\id AMO Kyaka Enga Shorter Bible, SF codes August 20, 93 
\h EMOSA 
\toc1 EMOSA 
\toc2 Emosa 
\toc3 Em 
\mt1 EMOSA  
\ip Poropeta akali Emosa banya pii ama wambo kanda soo buku pingi wambu dupwame piyami. Piyami dokona wambo nolako lenge akalinya pii malu pyaa nayami. Baa yuu Jutana taone mendena range doko kaepala Isaraele dokona ee kana 750 W.K. dopale dokopa Anatunya pii polo lao kareya. Karapala Emosana yuu gii dokopa wambu dupwa bange wakale wakale malu mena malupi minyuo nenge malu siyamo nao karo piyami. Wambu peparaeme kandeyaminyi dokopa Anatu lakando kareyami dee iso karenge yuu kapa siyalyamo lao suu piyami. Dopa piyamopape Emosame kandeya dokopa wambu kamongo dupwame iki bange malu dupwa reteyami. Dokopa wambu pendewa dupwa kamongo dupwame pyalana pipala randa maiyuo bange dupwa nyepakamipala nakamba kamongo puu pao peyami. Anatu lakandeyami doko mee ketae lakandeyami. Yuu nakamana isingi yuu doko meeko porailyi lapala angi poraiya naya. Yuu dokona renge dusipa siyasa dokona Anatumi nakama randa mairamo lapala kondapala pii doko paka napala polo lao kareya. Kote rolae singipi mee yulu rolae dupwa peparae ipwa ingyuo lyipyali yaka lao leya. Dopa pyuo kararami ramo dokopa Kamongo dokome nakamana rara dokona mee kyaka petaminyi dupwa sakame kumuo karara rapisi, lao lao kareya (rombo 5:15).  
\ip Emosame lao, Anatu baa poo pyasi inyguo kyai dupwa lao rolo lao karamo dokona banya wambu dupwa yulu peparaena pilyaminyi dupwa rolae pyuo poo pyasi ingyuo petena, leya.  
\c 1  
\p
\v 1 Akali mena sipisipi rapu pyuo karenge yuu Tekowa range akali Emosa banya pii dasipa lasi silyamo. Usaya baa Juta wambunya kiŋi ingyuo karo Jeropome Jewasena ikinyingi baa Isaraele wambunya kiŋi ingyuo karo piyamo dokopa Anatunya pii Emosa keta Isaraele wambu dupwana lao pano epeya. Epo lapeyamo dokopa ee kana lama epo papeyamopa enakana yuusili doko minyiya.   
\p
\v 2 Emosa dopa leya.  
\b  
\q1 Yuu kungu kyau Sayone dokona Kamongo doko karo pii andake lao,  
\q1 Jerusaleme dokona piso banya pii ketae palyuo epo lao  
\q1 isoko kyaka dupwa yando nelyamo.  
\q1 Napyamo yuu gii dokopa yuu Kamele kyau dokona isoko kyaka dupwa rakusi rapala kwaeyo pilyamo,  
\m leya.   
\s1 Anatumi Isaraele Wambunya Parali Maki Palenge Dupwa Kando Kote Lara  
\s1 Siria  
\p
\v 3 Damasakesa wambu dupwame yulu koo doko kamba pyuo kamba pyuo pilyaminyi dokona nambame nakama kaeya nao randa mairu, Kamongo dokome leya. Nakamame Giliate wambu kopetame minyuo koeya siyamiŋi.  
\v 4 Dokona lao anda kiŋi Aseyele piyamo dokona nambame isare mende peyaro. Peyo kiŋi Benatate banya kana kame piyamo doko yanganyi nembo piru, leya.  
\v 5 Yuu taone andake Damasakesa dokona kana kame dokona kambu konandenge doko pyao lalyaro. Dopa pipala yuu Apene lama lama wambu palenge dupwa nyuo kakondo yuu Betetene dokona gapomane akali mupwa ingyuo karenge doko nyuo kakondo piru. Pipala yuu Siria range wambu dupwa karapusi pyuo yuu Kua dokona nembo piru, leya.   
\s1 Pilisitia  
\p
\v 6 Kamongo dokome leya. Gasa wambu dupwame yulu koo kamba pyuo pyuo pilyaminyi dokona nambame nakama angi randa mairu. Nakamame wambu rara mende peparae lanyuo pao Itome wambu dupwana kendemande ingyuo karena lapala maipala kana nyiyami.  
\v 7 Dokona lao nambame yuu taone andake Gasa dokona kame dokona isare peyaronopa kame porai doko rao otara.  
\v 8 Nambame yuu Asitotepe yuu Asekelonepe dolapona akali mupwa dupwa neta nyuo kakondaro, leya. Kakondapala Ekerono wambu dupwa randa mairu. Mairunupa Pilisitia wambu pingisi petaminyi dupwa peparae kumarami, leya.   
\s1 Taya  
\p
\v 9 Kamongo dokome dopa leya. Yuu Taya range wambu dupwame yulu koo doko pyulu pyuo pilyaminyi dokona nambame nakama randa mairu. Nakamame wambu rara mende peparae yuu Itome dokona karapusi ingyuo lanyuo peyami. Nakamame wambu dupwa pipya puu minyuo karalu kararama lao lalu lao leyami doko masa nao piyami.  
\v 10 Renge dokona nambame yuu Taya kana kame dokona isare peyaro dokopa taone dokona anda peparae rao otara.   
\s1 Itome  
\p
\v 11 Kamongo dokome dopa leya. Yuu Itome range wambu dupwame yulu koo doko kamba pyuo kamba pyuo karenge dokona nambame nakama randa mairu, leya. Nakamame nakamana yangonge Isaraele wambu dupwa mena rae lenge pyalaminyili pyuo roko nyinyi palyuo pyao kareyami. Dopa pyuo piyaminyipa saka renge mende nakama keta pali naya. Nakamana imbu singi doko ipwa ingyuo guu lao kareya. Dokome kame soo kaeyarami ingya naya.  
\v 12 Dokona nambame yuu Temane dokona isare peyaro dokopa yuu Bosara taone dokona anda peparae rao otara.   
\s1 Amone  
\p
\v 13 Kamongo dokome lao, Yuu Amone range wambu dupwame yulu koo doko yaki nyii nalyaminyi dokona nambame nakama angi randa mairu. Nakama yuu liti wakale mendena doko nyelana yanda pyuo dokopa yuu Giliate range enda wane paleta dupwa pyao pyarokapapu pipala reteyami, leya.  
\v 14 Dokona nambame yuu Orapa dokona kana kame dokona isare peyaro dokopa taone dokona anda peparae rao lalyara. Yanda kanda soo piraminyi yuu gii dokopa pii andake palyuo karara. Kararamopa yanda angi piraminyi doko raiya pambake andake mende epenge dopale ingyuo koo mange nara.  
\v 15 Dokopa nakamana kiŋi dokope banya yulu pingi akali kyawa dupwape karapusi akali ingyuo yuu wakale lapona parami.   
\c 2  
\s1 Moape  
\p
\v 1 Kamongo dokome lao, Moape wambu dupwame yulu koo doko pyuo sulu silyaminyi dokona nambame angi nakama randa mairu, leya. Nakamame kiŋi yuu Itome range dokona kuli doko nyuo yanganyi nembo banya kingi doko nyuo mee bange inginyi nembeyami.  
\v 2 Nambame yuu Moape dokona isare peyaro dokopa Kereyote taone dokona anda peparae rao lalyara. Dopa piramo dokopa yanda kambu pyao laikuli pii lao piramo dokopa Moape wambu dupwa kumarami.  
\v 3 Kamongome lao, Nambame yuu Moape dokona iso karenge akali mupwa doko pyao kumaso dokopa yuu dokona akali kamongo ingyuo karaminyi dupwa opetae pyaro, leya.   
\s1 Juta  
\p
\v 4 Kamongo dokome dopa leya. Juta wambu dupwame yulu koo doko kamba pyuo pyuo karaminyi dokona nambame angi nakama randa mairu. nakamame nambana mana pii dupwa awa nale lao dee nambana mawa pii dupwa minyaro kara napala kupyuo yaki nyingi. Nakamana rora ambasupi dupwame mee bange lapo anatuŋu lao kingi lao kareyaminyi suu pingi dokonako pyulu pyuoko pelyaminyi.  
\v 5 Dokona nambame isare yuu Juta dokona peyaronopa Jerusaleme kana kame porai doko rao lalyara.   
\s1 Anatumi Isaraele Wambu Kando //  Kote Lara  
\p
\v 6 Kamongome dopa lao, Isaraele wambu dupwa yulu koo doko kamba pyuo kamba pyuo karaminyi dokona nambame nakama angi randa mairu, leya. Isaraele wambu dupwame akali rolae karenge kana aeya nalyamopa kuki mendeme kimbu suu kana kuki penge dupwa ropo pyaramana laope sera nange dupwa kendemande ingyuo karena lao kana nyuo karapusi pyuo nembelyaminyi.  
\v 7 Nakamame pyuku lenge range poraiya nange dupwape kalyo ramberaku pyao dee pendewa dupwa pyao ralinyi neta nembo pilyaminyi. Dopa pipala dokopa kendemande yulu pingi wanake dupwa ikinyingi rakangepa laparaeme kepo pyuo pilyaminyi. Dopa pyuo karapala nambana kingi poo pyasi doko kokwa soo mee inginyi nembeyami, leya.  
\v 8 Pendewa dupwame kamongo akali dupwana kana mone kyanje ingyuo nyiyami. Nyiyaminyisa yano pyakaraminyi dokopa komau dupwa range peyakarama lapala pendewa dupwana komau dupwa nyepala kingi wapambu lakao misi lenge panda dupwana kwuapala palyuo silyaminyi. Nakamana Anatunya anda dokona kana mone yano reto nyiyaminyi dupwa keta ipwa waene nyepala nao karaminyi.   
\p
\v 9 Dopa pyuo karaminyipape nambana wambu nakamana kingi reke lao Amone akali ama londe mano isa ingyuo lombala pasi dupwape ando ama isa napupa manda manjo poraingi dupwape pyao kokwa soo nembeyo kande.  
\v 10 Nambame nakama yuu Isipi piso neta nyuo lanyuo epeyo. Epapala ee kana akalisa pao kisima nembo yuu muiyane dokona laminyuo epeyo. Epapala dokopa Amo wambunya yuu doko nakamana inginya lao nyuo jiyu, kande.  
\v 11 Jepala dokopa nakamana ikinyingi dupwana lapo nambame poropeta ingyuo karena lao rombo palyuo nakamana akali parange dupwana lapo Anatu nakama maipala role karamano lao kyawa roka nao ipwa biya naa nao kumasi wambu minyanda nao lao kana minyapala kararami lao rombo palyuo piyu. Isaraele wambu dupwa doko kinyi panda daase? Namba Kamongo dokome pii dake lapusa pilyamo.  
\v 12 Dopa piyunupape nakamame akali parange kyawa roka nao karenge dupwa ipwa biya nena lao nyuo mapiso poropeta akali dupwa nambana pii laka nana lao kata roko piyami.  
\v 13 Dokona dakepa nambame nakama yuu dokona kalyo minjiku minyaronopa semene kenda pingi doko manjipala yuu pyao rambetaku pyao nembenge dopale ingyuo parami.  
\v 14 Dopa piraminyi dokopa akali kata wakasa makando penge dupwa kapa paa narami. Dee akali porai dupwa nakamana porainya renge nembarami. Dee yanda singi dupwa nakama rangena kyawa lete minya naramiko.  
\v 15 Yanda pingi akali dupwa nakamana panda isa para. Akali makando penge dupwa makando panya saka narami. Mena osena piso penge dupwa kata mende serandena papa narami.  
\v 16 Mange dokopa yanda singi paka nange dupwa nakamana kaku yanda walekyape dupwa yaki nyepala pako makando parami. Kamongo dokome pii dake letamo, leya.   
\c 3  
\p
\v 1 Nakama Isaraele wambu dupwa peparae Kamongo dokome Isipi piso nyuo lanyuo epeya. Dokona nakamana lao baame pii dake langilyamo selapape.  
\v 2 Wambu malu mee isa yuu dakena karaminyipape nambame nakama iki kando nyuo mondo lao rapu pingi. Renge dokona nakamana koo doko andake wakasa ingyuo pelyamo. Dopa pilyamo dokona nakama randa jero.   
\s1 Poropeta Akali Dokona Yulu Doko  
\p
\v 3 Akali lamame dusa paramba dusa paramba lao lao palya napala mee kata nyingisi?   
\p
\v 4 Mena laene dokome imwa dokona nuli nara mende kanda nao karo mee wuakaepe lengese?  
\p Mena laene yakane dokome banya kame palo dokona palyuo dokopa nuli wiipi mende pyao minyaro pisi napala dokopa ŋili ŋili lengese?   
\p
\v 5 Kone dokona nenge angi doko retapala pimanyi palya narami ramo dokona yaka epo lyakaro serase?  
\p Angi mende epo kone makasi dokona paa naramopa kone dokome mee petelyapala lyerase?   
\p
\v 6 Wambu pyala epenge dupwame yuu taone mendena karo yanda pingi byara pyarami dokopa wambu dupwa paka naramisi?  
\p Yuu taone andake mendena pundu sipuro randa andake sipyali doko Kamongome peya napyali doko ipyalisi?   
\p
\v 7 Kamongo wambu dupwana mupwa ingyuo iso karenge dokome yulu peparae pinya dokopa banya kendemande poropeta akali dupwa wambo panao lamaingi.   
\p
\v 8 Laene juraŋa pokaramo dokopa api mendeme paka nao mona kana pokapala kararase?  
\p Kamongo Mupwa Andake Wakasa karenge dokona pii laramo dokopa apimi pii doko nyuo lakami nao kaeyarase?   
\s1 Samaria Doko Pyao Kokwa Sinyi Nembara  
\p
\v 9 Nakamame wambu peparae yuu Asitote dee Isipi dolapona kiŋinya anda dupwana karaminyi dupwa kee lao lamaiyuo, Yuu Samaria nyuo awali lao kyau kuki kuki silyamo dupwana malu palyepala dokopa enda akalipi ama pauli lao koo andake wakale wakale dupwa sipuro pilyamo doko kandena lao lamaipi, leya.   
\p
\v 10 Kamongo dokome dopa letamo. Nakama wambu dupwana anda andake dupwa bange yulu koo pyuo nyiyaminyi kande dupwame reto simbwalyaminyi kande lao lamaiyalapa. Kinyi angi dokona palyuo panembena lao karenge yulu doko angi see nalyaminyi.  
\v 11 Dokona akali yanda pimwai dupwame nakamana yuu dokona epo karo awali lapala kame andake porai taone sukusa palyuo piro karenge doko pyao lalyarami. Lalyapala wambu dupwana bange ama keyange nakamana anda kameya dupwana seramo dupwa nyerami.   
\p
\v 12 Kamongome Samaria wambu nakama yongome yoko pyuo Anatunya wambu lapala isarena range dokona iki suu pyao kepo pyuo kalya malyape pyuo kawango yuku silyaminyi dupwa kando dopa letamo. Mena laeneme sipisipi pyao nelyamopa mena isingi akalimi kimbu kalepe kondasi iki kando nyingi dopale ingyuo nakama parami, leya.  
\v 13 Kamongo Mupwa Andake Wakasa karenge dokome pii dake Jekopena para pyasi wambu dupwa kale yukupala selapa lao letamo.  
\v 14 Nambame Isaraele wambu dupwa nakama yulu koo pilyaminyi dokona randa mairunu yuu gii dokopa yuu Betele dokona mena bangepe kiso maingi kana pyare dupwa pyao lalyanyi nembaro. Nembaronopa kana pyare paki pakipi pinjingi dusipa longalya longana pira.  
\v 15 Nambame kupwa pyuo manda renge dokopa palenge andape isasa pingi yuu giinya manda rao palenge andape dolapo laparae pyao lalyanyi nembaro. Kana andake penge bange anda kalya pyuo retenge dupwa pyao kokwa soo anda kamame andake wakasa dupwa pyao kokwa soo piru.   
\c 4  
\p
\v 1 Samaria enda dupwa nakama pii dake selapape. Nakama mena bulamakao yuu Basane dokona karenge dupwame nenge malu napala ando kameya ingyuo rondo lenge dopale ingyuo rondo lasi mee dolapo petaminyi. Nakamame wambu porai renge palya nange dupwa pyuo kopetame pisilyaminyi. Wambu pendewa dupwa randa maipala nakamame wambu dupwa kuki perala konda nalyaminyiko ama daa. Nakamame nakamana akali dupwa kando dopa letaminyi. Ipwa biya malu nao sepake lalana kaeya nao minyakao ipupwa letaminyi.  
\v 2 Kamongo Mupwa Andake Wakasa karenge baa poo pyasi dokome pii lalu lao lao dopa leya. Kinyi kinyi leto yuu gii mendasipa pyaka sera. Pyaka seramo dokopa nakama koe anga serapala dokona ukunya ingyuo lyeraminyipa wambu dupwame nakama ipyuo nyuo parami. Nakama peparae mendaki mendaki lao oma ingyuo ukunya kareta pele laro kararaminyipa nyuo parami, leya.  
\v 3 Wambu dupwame nakama ipyuo lanyuo pao yuu taone dusa kame repetale lalyarae kararamo dokona pyao pyale larami.   
\s1 Isaraele Wambumi Mana Nyepenge Dokona Nyii Nayami  
\p
\v 4 Kamongo Mupwa Andake Wakasa dokome Isaraele wambu dupwa kando dopa leya. Nakama yuu Betele poo pyasi dokona kaeya nao yulu koo pela pupenge ingiya kande doko pao yuu Gilikale dokona koo doko ando penale pyuo pupwape. Yuu peparae yangama dokopa mena yakape dupwa kiso maiyuo yuu gii rema epo papapiramo dokopa nakamana bange retelyaminyi dupwana akalisa dokona mendena mendena pyuo akalisa piramo doko longo minyuo epo pipwape, leya.  
\v 5 Nakama namba kando sangyu lao borete yangao joo nakamame bange matana piso namba jinya minyuo epelyamano lao eparaminyi doko nakama rangena kingi ketae pyambuo pinya mona nyepala pyuo karaminyi.   
\p
\v 6 Nambame yuu taone peparaena lopo sinya leyo dokopa nakama keta nenge see nayamopape nakama kuki perala mona kapu kyaa nayami, leya.  
\v 7 Apunda kana ee nengepe andenge mange dokona nambame apunda jepa napala yambe pyuo minyaro karo kaeyo. Nambame yuu taone mendakinya apunda jiyu dokopa taone mende dokona jii nayo. Yuu liti lapona apunda peyonopa liti lapo peya dupwana ee jingi yanda neya.  
\v 8 Kamongome dopa lamaiyuo, Yuu taone mendasipana palenge wambu dupwa ipwa nano dokome lokerapo leyasa ralo yuu taone mendena ipwa serali lao peyami. Peyaminyi yuu dupwana ipwa mendasa narami ingya nayamo doko soo kandapala dokopa namba keta kapu kyuo epa nayami.   
\p
\v 9 Nambame poo rambaya rakusi renge mende ee jingi dupwa rakusi rena lao peyo. Aimbu dupwame nakamana girapo eepe isa pikipi isa olipi dupwa nao lembeke nyinyi reteyaminyipape nakamame namba keta kapu kyuo epa nayami.   
\p
\v 10 Yuu Isipi dokona kumaro anga peyono dopale ingyuo nakama nakamana yuupi kwuanyi nembeyoli pyuo peyapu yanda piyami dokopa nakamana wanyane akali dupwa wua gela dokome pyao kumakayo. Dopa pipala mena ose dupwa neta nyuo nembo piyunupa nakama yanda kama kareyami dokona wambu nakamana wambu kumasi dokona gyaa kata dokona nenenge ai pyanyi pyambwakayo. Dopa piyunupape nakama namba keta kapu kyuo epa nayamiko, leya.   
\p
\v 11 Kamongo dokome dopa lamaiyuo, Nambame yuu Sotoma Gomorape pyao kokwa sinyi nembeyo dopale ingyuo nakama lapo pyao kokwa sinyi nembeyo. Nakama lapo pyarepala peyami dupwa poo rao pao isa mende rao wapu lenge dopale ingyapala lete peyami. Dopa piyunupape nakamame namba kareyo dokona kapu kyuo epa nayamiko.  
\v 12 Renge dokona nambame nakama Isaraele wambu dupwa randa jero. Nambame dopa piru dokona randa jeramo nyerama lyamo lao rapa rapa pyuo karalapape, leya.   
\b  
\q1
\v 13 Anatu baame iki yuu kyau dupwa pyuo waso  
\q1 porambaiye dupwa pyuo piya.  
\q1 Baame banya suu pingi dupwa akali dupwa soo nyinya lao lamaingi.  
\q1 Baameko yuu yango karenge doko iminjinyi lao alowa pingi.  
\q1 Baa yuu muu dupwana kyawa nyuo kata papingi.  
\m Dopa pingi dokona kingi doko Kamongo Anatu Porai Wakasa lenge.   
\c 5  
\s1 Anatumi Isaraele Wambu Peparae Koo Dupwa Kaepala Mona Enenge Palyuo Epena Lao Kyakale Leya  
\p
\v 1 Nakama Isaraele wambu dupwa pii dake selapape. Wambu malu pinya yanyanda mareta piso ee romo lenge dokoreke doko nakamana lao leto, leya.   
\b  
\q1
\v 2 Isaraele doko enda mapwae akali mare kanda nange dopale kandale doko  
\q1 sipurao epa nao isa pao palu palyuo palamo.  
\q1 Mendeme nyuo sukusa pyambwa naminyipa isa pao palu palyuo palamo doko  
\q1 mendeme baa nyiso minyalyuo nyii nara ingilyamo.   
\b  
\p
\v 3 Kamongo Mupwa Andake Wakasa karenge dokome pii dapa letamo leya. Isaraele wambunya yuu taone andake mendakinya yanda singi taosande mendaki (1,000) yanda pela pena lao nembaraminyi dokopa andete mendaki (100) iki anda kapu kyuo eparami. Dee taone andake mendena yanda singi andete mendaki (100) yanda pela pena lao nembaraminyi dokopa akalisa iki anda kapu kyuo eparami.   
\p
\v 4 Kamongo dokome Isaraele wambu dupwa lamaiyuo, Nakama namba keta ipupwape. Epapala dokopa nakama lete kararami.  
\v 5 Nakama yuu Biasipa dokona kingi wapambupi lakao misi lala paa nalapape. Yuu Betele doko buru bara paramo mena wambupi mende yapo rungi nyii naraŋa dokona namba karepe lao kotala paa nalapape. Yuu Gilikale dokona nakama paa nalapape. Dokona palenge wambu dupwa yuu wakale mendena karapusi pyuo lanyuo parami ingilyamo leya.   
\p
\v 6 Nakama Kamongo karara dokona papala lete karalapape. Doko kaepala paa narami ramo doko baa isare kekenge dopale ingyuo nakama Isaraele wambu dupwa keta epara. Isare dokome nakama yuu Betele wambu dupwa rao otara. Dokopa mendeme isare doko kapa kunja nara.  
\v 7 Akali kote pii angi lakamiramili doko kaepala kwaeyo lakamilyaminyi dupwape yulu rolae dupwa isa nembelyaminyi dupwape pyuo kokwa sinyi nembasi silyamo.   
\b  
\q1
\v 8 Kamongo dokome bui  
\q1 kingi Pelaetesepi Orayonepe dupwa wasiya.  
\q1 Baameko yuu iminjingi doko yangena lao  
\q1 yangenge doko iminjinya lao pingi.  
\q1 Dopako pyuo baame ipwa kota dupwa pulyuo epena lao nyepala  
\q1 dee apunda ingyuo kulimbwanyi yuu dokona isa peenge.  
\q1 Banya kingi doko Kamongo ingyuo palena.   
\q1
\v 9 Baame akali porai dupwa kokwa soo pena lao nakama kimbu isa ingyuo minyaro karelyamo poraiyuo karenge dupwa pyao lokwalyo pingi.   
\b  
\p
\v 10 Nakama Isaraele wambu dupwame wambu nakama kyai pilyaminyi lao lao panami dupwape kotena pii rolae laminyi dupwape awa nalyaminyi.  
\v 11 Nakamame wambu pendewa dupwa pyalana pyuo kalyinyi palyapala nakamana nenge dupwa waa nyakamyuo karaminyi kande. Dokona lao nakamana kaname anda keyange piyaminyi dupwana pali nao nakamba range girapo ee keyange wara piyaminyi dokona ipwa waene elyape dupwa naa nao pirami, leya.  
\v 12 Nakamana koo wakasa pilyaminyi dupwape kendepo kendepo wakasa nao pyuo karaminyi dusipa nambame yaka lanyi pyambuo soo karo. Nakamame akali keyange dupwa randa maiyuo karaminyi. Nakamame girisi pyuo kana jimi dupwa nyepala akali pendewa dupwana kote dupwa angi mondo lao sakami nalyaminyi, leya.  
\v 13 Dokona kwaelyamo yuu gii dokopa elya kalo karenge doko ama mona palipala pingi.   
\p
\v 14 Yulu koo dupwa yaki nyuo kaepala yulu rolae dupwana anjuku lao moko minyuo pyuo kararaminyi dokopa nakama kapa pisirami. Nakamame dokopa Kamongo Anatu Porai Wakasa doko namwa pipya karamano letaminyi doko letaminyili pyuo baa kinyi nakama piya role pyao karara.  
\v 15 Yulu koo dupwa epe kanda nao karapala yulu rolae dupwana mona nyuo pyuo karalapape. Nakamame kote pii dupwa rolae angi dokona palyuo lao karalapape. Dopa pyuo kararami ramo dokopa Kamongo dokome nakamana rara dokona mee kyaka petaminyi dupwa sakame kumuo karara rapisi.   
\p
\v 16 Dokona lao Kamongo Anatu Porai Wakasa dokome dopa letamo. Taone andake dupwana kata dupwana kondome kumuo ee lao kumaralerale nyuo pisirami. Mena rapu pyuo ee wara pyuo pingi akali dupwa ee lala epena laraminyi opetaeko ee lakana lao kana mailyaminyi lenge dupwa piya wambu kumarami dupwana yongo dupwana lao ee larami.  
\v 17 Isa girapo ee dupwa peparaena ee lao kumaralerale nyuo pisirami. Doo leto dupwa piya kande doko nambame randa jerosa pira, Kamongo dokome leya.\fig Akali mende mena laene kando paka pelyoŋo lapala kauseramo minyanyi piyamo neya.|src="FILEFIG" size="col" ref="5:19" \fig*   
\p
\v 18 Kamongona yuu gii doko ipyali yaka lao isilyaminyi dupwa kondo adake. Yuu gii dokome bange keyange aki mende minyakao eparase? Yuu gii dokome nakama iminjingi dokome yambe pyara. Yangaramo pisa narami.  
\v 19 Yuu gii dokopa akali mende mena laene kando paka pelyoŋo lapala mena beya karara dokona pao romeya dopale ingyara. Dopako pyuo akali mende anda range pao nambana anda dake dokoŋo lapala apya dokona kingi minyanyi pirasa kaumi naramo dopale ingyara.  
\v 20 Kamongona yuu gii doko elyape ingyuo eŋa pao gii palya nara.   
\p
\v 21 Kamongo dokome pii dopa letamo. Nakamana yuu gii andake nyuo malu palyuo nenge nao misi lenge dupwa nambame kando rae maiyuo awaka nalyo.  
\v 22 Nakamame nenge kiso mukinyi nembo maingipi witi jingi maingipi dolapo minyuo epo jeraminyi dokopa nambame rae maiyuo ama nyii naro. Nakamame mena susu lao nenge maipala ando rondo lapyamo minyapala namba jela eparaminyi dupwa kando aiyaka lao nyii naroko.  
\v 23 Nakamana kenane dokome ipwa uu lele lao karaminyi doko kaeyalapape. Nakamana gita pilyamano laminyi dokopa namba soo epe nasilyo.  
\v 24 Doo piminyi dupwa kaepala rolenge renge doko nakama keta ipwa ingyuo lyuo karena. Dopa pipala yulu rolae dupwa nakama keta ipwa ingyuo sokwa nao guu lao karena.   
\p
\v 25 Nakama Isaraele wambu dupwa ee kana akalisa kisima nenge see nange yuu muiyane dokona palyuo lanyuo epeyo dokopa nambame nakama mena yakape kiso joo bange dupwa joo pilapa lao kongo pii nayo.  
\v 26 Dopa piyuko doŋo epapuli nakamame kiŋi Sakutipa bui Kaewanepa dolapo anatuŋu lao isa kanapeme wasapala dolapo anatu ingyuo lakando karaminyi.  
\v 27 Dokona nambame nakama yuu wakale Damasakesa dumurena karapusi nembeyo kande dokopa nakamana mee bangeme anatu lao wasisi dupwa range role pyapeta soo parami. Namba Kamongo kingi Anatu Porai Wakasa dokome pii dake leto.   
\c 6  
\s1 Isaraele Wambu Dupwa Pyao Kwaeyara  
\p
\v 1 Nakama yuu Sayone dokona mende pirape lao rae maiyuo petaminyi dupwape nakama wambu yuu Samaria range dupwame randa mende namba keta eparande daa lao suu pyao karaminyi dupwape Isaraele yuu mupwa dokona akali andake ingyuo wambu iso karaminyi dupwa nakama Isaraele wambu mee dupwa epo pyamalyarami ingilyamo dupwape nakama peparae kwaeyo koo keta palirami ingilyamo dokona kondo andake pilyamo.  
\v 2 Nakamame yuu taone Kalena dokona pao kandalapa. Dopa pyuo kando pao yuu taone ama andake Emate doko kandama pao kama yuu taone Gati Pilisitia wambu palenge doko kando lano pupwa. Dopa pyuo kandapala dupwana yulu dokome nakama Juta wambupi Isaraele wambupi dupwana yulu nyuo isa palyili laro karapyalyape lao selapape? Dupwana yuu doko reeko sipyamopa nakamana doko kukindena palimwalyamo lao silyamisi?  
\v 3 Dokona nakamame suu pyaminyi dokopa yuu gii pyao kokwa sera doko nakama keta epa nara lao suu pilyaminyi. Nakamame yulu wakale wakale pilyaminyi dokome yuu gii koo doko repeta lanyuo imisa pilyamo.  
\v 4 Mena bulamakao yakanepe mena sipisipi yakanepe dupwa kuiyuo napala rate keyange dupwana ipyalo laro karaminyi dupwa nakama keta randa epara ingilyamo kando waso karalapape.  
\v 5 Nakama wambu dupwa Dapitimi piyamuli pyuo kenane enenge rae maiyuo mana nyuo pilyaminyi. Dopa pyuo gita dupwame minyuo kenane dupwa pyao karaminyi.  
\v 6 Nakama ipwa waene sipyamuli pyuo nakondali pyuo mamba kyapingi ama keyange dupwa kiso kondali pyuo pipala Isaraele wambu dupwa isa pwaminyi lao mona rando larami doko kame kame soo kaelyaminyi.  
\v 7 Dopa pyuo karaminyi dokona lao nakama dupwa wambo kyawa nyuo yuu wakale mendena karapusi palya parami. Dopa pyuo paraminyi dokopa nenge andake nao pati lenge dupwa mee ingyuo paramopa naa nalapale, leya.   
\p
\v 8 Kamongo Mupwa Andake Wakasa Ama Porai karenge dokome repe repe pii dapwa poraiyuo letamo. Isaraele wambu dupwa range mupwa lao suu pyao moŋo kyaŋe singi dokona nambame epe naso karo. Nakamana anda ama reeko keyange wakasa dupwa ipyalyo. Dokona nambame wambu dupwana taone andake mupwa dokope dee dokona bange silyamo dupwa peparaepe nakamana wambu yanda pimwai dupwa keta mairu, leya.   
\p
\v 9 Akali akalisa anda mendakinya palirami ramo doko peparae kumuo otarami.   
\p
\v 10 Akali mende kumasi seramo dokopa banya akali ree palu mendaki mendeme banya yongo doko malu pelana nyela epara. Epapala akali raiyoko mendaki dokome akali mende andakare yalu piro silyape lao kee lao kando lara. Akali mende mee karape panda daase? lara. Isingi pii mende lapala, Daa lara. Dokopa akali raiyoko mendaki dokome baa lamaiyuo, Pii laa napipi, lara, Namwame Kamongo dokona kingi lalana dokopa waso lamanale, lara.   
\p
\v 11 Kamongo dokome pii laramo dokopa anda kuki epengepe peparae lalyuo buru bara para.  
\v 12 Mena ose kana andake dokona kapa makandengese? Akali dupwame mena bulamakaome yuu apu renge masene dokome ipwa kota doko pyao injingisi? Pii nara doko soo kaepala nakamame yulu mendaki dopaleko pilyaminyi. Nakamame rolenge renge dupwa minyuo mauli inginyi nembelyaminyi. Nakamame yulu rolae dupwa minyuo kyai dokona palyuo karaminyi.   
\p
\v 13 Nakamame yanda pyuo mupwa ingyapala yuu taone Lotepa nyilyamano lao rae wakasa maiyuo nanga kapape lyuo karaminyi. Namwa rangena porai dokome yuu taone Kanaime doko nyiyamoko kande letaminyi.   
\p
\v 14 Laminyipape Kamongo Anatu Porai Wakasa dokome pii dake letamo. Isaraele wambu dupwa nambame nakama ami rara wakale mende nyuo peyaronopa nakamana yuu dokona yulu andele lao nyuo palirami. Akali rara mende lyamo dokome nakama yuu Amate dulurena piso pyao ralyo pao yuu Arapa donorena suu lara, leya.   
\c 7  
\s1 Emosa Baame Aimbu Malu Pii Repa Pyuo Kandeya  
\p
\v 1 Kamongo Mupwa Andake Wakasa karenge dokome renge mende namba lasaka piyamo pii repa repa pyuo kandeyo. Kandeyono dokona akali yulu pingi dupwame rambi isoko kiŋi mairami dupwa pyakepo oteyami. Oteyaminyipa renge dokona rambi enenge kene piyamo dokopa Kamongo dokome aimbu malu mee peeyamo kandeyo.  
\v 2 Nambana pii repa repa piyu dokona kandeyo dokopa aimbu dupwa peparaeme yuu dokona isoko andeyamo dupwa peparae nao otanyi nembeyami. Nembeyaminyi dokopa nambame pii dopa leyo. Kamongo Mupwa Andake Wakasa karenge doko embame Isaraele wambu dupwana koo doko nyuo kame sakamipi. Nakama rara kuki dokona nakama keta porainya renge palya nange dokona nakama apa pipala lete wai pyao paramisi? leyo.   
\p
\v 3 Dokopa Kamongo banya suu pingi alowa pipala dopa leya. Renge emba doo kandapinyi doko sipurao epa nara, leya.\fig Kamongo Anatu embame yulu doko pii nare.|src="FILEFIG" size="col" ref="7:5" \fig*   
\s1 Isare Reyamo Kandeya  
\p
\v 4 Kamongo Mupwa Andake Wakasa karenge dokome renge mendeko namba lasaka piyamo kandeyo. Kandeyono dokona Kamongo dokome banya wambu dupwa isarena pyao yangalana rapa rapa piyamo kandeyo. Isare dokome yuu kokorena ipwa kota andake doko reyamo kandeyo. Rao epo yuu dake ralana kanda soo reyamo kandeyo.  
\v 5 Dokopa wambu dupwa rara ama kuki dokome poraya narami ingilyamo dokona apa pipala nakama lete wai pyao paramisi?   
\p
\v 6 Dokopa Kamongo banya suu pingi doko kamba alowa pipala renge kandapi doko sipura narako, leya.   
\s1 Anda Minyuo Rolenge Puu Doko Pii Repa Repa Pyuo Kandeya  
\p
\v 7 Kamongo dokome namba renge wakale mendeko lasaka piyamo kandeyo. Kandeyono dokona Kamongo doko anda dokona apya repeta roya kareya. Akali dupwa peparaeme anda puu minyuo rolae panda kyai lao kandenge puu ane kuki peteta doko minyuo anda pyaminde Kamongo dokome puu doko minyaro kareyamo nambame kandeyo.  
\v 8 Kamongo dokome namba piso soo dopa leya. Emosa emba aki bange kandelese? leya.  
\p Dokopa nambame isingi dopa leyo. Puu kame minyuo rolo pingi dokore mende kandelyo, leyo.  
\p Baame namba isingi langyuo, Nambame puu dokome nambana wambu dupwa anda apya ingyaro karenge rombo doko pyakuiyuo neta pumisa dokona nyepala lasaka pilyu. Wambu dupwana yulu koo dupwana lao nambame randa mairu. Mairunu doko nambana suu pingi doko kamba alowa pii nalu nao naro.  
\v 9 Yuu Aisakena wambu para pyasi dupwa nakamana misi lenge panda dupwa ukiaki minyuo Isaraele wambunya yuu yapasi dupwa kokwa soo piru. Nambame kiŋi Jeropome banya rara dupwa peparae pyao rembe naro, leya.   
\s1 Poropeta Emosapa Purisi Akali Amasayapana Pii  
\p
\v 10 Yuu Betele range purisi akali Amasaya dokome Isaraele wambunya kiŋi Jeropome renge lapo paleyamo dupwa dopa pilyamoŋo lao lamaiyala pena lao wai nembeya. Emosa baame Isaraele wambu dupwa pipya embamoo yanda pimwai inginya lao dupwa kunji kunji pilyamo. Embame baa yuu dakena karena lao kaeyare ramo dokopa banya pii dokome yuu dake minyuo kwaeyaralyamo.  
\v 11 Pii dapa pyuo letamo. Yanda andake mende piraminyi dokona Jeropome baa kumara. Dokopa Isaraele wambu dupwa nakamana yuu yaki nyuo mendasa karapusi pyao lanyuo parami lao karamo, leya.   
\p
\v 12 Dokopa purisi Amasaya dokome Emosa lamaiyuo, Poropeta, kapa lapeleneŋe. Epapu yuu Juta dokona range lano misi lao karala puu. Dokopa yulu dokona emba kingi kisarami.  
\v 13 Yuu Betele dakena poropeta pii kamba laa napipi. Renge doko kiŋinya misi lenge panda doko wambu peparaena tembole anda andake sipyamo pilyamo, leya.   
\p
\v 14 Emosame pii isingi yano pyao dopa leya. Namba poropeta menge karaminyi dokore daa. Namba poropeta pii doko kana ropo pinya lao lenge dokore daa. Namba mena sipisipi dupwa isingi akali karo piki isa dupwa mondo lao iso karo pingi.  
\v 15 Namba nambana mena sipisipi isingi yulu dokona pyuo kareyonopa Kamongo dokome namba nyepala pii dopa lao langiya. Emba pao nambana Isaraele wambu dupwa pii jero dupwa lamaiyakala puu, langiya.  
\v 16 Dokona lao Kamongo baame dakepa apa letamo lao see leya. Embame poropeta pii laa nao karape lao dee Isaraele wambu dupwa pyalana pyuo laa napipi lao pilini.  
\v 17 Amasaya embame pii dake leene dokona epapu Kamongo dokome emba kando pii langilyamo. Embena enda doko kata barete dapwana pamuku yulu pyuo pisiramopa embena wane dupwa yanda pipala pyao kumaso embena yuu doko sukusa liti pyuo kunjo wambu wakale lapo maiyuo piraminyipa emba Anatu kingi soo laa nange yuu liti mendena pao kumare. Dopa pirinyipa Isaraele wambu dupwa pyao lanyuo pao yuu wakale mendena karapusi pyuo pirami, leya. Pisiki Minyasi Dokona Nenge Isa Jingi Rara Wakale Wakale Paleyamo Pii Repa Repa Pyuo Kandeya   
\c 8  
\p
\v 1 Kamongo Mupwa Andake Wakasa karenge dokome pii repa repa pyuo pii mende kamba langiyamo siyu. Isa jingi pisiki minyasi dokona paleta siyamo kandeyo.  
\v 2 Kamongo dokome namba langyuo, Emosa emba aki bange kandelese? leya.\fig Emosa emba aki bange kandelese? leya. Isa jingi pisiki minyasi mendena sipyasa kandelyo leyo.|src="FILEFIG" size="col" ref="8:2" \fig*  
\p Nambame isingi lao, Isa jingi pisiki minyasi mendena sipyasa kandelyo, leyo.  
\p Dokopa Kamongo dokome namba pii langyuo dopa leya. Isaraele wambu dupwa randa nyerami yuu gii doko epelyamo. Nambame Isaraele range wambu dupwa randa mairu. Dokona nambana suu pingi dee alowa pii nalu nao naro.  
\v 3 Yuu gii dokopa enda akalipi dupwa peparae kiŋinya anda pisiraminyi dupwa kenane pyao rae mai napala nakama ee lao kararami. Akali mange pukusi dupwa ranaro kararamo mumiko isu pyuo nyuo nembarami.   
\s1 Isaraele Keta Randa Andake Epara  
\p
\v 4 Nakama kale yukupala selapa. Nakamame bange yano pipyamo petaminyi dupwa nyuo kalyinyi palyuo yuu dokona wambu pendewa dupwa pyuo koo keta piso pilyaminyi.  
\v 5 Nakama range lanyi pyano dopa lao karaminyi. Yuu gii poo pyasi doko waiya lao paa nalepe dokopa namwana nenge dapwame minyuo kana nyemanale. Nenge dapwa waiya lao maketena nembamanale misi lenge gii doko anjukupa otara kandapisi lao suu pyao petaminyi. Dokona namwame bange dupwa kana namba ketae palyarama. Palyaramano dokona sikyali angi rolaena pii napala kyambo lao maiyuo wambu dupwa dereke pyuo bange ropo pinya lao kana nyerama.  
\v 6 Borete wasingi witi koole dupwa kana andake lao nyemanale. Kimbu suu kana penge dopale dinau nyepala isingi ropo pyalena saka nara akali dupwa namwame ropo pyao nyepala namwana kendemande ingyuo karena lamanale lao karaminyi.   
\p
\v 7 Kamongo, Isaraele wambunya Anatu dokome pii kana minyuo lalu lao lao, Nambame Isaraele wambunya yulu koo dupwa kame see napala suu pyaro kararo.  
\v 8 Dopa pirono dokopa yuusili andake minyara. Minyaramo dokopa wambu yuu range dupwa peparae koo keta palyuo ee lao pisirami. Yuu dokona yuu muu dupwa peparaena yuusili andake minyara. Ipwa Naele andake ingyuo palipala pyao sepala enakana lyaneya doko suu pyao yuu doko ando ketae papala enakana isa para.  
\v 9 Yuu gii mende eparamo dokopa andawai korakama neta karara doko kaepala anda pao alemanji ingyuo yapa sii pyuo yalyinya laro. Korakama neta rao karenge gii dokopa yuu doko iminjo umi ami lena laro. Lao, Namba Kamongo Mupwa Andake Wakasa karenge dokome pii dake lapunu pilyamo, leya.  
\v 10 Nambame nakamana kanape ee kanape minyuo nenge yaowa nao mali lyuo pingi dupwa alowa pyuo wambu malu pyuo kumanda piso pingi yuu gii dokore ingyuo retakaro. Dopa pyuo rae maiyuo kenane pingi kenane dupwa alowa pyuo mona rando ee lenge yuu gii inginyi pyambwakaro. Enda akalipa wane mendaki iki doko nembarala piso ee palelyamo lengenyili pyuo larami. Dopa pyuo endangipa rakangepa kyawasi rokapala kumanda piso wapungi bange dupwa nyuo yanenge yambe pyao wapuo petengenyili pyuo pirami. Yuu gii dusipa kwao nyiki nyiki piramoko karo paraminyipa lumwa pira.   
\p
\v 11 Yuu gii mende eparamo dokopa yuu dokona lopo sinya laro. Wambu dupwa loparami doko nenge ipwape lopa daa. Kamongo dokona pii doko nakama keta epa narasa doko ipwa nengepe ingyuo nanarami. Namba Kamongo Mupwa Andake Wakasa karenge dokome pii dake lapunu pilyamo.  
\v 12 Wambu dupwa yuu muu peparaena Kamongona pii soo nyelana koto paeyaraminyipa kapa pyuo kando nyii narami.  
\v 13 Yuu gii dusipana enda mapwae keyange dupwape akali parange porai dupwape peparae ipwa nanome kumapala malawai laramo pao palirami.  
\v 14 Dopa piraminyi dokopa wambu lapome yuu Samaria dokona kingimi wasisi anatuŋu lenge dupwa kando pii lalu lao lenge dupwa yuu Dane dokona anatu dokona kingi lao yuu Biasipa dokona anatu dokona kingi lao letamano lao lao karaminyi. Doo lao karaminyi dupwa kumarami doko dee lenge rao sipura narami, Kamongome leya.   
\c 9  
\s1 Kamongo Dokome Isaraele Wambu Dupwa Randa Maira  
\p
\v 1 Rendamu pingi kiso maingi bokote misi anda andakare singi dokona repeta Kamongo doko roya karapyamo namba kandapu. Karapala baame dopa leya. Tembole and dokona pote isa londe ketae dokona poraiyuo kusape palya. Dokopa anda doko peparae walu walu lena. Laramo dokopa pote dupwa peparae lalyuo lambuo palyuo laiyo palyuo pipala bolombalo lapala wambu dupwana kyawa dupwa pyao poro lapala nakama kumarami. Kumaraminyipa wambu menge lete pisiraminyi dupwa nambame yanda dokona nyuo kisaronopa kumarami. Dopa piramopa mendakipi mendali neta paa nana lao pyaro.  
\v 2 Akali lapome namba yaki nyuo pao yuwale kyaso ama kumungi wambu palenge dokona kando nyeramopape nambame nakama pao minyarapala nyero. Dee wambu dupwa yake panda pulyuo pao otaraminyipape nambame nakama isa ipyuo nyero.  
\v 3 Wambu dupwa yuu kyau Kamele lenge dokona ama ketae pao yalu piraminyipape nambame mee koto pao kando minyarapala nyero. Dee wambu dupwa ipwa kota kokorena yalu pirami ramo dokopa nambame kau andake mende ipwa dokona koko singi dokome nena laro.  
\v 4 Wambu yanda pimwai dupwame nakama nyuo lanyuo karapusi pela parami ramo dokopa nambame yanda pimwai dupwa lamaipala pyao kumasinya laro. Nambame wambu dupwa kokwa sinyi nembaro lao suu pyalu pyao pilyu. Nambame wambu dupwa nyisaro lao suu pyaa nalyo.   
\b  
\q1
\v 5 Kamongo Mupwa Andake Wakasa Ama Porai karenge doko banya kingi dokome yuu doko minyandelyamo dokopa  
\q1 yuu doko pyuku pyuku lenge.  
\q1 Dokopa wambu yuu dokona palenge dupwa mona rando ee lenge.  
\q1 Ipwa Naele palelyamo dokopa ando ketae papala panyi pilyamo dokopa isa pao lyanenge dopale ingyuo yuu muu dupwa peparae ketae papala enakana isa para.   
\q1
\v 6 Kamongo dokome banya anda doko yake panda dokona pingi.  
\q1 Pipala dokopa yake doko malawai lasi kyawa kuli dopale doko isa yuu dakena ketae pee pinyi palyiyamo piru karenge.  
\q1 Baame ipwa kota doko kee lao pulyuo nyepala dokopa  
\q1 kulimbanyi yuu dokona peenge.  
\q1 Doko banya kingi doko Kamongo lenge.   
\b  
\p
\v 7 Kamongo dokome dopa leya. Isaraele wambu dupwa nakama nambame mondo lao suu pyao karenge dopaleko ingyuo Itiopia wambu dupwa suu pyao karapunu pilyamo, leya. Doko nakama yuu Isipi dokona peteyaminyipa nyuo lanyuo epeyo kande dokoko suu pyao nambame Pilisitia wambu dupwa yuu Kirita dokona peteyaminyi lanyuo epo Siria wambu dupwa yuu Kua dokona peteyaminyipa lanyuo epo piyu, leya.  
\v 8 Namba Kamongo Mupwa Andake Wakasa karenge dokome Isaraele wambunya Kiŋi dokome isingi yuu doko poraiyuo kando karo. Dokopa yuu dokona yulu koo dupwa palyuo simbwalyamo. Simbwalyamo renge dokona nambame nakama pyao kokwa soo nembalu nembo nembaro. Nembaronopape Jekopena ree palu dokona lapo kyawa minyaro.   
\p
\v 9 Nambame Isaraele wambu dupwa makande pyuo kandaronopa koo dupwa ipwame soo nembengenyili pyuo nakama neta peyaro. Nambame yuu liti wakale dupwame nakamba makande pyuo minyalya minyana pyuo kandena laronopa kapa pali nange mee ruku raka pyuo kararami dupwa yapanyi nembarami.  
\v 10 Dokopa wambu yulu koo pingi nambana wambu pipya ruku raka pyuo karaminyi dupwame lao dokopa Anatumi namwa bange mendeme randa jinya laa nara lao kararami. Dopa laraminyipape wambu nyisu petenge dupwame yanda dokona nakama pyao kumakana laro, leya.   
\s1 Enakana Isaraele Wambu Elyape Keta Pisarami Doko  
\p
\v 11 Kamongo dokome dopa letamo. Dapitinya rara dokona kiŋi yulu doko anda lalyisi kwaeyo singi dopakale ingyuo silyamo. Dokona lao yuu gii mende pyaka solopyamo dokopa anda lalyuo kwaeyasi isa andopaepe peparae minyalyingi dopale ingyalopyamo. Dokopa yuu wamba Dapiti kareyamo yuu siya dopale ingyara.  
\v 12 Isaraele wambu dupwa yanda pyuo wini pipala yuu Itome paki wamba nyiyami dokona paki opetae nyerami. Nyepala yuu wakale dupwa peparae wamba nambana ingyuo siya dupwa nyeramiko. Kamongo dokome letamo dokome pyaka sera.   
\q1
\v 13 Kamongo dokome dopa letamo.  
\q1 Yuu gii mende pyaka seramo dokopa nenge dupwa waiya lao andara.  
\q1 Andapala jingi malu lyeramo dokona akali dupwame peparae kapa manjo otalana saka narami.  
\q1 Ipwa waene dupwa peparae waiya lao andapala jingi malu mee lyeramo dokona  
\q1 waene wasingi wambu dupwame wasingi panda soo simbwarasa wasalana saka narami.  
\q1 Dokopa enda akalipi peparae waene rende pingi malu mee nakama keta sera.  
\q1 Doko yuu kyau dokona ipwa palyuo simbwapala potemo neta penge dopale ingyara.   
\q1
\v 14 Ingyaramo dokopa nambame nambana wambu dupwa nakamana yuu range wambo palenge dokona lanyuo eparo.  
\q1 Eparono dokopa yuu andape lalyisi dupwa range waso palirami.  
\q1 Palipala nakamame isa waene dee wara pipala jingi lyeramo dokome ipwa waene waso narami.  
\q1 Nakama ee dupwa pyuo wara pipala range manjo narami.   
\q1
\v 15 Nambame nambana wambu dupwa yuu range maiyunu dokona minyuo epo petena laro.  
\q1 Larono dokopa akali mendeme wambu dupwa kapa kamba neta ralinyi nemba nara.  
\q1 Kamongo nakamana Anatu dokome dopa lapusa pilyamo.