\id COL - Keyagana NT with OT portions [kyg] -Papua New Guinea 2001 (web 2014) 
\h Kolosi 
\toc1 KOLOSI 
\toc2 Kolosi 
\toc3 Kol 
\mt1 KOLOSI  
\ip Poloꞌa Lomu vayaꞌai kalavusifiꞌmo maiꞌnenoꞌaeꞌmo mani avoꞌmo Kolosi taonifiꞌmo maiꞌnaya siosi vayaꞌaifeꞌmo kaeꞌniye. Mago Kolosi taonifi vekamo agiꞌamo Epafalasiꞌa Kalaisi aliꞌyaꞌamo neꞌaliya vekamoꞌa Lomu taonifiꞌmo eno Polofeꞌmo Kolosi siosi vayaꞌaifeꞌmo apava gemo huno ha paiꞌniye.  
\ip Poloꞌa ani gemo afitenoꞌaeꞌmo mago aigofe tisa vayaꞌmogi huꞌnaya gemo alino api aino ateꞌniye. Ani aigofe tisa vayaꞌmogimo alagamuna agege enisole vayaꞌaifeꞌmo mono huge Yu vayaꞌai mono gemo akame huge ma neꞌya oꞌaliyo ina neꞌya oꞌneyo huꞌa huge huꞌa aliꞌa apaya maleꞌnae. Poloꞌa hapa painoꞌaeꞌmo, ani agufa gemo akame nehaya vayaꞌmogi Kalaisiꞌmo ago ataleꞌa uꞌnae. Yesu Kalaisiꞌa hogote vekamo maiꞌneno muki yateꞌe vayaꞌaiteꞌeꞌmo yagaino neꞌapate. Agaefekeꞌmo lapakesamo afiꞌnetapa mono huta ala agiꞌamo amiyo, huno avoꞌmo kaeꞌniye. Lapakaemo Kalaisipiꞌmo maiꞌnetapaeꞌmo saufa kavaꞌmo hutapa lapaote maiyo, huno avoꞌmo kaeꞌniye. Kolosi siosi vayaꞌaifeꞌmo avoꞌmo kaeꞌniya agufa gemo huno Efasasi siosi vayaꞌaifeꞌmo avoꞌmo kaeꞌniye. Tikikasiꞌa Poloꞌeꞌmo lokaeno aliꞌyaꞌmo neꞌaliya vekamoꞌa ani avoꞌmo alininuno Kolosi siosi vayaꞌaina apamiꞌniye.  
\c 1  
\p
\v 1 Nagaemo Poloꞌnaeꞌmo Gotiꞌa agesamo afiteno hauꞌnigenoꞌaeꞌmo Yesu Kalaisi apa vekaꞌamo lekana paino nateꞌniya vekamoꞌnaꞌe konagatimo Timotiꞌeꞌmo mani avoꞌmo nekaoꞌae.  
\v 2 Laꞌagaemo Kolosi taonifiꞌmo maiꞌnaya lapaote vayaꞌmo Kalaisipiꞌmo maiꞌnetapaeꞌmo oꞌataleta alagepa huta maiꞌnaya konagatiꞌaeꞌmo mani avoꞌmo nekaoꞌae.  
\p Afotimo Gotiꞌe Ala kava neꞌmo Yesu Kalaisiꞌeꞌmo fiku lapa maeꞌana lapamiꞌanageno lapaipamoꞌmo falu hino.   
\s1 Poloꞌa hao ke hetenoꞌaeꞌmo nunumu huno apateꞌniya gemae  
\p
\v 3-5 Hogotetapa alagepa faigoko gemo afitetapaeꞌmo Gotiꞌa kokuꞌnapiꞌmo maleꞌneno yagaino nelapateya yafeꞌmo ava gemo afitetapa lapavayagunagu hutapa agava neꞌmaiye. Agava maiꞌnetapaeꞌmo Kalaisi Yesufeꞌmo lapakesa afita fatago huꞌnetapaeꞌmo muki apaote vayaꞌaifeꞌmo lapau lapayamopafiꞌmo lapauꞌniya kavafeꞌmo lapava gemo afiꞌnone. Afiꞌnona afinatetiꞌmo muki afinaꞌaeꞌmo nunumu huta nelapatone. Ala kava netimo Yesu Kalaisi afoꞌamo Gotifeꞌmo hao ke heta nelapatone.  
\v 6 Alagepa faigoko geꞌamo lapakaetegamo eno afole aiꞌniya gemoꞌa ma mopafi muki haopalegaꞌeꞌmo eno afole aiteno neꞌyaꞌamo alino neꞌate. Mani gemo Gotiꞌa fiku hapa maeno neꞌapamiya gemo afitetapaeꞌmo lama gemo haneꞌniye, hutapa afiꞌnaya afinatetiꞌmo lapakaepatiꞌeꞌmo neꞌyaꞌmo alino neꞌate.  
\v 7 Epafalasifeꞌmo lahau layamopafiꞌmo lahauꞌniya vekamoꞌa lagaeꞌeꞌmo lokaeno aliꞌyaꞌmo neꞌaliya vekamoꞌa lapakaetefeꞌmo Kalaisi aliꞌyaꞌamo oꞌataleno alagepa huno neꞌaliya vekamoꞌa mani gemo ago lapa paiꞌnigetapa afiꞌnae.  
\v 8 Agaemo lapava gemo hunoꞌaeꞌmo, Goti Aunemeꞌamoꞌmo apaipafiꞌmo aliꞌyaꞌmo aliꞌnigeꞌapaeꞌmo hapau apayamopafiꞌmo nehapaiye, huno laha paiꞌniye.   
\p
\v 9 Ani kava hutapa maiꞌnayaꞌmofeꞌmo afiꞌnona afinatetiꞌmo oꞌataleta nunumu huta lapateme lapateme eta maiꞌnone. Lagaemo, Apakaemo kahauꞌnisiya kavaꞌmo hisayafeꞌmo kaunekameꞌmoꞌa alino apaya malenageꞌa alagepa huꞌa apakesamo afiteꞌa ageꞌa aeto nehaya kavaꞌmo apaipafiꞌmo havai teno, huta nunumu nehune.  
\v 10 Gotiꞌa ani kavaꞌmo hisigeta ala agiꞌamo amisaya agufa kavaꞌmo hutapa maisageno alagepa kavaꞌmoꞌa lapaipafatiꞌmo alagagana huno afole aisigetapa Gotiꞌmo magoꞌe magoꞌe hutapa agesayafeꞌmo nunumu nehune.  
\v 11 Gotiꞌa ha le konali ayamufaꞌage vekamoꞌa ayamufaꞌaletiꞌmo lokiya vaino lapateno. Lokiya vaino lapatesigetapa hosu afinaꞌmo oꞌataleta hosu lapaipamo okalita lapamogaga aiꞌnetapa muki yaꞌmo Afoꞌamofekeꞌmo hao ke hegae.  
\v 12 Agaemo yagaino neꞌapateya ha le koteꞌmo haiꞌa neꞌmaiya vayaꞌeꞌmo hetama maleno lateꞌniya hetamatimo afaꞌa alisunafeꞌmo alo huno lateꞌniye.  
\v 13 Agaemo hani yaꞌmo lokiyaꞌalegatiꞌmo lagufamo alino katino lateteno lavalelineno hauꞌniya Mafaꞌneꞌamoꞌa yagaino neꞌapateya kegiꞌyafiꞌmo lateꞌniye.  
\v 14 Mafaꞌneꞌamoꞌmo kolaꞌaletiꞌmo miya faino hatu maeno latetenoꞌaeꞌmo hosu kavatimo alino ataleꞌniye.   
\s1 Kalaisiꞌmo hogote vekamo maiꞌniya gemae  
\p
\v 15 Kalaisiꞌa noꞌagaya Goti auneꞌamo maiꞌniye. Yege Mafaꞌneꞌamo maiꞌnenoꞌaeꞌmo muki alo huꞌniya yaꞌe vayaꞌeꞌmo aeno apakaseno maiꞌniye.  
\v 16 Gotiꞌa Kalaisipiꞌmo muki yaꞌe vayaꞌeꞌmo alo huno apateꞌniye. Kokuꞌnapiꞌmo haneꞌniya yaꞌe vayaꞌenagi ma mopafiꞌmo haneꞌniya yaꞌe vayaꞌenagi neꞌagaya yaꞌe vayaꞌenagi noꞌagaya yaꞌe vayaꞌenagi huno alo huno apateꞌniye. Agaetetikeꞌmo yagaiꞌa neꞌapataya vayanagi ala vayanagi kava vayanagi ala apaki vayanagi huno agaetefeꞌmo alo huno apateꞌniye.  
\v 17 Agaemo muki yateꞌe vayaꞌaiteꞌeꞌmo hogote vekamo maiꞌneno yagaino neꞌapategeꞌapaeꞌmo hanege maige huꞌa maiꞌnae.  
\v 18 Siosi vayaꞌmo Kalaisi agufaꞌagana huꞌa maiꞌnagenoꞌaeꞌmo apakenopaꞌagana huno maiꞌneno yagaino neꞌapate. Agaemo aepa faiꞌniya vekamo maiꞌniyanageno alagi hogote vekamo maisiyafeꞌmo kanolufatiꞌmo hogoteno he tiꞌniye.  
\v 19 Gotiꞌa muki agaiꞌa aipa agesamo Kalaisi aipafiꞌmo alagi hanesiyafeꞌmo hauꞌniye.  
\v 20 Hauꞌniyanageno kokuꞌnapi vayaꞌe ma mopafi vayaꞌeꞌmo agaetetiꞌmo alino nanu aeno apatesigeꞌa magokepi lokaeꞌa maisayafeꞌmo hauꞌniye. Gotiꞌa hauꞌnigenoꞌaeꞌmo Mafaꞌneꞌamoꞌmo malipu yosaleꞌmo aino lakiꞌniya kolaꞌaletiꞌmo alino nanu aeno lateꞌniye.   
\p
\v 21 Lapakaemo mago afinaꞌmo Gotiꞌeꞌmo lokaeta oꞌmaitapa lapaote aote hutapa maiꞌnetapaeꞌmo hosu kavaꞌmo huge hosu lapakesamo afige hutapa maiꞌnetapaeꞌmo kame vayaꞌamo maiꞌnayaꞌmonanafa hemenimo agaiꞌaꞌeꞌmo alino nanu aeno lapateꞌniye.  
\v 22 Goti aulagaleꞌmo lapaote vayaꞌamo maisageno hosu kavatapimo alagi ohanesigetapa vaiꞌmo oꞌalisayafeꞌmo Mafaꞌneꞌamoꞌmo agufamo aliteno faliꞌniya kavatetiꞌmo alino nanu aeno lapateꞌniye.  
\v 23 He, oꞌataleta lapakesa afita fatago hume hume neꞌutapaeꞌmo noꞌmo yafateꞌmo faiꞌa ategekana hutapa maiꞌneta oꞌataletapa alagepa faigoko geꞌamo afitetapa lapavayagunagu hutapa agava maiꞌneta oꞌataleꞌnisayana Goti aulagaleꞌmo alagepa huta he titapa maigae. Mani alagepa faigoko geꞌamo muki ma mopafi vayaꞌaifeꞌmo aeꞌa hakalo huꞌa hapa paiꞌnageꞌa afiꞌnae. Nagaemo Poloꞌna ani gelefeꞌmo Goti aliꞌyaꞌamo neꞌaluva vekamo hamaleꞌnove.   
\s1 Poloꞌa siosi vayaꞌaiteꞌmo aliꞌyaꞌmo aliꞌniya gemae  
\p
\v 24 Nagaemo lapakaetefeꞌmo kanamo neꞌaluvaꞌmofeꞌmo namogaga neꞌauve. Kalaisiꞌa kanamo aliꞌniya kava huꞌna agufalefeꞌmo kanamo neꞌaluve. Kalaisi agufaꞌamo agaiꞌa siosi vayaꞌamae. Goti mafaꞌneꞌamogi kanamo neꞌaliya aliꞌyaꞌapimo hano osuꞌniye. Nagaemo kanamo neꞌaluva hetamaꞌnimo aliꞌna hapa maegauve.  
\v 25 Gotiꞌa lapakaetefeꞌmo geꞌamo aeꞌna hakalo huꞌna hano hisuvafeꞌmo siosi aliꞌyateꞌmo navaleno alino nateꞌniye.  
\v 26 Gotiꞌa mago kavaꞌamo alino fala ki maleꞌnigeꞌa muki vayaꞌmogimo muki afinaꞌmo oꞌageꞌnayaꞌmonanafa hemenimo apaote vayaꞌamo alino apave liꞌniye.  
\v 27 Gotiꞌa muki nofi vayaꞌaitegamo asole ha le konali kavaꞌamo fala kiꞌniyanageno alino apave lisiyafeꞌmo hauꞌnigenoꞌaeꞌmo agesamo afiꞌniye. Mani fala kiꞌniya gemo Kalaisiꞌa lapaipafiꞌmo maiꞌniya nefeꞌmo ava gemo haneꞌniye. Agaetefeꞌmo ha le konali yaꞌamo alisayafeꞌmo lapavayagunagu hutapa agava neꞌmaiye.  
\v 28 Lagaemo muki vayaꞌamo apavalelita uta apatesunageꞌa Goti aulagaleꞌmo Kalaisipiꞌmo maiꞌneꞌa haiꞌa hapaisayafeꞌmo muki vayaꞌaifeꞌmo Kalaisife ava gemo aeta hakalo huta hapa nepaune. Lagaemo alagepa lagesamo neꞌafitaeꞌmo muki vayaꞌaifeꞌmo, ehetapiye, huta huge muki vayaꞌaina alita apaya malege huta neꞌmaune.  
\v 29 Nagaeꞌeꞌmo mani kavaꞌmo afole aisiyafeꞌmo Kalaisi ayamufaꞌaletiꞌmo naipafiꞌmo lusi kava huno aliꞌyaꞌmo neꞌaligeꞌnaeꞌmo ayamufaꞌaletiꞌmo naya mukiki huꞌna aliꞌyaꞌamo neꞌaluve.   
\c 2  
\p
\v 1 Nagaemo lapakaeꞌe Leyotisiya taonifiꞌmo maiꞌnaya vayaꞌe oꞌnageꞌnaya vayaꞌefeꞌmo naipafiꞌmo nahausoli huꞌneꞌna nayamukiki huꞌna aliꞌya neꞌaluva aliꞌyafeꞌmo nava gemo afisayafeꞌmo nahauꞌniye.  
\v 2 Lapaipamoꞌmo atete osuno lokiya vaino haneꞌnisigetapa lapau lapayamopafiꞌmo lapauꞌnisigetapa magoke lapaipa lapakesamo alita maisayafeꞌmo aliꞌyaꞌmo neꞌaluve. Ani kava huta maiꞌnetapaeꞌmo Gotiꞌa hogoteno alino fala kino ateꞌneno alino lapaveliꞌniya neꞌmo Kalaisiꞌmo ageta aeto hutetapa lole lapakesamo oꞌafitapa lusi kava huta magoke lapakesamo afisayafeꞌmo nahauꞌniye.  
\v 3 Kagemi yaꞌapimo aliꞌa fala kiꞌa neꞌmalaya kava huno Kalaisi aipafiꞌmo muki alagepa huꞌa afiteꞌa agesaya yaꞌamo fala kino haneꞌniye.  
\v 4 Mago vayaꞌmogimo haga lapaisiya agufa gemo huteꞌapaeꞌmo lapakesamo faiteꞌa humi olapatesayafeꞌmo mani gemo lapa nepauve.  
\v 5 Nagufaꞌamo lapakaeꞌeꞌmo lokaeꞌna oꞌmaiꞌnovaꞌmonanafa nauneꞌnameꞌamoꞌmo lapakaeꞌeꞌmo magokepi lokaeno maiꞌnigeꞌnaeꞌmo lapakovana Kalaisifeꞌmo lokiya vaitapa lapakesa afita fatago nehutapaeꞌmo magokepi lokaeta maiꞌnageꞌna lapaketeꞌnaeꞌmo namogaga neꞌauve.   
\s1 Kalaisipiꞌmo alagepa huꞌa neꞌmaiya kavafeꞌmo huꞌniya gemae  
\p
\v 6 Lapakaemo Kalaisi Yesufeꞌmo, Ala kava netimo maiꞌniye, hutapa aliꞌnaya kavaꞌmo hutapa agaepiꞌmo maime maime viyo.  
\v 7 Maiꞌnetapaeꞌmo yosamoꞌmo hafuꞌyamo neꞌaeya kava hutapa agaeteꞌmo atafauta alagi hutapa maiyo. Noꞌmo yafateꞌmo faiꞌa neꞌataya kava hutapa Kalaisiteꞌmo atafauta alagi huꞌnetapaeꞌmo alita lapaya maleꞌnona gelefeꞌmo lokiya vaitapa maiꞌnetapaeꞌmo magoꞌe magoꞌe hutapa lusi kava huta hao ke hetapa maiyo.  
\v 8 Fiku yanageꞌa mago vayaꞌmogimo ma mopafi vayaꞌmogi ageteꞌa afiꞌnaya agufa gemo huge afa aigofe gemo huge nehuꞌa humi lapategayanagi ehetapiye. Mani gemo Kalaisitegatiꞌmo noꞌmefa apakinago vayaꞌmogi nehaya agufa gemo ma mopafi kavaꞌmo ani kavaꞌmo huno afole aiꞌniye, huꞌa nehaya geeꞌmo apakesamo neꞌafiya yapifatiꞌmo neꞌe.  
\v 9 Muki Goti aipa agesamo Kalaisi aipa agesafiꞌmo alagi lama ge huno hanege hanege huno nehane.  
\v 10 Agaemo muki apauneꞌapameꞌe vayaꞌmo yagaiꞌa neꞌapataya vayaꞌaiteꞌe ala kava vayaꞌaiteꞌeꞌmo yagaino neꞌapateya vekamo maiꞌnigetapaeꞌmo agaepiꞌmo maiꞌnageno agaepi haneꞌniya yaꞌamo lapakaepiꞌmo havai teꞌniye.  
\v 11 Kalaisipiꞌmo maiꞌnagenoꞌaeꞌmo vayaꞌmogi lapakufamo lagauꞌa olapateꞌnafa Kalaisiꞌa lapakufamo lagaugekana huno hosu kavaꞌmo nehiya atafa lapaipa lapakesamo alino ataleꞌniye.  
\v 12 Ani agufa kavaꞌmo haneꞌnigeꞌa aniꞌmo faleꞌa nelapatagenoꞌaeꞌmo Gotiꞌa lapakesa afita fatago nehaya kavatetiꞌmo Kalaisiꞌeꞌmo kanolufiꞌmo kino lapateteno Kalaisiꞌeꞌmo magokepi ago alino he tino lapateꞌniye. Gotiꞌa Kalaisiꞌmo alino he tino ateꞌniya vekamo himamuꞌaletiꞌmo lapaipafiꞌmo aliꞌyaꞌmo aliꞌnigetapa lapakesa afita fatago huꞌnae.  
\v 13 Hosu lapakufamo lagauta oꞌataletapa hosu kavapiꞌmo maiꞌnetapaeꞌmo faliꞌnaya vayakana huta maiꞌnagenoꞌaeꞌmo Kalaisiꞌeꞌmo ago alino he tino lapateꞌniye. Gotiꞌa muki hosu kavatimo alino neꞌatalenoꞌaeꞌmo  
\v 14 anonatilefeꞌmo avoꞌmo kae maleꞌniya gemo ma kava hiyo ina kava osiyo, huno huꞌniya keꞌaepa gemo aeno kalo paeno ataleꞌniye. Gotiꞌa ani gemoꞌa aeno lagaseno kame huno lateꞌniya gemo alino ataleteno malipu yosaleꞌmo nili aiꞌniye.  
\v 15 Kalaisiꞌa falitenoꞌaeꞌmo yagaiꞌa neꞌapataya vayaꞌe ala kava vayaꞌeꞌmo agaiꞌamo ago aeno apakaseteno kame hisaya yaꞌapimo apayapatiꞌmo alino hapafaleno nofi kino apateteno vayaꞌai apaulagaleꞌmo heno apavayu hulino uꞌniye.  
\v 16 Ani kava huꞌniyaꞌmofeꞌmo vayaꞌmogimo, ma neꞌya neyo, ina neꞌya oꞌneyo, huꞌa nehuꞌapaeꞌmo, hopa afinafeꞌmofi saufa kaile hopa afinafeꞌmofi sapati afinaꞌmo maiꞌa falu nehaya afinafeꞌmofi, alita aeto hu maletetapa akame hiyo, huꞌa lapa paisagetapaeꞌmo akame hisaya kavaꞌmo ohaneꞌniye.  
\v 17 Mani agufa kavaꞌmo afole aisiya kavafeꞌmo aune kavaꞌmo haneꞌniyaꞌmonanafa Kalaisiꞌa auneꞌa ageꞌnaya agufaꞌamo ago afole aiꞌniye.  
\v 18 Mago vayaꞌmogimo amega apakufaletiꞌmo apakaiꞌapi apakiꞌapimo aliꞌa afepi neꞌapataya kavafeꞌmo amuse huꞌa enisole vayaꞌaifeꞌmo mono nehae. Apakaemo kavatapimo aliꞌa fako huꞌa lapateteꞌapaeꞌmo, hosu kavaꞌmo nehae, huꞌa hisaya gemo oꞌafiyo. Oꞌageꞌnaya kavaꞌmo agesayafeꞌmo apakaiꞌapimo fiku himuꞌnamu kavaꞌmo nehae. Atafa apaipafatiꞌmo, ala vayaꞌmo maiꞌnone, huꞌa fiku apakesamo neꞌafiye.  
\v 19 Apakaemo agufamo agenopagana huno maiꞌniya vekamo Kalaisiꞌmo oꞌatafauꞌa afaꞌa ataleꞌnae. Kalaisiꞌa agufaleꞌmo yagaino neꞌategenoꞌaeꞌmo aeno hapaiꞌniya yaꞌaꞌe aganunaꞌeꞌmo aeno haniteno alino magokepi lokaeno ateꞌnigeno Goti himamuꞌaletiꞌmo ko nesiye.  
\v 20-21 Lapakaemo ma mopafiꞌmo hogoteꞌa huꞌa aepa faiꞌa huꞌnaya gelefeꞌmo faliꞌnisayaꞌmoꞌmo na kava higetapa ina ya oꞌaliyo, ma neꞌya oꞌneyo, ani yateꞌmo ame oꞌaliyo, huꞌa nehaya gemo ma mopafi vayakana hutapa ma mopafi vayaꞌai keꞌaepa geꞌapimo akame nehae.  
\v 22 Mani keꞌaepa gemo aliꞌa neꞌa hano huꞌa atalesayafekeꞌmo haneꞌniye. Ma mopafi vayaꞌai keꞌaepa gemo aliꞌa apaya neꞌmalaya keꞌaepa geꞌagekeꞌmo haneꞌniye.  
\v 23 Mani agufa keꞌaepa gemoꞌa mono hisayafeꞌmo alino he tino neꞌapate. Aigofe gemo nehuꞌa apakufamo aliꞌa afepi apateꞌa apakafu kisiya yaꞌmo aliꞌa apakufamo amisayafeꞌmo alino he tino neꞌapate. Neꞌapateyaꞌmofeꞌmo afiteta ageꞌnona kavaꞌmo haneꞌniye, huꞌa apakesamo neꞌafiyaꞌmonanafa mani agufa keꞌaepa gemoꞌa apakufamoꞌmo hauꞌniya kavateꞌmo yagaiꞌa atesayafeꞌmo hapa noꞌmae.   
\c 3  
\p
\v 1 Gotiꞌa Kalaisiꞌeꞌmo magokepi alino he tino lapateꞌniyaꞌmofeꞌmo kokuꞌnapi haneꞌniya yafeꞌmo lapaꞌye huꞌninagetapa kahauya hiyo. Anileꞌmo Kalaisiꞌa Goti lamaga haopaleꞌmo siaꞌaleꞌmo neꞌmaiye.  
\v 2 Ma mopafi yafeꞌmo lapakesamo oꞌafitapa muga anaga kotegamo nehaneya yafekeꞌmo lapakesamo afiyo.  
\v 3 Lapakaemo faliꞌnageno afaꞌa neꞌmaiya yaꞌmo alino fala kino ateꞌnigeno Kalaisiꞌeꞌmo magokepi lokaeno Gotipiꞌmo nehaneyaꞌmofeꞌmae.  
\v 4 Kalaisiꞌa afaꞌa neꞌmauna yaꞌmo aepa vekamo afole aisigetapaeꞌmo ha le konali yaꞌamo agaeꞌeꞌmo alisageꞌa lapakegae.   
\p
\v 5 Aligayaꞌmofeꞌmo ma mopafi amega lapakufamoꞌmo nehaya kavaꞌmo amagita falita ataleyo. Kumai kavanagi oꞌaniꞌya kavanagi hosu lapaipa nekaliya kavanagi hosu kavafeꞌmo lapaka neteya kavanagi ma mopafi yafeꞌmo lapaꞌye nehiya kavanagi hutapa alita amagitapa falita ataleyo. Ma mopafi yafeꞌmo hapaꞌye nehisiya vayaꞌmogi aigofe gotifeꞌmo mono nehae.  
\v 6 Goti geꞌamo akame nosaya vayaꞌmogi ani agufa kavaꞌmo nehayaꞌmofeꞌmo aipamo leno neꞌapateyanageno kayoꞌmo apamigiye.  
\v 7 Hogotetapa ani agufa hosu kateꞌmo neꞌutapaeꞌmo hosu kavapiꞌmo maiꞌnayaꞌmonanafa  
\v 8 hemenimo muki mani agufa hosu kavaꞌmo ago ataleyo. Lapaipamo olege lapai vaitapa oꞌapatege hanageke yaꞌmo alita oꞌapamige huta faipa huta oꞌapatege hosu kigi yokalo gemo osuge lapaꞌye hisiya kavaꞌmo alino afole aino atesiya agufa gemo osuge hutapa maiyo.  
\v 9-10 Lapakaemo atafa vekatapimo atalege atafa vekatapimoꞌa nehiya kavaꞌmo atalege hutetapa saufa vekatapimo alita vaiꞌnayaꞌmofeꞌmo konagatapieꞌmo aigofe gemo osiyo. Gotiꞌa saufa vekatapimo alo huꞌniyanageno Gotiꞌmo ageta aeto nehutapaeꞌmo agaekana hutapa maisayafeꞌmo saufa vekatapimo magoꞌe magoꞌe huno alo huno nelapate.  
\v 11 Nelapateyaꞌmofeꞌmo saufa vayaꞌmo maiꞌnetapaeꞌmo Yu nofi vayapatiꞌmo oꞌmaiꞌnaya vayanagi Yu nofi vayapatiꞌmo maiꞌnaya vayanagi apakufamo olagauꞌnaya vayanagi apakufamo lagauꞌnaya vayanagi alu apake neꞌaiya vayanagi kahaufilaga vayanagi kalavusi aliꞌyaꞌmo neꞌaliya vayanagi afaꞌa neꞌmaiya vayanagi huꞌa hailami salami huꞌa noꞌmaifa Kalaisiꞌa agaiꞌageꞌmo muki kavaꞌmo aepa neꞌmo maiꞌnenoꞌaeꞌmo muki alu vaya alu vayaꞌai apaipafiꞌmo neꞌmaiye.   
\p
\v 12 Gotiꞌa lapakaefeꞌmo hau ayamopafiꞌmo hauꞌnigeno ago lekana paino lapateteno lapavaleno alino lapaote lapateꞌniyaꞌmofeꞌmo lapau huta apatege alitapa lapao yaꞌmo huge ina agufa vayaꞌmo maiꞌnone, hutapa lapakesamo afige yagu yaga kavaꞌmo hutapa apatege lapakaetegamo hosu kavaꞌmo nehisagetapaeꞌmo afaꞌa maiꞌnetapa falu fala lapaipamo kalita apatege hutapa maiyo.  
\v 13 Hosu kavaꞌmo lapakaepatiꞌmo hisagetapaeꞌmo konagatapilegamo afalu afalu kavaꞌmo hutapa vase kavaꞌmo huge hosu kavaꞌapimo alita atalege hutapa magokepiꞌmo lokaetapa maiyo. Mago konagatapimoꞌa konagaꞌaeꞌmo, nagaetegamo hosu kavaꞌmo huꞌniye, huno agesamo afiꞌnisiyaꞌmoꞌmo Ala kava neꞌmoꞌa hosu kavatapimo alino ataleꞌniya kava hutapa hosu kavaꞌamo alita ataleyo.  
\v 14 Mani kavaꞌmo nehutapaeꞌmohogote kavaꞌmo hutapa lapau lapayamopafiꞌmo lapainagenoꞌao alagepa huno magokepi alino lokaeno lapateno.  
\v 15 Gotiꞌa lapaipamo alino falu huno lapateꞌniya kavaꞌmoꞌa lapaipaleꞌmo yagaino lapateno. Gotiꞌa magoke vayaꞌmo maisageno lapaipamoꞌmo falu hisiyafeꞌmo keya aeno ge huꞌniye. Ani kava hutapa maiꞌnetapaeꞌmo Gotifeꞌmo hao ke heyo.  
\v 16 Lapaipamo alo higenoꞌao Kalaisifeꞌmo ava gemoꞌa lapaipafiꞌmo magoꞌe huno hanege hanege huno alagi haneno. Alagepa huta lapakesamo afiꞌnetapaeꞌmo konagatapimo afalu afalu kavaꞌmo hutapa alita apaya maletapaeꞌmo hosu kavaꞌmo osisayafeꞌmo ehetapiye, huta hapa paiyo. Lapaipafiꞌmo Gotifeꞌmo hao ke nehetapaeꞌmo samu yokemo huge mono yokemo huge Ala kava neꞌmo agiꞌaleꞌmo aliꞌa neꞌasagaya yokemo huge hutapa maiyo.  
\v 17 Muki agufa kavaꞌmo huge muki agufa gemo huge nehisayana Ala kava neꞌmo Yesu agiꞌalefeꞌmo hutetapa agaetetiꞌmo afotimo Gotifeꞌmo hao ke heta maiyo.   
\s1 Afamo anagaꞌmogimo hisaya kavafeꞌmo huꞌniya gemae.  
\p
\v 18 Aꞌnemogitapae, huꞌna, Ala kava nepiꞌmo maiꞌnisaya aꞌnemogimo hisaya kava hutapa anautapimogi apaiyafiꞌmo maiꞌnetapa geꞌapimo afiyo.  
\v 19 Anauꞌapimogitapae, huꞌna, aꞌnetapilegamo lokiya kavaꞌmo osutapa apakaefeꞌmo lapau lapayamopafiꞌmo lapaino.  
\v 20 Mafaꞌnemogitapae, huꞌna, muki kavatefeꞌmo itatapi afotapimogi geꞌapimo neꞌafisagenoꞌaeꞌmo Ala kava neꞌmoꞌa lusi kava huno amuse huno lapategaiyaꞌmofeꞌmo ani kavaꞌmo hiyo.  
\v 21 Afoꞌapimogitapae, huꞌna, mafaꞌnetapimogimo apaipamo lesiya agufa kavaꞌmo osiyo fiku yanageno apaipamoꞌmo kana hugiyanagi.  
\v 22 Aliꞌya neꞌaliya vayaꞌmogitapae, huꞌna, hosu kavanagetapa aliꞌya aepa vayaꞌmogi amuse huꞌa lapatesayafeꞌmo apaulagaleꞌmo maiꞌnetapaekeꞌmo geꞌapimo neꞌafiye. Gotifeꞌmo koli nehutapaeꞌmo muki afinaꞌmo lapaipafatiꞌmo geꞌapimo afiyo.  
\v 23 Muki alu aliꞌya alu aliꞌyaꞌmo neꞌalitapaeꞌmo vayaꞌaitefeꞌmo aliꞌyaꞌmo noꞌalufa Ala kava netefeꞌmo mani aliꞌyaꞌmo neꞌaluve, huta lapayamukiki hutapa aliꞌyaꞌmo aliyo.  
\v 24 Ala kava neꞌmo Kalaisi aliꞌyaꞌaleꞌmo maiꞌnayaꞌmofeꞌmo ago afiꞌnayana Ala kava neꞌmoꞌa alo hu maleꞌniya yapatiꞌmo miyatapimo alino lapamigiye.  
\v 25 Gotiꞌa hosu kavaꞌmo nehisaya vayaꞌmo agaiꞌa aulagaleꞌmo haiya vayaꞌmo maiꞌnafi huno agesamo oꞌafigifa anonaꞌapilefeꞌmo hosu miyaꞌapimo alino apamigiye. Gotiꞌa muki vayaꞌaina magoke agufa kavatetiꞌmo alino fako huno neꞌapate.   
\c 4  
\p
\v 1 Aliꞌya aepa vayaꞌmogitapae, huꞌna, yagaitapa neꞌapataya vayaꞌmo maiꞌnaya kava huno Ala kava netapimo kokuꞌnapiꞌmo maiꞌniye, huta ago afiꞌnayaꞌmofeꞌmo aliꞌyatapimo neꞌaliya vayaꞌaitegamo fatago kavaꞌmo hutapa alagepa yaꞌmo alita apamiyo.   
\s1 Nunumu nehutapa alagepa kavaꞌmo hiyo, huno huꞌniya gemae  
\p
\v 2 Nunumu nehutapaeꞌmo oꞌataleta alagepa huta kava yagaiꞌnetapa Gotifekeꞌmo hao ke hetapa nunumu huge huge hutapa maiyo.  
\v 3 Nunumu nehutapaeꞌmo Goti geꞌamo aeta hakalo huta hapa paisuna kaꞌmo valino latesigeta Kalaisifeꞌmo ava gemo hogoteno alino fala ki maleꞌneno hemenimo alino lave liꞌniya geꞌamo hapa paisunafeꞌmo nunumu hutapa lateyo. Mani gelefeꞌmo aliꞌa kalavusi huꞌa nateꞌnae.  
\v 4 Gotiꞌa alagepa huꞌna aeꞌna hakalo huꞌna hapa paisuvafeꞌmo hauꞌniye. Ani kava huꞌna hisuvafeꞌmo nunumu hutapa nateyo.  
\v 5 Lapakaemo malaga vayaꞌaifeꞌmo alagepa huta lapakesamo neꞌafitapa alagepa kavaꞌmo hiyo. Lapakaemo alagepa kavaꞌmo hisaya afinaꞌmo ago hano hugiyanagi alagepa kavaꞌmo hutapa alagepa aliꞌyaꞌmo aliyo.  
\v 6 Hagaꞌage gemo nehane, huꞌa hisayafeꞌmo ge hugefeꞌmo alagepa geꞌageꞌmo hiyo. Geꞌapileꞌmo alagepa huta aeta atagaina hutapa hapa paisayafeꞌmo alagepa huta afiꞌnetapa hapa paiyo.   
\s1 Poloꞌa lole vekalaꞌmo alino anateꞌnigeꞌana uꞌnaꞌa gemae  
\p
\v 7 Tikikasiꞌa lahau layamopafiꞌmo lahauꞌniya konagatimoꞌmo oꞌataleno muki afinaꞌmo Ala kava neꞌmo aliꞌyaꞌamo lagaeꞌeꞌmo lokaeno neꞌaliya vekamoꞌa uno muki kavafeꞌmo nava gemo huno lapa paigiye.  
\v 8 Agaemo uno haiya kava hutapa maiꞌnafi huno lapaketenoꞌaeꞌmo lapaipamo alino lokiya vaino lapatesiya gemo lapa paisiyafeꞌmo aliꞌna atesugeno ugiye.  
\v 9 Avagi huno visiya vekamo Onesimasifeꞌmo lahau layamopafiꞌmo lahauꞌniya konagatimoꞌa aliꞌyaꞌamo oꞌataleno muki afinaꞌmo alagepa aliꞌyaꞌmo neꞌaliya vekamo lapakaepati vekamo maiꞌniye. Anakaemo uꞌanaeꞌmo manileꞌmo muki afole aiꞌniya kavafeꞌmo ava gemo huꞌana lapa paigaꞌae.   
\s1 Kolosi vayaꞌaifeꞌmo ge apamamaeꞌnaya gemae  
\p
\v 10 Alisitakasiꞌa nagaeꞌeꞌmo kalavusimo huꞌniya vekamoꞌa ge lapamamaeꞌniye. Makiꞌa Manamasi avuꞌamoꞌmo ge lapamamaeꞌniye. Agaefeꞌmo, esigetapaeꞌmo alita falu fala huta atetetapa neꞌyaꞌmo amiyo, huꞌna lapa paiꞌnove.  
\v 11 Yesuꞌa mago agiꞌamo Yasitasiꞌa ge lapamamaeꞌniye. Mani loleꞌe magoꞌe vayaꞌmo Yu nofi vayaꞌmo maiꞌneꞌa Gotiꞌa yagaino apatesiya kavaꞌmo afole aisiyafeꞌmo nagaeꞌeꞌmo lokaeꞌa aliꞌyaꞌmo neꞌaliye. Alagepa huꞌa naha maeꞌnageno naipamoꞌmo falu huꞌniye.  
\v 12 Epafalasiꞌa lapakaepati vekamoꞌa Kalaisi aliꞌyaꞌmo neꞌaliya vekamoꞌa ge lapamamaeꞌniye. Lapakaemo alopa Kalisitini vayaꞌmo hamaletetapa oꞌataleta lokiya vaita maiꞌnetapa Gotiꞌa hauꞌniya kavaꞌmo agetetapa akame hisayafeꞌmo lusi kava huno nunumu huno nelapate.  
\v 13 Agaemo lapakaetegamogi Leyotisiya taonifiꞌmo maiꞌnaya vayaꞌaitegamogi Hilapolisi taonifiꞌmo maiꞌnaya vayaꞌaitegamogi huno lokiya kavaꞌmo huno agesa afifi huno aliꞌyaꞌmo neꞌaligeꞌnaeꞌmo lapa nepauve.  
\v 14 Lukiꞌa lahau layamopafiꞌmo lahauꞌniya lota vekaꞌe Nimasiꞌeꞌmo ge lapamamaeꞌnaꞌae.  
\v 15 Lagaefeꞌmo Leyotisiya konagatimogiꞌe Nipaꞌeꞌmo siosi vayaꞌmo noꞌafiꞌmo aliꞌa anupa huꞌa maiꞌnaya vayaꞌaifeꞌmo ge apamamaetapa hapa paiyo.   
\p
\v 16 Mani avoꞌmo alitapa lekana paitetapaeꞌmo Leyotisiya siosi vayaꞌmogi lekana paisayafeꞌmo alitapa apamiyo. Ani kava huꞌa Leyotisiya konagatimogitapamo mago avoꞌmo aliꞌa lapamisagetapa lekana paiyo.  
\v 17 Lapakaemo Akipasifeꞌmo Ala kava neꞌmoꞌa kamiꞌniya aliꞌyakamo alika hano huvo, hutapa ha paiyo.  
\v 18 Ani gemo huteꞌnaeꞌmo hemenimo nagaemo avoꞌmo nekaeya vekalegatiꞌmo avo kayoꞌmo aliꞌna avoꞌmo kaeꞌnaeꞌmo, Poloꞌna ge lapamamaeꞌnove, huꞌna avoꞌmo nekaove. Kalavusifiꞌmo maiꞌnovanagi lapake okanino. Gotiꞌa fiku lapa maeno lapamino. He lama ge.