\id 2PE 2 Peter in KwaraꞋae SFC Aug 2002sh, corꞋd 12/02sh, proofed 1/03sh 
\h 2 Peter 
\toc3 2 Peter 
\toc1 Na Ruana KerekereꞋa FaꞋasia Sa Peter 
\toc2 2 Peter 
\mt1 Na Ruana KerekereꞋa FaꞋasia Sa Peter  
\ip Na ru doe neꞋe sa Peter nia manata Ꞌabera liu Ꞌani neꞋe fuana Kristin kika fonea raolana faꞋamanataꞋanga rora ki. Nia saea fuada kira ke dau ngasi nama ana alaꞋanga sulia God ma sa Jesus Christ. AlaꞋanga mamana neꞋe nia saka maꞋi ana ngwae neꞋe kira tala lisia sa Jesus, ma kira ka rongoa faꞋamanataꞋanga nia.  
\ip Ta taꞋi faꞋamanataꞋanga rora neꞋe sa Peter manata Ꞌabera Ꞌania, na alaꞋanga neꞋeri Ꞌuri, kira saea sa Christ noaꞋa kasi oli maꞋi. Sa Peter fata Ꞌuri, sa Christ kasi oli maꞋi Ꞌua, duꞋungana God nia oga noaꞋa ta ngwae kasi funu. God oga ngwae ki taꞋifau kira ke faꞋasia falafala ana taꞋangaꞋa, ma kira ka oli basi maꞋi siana.  
\iot Na ru talingaꞋi ki saena buka neꞋe:  
\io1 God nia fili kulu ka donga falafala nia ki & 1:1-21  
\io1 Na faꞋamanataꞋanga rora ki & 2:1-22  
\io1 Olilana maꞋi sa Christ & 3:1-18  
\ib  
\c 1  
\p
\v 1 NauꞋa sa Simon Peter, na ngwae rao ma na ngwae ni lifurongo sa Jesus Christ, nau ku kerekere fuamuꞋa. Sa Jesus Christ niaꞋa na God kia ma nia ka faꞋamauri kia. ꞋAni na ꞋoloꞋoloꞋa nia, nia kwate kamu ka faꞋamamana, diꞋia logo neꞋe nia sasia amiꞋa.   
\p
\v 2 Nau ku foꞋo Ꞌiri God ke kwaiꞋofe amuꞋa ma ke kwatea aroaroꞋanga mamana fuamuꞋa sulia kamu saiana God ma na Aofia kia sa Jesus.   
\s1 RiꞋa ma na filifiliꞋanga God  
\p
\v 3 Kulu toꞋo ana ru ki taꞋifau neꞋe kulu boꞋoboꞋo Ꞌuani fuana tuaꞋa neꞋe donga falafala God ki. Na ru neꞋeri ki taꞋifau God neꞋe kwateꞋe Ꞌania ngasingasilana. God neꞋe nia tasa liu, ma ka leꞋa ma duꞋungana kulu sai leꞋa ana, nia laefi kulu fasi Ꞌiri kulu ka tua Ꞌania leꞋangaꞋa salilana nia.  
\v 4 ꞋUnaꞋeri nia ka kwatea na ru leꞋa liu ki fuaka neꞋe nia eta fataꞋa Ꞌani, fasi Ꞌiri neꞋe falafala kamu ki ke leꞋa diꞋia falafala God, ma muke saiana uuꞋa Ꞌusia na kwaiogaiꞋanga taꞋa ki ana magalia, neꞋe saiana faꞋali lamuꞋa.   
\p
\v 5 Ma osiꞋana God kwatea naꞋa ru ki taꞋifau fuamuꞋa ꞋunaꞋeri, muke sasi ngangata Ꞌiri na faꞋamamanaꞋanga kamu ka ngasi. Ma muka sasia logo ru neꞋe ki: muke abula ꞋoloꞋolo, ma muke malingaꞋinia God,  
\v 6 ma muke dau sulia malitana mauriꞋa kamu talamuꞋa, ma muke lalifuꞋa saena kaidaꞋi ana ꞋafitaꞋi Ꞌanga, ma muke donga falafala God ki  
\v 7 faꞋinia na kwaimaꞋanga ma na alafeꞋanga kamu fuamuꞋa kwailiu.  
\v 8 Ma diꞋia na falafala Ꞌi ngwae neꞋeri ki ka doe saena maurilamuꞋa, ka ꞋunaꞋeri kamu ka totolia naꞋa sasilana ru leꞋa Ꞌoro ki sulia na saiꞋi ruꞋa kamu ana Aofia kia sa Jesus Christ.  
\v 9 Ma sa tai bore Ꞌana neꞋe noaꞋa kasi toꞋo ana falafala Ꞌi ngwae neꞋe ki, nia diꞋia ta ngwae maa rodo, osiꞋana nia manata bura Ꞌani neꞋe God rufuanata naꞋa ana taꞋangaꞋa nia ki.   
\p
\v 10 Nia neꞋe, sasiku kina Ꞌae, muke sasi ngangata Ꞌiri ka faꞋataꞋinia neꞋe God nia fili kamu, ma ka sae kamu Ꞌani ngwae nia ki. SasiꞋa ꞋunaꞋeri neꞋe noaꞋa kamu kasi firute ma muka Ꞌasi kamu,  
\v 11 ma God ke baꞋa kwalo kamu saena ꞋInotoꞋanga na Aofia kia sa Jesus Christ neꞋe faꞋamauri kia. Ma na ꞋinotoꞋanga neꞋeri tuatua kasi sui.   
\p
\v 12 Sui bore Ꞌana kamu ka saiana taꞋifau na ru neꞋe ki, ma kamu ka faꞋamamana naꞋa ana faꞋamanataꞋanga mamana neꞋe kamu rongoa naꞋa, nia leꞋa fuana nau ku faꞋamanata toꞋo laꞋu amuꞋa ana kaidaꞋi Ꞌoro ki.  
\v 13 Sulia ana kaidaꞋi nau ku mauri Ꞌua saena magalia neꞋe, nau ku fia fasi nia leꞋa fuana nau ku saea laꞋu na ru neꞋe ki fuamuꞋa Ꞌiri noaꞋa kamu kasi manata bura Ꞌani.  
\v 14 OsiꞋana nau ku saiana noaꞋa kasi tau nau ku mae, diꞋia na Aofia sa Jesus Christ ka sae madako naꞋa ana fuaku.  
\v 15 Ma sulia ka ꞋunaꞋeri, nau ku rao ngasi Ꞌiri noaꞋa kamu kasi manata bura Ꞌani tae ki neꞋe nau ku faꞋamanata kamu Ꞌani, Ꞌi buri Ꞌana neꞋe nau ku mae.   
\s1 Sa Peter lisia na raralana sa Jesus na Christ  
\p
\v 16 Aia, ma ru neꞋe kami faꞋamanata Ꞌani sulia na daolana maꞋi na Aofia kia sa Jesus Christ Ꞌani ngasingasiꞋanga doe, nia noaꞋa laꞋu na ꞋaꞋemae ti ngwae kira boa goꞋo Ꞌada ki. Sulia kaimili talamiꞋa kami lisia nama na ꞋinotoꞋanga ma raralana.  
\v 17 Sulia kami tua faꞋinia Ꞌua naꞋa maꞋi ana kaidaꞋi God na MaꞋa nia kwatea naꞋa gwaungaꞋi Ꞌanga ma na ꞋinotoꞋanga fuana. Ma kami ka rongoa lingana God ngasingasiꞋa ka tasa nia fata Ꞌuri fuana, “Na ngela nau niniꞋa, neꞋe nau ku alafe liu ana, ma nau ku saeleꞋa liu sulia.”  
\v 18 Kami talamiꞋa mika rongoa lingana God faꞋasia Ꞌi langi, ana kaidaꞋi kami tua faꞋinia sa Jesus Ꞌi gwauna faꞋi ua abu baera.\x + \xo 1:18 \xt Matthew 17:1; Mark 9:2; Luke 9:28\x*   
\p
\v 19 Ma sulia ru neꞋeri, kaimili ka faꞋamamana ngasi naꞋa neꞋe na fatalana na profet ki sulia sa Christ nia mamana. Ma nia leꞋa fuana muke faꞋamamana logo Ꞌani. DuꞋungana na fatalana na profet neꞋeri ki, nia diꞋia na faꞋi unu neꞋe unu saena rodo, leleka ka dao ana asoa sa Christ ke sakatafangaꞋi laꞋu ma raralana ngwasinasina lana ka kwasu saena manatalamuꞋa.  
\v 20 Ma na ru doe ka tasa liu naꞋa neꞋe: Kamu ke malingaꞋinia nama neꞋe noaꞋa ta ru na profet ki kerekere sulia saena KerekereꞋa Abu ta alaꞋanga neꞋe fuli goꞋo maꞋi ada talada,  
\v 21 nama osiꞋana neꞋe kira oga kike alaꞋa sulia. OsiꞋana na alaꞋanga profet ki noaꞋa laꞋu faꞋasia manatana ngwae goꞋo Ꞌana, bore ma nia leka maꞋi faꞋasia God. Sulia na AnoꞋi ru Abu neꞋe nia talaꞋia na profet ki Ꞌua naꞋa maꞋi Ꞌi naꞋo Ꞌiri kika saea na fatalana God.   
\c 2  
\s1 Ngwae faꞋamanata ꞋosoꞋoso ki  
\p
\v 1 Ana kaidaꞋi Ꞌua naꞋa maꞋi Ꞌi Israel, ti ngwae ꞋosoꞋoso kira dao maꞋi, ma kira ka saea kira neꞋe profet God ki. Ma ka ꞋunaꞋeri logo, ti ngwae kike baꞋa dao maꞋi, ma kike faꞋamanata kamu Ꞌani na sokeꞋa ki. Ma na faꞋamanataꞋanga kira ki ke baꞋa faꞋalia na faꞋamamanaꞋanga ti ngwae ki. Ma kike baꞋa faꞋamanata logo Ꞌani fasi sa Jesus, na ngwae neꞋe mae fuana faꞋamaurilada, noaꞋa laꞋu na Aofia mamana. Ma sulia na ru neꞋeri ki, ꞋaliꞋali goꞋo God ke baꞋa kwatea na kwaꞋikwaꞋinga fuada.  
\v 2 Sui ka ꞋunaꞋeri bore Ꞌana, ngwae Ꞌoro ki kike baꞋa leka sulia na abula taꞋangaꞋa kira ki. Ma sulia tae ki neꞋe kira sasiꞋi ka taꞋa, ti ngwae kike baꞋa fata faꞋalia na faꞋamanataꞋanga mamana neꞋe.  
\v 3 Ma na ngwae faꞋamanata ꞋosoꞋoso neꞋeri ki, kike baꞋa ngalia mani ana alaꞋanga ꞋosoꞋoso kira ki neꞋe kira soke kamu ꞋaniꞋi. Kike baꞋa sasi ꞋunaꞋeri, sulia kira guguta. Aia, tau naꞋa maꞋi God ka lisia naꞋa tae ki neꞋe kira sasiꞋi, ma nia ka sasi akaꞋu fuana na matalangaꞋilada faꞋinia na faꞋalilada.   
\p
\v 4 OsiꞋana na Ꞌainsel ki Ꞌua naꞋa maꞋi neꞋe kira abula taꞋa, ma God ka kwatea kwaꞋikwaꞋinga fuada, ma ka aluda saena kula ni kwaꞋikwaꞋinga, ma ka firi fafida Ꞌani kwalo Ꞌi salo, ma kira ka tua goꞋo Ꞌada Ꞌua Ꞌi neꞋeri saena rorodoꞋa. Kira kwaimasi ana faꞋi asoa ana matalangaꞋinga.  
\v 5 Ka ꞋunaꞋeri logo fuana na ngwae ki saena magalia ba kira tua Ꞌua naꞋa maꞋi, sulia neꞋe abulaꞋanga kira ki taꞋa liu ma noaꞋa kira kasi faꞋadufa God. God ka saungida Ꞌani kafo doe liu. TaꞋi taꞋifilia sa Noa goꞋo neꞋe God faꞋamauria faꞋinia na fiu ngwae ki logo. God ka faꞋamauri kira, osiꞋana sa Noa faꞋamanata sulia abulaꞋanga neꞋe ꞋoloꞋolo.   
\p
\v 6 ꞋIu, ma God ka kwatea logo na kwaꞋikwaꞋinga fuana ngwae Ꞌi Sodom ma Ꞌi Gomora ki. Nia saungi kira Ꞌani mafula, fasi Ꞌiri ka faꞋataꞋinia fuana ngwae ki taꞋifau tae neꞋe ke baꞋa fuli fuana ngwae neꞋe kira aburongo ana niaꞋa ki.  
\v 7 Bore ma God faꞋamauria sa Lot, sulia sa Lot niaꞋa na ngwae saga, ma nia kasi oga na abulaꞋanga taꞋa ana ngwae neꞋe kira aburongo ana taki God ki.  
\v 8 Ma sa Lot neꞋe nia saga, nia tua faꞋinida, ma ka lisi kira, ma ka rongo kira sulia asoa, ma na liana ka figwanu liu sulia na abula taꞋalada.  
\v 9 Nia neꞋe, na Aofia saiana Ꞌafilana na ngwae neꞋe kira faꞋamamana ana niaꞋa ki, fasi Ꞌiri neꞋe ꞋafitaꞋiꞋanga ki noaꞋa kasi faꞋalida. Ma nia saiana ka kwatea logo na kwaꞋikwaꞋinga fuana ngwae taꞋa ki, leleka ka dao ana faꞋi asoa fuana na matalangaꞋinga mamana.  
\v 10 Ma nia ka kwatea na kwaꞋikwaꞋinga doe ka tasa fuana ngwae neꞋe kira roꞋosulia na kwaiogaiꞋanga taꞋa kira ki Ꞌani nonida, ma kira ka Ꞌaila Ꞌani na gwaungaꞋi Ꞌanga God.  
\p Ma na ngwae ki neꞋe nau ku fata sulida neꞋe kira faꞋamanata Ꞌani sokea ki, kira fata baꞋalafe ma kira ka fata noniraꞋa liu. Ma noaꞋa kira kasi manata doe goꞋo ana anoꞋi ru ꞋinotoꞋa ki Ꞌi langi, ma kira ka inaꞋu ana fata buri tolingaꞋi Ꞌanga logo ada.  
\v 11 Aia, ma na Ꞌainsel ki bore, neꞋe kira toꞋo ana ngasingasiꞋanga doe liufia na faꞋamanata ꞋosoꞋoso neꞋeri ki, noaꞋa kira kasi fata faꞋalia goꞋo na anoꞋi ru ꞋinotoꞋa ki Ꞌi langi Ꞌani alaꞋanga Ꞌoidorole ꞋunaꞋeri ki Ꞌi naꞋona na Aofia.  
\v 12 Ma na faꞋamanata ꞋosoꞋoso neꞋe ki noaꞋa kira kasi manata sulia na tae ki neꞋe kira sasiꞋi. ꞋUnaꞋeri, kira ka diꞋia naꞋa ru mauri kwasi ki neꞋe kira bolo fuana daulada ma fuana saungilada. OsiꞋana neꞋe ngwae neꞋeri ki, kira ka fata Ꞌoidorole sulia ru neꞋe noaꞋa kira kasi saiana ki. ꞋUnaꞋeri, God ke saungida diꞋia na ru mauri kwasi ki.  
\v 13 Ma sulia na nonifiiꞋanga neꞋe kira sasia ana ngwae, God ke duꞋua logo Ꞌani nonifiiꞋanga. Na faꞋamanataꞋanga ꞋosoꞋoso neꞋe ki, fangalada doe, ma kira ka kwaꞋu, ma noaꞋa kira kasi dau sulia maurilada fuana fangaꞋa saena asoa ki. KamuꞋa niniꞋa, muke Ꞌeke liu kaidaꞋi kira fanga faꞋi kamu saena fikuꞋa kamu ki, sulia na abulalada taꞋa liu, ma kira saiana kike soke ana kaidaꞋi ki taꞋifau.  
\v 14 Ma na kaidaꞋi kira lisia na kini, kira ka oga kakabaralana. NoaꞋa kira kasi mamalo faꞋasia abula taꞋangaꞋa. Ma kika talaꞋia na ngwae neꞋe faꞋamamanaꞋanga kira ki ngwataꞋutaꞋu Ꞌani abula taꞋangaꞋa. Ma kira ka oga liua gugutaꞋanga. Ma osiꞋana na ru neꞋeri ki, God ka kwatea kwaꞋikwaꞋinga fuada.  
\v 15 Kira leka matamata faꞋasia na tala saga, ma kira ka leka Ꞌada sulia falafala taꞋa sa Balaam, na ngela sa Beor. Sulia sa Balaam\x + \xo 2:15 \xt  Nambas 22:18; 24:13; 25:1-3; 31:16\x* oga liua na mani neꞋe nia ke ngalia ana sasilana ru taꞋa ki.  
\v 16 Nia neꞋe God ka kwatea na dongki nia ka fata balufia Ꞌani lingalinga Ꞌi ru diꞋia ngwae. Ma kaidaꞋi sa Balaam na profet rongoa neꞋe dongki nia fata ꞋunaꞋeri, nia ka faꞋasia naꞋa abula boleboleꞋanga nia ki.   
\p
\v 17 Aia, ma na ngwae neꞋe kira faꞋamanata Ꞌani na sokeꞋa, kira diꞋia goꞋo Ꞌada ta maꞋe kafo busu ba noaꞋa ta kafo saena ma ka langalanga. Ma kira ka diꞋia logo na gwaꞋi salo ba na iru irufia Ꞌiri na uta noaꞋa kasi toꞋo. Nia neꞋe God ka sasi akaꞋu ana lokafo rorodoꞋa fuada.  
\v 18 Kira tafeda talada ma na fatalada ka boleboleꞋa goꞋo Ꞌana. Ma ti ngwae neꞋe kira kakari alifaꞋi ka sui, ma kira ka talaꞋae kika rokisia na abulaꞋanga kira ki, ma noaꞋa kasi abula taꞋa faꞋinia na ngwae neꞋe kira rora ki. Ma na ngwae neꞋe kira faꞋamanata Ꞌani sokeꞋa, kira faꞋarora laꞋu ngwae neꞋeri ki Ꞌani na kwaiogaiꞋanga taꞋa ki Ꞌani nonida.  
\v 19 OsiꞋana na ngwae faꞋamanata neꞋeri ki, kira fata Ꞌuri fuada, “Kaimili fata alangaꞋi fuamuꞋa neꞋe muke aloge fasi Ꞌiri muke sasia amuꞋa ta ru bore Ꞌana neꞋe kamu oga sasilani ki.” Bore ma ngwae faꞋamanata neꞋeri ki talada noaꞋa kira kasi aloge. Kira diꞋia na ngwae rao ꞋoꞋo fuana na falafala taꞋa kira ki neꞋe faꞋalida. Sulia kwaiogaiꞋanga taꞋa kira ki gwaungaꞋi fafida, ma kira noaꞋa kasi mango faꞋasia fuli ru roraꞋa.  
\v 20 ꞋI naꞋo na ngwae faꞋamanata ꞋosoꞋoso neꞋeri ki kira saiana na Aofia kia sa Jesus Christ neꞋe faꞋamauri kia, ma kira ka kakari alifaꞋi faꞋasia na taꞋangaꞋa ki saena magalia neꞋe saiana faꞋalilada. Bore ma kira ka oli laꞋu Ꞌuana na sasilana taꞋangaꞋa kira ki ba kira sasiꞋi maꞋi Ꞌi naꞋo, fasi Ꞌiri neꞋe taꞋangaꞋa ki ka gwaungaꞋi fafida. Ma Ꞌi niniꞋari kira ka taꞋa ka liufia naꞋa kaidaꞋi neꞋe kira Ꞌiri sai Ꞌua ana sa Jesus Christ.  
\v 21 TaꞋi leꞋa nama Ꞌana fuada diꞋia noaꞋa kira kasi dao toꞋona na tala Ꞌuana ꞋoloꞋoloꞋa. Ma nia ka taꞋa liu naꞋa fuada neꞋe kira dao laꞋu toꞋona tala Ꞌuana ꞋoloꞋoloꞋa, ma kira ka abula laꞋu faꞋasia. Ma noaꞋa kira kasi roꞋosulia faꞋamanataꞋanga sa Jesus neꞋe God kwatea naꞋa fuada.  
\v 22 Kira ka faꞋataꞋinia mamana na alaꞋanga ba Ꞌuri ki, “Na kui oli ka Ꞌania logo tae neꞋe nia moataꞋinia.” Ma ta alaꞋanga laꞋu ka Ꞌuri, “Gwata neꞋe kira siufia nonina ka sui naꞋa, oli ka bunibuni laꞋu saena moꞋamoꞋa.”   
\c 3  
\s1 Olilana maꞋi na Aofia  
\p
\v 1 Kwaima leꞋa nau kina Ꞌae, ruana kaidaꞋi neꞋe nau ku kerekere naꞋa fuamuꞋa niniꞋa. DuꞋungana tae neꞋe nau ku keresia laꞋu kwau kerekereꞋa neꞋe fuamuꞋa osiꞋana nau ku oga faꞋamanata oliꞋa amuꞋa Ꞌuana ru neꞋeri ki, Ꞌasu Ꞌubani kamu kata manata rora.  
\v 2 Nau ku oga muke manata toꞋona alaꞋanga neꞋe profet abu ki ba Ꞌi naꞋo maꞋi, faꞋinia na faꞋamanataꞋanga na Aofia kia neꞋe faꞋamauri kia. Na ngwae ni lifurongo ki neꞋe kira fata faꞋataloꞋania fuamuꞋa, kira neꞋe saea na faꞋamanataꞋanga neꞋe fuamuꞋa.   
\p
\v 3 ꞋIu, na ru doe neꞋe nau ku oga muke saiana ana faꞋi asoa Ꞌisi ki ba ti ngwae kike leka maꞋi, ma na kwaiogaiꞋanga taꞋa kira ki ana noni ba talaꞋi kira. Ma kira ka fata Ꞌoidorole Ꞌuri amuꞋa,  
\v 4 “Na Christ baera nia naꞋa Ꞌi faꞋi? Sulia nia eta fataꞋa nia ke baꞋa oli laꞋu maꞋi saena magalia neꞋe, bore ma noaꞋa nia kasi dao Ꞌua. Na ngwae faꞋinaꞋonaꞋo etaeta kia ki kira mae naꞋa. Ma leleka ka dao ana kaidaꞋi neꞋe, noaꞋa ta ru kasi rokisi goꞋo, talaꞋae maꞋi ana talaꞋaelana magalia leka ka dao Ꞌi taꞋena, na ru ki taꞋifau bolo goꞋo Ꞌana.”   
\p
\v 5 Aia, ngwae neꞋe kira fata ꞋunaꞋeri ki, kira oga kike manata bura ana neꞋe God saungaꞋinia Ꞌi langi faꞋinia na magalia goꞋo Ꞌani fatalana. Nia saungaꞋinia na magalia Ꞌani na kafo, ma nia ka kwatea na magalia ka ruꞋu maꞋi faꞋasia na kafo.  
\v 6 Ma Ꞌani kafo logo, God ka takalongaꞋinia na magalia neꞋe ka tua Ꞌi naꞋo.  
\v 7 Aia, ma Ꞌani fatalana God logo, nia ka sasia na magalia neꞋe ka tua faꞋinia lalifuꞋanga masia kaidaꞋi nia ke baꞋa takalongaꞋinida Ꞌani mafula. Ana faꞋi asoa neꞋeri, God ke baꞋa matalangani na ngwae neꞋe noaꞋa kasi faꞋamamana ana ki, ma ka takalongaꞋinida.   
\p
\v 8 Aia, kwaima leꞋa nau kina Ꞌae, noaꞋa kamu kasi manata bura Ꞌani alaꞋanga ba Ꞌuri, taꞋi asoa diꞋia taꞋi toꞋoni faꞋi ngali ki Ꞌi maana God, ma taꞋi toꞋoni faꞋi ngali ki diꞋia logo taꞋi asoa Ꞌi maana God.  
\v 9 Nia neꞋe na Aofia noaꞋa kasi dole liu goꞋo fuana faꞋataꞋi mamanaꞋanga ana fatalana sulia olilana maꞋi, sui bore Ꞌana ti ngwae kira fia fasi nia ka dole mala Ꞌana. Bore ma na Aofia nia mabetau liu faꞋi kamu. Nia noaꞋa kasi oga ta ngwae ke funu. Bore ma nia oga liua ngwae ki taꞋifau kike kakari alifaꞋi faꞋasia na taꞋangaꞋa kira ki.   
\p
\v 10 Ma faꞋi asoa neꞋe na Aofia ke oli maꞋi, nia ke dao maꞋi diꞋia ta ngwae bili, sulia na ngwae ki kike baꞋa lebe. Ma ana faꞋi asoa neꞋeri, kike baꞋa rongoa na lingalinga Ꞌi ru doe, ma na mamanga ke baꞋa sui. God ke baꞋa malangisia na ru ki taꞋifau saena mamanga Ꞌani mafula. Ma na magalia ma na ru ki taꞋifau goꞋo Ꞌi saena, niꞋi ke baꞋa noꞋana.   
\p
\v 11 Ma osiꞋana God ke baꞋa malangisia ru neꞋeri ki ꞋunaꞋeri, muke manata leꞋa sulia na falafala kamu ki. Na abulaꞋanga kamu ke saga, ma muke roꞋosulia na kwaiogaiꞋanga God ki.  
\v 12 Ma muke kwaimasi ana faꞋi asoa neꞋe God ke matalangaꞋi maꞋi, ma muke sasi fasi Ꞌiri faꞋi asoa neꞋe ke dao ꞋaliꞋali maꞋi. Ana faꞋi asoa neꞋeri, God ke baꞋa takalongaꞋinia na mamanga ma na ru ki taꞋifau Ꞌi saena Ꞌani mafula.  
\v 13 Aia, ma kulu lialia masia na magalia faolu ma Ꞌi langi faolu neꞋe God ka eta fataꞋa Ꞌani fuaka. Ma na ngwae ki taꞋifau Ꞌi neꞋeri, kike roꞋosulia God.   
\p
\v 14 ꞋIu, kwaima nau kina Ꞌae, kaidaꞋi muke kwaimasi Ꞌua goꞋo amuꞋa masia faꞋi asoa neꞋeri, muke sasi ngangata Ꞌuana sagalana abulaꞋanga kamu, Ꞌiri God noaꞋa kasi silolongaꞋi kamu fafia ta ru, ma kamu ka tua kwaima faꞋinia.  
\v 15 NoaꞋa kamu kasi manata bura Ꞌani duꞋungana tae neꞋe na Aofia ka mabetau faꞋi kamu, sulia nia oga fasi Ꞌiri muke kakari alifaꞋi Ꞌiri nia ke faꞋamauri kamu. Aia, osiꞋana ru neꞋeri logo ba ngwaefuta kia sa Paul nia kerekere fuamuꞋa sulia. God neꞋe kwatea liatoꞋonga fuana sa Paul Ꞌiri nia ka kerekere ꞋunaꞋeri.  
\v 16 Ana kerekereꞋa sa Paul ki taꞋifau, nia faꞋamanata sulia na ru neꞋeri ki. Ti ru neꞋe sa Paul faꞋamanata Ꞌani ki, niꞋi ꞋafitaꞋi fuana saiꞋa ani. Ma na ngwae neꞋe noaꞋa kira kasi sai Ꞌi ru ma na faꞋamamanaꞋanga kira ki noaꞋa kasi ngasi, kika bulasia ru sa Paul saea ki, ma kira ka faꞋamanata Ꞌani na sokeꞋa sulia, diꞋia logo ba kira sasia ana ti bali ana KerekereꞋa Abu. Ma osiꞋana kira sasi ꞋunaꞋeri, God ke baꞋa kwatea na kwaꞋikwaꞋinga fuada.   
\p
\v 17 ꞋIu kwaima nau ki Ꞌae, kaumulu saiana taꞋifau naꞋa na ru neꞋe ki. Nia neꞋe, muke lialia, Ꞌasu Ꞌubani muka fiꞋi faꞋamamana ana sokeꞋa neꞋe ngwae taꞋa ki kira faꞋamanata Ꞌani, ma na faꞋamamanaꞋanga kamu ki ka Ꞌasia.  
\v 18 Ma muke sasi Ꞌuana lalifuꞋanga Ꞌani ngalilana na alafeꞋanga na Aofia kia sa Jesus Christ neꞋe faꞋamauri kia, Ꞌiri muke baꞋa sai leꞋa ana. Kuke baꞋatafea ana kaidaꞋi neꞋe ma ka tua tua firi! ꞋIu ke ꞋunaꞋeri.