\id 2TH - Kuman NT [kue] -Papua New Guinea 2008 (DBL 2014) 
\h 2 Tesalonaika 
\toc1 Pol pepa muno namba 2 bogl Tesalonaika yomba tongwa 
\toc2 2 Tesalonaika 
\toc3 2Tes 
\mt1 2 TESALINAIKA  
\mt2 Pol pepa muno namba 2 bogl Tesalonaika yomba tongwa  
\imt1 Ka mongo yegl ende okuna ongwa  
\ip Mambuno yeglmere pangwa: Krais aglke ende ikine unambuka engemo i sragl taragl plau dinambedi Tesalonaika taun God yombamo meglkwa ye nomano pond pirkwa. Yomba tau plau dikondume dingwa. Yeglpre ana Pol ya Sailas te Timoti, eremogl yomba i nomano wakai tendre dikun ere tena pre pepa i bogl teingwa.  
\ip Pol eremogl enge i ta ukrume dungwa, komnaiye kana yaglambu merkinde ye engenge beglmbi ana mambuno kinde kaima wu pene pi gigle kaima dinambuka. Te lo ka sendungwa yagl suwarata wu pene pi, ana yaglkumba ere Krais tenambuka.  
\ip Te yungu ombuno ye pirngino mina giglendi mogl ana yumbun i prapra i-wan moraglmedi dungwa. Ye yegl prukwa iwe, yomba prapra yombuglo ertre yene sutno wakai mogltre ana ye yene ya kongun akiye erikwa yomba erimere yegl yomba i eraglme dungwa pre ye yoko moglkre konguno ta panambuka i ere-yondo. Te ye kongun eraglkwa i yomburo dokokre, te yomba ta akeple dinaglkwa ipre ama yomburo dokokraglme dungwa.  
\c 1  
\s1 Pol pepa muno namba 2 bogl Tesalonaika God yombama tongwa  
\p
\v 1 Ene Tesalonaika God yombama Neno God ya Yaglkande Yesus Krais ye mina meglkwa yombamo. No Pol ya Sailas te Timoti no pepa muno i bogl ene tomga.   
\p
\v 2 God Neno ya Yaglkande Yesus Krais ye wakaino ya te mambunomo pokndungwa i ene mina pandigl tenambriwo.   
\s1 Pol kamange ere God diwakai yongwa  
\p
\v 3 Angrima wagle, ene pre no God engenge diwakai yei tenamga i mambuno wakai pangwa. Sraglpre ene pirngi dingwa i yake wu kande kande ongo te ene yombano mina kanwakai yengwa mambuno i ama yake wu kande pond kaima ongwa.  
\v 4 Te mambuno erikwa ipre ana God yombama meglmara no ene dembinosi mounga. Te yaglkumba ene eresigo pinuglone wanmogl ana pirngino gugl sikruko giglendi wanmeglkwa i ama no boglo kugltre ene di imitna ende wanmounga.   
\s1 Mambuno du-wakai mina God nono yumbu sinambuka  
\p
\v 5 Ene mambuno yegl erimara i mina, nono kanumga mem i God mambuno du keunde orkwa ana yumbu sinambuka kuno pamere erambuka. Ene giu geglkwa i God ere endinan ene ye kingdomo mina suna wakai moraglkwa.  
\v 6 Sraglpre, God ye taragl du-wakai pamere erambuka, ana yomba ene erekinde ereteimbi God ama ye erekinde ere tenambuka.  
\v 7 Ana okuwo Yesus ya angelomo gigle dingwa wagle bogl heven kondo te donga bauglo bogl ende atne ombuno dinaglkwa enge i ene yumbun ingwa pre God ere endinan wakai meglmbi te no ama yegl wakai moramga.  
\v 8 Yegl ere yomba God mambunomo kiure meglkwa ya nono Yaglkandeno Yesus ye kamo mambuno wakai pinande erekrikwa yomba ye punduwo kinde bagl ikine ende tenambuka.  
\v 9 Yomba kinde topono waule kinde aimande moraglkwa. Ye Yaglkande mambuglo mina ya ambuglangemo kande mina mogl eglke ende ana ye aimande kamun wu kinde pi moraglkwa.  
\v 10 Enge kande igle mina Yaglkande Yesus unambuka. Ana God wedi pirngi dingwa yomba holi ye gun pond yei ye kangiye ake mitna endimbi ana ene ama ye bogl akiye gun yeinaglkwa sraglpre God kamo no ene ditomga ene pirngi dingwa pre yegl eraglkwa.   
\s1 Tesalonaika God yombama giglendi moraglkwa pre ye kamange ere God teingwa  
\p
\v 11 Taragl plau dinambuka i no nomano mina pango ana ene pre no kamange engenge ounga. No yegl ounga i God ene akeple dinan wakai yene mogltre ana ene mambuno wakai eraglkwa pre ye aglendi yumara i eraglkwa. Te God siriye bogl tenan ene mambuno wakai eramnedi munduno pangwa i eraglkwa. Ana ene pirngino i nomano ake nusinan mambuno ipre ere poriya sinaglkwa.  
\v 12 No ama kamange yegl ounga, mambuno yegl erimbi ana ene bogl akiye nono Yaglkandeno Yesus Krais kangiye wu kande enambuka. Nono Godno ya te Yaglkandeno Yesus Krais ye wakaino mina sragl i yegl erambuka.   
\c 2  
\s1 Yomba ta lo pamere erekrukwa kamo  
\p
\v 1 Angrima wagle no Yaglkande Yesus Krais ende ikine unan nono ye bogl makai sinamga kamo i erme ene ditomun piryo.  
\v 2 Yomba tau dindre Yaglkande engemo plaudi kondume diteingo ene pirkwa. Yomba ta spirit ka dinarumedi pirambuka mo yomba ta ye yene nomane mina pirtre ka yegl dungwa mo te no ka yegl pepa bogl ye teime dingwa i ene ka yegl ta pirmbi ana sipuglo dikre te nomano yumbun pirkraglkwa.  
\v 3 Yomba tau ka kanekane kakimbi di ene tenaglmiwo, pirkriyo. Enge i yoko ta plau dikrambiwa. Komnaiye kana yomba merkinde kenaglme ere God mokono tenaglkwa. Te lo sendungwa yomba ye ombunodi unongugl pi moglkwa, ana yombamo i God dumere okuwo ende guglo kamun pi kinde erambuka.  
\v 4 Ye yene dembiye sindre ana dembiye karaugl ere teingwa yomba taragl kanekane ere God wedi i kunda ikine eretenambuka. Te God holi yungumo yungugl kra amedi mogl ana yene God mole dinambuka.   
\p
\v 5 Na ene bogl moglka enge taragl ipre ene ditengra i ene pir moglkrimo?  
\v 6 Erme taragl ta ye konbo yongugl tongwa i ene pirkan erikwa. Yegl orkwa i okuwo God enge dipanduglmara yenan i ye ombunodi unongugl enambuka.  
\v 7 Ene pirkan erikwa, lo ka sendingwa mambuno i erme atnekra kongun eremoglkwa. Ba taraglmo i konbo aimande yongugltre mogl ana enge ta yenan angai tenambuka.  
\v 8 Yegl eran enge igle lo ka sendungwa yombamo ikra ombunodi unongugl enambuka. Ana Yaglkande Yesus yene unambuka enge, yene dra murumbuglomo mina yombamo i si-atne ende te ambuglangemo mina lo sendungwa yombamo i siderwagl erambuka.  
\v 9 Lo ka sendingwa yomba i Satan siriye sitenan ye unongugl pi, mambuno kimbi mina ye kongun giglendi ere ana kimagl ya diu kanekane erambuka.  
\v 10 Ba mambuno kinde orkwa i kakimbi merkinde dungwa. Yomba wau boraglkwa meglmara i ye kakimbi ditongwa. Ba wau boraglkwa yomba i God kamo piramnedi pirmbi, ana God pra ye ere-inambuka, ba ye God kamo kaima pir kiurikwa.  
\v 11 Mambuno ipre God eremogl kakimbi giglendi dungwa mambuno i-endungo ye kakimbi mambuno i pirngi dinaglkwa.  
\v 12 Yeglpre yomba ka kaima pirngi dikre ana mambuno kinde eraglkwa i keunde pir gun yeingwa, God ka tange tenambuka enge ye topono kinde inaglkwa.   
\s1 God ene i-ikine endinagledi pre kan panduglkwa  
\p
\v 13 Angrima wagle, Yaglkande ene pre munduwo pangwa ipre no engenge ene pre God diwakai yei tenamga, sraglpre, komnaiye kana God ene ere-ina pre kan panduglkwa. Ene God yombama moraglkwa pre Holi Spirit wu holi enaglmedi ana ene ka kaima i pirngi dingwa mambuno i mina God ene ere-yungwa.  
\v 14 No kamambuno wakai ditomga i mina ye ene pinde yungwa. I yegl orkwa pre nono Yaglkandeno Yesus Krais ambuglangemo ene ama inaglkwa.  
\v 15 Ipre angrima wagle ene andigl giglendi mogl ana no ka beke tomga, i drano mina mo pepa muno bogl tomga ikra ene akegidi molo.   
\p
\v 16 Nono Yaglkande Yesus Krais ya te Neno God ye nono kanwakai yongwa. Te yene wakaimo mina ere endungo nono nomano engenge pokndungwa. Te nono akepledi norko pirngi dindre ana okuwo taragl wakai aimande inamga ipre sugl mounga.  
\v 17 Ana ene deno munduno ye sigigledi tendre te akepledi tenan ene mambuno wakai ere te ka wakai engenge dimoraglkwa.   
\c 3  
\s1 God no akeple dinambuka pre ene kamange ereteiyo  
\p
\v 1 Angrima wagle ene no pre kamange ere God tembi ye no akeple dinan Yaglkande kamo dumun oglandi waidi, ende yomba mina enan ana ene pirmitna ende imere yegl ye ama inaglkwa.  
\v 2 Te ene kamange ere God tembi ana yomba kinde ya mambuno kinde erikwa ye mina God no i-eglke endinambuka, sraglpre yomba tau ye Yesus Krais wedi pirngi dikrikwa.  
\v 3 Ba Yaglkande mambuno pamere orkwa God moglkwa. Ana ye yombuglo bogl tendre sutno moran ana taragl kinde ene mina ukrambuka.  
\v 4 Ene mambuno erikwa i no nomano Yaglkande mina gigle dungwa. Ipre no taragl eriyo ditomga i ene erikwa mambuno i aimande ere moraglkwa.  
\v 5 No punga Yaglkande ene nomano ake udinan ana God argan ere ene tongwa ya te Krais mina andigl giglendi mogl yumbun ingwa i ene pirpogl sinaglkwa.   
\s1 Yomba prapra kongun eraglmiwo  
\p
\v 6 Angrima wagle, Yaglkande Yesus Krais kangiye mina no ka giglendi dito mounga i ene piryo. Angro tau yomburo doko kongun erekre te ka beke tomga ene pirmere yegl ye pirkrikwa, yombamo i mina ene mogl eglke endiyo.  
\v 7 Enene pirkan erikwa, no mambuno ounga yeglmere ene ama erimbi kuno erambuka. Te no ene meglmara akiye mounga enge, no yomburo ta doko te yoko ta moglkunga,  
\v 8 te yomba ta kaiya moknamo no yoko ta nekunga. Tamanga, no topo ere keunde nomga no ene yumbun tekre dinamunedi pre ermine ya enduwer kongun pitnbogl ere ana kaiya mokna i-nomga.  
\v 9 No ene kaiya moknano yoko ninamga kuno orkwa ba ta i-nekunga, sraglpre no kongun wakai yegl ounga i ene ombunodi tomun ene ama yegl eraglkwa pre ounga.  
\v 10 No ene meglmara wanmogl ka kindine yegl di tomga, “Yomba ta yombuglo doko kongun erekran ana ye kaiya mokna nekrambuka.”   
\p
\v 11 No ka ta yegl digo punga: Ene meglmara pukamugl yomba tau kongun erekre yoko meglkwa. Ye yomba tau konguno pamara i keunde ere kayoko keme di wanmeglkwa. I ye taratno ta manga.  
\v 12 Ana yomba yeglmere Yaglkande Yesus Krais kangiye mina ye kiendi mogl ye yene konguno ere ana kaiya moknano ne moraglmiwo.  
\v 13 Angrima wagle, ene mambuno wakai erikwa i yomburo dokokre akeningandi eriyo.   
\p
\v 14 No ka kindine pepa i mina muno bogl tomga i yomba ta sendinan ye mambunomo pirkan ertre ana ene mogl eglke endimbi ye mundu wanmogl angai gorambuka.  
\v 15 Ana ye kanimbi yaglkumbano mereyegl moglkrambuka, ba ene angro mereyegl moran ana ye orkwa ipre mane ditenaglmiwo.   
\s1 Pol ka di dundindre diwakai yeitongwa  
\p
\v 16 Erme Yaglkande ye nomane bipokndi yongwa yagle ye yene bipokak ere tenan ana taragl kanekane mina ene nomano aimande bipokndi yenambiwa. Yaglkande ene prapra mina morambiwo.  
\v 17 Na Pol, nana onguna mina pepa i muno bogl diwakai yei ene teinga. Yegl ere pepa prapra muno bogl teimara ka ongun muno kuno yegl keunde boglka.  
\v 18 Nono Yaglkandeno Yesus Krais ye wakaimo ya wakaimo ene prapra mina panambiwo.