\id PHM - Border Kuna NT -Panama 2009 (DBL -2013) 
\h Filemón 
\toc1 Pablo Filemónga Karta Palmijad 
\toc2 Filemón 
\toc3 Flm 
\mt1 Pablo Filemónga Karta Palmijad 
\mt2 Filemón 
\ip Imi Pablo Romagin oturdalemaidgin tule-walgwen taknoni. Wedin Onésimo. Imi Onésimo tulega-pinche-arpaged-tule. Imi teun takalgu, tule-mani-ibgan immalmal-pakedyob tule-pid-paktimal pinche ega arpagal. Tenal tule-mani-ibed tule-pid-pakchadbal akalzhul aga e-itoleged we tule-pakchad-imadi-kus, tar-sagye-dewa o tar-mecha-dewa o kannan tule-pidga tar-ukchabal-dewa. Tenal Onésimo e-ibed-Filemóngin wakis. Tenal Onésimo Romagin kep Pablobal Pab-Jesús-abingenoni. 
\ip Imi Pablodin kannan Onésimo-palmijogal e-ibed-Filemónzhe. Al Pab-Purpa-Nuedbal Pablo Filemónzhe iti-karta palmiszhun. Tenal Filemón akpene Pablobal-Jesús-abingajadbal, al Pablo Filemónzhe wilenaigual Jesúsgin-kwenadyob Onésimo-abingegal. Tenal Pablo Filemónga chogzhabal: “Onésimo-pebi-mani-aturzhajad antin pega anal penuko.” Pitomalgu. 
\c 1  
\p  
\v 1 Filemón, imi antin-Pablo tegin anmal-kwenad-Timoteo, anmal-walbogid pega karta wis palmijimal. Imi antin Pab-Jesucristo-igalgin-chunmakedbal oturdaleged-neggin mellemai. Tenal pedin an-kwenad-pilaled, tegin pe anpak mes Pab-Jesús-igalgin arpagedmo.  
\v 2 Imi antin anmal-kwenad-Apiaga tegin Arquipoga iti-karta wis palmijimo. Tenal Arquipo anmalbak mes Pab-Jesús-igalgin alamas. Tenal tule-Jesúsbal-nanimalad-pel-kwapa-pe-neggin-ormamaladga an iti-karta wis palmijimo. 
\p  
\v 3 Imi Pab-Tummad-anmal-pab tegin anmal-Tummad-Jesucristo pega immal-nuegan imakelen, nabirin, tegin ulubgin akalzhul-itogal pe-imakelen, nabirbalin. 
\s1 Pablo Pabga tog-nuedi chogzhad Filemónga 
\p  
\v 4 Filemón, imi an Pabzhe kolalil, tegin an pegin pinzhealil, an keg-chulgu Pabga tog-nuedi pega chogalda. 
\p  
\v 5 Tenal an itosdo, pedin pela-pela Pab-Jesús-pilal tegin Pab-Jesúsgin penzhulbal. Tegin an itosbaldo pedin pel-kwapa tule-Pabbal-naigusmalad-pilalbal. 
\p  
\v 6 Tenal an pega Pabzhe kolnaido, pe Jesúsgin-penzhulidgin-chunmako, pe nuekwa itononigal anmal Cristobal pel-kwapa immal-nuegan-nikamal.  
\v 7 Tenal pe Pabbal-naigusmalad-pilaledbal, pe tar-okannosmal aga ulubgin weligwal-itogal. Al pe an-okannosmo, tegin pe weligwal-ulubgin-itogal an-imasbal. 
\s1 Pablo Filemónzhe wilesgujad kannan Onésimo-abingegal 
\p  
\v 8 Imi an Cristo-nuggin-palmilegalidbal, an igal-nika pega choggal, pe igi immal imakenab.  
\v 9 Tenal antin kantikidgin pega immal kwen chognejul. Tenal pe kwenamalad-pilaledbal, antin-Pablo peje wile, anka immal imagal. 
\p Imi antin pato cheredgus tegin an-Jesucristo-igalgin-chunmadiidbal an oturdaleged-neggin mellejibal.  
\v 10 Tenal pe weligwal an-imabiel, pe anka an-machi-purpaled-Onésimo-abingao. 
\p Tenal we Onésimo an-oturdaleged-neggin-mellejiidgin an-machi-purpaledga kunoni.  
\v 11 Tenal we machi akpene pega ib-nuedga kwen kuszhul. Tenal imidin we machi anka tegin pega ib-nuedga kunoni. 
\p  
\v 12 Imi an naga-tukin-chan-ukchiidyob an kannan pega we machi-palminebal. 
\p  
\v 13 Tenal an pinzhajando we machi ilgwen anpak peio, an-Pab-kaka-nuegangin-chunmadiidbal oturdaleged-neggin-mellejiidgin pe-anal an-pentagal.  
\v 14 Tenal antin, an peichul pe-wichulidgin an immal ima. Tenal antin peigujibaldo pe-itolegedbal meke-ibigin pe an-pentako, tenal an kantikidgin pe-imakedgin chul. 
\p  
\v 15 Imi an chogdé, Onésimo iché pegin wis wakis ibagwengin Onésimo peje kannan nadel, ilagwen pebak kudiguo.  
\v 16 Tenal pe melle tule-pinche-arpagedyob Onésimo-pal-tako, tenal pedin pul-pule kwenad-pilaledyob Onésimo-tako. Imi antin peyedzhe Onésimo-pilal, tenal Onésimo, pegadin pul-pule ib-nuedga kunoniko, sanal tegin Jesucristogin-pe-kwenadbal. 
\p  
\v 17 Imi pe-pakadyob pe an-takel, pe an-yopí Onésimo-abingemogo.  
\v 18 Tenal pe takel, we machi pebi-immal akalos o pegin mani kalenai-dewa, pe melle Onésimogin mani idiro, anid, an Onésimo-anal pega penuko. 
\p  
\v 19 Imi antin-Pablo naga tukin chunkalal nermas an pega penuko. Tenal antin pega nue immal kwen chogbijul. Tenal pedin nued wisdo, pe anpal Pab-Jesús-abingajadbal, pe-chunnad pe ankin kalenaimo. 
\p  
\v 20 Kwenad, imi an Cristogin pe-kwenadga maidbal, pe an-wis-pentako Pab-Jesús-ulgin pe nuedgin Onésimo-abingao an naga ulubgin weligwal-itogal.  
\v 21 Tenal an pe-kwen-penzhulidbal, an weob pega karta nermas. Imi an wisbaldo, an-peje-immal-ekichijadga pedin pul-pule wilub-okpis anka immal imako. 
\p  
\v 22 Tegin an peje immal-pid ekisbal: imi an chogdé pe anka Pabzhe kolnaidbal, antin kannan peje natapo. Al an pei, pe anka kuakwa kabed-neg wis nudako. 
\s1 Pablo-e-pakamalad kaka palmismalad 
\p  
\v 23 Imi an-pakad-Epafras pega kaka wis palmijimo. Tenal Epafras Jesucristo-igalgin-chunmadiidbal anpak mes oturdalemaimo.  
\v 24 Tegin anpak-mes-Pabga-arpamalad: Marcos, Aristarco, Demas, tegin Lucas pega kaka wis palmijimalmo. 
\p  
\v 25 Imi Pab-Jesucristo pe-purpaga immal-nuegan imakelen, nabirin. Pitogua.