\id JOL Kyaka Enga Shorter Bible, SF codes August 20, 93 
\h JOELE 
\toc1 JOELE 
\toc2 Joele 
\toc3 Joe 
\mt1 JOELE  
\ip Poropeta akali Joele lenge dokona lao arome pii kuki lama iki silyamano. Baa yuu anjokorape Anatunya yulu pyuo kareyape lao see nalyamano. Buku dake yuu Pesa wambu dupwame iso kareyaminyi dokopa ee kana 400 W.K. pao 500 W.K. dokopa piya ingilyamo. Isaraele wambunya yuu peparae dokona aimbu ama malu mee bii lao epo ee peparae nao oto peyaminyi dokope dee neta rao panyi andake pipala ee dupwa ama rao rakusi reyamo arome pii dolapo pyasi palamo. Joele baame randa andake dolapo eparambi doko kandapala repe repe lamaingi pii ingyuo lamaiya. Suu pyao Anatu baa rolae lengenyili pyuo pii nange wambu dupwa randa mairamo yuu gii doko repeta epeyamo doko siya. Poropeta akali dokome wambu dupwa Anatu rekya lao yaki nyiyami dupwa dee koo dupwa yaki nyuo kapu kyuo epena leya. Dopa pirami dokopa Kamongome nakama pyuo elyape keta pisaro lao lalu lao leyamo doko lamaiya. Pii mende poraiyuo sepenge doko Anatumi banya imambu doko wambu peparae keta peyaro leya doko akali keta enda keta wane keta wanake keta endemo alemope keta peyaro lao lalu lao leya.  
\ip Pitame Joelena poropeta pii Imambu epara leyamo doko (2:28-32) Pendekose yuu gii dokopa angi pyaka silyamo lao soo oteya (Aposelena Yulu 2:16-21).  
\c 1  
\p
\v 1 Dake Kamongona wai pii Petuwelena ikinyingi Joele lenge doko keta maiya.   
\s1 Ee Nengepe Pyao Kokwa Siyasa Ee Lao Yamaranguyami  
\q1
\v 2 Selapa, nakama wambu andapae dupwa.  
\q1 Wambu peparae yuu Juta dokona karaminyi dupwa peparaeme selapapeko.  
\q1 Yulu dapale mende  
\q1 emba ando karene yuu gii dokopape panda embena rakane ando kareyamo yuu gii dokopape mende piyase?   
\q1
\v 3 Dokona lao nakamana wane wanake dupwa lamaipwape.  
\q1 Dokopa nakamame nakamana wane wanake manjiraminyi dupwa lamairami dokopa  
\q1 dupwame rengya wai kiso nyeraminyi dupwa lamairami.   
\b  
\q1
\v 4 Aimbu ambo dupwa epo ee jingi dupwana minyarambuyami.  
\q1 Ambo mendeme neyamo pyarepala peya doko ambo enakaya nao dee dokome neyamo pyarepala peyamo doko mendeme nao piyami.   
\q1
\v 5 Doko girapo jingi waene enenge wasarami dupwa kokwa sipyamo dokona  
\q1 nakama ipwa biya nenge dupwa sipurao lenge rapala ee lao yamarangwalapape.  
\q1 Nakama ipwa waene nenge dupwa ee lalapapeko.   
\b  
\q1
\v 6 Akali rara mendeme yanda pinya nyuo suku pingi dopale ingyuo  
\q1 aimbu epo malu palyapala namwana ee yuupi nao otami.  
\q1 Nakama ama malu porai wakasa yaka lao sukusa paa napengele.  
\q1 Nakamana nenge wanga dupwa mena laenena nenge dopale.   
\q1
\v 7 Nakamame namwana isa girapo marange dupwa kokwa simi  
\q1 dee namwana piki isa dupwa nao rango pyanyi nembami.  
\q1 Dopa pyuo isa yanenge nao rekya lao nembaminyisa  
\q1 wangya dupwa kuli kewa lasi karaminyi.   
\b  
\q1
\v 8 Dokona nakama wambu dupwa wanake akali nyelana pingi kumulyamopa  
\q1 ee lao kumanda petenge dopale ingyuo ee lalapape.   
\b  
\q1
\v 9 Waene nengepe tembole anda dokona Anatu mairami mende see nalyamo.  
\q1 Dokona purisi dupwa Kamongo nenge jingi maingi dupwa ingi rando karaminyi.\fig Yuu dokome wambu ingyuo ee lao yamarangyuo silyamo.|src="FILEFIG" size="col" ref="1:10" \fig*   
\b  
\q1
\v 10 Nenge witi jingi dupwa kokwa soo nembo  
\q1 girapo dupwa yanda nao  
\q1 olipi dupwa kyapuo pipya.  
\q1 Dokona yuu mee muiyane sipyamo dokona  
\q1 yuu dokome wambu ingyuo ee lao yamarangyuo silyamo.   
\b  
\q1
\v 11 Witi jingipi bali jingipi dee ee nenge dupwa peparae kokwa siyamo dokona  
\q1 nakama ee rapu pingi dupwa mona rando ee lao karalapape.   
\q1
\v 12 Girapo isape piki isape dupwa kumalana kuliya.  
\q1 Jingi lyuo nenge isa dupwa peparae kumapala yando nao karaminyi.  
\q1 Dopa pipala wambu dupwana rae maingi renge dupwa inyimungu rali pipya.   
\b  
\q1
\v 13 Nakama purisi dupwa Kamongona kana pyare lasi dokona bange kiso maingi dupwa  
\q1 kumanda piso komau pingi dupwa pipala  
\q1 tembole anda dokona papala yuu gii ee lao piso yanganyi retalapape.  
\q1 Nakamana Anatunya anda dokona nenge waenepe mairami mende see nalyamo dokona dopa pyuo pisipwape.   
\q1
\v 14 Wambu dupwa nenge wasaka pyuo malu palyuo petena lamaiyalapape.  
\q1 Akali mupwa dupwape mee Juta wambu dupwape peparae elyambu pipala  
\q1 nakamana Kamongo Anatu dokona tembole anda dokona kolando papala  
\q1 Anatu kando ee lao lalapape.   
\q1
\v 15 Kamongona yuu gii doko repeta epelyamo.  
\q1 Eparamo dokopa Anatu Porai Wakasa dokome pyao kokwa sinya lao randa andake jera.  
\q1 Yuu gii dokona paka renge wakasa epara.   
\b  
\q1
\v 16 Namwana lenge angi dokome wambo kandamwanopa nenge jingi dupwa kokwa sinyi nembapya.  
\q1 Dokopa namwana Anatunya tembole anda dokona rae maingi renge mendepe see nalyamo.   
\q1
\v 17 Yuu yando dokona ee waingi dupwa kumulyamo.  
\q1 Dokona nenge jingi nyuo malu palyuo retarami ingya nalyamo.  
\q1 Dopa piramo dokome nenge jingi retenge anda dupwa mee kwua karo momo nao lalyara.   
\q1
\v 18 Rambi mena nenge dupwa pali napyasa  
\q1 mena bulamakao dupwa lopapala kae lao karaminyi.  
\q1 Mena sipisipi kaparo karaminyi dupwa opetae lopalyaminyiko.   
\q1
\v 19 Isareme rapala pinginyili pyuo  
\q1 rambipi isape yando nelyamo.  
\q1 Dopa pipyasa nambame Kamongo emba keta ee lao piso silyu.   
\q1
\v 20 Dopako pyuo ipwa guu lengepe rambi andenge pandape dupwa isareme renge dopale ingyuo kyapuo yando nelyamo dokona  
\q1 mena rae lenge dupwame kamameko emba kando ee letaminyi.   
\c 2  
\s1 Aimbunya Pii Makande Minyuo Leyamo Doko Kamongona Yuu Gii Eparamo Dokona Repe Repe Pii Ingyuo //  Leyasa Piya  
\q1
\v 1 Anatunya yuu kyau yapasi Sayone dokona  
\q1 wambu dupwa kamenge karasarami byara pyalapape.  
\q1 Kamongona yuu gii doko repeta epara dokona  
\q1 Juta wambu dupwa peparae pakame kumuo walu walu lalapape.   
\q1
\v 2 Dokopa yuu gii doko iminjo kwuamembe lapala  
\q1 kopa soo pyarambwara.  
\q1 Aimbu ama soo kaeyo doko yuu kyau dupwa minyarambu nyuo imisa pupurapala  
\q1 yuu sembelyamo pingi dopale ingilyamo.  
\q1 Wamba randa dopale yale mende epa nange dokona  
\q1 dee rengyana dopale mende epa nalu nao narako.   
\b  
\q1
\v 3 Dokopa isareme rao otenge dopale ingyuo aimbumi ee wara pisi dupwa nao otarami.  
\q1 Aimbumi ene nao panya parami dorena doko ee Etene yale seramo  
\q1 wambo kalyuo nao parami dorename ipwa kama pyasi sili laramo kandarami.  
\q1 Dokona bange mende aimbu dupwame yaki nyeraminyi yoko pyuo see nara.   
\q1
\v 4 Nakama mena ose lenge kambu nyera.  
\q1 Yanda pelana piso puu lao makandenge dopale ingyuo makandarami.   
\q1
\v 5 Aimbu dupwa yuu kyau ketae dupwana makandenge dokopa  
\q1 uliuli kilya kalu lao epele lao  
\q1 isareme isako poro paro lao renge dopale ingyuo pira.  
\q1 Nakama akali yanda pinya nyuo suku pyuo karenge dopale ingyuo maki maki pyuo kararami.   
\q1
\v 6 Aimbu dupwa repe repe pyuo eparami dokopa wambu peparae pakapala  
\q1 nakamana lenge kambu dupwa kumasi ingyara.   
\q1
\v 7-8 Nakama yanda pingi akali dopale ingyuo kana rondo dupwana pulyuo  
\q1 yanda pimwai pyalana pili lao pyuo pirami.  
\q1 Nakama peparae kata parami dokona  
\q1 kanda kanda suku piro karo papala  
\q1 mendasa longapala alowa pyuo ruku raka pyuo paa narami.  
\q1 Nakama panya paraminyi dokona bange mende sera ramo dokona  
\q1 karo kaeya napala mee yalapala puu pao parami.   
\q1
\v 9 Dopa pyuo aimbu dupwa taone andake dokona pyalana makando pao  
\q1 kana kame dupwana pulyapala yalala pao  
\q1 anda dupwana pulyuo papala  
\q1 waa nenge wambu dopale ingyapala windowa kata dupwana kolo parami.   
\b  
\q1
\v 10 Dopa piraminyisa yuu muu dupwa piku piku laramopa  
\q1 yake doko romo romo pira.  
\q1 Piramo dokopa neta kanape dolapo iminjiramopa  
\q1 bui dupwa yake dokona raa narako.   
\q1
\v 11 Kamongo dokome yuu gala lele lao banya ami akali dupwa dopa pinya dapa pinya lao pii poraiyuo lamaira.  
\q1 Yanda singi banya pii warombo singi dupwa  
\q1 ama malu mee dupwa porai wakasako.  
\q1 Kamongona yuu gii doko koo mangepe nao randa nyuo epara dokona  
\q1 api mendeme paka nao mona porayapala kararase?   
\s1 Koo Dupwana Kondapala Mona Kapu Kyinya Lao Kee Leya  
\q1
\v 12 Dopa piramopape epapu dakepa Kamongo dokome lao,  
\q1 Nakamana koo dupwana angi poraiyuo suu pyaokondali pyuo kondapala  
\q1 nenge naa nao ee lao yamarangyuo kondome kumuo namba karo dokona kapu kyuo ipupwa, leya.   
\q1
\v 13 Nakamana komau doko mee langa kangwa napala  
\q1 nakamana mona anda angi kinyi kinyi kondalapape.  
\b  
\q1 Nakamana Kamongo Anatu keta kamba range kapu kyuo ipupwape.  
\q1 Anjiki pipala sakao pyuo nyingi renge doko baa keta simbwaro karenge.  
\q1 Baa waiya lao imbwa napala banya lalu lao lenge pii dupwa mee suu pyaro karalu karenge.  
\q1 Baame yuu peparae koo dupwa kame sepala randa maiya nange.   
\q1
\v 14 Mende ramo namwana Kamongo Anatumi randa jelana suu pyara doko alowa pipala  
\q1 namwa keyange keta pyambuo ee nenge dupwa ama malu jera.  
\q1 Dokopa namwame nengepe waenepe dupwa Kamongo doko mairama.   
\b  
\q1
\v 15 Yuu kyau Sayone dokona byara pyao dokopa  
\q1 wambu dupwa nenge wasaka pyuo nyuo malu palyuo epena lamailapape.   
\q1
\v 16 Wambu dupwa epena lao nyuo malu palyapala  
\q1 Kamongona lao wato larami dokona rapa rapa pilapape.  
\q1 Wambu andapae dupwa lanyuo epo  
\q1 Wane wanake kuki dupwa nyuo malu palyuo  
\q1 dee wane nyaŋa dupwa opetaeko nyuo malu palyuo pirami.  
\q1 Kamame akali endape ene doo nyepala pisirami dupwa  
\q1 nakamana anda yaki nyepala ipupwapeko.   
\q1
\v 17 Purisi akali Kamongome yulu pyakamyuo  
\q1 tembole anda kolandenge dokopa mena pyao kiso maingi rate dokopana kanya dokona yulu pingi dupwame  
\q1 ee lao ateŋa dapa lao lalapape.  
\q1 O Kamongo, embena wambu dupwa kando sakape.  
\q1 Yuu wakale wakale dupwana wambu dupwame namwa kando giyalya giyana pyuo kilya kando  
\q1 nakamana Anatu doko anja karamo laope laa nana, lape.   
\s1 Anatumi Yuu Doko Ipwange Palyakamiya  
\q1
\v 18 Enakana Kamongo dokome banya yuu doko suu pyao kondo karapala  
\q1 banya wambu dupwa kondome kumuo piya.   
\q1
\v 19 Baame nakama isingi lamaiyuo,  
\q1 Epapu nambame nakama witi jingipi ipwa waenepe olipi ipwangepe dupwa jeronopa  
\q1 nakama nao sikya piramopa kararami.  
\q1 Dokopa wambu rara menge dupwame dee nakama kilya kando laa narami, leya.   
\q1
\v 20 Aimbu dupwame nakama pyalena lao dulurena karo epeyaminyi dupwa  
\q1 lapo yuu muiyane dokona pena laro.  
\q1 Dee lapo wambo epeyaminyi dupwa Kumungi Ipwa dokona ralinya nembaro.  
\q1 lapo enakaminyi dupwa Ipwa Kota Metiteraniane dokona ralinyi nembaroko.  
\q1 Dokopa nakamana yongo kumasi dupwa rumbyuo ai pyara.  
\q1 Nambame dopa pyuo dupwa pyao kokwa sero doko nakama peparae  
\q1 kando piyaminyi dokona isingi yano nyakarosa pira.   
\b  
\q1
\v 21 Dokona yuu dupwa paka nalapape.  
\q1 Kamongo dokome nakamana lao yulu peparae pyakalyamo dokona  
\q1 rae maiyuo karalapape.   
\q1
\v 22 Mena dupwa paka nalapape.  
\q1 Rambi andenge yuu dupwa kyaka yoko pyakalyilyamo.  
\q1 Isa dupwa jingi lyilyamoko  
\q1 piki isape girapo isape dupwa ando jingi malu lyuo karaminyi.   
\b  
\q1
\v 23 Sayone wambu dupwa rae maiyuo karalapape.  
\q1 Kamongome nakama reke lao apunda kamame andake dee kamame kuki jii napala  
\q1 mee kapa manda minyuo jiya.  
\q1 Enakana apunda kapa andake kulimbuo  
\q1 dee wambape dopa pyuo jinginyili pyuo jiya.   
\q1
\v 24 Dokopa witi lukungi mare dokona nenge dupwa soo simbwara.  
\q1 Girapo olipi kingingi mauli pete dokona waene welepe ipwange dokome soo simbuo pyoko pyoko lao epo nyisa pao karara.   
\q1
\v 25 Aimbu malu dupwame nakamana ee jingi nao oteyaminyi  
\q1 ee kana dupwana nakamana bange isa peyamo peteyami dupwa nambame nakama yano pyakao jero.  
\q1 Doko nambame aimbu malu dupwa nakama keta peeyo lyakande.   
\q1
\v 26 Epapu nakama nenge malu seramo napala sikya piramo kararami.  
\q1 Nakamana Kamongo Anatu yulu keyange nakamana lao pyakayamo doko lakandarami.  
\q1 Dokona rara lapome nambana wambu dupwa dee kamba kilya kando laka narami.   
\q1
\v 27 Dokopa Isaraele wambu dupwa, namba nakama pipya repeta  
\q1 karalyane lao serami.  
\q1 Namba Kamongo nakamana Anatu doko iki dokona  
\q1 wakale mende kara nalyamo lao serami.  
\q1 Dokopa wambu dupwame nambana wambu dupwa dee kamba giyalya giyana pyuo kilya kando laka narami, leya Anatumi.   
\s1 Anatunya Imambu Maira  
\q1
\v 28 Enakana nambame nambana Imambu wambu dupwa peparaena maralyinya laro.  
\q1 Dokopa nakamana ikinyipi wanenepe dupwame nambana pii boo pyao larami.  
\q1 Nakamana alemo dupwame kombeya pirami.  
\q1 Nakamana wanyane akali dupwa pii repa repa pyuo kandarami.   
\q1
\v 29 Dopa piramo yuu gii dusipana mee kendemande enda akalipi dupwa keta opetaeko  
\q1 nambana Imambu maralyinya laro.   
\s1 Kamongona Yuu Gii Pyaka Seramo Dokona Lao Repe Repe Pii Leya  
\q1
\v 30 Repe repe lamaiyuo dokopa yake dulunya yulu andake wambu dupwame kando yamarangwarami dopale pyuo  
\q1 isa yuu dokona wambu kandena lao yulu andake lapo lasaka pyuo piru.  
\q1 Ranjama kulimbuo soo isare rao isare sukwa doko kopa soo rali pyuo pira dusipa kandena lao lasaka piru.   
\q1
\v 31 Neta doko iminjo rali pyuo  
\q1 kana doko ranjama ingyuo pira.  
\q1 Wambo dopa piparamo dokopa enakana Kamongona yuu gii koo randa doko pyaka sera.   
\q1
\v 32 Dokopa mendeme Kamongona kingi lapala baa lete wai pyao nyakapili lao lara ramo doko baa nyiso pyuo nyera.  
\q1 Kamongome leyamuli pyuo  
\q1 yuu kyau Sayone dokonape dee Jerusaleme dokonape lapo mee lete kararami.  
\q1 Dokopa Kamongome wambu lapo rombo palyuo nyeramo dupwa kuma nao lete kararami.   
\c 3  
\s1 Anatumi Wambu Rara Dupwa Kote Lara  
\q1
\v 1 Kamongome dopa letamo.  
\q1 Yuu gii dokopa nambame wambu yuu Juta Jerusaleme range dupwa  
\q1 bange ongore angerepe wakale wakale dupwa kamba mairunupa kapa rae maiyuo kararami.   
\q1
\v 2 Nambame wambu rara peparae nyuo pyasepala  
\q1 yuu pau lama Jiyosapata lenge dokona lanyuo paro.  
\q1 Yuu dokona nambana wambu range dupwa kando randa maiyakayami dokona  
\q1 nakama kando kote laro.  
\q1 Nakama Isaraele wambu dupwa yuu wakale dupwana nyuo nembapala  
\q1 nambana yuu doko lili pyuo wakale wakale nakama nyiyami.   
\q1
\v 3 Nyepala nambana wambu dupwa kendemande yulu pyakamili lapala  
\q1 kate pyuo bange wini pyuo nyingi dopale ingyuo wambu dupwa kate pipala mokwa soo nyuo  
\q1 dee wane wanake dupwa nyepala ropo pyao maipala nakama kana nyiyaminyi dupwame  
\q1 enda pamuku dupwa kana maiyuo nyuo ipwa waene ropo pyao nao piyami.   
\p
\v 4 Yuu taone Taya Saitonepa dee Pilisitia range dupwa peparae namba kando apa pinya pilyamisi? Renge mende namba keta palipyasa dokona lao nakamame namba isingi yano pyamwali lao pilyamisi? Kinyi nakama renge mendena pirami ramo doko nambame waiya lao isingi yano pyakaro.  
\v 5 Nakamame nambana kana golope kana kulingipi dupwa nyimi dee nambana bange namba kamonganyi nembenge dupwa nyuo soo pao nakamana tembole anda dupwana reteyami.  
\v 6 Nakamame Juta wambu dupwape Jerusaleme wambu dupwape rangena yuu yaki nyepala nyuo yuu nanesa lanyuo pao Giriki wambu dupwa ropo pyao maiyami.  
\v 7 Epapu nambame yuu ropo pyao maiyaminyi petaminyi dupwa kaepala nakama nyisa nyuo lanyuo eparo. Dokopa nakamame nambana wambu randa maiyakayami dokona nambame dopako pyuo nakama randa jero.  
\v 8 Dopako pyuo nambame nakamana wane wanake dupwa Juta wambu dupwame ropo pyao nyinya laro. Nyepala nakamame dupwa Sapeyane wambu yuu nanesa range duwpa maipala bange nyerami. Kamongome dopa leya.   
\b  
\q1
\v 9 Pii dake rara peparae keta lamaipi.  
\q1 Yanda pingi akali peparae mupwape meepe dupwa kee lao nyuo  
\q1 sukusa sukusa pipala  
\q1 yanda pirami dokona wato rapa rapa pipwape.   
\q1
\v 10 Nakamana ee yulu pyuo yuu apu renge ane isa dupwa kamame rakyuo wua gela waso  
\q1 nakamana kema wua isa pyakepenge dupwa nyepala kaku waso pipwape.  
\q1 Dopa pipala kamame akali kuki yanda pii nange dupwa pyuoko pirami.   
\q1
\v 11 Nakama rara awali lao palaminyi dupwa  
\q1 waiya lao epo  
\q1 yuu pau lama dokona malu palyuo pisipwape.  
\b  
\q1 Dokopa Kamongo embena yanda pingi akali porai wakasa dupwa epena lare.   
\b  
\q1
\v 12 Rara dupwa peparae rapa rapa pipala  
\q1 yuu Jiyosapata pau lama dokona eparami.  
\q1 Yuu dokona namba Kamongo doko pisipala  
\q1 rara peparae awali lao palu pelyaminyi dupwa kote laro.   
\q1
\v 13 Nakama ama koo andake pilyaminyi.  
\q1 Dokona witi jingi wambu pilyamo pyakepo lyingi dopakale ingyuo  
\q1 nakama pyao pyakepo  
\q1 isa girapo jingi kalyuo pyaraku kingilyaminyi  
\q1 waene ipwange epo soo simbuo penge dopale ingyuo  
\q1 nakama kalyuo pyaraku piri.   
\b  
\q1
\v 14 Wambu taosande malu dupwa  
\q1 yuu pau lama kote lara dokona karaminyi.  
\q1 Yuu dokona Kamongona yuu gii doko repeta epara.   
\q1
\v 15 Neta kanapa dolapo iminjapyamopa bui dupwa rao kara nalyaminyi.   
\s1 Juta Wambu Dupwa Elyape Keta Pisara  
\q1
\v 16 Kamongome dokome yuu kyau Sayone dokona pii poraiyuo lao  
\q1 dee yuu gala lenge dopale ingyuo baame yuu Jerusaleme dokona pii lao piramopa  
\q1 yake yuupi dupwa piku piku lala lala para.  
\q1 Dopa piramopape baa rangeme banya wambu dupwa yaki nyii nao rapu pyuo karara.   
\q1
\v 17 Dokopa Isaraele wambu dupwame namba nakamana Kamongo Anatulyamo lao soo nyerami.  
\q1 Yuu kyau yapasi Sayone lenge dokona namba palenge.  
\q1 Dokopa yuu taone Jerusaleme doko poo pyasi ingyuo andake seramopa  
\q1 wambu rara wakale dupwame kamba nyuo isa palya narami.   
\q1
\v 18 Yuu gii dokopa girapo isa dupwa  
\q1 yuu kyau dupwana paeyo mee bange ingyuo andaramopa  
\q1 mena dupwa yuu kyau peparaena buu minyuo kararaminyi kandarami.  
\q1 Juta wambu dupwana ipwa epenge dupwana ipwa malu epara.  
\q1 Kamongona tembole anda dokona piso ipwa mende guu lao jerae pyao lupyuo eparamo dokome  
\q1 yuu Akasiya pau lama lama dokona isa andenge dupwa nenge pira.   
\b  
\q1
\v 19 Yuu Isipi wambupi yuu Itome wambupi dupwame  
\q1 yuu Juta wambu anjiki pyuo kareyaminyi dupwa piyaminyi dokona  
\q1 yuu Isipi doko muiyane ingyuo sinya lao  
\q1 dee yuu Itome doko pyao kokwa soo momo nanyi nembo pira.   
\q1
\v 20-21 Nambame wambu pyao kumuyaminyi dupwana reke lao yano pyakamyuo nakama randa mairu.  
\q1 Nambame wambu piyaminyi dupwa lete kara nana lao pyaro.  
\q1 Dopa pirunupape yuu Juta Jerusalemepe dolapona wambu dupwa mende pii naramo mee palu karalu kararami.  
\q1 Dokopa Kamongo doko yuu kyau Sayone dokona karara.