\id 2TI - Keyagana NT with OT portions [kyg] -Papua New Guinea 2001 (web 2014) 
\h 2 Timoti 
\toc1 2 TIMOTI 
\toc2 2 Timoti 
\toc3 2Ti 
\mt1 2 TIMOTI  
\ip Poloꞌa aliꞌyaꞌamo alagi alino hano hutenoꞌaeꞌmo mani henaga avoꞌmo kaetegeꞌapaeꞌmo amagiꞌnageno faliꞌniye. Poloꞌa ani kavatefeꞌmo hunoꞌaeꞌmo, kolaꞌnimo ma mopafiꞌmo aiꞌna lakiꞌna ataleꞌna visuva kanaꞌnimo ago hogo huꞌniye, huno huteno avoꞌmo kaeꞌniye. (4:6). Ani kavafeꞌmo agesamo afitenoꞌaeꞌmo Timotiꞌa oꞌataleno atafauno alagi huno maisiyafeꞌmo mani avoꞌmo kaeꞌniye. Poloꞌa huꞌniya kavafeꞌmo ava gemo huno, ani agufa kavaꞌmo huka maiyo, huno avoꞌmo kaeꞌniye.  
\c 1  
\p
\v 1 Gotiꞌa, Kalaisi Yesupiꞌmo maige maige huꞌa maisaya yaꞌmo aliꞌna apamiguve, huno huꞌniye. Mani gelefeꞌmo, Yesu Kalaisi apa vekaꞌamo maigane, huno naha paiꞌnigeꞌnaeꞌmo nagaemo Poloꞌnamo aliꞌyaꞌamo alisuvafeꞌmo hauꞌnigeno navaleno nateꞌniye.  
\v 2 Nahauꞌniya mafaꞌneꞌnimo Timotigaeꞌmo avoꞌmo nekaove. Afotimo Gotiꞌe Ala kava netimo Kalaisi Yesuꞌeꞌmo fiku kaha maeꞌana hanau huꞌana kateꞌanageno kaipamoꞌmo falu hino.   
\s1 Timotiꞌmo lokiya vaino atesiya agufa gemo ha paiꞌniya gemae  
\p
\v 3 Naginagomogi Gotifeꞌmo mono aliꞌyaꞌamo aliꞌnaya kava huꞌna nagupi mafaꞌnemoꞌa hosu kavaꞌmo hane, huno nosigeꞌnaeꞌmo mono aliꞌyaꞌamo neꞌaluve. Ani kava huꞌna kagaefeꞌmo nagesamo neꞌafiꞌnaeꞌmo Gotifeꞌmo muki afinaꞌae afinaꞌaeꞌmo okataleꞌna felugaꞌe haniꞌilagaꞌeꞌmo hao ke heꞌna nunumuꞌmo nehuve.  
\v 4 Kaunumo nelamiya kavafeꞌmo nagesamo afiteꞌnaeꞌmo kagesugenoꞌaeꞌmo naipafiꞌmo namogaga aisiya yaꞌmo havai tesiyafeꞌmo nahauꞌniye.  
\v 5 Kagaefeꞌmo nagesamo afiꞌna ho huꞌnaeꞌmo, lama ge huno agesa afino fatago huꞌniye, huꞌna nehuve. Mani agufa lama ge kavaꞌmo hogoteno alemokamoꞌmo Lovisi aipafiꞌmo haneꞌnigeno itakamoꞌmo Yunisi aipafiꞌeꞌmo haneꞌniya kava huno kagae kaipafiꞌmo haneꞌniye, huꞌna ago ageꞌnovaꞌmofeꞌmo lole nagesamo oꞌafiꞌnofa magoke nagesamo neꞌafuve.  
\v 6 Ani kava huka maiꞌnanaꞌmofeꞌmo kagesamo afika ho hisanafeꞌmo kaha nepauve. Nagaemo kagaeteꞌmo nayaꞌmo maleꞌna kateꞌnogenoꞌaeꞌmo Gotiꞌa lokiyaꞌamo ago alino kamiꞌniye. Kamiꞌniya lokiyaꞌamoꞌmo ata legekana huno yu oseno magoꞌe huno lesiyafeꞌmo fu huka kaegenoꞌao leno.  
\v 7 Na kava nehiyaꞌmofeꞌmae. Gotiꞌa alino lamiꞌniya Aunemeꞌamoꞌmo laipafiꞌmo aliꞌyaꞌmo neꞌaligetaeꞌmo lamoꞌya oꞌaita himamuꞌamo aliꞌneta lahau layamopafiꞌmo lahauꞌnigeta lagesamo neꞌafuna kavateꞌmo neꞌyagaune.  
\v 8 Alino lamiꞌniyaꞌmofeꞌmo Ala kava netimo faigoko geꞌamo aeka hakalo huka hapa paisanafeꞌmo kavagage osinageka Kalaisi agiꞌalefeꞌmo kalavusifiꞌmo maiꞌnova vekaeꞌmo kavagage osino. Kavagagemo osinageka faigoko gelefeꞌmo hanageke yaꞌmo alisayafeꞌmo Goti himamuꞌaletiꞌmo kanamo aliyo. Nagaemo kana aliꞌnova kava huka kanamo aligetaꞌao.  
\v 9 Gotiꞌa lagufamo alino katino latesigeta laote vayaꞌamo maisunafeꞌmo keya aeno ge huꞌniye. Alagepa aliꞌyaꞌmo aliꞌnona kavatetiꞌmo keya aeno ge osuꞌnifa nagaiꞌnigeꞌmo hapa maegauve, huno huꞌniyanagenoꞌaeꞌmo fiku laha maeno lamisiya kavaꞌalefeꞌmo keya aeno ge huꞌniye. Ema akeyaꞌvilaga ma mopamo alo osuꞌniya afinaꞌmo hogoteno Gotiꞌa Kalaisi Yesupiꞌmo maiꞌnonagenoꞌaeꞌmo fiku laha maeno lamiꞌniye.  
\v 10 Akeyaꞌvilaga lamiꞌniyaꞌmonanafa Yesu Kalaisiꞌa lagufamo alino katino lateno lahau neꞌvaiya vekamo afole aiꞌnigenoꞌaeꞌmo hemenimo ani kavaꞌmo laulagaleꞌmo ago afole aiꞌnigeta ageꞌnone. Agaemo nefaluna kavaꞌmo lokiyaꞌamo alino hano huno ataleteno agaiꞌaeꞌmo alagepa faigoko geꞌaletiꞌmo maige maige huꞌa maisaya yaꞌmo alino afole aino ateꞌniye.  
\v 11 Gotiꞌa ani faigoko geꞌamo aeꞌna hakalo huꞌna hapa nepauva vekamo maige apa vekaꞌamo maige alu nofi vayaꞌaina aliꞌna apaya neꞌmalova vekaꞌamo maige huꞌna maisuvafeꞌmo ago lekana paino nateꞌniye.  
\v 12 Ani aliꞌya neꞌaluvaꞌmofeꞌmo mani kanamo aliꞌna maiꞌnovaꞌmonanafa navagage alagi nosiye. Nagaemo naha maesiyafeꞌmo ina lafeꞌmo nagesa afiꞌna fatago huꞌnofi huꞌna ago ageꞌna aeto huꞌnove. Nagaemo ageteꞌnaeꞌmo amiꞌnova yateꞌmo afaꞌa yagaino nateme nateme neꞌviyanageno agaiꞌa afinakeꞌmo afole aigiye, huꞌna nagesamo afisuvafeꞌmo alino nave liꞌnigeꞌna ago ageꞌnove.   
\p
\v 13 Kagaemo aliꞌna kaya maleꞌnogeka afiꞌnana geleꞌmo atafauka alagi huvo. Ani gemoꞌa kaita haugekana huno ohaneꞌneno vayaꞌmo alino hapageno neꞌapateya gemo akame hisana kavaꞌmo auneꞌamo aliꞌna kave liꞌnove. Kalaisi Yesupiꞌmo maiꞌnekaeꞌmo kagesamo afika fatago nehukaeꞌmo kahau kayamopafiꞌmo kahauꞌnisigeka ani gemo atafauka alagi huvo.  
\v 14 Gotiꞌa faigoko geꞌaleꞌmo yagaika atesanafeꞌmo alino kamiꞌniye. Ani faigoko geꞌaleꞌmo laipafiꞌmo maiꞌniya aote Aunemeꞌamo himamuꞌaletiꞌmo yagaika ato.   
\p
\v 15 Ago afiꞌnanana muki Esiya kotega vayanagi Esiya vekalaꞌmo Fiselasiꞌagi Hemosenisiꞌagi huꞌa ago nataleꞌnae.  
\v 16-17 Ala kava neꞌmoꞌa Onesifolasiꞌe afamo anagaꞌaꞌeꞌmo hau huno apateno. Onesifolasiꞌa kalavusifiꞌmo maiꞌnova kavafeꞌmo avagage osuꞌnigeno Lomu taonifiꞌmo eno avaꞌyi huteno lusi kava huno kahauya huno nageno nava tetenoꞌaeꞌmo muki afinaꞌmo naha maege naha maege huno naha maeꞌnigenoꞌaeꞌmo naipamoꞌmo falu huꞌniye.  
\v 18 Efasasi taonifiꞌmo maiꞌnogenoꞌaeꞌmo muki afinaꞌaeꞌmo naha maeꞌniya kavaꞌmo ago ageꞌnane. Nagaemo Ala kava nefeꞌmo, kagae afinaꞌmo afole aisigekaeꞌmo kahau huka ato, huꞌna nunumuꞌmo huꞌna neꞌatove.   
\c 2  
\s1 Alagepa ati vekamo maiyo, huno ha paiꞌniya gemae  
\p
\v 1 Ani kavaꞌmo huꞌniyaꞌmofeꞌmo kagaemo mafaꞌneꞌnimogamo Kalaisi Yesuꞌa fiku kaha maeno kamiꞌniya kavatetiꞌmo lokiya vaika maiyo.  
\v 2 Nagaemo muki vayaꞌaifeꞌmo aeꞌna hakalo huꞌna hapa paiꞌnogekaeꞌmo apakaeꞌeꞌmo magokepi lokaeka maiꞌnekaeꞌmo kagaemo ago afiꞌnane. Kagaemo ani afiꞌnana gemo muki afinaꞌmo alagepa huꞌa aliꞌyaꞌmo neꞌaliya vayaꞌmogi ani geleꞌmo yagaiꞌa atesayafeꞌmo alika apamigeꞌapao aliꞌneꞌa magoꞌe huꞌa alu vayaꞌaina aliꞌa apaya maleyo.  
\v 3 Ani kavatefeꞌmo kagaemo Yesu Kalaisi alagepa ati vekaꞌagana huka maiꞌneka kanamo alige alige huka maiyo.  
\v 4 Ati vayaꞌmogimo kame hisayafeꞌmo ma mopafi yaꞌmoꞌa apatafauno apatesiya agufa aliꞌyaꞌmo noꞌaliye. Ati aliꞌyateꞌmo apavaleno alino apateꞌniya vekamoꞌa amuse huno apatesiyafeꞌmae.  
\v 5 Nagu nagu huꞌa yokalo nelaya vayaꞌmogimo nagu nagu hisaya keꞌaepa gemo akame osisayana hu maleꞌnaya yaꞌmo afaꞌa oꞌaligae.  
\v 6 Hoyamo ayamufa valeno alino neꞌvaiya vekamoꞌa hogoteno hoyaꞌafatiꞌmo lesiya neꞌyaꞌmo aligiye.  
\v 7 Mani nehuva geeꞌmo kagesa afifi huka maiꞌnegenoꞌao Ala kava neꞌmoꞌa alino kamisigekaeꞌmo muki geꞌamo afika aeto hugane.  
\v 8 Yesu Kalaisiꞌa Nevini aginagoꞌamoꞌmo alagepa faigoko geꞌnilefeꞌmo faliꞌniyatetiꞌmo ago alino he tino ateꞌniya kavafeꞌmo kage okanika kagesa afifi huka maiyo.  
\v 9 Mani Goti gelefeꞌmo huꞌapaeꞌmo, hosu kavaꞌmo nehiya vekamo maiꞌniye, huꞌa huteꞌa nofi kiꞌa nateꞌnayaꞌmonanafa Goti geꞌamo aino atagu ofaesiyafeꞌmo nofi kiꞌa oꞌateꞌnae.  
\v 10 Nagaemo lekana paino apateꞌniya vayaꞌmo Kalaisi Yesupiꞌmo maiꞌnisageno Gotiꞌa apakufamo alino katino apatesigeꞌapaeꞌmo ha le konali yaꞌamo aliteꞌa maige maige huꞌa maisayafeꞌmo Goti aliꞌyaꞌamo oꞌataleꞌna neꞌaliꞌnaeꞌmo muki alu kana ya alu kana yaꞌmo neꞌaluve.  
\v 11 Lama geeꞌmo lagesa afita fatago nehuna gemo haneꞌniyana, Agaeꞌeꞌmo faliꞌnisunana agaeꞌeꞌmo afaꞌa maigune.  
\v 12 Alagi oꞌataleta kanamo alime alime neꞌvisunana kini vayakana huta agaeꞌeꞌmo magokepi lokaeta maiꞌneta yagaita apategaune. Lagaemo agaefeꞌmo oꞌageꞌnona vekae, huta nehisunana lagaefeꞌmo oꞌapakeꞌnova vayane, huno hugiye.  
\v 13 Lagaemo, akame hugune, huta hutetaeꞌmo akame nosisunana agaemo huguve, huno hu maleꞌnisiya gemo akame hugiye. Huguve, huno nehiya gemo alagi oꞌataleno afaꞌa akame nehiya vekamo maiꞌniyaꞌmofeꞌmae.   
\s1 Alagepa huka aliꞌyaꞌmo aliyo, huno ha paiꞌniya gemae  
\p
\v 14 Ani geeꞌmo muki afinaꞌmo apakesamo afisayafeꞌmo ina ge huka hapa paiyo. Ala kava neꞌmo aulagaleꞌmo maiꞌneꞌnaeꞌmo, alu ge alu geletiꞌmo ge vaitapa kaveta osiyo, huka hapa paiyo. Ani agufa gemoꞌa afisaya vayaꞌaina hapa oꞌmaegaifa alino hosu hunoꞌageꞌmo apategaiye.  
\v 15 Gotiꞌa kagaefeꞌmo, Naulagaleꞌmo alagepa aliꞌyaꞌmo neꞌaline, huno husiyafeꞌmo kayamukiki huvo. Avagage osisiya agufa aliꞌyaꞌmo neꞌaliya vekagana huka lama gelefeꞌmo alagepa huka aliꞌyaꞌmo aliyo.  
\v 16 Aliganaꞌmonanafa ma mopafi geꞌe afa geꞌeꞌmo nehisagekaeꞌmo maika halove huka apato. Ani agufa gemoꞌa hapa oꞌmaesigeꞌa Gotifeꞌmo mono osuꞌa magoꞌe huꞌa hosu kavaꞌmo hugae.  
\v 17 Ani agufa hosu gemoꞌa apamuꞌmo apaleteno ko nesiya agufa kavakana huno aleme aleme uno ko sino alopa hegaiye. Ani agufa gemo aliꞌana apaya maleꞌnaꞌa vekalaꞌmo Haimeniyasiꞌe Failitasiꞌeꞌmo maiꞌnaꞌae.  
\v 18 Anakaemo alagepa kaꞌmo atale uꞌanaeꞌmo, agaegiꞌeꞌmo ago he tiꞌnonanageta falisunatetiꞌmo halate he otigune, huꞌana hapa paiꞌnaꞌageꞌapaeꞌmo mago vayaꞌamogi apakesa afiꞌa fatago huꞌnaya kavaꞌapimoꞌmo heleve hugekana huno asagauno aiꞌniye.  
\v 19 Asagauno aiꞌniyaꞌmonanafa Goti noꞌamo lokiya yafateꞌmo faino ateꞌniya yafaꞌmo afaꞌa haneꞌniye. Gotiꞌa faino ateꞌniya yafateꞌmo alagena yaꞌmo hu maleꞌniya yateꞌmo haneꞌniya gemoꞌa hunoꞌaeꞌmo, Ala kava neꞌmoꞌa vayaꞌamo apakeꞌniye, huno huteno magoꞌe gemoꞌa hunoꞌaeꞌmo, Muki vayaꞌamogimo Kalaisi agiꞌamo neꞌaya vayaꞌmogi hosu kavategatiꞌmo ataleꞌa viyo, huno hu maleꞌniye.   
\p
\v 20 Goti vayaꞌamo afaꞌa maigayaꞌmonanafa alopa nopiꞌmo lusi moniletiꞌmo miya nefaiya yuvapamo goli yafatetiꞌmo alo huꞌnaya yuvapaꞌe siluva yafatetiꞌmo alo huꞌnaya yuvapaꞌageꞌmo ohaneꞌnifa yosaletiꞌmo alo huꞌnaya yuvapagi mopaletiꞌmo alo huꞌnaya yuvapaꞌenagi huno haneꞌniye. Mago yuvapaꞌamo alagepa aliꞌyaꞌmo alisiya yuvapamo haneꞌnigeno mago yuvapamoꞌamo hosu aliꞌyaꞌmo alisiya yuvapamo haneꞌniye.  
\v 21 Mago vekamoꞌa ani hosu yatefeꞌmo aeno kalo paeno atesigenoꞌaeꞌmo alagepa yuvapagana huno maiꞌnisigeno kava vekaꞌamoꞌa muki alagepa aliꞌyaꞌaleꞌmo avaleno ategaiye.  
\v 22 Neya vayaꞌmogimo apakufamoꞌmo hauꞌniya kavaꞌmo nehaya kavategatiꞌmo ataleka kaune hetaleka eka yaveyave apaipafatiꞌmo Ala kava nefeꞌmo ge nehaya vayaꞌeꞌmo magokepiꞌmo lokaetapa maiꞌnetapaeꞌmo fatago kavanagi lapau lapayamopafiꞌmo nelapaiya kavanagi yuna lapaipa nekaliya kavanagi hutapa atafausayafeꞌmo vegala aeyo.  
\v 23 Negi maleteꞌa fiku gemo huge afige huꞌa neꞌmaisayaꞌmoꞌmo ago afiꞌnanana gegeꞌmo vaige vaige huꞌa maigayanagi maika halove huka apato.  
\v 24 Ala kava neꞌmo aliꞌyaꞌamo neꞌalisiya vekamoꞌa geletiꞌmo kaveta osuno muki vayaꞌaitegamo yagu yaga kavakeꞌmo huge alagepa huno alino apaya malege oꞌafiꞌnisaya vayaꞌaifeꞌmo aipamo leno oꞌapateno yuna aipamo kalino apatege huno maisiya vekageꞌmo maino.  
\v 25 Agaemo gemo amagiꞌa neꞌatagaya vayaꞌaifeꞌmo himuꞌnamu gefatiꞌmo osuno vase vase gemo huno alino api aino apategaiye. Gotiꞌa apaipamo alino afe leno apatesigeꞌapaeꞌmo lama geꞌamo afisafi oꞌafisafi, huno vase vase gefatiꞌmo hugiye.  
\v 26 Sataniꞌmo geꞌamo akame hisayafeꞌmo aneꞌaifiꞌmo hegekana huno apatafauꞌniye. Alagepa aliꞌyaꞌmo neꞌaliya vekamoꞌa apakaetegamo ge hugefeꞌmo hunoꞌaeꞌmo vase vase huno ge hisigeꞌapaeꞌmo aneꞌaifatiꞌmo aeꞌa kasalo paegae.   
\c 3  
\s1 Henagaꞌamo asole hanageke yaꞌmo afole aigiye, huno huꞌniya gemae  
\p
\v 1 Mani hemeni kaha paisuva gemo alagepa huka afiyo. Henagaꞌamo hosu afinaꞌmo afole aisigeꞌapaeꞌmo lusi kanamo aligae.  
\v 2 Vayaꞌmogimo apakaiꞌapiekeꞌmo hapauge monieꞌmo hapaꞌye huge apakaiꞌapiekeꞌmo ge huꞌa apakiꞌapileꞌmo aliꞌa asaga huge ala vayaꞌmo maiꞌnone, huꞌa apakesamo afige huꞌa faipa huꞌa apatege itaꞌapi afoꞌapimogi geꞌapimo oꞌafige hapao ke osege apaote kavaꞌmo osuge huꞌa maigae.  
\v 3 Apakaemo afamo anagaꞌapieꞌmo ohapauge vayaꞌai hosu kavaꞌapilefeꞌmo afaꞌa ateyo, huꞌa osuge huꞌa faipa huꞌa apatege hapauꞌniya kavateꞌmo alagepa huꞌa yagaiꞌa oꞌapatege hapau huꞌa oꞌapatege muki alagepa kavatefeꞌmo apaini huꞌa atege huꞌa maigae.  
\v 4 Apakaemo kutulu yaꞌmo nege apakesamo oꞌafiꞌneꞌa malage huꞌa huge ala vayaꞌmo maiꞌnone, huꞌa himuꞌnamu gemo huge huꞌa Gotifeꞌmo ohapauꞌnisigeꞌa apakufamoꞌmo hauꞌniya kavafekeꞌmo apamogaga aigae.  
\v 5 Apakaemo Gotifeꞌmo amega apakufaletiꞌmo mono nehayaꞌmofeꞌmo nehaya kavaꞌapiletiꞌmo huꞌapaeꞌmo, Goti himamuꞌaletiꞌmo apaipafiꞌmo aliꞌyaꞌmo noꞌaliye, huꞌa aliꞌa apave neliye. Ani agufa vayaꞌmo apataleka kaote maiyo.  
\v 6 Mago ani agufa vayaꞌmogi vayaꞌai nopiꞌmo kesi katetiꞌmo haiꞌa alagepa huꞌa apakesamo noꞌafiya aꞌne anagaꞌaina geꞌapiletiꞌmo nofi kigekana huꞌa neꞌapatae. Aꞌnemogi hosu kavaꞌapimoꞌa lusi kana huꞌnigeno asole yafeꞌmo hapaꞌye nehiya kavaꞌapimoꞌa apavayu hulino neꞌviye.  
\v 7 Muki afinaꞌmo gemo afige afige huꞌa maiꞌnayaꞌmonanafa lama gemo afaꞌa afiꞌa aeto osugae.  
\v 8 Akeyaꞌvilagamo Yanisiꞌe Yamalisiꞌeꞌmo Mosesefeꞌmo kame huꞌana ateꞌnaꞌa kava huꞌa ani vayaꞌmogi lama gelefeꞌmo kame huꞌa neꞌatae. Apaipa apakesamo kasaliꞌniya yakana huno haneꞌnigeꞌapaeꞌmo aigofe apakesa afiꞌa fatago nehaya vayaꞌmo maiꞌnae.  
\v 9 Vayaꞌmogi Yanisiꞌe Yamalisiꞌeꞌmo hosu kavaꞌanimo ageteꞌapaeꞌmo, negi kavaꞌmo huꞌnaꞌae, huꞌa huꞌnaya kava huꞌa hemenimo muki vayaꞌmogimo ani vayaꞌai hosu kavaꞌapimo ago ageꞌa ha leꞌa agegayaꞌmofeꞌmo magoꞌe huꞌa afaꞌa humi oꞌapategae.   
\s1 Goti geꞌaleꞌmo atafauka alagi huvo, huno ha paiꞌniya gemae  
\p
\v 10 Nehayaꞌmonanafa kagaemo nehuva kavaꞌnimo ago ageteka akame huꞌnane. Ago ageꞌnanana aliꞌna apaya maleꞌnogeka ago nagege muki afinaꞌmo na agufa kavaꞌmo nehufi huka ago nagege neꞌaluva aliꞌyaꞌmoꞌa na agufa neꞌyaꞌmo afole aisiyafeꞌmo aliꞌyaꞌmo neꞌalufi huka ago nagege Gotifeꞌmo nagesa afiꞌna fatago nehugeka ago nagege gemo noꞌafiya vayaꞌaitegamo yagu yaga kavaꞌmo huꞌnogeka ago nagege Gotiꞌe konagatimogiꞌefeꞌmo nahau nayamopafiꞌmo nahauꞌnigeka ago nagege kanamo aliꞌneꞌnaeꞌmo oꞌataleꞌna atafauꞌna alagi huꞌna maiꞌnogeka ago nagege huka nageꞌnane.  
\v 11 Apaini huꞌa nateꞌnageka nagege kanamo aliꞌnogeka nagege huka ago nageꞌnane. Nagaemo Atiyoki taonifatinagi Lisitiya taonifatinagi Aikoniyamu taonifatinagi huꞌa hanageke yaꞌmo aliꞌa namiꞌnageka nagege huka nageꞌnane. Ala kava neꞌmoꞌa muki hanageke kavapatiꞌmo nagufamo alino katino nateꞌniye.  
\v 12 He, muki vayaꞌmo Yesu Kalaisipiꞌmo maiꞌneꞌapaeꞌmo Gotitefeꞌmo alagepa kavaꞌmo nehisaya vayaꞌaifeꞌmo apaini huꞌa apategae.  
\v 13 Inagi hosu vayaꞌmogi humi apatesaya vayaꞌmo magoꞌe magoꞌe huꞌa hosu kavaꞌmo huteꞌa humi neꞌapatesagenoꞌaeꞌmo Sataniꞌa apakaeꞌeꞌmo humi apategaiye.  
\v 14 Humi apategaiyaꞌmonanafa kagaemo alino kaya maleꞌniya vekamo ago ageꞌnanaꞌmofeꞌmo afiteka aliꞌnana geleꞌmo atafauka alagi huꞌneka kagesa afika fatago huꞌnana kavateꞌmo atafauka alagi huka maiyo. Alino kaya maleꞌniya vekamo ago ageꞌnanaꞌmofeꞌmae.  
\v 15 Kagaemo aise mafaꞌnemo maiꞌnana afinatetiꞌmo Goti aote mukufi avoꞌmo kae maleꞌnaya gemo afime afime eka hemeni maiꞌnane. Gotiꞌa ani geletiꞌmo kagufamo alino katino kateno kahau vaisiyafeꞌmo alagepa kaipa kagesamo alino kamisigeka Kalaisi Yesufeꞌmo kagesa afika fatago hugane.  
\v 16 Muki gemo Goti mukufiꞌmo avoꞌmo kae maleꞌnaya gemo Goti avamusaꞌamo aiꞌniya gemo haneꞌniye. Alagepa huno hapa maesiyafeꞌmo alino apaya neꞌmaleya gemo hanege hosu kavaꞌapimo alino apave neliya gemo hanege alino api aino neꞌapateya gemo hanege fatago kavaꞌmo hisayafeꞌmo alino ho huno neꞌapateya gemo hanege huno haneꞌniye.  
\v 17 Gotiꞌa ani geletiꞌmo vayaꞌamo alo huno neꞌapateyanageꞌa haiꞌa hapaiꞌneꞌa muki alagepa kavaꞌmo afaꞌa hugae.   
\c 4  
\s1 Goti geꞌamo aeka hakalo huka hapa paiyo, huno ha paiꞌniya gemae  
\p
\v 1 Ala kava netimo Yesu Kalaisiꞌa muki vayaꞌai apaulagaleꞌmo afole aiteno agoti huno apatetenoꞌaeꞌmo vayaꞌamogitaleꞌmo yagaino lategaiye. Nagaemo agae aulagaleꞌe Goti aulagaleꞌeꞌmo huꞌnaeꞌmo,  
\v 2 Goti geꞌamo aeka hakalo huka hapa paiyo. Muki afinaꞌmo gekamo afigefe hisaya kanaleꞌe oꞌafigefe hisaya kanaleꞌefeꞌmo alo huka maiꞌnekaeꞌmo, aise afinaꞌmo haneꞌniyanagi malage hutapa gemo afiyo, huka hapa paiyo. Apakesa aliteka apave ligeꞌapao. Lapakaemo hosu kavaꞌmo osiyo, huka hapa paiyo. Goti geꞌamo akame hisayafeꞌmo alika he tika apato. Ani kavaꞌmo nehukaeꞌmo yagu yaga kavaꞌmo huka maime maime neꞌukaeꞌmo oꞌataleka alika apaya malo.  
\v 3 Henagaꞌa kaita haugekana huno ohaneꞌneno vayaꞌaina alino hapageno neꞌapataya geeꞌmo ohapaugiyaꞌmofeꞌmo ani agufa gemo alika apaya malo. Apakaiꞌapi nehapaiya kavaꞌmo akame huteꞌa hapauꞌniya gemo afisayafeꞌmo aliꞌa apaya neꞌmalaya vayaꞌmo apavaleliꞌa ege ege hugae.  
\v 4 Lama gelefeꞌmo apakameꞌya amiteꞌa alagepa kaꞌmo ataleꞌa kaitene gegana agufa gelefeꞌmo afigae.  
\v 5 Afigayaꞌmonanafa kagaemo muki afinaꞌmo alagepa huka kagesamo afiꞌneka kagaikaleꞌmo alagepa huka yagaika ato. Hanageke yaꞌmo neꞌalikaeꞌmo oꞌataleka atafauka alagi huka maiyo. Uꞌeꞌa huꞌa alagepa faigoko gemo aeꞌa hakalo huꞌa hapa nepaiya vayaꞌmogi neꞌaliya agufa aliꞌyaꞌmo lokiya vaika aliyo. Goti aliꞌyaꞌaleꞌmo maiꞌnana aliꞌyakamo muki agufa kavaꞌalefeꞌmo aliyo.   
\s1 Aliꞌyaꞌnimo alagi hano hugefeꞌmo hiye, huno huꞌniya gemae  
\p
\v 6 Nofi alagafati aniꞌmo lakiꞌa Gotiꞌmo ofalinimo neꞌamiya kava huꞌna kolaꞌnimo aiꞌna lakiꞌna ma mopafiꞌmo ataleꞌna visuva kanaꞌnimo alagi ago hogo hiyaꞌmofeꞌmae.  
\v 7 Kanale kamemo Goti vayaꞌamogimo nehaya agufa kamemo ago huꞌnove. Nagu nagu huꞌna uꞌna atupaleꞌmo he tiꞌnove. Apakesa afiꞌa fatago nehaya gelefeꞌmo yagaiꞌna ateꞌnogeno afaꞌa haneꞌniye.  
\v 8 Hemenimo fatago vayaꞌmogi alisaya agufa hetamaꞌnimo alino nateꞌniyanageꞌna aliguve. Ala kava neꞌmoꞌa agoti gemo alino fatago huno alino fako huno neꞌapateya vekamo afole aisiya kanaleꞌmo namigiye. Nagaiꞌnigeꞌmo oꞌaliguvaꞌmonanafa muki vayaꞌmo eminesiyafeꞌmo hapauꞌniya vayaꞌamogiꞌeꞌmo aligune.   
\s1 Ge atupa gemae  
\p
\v 9 Kayamufa valeka nagaetegamo malage huka eno.  
\v 10 Nimasiꞌa ma mopafi yafekeꞌmo hauꞌnigeno alagi ago nataleno Tesalonaika taonifiꞌmo uꞌniye. Kilesenisiꞌa Galesiya kotegamo uꞌniye. Taitasiꞌa Namalesiya kotegamo uꞌniye.  
\v 11 Lukiꞌa agaiꞌagekeꞌmo nagaeꞌeꞌmo lokaeno maiꞌniye. Makiꞌa Goti aliꞌyaꞌmo neꞌalinoꞌaeꞌmo alagepa huno naha maegaiyanagi avalelika eno.  
\v 12 Nagaemo Tikikasiꞌa aliꞌna atalogeno Efasasi taonifiꞌmo uꞌniye.  
\v 13 Ekaeꞌmo nalonokuꞌnimo Toloasi taonifiꞌmo Kapasi nopiꞌmo ataleꞌnovanagi aliteka muki mukuꞌaꞌnimo alinika eganaꞌmonanafa sipisipi agufaletiꞌmo alo huꞌnaya mukuꞌniꞌeꞌmo lusi kava huno nahauꞌniyanagi oꞌataleka alinateka eno.  
\v 14 Alekasaniꞌa aenimo alo nehaya aliꞌyaꞌmo neꞌaliya vekamoꞌa nagaetegamo alagi hosu kavaꞌmo huꞌniye. Ala kava neꞌmoꞌa anonaꞌalefeꞌmo alino amigiye.  
\v 15 Agaemo lusi kava huno ayamukiki huno lagaemo aeta hakalo huta hapa nepauna gelefeꞌmo kame huno ateꞌniyanagi agaefeꞌmo maika halove nehuka ehekae.  
\v 16 Lomu gamani vayaꞌmogimo hogote afinaꞌmo agotimo huꞌa nateꞌnageꞌnaeꞌmo naha maesiya gemo nehugenoꞌaeꞌmo mago vekamoꞌa eno naha oꞌmaeꞌnifa muki vayaꞌamo ago nataleꞌa uꞌnae. Inagi Gotiꞌa hosu kavaꞌapimo anonaꞌapilefeꞌmo oꞌapamisiyafeꞌmo nahauꞌniye.  
\v 17 Nataleꞌa uꞌnayaꞌmonanafa Ala kava neꞌmoꞌa nagae nahaopaleꞌmo lokaeno maiꞌnenoꞌaeꞌmo muki geꞌamo aeꞌna hakalo huꞌna hano hisugeꞌapaeꞌmo muki alu nofi vayaꞌmogimo alagepa faigoko geꞌamo afisayafeꞌmo ayamufa huno nateꞌniye. Laiyonimoꞌa nahaesiyafeꞌmo nehigenoꞌaeꞌmo Gotiꞌa nagufamo alino katino nateꞌniye.  
\v 18 Inagi Ala kava neꞌmoꞌa muki hosu kavapatiꞌmo nagufamo alino katino nateteno kokuꞌnapiꞌmo yagaino neꞌapateya koteꞌmo navalelino haino nategaiye. Muki afinaꞌmo ha le konali agiꞌamo alagi hanege hanege huno haneno. He, lama ge.  
\v 19 Pilisilaꞌe Akuvilaꞌenagi Onesifolasi afamo anagaꞌaꞌenagi hutapa ge apamamaeyo.  
\v 20 Ilasatasiꞌa Kolini taonifiꞌmo maiꞌnigeno Tolofimasiꞌa kaita hauꞌnigeꞌna Mailitasi taonifiꞌmo ataleꞌna eꞌnove.  
\v 21 Yasi neꞌaliya afinaꞌmo afole aigiyanagi amalageka huka aeka agaseka eno. Yumiyulasiꞌagi Piyunenesiꞌagi Lainasiꞌagi Kiloniyaꞌagi muki konagatimogiꞌeꞌmogi huꞌa ge nekamamae.  
\v 22 Ala kava neꞌmoꞌa kagaeꞌeꞌmo magokepiꞌmo lokaeno maino. Gotiꞌa fiku lapa maeno lapamino. He, lama ge.