\id HEB - Awa NT -Colombia, Ecuador 2009 (DBL -2013) 
\h Hebreos 
\toc1 Mɨnpazha Judío Awaruza Pɨnkɨh Para 
\toc2 Hebreos 
\toc3 Heb 
\mt1 Hebreos 
\mt2 Mɨnpazha Judío Awaruza Pɨnkɨh Para 
\ip Pɨnkɨh pammikane Judío awaruza an pɨnkɨh pam kit usparuza Jesucristowa kamtanamtu, mamaz awaruz usparuza naizninnamtu akwa. Mɨnpazha Judío awaruzne Jesucristora chɨhkashimtu, ussa an nɨjkulamanpa, an ñancha kamarɨt aizpa kianapa. Pammikane usparuza kurunnamtu, Judío awa kamarɨt aizpa kaiyamanpa, Jesucristo kamtamkin anza wat akwa, Dios Jesústa au sukin ɨnintɨt akwa (1.1-3). 
\ip Suasne pɨnkɨh pammikane Jesús Dios painkul i kamtanamɨztu, us Dioskasa ñamin uztɨt akwa. An sukin naiztuasmin, Jesúsne Dios ussa ɨnintɨt aizpa kamtɨt. Jesúsne an ñamin Dios pit kainammtuzkinkas (1.1) ángelkinkas (1.4–2.18) Moiséskinkas Josuékinkas (3.1–4.13) ñamin Judío pariyaruzkinkas (4.14–7.28) an katsa mika namtɨt. Jesucristo akwa, Diosne awaruza masas pit kin nanamtu (8.1–9.28). Jesucristo au akwa irɨt akwa, usne torokinkas pɨrikukinkas an tɨnta i, Jesús au katsa pariya namtɨt akwa. Diosne Jesucristora nɨjkultumikara watsat mɨlnazi, paiña kwail kirɨt aizpa wat kulninnapa, inna ishkumanpa. Ñamin Judío awa tororakas pɨrikurakas Dios akwa piantarɨtkas, Jesúsne au kwail akwa irɨt, ussa nɨjkultumikara watcha watsat mɨlnanapa (10.1-31). 
\ip Jesucristora nɨjkulamturuza awaruza watsat mɨlnanazi kainammtuasmin, pammikane ñamin akkwan Judío awaruzkas Jesústa nɨjkulara kaiznara. Capítulo 13kin pammikane Judío awaruza kurunnam kit chiwazha uspa akwa paikwat kit izmuruza kakishapu kiznamtu. 
\c 1  
\s1 Diosne paiña painkul akwa awaruza paranara 
\p  
\v 1 Nane maza pit kainanashimtus, Diosta piankamanapa. An ñamin Diosne paiña kainammtuza kurunnara, paiña pit pananapa, an ñamin kwaltuza parananapa. Akkwan pijikas akkwan tuntukas usparuza paranara.  
\v 2 An minpa payura Diosne paiña painkulta ɨninta, aumɨza parananapa. Diosne ussa narɨt, wan chiwal sarɨt aizpa sapnapa, wan ɨninnapa. Dioskas paiña painkul akwa wan sukas wan chiyukas sara, wan pa kianapa.  
\v 3 Diospa painkulne Dioskanain watsal iztɨt, au awaruz “Dios kwisha wari” piankamanapa. Diosne paiña painkulkanain iztɨt. Us wan sarɨt aizpa iznamtu akwa, usne parat kit au sukinkas au chiyurakas us pashit aizpa kinazi, us tɨnta akwa. Diospa painkul au kwail kiarɨt aizpa sɨnam sarawane, usne chiyura nut kit Dios iztakin ɨninmɨzta. 
\s1 Cristone ángelkinkas an tɨnta i 
\p  
\v 4 Mane Diosne paiña painkulta ángelkinkas an tɨnta sara. Katmizna Cristowa kalne ángelpa kalkinkas an tɨnta i. Dioskas ussa paiña painkul munninta, Dios kin namtɨt aizpa sapnapa.  
\v 5 Diosne mizurainkas ángelta ka kaiztachi: 
\q1 “Nune ap painkul i. 
\q2 Nane nua ap painkulta namnintau”\x + \xo 1:5 \xt Sal 2.7\x* 
\m Mamasa ángelta ka kaiztachi: 
\q1 “Nane up papihsh anash. 
\q2 Nune ap painkul anazi.”\x + \xo 1:5 \xt 2 S 7.14\x* 
\m  
\v 6 An Dios painkulne wan ángeltuzkinkas anza tɨnta i. Dios paiña ñancha painkul au sura uztuza annakane, ka kaiznara: 
\q1 “Wan ángeltuzne ussa wanmakkat kit ussa wakpuj wainñarawa.”\x + \xo 1:6 \xt Dt 32.43\x* 
\m  
\v 7 Dios ángeltuzpa parakane, usne sunkana kaiztu: 
\q1 “Nane wan ángeltuza ap kiwaintuza namninnanash, nawa wakpuj wainñanapa. 
\q2 Uspane inkwakanakas ippakanakas izanazi.”\x + \xo 1:7 \xt Sal 104.4\x* 
\m  
\v 8 Paiña painkulne ángeltuzkana chi. Diosne paiña painkulpa ka kaiztu: 
\q1 “Nune Dios i. Nune pailta payukima ɨninnazi. 
\q2 Ɨninkane, nune wan nil aizpa kinazi. 
\q1  
\v 9 Nune wan wat kinpa pashimtu. 
\q2 Nune kwail kinpa pashimtuchi. 
\q2 Katmizna nane nua ɨninnapa nat kit nua up izmuruzkin an wat kulnintau.”\x + \xo 1:9 \xt Sal 45.6-7\x* 
\m  
\v 10 Ma pitchin Diosne paiña painkulta ka kaizta: 
\q1 “Nune Anpat i. Nune an ñancha an su sara. 
\q2 Nukas up chihtɨkasa wan chiyura wa aizpa sara. 
\q1  
\v 11 Wan sarɨt aizpa pailtɨnazi. Nune mizurainkas pailmanazi. 
\q2 Wanne pĩn pɨttukanain pailtɨnazi, tailchasachi akwa. 
\q1  
\v 12 Pĩn pɨtta uk kit nan kit masaskana maizmu. 
\q1 Nune, Dios painkulne, maizmanazi. 
\q2 Nune wan payukima uznazi.”\x + \xo 1:12 \xt Sal 102.25-27\x* 
\m  
\v 13 Diosne mizurainkas paiña ángeltuza ka kaiznarachi: 
\q2 “Ap ɨnintukin nakasa uztain, 
\q1 ap aliztuza anuppanakima.”\x + \xo 1:13 \xt Sal 110.1\x* 
\m  
\v 14 Dios ángeltuza sunkana kaiznarachikas, Diosne ángeltuza ɨninnara, ussa kiwainñapa, ussa wakpuj wainñanapa. Usne usparuza ɨninnamtu, Diosta piantuza kiwainanapa, suntuz an kwail kiamanpa, chiyura uzanapa. Sunkana Diosne Diosta piantuza watsat mɨlnanazi. 
\c 2  
\s1 Pɨnkɨh pammika ka kaiznara: Kwiraruin Dios u akwa kirɨt aizpa mainmanpa 
\p  
\v 1 Dios paiña painkul akwa aumɨza paranarɨt akwa, aune awa aumɨza kamtanarɨt aizpa an akkwan mɨmɨztawamakpas, Dios watsal pit mainmanpa, paiña watcha pit chɨhkamanpa.  
\v 2 Ñamin ángeltuzne Moisésta Dios pit kainaara, awa wat aizpakas kwail aizpakas piankamanapa. Diosne sun pit kiarachiruzakas mɨashitchiruzakas ilninnara.  
\v 3 Sunkanain Diosne aumɨza ilnanazi, Dios au akwa kinashimtu aizpa kwayarane. Aune Dios aumɨza watsat mɨlnashimtu pianmakpas, aumɨza ilnamanpa. Au Anpat Jesúsne an ñancha mazantuza Dios usparuza watsat mɨlnamtu kainanara. Kwiztane us kaizta aizpa mɨmturuzne nɨjkulat kit aumɨza sun watcha pitmin kainanara.  
\v 4 Diosne au awaruza sun watcha pit piankamninnara. Sun pit Dios pit i pianmakpas. Diosne usparuza tɨnta kiwainnara, awa iztakin akkwan tuntu iztasparɨt kal kianapa. Dioskas paiña Sɨnam Izpulta au nɨjkulturuza ɨninnara, aumɨza kiwainnanapa, Dios pashimtu aizpa kianapa. 
\s1 Jesucristone awakanain namtɨt 
\p  
\v 5 Mane nane mamazpa su kainanamtus. Dios sun masas su sakane, Diosne mizurainkas ángeltuza masas sura ɨninnanapa chɨhkamanazi.  
\v 6 Mɨnpazha Dios pitta mɨnmika an masas sura ɨninnazi parɨt. Ka parɨt: 
\q1 “¡Ap Dios mɨzha! ¿Chikishma awaruzpa wat mintu? 
\q2 ¿Chikishma awaruza kiwainashimtu? Uspane awain mai. 
\q1  
\v 7 An ñamin une ángeltuza kwisha wat sara. 
\q2 Kwiztane nune mazara an tɨnta namninta, wan nu sarɨt aizpa ɨninnapa. Sunkana Diosne awaruzpa wat minta. 
\q2  
\v 8 Nune mazara an tɨnta namninta, wan pura aizpa ɨninnapa.”\x + \xo 2:8 \xt Sal 8.4-6\x* 
\m Dios ussa wan pura aizpa chɨhkakane, usne ussa wan chiwal ɨninnapa chɨhkara. Dios awara wan chɨhkarɨtkas, makima awane wan pura aizpa ɨninsachi.  
\v 9 Mane Jesústa mintain. Diosne ángeltuzkinkas Jesústa akkwan payuchinkimain we tɨnta namninta. Kwiztane Diosne Jesústa an tɨnta namnin kit us akwa an wat minta, au akwa naiz kit irɨt akwa. Dios wan awaruza panashit kit kiwainashimtu akwa, usne Jesústa au kwail akwa inapa ɨninta. Sun akwa Diosne Jesústa an tɨnta namnin kit watsal mikwa namninta, wan awa us akwa wat minñanapa. 
\p  
\v 10 Chiwazha Dios kit aizpa wat azi. Us wan pura aizpa sarɨt akwa, usne wan ɨninshina. Diosne akkwan awaruza paiña pashpa namninnashira, us uzmukin uskasa uzanapa. Katmizna Diosne paiña painkulta, Jesústa, awa kwail kiarɨt akwa inapa ɨninta, awaruza watsat mɨlnanapa. Cristo au akwa kapal naiztawane, Diosne ussa au katsa mikwa namninta, aumɨza chiyura mɨlnanapa.  
\v 11 Jesúsne kwail kirɨttuza sɨnam saninnamtu. Uspa paasne maza papihshmin mɨj. Jesús awaruza uspa kwail sɨnam sarawane, usne paiña kwal namninnashina. Katmizna Jesúsne, Dios painkulne, wan wat kultɨttuza ap izmuruz mai kiznashinai, mɨtsal kitchin.  
\v 12 Jesúsne paiña Taitta Diosta Dios pɨnkɨhta parɨt aizpa ka kaiztu: 
\q1 “Nane ap kanpamtuza Diospa parananash. 
\q2 Nane awa wanmakmukin ‘Dios watcha i’ kanta kiznash”\x + \xo 2:12 \xt Sal 22.22\x* 
\m  
\v 13 Mamasa Jesús ka kaizta: 
\q1 “Nane Diosta nɨjkulnash.”\x + \xo 2:13 \xt Is 8.17\x* 
\m Mamasa ka kaiztu: 
\q1 “Nane apain tus, Diosta piantuzkasa. Diosne suntuza nawa chɨhkanara, usparuza iznanapa.”\x + \xo 2:13 \xt Is 8.18\x* 
\p  
\v 14 Jesúsne au awakanain namta. Us irawane, Jesúsne Diablora anuppara, awaruza tɨnta ɨninnamanpa, awaruza akkwan kwail kininnamanpa.  
\v 15 Sunkana Jesúsne Diablora ishkumturuza chɨhtnara. An ñamin an sura uzamtuasmin, uspane pailta payukima irɨn ishkuarɨt, iashitchi akwa. Uspane kiwainmuruzkana Diablo ɨninta aizpa kiara.  
\v 16 Watcha, Jesúsne an sura ángel akwa kiwainna atchi. Us apain akane, usne Abrahampa kwaltuz akwa kiwainna ara, usparuza watsat mɨlnana.  
\v 17 Katmizna Jesúsne Diosta piantuzkanain nam kit naizta, usparuza kiwainanapa, usparuza wat kinanapa. Au akwa naiztawane, Jesúsne katsa pariya, watchamika namta, Dios iztakin au akwa paikwan. Suane usne Diosta piantuza, paiña kwaltuza, uspa kwail kiarɨt aizpa wat kulnashina.  
\v 18 Diablone Jesústa kwail kinpa kininshira, naiznapa. Jesús wan tailchat akwa, mane usne kwail kishimturuza kiwainnashina, kwail kiamanpa. 
\c 3  
\s1 Jesúsne Moiséskinkas an katsa i 
\p  
\v 1 Katmizna, Diosta piantuz mɨzhain. Diosne uruza paiña kwal namna akwanara, chiyura uzanapa. Jesúspa nɨjkultain. Dios ussa ɨninta paiña kal kinpa pianmakpas. Aune Jesús au katsa pariya i pianmakpas.  
\v 2 Dios Jesústa paiña kal chɨhkatpane, Jesúsne kwairachin kapal kira. Moiséskas Diospa kwal uzkin wan kal kapal kirɨt.  
\v 3 Sun Jesúsne Moiséskin an tɨnta mika i, Jesús wan pura aizpa sarɨt akwa. Jesúsne, awaruza paiña kwal namnintumikane, paiña kwalkin an tɨnta i.  
\v 4 Mɨnpazha wan yalkin uztu aizpa sarakas, Diosne wan chiwal wa aizpa sara.  
\v 5 Moisés Diospa yalkin kiwainmumikakana kal kimtuasmin, usne Dios kaizta aizpa chinkas maintachin mɨra. Dios Moisésta parawane, usne sun pitmin Diospa kwaltuza kainanara, Dios kishimtu aizpa piankamanapa.  
\v 6 Cristone Moiséskana chi azi, Cristo Dios painkul ara akwa. Diospa painkulne paiña kwaltuza wat ɨninnat kit Dios ussa ɨninta aizpa mɨra, maintachin. Diosne aumɨza paiña kwal namninnara, uskasa nukkulanapa. Katmizna aune Cristora tɨriztawamakpas, us aumɨza watsal kulnashimtu akwa. Sun payura aune Dios aumɨza mɨlashimtu aizpa mɨlananazi pianmakpas. 
\s1 Diosne ussa piantuza kwaizkulninnanazi 
\p  
\v 7 Katmizna une Sɨnam Izpul Dios pɨnkɨhta panintɨt aizpa wat mɨarawa. Sunkana parɨt: 
\q1 “Ma payu Dios uruza kwinta kinakane, une us kuruntu aizpa mɨarawa. 
\q2  
\v 8 Sun pit uruza kainammtu aizpa kwainachi. 
\q1 Ñamin Israel awaruz pul suwara chaamtuasmin, uspane cuarenta añokima kwail kiat kit Dios kaizta aizpa mɨashitchi. 
\q2 Uspane Dioskasa aliz kularɨt. 
\q1  
\v 9 Sun pul suwara pɨnamtuasmin, u ñamin kwalne nawa aliz kulara, na kuruntɨt aizpa piankamashitchi akwa. 
\q2 Na uspa iztakin akkwan watsal kal kitkas, uspane cuarenta añokima nawa wat mɨarachi. 
\q1  
\v 10 Katmizna nane sun payu uzattuza aliz kulnat kit usparuzpa 
\q2 ka kaiznarau: ‘Uspane pailta payukima uspa kaijchukin nawa kwail minñat kit ñan miwara ɨashimtu. 
\q2 Uspane na usparuza kamtanamtu aizpa mɨashitchi.’ 
\q1  
\v 11 Katmizna nane usparuza aliz kul kit kaiznarau: ‘Une nakasa kwaizkulmukin nappamanazi, tɨnta namanapa. 
\q2 Une kin namtɨt urara, Canaán sura nakasa uzamanazi.’ ”\x + \xo 3:11 \xt Sal 95.7-11\x* 
\p  
\v 12 Diosta nɨjkulturuz, uruzpain iztain, mɨnminkas kwail namamanpa, mɨnminkas Dios mi kaamanpa. Diosta nɨjkulshimtuchimikane Diosta, chiyura uztumikara, kwainazi, ussa an kanpamanpa.  
\v 13 Dios aumɨza makima mama akwanamtuasmin, pailta payukima uruzpain wat kishirain, tɨnta namnakima. U Diosta mɨashimtukine, ñanta kimmikane uruza kwail kininnashina. Ukas Dios kamtarɨt aizpa kwainnazi.  
\v 14 Dios pit mɨarawane, aune Cristowa kwal namtɨtmakpas, uskasa uzana. Makis aune Cristora watmin nɨjkulmɨztawamakpas. Minpa payukima ussa mɨamɨztane, aune Cristo uzkin uziznapas. 
\p  
\v 15 Dios pitta ka parɨt: 
\q1 “Ma payu Dios uruza kwinta kinakane, une us kuruntu aizpa mɨarawa. 
\q2 Sun pit uruza kainammtu aizpa kwainachi. 
\q1 Ñamin Israel awaruz pul suwara chaamtuasmin, uspane cuarenta añokima kwail kiat kit Dios kaizta aizpa mɨashitchi. Uspane Dioskasa aliz kularɨt.”\x + \xo 3:15 \xt Sal 95.7-8\x* 
\m  
\v 16 Une sun Dios kaizta aizpa mɨashitchiruza pian. Moisésne, mikwakana, sun Judío awaruza Egipto suras ukkanara, pul suwara ussa kanpaanapa.  
\v 17 Cuarenta añokima pul suwara chaamtuasmin, uspane kwail kishiat kit Dios kaizta aizpa mɨashitchi. Uspa kwail kiarɨt akwa, Diosne usparuza aliz kulnat kit naizninnara, sun awaruz pul sura ianakima.  
\v 18 Diosne sun us kaizta aizpa mɨrachiruza ka tɨnta kaiznara: “Nawa mɨrachiruzne mamaz Canaán sura, uspa kwaizkulmukin, nappamanazi.”  
\v 19 Sunkana aune uspa kwaizkulmu sura napparachi pianmakpas, uspa Diosta nɨjkularachi akwa. 
\c 4  
\p  
\v 1 Katmizna Dios paiña kwaltuza uskasa kwaizkulanapa kin namtɨt akwa, makima Diosne mama aumɨza Diospa kwaizkulmukin nappanapa akwanamtu. Katmizna aune arakan awakana uztakiwamakpas, sun kwaizkulmukin kamanpa. Suane aune Dioskasa kalpain uzanapas.  
\v 2 Diosne an ñamin uztuzakas aumɨzakas ma uztuzakas kawarain sun watsal pit kainanara. Uspa sun watsal pit mɨarakas, an ñamin uztuzne Dios watsal pit nɨjkulashitchi. Sun akwa Diosne usparuza watsat mɨlnarachi.  
\v 3 Aune Dios kwaizkulmukin nappanapas, Dios kin namtɨt aizpa nɨjkultu akwa. Mɨnpazha us kaizta aizpa nɨjkularachi akwa, Diosne usparuza aliz kulnat kit paiña pɨnkɨhta usparuzpa ka panintɨt: 
\q1 “Uspa nawa aliz kulnintɨt akwa, nane usparuza ka kaiznara: 
\q2 ‘Uspane nakasa ap kwaizkulmukin nappamanazi.’ ”\x + \xo 4:3 \xt Sal 95.11\x* ka parɨt. 
\m Dios wan pura aizpa sarakima, usne me paiña kwaizkulmu sarɨt, kwaizkulna.  
\v 4 Dios pɨnkɨhta sun séptimo payura Dios kit aizpa ka parɨt: 
\q1 “Wan wa aizpa kapal sarawane, Diosne séptimo payura kwaizkulta, 
\q2 paiña kwaizkulmukin.”\x + \xo 4:4 \xt Gn 2.2\x* 
\m  
\v 5 Mamasa Diosne sun pɨnkɨhta ka panintɨt: 
\q1 “Uspane nakasa ap kwaizkulmukin nappamanazi, nakasa kalpain uzana.”\x + \xo 4:5 \xt Sal 95.11\x* 
\m  
\v 6 An ñamin uzturuz sun watsal pit mɨarakas, uspane Diospa kwaizkulmukin Dioskasa kalpain uzana nappasachi, Dios kaizta aizpa nɨjkularachi akwa. Katmizna makima mamaz awaruzne Diospa kwaizkulmukin pianashina, Dioskasa kalpain uzana, Dios kaizta aizpa mɨamtune.  
\v 7 Dios paiña kwaltuza akkwan piji paiña kwaizkulmukin uskasa kalpain uzana akwanarakas, usne mamasa wan awaruza “ma payu naptain” kaiznamtu. Paiña kwaltuz pul suwara chaamtuasmin, Diosne usparuza akwanara. Kwiztane akkwan año pailtawane, Davidne Dios pɨnkɨhta, salmo pɨnkɨhta, sunkana parɨt: 
\q1 “Dios uruza kwinta kinakane, une us kuruntu aizpa mɨashina. 
\q2 Paiña pit uruza paranamtu aizpa kwaiman,”\x + \xo 4:7 \xt Sal 95.7-8\x* 
\m  
\v 8 Josué Canaán sura Israel awaruza mɨlnarakas, Diosne usparuza mamaz sura kwaizkulninnapa kin namnara, uskasa kalpain uzana. Josué Israel awaruza Canaán sura kwaizkulninnaratne, Diosne kwizta mamaz payuwa parasachiatka. Katmizna awane mamaz payura sun kwaizkulmukin nappashina, Dioskasa kalpain uzana.  
\v 9 Katmizna Dios kaizta aizpa mɨraruzne Dios kwaizkulmukin Dioskasa kalpain uzana nappanazi, Dios séptimo payura kwaizkultukana kwaizkulanapa.  
\v 10 Dios paiña kal kapal sarawane, usne kwaizkulta, wan kin minta aizpa pailta akwa. Sunkanain awa Dios kwaizkulmukin nappararuzne Dioskasa wanmakkat kit ussa nɨjkulamtu, uskasa kalpain uzana.  
\v 11 Katmizna aune an tɨnta namtawamakpas, Dioskasa wanmakkninnanapa, ussa nɨjkulanapa, uskasa kwaizkulanapa, uskasa kalpain uzanapa. An ñamin uzturuzne Dios kaizta aizpa mɨashitchi. Katmizna uspane Dioskasa wanmakkarachi, ussa nɨjkularachi akwa. Uspa uzarakanain uzman. 
\p  
\v 12 Dios paiña pit pɨnkɨhta panintɨtkas, usne sun pɨnkɨh awaruza paranamtu, sun pit piankam kit kianapa. Sun pitne Dioskanain uz. Mizurainkas kasachi. Sun pitne tɨnta i. Sun pitne pamans tiz mashtikana i. Mashti wan ñakas wan impulkas wan sɨhkas tɨtshina, awa ayukta wa aizpa izanapa. Paiña pit akwa, us aumɨza parakane, au izpulta paramtu. Diosne paiña pit akwa au mintu aizpa piankamnintu, chiwazha wat aizpa naanapa, chiwazha kwail aizpa kwayanapa.  
\v 13 Aune Dios iztakin aumɨza kulasachimakpas, Dios wan awaruzakas wan sarɨt aizpakas iznashimtu akwa. Mɨnminkas us mintu aizpa kulasachi. Diosne au chamtukin pian. Katmizna aune Diosta au kit aizpakas au minñarɨt aizpakas sɨnkarawamakpas. 
\s1 Jesúsne katsa pariya i 
\p  
\v 14 Jesúsne, Dios painkulne, au an katsa pariya nam kit Dios uztukin napta. Katmizna aune an tɨnta namtawamakpas, au Jesucristora an nɨjkulmɨznapa.  
\v 15 Au katsa pariyane au naiztu aizpa pian. An su uztuasmin, usne najtɨt uz kit us wan awa naizarɨtkanain naizta. Katmizna usne au akwa min kit kiwainnashimtu. Mazantuz ussa kwail kininarakas, usne mizurainkas kwail kitchi.  
\v 16 Katmizna Diosta paikwatpamakpas, ishkwatchin, us aumɨza pashinamtu akwa. Usne au kwail kirɨt aizpa sɨnam samtu. Ussa paikwatne, usne au wainñamtu aizpa piankam kit aumɨza wat minñat kit aumɨza kiwainanazi. 
\c 5  
\p  
\v 1 Mane Diosne maza pariyara Judío awaruztas namtu, ussa katsa pariya namninnapa. Suasne sun katsa pariyane awa akwa Diosta kwinta kimtu, Dios awaruza kiwainanapa. Sun pariyaruzne awaruzpa mɨlam Diosta mɨlaamtu. Uspakas awaruzpa piantamtu aizpa Diosta mɨlaamtu, awa kwail kiarɨt aizpa wat kulnanapa, sɨnam sananapa.  
\v 2 Apas Judío pariya wan awa kwail kimtukanain kwail kimtu akwa, uspane mamaztuza watmin kiwainashina. Usne wan kwail kimtuzakas kiwainashimtu, uskas kwail kimtu akwa.  
\v 3 Judío pariya awakanain kwail kimtu akwa, usne an ñancha chiwazha piantarawa, Diosta mɨlan, Dios paiña kwail kirɨt aizpa sɨnam sanapa. Sun kitpane, pariyane awa piantarɨt aizpa Diosta mɨlashina, Dios an awa kwail kiarɨt aizpa sɨnam sanapa.  
\v 4 Sun Judío pariyane usmin nasachi, katsa pariya namna. Diosmin ussa akwat kit katsa pariya Aarón namtakana namnintu. An ñamin Diosne Aarónta nara, katsa pariya namna.  
\v 5 Cristokas usmin katsa pariyara namna narachi. Dios ussa narawane, usne ussa katsa pariyara namninta. Suasne Diosne, paiña papihshne, sunkana kaizta: 
\q1 “Nane nua ap painkulta namnintau. 
\q2 Nakas up papihsh namtɨrau.”\x + \xo 5:5 \xt Sal 2.7\x* 
\m  
\v 6 Dioskas mamaz pɨnkɨhta ka panintɨt: 
\q1 “Nune minpa payukima katsa pariyakana uznazi. 
\q2 Nune pariya Melquisedec kal kirɨtkana kinazi.”\x + \xo 5:6 \xt Sal 110.4\x* 
\m  
\v 7 Cristo an sukin uzasmin, usne Diosta tɨnta paikwara, ussa kiwainnapa. Diosta paikumtuasmin, usne tɨnta akwat kit azta, ishitchi akwa. Cristo paiña papihshta wakpuj wainta akwa, Dios kishit aizpa kit akwa, Diosne us paikwat aizpa mɨt kit ussa irɨttas kakulninta.  
\v 8 Us Dios painkul atkas, usne Dios ɨninta aizpa tɨnta tailchat kit us kaizta aizpa mɨt kit piankamta.  
\v 9 An sukin uzasmin, Cristone Dios kaizta aizpa mɨt kit Dios ɨninta aizpa kapal kira. Sun akwa, usne au katsa mikwa namta, ussa mɨmturuza chiyura nuninnanapa, pailta payukima usparuza watsat mɨlnanapa.  
\v 10 Sun akwa, Diosne Cristora katsa pariya namninta, pariya Melquisedec kal kitkanain kinpa. 
\s1 Cristora nɨjkultuchine, kwail i 
\p  
\v 11 Nane uruza akkwan pit paranashimtus, u Melquisedec katsa pariyawa piankamanapa. Suasne une Cristowa, au katsa pariyawa, piankamanazi. U Dios pit mɨashimtuchi akwa, nane uruza wat kamtanasachish. Une piankamasachi.  
\v 12 U akkwan añokima Jesucristowa mɨarɨtkas, une kamtamtuz namarachi. Dios pit we piankamarɨt akwa, une an katsa kawiarachi. Une sun an ñancha pit kamtarɨt aizpa kiarawa. Une sun pit uruza kamtanarɨt aizpa mɨarawa, Cristo uruza watsat mɨlnamtu akwa. Cristora an nɨjkularawa, Dios pit an wat piankamanapa.  
\v 13 Dios pit we piantuzne chiwazha kwail aizpakas wat aizpakas naasachi. Une Dios watcha pit kamtasachi, wat pianchi akwa.  
\v 14 Cristora an wat piantuzne an tɨnta namat kit Diospa an piankamamtu. Diospa an piankamturuzne wat aizpa naamtu. Uspane chiwazha kwail aizpa naamtuchi. 
\c 6  
\p  
\v 1 Sun akwa an ñancha Cristowa kamtarɨt aizpa piankamarawane, aune an tɨnta namat kit Cristowa kamtarɨt aizpa an kammɨznachain. Nane uruza an ñancha kamtanarɨt aizpa mamasa kamtanashitchish. Sun payuin nane uruza u kwail minñarɨt aizpa chɨhkanapa kamtanarau, Dios kwail kimtuza ilnamtu akwa. Sun payukas nane uruza Diosta nɨjkulana kamtanarau, Cristo uruza kwailtas watsat mɨlnanapa.  
\v 2 Nane uruza an kamtanamanash, awaruza kwazikasa munnanapa. Nane Cristora nɨjkulturuza kɨzpukin chihtɨkasa pana uruza an kamtanamanash, Sɨnam Izpul sappanapa. Nane irɨttuz piltas kuhsanazi uruza an kamtanamanash. Nane Dios Cristora pianchiruza pailta payurakima naizninnanazi kamtanamanash. Ñamin nane uruza sunpa kamtanarau.  
\v 3 Dios aumɨza kiwainashimtu akwa, aune an tɨnta nampuspas. Chiwazha aumɨza an ñamin kamtanarɨt aizpa piankamarawane, aune katsa pariya Cristowa an kamanawas. 
\p  
\v 4 Mɨnpazha awa Cristowa piankamarakas, awa Cristora nɨjkultawane, Cristora we mɨmturuzne wan kamarɨt aizpa kaarɨshina, Cristowa kamtɨt aizpa kwairane. Dios kamtamtu aizpa kwairɨttuzne mamasa Cristora kaiyasachi, uspa minñamtu aizpa maizasachi akwa. Chiyuras Dios sun awaruza wat kiwainarakas, ussa kwairane, uspane Diosta kaiyasachi. Diospa Sɨnam Izpul usparuza chiwazha Diosta mɨlanamtukas, Diosta kwairane, uspane Diosta kaiyasachi, usparuza maizanapa.  
\v 5 Sun Dios pit mɨraruzne Dios paiña kwaltuza wat kin namtɨt aizpa piankamamtu. Cristo kailnakima uspane Dios kwaltuza tɨnta kiwainamtu piankamara.  
\v 6 Sun Diospa pianturuz an mɨashimtukine, Cristora an nɨjkulashimtukine, uspane Cristora kwait kit wan kaarɨnazi. Cristora kwaimturuzne “Jesús Dios painkulchi” kizanazi. Uspane Diosta mamasa kaiyasachi, Cristo uspa kwail kiarɨt aizpa sɨnam sanapa. Sunkana kizmuruzne Jesústa piantararuzkana mai. Cristowa kwail minñamtu akwa, uspane Cristowa kwail kizanazi, ussa ishanamtu akwa.  
\v 7 Aluwa kwinta kinash. Alu kikane, alu pilta taiz kit pulishtɨm. Pilta naptu. Alu pilta naptu akwa, pippa warɨt aizpa chikkamtu. Kwiztane pippa waramikane Dios mɨlat aizpa sapnazi. Sunkana Diosne paina pit mɨraruza wat kinashimtu.  
\v 8 Sun pilta pumin chiktane, sun sune kainsɨh, palichi. Kainsɨh akwa awane pu tizpiannazi. Tizpiantawane, awane pu pulchaknin kit ĩnta impaktanazi. Diosne sunkana us kaizta aizpa mɨshimtuchiruza naizninnanazi. 
\s1 Pɨnkɨh pammikane ka kaizta: “Ap izmuruza mɨzain” 
\p  
\v 9 Ap izmuruz, mɨzhain, na uruza pashinamtu akwa. Na uruza sunkana kurunnarakas, nane u Cristora kwayarɨt kaiznamtuchish. Nane Dios uruza watsat mɨlnamtu pianish, paiña wat kal kianapa.  
\v 10 Dios wat akwa, us kimtu aizpa nil i. Sun akwa Diosne u izmuruz kal kiamtu aizpa mainmanazi. U usparuza pashiamtu akwa, une mama Diosta piantuza wat kiwainashimtu.  
\v 11 U Diosta piantuza kiwainamtuasmin, nane uruza paikwashimtus, sunmin kal kiamɨznapa, Cristo kailnakima. Suasne Diosne u tɨriztu aizpa uruza mɨlananazi.  
\v 12 An sukin uzamtuasmin, une arakan awakanain uzman. An ñamin Diosta mɨraruz uzarasmin, uspane wenamtachin Diosta nɨjkulamɨzta, Dios usparuza kin namtɨt aizpa sappanakima. 
\p  
\v 13 Dios Abraham akwa chiwazha kin namtane, usne us kaizta aizpa kira. Dioskin anza katsa iztamika wachi akwa, Diosne ussa watcha parat kit  
\v 14 mamasa ka kaizta: “Watcha. Nane Dios muntɨtmika ish. Katmizna nane nua kwisha wat kinash. Nane nua akkwan pashapara mɨlnapa kiwainnash,”\x + \xo 6:14 \xt Gn 22.16-17\x* ka kizta.  
\v 15 Abraham Diosta tɨrɨzta akwa, Diosta maintachin nɨjkulta akwa, Diosne us mɨlam namtɨt aizpa ussa mɨlara.  
\v 16 Izmuruz mamazta pit parakane, izwainmumikara sayarawa, wat mɨnapa, watmin chaanpa. Maza awa “Dios ap izwainmumika i” kizkane, mamaz izmumikane “us kaizta aizpa watcha i” kizshina.  
\v 17 Dios “nawa mɨmturuza ap kwal namninnanash” kizta akwa, usne usparuza paiña uzmukin mɨlana namta. Kwiztane mamasa usne an kishit aizpa kin namta, wan awa piankamanapa. Dios maiztuchi akwa, usne paiña kwaltuza kin namtɨt aizpa kinazi.  
\v 18 Dios paiña kwaltuza kin namnarakas, kwiztane usne mamasa kishit aizpa tɨnta kin namta, wan awa watcha piankamanapa. Dios pa piji us kishit aizpa kin namtɨt akwa, aune Dios pɨrail apmanazi piammakpas. Katmizna aune au izmumikasha, au Diosta, ɨrɨtmakpas, us aumɨza kwira kinanapa. Usne aumɨza an tɨnta namninnanazi, Dios aumɨza mɨlana namtɨt aizpa sappanapa.  
\v 19 An sukin uztuasmin, aune Diosta tɨriztumakpas, us aumɨza mɨlan namtɨt aizpa sapnakima. Aune Cristo watcha i pianmakpas, us au katsa pariyakana Dios watsal uzkin naptɨt akwa. Jesucristo akwa aune Diosta paikumtumakpas, us mɨlan namtɨt aizpa tɨrizana.  
\v 20 Jesús chiyura an ñancha naptɨt akwa, usne aumɨza sua mɨlana namtu, us au katsa pariya namtɨt akwa. Sua au akwa pailta payukima Diosta paikumtu akwa, mane usne pariya Melquisedec kal kirɨtkana kimtu. 
\c 7  
\s1 Jesúsne katsa pariya Melquisedeckana namtɨt 
\p  
\v 1 An Melquisedecne Salem pɨpulu katsa mikwa munazi. Uskas katsa Diospa pariya munazi. Abraham cinco katsa mikwaruza anupparawane, Melquisedecne ussa wanmal kit us akwa Diosta paikwara, ussa tɨnta kiwainnapa.  
\v 2 Katsa mikwaruza anuppanarɨt akwa, Abrahamne uspa mɨjat aizpa ukkat kit Melquisedecta akkwan mɨlara. Chiwazha diez mɨjne, maza ukkat kit Melquisedecta mɨlara. Melquisedecpa munne “ap katsa mikwa wat kimtu” kiztu. Salem pɨpulura ɨnintɨt akwa, awane “an katsa mikwa awaruza kalpain uzninnamtu”\x + \xo 7:2 \xt Gn 14.17-20\x* kizara.  
\v 3 Mɨnminkas Melquisedecpa papihshpakas paiña akkuhshpakas pɨnkɨhta parachi. Mɨnminkas paiña kwal an ñamin uzturuza pianchi. Us kawira payukas us irɨt payukas mɨnminkas pianchi. Melquisedecne Dios Painkulkana i. Dios painkulne katsa pariya nam kit Dioskasa pailta payukima nukkultu. 
\p  
\v 4 Sun Melquisedec katsa mikwa azi piankamtain. Melquisedecne Abrahamkin an katsa mikwa azi. Abrahamne an ñancha Israel kwalpa papihsh azi. Katmizna cinco mikwaruza anupparawane, usne Melquisedecta chiwazha kana kirɨt aizpa mɨlara. Mɨnmika diez mɨjne, usne maza ukkat kit ussa mɨlara.  
\v 5 Ñamin Moisés uztasmin, Diosne Israel awaruztas Levíwa kwalta namninnara, pariyawa kal kianapa. Moisésne Israel awaruza ɨninnara, chiwazha kana kirɨt aizpa pariyaruza mɨlananapa. Mɨnmika diez mɨjne, usne maza ukkat kit pariyaruza mɨlanarawa. Israel awaruz Abrahampa kwalpakis puzarakas, uspane pariyaruza, uspa kwaltuza, Dios ɨnintɨt aizpa mɨlanarawa.  
\v 6 Melquisedec Levíwa kwalchikas, usne Abraham mɨlat aizpa sapta. Kwiztane Melquisedecne Diosta paikwara, Abrahamta, Dios kin namtɨtmikasha, wat kiwainapa.  
\v 7 Melquisedecne Diosta paikwara, Abrahamta wat kiwainnapa. Katmizna aune Melquisedec Abrahamkin an tɨntamika i pianmakpas.  
\v 8 An sukin uzamtuasmin, apas awaruzne pariya irɨmtuza chiwazha mɨlanamtu. Apas pariya imtukane, mamazne ussa maiz kit paiña kal kinazi. Izwainmuruzne Melquisedec mizurainkas irachi kizamtu.  
\v 9 Ankas ma pitchin kaiznash. Levíne an sukin paiña paimpa sapta. Leví an kwizta kawirarakas, Abrahamne Melquisedecta paiña paimpa mɨlara, paiña pashpa Levíwa akwa. Sunkana wan Israel pariyaruzne Melquisedecta uspa paimpa mɨlaarɨt, Abraham akwa. Sun akwa Melquisedec pariyane Levíwa pariyakin an tɨnta i pianmakpas.  
\v 10 Melquisedec Abrahamta wanmaltawane, Abrahamne mama pashpa mɨjchi azi. Abraham mama pashpa mɨjchikas, usne Melquisedecta paiña Israel kwal akwa, kwizta uzturuz akwa, paiña paimpa mɨlara. 
\p  
\v 11 Levíwa pariyaruzne Judío awaruza kurunamtu, Moisés parɨt aizpa mɨanapa. Uspane an ñancha pariya, Aarón muntɨtmika, kal kitkana, kiamɨzta. Moisés parɨt aizpa mɨarakas, sun pitne awaruza an wat namninnarachi, Dios usparuza wat kulninnanapa. Akkwan pariya Aarónta kanpaarakas, uspa us kal kitkana kal kiarakas, mamaz tuntu pariya atpa, awaruza wat namninnanapa. Sun masas pariyane pianashina, Melquisedec kal kirɨtkana kinpa.  
\v 12 Katmizna Diosne mamaz tuntu pariya nara, awa sɨnam sarɨttuza sapnanapa. Diosne pariya Aarónta kanparuza kwaiyat kit wanta maizninnara. Pariya Aarónkana kal kirɨttuza pailnintawane, Dioskas Moisés Judío awaruza ɨnintɨt aizpa maizninnara. Dios Moisés ɨnintɨt aizpa kwairɨt akwa, awaruzmin mamaz tuntuwara Dios uzkin piannashina.  
\v 13 Jesúsne sun masas pariya azi. Us pariya kwalkis puztachi akwa, paiña kwaltuzne mizurainkas Diospa yalta kal kiarachi.  
\v 14 Wanne Cristo Judá kwalkis puzta pianmai. Moisés Israel awaruza pariya Leví kwalpa panarɨtkas, usne mizurainkas pariyaruz Judá kwalkis puznazi pɨnkɨhta parachi. 
\p  
\v 15 Aune Dios kishimtu aizpa an wat piankamshimtumakpas. Dios Moisés ɨnintɨt aizpa maizta akwa, uskas Levíwa pariyaruza maiznara. An masas pariyane, Cristone, Melquisedec kal kirɨtkana ara.  
\v 16 Moisés Levíwa kwal pariyaruza namnashina kaiztakas, Diosne Moisés kaizta aizpa maiz kit Cristora pariya namninta, pailta payukima uztu akwa.  
\v 17 Sunkana us akwa Dios pɨnkɨhta ka parɨt: 
\q1 “Nune minpa payurakima pariya tuanazi. 
\q1 Nune pariya Melquisedec kal kirɨtkana kinazi.”\x + \xo 7:17 \xt Sal 110.4\x* 
\m  
\v 18 Katmizna Diosne Moisés Judío awaruza pɨnkɨh pat ɨnintɨt aizpa kwairɨt, sun ñamin pit uspa kwail kiarɨt aizpa sɨnam sanasachi akwa, awaruza watsat mɨlnasachi akwa.  
\v 19 Moisés pat ɨnintɨt aizpa awaruza wat namninnarachi akwa, Diosne masas watsal pit awaruza ɨninta, awa Jesústa tɨrizanapa, usparuza watsat mɨlnanapa. Us akwa awane Diosta kasha pianaashina. 
\p  
\v 20 Levíwa kwaltuzne pariya namara, Moisés sun ɨnintɨt akwa. Diosne Jesucristora au katsa pariya namninna namta, wan awa sun piankamanapa.  
\v 21 Levíwa kwaltas pariyaruz kawiamtu akwa, uspane pariyaruz namamtu, pariyawa kal kianapa. Diosne wan awaruza us kaiztɨt aizpa piankamninnat kit Jesucristora au katsa pariya namninna namta. Paiña pɨnkɨhtakas Cristowa ka parɨt: 
\q1 “Nane up Dios ish. Nane nua katsa pariya namnintus, ap kal pailta payukima kinpa. 
\q2 Na pɨrail kaiztuchi akwa, nane nua kaiztɨt aizpa maizmanash. 
\q1 Nune pailta payukima Melquisedec kal kirɨtkana kinazi.”\x + \xo 7:21 \xt Sal 110.4\x* 
\m  
\v 22 Dios Jesucristora sunkana narɨt akwa, aune Jesúspa pit Moisés ɨninta pitkin anza wari piankamtumakpas.  
\v 23 An ñamin pariya uzmuruzne akkwan mazi. Uspane uspa pariya kal kiamɨzsachi, iarɨt akwa. Iarawane, mamaz pariyaruzne uspa kal kiara.  
\v 24 Jesúsne manaz pariyaruzkana chi. Us imtuchi akwa, usne pailta payurakima nukkulnazi. Au katsa pariyane mizurainkas maizmanazi.  
\v 25 Katmizna Jesúsne Diosta aashimturuza pailta payukima watsat mɨlnanamtu. Mane Jesúsne uspa pariyane, chiyura uz kit Diosta uspa akwa pailtachin paikumtu. 
\p  
\v 26 Aune maza pariya Jesúskanain pashiamtanash. Usne Dioskana wat i. Usne mizurainkas kwail kin mintachi. Us sɨnam awa akwa, usne apas kwail kimtuzkana uztachi. Mane usne Diospa chiyura uztu, Dios paiñawa wat mintu akwa.  
\v 27 Sun Judíowa katsa pariyaruzne, an ñamin an sukin uzturuzne, payu aizpa piantarɨt aizpa Diosta mɨlanara, pariyaruzpa kwail kiarɨt akwa. Kwiztane uspane piantarɨt aizpa Diosta mɨlanara, awaruzpa kwail kiarɨt akwa. Jesús wan awa akwa maza piji irɨt akwa, usne pailta payukima au kwail kiarɨt akwa sɨnam sanashinai.  
\v 28 Moisés sun pit Judío awaruza panat kit Leví kwaltuza katsa pariyaruz munnanapa ɨninnara. Sun pariyaruzne wan awakanain kwail kiara. Moisés an ñamin sun ɨnintɨt aizpa parakas, kwiztane Diosne parat kit paiña painkulta nat kit Jesústa katsa pariya namninta, au akwa pailta payukima Diosta paikwanpa. 
\c 8  
\s1 Cristone an katsa pariya namta 
\p  
\v 1 Na sun pit uruza kainammtu aizpa mɨrain. Mamaz pitne an pitkin anza watsal wachi. Jesucristo au katsa pariya namtawane, usne chiyura, Dios uzmukin nura, Dioskasa wantuza ɨninnanapa. Suane Diosne ussa an tɨnta namninta.  
\v 2 Us au katsa pariya namtɨt akwa, usne Dios uztukin paiña kal mɨj. Awane Diospa uztukin sarachi. 
\p  
\v 3 Moisés Judío awaruza uspa pariyaruza namninnanapa ɨninnara, chiwazha piantarɨt aizpa Diosta mɨlananapa. Uspane mɨlamkas Diosta mɨlaara. Sunkana Jesúsne, au katsa pariyane, Dios pashit aizpa kit kit au kwail akwa irɨt.  
\v 4 Jesús an sukin uzaratne, usne pariya tuamanazi, apain akkwan pariya pura akwa. Apas pariyaruzne Diosta chiwazha mɨlaamtu, Moisés usparuza ɨninnarɨt akwa.  
\v 5 Au sukis pariyaruz Dios yalkin kal kiamtuasmin, Dios uzmukin chiyura anza watsal i. Apas pariyaruz Dios yalkin uspa kal kiamtuasmin, uspa kalne izpulkana iztɨt, Jesús chiyura, Dios uzmukin, paiña kal kimtu akwa. Moisés an sukin Dios yal sarachasmin, Diosne sun yal miza sana ussa kamtara. Moisés Dioskasa Sinaí ɨnkalta chamtuasmin, ka kaizta: “Na nua an yal antu aizpa izti, an sukin ap yalta sanapa. Izpulkana iztɨt. An yalne Dios uzmukana iztuchi.”\x + \xo 8:5 \xt Éx 25.40\x* ka kizta.  
\v 6 Mane, Jesúsne, au katsa pariyane, an sukin pariyaruzkin anza wat kal chiyura sapta, Diosta au akwa paikwan. Au sukin pariyaruzne Moisés ñamin ɨninta aizpa kiamtu. Uspa kalne an we tɨnta i. Sun masas contrato akwa, Jesúsne awaruza Dioskasa wanmaknashina, awa Dios uzkin nappanapa. Jesúsne an wat contrato sat kit aumɨza kiwaina namta, us parat aizpa piankamnanapa, au kwail kiarɨt aizpa kihananapa. 
\p  
\v 7 Awa Moisés an ñamin ɨnintɨt aizpa mɨasachi akwa, Diosne masas contrato chɨhkat kit Moisés an ñamin ɨnintɨt aizpa maizninta. An ñamin contrato awaruza wat namnasachi akwa, Diosne masas contrato aumɨza chɨhkanara, awaruza wat namninnanapa.  
\v 8 Diosne Israel awaruza kwail kiarɨt kaiznara, Moisés ɨnintɨt aizpa mɨashitchi akwa. Sun akwa Diosne paiña pɨnkɨhta patnin kit ka kaiznara: 
\q1 “Mɨzhain. Mamaz payura nane masas contrato ɨninnanash, 
\q2 an Israel awaruzkas, 
\q1 wan Judá awaruzkas, ap masas ɨninta pit nɨjkulanapa, 
\q2 nakasa contrato nappanapa. 
\q1  
\v 9 Judío awaruzne an kwizta nakasa masas contrato nappanazi. 
\q2 Judío awa Egipto suras puzarawane, uspa papihshtuzne nakasa nɨjkulat kit an ñancha contrato sappara. 
\q1 Suasne nane papihshkanain usparuza Egipto suras mɨlnarau. 
\q2 An ñancha contrato sapparakas, uspane ap contrato kwayarɨt. 
\q1 Ap contrato kwayarɨt akwa, 
\q2 nane usparuza mɨshimat kit kwainarɨt. 
\q1  
\v 10 Nane mamaz payura masas contrato usparuza chɨhkananazi, 
\q2 Israel awaruz masas contrato nappanapa. Diosne sun masas contratokin ka parɨt: 
\q1 Nane na ɨnintɨt aizpa usparuza piankamninnanash. 
\q2 Nane uspa kaijchukin ap pit nɨjkulninnanash. 
\q1 Nane uspa Dioskanain tuanash, usparuza kiwainana. 
\q2 Uspane ap kwalkanain puranazi. 
\q1  
\v 11 Wan awa Diosta piankamamtu akwa, mɨnminkas paiña izmuruza Diospa kamtanamanazi. 
\q2 Mɨnminkas paiña kwaltuza Diospa kamtanamanazi. 
\q1 Awane mamaztuza ‘Diosta piankamtain’ kaizamanazi, wan awa nawa me piankamamtu akwa. 
\q2 Katsa mikwaruzkas katsachiruzkas Diosta piankamanazi. 
\q1  
\v 12 Na awaruza pashinamtu akwa, nane uspa kwail kiarɨt aizpa wat kulnanash. 
\q2 Nane uspa kwail kiarɨt aizpa sɨnam sananash. Uspa kwail kiamtu aizpa pailta payurakima mainnanash.”\x * \xo 8:12 \xt Jer 31.31-34\x* 
\m  
\v 13 Dios masas contrato chɨhkarawawne, usne an ñancha contrato kiakpɨnta, wat chi akwa. Sun contrato wat chi akwa, tailchamai. Pailnapain azi. 
\c 9  
\s1 Chiyura Dios uzmu yalkas au sukin Dios yalkas 
\p  
\v 1 Diosne an ñancha contrato Israel awaruza chɨhkanat kit au sukin Dios yal sanapa ɨninnara. Usne usparuza akkwan ɨninmu chɨhkanat kit Diosta pashianapa kamtanara, Diosta wakpuj wainñanapa.  
\v 2 An sukin Dios yalne pakwa mɨjazi. An ñancha putnakin uru ɨlampara paizkakin kunarɨt. Mamin maza misharɨ ayukta uzta. Pariyaruzne pan sun misharɨra Diosta taarɨt. Awane an ñancha putnakin sɨnam putnakin muntɨt.  
\v 3 Dios yalkin, paizkakin, pĩn kantɨtkasa nailtɨt. Ayukta putnakin anza sɨnam putnakin muntɨt.  
\v 4 Pĩn kantɨtkin misharɨ uzta, incienso impaktana. Sun misharɨ tɨkasa sara. Sun misharɨ urukasa pianamal appaltɨt. Pĩn kantɨt naptawane, mamaz katsa kaja unara. Sun katsa kaja urukasa pianmal appaltɨt. Sun kaja ayukta maza uru ulmune wa. “Maná” muntɨt panne uru ulmura wintɨt. Sun kaja ayukta Aarónpa chiktɨt tɨwilkas warɨt. Sun kaja ayukta paas alpara uktakas wintɨt. Diosne diez ɨninmu an paas alpara ukta para.\fig Ayukta Diospa yal au sukin|src="BK00278B.TIF" size="span" copy="©David C. Cook Foundation" ref="HEB 9.4" \fig* 
\v 5 Ɨsal kajara paas uru ángeltuza unarɨt. Uspane Dios iztakin kunat kit uspa itsɨh ɨsal kajara appalmura asuztu. Diosne sun kaja appalmukin awa kwail kiarɨt aizpa sɨnam kwizninnamtu. Mane nane uruza sunpa an kwinta kisachish. 
\p  
\v 6 Dios yal kapal sarawane, pariyaruzne an ñancha putnakin nappamɨz kit puzamɨzta, pariyawa kal kianapa.  
\v 7 Katsa pariyain anza sɨnam putnakin maza pijin año aizpa naptu, Dios iztakin tuanpa. Anza sɨnam putnakin kwizta naptuasmin, katsa pariyane ainki wakarawa aimpi ayukta mɨlta, kaja appalmukin parannapa. Usne sun aimpi ayukta mɨlta, Dios paiña kwail kirɨt aizpa kwizninnapa. Sua tuasmin, katsa pariyane an aimpi mɨlta, Dios anpa awa kwail kiarɨt aizpa kwizninnanapa.  
\v 8 Pariyaruz payu aizpa an sukin Dios yal uspa kal kiana nappamtuasmin, Sɨnam Izpulne awa Dios iztakin chiyura nappasachi aumɨza kamtanamtu. An ñancha Dios yal an sukin nukkultuasmin, pariyaruz paiña kal kiarasmin, mɨnminkas chiyura Dios tukin naptachi, Dioskasa kwinta kin.  
\v 9 Awa chiwazha piantarɨt aizpa an ñancha Dios yalta mɨlarakas, sun kalparuzne awaruzpa kwail kiarɨt aizpa kwizninnasachi. Mane uruza kamtananash, Dios wan chiwal maizshimtu akwa, awa Dioskasa kalpain puranapa, Dios uspa kwail kiarɨt wat kulnanapa.  
\v 10 Dios an ñancha contrato Judío awaruza chɨhkanarawane, usne akkwan tuntu ɨnimmu usparuza ɨninnara. Usne chiwazha kwanpa kamtanara. Usne usparuza kwazikasa kitnapa kamtanara, Dios yalta napparachasmin, us iztakin wakpuj wainñarachasmin. Judío awaruzne wan ɨninmu mɨarawa, Jesús au katsa pariya narakima, Dios wanta masas maiznakima. 
\p  
\v 11 Cristo au sukin atpane, usne au katsa pariya nam kit chiyura napta, aumɨza wat kiwainanapa. Usne Dios iztakin napta, sua paiña wat kal au akwa kinpa. Awa Dios uzmu chiyura sarachi akwa, Diospa uzmune apas Dios yalkin anza watsal i.  
\v 12 Cristo Dios anza sɨnam uzmukin naptawane, usne chivowa aimpikas ternerowa aimpikas chiyura mɨltachi. Apas pariyaruzne pailta payukima sunkana kiara. Cristo au akwa irɨt akwa, usne, au katsa pariyane, Dios sɨnam uzmukin napta, awa kwail kiarɨt aizpa kwizninnanapa. Usne Dios anza sɨnam uzmukin maza piji napta, au kwail kiarɨt aizpa sɨnam sananapa, aumɨza pailta payukima watsat mɨlnanapa.  
\v 13 Apas pariyaruzne chivowa aimpikas torowa aimpikas impa kirɨttuza parannara, uspa ña pianamal mamasa sɨnam sanapa, mamaztuzkasa tuanpa. Ternera impaktawane, uspane ternerawa imjal kwazikasa nat kit impa kirɨttuza parannara, uspa ña pianamal mamasa sɨnam sanapa, mamaztuzkasa tuanpa.  
\v 14 Cristowa aimpine ternerowa aimpikinkas anza wari, Cristowa aimpi au ayukta kwail kiarɨt aizpa sɨnam sanamtu akwa. Paiña Izpulne, Cristokasa pailta payu uztumikane, Cristora kiwainta, au akwa inapa. Cristo ussain Diosta chɨhkarawane, usne au akwa piantarɨtmika namtɨt. Us chinkas kwail kirɨtkas, usne au akwa irɨt, paiña aimpi au kwail minñarɨt aizpa kwizninnanapa. Us au akwa irɨt akwa, usne au chiwazha kwail kiarɨt aizpa sɨnam sanarɨt, au Dios chiyura uztumikakasa tuanpa. 
\p  
\v 15 Katmizna, Cristone masas contrato awaruza chɨhkanarɨt, awaruz Dioskasa wanmakkanapa. Diosne awaruza akwanamtu, Dios mɨlan namtɨt aizpa sappanapa, pailta payukima chiyura uskasa uzanapa. Cristo Judío awaruz akwa, an ñancha contrato saptaruz akwa, irɨt, uspa kwail kiarɨt aizpa sɨnam sananapa, Dios usparuza chiyura pailta payukima uskasa uzninnanapa.  
\v 16 Awa irachasmin, mɨnpazha awane pɨnkɨhta pam kit us mɨj aizpa mamazta mɨlan namtu, irɨka. Awa sun mɨlan namtɨtmika irɨt piankamtawane, pa kimmikane ussa mɨlan namtɨt aizpa sapshina.  
\v 17 Sun pɨnkɨhta us mɨj aizpa pamtumika uztuasmin, mamazne ussa mɨlam namtɨt aizpa sapsachi, namtɨtmika mama uztu akwa. Namtɨtmika irawane, saptumikane ussa mɨlan namtɨt aizpa pa kishina.  
\v 18 Dios paiña kwaltuza an ñancha contrato chɨhkarawane, pariyane torora piantat kit torowa aimpi parantawa, awa sun contrato sappanapa.  
\v 19 Moisés wan Dios ɨnintɨt aizpa wan Judío awaruza kainanarawane, usne kwanam pɨriku ash tɨt kit hisopo tɨra ipta. Suasne usne ternerowa aimpikas cabrawa aimpikas kwazikasa narɨt. Usne hisopo tɨ kwazikas aimpikas ulmukin pain kit Dios contratora, Dios ɨnintɨt aizpa pɨnkɨhta ɨsalta tɨlpalta. Kwizta us wan Judío awaruza tɨtpalnarawane,  
\v 20 usne usparuza ka kaiznara: “Diosne ukasa an contrato chɨhkanara, us uruza ɨnintɨt aizpa sappanapa. Sun contratora aimpikasa tɨlpalta akwa, Diosne uruza contrato pɨnkɨhta parɨt aizpa kin namtɨt,”\x + \xo 9:20 \xt Éx 24.8\x* kiznara.  
\v 21 Dios yal sarawane, sunkana Moisésne Dios yaltakas wan ayukta pura aizpakas aimpikasa tɨlpalnapa ɨninta, chiwazha impa aizpa sɨnam sanapa, awa Dioskasa wanmakkanapa.  
\v 22 Moisésne wanpazhara aimpikasa tɨlpalnapa ɨninta, chiwazha impa aizpa sɨnam sanapa, Dioskasa wanmakkanapa. Aimpi akwa tɨlpalnamtukine, Diosne mizurainkas awawa kwail kiarɨt aizpa kaninnasachi. 
\s1 Cristone au akwa irɨt 
\p  
\v 23 An sukin uzasmin, Dios iztakin pianchasmin, awane chiwazha piantarawa, wan impa aizpa sɨnam sanapa, Dioskasa wanmakkanapa. Pariyaruzne Dios yalkin pura aizpa aimpikasa sɨnam sanarɨt. Chiyura pura aizpa an sura pura aizpakinkas anza wari. Katmizna Diosne chiyura pura aizpa aimpikasakas sɨnam sanarawa. Cristo au akwa irɨt akwa, paiña aimpine ternerowa aimpikinkas anza wari, paiña aimpi aumɨza sɨnam sanarɨt akwa, awa Dios iztakin aanapa.  
\v 24 Cristone, au katsa pariyane, apain Dios yalta, awa sarɨt yalta, naptachi. Cristone chiyura Dios iztukin napta, au akwa paikwanpa, aumɨza kiwainanapa, au Dios iztakin puranpa.  
\v 25 Apas katsa pariyane año aizpa piantɨt aizpa sap kit Diospa anza sɨnam yalta mamazpa aimpikasa mɨlta, awa kwail kirɨt aizpa sɨnam puranapa. Cristone maza piji it kit Dios iztakin paiña aimpikasa napta, au kwail kiarɨt aizpa sɨnam kwizninnanapa.  
\v 26 Dios au su sarasmin, Cristone año aizpa irachi, us maza piji pɨna naiztɨt akwa. Mane Cristone maza pijiin au sukin at kit maza piji au akwa irɨt, au kwail kiarɨt aizpa kwizninnana. Usne minpa payura au akwa piantarɨtmika namta, awaruza sɨnam sanana, awa Dioskasa wanmakkana.  
\v 27 Sunkana wan awaruzne maza pijin iarawa. Awa iarawane, kwiztane Diosne wan uspa kwail minñamtu aizpa chɨhkatchiruza ilnanazi.  
\v 28 Sunkana Cristone maza piji it kit au akwa piantatmika namta, au kwail kiarɨt akwa naizna. Sunkana usne wan awa kwail kiarɨt aizpa sɨnam sanashina. Cristo mamaz payura mamasa kailtukas, usne sun kailtu payura awa kwail kiarɨt aizpa sɨnam sammanazi, uspa kwail kiarɨt aizpa me sɨnam sarɨt akwa. Sun kailtu payura usne ussa tɨrizturuza watsat mɨlnanazi, chiyura uskasa uzanapa. 
\c 10  
\p  
\v 1 Moisésne Dios Judío awaruza ɨninnarɨt aizpa parɨt. Uspa Dios ɨnintɨt aizpa mɨashitchi akwa, uspane wat namarachi, Dios pashit aizpa kiana. Chiyura pura aizpa watcha i. Kwiztane Diosne chiyura aumɨza wan karamtu aizpa piankamninnanazi, au sukin mɨj aizpa pailtɨmtu akwa. Awa año aizpa piantarɨt aizpa Diosta mɨlarɨtkas, Moisés ɨnintɨt aizpa kiarakas, uspane mizurainkas sɨnam sarɨt uzasachi. Diosne mizurainkas usparuza sapnasachi, uspa kwail kwizninnarachi akwa.  
\v 2 Moisés ɨnintɨt aizpa usparuza wat namnarachikas, uspa kwail sɨnam saninnarachikas, uspane chiwazha piantarɨt aizpa Diosta mɨlamɨzta. Dios sun piantarɨt aizpa mɨlturuza sɨnam sanaratne, uspane mamasa sun piantarɨt aizpa Diosta mɨltakianazi. Sɨnam sarɨtmika paiña kwail kirɨt aizpa kwiznintɨt pian akwa, usne ayukta paiña kwailpa mintuchi.  
\v 3 Ñamin awane sunkana minñarachi. Año aizpa kalpa piantamɨzta akwa, uspane uspa kwail kiarɨt aizpa nɨjkulara.  
\v 4 Aune ternerowa aimpikas cabrawa aimpikas kwail kimturuza mizurainkas sɨnam sanasachi pianmakpas, Dios usparuza sapnanapa. 
\p  
\v 5 Chiwazha aimpi awawa kwail kwizninnasachi akwa, Cristo au sukin piannakane, usne Diosta ka kaizta: 
\q1 “Nune chiwazha piantarɨt aizpa pashitchi. 
\q2 Nune nawa awakana namtɨt, awa akwa inapa. 
\q1  
\v 6 Awa ternero Diosta mɨlarakas, 
\q2 nune ña impaktɨt aizpakas piantarɨt aizpakas pashitchi, awawa kwail sɨnam sananapa. 
\q1  
\v 7 Suasne Cristone Diosta ka kaizta: ‘Izti. Nane an sukin arau, nu pashimtu aizpa kin. 
\q1 Nane Dios pɨnkɨhta nawa parɨt aizpa kishinash.’ ”\x + \xo 10:7 \xt Sal 40.6-8\x* 
\m  
\v 8 Ñamin Moisés sun pit pɨnkɨhta pat kit Judío awaruza ɨninnara, kalpa piantanapa, uspa kwail akwa Diosta mɨlaanapa. Ma payu sunkana Cristone Diosta ka kaizta: “Mane Diosne piantarɨt aizpa pashitchi, awawa kwail sɨnam sananapa.”  
\v 9 Kwiztane Cristone Diosta ka kaizta: “Izti. Nane an sukin arau, nu pashimtu aizpa kin,” ka kizta. Us au akwa irɨt akwa, usne Moisés ɨnintɨt aizpa pailninta, sun awaruza wat namninnamtu akwa.  
\v 10 Cristo Dios pashit aizpa kishit akwa, usne Dios ɨnintɨt aizpa mɨra. Jesucristone, au akwa piantatmikane, maza piji irɨt, au kwail kiarɨt aizpa sɨnam sananapa, aumɨza Dios iztukin uzninnanapa. 
\p  
\v 11 Wan Judío pariyaruz an sukin uspa kal kiamtuasmin, uspane pailta payukima Diospa yalta akkwan piji sunmin piantarɨt aizpa mamazpa akwa mɨlanara. Ternerowa aimpine mizurainkas awawa kwail kwizninnasachi.  
\v 12 Cristone ussain Diosta chɨhkarawane, au akwa piantatmika namta. Usne maza pijiin irɨt, au kwail kiarɨt aizpa sɨnam sananapa. Paiña kal kapal pailtawane, usne chiyura nura, Dios iztakin pailta payukima uzna.  
\v 13 Suane usne paiña Taitta Dioskasa tɨriztu, paiña aliztuza kapal anuppanakima.  
\v 14 Cristone maza piji awa akwa inapa chɨhkara, wan Diosta piantuza sɨnam sanana, usparuza watsat mɨlnana.  
\v 15 Dios Sɨnam Izpulne sun watcha pit kaiz kit Dios pɨnkɨhta ka paninta: 
\q1  
\v 16 “Nane masas contrato pam kit Judío awaruza 
\q2 mamaz payura chɨhkananash. Anpatne ka kiznara. 
\q1 Nane Dios ɨnintɨt aizpa usparuzpa kaijchukin piankamninnanash. 
\q2 Nane sun pɨnkɨh parɨt aizpa ayukta mintukin usparuza piankamninnanash.”\x + \xo 10:16 \xt Jer 31.33\x* 
\m  
\v 17 Suasne Dios Sɨnam Izpulne ma pitchin ka kaizta: 
\q1 “Nane uspa kwail kiarɨt aizpakas mama minmanash. Awa Dios ɨnintɨt aizpa mɨamtuchikas, nane uspa kwail kiarɨt aizpa kwizninnat kit uspa kwail kiarɨt aizpa maintɨnash.”\x + \xo 10:17 \xt Jer 31.34\x* 
\m  
\v 18 Dios awaruzpa kwail kiarɨt aizpa kihashinamtu akwa, aune chiwazha piantarɨt aizpa Diosta mɨlashitchimakpas, au kwail kiarɨt aizpa kwizninnanapa. 
\s1 Pɨnkɨhta pamtumikane kamtanara, Diosta piantuz ussa paikuanapa 
\p  
\v 19 Mane, ap izmuruz, mɨzhain. Jesucristo au akwa irɨt akwa, Dios tukin naptɨt akwa, usne chiyura napta. Suane usne paiña aimpikasa au kwail kiarɨt aizpa sɨnam sanashina. Sun akwa aune Dios uzkin napshinamakpas, ishkwatchin, Dioskasa wanmakkana.  
\v 20 Jesús sun masas chiyura mi sanintɨt akwa, katmizna aune Dios iztukin chiyura napshimtumakpas, Dioskasa wanmakkana. Jesús irachasmin, sun chiyura mi sɨptɨt ara. Cristo uztu akwa, usne awaruza maizninnashina, masas miwara nappanapa, chiyura Dioskasa uzanapa.  
\v 21 Au katsa pariyane, Jesúsne chiyura uz kit wan Diosta piantuza ɨninnamtu.  
\v 22 Katmizna Dios tura ɨzhain, ussa wakpuj wainna. Mane ussa wat nɨjkultumakpas. Dios aumɨza maiznat kit au kaijchura wat namninta akwa, aune Dios watcha i pianmakpas. Cristo au kaijchukin au kwail mintɨt aizpa sɨnam sanarɨt akwa, aune Dios iztukin sɨnam awakana uztumakpas.  
\v 23 Diosta tɨrizna ɨzhain, us kin namtɨt aizpa kinkima. Wenamtuchin, Cristo watcha i kaizna ɨzhain. Paiña pit kwairachin, ussa mɨzhain. Usne us kin namtɨt aizpa kinazi, wenamnachin.  
\v 24 Mamaztuzpa minchain, usparuza kiwainnanapa, awaruza pashinanapa. Mamaztuza kiwainna ɨzhain, wat kal kianapa.  
\v 25 Diosta piantuz wanmakkakane, uspakasa wanmakna ɨzhain. Mazantuz ñamin wanmakkarakas, uspane wanmakna paiyarɨt. Sun wanmakmuchiruzkana uzman. Katmizna maza mazarain kuruntawamakpas, awa Dioskasa watmin chaanapa, Diosta wakpuj wainñanapa. Mane aune awaruza kiwainnarawa, au Anpat kailtu payu piananpain akwa. 
\p  
\v 26 Maza Dios watcha pit piankamtukas, sun awa kwail kimɨztune, Diosne paiña kwail kimtu aizpa sɨnam sasachi, au piantarɨtmikasha kwairɨt akwa.  
\v 27 Sun akwa, Diosne kwail kishimɨzturuza ishkwaninnat kit usparuza ĩnkin ɨninnanazi, usparuza ilnana.  
\v 28 Ñamin awa Moisés ɨnintɨt aizpa kitchine, kutña izwainmuruzkima us kwail kirɨt aizpa izarane, mikwane ussa inapa ɨninta. Minminkas ussa kiwainsachi.  
\v 29 Diosne Dios painkulta kwairɨtmikasha an tɨnta ilnazi, Dios painkulpa wat mintachi akwa. Cristone irɨt, awa masas contrato uskasa nappanapa, uspa kwail kiarɨt aizpa paiña aimpikasa sɨnam sananapa. Diosne Jesús chiwazha awakanain irɨt minturuza an tɨnta ilnanazi. Sɨnam Izpulne awaruza Diosta wanmalninnat kit Diosta piankamwainshimtu. Sɨnam Izpul kiwainnamtu akwa, Diosne ussa saptuchiruza an tɨnta ilnanazi.  
\v 30 Aune Dios kimtu aizpa pianmakpas. Ka kaizta: “Nane wan kwail kimtuza ilnanash. Nane uspa kwail kiarɨtkanain usparuza kailninnanash, sunkanain naizanapa.”\x + \xo 10:30 \xt Dt 32.35\x* Dioskas an kaizta: “Nane ap kwaltuza ilnanazi, nawa mɨamtuchine.”\x + \xo 10:30 \xt Dt 32.36\x* 
\v 31 Diosne, chiyura uztumikane, kwailtuza tɨnta ilnanazi. 
\p  
\v 32 Ñamin une Dios watcha pit mɨat kit Diosta piankamara. Dios uruza watsarɨt mɨlnara nɨjkultain. Awa uruzkasa waya kiarɨtkas, awa uruza tɨnta naizninnarakas, une uspa kwail tailchaara, u Diosta nɨjkularɨt akwa.  
\v 33 Masetne sun kwailtuzne uruza awa iztakin tɨnta ɨninnat kit uruza kwail pit kaizara. Uspane uruza akkwan piji naizninnara. U naizturuza kiwainamtasmin, sun kwailtuzne uruzakas kawarain kwail kinara.  
\v 34 Une kajchira sɨptɨttuz akwa tayal kit usparuza kiwainnashit kit uspa we mɨjat aizpa usparuza mɨlanara. Awa u su mɨj aizpa walkwarakas, une tayaltachin tailchaara, uspa u kaijchukin mɨj aizpa walkwasachi akwa. Sun kwail tailchamtuasmin, une wat tuat kit Dios uruza mɨlamtu aizpa pianmai. Usne aumɨza us mɨj aizpa mɨlananazi, us mɨj aizpa anza wat akwa.  
\v 35 Katmizna, Diosta nɨjkulmɨztain, wenamtachin. Watcha, Diosne uruza us wan kin namtɨt aizpa chiyura mɨlananazi.  
\v 36 Wan naiztu aizpa tɨnta tailchamtuasmin, une Dios kaizta aizpa mɨarawa, kwairachin. Dios pashit aizpa kiarawa, us uruza kin namtɨt aizpa chiyura sappanapa.  
\v 37 Diosne paiña pɨnkɨhta ka panintɨt: 
\q1 “Imparain imparain, Cristone, amtumikane, anazi. Usne watcha apain piannanpain. 
\q2  
\v 38 Nane awaruza wat namninnanash, nakasa wanmakkanapa. 
\q1 Nawa wat nɨjkulat kit nakasa uzanazi. 
\q2 Nane nɨjkultuchiruza ilnanash, nawa mɨarachi akwa, Diosta kwayarɨt akwa.”\x + \xo 10:38 \xt Hab 2.3-4\x* 
\m  
\v 39 Aune Diosta kwayamturuzkana chimakpas. Aune chinkas kamanash. Aune ishkwatchin Diosta kanpamtumakpas. Au Diosta nɨjkulamtu akwa, Diosne aumɨza watsat mɨlnanazi. 
\c 11  
\s1 Diosta nɨjkultɨttuz 
\p  
\v 1 Au Diosta nɨjkulturuzne Dios kaiztɨt aizpa watcha i mɨmtumakpas, wenamtachin. Dios aumɨza kin namtɨt aizpa apain sapparachikas, aune Dios aumɨza kin namtɨt aizpa pianmakpas. Diosta tɨriztawane, aune sappanapas. Aumɨza kin namtɨt aizpa izarachikas, aune an tɨnta namat kit Dios kaizta aizpa watcha i minñanash.  
\v 2 Ñamin uztaruz Dios kaizta aizpa watcha i nɨjkularɨt akwa, Diosne usparuzpa “wat awa mai” kiznara. 
\p  
\v 3 Au Dios kaizta aizpa watcha i nɨjkulamtu akwa, aune Dios au sukas au chiyukas sarɨt pianmakpas. Dios au su sarachasmin, chinkas wachi. Us tɨnta akwa, Diosne paiña pit kaiz kit wan wa aizpa sarɨt. 
\p  
\v 4 Abelne Dios kaizta aizpa watcha i nɨjkulta. Abel us piantarɨt aizpa Diosta mɨlarawane, Diosne Abelpa wat min kit paiña mɨlam sapta. Diosne Caín mɨlat aizpa saptachi, Diosta nɨjkultachi akwa. Abel Diosta nɨjkulta akwa, Diosne paiña kwail sɨnam sat kit Dios iztakin wat sara. Abel irɨtkas, aune mama Abelpa kamtumakpas. Aune uskana Dios kaizta aizpa watcha i nɨjkultawamakpas. 
\p  
\v 5 Enocne Dios kaizta aizpa watcha i nɨjkulta. Enoc uztasmin, Diosne chiyura ussa mɨlta. Ɨtchasmin, usne irachi. Dios ussa chiyura mɨltɨt akwa, an sukin awane ussa wanmalarachi. Dios pɨnkɨhta Enocpa parɨt: “Us Dios ɨnintɨt aizpa mɨrɨt akwa, Diosne Enocpa wat min kit kwizta chiyura mɨlta.”\x + \xo 11:5 \xt Gn 5.21-24\x* 
\v 6 Dios kaizta aizpa watcha i nɨjkultuchimikane Dios pashit aizpa kisachi. Diosta wakpuj wainshimtumikane Dios watcha uzi nɨjkultawa. Diosne ussa saimturuza us kin namtɨt aizpa mɨlananazi. 
\p  
\v 7 Noéne Dios kaizta aizpa watcha i nɨjkulta. Dios Noéra “mamaz payura nane an su pi pɨnninnash” kuruntawane, Noéne chinkas iztachin Dios kaizta aizpa watcha i nɨjkul kit ishkwat kit kwisha katsa kanua samɨzta, paiña kwaltuza watsat mɨlnana. Noé Dios kaizta aizpa watcha i nɨjkultɨt akwa, Diosne Noéra watsat mɨlnat kit Dios kaizta aizpa nɨjkultuchiruza ilnara. Noé Dios kaizta aizpa watcha i nɨjkultɨt akwa, Diosne Noéra wat namnin kit ussa watsat mɨlta. 
\p  
\v 8 Abrahamne Dios kaizta aizpa watcha i nɨjkulta. Diosne Abrahamta akwat kit mamaz su mɨlan namta. Us mɨnta ɨmtu pianchikas, Abrahamne Dios ɨnintɨt aizpa mɨt kit paiña sukis puzta, Dios sun su mɨlan namtɨt aizpa sapnapa.  
\v 9 Abraham Diosta nɨjkultasmin, sun suwara Dios mɨlan namtɨt sukin puztuasmin, Abrahamne ɨranchuruz sat kit mamaz suras awakana uzta. Abraham paiña pashpara, Isaacta, kawirawane, Isaacne sun Dios mɨlam namtɨt sukin uz kit ɨranchuruz sat kit Abraham uztakana uzta. Isaac paiña pashpara, Jacobta, kawirawane, Jacobne sun suwara Dios mɨlan namtɨt sukin uz kit ɨranchuruz sat kit Isaac uztakana uzta. Diosne sun kutñaruza sun su mɨlan namnara.  
\v 10 Abraham an sukin mɨlan namtɨt aizpa sapshimtuasmin, usne Diosta tɨrizta, mamaz pɨpulura, chiyura, ɨnpa, Dioskasa minpa payukima uznapa. Diosne an pɨpulura sarɨt. 
\p  
\v 11 Sarane Dios kaiztɨt aizpa watcha i nɨjkulta. Sara kwisha ɨnkwa parɨt akwa, usne pashpa mɨlsachi. Usne Dios kin namtɨt aizpa watcha i nɨjkulta, wenamtachin, pashpa wanapa. Pashpa warawane, Sarane pɨja ishta. Suas pashpa taizta. Sara ɨnkwa parɨtkas, Abraham ɨlapa parɨtkas, uspane Dios kaizta aizpa watcha i nɨjkulpail kit pashpa kawirailta.  
\v 12 Abrahamkas kwisha ɨlapa parɨtkas, usne pashpa kawirat kit papihsh namta. Paiña pashpane akkwan pashpa kawirara, aiznakima. Maza ampukis wan Abrahampa pashparuz kawiara. Kɨmaruz wiansachi. Pi ksukas wiansachi. Sunkana Abrahampa kwal wiansachi, aiztɨt akwa. 
\p  
\v 13 Iarachasmin, suntuzne Dios usparuza mɨlan namtɨt aizpa sapparachi, Dios kaizta aizpa watcha i nɨjkularɨtkas. An sunkin Dios usparuza mɨlan namtɨt aizpa sapparachikas, uspane Dios kaizta aizpa watcha i nɨjkulat kit chiyura wan sappanazi pianmai. An sukin uztuasmin, uspane “pailta payukima an sukin uzanawas” minñarachi.  
\v 14 “Apas chi makpas” kizturuzne mamaz sura sayamtu. Uspane wantuza “chiyu sura sayamtu” kainanamtu.  
\v 15 Uspane uspa ñamin su uzarakin kaiyashitchi, uspa kailna minñarachi akwa.  
\v 16 Uspane anza wat su, chiyura su, pashiara. Katmizna Diosne uspa akwa mamaz su sara, Dios uztukin puranpa. Dios uspa akwa mɨtsalchi akwa, Diosne “nane uspa Dios ish” kiztu. 
\p  
\v 17-18 Ñamin Diosne Abrahamta ka kin namtɨt: “Up painkul, Isaac kawirawane, usne akkwan pashpa mɨlnazi, akkwan kwal aiznakima. Abrahampa kwal munanazi,”\x + \xo 11:17-18 \xt Gn 21.12\x* ka kizta. Dios Abraham minta aizpa piankamtɨt akwa, usne Abrahamta ɨninta, paiña painkulta, Isaacta, piantanapa. Abraham Dios kaizta aizpa watcha i nɨjkultane, usne Dios ɨnintɨt aizpa kishina. Us piantarɨt aizpa Diosta mɨlashimtu akwa, Abrahamne Dios ɨnintɨt aizpa mɨt kit maza painkul mɨjatmikasha, Isaacta piantashina. Sun akwa Abrahamne Dios kin namtɨt aizpa watcha i nɨjkulta.  
\v 19 Abrahamne Diosta nɨjkul kit ka minta: “Diosne Isaacta irɨttas mamasa kakulninshina.” Isaac irachikas, Abrahamne ussa mamasa sapta, kamkis kakultɨtmikakana. \fig Abrahamne Isaacta piantanapain|src="LB00291B.TIF" size="span" copy="©David C. Cook Foundation" ref="HEB 11.19" \fig* 
\p  
\v 20 Isaacne Dios kaizta aizpa watcha i nɨjkulta. Isaacne Diosta paikwara, Jacobkas Esaúkas Dios kin namtɨt aizpa mamaz payura sappanapa, Dios usparuza wat kiwainanapa. 
\p  
\v 21 Jacobne Dios kaizta aizpa watcha i nɨjkulta. Jacobne inapain azi. Tɨwil putnaintuasmin, Dios iztakin sumtɨttuasmin, Jacobne Diosta paikwara, paas Joséwa painkultuza wat kiwainnanapa.\x + \xo 11:21 \xt Gn 47.31–48.20\x* 
\p  
\v 22 Joséne Dios kaizta aizpa watcha i nɨjkulta. Irachasmin, Joséne Israel awaruz Egipto suras puzanazi kiznat kit ɨmtu payura paiña sɨh uspakasa mɨlnapa ɨninnara, Canaán sura kamanapa. 
\p  
\v 23 Moiséspa papihshkas akkuhshkas Dios kaiztɨt aizpa watcha i nɨjkulpailta. Moisés ainki tuasmin, papihshkas akkuhshkas kutña mishkima uspa watsal iztɨt pashpara puintɨt mɨjara. Katsa mikwa wan ampu pashparuza piantanapa ɨnintɨt akwa, uspane katsa mikwa ɨnintɨt aizpa ishkwailtachi, mɨshichiwail. Katmizna uspane (papihshkas akkuhshkas) Moisésta piantarachi. 
\p  
\v 24 Moisésne Dios kaizta aizpa watcha i nɨjkulta. Moisés ɨlapa parawane, usne nat kit “Faraónpa, katsa mikwawa pashune ap akkuhsh chi” kizta. “Nane paiña painkul chish,” ka kizta.  
\v 25 Moisésne Israel awakasa uzna narɨt. Katsa mikwa sukin naiztukas, usne katsa mikwa kwaltuz kwail kiarɨtkana kishitchi.  
\v 26 Us Israel awakasa wanmaktɨt akwa, Moisésne Cristo naiztɨtkana naizta, Egipto sura uztuz ussa kwayarɨt akwa. Egipto su mikwa pa kiarɨtkas, Moisés paiña papihsh kiznakana pa kishitchi. Usne Egipto su uzturuzkana uzshitchi, uspa kwail kiarɨt akwa. Moisésne Dios mɨlamtu aizpa an wari minta. Egiptowa pialne wat chi minta. Moisésne Diosta tɨrizta, Dios ussa mamaz payura mɨlan namtɨt aizpa sapnakima. 
\p  
\v 27 Moisésne Dios kaiztɨt aizpa watcha i nɨjkulta. Usne Egipto sukis puz kit aliz kultɨt katsa mikwara ishkwatchi. Diosta iztachikas, Diosta kwairachi. Moisésne us kuruntɨt aizpa kanpara, Dios uskasa kwinta kit akwa.  
\v 28 Moisésne Dios kaiztɨt aizpa watcha i nɨjkulta. Usne wan Israel awaruza pɨrikuruza piantanapa ɨninnara, Pascua pishta izanapa. Suasne pɨrikuwa aimpi pirulta wintawane, uspane pɨjta ɨsalkinkas pɨjta kanmalkinkas nɨara, ángel uspa an ñancha painkultuza ininnamanpa. 
\p  
\v 29 Judío awaruzne Dios kaizta aizpa watcha i nɨjkulara. Katmizna uspane mittɨwara Kwanam Pira pilpara kwakkara. Egipto awa sun pimin kwakkashimtuasmin, uspane kwaara. 
\p  
\v 30 Judío awaruzne Dios kaizta aizpa watcha i nɨjkulara. Uspane Jericó pɨpulura siete payukima pɨlsamtaara. Kapal pɨlsaarawane, Diosne Jericó pɨpuluwa kalpialtuza azpian kit nainninnara, Israel awa Diosta nɨjkulara akwa.  
\v 31 Jericó kalpial naintachasmin, suane, maza ashampane, Rahab muntɨtmikane, Jericó pɨpulura uzta. Kwail ashampa akwa, usne ñamin akkwan ampukasa chaarɨt. Rahab Dios kaizta aizpa watcha i nɨjkultɨt akwa, usne Jericó awakasa irachi. Ñamin paas Judío awaruzne Jericó pɨpulura puintain ailta, sun pɨpulura iznapa. Ailtawane, Rahabne uspa paasta wat sapnat kit paiña yal nammɨlat kit paiña yalkin kulnaninta. Uspa paasta kiwaintɨt akwa, usne Jericó awa nɨjkultachiruzkasa irachi. 
\p  
\v 32 ¿Uruza mamaz kwinta kinsa? Mamaztuzpa kwinta kisachish. Mama we ish. Nane uruza Gedeónpakas, Baracpakas, Sansónpakas, Jeftéwakas, Davidpakas, Samuelpakas, Dios kainammtuzpakas kwinta kisachish.  
\v 33 Uspane Dios kaizta aizpa watcha i nɨjkulara. Mazantuzne waya kit kit katsa mikwaruza anuppanara. Mazantuzne awaruza ɨninnara, nil uzninnanapa. Katmizna uspa Diosta paikuara akwa, usne usparuza kiwainnara, Dios mɨlan namtɨt aizpa sappanapa. Mazantuz ishuruzkasa sɨpparɨtkas, Diosne usparuza katsa ishukis puzninnara, ishu kumanpa.  
\v 34 Awa mazantuza katsa ĩnkin kiaintɨtkas, uspane impaktarachi. Mazantuzne imasarɨt, awa usparuza mashtikasa piantashiamtasmin. Najtɨttuzne tɨnta kularɨt. Mazantuzne tɨnta waya kiat kit aliztuza anuppanara. Diosne anparuzakas kiwainnara, Diosta nɨjlularɨt akwa.  
\v 35 Ashampawa pashparuz iarɨtkas, Diosne sun pashparuza kuhsninnara, mamasa uzanapa. 
\p Awa mamaztuza naizninnarawane, uspane iara, Diosta kwairashitchi akwa. Uspa apa iarane, uspane chiyura uzanawas pianmai. Diosne anpparuzakas kiwainnanara, uspa Diosta nɨjkularɨt akwa.  
\v 36 Awane mamaztuza ishanat kit ilnara. Awane usparuza cadenakasa kaanarɨt kit kajchira sɨpnarɨt.  
\v 37 Mamaztuzne iarɨt, usparuza uk kinarɨt akwa. Awane mamaztuza tɨ kɨzmukasa kakwakin tɨtnara, ianapa. Mamaztuzne pɨriku ayakasa cabra ayakasa kwaarɨt, kamisha mɨjchi akwa. Mazantuzne ɨnkalparain chaara, uspa yal mɨjchi akwa. Mamaztuzne puiza namarɨt. Awane mamaztuza aim kinarɨt, naizanakima.  
\v 38 Sun naiztaruzne an wat awa mazi. Mamaztuza naiznintaruzne kwail awa mazi, naizturuza uspa sukis kwainarɨt akwa. Uspane ɨnkalparakas, awa purachiwarakas, awa mi karɨttuzkanain chaara. Sun naizarɨmturuzne an wat sura uzanazi. An sukin uzaraasmin, uspane uk kultakas pil kultakas uzara. 
\p  
\v 39 Diosne wan naiztaruzpa wat minñara, Dios kaizta aizpa watcha i nɨjkularɨt akwa. Mɨnminkas an sukin Dios usparuza mɨlan namtɨt aizpa mama sapparachi,  
\v 40 Dios au akwa chiwazha an wat kinashimtu akwa. Diosne paiña kal kapal pailshira, ñamin uzarɨtkas ma payu uzturuzkas Dios mɨlan namtɨt aizpa parejuin sappanapa, wan Diosta nɨjkulturuz Dioskasa uzanapa. 
\c 12  
\s1 Pɨnkɨh pamtumikane ka parɨt: Cristora kanparawamakpas 
\p  
\v 1 Nane akkwan awa Dios kaizta aizpa watcha i nɨjkultaruzpa kwinta kinarau. Uspane chiyuras izwainmuruzkana mai. Aukas uspa uzarɨtkana uzna piankamtawamakpas, wan naiztu aizpa tailchanapa. Katmizna chiwazha aumɨza kiwainamtuchi aizpa mamin chɨhkatpamakpas. Chiwazha kwail kishimtu aizpa chɨhkatpamakpas. Aune Cristora kanpat kit minpa payukima wan chiwal impara imparain tailchatpamakpas. Aune Dios pashit aizpakas, Dios ɨnintɨt aizpakas, kitpamakpas, wenamtachin.  
\v 2 Aune Jesústain kanparawamakpas, us pashit aizpa kiana. Usne Dios kaizta aizpa watcha i aumɨza nɨjkulninnara, Dios aumɨza chiyura watsat mɨlnanapa. Jesús an sukin uztuasmin, usne naiz kit ishtu tailchat kit kurishta irɨt. Jesús kurishta irɨtkas, usne mɨtsal kitchi, Dios ussa chiyura watsal kinninta akwa. Katmizna mane usne Dios mamin uz kit Dioskasa wantuza ɨninnamtu. 
\p  
\v 3 Jesúsne aukinkas an tɨnta naizta, awa ussa aliz kulaat kit kwail pit ussa paraara akwa. Katmizna wan naizamtu aizpa tailcharain. Najtɨt awakana uzman.  
\v 4 Uspa Cristora piantarɨtkas, makima kwailtuzne uruza piantanarachi. U kwail kiashitchikas, uspane uruza kwail kianapa ɨninñara, u Cristora nɨjkularɨt akwa.  
\v 5 Une Dios uruza, paiña pashparuzakana kurunnarɨt aizpa mainman, Dios pitta ka parɨt akwa: 
\q1 “Ap painkul, mɨzha. Na uruza ilnamtukas, nane uruza kamtanamtu, na kaiztu aizpa mɨanapa. 
\q2 Na chiwazha kiman kaiznarakas, nane uruza kurunnamtu, u kaijchukin tɨnta namanapa. 
\q1  
\v 6 Nane, u Anpatne, up pashimturuza kurunnamtus, kwail kiamanpa. 
\q2 Wan Diospa pashparuz kwail kiakane, nane uruza tɨt ilnanash, u kwail chɨhkanapa, uruza mamasa sappana.”\x + \xo 12:6 \xt Pr 3.11-12\x* 
\m  
\v 7 Une Dios uruza ilnamtu aizpa tailcharain, Dios sunkana uruza paiña pashparuzkanain kurunnamtu akwa. Wan papihshtuzne pashparuza ilnamtu, kwail chɨhkaanapa.  
\v 8 Diosne wan paiña pashparuza ilnamtu, us kaiztu aizpa mɨanapa. Dios uruza kurunnamtukine, uruza ilnamtukine, une Diospa kwal chi mai. Dios uruza ilnamtukine, une sailta pashparuzkana mai.  
\v 9 Mane ma pitchin uruza kainanash. An sukin uzamtuasmin, au papihshtuzkas au akkuhshtuzkas aumɨza ilnara, au wat nɨjkul kit chanapa. Katmizna aune usparuza chikas kikaimakpas. Uspawa wat mintamakpas. Katmizna Dios aumɨza ilnakane, aune Diosta an chikas kikaimakpas, us au chiyura papihsh namtɨt akwa. Usne aumɨza uskasa pailta payukima uzninnanazi.  
\v 10 Au papihshtuzkas au akkuhshtuzkas aumɨza an sukin akkwan payuchin ilninnara, aumɨza kamtanashit akwa. Diosne aumɨza ilnamtu, aumɨza wat namninnanapa. Usne aumɨza sɨnam saninnamtu, au kwail chɨhkanapa, Dios kaizta aizpa mɨanapa.  
\v 11 Dios aumɨza ilnakane, aune naiztumakpas, us aumɨza ishnintu akwa. Kwiztane kapal Dios kamtarɨt aizpa piankamarawane, awane nilmin kiat kit Dios iztukin kalpain uziznapas. 
\s1 Pɨnkɨh pamtumika ka parɨt: Aune Dios paramtu aizpa mɨrawamakpas 
\p  
\v 12 Katmizna Cristora nɨjkulamtuasmin, uruzpain an tɨnta namnintain. Najturuzne an tɨnta kultain, Cristora kanpaanapa.  
\v 13 Cristora kanpaamtuasmin, une wat aizpa kirain. Cristora we nɨjturuza wat kurunnarawa, kailsa miwara chaamanpa. Suasne uspane Cristo mi kaamanazi. Sun akwa Diosne uspa kwail kiarɨt aizpa kaninnanazi. 
\p  
\v 14 Aune Diosta piantuzkasa kalpain uzshiarawamakpas. Wan kwail kiashit aizpa chɨhkarain. Diosne uspa kwail chɨhkamturuza sɨnam saninanaat kit Taitta Dioskasa uzninnanazi.  
\v 15 Uruzpain iztain, wan awa Dios kiwainshimtu aizpa sappanapa, Diosta chɨhkamanpa. Diosta kwayamturuzne, Cristora an kanpashimtuchiruzne, Dios kaizta aizpa mɨshimturuza kwail kininnashina. Une mamaztuza kwail kiman, Dios mi kwaimanpa.  
\v 16 Esaúne kwail awakana uzta. Mamazpa ashampakasakas mamazpa ampukasakas uskana pitman. Uskanain Dios aumɨza kurunamtu aizpa kwaiman. Esaú Dios kuruntɨt aizpa mɨshitchi akwa, usne paiña papihsh ussa mɨlan namtɨt aizpa karɨt. Esaúne Isaacpa an ñancha painkul ara. Maza payura kwisha yak kirɨt akwa, Esaúne aimpihshta wan sukas, wan ussa mɨlan namtɨt aizpakas paininta.  
\v 17 Une Esaú kwizta kirɨt aizpa pianmai. Papihsh ussa wan mɨlan namtɨt aizpa saptachikas, usne papihshta paikwat kit tɨnta azta, us painintɨt aizpa mamasa sapnapa. Esaú Diosta mɨashitchi akwa, Diosne ussa kwairɨt. Esaú us kit aizpa maizsachi akwa, usne ussa mɨlan namtɨt aizpa mizurainkas saptachi. 
\p  
\v 18 Ap izmuruz, na kaiztu aizpa mɨzhain. Diosne aukasa masas contrato chɨhkanara, awa Dios tukin piannanapa. An ñancha contrato sunkana chi azi. Ñamin Judío awaruzne Sinaí muntɨt ɨnkalta ɨat kit an ñancha contrato sappara. Uspane sun ɨnkalta saarachi, ĩn puztɨt akwa. Ɨnkalpara tɨl wanish sɨp kit tɨlkwil parɨt. Tɨnta inkwa parɨt.  
\v 19 Mazantuz iru kwil tɨnta usamtuasmin, Diosne usparuza, Judío awaruza, tɨnta paranara. Ishkuarɨt akwa, uspane Diosta tɨnta aakwara, usparuza mamaz pit kaiznamanpa.  
\v 20 Uspane Dios ɨninnarɨt aizpa sappashitchi. Sunkana usparuza ka ɨninnara: “Chiwazha awakas chiwazha kalpakas an ɨnkalta mittɨ kultane, une ukkasa kiarawa, inapa. Tiznamkasakas piantarawa,”\x + \xo 12:20 \xt Éx 19.12-13\x* ka kiznara.  
\v 21 Moisés sun kirɨt aizpa iztawane, usne ka kaizta: “Nakas ishkwat kit ultus,”\x + \xo 12:21 \xt Dt 9.19\x* ka kizta. 
\p  
\v 22 Judío awa an ñancha contrato sapparakas, Diosne masas contrato ma payu uruza chɨhkanamtu, Diosta piantuz Sión ɨnkalta, Dios uzmura, chiyura Jerusalén pɨpulura, piannanapa. Suane mɨnminkas yawa mil ángel chiyura uzamtu wiansachi. Uspane Dios iztukin kwisha wat pura.  
\v 23 Diosne usparuza, Cristora an ñancha piantuza, wianta. Iarawane, Diosne uruza chiyura wanmakninnanazi. Suane Diosne, au katsa mikwa Juezne, uz. Suane usne wat namtɨttuza wanmakninnamtu. Diosne uspa kwail kiarɨt aizpa sɨnam saninnamtu, chiyura mɨlnana.  
\v 24 Jesúsne masas contrato ukasa saninta, uruza chiyura nuninnanapa. Us au akwa irɨt akwa, usne au kwail kiarɨt aizpa paiña aimpikasa sɨnam saninnara. Sunkana Jesúsne ukasa sun masas contrato sarɨt. Caín paiña aimpihshta, Abelta, piantarawane, Diosne Caínta ilta. Awa Jesústa piantarakas, Diosne, Jesúspa aimpikasa, awaruza sɨnam sanashit kit uspa kwail wat kulnashina. 
\p  
\v 25 Katmizna Dios aumɨza kurunnamtuasmin, aune us kainammtu aizpa mɨrawamakpas, kwairachin. Ñamin au sukin Dios sun Judío awaruza paranamtuasmin, uspane Dios ɨninnarɨt aizpa mɨashitchi. Dios usparuza kurunarɨt aizpa mɨarachi akwa, Diosne usparuza ilnara. Mane Diosne chiyuras aumɨza akwanamtu, us kurunamtu aizpa mɨanapa. Usne us kuruntu aizpa kwaimturuza watcha ilnanazi.  
\v 26 Ñamin Dios usparuza tɨnta paranamtuasmin, usne wan sura ulninta. Makas usne kin nam kit ka kaizta: “Nane mamasa kwinta kinash. An surakas chiyurakas ulninnash,”\x + \xo 12:26 \xt Hag 2.6\x* ka kizta.  
\v 27 Dios mamasa wan sarɨt aizpa ulninnanash kiztane, Diosne aumɨza wan sarɨt aizpa pailnapain kamtananamtu. Dios chiyura mɨj aizpa ulmanazi, pailta payukima mamtu akwa.  
\v 28 Dios ɨnintukin ultuchi, mizurainkas maiztuchi akwa. Suane Diosne aumɨza kin namtɨt aizpa mɨlananazi, uskasa uzanapa. Dios au akwa wat kimtu akwa, Diosta aishtaish kaizchain. Dios iztakin piannakane, Diosta wakpuj waintuasmin, aune Diosta ishkuatpamakpas. Us kuruntu aizpa mɨzhain.  
\v 29 Dios ussa mɨmturuza kiwainashimtukas, Diosne katsa ĩnkanain nam kit kwail kimtuza ishkwaninnanazi. Ĩn wan impakkamtukanain, Diosne kwailtuza pailninnanazi. 
\c 13  
\s1 Pɨnkɨh pammikane ka parɨt: Dios pashit aizpa kitpamakpas 
\p  
\v 1 Cristora piantuza pashinarain, aimpihshtuzkanain kwampihshtuzkanain.  
\v 2 Attishtas Diosta piantuz up yalta aakane, yal nammɨlatpa. Mazantuz mazantuza yal nammɨlanakane, uspane ángeltuza yal nammɨlanara pianchin. 
\p  
\v 3 Kajchira sɨptɨttuza minñat kit kiwaintain. Une aim kirɨttuza kiwainnarain, u uspakanain an sukin naizashimtu akwa. 
\p  
\v 4 Kasara kirɨttuzne nil uzarawa. Mamazpakasa chakain. Sɨnam awaruzkana uztain. Kasara kitchasmin, mamazkasa pitkain. Kasara kitpane, mamazpakasa pitkain. Diosne sunkana kimturuza ilnanazi. 
\p  
\v 5 An sukin uzamtuasmin, pialmin pashiman. U mɨj aizpakasa wat uztain. Diosne ka kaizta: 
\q1 “Nane uruza mizurainkas kwainamtuchish. 
\q2 Nane u we mɨj aizpa mɨlanazi.”\x + \xo 13:5 \xt Dt 31.6, 8\x* 
\m  
\v 6 Katmizna aune wan awaruza ka kizshinamakpas: 
\q1 “Ap Anpatne ap kiwainmumika i. 
\q2 Nane awa nawa kishimtu aizpa ishkumanash.”\x + \xo 13:6 \xt Sal 118.6-7\x* 
\p  
\v 7 Dios pit uruza ñamin kamtamturuza mintain. Iarachasmin, an sukin uzamtuasmin, uspane Dios kaizta aizpa watcha i nɨjkulara, wenamtachin. Katmizna uspa uzarakanain uzat kit Diosta nɨjkultain. 
\p  
\v 8 Jesucristo mizurainkas maiztuchi akwa, aune us kaiztu aizpa nɨjkulshinamakpas. An ñamin awa puraruz uzarasmin, Jesucristone maiztachi. Makas maiztuchi. Mamaz payura maizmanazi.  
\v 9 Awa uruza mamaz tuntu kamtam kamtanamtune, na kamtamtɨtkana kamtamtukine, usparuza mɨman, usparuza kanpaman. Dios aumɨza pashinamtu akwa, usne aumɨza wat kiwainashimtu, au kaijchu an tɨnta kulanapa, Diosta an wat mɨanapa. Judío awaruzne uspa kuamtu aizpa nanamtu, impa kuamanpa. Uspa impa aizpa kuamtukine, uspane uspa kaijchu an tɨnta kulanazi minñara. Sunkana chi. Judío awa impa aizpa kuamtuchikas, Diosne uspa kwail kiarɨt aizpa sɨnam sanasachi. 
\p  
\v 10 Jesucristone au akwa irɨt, au kwail kiarɨt aizpa sɨnam sananapa. Judío katsa pariyaruzne wakarara piantat kit Diospa katsa yalta mɨlanarakas, uspane aukanain Diosta wanmakkarachi, Diosta wari kizanapa.  
\v 11 Katsa pariyane wakarawa aimpira sap kit Diospa yalta nap kit Dios iztakin sun aimpi paranta, Dios awa kwail kiarɨt aizpa sɨnam sananapa. Suasne usne wakara ña kalpialmal inak kit pianamal impaktara.  
\v 12 Sunkana Jesúsne pɨpulu pianamal au akwa naiz kit mɨtsal kit kit irɨt. Paiña aimpi puztɨt akwa, usne paiña kwal kwail kiarɨt aizpa sɨnam sananara.  
\v 13 Awa Jesústa kwayarɨt akwa, Jesúsne pɨpulu pianamal irɨt. Awa Jesús naiztakanain aumɨza naizninnamtukas, Jesús kamtarɨt aizpa kimɨrachain. Aune au ñancha mɨrɨt aizpa chɨhkatpamakpas, Jesústain kanpanapa.  
\v 14 Aune an sukin pailta payukima uzamanapas. Katmizna aune mamaz chiyu uzmura saimtumakpas, mamaz payura sua uzanapa.  
\v 15 Aune Diosta “Dios kwisha wari” pailta payukima kizmɨrachain, Jesucristo au kwail kiarɨt aizpa sɨnam sanarɨt akwa. Diosta aishtaish kiztuasmin, aune “usne au Anpat i” kiztumakpas.  
\v 16 Aune wantuza wat kinarawamakpas. Aune chiwazha mɨjchiruza mɨlatpamakpas. Mamaztuza kiwainamturuzne Dios pashit aizpa kiamtu. 
\p  
\v 17 Uruza Dios pit kamtamtuza mɨrain, uspa kurunamtu aizpa kianapa. Dios pit kamtamturuzne uruza wat iznamtu. Uspa kal pailtawane, sun Dios pit kamtamtuza uspa kal akwa Diosta kainarawa. Une sun Dios pit kamtamtuza kiwainnarawa, uspa kal watsal kianapa, tayalamanpa. U uspa kuruntu aizpa mɨamtukine, uspane uruza kiwainnasachi. 
\p  
\v 18 Au akwa Diosta paikwarain. Na an sukin uztuasmin, nane u iztukin wat aizpa kirau. Ukasa chamtuasmin, nane wat pura aizpa kirau mintus.  
\v 19 Nane uruza akwanamtus, u Diosta paikwanpa, na u uztukin an azain kailnapa. 
\s1 Pɨnkɨh pamtumika minpa pit pamtu 
\p  
\v 20 Mane nane Diosta u akwa paikwanash, Dios uruza chiyura watsat mɨlninanapa, kalpain uzanapa. Diosne au Anpat Jesucristora, au katsa pɨriku izmumikasha, irɨttas kakulninta. Jesúsne paiña aimpikasa masas contrato chɨhkara, aumɨza chiyura napninnanakima. Aune chiyura pailta payukima uskasa uzanapas, Dios aumɨza mɨlan namtɨt aizpa kinpa.  
\v 21 Nane Diosta paikumtus, us uruza wan kal wat kiwainnapa, us pashit aizpa wan kianpa. Jesucristone uruza tɨnta kiwainnanazi, Dios pashit aizpa kianpa. Aune pailta payukima “Cristo kwisha wari” kizmɨrachain. Ka azi. 
\p  
\v 22 Ap izmuruz, wat mɨzhain. U Diosta piankamarɨt akwa, nane na kuruntu aizpa mɨanapa paikumtus. Nane uruza akkwan pitchin kamtanat kit pɨnkɨhta panarau, wan piankamanapa.  
\v 23 An pɨnkɨh uruza ɨninnamtuasmin, nane au aimpihsh Timoteo kajchiras puzta kainanamtus. Us nakin azain piannakane, nane uskasa uruza iznana ɨrɨnash. 
\p  
\v 24 Wan Dios pit kamtamtuzakas wan Diosta piantuzakas kakishapu kiztain. Italia sura uztuzne uruza kakishapu kaizamtu. 
\p  
\v 25 Nane Diosta paikumtus, us uruza wat kiwainnanapa. 
\p Pailti.