\id REV Kyaka Enga Shorter Bible, SF codes August 20, 93 
\h OREPALAISANE 
\toc1 OREPALAISANE 
\toc2 Orepalaisane 
\toc3 Orep 
\mt1 OREPALAISANE  
\ip Jone keta pii repa repa piyamo buku dake Kurisene wambu Yesu Koraisa Kamongo ingyuo kapa ingingi karamo lao suu piyami dokona randa maiyami dokopa piya. Buku dake angi renge paleyamo piya doko randa epo pyao pirami dokopa yaki nyii nao keyange mende pyakara lao suu pyao mondo lao pilyaminyi dokona pyuo karalu karena lao pii porakaiyo lao pyao maiya.  
\ip Buku dakena liti andarele pii repa repa piipi yulu oo repeta pyaka selana pilyamo dupwa lasaka pingi piipi pyasi palamo. Pii dupwana kongwalu malu palamo dupwa Kurisene wambu yuu gii dokopa kareyami dupwa kando leyasa kapa siyami. Wambu menge dupwa keta renge yalu pyuo siyasa kapa soo nyerami ingya naya. Buku dakena renge angi paleyamo piyamo dusipa dee kambako pii repa repa dupwa wakale wakale ingyuo piyamopape pii renge angi leyamo dusipanako epo renge palipa piya. Buku Orepalaisane dakena pii kuki lapona lao wambu suu pingi wakale wakale nyilyaminyi. Dopa piminyipape renge mupwa doko ama pano silyamo. Renge doko Kamongo Koraisa keta Anatumi banya yanda pimwai dupwa nyuo anamasi minyaramo dokopa Satane opetae anamasi minyalu minyuo minyapala baa yaki nyii nange wambu dupwa renge keyange maiyuo yuu yakepe enenge dokona pisara, leya.  
\ip Orepalaisane dokona Yesu dee kamba epara lao lalu lao lenge pii doko palamo.  
\iot Buku Dakena Pii Palamo Dusipa  
\io1 1. Pii kanda soo leya \ior 1:1-8\ior*  
\io1 2. Kanda soo pii repa repa piyamo dokope pepa pase Elyambu Pingi yanda ipingi nyepo pyao maiyamo dusipape \ior 1:9—3:22\ior*  
\io1 3. Pepa rongo pisi isa roo yanda ipingimi rambu lao upi lasi 4:1—8:1 4. Bikuli yanda ipingi nyepo \ior 8:2—11:19\ior*  
\io1 5. Kau pambeyape mena koo dolapope \ior 12:1—13:18\ior*  
\io1 6. Pii repa repa rara wakale wakale lapo \ior 14:1—15:8\ior*  
\io1 7. Pere warake yanda ipingi Anatunya imbu singi siya dusipa \ior 16:1-21\ior*  
\io1 8. Yuu Bapilone anda taone doko lalyuo burumbara piya dee mena koo poropeta kyambo lenge Satane baape isa parami doko \ior 17:1—20:10\ior*  
\io1 9. Lumwa pyuo kote palira doko \ior 20:11-15\ior*  
\io1 10. Yuu yakepe enenge Jerusaleme enenge \ior 21:1—22:5\ior*  
\io1 11. Pii lao lumwa pyuo leya \ior 22:6-21\ior*  
\c 1  
\p
\v 1 Anatumi Yesu Koraisa dokona pii polo lamaiyamo doko dakena pyasi palamo. Yulu oo repeta pyaka selana pilyamo dupwa Koraisa banya yulu pyakamaingi wambu wambo lasaka pinyale lao Anatumi baa lamaiya. Koraisame banya yulu akali Jone soo karena lao banya aŋala mende lamaiyala pena leya.  
\v 2 Namba Joneme Anatunya pii repa repa dokonape dee Yesu Koraisana pii renge kinyi rolae palamo dokonape kandapala pyao reteyo.  
\v 3 Yuu gii pyaka seramo doko repe ingilyamo dokona pii pyasi buku dakena yaka larami dupwa rae mairami. Pii polo lenge dusipa sepala warombo serami dupwa rae mairamiko.   
\s1 Elyambu Pingi Yanda Ipingi Nyepo Dusipa Yako Leya Doko  
\p
\v 4-6 Namba Jone, Elyambu Pingi yanda ipingi nyepo yuu Esia dokona pepa pyao jilyu. Anatu baa epapu karamo doko wambo kareyako enakana kararako dokope dee imambu yanda ipingi nyepo banya petenge isa repeta dokona karaminyi dupwape dee Yesu Koraisa pii rolae lao karenge doko baa kumungi dupwana kanda soo lete epapala, isa akali kamongo dupwa rapu pyuo karenge dokope dusipana mona keyange palyuo ipingi rengepe mona kyuu lao singi rengepe nakama keta paliramopa karamili yaka lao suu pilyu. Yesu namwa mona reteyamo dokona ranjama kulimbuo joo kumuyamo dokome, namwana koo dupwa rekya lanyi nembakaya. Banya isingi pandana namwa rapu pingi inginyi pyambuo Rakange Anatu lakandalapa langiya. Baa iki mupwa ingyaramopa neta renge yulu doko baa keta palu palena, doko kinyi.   
\p
\v 7 Kandalapape, Baa kopa dokona role pyapeta epelyamo. Enda akalipi peparae baa kandarami. Wambu baa arekyuo piyami dupwame kandaramiyoko. Wambu peparae baa suu pyao ee lao kondarami. Dopako pyuo pira, doko kinyi.   
\p
\v 8 Kamongo Anatumi Wakasa, Namba yuu ingya ingya ingyuo karo pao lumwa pingi ingyuo kararo letamo. Baa wakasa ingyapala wamba kareya, epapu karamo rengya kararako.   
\s1 Joneme Yesu Kandeya Pii Doko  
\p
\v 9 Namba Jone. Yesupa pakao karo dokome nakamana yangonge ingyuo karo. Namba nakama pipya Anatunya isingi yulu dokona karo randa nyepalape maka nao pyuo karamano. Anatunya pii dupwa polo lamaiyuo, dee Yesunya kingi lao kareyosa dokona yuu kingi Patamosa lenge ipwa kotana sukusa singi dokona nembeyami.  
\v 10 Namba dokona karo Kamongona yuu gii sande andake dokopa Imambu dokome namba keta maralyiya. Maralyiyamo dokopa mata siyamo dorena pii andake bikuli pii lele lao leyamo siyu dokona  
\v 11 dopa pyuo langiya. Emba kandarene dupwa pepana pyapala Elyambu Pingi yanda ipingi nyepo dusipana mairi. Mende yuu Epesasa lenge, mende Semena, mende Pekamama, mende Tayataira, mende Satisa, mende Pilatepia, mende Leotosia lenge yuu dusipana mairi leya.   
\p
\v 12 Leyamo doko sepala nambame apimi lao karape lao kandalana kapu kyiyu. Kapu kyepala bange kendapuli minyingi golome wasisi yanda ipingi nyepo kareyamo kandeyo.  
\v 13 Sukusa dokona akalinya ikinyingi yalende ingyuo kareyamopa komau londendeme kimbu dokona sinjimu polo karena lao wapupala, dee banya puingi rengeta dokona golo marapu mende puu pisaro kareya.  
\v 14 Banya kyawasi ama kyewa lapala maa bilima kapa ingiya. Banya lenge dolapo isare bui kakai pyuo renge dopale rao kareya.  
\v 15 Banya kimbu dolapo kapa lepolepo wakasa pingi dopale ingiya. Banya pii leyamo dokopa ipwa jeraeŋe pyao peya.  
\v 16 Banya kingi rolae dokome bui yanda ipingi nyepo minyapala kambu dokona wua gela paki pakipi nenge karenge doko minyaro kareya. Banya lenge kambu doko andowai korakamana neta andake renge dopale ingyuo peya.  
\v 17 Nambame baa kandeyo dokopa banya kimbu dokona pao palipala kumasi ingyuo siyu. Dokopa baame banya kingi rolae dokome namba keta retapala langiya. Emba paka napipi. Namba wambowana karapala pao lumwa pingi ingyuo karo.  
\v 18 Namba lete karenge akali ingyuo karo. Kanda. Namba kumuya kande doko nambame mee lete karo puu paro ingilyamo. Wambu kumaraminyipape Satane panda paraminyipape dolapona kii namba keta palamo.  
\v 19 Kandalene dupwape dakepale kando karene dupwape rengya pyaka seramo dupwape pepana pyao retape.  
\v 20 Nambame kingi rolae dokome bui yanda ipingi nyepo minyaro karo dokonape dee kendapuli minyingi bange golome wasisi yanda ipingi nyepo dokonape renge andake yalu pisi silyamo dokona ingyuo polo langiru. Doko bui yanda ipingi dusipa Elyambu Pingi yanda ipingi nyepowana aŋala rapu pyuo karenge dokona makande pyuo minyapusa pilyamo. Dee kendapuli minyingi bange yanda ipingi dupwa Elyambu Pingi yanda ipingi nyepo dokona makande pyuo pilyamo.   
\c 2  
\s1 Pepa Pase Epesasa Wambu Pyao //  Maiya Doko  
\p
\v 1 Aŋala Epesasa Elyambu Pingi rapu pyuo karamo dokona larono dupwa pepa pyao maipi doko, Mendeme bui yanda ipingi nyepo kingi rolaerena minyaro karo, kendapuli minyingi bange golo wasisi yanda ipingi nyepo rao singi sukusa dupwana papyuo karamo dokome dopa letamo.  
\v 2 Nakamame yulu andake pyuo karapala maka nao waa waa lao pyuo karaminyi doko nambame kandelyo. Nakama wambu koo pyuo karaminyi dupwa kando epe nasepala lapome nakama poropeta akali ingyuo karamano leyami dupwa kambuyanda pyuo kando siyami. Kambuyanda pyuo sepala nakamba kyambo lenge dopale ingiyasa kaeyami kande doko namba silyu.  
\v 3-5 Nambana kingi dokona lao randa nyepala waa waa lao maka nao pyuo karaminyi doko namba silyu. Dopa pyuo karaminyipape nakama keta pii mende palamo doko wamba kanda soo mona reteyaminyi doko kaeyapala epapu mende suu pyao karaminyi silyu. Yulu doo wakasa palyuo pyuo kareyami doko epapu isa pelyamo dokona poraiyuo masalapape. Kondapala mona kapu kyuo wamba yulu piyaminyili pyuo dee sipurao pyuo karalapape. Dopa pyuo pii narami ramo namba waiya lao epapala nakamana kendapuli minyingi bange doko nyuo nembaro ingilyamo.  
\v 6 Dee nakamana yulu mende kapa palamo doko Nikolatiya wambu namba rae mai nalyo dupwa nakamame rae mai nalyaminyiko.   
\p
\v 7 Imambu dokome Elyambu Pingi wambu dupwana pii lamailyamo dupwa nakama kale kata singi ramo dokome selapa.  
\p Anamasi minyarami dupwa letena renge palenge isa doko Anatunya ee sukusa karamo dokona nao karena laro letamo. Ote.\fig Kyawa rarange letena renge palenge doko nakama keta rombo palyuo jero.|src="FILEFIG" size="col" ref="2:10" \fig*   
\s1 Pepa Pase Semena Wambu Pyao //  Maiya Doko  
\p
\v 8 Aŋala yuu Semena Elyambu Pingi rapu pyuo karamo dokona dopa pyuo pepa pyao maipi. Wambowana karapala pao dee lumwa pira dokopa kararako baa kumapala dee lopo epeyamo dokome dopa letamo.  
\v 9 Nakama randa nao isa bange minya napala pendewa ingyuo karaminyipape mendena kamongo ingyapyamo karaminyi doko namba silyu. Wambu lapo Juu wambu karamano letaminyi dupwame nakamana kingi isa palyako lao karaminyi dupwa Juu wambu angi daa, dalapo Satane ralape ingyuo petaminyi.  
\v 10 Randa eparamo dupwana paka nalapape. Imambu koo baame nakama makande pyuo karapusi anda dokona nyuo pyambwaramopa yuu gii akalisa randa nao palirami. Nakama kapa kumarama lao suu pyapala mona kumapala kaeya nao pyuoko kararami ramo nambame kyawa rarange letena renge palenge doko nakama keta rombo palyuo jero.   
\p
\v 11 Imambu dokome Elyambu Pingi wambu dupwana pii lamailyamo dupwa nakama kale kata singi ramo dokome kale yukupala selapape.  
\p Anamasi minyarami dupwa kumungi renge lapo pyuo dokona nakama keta mende pii nara. Ote.   
\s1 Pepa Pase Pekamama Wambu Pyao Maiya Doko  
\p
\v 12 Aŋala Pekamama Elyambu Pingi wambu rapu pyuo karamo dokona pii larono dupwa pepa pyao maipi doko, Mendeme wua gela paki pakipi nenge karenge minyaro karamo baa dopa letamo.  
\v 13 Nakama Satane baa angi karenge panda dokona palaminyi doko namba silyu. Dopa pipyamo karaminyipape nambana kingi yaki nyii nalyaminyi. Dee nambana waili pii rolae minyuo karenge akali Andipasa lenge nyepala Satane karenge panda dokona pyao kumakayaminyi kandapala yuu gii dusipana namba mona reto yaki nyii nayamiko.  
\v 14 Dopa pyuo karaminyipape pii kuki nakama keta palamo. Doko nakama lapome akali Belame lenge dokona pii minyaro karaminyi. Belame baame akali mende Beleke lenge doko kando semango loma soo mena kuiyuo maingi minju narami dokope pamuku yulu dokope Isaraele wambu dupwa lasaka pinya lao mana lamaiya akali dokosa leto.  
\v 15 Dee nakama lapo karaminyi dupwa Nikolatiya wambunya mana wakale dupwa minyaro karaminyi.  
\v 16 Mona kapu kyelapape. Dopa pyuo pii narami ramo doko nambana kambu dokome wua gelaŋa minyuo nakamba waiya lao pyala eparo.   
\p
\v 17 Kale kata singi ramo dokome Imambumi Elyambu Pingi dokona pii dake lamailyamo doko selapa.  
\p Anamasi minyarami dupwa keta nenge myana lengende yalu pyuo silyamo dokona lapo maiyuo dee kana neta kapa yalende kingi alowa pyuo enenge pyasi paliramo mendepe mairu. Kingi pyasi paliramo doko menge dupwa see naraminyipa akali range nyeramo dokome iki soo gisara. Ote.   
\s1 Pepa Pase Tayataira Wambu Pyao //  Maiya Doko  
\p
\v 18 Aŋala Tayataira Elyambu Pingi wambu rapu pyuo karamo dokona dopa pyuo pepa pyao maipi. Anatunya Ikinyingi dokona lenge dolapo isare kekenge dopale rao karo, dee kimbu dolapo kapa lepolepo pingi dopale ingyuo karamo baa dopa letamo.  
\v 19 Nakamana yulu dupwa soo karo. Nakama mona retao yulu kaeya nao, maka nao waa waa lao pyuo karaminyi. Wamba yulu keyange ingyuo pyuo kareyami dokoko suu pyao kamame konda pyuo pyuo karaminyi.  
\v 20 Dopa pyuo pyuo kareyaminyipape pii mende nakama keta palamo. Doko nakama enda Jesapele lenge doko baa namba poropeta enda ingyuo peto letamo doko baa keta mende laa nalyaminyi. Enda baame nambana wambu dupwa pamuku yulu dupwape dee mena loma soo kuiyuo maingi dupwa nena lao kunji kunji pyao lamaiyuo petamo.  
\v 21 Nambame baa mona kapu kyerape lao isaro kareyonopa enda baame banya pamuku yulu mona kenda napala pyuoko petamo.  
\v 22 Dokona lao baapa banya kepo pyuo nyingi akali dupwape pipa mona kapu kyaa narami ramo doko pyuo pisirami mare dokona randa andake mairu.  
\v 23 Enda banya wane wanakepe pyao kumakaro dokopa Elyambu Pingi wambu peparae nambame wambunya suu pingi mona anda dupwa kando soo giso karo doko serami. Sepala nambame isa wambu yulu piraminyili pyuo manda manjo kingi kisaro doko serami.   
\p
\v 24 Dopa pyuo pironopa nakama Tayataira wambu lapo dupwa Satanena yulu koo yalu pisi silyamo dupwa mana nyii nayamisa nakama keta randa mende jii nara.  
\v 25 Yulu wambo kando nyiyami dupwa kaeya nao pyuo karo pao namba eparono dokona ingyara.  
\v 26 Lapo koo dupwa kalya nyuo anamasi minyapala laronyili pyuo pyuo pao yuu gii lumwa piramopa kararami dupwa rara wakale dupwa nakambame rapu pyuo karena laro. Nambana Rakane porainya renge andake namba keta jiyamo dupwa nyepala nakama maironopa  
\v 27 ane kusape porai nyepala pee warame wasisi dupwa pyao inji ranji penge dokona palyuo nakama rara wakale dupwa iso karena laro.  
\v 28 Yuu yangama yangama yakena bui andake yoyo lenge nakama keta mairu. Bui yoyo lenge doko bui doloma nyuo enakaenge doko suu pyao nakama mupwa wakasa ingyuo parami dokonasa letamo.   
\p
\v 29 Kale kata singi ramo dokome Imambumi Elyambu Pingi dupwana pii lamailyamo dupwa kale yukupala selapape. Ote.   
\c 3  
\s1 Pepa Pase Satisa Wambu Pyao //  Maiya Doko  
\p
\v 1 Aŋala yuu Satisa Elyambu Pingi wambu rapu pyuo karamo dokona dopa pyuo pepa pyao maipi. Mendeme Anatunya Imambu yanda ipingi nyepo dee bui yanda ipingi nyepo minyaro karamo dokome baa dopa letamo. Nambame nakamba pyuo karaminyi dupwa soo gisilyu. Nakama lete karamanoŋo lao karaminyipape mee kumasi dalapo romo romo pyuo karamisa pilyamo leto.  
\v 2 Lenge rao kandao karalapa. Nakamana yulu repetale kumuo pelyamo dupwa rangeme minyalyuo lete nyelapape. Nakamana yulu dupwa Anatunya lenge kambu dokona kapa ingyuo paa napyamo kandelyo.  
\v 3 Dokona lao mona kapu kyepala yulu mana langiyami kande dusipa yaki nyii nao minyaro karalapape. Lenge rao kara narami ramo dokopa namba waa nenge akali dopale ingyuo elya kalo eparono yuu gii doko see nao kararami lyakande.  
\v 4 Dopa pyuo lapunupape yuu Satisa dokona wambu lapona komau karo pisa napyamosa nakamana kingi doko isa paa nalyamo. Dupwa kapa ingyapyamopa nambamoo pipya komau kakepame dupwa wapwaro kararami.  
\v 5 Doko anamasi minyarami dupwa dopa pyuo komau kakepame wapwaro kararami dokopa nambame nakamana kingi lete palenge buku dokona sinya lapala kwuanyi nemba naro. Rakanemoo banya aŋala dupwapena lenge kambu dokona nambanaŋa lao nakamana kingi doko pano laro.   
\p
\v 6 Kale kata singi ramo dokome Imambumi pii Elyambu Pingi dupwana lamailyamo dupwa kale yukupala selapape. Ote.   
\s1 Pepa Pase Pilatepia Wambu Pyao //  Maiya Doko  
\p
\v 7 Aŋala Pilatepia Elyambu Pingi wambu rapu pyuo karamo dokona dopa pyuo pepa pyao maipi. Mende poo pyasi rolae pyuo karenge baame Dapitinya kii ikyane minyaro karo dokome lumbwaramo dokopa mendeme upi laa nao dee upi laramo dokopa mendeme lumbwa naoko pirami dopa letamo.  
\v 8 Nakamana yulu pyuo karenge dupwa namba kandelyo. Kandalapa. Nakamana kambu dowa lumbwakapu doko mendeme upi larami ingya nalyamo. Nakama kamame porai ingyuo kara nayaminyiko doŋo nambana pii leyonuli pyuo pyuo karapala nambana kingi doko yaki nyii nalyaminyi.  
\v 9 Lapome kyambo lao Juu wambuŋu letaminyi dupwa nakamba Juu wambu angi ingya napala Satanena wambu ingyuo petaminyi. Kandalapa. Nakamba nakamana kimbu yukuna dorena pongwa naro petena laronopa nakama nambana arapu dokona karaminyi doko soo gisarami.  
\v 10 Nambana pii dupwa waa waa lao maka nao minyaro karaminyi dokona randa andake yuu muu dupwana wambu peparae makande pyaa epara gii doko pyaka seramo dokopa nakama keta mende ingya nara.  
\v 11 Namba waiya lao eparo ingilyamo dokona lao nakama renge keyange kando nyiyami dupwa poraiyuo minyaro karalapape. Dokopa nakama keta keyangena renge palamo dupwa isa pakara ingya nalyamo.  
\v 12 Anamasi minyarami dupwa Anatunya tembole andana isa pinginya ingili lao karalu karalapa laro. Nakama dopa pyuo kararami dokopa namba Anatunya kingi nakama keta pyao palyaro. Dee Anatunya panda dokona yuu kingi Jerusaleme panda enenge yake panda dulunya rae Anatu baa lupyuo jeramo dokope dee nambana kingi enenge doko alowa pyuo pyao palyuo piru leto.   
\p
\v 13 Kale kata singi ramo dokome Imambumi pii Elyambu Pingi dupwana lamailyamo dupwa kale yukupala selapape. Ote.   
\s1 Pepa Pase Leotosia Wambu Pyao //  Maiya Doko  
\p
\v 14 Aŋala Leotosia Elyambu Pingi wambu rapu pyuo karamo dokona dopa pyuo pepa pyao maipi. Mendeme Kinyinya Rengepe Anatunya pii rolae nembo lao kinyi doko iki lengepe Antunya wasiyamo dupwana renge kuiyuo kanda siyamo dokope baa dopa letamo.  
\v 15 Nambame nakamana yulu dupwa kando silyu. Nakambana yulu usa kanya kanya manda raa nao isasa pii nao pyuo pelyaminyi. Yulu poraiyuo pyuo kararami ramo doko pyuo karo, dee kaeyarami ramo doko yaki nyepala kaeyamili lao suu pilyu.  
\v 16 Nakama yulu mee anda kanya pyuo karaminyi dokona nambame nakama kando ipyuo miku kasarolyamo.  
\v 17 Nakamame, Namwa kamongo ingyuo bange malu retapala aeya napyamo karamano, laminyipape nakama koorale ingyuo, koo keta palyuo pendewa pupyamo karaminyi. Lenge raa nao komau asingi wapuo karamano lao see nalyamisi?  
\v 18 Dokona lao kana golo yapasipi lao kandalana isarena yango makande pyuo kandasi namba reto karo dupwana lapo ropo pyao nyelapape. Dopa pyuo nyeraminyi dokopana angi kamongo ingyuo parami. Dee nakama komau kakepame lapo nyepala nakamana elyuo papara karaminyi dokona wapurami. Dopako pyuo mamba lapo ropo pyao jeronopa lenge pono lao rao kararami dokona lao kisalapape.  
\v 19 Namba wamba mona retenge dupwa pyalana pyuo mana lamaingi doko suu pyao nakama mona kapu kyepala sinyi pyuo karalapape.  
\v 20 Selapape. Nambame nakamana anda kambu dowa dokona kapakapa pyuo karo. Wambu mendeme sepala kambu dowa lumbwaramo dokopa namba andakare kolando eparonopa nakama pipya yalya kando nenge nao pisarama.  
\v 21 Nambame anamasi minyapala Rakanepa role pyao banya petenge isa andakena peto dokona ingyuo nakama anamasi minyarami dupwame nambapa petenge andake dokona role pyao petena laro ingilyamo.\fig Kambu dowa dokona kapakapa pyuo karo.|src="FILEFIG" size="col" ref="3:20" \fig*   
\p
\v 22 Kale kata singi ramo dokome Imambumi Elyambu Pingi dupwana pii lamailyamo dupwa kale yukupala selapape. Ote.   
\c 4  
\s1 Yake Panda Dokona Rengya Nyeramo Dupwa Kandeya  
\p
\v 1 Dokopa pii repa repa wakale mende piyamo kandeyo. Yake panda dorena kambu dowa mende lumbwaro kareyamo kandeyo. Kandeyo dokona pii romende bikuli pii ingiyamo wamba siyu doko dee kambako epo, Emba pulyuo ipu. Eparenepa yulu enakana pirami dupwa lasaka piruwale leya.  
\v 2 Leyamopa aopa Imambumi namba porainyi pyambuya. Dopa piya dokopa yake pandana kiŋinya petenge isa andake dokona mendali peteyamo kandeyo.  
\v 3 Banya lenge kambu kana rara wakale wakale pyasalya pyasana pisi kone keyange yalende yanga paupau lasi ingiya. Banya petenge dokona kau puiya rolepo ralepo rengende makeya pyuo siya.  
\v 4 Kiŋinya petenge isa andake dokona awali lao petenge wakale akalisa lama dee ipisu kisima (24) nyuo kako piyami. Petenge isa dupwana akali wambake 24 peteyamiko. Nakamana komau dupwa kyewa lengeme wapuwa kyawa rarange dupwa kana golo wasisimi pyuo piyami.  
\v 5 Petenge isa andake dokona piso yuu pele pipala yuu gala lao rali piya. Dee kendapuli yanda ipingi nyepo mendasipa Anatunya imambu yanda ipingi nyepoko dokona makande pyuo rao siya.   
\p
\v 6 Petenge isa andake siyamo dae wangu ipwa pete ketapa yale kyakapae mende siya. Dee petenge dokona awali lao lee renge bange kisima mende nakamana kyawa dupwana lenge malu rao buu minyiya.  
\v 7 Lee renge bange mende doko mena laene yalende kareya. Lapo pyuo doko bulamakao ikyane yalende kareya. Repo doko wambunya lenge kambu isa komba pyao kareya. Kisima doko yaka kambende bii lao pele leya.  
\v 8 Lee renge bange kisima dupwa papake yanda ipingi nyepo kareta matarena andarenape dokona lenge yuu sero kareya. Nakama kukwa korakamape imambu sepa nao kenane dopa pyuo pyao karalu karenge.  
\q1 Poo pyasi, poo pyasi, poo pyasi  
\q1 Porai Wakasa Kamongo Anatu  
\q1 baa wamba kareya  
\q1 epapu karamo  
\q1 rengya kararako.   
\m
\v 9 Isa petenge andake dokona petelyamopa kando lee renge bange kisima dupwame baa karalu karenge dokona lao kenane keyange dupwa lakandao pingi.  
\v 10 Pyao karenge dokopa akali wambake 24 dupwame baa petenge dokona petelyamopa lenge kambu dorena pao palipala baa karalu karenge dokona lao baa ketae pyambuo lakandao karenge. Ruli kwua pisingi doko suu pyao nakamana kyawa rarange keyange dupwa nyepala banya lenge kambu silyamo dokona retenge. Retapala kenane dopa pyuo pingi.   
\q1
\v 11 Namwana Kamongo Anatu,  
\q1 nyilyingi yulu dupwa  
\q1 emba keta kapa nyerenepa  
\q1 embame bange peparae wasingi.  
\q1 Dokona namwa emba ketae pyambuo  
\q1 kapa lakandapenge ingilyamo.  
\q1 Embame bange peparae pyuo wasii.  
\q1 Emba rangeko suu piinyili pyuo  
\q1 pyuo ingyapala minyaro karene.   
\c 5  
\s1 Pepa Rongo Pisi Buku Keyange //  Doko Kandeya  
\p
\v 1 Nambame mendali kingi rolaerename pepa rongo pisi reto peteyamo kandeyo. Dokona paki pakipi laparaena pepa pyasi dokona bange porai isa roo dopale yanda ipingi nyepowame nyuo upi lao rambu lao pisiya.  
\v 2 Namba kandeyono dokopa aŋala ama poraindeme pii romende lapala, Akali api keyangendeme isa roo yanda ipingi nyepowame pepa rongo pisi upi leyami dupwa kapa pyao lumbanyi nembarase? leya.  
\v 3 Doko yake dokona mendemepe isa yuunya akali mendemepe yuu isa donorena akali mendemepe angi doko lumbwapala kandarami ingya naya.  
\v 4 Dokopa nambame pepa rongo pisi doko mendeme kapa pyuo lumbuo kando yaka lao pii narami doko sepala ee andake lao peteyo.  
\v 5 Ee lao peteyonosa akali wambake mendeme namba kando, Ee laa kae. Dapitinya rora ambusipi dokona pinginya kene pyao epeya Jutana rara dokona laene dokome anamasi minyapala isa roo pyakero upi leyami dupwa nyuo lumbunyi nembapala epeya kapa kandare leya.   
\p
\v 6 Dopa leyamo dokopa Sipisipi Ikyane pyasi yalende, petenge isa andake suku dokona kareyamopa lee renge kisimape dee wambake dupwapeme nyuo kako pyao kareyami. Anatunya imambu yanda ipingi nyepo yuu muu dupwana mapanyi peeyamo dokona makande minyuo Sipisipi dokona kyawana nenge potemenge yanda ipingi nyepo karara, dee lenge yanda ipingi nyepoko rao siya.  
\v 7 Dokopa Sipisipi Ikyane dokome papala pepa rongo pisi akali dokome petenge isa andake dokona kingi rolaerename minyaro peteyamo doko nyiya.  
\v 8 Buku nyiyamo dokopa lee renge bange kisima dusipape dee akali wambake 24 dupwape Sipisipi Ikyane kando wapambu pii pyaro peteyami. Peteyami dokopa akali wambake dupwa mendaki mendaki lao rambyalu minyaro piso dee pere warake golome wasisi Kurisene wambunya ateŋa lenge dopale makande minyuo kyaa keyange piyamo minyaro peteyami piso  
\v 9 kenane enenge mende dopa lao piyami.  
\q1 Embame iki kapa ingyapyamopa  
\q1 buku rongo pisi doko nyepala  
\q1 bange porai upi laro palenge dupwa  
\q1 kapa rokwanyi nembare ingilyamo.  
\q1 Emba pyao kumakayamisa embena ranjama dokome  
\q1 wambu dupwa Anatunya lao ropo pyao nyepala  
\q1 kinyi rara wakale wakalepe  
\q1 pii wakale ingyuo lengepe  
\q1 dee wambu rara peparae  
\q1 Anatunya arapunya nyuo palyii.   
\q1
\v 10 Embame doloma Anatunya yulu pyakamirami lao  
\q1 rapu pinginya rara inginyi pyambuinyipa  
\q1 nakama dupwame yuunya iso kararami.   
\p
\v 11 Nambame dee kamba lenge nyuo kandeyono dokopa aŋala yanda kambunde kapa yaka laa narami ingya nayamopa kenane pyao kareyaminyi siyu. Petenge dokona lee renge kisimape wambake lapo pipa karo walya papalu pyuo  
\v 12 kenane rekyae lao piyami pyao,  
\q1 Sipisipi Ikyane piyami doko angingyuo karamo.  
\q1 Baa keta porainya rengepe singinya rengepe  
\q1 kamongonge dupwape dee porakai renge palengepe  
\q1 ketae pyambuo yanga paupau lao pingi dupwape  
\q1 silyamo dokona lao lakandapenge ingilyamo.   
\m
\v 13 Dokopa nambame siyunupa bange wasisi yakena yuunyape dee yuu dokona isa donorena dee ipwa kotana singipi peparaeme kenane pyao dopa pyuo leyami.  
\q1 Kiŋinya petenge isa andake petamo dokona  
\q1 dee Sipisipi Ikyane dokonape  
\q1 yuu peparae lakandao kingi ketae  
\q1 pyambwaraminyi kararambi ingilyamo.  
\q1 Nakamba keta yanga paupau lao  
\q1 porainya rengepe sulu sinya.   
\m
\v 14 Dokopa lee renge bange kisima dupwa kinyi kapa leyami. Dokopa akali wambake dupwa wapambu pii pyapala mona kando peteyami.   
\c 6  
\s1 Pepa Rongo Pisi Lumbuyamo Doko  
\p
\v 1 Nambame Sipisipi Ikyane dokome pepa rongo pisi dokona isa roome upi lao rambu lasi mupwa doko rekya leyamo doko kandeyo. Kandeyono dokopa lee renge bange kisima dokona mendeme banya pii doko yuu gala lele lapala lao, Emba ipu leya.  
\v 2 Dokopa mena ose kakepame mendena akalinde yanda isa minyaro peteyamo kandeyo. Doko kyawa rarange keyange yanda pyuo wambu anamasi minyilyamosa maingi dopalende piya. Baame wambu malu anamasi minyuo puu pao para ingiya.\fig Mena ose kakepame mendenaakalinde yanda isa minyaro peteyamo kandeyo.|src="FILEFIG" size="col" ref="6:2" \fig*   
\p
\v 3 Dee Sipisipi Ikyane dokome isa roome lapo pyuo upi lao rambu lasi doko nyuo rekya lanyi nembeya. Nembeyamo siyunu dokopa lee renge bange lapo pyuo dokome ingyuo, Emba ipu leya.  
\v 4 Leyamopa mena ose kone mende potemo epeyamo kandeyo. Akali osena peteyamo dokome isa yuunya akali nyuo mapinyi sero yango sukusa pyalya pyana pyuo pyuo kararami renge doko baa keta paleya. Dokopa baa wua gela reekonde minyaro kareya.   
\p
\v 5 Dee enakana Sipisipi Ikyane dokome pepa upi leyami bange repome doko rekya leyamo dokopa nambame siyunupa lee renge bange repo dokome lao, Emba ipu leya. Kandeyono dokopa ose pupuri mende kareya. Dokona peteyamo akali dokome sikyali pingi doko minyaro peteya.  
\v 6 Bange lee renge kisima kareyami dokona mendakindeme ingyuo pii dopa pyuo leya. Yuu gii mendaki dokona yulu pirami dokona lao mee nenge yando kenapa jingi sanapee mendaki yole ingyuo mokwa soo mairi. Dee yuu lapo bale jingi doko sanapee rema mokwa soo mairi. Nenge keyangepe waene ipwangepe wele ipwangepe kokwa see nalapape leya.   
\p
\v 7 Dee Sipisipi Ikyane dokome isa roo kisimame upi lao rambu lasi doko rekya lanyi nembeya. Dokopa lee renge bange kisima dokome, Ipu leya.  
\v 8 Namba kandeyono dokopa ose kangama nasindena akali peteyamo dokona kingi kumasi lengende piso epeya. Dokopa akali mende Satane panda lengendeme peteta epeya. Nakamba yuu muu peparae doko kunjo kisima pipala liti mendaki dokona iso kararambi ingiya. Yuu liti dokona wambu dupwa wua gelame pyao, lopo maiyuo, anga ikyane kiso maiyuo, mena rakaiyeme pyao nena lao pirami renge dopale nakama keta paleya.   
\p
\v 9 Sipisipi Ikyane dokome isa roome upi lao rambu lasi kingi paki doko rekya lanyi nembeya. Dokopa wambu lapo Anatunya pii dokona kaeya nao poraiyuo leyamisa letaminyi lapala pyao kumasiyami dupwana imambu dupwa Anatu rendamu pingi kiso maingi kana pyare isarena siyaminyi kandeyo.  
\v 10 Nakama pii kyakale rekyae koo lao lapala dopa leyami. Rolo Pingi Porakai Poo Pyasi Kamongo, embame yuu gii akipare epo paparamopa wambu namwa pyao kumakayami dupwa kote lao randa mairiŋi lao iso kararese? leyami.  
\v 11 Dokopa nakama mendaki mendaki lao komau kakepame maipala dopa pyuo lamaiya. Nakama pyao kumakayami kande doko dopako pyuo nakamana yangonge dee nakama role pyao yulu mendare pingi dupwa pyaramiko ingisi silyamo dokona pyapena lao iso karalapape leya.   
\p
\v 12 Sipisipi Ikyane dokome isa roome pepa upi lasi pakinyamange doko nyuo lumbuya. Dokona dee kandeyono dokopa yuusili andake minyiya. Dokopa neta doko alowa pyuo nyuu byake rokwasi wambarae pupuri dopale ingiya. Dee kana doko kone pyuo ranjama dopale ingiya.  
\v 13 Bui malu dupwa onya jingi puu napa nalyamo porambaiye minyuo kondanyi isa peenge dopale ingyuo peya.  
\v 14 Yake doko pepa yoko dopale ingyuo kao pele pele lao peyamo dokopa yuu kyau, dee yuu aelende ipwa kota sukusa singi dupwape mee ingyuo rali piya.  
\v 15 Dokopa yuunya kiŋi dee kingi ketae penge dupwape akali yanda singi aminya rapu pingipi kamongope dee akali poraipi karapusi akali meepe dupwa kana andape dee yuu kyaunya kana waingi dupwanape yalu piyami.  
\v 16 Pipala nakamame yuu kyau dee kana dupwape kando lamaiyuo, Nakambame lakao epo Anatu banya Kiŋinya petenge andake dokona pisipyamopa dee mena Sipisipi Ikyane kote lao randa jelana pilyamo dolapona yambe pyao nee pyakalapape leyami.  
\v 17 Imbu singi neta nyingi yuu gii doko pyaka soo kaelyamo dokopa api mendeme kapa poraiyuo kararase? leyaminyi siyu.   
\c 7  
\s1 Isaraele Wambu Anatunya Make Nyisi Dupwa Kandeya  
\p
\v 1 Dopa pepeyamopa aŋala kisima yuu pinjingi kisimana roya kareyaminyi kandeyo. Isa yuu ipwa kota isape dupwana poo lao paa nana lapala porambaiye dokona pyapi lao kareyami.  
\v 2 Dokopa dee neta pyakaenge dorena aŋala mende Anatumi banya lao kamu kepeyamo epeya. Epo aŋala kisima yuupi ipwa kotape kwuanyi nembarami lao porainya renge maiyamo dupwa kando dopa lao kyakale poraiyuo kaeyo lao epeya.  
\v 3 Isa ipwa kota yuupi kokwa sepa nao pao Anatunya yulu pyakamaingi wambu dupwana enamba dupwana banya lao kamu keparamopa dokona ingyuo penale leya.  
\v 4 Doko nambame Isaraelena rara liti pyuo make nyiyami dupwa wambu ama malu doko 144,000 ingiyamo siyu.  
\v 5 Jutana rara make nyisi dokona 12,000 ingiya. Dee Urupenana rara make nyisi dokona 12,000 ingiya. Dee Gatena dokona 12,000 ingyuo peya.  
\v 6 Asana rara dokona 12,000 ingiya. Napatalainya rara dokona 12,000 ingyuo peya. Manasana dokona 12,000.  
\v 7 Simionena rara dokona 12,000 ingiya. Lipaena doko dopaleko ingiya. Dee Isakana rara 12,000.  
\v 8 Dee Sepyulanena dokona dopaleko. Josepena doko 12,000. Dee Benjamenena 12,000 make nyisi ingyuo peya.   
\s1 Wambu Malu Yake Panda Peyaminyi Kandeya  
\p
\v 9 Dopa pyuo kandapeyono dokopa wambu ama soo kaeyo, mendeme kapa yaka lao sukusa paa narami dopale kandeyo. Yuu muu peparaenape pii rara wakale wakalepe yanenge rara wakale wakalepe wambu rara wakale wakalepe kiŋinya petenge isa andake siyamo Sipisipi Ikyanena lenge kambu dorena komau kakepame pipala isa bona yoko dupwa lakao eta eta palyuo minyuo kareyami.  
\v 10 Minyuo karo nakama pii ketae lao, Anatu baa petenge isa andakena petamo dokonape dee Sipisipi Ikyane dokonape nakamba keta namwa lete wai pyao nyingi renge doko palamo leyami.  
\v 11 Dokopa aŋala peparae, dee lee renge bange kisima dusipape wambake akali dupwape petenge isa andake dokona nyuo sukusa pyambuo roya karapala Anatunya lenge kambu siyamo dokona baapa lao mona kando pangu sepala dopa pyuo leyami.   
\q1
\v 12 Kinyi Anatu lakando ange lao  
\q1 banya kingi ketae pyambwarama ingilyamo.  
\q1 Baa soo gisingi dokome kamame porai renge  
\q1 baa keta palipyamopa neta renge ingyuo pelyamo, doko kinyi.   
\p
\v 13 Dokopa akali wambake dokona mendeme namba kando, Wambu komau kakepame wapungi dupwa nakama anja rangepe dee nakama apimoose lao piso siya.  
\v 14 Nambame isingi lao, Kamongo namba see nalyo, embame silinyi leyo. Dokopa baame langyuo, Kurisene wambu randa andake nyiyami. Randa andake nyepala karo Sipisipi Ikyanena ranjama dokome nakamana komau wate pyuo kyewa lapala nyiyamo karaminyi dupwaŋa leya.  
\v 15 Dopa pyuo peyamo dokona lao nakama kukwa korakamape yaka lao Anatunya petenge isa dokona repeta karo yulu pyakamaingi petenge andakena piso karenge dokome banya arapunya nakama nyuo palyingi.  
\v 16 Lopangepe ipwa nano pingipi dupwa nakama keta dee pali nara. Dopako pyuo porambaiye pyuo netapeme rakusi rao pii nara.  
\v 17 Sipisipi Ikyane petenge isa andake dokona karapala baa nakamana rapu pingi ingyuo pelyamo. Baame ipwa guu lete palenge dokona nakama reto karara. Doko Anatumi nakamana ee kwuakamirasa pira leya.   
\c 8  
\s1 Kurisene Wambu Ateŋa Leyaminyi Dupwa Anatunya Lenge Kambu Dokona Rendamu Pyuo Peya  
\p
\v 1 Sipisipi Ikyane dokome pepa rongo pisi dokona isa roome upi lao rambu lasi yanda ipingi doko rekya lanyi nembeya. Nembeyamo dokopa yake dorena mendasa lyapu laope pii napala koo pyuku pyuku pao yuu mee lama mee siya.  
\v 2 Enakana kandeyono dokopa aŋala yanda ipingi Anatunya lenge kambu dorena bikuli lenge yanda ipingi maiyaminyi minyaro kareyami.   
\p
\v 3 Dokopa aŋala mende pee golome wasisi rendamu pingi retenge pere mende lanyuo epapala rendamu pingi bange malupi dee Kurisene wambunya ateŋa lengepe nyuo pyasapala kiso maingi kana pyare doko kiŋinya petenge isa andake repeta siya dokona Anatu kiso maira ingiya.  
\v 4 Rendamu paleta isare sukwa doko Kurisene wambunya ateŋa dokopa rolae pyapeta aŋala dokome minyaro kareyamopa yake panda Anatunya lenge kambu siya dokona peya.  
\v 5 Dokopa aŋala doko kiso maingi pyare dokona isare lapo nyepala rendamu pingi penge dokona kisinyi palyiya. Palyapala isa yuunya pyao peeyara aopa yuu gala andake lao yuu pele pipala yuu dupwa yuusili minyiya.   
\s1 Bikuli Dupwa Leyaminyi Dokopa Yuu Dupwa Kwao Peya  
\p
\v 6 Dokopa aŋala yanda ipingimi nakama bikuli dupwa nyepala lalana rapa rapa piru kareyami.   
\p
\v 7 Aŋala mupwa baa banya bikuli leyamo dokopa randake kapa isarepe ranjama pale pale yuu dupwana kulimbuo epeya. Dokopa yuu muu dupwa remasa ingiyamopa liti mende rao oteya. Dee dokona isa kareyamo dupwa reyako. Dee isareme isoko dupwa rao pyalingi nyiya.   
\p
\v 8 Dokopa aŋala lapo pyuo dokome bikuli leyamopa isareme yuu kyaunya renge dopale ingyalya ingyana pipala ipwa kota sukusa dokona pyao nembeya. Dokopa ipwa kota doko remasa ingiyamopa liti mendaki dokona ranjama ingiyamopa  
\v 9 lee renge bange dokona siyamo dupwa kumuo oteya. Dee sipu dokona papyuo kareyamo dupwa kokwa sisi siya.\fig Yakakambe yake dokona bii lao karo pii ama ketae leya.|src="FILEFIG" size="col" ref="8:13" \fig*   
\p
\v 10 Aŋala repo pyuo dokome banya bikuli doko leya. Dokopa bui mende kendapuli rele lao yake dokona piso isa pyakao epeya. Epeyamo dokopa ipwa epo penge dupwa liti pyuo remasa ingiyamopa dokona liti mendenape dee ipwa guu dupwanape pyakala papala rao kokwa siya.  
\v 11 Bui doko imambusa ingyuo (kingi Kau Pingi lenge) dokome ipwana pao paleyamosa ipwa liti pyuo rema dokona mende kau pyuo siya. Kau pyuo kwaese dokona neyami dokopa wambu ama soo kaeyo kumuyami.   
\p
\v 12 Aŋala kisima doko bikuli leyamo dokopa neta kana dokonape dee bui dupwanape kanya remasa lao rombo pyao liti piyamopa liti mendaki dokona larapu iminjapa piya. Dopako pyuo kukwa doko remasa lao liti piyamopa dokona liti mende iminjo, dee korakama doko dopako piyamopa dokona liti mende iminjo piya.   
\p
\v 13 Enakana nambame kandeyono dokopa yaka kambe yake dokona bii lao karo pii ama ketae lao, Kwao para, kwao para, isa yuunya palaminyi dupwa randa andake nyerami. Aŋala rema bikuli lapa nami dupwa oo lalana petaminyi dokona kama kwao parami ingyalopyamo leya.   
\c 9  
\p
\v 1 Aŋala kingi paki ingyuo dokome banya bikuli doko leyamo dokopa bui yakena piso yuunya kondala epeyamo doko kandeyo. Doko baa yuwale mendasa lumwa pii nao soo dono puu pao peya dokona lao kii ikyane retaro kareya.  
\v 2 Bui baame yuwale kata soo puu penge doko kambu lumbuyamo dokopa dokona piso isare kyau andake kekenge koo kana lokwasu lao rapala pingi dopale epapala dokopa yuwalena sukwa dokome neta kata nyuo yambe pyalu pyao piya.  
\v 3 Dokopa goemba malu sukwa dokona lupyuo epo popokyalyame pilyamo randa pingi renge porai dopale pale pale epo yuu dupwana siya.  
\v 4 Baame isa rambipi dee bange wara piso karenge dupwa kokwa see nana leya. Lapala akali nakamana enambana Anatunya make pali nange dupwa iki randa mainya leya.  
\v 5 Nakamame wambu dusipa pyao kuma see nao kana kingi paki mee randa maiyuo karena leya. Randa doko popokyalyame pilyamo popo pingi dopale ingyuo pinya leya.  
\v 6 Kana kingi paki dusipana akalimi kumalana kame kungi pyao kararaminyipa kumarami kata mende see nara ingiya.   
\p
\v 7 Goemba dupwa mena oseme yanda pinya nyuo rapa rapa pipala karelyaminyi karenge dopale ingyuo kareyami. Nakamana ayemba dupwa kana golome kyawa rarange pingi dopale ingiyamopa nakama wambu lenge kambu nyiya.  
\v 8 Nakamana kyawa dupwa endana kyawasi ingyuo nenge dupwa mena laenena nenge ingyuo piya.  
\v 9 Nakama kapame wasisi bange dopale kyangalinya pee pipala nakamana papake mena oseme uliuli ipyuo nyilyamopa kili kali koo lao yanda pyalana penge dopale mane mane piya.  
\v 10 Nakamana konali doko popokyalyana konali dopale ingyuo papala ipwange popo koo pingi paleta dokome kana kingi paki dusipana wambu randa mairami ingiya.  
\v 11 Aŋala koonde yuwale kata soo puu penge dokona yuu range doko nakamana kiŋi ingyuo karapala nakama iso karara ingiya. Banya kingi doko Ipuru pii lao Apatone leyami dee Giriki pii dokona Apolyone leyami. Kingi doko wambu pyao kokwa sera dopale.   
\p
\v 12 Randa mendaki doko epo papeyamopape dee lama ene epara ingiya.   
\p
\v 13 Dokopa aŋala pakinyamange dokome banya bikuli doko leya dokopa Anatunya lenge kambu siyamo kana golome wasisi kiso maingi pyarena pinjingi dusipana anda kanya dokona piso pii lao epeya.  
\v 14 Pii doko aŋala pakinyamangeme bikuli minyaro kareya doko kando lamaiyuo, Aŋala kisima ipwa andake Yuporisa lenge dokona puu maisi karaminyi kandapi doko mokonya leya.  
\v 15 Wambu yuu muu peparaena dupwa nyuo liti rema ingyapala dokona liti mendaki pyao kumakarami lao aŋala kisima moko nembeya. Aŋala dusipame kana yuu giipi ee kanape dee keloke giipi wambu pyao kumakaraminyi doko dokopana lao rapa rapa pisi reteyami.  
\v 16 Nakamana yanda singi rara dokona akipare karaminyi lao siyu dokopa ama soo kaeya 200 milyane ose dupwana peteyaminyi siyu.  
\v 17 Nambana kombeya dokona akali dupwa nakama ose dokona peteyami. Nakamana pee pingi porai kapa yale doko kone kala isare uliyapu yale role rao kaa rao piyapya. Osena ayemba dusipa mena laene ayemba dopale ingiya. Nakamana nenge kata dokona isare rolepo ralepo rao uliyapu nyuo kyau lao epeya.  
\v 18 Isare rao kyau lao lulya kaso epeyamo renge koo rema dusipame mena osena nenge kata potemo epapala wambu peparae liti pyuo rema ingiyamo dokona liti mende pyao rembe neya.  
\v 19 Mena ose dupwana porainya renge doko nakamana nenge kata konalipi dolapona paleta karo konali dupwa kau ingyuo papala kaunya ayemba dokome wambu randa maiyuo piyami.   
\p
\v 20 Randa maiyuo piyaminyipape wambu lapo pyarepala peyamo dupwa rangena kingimi wasiyami dupwana paka paa nayami. Nakamame imambu koope dee bange golo dee kana kulingi kone kana pingi mee kanape dee isame wasisi lenge rao kando, pii soo kata papi nao pingi dupwa kando, kingi lao karalu kareyami.  
\v 21 Nakamana wambu pyao kana mauli minyuo, kepo pyuo, dee waa nyingipi dupwa yaki nyii nayami.   
\c 10  
\s1 Buku Kao Pele Pele Lasi Doko Aŋalame Jone Maiyamo Neya  
\p
\v 1 Enakana aŋala porai wakasa mende yake dokona piso isa epeyamo kandeyo. Kopa dokome komau ingyuo wapupala banya ayemba dorena kau puiya dokome nyuo bokembake pyuo piya. Banya lenge kambu dorena neta rele leyamopa kimbu dolapo isare kekenge dopale ingiya.  
\v 2 Banya kingi dokome buku kao pele pele lasi doko pyasinju leyamo kandeyo dokopa aŋala dokona kimbu rolaerena ipwa kota dokona karapala kyairena yuunya kareyamo kandeyo.  
\v 3 Dokopa mena laene gala lele lao kyakale leyamo dokopa yuu gala ama reeko yanda ipingi nyepo lapala isingi lamaiya.  
\v 4 Lapeyamo dokopa aopa pepana pyalana pipiyu dokopa, yake dokona piso pii mende lao, Apa lalaminyi lao mee soo manjipala pepana pyao reta napipi leya.   
\p
\v 5 Dokopa aŋala yuu ipwa kotape dolapona kimbu kararo kareyamo kandeyo dokome banya kingi rolae dokome yake dorena minyalyiya.  
\v 6 Baame Anatu yake dorena bange silyamo dupwape yuu dokona bange paleta silyamo dupwape dee ipwa kota dokona silyamo dupwape wasapala kareyamoko karenge dokona kingi lao pii angi ingyuo lalu lao lao dopa lamaiyuo, Yuu gii dakepa otara ingilyamo, Anatumi dee isaro kara nara.  
\v 7 Dopa piramo dokona aŋala yanda ipingi dokome bikuli lara dokopa Anatunya pironya lao poropeta akali dupwa lamaiyamo doko angi pyaka silyamo leya.   
\p
\v 8 Dokopa yake dokona piso piinde leyamo siyunu dokome dee kamba langyuo, Aŋalande ipwa kota yuupi dolapona kimbu karapala pepa kao pele pele lasi pyasinju lasi doko kingi rakana palyaro karamo doko nyela puu leya.  
\v 9 Dokopa aŋala kareya dokona pepa jinya lala peyo. Dokopa nyepala naa leya. Narenepa ingi anda soo keke piramopape embena kambu dokona lyaa ipwange ingyaramo rendeme kumare leya.  
\v 10 Dokopa banya kinginya pepa minyiya doko nyepala neyo dokopa nambana kambu dokona lyaa pala rende piya. Dopa piyamopape goe lao oteyono dokopa ingi dorena keke koo piya.   
\p
\v 11 Enakana namba langyuo, Dee kambako embame Anatunya pii doko wambu malupi yuu rara liti peparaepe pii wakale lengepe dee kiŋipi dupwana lao pano lare leya.   
\c 11  
\s1 Anatunya Tembole Anda Doko Makande Pyuo Kandena Leya  
\p
\v 1 Lapala makande pingi isa londe mende joo karo dokopa dopa langiya. Sipurapala Anatunya tembole anda dee kiso maingi kana pyarepe dolapo makande pyuo, dee tembole anda dokona Anatunya kingi lakando karaminyi wambu dupwa yaka lao kanda leya.  
\v 2 Dopa pirinyipape tembole anda dokona netarename kame piro karamo Juu daa rara menge dupwa maiyuo kaeyasi doko makande pyuo kanda napipi leya. Nakamame Jerusaleme Taone Yapasi doko kana akalisa kisima ipisu lamana apa nao kunji kanji minyuo kararami.  
\v 3 Dokopa nambana pii minyingi akali lama kumanda petenge komau wapuo pisirambinyipa pena lao nembaro. Nakamba yuu gii malu (1,260) dusipana Anatunya pii polo lao kararambi leya.\fig Anatunya tembole anda doko makande pyuo kanda.|src="FILEFIG" size="col" ref="11:1" \fig*   
\p
\v 4 Pii minyingi dolapo olipi isa lamape dee kendapuli minyingi lamape yuu muu peparaena Kamongo simuisa dokona lenge kambu silyamo dokona karenge.  
\v 5 Mendeme dolapo randa mainya pirami ramo dokopa pii minyingi dolapona nenge kata dokona isare potemapala nakama pyao kokwa sinyi nembara leya. Dopa pyuo para ingilyamo dokona akali mendeme dolapo randa maipuli lao piramo doko baa kapa lete kararande daa.  
\v 6 Nakambame porai renge palyuo yake kata upi larambinyipa Anatunya pii larambi gii dusipana apu epa nara. Dopako pyuo nakambame porainya renge palyuo ipwa dupwa ranjama inginyi pyambuope dee pinya suu pyarambinyili pyuo yuu dupwa anga ikyane koo kiso mairambi ingiya.   
\p
\v 7 Nakamba Anatunya pii polo lao otaparambinyi dokopa bange rae lenge koo yuwale kata soo puu penge dokona palenge doko potemo epapala nakamba kando yanda pimwaiyuo pyalana pipala baame nakamba nyuo anamasi minyapala pyao kumakara ingiya.  
\v 8 Dokopa taone andake Kamongo Yesu isa mamandona pyao palyiyami dusa ingyuo barete mendena nakambana yanenge mee sera ingiya. Taone doko kongwalu pii palyili lao kingi Sotoma kingi mende Isipi lenge.  
\v 9 Wambu yongo wakale wakale nyingi dupwana mendena mendena pyuo, dee pii wakale wakale lengepe rara peparaepe dupwame nakambana yanenge kakapange dolapo yuu gii rema dee mendena apo ingyuo dokopa malu pii nana lapala mee kandaro serami ingiya.  
\v 10 Kumuyambi dokona isa wambu rae maipala mali lyuo puu minyingi dupwa pipya bange mee maiyuo kararami. Poropeta akali dolapome isa wambu peparae mona kendanyi pyambuo kareyambi dolapo kumuyambi dokopa rae mairami ingiya.  
\v 11 Yuu rema dee apo ingyuo kote yuu sepeyamo dokopa poporambaiye lete palenge doko Anatu keta piso epapala nakamba keta maralyiyamopa sipurao epeyambi. Doko kandeyami dupwa mona nembo pakayami.  
\v 12 Enakana poropeta akali dolapo kando yake dokona piso yuu ketae nakamba kando kyakale lao, Dae ipupwa leya. Dokopa yanda pimwai dupwame apa pilyape lao kando kareyaminyipa yake panda kopa rakapana dokona pulyuo peyambi.  
\v 13 Dokopa aopa yuusili andake minyuo dee anda kamba kamba karenge dokona anda lapo lalyuo ranapala wambu ama malu (7,000) pyao kumakaya. Dokona pyarepala peyamo dupwa mona nembo pakapala Anatu yake panda karenge dokona kingi doko ketae pyambuo kararami ingiya.   
\p
\v 14 Randa lapo doko epo papeyamo dokopa repo doko repetale epana piro siya.   
\s1 Aŋala Yanda Ipingi Dokome Bikuli Leyamopa Mende Piya Doko  
\p
\v 15 Enakana aŋala yanda ipingi nyepo dokona bikuli leyamo dokopa yake dokona piso pii rekyae lao lapala, Namwana Kamongo kandale dee banya Koraisapa yuu muu dupwana kiŋi ingyuo kaelyambinyiŋi. Dokome iso karalu karara lyakande leyami.  
\v 16 Enakana wambake akalisa lama ipisu kisima Anatunya lenge kambu siyamo dokona nakamana petenge isa dupwana pisipala mona kando isa pao palipala Anatu lakandao dopa leyami.   
\q1
\v 17 O Kamongo Anatu Porai doko  
\q1 namwa emba kando ange letamano.  
\q1 Emba wamba karapala piso epo epapu kareneoko.  
\q1 Embame embena porai renge dokome minyuo  
\q1 wambu peparae rapu pyuo karene.  
\q1 Emba wambu kote lare gii pyaka sepeyamopa   
\q1
\v 18 Anatu suu pyaa nange wambu dupwa  
\q1 nenge sisi pyapala lao kareyami.  
\q1 Wambu kumuyami dupwa kando kote lapala  
\q1 embame embena yulu akali poropeta dupwape  
\q1 wambu yapasi dupwape  
\q1 dee wambu koo epengepe embena kingi ketae nembenge dupwape  
\q1 yole keyange mairi ingilyamo.  
\q1 Dee yuu gii dokopana wamba yuu dupwa kokwa siyami  
\q1 dokona embame kokwa sereoko leyami.   
\p
\v 19 Dokopa yake panda dokona tembole anda kambu doko lumbuyamopa Anatunya Kana Minyuo Lalu Lao Leyamo Pii Pyasi Paleyamo Bokote doko paneya. Paneyamopa yuu pele pyuo gala andake lapala yuusili minyuo randake kapa epo piyamo kandeyo.   
\c 12  
\s1 Enda Kau Pambeyapa Dolapona //  Piinde Palamo  
\p
\v 1 Enakana yake dokona kongwalu andakende piya. Doko endande banya komau doko neta dokome wapuo, kimbu kape dokona kana yapa singi dokome pee pyuo, kyawa rarange dorena bui akalisa ipisu lama paletandeme pyuo piya.  
\v 2 Enda baa repeta wane manjinya piyamopa mata piyamo dokome randa nyepala ee leya.   
\p
\v 3 Dee yake dokona kongwalu mende piya. Doko kau pambeya kone mende nenge kyai akalisa epengende banya ayemba yanda ipingi nyepo kareta ayemba dusipana wakale wakale kiŋinya kyawa rarange wakale wakale piso kareyamoko piya.  
\v 4 Banya konali dokome yakena bui dokona pakirena pyao pingyanyi isa yuu dokona malyiya. Malyapala enda wane repeta manjira ingiyamo lenge kambu siyamo dokona wane manji paramo dokopa nalana suu pyao epo kareya.  
\v 5 Enakana wane ane porainde ane pangali nyepala wambu rara peparae iso karara doko mandeya. Dokopa wane doko waiya lao nyepala Anatunya petenge isa dokona Anatu keta kupinyi pyambuyami.  
\v 6 Endangi doko Anatumi yuu pandape rapa rapa pyakamiyamo yuu muiyane dokona ralo peya. Baa yuu gii malu (1,260) Anatumi rapu pyuo kararamo pisira.   
\p
\v 7 Dokopa yake dokona yanda andake sipureya. Aŋala mupwa Maikele lenge dokome banya aŋala lapo dupwa pipa kau andake dokopa yanda pimwaiyami. Dokopa dee kaupi banya aŋala dupwapeme isingi yanda pimwaiyami.  
\v 8 Dopa piyamopape kau doko banya aŋala pipa pyao anamasi minyapala yake panda kara narami lao ralinyi nembeyami.  
\v 9 Kau kameya doko kingi Satane kingi mende Depele lenge doko isa kupinyi peeyami. Baa yuu muu peparaena wambu panga soo karenge doko baape banya aŋala dupwa pipa pyao ralinyi isa peyami.   
\p
\v 10 Enakana yake dokona piso pii andake dopa pyuo leyamo siyu. Koo mendeme Anatunya lenge kambu siyamo dokona kukwa korakamape karo namwana yangonge dupwa kando koo keta palyuo kote lao kareyamo doko neta nembelyaminyi. Anatumi porayapala kote palenge doko anamasi minyuo wambu iso karara yuu gii doko pyaka sepelyamo. Dokopa Koraisa banya isingi panda angi doko range nyilyamo, leya.  
\v 11 Namwana yangonge dupwame Sipisipi Ikyane kumuyamopa ranjama isa peyamo dokome Satane nyuo anamasi minyiyami. Nakama range kame soo kaepala kapa kumuo mainya suu pyao, dee pii keyange angi polo leyami dokome anamasi minyiyami.  
\v 12 Dokona lao yake dokona karaminyi dupwa peparae raeko maiyalapape. Dopa piramopape nakama isa yuupi ipwa kotape koo keta palirami ingilyamo. Satane dokome banya yuu gii otala ipyasa ingi koo palyuo isa panda dokona randa maiyalana epo karamo leya.   
\p
\v 13 Kau dokome baa isa yuunya kupyuo nembeyami doko kando sepala enda wane mandeyamo doko moko minyuo peteta peya.  
\v 14 Peyamopape enda doko yaka kambena papake lama maiyaminyi nyuo karapala bii lao yuu muiyane dokona peya. Yuu dokona ee kana rema dee apo ingyuo kau dokome pyasaramo lapala waso pisira ingiya.  
\v 15 Enakana kau dokona kambu dokome ipwa kasinyi peeyara ipwa kama pyao epeyamo dokome enda baa soo kaki pira ingiya.  
\v 16 Dopa piyamopape yuu dokome enda doko nyisalana pyuo banya nenge kata angapu lakipala kau nenge katana ipwa kama pyao epeya doko nao sokwara ingiya.  
\v 17 Dokopa kau dokome imbwuapala pao enda dokona para piyamo dupwa Anatunya mawa pii letamuli pyuo dee Yesunya pii rolae dupwape yaki nyii nao minyingi dupwa keta randa maiyapala peya.  
\v 18 Kau doko pao ipwa kota kee kama dokona isaro kareya.   
\c 13  
\s1 Wambumi Bange Koo Dolapo Lakandao Kareyami  
\p
\v 1 Enakana kandeyono dokopa ipwa kota dokona mena kanda nangende pulyuo epeya. Banya ayemba yanda ipingi dokona nenge akalisa kareta epeya. Dusipana wakale wakale bange kyawana rarange akalisako piso kareyamopa dokona Anatu kando pii koo pyasi paleya.  
\v 2 Mena koo doko mena lepete dopale ingyapala banya kimbu dolapo mena beyana kimbu nyuo lenge kambu doko mena laenena ingyuo piya. Kau pambeya doko banya porai rengepe kiŋinya petengepe dee kiŋi banya isingi panda andake doko maiyamopa mena doko baa epo kareya.  
\v 3 Mena ayemba dokona wuame pokwasi dokona kumuo kaeyali ingiyamopape pokwasi kata doko umbwua piyapya. Dokopa yuu muu peparae yamarangyuo mena dokoko kandaro soo puu peyami.  
\v 4 Wambu peparaeme kau pambeya doko banya porainya renge doko mena laene yale doko maiyamo dokona lao kau baa lakando kareyami. Dee mena dokona kingi lao dokopa dopa lao, Api mendeme mena doko yale ingyarape? Apimi nenge poko yanda pirape?   
\p
\v 5 Mena doko ee kana rema dee mee kana pakinyamangepe dokopa Anatu kando pii koo lao baa mupwa ingyuo kareyamopa Anatumi mende laa naya.  
\v 6 Dokopa mena baame Anatunya kingi dokonape Anatu karenge andape wambu banya arapunya karenge dupwape dokona lao mokwalipi leya.  
\v 7 Baa Anatunya wambu yanda pimwaiyuo anamasi minyapala wambu peparaepe pii wakale wakale lengepe rara peparaepe dee wambu yuu wakale wakalepe rapu pyuo karara yulu doko baa nyiya.  
\v 8 Dokopa isa enda akali dupwa nakamana kingi doko Anatumi yuu panda wasapa nayamo dokopa letena renge palenge buku dokona kingi pali nange dupwame mena bange koo dokona kingi lao kararami. Buku doko mena Sipisipi Ikyane wambu pyao kumakayami dokona ingyuo siya.  
\p Kale kata singi ramo soo pisipwape.  
\v 9-10 Karapusi anda palira ingingi dupwa pao palenge kandale. Dee mendeme yanda pipala pyara ramo doko baa yanda pipalako pyarami ingingi kandale. Randa koo dopa pyuo epeya kande dokopa Anatunya wambu baa kapa ingingi lao suu pyao karo kaeya nao pyuo karapengele.   
\p
\v 11 Dokopa mena bange koo lapo pyuo yuu dokona potemo epeyamo kandeyo. Dokona banya nenge dolapo sipisipi ikyane nenge dopale kareta baa pii leyamo doko kau pambeyame lele leyamo siyu.  
\v 12 Bange mena koo lapo pyuo doko bange mena koo mupwa wuame piyami umbwua piyamo dokopa role pyao karo banya porai renge nyepala isa wambu peparae bange mena koo doko mona maiyuo lakandena leya.  
\v 13 Dee baame yulu malu wambumi pii nange dupwa pyuope dee wambu kando kareyaminyipa isare lapo yake dokona piso rao isa epena laope piya.  
\v 14 Bange mena koo wuame pokoyaminyi lete peyamo dokome baa kapa pinya leyamopa mena baame wambumi pii nange yulu dupwa pyuo isa wambu minyoko piyamosa nakama kau dokona kingi ketae pyambuyami isa kanape dupwame kau baa yale bange mende wasapala kingi lao kareyami.  
\v 15 Dokopa mena dokome bange wasiyamo doko lete renge maiyamopa dokome baa pii lapala wambu baa mona maiyuo lakanda nayami dupwa pyao kumakana leya.  
\v 16 Mena lapo pyuo dokome akali koo epengepe kamongo pendewape karapusi palenge pali nangepe nakamana kingi rolaerena dee enambape dolapona make palyinya lao poraiyuo leya.  
\v 17 Lapome mena koona kingi nakamana enamba dokona namba ingyuo pyasi pali nara dupwame bange ropo pyaope dee nakamana bange dupwa kana nyuope pii narami leya.   
\p
\v 18 Dokona kongwalu mende palamo poraiyuo suu pyamana. Mendeme mondo lao sera ramo namba doko apiyakalende lao kandara. Namba 666 pyasi palipyamopape angi doko akalinya kingi ingilyamo.   
\c 14  
\s1 Kiiramo Nyisi Wambu Dupwa Kenane Enenge Mende Piyami  
\p
\v 1 Nambame kandeyono dokopa mena Sipisipi Ikyanende yuu kyau Sayone dokona roya kareya. Wambu 144,000 Sipisipi Ikyanena kingi dee banya Rakangena kingi nakamana enamba dupwana pyasi paleyamo kareyami.  
\v 2 Dee yake dokona pii andake ipwa jerae pyao pele lao dee yuu gala lele leyamo siyu. Doko akalimi rambyalu lenge dopale ingyuo leyami.  
\v 3 Anatunya petenge isa dorena lee renge bange kisimape dee wambake dupwa kareyaminyipa kenane enenge mende pyao kareyami. Kenane doko mee wambu dupwa soo nyii naramilinde Anatumi kiiramo nyiyamo wambu 144,000 dusipame mana nyerami ingiya.  
\v 4 Akali dusipame enda warenda nao waso karenge. Nakama Sipisipi Ikyane doko yaki nyii nao pelyamuli pyuo papingi. Nakama isa jingi mupwasa ingili lao isa wambu dupwana kanda soo kiiramo nyisi karaminyi.  
\v 5 Nakamba kyambo koo mende laa nao nyisu yakunayape pisi nalyamo karenge.   
\s1 Aŋala Rema Dusipana Yulu Pingi Doko  
\p
\v 6 Enakana aŋala mende yake dokona ama ketae bii lao pao dokopa isa wambupi yuu muu wakale dupwana rarape pii wakale wakale lengepe dupwa keta waili pii keyange sulu singi doko lamaiyala peya.  
\v 7 Baame Anatu epapu kote letamo dokona baa kando pakao lakandao karalapa leya. Yuu yakepe ipwa kotape dee ipwa guu lao pyakamenge dupwa wasiyamo doko baa kando ketae nembo mona kando pisipwape lao kyakale palyuo peya.   
\p
\v 8 Aŋala wambo doko lapeyamo dokopa enakana mendeme lao. Baa isa pwuamo. Kingi andake Bapilone lenge doko isa pwuamo doko baa wambu rara peparae waene ipwange porai enda banya pasende yulu pingi doko paleta napala pundana lao maiyamopa dokona lao taone andake doko baa isa pwuamo leya. (Yuu taone Orome dokona kongwalu palyuo leya.)   
\p
\v 9 Dee aŋala epo dokome kata dokonako palyuo pii ketae poraiyuo lapala, Mendeme mena bange koo dokonape mena baa yale kingi wasiyamo dokope kingi lao karapala banya kingi panda enamba dokona make doko palyuo pira ramo  
\v 10 doko baa Anatunya imbu singi nyingi waene ipwange doko nara leya. Anatumi mee ipwa pipa minyuo pyasalya pyasana pyuo pii nara. Anatu banya imbu singi doko pee kapo dokona kulimbwanyi palyapala dokopa nena lara. Aŋala poo pyasipi dee Sipisipi Ikyanena lenge kambu dolaponape karo ipwange doo isareme rao lulyakasisi randa andake pingi dopale naminyipa nakamana randa nyingi doko isare kyau ingili lao pao karalu karara.  
\v 11 Nakamana bange mena koo dokope dee mena baa yale bange kingimi wasiyami dokope kingi lapala banya make enambana nyiyami dupwa kukwa korakamape imambu see nao kae lao kararami.   
\p
\v 12 Dopa pyuo pyaka seramo dokopa Anatunya enda akalipi Yesu kapa ingingi lao suu pyapala banya mawa pii dupwa yaki nyii nao karapengele leya.   
\p
\v 13 Enakana dokopa yake dokona mende leyamo siyu doko, Pii dake pepana pyaa. Kamongona arapunya karo kumarami dupwa rae maiyuoko parami. Imambu Poo Pyasimi isingi dopa letamo. Nakama yulu keyange piyami doko mee isa paa nao nakama role pyapeta parami. Nakama mata sisiki nembo rae maiyuo karalu kararami letamo leya.   
\s1 Yuunya Ee Wambu Pilyamo Manjo Nyingi Doko  
\p
\v 14 Enakana nambame kandeyono dokopa yake dokona kopa kyewa lenge mende siya. Kopa dokona wambu kameyande peteya. Doko banya kyawa dokona golome bange kyawa rarange pyuo kingi dokona naipu enge kyai nee nengendeme ee manjo nyingi dokore minyaro peteya.  
\v 15 Dokopa aŋala mende tembole andana panda poo pyasi dokona karo epapala kopa dokona peteyamo doko kando kyakale poraiyuo lao, Isa yuunya nenge nenge wambu pilyamo. Manjo nyingi kana doko pyaka silyamo dokona embena naipu nyepala pyakepo manjo nyii leya.  
\v 16 Leyamopa kopana peteyamo dokome sipurapala isa yuu dokona jingi dupwa naipumi pyakepo manjo nyiya.   
\p
\v 17 Dokopa aŋala mende tembole andana panda poo pyasi doko yaki nyepala naipu nenge karenge dokore minyuo epeya.   
\p
\v 18 Dee aŋala mende kiso maingi kana pyare rapu pyuo karenge doko yaki nyepala naipu nao mama nyingi manjaro kareyamo doko kando kyakale lao dopa pyuo leya. Isa yuunya isa girapo dupwa poo relyamo dokona embena naipu nenge karenge dokome nyepala pyakepo lyepe leya.  
\v 19 Dokopa aŋala dokome banya naipu nenge karenge dokome nyepala girapo jingi peparae lyiya. Lyepala nyuo masene andake girapo pyao rakyuo kingingi dokona pyao pyambuya. Masene doko Anatunya imbumi kumungi dopale doko.  
\v 20 Waene pyao rakyuo kingingi panda doko anda taone kame netarena dokona ingyuo siya. Dokona girapo dupwa kingiyami dokopa ranjama epo pete siyamo makande pyuo wambu roya kararaminyipa nyuo mwuapala mange koe minyara dopale ingyuo dee epo pyasinju lao peyamo doko 300 kilomita dopale ingyuo londeya.   
\c 15  
\s1 Aŋala Yanda Ipingi Dusipame Bange Ama Koo Minyaro Kareyami  
\p
\v 1 Enakana yake dokona kongwalu andake wambu mona nembarami dopalende piyamo kandeyo. Aŋala yanda ipingi nyepowa isa yuu koo keta palyuo paramo bange yanda ipingi nyepowako minyaro kareyami. Bange koo kulimbwanyi palyaraminyipa Anatunya imbu singi doko pyai naramosa baa dee kamba kote laa nara ingiya.   
\p
\v 2 Dee kandeyono dokopa ipwa kotande isare pipa minyuo rukuraka pisi ingyapala siya. Siyamo pete nemba nembasa dokona wambu wambo mena bange koo dee bange mena baa dopale isame wasiyami dokopa yanda pimwaiyuo pyao nyuo anamasi minyiyamisa menana namba kingi palenge doko isa peyamo kareyaminyi kandeyo. Nakama Anatu rambyalu maiyamo dupwa minyaro kareyami.  
\v 3 Nakamame Anatunya kendemande akali Mosesena kenane doko pyao dee Sipisipi Ikyanena kenane doko pyao dopa pyuo leyami.  
\q1 O Kamongo Anatu Ama Porai doko,  
\q1 embena yulu dupwa peparae  
\q1 ama wakasa ingyapala elyape rolae ingyuo singi.  
\q1 Emba yuu muu peparaena kiŋi ingyuo karene.   
\q1
\v 4 Api mendeme Kamongo emba kando paka napala  
\q1 embena kingi doko ketae minyalya narase?  
\q1 Emba iki poo pyasi karene.  
\q1 Embena yulu rolae dupwa panasi silyamo  
\q1 dokome wambu yuu muu peparae epapala  
\q1 emba suu pyao mona kando pisarami.   
\p
\v 5 Enakana nambame kandeyono dokopa yake panda dokona Anatunya pii kinyi polo lao karenge komau anda dokona panda poo pyasi doko lumbuyamo kandeyo.  
\v 6 Dokopa aŋala yanda ipingi nyepo tembole anda dokona karo wambu kokwa seraminyi bange koo dupwa minyuo neta epeyami. Nakama komau karo pisi nange kyewa lasimi pipala golo puu dokome romba kyangalipi dokona puu pyapala epeyaminyi kandeyo.  
\v 7 Enakana lee renge bange kisima dokona mendeme aŋala yanda ipingi dusipa pere golome wasisi mendasipana Anatu mee kareyamoko karenge dokona imbu singi doko reto simbwapala maiya.  
\v 8 Enakana tembole anda dokona isare kyau lao Anatunya porai rengepe yanga paupau lengepe dupwame lyingi lyangi kuiya. Dokona mendali tembole anda dokona kolando parami ingya naya. Dopa piyamopape aŋala yanda ipingi dusipana anga ikyane otaramo mange dokopa tembole anda dee kapa parami ingiya.   
\c 16  
\s1 Pere Warake Anatunya Imbu Singi //  Paleta Dusipa  
\p
\v 1 Enakana pii mendeme tembole anda panda poo pyasi dokona piso aŋala yanda ipingi dusipa kando kyakale rekyae lao leyamo siyu. Dokona lao, Pere warake yanda ipingi dusipana Anatunya imbu singi silyamo doko isa yuunya kulimbwanyi palyala pupwa leya.   
\p
\v 2 Dokopa aŋala mupwa ingyuo dokome Anatunya imbu singi perena siyamo dupwa kulimbwanyi palyiya. Dokopa wambu bange mena koona make palyuo bange mena koo dopale kingimi wasapala kingi lao karenge dupwana yanenge dokona rete andake poro lao piya.   
\p
\v 3 Enakana dee aŋala lapo pyuo dokona banya perena siyamo doko ipwa kota dokona kulimbuya. Dokopa ipwa kota doko akali kumasinya ranjama dopale ingiya. Dokopa ipwa kota dokona lee renge bange peparae kumuo oteya.   
\p
\v 4 Dee aŋala repo dokome dopako pyuo banya perena siyamo doko ipwape dee ipwa guupi dupwana malyiyasa ranjamako ingiya.  
\v 5 Nambame siyu dokopa ipwana aŋala dokome dopa leya. Emba wambape dakepape mee kareneko karenge. Emba ama rolae poo pyasi ingingi dokome nakamba kando kote kapa rolae lapala randa mailyinyi leya.  
\v 6 Nakambame Anatunya wambupi dee poropetape dupwana ranjama dupwa kulimbwakamiyami. Dokona lao embame nakama ranjama dupwanako nena lao kapa mailinyi.  
\v 7 Dee enakana rendamu pingi kiso maingi kana pyare dokona piso pii mende leyamo siyu doko, Kamongo Anatu Ama Porai ingyuo karene doko embena kote pii dupwa rolae lenge leya.   
\p
\v 8 Aŋala kisima dokona banya perena siyamo dupwa neta dokona kulimbwanyi palyiyamo dokopa Anatumi akali dupwa kyawa yaki nyuo kaeyamopa neta dokome akali dupwa reya.  
\v 9 Neta isare ingyuo rao alyasi dokome akali dupwa rao raukusi reya. Rao raukusi rapalape Anatu baa randa koo dopale wambu keta mee kapa mairali doko kando kilya kando leyami. Lapala nakamba mona kapu kyuo banya kingi dokona lakandao lao pii nayami.   
\p
\v 10 Aŋala kingi paki dokona Anatunya imbu singi banya perena siyamo doko kulimbwanyi bange mena koona petenge isa dokona palyiya. Dokopa bange mena koona isingi panda dorena iminjiya dokopa akali banya arapunya karenge dupwa sii leyasa kambu nakepanyi nembo siyami.  
\v 11 Nakambana yulu koo piyami dupwa konda napala rete pyuo sii lao piyamo dupwana lao Anatu yake panda karenge doko baa kando kooŋo lao lao nembeyami.   
\p
\v 12 Enakana aŋala pakinyamange dokona perena siyamo doko ipwa andake kingi Yuporisa lenge dokona kulimbwanyi palyiya. Dokopa ipwa doko soko rali piyamo dokona kiŋi neta pyakaenge dorena karenge dupwa epena lao kata wapwakamira ingiya.  
\v 13 Enakana kandeyono dokopa imambu koo rema mungi dopaleronende kau pambeyana nenge kata dokonape dee mena koo nenge kata dokonape dee kyambo lenge poropetana kambupi dusipana neta epeyami.  
\v 14 Nakama imambu koo ingyapala wambumi pii nange yulu dupwa kemali pyuo pyuo papiyami. Imambu koo rema dupwame yuu muu peparaena papyuo kiŋi akali peparae Anatu Porai dokona yuu gii andake pyaka seramo dokopa yanda pirami dokona suu pyao kyakale lao nyuo sukusa sukusa pyuo epena leyami.   
\p
\v 15 Pii dake selapa. Namba waa nala penge dopale ingyuo eparo. Dokona nakama komau wapuo karo lenge rao karalapape. Dokome wambunya lenge kambu dokona papara paa nao rae maiyuo elya napala kararami.   
\p
\v 16 Enakana imambu koo dupwame kiŋi dupwa lanyuo yuu mende Ipuru pii lao kingi Amaketono lenge dokona peyami.   
\p
\v 17 Dokopa aŋala yanda ipingi dokome banya perena siyamo doko porambaiye dokona kulimbwanyi pyambuya. Dokopa tembole anda petenge isa dokona piso pii rekyae lao epo, Yulu doko pyuo kaelyamo leya.  
\v 18 Dokopa yuu pele pyuo rali pipala yuu gono lao yuusili kopetame minyiya. Anatumi yuu wambupi kanda soo ingiyamo yuu gii dokona piso yuusili dopale mende minya nange doko minyiya.  
\v 19 Taone andake doko remasa lao liti pyuo rali piya. Dee yuu mure lao rara wakale dupwana taone dupwa boo leya. Dokopa Anatumi yuu andake Bapilone lenge doko kame see napala banya kapona waene imbu singi renge paleta siyamo doko nao goe lena leya.  
\v 20 Leyamopa panda dokona yuu kyau dupwape dee panda lapo ipwa sukusa siyamo dupwape mee ingyuo rali piya.  
\v 21 Apu andake randake kapa reeko lasi kope byake dopale paleta isa epeyamo dokopa wambu dupwa piya. Dopa pyuo piyasa randake kapa dokome randa koo napala Anatu kando kilya kando leyami.  
\s1 Enda Pamuku Yulu Renge Piyamo Dokona Pii Lapo  
\p (Anatu yaki nyepala imambu wakale wakale suu pyaro kareyasa dokona enda pamuku leya.)   
\c 17  
\p
\v 1 Aŋala yanda ipingimi pere yanda ipingyako minyaro kareyami dokona mendeme epapala dopa pyuo langiya. Anda taone ipwa malu repeta dupwa enda pamuku yulu pyuo petamo doko baa randa nyera dokona lasaka pirole repeta ipu leya.  
\v 2 Yuunya kiŋi akali dupwame enda pamuku yulu andake piyamo dokopa kando nyepala pamuku yulu wakasa pyuo kareyami. Dee isa akali peparaeme enda dokopa pamuku yulu piyami. Pipala akali biya napala kyawa sisingi bolombalo letamo karenge dopale ingyuo peyamiŋi leya.   
\p
\v 3 Imambu dokome namba nyuo kako piyamopa aŋala mendeme namba nyuo soo yuu muiyane dokona peya. Dokona endande mena kone yanenge peparaena pii koo dupwa pyasi paleyamo mata dokona peteyamo kandeyo. Mena doko ayemba yanda ipingi nyepo dusipana nenge akalisa epengepya.  
\v 4 Enda doko baa komau kone rara lama piya. Komau doko kana golo wakale wakale kana kalya pisi mola kareta dokona kana malu penge dopale wasiyaminde wapwaro peteya. Banya kingi raka dokona kana golo kapo dokona banya yulu koo karo petenge dupwame simbwaro siyamopa minyaro peteya.  
\v 5 Banya kingi mende kongwalu pii ingyuo yuu andake Bapilone doko baa pasende enda peparaena endangi kyawa ingyapala dee isa yuunya ama yulu koo peparaena endangi ingyuo petamo lao banya enamba dokona pyasi paleya.  
\v 6 Enda dokome Anatunya wambu Yesu yaki nyii nao baa reke lao kumuyami dupwana ranjama napala kyakao peteyamo kandeyo.  
\p Kandapala nambame yamaranguyu.  
\v 7 Yamarangyuo peteyo dokopa aŋala mendeme epapala, Akipamo emba yamarangyuo karepe? Nambame mena koo banya ayemba yanda ipingi dusipana nenge akalisa epenge mata dokona enda baa petamo dokona renge yalu pyuo palamo dupwa polo langirowale leya.  
\v 8 Mena kandelene doko lete kareyamoko doŋo epapu kara nalyamo. Baa yuwale kata soo puu penge dokona pisipala dee pulyuo eparamo dokopa pyao kokwa sinyi nembarami. Isa wambu lapo Anatumi ene kanda soo yuu wasapa nayamo dokopa nakamana kingi letena renge palenge buku dokona pyasi pali nalyamo dupwa mena doko kandarami dokopa mona nembarami lyakande leya. Mena doko karapala dee pana naya doko dee enakana maro lara leya.   
\p
\v 9 Akali mondo lao suu pingi dupwame renge dupwa kapa ingyuo soo nyerami. Ayemba yanda ipingi dusipa yuu kyau yanda ipingi dusipana enda petenge doko lyakande. Dee ayemba yanda ipingi dusipa kiŋi yanda ipingyako karaminyi doko. (Kiŋi akali Orome rapu pyuo kareyami dokonasa letamo.)  
\v 10 Kiŋi yanda ipingi dokona kingi paki wambo oteya. Mende doko epapu kiŋi ingyuo pyuo karamo. Mende ene epara doko baa kiŋinya yulu yuu gii mendasipa iki pyuo karara.  
\v 11 Mena bange koo wambo karapala epapu kara nalyamo doko baa kiŋi yanda ipingi nyepo karaminyi dusipana mange lama ingyuo karenge. Doko kokwa serami ingilyamo.   
\p
\v 12 Menana nenge akalisa kandelene dusipa kiŋi akalisa dopale rombo palyaraminyipa nakama keloke gii awa mendaki iki mena role pyao kiŋi yulu pirami lyakande leya.  
\v 13 Kiŋi dusipa suu pingi doko mendakinyako palyuo suu pyarami. Nakamana pawape porainya rengepe dolapo mena baa keta mairami.  
\v 14 Nakama mena Sipisipi Ikyane dokopa pyakandaraminyipa Sipisipi banya wambu baa yaki nyii nange rombo palyuo yapo nyiyamo dupwa pipame mena koo doko nyuo isa palyarami. Doko baa kamongonyako Kamongo ingyuo karo dee kiŋinyako Kiŋi ingyuo karenge dokome nyuo anamara leya.   
\p
\v 15 Dee aŋala doko kamba langyuo, Ipwa malu dupwana enda baa repeta pisipyamo kandelene doko wambu ama malupi yuu wakale wakalepena rarape pii rara wakale wakalepe dupwa lyakande leya.  
\v 16 Nenge wanga akalisa kandelene dupwape dee mena koo dokomepe renga usale pamuku enda doko kando epe naserami. Epe nasepala banya komau dupwa pyao rokwanyi nembapala baa mee papara karena larami. Dopa pyuo pipala banya yanenge napala mee seramo dupwa isarena pyambwarami.  
\v 17 Anatumi suu piyamuli pyuo piramiŋi lapala nakama kiŋi dupwa suu pingi mendaki palyapala nakamana kiŋinya porai renge dupwa mena keta maiyaminyipa baa Anatu laramuli pyuo gii dupwana wambu iso karara ingiya.   
\p
\v 18 Enda kandapi doko mee taone andake doko makande minyuo pipyasa pilyamo. Taone doko baa kamame ketaele ingyuo karapala kiŋi doloma nyuo isa palyuowale karamo leya.   
\c 18  
\s1 Yuu Bapilone Anda Taone Doko Lalyuo Burumbara Peya  
\p
\v 1 Dopa pipeyamo dokopa aŋala mende yakena piso epeyamo kandeyo. Baa porai renge paleta banya yanga paupau lenge dokome isa yuu peparaena yanganyi peeyo epeya.  
\v 2 Baame pii rekyae koo lapala, Yuu andake Bapilone pamuku enda ingingi doko isa pwuamo leya. Taone andake doko lalyuo burumbara pupyamopa imambu ama koo dupwa epapala palaminyiko. Dee yaka ama koo karo petenge dupwa palaminyiko.  
\v 3 Doko wambu rara peparaeme baa role pyao pasendiya yulu piyami doko banya waene porai dopakale neyamisa piya. Dee kiŋi akali dupwame baa kando nyepala role papyuo nyuo kareyami. Dee bisinase akali dupwame banya yulu koo kyaŋe singi dokona mana nyepala pyuo karo isa bangena kamongo kareyamipya.   
\p
\v 4 Enakana yake dokona piso kyakale mende dee lao epeyamo siyunu dokome,  
\q1 Nambana enda akali dupwa  
\q1 yulu koo dokona role pyao pisarami.  
\q1 Pipala dokona yole koo doko nyisaramiŋi  
\q1 dokona lao mata maiyuo rekya lao pupwape.   
\q1
\v 5 Banya yulu koo pyuoko peteyamo dupwa  
\q1 kyau pyao ama yuu dulu yake dokona pupyamopa  
\q1 Anatu baame enda baa kame see napala suu pyaro karamo.   
\q1
\v 6 Baa wambu malu kwaenyi nembeyamo dokona makande minyuo  
\q1 baa ama kamba soo kaeyo kwaoko penale.  
\q1 Baame waene porai dupwa kapona keyano pilya kande  
\q1 dokona nakamame porai doko minyuo komondo kata palyapala  
\q1 baa kaumi kumuo nena lao mairaminyi nara leya.   
\q1
\v 7 Enda banya kingi range ketae nembo  
\q1 kalya malyape piyamo dokona manda manjo  
\q1 mona anda randa koo nao ee lao penale.  
\q1 Baa mona anda dorena lao  
\q1 namba kiŋinya etenge dokome  
\q1 kuini endana rate wambu iso petenge  
\q1 dokona peto kande.  
\q1 Namba mee waiya petonde daa.  
\q1 Mona kenda pingi yulu paliramopa  
\q1 ee lao pisirunde daa lao petamo.   
\q1
\v 8 Dopa pyuo laramosa koo wakale wakale dupwa  
\q1 enda baa keta yuu gii mendaki dokonako  
\q1 mee komondo kata palyuo epara.  
\q1 Epara dokome yuu andake doko  
\q1 anga ikyane kiso maiyuo lopo andake soo  
\q1 mona rando papala rao muku sera.  
\q1 Doko Kamongo Anatu Porai dokome  
\q1 baa kote laramosa pira leya.   
\p
\v 9 Isa kiŋi akali enda baapa pasendiya yulu pyuo rae rae maiyuo kareyami dupwa anda taone doko rao kyau lao eparamo kandapala ee dokome kata kanda narami.  
\v 10 Nakama baa randa nyeramo doko kando pakapala ama nanesa karo kando karo lao, Yuu anda malu karenge Bapilone kandale doko kopyali ingyuo mee waiya lao koo keta palyuo pwuamo, wamao lao kararami.   
\p
\v 11 Bisinase akali dupwa opetae enda banya lao dee bisinase pyuope ropo pyao pii naramalyamo lapala ee lao yamarangyuo kararami.  
\v 12 Nakamana kana golo dee kulingipi kana malu penge mola kare kare bange keyange wakasape dupwa, dee ropo pyaramande daalyamo leyami. Komau keyange rara wakale wakale dupwape isa keyangepe kapa kyarasi mee kapape mena elepande nenge dupwape kana keyangepe dupwame nyepala bange keyange wasiyami dupwape  
\v 13 nenge kyaa pilyamo, kopo nenge dupwape rendamu pingipi mamba kyaa pingipi waene ipwange mamba wele polawape kenapa dee bulamakao sipisipi mena osepe nakamana uliuli ipyuo nyingi dupwape dee kendemande akali ropo pyao nyiyami dupwa peparaepe mee pyalingi nyuo pwuamo lapala mona nembo kararami.  
\v 14 Bisinase yulu pyuo karenge akali dupwa baa kando lao, Isa bange keyange embena mona nyiyamo dupwa isa puu pao paramosa dee kando nyii nare lao kararami.   
\p
\v 15 Akali lapo taone andake dokona karo bisinase pyuo kamongoyami dupwa randa nyisarama lapala mee nanesale karo ee lao ipwakuku nyuo kararami.  
\v 16 Nakamame lao, Taone andake doko randa koo nyilyamo kanda nalyamisi? Baa komau keyange rara wakale dupwa wapuo kana golope kulingipi dee mola kana mone malu pengepe pee pipala peteya kanda.  
\v 17 Doko baa yuu gii mendaki dokona pendewa inginyi nembo isa pelyamolamo larami.   
\p
\v 18 Namba kandeyono dokopa ipwa sipu dupwana akali mupwape dee sipunya mee papyuo karenge wambu dupwape sipunya yulu pingi akali dupwape dee ipwa kotana bisinase yulu pingi akali dupwape nanesale karo taone doko isare rao kyau leyamo kandapala pii rekyae lao, Taone andake doko manda manjo mendasa dopale kara nange leyami.  
\v 19 Lapala nakama pee awaipi pyao ee lao, Taone andake kandale doko kopyali ingyuo mee waiya lao koo keta palyuo pwuamo leyami. Taone andake dokonako sipu yulu minyingi akali dupwa bange manjo epo kamongo peyami. Doko baa yuu gii mendaki mee pyalingi nyuo pelyamo lao kareyami.   
\p
\v 20 Enda baa koo keta palu palyuo para dokona lao yake doko emba rae maipi. Dopako pyuo Anatunya wambupi dee aposele poropeta akalipi peparae enda baame nakama kando koo pyuo karapya dokona Anatumi baa kando pyao kokwa silyamo dokona rae maiyalapape leya.   
\p
\v 21 Enakana aŋala porai mendeme kana ama reeko mende nyuo ipwa kota dokona pyao nembo karo lao, Taone andake yuu Bapilone kandale doko dopa pyuo pyao kokwa sinyi nembelyamo doko dee kandaraminde daalyamo leya.  
\v 22 Dopa pilyamo dokona yuu Bapilone niliyanda rambyalu kurulupi dee bikuli dokome akali singi dupwame kenane pyaraminyi dee seraminde daa lyakande. Kaname witi jingi pyao rakyingi dokona kelakalo laramo dee see naramiyoko.  
\v 23 Emba keta isare mende dee sinyi pyuo raa nara. Enda yapo lapo pyao nyuo pii naraminyipa yuu apa sera lyakande. Embena bisinase akali dupwa wambo dokopa ama kamongapala mee dupwa isa palyuo kareyami. Embame wambu peparae isokome pyao nyuo kareyamiko.   
\p
\v 24 Poropeta akali dupwanape dee Anatunya wambu dupwana ranjama dupwape taone andake doko keta palamo. Dee wambu peparae pyao nakamana ranjama kulimbuyaminyi ranjama doko nakama keta kwualyamoko.   
\c 19  
\s1 Yuu Bapilone Kwao Peyamo Dokona Wambu Peparae Rae Maiyami  
\p
\v 1 Enakana yake dokona piso pii ketae lao wambu ama malumi pii larami dopale leyaminyi siyu doko, Lete wai pyao nyingi yulupi yanga paupau lenge dokope porainya rengepe namwana Anatu baa keta palenge. Dokona banya kingi lakandalapape leya.  
\v 2 Pasendiya enda baa yuu muu dupwana papyuo kwuanyi nembeyamo dokona baa kote ama rolae lenge dokome randa andake kapa mailyamo. Enda baa randa mailyamo doko Anatunya kendemande akali dupwa pyao kumakaya dokona yano nyilyamo.  
\v 3 Dee kamba pii porakai lapala, Anatunya kingi doko lakandamana. Yuu taone ama andake doko rapyamo dokona sukwa doko pyuo pao karalu karara leya.  
\v 4 Dokopa alemo akalisa lama ipisu kisimape dee lee renge bange kisimape Anatu banya kiŋinya petenge isa dokona peteyamo dokona mona kando banya kingi ketae pyambuo lao, Kinyi banya kingi lakandamana leyami.   
\s1 Sipisipi Ikyaneme Enda Yapo Nyiyamo Nenge Andake Neyami Doko  
\p
\v 5 Kiŋinya petenge isa dokona piso pii mende lao epeya. Banya kendemande akali koo epengepe Anatu angi lao suu pyao karaminyi dupwame banya kingi lakandalapape leya.  
\v 6 Enakana pii mende wambu malu wakasame ipwa jerae pyao malyili laope dee yuu gala lao rali pili lao lao epeyamo siyunu dokona lao, Namwana Kamongo Anatu Porai Wakasa doko baa kiŋi ingyuo karamo dokona lakando karamana leya.  
\v 7 Namwa mona seramopa raeme kumuo karamanale. Baa ama andake ingyuo karamo dokona lakandamana. Sipisipi Ikyanena enda nyuo pakaramo gii doko pyaka sepelyamo. (Sipisipi Ikyanena enda doko Elyambu Pingi dokonasa letamo.)  
\v 8 Enda baa komau karo pisi nange kyewao lasi Anatu maiyamopa wapwaro petamo. (Komau doko Anatunya wambu yulu rolae pingi dupwana makande pyuo pupyasa pilyamo leya.)   
\p
\v 9 Dokopa aŋala dokome namba langyuo, Pii dake pepa pyao retape leya. Sipisipi Ikyane enda nyeramo dokopa nenge andake narami dokona epena lara dupwa rae maiyuo parami leya. Lapala aŋala dokome pii konda pyuo lao, Pii dusipa Anatunya kambunya potemo epelyamo leya.  
\v 10 Leyamopa namba banya kimbu siyamo dokona pao palipala baa lakandalana piyunu dokopa, Dopa pii napipi kae leya. Namba embape dee embena yangonge dupwapeme Yesunya lao karaminyi kendemande dopaleko karoŋo. Emba Anatu iki lakandape leya.  
\p Yesumi pii renge kinyi rolae lenge doko poropeta dupwame lenge apo dokonako lao epeya.   
\s1 Mena Ose Kakepamendena Akalinde Peteya  
\p
\v 11 Enakana yake kata lumbuyamo kandeyono dokopa mena ose kakepamende kareya. Mena dokona mendeme banya kingi doko Kaeya Nao Rolae Pyuo Karalu Karenge lengende peteya. Baame kote lalanape dee yanda pinyape dokopa rolae dokona palyuo pyuo karenge leyami.  
\v 12 Banya lenge doko isare uliyapu nyili lao rengende banya kyawa dokona kiŋinya kyawa rarange malu dupwa piya. Banya kingi pyasi paleyamopape mendeme yaka lao kandarami ingya nayamopa baa iki siya.  
\v 13 Komau londe baa piso kareyamo doko ranjama yuu siyapya. Banya kingi doko Anatunya Piiŋi lenge.  
\v 14 Yake pandana ami dupwa komau kyewao lenge dupwa pipala ose kakepame dupwana piso baa peyamuli pyuo peyami.  
\v 15 Wua gela nao mama nyingi londende akali banya kambu dokona epeya dokome rara peparae pyao nyuo isa palyara ingiya. Baame kapa ane pangali porai mende nyepala dokome rara dupwa iso karara ingiya. Baa Anatu Ama Porai dokona imbu singi doko makande minyuo waene kalyuo pyarakwuaramo dokopa waene ipwange poro lao neta epara.  
\v 16 Banya komau londepe dee kimbupi dolapona pepa pyasi paleyamo doko, Baa kiŋinyako Kiŋi mupwa dee kamongonako Kamongo mupwa doko lao paleya.   
\p
\v 17 Enakana kandeyono dokopa aŋalande neta reyamo dokona roya kareya. Dokome yaka peparae ketae bii lao kareyami dupwa lamaiyuo kyakale poraiyuo lao, Nakama Anatunya nenge andake rapa rapa pilyamo dokona epo kapalapape leya.  
\v 18 Wambu pyasi seramopa kiŋipi yanda singi mupwa mee yanda singipi mena ose dee akali piso paenge dupwape koo epengepe puu maisi dee mee karengepe wambu dupwana yanenge dupwa nala ipupwape leya.   
\p
\v 19 Enakana kandeyono dokopa mena koo dokope isa wambunya kiŋi dupwape nakamana yanda singi dupwa nyuo mendakyapala akalinde osena peteyamo doko banya ami pipa kando yanda pimwaiyami.  
\v 20 Dopa pipala mena koo doko banya poropeta angi daandepa pipu lao kemali pyuo role pyao papingi dolapo nyuo puu maiyami. (Poropeta dokomeyoko wamba yulu andake pyuo wambu malu minyoko piyamo kata dokona ingyuo mena koona make nakamana enamba dokona paleyamopa bange mena koo baa dopale kingimi wasapala kingi lao kareyami.) Nakamba kando yanda pimwaiyuo pipala mena koo doko banya kyambo lenge poropeta akali dokope isare rao lulya kaso karenge andake dokona kupinyi pyambuyami.  
\v 21 Akali osena peteya dokona banya nenge katana wua gela epeya dokome nakambana ami pyao pyalingi nyiya. Dokopa yaka peparaeme epo nakamana minju dupwa napala sikya piyamopa peyami.   
\c 20  
\s1 Satane Baa Ee Kana Malu (1,000) Karapusi Palyara Ingiya  
\p
\v 1 Enakana nambame aŋala mende yake dokona piso epeyamo kandeyono dokopa baa yuwale kata soo puu penge dokona kii dokope dee puu sane londe mendepe kingi rakana palyaro kareya.  
\v 2 Baame kau wambarae Satane doko kupyuo nyepala ee kana 1,000 puu mainyi palyiya.  
\v 3 Aŋala dokome baa yuwale kata soo puu penge dokona Satane pyao pyano kii palyapala ee kana 1,000 dusipana isa wambu dupwa dee kunji pyao kara nana lapala bange pyakerasindeme upi lanyi palyiya. Enakana dee yuu gii kuki lama neta epapala papyuo karara ingiya.   
\p
\v 4 Enakana Anatumi rombo palyiyamuli pyuo wambu keta kote larami dupwa nakamana kote pii lao petenge isa dupwana peteyaminyi kandeyo. Dee wambu malu Yesunya yulu minyuo Anatunya pii boo pyao leyamisa ayemba puku piyami dupwana imambu kandeyo. Dee nakama role pyao kareyami dupwa mena koo dokona dee baa dopale isa bange wasiyami dokona kingi laa nao menana make nakamana enamba kingipi dupwana pyasi pali nayamopa kareyami. Nakama Koraisapa role pyao isa yuu ee kana 1,000 ingyuo iso kararami ingiya.  
\v 5 Dupwa isa wambu kanda soo lopo eparami ingiyamo kandeyo. Menge kumuyami dupwa lenge raa nao pao ee kana 1,000 epo para ingiya.  
\v 6 Kanda soo lopo eparami dusipa raeme kumuo parami. Kumungi renge mende doko nakama keta pali nara. Nakama Anatu Koraisapana purisi akali ingyapala nakamba role pyao ee kana 1,000 isa yuunya wambu iso kararami.   
\s1 Satane Nyuo Anameya Doko  
\p
\v 7 Ee kana 1,000 epo paparamo dokopa Satane kata lumbuo yaki nyeramo neta epara.  
\v 8 Epapala Satane baame yuu Goko Mekokopa dolapona wambu Anatunya kingi epe nasingi yuu muu peparaena pisirami dupwape kando nupi sepala nakama nyuo kiminjapala yanda pinya lao mapinyi retara ingiya. Dokopa dokona akali kareyami dupwa ipwa pota kee kana mendeme yaka lao kanda nara dopale ingyuo kareyami kandeyo.  
\v 9 Dokopa nakama raeyapala Anatunya wambu palyuo karenge pandape dee anda taone Anatu mona retenge dolapope nyuo sukusa palyaro kararaminyipa yake dokona piso isare rao epo nakama rao otara ingiya.  
\v 10 Dokopa Satane wambu dupwa pipa panga soo kareyamo doko Anatumi nyuo isare rao lulya kaso karenge andake dokona pyao nembara ingiya. Baape mena koo dee poropeta kyambo lenge dokope isare dokona rao karalu kararami ingiya.   
\s1 Kote Ama Andake Lao Oto Lara Doko  
\p
\v 11 Enakana kiŋinya petenge isa reeko kakepamendena mendali peteyamo kandeyo. Banya lenge kambu dokona yake yuupa dolapo mee ingyuo rali piyambinyipa dee kanda narami ingiya.  
\v 12 Dokopa wambu kumasi koo epengepe peparae kiŋinya petenge isa siyamo dokona roya kareyaminyi kandeyo. Dokopa buku lapo kumuyami dupwa aki mende pyuo kareyami lao buku dupwana pyasi paleyamopa kando kote larami buku dusipa lumbuyami. Dee mende letena palenge buku doko lumbuyaminyi kandeyo. Dokopa kareyaminyi dupwa buku leyamuli pyuo kote lao roleyami.  
\v 13 Enakana ipwa kotana kumuo peyami dupwa neta epeyami. Dee yuunya kumasi dupwape imambu kumuo penge panda dokona peyami dupwape neta epeyamiyoko. Epapala aki yulu mende piyami lao dupwana minyuo kote lao roleyami.  
\v 14 Dokopa kumungi renge dokope dee Satane panda karenge dupwape isare andake dokona pyambuyami. (Isare andake rao singi dokona parami dupwa dee kamba kumarami.)  
\v 15 Wambu letena renge palenge buku dokona kingi pali nayamo dupwa isarena pyao nembeyami.   
\c 21  
\s1 Yake Yuupa Enenge Alowa Piramo Doko  
\p
\v 1 Enakana yake yuupa dolapo wakale enenge ingyuo alowa piyamo kandeyo. Yake yuupa wamba singi dolapo nyuo alowa piyamopa kota pete doko mee ingyuo rali piya.  
\v 2 Dokopa Jerusaleme taone yapasi doko enenge ingyuo alowa pipala yake dokona piso enda mapwae rapa rapa pyuo kalya pipala akali anda epenge dopale mane mane pyuo epeyamo kandeyo.  
\v 3 Dokopa kiŋinya petenge isa dokona piso pii rekyae lao, Kandalapa epapu Anatu baame wambunya raka dokona sukusa palamo. Baa nakama pipa palyuo karo piramopa nakama banya wambu ingyuo parami.  
\v 4 Anatumi isa wambu mona minyarambu nakamana lengena ee kwuakamira. Nakama dee kuma naope sakame kumuo mona rando ee lao kara nao pirami. Yulu wambo singi dupwa pyalingi nyilyamo leya.   
\p
\v 5 Kiŋinya petenge isa dokona peteyamo dokome, Nambame epapu bange dupwa peparae komba pyao enenge ingyuo nyilyu leya. Pii dake ama rolae angi ingilyamo dokona pepana pyao retape leya.  
\v 6 Baame namba kando dee kamba langyuo, Yulu doko pyuo kaeyalono. Namba yuu ingya ingya ingyuo karo pao lumwa pingi ingyuo karo. Mendalimi ipwa nara ramo doko baa lete palenge ipwa guu lao epenge dokona mee pakiki nena lao mairu leya.  
\v 7 Mendeme koo dupwa nyuo anamasi minyaramo dokona nambame baa elyape keta piso banya Anatu ingyuo paronopa baa nambana wane angi ingyara leya.  
\v 8 Dopa piramopape pakapala iki iki lao parami dupwape panga soo lenge dupwape yulu koona wangu lakapala pingipi wambu yango pyao kumakaengepe kepo pyuo pamuku yulu pingipi wambu yango mauli minyuo pingipi Anatu kaepala mee bange dupwana mona andengepe pii kyarepa pyuo kyambo pii lengepe dupwa nakamana yuu doko yuu kyuwande isare rao lulya kaso karenge dokona parami. Dokona papala dee kambako lapo pyuo kumarami leya.   
\s1 Jerusaleme Enenge Doko  
\p
\v 9 Aŋala yanda ipingi nyepowame bange koo isa wambu kwuanyi nembenge nakamana pere yanda ipingyako dupwana siyamopa minyaro kareyami dokona mendeme epapala lao Sipisipi Ikyanena enda nyelana pilyamo doko lasaka pirowale ipu langiya.  
\v 10 Dokopa imambu doko epo namba keta maralyiyamopa aŋala mendeme namba soo yuu kyau ama ketaendena peya. Papala dokona karo yuu taone Jerusaleme enenge poo pyasinde Anatu keta yake dokona piso epeyamo doko lasaka piya.  
\v 11 Kandeyono dokopa taone doko Anatunya yanga paupau lenge dokome neta ranyi nembeya. Lepolepo neta epenge doko kana kyakapaende mone malu maiyuo ropo pyao nyingi dopalende ketapa ingyuo lepolepo pyuo kareya.  
\v 12 Dokona kame ama yuu ketae piro kareyamopa dokona kakota lumbungi akalisa ipisu lama dupwana aŋala mendaki mendaki lao rapu pyuo kareyami. Kakota lumbungi dupwana Isaraele rara akalisa ipisu lamako dupwana kingi pyaro kareya.  
\v 13 Taone dokona kame kisima dupwana kambu rema larapu piro kareya. Kame dulurena kambu remape dumurena remape dambirena remape donorena rema larapu piro kareya.  
\v 14 Taonena kame andake dokona kana susa akalisa ipisu lama dokona Sipisipi Ikyanena aposele akali akalisa ipisu lamana kingi pyasi paleya.   
\p
\v 15 Aŋalame namba pii angi langiyamo doko baa kana golo pangalinde anda taone dokonape kame dee kambupi dupwa makande pinginde minyaro kareya.  
\v 16 Taone andake dokona kame pinjingi dusipana paki pakipi ama kapa kapa pyuo make mendakinya palyuo kalomala peyapya. Dokopa aŋala banya makande pingi pangali dokome taone makande piyamo dokopa make londe 2,000 kilomita ingyuo peya. Dee ketae dorena mendare dopaleko ingyuo peya.  
\v 17 Aŋala dokome kame ketae pulyuo dorena piyamo dokopa make mita 67 dopale ingiya. Makande doko aŋalame mee wambu pinginyili pyuoko piya.  
\v 18 Kame andake doko kana kyakapae keyangendeme waso dee taone angi doko golo yapasi ketapa ingyuo lepolepo pyuo karengendeme wasisi siya.  
\v 19 Taone dokona kana kame susa dupwa mone andake penge kana dupwame piya. Kana susa wambo doko wua gamya yongo nyingindeme piyapya lapo pyuo reteya doko bulu dee repo pyuo sereya doko kala wakale wakale kisima doko kyakapae ingyuo siya.  
\v 20 Kingi paki doko kone pyuo kokwa silya sana pingi. Pakinyamange doko kone yanda ipingi doko lulya renge mange lama doko kana rara wakale kyakangende. Mange mendaki doko lulya renge rara wakalendepya. Akalisa doko kyakapala lulya raoko piya. Akalisa ipisu mendaki doko role renge bulundepya. Akalisa ipisu lama doko kone mendere wakalendepya.  
\v 21 Kambu dowa akalisa ipisu lama siya dusipa mola akalisa ipisu lama kana malu penge dalapome wasiyamipya. Dowa akalisa mendaki ipisu lama dokona mola mendaki larapu wasiyamipya. Taone dokona kata peparae dupwa golome iki wasisinde ketapa ingyuo lepolepo pyuo siya.   
\p
\v 22 Anda taone dokona tembole anda mende kareyamo kanda nayo. Kamongo Anatu Ama Porai dokope Sipisipi Ikyane dokope nakamba iki tembole anda ingyaro kareyambi.  
\v 23 Taone dokona neta kanape dolapo rao karara kata mende see naya. Anatunya yanga paupau lenge dokome neta rao dee Sipisipi Ikyane dokome lambe ingyuo rao kareyamo kandeyo.  
\v 24 Isa wambu dupwa banya yanganyi pyambwara dokona kararami. Dokopa yuunya kiŋi akali dupwa nakamana kiŋi yulu lakandeyami dupwa paleta eparaminyi taone doko au pyuo para.  
\v 25 Taone andake dokona kambu dupwa yangama alemanji lao lumbasi mee sulu seramopa yuu iminja naramo dokona lao kambu doko upi larami renge mende pali nara.  
\v 26 Wamubunya rara dupwana ketae pyambungi yulupi dee akali anginya lakandenge yulupi dupwa paleta taone andake dokona eparaminyipa dokonako sera.  
\v 27 Dopa pyuo eparaminyipape yulu kwao karengepe dee elya nao koo pingipi kyambo lao karengepe dupwa taone dokona epa narami. Sipisipi Ikyanena lete palenge buku dokopa nakamana kingi silyamo dupwa iki taone dokona eparami.   
\c 22  
\s1 Ipwa Isape Letena Renge Palenge Dolapona Letamo  
\p
\v 1 Enakana aŋala dokome ipwa letena renge palenge doko namba lasaka piya. Ipwa doko Anatu dee Sipisipi Ikyanepe dolapona petenge isana piso guu lapala ketapa ingyuo lepolepo pyuo epo peyamo kandeyo.  
\v 2 Ipwa doko kata barete rolae dokona epo peya. Ipwa kee kama paki pakipi dolapona letena renge palenge isa doko kareya. Isa dokome kana kumuo yapa soo piramo dupwana yaka lao jingi lyuo karo ee kana mendaki dokopa yuu gii akalisa ipisu lama larapu jingi lyepa piya.  
\v 3 Anatumi epekanda nange yulu dopale mende anda taone dokona see naya.\fig Ipwa kee kama paki pakipi dolapona letena renge palenge isa doko kareya.|src="FILEFIG" size="col" ref="22:2" \fig*  
\p Anatunyape dee Sipisipi Ikyane dokonape petenge isa doko taone dokona seramopa banya kendemande dupwame dokona karo mona kando banya kingi lao kararami.  
\v 4 Nakambame Anatunya lenge kambu kandarami dokopa nakamana enamba dokona banya kingi doko pyasi palira.  
\v 5 Taone doko dee iminja naramopa Kamongo Anatumi yanga paupau lanyi pyambwaramo dokopa lambe netape dolapona yulu mende pali nara. Wambu kararami dupwa kiŋi ingyuo iso karalu kararami.   
\s1 Yesu Epara Doko  
\p
\v 6 Enakana aŋala dokome namba kando lao, Pii pepana pyapinyi dupwa angingyuo para lyakande leya. Dokona lao Kamongo Anatu baame poropeta akali dupwa banya Imambu maingi dokome repeta apa pira lao aŋala mendeme banya kendemande dupwa lasaka piraŋa pena leya.   
\p
\v 7 Yesumi, Selapape letamo. Namba repeta eparowale. Buku dakena pii pyasi palamo dupwa moko minyuo pirami dupwa raeme kumarami.   
\p
\v 8 Nambana kingi Jone lenge. Pii repa repa piyamo kando ote pipala dokopa aŋala lasaka piyamo kimbu siyamo dokona pao palipala mona kando banya kingi lalana piyu.  
\v 9 Dopa piyunupape baame langyuo, Dopa pii kae leya. Namba mee embape dee embena akali yango poropeta dupwamepe buku dakena pyasi palamuli pyuo pirami dupwanako mendaki ingyuo karoŋo. Anatu dokona mona kando kingi lapengeŋe leya.  
\v 10 Dopa lapala baame kamba langyuo, Buku dakena pyasi palamo yulu rengya nyeramo dupwa kalyamo kara napipi. Angi piramo yuu gii doko repeta palira ingilyamo.  
\v 11 Akali yulu koo pirami ramo doko kata dokonako pipape. Dee kwao kararami doko dopako pyuo karalapape. Keyange pirami dupwa dokonako pyuo karo. Dee poo pyasi yulu pyuo kareyami kande dupwa dokona pyuo karo pipape.   
\p
\v 12 Yesumi, Selapa, repeta usale eparo letamo. Nambame aki yulu piyami lao dupwana manda manjo kingi kisaro ingilyamo.  
\v 13 Namba yuu ingya ingya ingyuo karo pao lumwa pingi ingyuo karo wambo dokona piso karo pao enakana dokona kararoko.   
\p
\v 14 Wambu komau wate pyuo poo pingi dupwa rae mairami. Nakama letena isa jingi doko napala anda taonena kambu dowa dokona sukusa parami lyakande.  
\v 15 Kame netarename karaminyi dupwa pasendiya yulu pingipi mauli pee minyingipi wambu kepo pingipi wambu yango pingipi kyambo lalana wangu lakangepe mata kando pii lenge dupwa rae maingipi Anatu kaepala mee wakale dupwa mona nyingi dupwana pyuo karaminyi.   
\p
\v 16 Yesumi, Nambana aŋala mende pii dusipa Elyambu Pingi wambu keta sinya lao lamaiyala pena lapu letamo. Namba Dapitinya para pyao peyamo dokona ingyuo mandeyami. Namba yangama bui yoyowande renge dopale ingyuo karo.   
\p
\v 17 Imambu Poo Pyasi dee Sipisipi Ikyanena enda dokopame kee lao sukusa ipupwape letambinyi. Dokona mendeme seramo dokome kee lao epena lena. Ipwa namwali lao suu pyarami dupwa epo ipwa lete palenge doko ropo pyaa nao mee narami leya.   
\s1 Pii Lao Lumwa Pyuo Leyamo Doko  
\p
\v 18 Namba Jone, mende piraŋa lao pii pyasi palamo dupwa serami wambu dupwa keta langyuo wambu pyuo leto kande. Doko mendeme pii dakena konda pyuo pyao pira ramo doko Anatumi yulu koo buku dakena pyasi palamo dupwa baa keta karala pena lara.  
\v 19 Dee mendeme Anatunya pii buku dakena pyasi palamo dokona mende kwuanyi nembara ramo doko Anatumi letena renge palenge isa jingi akali baa narali dupwa mai nara. Dee baa yuu taone poo pyasi dokona sukusa paa narako. Buku dakena keyange nyerami lao pyasi palamo dupwa baa angi nyerande daako.   
\p
\v 20 Mendeme pii pyasi dusipa angingyuo paraŋa letamo doko baa, Olo epena kimbu malyaro karo letamo. Doko kapaŋa Kamongo Yesu emba waiya lao ipu.   
\p
\v 21 Kamongo Yesunya mona keyange palyuo ipingi renge doko nakama keta palena.