\id REV - Kuman NT [kue] -Papua New Guinea 2008 (DBL 2014) 
\h Ka Teke Pangwa 
\toc1 Ka i Yesus Krais dipene ende Jon tongwa 
\toc2 Ka Teke Pangwa 
\toc3 KTP 
\mt1 KA TEKE PANGWA  
\mt2 Ka i Yesus Krais dipene ende Jon tongwa  
\imt1 Ka mongo yegl ende okuna ongwa  
\ip Rom yomba eremogl Juda sutno meglkwa enge pepa i muno beglkwa. Enge i Rom yomba eremogl Yesus Krais wedi pirngi dungwa yomba ere singo teke ende pere pere eingwa.  
\ip Pepa Ka Teke Pangwa i muno boglkwa yagle kangiye Jon, sraglpre, pepa i mina Jon yene kangiye enge 4 suna igle boglkwa. Yomba tau pirkwa buglayungu A.D. 95 mina pepa i muno boglkwa.  
\ip Ka mem tau mere pepa i mina pangwa i yegl: Taragl kane kane okuwo plau dinambuka pre ka diboglkwa merkinde pepa i mina pangwa. Te Yesus Krais Yaglkande moglkwa ana ye ongo mina God eremogl kundamo ikine prapra engre atne ende te Satan ama engre atne endinambuka. Ana pirngi dingwa yomba andigl giglendi moraglkwa ye God bogl meglmbi ana okuwo God taragl ere i kor endinan ana ye yumbun ta ikraglkwa.  
\c 1  
\s1 Ka teke pangwa i Yesus Krais dipene ende Jon tongwa  
\p
\v 1 Okuna ka i teke pango Yesus Krais i-pene endungwa. Taragl tambre kana plau dinambuka ipre Yesus Krais nigl kongunmo yomba ditenambuka pre God di Yesus tongwa. Ana Yesus ka i ere i-nongugl kaima endina pre angelomo ta di endungo wu kongunmo yomba Jon ditongwa.  
\v 2 Ana na Jon taragl prapra ta kaninga i pepa muno boglka, i God kamo ya te Yesus Krais ka dungwa ya te kongun orkwa i ama akiye dipene end-iwa.  
\v 3 Propet ka pandum dungo pepa i mina bogl pandiglka kerambuka yomba ya, te pir i-nomano suna endinaglkwa yomba prapra gun yenaglkwa. Sraglpre, taragl i prapra plau dinaglkwa enge ende magl ungwa.   
\s1 Jon pepa muno bogl God yombama yungu ombuno 7 tongwa  
\p
\v 4 Na Jon, Esia Provins God yombama yungu ombuno 7 suna yeingwa i na pepa muno bogl teinga,  
\p God erme moglkwa, okuna imbo moglkwa te okuwo unambuka, ana ye wakaimo ya dem munduwo pokndungwa i ene tenambuka, te God king boglmo mina nongagle spirit 7 meglkwa, ye ombugl arganno ya deno munduno pokndungwa ene tenaglkwa.  
\v 5 Te Yesus Krais ye God kamo pamere dindre, te geglkwa mina ye komnaiye andigl ukor pindre ana makandle king prapra ye sutno moglkwa. Ye ama arganmo ya dem munduwo pokndungwa ene tenambiwo.  
\p Ye nono wakai kandre ana bormaimo mina tandaglmeno koko endungo nono wu wakai omga.  
\v 6 Ana ye ere endungo nono ye yombamo mogltre ana ye Nem God kongunmo eramga pre pris kongun norkwa. Ana Yesus yombuglomo pai kuno orkwa ya kangiye kande aimande aimande panambuka. I kaima.   
\q1
\v 7 Kaniyo, ye kamun kua mina  
\q1 suna mogl una orkwa, ana  
\q1 yomba prapra ongumutno  
\q1 mina ye kanaglkwa, te  
\q1 kuglange mina ya buglo-nil  
\q1 mina singwa yomba ikra ama  
\q1 kanaglkwa. Te makandle  
\q1 yomba prapra ye pre kinano  
\q1 suwo gundo piutno tagla  
\q1 sindre kai giglange sinaglkwa.  
\q1 I kaima yene, yegl panambuka.   
\p
\v 8 Yaglkande God yegl dungwa, “Na mambuno boglmara kaima mogl te dundumara kaima moglka.” Ana God i yombuglo pond pangwa ye erme moglkwa okuna imbo moglkwa te okuwo unambuka.   
\s1 Jon ye Krais kangwa  
\p
\v 9 Na Jon, ene angro, nono Yesus bogl wu suwara pi ye kingdomo mina i yumbun ya giugl indre pirwinge ere wanmounga. Na God kamo dipene ende te Yesus wedi pirngi diga i dinongugl endiga pre na sendigo ailan Patmos moglka.\f + \fr 1:9 \ft Rom yomba eremogl yomba ta mambuno kinde erikwa i ana kane panaglme di pirkwa i di endigo ana ye ende ailan Patmos pipi erikwa. Ailan Patmos i kane paingwa angai.\f*  
\v 10 Ana Yaglkande engemo mina Holi Spirit na ake wu dinarko ana na mokonamugl ka kande ta dungo pirka. Nungo embriye biukul bendumere yegl dungwa.  
\v 11 Ana ka i yegl dungwa, “Taragl prapra kanga i pepa mina suna bogltre ana God yombama yungu ombuno 7 meglmara endinatnga: I Efesus kamun ya, Smena kamun ya, Pergamam kamun ya, Taiataira kamun ya, Sadis kamun ya, Piladelpia kamun ya te Leodisia kamun.”   
\p
\v 12 Ana yomba ka dinarkwa i kanagledi pre kan aketeinga. Na kan aketendre ken-lam 7 gol pagl bekingwa i botno mina tengo kaninga.  
\v 13 Te ken-lam botno yeimara pukamugl i yomba ta moglko kaniga. Ye Yomba Wam mereyegl.\x + \xo 1:13 \xt Daniel 7:13\x* Ye gagl suna olto endungo wu kagle mina sitorwa orkwa, te piuriye mina kumagl gol pagl bekingwa i ta dongo pangwa.  
\v 14 Ye bre ya bre yungo kruwo sipsip yungo ya kamun kua kruwo mereyegl, te ye ongumuglo suwo-akiye endi donga bauglo mereyegl ambuglange giglendi sungwa.  
\v 15 Ye kagle suwo-akiye bras endi donga mina suna de gogl ere wangigldi pamere yeglmere, te nungo embriye nigl muglkumdi kuglosi mu dumere yegl.  
\v 16 Ye ongo wokra kugl-kuri 7 ake moglkwa, te dikumba prak ta drambiye ya gon mina akiye nongwa i ye dra mina ende menda wu pangwa. Ana ye gumadra ande ambuglange kande giglendi sumere yegl ambuglange sungwa.   
\p
\v 17 Na ye kandre ana ukandi yange kagle mina si, geglkwa mereyegl du painga. Ana ye ongo wokra na nangina ake yegl dungwa, “Ene kundugl goglkro! Na gumamugl moglka te pundunomugl moglka.  
\v 18 Na kor-moglka yagle! Na okuna goglkra, ba kano, na kor aimande moglka, te aimande aimande mogl enaglka. Te na geglkwa ki ya geglkwa yomba dumono i ki suwo-akiye na ake moglka.   
\p
\v 19 “Yeglpre, taragl erme plau dungwa ya okuwo plau dinambuka ene kan-kondinga i pepa mina muno boglo.  
\v 20 Ana kugl-kuri 7 na onguna wokra yongwa i ya ken-lam gol 7 ene kanga i mambuno kaima teke pangwa i yegl. Kugl-kuri 7 i angelo 7 ye God yombama yungu ombuno suwara suwarandi yomara i sugl meglkwa. Te ken-lam gol 7 i God yombama yungu ombuno 7 yeingwa.   
\c 2  
\s1 Ka muno bogl Efesus kamun God yombama yungu ombuno yongwa i tongwa  
\p
\v 1 “Ene ka tau yegl pepa muno bogl Efesus God yombama angelono i to.\f + \fr 2:1 \ft Ka i di God yombama angelomo wagle tongwa, ba yagl ambu God yombama meglkwa i mambuno erimere ka dungwa.\f*  
\m Kamo i yegl: Na kugl-kuri 7 onguna wokra ake moglka te ken-lam gol mina bekingwa 7 yemara suna igle wu ikine ikine pi wanmoglka, na ene pre ka yegl diga:  
\v 2 Ene kongun prapra etnga i na pirkan erika; yombuglo ere te andigl giglendi motnga, te mambuno kinde erikwa yomba i ene wakai kankitnga, ana yomba tau aposel moune dingwa i ene mambunono kandime dinga ye aposel ta moglkrikwa, ba ye kakimbi yomba meglkwa.  
\v 3 Na kangina pre ere ene yumbun pond inga, ba ene ta oglka ere kinde kondokitnga. Ene giglendi motnga.   
\p
\v 4 Ba ene taragl tau etnga i na pirka kuno erekrukwa i yegl. Ene komnaiye kana na pre mundun pamere yeglkra erme ta paikrukwa.  
\v 5 Ene okuna mambuno wakai ere wanmotnga ikra erme kindekondo yange singa. Ene okuna mambuno wakai etnga ikra poglodi pirtre ana noman yake tendre, ana mambuno wakai okuna etnere ikra aglke kordagl ero. Te yegl ta erekitn na ene motnara undre, ana ken lamnen boglmo mina yongwa i ikorugl endinaglka.  
\v 6 Ba ene mambunon wakai yegl ta etnga i ina wakai pirka: Nikolas yombama taragl erikwa i ene wakai pirkre kankinde yenga. I na ama kankinde yeinga.   
\p
\v 7 Yomba ta kina panan ana Holi Spirit ka di God yombama wagle tongwa i pirpogl sinambuka. Te yomba ta mambuno kinde engre atne ende andigl giglendi moran ana kor aimande meglkwa endimo i mina prawe dimbo kaiya mokna ninambuka, endimo i God dumomo wakaile suna pangwa.   
\s1 Ka muno bogl Smena kamun God yombama yungu ombuno meglkwa i tongwa  
\p
\v 8 “Ka i pepa muno bogl Smena God yombama angelono moglkwa i to:  
\m Na kanna i yegl: Na mambuno boglmara moglka te dundumara moglka, te na gogltre ana aglke andigl kor-moglka.  
\v 9 Ene yumbun kanekane indre ana kiuglgiunde motnga i na pirkan erika.\f + \fr 2:9 \ft Smena God yombama ye makandle taragl kiuglgiunde meglkwa. Ba Holi Spirit taraglmo, ye merkinde paitongwa.\f* Ba heven mambuno wakai ikra merkinde ene mina paitongwa. Te yomba tau ye Juda yomba moune dindre, ene dikinde yeingwa i na pirkan erika. Ba ye Juda yomba kaima ta moglkrikwa, ye Satan yombama meglkwa.  
\v 10 Ene yumbun inatnga mangigl eran kade kundugl pirkro. Pro, na ene diteinga, ene ta etn kanagledi pre Satan si kane yungu endinambuka, ana ande enge 10 keunde ene yumbun ya giu kande inatnga. Ba ene pirngi dinga i mina pir giglendi mogl pi gotn, na kor aimande meglkwa i ekin bitno gagl mereyegl ene tenaglka.   
\p
\v 11 Yomba ta kina panan ana Holi Spirit ka di God yombama wagle tongwa i pirpogl sinambuka. Ana yomba ta kunda yombuglo erambuka ye okuwo aimande goraglkwa mambuno i ye aglke ta sigoglkrambuka.   
\s1 Ka muno bogl Pergamam kamun God yombama meglkwa i tongwa  
\p
\v 12 “Ene ka i pepa muno bogl Pergamam God yombama angelono moglkwa i to:  
\p Dikumba prak drambiye ya gon mina akiye nongwa i na mina yongwa.  
\m Kamo i yegl:  
\v 13 Ene dumo ta moglpai etnga i na pirkan erika. Dumomo igle Satan king boglmo yongwa. Ba na kangina ene kaima akegidi motnga, ipre ene na wedi pirngi dinga i ta uglmange erekitnga. Te Antipas engemo yongwa enge na pre pirngi dungwa i dinongugl endungwa pre ana ene dumun mina igle ye sigeglkwa, dumomo igle Satan moglmara.   
\p
\v 14 Ba ene taragl tau etnga i na pirka kuno erekrukwa. Ene mina yomba tau Balam beke tomere ikra ere wanmeglkwa. Okuna Balam eremogl Israel yomba tandaglme mina yange sinaglmedi pre di nusi Balak tongo, ana Balak kakimbi di Israel yomba tongo Israel yomba ye god kimbi kaiya mokna ofa ereteingwa i nendre te yagl ya ambu kunogl gundo wanmeglkwa.  
\v 15 Balak ormere yegl ene mina yomba tau ama Nikolas epiglmo beke temere i akegidi i-wanmeglkwa.  
\v 16 Ipre ene nomanen yake to! Te ene yegl ta erekitn ene motnara na tambre undre, ana yombamo i na drana mina dikumba prak ende menda wu pangwa i mina kunda bogl tenaglka.   
\p
\v 17 Yomba ta kina panan ana Holi Spirit ka di God yombama wagle tongwa i pirpogl sinambuka. Te yomba ta mambuno kinde engre atne ende giglendi andigl moran ana heven suna bret-mana teke yongwa i tau ye tenaglka.\f + \fr 2:17 \ft Israel yomba makan waule wanmeglkwa enge i, God eremogl bret-mana tongo ye neingwa. Kisim Bek numa 16 ya Buk Song 78:24 kano.\f* Te kombuglo kruwo ta ombugl tenaglka. Ana kombuglomo i mina ye kangiye kor ta bogl pandiglka i yene kombuglo inambuka yombamo i keunde pirkan erambuka. Ba kangiye i yomba ta pirkan erekrikwa.   
\s1 Ka muno bogl Taiataira kamun God yombama yungu ombuno meglkwa i tongwa  
\p
\v 18 “Ene ka i pepa muno bogl Taiataira God yombama angelono moglkwa i to:  
\m Ka i God Wam kamo yegl: Na ongumutna donga bauglo mereyegl ambuglange sungo te katna ain bras donga mina de gogl kaima ormere yegl orkwa.  
\v 19 Na kaniga, ene taragl kanekane etnga ya yomba kanwakai yenga ya pirngi dinga ya kongun akeple dinga ya te yumbun mina ene kiendi motnga. Ana ene erme taragl wakai tau etnga i wakai kaima pai okuna etnga ikra engrukwa.   
\p
\v 20 Ba ene taragl suwarata etnga i na pirka kuno erekrukwa. Ene eremogl ambu Jesebel kanwinge etngo ye yene propet ta mole dungwa.\f + \fr 2:20 \ft Jesebel, i ambu kinde kaima ta kangiye, ye okuna Israel mina kuwin moglkwa. Ka tau 1 King 18:4 ya 19:1-2 ya 21:1-28 te 2 King 9:22 ya 9:30-37 igle kano. Ambu i Nikolas epiglmo ta moglkwa mereyegl pangwa, ye eremogl Taiataira ambu tau gundo i suna ungo ana ye mambuno kinde ormere i ye erikwa. Ana mambuno i mina ye kangiye Jesebel we dingwa.\f* Ye kamo beke tongwa i na nigl konguna yomba i-toro tendre ana auro ipi yaglambu kunogl gundumara ya god kimbi pre kaiya mokna ofa ere neimara igle suna ongwa.  
\v 21 Ye kunogl gundungwa mambuno i kindekondo nomane yake tenambedi pre na enge bagl te suglmo moglka, ba ye mambuno orkwa i kinde kondinakrukwa.  
\v 22 Ana yegl orkwa ipre ambumo i piyasi giugl pirkwa dumo mina endinaglka. Ana yomba ambumo i bogl kunogl gundo mambuno kinde erikwa i nomano yake tekrimbi ye ama giugl pond tenaglka.  
\v 23 Ye yombama ombugl sigoglmbo ana God yombama prapra pirkan eraglkwa, na yomba prapra nomano ya deno munduno mina kanpogl sungwa yagle moglmedi piraglkwa. Te ene suwara suwarandi mambuno sraglmere erimere i na topo pond bagl te ikine endinaglka.  
\v 24 Ba ene yomba tau Taiataira kamun meglkwa i ambumo ka kinde beke tongwa i ene erekre te ‘Satan mambunomo teke kaima pangwa,’ we dingwa i ene ta beke pirkrikwa. Ipre na yumbun tau-tau ta ene tekraglka.  
\v 25 Ana ene mambuno wakai erikwa i aimande akegidi wanmogl embi na unaglka.   
\p
\v 26 Yomba ta taragl kinde si-atne ende na ka dimere eremogl pi goran ana na yombutna teimbo ye yomba yungu ombuno ombuno mogl-eingwa i ye sutno morambuka.   
\q1
\v 27 ‘Ye ain muglmbo ake indre  
\q1 yomba sutno mogl te makansingala siderwagl erimere yegl  
\q1 yomba siderwagl erambuka.’\x + \xo 2:27 \xt Buk Song 2:9\x*  
\m Na yomba sutno moraglka pre Nina yombuglomo narmere yegl ye ombugl tenaglka.  
\v 28 Te kamun tanginagledi orko kugl-kuri de-de orkwa i na ama ye tenaglka.  
\v 29 Yomba ta kina panan ana Holi Spirit ka di God yombama wagle tongwa i pirpogl sinambuka.   
\c 3  
\s1 Ka muno bogl Sadis kamun God yombama yungu ombuno meglkwa i tongwa  
\p
\v 1 “Ka i pepa muno bogl Sadis kamun God yombama angelono moglkwa i to:  
\m Kamo i yegl: God Spiritmo 7 ya te kugl-kuri 7 ake moglkwa yagle ye ka yegl dungwa, “Ene mambuno kanekane etnga i na pirkan erika, te yomba kanigwa ene kor-motnga mereyegl etnga. Ba tamanga. Ene gogl kondinga.  
\v 2 Ene ugl panga kondo andiglo. Ene mambunon tau goragledi orkwa i erekun ere akegidi moglo. Sraglpre, kaniga ene mambuno tau etnga i na Godna ongumuglo mina kuno ta erekrukwa.  
\v 3 Ene okuna ka wakai beke tengwa ya pir inga ikra erme poglodi pirtre, duglo bogl ana tandaglme mina nomanen yake to. Ba ene ugl panga kondokre ana andiglkitn, na kunogl yomba mereyegl unaglka, ana na aunake ene motnara unaglka engemo i ene ta pirkan erekratnga.   
\p
\v 4 Ba ene yombanma kurita Sadis kamun meglkwa, ye gatno sideglmbi yeikre ana wakai meglkwa. Yeglpre ye gatno kruwo endimbi ana na bogl akiye wanamga kuno orkwa.  
\v 5 Ana yomba ta mambuno kinde engre atne ende giglendi moran ana yomba gagl kruwo endimere yegl ye teimbo endinambuka. Te ye kangiye kor aimande meglkwa pepa mina pangwa i na koko endekraglka. Ana Nina mambuglo mina ya te ye angelomo wagle mamburo mina ye kangiye na dipene endinaglka.  
\v 6 Yomba ta kina panan ana Holi Spirit ka di God yombama wagle tongwa i pirpogl sinambuka.   
\s1 Ka muno bogl Piladelpia kamun God yombama yungu ombuno meglkwa i tongwa  
\p
\v 7 “Ka i pepa muno bogl Piladelpia kamun God yombama angelono moglkwa i to.  
\m Kamo i yegl: Na holi kaima ya te ka kaima mambuno moglka. Na Devit kimo ake moglka, na konbo dra yauro endimbo ana yomba ta yonguglkrambuka, te na konbo dra yonguglmbo ana yomba ta yauro endekrambuka.  
\v 8 Ene taragl etnga i na pirka. Kano! Ene gumanomugl konbo dra yauro endiga audi yongwa i yomba ta yongugl getndikrambuka. Na pirkan erika ene yombutn kurita paimoglkwa. Ba na ka beke teimere ene sika sindre te na kangina ene di uglmange erekitnga.  
\v 9 Ene pro! Satan epiglma igle meglkwa i ye Juda yomba moune dingwa, ba ye Juda yomba kaima ta moglkrikwa, ye kakimbi yomba meglkwa. Na ere endimbo ye wu ene katn mina mangi dindre ana na ene kanwakai yeinga i ye kanpogl sinaglkwa.  
\v 10 Sraglpre, na kanna ene mina yongo ana yumbun mina engre atne ende kiendi wanmotnga. Ipre, ana makandle yomba erimbi kanagledi pre yumbun makan koglkoglo teimbo unambuka enge na ene sugl mogl teimbo wakai moratnga.   
\p
\v 11 Na tambre kana unaglka, ene taragl ta idiom i akegidi moglo. Yegl etn ana ekin bitno gagl ene topon pre yongwa i yomba ta i-dinaglmiwa.  
\v 12 Yomba ta yombuglo ere giglendi moran ana na ere endimbo ye yungu kauglange mereyegl Nina God holi yungumo mina suna andigl panambuka. Ye igle aimande mogl ana aglketa wu menda pikrambuka. Ana ye mina na Godna kangiye boraglka, te na Godna sitimo kangiye i ye mina ama boraglka. Sitimo i kangiye Jerusalem dumo kor. Dumomo kor i heven suna na Godna moglmara yei ende atne unambuka. Te na nana kangina kor ama ye mina boraglka.  
\v 13 Yomba ta kina panan ana Holi Spirit ka di God yombama tongwa i pirpogl sinambuka.   
\s1 Ka muno bogl Leodisia kamun God yombama yungu ombuno meglkwa i tongwa  
\p
\v 14 “Ene ka tau pepa muno bogl Leodisia kamun God yombama angelono moglkwa i to. Ye kamo i yegl: Ye eremogl God kamo pinande ere ana ka kaima ditongwa, ye mem mambuno bogl pango ana God taragl kanekane ere yongwa.  
\v 15 Ene kongun prapra etnga i na pirkan erika, i ene mambunon ta bi yeikrukwa te ninga dikrukwa. Na pirka ene biyei moratnga mo ningadi moratnga i pra iwe.  
\v 16 Ene ninga dikitnga te bi yeikitnga ba suna bange motnga. Yeglpre na drana mina ene eursi menda endinaglka.  
\v 17 Ene enene pre, na taragl merkinde painarko wakai mogltre ana taragl kanekane ta dokokriye dinga. Ba ene kinde kaima motnga pre yomba ene mitn goraglkwa. Sraglpre, ene kiuglgiunde kaima mogl te ongumutn kin yongo ana kungutn gatn ta paikruko yokoko motnga.\f + \fr 3:17 \ft Leodisia yomba ye yene ongumutno mina taragl merkinde pai norme dingwa, ba God ongumuglo mina ye kiuglgiunde kaima meglkwa. Ka Teke Pangwa 2:9 mina pangwa i kano.\f*  
\v 18 Yeglpre na ene diteinga, gol endi dongwa mina gagltenge eriko wu gol kaima ongwa i na mina topo sinatnga. Yegl etn ene taragl merkinde paitenan ana gagl kruwo topo indre nangin yoko yongo angai gotnga i ende simbi dinatnga. Te marasin wakai topo ertre ana ongumutn kirai bogltre ene kanpogl sinatnga.   
\p
\v 19 Yomba na kanwakai yeinga ye ka tendre te embriyeno kinde akedu ende teinga. Ipre ene embriyen kinde pre poglodi pirtre ana noman yake to.  
\v 20 Ene pro! Na yungu dra mina andigl mogl ana sigiu-giudi moglka. Ana yomba ta na nunguna embriye ye pirtre yungu dra yauro naran ana ye moglmara yungugl pi na kaiya mokna ye bogl neimbo, te ye na bogl ninambuka.   
\p
\v 21 Yomba ta mambuno kinde si-atne ende andigl giglendi moran ana na kanwinge erimbo na sia king botna mina akiye amedi morambuglka. Kuno yeglmere na ama kunda yombuglo erika pre ana erme Nina ekin sia kingmo mina amedi moglka.  
\v 22 Yomba ta kina panan ana Holi Spirit ka di God yombama tongwa i pirpogl sinambuka.”   
\c 4  
\s1 Heven suna God sia kingmo mina moglko dembiye siteingwa  
\p
\v 1 Taragl yegl dundungo, ana na kaniga heven imbo konbo dra ta yauro audi yongo ana nungo embriye ta komnaiye kana dungo na pirka, i biukul bendumere yeglkra aglkekor dungwa, “Ene ende egli ya wo, ana taragl okuwo plau dinambuka i na ombuno dimbo kanatnga.”  
\v 2 Ana tambre kana Holi Spirit na ake undi narko na kaniga heven sia king ta igle yongo ana yomba ta amedi moglkwa.\f + \fr 4:2 \ft Yagl ta king boglmo wakai mina amedi moglko ana Jon kangwa, i God moglkwa. Ba Jon eremogl God kangiye kaima daglkrukwa. Ana okuwo Ka Teke Pangwa 7:10 mina ka yegl pangwa, “God king boglmo wakai mina amedi mogl mogl orkwa.” Te Jon eremogl God yomba mereyegl moglme dikrukwa. Ba ye eremogl God pre, ambuglange kande ya te teikombukun kanekane di simboglkwa.\f*  
\v 3 Yomba sia king mina amedi moglkwa ikra ye ekinmo wakai i kombuglo jaspa ya konilian singigleno wakai yeglmere ye gumadra mina pango, ana teikombukun muno boglkwa i kombuglo emeral mereyegl ere sia king winambodi isuna endungwa.  
\v 4 Te sia king yomara igle ama sia 24 yei winambo digo ana yomba mina ende okuna eingwa yomba 24 igle amedi meglkwa, ye gagl olto kruwo ende pandigl te king bitno gagl gol mina bekingwa i bitno mina pango meglkwa.  
\v 5 Ana sia king mina ambuglangesi potndungo, te kamun gurgagla dindre gurgurdi ongwa. Ana sia king yomara gumamugl igle ken-lam 7 depangwa. Ken-lammo 7 i God yene Spiritmo.  
\v 6 Te sia king yomara gumamugl igle ombugl taragl ta yongwa, i mundi nigl kande glas mereyegl moglkwa ana kuglmuna kaima yei pesungwa.  
\p Te sia king yomara dumo igle taragl kor-meglkwa 4 mogl winambo dingwa. Ana ye gumanomugl ya te mokonomugl ongumutno pai kuno orkwa.  
\v 7 Ana taragl kor-meglkwa ikra mogl komuno endungwa i singigle agl-pusi kande kangiye laion mereyegl pangwa te ta bugla-kau kumugl mereyegl singigle pangwa, te ta gumadra yomba mereyegl pangwa, te ta kua-dua koiye pigladi omere yegl singigle pangwa.  
\v 8 Taragl 4 kor-meglkwa ikra suwara suwarandi koiyeno 6 paingwa. Ana nangino mina ongumutno merkinde pai kuno orko te koiyeno mina tembe ya atne akiye pangwa. Te ye ermine ya enduwer engenge ka yegl dingwa:  
\q1 “Holi, holi, holi,  
\q1 ye God Yaglkande Giglekui  
\q1 dungwa, ye okuna moglkwa,  
\q1 erme moglkwa, ana okuwo unambuka.”   
\m
\v 9 Yomba ta sia king mina amedi moglkwa i ye kor aimande aimande moglkwa. Ana ipre taragl 4 kor-meglkwa ye ambuglangemo dipene ende te kangiye kande tendre ana diwakai yei tengo,  
\v 10 ana mokomugl ende okuna eingwa yomba 24 ye eremogl kor aimande aimande moglkwa sia king mina amedi moglmara igle goglkuno bondugl ana dembiye karaugl ereteingwa. Ye king bitno gagl endingwa i gugl sia king yomara igle nongagle yendre ana yegl dingwa:   
\q1
\v 11 “No Yaglkandeno ya Godno  
\q1 motnga, ene kangin kande  
\q1 tendre te dembin sumga ya  
\q1 yombutn kande pangwa i ene  
\q1 inatnga kuno orkwa. Sraglpre,  
\q1 ene taragl prapra ereyei  
\q1 kondinga, ana enene pitnere  
\q1 mere taragl prapra ereyengo  
\q1 ana erme paimeglkwa.”   
\c 5  
\s1 Jon pepa ta akepere sipegl di pandiglkwa i yongo kangwa  
\p
\v 1 Ana yomba ta sia king mina amedi moglkwa ikra ye ongo wokra pepa diglmbi ta kaninga. Pepamo i mina muno koglkoglo beglkwa paingo ana uglo mina boma nuglo 7 ake dangesi sigigledi kondingwa.  
\v 2 Ana na kaniga angelo ta gigle dungwa ye ka kande yegl dinongugl endungwa, “Ira wakai kaima moran ana boma nuglo 7 i si anda bogl ende pepa i pigla dinambe?”  
\v 3 Ba heven suna mo makandle mo te makan atne yomba suwarata pepa i pigladi ana suna kanambuka kuno erekrukwa.  
\v 4 Ana yomba suwarata kuno eran ye pepa i pigla dindre ana suna i kanambuka pre dokingwa ba tamango ana na kai pond kaima erika.  
\v 5 Ba kongun yomba ende okuna eingwa 24 ikra suwarata yegl dinarkwa, “Ene kai erekre, kano! Juda yomba yunguno ombuno mina agl-pusi kande kangiye laion ta moglkwa. Ye King Devit gawamo kunda yombuglo orkwa. Ye boma nuglo 7 i si anda bogl ende ana pepa pigla dinambuka kuno orkwa.”   
\s1 Jon eremogl Sipsip Nangigle moglko kangwa  
\p
\v 6 Ana na kaniga sia king yomara igle taragl kor-meglkwa 4 ikra ya ende okuna eingwa yomba 24 mogl winambo dimara sunawom igle Sipsip Nangigle sigeglkwa mereyegl singigle pango andigl moglkwa. Ye bre yongagle 7 pango te ongumuglo 7 pangwa. Ana 7 i God Holi Spiritmo, ye diendungo endpi makan koglkoglo eingwa.  
\v 7 Te Sipsip Nangigle undre ana yomba ta sia king mina amedi moglmara pepa perkwa ongo wokra yongwa ikra ingwa.  
\v 8 Ana pepa i perkwa ake yungo, taragl kor-meglkwa 4 ikra ya yomba mina ende okuna eingwa yomba 24, ye Sipsip Nangigle moglmara gumamugl mangidi te meglkwa. Ana ye suwara suwarandi onguno mina gita mereyegl ya te gol mina dis bekingwa i endi inge demine wakai orkwa suna kausi moglko ye ake meglkwa. Ana inge demine orkwa i God yombamo du-wakai wagle ye kamangeno.  
\v 9 Ye giglange kor ta yegl dingwa,  
\q1 “Ene pepa perkwa i indre  
\q1 ana boma nuglo dangingwa  
\q1 i si anda boratnga kuno  
\q1 orkwa. Sraglpre, ene sigeglko  
\q1 ana bormain mina epigl  
\q1 kanekane ya ka kanekane  
\q1 dingwa ya te yomba nangino  
\q1 kanekane pangwa dumo  
\q1 koglkoglo meglkwa i ene topo  
\q1 ere i-ikine God mina endinga.   
\q1
\v 10 Ana ene etngo ye king  
\q1 yungumo ombuno ta mogltre  
\q1 te no Godno prismo mogl.  
\q1 Ye makandle yomba sutno  
\q1 mogl ana God kongunmo erikwa.”   
\s1 Sipsip Nangigle kangiye dembiyesi mitna imbo endingwa  
\p
\v 11 Na aglke kanigo ana angelo merkinde kaima ka digo nunguno embriye pirka. Ye nambano tausen tausen mogl ende mitna pi ana andret milion meglkwa. Ye mogl winambodi ana sia king ya taragl kor-meglkwa 4 ikra ya te yomba mina ende okuna eingwa 24 ikra isuna endingwa.  
\v 12 Ye ka kande di giglange yegl dingwa:  
\q1 “Sipsip Nangigle okuna  
\q1 sigeglkwa. Ye kangiye kande  
\q1 ya taragl wakai kanekane ya  
\q1 nomane wakai ya te  
\q1 yombuglomo inambuka kuno  
\q1 orkwa. Ana yomba prapra ye  
\q1 kangiye ake mitna imbo ende  
\q1 gunyei tendre ana dembiye si tenaglkwa.”   
\p
\v 13 Ana taragl kanekane heven suna meglkwa ya makan bolamugl te makan atnekra meglkwa ya mundi nigl bolamugl ya te atnekra mogl-eingwa te taragl prapra koglkoglo mogl-eingwa ye giglange yegl digo na pirka:  
\q1 “God sia kingmo mina amedi  
\q1 moglkwa, te Sipsip Nangigle  
\q1 akiye, dembinosi ya kangino  
\q1 kande ya ambuglange te  
\q1 yombuglo giglendi prapra, ye  
\q1 mina aimande aimande pai enambuka.”   
\p
\v 14 Te taragl kor-meglkwa 4 ikra yegl dingwa, “I kaima” Ana ende okuna eingwa yomba ye mangidi goglkuno bondugl dembiye karaugl ere tengwa.   
\c 6  
\s1 Sipsip Nangigle boma nuglo 7 prapra akepogl endungwa  
\p
\v 1 Okuwo na kaniga Sipsip Nangigle boma nuglo 7 pepa mina sidangingwa ikra komnaiye pangwa ye akepogl endungwa. Ana taragl 4 kor-meglkwa suwarata kamo nungo embriye na pirka kamun gurgagla dumere yegl orko dungwa, “Endwo!”  
\v 2 Dungo na kaniga bugla-hos kruwo ta moglkwa, ana moko bolamugl yomba ta kimbir ake amedi moglkwa. Ana kunda yombuglo erekondingwa ekin bitno gagl ta pandigl tongo ana ye kunda yombuglo erikwa mereyegl ere bugla-hos bogl ende menda pi ana kunda merkinde yombuglo orkwa, te okuwo ye ombugl kunda merkinde yombuglo erambuka.   
\p
\v 3 Ana Sipsip Nangigle ye boma nuglo namba 2 akepogl endungo ana taragl 4 kor-meglkwa namba 2 yegl dungo na pirka, “Endwo!”  
\v 4 Dungo bugla-hos gogl mundu ende menda ungwa. Ana yomba bolamugl amedi moglkwa, ye makandle yomba enge wakai meglkwa ikorugl endinan yomba yene ikine ikine kunda bogl goraglkwa pre yombuglo tengwa, te dikumba prak kande ta ama tengwa.   
\p
\v 5 Ana Sipsip Nangigle ye boma nuglo namba 3 akepogl endungo taragl 4 kor-meglkwa namba 3 yegl dungo na pirka, “Endwo!” Ana na kanmoglko bugla-hos kama ta moglkwa. Ana moko bolamugl yomba ta amedi mogl ye sikel ake moglkwa.  
\v 6 Ana taragl 4 kor-meglkwa ye mina pukamugl yomba nunguno embriye mereyegl ta unongugl pi yegl dungo pirka, “Ene wit yumbusi singala suwarata endimin topomo,\f + \fr 6:6 \ft Yomba eremogl wit, ya te rais-bali moni bogl ina pre, okuna kana sikel wendigltre ana okuwo yomba teingo topo erikwa. Yeglpre, yagl ta bugla-hos mina amedi moglkwa i sikel suwarata ake moglkwa.\f* i ande enge suwara kongun ere topo imere yegl. Te bali yumbusi singala suwota endimin topomo, i ama ande enge suwara kongun ere topo imere yegl. Ba olip nuglo ya wain ene erekinde erekro!”   
\p
\v 7 Ana Sipsip Nangigle ye boma nuglo namba 4 akepogl endungo ana taragl 4 kor-meglkwa ikra namba 4 ombugl yegl dungo na pirka, “Endwo!”  
\v 8 Dungo bugla-hos gaglkine ta moglko kaniga. Yomba bolamugl amedi moglkwa ye kangiye, “Geglkwa”, te “Geglkwa Dumo” ye umara mokomugl magl wora ungwa. Ana ye yombutno tengo imbrika, i yomba uglomugl meglkwa yumbusi epigl 4 ende ana epigl suwarata dikumba prak mina bogl geglmbi te kindan mina ya kinde kanekane mina ya te makandle dua-kambu are mina ye ere sigorambrika.   
\p
\v 9 Ana Sipsip Nangigle ye boma nuglo namba 5 akepogl endungo ana na kaniga yomba tau God kamo ake gidindre te dipene endingwa pre yaglkumba sigeglkwa. Ikra kuiyano alta mina atnekra meglkwa.  
\v 10 Ye ka kande dindre aglendi yegl dingwa, “Yaglkande, ene giglekuidi mogl ana holi ya ka kaima mambuno motnga. Ene enge sramuna endinan ana yomba kot eretendre te no sigeglkwa ikra ene topo te ikine endinatne?”  
\v 11 Ye yegl digo ana gagl kruwo suwara suwarandi ye tendre yegl ditongwa, “Ene enge kurita olto dagl sugl kanmeglmbi ana yaglkumba eremogl ene sigeglmere yeglkra ama ene kongun akiye erikwa ya te angro tau sigeglmbi namba God prumere kuno eran ana ene bormaino toidumara i God yumbun te ikine endinambuka.”   
\p
\v 12 Ana Sipsip Nangigle ye boma nuglo dangingwa namba 6 akepogl endungo na taragl yegl kaniga: Imem pond ungo te ande ake kama-si gagl alap kama mereyegl orko te ba ake gogl kaima ere wu bormai mereyegl ongwa.  
\v 13 Te ir iwanga pond mange koiye yei wu endi kogla sungo mongo dekrukwa yangimere yegl ana kugl-kuri kamun mitna pai eingwa i yei yange makan mina singwa.  
\v 14 Kamkua eremogl kungugl gagl ake pemasimere yegl ere wu taya ongo te makan muglo prapra ya te ailan prapra ye angaino kondo ende wu eglke eingwa.   
\p
\v 15 Taragl yegl unongugl ongo ana makan koglkoglo king prapra ya te yomba kangino kande pangwa ya te kimbirnem yomba kande prapra ya, te taragl paitongwa yomba ya te yomba gigle dingwa ya te yomba topo ikre nigl-kongun yoko erikwa ya te yomba yoko meglkwa, ye prapra teke pi kombuglo mur mina ya makan muglo kombuglo pukamugl teke paingwa.  
\v 16 Ye paimogltre yegl di makan muglo ya kombuglo tengwa, “Ene yange no mounara sindre no simbre eriyo. Ana yomba sia king mina amedi moglkwa i no kankran te Sipsip Nangigle dem kumbrukwa i no mina ukrambuka.  
\v 17 Sraglpre, ye deno kumbruko yumbun tenambrika enge kande ikra magl orkwa, ipre yomba ira andigl giglendi morambe?”   
\c 7  
\s1 Israel yomba 144,000 God munomo pandigl tongwa  
\p
\v 1 Taragl yegl erekondungo ana okuwo na kaniga angelo 4 ye makan uglomugl ande umara ya beimara te nigl bre beiye andigl mogl, ana makan koglkoglo irmo 4 i eremogl makandle ya mundi nigl te endi mina ir mangekrambedi ake gidi meglkwa.  
\v 2 Ana na kaniga ande umara angelo ta ende egli ungwa. Ye eremogl God kor aimande moglkwa muno pandigl tongwa taragl ake mogl ana angelo 4 ye makan ya mundi nigl erekinde eraglmedi yombuglo tongwa ikra ye agle kande ditendre,  
\v 3 yegl dungwa, “Ene makan ya mundi nigl te endi prapra erekinde erekriyo ana nono God nigl-kongunmo yomba mamburo wagle muno si eglyei tomun ana okuwo ene taragl i prapra erekinde eraglkwa.”  
\v 4 Ana Israel yungu ombuno prapra mina yomba God munomo pandigl tongwa i namba digo na pirka 144,000.   
\q1
\v 5 Juda yungumo ombuno mina  
\q1 yomba 12,000 God munomo pandigl tongwa,  
\q1 te Ruben yungumo ombuno mina 12,000,  
\q1 te Gat yungumo ombuno  
\q2 mina 12,000,   
\q1
\v 6 te Aser yungumo ombuno mina 12,000,  
\q1 te Naptali yungumo ombuno mina 12,000,  
\q1 te Manase yungumo ombuno mina 12,000,   
\q1
\v 7 te Simeon yungumo ombuno mina 12,000,  
\q1 te Levai yungumo ombuno mina 12,000,  
\q1 te Isaka yungumo ombuno mina 12,000,   
\q1
\v 8 te Sebulun yungumo ombuno mina 12,000,  
\q1 te Josep yungumo ombuno mina 12,000,  
\q1 te Bensamin yungumo ombuno mina 12,000.   
\s1 Yaglambu merkinde kaima gagl kruwo ende God dembiye site meglkwa  
\p
\v 9 Taragl i dundungo okuwo na kaniga yomba merkinde kaima meglkwa. Ana yomba suwarata kere kuno erambuka manga, i dumo makan koglkoglo yomba wingwa, yungu ombuno kanekane ya yomba nangino kanekane pangwa ya te ka kanekane dingwa undre ana sia king ya Sipsip Nangigle gumanomugl andigl meglkwa. Ye gagl kruwo olto ende pandigl ana endi palm yongagle yaundo pango ake meglkwa.  
\v 10 Ye ka kande di yegl dingwa:  
\q1 “Nono Godno ye sia king  
\q1 mina amedi moglkwa ya te  
\q1 Sipsip Nangigle ye nono ereimbriko nono wakai mounga.”   
\m
\v 11 Ana sia king yomara i ya yomba mina ende okuna eingwa ya te taragl 4 kor-meglkwa ikra meglmara igle ana angelo prapra andigl mogl winambodi isuna endingwa. Ana ye prapra sia king yomara gumamugl goglkuno bondugl God dembiye karaugl ere tendre,  
\v 12 yegl dingwa:  
\q1 “I kaima! No Godno dembiye  
\q1 sindre ana kangiye kande  
\q1 dipene endinamga! Ye  
\q1 nomanemo wakai kaima  
\q1 pangwa, ye diwakai yei  
\q1 tenamga, te ye kangiye  
\q1 dembiyesi mitna imbo  
\q1 endinamga! Ye yombuglomo  
\q1 kande kaima pangwa! Te  
\q1 yombuglo gigle dungwa i  
\q1 prapra ye mina pangwa! I  
\q1 prapra God mina aimande  
\q1 aimande panambuka! I kaima!”   
\s1 Yomba epigl i giuglno erme dundungwa  
\p
\v 13 Ana yomba mina ende okuna eingwa yomba ikra suwarata krapogl narkwa, “Yomba gagl kruwo olto ende meglkwa i ye irane? Te ye dumo aglokra wime?”   
\p
\v 14 Ana na ka yegl di ikine endiga, “Yagl kande, i ene pirkan etnga.”  
\p Ana ye yegl di narkwa, “Yomba i kunda ikine onguno mina ye pigle goglne wanmogl wingwa, te ye gatno suna Sipsip Nangigle bormaimo mina nigl keglko wu kruwo kaima ongwa.   
\p
\v 15 Ipre,  
\q1 “God siamo king mina  
\q1 gumamugl andigl mogltre ana  
\q1 ermine ya enduwer God holi  
\q1 yungumo mina dembiye  
\q1 karaugl ertre meglkwa. Yegl  
\q1 eriko ana sia king mina amedi  
\q1 moglkwa ikra ye bogl akiye  
\q1 meglmbi ana sutno wakai mogl tenambuka.   
\q1
\v 16 Ye aglketa kindan goglkre  
\q1 te nigl pre aglke ta goglkraglkwa. Ana ande sinan ye  
\q1 ta de giu goglkraglkwa, te  
\q1 taragl kanekane ta eran  
\q1 nangino mina ninga dikrambuka.   
\q1
\v 17 Sraglpre, Sipsip Nangigle,  
\q1 God siamo king mina sunawom amedi mogl ana yomba i  
\q1 ye sutno wakai mogltre ana  
\q1 auro ipi niglkor aimande  
\q1 yange pamara suna igle  
\q1 enambuka. Te ye ongumutno  
\q1 mina kai nuglo prapra i God  
\q1 koko ende tenambuka.”   
\c 8  
\s1 Sipsip Nangigle ye boma nuglo namba 7 akepogl endungwa  
\p
\v 1 Ana Sipsip Nangigle boma nuglo 7 pepa ake perkwa mina sidangingwa ikra akepogl endungo ana heven suna taragl suwarata kugla dikriko te ka ta dikriko kiendi yongo ande kuiya hap-awa orkwa.   
\p
\v 2 Ana okuwo na kaniga angelo 7 wagle God moglmara nongagle andigl meglkwa ikra biukul 7 teingo ye ingwa.   
\p
\v 3 Ana angelo suwarata wu alta mina andigl moglkwa. Ye alta pletmo gol mina bekingwa i ake mogl ana ofa garan inge demine wakai erambuka pre paura merkinde teingwa, te God yomba du-wakai meglkwa kamangeno i akiye i-suwara ende ana sia king yomara gumamugl igle alta gol mina bekingwa yongwa i mina ofa gagl tenambuka.  
\v 4 Ana angelo ikra ofa gaglko inge demine wakai ya te God yomba du-wakai meglkwa kamangeno i prapra angelo ongo mina kondo ana endi eglke God gumamugl moglmara ongwa.  
\v 5 Ana angelo eremogl inge demine orkwa plet gol i indre ana alta mina ofa gaglkwa nir singre indre plet gol mina sikau sindre toindi makandle endungo ana kamuntai sungo te gurgagla kande dungo te kamun mina sipotndi poriya sungo ana makandle imem pond kaima ungwa.   
\s1 Angelo 4 ye biukul bu dingwa  
\p
\v 6 Ana angelo 7, biukul 7 ingwa ikra bu dinamunedi akekun erikwa.   
\p
\v 7 Yegl eriko ana angelo namba 1 biukulmo bendungo ana kamun araglmongo ya endi donga bormai bogl sikugl endungwa ana yange makandle, sungwa. Ana makan ombuno suwota mina igle ombuno suwarata donga detenge orkwa, te endi ombuno suwota mina igle ombuno suwarata detenge orko ana kugl-kan ama prapra de kondungwa.   
\p
\v 8 Ana angelo namba 2 biukulmo bendungo ana taragl kande ta makan meglmbe mereyegl donga de bauglo ere pango piyasi mundi nigl suna endingwa. Ana mundi nigl ombuno suwota mina igle ombuno suwarata wu bormai kogl ongwa.  
\v 9 Te mundi nigl taragl kor-meglkwa kanekane ombuno suwota mina igle ombuno suwarata gogl kondingwa. Te sip ombuno suwota mina igle ombuno suwarata kinde erekondungwa.   
\p
\v 10 Ana angelo namba 3 biukulmo bendungo ana kugl-kuri kande ta ken-lam mereyegl depangwa, heven imbo kondo uglusi nigl kande ombuno suwota mina igle suwarata ya te nigl ongo boglmara ombuno suwota mina igle ombuno suwarata mina yange bolamugl sungwa.  
\v 11 Kugl-kuri ikra kangiye, “Geu kinde”. Ipre nigl ombuno suwota mina igle suwarata giu kinde orkwa. Yomba merkinde niglmo i nendre ye geglkwa. Sraglpre, nigl i giu kinde kaima orkwa.   
\p
\v 12 Ana angelo namba 4 biukulmo bendungo ana ande ya ba ya te kugl-kuri ombunono suwota mina igle ombuno suwara suwarandi ambuglangeno gongugl mangigl orkwa, te ande enge suwara mina ombunono suwota igle ombuno suwarata ambuglangeno gongungwa, te enduwer kugl-kuri ama yegl orkwa.   
\p
\v 13 Na sragl i kanmogltre ana pirka kua keglmba ta kamun mitna wau yomara pur-di wopindre ka binan bogl yegl dungwa, “Yumbun kande pana orkwa, yumbun pana orkwa! Yaglambu makandle meglkwa ene mitno golo. Sraglpre, angelo suwota biukulno bendinamnedi erikwa ye bu dimbi ana yaglambu yumbun pond kaima inaglkwa!”   
\c 9  
\s1 Angelo namba 5 biukulmo bu dungwa  
\p
\v 1 Angelo namba 5 biukulmo bendungo ana kugl-kuri ta heven suna imbo yei yange makan mina sungo na kaniga. Ana maugl yei ende atne kaima ongo beiye paikrukwa kimo teingo kugl-kuri i ake moglkwa.  
\v 2 Ana kugl-kuri ikra maugl beiye paikrukwa dra yauro endungo ana ende inge kombuglo gaiglko inge pond kumbuyambsi umere yegl murmaugl mina ende egli wu ana ande ya kamun kua si yokungo akemim orkwa.  
\v 3 Te endi inge mina mongondo wu menda pi ende atne makandle wingwa. Ana ye yomburo giglendi, i makandle toki gaimbande yombuglomo pamere yegl tongwa.  
\v 4 Te ka giglendi yegl di mongondo tengwa, “Ene kugl-kan ya taragl kanekane makan mina paingwa i mo endi ta erekinde erekraglkwa. Ba yomba mamburo wagle God munomo egli ta paikrambuka i keunde ene erekinde eretenaglkwa.”  
\v 5 Ye yomba sigoraglkwa yomburo tekrukwa. Ba ye giugl keunde kaglimbi ba 5 erambuka. Ana mongondo wagle ende perepere pindre ditomere ere giu kinde kaima yomba teingwa. Te ye giugl kaglkwa i toki gaimbande giugl kaglko pirmere yegl kuno orkwa.  
\v 6 Yegl erimbi enge igle yomba goramnedi konbauna dokinaglkwa, ba geglkwa konbaunamo i ta yenan kankraglkwa. Te ye goraglkwa i wakai kaima piraglkwa, ba geglkwa mambuno i ye mina teke ende eglke enambuka.   
\p
\v 7 Te na kaniga mongondo i singigle bugla-hos kunda mina enaglmedi pre akekun ere endigo meglmere yegl ere meglkwa. Ana mongondomo i bitno mina king bre gagl gol pagl bekingwa mereyegl ende pandigl meglkwa. Te ye gumano drano yomba pamere yegl kuno pangwa.  
\v 8 Ana mongondomo i bitno yungo ambu bitno yungo oltokuri sumere yegl kuno sungwa. Te singino agl-pusi kande kangiye laion singiye pamere yegl kuno pangwa.  
\v 9 Ye piutno mina ain awagle mereyegl gaglsuna endigo pangwa. Te koiyeno mina tama tama singwa i bugla-hos merkinde bugla-hos-kar gundo indre kunda pamara suna eingo koinge sumere yegl sungwa.  
\v 10 Te ye deno-yagle mina kangigle yaglkwa, i toki gaimbande dem-yagle pamere yegl kuno paingwa. Ana deno-yagle mina igle yomba erekinde eretenaglkwa i ba 5 keunde eraglkwa.  
\v 11 Ana ye kingno ta moglkwa i angelo ta murmaugl beiye paikrukwa sugl moglkwa. Hibru kanno mina ye kangiye “Abadon,” te Grik kanno mina kangiye “Apolion,” nono kanno mina ye kangiye i mambunomo yegl, “Taragl prapra erekinde kaima orkwa yagle.”   
\p
\v 12 Ana yumbun komuno suwarata pangwa ikra dundungwa, ba yumbun suwo paimiurka ye okuwo plau dinambrika.   
\s1 Angelo namba 6 biukulmo bu dungwa  
\p
\v 13 Angelo namba 6 biukulmo bendungo, ana God mambuglo mina nongagle alta gol pagl bekingwa yomara igle geke yongwa 4 yomara, ana sipsip bre yongagle 4 pamara suna i nungo embriye ta dungo na pirka.  
\v 14 Ana nungo embriye i yegl di angelo namba 6 biukul ake moglkwa ikra tongwa, “Angelo 4 ye nigl kande Yufretis womara kane paimeglkwa i ene poko endo.”  
\v 15 Ye ka i pirtre, ana angelo 4 wagle ikra kane poko ende tongwa. Ana angelo 4 i pindre yomba kindaginde yumbusi ombuno suwota endindre, ana ombuno suwarata mina igle yomba prapra sigoraglkwa pre yegl erikwa. Ana angelomo 4 ye ande enge ya ande kuiya ya ba ya te buglayungu aunake engemo i plau dinambedi pre akekun eremeglkwa.  
\v 16 Ana kimbirnem wagle bugla-hos ausi meglkwa, i ye nambano 200 milion we digo na pirka.   
\p
\v 17 Ana na ongumutna-mugl ta yegl orko kaniga, bugla-hos ya te yomba bugla-hos bolamugl ausi meglkwa. Ye piutno mina ain awagle pangwa i ekinmo endi dongwa bauglo mereyegl gogl orkwa, te kum endungwa, i gamba moro endungwa mereyegl, te ake kilen endungwa i kombuglo salpa mereyegl. Te bugla-hos bitno mina agl-pusi kande kangiye laion bitno mereyegl, te drano mina endi dongwa bauglo ya endi inge ya kombuglo salpa de bauglo gogl ormere yegl ere ende menda wu pangwa.  
\v 18 Ana yomba kindaginde yumbusi ombuno suwota endingwa ikra suwarata mina taragl kinde suwota ninga dungwa ikra yomba prapra sigeglkwa. Taraglmo i endi dongwa ya endi inge ya te kombuglo salpa de bauglo orkwa i bugla-hos drano mina ende menda ungwa.  
\v 19 Ana buglamo bugla-hos yomburo giglendi pangwa i drano mina ya te deno-yagle mina pangwa. Ye yagleno toki mereyegl pamara igle bitno pangwa. Ana ye bitno i mina yomba si kinde kaima erikwa.   
\p
\v 20 Ana yomba tau taragl kinde suwota eremogl ye sigoglkrikwa ikra ye taragl onguno pagl bekingwa i kinde kondokrikwa. Te spirit kinde dembiye karaugl eretengwa i ama kondokre te nomane yake tekre ana god kimbi kuiyano gol mina ya silva ya bras ya kombuglo ya te endi mina bekingwa. Taraglmo i ongumutno kankre, kinano ka pirkre te konbauna wu ikine-ikine pikrikwa.  
\v 21 Yombamo ye yomba sigogltre, giglgiyai ertre te yagl ambu kunogl gundo te kunogl gogl neingwa mambuno i nomane yakete kinde kondokrikwa.   
\c 10  
\s1 Angelo diglmbi pepa kembra ta tongo Jon i-nongwa  
\p
\v 1 Ana angelo yombuglo kaima orkwa ta heven imbo kondo ende atne ungo kaniga. Ye kamun kua gaglsuna olto mereyegl werikwa, te ye bre mina teikombukun bogl pangwa. Ana ye gumadra mina ande mereyegl ambuglange sungwa, te kagle koglkoglo endi dongwa de bauglo ormere yegl orkwa.  
\v 2 Ana angelomo i buk kembra ta ake moglkwa. Ana bukmo i pogl endigo ongo mina yongwa. Te kagle koglo wokra pangwa i mundi nigl bolamugl engre mogltre, te kagle koglo kondakra makan engre moglkwa.  
\v 3 Ana ye kaglkane binan bogl agl-pusi kande kangiye laion kagladi endumere yegl endungo, kamun gurgur dungwa 7 ka dindre, dingwa.  
\v 4 Ana kamun gurgagla 7 ka digo pirtre, na kamo dingwa i muno boragledi erika, ba heven imbo ka ta yegl atne ungwa, “Kamun gurgagla 7 ka dingwa i ene noman mina keunde pitn panan pepa mina muno bogl suna endekro.”   
\p
\v 5 Ana okuna angelo ta mundi nigl ya te makan engre andigl moglko kaniga ikra ye ongo wokra buglosi heven imbo ende dungwa.  
\v 6 Ana ye eremogl God kor aimande yene moglkwa kangiye mina ka giglendi dungwa. Ye heven beke yei te taragl prapra heven paingwa i beke yongwa. Te makan beke yei te taragl prapra makan mina paingwa i beke yongwa. Te mundi nigl beke yei te taragl prapra suna pangwa i ama beke yongwa. Ana angelo yegl dungwa, “Enge dundinambuka magl orkwa, ipre sugl kordagl ta kan moglkrambuka.  
\v 7 Ana angelo namba 7 biukulmo bendinan piraglkwa enge igle God taraglmo uglmange ere pangwa i kaima kongunmo ere, poriya sinambuka. Te God kamo i okuna kana nigl kongunmo yomba propet wagle ka-dem dite kondigo pirkan ere meglkura i kaima pai inambuka.”   
\p
\v 8 Ana okuna heven suna yomba ta nungo embriye menda ungo pirka ikra aglke kordagl wu yegl dinarkwa, “Ene endpi angelo ta mundi nigl ya makan engre andigl mogltre, ana buk kembra ta ongo mina ake pigladi moglkwa i ene pi yo.”   
\p
\v 9 Yegl dungo na ende magl angelo moglmara pindre ana buk kembra ikra narambedi pre krapogl teinga, ana ye yegl di ikine ende narkwa, “Ene indre drangesi no. Nemin den mundun mina suna geu erambuka. Ba dran mina brume nuglo mereyegl dongun erambuka.”  
\v 10 Yegl dungo na buk ye ongo mina indre drangesi neinga. Neingo na drana mina suna brume nuglo mereyegl dongun orkwa, ba ne guro eriko dana mina suna geu orkwa.  
\v 11 Ana ka yegl dinarkwa, “Ene God kamo propet i yomba koglkoglo mogl-eingwa ya te yomba yungu ombuno ombuno ya te yomba kanno perepere pangwa ya te king merkinde i aglke kordagl kamo propet i ditenatnga.”   
\c 11  
\s1 Yagl suwo kamambuno dimbrika  
\p
\v 1 Ana muglmbo mereyegl ende buglo siye ta nartre, yegl di narkwa, “Andigl pi God holi yungumo mina buglo siye yendre, te alta ama buglo siye yei, te yomba yungugl God dembiye karaugl ere meglkwa i kere nambano inatnga.  
\v 2 Ba ene God holi yungumo togl suna kra yomba makaisi-si erimara igle ene buglo siye ta yeikro.\f + \fr 11:2 \ft Ka i Aposel 21:30 mina kano.\f* Sraglpre, dumo igle Yomba Bina dumono yongwa. Ana yombamo i undre siti holi engre gidi mogl ba 42 yenambuka.\f + \fr 11:2 \ft Ana ba 42 i ande enge 1,260 te buglayungu suwota ya te ta ikine kuno orkwa. Daniel 7:25 ya 9:27 ya te 12:7 mina kano. Te bangeta yomba wu Jerusalem engre moraglme dungwa i, Luk 21:24 mina kano.\f*  
\v 3 Ana na kanna dinongugl endimbrika yagl suwo na yombura teimbo ye werai gagl ende pandigl, ana ande enge 1,260 na kanna dinongugl ende wanmorambrika.”  
\v 4 Yagl suwo i endi olip endiye suwo ya te ken-lam suwo botno pamere yeglmere makan koglkoglo sugl moglkwa Yaglkande guma mina nongagle andigl pambrika.\f + \fr 11:4 \ft Sekaraia 4:1-5 ya te 4:10-14 te Ka Teke Pangwa 1:12 i mina kano.\f*  
\v 5 Yomba ta yagl suwo i erekinde eretenamnedi erimbi ana ye drano mina endi donga menda undre kundano ikine i gagltenge erambuka. Yomba ta yagl suwo erekinde eretenagledi erambuka ana mambuno yegl mina goraglkwa.  
\v 6 Yagl suwo i yomburo kuno orkwa pre kamun kua siget-dinambrika. Yegl ertre ye God kamo dimorambrika enge i kamun sikrambuka. Te ye yomburo kuno orkwa pre nigl prapra i-yake tembir wu bormai kogl enaglkwa. Te yene taragl kinde kanekane makan mina ta erambugledi pirambrere i ertre ana yomba erekinde erambrika.   
\p
\v 7 Ana yagl suwo ikra God kamo di kondimbir, ana kambu are ta maugl beiye paikrumara ende menda undre ana ye kunda bogl tendre, te kunda yombuglo ere, ana yagl suwo sigorambuka.  
\v 8 Ye geur nangino briye siti kande konbaunanmo mina suna igle yenambirka. Ana nono ka di simbogl yegl dumga i Sodom ya Isip igle Yaglkandeno ama endi-prak mina sigeglkwa.  
\v 9 Ana ande enge suwota ya te ta ikine yomba nangino kanekane pangwa ya te yungu ombuno ombuno ya te ka kanekane dingwa, te makan koglkoglo yomba prapra yagl suwo i nangino briye kanaglkwa ba ta boglo ere ipi maugl siyo dikraglkwa.  
\v 10 Ana yagl suwo geur makandle koglkoglo yagl ambu prapra gun pond yei, ama munduno argan pre taragl te imboriya endinaglkwa. Sraglpre, propet suwo i giu pond kaima makandle yagl ambu tembrika.   
\p
\v 11 Ande enge suwota ya te ta ikine i dundungo, ana God kor-meglkwa ir diendungo ende yagl suwo mina suna ongo ye ukor pi andiurka, ana yomba merkinde ye kandre kundugl pond kaima geglkwa.  
\v 12 Ana heven suna yomba nungo embriye binan bogl yegl di yagl suwo i tongo pirmbrika, “Ene suwo ende koglo ya wiro.” Dungo yagl suwo andigl ende kamun kua mina suna pindre ende heven suna embriko, ana kundano ikine wakai ere kanmeglkwa.   
\p
\v 13 Enge igle keunde imem kande ungo ana siti kande ombuno 10 meglkwa ana ombuno suwarata yange siderwagl baruwagl ertre, te yomba 7 tausen imem i mina sigoglkwa. Ana tau kor-meglkwa kuiyano taya ongo God heven Nem kangiye di mitna imbo kaima endingwa.   
\p
\v 14 Yumbun kande namba 2 ikra dundungwa ba pro, enge kurita mogl yumbun namba 3 unongugl enambuka.   
\s1 Angelo namba 7 biukulmo bu dungwa  
\p
\v 15 Ana angelo namba 7 biukulmo bendungo, heven imbo tau nunguno embriye binan bogl yegl dungwa:  
\q1 “Yaglkande God ya te  
\q1 ye Kraismo\f + \fr 11:15 \ft “Yagl i God yombama ere-inambuka pre pinde yungwa.” Grik yomba kanno mina kangiye yegl: “Krais.”\f* bogl makan  
\q1 koglkoglo yei-ongwa i ye king  
\q1 miurkura. Ana Yaglkande king  
\q1 aimande aimande morambuka.”   
\p
\v 16 Te 24 yomba mina ende okuna eingwa botno mina amedi God guma wagle nongagle meglkwa ye botno kondo goglkuno bondugl mangi dindre, ana God dembiye karaugl erete yegl dingwa:   
\q1
\v 17 “Yaglkande God ene  
\q1 kaima giglekuidi motnga, ene  
\q1 erme motnga te okuna ama  
\q1 mogl unga, ana ene yombutn  
\q1 kande indre, te king motnga.  
\q1 Ipre no ene diwakai yeitomga.   
\q1
\v 18 Ana makan yomba deno  
\q1 kumbruko te ene ama den  
\q1 kumbratnga enge i plau  
\q1 dikondungwa, erme yomba  
\q1 geglkwa yumbu sindre, ana  
\q1 ene nitn kongun yomba  
\q1 propet wagle topo te ikine  
\q1 endinatnga. Te ene yombanma du-yene ya te yomba ene  
\q1 kundutn gogl atnekra  
\q1 meglkwa yomba kembra ya  
\q1 kande akiye, erme ene topo  
\q1 te ikine endinatnga enge  
\q1 yongwa. Te makan erekinde  
\q1 erikwa yomba i ye ama  
\q1 erekinde eretenambuka!”   
\p
\v 19 Yeglpre yomba mina ende okuna engwa ka dikondigo, ana God holi yungumo heven suna yongwa i dra yauro yongo, ana yungugl kra sunawom kaima ire God bokis kontrakmo nongugl yombuglo yongo kanigwa. Ana igle kamun kua sipotndi ambuglangesi koglkoglo endungo, ana kamun gurgagla kande di kamuntai sungo, te makan imem pond ungo, ana kamun araglmongo pond kaima sungwa.   
\c 12  
\s1 Ambu ya te toki kande dragon  
\p
\v 1 Ana heven suna diu kande ta wu pene ongwa. Igle ambu ta moglko ana ande ye gaglmo suna mereyegl endungwa te ba ye kagle mina atnekra pangwa. Te bre mina kugl-kuri 12 ekin bre gagl wakai kaima mereyegl ende moglkwa.  
\v 2 Ambumo gak dane pangwa. Te gak kugl yenambuka engemo yongo, ana ye giugl pir kai kaglkane pond orkwa.  
\v 3 Yegl eremoglko ana heven suna diu ta ama plau dungwa, i yegl: Toki dragon gogl mundu ta bre 7 pango, te bre yongagle 10 pangwa. Ana bre 7 mina ikra king bitno gagl prapra pangwa.  
\v 4 Toki dragon yagle mina kugl-kuri kamun mitna pangwa i epigl suwarata kuro endungo yange makan mina sungwa. Te kugl-kuri epigl suwo yoko pai meglkwa. Ana tokimo ikra ambu gak kuragledi eremoglmara igle gakmo kuran ana sigogl ninagledi pre ambu guma mina andigl sugl kan moglkwa.  
\v 5 Ana ambumo wam kugl yongwa. Gakmo i okuwo ain muglmbo ake mogltre ana makan koglkoglo yomba mogl-eingwa i sutno morambuka. Ba ambumo wam i tambre kana i-egli God moglmara ya sia kingmo mina eingwa.  
\v 6 Te ambumo teke ende makan waule ta God akekun ereyei tomara igle ongwa. Dumo igle ambumo suglmo wakai eremogl embi ande enge 1,260 yenambuka.\f + \fr 12:6 \ft Juda yomba ande enge kerko 30 orko ana ba suwarata dundungwa. Ana “Ande enge 1,260 i”, ba 42 orko te buglayungu suwota ya te ta ikine kuno orkwa.\f*   
\p
\v 7 Ana heven suna kunda kande pangwa. Angelo Maikel ye angelomo wagle bogl kunda ere toki kande dragon teingo, te toki kande dragon angelomo wagle bogl ama kunda ere ikine endingwa.  
\v 8 Ba toki dragon kunda yombuglo erekrukwa pre heven suna simenda endigo ana heven suna ye erme dumomo kaima ta yeikrukwa.  
\v 9 Te toki kande dragon ikra si-atne endingwa, tokimo i okuna imbo toki, ye kangiye spirit kinde mo Satan. Ye makan koglkoglo yomba bakaglte erekinde eretongwa. Sraglpre, ye si makandle endigo angelomo wagle bogl akiye ende makandle wingwa.   
\p
\v 10 Ana ka kande ta heven suna yegl dungo nungo embriye pirka:  
\q1 “Erme Godno nono  
\q1 ere-yungwa, ya yombuglomo  
\q1 ya ye kingdomo ya te Krais  
\q1 yombuglomo kande i ombuno  
\q1 dinambuka. Sraglpre, nono  
\q1 angro pirngi dingwa wagle  
\q1 God ongumuglo mina ermine  
\q1 ya enduwer ka-tange te  
\q1 meglkwa yomba ikra si makandle endingwa.   
\q1
\v 11 Nono angro pirngi dingwa  
\q1 ye Sipsip Nangigle bormaimo  
\q1 mina ya God kamo kaima di  
\q1 nongugl endingwa igle mina  
\q1 ye pirngidi kunda yombuglo  
\q1 ere kunda ikine engre atne  
\q1 ende meglkwa. Yegl ere yene  
\q1 nangino ake-gingir dikre ana  
\q1 goramnedi pre kinde kondingwa.   
\q1
\v 12 Ipre heven ya te yomba  
\q1 heven suna meglkwa ene gun  
\q1 yeiyo! Ba makan ya te mundi  
\q1 nigl ene mina yumbun plau  
\q1 dinambuka! Sraglpre, Satan  
\q1 ende atne ene mina ungwa te  
\q1 ye kangwa engemo sungunagle pangwa, ipre ye dem  
\q1 pond kumbruko ana mambuno  
\q1 kinde kanekane ere wanmoglkwa.”   
\p
\v 13 Ana toki kande ikra kango, ye si makandle endingwa pango ana ye eremogl ambu gak yagl kugl yongwa ambumo ikra erekinde eretena pre sika sungwa.  
\v 14 Ba ambumo ana kua-dua koiyemo suwo pandigl teingo ye pigladi endpi makan waule ta ye pre akekun ere yeimara ongwa, igle toki kande mina eglkekra moran ana ye suglmo wakai mogl eimbi buglayungu suwota ya te ta ikine yenambuka.  
\v 15 Ana toki dra mina nigl membigl simenda endungwa. Niglmo i wu nigl kande mereyegl pindre ana si waidi ambu i omara okuwo sikasi ongwa. Sraglpre, toki prukwa nigl pi ambu sikake yendenan wau borambuka.  
\v 16 Ba makan ye ambu i akeple dindre ana dra audi toki kande dragon nigl membigl sungwa ikra pemge endungwa.  
\v 17 Yegl orko, toki dem pond kumburo ambu ikra tendre, ana ye nangiglma God lomo ake giglendi mogl te Yesus Krais kamo kaima dipene endingwa i kunda eretena pre ende menda ongwa.  
\v 18 Ana tokimo kande dragon mundi nigl bina okupole andigl moglkwa.   
\c 13  
\s1 Kambu are suwo unongugl embrika  
\p
\v 1 Ana na kaniga kambu are kande ta mundi nigle suna ende egli ungwa. Ye bre 7 pango te bre yongagle 10 pangwa, ana pamara igle king bitno gagl 10 bre yongagle i mina suwarandi pangwa. Ana bre 7 i mina suwara suwarandi God kenaglmo singwa pangwa.  
\v 2 Te kambumo are na kaniga i agl-pusi kande kangiye lepat mereyegl, te ye kagle bugla-bea kagle mereyegl, te dra agl-pusi kande kangiye laion dra mereyegl, ana toki kande dragon yombuglomo pangwa i ya te yene sia kingmo ya nambamo giglekui dungwa i kambu are ama tongwa.  
\v 3 Ana kambu are bre 7 i mina suwarata sigeglkwa mereyegl orko num de pangwa. Ba num dongwa i kor yei kondungo, ana yomba makandle koglkoglo mogl-eingwa i prapra wai kugltre, ana kambu are mina eingwa.  
\v 4 Ana yomba prapra toki dragon dembiye karaugl ere tengwa. Sraglpre, ye yombuglomo giglekui dungwa i kambu are tongwa pre, ana yomba eremogl kambu are i ama dembiye karaugl eretendre ka kra yegl peglkwa, “Kambu are moglmere yegl ira moglme? Te ira ye kunda bogl tenambe?”   
\p
\v 5 God kan winge orko kambu are gunyei ka guagua di God kenaglmo sitongwa. Ye ba 42 keunde kongun yegl erambuka pre yombuglomo pangwa.  
\v 6 Ye dra aundindre ana God kenaglmo si te God kangiye ya dumomo heven suna pre katewe tendre, te God yombama heven suna meglkwa i ama prapra dikinde yeitongwa.  
\v 7 Te God ama kan winge orko ye ombugl God yomba du-wakai meglkwa kunda erete ana kunda yombuglo ere si-atne endungwa. I God yombuglomo tongo ana yomba yungu ombuno kanekane ya te makan koglkoglo yomba mogl-eingwa ya te ka kanekane dingwa ya nangino kanekane pangwa i mina ye kingno morambuka,  
\v 8 te yomba makandle koglkoglo mogl-eingwa, ye God dumo makan ereyongwa enge kangino kor aimande meglkwa buk mina paikrukwa, ye kambu are dembiye karaugl ere tenaglkwa. Ana bukmo i Sipsip Nangigle okuna sigeglkwa ikra bukmo.  
\v 9 Ana yomba ta kina panan ka i pirdime dinambuka:   
\q1
\v 10 Te yomba ta kane simbi  
\q1 kane panambuka panan,  
\q1 i pra kane panambuka, te  
\q1 yomba ta dikumba prak mina  
\q1 simbi gorambuka panan, i pra  
\q1 dikumba prak mina sigoraglkwa.  
\m Taragl yeglmere plau dinan ana God yomba du-wakai meglkwa pirngi dingwa i ake gidi ana giglendi andigl molo.   
\p
\v 11 Okuwo na kaniga kambu are ta makan sunakra ende menda ungwa. Ye bre yongagle suwo sipsip nangigle bre yongagle pamere yegl pangwa ba toki kande dragon ka dumere yegl dungwa.  
\v 12 Ana kambu are namba 2 ikra kongun prapra giglendi kambu are namba 1 ikra yombuglomo mina orko, ana makandle yomba prapra ye dembiye karaugl ereteingwa. Ye num kande dongo gorambuka mereyegl pangwa, ba kor yongo goglkre yoko moglkwa.  
\v 13 Te kambu are namba 2 ikra diu kande kanekane orkwa. Yomba prapra kan meglmara ye orko endi donga depangwa kamun mitna ende atne makandle ungwa.  
\v 14 God kan winge orko ongumuglo mina ana kambu are namba 2 diu kanekane orkwa. Ye yegl ere makan yomba mogl-eingwa i bakaglte wanmoglkwa. Te kambu are namba 1 dikumba prak mina singwa ba goglkre kor-moglkwa ye kuiyamo beke yei ana kangiye dembiye karaugl eretenaglmedi pre ka giglendi yomba ditongwa.  
\v 15 Kuiyamo beke yeingo ana God kan winge orko kambu are namba 2 dra mur pudi suna endungwa. Yegl orko kambu are namba 1 kuiyamo ka dungwa. Ana yomba ta kuiyamo i kangiye dembiye karaugl ere tekraglkwa ye prapra sigoraglme dungwa.  
\v 16 Te ye ama dungo yomba kembra ya te kande, minge moni kan neingwa ya kiuglgiunde meglkwa, yomba yoko meglkwa ya te nigl-kongun yoko erikwa yomba, ye kindaginde yene onguno wokra mo mamburo mina muno sikendingwa.  
\v 17 Yeglpre yomba ta kambu are munomo ikraglkwa, ye taragl kanekane ta topo erekre, te ye taragl ake-neingwa i ta ipi topo bogl ikraglkwa. Sraglpre, kambu are kangiye munomo i ye mina paikrukwa.   
\p
\v 18 Taragl ene pirpogl siyo. Yomba ta nomane pai pogl sinambuka ana kambu are nambamo i kere mambunomo ye ere i-nongugl endinambiwo. Namba i yomba suwara ta nambamo, ana namba i 666.\f + \fr 13:18 \ft Okuna Hibru ka ya Grik ka mina pepa muno beglkwa enge i, ye namba ta muno boglkrikwa. Leta suwarandi ye nambano mereyegl paingwa. Leta “a” namba wan “1” mereyegl te leta “b” namba “2” mereyegl pago ana leta tau ama namba mereyegl pai eingwa. Yeglpre, ene yomba ta kangiye muno botn, ana ene kangiye i letamo kandre ana nambano imakai sinatnga. Pir pogl singwa yomba merkinde namba 666 ipre nomano kanekane pangwa. Ana pirpogl singwa yomba tau pirkwa, Jon eremogl Sisa Nero pre dumedi pirkwa. Ye okuna Rom kingno mogltre ana God yombama wagle ere kinde orkwa yagle.\f*   
\c 14  
\s1 Yomba 144,000 ya Sipsip Nangigle  
\p
\v 1 Ana na kan iro ende Sipsip Nangigle kamun muglo Saion andigl moglko kaniga. Te yomba 144,000 ye bogl akiye andigl meglkwa. Ana Sipsip Nangigle ya Nem kangino yomba i mamburo mina muno beglko pangwa.  
\v 2 Ana heven suna mudungo na pirka i nigl kande kuglo sindre mudumere yegl dungwa. Te kamun gurgagla dumere yegl dungwa. Ana mudungo pirka i yomba gita sigo bur dindre be wakai dumere yegl dungwa.  
\v 3 Ana yomba 144,000 ikra eremogl God sia kingmo mina ye taragl 4 kor-meglkwa ya te yomba mina ende okuna eingwa gumanomugl andigl mogltre ye giglange kor ta dingwa. Ana giglangemo i yomba ta beke inaglkwa ta kuno erekrukwa. Ba yomba 144,000 makandle yomba meglmara God toposi ikine ende pinde yungwa i keunde giglangemo i beke pir inaglkwa.  
\v 4 Yombamo i ambu bogl paikrikwa,\f + \fr 14:4 \ft Grik ka mina ye okuna “ambu bogl paikrume” yegl dingwa. Ba nomano pai pogl sungwa yomba merkinde eremogl God mambuno wakai eraglmedi prumere erikwa ana mambuno kinde erekrikwa ipre ana ye ka dibogl dumedi pirkwa.\f* ana ye Sipsip Nangigle dumo ta omara i ye ama sikasi eingwa. Ana God makan yomba tau meglmara suna igle ye toposi ikine endungwa. Yeglpre taragl mongo komnaiye koglmere yegl ye komnaiye mogltre, Sipsip Nangigle ya God yombamo meglkwa.  
\v 5 Yombamo drano mina kakimbi ta di kankrikwa. Te ye aglau kaima ta ere kankrikwa.   
\s1 Angelo suwota kamambuno dingwa  
\p
\v 6 Ana na kaniga angelo ta kamun mitna wau yomara suna pigladi wongwa, ye kamambuno wakai aimande pangwa i yomba makandle koglkoglo mogl-eingwa ya te yungu ombuno perepere ya ka kanekane dingwa ya te nangino singigle kanekane pango meglmara ye kor aimande ka i ditenambuka.  
\v 7 Ye ka binan bogl yegl dungwa, “God kunduglmo gogltre ana diwakai yei kangiye kande teiyo; sraglpre, God yomba ka tange tenambuka engemo plau dungwa. Ipre, heven ya makan ya mundi nigl te nigl ongo prapra ere yongwa yagle dembiye karaugl ereteiyo.”   
\p
\v 8 Te angelo ta mokomugl undre yegl dungwa, “Babilon\f + \fr 14:8 \ft Jon ka i muno boglkwa enge i, taun kande Babilon i enge oltokuri ende wongo kinde ere yongwa. Yeglpre, ana nomano pai pogl sungwa yomba merkinde ka i Babilon kaima pre ta dikrumedi pirkwa. Jon eremogl Babilon yomba mambuno kinde okuna erikwa i pirtre ana kantri ta yomba mambuno kinde ere ana God mokono teingwa ipre ka dibogl dumedi pirkwa. Te yomba tau eremogl kantri Rom pre dumedi pirkwa. Ana ka 1 Pita 5:13 mina pangwa i kano. Te yagl ambu tau eremogl Babilon i yomba prapra mambuno kinde ere Krais ya God yombama teingwa ipre dumedi pirkwa.\f* taun kande yange sungwa! Yangesi kinde erekondungwa! Taun Babilon suwara ye eremogl yagl ya ambu kunogl gundingwa mambuno i yomba makan koglkoglo ombuno dungo mambuno orkwa i nigl wain gigle dungwa mereyegl ye tongo yomba nendre ana ye mambuno kinde ormere i erikwa.”   
\p
\v 9 Ana angelo namba 3 ye mokonomugl undre ka binan bogl yegl dungwa, “Yomba ta ye kambu are mo kuiyamo ta dembiye karaugl eretendre te ye munomo indre ana mambuglo mo ongo mina pandrambuka,  
\v 10 ye wain ninambuka. Wainmo i God dem kumbrukwa. Ye niglkor bogl ta sikuglmagl endekrukwa, tamanga. Ye dem kumbrukwa i toindi kap mina ende topomo kinde bagl te ikine endinan ana yombamo ninambuka. Ana God angelomo holi ya te Sipsip Nangigle ongumutno-mugl yombamo i donga kombuglo salpa mina de wangigldi pamara igle giu kinde inambuka.  
\v 11 Ana endi dongwa de giugl geglkwa ingemo i aimande aimande wu egli pi panambuka. Yomba i ye kambu are ya te kuiyamo dembiye karaugl eretendre te kangiye munomo ingwa, ye ermine ya enduwer yoko ta mogl wakai pirkraglkwa.”  
\v 12 Taragl i plau dinambuka enge God yomba du-wakai meglkwa lomo pir pinande ere ana Yesus wedi pirngi dingwa gugl sikrukwa ye giglendi andigl moraglkwa.   
\p
\v 13 Ana heven imbo ka ta yegl dungo na pirka, “Ene ka i muno boglo. Erme mambuno bogl mogl ende imbor enaglkwa yomba Yaglkande wedi pirngi dindre goraglkwa ye gun yenaglimiwo.”  
\p Te Holi Spirit ama dungwa, “Ye gun kaima yenaglkwa; sraglpre, ye kongun pitnbogl erikwa ikra erme kindekondo ana mogl ir si piraglkwa. Ana ye yoko ta ende pikrikwa. Tamanga. Ye mambuno wakai okuna erikwa ikra ye enaglmara akiye enambuka.”   
\s1 Makan mina mokna mongo dongwa uraglkwa engemo ungwa  
\p
\v 14 Okuwo na aglke kanga kamun kua kruwo ta pangwa. Kamun kua i bolamugl yomba ta amedi moglkwa, i “yomba wam mereyegl.”\f + \fr 14:14 \ft Epigl i ka ta Daniel 7:13 mina pangwa i kano.\f* Ana ekin bre gagl gol mina bekingwa i bre mina pangwa. Te ye maima pigl mawasi ninagl nongwa ta ongo mina ake moglkwa.  
\v 15 Yegl orko ana angelo ta God holi yungumo mina ende menda wu ka binan bogl di kamkua kruwo bolamugl amedi moglkwa yagle ditongwa, “Ene maiman pigl mawa sungwa indre mokna mongo bogl yongwa keglu suwo; sraglpre, makandle mokna mongo bogl yei kondungo ana uraglkwa engemo yongwa.”  
\v 16 Yegl dungo kamkua mina amedi moglkwa yagle piglmo ake indre mangidi ana makandle mokna mongo dongwa keglu sungwa.   
\p
\v 17 Ana angelo ta heven suna God holi yungumo mina ende menda ungwa. Ye ama maima pigl mawasi ninagl nongwa ta ake moglkwa.  
\v 18 Te ombugl angelo ta endi donga sugl moglkwa ye alta mina ende menda undre ana ka binan bogl yegl di angelo ta maima pigl ninagl nongwa indre moglkwa ikra ditongwa: “Makan mina wain mongo bogl yongwa ene egle mina keglusi imakai suwo. Sraglpre, ye mongomo bogl yei kondungwa.”  
\v 19 Yegl dungo angelo ikra piglmo indre mangidi ana makan mina wain eglke bogl keglusi mongo uro makai sindre ana wain nuglo dukingwa maugl kande mina endungwa, i God dem kumbrukwa mauglmo.  
\v 20 Wain nuglo dukingwa maugl i siti mendakra yongwa, ye wain engre deruwagl baruwagl eriko ana bormai maugl mina kuglosi wu menda pi waidi ongo makan 300 kilomita orko ana mong mogl ende egli ungwa i bugla-hos dra mina ain keglko pamara yeglmere sing yongwa.\f + \fr 14:20 \ft Nomano pai pogl sungwa yomba tau eremogl taun kande i Jerusalem we dingwa. Ana Grik ka mina muno yegl beglkwa, “1,600 stadia” ana i nono nambano mina 300 kilomita kuno orkwa, mo namba 1,600 i taragl ta pre dum?\f*   
\c 15  
\s1 Angelo 7 ye taragl kinde kaima 7 ake meglkwa  
\p
\v 1 Te na kaniga kamun mitna diu gaglebogl plau dungo na sipuglo dinga. I angelo 7 ye yomba erekinde eraglkwa pre taragl kinde kaima 7 ake meglkwa. Ana taragl 7 i mina God dem kumbrukwa ere, pradinan ana okuwo taragl yumbun ta plau dikrambuka.  
\v 2 Te na taragl ta kaninga, i mundi nigl kande i glas mereyegl endi donga bogl sikuglmagl endigo potndi yongwa. Ana yomba kambu are ya te ye kuiyamo te kangiye nambamo engre atne endingwa i keunde mundi nigl glas mereyegl potndi yomara bina ye andigl meglkwa.\f + \fr 15:2 \ft Numa i mina ka merkinde, Moses kamo boglo pamere siye kuno pangwa. Moses okuna kimagl mere ertre Isip yomba ere kinde orkwa. Ana God mundi nigl gogl poimsi i koglkoglo endungo ana Israel yomba makandle suna ende pi Isip kondo ana mundi nigl bina andigl meglkwa. Ana Moses ya Israel wagle giglange suwarata di Yaglkande teingwa. Ka ta Kisim Bek numa 15 mina kano.\f* Ye God gitamo tongo akindre,  
\v 3 ana God kongunmo yomba Moses giglangemo dindre te Sipsip Nangigle giglangemo dingwa:  
\q1 “O God, Yaglkande, ene  
\q1 yombutn kande kaima  
\q1 pangwa. Ene kongun prapra  
\q1 etnga, i kande kaima pangwa,  
\q1 no kandre ana pirpogl  
\q1 sinamga mere manga! Ene  
\q1 yomba prapra kingno motnga,  
\q1 ene mambunon du-yene  
\q1 pandre te kaima keunde pangwa!   
\p
\v 4 O Yaglkande, ene suwara  
\q1 kaima holi motnga. Ipre  
\q1 yomba ira ene kundutn gogl  
\q1 tekrambe? Te yomba ira ene  
\q1 kangin di mitna ende  
\q1 tekrambe? Tamanga. Makan  
\q1 koglkoglo yomba prapra wu  
\q1 ene dembin karaugl  
\q1 eretenaglkwa. Sraglpre, ene  
\q1 mambuno du-yene etnga i  
\q1 ombunodi wu pene pi kondungwa.”   
\p
\v 5 Yegl di kendingo okuwo na kaninga kamun mitna yungugl kra God holi yungumo sel dra yauro yongwa i ka kaima dipene endungwa.  
\v 6 Ana angelo 7 ikra taragl 7 kinde kaima yomba erekinde eraglkwa ake indre ana God holi yungumo mina kondo ende menda wingwa. Ye gagl suna wakai-yene pesungwa ende pandigl te gol kumagl piutno mina dengwa.  
\v 7 Te taragl 4 kor-meglkwa mina suwarata gol dis 7 God kor aimande aimande moglkwa dem kumbrukwa i kausi moglko indre ana angelo 7 wagle tongwa.  
\v 8 Ana God ambuglangemo ya yombuglomo mina endi inge wu God holi yungumo mina kau sungo ana yomba ta ende yungugl enaglkwa kuno erekrukwa. Tamanga. Yomba yungugl pikre sugl mogl-embi ana angelo 7 wagle taragl kinde 7 ikra kongunmo ere kondinaglkwa.   
\c 16  
\s1 God dem kumbrukwa dis 7 mina suna yeingwa i toindi endingwa  
\p
\v 1 Ana na pirka God holi yungumo mina ka binan bogl ta di angelo 7 wagle tongwa, “Ene endpi God dem kumbrukwa dis mina suna yeingwa i toindi makandle endiyo.”   
\p
\v 2 Yegl dungo angelo namba 1 endpi ana ye dismo toindi makandle endungwa. Yegl orko yomba ye kambu are munomo igo pangwa ya kuiyamo dembiye karaugl ereteingwa yomba ye nangino mina moi kinde giu orkwa kane kane nongwa.   
\p
\v 3 Te angelo namba 2 dismo toindi mundi nigl endungwa. Ana mundi nigl wu yomba geglkwa bormaino koglkwa mereyegl ongwa. Ana nigle taragl kor-meglkwa prapra gogl kondingwa.   
\p
\v 4 Te angelo namba 3 dismo toindi nigl kande ya kembra prapra mina endungo ana ye wu bormai eingwa.  
\v 5 Ana angelo ta nigl prapra sugl moglkwa ye yegl dungo na pirka:  
\q1 “God ene okuna imbo  
\q1 motnga, te erme motnga. Ene  
\q1 mambunon du-wakai pangwa,  
\q1 ene holi kaima motnga. Ene  
\q1 yomba ka-tange tenga i  
\q1 mambuno wakai pamere etnga.   
\q1
\v 6 Sraglpre, ye okuna ene  
\q1 yombanma du-wakai ya  
\q1 propet wagle sigeglko  
\q1 bormaino wu menda ongura.  
\q1 Ye mambuno kinde erikwa  
\q1 ikra pre ene topono kinde i  
\q1 bormai ninaglmedi te ikine endinga.”   
\m
\v 7 Ana alta mina ka yegl dungo pirka:  
\q1 “Yaglkande God, ene  
\q1 yombutn pond kaima pangwa.  
\q1 Ene yomba ka-tange tenga i  
\q1 mambuno du-wakai ya ka  
\q1 kaima pamere etnga.”   
\p
\v 8 Angelo namba 4 ye dismo toindi ande mina endungwa. God kanwinge orko ande pond dongo ana ninga dumara i yomba de tenge erikwa.  
\v 9 Yomba ande detenge ertre ana God i yombuglomo pai kuno orko taragl prapra sugl moglkwa i yeglmere orkwa i yomba mambuno kinde kangiye mangagl singwa. Taragl kinde yeglmere orkwa i God yombuglomo pai kuno orko erambuka. Ba yomba mambuno kinde erikwa i kondo nomano yake tekre te God kangiye di mitna ende tekrikwa.   
\p
\v 10 Ana angelo namba 5 dismo toindi kambu are sia kingmo mina endungwa. Endungo kambu are yombuglomo mina yomba atne meglmara igle mim waidi kondungwa. Te ye giugl pond geglkwa ipre drambino giugl kaiglkwa.  
\v 11 Ye giu geglkwa ya moi kanekane neingwa ipre deno pond kumbro mangaglsi God heven nem teingwa. Yegl ere ye mambuno kinde erikwa i kondokre nomano yake tekrikwa.   
\p
\v 12 Te angelo namba 6 dismo toindi nigl kande Yufretis mina endungwa. Niglmo darukwa, i ande umara ire king wagle unaglkwa pre konbauna akekun ere yongwa.  
\v 13 Ana na kaniga spirit kinde suwota ye koglko mereyegl meglkwa, ye toki kande dragon ya kambu are ya te propet kakimbi drano mina ende menda wingwa.\f + \fr 16:13 \ft Propet kimbi i kambu are namba 2 iwe. Ye kambu are namba wan propetmo mereyegl moglkwa ana ye eremogl kambu are namba 1 i kuiyamo yomba prapra dembiye karaugl ere teiyo dungwa. Ka Teke Pangwa 13:11-16 mina kano.\f*  
\v 14 Ye spirit kinde spiritmo wagle kimagl kanekane erikwa, ye ende makan koglkoglo pi king meglmara dimakai simbi ana God yombuglomo kande pangwa engemo kande mina kunda eraglkwa.   
\p
\v 15 “Piryo! Na kunogl gogl yomba mereyegl unaglkwa!\f + \fr 16:15 \ft Epigl 15 mina ka pangwa i, Yesus Krais yene ka dungwa.\f* Yomba ta ugl paikre, gaglmo ende ana akekun eremoglkwa, ye gun yeiyondo. Sraglpre, ye nangiye yokoko moglkrukwa pre yomba meglmara ye wu ikine ikine enambuka, ye angai goglkrambuka.”   
\p
\v 16 Ana spirit kinde wagle eremogl king wagle dimakai singwa, dumomo i Hibru kanno mina Amagedon\f + \fr 16:16 \ft Amagedon i yegl, “Megido kamun muglo.” Okuna yomba epigl ta eremogl, Israel kunda bogl tendre ana King Josaia sigeglkwa, i taun Megido mangigl kaima sigeglkwa. Ka tau 2 King 23:29-30 ya te 2 Stori 35:20-24 mina kano. Yeglpre, nomano pai pogl sungwa yomba tau eremogl kamun Megido ipre ta dikrumedi pirkwa. Ana okuwo kimbirnem wagle dumo ta pindre ana wu kinde pi ana wau bogl kondinaglkwa ipre ka diboglme dingwa.\f* we dingwa.   
\p
\v 17 Ana angelo namba 7 ye dismo toindi kamun mitna wau yomara endungwa. Te God holi yungumo yungugl kra sia king yomara ka kande ta dungwa, “Taragl i ere dundungwa!”  
\v 18 Ana kamun potndi poriya sungo, wiyau endigo ongo, kamun gurgagla kande dungo, ana imem pond kaima okuna makandle ta ungo yomba ta kankrimere imem i ungwa.  
\v 19 Yegl ere siti kande sibukondi suwota endungwa, te siti makan koglkoglo yongwa yange deruwagl erikwa. Ana God pir ikine dumo kande Babilon ende ana ye dem kumbrukwa wainmo kap mina moglkwa i tongo neingwa.  
\v 20 Te ailan prapra teke ende taya eingo, makan muglo prapra ta paikrikwa.  
\v 21 Te kamkua mina kamun araglmongo pond goriye suwarandi yumbunmo 50 kilogram, ana yange yomba angaino mina si kinde kaima eretongwa. God araglmongo endungwa ipre ye God mangagl si teingwa. Sraglpre, God dem kumbrukwa i wu kinde kaima ongwa.   
\c 17  
\s1 Ambu ta mambuno kinde orkwa pre topo kinde yungwa  
\p
\v 1 Ana angelo 7 wagle dis 7 ake meglkwa ikra suwarata undre yegl dinarkwa, “Endwo, ambu kande konbauna ambu ye yumbun inambere na ombuno ditenaglka, ye nigl kande merkinde moglmara bolamugl amedi moglkwa.  
\v 2 Makan koglkoglo king wagle ambumo i bogl kunogl merkinde gundingwa\f + \fr 17:2 \ft Yagl ya ambu kunogl gundome dingwa i, yomba tau God kaima mokono tendre ana god kimbi duglo bogltre te mambuno kinde yegl kane kane erikwa ipre dungwa. Ana yomba mambuno yegl erikwa i, God ongumuglo mina ambu ta wiye kaima kondo ana yagl pere ta kunogl gundungwa mereyegl kangwa.\f*, te makandle yomba prapra ye wain kinde neingwa mereyegl du ere ana ye bogl ama kunogl gundingwa.”   
\p
\v 3 Na Holi Spirit yombuglo mina moglko ana angelo na auro yendpi makan waule ta suna ongwa. Igle na kaniga kambu are gogl ta mina ambu ta bolamugl amedi moglkwa. Kambu are i nangiye mina kangiye merkinde beglko kausi paingwa, kangiye i prapra God dikinde yeingwa ana kambumo are i bre 7 pango, te bre yongagle 10 pangwa.  
\v 4 Ambumo ye gaglsuna gogl ya kum endungwa ta endungwa, te ye ekin gaglkwa i gol kanekane ya te kombuglo wakai ya bis topo kande boglkwa. Ye kap ta ake moglkwa i taragl kinde kanekane God ongumuglo mina kumbuno kinde orkwa, ye yagl kunogl gundungwa ya deglmbimo kinde kanekane i kap mina suna kausi moglkwa.  
\v 5 Ye kangiye mambuglo mina muno beglkwa pango ana kangiye mambuno teke pangwa i yegl:  
\q1 Babilon dumo kande iwe  
\q1 ambu yagl kunogl gundingwa  
\q1 prapra ya te makandle  
\q1 mambuno kinde kanekane erikwa mano.   
\m
\v 6 Ana na kaniga ambu i God yombama du-wakai ya te Yesus wedi pirngi dindre te kangiye dipene endingwa yomba i bormaino nendre du orkwa. Na ambumo i kaniga enge na sipuglo kinde diga.  
\p Na i kandre ana nangina koglka.  
\v 7 Ana angelo yegl di narkwa, “Ene sraglpre sipuglo dine? Kambu are ta bre 7 pango ta bre yongagle 10 pangwa i ambu ta bolamugl amedi moglkwa, i na mambunomo teke pangwa ene dipoglsi tenaglka.  
\v 8 Kambu are ene kanga i okuna moglkwa ba erme moglkrukwa. Ana okuwo guglo kamun mina wu egli pi ana wu kinde kaima pi kondinambuka. Makandle yomba tau okuna God dumo kamun makan ere yongwa enge, ye kor aimande meglkwa pepa mina i kangino suna paikrukwa, ye kambu are kandre sipuglo dinaglkwa. Sraglpre, ye okuna moglkwa te erme moglkrukwa ba okuwo unambuka.   
\p
\v 9 “Yomba ta nomane wakai pai pogl sungwa ye taragl i mambunomo pirambuka. Bre 7 i makan muglo 7, ambu makan muglo 7 bolamugl igle amedi moglkwa.\f + \fr 17:9 \ft Yomba eremogl makan meglmbe 7 bolamugl Rom siti i beke yeingwa.\f*  
\v 10 Te bre 7 i ama king 7 diboglkwa, ba king 5 wu kinde pi kondingwa, ana suwarata erme moglkwa te ta unongugl pikrukwa ana okuwo unongugl pindre enge sungunagle keme morambuka.  
\v 11 Ana kambumo are i okuna moglkwa ba erme moglkrukwa, ye king namba 8 moglkwa. Ye king 7 mina i ama aine suna moglkwa pre ye wu kinde kaima enambuka.   
\p
\v 12 “Ene bre yongagle 10 paingo kanga i king 10 wagle, ye king kongun erekrikwa, ba ye kambu are i akiye yombuglomo indre ana ye ande kuiya suwara keunde king kongun eraglkwa.  
\v 13 Ye nomano suwara yeingwa. Ana ye yombuglono ya gigledi i kambu are tenaglkwa.  
\v 14 Ye kunda ere Sipsip Nangigle tenaglkwa, ba Sipsip Nangigle yombuglo ere ye engre atne endinambuka. Sraglpre, ye yagl kande prapra Kandeno mogltre te king prapra ye Kingno moglkwa. Ana yomba prapra ye agle dindre pinde i-pere endungo ye pirngi kaima dindre mokomugl wingwa i ye Sipsip Nangigle bogl akiye kunda yombuglo eraglkwa.”   
\p
\v 15 Te angelo ama yegl di narkwa, “Ene nigl prapra kanga, ana ambu mambuno kinde kanekane orkwa i bolamugl amedi moglkwa. I makan koglkoglo ya yomba yungu ombuno kanekane ya ka kanekane dingwa ya nangino kanekane pangwa i umakai singwa.  
\v 16 Kambu are ya bre yongagle 10 ene kanga i prapra deno kumburo ambu mambuno kinde orkwa i tenaglkwa. Ambumo kungugl gaglmo prapra sibiglki baglki diendimbi yokoko moran ana nangiye miye nendre ana donga mina gagltenge eraglkwa.  
\v 17 King wagle yene pirmere ta erekrikwa ba God nomano tongo ye yegl erikwa. Ye nomano suwara yeikondo ana ye king moraglkwa yomburo ingwa i prapra kambu are tenaglkwa. Ye yegl eremogl eimbi ana God taragl okuna eragle dungwa ikra prapra erekuno erambuka.  
\v 18 Ambu kanga i siti kande, i makan koglkoglo king meglkwa i sugl moglkwa.”   
\c 18  
\s1 Babilon kamun yangesi deruwagl orkwa  
\p
\v 1 Ana i dundungo na kaninga angelo ta heven imbo ende atne ungwa. Ye yombuglomo giglendi pango te ekinmo ambuglange pond sungo ana makan mundu ambuglange sungwa.  
\v 2 Ye agle binan bogl yegl dungwa:  
\q1 “Babilon dumo kande yange  
\q1 sungwa! Babilon kamun  
\q1 yangesi deruwagl ere  
\q1 kondungwa! Erme ye wu spirit  
\q1 kinde angaimo orkwa ana  
\q1 spirit kinde prapra ya kua  
\q1 kinde deglmbi yeingwa akiye igle meglkwa.   
\q1
\v 3 Sraglpre, yomba makan  
\q1 koglkoglo meglkwa i ye akiye  
\q1 kunogl gundingwa. I ye  
\q1 wainmo gigle dungwa  
\q1 mereyegl neingwa, makandle  
\q1 king wagle ye bogl ama  
\q1 mambuno kinde erikwa. Te  
\q1 makandle yomba diminge ya  
\q1 kungugl gagl bona topo ere  
\q1 ake nina pre kongun erikwa  
\q1 yomba ye mambunomo kinde  
\q1 kanekane angai goglkrukwa i  
\q1 ere moni kande gundo ingwa.”   
\p
\v 4 Ana heven imbo ka ta atne ungo na pirka yegl dungwa:  
\q1 “Na yombanma wagle,  
\q1 kamun i kindekondo ende  
\q1 menda wiyo. Yegl erekrimbi ye  
\q1 bogl akiye tandaglme ere  
\q1 dinaglkwa te ye mambunomo  
\q1 kinde orkwa i topomo ene akiye i-dinaglkwa.   
\q1
\v 5 Ye tandaglme kinde orkwa i  
\q1 bir tembe tembe yei ende  
\q1 mitna imbo ongo heven ake  
\q1 yungwa, ana mambuno kinde  
\q1 orkwa i God aimande poglodi pir moglkwa.   
\q1
\v 6 Ye mambuno kinde ere ene  
\q1 tomere yegl ene kuno yegl  
\q1 ere te ikine endinaglkwa, ye  
\q1 mambuno kinde orkwa i pre  
\q1 ene aglke aglke sidakagl ere  
\q1 te ikine endinaglkwa. Ye nigl  
\q1 gigle dungwa kap mina sikugl  
\q1 magle endumere yegl ene  
\q1 ama kuno yegl aglke aglke  
\q1 sikugl magle ende ye  
\q1 ninambuka pre tenaglkwa.   
\q1
\v 7 Ye yene nendre indre  
\q1 kangiye ake mitna ende te  
\q1 karaugl engrukwa, ye karaugl  
\q1 engrumere yegl ana ene giu  
\q1 merkinde ereteiyo. Ene yegl  
\q1 ereteimbi ye kai merkinde erambuka.  
\q1 Ye nomane suna yegl  
\q1 prukura, ‘Na ambu werai ta  
\q1 moglkrika, na ambu kande  
\q1 kuwin moglka. Ipre na ambu  
\q1 kuwin mereyegl sia mina  
\q1 amediga te kai kaima ta erekraglka.’   
\q1
\v 8 Ye yegl pir moran taragl  
\q1 kundugl ongo kanekane i  
\q1 ande enge suwarata ye mina  
\q1 unongugl pi tenambuka. Kinde  
\q1 imbo kanekane sinan te  
\q1 kindan pond yenan ana  
\q1 yomba kai mungonbugl  
\q1 eraglkwa. Ana Babilon kamun  
\q1 endi donga mina de  
\q1 kondinambuka. Sraglpre,  
\q1 Yaglkande God giglekui  
\q1 dungwa eremogl ye  
\q1 mambunono kinde i yumbusi  
\q1 tendre ana topo te ikine endinambuka.   
\p
\v 9 “Makan koglkoglo king ye bogl kunogl gundingwa te ye bogl mambuno guagua kanekane erikwa ye endi donga detenge eran inge kandre kai ninga dungwa ere munburaglkwa.  
\v 10 Ye giu kande yungwa ipre kundugl gogl ana ye eglkekra andigl mogl kai ere yegl dinaglkwa:  
\q1 “‘Yumbun kande pana  
\q1 orkwa! Yumbun kande pana  
\q1 orkwa! Babilon siti kande ene  
\q1 yombutn kande pangwa  
\q1 motnga. Ande kuiya suwara  
\q1 mina ene topon kinde plaudi tongwa iwe!’   
\p
\v 11 “Makan koglkoglo yomba prapra taragl kanekane ye mina topo ere-ere erikwa yomba ye kai ninga dungwa ere ana Babilon pre munburaglkwa. Sraglpre, ye bonano aglketa topo eraglkwa. Tamanga.  
\v 12 Bona gana i gol ya silva ya kombuglo wakai kaima ya bis topo kande boglkwa ya gagl alap kruwo wakai ya te gagl alap gogl kanekane ya te gagl-silka. Te endi kanekane demine wakai orkwa ya taragl kanekane bugla-elepant singiye mina bekingwa ya taragl kanekane endi mina bekigo topo kande boglkwa ya bras ya ain ya te kombuglo muno kanekane pangwa.  
\v 13 Ana bona gana tau yegl. Sinamon ya neingwa gene ya endi inge demine orkwa paura ya taragl nuglo kanekane demine wakai orkwa ya wel sanda wakai ya wain ya olip nuglo te plawa wakai ya wit ya bugla-kau ya sipsip ya bugla-hos ye karmo gundo i wangwa bogl ya te nigl-kongun yoko erikwa yomba ya te yomba tau kuiyano bogl taragl i prapra ta topo eraglkwa mere manga.   
\p
\v 14 “Ye mina taragl topo ere-ere erikwa yomba yegl dinaglkwa, ‘Ene taragl mundun pango inagledi pitnga i ene kindekondo ende wu eglke ongwa. Bugla mokna wakai topo kande boglkwa ya ene ekinen wakai i prapra ene kinde kondingwa. Taragl yeglmere ene mina aglketa wu panan yomba kankraglkwa.’  
\v 15 Ana sitimo i giugl kande inan yomba taragl topo bogl indre ana minge moni kande sigundo ingwa, yomba ye kundugl pond gogl ana eglkekra andigl mogl kai ertre nomano kinde eran:  
\v 16 ana ye yegl dinaglkwa:  
\q1 “‘Yumbun kande pana  
\q1 orkwa! Siti kande i yumbun  
\q1 kande pana orkwa! Ene  
\q1 gaglsuna wakai gogl ya kum  
\q1 endungwa endindre ana gol  
\q1 ya te kombuglo wakai ya bis  
\q1 topo kande boglkwa ekin gatnga!   
\q1
\v 17 Ande kuiya suwarata keme  
\q1 kungugl gagl wakai ya minge  
\q1 moni sragl prapra erekinde erekondungwa!’  
\p “Te sip guma akingwa yomba prapra ya te sip mina waningwa yomba prapra ya te sip mina kongun erikwa yomba te sip mina taragl topo bogl i-i erikwa yomba, ye eglkekuri andigl moraglkwa.  
\v 18 Ana Babilon donga denan ye inge kandre, kaglkane yegl inaglkwa, ‘Siti kande kuno yeglmere ta yomo?’  
\v 19 Ye yungum gamba bitno mina engre miriye pond gogl kai ere ama nomane kinde eriko yegl dingwa:  
\q1 “‘Yumbun kande pana orkwa!  
\q1 Yumbun kande pana orkwa!  
\q1 Sip mundi nigle paingwa i  
\q1 ake-neingwa yomba ende  
\q1 aglo eime? Ye siti i monimo  
\q1 mina ye moni pond sidagl  
\q1 ake-neingwa ana ande kuiya  
\q1 suwara keme ye pra kinde ere kondingwa!   
\q1
\v 20 Heven ya God yombama  
\q1 du-wakai ya aposel wagle ya  
\q1 te propet wagle ene gun  
\q1 pond yeiyo, ana siti i kinde  
\q1 ere kondungwa! Sraglpre, ene  
\q1 erekinde eretomere ikra God  
\q1 mongo punduwo bagl te ikine endungwa.’”   
\p
\v 21 Ana angelo giglekui dungwa ta wit siderwagl erikwa kombuglo kande yeglmere ta ake i-mitna ende piyasi mundi nigl suna ende, yegl dungwa:  
\q1 “Mambuno yeglmere Babilon  
\q1 siti kande muglkumdi piyasi  
\q1 endimbi ende atne enan  
\q1 yomba aglketa kankraglkwa.   
\q1
\v 22 Te gita singwa yomba  
\q1 ya tambagle singwa yomba  
\q1 ya puming singwa yomba  
\q1 ya biukul bu dingwa yomba  
\q1 i ene mina aglketa simbi  
\q1 pirkraglkwa. Te kongun  
\q1 kanekane beke pirkan erikwa  
\q1 yomba ye aglketa ene mina  
\q1 meglmbi kankraglkwa. Te wit  
\q1 siderwagl erikwa kombuglo i  
\q1 aglketa kiglekoi dinan pirkraglkwa.   
\q1
\v 23 Ken-lam suwarata ene  
\q1 mina aglketa ambuglange  
\q1 sinan kankraglkwa. Ana yagl  
\q1 ambu kor bogl inaglkwa  
\q1 nunguno embriye ene mina  
\q1 aglketa dimbi pirkraglkwa.  
\q1 Okuna ene yombanma taragl  
\q1 mere ake ne topo bogl i-i  
\q1 erikwa yomba ye makandle  
\q1 yomba kande meglkwa. Ene  
\q1 nimbine kinde di yomba koglkoglo i-toro tenga.   
\q1
\v 24 Ana siti suna igle propet  
\q1 wagle ya God yombama duwakai ya te yomba tau  
\q1 makandle sigeglkwa ye  
\q1 bormaino ene mina suna  
\q1 paimoglkwa pre yegl eretenaglkwa.”   
\c 19  
\s1 Babilon kamun kinde orkwa ipre yomba heven meglkwa gun pond yeingwa  
\p
\v 1 Taragl i plau dungo okuwo na pirka taragl ta heven suna yomba merkinde ka kande dingwa mereyegl ungwa! I yegl dingwa:  
\q1 “God kangiye ake mitna  
\q1 imbo endinamga!\f + \fr 19:1 \ft Jon eremogl Grik ka mina buk i muno boglkwa ba epigl 1 ya epigl 3 ya epigl 4, ya te epigl 6 ka i ye ama muno boglkwa. “Nono God kangiye dembiye si mitna endumuno” i Hibru ka mina muno boglkwa. Hibru ka mina yegl pangwa “Haleluya.”\f* Nono  
\q1 Godno no ere-yungwa, ye  
\q1 kangiye kande pango ana  
\q1 yombuglo pond pangwa.   
\q1
\v 2 Ye ka kaima ya mambuno  
\q1 du-wakai mina yomba yumbu  
\q1 sungwa, ambu kande yagl  
\q1 kunogl gundungwa. God  
\q1 erekinde eretongwa. Ambumo  
\q1 i yagl kunogl gundungwa  
\q1 mambuno i makandle yomba  
\q1 ombuno ditongo mambuno  
\q1 kinde ye ormere yegl erikwa,  
\q1 te God kongunmo yomba  
\q1 wagle sigoglkwa. Ormara ipre  
\q1 God topo kinde te ikine endungwa.”   
\m
\v 3 Ana ye aglke kordagl yegl dingwa:  
\q1 “Nono Godno dembiyesi  
\q1 mitna imbo endinamga! Dumo  
\q1 kande i detenge orko endi  
\q1 ingemo aimande aimande  
\q1 ende egli pi pangwa.”   
\p
\v 4 Ende okuna eingwa yomba 24 ya te taragl kor-meglkwa 4 ye eremogl God king boglmo mina amedi moglkwa i yange goglkuno bondugl tendre dembiye karaugl erete yegl dingwa:  
\q1 “Kaima, Nono God kangiye  
\q1 ake mitna imbo endinamga!”   
\p
\v 5 Ana king boglmo mina ka ta yegl dungwa:  
\q1 “God kongunmo yomba  
\q1 prapra God kunduglmo  
\q1 geglkwa, te yomba yoko ya  
\q1 yomba kande wagle ene  
\q1 prapra nono Godno dembiyesi mitna imbo endiyo!”   
\s1 Sipsip Nangigle ambu ingwa pre kaiya mokna bir neingwa  
\p
\v 6 Ana taragl ta yomba merkinde kaima ka dimere yegl digo te nigl kande sungwa mudumere yegl ya kamun gurgagla pond dumere yeglmere digo na pirka i yegl dingwa:  
\q1 “God dembiyesi mitna imbo  
\q1 endiyo, sraglpre, ye Yaglkande nono Godno ye  
\q1 yombuglo kande pango erme king kaima moglkwa.   
\q1
\v 7 Nono wakai pir gunyei  
\q1 kangiye kande tenamga!  
\q1 Sraglpre, Sipsip Nangigle ye  
\q1 ambu inambuka engemo  
\q1 yongo te ye inambuka  
\q1 ambumo i yene akekun ere kondungwa.\f + \fr 19:7 \ft Sipsip Nangigle i, Krais iwe. Te Krais eremogl ambu ta kan panduglkwa, i God yombamo iwe. Ana okuwo Krais ende ikine undre ana yombamo inambuka i ye bogl imbrika mereyegl erambuka. Ana Krais eremogl yombamo yagl ambu auro i-endepi dumomo wakaile enan ana ye bogl wakai aimande aimande moraglkwa.\f*   
\q1
\v 8 Ye gagl suna wakai kruwo  
\q1 pesindre ambuglangesi tange  
\q1 yongwa endinambuka pre  
\q1 teingwa! Gagl suna kruwo i  
\q1 God yombama mambunono  
\q1 du-yene erikwa i ombuno dungwa.”   
\p
\v 9 Ana angelo ta yegl dinarkwa, “Ka i muno boglo, ‘God digaglko yomba Sipsip Nangigle ambu ingwa kaiya mokna bir kande nemara wingwa yomba ye gun yenaglkwa.’” Ye ka i ama di ainungwa, “Ka i God kamo kaima.”   
\p
\v 10 Yegl dinarko na yange goglkona bondugl dembiye karaugl ere tenagledi erika, ba ye mane dinare yegl dungwa, “Yegl erekro! Na ene angitnma wagle bogl kongun suwara ounga, ene pirngi dindre Yesus kangiye dipene endingwa. Ene God suwara dembiye karaugl ereteiyo, nono pirkan ounga, Yesus kangiye dipene endingwa yomba i Spirit akeple dungwa.”\f + \fr 19:10 \ft Ka i, Grik mina, ka mem wu nongugl kaima pikrukwa. Yomba tau kamo i yake yegl teingwa, “Na ama ene bogl kongun suwara ouglka te ene angitnma wagle bogl kongun akiye ounga, ene Yesus pirngi dindre ana ye kangiye di nongugl endinga yomba. Ene God suwara dembiye karaugl ere tenatnga. Nono pirkan ounga, Holi Spirit eremogl propet wagle akeple dungo ye God kamo dingwa te Holi Spirit ama yomba akeple dungo ana Yesus kangiye dinongugl endingwa.”\f*   
\s1 Yomba ta bugla-hos kruwo moko bolamugl amedi moglkwa  
\p
\v 11 Na kaninga heven audungo bugla-hos kruwo ta nongagle moglkwa, te yomba bolamugl amedi moglkwa, ye kangiye yegl, “Ka Kaima ya Mambuno Du-wakai Kongun Pamere Orkwa,” ana ye yomba yumbusi tendre te kunda orkwa i ye mambuno du-wakai pamere kuno ere orkwa.  
\v 12 Ye ongumuglo koglkoglo donga bauglo mereyegl orko te bre mina king bre gagl merkinde ye bre mina pangwa. Ye nangiye mina kangiye ta beglko pangwa i yomba ta pirkan erekrikwa, ba ye yene pirkan orkwa.  
\v 13 Ye gaglmo suna olto endungwa i bormai dangungwa, te ye kangiye “God Kamo” we dingwa.  
\v 14 Ye endongo, heven kimbirnem wagle prapra buglano bugla-hos kruwo mina bolamugl amedi mogl omara eingwa, ye gaglsuna endingwa i kruwo wakai yene te pesi yongwa.  
\v 15 Yomba bugla-hos kruwo mina mogl ende okuna ongwa yagle ye dra mina dikumba prak muglo nongwa ende menda ungwa. Dikumba prakmo i mina yomba koglkoglo makandle mogl-eingwa i sigorambuka. Te ye ain buglo ake mogltre ana ain i mina yomba sugl morambuka, te wain mongo siderwagl ere nuglo dukingwa kombuglo i mina ye wain mongo engre deruwagl erambuka. I God Giglekui dungwa dem pond kumbrukwa i ombuno dinambuka.  
\v 16 Ana gaglmo suna mina ya te bikiye mina ye kangiye yegl beglko pangwa:  
\q1 King prapra ye kingno mogltre  
\q1 te yomba kande prapra ye  
\q1 yombano kande moglkwa.   
\p
\v 17 Ana na kaninga angelo ta ande mina suna andigl moglkwa. Ye ka kande di kua prapra kamun mitna pigladi wanmeglkwa i tongwa, “Wiyo, God kaiya mokna bir kande tena ormara i ene umakai siyo.  
\v 18 Ene umakai sindre, king wagle ya kimbirnem yomba kande wagle ya te yomba giglekui dingwa ya bugla-hos prapra ya te bugla-hos ausingwa yomba ya te yomba prapra ya te yomba yoko wanmeglkwa ya te nigl-kongun yoko yomba ya te yomba kande wagle ya te yomba kindewond prapra nangino ne kondinaglkwa.”   
\p
\v 19 Na kaninga kambu are ya makandle king prapra kimbirnemno wagle bogl ye yomba bugla-hos mina amedi moglkwa i kunda bogl tenapre ye kimbirmo nem wagle bogl wu makai singwa.  
\v 20 Ba ye eremogl kambu are ya propet kakimbi kane singwa, propet kakimbi diu kanekane kambu are ongumuglo mina orkwa. Ye diu ormara i mina yomba kambu are munomo indre te kuiyamo dembiye karaugl erikwa yomba i bakagl tongwa. Ye suwo-akiye kor-mogl pambriko piyasi murmaugl atne kombuglo salpa de bauglo ere moglmara endingwa.  
\v 21 Ana bugla-hos mina amedi moglkwa yagle ye dikumba prak akete akiye nongwa dra mina menda ungwa ikra mina yomba prapra sigogl kondungwa. Ana kua prapra wu ye nangino ya miyeno neingo dano orkwa.   
\c 20  
\s1 Buglayungu 1,000 Satan kane pangwa  
\p
\v 1 Na kaniga angelo ta heven kondo ende atne ungwa ye maugl beiye paikrukwa ki ya te sen kande ta ongo mina ake indre moglkwa.  
\v 2 Ye toki kande dragon i akegidi moglkwa, tokimo i kamkand imbo toki, ye yomba prapra ka-tange tongwa. Tokimo i Satan iwe, ye buglayungu 1,000 kane paimorambuka pre angelo sen indre kane koglkwa.  
\v 3 Ye eremogl Satan piyasi maugl beiye paikrumara atne ende, konbo dra yongugl sigetdi boma nuglo ake sidange gidi kondungwa.\f + \fr 20:3 \ft “Boma nuglo.” Maugl dra sigegl dungwa i yomba ta yauro endekraglkwa pre, God boma nuglomo dange pandiglkwa. Ka Teke Pangwa 7:2-3 ya te 9:4 mina kano.\f* Ana ye kane paimogltre makan yomba prapra kakimbi aglketa ditekrambuka. Ye sugl paimogl enan buglayungu 1,000 dundinambuka. Ana okuwo ye kane poko endimbi enge sungunagle keunde ta yoko wanmorambuka.   
\p
\v 4 Ana na kaniga sia king tau yongo ana yomba tau siamo igle amedingwa. Ye kot mina yomba mambunono yumbu sinaglkwa pre God kongun tongwa. Yomba merkinde sigeglkwa spiritno kaniga ye eremogl Yesus wedi pirngi dindre kangiye dembiyesi pene ende te God kamo ake gidingwa. Yegl erikwa ipre kunda ikine eremogl nunguno gariko ana geglkwa. Te na kaninga yomba eremogl kambu are ya kuiyamo dembiye karaugl erekre te ye munomo mamburo mina ya onguno mina ikrikwa yomba, ye kor-moraglkwa indre ana Krais bogl akiye buglayungu 1,000 king meglkwa.  
\v 5 Yombamo geglkwa i okuna andiglkrikwa pre erme komnaiye kaima andigl ukor enaglkwa. Yomba geglkwa tau enge igle andiglkrikwa ye buglayungu 1,000 i dundinambuka pre sugl kanmeglkwa.  
\v 6 Yomba komuno kaima andraglkwa i ye holi mogl gunyei moraglkwa. Te okuwo goraglkwa i yombuglomo i ta kuno eran yomba i ta engre atne endekrambuka. Yegl eran yombamo i God prismo mogltre te Krais prismo mogltre ana ye Krais bogl akiye buglayungu 1,000 king moraglkwa.   
\s1 Satan wu kinde kaima ongwa  
\p
\v 7 Ana buglayungu 1,000 dundinan, Satan kane pangwa gugl ende teimbi ana kane yungu kondo ende menda enambuka.  
\v 8 Ye ende menda undre ana yomba makan koglkoglo ya nigl bre beiye te ande umara beimara yomba mogl-eingwa i kakimbi ditenambuka. Gok ya Mangok epiglmo i kakimbi ditenambuka, ye endpi kunda eraglmedi pre dimakai sinambuka. Yombamo ye nambano mundi nigl menda okupo yei omere yegl.  
\v 9 Ye endpi makan koglkoglo pindre God yombama meglmara ya te dumo kande God wakai kaima kangwa i yombugl isuna endinaglkwa. Ba heven imbo endi donga ende atne undre ana goglko kimbirnem wagle de gogl kondingwa.  
\v 10 Te Satan eremogl kimbirnem wagle kakimbi dite wanmoglkwa, piyasi maugl beiye paikrukwa kombuglo salpa depamara suna endingo, igle okuna kambu are ya propet kakimbi piyasi atne endingo miurara, ana ye wu suna ongo suwota orko ana ermine ya enduwer giugl engenge pir moraglkwa.   
\s1 Kot kande plau dungwa  
\p
\v 11 Ana na kaniga sia king kande kruwo ta yongo ana yagl ta bolamugl amedi moglkwa. Ye mambuglo mina heven ya te makan teke endimbriko ana dumono ta yeikrukwa.  
\v 12 Yomba kande ya kindewond geglkwa ye sia king yomara gumamugl andigl meglko kaniga. Ana yagl sia king mina amedi moglkwa i buk tau poglkwa, te buk ta ombugl poglkwa i kor aimande meglkwa buk. Ana ye ka buk mina beglko pangwa i kandre ana ye yomba geglkwa yumbusi i-perepere endungwa, i ye yene mambunono erimere erimere yumbu sungwa.  
\v 13 Ana mundi nigl suna yomba gogl paimeglkwa i mundi nigl te ikine endungwa. Te goglkwa ya geglkwa dumo suna geglkwa yomba ye mina paimeglkwa i ye suwo te ikine endimbrika, yomba kindaginde taragl erimere erimere yegl ye mambunono suwara suwarandi yumbu sungwa.  
\v 14 Ana goglkwa ya Geglkwa Dumo piyasi donga mina suna endingo ende atne embrika, maugl kande mina endi donga atne depangwa i geglkwa namba 2 orkwa.  
\v 15 Ana kor aimande meglkwa buk i mina yomba ta kangiye paikrukwa ye maugl beiye paikrukwa mina donga depamara piyasi atne endingwa.   
\c 21  
\s1 Heven kor ya makan kor plau dimbrika  
\p
\v 1 Ana na kaniga kamun mitna kor ya te makan kor plaudi pambrika. Sraglpre, kamun mitna ya te makan okuna pambrika wu taya embrika. Te mundi nigl ama ta mogl paikrukwa.  
\v 2 Te na kaniga God Sitimo Holi, i Jerusalem kor i God mina heven imbo ende atne ungwa. Ye ekinmo wakai kaima pangwa, i ambai yagl enapre ekin wakai gagl ana yaglmo unambuka pre akekun ere moglmere yegl.  
\v 3 Ana king boglmo mina ka kande ta yegl dungo pirka, “Pro! God wu yomba meglmara moglkwa iwe. Ye yomba meglmara pukamugl moglpai eran ana ye God yombama moraglkwa. God ye yene yomba bogl mogl ana ye Godno morambuka.  
\v 4 Ye kai nuglono prapra God koko ende tenambuka. Te aglketa goglkre, nomano yumbun dekran, kai erekre ana giu ta pirkraglkwa. Sraglpre, makandle mambuno goglo taragl i prapra wu taya pi kondingwa.”   
\p
\v 5 Te yagl ta king bogl mina amedi moglkwa i yegl dungwa, “Na taragl prapra ere-ikor endiga.” Yegl dindre ama dungwa, “Ene ka i muno boglo, i ka kaima pangwa pre yomba prapra ka i pirngi dinaglkwa.”   
\p
\v 6 Te na ama yegl dinarkwa, “Taragl prapra plaudi kondungwa. Na Gumamugl moglka te Yaglemugl moglka, te na Taragl Mambuno Boglmara moglka te Dundumara moglka. Yomba ta nigl gogltre ninambuka eran ana niglmaugl mina ongo bogl ungwa kor aimande nigl i teimbo ana ye topo tekre yoko ninambuka.  
\v 7 Ana yomba ta kunda yombuglo ere wanmoglkwa, ye taragl i prapra inan ana na ye Godmo moglmbo te ye na wana morambuka.  
\v 8 Ba yomba kundugl gogl inik singwa ya pirngi dikrikwa ya mambuno kinde kanekane erikwa ya yomba sigeglkwa yomba ya yagl ambu kunogl gundingwa ya nimbine kirai erikwa ya god kimbi pirngidi dembiye karaugl erikwa ya te kakimbi dingwa, ye dumono maugl beiye paikrukwa mina kombuglo salpa donga depamara igle moraglkwa. I geglkwa namba 2 orkwa.”   
\s1 Jerusalem kor  
\p
\v 9 Ana angelo 7 eremogl God dem kumbrukwa dis 7 mina kausi yongwa ake meglkwa ikra suwarata na moglmara undre yegl di narkwa, “Endwo! Sipsip Nangigle embiye ene ombuno ditenaglka, ye ambu i erme ina orkwa.”  
\v 10 Ana Holi Spirit yombuglo bogl narko ana angelo na boglo ere yendpi kamun muglo kande olto ta yomara pindre ana God Sitimo Holi Jerusalem heven suna God mina ende atne ungo ombuno di narkwa.  
\v 11 Ana God ambuglangemo sitimo i mina ambuglange si yongwa. Ambuglange sungwa i kombuglo jaspa muno-gane orkwa topo kande bogl te glas mereyegl potndi yongwa.  
\v 12 Sitimo kande togl kande giglendi mitna imbo pango te konbo dra 12 yongo ana angelo 12 konbo dra i sugl meglkwa. Konbo dra suwara suwarandi i mina Israel yungu ombuno 12 suwarandi kangino beglko pangwa.  
\v 13 Ana konbo dra i suwota di yongwa, ande umara suwota yongo, nigl bre kra suwota yongo, nigl beiye kra suwota yongo, te ande beimara suwota yongwa.  
\v 14 Siti toglmo akegi dinambuka i kombuglo kauglange 12 giglendi paingwa. Ana kauglange 12 i mina Sipsip Nangigle aposelma wagle 12 kangino bogl endigo pangwa.   
\p
\v 15 Ana angelo ka di narkwa ikra ye buglo siye gol pagl bekingwa i siti ya togl ya te konbo dra buglo siye yenapre ake moglkwa.  
\v 16 Siti kande i koglkoglo ya ikine-ikine siye kokunkuno yongwa. Ana angelo buglomo siye pagl siye yei kango kunoglbomo ya prak siemo 2,200 kilomita orkwa.\f + \fr 21:16 \ft 12,000 stadia i Grik ka mina muno beglkwa, ana nono kanno mina 2,200 kilomita kuno orkwa. Jon eremogl 2,200 kilomita kaima dimboglmo mo 12,000 stadia i taragl ta pre dum manda?\f*  
\v 17 Te siti toglmo pai ende mitna ongwa i ama siye yongo siemo 65 mita orkwa.\f + \fr 21:17 \ft Okuna ye 144 kiubit we dingwa ba erme nono 65 mita we dinamga.\f* Buglo siye i yomba taragl siye yei-yei erikwa buglo. Buglo siye i angelo indre togl siye yongwa.  
\v 18 Ana siti toglmo i kombuglo jaspa topo kande boglkwa i mina orkwa, te sitino i mundu yene gol mina kei yongo, ana glas mereyegl pesi yongo kan pogl singwa.  
\v 19 Te siti togl kauglangemo mambuno mina ana kombuglo kanekane topo kande boglkwa ekin te panduglkwa. Ana toglmo kauglange namba 1 kombuglo jaspa; namba 2 kombuglo sapaia, i moro endungwa; namba 3 kombuglo aget, i kruwo; namba 4 kombuglo emeral, i kugl nangiye koglkwa;  
\v 20 te namba 5 kombuglo sadonikis, i gogl ya kruwo orkwa; namba 6 kombuglo konilian, i gogl mundu orkwa; namba 7 kombuglo krisolait, i ake dindungwa; namba 8 kombuglo beril; namba 9 kombuglo topas, i dindungwa mereyegl kaneta; namba 10 kombuglo krisopres; namba 11 kombuglo haiasin; ana namba 12 kombuglo ametis, i gogl kaneta.  
\v 21 Ana konbo dra 12 i bis kruwo 12 topo kande kaima boglkwa i mina eriko pangwa. Konbo dra suwara suwarandi bis kruwo kande suwara pagl erikwa. Te siti konbaunamo prapra gol keunde yongo ana glas kan pogl simere yegl yongwa.   
\p
\v 22 Ana holi yungu siti suna igle ta yongo kankrika. Tamanga. God Yaglkande Giglekuidi moglkwa ya Sipsip Nangigle ye yene sitino holi miurka.  
\v 23 Te siti i ande ya ba ambuglangesi siti i tenambrika kuno erekrukwa. Tamanga. God yene ambuglangemo ambuglange sitongwa, te Sipsip Nangigle ye siti i ken lamno moglkwa.  
\v 24 Ana makan koglkoglo yomba ye siti ambuglangemo i mina wanmoraglkwa. Te makandle king wagle yene ekino wakai indre ana ende siti igle suna enaglkwa.  
\v 25 Ana enge ermine siti togl dra prapra ta yongugl getndikraglkwa. Sraglpre, mim suna igle ta erekrambuka.  
\v 26 Makan koglkoglo yomba prapra ekino wakai ya kangino kande indre ana ende siti igle enaglkwa.  
\v 27 Te taragl deglmbi yongwa ya yomba mambuno nikedi ertre ana bakagl kakimbi dingwa ye dumo kor suna igle ta pikraglkwa. Ba yomba kangino Sipsip Nangigle bukmo kor aimande moraglkwa i mina pangwa i keunde ende suna igle enaglkwa.   
\c 22  
\s1 Kor aimande nigl ya kor aimande endi  
\p
\v 1 Ana angelo ikra nigl kande ta ombunodi narkwa, i kor aimande moraglkwa niglmo, te niglmo i kuglmuna yei glas mereyegl yongwa. Niglmo i God ya Sipsip Nangigle siano king botno mina undre ana  
\v 2 siti konbauna sunawom wopi pangwa. Ana niglmo womara bina koglkoglo kor aimande endi pangwa, endimo i buglayungu suwara mina mongo enge 12 koglkwa, i ba gere yomere yomere mongo koglkwa. Te endimo yaundo i makandle yomba erewakai erambuka pre pangwa.  
\v 3 Ana igle taragl God ta prukrumere i suna igle ta yeikrambuka. God ya Sipsip Nangigle ye siano king i keunde siti suna i yenan ana ye God kongunmo yombamo prapra ye dembiye karaugl erete moraglkwa.  
\v 4 Yegl ere ye God gumadra kanimbi ana ye kangiye ye mamburo wagle bogl pandrambuka.  
\v 5 Kamun igle mim aglketa paikrambuka. Te yomba ye ken-lam ambuglangemo ya ande ambuglangeno i wedi ta pirkraglkwa. Sraglpre, Yaglkande God ambuglange sitenan ana yomba ye king aimande aimande moraglkwa.   
\s1 Yesus tambre kana unambuka  
\p
\v 6 Ana angelo yegl di narkwa, “Ka i prapra ka kaima, ana yomba pirngi kaima dinaglkwa. Yaglkande God ye propet wagle spiritno akeple dungo ana ye kamo dingwa. Te ye taragl tambre kana plau dinambuka i yene niglmo kongunmo yomba ombuno ditenambuka pre angelomo diendungwa.”   
\p
\v 7 Yesus yegl dungwa, “Ana piryo! Na tambre kana ene meglmara unaglka. Ye dungwa ipre, yomba ta ka propet dingwa buk i mina pangwa pir akegidi i-wan moraglkwa ye gun yenaglkwa.”   
\p
\v 8 Na Jon, na ka i pirtre te taragl i prapra kaniga. Na pirkondo te taragl i kan-kondo ana goglkuna bondugl angelo taragl ombuno dinarkwa ye kagle mina dembiye karaugl eretenagledi erika.  
\v 9 Ba angelo yegl di narkwa, “Ene yegl erekro! Ene ya angitnma propet wagle bogl nono kongun suwara ounga. Te na ama yomba tau pepa i mina ka pangwa i pir i-wan meglkwa ye bogl kongun suwara ounga. Ene God suwara dembiye karaugl ereto.”   
\p
\v 10 Te ka ta ama yegl di narkwa, “Ka propet buk i mina pangwa i ake teke yeikro. Sraglpre, taragl i plau dinambuka engemo magl orkwa.  
\v 11 Ipre yomba taragl ere yewe yeingwa ye aimande ere yewe yei wanmoraglkwa; te yomba ta mambuno deglmbi yongwa erikwa ye aimande mambuno deglmbi yongwa eremoraglkwa. Te yomba mambuno du-wakai erikwa ye aimande du-wakai eremoraglkwa. Te God yombama holi meglkwa ye aimande holi mogl-enaglkwa.”   
\p
\v 12 Yesus yegl di narkwa, “Pro! Na tambre kaima unaglka, te yomba prapra topono indre unaglka, te yomba suwara suwarandi yene mambunono erumere erumere yegl topono tenaglka.  
\v 13 Na Gumamugl moglka te Yaglemugl moglka, te Taragl Mambuno Boglmara moglka te Dundumara moglka.   
\p
\v 14 “Yomba gatno suna nigl endingwa ye gun yenaglkwa, ye pra kor aimande moraglkwa endi mongo nendre te siti i toglmo konbo dra yemara ye ende suna enaglkwa.  
\v 15 Te agl mere erikwa yomba ya kumo ere nimbine kirai erikwa yembi, yagl ya ambu kunogl gundingwa, ya yomba sigeglkwa, ya god kimbi dembiye karaugl erikwa yomba, ya te kakimbi pre munduno pango ka di wanmeglkwa, ya ye prapra siti igle mendakra moraglkwa.   
\p
\v 16 “Na Yesus, na angelona okuna ene mina diendigo ye ka i di God yombama tongwa. Na iwe, Devit nangiglma gawamo mogl wimara i mina na dire-kane ta moglka, te tangina kana kugl-kuri ambuglange pond sungwa i na moglka.”   
\p
\v 17 Ana Holi Spirit ya Sipsip Nangigle embiye, ye yegl di ikine endimbrika, “Yesus, ene wo!” Te yomba ka i pirkwa ye ama yegl dinaglkwa, “Yesus, ene wo!”  
\p Ana yomba ta nigl gorambuka, wo do, te yomba ta ama nigl ninamnedi piraglkwa ye ukor aimande nigl ninaglkwa, i God munduwo argan pre yoko tongwa.   
\p
\v 18 Ka propet buk i mina pangwa pirkwa yomba prapra na ka giglendi di teinga. Yomba ta ka pamara ta di ainan ana God ere kinde ere tongwa buk i mina dipanduglkwa i ye mina aine tenambuka.  
\v 19 Te ka propet buk i mina pangwa i yomba ta i-bina endinan ana ye mina taragl wakai i God ama i-eglke endinambuka. Te kor-moraglkwa endi mongo i ye nekrambuka te God sitimo holi buk i mina dumara igle suna moglkrambuka.”   
\p
\v 20 Yomba taragl i prapra dinongugl endungwa yagle yegl dungwa, “Kaima yene, na oglandi unaglka!”  
\p I kaima, Yaglkande Yesus, ene wo!   
\p
\v 21 Yaglkande Yesus wakaimo i God yombamo prapra ene mina yenano. I kaima.