\v 36 Mago vayaꞌamogimo mago apakesa afiꞌa fatago huꞌnaya vayaꞌaifeꞌmo huꞌa faipa huꞌa apateteꞌa nofi kayotetiꞌmo apamagiꞌnae. Mago vayaꞌamogimo mago apakesa afiꞌa fatago huꞌnaya vayaꞌmo seli nofitetiꞌmo kiꞌa apateteꞌa kalavusi huꞌa apateꞌnae.  
\v 37 Yafa kayotetiꞌmo apamagige sotetiꞌmo apakufamo vasagaliꞌa atalege hosu kavaꞌmo hisayafeꞌmo apamalageka huge naipeletiꞌmo apaiꞌa kiꞌa apatege huꞌnae. Kukenaꞌapimo ohaneꞌnigeꞌa sipisipi agufamo aliꞌa vaige meme agufamo aliꞌa vaige huteꞌa umenitata huꞌa maiꞌnae. Kagemi yaꞌapimo alagi ohaneꞌnigeꞌapaeꞌmo apaini huꞌa apateteꞌa apakaetegamo hosu kavaꞌmo huꞌnageꞌa maiꞌnae.  
\v 38 Ma mopafi vayaꞌmogimo apakaeꞌeꞌmo magokepi alagi lokaeꞌa maisaya agufa vayaꞌmo oꞌmaiꞌnae. Nata vayaꞌmo maiꞌneꞌa kaꞌme kotega umenitata huꞌa maige avelegamo umenitata huꞌa maige yafa kapiꞌmo uꞌa maige kelifiꞌmo uꞌa lamiꞌa maige huꞌa maiꞌnae.  
\v 39 Gotiꞌa muki vayaꞌamogimo apakesa afiꞌa fatago huꞌnaya kavatetiꞌmo naulagaleꞌmo fatago vayaꞌmo maiꞌnae, huno huꞌniyaꞌmonanafa Gotiꞌa polomasi gemo hunoꞌaeꞌmo, fiku lapa maeꞌna lapamiguve, huno hu maleꞌniya yaꞌmo oꞌaliꞌnae.  
\v 40 Gotiꞌa lagaefeꞌmo, aeno agaseꞌniya yaꞌmo aliꞌna lapamiguve, huno agesamo afiꞌniye. Apakaiꞌapigeꞌmo apaoteꞌmo haiꞌa ohapaigafa lagaeꞌeꞌmo magokepiꞌmo haita hapaisunafeꞌmo agesamo afiteno hu maleꞌniye.   
\c 12  
\s1 Yesufekeꞌmo lagesamo afigetao, huno huꞌniya gemae  
\p
\v 1 Ani asole vayaꞌmogimo apakesa afiꞌa fatago huꞌnaya kavaꞌmo aliꞌa lave liꞌnaya vayaꞌmo faliteꞌapaeꞌmo hiyakana huꞌa maiꞌneꞌa faiꞌa vego huꞌa maiꞌneꞌa aliꞌa folagapiꞌmo lateꞌa maiꞌneꞌa aulu lahaeꞌa lageꞌa neꞌmaiye. Aulu lahaeꞌa lageꞌa maiꞌnayaꞌmofeꞌmo lagaemo neꞌaluna kanamo ataleta latafausiya hosu kavaꞌmo hatu maeta ataleteta oꞌataleta atafauta alagi huta maiꞌneta valino lateꞌniya kateꞌmo nagu nagu huta vigetao.  
\v 2 Yesufekeꞌmo aulu haelita nagu nagu huta vigetao. Agaekeꞌmo lagesa afita fatago nehuna kavaꞌmo alino aepa faiꞌniyanageno alino hano huno atesiya vekamo maiꞌniye. Agaemo, lusi kava huꞌna namogaga aiguve, huno agesamo afiꞌnenoꞌaeꞌmo malipu yosaleꞌmo falisiya kavatefeꞌmo oꞌataleno atafauno alagi huno maiꞌneno faliꞌniye. Malipu yosaleꞌmo falisiya kavafeꞌmo lusi kava huno navagage hugiye, huno huteno agesa alaꞌamo oꞌafiꞌnifa, kanalene, huno falitenoꞌaeꞌmo haino Gotiꞌa yagaino neꞌapateya siaꞌaleꞌmo lamaga haopaleꞌmo fai maiꞌniye.  
\v 3 Hosu vayaꞌmogimo apaini huꞌa ateꞌnaya kavafeꞌmo lapakesa afifi hutapa maiyo fiku yanageno alagaꞌmo lapaesigetapa lapaipamoꞌmo kana nehinagetapa atalegayanagi.   
\p
\v 4 Hosu kavafeꞌmo kame hutapa neꞌatageꞌapaeꞌmo kamiti olapamagiꞌnayaꞌmofeꞌmo oꞌataleta kame hutapa ateyo.  
\v 5 Lapakaemo Goti mafaꞌneꞌamo maiꞌnagenoꞌaeꞌmo Gotiꞌa lapaipamo alino lokiya vaino atesiya agufa gemo hiyo huno huꞌniya gemo ago lapa paiꞌniyana lapake kaniꞌniye. Ani geeꞌmo hunoꞌaeꞌmo,  
\q1 Mafaꞌneꞌnimogae, huno, Ala kava neꞌmoꞌa alino api aino nekateno kayoꞌmo kamisigekaeꞌmo, ina agufa kavane, huka kagesamo oꞌafiyo. Ani kava huno ge kahausigekaeꞌmo kaipamoꞌmo kana osino.  
\v 6 Ala kava neꞌmoꞌa muki vayaꞌaifeꞌmo hau ayamopafiꞌmo nehaiya vayaꞌmo kayoꞌmo neꞌapamiye. Agaemo muki vayaꞌamo agaetegamo neꞌagenoꞌaeꞌmo alino falu fala huno neꞌapatenoꞌaeꞌmo, mafaꞌneꞌnimo maiꞌnae, huno hapa nepaiya vayaꞌmo kayoꞌmo neꞌapamiye,  
\m huno huꞌniye.  
\v 7 Lapakaemo kanamo aliꞌnetapaeꞌmo oꞌataletapa atafauta alagi huꞌnetapa neꞌvisayana agaiꞌa mafaꞌneꞌalegamo nehiya agufa kavaꞌmo nehiye. Afoꞌapimogi muki mafaꞌne anagaꞌapimo kayoꞌmo neꞌapamiye.  
\v 8 Gotiꞌa muki mafaꞌneꞌamo kayoꞌmo neꞌapamiyaꞌmofeꞌmo kayoꞌmo nolapamisiyana mafaꞌneꞌamo oꞌmaiꞌnafa megusa mafaꞌnegana hutapa neꞌmaiye.  
\v 9 Ma mopafi afotimogimo aliꞌa api aiꞌa lateꞌnagetaeꞌmo apaiyafiꞌmo maiꞌnone. Launelameꞌmo Afotimoꞌeꞌmo magoꞌe huta aiyafiꞌmo maigetao alagepa huta maigunanagi.  
\v 10 Ma mopafi afotimogimo apakesafatiꞌmo afiꞌa aise afinaꞌmo kayoꞌmo lamiꞌnayaꞌmonanafa agaemo alagepa kavaꞌageꞌmo huta agaekana huta laote vayaꞌamo maisunafeꞌmo laha maeteno kayoꞌmo nelamiye.  
\v 11 Gotiꞌa kayoꞌmo nelamigetaeꞌmo, lamogaga neꞌauna kavaꞌmo ohaneꞌnifa lagafu nekiya kavaꞌmo haneꞌniye, huta lagesamo neꞌafunaꞌmonanafa Gotiꞌa kayotetiꞌmo alino laya malesigetaeꞌmo henagaꞌamo laipafatiꞌmo fatago kavaꞌmoꞌa alagagana huno aesigeta laipamoꞌmo falu hugiye.  
\v 12 Inagi lapayaꞌmoꞌmo alagaꞌmo nehaegeno lapaiyamoꞌmo atete nehigi alitapa lokiya vaita ateyo.  
\v 13 Api kateꞌmo vigenoꞌao lapaiyamo afe leꞌniya lapaiyamo auꞌamo alino api aino alino alagepa huno nelapateno alino lokiya vaino lapateno.   
\p
\v 14 Lapakaemo muki vayaꞌeꞌmo alagepa huta magokepi lokaeta maiꞌnetapa aote kavaꞌmo alisayafeꞌmo nagu nagu hutapa vegala aeyo aote kavaꞌmo oꞌaliꞌnisaya vayaꞌmogimo Ala kava neꞌmo oꞌagegayaꞌmofeꞌmae.  
\v 15 Fiku yanageꞌa mago konagatapimogimo Gotiꞌa fiku hapa maeno neꞌapamiya kavateꞌmo haiꞌa metalegayanagi kava yagaitapa maiyo. Fiku yanageno hafuꞌyafatiꞌmo ausisi aeteno hosu atu neheya yaꞌmo afole aiteno hanageke yaꞌmo alino lapamiteno asole vayaꞌmo alino hosu huno apategaiyanagi yagaitapa maiyo.  
\v 16 Isoꞌa kumai kavaꞌmo huge mono osuno aote kavafeꞌmo, afa kavaꞌmo haneꞌniye, huno huge huno maiꞌniye. Isokana huno maiꞌnisiya vekamo lapakaeꞌeꞌmo oꞌmaisiyafeꞌmo kava yagaitapa maiyo. Isoꞌa yege mafaꞌnemo maiꞌniyaꞌmonanafa aise neꞌyaꞌmo miya faisiyafeꞌmo yege mafaꞌnemogi neꞌaliya yaꞌmo ha maesiya yaꞌamo fiku ago ataleꞌniye.  
\v 17 Henagaꞌamo afoꞌamoꞌmo yege mafaꞌnemogi neꞌaliya milesimi gemo Gotiꞌa ha maesiya agufa milesimi gemo ha paisiyafeꞌmo hauꞌniyaꞌmonanafa afoꞌamoꞌmo ha opaiꞌniye. Ha opaiꞌnigenoꞌaeꞌmo aunumo emine neꞌegeno aviꞌya nehunoꞌaeꞌmo aukaya huno ge huꞌniyaꞌmonanafa aipamo alino afe lesiya kaꞌmo alagi ohaneꞌniye.   
\s1 Lole kotalake gelafeꞌmo anava gemo huꞌniya gemae  
\p
\v 18-19 Akeyaꞌvilagamo Isaleli vayaꞌmogi atafa kotalake gemo afisayafeꞌmo avemo agiꞌamo Sainai avemo aiyafiꞌmo uꞌa maiꞌnayana lapakaemo ame alisaya aveleꞌmo etapa oꞌmaiꞌnae. Ani avefiꞌmo alopa atamo kaeꞌnigeno lusi hani huꞌnigenoꞌaeꞌmo lusi yasimo aliꞌnigeno pikulimo huꞌnigeno lokiya gemo huꞌniye. Ani gemo nehigeꞌapaeꞌmo Isaleli vayaꞌmogi afiteꞌapaeꞌmo, kahao ke honanagi, magoꞌe huno ani gemo laha opaino, huꞌa ha paiꞌnae.  
\v 20 Gotiꞌa, \it mani aveleꞌmo mago vekamoꞌa eno ame alige afumoꞌmo eno ave aiyafiꞌmo ame alige nehisigetapaeꞌmo yafa kayotetiꞌmo amagigegeno falige keveletiꞌmo haegeno falige hino,\it* huno hapa paiꞌniyaꞌmofeꞌmo lusi kava huꞌa koli huꞌnae.  
\v 21 Ageteꞌapaeꞌmo lusi kava huꞌa koli huteꞌa apamoꞌya aiꞌnagenoꞌaeꞌmo Moseseꞌa, \it lusi kava huꞌna atete nehuꞌna koli nehuve,\it* huno huꞌniye.   
\p
\v 22 Lapakaemo Sainai aveleꞌmo oꞌmeꞌnafa Saiyoni kotega avemo kokuꞌnapi Yulusalemu taonifiꞌmo yalagisa Gotiꞌa neꞌmaiya taonifiꞌmo tauseni tauseniꞌa enisole vayaꞌmo neꞌmaiya taonifiꞌmo etapa maiꞌnae.  
\v 23 Gotiꞌa yege mafaꞌneꞌamogi apakiꞌapimo kokuꞌnapiꞌmo avoꞌmo kae maleꞌniya vayaꞌmo aliꞌa anupa huꞌa maiꞌneꞌa apamogaga neꞌaiyategamo etapa maiꞌnae. Lapakaemo Gotiꞌa muki vayaꞌmo alino fako huno neꞌapateya vekalegamo eꞌnae. Fatago vayaꞌmo alino alagepa huno apateꞌniya vayaꞌai apauneꞌapametegamo eꞌnae.  
\v 24 Yesuꞌa folagapi vekamo saufa kotalake gemo hu maleꞌniya vekalegamo eꞌnae. Kolaꞌaletiꞌmo aino fuli fuli huno faleno apateꞌniya kolaꞌalegamo eꞌnae. Ani kolaꞌamoꞌmo Evo kolaꞌamo ago aeno agaseꞌniyaꞌmofeꞌmo hosu kavafeꞌmo ge nosifa alagepa kavafekeꞌmo ge nehiye.   
\p
\v 25 Inagi ehetapiye, ge nehisigetapaeꞌmo geꞌamo amagita oꞌataletapa geꞌamo alagepa hutapa afiyo. Gotiꞌa ma mopafi Sainai aveletiꞌmo ge huꞌnigeꞌapaeꞌmo geꞌamo oꞌafiꞌa amagiꞌa ataleꞌnaya vayaꞌmo aeꞌa kasalo opaeꞌnayaꞌmofeꞌmo kokuꞌnapatiꞌmo ge nehisigetaeꞌmo oꞌafita lakameꞌya neꞌamisunana haiya kava huta aeta kasalo paegaune.  
\v 26 Gotiꞌa akeyaꞌvilagamo ge huꞌnigenoꞌaeꞌmo imima aliꞌnigeno ma mopamoꞌmo kanage kanage huꞌniyaꞌmonanafa hemeni afinatefeꞌmo lapa maegauve, huno hu maleꞌniya gemoꞌmo hunoꞌaeꞌmo, \it halate mopaꞌageꞌmo aliꞌna kanage kanage huꞌna oꞌategaufa kokuꞌnaꞌeꞌmo aliꞌna kanage kanage huꞌna ategauve,\it* huno hu maleꞌniye.  
\v 27 Agaemo, \it halate,\it* huꞌniya gemo aepaꞌamo haneꞌniyana alino kanage kanage osisiya kavaꞌmo noꞌagona kavaꞌmo hanesiyafeꞌmo alino kanage kanage hisiya kavaꞌmo apayatetiꞌmo alo huꞌnaya yaꞌmo neꞌagona yaꞌmo alino ataleꞌniye, huno alino lave liꞌniye.  
\v 28 Gotiꞌa kini vayaꞌmo alino hamaleno lateꞌnigeta kini vayaꞌmogi neꞌaliya agufa alagepa yaꞌmo aliꞌnonanageta alagepa huta maige maige huta maigune. Ani kavaꞌmoꞌa kanage kanage osugiyaꞌmonanafa hanege hanege huno nehaneno haneno hano osuno afaꞌa hanegaiye. Ago lamiꞌniyaꞌmofeꞌmo hao ke neheta Goti aiyafiꞌmo maiꞌneta koli huꞌneta mono higetao.  
\v 29 Gotitimoꞌmo atafiꞌmo kageno leno asaga neliya yakana huno maiꞌniyaꞌmofeꞌmae.   
\c 13  
\s1 Ina kavaꞌmo hiyo, huno huꞌniya gemae  
\p
\v 1 Konagatapieꞌmo nelapaiya kavaꞌmo oꞌataletapa magoꞌe huno lapau lapayamopafiꞌmo lapaino.  
\v 2 Nata vayaꞌmo esagetapaeꞌmo lapake okanitapa hapa maeta yagaitapa apateyo. Mago vayaꞌmogimo ani agufa kavaꞌmo huꞌa enisole vayaꞌmo hapa maeꞌa yagaiꞌa apateꞌneꞌapaeꞌmo, enisole vayaꞌmo hapa maeꞌnone, huꞌa oꞌapakeꞌnae.  
\v 3 Kalavusifiꞌmo neꞌmaiya vayaꞌaifeꞌmo lapake kanitapa oꞌapataletapa lapakesamo afiyo. Apakaeꞌeꞌmo magokepiꞌmo lokaeta kalavusi huꞌnegekana hutapa apakaefeꞌmo lapakesamo afiyo. Kalaisitefeꞌmo hanageke yaꞌmo neꞌaliya vayaꞌaifeꞌmo lapake kanitapa oꞌapataletapa lapakesamo afiyo, apakaeꞌeꞌmo ma mopafi maiꞌnetapaeꞌmo hanageke yaꞌmo alisaya vayaꞌmo maiꞌnayaꞌmofeꞌmae.   
\p
\v 4 Muki vayaꞌmogimo aꞌmo alige veleꞌmo maige nehaya kavafeꞌmo ala agimo neꞌamiꞌapaeꞌmo, kanale kavaꞌmo haneꞌniye, huꞌa hisaya kavaꞌmo haneꞌniyaꞌmonanafa Gotiꞌa kumai kavaꞌmo nehaya vayaꞌe yafaꞌmo nehavaya vayaꞌeꞌmo agoti huno apategaiyaꞌmofeꞌmo veyalavemogimo kavaꞌapimo aliꞌa hosu huꞌa oꞌateyo.  
\v 5 Lapaꞌye osino. Aliꞌnaya yafekeꞌmo, alagi haneno lateꞌniye, hutapa lapakesamo neꞌafitapa lapaipamoꞌmo falu hino. Na kava higetapaene. Agaiꞌamo hunoꞌaeꞌmo, \it muki afinaꞌmo olapataleꞌna lapakaeꞌeꞌmo magokepi lokaeꞌna maige maige huꞌna maiꞌneꞌna lapa magauve,\it* huno huꞌniyaꞌmofeꞌmae.  
\v 6 Huno huꞌniyaꞌmofeꞌmo koli osuta lokiya gemo hutaeꞌmo,  
\q1 Ala kava neꞌmoꞌa laha neꞌmaeya vekamo maiꞌniye. Koli osugune. Ma mopafi vayaꞌmogi lagaetegamo na kavaꞌmo hugae, huta hugune.   
\p
\v 7 Yagaiꞌa lapateꞌneꞌa Goti geꞌamo lapa paiꞌnaya vayaꞌaifeꞌmo lapakesamo afiyo. Alagepa kavaꞌmo huteꞌa uꞌa ka atupaleꞌmo avaꞌyi huꞌnae, hutapa lapakesa afifi nehutapaeꞌmo apakesa afiꞌa fatago huꞌnaya kavaꞌapimo apakame hutapa hiyo.  
\v 8 Yesu Kalaisiꞌa alu afina alu afinaꞌmo alu kavaꞌmo huno noꞌmaifa akeyaꞌvilaga maiꞌniya kava huno neꞌmaiyanageno henagaꞌamo ani agufa kavakeꞌmo huno maigiye.  
\v 9 Hosu kavanageꞌa mago vayaꞌmogi aeto aeto agufa geletiꞌmo lapayateꞌmo heꞌa lapavayu huliꞌa ugayanagi ehetapiye. Alagepa kavanageno Gotiꞌa fiku lapa maeno nelapamiya gemoꞌa lapaipa lapakesamo alino lokiya vaino lapategaiye. Neꞌyafeꞌmo, neyo, huꞌa huge oꞌneyo, huꞌa huge nehaya gemoꞌa lapaipa lapakesamo alino lokiya vaino olapategaiye. Ani gemo akame nehaya vayaꞌmo hapa oꞌmaeꞌniye.  
\v 10 Lagae ofalinimo haneꞌniye. Inagi lagae ofalinimo hiꞌyalamutetiꞌmo alita neꞌnonaꞌmonanafa mono huꞌa neꞌapataya vayaꞌmogi seli nopiꞌmo aliꞌyaꞌmo neꞌaliya vayaꞌmo lagae hiꞌyalamutetiꞌmo afaꞌa aliꞌa oꞌnegae.  
\v 11 Na agufa kavaꞌmo nehayaꞌmofeꞌmae. Mono huꞌa neꞌapataya vayaꞌmogimo hosu kavaꞌapilefeꞌmo afumo amagiteꞌa kolaꞌmo lakiꞌa aliniꞌa mono nopiꞌmo faleꞌa haiꞌnayaꞌmonanafa afumogi apakufaꞌamo alini uꞌa taonimo lafi kegiꞌya malagamo atafiꞌmo nekae.  
\v 12 Ani kavaꞌmo nehagenoꞌaeꞌmo Yesuꞌa vayaꞌamo kolaꞌaletiꞌmo apavaleno alino apaoteꞌmo apatesiyafeꞌmo taonimo lafi kegiꞌya malagamo uno faliꞌniye.  
\v 13 Apakameꞌya amiꞌnageno hosu vekagana huno maiꞌnigeꞌapaeꞌmo lafi kegiꞌya malagamo avaleliꞌuꞌa amagiꞌnayaꞌmofeꞌmo apakameꞌya lamisayafeꞌmo agaetegamo lafi kegiꞌya malagamo vigetao.  
\v 14 Hanege hanege huno hanesiya taonimo ma mopafiꞌmo ohaneꞌniyaꞌmonanafa afole aisiya taonifiꞌmo maisunafeꞌmo agava neꞌmaune.  
\v 15 Inagi lagaemo agaetetiꞌmo muki afinaꞌmo Gotiꞌmo ofalinimo neꞌamitaeꞌmo agiꞌaleꞌmo alita asaga huta neꞌatetaeꞌmo hao ke hegetao. Lavayafatikeꞌmo ani ofalinimo amigetao.  
\v 16 Neꞌamitetapaeꞌmo alagepa kavaꞌmo huge hapa maetapa apamige hisayafeꞌmo lapake okanino. Gotiꞌa ani agufa ofalinimo neꞌamiya kavafeꞌmo lusi kava huno nehaiye.  
\v 17 Lapakaemo yagaiꞌa nelapataya vayaꞌai apaiyafiꞌmo maiꞌnetapa geꞌapimo afiyo. Apakaemo lapakupi mafaꞌneleꞌmo yagaiꞌa neꞌataya aliꞌyaꞌapilefeꞌmo Gotifeꞌmo ha paigae. Geꞌapimo afigeꞌapao apaipamoꞌmo kana osuꞌnisigeꞌa apamogaga aiꞌa aliꞌyaꞌmo aliyo. Apaipamoꞌmo kana hisiya kavaꞌmoꞌa lapa oꞌmaegaiye.   
\p
\v 18 Nunumu hutapa lateyo. Lagaemo muki kavatefeꞌmo, alagepa kavaꞌmo hugesune, huta lole lagesamo oꞌafita magoke lagesamo afiꞌnetaeꞌmo, lagupi mafaꞌnemoꞌa hosu kavaꞌmo nehae, huno laha nopaigeta alagepa huta neꞌmaune.  
\v 19 Aise afinaꞌmo utesigeꞌna lapakaetegamo visuvafeꞌmo nunumu hutapa lateyo, huꞌna lokiya gemo huꞌna lapa nepauve.   
\s1 Nunumu huꞌniya gemae  
\p
\v 20 Gotiꞌmo Ala kava netimo Yesuꞌa hogote vekamo sipisipileꞌmo yagaino neꞌapateya vekamo kolaꞌaletiꞌmo hanege hanege huno hanesiya kotalake gemo hu maleꞌniya kolaꞌaletiꞌmo faliꞌniyatetiꞌmo ago alino he tino ateꞌniye. Nagaemo Gotiꞌa alino nanu aeno lateꞌniya vekaeꞌmo nunumu huꞌnaeꞌmo,  
\v 21 Muki alagepa kavafeꞌmo kahauꞌnisiya kavaꞌmo hisayafeꞌmo alagi alika alagepa huka apato. Yesu Kalaisitetiꞌmo apaipafiꞌmo aliꞌyaꞌmo aligeꞌapao kahauꞌnisiya kavaꞌmo hiyo. Kagikaleꞌmo alita asaga huta katenageka ala kagi vekamo maige maige huka maiyo. He, lama ge.   
\s1 Ge atupa gemae  
\p
\v 22 Konagaꞌnimogitapae, yatala gemo avo okaeꞌnovana lapaipamo alino lokiya vaino lapatesiya gemo afitetapaeꞌmo alagaꞌmo olapaeꞌninagetapa lapaipamoꞌmo falu hino.  
\v 23 Afiyo, konagatimo Timotiꞌmo kalavusifatiꞌmo ago hatu maeꞌa ateꞌnae. Agaemo nagaetegamo malage huno esigeꞌna lapakaetegamo avaleliꞌna utaꞌa lapakegauꞌae.  
\v 24 Lapakaemo yagaiꞌa nelapataya vayaꞌe muki Goti apaote vayaꞌaꞌefeꞌmo ge apamamaeyo. Itali kotega vayaꞌmogimo ge lapamamaeꞌnae.  
\v 25 Gotiꞌa muki vayaꞌamogitapamo fiku lapa maeno lapamino. He, lama ge.