\id JHN - Border Kuna NT -Panama 2009 (DBL -2013) 
\h Juan 
\toc1 Juan Jesucristogin-kaka-nuegan Palchogzhad 
\toc2 Juan 
\toc3 Jn 
\mt1 Juan Jesucristogin-kaka-nuegan Palchogzhad 
\mt2 Juan 
\ip Imi Juandin kepe-sagla-akar Jesúsbak pipirmadi-kus. Tenal Juan imial Jesús-immal-imajad takchagus, tegin ual Jesús-immal-chogzhad itodi-kusbal. Tenal Juan pela-pela Jesús-pilalgus. 
\ip Al Pab-Purpa-Nuedbal Juandin Jesús-immal-imajadbal tegin Jesús-immal-chogzhadbal tulemalga oyos Jesúsdé chunchunnad Pab-Tummad-e-Machi tulemal Jesúsgin penzhulmalgal. Tegin Juan anmalga chognonibal Jesúsdin nakrusgin purkwis tulega iskued penukegal tegin ibapágin Jesús kannan tullenonibal. 
\ip Imi Juandin Zebedeo-e-machi tegin Jacobo-e-urpabal. Tenal Juan Judio-tule tenal Jesús-e-chapingan-walambe-kakabogwad-walgwenmo. Tenal Juandin Jesús-pul-tar-pilaled-tule tegin pul Jesús-wagliki-kudiid-tulebal. 
\ip Tenal Juan Apocalipsis karta nermajad, tegin 1 Juan, 2 Juan, 3 Juan karta nermasbalid. Pitomalgu. 
\c 1  
\s1 Jesús kepe-sagla-akar pato kudiin, imidin sanal kunoni 
\p  
\v 1 Imi kepe-saglagin ampayo iti-nap naigueddu, Pab-kakapurwabi kudiin, tenal Pab Tummadbak kudii. Tenal we kakapurwa, Pab. Wedin, Pab-Jesús.  
\v 2 Tenal Pab-Jesús kepe-saglagin Pab Tummadbak pato purpal kudiin. 
\p  
\v 3 Imi Pab Tummad Jesúsbal pel-kwapa immalmal opinnis. Tenal immal-kwen-nikchul, Pab Tummad Jesúsbal kwen opinniszhulid.  
\v 4 Tenal tule-tullejiid pel-kwapa Pab-Jesús-akar tani, tegin Jesúsbal pel-kwapa tulemal-mag-itononimal neg-talgunonikidyob.  
\v 5 Imi neg-taled neg-chichid-otalo. Tenal neg-chichid neg-taledgin keg pal nakwegus. Al Pab-Jesús neg-taledyob anmalga kunonimo. 
\p  
\v 6 Imi te ibagwengin tule-walgwen maigus, we tuledin nug Juan Bautista. Tenal we tule Pab-Tummad-tar-palmial.  
\v 7 Tenal Juan noni tulemalga palchoggal, Jesúsdin kallen neg-otalogedyobid. Tegin Juan nonibal, tulemal-pel-kwapa ebal Jesúsgin ibzhenonimalgal.  
\v 8 Tenal Juan Bautista kallen pela-pela neg-otalogedyob-chul, pinche unnila Jesúsgin chunmanoni.  
\v 9 Tenal Jesúsdin neg-otaloged-chunchunnad, tenal Jesús tule-ilbal mag itogal tulemal-imanoni. Al Jesús iti-napche noni. 
\p  
\v 10 Tenal Jesús iti-napkin tigusgu, tule-iti-napkin-pukmalad aku Jesús-takchamal, Jesúsde toa-tule. Tenal Jesús-iti-nap-opinnijadbal, tulemal mag Jesús-taked-wilubmalan.  
\v 11 Tenal Jesús aga e-tulemal-Israelmalzhe nonigu, e-tulemal Jesús-kwen-abingaszhulmal. 
\p  
\v 12 Tenal tulemal-wal-walgwen Jesúsgin-penzhul-kunonikidgin Jesús-abingasmal. Tenal Jesús tule-e-abingasmaladga igal-ukcha, Pab-Tummad-nuskanga kugal.  
\v 13 Tenal Pab-nuskan tule-sanaledyob kwen mimmilenonijulmal, tegin tule-sanal-pinzheedyob-chul, tegin tule-itolegedbal-chulbal. Tenal Pab-nuskan Pab-Tummad-itolegedbal mimmilenonimal. 
\p  
\v 14 Imi Pab-kakapurwa anmalga sanal kunoni. Wedin Jesús. Tenal Jesús anmal-abalgin kudigus. Tegin anmal Jesús-yer-taed-takchamal. Tenal anmal Jesús-e-taedbal mag takchamal Jesús Pab-Tummad-akar noni. Tenal anmal mag takchamalbal wedin Pab-Tummad-Machi-walkwénnagwad. Tenal Jesús tulemalbak pinnallé-naneed-wilubzhulinadbal yabli pinnallé nanedi-kus. Tenal Jesús napírra chunmadi-kusbal. 
\p  
\v 15 Imi Juan Bautista Jesúsgin chunmadi-kusgu, chogdi-kusdo: “Imi an akpene pemalga chogzhado: ‘Tule-pid kujal an-cholbal noniko. Tenal we tule anka-pul-iktual-kudigujadbal, anka pul tule-tummad.’ Imi Jesús, a-tuledo.”  
\v 16 Tenal Jesús wilejakwa anmal-taked-wilubzhulinadbal yabli wilejakwa anmal-takti-kus. Al anmal ukin-ukin pentalenonimal. 
\p  
\v 17 Imi Pab Tummad Moisésbal igal-mezhis tule igi naneed-wilubmal. Tenal tulemal Jesucristobal kep wisgunonimal Pab Tummad wilejakwa tule-taked-wilubzhulinadbal, napírra wilejakwa tule-tak. Tenal tulemal Jesucristobal igal-chunchunnad wisgunonimalbal.  
\v 18 Tenal Pab Tummad, tule tar-kwen-takchajul-kus, tenal e-Machi-walkwénnagwad-Jesúsbi aga mecha e-Pabbak kudigus. Al Jesús tulemalga palchognonijun, Pab Tummadde ibi-tule. 
\s1 Juan Bautista chogzhagujad, ede Pab-akpene-chogzhad-palmidagoed-tulejul 
\r (Mateo 3:1-12; Marcos 1:1-8; Lucas 3:1-9, 15-17) 
\p  
\v 19 Imi Juan Bautista kepegin Jesúsgin chunmakalgu, weob kusdo. Tenal teun Judiomal-Jerusaléngin-pukmalad tule-irwal-Pabzhe-kolmalad-tegin-e-pentamalad-palmismal Juan Bautistaje ekisgal: “¿Pede, ibi-tule?”  
\v 20 Tegin tule-palmilenonimalad Juan Bautistaje ekichisgu, “¿Pe ibi-tule?” Juan yakir tulemal-kwen-itoszhul. Tenal Juan tule-nonimaladga pakal-pud chogzhado: 
\p —Antin, an Cristo-Pab-Tummad-akpene-chogzhad-palmidagoed-tulejul. 
\p  
\v 21 Tegin tule-palmilenonimalad kannan Juanzhe ekichialbal: 
\p —¿Tede pede toa-tulejun? ¿Tegil pe Pab-kaka-palchoged-akpenegwad-Elíasdé? 
\p Tegin Juan tulemalga chogalbal: 
\p —Antin a-tulejul. 
\p Tegin tule-palmilenonimalad kannan Juanzhe ekichialmalbal: 
\p —¿Tegil pe te Pab-kaka-palchogeddé? 
\p Tegin Juan tulemalga chogalbal: 
\p —Chulá. 
\p  
\v 22 Tegin tule-palmilenonimalad kannan Juanzhe ekichialbalzhun: 
\p —¿Tegil pe we tulejul-choggu, tede pede toa-tulejun? Al an pei, pe anka wis chog, tule-an-palmialidga an nuekwá pebal choggal. ¿Tegil ibi pe chedanijun? 
\p  
\v 23 Tegin Juan Bautista tule-palmilenonimaladga Pab-kaka-palchoged-Isaías-chogzhadgin palchogalzhun: 
\q1 —Imi tule-walgwen neg-nikchulidbal kolmakal-kolmakal chunmanoniko: 
\q1 ‘Imi pe Tummadga inniki-inniki igal imakenabmal.’ 
\qr Is. 40:3 
\m Antin a-tuledo. 
\p  
\v 24 Tegin Pariseomal-tule-palminonimalad Juanzhe kannan ekichialbal: 
\p  
\v 25 —Imi pe Pab-akpene-chogzhad-palmidagoed-tule-chul-choggu, tegin pe Elías-chul-choggu, tegin pe te Pab-kaka-palchoged-chulbal-choggu, ¿tede pe ibiga tigin tulemal-okchun? 
\p  
\v 26 Tegin Juan tule-nonimaladga chogalzhun: 
\p —Imi antin tiginbi unnila tule-og, oyogal tule aga ulubgin chunchunnad iskuedgin pukib-itononi. Tenal tule-tummad-chunchunnad pemal-abalgin kudii, tenal pemal yabli aku we tule-takmal.  
\v 27 Tenal tule-an-cholbal-tanikiddin anka-pul-tule-tummadiidbal, an pel-unnijul we tulega kutar-tub echikkal. 
\p  
\v 28 Tegin Juan Bautista tigin-tule-ognaidgin, teun tiwal-Jordán-opakal-Betaniagin, Juanga pel-kwapa weob immal kusdo. 
\s1 Jesús tule-iskued-eligal nonikid 
\p  
\v 29 Tegin te pangin, Juan Bautista tani-Jesús-takalgu, chogal: “Pe tak, Oveja-Chapini-Pab-Tummad-akar-tanikid tanigu. We tule pel-kwapa tule-iti-napkin-pukwamaladga iskued-nikad pél elinoniko.  
\v 30 Tenal an akpene we tulegin pemalga chunmadi-kusdo. Tenal teun an chogzhado: ‘Tule-an-cholbal-tanikoed anka-pul-iktual-kudiidbal anka pul tule-tummaddo.’  
\v 31 Tenal an akpene pel-wichulmogan, Pab-akpene-chogzhad-palmidagoedde toa-tule. Tenal Israel-tulemal mag takegal piti-tule Pab-akpene-chogzhad-palmidagoed, al an tigin-tulemal-ognoni.” 
\p  
\v 32 Tegin Juan Bautista kannan Jesúsgin chunmakalbal: “Imi an takchado, Pab Purpa Nued nikpa-akar nuyob aktedani, tegin Jesúsgin chignoni.  
\v 33 Tenal ampa an wichulmogan Jesúsde toa-tule. Tenal Pab Tummad tigin-tulemal-oggal an-palmial. Tenal Pab Tummad anka chogzhado: ‘Imi pe tule-takchal Pab Purpa Nued nuyob targin chignoni, wedin chunchunnad a-tule. We tuledin Pab-Purpa-Nuedgin-tulemal-ogoed.’  
\v 34 Tenal an chunchunnad imial takchado, Pab Purpa Nued Jesúsgin nuyob chignoni. Al an chogdo, we Jesús chunchunnad Pab-Machido.” 
\s1 Tule kepegin Jesúsgin-turdamaladga tognonimalad 
\p  
\v 35 Tegin te pangin, Juan Bautista aga e-chapingan-walbogwadbak pukwadgin, Jesús-takalmalbal.  
\v 36 Tegin Juan Jesúsgin chogalbal: 
\p —Pe tak, Pab-Oveja-Chapini tanigu. 
\p  
\v 37 Tegin Juan-e-chapingan-walbogid, Juan-Jesúsgin-chogzhad itosgu, Jesús-cholbal ilgwen nadmal.  
\v 38 Tegin Jesús chorzhik akpiridgu walbo tule-takal, e-cholbal tanimal. Tegin Jesús tule-walbogwadzhe ekichial: 
\p —¿Ibi pe peimaldé? 
\p Tegin tulemal-Jesús-cholbal-tanimalad Jesúsga chogal: 
\p —Tule-oturdaked, ¿pia pe maidé? 
\p  
\v 39 Tegin Jesús tule-e-cholbal-tanimaladga chogal: 
\p —Tegil pe anpak nemaldo an-neg-takegal, an pia mai. 
\p Tegin tule-walbogid Jesúsbak mes nadmalzhun, Jesús-maidzhe. Tenal teun takalgu, neg pato chedo-wachilbake nai. Al tule-walbogid aka Jesús-neggin pesmalzhun kabgal. 
\p  
\v 40 Tenal tule-walbogid-Juan-itosmalad-walgwen nug Andrés. We Andrésdin Simón-Pedro-e-urpa.  
\v 41 Tegin Andrés ilgwen aga e-ia-Simónzhe nad. Tegin Andrés e-ia-Simónzhe nonigu, Simónga chogal: 
\p —Imi anmal Pab-akpene-chogzhad-palmidagoed-tule-onosmal. Wedin, Cristo. 
\p  
\v 42 Tegin Andrés Jesúszhe aga e-ia-Simón-cheal. Tegidgin Jesús Simón-takalgu, Simónga chogal: 
\p —Imis pe nug Juan-machi-Simón. Tenal pe kujal nug-pid nikunoniko, Cefas. (We nugdin choglege Pedro.) 
\s1 Jesús Felipeje tegin Natanaelzhe kochagujad ebak-negal egin turdagal 
\p  
\v 43 Tegin te pangin Jesús Galileaje nejognaidgin, Jesús Felipe-takal. Tegin Jesús Felipega chogal: 
\p —Anpak nemalma ankin turdagal. 
\p Tegin Felipe Jesúsga chogal: 
\p —Tegil nabirde. 
\p  
\v 44 Tenal Felipedin, Betsaida-tol, Andrés-tegin-Pedro-e-neg-kweburginmogad.  
\v 45 Tegin Felipe Natanael-aminad. Tegin Felipe Natanael-onosgu, ka chogal: 
\p —Imi anmal tule-walgwen-onos. Akpene-akar Moisés-kartagin nermakal maido, tule-walgwen taniko. Tenal Pab-kaka-palchogmalad ampa Moisés-chogzhadyob chogzhamalmo tule taniko. Tenal we tule Jesús-Nazaretkined. Tenal we Jesúsdin José-e-machi. 
\p  
\v 46 Tegin Natanael Felipega chogalzhun: 
\p —¿Nazaretkinedí? ¿Imi tule-nued Nazaret-akar igi noniko-ade? Chulá. 
\p Tegin Felipe Natanaelga chogal: 
\p —Tegil nemaldo takne, pe wisgal ib-chunchunnad o chul. 
\p Tegin Natanael Felipega chogal: 
\p —Tegil an pebak naodo. 
\p  
\v 47 Tegin Jesús Natanael-e-omodani-takchagu, Jesús Natanaelgin chunmakal, chogal: 
\p —We tule, Israel-tule-chunchunnad. Tenal we tule, tule-nued, keg tulemal-yardaged. 
\p  
\v 48 Tegin Natanael Jesús-egin-chogzhad itosgu, Jesúszhe ekichial chogal: 
\p —¿Igi pe an-wiis-ade, an tule-yardaged-tulejul? 
\p Tegin Jesús Natanaelga chogal: 
\p —Imi Felipe ampayo peje kolneeddu, an chapi-wag-islub-ulpal-kwichi, an pe-takcha. 
\p  
\v 49 Tegin Natanael Jesúsga chogal: 
\p —¿Teobí? Tule-oturdaked, tegil pe Pab-Tummad-Machido. Tegin pe Israel-tulemal-e-erreybaldo. Al pe nabir an-wísye. 
\p  
\v 50 Tegin Jesús Natanaelga chogal: 
\p —Imi an chapi-wag-islub-ulpal kwichi an-pe-takchad an-pega-chogzhadbal ¿pe ankin ibzhenoniyé? Tenal an pega iché immal-imajadbal pato pe ankin ibzhenoni. Tenal an pega chogzhundo: pe kujal pul-pule immal-taktijulmalad taknoniko. 
\p  
\v 51 Tegin Jesús kannan chogalbal: 
\p —Imi an chunchunnad pega chogdo: imi pemal kujal taktamalo, nikpa-neg arkejii. Tegin pe taktamalbalo, Pab-angelmal an-Te-Tule-Chunnaje nikpa-akar aktegwis, tegin nakwegwisbal. 
\c 2  
\s1 Jesús Canágin ti opinnijad vinoga 
\p  
\v 1 Tegin Jesús-Natanaelbak-chunmajad-ibapágin, Caná-Galileagin, tule-walgwen ome-nikunai. Imi teun Jesús-e-nan tule-ome-nikunaidgin chimo.  
\v 2 Tenal teun takalgu, machi-ome-nikuneed-e-pab, Jesúszhe kochamo, Jesús aga e-chapinganbak e-machi ome-nikuoed-takegalmo.  
\v 3 Tegin machi-ome-nikunaidga vino akunonigu, Jesús-e-nan Jesúsga chognoni: 
\p —Machi, tulemalga vino akus. ¿Anmal igi imamalo? 
\p  
\v 4 Tegin Jesús aga e-nanga chogal: 
\p —Ome, ¿ibiga pe anka weob chogdé? Imi anka ampa wilub kwen omojul immal-taktijulid imagal. 
\p  
\v 5 Tenal Jesús-e-nan neg-ibed-e-mosmalga chogal: 
\p —Jesús pemalga immal chogoed-yopí, pe imakenabmal. 
\p  
\v 6 Imi teun aka-mosmal-abir metemal-akwagad-kwanerkwa pukwamal. Tenal we metemal ti-chigal pukwamal, Judio-tulemal Moisés-igalbal chunkal-enukedgin chwilidik aga imamalgal. Tenal mete-ilbal galón-tulagwen o galón-tulagwen-kakaambe-dewa, melgu ti chei. 
\p  
\v 7 Tegin Jesús neg-ibed-e-mosmalga chogal: 
\p —Imi we mete-kwanerkwad pél pe taka-taka ti enzhemalo. 
\p Tegin neg-ibed-e-mosmal metegin pél ti enzhasmalzhun. 
\p  
\v 8 Tegin Jesús neg-ibed-e-mosmalga chogalbal: 
\p —Imisgin pe iche wis weido, itoged-tummadzhe chedgal, we tummad itogal, igi itole-dewa. 
\p Tenal neg-ibed-e-mosmal Jesús-chogzhadyob pél immal imasmal.  
\v 9 Tegin tule-itoged-tummad mosmal-kobed-chejad itosgu, pato itogal, vino. Tenal tule-itoged-tummad wichul pia vino tani. Tenal neg-ibed-mosmal-ti-wesmaladdin wismal, vino ti-akar tani. Tegin tule-itoged-tummad machi-ome-nikujadzhe kocha,  
\v 10 tegin machiga chogal: 
\p —Imi meke-ibi-tule keg-chulgu vino-pul-nugu-kobleged-inzhel mimimal. Tegin tulemal pela-pela vino kobalmalal, kep vino istar-kobleged tulemalga mimilegalbal. Tenal pegadin teob kwen kuszhul. Tenal pedin imisgwadzhe pe pul vino-nued chabos. 
\p  
\v 11 Imi Jesús weob Caná-Galileagin kepe immal-taktijulid imas. Tenal Jesús aga oyosdo, ede kannaleged nika. Tegin e-chapingan kep Jesúsgin ibzhenonimalzhun. 
\p  
\v 12 Tegin Jesús vinoga-ti-opinnijad-cholbal Jesús tegin e-nan, tegin e-urpamal, tegin e-chapingan Capernaumzhe nadmalzhun. Tegin Jesúsmal Capernaumgin ipókwajal wis ampagusmal. 
\s1 Jesús Pabzhe-koled-neg-akar tule-immalmal-ukpukmalad-onijad 
\r (Mateo 21:12-17; Marcos 11:15-19; Lucas 19:45-48) 
\p  
\v 13 Imi Judiomalga-Pab-Najad-Itoged omodanikidgin, Jesús Jerusalén-neg-kweburzhe nad. 
\p  
\v 14 Tegin Jesús Jerusalénzhe nonigu, ilagwen Pab-Tummadzhe-koled-negzhe nad. Tegin Jesús Pabzhe-koled-negzhe tognonigu, taknatap tulemal moli-peb-nikad, ovejamal tegin numal-ukpukmal. Tegin tulemal mesa-nabal pukwamalbal, tulemalga mani-pid Judio-mani-chunnadbak ogwananimalbal. 
\p  
\v 15 Tegidgin Jesús tulemal-takchagu immal-ukpukmal, Jesús tub-kwilomakaled amis. Tegin Jesús tub-kwilomakaledgin Pabzhe-koled-neg-akar ovejamal, moli-peb-nikmalad-pukwad-onis. Tegin Jesús tulemal-mani-ogwananimalad-e-mani misbal, tegin e-mesa okpisbal.  
\v 16 Tegin Jesús tule-nu-ukpukmaladga chogal: 
\p —¡Pe magadbal numal-onimalo! ¡Imi an pal kwen peichul, pemal immal-uked-negga an-Pabzhe-koled-neg imamalgal! 
\p  
\v 17 Tegin Jesús-e-chapingan Jesús-chogzhad itosgu, kep itos-nadmal akpene Pab-kartagin nermakal mai: 
\q1 Imi an Peje-koled-neg nudagal 
\q1 an pela-pela arpanaidbal, an neg-owed. 
\qr Sal. 69:9 
\p  
\v 18 Tegin Judio-tummagan Jesúszhe ekichialmalzhun: 
\p —¿Imi pede ibi-tule-ade? ¿Pe igi anka oyogo, pe igal-nika weob immal-tulgan-onigal, tegin mani migalbal? Pe anmalga immal-taktijulid oyogenabgweldo, anmal wisgal pe Pab-Tummad-akar tani o chul-dewa. 
\p  
\v 19 Tegin Jesús tule-tummaganga chogal: 
\p —Imi pemal iti-Pabzhe-koled-neg opelojal, antin ibapágin kannan iti-neg okwisbalo. 
\p  
\v 20 Tegin Judiomal Jesúsga chogalmal: 
\p —Pe melle anka yosgu chunmama. Imi iti-neg pirka-tulabo-kakanerkwa kales chobgal. ¿Tenal pe chog: “An ibapágin kannan chobneé?” Chulá, an pegin kwen ibzhejulá. 
\p  
\v 21 Tenal Jesús akwa-neggin kwen chunmaszhul, tenal Jesús aga e-changin chunmas.  
\v 22 Al Jesús purkwaled-akar kannan tullesgu, e-chapingan kep wisgunonimal, Jesús chogzhagus e-chan ibapágin kannan kwisgunonibalo. Al Jesús-e-chapingan kep Pab-kartagin ibzhenonimalzhun. Tegin Jesús-e-chapingan kep Jesús-chogzhadgin ibzhenonimalbalzhun. 
\p  
\v 23 Imi Jesús Pab-Najad-Itogedgin Jerusaléngin-maidgin, Jesús-immal-taktijulmalad-imajadbal tulemal-ichejul Jesúsgin ibzhenonimal, Jesús Pab-akpene-chogzhad-palmidagoed-tule. 
\p  
\v 24 Tenal Jesús pakal-pud tulemal-wiis-choggu tulemal nuekwa ebal naiguszhulmal, al Jesús tulemalgin kwen ibzhejulda.  
\v 25 Tenal Jesús tule-kwen-napijul ega choggal, we tule, tule-nued o tule-iskana. Tenal Jesúsdin pato wiis, tule aga ulubgin igi pinzhebukmal. 
\c 3  
\s1 Nicodemo Jesúszhe arpigujad Jesúsbak chunmagal 
\p  
\v 1 Imi teun takalgu, tule-walgwen maido. We tule nug, Nicodemo. Tenal we tule, Pariseo-tule, tenal Judio-tummagan-wala-tulapá-kakaambegwad-walgwenga maimo.  
\v 2 Tenal Nicodemo mutik Jesús-wis-taknoni Jesúsbak chunmagal. Tegin Nicodemo Jesúsga chogal: 
\p —Tule-oturdaked, anmal wismaldo, Pab Tummad pe-palmial Pab-igalgin anmal-oturdagal. ¿An igi nabir wiis? Imi Pab-tule-palmialidbi weob immal-taktijulmalad ima. Tenal Pab pebak kudijulilen, pe weob immal-taktijulid kwen imakojulin. 
\p  
\v 3 Tegin Jesús Nicodemoga chogal: 
\p —Nabir. Imisgin an chunchunnad pega chogdo: imi tule kannan kwen mimmilejulil, Pab-neg-takmaid kwen takojul-kuo. 
\p  
\v 4 Tegin Nicodemo Jesúsga chogal: 
\p —¿Imi tule-seredgin igi kuneé, kannan mimmilegal? Keg kue. ¿Anmal kannan nangin togenabbalzhundé, kannan mimmilegal? ¡Paaa! ¿Igi taklejun? 
\p  
\v 5 Tegin Jesús Nicodemoga chogal: 
\p “Imi an chunchunnad pega chogdo: imi tule tigin tegin Pab-Purpa-Nuedbal mimmilejulil, we tuledin meke-igi Pab-neg-takmaidgin keg tog.  
\v 6 Tenal tule sanal mimmilenonikil, wedin sanal. Tenal tule Pab-Purpa-Nuedbal mimmilenonikil, wedin purpa.  
\v 7 Tenal tule-kannan-mimmilegoed-igal an pega chogzhadgin, pe weob pakal peied-wilubzhulin. 
\p  
\v 8 “Imi pe takto, purwa kolalil, a-itoleged nane. Tenal pe nabir purwa-koled itogo, tenal pe wichul, purwade, pia tanibal, tegin pe wichulbal, purwade, piaje nebal. Tenal tule Pab-Purpa-Nuedbal kannan mimmilenonikil ampa purwa-yopímo. Al pe mag kwen itojul tule igi Pab-Purpabal mimmilenoni. Tenal tule e-taedbal mag taklenoniko, Pab Purpa Nuedbal mimmiles.” 
\p  
\v 9 Tegin Nicodemo kannan Jesúszhe ekichialbal: 
\p —¿Tede igijun we immal-pe-chognaiddé? 
\p  
\v 10 Tegin Jesús Nicodemoga chogal: 
\p “¿Imi pe Israel-tule-oturdaked-tummadzhulzhí? ¿Tede pe wichuldé, ibigin an chunmajii?  
\v 11 Nabir. Imi an chunchunnad pega chogbaldo: imi anmal immal-wijiidbal we immalgin chunmadimal. Tenal anmal immal-takchadbal we immalgin chunmadimalbal, kaka-kwadigalzhul. Tenal pemal yabli anmal-chunmakedgin kwen ibzhejulmal.  
\v 12 Imi antin iti-napkined-immalmalgin pemalga chunmadimal. Tenal pemal ampa anpal kwen ibzhejulmal-choggu, ¿tede an igi pega Pab-neggined-immalmalgin chunmako? Keg kue. 
\p  
\v 13 “Imi tule-pid Pab-maidzhe kwen nakwiapchul, pemalga Pab-neggined-immalmalgin chunmagal. Tenal an-Te-Tule-Chunnabi Pab-Tummad-maid-akar aktenoni. Al an igal-nika Pab-neggined-immalmalgin pega chunmagal. 
\p  
\v 14 “Tenal akpene Moisés neg-nikchulidbal chowalgin nakpe-ezha-kortigidgad-nazhis tule melle purkwemalgal. Tenal an-Te-Tule-Chunna ampa chowalgin nazhileged-wilubmo,  
\v 15 tulemal-pel-kwapa an-Te-Tule-Chunnagin-penzhul-kunonikidbal, ilagwen-nadgu tula-tigal. 
\p  
\v 16 “Imi Pab Tummad peyedzhe pel-kwapa tule-iti-napkin-pukmalad-pilalgus. Al Pab Tummad iti-napche e-Machi-walkwénnagwad-palminoni, tulemal-anal iskuedgin purkwegal. Al meke-ibi-tule Pab-Tummad-Machigin penzhul-kunonikil, ilagwen-nadgu tullego, e-iskuedbal Pab Tummadzhe sapejul pal kwen oturdalegojul-kuo.  
\v 17 Tenal Pab Tummad aga e-Machi-palminoni, e-Machibal tule-iti-napkin-pukmalad-abonogal, sapejul tule-iti-napkin-pukmalad-oturdagal-chul. 
\p  
\v 18 “Tenal meke-ibi-tule Pab-Tummad-Machigin penguszhulil, Pab Tummadzhe sapejul pal kwen oturdalegojul. Tenal tule Pab-Tummad-Machigin ibzhaszhulil, Pab-Machi-Walkwénnagwadgin-ibzhejulidbal Pab Tummadzhe pato sapejul oturdalegedzhe natapmal. 
\p  
\v 19 “Imi Pab-Machi iti-napche nonikidbal, neg-otalononi, tule igi nanemalgal. Tenal tulemal pul neg-chichidgin nanebimal, pul neg-taledga. ¿Ibiga tulemal weob nanebimal? Imi tulemal pul-yer itomal istar nanegal. Al we tulemal Pab Tummadzhe sapejul oturdalenonimalo. 
\p  
\v 20 “Tenal tule-istar-nanemalad-pel-kwapa istar neg-taled takmal. Tenal tulemal-iskana yapa neg-taledzhe tagmal, e-istar-taed melle mag taklegal. Al tule-istar-timalad ampa yapa Pab-Machije tagmalmo e-istar-taedde melle mag taklegal. 
\p  
\v 21 “Tenal tule-nuegan neg-taledzhe nonidamal, mag taklemalgal, e-immal-imajadde Pab-peiedyob imasmal.” 
\s1 Juan Bautista kannan Jesúsgin chunmajad 
\p  
\v 22 Tegin Jesús Nicodemobak-chunmajad-cholbal Jesús aga e-chapinganbak Jerusalén-akar nadmal. Tenal Jesús ampa Provincia-Judeabal kudii-pesmal. Tegin Jesúsmal tebal tigin-tulemal-ogdi-kusmal. 
\p  
\v 23 Tenal teun Salim-omopen Enón-neg-nugadgin tulemal-ichejul Juan Bautistaje irmamamimal Juan tigin e-oggal. Tenal ti tebal ichejul nai-choggu, al Juan Bautista tigin tulemal-ognaimo.  
\v 24 (Tenal teun Juan Bautista ampayo oturdaleged-neggin oturdalegeddu.) 
\p  
\v 25 Imi teun Juan-e-chapingan, chwilidik-immal-imaked-igalgin Judio-walgwenbak aga imakalmal.  
\v 26 Tegin e-chapingan Juanga chognonimal: 
\p —Tule-oturdaked, imi tule Jordán-tiwal-opakal pebak kudigujad, tegin pe akpene we tulegin chunmadi-kujad, tigin-tulemal-ognaimo. Tegin tulemal-pel-kwablejal we tuleje irmamaimo. 
\p  
\v 27 Tegin Juan Bautista aga e-chapinganga chogal: 
\p “Nabir. Tenal ankadin iwen-kwen-akalzhul. ¿Tenal Pab Tummad pe-pentajulil immal imagal, pe igi immal imako? Keg kue. Al Jesús-immal-imanaid Pab-Tummad-itolegedbal Jesúsga kunai.  
\v 28 Imi pemal chunchunnad an-itosmal, an igi chogzhad. Tenal an chogzhado, an Pab-akpene-chogzhad-palmidagoed-tulejul. Tenal Pab Tummad an-palmial we tulega iktualeba igal-nudagal. 
\p  
\v 29 “Imi pemal wismaldo, tule-ome-nikuedgin, igi igal-mai. Tenal puna e-machered-nikuneedgad, e-machered-e-aigad chul. Tenal machered-e-ai pinche we machered-pentanai, tegin we machi-ome-nikuneed-abintajii, inkwa noniko-dewa. Tegin e-ai machi-ome-nikuneed-itojal tani, e-ai pela-pela weligwal itononiko. Imi antin ampa we tule-e-aiyobmo. Al an weligwal itononi.  
\v 30 Al Jesús-e-nug pul tunkued-wilub. Tenal antin pul nug-totogwadga kued-wilub.” 
\s1 Jesús Pab-Tummad-maid-akar-tanikid-tule 
\p  
\v 31 Tegin Juan chogalbal: “Imi tule-Pab-Tummad-maid-akar-tanikid, pul tule-tummad. Tenal tule-iti-napkined Pab-neg-taktijulidbal Pab-neggin keg chunma. Tenal tule iti-napkined-choggu, al tule iti-napkinbi nabir chunma. Tenal tule-Pab-Tummad-maid-akar-tanikid, tule-iti-napkinedyob chul. Tenal we tule pel-kwapa immal wiis. 
\p  
\v 32 “Tenal tule-Pab-maid-akar-tanikid imial-immal-takchadbal, tegin ual-immal-itojadbal, chunmakalda. Tenal tulemal yabli e-chunmakedgin kwen ibzhejulmal.  
\v 33 Tenal tule Pab-maid-akar-tanikid-chunmakedgin ibzhajal, we tule chognoniko, Pab Tummad chunchunnad chunma.  
\v 34 Tenal tule-Pab-tar-palmialid, Pab-chogzhadgin chunma. Tenal Pab Tummad tule-e-akar-tanikidga pellallé E-Purpa-Nued-ukpal. 
\p  
\v 35 “Tenal Pab Tummad e-Machi-pilaledbal pela-pela aga e-machiga igal-ukcha pellallé immal imagal. 
\p  
\v 36 “Tenal meke-ibi-tule Pab-Machigin penzhul-kunonikil, ilagwen-nadgu tula-tio. Tenal meke-ibi-tule Pab-Machi-abingejulil, ilagwen-nadgu pal kwen tullegojul-kuo. Tenal tule-Pab-Machi-abingaszhulmalad ampa sapejul Pab Tummadzhe ilagwen-nadgu oturdalenonimalo.” 
\c 4  
\s1 Jesús Samaritano-omebak chunmajad 
\p  
\v 1 Imi teun takalgu, Pariseomal wisgunonimal, tulemal-pul-ichejul Jesúsbal naigumamimal, Juanbal pul-iché naigumamimal. Tegin Jesús Juanga pul ichejul tigin tulemal-ognaibal.  
\v 2 (Tenal Jesús tigin-tulemal-kwen-ognaichul, tenal e-chapingan tigin-tulemal-ognanimal.) 
\p  
\v 3 Tegin Jesús wisgusgu Pariseomal e-wisgusmal ede tigin ichejul tulemal-ognai, Jesús Provincia-Judea-akar kannan nadmalbal, Provincia-Galileaje. 
\p  
\v 4 Imi teun Jesús Provincia-Samariagin keg-chulgu najo-wilub.  
\v 5 Tegin Jesús Provincia-Samariagin-natapidgin neg-kwebur-Sicar-nugad-tikalzhe nonimalzhun, tad-Jacob akpene aga e-machi-Joséga nap-ukchadzhe.  
\v 6 Tenal we neggin Jacob-ti-wejad-ya akial-chii. Tenal Jesús peyedzhe-nanajadbal pela-pela uluku tani-choggu, al Jesús ti-ya-akial-chiid-nabal chignoni. Tenal teun takalgu, tad pato yoroku. 
\p  
\v 7 Tegidgin Jesús Samaritano-ome-takal, e-chiidzhe ti weidani. Tegin Jesús omega chogal: 
\p —¿Imi pe ti-wejal, anka pe wis ti udagojí? 
\p  
\v 8 (Imi teun Jesús-e-chapingan pato neg-kweburzhe nadmal mas-kunned pakegal.) 
\p  
\v 9 Tegin Samaritano-ome Jesúsga chogal: 
\p —An pega ti kwen uknejul. ¿Imi pe Judio-tulejulzhí, tede pe igi anche ti ekisneé? ¿Pe wiszhulzhí, antin Samaritano-tule? 
\p (Imi teun Judio-tulemal Samaritano-tulemalbak kusgu aga istar takmal.) 
\p  
\v 10 Tegin Jesús Samaritano-omega chogal: 
\p —Imi pe wisgujalen Pab tulega ibi uko, tegin pe wisgusbalilen toa peje ti ekisnai, pe anka kwen chogzhajulin: ‘An pega ti kwen ukojul.’ Tenal pe anche ti ekichijalen, antin pega ti-ilagwen-nadgu-tule-otuloged ukoen. 
\p  
\v 11 Tegin Samaritano-ome Jesúsga chogalzhun: 
\p —Tummad, pe pormo nikchul ti weigal, tenal ti-ya-akial-chiid-orojulbali. Al pe unnijul ti weigal. ¿Tede pe pia ti-tule-otuloged onogo-adé?  
\v 12 ¿Ade pede anmal-tadgan-Jacobga pul tule-tummadzhí? Imi Jacob aga we ya akis aga ti kobgal. Tegin Jacob-e-nuskan ampa we yagin ti kobzhamalmo, tegin e-immalmal-tulgan ampa we yagin ti kobzhamalmo. 
\p  
\v 13 Tegin Jesús Samaritano-omega chogalbal: 
\p —Imi meke-ibi-tule we ti kobzhal, ampa kannan-kannan ukul-ukul itononibalo.  
\v 14 Tenal meke-ibi-tule an-ti-ukchad kobzhal, ukul-ukul pal kwen itononikojul. Tenal an-pega-chogzhad-ti tule-ulubgin ti-kammubal ti-ilagwen-nadgu-ariomaidyob kunoniko, tule ilagwen-nadgu tullegal. 
\p  
\v 15 Tegin Samaritano-ome Jesúsga chogalbal: 
\p —¿Teobí? Tummad, tegil pe anka te ti udado, an melle ukul-ukul pal itogal, tegin an itije, melle ti pal weinonigalbal. 
\p  
\v 16 Tegin Jesús omega chogalbal: 
\p —Nabir. Tegil pe aga macheredzhe kolnaddo. Tegin pe kannan tagbalo. 
\p  
\v 17 Tegin ome Jesúsga chogal: 
\p —Ani, an machered-kwen-nikchuli. ¿Tede an igi naga macheredzhe kolnao? 
\p Tegin Jesús omega chogal: 
\p —Nabir pe chogendo: ‘An machered-kwen-nikchul.’  
\v 18 Tenal pe machered-walatalgus-nikugus. Tenal pe-machered-nikad ampa pe-machered-chunchunnad chulbal. Al pe anka chogzhad, ib-chunchunnaddo: ‘An machered-kwen-nikchul.’ 
\p  
\v 19 Tegin ome Jesúsga chogal: 
\p —¿Tummad, igi pe an-wisgus-ade, an machered-nika? ¿Tegil pe Pab-Tummad-kaka-palchogeddé? ¿Al pe weob an-wisyé?  
\v 20 Imi anmal-tadgan iti-yal-kwichidgin Pab Tummadzhe kochamal, tenal pemal-Judiomal chogmal, anmal Jerusalénginbi Pab Tummadzhe koled-wilubmal. ¿Tegidde pe igi chogmójun? 
\p  
\v 21 Tegin Jesús omega chogal: 
\p “Ome, pe melle ankin-penguma. Tenal ibe kujal nonikodo, meke iti-yal-kwichidgin, meke Jerusaléngin, pemal Pab Tummadzhe kwen kolojulmal.  
\v 22 Tenal pemal-Samaritano-tulemal Pab-Tummad-wichulmaladbal Pab Tummadzhe kolnanimal. Tenal anmal-Judiomal Pab-Tummad-wijiidbal Pab Tummadzhe kolnanimal. Imi Pab-Tummad-tule-abonoged-igal unnila Judiomalbalbi noni. 
\p  
\v 23 “Tenal ibe noniko, tenal imi ibe pato iche-iche kunai, tule-chunchunnad-Pab-otummonanimalad purpal, tegin ib-chunchunnadgin Pab Tummadzhe kolnanimal, tenal Pabzhe-koled negginbijul. Tenal Pab Tummad tule-purpal-eje-kolmalad-ami, eje-koledgin e-otummogal.  
\v 24 Tenal Pab Tummad purpaled-choggu, al tulemal chunchunnadgin purpal Pab Tummadzhe kolenabmal Pab-Tummad-otummogal.” 
\p  
\v 25 Tegin ome Jesúsga chogal: 
\p —Imi antin, an wisdo, Pab-akpene-chogzhad-palmidagoed-tule noniko. Wedin nug, Cristo. Tenal Cristo nonikil, anmalga pel-kwapa immalmal palchognoniko. 
\p  
\v 26 Tegin Jesús omega chogalzhun: 
\p —Imi an-pebak-chunmajiid, an a-tuledo. 
\p  
\v 27 Tegidgin Jesús-e-chapingan irmanonimal, Jesúszhe. Tegin e-chapingan Jesús-omebak-chunmajii-takchagu, weob pakal pesmal. Tenal e-chapingan Jesúszhe kwen ekichiszhulmal: “¿Ibi pe omeje ekis-wede?” Tegin e-chapingan Jesúszhe ekichiszhulmalbal: “¿Ibiga pe omebak chunmajii-wede?” 
\p  
\v 28 Tegidgin ome aga mete-ti-weied ebes, ilgwen neg-kweburzhe nadzhun. Tegin ome neg-kwebur omosgu, tulemalga palchognatap: 
\p  
\v 29 —Webal tule-walgwen chii. We tule an-igi-kudiid, pel-kwapa anka chogzha. Antin, an takto, we tule, Cristo-Pab-akpene-chogzhad-palmidagoed-tule. Al an pei pe anpak nemal we tule-taknegal. 
\p  
\v 30 Tegin tulemal neg-kwebur-akar almalzhun, Jesús chiidzhe. 
\p  
\v 31 Tegin ome-neg-kweburzhe-naded-impagin Jesús-e-chapingan Jesúsgin wilenaigualmal chogalmal: 
\p —Tule-oturdaked, pe mas wis kunkwelma. 
\p  
\v 32 Tegin Jesús aga e-chapinganga chogal: 
\p —Tenal antin, an mas nika, tenal pemal kwen wichulmal, ibi-mas. 
\p  
\v 33 Tegidgin Jesús-e-chapingan aga emal-emal ekichialmal: 
\p —¿Tegil tulemal masgin Jesús-okuchamaldé? ¿Al Jesús yapa mas kunyé? 
\p  
\v 34 Tegin Jesús chogalbal: 
\p —Imi Pab-Tummad-an-palmialid-choged-pallí an immal imaked, tegin Pabga-arpaged-pelogoed, wedin anka mas-kunned-chunchunnad.  
\v 35 ¿Imi pemal chogmalzhulzhí, ampa ni-walabake napi, immal-kwa weigal? Tenal an pemalga chogdo: pe nue takmaldo, trigo pato korodik nai, kuakwa kwangalnai. 
\p Tenal Jesús purpal chogzha, tulemal pato kuakwa pukwamal, Pabbal-naigugal.  
\v 36 Tegin Jesús chogalbal: 
\p “Imi tule Pabbal-naigugal tulemal-amijal, we tule yer itononiko, tule-e-arpajadbal ega mani penuklejadyob. Tenal tule Pabbal-naigugal tulemal-imasmalal, we tulemal ilagwen-nadgu tullemalo. Al tule-immal-tigzhad tule-immal-wesmaladbak aga mes welgumalo. 
\p  
\v 37 “Imi tadgan chogedyob: ‘Imi tule immal tigzhal, tenal tule-pid we immal-tigzhad weio.’ Tenal we chogzhad, ib-chunchunnad.  
\v 38 Tenal tule-immal-kwa-weiedyob an pemal-palmial tulemal-amigal, anpal naigugal. Tenal pemal kwen arpaszhulmal, pemal taknonimal, we tulemal pato kuakwa pukwamal anpal-naigumalgal. Tenal tule-pimalad pato arpasmal. Tenal tule-pimalad-arpajadbal pemalga ib-nuedga kunoni. Pitogua.” 
\p  
\v 39 Imi Samaritano-ome tulemalga chogzhado, Jesús ega pel-kwapa immal-akalodiid chogzha. Al we neg-kweburgin Samaritano-tolgan-ichejul Jesúsgin ibzhenonimalzhun. 
\p  
\v 40 Tegin Samaritano-tolgan Jesúszhe nonimalgu, Jesúsgin wilenaigualmalzhun e-neg-kweburgin wis peigal. Al Jesús ibbo we neg-kweburgin peszhun.  
\v 41 Imi teun Jesús Samaritano-tolganga kakal-chunmajadbal, Samaritano-tule-pul-ichejul Jesúsgin ibzhenonimal. 
\p  
\v 42 Tegin Samaritano-tulemal-Jesúsgin-ibzhenonimalad omega chogalmalzhun: 
\p —Imi pe anka chognonikidbalbi an kwen ibzhaszhulmal, imi anmal ual Jesús-itojadbal pul-pule Jesúsgin ibzhenonimal. Al anmal chunchunnad wisgunonimaldo, Jesús tule-iti-napkin-pukmalad-e-abonoged-chunchunnad. Wedin Cristo. 
\s1 Jesús tule-errey-yalbal-arpaged-e-machi-nudajad 
\p  
\v 43 Tegin Jesús ibbo Provincia-Samariagin megwijad-cholbal, ukin Provincia-Galileaje nadmal.  
\v 44 Imi akpene Jesús aga tukin chogzhado: “Tule-Pab-kaka-palchogmaladdin aga e-neg-kweburginmalad tule-tummadyob kwen tar-takojulmal.” 
\p  
\v 45 Tegin Jesús Provincia-Galileaje omosgu, Galilea-tolgan ampokaagwal Jesús-abingasmal. Tenal akpene Galilea-tolgan Pab-Najad-Itogedgin Jerusalénzhe arpigusgu, Jesús-takchamal, pél immal imasgujad. Al we tulemal yer Jesús-abingasmal. 
\p  
\v 46 Tegin Jesús kannan Caná-Galileaje nonibal. Imi akpene Caná-neg-kweburgin Jesús vinoga ti opinnis. Tegin Jesús kannan Canáje nonikidgin, teun tule-walgwen Capernaum-neg-kweburgin maimo. Tenal we tule errey-yalbal-arpaged-walgwen. Tenal teun errey-yalbal-arpaged-e-machi Capernaumgin yee-pakal mellemai. 
\p  
\v 47 Tegin tule-errey-yalbal-arpaged itosgu Jesús Judea-akar kannan Galileaje noni, we tule Jesúszhe al, Caná-neg-kweburzhe. Tegin tule-errey-yalbal-arpaged Canáje nonigu, Jesúsgin wilenaigual Capernaumzhe ebak negal, e-machi-purkwedani-maid nuda-negal. 
\p  
\v 48 Tegin Jesús machi-yeed-e-pabga chogal: 
\p —Imi pemal immal-taktijulid kwen takchulil, ankin kwen ibzhenonikojulmal. 
\p  
\v 49 Tegin tule-errey-yalbal-arpaged Jesúsga chogal: 
\p —Tummad, nabir pe chogendo. Tenal antin, an peido an-machi ampayo purkweddu, pe an-negzhe wis nao an-machi-nudagal. 
\p  
\v 50 Tegin Jesús tule-errey-yalbal-arpagedga chogal: 
\p —Imi an pe-negzhe need-wilubzhul, tenal pedin aga negzhe nao. Tenal pe-machidin kwen purkwenejul, pato nugus. 
\p Tegin machi-yegujad-e-pab Jesús-weob-ega-chogzhad itosgu, Jesúsgin ibzhas. Tegin we tule aga negzhe nadzhun. 
\p  
\v 51 Tegin machi-e-pab ampa igalbal-natapidgin, e-mosmal igalbal machi-e-pab-abin-almal. Tegin e-mosmal igalbal e-tummad abingusgu, machi-e-pabga chogalmal: 
\p —¡Pe machi pato nugus! 
\p  
\v 52 Tegin machi-e-pab e-mosmalga chogal: 
\p —¡Tegil an weli! ¿Tede an-machide ibi-wachigin wis kadi-kunoni-ade? 
\p Tegin e-mosmal e-tummadga chogal: 
\p —Sae, ibgin-wachilgwengin, uged pe-machiga akinnoni. 
\p  
\v 53 Tegidgin machi-e-pab wisgud-nad we wachigin Jesús ega chogzhagus: “Pe-machi pato nugus.” Al machi-e-pab Jesúsgin ibzhenonijun, tegin e-negginmalad pel-kwapa Jesúsgin ibzhenonimalmojun. 
\p  
\v 54 Tenal Jesús Judea-akar Galileaje nonigu, wegin Jesús pato ilabogus immal-taktijulid imagus. 
\c 5  
\s1 Jesús Betzata-ti-chiid-nabal tule-keg-naneed-nudajad 
\p  
\v 1 Tegin Jesús machi-nudajad-cholbal, Judio-itoged-tummad-naigudanikidgin, Jesús Jerusalén-neg-kweburzhe nonimo.  
\v 2 Imi teun Jerusaléngin Oveja-Wanagak-tikalbal, ti-tummad wilagwal chii. Tenal ti-wilagwal-chiid Hebreo-kakagin nug Betzata. Tegin ti-wilagwal-chiid-tikalbal neg-matargana-kwaatal pukwamalbal. 
\p  
\v 3 Tenal we negmalgin, tule-yemalad-ichejul mamimal, tule-aku-atamalad, tule-mego-mego-nanemalad, tegin tule-tuwa-tinkualmalad. (Imi tule-yemalad ti-mumurmadagoed abintamamimal.  
\v 4 Tenal ti-chiidgin Pab-angel impa-impagin aktenonikil, ti omumurma-nonida. Tenal tule-yeed-keped ti-mumurmakedgin opchal, meke-ibi-poni we tulega nugunonida.) 
\p  
\v 5 Imi teun takalgu, tule-walgwen pirka-tulagwen-kakaambe-kakapábakkus, ti-mumurmaked-nabal yee mellemai.  
\v 6 Tegin Jesús tule-yeed-mellemai-takchagu, Jesús pato wiis we tule tikajulgus weob mellemai. Tegin Jesús tule-yeedzhe ekichial chogal: 
\p —¿Pe nugubi? 
\p  
\v 7 Tegin tule-yeed Jesúsga chogal: 
\p —Tummad, teobdo. Tenal an tule-kwen-nikchul an-chedgal, ti-mumurmanonikoedgin obgal. Tenal an alamanain obnegal, tenal tule-pid an-iktusda antu obgal. Al an keg nugu. 
\p  
\v 8 Tegin Jesús tule-yeedga chogalbal: 
\p —¿Teobí? Tegil imisgin an pega chog: pe kwisgu, tegin pe-kachi aga pe olmako, tegin pe nanao. 
\p  
\v 9 Tegidgin tule-yeed ilagwen nugunonijun. Tegin tule-yeed aga kachi olmas. Tegin tule-yeed kannamadi-kualzhun. 
\p Tenal teun ulukued-ibe nai.  
\v 10 Al Judiomal tule-nugujadga chogalmal: 
\p —Imi pe wichulzhí imis ulukued-ibe nai. ¿Ibiga pe olmakal kachi cheinatap-wede? Wedin izhe. 
\p  
\v 11 Tegin tule-nugujad Judiomalga chogal: 
\p —Imi tule-an-nudajad anka chogzhado: ‘Nanao.’ Tegin anka chogzhabaldo: ‘Aga pe kachi chedo.’ Al an kachi cheinatapto. 
\p  
\v 12 Tegin Judiomal tule-nugujadzhe ekichial: 
\p —¿Toa-tule pega chogzha-ade: ‘Pe nanao, aga pe kachi chedo?’ 
\p  
\v 13 Tenal tule-nugujad wichuldo, toa-tule e-nudas. Tenal Jesús tule-nudasgu, tule-ichejulidbal Jesús tule-nugujadgin oweles. 
\p  
\v 14 Tegin Jesús tule-nudajad-cholbal untaradgin Jesús Pab-Tummadzhe-koled-neggin tule-nugujad-abingunonibal. Tegin Jesús tule-nugujadga chogal: 
\p —Imi pe takto, pedin nugus. Tenal pe imis-akar iskuedgin melle pal nanao, pega pul melle poni-tummad nononigal. 
\p  
\v 15 Tegin tule-nugujad Judiomalzhe nad, aga chognad Jesús e-nudas. 
\p  
\v 16 Imi Jesús ulukued-ibegin tule-nudas-choggu, al Judiomal chabzhul Jesús-imabi-kualmalzhun.  
\v 17 Tegin Jesús Judiomalga chogal: 
\p —Imi an-Pab pane-pane arpanai-choggu, al an pane-pane arpamo. 
\p  
\v 18 Tenal Jesús chogzhadbal ede Pab Tummadyob pane-pane arpanai, wedin chogle Pab Tummad Jesús-e-pab, tegin wedin choglebal Jesús Pab Tummadbak aga-a-yopí tule-tummadga maimo. Al Judiomal pul-pule Jesús-mesbi-kualmalzhun. Tenal Jesús ulukued-ibegin kwen ataszhulidbal, Judiomal Jesús-mesbi-kualmalbalzhun. 
\s1 Pab Tummad Jesúsga igal-ukcha tule-otulogal, tegin tulemalga igal-itogalbal toa nos, o toa noszhul 
\p  
\v 19 Tegin Jesús Judiomalga chogalbal: “Imi an chunchunnad pemalga chogdo: imi Pab-Machi aga e-itolegedbal keg immal ima. Tenal Pab-Machi e-Pab-takel immal ima, ampa teopí Pab-Machi immal imamo. Tenal Pab Tummad meke-ibi-immalagin immal ima, e-Machi ampa teopí immal imamo. 
\p  
\v 20 “¿Ibiga teob? Imi Pab pela-pela aga e-Machi-pilal-choggu, al e-Pab pel-kwapa e-immal-imaked oyomo. Tenal Pab kujal e-Machiga pul-pule immal oyogo, pemal keger takegal.  
\v 21 Tenal Pab kannan tule-purkwalmalad-otulo-choggu, al e-Machi ampa e-Pab-yopí e-itolegedbal tule-purkwalmalad-otulomo. 
\p  
\v 22 “Teginbal, Pab Tummad tulega igal-kwen-itogojul-kuo. Tenal Pab e-Machiga igal-ukcha, tulemalga igal-itogal, tulemal piaje sapejul oturdaleged-wilubmal.  
\v 23 Tenal Pab e-Machiga weob igal-ukcha, tulemalde e-Machigin atamalgal, tulemal-pel-kwapa e-Pabgin atagedyobmo. Tenal tule Pab-Machigin kwen atajulil, Pab-machi-palmialidbal ampa Pabgin kwen atajulmalmo.” 
\p  
\v 24 Tegin Jesús chogalbal: “Imi an chunchunnad pemalga chogdo: meke-ibi-tule an-chunmajadgin ibzhajal, tegin Pab-an-palmialid-penguszhulil, we tule ilagwen-nadgu tullego, tegin we tule Pab Tummadzhe sapejul kwen oturdalegojulbal. Tenal tule Pabgin ibzhejal, tule-purkwed-igal-akar nos, tegin tule-ilagwen-nadgu-tulleged-igalgin tognonibal. 
\p  
\v 25 “Tenal an chunchunnad pemalga chogbaldo: tenal ibe noniko, tenal imi ibe pato naigunoni, tule-purpal-purkwalmalad mag itononiko Pab-Machi ibi chogzhad. Tenal tule-Pab-Machi-chogzhad-nued-itosmalad purpal tullenonimalo. 
\p  
\v 26 “Tenal Pab kusgu aga e-otuloged cheitii-choggu, al Pab aga e-Machiga igal-ukchamo, kusgu aga e-otuloged cheigalmo.  
\v 27 Tenal Pab-Machi, Te-Tule-Chunna-choggu, al Pab e-Machiga igal-ukchabal tulemalga igal-itogal tulemal piaje sapejul oturdaleged-wilubmal. 
\p  
\v 28 “Imi pemal melle an-chogzhadgin weob pakal peimalo. Tenal ibe nonikodo, tulemal-pel-kwapa-purkwismalad-uan-yabal-mamimalad Pab-Machi-chunmaked itomalo.  
\v 29 Tenal te ibegin, tule-purkwismalad uan-akar kwisgunonimalo. Tenal tule-nued-nanasmalad ilagwen-nadgu tullego, tenal tule-istar-nanasmalad ilagwen oturdaleged-neggin sapejul oturdalego.” 
\s1 Jesús chogzhagujad, ede chunchunnad Pab-Machi-Chunnad 
\p  
\v 30 Tegin Jesús Judiomalga chogalbal: “Imi antin, an-itolegedbal keg walgwen immal ima, tenal Pab-anka-chogzhadbal an tulega igal-ito. Tenal antin tulemalga nuekwa igal-itogo piaje sapejul oturdaleged-wilubmal. Tenal an peiedyob an kwen nanejul, Pab-an-palmialid peiedyob, an nane. 
\p  
\v 31 “Tenal an naga walgwen chunmakelen, an chunmakeddin ib-nuedga kwen kunonikojulin.  
\v 32 Tenal imidin tule-pid ankin yer chunmadii. Wedin Juan Bautista. Tenal antin wisdo, we tule-ankin-chunmadiid, ib-chunchunnad. 
\p  
\v 33 “Imi pemal Juan Bautistaje tulemal-palminonimal. Tenal Juan pemalga napírra chogzhado, antin a-tuledo.  
\v 34 Tenal Pab Tummad ankin chunmajadbal, tegin an immal-taktijulmalad imajadbal, al an tule-kwen-napijul ankin chunmagal antin toa-tule. Tenal Pab-sapejul-tulemal-oturdakoed-akar pemal nabir abonolegal. Al Juan-ankin-chunmajadbal, an pemalga chognonimo.  
\v 35 Imi Juan Pab-wisgugal tulemal-oturdadi-kus, achachar-tummad kanaidgin neg-otarmanaidyob. Tenal pemal yabli ichéjal yer Juan-chogzhad wis itosmal.” 
\p  
\v 36 Tegin Jesús Judiomalga chogalbal: “Tenal antin, an-immal-imanaidbal Juan-ankin-chogdi-kujadga, pul-pule pemalga oyonai, antin toa-tule. Tenal Pab-anka-arpaged-ukchadbal, tegin an-Pabga-immal-imanaidbal, an oyonaido, Pab an-palmial.  
\v 37 Tenal Pab-an-palmialid aga tukin ankin chunmadi-kus antin a-tule. Tenal pemal Pab-chunmaked-kwen-itoszhulmal, tegin pemal Pab-pel-takchajulmalbal. 
\p  
\v 38 “Tenal pemal kwen ibzhaszhulmal-choggu Pab an-palmial, al Pab-pemalga-chogzhaddin pemal-ulubgin kwen peszhul. 
\p  
\v 39 “Tenal pemal ebinzhemal, Pab-kartagin-turdanaidbal pemal wisgune, pe igi ilagwen-nadgu tullegal. Al pemal pela-pela Pab-kartagin turdananimal. Tenal pemal nabir turdananimalando, tenal Pab-karta ankin chunmanai.  
\v 40 Tenal pemal yabli anche yapa tagmal ilagwen-nadgu tullegal.” 
\p  
\v 41 Tegin Jesús Judiomalga chogalbal: “Imi antin, an tule-an-nug-otummomalad-kwen-abingenai-chul.  
\v 42 Tenal an pemal-wismal, pemal ulubgin Pab-kwen-pilalzhulmal.  
\v 43 Tenal antin, an-Pab-nuggin nonido, tenal pemal an-kwen-abingaszhulmal. Tenal tule kujal aga tukin tanikil, pemal we tule-abingemalo. 
\p  
\v 44 “Tenal pemal aga emal-emal aminanimal aga nug otummogal. Tenal pemal Pab-Tummad-walkwénnagwad-kwen-aminanijulmal pe-nug-otummogal. ¿Tede pemalde, igi ankin ibzhenonimalo-wede? Keg kue. 
\p  
\v 45 “Tenal pemal ankin kwen ibzhaszhulmal-choggu, al pe melle ankin pinzhemalo, an Pabga pemal-tuktinemal. Tenal pe Moisés-igalgin-pe-ibzheedbal, pe chogmal: ‘Imi anmal keg-chulgu Pab-negzhe tognemal.’ Tenal pemal-nuekwa-nanaszhulidbal Moisés Pab Tummadga pemal-tuktimalo. 
\p  
\v 46 “Tenal pemal Moisés-penzhul-kujalen, pemal ampa ankin penzhul-kunonimalmogan. ¿Ibiga an teob pemalga chog? Imi Moisés pél ankin nermas.  
\v 47 Tenal pe Moisés-nermajadbal, pe pengus-choggu, ¿tede pe igi an-chogzhiidgin ibzhenonimalmogo? Keg kue. Pitomalgu.” 
\c 6  
\s1 Jesús miliatal masgin tule-okuchad 
\r (Mateo 14:13-21; Marcos 6:31-44; Lucas 9:11-17) 
\p  
\v 1 Tegin Jesús chunmajad-cholbal untaradgin nad, Galilea-mata-opakal. Tenal we mata nugbal, Tiberias-mata.  
\v 2 Teun takalgu, tulemal takchamal Jesús tule-yemalad-nudas, al Jesús-immal-taktijulmalad-imajadbal tulemal-ichejul Jesúsbak irmadmalmo.  
\v 3 Tegin Jesús aga e-chapinganbak yalzhe nadmal. Tegin Jesús aga e-chapinganbak yal-abaladzhe nonimalgu, yal-abal ampagunonimalzhun.  
\v 4 Tenal teun Judiomalga Pab-Najad-Itoged-e-wilub pato omodani-choggu, al tulemal-ichejul irmanonimalmo. 
\p  
\v 5 Tegin Jesús panna atadgu, takal tulemal-ichejul e-chiidzhe irmadanimal. Tegin tulemal nonimalgu, Jesús Felipega chogal: 
\p —¿Anmal pia tulemalga mas-kunned paknemalo-wede, tulemal-okunkal? 
\p  
\v 6 (Tenal Jesús pinche Felipega weob chogzha Felipe-wilub-takegal, Felipede igi chogdago-dewa. Tenal Jesús pato wiis, ede igi tulemal-okunno masgin.) 
\p  
\v 7 Tegin Felipe Jesúsga chogal: 
\p —Ante wichí. Imi tule ni-walapábak arpanailen, we mani-kanaid ampa kwen unnijulin we tulemalga mas-kunned pakegal. Tenal we mas-kunned, ampa iché-iché tulemal-wis-okunmaloen. 
\p  
\v 8 Tegin Jesús-e-chapin-pid-Andrés-nugad, Simón-Pedro-e-urpa, Jesúsga chogal: 
\p  
\v 9 —Imi machi-toto-walgwen wegin madu-olgana-cebadagad-kwaatal wis nika, tegin ua-purwigana-ukabo-nikbal. ¿Tenal immal-ichegwaddé ibiga nabir-wede, tule-ichejul-pukwadga? We mas-kunned aku pel-kwapa tulemal-okunkal. 
\p  
\v 10 Tegin Jesús chogal: 
\p —Tenal ankadin iwen-kwen-akalzhul madu-kwaatal. Tenal antin, an pei, pemal tulemalga chognao: ‘Pe wis ampagumalo.’ 
\p Tenal teun we neggin kagan ichejul nai. Tegin Jesús-e-chapingan Jesús-chogzhadyob imasmal. Imi teun takalgu, machergan-ampagusmaladbi, miliatalzhal. Tenal omegan, tegin nuskan pel choglejul. 
\p  
\v 11 Tegin Jesús kwaatal-madu-olgana tegin ua-chus. Tegin Jesús Pab Tummadga tog-nuedi chogzhagu, madu, ua Jesúsga melgudzhun. Tegin Jesús aga e-chapinganga madu-ukcha. Tegin Jesús-e-chapingan tule-ampagusmaladga madu-mimiszhun, tulemal kunpiedyob. Tegin Jesús-e-chapingan ampa teopí ua-ukabogid-imasmo, tulemal e-kunpiedbal. 
\p  
\v 12 Tegin tulemal pel-kwapa immedzhe mas kuchamalgu, Jesús aga e-chapinganga chogal: 
\p —Imi pemal mas-okpitchad weimalo, melle pinche perienzhegal. 
\p  
\v 13 Tegin Jesús-e-chapingan tulemal-kwaatal-madu-kuchamalad-okpitchad wesmalgu, ampa karpa-kwaambe-kakabog okpis. 
\p  
\v 14 Tegin tulemal takchagu Jesús mas-kunnedgin immal-taktijulid imas, chogalmal: 
\p —We tule, Pab-kaka-palchoged-chunchunnad. Wedin Pab-chogzhad-iti-napche-palmidagoed-tule. 
\p  
\v 15 Tegin Jesús mag takchagu tulemal pinzhebukmal kantikidgin erreyga e-odonemal, Jesús aka-ulak yalaganbal walgwen nadbal. 
\s1 Jesús ti-askin kannamakal e-chapinganzhe nonikid 
\r (Mateo 14:22-27; Marcos 6:45-52) 
\p  
\v 16 Tegin tad-arkwatku, Jesús-e-chapingan mata-kakche ul-naidzhe aktenonimal  
\v 17 tegin kep ulgin aknakwismalzhun. Tegin Jesús-e-chapingan nadmalzhun mata-opakal, Capernaumzhik. Tegin neg-chichilegalgu, Jesús ampa yalaganbal kudiid, ampa kwen taklejul. 
\p  
\v 18 Imi teun Jesús-e-chapinganga sapejul purwa kolnonigu, pela-pela mata arwialzhun.  
\v 19 Tegin Jesús-e-chapingan kilómetro-atal o nerkwa-dewa kammegin-nanajadbal Jesús-takalmal e-ulzhe tani. Tenal Jesús ti-askin kannamadani. Tenal e-chapingan Jesúsgin kwakialmal. 
\p  
\v 20 Tegin Jesús ulzhe nonigu, aga e-chapinganga chogal: 
\p —Melle pe tobgumalma; antin, an Jesúsde. 
\p  
\v 21 Tegin e-chapingan Jesúsga chogalmal: 
\p —Tegil pe akalzhul ulgin nakwedo. 
\p Tegin Jesús ulgin nakwisgu, pato itogalmal, neg-kwebur-natapidzhe ul-naigumaladgin pato nai. 
\p  
\v 22 Tegin te pangin, tulemal-opakal-mas-kuchamalad wisgusmal sae ul-walkwénna nai, tenal Jesús ulgin kwen nakwiszhul. Tenal Jesús-e-chapinganbi nadmal. Tenal tulemal kwen wichulmal Jesúsde pia nad. 
\p  
\v 23 Tegin ulmal-neg-kwebur-Tiberias-akar-nonimalad Jesús-Pabga-nuedi-chogzhadgin-tulemal-okuchad-omopen naigunonimal.  
\v 24 Tegin tulemal takchagu Jesús taklejul, tegin Jesús-e-chapingan taklejulmo, tulemal-sae-mas-kuchamalad ulmal-nonimaladgin aknakwismal. Tegin tulemal Capernaumzhe Jesús-aminadmalzhun, Jesúsde Capernaumgin mai-dewa o chul-dewa. 
\s1 Jesús purpal chogzhagujad, ede madu-chunchunnad 
\p  
\v 25 Tegin tulemal mata opasmalgu, we neg-kweburgin Jesús-onosmal Jesús mai. Tegin tulemal Jesúszhe ekichialmal: 
\p —Tule-oturdaked, ¿inkwa pe noni-wede, itije? 
\p  
\v 26 Tegin Jesús tule-nonimaladga chogal: 
\p “¿Ibiga pe an-aminanimal-ade? Imi an chunchunnad pemalga chogdo: imi pemal pela-pela immedzhe mas-kuchadbal pe an-amidanimal. Tenal pemal immal-taktijulid-takchadbal pe an-kwen-amidanijulmal ankin ibzhegal. 
\p  
\v 27 “Tenal an pemalga chogdo: pe melle pinche iti-napkined-mas-kunned-onoedgin, pe arpamalo. Tenal pe tule-ilagwen-otuloged-mas-kunned-onoedgin, pe arpamalo. Tenal an-Te-Tule-Chunna pemalga tegiid-mas-kunned uko. Tenal Pab Tummad ankin chogzhado, ede yer an-tak.” 
\p  
\v 28 Tegin tulemal Jesúszhe ekichialmal: 
\p —¿Tegil anmal igi imakenabzhun, Pabga immal imagal? 
\p  
\v 29 Tegin Jesús tulemalga chogal: 
\p —Nabir. Imi pemal Pabga immal imabiel, pe penzhulinabmal Pab Tummad an-palmial. 
\p  
\v 30 Tegin tulemal Jesúszhe ekichialmalbal: 
\p —¿Tegil pe ibi immal-taktijulid pe anmalga imako oyogal, pedin ibi-tule? Tenal anmal immal-taktijulid takalil, anmal kep pegin ibzhenonimalo. ¿Tede pe ibi anmalga imakojun?  
\v 31 Tenal anmal-tadgan neg-nikchulidbal maná-mas kuchamal. Tenal Pab-kartagin nermakal maimodo: 
\q1 Teun ad Pab-neg-akar tadganga mas-kunned ukcha, kunkal. 
\qr Ex. 16:4; Neh. 9:15; Sal. 78:24-25 
\p  
\v 32 Tegin Jesús tulemalga chogalzhun: 
\p —Imi an chunchunnad pemalga chogdo: imi Moisés Pab-neg-akar, pe-tadganga maná-mas kwen ukchajul. Tenal Pab Tummad pe-tadganga maná-mas ukchamal. Tenal imidin an-Pab nikpa-akar pemalga purpal mas-chunchunnad ukmal.  
\v 33 Tenal Pab-akar-mas-tanikid, wedin tule, wedin mas-chunnad-chul. Tenal we tuledin Pab-neg-akar tani. Tegin we tule ilagwen-nadgu-tullegal tule-iti-napkin-pukmalad-imada. 
\p  
\v 34 Tegin tulemal Jesúsga chogalmal: 
\p —Tummad, tegil pe imis-akar anmalga we madu ukodo. 
\p  
\v 35 Tegin Jesús tulemalga chogalbal: 
\p “Imi antin purpal madu-tule-otuloged. Tenal tule anche nonikil anpal-naigugal, ukul pal kwen itogojul. Tenal tule ankin ibzhajal, ukul-ukul pal kwen itogojulbal. 
\p  
\v 36 “Tenal antin pemalga chogzhado: pemal an-takchamal, tenal pemal yabli ankin kwen ibzhaszhulmal.  
\v 37 Tenal tule-Pab-anka-ukchamalad pel-kwapa anche nonimalo anpal-naigumalgal. Tenal antin tulemal-anka-uklesmalad-ilgwen-abingene, an pal-kwen-onogojul. 
\p  
\v 38 “Tenal antin Pab-neg-akar aktenoni, Pab-an-palmialid-itolegedbal immal imagal, an naga itolegedbal immal imagal-chul.  
\v 39 Tenal Pab-an-palmialid peigujii, an nuekwa ega pel-kwapa tule-anka-uklesmalad-tako melle walgwen-pel periengugal. Tegin Pab-Tummad-peigujibal neg-tuku omojal, antin tulemal-anka-uklesmalad-otulobalo. 
\p  
\v 40 “Tenal an-Pab peigujibal, meke-ibi-tule e-Machi-takalil, tegin e-Machigin ibzhajal, we tule ilagwen-nadgu tullego. Tegin neg-tuku omojal, an purkwaled-akar kannan we tule-otulobalo.” 
\p  
\v 41 Tegin Judiomal Jesús-chunmajad itosmalgu ede madu-Pab-neg-akar-tanikidyobid, Judiomal aga emal-emal istar-itogedgin Jesúsgin ulualmalzhun.  
\v 42 Tegin Judiomal chogalmal: 
\p —¿We Jesúsde, José-machijulzhí? ¿Imi e-pab tegin e-nan, anmal mag takmalzhulzhí? ¿Tede anmalga igi chogne: ‘An Pab-neg-akar-aktenoni?’ Chulá. Keg kue. 
\p  
\v 43 Tegin Jesús Judiomalga chogal: 
\p “Pemal melle aga emal-emal ankin istar chunmamalma.  
\v 44 Imi an-Pab-an-palmialid yer-ito tule-kwen-imajulil anche taggal, we tule anche kwen nonikojul. Tenal tule keg walgwen aga tukin anche tag. Tenal tule-anche-nonikid neg-tuku omojal, an kannan we tule-otulogo.  
\v 45 Tenal akpene Pab-kaka-palchoged Pab-kartagin chogzhado: 
\q1 Tenal Pab Tummad e-igalgin pel-kwapa 
\q1 tulemal-oturdako. 
\qr Is. 54:13 
\m Tenal tulemal-pel-kwapa yer Pab-itojal, tegin Pabgin turdajal, we tulemal anche nonimalo anpal-naigugal. 
\p  
\v 46 “Imi tule kwen nikchul Pab-takchad. Tenal tule-Pab-akar-tanikidbi unnila Pab-takcha.  
\v 47 Tenal an chunchunnad pemalga chogdo: imi tule an-kwen-penguszhulil, we tule ilagwen-nadgu pato tula. 
\p  
\v 48 “Tenal antin purpal madu-tule-otuloged.  
\v 49 Tenal pe-tadgan neg-nikchulidbal mas-kunned-maná kuchamal. Tenal pe-tadganga we mas-kunned yabli kwen unniguszhulmal, pe-tadgan yabli purkwismal. 
\p  
\v 50 “Imi an pemalga madu-Pab-neg-akar-aktejadgin chunmanaimodo. Tenal tule we madu kuchal, ilagwen-nadgu tullego, pal kwen purkojul-kuo.  
\v 51 Tenal antin purpal we madu-tule-otuloged. Tegin antin madu-Pab-neg-akar-tanikid. Tenal tule we madu kuchal, ilagwen-nadgu tullego. Tenal we madudin an-chan. Tenal antin pel-kwapa tule-iti-napkin-pukmaladga an-chan uko tullemalgal.” 
\p  
\v 52 Tegin Judiomal aga emal-emal pela-pela imakalmal chogalmal: 
\p —¿Imi we tulede igi anmalga aga e-chan ukne-ade, anmal kunmalgal? Wedin kakanma. 
\p  
\v 53 Tegin Jesús Judiomalga chogalzhun: 
\p “Imi an chunchunnad pemalga chogdo: imi an-Te-Tule-Chunna-e-chan pe kwen kunchulil, tegin pe an-abe kwen kobzhulbalil, pedin tulajul, pedin tule-purkwal. 
\p  
\v 54 “Tenal meke-ibi-tule an-chan kuchal, tegin an-abe kobzhalbalil, we tule ilagwen-nadgu tullego. Tegin neg-tuku omojal, an purkwaled-akar kannan we tule-otulobalo.  
\v 55 ¿Ibiga an teob chog? Imi an-chan mas-kunned-chunchunnad, tegin an-abe kobed-chunchunnadbal.  
\v 56 Tenal meke-ibi-tule an-chan kuchal, tegin an-abe kobzhabalil, we tule ilagwen ankin mai, tegin antin we tulegin ilagwen maimo. 
\p  
\v 57 “Tenal Pab-tulad an-palmial, tegin an Pabbal tula-tibal. Tenal tule an-chogzhadyob an-chan-kuntimogal, we tule ampa anpal tula-timogo.  
\v 58 Tenal antin madu-chunnad Pab-neg-akar-aktenonikid, tule-akpene-mas-kunned-maná kuchadyob-chul. Tenal anmal-tadgan neg-nikchulidbal mas-kunned-maná kuchamal, tenal anmal-tadgan yabli purkwismal. Tenal tule iti-madu kuchal, ilagwen-nadgu tullego. Pitomalgu.” 
\p  
\v 59 Tenal Jesús Capernaumgin, Judio-ormaked-neggin, tulemal-oturdanaidgin weob chunmasdo. 
\s1 Jesús-e-chapingan-ichejul Jesús-midmalad 
\p  
\v 60 Tegin Jesús-e-chapingan-ichejul Jesús-ega-chogzhad itosmalgu, chogalmal: 
\p —Peyedzheá. ¿Toa we igal abingao? Chulá. 
\p  
\v 61 Tenal Jesús wiis-choggu e-chapingan e-nik istar chunmakalmal, al Jesús aga e-chapinganga chogal: 
\p “¿Imi pemal ebinzhemal, an pemalga immal-chogzhad, pemalga ib-nuedzhul? Chulá. Wedin pemalga ib-nueddo. 
\p  
\v 62 “Tenal pe takalil an-Te-Tule-Chunna an-akpene-maigujadzhe kannan nakwenatap, Pab-Tummad-negzhe. ¿Pe igi kujal, pe ebinzhe? Tenal pemalga tegí ib kunonikil, pemal pul-pule istar an-taknoniko. 
\p  
\v 63 “Imi Pab Purpa Nued tule-otuloda. Tenal tule-chan ibga keg pel ku. Tenal an-chunmajad ib-purpaled, wedin tule-otuloged.  
\v 64 Tenal pemal-wal-walgwen yabli an-chunmajadgin kwen ibzhejulmal.” 
\p Tenal Jesús kepe-sagla-akar wiis-choggu toa-tulemal egin kwen ibzhaojulmal tegin toa-tule egin akpinnonibalo,  
\v 65 al Jesús chogalbal: 
\p “Imi an pemalga chogzhundo: tule keg a-itoleged anche tagmal anpal-naigugal. Tenal Pab nabir-ito tule-imajal, we tule kep anche noniko anpal-naigugal.” 
\p  
\v 66 Tenal teun-akar Jesús-e-chapingan-ichejul Jesús-midmal. Tegin tulemal Jesúsbak pal kwen nanaszhulmalbal. 
\p  
\v 67 Al Jesús e-walambe-kakabogwadga chogalzhun: 
\p —¿Imi pemal nebimalmodé, we chapingan-pimaladyobmo? 
\p  
\v 68 Tegin Simón-Pedro Jesúsga chogal: 
\p —Tummad, ¿anmal toaje pal nemalo-ade? Imi pedin, pe chunmakedbal anmal-oturdanai, anmal igi nabir ilagwen-nadgu tullegal.  
\v 69 Tenal anmal pegin ibzhemal. Tegin anmal wismalbal, pedin tule-chwilidikid, tule-iskued-kwen-nikchulid, tule-Pab-Tummad-akar-tanikid. 
\p  
\v 70 Tegin Jesús aga e-chapinganga chogal: 
\p —Teobdo. Antin a-tuledo. ¿Imi antin naga tukin pemal-walambe-kakabogwad-chuszhulzhí? Tenal pemal-walgwen yabli nia. 
\p  
\v 71 Tenal teun Jesús Simón-machi-Judas-Iscariotegin chunmas. Tenal we Judas, walambe-kakabogwadmogando, tenal Judas te-cholbal manibal-Jesúsgin-akpinnonikoed. 
\c 7  
\s1 Jesús-e-urpamal Jesúsgin pengusmalad 
\p  
\v 1 Tegin Jesús-chunmajad-cholbal, Jesús Provincia-Galileagin pipirmadiidbal, Provincia-Judeaje pal kwen nebijul-kual. Imi teun Judeagin Judio-tummagan kuakwa pukwamal Jesús-mesgal. 
\p  
\v 2 Tenal teun Judiomalga Chapi-Aangad-E-Itoged omodani.  
\v 3 Al Jesús-e-urpamal yami Jesúsga chogalmal: 
\p —¿Imi pedin iti-akar need-wilubzhulzhí, Provincia-Judeaje? Tenal pe-chapingan pe-takenabmal, pede igi immal-taktijulid ima.  
\v 4 Tenal meke-ibi-tule aga oyobiel ede toa-tule, otukal immal imaked-wilubzhul. Tenal we tule pel-kwapa-tulemal-wagin immal imakenab. Tenal pe immal-taktijulmalad imakel, pel-kwapa tule-iti-napkin-pukmaladga oyogenabbal. 
\p  
\v 5 Imi teun takalgu, Jesús-e-urpamal Jesúsgin kwen ibzhejulmal Jesúsde Pab-akar tani. 
\p  
\v 6 Al Jesús aga e-urpamalga chogalzhun: 
\p “Tenal ankadin ampa ibe kwen omojul Jerusalénzhe negal. Tenal pemalgadin meke-ibi-ibe, ibe-nued Jerusalénzhe negal.  
\v 7 Tenal tule-iti-napkin-pukmalad istar pemal-kwen-takchulmal. Tenal an-tulemalgin-chogzhadbal we tulemal istar timal, al tulemal-iti-napkin-pukmalad istar an-takmal. 
\p  
\v 8 “Tenal pemal nadmaldo, Jerusalénzhe ibe itogal. Tenal anka ampa wilub kwen omojul. Al an imis Jerusalénzhe kwen nejul ibe itogal.” 
\p  
\v 9 Tenal Jesús pél e-urpamalga chunmasgu, yabli Provincia-Galileagin pes. 
\s1 Jesús ibe-itogedgin Pab-igalgin tulemal-oturdajad 
\p  
\v 10 Tenal Jesús-e-urpamal ibe-itogedzhe naded-cholbal, Jesús kep te-cholbal itogedzhe nadmojun. Tenal Jesús yakiri nad, tulemalga kwen chogzhajul-kus, ede Jerusalénzhe nemo.  
\v 11 Al Judio-tummagan itogedgin Jesús-abintabukgwadgin chogalmal: 
\p —¿Pia nade a-tulede? ¿Ampa owedyé? 
\p  
\v 12 Tegin tulemal-yogasalmalad aga emal-emal arpa-arpa Jesúsgin chunmananimal. Kwen choge: “We Jesúsde, tule-nued.” Tenal kwéntin chogmoga: “Chulá. We Jesúsde, tulemal-yardaged.”  
\v 13 Tenal tulemal-chunmananimalad Judio-tummagan-tobedbal pakal-pud kwen chunmananijulmal, pinche otukal chunmananimal. 
\p  
\v 14 Tegin itoged-naigujad-ibabakegin, Jesús kep Pab-Tummadzhe-koled-negzhe noni. Tegin Jesús Pab-igalbal tulemal-oturdakalzhun.  
\v 15 Tegin Jesús tulemal-oturdanaidgin, Judio-tummagan Jesúsgin weob pakal pesmal, tegin Judio-tummagan chogalmal: 
\p —¿We tulede igi pirkin immal wiis-wede, Pab-igalgin tulemal-oturdagal? We tule tummaganzhe nue kwen turdas-chuli. 
\p  
\v 16 Tegin Jesús Judio-tummaganga chogal: 
\p “Imi an tulemal-oturdanaid, an-akar kwen tanijul. Wedin, Pab-an-palmialid-akar tani.  
\v 17 Tenal meke-ibi-tule Pab-Tummad-chogedbal nanebiel, kep wisgunoniko, an tulemal-oturdaked, Pab-Tummadgad, o an naga tukin onojad. 
\p  
\v 18 “Imi tule aga tukin chunmakel, pinche aga tukin nug otummobi. Tenal antin, an tule-an-palmialid-nug okannoel, an napírra-chunmaked-tule, an kakanzheed-tulejul. 
\p  
\v 19 “¿Imi Moisés pemalga igal-mezhiszhulzhí, pe igi naneenabmal? Tenal pemal yabli Moisés-igal-mamikid-pallí kwen nanaszhulmal. Tenal pemal Moisés-igal-mamikid-pallí kwen nanaszhulmal-choggu, ¿tede pemalde ibiga an-mesbimalzhun?” 
\p  
\v 20 Tenal tule-yogasalmalad Jesúsga chogalmal: 
\p —Nia koeles pe-imas. ¿Al pe weob chunmayé? ¿Toa pe-mesbi-ade? Pe kakanma. 
\p  
\v 21 Tegin Jesús tulemalga chogal: 
\p “Tenal an ulukued-ibegin immal-taktijulid-choggwen imajadgin pe weob pakal pesmal. Tenal pemal chogmal, an noal immal imas.  
\v 22 Tenal Moisés-pemalga-igal-mezhijadbal, pemal ulukued-ibegin ampa machi-abgan-tuku chikmal. (Tenal tule-abgan-tuku-chiked-igal chunchunnad Moisés-akar tanijul, we igal anmal-tadgan-Abraham-akar tani.) 
\p  
\v 23 “Tenal pe melle Moisés-igal-mamikidgin walmagal, pemal chwilidik machi-imagal ulukued-ibegin akalzhul machi-abgan-tuku chikmal. ¿Tede an ulukued-ibegin kwablekwá tule-nudajal, ibiga pe ankin ulualdamalzhun? Tenal pemal ankin urwed-wilubzhulin. 
\p  
\v 24 “Tenal pe melle yogasal chogo: ‘We tule nos.’ Tenal pemal nuekwá-immal-itojadbal, kep pe we tulegin immal chogo.” 
\s1 Tulemal Pab-akpene-chogzhad-palmidagoed-tulegin chunmasgujad 
\p  
\v 25 Tegidgin Jerusalénginmalad-wal-walgwen chogalmal: 
\p “¿We tulede, tummagan tar-mesbi-kunanimaladzhulzhí?  
\v 26 Imi pe takto, we tule, tulemal-ichejul-pukwad-wagin chunmanai, tenal tule-tummagan ib kwen imaszhulmal. ¡Paaa! ¿Igi taklejun? ¿Tegil tule-tummagan pinzhemaldé, we tule chunchunnad Cristo-Pab-akpene-chogzhad-palmidagoed-tule? Antin chog chul. 
\p  
\v 27 “Tenal anmal nued wismaldo, we tule pia-akar tani. Tenal Pab-akpene-chogzhad-palmidagoed-tule tanikil, anmal kwen wisguojul pia taniko.” 
\p  
\v 28 Al Jesús Pabzhe-koled-neggin ampa tulemal-oturdanaidgin, Jesús arpak sapejul kolal chogal: 
\p —Imi pemal an-nued-wismaldo, tegin pemal wismalbal, an piagwad. Tenal an pinche an-itoleged-immal-imagal an kwen nonijul. Tenal Pab-Tummad-an-palmial. Tenal Pab Tummad keg-chulgu ib-chunchunnadgin chunma. Tenal pemal Pab-kwen-wichulmal.  
\v 29 Tenal antin, an wisdo Pabdin toa-tule. Tenal an Pab-akar tani, tegin Pab an-palmialbal. 
\p  
\v 30 Tenal Judio-tummagan Jesús-chogzhad itosgu, Jesús-kabi-kualmal. Tenal tulemal Jesús-kwen-kaszhul-kus, Jesús kaleged-wilub ampa omojulidbal. 
\p  
\v 31 Tenal tulemal-ichejul Jesúsgin ibzhenonimal, tegin tulemal-Jesúsgin-ibzhenonimalad Jesúsgin chogalmal: 
\p —Imi we tule Pab-akpene-chogzhad-palmidagoed-chunchunnadil, pel-kwapa immal-taktijulid imaked-wilub. Tenal Jesús pel-kwapa immal-taktijulmalad imanai-choggu, al anmal mag taknonimaldo, we tule chunchunnad Cristo-Pab-akpene-chogzhad-palmidagoed-tule. 
\s1 Pariseomal Jesús-kabi-kualmalad 
\p  
\v 32 Tegin Pariseomal takchagu tulemal arpa-arpa Jesúsgin chunmananimal: “We Jesús, Cristo-Pab-akpene-chogzhad-palmidagoed-tule,” Pariseomal tegin tule-irwal-Pabzhe-kolmalad-e-tummagan chowal-ibgan-palmismal Jesús-kagal. 
\p  
\v 33 Tegin Jesús chogalzhun: 
\p —Imi antin pemalbak iché-iché napi wis kudii. Tenal an kujal kannan nebal, tule-an-palmialidzhe.  
\v 34 Tenal pemal an-amialmalal, an-kwen-onogojulmal. Tenal an-megoedgin, pemal kwen togojul-kuo. 
\p  
\v 35 Tegin Judio-tummagan aga emal-emal ekichialmal: 
\p —¿Tegil we tulede, pia néjun, anmal tar-kwen-onogojuliddé? ¿Tegil anmal-Israel-tule-Griegomal-abalgin-pukwamaladzhe nedé? ¿Tegil Pab-igalgin Griegomal-oturdanedé?  
\v 36 ¿Imi we tule-chunmajadde, ibi chogzhun? We tule chogzhado: ‘Imi pemal an-amialmalal, an-kwen-onogojul-kuo.’ Teginbal: ‘Pia an megódin, pemal kwen togojul-kuo.’ Tenal anmal kwen wichulmal we tule pia ne. 
\s1 Jesús purpal tule-otuloged. 
\p  
\v 37 Imi ibe-itoged-pul-chunchoged imis-pelguedgin, Jesús kwisgudgu, sapejul kote chogal: 
\p “Imi meke-ibi-tule aga ulubgin ampa Pab-napi-itogel, anche tagmalo, an ulubgin yer ne-imako, tule ukul-ukul itogedgin, ti-kobzhadbal yer itononikoedyob. 
\p  
\v 38 “Tegin meke-ibi-tule ankin ibzhenonikil, Pab-kartagin-chogzhadyob aga ulubgin pela-pela Pab-Purpa-Nued-nikadbal, ilagwen-nadgu tullego, ti-kammubal ti pela-pela ariomaidyob.” 
\p  
\v 39 Tenal Jesús weob chunmajadgin Pab Purpa Nuedgin chunmas. Tenal teun Jesús ampa Pab-Machiyob nug otummolejul-choggu, al tule-pel-kwapa-Jesúsgin-ibzhenonimaladga Pab Purpa Nued ampa kwen ukleszhul. Tenal tulemalga kep kujal Pab Purpa Nued uklenoniko. 
\s1 Tulemal Jesús-ulgin aga emal-emal iskudmalad 
\p  
\v 40 Tenal tulemal-wal-walgwen Jesús-chunmajad itosgu, chogalmal: 
\p —We tule chunchunnad Pab-kaka-palchoged-chunchogeddo. 
\p  
\v 41 Tenal tule-pimalad chogmo: 
\p —We tule, Cristo-Pab-akpene-chogzhad-palmidagoed. 
\p Tenal tule-kwénna-kwénna chogmalmo: 
\p —¿Ade-Cristode tule-Galileagined tanikojí?  
\v 42 ¿Tenal Pab-kartagin chogzhajulzhí, Cristode David-e-wagwa, tegin neg-kwebur-akpene-David-megwijadgin mimmilenoniko, Beléngin? Al we tule Cristojuldo. 
\p  
\v 43 Al tulemal Jesús-ulgin aga emal-emal iskudmal.  
\v 44 Tegin tule-wal-walgwen Jesús-kabi-kualmal. Tenal tulemal Jesús-kwen-kaszhul-kusmal. 
\s1 Judio-tummagan Jesúsgin kwen ibzhaszhulmalad, Jesúsde Cristo 
\p  
\v 45 Tegin chowal-ibgan kannan tule-irwal-Pabzhe-kolmalad-e-tummaganzhe tegin Pariseomalzhe nonimalbal. Tegin tule-tummagan chowal-ibganzhe ekichial: 
\p —¿Ibiga pe Jesús-cheinonijulmaldé? 
\p  
\v 46 Tegin chowal-ibgan tule-tummaganga chogalmal: 
\p —We tuleyob, tule kwen nikchul, yer chunmaked. Al anmal we tule-cheinonijulmal. 
\p  
\v 47 Tegin tule-tummagan chowal-ibganga chogal: 
\p —¿We tule pe-pinzheed kasmoyé? Tenal pemal pinzheed-kaleged-wilubzhul.  
\v 48 ¿Imi anmal-tummagan-tegin-Pariseomal we tulegin ibzhasmalmoyé? Chulá. We tule anmal-pinzheed-kwen-kaszhul-kus.  
\v 49 Tenal tulemal-Jesúsbal-naigusmalad Moisés-igal-mamikid kwen wichulmal. Al Pab sapejul we tulemal-oturdanoniko. 
\p  
\v 50 Tegin Pariseo-akpene-Jesúszhe-mutik-arpigujad-Nicodemo, e-pakamaladga chogal: 
\p  
\v 51 —¿Imi anmalga igal maichulzhí, kepegin tulega igal-itogenabgwel, we tule igi chog-dewa? Tegin pe we tulega pél igal-itojad-cholbal kep pe chogo, we tule immal akalos o chul-dewa. 
\p  
\v 52 Tegin tule-tummagan-pimalad Nicodemoga chogalmal: 
\p —¿Tegil pe Galilea-tolmodé? ¿Al pe weob chunmanaimoyé? Tenal pe pél amienab, Pab-kartagin igi chog. Tenal pe Pab-kartagin pél apchojal, kep pe wisgunonikodo, Pab-kaka-palchoged Provincia-Galileagin kwen nonikojul. 
\s1 Ome machered-pidbak-yosgu-kudiidbal tule-tummagan ome-tuktinonimalad 
\p  
\v 53 (Tegin tule-tummagan Nicodemoga pél chunmasgu, aga negzhe pél nadmalzhun. 
\c 8  
\p  
\v 1 Tegin Jesús Olivo-yalzhe nad.  
\v 2 Tegin te pangin neg-oiposgu, Jesús kannan Pabzhe-koled-negzhe nonibal. Tegin tulemal-ichejul Jesúszhe irmanonimal. Tegin Jesús chigwiszhun Pab-igalbal tulemal-oturdagal. 
\p  
\v 3 Tegin Jesús tulemal-oturdajiidgin, Moisés-igalgin-tulemal-oturdamalad tegin Pariseomal Jesúszhe ome-cheinonimal. Imi we ome machered-pidbak yosgu-kunai-taklejadbal tulemal we ome-kasmal. Tegin Pariseomal neg-abalgin ome-okwisnonimal.  
\v 4 Tegin Pariseomal Jesúsga chogalmal: 
\p —Tule-oturdaked, imi anmal we ome-kasmaldo, machered-pidbak yosgu-kunai.  
\v 5 Tenal Moisés anmalga igal-mezhisdo, ome-machered-pidbak-yosgu-kunai-taklejal, akwagin sagyeal tar-mejo. ¿Imi pedin, pe igi chogmójun, we ome-mesgal ib-nued o chul? 
\p Tenal Jesús ilgwen yakir pes. 
\p  
\v 6 Tenal Pariseomaldin yami Jesús-wilub-taknonimal, Jesús igi ega chogdago-dewa. Tenal Jesús istar chogzhal, we tummagan igal-nika Jesús-kagal. 
\p Tegin Pariseomal Jesúsga omegin chunmasgu, Jesús ilgwen tullu-chigwis. Tegin Jesús kogin nap-nermakalzhun.  
\v 7 Tenal Pariseomal kannan-kannan Jesúszhe ekisnaigualmal, Jesúsde igi ome-imako. Tegin Jesús kannan inniki chignonibalgu, Pariseomalga chogal: 
\p —Imi tule-iskued-nikchulid-inzhel we omegin akwa meto. 
\p  
\v 8 Tegin Jesús kannan tullu-chigwisbalgu, kannan kogin nap-nermakalbal. 
\p  
\v 9 Tegin tulemal Jesús-chogzhad itosmalgu, tulemal-ome-tuktinanimalad-wal-walgwen aknimai-kual. Kepegin chelegan-inzhel nadmal, tegin te-cholbal machimal-chapingana aknidmalmojun. Tenal Jesús omebak apinni pes. 
\p  
\v 10 Tegin Jesús tullu-chiid kannan inniki chigwisgu, omeje ekichialzhun: 
\p —Ome, ¿pia naddé, tulemal-pe-tuktinanimaladdé? ¿Pegin kwen chogzhajul-kus, pe sapejul oturdaleged-wilub? 
\p  
\v 11 Tegin ome Jesúsga chogal: 
\p —Chulá, Tummad. 
\p Tegin Jesús omega chogalzhun: 
\p —An-pela, an pegin kwen chogojul-kuo, pe sapejul oturdalegenab. Imisgin pe akalzhul pe nejunno. Tenal pe melle iskuedgin pal nanao.) 
\s1 Jesús igal-napírragwad otalononikid 
\p  
\v 12 Tegin Jesús tulemalga chogalbal: 
\p —Imi antin tule-iti-napkin-pukmaladga kallen neg-otalonaidyob igal-chunchunnad otalononi, tule igi naneenabmal. Tenal tule anpak kudiil, wisgunoniko tule igi tullenoniko, tule neg-taledgin pel-kwapa mag immal taknonikidyob. Tenal tule neg-chichidgin kudiidyob, we tule immal-kwen-wichulidgin pal kwen nanaojul-kuo. 
\p  
\v 13 Tegin Pariseomal Jesúsga chogalmalzhun: 
\p —Imi pe aga tukin pe chunmajima. Al pe-chogzhad ibga keg pel ku. 
\p  
\v 14 Tegin Jesús Pariseomalga chogal: 
\p “Chulá. Imi an naga tukin chunmajiilen, wedin ampa anka iwen-kwen-akalzhulin. ¿Ibiga an teob chog? Imi antin, an wisdo, an pia-akar tani. Tegin an wisbaldo, an piaje nebal. Tenal pemal an-kwen-wichulmal, an pia-akar tani. Tegin pemal an-kwen-wichulmalbal, an piaje nebal.  
\v 15 Tenal pemal pinche askin tuleyob pinzhemal. Tenal pe tulegin chogmal: ‘We tule, tule-nued.’ Tegin pemal chogmalbal: ‘We tule, tule-iskana.’ Tenal antin tulegin kwen chogzhul wedin tule-nued o tule-iskana. 
\p  
\v 16 “Tenal an tulemalgin chogbielen, tule-nued o tule-iskana, wedin anka iwen-kwen-akalzhulin. Tenal antin walgwen immal kwen chogzhul. Tenal Pab-an-palmialid an-chogedyob ampa chogmo-choggu, al an-immal-chogzhad wedin ib-chunchunnaddo. 
\p  
\v 17 “Tenal pemal-igal-mamikid chogdo, tule-walbogid immal takchal, tenal yopí chogzhamalal, wedin ib-napírra.  
\v 18 Tenal antin naga tukin chunmajii, tegin Pab-an-palmialid ampa an-yopí chunmajimo. Al an-chogzhaddin, ib-chunchunnaddo.” 
\p  
\v 19 Tegin Pariseomal Jesúsga chogalmalzhun: 
\p —¿Teobí? ¿Imi pia pe-pabdéjun? 
\p Tegin Jesús Pariseomalga chogal: 
\p —An-pela, pe aku an-takmal, an igi pinzhe. ¿An-Pab pulzhun, pe igi wisguo? Imi pe an-nued-wisguelen, pe an-Pab-wisgumalmogan. Pitogua. 
\p  
\v 20 Tenal teun Jesús Pabzhe-koled-neggin tule-mani-ukmalad-neg-yabal tulemal-oturdadi-kus. Tenal Jesús ampa e-kaleged-wilub omojul-choggu, al tulemal Jesús-kwen-kaszhul-kusmal. 
\s1 Jesús chogzhagujad, Judio-tummagan e-kwen-wichulid 
\p  
\v 21 Tegin Jesús Judio-tummaganga kannan chogalbal: 
\p —Imi antin, an ne, tenal pemal an-amialmalal, an-kwen-onogojul-kuo. Tenal pemal aka aga iskuedgin purkwemalo. Tenal an-naoedzhe, pe kwen togojul-kumalo. 
\p  
\v 22 Al Judio-tummagan aga emal-emal ekichialmal: 
\p —¿Tegil we tulede, aga tukin mesnedé? ¿Imi anmal naga tukin mesnejulmal-choggu, al we tule chogyé anmal e-naoedzhe kwen togojul-kuo? 
\p  
\v 23 Tegin Jesús Judio-tummaganga chogalbal: 
\p —Tenal pemal iti-napkinmalad, tenal antin nikpa-neggined. Tenal pemal nikpa-negginmalad-chul, tenal antin iti-napkined-chulmo.  
\v 24 Al an pemalga chogzhado: ‘Pemal iskued-nikadgin ampa purkwenemal.’ ¿Ibiga an teob chog? Imi an pemalga chogzhiidgin pe ibzhejulil an toa-tule, pemal aka aga iskuedgin purkwenemal. 
\p  
\v 25 Tegin Judio-tummagan Jesúsga chogalmal: 
\p —¿Tegil pe toa-tulejun? 
\p Tegin Jesús tule-tummaganga chogalzhun: 
\p —Imi an kepe-sagla-akar an pemalga chognonido, an a-tule.  
\v 26 Tenal pemal-noal-tiidbal, an pemalgin ichejul immal-choged nika. Tenal tule-an-palmialid napírra immal chog. Tenal tule-an-palmialidbal an turdajadbal, an tule-iti-napkin-pukmaladga chunmanoni. 
\p  
\v 27 Tenal Judio-tummagan aku itosmal, Jesúsde e-Pabgin chunmadii.  
\v 28 Tegin Jesús tule-tummaganga chogalzhun: 
\p —Imi pemal nikpa an-Te-Tule-Chunna-onakwijal, kep pe wisgunonimalo, ante toa-tule. Tenal an naga-itoleged, walgwen immal kwen imajul. Tenal an Pabbal-immal-turdajadbal, an chunmadii.  
\v 29 Tenal tule-an-palmialid anpak mes kudii. Tenal an-Pab-peiedbal an Pabga keg-chulgu immal ima-choggu, al an-Pab walgwen an-kwen-ebejul. 
\p  
\v 30 Tenal Jesús ampa chunmanaidgin, tulemal-ichejul Jesúsgin ibzhenonimal. 
\s1 Judio-tummagan Jesúsgin-ibzhejulidbal mag taklenonimal niazhikmalad 
\p  
\v 31 Tegin Jesús Judio-egin-ibzhenonimaladga chogalzhun: 
\p —Imi pemal pane-pane an-chogzhad-pallí kudimalal, pemal anpal-turdamalad-chunchunnadga kunonimalo.  
\v 32 Tegin pemal igal-chunchunnad wisgunonimalbalo. Tegin pemal mag itononimalbalo, pe iskuedgin ololgusmal. 
\p  
\v 33 Tegin Judiomal Jesúsga chogalmal: 
\p —Anmal, Abraham-e-wagwagan. Tenal anmal tule-pimaladzhe kwen kalesgudijulmal tule-anmal-kasmalad-peiedyob immal imagal. Tenal pedin chogdo, anmal kalejad-akar kep nonemal. Pe kakanma. 
\p  
\v 34 Tegin Jesús Judiomalga chogal: 
\p —Tenal antin chunchunnad pemalga chogdo: imi tule iskuedgin kudiil, wedin chogledo, we tule iskuedgin kalesgudii. Tenal tule pane-pane iskuedginbi kudii-choggu, al we tule keg iskuedgin no.  
\v 35 Imi tule-pinche-arpaged igal-kwen-nikchul, tule-neg-ibed-e-kwenadga kugal. Tenal tule-neg-ibed-e-machi igal-nika, ilagwen-nadgu neg-ibed-e-kwenadga kugal.  
\v 36 Imi Pab-Machi iskuedgin pe-ololchenonikil, pe chunchunnad ololgunoniko.  
\v 37 Tenal an wisdo, pemal Abraham-e-wagwagan, tenal pemal an-chogzhad kwen abingejulidbal, pemal yabli an-mesbimal.  
\v 38 Tenal an Pab-waglik-immal-takchadbal, an chunmadido. Tenal pemal, pe-pab-itojadbal immal imamal. 
\p  
\v 39 Tegin Judiomal Jesúsga chogalmal: 
\p —Imi an-tad, Abraham. ¿Tede an igi akaldé? 
\p Tegin Jesús Judiomalga chogal: 
\p —Imi pemal Abraham-e-wagwa-chunchunnadilen, pemal Abraham-immal-imajad-pallí, pe immal imadimogan.  
\v 40 Imidin pemal Abrahamyob immal kwen imaszhulmal. Tenal an Pab-Tummadgin-turdajadbal an pemalga chunchunnad chogzhado. Imi antin tule-nued, tenal pemal yabli igal-aminanimal an-mesgal. Tenal Abraham pemalyob kwen pinzhaszhul-kus.  
\v 41 Tenal pemal, pe-pab-Satanás istar immal imaked-yopí, pemal tamalmo. 
\p Tegin Judiomal Jesúsga chogalmal: 
\p —Tenal anmal neg-chichidgined-tulejulmal; anmal-pab-chunchunnad, Pab Tummad. Tenal pe melle anmalgin chogdago, nia-Satanás anmal-pab. 
\p  
\v 42 Tegin Jesús Judiomalga chogal: 
\p “Imi Pab Tummad pemal-pab-chunchunnadilen, pemal pela-pela an-pilalmalan. Imi antin Pab-akar noni, iti-napche. Al an wegin mai. Tenal an naga-itolegedbal kwen nonijul, tenal Pab Tummad an-palminoni.  
\v 43 ¿Imi an-pemalga-chunmajad, ibiga pe mag itojulmal pe ebinzhe? Imi pemal Pab-Tummad-nuskan chul-choggu, al pe aku-itomaldo an-chunmajad. 
\p  
\v 44 “Tenal nia-sagla pe-pab-choggu, al pe niazhikidmalmo. Tenal nia-sagla igi peídin, pemal teob nanemalmo. Tenal nia-sagla kepe-sagla-akar tule-mes. Tegin nia-sagla keg inniki chunmabal, keg-chulgu kakanzhaal chunmada. Tenal nia-sagla tule-kakanzheed-e-sagla-choggu, al nia-sagla chunmakalil, kusgu e-taedbal kakanzhealda, keg inniki chunmada. 
\p  
\v 45 “Tenal antin, pemalga inniki chunma-choggu, al pe ankin kwen ibzhejulmal.  
\v 46 ¿Imi pemal-walgwen, toa ankin chogo, an immal akalos? Chulá. ¿Imi an chunchunnad chunmanaidbal, tede ibiga pe keg anpal ibzhemalzhun? Tenal pemal ankin ibzheed-wilubmalan. 
\p  
\v 47 “Tenal tule-Pab-Tummadzhikiddin, Pab-Tummad-chunmaked mag ito. Tenal pemal Pab-Tummadzhikidzhulmalad-choggu, al pemal Pab-Tummad-chunmaked mag kwen itojulmal.” 
\s1 Jesús chogzhagujad ede Pab-Machi 
\p  
\v 48 Tegin Judiomal Jesúsga chogalmal: 
\p —Imi pe anmalgin chogzha-choggu anmal niazhikmalad, al anmal nabir pegin chogzhado, pedin tule-iskana, anmal-Samaritano-tule-takedyob. Tegin anmal nabir pegin chogzhabal pedin nia-nika. 
\p  
\v 49 Tenal Jesús Judiomalga chogalzhun: 
\p —Chulá. Antin, an nia-kwen-nikchul. Tenal antin, an-Pab-nug otummonai. Tenal pemal an-nug izhonanimal.  
\v 50 Tenal antin naga tukin nug-onudanaichul. Tenal tule-pid an-nug-onudanai, tenal we tule nabir chogo, an tule-nued o chul.  
\v 51 Tenal an chunchunnad pemalga chogdo: imi meke-ibi-tule an-chogzhad-pallí tael, we tule purkwed kwen itogojul-kuo. 
\p  
\v 52 Tegin Judio-tummagan Jesúsga chogalmal: 
\p —Imi pe-immal-chogzhadbal anmal nued wismaldo, pedin nia-nika. Imi anmal-tad-Abraham purkwis, tegin Pab-kaka-palchogmalad purkwismalmo. Tenal pedin chog: ‘Tule an-chogzhad-pallí tael, purkwed kwen itogojul-kuo.’  
\v 53 ¿Tede igijun? ¿Imi pede anmal-tad-Abrahamga pul pe tule-tummadzhí? Imi anmal-tad-Abraham purkwis, tegin Pab-kaka-palchogmalad purkwismalmo. ¿Tegil pe toa-tulejun? 
\p  
\v 54 Tegin Jesús Judio-tummaganga chogalbal: 
\p “Imi antin, an naga tukin okannoelen, wedin anka ibga keg pel kuoen. Tenal an-Pab an-nug-okanno. Tenal pemal chogmal, an-Pab pemal-Pab-Tummadga mai. 
\p  
\v 55 “Tenal pemal aku Pab-Tummad-takmal. Tenal antin, an naga mag Pab-tak. Imi an chogzhalen an Pab-kwen-wichul, an pemalyob kakanzhenaimogan. Tenal antin, an Pab-Tummad-wisdo. Tegin an Pab-chogzhad-pallí nanegwisbal.  
\v 56 Teun pe-tad-Abraham weligwal an-itosdo, an tanikoedgin. Tegin Abraham an-tanikoed-takchadbal, aga ulubgin weligwal-itononibal.” 
\p  
\v 57 Tegin Judio-tummagan Jesúsga chogalmalzhun: 
\p —Imi pe pirka-tulabo-kakaambe pel nikchuli, ¿tede pede Abraham-takchadé? Chulá. 
\p  
\v 58 Tegin Jesús Judio-tummaganga chogal: 
\p —Imi an chunchunnad pemalga chogdo: Abraham ampayo mimmilegeddu, antin pato tetuel kudii. 
\p  
\v 59 Tegin Judio-tummagan Jesús-chogzhad itosmalgu, akwa chualmal, akwagin Jesús-mesgal. Tenal Jesús Pabzhe-koled-neggin aga tukin otukcha. Tegin Jesús te-cholbal Pabzhe-koled-neg-akar nodzhun. 
\c 9  
\s1 Jesús tule-kusgu-aku-ataged-nudajad 
\p  
\v 1 Tegin Jesús natapidgin tule-walgwen-takcha, kusgu mimmilejad-akar aku-ata.  
\v 2 Tegidgin e-chapingan Jesúszhe ekichialmal: 
\p —Tule-oturdaked, ¿we tulede, toa-iskuedbal mimmilejad-akar aku-ata-wede? ¿E-pabganbal o aga tukin? 
\p  
\v 3 Tegin Jesús aga e-chapinganga chogal: 
\p “Chulá. We tule e-iskuedgin aku-kwen-atajul, tegin e-pabgan-iskuedgin pel chulbal. ¿Ibiga we tulega weob kus? Nabir. Imi Pab-Tummad-immal-taktijulid-imaked, we tulebal mag taklenonigal. 
\p  
\v 4 “¿Ibiga pe wisgubimal-ade, we tule igi kus? Imi tule ampa neg-taledgin e-tummadga arpagenab. Tenal neg-mutikid tanikil, tule mag pal kwen takojul-kuo e-tummadga arpagal. Al an ampayo purkweddu, tegin ampa an igal-nikadgin, anmal Pab-Tummad-an-palmialidga arpagenabmal.  
\v 5 Tenal an iti-napkin ampa kudiidgin, an tule-iti-napkin-pukmaladga igal-chunchunnad oyonai, tadgwa neg-otalonaidyob.” 
\p  
\v 6 Tegin Jesús e-chogzhad-cholbal napkin kwi-akcha, tegin nap-kwibied wes. Tegin Jesús olma-olma nap imas. Tegin Jesús kep tule-aku-ataged-imiagin yan-yan-yan olli imas.  
\v 7 Tegin Jesús tule-aku-atagedga chogal: 
\p —Imisgin pe naddo, Siloé-ti-tummad-wilagwal-chiidzhe, imia enukkal. 
\p (Imi Siloé choglege: Palmilegalid.) 
\p Tegin tule-aku-ataged nadzhun Siloé-ti-chiidzhe imia enukkal. Tegin tule aga imia enusgu, kannan akpirisgu, imia mag atanonijun. 
\p  
\v 8 Tegin tule-e-neg-tikalbal-mamimalad tegin tule-mani-ekichi-tar-taktimalad aga emal-emal ekichialmal: 
\p —¿We tulede anmal taktijulzhí, mani ekichii? 
\p  
\v 9 Tegin tule-wal-walgwen chogalmal: 
\p —A-tuledo. 
\p Tegin tule-pimalad chogmalmo: 
\p —Chulá. We-tule ajuli, pinche ayob-taklege. 
\p Tegin tule-nabir-atanonikid aga tukin chogal: 
\p —Antin, an mani-ekichii-taed-tuledo. 
\p  
\v 10 Tegin tulemal, tule-nabir-atanonikidga chogalmalzhun: 
\p —¿Pe igi nabir atanoni-adé? 
\p  
\v 11 Tegin tule-nabir-atanonikid tulemalga chogal: 
\p —Imi tule-Jesús-nugad napkin kwi-akchagu, olma-olma nap-imas, tegin an-imiagin yan-yan-yan olli-imas. Tegin Jesús anka chogzhado: ‘Pe nad, Siloé-ti-chiidzhe imia enukne.’ Tegin an nadzhun imia enukkal. Tegin an imia enusgu, an nabir atanonijun. 
\p  
\v 12 Tegin tulemal, tule-nabir-atanonikidzhe ekichialmal: 
\p —¿Imide tule-pe-nudajadde pia naddé? 
\p Tegin tule-nabir-atanonikid tulemalga chogal: 
\p —An wichí pia nad. 
\s1 Pariseomal tule-nabir-atanonikidzhe ekichismalad: “¿Pe igi nugus?” 
\p  
\v 13 Tegin tulemal Pariseomalzhe tule-nabir-atanonikid-chesmal oyogal.  
\v 14 Imi teun takalgu, Jesús ulukued-ibegin tule-aku-atagedga imiagin yan-yan-yan olli imas, tegin we tulega nabir imia atanonijun.  
\v 15 Tegin Pariseomal tule-nabir-atanonikidzhe ekichialmalzhun: 
\p —¿Pe igi nabir atanoni-adé? 
\p Tegin tule-nabir-atanonikid Pariseomalga palchogalzhun: 
\p —Imi tule an-imiagin yan-yan-yan olli imasgu, an tigin imia enus. Tegin an-imia nabir atanonijun. 
\p  
\v 16 Tegin Pariseomal-wal-walgwen chogalmal: 
\p —Imi tule-pe-nudajad, Pab-Tummad-akar kwen tanijul. ¿Ibiga an teob chog? Imi we tule ulukued-ibe-igalgin kwen ataszhul. 
\p Tenal Pariseomal-pimalad chogalmal: 
\p —Chulá. ¿Imi tule-iskued-nikad igi kuneé, weob immal-taktijulid imagal? Keg kue. 
\p Imi teun Pariseomal aga yopí kwen chogzhajulmal. 
\p  
\v 17 Tegin Pariseomal kannan tule-nabir-atanonikidzhe ekichialmalbal: 
\p —¿Imi tule-pe-imia-nudajadgin, pe igi chogmójun? 
\p Tegin tule-imia-nugujad Pariseomalga chogal: 
\p —Imi tule-an-imia-nudajad, Pab-kaka-palchoged. 
\p  
\v 18 Tenal Pariseomal we tulegin kwen ibzhaszhulmal, we tule akpene aku-atage-nad, tenal imisdin mag atanoni. Al Pariseomal tule-nabir-atanonikid-e-pabganzhe kochamal. Tegin e-pabgan nonimalgu, Pariseomal e-pabganzhe ekichialmal chogalmal: 
\p  
\v 19 —¿Imi we, pe-machiyé? 
\p Tegin machi-e-pab tule-tummaganga chogal: 
\p Eye, an-machido. 
\p Tegin Pariseomal ekichialmalbal: 
\p —Imi tulemal chogmal, pe-machide kusgu aku-ata mimmiles. ¿Nabir chogmal o chul? ¿Tede ibiga pe-machide nabir imia atanonijun? 
\p  
\v 20 Tegin machi-e-pabgan Pariseomalga chogalmalzhun: 
\p —Imi anmal wismaldo, wedin an-machi, tenal an-machi kusgu aku-ata mimmiles.  
\v 21 Tenal anmal wichul, igi nabir imia-atanoni. Tenal an wichulbal, toa-tule an-machiga imia nudas. Tenal an-machi pato chered-choggu, al pe machije ekisdo. Tenal an-machi aga tukin pega chogo, toa e-nudas. 
\p  
\v 22 Imi teun Judio-tummagan pato igal-mezhismal, meke-ibi-tule Jesúsgin chogzhal, Jesús, Cristo-Pab-akpene-chogzhad-palmidagoed-tule, we tuledin Judio-ormaked-negzhe-naneed-akar kantikidgin tar-onomalo.  
\v 23 Al tule-nabir-atanonikid-e-pabgan Judio-tummagan-tobgualmal. Al machi-e-pabgan chogzhamaldo: “An-machi chered-choggu, al an-machije pe immal ekismaldo.” 
\p  
\v 24 Tegin Pariseomal kannan tule-nabir-atanonikidzhe kochamalbal. Tegin Pariseomal tule-imia-atanonikidga chogalmal: 
\p —Imi pe Pab-wagin chunchunnad anmalga nuekwá chogenab, pe igi nugus. Tenal anmal nued wismaldo, we tule-pe-nudajad, tule-iskana. ¿Tenal pedin, pe igi chogmojun, we tule, tule-nued o tule-iskana? 
\p  
\v 25 Tegin tule-nabir-atanonikid Pariseomalga chogalzhun: 
\p —An wichí ibi-tule, tule-nued o tule-iskana. Tenal an wisdo, an aku atagen, tenal imidin an nabir atanoni. 
\p  
\v 26 Tegin Pariseomal tule-nabir-atanonikidzhe ekichialmalbal: 
\p —¿Imi tule-pe-nudajad, igi pe-imas? ¿Tegin we tule igi nabir atagal pe-imasbal? 
\p  
\v 27 Tegin tule-nabir-atanonikid Pariseomalga chogal: 
\p —Imi an pemalga pato pellallé chogzha. ¿Pe an-itoszhulzhí, an chunmajaddé? ¿Tede ibiga pe kannan anche ekisdanibal-adé? ¿Tegil pemal e-chapinganga togbimalmodé? ¿Al pe weob chogmoyé? 
\p  
\v 28 Tegin Pariseomal tule-nabir-atanonikidzhe ulualmal. Tegin Pariseomal tule-imia-atanonikidgin istar todoalmal chogalmal: 
\p —Imi pedin we tulebak naigus. Tenal anmaldin, anmal Moisés-igalbal-turdamalad.  
\v 29 Tenal anmal wismaldo, Pab Tummad Moisésga chunmas. Tenal anmal we tule-kwen-wichulmal pia-akar tani. 
\p  
\v 30 Tegin tule-nabir-atanonikid Pariseomalga chogal: 
\p “¿Teobí? ¿Igi taklebalzhun? Pemal wichulmalde, we tulede pia-akar tani. Tenal we tule yabli an-imia nudas.  
\v 31 Tenal anmal nued wismaldo, Pab Tummad tule-iskana-kwen-itojul, eje koled. Tenal Pab tule-egin-atamalad tegin tule-e-chogzhad-pallí-tamalad ito, eje koled. 
\p  
\v 32 “Tenal anmal kwen itodijulmal, tule-mimmilejad-akar-imia-aku-ataged nugus.  
\v 33 ¿Imi we tule Pab-Tummad-akar tanijulilen, chun weob immal imakoen? Keg kue.” 
\p  
\v 34 Tegin Pariseomal tule-nabir-atanonikidga chogal: 
\p —Tenal pedin iskuedgin mimmiles. ¿Tede pede igi Pab-igalgin anmal-oturdaneé? Keg kue. 
\p Tegin Pariseomal Judio-ormaked-negzhe-naneed-akar kantikidgin tule-nabir-atanonikid-onodmalzhun. 
\s1 Jesús tule-purpal-aku-immal-takmaladgin chunmajad 
\p  
\v 35 Tegin Jesús wisgus Pariseomal kantikidgin Judio-ormaked-negzhe-naneed-akar tule-nabir-atanonikid-onodmal. Tegin Jesús te-cholbal tule-nabir-atanonikid-abingusgu, tule-imia-atanonikidga chogal: 
\p —¿Imi pe Te-Tule-Chunnagin ibzhe o chul? 
\p  
\v 36 Tegin tule-nabir-atanonikid Jesúsga chogal: 
\p —¿Imi Te-Tule-Chunnade toajun? Tummad, imi an pei, pe anka chog, an we tulegin ibzhegal. 
\p  
\v 37 Tegin Jesús tule-nabir-atanonikidga chogal: 
\p —Imi pedin akpene we tule-takcha, tegin pe imis we tulebak chunmajibal. 
\p  
\v 38 Tegin tule-nabir-atanonikid Jesúsga chogal: 
\p —Tummad, an pegin ibzhedo. 
\p Tegin tule Jesús-abir chimtisgu, Pab Tummadyob Jesús-otummoal. 
\p  
\v 39 Tegin Jesús tule-nabir-atanonikidga chogalbal: 
\p —Imi antin iti-napche noni, pidzhi-pidzhi tulemal-urpegal, tulemal-purpal-aku-immal-takmalad, mag purpal immal taknonigal. Tegin tulemal-purpal-mag-immal-takmalad, purpal aku immal taknonigalbal. 
\p  
\v 40 Tegin Pariseomal-Jesúsbak-pukmalad Jesús-chogzhad itosgu, Jesúsga chogalmal: 
\p —¿Imi pede ebinzhe anmalde purpal aku immal takmalmo? Pe immal-kwen-wichulidyob anmal-takmalma. 
\p  
\v 41 Tegin Jesús Pariseomalga chogal: 
\p —Imi pemal chogmalalen: ‘An purpal aku immal tak,’ pemal iskued kwen nikchulmalan. Tenal pemal aga tukin chogmal: ‘Anmal purpal mag immal takmal,’ al pemal ampa iskued nika-nemal. 
\c 10  
\s1 Jesús tule-oveja-taked-chunchunnadgin chunmajad 
\p  
\v 1 Tegin Jesús chogalbal: “Imi an chunchunnad pemalga purpal chogdo: imi tule oveja-kalu-emakal-chiid wanagakpal togzhulil, tegin tule oveja-kalu-emakal-chiid-yankalbal togzhal, wedin tule-iskana, tule-oveja-aturzhedanimalad.  
\v 2 Tenal tule oveja-kalu-emakal-chiid wanagakpal togdanikil, we tuledin oveja-e-taked-chunchunnad. 
\p  
\v 3 “Tenal tule-wanagakkin-chiid tule-oveja-taked-chunchunnadga wanagak egao toggal. Tegin ovejamal tule-e-taked-chunnad-kakapurwa mag itomal. Tegin tule-oveja-taked ovejamal-nug-ilbal ovejamalzhe kottago, magadbal onigal. 
\p  
\v 4 “Tegin tule-oveja-taked pél ovejamal-onijal, kep ovejamal-iktudo. Tegin ovejamal tule-e-taked-kakapurwa-mag-itogedbal cholbal pél irmadmalo.  
\v 5 Tenal ovejamal tule-pid-kakapurwa aku itomal-choggu, al ovejamal keg tule-pid-cholbal nanemal. Tenal tule-pid ovejamalzhe kolalil, ovejamal akne-akne e-itoleged irmadmalo. Pitomalgu.” 
\p  
\v 6 Imi Jesús oveja-taked-igalgin tulemalga chunmasdo, tenal tulemal yabli aku itomal ibi chogle-wede. 
\s1 Jesús tule-oveja-akwed-nuedyob tulemalga maid 
\p  
\v 7 Tegin Jesús kannan tulemalga chogalbal: “Imi an chunchunnad pemalga chogdo: imi antin oveja-kalu-emakal-chiid-e-wanagakyob kunoni.  
\v 8 Tenal tule-an-iktual-tulemal-oturdamalgal-nonimalad anyob kwen nonijulmal. Tenal we tulemaldin pinche tule-iskanayob tegin tule-oveja-aturzhemaladyob nonimal. Tenal ovejamal-tule-kwapid-kwen-itodijulidyob, tule-an-iktual-nonimaladbal kwen ibzhaszhulmal. 
\p  
\v 9 “Imi antin oveja-kalu-emakal-chiid-e-wanagakyob-choggu, al ovejamal wanagakpal togzhal, akalzhul mego, tegin ovejamal akalzhul magadbal nobalo mas-kunned amigal. Tenal meke-ibi-tule anpal Pab Tummadgin naigunonikil, oveja-yopí abonolenonimalo, tegin an we tule-akwenonimalbalo. 
\p  
\v 10 “Tenal tule-immal-aturzhemaladdin tanimaldo oveja-aturzhegal, oveja-mesgal, tegin oveja-opelogalbal. Tenal tule-an-iktual-tulemal-oturdagal-nonimalad tulemal-opelononimal. Tenal antin nonido, tulemal purpal ukin-ukin tula-tigal, tegin tulemal anpal aga ulubgin pela-pela yer itononigalbal.” 
\p  
\v 11 Tegin Jesús chogalbal: “Imi antin tule-nuekwá-oveja-akwedyob noni. Tenal ovejamalga poni-tummad noalil, tule-oveja-akwed-nued akalzhul aga oveja-anal purko. 
\p  
\v 12 “Tenal tule-manigin-oveja-takmaladdin tule-chunchunnad-oveja-takedyob kwen nanejulmal. Tenal ovejamal-emalgadzhul-choggu, al achu-kwegwed kolmadanikil, tule-manigin-oveja-takmalad ilgwen oveja-midmalo. Tegin tule-oveja-takmalad abarmadmalal, achu-kwegwed ovejamal-kanoniko. Tegin ovejamal-pimalad akne-akne abarmadmalzhunno. 
\p  
\v 13 “Imi tulemal maniginbi oveja-takmal-choggu, al ovejadu abarmadmalo. Tenal we tulemalga iwen-akalzhul oveja kullego. 
\p  
\v 14 “Tenal antin tule-manigin-oveja-takmaladyob kwen nonijul. Tenal antin oveja-akwed-chunchunnadyob noni. Tenal tule-oveja-nued-akwed aga ovejamal-nued-wismal, piti e-ovejamal. Tegin ovejamal aga e-taked-nued-wismalmo. Tenal an oveja-taked-nuedyob an naga chapingan-wismo, tegin an-chapingan ampa an-nued-wismalmo. 
\p  
\v 15 “Tenal tule-oveja-nued-takmaladyob an-Pab an-nued-wismo, tegin antemo ampa an-Pab-nued-wismo. Teginbal, an oveja-akwed-nuedyob an naga chapingan-anal akalzhul purko. 
\p  
\v 16 “Tenal an oveja-pimalad-nikabal, tenal we kalu-yabalid-chul, aknemalad. Tenal an itije keg-chulgu oveja-aknemalad-cheinoniko. Tenal ovejamal-an-cheinonimaloed mag an-kakapurwa itononimalmogo. Tenal we ovejamal aga pulakwa ampagunonimalo, tegin antin tule-e-akwed-walkwénnagwadga kunoniko.” 
\p Tenal Jesús tulegin chunmas, ovejagin kwen chunmaszhul. 
\p  
\v 17 Tegin Jesús chogalbal: “¿Imi an-Pab, ibiga an-pilal pe ebinzhe? Imi an-Pab an-wisdo, an naga tukin purkwene, tegin an kannan naga tullenebal. Al an-Pabdin an-pilal.  
\v 18 Tenal tule an-kwen-mejojul-kuo, an naga tukin purkwene. Tenal an igal-nika naga purkwegal, tegin an igal-nikabal an naga kannan tullegalbal. Tenal an-Pab anka chogzhado, an naga purkweenab, tegin an naga kannan tullegenabbal. Pitomalgu.” 
\p  
\v 19 Tegin Judiomal Jesús-chunmajad itosgu, kannan aga iskudmalbal.  
\v 20 Tegin Judiomal pul-melu Jesúsgin chogalmal: 
\p —Imi Jesús nia-nika. ¿Ibiga pe Jesús-itomaldé? We tule koegwa. 
\p  
\v 21 Tenal Judiomal-pimalad chogalmal: 
\p —Chulá. Imi tule-nia-nikad weob kwen chunmajul. ¿Pede pe ebinzhe niade tule-aku-ataged-nabir-nudako? Chulá. Keg kue. 
\p Tenal Judiomal aka-weob Jesús-ebesmalzhun, Jesúsgin pal kwen chogzhajulmal. 
\s1 Judiomal Jesúsgin kwen ibzhejulmalad Jesúsde Pab-Machi 
\p  
\v 22 Tegin ti-nigin, Jerusaléngin Pabzhe-Koled-Neg-Nudajad-Ibe naigunoni.  
\v 23 Imi teun Jesús Pabzhe-koled-neg-ubeb-Salomón-nugadgin pipirmadii.  
\v 24 Tenal teun Judiomal pulal Jesúszhe nonimal, Jesúszhe ekichialmal: 
\p —¿Inkwaje pe anka chogne-wede: ‘An Cristo-Pab-akpene-chogzhad-palmidagoed-tule?’ Imi pe Cristol, anmalga pe ilgwen chogdo. 
\p  
\v 25 Tegin Jesús Judiomalga chogal: 
\p “Imi antin, an pemalga pato chogzhado an Cristo. Tenal pemal yapa anpal ibzhemal. Tenal antin, an-Pab-nuggin immal-imanaidbal, an pemalga pato oyosbal an Cristo. Tenal pemal yapa anpal ibzhemalbal. 
\p  
\v 26 “Imi tule-oveja-taked ovejamalzhe kolalil, ovejamal egad-chulil, aku tule-oveja-taked-itomal. Tenal pemal ampa teopímo. Imi pemal an-chapingan-chulidbal, pemal anpal kwen ibzhejulmal. 
\p  
\v 27 “Tenal an-chapingan, an-ovejamalyob mag an-itomal. Tenal antin mag an-chapingan-takmalmo, toa-tule. Al an-chapingan anpal naigunonimalbal.  
\v 28 Tenal antin ilagwen-nadgu tullegal an-chapingan-ima, tenal an-chapingan pal kwen purkojulmal. Tenal tulemal ankin an-chapingan-kwen-idirojul-kubalo. 
\p  
\v 29 “Imi an-Pab anka chapingan-ukcha. Tenal an-Pab pul-tule-tummad-choggu, al tule an-Pabgin keg an-chapingan-pal-idir.  
\v 30 Tenal an-Pab tegin an, anmal walkwénna kumal.” 
\p  
\v 31 Tegidgin Judiomal istar Jesús-itogalgu, kannan akwa chualmalbal Jesús-mesgal. 
\p  
\v 32 Tenal Jesús Judiomalga chogal: 
\p —Tenal antin Pab-kannalegedbal pemalga ichejul immal-taktijulmalad-nuegan imas. ¿Tede an ibi-immal-taktijulid-imajadbal pemal akwagin an-mesbi-kualmalzhun? 
\p  
\v 33 Tegin Judiomal Jesúsga chogalmal: 
\p —Imi pe-immal-nuegan-imajadbal, anmal pe-kwen-mesbijulmal. Tenal pe Pabyob-itogedbal pe Pab Tummadgin walmas. Al anmal akwagin pe-mesbimal. Imi pedin tule, tenal pedin yabli chogzhado: ‘Antin Pab.’ 
\p  
\v 34 Tegin Jesús Judiomalga chogal: 
\p “Imi an chogzhal: ‘Antin Pab’, wedin iwen-akalzhul. ¿Imi Pab-kartagin nermakal maichulzhí: 
\q1 Antin chogzhado, pemal pab-tummagan? 
\qr Sal. 82:6 
\m Tenal akpene Pab Tummad purpal tule-wal-walgwenga weob chunmas. 
\p  
\v 35 “Tenal pemal nued wismaldo, pemal keg Pab-kartagin-nermakal-maid piskemalal. Tenal Pab Tummad we tulemalgin chogzhadbal, we tulemal pab-tummagan, al ankin pul-pule nabir chunmalenoniko an Pabmo. ¿Ibiga an teob chog?  
\v 36 Imi Pab Tummad pidzhi an-oniris ega arpagal. Al Pab Tummad iti-napche an-palminoni. Imi an Pab-Machiye an chogzhadgin, ¿tede ibiga pemal ankin chogmal an Pab Tummadgin walmas? Chulá. 
\p  
\v 37 “Tenal antin, an-Pabyob immal imajulilen, pe melle ankin ibzhemalodo. 
\p  
\v 38 “Tenal antin, an-Pabyob immal imakel, tenal pe an-chunmakedgin kwen ibzhejulil, an immal-imajadbal pemal yabli ankin ibzheenabmal. Tenal pe ankin ibzheel, pe wisgunoniko, tegin pe mag itononibalo Pab ankin mai, tegin an Pabgin maimo.” 
\p  
\v 39 Tegidgin Judiomal Jesús-chunmas-itosmalgu, Jesús-kabi-kualmal, tenal Jesús-kwen-kaszhul-kusmal. Tenal Jesús ilgwen Judiomalgin wakis. 
\p  
\v 40 Tegin Jesús kannan Jordán-tiwal-opakal nad, akpene Juan Bautista tigin-tulemal-ognaigujadzhe. Tegin Jesús tebal peszhun.  
\v 41 Tegin tulemal-íchejul Jesús-taknonimal. Tegin tulemal Jesúsgin chogalmal: 
\p —Imi Juan Bautista immal-taktijulid kwen imaszhul. Tenal Juan we tulegin-chunmajad pel-kwapa ib-chunchunnaddo. 
\p  
\v 42 Tegin tulemal-ichejul-Jesús-taknonimalad aka Jesúsgin ibzhenonimal. 
\c 11  
\s1 Jesús wisgujad Lázaro yee-pakal mai 
\p  
\v 1 Imi teun tule-walgwen-Lázaro-nugad yee-pakal mai. We tuledin Betaniagined. Tenal Betania-neg-kweburdin María-tegin-e-ia-Marta e-neg-kweburmo.  
\v 2 Tenal María, Lázaro-yee-pakal-maid-e-pun. Tenal María ampa te-cholbal Jesús-naggin ti-wawad eyogoed, tegin e-saglagin Jesús-nag tinobaloed. 
\p  
\v 3 Tegin María aga iabak yee-pakal e-yai-Lázaro-takalgu, Jesúszhe tulemal-palmis. Tegin punamal-walbogid tule-palmijogalidga chogalmal: 
\p —Imi pe Tummad-Jesús-omojal, Jesúsga pe chogo: ‘María aga e-iabak chogmal: Pede kege-chulgu tago, pe-ai-nued-Lázaro yee-pakal mai.’ 
\p  
\v 4 Tegin Jesús e-ai yee-pakal-mai itosgu, chogal: 
\p —Tenal we poni ilagwen Lázaro-mesgal-chul. Tenal we poni pinche Pab-Tummad-nug-okannogal. Tegin Pab-Machi we ponibal e-nug okannolenonigalmo. 
\p  
\v 5 Imi teun Jesús pirkin Marta tegin e-urpa tegin Lázaro-pilalmo.  
\v 6 Tenal Jesús wisgusgu Lázaro yee-pakal mai, apka kwen alzhul, ampa ibbo e-maidgin mai-pes. 
\p  
\v 7 Tegin Jesús ibbogin kep aga e-chapinganga chogal: 
\p —Kannan nemalma, Provincia-Judeaje. 
\p  
\v 8 Tegin e-chapingan Jesúsga chogal: 
\p —¿Tule-oturdaked, imi Judiomal imichal akwagin pe-mesnemalanzhulzhí? ¿Tede pe kannan nebibaldé? 
\p  
\v 9 Tegin Jesús aga e-chapinganga chogal: 
\p —Teobdo. ¿Tenal ibede, wachilambe-kakabog nikchulzhí? Imi tule neg-ibgin kudiil, iti-napkin pel-kwapa neg-taledbal keg nag-kol.  
\v 10 Tenal tule mutik kudiil, neg-chichidbal nag-kolnonida. Tenal an-wilub ampa omojulmo an-kamalgal, al an akalzhul Provincia-Judeaje nao, tule an-kwen-kaojulmal. 
\p  
\v 11 Tegin Jesús teob chogzhagu, kep aga e-chapinganga chogalbal: 
\p —Imi an-ai-Lázaro, pato kabid. Tenal antin Lázaroje neenab, an-ai-Lázaro otagal. 
\p  
\v 12 Tegin e-chapingan Jesúsga chogalmal: 
\p —Tummad, ¿imi Lázaro kabidedde, pato nugudanijulzhí? ¿Tede ibiga pe nebidé? 
\p  
\v 13 Tenal Jesús otukal chogzhado, Lázaro pato purkwis. Tenal Jesús-e-chapingan ebinzhemal, Jesús-teob-chogzhadde, pinche Lázarode kabmai. 
\p  
\v 14 Tegin Jesús kep aga e-chapinganga pakal-pud chogalzhun: 
\p —Imi an-ai-Lázaro pato purkwis.  
\v 15 Tenal an weli-itodo, an Lázaro-abir kudijulidbal, pemal ankin ibzhenonimalgal. Tenal anmal yabli Lázaroje neenabmal. 
\p  
\v 16 Tegin Tomás tegin pimalbalid Tarbo-Mimmilejad Jesús-e-chapingan-pimaladga chogalzhun: 
\p —Tegil anmal Jesúsbak nemalmodo, Jesúsbak mes purkwegal. 
\p Tegin e-chapingan Jesúsbak nadmalzhun. 
\s1 Jesús chogzhagujad, ede purkwaled-akar kannan tule-otuloged, tegin ilagwen-nadgu tule-otullegedbal 
\p  
\v 17 Tegin Jesús Betaniaje nonigu, pato taknoni Lázaro ibabakegus tigles.  
\v 18 Imi Betania-neg-kwebur Jerusalénzhe, wachi-abal-naneed-wilub-panku.  
\v 19 Tegin Judiomal-íchejul Martaje tegin Maríaje nonimal tar-pentagal, Lázaro-purkwijadbal melle twagdar pukib-pinzhegal. 
\p  
\v 20 Tegin Marta tani-Jesús-itosgu, Jesús-abin-nad, Jesús-abintagal. Tenal Maríadin neggin chii-pes.  
\v 21 Tegin Marta Jesús-abingusgu, Jesúsga chogal: 
\p —Tummad, imi pe wegin mailen, an-yai kwen purkwiszhulin.  
\v 22 Tenal an wisdo, meke-ibi pe Pab Tummadzhe imis ekichial, Pab pega immal imako. 
\p  
\v 23 Tegin Jesús Martaga chogal: 
\p —Imi pe-yaidin, ampa kannan tullego. 
\p  
\v 24 Tegin Marta Jesúsga chogal: 
\p —Teobdo. Tenal an wisdo, an-yai neg-tukuje tule-purkwismalad-kannan-tullegedzhe, tullemogo. 
\p  
\v 25 Tegin Jesús Martaga chogalzhun: 
\p —Imi an purkwaled-akar-kannan-tule-otuloged, tegin an ilagwen-nadgu tule-otullegedbal. Tenal tule ankin ibzhajal tegin meke purkwijal, kannan tullego.  
\v 26 Tenal tule ampa tuladgin ankin ibzhediil, pal kwen purkojul-kuo. ¿Imi an-pega-chogzhadgin, pe ibzhe? 
\p  
\v 27 Tegin Marta Jesúsga chogal: 
\p —Tummad, an pegin ibzhedo. Tenal an pe-kwen-penzhul, pedin Cristo, Pab-Tummad-Machi. Peed, pe-choglesgujad-iti-napche-tanikoed-tule. 
\s1 Jesús Lázarobal-pukib-itogedbal pojad 
\p  
\v 28 Tegin Marta pél Jesúsga chunmasgu, kannan negzhe nad aga e-urpaje kolnegal. Tegin Marta aga neg omosgu, pidzhi aga e-urpa-ches e-urpabak chunmagal. Tegin Marta Maríaga chogal: 
\p —Imi tule-oturdaked noni. Tenal tule-oturdaked webal kwichi-pes. Tenal tummadde chog: ‘Pede tago.’ 
\p  
\v 29 Tegin María Marta-chogzhad itosgu, ilgwen nadzhun Jesús-kwichidzhe.  
\v 30 Tenal teun takalgu, Jesús ampayo Betania-neg-kweburzhe tog, ampa Marta-abingujadgin kwichi.  
\v 31 Tenal teun Judiomal-María-neggin-María-pentabukmalad takchagu María kueye-kueye nad, María-cholbal nadmalmo. Tenal Judiomal ebinzhemal Maríade uanzhe ponad. 
\p  
\v 32 Tegin María Jesús-kwichidzhe omosgu, Jesús-taknoni ampa kwichi. Tegin María Jesús-abir-chimtinoni. Tegin María Jesúsga chogal: 
\p —Tummad, imi pe wegin mailen, an-yaidin kwen purkwiszhulin. 
\p  
\v 33 Tegin Jesús takchagu María pokwis tegin Judiomal-María-cholbal-tanimalad poalmalmo, al Jesús pela-pela pukib-itononimo.  
\v 34 Tegin Jesús tulemalzhe ekichial: 
\p —¿Pia pe Lázaro-tigzhamaldé? 
\p Tegin tulemal Jesúsga chogalmal: 
\p —Tummad, tegil nemaldo taknegal, pia anmal Lázaro-tigzhamal. 
\p  
\v 35 Tegidgin Jesús poalmo. 
\p  
\v 36 Tegin Judiomal pokwis Jesús-takchagu, Jesúsgin chogalmal: 
\p —Pe tak, pule aga e-ai-pilal. 
\p  
\v 37 Tenal Judiomal-wal-walgwen chogalmal: 
\p —¿Imi Jesús-tule-aku-ataged-nudajad ampa unnigusmoganzhulzhí, melle Lázaro purkwegal? ¡Paaa! ¿Igi kuszhun? 
\s1 Jesús purkwal-maid-akar kannan Lázaro-otulojad 
\p  
\v 38 Tegin Jesús Judiomal-egin-teob-chogzhad itosgu, pul-pule pela-pela pukib-itononibal. Tegin Jesús uanzhe nadzhun. Imi teun tulemal kusgu e-igal-maidbal, akwapir-ya-tummad-yabal tule-tigmal, tegin akwa-tummadgin uan-ya chaktimalbal. Al tulemal akwa-yabal Lázaro-tigzhamalmo. Tegin Jesús Lázaro-tiglejad-nabal kwisgunonigu, chogal: 
\p  
\v 39 —Akwa-tummad-chiid, pe onirmaldo. 
\p Tegin tule-purkwijad-e-pun-Marta-nugad Jesúsga chogal: 
\p —Tummad, ¿ibiga pe akwa onirbidé? An-yai-nugan pato ibabakegus tigles. ¿Pato nun-yapanzhulzhí? 
\p  
\v 40 Tegin Jesús Martaga chogal: 
\p —¿Imi an pega chogzhajulzhí, pe ankin ibzheele, pe Pab-Tummad-kannaleged-tako? 
\p  
\v 41 Tegin tulemal akwa-tummad-uan-ya-edujiid onirismal. Tegin Jesús nikpa atadgu, chogal: 
\p —Pabye, tog-nuedi an pega chogye, Lázarogin pe anka immal imanaidbalye.  
\v 42 Tenal an wisdo, pedin keg-chulgu, an peje immal ekisedbal, pe anka immal imakoye. Al an pega weob chogzhaye, tule-itigin-pukmalad ankin ibzhemalgal pedin an-palmialye. 
\p  
\v 43 Tegin Jesús teob chogzhagu, sapejul kolal, chogal: 
\p —¡Lázaro, pe uan-yabal-maid-akar pe noma! 
\p  
\v 44 Tegidgin Lázaro-purkwal-maid ya-yabal-akar noalgu, pel-kwapa nono-akar nag-tukuje molgin-ebirmakal nos. Tegin Jesús tulemalga chogal: 
\p —Pe Lázarogin mol-ebirmakaled pe epatmalo, a-ito nanegal. 
\p Tegin tulemal Jesús-chogzhadyob imasmalzhun. 
\s1 Judio-tummagan Jesús-mesbi-kualmalad 
\r (Mateo 26:1-5; Marcos 14:1-2; Lucas 22:1-2) 
\p  
\v 45 Tegin Judiomal-María-taknonimalad takchagu Jesús kannan Lázaro-otulos, ichejul Jesúsgin ibzhenonimalzhun. 
\p  
\v 46 Tenal Judiomal-wal-walgwen Pariseomalzhe nadmal, Jesúsgin chunmagal Jesúsde igi pel-kwapa immal imajad.  
\v 47 Al tule-irwal-Pabzhe-kolmalad-e-tummagan tegin Pariseomal, tule-tummagan-pimaladzhe kochamal ormagal. Tegin tule-tummagan-wala-tulapá-kakaambegwad pél nonimalgu, chogalmal: 
\p —¿Imi anmal igi we tule-imamalo-wede? We tule íchejul immalmal-taktijulmalad imadii.  
\v 48 Tenal anmal we tule-kajulmalal, tulemal-pel-kwapa we tulebal ibzhenonimalo. Tenal tulemal we tulebal naigunonimalal, Romano-tummagangin abin-kwisgunonimalo. Al Romano-tummagan anmal-Pabzhe-koled-neg opelononiko, tegin anmal-tule-opelononimalbalo. 
\p  
\v 49 Imi teun te pirkagin, tule-tummad-walgwen-Caifás-nugad tule-irwal-Pabzhe-kolmalad-pul-tummadga mai. Tegin Caifás chogal: 
\p —¡Pemal immal kwen wichulmalma!  
\v 50 ¿Tenal pemal wismalzhulzhí, tule-pel-kwapa melle purkwegal, tule-walgwen pul-akalzhul purko? 
\p  
\v 51 Tenal Caifás aga e-itoleged teob kwen chogzhajul, tenal Pab-Tummad-itolegedbal chunmas. Imi Caifás te pirkagin tule-irwal-Pabzhe-kolmalad-pul-tummadga mai-choggu, al Caifás iktualeba Jesúsgin-immal-kuoedgin chunmas. Tenal Caifás chogzhado, Jesúsde Judio-tulemalga purko. 
\p  
\v 52 Tenal Jesús Judiomalgabi kwen purkojul, tenal Pab-nuskan-pel-kwapa iti-napkin akne-akne pukwamaladga purko. Tenal Jesús purkwenonibalo Pab-nuskan-pel-kwapa pulakwa ampagunonimalgal, tegin Jesús tule-choggwénnagwadga Pab-nuskan-imamalgalbal. 
\p  
\v 53 Al teun-akar Judio-tummagan igal-aminanimalzhun, Jesús-mesgal. 
\p  
\v 54 Tenal Judiomal-Jesús-aminanikidbal, Jesús Judio-neg-kweburmalgin keg pal nanegus. Tegin Jesús wakiszhun neg-nikchulidzhik, neg-kwebur-totoje. Tegin Jesús Efraín-neg-nugadzhe nadzhun. Tegin Jesús aga e-chapinganbak Efraíngin peszhun. 
\p  
\v 55 Tegin Judiomalga Pab-Najad-Itoged omodanigu, tulemal-íchejul Jerusalénzhe irmanonimal. Tenal teun Judiomal iktualeba nonimal, aga chwilidik purpa imamalgal Pab-Najad-Itoged-Ibe itogal.  
\v 56 Tegin tulemal-irmanonimalad Jesús-amialmal, tegin Pabzhe-koled-neg-yabal aga emal-emal Jesús-ekisalmal: 
\p —¿Igi pe ebinzhe? ¿We tule iti-itogedzhe nonikojuldé? 
\p  
\v 57 Tenal tule-irwal-Pabzhe-kolmalad-e-tummagan tegin Pariseomal akpene igal-mezhismal: imi tule wisgujal, Jesúsde pia mai, we tuledin keg-chulgu Judio-tummaganga chogneenab, Judio-tummagan Jesús-kanemalgal. 
\c 12  
\s1 María Jesúsgin ti-wawad imajad 
\r (Mateo 26:6-13; Marcos 14:1-9) 
\p  
\v 1 Imi Pab-Najad-Itoged ibanerkwaje kuele, Jesús Betania-neg-kweburzhe noni. Tenal Betaniagin Jesús akpene purkwaled-akar kannan Lázaro-otulojad.  
\v 2 Tegin Jesús Betaniaje nonigu, tulemal Jesúsga mas imasmal Jesús-okunkal. Tenal teun Marta tulemalga mas-kunned cheikwis. Tenal Lázarodin Jesúsbak mes mesagin mas kunchimo. 
\p  
\v 3 Tegidgin María pude-walgwen ti-wawad-nardo-nugad cheinoni. Tenal we ti-wawad péyedzhe karkegu. Tegin María Jesús-naggin ti-wawad imas, tegin e-chagla-kiagin Jesús-nag-tinosbal. Tenal María Jesúsgin ti-wawad imasgu, pel-kwapa wawadik neg-kas. 
\p  
\v 4 Imi teun takalgu, Jesús-e-chapingan-walgwen-Judas-Iscariote-nugad chimo. Tenal we tule kujal manibal-Jesúsgin-akpinnonikoed-tule. Tegin Judas Maríaga chogal: 
\p  
\v 5 —¿Ibiga pe manigin ti-wawad ukchajuldé? Imi pe pirkagwen arpaged-wilub karkegu pe manigin ti-wawad ukchagalan. Tenal pe manigin ti-wawad ukchalen, pe Jesúsga we mani ukoen, anmal tule-wilemalad-pentagal. 
\p  
\v 6 Tenal teun Judas Jesúsmalga mani-chaboedga kudii. Tenal Judas kusgu mani-aturzheed-choggu, al Judas tule-wilemalad-pentakedgin kwen pinzhaszhul, pinche aga mani-kaedginbi pinzhedii. 
\p  
\v 7 Tegin Jesús aga e-chapinganga chogalzhun: 
\p —Pe melle weob omegin chunmama. We ome meke-chii. Imi an-yo-purkweddu, we ome anka iktualeba ti-wawad imas.  
\v 8 Tenal tule-wilemaladdin keg-chulgu pemal-abalgin kudiguo, pal kwen chulguojul-kuo. Tenal antin pemalbak ilgwen kwen nadguojul, an pemalbak íche wis kudiguo. 
\p  
\v 9 Imi teun takalgu, Judiomal-ichejul wisgusmal Jesúsde Betaniagin mai. Al Judiomal Jerusalén-akar almal Jesús-takegal. Tenal Judiomal Jesús-takegalbi kwen nonijulmal, tenal Lázaro-kannan-tullejad-takegal nonimalmo. 
\p  
\v 10 Tenal tule-irwal-Pabzhe-kolmalad-e-tummagan chogalmal, emalde Lázaro-mejenabmalmo.  
\v 11 ¿Ibiga Judio-tummagan weob chogzhamal pe ebinzhe? Imi teun Lázaro-kannan-tullejadbal Judiomal-ichejul Jesúsbal-naigunonimal, tegin Jesúsgin ibzhenonimalbal. 
\s1 Jesús errey-tummadyob Jerusalénzhe tognonikid 
\r (Mateo 21:1-11; Marcos 11:1-11; Lucas 19:28-40) 
\p  
\v 12 Tegin te pangin, tulemal-ichéjul-Pab-Najad-Itoged-itononimalad wisgusmal, Jesús Jerusalénzhe tanimo.  
\v 13 Al tulemal-Jesús-wisgusmalad uga-ka-annik Jesús-abin-nadmal. 
\p Tegin tulemal Jesús-abingusmalgu, kep pulal kolmanatapmal, chogalmal: 
\p —Jesúsye, pe-nug otummoledi-kuelen, nabirinye. 
\q1 Imi pedin Pab-nuggin-tanikid-tuleye. 
\q1 Tenal pe Israel-erreyga tanikidbal, 
\q1 Pab Tummad pega immal-nuegan imakelen, 
\q1 nabirbalinye. 
\qr Sal. 118:25-26 
\p  
\v 14 Tegin Jesús moli-burro amiapku, moligin nakwis. Imi akpene Pab-kartagin choglesgujadyob kunoni. Tenal Pab-kartagin chogdo: 
\q1  
\v 15 Imi pemal-punamal-Sióngin-pukmalad, 
\q1 pe melle tobgudamalo. 
\q1 Pe tak, 
\q1 pe-errey moli-burro-chapini-askin-chii-tani. 
\qr Zac. 9:9 
\p  
\v 16 Tenal Jesús moli-burro-askin-chiid tanigujadgin, teun e-chapingan aku-itomal, ibi chogle-wede. Tenal Jesús otummolenonigu, e-chapingan kep mag-itononimal, tulemal erreyyob Jesús-otummojad, akpene-akar Pab-kartagin choglesmai. 
\p  
\v 17 Tegin tulemal-Jesús-takchamalad tule-pimaladga choge-natapmal: “Jesús Lázaroje kochadbal, Lázaro-otulos.” 
\p  
\v 18 Tegin tulemal wisgusmalgu Jesúsde Lázaro-otulos, Jesús-takpi-kualmal. Tenal tulemal wisgusmalgu Jesúsde tani, al tulemal-ichéjul Jesús-abin almal.  
\v 19 Al Pariseomal aga emal-emal chogalmalzhun: 
\p —Pe tak, anmal-Jesúsgin-igal-mezhijad tar-mesgal, ibga kwen kuszhul-kus. Tenal tulemal-pel-kwapa Jesúszhe irmamamimal, Jesúsbal naigugal. 
\s1 Jesús aga purkoedgin chunmajad 
\p  
\v 20 Imi teun takalgu, Pab-Najad-Itoged-Ibe itogal, Judiomal Jerusalénzhe nonimal. Tenal Judiomalbak kwénna-kwénna Griegomal nonimalmo Pab-Tummad-nug-otummogal.  
\v 21 Tegin Griegomal Felipeje nonimal. Tenal Felipedin Provincia-Galileagin, Betsaida-neg-kweburgined. Tegin Griegomal Felipeje nonimalgu, Felipeje wilegal chogalmal: 
\p —Tummad, imi anmal Jesúsbak chunmabimal. 
\p  
\v 22 Tegin Felipe Griegomalga chogal: 
\p —An takkwelo, Jesús pemalbak chunmako-dewa. 
\p Tegin Felipe Andrészhe nad, Andrésga choggal. Tegin Andrés kep Felipebak mes Jesúszhe nadzhun Jesúsga choggal.  
\v 23 Tegin Andrés pél Felipe-ega-chogzhad Jesúsga chogzhagu, Jesús tule-walbogidga chogal: 
\p —¿Teobí? 
\p Tegin Jesús chogalbal: 
\p “Imi an-Te-Tule-Chunnaga wilub pato naigunoni an-nug okannolegal.  
\v 24 Tenal an chunchunnad pemalga chogdo: imi trigo-kwa napche arkwan-chulil, tegin trigo-kwa purkwiszhulbalil, ampa e-kwa kwakwénna peio. Tenal trigo-e-kwa purkwijal, tegin ninonikil, íchejul chanma-nonida. 
\p  
\v 25 “Tenal anmal-tule ampa teopí tamo. Imi tule aga changin pinzheel, yapa purkwejogel, we tule pelgunoniko. Tenal tule iti-napkin-kudiidbal aga changin nue pinzhejulil, akalzhul purkwejogel, we tule unniguo ilagwen-nadgu tullegal. 
\p  
\v 26 “Tenal meke-ibi-tule anka immal imabiel, an-igal-mamikid-pallí naneed-wilub. Al an pia-maídin, we tule anpak kudigumogo. Tenal tule anka immal imanail, an-Pab we tule-otummononiko.” 
\p  
\v 27 Tegin Jesús chogalbal: “Imi antin purkweenab-choggu, ¿an ulubgin chuli-pinzhe-itogedbal an igi Pabga chogenabdé? ¿An chogenabgweldé: ‘Pabye, pe an-wis-pentakelen, nabirinye, we wileged melle anche nonigalye?’ Chulá. Tenal antin iti-napche noni purkwegal.” 
\p  
\v 28 Tegin Jesús chogalbal: “Pabye, pe aga nug okannogelen, nabirinye.” 
\p Tegidgin tule-kakapurwa nikpa-akar kolnoni chogal: “Imi antin pato naga nug okannos, tegin an kannan naga nug okannonebal.” 
\p  
\v 29 Tenal tulemal-aka-pukmalad teob itosgu, wal-walgwen chogalmal: 
\p —Wedin, mar-koledi. 
\p Tegin tule-pimalad chogalmalmo: 
\p —¿Tegil angel Jesúsga chunmasdé? 
\p  
\v 30 Tegin Jesús tulemalga chogal: 
\p “Imi we kakapurwa-kolnonikid anka kwen chunmanonijul tenal pemalga chunmanoni, pemal ankin ibzhegal. 
\p  
\v 31 “Tenal tule-iti-napkin-pukmaladga wilub pato naigunoni, Pab Tummad sapejul tulemal-oturdagal. Tegin nia-Satanás-iti-nap-takmaid-akar onolenonimogo.  
\v 32 Tenal tulemal nikpa an-nazhismalal, an pel-kwapa tulemal-weine anpal naigugal.” 
\p  
\v 33 Imi Jesús weob chogzhadbal oyonai, ede nakrusgin purkwene. 
\p  
\v 34 Tenal tulemal Jesús-chogzhad itosmalgu, chogalmal: 
\p —Tenal anmal wismaldo, Moisés-igalgin choglesmai, Cristo-Pab-akpene-chogzhad-palmidagoed-tule ilagwen-nadgu tula-tio, kwen purkojul. ¿Tede ibiga pe chogzhun: ‘Te-Tule-Chunna nikpa-naigujadgin purko?’ ¿Tede toajun, Te-Tule-Chunnadé? 
\p  
\v 35 Tegin Jesús tulemalga chogalzhun: 
\p “Nabirdo. Imi pemalga íche neg-tallé wis nai. Tenal neg-chichid ampayo naigueddu, pe neg-taledgin nanemalo. Tenal tule-neg-chichidgin-nanemalad, wichul pia natap. 
\p  
\v 36 “Tenal pemal ampa neg-taled-naidgin, pe melle pengumalo neg-taledgin nanegal. Tegin pe melle ankin pengumalbalo tule-neg-taledgin-nanemaladbak naigugal. Tenal neg-taleddin choglege, an Jesús.” 
\p Tegin Jesús pel-kwapa chunmasgu, nadzhun. Tegin Jesús aga otukchajun tulemal melle e-onogal. 
\s1 Judiomal Jesús-immal-taktijulmalad takchamalad, Jesúsgin yabli ibzhaszhulmal 
\p  
\v 37 Imi teun Jesús tulemal-wagin ichejul immal-taktijulmalad imas, tenal tulemal yabli Jesúsgin kwen ibzhaszhulmal.  
\v 38 Tenal tulemal-Jesús-pengujad akpene-Pab-kaka-palchoged-Isaías-chogzhad-yopí kunoni. Tenal teun Isaías chogzhado: 
\q1 ¿Tummad, toa anmal-chognonikidgin ibzhenoni? 
\q1 Tulemal anmalbal pél ibzhenonijulmal. 
\q1 ¿Tegin Pab Tummad toaga e-kannaleged oyononi? 
\q1 Ampa a-tulemalgado. 
\qr Is. 53:1 
\p  
\v 39 Tenal tulemal Jesúsbal kwen ibzhaszhulmal, akpene Isaías chogzhagujadyob: 
\p  
\v 40 Imi Pab purpal we tulemal-imia akalosmal, 
\q1 melle purpal mag takegal. 
\q1 Tegin Pab purpal we tulemal-niga okannosmal, 
\q1 melle ulubgin Pabgin ibzhegal. 
\q1 Imi Pab chogzhado: 
\q1 “Imi an purpal weob we tulemal-imas, 
\q1 melle e-taed ogwalegal anpal naigugal. 
\q1 Tegin an purpal melle we tulemal-nudagalbal.” 
\qr Is. 6:10 
\p  
\v 41 ¿Tenal teun ibiga Isaías weob chogzha pe ebinzhe? Imi Isaías sanaledyob Jesús-takcha, otummolenai. Al Isaías Jesúsgin weob chunmanonida. 
\p  
\v 42 Tenal Judio-tummagan-wal-walgwen yabli Jesúsgin ibzhenonimal. Tenal Judio-tummagan-Jesúsgin-ibzhemalad Pariseo-tobedbal kwen chogzhajulmal emalde Jesúsgin ibzhasmal. 
\p Tenal we Judio-tummagan chogzhamalalen, emalde Jesúsbal naigusmal, Judio-tummagan-pimalad kantikidgin Judio-ormaked-neg-akar Judio-tummagan-Jesúsgin-ibzhenonimalad-onodmalan. 
\p  
\v 43 ¿Ibiga Judio-tummagan weob imasmal pe ebinzhe? Imi Judio-tummagan-Jesúsgin-ibzhasmalad pul-pule tulemal-aminanimal e-nug-okannogal, pul Pab Tummad e-nug otummoedga. 
\s1 Jesús-tulemalga-chunmajadbal Pab Tummad sapejul tulemal-oturdakoed 
\p  
\v 44 Tegin Jesús sapejul kotegu, chogalbal: “Imi tule ankin ibzhenonikil, ankinbi kwen ibzhenonijul, tenal tule-an-palmialidgin ibzhenonimo.  
\v 45 Tenal tule mag an-takel, mag tule-an-palmialid-takmo. 
\p  
\v 46 “Imi antin iti-napche kallen-kaedyob noni, tule ankin ibzhajal, we tule wisguo igi naneenab, neg-chichidgin-kudiidyob pal kwen nanaojul.  
\v 47 Tenal tule an-chunmaked mag itogel, tenal we tule an-chogzhadyob kwen nanejulil, an kwen chogojul-kuo we tule sapejul oturdaleged-wilub. 
\p “Tenal antin iti-napche noni, tule-iti-napkin-pukmalad-abonogal tenal tule-pukmaladgin choggal-chul, we tulemal sapejul oturdaleged-wilubmal. 
\p  
\v 48 “Tenal tule an-abingejulil, tegin an-chogzhad kwen abingejulbalil, we tulegin choglenoniko, wedin sapejul oturdalegenab. Tenal neg-tuku omojal, an-nega-chogzhadbal we tule Pab Tummadzhe sapejul oturdalenoniko.” 
\p  
\v 49 Tegin Jesús chogalbal: “Tenal an naga-itolegedbal walgwen kwen chunmajul. Tenal an-Pab-an-palmialid anka chogzhado, an ibigin chunmakenab, tegin e-chogzhadbal an tulemal-oturdakenabbal.  
\v 50 Al an nued wisdo, Pab-anpal-kaka-palmialid tulemal-ilgwen-nadgu-tullegal. Al meke-ibigin an chunmajal, Pab-anka-chogzhad-yopí an chunmamo. Pitomalgu.” 
\c 13  
\s1 Jesús aga e-chapinganga nag enukchad 
\p  
\v 1 Teun Pab-Najad-Itoged-Ibe pan-kuele, Jesús pato wiis ega wilubgan noni iti-nap ebegal, nikpa e-Pabbak mes megnegal. Tenal Jesús tule-iti-napkin-ebal-nanimalad-pilalgus. Tenal Jesús pela-pela aga e-chapingan-pilalgus e-purkwijadzhe. 
\p  
\v 2 Tegin Jesús aga e-chapinganbak chedokí mas kunchiun, nia Simón-machi-Judas-Iscariotegin pato togzha Jesúsgin-akpingal.  
\v 3 Tenal Jesús wiis, e-Pab ega igal-ukcha pel-kwapa immal imagal. Tenal Jesús wisbaldo, ede Pab-Tummad-akar noni, tegin ede kannan Pab Tummadzhe nebal.  
\v 4 Tegin Jesús mas-kunchiid-akar kwisgudgu, aga chuba echus. Tegin Jesús toalla amiapku, aga muchil-abal toalla etis.  
\v 5 Tegin Jesús pardegin ti eyosgu, aga e-chapinganga nag enukalzhun. Tegin Jesús muchilgin-toalla-etilenaidgin aga e-chapinganga nag elisbal. 
\p  
\v 6 Tegin Jesús Simón-Pedro-nag-enukchogalgu, Pedro Jesúsga chogal: 
\p —¿Tummad, pe anka nag enuknemoyé? ¡Chulá! 
\p  
\v 7 Tegin Jesús Pedroga chogal: 
\p —Imi an-pega-nag-enuked ampa pe aku-ito an ibi pegin imanai. Tenal pe kujal kep mag itononiko. 
\p  
\v 8 Tegin Pedro Jesúsga chogalbal: 
\p —Tummad, an meke-igi pega igal-kwen-uknejul, pe anka nag enukkal. 
\p Tegin Jesús Pedroga chogal: 
\p —Imi pe anka igal-kwen-ukchulil an pega nag enukkal, pe anpal-naid-tulejul. 
\p  
\v 9 Tegin Simón-Pedro Jesúsga chogalbal: 
\p —Tummad, imi pe teob chogel, tegil pe melle an-nagbi enukodo. Tenal an-chunkalzhe tegin an-nonoje-pakal pe anka enuko an pega oyogal, an chunchunnad pebal nai. 
\p  
\v 10 Tenal Jesús Pedroga chogal: 
\p —Imi tule-obzhamalad pato obed-wilubzhulmal. We tulemal pel-kwapa enukal-nemal, e-nagbi enuked-wilubmal. Tenal pemal pato chwilidik-nemal. Tenal pemal-abalgin tule-walgwen ampa iskued nika. 
\p  
\v 11 ¿Tenal Jesús, ibiga weob chogzha pe ebinzhe? Imi teun Jesús pato wisdo, toa-tule egin akpinnonikoedde. Al Jesús chognoni: “Pemal-pel-kwapa chwilidik-nejulmal.” 
\p  
\v 12 Tegin Jesús aga e-chapinganga pel-kwapa nag enusgu, aga kannan chuba yosbal. Tegin Jesús mesaje kannan chignadbal. Tegin Jesús aga e-chapinganga chogalbal: 
\p —¿Imi an pemalga nag enukchad, ibi chogle-wede? 
\p Tegin e-chapingan Jesúsga chogal: 
\p —Anmalde wichí. 
\p  
\v 13 Tegin Jesús aga e-chapinganga nuekwa palchogalzhun: 
\p “Nabir. Imi pemal anche kolmal: ‘Tummad’ tegin ‘Tule-oturdaked.’ Wedin ib-nued. Antin ádo.  
\v 14 Imi antin ‘Tummad,’ tegin antin ‘Tule-oturdaked.’ Tenal antin pemalga yabli nag enusmal tule-pinchegadyob. Tenal an pemalga imis nag-enukchadyob, pemal aga muchub-muchub nag-enukedgin naneenabmalmo. 
\p  
\v 15 “Tenal an pemalga chagla chis, pemal aga emal-emal pentamalgal, an pemalga imajadyob.  
\v 16 Tenal an chunchunnad pemalga chogdo: imi tule-pinche-arpaged meke-igi e-ibedga pul tule-tummad chul. Teginbal, tule-palmilegalid meke-igi tule-e-palmialidga, pul tule-tummad chulmo. 
\p  
\v 17 “Tenal an-imis-pemal-oturdajad pemal mag itononikidbal, tegin an-pega-chogzhad-yopí pe nanebi-kualil, Pab Tummad pega immal-nuegan imanoniko. 
\p  
\v 18 “Tenal an pemalgin-pel-kwapa chunmajul. Tenal an wisdo, an toamala-chus. ¿Ibiga an weob pemal-chus pe ebinzhe? Nabir. Imi akpene Pab-kartagin nermakal-maidyob kunonigal. Tenal Pab-kartagin chogdo: 
\q1 Imi tule-anpak-mes-mas-kuchamalad-walgwen ankin akpinnoni. 
\qr Sal. 41:9 
\p  
\v 19 “Tenal an pemalga iktualeba chogdo. Tenal an-pemalga-chogzhiidyob anka kunonikil, pe ankin ibzhenoniko, antin Pab-an-palmialid-tule.  
\v 20 Tenal an chunchunnad pemalga chogdo: meke-ibi-tule an-tule-palmialid-abingeel, we tule pato an-abingasmo. Tegin tule an-abingajal, pato Pab-an-palmialid-abingasmo.” 
\s1 Jesús chogzhagujad Judas egin akpinnoniko 
\r (Mateo 26:14-16; Marcos 14:10-11; Lucas 22:3-6) 
\p  
\v 21 Tegin Jesús pél chunmasgu, aga ulubgin pela-pela nunma-itononi. Tegin Jesús aga e-chapinganga nuekwa palchogalzhun: 
\p —Imi an chunchunnad pemalga chogdo: imi pemal-walgwen ankin akpinnoniko. 
\p  
\v 22 Tegin e-chapingan Jesús-chogzhad itosmalgu, weob pakal pesmal. Tegin Jesús-e-chapingan nue aga emal-emal takalmal, Jesúsde toagin chogzha-dewa. 
\p  
\v 23 Tenal teun takalgu, Jesús-e-chapin-pul-pilaled-Juan, Jesús-waglika mas kunchii.  
\v 24 Al Simón-Pedro kakagin Juanga wilub imas, Jesúszhe ekisgal, Jesúsde toagin chogzha, egin akpinnoniko. 
\p  
\v 25 Tegin Juan Jesús-ua-nabal Jesúszhe ekichialzhun: 
\p —¿Tummad, pe toagin chogzha-ade, pegin akpinnoniko? 
\p  
\v 26 Tegin Jesús Juanga chogalzhun: 
\p —Imi an masgin madu wartichajal, tegin an we tulega madu ukchal, a-tule ankin akpinnonikoed. 
\p Tegidgin Jesús masgin madu wartichasgu, Simón-machi-Judas-Iscariotega madu-ukcha.  
\v 27 Tegin Judas Jesúsgin madu chusgu, nia-Satanás Judasgin tognoni. 
\p Tegin Jesús Judasga chogalzhun: 
\p —Imi pe immal imaneed, pe kueye imanaddo. 
\p  
\v 28 Tenal e-chapingan-Jesúsbak-mes-mesagin-pukmalad aku-itomal, Jesúsde ibiga Judasga weob chogzha: “Pe nao.” 
\p  
\v 29 Tenal teun takalgu, Judas Jesúsmalga mani-chaboedga kudii-choggu, al Jesús-e-chapingan ebinzhasmal, Jesúsde Judasga chogzha, itogedga immal paknegal. O chulil, ebinzhasmalbal, Jesús Judasga chogzha, tule-wilemaladga mani uknegal. 
\p  
\v 30 Tegin Judas madu-ka-uklejad kuchagu, ilgwen nod. Tenal teun neg pato mutik. 
\s1 Jesús chogzhagujad e-chapingan aga muchub-muchub pilalguenabmal 
\p  
\v 31 Tegin Judas-naded-cholbal, Jesús aga e-chapingan-pimaladga chogal: 
\p “Imi an-Te-Tule-Chunna-nug-okannoleged-wilub pato noni. Tegin an-Te-Tule-Chunnabal, Pab-Tummad-nug-okannolenonimogo.  
\v 32 Tenal an-Te-Tule-Chunnabal Pab-Tummad-nug-okannolenonikil, Pab Tummad an-Te-Tule-Chunna-nug-okannononimogo. Tenal Pab Tummad imis-imis an-Te-Tule-Chunna-nug-okannogo.” 
\p  
\v 33 Tegin Jesús chogalbal: 
\p “An-machimal, imi an pemalbak iché napi wis kudii. Tenal an akpene Judiomalga chogzhado: ‘Pemal an-amialmalal, an-kwen-onogojulmal.’ Tenal an Judiomalga-chogzhad-yopí an pemalga chogmodo. Tenal pemal an-amialmalal, an-kwen-onogojulmal. Tegin pemal imis-imis an-togoed-negzhe kwen togojulmalmo.” 
\p  
\v 34 Tegin Jesús chogalbal: “Imi antin imis-akar pemalga igal-pin-mesne, pemal aga muchub-muchub pilalgumalo. Tenal an pemal-pilalgujadyob pemal aga muchub-muchub pilalguenabmalmo. 
\p  
\v 35 “Tenal pemal aga muchub-muchub pilalgunonimalal, tulemal-pel-kwapa mag pemal-taknonimalo, pemal chunchunnad anpal-turdasmalad-tulemal.” 
\p  
\v 36 Tegin Simón-Pedro Jesúszhe ekichial: 
\p —¿Tummad, pia pe ne-ade? 
\p Tegin Jesús Simón-Pedroga chogal: 
\p —Imis an-needzhe, keg anpak pe neel. Tenal kujaldin pe akalzhul an-cholbal nemogo. 
\p  
\v 37 Tegin Pedro Jesúsga chogalbal: 
\p —¿Tummad, ibiga keg an imis pebak ne-ade? Antin, an kuakwa kudii, pega purkwegal. 
\p  
\v 38 Tegin Jesús Pedroga chogal: 
\p —¿Pe kuakwa kudií, anka purkwegalá? Chulá. Imi an chunchunnad pega chogdo: ampayo kallin-mastad namakeddu, pedin ilapá ankin chogo: ‘Antin Jesús-kwen-wichul.’ 
\c 14  
\s1 Jesús chogzhagujad: “Tule anpalbi Pab Tummadzhe omogo” 
\p  
\v 1 Tegin Jesús aga e-chapinganga chogalbal: 
\p “Imi pemal melle chuli-pinzhe itononimalo. Tenal pemal Pab Tummadginbi ibzhao, tegin pe ankin ibzhemalmogo.  
\v 2 Imi an-Pab-neggin neg-íchejul-nika nued meggal. Tenal an neg nikchulilen, an pemalga pato chogzhan an neg kwen nikchul. Imi an pemaldu Pab-negzhe nejogalzhun, pemalga neg nudagal. 
\p  
\v 3 “Tenal an pemalga neg nudane-choggu, al pemal pato wismaldo, an pemalga neg nudajal, an kannan pemal-aminonibalo pemal anpak mes negal. Al an pia megódin, pemal tebal anpak mes megmogo.  
\v 4 Tenal pemal pato wismaldo an-neg-megoed pia nai.” 
\p  
\v 5 Tegin Tomás Jesúsga chogal: 
\p —Tummad, an wichí, pia pe ne. ¿An igi wisguo, pe-maidzhe omogal? 
\p  
\v 6 Tegin Jesús Tomásga chogal: 
\p —Anid, an pe-chedoed, anpalbi unnila pe Pab-Tummad-maidzhe togmalo. Imi an-chunmaked igal-chunchunnad, tegin an tule-otulogedbal. Tenal tulemal-pel-kwapa anpalbi Pabzhe omomalo, igal-pid pal kwen maichul.  
\v 7 Tenal pemal an-wisgujalen an toa-tule, pemal pato wisgunonimogan, an-Pabdin ibi-tule. Tenal pemal imis-akar an-Pab-wisgunonimal, tegin pemal mag an-Pab-takchamalbal. 
\p  
\v 8 Tegin Felipe Jesúsga chogal: 
\p —Tummad, tegil pe anmalzhe pe Pab-Tummad-oyodo. Agin anmal kep kus pinzhenonimalo. 
\p  
\v 9 Tegin Jesús Felipega chogal: 
\p “Felipe, ¿an ínkwagus pemalbak kudii? ¿Tede pe ampa aku an-takdé? Chulá. Tenal meke-ibi-tule mag an-takchal, we tule pato mag Pab-Tummad-takchamo. ¿Tede ibiga pe anka chogde: ‘Pe anka Pab-Tummad-oyo?’  
\v 10 ¿Imi pe ibzhejuldé, antin Pabgin mai, tegin Pabdemo ankin maimo? Tenal an-pemalga-chunmaked an-itolegedbal kwen chunmajul, wedin Pab-itolegedbal an chunma. Tenal Pab-ankin-maid anpal e-arpaged ima. Wedin oyolenaibal, Pab Tummad ankin maimo. 
\p  
\v 11 “Felipe, pe melle ankin penguma, antin Pabgin mai, tegin Pabdemo ankin maimo. Tenal an-imis-pega-chogzhadbal pe ibzhejulil, tenal an-immal-taktijulid-imajadbal, pe yabli ankin ibzhao. 
\p  
\v 12 “Tenal an chunchunnad pemalga chogdo: imi tule ankin ibzhajal, an-immal-taktijulid-imakedyob, we tule ampa immal-taktijulid imamogo. Tenal an-Pabzhe-needbal tule-ankin-ibzheed anka pul-pule immal-taktijulmalad imako. 
\p  
\v 13 “Tenal pemal an-nuggin Pabzhe meke-ibi-immala ekisel, antin pemalga pel-kwapa imako, Pab e-Machibal nug okannolenonigal.  
\v 14 Tenal pe anche immal ekisbiel, pe akalzhul an-nuggin ekiso. Tegin pe anche immal ekised-ilbal, an pemalga immal imako.” 
\s1 Jesús kaka-ukchad, ede e-chapinganga Pab-Purpa-Nued-palmidago 
\p  
\v 15 Tegin Jesús chogalbal: “Imi pemal an-pilalmalal, pe an-choged-pallí immal imamalo. 
\p  
\v 16 “Tenal an Pabzhe ekisnedo Pab pemalga pe-pentaked-pid-palmidagal, pemalbak ilagwen-nadgu peigal.  
\v 17 Tenal we tule-pentakeddin Pab-Purpa-Nued-inniki-chunmaked. Tenal tule-iti-napkin-Pab-wichulmalad Pab-Purpa-Nued-kwen-takchulmaladbal, tegin Pab-Purpa-Nued-kwen-wichulmaladbal keg Pab-Purpa-Nued-abingeel. Tenal Pab-Purpa-Nued-pemalbak-kudiidbal tegin Pab-Purpa-Nued-pemalgin-megoedbal, pemal Pab-Purpa-Nued-wismal. 
\p  
\v 18 “Imi an walagwen pemal-kwen-metnejul, nuskan-pabgan-nikchulidyob. Tenal an pemalzhe kujal kannan nonibalo.  
\v 19 Tenal tule-iti-napkin-pukmalad iche-iche an-napi-wis-taktimal. Tenal pemal-anpal-nanimaladdin kujal kannan an-takmalbalo. Tenal antin tulamai-choggu, al pemal tullemalmogo. 
\p  
\v 20 “Tenal pemal te ibegin kep nuekwa an-wisgunonimalo, antin, an-Pabgin mai, tegin pemal ankin mai, tegin an pemalgin maimo.  
\v 21 Imi tule an-igal-mezhijad igejulil, tenal an-chogzhad-pallí naneel, we tule chunchunnad an-pilal. Tenal an-Pabdin tule-an-pilaled-pilal-kunonimogo, tegin an we tule-pilal-kunonimogo. Tenal tule-an-pilaledga an oyononiko, antin ibi-tule.” 
\p  
\v 22 Tegin Judas-pid-Jesúsgin-akpitchulid, Jesúszhe ekichial: 
\p —Tummad, ¿ibiga pe anmalgabi oyononikodé? ¿Ibiga pe tule-iti-napkin-pukmaladgadin chuldé? 
\p  
\v 23 Tegin Jesús Judasga chogal: 
\p “Nabir. Imi meke-ibi-tule an-pilalel, an-chogzhad-pallí nane. Tegin an-Pabdin we tule-pilalguo, tegin an-Pab we tule-ulubgin megnoniko, tegin an we tule-ulubgin megnonimogo.  
\v 24 Tenal meke-ibi-tule an-pilal-chulil, an-chogzhad-pallí keg nanemal. Imis an-pemalga-chogzhad, an-chunmaked-chul, wedin an-Pab-an-palmialid-e-chunmaked-chunchoged. 
\p  
\v 25 “Imi an pemalga we immalmal chogzhad, ampa an pemalbak kudiidgin, an pemalga chogzhado.  
\v 26 Tenal Pab Tummad an-nuggin pemalga tule-pentaked-palminoniko. Wedin Pab Purpa Nued. Tenal Pab Purpa Nued pel-kwapa an-chunmajadgin pemal-oturdanoniko. Tegin Pab Purpa Nued an-pega-chogzhad kannan wisgugal pe-imanonimalbalo pemal melle igemalgal. 
\p  
\v 27 “Tenal antin, an ne. Tenal an ulubgin akalzhul-itogal pemal-imako. Tenal tule-iti-napkin-pukmalad akalzhul-itogal pemal-imakedyob an pemal-kwen-imakojul. Tenal antin chunchunnad ulubgin-akalzhul-itogal pemal-imako. Tenal pe melle chuli-pinzhe-itononimalo, tegin pe melle kwakidamalbalo. 
\p  
\v 28 “Imi pemal an-itosmal: ‘Antin, an ne. Tegin an pemalzhe kannan nonibalo.’ Tenal pemal chunchunnad an-pilalmalalen, an-Pabzhe-naoedbal pemal weligwal itomaloen, an-Pab anka pul tule-tummadiidbal, pemal pul-pule pentalenonimalo. 
\p  
\v 29 “Imi an-pemalga-chogzhadyob neg ampayo kuoeddu, an iktualeba pel-kwapa pemalga chogzha. Al an-pemalga-chogzhadyob neg kunonikil, pemal kep ankin ibzhenonimalo.  
\v 30 Tenal antin pemalbak keg nue pal chunmakel. Imi tule-iti-napkinmalad-e-tummad-nia-sagla pato tani. Tenal nia-sagla-tanikiddin a-itoleged keg ankin nakwe. Tenal nia-sagla pinche ankin nakwijadyob kunoniko. 
\p  
\v 31 “Tenal tule-iti-napkin-pukmalad turdakenabmal an naga-Pab-pilal tegin an Pab-chogzhad-pallí pél immal imabal. Pitomalgu. Tegil nemaldo.” 
\c 15  
\s1 Jesús chogzhagujad: “Pemal ankin mamikinabmal, Pabga nuekwa immal imagal” 
\p  
\v 1 Tegin Jesús kannan aga e-chapinganga chunmakalbal, chogal: 
\p “Imi antin pemalga purpal uva-chaglagin chunmane. Tenal uva-chagla-chunnad chogle, an Jesús. Tegin tule-uva-taked chogle, an-Pab.  
\v 2 Tenal uva-tub-kigwen kwen chanmaszhulil, tule-uva-taked nagagin uva-tub chikenab. Tenal uva-tub-kigwengin chanmako-taklegel, tule-uva-taked chagla-omopen uva-tub chikenab, pul-ichejul chanmagal. 
\p  
\v 3 “Tenal an-pemalga-chogzhadbal pemal pato ulubgin chwilidik-nemal.  
\v 4 Tenal pemal pane-pane ankin kudimalal, antin pemalgin maimogo. Imi uva-tubmal e-saglagin akenaichulil, uva-tubmal keg aga tukin chanmamal. Tenal pemal ampa teopímo. Imi pe ankin maichulil, pe an-Pabga keg ib-nuedga kumo. 
\p  
\v 5 “Imi antin uva-chaglayob, tenal pemal uva-tubmalyob. Tenal tule ankin mail, tegin an we tulegin maimogo. Al tule-ankin-maid Pabga pela-pela immal imanoniko, uva chanmakedyob. Tenal tule ankin maichulil, Pabga keg immal ima, uva keg chanmakedyobmo. 
\p  
\v 6 “Tenal tule ankin maichulil, Pab-igenoniko, uva-tub-sagla-nagagin chiklejadyob. Tenal tule uva-tub-itimismalal, tar-midmalo. Tegin uva-tubmal pél tinkujal, kep weinonimalo, choje-midgal okummagal. Tenal tule ankin maichulil, uva-tubmal-itimilejad-yopí kunonimogo, we tulemal Pabga ibga keg pel kunonimalo. 
\p  
\v 7 “Tenal pemal ankin mail, tegin pe an-chogzhad-pallí naneel, ibi pe peídin pe Pabzhe ekísmal, Pabdin pega immal imako. Tegin Pabdin pe-immal-ekichijad pega uknoniko.  
\v 8 Tenal pemal pela-pela Pabga immal imanail, uva-nued-chanmakedyob kunoniko. Al pemal an-Pab-nug-otummononimalo, tegin pemal oyononimalbalo, pemal ankin-turdamalad-tule-chunchunnad.” 
\p  
\v 9 Tegin Jesús chogalbal: “Imi Pab an-pilalgujadyob, an pemal-pilalmo. Tenal pemal an-pilaledgin pe kudigumalo, pe melle an-pilaledgin nomalo.  
\v 10 Tenal Pab-anka-chogzhad-pallí an kudiidbal, al Pab ukin-ukin an-pilal. Tenal pemal ampamo. Tenal pemal an-igal mezhijad-pallí tamalal, an ukin-ukin pemal-pilalgunatapmogo. 
\p  
\v 11 “Imis an-pemalga-chogzhiid, an pemalga chogzhado, an ulubgin weligwal-itogal, tegin pemal weligwal-itomalgalmo, tenal pemal-pel-kwapa pellallé yer itogal.  
\v 12 Tenal an pemalga igal-mezhijad choge: ‘Pemal aga muchub-muchub pilalgumalo, an pemal-pilalgujad-yopímo.’  
\v 13 Tenal tule-pilaled-pul-chunchoged chogle, tule akalzhul aga e-ai-anal purko.  
\v 14 Tenal pemal an-chogzhad-pallí tamalal, pemal an-ai-nuegan. Al an pemal-anal iwen-akalzhul purko. 
\p  
\v 15 “Tenal an imis-akar tule-pinche-arpamaladyob an pemal-pal-kwen-taknejul, an-ai-nueganyob pemal-taknejun. ¿Ibiga an teob chog? Imi tule-pinche-arpamalad wichul e-ibed ibi imane. Tenal tummad-e-ai-nuegandin wismaldo, we tummad ibi imane. Imi an-Pabgin-turdajad, an pemalga pel-kwapa chogzha-choggu, al an imis-akar an-ai-nueganyob pemal-taknemal, tule-pinche-arpamaladyob chul. 
\p  
\v 16 “Imi pemal an-chuszhulmal. Anid, an pemal-chusmal, pe Pabga immal imanegal, uva-chan taka-chiidyob. Tenal pe-Pabga-arpaged ilgwen peinoniko, pal kwen pelguojul. Al meke-ibi pe an-nuggin Pabzhe ekisel, Pabdin pemalga imako.  
\v 17 Tenal an pemalga igal-mezhisdo: ‘Pemal aga muchub-muchub pilalguenabmal.’ ” 
\s1 Jesús chogzhagujad, tule-iti-napkin-pukmalad istar ebal-naigusmalad-taknonimalo 
\p  
\v 18 Tegin Jesús chogalbal: “Imi tule-iti-napkin-pukmalad istar pe-takalil, pe ebinzhemalo, we tulemal pemal-iktual istar an-takchamalmo.  
\v 19 Tenal pemal tule-iti-napkin-pukmaladyob nanemalalen, tulemal yer pe-taknonimaloen, aga e-pakadyob. Imidin pe we tulemalyob kwen nanejulmal, tenal an-iti-nap-akar-pe-chujadbal tulemal istar pe-taknonimalo. 
\p  
\v 20 “Imi pemal nue pinzhemalo, an akpene pemalga igi chogzhad. Tenal an chogzhado, tule-pinche-arpaged e-ibedga, meke-igi pul tule-tummad chul. Tenal tulemal sapejul an-imadi-kusmalad sapejul pemal-imanonimalmogo. Tenal tulemal an-chogzhad-pallí nanedimalalen, pe-choged-pallí nanemalmogoen.  
\v 21 Tenal we tulemal aku Pab-an-palmialid-takmal. Al pe-anpal-nanimaladbal tulemal istar pegin immal imanonimalo. 
\p  
\v 22 “Tenal an tule-istar-pe-takmaladzhe nonijulilen, tegin an we tulemalga kwen chunmaszhulbalilen, iskued kwen nikchulmalan. Tenal an tule-istar-pe-takmaladzhe nonikidbal, tegin an we tulemalga chunmajadbal, iskued nika-nemal. Tenal tule-istar-pe-takmalad keg chogmalal: ‘Antin immal-wichulidgin iskuedgin nanedii.’ Al we tulemalgin e-iskued chii-peszhun. 
\p  
\v 23 “Tenal tule istar an-takel, we tule istar an-Pab-takmo.  
\v 24 Tenal an tule-yogsalmaladyob tulemal-abalgin immal-taktijulmalad imaszhulilen, tulemal iskued kwen nikchulmalan. Tenal we tulemal an immal-taktijulmalad takchamal, tenal we tulemal yabli istar an-takmal. Tenal we tulemal ampa istar an-Pab-takmalmo. 
\p  
\v 25 “Tenal we immalmal imis kunaid, pato tikajulgus Pab-kartagin choglesmaido. Tenal Pab-kartagin chogdo: 
\q1 Imi an immal kwen akaloszhul, 
\q1 tenal tulemal yabli istar an-taknonimal. 
\qr Sal. 35:19; 69:4 
\p  
\v 26 “Imi antin Pab-akar pemalga Tule-Pentaked-palminoniko. Tenal Tule-Pentaked, Pab Purpa Nued, napírra immal imaked. Tenal we Purpa-Nued Pab-akar nonikil, napírra ankin chunmanoniko.  
\v 27 Tenal pemal kepe-akar anpak kudigujadbal, pemal ankin napírra chunmanonimalo.” 
\c 16  
\p  
\v 1 Tegin Jesús chogalbal: “Imi an pemalga pél chogzhado, pemal melle ankin pengunonimalo.  
\v 2 Tenal tulemal Judio-ormaked-negzhe-naneed-akar kantikidgin pemal-onodmalo. Tegin pemalga ibe nonibalo, tulemal pe-mesnonimalbalo. Tenal tulemal pe-mechamalal, ebinzhenonimalo, emalde Pab Tummadga ib-nued imananimal. 
\p  
\v 3 “Tenal we tulemal Pab-kwen-wichulidbal, tegin an-kwen-wichulidbal, chabzhul pemal-imanonimalo.  
\v 4 Tenal an pemalga iktualeba pel-kwapa chogzhado. Al an-pemalga-chogzhiidyob kunonikil, pemal ebinzhenonimalo, an pemalga tikajulgus pel-kwapa chogzha, tulemal chabzhul pe-imanonimalo. Tenal an pemalbak-mecha-kudiidbal an kepegin pemalga weob immal-kuoed kwen chogzhajul-kus.” 
\s1 Jesús kaka-ukchad, Pab Purpa Nued taniko 
\p  
\v 5 Tegin Jesús chogalbal: “Antin, an Pab-an-palmialidzhe an nejogal. Tenal pemal-walgwen anche pel kwen ekiszhulmal, an pia ne.  
\v 6 Imi an pedu ne, tenal an-pemalga-chogzhadbal pemal aga ulubgin pela-pela pukib-itononimal.  
\v 7 Tenal an chunchunnad pemalga chogdo: imi an we-akar nadel, pemalga pul ib-nuedga kunoniko. ¿Ibiga an teob chog? Imi an pemaldu nejulilen, Tule-Pentaked pemalzhe kwen nonikojulin. Al an ne, pemalga Tule-Pentaked-palmidagal. 
\p  
\v 8 “Tenal Tule-Pentaked pemalzhe nonikil, mag ito tule-iti-napkin-pukmalad-imanoniko, emalde iskuedgin kudii. Tegin tulemal mag itononimalo, igal-napírragwad igi mai, tegin tulemal mag itononibalo, Pab chabzhul tule-oturdanoniko. 
\p  
\v 9 “Tenal Tule-Pentaked mag-ito tule-iti-napkin-pukmalad-imanoniko, emal ankin-kwen-ibzhejulidbal iskuedgin kudii.  
\v 10 Tenal an-naga-Pabzhe-needbal pemal an-pal-kwen-takojulmalbal. Al Tule-Pentaked mag-ito tule-iti-napkin-pukmalad-imanoniko, piti-igal pul-igal-napírragwad.  
\v 11 Tenal Pab Tummad chabzhul iti-nap-takchiid-e-tummad-Satanás-oturdanonikoedbal, Tule-Pentaked mag-ito tule-iti-napkin-pukmalad-imanoniko Pab Tummad ampa chabzhul tule-iti-napkin-pukmalad-oturdanonimogo. 
\p  
\v 12 “Tenal antin pemalga ampa ichejul immal nika pemalbak chunmagal. Tenal pemal kwen unnijulmal, pél an-itogal. 
\p  
\v 13 “Tenal Pab-Purpa-Nued-napírra-immal-imakeddin pemalzhe nonikil, pinna-pinna igal-pul-chunchunnadgin pemal-oturdamaio. Tenal Pab Purpa Nued walagwen aga e-itoleged kwen chunmanejul, tenal Pab-Tummad-itojadbal, pemalga chunmanoniko. Tegin Pab Purpa Nued pemalga neg-kujal-igi-kuoedgin chognonibalo.  
\v 14 Tenal Pab Purpa Nued pemalga an-immal-wijiidgin chunmanoniko, pemal wisgal, antin ibi-tule. Tenal Pab Purpa Nued chunmanonikidbal an-nug okannononiko. 
\p  
\v 15 “Imi Pab-Tummad-pel-kwapa-immalmal-nikad, ampa ankadmo. Al an pemalga chogzhado: Pab Purpa Nued an-immal-wijiidgin, pemalga chunmanoniko. Tegin Pab Purpa Nued mag-ito pemal-imanonimalbalo.” 
\s1 Jesús chogzhagujad e-chapingan pukib-itononiko, tenal te-cholbal aga ulubgin weligwal-itononibalo. 
\p  
\v 16 Tegin Jesús chogalbal: 
\p —Imi an nue-naojul an pemalgin wis owelene, tegin an nue-naojulbal pemal kannan an-taknonimalbalo. 
\p  
\v 17 Al Jesús-e-chapingan-wal-walgwen aga emal-emal ekichialmalzhun, chogalmal: 
\p —¿Imi Jesús-chogzhad, ibi chogle-wede? Imi Jesús chogzhado: ‘Imi an nue-naojul an pemalgin wis owelene, tegin an-nue-naojulbal pemal kannan an-taknonimalbalo.’ ¿Ibi chogle-wede? ¿Ede aga e-Pabzhe neé? 
\p  
\v 18 Tegin Jesús-e-chapingan kannan-kannan aga emal-emal ekichialmalbal: 
\p —¿Ibi chogle-wede, ‘Nue-naojul?’ Anmal aku-itomal, Jesús-chogzhad. 
\p  
\v 19 Tegin Jesús mag takchagu e-chapingan immal ekisbi-kunanimal, Jesús aga e-chapinganga chogalzhun: 
\p “¿Ibiga pemal aga emal-emal immal ekisnanimal-wede, an ibi chogzha: ‘Imi an nue-naojul an pemalgin wis owelene, tegin an nue-naojulbal, pemal kannan an-taknonimalbalo?’ Nabir.  
\v 20 Imi an chunchunnad pemalga chogdo: pemal pukib-itogedgin pononimalo, tenal tulemal-iti-napkin-pukmalad weligwal-itononimalo. Tenal pemal pela-pela pukib-itononimaloendo, tenal pemal te-cholbal weligwal-itononimalmogo. 
\p  
\v 21 “Imi ome nuchu-nikued-wilubgan omojal, peyedzhe nunmaked-itogo. Tenal ome nuchu-nikujad-cholbal, e-nunmajadgin pal kwen pinzhaojul. Tenal omega iti-napche nuchu mimmilejadbal, weligwal-itononiko.  
\v 22 Tenal pemal ampa teopímo. Imi pemal imis pela-pela pukib-itomal, tegin an kannan pemal-takalbalil, pemal aga ulubgin pela-pela weligwal itononimalo. Tenal we welgued tulemal pemalgin pal kwen idirojul-kuo, pemal ilagwen weligwal pesgu-peio. 
\p  
\v 23 “Tenal te ibe nonikil, pemal anche pal immal ekisojulmal. Tenal an chunchunnad pemalga chogdo: imi pemal an-nuggin an-Pabzhe meke-ibi ekisel, Pabdin pemalga immal-ekichijad imako.  
\v 24 Tenal pemal ampa imisgwadzhe an-nuggin Pabzhe immal kwen ekiszhulmal. Tenal pe Pabzhe immal ekismalal, Pab pemalga immal imako, pemal aga ulubgin pela-pela weligwal-itononigal.” 
\s1 Jesús chogzhagujad, e-chapingan walagwen e-ebemaloed 
\p  
\v 25 Tegin Jesús chogalbal: 
\p “Imi an pemalga chogzhad, an otukal chogzhado. Tenal pemalga ibe noniko, an pemalga inniki-inniki Pabgin chunmanoniko, an otukal pemalga pal kwen chunmakojul. 
\p  
\v 26 “Tenal pemal te ibegin an-nuggin Pab Tummadzhe immal ekisnoniko. Imidin an pemalga chogzhul, an pemal-anal Pabzhe wilene Pab pemalga immal imagal. Tenal pemal an-nuggin ilagwen Pabzhe immal ekisenabmal. 
\p  
\v 27 “Imi pemal-an-pilaledbal tegin pe ankin ibzhajadbal an Pab-Tummad-akar tani, Pab Tummaddin pemal-pilal. Al pe akalzhul ilagwen Pabzhe immal ekismalo.  
\v 28 Imi an Pab-maid-akar an iti-napche noni. Tenal imidin an kannan iti-nap-akar nejogalbal, an-Pab-maidzhebal.” 
\p  
\v 29 Tegin e-chapingan Jesúsga chogalmal: 
\p —Imidin pe pakal-pud chunmasdo, pe otukal pal kwen chunmaszhul.  
\v 30 Tenal imidin anmal mag itosmal, pedin pel-kwapa immal wiis, tegin pe wisbal, tulemal ibi peje ekisbi-kunanimalbal. Al anmal wisdo, pe Pab-Tummad-akar-tanikid-tule. 
\p  
\v 31 Tegin Jesús aga e-chapinganga chogal: 
\p —¿Imidin pe ankin ibzhemalá?  
\v 32 Tenal pemalga ibe noniko, tenal pemalga pato ibe noni, pemal-pel-kwapa pis-pis aga negzhe abarmadmalo. Tegin pemal walagwen an-ebemalo. Tenal antin walagwen yabli kwen peiojul, tenal an-Pab yabli anpak kudio. Tenal an-pemalga-immal-chogzhad pato noni. 
\p  
\v 33 “Imi an pemalga pel-kwapa chogzhado, pemal anpak-mecha-tiidbal, pe aga ulubgin akalzhul-itononimalgal. Tenal pemal iti-napkin-pukmaladgin pela-pela wilenonimalo. Tenal pe melle pukib-itononimalo. Tenal antin tule-iti-napkin-pukmaladgin pato nakwis-kudii.” 
\c 17  
\s1 Jesús aga e-chapinganga Pab Tummadzhe kochagujad 
\p  
\v 1 Tegin Jesús pél chunmasgu, nikpa atad, tegin Pabzhe kolal chogal: “Pabye, imi antin, an pe-machiye. Imi an-ibe pato noni-choggu, al pe an-nug okannogo an pe-nug okannogalmoye. 
\p  
\v 2 “Imi pe anka igal-ukcha tule-pukwamalad-ugakche takegalye. Tenal pe anka wal-walgwen tule-ukcha anpal-naigugalye. Al an ilagwen-nadgu we tulemal-otulogoye.  
\v 3 Tenal tule-ilagwen-nadgu-tullemaladdin nuekwa Pab-Tummad-chunchunnad-walkwénnagwadbi wisgunonimalo, tegin Jesucristo-wisgunonimalbaloye. 
\p “Pab Tummadye, imi ani-Jesucristo, tenal pedin iti-napche an-palminoniye.  
\v 4 Tenal pe-anka-arpaged-ebejad an-pél-imajadbal antin iti-napkin pe-nug okannodi-kusye.  
\v 5 Pabye, imi iti-nap-ampayo-naigueddu pe an-nug okannojad-yopí, pe imis pe-wagin pe an-nug-okannobaloye. 
\p  
\v 6 “Imi tulemal-iti-napkin-pukmalad-pe-anka-ukchamaladdin, an pe-wisgugal an ne-imasye. Tenal tulemal-pe-anka-ukchamalad akpene pegadga kudigus, tenal imidin we tulemal pe anka uknonimoye. Tenal tulemal-pe-anka-ukchamalad pe-chogzhad-pallí nanedi-kusmalye.  
\v 7 Tenal tulemal-pe-anka-ukchamalad wismal, pél pe-anka-chogzhad pe-akar taniye.  
\v 8 Tenal pe-anka-chogzhad an we tulemalga ukin pel-kwapa chogzhamoye. Tegin tulemal-pe-anka-ukchamalad an-chogzhad-abingasmalmoye. Al we tulemal pe-kwen-penguszhulmal, an chunchunnad pe-akar tani, tegin pe an-palmialbalye. 
\p  
\v 9 “Imi tule-pe-anka-ukchamaladga an peje wilenaiye. Tenal tule-iti-napkin-pukmaladga an peje kwen wilenaichulye. Tenal tule-pe-anka-ukchamalad ampa pegadmo-choggu, al an peje we tulemalgabi wilenaiye.  
\v 10 Tenal tulemal-an-nikad, pel-kwapa ampa pegadmoye, tegin tulemal-pe-nikad, pel-kwapa ampa ankadmoye. Tenal we tulemalbal an-nug-okannoledi-kusye. 
\p  
\v 11 “Imi antin iti-napkin pal kwen peinejul, tenal tulemal-pe-anka-ukchamalad iti-napkin peinemalye. Tenal antin, an peje natap pebak meggalye. Pab-chwilidikidye, imi pe nug-tummad nikadyob, pe anka nug-tummad ukchamoye. Tenal pe-tummadga-maidbal pe nue tulemal-pe-anka-ukchamalad-tako, pebak mecha nanegalye. Tegin pe nuekwa we tulemal-takedbal, tule-choggwénnagwadga kunoniko, an pebak mecha kudiidyobmoye. 
\p  
\v 12 “Imi tule-pe-anka-ukchamaladbak an iti-napkin ampa kudigusgu, pe-anka-nug-tummad-ukchadbal an we tulemal-chabos melle akalomalgalye. Tenal tule-pe-anka-ukchamalad an kwen oweszhul-kus. Tenal tule-pela-pela-aga-ulubgin-iskujad-tulebi wis owelesye, pe-karta akpene nermakal-maidyob kunonigalye. 
\p  
\v 13 “Imi antin peje natapye. Tenal antin ampayo iti-nap-akar needdu, an weob pega chog, tule-pe-anka-ukchamalad anyob aga ulubgin pela-pela weligwal-itogalye.  
\v 14 Tenal pe-anka-chogzhad, pel-kwapa an we tulemalga chogzhamoye. Tenal tule-pe-anka-ukchamalad ampa an-yopí tule-iti-napkin-pukmaladzhik naichulmal-choggu, al tule-iti-napkin-pukmalad istar tule-pe-anka-ukchamalad-taknonimalmoye. 
\p  
\v 15 “Tenal an peje wilenaichul, pe iti-nap-akar tule-pe-anka-ukchamalad-chedgalye. Tenal an peje wilenai, pe anka nuekwa we tulemal-tako, nia-sagla melle we tulemalzhe walmagalye.  
\v 16 Imi antin tule-iti-napkined-chul-choggu, al tule-pe-anka-ukchamalad ampa an-yopí, tule-iti-napkinmalad-chulmalmoye.  
\v 17 Imi pe pidzhi tule-pe-anka-ukchamalad-urpo, igal-chunchunnad-pallí inniki nanemalgalye. Tenal pe-anka-chogzhagujaddin, igal-chunchunnadye. 
\p  
\v 18 “Imi pe iti-napche an-palminonikidyob, an tule-iti-napkin-pukmaladzhe, tule-pe-anka-ukchamalad-palmismo pe-kakapurwa palchoggalye.  
\v 19 Imi antin pane-pane pe-itolegedbalpí unnila chwilidik nanedi-kusye, tule-pe-anka-ukchamalad pane-pane pe-chogzhadbalpí unnila chwilidik nanemalgalmoye. 
\p  
\v 20 “Pabye, imi tule-pe-anka-ukchamaladgabi an peje kolnai-chul. Tenal an-chapingan-ankin-chunmanonikoedbal tulemal-pimalad ankin ibzhenonimalo. Al an we tulemal-ankin-ibzhenonimaloedga an ampa peje kolmoye.  
\v 21 Tenal tule-ankin-ibzhenonimaloedga an peje kolmo tule-pel-kwapa-ankin-ibzhemalad choggwénnagwadga kunonigal, pe ankin maidyob, tegin an pegin maidyobmoye. Tegin tule-ankin-ibzhenonimaloedga an peje kolbal, we tulemal anmalgin maigal tule-iti-napkin-pukmalad penzhulgal pe an-palmialidye. 
\p  
\v 22 “Imi antin, an-chapinganga nug-okannoed ukcha, pe anka nug-okannoed ukchadyobmoye, tulemal-ankin-ibzhenonimaloed choggwénnagwadga kunonigal, anmal walkwénna kudiidyobmoye. 
\p  
\v 23 “Imi antin, an-chapingangin mai, tegin pedin ankin maimoye. Tenal an-chapingan chunchunnad choggwénnagwadga kunonikil, tule-iti-napkin-pukmalad mag pe-taknonimalo, pe an-palmialid, tegin pe an-chapingan-pilalmo, pe an-pilalgujadyobmoye. 
\p  
\v 24 “Pabye, imi iti-nap ampayo naigueddu, pe an-pilalgudii-choggu, al pe anka nug-tummad ukchaye. Al an pei, pe-tule-anka-ukchamalad an-megoedgin megmalmogoye, an-tummadga-maid wisgumalgalmoye. 
\p  
\v 25 “Pab-innikigwadye, imi tule-iti-napkin-pukmalad pe-kwen-wichulmal. Tenal antin mag pe-takcha, tegin tule-pe-anka-ukchamalad wisgunonimal, pe an-palmialye.  
\v 26 Tenal antin pe-wisgugal tule-pe-anka-ukchamalad-imadi-kus, pedin ibi-tuleye. Tenal antin ampa ukin-nadgu pe-owisgugal tule-pe-anka-ukchamalad-imadi-kubaloye. Tenal pe-an-pilalgudi-kujadyob pedin tule-pe-anka-ukchamaladgin kudigumogo, tegin antin we tulemalgin maimogoye. Pitogua.” 
\c 18  
\s1 Judio-tummagan Jesús-kasgujad 
\r (Mateo 26:47-56; Marcos 14:43-52; Lucas 22:47-53) 
\p  
\v 1 Tegin Jesús Pab Tummadzhe pél kochagu, Jesús aga e-chapinganbak kullubal nadmalzhun, Cedrón-tian-opakal, immal-chalgan-naidzhe. Tegin Jesús aga e-chapinganbak tebal ampagutapmalzhun. 
\p  
\v 2 Tenal Judas-Iscariote-Jesúsgin-akpitchad ampa we immal-chalgan-naid wismo. Tenal Jesús aga e-chapinganbak melugus we immal-chalgan-naidbal ormadi-kus.  
\v 3 Al Judas we immal-chalgan-naidzhe íchejul tulemal-cheinonimal, tegin íchejul chulubmal-cheinonimalbal. Tegin Judas tulemal-irwal-Pabzhe-kolmalad-e-mosmal, tegin Pariseomal-e-mosmal-cheinonimalbal. Tenal tulemal-nonimalad kallen-annik-nonimal, tegin achachar-ogaal cheinonimalbal. Tegin tulemal es-pilacheed tegin chowal-oro ilabal anniknonimalbal. 
\p  
\v 4 Tenal Jesús pato wiis, ega igi immalmal kuoed. Al Jesús tulemal-tanimalad-abin-nad. Tegin Jesús tulemalzhe ekichialzhun: 
\p —¿Pe toa-amimaldé? 
\p  
\v 5 Tegin tule-nonimalad Jesúsga chogalmal: 
\p —Anmal Jesús-Nazaretkined-amidanimal. 
\p Tegin Jesús tule-nonimaladga chogal: 
\p —Anid, an Jesús-Nazaretkineddé. 
\p Imi teun takalgu, Judas-Jesúsgin-akpitchad tule-nonimaladbak kwichimo. 
\p  
\v 6 Tegin Jesús aga tukin chogzhagu ede Jesús, tulemal-Jesús-kagal-nonimalad chorzhik-chorzhik nadmal, ilgwen napche aglatapmal. 
\p  
\v 7 Tegin Jesús kannan tule-nonimaladzhe ekichialbal: 
\p —¿Tegil pe toa-amimalzhun? 
\p Tegin tule-nonimalad kannan Jesúsga chogalmalbal: 
\p —Anmal Jesús-Nazaretkined-amidanimaldo. 
\p  
\v 8 Tegin Jesús kannan tule-nonimaladga chogalbal: 
\p —Imi antin, an pemalga chogzhado, ante Jesús-Nazaretkined. Tenal pe an-amidani-chogel, we an-chapingan-pukmalad, meke nemalodo. 
\p  
\v 9 Al Jesús-e-chapingana-immal-kujad, Jesús-akpene-chogzhad-yopí kunoni. Tenal akpene Jesús chogzhado: “Imi tule-pe-anka-ukchamalad an kwen oweszhul-kus.” 
\p  
\v 10 Tenal teun takalgu, Simón-Pedro es-nai kwichi. Tegin Pedro es unnusgu, tule-irwal-Pabzhe-koled-pul-tummad-e-mos-chiktegu, chuchu-nuedzhikpi kaledap-idirrí. Tenal tule-chuchu-chiklejad nug Malco. 
\p  
\v 11 Tegin Jesús Pedroga chogal: 
\p —Es kannan uka-yabal pe yoo. Imi Pab-chogedbal anka wileged noni, kobed-kakpi-koblegedyob. Al an weob wileged-wilub. 
\s1 Chulubmal Anászhe Jesús-chejad 
\r (Mateo 26:57-58; Marcos 14:53-54; Lucas 22:54) 
\p  
\v 12 Tegin chulub-tummad aga e-chapinganga igal-ukcha, Jesús-kagal. Tegin chulubmal Judio-tummagan-e-mosmalbak Jesús-kasmalgu, Jesús-chunkal kugmasmal. 
\p  
\v 13 Tegin tulemal-Jesús-kasmalad ilgwen Anás-negzhe Jesús-chesmal. Imi teun takalgu, Caifás te pirkagin tule-irwal-Pabzhe-kolmalad-pul-tummadga mai. Tenal Anásdin, Caifás-e-chak.  
\v 14 Tenal Anás-chapin-Caifásdin akpene Judiomalga Jesúsgin chogzhagujad, tule-walgwen purkwel, pul ib-nued pul tulemal-pel-kwapa purkwemalgal. 
\s1 Pedro kepe Jesúsgin chogzhagujad: “An Jesús-kwen-wichul” 
\r (Mateo 26:69-70; Marcos 14:66-68; Lucas 22:54-57) 
\p  
\v 15 Tegin Simón-Pedro tegin Juan Jesús-cholbal nadmal. Tenal tule-irwal-Pabzhe-kolmalad-pul-tummad mag Juan-tak-choggu, al Juan Jesúsbak mes togzhamo, tule-tummagan-neg-abalgin-neg-olol-naidzhe. 
\p  
\v 16 Tenal Pedrodin magadbal wanagakkin kwichi-pes. Tenal tule-tummad-mag-Juan-takedbal Juan puna-wanagak-takchiidbak chunmas, Pedro-odogal. Tegin Pedro kep togdemojun. 
\p  
\v 17 Tenal puna-wanagak-takchiid Pedroje ekichial: 
\p —¿Imi pe we tule-kalejad e-chapinmojulzhí? 
\p Tegin Pedro punaga chogal: 
\p —Chulá. An we tule-e-chapin-chuli. 
\p  
\v 18 Imi teun takalgu, neg pela-pela tampe kunaidbal, tule-tummagan-e-mosmal tegin chowal-ibgan cho ogasmal. Tegin tule-tummagan-e-mosmal chowanonimalzhun. Tegin Pedro we tulemalbak mes chowanonimo. 
\s1 Anás Jesúsga igal-itojad 
\r (Mateo 26:59-66; Marcos 14:55-64; Lucas 22:66-71) 
\p  
\v 19 Tegin tule-irwal-Pabzhe-kolmalad-pul-tummad-Anás Jesúszhe, e-chapingan-ekichial. Tegin Anás Jesúszhe ekichialbal: “¿Pe igi aga pe-chapingan-oturdanaibaldé?” 
\p  
\v 20 Tegin Jesús tule-tummad-Anásga chogal: 
\p —Imi antin tulemalga pel-kwapa inniki-inniki chunmadi-kus. Tegin Judiomal ampagunonimalal, an keg-chulgu Judio-ormaked-neggin tegin Pabzhe-koled-neggin tulemal-oturdadi-kusbal. Tenal antin otukal kwen chunmaszhul-kus.  
\v 21 ¿Tede pe ibiga anche ekisdé? Imi pe tule-an-itosmaladzhe pe ekisdo. Tenal we tulemal an-wismal, an igi chunmadi-kus. 
\p  
\v 22 Tegin Jesús Anásga pél chunmasgu, chowal-ibed-walgwen-Jesús-abir-kwichid Jesús-wagal ebios. Tegin we chulub Jesúsga chogal: 
\p —¿Ibiga pe weob tule-irwal-Pabzhe-kolmalad-pul-tummad-abinchus-wede? Imi pe tule-irwal-Pabzhe-koled-pul-tummadga pe kaka-kochadyob igal kwen maichul. 
\p  
\v 23 Tegin Jesús tule-e-wagal-ebiojadga chogal: 
\p —Imi an tule-tummadga istar chunmajal, anka pe chogdo, an igidgin istar chunmas. Tenal an istar kwen chunmaszhul. ¿Tede ibiga pe an-ebiosdé? Weobdin ib-nuedzhul. 
\p  
\v 24 Tegin Anás chunkal-kugmakal tule-irwal-Pabzhe-kolmalad-pul-tummad-Caifászhe Jesús-palmis. 
\s1 Pedro kannan Jesúsgin chogzhagusbalid: “Antin Jesús-kwen-wichul” 
\r (Mateo 26:71-75; Marcos 14:69-72; Lucas 22:58-62) 
\p  
\v 25 Tegin Simón-Pedro ampa chowajiidgin, tule-walgwen Pedroje ekichial: 
\p —¿Imi pe tule-kalejad-e-chapinmojulzhí? 
\p Tegin Pedro chogal: 
\p —Chulá. An we tule-kalejad-e-chapin-chuli. 
\p  
\v 26 Tegin tule-irwal-Pabzhe-kolmalad-pul-tummad-e-mos, Pedro-tarbi-chuchu-chikchad-e-kwenad Pedroje ekichialmo: 
\p —¿Imi an pe-takchamojulzhí, pe tule-kalejadbak immal-chalgan-naidgin pe kudimo? 
\p  
\v 27 Tegin Pedro kannan chogalbal: 
\p —Chulá. An we tule-kalejad-e-chapin-chul. 
\p Tegidgin kallin-mastad kep namanonijun. 
\s1 Pilato Jesúsga igal-itojad 
\r (Mateo 27:11-26; Marcos 15:1-15; Lucas 23:1-5, 13-25) 
\p  
\v 28 Imi tule-tummagan Caifás-neggin Jesúsga igal-itosgu, Judiomal Romano-gobernador-negzhe Jesús-chesmal, Jesúsga igal-itogal. Tenal teun, neg wakur-wakur. Al Judio-tummagan melle igal-mamikidgin iskugal tegin Judio-tummagan akalzhul Pab-Najad-Itogedgin mas kunmalgal, gobernador-negzhe kwen togzhajulmal.  
\v 29 Tenal Judio-tummagan gobernador-negzhe togzhajulidbal, Gobernador-Pilato tule-tummagan-pukwadzhe nononijun. Tegin Pilato Judio-tummaganzhe ekichial: 
\p —¿Ibiga pe anka we tule-tuktidanimal-wede? 
\p  
\v 30 Tegin Judio-tummagan Pilatoga chogalmal: 
\p —Imi we tule, tule-nuedilen, anmal peje we tule-kwen-cheinonijulin. 
\p  
\v 31 Tegin Pilato Judio-tummaganga chogalzhun: 
\p —¿Teobí? Tegil pe we tule-chedmaldo, pe-igal-mamikidbal igal-itogal. 
\p Tegin Judio-tummagan Pilatoga chogalmalbal: 
\p —Pe anmalga nabir chogendo, tenal anmal yabli igal-kwen-nikchul tule-iskana-mesgal. 
\p  
\v 32 Imi Jesús akpene chogzhagusdo, e-purkoedgin ega igi kunoniko. Tenal Jesús-chogzhad-yopí Jesúsga kunoni. 
\p  
\v 33 Tegin Pilato e-negzhe kannan togzhagu, Jesúszhe kocha. Tegin Pilato Jesúszhe ekichial: 
\p —¿Imi pede, Judiomal-erreyzhí? 
\p  
\v 34 Tegin Jesús Pilatoga chogal: 
\p —¿Pe aga tukin aga onos an Judio-errey, o tule-pid pega chogzha? 
\p  
\v 35 Tegin Pilato Jesúsga chogal: 
\p —¿Ante Judio-tulejí, an we immalmalgin yolegal? Chulá. Imi pe-tule-irwal-Pabzhe-kolmalad-e-tummagan tegin pe-tulemal anche pe-cheinonimal. 
\p Tegin Pilato Jesúszhe ekichialbal: 
\p —¿Tede pe ibi akaloszhun? 
\p  
\v 36 Tegin Jesús Pilatoga chogal: 
\p —An immal kwen akaloszhul. Tenal an tule-tummadyob an neg-takchido, tenal an iti-napkingajul. Tenal an tule-tummadyob iti-napkinga neg-takmailen, an-mosmal anka pila-onosmalan, Judiomal melle an-kagal. Imidin an-chapingan pila-kwen-onoszhulmal. Tenal an tule-tummadyob neg-takmaid iti-napkinedgajul. 
\p  
\v 37 Tegin Pilato Jesúsga chogal: 
\p —¿Tegil pe Erreydé? 
\p Tegin Jesús Pilatoga chogal: 
\p —Teobdo, an erreydo. Imi an mimmiles erreyga kugal. Tenal an iti-napche noni, igal-chunchunnadgin chunmagal. Tegin tulemal-igal-chunchunnadzhikmalad-pel-kwapa mag an-itosmal. 
\p  
\v 38 Tegin Pilato Jesúsga chogal: 
\p —¿Ibi igaldin, igal-chunchunnaddé? Pinche pe chunmama. 
\p Tegin Pilato pél Jesúszhe immal ekichisgu, kannan Judiomal-pukwadzhe magadbal nosbal. Tegin Pilato Jesúsgin Judiomalga chogal: 
\p —Imi pe we tulegin chogzhamaldo immal akalos. Tenal an we tuleje immal ekichisgu, an we tulegin immal-akalojad kwen onoszhul-kus.  
\v 39 Imi pemalga kusgu igal mai-choggu Pab-Najad-Itogedgin tule-oturdalemaid-walgwen onoenab, al an wisgubi, ¿pe igi peimal, an we Judiomal-errey-onogo o chul? 
\p  
\v 40 Tegin Judiomal sapejul kolmakalmal chogalmal: 
\p —¡Pe melle we tule onogo! ¡Barrabásdin pe anmalga onogo! 
\p Tenal Barrabásdin, kantikidgin-tulemalgin-immal-aturzheed-tule. 
\c 19  
\p  
\v 1 Tegidgin Pilato e-chulubmalga chogzha: “Pe pela-pela Jesús-ebiomalo.” Tegin Pilato-e-chulubmal sapejul Jesús-ebiosmalzhun.  
\v 2 Tegin chulubmal tub-iko-nikad kwilomasmal, tegin kep Jesús-nonogin iko-kurkin chismalzhun. Tegin chulubmal erreyyob Jesúsgin mol-kwalugiid yosmalbal.  
\v 3 Tegin chulubmal Jesús-abir nonimalgu, Jesúsgin todoalmal chogalmal: 
\p —Judio-erreyye, imi pe ilgwen tule-tummadga-mailen, nabirinye. 
\p Tegidgin chulubmal twássa Jesús-wagal-ebiosmal. 
\p  
\v 4 Tegin Pilato neg-yabal-akar kannan nononibalgu, Judiomalga chogal: 
\p —Imi an pemalga kannan we tule-cheidanibal. Tenal antin, an takto, we tule immal kwen akaloszhul. 
\p  
\v 5 Tegin Jesús Pilato-neg-yabal-akar nononigu, Jesús pato nonogin iko-kurkin-chii nononi. Tenal Jesús mol-erreygadyob-yowi nononibal. Tegin Pilato Judiomalga chogal: 
\p —Imi pe takto, we tule igi-takle. 
\p  
\v 6 Tegin tule-irwal-Pabzhe-kolmalad-e-tummagan tegin e-pentamalad Jesús-takalgu, sapejul kolmakalmal chogalmal: 
\p —¡We tule nakrusgin pe tar-piokmalo! ¡We tule nakrusgin pe tar-piokmalo! 
\p Tenal Pilato Judiomalga chogal: 
\p —Imi pemal peimalal nakrusgin we tule-pioko, pe tar-chedmaldo. Tenal antin, an takto, we tule immal kwen akaloszhul. Al an we tulegin pal kwen yolenejul. 
\p  
\v 7 Tegin Judiomal Pilatoga chogalmal: 
\p —Chulá. We tuledin peyedzhe immal akalos. Tenal anmalga igal-maido: imi meke-ibi-tule anmal-igalgin yolejal, we tule purkwed-wilub. Tenal we tule aga chogzhadbal, ede Pab-Tummad-Machi, al purkwed-wilubdo. 
\p  
\v 8 Tegin Pilato Judiomal-chogzhad itosgu, pul-pule kwakial.  
\v 9 Tegin Pilato kannan neg-yabal togzhabalgu, Jesúszhe kocha. Tegin Pilato Jesúszhe ekichial: 
\p —¿Pede piagwad-ade? 
\p Tenal Jesús Pilato-kwen-abinchuszhul-kus, ilgwen yakir pes.  
\v 10 Tegin Pilato Jesúsga chogal: 
\p —¿Ibiga pe yapa an-abinchudé? ¿Pe wiszhulzhí, an igal-nika, pe-onogal, o nakrusgin pe-piokkal? 
\p  
\v 11 Tegin Jesús Pilatoga chogal: 
\p —Imi pe igal-nikado, pe weob an-imagal. Tenal Pab Tummad pega igal-ukchajulilen, pe igal-nikchulin, pe weob an-imagal. Al tulemal-pega-an-ukchamaladdin, pega pul-pule iskued nikunonimal. 
\p  
\v 12 Tegin Jesús weob chogzhagu, Pilatode igal-amijan Jesús-onogal. Tenal Judiomaldin sapejul kolmananimal, Pilatoga chognanimal: 
\p —Imi pe we tule-onojal, pe Romano-Tummad-Césarbak aichulidga kuo. Tenal meke-ibi-tule chogel, ede errey, we tuledin Césarbak istargad. 
\p  
\v 13 Tegin Pilato Judiomal-chogzhad itosgu, neg-yabal-akar Jesús-onos. Tegin Pilato igal-itoged-kangin chigwiszhun choggal piaje Jesús oturdaleged-wilub o purkweenab. Tenal we kan Akwa-Mata-Mata-neg-nugadgin chii. Tenal kan-chiid-neg Hebreo-kakagin pimal Gabata.  
\v 14 Imi teun takalgu, Pab-Najad-Itogedga-immal-nudaked-ibe pato naigunoni. Imi teun tad yorokupen. Tegin Pilato Judiomalga chogalzhun: 
\p —¡Pe tak, pemal-errey igi-takle! 
\p  
\v 15 Tenal Judiomal sapejul kolmakalmal chogalmal: 
\p —¡Pe we tule-mesmalo, pe we tule-mesmalo; nakrusgin tar-piokmalo! 
\p Tegin Pilato Judiomalga chogal: 
\p —¿Pemal peimal, an nakrusgin pe-errey-pioko? 
\p Tegin tule-irwal-Pabzhe-kolmalad-e-tummagan Pilatoga chogalmal: 
\p —Imi we tule, anmal-errey chul. Romano-Tummad-Césarbi anmal erreyga mai. 
\p  
\v 16 Tegin Pilato Judiomalga igal-ukchajun, nakrusgin Jesús-piokkal. Tegin chulubmal Jesús-chesmalzhun Jesús-piokkal. 
\s1 Chulubmal nakrusgin Jesús-piokchamalad 
\r (Mateo 27:32-44; Marcos 15:16-32; Lucas 23:26-43) 
\p  
\v 17 Tegin Jesús Jerusalén-neg-kwebur-akar nodgu, aga nakrus-mai nad, Tule-Nono-Kal-Yal-neg-nugadzhe. Tenal we neg Hebreo-kakagin pimal Gólgota. 
\p  
\v 18 Tegin chulubmal Gólgota-neg omosgu, nakrusgin Jesús-piokchamal. Tegin chulubmal Jesús-egek nakrus-pidgin walbo tule-piokchamalmo. 
\p  
\v 19 Tegin Pilato chulubmalga chogzha: 
\p —Pemal nakrus-tukugin karta nazhimalo: 
\qc \sc WEDIN JESÚS-NAZARETKINED,\sc* 
\qc \sc JUDIOMAL-E-ERREY.\sc* 
\p  
\v 20 Imi teun Jesús neg-kwebur-tikalbal nakrusgin-nai-choggu, al Judiomal-irmamamimalad-ichejul Jesús-nakrusgin-nermakal-naid apchosmal. Tenal we nermakal-naid kaka-chogapágin nermakal nai; Hebreo-kakagin, Romano-kakagin tegin Griego-kakaginmo. 
\p  
\v 21 Tegin Judiomal-irwal-Pabzhe-kolmalad-e-tummagan takchagu nakrus-tukugin karta-nermakal-nai, Pilatoga chogalmal: 
\p —¿Ibiga pe weob Jesúsgin nermas-wede? Pe weob nermaked-wilubzhulin. Imi we nermakal-naid pe keg-chulgu ogwagenab. Tenal pe nermakenabdo: ‘We Jesús-Nazaretkined aga tukin chogzha, ede, Judiomal-e-Erreyye.’ 
\p  
\v 22 Tegin Pilato Judio-tummaganga chogal: 
\p —An kwen ogwanejul. Imi nakrusgin-nermakal-naid-yopí, ampa an ebene. 
\p  
\v 23 Tegin chulubmal nakrusgin Jesús-piokchamalgu, Jesúsbi-mol chusmal. Tegin chulubmal pis-pis chogabake tunukwa-tunukwa Jesús-mol urpismal chulub-ilbal aga chumalgal. 
\p Tenal Jesús-mol-ulak-yowiddin, kwen echirmaszhulmal. Tenal we mol nikpa-akar-ulpalidzhe ilgwen olol, tikal pel makalzhul.  
\v 24 Al chulubmal chogalmal: 
\p —Anmal melle we mol echirmamalo, aka weob ebemalo. Anmal pul molgin todomalo, takegal toa pul chuo. 
\p Imi chulubmal we immalmal-imajad, akpene Pab-kartagin nermakal maid-yopí kunoni. Tenal Pab-kartagin nermakal maido: 
\q1 Tulemal an-molmal mimismal, 
\q1 tegin an-molgin todosmal, 
\q1 toa pul mol chumalo. 
\qr Sal. 22:18 
\p Al chulubmal teob imasmaldo. 
\p  
\v 25 Imi teun takalgu, Jesús-nakrusgin piokal-naid-abir, Jesús-e-nan, tegin Jesús-e-nan-e-urpa kwichimo. Tegin Cleofas-e-ome-María tegin María-Magdalena pukwamalmo. 
\p  
\v 26 Tegin Jesús aga nan-takchagu, tegin e-chapin-pilaled-takchabalgu, Jesús aga e-nanga chogal: 
\p —Ome, imi antin, an purkwene-choggu, al we Juan an-anal pe-machiyob kunejun. 
\p  
\v 27 Tegidgin Jesús Juanga chogalmo: 
\p —Imi we ome aga pe-nanyob pe takchunno. 
\p Imi teun-akar Juan e-neggin aga e-nanyob Jesús-e-nan-akwiszhun. 
\s1 Jesús nakrusgin-nai purkwijad 
\r (Mateo 27:45-56; Marcos 15:33-41; Lucas 23:44-49; Hebreos 9:1-28) 
\p  
\v 28 Imi Jesús aga wiis-choggu ede Pab-chogzhadbal pél immal imas, al Jesús Juanga-chogzhad-cholbal, Pab-kartagin nermakal-maidyob kunonigal, chogalzhun: 
\p —An ukul-ukul ito. 
\p  
\v 29 Imi teun pude-walgwen-vino-choled Jesús-abir kwichimo. Al tule upchanyob immal-tutu cheinonigu, vinogin owartichas. Tegin tule-Jesús-okob-chognaid hisopo-chowal-tukugin immal-tutu chis, tegin Jesús-kakagin immal-tutu nazhis, Jesúsde nugal.  
\v 30 Tegin Jesús vino-choled kobzhagu, chogal: 
\p —Imi antin pato pél immal-imas. 
\p Tegin Jesús teob chogzhagu, nono yaku nad, ilgwen purkwis. 
\p  
\v 31 Imi teun takalgu, Pab-Najad-Itoged pan-kuele-choggu, al Judiomal peichulmal ulukued-ibe-pul-chunchogedgin tule-mui nakrusgin nanimal. Al Judiomal Pilatoje igal-amiapmal, chulubmal tule-nakrusgin-nanimalad-tuwa piskegal, ilgwen tule-opurkwemalgal. Tegin Judiomal peimalbal tule-nakrusgin-nanimalad purkwismalal, chulubmal tule-e-mui-odemalgal. 
\p  
\v 32 Tegin Pilato Judiomalga igal-ukchagu, chulubmal tule-Jesús-abir-naid-e-tuwa pichis, tegin tule-pid-Jesús-abir-naid-e-tuwa pichismalbal.  
\v 33 Tenal chulubmal Jesúszhe nonimalgu, taknonimal, Jesús inkwa pato purkwal-nai. Al chulubmal Jesús-tuwa kwen pichiszhulmal. 
\p  
\v 34 Tenal chulub-walgwen ezhigin Jesús-tikal-eyurusgu, apka-pakal abe tibak arioal.  
\v 35 Imi antin, an imial takchado, chulub ezhigin Jesús-tikal-eyurus. Tenal an-immal-chogzhiid, ib-chunchunnaddo. Tenal an imial Jesús-takchadbal, an napírra chunmanai, pemal Jesúsgin ibzhegalmo Jesúsde Pab-Machi. 
\p  
\v 36 Tenal we immalmal-kujad, akpene Pab-kartagin choglejad-yopí kunoni. Tenal Pab-kartagin nermakal maido: 
\q1 Imi tulemal we tule-e-kal kwen piskojul-kuo. 
\qr Ex. 12:46; Num. 9:12; Sal. 34:20 
\m  
\v 37 Tegin Pab kartagin nermakal maibaldo: 
\q1 Imi tulemal, tule-ezhigin-eyurulejad-takmalo. 
\qr Zac. 12:10 
\s1 José Nicodemobak Jesús-mui-tigzhamalad 
\r (Mateo 27:57-61; Marcos 15:42-47; Lucas 23:50-56) 
\p  
\v 38 Tegin Jesús purkwijad-cholbal, José-Arimateagined Pilatoje igal-ekichiap, Jesús-mui-tignegal. Tenal Josédin, Jesúsbal-turdaked-tulemo. Tenal José Judio-tummagan-tobedbal, otukal Jesúsbal turdadi-kus. Tegin Pilato Joséga igal-ukcha, akalzhul Jesús-mui-chedgal. Tegin José Jesús-nakrusgin-naidzhe nonigu, Jesús-mui-naid-odes tignegal. 
\p  
\v 39 Imi teun takalgu, Nicodemo Josébak kunaimo. Tenal we Nicodemodin akpene-mutik-Jesúszhe-arpigujad-tule. Tegin Nicodemo immal-wawad-kwamakaled libir-tulapá-kakaambe-kakatal cheinoni, Jesús-muigin imagal. Tenal immal-wawad mirra-áloe-oburaled-ina.  
\v 40 Tegin José, Nicodemobak kusgu Judio-igal-maidbal, mol-orojulidgin, tegin ina-wawadgin, Jesús-mui ebirmasmal. 
\p  
\v 41 Imi teun Jesús nakrusgin purkwijad-abir, nagnu nai. Tenal we nagnugin uan-ya-pin chii. Tenal we uan-yagin ampa tule kwen tigledijulid.  
\v 42 Tenal Pab-Najad-Itogedga immal-nudaked-ibe nai-choggu, al José Nicodemobak uan-aka-waglika-chiidbal kueye-kueye Jesús-mui tigapmalzhun. 
\c 20  
\s1 Jesús purkwaled-akar kannan tullesgujad 
\r (Mateo 28:1-10; Marcos 16:1-8; Lucas 24:1-12) 
\p  
\v 1 Tegin Tumigin polegu, wagal ampa aku-takle, María-Magdalena uanzhe nad. Tegin María-Magdalena uanzhe omosgu, taknatapmal, akwa-tummad-uan-ya-chaktijiid pato oniral-chii. 
\p  
\v 2 Tegin María takchagu akwa-tummad-uan-ya-chaktijiid oniral-chii, kannan ilgwen abarmakalzhun, Simón-Pedroje tegin Jesús-e-chapin-pul-pilaledzhe. Wedin an. Tegin María anmalga chogalzhun: 
\p —Imi tulemal uan-akar anmal-Tummad-mui chesmal. Tenal anmal wichulmal, pia Tummad-mui-tigzhamal. 
\p  
\v 3 Tegin Pedro anpak mes uanzhe nadzhun.  
\v 4 Tegin anmal nadgu aga mecha abarmadmal. Tenal antin pul Pedroga abarma-choggu, al an-inzhel uanzhe omos. 
\p  
\v 5 Tegin an uan-yabal nuekwa takegal an tullu imasgu, an takchado, mol-Jesús-ebirmajadbi pukwa. Tenal an uan-yabal kwen togzhajul. 
\p  
\v 6 Tegin Simón-Pedro, an-cholbal nonigu, ilgwen uan-yabal togzha. Tenal Simón-Pedro takchamodo, mol-Jesús-ebirmajadbi pukwamo.  
\v 7 Tegin Simón-Pedro takchabal, mol-Jesús-mui-e-nono-ebirmajad pis pukwa, tenal nuekwa pipisal pukwa. 
\p  
\v 8 Tegin antin uan-yabal kep togzhamo. Tegin an takchagu Jesús-mui maichul, kep an penzhul-kunoni, Jesús kannan tulles.  
\v 9 Tenal teun anmal ampa aku-itomal, Pab-kartagin nermakal mai, Jesúsdin keg-chulgu purkwaled-akar kannan tulleged-wilub. 
\p  
\v 10 Tegin kep anmal kannan negzhe almalbal. 
\s1 Jesús María-Magdalenaga sanal nononikid 
\r (Marcos 16:9-11) 
\p  
\v 11 Imi teun takalgu, María-Magdalena uan-magarbal ampa pogwis-pes.  
\v 12 Tegin María poed-abalgin nuekwa uan-yabal takegal tullu imasgu, takal, angel-walbo mol-chibugan yoyo-pukwamal. Tenal angel-walgwen Jesús-megwijad nag-tukubal chii, tegin angel-walgwen Jesús-nono-megwijadzhik chimo. 
\p  
\v 13 Tegin angelmal Maríaje ekichialmal: 
\p —¿Puna, ibiga pe po-wede? 
\p Tegin María angelmalga chogal: 
\p —Imi tulemal anpi-Tummad-e-mui chesmal. Tenal an wichul tulemal pia an-Tummad-tigzhamal. 
\p  
\v 14 Tegidgin María-Magdalena akpiridgu, takal Jesús e-abir kwichi. Tenal María wichul wedin Jesús. 
\p  
\v 15 Tegin Jesús Maríaga chogal: 
\p —¿Puna, ibiga pe po-wede? ¿Pe toa ami-ade? 
\p Tenal María ebinzhe, we tulede, nagnu-taked. Al María Jesúsga chogal: 
\p —An-ai, pe we tule-mui-chejal, anka pe chogoma, pia pe ches, an akne tignegal. 
\p  
\v 16 Tegin Jesús Maríaje kote: 
\p —¡María! 
\p Tegidgin María-Magdalena Jesúszhik akpiridgu, sapejul Hebreo-kakagin kote, chogal: 
\p —¡\it Rabuni\it*! (Wedin choglege, tule-oturdaked.) 
\p  
\v 17 Tegin Jesús Maríaga chogal: 
\p —María, melle pe an-kama. An ampayo Pab Tummadzhe nakwe. Imidin an pei, pe ne, an-kwenadganzhe. Tegin pe an-kwennadganga chogo: “Antin, an Pab Tummadzhe nakwene. Tenal Pab Tummad, an-pab tegin pe-pabmo. Tenal Pab Tummad an-Pab-Tummadga mai tegin pe-Pab-Tummadga maimo.” 
\p  
\v 18 Tegin María-Magdalena, Jesús-e-chapinganzhe nadzhun. Tegin María Jesús-e-chapinganga pél palchogzhajun, ede Pab-Jesús-takcha. Tegin María palchogzhabal, Jesús ega pél chunmajad. 
\s1 Jesús aga e-chapinganga nononikid 
\r (Mateo 28:16-20; Marcos 16:14-18; Lucas 24:36-49) 
\p  
\v 19 Imi teun ampa te Tumigin, mutik Jesús-e-chapingan Judio-tummagan-tobedbal neg-yabal pukwamal. Tenal Jesús-e-chapingan wanagakkin piir chowal mezhismal melle tulemal kin togmalgal. Tegidgin Jesús e-chapingan-abalgin nononigu, e-chapinganga chogal: 
\p —Anná, tegidde, ¿pemalde, igi kumal? 
\p  
\v 20 Tegin Jesús teob chogzhagu, e-chapinganga e-chunkal-eskorogin-pioklejad tegin e-tikal-eyurulejad oyos e-chapingan wisgal, ede chunchunnad Jesús. Tegin Jesús-e-chapingan Pab-Jesús-takchagu, weligwal pesmalzhun. 
\p  
\v 21 Tegin Jesús kannan aga e-chapinganga chogalbal: 
\p —Pe aga ulubgin akalzhul-itomalalen, nabirin. Imi an-Pab an-palmialidyob, an pemal-palminemalmo Pab-kaka-nuegan palchoggal. 
\p  
\v 22 Tegidgin Jesús aga e-chapingan-agnus. Tegin Jesús aga e-chapinganga chogal: 
\p —Imisgin pe Pab-Purpa-Nued-abingemalo.  
\v 23 Tenal pe Pab-Purpa-Nued-abingajadbal, pe igal-nika, meke-ibi-tulega pe chogzhal, ‘Pe iskued pelgus,’ we tule-e-iskued pelguenab. Tegin pe meke-ibi-tulega chogzhal, ‘Pe iskued pelguszhul,’ we tule ampa iskuedgin kudii, e-iskued ampa pelgujul. 
\p  
\v 24 Imi Jesús aga e-chapinganga nononigusgu, teun Tomás Jesús-e-chapingan-pimaladbak chijul. Tenal Tomás Jesús-e-chapingan-walambe-kakabogwad-walgwenmo. Tegin tulemal Tomás-pimalbal, Tarbo-Mimmilejad. 
\p  
\v 25 Tegin Jesús-e-chapingan-pimalad Tomásga chogzhamal, emalde Jesús-takchamal. Tegin Tomás Jesús-kannan-tullejad itosgu, e-pakamaladga chogal: 
\p —Imi we tule-pe-anka-chogmalad e-chunkalgin eskorog-ya-chiid an takchulil, tegin an ko-yojulil, tegin an e-tikal-eyurulejadgin an chunkal-yojulbalil, an kwen ibzhaojul, wedin Jesús. 
\p  
\v 26 Tegin Jesús-kannan-tullejad-tumigwengin Jesús-e-chapingan ampa te neggin ampagunonimalbal. Tenal teun Tomás e-pakamaladbak mes kujimo. Tenal Jesús-e-chapingan wanagakkin piir chowal mezhismalbal, melle tulemal kin toggal. Tenal teun Jesús kannan e-chapingan-abalgin nononibal. Tegin Jesús aga e-chapinganga chogal: 
\p —Anná, tegidde, ¿pemalde, igi kumal? 
\p  
\v 27 Tegin Jesús Tomásga chogal: 
\p —Imi pe takto, an-chunkal. Imisgin pe ko yodado. Tegin pe an-tikal-eyurulejadgin pe chunkal yobaldo. Tomás, pe melle ankin penguma, pe ankin ibzhema, antin Jesús-chunchunnaddo. 
\p  
\v 28 Tegin kep Tomás Jesúsga chogalzhun: 
\p —Pedin, pe an-Tummad tegin pe an-Pab-Tummadbal. 
\p  
\v 29 Tegin Jesús Tomásga chogalbal: 
\p —Imi pe sanal an-takchadbal pe ankin penzhul-kunoni. Tegin an chogbaldo, tule an-takchajulidbal, yabli ankin ibzheel, ib-nued we tulega kus. 
\s1 Juan iti-karta nermajad oyogal Jesúsde Pab-Machi-chunchunnad 
\p  
\v 30 Imi Jesús e-chapingan-wagin ichejul immal-taktijulmalad-pimalad imas. Tenal an iti-kartagin, Jesús pél immal-taktijulmalad an kwen chogzhajul-kus. 
\p  
\v 31 Tenal antin iti-kartagin an kwénna-kwénna Jesús-immal-taktijulmalad wis nermas, pemalga pakal-pud oyogal, Jesús, Pab-Machi-chunchunnad, wedin Cristo-Pab-Tummad-akpene-chogzhad-palmidagoed-tule. Al pe Jesúsgin ibzhenonikil, pe ilagwen-nadgu tullego. 
\c 21  
\s1 Jesús mata-kakpal aga e-chapinganga nononikid 
\p  
\v 1 Tegin Jesús-e-chapinganga-nononikid-cholbal, Tiberias-mata-kakagin e-chapinganga kannan nononibal. Imi teun takalgu, weob kusdo.  
\v 2 Imi teun Jesús-e-chapingan-walakugle pulakwa pukwamal: Simón-Pedro, Tomás-Tarbo-Mimmilejad, Natanael-Caná-Galileagined, Zebedeo-machimal, tegin Jesús-e-chapingan-pimalad-walbo pukwamalmo. 
\p  
\v 3 Tegin Simón-Pedro e-pakamaladga chogal: 
\p —Imi antin, an chakigin ua-wis-kanegwelo. 
\p Tegin e-pakamalad Pedroga chogalmal: 
\p —Anmal pebak nemalmo. 
\p Tegin e-pakamalad Pedrobak nadmalmojun ua-kagal. Tegin Jesús-e-chapingan ulzhe omosgu, ulgin aknakwismalzhun. Tenal Jesús-e-chapingan oipos chakigin ua-kananimal. Tenal Jesús-e-chapingan pel ua-kwen-kaszhul-kusmal. 
\p  
\v 4 Tegin neg-oiposgu, Jesús-e-chapingan takalmal, Jesús mata-kakpal kwichi. Tenal Jesús-e-chapingan wichul, wedin Jesús. 
\p  
\v 5 Tegin Jesús aga e-chapinganzhe kotegu, e-chapinganzhe ekichial: 
\p —Machimal, ¿pemal ua-kasmal o chul? 
\p Tegin e-chapingan Jesúsga chogal: 
\p —¿Piawa? ¡Saté! 
\p  
\v 6 Tegin Jesús aga e-chapinganga chogalbal: 
\p —Imisgin pe ul-naid-nuedzhik pe chaki opato. Wezhikdin pe nabir ua-kamalo. 
\p Tegin e-chapingan chaki ebigalgu, ichejul-ua-kajadbal pel unnijul chaki ebigusmal. 
\p  
\v 7 Tegin Jesús-e-chapin-pilaled, Pedroga chogal: 
\p —We tule, Pab-Jesús. 
\p Imi teun takalgu Pedro yogal-nikchul kunain. Tegin Jesús-e-chapin-pilaled Pedroga chogzhagu: “We Jesús,” Pedro mol yos. Tegin Pedro ul-akar ilgwen tije ichomadgu, Jesúszhe tomomakal nadzhun. 
\p  
\v 8 Tegin Jesús-e-chapingan-pimalad cholbal ulgin nadmalmo. Tenal Jesús-e-chapingan mata-kaka-akar twagdar pannajul kunai, unnila tali-tulabo-kakaambe panku. Al Jesús-e-chapingan mata-kakaje chakigin ua-tak-ebidmal. 
\p  
\v 9 Tegin Jesús-e-chapingan mata-kakaje omosgu, pato takalmal, Jesús chogin ua-chelonai, tegin Jesúsga madu maibal. 
\p  
\v 10 Tegin Jesús aga e-chapinganga chogal: 
\p —Pe ua-pid-chedamalbaldo, imis-pe-kasmalad. 
\p  
\v 11 Tegin Simón-Pedro kannan ulgin nakwisbalgu, pinna-pinna ua-weimaid-pakas kannan mata-kakaje chaki urpismal. Tenal teun ua-kasmalad ua-uka-tadaganbi ne, purwigwad pel nikchul. Tenal ua pelugles uka-tulakugle-kakaambe-kakapá ua-kasmal. Tenal Jesús-e-chapingan-ichejul-ua-kajadbal, chaki yabli kwen idiriszhul-kus. 
\p  
\v 12 Tegin Jesús aga e-chapinganga chogal: 
\p —Tagmalma, mas wis itomalgal. 
\p Tenal e-chapingan Jesús-tobedbal, Jesúszhe kwen ekichiszhulmal: “¿Pede toa-tule?” Tenal e-chapingan wismaldo, wedin Pab-Jesús.  
\v 13 Tegin Jesús madu chusgu, aga e-chapinganga ukcha. Tegin Jesús ampa madu-yopí ua-imasbal.  
\v 14 Imi teun takalgu, Jesús kannan tullejad-akar, wegin pato ilapágus aga e-chapinganga nogus. 
\s1 Jesús Simón-Pedroje ekichijad: “¿Pede an-pilal-dewa?” 
\p  
\v 15 Tegin Jesús aga e-chapinganbak pél mas kuchad-cholbal, Jesús Simón-Pedroje ekichial: 
\p —¿Juan-machi-Simón, pe wemalga pul pe an-pilal? 
\p Tegin Pedro Jesúsga chogal: 
\p —Tummad, pe an-nued-wisdo, an pe-pilal. 
\p Tegin Jesús Simón-Pedroga chogalbal: 
\p —Tegil pe anka tule-anpal-naigusmalad-akodo, tule-oveja-taked oveja-mimmigan-akwedyob. 
\p  
\v 16 Tegin Jesús kannan Simón-Pedroje ekichialbal: 
\p —¿Juan-machi-Simón, pe an-pilal? 
\p Tegin Simón-Pedro Jesúsga chogalbal: 
\p —Tummad, pe an-nued-wisdo, an pe-pilal. 
\p Tegin Jesús Pedroga chogalbal: 
\p —Tegil pe anka tule-anpal-naigusmalad-akodo, tule-oveja-taked ovejamal-akwedyob. 
\p  
\v 17 Imi Jesús wegin ilapáguo, Pedroje immal ekised. Tegin Jesús kannan Simón-Pedroje ekichialbal: 
\p —¿Juan-machi-Simón, pe an-pilal? 
\p Tegin Jesús Simón-Pedroga ilapá chogzhadbal, “¿Pe an-pilal-dewa?” al Simón-Pedro pukib-itononi. Tegin Simón-Pedro Jesúsga chogalzhun: 
\p —Tummad, pedin pel-kwapa immal wiis. Al pe an-nued-wisdo, an chunchunnad pe-pilal. 
\p Tegin Jesús Simón-Pedroga chogalbal: 
\p —Tegil pe anka tule-anpal-naigusmalad-akodo, tule-oveja-taked ovejamal-akwedyob. 
\p  
\v 18 Tegin Jesús Simón-Pedroga chogalbal: 
\p —Imi an chunchunnad pega chogdo: imi pe machigin pe-itoleged aga pe mol yo, tegin pe-itoleged pe pia naddabal. Tenal pe sered kunonikil, pe nallakwa chakwa imakenab, tule pega mol yogal. Tegin pe-yapa-needzhe, tule pe-chedmalbalo. 
\p  
\v 19 Tenal Jesús-Pedroga-chogzhad choglejundo, Pedro kalejal, tulemal Pedro-mesnemal. Tenal Pedro weob purkwene Pab-nug otummogal. Tegin Jesús Pedroga chogalbal: 
\p —Tenal pe melle an-igeo, tenal pe keg-chulgu anpak naiguo. 
\p  
\v 20 Tegin Pedro akpiridgu, takal, Jesús-e-chapin-pul-tar-pilaled e-cholbal tanimo. Tenal we chapin-Jesús-cholbal-tanikid, akpene Jesús napi mas kunchiun, Jesús-abir chigujad-tule, tegin we chapin Jesúszhe ekichis-kusbalid: “¿Tummad, toa manibal-pegin-akpinnoniko-ade?”  
\v 21 Tegin Pedro we chapin-tanikid-takchagu, Jesúszhe ekichial: 
\p —¿Tummad, pe igi we tule-imanemo-wede? 
\p  
\v 22 Tegin Jesús Pedroga chogal: 
\p —Imi an peielen, we tule an-tanikoedzhe ampa tula kudii, anka ampa iwen-kwen-akalzhulin. Wedin pe-ib-chul pe wegin yolegal. Tenal pe keg-chulgu anpal-naiguoed-wilub. 
\p  
\v 23 Imi Jesús Simón-Pedroga weob chogzhadgin, kwenadgan-abalgin kaka nononi, we chapin-Jesús-cholbal-tanikid kwen purkwenejul. Tenal Jesús kwen chogzhajul, we chapin kwen purkwenejul. Tenal Jesús unnila chogzhado: “An peielen, we chapin an-tanikoedzhe ampa tula kudii, anka ampa iwen-kwen-akalzhulin. Wedin pe-ib-chul pe wegin yolegal.”  
\v 24 Tenal we chapin-Jesús-cholbal-tanikid, wedin an. Tenal antin, an pel-kwapa immal takchadbal, we immalmal-kujadgin an chunmas, tegin an pél nermasbaldo. Tegin an wisbaldo, pél-an-pega-chogzhaddin, wedin ib-chunchunnad. 
\p  
\v 25 Imi Jesús ichejul immal-pimalad imadi-kus. Tenal tule Jesús-immal-imajad-ilbal pél nermakalen, an chogdé, iti-nap ampa kwen unniguojulin, we karta-nermakaled chabogal. Pitogua.