\id 1TH - Kuvi
\ide UTF-8
\h ୧ତେସଲନିକି
\toc3 ୧ତେସ
\toc2 ୧ତେସ
\toc1 ତେସଲନିକି କୁଲମିତାକି ପା଼ୱୁଲ ରା଼ଚାମାନି ର଼ ଲମ୍ବର ଆ଼କୁ
\mt2 ଥେସଲନିକୀ ମଣ୍ତଳୀ ନିକଟକୁ ପାଉଲଙ୍କ ପ୍ରଥମ ପତ୍ର
\mt1 ତେସଲନିକି କୁଲମିତାକି ପା଼ୱୁଲ ରା଼ଚାମାନି ର଼ ଲମ୍ବର ଆ଼କୁ
\imt ମୂଲୁ ହା଼ଡା
\ip ତେସଲନିକି ର଼ ଲମ୍ବର ଆ଼କୁ ପାଣ୍ତ୍‌ୱିଆ଼ହାମାନି ପା଼ୱୁଲ ତା଼ଣାଟି ରା଼ସ୍‌କି ଆ଼ହାମାନେ \xt ୧:୧\xt* । ଈଦି ଜୀସୁ କ୍ରୀସ୍ତ ଜାର୍ନାଆ଼ତି ୫୧ ବାର୍ସା ଡା଼ୟୁ ରା଼ସ୍‌କି ଆ଼ହାମାନେ । ତେସଲନିକି ପିଲିପ ଦେ଼ସାତି ର଼ କାଜା ଗା଼ଡ଼ା ମାଚେ । ପା଼ୱୁଲ ଏଚେ଼ତା ଆ଼କୁ ରା଼ଚିମାନେସି ଏଚିବେ଼ଲା ଏ଼ୱାସି କରନ୍ତି ଗା଼ଡ଼ାତି କୁଲମିତା ମାଚେସି । ଏମିନି କୁଲମିତା ୱେଣ୍ତେ ରୀ ଦେବାତାକି ମାହାପୂରୁ କାତା ୱେ଼କ୍‌ହାଲି ହାଚେସି ଏଚିବେ଼ଲା ତେସଲନିକି କୁଲମି ଗା଼ଡ଼ି ଆ଼ହାମାଚେ \xt କାମା ୧୭:୧-୧୦\xt* । ଏମ୍ବାଆଁ ଜୀହୁଦି ଅ଼ଡ଼େ ଗ୍ରିକ୍‌ ଜ଼ଲିନି ଲ଼କୁ ତା଼ଣାଟି କୁଲମି ଆ଼ହାମାଚେ । ଡା଼ୟୁ ଜୀହୁଦି ଲ଼କୁ ଡା଼ହାରା ଆ଼ହାନା ପା଼ୱୁଲ କ଼ପାଟି ନିଙ୍ଗାଲିଏ ତେସଲନିକି ଗା଼ଡ଼ା ପିସାଲି ଆ଼ତେ ।
\ip ପା଼ୱୁଲ କରନ୍ତିତା ଏତି ଡା଼ୟୁ ତାନି ଆଟ୍‌ହିତାସି ତିମତି ତା଼ଣାଟି ତେସଲନିକି କୁଲମିତି କାତା ବାରେ ୱେଚେସି । ଏ଼ୱାରି ଜୀୱୁ ନ଼ୱିଆ଼ହିମାନାଣି ୱେଞ୍ଜାନା ହା଼ରେକା ରା଼ହାଁ ଆ଼ହାନା ତାନି ଈ ରା଼ହାଁ ତ଼ସାନା ରା଼ଚାମାନେସି । କ୍ରୀସ୍ତ ୱେଣ୍ତା ୱା଼ନି କାତା ଏ଼ୱାରି ତାମି ବିତ୍ରା ଅଣ୍‌ପିମାଚେରି ଅ଼ଡ଼େ କ୍ରୀସ୍ତଇଁ ନାମାହାଁ ହା଼ତିହିଁ କ୍ରୀସ୍ତ ୱେଣ୍ତା ୱା଼ନାଟି କା଼ଲାକା଼ଲାତି ଜୀୱୁ ବେଟା ଆ଼ନେସି, ଈ ବାରେ କାତାତି ପୁଣ୍‌ମ୍ବି କିହାଲି ରା଼ଚିମାନେସି \xt ୫:୬-୮\xt* ।
\iot ପତିତା ମାନାୟି
\io1 ୧ ଜହରା ତଲେ ପୁଣ୍‌ମ୍ବି କିହାନା ଆ଼କୁତି ମା଼ଟ୍‌ନାୟି । \ior ୧\ior*
\io1 ୨ ତିମତି ତେସଲନିକିତି କାବ୍ରୁ ଅ଼ଡ଼େ କାମାତି କାତା ୱେହ୍‌ନାୟି । \ior ୨:୧–୩:୧୩\ior*
\io1 ୩ କ୍ରୀସ୍ତଇଁ ନାମିତି ଲ଼କୁ ଏ଼ନିକିଁ ଜୀସୁ ୱେଣ୍ତା ୱା଼ନାଟି ଉଜେଡ଼ିତା ଡ଼ୟିନେସି । \ior ୪:୧–୫:୧୫\ior*
\io1 ୪ ଡା଼ୟୁତି କାତା ୱେସାନା ଆ଼କୁତି ରା଼ପ୍‌ନାୟି । \ior ୫:୧୬-୨୮\ior*
\c 1
\p
\v 1 ପା଼ୱୁଲ, ସିଲା ଅ଼ଡ଼େ ତିମତି ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣା ମାନି ତେସଲନିକି କୁଲମିତା ମାନି ଲ଼କୁତାକି ଆ଼କୁ; ମାହାପୂରୁତି କାର୍ମାମେହ୍‌ନାୟି ଅ଼ଡ଼େ ହିତ୍‌ଡ଼ି ମିଙ୍ଗେତାକି ଆ଼ପେ ।
\s ତେସଲନିକିତା ମାନାରି ନୀଡିନାୟି ଅ଼ଡ଼େ ନାମିନାୟି
\p
\v 2 ମା଼ ପ୍ରା଼ତାନାତା ମୀ ଦ଼ର୍‌କା ଆସାନା ବାରେତାକି ବାରେବେ଼ଲା ମାହାପୂରୁଇଁ ଜହରା କିହିମାନମି, 
\v 3 ମା଼ ଆ଼ବା ମାହାପୂରୁ ନ଼କିତା ମା଼ମ୍ବୁ ମୀ ନାମୁତି କାମା, ଜୀୱୁ ନ଼ନି କାମା ଅ଼ଡ଼େ ମା଼ ପ୍ରବୁ ଜୀସୁ କ୍ରୀସ୍ତ ତା଼ଣାଟି ମୀ ବା଼ର୍ସୁ ତଲେ ଅ଼ର୍‌ହିନାୟି ଏ଼ନିକିଁ ଆ଼ଟ୍‌ୱା । 
\v 4 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି ମା଼ମ୍ବୁ ପୁଞ୍ଜାମାନମି, ମାହାପୂରୁ ମିଙ୍ଗେ ଜୀୱୁ ନ଼ହାଁ ମାଞ୍ଜାନେସି ଇଞ୍ଜାଁ ତାନି ଲ଼କୁ ଆ଼ହାଲି ଆ଼ଚାମାଞ୍ଜାନେସି । 
\v 5 ଇଚିହିଁ ମା଼ ନେହିଁ କାବ୍ରୁ ୱେ଼କ୍‌ନାଣି ତଲେ ଆ଼ଏ, ସାମା ବା଼ଡ଼୍‌ୟୁ, ସୁଦୁଜୀୱୁ, ସାତା ତଲେ, ମୀ ତା଼ଣା ଏଜା ମାଞ୍ଜାତେ, ଇଞ୍ଜାଁ ମୀ ତା଼ଣା ମାଚାଟି ମୀ ତଲେ ମା଼ମ୍ବୁ ଏ଼ନିକିଁ ଲେ଼ମ୍ବା ମାଚମି, ଏ଼ଦାଆଁ ମୀରୁ ପୁଞ୍ଜାମାଞ୍ଜେରି । 
\v 6 ଅ଼ଡ଼େ, ମୀରୁ ହା଼ରେକା ଦୁକୁତା ମାଞ୍ଜାହାଁ ଜିକେଏ ସୁଦୁଜୀୱୁଟି ହୀପ୍‌କି ଆ଼ହାମାନି ରା଼ହାଁତଲେ ଏ଼ ବ଼ଲୁ ଅ଼ପାକଡାନା ମା଼ ଜେ଼ଚ ଅ଼ଡ଼େ ପ୍ରବୁ ଜେ଼ଚ ତା଼କିନାତେରି ଆ଼ହାମାଚେରି, 
\v 7 ଏ଼ନିକିହିଁ ମୀରୁ ମାକିଦନିୟା ଅ଼ଡ଼େ ଆକାୟାତା ମାନି ବାରେ ନାମୁଗାଟାରି ତା଼ଣା ନାମୁତା ନେହିଁ ଗୂଣୁ ତ଼ହ୍‌ନାତେରି ଆ଼ହାମାଚେରି । 
\v 8 ଇଚିହିଁ ତେସଲନିକିତି ନାମୁଗାଟାରି ତା଼ଣାଟି ପ୍ରବୁତି ନେହିଁ କାବ୍ରୁତି କାତା ୱାର୍‌ଇ ମାକିଦନିୟା ଅ଼ଡ଼େ ଆକାୟାତା ୱେ଼ଙ୍ଗାମାନେ, ଏ଼ଦି ଆ଼ଏ, ସାମା ମାହାପୂରୁ ତା଼ଣା ମୀ ନାମୁତି କାବ୍ରୁ ଜିକେଏ ବାରେୱାକି ୱେ଼ଙ୍ଗାହାଚେ, ଏ଼ଦାଣି ତାକି ମାଙ୍ଗେ ଅ଼ଡ଼େ ୱେସାଲି ଲ଼ଡ଼ା ହିଲେଏ । 
\v 9 ଏ଼ନାଆଁତାକି ଇଚିହିଁ ଲ଼କୁ ତା଼ମ୍ବୁ ମା଼ କାତା ୱେସ୍‌ପି ଆ଼ନେରି, ମୀ ତା଼ଣା ମା଼ମ୍ବୁ ୱା଼ତମି ଏ଼ନାଆଁ ଆ଼ହାମାଚେ, ଅ଼ଡ଼େ ଏ଼ନିକିଁ ମୀରୁ ପେ଼ଣ୍‌କା ବମାୟାଁଣି ପିସ୍ତେରି, ଇଞ୍ଜାଁ ଜୀୱୁଗାଟି ଅ଼ଡ଼େ ସାତା ମାହାପୂରୁଇଁ ସେ଼ବା କିହାଲି, 
\v 10 ଅ଼ଡ଼େ ଏ଼ୱାସି ଜାହାରା ଆମିନି ମୀର୍‌ଏଣାଇଁ ହା଼ତାରି ତା଼ଣାଟି ୱା଼ହିମାନି ମାହାପୂରୁତି କାର୍‌ବିଟି ଗେଲ୍‌ପାଲି ନିକ୍‌ହାମାନେସି, ମା଼ ଏ଼ ଗେଲ୍‌ପାନି ଜୀସୁଇଁ ଲାକପୂରୁଟି ୱେଣ୍ଡା ୱା଼ନାଣି କା଼ପୁ କା଼ଚାନା ଡ଼ୟାଲି ।
\c 2
\s ତେସଲନିକିତା ପା଼ୱୁଲତି କାମା
\p
\v 1 ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମୀରୁ ଜାହାରାଇଁ ପୁଞ୍ଜାମାଞ୍ଜେରି, ମା଼ମ୍ବୁ ମୀ ତା଼ଣା ୱା଼ହାମାନାୟି ଉଜେଏତାୟି ଆ଼ହା ହିଲେଏ; 
\v 2 \x + \xo ୨:୨ \xo*\xt କାମା ୧୬:୧୯-୨୪; \xt*\xt କାମା ୧୭:୧-୯\xt*\x*ସାମା ଏ଼ନିକିଁ ମୀରୁ ପୁଞ୍ଜାମାଞ୍ଜେରି, ମା଼ମ୍ବୁ ତେସଲନିକିତା ୱା଼ନି ନ଼କେଏ ପିଲିପିତା ହା଼ରେକା ଦୁକୁ କସ୍ତ ଅ଼ଡ଼େ ନିନ୍ଦା ବେଟାଆ଼ତି ଡା଼ୟୁ ମୀ ତା଼ଣା ଜୀୱୁତି ପିସାହାଁ ମାହାପୂରୁତି ନେହିଁ କାବ୍ରୁ ୱେ଼କ୍‌ହାଲି ତାକି ମା଼ ମାହାପୂରୁ ତଲେ ସା଼ସା ବେଟା ଆ଼ହାମାଚମି । 
\v 3 ଏ଼ନାଆଁତାକି ଇଚିହିଁ ମା଼ ୱେ଼କ୍‌ନି କାତା, ଲାଗେଏତାୟି କି ନା଼ଡ଼ିକିନି ଲେହେଁତାୟି ଆ଼ଏ । 
\v 4 ସାମା ମା଼ କେୟୁତା ନେହିଁ କାବ୍ରୁ ୱେ଼କ୍‌ନି ବ଼ଜୁ ହେର୍‌ପି ଆ଼ହାଲିତାକି ମା଼ର ଏ଼ନିକିଁ ମାହାପୂରୁତି ଅଦିକାରା ଜ଼ଗେ ଆ଼ହାମାନାୟି, ଏଲେକିହିଁଏ ମା଼ର ୱେ଼କ୍‌ହିମାନାୟି, ମା଼ ହିୟାଁତି ମାହାପୂରୁ ତାୟିପାରି କିନାସି, ମାଣ୍‌ସିଇଁ ରା଼ହାଁ କିହାଲିତାକି ଏ଼ଦାଆଁ କିଆନା ସାମା ମାହାପୂରୁଇଁ ରା଼ହାଁ କିହାଲିତାକି ଏ଼ଦାଆଁ କିହିମାନାୟି । 
\v 5 ମୀରୁ ନେହିଁକିଁ ପୁଞ୍ଜାମାଞ୍ଜେରି, ମା଼ମ୍ବୁ ଏଚେଲା ଜିକେଏ ନା଼ଡ଼ିକିନି ହା଼ଡାୟାଁ ତଲେ ୱେସାମାଞ୍ଜଅମି, କି ଜୂପ୍‌କା ଆ଼ନିଲେହେଁତି କାତା ୱେସାମାଞ୍ଜଅମି, ଏ଼ ବାରେତାକି ମାହାପୂରୁ ସା଼କି ମାନେସି । 
\v 6 ମା଼ମ୍ବୁ ଆମ୍ବାଆରି ତା଼ଣାଟି ଗାୱୁରମି ବେଟାଆ଼ହାଲି ଅଣ୍‌ପି ହିଲାଆତମି, ଆ଼ତିଜିକେଏ ମୀ ତା଼ଣାଟି କି ଏଟ୍‌କା ଆମ୍ବାଆରି ତା଼ଣାଟି ଆ଼ପେ ଆମିନି ମାଣ୍‌ସି ତା଼ଣାଟି ଗାୱୁରମି ବେଟାଆ଼ହାଲି ଅଣ୍‌ପାହିଲଅମି । 
\v 7 କ୍ରୀସ୍ତିତି ପାଣ୍ତ୍‌ୱିଆ଼ତି ସୀସୁୟାଁ ଲେହେଁ ମା଼ମ୍ବୁ ମୀ ତା଼ଣାଟି ଗାୱୁରମି ବେଟାଆ଼ହାଲି ଅଣ୍‌ପିତମିମା, ସାମା ତାଲି ଏ଼ନିକିହିଁ ଜାହାରା କକାରି ପ଼ଦାଁଣି ଜୀୱୁନ଼ହାଁନା ଜାତ୍‌ନୁ କିନେ ମା଼ମ୍ବୁ ଜିକେଏ ମିଙ୍ଗେ ଏଲେକିହିଁଏ ଜାତ୍‌ନୁ କିୟାତମି । 
\v 8 ଏଲେକିହିଁ ମିଙ୍ଗେତାକି ମା଼ ଜୀୱୁନ଼ନାୟି ମାନାକି, ମିଙ୍ଗେ ୱାର୍‌ଇ ମାହାପୂରୁତି ନେହିଁ ବ଼ଲୁତା ଆଣ୍ତ୍‌ୱି କିହାମାଞ୍ଜାଆତମି, ସାମା ମିଙ୍ଗେତାକି ଜାହାରାଇଁ ଦା଼ନା କିହାଲି ଜିକେଏ ମା଼ମ୍ବୁ ତିୟାରା ଆ଼ହାମାଚମି । ମୀରୁ ଏଚେକା ଜୀୱୁ ନ଼ନାତେରି ମାଚେରି । 
\v 9 ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ମ୍ବୁ କାମାଲ଼ଡ଼ା ଇଞ୍ଜାଁ ୱା଼ହୁ କାମା କିହାମାନାୟି ମୀ ଅଣ୍‌ପୁତା ମାନେ, ଏ଼ନିକିଁ ମା଼ମ୍ବୁ ଆମ୍ବାଆତେରି ମିଙ୍ଗେ ବ଼ଜୁଲେହେଁ ଆୟଅମି, ଈଦାଆଁତାକି ଲା଼ଆଁ ମାଦେନା ୱା଼ହୁ କାମା କିହାଁ ମାହାପୂରୁତି ନେହିଁ ବ଼ଲୁ ମୀ ତା଼ଣା ୱେ଼କ୍‌ହା ମାଚମି ।
\p
\v 10 ମାହାପୂରୁ ତା଼ଣା ନାମିନାତେରି ମୀରୁ, ମିଙ୍ଗେତାକି ମା଼ମ୍ବୁ ଏ଼ନିକିଁ ସୁଦୁ ତଲେ, ଦାର୍ମୁତଲେ, ଦ଼ହ ହିଲାଆଲେହେଁ ଲେ଼ମ୍ବାମାଞ୍ଜାତମି, ଏ଼ଦାଆଁ ମୀରୁ ଅ଼ଡ଼େ ମାହାପୂରୁ ସା଼କି । 
\v 11 ଅ଼ଡ଼େ ମୀରୁତ ପୁଞ୍ଜାମାଞ୍ଜେରି, ଆ଼ବା ଏ଼ନିକିଁ ଜାହାରା ମୀର୍‌କା ମା଼ସ୍‌କାଣି ଜା଼ପ୍‌ନେସି, ଏଲେକିହିଁଏ ମା଼ମ୍ବୁ ମୀ ବାରେଜା଼ଣା ତାକି ବୁଦିଜା଼ପ୍‌ହାଁ ଅ଼ଡ଼େ ରା଼ହାଁ କିହାଁ ରଣ୍ତିଏ ଅଣ୍‌ପୁ ତଲେ ବାତିମା଼ଲା ମାଞ୍ଜାତମି, 
\v 12 ଏ଼ନିକିଁ ମିଙ୍ଗେ ହା଼ଟାମାଞ୍ଜାନି ମାହାପୂରୁ ରା଼ଜିତି ଜ଼ଗେ ମାଣ୍‌କି ତଲେ ତା଼କିଦେରି, ଇଞ୍ଜାଁ ତାନି ଗାୱୁରମିତା ଆଣ୍ଡାଲି ଆ଼ଡିଦେରି ଇଞ୍ଜିଁ ବାତିମା଼ଲି ମାଞ୍ଜାନମି ।
\p
\v 13 ଅ଼ଡ଼େ ଈଦାଆଁତାକି ମା଼ମ୍ବୁ ଜିକେଏ ଜ଼ମାଆନା ମାହାପୂରୁଇଁ ଜହରା କିହିମାନମି, ଏଚିବେ଼ଲା ମୀରୁ ମା଼ମ୍ବୁ ୱେ଼କ୍‌ହାମାନି ମାହାପୂରୁତି ବ଼ଲୁ ଆବିତେରି, ଏଚିବେ଼ଲା ଏ଼ ବ଼ଲୁଇଁ ମାଣ୍‌ସିତି ବ଼ଲୁ ଲେହେଁ ଆବାଆନା ସାମା ମାହାପୂରୁତି ବ଼ଲୁଲେହେଁ ଆବାମାଚେରି, ଅ଼ଡ଼େ ସାତା ତଲେ ଏ଼ଦି ମାହାପୂରୁତି ବ଼ଲୁ, ଇଞ୍ଜାଁ ନାମିତାତେରି ମୀରୁ, ମୀ ହିୟାଁତା ଏ଼ଦି ଜିକେଏ କାମା କିହିମାନେ 
\v 14 \x + \xo ୨:୧୪ \xo*\xt କାମା ୧୭:୫\xt*\x*ଇଚିହିଁ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମୀରୁ କ୍ରୀସ୍ତ ଜୀସୁ ତା଼ଣା ମାନି ଜୀହୁଦା ଦେ଼ସାତି ମାହାପୂରୁ କୁଲମିତା ଏ଼ନିଆ଼ହିଁ ମାଚେରି ଏଲେ ଆ଼ହାମାଞ୍ଜେରି, ଏ଼ୱାରି ଜୀହୁଦିଙ୍ଗା ତା଼ଣାଟି ଆମିନି ଦୁକୁ ବେଟା ଆ଼ହାମାଚେରି, ମୀରୁ ଜିକେଏ ଜାହାରା କୂଡ଼ାତି ଲ଼କୁ ତା଼ଣାଟି ଏ଼ ବାରେ ଦୁକୁ ବେଟାଆ଼ହି ମାଞ୍ଜେରି । 
\v 15 \x + \xo ୨:୧୫ \xo*\xt କାମା ୯:୨୩,୨୯; ୧୩:୪୫,୫୦; ୧୪:୨,୫,୧୯; ୧୭:୫,୧୩; ୧୮:୧୨\xt*\x*ଏ଼ ଜୀହୁଦି ଲ଼କୁ ମା଼ ପ୍ରବୁ ଜୀସୁଇଁ ଅ଼ଡ଼େ ମାହାପୂରୁ ଅଣ୍‌ପୁତି ବ଼ଲୁ ୱେହ୍‌ନାରାଇଁ ପା଼ୟାମାଚେରି, ଅ଼ଡ଼େ ମାଙ୍ଗେୱା ସା଼ସ୍ତି କିୟାତେରି, ଏ଼ୱାରି ମାହାପୂରୁତି ରା଼ହାଁ ଗାଟାରି ଆ଼ଏ! ବାରେ ନ଼ର ନା଼ରିତି ସାତ୍ରୁୟାଁ । 
\v 16 ଇଚିହିଁ ଏଟ୍‌କା କୂଡ଼ାତାରି ଗେଲ୍‌ପି ଆ଼ହାଲିତାକି ଏ଼ୱାରିତା଼ଣା ମାଙ୍ଗେ ନେହିଁ କାବ୍ରୁ ୱେ଼କହାଲି ହୀହିମାଞ୍ଜାତେରି, ଇଞ୍ଜାଁ ଏ଼ୱାରି ପା଼ପୁତା ଜାହାରାଇଁ ନେଞ୍ଜିକିହାମାନେରି; ଏ଼ୱାରି ଲାକ ମାହାପୂରୁତି କାର୍‌ବି ନିଙ୍ଗିତେୟିଏ ।
\s ପା଼ୱୁଲ ଏ଼ୱାରିତା଼ଣା ଅ଼ଡ଼େ ୱେଣ୍ଡେ ବେ଼ଚି ହାଜାଲି ମ଼ନ କିନାୟି
\p
\v 17 ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ମ୍ବୁ ହିୟାଁତା ଆ଼ଏ, ସାମା ଆଙ୍ଗାତା ଗା଼ଡ଼େକା ତାକି ମୀ ତା଼ଣାଟି ଏଟ୍‌କା ଆ଼ହାମାନାକି ମୀ ମୂମ୍ବୁ ମେସାଲି ଗାଡି ପଣ୍‌ଙ୍ଗୁ ତଲେ ହା଼ରେକା ଅଣ୍‌ପାମାଚମି । 
\v 18 ଏ଼ଦାଆଁତାକି ମା଼ମ୍ବୁ ମୀ ତା଼ଣା ୱା଼ହାଲି ଅଣ୍‌ପାମାଚମି, ଏ଼ଦାଆଁ କିହାଁ ନା଼ନୁ ପା଼ୱୁଲ ର଼ ଦେବା, ହାଅ, ରୀ ଦେବା ୱାୟାଲି ଅଣ୍‌ପିମାଚେଏଁ, ସାମା ସୟତାନ ମାଙ୍ଗେ ୱାୟାଲି ହୀୟାଆତେ । 
\v 19 ଇଚିହିଁ ମା଼ ପ୍ରବୁ ଜୀସୁ ୱେଣ୍ଡାୱା଼ନି ଦିନା ତାନି ନ଼କିତା ମା଼ ବା଼ର୍ସୁ, ରା଼ହାଁ କି ଟ଼ପେରି ଏ଼ନାୟି ? ଏ଼ଦି କି ମୀରୁ ଆ଼ଏ ? 
\v 20 ମୀରୁ ମା଼ ରା଼ହାଁ ଅ଼ଡ଼େ ମା଼ ଗାୱୁରମି ଲେହେଁ ତାତେରି ।
\c 3
\p
\v 1 \x + \xo ୩:୧ \xo*\xt କାମା ୧୭:୧୫\xt*\x*ଏ଼ଦାଆଁତାକି ମା଼ମ୍ବୁ ଅ଼ର୍‌ହାଲି ଆ଼ଡାଆନା ଆତିନି ଗା଼ଡ଼ାତା ରଅତମି ଡ଼ୟାଲି ତୀରି କିତମି\f + \fr ୩:୧ \fr*\ft କାମା ୧୭:୧\ft*\f* । 
\v 2 ଇଞ୍ଜାଁ ମିଙ୍ଗେ ସୂସ୍ତି କିହାଲି ଅ଼ଡ଼େ ମୀ ନାମୁତା ମିଙ୍ଗେ ରା଼ହାଁ ହୀହାଲି କ୍ରୀସ୍ତତି ନେହିଁ କାବ୍ରୁତି କାମାତା ମାହାପୂରୁ ତଲେ ଆଣ୍ତାନା କାମା କିନି ମା଼ ତାୟି ତିମତିଇଁ ପାଣ୍ତାତମି । 
\v 3 ଏ଼ନିକିଁ ଆମ୍ବାଆରି ଈ ବାରେ କସ୍ତ ତାକି କିଲିବିଲି ଆ଼ଅରି, ମା଼ମ୍ବୁ ଏ଼ଦାଆଁତାକି ହେର୍‌ପି ଆ଼ହାମାଚମି ଇଞ୍ଜିଁ ମୀରୁଏ ପୁଞ୍ଜାମାଚେରି । 
\v 4 ଇଚିହିଁ ମାଙ୍ଗେ ନିନ୍ଦା କସ୍ତ ବେଟାଆ଼ହାଲି ଆ଼ନେ, ଈଦାଆଁ ମା଼ମ୍ବୁ ମୀ ତା଼ଣା ମାଚି ବେ଼ଲାତେଏ ମିଙ୍ଗେ ନ଼କେଏ ଏଚର ପା଼ଲି ୱେସାମାଞ୍ଜାତମି, ଇଞ୍ଜାଁ ସାତେଏ ଏଲେ ଆ଼ହାମାନେ, ଇଞ୍ଜିଁ ମୀରୁ ଏ଼ଦାଆଁ ପୁଞ୍ଜିମାଞ୍ଜେରି । 
\v 5 ଏ଼ଦାଆଁତାକି ଏଚେ଼ତା ତାୟିପାରି କିନାସି ମିଙ୍ଗେ ତାୟିପାରି କିୟାନେସି ଅ଼ଡ଼େ ମା଼ ୱା଼ହୁତି କାମା ଉଜେଏତାୟି ଆ଼ହାଡ଼ୟିନେ, ଈଦାଆଁ ଅଣ୍‌ପାନା ନା଼ନୁ ଜିକେଏ ଅ଼ର୍‌ହାଲି ଆ଼ଡାଆନା, ମୀ ନାମୁ ଏଚେକା ମାନେ ଇଞ୍ଜିଁ ପୁଞ୍ଜାଲି ତିମତିଇଁ ମୀ ତା଼ଣା ପାଣ୍ତାତେଏଁ । 
\v 6 \x + \xo ୩:୬ \xo*\xt କାମା ୧୮:୫\xt*\x*ସାମା ନୀଏଁ ତିମତି ମୀ ତା଼ଣାଟି ମା଼ ତା଼ଣା ୱେଣ୍ତା ୱା଼ହାନା ମୀ ନାମୁ ଅ଼ଡ଼େ ଜୀୱୁ ନ଼ନାଣି ରା଼ହାଁତି କାବ୍ରୁ ମାଙ୍ଗେ ୱେସାମାଞ୍ଜାନେସି, ମୀରୁ ମାଙ୍ଗେ ନେହିଁକିଁ ଅଣ୍‌ପିମାଞ୍ଜାଦେରି, ଅ଼ଡ଼େ ମା଼ମ୍ବୁ ମିଙ୍ଗ ଏଚେକା ମେସାଲି ଅଣ୍‌ପି ମାନମି, ମୀରୁ ଜିକେଏ ମାଙ୍ଗ ମେସାଲି ଏଚେକା ଅଣ୍‌ପି ମାଞ୍ଜାଦେରି, ଏଲେକିଁ ମାଙ୍ଗେ ନେହିଁ କାବ୍ରୁ ୱେସାମାଞ୍ଜାନେସି । 
\v 7 ଏ଼ଦାଆଁତାକି ଏ଼ ତାୟିୟାଁ, ମୀ ନାମୁଟି ମା଼ମ୍ବୁ ମା଼ ବାରେ ଦୁକୁ ଅ଼ଡ଼େ କସ୍ତତା ମୀ ତାକି ସା଼ସା ବେଟା ଆ଼ହାମାନମି । 
\v 8 ମା଼ମ୍ବୁ ନୀଏଁ ନୀଡାମାନମି ଆତିହିଁ ମୀରୁ ପ୍ରବୁ ତା଼ଣା ତୀରିଆ଼ହାଁ ମାଞ୍ଜୁ । 
\v 9 ହାଅ, ମା଼ମ୍ବୁ ମାହାପୂରୁ ନ଼କିତା ମୀ ତାକି ବେଟାଆ଼ହାମାନି ରା଼ହାଁତାକି ରା଼ହାଁ ଆ଼ହାମାନମି, ମା଼ମ୍ବୁ ଏ଼ନିକିଁ ୱେଣ୍ତେ ହୀନି ଦା଼ନା ଲେହେଁ, ମୀ ତାକି ମାହାପୂରୁଇଁ ଏ଼ନିକିଁ ଜହରା କିହାଲି ଆ଼ଡିନମି । 
\v 10 ମୀ ନାମୁତା ଏ଼ନାୟି ଲ଼ଡ଼ାମାନେ, ଏ଼ଦାଆଁ ମିଙ୍ଗେ କିହାଲି ଅ଼ଡ଼େ ମୀ ମୂମ୍ବୁ ମେସାଲି ଆ଼ଡିନମି ଏ଼ଦାଆଁତାକି ଲା଼ଆଁ ମାଦେନା ବାରେ ହିୟାଁ ତଲେ ବାତିମା଼ଲି ରୀସି ମାନମି ।
\p
\v 11 ମା଼ ଆ଼ବା ମାହାପୂରୁ ତା଼ନୁଏ ଅ଼ଡ଼େ ପ୍ରବୁ ଜୀସୁ ମାଙ୍ଗେ ମୀ ତା଼ଣା ୱାୟାଲି ତବେ ଜିରୁ ତ଼ସ୍ତାପେସି । 
\v 12 ଅ଼ଡ଼େ, ମା଼ମ୍ବୁ ମିଙ୍ଗେ ଜୀୱୁନ଼ହିଁ ମାଞ୍ଜାନି ଲେହେଁ ମୀରୁ ରଅତେରି ରଅଣାଇଁ ଜୀୱୁ ନ଼ୱିଆହିଁ ବାରେ ଲ଼କୁଇଁ ଜୀୱୁ ନ଼ୟାଁଲି ପ୍ରବୁ ମୀ ଜୀୱୁ ନ଼ନାଣି ଦିନାତାକି ଦିନା ପାଡି କିୟାପେସି । 
\v 13 ଏ଼ୱାସି ମୀ ହିୟାଁତି ସୂସ୍ତି କିୟାପେସି ଏଚିବେ଼ଲା ମା଼ ପ୍ରବୁ ଜୀସୁ ତାନି ଲ଼କୁତଲେ ୱେଣ୍ତା ୱା଼ନାଟି ମୀରୁ ମା଼ ଆ଼ବା ମାହାପୂରୁ ନ଼କିତା ଦ଼ହ ହିଲାଆନା ସୁଦୁ ଗାଟାତେରି ତ଼ଞ୍ଜା ଆ଼ଦେରି ।
\c 4
\s ମାହାପୂରୁ ରା଼ହାଁ ଆ଼ନିଲେହେଁ ନୀଡିନାୟି
\p
\v 1 ଏ଼ ମା଼ ତାୟିୟାଁତେରି, ମାହାପୂରୁଇଁ ରା଼ହାଁ କିୱି କିୟାଲି ଏ଼ନିକିଁ ନୀଡିନାୟି ମାନେ, ଏ଼ଦାଆଁ ମୀରୁ ମା଼ ତା଼ଣାଟି ଏ଼ନିକିଁ ଜା଼ପାମାଞ୍ଜେରି ଅ଼ଡ଼େ ଏଲେକିହିଁଏ ନୀଡାମାଞ୍ଜେରି, ସାମା ଏ଼ଦାଣିକିହାଁ ହା଼ରେକା ନେହିଁ କିୟାଲି ମା଼ମ୍ବୁ ପ୍ରବୁ ଜୀସୁ ଦ଼ରୁତଲେ ମିଙ୍ଗେ ହା଼ରେକା ବାତିମା଼ଲି ମାଞ୍ଜାନମି । 
\v 2 ଏ଼ନାଆଁତାକି ଇଚିହିଁ ମା଼ମ୍ବୁ ପ୍ରବୁ ଜୀସୁ ତା଼ଣାଟି ମିଙ୍ଗେ ଏ଼ନି ଏ଼ନି ହୁକୁମି ହୀହାମାଞ୍ଜାତମି ଏ଼ଦାଆଁ ମୀରୁ ପୁଞ୍ଜାମାଞ୍ଜେରି । 
\v 3 ମୀରୁ ସୁଦୁ ଗାଟାତେରି ଆ଼ହାଁ ମାଞ୍ଜୁ, ଈଦିଏ ମାହାପୂରୁତି ଅଣ୍‌ପୁ ତଲେ ମାଞ୍ଜୁ, ଅ଼ଡ଼େ ବାରେ ଲେହେଁତି ଦା଼ରିକାମାଟି ଏଟ୍‌କା ଆ଼ହାନା ମାଞ୍ଜୁ । 
\v 4 ମାହାପୂରୁଇଁ ପୁନାଆତି ଲ଼କୁ ଲେହେଁ ଆଙ୍ଗାତି ଜୂପ୍‌କାତି ଅଣ୍‌ପୁ ତଲେ ମାନାଆନା ମୀରୁ ରଅ ରଅତେରି ମୀ ମୀ ଡକ୍ରି ତଲେ ଲ଼କୁ କାନୁତା ସୁଦୁ ଅ଼ଡ଼େ ମା଼ନି ତଲେ ମାଞ୍ଜାଲି ପୁଞ୍ଜୁ । 
\v 5 ଇଞ୍ଜାଁ ମାହାପୂରୁଇଁ ପୁନାଆତି ଏଟ୍‌କା କୂଡ଼ାତି ଲ଼କୁ ଲେହେଁ ଆଙ୍ଗାତି ଅଣ୍‌ପୁ ତଲେ ମାନାଆନା । 
\v 6 ଏମ୍ବାଟିଏ ଈ ବାରେ କାତାତା ଆମ୍ବାଆସି ତାନି କ୍ରୀସ୍ତାନା ତାୟିଇଁ ଦ଼ହ କିଆପେସି, କି ନା଼ଡ଼ି କିଆପେସି, ଏ଼ନାଆଁତାକି ଇଚିହିଁ ପ୍ରବୁ ଏଲେ କିନାଣାଇଁ ଡଣ୍ତ ହୀନେସି ଇଞ୍ଜିଁ ମା଼ମ୍ବୁ ତଲିଏ ମିଙ୍ଗେ ୱେସାନା ଜାଗ୍ରାତା କିହାଁ ସା଼କି ହୀହାମାଞ୍ଜାତମି । 
\v 7 ଇଚିହିଁ ମାହାପୂରୁ ମାଙ୍ଗେ ପ଼ଲ୍‌ଆଗାଟି କାମାତା ନୀଡାଲି ଆ଼ଏ, ସାମା ସୁଦୁ ଗାଟାତାୟି ଆୟାଲି ଆ଼ଚାମାଞ୍ଜାନେସି । 
\v 8 ଏ଼ନାଆଁତାକି ଇଚିହିଁ ଆମ୍ବାଆସି ଈ ଜା଼ପ୍‌ନାଣି ଅ଼ପଅସି, ଏ଼ୱାସି ମାଣ୍‌ସିଇଁ ଆ଼ଏ, ସାମା ମିଙ୍ଗେ ମୀ ହିୟାଁତା ଆମିନି ମାହାପୂରୁ ସୁଦୁଜୀୱୁ ହୀହାମାଞ୍ଜାନେସି ଏ଼ୱାଣାଇଁ ଅ଼ପଅସି ।
\p
\v 9 ତାୟିୟାଁ ଅ଼ଡ଼େ ତାଙ୍ଗିସ୍କାଣି ଜୀୱୁ ନ଼ନାଣି ରା଼ଚାଲି ଲ଼ଡ଼ା ଆ଼ଏ, ଇଚିହିଁ ମୀରୁ ମୀରୁଏ ଜୀୱୁ ନ଼ୱିଆୟାଲି ମାହାପୂରୁ ତା଼ଣାଟି ଜା଼ପାମାଞ୍ଜେରି । 
\v 10 ଅ଼ଡ଼େ, ମୀରୁ ଏଲେକିହିଁଏ ମାକିଦନିୟାତା ମାନି ବାରେ କ୍ରୀସ୍ତାନା ତାୟିୟାଁ ଅ଼ଡ଼େ ତାଙ୍ଗିସ୍କାଣି ଜିକେଏ ଜୀୱୁ ନ଼ହିମାଞ୍ଜେରି । ସାମା ଆତିହିଁ ଜିକେଏ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମୀରୁ ଏ଼ନିକିଁ ଅ଼ଡ଼େ ଆଗାଡ଼ା କିହାଲି ରା଼ହାଁ କିଦେରି, 
\v 11 ଅ଼ଡ଼େ ମିଙ୍ଗେ ହୀପ୍‌କିଆ଼ହାମାନି ମା଼ ହୁକୁମି ଲେହେଁ ମୀରୁ ଏ଼ନିକିଁ ହିତ୍‌ଡ଼ି ତଲେ ନୀଡା ବାତ୍‌କିଦେରି, ଜାହାରା କାମାତା ହିକିଦେରି ଅ଼ଡ଼େ ଜାହାରା କେୟୁତଲେ କାମା କିହାଲି ପା଼ଡ଼ାଆ଼ତାୟି ଇଞ୍ଜିଁ ଅଣ୍‌ପାଦୁ, ଈଦାଆଁତାକି ମା଼ମ୍ବୁ ମିଙ୍ଗେ ବାତିମା଼ଲି ମାଞ୍ଜାନମି, 
\v 12 ଏ଼ନିକିଁ ପାଙ୍ଗାତି ଲ଼କୁତାକି ମୀରୁ ନେହିଁ ମାଣ୍‌କି ତ଼ହ୍‌ନାତେରି ଆ଼ଦେରି ଇଞ୍ଜାଁ ମିଙ୍ଗେ ଏ଼ନାୟି ଜିକେଏ କା଼ତାରା ଆୟେଏ ।
\s ପ୍ରବୁତି ୱେଣ୍ତା ୱା଼ନାୟି
\p
\v 13 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ବା଼ର୍ସୁ ହିଲାଆ ଏଟ୍‌କାତି ବାରେ ଲ଼କୁ ଲେହେଁ ମୀରୁ ଏ଼ନିକିଁ ଦୁକୁ ଗାଟାତେରି ଆ଼ଅତେରି, ଈଦାଆଁତାକି ହା଼ତାରି କାତାତି ମୀରୁ ପୁନାଆନା ମାଞ୍ଜୁ ଈଦି ମା଼ ଅଣ୍‌ପୁ ଆ଼ଏ । 
\v 14 ଏ଼ନାଆଁତାକି ଇଚିହିଁ ମା଼ର ନାମିନାୟି, ଜୀସୁ ହା଼ହାନା ୱେଣ୍ଡେ ନିଙ୍ଗାମାନେସି, ଆତିହିଁ ମାହାପୂରୁ ଜୀସୁ ତା଼ଣାଟି ହା଼ହାମାନି ଲ଼କୁଣି ଏଲେଆ଼ହିଁ ତାନିତଲେ ତାନେସି, ଈଦାଆଁ ଜିକେଏ ନାମିନାୟିମାନେ ।
\p
\v 15 \x + \xo ୪:୧୫ \xo*\xt ୧କର ୧୫:୫୧,୫୨\xt*\x*ମା଼ମ୍ବୁ ପ୍ରବୁତି ବ଼ଲୁଲେହେଁ ମିଙ୍ଗେ ଈଦାଆଁ ୱେସିମାଞ୍ଜାନମି, ମା଼ର ଏଚେକା ଲ଼କୁ ପ୍ରବୁତି ୱେଣ୍ଡେ ୱା଼ନି ଦିନା ପାତେକା ନୀଡାହାଁ ଡ଼ୟା ମାନାୟି, ମା଼ମ୍ବୁ ଏ଼ନିକିଁ ଜିକେଏ ହା଼ହାମାନି ଲ଼କୁତି ନ଼କିତା ହାଲଅମି । 
\v 16 ଏଚେଟିଏ ପ୍ରବୁତି କାଜା ଦୂତୁତି ହୁକୁମି ହୀହାମାନି ହା଼ଡା ଅ଼ଡ଼େ ମାହାପୂରୁତି ତୀତ୍ରି ମ଼ହ୍‌ରି ହା଼ଡାତଲେ ଲାକପୂରୁଟି ରେ଼ଚା ୱା଼ନେସି, ଇଞ୍ଜାହାଁ କ୍ରୀସ୍ତଇଁ ନାମାହାଁ ହା଼ହାମାନାରି ଏ଼ୱାରି ନ଼କେଏ ନିଙ୍ଗିନେରି; 
\v 17 ଅ଼ଡ଼େ ଡା଼ୟୁ ଏ଼ ଦିନା ନୀଡାମାନି ଲ଼କୁତାୟି ବାରେ, ଏ଼ୱାରିତଲେ ପ୍ରବୁଇଁ ବେଟାଆ଼ହାଲି ଦୂନ୍ଦ୍ରା ତଲେ ୱାର୍‌ଇ ହା଼ଗୁତା ଅ଼ୱିଆ଼ନାୟି ଏଲେକିହିଁଏ ମା଼ର ପ୍ରବୁ ତଲେ କା଼ଲାକା଼ଲା ତାକି ଡ଼ୟିନାୟି । 
\v 18 ଏ଼ନାଆଁତାକି ଇଚିହିଁ ଈ ବାରେ କାତା ଆସାନା ମୀରୁ ମୀରୁଏ ରଅତେରି ରଅଣାଇଁ ସା଼ସା ହୀୱି ଆ଼ଦୁ ।
\c 5
\s ପ୍ରବୁ ୱା଼ନି ଦିନାତାକି ଜାଗ୍ରାତା ଆ଼ନାୟି
\p
\v 1 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କା କା଼ଲା ଅ଼ଡ଼େ ତୀରି କିହାମାନି ବେ଼ଲାତି କାତା ମିଙ୍ଗେ ରା଼ଚାଲି ଲ଼ଡ଼ା ଆ଼ଏ, 
\v 2 \x + \xo ୫:୨ \xo*\xt ମାତି ୨୪:୪୩; ଲୂକ ୧୨:୩୯; ୨ପିତ ୩:୧୦\xt*\x*ଇଚିହିଁ ପ୍ରବୁ ୱା଼ନି ଦିନା ଲା଼ଆଁୟାଁ ଡଂଗେଏସି ୱା଼ନି ଲେହେଁ ୱା଼ନେ ଇଞ୍ଜିଁ ମୀରୁ ପୁଞ୍ଜାମାଞ୍ଜେରି । 
\v 3 ନୀଏଁ ବାରେୱାକି ହିତ୍‌ଡ଼ି ଇଞ୍ଜାଁ ଆଜି ହିଲେଏ ଇଞ୍ଜିଁ ଲ଼କୁ ୱେହ୍‌ନି ବେ଼ଲାତା ଦେବୁଣିଏ କକାରି ପ଼ଦା ଆ଼ନି ଇୟାନାକି ଲୁଞ୍ଜିନି ବୀସା ଲେହେଁ ଏ଼ୱାରାକି ନା଼ସା ୱା଼ନେ, ଅ଼ଡ଼େ ଏ଼ୱାରି ଏମ୍ବାଟି ଏ଼ନିଜିକେଏ ଗେଲ୍‌ପି ଆ଼ଅରି । 
\v 4 ସାମା ଏ଼ ତାୟିୟାଁତେରି ମୀରୁ ଆନ୍ଦେରିତା ହିଲଅତେରି, ଏ଼ ଦିନା ମୀରୁ ପୁନାଆରେ଼ଟୁ ଡଂଗେଏସି ୱା଼ନିଲେହେଁ ମୀରୁ କା଼ଚାହିଲାଆ ବେ଼ଲାତା ୱା଼ନେସି । 
\v 5 ମୀରୁ ବାରେଜା଼ଣା ଉଜେଡ଼ି ଅ଼ଡ଼େ ମାଦେନାତି ମୀର୍‌କା ଇଞ୍ଜାଁ ମା଼ସ୍‌କାତେରି, ମୀରୁ ଆନ୍ଦେରି ଅ଼ଡ଼େ ଲା଼ଆୟାଁତି ମୀର୍‌କା ମା଼ସ୍‌କାତେରି ଆ଼ଏ; 
\v 6 ଏ଼ଦାଆଁତାକି ୱା଼ଦୁ ମା଼ର ଏଟ୍‌କାତାରି ଲେହେଁ ଇଦା କିଆପ, ମା଼ର ଜାଗ୍ରାତା ଆ଼ହାଁ ସେତ୍‌ନା ତଲେ ଡ଼ୟିନ । 
\v 7 ଇଚିହିଁ ଆମ୍ବାଆରି ଇଦା କିନେରି, ଲା଼ଆଁୟାଁ ଇଦା କିନେରି, ଅ଼ଡ଼େ ଆମ୍ବାଆରି କା଼ଡ଼ୁ ହ଼ଚିନେରି ଲା଼ଆଁୟାଁ ହ଼ଚିନେରି, 
\v 8 \x + \xo ୫:୮ \xo*\xt ଏପିସି ୬:୧୩-୧୭\xt*\x*ସାମା ମା଼ର ମାଦେନାତି ମୀର୍‌କା ମା଼ସ୍‌କା ଆ଼ହାମାନାକି ଜୀୱୁ ନ଼ନି ଲେହେଁତି ନାମୁତି ବକ ପା଼ଟା ତୁର୍‌ହାଁ, ଗେଲ୍‌ପିଆ଼ନି ବା଼ର୍ସୁତି ଟ଼ପେରି ତା଼ର୍ୟୁଁତି ତୁର୍‌ହାଁ ଜାଗ୍ରାତା ତଲେ ଡ଼ୟିନ । 
\v 9 ମାହାପୂରୁ ମାଙ୍ଗେ ତାନି କାର୍‌ବି ତାକି ଡଣ୍ତ ହିୟାଲି ଆ଼ଏ, ସାମା ମା଼ ପ୍ରବୁ ଜୀସୁ କ୍ରୀସ୍ତ ତା଼ଣାଟି ଗେଲ୍‌ପିଆୟାଲି ଆ଼ଚାମାଞ୍ଜାନେସି । 
\v 10 ଏ଼ୱାସି ମା଼ ତାକି ହା଼ତେସି, ମା଼ର ହା଼ତିହିଁ କି ଜୀୱୁତଲେ ମାଚିହିଁ ମା଼ର ଏ଼ନିକିଁ ଏ଼ୱାଣିତଲେ ନୀଡିନାୟି । 
\v 11 ଏ଼ଦାଆଁତାକି ନୀଏଁ କିହିମାନି ଲେହେଁ, ମୀରୁ ରଅତେରି ରଅଣାଇଁ ସା଼ସା ଅ଼ଡ଼େ ସା଼ୟେମି କିୱିଆ଼ଦୁ ।
\s ଜା଼ପ୍‌ନାୟି ଅ଼ଡ଼େ ଜହରା କିହାଁ ଆ଼କୁତି ରା଼ପ୍‌ନାୟି
\p
\v 12 ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ମ୍ବୁ ମିଙ୍ଗେ ବାତିମା଼ଲି ମାଞ୍ଜାନମି, ଆମ୍ବାଆରି ମୀ ତା଼ଣା ୱା଼ହୁତଲେ କାମା କିନେରି ଇଞ୍ଜାଁ ପ୍ରବୁତି କାମାତା ମୀ ସା଼ଲୱି କିନାରି ଲେହେଁ ମିଙ୍ଗେ ସେତ୍‌ନା ହିୟାନେରି, ଏ଼ୱାରାଇଁ ମା଼ନୱି ଆ଼ଦୁ, 
\v 13 ଅ଼ଡ଼େ ଏ଼ୱାରି ମୀ ତା଼ଣା କିହିମାନି କାମାତାକି ଏ଼ୱାରାଇଁ ହା଼ରେକା ଜୀୱୁନ଼ଦୁ । ମୀରୁ ମୀରୁଏ ହିତ୍‌ଡ଼ି ତଲେ ମାଞ୍ଜୁ ।
\p
\v 14 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମିଙ୍ଗେ ବାତିମା଼ଲି ମାଞ୍ଜାନମି ନିସ୍ତା ଗାଟାରାଇଁ ଜାଗ୍ରାତା କିଦୁ, ଆଜି ଗାଟାରାଇଁ ସା଼ସା ହୀଦୁ, ବା଼ଡ଼୍‌ୟୁ ହିଲାଆଗାଟାରାଇଁ ସା଼ୟେମି କିଦୁ, ଅ଼ଡ଼େ ବାରେଜା଼ଣା ତାକି ସୁଦୁ ଗାଟାତେରି ଆ଼ଦୁ, 
\v 15 ଜାଗ୍ରାତା ଆ଼ଦୁ ଲାଗେଏ କିୟାତାଣାଇଁ ୱେଣ୍ତେ ଲାଗେଏ କିଆଦୁ, ସାମା ବାରେବେ଼ଲା ମୀରୁ ମୀରୁଏ ରଅତେରି ରଅଣାକି ଅ଼ଡ଼େ ବାରେ ଲ଼କୁତାକି ନେହିଁ କିୟାଲି ଅଣ୍‌ପେମାଞ୍ଜୁ ।
\p
\v 16 ବାରେବେ଼ଲା ରା଼ହାଁ ଆ଼ଦୁ । 
\v 17 କା଼ଲେଏ ପ୍ରା଼ତାନା କିହେ ମାଞ୍ଜୁ । 
\v 18 ମୀରୁ ଏ଼ନିଆ଼ହିଁ ମାଚିହିଁ ଜିକେଏ ମାହାପୂରୁଇଁ ଜହରା କିଦୁ, ଇଚିହିଁ ମୀରୁ କ୍ରୀସ୍ତ ଜୀସୁ ତା଼ଣା ଆଣ୍ତାନା ଏଲେକିହିଁଏ ନୀଡାନା ମାଞ୍ଜୁ ଇଞ୍ଜିଁ ମାହାପୂରୁତି ଅଣ୍‌ପୁ ।
\p
\v 19 ମାହାପୂରୁତି ଜୀୱୁଇଁ ଆ଼ଂଗାଆଦୁ; 
\v 20 ମାହାପୂରୁ ବ଼ଲୁ ୱେହ୍‌ନାଣି ଉଜେଏ ଇଞ୍ଜିଁ ଇନାଆଦୁ । 
\v 21 ବାରେ ତାୟିପାରି କିହାନା ଏ଼ନାୟି ନେହାୟି ଏ଼ଦାଆଁ ଆହ୍‌ଦୁ । 
\v 22 ବାରେ ପ଼ଲ୍‌ଆ ତା଼ଣାଟି ଏଟ୍‌କା ଆ଼ଦୁ ।
\p
\v 23 ହିତ୍‌ଡ଼ି ହୀନି ମାହାପୂରୁ ମିଙ୍ଗେ ବାରେ ୱାକିଟି ସୁଦୁ ଗାଟାତେରି କିୟାପେସି, ମୀ ଜୀୱୁ, ପୂଣ୍ତା, ଅ଼ଡ଼େ ମୀ ଆଙ୍ଗା ବାରେତି ମା଼ ପ୍ରବୁ ଜୀସୁ କ୍ରୀସ୍ତ ୱା଼ନି ପାତେକା ଦ଼ହ ହିଲାଆଗାଟାୟି ଆ଼ହା ମାଞ୍ଜାଲି ହିୟାପେସି । 
\v 24 ଆମ୍ବାଆସି ମିଙ୍ଗେ ଆ଼ଚାମାଞ୍ଜାନେସି ଏ଼ୱାସି ଟିକାଣା ଗାଟାସି ଏ଼ୱାସି ଈ ବାରେ କିନେସି ।
\p
\v 25 ଏ଼ ତାୟିୟାଁ ମାଙ୍ଗେତାକି ପ୍ରା଼ତାନା କିଦୁ ।
\p
\v 26 ବାରେ ତାୟିୟାଁଇଁ ସୁଦୁଜୀୱୁଟି ନଣ୍ତିନି ଲେହେଁ ବାରେଜା଼ଣାତି ଜହରା କିଦୁ ।
\p
\v 27 ବାରେ ତାୟିୟାଁ ନ଼କିତା ଈ ଆ଼କୁ ପ଼ଡ଼ୱି ଆ଼ହାଲିତାକି ନା଼ନୁ ପ୍ରବୁତି ଦ଼ରୁତଲେ ମିଙ୍ଗେ ପାର୍‌ମାଣା କିହିମାଞ୍ଜାଇଁ । 
\v 28 ମା଼ ପ୍ରବୁ ଜୀସୁ କ୍ରୀସ୍ତତି କାର୍ମାମେହ୍‌ନାୟି ମିଙ୍ଗେ ଆୟାପେ ।