\id 1JN - Kuman NT [kue] -Papua New Guinea 2008 (DBL 2014) 
\h 1 Jon 
\toc1 Jon pepa muno namba 1 Boglkwa 
\toc2 1 Jon 
\toc3 1Jon 
\mt1 1 JON  
\mt2 Jon pepa muno namba 1 Boglkwa  
\imt1 Ka mongo yegl ende okuna ongwa  
\ip Pirngi dumga yomba ambuglange mina wan mogltre ana tisa kimbi wagle ka dinaglkwa pirkramga. Tisa kimbi wagle i eremogl okuna pirngi dingwa yomba bakagl teingwa.  
\ip Ka i muno boglkwa yagle kangiye Jon. Ye Sebedi wam. Ye aposel mogltre ana kamambuno wakai yaglmo i muno bogltre te pepa Ka Teke Pangwa akiye muno boglkwa. Ana yomba tau pirkwa pepa muno i buglayungu A.D. 90 mina boglmedi pirkwa.  
\ip Ka mem kande yegl pangwa: Jon nomane kande suwo pango ana pepa muno i boglkwa.  
\iq1 1) Tisa kimbi wagle mokono tenaglkwa.  
\iq1 2) Yesus wu yomba kaima pindre kor aimande moramga norkwa i pirngidi te God wakai kaima kan ana yomba ta wakai kaima kanaglkwa.  
\c 1  
\s1 Kor aimande ka wu pene ongwa  
\p
\v 1 Kamo i okuna imbo mambuno bogl pai ungwa, i no kinano mina pirtre te ongumutno mina kandre te kandime dindre ana onguno pagl ake pirtre ounga. Ipre kor aimande kamo i no dipene endumga.  
\v 2 Kor aimande kamo i wu pene ongo no kandre ana kor aimande moramga kamo i no boglo kugl ana dipene ende ene tomga. Kamo i okuna imbo Nem mina moglkwa ana erme no mina wu pene ongwa.  
\v 3 No pirtre te kandre ounga i ama ene ditomga, ene no mina nomano suwara yei meglmbi ana nono prapra Neno Kande ya Wam Yesus Krais mina nomano suwara yei moramga.  
\v 4 Nono gun yomga i kaima yene kausi panambuka pre kamo i pepa bounga.   
\s1 Ambuglange mina suna wanmoramga  
\p
\v 5 Kamo i ye Wam mina no punga pre ana dipene ende ene tomga. God, yene ambuglange moglkwa, ye mina mim kaima ta paikrukwa.  
\v 6 Nono God bogl tapsi moune dindre ana mim mina suna wanmoun, ana nono kanno kakimbi orkwa pre nono ka kaima pamara suna wanmoglkunga.  
\v 7 Ba ye ambuglange mina moglmere kuno yegl nono ama ambuglange mina suna mouno ana nono yomba tau bogl tapsi mounga, ana ye Wam Yesus bormaimo i nono tandaglmeno prapra koko endungo nono nomano pesi yongwa.   
\p
\v 8 Ba nono tandaglmeno paikrume dumuno, ana no nono kakimbi di yumga, ipre ka kaima nono nomano mina suna yeikrukwa.  
\v 9 Ba nono tandaglmeno dipene endumuno, ana God nono kondokre yene mambunomo du-wakai mina nono tandaglmeno ya mambunono kinde prapra koko ende noran ana nono nomano pesi yenambuka.  
\v 10 Ba nono tandaglme ta erekune dumuno ana nono kanno i mina, God kakimbi yomba we dumga. Yeglpre ye kamo kaima i nono nomano suna paikrukwa.\f + \fr 1:10 \ft Kamambuno pepa mina bange tau mere ka pangwa i yomba prapra tandaglme erikwa. Buk Song 14:3 ya Aisaia 53:6 te 64:6 kanamga.\f*   
\c 2  
\s1 Krais ye nono akeple dungwa yagle  
\p
\v 1 Na nangrima wagle, ene tandaglme ere dinaglkwa pre ka i pepa bogl teinga. Ba yomba ta tandaglme eran, ana nono pre akeple dinambuka yaglmo ta moglkwa, i Yesus Krais yagl du-yene kaima, ye Nem bogl mogltre ka dite moglkwa.  
\v 2 Ye yene kongun ere ana nono tandaglmeno koko ende norkwa, i nono keme pre manga. Ba makan yomba prapra tandaglmeno pre orkwa.   
\p
\v 3 Ana nono God lomo dumere oun, nono kaima yegl piramga; nono ye pirkan pogl sumga.  
\v 4 Yomba ta yegl dinan, “Na God pirkan erika,” ba God lomo dumere ye erekran, ye kakimbi yomba moglkwa, te ka kaima ye nomanmo mina suna paikrukwa.  
\v 5 Ba yomba ta God kamo pinande eran, ana God yomba kanwakai yongwa mambuno i ye mina kaima pai kausi tenambuka. Ana mambuno yegl mina nono pirkan eramga nono God yombamo mounga.  
\v 6 Ba yomba ta God mina sidakagl mole dinan, ana ye Yesus mambuno pamere yegl ere wanambuka.   
\p
\v 7 Angrima wagle, na lo kor ta bogl ene tekrika. Tamanga. Ba i lo kuand pango ene okuna imbo pir i-wanmogl wingwa ikra erme bogl teinga. Lo kande i kamo ene pir kendingwa.\f + \fr 2:7 \ft Ka i yeglmere, Jon dungwa i Yesus lo i tongwa ipre ka yegl dungwa: “Ene suwara suwarandi yomba ta wakai kaima kanaglkwa.” Ye lo i okuna imbo ye kamambuno wakai pirkwa enge lono i okuna imbo pangwa. Ba Yesus yene dungwa, lomo i erme kor (Jon 13:34), ana epigl 8 mina Jon dipene ende i ombugl lo kor we dungwa. 1 Jon 3:23 ama kanamga.\f*  
\v 8 Ba na ka erme bogl teinga i ama lo kor. Lomo i Yesus mina ya ene mina kanigwa kaima lo kor orkwa. Sraglpre, mim ikra dundungo ana ambuglange kaima plaudi ambuglange sikondungwa.   
\p
\v 9 Yomba ta na ambuglange sumara mole dinambuka, ba ye angigle kankinde yei moran ana ye mim ormara sunakra wanmoglkwa.  
\v 10 Yomba ta ye angigle kanwakai yongwa i ana ambuglange sumara wanmoglkwa. Ambuglange igle mina taragl kinde ta bagl nusinan ye yange sikrambuka.  
\v 11 Ba yomba ta angigle kankinde yei wangwa i ye mim ormara suna wanmoglkwa. Ye ende aglokra ongwa i ye konbo kanpogl sikrukwa. Sraglpre, mim bongond ye ongumuglo si kin yei kondungwa.   
\q1
\v 12 Nangrima kembra wagle,  
\q1 na pepa i bogl ene teinga.  
\q1 Sraglpre, Yesus kangiye mina  
\q1 ene tandaglmeno God koko ende tongwa.   
\q1
\v 13 Nenma wagle, na pepa i  
\q1 bogl ene teinga. Sraglpre,  
\q1 yagl i okuna imbo mogl ungwa  
\q1 erme moglkwa i mambunomo  
\q1 ene pirkan erikwa.  
\q1 Yagl gakmugl wagle, na pepa  
\q1 i bogl ene teinga. Sraglpre,  
\q1 Satan mambunomo kinde ene  
\q1 engre atne ende kendingwa.  
\q1 Nangrima kembra wagle, ene  
\q1 God Neno pirkan kendingwa.  
\q1 Ipre na pepa i bogl ene teinga.   
\q1
\v 14 Nenma wagle, na pepa  
\q1 bogl ene teinga. Sraglpre, ye  
\q1 okuna imbo mambuno bogl  
\q1 moglkwa i ene pirkan erikwa.  
\q1 Te ene kumugl wagle, na  
\q1 pepa bogl ene teinga.  
\q1 Sraglpre, ene yombuglo  
\q1 eremeglko ana God kamo  
\q1 ene mina suna yei-pango,  
\q1 ana ene Satan si-atne endingwa.   
\s1 Makan taragl pre munduno paikrambiwo  
\p
\v 15 Ene makan mina mambuno kanekane pangwa ya taragl kanekane pangwa ipre munduno paikrambiwo. Yomba ta makan mina mambuno kinde pangwa ipre munduwo kande panan ana ye Neno Kande pre munduno pangwa i ye mina paikrukwa.  
\v 16 Makandle yomba mambunono yegl pangwa: Nomano kinde ponglau boglko, taragl bumbuno gogl te ekriye kinde beglkwa. Mambuno i Neno Kande mina ta ukrukwa, ba makan mina ungwa.  
\v 17 Makan mina mambuno kanekane ya bumbunomo pangwa i dundinambuka, ba yomba ta God prumere erambuka ye kor aimande morambuka.   
\s1 Krais yaglkumbamo plau dikondingwa  
\p
\v 18 Na wanma amburama wagle, enge dundinambuka mangigl orkwa. Krais yaglkumbamo unambe digo ene pirkwa ikra erme merkinde winga. I nono pirkan ounga, enge dundinambuka mangigl orkwa.  
\v 19 Yombamo i nono yombano kaima ta moglkrikwa, ipre ye nono mina kondo ende menda eingwa. Ye nono yombano kaima meglma daglma ana ye nono akiye moungo. Ba ye nono kondo ende eingwa mambuno i ombuno dungwa ye prapra nono yombano kaima ta moglkrikwa.   
\p
\v 20 Ba Yesus Krais eremogl Holi Spirit ene pinde yungo ana ene prapra ka kaima pirpogl singwa.  
\v 21 Na pepa muno bogl teinga i ene ka kaima i ta pirkrimedi ta pepa bogl tekrika, tamanga. Ba ene ka kaima pirkan erikwa, ana ka kaima mina kakimbi ta paikrukwa.  
\v 22 Ipre kakimbi dingwa yomba ira moglme? Yomba ta Yesus ditorwa ere Krais\f + \fr 2:22 \ft “Krais” we dingwa kamo mambuno i yegl: “Yomba ta God pinde i-pere endinan God yene kongunmo erambuka.”\f* moglkrume dungwa i ye kakimbi yomba moglkwa. Yomba yeglmere Krais yaglkumbamo mogltre ana nem ya Wam akiye ditorwa orkwa.  
\v 23 Yomba ta Wam ditorwa erambuka i ye Nem ama akiye ditorwa orkwa. Te yomba ta Wam dinongugl endinambuka i ye Nem ama dinongugl endungwa.   
\p
\v 24 Ene pirdime diyo, komnaiye kana kamo digo pirkwa i ene nomano mina suna yei-panano. Kamo i ene nomano suna yei panan ana Wam ya Nem bogl ene aimande mogl-enaglkwa.  
\v 25 Te nono kor aimande moramga i Krais noragledi pre ka dipandigl noro kondungwa.   
\p
\v 26 Ana yomba tau ene auro yend konbo gua enamunedi erikwa ipre na ka i muno bogl ene teinga.  
\v 27 Ba ene pre Krais Holi Spiritmo ene pinde yungo ana ene mina mogl pangwa, ipre yomba ta ene ka dite bekete erekrambuka. Ba ye Holi Spiritmo i mina taragl prapra ene beke tongwa. Ana Holi Spirit ka beke tongwa i taragl kaima, i kakimbi tamanga. Yeglpre Holi Spirit ka beke tomere yegl ertre ana ene Krais mina sidakagl moraglkwa.   
\p
\v 28 Kaima, na nangrima wagle, ene Krais mina aimande moraglmiwo. Yegl ere meglmbi ana ye wu pendigl enambuka enge igle nono andigl giglendi mogl ye mambuglo mina angai ta goglkramga.   
\p
\v 29 Ene pirmbi Krais du-wakai moglkwa panan, ana ene pirkan eraglkwa, yomba ta mambuno du-yene eraglkwa ikra ye God nangiglma kaima meglkwa.   
\c 3  
\s1 God nangiglma mounga  
\p
\v 1 Kaniyo! Neno Kande nono pre munduwo pond kaima pangwa. Yegl orko ye nono pre God nangiglma we dungwa, i kaima nono God nangiglma mounga iwe. Ana makan yomba eremogl God pirkan erekrikwa mambuno ipre, nono ama pirkan erekrikwa.  
\v 2 Yeinomga wagle, nono erme God nangiglma mounga. Okuwo nono srambre ere moramga nono pirkan erekunga, ba ye unongugl enan nono kandre ana ye moglmere kuno yegl nono moramga.  
\v 3 Ana yomba ipre munduno pango sugl meglkwa, ye yene nomano tokaisindre ana Yesus du-wakai moglmere yegl ye ama du-wakai meglkwa.   
\p
\v 4 Yomba tandaglme erikwa i God lomo sendingwa. Kaima, tandaglme erikwa mambuno i lo ka pirpogl sikre sendingwa.  
\v 5 Ba ene pirkondingwa, Krais nono tandaglmeno koko endina pre wu pene ongwa. Ye yene mina tandaglme ta paikrukwa.  
\v 6 Yomba ta Yesus mina sidakagl meglkwa, ye tandaglme aimande ta erekrikwa. Ba yomba ta tandaglme ningadi erikwa i ye Yesus ta kankre te pirkre erikwa.   
\p
\v 7 Na nangrima wagle, ene kanpogl siyo. Aglau eran yomba ta ene kakimbi ditendre bakaglte dinaglmiwo. Yomba mambuno du-yene pamere orkwa, i ye Krais du-yene moglmere kuno yegl meglkwa.  
\v 8 Yomba ta tandaglme ningadi erambuka ye Satan yombamo moglkwa. Sraglpre, Satan okuna mambuno bogl tandaglme orkwa. Ana God Wam ende nongugl ungwa i Satan mambunomo kinde i sidundina pre ungwa.  
\v 9 Yomba ta God nangigle moglkwa i tandaglme aimande ta ere moglkrambuka. Sraglpre, God embriye mambunomo i ye mina pangwa pre ana tandaglme aimande ta erekrambuka. Tamanga; ye God yombamo kaima moglkwa.  
\v 10 Ana God nangiglma ya te Satan nangiglma meglkwa i kanpogl sinamnedi pun kade ana mambuno yegl mina kanamga: Yomba mambuno du-pamere erekre te angigle ta kanwakai yeikran, ana ye God yombamo kaima ta moglkrukwa.   
\s1 Yomba kanwakai yeinamga mambuno i Yesus ombuno dinorkwa  
\p
\v 11 Ene okuna kana ka boglo yegl kiglko pirkwa: Nono yomba ta pre munduno panan kanwakai yeinamga.  
\v 12 Nono Kein mereyegl moglkramga. Ye Satan yombamo mogl ana angigle okuwo Abel sigoglkwa. Ana ye sraglpre Abel sigoglme? Sraglpre, ye taragl prapra orkwa i aglau orko te angigle Abel taragl prapra du-yene pamere orkwa.  
\v 13 Angrima wagle, makan yomba ene kankinde yembi ana ene sipuglo dikriyo.  
\v 14 Nono yegl piramga, angro ta pre munduno pango kanwakai yomga ikra gounga mambuno i kindekondo ukor omga. Yomba ta angigle kan wakai yeikrukwa ye geglkwa mambuno i mina suna mogl pangwa.  
\v 15 Yomba ta angigle pir kinde yei tomara, i ye yomba sigoglkwa mereyegl orkwa. Ana ene i pirkan erikwa, yomba sigeglkwa yomba ana kor aimande meglkwa i ye mina suna yeikrukwa.   
\p
\v 16 Yomba sraglmere wakai kanamga mambuno i yegl mina no kanpogl sumga: Yesus Krais nono pre ere kor-moglkwa i kinde kondungwa, te nono ama angro wagle pre munduno panan kor-mounga i kinde kondinamga.  
\v 17 Yomba ta taragl merkinde paitenambuka ana ye angigle ta taragl ta inagledi doko moglkwa i kanambuka, ba ye miriye goglkran ana God wakai kangwa mambuno i ye mina sraglmere suna panambe?  
\v 18 Nangrima wagle, nono drano mina ya ka dumunara yomba wakai kaniye dikramga ba nono nomano tendre ana taragl kaima tenamga.   
\s1 Pirngi dingwa yomba God mambuglo mina kundugl goglkrikwa  
\p
\v 19 Yegl ounara i nono pirkan eramga, nono ka kaima mina mounga. Mambuno igle mina nono God ongumuglo wagle kundugl goglkre giglendi moramga.  
\v 20 Ba nono nomano ka-tange noran kade ana nono yegl piramga: God nono nomano engre atne ende ana ye kande kaima mogl te taragl prapra pirkan erekondungwa.   
\p
\v 21 Yeinomga wagle, nono nomano ka-tange norokran kade ana nono God mambuglo wagle pir-oglmbasi moramga.  
\v 22 Te nono ye lomo pinande ere, mambuno wakai prumere ertre ana taragl prapra pre kamange eretomgo ye norkwa.  
\v 23 Ana ye lomo yegl pangwa: Nono ye Wam Yesus Krais kangiye pirngidi ana yomba ta pre munduno panan kanwakai yeinamga, i ye nono eriyo dinormere eramga.  
\v 24 Yomba ye God lomo prapra pinande erikwa i God mina meglko te God ama ye bogl moglkwa. Ana God nono bogl moglkwa i ye Holi Spirit norkwa i mina dinongugl endungo nono pirkan ounga.   
\c 4  
\s1 God Spiritmo ya spirit kinde kandime dinamga  
\p
\v 1 Yeinomga wagle, yomba prapra spirit no mina moglme dinaglkwa i ene pirngi dikriyo. Spirit prapra God mina wingwa mo ukrikwa i ene yomba i mina yumbusi kaniyo. Sraglpre, propet kimbi merkinde ende makan koglkoglo eingwa.  
\v 2 Ana mambuno yegl mina ene God Spiritmo kanpogl sinaglkwa: Yomba ta eremogl Yesus Krais pre, ‘yomba nangiye kaima pame’ dinan ana God Spiritmo yomba i mina moglkwa.\f + \fr 4:2 \ft Jon pepa muno i boglkwa enge, propet kakimbi wagle kakimbi tau di Yesus mambuno ormere pre dingwa. Nono yombamo ka dingwa i mambuno ta pirpogl sikunga ba yomba bitno pai pogl sungwa tau pirkwa, yomba ka yegl beke teimedi pirkwa, Yesus ya Krais ye kuno ta mogl kiuredi pirkwa. Krais, ye okuna imbo God bogl akiye miurka (Jon 1:1 kanamga). Ye God Wam moglkwa. Kaima, Krais wu yomba ongwa, ba God yomba ere-inagledi kongun orkwa i ye Krais ongo i mina keunde orkwa. Taragl kanekane Yesus makandle igle moglkwa enge orkwa i ya te goglkwa enge i Krais kongunmo tamanga te ye kongun i ere yomba ta akeple dikrumedi pirkwa. Ba Jon dungwa propet kakimbi wagle ka i dingwa i kimbi kor, Yesus Krais ye God Wam kaima moglkwa, te ye yomba kaima ta moglkwa, te ye kongun orkwa i ombugl suwara pangwa.\f*  
\v 3 Ba yomba prapra Yesus pre ‘Yomba nangiye kaima’ paikrume dimbi ana ye spiritno i God mina ta ukrukwa. I Krais kundamo ikine spiritmo ye mina moglkwa. Ana yomba yeglmere unaglme digo ene pirkwa ikra ana erme wingwa makan koglkoglo mogl kondingwa.   
\p
\v 4 Nangrima wagle, ene God yombamo meglkwa pre propet kakimbi wagle engre atne endingwa. Sraglpre, Spirit ene mina moglkwa i mogl mitna imbo kaima ende ana makan yomba mina spirit moglkwa i engre atne endungwa.  
\v 5 Ye makan yomba meglkwa, ipre makandle taragl pre kamo ningadi digo ana makan yomba kinano yei ka dingwa i pirkwa.  
\v 6 Ba nono God yombamo moungo ana yomba ta God wedi pirkan erikwa i ye nono kanno pirkwa. Ba yomba ta God wedi pirkrikwa ye nono kanno ama pirkrikwa. Mambuno yegl mina Spirit ka kaima dungwa ya spirit kakimbi dungwa i pirkan dime dinamga.   
\s1 God yomba wakai kanumere yegl nono ama yomba wakai kanamga  
\p
\v 7 Angrima wagle, nono yomba tau pre munduno panan kanwakai yeinamga. Sraglpre, yomba kanwakai yengwa mambuno i God mina ungwa. Ana ta ye yomba pre munduwo panan, ye God nangigle moglkwa pre ana God mambunomo pirkan orkwa.  
\v 8 Te ta ye yomba pre munduwo paikran ana ye God mambunomo i ta pirkan erekrukwa. Sraglpre, wakai kanigwa mambuno i God yene moglkwa.  
\v 9 Ye Wam suwara kaima di makandle endumara mambuno igle mina, ye nono pre munduwo pango wakai kangwa i ombunodi norkwa. Ipre ye Wam mina nono kor-moramga.  
\v 10 Yomba wakai kanigwa mambuno i yegl: Nono ta komnaiye kana God wakai kankunga, ba God yene komnaiye kana nono wakai kandre ana ye Wam nono tandaglmeno koko endinambuka pre di endungo makandle ungwa.  
\v 11 Angrima wagle, God nono pre munduwo pango wakai kaima kangwa, ipre nono ama ye ormere yegl ere yombano ta pre munduno panan kanwakai yeinamga.  
\v 12 Yomba ye kaima God kankrikwa, ba nono yombano bogl argan ere nomano suwara yei mouno ana God nono mina morambuka. Te ye kanwakai yongwa mambuno i nono mina pai kuno erambuka.   
\p
\v 13 Mambuno yegl i mina nono pirdimedi ana ye mina moungo te ye nono bogl moglkwa. Sraglpre, ye Spiritmo norko nono mina suna moglkwa.  
\v 14 Te Neno Kande Wam makan yomba i-ikine endinambedi pre diendungo ungwa i no kandre ana ye kamo dipene endumga.  
\v 15 Yomba ta Yesus pre God Wam moglme dinan, ana God yombamo i mina moglko te yombamo i ombugl God mina morambuka.\f + \fr 4:15 \ft 1 Jon 4:2 ka pangwa i kanamga.\f*  
\v 16 Te nono ombugl God nono pre munduwo pangwa i mina pirpogl sindre ana i mina mounga.  
\p Ana munduno argan erikwa ya te kanwakai yengwa i God mambuno kaima moglkwa. Ta ye argan ere yomba kanwakai yei moran ana yombamo i God mina moglko te God ama ye mina moglkwa.  
\v 17 Mambuno yegl mina ye munduwo argan ere kanwakai yongwa i nono mina pai kau sungwa pre ana enge kande mina yomba yumbu sinambuka enge nono kundugl ta goglkramga. Sraglpre, ye moglmere yegl nono makandle igle mounga.  
\v 18 Ana yomba kanwakai yeingwa mambuno i nono mina panan ana nono kundugl ta goglkramga. Ba kanwakai yei argan erikwa i eremogl kundugl geglkwa mambuno ikra ikorugl endungwa. Te argan erewakai kanigwa mambuno i yomba ta mina paikrukwa pre ye kundugl geglkwa. Sraglpre, kundugl geglkwa mambuno i ye pirkan erikwa okuwo yumbun giu inaglkwa.   
\p
\v 19 God komnaiye kana nono pre argan ere kanwakai yongwa, ipre nono ama God ya yomba kanwakai yeinamga.  
\v 20 Ana yomba ta na God kanwakai yei ye dinambuka, ba ye angigle kankinde yei tenan ana ye kakimbi yomba moglkwa. Te yomba ta angigle magl moglko kangwa i kanwakai yeikran ana God teke moglko kankrukwa pre ye eremogl God kanwakai yeikrambuka.  
\v 21 Ana Krais ka giglendi yegl dinorkwa: Yomba ta God pre munduwo panan ana ye angigle pre munduwo ama panambuka.   
\c 5  
\s1 Yesus wedi pirngi dindre makan taragl engre atne endingwa  
\p
\v 1 Yomba ye Yesus pre Mesaia moglmedi pirngi dingwa, ye God nangiglma meglkwa. Yomba ta eremogl neno pre munduno panan, ana ye nangiglma pre akiye munduno pangwa.\f + \fr 5:1 \ft 1 Jon 2:22 ya 4:2 ka pangwa i kanamga.\f*  
\v 2 Nono God nangiglma pre munduno pango pirkan ounga i mambuno yegl: God wedi munduno pango ana ye lomo prapra pinande orumnara i dipoglkwa.  
\v 3 Nono God pre munduno panan, ye lomo prapra pinande eramga. Ye lomo i wirigl ta paikrukwa.  
\v 4 Sraglpre, God nangiglma wagle ye makandle embriye mambuno kinde i engre atne endingwa. Ana nono pirngi dumunara i mina yombuglo ere makandle embriye mambuno kinde i ama engre atne endumga.  
\v 5 Ana makandle embriye mambuno kinde i yomba ira yombuglo ere engre atne endume? Yomba ta Yesus pre God Wam moglmedi pirngi dungwa yomba i keunde yombuglo erikwa.\f + \fr 5:5 \ft 1 Jon 4:2 ka pangwa i ombugl kanamga.\f*   
\s1 God yene Wam pre kamo dipendigl endungwa  
\p
\v 6 Ana Yesus Krais nigl mina baptais ormara mambuno i ya te gogl bormaimo toindi endumara mambuno i mina ungwa.\f + \fr 5:6 \ft Grik kanno mina ka i mongomo ta wu pene pikrukwa. Ye bormai ya nigl pre keunde dungwa. Ba yomba mere pirkwa nigl iwe Yesus baptais orkwa ipre dumedi pirkwa, te bormai iwe Yesus goglkwa ipre dumedi pirkwa.\f* Ye nigl mina suwara i keunde ta ukrukwa, ba nigl mina ya te bormaimo mina akiye ungwa. Ana Holi Spirit ka di nongugl ende taragl i kaima we dungwa. Sraglpre, Holi Spirit ka kaima nem moglkwa pre ye ka kaima dungwa.  
\v 7 Ana taragl suwota mambuno i dipeglkwa:  
\v 8 Holi Spirit ya nigl ya te bormai, ana taragl suwota i ka digo wu suwara ongwa.  
\v 9 Yomba ka dipene endigo nono punga, ba God ka di nongugl endungwa i yombuglo ere yomba kanno engre tongwa. Sraglpre, God ka dungwa i yene Wam pre dipene endungwa.  
\v 10 Yomba ta God Wam wedi pirngi dingwa, God ka dipene endungwa i ye nomano suna yei-pangwa. Ta ye God kamo pirngi dikrikwa, ye God kakimbi di-di orkwa yagle we dingwa. Sraglpre, God yene Wam pre kamo dipene endungwa i ye pirngi dikrikwa.  
\v 11 Ana God kamo dipene ende norkwa i yegl kra: Nono kor aimande moramga i God norkwa. Ana kor aimande moramga mambuno i yene Wam mina yongwa.  
\v 12 Yomba ta ye God Wam i-wan morambuka, ana kor aimande moraglkwa ye mina yongwa. Te ta God Wam i-wan moglkrambuka, ana kor aimande moraglkwa i ye mina yeikrukwa.   
\s1 Kor aimande moramga kamo  
\p
\v 13 God Wam ye kangiye mina ene pirngi dindre ana kor aimande moraglkwa i-kondingwa i ene pirkan eraglkwa, ipre na pepa muno i bogl ene teinga.  
\v 14 Yeglpre nono God kunduglmo goglkre ye moglmara magl pindre ana ye prumere nono taragl kanekane ta norambedi krapogl tomun, ye pra nono pir norambuka.  
\v 15 Ana nono pirkan ounga: Taragl ta inamunedi pre kamange ounga i God ama pirkan orkwa. Te nono pirkan ounga: Ye taragl ta norambedi krapogl tomga ikra i-kondumnedi prumga.   
\p
\v 16 Yomba ta angigle tandaglme eran kanambuka, ba tandaglme i mina ye ta goglkrambuka mere panan, ana ye kamange ere God tenan ana angigle kor aimande morambuka i God tenambuka. Sraglpre, tandaglme tau pango erikwa i yomba sigoglkwa pre na ka i diga. Te tandaglme tau pangwa i yomba erimbi ana ye goraglkwa. Ipre ene kamange ere God teiyo na yegl ta dikrika.\f + \fr 5:16 \ft Kamambunomo kaima ta wu pene pikrukwa. Yomba tau pirkwa i yomba kaima geglkwa ipre dumedi pirkwa. Te yomba tau pirkwa aglke kor goraglkwa ipre dumedi pirkwa (Ka Teke Pangwa 2:11 ya 20:14), ye ka i akete “geglkwa” i yeglmere, “ende guglo kamun enaglkwa”.\f*  
\v 17 Ana mambuno kinde prapra erikwa i tandaglme orkwa, ba tandaglme tau pango erikwa i ta goglkraglkwa.   
\p
\v 18 Nono pirkan ounga, God nangiglma meglkwa i tandaglme aimande ta ere wanmoglkrikwa. God yene nangiglma sugl wakai moglko ana Satan ta ye erekinde eretekrukwa.  
\v 19 Nono God nangiglma mounga pre ana pirkan ounga, te makan koglkoglo mogl eimara suna igle Satan kongun akeningandi ere ende okuna ongwa.  
\v 20 Nono ama pirkan ounga God Wam undre ana pirpogl sinamga nomano norkwa. Yegl orko kade nono God kaima moglkwa i pirpogl sumga. Ana God kaima ya Wam Yesus Krais, ye mina nono sidakagl mounga. Ye God kaima moglkwa, te kor aimande meglkwa i ye mina yongwa.   
\p
\v 21 Na nangrima wagle, god kimbi mina ene sidakaglkre mogl eglke endiyo.