\id TIT - Kwanga NT -Papua New Guinea 1992 (DBL 2014) 
\h Taitas 
\toc1 Pol To Taitas Ni Rumbwero Chengi 
\toc2 Taitas 
\toc3 Tai 
\mt1 Pol To Taitas Ni Rumbwero Chengi  
\c 1  
\p
\v 1 Ani Pol, ani Gotri tau ra himache, Jisas Kurais himache. Woro Gotri rihi nasiro ri himiyama hurahama le wui sembe ha sumbu tini wunu ani okulawa Gotri mwanji mwe naha ti wu hambwasini Gotri sumbu tini wu sirinanda kinani o tau ki ri ani ondiyasini rumbwero.  
\v 2 Ani a randau tau mwe ti ele sembe haro himako i wui sembe tini wunu ani okulandau ti, wu eripeꞌaripendani ete da ete da himamwale kipe tini wu nikisinda ki. Woro mwanji gambonda nambwe Gotri mwaꞌambweche fori ri wosi nambwe ri daro gisi ki imbihumbwa kapwa ka himamwale ako nunu ri ha kinani ri bwasiro.  
\v 3 Wosini dani ini o imbihumbwa ri bwasiro gisi hinga naha tawani hima fwele ri mwanji ti wu bwa kinani ri ondiyasiwani yanisini daro mwanji mwe oti amwei ya sukwa. Woro nunu ri ai ratandau hima, Gotri, o sumbu hinga a wosi kinani ani ni ri ondiyasiwani ani o ri sawendiri mwanji ni a sirinani do ri mwanji ti a bwandau.   
\p
\v 4 Ai che, Taitas, dohaꞌa chengi mini ni a kaindau. Mini ai che mwe naha, hinde wowani mini nui sembe ha sumbu hingambwa naha mini ki dau. Nui Yapai Gotri ga nunu ai ratandau hima ri, Kurais Jisas, ga findo mini keke woni sembe wahapi sumbu ti o mini fi hakonda.   
\p
\v 5 E, Kirit ko ki mini ani hanjaꞌaisiwani mi dau ti, ele tau tipa ete dau ni mi ai wonorukweni mi ra ra, o imbihumbwa mini a sawero hinga ele ko hinga tinda wunu ki dau sios leni auli ki sios mekupu hima le ma wunu esisi.  
\v 6 Woro hima mwe ri, rini ele himiyama hurahama i nindo tiki kapwa sumbu fori wosinda nambwe hima, rini humwe funda naha, e, ri che le Kurais ni sembe haro hima hinga sa wu dawa hima le wunu heiwa ele kapwa sumbu ga nuwai yapai mwanji tini sawesiyaꞌai sumbu ga wu wosinda hinga. O ri hima hinga rini sios mekupu hima hinga ya ma rini esisi.  
\v 7 Woro ka mi hambwanda, e, sios auli hima ri rini Gotri tau tini aulindau hima. O keke ri ichiꞌucha numbo ti kipe naha tumbwa sa ri ichiꞌuchandawa apa ele himiyama hurahama o hingambwa sa rini wu hei. Rini apa mwanji yetupwasi hima hinga ri da hinga. Rini apa sembe enge a sumbu ti rini ki metengei sukwa hinga. Rini apa uku sumbwe ti ri asini ambwatinambwati hinga. Hima fwelenga anangiyani wunu ye hinga. E, rini ya miyafo ri toro ki apa ri okokonanda hinga.  
\v 8 Mina. Rini ele biya ko sumbwe ki taro hima leni rakaruni sa wunu ri enependa. Rini ele sumbu kipe naha tini sirinandau sumbu tini sa ri okokonandani ele sumbu kipe hinga ya sa ri wosinda. Rini kipe naha naha ki sa ri dasini Gotri sumbu tumbwa sa ri sirinanda. Wondani ele ri hima tape okokona norukwenahani sa ri aulini da.  
\v 9 Wondani kale mwanji mwe naha rini wu ondiyakandiyandaro mwanji ti sa ri toronambusi. Wosini apa ele hima i sembe ha sumbu ti o mwanji mwe naha ri mendindaro ki sa wunu ri okulanda. Wondani Gotri mwanji ni gumwa sisini sawesiyaꞌaindau himako ni mwanji kwambu tiki wunu sawewa apa o wui kapwa sumbu keke huruhumba ti sa wu a.   
\s1 Kirit mapwa ki mwanji gambo hima le miyafo naha dau  
\p
\v 10 Hinde wowani, Gotri mwanji ni sawesiyaꞌaindau hima le miyafo naha wu dau. Wosini ahirahi mwe nambwe mwanji fweleni wu bwandani hima lei inaka tini wu yeni rasaini wunu gambondau. Woro ele hima miyafo wunu hima tape kupu tini kutoro hima lei wui hima kupu.  
\v 11 Ete na hima miya hinga le wunu hima lei ya tini wu raꞌai kinani Gotri nu bwa ki nunu ohouna nambwe mwanji leni o wunu ondiyakandiyanda. O sumbu hinga wu wosikoni hima fweleni, e, wui hima kupu le okwe, walambe naha wunu indau. O keke ete na hima miya hinga ti wu tani mwanji ti wu bwawa ma wunu sawewa sa gaina.  
\v 12 Imbihumbwa wui gotri mwanji bwarakarandaro Kirit pe hima fori ka hinga ri sawero: “Kirit pe hima le wunu mwanji gambo hima tiya naha lembwa. Wunu fuku pe kapwa omwe hinga naha. Wunu ahirahi tini mama ti wu a a nimba wu hamumbwamundau hima tiya.”  
\v 13 Woro do mwanji oti mwe naha. O keke wui sembe ha sumbu tini mi wonorukwe ki mwanji ti kwambu naha tiki ma wunu sawewa wui sumbu tini sa wu hambwa.  
\v 14 Wondawa wunu apa gamindache nani Juta hima kupu lei atei mwanji ba fo ba fwelenga wui sawendiri mwanji lenga wasamba wuhi ti hinde apa wu owe kumbwa. Hinde wowani, ele mwanji hinga wu bwandau ti, Gotri mwanji mwe naha tini gumwa sindau hima le ele to bwandau.   
\p
\v 15 E, sembe wuhi ti halayanahasini dau hima le, wui sumbu ti tinda ete kipe naha tumbwa. Woro Kurais ni sembe ha nambwe sembe kisi tinga dau hima le, ele sumbu wuhi tinda ete kipe mina, kapwa naha tumbwa. Hinde wowani, wui inaka tinga wui sembe tinga funda ete hundusini kapwa naha ki ya ete dau.  
\v 16 Wosiwani wui takisopo ki ka hinga ya wu sawe: “Ani Gotri ani hambwandau.” Wosini wui ichiꞌucha to Gotri ni gumwa ti ya wu sindau. Wunu Gotri miyaningisopo ki kapwa naha, Gotri mwanji ni yetupwani sirinanda nambwe hima tiya, e, sumbu kipe foti wu wosino kwambuche foti wunu ki da nambwe.   
\c 2  
\s1 Mekupu tiro hima lei wui mwanji  
\p
\v 1 Woro mini Gotri hima kipe naha le mini wu ondiyakandiyaro mwanji ni mi sirinani ele himiyama hurahama ni ma ondiyakandiyanda. Wondani ka hinga ma wunu sawe:  
\v 2 Ele mekupu tiro hima le apa uku sumbwe asini ambwatinambwati hinga. Wunu ele sumbu kipe tumbwa inaka wuhi ki sa wu hambwandani wui inaka tini sa wu aulinda. Wunu sembe ha sumbu wuhi ni kipe tumbwa hima leni sa wu bwandani, hima keke norukweni sa wu wondani ele nomo hinga wunu ki sukwawa kwambu tiki wu etino bomo tini kipe naha sa wu hambwanda.   
\p
\v 3 Wondawa ele mekupu tiro humwe le okwe wunu kipe naha ki halayasini ya sa wu ichiꞌuchanda. Apa hima forini gumwa tokwe mwanji wu bwa ki. Apa waini uku tito inaka wuhi ti wunu aulisi ki. Wunu ondiyakandiyandau hima hinga sa wu dasini sumbu kipe tini ele biya humwe samba hinga leni sa wunu ondiyakandiyanda.  
\v 4 Wondawa wunu wui hurache lenga wui che lenga mwe naha wunu keke sa wu wo.  
\v 5 Wosini wui hima tape okokona ti sa wu aulindani kipe naha halayasini ya sa wu da. Wondani wui aka ti norukweni sa wu aulindani wui che hurache sa wu norukweni okulanda. Wondani wui hurache lei tako tokwe sa wu da. Wunu o sumbu hinga tini sa wu wosindawa, apa ele hima le wunu keke Gotri mwanji kipe tini hinde wu saweholiya kumbwa.   
\s1 Hima wapa lei wui mwanji  
\p
\v 6 Woro ele hima wapa leni o mwanji hingambwa ma wunu sawewa, wui hima tape okokona ti sa wu aulini da.  
\v 7 Ele sumbu hinga mi wosindau ti, mini himamwale hinga ma dawa, mini ni sa wu hei hei ele hima ele sumbu kipe hinga tinda ya sa wu sirinanda. E, apa kapwa mwanjiche foringa anarasini walambe wunu ondiyakandiya kei. Mini sumbu kipe naha tumbwa mi inaka ki ma hambwanahasini wunu ondiyakandiyanda.  
\v 8 Wondani mini mwanji kipe tumbwa ma bwandawa hima le mwanji mini saweno sumbu sa wu hanjaꞌai. Wondawa ele nui miho hima le apa kapwa mwanjiche fori hinde nunu wu bwa kumbwa, mina. Kapwa mwanji ti nunu wu bwakoni apa huruhumba ti wu hei sindau.   
\s1 Tau ra himache lei wui mwanji  
\p
\v 9 Hima i tako tokwe dau tau ra himache leni ka hinga ma wunu sawe: Wunu ele tau hinga wu ra kinawa, wunu aulindau hima lei tako tokwe ya sa wu da. Wondani ele wunu aulindau hima le wu okokonandau tau hinga ya sa wu randa. Apa wunu aulindau hima leni kapwa mwanji wasa wunu sawe kei.  
\v 10 Apa wui mwaꞌambwe tipache fwele hili ti wu ya kei. Mina. Wunu wui mwanji naha tumbwa kipe naha sa wu sirinandawa, apa wunu aulindau hima le sembe kipe ti sa wu hambwanda. Wondawa nunu ai ratandau hima ri, Gotri, ri mwanji kipe ti ele hima ni nu bwandau ti, ele wui sumbu kipe keke hima le o Gotri mwanji ni wu okokonakonda.   
\s1 Kipe naha ki halayasini nu dani Kurais tano gisi rihi tini nu nikisinda  
\p
\v 11 Hinde wowani, ka nu hambwasinda, Gotri ele hima hinga tinda ai wunu ratano hima keke wo sumbu rihi ti amwei ka ya sirasinda.  
\v 12 Woro ka Gotri hima keke wo sumbu rihi to ka hinga nunu ondiyakandiyasinda: Gotri ni gumwa sindau sumbu ti, e, hima tape okokona tinga nuwe pe sumbu tinga sirinano sumbu ti nu hanjaꞌaisini, do nu dau gisi hinga ki Gotri numbo kipe tumbwa nu hambwani norukweni nu ichiꞌuchandani Gotri sumbu kipe tini nu sirinanda ki.  
\v 13 Ka Gotri hima keke wo sumbu to nunu ondiyakandiyandawani, sembe ha sumbu ti kwambu tiki nu etisini, ka eripeꞌaripe nu torokondau gisi ti, nu nikisindau. Mwe naha to sa, nui Apukolaka Gotri, nunu ai ratandau hima ri, Jisas Kurais, kaꞌapwe kipe tinga Gotri hi okundau tinga ri soꞌoisini amwei ri sirano tini nu nikisindau.  
\v 14 Kurais rinjenga ri hima tape ti nunu keke ri ohumbwero ti, rini ele nui kapwa sumbu tinda ete ri rani ri rumbwewa nunu ri himiyama hurahama minde hinga halaya naha nu sirasini, ele sumbu kipe le keke nu woni ele ni nu sirinanda ki.   
\p
\v 15 Gisi gisi mini ele himiyama hurahama ni dele mwanji numbwa ma ete wunu sawenda. Gotri mini haro kwambu mi torosini wui sembe tini ma yeni rasaiwa ele mwanji ni sa wu sirinanda. Woro mi mwanji ni mendini sirinanda nambwe hima leni ma ai kwambu ki sawendiriwa wunu okwe sa wu sirina. Apa hima fori mini rakai ki, mina.   
\c 3  
\s1 Sumbu kipe ki kwambu naha ki ma etiwa nu eti  
\p
\v 1 Mini ele himiyama hurahama i inaka tini ma wunu yeni rasaindawa wunu gapiman tako tokwe sa wu dasini, ele gapiman tau ra himache lei wui mwanji ti wu mendini sa wu sirinanda. Wondani wunu ele sumbu kipe ni wu wosi ki sa wu otokunanda.  
\v 2 Apa wunu hima forini kapwa mwanji ti wu bwani wu anangiya ki. Wunu wapi hima naha wu dasini ele hima ni mwanji ti awari naha sa wu bwanda.   
\p
\v 3 Mi hambwandau, injelembwa nunu okwe inaka kipe fo nunu ki da nambwe dawani, ri mwanji ti nu sawesiyaꞌaindawani Saiten nunu gambondawani nu ambwatinambwatindani ele sumbu hinga nu wosindaro. Ele hima tape okokona sumbu ga au sai sumbu ga nunu aulindawani ele sumbu ni ete nu sirinandaro. E, ele biya hima ni sembe amwaka nu a a, wui mwaꞌambwe ni funda nu okokonandani nu indaro. Ele hima nunu wu omwemendindawani, nunu okwe nunjenga nu ai wunu nu omwemendindaro.   
\p
\v 4 Wondawani nunu ai ratandau Gotri ri hima keke wo sumbu ga hima ni okokonandau sumbu rihi ga amwei sirakoni ya nunu ri ai ri rata.  
\v 5 Do nunu ri ai rataro ti, nui sumbu kipe ti keke nunu ri rata nambwe. Minambwe naha. Ri hima keke wo sumbu ki nunu ri ai rataro. Wosini uku ti nunu ri yasisiwani che ako hinga nu sirawani ri Himamwale kipe to himamwale ako ti ya nunu ri ha.  
\v 6 Woro Gotri do Himamwale rihi ti nunu ai ratandau hima ri Jisas Kurais ri tau ki omwesika naha ri dawehenasiwani nunu ga ya da.  
\v 7 O sumbu hinga ri wosisini Kurais nunu keke woro sumbu ki hima kipe naha nunu ri nasini ka ri ete da ete da himamwale ako nu toro ki nunu ri ondiyasiro ti, nunu o tini nu toro ki sembe ti nu hasini nu nikisindani nu da ki.   
\p
\v 8 Woro do mwanji mwe naha, ani ai okokona ti dele mwanji ni numbo miyafo kwambu ki ku sawewa ele Gotri ni sembe haro hima sa tani o mwanji ni inaka tiki wu owesini wu hambwafwaꞌaisini sumbu kipe tumbwa sa wu wosindani wu sirinanda. Hinde wowani, dele mwanji hima leni mwe naha okulandau.   
\p
\v 9 Woro ambwatinambwatini hima lenga anambwandau sumbu ti, ele atei hima hi miyafo kairo chengi keke mwanji leki anayendau sumbu ti, anangiya ti, Gotri lo mwanji ti keke mwanji leki anayendau sumbu ti, ele sumbu hinga ni funda hambwafwaꞌaisini ratako. Mi hambwandau, o sumbu hinga to hinde apa mini okulawa sumbu kipe tini mi sirina kumbwa.   
\p
\v 10 Sios hima leni huwa ki randau hima fori mi heiwa metengei autangi mwanji ma rini sawe. E, ri mendi nambwe nawa numbo fonga ma ai rini autangi. Wosiwa mini ri mendini sirina nambwe ti nawa, gumwa ti ma rini sisiwa hoko ki sa ri raru.  
\v 11 Mi hambwandau hinga, ete na hima miya hinga ti numbo kipe ti ri hanjaꞌaiwani ri kapwa sumbu tito walambe rini ihiro.   
\s1 Mwanji tipa fo  
\p
\v 12 Ichai Atemas hima pi Tikikas fini forini mini tambwa a rumbwewa ri iwa ma huwainani tani Nikopolis ko ki ani hei. Hinde wowani, ausuwa omwesika sindani fwa ti imbikiꞌembekindau gisi leki ani apa Nikopolis ko ki a da ki anjenga ai inaka ki ba bwani ani injisindau.  
\v 13 Woro mi hambwanahasini ka lo mwanji ki tau randau hima ri, Sinas, rini ga Apolos ga Gotri tau keke numbo ki fi ini fi ratorondau mwaꞌambwe leni mi hambwafwaꞌaisini ma fini okulanda, wosiwa fi ini numbo tiki mwaꞌambwe fweleni hinde fi heifu kumbwa.   
\p
\v 14 E, ele sembe haro himiyama hurahama le ma wunu ondiyakandiyawa, kwambu tiki wu etisini tau kipe le wu ra ki au wunu saini ele mwaꞌambwe heifundau hima leni wu okulano sumbu ti, kipe naha sa wu hambwa. Apa nimba tauwofu wu dasini ahirahi mwe wunu ki sukwa nambwe wu da ki.   
\p
\v 15 E, ani ga dau hima le tinda ete o mini wu weseꞌanda. Nunu ga ka sembe ha sumbu funda sirinandau nui nau leni nui weseꞌa ti ma wunu sawe.  
\p Gotri hima keke woni hima okulandau sumbu ti kunu ga ya o ete da.