\id PHP - Kuot NT [kto] -Papua New Guinea 2001 (DBL 2014) 
\h Filipai 
\toc1 Babam la omirong Paulo me mai ekelesiap onim Filipai 
\toc2 Filipai 
\toc3 Fl 
\mt1 Babam la omirong Paulo me mai ekelesiap onim Filipai  
\c 1  
\p
\v 1 Turuo Paulo ga Timoti, ii teipien o ubi angan Karisito Iesu, osagaing urio babam ga ila miun ekelesiap am Karisito Iesu la maionama na taun Filipai ga teip mila uke o unualeap ga mimi dikanip o urio lotu.  
\v 2 Mariking me ai Morowa Ira buang ga Ila Kakani Iesu Karisito meba lialang ubonuvarap ga malina miun.   
\s1 Paulo la ivo temaieng me aun Morowa  
\p
\v 3 Tie, ma mirier taraiap ganam la man mariktung me milam ga tume tivo temaieng me Morowa.  
\v 4 Ga ma mirier lap la tume marik me ai Morowa meba miagaalie, tume marik un tenubap.  
\v 5 Memani, mime dus maranit ga turuo, ga iat okosarbuong uriro ubi o bais ula mumuru ga mime okosar gare ro o natauan la la mipto urio bais ula mumuru tinan ga muio puoieng titot.  
\v 6 Ga tume marik un tenubap, memani arit ara Morowa la pupuaro meba okosarang lake ubi ula mumuru na ninimiap ming. Ga nagantung migat eba ubiang ga ala ga ala ga eba oitamung urio ubi na lap tubiat la eba ina terigiang Iesu Karisito.   
\p
\v 7 Are ratmat ga mumuru le tevurustang me milam ganam. Memani, mime dus maranit ga turuo na urio ubi o bais o ties ula mumuru ang Karisito ga man migamarie gat na tara la betmeng giginanimup ira ruo. Eva, toagamilie na tara la tunama na luguan o arubu me bais ula muru la ovaiktung mai teip ga magaulap meba omeira uriro bais ula mumuru la migat o. Met iriro tavuk ming, mimi la mionama na ubonuvarap ang Morowa ga maset narung me milam.  
\v 8 Eva, Morowa la toit migat la maset narung me milam ganam gare mani. Narung me milam gare Karisito la naong maset me milam.   
\p
\v 9 Tie, mariktung me ai Morowa me milam gare ro, Tavuk o na maime non teip ga magaulap ganam la eba betang ga kakani ba kan maset ira mi ga iruo tavuk la eba miagaalie meba amira migat Morowa ga agat ang la mumuru gano la eba betieng ga kakanu ba kan ira mi.  
\v 10 Me uriro agat la muru, eba marakiming migat tavukup ganam mila mumurum maset ga mamiuluan. Ga nunumiap ming le babau ba ga tala kan puoong migana ba meba tiesang ga amama okosarming kiribas. Karuk. Eva, man okosarming gare tiruo ga ila puoieng ira tara tubiat la eba ina terigiang Karisito me na uro kimanam.  
\v 11 Ga mariktung gat gare ro: Miriro tavukup am ganam mila puvuvum la eba mavaikang Iesu Karisito me miun, urie mulinim ma la eba dakmeng na ninimiap ming. Met iriro, na tara la magimameng inamaniap onim na kimanam tavukup mim, tie eba ovienmeng bonim a Morowa ga maialang bonim ula kanu aun.   
\s1 Ties ula mumuru la man kakanu na tara la unama Paulo na luguan o arubu  
\p
\v 12 Tie, ekelesiap papap tuam, narung meba mira: Migat, tunama na luguan o arubu titot. Pa iruo paga la betong ira ruo, irie la tale kan obunakong alang ieng ties ula mumuru ang Karisito. Karuk. Ga okakalaitong it uriro ubi o bais meba ila betieng mai papot ma teip ga magaulap ga eba meptang urio bais ula muru.  
\v 13 Utmat la betieng gare ro, Teip o danunumiap ganam la umiale na luguan ila kani ang primia Kaisar, ga non teip ga magaulap gat, mirie la maset meira la tomaiabu na luguan o arubu meba oagaralie bais ula mumuru ang Karisito.  
\v 14 Tie, uriro nunamap tung na luguan o arubu, urie la mangangasieng dalap ma papot ma ekelesiap papap, are ratmat ga okurupmein nuraiap maiong ga mamaranim migat meba baismeng o ties ang Morowa.   
\p
\v 15 Migat, non ekelesiap am Iesu la baismeng o bais ula muru, muana la kiram dalap ma me rulam. Pa non ekelesiap la baismeng o bais ula muru, muana la nameng meba tomiana me lourup gare migana ila uke me bais o bais ula mumuru. Pa non ekelesiap la tevurusmeng me uriro ubi rung ga mirie gat la man baismeng a Karisito.  
\v 16 Eva, miruo ekelesiap papap tuam la mime bais a Karisito, memani, nameng maset me rulam ga ameit Morowa la uabua ra kaguma ira ruo meba obunaktang alang a tavuk ila kire ga karuk a migana ba la puoong meba eniang uriro bais ula muru.  
\v 17 Pa non ma mirie la mime bais a Karisito, memani nameng meba mavaikmeng bop ma mila kanim na irap ma inamaniap. Eva, agat maiong la tale kan puvuvu na irap a Morowa. Karuk. Okosarmeng it meba ina maiabum noba non giginanimup tobuo na tara la tunama na luguan o arubu.   
\p
\v 18 Pa tale kan kadiktung maime tavukup maiam. Karuk. Memani, agattung gare ro: Leba baismeng o bais a Karisito, tie mumurut me rulam me man tavukup la baismeng ma. Iriro tavuk la mime bais o bais ula muru o agat maiong ga meinio bonim tuo o baismeng o agat ula migat, irie la paga agarit. Pa leba baismeng a Karisito ga ovienmeng bonim a me nakap, tie teruba me iruo paga ga eba kan man teraba maset.  
\v 19 Memani, orit ara busit la mime marik meba toagamilie ga Muranama a Iesu Karisito la ume tongangas. Ga iruo paga titot la betong ira ruo la eba toagaalie ga eba tovikmeng na iriro luguan o arubu ga tala.  
\v 20 Narung migat ga auantula irio paga un nagan meba tale betang: Tale ga akosartang paga ba ila kire ga orala mulinubap kirat. Karuk. Pa eba tomamarani ba migat meba avaiktang Karisito na neip tuo are tinan la tume okosar. Eva, leba temung o leba taving, ebat talang bonim ula kanu aun Karisito ma neip tuo.  
\v 21 Memani, tara la tunama na uro ninimiap, pagap ganam la makosartung na neip tuo la eba maialang bonim ula kanu aun Karisito. Pa leba taving, eva, eba tonang ga Karisito ga urie la eba okurupteling urio ninimiap titot la tunama na uro kimanam.  
\v 22 Pa leba ka man temung ga tonang na neip onim na uro kimanam, terit eba maagaralie papot ma teip ga magaulap ga eba omeuluan ties ang Karisito ga urie la eba are ba mulinim o ubi rung. Gare tiruo ga tale orit man alang la eba orouluo: Eba temung o eba taving? Tale orit man alang la mumuru me rulam.  
\v 23 Eva, tunama kabirana lie litiro narain agaripien la nelinam na agat tung. Eva, mitara narung meba taving ga marolaing neip tuo ga tala tonang ga Karisito ga okurupteling urio ninimiap titot la tunama na uro kimanam.  
\v 24 O atabo mumuru gat meba meimung neip tuo onim na urio kimanam, meba miagaralie.  
\v 25 Eva, nagantung maranit ira Morowa la naong me rulam meba ka man temung meba miagaralie. Are ratmat ga tira eba ka man tonang ga mimi na urio kimanam ga ubirang meba ongangastang nagan ming ga tenubap iro nagan.  
\v 26 Leba ina tala mii ga tonang iat ga mimi meba dakieng tenubap ming ira Karisito Iesu, muana la togimaming la inagat tunama ga mimi.   
\p
\v 27 Tie, mimi le amiuluan migat tavuk ila puvuvui are la miilo bais ula mumuru ang Karisito meba akosarming. Pa leba tale migimarang o tonang kakaliat, tie ebat tera gare ro, Dusming un narit dalap ga un narit agat ga ubiming iat meba maagamilie teip ga magaulap meba omiuluan bais ula mumuru ang Karisito.  
\v 28 Ga tuga taptang la tale mirau maime miriro teip la mime nekaromela ga mimi. Karuk. Tie, leba tale miraung maime karorap, urio la masingiala gare ro, Eba makiraraang Morowa ga eba ioumeng, pa eba ina milagiang Morowa. Migat, eba akosarang Morowa buang iruo paga.  
\v 29 Ga iriro Morowa, irie la talet ualo ubonuvarap miun meba naganming maranit ira Karisito. Karuk. Pa eba gat miairang meba miaving ngitngit na bonim a Karisito.  
\v 30 Tie, titot la omila ra urie ngitngit, memani mimi gat la miobu na uriro danunumiap la togimaming tinan la darunam una me bais ula mumuru ga titot mipto ties tuo la man darunam ka ume.   
\c 2  
\s1 Mimi le amiuluan tavuk ang Iesu Karisito  
\p
\v 1 Tie, atabo dalap mi la mime omela ngangas ira Karisito? Atabo dalap mi la maiot teteiliat me na ang Ila Kakani me milam? Atabo mionama ga nemiganming ga Muranama Ila Babai? O atabo mime kadik maset maime ekelesiap papap ga mime mabomivara, a?  
\v 2 Tie, leba are ba rie, okosarming tenubap tung meba betieng ga kakanu ba migat me miriro tavukup. La are ro: Mionang un narit it dalap, ga miaring namurit na aime Morowa ga miaring narit it agat ga narit it tavuk kabirana kan mi.  
\v 3 Ga na tara la okosarming ubi ang Ila Kani, tie buat agatming me milam kan meba mavienmeng non ekelesiap bop mi. Karuk. Pa tekapirming ga mionang mapat non ekelesiap ga buat agatming lake me milam.  
\v 4 Ga mimi narit narit le umialeng bo ubiap kan mim, ga buat mialam ibup mi ira ma ubiap maiam non teip ga magaulap. Karuk. Umialeng gat bo ubiap maiam non ekelesiap. Tie, me miriro tavukup, okosarming tenubap tung meba betieng ga kakanu ba migat.   
\s1 Karisito la tekapirong kan ga ovienong Morowa bonim a Karisito tubiat  
\p
\v 5 Eva, miaring it narit agat na dalap mi gare Iesu Karisito la ume agat na dalap a.  
\v 6 Unama gare Morowa migat, pa tale agatong gare ro, “Turuo la karuna gare Morowa. Are ratmat ga eba akosartang tavuk ang Morowa meba orala bonim ula kanu.” Karuk.  
\v 7 Pa aulai luaga a orong ga betong gare migana la tale amaning bonim ga auluan tavuk la mime akosar inamaniap.  
\v 8 Ga agimameng inamaniap la unama gare migana migat. Ga tekapirong ga ouluan ties ang Morowa, ila puoieng la uvara.  
\v 9 Met iriro muana, Morowa la maset kan ovienong bonim a Iesu ga ualo non bonim ula kanu aun la makurupin mirier bop ganam.  
\v 10 Tie, akosarong Morowa ira a gare ro, ga mirier angelop ganam na panbinim, ga inamaniap o pagap onim na kimanam ga pagap la maionama upat kimanam la eba makofmeng dadebip ma na irap a Iesu ga maionang apat.  
\v 11 Ga mirie ganam la eba ovienmeng bonim a ga eba ovaikmeng ties gare ro: “Iesu Karisito irie Ila Kakani buang.” Ga me iriro tavuk, inamaniap ganam la eba maialang bonim ula kanu aun Morowa Mamo.   
\s1 Mimi le makosarming tavukup mila mumurum ga mionang gare lalabie kabirana ma inamaniap  
\p
\v 12 Are ratmat ga ekelesiap papap tuam migat, mimi le omiuluan ties ang Morowa. Tinan la tume tunama ga mimi ga mime mipto ties tung ga omiuluan. Pa titot la tale gat tunama ga mimi. Karuk. Tunama ra kakaliat. Pa mirulo gare ro, Omiuluan urio ties migat la omirtung me miun titot. Tie, titot le didirming ga miraung ga omiuluan ties ang ga mimamaranim ba iro ubi ang meba omila urio kamniap agarit la opuoong Morowa meba alang miun. Urio kamniap la ualo agarit, urie ninimiap la eba ina milagiang Morowa.  
\v 13 Tie, mimi le mimung gare ro, memani, iriro migana la ubiong na dalap mi ga imuam dalap mi, irie Morowa. Eva, ubiong na dalap mi meba naming maset meba mamiuluan tavukup am o agat kan ang.   
\p
\v 14 Eva, mirie pagap ganam la mime makosar, buat nemukatming ga buat nebukmila o daminam o ties kabirana mi. Karuk.  
\v 15 Memani, mimi la lop am Morowa ga buat okosarming kiribas ba, pa mibabaum ba migat na irap a Morowa. Are ratmat ga narung meba betming maset gare lalabie na tara la mime mionama kabirana ma teip ga magaulap onim na kimanam la mime makosar tavukup mila kiram ga mime oguek ties ang Morowa.  
\v 16 Ga mimi le ovaikming bais ula mumuru ang Morowa la ime maagailie teip ga magaulap meba omela ninimiap la iot maset atatan makin. Tie, leba okosarming gare tiruo, eba tevurustang me milam tubiat na tara la eba ina terigiang Iesu me na urio kimanam. Muana la tira gare ro, Ubiap la tume makosar kabirana mi, mirie la tale ubiap agarit. Karuk. Pa betmeng ga kakanim migat.   
\p
\v 17 Pa leba betmeng giginanimup mila kanim ira mi, eva eba teraba maset. Nagan ming ga ubi ming la are kamniap ming me aun Morowa. Are ratmat ga leba tomenamung ga taving ga iura olabuan tuo ga urukang ubuo nagan ming gare tinan la aurukmeng miridaip wain abuo luaga o lavang meba itmaiamung uriro lavang na luguan ila kani o lotu, tie eba terabat maset ga mimi.  
\v 18 Are ratmat ga mimi le temiba ga inagat temiba maset ga turuo.   
\s1 Tiesong Paulo namo eba asagaang Timoti me Filipai  
\p
\v 19 Tie, leba naang Ila Kakani Iesu, eva tale kagat ga eba asagarang Timoti ga ala mi. Ga tubiat na tara leba ina terigiang ga toalava mi gare mani, tie eba mumurum ba dalap tuo me urie ties.  
\v 20 Eba asagarang Timoti me mi, memani tale mating noba migana gare Timoti la amaning namurit dalap ga turuo, ga man agatong papot meba miagaalie.  
\v 21 Non inamaniap la mimet agat maime pagap maiam kan. Tale kan mime agat migat meba umaialeng bo ubi ang Iesu Karisito. Karuk.  
\v 22 Pa amit Timoti, misingtuala ra a irie migana ila muri. Irie la toagaulie na ubi o bais ula mumuru, are kulot la ume agaulie ira ang.  
\v 23 Are ratmat ga tuga ka marera man pagap ganam o nunamap na luguan o arubu la eba betmeng gare mani ira ruo. Ga tubiat a iriro, eba kakalait asagarang Timoti ga ala mi.  
\v 24 Ga nagantung gat ira Ila Kakani la eba orangaang alang tung, ga tubiat eba kakalait tala mi ga migimarang.   
\s1 Ties me un Epafrodaitas  
\p
\v 25 Pa na tara la man agattung, tuga mumuru meba ina asagarang gat Epafrodaitas ga ala mi. Iriro migana, irie la ekelesia papa ruang ga ubiong iat ga turuo ga irie migan tuang una urio danunumiap me bais o ties ula mumuru ang Karisito. Anagirung tinan la asagaming ga muo toi ga toagaulie ma pagap la kagestung ma.  
\v 26 Titot la tuga ina asagarang meba ina ala mi. Memani, mitara naong meba migimaang narit narit ga giginam dalap a me milam, muana la mipto gas a la aiop tafa ula kanu ga kadikming aime. Are ratmat ga namo ina terigiang me mi.  
\v 27 Migat, tinan la tafaong migat, ga kagarat meba aving. Pa Morowa la kadikong aime ga amuriraong iruo migana. Na tara la amuriraong Morowa, eva irie gat la kadikong me rulam. Memani, leba ama aving Epafrodaitas, eba taving giginanim ula kanu to na luguan o arubu. Pa Morowa la amuriraong Epafrodaitas ga ovugutuara giginanim tung.  
\v 28 Are tiruo ga narung maset meba kakalait asagarang ga ala mi, meba ina agimaming ga iat tevurusming ga irie ga dalap tuo la eba maiot teteiliat.  
\v 29 Are ratmat ga tubiat na tara la eba ala migimaang Epafrodaitas, alagiming ga maset tevurusming aime gare non ekelesia papa ming. Eva, mialang bonim ula muru aun migana la are tiruo.  
\v 30 Memani, tale kan agatong ume ninimiap ang kan meba okosarang ubi ang Karisito. Karuk. Na tara la tale puoming meba toagamilie, tie naong meba opuoang urio ubi la tale puoming meba toagamilie. Are ratmat ga kagarat meba aving na urio ubi ang Karisito la man okosarong.   
\c 3  
\s1 Migana la naganong ira Karisito, iriet migana ila puvuvui migat na irap a Morowa  
\p
\v 1 Tie, ekelesiap papap tuam, tuga itamung ties tung, pa non ka tiesiap misik la maiot. Tale kan palalarung la inagat omirtung uro ties me miun, gare tinan la mamirtung non babap ga mela miun. Pa uriro babam la eba miagailie ga uialeng mibuo ga eba mabukila teip la mime mikarabutmiala ga namo akirarameng tavuk ming ila muri. Eva, uriro ties la namo tiesieng me miun, urie la are ro: Temiba aime Ila Kakani.  
\v 2 Ga maset temamalienming me Iudaiap la mime bais a tavuk o kasau. Mirie la kamena gare kavunap mila suvameng la mime makosar tavukup mila kiram meba akirarameng tavuk ming ila muri.  
\v 3 Mirulo gare ro, bubuo inamaniap migat am Morowa la bume akosar tavuk migat o kasau, pa tale Iudaiap. Karuk. Memani, Iudaiap la mime akosar tavuk o kasau na neip ma, pa bubuo la bume lotu me ai Karisito Iesu iro kukunim ang Muranama Ila Babai. Ga tale agatbuong me iriro tavuk o kasau la businguala meba betbuong ga bupuvuvum ba na irap a Morowa. Karuk.  
\v 4 Pa leba agatmeng non teip la puvuvum na irap a Morowa ma pagap ma neip. Tie, atabo puorung it meba tevientang me iriro namurit it muana ga muana ruang la eba akurupteling muana maiang mirier teip ganam.  
\v 5 Muana ruang la are ro: Tokasaumeng na la lama gamin tubiat la tovarangeieng naga. Turuo migana onim Israel, pa butamat tung la Bensamin. Non gat paga, turuo migana onim Hibru migat, memani ira ruang ga naga rung la iat litie Hibrupien, ga turuo gat parasaio la tume aruluan maimai ang Moses.  
\v 6 Ga tomamarani migat la man okosartung ubi ang Morowa, gare tiruo ga man makirararung migat ekelesiap am Iesu.\f + \fr 3:6 \ft F Memani, na agat kan ang agatong gare ro, Tavuk tuang la eba agaralie Morowa. Pa tale are ba rie na irap a Morowa.\f* Ga non paga, leba tovuvuomeng inamaniap me tavuk o unuluap o maimai ang Moses, eva eba tale omaioping sik ba rung. Karuk.   
\p
\v 7 Pa titot la nagantung ara ira Karisito, are ratmat ga miriro pagap ganam la magattung pagap it mila kanim, mirie la agatming gare pagap mila kiram. Memani, obunakmeng alangtung meba aruluan Karisito.  
\v 8 Non gat paga, man agattung maime pagap ganam, miruo la pagap mila kiram, na tara la arakirung Karisito Iesu irie Ila Kakani ruang, uriro unirap aime Karisito la natauan paga migat. Are tiruo ga magattung pagap la makosarong meba toagaalie, pa turuo la arula tavuk ang Karisito. Are ratmat ga magorung ara non pagap tinan la tume maruluan ga makosar, ga arula Karisito ga nemigantung ga irie.  
\v 9 Ga tuga pareptang ira Karisito ga eba turuo ba migana ang. Are ratmat ga iriro tavuk tuang ila puvuvui la tale betong iro maimai ang Moses, pa betong ira tavuk o nagan, Nagantung ira Karisito, ga iro urio nagan tung eba toevang Morowa migana la puvuvui.  
\v 10 Ga narung meba maset arera Karisito ga kukunim ang la ina teuara na una ga narung meba nemigantang ga irie meba asaintang tavuk o unuaviap o ngitngit, ga eba taving gare ba irie.  
\v 11 Me iriro tavuk, narung meba toemung Morowa kabirana ma inamaniap la mevara ga tubiat eba tonang ga Karisito atatan makin.   
\s1 Paulo la ume ibir maranit na nekotarek  
\p
\v 12 Tie, Miriro tavukup ganam la mirulo ma, tale kan tulo la tuga marula ra titot. Karuk. Ga tale kan tiestung la tuga tale mating kiribas ga tomumuri na irap a Morowa. Karuk. Pa arit Karisito Iesu la tovuvuoong ara ga eba alang uniap ula muru toun me ubi la ualo toun meba opuorang: Are ratmat ga tomamarani ga ibirtung maranit na nekotarek meba orala uriro uniap ula muru la orangaong Karisito me rulam.  
\v 13 Ekelesiap papap tuam, tale kan agattung la tuga orula ra uriro uniap gano ang Karisito. Karuk. Are ratmat ga tale gat ina magattung pagap la makosartung tinan, pa man agattung it maime pagap ganam la namo betmeng tubiat.  
\v 14 Tie, me iriro tavuk, man ibirtung o kukunim tung gano mebat betang na gar lagorang ga orala uriro uniap onim nakap la tomarikong Morowa ira Karisito, urie ninimiap ula iot maset atatan makin.  
\v 15 Are ratmat ga mimi ganam la kakanu ra unirap ming ira Karisito, le mimaning narit agat gare turuo la tume agat. Pa leba noba mi la ame non ara agat, tie Morowa la eba ovuvutaling urie agat ming uakap meba omeuluan agat ang.  
\v 16 Pa paga ila kani la are ro: Iriro tavuk la miaria ra titot, iriet tavuk le buaring maranit ga man okosarbuong.   
\p
\v 17 Ekeleisap migap tuam, amiuluan tavuk la tume akosar. Ga maset magimaming miriro teip ga magaulap la mime ameuluan tavuk pang la misinguala meba amiuluan na tara la ponama ga mimi, mimi kan le amiuluan.  
\v 18 Memani, ame papot ma teip ga magaulap la mime mameuluan non ara tavukup mila kiram ga tesingmaiala mirie karorap o urio ubi la okosarong Karisito na tara la uvara iro maiogun. Are ratmat ga titot la inagat mirulo ma kup la meriva na irap tuo gare tinan la mirulo.  
\v 19 Tie, miriro teip, neip ma la are kan morowap maiam, mirie la meke agarip maiam. Ga mime mavien bop ma miruo pagap mila kiram ga mulimeba maime ga mimet agat maime pagap onim na kimanam. Are ratmat ga eba makiraraang Morowa ga eba saikmeng na iou.  
\v 20 Pa bubuo la bubuo inamaniap onim na panbinim. Ga man bumamaranim ga auanbula Ila Kakani Iesu Karisito, irie la eba oolaing panbinim ga muong lourup ga eba ina bulagiang.  
\v 21 Ga irie kan la eba maigorala miruo neip buo onim na urio kimanam ga eba kamena gare ba neip a onim na panbinim ga eba okosarang gare tie o kukunim ang ula kanu. Uriro ngangas ang, urie la puoieng meba iabum iat pagap ganam apat meba ake maime ga ualeng mabuo.   
\c 4  
\s1 Man tevurusbuong un narit dalap ga buarang agat ula muru  
\p
\v 1 Are ratmat ga ekelesiap papap, dusming maranit ira Ila Kakani gare titot la mirulo. Mimi la tume na me milam. Naganming ira Karisito ga mitara teruba me milam. Memani, urio la masingiala teip ga magaulap la okosartung ubi migat ang Ila Kakani ga tubiat eba alang uniap ula muru toun.   
\p
\v 2 Tie, nunuo Iuodia ga nunuo Sintiki, meunorung meba betmang un namurit dalap ira Ila Kakani.  
\v 3 Ga nunuo Sisikos, migan tuang ara migat, nomariktung meba leaganalie liruo magabie. Tinan la lipama migat ga turuo ga ubiliong maranit me uriro ubi o ties ula mumuru. Are ratmat ga maset leagalilie Klemen ga teip la mime ubi iat ga turuo. Eva, bop ma la maiot na babam o ninimiap la iot atatan makin.   
\p
\v 4 Tie, busit le man tevurusming aime Ila Kani. Inagat miralava: Man tevurusming.  
\v 5 Akosarming tavuk ila teteiliatong ira ma teip ga magaulap meba meira mimi inamaniap am Morowa. Memani, kagarat it leba ina terigiang Ila Kakani me na uro kimanam.  
\v 6 Buat giginam dalap mi me man pagap la kagesming ma. Karuk. Pa me mirie pagap ganam, marikming me ai Morowa me man paga la kagesming a ga amikang o ties o temaieng.  
\v 7 Leba okosarming gare tiro, tie malina ang Morowa la eba ualeng mabuo dalap mi ga agarip mim na ubi ang Karisito Iesu. Iriro malina ang Morowa, irie la amaning kukunim la makurupin mirier agarip maiam inamaniap.   
\p
\v 8 Tie, ekelesiap papap tuam, tuga ina miralava a non gat paga la are ro: Managiming ma miriro tavukup: Tavuk la migat, ga tavuk la puoong meba ovienbuong bonim a Morowa, ga tavuk ila puvuvui, ga tavuk ila babai, ga tavuk o na, ga tavuk la ame bonim ula mumuru maset, ga tavuk ila mumuri migat, ga tavuk o uvien.  
\v 9 Eva, miriro tavukup ganam la misingtuala ma ga magimaming ara na ninimiap tung, tie mimi le mamiuluan. Leba okosarming gare tiruo, tie Morowa a malina la eba onang ga mimi.   
\s1 Tevurusong Paulo maime Filipaip la osagameng kamniap maiong  
\p
\v 10 Tie, titot la teruba migat aime Ila Kakani, memani agat ming me rulam ga osagaming kamniap me toun. Migat, tinan la agatming me paga la kagestung a, pa tale mimaning alang meba toagamilie.  
\v 11 Tale mirulo gare tiro meba taranang agat ming me pagap la kagestung ma. Karuk. Memani, lasengtung ara la tunama kan gare tiro. Leba matim papot pagap o kagestung ma pagap, dalap tuo la mimet tevurus me miruo.  
\v 12 Migat, puorung it meba tonang gare migana ila bai. Ga puorung gat meba tonang gare migana la amaning papot ma pagap. Arit ara tavuk o parak papot, ga tavuk gat o tafa me parak. Arit gat tavuk o unuariap ma papot pagap, ga tavuk gat o kages ma pagap. Na taraiap ganam ga na napup ganam, tumet teruba me miruo pagap.  
\v 13 Pa tale agattung la mapuorung ara miriro tavukup ganam o kukunim tung kan. Karuk kan migat. Pa iro kukunim ang Karisito, irie la ume ualo kukunim ang toun, ga puorung meba makosartang miriro pagap ganam.   
\p
\v 14 Eva, uriro ties tung la migat o. Pa na tara la ogimaming giginanim la betieng ira ruo, tie toagamilie maset, ga iriro tavuk ming la mumuri.  
\v 15 Mimi teip ga magaulap onim na taun Filipai, mimi kan la mira gare ro: Tara la puruaro ubi o bais o ties ula mumuru ang Karisito la lake baistung na provins Masedonia. Ga na tara la orulai provins Masedonia, karuk kan ma ekelesiap ba la nemiganmeng ga turuo me tavuk o kamniap ma kakepup ga pagap meba toagamilie. Karuk. Mimit la akosarming irio tavuk.  
\v 16 Ga na tara la man tunama ka na taun Tesalonaika na provins Masedonia, narain lapien la masagaming kakepup ga non pagap meba toagamilie.  
\v 17 Ebun mima tiestung gare tiruo meba ina mimariktang gat o kamniap ba. Karuk. Pa narung it aime Morowa la eba apulang uniap ula muru me miun me iriro tavuk la akosarming ira ruo.  
\v 18 Narung meba omira gare ro, Tuaram ara pagap ganam la masagaming me toun na kilalap a Epafrodaitas. Are ratmat ga titot la matim papot ma pagap ga dakmeng maset. Ga urio kamniap la are lavang la ame kukuf ula mumuru la mialo aun Morowa ga teuba me milam me uriro lavang.  
\v 19 Are ratmat ga Morowa ruang la eba mapuoang pagap la kagesming ma ga mirier pagap mila mumurum am ganam na panbinim. Eba okosarang Morowa gare tiro na ubi ang Karisito Iesu.  
\v 20 Ira Morowa, irie Ira buang, bubuo ganama le bualang bonim ula kanu aun atatan makin. Amen.   
\s1 Tiesiap lagorang  
\p
\v 21 Tualo “la ula muru” me maun inamaniap am Morowa na ubi ang Karisito Iesu. Papap tuam la maionama ga turuo, la maialo “la ula muru” me miun.  
\v 22 Teip ga magaulap am Morowa la maionama togo la osagameng “la ula muru” me miun. Ga mirie non ekelsiap gat la okosarmeng ubi na luguan ang orong ila kakani Kaisar, la mamaranim migat meba osagameng “la ula muru” me miun.  
\v 23 Ubonuvarap ang Ila Kakani buang Iesu Karisito la eba iot na dalap mi ganam.