\id JAS - Kuot NT [kto] -Papua New Guinea 2001 (DBL 2014) \h Iemes \toc1 Babam la omirong Iemes \toc2 Iemes \toc3 Ie \mt1 Babam la omirong Iemes \c 1 \p \v 1 “La ula muru” me miun, Turuo Iemes, migana o ubi ang Morowa ga Ila Kakani Iesu Karisito. Omirtung urio babam ga osagarung me miun manaburuan ga narain ma garip ma teip onim Israel migat la omaiolai pianam ming ga mila maionama tapmat na uro kimanam gano. \s1 Uvuvuo la ime ongangas nagan buong \p \v 2 Ekelesiap papap tuam, na tara la non ara non ara uvuvuop la namo betmeng ira mi, muana la naganming ira Morowa, tie buat giginam dalap mi. Karuk. Pa mimi le temiba maime maset. \v 3 Memani, mamit pagap la betmeng it meba ovuvuomeng naganming, mirie la mime avaik tavuk o dus maranit ga miavim giginanimup. \v 4 Are ratmat ga dusming maranit ga miavim giginanimup leba betmeng ira mi. Leba okosarming gare ro, tie eba man mikakanim ba iro nagan ga tala kan kagesming a paga ba ga a tavuk ang Morowa. Karuk. Tavuk ming la eba mumuri ba maset ga puvuvui ba na irap a Morowa. \s1 Migana la kagesong o agat ula mumuru, irie le aekang me ai Morowa \p \v 5 Tie, leba noba migana kabirana mi la kagesong o agat ula mumuru meba ouluan agat ang Morowa, tie, aekang Morowa meba alang agat ula kanu aun. Eva, eba alang aun. Memani, Morowa la ume ualam papot ma pagap maun mirier inamaniap am ga tale kan ume bukbuk aime migana ba la aika. Are ratmat ga eba gat alang agat ula muru aun. \v 6 Are ratmat ga na tara la amika Morowa, amikang migat un nagan ga buat mimaning narain agaripien. Karuk. Memani, migana la amanin narain agaripien, irie la tale ouluan maset ties ang Morowa. Karuk. Kauna gare boulup na pirom la oilafieng ifif ga teiara tapmat. \v 7 Migana la are tiruo la tala kan agatong Ila Kakani la eba alang paga ba aun. Karuk. \v 8 Memani, amaning narain agaripien la nekoratliong tapmat ga mirier tavukup ganam la makosarong, tale kan naganong ga makosarong. Karuk. \s1 Ties me maun teip mila baim ga teip gat mila memanim papot ma pagap \p \v 9 Tie, ekelesiap papap pam la mime tekapir, temibat. Memani, bop mi la kakanim na irap a Morowa. \v 10 Pa ekelesiap papap pam la mimanim papot ma kakepup, buat it temiba me mitmat kakepup. Karuk. Pa mirie le temeba la eba kakapim ba bop ma na irap a Morowa meba mavienang bop ma tubiat. Memani, na tara la eba meving gare sasaip ma kaburabap, tie mirie kakepup la eba tale magamelie na irie tara. \v 11 Abit ara tara la betong efan, mitara papamne ga ume maii palisip. Sasaip ma kaburabap a palis la mime melum, ga sasaip ma kaburubap mila mumurum la mime nam. Aret tie ga miriro teip la memanim papot ma pagap, mirie gat eba man saikmeng na tara la man makosarmeng ka non ara non ara ubiap. \s1 Morowa la ume buidang maset ga tale kan ume burana meba akosarbuong tavuk ila kire \p \v 12 Tie, miriro inamaniap la naganmeng ira Karisito ga miavio giginanim me mirier uvuvuop, mirie le temeba. Memani, na tara la ebar makurupmeling mirier uvuvuop, tie eba alang Morowa ninimiap la eba iot maset atatan makin maun are uniap maiong. Memani, midaong ara Morowa meba alang urio uniap maun inamaniap la mime na aime. \v 13 Pa miptang, leba aranang paga ba noba migana meba akosarang tavuk ila kire, buat tiesong gare ro, “Morowa la tourana ga akosartung irio tavuk.” Karuk. Eva, utmat la ties o kakarabunim. Kirinim la tale puoieng meba iranang Morowa, ga Morowa la tale ume urana migana ba meba okosarang kirinim. \v 14 Pa na buong kan ula kiro la ime mavanaieng dalap buo ga buirana meba akosarbuong tavuk ila kire. \v 15 Tie, tuga okosartang ties o uvuvuo. Uriro na ula kiro la teiara meba okosarieng kirinim, urio la are magabun la mugo la namo uvarangeieng. Ga tara la betieng kirinim ga kakanu, ime ovarangeieng nuvarap. \p \v 16 Tie, ekelesiap papap tuam migat, ebun miairang uriro na ula kiro ga mikarabutiala. \v 17 Mirier pagap ganam mila mumurum ga mirier kamniapup la babaim migat, mirier ganam la mime mamaio aun Morowa. Iriro Morowa, irie la okosarong lalabie na panbinim. Eva, irie la mumuri ga tale ume aigorula tavuk ang ila muri, are louburien a non paga la betong efan ga laklage pa tubiat inagat papoi. Morowa la tale are tie. Karuk. Pa unama gare kan tie atatan makin. \v 18 Ga iro kan na ang, bukosarong ga betbuong gare lop am o ties o migat pa irie gare Mamo buang. Eva, irie la buiteong iro kan ties ang migat meba bunang ga irie gare natauan gar kabirana ma mirie inamaniap ganam ga mirier pagap ganam la makosarong. \s1 Leba naganbuong migat ira a Morowa, tie eba makosarbuong tavukup mila mumurum gat \p \v 19-20 Tie, ekelesiap papap tuam la narung maime, mimi le maset amira iriro paga: Mimir ganam le maset miptang ties ang non migana. Ga mimir ganam le teteiliat ming pa buat kakalait tiesming o bukbukming. Memani, tavuk ma dalap mila papamnam la tale avaikmeng tavuk ila puvuvui la naong Morowa meba akosarbuong. \v 21 Are ratmat ga maduratming mirier non ara tavukup mila papalim ga tavukup mila kiram la mime busit bet na dalap mi. Ga tekapirming ga omila urio ties la ulio Morowa na dalap mi. Uriro ties, urie la puoieng meba ina milagiieng. \p \v 22 Mirulo maranit migat gare ro, Buat mipto agarit uriro ties. Karuk. Narung migat meba omiuluan. Pa lebat miptang agarit, tie mimi la tevanaming kan. \v 23 Leba noba migana la upto agarit ties ang Morowa, ga tale ouluan. Irie la are migana la tegimaong na tilagu. \v 24 Eva, ogimaong kan pava a, pa tubiat la ula ga kakalait uvaio pava a la ui gare mani. \v 25 Pa maimai ang Morowa la mumuru migat ga ime maagailie teip ga magaulap meba magomeng kiribasiap maiam ga memung puvut na irap a Morowa. Ga leba migana ba la maset uii na urio maimai ga ouluan migat, tie eba malaminaisang Morowa ubiap ganam la ume makosar. \p \v 26 Tie, leba migana ba la teagatong irie kan la mumuri ga ume lotu migat me ai Morowa pa tale maset uale bo nanam a, migat irie la tale ouluan ties ang Morowa. Karuk. Irie kan la man tevanaong. Are ratmat ga nagan ang ga lotu ang la aret paga agarit. \v 27 Eva, tavuk ang ekelesia la puvuvui maset ga tale amaning kiribas na irap a Morowa Mamo buang la are ro: Bubuo le maagabulie lop la mevara ra irap maiam ga nagap maiam, ga magabulie magaulap la mevara laip maiam ga ubualeng mabuo na tara la betmeng giginanimup ira ma. Ga non gat paga, maset omamalienbuong nunumiap buong kan meba tale bukosarang tavuk onim na uro kimanam meba abuuluan ga bupapalim ba na irap a Morowa. \c 2 \s1 Akosarbuong it namurit tavuk ila muri me maun mirier inamaniap \p \v 1 Tie, ekelesiap papap tuam, naganming ara ira Ila Kakani buang Iesu Karisito. Iriro Ila Kakani buang, irie la amanim pagap mila mumurum na panbinim. Are ratmat ga leba maratming ekelesiap me na non ara garip na agat ming, pa maset umiale mabuo mirie la memanim papot ma kakepup, pa mialam ibup mi ira ma inamaniap agarit, tie akosarming tavuk ila kire. Are ratmat ga akosarming it namurit tavuk ila muri ira ma mirier inamaniap ganam. \v 2 Agatming maset me uriro gas tung: Na tara la iat nebolaming meba miptang ties ang Morowa, tie narain teipien la liobu na luguan ming o lotu: Non migana la tesasaong maset ga amaning baiama a gol la uabua na kinonam a, la uobu na luguan o lotu. Pa noba migana la bai, irie la gigiritmeng it sasaip am ga tale mumurum, irie gat la uobu na luguan o lotu. \v 3 Tie, atabo eba akosarming tavuk ila mumuri ira migana la maset kan tesasaong ga eba amilava, “Munang nonang abuo iro luaga la muri.” Pa atabo eba amilava migana ila bai gare ro, “Nunuo, munang dusnang tasik.” o “Nonang to kagarat mai kibap tuo.” \v 4 Leba akosarming tavuk la are rie ga miniang irio migana la bai, tie akosarming tavuk ila kire na irap a Morowa, are la avuvuoming irie ekelesia iro agat ming ula kiro. \p \v 5 Tie, ekelesiap papap tuam la narung maime, miptang ties tung. Miriro inamaniap la baim na irap ma inamaniap onim na uro kimanam, mirie la maiteong Morowa ga eba betmeng gare inamaniap la naganmeng maset ira a. Ga uabuara Morowa kaguma ira ma miriro inamaniap la naong maset maime, meba maionang tapma na inamon ang ga ualeng mabuo, are la midaong ara tinan. \v 6 Pa mimi la mime mamulimiba miriro inamaniap mila baim. Maset onagiming utmat: Aga la ume mibounama ga uabu giginanim mibuo ga miurana me na ties, a? Eva, miriro inamaniap la memaning papot ma kakepup, miriet la okosarmeng gare tiro. \v 7 Migat, uabu Morowa bonim ula mumuru ang Karisito ira mi? Pa aga la ume fugau iro utmat bonim, a? Irie gar ma inamaniap la memanim papot ma kakepup, miriet la mime akosar itmat tavuk. \p \v 8 Tie, lama omiuluan uriro natauan maimai la ualo Morowa buun, tie mimi la akosarming tavuk ila muri na irap a Morowa. Uriro natauan maimai la omirmeng na Babam ula puaru, urie la igama, “Maset naming me mirie non migap mim are la naming kan me milam.” \v 9 Pa leba maratming ekelesiap me na non ara garip na agat ming, ga maset umiale mabuo mirie la memanim papot ma kakepup, ga mialam ibup mi ira ma inamaniap agarit, tie akosarming tavuk ila kire, ga arupmiaba ra irio maimai ang Morowa. \v 10 Memani, leba noba migana la ume busit mauluan mirier maimaiap, pa arupuaba namurit it maimai, tie irio tavuk ang are la marupuaba ra mirier maimaiap ganam na irap a Morowa. \v 11 Abit ara, Morowa la tiesong gare ro, “Mimi mila magiang, buat akosarming tavuk o sadak”, ga tiesong gat gare ro, “Mimi la buat minamuam inamaniap ga meving.” Are ratmat ga leba tale akosarnang tavuk o sadak, pa nunamua noba migana, eva nunuo migana la betnung gare migana la ume marupuaba mirier maimaiap. \p \v 12 Tie, mimi le maset tiesming o ties ula muru ga akosarming tavuk ila muri na irap a Morowa, memani eba midusang na ties ga oauluan maimai ula nou ga mivuvuoang. Uriro maimai ula nou, urie la eba buagailie meba akosarbuong tavuk ila muri ga ina bulagiieng tubiat. \v 13 Memani, leba migana ba la tale ume kadik maime non inamaniap, tie eba tale kadikang Morowa aime, na tara la mavuvuoong inamaniap na ties. Karuk. Pa migana la kadikong me non ara inamaniap ga akosarong tavuk ila mumuri ira ma, tie eba tale araung me iriro tara o ties. Karuk kan migat. Memani, irie kan la puoong meba okurupeling ties. \s1 Leba tale asingiala nagan buong tavuk ila mumuri, tie uriet pagat agarit \p \v 14 Tie, ekelesiap papap tuam, leba amama migana ba, “Tume nagan ira Karisito”, pa tale kan ume akosar tavuk ila mumuri, tie naganang irio migana la aret paga agarit. Atabo nagan are tiruo la puoieng meba aagailie na tara la gorang la eba ina malagiang Morowa inamaniap am? Karuk kan migat. \v 15-16 Leba noba ekelesia papa o lou la tale amaning buruma ga parak ba, tie tale puoong noba mi meba aalava gare ro, “Nolaminaisang Morowa ga malina le ot na dalap nuo ga eba noagaalie Morowa meba manoping burap ga parakiap mila mumurum.” Tie, la mimi kan la tale mialo parak ba aun meba magailie neip a, tie atabo urio ties la eba aagailie iriro migana gare ba mani, a? Karuk kan a paga. \v 17 Are ratmat ga uriro nagan la tale akosarieng tavuk ila mumuri na ninimiap ang migana la naganong, tie iriro tavuk o nagan la uvara ra na irap a Mrowa. \p \v 18 Tie, atabo non migana la eba amama, “Ualo Morowa kamniap maun inamaniap am narit narit. Are ratmat ga non migana la ume nagan, pa non migana la ume akosar tavuk ila muri.” Tie, tuga tapulang uriro ties gare ro, “Leba nagannang pa tale nume akosar tavuk ila muri, tie, eba onera urie nagan nung gare mani? Pa turuo eba akosartang tavuk ila muri, ga met iriro eba nosingiala o nagan tung.” \v 19 Tie, atabo nunuo la nume nagan gare ro, Morowa narit it la unama. Mumuru nagan nung! Pa muranap mila kiram gat la naganmeng gare tie. Pa didirmeng gat un nuraiap, memani tale mime omeuluan ties ang Morowa ga eba eralim Morowa na ties ga eba mela na kit o iou. \v 20 Nunuo migana ila bangutong migat! Lama nagannung it, pa tale akosarnung tavuk la teuba Morowa aime gat, tie nagan nung la aret paga agarit. \v 21 Agatnang memani ga iva Morowa Abraham gare migana ila puvuvui? Naptang, Abraham la uabua poi ang Aisak bo lavang ga namo alang gare kamniap. Na irie tara, agimaong Morowa tavuk ang ga iva irie migana ila puvuvui. \v 22 Agatming maset, uriro nagan ang Abraham ga tavuk ang ila mumuri, litie la iat nelipama, ga itmat tavuk ila mumuri la opuoong migat nagan ang. \v 23 Met iriro tavuk, non ties na Babam ula puaru la opuoong migat. Uriro ties la ilo gare ro, “Abraham la naganong iro ties ang Morowa ga iva Morowa irie migana ila puvuvui.” Ga Morowa la iva gat irie migan ang. \p \v 24 Are ratmat ga titot la mira la uakap gare ro, Migana ba la naganong agarit, tala kan iva Morowa migana ila puvuvui. Karuk. Agatong aime migana la akosarong tavuk ila mumuri, ga ira iriro muana eba evang Morowa migana ila puvuvui. \v 25 Aret uro magabun o sadak Rahap tinan la uiale bo teipien o uniap tigit na taun Ieriko ga tubiat la ina lesagaieng Rahap ga ina bun oliuluan non alang ga igoliong. Eva, anagiong Morowa tavuk la akosarieng Rahap ga ivo urio magabun urie magabun ula puvuvui. \v 26 Tie, leba maolaing muranama neip a migana ba, miriro neip la mevara ra. Aret tie, leba migana ba la naganong pa tale kan akosarong tavuk ba ila mumuri, tie urie nagan ang are la ivara ra. \c 3 \s1 Maset temamalienbuong me tiesiap buam \p \v 1 Tie, ekelesiap papap tuam, migat ara mirier inamaniap ganam la eba dusmeng na ties ang Morowa. Pa bira na irie tara, Morowa la avuvuoong ara tavuk maiang, ga eba maset mavuvuoang teip o usingnualap. Are ratmat ga ebun papot ma teip kabirana mi la omela ubi la mime masingmiala teip ga magaulap a tavuk la naong Morowa aime. \v 2 Memani, papot ma taraiap la bume makosar non ara non ara kiribasiap ga bume okaban. Pa leba migana ba la puoong meba tale makosarang tiesiap ba mila kiram, tie, irie migana ila puvuvui maset na irap a Morowa ga irie la puoong meba mairorotang mirier napup ma neip a. \p \v 3 Na tara la nabuong meba akosarbuong hos meba ouluan ties buong, tie bume buabua nap a ain na nanam a hos ga irat iriro tavuk bume mairorot neip a ganam. \v 4 Ga agatbuong gat tavuk iang sip ula kakanu la ibirieng na pirom. Sip la paga ila kakani, ga ifif ula mamaranu la ime oilaf na tara la ibirieng na pirom. Pa stia o sip la tatak arot paga. Pa leba ama ala kepten na nap ba, tie ume arigiong isik tatak stia ga ime aiuluan sip me na man nap la namo ala iriro kepten ana. \v 5 Aret gat tie, uriro malobiem, uriet la tatak nap ma neip buo, pa me uriro malobiem teip la mime tekanir maset ga mavien bop ma me nakap. Bira ra, tatak it kit la puoieng meba ira ga betieng kit ula kakanu na panap ga masuamieng kuop ganam. \v 6 Eva, malobiem gat la are kit. Urie, non nap la ut ira ma neip buo, pa mitara ime ivam papot ma non ara tiesiap mila kiram ga ime makosar neip buo ganam ga papalim. Ga ime makosar non ara non ara tavukup mila kiram ga okiraraieng ninimiap buong gano. Uriro kit, urie la ime bet na kit o iou ang Satan. \v 7 Tie, ame non ara non ara suvailap, ga kobengip ga kagokup, ga mirier pagap la mime maiot na pirom. Eva, puomeng inamaniap meba malasengmeng miriro pagap ga makosarmeng meba meptang ties ga maionang mapat. \v 8 Pa karuk kan a migana ba la puoong meba olasengang malobiem a kan. Karuk. Mirier lap ganam malobiem la tale kan ime oiuluan ties ga ime teiara busit me tiesiap mila kiram, are kabo o non kuguom ula kiro la inamua migana ga uvara. \v 9 Ma malobip buo, bume avien Ila Kani Ira buang. Ga ma malobip buo kan, bume okosar ties ula kiro ga bume makaran mirie non teip ga magaulap la makosarong Morowa meba betmeng gare Morowa kan. \v 10 Na namurit nanam, bume avien Morowa ga bume ties o karan gat. Ekelesiap papap tuam, buat miaira iriro tavuk ila kire le betang kabirana mi. \v 11 Maset onagibuong. Karuk kan o danuot ba la ime bet burunam ula mumuru me tapnuap ga burunam ula tesu gat. \v 12 Ekelesiap papap tuam, atabo kuop a fig la puomeng meba mulum ba ma kabop a oliv, a? Tale puoieng. Ga atabo kuop a wain la puomeng meba mulum ba ma kabop a fig, a? Urie gat la tale puoieng. Are gat tie, burunam ula tesu la tale puoieng meba iat betieng ga burunam ula mumuru me tapnuap na namurit danuot. Karuk. \s1 Agat ula muru onim na panbinim ga agat ula muru onim na kimanam \p \v 13 Tie, leba aga ba migana kabirana mi la amaning agat ula muru ga unirap ula muru maset, tie mumuru le masingala o agat ang ula muru: Ninimiap ang le maset betieng la uakap na irap ma inamaniap ga masingala a tavuk ila muri ga tavuk o uteteiliat. \v 14 Pa la mimi la mime kiram dalap mi maime non teip ga mime oisin alang meba miavim bop mi me nakap, tie mimi la buat tekanirming me agat ming ula muru ga unirap ming. Karuk. Memani, leba are ba rie, mikarabum ara. Ga urio ties ming la tale nepuoieng ga ties migat ang Ila Kakani. \v 15 Utmat non ara agat ula muru la tale muio aun Morowa. Karuk. Pa pagat onim na uro kimanam. Ga na me neip onim na uro kimanam la betieng gat aun Satan. \v 16 Miptang, miriro inamaniap la mime kiram dalap ma me non inamaniap ga mime oisin alang meba maiavim bop ma me nakap, mirie la tale kan mime maionama maset aun malina, pa mime makosar non ara tavukup mila kiram. \p \v 17 Pa miriro ekelesiap la omela agat ga unirap ula mumuru aun Morowa, mirie la mime makosar tavukup gare ro, Natauan, mime akosar tavuk ila babai. Pa lama narain, mime maionama aun malina ga non teip, ga mime mepto ties maiong non inamaniap la maagamelie. Non gat paga, mime kadik migat me non ara inamaniap ga maiaviam parakiap ma tavukup mila mumurum. Eva, mimet akosar namurit tavuk ira ma teip la memaning bop ga ira ma teip agarit. Ga tale mime kakarabum ira tavuk ila mumuri la mime ameuluan. Karuk. Mime ameuluan migat. \v 18 Miriro inamaniap la menum aun malina, mirie la mime na migat me narit dalap ga non teip ga maiaviam parakiap ma tavukup mila puvuvum, kamena gare migana la ulio kabo na ubi ga tubiat eba makakavaang parakiap mila mumurum. \c 4 \s1 Tekapirming na irap a Morowa \p \v 1 Tie, man paga la irie muana o danunumiap ga nebuknulap la betieng kabirana mi? Irie tavuk la betong na dalap mi la are ro: Ame non ara non ara agarip mila kiram ma dalap la temaiara meba mamila non ara pagap, mirie la maiot na dalap mi la mime nekaromela ga agarip mim mila murum. \v 2 Mime na maset meba mamila non ara non ara pagap la magimaming, pa tale puoming meba mamila. Are ratmat ga mime kiram dalap mi me non inamaniap ga mitara mime bukbuk ga pumiaro danunumiap ga non inamaniap ga mime minamuam ga mevara. Pa tale puoming meba mamila, memani, tale kan mime amika Morowa meba alam pagap miun. \v 3 Ga na tara la amika Morowa ma pagap la naming maime, tale ume mikami. Memani, dalap ga agarip mim la tale puvuvum na irap a ga amarikming it meba mamila pagap meba temeba dalap mi maime. \p \v 4 Amiolai Morowa gare magabun la aiolai lai iang ga ila man sadakieng tapmat. Miptang, leba migana ba la naong aime tavuk onim na kimanam ga auluan, tie irie la akosarong tavuk o nekaronulap ga Morowa. Inagat miralava: Migana aga la namo nemigan ang ga tavukup onim na uro kimanam, eba irie ba karorama ang Morowa. \v 5 O atabo agatming non ties na Babam ula puaru la ilo agarit? Tiesieng gare ro, “Iriro Muranama Ila Babai la uabua Morowa ga ut tapma ira buo, mitara naong meba bunang apat Morowa iriet narit la ume madurat tavukup mila kiram.” \v 6 Pa Morowa la ume kan maset bubouvara. Are ratmat ga igama Babam ula puaru, \q1 “Ume nekaroula Morowa me inamaniap la tevienmeng me nakap, pa ume mabouvara inamaniap la mime tekapir.” \rq Gut 3:34\rq* \p \v 7 Are ratmat ga mionang apat Morowa ga omiuluan ties ang. Na tara la muo betong Satan mi, tie dusming maranit ga akalaming. Eva, eba miolaing ga igoang miuluo. \v 8 Mila kan kagarat ai Morowa, ga irie la eba muong kagarat mi. Mimi inamaniap la mime okosar kirinim, dalap mi le mionang ga babaim ba gare migana la magosong kilalap a ga babaim. Mimi inamaniap la naming aime Morowa ga agatming gat maime tavukup mila kiram onim na uro kimanam, lepukutmiara litie narain agaripien ga mababauraming dalap mi. \v 9 Tara la mumio kagarat ai Morowa, tie giginam ba dalap mi ga miliba papot. Mimi teip la fagabuoming titot, aigormila iriro tavuk o fagabuo ga eba miliba. Mimi teip la temiba titot, aigormila iriro tavuk o tenubap ga giginam ba dalap mi migat. Memani, mime makosar non ara non ara kiribasiap na irap a. \v 10 Tekapirming na irap a Ila Kakani. Leba okosarming gare ro, tie eba miaving Ila Kakani me nakap. \s1 Buat ovureming ties me maun non ekelesiap papap buam \p \v 11 Tie, ekelesiap papap tuam, mimi narit narit labuat miaramo ties ula kiro me maun non ekelesiap papap mim. Migana ba la tiesong kirat me ira ma non mikmigap o mavuvuoong o ties, irie la uaramo ties ula kiro me iro maimai ga ovuvuoong gat ties. Miptang, leba ovuvuoang maimai o ties, tie urie la are tale gat unama upat maimai. Karuk. Tekosarong it meba onang na nunamap ang ias o maimai. \v 12 Morowa iriet narit la okosarong maimai, ga iriet la irie ias. Are ratmat ga iriet narit la puoong meba ina malagiang inamaniap o makiraraang. Pa nunuo aga la puonung meba mavuvuonang non ekelesiap papap nuam o ties? \s1 Buat tekanirming me ubiap mim la namo makosarming \p \v 13 Tie, miptang, mimi teip la mime ties gare ro, “Atabo titot o kalup eba bula na non pianam ga okosarbuong ubi o butamat puoieng iro namurit karanim ga met iriro tavuk eba mabula papot ma kakepup.” \v 14 Mime miaramo utmat ties, pa tale amit man paga la eba betang kalup. Ninimiap ming la kaina gare uvau parabira namur ga no ra kakalait na tara la ume ui espan. \v 15 Are ratmat ga mumuru le tiesming gare ro, “Leba naang Ila Kakani, tie eba pemung ga okosarpang uro ubi.” \v 16 Pa mirulo migat, iriro tavuk la mime mavien bop mi kan ga miaramam ubiap mila kakanim, mirie tavukup ganam la kiram migat na irap a Morowa. \v 17 Are ratmat ga onagiming maset: leba amira tavuk ila mumuri pa tale akosarming, tie okosarming kirinim. \c 5 \s1 Miriro teip la memanim papot ma pagap pa tale maagamelie teip mila baim, eba omela uniap ula kiro tubiat \p \v 1 Tie, mimi teip la mimanim papot ma pagap, miptang. Mumuru le managiming giginanimup mila kakanim la namo betmeng ira mi, eva eba miliba ga kabuat kupming kirat. \v 2 Mirie pagap ga sasaip mim la isam ara ga mirier burap la maiom ara sikailap. \v 3 Gol ga silva ming la murutliong ara ga utmat murut la ovaikieng uakap kiribas ming. Uriro murut la eba mikiraraieng gare kit la masuamieng neip mi. Memani, mimi la man mipamuam ka papot ma kakepup ga non pagap, pa la lagorang la kagarat ara. \v 4 Miptang maset: Mimi la tale mialo uniap maiong teip me ubi la okosarmeng na ubiap mim. Are ratmat ga man kupmeng ga avaikmeng iriro tavuk ming ila kire. Ga miriro teip o ubi la mela kakavameng na ubiap mim, marik maiong la betieng ara ai Ila Kani, irie la amaning ngangas gano la upto ra. \v 5 Ninimiap ming togo na uro kimanam la ime dak ma pagap mila mumurum ga man temiba. Ga busit man parakming ga papungming, pa tara la eba madusang Morowa teip mila kiram na ties la muor kagarat. \v 6 Kadik, mime miabuam inamaniap mila puvuvum na ties ga mavureming agarit o ties. Tale nekaromela ga mimi, pa minamuam it agarit ga mevara. \s1 Dusbuong maranit ga auanbula Ila Kakani la eba ina terigiang \p \v 7 Are ratmat ga ekelesiap papap tuam, na tara la betieng giginanim ira mi, tie dusming maranit ga miaving giginanim ga auanmila Ila Kakani la eba ina terigiang. Agatming iriro migana la amaning ubi la ume ouanula parak ula muru la eba betieng na ubi ang. Ume mangangas dalap a a tara ila laklage ga auanula afarat ga efan meba ka lake okosarliong ubi liong, ga tubiat eba bat okakavaang paparak na ubi. \v 8 Aret tie, mimi gat le dusming maranit iro nagan ga miaving giginanim la betieng ira mi. Memani, tara la eba ina terigiang Ila Kakani la muor kagarat. Are ratmat ga mangangasming dalap mi. \v 9 Ekelesiap papap tuam, buat nemukatming ga non ekelesiap. Ebun miuabu Ila Kani na ties. Miptang, iriro Ila Kani, irie ias migat ga man dusong tapma lavie a tabuna ga namo obung meba mivuvuoang. \p \v 10 Tie, ekelesiap papap tuam, managiming unulip tinan la mime maiaramo bais ula mumuru, memani masagaong Ila Kani meba ubimeng gare tie. Man makirarameng karorap ga maialo ngitngit ula kanu maun, pa dusmeng maranit iro nagan ga maiavio urie giginanim. Are ratmat ga mimi le miaving iritmat tavuk maiang ga mamiuluan. \v 11 Miptang, bubuo la bume ties gare ro, “Inamaniap la mangangasmeng dalap ma ga maiavio giginanim, eba malaminaismeng.” Amit ara gas a Iop. Irie gat la dusong maranit iro nagan ga maset uavio urie giginanim gano la betieng ira a ga tubiat alaminaisong Ila Kakani. Eva, bira ra, Morowa la ume bubouvara ga ume kadik me bulam. \p \v 12 Tie, ekelesiap papap tuam, natauan paga le anagiming la are ro: Buat mivo panbinim o kimanam o noba non paga meba ongangasang ties ming ga mivang migat tatuan. Karuk. Paga la migat, iriet la mimama “migat” ga puoong ara. Pa paga la tale migat, tie mimamat “karuk”, ga urie la puoieng ara. Ebun ongangasming ties ming ga mimama “Migat tatuan” ga eba apulang Morowa uniap ula kiro me miun. \s1 Marik maiong teip mila puvuvum la imaning ngangas \p \v 13 Eva, leba noba mi la uavio ngitngit, irie le marikang me ai Morowa. Leba noba mi la temeba dalap a, tie arang sasang ba ga ovienang bonim a Morowa me nakap. \v 14 Leba noba mi la amaning tafa, tie mamarikang teip mila uke o lotu meba mumaiong ai. Ga na bonim a Ila Kakani eba maiabung ikin ira ma neip a, ga marikmeng me ai Morowa meba ina amuriraang. \v 15 Pa leba naganmeng miriro teip mila uke, tie eba mapulam Ila Kani marikiap maiam, ga eba amumuriraang Ila Kani irie migana ga eba ina emung. Pa leba okosarang irie migana ila tafaong kirinim ba, tie eba ina avaiang Ila Kani urie kirinim ang. Ga leba makosarang iriro migana ila tafaong kirinimup ba, tie eba ina amumuriraang Ila Kakani irio migana ila golaiong. \v 16 Are ratmat ga mimi narit narit le mavaikming kirinimup mim me maun non ekelesiap ga mimi narit narit le marikming me ai Morowa meba miagaalie, ga eba ina mimuriraang. Eva, leba migana ba ila puvuvui la okosarong marik, tie marik ang la imaning ngangas ula kakanu ga puoieng migat meba maagaalie non gat teip. \p \v 17 Tie, Elia irie migana la kauna gare bubuo. Irie la marikong maranit me ai Morowa, meba tale alaming afarat. Ga tale ulum afarat na kimanam, puoieng ira ma naien ma karaip ga gunamur ma ulangip. \v 18 Ga tubiat la ina gat marikong ga ina bat ulum afarat me na uro kimanam ga inagat siksikmeng paparakiap na ubiap. \s1 Migana la oulai ra ties migat, temaieng le ina alagibuong \p \v 19-20 Ekelesiap papap tuam, leba oolaing noba mi ties migat ang Morowa ga mauluan non ara non ara tiesiap o usingnualap ga fafaleang it tapmat pa non ekelesia papa ang la ina alagiong ga ina terigiong me ai Morowa, tie mimi le amira iriro paga: Iriro migana la alagiong ara muranama a na alang o nuvarap ga aagaulie meba tale oala uniap ula kiro aun Morowa me papot ma kirinimup la ume makosar.