\id 1JN - Keyagana NT with OT portions [kyg] -Papua New Guinea 2001 (web 2014) 
\h 1 Yoni 
\toc1 1 YONI 
\toc2 1 Yoni 
\toc3 1Yo 
\mt1 1 YONI  
\ip Yoniꞌa Kalisitini vayaꞌmo alino lokiya vaino apatesigeꞌa Gotiꞌe mafaꞌneꞌamo Yesu Kalaisiꞌeꞌmo afalu afalugana huꞌa lokaeꞌa maisayafeꞌmo avoꞌmo kaege aigofe gemoꞌa alino hosu huno oꞌapatesiyafeꞌmo avoꞌmo kaege huno kaeꞌniye. Yoniꞌa, aigofe vayaꞌmogi Yesufeꞌmo Kalaisi neꞌmo oꞌmaiꞌniye, huꞌa huteꞌa humi lapategefeꞌmo nehae, huno hutenoꞌaeꞌmo, Gotiꞌa lapakaefeꞌmo hau ayamopafiꞌmo hauꞌniya vekamo maiꞌniye. Gotifeꞌmo lapau lapayamopafiꞌmo lapauꞌnisigetapaeꞌmo konagatapimogiꞌefeꞌmo lapau lapayamopafiꞌmo lapaino, huno mani avoꞌmo kaeꞌniye.  
\c 1  
\s1 Maige maige huta maisuna yaꞌmo aepa vekaeꞌmo ava gemo huꞌniya gemae  
\p
\v 1 Lagaemo mago vekamo agiꞌamo Goti Geꞌamo maige maige huꞌa neꞌmaiya yaꞌmo aepa vekaeꞌmo ava gemo huta mani avoꞌmo nekaone. Ani vekamo aliꞌyaꞌamo aepa faiꞌniya afinatetiꞌmo maime maime eno maiꞌnigetaeꞌmo geꞌamo afiteta laulagafatiꞌmo ageꞌnone. He, aulu haeta ageteta agufaleꞌmo layatetiꞌmo ame aliꞌnone.  
\v 2 Mani vekamo afaꞌa neꞌmaiya yaꞌmo aepa vekamo afole aiꞌnigeta agetetaeꞌmo agaefeꞌmo faigoko geꞌamo aeta hakalo huta lapa nepaune. Agaemo maige maige huꞌa neꞌmaiya yaꞌmo aepa vekamoꞌa Goti muki yaꞌmo Afoꞌamoꞌeꞌmo magokepi lokaeno maiꞌneno lagaetegamo afole aiꞌniya vekaekeꞌmo ava gemo lapa nepaune.  
\v 3 Lagaemo afiteta ageꞌnona kavafeꞌmo ava gemo hutaeꞌmo lapakaemo lagaeꞌeꞌmo afalu afalugana huta maisunafeꞌmo aeta hakalo huta lapa nepaune. Lagaemo Afotimoꞌe mafaꞌneꞌamo Yesu Kalaisiꞌeꞌmo afalu afalugana huta neꞌmaune.  
\v 4 Lagaemo lapaipafiꞌmo lapamogaga aisaya kavaꞌmo havai tesiyafeꞌmo mani avoꞌmo nekaone.   
\p
\v 5 Goti Mafaꞌneꞌamoꞌmo ina ge huno laha paiꞌnigeta afitetaeꞌmo aeta hakalo huta lapa nepaune. Lapa paitaeꞌmo Gotiꞌa ha le yaꞌaꞌe vekamo maiꞌnigeno aipafiꞌmo hani yaꞌamo alagi ohaneꞌniye, huta lapa nepaune.  
\v 6 Lagaemo hanipiꞌmo umenitata nehutaeꞌmo, Gotiꞌeꞌmo afalu afalugana huta lokaeta neꞌmaune, huta nehisunana aigofe gemo huteta lama gemo alagi akame nosune.  
\v 7 Lagaemo hanipiꞌmo umenitata osuta Gotiꞌa aeno ha neleya yateꞌmo neꞌmaiya kava huta aeno ha neleya yategamo umenitata nehisunana agaeꞌeꞌmo afalu afalugana huta maiꞌnonagenoꞌaeꞌmo agaemo lagaeꞌeꞌmo ani kava huno afalu afalugana huno neꞌmaigeno Mafaꞌneꞌamo Yesu Kalaisi kolaꞌamoꞌa muki hosu kavatimo aeno kalo paeno neꞌatale.   
\p
\v 8 Lagaemo, hosu kavatimo ohaneꞌniye, huta nehisunana lagaitieꞌmo humi nelatonagenoꞌaeꞌmo lama gemo laipafiꞌmo alagi nohane.  
\v 9 Lagaemo Gotifeꞌmo, magufa hosu kava huꞌnove, inagufa hosu kava huꞌnove, huta aeta hakalo huta ha paisunagenoꞌaeꞌmo alagi alino ataleteno, afaꞌa ateyo, nehunoꞌaeꞌmo muki hosu kavatimo aeno kalo paeno atalesiyafeꞌmo agaemo huguve, huno hu maleꞌniya geꞌamo alagi akame huno fatago kavaꞌamo hugiye.  
\v 10 Lagaemo, hosu kavaꞌmo osuꞌnone, huta nehisunana ina ge huta Gotifeꞌmo hutaeꞌmo, aigofe gemo nehiya vekae, huta nehunagenoꞌaeꞌmo lama gemo laipafiꞌmo alagi nohane.   
\c 2  
\p
\v 1 Aise mafaꞌneꞌnimogitapae, lapakaemo hosu kavaꞌmo osisayafeꞌmo mani gemo lapakaefeꞌmo avoꞌmo nekaove. Mago vekamoꞌmo hosu kavaꞌmo hisiyana laha maeno muki yaꞌmo Afoꞌamofeꞌmo ge huno nelateya vekamo maiꞌniye. Ani vekamo Yesu Kalaisiꞌa fatago vekamo maiꞌniye.  
\v 2 Agaiꞌamo Gotiꞌa aipamoꞌmo falu huno latesiyafeꞌmo maiꞌniye. Gotiꞌa lagaefekeꞌmo aipamoꞌmo falu huno latesiyafeꞌmo oꞌmaiꞌnifa muki ma mopafiꞌmo maiꞌnaya vayaꞌefeꞌmo Gotiꞌa aipamoꞌmo falu huno apatesiyafeꞌmo maiꞌniye.   
\p
\v 3 Gotiꞌa, mani kava hiyo, ina kava osiyo, huno huꞌniya geꞌamo akame nehisunana ani kavatetiꞌmo ago ageꞌnonana Gotiꞌa ageta aeto huꞌnone.  
\v 4 Mago vekamoꞌa, ageꞌna aeto huꞌnove, nehunoꞌaeꞌmo Goti keꞌaepa geꞌamo akame nosisiyana agaemo aigofe vekamo maiꞌnigeno lama gemo aipafiꞌmo alagi nohane.  
\v 5 Nohaneꞌniyaꞌmonanafa muki vayaꞌmogi Goti geꞌamo akame nehisaya vayaꞌmogimo Gotifeꞌmo hapau apayamopafiꞌmo nehapaiya kavaꞌapimoꞌmo haino hapaiꞌniye. Ani kavatetiꞌmo ago ageꞌnonana agaepiꞌmo maiꞌnone.  
\v 6 Agaepiꞌmo alagi maiꞌnone, huꞌa nehisaya vayaꞌmogimo Yesuꞌa huꞌniya agufa kavaꞌmo akame huꞌa hisaya kavaꞌmo haneꞌniye.   
\s1 Saufa keꞌaepa geeꞌmo ava gemo huꞌniya gemae  
\p
\v 7 Naganaꞌnimogitapae, nagaemo saufa keꞌaepa gemo lapakaefeꞌmo avoꞌmo nokaofa atafa keꞌaepa gemo akeyaꞌvilaga aepa faitapa afiꞌnaya afinatetiꞌmo aliꞌnaya gemo lapakaefeꞌmo avoꞌmo nekaove. Lapakaemo mani atafa keꞌaepa gemoꞌa aepa faiꞌnaya afinatetiꞌmo afime afime etapa afita maiꞌnae.  
\v 8 Afitapa maiꞌnayaꞌmonanafa hemenimo saufa keꞌaepa gemo lapakaefeꞌmo avoꞌmo nekaove. Mani keꞌaepa gemoꞌa agaepiꞌmo haneꞌnigenoꞌaeꞌmo lapakaepiꞌeꞌmo haneꞌniye. Hani huꞌniya kavaꞌmo hano hugefeꞌmo nehigenoꞌaeꞌmo ha le yaꞌmoꞌa aeno ha neleyaꞌmofeꞌmae.  
\v 9 Mago vekamoꞌa, ha le yategamo neꞌmauve, huno huteno konagaꞌaeꞌmo hau ayamopafiꞌmo ohauꞌnisigeno aini huno neꞌatesiyana hanipiꞌmo maime maime neꞌe.  
\v 10 Konagaꞌaeꞌmo hau ayamopafiꞌmo nehaiya vekamoꞌa ha le yategamo alagi maiꞌnigenoꞌaeꞌmo aipafiꞌmo alino agoꞌya faino atalesiya agufa kavaꞌmo alagi nohane.  
\v 11 Nohaneꞌniyaꞌmonanafa konagaꞌaeꞌmo hau ayamopafiꞌmo ohauꞌnigeno aini huno neꞌatesiya vekamoꞌa hanipiꞌmo maiꞌneno hanipiꞌmo umenitata nehunoꞌaeꞌmo, haiya kateꞌmo neꞌufi, huno noꞌage. Hani yaꞌmoꞌa aulagafiꞌmo aino ati kaeꞌniyaꞌmofeꞌmo kaꞌmo noꞌage.   
\s1 Ma mopafi yafeꞌmo olapaino, huno huꞌniya gemae  
\p
\v 12 Aise mafaꞌneꞌnimogitapae, Gotiꞌa Kalaisi agiꞌaletiꞌmo hosu kavatapimo ago alino ataleꞌniyaꞌmofeꞌmo lapakaefeꞌmo mani avoꞌmo nekaove.  
\v 13 Vayatama vayaꞌmogitapae, lapakaemo aepa faiꞌniya afinatetiꞌmo maiꞌniya vekamo ago ageꞌnayaꞌmofeꞌmo lapakaefeꞌmo mani avoꞌmo nekaove. Neya vayaꞌmogitapae, lapakaemo hosu vekamo aetapa agaseꞌnayaꞌmofeꞌmo lapakaefeꞌmo mani avoꞌmo nekaove. Saufa mafaꞌneꞌnimogitapae, lapakaemo muki yaꞌmo Afoꞌamoꞌmo ago agetapa aeto huꞌnayaꞌmofeꞌmo lapakaefeꞌmo avoꞌmo nekaove.  
\v 14 Vayatama vayaꞌmogitapae, lapakaemo akeyaꞌvilaga aepa faiꞌniya afinatetiꞌmo maiꞌniya vekamo ago ageꞌnayaꞌmofeꞌmo lapakaefeꞌmo mani avoꞌmo kaeꞌnove. Neya vayaꞌmogitapae, Lokiya vaitapa maiꞌnagenoꞌaeꞌmo Goti geꞌamo lapaipafiꞌmo alagi haneꞌnigetapaeꞌmo hosu vekamo aetapa agaseꞌnayaꞌmofeꞌmo lapakaefeꞌmo mani avoꞌmo kaeꞌnove.  
\v 15 Lapakaemo ma mopafi kavafeꞌmofi ma mopafi yafeꞌmofi huno olapaino. Ma mopafi kavafeꞌmo nehapaiya vayaꞌmogimo Afotimo Gotifeꞌmo hapau apayamopafiꞌmo nohapaiye.  
\v 16 Muki ma mopafi kavaꞌmo haneꞌniyana apakufamoꞌmo haꞌye nehiya kavaꞌmo hanege neꞌageꞌapaeꞌmo hapaꞌye nehiya kavaꞌmo hanege aliteꞌa ala apaki neꞌaliya kavaꞌmo hanege huno haneꞌniye. Ani kavaꞌmoꞌa Goti kavaꞌamo ohaneꞌnifa ma mopafi kavaꞌmo haneꞌniye.  
\v 17 Ma mopafi kavaꞌe ma mopafi kavafeꞌmo hapaꞌye nehiya kavaꞌeꞌmo ago hano hugefeꞌmo nehiyanageno alagi hano hugiyaꞌmonanafa Goti geꞌamo akame nehaya vayaꞌmo maige maige huꞌa maigae.  
\v 18 Saufa mafaꞌneꞌnimogitapae, ma mopamo hano husiya afinaꞌmo ago hogo nehiye. Lagaemo, Kalaisi kameꞌamo afole aigiye, huta ago lapa paiꞌnonagetapa afiꞌnae. Inagi hemenimo asole kame vayaꞌamo afole aiꞌnayaꞌmofeꞌmo hano husiya afinaꞌmo ago hogo nehiye, huta afiꞌnone.   
\s1 Kalaisi kame vayaꞌamo afole aiꞌnaya gemae  
\p
\v 19 Apakaemo ago lataleꞌa uꞌnayaꞌmonanafa vayatimo oꞌmaiꞌnae. Apakaemo lagaepatiꞌmo maiꞌnaesinana olataleꞌa lagaeꞌeꞌmo magokepi lokaeꞌa maiꞌnaesine. Ani vayapatiꞌmo mago vekamo vayatimo oꞌmaiꞌniye, huta apakesunafeꞌmo ago lataleꞌa uꞌnae.  
\v 20 Apakaemo ataleꞌa uꞌnayaꞌmonanafa lapakaete aote vekamo Kalaisiꞌa uvelimo lakino faleno lapategekana huno Goti Aunemeꞌamo alino lapamiꞌnigetapa muki geꞌamo afiꞌnae.  
\v 21 Inagi lapakaemo lama gemo oꞌafiꞌnayaꞌmofeꞌmo mani avoꞌmo okaeꞌnofa lapakaemo lama gemo ago afitetapaeꞌmo aigofe gemoꞌmo lama gefatiꞌmo afole noꞌaiye, hutapa ago afiꞌnayaꞌmofeꞌmo lapakaefeꞌmo mani avoꞌmo kaeꞌnove.  
\v 22 Aigofe vayaꞌmo ina lagimae. Yesufeꞌmo Kalaisi neꞌmo oꞌmaiꞌniye, huꞌa aeꞌa hakalo huꞌa hapa nepaiya vayaꞌmo aigofe vayaꞌmo maiꞌnae. Apakaemo, Yesuꞌa Kalaisi neꞌmo oꞌmaiꞌniye, huꞌa huge Gotiꞌmo Yesu afoꞌamoꞌmo oꞌmaiꞌniye, huꞌa huge huꞌa aeꞌa hakalo huꞌa hapa nepaiya vayaꞌmo Kalaisi kame vayaꞌamo maiꞌnae.  
\v 23 Muki vayaꞌamogi, Yesuꞌa Kalaisi neꞌmo oꞌmaiꞌniye, huꞌa aeꞌa hakalo huꞌa hapa nepaiya vayaꞌai apaipafiꞌmo muki yaꞌmo Afoꞌamoꞌmo avaleꞌa oꞌateꞌnae. Muki vayaꞌamogimo, Yesuꞌa Kalaisi neꞌmo maiꞌniye, huꞌa aeꞌa hakalo huꞌa hapa nepaiya vayaꞌai apaipafiꞌmo muki yaꞌmo Afoꞌamoꞌe Mafaꞌneꞌaꞌeꞌmo anavaleꞌa anateꞌnageꞌana neꞌmaiꞌae.   
\p
\v 24 Ani gemo haneꞌniyaꞌmofeꞌmo lapakaemo hogotetapa aepa faitapa afiꞌnaya afinatetiꞌmo afiꞌnaya gemo lapaipafiꞌmo alagi hanesiyafeꞌmo atafauta alagi hiyo. Aepa faitapa afiꞌnaya afinatetiꞌmo afiꞌnaya gemoꞌa lapaipafiꞌmo alagi haneꞌnisiyana Mafaꞌneꞌafiꞌe Afoꞌamopiꞌeꞌmo alagi maigae.  
\v 25 Kalaisiꞌa lapa maegauve, huno hu maleꞌniya polomasi gemoꞌa hunoꞌaeꞌmo, maige maige hutapa maisaya yaꞌmo aliꞌna lapamiguve, huno laha paiꞌniye.  
\v 26 Nagaemo humi lapategefeꞌmo nehaya vayaꞌai apava gemo huꞌna lapakaefeꞌmo ago avoꞌmo kaeꞌnove.  
\v 27 Humi lapategefeꞌmo nehayaꞌmonanafa Kalaisiꞌa uvelimo lakino faleno lapategekana huno Goti Aote Aunemeꞌamo alino lapamiꞌnigeno alagi maisiyafeꞌmo lapaipafiꞌmo alagi maiꞌniyaꞌmofeꞌmo mago vayaꞌmogi aliꞌa lapaya malesaya agufa gemo ohaneꞌniye. Goti Aunemeꞌamoꞌmo muki geꞌamo ago alino lapaya maleꞌniyaꞌmofeꞌmae. Ani gemo mago aigofe gemo ohaneꞌnifa alagi lama gemo haneꞌniye. Agaemo, Kalaisipiꞌmo alagi maiyo, huno huteno alino lapaya maleꞌniyanagetapa Kalaisipiꞌmo alagi maigae.   
\p
\v 28 Aise mafaꞌneꞌnimogitapae, Eminesigetaeꞌmo lokiya vaita maiꞌneta uta fala okita aulagaleꞌmo lavagage osisiyafeꞌmo hemenimo agaepiꞌmo alagi maigetao.  
\v 29 Lapakaemo Gotiꞌa alagepa kavaꞌagekeꞌmo nehiya vekae, hutapa ago afiꞌnayaꞌmofeꞌmo agaemo alagepa kavaꞌmo nehaya vayaꞌmo hogoteno alino apateꞌnigeꞌa mafaꞌneꞌamo maiꞌnae, hutapa ago afiꞌnae.   
\c 3  
\s1 Goti mafaꞌneꞌaifeꞌmo apava gemo huꞌniya gemae  
\p
\v 1 Afiyo, Afotimoꞌa lagaefeꞌmo aeto agufa kava huno hau ayamopafiꞌmo hauꞌnigenoꞌaeꞌmo, Mafaꞌneꞌnimogitapae, huno nehigetaeꞌmo lahau neꞌaune. Ma mopafi vayaꞌmogimo Gotiꞌmo oꞌageꞌnayaꞌmofeꞌmo lagaeꞌeꞌmo lageꞌa aeto nosae.  
\v 2 Nahauꞌniya vayaꞌmogitapae, hemenimo Goti mafaꞌneꞌamo maiꞌnonanageta henagaꞌamo haiya agufa vayaꞌmo maisupi, huta oꞌafiꞌnonaꞌmonanafa agaemo emineno afole neꞌaisigetaeꞌmo agaekana huta maigune, huta afiꞌnone. Haiya agufa vekamo maiꞌnifi, huta ageta aeto hugunaꞌmofeꞌmo agaekana huta maigune.  
\v 3 Muki vayaꞌamogimo, ani kavaꞌmo afole aigiye, huꞌa huteꞌa agava maiꞌneꞌa apamogaga neꞌaiya vayaꞌmo apaikaiꞌapimo sese huꞌa neꞌapatae. Agaemo yaveyaveꞌage aipaꞌe vekamo maiꞌniyanageꞌa agaekana huꞌa maisayafeꞌmae.   
\p
\v 4 Hosu kavaꞌmo nehaya vayaꞌmogimo Goti keꞌaepa geꞌamo ago amagiꞌa neꞌatalae. Hosu kavaꞌmo Goti keꞌaepa geꞌamo amagiꞌa neꞌatalaya kavaꞌmo haneꞌniye.  
\v 5 Lapakaemo ago afiꞌnayana Kalaisiꞌa hosu kavatimo alino atalesiyafeꞌmo emineno afole aiꞌniye. Agaiꞌa aipafiꞌmo hosu kavaꞌamo alagi ohaneꞌniye.  
\v 6 Muki vayaꞌmogi agaepiꞌmo alagi maiꞌnisaya vayaꞌmogimo hosu kavaꞌmo nosae. Hosu kavaꞌmo nehaya vayaꞌmogimo Kalaisiꞌa oꞌagege ageꞌa aeto osuge huꞌnae.   
\p
\v 7 Aise mafaꞌneꞌnimogitapae, fiku yanagetapa apateꞌnisageꞌa humi lapategayanagi. Kalaisiꞌa fatago vekamo maiꞌniya kava huꞌa alagepa kavaꞌmo nehaya vayaꞌmo fatago vayaꞌmo maiꞌnae.  
\v 8 Sataniꞌa aepa faiꞌniya afinatetiꞌmo hosu kavakeꞌmo hume hume neꞌeya kava huꞌa muki vayaꞌmogi hosu kavaꞌmo nehaya vayaꞌmo Satani vayaꞌamo maiꞌnae. Goti Mafaꞌneꞌamoꞌmo Satani aliꞌyaꞌamo alagi alino hano huno atalesiyafeꞌmo emineno afole aiꞌniye.  
\v 9 Ina lagimo Gotiꞌa alino apateꞌnifi Goti avina yaꞌamo apaipafiꞌmo haneꞌniyaꞌmofeꞌmo hosu kavaꞌmo akame nosae. Gotiꞌa alino apateꞌniyaꞌmofeꞌmo apakaemo hosu kavaꞌmo alagi akame osugae.  
\v 10 Muki vayaꞌmogi fatago kavaꞌmo nosaya vayaꞌmo Goti mafaꞌneꞌamo oꞌmaiꞌnae. Konagaꞌapieꞌmo nohapaiya vayaꞌmogimo ani kava huꞌa Goti mafaꞌneꞌamo oꞌmaiꞌnae. Ani kavatetiꞌmo Goti mafaꞌnemo maiꞌnafi Satani mafaꞌnemo maiꞌnafi huꞌa apakesaya kavaꞌmo haneꞌniye.   
\s1 Konagatapieꞌmo lapaino, huno huꞌniya gemae  
\p
\v 11 Lapakaemo aepa faiꞌnaya afinatetiꞌmo, konagatapieꞌmo lapau lapayamopafiꞌmo lapaino, huta lapa paiꞌnonagetapa afiꞌnae.  
\v 12 Kenikana huta oꞌmaisuna kavaꞌmo haneꞌniye. Keniꞌa hosu vekamo mafaꞌneꞌamo maiꞌneno aganaꞌamoꞌmo amagiꞌnigeno faliꞌniye. Na kava higeno kamiti amagiꞌniye. Keniꞌa hosu kavaꞌmo huꞌnigeno aganaꞌamoꞌmo fatago kavaꞌmo huꞌniyaꞌmofeꞌmo kamiti amagiꞌnigeno faliꞌniye.  
\v 13 Konagaꞌnimogitapae, ma mopafi vayaꞌmogimo apaini huꞌa lapatesagetapaeꞌmo lapau oꞌaiyo.  
\v 14 Lagaemo konagatieꞌmo lahau layamopafiꞌmo nelahaiyaꞌmofeꞌmo ago afiꞌnonana nefaliya kavategatiꞌmo ago ataleta eta afaꞌa neꞌmaiya kavategamo neꞌmaune. Konagaꞌapieꞌmo hapau apayamopafiꞌmo nohapaiya vayaꞌmo nefaliya kavategamo alagi neꞌmaiye.  
\v 15 Konagaꞌamofeꞌmo aini huno neꞌateya vekamoꞌa konagaꞌamoꞌmo kamiti neꞌamagiya vekagana huno maiꞌniye. Lapakaemo ago afiꞌnayana kamiti neꞌapamagiya vayaꞌai apaipafiꞌmo maige maige huꞌa neꞌmaiya yaꞌmo alagi nohane.  
\v 16 Yesuꞌa afaꞌa neꞌmaiya yaꞌamo lagaetefeꞌmo ataleꞌniyaꞌmofeꞌmo lagaefeꞌmo hau ayamopafiꞌmo hauꞌniya kavaꞌamo ageꞌnonanageta ani kava huta konagatimogitefeꞌmo afaꞌa neꞌmauna yatimo atalesuna kavaꞌmo haneꞌniye.  
\v 17 Haneꞌniyaꞌmonanafa mago vekamoꞌa hapa maesiya yaꞌamo haneꞌniya vekamoꞌa agesiyana mago konagaꞌamoꞌmo kafu huteno maiꞌnisigeno agetenoꞌaeꞌmo hau huno ateteno oꞌamiꞌnisiyana Gotiꞌa hau ayamopafiꞌmo hauꞌniya agufa kavaꞌamo aipafiꞌmo haneꞌnifiye.  
\v 18 Aise mafaꞌneꞌnimogitapae, lavayaꞌaletikeꞌmo geꞌagekeꞌmo hutaeꞌmo, lahau layamopafiꞌmo nelahaiye, huta osuta alagi lama ge huno lahau layamopafiꞌmo lahauꞌninageta alagepa kavaꞌmo higetao.   
\s1 Goti aulagaleꞌmo koli nosaya vayaꞌaifeꞌmo apava gemo huꞌniya gemae  
\p
\v 19 Ani kavatetiꞌmo ago ageꞌnonana lama ge vayaꞌamo maiꞌnonaꞌmofeꞌmo laipamoꞌmo falu huꞌnisigeta Goti aulagaleꞌmo atete osugune.  
\v 20 Yuꞌilaga mafaꞌnetimoꞌa, hosu kavaꞌmo nehae, huno nehisigenoꞌaeꞌmo Gotiꞌa yuꞌilaga mafaꞌnetimo ago aeno agaseno muki kavatimo ageꞌniye.  
\v 21 Nahauꞌniya vayaꞌnimogitapae, Yuꞌilaga mafaꞌnetimoꞌa hosu kavaꞌmo nehae, huno nosisiyana lagaemo Gotiꞌa laha maegaiye, huta ago afiꞌnone.  
\v 22 Lagaemo keꞌaepa geꞌamo akame nehunagenoꞌaeꞌmo amuse huno nelateya agufa kavaꞌmo nehunaꞌmofeꞌmo aukaya nehunagenoꞌaeꞌmo alino nelamiye.  
\v 23 Goti keꞌaepa geꞌamoꞌmo hunoꞌaeꞌmo, mafaꞌneꞌnimo Yesu Kalaisi agiꞌalefeꞌmo lapakesa afita fatago nehutapaeꞌmo konagatapimogifeꞌmo lapaino, huno laha paiꞌniye.  
\v 24 Muki vayaꞌmo keꞌaepa geꞌamo akame nehaya vayaꞌmo Gotipiꞌmo alagi maiꞌnageno apakaepiꞌmo alagi neꞌmaiye. Ani kavatetiꞌmo ago ageꞌnonana Gotiꞌa alino lamiꞌniya Aunemeꞌaletiꞌmo lagaepiꞌmo alagi neꞌmaiye.   
\c 4  
\s1 Goti Aunemeꞌaꞌe hosu apauneꞌapameꞌefeꞌmo apava gemo huꞌniya gemae  
\p
\v 1 Nahauꞌniya vayaꞌnimogitapae, Asole aigofe vayaꞌmogi gemo aeꞌa hakalo huꞌa hapa nepaiya vayaꞌmo muki ma mopafiꞌmo umenitata nehae. Umenitata nehayanagi lama gemo nehae, hutapa oꞌafitapa alagepa huta alita fako hutapa afitetapaeꞌmo, Gotitegatiꞌmo eꞌnafi oꞌmeꞌnafi, hutapa afiyo.  
\v 2 Muki vayaꞌmogimo, Yesuꞌa Kalaisi vekamo maiꞌneno ma mopafi vayaꞌai apakufagana agufamo aliteno vemo hamaleꞌniye, huꞌa nehaya vayaꞌmo Goti Aunemeꞌamo aliꞌnae. Lapakaemo ani kavatetiꞌmo ageꞌnayana Goti Aunemeꞌamo apaipafiꞌmo maiꞌniye, huta agetapa aeto huꞌnae.  
\v 3 Muki vayaꞌmogimo, Yesuꞌa Kalaisi vekamo maiꞌneno ma mopafi vayaꞌai apakufagana agufamo aliteno vemo hamaleꞌniye, huꞌa nosaya vayaꞌmo Goti Aunemeꞌamo oꞌaliꞌnae. Apakaemo Yesu kameꞌamo aunemeꞌamo aliꞌnae. Lapakaemo, hogotetapa ani aunemeꞌamo egaiye, hutapa afiꞌnagenoꞌaeꞌmo ago eꞌniye.  
\v 4 Aise mafaꞌneꞌnimogitapae, lapakaemo Goti mafaꞌneꞌamo maiꞌnetapaeꞌmo aigofe vayaꞌaina ago aeta apakaseꞌnae. Lapaipafiꞌmo maiꞌniya Aunemeꞌamoꞌa ma mopafi vayaꞌai apaipafiꞌmo maiꞌniya aunemeꞌamo ago aeno agaseno maiꞌniyaꞌmofeꞌmae.  
\v 5 Apakaemo ma mopafi vayaꞌmo maiꞌnayaꞌmofeꞌmo ma mopafi kavafekeꞌmo ava gemo huꞌa hapa nepaigeꞌapaeꞌmo ma mopafi vayaꞌmogi neꞌafiye.  
\v 6 Lagaemo Goti vayaꞌamo maiꞌnone. Gotiꞌa ageꞌa aeto huꞌnaya vayaꞌmogimo getimo neꞌafiye. Goti vayaꞌamo oꞌmaiꞌnaya vayaꞌmogimo getimo noꞌafiye. Ani kavatefeꞌmo lama ge aepa Aunemeꞌamo agege aigofe gemo aepa aunemeꞌamo agege huta agegaune.   
\s1 Gotiꞌa hau ayamopafiꞌmo hauꞌniya vekaeꞌmo ava gemo huꞌniya gemae  
\p
\v 7 Nahauꞌniya vayaꞌmogitapae, Hapau apayamopafiꞌmo nehapaiya kavaꞌmo aepa vekamo Gotiꞌa maiꞌniyaꞌmofeꞌmo konagatimogifeꞌmo lahau layamopafiꞌmo lahaino. Muki vayaꞌmo hapau apayamopafiꞌmo nehapaiya vayaꞌmo Gotiꞌa alino apateꞌnigeꞌa mafaꞌneꞌamo maiꞌneꞌa Gotiꞌa ago ageꞌa aeto huꞌnae.  
\v 8 Gotiꞌa hau ayamopafiꞌmo nehaiya vekamo maiꞌniyaꞌmofeꞌmo hapau apayamopafiꞌmo nohapausiya vayaꞌmogimo Gotiꞌa ageꞌa aeto osuꞌnae.  
\v 9 Gotiꞌa Yesutetiꞌmo afaꞌa maisuna yaꞌmo alisunafeꞌmo aiya magoke mafaꞌneꞌamo alino ateꞌnigeno ma mopafiꞌmo emineꞌniye. Gotiꞌa ani kavatetiꞌmo lagaefeꞌmo hau ayamopafiꞌmo hauꞌniya kavaꞌamo alino lave liꞌniye.  
\v 10 Ala alagepa kavaꞌmoꞌa haneꞌniyana lagaemo Gotifeꞌmo lahau layamopafiꞌmo olahauꞌniyaꞌmonanafa Gotiꞌa lagaefeꞌmo hau ayamopafiꞌmo hauꞌniye. Agaemo lagaefeꞌmo hau ayamopafiꞌmo hauꞌnisigeno aipamoꞌmo falu huno latesiyafeꞌmo Mafaꞌneꞌamo alino ateꞌnigeno emineno hosu kavatilefeꞌmo falino miya faino lateꞌniye.  
\v 11 Nahauꞌniya vayaꞌmogitapae, Gotiꞌa lagaefeꞌmo hau ayamopafiꞌmo hauꞌniyaꞌmofeꞌmo konagatimogifeꞌmo lahau layamopafiꞌmo lahaino.  
\v 12 Mago vekamoꞌa Gotiꞌmo mago afinaꞌmo oꞌageꞌniye. Lagaemo konagatimogifeꞌmo lahau layamopafiꞌmo nelahaisiyana Gotiꞌa lagaepiꞌmo alagi maiꞌnigeno hau ayamopafiꞌmo hauꞌniya kavaꞌamo laipafiꞌmo kosino afu leꞌniye.   
\p
\v 13 Goti Aunemeꞌamo ago alino lamiꞌniyaꞌmofeꞌmo ani kavatetiꞌmo ago ageꞌnonana agaepiꞌmo alagi maiꞌnonageno lagaepiꞌmo alagi maiꞌniye.  
\v 14 Lagaemo Afotimoꞌmo Mafaꞌneꞌamoꞌmo muki ma mopafi vayaꞌai apakufamo alino katino apatesiyafeꞌmo alino ateꞌnigeno emineꞌniye, huta agetetaeꞌmo aeta hakalo huta hapa nepaune.  
\v 15 Gotiꞌa muki vayaꞌmogi, Yesuꞌa Goti mafaꞌneꞌamo maiꞌniye, huꞌa aeꞌa hakalo huꞌa hapa nepaiya vayapiꞌmo alagi maiꞌnigeꞌa apakaemo agaepiꞌmo alagi maiꞌnae.  
\v 16 Gotiꞌa lagaefeꞌmo hau ayamopafiꞌmo hauꞌniye, huta afitetaeꞌmo ani kavafeꞌmo lagesa afita fatago nehune. Gotiꞌa hau ayamopafiꞌmo nehaiya vekamo maiꞌniye. Hau ayamopafiꞌmo hauꞌniya kavapiꞌmo alagi maiꞌnisaya vayaꞌmo Gotipiꞌmo alagi neꞌmaigeno Gotiꞌa apakaepiꞌmo alagi neꞌmaiye.  
\v 17 Gotiꞌa agoti huno apatesiya afinaꞌmo lagaemo koli osisunafeꞌmo Gotiꞌa lagaefeꞌmo hau ayamopafiꞌmo hauꞌniya kavaꞌamoꞌmo laipafiꞌmo kosino ago afu leꞌniye. Hemenimo Kalaisiꞌa maiꞌniya kava huta ma mopafiꞌmo maiꞌnonaꞌmofeꞌmo agoti huno apatesiya afinafeꞌmo koli osugune.  
\v 18 Gotiꞌa lagaefeꞌmo hau ayamopafiꞌmo hauꞌniye, huta huteta agaefeꞌmo lahau layamopafiꞌmo lahauꞌnisiyana koli nosune. Haino hapaiꞌniya hau ayamopafiꞌmo hauꞌniya kavaꞌaletiꞌmo koli nehuna kavatimo laipafatiꞌmo alino neꞌatale. Koli nehaya kavaꞌmo aepaꞌamo haneꞌniyana hosu kavaꞌmo nehunaꞌmofeꞌmo hosu miyatimo aligune, huꞌa apakesamo neꞌafiye. Gotiꞌa hau ayamopafiꞌmo hauꞌniya kavaꞌamoꞌmo koli nehaya vayaꞌai apaipafiꞌmo kosino afu nole.  
\v 19 Gotiꞌa hogoteno lagaefeꞌmo hau ayamopafiꞌmo hauꞌniyaꞌmofeꞌmo lagaemo Gotifeꞌmo lahau layamopafiꞌmo nelahaiye.   
\p
\v 20 Mago vekamoꞌa, Nagaemo Gotifeꞌmo nahau nayamopafiꞌmo neꞌnahaiye, huno nehunoꞌaeꞌmo konagaꞌamogifeꞌmo alagi nohaisiyana aigofe vekamo maiꞌniye. Agaemo ageꞌniya konagaꞌamofeꞌmo nohaisiyana haiya kava huno oꞌageꞌniya Gotifeꞌmo hau ayamopafiꞌmo haugiye.  
\v 21 Gotiꞌa mani keꞌaepa geꞌaeꞌmo, Lapakaemo Gotifeꞌmo lapau lapayamopafiꞌmo nelapaisigeno konagatapimogiꞌefeꞌmo lapau lapayamopafiꞌmo lapaino, huno laha paiꞌniye.   
\c 5  
\s1 Lagaemo ma mopafi kavaꞌmo ago aeta agaseꞌnone, huno huꞌniya gemae  
\p
\v 1 Ina lagimo, Yesuꞌa Kalaisi neꞌmo maiꞌniye, huꞌa huteꞌa apakesa afiꞌa fatago nehafi Gotiꞌa alino apateꞌnigeꞌa mafaꞌneꞌamo maiꞌnae. Muki vayaꞌamogimo alino apateꞌniya vekaeꞌmo hapau apayamopafiꞌmo nehapaisiyana ani kava huno alino apateꞌniya mafaꞌneꞌamogiꞌefeꞌmo hapau apayamopafiꞌmo nehapaiye.  
\v 2 Lagaemo Gotifeꞌmo lahau layamopafiꞌmo nelahaisigeta Goti keꞌaepa geꞌamo akame nehisunana ani kavatetiꞌmo alagi ageꞌnonana Goti mafaꞌneꞌamogifeꞌmo lahau layamopafiꞌmo nelahaiye.  
\v 3 Gotifeꞌmo hapau apayamopafiꞌmo nehapaiya kavaꞌmoꞌa Goti keꞌaepa geꞌamo ma kava hiyo, ina kava osiyo, huno huꞌniya geꞌamo akame nehaya kavaꞌmo haneꞌniye. Goti keꞌaepa geꞌamo akame hisuna kavaꞌmoꞌa kana osuꞌniyanageta afaꞌa akame hisuna kavaꞌmo haneꞌniye.  
\v 4 Gotiꞌa alino apateꞌniya mafaꞌneꞌamogimo ma mopafi kavaꞌmo aeꞌa neꞌagasae. Lagaemo Goti Mafaꞌneꞌaeꞌmo lagesa afita fatago huꞌnona kavatetiꞌmo ma mopafi kavaꞌmo ago aeta agaseꞌnone.  
\v 5 Ina lagimo ma mopafi kavaꞌmo aeꞌa agasegae. Yesuꞌa Goti Mafaꞌneꞌamo maiꞌniye, huꞌa apakesa afiꞌa fatago nehaya vayaꞌamogigeꞌmo afaꞌa aeꞌa agasegae.   
\s1 Yesu Kalaisifeꞌmo faigoko geꞌaeꞌmo ava gemo huꞌniya gemae  
\p
\v 6 Yesu Kalaisiꞌa anitetiꞌe kolaꞌaletiꞌeꞌmo emineꞌniye. Agaemo aniꞌalefekeꞌmo emiꞌnoꞌmeꞌnifa kolaꞌaleꞌefeꞌmo emineꞌniye. Goti Aunemeꞌamoꞌmo lama geꞌageꞌmo nehiya vekamo maiꞌniyaꞌmofeꞌmo ageteno ha maeno Kalaisifeꞌmo faigoko geꞌamo nehiye.  
\v 7 Loleꞌe magoꞌe vayaꞌmo kokuꞌnapiꞌmo maiꞌneꞌapaeꞌmo ageteꞌa ha maeꞌa faigoko geꞌapimo nehae. Apakaemo Afotimoꞌagi Goti Geꞌamae huꞌa agi neꞌaya vekagi Aote Aunemeꞌagi huꞌa maiꞌnayaꞌmonanafa magoke Gotiꞌa maiꞌniye.  
\v 8 Loleꞌe magoꞌe yaꞌmogimo ma mopafiꞌmo haneꞌneꞌa ageteꞌa ha maeꞌa faigoko geꞌamo nehae. Aunemeꞌamoꞌmogi aniꞌmoꞌagi kolaꞌamoꞌagi huꞌa magoke agufa geꞌageꞌmo huꞌa ageteꞌa ha maeꞌa faigoko geꞌamo nehae.  
\v 9 Ma mopafi vayaꞌmogimo ageteꞌa ha maeꞌa faigoko gemo aeꞌa hakalo nehageta afitetaeꞌmo, alagi lama gemo nehae, huta nehunaꞌmonanafa Gotiꞌa ageteno ha maeno faigoko gemo aeno hakalo nehiya gemoꞌa ma mopafi vayaꞌai geꞌapimo alagi ago aeno neꞌagase. Gotiꞌa Mafaꞌneꞌamo ageteno ha maeno faigoko gemo aeno hakalo huꞌniye.  
\v 10 Mani ageteno ha maeno faigoko geꞌamo Goti Mafaꞌneꞌaeꞌmo apakesa afiꞌa fatago nehaya vayaꞌai apaipafiꞌmo haneꞌniyaꞌmonanafa Gotiꞌa lama gemo nehiye, huꞌa nosaya vayaꞌmogimo Gotiꞌa aigofe gemo nehiya vekamo maiꞌniye, huꞌa nehae. Apakaemo Gotiꞌa Mafaꞌneꞌamo ageteno ha maeno faigoko gemo aeno hakalo huꞌniya geꞌaeꞌmo apakesa afiꞌa fatago osuꞌnayaꞌmofeꞌmae.  
\v 11 Gotiꞌa ageteno ha maeno faigoko gemo aeno hakalo hunoꞌaeꞌmo, nagaemo maige maige hutapa neꞌmaiya yaꞌmo aliꞌna lapamiꞌnove, huno laha paiꞌniye. Ani maige maige huꞌa neꞌmaiya yaꞌmo mafaꞌneꞌafiꞌmo maiꞌniye.  
\v 12 Goti Mafaꞌneꞌamo avaleꞌa apaipafiꞌmo ateꞌnaya vayaꞌmo maige maige huꞌa neꞌmaiya yaꞌmo ago aliꞌnae. Goti Mafaꞌneꞌamo avaleꞌa apaipafiꞌmo oꞌateꞌnisaya vayaꞌmo maige maige huꞌa neꞌmaiya yaꞌmo oꞌaliꞌnae.  
\v 13 Nagaemo mani gemo Goti Mafaꞌneꞌamo agiꞌalefeꞌmo lapakesa afita fatago nehaya vayaꞌmogita hutapaeꞌmo, maige maige huta maisuna yaꞌmo aliꞌnone, hutapa afitetapa agesayafeꞌmo mani avoꞌmo kaeꞌnove. Lapakaemo afitetapa lapakesa afita fatago hume hume visayafeꞌmo avoꞌmo kaeꞌnove.   
\s1 Afaꞌa maisuna yaꞌmo ago aliꞌnonanageta maige maige huta maigune, huno huꞌniya gemae  
\p
\v 14 Lagaemo Gotiꞌa, ani kavaꞌmo huguve, huno hu maleꞌniya kavatefeꞌmo nunumu huta afi gesunagenoꞌaeꞌmo getimo afaꞌa afiteno hugiye, huta agaefeꞌmo lagesa afita fatago nehune.  
\v 15 Getimo neꞌafiye, huta afiꞌnisunana ago ageꞌnonana na agufa yafeꞌmo aukaya huta ge nehisupi ago alino lamiꞌnigeta aliꞌnone, huta lagesamo neꞌafune.  
\v 16 Mago vekamoꞌa konagaꞌamoꞌmo ageꞌnigeno hosu kavaꞌmo ofalisiya agufa hosu kavaꞌmo huꞌnisigeno agetenoꞌaeꞌmo Gotifeꞌmo afi gesigenoꞌaeꞌmo ani konagaꞌamoꞌmo falisiya agufa hosu kavaꞌmo osuꞌniya konagaꞌamoꞌmo maige maige huno maisiya yaꞌmo alino amigiye. Mago vekamoꞌa alagi falisiya agufa hosu kavaꞌmo nehisiyana nunumu hutapa ateyo, huꞌna nosuve.  
\v 17 Muki agufa alagepa osu kavaꞌmo nehaya kavaꞌmoꞌa hosu kavaꞌmo haneꞌniyaꞌmonanafa mago hosu kavaꞌmoꞌa alagi falisaya kavategamo alino noꞌapateya hosu kavaꞌmo haneꞌniye.   
\p
\v 18 Gotiꞌa alino apateꞌniya mafaꞌneꞌamogimo hosu kavaꞌmo akame nosae. Gotiꞌa alino apateꞌniya vayaꞌmogi apakaiꞌapileꞌmo yagaiꞌa neꞌapatagenoꞌaeꞌmo hosu vekamoꞌa alino hosu huno noꞌapate.  
\v 19 Lagaemo ago ageꞌnonana Goti mafaꞌneꞌamo maiꞌnonaꞌmonanafa muki ma mopafiꞌmo maiꞌnaya vayaꞌmogimo hosu vekamo aiyafiꞌmo maiꞌnageno yagaino neꞌapate.  
\v 20 Lagaemo ago ageꞌnonana Goti Mafaꞌneꞌamo emineno lama ge Gotiꞌa ageta aeto hisunafeꞌmo lagesamo afisuna yaꞌmo alino lamiꞌniye. Lagaemo lama ge vekafiꞌmo maiꞌnetaeꞌmo Mafaꞌneꞌamo Yesu Kalaisipiꞌmo maiꞌnone. Ani vekamo lama ge Gotiꞌa maiꞌnenoꞌaeꞌmo alagepa huta maige maige huta maisuna yaꞌmo aepa vekamo maiꞌniye.  
\v 21 Aise mafaꞌneꞌnimogitapae, aigofe gotiꞌapimogimo apakame osutapa maita halove huta maiyo. He, lama ge.