\id TIT Kyaka Enga Shorter Bible, SF codes August 20, 93 
\h TAITESA 
\toc1 TAITESA 
\toc2 Taitesa 
\toc3 Tai 
\mt1 TAITESA  
\ip Taitesa baa Juu daa rara akali. Baa Anatunya waili pii keyange sepala mona kapu kyepala Yesu kapa ingingi lao suu pyapala Kurisene ingiya. Dopa pipala baa Pole pipya karo Anatunya yulu pyuo nyiso kareya. Poleme Taitesa yuu Kirita dokona Elyambu Pingi doko iso karena lamaiya. Taitesa dokona kareyamo dokopa Poleme pepa pase dake pyao renge remana lao pii lamaiya.  
\ip Yuu Kirita dokona wambu malu mee kopetame pyuo kareyami dokona suu pyapala Poleme Taitesa Elyambu Pinginya akali mupwa apa pyuo kararami lao lamaiya. Poleme Taitesa apa pyuowale alemo dupwape dee endemo dupwape dee akali parangepe kendemandepe dupwa mana lara lao lamaiya. Endemo dupwame mana nyepala enda angi dupwa range mana lamairami. Pii lumwa pyuo lao Poleme Taitesa apa pyuo karare lao lamaiya. Baa mona seramopa karo wambu dupwa pipya puu minyuo apiyanda pii nao mona mendaki palyuo karena lamaiya.  
\iot Buku Dakena Pii Palamo Dusipa  
\io1 1. Pii kanda soo leya \ior 1:1-4\ior*  
\io1 2. Elyambu Pinginya akali mupwa dupwana yulu \ior 1:5-16\ior*  
\io1 3. Elyambu Pingi dokona akali endape dupwa apa pyuo kararami lao mana leyamo doko \ior 2:1-15\ior*  
\io1 4. Wambu dupwa yulu pinya lao porainyi pyambuo repe repe pii lamaiya \ior 3:1-11\ior*  
\io1 5. Pii lao oto leya \ior 3:12-15\ior*  
\c 1  
\p
\v 1-2 Namba Pole Anatunya kendemande akali ingyuo karo Yesu Koraisana aposele akali dokome pepa pase pyao jilyu.  
\p Anatunya rombo palyisi wambunya kapa ingingi lao suu pingi doko andanyi pyambwapala pii angi namwana misi pii lenge doko nolakare lao Anatumi emba kyakale lao mapanyi peelyo pare langiya. Ene busiyamo dokopa Anatu kyambo laa nange dokome nakama lete karalu kararami lao kinyi lalu lao leya.  
\v 3 Banya yuu gii rolae dokopa waili pii dokona namwa nolako langiya. Langyapala dokopa waili pii doko namba keta jepala polo lamaikare lao namwana Lete Wai Pyao Nyingi Anatu dokome letonuli pyuo piri leya.   
\p
\v 4 Nambana Kurisene wane angi Taitesa emba pepa dake pyao jilyu.  
\p Rakane Anatu Koraisa Yesu namwana Lete Wai Pyao Nyingi dokopana mona keyange palyuo ipingipi mona kyuu lao singipi emba keta palena.   
\s1 Taitesame Yuu Kirita Dokona Karo Yulu Piya Dupwa  
\p
\v 5 Nambame yuu Kirita dokona karo yulu lapo pyuo maleyono silyamo dupwana pyuo otakareŋe lapala yuu dokona karape leyo. Dopa pyuo taone dupwana yaka lao Elyambu Pinginya akali mupwa lapo rombo palyare lao leyo kande. Pii dusipa kame see napipi.  
\v 6 Elyambu Pinginya akali mupwa doko baa pii pali naramopa enda mendaki ikinya akalingi ingyuo karena. Banya wane wanake dupwa Kurisene inginya lao kando karo kingi lakami naraminyipa mena rae lenge ingyuo kamba laa nao ando pena lao rapu pyuo karena.  
\v 7 Elyambu Pinginya akali mupwa doko Anatunya yulu rapu pyuo karenge dokona yuu peparae rolae pyuo karena. Baa mena marakai ingya naope imbwualana wangu lakapala imbwua naope biya naa naope waiya lao langa pyakanda naope bange nyipuli lao suu pyaa nao karena.  
\v 8 Wambu eparami dokopa yako yako lao nenge pyuope yulu rolae dupwana mona retena. Baa range rapu pyuo karope rolae pyuope poo pyasi karope rangeme mondo lao rapu pyuo karena.  
\v 9 Waili pii angi Anatunya mana pii lengenyili pyuo pingi doko baa poraiyuo minyuo karena. Dopako pira ramo doko pii rolae lamaiyuo wambu serami dupwa andanyi nembo pirasa pira. Dopa pyuo pira dokome wambu pii rolae rae mai nange dupwana pii kyai ingilyamo lao lasaka pyuo nolakara.   
\p
\v 10 Wambu malumi mee pii kopetame lapala pii angi doko nembo wakale dupwa kando panga soo lao karenge. Juu yanenge kalomasi dee Kurisene ingiyami dupwa panga sooko karaminyi.  
\v 11 Akali dopaleme kana mone nyimwali lapala yulu ama koo pyuo pii kopetame mana lamaiyuo ree palu wambu dupwana suu pingi bolombalo lanyi nembo randa mailyaminyi doko kaena lamairi.  
\v 12 Kirita wambu rangena poropeta akali mende dopa leya. Kirita wambu yuu peparae kyambo lao mena rae lenge dopale ingyuo maka suku suku napala nenge nyura nao pyuo karenge leya kande.  
\v 13 Pii doko kinyi leya. Dokona lao nakamana Anatu kapa ingingi lao suu pingi doko kapa andaramo dokona pii poraiyuo lao pyalana pyuo lamaiyuo karape.  
\v 14 Juu wambunya sinju pii dupwape dee isa wambu lapo pii angi yaki nyiyami dupwana mawa pii dupwape minyuo kara nana.  
\v 15 Wambu mona rolae singi doko kata yulupi dupwa peparae rolae ingyuoko penge. Wambu mona karo petenge Yesu mona mai nangena mona anda dee yulupi dupwa koo ingyuo singi dokona yulu peparae rolae ingyuo paa nange.  
\v 16 Nakama kambu dokome Anatunya wambuŋu lao yulu piminyi dupwame banya ingyuo paa nalyamo. Nakama kamba lao yango mende kando awa epekanda napala yulu koo pingi dokome yulu keyange pinya saka nalyaminyi.   
\c 2  
\s1 Mana Pii Angi Dupwa  
\p
\v 1 Pii lare dupwa Anatunya mana pii palamo dupwana iki moko minyuo lapengele.  
\v 2 Alemo dupwa biya malu nao enokwanyi nemba nao mona palenge ingyuo rangena suu pingi kame pyuo minyuo karena lamairi. Dokona ingyuo nakama Anatu kapa ingingi lao suu pingipi mona retenge yulupi dolapo pyuo karo randa eparamo dokopa porayapala karena lao mana lamaipi.  
\v 3 Endemo nakama Imambu Poo Pyasinya yulu pingi endana yulu dopale pyuo petena lamairi. Mendali koo keta palyuo kingi isa nembalana suu pyao kyambo laa nao biya malu nao pisarami ingya nana lamairi. Yulu keyange dupwa mana lamaiyuo petena.  
\v 4 Doko enda angi dupwame nakamana akalingi ikinyingipi rapu pyuo mona retarami dokona mana lamainya lamairi.  
\v 5 Nakama suu pingi rangeme kame pyuo minyuo mondo lao piso anda dokona yulu au pyuo pyuo nakamana akalinginya pii soo petena. Dopa pirami ramo dokopa lapome Kurisene yulu kooŋo lao laa narami.   
\p
\v 6 Pii dokonako ingyuo akali parange dupwa suu pingi rangeme kame pyuo minyinya lao poraiyuo mana lamairi.  
\v 7 Embame range yulu keyange dokona nyiso pyuo wambu yango dupwa lasaka pingi ingyuo karare. Pii angi dupwa suu pyao mana lamaipala mee langa male lalya lana pyuo laa napipi.  
\v 8 Pii angi dokonako larenepa akali dupwame pii dokona koo mende koto nyii nana lao karape. Dopa pirinyipa embena nyisu petenge dupwame namwa keta koo lao lalana saka napala elyuo karenale.   
\p
\v 9-10 Yulu pingi akali dupwame nakamana yulu pyakamingi akali dupwana pii minyuo nakama rae mainyi pyambuo karena. Nakamame kamba pii laope waa mende nyakamiwape pii nana. Dopa pilyamano lao dokopa nakama mondo lao keyange pyuo karalu karena. Dopa pyuo pirami ramo dokopa nakamana yulu peparaeme namwana Lete Wai Pyao Nyingi Anatunya mana pii dokona ketae pyambuo piramisa pira.   
\p
\v 11 Anatu banya mona keyange palyuo ipingi wakasa dokome akali peparae lete wai pyao nyelana piya doko nyuo paneya.  
\v 12 Banya mona keyange palyuo ipingi dokome dopa lao mana langingi. Nakama dae karo Satanena kata yaki nyepala yulu koo dupwana mona andanyi nemba nao suu pingi rangeme kame pyuo minyuo rolae pyuo Imambunya kata dupwana karalapape lao langingi.  
\v 13 Namwa yuu gii elyape keta pisarami lao namwana Anatu kamame wakasa dee Lete Wai Pyao Nyingi Yesu Koraisapa neta renge ingyuo panarambi doko iso karamano.  
\v 14 Koraisame baa namwana koo dupwana kumuo jepala namwa baa rangena wambu kipungi poo pyasi inginyi pyambuo kiiramo nyiya dokome yulu keyange dupwa angingyuo pinya suu pyao pimana.   
\p
\v 15 Pii lasi dusipa nyuo mana lamaipi. Wambu embena pii serami dupwa porainya renge dokome paleta mona porainyi pyambuo pyalana pyuo lare. Mendeme emba kando ketae nemba nana.   
\c 3  
\s1 Kurisene Wambunya Yulu Dupwa  
\p
\v 1 Embena wambu yango dupwa kando gapomanepe kanjilipinya pii rape rape lao soo pisirami doko kame see nana lamairi. Gapomanepe kanjilipi yulu keyange lapo mairami ramo dokopa embena wambu dupwame mumu laa napala pinya lamairi.  
\v 2 Nakamame akali peparae kando mona seramopa yako lao anjiki pyuo karo mendali kando pii koo laa nana lao lamairi.  
\v 3 Wambo namwa range kopyali ingyuo kamba lao kopetame pyuo kareyama. Namwa yulu koo dupwana mona andanyi pyambuo kopyali yulu wakale wakale dupwa pipala dokona kendemande ingyuo kareyamako. Mendali koo keta palyalana kanda lyanolyano pipala wambu dupwa kando awa epekanda nayamano dokopa nakamame namwa kando awa epekanda nayamiyoko.  
\v 4-5 Namwana Lete Wai Pyao Nyingi Anatu anjiki pingipi mona retenge rengepe paneyamo doko baame namwa lete wai pyao nyiyasa piya. Doko namwame yulu keyange piyamandena lete wai pyao nyiyande daa. Anatu rangena sakao nyiso karenge renge dokona banya Imambu Poo Pyasinya manjo nyingi enengepe lete karenge enengepe dolapo jiyamo dokome namwa poo pyao lete wai pyao nyiya.  
\v 6 Namwana Lete Wai Pyao Nyingi akali Yesu Koraisa keta Anatumi banya Imambu Poo Pyasi peparae namwa pipya kulimbuo jiya.  
\v 7 Banya mona keyange palyuo ipingi dokome Anatu namwana koo dupwa nyuo kame sakao roleyamo dokona namwa lete karenge dokona lao nyimwali yaka lao suu pilyamano doko kapa nyerama.  
\v 8 Pii dake kinyi palamo.  
\p Anatu mona maingi wambu dupwame wambu yango nyiso embame yulu keyange dupwa yapo pyuo petena lao poraiyuo mana lamaiyuo karape. Yulu dopale keyange ingyapala wambu nyisingi.  
\v 9 Kopyali ingyuo apiyanda pyuo laa nao mumbwange kauwange kamongo dupwana kingi lasi londe dupwa minyuo dopale kandale lao pyuo lao karare doko kapa ingyuo paa nalyamo. Laiya laa nao Lowa pii dokona lao suu pyao sisi nyuo kara napipi. Dusipame mendali nyisa nao mee ingyuo pelyamo.  
\v 10 Wambu lapome Elyambu Pinginya yulu kwaenyi nembalana nembo nembo minyuo larami ramo yuu lama rolo lamairinyi see narami ramo dokopa role pyao yalya kando pisa nalapape.  
\v 11 Akali dopale baa Anatunya Imambunya yulu suu pyaa nao kumasi kyukurenge karo banya koo dupwame baa akali kyai lao lasaka pingi doko emba silinyi.   
\s1 Pii Lumwa Pyuo Leyamo Doko  
\p
\v 12 Nambame Atemasa panda Tikikasapa nakama keta pena laro dokopa namba kupwa pingi yuu gii dokopa yuu Nikopolisa karalana dokona emba opetae Nikopolisa ipili lao suu pilyu dokona waiya lao ipupi.  
\v 13 Lowa minyingi akali Sinasa Apolosapa ene epena pirambinyi dokopa emba nyiso bange peparae nakamba yangyarali dupwa mairinyi eparambi.  
\v 14 Namwana wambu dupwa yulu keyange pyuo nakamana wambu yango nyiso yangyarali dupwa maingiŋi lao mana lamaipi.   
\p
\v 15 Wambu dae yalya kando pisimwa dupwa peparaeme nakama kando yako letaminyiko. Yako lenge pii doko namwana Kurisene yango dupwa lamaiyakape.  
\p Anatunya mona keyange palyuo ipingi doko nakama peparae keta palena.