\id MIC Kyaka Enga Shorter Bible, SF codes August 20, 93 
\h MAEKA 
\toc1 MAEKA 
\toc2 Maeka 
\toc3 Mae 
\mt1 MAEKA  
\ip Poropeta akali Aisaya kareyamo dokopa poropeta akali mende Maeka lenge baa opetae lao kareya. Maeka baa yuu Juta dokona taone kuki mendena range. Juta wambu dupwa yulu koo pyuo pendewa wambu dupwa kote kyai pyuo lao kalyinyi isa palyuo kareyaminyi dokona Anatu baame doko kandapala randa andake mairamo renge doko Maekame siya. Poropeta Emosa baame yuu Isaraele wambu dupwa yulu koo piyaminyi dokona randa andake nyeraminyi pii doko leya. Maekame Emosana pii doko sepala yuu Juta wambu dupwa opetae moŋo dopako pyuo nyerami lao soo gisiya. Soo nyepala waili pii lamaiyamo dokona yuu rakyame keyange mende pyakamira renge doko opetae leya. Pii mupwa dasipa warombo soo yaka lalapape. Mendaki poraiyuo sepenge doko wambu peparae dupwa yuu muu dupwana peparae dupwa Anatu isaramo mona seramo doko (rombo 4:1-4). Pii lama nolako letamo dolapo Dapitinya rara dokona kiŋi porai mende enenge eparamo dokome Isaraele wambu dupwa manda rena lara (rombo 5:2-4). Rombo 6:8 dokona iki Isaraele wambu dupwana poropeta akali dupwa peparaeme pii angi kulisa leyami doko palamo. Kamongome keyange doko anjuku lao langipya kandapi. Dokona nakama keta yulu pimili lao suu pilyamo doko dakeŋe selapape. Yulu rolae yapasi dupwa pyuo nakamana mona retalu reto retenge doko lasaka pyuo nakamana Kamongo dokona inyimungu rape rape lao karo pirami, leya.  
\c 1  
\p
\v 1 Akali Jotame Easa Esekayamoo dusipa Juta rara dokona kiŋi yulu pyuo kareyaminyi yuu gii dokopa Kamongo Anatumi akali Maeka yuu Moresete range doko pii lamaiyamo dupwa buku dakena pyasi palamo. Kamongo dokome pii dasipa yuu Samaria Jerusaleme dolapona ingyuo Maeka nolakao lamaiya.   
\s1 Samaria Jerusalemepa Randa Nyerambilyamo Lao Ee Lao Ingi Randaya  
\q1
\v 2 Wambu peparae nakama pii dake selapape.  
\q1 Isa yuu panda karaminyi dupwa peparaeme pii dake selapape.  
\q1 Kamongo Mupwa Andake Wakasa dokome nakama koo pimiŋi lao  
\q1 banya yake panda tembole anda dokona karo, lara.   
\q1
\v 3 Kamongo doko banya yuu poo pyasi dokona piso epelyamo.  
\q1 Isa epapala yuu kyau ketae dupwana kata papira.   
\q1
\v 4 Papiramo dokopa yuu kyau moko kararamo dupwa rao lili lao ipwa ingyapala  
\q1 yuu lama lama dupwana kyau ipwa lyuo epele lao epara.   
\b  
\p
\v 5 Yulu dopa piramo renge doko Isaraele wambu dupwame Anatu kando koo pyuo kamba lao karaminyi dokona ingyuo pira. Isaraele wambumi kamba lami dokona apinya rengendena pilyamo laramisi? Samaria wambu keta palamo. Api mendeme yuu Juta dokona mee bange anatu lao lakando koo pyuo karase? Jerusaleme wambu dupwame koo doko pilyaminyi.  
\v 6 Dokona lao Kamongo dokome letamo. Nambame yuu Samaria taone dupwa kokwa seronopa anda muku dokona isa girapo wara pyuo narami. Nambame taone kaname pisi dupwa pyao sinjimu ingyapala lama dokona kulimbwanyi nembaronopa susa kana dupwa iki sera.  
\v 7 Nakamana mee bange yapasi lapo anatu ingyuo retenge dupwa pyao kokwa soo inji ranji pyuo para. Bange peparae tembole anda dokona pamuku yulu pinya lao maimi dupwa isareme yango kokwa sinyi nembaro. Dopa pipala mee bange anatu lao kingimi wasisi dupwa pyao mee bange inginyi nembaro. Samaria wambu dupwame bange dupwa nyepala anatu lao pyuo karapala Anatu angi doko kando koo pyuo kareyami dupwa epapu nakamana yanda pimwai dupwame bange dupwa nyuo yuu wakale lapona paraminyipa anatuŋu lao misi lele lao kararami.   
\p
\v 8 Dokopa Maekame dopa leya. Dopa pira dokona suu pyao namba ee lao ingi randarolyamo. Namba sakalyo lao nolako dokopa kimbu suu pii nao mee papara karo piru. Namba yana suwa kararope wua londe lenge dopale ingyuo lao yaka ulyakili pii ketae lenge dopale ingyuo ee poraiyuo ketae larolyamo.  
\v 9 Dokona lao Samaria wambunya randa dupwa kapa umbwa pii nara ingilyamo. Juta wambu dupwa randa mendare nyerami ingyapya doko epapu angi Jerusaleme kame kambu dokona sukusa nambana wambu palenge dokona oo pyaka silyamo.   
\s1 Yanda Pimwai Dupwa Jerusaleme Epo Pyaka Sela Epeyami  
\p
\v 10 Namwa nyuo isa palyuo kaeyasi petamano doko Gati wambu dupwa lamai nalapa. Ee lao petene laope kanda nana lao pisipwa. Wambu yuu Bete Leapora range dupwa mende pirami ingya nalyamo doko lasaka pyuo dokopa yuu sinjimu dokona kimu kiki pyuo bai bai pipwape.  
\v 11 Nakama yuu Sapia range dupwa papara elya nyuo yuu wakale mendena karapusi pyao lanyuo parami. Yuu taone andake Sanane palenge wambu dupwa pakapala neta epa narami. Nakama yuu Betesele wambu dupwa ee lao kumaralerale nyiyami kande doko sepala nakama range kana lambo mendena pao lyolo pii naramalyamo lao suu pyalapape.  
\v 12 Yuu Marote range wambu dupwa Kamongo dokome Jerusaleme nakamana yuu repeta doko randa maiyamo kandapala nakama manda rao kiiramo pumwali yaka lao ingi randayami.  
\v 13 Yuu Lakisi palenge wambu dupwa nakamana mena oseme ipyuo penge uliuli doko yapa lao kimbu selapape. Nakama Isaraele wambunya koo dupwa makande minyuo pipala Jerusaleme doko yulu koo pinya lao lasaka piyami.  
\v 14 Epapu Juta wambu dupwa nakama yuu Moresete Gati doko range sepe lalapape. Dokona lao Isaraele kiŋi dupwa yuu taone Akisipi dokome kapa nyisara ingya nalyamo.   
\p
\v 15 Nakama Maresa wambu dupwa Kamongo dokome lao, Baame nakama minyuo pao yanda pimwai keta pyamalyeronopa yanda pimwai dupwa epo nakama pyao nembo nakamana yuu taone doko nyerami letamo. Dopa piraminyipa Isaraele kiŋi dupwa ralo pao yuu Atalame kana anda dokona yalu pirami.  
\v 16 Juta wambu dupwa nakamana wane wanake mona retenge dupwa suu pyao kyawasi angasipi pyao kumanda pisipwape. Nakamana wane wanake dupwa nyuo minyuo parami dupwana suu pyao nakamana kyawasi angasipi pyao yaka dopo yamanji akusuli doo pisirami.   
\c 2  
\s1 Pendewa Wambu Mata Rukyuo Pyao Dokona Nakamana Porai Doko //  Lasaka Pingi  
\p
\v 1 Wambu luu palenge rate dokona piso yulu koo dopa pirama lao lao palyuo piso pilyaminyi dupwa nakama ingi rando pakarami. Yuu yangaramo dokopa nakama mende pirama lao lao palyaminyi dokona pilyaminyi.  
\v 2 Nakamame yuu mende mango nyimwali aiya lami ramo doko mee nyilyaminyi. Nakamame anda lapo mango nyimwali aiya lami ramo doko mee nyilyaminyiko. Dee nakamame wambu anda range dupwa pyao kokwa soo nembo bange dupwa minyarambu nyakamilyaminyiko.   
\p
\v 3 Dopa pilyaminyi dokona lao Kamongome dopa letamo. Nambame nakama keta randa andake mende jero lao lao palyilyu dokona nakama mendali lete pao awa pii narami. Yuu gii dokopa nakama keta keyange ingya nao randa palira dokopa nakama keta rolae pingi lao suu pyao karaminyili pyuo kara narami.  
\v 4 Yuu gii doko eparamo dokopa wambu dupwame nakamana randa nyerami sinju arome pii doko sepala dokopa randa nyingi doko dopa pyuo nyingilyamo, larami. Lapala ingi kauwao kenane nombe nombe pisinyi pyambuo dapa lao pyarami.  
\q1 Namwa pyao uki palyalu palyuo palyiyami.  
\q1 Kamongo dokome namwana yuu doko nyiya.  
\q1 Nyepala baame wambu namwa anjo minyuo peyami dupwa maiya  
\m lao pyarami.   
\p
\v 5 Dopa pipala enakana Kamongona wambu dupwana yuu doko range maira dokopa kamba rombo pyao nyerami yuu gii dokopa nakama mendepe nyii narami.   
\p
\v 6 Wambu dupwame namba kando dopa langilyaminyi. Embame pii namwa kando langya napipi. Randa dokona lao namwa boo pyao langya napipi. Anatumi namwa kando awa narande daa.  
\v 7 Isaraele wambu dupwa kapa koo keta palirami lao silisi? Kamongo baa waiya lao imbwa nange doko kame sipyase? Baame letene dupwa kinyi pirase? Baame wambu yulu rolae pingi dupwa kando pii anjiki pyuo laa nangese? lao langilyaminyi.   
\p
\v 8 Kamongo dokome isingi dopa letamo. Dopako dooŋo nakamame nambana wambu dupwa pyao yanda pimwai dopale ingilyaminyi. Nakamame pau lasi wambu yanda otapyamo lete ipwamano lao imi dokopa nakamana komau matarena ketae dupwa epo roko nyakamilyaminyi.  
\v 9 Nakamame nambana wambu dupwana enda dupwa nakamana anda mona retenge dokona pisiminyi pyao ralinyi nembo nakamana wane wanake mona retenge nambame nyisingi dupwa pyao kokwa sakamyuo pilyaminyi.  
\v 10 Yuu dakena nakama lete penge panda mende see nange waiya lao sipurao pupwape. Nakamana koo dupwana nakama pyao kokwa seramopa kando ingi randarami.   
\p
\v 11 Akali mende dupwana papyuo poropeta karo angi mende pira ingyapyamo kando lete lao kyambo malu lao nakama keta waene biyape mee soo kakana para lapyamo poropeta doko kando wambu dupwame rae mailyaminyi.   
\p
\v 12 Dopa piramopape nambame Isaraele wambu pyarepala pao karaminyi dupwa peparae nyuo pyasaro. Nambame nakama mena sipisipi ingyuo kame sukusa karo isakona karo pilyaminyipa lanyuo epenge doko suu pyao nakama lanyuo eparo. Nakamana yuu dokona wambu palyuo kete pyarami, leya Kamongome.   
\p
\v 13 Anatumi nakamana kata wapwakamyuo karapusi pyao lanyuo peyami doko mokwapala nyisa nyuo nembara. Nakama taone andake kame kambu dowa dupwa pyao lalyapala mee nyisa epo parami. Nakamana kiŋi doko Kamongo Anatu dokome baa range kata lanyuo para.   
\c 3  
\s1 Maekame Isaraele Lita Dupwa Yulu Koo Piyami Dupwana Lao Nembeya  
\p
\v 1 Isaraele lita dupwa nakama pii dake selapape. Nakama yulu rolae yapasi dupwa pepengele doko kaepala  
\v 2 yulu koo dupwa mona maipala yulu keyange dupwa awa nalyaminyi. Nakamame nambana wambu dupwana yongo yanenge dupwa raka pyao nyakamyuo minju kuli dokona parara kando lao nyuo pilyaminyi.  
\v 3 Nakamame nambana wambu dupwa pyao nao otelyaminyi. Nakamana yanenge dupwa rekya lao kuli dupwa roo pyao minju dupwa kunjo kalomo mena minju sanana yangalana pingi dopale ingyuo pilyaminyi.  
\v 4 Nakama Kamongo kando ee larami yuu gii doko epelyamo dokopa ee laraminyipape baame nakama yulu koo pimi dokona nakamana ateŋa dupwa saka nara.   
\p
\v 5 Poropeta lapome wambu dupwame kana jimi dokopa kyambo panga soo dopa letaminyi. Nakama mona seramo kararami, letaminyi. Wambu kana jii nami dupwa keta yanda sipurena lao karaminyi. Poropeta dupwasa kando Kamongo dokome dopa letamo.  
\v 6 Nakama dopa pyuo nambana wambu kando rapu pyaka nao kata koo lasaka pyakao karaminyi. Dokona nakama keta ene piramo dupwana pii repa repa pyuo kanda narami dee nakamame yulu dopa pira ingilyamo laope kapa laa narami. Poropeta dupwa nakamana yuu gii doko repe otelyamo. Nakamana yulu isa pao kaepyamo karaminyi.  
\v 7 Poropeta mendasipa ene mende pira larami doko pii naramosa dokona elya nyerami. Nakama peparae Anatumi isingi mende kotaraminyi doko mai narasa kopyali ingyuo saka narami, leya Maekame.\fig Poropeta dupwame ene mende piramo dupwa kana jinyalao polo lamailyaminyi.|src="FILEFIG" size="col" ref="3:11" \fig*   
\p
\v 8 Saka naraminyipape Kamongo dokome namba banya Imambu dokome paka pyao soo porai renge joo pipya dokome kapa rolelyo lao silyu. Dopa pilyu dokome porayapala Isaraele wambu dupwana koo dupwa pano polo lamaiyakamiru.  
\v 9 Nambana pii dake selapape. Nakama Isaraele wambunya lita dupwa yulu koona lao rolenge dupwa awa nao yulu rolae dupwa nyuo alowa pipala koo inginyi reto karaminyi.  
\v 10 Wambu pyanyi malu palyuo yulu koo dupwa lao rola nao Anatunya taone andake Jerusaleme doko pilyaminyi.  
\v 11 Taone andake dokona lita dupwame panga soo bange nyelana lao palyapala iso karaminyi. Purisi dupwame kana nao sisi Anatunya mawa pii polo lamailyaminyi. Poropeta dupwame ene mende piramo duwpa kana jinya lao polo lamailyaminyi. Nakama peparaeme nakama keta Kamongo role pyao karamo, letaminyi. Nakamame lao, Kamongo doko namwa role pyao karamo. Randa dupwa namwa keta epa naraŋa letaminyi.  
\v 12 Nakamame dopa pilyaminyi dokona ingyuo yuu Sayone doko kwai mapu lapo pyasi sili lao yuu Jerusaleme doko ama pyao kokwa sinyi nembo dee tembole misi anda karenge dokona imwa palyuo pira.   
\c 4  
\s1 Kamongome Yuu Muu Peparae Mona Kyuu Lao Sinya Lao Rapu Pira  
\r (Ai 2:1-4)  
\q1
\v 1 Yuu gii ene eparamo dupwana  
\q1 yuu kyau tembole misi anda karamo  
\q1 yuu doko kamame ketaele ingyuo sera.  
\q1 Seramo dokona wambu rara wakale malu mee dupwa epo kararami.   
\q1
\v 2 Dokopa nakamana wambu dupwame lao,  
\q1 Kamongona yuu kyau ketae dokona mwua.  
\q1 Isaraele wambunya Anatu banya tembole anda dokona mwua.  
\q1 Namwa baame yulu pimili lao suu pilyamo dupwa mana langira.  
\q1 Baame namwa kata parami lao rombo palyakayamo dupwana parama.  
\q1 Kamongona mana pii dupwa yuu Jerusaleme piso epelyamo.  
\q1 Yuu Sayone piso banya wambu dupwa pii lamailyamo.   
\b  
\q1
\v 3 Baame wambu yuu muu ree lao bange arete pyuo akema lao langa lao karaminyi dupwa nyuo kui lao karara.  
\q1 Karapala wambu porai wakasa Isaraele role pyaa nao naneta karaminyi dupwape repeta dupwape kote lao yapalya yapana pira.  
\q1 Dokopa nakamana wua gela dupwa amame pyao rakyuo yuu apu renge ane isa inginyi pyambwapala  
\q1 kaku duwpa rakyapala kope pyakepenge bange waso pirami.  
\q1 Yuu muu wakale wambu dupwa dee kamba yanda pela paa nalu nao napala  
\q1 nakama yanda pela panya rapa rapape pii naramiko.   
\q1
\v 4 Wambu peparae manda rao mona seramopa  
\q1 nakama rangena isa girapope pikipi ee repeta palyuo  
\q1 mendena lao paka nao palyuo kararami.  
\q1 Anatu Kamongo Porai Wakasa dokome pii dake lalu lao leya.   
\b  
\p
\v 5 Wambu rara wakale wakale dupwame mendaki lao nakama rangena anatu lenge dupwa lakando pii warombo serami dokopa namwa namwana Kamongo Anatu karalu karenge dokona pii warombo soo lakando karalu kararama.   
\s1 Isaraele Wambu Anjo Nyuo Peyami Dupwa Range Sukusa Eparami  
\p
\v 6 Kamongo dokome dopa letamo. Nambame wambu randa maiyunu wambu wakale dupwame karapusi lanyuo peyaminyi yasu neyaminyi dupwa range sukusa nyuo pyasaro yuu gii doko oo epelyamo.  
\v 7 Wambu papae rambungi ingyuo anda nanesa karapyamo petaminyi dupwa nambame enenge ingyuo kanda soo wasaronopa nakama rara ama wakasa andake ingyuo para. Dokopa nambame yuu Sayone kyau dokona karo yuu gii dokopa piso kanda soo rapu piru doko pyuo karalu kararo, leya.   
\p
\v 8 Dokopa nakama Jerusaleme wambu Anatu baa rangeme isilyamo dokona nakamana yuu taone andake mupwa wamba siyamo doko dee kamba mupwako ingyuo sera.  
\v 9 Nakama akipamo ee poraiyuo kaeyo letamisi? Akipamo nakama enda wane manjana mata pilyamo randange doko suu pyao ingi randalyamisi? Nakama dopa pilyaminyi doko nakamana kiŋi akali mende kara nao kanjili dupwa kumuo piyami dokona suu pyao ingi rando karamisi?  
\v 10 Jerusaleme wambu dupwa enda wane manjana nenge sisi pyao ee lenge doko suu pyao ee poraiyuo lalapape. Epapu nakama yuu taone andake doko yaki nyuo pao yuu mee langa pau dupwana palirami. Nakama yuu Bapilone parami. Dopa pyuo yuu dokona yanda pimwai dupwame pyalena piraminyipape Kamongo dokome nakama kiiramo nyeramo eparami.  
\v 11 Wambu rara wakale malumi nakama pyalena elyambu pilyaminyi. Nakamame lao dokopa Jerusaleme doko kokwa soo pupyali yaka lao letaminyi. Namwame yuu doko pyao kokwa seramo kandamwali yaka letaminyi.  
\v 12 Dopa laminyipape wambu rara dupwame Kamongona lao suu pyapyamo doko see nalyaminyi. Dopa pipyamopape nakama mendakinya nyuo malu palyapala randa maiyuo lisi ingyuo minyuo gisimu gasimu laro lao suu pyapyamo doko see nalyaminyi.   
\p
\v 13 Kamongome dopa letamo. Jerusaleme wambu dupwa nakamana yanda pimwai dupwa randa nenge kyai ane isa dopale manda manjo wasanyi pyambwaro. Nakamame wambu rara malu anamasi minyinyi palyuo kararami dokona nakamana bange dupwa peparae nambana ingyuo dee Kamongo yuu muu peparaena ingyuo karamo dokona ingyara.   
\c 5  
\p
\v 1 Jerusaleme wambu dupwa nakamana yanda pepengele akali dupwa nyuo malu palyalapa. Namwa pyalena nyuo kako pyapelyaminyi. Kako pyapala Isaraele wambunya akali lita doko pyalena pilyaminyi.   
\s1 Anatumi Beteleme Range Mendeme Rapu Pira Lao Lalu Lao Letamo  
\p
\v 2 Yuu Juta dokona Beteleme Eporata taone ama kuki ingyaramopape nambame nakama range sukusa dokona mende Isaraele wambu rapu pirande rombo palyuo nyero. Banya rora ambasupi dokona wamba malu mee karo peyami dokonandeme rapu piraŋa lao rombo palyaro.   
\p
\v 3 Kamongome banya wambu dupwa nakamana yanda pimwai dupwa keta maipala kaeyaramo pao enda mende wane manjira ingilyamo doko angi manjira gii doko pyaka sera. Dokopa banya rara dokona lapo anjisi yuu wakalena karaminyi dupwa dee rangena wambu dupwa pipya karengenyili pyuo pyasapala range kararami.  
\v 4-5 Baa eparamo dokopa porai renge Kamongo keta palenge dokomepe Kamongo Anatu kamame mee mende nyilyingili karenge doko baa range keta eparamopa dolapome nyuo rapu pyuo karara. Banya wambu dupwa koo keta pali nao lete kararami. Dokona lao wambu yuu muu ree lao peparaeme banya porai andake wakasa doko soo gisaraminyipa banya mona kyuu lao singinya renge doko maira.  
\s1 Kiiramo Lete Eparamipi Randa //  Nyeramipi Doko  
\p Dokopa Asiria wambu yanda pimwai dupwame epo namwana yuu doko ama pyao kwaenyi nembala eparami dokopa namwame namwana akali lita porai dupwame yanda pela pena lao nembarama.  
\v 6 Nembaramanopa nakamana yanda kaku wuape dokome porayapala yuu Asiria doko nyuo isa palyarami. Asiria wambu dupwame namwana yuu doko pyao uki palyamwali lao pirami dokopa dopa pyuo pyapala namwa nyiso kyawa lete nyerami.   
\p
\v 7 Isaraele wambu palyuo karalu kararami dupwa pipyaeme manda rao mona kyakange dopale ingyaramopa Kamongome rara wakale dupwa keta nyisala pena lao nembara. Dokopa nakamame mee akali yaki nyepala Anatu keta kamba kamba serami.  
\v 8 Isaraele wambu lapo yuu wakale dupwana mende yaka yaka lao mena laene nenge koto isako imwa dupwana paenge dopale ingyuo paeyo kararami. Nakama mena sipisipi kararami dupwana sukusa pao kararaminyipa pyakala lambwapala kapuso nyepala nao rokwalya rokwana pinyi nembarami. Mendeme nyisara lao suu pyaa narami.  
\v 9 Dopa pyuo Isaraele dupwame nakamana yanda pimwai dupwa pyao isa palyuo kokwa soo nembarami.   
\p
\v 10 Kamongo dokome lao, Yuu gii dokopa nambame nakamana mona mena ose dupwa pyao nembo mena oseme ipyuo penge uliuli dupwa pyao kokwa soo nembakao piru, letamo.  
\v 11 Nambame nakamana yuu taone dupwa pyao kokwa soo yanda lome yanda karenge kame dupwa pyao lalyinyi nembo piru.  
\v 12 Nambame nakamana isako yalu pyuo wara pyuo wambu lao pingi dupwa pyuo kokwa soo uki palyakao nakamana pipuli wambu dupwa mende pyarepala paa nana lao piru.  
\v 13 Nambame nakamana semango lao mee isa lapo wasapala lakandenge dupwa pyao kokwa soo nembaro. Nembaronopa bange rangena wasisi dupwa dee lakanda narami.  
\v 14 Nakamana yuu dokona mee bange enda anatu kingi Asera lenge dopale wasisi dupwa pyao lakao palyuo nakamana yuu taone andake dupwa pyao inji ranji pyuo kokwa soo nembaro.  
\v 15 Namba ama imbumi kumuo karo wambu rara nambana pii rape rape lao pii nalyaminyi dupwa pyapala yano nyero, letamo.   
\c 6  
\s1 Kamongo Dokome Isaraele Wambu Pipya Koo Kando Yulu Mende Pira  
\p
\v 1 Kamongo dokome Isaraele wambu pipya makapala koo kandale lao pii lara doko selapape.  
\p O Kamongo, sipurapala embena renge palamo doko laa. Larene dokopa yuu kyau kuki andakepe dupwame pii larene doko sinyale.   
\p
\v 2 Yuu kyau isa yuu dokona susa pyao sulu singi dupwa Kamongona pii laramo doko selapape. Kamongo dokome banya Isaraele wambu dupwa pipya koo kando lalana suu pilyamuli pyuo lara.   
\p
\v 3 Kamongo dokome dopa letamo. Nambana wambu dupwa nambame nakama pipya apa pipu? Nambame apa pyuo nakama mona kendanyi pyambwapusi? Isingi langyalapape.  
\v 4 Nambame nakama Isipi piso minyuo epeyo. Nambame nakama kendemande yulu pyuo kareyaminyi kiiramo nyiyu. Nambame Mosesemoo Eronemoo Miriamemoo dusipame nakama lanyuo paramiŋi lao peeyakayo.  
\v 5 Nambana wambu dupwa nakama keta kiŋi Beleke yuu Moape range dokome mende piruna lao lao palyiyamopa Belame Beona ikinyingi dokome baa isingi apa lamaiyape lao suu pyalapa. Dee yuu taone Akasiya dokona piso pao yuu Gilikale panya penge kata dokona yulu mende piya kande doko nakama masalapapeko. Yulu dupwa suu pyapala nambame nakama keta apa pyuo lete nyelana mende piyu doko soo gisarami.   
\s1 Kamongome Wambu Keta Yulu Pimili Lao Piso Silyamo Doko  
\p
\v 6 Nambame Kamongo Anatu yake panda karengedoko lakandala pao dokopa aki bange minyuo pao mairusi? Nambame mena bulamakao ikyane ama keyange minyuo epo kiso mairusi?  
\v 7 Nambame mena sipisipi taosande malu minyuo epo maiyuo dee isa olipi ipwange ipwa ingyuo guu lao karalu karena lao soo kaeyo minyuo epo maiyuo piru ramo Kamongo dokome doko kando rae mairase? Dee nambana wane mupwasa doko nambana koo dupwana suu pyao nyuo kame sakana lao mairusi? Doko daa.  
\v 8 Kamongome keyange doko anjuku lao langipya kandapi. Dokona nakama keta yulu pimili lao suu pilyamo doko dakeŋe selapape. Yulu rolae yapasi dupwa pyuo nakamana mona retalu reto retenge doko lasaka pyuo nakamana Kamongo dokona inyimungu rape rape lao karo pirami.\fig Akali dopa pyuo kopetame sikyali pyuo ropo pingi dupwa kapa nyuo kame sakamirase?|src="FILEFIG" size="col" ref="6:11" \fig*   
\p
\v 9 Kamongo doko andake lao pakao kararami ramo doko mona palyuokondali pyuo kararamisa pira. Kamongome wambu yuu taone andake dokona palenge dupwa kando dopa lao kee letamo. Selapape. Nakama wambu yuu taone andake dokona elyambu pilyaminyi dupwa.  
\v 10 Akali yulu koo pingi dupwana anda dupwana kanape mee bange andakepe kyambo lao panga soo nyuo retelyaminyi. Nakama ropo pingi dokopa make angi dokona palya nao kana nyilyaminyi. Yulu dopale doko namba awa nange.  
\v 11 Akali dopa pyuo kopetame sikyali pyuo ropo pingi dupwa kapa nyuo kame sakamirase?  
\v 12 Nakamana akali numi dupwame wambu pendewa dupwana bange dupwa mee nyakamyuo kamame pendewa panyi nembo taonena palaminyi dupwa peparae pii kyambo lenge.  
\v 13 Dokona lao epapu nambame nakamana koo dupwana suu pyao nakama kanda soo pyao uki palyuo kokwa soo nembalana pyano.  
\v 14 Nakama nenge naraminyipape sikya pii napala mee yango nano nano piramo kararami. Nakamana pinji dupwa nyakarami lapala soo pelyamano lao paraminyipape kapa wai rombo nyii narami. Pinji lapo range nyuo parami dupwa nambame yanda pipala pyao kokwa sinya laro.  
\v 15 Nakama ee wara piraminyipape angi doko naa narami. Isa olipi ipwange kingyuo kamwaraminyipape range kapa mamba doko yanga narami. Dee waene ipwange kingyuo kamwaraminyipape angi doko kapa naa naramiko.  
\v 16 Nakamame kiŋi Omiripa banya ikinyingi kiŋi Ayapepa dolapona yulu koo dupwa moko minyuo pilyaminyi. Nakama nakambana pii leyambinyili pyuo kaeya nao pyuo puu pao pelyaminyi dokona nambame nakama pyao kokwa seronopa wambu menge yuu mure lao dupwa peparaeme nakama kilya kando gilya giyana pyuo lena lao piru.   
\c 7  
\s1 Isaraele Wambunya Yulu Keyange Dupwa Uki Paleya  
\p
\v 1 Mona kare kare kara nalyo. Namba akali mendeme lopapala isa dupwana jingi lyilyape lao kandelyamo lyii nao isa girapo dupwana jingi lyii nalyamo kando pingi dopale ingilyamo. Doo girapo jingipi piki jingi rende pingipi dupwa peparae lyuo otami.  
\v 2 Akali yulu rolae pingi mende yuu dokona kara nalyamo. Mendeme Anatu warombo serami ingya nalyamo. Nakama peparae kumuo oteyami. Wambu peparae pyao kumalena yuu gii angi mende pilyape lao isilyaminyi. Nakama pepareme yango dupwa pyalena lao koto karaminyi.  
\v 3 Nakama peparae yulu koo dupwana pinya ama mora piso otasi karaminyi. Akali mupwa dupwape kote singi dupwapeme yulu koo dokona panga soo nyisamana kana jinya lao nyakamyuo karaminyi. Akali andake dokome lao dokopa, Dopa pimili lao suu pilyu, lapyamo dokopa menge dupwa pipya wato lao petaminyi.  
\v 4 Lapo ama keyange pyuo karamano lao suu pilyaminyi dupwape dee lapo rolae wakasa pyuo karamano lao suu pilyaminyi dupwape mee kapa pali napyamo ipi pyuo pyuo karaminyi.  
\p Yuu gii Anatumi wambu dupwa randa mairu lao poropeta akali dupwa keta repe repe pii lao reteyamo doko epapelyamo. Nakama dokona apa pimwane lao suu pyao saka nalyaminyi.  
\v 5 Embena anda maki palenge dokope embena puu minyingi dokomepe pii langirami dupwa angi lapo langilyaminyi lao suu pyaa napipi. Dee kamame embena etene dokope kandokondali pyuo pii waso lamaipi.  
\v 6 Yuu gii pyaka seramo dokopa ikinyingi dupwame rakange dupwa kopyali inginyi nembo wanenge dupwame endangi dupwa kando mata rukyuo pyao enda dupwame ayangepa sisi nyuo pirami. Akali mendena ree palu mendaki dupwa banya yanda pimwaiko ingyarami.   
\p
\v 7 Dopa piraminyipape nambame Kamongo kandaro kararo. Namba mona porayapala Kamongo dokome namba pyuo nyeramo doko keta isaro kararo. Nambana Anatu dokome nambana pii sera.   
\s1 Kamongome Pyuo Lete Nyela Epara  
\p
\v 8 Namwana yanda pimwai dupwame renge mende pali naramopa namwa kilya kando gilya giyana pyuo rae maiya nalapape. Namwa koo keta papalape dee keyange keta palirama ingilyamo. Dopako pyuo namwa dakepa iminjingi dokona karamano doko Kamongo dokome yanga paupau lenge renge jera.  
\v 9 Namwa Kamongo kando koo piyamano dokona banya imbu singi doko namwa keta kapa popokau laramo nyemanale. Nyeramanopa enakana baame namwa kando koo piminyi dupwa nyuo rolakao nyiso pira. Dopa pipala baame namwa yangenge dorena nyuo pisaramo namwa rangeme nyiso kyawa minyara doko kandaramako.  
\v 10 Dopa piramo doko kandapala dokopa nambana yanda pimwai dupwa elya nyerami. Wamba dokopa nakamame namba piso soo male male lao, Embena Kamongo Anatu doko anja karamo? leyami. Leyaminyi dupwa rengya kata dokona wara ingyuo kalyuo pyarakwuarami ingilyamo.   
\p
\v 11 Jerusaleme wambu dupwa yuu taone andake dokona kana kame kamba pirami yuu gii doko epelyamo. Yuu gii dokopa nakamana yuu doko dumbili dumbili lao konda pyuo nyerami lyakande.  
\v 12 Yuu gii dokopa nakamana wambu yuu Asiria dulurena petaminyi dupwape yuu Isipi donorena petaminyi dupwape ipwa Yuporisa repeta petaminyi dupwape dee ipwa kota ama londeta repeta piso palyuo pao kamame yuu kyau naneta pelyaminyi wambu dupwape peparae range sukusa epo pyasarami.  
\v 13 Dopa piraminyipape wambu yuu dokona palaminyi dupwame yulu koo pilyaminyi dokona lao yuu doko penda penda ingyuo para.   
\s1 Kamongo Dokome Isaraele Wambu Mona Rando Karapala Nyisiya  
\p
\v 14 Kamongo, embena wambu yapo rombo palyuo nyiinyi dupwana emba rapu pingi akali karape. Nakama yuu muiyane dokona palyuo karaminyipape paki pakipi yuu elyape sipyamoko palaminyi. Yuu Besane yuu Giliatepe nenge singi yuu dolapona wamba piyaminyili pyuo nao palyuo karala pena lapili yaka.   
\p
\v 15 Kamongo, wamba yuu Isipi doko yaki nyuo epeyamanopa yulu kanda nange yamarangwaramili lapo pii kande doko suu pyao dakepa pyakape.  
\v 16 Yuu muu dupwana wambu porai karamano lao suu pilyaminyi dupwame yulu doko dopa pirinyi kandapala elya nyerami. Nakama kambu upi lapala kalepoe karele larami.  
\v 17 Nakama rombame kata wapuo yuu dokona kau ingyuo nakamana yalu pyuo pisiraminyi panda doko yaki nyuo neta walu walu lao eparami. Nakama pakame kumuo namwana Kamongo Anatu doko keta kapu kyuo eparami.   
\p
\v 18 Kamongo emba yale anatu mende kara nalyaminyi. Embena wambu mee kumapa nao lete karaminyi dusipana koo dupwa nyuo kame sakamilini. Emba mee imbuo karalu kara napala embena mona retalu reto retenge renge doko namwa keta lasaka pingi.  
\v 19 Embame namwa deeko kondo sakao nyiso karare. Embame namwana koo dupwa yuu dokona kalyuo minjiku minyapala kota pete yalu dokona nembare.  
\v 20 Embame embena yulu keyange pyakao karalu karenge dokope embena mona retalu reto retenge renge dokope dolapo embena Isaraele wambu Aporakame Jekopepena para pyasi dupwa lasaka piri. Wamba namwana rora ambasu dupwa dopa piruŋu lalu lao leeneli pyuo lasaka pirisa pira.