\id PHP - Awa NT -Colombia, Ecuador 2009 (DBL -2013) 
\h Filipenses 
\toc1 Filipenses San Pablone An Pɨnkɨh Para 
\toc2 Filipenses 
\toc3 Flp 
\mt1 Filipenses 
\mt2 San Pablone An Pɨnkɨh Para 
\ip Macedonia suwara ɨmtuasmin, San Pablone Filipos pɨpulukin an ñancha Cristora nɨjkulturuza wanmakninnara. Pablo kajchira sɨptɨt akwa, usne usparuza an pɨnkɨh pamtu, usparuza panashimtu akwa. Cristora nɨjkulturuza “aishtaish” kiznamtu, ussa kiwainapa, pial ussa mɨlaarɨt akwa. Uskas uspa akwa tayaltu, kwail kamtamtuz sun pɨpulura ɨara akwa. Katmizna usne kurunnamtu, Diosta kanpaanapa, tɨnta namaanapa, mama Cristora an nɨjkulaanapa. 
\ip Kakishapu kiznarawane (1.1-11), Pablone usparuzpa Diosta “aishtaish” kiztu, sun Filipos pɨpulura uztuz Cristora nɨjkulamtu akwa. Suasne usne usparuza us maztu aizpa kainanamtu, us kajchira sɨptɨt akwa. Pablo Cristokasa wanmaktɨtkas, usne Cristo akwa inapain i. Ka kiztu: “na uztane, Cristo akwa uznash; na irane, chiyura kana kinash” (1.12-21). Usne Filipos pɨpulura uztuza kurunnamtu, Cristora mama nɨjkulanapa, tɨnta namanapa, Cristo uztakana uzanapa (1.27–2.18). Suasne Pablone paiña kiwaintuzpa, Timoteowakas Epafroditowakas, panamtu (2.29-30). 
\ip Mamasa usne “nane wat min ish” kaiznamtu, Cristora wanmaltɨt akwa, Cristo ussa nil awakana namtɨt akwa. Us Cristora nɨjkultɨt akwa, Diosne ussa chiyura mɨlshina. Suasne Pablone usparuza kurunnamtu, Jesucristo akwa wat kulanapa, us kamtamtu aizpa kianapa (cap. 4). 
\c 1  
\s1 Kakishapu 
\p  
\v 1 Pablokas Timoteokas Jesucritora kiwainmumika mai. Aune “kakishapu” u Jesucristora piantuza Filipos pɨpulura kaiztuas. Wanmakmukin ɨnintuzakas “kakishapu” kiztuas. Mamaz wanmakmukin kiwaintuzakas “kakishapu” kiztuas. 
\p  
\v 2 Au Taitta Dioskas au Anpat Jesucristokas uruza wat kiwainnashimtu, ayukta minñat kit watmin uzanapa. 
\s1 Pablone Diosta paikumtu nɨjkulturuz akwa 
\p  
\v 3 Uruza nɨjkulnakane, Diosta aishtaish kiztus.  
\v 4 U akwa paikumtune, nane wat kul kit paikumtus.  
\v 5 Au paasne sulmin Dios watsal pit kainammtuas, an ñakis makima.  
\v 6 Jesucristora nɨjkularasmin, Diosne u akwa wat kimɨzta. Usne uruza wat kirɨt aizpa an kimɨznazi, Jesucristo kailtu payukima.  
\v 7 Uruza watmin min kit panashimtus, u nakasa Dios watsal pit kainana masara akwa. Diosne aumɨza wat min kit kiwainta. Kajchira wakas, ɨninmikara iztakin purakas, nane Dios wat pit parat kit nil kainananash.  
\v 8 Diosne na uruza kwisha pashinamtu pian, Jesucristo uruza pashinamtakanain.  
\v 9 Diosta paikukane, nane paikumtus mamaztuza an akwan pashiamɨznapa, Diosta an piankam kit an nilmin minñanapa,  
\v 10 an nil aizpa naanapa. Sunkana kiarane, pailta payu wat uzarane, une kwail kiamanazi. Mɨnminkas uruza Dios iztakin kwail patkulmanazi, Cristo kailtu payu taizkane.  
\v 11 Jesucristone uruza kiwainnanazi, nil chaanapa, wat kianapa, awa Diosta kwisha wari kizanapa. 
\s1 Nane Cristo uztakana uzshimtus 
\p  
\v 12 Cristora piantuz, na kaiztu aizpa mɨrain. Wan nawa kiarɨt aizpa akwa, mamaztuzne an awaruza kamtanara, Dios watsal pit mɨanapa.  
\v 13 Sunkana apain wan katsa suldaruruza ɨninturuzkas mamaztuzkas na kajchira wara pianmai, na Cristora kanpara akwa.  
\v 14 Na kajchira wa izarawane, an akwan Cristora piantuzne au Anpatta pashiat kit Dios pit an tɨnta kwinta kiara, ishkwatchin. 
\p  
\v 15 Watcha i. Mɨnpazhane Cristowa ñanta kamtaamtu, na kimtu aizpa wat chi minñamtu akwa, nawa aliz kulamtu akwa. Diosta pashimtuasmin, mamaztuzne Cristowa anza wat kainanamtu.  
\v 16 Pashiamtu akwa, Cristowa kamtaamtu. Na kit aizpa pianmai. Kajchira wakas, nane Dios watsal pit ɨninturuza nil kainananash.  
\v 17 An ñancharuzne uspain minñat kit nawa kwail minñamtu, Cristora wat piantuchi akwa. Na kajchira warɨt akwa, uspane nawa an naizninñamtu.  
\v 18 Paas pit pararakas, nawa kwail minñarakas, watcha minñarakas, uspa kaizamtu aizpa mɨmtuchi ish. Uspa chiwazha kizamtuasmin, Cristowa pit kaizamtu. Sun akwa watsal kultus. 
\p  
\v 19 Watcha, nane anza wat kulmɨznash. Nane na akwa watmin puztɨnazi mintus. U Diosta paikuamtu akwa, Jesucristowa Izpul nawa kiwaintu akwa, nane kajchiras watmin puztɨnash.  
\v 20 Sun payura tɨriztuasmin, Dios pit tɨnta parananash, mɨtsal kitchin, ishkwatchin. Kajchiras puz kit uztane, irane, Diosne nawa wat kiwainshina. Ñamin makima nane tɨnta kal kishimtus, wan awa Cristowa an piankamanapa, wat minñanapa.  
\v 21 Apain uzne, Cristo ɨnintu aizpa kishimtus. Irane, chiyura anza wat uznash.  
\v 22 Au sukimin uzne, nane Cristo akwa kal kinash, wan awaruz ussa nɨjkulat kit piankamanapa. Nane chiwazha pianchish. ¿Uzna anza watsa? ¿Inna anza watsa?  
\v 23 Paas tuntu kirane, kwisha sam i. Nane au sukis ishimtus, Cristokasa tuan. Nawane inna anza wari.  
\v 24 Sunkana nane u akwa an sukin uznash. Na uzna anza wari.  
\v 25 Katmizna nane au sukin uruzkasa nukkulmɨznash pianish, uruza kiwainana, u an wat nɨjkulanapa, u an wat kulanapa.  
\v 26 Na mamasa uruza kailkane, une na akwa an wat minñat kit akwan piji Jesucristora aishtaish kizamɨznazi. 
\p  
\v 27 Sunmin kiamɨztain: Cristo watsal pit parɨt aizpa iz kit nil uzarawa. Na uruza izna ɨkane, na uruza chi ɨmakane, na kaizta aizpa kirain. Maza kwalkanain wanmakkat kit maza pitmin kaizarakanain mɨat kit uzarawa, nil uzanapa. Une sulmin an watsal pit izat kit nɨjkularawa, uruzpain kiwainana. U miza uzamtu piankamshimtus.  
\v 28 Aliz awa Dios watsal pit akwa ukasa waya kikane, ishkuarachi. Sun kwail kiat akwa, uspane minpa payura iarɨnazi, ĩnta naizana. Sunkana Diosne uruza watsat mɨlnanazi. U Dios ɨnintu aizpa kiamtu akwa, Diosmin wan uruza kiwainanat kit sɨnam kulninnanazi.  
\v 29 Diosne uruza wan kain mɨlanara, Cristora nɨjkulanapa. Cristora nɨjkulamtu akwa, ukas Cristo akwa naizarɨnazi.  
\v 30 Naizamtukas, aune Cristo akwa sulmin tɨnta kimtumakpas, wan paiña pit mɨanapa. Une an ñancha na kit aizpa izara. Mane une na tɨnta kimtu aizpa mɨamɨztu, wan Dios pit mɨanapa. 
\c 2  
\s1 Jesús uztakanain uztain 
\p  
\v 1 Cristone uruza kiwainashimtu, tɨnta kulanapa. Uruza panashimtu, u wat kianapa. Dios Sɨnam Izpulne aumɨza akwanamtu, uskasa sulmin wanmakkana. Une mamaztuza pashinamtu, kiwainana.  
\v 2 Katmizna wan na kaizta aizpa kirain. U mamaz tuntuin nɨjkularane, nane watsal uznash. Une uruzpain pashirain. Sulmin minñat kit kal kiarawa.  
\v 3 “Aune mamazkin an wat kitmakpas” kizanachi. Kal kimtuasmin, umin minkain. Mamaztuzpa anza wat kiarɨt aizpa minñarawa.  
\v 4 U akwain wat kirɨt aizpa sayanachi. Mamazpa wat kiarɨt aizpa sairain. 
\p  
\v 5 Uruzpain kawarain mintain, Jesucristo mintakanain, usmin anza katsa namtachi akwa.  
\v 6 Jesúsne sunkana uzta: 
\q1 Jesúsne Dios azi. 
\q2 Jesúsne Dioskanain ɨninna sairachi. 
\q1  
\v 7 Diostas us mɨj aizpa paimpa chɨhkat kit 
\q2 ampukanain kawira, 
\q2 kiwainmumikakanain namna, awaruza kiwainanapa. 
\q1  
\v 8 Awakanain uzasmin, usmin an ainkin namta. 
\q1 Dios ussa ɨninta aizpa kit kit 
\q2 kurishta mɨtsalpazhain ira. 
\q1  
\v 9 Katmizna Diosne ussa anza katsa nam kit 
\q2 uskasa ɨninna unat kit 
\q2 ussa mamaz munkin anza wat mun munta. 
\q1  
\v 10 Suasmesa Jesústa mɨmtuchiruzkas 
\q2 mɨmturuzkas chiyura uztuzkas 
\q1 au sukin uztuzkas pil ayukman uztuzkas 
\q2 ussa wakpuj wainñanazi. 
\q1  
\v 11 Suasne wan awane “Jesúsne Anpat i” kizat kit kwinta kianazi. 
\q2 Sun kizamtuasmin, “Taitta Diosta kwisha wari” kizanazi. 
\s1 Cristora nɨjkulturuzne an sura wat uzanazi 
\p  
\v 12 Katmizna, na Cristora nɨjkulturuza pashinamtu akwa, na kaiztu aizpa mɨrain. Na uruzkasa uztuasmin, une na kaizta aizpa pailta payu mɨara. Maneme na attishta uzasmin, an ñakanain na ɨninta aizpa an nil mɨrain. Dios uruza sɨnam sanarɨt akwa, ussa wakpuj wain kit us kurunta aizpa kit kit Diospa kal chɨhkat aizpa kirain.  
\v 13 Diosne ukasain kal kimɨz kit kiwaintu, us pashit aizpakas wan kianapa. 
\p  
\v 14 Wan kirain, pilchapuzarachin, kutkuarachin,  
\v 15 mɨnminkas u kwail kiarɨt kizamanpa. Dios uruza paiña kwal namnarɨt akwa, uzat kit watmin mintain. Kwail kimtuzkin uzamtuasmin, chinkas kwail kiman. Suasne sun awane u mamaz tuntu uzamtu aizpa izanazi.  
\v 16 Une an watsal pit kaiznarawa, mamaztuzkas mɨat kit mamaz tuntu uzanapa. Sunkana Cristo akane, nane u akwa kwisha wat minnash, u ap pit mɨara akwa.  
\v 17 U Diosta nɨjkulara akwa, us pashit aizpa kiarɨt akwa, une us akwa naizara. Imtune, nakas u akwa naiztɨnash, na uruza Diospa kainanat akwa. U akwa naiztakas, nane ukasa watsal kulnash.  
\v 18 Sunkanain nakasa watsal kultain. 
\s1 Timoteokas Epafroditokas 
\p  
\v 19 Anpat Jesústa nɨjkulmɨztu akwa, nane Timoteora u uztukin azain ɨninshimtus. Us kailkane, miza u uzamtu kainakane, nane watsal kulnash.  
\v 20 Usne u akwa nakanain mintu. Mɨnminkas uskana u wat akwa kiwainshimtuchi.  
\v 21 Wan awane uspain kal kiamtu aizpa sayamtu. Jesucristowa kal kin minñamtuchi.  
\v 22 Uruzne miza Timoteo nil uz kit wat kit aizpa pian. Usne nakasa Dios watsal pit kainana kiwainta. Usne painkul papihshta kiwaintukanain nawa kiwainta.  
\v 23 Na kimtu aizpa pailtawane, nane Timoteora uruzpara aza ɨninshimtus.  
\v 24 Ap Anpat nawa kiwaintuasmin, nane masakin uruza ɨnash. 
\p  
\v 25 Mane nane Epafroditora kailninna mintus. An añakanain nɨjkultamikane nawa kiwain kit nakasa awa iztakin kwisha wat kamtanara. Une ussa nawa ɨninñara, na we aizpa kiwainapa.  
\v 26 U us imtu mɨara akwa, usne tayal kit wan uruza kwisha izna ɨshira.  
\v 27 Watcha, inapain tuazi. Diosne ussa kiwainta. Irachi akwa, nawakas kiwainta, na kwisha tayalmanpa.  
\v 28 Katmizna nane ussa azain ɨninshimtus, u ussa mamasa izat kit watsal kulanapa, na we tayalnapa.  
\v 29 Us akane, au Anpatta nɨjkultu akwa, ussa yalta napnintain, watsal kulnapa. Wan awa uskanain wat minñarawa. Epafrodito awakanain wat paraarawa.  
\v 30 Nawa tɨnta kiwaintuasmin, usne imasara, Cristowa kal kimtu akwa. Us u akwa watmin minshimtuasmin, usne u wan kishiamtu aizpa wan tɨnta kimɨzta, nawa kiwainna. 
\c 3  
\s1 Cristora piankamna 
\p  
\v 1 Mane, Cristora piantuz, au Anpat Jesucristora nɨjkulamtu akwa, watsal kultain. Uruza an pit paakima parakas, nawa kwail kinaptuchi. An pit na kaizta aizpa u akwa nil i.  
\v 2 Kwail kimtuzkasa wanmaknarachi. An ña tɨtmuruzne Cristora nɨjkularachi. Ñanta kamtaamtu, awa uspakanain kianapa.  
\v 3 Au Cristora nil nɨjkulamtu akwa, aumin watcharuz makpas. Paiña Izpul akwa, Diosta wakpuj waintumakpas. Jesucristowa kwisha wat mintumakpas. Aumin kal kiarɨt aizpa nɨjkultuchimakpas, sɨnam watsanapa.  
\v 4 Watcha. Nane chiwazha na kit aizpa anza nɨjkulshinas. Mamaztuz uspa kiarɨt aizpa nɨjkulamtukas, nane uspakin anza akwan nɨjkulshimtus.  
\v 5 An ñancha nane na kirɨt aizpakas miza na uzta aizpakas kainanamtus. 
\q1 Ocho payura kawirawane, awa nawa tɨttara, Judío awa ɨnim akwa. 
\q1 Benjamínpa kwal ish. 
\q1 Kawimtuasmin, nane Judío awa arau. 
\q1 Ap taittakas ap akkwakas Judío awa mazi. 
\q1 Fariseo Judío awa kurunta aizpa kimtuasmin, nane Moisés ɨninta aizpa kimɨztau. 
\q1  
\v 6 Cristowa wanmakmuruza tɨnta kanpashinat kit naizninnarau. 
\q1 Moisés ɨninta aizpa nil kirau, pailnakima. Mɨnminkas ɨninta aizpa na kitchi kizasachi. 
\p  
\v 7 Wan na akwa kimtu aizpa nɨjkultau. Mane nane wan kit aizpa chɨhkarɨmtus, na Cristora nɨjkultu akwa.  
\v 8 Katmizna wan chiwal kirɨt aizpa kain i mintus, chinkas na akwa kana kitchin. Na sun wan kirɨt aizpakin Anpat Jesucristora piankamna anza watsal i. Nane wan chiwal mɨj aizpakas wan chiwal kirɨt aizpakas pakkanain min kit wan chɨhkarɨmtus, Cristora kanpana.  
\v 9 Suasne nane Cristokasa sulmin uzmɨznash. Na nil kishimtu aizpakas Moisés ɨnintɨt aizpakas, nawa nil uzna namninsachi. Diosne Cristora nɨjkultuza kiwainamtu, nil uzanapa.  
\v 10 Nane Cristora an wat piankamshimtus. Diosne Cristo irɨttas tɨnta kuhsninta akwa, kawarain nane Diosta paikumtus, nawa kiwainnapa. Nakas Cristokana naiztakanain naiztɨnash. Cristone Dios ɨninta aizpa kira, innakima. Nakas Cristokana Dios ɨninta aizpa kishimtus, innakima.  
\v 11 Wan irɨttas kuhsakkane, nakas sun payu tɨriznash, irɨttas kuhsna. 
\s1 Minparakima ãĩn ɨt kit piannamɨztu 
\p  
\v 12 Nane makima miza uzna we pianish. Wan kin pashit aizpa pailtachish. Jesucristo an ñancha nawa akwarɨt akwa, nane Cristora sait kit us pashit aizpa kishimɨznash.  
\v 13 Cristora piantuz, mɨrain. Nane mama wan kishit aizpa pailtachish. Sunkana minnash. Nane miza an ñancha uzta aizpa mainshimtus, makis pailta payukima na kishimtu aizpa kin.  
\v 14 Suasmesa, Dios pashit aizpa kiarawane, nane minpara piannanash, pailta payukima chiyura uzna. Suane Diosne Jesucristo akwa nawa akwanat kit nawa mɨlam mɨlanazi. 
\p  
\v 15 Katmizna, wan nil nɨjkulamturuzne sunkanain mintawamakpas. Mamaztuz mamaz tuntu minñarane, Diosne usparuza kurunnanazi, nil piamkamanapa.  
\v 16 Makima aune akkwan pit izat kit piankamtamakpas. Suas an piankam kit an nil pit akwa wat uztain. 
\p  
\v 17 Cristora piantuz, nawa izat kit na uztakanain uztain. Mamaz nakanain uzturuza izat kit sunkanain kimɨztain.  
\v 18 Akkwan pijikima kaiznarɨtkas, mane nane mamasa tayal kit az kit sunmin kaiznamtus. Akkwan awane “Cristo au akwa irachi” kizamtu.  
\v 19 Sun Cristora aliz awaruzne minpa payurane iarɨnazi, ĩnta naizana. Uspain chiwazha kwan pashiamtu aizpakas kwail kiashimtu aizpakas minñamtu. Diosta minñamtuchi. Kwail kiamtuasmin, mɨtsal kiamtuchi. An sukin wa aizpa minñamtu.  
\v 20 Sunkana aune chiyuras kwal makpas. Chiyuras sɨnam sammikasha, Anpat Jesucristora tɨrizpuspas.  
\v 21 Dios tɨnta kimtu akwa, usne au wan najtɨt ña paiña watsal ñakanain namninnazi. Dios tɨnta kishimtu akwa, wan chiwal ɨninshina, us kishit aizpa kianapa. 
\c 4  
\s1 Anpatta watsal kultain 
\p  
\v 1 Katmizna, na Cristora nɨjkulturuza pashinamtu akwa, na kaiztu aizpa mɨrain. U nawa watsal kulninñamtu akwa, nane uruza izshinamtus. Anpat Jesucristokasa nil uzmɨztain. 
\p  
\v 2 Nane Evodiarakas Síntiquerakas paikumtus, Anpatpa kwampihshkanain nɨjkulnapa, waya kitchin.  
\v 3 Watcha, nane ap wat kiwainmikara paikumtus, an paas ashampara kurunapa, uspa paas kwail kizamanpa. Uspa paasne nakasa ñancha kal kiwainpailta. Clementekas mamaz nakasa kal kittuzkas nawa kiwainñara, sun watsal pit kainana. Dios usparuza watmin uzninnarɨt akwa, au Anpatne usparuzpa mun chiyura pɨnkɨhta parɨt. 
\p  
\v 4 Anpatkasa chamtuasmin, watsal kultain pailta payukima. Mamasa kaiztus, watsal kultain.  
\v 5 Mamaztuza wat mintain, wan awa u wat kiamɨzta aizpa piankamanapa, au Anpatne kasha anpain pamtu akwa. 
\p  
\v 6 Une wan kishimtu aizpa ishkuman. Naizakane, uruza kwail kimɨzkane, sunkana Diosta paikwatpa, uruza kiwainnapa. Ussa wanta aishtaish kizmɨztain.  
\v 7 Sunkana Diosne uruza watsal usninnanazi. Mɨnminkas Dios awa akwa kimtu aizpa piankamsachi, watsal uzanapa. Dios uruza watsal uzninna kiwainamtu akwa, usne Jesucristo akwa uruza kurunnanazi, nil minñanapa, Jesucristokasa chaanapa. 
\s1 Wan wat aizpa mintain 
\p  
\v 8 Minpa Cristora nɨjkulturuz mɨrain. Kwinta kiamtune, watcha pit kaizarawa. Wat pitkas kaizarawa. Nil pitkas kaizarawa. Kwinta kiamtune, chinkas kwail pit kaizman. Watsal pitkas kaizarawa. Wan wat aizpa mintain. 
\p  
\v 9 Wan na kamtara aizpa mɨat kit saptain. Na kaizta aizpa mɨara. Na miza uztu aizpa izara. Sunkanain kirain. Sunkana kiarane, Diosne uruza watsal uzninnanazi. 
\s1 Filipos Awaruzne Pablora mɨlaamtu 
\p  
\v 10 Mane nane au Anpatta kwisha watsal kultus, u mamasa nawa mɨlan minñamtu akwa. Nawa kiwainashimtukas, une an ñancha chinkas nawa kinamarɨt.  
\v 11 U nawa kiwaintachikas, nane chinkas we kitchish. Na mɨj aizpa wat kuj kit kamtɨt ish.  
\v 12 Na we aizpa mɨjkas, na akkwan mɨjkas, nane uzna kamtɨt ish. Yak kimtu aizpakas tukta kumtu aizpakas sunkana uzna kamtɨt ish.  
\v 13 Cristo nawa kiwaintu akwa, nane watsal uzshinas.  
\v 14 Sunkana uruzne nawa wat kit kit na we aizpa kiwainñaara. 
\p  
\v 15 Nane u Macedonia sukin uzturuza Dios watsal pit kamtanamɨztau. Mamaz sura ɨkane, u Filipos pɨpulukis wanmakmuruzmin na we aizpa mɨlam ɨninñara, na we kimanpa.  
\v 16 Na Tesalónica pɨpulukin tuasmin, une pakima mɨlam ɨninñara, na we kimanpa.  
\v 17 Na u mɨlam sairachikas, nane Diosta u akwa paikumɨztus, u an akkwan mɨlam sappanapa.  
\v 18 Nane me u ɨninta aizpa wan saptɨt ish, tizawal. An mɨlam Epafrodito akwa ɨnintɨt akwa, nane kapal mɨjish. Nawa kain mɨlat akwa, Diosne u wat kiarɨt aizpa iz kit u akwa watsal kulta.  
\v 19 Sunkana u na we aizpa mɨlat akwa, Diosne u we aizpa mɨlananazi. Us mɨj aizpa chiyura pailtuchi akwa, usne Jesucristowa kanpamtuza mɨlananazi.  
\v 20 Aune Diosta pailta payu kwisha wari kizpuspas. Sunkana kirain. 
\s1 Minpa kakishapu kiztu 
\p  
\v 21 Na akwa wan Jesucristora nɨjkulturuza kakishapu kizanaka. Cristora nɨjkulturuzne nakasa puraruzne kakishapu kizmu pit ɨnninamtu.  
\v 22 Wan Roma pɨpulukin Jesucristora nɨjkultaruzne Roma katsa ɨninmika yalta uztuza kakishapu kizmu pit ɨninamtu.  
\v 23 Au Anpat Jesucristone uruza kiwainnanazi, uruza pashinamtu akwa. 
\p Pailti.